Matu Ronglii Magazine

Ronglii Magazine Volume (V)

noreply@blogger.com (ကိုကိုလတ္) — Wed, 11 Mar 2009 06:49:00 +0000

Matu Ronglii Magazine Volume (V) he vasawk tawm pon. Cover model la Khin Ma Nge tyk la awm tih hate thla khui ah va sawk pon ai ti he zaak la awm.

MATU Modern Rock Valaw Pon

noreply@blogger.com (ကိုကိုလတ္) — Sat, 31 Jan 2009 02:54:00 +0000

Maturam ah a u lawng khaw asai vai nawh Modern Rock lumha cyk la valaw pon.

Ka Hilh Dam Matu Ram

tila Album Title apeek tih Top Big lawng asaak la awm. Audio CD la awm tih azai la VCD kop kasai ai tila Top Big lawng athui.

Compser:
Top Big on Thomas Matu
lawng athut tih
Music Band tah
"The Calvary Music Band"
kalawng sai la awm.
Lead: Seng Mon Aung,
Bass: Luke, John,
Drum: Thar Nge,
Mixing: Min Thu, Studio: KZ
la awm.

Matu thlangthli lawng Matu awl la ng'zaak vai nawh laa la awm de tihin hang Lai han pum kah ronglii tim ah thlang lawng angaih biik Music la awm tih, mah Matu rongliithli khaw hai benla thyng u hang van pon tila pokna on thang pawm pui ham la awm.
He kah Album dawng kathum laa thli he Ram thang pawmna on cadawng hula ngaihna laa thli la awm tih, adang kah angla laathli thum

Matupi
Tlaangsang kah paai
Matuthli kah sing
Nu on Pa kah lungna
Thaa hyr u sih
Ka hilhdam Maturam
Na mang tawng seh
Thlemhah kah thlavaang
Lungding tlou khawhaal
Voikhat tal va leng de
Hukhyng doot ka ngaih
Na mang tawng seh

Mah Matu thlangthli rong hangna ham he atlo atlo cuikna byng nawh tih lumla ben on khaw rong hamla awm. Lumla ben a rongna ham he tak Matu lumla athong thli boih he copy sai myh la original tape, cd on vcd thli he ryp ryp thaa peek ham awm. Tedeng ah ni lumla kasai thli lawng kokthok thaa alawh thai vetih tere tere arong thai ai.

Nang on kai lawng a lo la thaa pee u sih!

Krismas hin on Tuhkai u tih

noreply@blogger.com (ကိုကိုလတ္) — Mon, 22 Dec 2008 08:08:00 +0000

By : Stephen Thang

Diklai han ah thlangbol bro nawh la a pung angla pokna khaw bro nawh la zahawh. Kum rook December thla pha veng awmngaih tangkiik on Bawipa Jesu thangna khawhin te ana ym u. Diklai thlawnkung Bawi thangna khawhin te ym hamla awm pai. Tede, khatsut lawng atah Krismas hin he awlpui betla a pok u tih khatsut lawng atah awlpui nawh la a pokna a awm dawngah adang kah angla tyngsak hamla ka ngaih.

Krismas Kawnghu a tawi tyngsakna:
Nova lawng ca pathum a cuun tih Shem, Ham on Japhet a mingna. Ha lawng Kusa a cuun, Kusa lawng Nimrod a cuun. Tekah Nirod tah diklai han ah thara thlaang, Pathen haai-ah tha ka ra sakaap thlaang la awm (Gen. 10:1-9). Himrod he thara thlaang la a awm dawngah khawpui pareet a uk tih Babel tila miing asak. Babel kalawng Babilon tite va awm. Babel tah prautyk la calna ti ngaihna ni. Te kah Babel khawpui aka synkung kah thangpawmna lungbui te Bawipa lawng a ngaih nawh dawngah Babel imsaang te a phe pe. Te veng kalawng dilai dawngah awlcawm awlcee pekbouna te awm (Gen. 11:1-9).

Nimrod te tetih angla tharana on ah a betoot dawngah a ram khui kah thlangping lawngah Pathen angla a bawk u. A patawng hang tih a dyk tawm veng hetihla awl a yyn. Kai ka dyk atah khawmik khui la ka kuun selang khaw ka sa ai, te dawngah khawmik te bawk uh atina. Amah dyk hu atah a pilnamthli boih lawng khawmik te a bawk u. Tih a dyk hu can a div cong atah a zu Samiram te a bung ry. A cuun ham koi ca te huhsit la a awmna nawh hamla titih hetihla khaw a khan. A peeng a raam khui kah bawi maangthli boih a khy tih sengpahrang im haai-ah belphaithli a khyhsak. Te kah belphaithli dawngah sui, tangka on lungvar phu tlouthli a mah pok a awm atah he kah ka cuun ham koi camaw he khawmik kah ca la awm ai tila awl a khyh.

Pilnam rangpui lawng khawmik dawngah khaw aka sa Nimrod kah cap ate lamtoom on belphaithli te khaw a zin thlan veng talawng ah boih a tloong u. Nimrod zu Samiram lawng a laipaithli te khawzin ah a hyp la a tuih tih sui, tangka on lungvar phu tlouthli te talawng ah belphai dawng a khyhsak. A vyn myncang khaw a thaih venga atah belphai dawng kah sui, tangka on lungvar phu tlouthli te rangpui lawng a huh u. A kawpok calla a raisak u tih sengpahrang nu kah a ca he khawmik kah a ca ni tila rampum ah a phawngsak. Camaw te December ni 25 hin ah a cuun, tih Tamut tila ming a sak. (Ezek. 8:14). Tamut te a roong hang atah ana pa Nimrod zyng ah Sengpahrang a bi. Tamut a dyk hu atah kum rook December thla ni 25 hin te Tamut kah thang hin ym poi a sai u popa.

Te cong Rawm ukna ty (AD 312) a pha veng Rawm ukkung bawi Kunstantin tah raltuk a ceh hinat ah vaan ben ah vailam tung a huh. He raltukna ah ka taa atah Kricathli kah Pathen ka bawk ai tila awl a kam. A awlkam angla raal a taa tih te veng kalawng Tamut sengpahrang kah thang hin ymna poi December ni (25) hint e Bawipa Jesu thangna hin la a thaw pe. Te hin kalawng tihin to Kri thlangbol a kuum ngai lawng December ni 25 hin te Jesu thang hin la po ana hawna u.

Adang kah pokna he kop byh lah sih:
Bethlehem khaw vaitaw im ah cuun ham ni, thla sop on caming cuun tih, (Luka 2:6) tila Baibul lawng a thui. Meri he thla sop la ca a cuun tite ming u. Dilai dawng thlangcuih mingthangthli kah tel Encyclopedia Britanica Cabu dawng “huta khat lawng ca a cuun veng huta atah hin 266-267 law tih, tawngpa atah hin 270-271 law” tila a thui. Te dawngah cuun hin 270 tihnawh atah 271 hin te a hula kop teekawi pum a kym hin te ming u.

Juda Calendar teena ah Bawi Jesu thangna kum tah 3759 lum, roshhashana, Tirhi ni (1) hin la awm. Juda Calendar 3759 lum te ningmi kah Calendar ah 3 BC la awm. Roshhashana tah Rengsara tum poi (Yom Teruah) la awm. Juda Calendar kah Tirhi ni (1) hin te ningmi kah Calendar (Karikorian Calendar) ah September ni (11) la awm. Te dawngah Bawi Jesu thang hin he 3 BC September ni 11 tila Roy A. Rein Hold lawng a thui.

Khawhinthli dawngah Pathen Kamthlahna:
“Khawhin pakhat lakah pakhat theen bet tila khasut lawngah a pok, thlaang boih a kawngaih angla hawn she. Khawhin aka tot lawng Bawipa hamla a tot tih, aka tot nawh lawng khaw Bawipa hamla tot nawh, (Rawm 14:5-6)” tila Baibul lawng ng’cangpui. Te dawngah khawhin he awlpui la pok nawh tih, khawhin aka syynkung Pathen he awlpui betla ka pok. Pathen lawng a sai thaihu boih he “Amah dawng kalawng Amah hamla a sai (Rawm 11:36).

Te dawngah Krismas on tuhkai u tih a khawhin lak ah Jesu Amah he awlpui ngai tih, a khawhin ymna lakah Jesu Amah ym ngai hamla theen. Jesu he vai at byng cuun la a awm monih, Amah aka tangnathli thinkaw khui ah hinrook a thai la cuun popa hamla awm.
Krismas tihe tu nym?
Krismas tit ah “Pathen kah laksawng” tina ni. “Metihtiah ningmi hamla camaw cuun la awm (Isai. 9:6), ti on “Pathen lawng diklai (thlangthawlh) a lungna tangkiik dawngah Capa khyhdyyn a peek (Johan 3:16)” ti awl he tuhkai u. Pathen kah lungna khui kalawng aka thong laksawng tah Capa Jesu Kri rangon dungzan hingna he ni (Rawm 6:23). Laksawng tihe mah ben kah saina, thahyrna angoo myhla a zo peek te ni. Pathen kah laksawng peek dungzaan hingna dawng thlanghing thahyrna on saina thuum nawh tina ni.

Krismas kah kamthlahna:
Pathen kah dungzaan kamthlahna tah awlpui pakhat la awm. Dilai thlangthawlhthli thlawnna he Pathen kah kamthlahna a bou kok la awm. Pathen tah Muithla la awm (John 4:24). Thlangthawlhthli tah taksa la a awm dawng muithla kah thaihu te ming u nawh (I Kawrin 2:14). Te dawngah pumas thawlh dawngah aka tliim dingrii thlangthawlh thlawn hamla Pathen te taksa pum la va law (Heb. 10:5, Joh. 1:14). Thlanghing coongna dawng kalawng Pathen kamthlahna a sopna hamla ni.
Krismas aka dou khasutthli:
Herod: Jesu thang ty ukkung bawi la awm. Jesu kah thangna te thlang ngawnna on a dou. Amah saw-ah ukkung awm a ngaih nawh dawngah thlang a ngawn. Jesu dilai dawngah cuun la a awmna tah dykna khui kalawng hingna peek hamla ni. Te dawngah Krismas ng’douna u lawng muithla be thlangngawnna law awm myhla thlanghing peekna la awm seh.

Khawlaw ben kah thlangcuihthli:
Saw ben aisi maawtna on Bethlehem vaitaw akhawng dawng kah camaw te a huh u tih a phu aka tlou laksawng on a bawk u. Mami ah a phu aka tlou kok hingna peesengna on Jesu te dou u van sih.
Tuudoonthli: Van thlaang kah awlthang a zaak u, a tuuthli a ceh taak u tih camaw te a huh u veng Pathen te kawpok rai tangkiik on a thangtheensak u. Khyhton kova on dilai thaihu boih te cehtaak tih Jesu te dou u silang kawpok rai Pathen hingna on thangtheensak u van sih.

Simion: A Ciim Muithla kah maawtna rangon bawkim a pha tih Camaw te a huh. A kut ah a pawm tih Pathen a thangtheen. Dilai Thlawnkung Bawi he ka mik roo on ka huh po dawng ngaimaawng la ka dyk pon ai tila Bawipa a thangtheensak. Jesu Kri he mah thinkaw muithla mik on huh tih mah muithla kut on pawmna a awm nawh atah hingna ah ngaimaawngna tihe awm thai nawh.

Te dawngah Krismas on tuhkai u tih pokna a phun phun awm mai cakhaw Bawipa pakhat byng ni. Huhna a phun phun awm mai cakhaw Muithla khat byng ni. Pathen kah dungzaan kamthlahna dawng Kri hing cuuthaih tih thinkaw, lungbui khui ah Kri a thai la cuun popa rui on Pathen kah bawilenna hamla hing u van pon sih tila he catawi on thapeek hamla ka ngaih. “Soprep boih he Amah dawng kalawng Amah rangon Amah hamla hawn seh.” Amen.

Im Mel Ty Na Hilh Ouh Pon Aw? Ronglii...

noreply@blogger.com (ကိုကိုလတ္) — Fri, 12 Dec 2008 07:41:00 +0000

Salai N.A.San

B.E (Civil)

Kai na pa he thingkung ankungthli a liing bro a ngaih. Khawhaal sikding ty a pha atah antam on maipuu thingthli a liing bal pon. Lumha cyk ah amu (a ti) te diklai dawngah a heh. Tui on ko ko a syyp atah a mu khui kalawng ankung cathli te va pou hang. Te congah aka pou tangte a kungthli te diklai theen dawng kop a phung bal. Ai eek, me-e eek, vaitaw eek …. Te a ngo vengah a peek tih tui on kop a syyp bal. Te atah ankungthli khaw voh voh va roonghang pon. Ramsa lawng a phe thaina nawh ham dum te a khangmaai cala a thung. Thla khat, thla hih cong atah antam thingthli te dik dik saai tih myncang khawsee ah a pa amah lawng a sai an dum te a byh veng kawhoona te a thai thai la kop kop a dang. Khawhaal ty a pha tih an a khaa lii vengah a pa kah dum a sai dawng kah an te a tui tui la ka caak u.

Mami Rongliithli he antam aka liingkung a pa angla ng'awm u. Cadawng hula vengah mah kah hailam ham bi thahyr tih bibi sai hamla aty can lawng m'pha u van pon. Bibi ham a can theen lii vengah ronglii zahawh ngai tah (ဘုံဆိုင္) zuu dawr la cet tih ngaawl u. Zu a aawk u cong atah im mel ham khaw ming tlaih nawh. Bii sai ham khaw a hilh u pon. Ka lungna rongliithli aw… Tihin na thi na ngan a theen lii veng na aawk tih na awmtheen hyn de catah zuu lawng nang te kop n'aawk veng diklai dawngkah tlawhna on rainathli te thlaangtloo lak ah zahawh na tawng ai. Mah Matu rongliithli he zuu ben ah (စည္းကမ္း) khyh u nawh tangkiik. Ng'aawk bal pon atah pailang khui kah a boih thlan to aawk ham ng'ngaih u. Amah kah limit te ming tlaih nawh. Boih a aawk cong atah im mel ham thui bol thou pateng thou ha thai tlaih nawh tih zuu dawr ah (တည္းခိုခ) peek ham ngo myhla zin at tah (နားလည္မႈ)on re ip van bal. Mincang a pha veng atah n'thlem kah a aawk te a zahawh aih dawngah a luu te kir kir a tlawh pe pon. Ceh awm khaw nawm tlaih nawh. Te dawngah mingcang hii mai ah zu dawr kalawng im pateng pha thlan, zuu te a zawl nawn a aawkthil bal. Lamha atah amah kah lu tlawh dipna ham a aawk de zuu dawr kah aka awm a pazathli on kop a hum u veng atah im mel a hilh nawn bal pon. A can can atah a manu a napa lawng zu dawr ah theeng theeng avan tlap u tih ngah ngah a maawt u. Te tih angla zuu aawkna he Cycle angla hoi popa u pon. Te kah Cycle dawngah rongliithli aka cet thawlh thlaang mok awm pon. Thi-ngan lawng angoo tangkiik tih a aawk monih. A nawmna mailai ham ni a aawk u mai de ni zaw? Te dawngah zuu he na ngaih tang tang tih na aawk nawh atah "Ka aaw tlaih nawh my," tila lungbui te na caksak atah na aawk myhla ro na awm thai ai. Zuu aawk te na tong thai pon atah na kawpok nawm ai, im khui kah လူမႈေရး၊ စီးပြါးေရး thli te khaw ေအာင္ျမင္မႈ na dang bal ai.

Kai napa lawng antamu (a ti) theen te a tyy tih antamkungthli te diklai theen nawh dawngah liing mai kawinih (thuina maiah: lungtou, a thliing tiim ah) metih la khaw anram te sai thai nawh my. Thluur khaw thluur thai nawh my. Mami rongliithli hailam n'rongna ham (A ti) theen (cuihna) on diklai theen (Cuihna) on lai theen (Thomna) he a ngoo tangkiik pon. Te kah cuihna on thomna a ti n'khyh u nawh kawinih thlaang kah tamnaa la ni po ng'awm u pon ai. Degree saang saang aka dang tangtethli on aka kaai liithli khaw zahawh thlang ng'awm u pon. Mah Maturam tare tare awmtheenna on thlaang hu phana ham tah Matu thlaangthli boih lawngah cuihna ben ah tha ng'peek u hamla awm. Ahih tah a u phyn ni… te ang kawpok te khyh u tlaih bol sih. Ahih capa lawng Degree theen theen a dang tih ka awmngaih pui van… te ang kawpok theen te khyh u van pon sih. (Thomna) he a ngoo tangkiik pon. Te kah cuihna on thomna a ti n'khyh u nawh kawinih thlaang kah tamnaa la ni po ng'awm u pon ai. Degree saang saang aka dang tangtethli on aka kaai liithli khaw zahawh thlang ng'awm u pon. Mah Maturam tare tare awmtheenna on thlaang hu phana ham tah Matu thlaangthli boih lawngah cuihna ben ah tha ng'peek u hamla awm. Ahih tah a u phyn ni… te ang kawpok te khyh u tlaih bol sih. Ahih capa lawng Degree theen theen a dang tih ka awmngaih pui van… te ang kawpok theen te khyh u van pon sih.

Kai napa lawng antam te a phung tih a khyh sut monih. Hin rook tui vok vok a syp van atah anramthli hin at cong hin at roong tih a pa te awmngaih kawhoona a peek. Anram te tui on syyp myhla Acid tui on syyp mai kawinih metihla a awmna ai? Te dawngah mami rongliithli khaw Acid tui lakah rih aka awm ngai (Mah Maturam aka phe on aka rawksakkung, Mah kah hailam ngaiyypna aka phekung) zu he ka pia, nang, na aawk ouh atah tong hawn loih. Na aawk thlan bal atah hailam ah khaw na aawk nawh ham ralring popa hamla awm.

Kai napa lawng ankung a roongna ham a ngoongaih ေျမၾသဇာ vok vok a peek angla mami khaw Pathen Awl on hing hamla awm. Te kah Pathen Awl ေျမၾသဇာ on na hing atah zu, sarawh, No.4 …… aka the thaihu boih te na tong thai ai.

Ramsa lawng dum khui ah kuun tih ankungthli a phena thai nawh hamla dum te a theen la a tung van angla mah lawng mah ham စည္းကမ္း te n'sai hamla a ngoo. Teah ni zu dawr la na ceh ham a ngaih tangkiik na khaw te na thlot thai ai.

Matu ronglii, nang ta dum na khyh van pon aw? A ti a mu na tyy thlan atah a loo la tyy van loih. Na tyy pon bal atah ……. tui syyp a ngoo pon tite ming ….., te cong ေျမၾသဇာ peek khaw a ngoo bal atah a lo la pee loih. Na dum te a khangmaai nawh hyn atah a theen la tung loih………….

Note:

He kah Article he a u khaw ka thuinyt tih ka thut monih. Kamah kah kawng ni ka thutna la awm.

Lungna on Haai la Cawh sih

noreply@blogger.com (ကိုကိုလတ္) — Mon, 08 Dec 2008 05:54:00 +0000

by: Mr. K. Lawng Myn

He ca tel thaina a ty theen aka pekung Bawipa ming ka thangtheensak. Te cong "cape" comitteethli teng khaw awmngaihna ka khyh. Bawi Kri ah Rongliithli on lungna dawng haai la cawhna ham tah a dang ka angla ka huhna awm.

Lungna on ropna u nawh he me kalawng a law kai? Awlpui la "thina u the he" me kalawng a law kai? Te atah metihla kop n'lungna u the lah ai?

Thuinytna: Hin at ah ka khaw dawngah buthlut awm. Te buthlut te ziitca de ka tuui nawh dawngah hula tah bou hang tih ka pum boih lawng a tlawh te ka zaak. Ka pazathli lawng khaw tlou ai a ti u dawngah avan tek ham a rih u. Tede hu la tah kamah lawng ngah ngah ka dyh tih a haai te boih thong tih a tlawh khaw pahoi hoih.

Thui Ngaihna: "Thina" a ti he me kalawng a law kai ti atah na pui kah thawlhna te na khuiah na khyh tih na kawnehna. Vaili vainga alaw hang atah na yh thai nawh tih tlawh angla na kemna tih lungbui ah na nawm thai tlaih nawh. A ziit vengah na tuui kawinih taa! Bawi Kri ah rongliithli te tlawhna te na paza lawngkhaw hoihsak thai nawh my. Tede, a hoihna tah a khui kah thaihu theennawhthli boih te a thong congah ni a mawng la na awm hyn ai. (Jacob 5:16), "Khat on khat thawlh dawk lou u lang na hoihna u hamla thangthuina khyh u lah", ati angla na kawneh thlaang tengah cet tih dawk lawh on thangthui haih a ngo hyn. Te dawng kalawng "Thina" te auh vetih "Lungna" te law ai. Te tihla n'ral hai ah thawlh phawng tih dawk n'lawh he rai tangkiik de, u lawng khaw thawlh dawk lawhna on ren bihna te hoot tang nawh. Imkhui kaw on pilnam boih lawng "Lungna" n'khyh tih "Thina" a ti tlawh angla na kem te a hoihna ham tah thawlh dawk lawh tih thangthui haih he ni (Pro. 28:13).

Matu tlangsawm on tlang dawng kah zilding aka hyyp tih su va angla pyr hang congah khawthla vangsaang la a hyn nep ah khaw aka sa on Maturam duup pui thel saang, liksai, cakaw vate, tui aka aw tih seel la thlaang la cong hang Matu rongliithli mami boih lawng a saw kah thui angla "Thina" he hoot silang "Lungna" on haai la cawh u sih.

HUH NGAIH NAWH ON NGAIH KOK

noreply@blogger.com (ကိုကိုလတ္) — Sat, 06 Dec 2008 05:20:00 +0000

by: Rev. Kui Ca

I. Matu awl mekah awl kai?

Genealogy ben on Generation ben te Baibul on haih dan vengah pengnelna theen aka awm dyyn tah Gen. 11:7-8 he ni tila ka pok. Khat on khat a awlthui a zaakming u nawh na hamla ‘tumpalau’ pe sak sih, "Let us go down, and there confound their language, that they may not understand one another’s speech". Thlangphun khat la aka khawlkung tah awl he ni. Ram pakhat kah khawsak awmihna on a coongna te awl on nawh tah cathut byng lawng a tyngsak thai. (Language, tongue is an expression of ideas by words or written symbols, mode of speech peculiar to a nation).

Pathen sai thaihu boih he amah tingtaawk ah phokna boih a khyh u de, tethli khui ah thlanghing byng he ni cal-thai thoomna aka khyh pon. (Man is the only animal that has the faculty of speech). He kah ‘tumpalau’ Babel kalawng Babilon va pok hang. Matu kah casak hy Cing, Dom, Dai, Phatu he Pathen lawng tumpalau seh ati veng tezah tahe kah awl he ana syn haih tih he thlangphun he ana phengna haih pon ni tila ka huh.
Ramtlo on thlangphun tlo hamla ‘tumpalau’ paai de, kai ham tah Hebru, Krik on English lawng a phavot awl awm myp van tite ka huh vengah ka zahpui nawh tih thangpawm tare hamla ka ngaih. Cing awl, Dai awl, Dom awl, Phatu awl he ‘Matu Awl ni’. A kuung awm nawh.

II. Khinglang Haih ham;

Tu dawngah zin-at pyr na haawk khing?
Let us prepare to toot out a tiger with a variety of sounds. A ka ring thai phun soprep awl on kai tuut-aw u sih.
Bawlsiip Cangtlag khaw thimkaw van koih, ka suui cyk lawng phen-uui tih kawh cuuk thing ka ook ai ti thlang koih. Thlangtawm lawng a ziing a reelna ka caming, vakawk lawng a cuukna baawng thawngdyng angla aka awm aka dyk vik a khyntoong poi tih Bawlsiip kah Cangbaawng lawng khaw tlim pon mah ta te.
Ka thlangngaih a ngawlhna imcii nang te kan kyyt silang, halempaai ah khiik kan cuun silang tah, a myi ka hy veng rook ah kan thlam congah kan byh ai. A zeh ngawlhngaw sithaa boot aw kan kyyt ai, lempaai cuun khiing o... myihy ty ah kan thool ai. “The bright moon light with all the planet these above, make me full that feel you fallin lover.” Saw vaan kah thlavaang lawng nang ngaihna thinthlit mo on thingthyk van ruisuun. Presley Elvis on Petboon mi kah laa lakah nupa kah laa lawng lungnat sulzung a caa sak ngaai ta.

III. KA HU NGAIH THYK NAWH

Matupi kalawng Pakoku la distance course phi hamla cet thuk tih, thlahih Pakoku ah a awm congah aka vooi hang lawng Palaawng pong kah tuinawk ah aka van ta-aai aisen a huh vengah, mah awl la tu a ti tang de? aka ti railaithli ke ka hu ngaih thyk nawh.
Bibi bet a sai van dawkaa on khawrek ramrek la ka bii khymtam pon aka ti angla a manu napa ul-uul aka tlung cadawng, hula ke ka hu ngaih thyk nawh.
Tun-im la thlaang boih a ceh congah, tapek ca a nawh aw ka van ngeh pek hun he aka ti angla a huui sen awrh la, mik-huu mym tuut la aka kuun phai hula ke ka hu ngaih thyk nawh.
Lawngpyng ceh vengah, mah lak ahaamca on thalrih aka phyi phelhsak lat on lawng kang kong la aka cet cadawng, hula ke ka hu ngaih thyk nawh.
Zin ceh veng buh caakna kungah buh aibaawkca teh la aka thlym tih a kaa ah a be taawt la aka det, imkung lawng zin a zahna tih a kuihkhoong hetehca la pet a sah tih a thaawng te coi on khaw thui thanoh ouhla, a kut sa lol on ah tuinu khui kah rubawh nga pathop ruila zam aka diik cadawng, hula ke ka hu ngaih thyk nawh.
A kaw lawng zik zik a ngaih cadawng a teng la a leeng pe vengah, a awlthui a ym yyt ah dangkai on awlzang a tyng phaat hiil la khawrek ramrek la aka nuui hula te ka hu ngaih thyk nawh.
A manu napa teng kalawng a thlalpang hinrook, thlarook tangka a dang lakah, a zahawh ngaaila aka hawna tih aka aw a ka ca cadawng hula te ka hu ngaih thyk nawh.
Zin ceh vengah mah lak ahaamca on nunu patawng lawngah thalrih a naatlol ruila khou khou a hui-haai veng mai ah, a lu ah pavuah cawt a pong phai tih, lawngteng kah ram a ceh paitaai ruila bat bat a awh ruila Kawl Laa ‘Love Song’ a khaak khaak la rawt-raat la aka sa railai cadawng te ka hu ngaih thyk nawh.
A im ah zin la ka pah vengah m’byh khaw m’byh thamhal ouhla, a huui myp moutou ruila ngawl tih, a manu napa on a maza manau on caak haih ouhla buh amah pok a caak praap tih, a hah congah law phai tih, zin kah haai ah ihna himbaai a phaih tih a thal la dauh ralh on tui-kaawm aka tok ang ti railai hy ke ka hu ngaih thyk nawh.
Tun-im ah phungthui li vengah a teng kah a pazathli a veet tih soh aka cal, laa sak ty veng atah hekah laa lawng nawh aw a nu avan khoo mat laawt aka ti kom angla huui moutou la myp ruila tungteng rawniing rilh angla aka pai tlunglung a roh cadawng on hula ke ka hu ngaih thyk nawh.

IV. KA NGAIH KOK TAH:-

Pum veng thlangping a ceh thlan ah velval lamha la cet tih ngawlhtlaangthli, pulpit on cabawithli aka thuut, phungthui awl a hutuung yyt ah phungthuikung kah a kaa ah harh hart a byh ruila a mik pyl-ngatleh kah mik angla aka khap tlaih nawh, pum bot congah thlaangthli bang a ceh cong hu la tleng-elh re bal tih, bangbyrh on thawhthli a khaih congah hukhyng la lat aka cet bal hula te ka ngaih kok.
Zin la ceh veng, pawng ram ceh vengah mah lak ahaamca lamha sak congah vorh aka khawl, thalrih a phyih atah hoot a baawm tih a ka phyih pe, buh caak vengah a mah lak ahaamca lamha lawng buh a pacaaw tih a bap lamha thlan rook tah buh-an tek ouhla aka ngawl, caak cong bot ah um-am, beel-zaak silh heet on a ka kym cadawng on hula te ka ngaih kok.
A kawngaih bet cadawng lawng zingzawi aroh hamla dyym a ceel vengah, a ypna kok a hutapyi re a ceel congah aka cet, a ceh thlan ah a manu napa on a mazathli lamha la aka zaaksak hula, vaa a sak thlan rook hula cyym la aka awm, cadawng kah awltheen roidoh on bainaak on tangka pheksa zook pe dok hamla aka maawm u nawh hula te ka ngaih kok.
Cadawng on me-aang thlaang khaw a im ah aka law boih te vanpila ym-aw on ngawlhna a nyh tih a ngawlhsak congah tuiding mai, tuibe mai khaw me-aang na aawk ai tila aka doot, a khom u, a ceh vengah thawhkeeng hiil nawh tah vawngka hiil la a thak congah awlding on aka phih, tahe kalawng kop va leeng bal ne ti ruila aka thak hula te ka ngaih kok.
Thlaang lawng a khoihna himbaai hanaak a byn a naak rook te dan ouhla, oot bal ouhla amah kah tingtaawk la bynnaak ca on cyp-myih la aka cil aka po u, a im la leeng vengah bangkil bangcawng tola phithlat la aka khyh, a imkhui kah thaihu amah a awmna koi hyn ah boih aka awmsak, buh zailop la, an aawpcyyp on ranpatan la a ka thaawng thai, buh-an a tlawk li vengah Kawlnu Kawlpathli kah thaihu a hona laa aka sa tawktaai a roh nawh, a ihna hyn kah cabawi dawngah cartoon cabu a awm myhla, Baibul on Matu Laabu huh popa thai la aka khyh, a manu napa a thawh thlan ah aka thou tih hai a bet, tui a thaan, buh tui a khyng cong dengah a ngo na la ceh ham a awm dawngah a manu a ka thawh hula te ka ngaih kok.
Mingcanghi huta buh hin khong tih an a thaawng ty vengah a im ah n’leeng. Ava a cathli on thlangping la awm u de, cawka kalawng a va a ihna kah thawh hamla a va law phai thlan narut ah, a im cim thlou la, imkhaawt on bawmba rui aka zaal roo huh ham awm nawh. Thlaang tezoh kah ihna on bainaak tezoh mai te mehy ah a khyh pe kang kai tite mik on dan pe tlol hiil la aka halap huta, ng’ka leeng haih tawngpapyi khat lawng imkym loukym ben ah ham tih im hartakar la a khyh myi a huh vengah, a mikhu caawt a hawn u ngaai ruila a kam a naih phai ngaai on a lu vel a thleng ruila, he huta ke a hula vengah a myi ka byh caraw carap hau mongmai ni he-ah ti hiil la a koh huta te ka ngaih kok.
Imkhuikaw buh tun veel congah, thangthuina khah bot pahoi van on amah kah buh beel tek ouhla coi dak a lawh tih a lung a bou kok te a canoi a peek lamha congah, te lakah thop aka ziit te a sawh tih a va kah beel dawngah a tlong pe phai ruila ‘napa he tamreen, y-laawngna uh, nangmi ngoon na caak popa u badai, napa lawng ni khaw a van khan tih imkhuikaw hetila khaw n’sak tih ng’hing he a ti ruila a cathli boih meh a ka rek phai huta ka ngaih kok.
Tuihawi raa sak vengah, tahoong rangpui bi sai veng, mal tlok hamla thing tlok ham, haawn pon hamla ahaamca khathaa lawng ngaih de ni hea.. ti awl a zaak vengah thlaang lawng ka ming la ba-baa khy on thui on n’tuih hau ai tila a rih tih, u lawng a ceel, a tuih thlan ah haawn awk la, mal tlok la, thing tlok, tui thaan la amah kawthai on zepzaap aka cet praap cadawng te ka zahna tong tih ka ngaih kok.
Huhai, patal, cadah on khawdeng bawm ham a lou phawh pe vengah, loukung pateng a tat thlan ah ‘cawh, cawh, tamreen, kut dyyt-cawng ni he a ti ruila ha pai la aka cawh lamha, khaw hinzung at pyr khaw a leuh on leuh nawh khaw aka dan vaai nawh, thleenben kho u ty vengah khaw pawteng on tlop hui zun kah khawcak bat bat aka heeng pe re cadawng on hula te ka ngaih kok.
Krismas, kumthai zun ah, raawk-ram vengah, lamha la cawh tih, thlangping buh-an a cah congah, a pazathli nala buh taawm peh ca, meh te taawm pe phai ca, mami ngon a tui a haang hawng on khaw n’caak thai, patawng on huta camawthli he ni awlpui pon ti ruila a bot to thlaang aka teem, um-am, beel-zak a silh congah, lengkhawm on laasak li vengah, tihin kah ka nuih he ni khaw aka to pon ai a kati ang tila rak rak aka nui nawh, a tengah aka ngaawl cadawng lawng a zakngaih koi la a paromna vengah balak thuk ngaai ruila, a nawcy ca hawng vel tyngsak on a dang la tah zangaih on a duu thlangla zik zik aka nui, a zah ngaai ruila a tengah aka ngaawlthli te mikkel on ryp-ryyp no no kaibyh ngaai ruila aka nui, kumthai hin rook ah ‘cyp-amyih la aka awm, hula khui ah a tyk u tih laksawng aka dou popa hula te ka ngaih kok. Tede, a cadawng a hyp la a ngaih bet parym va law ti awl a zaak veng nauh on uica a ka haang khong taldawng haikung ah a haraawng ah voih salh ng’khing veng aka vir u soh a ka diik hula te tah ka hu ngaih nawh kok.

Aw ka hingna, roonglii lawng hekah vai hamkoi he a vai boih thlan to noi aih bol de saw ne.

Awlthui Kaathui Tyymsaawm Sih

noreply@blogger.com (ကိုကိုလတ္) — Thu, 04 Dec 2008 08:17:00 +0000

by:Okla Bik (Konglong tlaang)

Ram zoutheen phoih Laitlaang ram nawm, Vaan saang danna hyn nep, Noitlaang huhaang zilh law dingry, Raipaai baw ang rimtui ……..

Pahaam Rev. Ngai Tim kah laa phawh awl Matthew Pa Sawng lawng cassette dawngah a sak te ka hutuung lii vengah ka tengah aka ngaawl kamzin aka pai pek te hetila awl ka doot. “Na cehna khawra kah thlaangthli a sading u de aw? ka tina. Te thlaang lawng, “A sa a ding on a ding nawh ka ming ka tung nawh. A sa a taai ka zuh ka zam pe monih,” tila awl avan thlat. Thlangtlo khat bal lawngah hetila kop a doot bal, “Sizung ah aka ral te tuibe lunghang a aawk van de aw?” a tina. Ahih lawngah, “Tuibe tah a aawk de, lunghang tah a aawk monih,” tila awl a thlat pe bal.

Awl theen on awltang n’thui vengah nuih palom la awl aka khap bro nawh la ng’awm u. Te congah awl theen nawh, “Kai ngeh, vawm ngeh, na nu ka lu, thlang haa pataa, thlangngau pathu ….” tila kamrai ah aka baang khaw mong awm bal. He he theen na ti aw? Thlaang kah nuihbu kamring la ka awm, thlaang angla kaw ka pok thai thlan, ka mik tyng thlan tih ka haa khui thlan, thlaangthli sel rai a thui u vengah me-ee raai ni ka thui, tila na pok van aw? Thlaang hu ka kee thlan tila na pok tih dawk na lawh aw?

Thlaang khatsut lawng aciim pulpit sawah luui tih nuihbu palomthli, rongliithli kah a ngaih phawng pe mailai tih Gospel Awlthang Theen ka phawng, Sermon ka thui tila a pok he song ai aw? Thlaang khat lawng Sermon ty ah hetila a phawng, “Kawl ram pum ah phung thui thaina lehmhat kai byng lawng ni ka khyh, u lawng khaw he lehmhat he a khyh monih,” ti. He he a tak aw a thui, u minister lawng a peek kai? Awlceet n’thui kawinih zahrau ni a pawh ngai ai ka ti.

Voi at ah bawk-im khuiah rongthai hy lawng lumlaa tuun hamla kamthlah u. Thlaang khat ko law tih, “Cet uh, cet uh! Dom laa te tu na tina ai? Mah laa pateng khaw n’sa lek nawh, sut pawk….” a tina. Thlaangthli tah tuicil tui la haih laawng sih, talum tanga angla haih lyym sih, a ti vengah, pekbouna awl n’thui khaak he theen aw? A zah ham awm tangkiik, ka ti. Patawng khat lawngah, “Thlaang hu ah bat khing khaw, paha pakhat thlaang lawng a caak khing khaw, tahe atah ka ca pa lawng bu thai a syn van pon tih bawi bou avan huh van pon,” tila thlaang lak ah a phawng.

Matu ram ai mikhaai teh ca khui ah thlaang a zawl ca, imbing a zawl ca on vang pook pook n’sak u tih dykhing n’taawng vengah khawdeng raina caalla m’ming. Zaan veng nuhaam pahaamthli lawng aka saikung ming myhla lungtou thingngaw sungraai ana bawk u. A hu dengah ram khui kah awlthang theen aka phawngthli lawng Maturam avan pha u. That Dun kah Jubilee khui maiah bu atlo tlo, pawmna atlo tlo la huthun mangthaawng on khaw n’sak u. U-a- bu khaw a langna awm nawh. Talim hu ah talam pat zyng n’tong u. Cang lak maidawn, cangthuum kawnghing angla boih ng’awm u. Atheen heet la pok u lah sih. Su lawng tu caak ham a khyh nawh yyt ah phak keeng a rem angla, uipyt, uitang thaih phak phak m’bou angla mah khaw ra ca phek phek m’pek m’bou u he na pok vaai van aw?

Thlaangthli lawng khawbot ram vol ming nawh mingtung ramthli a thui u vengah kai tah mah khaw ra, mawlme on sawkca tuivathli he ni thui soh hamla ka ngaih. Mah ram mah phun aka pawmsaangthli he lungna on a sawsaang la tare pawmsaang ka ngaih. Zaan veng nuhaam pahaamthli lawng tu ana ming u nawh khuiah mah phungza he ana thintlawhna u tih a ming he a kym a kawl u. A cathli ming a sak vengah ama nu ana pathli kah ming, huuitai koinau mingthli ni ko ko ana sak u. Tahe atah Daihnan, Kola, Belkhong, Lingtui, Ngapang, Sithleh, Amsawl zun ka pha vengah, Aung San, Ne Win, San Yu, Starlin, Ghandi, Nobel, Elizabeth, Thi Saing, Sun Ceu, Sung Tin Par, Reagan mingthli myp ka zaak. Huuitai nawh cakhaw phring nawh maiah thlaang kah ming, bawi mang mingthli n’sak praap he na ca zak nawh ai aw? Thai tak nym ka ti de thaihuk la ni na awm den nizaw?

Mah ram mah phun mah awl mah ca he thintlawhna silang, mah awlka on mah phun a auhna nawh hamla mah ca he thintlawhna u sih. Mah awl mah kaa a auhna nawh hamla cabu phun phun sai u sih. Mah cabuthli tangka phaisa peseengna on lai u silang thaa pe u sih. Maturam hamla thaihu theen aka saithli Baibul ca, Lumlaa ca-uk aka saithli, CD, VCD on Tape aka saithli ka huh veng awmngaih ruila bantang kut ka tuuk. Kai he bawlung ka thuih thai monih. Tede bawlung aka thuih thaithli, kawl aka sut thaithli ka huh a ngon tah kut bel on tha ka peek. Mah ram, mah phyn, mah awl, mah ca ka lungna tihe awl kaa byng on nawh tih thinkaw, lungbui, kut, khaw on tyngsak sih.

Nuui U Lah Sih

noreply@blogger.com (ကိုကိုလတ္) — Mon, 01 Dec 2008 09:15:00 +0000

By: C. Hla Muan (Agri.)Yangon

Nuihna lawng he thlanghing ham thaihu theen tangkiik a zahawh m'peekna kawng he thui lah sih. Hetila n'thui thai. Nuihna lawng ngaihang kawpok raina (စိတ္ဖိစီးမွဳ) he a auhsak, ming thaina thlaawk ben tha avan rasak. Lungbui (ႏွလုံး) sadingna a peek. N'nuihna lawng he thlanghing pum taksa khui kah aka awm tharana soprep boih te khaw a cuui tih te khui kalawng aka theen kok te pumraw ham tharana tare la a bol a rai bal tite n'huh.

Psychology ben kah thlangcuih Kelikonikol lawng vaikhat lakah (azawl) nuihna lawng pateng thawhtat pawngpana rookah kawpok a awmngaihsak. Thlaang zahawh on imkhui kaw, paza laikoithli on ngawlhthlung haih tih n'nuihna lawng khaw thlanghing khawsakna tha a thlyysak. Lungbui pokrai ngaihangnathli khaw a auhsak tila a thui.

Calorie (Caakaawk dawngah aka awm Thaihu "Kelori") : Minute 10 - 15 khui n'nuihna rangon lungbui ben sadingna (ႏွလုံးခုန္ႏွဳန္း) 10% kalawng 15% tharana tare a peek. Hin at khui Kelori 40-165 Kilo a phet thai la awm. Kum at a rau cong atah pumraw rit khat la n'awm na (ကုိယ္အေလးခ်ိန္) te 2 Kg hil a thumh (a zawlsak) thai bal.

Tlawh A Hoikhaangsak : Thlangcuih pakhat lawng tah camothli lawng nuih ciil, nuih kawng TV program dawng a byh vengah a tlawhnatna te a yh thai tila a thui.

Sadingna M'peek : N'nuih vengah he tlawhmi, natmi aka ngawn thai "cells" he taksa khui lawng va thong tih pumraw khui kah tlawhnatthli te khat cong khat a ngawn thai tila n'huh. Te thaihu theen "cells" te pumraw dawng nazi (khawnoklung) 12 khui a thara tangkiik tila n'huh bal.

Thinkaw, lungbui, Muithla awmngaih tarena ham tah "Nuihna" he tuisi theen kok pon ni.

HAAI LA CAWH SIH

noreply@blogger.com (ကိုကိုလတ္) — Mon, 01 Dec 2008 08:30:00 +0000

by: Van Hung Cang

Ronglii rongthai
khawthlii o tui ang
tha awm lii veng
haai la cawh sih.

Dan ngaih awmtheen
rai ang pailum
baw a tui lli veng
haai la cawh u sih.

Nuhaam pahaam

lawng m’peek bibi te
lengpang thyyng lang
haai la cawh u sih.

Kawpok thik-at sai thik-at
pai ham ram dan
raina yh lang
haai la cawh u sih.

Oih A! Ti Maisih

noreply@blogger.com (Matu Ronglii Magazine) — Sat, 29 Nov 2008 11:11:00 +0000

Oih A! Ti Maisih
By: Chronostrepho

“Aza, me kalawng na pok? Na sa ding aw? Na zu na ca ta navan law pui aw?”

Hin at ah pia rawi thlaang pahih cadawng Pa Sawng on Rui Thlaang pok myh la hum ahih tih cadawng Pa Sawng lawng Cadawng Rui Thlaang te a saw kah awl angla a tina congah kut a tuuk.

Te vengah cadawng Rui Thlaang lawng cuihcaih cuihcaih a nuih ruila, “Oih a! Ti maisih,” a ti congah, ana pia kah awl te he tila a thlat pe. “Ng’huhna hih nawh kum ha dalh law pon tih, nang khaw dalh kan haai pon ta a! Nan voom nawh kawinih kan ceh taak pon ai tate. Tihin hang atah Malaysia on India ngai la cet u tih te ben la ni na ceh van cawini, tila ka pok ta,” a tina.

Pa Sawng lawngah, “Mela ka ceh bal ai. A nu a pa khaw patawng hih pon tih, kai lawng ka ceh taak vik kawinih, a u lawng byh manawh, ka ti tih, mela khaw ka ceh monih. Nang ta tu na sai?” a tina.

Te vengah Rui Thlaang lawng, “Kai khaw kamah khaw ah ni ka awm hyn ca. Sengim ka cong congah bi ka dang khom ai nym, ka ti tih ka dongvong aroh van de tangka peek ham ka khyh nawh tih bi khaw ka sawh rop tlaih monih. Khawlawng thla ceh ham khaw a nu lawng n’thlawh khak tih ka ceh thai nawh.” Cuihcaih nui tih, “ Na zu van lou langtah te congah na ngaih atah cet, n’tina de ta. Ka kaw on ka rolh hulathli khaw, mekah, parcel la kang a pat u tih a u a awm tlaih monih,” ti ruila a pia te a mikhaai ah a byh.

Pa Sawng lawng, “A nang, na kum mezoh a law oom pon ca he? Na sam khaw thom aka paawk van pon ang a ti la?” a tina.

Rui Thlaang te cap nui tih, “ Sawm thum kum rih law van pon he. Nang on ng’kum vai hih om ta nizaw? Nang lak ah thla hih ka haam bet mai cawini. Ka sam khaw me tila kai nym he, thom paawk van praap pon he mm. Sam myym sii on bet ka thiim van he. Tih nawh kawinih hulathli lawng patawng hau n’sak u vetih, n’rih hau u mai ai, ka ti tih,” a tina.

Te vengah Pa Sawng lawngah, “Oih a, tihin hang cadawng hulathli kah thloihthlam u angla khaw bet thloihthlam u a ngo van pon he. Tih nawh kawinih, Valang khaw kah Ngawl Kawl, Cangtaak kah Thang Boi angla zu taal la cadawng pawng la ng’awm sawl ai ta o,” a tina van.

Rui Thlaang lawng, “Hulathli khaw awm van de, ka kaw khyk aka ti he ka hu nawh mangkhak ca he. Ka kaw a tlaak atah a thlaang a theen nawh ahkhaw, thlaang a thee aih nawh atah, ka be mai hawn ai,” ka ti praap van pon deta.

“Me ang hula nym ca na tyk bal? Valang nuthli, Ngala nuthli, Leiring nuthli puul puul pet u na hu nawh aw ke? Malaysia on India la cadawngthli lawng a ceh taak kang u tih hulathli pawng u sut pon ta ke. Vaa sak a ngaih u yyt ah Pathen aka ming nawhthli, thlangtlo namthli a thlaak la a thlaak u praap pon ta ke. Parcel la khaw a pat boih u aih van monih. Awm u hyn ca! Na ngaih tang tang atah kai lawng kavan tlap ai saw?” tila a nuih ruila Pa Sawng lawng Rui Thlaang te a mikhaai ah a byh tih a tina.

Rui Thlaang lawng, “Oih ca, te tila aka congdook soh hulathli te nawh aw, ka rih laawt te. Thui praap mai lah sih. Tihin hang kah hukhyng tlawhna aka khyh khaw n’zuna plong hau ai, ka ti tih ka rih laawt. Hmantang ah ka ngaih he ka thui mai lah ai. Hing khui pyr zuva la awm ham dawngah, Pathen aka tangna, thlangbol aka lungna, Pathen bawkna benah lungbui aka pe thlaang he number pakhatna ah ka ngaih. Te congah, a thlaang a theen pawkzawk pai ahkhaw a thaa zawng tih bibi khaw aka ngak tah ka ngaih nawh. Te congah a kaw aka awm nawh, thuina maiah hinzah koi khaw ming nawh, reen hamkoi khaw aka ming nawh, anu apa khaw aka lungna nawh koi tah ka pok hanlan tlaih nawh. Te congah awlcal thingka aka theen, azoi la kaw aka daw, thlaang aka voomtooi thai, tangka phaisa dawngah cuihna aka khyh, atyyng nawh la thaihu aka ngaih praap nawh, kutverh aka khyh nawh, moi khaw aka thee aih nawh, amah pok van atah aka thloihthlam u thai popa, thlarui thlasam ben thaihu, thuina maiah, hii huithli, hii tah thai khaw a ngo van bal. Buh an thawng khaw aka thoom ti maisih. An aka hop thai nawh, an aka paawt thai nawh, azoi la mah Matu caak aawk aka ming nawh tah ka tawh hih pyt vetih roproina imkhui ah awm manawh. Matu la ka thang ouh tih, Matu anbek, andam nawh atah buh an khaw ka kaw khyk pha nawh ouh he. Te congah thlemhah kawnphai, cinghyy aikhaawk ah siik syyk toi hih ham mah Matu nu cing ka zuna van makawi, ka ti mangkhak. Mah nu tah mah lawng man nih n’lawh pai sui nizaw? Thlaang kah khawsak singzoo khaw aka ming thlaang a ngo. Ca tang a saang aih nawh ahkhaw Kawl awl, mah lai awl on thlaang kah khawsak lawng aka ming thlaang sui ka ti bal. Aka maawl aih thlaang tah zahrau la pia lak ah awm vetih theen manawh. He ang thlaang, ti maisih, he zu hamla ka ngaih de ta o,” a tina.

Pa Sawng lawng Rui Thlaang kah awl te a hutuung heet tih awlthui a boih cong atah, “Kai angla nawh aw phek na pok van pai te. Te tila nawh aw, kai khaw ka pok tih tahe to ka zu ka dang nawh laawt he. Te khaw aka theen te ng’ngaih dawngah zu theen nawh n’lawh tih hing khui pyr thinkaw pumsa khawdeng patang la awm lak atah tahe ah m’patawng aih pon monih. Pathen tengah thangthuina on bih de lah sih. Kaimi pum im atah nuthli buhzeh thangthuina Ryng hin (zarhte) hin rook ah a sai u tih, teah zu theen ka dangna hamla, ka ti tih thangthuina ka bih de ta,” a tina.

Te vengah Rui Thlaang lawngah, “Oih a! Ti maisih, kai khaw te te theen tila ka pok te. Kamah lawngtah ka tlap van pon de, Pathen tengah thangthui tih bih he theen tangaak ai. Kai hamla khaw thangthuina van khyh u van lah seh ne,” a tina.

Pa Sawng lawng “Oih a, kavan thui badai,” ka cet delah ai. Tahe kalawng kop huh hih bal sih ne,” a tina ruila pahoi pek ahih.

DV 2010

noreply@blogger.com (ကိုကိုလတ္) — Sat, 29 Nov 2008 08:09:00 +0000

DV he thlang zahawh lawng aming (Electronic Diversity Visa Lottery) American ram ah awm thai na ham kaam nokna pakhat la awm.Ng'hu veng ah daat on pat la awm de tihinhang atah Online on ni sai thai la a awm pon. 2010 kum ah American ram kacet ham kangaihthli ham me computer dawr ceh ngo myh la kaam nok thai la awm. Instructions thli acaih cala n'tee cong ah ango ngaih thli te n'dek pe cong ah muithlip (photo) pat pe ham ca mai ni. DV Lottery he aleng kah thlangthli lawng ameeksa sai ham la alaklaw ah kuun thaina nawh ham (Fake) kasai website thli mok awm tih asong address dawng kuun thai ham ango. Tecong ah ralring ham ka awm tah hukhyng bih ah Dead line he December (1) hin la a awm dawng ah he thlan ah pat ham ango ai. Nazoutheen u seh! [ DV 2010 ]

KACA, RONGLII HAM CAPAT

noreply@blogger.com (ကိုကိုလတ္) — Fri, 21 Nov 2008 08:14:00 +0000

To.
Ka ca, Ronglii
Kawl Khaw

Mami thlawnkung Bawipa Jesu ming on lamha la bantang kut kan tuuk. Na sading tila thawngpang ka zaak. Kaimi (napa cakaw) khaw ka sa boih ding u tih Pathen ming ka thangtheensak.

Ka ca aw! Nang hamla ka titih khawlaw khawtlaak, asiip, a hawt la tangka ka van tlap. Khawsik rawdaw timah, khawcui dikzaak timah, khawling haaihaawn timah bi ka bi. Thlaang timah zah ka taal, ka deng tih tangka ka dang thai mak atah ka ti dawngah bi aka awm sarui (ka bi nook nawh bi khaw) te ka bi tangkiik pon. Ka thin on ka bawng laklaw ah ka ca, nang he kan kem. Tangka ka tlap li vengah vai vai tah ka sading nawh, caak-aawk vot la ka awm, ka piathli lawng n'thai n'latna u, thlaang on ka tawh u the... raina ka tawng tangkiik. Ka kawthe de, kop ka awmngaih. Ka thathe de, ka tha kop thlyy. Tu dawngah ti atah ka ca nang lawng "thlangcuih la va cong cing seh" ti ka ngaih dawngah raina soprep nga ngah ka yh. Na kaw thesak bol lang thadyng thai on tha van hyr tare ne.

Pathen ming on ka tlap tih ka dang tangka boih khui kah (1/10) he Pathen amah tengah ka peek popa. Te congah, kaca, nang hamla ka van pat thuk. Nang lawng khaw he tangka he Pathen peek zoutheenna la van pok langtah hawnah. Tangka he thingram angla a zoica la, tuitawh dawng kah tui dyh angla, a zoi cala ka dang thai nawh dawngah thingram angla van heh prap bol, tui angla van hawk prap bol. Na ngaih sarui lai na lakah ango kok thaihu te lainah. Thaihu lai ham na kamthlah tih khawawk zal kah tangka na pawh rok vengah Pathen pok, kai kah patang ka khangnathli khaw pok lang tah lai. Te atah na thaihu lai te kang ai. A phu khaw awm ai. Na kaw khyk avan deng ai. Adau ben kah thaihu phu ka tlouthli awlpui la van pok bol. Khui ben kah "cuihna" a saang, na khyhna thai hamla tangka he awlpui la van haw nah. A dau ben thaihu tah kawlkalh, khui ben "cuihna" tah a sip ka awm tuipui sawk on vai u tih kak thai tlaih nawh. Namah on na pilnamthli lawng a rongna la awm ai.

Caak-aawk dawngah ngaithyn a ngo tangkiik. Thi on ngan, thlawk on thling dawngah tha aka pekung buh, meh caak tah theen. Tede, nang kah sadingna, cuihna thlawk, awmtheenna, na sak a theenna on tharangnathli (active) boih a hyp la ziil ziil ka hyynkung Alcohol a ti u rui thai koi zu (on number 4, a thlothli khaw) a ti thli tah van tek ro bol. Thlaang ngawnkung ni. Thawlhna ka tawmkung bal ni. Kai lawng ka ngaih nawh angla Pathen lawng tare tah a tuui. Te ang thaihu thena sai pon atah na pia theenthli la ka awm, na cangzeh on na rukngaihthli lawng n'hoot u pon ai. Thlaang baawkthli lawng "If you booze, you will lose," (Zu na raai atah na auh ai) tila a thui. Song tangkiik. He awl he Pathen ka ongnawhthli lawng pateng "taduh"(Amen) a peek. Zu raai la na awm ata na auh tangtang ai. Tede, "cuihna" na dang atah na bawilen ai. Ka ca, Pathen awl on a rop la pok heet lah, vai byng monih, hin rok... hin rok ah tip tip pok popa lah.

Cuihna na tlap li vengah na kut na khaw, na thlawk na thling tawn a baa maithai. Na mik tha aw boih thai mai. A tlo tlawhna khaw na dang thai mai. Sizung awm na hoih thai hyn. Tede, sizung ah hoih thai la aka awmnawh lunglii tlawhna (AIDS) tihe a rih awm tangkiik. He tlawhna lawng phyn a milhsak. He ang tlawhna he AIDS tlawhna a mi ka khyhthli kah thi on thaihu a hawnathli blader, syringe on vyndekna phaaimet kuhcii dawng kalawng n'dou thai. Te congah, huta the dawng kalawng ah khaw n'dang thai bal. Huta lawng he Bawi kuirang, sengphrangthli on Pathen thlaangthli a thloih thai tih a pazaawk ngai khok. Thlaanghalhnuthli lawng tangka a ngaih yt-ah a awl a tuuisak u tih thlaang a zook. Lunglii tlawhna te a rek araa, hinglung a dawn molh a pai pe congah, a tangka tong a rawt pee bal. Mikhuh hazaak ah sop pon. He ang thaihu dawng na cuih van khyh. Diklai awmtheenna mai ni. He ang aih mai he na ti hau ai. Pumsa on muithla hingna tola ka ngawnkung la awm. He ang thaihu thethli saina hamla kai lawng patang ka khang (ka yh) monih. Ka ca, nang lawng cuihna dang seh tila ka kamthlahna ni. Ka thui angla, ka sai angla na sai nawh atah na auh tak tak ai. Ka ca, rih awm tangkiik ni, van heng taak ne.

Te congah nang ka maawtkungthli, cangpuikungthli on ukkung bawithli hui ah awm lang awl van ngai peh, a theen thaihu ni tethli lawng a thui u. A the thaihu ni a sai hau raitaat atah na kaw on van tol kang hawn. Theen nawh, song nawh na titih na vu na pang soh mai cakhaw nang thlaang khat cakah ngaihna angla thawleng u thai nawh my. Ui lawng vui a naak angla ni a awm ai. Vui lawng ui naak a rih yt ah heng lawng a hai tih a cungku rup vai monih. Te nalak atah awlngai ruila Ahi lawng kuttin dawngah meh sok sok a tung angla cuihna sok sok van tung. He ni kai (na pa) kah kamthlahna.

A botna awl on taaikhaih ka ngaih tah; tangka lawng nang te n'haawna bol seh. Nang lawng tangka te a theen la haaw nah. "Na tuh angla na ah ai", ati angla, zu on huta the, atlo thaihu the dawng cangti na tuh atah a the la na ah van ai. "Cuihna" laikawk a kau dawng cangti zahawh na tuh atah cuihna zahawh na ah van ai. Zu on huta the dawngah na rou tung bol, auh ai. Tede, cuihna dawngah na rou te tung lah, na hing khui pyr na pang ai. Cuihna tlap vengah khaw vaan ben dan on rypawm thlaang la va awm. Na nu on na pa ruh hawnsakkung la khawsak ouhla nu on pa ka awmngaihsakkung canau theen la va awm ne. Thaihu the sai ham tah tuukkiikkung ngoo nawh. Tede, thaihu theen sai ham tah a raai tangkiik dawngah n'hing khui pyr cangpuikung tengah cangkop a ngaih. Cuihna on thaihu the boih n'taa thai. Cuihna on thaihu theen zahawh n'dang thai bal. Ka thui awlthli boih he nang ham tharana la va awm pon ai, ti ka pok vengah na sawah awmngaihna ka khyh tih, Bawipa ming ka thangtheensak.

Pathen lawng zoutheenna n'pee hawn seh. Tede seh.

Napa,
Cuih Ngaih Thang

Ngaithyynna He Sii Kah Lakah Theen

noreply@blogger.com (ကိုကိုလတ္) — Fri, 21 Nov 2008 06:52:00 +0000

Saza Le Ding (Siloam Clinic)

Tlawhmi he hyn rook ah awm. Khawthlii, zilh dawngah, tui dawngah, thaihu soprep dawngah boih awm.Thaihu rook, hyn rook dawng kalawng n'dang thai. Tlawh phun zahawh thlang tih boih n'rel ham rai tangkiik. Tede adang ben kah tlawhnathli he tah a then cala n’ngaithyyn thai atah n’reel thai. Thlaang zahawh lawng n’tlawhna u tlawh (Disease) la awm. Tekah tlawh te n’reelna ham tah thlang baawk awl la
1. Food, Fluid = Buk, an on cakaawkthli,
2. Fly = Pil,
3. Filth = A thi a haai,
4. Formide = Hawpai, thaihuthli,
5. Finger = Kut dawn,

Hethli he n’ngaithyyn atah rel thai la aka awm tlawhnat mingthli:
1. Diarrhre : Saihaak
a) Saihaak mailai
b) Lu lawl awng saihaak : Gastro Enteritis
c) Saihaak puui : Cholera
2. Dysentery
a) Amoebic on
b) Bacillary dysentery
3. Enteric Fever (typhoid)
4. Viral hepatitis (thin phing phun thum)
5. Zung hut (worm infection) phun mon awm.
6. Vyn ben tlawhna (scabies) a phun phun.

1. Food, Fluid : Buh an boih he a ciim cala silh tih a tlawk tih a hin to n’thawng pon atahboih cim Tui khaw a tlawk heet cong atah tui khui kah tlawhmi boih dyk pon. Aawk ham then pon. Mah khaw ah April, May, June veng tui thai on thing athaih rampu a zahawh vengah ngaithyyn a ngo.

2. Fly : Pil he eek im ah dui tih pung, eek im on a rawng a thaang dawng kalawng valaw tih a kut a khaw dawngah tlawhmi be myp la awm. Te pil te n’khyh sut caak aawk, a ding a deuh dawngah cu tih tlawhmi te a khyh. Te caakaawk te n’caak atah tlawhmi on haih n’caak tih a saw kah tlawhnatna te n’dang thai.

3. Filth : A tui a hai, im teng im vaai, im khui on ek im ciim caihsak ham a ngo. Im kah ui, ai, seel on vaitaw, marangthli kah zun, eekthli boih te cimsak ham a ngo. Hethli dawng kalwng khaw a lawng im tloo tloo kalawng a sawben kah tlawhnatnathli he n’dang thai bal.

4. Formide : Thaihu hawpainathli; beelzak, um am, angki hinaak, himbaaithli on cubu, kheden (sengcamothli ham) boih a ciim hamla a ngo. Buh caak tawm bel silh lakah buh cak congah a cim la silh tih a then cala khyh a ngo. Vyn tlawh phainat (scabies) aka tlou kah hawpaithli na tek atah pahoi n’dou thai pon. Buh caak tawm ah im n’tel he theen nawh. Im khui kah dym aka awm thlawhmithli te im na tel atah zilh on a saw la boih sawng hang tih bel m’phaih veng buh on cakawk dawng la boih a pha. Te Caak haih dawngah a saw ben kah tlawh te n’dang bal.

5. Finger : Kut, a saw ben kah F=4 he boih m’vai tih n’sai ham awlpui la awm. Thaihu a cim khaw, a ti a haai khaw, eek im ah khaw ng’kut on boih n’tek, n’sai u. Te dawngah caak koi buh on an tek thlan-ah a ciim nawh thaihu tek cong rookah eek im kalawng m’mel cong rook ah ng’kut he tui ciim on saapeet on a ciim la silh a ngo. Kuttin he zark khat voi khat ng’teh a ngo. Kuttin a san atah zuunhuut zahawh thlang ng’dang ai.

Te dawngah a saw ben kah tlawhna boih kalawng loihna thai ham 5Fs he a theen la vai u sih tila kan ceel u.

Capat

noreply@blogger.com (ကိုကိုလတ္) — Mon, 11 Aug 2008 14:18:00 +0000

Metihla n'ti lah ai aw?

Maturam kah hula a thlaang aka theen theenthli ramdang ah bang a pat u pon ca. Tahe ah aka awm dyn ca khaw ceh hamla cai u tong tong hyn. Matu cadawngthli na tawngpa u nawh dawng ah aw?

Tete Matu cadawngthli metihla n'ti u lah ai aw? Matu hulathli ram renna, lungna on a theen la khawpok uh ne. Ramdang kah Parcel ceh aw aka meek ngai, Maturam on Rangoon kah Parcel aw aka meek bet. Matu hulathli, metihla khaw na pok u lah ai aw?

By: Matu Cadawng
Tan Tan

အေမ့မွာတမ္း

noreply@blogger.com (ကိုကိုလတ္) — Wed, 07 May 2008 16:13:00 +0000

ေလာဘရယ္မဲ့၊ အတၠမ႐ွိေသးတဲ့
အျပစ္မဲ့ အျဖဴစင္ဆုံး ကေလးဘ၀က
ေအးျမတဲ့ အေမ့ေမတၠာေအးရိပ္ဟာ၊ ကြၽန္ေတာ့အတြက္
လိုတရတဲ့ နိဗၺာန္ပဲေပါ ...

အ႐ႈပ္အေထြးမ်ားနဲ႔၊ ေလာကရဲ႕ ပရိယာယ္ၾကားထဲ
အဆိုးနဲ႔အေကာင္း၊ အ႐ွက္နဲ႔သိကၡာေတြကို
ခဲြျခမ္းသိတတ္တဲ့ အသက္အ႐ြယ္ရလာတဲ့အခ်ိန္မွာ
အေမ့ေမတၠာကိုေက်ာခို္င္း ဆႏၵေစရာလွမ္းလို႔
ေမွာင္မိႈက္ျခင္းခရီး စႏွင္ခဲံေပမယ့္ ...

ရင္ႏွစ္သားမို႔ အျပစ္မျမင္ ေပြမယူပဲ
ခ်စ္ေသာသားအတြက္ ေသာကအပူ
ရင္တြင္းဒဏ္ရာမ်ားစြာကို အၿပဳံးမ်က္ႏွာနဲ႔ ဖုံးကြယ္ခဲ့ရင္း
သားမိုက္အတြက္ ဖဘုရားထံေတာ္ပါး
စဥ္ဆက္မျပတ္ ေတာင္းဆုေခႊ်ေပးခဲ့တဲ့ အို... အေမ

အဆင္းရယ္မ႐ွိ အခ်င္းရယ္မဲ့ျပန္ေတာ့
အေတြ႕အႀကဳံမွ ဘ၀ဒႆနအျမင္နဲ႔
အေမ့ဆုိဆုံးမစကား ႐ႈပ္ေထြးမႈနဲ႔ ေလာကေရးရာ
ႀကဳံႀကိဳက္ခိုက္မွာ ကြၽန္ေတာ့အတြက္ ဆင္ျခင္တုံတရား
မ်ားစြာကို ေပးခဲ့တယ္ ...

ပ်က္စီးျခင္း လမ္းမထက္က
ၾကင္နာဟန္ အၿပဳံးတုတစ္ခ်ိဳ႕နဲ႔
အဆိပ္လူးေမတၱာ နားလည္သိတတ္တဲ့ ခ်ိန္မွာေတာ့
ေႏြးေထြးတဲံ အေမ့ေမတၱာရိပ္မွာ ခိုနားဖို႔
ကြၽန္ေတာ့္ရဲ႕ ေနာင္တနဲ႔ အိမ္အျပန္းခရီးကို
အေမ... အၾကင္နာအၿပဳံးနဲ႔
မႀကိဳဆုိနိဳင္ခဲ့ေလၿပီ ... ။ ။

စာ(င္)မာ့

............................................................
အေမမ်ားေန႔၌

(၁၉၉၃ ဒီဇင္ဘာလ၊ ၇ ရက္) ေန႔တြင္ ခရစ္ေတာ္၌ အိပ္ေပ်ာ္သြားေသာ ခ်စ္ေသာ အေမ့ ကို မိခင္မ်ားေန႔၌ ဂုဏ္ျပဳေရးသားေသာ ရင္းတြင္း ကဗ်ာတစ္ပုဒ္ ျဖစ္ပါသည္။ ။

Voitu Khaw ah im ung

noreply@blogger.com (ကိုကိုလတ္) — Wed, 09 Apr 2008 08:54:00 +0000

8 April, 2008 cawn ni hih hin ah Matupi peng, Voitu Khaw (Thangpyh vang) ah im ung tila Matupi ben kalawng awlthang zaak la awm. Khawthun khawnoklung 2pm zunzan ah ung titih im 13 hawm ung tila zaakna awm. Me kalawng metihla a ung kai tihe tah acaihla zaakna awm thlan hyn. Im dawng 13 a ung dawngah im myhla camaw patawng bro nawhla awm cawi ni. Bro nawhla kawthee pui ham awm. Voitu Khaw kah khawdeng kaming thlang thli ham thangthuina khyh pe u sih.

Awlceh Lawng

noreply@blogger.com (ကိုကိုလတ္) — Fri, 04 Apr 2008 14:48:00 +0000

Rev. Chan Thleng

Hin at ah ka zu lawng cabu khat a tee lii vengah, “Thlaangthli cet u hang, na ti makawi, thlaangthli cet hang u,’ na ti aroh,” n’tina. Kai lawng, ‘Mah awl boih balbol taca, na zakming atah khok pon ta,’ ka tina de a ngaai tlyp thai nawh.

Matu awl n’thui vengah awlthui ceh lawng vai u boih nawh. Ca cangna lawngpui ng’khyh nawh dawngah ng’awl a hoi sarui la n’thui praap. Thuina mai ah, khat lawng, ‘tambok,’ ti tih khat bal lawng ‘tangbok’ ti bal. Atlo khat bal lawngtah ‘tumbok, tambok,’ ti u. Me awl aka song kai? He ang awlthui aka vai u nawh mong awm. Awlceh lawng vai u boih thai kawinih theen paai sui de. A vai u cing hamla awm tila ka thuingaihna thlan ni.

Khawtlaak ben ram ah aka awm sadau thlaangthli lawngtah awlceh lawng boih a khyh dawngah awlthui hang thai tlaih nawh. Kawl awl khaw thut vengah awlceh lawngpui hang thai nawh. Tu dawngah lawng a hang nawh kai? Ca cangna a khyh u tih awlceh lawng rokbah tangte a awm dawngah ni.

Cyk kah awl te kop byh lah sih. Sadau awlceh lawng (Grammar) byh thil lah sih. Sadau awl latah awlthaan (sentence) khat he pahih la a pek, subject on predicate, tila. Subject hetah thaihu aka saikung la awm tih predicate tah thaihu a saina la awm. Te dawngah awlthaan khat dawngah, Subject + Predicate tila awm. Sadau awl la ‘Thlaangthli cet hang u,’ tihe ‘People go up,’ tila awm. Te dawngah, ‘People (subject) + go up (predicate), mah awl latah, ‘Thlaangthli (subject) + cet hang u (predicate). Te de predicate he kop pek thai la awm bal. Predicate he saina la a awm dawngah verb on metila a sai tite aka tyngsak awl adverb tihe awm. Go he verb (saina) la awm tih, up hetah metila a ceh u tite aka tyngsak awl (adverb) la awm. Sadau awlceh lawng zahawh ngaai tah verb (go) congah adverb (up) he rep pahoi awm. Tede verb a awm thlan ah adverb khaw lat awm thai van bal. Tede zawl. Mah awl kop m’byh vengah, Thlaangthli (subject) + cet (verb) hang (adverb) ti ham awm. Mah awl la awl aka coih u tihe awm. Awllung u lawng kop a khii tah thlaangthli he ni. Te dawngah sadau awl la tah reflective pronoun n’ti ai.

Mah awl la, Thlaangthli cet u hang, he Grammar awlceh lawng la m’bet kawinih, thlaangthli (Subject) + cet (verb), u (reflective pronoun), hang (adverb) tila lat a awm dawngah awlceh lawng song nawh. Tuah ti atah verb on adverb he rep bet u tlaih nawh tih reflective pronoun on lat a bet hih dawngah awlceh lawng lawlh. Tede Thlaangthli cet hang u, n’ti kawinih, Thlaangthli (subject) + cet (verb), hang (adverb), u (reflective pronoun) tila awm tih awlceh lawng aka thym bet la awm.

Zakming sarui awlthui he kawlkalh hamtah theen mai suide, awlceh lawng athym la n’thui tare kawinih theen tare ngaai ai.

Music Terms

noreply@blogger.com (ကိုကိုလတ္) — Sun, 09 Mar 2008 11:24:00 +0000

Music Terms boih he tah thlangbawk awl (English) mo nih. Hekah Music termthli he tah, a zahawhbik (German, Italian, France and Spanish) term dawng kalawng kalawla awm tih, thlangbawkthli lawng khaw tee kah ni patong a kawngla awm. A kawng tila khaw awm nawh tih, terms thli he a hawna la awm. A thuingaihna a sulam he ni a mami English Music Dictionary la kop asai tih, a kawng u la awm tite ming thaila awm. Diklai pum boih ah (Staff Notation) he ahawna tih, tedawng kah ahawna dawngah Music Terms he boih huh thai la awm. Acan vengah German terms mai aaw, Italian term mai aw, lak lak ah ahawna thli khaw awm tih, France on Spanish hetah bet ah a hawna zawl tih he thui thai la awm. Music Dictionary he khaw tahe san atah a phun phun mok sawk tih, German Terms kalawng English la, Italian Terms kalawng English la, France Terms kalawng English la titih mok n'tee thai, byh thai la awm. Terms on Dictionary tihe a thuingaihna vai u hih nawh. Music Dictionary dawng atah, lumlaa ben kah awllung he boih thumla awm. Music term dawng atah a mah byng he ni dok huh la awm.

Music Score boih dawngah Music term na tee vengah mah Matu awllung na tee vengkah angla n'tee paraap. Tihla n'tee atah teni aka songbik la a awm. Thlangbawk awllung na tee angla na tee kawi nih na palh la awm ai. Music term he tudawng ah ming hamla a ngo ti atah, lumlaa (Music) he a satalna ham, a lona ham, a zaina ham, a ryym awmna ham, a kuihna, laa a kun thuk kungna a theenna ham, kawthee awmngaih tyng sakna ham, a ngaih la pang, azawl la pang ti veng kahamla a ngaih dawngah angola awm. Music score/note boih boih dawngah Music term he a zawlbik pakhat, pahih na huhna awm ai. Music term he khasut laa dawngah mok na huh angla, khasut laa bal dawng atah khat kangnaa khaw na huh nawh na khaw awm ai. Azahawh ngai tah (Church Himnal or Himn) laa dawng ah Music Tems he awm nawh. Himn laa he tah Pumim ah thlangbol lawh asak laa la awm tih, camo patawng, cadawng hula he boih athum veng atah Music terms he laa dawngah awm cakhaw haw na hamla a raina awm. Music terms azahaw ngai he tah, (choral song) dawngah huhla awm. Tecongbal ah, Tumbel (instruments) kah Music score dawngah huh thaila awm bal. Thuina mai ah, (Piano pitch, Classical Guitar Pictch) dawngah mok n'huh thai. Laa boih boih dawngah Music term he thum cing cing seh tila khaw a thuingaihna monih. Music term he Laaphawhkung (composer) amah rang mai ni. Laphawhkung a mah lawng a ngaihna ah a thum sak thai bal ngon. Tede te kah a vol ah rules or principles khaw awm bal ngon. Laaphawhkung lawng laa ka thut ai ati atah, te kah rules or principles te lumha la a ming a ngo. Thuinamai-ah, "Shout to the Lord (Bawipa tengah pang lah)" he Laaphawhkung lawng term or expression a thum sak vengah, azai cala pang tina kah term te thum mai khawi nih, a palh la awm ai. Tudawngah tikawinih catlang dawngah "pang lah" ati lak ah nga ngah thum atah palh tite a caih caala tyng.

Accidental = Note saw mai aw? Note teng mai aw? (Sign) a suih ca tih, note kah awl te a thloh la vik a hoi. Hekah ( b, #, f, x, bb) sign he note hai a awm atah, tikah note awl te rekthym (half step) he a sang sak, a tom sak. Azahawh ming ham la na ngaih a tah, Music Theory dawng ah na byh thai.

Accoustics = Tumbel kah awl (effect) athum myhla a mah taktak awl te ni.

Allegretto = A khohna tawng ah lo (bahong lo khaw lo nawh, zai khaw zai nawh)

Allegro = Lo (allegretto lak ah bet ca lo)

Allemande = A khohna tawng la lam ( a lo la lam nawh, a zai caala khaw lam nawh)

Andante = "cehna dan" (ceh vengah a lo lam khaw ceh nawh,a zai cala lam khaw cet nawh, a khoh khong la cet te ni)

andantino = andante lak ah bet ca lo

cantando = lumlaa na sak angla

cantabile = laa nasak veng kah angla

con = on (with)

con brio = muithla on

crescendo (cresc.) = voh voh bau, a bau la voh voh sa, pang, tum

da capo (D.C.) = a kung kalawng kop tawng

D.C. al Fine = a kung kalawng kop tawng lang tah (Fine) a awm na ah bot sak.

Decrescendo = voh voh zawl, a zawl la voh voh sa, pang, tum

Diminuendo = "decrescendo" on a thuingaihna vai u hih (voh voh zawl, a zawl la voh voh sa, pang, tum)

dolce = a didip cala, a tui cala

grave = a zai cala, bahong a zai la

harpsichord = kum thawngkhat zaruk on kum thawngkhat zareet zuzan ah tumbel la ahawna u hawpai pakhat. Tahe san ah (Grand Piano) ati u ke on vai u hih. A rui he (Piano) dawngka thicung on a cak la rap a hen thil angla awm nawh tih, thi tlang dawngah mal rui pin angla a pin ca.

leggiero = a zanghop cala, awmngaih kawho cala

mezzo forte = a khokkhong la bau, pang

minuet = lam vengah a khokkhong cala awmngaih kawho on lam, a zahawhngai beat pattern he tah vaithum(triplet) la awm.

Moderato = a khokkhong la

(Op.) Opus = "sai" laaphawhkung lawng a sai ham koi

Piu = ta-re (more)

Poco = a zawlca (a little)

Ritardando (retard; rit.) = voh voh a zai la (sa, pang, tum)

Sforzando (sfz) = laa sak phaili vengah thlawt, laa a bau la mai aw, a zawl la mai aw asak a tum, te ni

simile = lumha kah a awm angla sai ham

spirito = muithla

tempo = alo, azai

a tempo = lummha kah alo azai na angla

Note: He kah "Music Terms" he Ceng Ting lawng athut la awm tih Matu Ronglii Blog dawng kop thum sakla awm.

Calung Betna A Lawng A Im

noreply@blogger.com (ကိုကိုလတ္) — Wed, 16 Jan 2008 16:49:00 +0000

Calung Betna A Lawng A Im

Rev. Chan Thleng

Me kalawng cathutna a law tih metila a thut u, tite thui hamla tlaih nawh tih ca thut vengah awllung metila ng'hoop tlaangna ai, ti teni thui hamla ka kamthlah. Sadau thlaangthli lawng ca a thut u vengah awllung boih a hoop a tlaang tih ca a thut. Te dawngah awllung khat rip lawng thui ngaihna rip a khyh. Te ang awllung hooptlangna te grammar ti u. Mah ca thut vengah khaw awllung hooptlaangna a awm nawh atah awllung kah thuingaihna zakming thai la awm nawh. A thuingaihna atlo la awm thai. Te dawngah adang kah angla hooptlaangna he byh langtah ca na thut vengah awllung asong la hooptlaang lah.

Te congah, awllung asan on atawi thut vengah ngaithyyn hamkoi khaw awm bal. Ngaihna angla awllung he thut thai la awm biit nawh cakhaw a coong thai khuiah a sop la thut hamla awm.

Calung pakhat rip lawng a thuingaihna rip a khyh. Sadau awl la tah Parts of Speech titih awllung boih a hoi a tlaang.

Noun : Noun he thaihu ming boih, thaihu boih, hyn ming boih a thuingaih.
Thuina maiah – Thlaang, Im, Lou, Tui, thing, Leng Kawi, raw etc.
Thaihu khat lak ah a zahawh atah: thlaangthli; Imthli; louthli tila n'thut ai. Thlaang thli tila n'thut maikawinih, thlaang on thli tihe atlo tlo la a awm dawngah thuingaihna atlo la awm hau pon. Thlaang on thli te rep a bet u la thut ham awm, thlaangthli, imthli, louthli tila.
Tek thai la aka awm nawh, tede thaihu angla pokna aka awm awllungthli khaw noun la awm bal. Thuina maiah, thangtheenna, bawilenna, awmngaihna, kawhoona; thangtheen on na awllung te rep a bet u la thut ham awm. Thangtheen na tila n'thut manawh.
Thaihu khat zyngah hawna awllung on saina (verb) haih n'thut manawh. Thuina maiah, thaihu asai, tila n'thut manawh. A (pronoun) lawng thlaang khat nawh atah thaihu khat a khii, tih sai hetah saina (verb) ni. Te dawngah thaihu a sai tila n'thut ai.
Adjective: Noun (thaihu) aka thuicaih awl he adjective a mingna. Thuina maiah Awlthang he noun la awm tih, me ang awlthang tite aka thuicaih awllung theen he adjective a mingna. Te dawngah, awlthang theen tila n'thut ai; ram awmtheen, thaihu theen, kawpok theen, hetila n'thut ai. Awlthangtheen tila n'thut manawh. Te congah adjective amah byng khaw awm thai. Thuina mai ah, Bawipa tah theen, hai tah ling; tui tah ding, tila n'thut ai.
Verb: Saina awllung. Thuina maiah, Camawthli heng u; Buh ka caak. Lai Peng ca a byh. Hekah heng, caak, byh awllungthli he saina, verb a mingna. Na hilh hau ai, Buh kacaak; Lai Peng ca abyh, tila hau na thut ai. Ka, a he tah (pronoun) la awm tih caak, byh he saina verb la awm. Haih rep na thut nawh my.
Adverb: Verb saina awllung aka thuicaih awllung he adverb tila a khy u. Thing tlim rup. Khaw thlii khyngdeng; Ba Hou va pai prak. He kah awllung rup, khyngdeng, prak he adverb a mingna. Metila a sai tite a tyngsak. Adverb he verb awllung a hu benah, nawh atah a haai benah aw awm thai. Thuina maiah, Thing tlim rup (or) Thing rup tlim, a thuingaihna khat boih ni. Na zawngna angla na hawna thai.
Mah awl la saina verb ni aka awm, passive verb awm nawh. Thuina maiah, 'Thlawn la na awm pon; Sai la awm pon; Hoih la awm pon,' he awl he sadauthli awlhawna passive verb ni. Tede mah awl la ng'hawna u van pon. Theen van mai.

Atlo awllung betna awm hyn de, hezoh mai deseh. Matu Holy Baibul dawngkah awl hawna he a saw kah awllung bet angla thut la awm tih na tee vengah na zakming thai ai.

Te congah awl zaai on awl loo thut he a ngo bal. A heem a saang khaw thut ham awm de, rai tih n'thut thai nawh. Tede a zaai on a loo hetah n'thut thai. Thuina maiah, 'Buh ka cak, n'ti nawh tih, Buh ka caak, ni n'ti. Pathen renna, n'ti nawh tih, Pathen reenna, ni n'ti. Te dawngah mah ca na thut vengah ngaithyyn a ngo. Bawipa tah theen, Bawipa tah theen, tila n'thui ham te Bawipa tah then, Bawipa tah then, n'ti kawinih song tlaih nawh pon. Then titah, raipaai then, hula lawng raipaai a then, tila ni a thuingaihna vik a awm pon.

Mah awl ah 'hla' awllung awm nawh. Hlaanghli n'ti kawinih mah awl nawh ni. Mah awl la tah na lai te na huui benla na naw vel pongsak langtah thui lah, thlaangthli tila ni na thui ai.

Mah ca na thut thai bet pon ai, tila ka ngaiyyp.

----- 000 -----

NU AWL PA KAA

noreply@blogger.com (ကိုကိုလတ္) — Thu, 27 Dec 2007 17:04:00 +0000

Nu Awl Pa Kaa
by: Rev. Kui Ca

Ka tunngaih = A Pa
Ka thunngaih = A Nu
Awingiah ngouzen = Likngou tah tawngpa byng lawng a awi dawngah a ca tawngpa te likngou la a thuidot tih "awingaih ngouzen" tila a toi u.
Awingaih = Capa thuina.
Awilung = Hawilrui te tumlung on tumsuih a pan de, huta byng lawng a awi thai dawngah, a danngaih a canu te "awilung" ana tina u.
Huta lawng tah raipaai on a vaa te ru-rai on a thuidot ith "thenngaih" tila a rah u.
Tawngpa lawng tah raipaai on ru-rai he a ruk van dawngah, a thlangngaih on a lungna a zu te "ka rukngaih" tila a khy.
Tawngpa on Hut lawng a thangngaih te bawk ah "cangzeh" = tymding, a tym tila a toi u.
Ka putngaih = Lampawk.
Vangdawng = Kaw, Im.
Hunlung = Lou
Ka syn = Ka ca.
Hunlep = Ngannu.
A thon = Thangraawi.
Bynngaih cauhing, Huta byng lawng cak he a byn. te dawngah a canu te cak on a thuidot tih, bynngaih cauhing cauhing tila a khy u.
Pokcyk = Caming a cuun cyk on caming awmthang.
Humik = Khaw a tla thuk on thlaang aka dyk te a vai u la a pok dawngah humik angla na tla zap ai nym a nati u.
Thimnu = Thuthim nu, dom nu, noiben ah aka awm huta.
Pawmtang = Reng a baawk on aka pawmtang te bawi canu kah awi-naak on ana vaisak u dawngah, bawi canu te "pawmtang" tila a thui u tih, reeng, aka pawmtang nawh tatah "Pawmduul" ti u tih, kawdeng canu thuina la a hawna u. Raisi pawmduul pawm ni ka tuuk a nati u.
Bawiva = Im ka vylh voih boih imsa lousa tah bawiva n'ti, ramhum ah aka awm te tah "pawngsa, ramsa" n'ti.
Pawmcung = Lampawk, li, pala, tamca thui myhla, imkhui kah hawnathli boih te "pawmcung" n'ti.
Awva = Raal tukna, ceem tlokna ah hawnathli boih tah "awva"n'ti.
Toi = Khawthla kah thlaang voom te "toi" (greetings) a mingna tih, a ming la sak tih khy raitaat tah toi n'ti.
Lung ka haalna ai = Ka reem ka haalna ai.
Caluptawi = Imkhui kaw mikhaai sop la buh veel tih caak.
Rengam = Bawina Sou.
Pahbou = Thlangngaih, zuva kah pekna, pacaa on pekna khaw a khi.
Kanghung = Suva awl a ring lii veng ty.
Raithlan = Hawta tah rurai on ana thuidot u dawngah zu na hamla bee te "raithlan" ana ti.
Kawkcuk thing = Capa, zin aka thlau, thlaang a tunna nook thlaang te vakawk kah a cuuk comna bawng thawngdyng on a thuidot tih "kawkcuuk ting" tila a thui u.
Kaaikung = Lamkaai
Dapantui = Roproina, thinkaw hawnghaihna.

TU HAMLA NA AWM?

noreply@blogger.com (ကိုကိုလတ္) — Mon, 17 Dec 2007 07:49:00 +0000

TU HAMLA NA AWM?

Thlaanglawng thaihu a pok mon de,
BAWIPA kah kamthlahna ni
aka coong, (Tahtuk 19:21)

Hin at tah ka pia khat lawng ana pa teng la n'ceh pui. Ana pa te im ah ana awm nawh. Laikaawk la awm mai cawi ni, titih im kalawng laikaawk la pahoi n'ceh pui. Laikaawk tide caang lingna laikaawk nawh ni. Sangvut lingna laikaawk la awm. Laikaawk te kau thlang. Sangvut khaw hin tih ah hamla awm pon. Laikaawk laklung ah teng (tank) angla awm de, a hu ben atah thaihu phuihna angla khaw a ka awm seh khat te awm. 'Ka pia Vern, ke kah aka awm ke n'tu nym ca? Mawtawkaa aw?' ka tina. Te vengah ka pia lawng a nuih ruila, 'A pa lawng avan thui badai,' n'tina. Ana pa va law tih, 'He kah seh he sangvut ah na seh ni,' n'tina. Te congah seh saw la a luui congah kai khaw luui hang van, n'titna tih ka luui hang van. Te cong atah seh te a mawng. A haai ben ah seh lawng sangvut te bawn bawn a ah conga a hu benla a tanawlh phai. Tekah cangvui te seh khat bal lawng phawng phawng a til congah a cang te a hu ben kah cangpaai angla aka awm khuiah nawi nawi a kawng. Seh a hu ben kah adang ben ngaai ah aka awm seh bal lawng cangziing te no no a tum bal tih patong patong a ceh taak. Ka byh vengah a byh theen thlang. Seh pakhat mai lawng, sangvut a ah, a til, cangziing a tum tih vai la bibi cong kang. Kamah khaw kah caang ng'ah na kawinih kawlkalh ah ni a cong suide a! ka ti. Te vengah, ka pia kah ana pa lawng a nuih ruila, 'Na mah khaw ah he ang awm van aw?' n'tina. 'Mekah a awm bal ai, te nawh aw ka ming nawh laawt. He on tah cang ah zoi tahe a,' ka tina.

Thlangcuihthli lawng thaihu a sai u vengah, n'tu a sai, tu hamla a sai, tu a phu aka awm, tihe a pok tih a sai u. Tepek ah seh te, cang ah-na seh, caang ah-na hamla sai la awm tih, caang a ah-na. Thlangcuihthli kah thaihu sai la a awm dawngah hawna hamla a phu awm tangkiik. Pathen tare tah cuihna ah, mingna ah, thoomna ah, soprep boih ah aka sop kok tlongkholh la awm. "Kai tah Alpha on Omega, lamha cyk on hukhyng kok, Akuung on a dawng la ka awm,' (Awlphawng 22:13) Pathen lawng ti. Tihin hang kah thlanghing cuihna he kawpok la rai tangkiik. America ah aka awm on zilh dawngah praap m'voom u thai. Computer dung la awm hang pon tih, ming lek nawh tola cuihna he saang pon. Diklai thlangcuih lawng a ngaihna saisak hamla seh a sai thai atah aka cuih kok Pathen tare lawng ta thaihu a sai he mailai la, a phu awm myh la sai nawh my nizaw? Thlangcuih kah thaihu sai tah kawpok la n'raisak u tih Pathen kah kawpok rai thaihu sai hetah amah pok ah aka awm angla ng'ngaai u. Apaai thing pakhat ke metila a paaina tite m'pok kawinih m'pok lek thai nawh my. Thlanghing kah thaihu sai he awlpui la m'pok u tih thaihu kawpokrai aka van saikung Pathen te lat ng'koh thai nawh. Bawipa lawngah, Solomon kah bawilenna lawng thlemrim dawrai pateng khaw a pha monih, (Mathai 6:29) tila avan thui. Seh a rawk atah thlaang lawng kop a tlaih thai. Tede thlanghing he a dyk atah a u lawngkhaw thawh kop thai tlaih nawh. Pathen byng lawng ni a thawh thai. Ahih tah thawhkopna on hingna la awm (Johan 11:25). Thlanghing cuihna lawng a pha thai nawh cuihna aka khyhkung tah Pathen ni.

Aka cuih kok Pathen, nang aka lungvatkung Pathen lawng, a capa thii on na thawlh bongha boih te a van tuui tih nang hamla lawngpui theen boih avan rokbah pon. Te dawngah ni diklai dawngah nava thang. Pokna, mengtengna, kamthlahna awm myhla thlanghing lawng pateng khaw thaihu a sai nawh atah Pathen tare lawngtah nang he mailai la n'sai monih ta. A kamthlahna sopsak hamla ni n'sai. He he na ming nawh kawinih na dalraa vetih, lawngpyng ceh li ah aka pal praap angla na awm ai. Namah ngaih thaihu na sai mai suide coong nawh my (Tahtul Awlcuih 19:21). Na lu dawng kah sam tham at pateng khaw na mym na baawksak thai monih (Mathai 5:36). Thaihu aka saikung lawng a sai thaihu metila ka hawna ai, tite a ming angla, nang aka saikung Pathen byng lawng ni nang ham kamthlahna te a ming. A kamthlahna on a mengtengna he dungzaan to aka cak la awm (Saam 33:11). Te Pathen kah kamthlahna a kawngaihna dawng teah na thinkaw boih te hal, te atah na kamthlahna boih te cong ai (Saam 37:5,6). Kamthlahna khyh myh-la metila na congdook praap? Me na pha ai? Thlanghing cuih la tah na cuih van mai de cawi ni, tede na cuihna lawng thangvyn ah aka law hamkoi thaihu a ming monih. Laa dawngah, "Lai rui ang awi tangte dykna, a ty botna lawng ng'ke prak ai,' a ti angla, saithaina ng'khyh nawh hingna dawngah heah mah ngaih la khaw khan thil hamla rai thlang. Te dawngah aka tat tlaih nawh aka cak kok Bawipa dawngah pai lah. Na cehna lawngpui te noopcaap langtah na khawleh a cakna ben la te cet lah, (Tahtuk 4:26). Pathen awl lawngah, "Khaw aka pok thai lawng thaihu a nai a naawng, tede thlangngau lawngtah diklai a botna ben to a byh," (Tahtuk 17:24) ti. A thuingaihna tah amah pok ah thaihu boih aka ming angla thaihu a sai phryyp praap, tina ni. He he thawlhna akung la awm. Mah ham byng pokna, ngaihna he thawlhna a phytna la awm. Te dawngah mah hoihkhangna awlpui la pok lak ah Pathen lawng amah kah kamthlahna a sopna ham ng'khyhna ben ah na hoi u ah ni na hoihkhangna a awm lat ai. Te lak ah aka bou on awlpui atlo thaihu na hing khuiah awm thai nawh. Te ni na hing thil hamla aka awm. A dang kah awlpui panga he atheen la tee langtah sai pahoi lah.

1. Namah on namah awlpui la na ngaai u tang tang aw? Oih, na ngaai u hamla awm. Na ngaai u atah na imkhui kaw, na ca na nau, pilnam rangpui on khaw ram hamla hoikhangna aka sai la na awm hamla awm. Maawtkung la na awm nawh cakhaw hoihkhangna aka sai thlaang la na awm ai. Te tila na awm hamla Pathen lawng ng'ngaih. Te tila na awm thaina ham awlpui a tawngna u tah, "na hingna te Pathen ko ni" tite ming langtah a kut dawngah nawn u lah. Pathen na ming nawh tih namah ngaih ah hoihkhangna aka tlap thlaang la na awm atah, langre huhaang ah tuihalh tawnba on kamthlahna ming myhla aka rera, thalrih aka phui thlaang la ni na awm. Patang khang ruila na rera khing cakhaw kamthlahna na pha manawh. Tu ah ti atah thinthah on kawtalh thlaang la na awm. Jesu lawng awlding on ng'khy tih lawngpui theen ah cehpui hamla ng'khy vengah na ngaih nawh. Ka cuih, ka bawi na ti de, na cuih nawh (Awlphawng 3:17). Te dawngah raina, ngaihangna on patangna a pai vengah na lakyng. Na lakyng hamla tyyng. Nang lak ah thaa aka raa ngaai, zouthee-na na saw ah a pai vengah, Samson angla na tharaana boih te haa baat pon. A u lawng m'pai pui tlaih nawh. Te dawngah thaihu na saina rook ah Bawipa ming langtah, te atah, Pathen kah ngaimawngna, thlanghing kah zakmingna boih aka pong volh lawngah Jesu Kri dawngah nang kah thinkaw lungbui te a thlipthung ai, (Filipi 4:7).

2. Na hingna te Pathen kawngaih hingna benla hing lah, khaw sa lah. Pathen kawngaih hingna metila na tawngna ai? Paul lawngah, Muithla dawngah hing u lah, (Kalati 5:16) ti. Metila Muithla dawngah ka hingna thai ai, na ti atah, he he Bawipa tengah bih langtah sai lah. Muithla kah athaih pakow he (Galati 5:22-25). He kah athaih pakow he saw ben kalawng vision angla va phou nawh my. Namah ro ro lawng na sai hamkoi ni. Thlawnna tah Pathen reenna laksawng la awm tih thlanghing kah sai thai koi nawh ni, tede Muithla ah na hing atah athaih te na thaih hamla nang kah sai koi la awm. Ngah ngah sai lah. Tahe kalawng sai pahoi loih ne. Hin at na sai thai cong atah a hin bena tah zoi badai. Te cong kalawng patong patong na sai thai ai. Na sai tlol atah Bawipa tengah thangthui lah. Bawipa m'bawm lah, tila lungbui tang on thangthui lah. Nang bawm hamla Bawipa tah awm zozah. Na sai tlol tih na plong ahkhaw na kaw botsak bol. Bawipa tengah kop kop reenna bih lang thou lah. N'thawh badai. He dawngah ongna theen na taawm thaina u ham thaa van hyyr u lah; thaihu theenna ham cuihna; cuihna ham, pacyng thaina; pacyng thaina ham ngah ngah yh-na; ngah ngah yh thaina ham Pathen kawngaih la awmna; Pathen kawngaih la awmna ham miamanau reen u the-na, miamanau reen u the thaina ham lungna te khyh u lah. He thaihu saithainathli he tare tare na khyh u atah hoikhang myhla, mami Bawipa Jesu Kri mingna benah tula coong myhla na awm u manawh, (2Piter 1:5-8).

3. Saithaina, bibina tu na khyh? Na bibi na khyh te Bawipa tengah nyh lah. Bawipa, he thaihu he nan saisak tih ka ym thlang, ka awmngaih thlang, tila Bawipa tengah nyh lah. Bawipa lawng diklai dawngah na bibina dawng kalawng zoutheenna peek ham a khyhsut pon. Atling la ni na thang de, na thaihu saina dawngah Bawipa te na ym tih yp awm la na sai atah na bibina pungtaai ai. Tede a pyh ngaih (hak kau) thlaang la na awm tih thaihu me ang khaw khyh boih, dang boih hamla na pok praap atah na thlaawng kang ai. Khat khaw tingtaai manawh. Diklai dawngah asan na hing ahkhaw a tawi na hing ahkhaw na hingna te a phu awm hamla Bawipa lawng a ngaih dawngah, a phu na awmna hamkoi bibi te pok heet lang na kaw khuiah hyymna a awmna angla bi lah. Huu la haai la phur phur cu bol. Na kaw khuiah bi hamla, sai hamla hyymna na khyh te sai lah. Tekah na bi on diklai dawng na hing khui ah Bawipa ming thangtheenna na sai thai ai. Hekah bi na bina u he aka vot aka thok Pathen thlaangthli dawmthlaaina ham byng nawh ni, Pathen tengah awmngaihna a coih pawk la tyngsakna la khaw awm bal. Hekah bibina on namami on namami kah pihyn na tyngsak u pon angla, Kri kah awlthang theen awlngaaina on nangmi lawng ongna na tyngsakna u dawngah, te congah nangmikah moihoihna te tethli on thlaangthli tengah na tyngsakna u rang on thlaangthli lawng Pathen te a koh u ai, (2Korinth 9:12-13).

4. Na lungbui pokna, kamthlahna te Pathen ram benah paisak mangkhak. Bawipa lawng thangthuina n'cangsak, 'Na ram va pai hawn seh,' tihe na imkhui kalawng tawng. Na imkhui kaw boih khat khaw haataa myhla, Joshua lawngah, "…kai on ka imkhui kaw lawngtah Pathen bi ni ka bi u ai," (Joshua 24:15b) a ti angla na imkhui kaw te Bawipa ming on paisak lah. Bawipa kah awl te ngaai langtah, te atah Abraham angla na cadil nauha to lawng zoutheen a taawng ai. Bawipa lawng im a sak nawh atah im aka sakung lawng poi oop la ni im a sak, (Saam 127:1) ti te ahawng la ngaai bol. Na cathli aw, nawh atah na imkhui ah Bawipa aka ming nawh a awm atah maawng praap bol. Bawipa dawngah na imkhui kaw boih lum-up la na awm ham ngaithyyn lah. Na imkhui kaw ah Bawipa ram a pai tih Bawipa Ciim Muithla kah maawtna on khawsak hamla thuityn lang cangsak lah. Zu lawh va sakna on thaihu soprep ah na imkhui kaw ah Pathen ming thangtheen la awm hawn seh. … nangmi kah khawbo ramlang te Kri kah awlthang theen on a rop la awmsak uh, (Filipi 1:27). Te congah na khaw khui ah, na ram ah Pathen ram a pai thaina hamla awlthang theen phawngna, mission bibina ben ah thaa pe langtah thuum lah. He he Pathen kah awlpeek ni. Te dawngah cet u langtah namtawm thlaang boih te hubaang la van sai uh, Pa, Capa, Ciim Muithla mingah baptisma van pe uh, kai lawng awl kan peek uthli boih he a vaina u hamla van cang pui uh, (Mathai 28:19,20) Bawipa lawng ti.

5. Na awmna thlangbol khui ah tungpang hamkoi la awm lah. Thlangbol he Kri kah a pum la awm tih a hingna on a lai la awm (Galati 5:25). Te dawngah Kri pum he na lungna ai. Kri pum a roongna ham on a theenna ham thaa na peek popa ai. Metila aka bawmkung la ka awm thai lah ai, tite na pok popa ai. Thlangbol teng kalawng tu hoihkhangna ka dangna lah ai, tila pok hau bol. Bawmna aka dang thlaang he hoihkhang thlaang nawh ni, khawdeng on sading nawh thlaang ni. Khawdeng on sading nawh thlaang la awm ham na ngaih nawh macawi? Thlaang hoihkhang la awm ham, thlaang aka bawmceem ham, thaihu theen sai ham, thlaang aka maawt hamla ni Pathen lawng nang te ng'ngaih. Te tila thlangbol khuiah na awm tih Pathen ming na thang theensak hamla na kamthlah tih na pok hamla awm. Kri thlaangthli on pawlneengna ah awmngaih thathly on pawlneeng popa langtah thlangbol thaa aka pekung la awm lah. Tu ah ti atah, Bawipa kah mik tah diklai pum ah awm tih amah tengah thinkaw aka hal thlaangthli te thaa a raasak, (2Dungtokna 16:9) ti.

A saw kah awl panga hy he tee mailai bol, hawna lah. Pathen tah Muithla on awltak la a awm dawngah awltak on na sai hamla awm (Johan 4:24). Te atah na hingna dawngah kawpok rai Pathen kah saithaina te na huh ai.

Aw, Bawipa nang lawng n'ciimsak lah,
Ka thin ka kaw khui ah awmthli he
Kawngaihna on thaihu boih boih
Namah kohna ham ni na sai.

Raipaai angla, raipaai angla, raipaai angla,
Ka moibo van tyngsak lah!
Amen!

----- 000 -----

26 Bukit Sedap Road,Singapore 279924

DIKLAI BAWINA

noreply@blogger.com (ကိုကိုလတ္) — Tue, 11 Dec 2007 13:41:00 +0000

DIKLAI BAWINA

Uica awng on thi-eek lawng a caak thaina on thlanghyynthli lawng a muk tih a hyn thaina he diklai dawngah na kaawn te van tung u bol. Uica awng on thi-eek lawng a caak thai nawh, thlanghyynthli lawng a muk tih a hyyn thaina nawh vandawng khaw ah na kaawn te van tung u lah. Metitiah na kaawn a awmna ah na lungbui khaw awm van ai (Mathai 6:19-21).
Kri on thawhkop la na awm u pon dawngah, Pathen bantang benah aka ngaawl Kri a awmna, saw ben kah thaihu dawngah na thinkaw te khyh u lah. Diklai thaihu dawngah thinkaw khyh myhla, saw benah aka awm thaihu dawngah na thinkaw te khyh u lah. Na dyk u pon tih, nangmi kah hingna te Kri on Pathen dawngah thuh la awm pon (Kolose 3:1-3).

Diklai bawireng on awmtheenna,

haataana on thailatna ni.

Tede vaan bawirengna tah

dungzaan tola kak tlaih manawh.

( Pathen Thangtheenna Laa No. 242)

Singapore kah mingthang sizung khat la aka awm Mount Elizabeth Hospital la Samuel manu cancer tlawhna tuui hamla August 29, 2007 ah ka pha hih. Sizungah awm hamla a phu a tlawh aih dawngah hotel khat ah ka awm hih. Hotel ahkhaw hin san awm hamla tangka bro nawh a boih ham dawngah im vat hamla khing ka tlap hih. Te vengah America ram kah ka pia khat lawng, 'Holland Road ah aka awm 26 Bukit Sedap ah na awmna ham awm. A phu na peek ngo nawh,' n'tina. Te dawngah te im la ka pawng hih. Im ka pha vengah imkung tah America nam Mr. Scott Douglas zuva la awm. Im thawhka ka pha vengah n'dou tih ng'ym hih. Pathen tengah thangthuina avan khyh. Im khui la n'kuun pui hih tih imkhui te ka byh vengah im bou tangkiik tih akhaanthli bro nawh la awm. TV byhna, buh caakna, buh an thawngna, tuithlukna, tui zouna hyn, internet hawna thaihu soprep boih awm. Kaihih ka awmna akhaan te ka byh bal vengah ihna thah tangkiik, air-conditioner on phone on tuithlukna on thuutna u thaihu biit awm, tih ka awmna hotel lak ah theen ngaai. Imkung lawng, 'Namah hih ngaih la awm hih, thaihu na ngo sarui haw nah, khaw-awk hinaak suk hamkoi boih te he ah khyh, im-awm lawng avan suk badai. Brih ro ro bol, namah im pon ni,' n'tina hih. Ihna himbaai khaw avan thaw popa. Me vengah nym tah buh khaw n'cah hih. Ka awmna im khui ah vaai khaw law nawh tih kamahih ngaih la ka awm thai hih. Bawipa tengah awmngaih cil ka thui hih tih ka ym hih tangkiik. Kamah ngaih la thaihuthli ka hawna hih tih brihna khaw awm tlaih nawh de, ka kaw khuiah thaihu aka awm mangkhak tah, "He he na im nawh ni. He ah po na awm manawh," tila ka lungbui lawng mangkhak avan thui. Ka lungbui lawng avan thui tah Kawlram, Yangon khaw, Insein, 951/C Gone Myint Tharyar lawngpui, Ywamah khawlaw benah aka awm im te ni na im n'tina. Singapore ah ka awmna im he kamah im lak ah theen tih thaihu boih sop pon de, ka im tak nawh dawngah ka kaw khyk ti thai nawh.

Paul lawngah, 'Tahe ng'awmna diklai im he phe la awm cakhaw, kut on sak nawh, Pathen lawng avan khyh vandawngah dungzaan im ng'khyh u, tite m'ming u,' (2Korinth 5:1) tila avan thui. Na pokna lungbui meah a awm? Vaan dawngah aw, nawh atah he diklai dawngah aw? Namah on namah te meben thlaang la na ngaai u? (2Korinth 13:5). Thlanghing a lungna dawngah a hingna te thinglam dawngah mami kah thawlh laiba sahna ham aka pekung vaan on diklai aka saikung, thaihu boih aka mingkung lawng bawina pahih kawng Mathai 6:19-21 dawngah a caih cala avan thui.

1. Diklai bawina hetah kawlkalh hamla ni a awm. 'Thlanghing he huu la haai la aka cet aroh muithlip on ni a lawh hih. Amah pok atah tawk alek van de, zawkka mai ni; kaawn khaw a tung de, u lawng a pang ai, tite ming nawh," (Saam 39:6) tila David lawng avan thui. Te dawngah Kri lawng diklai thaihu dawngah lakyng nawh ham avan thui tih (Mat. 6:31-34), diklai bawina dawngah cuihna khyh hamla avan thui.

Diklai dawngah na kaawn van tung u bol, tila Bawipa lawng avan thui. Tu dawngah? Thlanghing he diklai ko la a awm nawh dawngah diklai thaihu dawngah thin a tlawh hamla awm nawh. Huh nawn thaihu hetah aka auh hamkoi la awm. Aka cak nawh, aka awm po hamkoi nawh ni. Diklai dawng kawlkalh ng'awm khui veng kah hawna ham mai ni. Tede diklai thaihu theen nawh tina nawh ni. Cak nawh, awm po nawh, tila avan thui ni. Aka cak on dungzaan to aka awm rou pang hamla Bawipa lawng ngkhyh dawngah, diklai thaihu dawngah lungbui van khyh bol ti. Diklai dawng nghing khui vengah Bawipa ypna on khaw n'sak atah, atling la n'thang u de, (1Timote 6:7) vaan dawng kah aka saawng bi aka bi nawh vaa pateng khaw Bawipa lawng a pok pe atah mami hamla lakyng ham awm nawh, ti. Tangka ngaih aihna he thawlhna a pungna la lat awm (1Tim. 6:10) tih pungthuikung lawngkhaw, khawling huiah patang palai la bi ka bi he ka thiina, tuah ti atah kai lawng ka ceh taak atah ka hu kah thlaang ham ni ka ceh taak khong (Ekklesiastes 2:18) ti. Pok myhla, thlanghing he pilnam tiim kalawng auh vilvak thai tihe ming hamla awm, bawi la aka ngaai u tih aka ook u thlaang Pathen haai ah tula khaw awm nawh (Luka 12:20,21)tila Bawipa lawng ngaithyynna awl avan thui.

2. Vandawng khaw ah na kaawn te van tung u lah. Kri lawngah vaan dawngah na kaawn tung u lah, tila cuihna awlhyp a van thui he, tu dawngah kai. Diklai thaihu he ngaih u ro ro bol, tina kai aw? Nawh ni, ti nawh. Diklai dawng na awm vengah na dungzaan im ah na hawna hamkoi kaawn tlapna lawngpui ni avan thui. Thlaang lawng diklai pum he khyh mai cakhaw a hingna te a thlaawng atah aphu n'tu aka awm? A hingna te n'tu on a thaw thai ai? (Mat. 16:26) ti. Hingna n'thlaawng paai kawinih, bahau la, vawvaa la awm paai ai ta. Hingna a awm tlaih nawh atah n'tu aka awm tlaih ai. Tahe ah vandawng rou te nghu thlan pai de, aka awm hamkoi vandawng rou te ongna mik on boih nghuh thai (Hebrai 11). Aka pawci thai nawh rou ng'khyhna vaan benla thinkaw te ng'khyh hamla awm. Huh nawn thaihu dawngah n'cet nawh tih huh nawh thaihu awm kheng ti Muithla mingsakna rang on m'ming, ng'ong thaihu dawngah ni n'ceh u (2Korinth 5:7). Diklai thlanghing lawng pateng khaw thaihu a huh tangte te ong ree tlaih nawh. A huh pon dawngah ong khaw ngo tlaih nawh. Huh nawn byng he m'vai kawinih thlanghing aka roong nawh kok la ng'awm ai. Tu ah ti atah thlaang kah tangte huh byng te ni n'lamtoon vetih m'vai pon ai. Huh nawn byng n'lamtoon kawinih aka haataa hamkoi la ni, ng'awm ai. Sengcamo lawng degree a huh ham te a huh a dang dengah sengim kai kawinih metila a coongna ai? Te dawngah Tahtuk Awlcuih lawng, 'Mengteng kamthlahna aka khyh nawh thlaang pal,' a ti laawt. Tu dawngah a pal? A dang hamkoi thaihu te ongna mik on a dan a huh nawh dawngah kamthlahna khyh nawh. Kamthlahna a awm nawh atah u lawng bi bi nawh. Tahtuk Awl lawng, "Hailam thaihu huh doonna a awm nawh atah, thlaang lawng yh thaina khyh nawh," (29:18) ti.

Pathen cathli lawngtah Ciim Muithla maawtna rang on hin rook khawsakna dawngah cuihna a khyh u. A lungbui thinkaw boih te Bawipa awmna Ciim Muithla tempul la a hawna u (1Korinth 6:19). Ongna ngaiyypna on hailam ben te a dan u. Hailam ben byng a dan u dawngah tahe kah thaihuthli tula sak u nawh, tina nawh ni. Tahe kah thaihuthli boih he Bawipa lawng tahe kah hawna hamla m'peek a ti dawngah a ym u tih awmngaih ruila a hawna u. Tede hing thil aih nawh. Habakkuk angla, khyh ahkhaw khyh nawh ahkhaw Bawipa amah lawng m'peek atah awmngaihna a khyh u tong tong (Habakkuk 3:17-18). Thaihu soprep dawngah hingna lawng a ming u (Filipi 4:11-13). Ongna khyh myh la Pathen cathli mingna nawh, ongna awm myhla thaihu sai mailai he ngauna a tyngna khong la awm tih Paul lawng tah thawlhna ti (Rom 14:23b). Lamha la ka thui pon angla, Joba on Paul lawng a thui angla, diklai dawngah a u khaw kaawn on tangka on thang haih nawh. Pathen lawng a hing khui hawna hamla tangka on kaawn a peek, tede dungzaan hawna ham pe nawh. A ceh taak ai. Ahih hu ah aka law thlaang hamla patong a ceh taak ai. A u lawng a hawna ti pateng khaw ming tlaih manawh. A hing khui ham byng la Pathen lawng a peek de, amah kah thaihu van ro ro angla a pok tih thaihu dawng teah a hingna aka khyh thlaang tah ramsa, suvaa hingna on a langna awm nawh. Pathen te ming tlaih nawh. Pathen ming, Krica, thlangbol ti pateng khaw zaak ham ngaih nawh. Paha pakhat a peek ham tare tah thui tlaih bol. Te ang thlaang te ' A kaw aka awm nawh thlangngau,' tila Bawipa lawng avan thui (Luka 12:20). Amah pok atah bawi la, thlangcuih la ngaai u de aka cuih nawh thlangngau la ni a awm. Thuina maiah, tekah bawi lawng khawdeng thlaang khat te a reen tangkiik tih im lou thaihuthli on tangka phaisa a peek. Tede te thlaang lawng aka pekung bawi tengah ym cil khaw thui nawh, awmngaihna khaw tyngsak nawh. A tengah vaai khaw cet nawh tih kamah lawng ka huh ka dang van ro ni, titih hool u kawinih ahih aka reenkung bawi lawng te tila a awm te ming tih hu kawinih, metila te thlaang te a tina ai? Ym nawh my nizaw? A tol zozah pon ai. Te tih angla ni, diklai bawina aka ypna tih aka hool uthli boih he Pathen haai ah a awm. Te dawngah nawh aw, thlangngau, a mingna laawt.

Thui tang tang atah zoutheenna pekung Pathen tengah awmngaih cil aka thui tih diklai dawng a awm khui vengah a hawna thaihu dawngah Pathen tengah ymna aka khyh thlaangthli he thlaang hoikhang on thlanglen la boih awm u. Ka awl he na ngaai tih ka awlpeek he na vai u atah na cadil nauha thawngsang tola zoutheen na dawng u ai (Deuteronomy 6), tila Pathen lawng a thlangtyk Israel cathli tengah a thui pe. Kri thlaangthli he Israel thai, olive thing dawngah a cawng haih (Rom 11:11-21) la ng'awm u pon. Pathen imkhui kaw khat la ng'awm u. Te dawngah Pathen awl te ongca mami hamla awm tong tong hyn.

Te dawngah, vaan bawilenna on lai bawilenna akung tah vaan dawngah aka awm mami na Pa Pathen ni. Pathen awl angla a kawngaihna angla diklai bawina te a ming bawilen thangtheenna ham ng'hawna tih awmngaih cil n'thui popa atah na cehna lawngpui manthui tare ai. Vaan dawngah rou na tung la khaw awm bal. Tede zoutheen pekung Pathen te ming myhla diklai bawina ro ro te na hing thil atah, ming doon thai la aka awm nawh na hingna a bot cong atah na kaawn on na thaihu khaw boih na ceh taak vetih thlaang lawng ni a pang khong pon ai. Te nawh aw Phungthuikung lawng, Patang palai la bi ka bi khaw ka thii-na, ka dyk cong atah thlaang ham ni ka ceh taak khong ai,' (Ekklesiastes 2:17-18) a ti laawt.

N'thaihu a awmna dungzaan Bawipa on ng'awm haihna hamkoiVaan ben la thinkaw khyh u silang, diklai dawng ng'hing khui ahBawipa ming thangtheenna ham Bawipa kah zoutheen peek heAwmngaih cil thuina, ym cil thuina on hawna u sih. Amen!

----- 000 -----

December 6, 2007 26 Bukit Sedap Road Singapore 279924

SYKHALH-NA TAANA

noreply@blogger.com (ကိုကိုလတ္) — Mon, 03 Dec 2007 13:21:00 +0000

SYKHALH-NA TAANA

Thlanghing tengah aka law nook nawh sykhalhna te nangmi tengah a law monih. Pathen tah a yp awm: ahih lawng na yh lek thai nawh te sykna te na saw ah paisak manawh. Sykhalhna na taawng mai bal cakhaw, sykna huui ah na pai thaina ham ahih lawng lawngpui avan rok ai, (1Korinth 10:13).

Thaihu thee te olh lah, te atah na teng kalawng heng badai. Pathen tengah zooi lah, te atah nang tengah ahih te zooi van ai, (Jakob 4:7,8).

1973 kum hin at atah ka mia lawng awkngal a kah tih avyn hin ah sana thuih hamla ka cet u. Awkngal khaw nauh pon de, sana la a awm dawngah a tengah azooi la ceh hamla a rih awm tangkiik. Awk ngal te a thlaak a thlaak u tih a hu la tah tuiva la put cungpung. Tui dawng a zuun thuk vengah ralvaang ah lou aka phou hutathli lawng tui dawngah aka zuun thuk awk ngal te a huh u. Te vengah Pa Im Teng (thlangthii) lawng lumpawk a pawm tih langdaai kalawng a mah. Awkngal lan la puk a cuuk hang vengah langdaai kalawng Pa Im Teng lawng kyng a kah van de, a yn tlung saw ah pawn a kah tih awk ngal lawng Pa Im Teng te lat a thlaak. Te vengah lou ah aka awm hutathli lawng angaih la paang u tih, "Awi Tyyp napa heng , heng, heng," tila a ngaih thlang la a dook thuk u. Pa Im Teng khaw alola la heng tih lan louha sa la phaat avan heng taak. Louha sa avan pha vengah awkngal lawng a mel taak.

Pa Im Teng tu dawngah awkngal lawng a ngeh thai nawh? Pakhatna ah awkngal tah bongha a ka ca te la awm pon dawngah khalaa tlaih nawh. A pahihna ah Pa Im Teng lawng a heng taak. Pathen cathli sykna kalawng a loihna on a taana tah hetila ni a awm van. Awkngal angla Seitan tah bongha caak tangte la awm pon. Kalvari ah a luu neet la awm pon (Genesis 3:15). Tede bongha caak ruila khaw Pathen cathli metila ka dolhna lah ai, titih sandeih angla kaawk ruila Pathen cathli te a mee tong tong, (1Piter 5:8). Te dawngah na cehna lawngpui te noopcaap langtah na khawleh a cakna ben ah te cet lah; banvoi bantang benla nawng bol, a thee benla na khaw te kaan bol (Tahtuk 4:26,27). Tu ah ti atah thlangdong kah lawngpui lawngtah thaihu thee te a reel (Tahtuk 16:17a). Thlawnna ben thui tlaih myhla thlawn te cathli sykna khui ah a tlaakna nawh hamla, sykhalhna taana hamla Pathen cathli lawng n'sai hamkoi pali aka awm Baibul lawng avan thui he byh u lah sih.

David Sengpahrang lawng, Aphu aka awm nawh thaihu benla ka mik rawi he daisak bol lang; na awl angla ka mik rawi he khom lah, (Saam 119:37) tila Bawipa tengah thangthui. Huhna, zaakna, pokna, ngaihna, mingna lawng hin rook ah thlanghing he a maawt. N'thaihu ngaihna a awmna benla kawpok lawng n'ceh pui. Tekah pokna lawng thlanghing te a taa atah a pokna ben la hing. Te dawngah thlanghing aka taakung thaihu te ahih kah bawi la awm (2Piter 2:19b). Pokna a zahawh atah m'pokna lawng zahawh n'taa van. Thlaang kah a haam ke na byh atah namah khaw puu na haam van nizaw? Awl on thui kaa de, lungbui pokna lawng a thui awl te a vai nawh atah a pokna ben la ni kop kop mel. Hin at ah Nu Helen lawng Samin khaw kah a paai mu im tengah a heh tih mezoh nym a awm congah Samin la kop a voi taak. Kop a law bal veng atah a canu Julia haih avan law pui. Julia te kum li law ca khong. Te vengah thlemvaai veng kah apaai mu a heh te pou tih a paai pateng mym kang tih phyrh tawm ca boih pon. Ym tangkiik ruila a canu Julia a khy tih, 'Tami, byh lah he, kai lawng a paai ka heh te tahe kop paai tawm pon he,' a tina. A canu lawng a byh van tih a ym hih tangkiik. A byh hih cong tih a ceh taak tawm atah, a canu nala, "Tami, a paai he sik bol be," a tina. Te congah cet hih. Tede a manu a ceh cong khongah, a canu Julia te kop mel tih a paai mym te khat khaw thlung tlaih myh la biit a sih. Thleem ben ah a paai te a manu lawng a byh kop bal vengah khat khaw awm tlaih nawh. A u lawng a sih, tila a doot vengah a canu lawng a sih tite a ming. A thinsa tangkiik ruila a canu te a bawh. Avan thui u vengah ka nui ka nui u. Tu dawngah Julia lawng a manu lawng a thui pe lal lal ah apaai biit a sih? Camo la a awm dawngah aw? Oih, tekhaw a sogna awm. Tede te lak ah aka song ngaai tah, apaai pokna, sih hamla ngaihna te atlo thaihu pokna lawng a thaw pe nawh dawngah ni. A manu lawng tekah apaai kawng pokna lak ah camo lawng a ngaih ngaai atlo pokna a kaw khuiah poksak kawinih, metyk ahkhaw apaai te sik nawh my. }} Sykna me kalawng a law ti atah lungbui ngaih pokna dawng kalawng ni a law. Lungbui he thlanghing aka maawtkung la awm tih Seitan lawng huur hamla a ngaih. Tede he he pok lah: "Nangmi he namami ko la na awm u monih, nangmi tah aphu on lai la na awm u pon dawngah na pum on Pathen te thangpawm u lah," (1Korinth 6:19). Pathen ko la na awm pon dawngah athee thaihu me ang pokna lawngkhaw na lungbui a van huur vengah heng taak. Na thinkaw khui ah pokna theen nawh a awm lii veng teah pokna aka theen on thaw tlengtlap praap. Bawipa kah awltak pokna on atlo kawpok theen on na kawpok te thaw lah. Thaihu theen nawh lawng n'taa bol seh, thaihu theen on thaihu theen nawh te taa lah, (Rom 12:21). Jesu te na thinkaw mik on byh lang pok mangkhak lah, (Hebrai 3:1). Bawipa Jesu te pok zozah langtah, (2Timote 2:8), … aka song boih, thangpawm koi boih, aka thym boih, aka ciim boih, lungna aka kap boih, nai hamkoi boih, n'tu khaw aka theen tih koh ham tyyngthli boih – te ang thaihuthli te van pok uh, (Filip 4: 8). Thaihu theen nawh pokna lawng lungbui a caak tih pawcina benla a maawt. Awl hawng on 'rih bol ne,' n'ti vengah, rih na zahawh a awmsak lat. Thlaang saw ah kawlawna nawh kawng pok vengah ihmyh lawhnai la ng'awm tare. Te te Seitan kah sykna lawngpui theen kok pon ni. Kri thlaang Pathen cathli la ng'awm u dawngah, sykhalhna a law vengah Kri saithaina on a bawilenna pok tih thawlhna te taa hamla awm. Te atah thawlh sykna te heng badai. Na heng taak atah na loih ai, sykna te na taa pon! Zou Sep angla sykna te heng taak. (Pa Im Teng khaw a heng dawngah loih).
A pabe sykhalhna taana lawngpui tah Pathen cathli tengah na raina on sykhalh na taawngna te phawng, thui pelah. Pathen cathli he amah byng awm thai nawh. Bawipa lawng Pathen cathli thik at la a khyhna hetah athee atheen minghaih awmngaih haih, kawthee haih hamla ni. Baibul lawng he tila avan thui: Pahih tah pakhat lak ah theen bet,… dawmthlaaikung khyh myhla aka tlim thlaang tah a reen ham awm; Amah byng aka awm tetah thlaang lawng a piaawk mai suide, pahih rawi tah huur ahih thai, rui pathum m'veh atah zy pat nawh, (Ecclessiastes 4:9, 12) ti. Pathen lawng hyn theen kok Eden ah Adam a khyh congah pateng khaw amah byng awm te theen nawh, ti tih Evi a sai pe atah, he diklai thawlh ralrih awmna ram tare atah Pathen cathli ruun u thee tih thaa lawh haih tare hamla awm. Raina, sykhalhna on patangna a law vengah ongcathli te pyn tih rangpui la Bawipa tengah thangthui pui hamla awm. Bawipa lawngah: Raina na taawng hin vengah ng'khy lah; kai lawng kan loihsak vetih, te atah kai te nan thangpawm ai, (Saam 50:15) ti. Khat on khat Bawipa ming ah pawlneeng u tih khat on khat saw ah khawdawp ngaaina on khat on khat hamla thangthui u hamla awm (Jakop 5:16). N'raina, bongha angla pum dawngah n'caak u te thuh khak myhla, thui, phawng tih tuui hamla awm. Bongha thuhkhak tih tuui myhla a awm atah ahu la te bongha lawng raina abou ngaai m'peek thai. Seitan lawng atah na thawlhna, na raina te phawng nawh hamla, zahrau zahdeng la m'poksak ai. Tede awltak Baibul lawng avan thui tah, aka thawlh nawh u ca khat khaw awm nawh (Rom 3:23) tila avan thui tih, thawlh sykna raal aka tuk boih la ni ng'awm u (1Korinth 10:13) ti. Thawlhna, raina, sykhalhna n'taawng vengah Pathen haaiah phawng myhla, ongcathli tengah pyn myhla awmna hetah mah on mah aka song kok la ngaaina u, nawh atah, zahrau thaihu la Seitan lawng poksakna dawngah ni. Pathen haai ah dungvong la ng'awm thai nawh dawngah mah kah ahyp thaihu thawlhna te thui hamla n'rih. Thui myhla a san na khyh atah te lawng ng'ngawn ai. Bawipa awl lawngah, 'Aka ook u te Pathen lawng a olh tih, dungvong la aka awmthli tengah reenna a peek,' (Jakop 4:6) ti. Sykhalhna na taawng vengah ongcathli on bawm u langtah tuk lah. (Pa Im Teng khaw lou kah thlaangthli lawng heng hamla a dook u tih te ni a heng van.)
A pathumna sykhalhna taana lawngpui tah, Raai te na tuk van hamla ni. Raai te na tuk atah na teng kalawng heng ai (Jakop 4:7). Diklai dawng kah ongca Pathen thlaangthli boih he raal aka tuk li la ng'awm u. Laa dawngah, 'Raltukna on kawthee-na, tuiphu angla thou cakhaw; Jesu rang on u lawng nym n'taa tang ai," (Pathen Thangtheenna laa, No. 271) tila n'sak angla seitan raal boih n'tuk u. Metila seitan raal te n'tukna ai? Lamha la ming ham aka awm tah Pathen ca la ng'awm pon dawngah Seitan lawng amah ngaih angla ng'hawna thai nawh, ti he ming hamla awm. Tede, na thinkaw lungbui ahong la a awm atah, sykna te a lawsak. Namah kawngaihna, na imkhui ah raina, na pui na paw on aw, nawh atah na ngona soprep te aty theen la a lawh vetih, 'te tila sai saw, theen ai ta,' tila na kaw khuiah a lawsak ai. Tede Pathen cathli lawng tah Pathen awl on tekah sykhalhna awl te nyhtah hamla awm. Paul lawng Seitan raal tukna phawlip a thui te muk lah. 'Seitan kah kamthlahna te na khoongna u thai hamla Pathen kah phawlip cungkym on thokcau u lah,' ti, (Efesa 6:11). Thlawnna thii lumyk te myk u lang, Pathen Awltak muithla samsen te pawm u lah, (Efe. 6:17) ti. Pathen awl on Seitan kah zookna te daam hamla awm. Metila n'daamna ai? Bawipa Jesu amah lawng dan ham, oot hamkoi avan sai pon (Mathai 4:1-11). He awl he tee delah. Pathen awl on Seitan kah pala alh te daam lah. Pathen awl tah a thaa a raa dawngah (Hebrai 4:12), Seitan lawng a rih. Na kaa ro ro on Pathen awl te pahoi pahoi thui langtah Seitan te ongna phring on dee lah. Heng badai. Heng kheng kheng ai, dee mah dee lah. Namah thaa on Seitan te taa hamla kamthlah bol. Sandeih aka kaawk te namah thaa on taa hamla kamthlah bol. Na taa nawh my, ng'ngeh zozah ai. Lumpawk on na kah ah ni a song ai. Lumpawk tah Pathen Cabu ni. Tede na kaw khuiah Pathen awl caryp na khyh dengah ni (Kolosa 3:16) Seitan te na kah thai hyn bal ai. Matu ram ah lumpawk athai pai pawk pon. Lai van langtah caryp khaw khyh lah. Rap dawngah lumpawk khyh sut tih caryp aka awm nawh angla, Baibul tah awm pon de, na tee nawh, na kaw khuiah na khyh nawh atah seitan raal na taa thai manawh. Pathen awl te kym langtah hawnah. He he Seitan sykhalhna taana lawngpui ni. Pathen Awl caryp on Seitan te kaap lah. A tal lungah na kah phek vetih Goliath angla tlim kyng congah a rawn pateng khaw Pathen awl samsen on na tlok thai ai.
Namah on namah yp u bol lang Bawipa thaa ypna lah. Namah on namah te kai he Bawipa kah ni, tila ming lang, thui popa lah. Na thinkaw boih on Bawipa te ypna lang, namah kah mingna dawngah hangdang u bol. Na ceh na awmna rook amah te ming lah, te atah na lawngpui avan dongsak ai, (Tahtuk 3:5-6) tila Bawipa awl lawng avan thui. Ka ming pon ta a! Ka taa badai, coong badai, tila namah kah pokna mailai dawng hangdang u bol. Bawipa awltak nawh atah mah lungbui he khaw ypna ham awm nawh. Tu ah ti atah thinkaw he zakming thai lek nawh tola thailat aka raa la awm (Jeremiah 17:9) tila Pathen awl lawng avan thui. Te dawngah, ka taa thai badai, ti langtah, thaihu theen nawh saina ah, awl theen nawh thuina ah ngah ngah awm bol, vik ceh taak. Ka yh thai badai, ti bol. Te ang thaihuthli te reel lah. Thlangcuih lawngtah Bawipa te a rih tih thaihu theen nawh te a heng taak; tede thlangngau lawngtah pokna khyh myh la praap praap a muk, (Tahtuk 14:16) tihe ming ham awm.

Hekah sykhalhna raal taana lawngpui pali he hawna lah. Te atah Seitan raal, sylkhalhna na taa thai pon ai.

Dyk tola yp awm la awm lah, hingna bawi lumyk te kan peek ai, (Awlphawng 2:10b).
Bawipa Lawng He Awl aka teethli boih sawah Seitan saw ah taana pe hawn seh.
Amen!

----- 000 -----

(November 29, 2007) 26 Bukit Sedap Road, Singapore 279924

ညဥ့္ငွက္ပန္း

noreply@blogger.com (ကိုကိုလတ္) — Sun, 02 Dec 2007 14:02:00 +0000

တစ္ပြင့္ တစ္လႊာ
တစ္လႊာ တစ္ခတ္
ငုံအစစ္မို႔
ရင့္လို႔ပဲ ၀ါ၀ါ
ညွာတံပဲ ျပဳတ္ျပဳတ္
"ျဖဳတ္" ခနဲပဲ ေႂကြေႂကြ
ဖြဖြကေလး ေကာက္လို႔
ပန္းေျခာက္ကေလးပဲ
ျမတ္ႏိုးမယ္။ ။

KRI ANGLA SAI LA NG'AWM U

noreply@blogger.com (ကိုကိုလတ္) — Mon, 26 Nov 2007 11:57:00 +0000

KRI ANGLA SAI LA NG'AWM U

… amah on voh voh n'lou u tih Muithla la aka awm Bawipa teng kah bawilenna on voh voh m'be u. (2Korinth 3:18b)

Pathen lawng Eden dum ah thlanghing (nang) n'sai vengah Pathen amah kah mui on aka lou la n'sai (Genesis 1:27). Jesu Kri angla, Kri on aka lou u la n'sai. Awlpui tangkiik la n'sai dawngah Pathum Pakhat (trinity) Pathen doot u the, ' mami angla aka awm thlanghing sai u sih' (Genesis 1:26) ti. Ramsa boih on n'lawhna u nawh tah Pathen lawng amah muithla te nghingna dawngah m'peek. Thlanghing he Pathen lawng a sai vengah thaihu pahih on a sai, pum on muithla on a sai. Takbawl a sai tih hingna muithla a peek. Te kalawng thlanghing la coong. Pum he diklai la mel kop vetih a muithla m'peek hetah Pathen amah tengla mel kop ai (Ekklesiastes 12:7) tila awlphawngkung lawng a thui. Pathen lawng thlanghing a sai te seitan lawng a phe vengah, thlanghing kop atheenna hamla vaan celtuihthli a ceel tih tlaihsak kop nawh. Amah ro ro lawng patang a khang tih a soutui thisen la a laawng tola thangthui, thisen a laawngsak tih dykna te dykna van on kop n'tlang. Thawlh phu dykna (Rom 6:23) selkhui thawhka te a phee tih dykna on thawlhna raal te pheng avan taa. Te dawngah Paul lawng thawlh thara saithaina dykna te, Aw dykna, na taana mela a awm? Aw dykna na syy mela a awm? …. Mami Bawipa Jesu Kri rang on taana te mami tengah m'peek pon,' (Rom 15: 55, 57) tila dykna phyl ziin te a dook.

Pathen on aka lou uthli boih tah Pathen cathli la awm u. Pathen casak, thang kop cathli la awm u. Amami lawngkhaw Pathen ca la a awmna te a ming u. Paul lawngah, 'nangmi pum tah Kri amah kah a beekthli ni tite na ming u nawh aw? Te dawngah u khaw Kri on aka tawm u tah muithla ah pum khat la awm hih,' (Korinth 6:15, 17) ti. Tekah mingna tetah Pathen Muithla Ciim lawng a mingsak (1Korinth 2:10-16). Ciim Muithla rang byng on ni thlaang lawng Jesu tah ka Bawipa, ka thlawnkung a ti thai (1Korinth 12:6b). A u khaw Pathen Ciim Muithla aka khyh nawh thlaang tah Pathen thlaang nawh ni, tila Paul lawng avan thui bal. Te dawngah Kri angla awmna hetah Muithla dawngah hingna he ni. Muithla dawngah hingna metila ka mingna ai, na ti thai. Thlaang khatsut lawngtah Muithla baptisma huh hamla awm, nawh atah ming nawh awl cal hamla awm, tila a pok u. Tede ming nawh awl tah kutdou laksawng khat la awm, tih baptisma tihe khaw muithla on hingna heni a thui. Mah pokna on thlaang lawng sai hamkoi thahu nawh ni. Te atah Muithla hingna he metila a tyngna? Laamna on aw? Huhsakna vision mingna aw, nawh atah tawngha awl thuina aw? He angthli boih he Pathen awl on aka roong tih awltak mingna ah aka haam thlaangthli hamla theen tangkiik suide, Pathen awl aka tee vaai nawh, ongna lawngpui aka zakming heet nawh thlaangthli hamla seitan a rawlhna u aka zoi kok lawngpui la awm lat thai. Kawpokrai saithaina sarui he Pathen muithla ben kah boih nawh ni. Tawngha rawlthli lawng thaihu kawpokrai a sai thai u, tite Baibul dawngah ng'huh. Bawipa Jesu lawng lungtou buh la seitan kah awlpeekna rang on sai nawh, (Mathai 4:1-4).

Khaw khat ah ongca khat tah toom tum tih paang ruila, Haleluiah! Amen! thuina ben ah a u lawng pha tlaih nawh. Kamah byng lawng Haleluiah tihe ka thui ai, ti angla a pok. Im atah tlungthang tih a va a ca kah awlthui tula sak nawh. Ciim Muithla na khyh u monih, na ming u monih, kang a tina. A va a cathli lawngkhaw ahih kah thui te tu la sak van nawh. Pathen cathli aka maawtkung, lawngpui aka thy pekung hoithoi Pathen Awl (Saam 119:105) hutuung myhla mah lungbui pokna, hy ngaihna on lawngpui n'ceh vengah lawngpui hang hamla zoi ca. Te vengah seitan lawng azooi cala a maawt thai pon. Lawngpui nyh-kung map a awm nawh atah thlaang lawng lawgpui a hang popa.

Te atah Pathen awl lawng Muithla thlaang, Kri hingna aka khyh kah moibo metila avan thuina? Metila Muithla ah nghingna ai? Galati 5:16-25 awl he tee lah. He awl khuiah Muithla thlaang ni tite ming thaina a tyngna awl tah aziit 22 -23a heni. Tede Muithla thaih tah lungna, awmngaihna, ngaimaawngna, yh thaina, reenna, theenna, yp-awmna, kawdawna on pacyngna he ni. Hekah Muithla thaih pakow hyhe na hingna dawngah a tyng nawh atah, Muithla ah na hing nawh, tite ming hamla awm. Tu ah ti atah Bawipa lawng he tila thui: Ahimi te a thaih ah na nok u badai. U lawngah athliing thing dawng kalawng misur thaih a bit nook tih, thlingdum dawng kalawng thaidut thaih a bit nook? Thing theen dawng kalawng athaih theen thaih tih, thing thee dawng kalawng a thaih thee thaih van. Thing theen dawngah athaih aka thee thaih nawh tih, thing thee dawng kalawng a thaih theen thaih thai van bal nawh (Mathai 7:16-18) ti. A sop bir la thaihu sai thaina ka thui ngaihna nawh, a u khaw thlanghing aka sop awm nawh (Filipi 3:12) tite Baibul lawngkhaw avan thui. Diklai haan ah thawlh seitan raal on n'tuk u popa dawngah sopna hyn m'pha thlan hyn. He muithla thaih pakow hy he thuicaih hamla bro nawh san ai. He ah n'thui thai boih manawh. Tede he hingna he na lungbui ah a awm atah hin rook na hingna dawngah patang khang on khawdeng thlaang la na awm mai cakhaw, aka dyk thai na pum dawng teah Kri kah hingna te tyng ai. Paul lawngah, Te dawngah ka thaa thee u nawh, pumsa atah ka patang u de, ka thinkaw khui atah hin at cong hin at athai la patong patong ka awm u, Metitiah aka zaang ca on kawlkalh patang khangna he ka dang hamkoi dungzaan bawilenna on ka nyhtah vengah tula khaw thuum nawh nawh, (2Korinth 4:16-18) ti. Pumsa ben atah Paul he bro nawh la thlanglen la awm van de, Kri Muithla on a hing cong atah, ..ka hoihkhangna boih boih te Kri dawngah tahe tah ka thlaawng kang pon. Thaihu ka thlaawngthli boih lak ah ka Bawipa Jesu mingna te bou ngaai, ahih dawngah thaihuthli boih boih te ka thlaawng kang. Te angthli te boih baai lani ka pok pon, (Filipi 3:7-8) ti. Te dawngah, Muithla on m'be-na tah a tyngna ham Muithla tharana on Muithla thaih te tyngsak hamla a ngo. Kri thlaang, Kri on aka lou u tah amah hamla hing tlaih nawh tih Kri bawilenna ham ni a hing pon. Kai hamla ka hingna he Kri ni, ka dyk cakhaw hoihkhangna ni (Filipi 1:21). Mah hoihkhangna ham, mah kawngaih khyk a tina ham, thinkhyk kawdeeng la laamna he tlaih nawh tih, pumsa ben ah patang cakhaw Kri hingna te thlaang hoihkhangna hamla mami pum dawngah a tyng atah, te te Kri on lawhna u la awm.

Kri kah a coongna te Paul lawng he tila a phawng:

Ahih tetah a coongna dawngah Pathen la awm de
Pathen on a van la a awmna te phoih hamla pok nawh.
Amah on amah te tula khaw pok u myhla,
Tuihzoih kah paihyn te a huur congah,
Thlanghing angla te va sai u.
Thlanghing khat angla awm van tih, dungvong la a awm congah,
Dyk tola awl a ngaai tih thinglam dawng ah dyk.
Te dawngah Pathen lawng ahih te sawsaang kok ah a khyh tih
Ming boih boih saw ah aka awm ming te a peek.
Jesu kah ming dawngah
Vaan on diklai on diklai dang kah
Tunkhuuk boih lawng cyngkyng tih
Pa Pathen bawilenna ham on
Lai boih lawng Jesu Kri tah Bawi ni tite
A phawngna hamla ni.
( Filipi 2:6-11)

He hingna he na hingna thai hamla Bawipa tengah thangthui langtah tharana lou lah.

Te dawngah nangmi boih lawng aka song nawh thaihu te na dul u tih na teng vaai
kah thlaang tengah awl song te na thui u hamla awm. Mami he pum khat kah a beek la ng'awm u. Na thinsa-na dawngah thawlh bol: na thinsa ruila khaw van leuhsak bol, seitan te a paihyn van pe u bol. Aka hyyn nook lawng hyyn tlaih bol seh, bibi selang a ka votthok thlaangthli te a dawmthlaai thaina ham amah kut ro on amah ham hoihkhangna thaihu te sai seh. Na kaa khui kalawng awlthee thongsak bol, tede thlangtlo kah a ngo-na ham aka hoikhang hamkoi awl te thui lah. Te ah ni aka hutuungthli ham hoihkhangna a awm ai. Pathen kah Ciim Muithla te kaw theesak u bol. Ahih on ni thlawnna hin hamla nangmi he nokna deng thil la na awm u. Thii-na, thinbon thinsa-na, tengna, awlthee thuina on thlaang saw ah me ang athee pokna khaw tong u loih. Khat on khat saw ah reenna van khyh u lang Kri dawngah Pathen lawng nangmi khawdawp ng'ngaai u angla nangmi khat on khat khawdawp ngaai u lah.
(Efesa 4:25-32)

Kri angla hing ham on Kri khuiah Muithla rang on na hingna hamla diklai sing nupa phung te hoot langtah (Rom 12:2) Kri dawngah a thai la saipan la na awmna ham (2Korinth 5:17) Pathen Ciim Muithla lawng ng'awm pui hawn seh. Amen!

----- 000 -----

November 25, 2007, Singapore