मिथिमीडिया

मिथिला मे दुर्गापूजा (दशमी) : माता केर 9 दिव्य स्वरूपक पूजन ओ परम्परा

2026-10-11T22:30:48.479+05:30

मिथिला मे दुर्गापूजा (Durga Puja in Mithila) देवीपूजन केर पावनि कें दशमी रूप मे मनाओल जाइत अछि। एहि मे माँ शक्ति केर नौ स्वरूपक आराधना होइत अछि आ दशम दिन जतरा मनाओल जाइत अछि। एहि तरहें दस दिनक ई पावनि दशमी कहबैत अछि। मान्यता अछि जे माता कैलाश सँ मिथिला अपन नैहर अबैत छथि। माता केर आगमन पर जनजागरण लेल मिथिला मे डिगडिगिया (हमर फसिल लऽधबऽध) देल जाइत अछि। कृषक लोकनि एकरा नीक फसिल होएबाक कामना सँ जोड़ि कऽ देखैत छथि।

दशमी केर पहिल दिन प्रतिपदा कें पारम्परिक दशमी कलश बैसाओल जाइत अछि, कलशस्थापन कएल जाइत अछि। ई कलश जयन्ती (जओ केर बीज) सहित बैसाओल जाइत अछि, तैं एकरा जयन्ती कलश सेहो कहल जाइत अछि। एकर बाद माता केर दसदिनक पूजा शुरू होइत अछि। दशमी केर नओ दिन माता केर नओ स्वरूप केर पूजन होइत अछि आ दशम दिन जतरा ओ भसान होइत अछि। एहि ठाम देवी माता केर 9 दिव्य स्वरूपक सामान्य जनतब देल गेल अछि।

प्रथम देवी शैलपुत्री: माता केर पहिल स्वरूप

वन्दे वाञ्छितलाभाय चन्द्रार्धकृतशेखराम्।

वृषारूढां शूलधरां शैलपुत्रीं यशस्विनीम्॥

देवी शैलपुत्री केर अवतरण पर्वतराज हिमालय केर पुत्री रूप मे भेल छलनि। ओ वृषभ पर विराजमान छथि, हुनक मुखमण्डल पर आधचान सुशोभित छनि। माता हाथ मे त्रिशूल व कमल धारण कएने छथि। भगवती अपनेक समस्त मनोकामना पूर्ण करथि।

द्वितीय देवी ब्रह्मचारिणीः माता केर दोसर स्वरूप

दधाना करपद्माभ्यामक्षमालाकमण्डलु।

देवी प्रसीदतु मयि ब्रह्मचारिण्यनुत्तमा॥

देवी ब्रह्माचारिणी तप लेल जानल जाइत छथि। भगवान शिव कें पति रूप मे प्राप्त करबाक लेल कठोर तपस्या केलनि। माता श्वेत वस्त्र धारण केने छथि, हाथ मे कमंडल एवं जप केर माला छनि। आदिशक्ति माँ दुर्गा एहि ज्योतिर्मय स्वरूप मे संयम एवं सदाचार कें प्रतिबिम्बित करैत छथि।

तृतीय देवी चन्द्रघंटाः माता केर तेसर स्वरूप

पिण्डजप्रवरारूढ़ा चण्डकोपास्त्रकैर्युता।

प्रसादं तनुते मह्यं चन्द्रघण्टेति विश्रुता॥

देवी चंद्रघंटा केर मुखमंडल पर आधचान छनि। माता कें दसटा हाथ छनि आ ओ सिंह पर सवार छथि। माता केर ई स्वरूप सदा युद्ध लेल त्तपर रहैत अछि। तेसरे दिन, देवी चंद्रघंटा केर आराधना सँ शत्रु दमन होइत अछि। भक्त माता सँ निर्भयता, शान्ति आ समभाव प्राप्ति केर कामना करैत छथि।

चतुर्थ देवी कूष्माण्डाः माता केर चारिम स्वरूप

सुरासम्पूर्णकलशं रुधिराप्लुतमेव च।

दधाना हस्तपद्माभ्यां कूष्माण्डा शुभदास्तु मे॥

अष्टभुजा देवी कूष्माण्डा आदिशक्ति केर स्वरूप छथि। ओ सृष्टि केर रचयिता छथि जे अन्हार सँ इजोत दिस जएबाक आशीष देइत छथि। माँ दुर्गा केर एहि स्वरूप मे एक हाथ मे अमृत कलश छनि, ओतहि दोसर हाथ मे रक्त सँ भरल घैत छनि। माता केर एहि स्वरूपक पूजन सँ भक्त लोकनि कें शोक आ रोग सँ मुक्ति भेटैत छनि। संगहि सृष्टि मे निहित परमब्रह्म धरिक दुर्लभ ज्ञान कें जाग्रत करबाक इजोत भेटैत छनि।

पाँचम देवी स्कन्दमाता : माता केर पाँचम स्वरूप

सिंहासनगता नित्यं पद्माश्रितकरद्वया।

शुभदास्तु सदा देवी स्कन्दमाता यशस्विनी॥

जगतजननी देवी अपन एहि स्वरूप मे जगत सेनानायक भगवान स्कंद (कुमार कार्तिकेय) केर माता छथि। देवी अपन पंचम स्वरूप मे ममता आ वात्सल्य केर प्रतिमूर्ति छथि। देवी स्कंदमाता केर दू हाथ मे कमल केर फूल छनि, एक हाथ मे वर मुद्रा आ एक हाथ सँ ममतामयी जगदम्बा अपन पुत्र कें कोरा मे धेने छथि। माँ दुर्गा एहि रूप मे भक्त पर अपन स्नेह केर बरखा करैत छथि।

छठम देवी कात्यायनी : माता केर छठम स्वरूप

चन्द्रहासोज्ज्वलकरा शार्दूलवरवाहना।

कात्यायनी शुभं दद्यादेवी दानवघातिनी॥

महिषासुर केर संहार करबाक हेतु जखन देवी पृथ्वी पर अवतरण लेलनि, त हुनक प्रथम पूजन केर सौभाग्य महर्षि कात्यायन कें प्राप्त भेलनि। फलस्वरूप माँ दुर्गा केर ई रूप कात्यायनी नाम सँ विख्यात भेल। सिंह पर आरूढ़, चारि भुजाधारी, उज्ज्वल माँ कात्यायनी केर एक हाथ मे चन्द्रहास तलवार छनि, एक हाथ मेकमल सुशोभित छनि, एक हाथ वर मुद्रा मे छनि एवं एक हाथ अभय मुद्रा मे छनि। देवी माँ अपन भक्त कें मनोवांछित पुरुषार्थ (धर्म, अर्थ, काम, मोक्ष) प्राप्त करबाक शक्ति प्रदान करैत छथि।

सातम देवी कालरात्रि : माता केर सातम स्वरूप

एकवेणी जपाकर्णपूरा नग्ना खरास्थिता।

लम्बोष्ठी कर्णिकाकर्णी तैलाभ्यक्तशरीरिणी||

वामपादोल्लसल्लोहलताकण्टकभूषणा।

वर्धनमूर्धध्वजा कृष्णा कालरात्रिर्भयङ्करी।।

माँ कालरात्रि केर रंग रातिक घनगर अन्हार जकाँ अछि एवं हुनक तीनटा गोल-गोल नयन छनि। गदर्भ पर सवार, चतुर्भुज माँ दुर्गा केर ई भयंकर विभूति शुभङ्करी कहबैत छथि कारण माता अपन भक्त कें सदा शुभ फल प्रदान करैत छथि। माँ कालरात्रि केर उपासना नवरात्रिक सातम दिन, दुष्ट एवं भय सँ मुक्ति प्राप्त करबाक हेतु कएल जाइत अछि।

आठम देवी महागौरी : माता केर आठम स्वरूप

श्वेते वृषे समारूढा श्वेताम्बरधरा शुचिः।

महागौरी शुभं दद्यान्महादेवप्रमोददा॥

गौर वर्ण केर, गौर वस्त्र धारण कएने, बिजली समान श्वेत कान्ति सँ दीप्यमान, पवित्रता केर प्रतिमूर्ति, देवी महागौरी वृषभ पर आरूढ़ छथि। माँ दुर्गा केर ई अनुपम स्वरूप छनि जिनक एक हाथ मे त्रिशूल छनि, दोसर हाथ मे डमरू छनि। भक्त लोकनि माता महागौरी कें एकनिष्ठ भाव सँ आराधना करैत लोक एवं शांति सुख केर कामना करैत छथि।

नवम देवी सिद्धिदात्री : माता केर नवम स्वरूप

सिद्धगन्धर्वैक्षाद्यैसुरैरमरैरपि।

सेव्यमाना सदा भूयात् सिद्धिदा सिद्धिदायिनी॥

कमल पर विराजित, चारि हाथ सँ माता अष्ट-सिद्धिदायी छथि। माँ सिद्धिदात्री केर पूजा सँ सभ देव, दानव, मनुष्य, यक्ष, गंधर्व, आदि उपकृत होइत छथि। आदिशक्ति केर परम अनुकम्पा सँ भगवान शिव समस्त सिद्धि प्राप्त करैत छथि आ अर्धनारीश्वर बनैत छथि। सिद्धिदात्री माता एहि भवसागर सँ भक्त कें पार करैत छथि, मुक्ति केर मार्ग प्रशस्त करैत छथि।

दशम दिन जतरा ः माता केर विदाइ

सर्वमंगल मांगल्ये शिवे सर्वार्थ साधिके।

शरण्ये त्र्यम्बके गौरि नारायणि नमोऽस्तु ते॥

परम मंगलमयी, शिव (कल्याणकारी) स्वरूपा, भगवान शिव केर पत्नी पार्वती, सब तरहक लक्ष्य, मनोकामना आ पुरुषार्थ (धर्म, अर्थ, काम, मोक्ष) कें सिद्ध व पूर्ण केनिहार माता, शरणागत केर रक्षा केनिहार वा शरण देनिहार, तीन नेत्र वाली (भूत, वर्तमान आ भविष्यक ज्ञाता) गौर वर्ण वाली माता पार्वती, हे नारायणी (नारायण केर शक्ति), अहाँ कें नमन अछि।

दशमी (Dashami) तिथि कें मिथिला मे जतरा पावनि रूप मे मानओल जाइत अछि। मान्यता अछि जे गौरी मिथिला केर बेटी छथि आ दशमी पावनि मे कलशस्थापन दिन नैहर आएल रहैत छथि। दशमी तिथि कें पुनः कैलाश दिस विदा होइत छथि। माता केर पुनः कैलाश आगमन केर समाद नीलकंठ पक्षी उत्तर दिस जा महादेव कें कहैत छथि। एहि दिन नीलकंठ पक्षी कें उड़ैत देखब (नीलकंठ दर्शन) शुभ मानल जाइत अछि। कृषक लोकनि नीलकंठ देखैत ई आश्वस्त होइत छथि जे आगामी नीक फसिल होएत। नीलकंठ पक्षी खेत-पथार कें कीट-फतिंगा सँ मुक्त करैत अछि जे फसिल लेल उपकारी होइत अछि।

मानल जाइत अछि जे दशमी दिन सब द्वार खुजल रहैत अछि, आ एहि दिन जतरा कें शुभ मानल गेल अछि। कलशस्थापन दिन लगाओल जयन्ती (जओ केर पौध) एहि दिन काटल जाइत अछि आ लोक ओकरा माथ पर धारण करैत अछि। बहुत लोक जयन्ती टीक मे बान्हि लैत छथि। एहि दिन माता कें विदा करैत भसान ओ विसर्जन कएल जाइत अछि। प्रसाद मे चूड़ादही ओ मधुर रहैत अछि जे मिथिला मे जतरा पहर ग्रहण कएल जाइत अछि। चूड़ादही ग्रहण कएला उपरांत यात्रा करब शुभ-सफल मानल जाइत अछि।

जानकारी हो जे बंगाल मे शुभ विजया कहैत माता कें विदा कएल जाइत अछि। अहिबाती महिला लोकनि आपस मे सिंदूरखेला करैत एकदोसर कें सिंदूर लगबैत छथि जे सोहागभाग केर परिचायक अछि। मिथिला मे सेहो बेटी विदाइ काल खोइछ भरब आ सिंदूर उपहार देब परंपरा मे सम्मिलित अछि। एहि तरह सँ दस दिनक ई उत्सव समापन होइत अछि।

दिनकर जयन्ती : लोक भवन मे मिथिलाक लोक

2026-10-04T13:38:05.300+05:30

संगप्रसंग : लोकभवन मे मिथिलाक लोक - रश्मिरथी रामधारी सिंह दिनकर केर दीप्ति आद्यावधि पसरल अछि। कालजयी कृति रचनाकार कें सेहो कालजयी बना देइत छै। कोनो रचनाकार अपन देशकाल अनुरूप रचना करैत अछि। मुदा समय केर संग किछु रचना जनप्रियता संगहि अपन सार्थकता सिद्ध करैत आगां बढ़ैत अछि। कोलकाता स्थित राज भवन जे कि आब लोक भवन कहबैत अछि, मे मिथिलाक सपूत दिनकर केर जयंती कार्यक्रम अवसर पर जेबाक सुयोग भेल। कार्यदिवस रहितो माननीय राज्यपाल श्री आरएन रवि महाशय केर हकार पर कार्यक्रम मे उपस्थित भेल छलहुँ।

आयोजनक पहिल सत्र मे माननीय राज्यपाल महोदय सहित विषय विशेषज्ञ लोकनि अपन विचार आदि प्रकट केलनि। दोसर सत्र मे रश्मिरथी केर मंचन राखल गेल छल। बैकड्रॉप मे डिजिटल डिस्प्ले चलि रहल छल कि कलाकार दल मंच पर दृष्टिगत भेल। महाभारत केर पात्र लोकनि सुसज्जित भेल ठाढ़ छलाह। महारथी कर्ण कें दुर्योधन सम्मानित करैत राजमुकुट पहिरा रहल छलाह। महारथी कर्ण पहिल दृश्य सँ दर्शकक आँखि केर प्रिय पात्र बनि जाइत छथि। कर्ण केर आवाज कान मे पड़ल तऽ सहजें मैथिली सिनेमा केर लोकप्रिय अभिनेता संजीव पूनम मिश्र मोन पड़लाह। हम अपन संगी साहित्यिक श्री विजय इस्सर जी कें कहलियनि जे ई संजीव छथि से आवाज सँ बुझना जा रहल अछि। पछाति दोसर-तेसर दृश्य सँ संजीवे छथि से निजगुत भऽ सकल छलहुँ।

जेना-जेना कथा मंचित होइत अछि, कलाकार लोकनि दर्शकक हृदयतल धरि पहुँचि जाइत छथि। एक नाटक प्रेमी रूप मे अभिनयकला केर एहन प्रदर्शन एहि सँ पहिने हम देखि सकितहुँ से संभव नहि भेल छल। नाटक अपन नव कलेवर नव कला दिस डेग बढ़ा चुकल अछि। मंच-माइक-परदा आदि केर कोनो प्रयोजन नै, पहिने भेल जे डायलॉग रिकार्ड कएल अछि, तेहन परफेक्ट, तेहन टनगर से गौर कएल जे सब कलाकार केर संग मे सुक्ष्म माइक-यंत्र लागल छनि। फेर एक आम दर्शक जकाँ अचंभित छलहुँ जे कलाकार लोकनि रश्मिरथी केर नमहर-नमहर पद स्मरण कोना रखने छथि। ई सब अनुभव हमरे नहि, बेसी भाग दर्शकक रहलनि। एहन प्रदर्शन आ अभिनय निश्चित सिनेमा-टीवी कें टक्कर देइत बुझना गेल।

मिथिलाक सपूत दिनकर केर रश्मिरथी केर नाट्य मंचन मे मिथिलाक नामी कलाकार संजीव पूनम मिश्र कें देखैत गौरवबोध भऽ रहल छल। संजीव जाहि उर्जा आ कला संग मंच पर अपन प्रतिभा साबित कऽ रहल छलाह से सबकें मोहित केने छल। एहना खूब कम होइत अछि जे हम दर्शक रूप मे उपस्थित छी आ मंच दिस जाइत छी। मुदा ओहि दिन हम अपना कें नहि रोकि सकल छलहुँ आ संजीव जी सँ ने मात्र भेट केलहुँ, एकटा सेल्फी सेहो लेलहुँ। हमरा लेल एकटा फैन जकाँ ई विशेष अवसर रहल।

किछु वर्ष पूर्व मधुबनी फिल्म फेस्टिवल मे संजीव जी भेटल छलाह। अपन लगातार काज सँ पर्दा पर भेटिते रहैत छथि। ओना हम हिनक काज कें सौभाग्य मिथिला टीवी केर समय सँ देखैत आबि रहल छी। जाहि लगन सँ कला कें लगातार निखारि रहल छथि से प्रशंसनीय मात्र नै अपितु अदम्य साहसक बात अछि। साहित्यिक श्रीमती हिमाद्री मिश्र जी कें आभार जे एहि कार्यक्रम सँ हमरा जोड़लनि। लोक भवन मे एहन विशेष आयोजन लेल माननीय राज्यपाल महोदय कें हृदय सँ धन्यवाद।

— रूपेश त्योंथ

- - - - -

रूपेश त्योंथ सुपरिचित कवि, स्तम्भकार ओ सम्पादक छथि। सम्प्रति कलकत्ता मे रहैत आइटी प्रोफेशनल रूप मे कार्यरत छथि आ स्वतंत्र लेखन क्षेत्र मे सेहो लगातार सक्रिय छथि। मैथिलीक प्रतिष्ठित ऑनलाइन पत्रिका मिथिमीडिया केर सम्पादन व संचालन करैत छथि। रूपेश मैथिली भाषा मे नवकृष्ण ऐहिक नाम सँ व्यंग्य लिखैत आबि रहल छथि। हिनका लेखन हेतु साहित्य अकादेमी युवा पुरस्कार सहित कतेको सम्मान प्राप्त छनि। रूपेश अनेक राष्ट्रीय ओ अंतर्राष्ट्रीय साहित्यिक आयोजन सब मे मैथिलीक प्रतिनिधित्व कऽ चुकल छथि।

चौरचन : चन्द्रपूजाक मंत्र सहित सम्पूर्ण विधि-विधान ओ लोक-परम्परा

2026-09-14T12:56:03.760+05:30

मिथिलाक लोकजीवन मे चौरचन पर्वक विशेष महत्व अछि। भाद्रपद मासक शुक्ल पक्षक चतुर्थी तिथि कें मनाओल जाएवला ई पर्व चन्द्रमाक पूजा आ पारिवारिक सुख-समृद्धि सँ जुड़ल अछि। मिथिलामे एकरा चौरचन, चौठ चन्द्र अथवा चौठचन्द्र नाम सँ सेहो जानल जाइत अछि।

चौरचनक दिन व्रती महिला दिनभरि उपवास करैत छथि आ साँझमे विधिपूर्वक पूजा करैत छथि। एहि दिन चन्द्रमाक दर्शन कऽ हुनका अर्घ्य देल जाइत अछि। पूजा लेल विभिन्न प्रकारक पकवान, फल, मिठाइ आ विशेष रूप सँ हाथ सँ बनाओल गेल प्रसादक उपयोग होइत अछि। मिथिलाक अनेक घरमे एहि अवसर पर पकवान बनाबय आ पूजा करबाक विशेष परंपरा अछि।

चौरचन पर्वक एकटा महत्वपूर्ण पक्ष अछि—परिवारक मंगल आ संतानक सुख-समृद्धिक कामना। महिलासभ श्रद्धापूर्वक व्रत रखि परिवारक कल्याण लेल प्रार्थना करैत छथि। एहि अवसर पर परिवारक सदस्यसभ एकत्रित होइत छथि आ उत्सवक वातावरण बनैत अछि।

चौरचन केवल धार्मिक पर्व नहि, बल्कि मिथिलाक लोकसंस्कृति, पारिवारिक परंपरा आ सामाजिक एकताक प्रतीक सेहो अछि। बदलैत समयक बीचो मिथिलावासी अपन एहि पारंपरिक पर्व केँ श्रद्धा आ उत्साहपूर्वक मनबैत छथि। चौरचन मिथिलाक सांस्कृतिक पहचानक एक महत्वपूर्ण हिस्सा अछि।

भाद्र शुक्ल चतुर्थी तिथि कें व्रत-उपवास कऽ सन्ध्याकाल स्त्री वा पुरुष स्नान कऽ आसन पर बैसि पूजाक सब सामग्री अरिपन अनुसार दही, डाली, मररक खीरपूरी, दीप संग कलश स्थापन कऽ पूजा पर बैसथि।

पवित्र होएबाक मंत्र

नम:! अपवित्रः पवित्रो वा सर्वावस्थां गतोऽपि वा।

यः स्मरेत्पुण्डरीकाक्षं स बाह्याभ्यन्तरः शुचिः॥

नमः! पुण्डरीकाक्ष: पुनातु।

तेकुशा, तिल एवं जल लऽ संकल्प

नमोऽस्यां रात्रौ भाद्रे मासि शुक्ले पक्षे चतुर्थ्यां तिथौ अमुकगोत्रायाः मम (नाम उच्चारण - अमुकीदेव्याः / अमुकशर्मणः) सकल कल्याणोत्पत्तिपूर्वक धनधान्य समृद्धि सकलमनोरथ सिद्ध्यर्थं यथाशक्ति गन्धपुष्प धूपदीप ताम्बूल यज्ञोपवीत वस्त्र, नानाविध नैवेद्यादिभिः रोहिणीसहित भाद्रशुक्लचतुर्थी चन्द्रपूजन महं करिष्ये।।

(एहि ठाम महिला द्वारा कएल गेल पूजाक मंत्र देल अछि। यज्ञोपवीतधारी ‘नमो’ केर स्थान पर ॐ केर उच्चारण करथि।)

पञ्चदेवताक पूजा

अक्षत - नमो गणपत्यादिपञ्चदेवताः इहागच्छत इह तिष्ठत।

अर्घ्य– एतानि पाद्यादीनि एषोsर्घ्यः नमो गणपत्यादिपञ्चदेवताभ्यो नमः।

चानन– इदमनुलेपनम् नमो गणपत्यादिपञ्चदेवताभ्यो नमः।

अक्षत- इदमक्षतम् नमो गणपत्यादिपञ्चदेवताभ्यो नमः।

फूल– इदं पुष्पम् नमो गणपत्यादिपञ्चदेवताभ्यो नमः।

बेलपात- इदं बिल्वपत्रम् नमो गणपत्यादिपञ्चदेवताभ्यो नमः।

दूबि- इदं दूर्वादलम् नमो गणपत्यादिपञ्चदेवताभ्यो नमः।

जल लए धूप, दीप, नैवेद्य, पान सुपारीक उत्सर्ग करी-

एतानि गन्ध-पुष्प-धूप-दीप-ताम्बूल-यथाभाग-नानाविधनैवेद्यानि नमो गणपत्यादिपञ्चदेवताभ्यो नमः।

अरघीमे जल लए आचमन-

इदमाचनीयं नमो गणपत्यादिपञ्चदेवताभ्यो नमः।।

विष्णुक पूजा

एकर बाद विधवा स्त्री अथवा पुरुष विष्णुक पूजा करथि।

तिल लए- नमो भगवन् श्रीविष्णो इहागच्छ इह तिष्ठ एना आवाहन कए

जल लए- एतानि पाद्यादीनि एषोऽर्घ्यः नमो भगवते श्रीविष्णवे नमः।

एहि तरहें पञ्चोपचारसँ पूजा करथि।

गौरीक पूजा

सधवा स्त्री विष्णुक स्थान मे गौरीक पूजा करथि।

अक्षत लए- नमो गौरि इहागच्छ इह तिष्ठ (आवाहन कए)

अर्घ्य- एतानि पाद्यादीनि नमो गौर्यै नमः।

चानन- इदमनुलेपनम् नमो गौर्यै नमः।

सिन्दूर- इदं सिन्दूरम् नमो गौर्यै नमः।

अक्षत- इदमक्षतम् नमो गौर्यै नमः।

लाल फूल- इदं पुष्पं नमो गौर्यै नमः।

दूबि- इदं दूर्वादलं नमो गौर्यै नमः।

बेलपात- इदं बिल्वपत्रं नमो गौर्यै नमः।

अरघीमे जल लए धूप, दीप, नैवेद्य, पान-सुपारीक उत्सर्ग करी-

एतानि गन्ध-पुष्प-धूप-दीप-ताम्बूल-यथाभाग-नानाविधनैवेद्यानि नमो गौर्यै नमः।

अरघी मे जल लए- इदमाचमनीयम् नमो गौर्यै नमः।

चतुर्थीचन्द्रक पूजा

एकर बाद अक्षत लए- नमो रोहिणीसहित-भाद्रशुक्ल-चतुर्थीचन्द्र इहागच्छ इह तिष्ठ। एना आवाहन कए

उज्जर फूल लए चन्द्रमाक ध्यान करी-

श्वेताम्बरं स्वच्छतनुं सुधांशुं चतुर्भुजं हेमविभूषणाढ्यम्।

वरं सुधां दिव्यकमण्डलुञ्च करैरभीतिञ्च दधानमीडे।।

एष पुष्पाञ्जलिः नमो रोहिणीसहित-भाद्रशुक्ल-चतुर्थीचन्द्राय नमः।

एकर बाद अरघीमे जल, चानन आ फूल लए-

सोमाय सोमेश्वराय सोमपतये सोमसम्भवाय गोविन्दाय नमो नमः।।

एतानि पाद्यादीनि एषोऽर्घ्यः नमो रोहिणीसहित-भाद्रशुक्ल-चतुर्थीचन्द्राय नमः।

उजरा चानन लए-

मलयाद्रिसमुद्भूतं श्रीखण्डं त्रिदशप्रियम्।

सर्वपापहरं सौख्यं चन्दनं मे प्रगृह्यताम्।।

इदमनुलेपनं नमो रोहिणीसहितभाद्रशुक्लचतुर्थीचन्द्राय नमः।

अक्षत– इदमक्षतं नमो रोहिणीसहितभाद्रशुक्लचतुर्थीचन्द्राय नमः।

उजरा फूल-

त्रैलोक्यमोदकं पुण्यं शुक्लपुष्पं मनोहरम्।

दिव्यौषधिक्षपानाथ गृह्यतां च प्रसीद मे।।

एतानि पुष्पाणि नमो रोहिणीसहितभाद्रशुक्लचतुर्थीचन्द्राय नमः।

बेलपात- इदं बिल्वपत्रम् नमो रोहिणीसहितभाद्रशुक्लचतुर्थीचन्द्राय नमः।

दूबि- इदं दूर्वादलम् नमो रोहिणीसहितभाद्रशुक्लचतुर्थीचन्द्राय नमः।

जनेउ- सुसंस्कृतं चतुर्वेदैर्द्विजानां भूषणं वरम्।

यज्ञोपवीतं देवेश कृपया मे प्रगृह्यताम्।।

इमे यज्ञोपवीते बृहस्पतिदैवते नमो रोहिणीसहितभाद्रशुक्लचतुर्थीचन्द्राय नमः।

वस्त्र- तन्तुसन्तानसम्भूतं कलाकोशलकल्पितम्।

सर्वाङ्गभूषणं श्रेष्ठं वसनं परिधीयताम्।।

इदं वस्त्रं बृहस्पतिदैवतं नमो रोहिणीसहितभाद्रशुक्लचतुर्थीचन्द्राय नमः।

अरघीमे जल लए धूप, दीप, डाली, दहीक उत्सर्ग करी-

नैवेद्यं गृह्यतां देव भक्ति मे ह्यचलां कुरु।

ईप्सितं मे वरं देहि परत्र च पराङ्गतिम्।।

एतानि गन्ध-पुष्प-धूप-दीप-सदधि-पक्वापक्वान्नादि-नानाविधनैवेद्यानि नमो रोहिणीसहित-भाद्रशुक्ल-चतुर्थीचन्द्राय नमः।

पान-सुपारी-

पूगीफलं महद्दिव्यं नागवल्लीदलैर्युतम्।

कर्पूरादिसमायुक्तं ताम्बूलं प्रतिगृह्यताम्।।

एतानि ताम्बूलानि नमो रोहिणीसहित-भाद्रशुक्ल-चतुर्थीचन्द्राय नमः।

धूप-

गन्धभारवहं दिव्यं नानावस्तुसमन्वितम्।

सुरासुरनरानन्दं धूपं देव गृहाण मे।।

एष धूपः नमो रोहिणीसहितभाद्रशुक्लचतुर्थीचन्द्राय नमः।

कलश पर राखल दीप उत्सर्ग करी

मार्तण्डमण्डलाखण्डचन्द्रबिम्बाग्निदीप्तिमान्।

विधात्रा देवदीपोऽयं निर्मितस्तेऽस्तु भक्तितः।।

एष कलशदीपः नमो रोहिणीसहित-भाद्रशुक्ल-चतुर्थीचन्द्राय नमः।

शंखमे दूध, उजरा फूल आ चानन लए-

अत्रिनेत्रसमुद्भूत क्षीरोदार्णवसम्भव।

गृहाणार्घ्यं मया दत्तं रोहिण्या सहितप्रभो।।

इदं दुग्धार्घ्यम् नमो रोहिणीसहित-भाद्रशुक्ल-चतुर्थीचन्द्राय नमः।

एकर बाद बेरा-बेरी डाली आ दहीक छाँछी हाथमे लए-

दर्शन-मन्त्र-

सिंहः प्रसेनमवधीत् सिंहो जाम्बवता हतः।

सुकुमारक मा रोदीः तव ह्येष स्यमन्तकः।।

प्रणाम-मन्त्र-

नमः शुभ्रांशवे तुभ्यं द्विजराजाय ते नमः।

रोहिणीपतये तुभ्यं लक्ष्मीभ्रात्रे नमोऽस्तु ते।।

प्रार्थना-मन्त्र-

मृगाङ्करोहिणीनाथ शम्भोः शिरसि भूषण।

व्रतं सम्पूर्णतां यातु सौभाग्यं च प्रयच्छ मे।।

रूपन्देहि यशो देहि भाग्यं भगवन् देहि मे।

पुत्रान्देहि धनन्देहि सर्वान् कामान् प्रदेहि मे।।

विसर्जन

चन्द्रमाक– नमो रोहिणीसहित भाद्रशुक्लचतुर्थीचन्द्र पूजिसोऽसि प्रसीद क्षमस्व स्वस्थानं गच्छ।

गौरीक- नमो गौरि पूजितासि प्रसीद क्षमस्व।

पञ्चदेवताक- नमो गणपत्यादिपञ्चदेवताः पूजिताः स्थ क्षमध्वं स्वस्थानं गच्छत।

दक्षिणा

दक्षिणाक रुपया कें भूमि पर राखि जल सँ सिक्त कए तेकुशा, तिल एवं जल लए

नमोsस्यां रात्रौ कृतैतद् रोहिणीसहितचतुर्थीचन्द्रपूजनकर्मप्रतिष्ठार्थं एतावद् द्रव्यमूल्यहिरण्यम् अग्निदैवतं यथानामगोत्राय ब्राह्मणाय दक्षिणाम् अहं ददे।

पूजा सम्पन्न भएलाक बाद घरक आन सदस्य एक एक टा फल हाथमे लए चन्द्रमाक दर्शन करैत काल निम्नलिखित मन्त्र पढथि। यद्यपि एहि सन्ध्यामे चन्द्रमाक उदय पश्चिम-दक्षिण कोणमे होइत अछि, आ धात्रेयिकावाक्य उत्तरमुख अथवा पूर्व मुहें ठाढ भए पढबाक थीक, तें चन्द्रमाक दर्शन कए उत्तराभिमुख भए ई दूनू मन्त्र पढि पुनः चन्द्रमाक दर्शन करबाक परम्परा देखैत छी।

हाथ में फल लए चन्द्रमाक स्तुति-

सिंहः प्रसेनमवधीत् सिंहो जाम्बवता हतः।

सुकुमारक मा रोदीः तव ह्येष स्यमन्तकः।।

दधिशंखतुषाराभं क्षीरोदार्णवसम्भवम्।

नमामि शशिनं भक्त्या शम्भोर्मुकुटभूषणम्।

अत्रिनेत्रसमुद्भूतं क्षीरोदार्णवसम्भवम्।

नमामि शशिनं भक्त्या शम्भोर्कुटभूषणम्।।

डाली उठएबाक मन्त्र। अन्य सभ व्यक्ति एही मन्त्रसँ चन्द्रमाक दर्शन करी।

क्षमायाचना-- सपरिवार कलजोरी- हे चतुर्थी चंद्र हम त आहां के बच्चा छी यथासाध्य नैवेद्य फुल पान लय आहांक पुजा कयल कोनो त्रुटि लेल क्षमा करब।

तदुपरांत मड़ड उत्सर्ग कय भांगि आ प्रसाद वितरण करी।

पंडित भेट जाईथ त सर्वोत्तम नै त पिता/पती/पुत्र/भाई/कुटंब/संवंधी से उपरोक्त विधि से पुजन करी

लक्ष्मीनाथ गोसाँइ एकटा बहुभाषी बहुलार्थी कवि

2026-09-05T22:01:17.185+05:30

लक्ष्मीनाथ गोसाँइ एकटा साधक, संत रूप मे विख्यात भेलाह। ताहि रूपें बाबाजी लक्ष्मीनाथ मिथिलाक गाम-गाम मे सर्वमान्य छथि। ई सर्वमान्यता हुनक कवि स्वरूप कें कनेक बिसरा देल गेल। इहो सत्य जे हुनक बनाओल भजन आइयो मिथिलाक गामेगाम खूब प्रचलित छै। विद्यापतिक बाद साइते कोनो कवि कें ई सौभाग्य भेटल जे ओ सभटा संस्कार मे अपन कविताक मादे उपस्थित होथि। तथापि हिनक कविताक आलोचनात्मक पक्ष पर, कविताक स्वभाविक मूल्यांकन सभ पर लोक सबहक ध्यान एखनो नहि गेल अछि।

कवि लक्ष्मीनाथ जे कतेको भजन मे, गीत मे एकटा प्रगतिशील मानुस विवेक ठाढ़ करबाक गप्प करैत छथि, ताहि पर कोनो काज नहि कऽ हमरा लोकनि हुनकर भजन केर कीर्तन मे लीन रहलहुँ। ओना ई भजन-कीर्तन सेहो हमर समाजक लोकपक्ष छी जाहि पर धियान देब आवश्यक अछि।

मिथिलाक समाज कविपूजक अछि, कोनो कविक एहन पूजा आन ठाम प्रायः नहिए देखाओत। दक्षिण भारतक किछु कवि कें अपवाद मानल जाए तखन। तथापि तुलनात्मक रूपें मूल्याकन करी तऽ जे स्थान संत तिरुवलुत्वर, वा वसबन्ना वा अल्लमप्रभुदेवक दक्षिण भारतीय राज्य मे अछि ताहि सँ कम उपस्थिति लक्ष्मीनाथ गोसाँइ केर नहि।

जओ तथ्य आ सामाजिक मान्यता कें एक जग्गह पर राखल जाए तऽ मिथिलाक कोनो क्षेत्र मे बारहो वर्ण आ सभ संप्रदाय मे लक्ष्मीनाथ लेल अथाह सिनेह आ भक्ति सेहो छनि। बनगाँव केर बाबाजीकुटी पर ब्राह्मणेटा नहि सभ जाति आ धर्मक लोक जाइत छथि। एहने सब स्थिति लक्ष्मीनाथ गोसाँइ केर आनोआन कुटी सभ पर छनि। मुदा बनगामक बगले मे बरियाहीक कोनो मुसलमान व्यक्ति धरि बाबाजीक किरिया नहि खाइत अछि तकर कारण सेहो व्यापक हेतै जाहि पर विचार करबाक बेगरता अछि।

कविपूजक मिथिला समाज मे बाबाजी एकटा उपास्य देव छथि, उपास्य कवि बनेबाक कोनो ब्योंत मिथिलाक आलोचक लोकनि नहि केलनि अछि। हुनक कवि कर्म आ भाषा पर जतेक चर्चा हेबाक चाही से नहि भेल। किछुए महत्त्वपूर्ण विद्वान हिनकर कवि-कर्म पर चर्चा सेहो केलनि।

लक्ष्मीनाथक भाषा पक्ष पर विवेचन बेसी आवश्यक अछि। ब्रजबोली पर सर्वाधिक काज कएनिहार प्रोफेसर शैलेन्द्र मोहन झा ब्रजबोली कें अत्यन्त महत्वपूर्ण स्थान देलनि, मध्यकालीन साहित्य बुझबाक लेल। शैलेन्द्र बाबू लिखैत छथि "ब्रजबोलीक उ‌द्भवविषयक उपर्युक्त विवरण सँ इएह निष्कर्ष निकालल जा सकैछ जे ई बांग्लादि भाषाक संग मैथिलीक क्षेत्रीय समीकरण अछि। एकरा जे मैथिलीक प्रादेशिक प्रयोग कहल गेल अछि ओकर पाछू इएह धारणा छल।"

लक्ष्मीनाथ गोसाँइ केर काव्य कें गंभीरतापूर्वक देखलाक पछाति इहो कहि दी तऽ अतिशयोक्ति नहि जे मैथिली आ खड़ी बोली मे लिखित हिनकर पद विशिष्ट तऽ छनि मुदा ई ब्रजबोलीक अंतिम कवि छथि एहि परंपरा मे। जाहि ब्रजबोली कें बांग्ला साहित्यक शीर्ष आचार्य डॉ० सुकुमार सेन मैथिली भाषा सँ उत्पन्न मानैत छथि- "ब्रजबोली मूलतः मैथिली भाषा सँ उत्पन्न भऽ कें बंगाली कवि द्वारा भाषा एवं बांग्ला साहित्य केर रस संचार सँ पुष्ट एवं परिवद्धित भेल अछि।"

एहि ब्रजबोली मे विकास यात्रा अछि। लक्ष्मीनाथ ताहि विकास यात्रा मे अपन अनुपम पद गढ़लनि। मैथिली मिश्रित साधुभाषा सेहो हिनकर पद लेल विद्वान लोकनि चिन्हित केलाह। लक्ष्मीनाथ पर सर्वाधिक काज केनिहार पं० छेदी झा द्विजवर 'विवेक पंचरत्न' केर भूमिका मे लिखैत छथि- "स्वामीजीक कविताक भाषा शुद्ध ब्रजभाषा नहि, मैथिली मिश्रित साधुभाषा अछि। अपनेक लिखल किछु महेशवानी शुद्ध मैथिलीमे अछि।"

द्विजवर जी 1959 मे "गोस्वामी लक्ष्मीनाथ परमहंस की वृहत् जीवनी" सेहो लिखलनि। 1960 में गीतावलीक संपादन कएलनि। गोसाँइजी पर सर्वांगपूर्ण शोधपरक काज करबाक श्रेय डॉ० ललितेश्वर झा कें छनि। हिनकर लिखल ग्रंथ हिन्दी मे छनि जाहि मे "मैथिली का कृष्ण-काव्य एक अध्ययन" आ गोस्वामी लक्ष्मीनाथ की पदावली"। ई दुनू ग्रंथ लक्ष्मीनाथक काव्य वैशिष्ट्य सँ हिन्दी वा मैथिली समाज कें पूर्ण परिचय कराओल गेल। मैथिली साहित्यक इतिहास ग्रंथ सभ मे सेहो गोसाँइ जीक परिचय भेटैत अछि।

1955 मे प्रो० कामेश्वर शर्मा "हिन्दी साहित्य को बिहार की देन" प्रथम खण्ड मे लक्ष्मीनाथक परिचय करओलनि। शिवपूजन सहाय जी "हिन्दी साहित्य और बिहार" शीर्षक सँ एकटा ग्रंथ संपादित कएलनि जे बिहार राष्ट्रभाषा परिषद सँ 1960 मे छपल। एकर प्रथम खण्ड 1960 आ दोसर खण्ड 1963 मे गोसाँइ जीक नीक परिचय प्रस्तुत कएल गेल अछि। श्री कामेश्वर चौधरी 'कलाकार' 1960 मे लक्ष्मीनाथ गोसाँइ पर पटना विश्वविद्यालय सँ शोधकार्य केलनि जिनकर निदेशक छलाह-आचार्य नलिन विलोचन शर्मा। ई लक्ष्मीनाथ गोसाँइ पर भेल पहिल शोध कार्य थिक।

गोसाँइ जी प्रथमतः आ अंततः कवि छथि। एकटा एहन कवि जिनकर गीत लोककंठ मे उतरल अछि। हिनकर कविताक भाषा पर विचार करैत कहल जा सकैछ जे जयदेव आ विद्यापतिक परंपरा मे लक्ष्मीनाथ अबैत छथि। लक्ष्मीनाथक कविता ओहि सभ परंपराक विस्तार थिक जाहि मे गीत गोविन्द आ विद्यापति पदावली लिखल गेल। तथापि मैथिली आलोचना आ साहित्य मे लक्ष्मीनाथ मूल्यांकन नीक सँ नहि भेल। हिनकर भाषाक कारणें विद्वान लोकनिक कहब छलनि जे मैथिलीक अपेक्षा ब्रजभाषा आ अवधीक निकटता लक्ष्मीनाथक भाषा संग छनि। मैथिलीक विद्वान लोकनिक धियान हिनकर भाषा पर जेबाक चाही।

लक्ष्मीनाथ मैथिली साहित्यक सूरदास छथि। ब्रजभाषा ब्रजबोली सँ निर्मित जे कृष्ण काव्यक परंपरा छै ताहि संदर्भ मे लक्ष्मीनाथ गोसाँइ केर मूल्यांकन हेबाक चाही। कृष्णभक्ति काव्य-परंपरा, हिनका पर आओर नीक काज कएल जा सकैछ। डॉ० राम चैतन्य धीरज 'साक्षी लक्ष्मीनाथ' शीर्षक सँ एकटा पुस्तिका हिनका पर बहार कएलनि आ अरविन्द मिश्र 'नीरज' लक्ष्मीनाथ पर महाकाव्य लिखलनि अछि।

साहित्य आलोचना मे कतेको बेर मूल्यांकन संबंधी समस्या अबैत अछि। ताहि समस्या पर समधानि कऽ विचार देबाक चाही। लक्ष्मीनाथ गोसाँइ हमर भाषाक जरूरी कवि छथि, जिनकर साहित्य आ भाषा पर विद्वान लोकनि कें पुनर्विचार करबाक आवश्यकता अछि। मैथिली साहित्यक आलोचनाक पद्धति नीक सँ निर्मित नहि भेल अछि। मैथिली मे साहित्यिक आलोचनाक वैज्ञानिक प्रवृत्तिक आ समाजशास्त्रीय पद्धति दुनूक अभाव रहल अछि।

एहि दुनू पद्धति सँ लक्ष्मीनाथ गोसाँइ केर बहुलतावादी दृष्टि पर नजरि देबाक आइ जरूरति अछि। हिनक बहुभाषी आ बहुलार्थी व्यक्तित्त्व आ कविकर्म मात्र पूजा आ उपासनाक वस्तु नहि बनि जाए, ताहि पक्ष सेहो समग्रता मे विचार हेबाक चाही। लक्ष्मीनाथ कें साहित्य मे पहिल बेर हिन्दी मे मिश्रबंधु लोकनि चिन्हलनि।' साहित्य अकादेमी नई दिल्ली द्वारा मैथिली मे लक्ष्मीनाथ गोसाँइ पर एकटा मोनोग्राफ प्रकाशित भेल। गोसाँइ जी हिन्दी मे डॉ० रमाकान्त झा अपन शोध ग्रंथ प्रकाशित कएलनि।'

लक्ष्मीनाथ गोसाँइ एकटा बहुभाषी कवि छथि। ओ हिन्दीक खड़ी बोली मे लिखलनि। ओ ब्रजभाषा मिश्रित मैथिली मे पद रचना कएलनि। ओ मैथिलीक खाँटी शब्दावलीक प्रयोग करैत लिखलनि। अवधी मे सेहो लिखलनि। एकटा समग्र संपूर्ण कवि जे अपन बहुलार्थ तत्त्वक प्रधानताक कारण सर्वस्वीकृत भेलाह। मिथिलाक लोकदेव रूप मे हिनक पहिचान भेल। एकटा साधक एकटा संत जे मिथिला मे सर्वपूजित भेलाह से छथि लक्ष्मीनाथ गोसाँइ। मैथिली आलोचना कें गोसाँइ जी पर सम्रगता मे विचार करबाक आवश्यकता अछि।

सन्दर्भ संकेतः
1. डॉ. शैलेन्द्र मोहन झा ब्रजबोली साहित्य पृ.-16, बिहार हिंदी ग्रंथ अकादमी, पटना-सं. 1988
2. डॉ. सुकुमार सेन - बंगाली साहित्य परिषद पत्रिका अक-3. प्र०-147
3. विवेक पंचरत्न, संपादक- पं. छेदी झा द्विजकर, द्वितीय संस्करणक भूमिका
4. मिश्रबन्धु विनोद चतुर्थ खंड-1934
5. डॉ. रमाकान्त झा - गोस्वामी लक्ष्मीनाथ साधना और सहित्य, 2001, जयभारती प्रकाशन, इलाहाबाद

— डॉ. अरुणाभ सौरभ

- - - - -

डॉ. अरुणाभ सौरभ मैथिलीक प्रतिष्ठित साहित्यकार छथि। ई एनसीइआरटी क्षेत्रीय शिक्षा संस्था, भोपाल मे सहायक प्राध्यापक रूप मे कार्यरत छथि। अरुणाभ साहित्य अकादेमी युवा पुरस्कार, भारतीय ज्ञानपीठ नवलेखन पुरस्कार सहित अनेक सम्मान सँँ विभूषित छथि। ई मातृभाषा मैथिली सहित हिन्दी साहित्य मे सेहो समान रूप सँ कलम चला रहल छथि।

मिथिमीडिया : सीमित संसाधन आ अनुभव संग डेगा-डेगी

2026-08-15T22:49:00.000+05:30

कोनो काज करबाक लेल कटिबद्धता आवश्यक होइ छै। एही कटिबद्धता ओ मातृभाषा प्रति दायित्वबोधक संग हमसब एकटा लुक्खी प्रयास शुरू केने छलहुँ। अनेक झंझावात सहैत ई प्रयास एमकी अपन यात्रा मे 14 वर्ष पूर्ण कएलक अछि से एक बेर फेर असीम उत्साह सँ भरि गेल छी।

मिथिमीडिया 15 अगस्त 2012 कें औपचारिक रूप सँ एक अभियान जकाँ शुरू भेल छल। ई बेस संतोषप्रद अछि जे हमरा लोकनि एहि माध्यम कें एतेक साल ने मात्र जिआ लेने छी, अपितु आगाँ सेहो बढ़ा रहल छी। संघर्षे करैत हमरा लोकनि एतेक साल धरि निरंतरता बनओने रखलहुँ अछि।

आरंभहि सँ मिथिमीडिया कें पाठकक प्रेम भेटैत रहल अछि। देश-विदेश मे पसरल मैथिल बेर-बेर मिथिमीडिया पर आबि हालचाल सहित मैथिली साहित्य केर आस्वादन करैत रहैत छथि। मिथिमीडिया वेब पर अपन विधा मध्य एहन महत्वपूर्ण जगह अछि, जतए भाषा-साहित्य सँ लऽ आन-आन विषयक स्तरीय आलेख मैथिली भाषा मे उपलब्ध अछि। कंटेंट क्वालिटी, तकनीक, प्रसार आदि अनेक मोर्चा पर मिथिमीडिया वेब पर मैथिलीक नेतृत्व कऽ रहल अछि।

एहि किछु साल मे हमरा लोकनिक सोझाँ अनेक एहन अवसर आएल अछि, जाहि सँ उत्साह बढ़ैत गेल अछि। ऑनलाइन सुविधा जेना-जेना बढ़ल जा रहल अछि, मिथिलाक सामान्य पाठक, विद्यार्थी, शोधार्थी आदि अनेक लोक एहि पोर्टलक उपयोगी कंटेंट सँ थोड़-बहुत लाभान्वित भऽ रहल छथि। समाजोत्थान मे एकरत्ती 'लुक्खी योगदान' तऽ अबस्से देल अछि, जेना कि किछु प्रतिक्रिया सब हमरा लोकनि धरि पहुँचैत रहैत अछि।

मिथिमीडिया एकटा स्तरीय ऑनलाइन पत्रिका, डिजिटल कंटेंट प्लेटफार्म बनल रहए - बढ़ैत रहए ताहि दिशा मे लगातार प्रयास जारी अछि। संगहि एकर सेवा केर विस्तार होइ, एहू दिशा मे काज कएल जा रहल अछि। मिथिमीडिया कतेको कार्यक्रम, अभियान आदि मे सेहो सामर्थ्य अनुरूप संग देइत रहल अछि। भाषा-साहित्य आ मैथिली मीडिया केर विकास हेतु हमरा लोकनि लगातार कतेको प्रोजेक्ट सबहक संग मिलि काज कऽ रहल छी। संगहि एहि यात्राक्रम मे अनेक एहन उपलब्धि सब अछि जे हमरा लोकनि कें उत्साहित करैत रहैत अछि।

मैथिली भाषा मे काज करैत डिजिटल जगत मे अवसर कम छै, मुदा अवसर नहि छै, से आब कहल नहि जा सकैत अछि। मिथिमीडिया अनेक पैघ कंपनी सब संग वेब पर मैथिली सामग्री केर विस्तार हेतु काज केलक अछि, कऽ रहल अछि। आइ गूगल सन बड़का कंपनी हो वा सरकार केर डिजिटल इंडिया सँ जुड़ल उद्यम, मैथिली भाषा मे जे कोनो काज भऽ रहल अछि, ओहि मे मिथिमीडिया केर साक्षात रूप सँ नहि बेस तऽ थोड़-बहुत योगदान जरूर अछि।

इहो पढू : मैथिली वेब पत्रकारिता: केहन चुनौती, कतेक संभावना

समय कखनो आसान कखनो विपरीत होइ छै, मुदा दृढ़ता संग कम सँ कम ठाढ़ रहब जरूरी हाेइ छै। अपने लोकनिक सहयोग, शुभेच्छा सँ हमर कटिबद्धता आओर दृढ़ होइत अछि। एहि चौदह वर्षक यात्राक्रम मे बहुत सहयोगी लोकनि संग अएलाह, जे जतेक डेग संग छलाह, जे संग छथि, हुनका सब कें धन्यवाद कहैत छी।

सबहक सहयोग आ संग सँ ई प्रयास चलैत रहत से विश्वास अछि। सीमित संसाधन आ अनुभव संग मिथिमीडिया डेगा-डेगी बढ़ल जा रहल अछि। पाठक ओ अपन सभ सहयोगी लोकनिक प्रति आभार प्रकट करैत नूतन बरख आ नूतन चुनौती सहित आओर बेसी कार्य अवसर लऽ आबए ताहि शुभकामना संग बधाइ। जय मैथिली!

— रूपेश त्योंथ (संस्थापक सम्पादक)

मिथिला मिरर केर संपादक ललित नारायण झा कें पीएचडी उपाधि

2026-07-30T19:30:00.000+05:30

मैथिली पत्रकारिताक क्षेत्र मे उल्लेखनीय योगदान देनिहार वरिष्ठ पत्रकार आ मिथिला मिररक संस्थापक-संपादक ललित नारायण झा कें पीएचडी उपाधि प्रदान कएल गेल अछि। ललित नारायण मिथिला विश्वविद्यालय, दरभंगाक मैथिली विभागमे सम्पन्न मौखिकी परीक्षा मे सफल भेलाक बाद विश्वविद्यालय द्वारा हुनका "समकालीन मैथिली पत्रकारिताक दशा ओ दिशा" विषय पर कएल गेल शोधक लेल पीएचडी उपाधि प्रदान करबाक स्वीकृति देल गेल। तत्पश्चात 28 जुलाई 2026 कें विश्वविद्यालयक उप परीक्षा नियंत्रक डॉ. सुरेश पासवान औपचारिक रूप सँ हुनका पीएचडी. उपाधि प्रदान कएलनि।

समकालीन मैथिली पत्रकारिताक गंभीर अध्ययन

ललित नारायण झाक शोध-प्रबंध समकालीन मैथिली पत्रकारिताक बदलैत स्वरूप, विकास-यात्रा, चुनौतीसभ आ भविष्यक संभावना पर केन्द्रित अछि। विश्वविद्यालयक विभिन्न प्राध्यापकसभ एहि शोधक मूल्यांकन करैत एकरा विषयवस्तुक दृष्टिसँ अत्यन्त महत्त्वपूर्ण, तथ्यपरक आ शोधपरक कृति कहलनि। हुनक अनुसार ई अध्ययन मैथिली पत्रकारिताक इतिहासकेँ व्यवस्थित रूपमे प्रस्तुत करबाक संगहि वर्तमान पत्रकारितामे भऽ रहल परिवर्तनसभक गम्भीर विश्लेषण सेहो करैत अछि।

शिक्षकसभक मत अछि जे ई शोध भविष्यमे मैथिली पत्रकारितापर अध्ययन करनिहार विद्यार्थी आ शोधार्थीसभ लेल एकटा महत्त्वपूर्ण संदर्भ सामग्री आ मार्गदर्शक ग्रंथ सिद्ध हएत।

प्रो. (डॉ.) नारायण झाक निर्देशन मे सम्पन्न भेल शोध

ई शोधकार्य मैथिली विभागक वरिष्ठ विद्वान प्रो. (डॉ.) नारायण झाक निर्देशनमे सम्पन्न भेल। शोधक क्रममे समकालीन पत्रकारिताक विविध आयाम, डिजिटल परिवर्तन, भाषा, समाज आ मीडियाक परस्पर सम्बन्धसभक व्यापक अध्ययन कएल गेल।

दू दशकसँ पत्रकारितामे सक्रिय

मूल रूपसँ बिहारक मधुबनी जिलाक मैलाम गाम निवासी स्वर्गीय राजेन्द्र झा आ स्वर्गीय निर्मला देवीक ज्येष्ठ पुत्र ललित नारायण झा लगभग दू दशकसँ व्यावसायिक पत्रकारितासँ जुड़ल छथि। विशेष रूपसँ ओ डेढ़ दशकसँ बेसी समय धरि मैथिली टेलीविजन आ डिजिटल पत्रकारितामे सक्रिय भूमिका निभा रहल छथि आ एहि क्षेत्रक प्रमुख हस्ताक्षरक रूपमे अपन विशिष्ट पहचान बना चुकल छथि।

'मिथिला मिरर' सँ डिजिटल पत्रकारिताकेँ भेटल नव पहचान

15 अगस्त 2013 केँ राष्ट्रीय राजधानी नई दिल्लीसँ ललित नारायण झा मिथिला मिररक स्थापना कएलनि। मैथिली पत्रकारिताक इतिहासमे ई पहल डिजिटल आ दृश्य-श्रव्य पत्रकारिताक क्षेत्रमे एकटा महत्त्वपूर्ण उपलब्धिक रूपमे देखल जाइत अछि। मिथिला मिरर मैथिली पत्रकारिताकेँ परम्परागत प्रिन्ट माध्यमसँ आगाँ बढ़ा डिजिटल मंच धरि पहुँचयमे उल्लेखनीय भूमिका निभौने अछि।

इलेक्ट्रॉनिक आ डिजिटल मीडिया दुनूमे व्यापक अनुभव

देशक विभिन्न प्रतिष्ठित मीडिया संस्थानमे कार्य करबाक अतिरिक्त ललित नारायण झा भारत सरकारक इलेक्ट्रॉनिक मीडिया मॉनिटरिंग सेंटर (EMMC) मे सेहो लगभग एक दशक धरि सेवा दऽ चुकल छथि। समाचार संकलन, रिपोर्टिंग, लेखन, सम्पादन, एंकरिंग, वीडियो पत्रकारिता, डिजिटल मीडिया प्रबंधन आ इलेक्ट्रॉनिक मीडिया सहित पत्रकारिताक लगभग सभ प्रमुख क्षेत्रमे हुनका व्यापक अनुभव अछि।

पी-एच.डी.क एहि उपलब्धिक बाद सोशल मीडिया सहित विभिन्न माध्यमसँ हुनका लगातार बधाई आ शुभकामना भेटि रहल अछि। मैथिलीक वरिष्ठ साहित्यकार प्रो. भीमनाथ झा, प्रो. अरुण कुमार कर्ण, प्रो. (डॉ.) नारायण झा, प्रो. दमन कुमार झा, प्रो. अशोक कुमार मेहता, डॉ. सुरेश पासवान, डॉ. शैलेन्द्र मोहन मिश्र, वरिष्ठ पत्रकार विजय देव झा, कुन्दन कुमार मिश्र, प्रवीण झा सहित अनेको साहित्यकार, पत्रकार, शिक्षाविद् आ मैथिली समाजक प्रबुद्धजन हुनका एहि उपलब्धिपर शुभकामना जनबैत उज्ज्वल भविष्यक कामना कएलनि।

मैथिली भाषा आ पत्रकारितासँ जुड़ल लोकनिक मानब अछि जे ई उपलब्धि केवल ललित नारायण झाक व्यक्तिगत सम्मान नहि, बल्कि समकालीन मैथिली पत्रकारिताक अकादमिक अध्ययनकेँ नव दिशा देबाक दिशामे एकटा महत्त्वपूर्ण उपलब्धि अछि।

महत्वपूर्ण पहल : रैयाम आ सकरी चीनी मिल पुनः शुरू करबाक निर्णय

2026-07-30T10:18:47.280+05:30

बिहार राज्य मंत्रि परिषद रैयाम आ सकरी स्थित बंद पड़ल चीनी मिल परिसर मे नव सहकारी चीनी मिल आ गन्ना (कुसियार) आधारित उद्योग स्थापनाक प्रस्ताव कें मंजूर कएलक अछि। एहि परियोजनाक संचालन लेल इण्डियन पोटाश लिमिटेड (IPL) कें स्वीकृति देल गेल अछि। सरकार एहि निर्णय कें मिथिलाक औद्योगिक विकासक दिशा मे ऐतिहासिक डेग मानि रहल अछि।

रैयाम मे लगभग 68 एकड़ जमीन पर पहिल चरण मे प्रतिदिन 3,500 टन गन्ना पेराइ क्षमता (TCD) बला नव चीनी मिल स्थापित होएत। बाद मे एकर क्षमता 5,000 TCD धरि बढ़ाओल जाएत। एहि परिसर मे सह-विद्युत उत्पादन इकाइ, इथेनॉल डिस्टिलरी आ कम्प्रेस्ड बायोगैस (CBG) इकाइ स्थापनाक योजना सेहो अछि। रैयाम परियोजनाक अनुमानित लागत लगभग ₹504.67 करोड़ अछि।

तहिना, सकरी मे लगभग 30 एकड़ जमीन पर 3,500 TCD क्षमता बला नव चीनी मिल स्थापित होएत। भविष्य मे एकर क्षमता 5,000 TCD धरि बढ़ाएल जाएत। एहि परियोजना मे सह-विद्युत उत्पादन इकाइ स्थापना प्रस्तावित अछि। सकरी परियोजनाक अनुमानित लागत लगभग ₹347.76 करोड़ अछि।

दूनू परियोजना मे कुल प्रस्तावित निवेश लगभग ₹852.43 करोड़ अछि। सरकारक अनुसार ई परियोजना मात्र चीनी उत्पादन धरि सीमित नहि रहत, अपितु गन्ना सँ निकलएबला विभिन्न उपोत्पादक उपयोग करैत आधुनिक सुगर कॉम्प्लेक्स विकसित कएल जाएत।

परियोजना मे गन्ना उत्पादक इच्छुक आ पात्र किसानसभ कें सहकारी समितिक माध्यम सँ जोड़ल जाएत। समिति किसानसभ कें आधुनिक खेती, कृषि आदान, कृषि यंत्र, तकनीकी सलाह आ कृषि ऋण सुविधा उपलब्ध कराओत। एकर संगहि चीनी मिल कें नियमित गन्ना आपूर्ति सुनिश्चित कएल जाएत। एहि प्रयास सँ गन्ना खेती कें बढ़ावा भेटत आ किसानक आय बढ़बाक नव अवसर बनत।

बिहार सरकार बिहार गन्ना उद्योग निवेश प्रोत्साहन नीति-2026 अंतर्गत परियोजना कें आवश्यक सहायता देत। रैयामक लगभग 68 एकड़ आ सकरीक लगभग 30 एकड़ जमीन इण्डियन पोटाश लिमिटेड (IPL) कें 30 वर्ष लेल ₹1 टोकन राशि पर लीज देबाक प्रावधान कएल गेल अछि। भविष्य मे आवश्यकता अनुसार अतिरिक्त जमीन उपलब्ध करएबाक व्यवस्था सेहो राखल गेल अछि।

सरकारक अनुसार इण्डियन पोटाश लिमिटेड (IPL) कें चीनी उद्योग संचालनक व्यापक अनुभव अछि। देशक विभिन्न राज्य मे चीनी मिल संचालन अनुभव कें ध्यान मे रखैत कम्पनी कें एहि परियोजनाक भागीदार चुनल गेल अछि।

सरकारक मानब अछि जे एहि निर्णय सँ मिथिला मे औद्योगिक गतिविधि बढ़त, स्थानीय स्तर पर रोजगार अवसर सृजित होएत, किसानसभ कें लाभ भेटत आ क्षेत्रीय अर्थव्यवस्था कें नव गति भेटत। कृषि, उद्योग, उर्जा आ रोजगार कें एक संग जोड़एबला नव आर्थिक मॉडल सेहो विकसित होएबाक संभावना अछि।

भारतीय जनता पार्टीक प्रदेश अध्यक्ष संजय सरावगी (Sanjay Saraogi) एहि परियोजनाक निर्णय पर बिहारक मुख्यमंत्री सम्राट चौधरीक प्रति आभार व्यक्त कएलनि।ओ कहलनि जे मुख्यमंत्री सम्राट चौधरीक नेतृत्व मे लेल गेल ई निर्णय मिथिलाक गन्ना किसान, स्थानीय युवा आ औद्योगिक विकास लेल अत्यंत महत्वपूर्ण अछि। एहि पहल सँ गन्ना किसानसभ कें अपन उपजक उचित बाजार भेटत, जखनकि स्थानीय युवासभ लेल रोजगारक नव अवसर सृजित होएत।

भाजपा प्रदेश अध्यक्षक अनुसार बिहार सरकारक ई निर्णय प्रधानमंत्री नरेंद्र मोदीक "विकसित भारत" केर संकल्प आ मुख्यमंत्री सम्राट चौधरीक नेतृत्व मे "विकसित आ आत्मनिर्भर बिहार" बनेबाक दिशा मे एक महत्वपूर्ण डेग अछि।

ओतहि मंत्री नीतीश मिश्र (Nitish Mishra) एहि महत्वपूर्ण पहल लेल यशस्वी प्रधानमंत्री नरेन्द्र मोदी, यशस्वी गृह एवं सहकारिता मंत्री अमित शाह, मुख्यमंत्री सम्राट चौधरी (Samrat Choudhary) एवं राज्य मंत्रिपरिषद केर हृदयतल सँ आभार जनओलनि अछि। जानकारी हो जे नीतीश मिश्र पूर्व मे उद्योग मंत्री रहैत एहि दिशा मे उल्लेखनीय प्रयास केने छथि।

आब देखबाक चाही जे ई निर्णय फूसि-फटक्का नहि हो, अपितु वास्तव मे धरातल पर साकार हो। बिहार सरकार आ नेता लोकनि केर घोषणा-निर्णय आ प्रचार सबसँ बिहारक जनता त्रस्त रहल अछि। उद्योग, रोजी-रोजगार लेल विपन्न जनता एहन सन कोनो घोषणा कें तावत धरि घोषणाटा मानैत छथि जावत ओ साकार नहि भऽ जाइत अछि।

इस्तीफा उपरान्त धर्मेन्द्र प्रधान कें पाग सँ स्वागत, किएक?

2026-07-28T10:44:16.276+05:30

छात्र लोकनिक आन्दोलन उपरान्त धर्मेन्द्र प्रधान (Dharmendra Pradhan) कें शिक्षा मंत्रालय सँ इस्तीफा देबए पड़लनि। एकर बाद जखन ओ संसद पहुँचैत छथि तऽ हुनक भव्य स्वागत होइत अछि। स्वागत मिथिला परम्परा (Mithila Tradition) अनुसार पाग-दोपटा संग सांसद गोपाल जी ठाकुर द्वारा होइत अछि। मीडिया मे एकर खूब चर्च होइत अछि, संगहि प्रश्न उठाओल जाइत अछि। इस्तीफा पश्चात बैकफुट पर गेल पूर्व मंत्री कें एहन भव्य स्वागत केर कोन प्रयोजन, कोन काज!

गोपाल जी ठाकुर स्वयं सोशल मीडिया माध्यम सँ विस्तारपूर्वक लिखलनि अछि जे किएक इस्तीफा केर बादहु धर्मेन्द्र प्रधान केर स्वागत केलनि, सम्मान देलनि।

Gopal Jee Thakur लिखैत छथि, "शिक्षाक माध्यम सँ मिथिला कें नव पहचान, मैथिली कें नव सम्मान आ दरभंगा कें नव उड़ान देनिहार यशस्वी जननेता माननीय श्री धर्मेन्द्र प्रधान जीक योगदान सदिखन स्मरणीय रहत। शिक्षा जगत मे हुनकर दूरदर्शी निर्णय कें मिथिलाक आबएवला पीढ़ी सभ सदिखन मोन राखत।"

संसद परिसर मे माननीय श्री धर्मेन्द्र प्रधान जीक मिथिलाक गौरवशाली परंपराक प्रतीक पाग आ अंगवस्त्र सँ आत्मीय स्वागत आ अभिनन्दन करबाक सौभाग्य भेटल।

हुनकर कार्यकाल मे मिथिला, दरभंगा आ मैथिली भाषा कें शिक्षा क्षेत्र मे भेटल प्रमुख उपलब्धि—

1. राष्ट्रीय शिक्षा नीति (NEP-2020) केर माध्यम सँ मातृभाषा आधारित शिक्षा कें राष्ट्रीय प्राथमिकता देल गेल।

2. CBSE केर पाठ्यक्रम मे मैथिली भाषा कें शामिल करबाक ऐतिहासिक निर्णय लेल गेल।

3. CTET मे मैथिली भाषा कें शामिल कऽ लाखो युवा लेल राष्ट्रीय स्तर पर नव अवसर उपलब्ध कराओल गेल।

4. NCERT द्वारा भारतीय भाषा आ मातृभाषा सभक संरक्षण तथा अध्ययन सामग्री तैयार करबाक दिशा मे महत्वपूर्ण पहल कएल गेल।

5. PM SHRI विद्यालय योजनाक अंतर्गत दरभंगाक चयनित विद्यालयसभ कें आधुनिक शिक्षा, स्मार्ट क्लास, विज्ञान प्रयोगशाला आ डिजिटल सुविधा सँ जोड़ल गेल।

6. दरभंगाक केंद्रीय विद्यालयसभ कें सुदृढ़ करबाक आ गुणवत्तापूर्ण शिक्षाक विस्तार लेल उल्लेखनीय पहल कएल गेल।

7. दरभंगा मे केंद्रीय विद्यालय संख्या–3 (AIIMS परिसर) केर स्थापनाक दिशा मे महत्वपूर्ण प्रगति भेल।

8. ललित नारायण मिथिला विश्वविद्यालय कें राष्ट्रीय उच्च शिक्षा सुधार कार्यक्रम आ शैक्षणिक पहलसभ सँ जोड़ल गेल।

9. भारतीय भाषाक संरक्षण आ संवर्धनक राष्ट्रीय नीति मे मैथिली जकाँ भारतीय भाषा कें नव उर्जा आ संस्थागत महत्व भेटल।

10. डिजिटल शिक्षा, कौशल विकास, शोध आ नवाचार आधारित शिक्षा कें बढ़ावा दऽ मिथिलाक विद्यार्थीसभ लेल नव अवसर सृजित कएल गेल।

11. दरभंगा मे दूटा केंद्रीय विद्यालयक माध्यम सँ हजारो विद्यार्थी कें गुणवत्तापूर्ण केंद्रीय शिक्षा व्यवस्थाक लाभ लगातार भेटि रहल अछि।

12. मिथिलाक भाषा, संस्कृति आ शिक्षा कें राष्ट्रीय स्तर पर सम्मान दिएबाक दिशा मे अनेक ऐतिहासिक निर्णय लऽ एहि क्षेत्रक शैक्षणिक पहचान कें नव मजबूती प्रदान कएल गेल।

मिथिलाक जनता कें पूर्ण विश्वास अछि जे शिक्षा, मातृभाषा आ युवा सभक भविष्य प्रति अहाँक ई प्रतिबद्धता आबयवला वर्षसभ मे सेहो प्रेरणाक स्रोत बनल रहत।

मिथिलाक दिस सँ माननीय श्री धर्मेन्द्र प्रधान जी कें हार्दिक धन्यवाद आ अभिनन्दन।

जय मिथिला! जय मैथिली! जय भारत! 🇮🇳

मिथिलाक विद्यार्थी लोकनि हेतु खुशखबरि, CTET परीक्षा मे मैथिली भाषा शामिल

2026-05-12T12:21:00.004+05:30

केंद्रीय शिक्षक पात्रता परीक्षा (CTET) मे मैथिली भाषा कें शामिल कएल गेल अछि. केंद्रीय शिक्षक पात्रता परीक्षा के लेल आवेदन 11 मइ सँ 10 जून तक खुलत, आओर परीक्षा 6 सितंबर कें होएत. एहि हेतु विभिन्न विषय लेल जानकारी प्रकाशित कएल गेल अछि. मैथिली भाषा (Maithili Language) लेल कोड 25 देल गेल अछि, जे ई सिद्ध करैत अछि जे आब मैथिली कें औपचारिक रूप सँ केंद्रीय शिक्षक पात्रता परीक्षा मे शामिल कएल गेल अछि.

ई जानकारी लोकसभा मे सांसद आ भाजपा सचेतक डॉ. गोपालजी ठाकुर द्वारा प्रेस विज्ञप्ति मे देल गेल अछि. ओ कहलनि जे केंद्रीय शिक्षक पात्रता परीक्षा मे मैथिली भाषा कें शामिल करब 8.5 करोड़ मिथिलावासी लेल गौरवक विषय अछि. केंद्र सरकार केर एहि डेग सँ मैथिली भाषी अभ्यर्थी सब कें शिक्षक पात्रता परीक्षा मे अपन मातृभाषा चुनबाक अधिकार भेटतै, जाहि सँ लाखो मैथिली भाषी विद्यार्थी लोकनि कें रोजगारक अवसर भेटतै.

केंद्र सरकार द्वारा शिक्षक पात्रता परीक्षा मे मैथिली कें शामिल करब मिथिला क्षेत्र लेल वरदान बताबैत ओ कहलनि जे, कक्षा 6 सँ 10 तक पढ़ाइ लेल केंद्रीय शिक्षक पात्रता परीक्षा मे मैथिली कें शामिल कएला सँ नव रोजगार केर अवसर बढ़त आ संगहि राष्ट्रीय स्तर पर मैथिली भाषा केर विस्तार सेहो होएत. केंद्रीय शिक्षक पात्रता परीक्षा मे मैथिली कें शामिल कएला सँ देश भरि मे सब प्रकारक सरकारी स्कूल मे शिक्षण केर अवसर भेटत, आ मैथिली भाषा कें विकास, संरक्षण, आ संवर्धन लेल वरदान साबित होएत.

एहि संबंध मे अपन पहल आ प्रयास पर चर्चा करैत ओ कहलनि जे सरकार कें कहल गेल अछि जे मैथिली भाषी क्षेत्रक स्कूल मे कक्षा 6 सँ 10 तक मैथिली भाषा केर शिक्षा शुरू कएल जाए आ एहि भाषा मे पाठ्यपुस्तक उपलब्ध कराओल जाए. मैथिली भाषाक प्रति केंद्र सरकार केर प्रतिबद्धता आ संवेदनशीलता लेल ओ प्रधानमंत्री नरेंद्र मोदी, गृहमंत्री अमित शाह, शिक्षा मंत्री धर्मेन्द्र प्रधान आ मुख्यमंत्री सम्राट चौधरी कें आभार व्यक्त केलनि.

शिक्षाविद भोगेन्द्र झा केर आकस्मिक निधन, मिथिला समाज मे शोक व्याप्त

2026-04-21T13:23:00.012+05:30

कोलकाता: प्रख्यात शिक्षाविद आ समाजसेवी भोगेन्द्र झा (70) केर आकस्मिक निधन सोमदिन (20 अप्रील 2026) कें कोलकाता मे भेलनि। हिनक निधन सँ महानगर सहित सम्पूर्ण मिथिला समाज मे गहींर शोक व्याप्त भ’ गेल अछि। निधन केर खबरि सँ शिक्षा जगत, सामाजिक संगठन आ शुभचिंतक लोकनि मे शोक केर लहरि पसरि गेल अछि। ओ एकटा सफल शिक्षाविद मात्र नहि छलाह, बल्कि समाज कें दिशा देनिहार एक दूरदर्शी व्यक्तित्व छलाह।

भोगेन्द्र झा अपन जीवनक अधिकांश समय शिक्षाक क्षेत्र कें समर्पित केने छलाह। बागुइआटी अंचल मे जखन गुणवत्तापूर्ण विद्यालयक भारी कमी छल, तखन ओ एहि आवश्यकता कें बुझैत कतेको शिक्षण संस्थानक स्थापना केलनि। हुनक प्रयास सँ हजारो विद्यार्थी कें बेहतर शिक्षा प्राप्त करबाक अवसर भेटल। ओ मानैत छलाह जे शिक्षा ओ माध्यम अछि, जाहि सँ समाजक सभ वर्ग कें सशक्त बनाओल जा सकैत अछि आ जीवन मे सफलताक बाट फोलल जा सकैत अछि।

कलकत्ता पब्लिक स्कूल केर चेयरमैनक रूप मे ओ संस्थान कें नव उँचाइ पर पहुँचओलनि। हुनक नेतृत्व मे विद्यालय केवल शैक्षणिक उत्कृष्टता मे नहि, बल्कि अनुशासन, नैतिकता आ सामाजिक मूल्यक लेल सेहो अपन अलग पहचान बनौलक। ओ छात्रसभक सर्वांगीण विकासक पक्षधर छलाह आ सदिखन एहि बात पर जोर देइत छलाह जे शिक्षा केवल किताबक ज्ञान तक सीमित नहि रहि, बल्कि व्यक्तित्व निर्माणक माध्यम बनए।

मूल रूप सँ मिथिलाक मधुबनी जिलाक बेनीपट्टी-नवकरही गामक निवासी भोगेन्द्र झा अपन गाम कें कखनो नहि बिसरलनि। ओ अपन गाम आ जिला मे सेहो विद्यालयक स्थापना क’ बच्चासभक भविष्य संवारबाक महत्वपूर्ण काज केलनि। प्रवास मे रहितो ओ मिथिलाक भाषा, संस्कृति आ समाजक लोकसभक लेल सदिखन तत्पर रहलाह। हुनकर एहि समर्पण हुनका केवल शिक्षाविदटा नहि, बल्कि एक सुच्चा समाजसेवीक रूप मे स्थापित कएलक।

भोगेन्द्र बाबूक व्यक्तित्व अत्यंत सरल, सौम्य आ प्रेरणादायक छल। ओ विद्यार्थी, शिक्षक आ अभिभावक सभक बीच समान रूप सँ लोकप्रिय छलाह। हुनकर मान्यता छल जे एकटा शिक्षक केवल पढ़बएबला नहि, बल्कि समाजक मार्गदर्शक होइत अछि। एहि सोचक संग ओ अपन संस्थान सभ मे शिक्षकसभ कें उच्च आदर्शक संग काज करबाक प्रेरणा देलनि।

हुनक आकस्मिक निधन सँ सभ कियो स्तब्ध अछि। ककरो विश्वास नहि भ’ रहल अछि जे शिक्षा जगतक ई उज्ज्वल सितारा आब हमरा सभक बीच नहि रहलाह। विभिन्न सामाजिक आ शैक्षणिक संगठनसभ हुनकर निधन पर गहींर शोक व्यक्त केलनि आ एकरा अपूरणीय क्षति बतौलनि।

मिथिला समाजक लोकसभ हुनका एकटा एहन व्यक्ति रूप मे याद क’ रहल छथि, जे मात्र शिक्षा क्षेत्र मे योगदान नहि देलनि, बल्कि सामाजिक एकता आ सांस्कृतिक मूल्य कें सेहो सशक्त बनौलनि। हुनका द्वारा स्थापित संस्थान सभ आइयो हुनक आदर्श आ विचार कें आगाँ बढ़ा रहल अछि।

भोगेन्द्र झा केर जीवन आ हुनक काज आगामी पीढ़ी लेल प्रेरणाक स्रोत बनल रहत। ओ अपन पाछां दू पुत्र, एक पुत्री, नाती-पोता सहित भरलपूरल परिवार, सखा-शुभचिंतक सभ कें छोड़ि गेलाह अछि। इश्वर सँ प्रार्थना अछि जे दिवंगत आत्मा कें शांति प्रदान करथि आ शोक संतप्त परिवार कें एहि कठिन समय मे धैर्य आ शक्ति देथि।

नेपालक पहिल मैथिलीभाषी प्रधानमंत्री, रैपर सँ राजपाट धरि अपूर्व यात्रा

2026-03-27T19:00:00.003+05:30

नेपाल मे बालेन युग शुरू भ' गेल अछि। 35 वर्षीय बलेन्द्र शाह, जे बालेन नाम सँ जानल जाइत छथि, 45म प्रधानमन्त्री रूप मे शपथ लेलनि अछि। बालेन शाह राष्ट्रीय स्वतंत्र पार्टी माध्यम सँ जीत दर्ज क' इतिहास रचलनि। राष्ट्रपति कार्यालय मे आयोजित भव्य समारोह मे बालेन शाह प्रधानमन्त्रीक शपथ लेलनि। पद आ गोपनीयताक शपथ हिन्दू संस्कारक अनुसार होइत संपन्न भेल। एहि वर्ष रामनवमी केर विशेष दिन बालेन शाह शपथ ग्रहण केलनि।

नेपाल मे भेल जेन-जी आन्दोलन मे बालेन केर लोकप्रियताक झलक भेलटल छल। युवा सब बालेन कें प्रधानमंत्री बनेबाक मांग करैत आबि रहल छल। हुनका लोकनिक इच्छा आब पूरा गेल अछि। ध्यान देबऽ बला बात छै जे बालेन शाह चारि बेरक प्रधानमंत्री केपी शर्मा ओली कें भारी अंतर सँ हरा पद पर काबिज भेलाह अछि।

नेपालीय मिथिलाक मैथिली भाषी परिवार मे जन्मल शाह भारतक विश्वेश्वराय टेक्नोलॉजिकल यूनिवर्सिटी सँ स्ट्रक्चरल इंजीनियरिंग मे स्नातकोत्तर डिग्री अर्जित करबा सँ पहिने काठमांडू मे स्नातक केर डिग्री पूरा केलनि। इंजीनियरिंग केर शैक्षणिक पृष्ठभूमि काठमांडू महानगरक मेयर रूप मे हुनक कार्यशैली आ शासन कें मजबूत करबा मे महत्वपूर्ण भूमिका निमाहलक। जानकारी हो कि ओ एकटा रैपर रूप मे जनताक बीच लोकप्रिय भेलाह आ फेर राजनीति मे डेग बढ़ओलनि।

एकटा रैपर आ इंजीनियर सँ प्रधानमंत्री पद धरि हुनक यात्रा असामान्य तऽ अछिए, नेपालक बदलैत राजनीतिक संस्कृतिक प्रतीक सेहो बनि गेल अछि।

रैप सँ शुरुआत: राजनीति मे प्रवेश करबा सँ पहिने बालेन शाह नेपालक हिप-हॉप रेप केर दुनिया मे एकटा सुप्रसिद्ध नाम छल। अपन गीतक माध्यम सँ सामाजिक असमानता, भ्रष्टाचार, आ युवा मामिला के प्रमुखता सँ संबोधित करैत छलाह। हुनक संगीत खाली मनोरंजन नै छल, बल्कि सिस्टम केर खिलाफ आवाज छल। एहि कारण सँ जेन-जी मध्य बालेन केर लोकप्रियता बढ़ैत गेल।

विद्रोही चेहरा: बालेन केर राजनीतिक प्रवेश पारंपरिक दल सँ अलग छल। ओ पहिने स्वयं कें स्वतंत्र उमेदवार रूप मे प्रस्तुत केलनि। ओ एकटा एहन नेताक छवि बनौलनि जे व्यवस्था सँ बाहर सँ आबि ओकरा बदलबाक दावा करैत छल-आ ई बात युवा लोकनि कें सबसँ बेसी आकर्षित केलक। 2022 मे काठमांडू महानगरपालिका मेयर रूप मे हिनक जीत ऐतिहासिक रहल। ओ पैघ राजनीतिक दल सँ बेसी काज करैत जनता केर विश्वास जीत लेलथि। मेयर बनलाक बाद ओ किछु कठोर आ त्वरित फैसला लेलनि, जेना अवैध संरचना पर दबाव बनाएब, सार्वजनिक स्थान केर संरक्षण, आ शहरी प्रबंधन मे सुधार। ई सब डेग हुनका "एक्शन-ओरिएंटेड" नेता रूप मे स्थापित केलक।

प्रदर्शन आ युवा नेतृत्व: नेपाल मे जेन-जी आन्दोलनक प्रतीक बालेन शाह मानल जाइत अछि। युवा पीढ़ी कें राजनीति केर निकट अनबा मे हिनक भाषा, सोच, आ कार्यशैली केर प्रमुख भूमिका छल। सोशल मीडिया केर प्रभावी उपयोग आ सीधा संवाद शैली हुनका युवा केर "अपन नेता" रूप मे स्थापित केलक।

विवादित निर्णय: हुनक निर्णयक प्रशंसा भेल ओतहि अनेक विवाद सेहो उत्पन्न भेल। अवैध संरचना कें हटएबाक काज लेल ओ आलोचना केर केंद्र मे छलाह। प्रशासनिक प्रक्रिया कें बाइपास करबाक आरोप सेहो लगाओल गेल छल। अभिव्यक्ति आ नीति केर बीच संतुलन पर सवाल उठल। कखनो काल हुनक काज आ बयान सब आक्रामक जानि पड़ैत छल।

आम निर्वाचन आ दू तिहाई बहुमत: राष्ट्रीय राजनीति मे प्रवेश केलाक बाद बालेन शाह आम चुनाव मे अभूतपूर्व सफलता प्राप्त केलनि। हुनक नेतृत्व मे राष्ट्रीय स्वतंत्र पार्टी केर संसद मे दू तिहाइ बहुमत प्राप्त भेल - नेपाल केर राजनीति मे ई एकटा बड़का मोड़ साबित भेल अछि। ई जनादेश परिवर्तन, पारदर्शिता, आ नव नेतृत्व प्रति जनताक विश्वासक झलक छल। एहि ऐतिहासिक विजयक बाद बालेन शाह नेपालक प्रधानमंत्री नियुक्त भेलाह। हुनक नियुक्ति कें "नव युग" रूप मे देखल जा रहल अछि। बालेन शाहक कथा मात्र एक व्यक्तिक सफलता नहि, नेपालक बदलैत राजनीतिक मानसिकताक प्रतिबिंब अछि। रैप सँ राजनीति मे हुनक यात्रा ई बात कें दर्शाबैत छै जे नव पीढ़ी आब खाली दर्शक नै रहै छै बल्कि परिवर्तन केर क्षमता रखैत छै।

रूपेश त्योंथ लिखित होरी विशेष कविता 'नेहक रंग'

2026-03-03T23:10:00.006+05:30

नवल किरण थिक नेहक रंग

चहुँदिक पसरल विपुल उमंग

बाधबोन धरि पीत बसंती

प्रेम पाबि मन बड़ श्रीमंत

होरी पाबनि मचल धुरखेल

द्वेष मेटा सब कएने मेल

फाग गबै छथि मूषक नंदी

शिवगण सराबोर छथि भेल

आमक मज्जर गमक पसारए

फूलल सरिसो नयन जुराबए

बोरिआ बिस्तर बन्हने ठंढी

बाल-बिरिध सब संगहि नाचए

पुआ-पूड़ी, खीर-पकवान

घोरल सरबत, पान-मखान

लाल, पीअर, हरियर, नारंगी

सिनेहक सागर उबडुब चान

प्रेम-प्रीति केर अनुपम धार

सुख-दुःख भेलै एकाकार

होरी खेलू सब साथी-संगी

वसुधा बनल एक परिवार

— रूपेश त्योंथ

- - - - -

कविताक भावार्थ ः प्रस्तुत कविता होरी त्योहार कें मात्र रंगक खेल नहि, अपितु आपसी प्रेम आ सद्भावक प्रतीक मानैत अछि। कवि कहैत छथि जे फागुनक मस्ती आ आनंदक बीच प्रकृति आ मनुष्य दुनू खुशी सँ सराबोर छथि। एतय ‘धुरखेल’ (धूर-माटिक होली) संग-संग मनक मइल मेटा कें एक-दोसरा कें गला लगएबाक संदेश देल गेल अछि।

कविताक सुन्दरता तखन आओर बढ़ि जाइत अछि, जखन एहि मे शिवजीक गण आ नंदी-मूषक कें सेहो फाग गबैत आ होली खेलैत देखाओल गेल अछि, जे एहि पर्वक सर्वव्यापकता कें दर्शओबैत अछि। मैथिली संस्कृतिक पहिचान पूआ-पुड़ी, पान आ मखान केर उल्लेख उत्सवक स्वाद कें जीवंत बना देइत अछि। अंत मे कवि गहन संदेश देइत छथि जे जखन प्रेमक मधुर धार बहैत अछि, तखन पूरा पृथ्वी एक परिवार (वसुधैव कुटुम्बकम्) बनि जाइत अछि।

- - - - -

रूपेश त्योंथ (Rupesh Teoth) सुपरिचित कवि, स्तम्भकार ओ सम्पादक छथि। सम्प्रति कलकत्ता मे रहैत आइटी प्रोफेशनल रूप मे कार्यरत छथि आ स्वतंत्र लेखन क्षेत्र मे सेहो लगातार सक्रिय छथि। मैथिलीक प्रतिष्ठित ऑनलाइन पत्रिका मिथिमीडिया केर सम्पादन व संचालन करैत छथि। रूपेश मैथिली भाषा मे नवकृष्ण ऐहिक नाम सँ व्यंग्य सेहो लिखैत आबि रहल छथि। हिनका साहित्य अकादेमी युवा पुरस्कार सहित कतेको सम्मान प्राप्त छनि। रूपेश कतिपय राष्ट्रीय ओ अंतर्राष्ट्रीय साहित्यिक आयोजन सब मे मैथिलीक प्रतिनिधित्व क' चुकल छथि।

मैथिली अकादमी : बिहार सरकार केर उदासीनता सँ निष्क्रिय भेल संस्था, हस्तक्षेपक मांग

2025-12-24T13:50:00.004+05:30

मिथिला ऐतिहासिक, सांस्कृतिक आ बौद्धिक दृष्टि सँ सदैव बिहार राज्यक गौरव रहल अछि। संपूर्ण मिथिला क्षेत्र आ देश-विदेश मे निवास करैत मिथिलावासी सदा सँ राष्ट्रीय जनतांत्रिक गठबंधन आ राज्य नेतृत्व प्रति अपन समर्थन प्रकट करैत आएल छथि। विगत विधानसभा चुनाव मे मिथिला क्षेत्र सँ गठबंधन कें मिलल व्यापक जनादेश एहि विश्वासक स्पष्ट प्रमाण मानल जा रहल अछि।

मुदा एतेक व्यापक जनसमर्थनक बावजूद राजधानी पटना मे अवस्थित मैथिली अकादमीक वर्तमान स्थिति अत्यंत दुःखद आ चिंताजनक बनि गेल अछि। अकादमी लगभग पूर्णतः निष्क्रिय अवस्था मे पहुँचि गेल अछि, जाहि सँ मैथिली भाषा मे अध्ययन आ शोध करैत विद्यार्थी, शोधार्थी आ साहित्य प्रेमी सभ गंभीर समस्या सँ जूझि रहल छथि।

जानकार लोकनिक अनुसार मैथिली अकादमी सँ मानक पाठ्य-सामग्री, शोध-पत्रिका आ संदर्भ ग्रंथ आब उपलब्ध नहि अछि। साहित्यिक संगोष्ठी, पुस्तक प्रकाशन, लेखक सम्मेलन आ सांस्कृतिक गतिविधि सभ पूर्ण रूपें ठप भ’ गेल अछि, जाहि सँ भाषा-साहित्यक सतत विकास बाधित भ’ रहल अछि।

सब सँ गंभीर विषय ई अछि जे मैथिली अकादमी द्वारा विगत कएक दशक मे प्रकाशित ऐतिहासिक आ दुर्लभ साहित्यिक धरोहर उचित देख-रेख आ संरक्षणक अभाव मे नष्ट होएबाक कगार पर अछि। विद्वान लोक मानैत छथि जे यदि शीघ्र ठोस कदम नहि उठाओल गेल त’ ई केवल मिथिला नहि, बल्कि संपूर्ण भारतीय सांस्कृतिक विरासत लेल अपूरणीय क्षति साबित भ’ सकैत अछि।

एहि स्थिति कें देखैत मैथिली भाषा-प्रेमी समाज, शिक्षाविद आ साहित्यकार सभ सरकार सँ मांग क’ रहल छथि जे मैथिली अकादमी मे पूर्णकालिक निदेशक सहित आवश्यक पदाधिकारी आ कर्मचारीक शीघ्र नियुक्ति कएल जाए। संगहि अकादमी लेल पर्याप्त बजट आवंटन, स्पष्ट कार्ययोजना आ नियमित प्रशासनिक व्यवस्था सुनिश्चित क’ एकरा पुनः पूर्णतः क्रियाशील बनाओल जाए।

मिथिला समाजक मानब अछि जे यदि सरकार एहि विषय पर संवेदनशीलता आ दूरदर्शिता सँ निर्णय लेत, त’ संपूर्ण मिथिला क्षेत्र, देश-विदेश मे बसल मिथिलावासी आ मैथिली भाषा-प्रेमी समाज मे सकारात्मक संदेश जाएत आ मैथिली भाषा-साहित्य आ संस्कृति केर संरक्षण आ संवर्धनक उद्देश्य पुनः सशक्त रूपें पूरा भ’ सकत।

जानकारी अनुसार, मैथिली अकादमी लगभग पाँच महीना सं बंद‌ पड़ल अछि। अकादमीक पुस्तक विक्रय केन्द्र पर कोनो स्टाफ नहि भेटैत अछि, जाहि सँ विद्यार्थीक पुस्तक खरीद मे गंभीर कठिनाइ अछि। अकादमी द्वारा पिछला करीब 49 वर्ष मे 213 पुस्तक प्रकाशित कएल गेल अछि, जाहि मे कतेको साहित्य अकादेमी पुरस्कार विजेता किताब सेहो शामिल अछि। मुदा 2017 केर बाद वेबसाइट बंद भेल, आ 2021 केर बाद कोनो नव किताब नहि प्रकाशित भऽ सकल अछि। एहि तरहें अकादमीक मूल लक्ष्य पूरा नहि भऽ रहल अछि।

शिक्षा विभागक एक सूत्र सँ भेटल जनतब अनुसार, भाषा अकादमी सबकें एकीकृत रूप सँ संचालनक योजना बनाओल जा रहल अछि — जाहि मे एक निदेशक आ किछु उप-निदेशक केर नियुक्ति होएत। मुदा कतिपय विद्वान एहि योजना पर आपत्ति करैत छथि। हुनक कहब छनि जे भाषा-विशेषज्ञ कें जओ नेतृत्व नहि देल जाएत त’ अफसर लोकनि उचित ध्यान नै देताह आ संस्थान नीक सँ संचालित नै भऽ सकत। मैथिली अकादमी कें पहिने जकां स्वतंत्र आ स्वायत्त रूप मे संचालित करब उचित होएत।

वर्तमान मे मैथिली अकादमीक स्थिति चुनौतीपूर्ण आ चिन्ताजनक अछि — जखनकि एहि संस्थाक स्थापना मूल रूप सँ मैथिली भाषा आ संस्कृति केर संवर्धन, प्रकाशन आ संरक्षण लेल भेल छल। विद्यार्थी, लेखक, शोधकर्ता आ आम पाठक सभक बीच ई बहुत आवश्यक संस्थान छल, मुदा वर्तमान मे बंद पड़लाक कारण ओ अपन उद्देश्य सँ दूर भऽ रहल अछि।

मैथिली भाषाक भविष्यक मजबूती लेल इतिहास-साहित्य मे अग्रणी एहि अकादमीक पुनः सुचारु रूप द’ देबाक लेल सरकार एवं स्थानीय समाजक सक्रिय पहलक आवश्यकता अछि — नहि तऽ एक प्रगतिशील भाषा संस्थानक खालीपन मैथिली भाषा-संस्कृति पर सरकारी उदासीनता आ आघात रूप मे देखल जा रहल अछि।

दीयाबाती पर प्रधानमंत्री दिस सँ राष्ट्र केर नाम संदेश - मैथिली भाषा

2025-10-20T11:30:00.000+05:30

प्रधानमंत्री नरेन्द्र मोदी दीयाबाती केर शुभ अवसर पर देशवासी नामे पत्र लिखलनि। पीएम शुभकामना देइत पत्र मे राम मंदिर निर्माण पश्चात दोसर दीयाबाती केर चर्चा करैत नक्सलवाद केर समाप्तिक जिकर केलनि आ कहलनि जे देशक दूर-दराज स्थित कतेको क्षेत्र मे पहिल बेर दीयाबाती पाबनि मनाओल जा रहल अछि।

प्रधानमंत्री अपन चिट्ठी मे जीएसटी दर मे गिरावट, आत्मनिर्भर भारत आ स्वदेशी कें बढ़ावा देबाक विषय मे सेहो उल्लेख केने छथि। पाठक कें बतबैत हर्ष बोध भऽ रहल अछि जे प्रधानमंत्री भारतक विभिन्न भाषा मे देल गेल अपन पत्र कें मैथिली भाषा मे सेहो प्रेषित केलनि अछि। मैथिली भाषा मे प्रधानमंत्री केर संदेश एतय पढ़ल जा सकैत अछि।

हमर प्रिय देशवासी लोकनि,

उर्जा आ उमंग सँ भरल दीयाबातीक एहि पावन पर्व पर अपने सभकें हमर बहुत-बहुत शुभकामना। अयोध्या मे राम मंदिरक भव्य निर्माणक बाद ई दोसर दिवाली अछि। प्रभु श्रीराम हमरा मर्यादाक पालन करब सिखबैत छथि आ संगहि हमरा अन्याय सँ लड़बाक सीख सेहो देइत छथि। एकर जीवंत उदाहरण हमरा लोकनि किछु मास पूर्व ऑपरेशन सिंदूर मे देखलहुँ। ऑपरेशन सिंदूर मे भारत मर्यादाक पालन सेहो कएलक आ अन्यायक बदला सेहो लेलक।

एहि बेरक दिवाली एहि लेल सेहो विशेष अछि किएक तऽ देशक कतेको जिला मे दूर-दूरक क्षेत्र मे पहिल बेर दिवालीक दीप जरत। ई ओ जिला थिक, जतऽ नक्सलवाद आ माओवादी आतंक कें जड़ि सँ मेटा देल गेल अछि। बीतल दिन मे हम देखलहुँ जे कोना अनेक व्यक्ति हिंसाक बाट छोड़ि कऽ विकासक मुख्य धारा मे सम्मिलित भेलाह आ ओ देशक संविधानक प्रति आस्था व्यक्त कएलनि। देशक, ई बड्ड पैघ उपलब्धि अछि।

एहि ऐतिहासिक उपलब्धि कें बीतल किछु दिन पहिने देश मे नेक्स्ट जनरेशन रिफॉर्म केर सेहो शुरूआत भेल अछि। नवरात्रक पहिल दिन जीएसटीसक कम दर लागू भेल। जीएसटी बचत उत्सव मे देशवासी कें हजारो-करोड़ टाका बचि रहल छनि।

कतेको संकट सँ गुजरि रहल विश्व मे, हमर भारत स्थिरता आ संवदेनशीलता दुनूक प्रतीक बनि कऽ उभरल अछि। आबएवला किछु समय मे हम दुनिया केर तेसर सभ सँ पैघ अर्थव्यवस्था सेहो बनएवला छी।

विकसित आ आत्मनिर्भर भारतक एहि यात्रा मे एक नागरिकक रूप मे हमर दायित्व अछि हम देशक प्रति अपन कर्तव्यक निर्वहन करी।

हम स्वदेशी अपनाबी आ गर्व सँ कही-ई स्वदेशी थिक। हम एक भारत श्रेष्ठ भारतक भावना कें बढ़ाबी। हम हर भाषाक सम्मान करी। हम स्वच्छताक पालन करी। हम अपन स्वास्थ्य कें प्राथमिकता दी। भोजन मे तेलक मात्रा दस प्रतिशत कम करी आ योग कें अपनाबी। ई सभ प्रयास हमरा लोकनि कें आओर गति सँ विकसित भारत दिस लऽ जाएत।

दिवाली हमरा इहो सिखबैत अछि जे जखन एक दीप दोसर दीप कें जरबैत अछि, तऽ ओकर प्रकाश कम नहि होइछ अपितु आओर बढैत अछि। एहि भावना सँ, हमरा लोकनि कें सेहो एहि दिवाली पर अपन समाज मे, अपन लऽगपास स‌द्भाव, सहयोग आ सकारात्मकताक दीप जरेबाक अछि। एक बेर पुनः अपने सबकें दीपपर्वक बहुत-बहुत शुभकामना।

अपनेक

नरेन्द्र मोदी

फजलुर रहमान हाशमी : मैथिली भाषा ओ साहित्य केर सुच्चा सिपाही

2025-07-20T15:11:00.009+05:30

बेगूसराय केर धरती साहित्य रत्न सँ भरल-पूरल अछि. दिनकर जहिना भारतीय साहित्य कें आलोकित केलनि, ओहिना फजलुर रहमान हाशमी (1940-2011) मैथिली भाषा कें अपन अनुपम लेखनी सँ सिक्त केलनि. भवानंदपुर गाम केर निवासी हाशमी अपन लेखनी सँ मैथिली भाषा-साहित्य मे सुनाम अर्जित केलनि.

फजलुर रहमान हाशमी (Fazrul Rahman Hashami) भारतीय-दर्शन आ वैदिक-साहित्य केर नीक अध्ययन केने छलाह. हिनक काव्य-रचना मे अनेक पौराणिक-प्रसंग प्रमुखता सँ देखबा मे अबैत अछि. हाशमी साहित्यिक मंच केर कुशल आ लोकप्रिय संचालक छलाह. मिथिलाक माटि-पानि सँ हिनक लगाओ ततेक छलनि जे भूमिजा सीता कें केंद्र मे रखैत रचना केलनि.

मैथिली भाषा कें व्यापक दृष्टि सँ समृद्ध केनिहार हाशमी एक उदाहरण प्रस्तुत केलनि जे भाषा जाति-धर्म केर नै, अपितु भूमि सँ जुड़ल होइत अछि. हिमालय सँ ल' गंगाधरिक भूमि मे पसरल मिथिला केर समस्त जनमानस केर भाषा मैथिली वा ओकर उपभाषा सब अछि.

मैथिली मे हिनक पहिल पोथी 'हरवाहक बेटी' प्रकाशित भेल छल जाहि मे माँ सीता केर बनवास-प्रसंग मुक्तक काव्य रूप मे लिखल गेल अछि. दोसर कविता संग्रह 'निरमोही' नाम सँ प्रकाशित भेल छलनि. हिनक कविता सब मैट्रिक, इंटर आ बीए केर पाठ्यक्रम मे शामिल कएल गेल. मैथिली हिनक परिचिती बनि गेल छलनि, जखन कि ओ उर्दू आ हिन्दी साहित्य मे सेहो रचना माध्यम सँ योगदान करैत छलाह.

हिनक साधना-समर्पण ओ प्रतिभा कें मिथिलाभरि मे खूब सम्मान सँ देखल जाइत अछि. मैथिली भाषा मे हिनक योगदान कें देखैत हिनका साहित्य अकादेमी अनुवाद पुरस्कार (2002) सँ सम्मानित कएल गेलनि. ओतहि हाशमी साहित्य अकादेमी मैथिली सलाहकार समिति केर सदस्य सेहो बनाओल गेल छलाह. संस्कृत विश्वविद्यालय (दरभंगा) दिस सँ हिनका आचार्य केर उपाधि भेटल छल.

आचार्य हाशमी साहित्य अकादेमी दिस सँ अंग्रेजी, हिन्दी आ उर्दू भाषा केर अनेक किताब कें मैथिली भाषा मे अनुवाद केने छथि. जाहि मे मीर तकी मीर, फिराक गोरखपुरी आ अबुल कलाम आजाद आदि महत्वपूर्ण अछि.

मैथिली भाषा मे हिनक मौलिक प्रकाशित कृति:

1. हरवाहक बेटी (खंडकाव्य)
2. निर्मोही (कविता संग्रह)

मैथिली भाषा मे अनुवादित प्रकाशित कृति:
1. अब्दुल कलाम आजाद (अनुवाद - साहित्य अकादेमी)
2. मीर तकी मीर (अनुवाद - साहित्य अकादेमी)
3. फिराक गोरखपुरी (अनुवाद - साहित्य अकादेमी)

हिन्दी भाषा मे मौलिक प्रकाशित कृति:
1. रश्मि रशि (कविता संग्रह)
2. मेरी नींद तुम्हारे सपने (गजल संग्रह)

मिथिलाक एहि महान कलमकार केर पुण्यतिथि पर हिनक किछु पांति पढ़ैत श्रद्धांजलि अर्पित करैत छी. मिथिला समाजक तत्कालीन आर्थिक विपन्नता कें देखैत हाशमी लिखैत छथि —

पुत्रक आवाजसँ करेजा कांपि गेल

राशन नहि छैक बाबू

भिनसरसँ भूखले छी

आ हम गमछी कान्ह पर राखि कs

बढि रहल छी दोकान दिस

उधारक खातिर

- - - - -

प्रस्तुतिः मिथिमीडिया संपादकीय विभाग

पुनौराधाम मे बनाओल जाएत भव्य जानकी मंदिर, न्यास समिति गठित

2025-06-27T15:00:00.002+05:30

मिथिलाक सीतामढ़ी जिला स्थित पुनौराधाम मे माँ जानकी जन्मस्थली पर भव्य मंदिर निर्माण केर घोषणा सं लोक उत्साहित अछि. मुख्यमंत्री नीतीश कुमार केर घोषणा उपरांत एहि काज हेतु एक न्यास समिति बना देल गेल अछि. मुदा विधानसभा चुनाव सं ठीक पहिने एहि उपक्रम कें किछु लोक संदेह ओ राजनीतिक दृष्टि सं देखि रहल अछि.

उपमा तोहर देब ककरा सम

2025-06-15T21:30:00.008+05:30

[मातृभाषा मैथिली हेतु समर्पित व्यक्तित्व शरदिन्दु चौधरी केर देहावसान सँ साहित्यिक लोकनि मे एकटा शोक एकटा हताशा व्याप्त अछि. हुनक व्यक्तित्व ओ कृतित्व केर चर्चा सँ सोशल मीडिया पाटल अछि, ओतहि हुनक अनुपस्थिति सँ मैथिली भाषा-साहित्य मे जे रिक्तता आएल अछि, से भरब असंभव सन लगैत देखल जा रहल अछि. साहित्यिक राज कुमार मिश्र मैथिली केर एहि दिवंगत सिपाही केर विभिन्न योगदान पर इजोत देलनि अछि.]

लेखक शरदिन्दु

मैथिली साहित्य मे शरदिन्दु चौधरी (जन्मः 7 अक्टूबर 1956 - मृत्युः 11 जून 2025) मूलतः एक व्यंग्यकार रूप मे स्थापित छलाह. समाज मे व्याप्त पाखंड-प्रपंच कें ओ लेखनक लक्ष्य बनौलनि. बड़ अजगुत देखल, जँ हम जनितहुँ, करिया कक्काक कोरामीन, गोबर गणेश, बात-बात मे बात इत्यादि हुनक प्रकाशित पोथी थिक.

कतोक मैथिली साहित्यकार आ संस्थाक लोक जे हुनक साहित्यिक व्यंग्यवाण सँ पीड़ित छलाह से हुनका सँ जीवनभरि कन्नी कटैत रहलाह. ई हुनक व्यंग्य लेखनक सफलते कही. वैयक्तिक व्यवहार मे ओ खांटी मैथिलीसेवीक प्रति फूल सन कोमल आ छद्म मैथिलीसेवीक प्रति बज्र सन कठोर बनि जाथि.

पत्रकार शरदिन्दु

मैथिली लेखक होएब एक बात थिक आ मैथिली लेखक संग पत्रकार होएब विशिष्ट बात थिक. मैथिलीक पत्रकारिता हुनक सोनित मे छल. पिता प्रख्यात साहित्यकार स्वनामधन्य सुधांशु शेखर चौधरी मिथिला मिहिर पत्रिकाक संपादक रहथिन. हुनका लोक संपादकजी नामे जनै छलनि. एखन त' मैथिलीक देखनुक आ हिलसगर दैनिक पत्रो बहराइत अछि जे अन्यान्य भाषाक पत्र सँ उन्नैस नै बीसे होएत मुदा आइ सँ पचीस बरख पूर्व साहित्य संगे साहित्येतर विषय कें कभर करएबला मैथिली मे कोनो एकटा पत्र-पत्रिका नै छल. तकर पूर्ति कएने रहथि यएह शरदिन्दु चौधरी!

हिनके संपादकत्व मे फरबरी 2000 मे मैथिलीक द्वैमासिक पत्रिका 'समय-साल' बहराएब आरंभ भेल जे 13-14 साल धरि प्रकाशित होइत रहल. दाम हिसाबे ई बेस मोटगर-गतगर होइत छल. एहि मे क्षेत्रीय, राष्ट्रीय-अंतरराष्ट्रीय महत्वक विविध आलेख सभ प्रकाशित होइत छल. कथा-कविता आ पोथीक पाठकीय मन्तव्य सेहो छपए मुदा से अनुपातहि मे. समय-सालक जनप्रियता एहने छल जे रेलवे बुक स्टॉल आ बस स्टैंड पर सहजहिं उपलब्ध होइत छल. दिल्ली मे सैकड़ो पत्रिका बिकाइत छल. शरदिन्दु चौधरी पटना सँ प्रकाशित हिन्दी दैनिक आर्यावर्त आ मैथिली साप्ताहिक मिथिला मिहिर मे सेहो काज कएने रहथि.

प्रकाशक शरदिन्दु

मैथिली पोथीक प्रकाशन सदा सं कठिनाह रहल अछि. लेखक अपन पोथी कहुना छापिए लैत अछि. मुदा वितरण बेर मे थस्स लए लैत अछि. छपलाहा पोथीक कोन गति होइत छैक से कहबाक प्रयोजन नै, सभ बुझिते होएब. किछु हित-अपेक्षित मे बिलहाइत अछि आ तकर बाद घरक कोनो कोन-कोनटा आ मचान पर रखाइत अछि. प्रकाशन अर्थ थिक पोथी कें छापि ओकरा सम्यक वितरण करब, ओकरा प्रकाश मे आनब. पोथी छापि ओकरा पुनः बाकस-झप्पा मे बंद कए देब प्रकाशनक उद्देश्य कें पूरा नै करैत अछि. एही उद्देश्य सँ शरदिन्दु चौधरी वर्ष 1999 मे 'शेखर प्रकाशन' केर स्थापना कएलनि जे मैथिली भाषा-साहित्य लेल समर्पित छल. हुनका अपन प्रेस छलनि. पटना रेलवे जंक्शन लग पोथीक स्टॉल छलनि जतय ओ स्वयं बैसथि.

देश मे मैथिलीभाषीक कतहु जुटान संभावित होइ 'शेखर प्रकाशन' हाजिर भेटैत छल बिनु नफा-नोकसान केर परबाहि कएने. कएक बेर त' जाइ-अबैक खर्चो नै उपर होइक शेखर प्रकाशन कें. विद्यापति समारोह आ पुस्तक मेला सभ मे शेखर प्रकाशनक उपस्थिति सँ मैथिलीभाषीक हृदय पुष्ट होइत छल. मैथिली पोथी वितरणक एहि यज्ञ मे शिव कुमारजी अदौकाल सं एक याज्ञिक रहलाह अछि. मैथिली पोथी नै भेटैत छै तकर शिकाइत पर 'मिथिमीडिया' (मैथिलीक डिजिटल पत्रिका) सं गप करैत एक बेर शरदिन्दु चौधरी कहने रहथि- "ई लांछन जे हमरासभ पर अछि जे मैथिली पोथी नै भेटैत अछि त' एहि बजार मे हम तैं बैसल छी जे ओ लांछन सँ कम सँ कम दूर रही हम सभ." आ' ई काज शरदिन्दु चौधरी बिनु हानि-लाभ कें करैत रहलाह.

एहि मैथिली प्रकाशन आ वितरण मे हुनक कतेक टाका बूड़ल तेकर अत्ता नै. दुर्लभ मैथिली पोथीक खोज हुनके लग सं आरंभ होइत छल आ हुनके लग खतम भ' जाइ छल. मैथिली हुनक वृत्ति आ मैथिलीए हुनक साधना छल. अनेको लोक कें ओ मदति कएलनि जे आइ पैघ लेखक -विचारक, शिक्षक आ सरकारी अधिकारी छथि.

हुनक विरोधिओ ई गछैत अछि जे अर्थ आ समांगक दृष्टि सं लचरल (एकरो कारण मैथिलीए छल जाहि लेल ओ हाड़ गलबैत रहलाह ) रहितहुँ शरदिन्दु चौधरी अपन जीवन काल मे मैथिली लेखन, मैथिली पत्रकारिता आ मैथिली प्रकाशन क्षेत्र मे से कीर्तिमान स्थापित कएलनि अछि जे आबएबला समय मे असंख्य मैथिलीसेवी हेतु प्रेरक होएत!

अयोध्या मे राम दरबार स्थापित, पाहुन संग जानकी विराजमान

2025-06-05T12:11:00.072+05:30

Ayodhya Ram Mandir: अयोध्या राम मंदिर मे गंगा दशहरा केर शुभ मुर्हूत पर राम दरबार केर प्राण प्रतिष्ठा कएल गेल. एहि अवसर पर सीएम योगी आदित्यनाथ विशेष रूप सँ उपस्थित छलाह. राम दरबार सहित आठ देव विग्रह केर प्राण प्रतिष्ठा गंगा दशहराक शुभ अवसर पर भोर 11:25 सँ 11:40 बजे धरि अभिजीत मुहूर्त मे संपन्न भेल. ब्रह्ममुहूर्त सँ मंदिर प्रांगण मे पंडित, आचार्य आ संत लोकनिक समवेत स्वर, शंखध्वनि व हवन केर गमक एक आध्यात्मिक वातावरण तैयार केने छल.

राम दरबार कें सजओनिहार प्रख्यात मूर्तिकार सत्य नारायण पांडेय कहलनि अछि जे एक हजार साल धरि राम दरबार केर मूर्ति सुरक्षित रहत. जाहि पाथर सँ मूर्ति सब बनल अछि से जतेक बेर धोअल जाएत ततेक चमकैत रहत. राम मंदिर ट्रस्ट केर महासचिव चंपत राय पाथर चयन मे वैज्ञानिक लोकनिक सेहो मदति लेने छलाह.

मूर्तिकार सत्यनारायण पांडेय कहलनि जे सिंहासन सहित राम दरबार केर मूर्ति केर ऊंचाइ कुल सात फुट होएत. सिंहासन करीब साढ़े तीन फुट ऊंच अछि, जखन कि सीताराम केर विग्रह साढ़े चारि फुट केर अछि. मूर्ति सिंहासन पर स्थापित कएलाक बाद ऊंचाइ एक सँ ड़ेढ फुट कम भेल अछि. एहना मे कुल ऊंचाइ करीब सात फुट धरि रहत. ओतहि हनुमान आ भरत केर मूर्ति बैसल मुद्रा मे छनि, जिनक ऊंचाइ अढाइ फुट अछि. लक्ष्मण व शत्रुघ्न केर मूर्ति ठाढ़ मुद्रा मे छनि, जिनक ऊंचाइ तीन-तीन फुट छनि.

मिथिला केर जनमानस मे जे निराशा छल से अंततः समाप्त भेल. अयोध्या मे जखन रामलला केर विग्रह स्थापित भेल त लोक सीता केर मूर्ति नहि पाबि असंतोष व्यक्त करैत छलाह. भक्त लोकनि केर कहब छलनि जे सीता बिनु राम अधूरा छथि. ओना जन्मस्थान पर पाहुन राम केर बाल अवस्था सँ जुड़ल मूर्ति स्थापना केर पश्चात राम दरबार मे जानकी कें पाबि लोक हर्ष प्रकट क रहलाह अछि. एख तरहें ई भक्तक मनोभावना केर पूर्ति जकां लागि रहल अछि.

राम दरबार केर स्थापना अयोध्या मे अबस्से होइत कारण बेसीभाग राममंदिर मे रामदरबार केर झांकी भेटैत अछि. मिथिलाक लोक जखन अयोध्या पहुंचताह त' पाहुन राम संग जानकी केर दर्शन करैत संतोष आ सुख केर अनुभूति करताह. राम दरबार मे राम-जानकी संग लक्ष्मण, भरत, शत्रुघ्न सहित प्रिय हनुमान सेहो विराजित छथि.

'कविक आबा' कविता संग्रह केर लोकार्पण ओ कविगोष्ठी

2025-04-27T23:02:00.021+05:30

डॉ. सन्तोष कुमार झा लिखित मैथिली काव्य संग्रह 'कविक आबा' केर लोकार्पण 27 अप्रैल 2025 (रविदिन) कें कोलकाता स्थित बड़ाबाजार लाइब्रेरी मे संपन्न भेल. साहित्यिक मंच 'संपर्क' दिस सं आयोजित एहि कार्य्रकम मे उक्त पोथी पर विस्तार सं चर्च-विमर्श कएल गेल.

प्रसिद्ध वैज्ञानिक ओ साहित्यकार डॉ. योगेन्द्र पाठक वियोगी पहिल सत्र केर अध्यक्षता केलनि. एहि सत्र मे नवारम्भ द्वारा प्रकाशित कविता संग्रह 'कविक आबा' कें लोकार्पित कएल गेल. साहित्य अकादेमी भाषा सम्मान सँ सम्मानित, संस्कृत एवं मैथिली दुनू भाषा मे अपन पहिचान रखनिहार डॉ. उदयनाथ झा अशोक, वरिष्ठ कवि ओ साहित्य अकादेमी मे मैथिली परामर्श मंडल सदस्य डॉ. विद्यानंद झा, वरिष्ठ कवि बिनय भूषण ओ साहित्य अकादमी सँ सम्मानित युवा कवि चंदन कुमार झा अपन-अपन अमूल्य ओ सारगर्भित विचार प्रस्तुत केलनि.

डॉ. उदयनाथ झा अशोक जनओलनि जे वर्तमान परिस्थिति मे एहि तरहक काव्यक अत्यधिक आवश्यकता अछि जे देश एवं समाज कें नव दिशा प्रदान करए एवं काव्य गुणक अनुरूप हो. समकालीन कविता मे एहि कविता संग्रहक उपयोगिता कें देखबैत वरिष्ठ कवि बिनय भूषण कहलनि जे एखन देश जाहि परिस्थिति सँ लड़ि रहल अछि ई कविता संग्रह तकर समयानुकूल अछि.

डॉ. विद्यानंद झा एहि कविता संग्रह कें गाम, समाज, खेत, मजदूर, किसान, देश एवं राष्ट्र सँ जुड़ल समस्या कें देखाबएबला बतौलनि. अपन विचार रखैत चंदन कुमार झा कवि कें निष्पक्ष भाव सँ लिखबाक एवं चुप नहि रहबाक सलाह देइत कहलनि जे ई काव्य संग्रह जाहि मे विविध विधाक कविता संकलित अछि, समाजोपयोगी साबित होएत तथा एकटा सार्थक काज सिद्ध होएत.

डॉ. योगेन्द्र पाठक वियोगी एहि कविता संग्रह मे सम्मिलित कविता 'सिमरियाक मेला' केर प्रशंसा करैत बजलाह जे एहि तरहक प्रभावी कविता ऑडियो बुक रूप मे प्रस्तुत कएल जेबाक चाही. जाहि सँ सुगमतापूर्वक पाठक एवं श्रोताक पहुंच मैथिली कविता धरि बनि सकै आओर मैथिली कविताक पाठक एवं श्रोता कें सहज रूपें सामग्री उपलब्ध भ' सकै.

कार्यक्रमक दोसर सत्र मे वरिष्ठ साहित्यकार लक्ष्मण झा सागर केर अध्यक्षता मे कविगोष्ठी आयोजित भेल. हरिवंश झा (बालकवि), कामेश्वर झा कमल, चंदन कुमार झा, शैल झा सागर, राजीव रंजन मिश्र, पवन कुमार झा (गुमनाम फरिश्ता), रंजना झा, हिमाद्रि मिश्र, नीलम झा, अमरनाथ भारती, नबोनाथ झा, सुधीर कुमार झा, विजय इस्सर, बिनय भूषण ओ रूपेश त्योंथ अपन रचना पाठ प्रस्तुत केलनि.

कार्यक्रम मे आएल अतिथि लोकनि कें स्वागत मे पौधा देल गेलनि एवं अन्त मे कवि डॉ. सन्तोष कुमार झा सभक प्रति अपन आभार व्यक्त कयलनि. कार्यक्रमक संचालन मिथिलेश कुमार झा केलनि. कार्यक्रम केर डिजिटल मीडिया सहयोगी मिथिमीडिया द्वारा कार्यक्रम केर किछु अंश सोशल मीडिया पर प्रसारित कएल गेल.

कार्यक्रमक अंत मे हेमनिए मे दिवंगत भेल मैथिलीक सुप्रसिद्ध कवि, मैथिली मे मुक्तछंद-धाराक पुरोधा स्वनामधन्य कीर्तिनारायण मिश्रक स्मरण मे दुइ मिनटक मौन धारण कऽ हुनका श्रद्धांजलि देल गेलनि.

जुड़शीतल : जुड़ल रहू, जुड़ाएल रहू 🌻

2025-04-15T22:29:00.007+05:30

आइ भोरे निन्न नै फूजल। जुड़शीतल कें पितामही अनरओखे ठंढा जल सँ माथ पर थप्पा देइत छलीह आ निन्न टुटैत छल। ओहि सभ दिन मे बाबरी सुतलो मे सोटले रहैत छल। किशोरवयक समय छल, हाथ सँ बाबरी सरियओबैत उठैत छलहुं। पितामह कहितथि, चलह आब हमरा संगे जुड़बै छी गाछ-बिरिछ कें। आ विदा भ' जाइ छलहुं पोखरि भीड़ पर स्थित गाछी, हत्ता, धूमा गाछतर, बरहरी भीड़ पर - जुड़बैत चलैत छलहुं ओहि गाछ-बिरिछ कें जे सालभरि प्राणवायु, फल-फलहरी, जाड़नि-काठी सँ अनवरत जुड़बैत रहैत छल सर-समांग ओ सकल समाज कें। हमहीं नै, गामक लगभग गोटेक भोरका रूटीन यएह छल एहि पावनि दिनक। गाम-घर मे आब एहि दिन की-केना होइ छै नै जानि!

गाछ कें पोसब, फल लगाएब मिथिला मे परम्परा सन रहल छै। गाम आब तेजी सँ शहरक अनुकरण मे लागल अछि, से स्थिति परिवर्तित भेल जा रहल छै। सुनैत छलियै जे हमर गाम मे पहिने लोक एहि दिन शाही शिकार पर जाइ छल। मुदा जंगल कम भेने शाही उपटि गेलै आ शिकार खेलबाक प्रथा सेहो बन्ने सन भ' गेलैक।

हमरा मोन अछि एक बेर सेहन्ते समवयसू किछु मित्रक संग चिड़ै-चुनमुन केर शिकार पर हमहूं निकलल छलहुं। कएक दिन पहिने सँ तीर-कमान बनेबाक उपक्रम चलल छल। आध दर्जन कांच-कुम्मर किशोर आम गाछ पर स्थित उल्लू खोंता पर अटैक केने छलियै। सुनैत छलियै जे उल्लू कें दिन मे नै सूझैत छै मुदा ओ उल्लू जोड़ा हमरा सभ मित्र कें बेरा-बेरी टीक नोचि क' ल' गेल। उल्लू दंपत्ति अपन संतति रक्षा लेल बेस आक्रामक भेल छल।

हम सब पड़ाइत-पड़ाइत बरहरी भीड़ पर शरण लेने छलहुं। बहुत दिन धरि हमर संगी-सखा सब मे उल्लूक आतंक रहल छल। हम सब गाछी दिस जाइ त' ओ उल्लू हमरा सभ कें देखि जोर-जोर सं बाजए आ चांगुर-चोंच सं अटैक करए। एहना ओ तखन करए जखन कि हम सभ ओकर किछु बेसी नोकसान नै क' सकल छलियै, कने उछन्नर धरि देने छलियै। ई सिलसिला किछु मास धरि चलल छल, रसेरसे से कम भेल।

संतति रक्षा, पोषण केर भाव प्राणी मात्र मे प्रकृति देने अछि। ई पृथ्वी, ई गाछ-बिरिछ, प्रकृति-पर्यावरण जीव मात्र कें अपन संतान जकां पोषैत अछि। एकर रक्षा करब त' सखा-संतति, आगामी पीढ़ी सेहो जुड़ाइत रहत।

एहि दिनक कादो खेलब मोन पड़ैत अछि त' दुखी भ' जाइ छी। बहुत किछु आब छुटि सन गेल अछि। छुटल पुनि भेटैत नै छै, बीतल समय घुरैत नै छै। बस स्मरण क' हिए कनेक हल्लुक अबस्से भ' जाइत अछि।

मिथिला नववर्ष, जुड़शीतल केर हार्दिक शुभेच्छा। जुड़ल रहू, जुड़ाएल रहू!

— रूपेश त्योंथ

गोस्वामी तुलसीदास विरचित श्री राम स्तुति - श्री रामचन्द्र कृपालु भजुमन - Shri Ram Stuti

2025-04-06T13:26:00.005+05:30

॥दोहा॥

श्री रामचन्द्र कृपालु भजुमन
हरण भवभय दारुणं।
नव कंज लोचन कंज मुख
कर कंज पद कंजारुणं॥१॥

कन्दर्प अगणित अमित छवि
नव नील नीरद सुन्दरं।
पटपीत मानहुँ तडित रुचि शुचि
नोमि जनक सुतावरं॥२॥

भजु दीनबन्धु दिनेश दानव
दैत्य वंश निकन्दनं।
रघुनन्द आनन्द कन्द कोशल
चन्द दशरथ नन्दनं॥३॥

शिर मुकुट कुंडल तिलक
चारु उदारु अङ्ग विभूषणं।
आजानु भुज शर चाप धर
संग्राम जित खरदूषणं॥४॥

इति वदति तुलसीदास शंकर
शेष मुनि मन रंजनं।
मम् हृदय कंज निवास कुरु
कामादि खलदल गंजनं॥५॥

मन जाहि राच्यो मिलहि सो
वर सहज सुन्दर सांवरो।
करुणा निधान सुजान शील
स्नेह जानत रावरो॥६॥

एहि भांति गौरी असीस सुन सिय
सहित हिय हरषित अली।
तुलसी भवानिहि पूजी पुनि-पुनि
मुदित मन मन्दिर चली॥७॥

॥सोरठा॥

जानी गौरी अनुकूल सिय
हिय हरषु न जाइ कहि।
मंजुल मंगल मूल वाम
अङ्ग फरकन लगे॥

गायत्री मंत्र - सावित्री मंत्र : Gayatri Mantra - Savitri Mantra अर्थसहित वर्णन

2025-02-03T13:32:00.000+05:30

गायत्री मंत्र:
ऊँ भूर्भुव: स्व: तत्सवितुर्वरेण्यं भर्गो देवस्य धीमहि। धियो यो न: प्रचोदयात्।।

सावित्री मंत्र:
ऊँ भू: ऊँ भुवः ऊँ स्वः ऊँ महः ऊँ जनः ऊँ तपः ऊँ सत्यम ऊँ

साहित्यिक मिथिलेश कुमार झा कें 'बाबूसाहेब चौधरी सम्मान'

2025-01-19T22:43:00.004+05:30

प्रत्येक वर्ष जकाँ एहू बेर मिथिला सेवा ट्रस्ट, अश्विनीनगर, बागुइआटी, कोलकाता द्वारा 18 आ 19 जनवरी 2025 केँ द्वि-दिवसीय कार्यक्रमक आयोजन स्थानीय बंधुमहल क्लबक प्रांगणमे कएल गेल. कार्यक्रमक पहिल दिन हनुमान चालीसाक सामूहिक पाठ एवं अष्टयाम संकीर्तन भेल. दोसर दिन मिथिला विभूति पर्व समारोह आयोजित भेल.

कार्यक्रमक आरंभमे अतिथि लोकनि ओ संस्थाक पाँचटा सदस्य मिलि विद्यापतिक स्थापित प्रतिमा पर माल्यार्पण केलनि. भगवतीक गीत जय-जय भैरवि गओलनि सुश्री स्नेहा झा. स्वागत वक्तव्य श्री विजयकांत झा देलनि. संस्थापक अध्यक्ष श्री रमाकान्त झा अपन उद्गार व्यक्त करैत संस्थाक काजक चर्चा केलनि। एहि अवसर पर संस्था द्वारा घोषित सम्मान प्रदान कएल गेल.

एहि बर्ख श्री मिथिलेश कुमार झा (साहित्यकार) केँ बाबूसाहेब चौधरी सम्मान, डाक्टर रामसेवक ठाकुर (कवि ओ रंगकर्मी) केँ जानकी संतति सम्मान, श्री शिवचरण शुक्ल (समाजसेवी) केँ मिथिला संकीर्तन मंडली सम्मान, श्रीमती पियाली सरकार (पार्षद) केँ मिथि-बंग गौरव सम्मान सँ सम्मानित कएल गेलनि. सम्मानित अतिथि लोकनि अपन-अपन उद्गार व्यक्त केलनि.

प्रधान वक्ता डाक्टर अनमोल झा संस्थाक सामाजिक गतिविधि संगहि मैथिली भाषा ओ साहित्यक हेतु कोलकाताक महत्वक उल्लेख केलनि. एहि अवसर पर श्री राधेश्याम झा द्वारा लिखल नाटक "हमर दुखक नहि ओर" केर लोकार्पण भेल.

कार्यक्रमक दोसर सत्रमे गीतनादक कर्णप्रिय आयोजन भेल. आयोजन स्थल पर गज्जल दर्शक-श्रोताकेँ अपन सुमधुर गायनसँ तृप्त केलनि श्री कुंजबिहारी मिश्र, सुश्री रचना झा, श्री माधव राय आ श्री हेमकान्त झा प्यासा. मंच उद्घोषक रहथि श्री रामसेवक ठाकुर.

अकासतर बैसकी केर नव संयोजक 'गुमनाम फरिश्ता'

2025-01-12T23:23:00.000+05:30

नन्दन प्रांगण मे अकासतर बैसकी केर दशम वार्षिक पर्व आयोजित भेल. श्री उदय शंकर मिश्र जी (दरभंगा) केर अध्यक्षता मे आयोजित बैसकी मे डेढ दर्जन सं बेसी साहित्य सिनेही लोकनि उपस्थित भ' कविता पाठ केलनि. सालक पहिल गोष्ठी मे संयोजक डा. संतोष कुमार झा एहि साल हेतु संयोजनक भार सर्वसम्मति सं श्री पवन कुमार झा (गुमनाम फरिश्ता) कें देलनि अछि. नव संयोजक कें हार्दिक बधाइ!

'रामलोचन ठाकुर : व्यक्तित्व ओ कृतित्व' पोथी लोकार्पण व 'सम्पर्क' मासिक बैसार

2025-01-05T22:59:00.002+05:30

संपर्क (कोलकाता) क जनवरी मासक बैसार आयोजित भेल। बेरूपहर 4 बजेसँ प्रोग्रेसिभ हाॅल (विवेकानंद रोड) मे आयोजित ई बैसार दू सत्रमे भेल। पहिल सत्रमे श्रद्धेय रामलोचन ठाकुर पर केंद्रित पोथी "रामलोचन ठाकुर (व्यक्तित्व ओ कृतित्व)" केर विमोचन आ दोसर सत्रमे संपर्कक नियमित बैसार भेल जाहिमे रचनाकार लोकनि अपन-अपन नव रचनाक पाठ करैत गेलाह।

कार्यक्रमक आरंभमे रामलोचन जीक मढ़ाओल फोटो पर माल्यार्पण कऽ अपन भावपूर्ण श्रद्धांजलि अर्पित केलनि रामलोचन जीक पत्नी श्रीमती सीता ठाकुर। तत्पश्चात उपस्थित समस्त गोटे ठाकुर जीकेँ पुष्पांजलि अर्पित केलनि। एहि विमोचन सत्रक अध्यक्षता केलनि प्रसिद्ध वैज्ञानिक एवं नामी साहित्यकार डाक्टर योगेन्द्र पाठक वियोगी। आसन ग्रहणक बाद मंचासीन लोकनिक स्वागत पुष्पगुच्छसँ कएल गेल। स्वागतक बाद श्री नवीन चौधरी जीक संपादनमे संपर्क द्वारा प्रकाशित पोथी "रामलोचन ठाकुर (व्यक्तित्व ओ कृतित्व)"क विमोचन श्रीमती सीता ठाकुर केलनि। एहि अवसर पर 'देसकोस'क संपादनसँ जुड़ल वयोवृद्ध मैथिलीसेवी श्री सत्यनारायण झा रामलोचन जीक व्यक्तित्व ओ क्रियाकलाप संदर्भित अपन उद्गार प्रस्तुत केलनि। मधुबनीसँ आएल प्रसिद्ध मैथिली अभियानी ओ साहित्यकार श्री दिलीप कुमार झा विमोचित पोथी पर अपन मंतव्य रखलनि। एहि पोथीक संपादक तथा प्रसिद्ध साहित्यकार श्री नवीन चौधरी अपन संस्मरण सुनबैत भावविह्वल भऽ गेलाह। एहि पोथीक हेतु सामग्रीक ओरियानमे ओ श्री केदार कानन एवं श्री नचिकेताक सहयोगकेँ सेहो रेखांकित केलनि। श्रीमती सीता ठाकुर अपन भावपूर्ण आशीर्वचन देलनि। अध्यक्षीय वक्तव्यमे वियोगी जी एहि पोथीक संकलन ओ प्रकाशन संदर्भित अपन अनुभव आ उद्गार व्यक्त केलनि।

दोसर सत्रक अध्यक्षता प्रसिद्ध साहित्यकार श्री लक्ष्मण झा सागर केलनि। पुष्पगुच्छसँ हुनक स्वागत कएल गेल। एहि सत्रमे संपर्कक नियमित मासिक बैसार भेल जाहिमे रचनाकार लोकनि अपन-अपन नव आ अप्रकाशित रचनाक पाठ करैत गेलाह। एहिमे श्रीमती रंजना झा (कविता), श्रीमती नीलम झा (कविता), श्रीमती हिमाद्रि मिश्र (गीत), सर्वश्री विजय ठाकुर (कविता), श्रवण कुमार (कविता), मायानंद मिश्र (कविता), संदीप कुमार झा प्रदीप (कविता), अशोक झा भोली (गीत), पवन कुमार मिश्र (कविता), नवोनाथ झा (गीत), कामेश्वर झा कमल (कविता), चंदन कुमार झा (कविता), विजय इस्सर वत्स (कविता), अमरनाथ झा भारती (कविता), पवन कुमार झा 'गुमनाम फरिश्ता' (गजल), राजीव रंजन मिश्र (गजल), संतोष कुमार झा (कविता), अनमोल झा (लघुकथा), विद्यानंद झा (कविता) तथा लक्ष्मण झा सागर (कविता) सम्मिलित भेलाह। दुनू सत्रक संचालन श्री मिथिलेश कुमार झा केलनि। एहि सत्रमे माँजल रंगकर्मी श्रीमती किरण झा आर्द्र स्वरें ठाकुर जीक प्रति अपन उद्गार व्यक्त करैत कहलनि जे रामलोचन जी आ नबोनारायण जी हमरा मैथिली मंच पर अनलनि। श्री रमाकान्त झा अपन उद्गारमे ठाकुर जीक सहयोगी प्रवृत्तिक उल्लेख केलनि।

संपर्क द्वारा प्रकाशित ई पहिल पोथी छल। पोथी जिनका पर केंद्रित अछि, विमोचन हुनक पत्नीक हाथे भेल। एहि आयोजनमे कोलकाताक प्रायः समस्त साहित्यकार उपस्थित भेलाह। प्रायः दू गाही एहन साहित्यकार अपन रचनाक पाठ केलनि जे संपर्कमे पहिल बेर उपस्थित भेल छलाह। माने, कइएक दृष्टिएँ ई आयोजन मैथिली - जगतमे ऐतिहासिक भेल। तीस बर्खसँ बेसी पुरान 'संपर्क' अपन सूत्रधारक प्रति कृतज्ञ भेल आ एकटा उदाहरण प्रस्तुत केलक। एहिसँ अगिला खाढ़ी सेहो प्रेरणा ग्रहण करत।

पोथीकेँ परिकल्पित सरूप देबामे सहयोगीक रूपमे सदति मन राखल जेताह सर्वश्री वियोगी जी, केदार कानन, नचिकेता, दयाशंकर मिश्र आदि। श्री नबोनारायण जी पोथीक ओरियानसँ विमोचन धरि निरंतर संग रहलाह। विमोचन कार्यक्रमकेँ सफल बनेबा हेतु दत्त-चित्तसँ काज केलनि श्री विजय इस्सर जी। श्री रूपेश त्योंथ जी मिथिमीडियाक माध्यमे पूरा कार्यक्रमक जीवंत प्रसारण कऽ महत्वपूर्ण उपकार केलनि। महानगरीय व्यस्त जीवनक अछैतहु अपन महत्वपूर्ण उपस्थितिसँ आरो जे लोकनि धन्य केलनि ताहिमे प्रमुख रहथि सर्वश्री अश्विनी झा, संतोष मिश्र, रत्नेश्वर झा, गंगा झा, विनयभूषण, शम्भुनाथ झा, दिनेश मिश्र, प्रेम नारायण झा, अमलेस साव आदि।