Nación Galega

Crónica dunha catástrofe anunciada

2012-01-04T17:40:00.005+01:00

Parece que neste ano 2012, teremos que facer fronte a máis desemprego, a máis impostos, a máis austeridade, a máis corrupción, a máis destrución, etc

Comecemos polo emprego. Neste ano 2012 o estado español agarda máis desempregad@s, por se os que engrosan as listas do INEM non abondaran. Que vai facer o goberno do PP? Parece que resignarse a manter a axuda dos 400€ a desempregad@s de longa duración e a tentar manter as cousas máis ou menos para que non empeoren máis do que xa están.

No Estado hai moitos problemas pero os que máis preocupan neste momento son os do déficit e o paro. Se non creamos emprego dificilmente poderemos reducir o déficit público xa que non ingresaremos diñeiro d@s contribuíntes, polo tanto, o señor Rajoy e o seu equipo dedicen subir os impostos. Ás persoas con máis recursos? Pois claro que non, súbelle-los á clase traballadora (debe ser porque temos poucos).

Como coa vía da suba de impostos non vai recadar todo o necesario, para non incorrer nese temido déficit e que a Unión Europea, os mercados e as empresas de cualificación (verdadeiros voitres) non se nos boten enriba haberá que reducir o investimento público. Que pasará entón? Despois disto, haberá máis desemprego porque a inversión caerá e con ela, o emprego que xeraría.

No tocante á austeridade xa se pode comprobar como a redución en gasto en servizos sociais baixa (lei de dependencia conxelada), o gasto en educación redúcese (despido de profesorado), o gasto en sanidade báixase (o persoal sanitario só se repoñerá nunha taxa do 10%, polo tanto menos persoal sanitario), I+D+i redución drástica (adeus ós programas de investigación e de captación de investigadores/as), conxelación do salario mínimo interprofesional (a UE recomendaba que no estado español fose de 1026 non de 641€)...

Parece que se lles esquece a austeridade na familia real (60 millóns de €), Igrexa (10.000 millóns de €), loita contra a fraude fiscal (23% no Estado fronte ó 13% da UE), Senado, agrupamento de concellos, gasto militar...

Todo isto é o que nos agarda, mais nunca hai que ser pesimista, haberá que loitar para mudar a situación. Está claro en que hai alternativas a estas maneiras de gobernar e senón que llo digan a países que están crecendo e mellorando o estado do benestar, como Dinamarca, Islandia, Finlandia...

Ánimo xente! e a seguir loitando!

Xornada de reflexión. Reflexionade ben!

2011-11-19T15:29:00.004+01:00

Nesta xornada de reflexión, gustaríame dicir queserve para unha fonda reflexión sobre a situación na que vive o estado español. Unha profunda crise económica pero tamén social é a que nos está a afundir; os mercados financieiros están agardando á suculenta dentellada que queren propiciar ós servizos públicos, por que? Pois porque xa se recortou das infraestruturas, privatizaron parte de de empresas, infraestruturas novas, etc que queda agora? Pois os servizos públicos.

Estas medidas adóptanse despois de que a banca engulira 130.000 millóns de euros dos fondos públicos (de tod@s nós) e que seguen acumulando beneficios escandalosos cada ano e NON dan crédito ás nosas pequenas e medianas empresas porque non lles convén.

Ante esta situación, hoxe debemos pensar se este domingo queremos mudar as cousas ou ben, dar un xiro ás políticas, para que realmente se ocupen do que deben que non é nin máis nin menos que da xente.

Se o sector financiero e mercantil está nunha situación mala non é por culpa da cidadanía, é culpa dos seus xestores que especularon, creceron a ritmos descontrolados e cunha mala xestión que desembocou nesta grave crise económica. Polo tanto, a xente non temos que pagar a súa incompetencia porque, a que ninguén che paga a ti se o teu negocio fracasa por unha mala xestión?

Este domingo podemos favorecer á maioría de dous partidos, un que fixo políticas de dereita e outro que, alí onde goberna, o que fixo foi privatizar e recortar de todos os ámbitos incluíndo sanindade e educación. Por iso eu estou seguro de que se os partidos minoritarios teñen máis forza, este estado será algo máis democrático, será un pouco máis plural e tamén poderemos defender os intereses da xente e non só mimar ás grandes empresas e banca deixando de lado á cidadanía.

Boa xornada de reflexión e votade con cabesiña.
;-)

Lumes en Galiza, ó PP dálle igual!

2011-10-20T20:23:00.008+02:00

O monte galego arde sen parangón. Vimos de ver unha intensa actividade incendiaria no país, mais unha escasa actividade política por parte da Xunta de Galiza e do goberno do Partido Popular, os cales non fixeron nada e restaron importancia ó que estaba e, aínda está mentres escribo este artigo, acontecendo.

O lume está comendo moitos lugares que non contan con ningunha protección pero tamén hai zonas de gran valor ecolóxico da Rede Natura 2000. Isto sen que o goberno de Núñez Feijóo aumente as brigadas contra o lume que, dende setembro, están sendo despedidas. Tamén cabe dicir que as axudas á prevención foron erradicadas por mor dunha "austeridade" atroz.

Con estas perspectivas de; poucos medios, poucas brigadas, monte descoidado, etc non parece de estrañar que o lume e @s incendiari@s estean acabando co noso patrimonio natural. Isto vaise traducir en miles de hectáreas arrasadas (van 14000!! a día de hoxe e aumentando) que farán que moitas especies animais non teñan sustento para se alimentar e vivir, que moita xente que vive no rural non poida alimentar ó gando ou labrar as terras, que moitas especies vexetais tarden décadas en recuperarse...

Non me colle na cabeza como este goberno do PP fai uns anos estaba na rúa manifestándose contra a vaga de lumes do 2006 e ande hoxe "escapado" (Presidente desaparecido, superdelegado da Xunta de Ourense no Bernabeu en Madrid e declaracións institucionais escasas).

A día de hoxe non vin que o presidente galego, Núñez Feijóo dese a cara para informar á cidadanía sobre o que está facendo para poder rematar con esta vaga incendiaria e que vai facer para que non se volva repetir.

Por todo isto penso que debemos esixir responsabilidades políticas ó goberno da Xunta de Galiza para que faga todo o que estea na súa man para rematar cos lumes, retomando as políticas políticas de prevención axeitadas, facer leis que primen as especies autóctonas fronte ás foráneas, loitar contra o abandono do rural e mellorar a xestión dos nosos montes e un longo etcétera.

Xa se sabe a política do Partido Popular; "nin goberna nin deixa gobernar".

Aquí vemos unha imaxe de ADEGA que demostra que non se está facendo un bo traballo:

Reforma constitucional a dúas bandas

2011-08-31T14:00:00.001+02:00

Despois de moito tempo sen escribir nin unha soa liña neste blogue, retomo a miña escritura cun tema de moito calado e de gran polémica social, a reforma constitucional.

Xa é ben sabido por todo o mundo que o PSOE deu un xiro neoliberalista brutal e que se axeonllou ante os mercados financeiros xa hai moito tempo, mais coido que esta vez xa se pasou de tódolos límites e coido non llelo podemos permitir por todo o que supón e ocasionaría.

Esta reforma constitucional xa debería ser rexeitada só pola súa forma de realizala. Penso que unha reforma de tal importancia non debera realizarse de costas á sociedade e, por riba, entre só dous partidos. Acaso a sociedade non pinta nada? Só hai, no estado español, dous partidos políticos?

Ante esta maneira de reformar e de aplicar modelos neoliberais inxustos coa meirande parte da poboación, como non imos estar en contra d@s polític@s!? Claro que estamos desencantados coa clase política.
Mais ante isto hai que dicir que non tódolos partidos son iguais pois estamos a ver como votaron en contra da reforma; BNG, PNV, ERC-IU-ICV, UPyD e Nafarroa Bai, así como o deputado socialista, Antonio Gutiérrez. Estes partidos están a pensar no ben do conxunto da sociedade e non nos intereses partidistas e financeiros.

Ademais disto eu digo que, se España e o conxunto dos seus políticos, quere demostrar que aínda queda algo de democracia, esta reforma debería ser tombada no Senado e, desta maneira, demostrar que, aínda que en contadísimas ocasións, o Senado pode servir ós intereses xerais da sociedade e non das grandes empresas, da banca e do capitalismo.

NON Ó BIPARTIDISMO

Despois non hai diñeiro...

2011-05-09T16:05:00.000+02:00

Estamos fartos de escoitar como persoas como Núñez Feijóo que din que non hai diñeiro para iso ou para aquelo outro e vemos como se recorta de servizos sociais tan básicos como educación, sanidade ou desenvolvemento e innovación, tamén vemos ó goberno central recortar dos cheques bebé que favorecían a natalidade, conxelando as pensións ou os salarios do funcionariado, etc.

Ante esta situación, moita xente pensa que será certo que o estado español ou Galicia non teñen cartos, mais iso é o que nos queren facer crer. Hoxe mesmo no xornal aparece como a Igrexa Católica recibe uns 10.000 millóns de euros ó ano das arcas públicas, é dicir, de toda a cidadanía (sexa católica ou non). Aquí non remata a cousa porque cando tamén sabemos que os equipos de fútbol lle deben á administración máis de 630 millóns de euros, mentres fan fichaxes "estrella".

Por que non protestamos ante estas situacións realmente inxustas? É preferible que se conxelen as pensións a centos de persoas que traballaron moitos anos da súa vida e que agora non chegan a fin de mes e se lle permita esa débeda ós equipos de fútbol? Porque se negou a proposta do BNG no congreso onde se pedía que os equipos de fútbol aboasen a débeda?

É preferible darlle dez mil millóns de euros á Igrexa en vez de axudar ós parados e paradas e crear emprego?

Por que se lle axudou á banca e non á xente que é a realmente importante e a que sofre as causas da crise?

Está claro que se pode facer outro tipo de políticas, pensadas para a xente e que melloren a nosa calidade de vida. Estamos ante unha situación inxusta que debemos cambiar. Están os dous grandes partidos estatais disposto a facelo? Sinceramente penso que non.

A importancia da xuventude

2011-03-29T19:04:00.000+02:00

En Galicia o Partido Popular non ten consideración pola xente nova. Desde hai dous anos o PP non fixo nada que nos beneficiase nin que contribuíse a prestar máis servizos, en cambio podemos citar a supresión da meirande parte das liñas de Noitebús, a lei de convivencia onde se solucionan os conflictos nas aulas con expulsións máis longas, inexistentes políticas de fomento do emprego xuvenil tendo a miles de parados menores de 30 anos e formados perfectamente, paralización dos locais de ensaio e gravación para @s nos@s artist@s musicais, reforma dos centro Quérote para financiar a unha asociación antiaborto, falta de promoción de vivendas públicas e un longo etc.

A situación da xuventude hoxe é moito peor cá de hai uns anos porque se pensa que a xente nova non importa ou, máis ben, que non interesa xa que non imos ir votar en masa. É precisamente por esta razón pola cal non gastan os cartos en políticas xuvenís.

Cando se criminaliza á poboación máis nova e non se lle ofrecen recursos e servizos para desenvolver as súas actividades, estas potencialidades botaranse a perder por falta de desenvolvemento, porque llas estaremos limitando e cortando. Pensemos un momento.
Cando se constrúe un centro social, casa da xuventude, etc estase a crear unha instalación que permite á xente máis nova ter un lugar para desenvolver as súas capacidades sexan cales sexan (pintura, música, fotografía, escritura...) que xunto compaxinadas cunha boa programación cultural e deportiva, potenciarán a creatividade e as súas potencialidades.
Cando se constrúen vivendas de promoción pública, estase a dar a oportunidade para que moitos mozos e mozas poidan emanciparse e ter a unha vivenda digna, xa sexa en réxime de alugueiro ou compra.
Cando se apoia o asociacionismo estamos apostando pola autoorganización polo autodesenvolvemento propios.

Podería seguir enumerando exemplos de todo canto non se está a facer desde a Xunta de Galicia por mor da "austeridade".
Realmente queremos que nos nosos concellos deixen de lado ou continúen a se deixar de lado as políticas xuvenís? A resposta é sinxela. O 22 de maio Vota!! entre tod@s podemos facer que a situación dos nosos concellos cambie, porque alí onde está o BNG a mocidade non é un estorbo, non se lle ignora. Faite escoitar e pensa que hai un partido que conta contigo.

Por unha política diferente

2011-02-23T14:34:00.002+01:00

"Eu non fun! foi Pepito!" ou "pero el máis!" son as expresións que adoita empregar o presidente da Xunta, Alberto Núñez Feijóo. Non as usa literalmente pero é o trasfondo dos seus discursos no Parlamento galego e nas súas intervencións públicas.

Parece que todo o que lle acontece a Galicia e á cidadanía é culpa do terrible goberno español, xa que parece que é quen nos goberna, porque Galicia non ten goberno propio para as cousas malas. Mais cando hai unha boa nova no país, si parece que temos un goberno propio ó que lle debemos agradecer o mérito. Os dous primeiros anos todo era culpa do bipartito, tras estes dous anos de crítica e de destrución de todo o feito agora tócalle ó goberno central.

O anterior reflicte a falta de responsabilidade do Partido Popular, xa que é intolerable que se lle bote a culpa de todo o que nos pasa ó goberno do Estado (que en parte tamén a ten, pero non toda) e non se intente facer nada desde o pouco autogoberno que presenta o noso país. Así, parece ridículo queixarse das poucas competencias que posuímos en materia de emprego pero que se neguen a reformar o Estatuto de Autonomía para avanzar cara un país con máis autogoberno e que os problemas que nos afecten se poidan solucionar desde Santiago e non desde Madrid. Desta maneira, mentres o PP está atarefado con demostrar que o presidente Zapatero é un homiño con cornos de cor vermella e un tridente, en Galicia segue medrando o paro dunha forma xigantesca.

Non creo que Galicia mereza un goberno e un presidente como os que por desgraza temos. Non merecemos ter un presidente que se vaia tódolos meses fóra do país para facer campaña política noutras comunidades e se esqueza do cargo que ten e das súas responsabilidades. Un goberno que menospreza cuestións como a lingua, a cultura e ás súas figuras máis emblemáticas non pode guiar o noso futuro. Uns conselleiros e conselleiras que ante un problema só dean escusas e non intenten amañalo.

A pesar diso hai partidos en Galicia que tentan sacar as cousas adiante e traballan por e para o pobo galego. Convido a que miredes o seu traballo e pensade de cara as próximas eleccións. Ides premiar a uns dirixentes incompetentes que non tentan solucionar nada ou, pola contra, darédeslle unha oportunidade a quen o pode facer ben, pensando na sociedade e dun xeito diferente?

Unha escultura ou algo máis?

2011-01-18T15:48:00.000+01:00

  Hoxe lendo o xornal na biblioteca da miña facultade para descansar un pouco despois de estar estudando, vexo unha noticia que me impresionou bastante. Dita noticia comentaba o absoluto desprezo que o Partido Popular ten co diálogo social, a democracia, coa sociedade galega e co seu autor Fernando Blanco. O feito é que retiraron a escultura do diálogo co que se conmemoraban os 25 anos do Parlamento de Galicia para que acabe nun vertedoiro de Milladoiro.
  Esta actuación non responde a ningún criterio lóxico nin racional. Os argumentos empleados polo PP é que a estrutura estaba collendo ferruxe e que invadía unha parte da beirarrúa. Calquera persoa que pasara por alí, vería que o anaco que sobresaía por fóra do valado do Parlamento non ocupaba nin un cuarto do paso para os viandantes.
  Ante estas escusas o Concello de Santiago de Compostela respondeu que non lle solicitara a retirada do monumento ao Parlamento de Galicia por invadir unha pequena parte da beirarrúa.
  Así ante unha longa lista de cousas por destruír, o PP parece que non ten paranza en borrar todo elemento que recorde á etepa do BNG e PSdG ou Bipartito. Por outra banda tamén quita un símbolo de entendemento entre partidos para facer que o país avance cara o futuro e non se quede estancado, quita un elemento que máis que ser unha escultura, era o símbolo que recordaba que desde había 25 anos os galegos e as galegas podían vivir no seu país dunha maneira democrática e libre.

O elemento da discordia era esta estrutura de aceiro que se ve á esquerda da fotografía:

Estamos estragando o noso patrimonio natural

2010-12-02T12:57:00.000+01:00

En Galicia contamos coa planta de “reciclado” que é Sogama que acolle practicamente á totalidade dos 315 concellos que conforman o país. Este modelo centraliza todos os refugallos da cidadanía, co conseguinte custo en transporte e coa saturación desta planta desde fai moito tempo. Esta saturación é tal, que o macrovertedoiro de Areosa, que ten ao lado está a punto de encherse.

Agora abriuse o debate de que hai que facer outra macroplanta no sur de Galicia para desconxestionar a Sogama e poder reducir custes de transporte.

Todos os que pensemos que este país é unha xoia natural a preservar, ven nisto un despropósito. As causas de que os partidos políticos da oposición, ecoloxistas, parte da cidadanía… nos postulemos en contra non son outras que estas plantas van no sentido contrario a onde debéramos, que é a Reducir, Reciclar e Reutilizar.

Sogama e a nova planta de “reciclado” que pretende construír a Xunta no sur de Galicia non é máis que unha incineradora onde se queiman todos os residuos para poder crear enerxía eléctrica (nun país que somos potencia en enerxías renovables e, polo tanto non contaminantes).

Desde grupos ecoloxistas e grupos políticos estase a pedir unha reflexión en profundidade se é ese o modelo que queremos para os próximos anos. Estes grupos están dando a alternativa, que é apostar polas plantas de reciclaxe comarcais. Estas plantas acollerían os residuos a nivel comarcal e conseguiríase así, unha taxa de reciclado e revalorización do lixo. Este modelo xa está probado e funciona moito mellor (medioambientalmente falando, xa que a taxa de reciclado é maior) que o actual sistema de centralizar. Ademais que coas diversas plantas esparexidas polo territorio, crearíanse postos de traballo en diversos lugares e non todos nun só municipio.

Este é un debate que nos afecta a todos, queremos camiñar cara un país sustentable ou cara un país onde se siga apostando pola contaminación?

Os organismos e os conflitos

2010-11-25T18:06:00.000+01:00

Como ben sabedes no planeta Terra no que vivimos existe unha organización creada despois da 2º Guerra Mundial para diversas cousas, entre elas, están dúas principais que cito textualmente da Carta das Nacións Unidas:

1. Manter a paz e a seguridade internacionais, e con tal fin: tomar medidas colectivas eficaces para previr e eliminar ameazas da paz, e para suprimir actos de agresión e outros quebrantamentos da paz; e lograr por medios pacíficos, e de conformidade cos principios da xustiza e do dereito internacional, o axuste ou arranxo de controversias ou situacións internacionais susceptibles de conducir a quebrantamentos da paz;
2. Fomentar entre as nacións relacións de amizade baseadas no respecto ó principio da igualdade de dereitos e a da libre determinación dos pobos, e tomar outras medidas adecuadas para fortalecer a paz universal.

Por estas cousas eu hoxe pregúntovos se a ONU serve para algo na realidade. Xa sabemos que as cousas sobre o papel están moi ben e son moi fermosas cando as imaxinamos, mais cando as queremos poñer na práctica, non todo funciona nin é tan fermoso e sinxelo como plantexáramos no papel.
A ONU, na miña máis sincera opinión, non ten o poder suficiente para poder executar os seus dous principios fundamentais e principais. Pero hai organismos que si teñen poder diplomático suficiente como pode ser EE.UU ou a Unión Europea que por intereses propios evitan posicionarse. Isto é algo que todos e todas vós podedes comprobar. Para esta comprobacións só teño que citar Sáhara e Palestina (por ser os máis coñecidos) ou as Coreas.
Se pensamos nestes dous territorios que están nun conflito bélico permanente desde fai décadas, non vemos que a solución ós conflitos (ambos por cuestións de territorio) estea próxima.
Cada vez que vemos unha noticia nos informativos sobre novos ataques, o máximo que a ONU fai é recriminar unha actuación da parte que cometeu o ataque. Non esixe responsabilidades, non fai forza para que pare, nin implica a outros estados para forzar a unhas negociación diplomática e arranxar o conflito dunha vez por todas.
Ante o recente ataque que houbo no Sáhara, nin a ONU, nin a Unión Europea, nin ningún outro organismos fixo nada (nada práctico) para que este conflito se amañe. O único que fixeron foi o que levan facendo anos para lavarse as mans e non ter remordementos de conciencia, recriminar o ataque e máis nada, sen aplicar ningún tipo de castigo nin esixir responsabilidades deixando que o conflito siga adiante.

Por todo isto, eu penso que se estes organismos, ou ben non poden (ONU) ou ben non queren amañar os conflitos de maneira definitiva (EE.UU, UE).

Ás voltas co Papa

2010-11-09T00:15:00.004+01:00

Quixen facer o meu comentario despois da visita do Papa a Santiago de Compostela para que logo non me digan que critico sen nin se quera saber o que fose a pasar.
Pois ben, o Papa xa se foi e a análise é clara. A visita papal non acadou ningunha das expectativas creadas exceptuando a da seguridade que si se cumpriu.

Feijóo creou unhas expectativas dicindo que unhas 200.000 persoas visitarían a cidade de Santiago de Compostela e que deixarían montes e moreas de cartos, que nin de broma, pasou, agás na súa marabillosa mente.

Despois disto, temos que preguntarnos se é lóxico nos tempos que corren, que un Estado aconfesional sufrague unha visita soamente eclesiástica. Haise que dar conta de que o Papa non veu por ningunha cuestión política, senón que veu para dar unha misa e para "proxectar a imaxe de Galiza no mundo" (segundo Feijóo).

Se temos o razoamento este, por que non sufragamos os concertos de grandes grupos musicais, os grandes encontros entre equipos de fútbol ou a visita dalgún ou dalgunha celebridade cinematográfica, xa que eles tamén proxectarán a imaxe de Galiza no mundo se veñen unhas horas a Galiza, segundo as ideas de Feijóo and company.

Agora só darei un argumento máis de por que non debera ser sufragada a visita papal con diñeiro público.
Como ben sabemos no estado español convivimos xentes de moi diversa relixión ou mesmo que non teñen ningunha, por iso non debería sufragarse con fondos públicos.
Pois xa que o goberno do Partido Popular sufraga a viaxe do Papa Bieito XVI, por que non sufragar a visita dalgún líder de calquera outro grupo relixioso ou ateo?

Penso que se alguén debera sufragar esta polémica visita é a Igrexa Católica e os fieis que quixeran velo, tal e como se fose un concerto de música, unha ópera, etc polos cales calquera persoa ten que pagar para entrar non é o estado quen cho sufraga.

Hai que ser máis ambicioso

2010-10-26T22:17:00.006+02:00

A Xunta de Galicia vai crear plataformas empresariais para poder expandir as nosas empresas e aumentar o número de exportacións e poidan levar oficinas ao exterior.

Isto é algo que está moi ben sempre e cando esta especie de embaixadas non fosen exclusivamente para a promoción comercial das empresas que se queiran expandir.

A Xunta de Galicia debería promocionar, ademais que ás empresas, debería aproveitar e xa que vai facer estes edificios para poder desenvolver e potenciar a nosa presenza no exterior.

As embaixadas non só deberan cumprir unha función comercial, senón tamén son unha posibilidade de facernos ver no mundo globalizado no que vivimos e, sobre todo, diferencíandonos do resto das culturas e dos pobos.
As maneiras de diferenciarse son o emprego e promoción da nosa cultura, lingua, empresas, sociedade, potencial educativo, e desenvolvendo e dando a coñecer as nosas potencialidades.

Os países onde máis podemos desenvolvernos cunha maior facilidade son os países lusófonos pola similitude idiomática, pero non os únicos.
Por estas razóns a Xunta non debera desbotar a oportunidade que ten para poder facer que o país se visualice, medre, e poidamos captar fondos doutras empresas para que invirtan en Galicia creando emprego.

O que estaban esperando!

2010-10-13T15:34:00.004+02:00

Ola a todos e a todas! o que estaban esperando xa chegou! o guión do filme O Divino Ferrete, xa está dispoñible para todas aquelas persoas que quieran ollar como vai ser a estrutura do primeiro filme porno en galego!

Aquí lles deixo o enlace para que despois me digan que tal lles pareceu este guión.
Sen dúbida esta iniciativa tivo un grande éxito e por iso é ben recibida neste blogue, non porque sexa pornografía senón porque é unha idea orixinal, innovadora e atrevida.

http://www.odivinoferrete.com/wp-content/uploads/2010/09/O-divino-ferrete.pdf

Seguen coa desnormalización

2010-10-10T12:20:00.005+02:00

Parece que a pretensión do Conselleiro de Educación, Jesús Vázquez, de darlle continuas labazadas á normalización do noso idioma non para só nas escolas e institutos.

A nova fronte de batalla comeza na toponimia. O candidato á alcaldía da Coruña propón que se poida legalizar La Coruña, claro que para iso teñen unha lei que lles estorba que é, a lei de Normalización Lingüística (a peor lei do mundo, xa que di que os topónimos de Galicia serán en galego). Pero non teñen medo en dicir que se fai falla, modifícase e problema resolto. Estráñame que non a queiran derrogar e propoñer unha lei de normalización do español.

Isto comézase a falar xusto sete meses antes dunhas eleccións municipais. Non lles soa de algo? O problema repítese, volven a empregar a lingua galega para facer campaña electoral. Todo isto, non é máis que tapadeiras para ocultar a verdadeira problemática, que é a ineficacia do goberno. Xa que son incapaces de ter un bo proxecto e resolver os problemas do país.

Eu non sei por que lles fai mal que a xente se exprese en galego. Por que non queren que o galego poida existir dunha maneira normal e que se empregue de forma cotiá? Sería perder unha riqueza e un patrimonio de valor incalculables.

Sexo-normalización!

2010-10-05T15:14:00.006+02:00

A lingua galega desde hai anos e, tras duros procesos de normalización e concienciación social, está aparecendo en novos ámbitos da vida cotiá.

O de hoxe non é un ámbito menos importante, é máis, este é un ámbito que pode ter unha difusión moito maior que libros, conferencias, anuncios ou pancartas.

Estoulles a falar do sexo, un tema que, ás veces conleva tabús e críticas, cando debera ser algo natural.

Pois ben, un grupo de persoas mediante Galego Lab, que é unha organización que ten como obxectivo o impulso de acctividades de promoción da lingua galega na vida cotiá, van crear o primeiro filme pornográfico íntegramente en galego fartos de ver como este tipo de cinema sempre estivese noutros idiomas!

O nome do filme é "O divino ferrete". Os guionistas serán Diego Ameixeiras, Iolanda Zúñiga, Xabier Cid, Begoña Paz e Alejandro Tobar.

Os galegos xa podemos dicir que a lingua acadou todos ou case todos os ámbitos da vida.

Quen sabe se nun futuro, seremos unha gran potencia neste tipo de filmes.

Debate sobre a memoria histórica e xuízo a Baltasar Garzón

2010-09-08T17:05:00.004+02:00

Por que segue existindo resistencia a que se investiguen os crimes franquistas?
Por que nos parecería mal que non se condenase un asasino que matou a varias persoas e poida andar libremente pola rúa?

Hoxe no estado español, seguen a provocarse discusións sobre unha ditadura que nos fixo un mal tremendo. Provocando atraso en tódolos eidos; cultural, económico, social, etc. Isto non sería problema, se non fose porque hai persoas que defenden ou non ven que tivo de negativo a ditadura de Franco.

Para todas aquelas persoas que non saben ou non queren darse conta do que pasou vou deixar unha serie de argumentos, entre outro moitos que haberá para poder rexeitar a ditadura.

Durante este período de corenta anos, prohibíronse as diferentes linguas que hai no Estado.
A censura instaurouse para evitar a difusión das linguas, cultura, coñecementos e sobre todo, para evitar que chegase información do exterior.

Exilio dos nosos mellores intelectuais, facendo que; médicos, investigadores, escritores, arquitectos, etc se tivesen que marchar para poder desenvolver o seu traballo.
Paralizou o avance, mentres outros estados europeos desenvolvían as súas redes de transporte, infraestruturas, servizos, mellorando a educación e a sanidade... España estivo estancada.

Durante os primeiros anos da posguerra a xente tiña racionado o seu alimento e tendo que malvivir como puidesen.

A Igrexa tivo grandes privilexios que, a día de hoxe, conservan algúns. Desta maneira non había liberdade relixiosa nin sexual, onde non existía o divorcio.
Este réxime ditatorial asasinou a centos de persoas só pola súa ideoloxía, pola súa defensa dos dereitos humanos... xa que non había liberdade ideolóxica nin por suposto, partidos políticos nin asociacións.

Por todas estes sucesos e moitos máis, son polos que non defendo a este réxime nin tampouco que se queira condenar ou xulgar ao único xuíz que tivo valor para destapar aos culpables destes feitos e, o que é máis importante, que os familiares poidan soterrar os seus familiares dignamente.

As Touradas

2010-08-14T14:13:00.003+02:00

Co debate aberto nestas semanas pasadas por mor de que Cataluña prohibiu as corridas de touros, quero facer un pequeno comentario extrapolado a Galiza.

Nesta terra os touros non están nada arraigados, é algo que podemos comprobar vendo o número de prazas que temos. Non entendo o afán de querer que esta "festa" sexa "nacional".

En Galiza non temos esa cultura de touros, turismo desaforado, cultura flameca, etc. que tanto identifica a España, mentres que si temos unha cultura atlántica e propia que nos identifica e nos diferencia.

Non entendo por todo isto, que o señor José Blanco (ministro de Fomento) e Alberto Núñez Feijóo (presidente da Xunta de Galicia) fosen á praza de touros de Pontevedra en apoio a esta festa, que nada ten que ver con esta terra.

Non considero que isto sexa unha festa, non é razoable ter que maltratar a un animal desa forma só para o disfrute duns poucos. Por iso abogo por que se fagan (onde haxa tradición) pero sen ter que maltratar e matar ó touro.

"Red Madre"

2010-06-23T17:16:00.006+02:00

O PPdeG acaba de aprobar no Parlamento Galego, en solitario, a creación e o financiamento da chamada "Red Madre" co que quere contribuír a axudar ás rapazas deste país que pretendan seguir adiante ante un embarazo. Dita rede está considerada antiabortista e ten un claro perfil moral.

Mentres se fai todo isto, tamén se está a levar a cabo o desmantelamento dos servizos das oficinas de Igualdade + Benestar (I+B) nas que se ofrecía axuda ás familias, tamén os centros Quérote onde se informaba aos mozos e mozas deste país sobre a temas relacionados coa sexualidade (enfermidades, medios anticonceptivos, asesoramento, información, etc) a través de citas presenciais ou ben por internet. Esta rede de centros foi eloxiada por organismos europeos e ía nas políticas da OMS (organización mundial da saúde).

Esta dobre moral que fai o PP en Galicia non se pode tolerar, xa que primeiro elimina todo o feito polo goberno anterior e despois axuda a crear outros servizos que están suxeitos a unha moral basicamente católica. Isto fai que a información que se dea neses lugares será subxectiva e non obxectiva como debera ser un servizo público ou con financiamento público.

Con isto, vese que o Partido Popular está favorecendo aos intereses da Igrexa Católica e das organizacións de pensamento conservador, claramente contrarios á lei do aborto feita polo goberno do Estado.

Problema mundial, responsabilidade de ninguén?

2010-05-20T01:24:00.001+02:00

Pode que este artigo sexa algo duro demais pero é a pura e crúa realidade.
Onte estaba no ordenador coa televisión acesa, estaba nun canal calquera cando de súpeto comeza unha película que se chamaba “La ciudad del silencio”.
O título non me chamou moito a atención, a dicir verdade, mais con só ver os 10 primeiros minutos é unha película que che “engancha” pero que tamén pode facer que cambies de canle pola dureza das imaxes.
Se cambiásemos pola dureza non habería problema pero aquí, o caso, é que se cambias é porque nos doe ver a realidade desta merda de mundo no que vivimos. Sinto empregar este tipo de palabra pero é que estou moi cabreado co que vin. Non só cabreado senón que tamén me sentín impotente por non poder facer nada ante uns feitos tan terribles e tremendamente desoladores.
Recoméndovos que vexades a película porque é tremendamente dura pero fai que un poida ver a realidade. Esta realidade moitas veces é contada e por nós é sabida, mais non te das conta da gravidade dos feitos ata que chos presentan en imaxes.
A dita película, comeza dicindo que é unha réplica de feitos reais. Non vos vou dicir de que vai pero si que trata sobre un problema moi grave, non só nos países en vías de desenvolvemento (nos cales se acentúa máis o problema) senón que tamén afecta ós países desenvolvidos (que obvian as súas responsabilidades). Teño que dicir que este mundo é unha puta merda, que ás veces pensas que qué fan os empresarios, os políticos, a policía, a sociedade, os traballadores, etc para que este mundo non sexa como é hoxe en día. A min en particular, esta película cabreoume moito e por iso á 1:15 da noite estou escribindo isto.
Ó igual que este problema, hai outros moitos non vou a negalo eu, xa que é ben sabido (ou non, igual me trabuco) pero que este pode ser un dos máis graves.
Cando vexades a película, por favor escribídeme a vosa opinión e que credes vós.

A imaxe da política

2010-05-01T02:02:00.005+02:00

Con motivo do día do traballador quero dicir varias cousas.

Penso que este día está moi ben para dar a coñecer as necesidades que teñen os traballadores e traballadoras. Non só este día é bo para reivindicar dereitos e melloras pero este é o día da clase obreira.
Tamén sei que a medida que pasa o tempo, moita xente perde a ilusión e a esperanza, por digo o seguinte.

Desde fai uns días, estoume preguntando se a xente e, sobre todo, as clases medias e baixas recuperarán algún día a confianza na política. Ben sei que isto é difícil debido a moitos factores; políticos corruptos, malversación de fondos, mala xestión sen castigos nin sancións, poucas políticas socias, poucas subvencións e axudas, e un longuísimo etc.

Ante este panorama non me parece nada raro que moita xente perda a crenza nos nosos políticos e representantes. Para min, aínda queda esperanza (teño que dicir que son moi positivo e un optimista acérrimo) que non todo está perdido e que aínda queda xente honrada e que ve a política como algo para mellorar a sociedade e non algo só do que sacar proveito.
Espero que non se deixen enganar polos medios de comunicación que tenden a xeneralizar e contribúen a facer ver que este panorama afecta a tódalas persoas de todos os partidos políticos.

Despois disto só quero dicir que NON TODOS OS PARTIDOS SON IGUAIS. Digo isto porque é algo que me senta moi mal, debido a que non me gustan nada as xeneralizacións.
Non está ben dicir algo así, xa que tampouco me gustaría que dixesen que tódolos os galegos e galegas somos tontos ou que os cataláns son amarrados.

Sen máis espero que gocen dunha xornda festiva e desexarlles que sexan algo máis optimistas.

Un saúdo

Posible venda de R

2010-04-08T13:03:00.007+02:00

Boas!

Despois de bastante tempo sen escribir, volvo con forzas e avísovos de que vou intentar escribir máis asiduamente.

Onte lendo o xornal, lin unha noticia que me deixou coa boca aberta. Esta noticia era a intención de vender R, a compañía galega de telecomunicacións.
Unha das poucas empresas grandes que nos quedan, que se atopa en mans galegas, pretende ser mercada por unha empresa con sede nos Países Baixos.
A moita xente pode que esta noticia lle pareza unha parvada, mais o certo é que non o é.

• R é 100% galega, os traballadores e traballadoras son todos galegos e galegas, isto é moi importante porque crea riqueza dentro da súa terra. Non só dá postos de traballos directos senón indirectos tamén.
• R é unha empresa que creu na súa terra e cando lle ía (e vaille) ben non marchou para fóra de Galicia. Quedou aquí e investiu aquí dándolle un mellor servizo á poboación galega nos tres eidos que traballa (internet, televisión e telefonía). Este servizo non se estancou, senón que segue mellorando, dando sempre o que pagas. Outras empresas pagas e non recibes nin a metade da velocidade de Internet que tes contratada, por exemplo.
• Esta compañía non só é líder no mercado galego senón que é referente a nivel español e europeo, xa que conta cuns beneficios moi bos ademais da súa calidade de servizos e pola súa aposta de crecemento instalando fibra óptica nos concellos nos que non estaba presente.
• Unha compañía comprometida co idioma, impulsando o uso do galego dentro e fóra da empresa.
• Unha empresa líder nas TIC (Tecnoloxías da información e comunicación).

Esperemos que Caixanova, non queira vender a súa parte da empresa porque senón, vainos a pasar o mesmo de sempre. Empresas creadas aquí, comezan a crecer e unha vez xa estables, vendémolas e os centros de decisións vanse fóra de Galicia e os investimentos tamén.

O "marabilloso" goberno do PP en Galicia

2010-02-04T22:45:00.006+01:00

A Xunta de Galicia, ó mando de Alberto Núñez Feijoo, non podería estar facendo peor as cousas.

No ámbito do idioma, non hai unha soa organización, sindicato, partido político, etc excepto Galicia Bilingüe, que o apoie o seu texto. Este borrador do decreto é un claro retroceso no proceso de normalización da lingua galega que pretende ocultar baixo a importancia do inglés.
Hai que dicir unha cousa, se en vez de darlle tanta importancia á gramática nas clases de inglés, se incidise máis na fala e en procurar que o alumno se desenvolvese ben oralmente non habería que poñer ese 33% de materias en inglés. Porque, ó meu xulgar, se a Consellería de Educación pon o 33% de materias en inglés o que vai facer é que os rapaces non entendan nada desas clases ( polo menos a día de hoxe, porque non hai o nivel suficiente ).
Outro dato da Consellería de Educación e Ordenación Universitaria é que baixou as partidas destinadas á Secretaría Xeral de Política Lingüística e concedeulle case 350 millóns de euros ó ensino privado, cando hai necesidades no ensino público que poderían resolverse se parte deses cartos se destinasen á educación pública

No ámbito dos servizos sociais, está privatizando os servizos sanitarios que son de tod@s. Podédelo ver nos xornais ou noutras fontes, que está dándolle ás empresas determinadas tarefas dos hospitais e residencias para maiores.
Un caso é a financiación do Novo Hospital de Vigo que está a ser financiado con capital público e con capital privado, iso si, despois a empresa terá concesión de diversos servizos durante 20 anos.
No caso das 18 residencias de maiores construídas con fondos públicos, que estaban a punto de ser inauguradas cando gañou o PP as eleccións, van ser regaladas ás empresas para reducir gastos segundo Feijoo. Claro! constrúense con cartos de todos e benefícianse catro de sempre!.

No caso dos servizos de Igualdade e Benestar creados polo bipartito, vai despedir a 61 traballadores e vai privatizar este servizo por iso, fai uns días se manifestaron os traballadores e as traballadoras deste organismo que é de grande utilidade.

Algo que tanto criticou o goberno do PP ó bipartito foi os gastos do parque móbil da Xunta de Galicia. Pois ben, Feijoo e a súa austeridade acaban de gastar 6 millóns de euros na renovación de vehículos cando hai coches que están nos garaxes enchéndose de po por non darlle uso.

Outro caso é a falta de respecto que ten o conselleiro de Cultura pola cultura galega dicindo que a nosa propia cultura estaba acomplexada!! Cando foi el quen comezou a retirar axudas ó sector audiovisual galego, á feira da cultura galega, á investigación da memoria histórica, etc. e concedéndolle case 350 millóns de euros ó ensino privado cando hai necesidades no ensino público que poderían resolverse se parte deses cartos se destinasen á educación pública

Un saúdo e espero que recapaciten tod@s @s que votaron a estes individuos.

Non ao borrador do galego

2010-01-10T16:16:00.004+01:00

Todas as persoas que poidamos ir á folga do día 21 de xaneiro debemos ir a Santiago de Compostela para mostrar o noso descontento polo borrador que o Partido Popular presentou o día 30. Este borrador supón pasar dun 50% de materias en galego a un 33%, incluso menos que nos tempos de Fraga que era dun 35%.
Todo isto, Alberto Núñez Feijoo pretende escondelo baixo o pretexto de dar un 33% de materias en inglés, algo que a día de hoxe é practicamente imposible.
Ademais disto, o goberno do Partido Popular vai permitir que se lle consulte ao pais a lingua de determinadas materias, algo que o Tribunal Superior de Xustiza de Galicia non veu ben.

Por todas as agresión á nosa lingua debemos manifestarnos e mostrar o rexeitamento xeral da sociedade galega contra ese borrador que ataca directamente á lingua galega.

Un saúdo

Non ao borrador sobre o galego do Partido Popular

2010-01-04T16:55:00.001+01:00

O borrador presentado pola Consellería de Educación o día 30 de decembro debe ser rexeitado por todos os grupos políticos, asociacións e sectores da sociedade.

Decreto de 247/1995:35% materias en galego
Decreto 124/2007: 50% materias en galego
Decreto de 2009:33% materias en galego

O goberno de Feijoo vai ser o primeiro goberno, en toda a historia da democracia, que aprobe unha medida para a involución do galego no ensino.
O decreto do 2007 é un texto ambicioso que pretende que o alumnado saia da ensinanza obrigatoria cunha competencia idéntica, tanto en galego como en castelán. Un dato: debe incidirse máis nos sectores máis novos da sociedade, xa que son os grupos que máis castelanizados se atopan.
Ademais, contempla que os equipos de dinamización e normalización lingüística fomenten o uso da lingua galega no centro.

Eu estou a favor do decreto do 2007 porque é igualitario, ademais, o castelán ten presenza en moitos máis lugares que o galego ( Ex. radios, xornais, cadeas de televisión, internet, publicidade, comercio(un 60% nunca usa o galego) , etc. ) nos lugares citados o castelán predomina sobre o galego.
Tamén opino que se deberían manter as partidas relacionadas coa promoción da lingua galega, xa que o PP, co pretexto da crise reduciu as partidas destinadas a todo o que tiña que ver con este apartado, como poden ser as clases de inmersión lingüística en galego para contornos castelanfalantes, redución das subvencións aos equipos de normalización e dinamización lingüística, etc.
Aquí vos deixo o enlace para que vexades o decreto do 124/2007 e me digades se é tan malo e tan impositivo como din os de Galicia Bilingüe ou os do Partido Popular.

http://www.xunta.es/Dog/Dog2007.nsf/FichaContenido/22B3A?OpenDocument

Un saúdo e espero os vosos comentarios.

Boas Festas

2009-12-24T22:02:00.000+01:00

Espero que pasedes un bo nadal e un mellor aninovo.