نوبل پرائز کو “شغل پرائز” کہنا زیادہ مناسب ہوگا۔ کیونکہ اوباما کی امن کی خونخوار کاوشوں کے بدلے یہ شغل دنیا کے سامنے مچایا گیا۔ سوچتا ہوں اوباما نے کیا  کیا ہے جو اسے یہ پرائز ملا ہے؟ کیا اس لئے ملا ہے کہ پاکستان میں ڈرون حملے ابھی تک اوباما نے جاری رکھے ہوئے ہیں؟ یا اس لئے کہ وہ ایک دو خطابوں کے ذریعہ مسلم امہ کی آنکھوں میں دھول جھونکنے آئے تھے؟ یا اس لئے کہ اسرائیل کی جنگی جنونی کیفیت کے سامنے اوباما کچھ نہیں کر پا رہے؟

لوگ ہزار کہیں کہ ایک کالے کا امریکہ کا صدر بننا معجزہ ہے میں اس بات کو روزِ اول سے ماننے کے لئے تیار نہیں۔ اوباما کو دنیا کے سامنے لاکر پیش کیا گیا ہے۔ اسکا بڑا مقصد یہ ہو سکتا ہے کہ مسلمت امت کے دل میں جو امریکہ کے لئے نفرت ہے اسے کم کیا جائے۔ لیکن ایسا کبھی ہو نہیں سکتا۔ مسلمانوں کو امریکہ نے وہ زخم دئیے ہیں جنہیں مندمل ہوتے بہت عرصہ لگے گا۔ بلکہ شاید ہی مندمل ہوں۔

بحیثیت قوم ہمیں امریکہ سے نفرت نہیں ہونی چاہئے۔ بلکہ ہمیں ان مٹھی بھر لوگوں سے سخت نفرت ہے جو اپنے مفادات کے خاطر دنیا کہ امن وامان کو تباہ کرنے پر تلے ہوئے ہیں۔ سوچنے کی بات ہے کہ کیوں ہر طرف مسلمانوں پر ہی نزلہ گرا ہوا ہے۔ پاکستان عراق افغانستان کشمیر ودیگر مسلم ممالک ہی کیوں آگ کی لپیٹ میں ہیں؟ امریکہ اور مغربی ممالک کو اپنی شر پسندانہ پالیسیوں پر نظر ثانی کرنی ہوگی ورنہ ایک وقت آئے گا کہ مسلمانوں کا ہاتھ اور انکا گریبان ہوگا۔ اور میں اسلام کی سماحت کو مد نظر رکھتے ہوئے اس بات کو یقین سے کہہ سکتا ہوں کہ اس وقت بھی مسلمان اس وحشت کے ساتھ اپنے دشمن کے ساتھ بھی پیش نہیں آئیں گے۔ مسلمانوں کی تاریخ اس بات کی گواہ ہے۔

امریکی سفیر این ڈبلیو پیٹرسن نے آج ایکسپریس نیوز کو انٹرویو دیتے ہوئے کہا ہے کہ کیری لوگر بل اگر پاکستانی پارلیمنٹ میں پاس نہ ہوا تو یہ ایک طمانچہ ہوگا۔ پاکستان کی غیور قیوم پہلے ہی اس کشکول کو مسترد کرچکی ہے۔ پارلیمنٹ کو بھے چاہئے کہ یہ بل مسترد کرکے غیرت کا ثبوت دیں اور جو طمانچہ امریکی سفیر نے کہا وہ امریکا کہ منہ پر دے ماریں۔ ویسی بھی اہلِ انجیل کا کہنا ہے کہ اگر آپ کوکوئی ایک تھپڑ مارتا ہے تو دوسری گال بھی اس کے آگے کردیں۔ تمنا ہے ایسا ہی ہو۔ ہمیں امریکہ سے تعلقات رکھنے کی اگر ضرورت ہے تو ضرور رکھیں پر یہ تعلقات برابری کی بنیاد پر ہوں۔ غلامی کسی صورت پاکستانی عوام کو قابلِ قبول نہیں۔

ہمارے حکمرانوں سے تو خدا ہی پوچھے کہ وہ ایسے بھیک کیوں مانگ رہے ہیں۔ صدر زرداری اور اس کے حواریوں کو کیا ہوگیا ہے کہ وہ ڈالروں کی زرق برق دیکھ کر دین ایمان وطن کھونے کے لئے تیار ہیں۔ حسین حقانی صاحب تو ہمارے سفیر ہی نہیں لگتے۔ وہ اکثر باتوں میں امریکہ کا دفاع کرتے نظر آتے ہیں۔ یار ہوس کی بھے انتہا ہوتی ہے۔ باوثوق ذرائع کا کہنا ہے کہ عدلیہ اور فوج کو مداخلت سے روکنے کی شق زرداری صاحب اور انکی حواریوں کا کارنامہ ہے جو بیکار نامہ ثابت ہو رہا ہے۔ فوج نے اس بل کی مخالفت کرکے عوام کی نمائندگی کی ہے۔ اور جمہوریت والے اسے مداخلت قرار دے رہے ہیں۔ جبکہ امریکہ اپنی چھاؤنیاں پاکستان میں تعمیر کر رہا ہے اور جمہوریت والوں کو کچھ نظر نہیں آ رہا۔ اللہ ہمارے ملک کی حفاظت فرمائے۔ ہمارے حکمرانوں کو ہدایت عطا کرے۔ آمین۔

کچھ عرصہ قبل میں نے ایک مقابلے کی تجویز دی تھی۔ اسی بات کو آگے بڑھاتے اور عملی جامہ پہناتے ہوئے مقابلے کا اعلان کرتا ہوں۔

چونکہ یہ بلاگ قرآن پاک اور خطِ نستعلیق کی خدمت اور ارتقائی اسباب کے لئے لکھا گیا ہے اس لئے اس مقابلے کی ابتدا قرآن پاک اور خطِ نستعلیق کے مواضیع سے ہی کرنا ضروری ہے۔ سوچ بچار کے بعد مجھے مناسب معلوم ہو رہا ہے کہ درجِ ذیل مضمون پر احباب کو لکھنے کی دعوت دوں:

1- خطِ نستعلیق:
خطِ نستعلیق کے موجد کے متعلق لکھیں۔ نیز خطِ نستعلیق کا ارتقائی مرحلہ بھی محورِ موضوع بنائیں۔ایک شق خطِ نستعلیق کی یونیکوڈ فونٹس کے بارے میں بھی لکھ سکتے ہیں۔ خطِ نستعلیق کو یونیکوڈ خط بنانے میں کیا مشکلات پیش آ رہی ہیں؟ اس حوالے سے آپ اپنی رائے بھی موضوع میں شامل کرسکتے ہیں۔

 اپنے کام کو ایک علمی کام ثابت کریں۔ اور جن حوالہ جات سے چاہے وہ کتابی شکل میں ہوں یا انٹرنیٹ پر ہوں ان کا حوالہ ضرور دیں۔ میں اس موضوع کے آخر میں ایک فائل منسلک کروں گا۔ ورڈ کی اس فائل کو اتار لیں اور اپنا مضمون اسی فائل میں لکھیں۔ اس فائل میں میں لکھنے کا طریقہ بھی تحریر ہوگا۔
 

انعامات وہدایات

• انعامات کے متعلق ہم ابتدائی طور پر درجِ ذیل انعامات رکھ رہے ہیں:
  1- ایک کلو عجوہ کھجور جو ایک خوبصورت پیک میں ہوگی۔
  2- ایک عدد قرآن پاک جو کنگ فہد قرآن پرنٹنگ پریس سے طبع شدہ ہوگا۔
  3- ایک عدد جائے نماز۔
  4- ایک عدد تسبیح۔
  5- ایک عدد ٹوپی۔
  6- ایک عدد عطر۔

1- یہ سب چیزیں مدینہ منورہ سے ارسال کی جائیں گی۔ ابتدا کے طور پر ہم یہ انعامات رکھ رہے ہیں۔ جبکہ مستقبل میں لوگوں کی تعداد اور شوق دیکھ کر مقابلے کے طریقہ کار اور مزیدقیمتی  انعامات شامل کئے جاسکتے ہیں۔

2- انعام کی حقدار اگر خاتون ہوئیں تو پانچویں اور چھٹی چیز کے بدلے میں کوئی مناسب سی چیز ہوگی۔

3- فی الحال اس مقابلے میں انعام کا حقدار ایک شخص ہوگا۔ اس کا طریقہ کار یہ ہوگا کہ مضامین وصول کرنے کے بعد شاکر القادری صاحب اور تفسیر صاحب کو ارسال کریں گے۔ اور باتفاق جو مضمون بہترین مضمون قرار پائے گا اسے انعام ارسال کردیا جائے گا۔

4- کوئی بھی موضوع لکھتے وقت کسی بھی مسلک پر طعن وتشنیع سے گریز کریں۔ دیگر مذاہب کے متعلق لکھتے ہوئے علمی انداز اور طور طریقے سے کام لیں کہ ہمارا مقصد تعمیری ہے تخریبی نہیں۔

5- اگر آپ کو کوئی بات اہل سنت والجماعت کے عقیدے کے منافی معلوم ہوتی ہے اور اسے اجاگر کرنا چاہتے ہیں تو اسے بھی دلائل کے ساتھ علمی انداز میں پیش کریں۔

6- اہل سنت والجماعت کے لفظ کو وسیع معنوں میں لیں اور اسے کسی مخصوص مسلک کے ساتھ منسلک نہ سمجھیں۔اس حوالے سے پاکستان میں کسی مخصوص مسلک کے ساتھ منسلک سمجھا جاتا ہے جبکہ اسکا معنی وسعت مانگتا ہے۔

7- مضمون کم از کم 1000 الفاظ پر مشتمل ہو۔ اس سے کم قابلِ قبول نہ ہوگا۔ جبکہ زیادہ الفاظ آپ کی علمی قابلیت کی دلیل ہوگی۔

8- مقابلہ ختم ہونے پر ہم سب مضامین نشر کریں گے اور انعام یافتہ مضمون کو دیگر مضامین کے سامنے رکھ کر موازنہ کریں گے اور بتلائیں گے کہ کن وجوہات کی بنا پر ہم نے اس مضمون کو انعام کا حقدار ٹھہرایا۔ اور اس عمل کا مقصد یہ ہے کہ آئندہ لکھنےوالے احباب ان چیزوں کا خیال رکھیں گے۔اس عمل سے لکھاریوں کی حوصلہ افزائی ہوگی اور علمی تحصیل میں اضافہ ہوگا۔نیز کسی کو اعتراض بھی نہ ہوگا کہ اس مقابلے میں کسی کی طرفداری کی گئی ہے۔

9- لکھنے والے احباب اپنا نام اور ایمیل نیز فون نمبر ایمیل کریں ۔ اور ساتھ ہی یہ بھی لکھیں کہ فلاں مضمون پر لکھنے کا ارادہ ہے۔

10- 31 اکتوبر 2009 تک آپ اپنے کوائف اس ایمیل پر ارسال کرسکتے ہیں raasikh@gmail.com۔

11- مضامین وصول کرنے کی آخری تاریخ  30 نومبر 2009 ہوگی۔

12- اس مقابلے کے متعلق اگر آپ اپنے بلاگ پر لکھیں گے تو ہم آپ کے شکر گزار ہوں گے۔ کہ یہ اجر وخیر کا کام ہے اور خیر پر دلالت کرنے والا خیر کرنے والے کے برابر اجر وثواب کا خدا باری تعالی سے مستحق ہوگا۔

13- اس حوالے سے اگر آپ کے پاس کوئی تجویز یا مشورہ ہے تو ضروری پیش کریں۔ تمام مندرجہ بالا باتیں حتمی باتیں نہیں۔ مناسب تجاویز سامنے آنے پر رد وبدل کا امکان موجود ہے۔

14- آپ سب کے لئے دعا گو ہوں خدا  مجھے اور آپ کو خدمتِ قرآن کی توفیق عطا فرمائے۔ آمین ثم آمین۔

فائل یہاں سے اتاریں

والسلام علیکم ورحمۃ اللہ وبرکاتہ
مدینہ شریف
راسخ کشمیری

قادیانیت کے حوالے سے گزشتہ عرصہ بلاگرز کے درمیان کافی لے دے ہوئی ۔ خبروں میں بھی قادیانیت کا تذکرہ ہوتا رہا۔ جناب خود ساختہ جلا وطن (MQM) کے قائدِ ابدی الطاف حسین صاحب نے بھی اس مسئلہ میں بس یونہی ٹانگ اڑائی تو علمائے کرام نے اس ٹانگ کو اپنے قبضے میں اس طرح لیا کہ ٹانگ چھڑانے کے لئے انہیں دوسرا بیان دینا پڑا۔بات یہ ہے کہ ہر کوئی ایک دوسرے کے کام میں مداخلت کرے گا تو اسکے ساتھ ایسے ہی ہوگا۔ قادیانیوں کے کفر واسلام کا مسئلہ علماء کے درمیان مسئلہ ہے الطاف صاحب ان باتوں سے دور رہیں تو امید ہے اپنی پارٹی کو بہتر طور طریقے پر چلا سکیں گے ورنہ ان کے لئے مشکلات پے درپے آتی رہیں گی۔

***

اس حوالے سے پنجابی فلموں کے ہیرو گورنرِ پنجاب  سلمان تاثیر بھی  توہینِ ختم نبوت کے قانون پر اپنی بے صبری نہ چھپا سکے بلکہ وہی معاندانہ رویہ اختیار کئے ہوئے غلط بیان دیا۔ انہیں بھی تردیدی بیان جاری کرنا پڑا۔  کہنے والے کہتے ہیں کہ یہ قانون در اصل توہین کے مرتکب آدمی کو کچھ تحفظ اس لئے دیتا ہے کہ کم سے کم اگر پکڑ لیا جائے تو عوام اس کا کچھ نہیں بگاڑ سکتی جبکہ ختم کرنے کی صورت میں عوام مزید ہوشیار ہوجائے گی۔۔۔ اور دمادم مست قلندر ہوگا۔ ویسے بھی اس معاملے پر ہم لوگ بیحد جذباتی ہیں، کریں بھی کیا کہ یہ معاملہ ہے ہی اتنا حساس۔ ويسے جو واقعتا توہین کے مرتکب ہوتے ہیں تو ان کے ساتھ  برا ہی ہونا چاہئے کیونکہ ہم لوگ اپنی ماں بہن کو دی گئی گالی برداشت نہیں کرتے اور قتل پر تل آتے ہیں تو یہ تو رحمۃ للعالمین صلی اللہ علیہ وآلہ وسلم کا معاملہ ہے کہ جن کی محبت سے ہمارے ایمان کی تکمیل ہوتی ہے۔ اور اس محبت کا اندازہ ایک غیور مسلمان ہی لگا سکتا ہے۔ ورنہ بہت سے ایسے لوگ ہیں جو مغربی افکار سے آلودہ ذہن لیکر اپنے معاشرے میں تہذیب وتمدن کی لن ترانیاں گاتے نظر آتے ہیں۔۔۔ کیا انبیاء علیہم الصلاۃ والسلام پر دشنام طرازی تہذیبی عمل ہے؟  اگر نہیں تو اس کا دفاع کرنا بھی ایک غیر مہذب عمل ہے۔ البتہ قانون کی بالادستی ہونی چاہئے تاکہ کوئی شخص ذاتی رنجش کی بنیاد پر اس قانون کا غلط استعمال نہ کرے۔

***

ویسے آج تک جتنے بھی اس حوالے سے واقعے سامنے آئیں ہیں اربابِ معرفت کا کہنا ہے یہ ایجنسیوں کا کھیل ہے جو اس ملک میں افراتفری پھیلانا چاہتی ہیں۔ملک دشمن عناصر کو یہاں امن وامان ایک آنکھ نہیں بھاتا۔  اور یہ بات بالکل بعید نہیں کیونکہ ہم لوگ جو پاکستان میں رہتے ہیں کبھی ہم نے اپنے غیر مسلم کو دزدیدہ نگاہوں سے نہیں دیکھا۔ بلکہ اسکا  اتنا ہی احترام کیا جاتا ہے جتنا عام انسان کا۔ مذہبی اختلافات کے باوجود قتل وغارت گری تک بات نہیں پہنچتی۔ ہمارے ہاں کتنے گرجہ گھر ہیں کبھی بھی کسی مسلمان نے ان پر حملہ کرنے کی کوشش نہیں کی۔ جب بھی باتیں سامنے آتی ہیں تو اس میں باہر والوں – خدا انہیں غارت کرے- کا ہاتھ ہوتا ہے۔

***

میں نے یہ موضوع قادیانیوں کے قرآنی تراجم پر گفتگو کرنے کے لئے شروع کیا تھا۔ لیکن بات کہاں سے کہاں چلی گئی۔اصل موضوع کی طرف آتا ہوں۔ میں  یہ موضوع قادیانیوں کے تراجم کی تشہیر کے لئے نہیں لکھ رہا بلکہ ان دوست واحباب کی انتباہ کے لئے لکھ رہا ہوں کہ ان تراجم کو پڑھتے وقت یہ  معلوم ہونا چاہئے کہ یہ ترجمہ کس کا ترجمہ پڑھا جا رہا ہے۔ بصورتِ دیگر جن لوگوں کو مذہبی اختلاف کا علم نہیں ہوتا بعض دفعہ وہ عقیدے کی کشمکش میں پڑ کر اپنا دین ایمان کھو بیٹھتے ہیں۔  عقیدہ اور ایمان ہی ہے جو انسان کو سرخرو کر سکتا ہے ورنہ کفر وشک میں پڑ کر نور سے محروم اور نار کا مستحق بناتا ہے۔ خدا ہمارے دین ایمان کو محفوظ کرے۔ اور راہِ حق پر تادمِ آخر رکھے۔ آمین ثم آمین۔

***

میرے سامنے ڈاکٹر وجیہ بن عبد الرحمن کی ایک بحث موسوم بعنوان (معانئ قرآن کریم کے انگلش تراجم میزانِ اسلام میں) عربی میں موجود ہے۔ جو قرآن پرنٹنگ پریس میں چھپی ہے۔  میں اس بحث کا مکمل ترجمہ تو نہیں کر رہا بلکہ پڑھ کر اس میں چند باتیں جو قادیانیت کے متعلیق ہیں شئیر کر رہا ہوں:
ڈاکٹر صابر طعیمہ اپنی کتاب (باطنی عقائد پر اسلام کا حکم) صفحہ 372 سے لیکر 400 تک اس بحث کو چھیڑتے ہوئے  کہتے ہیں کہ جب انگریز ہندوستان پر حملہ آور ہوئے اور مغلوں کی سولہویں صدی میں بنائی گئی تیموری سلطنت روبہ زوال ہوئی تو انگریزوں نے اپنے آپ کو 50 ملین مسلمانوں کو اپنے مقابل پایا ۔ اور اس بات کا انہیں ادراک تھا کہ مسلمانوں کا مقابلہ اتنا آسان کام نہیں۔ اور یہ بات بھی نہیں کہ مسلمانوں کے حالات بہتر تھے۔ بلکہ فقر وفاقے کی زندگی گزارنے پر مجبور تھے۔

***

آنا فانا قادیانی تحریک قادیان سے شروع ہوئی ۔  ابو الحسن الندوی رحمۃ اللہ علیہ فرماتے ہیں کہ مرزا غلام احمد قادیانی نے بتدریج اپنے آپ کو دنیا کے سامنے پیش کیا پہلے اپنے آپ کو مسیحِ موعود ثابت کرنے کی کوشش کی پھر نبوت بلکہ نبوت سے بھی اعلی کا دعوی کر ڈالا ۔ مرزا کی کتابیں براہینِ احمدیہ اور ازالۂ اوہام کے مطالعہ کرنے  سے یہ بات بالکل عیاں ہوجاتی ہے۔کہ اس میں مرزا نے الہام اور علم باطنی اور علم یقینی کو ایط طبعی منزل قرار دیا ہے جو آپ صلی اللہ علیہ وآلہ وسلم کی متابعت اور ان میں فناء ہونے سے حاصل ہوسکتی ہے۔پھر مرزا بغیر (نبوت) لفظ کی تصریح کے نبوت کے خصائص کا ذکر کرتا ہے اور کہتا ہے کہ ان خصائص کا پانا تبعیت اور وساطت سے ممکن ہے۔

***

1900؁  میں عبد الکریم نامی شخص نے خطبۂ جمعہ میں کہہ ڈالا کہ مرزا غلام احمد اللہ کی طرف سے بھیجے گئے ہیں اور ان پر ایمان لانا واجب ہے۔ اور انبیاء پر ایمان لاتا ہے اور مرزا پر نہیں لاتا وہ رسولوں کے درمیان تفریق کا مرتکب ہوتا ہے۔

***

قادیانیوں کے اعتقادات میں سے یہ ہے کہ عیسی علیہ السلام اپنی ظاہری موت کے بعد کشمیر کی طرف ہجرت کرگئے تاکہ انجیل کی تعالیم وہاں پر پھیلاسکیں ۔ 120 کی عمر میں وفات پائی اور کشمیر ہی میں دفن ہوئے۔  پھر مرزا نے اس بات کا بھی دعوی کیا کہ وہ مہدی اور عیسی اور محمد علیہم الصلاۃ والسلام ان میں حلول ہیں۔اسی طرح قادیانیوں کا یہ بھی اعتقاد ہے کہ مرزا غلام احمد مہدی بھی ہے اور نبی بھی۔  قادیانیوں کا یہ بھی اعتقاد ہے کہ قرآن پاک جو معجزات بتلاتا ہے وہ مجازی اور رمزی تعبیرات ہیں۔

***

قادیانیوں کے مشہور انگلش تراجم

قادیانیوں کے مشہور انگلش تراجم درجِ ذیل ہیں:
1. محمد علی لاہوری کا ترجمہ۔
2. غلام فرید کا ترجمہ۔
3. ظفر اللہ خان کا ترجمہ۔
4. خواجہ کمال الدین کا A Running Commentary on the Holy Quran ترجمہ۔ یہ لندن  1948 میں طبع ہوا۔  اس ترجمہ میں مصنف نے قرآنی آیات کی بعید از قیاس تاویلات کی ہیں۔ مثال کے طور (دخان) یعنی دھواں کے متعلق لکھا ہے کہ اس سے مراد ریل انجن کا دھواں ہے۔

محمد علی لاہوری کا ترجمہ

1916 میں قرآنِ مجید کے نام سے یہ ترجمہ انگلینڈ میں ظاہر ہوا۔ اس وقت چونکہ مسلمانوں کے اوساط میں ابھی کوئی  انگریزی مقبول ترجمہ ظاہر نہیں ہوا تھا تو اس ترجمے کو ہاتھوں ہاتھ لیا گیا۔  عبد اللہ یوسف علی اور بکثال کے ترجمے سے قبل اسے مسلمانوں کا ترجمہ تصور کیا جاتا تھا۔  اس ترجمہ میں جو عقائدی غلطیاں ہیں وہ صریح ہیں مثال کے طور عیسی علیہ السلام کی موت کا قول ہےتاکہ مرزا قادیانی کی نبوت کو سچ ثابت کیا جاسکے۔ اسی طرح فرشتوں کے بارے میں یہ کہا گیا ہے کہ یہ اللہ تعالی  کی خیر کی ارادی قوت کی تمثیل ہے۔ جبکہ جن شر کی مجازی تعبیر ہے۔ اسی طرح جنت کو اللہ تعالی کی رضا کی معنوی تجسید گردانا گیا ہے۔ اور دوزخ کو اللہ تعالی کی ناراضگی کی معنوی تجسید لکھا گیا ہے۔اور تمام معجزات کا  سرے سے ہی انکار کیا گیا ہے۔

***

ظفر اللہ خان  کا ترجمہ

1371 ہجری میں یہ ترجمہ لندن میں  The Quran نام کے تحت شائع کیا گیا۔  اس میں معجزات کی غلط تاویل کی گئی۔ نیز جنات کے وجود کا انکار کیا گیا۔ اور یہ لکھا گیا کہ یہ انسان کا ہی ایک Aristocratic Group ہے جو عوام الناس کے ساتھ نہیں رہتا۔ اسی طرح شیطان کو نفسِ امارہ  بالسوء کی مجازی تعبیر گردانا گیا ہے۔

قادیانیت کے متعلق کتابوں کے مطالعہ کے لئے اس ربط پر تشریف لے جائیں۔

نستعلیق بلاگ کو آن لائن کرنے میں جو کارفرما عوامل ہیں ان میں سب سے بڑی صرف اور صرف دو باتیں ہیں اور وہ ہیں طباعتِ قرآن پاک اور خطِ نستعلیق کی خدمت کرنا۔ اس حوالے میں اپنی تقصیر کا معترف ہوں۔ اور میں یہ بوسیدہ عذر پیش کرکے کہ میرے پاس وقت کم ہے اس پراجیکٹ کو دھچکا نہیں لگانا چاہتا کہ میری زندگی کے یہ دو اہم ہدف ہیں۔ اگر میں خود ہی ہمت نہیں کروں گا تو مخلص دوست واحباب بھی میسر نہ ہوں گے۔

***

ستعلیق بلاگ پر دوست احباب تشریف لاتے ہوں گے لیکن کم ہی تبصرے ملتے ہیں اس لئے اندازہ نہیں ہوپاتا کہ دوست احباب اس بلاگ کے بارے میں کیا سوچتے ہیں۔ بہر کیف اس امر میں بھی میں اپنے آپ کو ہی کوس سکتا ہوں۔

***

ہماری اردو بلاگنگ ابتدائی مرحلے میں ہے۔ اس کو ارتقائی مرحلے میں داخل کرنا ایک چیلنج ہے اور میں اس بات سے بیحد خوش ہوں کہ احباب متحد ہوکر یہ کام کرتے چلے آ رہے ہیں۔ اس حوالے سے منظر نامہ کا وجود آکسیجن کا کردار ادا کر رہا ہے۔ہفتہ بلاگستان بڑا زبردست کارنامہ ہے۔ خدا کرے اردو کا یہ کارواں پھلتا پھولتا اور منزل کی طرف چلتا رہے۔ آمین۔

***

چونکہ یہ بلاگ در اصل قرآن پاک اور نستعلیق خط کے لئے ہے اس لئے میں کئی دنوں سے سوچ رہا تھا کہ کس طرح اس بلاگ کے ذریعہ مطلوبہ اہداف حاصل کرنے چاہئیں۔مکرم شاکر القادری صاحب سے مشورہ کیا کہ قرآن شریف اور نستعلیقی موضوعات کے حوالے سے مقابلہ کا اعلان کیا جائے وہ اس طرح کہ ایک موضوع دیا جائے اور دوستوں کو اس پر تحقیقی مقالہ لکھنے کو کہا جائے۔ اور جس شخص کا سب سے بہترین مقالہ ہوگا اسے بطورِ انعام مدینہ منورہ سے کوئی تحفے تحائف بھیجیں جائیں۔ اس حوالے سے شاکر القادری صاحب نے تو میری ہمت افزائی کی ہے اب آپ دوست احباب اس حوالے سے کیا کہتے ہیں وہ معلوم کرنا چاہتا ہوں۔ امید ہے آپ لوگوں کی طرف سے بھی مثبت جواب ملے گا۔

***

قرآن پاک کا کام میں تو ذریعۂ نجات سمجھ کر کر رہا ہوں۔ جبکہ نستعلیق کا کام بھی بیحد اہمیت کا حامل ہے ۔ ان شاء اللہ کسی مناسب موقع پر دونوں پراجیکٹ کی تفصیلات آپ احباب کے سامنے پیش کروں گا۔ اور جو جو احباب ان دونوں کاموں کے لئے میدان میں آنا چاہیں مطلع کریں کہ میری بھی ہمت بندھے اور ایک پلان کے تحت ہم سب اکٹھے رفتہ رفتہ منزل تک سفر کرسکیں۔ (ان شاء اللہ)۔

والسلام علیکم
راسخ کشمیری۔ مدینہ شریف۔ 30 ستمبر 2009۔ بدھ

کس باغ میں آسیب خزاں آ نہیں جاتا
گل کونسا کھلتا ہے جو مرجھا نہیں جاتا

***

کون سا جھونکا بجھا دے گا کسے معلوم ہے
زندگی اک شمع روشن ہے ہوا کے سامنے

***

میری نانی  (حمیدہ خانم) ر اہِ حق سدھار گئیں۔ انکی مقدار محبت کو لفظوں میں لانا ممکن نہیں۔ میرے ساتھ وہ کتنی محبت کرتی تھیں وہ میں ہی محسوس کرسکتا ہوں۔ انکی محبت کو لفظوں کا پیرہن نہیں پہنا سکتا۔ خدا ان کی قبر پر رحمتیں برسائے اور سوال کے وقت ثابت قدمی عطا کرے اور جنت الفردوس میں اعلی مقام عطا فرمائے۔ آمین ثم آمین۔

***

بہتر (72) سال کی تھیں اور زندگی کے نشیب وفراز میں بہت سارے صدمے جھیلے۔ جس وقت ہندوستان کی زمین پاکستان کو جنم دینے کے لئے دردِ زہ میں مبتلا تھی اس وقت وہ جڑانوالہ اور فیصل آباد میں ہوتی تھیں ۔ ہندو مسلم لڑائی دیکھی اور بہت سارے اندوہناک منظر صفحۂ خیال میں محفوظ کئے۔ جوان ہوئیں تو نانا (خواجہ محمد صادق) کے عقد نکاح میں آئیں۔ ہمیں نانی بتایا کرتی تھیں کہ ہمارے نانا جی سیاست میں بھرپور حصہ لیا کرتے تھے۔ 2003 میں جب پاکستان جانا ہوا تو نانا جی کے ایک معمر دوست سے ملاقات ہوئی وہ ان کو یاد کیا کرتے تھے اور محلے میں جسے جس چیز کی ضرورت پڑتی اسے پورا کرنے کے لئے آگے آگے ہوتے۔

***

نانی بتاتی ہیں کہ ہمارے نانا محترم سید عطاء اللہ شاہ بخاری کے ساتھ بھی ہوا کرتے تھے اور ان کے ساتھ کئی مرتبہ جیل کے ہوا بھی کاٹی۔۔۔ اس خدا ترس بندے کی کہانی بہت عجیب تھی لوگوں سے محبت کرنے والا اپنوں کی نفرتوں کا شکار ہوا۔ تجارتی غرض سے نکلے ہوئے نانا جی کراچی گئے اور پلٹ کا گھر نہ آئے۔ انکے ڈائری اور ایک خط گھر کے پتے پر ضرور پہنچا۔ شنید ہے کہ اس سارے معاملے میں ان کے چھوٹے بھائی کا ہاتھ تھا۔ اور وجہ یقینا پیسہ ہی ہوگی۔ کہ لالچ بڑی بری بلا ہے۔

***

32 سال سے زیادہ عرصہ سے میرے نانا جی لاپتہ ہیں۔ اور میری نانی مرحومہ نے یہ عرصہ بڑے صبر وتحمل سے گزارا۔ اس تہجد گزار عورت نے صبر ومحبت کی اعلی مثالیں قائم کیں۔ انکا منور چہرہ میری آنکھوں میں سمایا ہوا ہے۔ انکی محبت میرے وجود میں تحلیل ہے۔ مدینہ منورہ میں بھی کئی سال گزارے پھر پاکستان چلی گئیں اور اب آخری مرتبہ چند ماہ پہلے مدینہ منورہ تشریف لائیں بہت کمزور ہوچکی تھیں۔ کمزور کیوں نہ ہوتیں زمانے کے بوجھ اپنے کندھوں پر اٹھاتی اٹھاتی آخر کار تھک ہار کر جوارِ رحمت میں جگہ پالی (ان شاء اللہ)۔ آپ دوستوں سے یہ باتیں اس لئے شئیر کیں کہ جب بھی یہاں سے آپ کا گزر ہو میری نانا نانی اور دادا دادی کے لئے ضرور دعائے مغفرت کردیں۔ اور ہوسکے تو فاتحہ پڑھ کر بخش دیں۔ اللہ تعالی آپ کو اجر جزیل عطا فرمائے ۔ آمین ثم آمین۔

والسلام علیکم ورحمۃ اللہ وبرکاتہ
مدینہ شریف
26 ستمبر 2009

ملکِ عزیز میں آئے دن بمبار گاڑیوں کے ذریعہ معصوم جانیں ضائع ہوتی نظر آتی ہیں۔ ایسے ہولناک مناظر اب ہماری زندگی میں روٹین بنتے چلے جا رہے ہیں۔۔۔ کیوں ؟ اس سوال کا جواب اربابِ اختیار ہی دے سکتے ہیں جنکی بصارت پر حرصِ اقتدار اور ہوسِ مال نے پردے ڈالے ہوئے ہیں جبکہ وہ بصیرت سے بھی محروم نظر آتے ہیں۔

***

بمبار گاڑیوں کا تاریخی تذکرہ کرتے ہوئے (Mike Davis) اپنی کتاب (Buda’s Wagon, A brief history of the Car Bomb) میں اسے (Mario Buda) کی طرف منسوب کرتے ہیں جوامریکا میں  ایک اطالوی مہاجر دہشت پسندوں کے گروہ سے تعلق رکھتا تھا۔

***

ستمبر   1920؁ کی ایک دوپہر (نیویارک۔ وال سٹریٹ) پر قیامت خیز ثابت ہوئی جب (Mario Buda) نے اپنی گاڑی جسے ایک گھوڑا کھینچ رہا تھا دوراہے پر کھڑی کی اور نکل کر خود ہجوم میں شامل ہوگیا ۔ تھوڑے ہی فاصلے پر کچھ پمفلیٹ بھی گرے پڑے تھے جن پر حکومتِ وقت کے لئے پیغام تحریر تھا کہ’’سیاسی قیدیوں کو رہا کردیا جائے ورنہ یقینی موت سے تم کہیں نہیں بھاگ سکتے ‘‘ یہ پیغام امریکی دہشت پسند تنظیم کی طرف سے تھا۔

***

اس گاڑی کو معدنی بارود اور آتشی مادے ’’جیلاٹین‘‘ سے بھرا گیا تھا۔ اور جب یہ مادہ پھٹا تو اس نے زمین میں گڑھا کردیا تھا ۔ ارد گرد مکانات میں کھڑکیوں کے شیشے چور چور ہوگئے تھے ۔ اور پاس ہی کھڑی مزید گاڑیوں میں آگ لگ چکی تھی جبکہ بڑی بڑی بلڈنگوں کو خالی کرانے کا کام بھی شروع ہوچکا تھا۔ہر جگہ آہ وبکا کی آوازیں سنی جا رہی تھیں۔ اس جہنمی انداز قتل میں 40 جانیں ضائع ہوئیں تھیں اور 200 کے قریب زخمی ہوئے۔

***

(Mario Buda) نے یہ مذموم حرکت حکومتِ وقت سے انتقامی جذبہ کے تحت کی تھی کہ اس کے دو ساتھی (Nicola Sacco) اور (Bartolomeo Vanzetti) قتل وڈکیتی کے الزام میں جیل کاٹ رہے تھے جنہیں بعد میں   1927؁ کو پھانسی دے دی گئی تھی۔اس حادثہ کے 91 سال بعد چل سو چل خودکش گاڑیوں کا سلسلہ چل نکلا جو کرۂ ارض کے طول وعرض میں پھیلا اور پھیلتا گیا۔ اور آج یہی حربے امریکا اور امریکیوں کے ایجنٹ ہمارے وطن میں آزما کر  وطنِ عزیز میں انتشار اور دہشت پھیلا رہے ہیں۔

***

دہشت گردی اور دہشت پسندی کی اصطلاحات اور مذموم اعمال امریکا کی ہے دین ہے۔ بمبار گاڑیوں سے شروع ہوئی یہ داستان بمبار جہازوں تک ارتقائی مرحلے طے کرچکی ہے اور اس سے بڑھ کر خودکش بمبار کی اصطلاح بھی انسانی وحشی اختراعات میں شامل ہوچکی ہے۔ مغربی دنیا نے دنیا کو سوائے ویرانی کے کچھ نہیں دیا۔ عراق وافغانستان نیز فلسطین اور دنیا کے دیگر پسماندہ مسلم ممالک پر ایک نظر ضرور ڈالیں۔ ہر طرف نفرت ووحشت اور بارود کی پھیلتی ہوئی بو ہی محسوس ہوگی۔۔۔

***

تاریخ شاہد ہے کہ عالمِ اسلام نے انسانیت کے لئے بہتری وبرتری کے وہ وہ فارمولے زندگی کے ہر میدان میں ایجاد کئے جنہیں آج مغربی دنیا اپناکر سارا سہرا اپنے سر لے لیتی ہے اور فخریہ انداز میں بتلاتی ہے کہ ہم نے انسانی زندگی کو ترقی اور عروج عطا کیا۔ افسوس کے مسلمانوں نے اپنی ایجادات واختراعات کو آگے نہ بڑھایا ۔ شہوات کے دائرے میں گھومتی ہوئی یہ امت اس بھول کا خمیازہ بھگت رہی ہے۔ خدا ہمارے حال پر رحم فرمائے ۔ آمین۔

راسخ کشمیری۔ مدینہ شریف۔  بدھ 26 رمضان المبارک  1430؁۔ 16 ستمبر 2009؁

 اس برسات کی اکتا دینے والی رات میں بھی وہ اپنے پرانے شغل میں مبتلا تھا جس کو اس کے روزمرہ کے مشاغل میں شامل سمجھا جانا غلط نہ ہوگا۔ ماجد سامنے کی مسہری پر اوندھا دراز تھا، جوتے اس نے نہیں اتارے تھے اور قمیض کا کالر ڈھیلا کر لیا تھا۔ دن بھر کی گرد اور کثافت نے اس کے گھونگھریالے بالوں کی توانائی مرجھا دی تھی۔ میں نے دیکھا اس کی انگلیاں موبائل کے بٹنوں پر چل رہی تھیں اور اپنے گردوپیش سے بے خبر اس کی آنکھیں موبائل کے بلوری پردے پر انہماک کے ساتھ گڑی ہوئی تھیں۔ اس کے اس شغل سے میں اب کچھ اکتا سا چکا تھا۔ ایک بار اس نے مجھے موبائل کی اسکرین پردو Lesbian لڑکیوں کی چھوٹی movie دکھائی تھی جو خاصے گدیلے اور آرام دہ بستر پر دراز ایک دوسرے کی ٹی شرٹ اتار رہی تھیں۔ خدا جانے آدھے منٹ کی مووی کے ایسے عریاں اور شہوت انگیز ٹکڑے وہ کہاں سے اور کیسے حاصل کر لیتا تھا۔ میں نے لپک کر اس کا موبائل چھین لیا اور اس کے اسکرین پر نظر ڈالی مگر تب تک پردے پر اندھیرا ہو چکا تھا۔ میں نے موبائل اُسکے بستر پر ڈال دیا۔ ماجد اٹھائیس سال سے زیادہ کا نہ تھا جنسیت سے اس کی دلچسپی اسکی عمر کا تقاضا تھا اس لیے میں نے اس سے نہ پوچھا کہ اس بار وہ کونسی فحش فلم Downloadکرا کر لایا ہے۔

ہم دونوں ایک ہی کمپنی میں ملازم تھے میں اس سے کئی سال بڑا تھا اور کمپنی میں خاصا پرانا ہو چکا تھا۔ وہ میری تقرری کے کئی سال بعد کمپنی کے مارکیٹنگ سیکشن میں آیا تھا۔ میرے بیوی بچے تو وطن میں تھے ۔ مکان میں جگہ بھی تھی اور ماجد بھی اکیلا ہی تھا میں نے اس کو پے انگ گیسٹ کے طور پر جگہ دے دی۔ ماجد ایک تیز طرار اور ذہین لڑکا تھا۔ اس کا رنگ صاف، ناک نقشہ متوازن اور قد نکلتا ہوا تھا۔ انگریزی بھی اچھی بولتا تھا۔ چال ڈھال میں تھوڑی سی اکڑ اور خودسری کا انداز صاف نمایاں تھا۔ کئی بار میں نے یہ محسوس کیا کہ اس کے پاس مجھ سے گھلنے ملنے یا بے تکلف ہو کر باتیں کرنے کے لیے کوئی موضوع نہیں ہوتا جس کے سبب وہ خود اپنے خول میں مگن رہتا۔ ایک دن نہ جانے کس جھونک میں اور بڑے منہ پھٹ انداز میں اس نے اس رویئے کا سبب بھی بتا دیا۔ کہنے لگا: ”میں نے سنا ہے کہ آپ نے کمپنی کولکھ کر دے دیا ہے کہ آپ کو کوئی ایسا کام نہ سونپا جائے جس میں کمپیوٹر کی ضرورت پڑے کیونکہ آپ کو اسے آپریٹ کرنا نہیں آتا اور آخری عمر میں کمپیوٹر سیکھنے کے جھمیلے میں آپ پڑنا بھی نہیں چاہتے ۔“ میں نے ماجد کو بتایا کہ اس نے ٹھیک سنا ہے، کمپیوٹر سے مجھے وحشت ہوتی ہے وہ دوسروں کا منہ کھلوائے بغیر باتیں کرتا ہے۔ اس کے جواب میں وہ تیوریوں پر بل دے کر بولا: ”مجھ جیسے لوگوں کو جو تہذیب پال رہی ہے اس کو ٹکنو کلچر کا نام دیا جاتا ہے۔ جناب اتنا فاصلہ ہو گیا ہے ہمارے اور آپ کے درمیان کہ جب کبھی میں خالی وقت میں آپ سے گپ لڑانا چاہتا ہوں تو گھنٹہ بھر یہی سوچتا رہتا ہوں کہ ہم دونوں کون سے ایسے ٹاپک پر بات کر سکتے ہیں جس کے درمیان کوئی واہٹ پید اہونے کا امکان نہ رہے۔ صاحب مجھے تو آپ کے ہاتھ کی بنائی کافی کی تعریف کرتے ہوئے بھی ہچکچاہٹ ہوتی ہے۔ مزے لیتا ہوں اور خاموشی سے پی جاتا ہوں۔“

یہ بات اگر ماجد مجھے نہ بھی بتاتا تو بھی مجھے اس کا احساس تھا۔ وہ مجھے گھر کے اند رکی ایک بے معنی سی شئے سمجھ کر نظرانداز کر دیا کرتا تھا۔ سچ تو یہ ہے کہ خود کمپنی نے جس کا میں برسوں سے ملازم تھا مجھے صاف بتا دیا تھا کہ اگلے ایک سال کے عرصے کے بعد وہ مجھے نکال دے گی۔ دیکھا جائے تو اس میں نہ کمپنی کا کوئی قصور تھا نہ مجھ جیسے بوڑھے آدمی کا۔ یہ بتانے میں مجھے تکلف نہیں کہ بستر پر لیٹے اس بدلتی دنیا کے بارے میں فکرمندی سے میں سوچا کرتا،د یکھتے ہی دیکھتے تجارت کی دنیا میں جو انقلاب آیا تھا اس نے مجھ جیسے بہت سے لوگوں کو یکایک بے مصرف ثابت کر دیا تھا۔ میں اگر کمپیوٹر چلانا سیکھ بھی لیتا تو اپنے مزاج اور پوری شخصیت کو کیسے بدلتا جو نئے تجارتی نظام کی نئی ضرورتوں کے پیش نظر ناکارہ ثابت ہو چکی تھی۔ ماجد جتنا وقت موبائل پر صرف کرتا شاید اتنا ہی وقت وہ اپنے کمپیوٹر پر انٹرنیٹ کی ہوا خوری میں بھی گزارتا۔ ایک دن جب میں نے اس کو حسب معمول رات کے وقت بستر پر موبائل سے شغل کرتے دیکھا تو چڑ کر بولا: ”میاں تم سے اگر کوئی بات کرنا بھی چاہے تو کب کرے تم کو اپنے کھلونے سے فرصت نہیں ملتی۔“ میری بات سن کر اس نے موبائل پر سے نظر تو نہیں ہٹائی لیکن دھیرے سے مسکرایا اور بولا: ”ابھی ابھی ایک Message آیا ہے۔ لیجئے آپ بھی سنیئے۔“ یہ کہہ کر اس نے اسکرین پر لکھی عبارت پر نظر ڈالی اور بولا: اس پیغام کا عنوان ہے :” دائمی رہائش گاہ“ پھر اس نے عبارت پڑھنا شروع کی: ”اے لوگو لپکو اپنے رب کی طرف ، اس کی پرکیف اور پربہار جنتوں، نیز اس کی حفاظت اور آغوش پناہ یعنی مغفرت کی طرف کہ وہ حقیقی اور دائمی رہائش گاہ ہے۔“ ایمانداری کی بات تو یہ ہے کہ اس چھوٹے سے Handset کی کرامتوں سے مجھے پوری آگاہی نہ تھی اور نہ دلچسپی۔ جب کبھی بال بچوں کو فون کرنے کی ضرورت پڑتی تو پی سی او یا دفتر کے فون سے کام چلا لیتاتھا۔ بیوی تو دفتر کے ہی فون پر رابطہ قائم کر لیا کرتی تھی۔ دراصل اس کمپنی سے میرا معاملہ کچھ گھریلو قسم کا تھا۔ میرا باپ اپنی نو عمری کے زمانے سے ہی کمپنی کے موجودہ مالک کے باپ کا نجی سیکریٹری تھا اور اپنے بڑھاپے تک اسے چھوڑ کر کہیں نہ گیا۔ یہاں تک کہ تعلیم مکمل کرنے کے بعد مجھے یہاں ملازمت باپ کی خدمات کے مدنظر ہی ملی تھی۔ ماجد موبائل پر بھیجی گئی اس عبارت کو سنانے کے بعد اس بات کی دیر تک کوشش کرتا کہ مجھ سے باتیں کرے۔ اس درمیان اس نے مجھے بتایا کہ موبائل ہمارے نظامِ سرمایہ داری کی رگ رگ میں سما چکا ہے۔ میں نے اس موقع پر ماجد کے بارے میں اپنے دل کی بات پہلی بار کہہ دی: ”تم نوجوان لوگ مجھے کسی دوسری ہی دنیا کی مخلوق لگتے ہو۔“ یہ کہہ کر میں ہنسا او رمعذرت خواہ نگاہوں سے اس کو دیکھنے لگا کہ کہیں وہ برا نہ مان جائے ۔ اس کے چہرے پر ناگواری کا کوئی اشارہ نہ تھا۔ وہ کچھ سوچ کر بولا: ”ہمارے دن اور رات اب کارپوریٹ سوسائٹی میں گزرتے ہیں۔ نفع نقصان پر قائم اس سماج میں جینے کے لیے میرا خیال ہے کہ جسم میں خون کی گردش ذرا تیز چاہیے ۔ پھر اس نے بتایا کہ اس کا بلڈ ہمیشہ نارمل سے کچھ زیادہ بڑھا ہوا ہی رہتا ہے۔ یہ تو مجھے معلوم تھا کہ وہ کافی میں دودھ کے بجائے اسپرین کی گولی ڈال کر پیا کرتا تھا دوسری حیرت انگیز بات اس کی نیند کے بارے میں تھی۔ دیر رات تک میں اس کو انٹرنیٹ پر شادی ڈاٹ کام کی سیر کرتے دیکھتا۔ پھر نصف شب کے آس پاس جیسے ایک نئی تازگی آجایا کرتی۔ اس وقت اگر میں کچھ دیر کو ہوشیار ہو جاتا تو ماجد کو موبائل پر کسی سے باتیں کرتے ہوئے پاتا۔

اس گفتگو کے آدھے جملے جومیرے کانوں تک پہنچتے انہیں ادا کرتے وقت اس کے سینے میں مچلتے جذبات کی جو دھوپ چھاؤں مجھے اس کے چہرے پر آتی جاتی دکھائی دیتی اور جس کے ساتھ اس کی آنکھیں بار بار چمک اٹھتیں اور چہرہ تمتما جایا کرتا یا پھر گالوں پر شرارت بھری کیفیت کا شوخ رنگ سا بکھر جایا کرتا اور پھر جذبات کی آنچ سے پگھلے ہوئے الفاظ قطرہ قطرہ اس کے موبائل کے مائک پر ٹپکنے لگتے اور آواز میں ایک میٹھا سا مخملی سا ارتعاش کھنک جایا کرتا اور بے قراری کی اس کیفیت میں یہ اندازہ کر کے کہ میں جاگ گیا ہوں اس کا اچھل کر بستر چھوڑ دینا اور لمبی ڈگ بھر کر ڈرائنگ روم میں جا کر سلسلہ کلام جاری رکھنا ان باتوں سے مجھے یہ اندازہ تو ہو ہی جاتا کہ موبائل کی دوسری طرف جو کوئی بھی ہے وہ کہ کوئی عام اور کاروباری فرد نہیں ہے اور نہ ہی کوئی ایسا شناسا یا عزیز ہے جس کے لیے اتنے تن من کے ساتھ اتنی گہرائی میں اتر کر تیرنے کا مزہ لیا جاتا ہے اور جس کی دوسروں سے رازداری بھی برتی جاتی ہے۔ راتوں کی ان مہمات کو سر کرنے کے بعد خدا جانے وہ اپنی نیند کب پوری کرتا تھا۔

دھیرے دھیرے مجھے ماجد کے بارے میں جس کا پورا نام ماجد شیخ تھا کچھ اور باتیں بھی معلوم ہوئیں۔ ماجد کا باپ ایک سرکاری افسر تھا جو چند سال پہلے فوت ہو چکا تھا۔ ایک بڑا بھائی تھا جو ماں سے لڑ جھگڑ کر بیوی بچوں کے ساتھ رہ رہا تھا۔ بڑی بہن کسی ڈگری کالج میں پڑھاتی تھی اور ماں کی کفالت کر رہی تھی۔

ایک رات وہ انٹرنیٹ پر شادی ڈاٹ کام میں اسکرین پر ایک لڑکی کی تصویر کو انہماک کے ساتھ دیکھ رہا تھا۔ لڑکی کی عمر ستائیس اٹھائیس سال کی رہی ہوگی۔ تصویر میں وہ خاصی جاذبِ نظر کہی جاسکتی تھی ، دوپٹے سے آدھا سر ڈھکا ہوا، شرمائی سی کیمرہ مین کے بہت اصرار پر آدھی ادھوری نگاہوں سے کیمرے کی طرف دیکھ رہی تھی۔ چہرے پر ملاحت اور بھولے پن کی گھریلو سی کشش تصویر سے نکل کر جیسے پھاندی پڑ رہی تھی۔ اس پر نظر پڑتے ہی میں اپنی جگہ ٹھٹھک سا گیا۔ دھندلا سا خیال یہ بھی آیا کہ غالباً وہ چہرہ کہیں دیکھا تھا لیکن اس سے قبل کہ میں تصویر کی جانب پوری طرح متوجہ ہوں ماجد نے بڑی تیزی سے تصویر کو اسکرین پر سے غائب کردیا۔ مجھے شک ہو اکہ کہیں یہ لڑکی وہ تو نہیں جس سے راتوں میں موبائل پر ماجد دیر تک باتیں کیا کرتا ہے۔ لیکن میں نے بھی چشم پوشی سے کام لیا اور ماجد سے کچھ نہیں پوچھا۔ اسی وقت ماجد کے موبائل پر کوئی پیغام آنے کی گھنٹی بجی۔ ماجد نے پیغام پڑھا ، زور سے قہقمہ لگایا اور بولا: ”آپ دیکھ لیجئے ٹیکنالوجی کہاں کہاں اور کیسے کیسے استعمال ہو رہی ہے۔ اس پیغام کا عنوان ہے : ”حیات اور شعور“ پھر اس نے عبارت پڑھ کر سنائی: ”موت فنا نہیں بلکہ بقا کا نام ہے یہ وصالِ حق کا ذریعہ ہے ، موت کا آنا محدود کو چھوڑ کر لامحدود کی طرف جاتا ہے۔ ہوش مند و باشعور لوگوں کی طرح بھی طبعی موت کے پہلے ارادی موت اختیار کر کے اس کی لذت اور راحت کا مزہ چکھ لو۔“ پھر وہ مسکرا کر بولا: ”کچھ دنوں میں اب یہ Message آئے گاکہ ارادی موت کس کو کہتے ہیں اور اس موت کو کیسے گلے لگانا چاہیے تاکہ سیدھے جنت میں جانے کو مل جائے ۔“ مجھے ان پیغامات میں دلچسپی نہ تھی میں نے کوئی جواب نہ دیا اور دوسری طرف کروٹ لے کر سو گیا۔

یہ کہنے میں مجھے تکلف نہیں ہے کہ ماجد ایک محنتی اور ذہین لڑکا تھا جو اپنی ماں سے دور رہنے کے سبب کبھی کبھی اسے بہت یاد کرتا، موبائل پر اس سے بات کرتے ہوئے رو بھی پڑتا۔ اس کا خیال تھا کہ ماں نے اس کے لیے سب دکھ اٹھائے تھے اور اس کے بڑے بھائی نے نہ صرف اپنی پسند سے شادی کر کے اور پھر اکثر ماں کے مقابلے میں اپنی بیوی کی بے جا طرفداری کر کے ماں کا بہت دل دکھایا تھا۔

جن دنوں مجھ سے پردہ داری کے ساتھ ماجد موبائل پر راتوں میں عشق لڑایا کرتا مجھے اکثر اپنی جوانی یاد آیا کرتی، تب پیغام و سلام پہنچانے کے اتنے آسان ذرائع موجود نہ تھے، اس وقت ہر گھر میں فون بھی نہ تھے ۔ میری معشوقہ جو آج میرے جوان بچوں کی ماں ہے اس لڑکی تک ایک رقعہ حفاظت سے پہنچانے کے لیے کتنے پاپڑ بیلنا پڑتے تھے۔ جوانی کے وہ پاگل پن کے دن مجھے یاد آتے جب میں اس پردہ دار لڑکی کی ایک جھلک دیکھنے کے لیے اسکول کی بس کے انتظار میں گرمی کی دوپہروں میں ان پیڑوں کے نیچے ٹہلا کرتا تھا جہاں کنکوے کا مانجھا سوتنے والے کاریگر اپنا کام کر رہے ہوتے۔ یہ عشق میں نے طالب علمی کے زمانہ میں کیا تھا۔ تعلیم پوری ہوئی تو نوکری ملنا آسان نہ تھا۔ لڑکی غریب گھر کی تھی اس کے بھائی وغیرہ پہلے ہی پاکستان جا چکے تھے۔ بیوہ ماں اس کی شادی بلاتاخیر کر کے اپنے بیٹوں کے پاس کراچی جانے کے لیے بہت دنوں سے بے حد پریشان تھی۔ اس لیے ایک بہت ہی معمولی سی ملازمت اختیار کر کے اپنے ماں باپ کی مخالفت کے باوجود مجھے اپنی محبوبہ کو بیاہ کر لانا پڑا تھا۔ جب میں ماجد کو جذبات میں ڈوب کر راتوں کی تنہائیوں میں اس کی محبوبہ سے باتیں کرتے دیکھتا تو مجھے لگتا شاید میں ایک بار پھر اپنی جوانی کے گزرے ہوئے عہد میں لوٹ آیا ہوں او رماجد کی وہ شب بیداریاں مجھے اپنی شب بیداریاں لگنے لگیں۔

ایک دن ماجد کی غیر موجودگی میں ایک خاتون نے گھر کی کال بیل بجائی۔ میں نے دروازہ کھولا تو دیکھا کہ متوسط گھرانے کی ایک مسلم خاتون دروازے پر کھڑی ہے۔ اس خاتون نے مجھے بتایا کہ وہ ماجد شیخ کے بارے میں کچھ ضروری معلومات حاصل کرنے کے لیے اس کی غیر موجودگی میں مجھ سے ملنے کی فکر میں تھی۔ اس نے اپنا تعارف کراتے ہوئے مجھے بتایا کہ وہ اس لڑکی کی ایک سہیلی کی بڑی بہن ہے جس کو ماجد یہاں سے سینکڑوں میل دور کے ایک چھوٹے سے شہر میں شادی ڈاٹ کام میں اس کی تصویر دیکھنے کے بعد کافی دنوں سے بلاناغہ فون کیا کرتا ہے۔ لڑکی متوسط گھرانے کی ہے، بی اے پاس ہے گھر پر بچوں کو ٹیوشن پڑھاتی ہے، قبول صورت ہے۔ لمبی انتظار کے بعد کوئی معقول رشتہ نہ آنے کے سبب اس نے گھر والوں سے چھپا کر ماں کی رضامندی سے لیکن باپ کی لاعلمی میں رشتے کی تلاش میں انٹرنیٹ پر اپنی تصویر اور موبائل نمبر دیا تھا۔ وہ ایک ایسے باپ کی بیٹی ہے جس کا یہ ایمان ہے کہ جو لڑکیاں ٹی وی دیکھا کرتی ہیں ان کا جنازہ اس وقت تک قبر میں دفن ہونے سے انکار کر دیا کرتا ہے جب تک ان کا ٹی وی بھی ان کے ساتھ قبر میں نہ دفن کر دیا جائے ۔ وہ ٹی وی کو تالے میں رکھتا ہے۔ اس خاتون نے بتایا کہ لڑکی کا باپ کسی پرائیویٹ کالج میں پڑھاتا تھا اب ریٹائر ہو چکا ہے اور کئی بیماریوں کا مریض ہے۔ لڑکی کی ماں ایک گھریلو عورت ہے اور گنٹھیا کے شدید مرض میں مبتلا ہے۔ جہاں تک لڑکی کا سوال ہے وہ بہت سگھڑ، گھریلو، نیک مزاج اور روزہ نماز کی پابند ہے۔ میں نے اس خاتون سے پوچھا:
”کیا وہ دونوں ایک دوسرے سے کبھی ملے ہیں؟“
”نہیں۔ صرف دونوں نے ایک دوسرے کی تصویریں انٹرنٹ پر دیکھی ہیں۔“
”کیا دونوں نے اپنے بزرگوں کو اس سلسلے میں اعتماد میں لیا ہے ؟“ میں نے جاننا چاہا۔
”نہیں۔ دونوں کو اس معاملے میں اپنے بزرگوں پر اعتماد نہیں ہے۔“ یہ جواب سن کر مجھے تھوڑی سی حیرت ہوئی۔ تو اس نے بتایا کہ دونوں ایک دوسرے کو اپنی اپنی جگہ اپنے اپنے بارے میں سمجھنے اور سمجھانے میں لگے رہتے ہیں لیکن اپنے اپنے بزرگوں کو شامل نہیں کرنا چاہتے۔“
پھر میں نے اس ادھیڑ عمر کی سادہ مزاج خاتون سے آخری سوال کیا:
”کیا وہ ایک دوسرے کو پسند کرتے ہیں؟“
”یہ بات تو وہ دونوں ہی زیادہ بہتر جانتے ہوں گے۔“ اس نے جواب دیا۔
”میں تو آپ سے ماجد کے چال چلن وغیرہ کے بارے میں جاننا چاہتی ہوں۔ وہ بھی اپنے طور پر، کیونکہ اس لڑکی نے اپنی سہیلی کو جس کی میں بڑی بہن ہوں درپردہ اپنا ہم راز بنایا ہوا ہے اور کیونکہ میری بہن یہیں میرے پاس ہے اس لیے وہ اپنی دوست کی بہتری کے لیے اپنی جگہ چپ چاپ ماجد کے بارے میں معلومات کر لینا چاہتی ہے۔“

میں نے اس خاتون کو بتا دیا کہ لڑکا مناسب تنخواہ پاتا ہے ، کمپنی میں عزت کی نگاہ سے دیکھا جاتا ہے اور جہاں تک میری علم میں ہے اس کا چال چلن بھی ٹھیک ہی ہے البتہ خاندانی حالات کامجھے کوئی خاص علم نہیں ہے۔ لڑکی کے بارے میں اس خاتون کی بتائی ہوئی باتوں میں مجھے ایک بات پریشان کر رہی تھی، اس لیے میں نے اس سے ہمت کر کے پوچھ ہی لیا:
”آپ کہتی ہیں کہ لڑکی کو ٹی وی دیکھنے کی ممانعت ہے اور باپ ٹی وی کو تالے میں رکھتا ہے۔“
”جی ہاں ٹھیک کہہ رہی ہوں۔ لڑکی کے کمرے میں ایک کھڑکی تھی جس پر وہ کبھی کبھی کھڑی ہوتی تھی۔ سامنے ایک قصائی کی دکان تھی اس کا جوان لڑکا اس پر ڈورے ڈالنے لگا۔ بڑا بوال ہوا۔ باپ کا خیال تھا کہ ایسی گمراہیاں ٹی وی دیکھنے سے ہوتی ہیں۔ باپ نے ٹی وی میں تالا لگا دیا اور وہ کھڑکی بھی چنوا دی۔“
میں نے پوچھا: ”پھر اس لڑکی کو موبائل کیوں تھمادیا گیا جو سینکڑوں میل دور ایک انجان لڑکے سے راتوں میں عشق و محبت کی باتیں کیا کرتی ہے۔“
اس کے جواب میں اس اجنبی خاتون نے مجھے بتایا کہ لڑکی کی ماں زمانہ شناس ہے۔ اس کا خیال ہے کہ لڑکی کا باپ تو بیٹی کا رشتہ تلاش کرنے میں کچھ نہیں کر پا رہا ہے اگر لڑکی کو بھی مشکیں باندھ کر رکھا گیا تو شاید وہ زندگی بھرکنواری ہی بیٹھی رہے۔

ماجد کے بارے میں اس اجنبی خاتون کی تفتیش کے بعد خاصا وقت گزر گیا۔ سچ تو یہ ہے کہ اس دوران میں اپنی گھریلو پریشانیوں کے سبب ماجد کی صحبت سے کچھ کٹ سا گیا تھا۔ اسی دوران ایک عجیب واقعہ ہوا۔ دراصل ماجد نے اس کا جن لفظوں میں تجزیہ کیا تھا اس نے مجھے سوچنے پر مجبو رکردیا تھا۔ ہو ایہ تھا کہ ایک دن ماجد حسبِ معمول بستر پر دراز اپنے موبائل کے پردے پر آنکھیں جمائے کوئی منظر دیکھنے میں محو تھا میں نے ہمیشہ کی طرح اس سے دریافت کیا:
”پھر تم نے کوئی فحش منظر کہیں سے اڑا لیا۔“ جواب میں وہ خاموشی سے اسکرین دیکھتا رہا تو میں نے موبائل اس کے ہاتھ سے چھیننا چاہا، ٹھہریے وہ بولا: ”لیجئے ایک قصائی سے آپ کی ملاقات کرواتا ہوں۔“ یہ کہہ کر اس نے موبائل کے کچھ بٹن دبائے اسکرین جب روشن ہو گیا تو موبائل اس نے میری طرف بڑھا دیا۔ اسکرین پر سیاہ شلوار اور لمبے کرتے میں ارغوانی رنگ کی واسکٹ پہنے اور سر پر چنٹ دار گول ٹوپی لگائے بے ڈول بدن کا داڑھی والا ایک پٹھان ہاتھ میں ننگی تلوار لیے کھڑا تھا۔ اس کے پیروں کے پاس ہی ایک آدمی جس کی دونوں کلائیاں پیٹھ کے پیچھے رسی سے بندھی ہوئی تھیں فرش پر سینہ کے بل پڑا ہوا تھا۔ یکایک وہ تلوار والا پٹھان اپنا ایک گھٹنا اس کی پیٹھ پر رکھ کر بیٹھتا ہے۔ اپنے ایک ہاتھ کی مٹھی سے اس کے سر کے بالوں کو کھینچ کر فرش پر پڑے آدمی کا چہرہ اوپر کی جانب اٹھاتا ہے اور اللہ اکبر کا بلند نعرہ لگا کر اس کی اوپر کھینچی گردن پر مہارت کے ساتھ تلوار کا دھاردار پھل چلا دیتا ہے یہاں تک کہ سر تن سے جدا ہوجاتا ہے۔ پھر زمین پر لرزتے ہوئے بے سر کے تن کی پیٹھ پر کٹے ہوئے سر کو رکھ دیتا ہے۔ زمین پر خون کی نہر بہہ اٹھتی ہے اسی وقت ایک عبارت پیش منظر میں ابھرتی ہے لکھا ہے:
 ”یہ ظلم نہیں! بڑے مقصد کے حصول کے لیے جدوجہد ہے۔“
میں اس بھیانک اور دل سوز منظر کو پھٹی پھٹی آنکھوں سے دیکھتا رہ جاتا ہوں۔ کچھ پل بعد اس سکتہ کی کیفیت سے نکل کر میں سانس روکے ماجد کی طرف دیکھتا ہوں اور پوچھتا ہوں:
”یہ سب کیا ہے ؟“ جواب میں ماجد چپ رہتا ہے۔ میں پھر کہتا ہوں:
”اپنے حلیے سے یہ افغانستان کا کوئی طالبان لگ رہا ہے شاید۔“ ماجد کوئی جواب نہیں دیتا، اپنا موبائل جیب میں رکھ کر گھر سے باہر چلا جاتا ہے لیکن اس موضوع کو لے کر دوسرے دن ناشتے پر ماجد سے میری جو بات ہوئی اس نے مجھے اور بھی پریشان اور فکرمند کر دیا تھا میں نے اس سے پوچھا تھا:
”کیا وہ افغانستان میں کھینچی گئی کوئی فلم تھی؟“
”معاملہ افغانستان، ترکستان یا بلوچستان کا نہیں ہے۔ معاملہ تو ان وسائل کا ہے جن کی مدد سے یہ منظر آپ تک پہنچ رہا ہے۔“ پھر وہ مسکرا کر بولا تھا: ”ٹیکنالوجی کی مدد سے ایسے قصائی بھی پید اکیے جاسکتے ہیں، جو ٹائم بم کی طرح کہیں بھی اور کبھی بھی پھٹ سکتے ہیں۔ اس کو ٹیکنالوجی کلچر کی ایک چھوٹی سی سوغات کہا جاتاہے۔“ اس کے جواب نے مجھے چونکا دیا مگر میں اس کو مشکوک نگاہوں سے دیکھتا رہا تھا۔ میں نے اس سے معلوم کرنا چاہا کہ کیا وہ طالبانوں کاہمدرد ہے۔ کیا وہ مذہبی آدمی ،آخر اس نے اس فلم کو اپنے موبائل پرڈاؤن لوڈکیوں کیا؟ جواب میں وہ میرے سارے سوالوں کا مذاق اڑاتا رہا۔ پھر بولا: ”اس کوآپ لہو گرم رکھنے کا ایک بہانہ سمجھ لیجئے ۔ یہ چیزیں میرے لیے اسپرین کا کام دیتی ہیں۔“ اس میں شک نہیں کہ ماجد کو بہ ظاہر مذہب سے کوئی دلچسپی نہیں تھی۔ بلکہ سچ تو یہ ہے کہ اسے اپنے علاوہ کن چیزوں سے دلچسپی تھی یہ بتانا مشکل ہی تھا۔

اس واقعے کو کافی دن گزر چکے تھے ماجد اپنا تبادلہ کرا کر ماں کے پاس جا چکا تھا۔ اس کے معاشقے نے اتنے عرصے میں کیا صورت اختیار کی تھی اس کی جستجو بھی میرے اندر اب پہلی جیسی نہیں رہ گئی تھی لیکن ایک دن دفتر کے کچھ لوگوں میں ایک عجیب سی کھسر پھسر ہو رہی تھی۔ بات کوکریدنے پر اتنا معلوم ہو اکہ ماجد نے اپنے گھر والوں سے چھپ کر ان کی شمولیت کے بغیر سینکڑوں میل دو رکسی شہر میں اپنی پسند کی شادی کر لی ہے۔ یہ بات میرے لیے کچھ خوشی کی بھی تھی اور کچھ تشویش کی بھی۔ میں نے ماجد سے فون پر بڑی بے صبری سے اس پراسرار خبرکی تصدیق چاہی تو معلوم ہوا کہ وہ خبر درست تھی اور وہ لڑکی وہی تھی جس سے ماجد راتوں میں موبائل پر باتیں کیاکرتا تھا۔ اتنی معلومات ہونا میری جستجو کے لیے کافی تھی۔ حالانکہ تفصیل کے طو رپر یہ جاننے کے لیے ابھی بہت کچھ باقی تھا۔ مثلاً یہی کہ شادی کیوں کر ہوئی، گھر والے کیوں شریک نہیں ہوئے اور شادی کر کے ماجد اپنی بیوی کو کہاں لے کر آیا اور لڑکی فی الحال کہاں مقیم ہے۔

ماجد کی شادی کی خوش خبری مجھ تک پہنچے ہوئے غالباً ایک ماہ گزرا ہوگا کہ ایک دن میرے گھر کی کال بیل بجی۔ دروازہ کھلا تو دیکھا وہی مقامی خاتون ایک بار پھر دروازے پر کھڑی ہے جنہوں نے خود کوکچھ عرصہ پہلے ماجدکی معشوقہ کی کسی سہیلی کی بڑی بہن کہہ کر متعارف کروایا تھا۔ اس اجنبی خاتون نے جو سنسنی خیز باتیں مجھے بتائیں وہ اخباروں کے لیے تو اچھا خاصہ مسالہ تھا لیکن میں تو جیسے تھرا کر رہ گیا۔ معلوم ہواکہ ماجد نے لڑکی کو اس بات پر رضامندکیا کہ بارات میں مع اپنی والدہ کے وہ کسی بھی عزیز کو شریک نہیں کرے گا اور صرف دو چار دوستوں کے ساتھ بارات لے کر آئے گا۔ ہوٹل میں قیام کرے گا اور دلہن کو رخصت کرکے ہوٹل میں لائے گا پھر شب عروسی گزار کر دوسرے دن ہنی مون کے لیے کسی پہاڑی اسٹیشن پر لے جائے گا۔ لڑکی کے ماں باپ راضی ہو گئے ۔ کیونکہ اتنا تو معلوم ہی تھا کہ لڑکا برسرروزگار ہے اور خاندان بھی ٹھیک ہے ، یہ ان کے گھر کی پہلی اور آخری شادی تھی۔ انہوں نے پورے اہتمام اور تمام رسومات کے ساتھ بیٹی کا عقد اور مہمانوں کی ضیافت کر کے اسے رخصت کیا۔ لڑکی رات بھر اپنے دولہا کے ساتھ ہوٹل میں رہی۔ وہاں دونوں کے درمیان زن و شوہر کا رشتہ قائم ہوا لیکن دوسرے روز تین پہر دن گزرنے کے بعد دولہا اپنی دلہن کو ہوٹل میں چھوڑ کر اور دلہن کی ماں کو یہ فون کر کے کہ ماجد کی والدہ دل کا دورہ پڑنے سے ہسپتال میں بھرتی کی گئی ہے الٹے پیروں جہاں سے آیا تھا وہاں واپس ہو گیا۔ ابھی ایک ہفتہ پہلے اسی نے موبائل پر لڑکی کو بتایا کہ وہ اسے طلاق دے چکا ہے۔ طلاق کی نوعیت کیا تھی یہ بھی وہی جانتاتھا۔ لڑکی کی ماں نے فون پر ماجد کی والدہ سے جب بات کی تو اس نے جواب دیا کہ لڑکی والوں نے نہ تو شادی کے معاملے میں اس کی ایما لی اور نہ اس کوشریک کیا گیا۔ اس لیے جو کچھ ہوا اس کی ذمہ داری ماں پر عائد نہیں ہوتی۔ جب لڑکی کی ماں نے قانونی چارہ جوئی کے لیے وکیلوں سے مشورہ کیا تو انہوں نے بتایا کہ جہیز کا مقدمہ قائم کرنا پڑے گا۔ لڑکی کو بہت سے جھوٹ بولنا پڑیں گے۔ دو تین سال کی مدت کے بعد تقریباً تین لاکھ روپیہ لڑکا گلو خلاصی کے عوض دے گا جس میں سے آدھی رقم وکیل اپنے محنتانے کے بہ طور لے لے گا۔ لڑکی کے ماں باپ ضعیف اور بیمار ہیں دوسرا کوئی دوڑنے دھوپنے والا گھر میں نہیں۔ مقدمہ لڑنا ان کے لیے عذاب تھا مگر لڑکی نے یہ کہہ کر ان کی مشکل آسان کردی کہ وہ عدالت میں اپنے وکیل کے سکھائے ایک بھی جھوٹ بولنے کے لیے تیار نہ ہوگی۔ یہ احوال بتا کر وہ خاتون کمرے سے باہر آئی کچھ فاصلے پر کھڑی ایک ٹیکسی کی طرف بڑھ کر آواز لگائی۔ ٹیکسی سے چادر میں لپٹی ایک لڑکی اتری جس کے ساتھ وہ کمرے میں واپس آئی۔ میں نے دیکھا وہ وہی تصویر والا چہرہ تھا، بھولا سا، اداس سا اور شرمیلا سا چہرہ۔ اس لڑکی نے صرف مجھے اتنا بتایا کہ نکاح سے پہلے جب ماجد ڈائس پر آکر بیٹھا تو بھی باربار وہ موبائل پر کسی سے بات کررہا تھااور اس کے چہرے پر ہوائیاں اُڑرہی تھیں اور نکاح کے بعد بھی وہ مسلسل موبائل پر ہی مصروف تھا۔ پھر وہ ڈبڈبائی آنکھوں سے اپنے دونوں ہاتھ جوڑکر بولی۔
”انکل میں آپ کے ہاتھ جوڑتی ہوں، مجھے اس قصائی سے ملوا دیجئے۔“ میں نے مردہ سی آواز میں اسے بتادیا کہ ماجد کا تبادلہ ہو چکاہے اور وہ اپنے وطن اپنی والدہ کے پاس جا چکا ہے۔
میرے لیے یہ بڑا افسوسناک واقعہ تھا۔جب مجھے ماجد سے اس موضوع پر بات کرنے کا موقع ملا تو میں نے اس سے پوچھا: ”یہ تم نے کیا کیا؟ ماجد تم سے ایسی امید نہ تھی۔“ اس کاجواب تھا: ”بڑ امقصد حاصل کیے جانے والے فیصلے جلد بازی میں نہیں کرنا چاہئیں۔“ یہ سن کر میں اپنا غصہ نہ روک سکا۔ بولا: ”یہ قصائی پن تم نے کیوں کیا؟“ اس کا جواب تھا: ”کیسا قصائی پن۔ شادیاں ہوتی ہیں تو طلاقیں بھی ہوتی ہیں۔“

اس گفتگو کے بعد ماجد سے پھر میری ملاقات نہ ہوئی۔ ایک موسم گرما کی شام جب عید کا تہوار قریب تھا میں گھر کے لیے کچھ خریداری کے واسطے بازار گیا۔ چوڑی والی گلی میں اس شام خواتین کا مجمع تھا وہیں مجھے اتفاق سے وہ خاتون مل گئیں جو ایک بار ماجد کی محبوبہ کو میرے گھر لے کر آئی تھی۔ میں نے ان سے اس لڑکی کے ساتھ ہونے والے حادثے پر افسوس کا اظہار کیا تو اس نے بتایا کہ اس لڑکی کے سامنے جینے کا کوئی مقصد نہ رہ گیا تھا اس لیے اس نے پھانسی لگا کر خود کشی کرلی۔ یہ خبر سننے کے بعد سے نہ جانے کیوں کئی بار میری آنکھوں کے سامنے تلوار سے سر کاٹنے والا وہ دردناک منظر گھوم گیا جو ماجد نے کبھی موبائل کے اسکرین پرمجھے دکھا کر ایک قصائی سے ملوایا تھا۔

انہیں دنوں کی ایک رات میں نے خواب میں ماجد کو دیکھا۔ اس کے بدن پر ایک مختصر سی چڈھی کے علاوہ اور کوئی کپڑا نہ تھا وہ ننگے بدن ایک اونچی کرسی پر بیٹھا تھا اور اس کے کندھے کے سہارے چمڑے کی ایک پیٹی لٹک رہی تھی جس میں ایک خاصا بڑا سا خنجر بندھا ہوا تھا۔ کچھ دیر میں اسے خائف نظروں سے دیکھتا رہا پھر میں نے ہمت کرکے اس سے کہا: ”بلاشبہ تم بے حد کمینے آدمی ہو۔“ میری کہی گئی اتنی سخت بات پرذرا بھی بر امانے بغیر اس نے سوال کیا:
”کیوں؟“
”تم نے اس سیدھی سادی معصوم لڑکی کو موت کے گھاٹ اُتار دیا۔“
وہ کچھ نہیں بولا۔ کرسی پر سے اٹھا کندھے سے لٹکا ہوا خنجر کرسی کی پشت پر ٹانکا اور اپنے بدن سے چڈھی کو یوں اتارا جیسے وہ کسی کے سامنے نہیں بلکہ غسل خانے میں اکیلا ہو۔ میں نے اس کومادر زاد ننگا دیکھا۔ اس نے چڈھی کو کرسی کی سیٹ پر رکھ کر ہاتھوں سے اس کی سلوٹوں کو برابر کرنے کا کام کرتے ہوئے جواب دیا:
”اگر ہم بدقسمتی سے اپنی پسند کی زندگی جی نہیں پائیں لیکن ہمیں اپنی پسند کی موت مرنے کاموقع مل جائے تو اس طرح کی موت مر جانے میں کونسی برائی ہے۔“
یہ کہہ کر ماجد نے کسی کو پکارا میں نے دیکھا کہ آواز پر کوئی اندر آیا مگر چہرہ نظر نہیں آیا مادر زاد ننگے ماجدنے اس کو اپنی چڈھی پکڑا دی۔ آنے و الے نے ہاتھ بڑھا کر چڈھی لے لی اور جب وہ واپس جانے کو پلٹنے لگا تو اس کے چہرے پر روشنی پڑی۔ میں نے صاف پہچان لیا کہ وہ زویا ہے میری اکلوٹی بیٹی زویا جو بی اے کے آخری سال میں پڑھ رہی تھی۔ میرے منہ سے چیخ نکلتے نکلتے رہ گئی۔ میں ماجد کو گھورتا رہا پھر یہ سوچ کر کہ کیا ماجد میری بیٹی کے سامنے بھی مادرزاد ننگا تھا۔ میری نظر اس کی ناف کے نیچے پھسلی جہاں سیاہ بالوں کے گھناؤنے گچھے تھے۔ میں نے ابکائی لی اور میری آنکھ کھل گئی۔ میرا بدن پسینے پسینے ہو رہا تھا او رمیں زویا کو چیخ چیخ کر پکار رہا تھا۔

اس روز سارا دن میں ایک عجیب سی کیفیت میں مضطرب رہا۔ دوپہر کو دفتر میں میری بیوی کا فون آیا خدا جانے کیوں اس اضطراب میں سب سے پہلے میں نے بیوی سے اپنی بیٹی زویا کی خیریت پوچھی۔ میری یکایک اس غیر متوقع دریافت پر بیوی کو کچھ حیرت ہوئی بولی :”کیوں؟ زویا کو کیا ہوا ہے، وہ ٹھیک ٹھاک ہے۔“ پھر میری بیوی نے مجھے بتایا کہ زویا بہت دنوں سے اپنے ماموں سے موبائل دلانے کی ضد کر رہی تھی۔ جو اس کے ماموں نے آج اسے تحفے میں دے دیا ہے کیونکہ آج اس کی اٹھارویں سالگرہ ہے۔ یہ سن کرمیں پھر ایک اضطرابی کیفیت میں مبتلا ہو گیا۔ ایک ہیجانی حالت میں زویا کو اس کے موبائل پر یہ سوچ کر فون کیا کہ اس کے یوم پیدائش پر اسے مبارک باد تو دے ہی دوں۔ ”ہلو…“ ادھر سے جانی پہچانی زندگی سے بھرپور چہکتی ہوئی آواز آئی۔ ایک پل اس آوا زکا سحر مجھے اچھا لگا پھر میں سینے میں کروٹیں لیتے اضطراب کو دباتے ہوئے بولا: ”بیٹی، اپنا خیال رکھنا۔“ میرے منہ سے مبارک باد کا ایک لفظ بھی نہ نکلا بلکہ اس کی جگہ باوجود اپنے کو پوری طاقت سے روکنے کے میں پھوٹ پھوٹ کر رو پڑا۔

اضطراب (اقبال مجید) الزبیر میگزین