NAYYER MADANI .... نیر مدنی

نیّر مدنی کا فارسی کلام

2017-08-12T01:40:00.002-07:00

نیّر مدنی کا فارسی کلام

کرد بر من نظرے شوخ نگاہے عجبے

بر لبم وجد کناں آمدہ آہے عجبے

منزلم زیر قدم شوق ہمہ برق و صبا

خضر راہے عجبے، رہرو راہے عجبے

کعبہ از جلوہ او، دیر ہم از جلوہ او

دیں پناہے عجبے، کفر پناہے عجبے

دل پریشاں بہ طلب، او بہ نہانخانہ دل

میہمانے عجبے، چشم براہےعجبے

این گرفتار تپش، او بہ ادا و غمزہ

نیم بسمل عجبے، نیم نگاہے عجبے

نگہم بر رخ محبوب و لبم وقف درود

این گناہے عجب و طرز گناہے عجبے

دل گرفتار غم و غم بہ نگہبانئ دل

ناتوانے عجبے، پشت پناہے عجبے

حکم بربادئ نیّرشد و نیّر مسرور

داد خواہے عجبے، آمد و شاہے عجبے

نیر مدنی: ڈاکٹر سید سعید احمد کی کتاب "شہر ادب کانپور" سے مضمون

2017-08-11T13:33:00.000-07:00

نیر مدنی

(ڈاکٹر سید سعید احمد کی کتاب "شہر ادب کانپور" سے)

1935 کا زمانہ تھا تحریک آزادی اپنے شباب پر تھی۔ لکھنؤ میں ایک کل ہند مشاعرہ زیر صدارت مسز سروجنی نایئڈو منعقد ہوا جس میں مولانا حسرت موہانی، اصغر گونڈوی اور دوسرے شعراء شریک تھے۔ اس مشاعرے میں حضرت نیر مدنی بھی جو ابھی محض مبتدی تھے، مدعو کرلئے گئے تھے۔ ان کی ایک نظم "غلامی" اس دور میں بڑی شہرت پا گئی تھی۔ مس سروجنی نایئڈو کی فرمائش پر نیر صاحب نے یہ نظم سنائی تو حاضرین نے بہت پسند کی۔ جب نیر صاحب نظم سنا کر جانے لگے تو اصغر گونڈوی نےپوچھا "میاں کس کے شاگرد ہو؟" تو نیّر نے برجستہ کہا "حضور آپ ہی کا شاگرد ہوں"۔حضرت اصغر کے برابر میں مولانا حسرت موہانی بھی تشریف فرما تھے۔ انہوں نے حیرت سے اس نوجوان کو دیکھا۔ اصغر نے ذہن پر زور دیتے ہوئے کہا "میاں مجھےتو یاد نہیں پڑتا کہ تم کبھی اصلاح کی غرض سے میرے پاس آئے ہو؟" نیّرصاحب نے جواب دیا "حضور آپ درست فرماتے ہیں دراصل میں آپکے رنگ میں غزل کہنے کی کوشش کرتا ہوں اس لئے میں خود کو آپ کا معنوی شاگرد سمجھتا ہوں ورنہ اور کوئی میرا استاد نہیں ہے۔ اس جواب پر مولانا حسرت موہانی بڑے محظوظ ہوئے اور اصغر گونڈوی سے مخاطب ہوکر بولے "بسم اللہ۔ ایسے شاگرد کہاں نصیب ہوتے ہیں"۔ اصغر صاحب نے حسرت موہانی کے اس جملے کے بعد سکوت فرمایا اور نیر صاحب اس دن سے خود کو اصغر گونڈوی کا باقاعدہ شاگرد کہنے لگے اور شاعری میں ان کے اتباع کو حرز جاں بنالیا۔

نیّرمدنی نے 1933ء سے شعر کہنا شروع کئے اور 1983ء میں انتقال تک یہ سلسلہ جاری رہا۔ ان کا یہ پچاس سالہ ادبی سفر بڑے بڑے شعراء کے درمیان میں گذرا۔ شاعری کے آفتاب و ماہتاب کے درمیان ان کی سخنوری کا چراغ بھی پورے آب و تاب سے دمکتا رہا اور شائقین ادب سے داد سخن لیتا رہا۔ وہ غالب کے بڑے مداح تھے۔ اقبال، اصغر، جگر اور فانی سے بے پناہ عقیدت رکھتے تھے۔ وہ کہتے تھے کہ غالب کا علو، اقبال کی آفاقیت، اصغر کا لہجہ اور پاکیزہ خیالی، جگر کی مستانہ روی اور فانی کا آرٹ، یہ ہیں وہ خصوصیات جنہوں نے مجھے ان کا گرویدہ بنادیا ہے۔۔ چنانچہ ان کی شاعری میں یہی رنگ نمایاں ہیں۔ انہوں نے اپنے ایک شعر میں مولانا روم اور حضرت امیر خسرو سے بھی کسب فیض کا اظہار کیا ہے:

مرے سبوچۂ شعروغزل میں ہے نیّر

شراب میکدۂ پیر رومی و خسرو

حضرت مولانا نیّرمدنی کا اصلی نام سید محمد مدنی تھا۔ آپ کے والد حضرت مولانا سید محمد حسین بہ سلسلہ ملازمت ترک سکونت کرکے الہ آباد سے کانپور آگئے تھے۔ اس وقت نیّرصاحب کی عمر تقریبا دس سال تھی۔ نیّر صاحب نے ابتدائی تعلیم تو اپنے والد سے حاصل کی، لیکن دین کی اعلی تعلیم کے لئے دیو بند تشریف لے گئے اور وہاں حضرت مولانا اشرف علی تھانوی کی زیر نگرانی درس نظامی کی تکمیل کی اور 1932ء میں کانپور کی ایک مسجد میں امامت و خطابت کے فرائض انجام دینے لگے۔ قیام پاکستان کے بعد کانپور سے کراچی ہجرت کی اور یہاں بھی مسند رشدو ہدایت پر فائز رہے۔

1933ء میں آپ نے پہلا طرحی مشاعرہ پڑھا جس کا ایک شعر یہ تھا:

پایا مجاز ہی سے حقیقت کا راستہ

مجھ کو مذاق عشق نے انساں بنادیا

نیّر مدنی کی شاعری عارفانہ رنگ میں ڈوب کر کی گئی ہے وہ دین پس منظر کی وجہ سے عشق حقیقی کا اظہار نہایت خوبصورتی سے کرتے ہیں لیکن اس کا یہ مطلب نہیں کہ وہ محض معرفت کی یکسانیت میں گرفتار رہے۔ انہوں نے ہر موضوع اور ہر رنگ میں شعر کہے اور بڑی کامیاب غزلیں کہیں۔ مندرجہ ذیل اشعارسے نیّر کے انداز شاعری پر بخوبی روشنی پڑتی ہے۔

کام کرجاتے ہیں جس دم حادثات ۔۔۔ منکشف ہوتے ہیں اسرار حیات

غم بھی ہے منجملۂ ارباب عیش ۔۔۔ ہوسکے تو بخش دے فرقت کی رات

عشق کی سادہ مزاجی دیکھئے ۔۔۔ پوچھتا ہوں ان سے اپنے دل کی بات

دل میں نیّر وہ نہیں تو کچھ نہیں ۔۔۔ کائنات و ماورائے کائنات

مومن نے کہا تھا:

تم مرے پاس ہوتے ہو گویا ۔۔۔ جب کوئی دوسر انہیں ہوتا

نیّر نے اس مضمون کو کچھ یوں ادا کیا ہے:

وہ مرے سامنے نہیں ہوتے ۔۔۔ میں خود اپنے حضور ہوتا ہوں

اور نیّر کے اس شعر میں کیا غالب کے مخصوص لب و لہجہ کا عکس نظر نہیں آتا؟

کبھی مجاز بھی ہے آیئنہ حقیقت کا ۔۔۔ کبھی حقیقت کونین نقش مبہم ہے

نیّر صاحب کو بڑی قدرت کلام حاصل تھی۔ عربی و فارسی پر دسترس ہونے کی وجہ سے لفظیات پر مکمل عبور تھا۔ ہر موقع اور ہر موضوع کے اعتبار سے الفاظ کا انتخاب ان کے لئے بڑا کام نہ تھا۔ نئی نئی تراکیب لفظی ان کی شاعری میں جگہ جگہ ملتی ہیں۔ مثلا ان کا ایک شعر ہے:

عشق کا میکدہ ہےاور جلوہ ساقی ازل ۔۔۔ میرا سرور جاوداں میری شراب بے خلل

اس شعر میں " شراب بے خلل " نیّر صاحب کی اختراع پسندی کا منہ بولتا ثبوت ہے۔ اسی طرح ان کے ایک شعر میں آنسوؤں کو " جبرئیل غم پنہاں" کہا گیا ہےشعر یہ ہے:

درد آسودہ اقصی اگر ایماں ہوگا ۔۔۔ جبرئیل غم پنہاں سر مژگاں ہوگا

شاعری میں نیّر مدنی کے ان گنت شاگرد تھے جن میں سے چند نے انکی شاگردی کوباعث فخر جانا مثلا اشفاق کانپوری، وفا کانپوری، ریاض سیالکوٹی، عالم عظیم آبادی اور فضل گوالیاری۔ ان حضرات نے اپنے مجموعہ ہائے کلام اور ذاتی کتابوں اور تحریروں میں نیّر صاحب کی شاگردی پر برملا فخر کا اظہار کیا ہے۔ نیّر صاحب کا کلام جو ہزاروں صفحات پر پھیلا ہوا ہے ہنوز تشنۂ طباعت ہے۔

نیرمدنی کے انتقال پرزعماء کے تاثرات وپیغامات

2010-07-28T06:57:00.000-07:00

سلیم احمد

نیر مدنی کے انتقال کے محض دو ہفتے بعد ہی ممتازنقاد اورشاعر سلیم احمد بھی اس دنیائے آب وگل سے رخصت ہوگئے تھے۔ جناب نیر مدنی کے انتقال پر انہوں نے تعزیتی پیغام میں کہا تھا؛

"جناب نیرمدنی سے ملنے کے بعد ایک ایسی خوشبو سی محسوس ہوتی تھی جو اب ملنی مشکل ہے۔ ان سے گفتگو کرکے ایسا محسوس ہوتا تھا جیسا کہ کسی بڑے عالم اوربزرگ شاعر سے ہم کلام ہوں۔ نرم لہجے میں ان کی پاکیزہ گفتگو کی آوازمیرے کانوں میں اب بھی رس گھول رہی ہے، انکا اخلاق، انکی سادگی اورانکی پاکیزہ خیالی کی میں جتنی تعریف کروں کم ہے۔ بحیثیت شاعر وہ بہت بلند تھے، ان کےکلام میں پختگی تھی، انکا کلام تصوف میں ڈوبا ہوا تھا۔ عارفانہ شعر کہتے تھے۔ انہیں ہرصنف سخن پرعبورحاصل تھا اور انتہائی قادرالکلام استاد فن تھے۔ وہ ایک روایتی شاعر ہونے کی وجہ سے بھی عمر بھر دین پرقايم رہےکیونکہ انکا تعلق روایتی معاشرے سے تھا۔ روایتی شاعری سے دراصل وہ شاعری مراد ہے جوروایتی اقدار اورروایتی رویوں کی حامل ہو۔ نیر صاحب شايد اسی وجہ سے معاشرے میں اجنبی بن کررہ گئے تھے کہ وہ پرانی وضع داری اورروایات کے حامل تھے اورخودداری بھی ان میں بہت تھی۔ نیر صاحب اچھے سخن گو ہی نہیں بہت اچھے سخن فہم بھی تھے۔ انہیں سن کر ہمیں اصغر اورجگر یاد آتے تھے، نیراس قبیل کے آخری شاعر تھے جو اب نہ رہے۔ اللہ انہیں اپنے دامن رحمت میں جگہ دے اورلواحقین کو صبر جمیل غطا فرمائے۔ آمین "

ڈاکٹرسید یاورعباس

ڈاکٹرسید یاورعباس مرحوم جناب نیر مدنی کےقریبی اوردیرینہ دوستوں میں سے تھے۔ نیر صاحب کی وفات پر اپنے پیغام میں ڈاکٹر یاور عباس نے کہا؛
"جناب نیر مدنی مرحوم پر کچھہ لکھنے کی ابتدا انا للہ وانا الیہ راجعون سے کرنے کے بعد یہ مصرعہ پڑھنا خلاف موقعہ نہ ہوگا کہ

بہت آگے گئے باقی جو ہیں تیار بیٹھے ہیں

نیر صاحب میرے پرانے دوست اورترویج اردو کے معاملات میں میرے پرانے ساتھی تھے۔ متحدہ اردو محاذ میںوہ میرے دوش بدوش رہے۔ غزل ، نعت اور سلام کی محفلوں میں ساتھہ رہا۔ اچھے انسان، اچھے مسلمان اوراچھے دوست تھے۔ سوچ سمجھہ کر شعر کہتے تھے جس میں گہرائی کے ساتھہ خوبصورتی بھی ہوتی تھی۔ ہاں! مگر اپنے دوست حضرت کرارنوری کا یہ مصرعہ ہروقت میرے جاگے ہوئے شعور میں رہتا ہے؛

کیا جانئے بحر ہستی میں کب موج اٹھے کب بہہ جایئں

نیر مدنی صاحب کی یاد میں یہ چند مصرعے کسی شاعر کے بار بار یاد آتے ہیں؛

اک یار با وفا تھا اک مرد باوفا تھا

محفل میں دوستی کی اک رند پارسا تھا

اللہ مغفرت فرمائے۔ آمین

پیرزادہ عاشق کیرانوی

زندگی اپنی جن علامتوں، ضوکاریوں، شیرازہ بندیوں اورافکارونظریات کی ہمہ گیریت کی وجہ سےممتاز نظر آتی ہے ان میں شاعری کو جو فوقیت حاصل ہے وہ کسی اور فن کو میسر نہیں۔ شاعر اپنے اطراف و جوانب سے جسطرح متاثر ہوتا ہے اورجس انداز سے اسکو معاشرے کے سامنے پیش کرتا ہے وہ اسی کا حصہ ہے۔ ہزاروں واقعات ایسے ہیں جنہیں ہم صرف شاعری کی وجہ سے جانتے ہیں اور پرکھتے ہیں۔ لاتعداد افراد ہزاروں سال گذرنے کے بعد بھی نہ صرف اپنی حیات کا ثبوت دے رہے ہیں بلکہ ہم انکو انکی آنکھوں سے چلتا پھرتا دیکھتے ہیں۔ کسی نے خوب کہا ہے

رشک اعجاز مسیحا ہے کلام شاعر

سیکڑوں سال کے مردے کو جلا رکھا ہے

جناب نیرمدنی کا بھی ایسے ہی افراد میں شمار کیا جائے گا جنہوں نے نہ صرف اپنی شاعری اور پاکیزہ سیرت وکردار سے ماحول کو متاثر کیا بلکہ اپنے بعد ایک بہت بڑی تعداد ایسے شاعروں کی چھوڑ گئے جو اس چراغ کو روشن رکھیں گے۔ جناب نیرمدنی کی پوری زندگی اس پودے کو پروان چڑھانے میں بسر ہوگئی۔ انہوں نے اسقدر تعداد میں شعر کہے کہ انکا شمار میں آنا مشکل ہے۔ مجھے امید ہے کہ جناب نیرمدنی کے تلامذہ اس سرمائے کی حفاظت کریں گے جو وہ چھوڑ گئے ہیں۔

جناب نیر مدنی بڑے شاعر بڑے عالم

جہاں میں جن کےعلم وفن کا ہرسوبول بالا ہے

ہر اک شاعر کو ان کا عہد زریں یاد آئے گا

مقام شاعری ان کا بڑا ارفع ہے اعلی ہے

(آئندہ پوسٹ میں ملاحظہ فرمایئں جناب تابش دھلوی اور جناب ثاقب انجان کے پیغامات)

Idarah Adab-e-Aaliah, Kanpur, India. 29 February 1948

2010-07-15T00:49:00.000-07:00

2010-07-15T00:46:00.000-07:00

AN INTERVIEW PUBLISHED IN DAILY HURRIYET, KARACHI. SEPTEMBER, 1969

2010-07-15T00:33:00.001-07:00

Nayyer Madani: Before Partition

2010-07-15T00:26:00.000-07:00

2010-07-15T00:09:00.000-07:00

قطعات تاریخ وفات نیرمدنی

2010-06-05T00:45:00.001-07:00

رکھے تمہیں اللہ سدا خلد بریں میں

عابد بھی تھے عالم بھی تھے وہ اہل سخن تھے

کہتے ہیں یہ سب اہل ادب نیرمدنی

تم ماہر فن ماہر فن ماہر فن تھے

1983ء

کل سر راہ وفا کہتا تھا اک بالغ نظر

روشنی کے واسطے بھٹکے نہ کوئی دربد‏ر

یاد ماضی سے منور کیجئے دنیائے دل

جب کہ اب ہے جنت الفردوس ہی نیرکا گھر

1983ء

پھول نے پھینکی مہک روشنی تاروں سے چھنی

قبر ہے نور فگن چادر رحمت ہے تنی

غیب سے مصرعۂ تاریخ وصی نے پایا

ہے یہی صبح الم حضرت نیرمدنی

1983ء

ضو فگن ہیں ابھی اوراق کتاب فن پر

ناز تاریخ تھے تمہید تھے نیرمدنی

بزم اشعارستاروں کا وصی تھی مخزن

جب وہ آیئنۂ خورشید تھے نیرمدنی

1983ء

وداع دوست

ثاقب انجان

جنگ آزما جو نور سے ظلمت ہے آج بھی

نیر ادب کو تیری ضرورت ہے آج بھی

تھا کل بھی توھی خسروملک سخن اے‏دوست

اقلیم فن پہ تیری حکومت ہے آج بھی

بزم سخن میں حسن سخن پر یہ تبصرہ

اے دوست صرف تیری بدولت ہے آج بھی

سونی پڑی ہے بزم محبت ترے بغیر

اہل وفا کو تیری ضرورت ہے آج بھی

وہ شخص کل بھی حامل لطف رسول تھا

اس پر خدائے پاک کی رحمت ہے آج بھی

لاریب وہ تھا کاشف اسرا ر معرفت

نیر چراغ کوئے ولایت ہے آج بھی

نیرمدنی

2010-06-05T00:24:00.000-07:00

اگراشعارمیں پاکیزگی ھو تونیرشاعری پیغمبری ھے

نیرمدنی ھندوپاکستان کے معروف شاعر اور تحریک آزادی کے ایک ممتازرھنما 12 اگست 1983 کو کراچی میں انتقال کیا- نیرمد‏نی کا اصل نام سید محمد مد‏نی تھا جبکہ نیّران کا تخلص تھا۔ انکا آبائی وطن موضع بہادرپورضلع الہ آباد ہے جو انڈیا کے صوبے یوپی میں واقع ہے۔ وہ 1913 میں پیدا ہوئے اورجب انکی عمر د‏س سال تھی تو ان کے والد الہ آباد کی سکونت ترک کرکے بسلسلۂ روزگارکانپور آگئے۔ نیرمد‏نی کے والد سید محمد حسین رحمتہ اللہ علیہ ایک جید عالم تھے۔ انہوں نے نیرمد‏نی کوابتدامیں عربی، فارسی حدیث اور فقہ کی تعلیم دی اوراسکے بعد انہیں برصغیر کے عظیم دینی تعلیم کے ادارے دارالعلوم دیوبند بھیج دیا جہاں مولانا اشرف علی تھانوی رح کی نگرانی میں دینی تعلیم کے حصول کا آغاز کیا۔ غارغ التحصیل ہونے کے بعد رسم دستاربندی سے چند روزقبل سید محمد حسین کا انتقال ہوگیا جس کے بعد نیرمدنی نے انہی کی جگہ مسجد کا‏نپورٹینری میں جومحلہ بھّنانہ پورہ میں تھی امامت و خطابت کا منصب سنبھالا۔ اس وقت نیرمد‏نی کی عمرمحض انیس سال تھی۔

نیرمد‏نی نے باقاعدہ شاعری کا آغاز1933 میں کیا جب انہوں نے اپنا پہلا طرحی مشاعرہ پڑھا اورطرحی غزل کے اس شعر پربے پناہ داد وصول کی؛

پایا مجاز ہی سے حقیقت کا راستہ
مجھہ کومذاق عشق نے انساں بنادیا

اس کے بعد نیرکی شاعری مقبول ہوتی گئی اورکانپور، لکھنؤ، قنوج وغیرہ کے تقریبا ہر مشاعرے میں انکی شرکت لازمی سمجھی جانے لگی۔ انکی غزلیں، نظمیں اورقطعات کانپورکے بڑے اخبارات وجرائد قومی اخبار، صداقت اوربیدار میں باقاعدگی سے شائع ہوتے تھے۔

نیرمد‏نی بنیادی طورپرغزل کے شاعرتھے۔ انہوں نے باقاعدہ کسی کی شاگردی اختیار نہیں کی تاہم وہ اصغرگونڈوی کو اپنا معنوی استا‏د قراردیتے تھے۔ سنہ 1935 میں جب تحریک آزادی زوروں پر تھی اس وقت نیرجوان تھےاوربڑے زوروشور سے انقلا‏بی نظمیں کہتے تھے، چنانچہ جب لکھنؤمیں آل انڈیا نیشنل کانگریس کے زیراھتمام سالانہ مشاعرہ منعقد ہوا جسکی صدارت بلبل ھند سروجنی نایئڈو نے کی تھی تو سروجنی نایئڈ‏ونے شعراء کی ترتیب کا خیال کئے بغیرنیرمد‏نی کی نظم 'غلامی' پہلے سننے پراصرار کیا۔ اس زمانے میں نیرکی یہ نظم ھندوستان کے طول وعرض میں بہت مقبول تھی۔ جب یہ نوجوان شاعرنظم پڑھہ کراترے تواصغرگونڈوی نے پوچھا کہ میاں کس کے شاگرد ہوتو نیرنے برجستہ جواب دیا کہ حضور آپ ہی کا شاگرد ہوں۔ اصغراورحسرت موہانی ساتھہ بیٹھے تھے، اصغر نے ذہن پر زور دیتے ہوئے کہا کہ مجھے تویاد نہیں کہ تم کبھی بغرض اصلاح میرے پاس آئے ہو۔ نیر نے اقرار کرتے ہوئے کہا کہ جناب کے رنگ میں غزل کہنے کی کوشش کرتا ہوں اوراسی رنگ نے مجھے آپ کا شاگرد بنادیا ہے۔ حسرت موہانی اس گفتگو سے بہت محظوظ ہوئے اوراصغر سے مخاطب ہوکر بولے کہ بسم اللہ! ایسے شاگرد کہاں نصیب ہوتے ہیں۔ اصغرگونڈوی نے کسب کمال کن کہ عزیزجہاں شوی کہتے ہوئے نیرمدنی کواپنا شاگرد لکھنے کی اجازت دے دی۔ اصغر سے نیر کی یہ پہلی ملاقات تھی جو آخری بھی ثابت ہوئی۔ اس پہلی اورآخری ملاقات میں نیر نے برجستہ یہ شعرپڑھا؛

مبارک حضرت اصغر کا فیض باطنی نیّر
ترے نغموں میں کیف بادۂ الہام پاتا ہوں

حوالہ: روزنامہ حریت کراچی، 23 ستمبر 1969

تقسیم برصغیرکے بعد نیرمد‏نی پاکستان آگئے۔ وہ اپنے اہل خانہ کے ھمراہ 1950 میں موناباؤ کی سرحد عبورکرکے سندھہ کے قدیم تاریخی شہرٹھٹھہ پہنچے۔ چند ہفتے ٹھٹھہ میں قیام کے بعد وہ کراچی آگئے۔ کراچی آنے کے بعد انہوں نے تعلیم وتعلم اورقرآنی تعلیمات کی ترویج کواپنا مقصد حیات بنالیا۔ انہوں نے اپنا مرکز ایک ایسی بستی کو بنایا جہاں تعلیمی سہولتوں کا فقدان تھا،جہاں لوگ کسب معاش کوہی زندگی سمجھنے پرمجبورتھے۔ نیرنے گولیمارنامی اس بستی میں جواب گلبہار کے نام سے مشہورہے ایک مسجد کی بنیاد ڈالی۔ انہوں نے اس طرح اپنے اجداد کی اس سنت کو بھی زندہ کیا کہ وہ جہاں جاتے تھے مسجد کی بنیاد ضرورڈالتے تھے۔ قادریہ مسجد نامی اس مسجد میں نیرمد‏نی نے خود اذان و نمازکا اہتمام کیا، مسجد کی توسیع، تعمیراورآرائش کواپنے ذاتی آرام وآسائش پرفوقیت دی۔ تاہم شعروشاعری کا سلسلہ اورادبی سرگرمیاں بھی جاری رکھیں۔ نیّرسمجھتے تھے کہ اردوزبان وادب کی خدمت بھی ان کے فرائض کا ایک جزوہونا چاہئے۔ اسی خیال کے تحت انہوں نے ایک بزم ادب قائم کی۔ اس بزم کے تحت ہونے والے مشاعروں میں شہرکے معروف شعرائے کرام اوراہل ذوق باقاعدگی سے شرکت کرتے تھے۔ بعد ازاں انہوں نے اپنے معنوی استاد کوخراج عقیدت پیش کرنے کیلئے اس بزم کو' بزم اصغر' کے نام سے موسوم کیا۔ 1961 کے اوائل میں نیرمدنی گلبہار سے ناظم آباد منتقل ہوگئے اور کچھہ ہی عرصے کے بعد یہاں سے کنٹری کلب روڈ جو اب یونیورسٹی روڈ کہلاتا ہے پر واقع سوئی گیس ٹرانسمیشن کمپنی بسلسلۂ ملازمت منتقل ہوگئے۔ نیّرنے یہاں بھی کمپنی کی مسجد میں امامت وخطابت کا منصب سنبھال لیا۔ تاہم نیرکا مزاج ملازمت سے مطابقت نہیں رکھتا تھا۔ 1964 میں انہوں نے ملازمت ترک کردی اورایک بار پھرقادریہ مسجد کی خدمت میں مصروف ہوگئے۔ اسکے ساتھہ ہی انہوں نے کراچی کے ایک معروف اسکول حالی مسلم اسکول میں درس وتدریس بھی شروع کردی۔

اردوزبان کی ترویج کیلئے بھی نیرمد‏نی نے بے بہا خدمات انجام دیں۔ اوائل 1970 میں انہوں نے اپنے دوستوں ڈاکٹرسید یاورعباس، اورسید آل رضا کے ساتھہ مل کرمتحدہ اردو محاذ کی بنیاد رکھی۔ اس ادارے کا مقصد اردوزبان کوپاکستان میں سرکاری دفاترمیں رائج کرانا،اور اسے اعلی سطح تک ذریعۂ تعلیم بنانا تھا۔ متحدہ اردومحاذ کے تحت جام جم کے نام سے ایک ادبی رسالے کا بھی اجراء کیا گیا جس میں فلسفہ ، تصوف اور ادب کے موضوعات پرنیرمد‏نی کے مضامین اردوادب میں ایک گرانقدرخزانے کی حیثیت رکھتے ہیں۔ مسئلہ جبروقدرکے موضوع پر پرنیرمد‏نی کا ایک مضمون اعلی اد‏بی حلقوں میں بےحد سراہا گیا۔

نیرمدنی وسیع المشرب انسان اورلااکراہ فی الدّین کے قائل تھے۔ وہ مجا‏لس عزاء میں سلام بھی پڑھتے تھے، اورمحافل مناقب میں خلفائے راشدین کی منقبت میں بھی حق عقیدت ادا کرتے تھے۔ جمعے کی نمازمیں دیئے گئے انکے خطبات نہ صرف د‏ینی حوالوں سے اہم ہیں بلکہ یہ اردوادب، فلسفے اورعلم الکلام کے بھی اعلی شاہکارہیں۔ انکے مواعظ میں نہی عن المنکراورامربا المعروف کا ذکر ہوتا تھا۔

نیرمد‏نی کی شاعری: نیرمدنی قد‏یم اساتذہ میں غالب، اقبال، جگر، اورفانی سے متاثرہیں۔ ایک انٹرویومیں انہوں نے کہا کہ 'غالب کا علو، اقبال کی آفاقیت، اصغر کا لہجہ اور اسکی پاکیزگی، جگر کی مستانہ روی اورفانی کا آرٹ، یہ ہیں وہ خصوصیات جنہوں نےمجھے ان کا گرویدہ بنادیا'۔