NELLAI RAMANUJAM

வாழ்க்கை என்னும் பேருந்து

2012-05-27T09:15:00.000+05:30

எங்கள் தாத்தாவிடம் ஆலோசிக்காமல் எந்த ஒரு முடிவும் எடுத்ததில்லை எங்கள் ஊரில். எங்கள் மரியாதை மிக்க மாமாவின் எதிரே நாங்கள் உட்கார்ந்து பேசியதில்லை. எனது பெரியம்மாவின் மீது உள்ள பாசத்தால் கல்யாணமே வேண்டாம் என்றான் என் பங்காளி. தனது மூத்த பிள்ளை மீது உள்ள பாசத்தால் இன்னொரு பிள்ளை பெற்றுக்கொள்ளவில்லை என் நண்பன். மனைவின் முகம் பார்த்தே தினமும் காலையில் எழுவார் என் சித்தப்பா. இத்துணை முக்கியத்துவமான நபர்கள் இன்று இந்த மண்ணில் இல்லை. ஆனால் எதுவும் நின்று போய்விடவில்லை; யாரும் உடைந்து போய்விடவில்லை. நிறுத்தத்தில் பயணிகளை இறக்கிவிட்டு இயல்பாக பயணிக்கிறது வாழ்க்கை என்னும் பேருந்து. ஒரே பேருந்தில் பயணித்தாலும், அனைவரது இறங்கும் இடமும் ஒன்றல்ல. இறங்கும் இடம் சொல்லி பயண சீட்டை வாங்குவதில்லை பயணிகள் பயணிகள் இறங்கும் இடத்தை நடத்துனரே தீர்மானிக்கிறார் இந்த பேருந்தில். பேருந்தின் வேகத்தை ஒட்டுனரே தீர்மானிக்கிறார். இதில் தனது பேருந்து வேகமாய் செல்வதாய் சில பயணிகளுக்கு மகிழ்ச்சி. மேலும் சிலர், தனது இருக்கையை விலை பேசுகிறார். இன்னமும் சிலர் பேருந்தை முழுவதும் விலை பேசுகிறார். பாவம் அவர்களுக்கு தெரியாது அடுத்த நிறுத்தம் அவர்கள் இறங்கும் இடம் என்று.

பாவம்

2011-11-11T15:37:00.006+05:30

வந்து சென்றதின் அடையாளமாய்

எவ்வளவு உதறி தள்ளியும்

வீடுவரை வந்து விடுகிறது

கடற்கரையின் மணல் துகள்கள்;

விலை மாதுவிடம் பெற்ற பாவத்தை போல.

2011-01-06T20:04:00.003+05:30

JUST 2 MONTHS BEFORE I WAS AT LEH. AGAIN PLANNING TO GO BY NEXT WEEK. THE CURRENT TEMP AT LEH IS -30degC. Will come back and keep posting.

2010-12-25T11:25:00.000+05:30

இரவு நேரங்களில் அவளை காண முடியாது.
பகலில் மட்டுமே எனது காதல் சொல்ல நேரம் உண்டு.
அவள் பெயர் "விபச்சாரி" மற்றவர்களுக்கு.
என் உயிரை ஆள்வதால்,
எனக்கு " ஆண்டாள்" அவள்.

2010-12-06T09:14:00.004+05:30

ஆலயம் சென்று இறைவனை வழிபட தேவை இல்லை எனக்கு.

நான் எங்கே இருக்கிறேனோ அங்கே அமர்ந்து வழிபட்டு கொள்வேன்.

அறையில் குளிப்பதை விட ஆற்றில் குளிப்பது பிடிக்கும் எனக்கு

ஆற்றில் குளிப்பதை விட மழையில் நனைவது பிடிக்கும் எனக்கு

என் உடம்பின் கழிவுகள் நீங்கி விட்டால்

காற்றில் கலந்துள்ள நீரில் நனைத்து கொள்வேன் என் உடம்பை.

நிழல் பின்னே நாய் போல

2010-07-04T19:19:00.003+05:30

நான் பிறந்த நேரம் காலை 5:45.
தொடர்ந்து ஓடிகொண்டிருக்கிறது கடிகாரம்
அதன் பின்னே நானும் ஓடிகொண்டிருக்கிறேன்
"நிழல் பின்னே ஓடும் நாய் போலே".
கல்லூரி காலம் முடிந்தது.
கல்லூரியின் வெற்றியும் தோல்வியும்
வாழ்க்கையோடு சம்மந்தப்படவில்லை.
கல்லூரியோடு என் காதலும் முடிந்தது
நான் நேசித்த பெண் என் வாழ்க்கையில் வரவில்லை.
திருமணம் நடந்தது பெற்றறோரின் நிச்சயப்பு.
ஆம்! காமம் தான் காதல் தோல்விக்கு மருந்து.
காமத்துடன் வாழ்க்கையை துவக்கினேன் என் மனைவியுடன்.
சூரியன் கிழக்கில் இருந்து உச்சிக்கு வர வர
பனி உருகி மலை தெரிவது போல ;
வயது ஏற ஏற காமம் கரைந்து அன்பு மிஞ்சியது இருவரிடமும்.
பொறுப்புகள், பிள்ளைகள், கஷ்டங்கள், நஷ்டங்கள், நோய்கள் .
என்னை விட தாமதமாக உலகத்திற்கு வந்தாலும்
சரியாக என்னை போலவே என் பிள்ளைகள்
நிழல் பின்னே ஓடும் நாய்களாய்.
இதோ விரிக்கப்படிருக்கிறது மரண படுக்கை.
சாய்ந்து விட்டேன் அதன் மேலே
நெருங்கி விட்டது மரணம்.
சிந்தனைகள் பலவாறு வந்து போகிறது மனதில்.
எனது பெற்றோர்கள் தாங்கள் மலடல்ல என நீருபித்து கொண்டது "நான்".
எனது காமத்திற்கு தீனி தேடிய போது வந்து போனது என் "காதல்".
ஆனால் அதற்க்கு தீனி இட்டது என் வாழ்க்கை துணை "திருமணம்".
வாழ்க்கை முழுவதும் எனது பசிக்கு உணவு தேட முயன்றது என் "அறிவு".
நானும் மலடல்ல என சமுதாயத்திற்கு காட்டி கொண்டது என் "பிள்ளைகள்".
உடல் தளர தளர மனம் தளர்ந்த போது
துணைக்கு தேவை பட்டது மனிதர்கள் "பாசம்".
இதோ பிரிய போகிறது என் உயிர் ,
உணவிற்கும், காமத்திற்கும், புகழிற்கும் மட்டுமே வாழ்ந்து முடித்து விட்டேன் .
இல்லை ஓடி முடித்து விட்டேன்.
ஓவ்வொரு மனிதனும் இதற்க்காகவே
இன்னமும் ஓடிகொண்டிருக்கிறான் .
அல்லது ஓடிமுடித்து விட்டான் .
அல்லது ஓட போகிறான்
இதோ எனக்கு பேரன் பிறந்து விட்டதாய் செய்தி
நேரம் மாலை 6:15.
இன்று இரவு எனது மரணம்
நாளையும் அதே விடியல் .

சலசலப்பு

2010-05-12T19:07:00.004+05:30

மௌனமான அந்த குடிசையில்

சலசலப்பை ஏற்படுத்தும்

அந்த கருவண்டை போல;

என் மனம் மௌனமான தருணங்களில்

உன் நினைவென்னும் சலசலப்பு.

ஈன்ற பொழுதினும் பெரிது வலிக்கும்

2010-02-19T19:19:00.002+05:30

அம்மாவுக்கு சீரியஸ் என செய்தி கேட்டு
அவசர விடுமுறையில் வந்த அவளது ஒரேமகன்
உயிர் இழுத்துக்கொண்டு இருப்பதில் கவலையுற்று
இறுதி சடங்கிற்கான செலவை சொந்தகாரகளிடம் கொடுத்து விட்டு
அவசரமாய் பறந்து கொண்டு இருக்கிறான் அந்நிய தேசத்திற்க்கு.

மனசாட்சி

2010-02-19T19:19:00.001+05:30

குறையுடன் பிறந்து
சுகமில்லாமல் இருக்கும்
அவன் குழந்தையை
கொன்றுவிடலாம் என்று
பலர் ௬றி அவன் மறுத்தபோதிலும்
தானாகவே இறந்துவிடாத
என்று உள்ளுர அவன் மனம் ஏங்குகிறது
கண்ணீருடன்.

சட்டமா ? பாசமா ?

2010-02-19T19:17:00.000+05:30

நோயின் உச்சத்தில்
குற்றுயிருமாய், குறையுயிருமாய்
நாறி கொண்டிருக்கும் தன் தாய்க்கு
தூக்க மாத்திரை கரைத்து
நிரந்தரமாய் தூங்க செய்துகொண்டு இருக்கிறான்
அவளை உணர்ந்த பாசக்கார குற்றவாளி மகன்.

அதே வீட்டில் தான் நீயும் நானும்

2010-02-16T19:39:00.003+05:30

நான் ருதுவாகியவுடன் முதன் முதல் பார்த்து வெட்கப்பட்ட ஆண் மகன் நீ தான். சிறுவயதில் நமது வீட்டு மொட்டை மாடியில் அப்பா அம்மா விளையாட்டு விளையாடும் பொழுதெல்லாம் "அப்பா" நீதான். அன்று தேங்காய் சிரட்டையில் ரசம் வைத்து, சாதம் சமைத்து உனக்களித்த இந்த மஞ்சுதான் இன்றுவரை உனக்கு உணவு சமைத்து தருகிறாள் அவளது உயிரையும் அதில் கலந்து. உன்னை என் வாழ்க்கையில் எப்படி பார்க்க வேண்டும் என்று நினைத்தேனோ அப்படியே இன்று நீ.

உனது வான கலர் ஜீன்ஸ் பேண்டை உன்னை கேட்காமல் நானே எடுத்து துவைத்த போதெல்லாம் எனது தலை வீங்கும் அளவுக்கு குட்டி விட்டு என்னிடம் தஹறாரு செய்வாய் எப்பொழுதும். இதுவரை ஜீன்ஸில் பார்த்த உன்னை, இப்பொழுது வேஷ்டி, சட்டையில் பார்ப்பது புதிதாகதான் உள்ளது. அழகாகவும் உள்ளது.

அதே சென்ட்டைதான் இப்பொழுதும் தெளித்திருக்கிறாய் உனது சட்டையில். ஆனால் உனது கழுத்தில் உள்ள மாலையின் மனமும் சேர்ந்து கொண்டது இப்பொழுது.

தெரியும்மா!! ஒவ்வொரு முறையும் உனது சட்டையை துவைக்கும் முன்பு அதனுடன் சிறிது நேரம் வாழ்ந்துவிட்டு தான் எனது ஆசையையும், உணர்வையும் உனது சட்டையுடன் சேர்த்து நீரில் அமிழ்த்தியிருக்கிறேன் . உனது உடல் வாசமும் உடை வாசமும் என் நெஞ்சுக்குள் எப்பொழுதும் வசித்து வரும். நீ பத்தாம் வகுப்பில் கணக்கு தேர்வில் நூற்றுக்கு நூறு வாங்கிய பொழுது என்னை கட்டிபிடித்து உன் மகிழ்ச்சியை தெரிவித்திருக்கிறாய். இன்ஜினியரிங் காலேஜில் இடம் கிடைத்தவுடன் எனது கையை பற்றி மகிழ்ச்சியை வெளிபடுத்திருக்கிறாய். இன்று மணவறையில் மண உடையில் உனது கண்களினால் மகிழ்ச்சியை என்னிடம் வெளிபடுத்துகிறாய்.

அன்று மொட்டை மாடியில் நாம் கல்யாண விளையாட்டு விளையாடும் பொழுது நம்மை சுற்றி இவ்வளவு ௬ட்டம் இல்லை. இப்பொழுது ௬ட்டம் அதிகம் அவ்வளவுதான். நீண்ட நாளுக்கு பிறகு மீண்டும் நாம் கல்யாண விளையாட்டு விளையாடுவதில் ஏனோ என் மனம் துள்ளுகிறது. அன்று நீ சிவப்பு கலர் சட்டை போட்டிருந்தாய், தோள்களில் மாலை இல்லை. இப்பொழுது பட்டு சட்டையுடன் தோள்களில் மாலையுடன் நீ. பட்டு புடவை, தலை நிறைய பூவுமாய் நான். மணமகன் நீ. மணமகள் நான். ஆனால் நமது திருமணதிற்கு உற்றார் உறவினர்கள் ௬ட்டம் தான் இல்லை. இங்கு ௬டியுள்ள ௬ட்டம் எல்லாம் உனது திருமணதிற்கு வந்தவர்கள். நமது திருமணதிற்கு அல்ல. ஆனாலும் மணமகன் நீ. மணமகள் நான். உன் மனைவியாக போகிறவள் தான் வேறு.

நமது கல்யாண விளையாட்டை என்றோ நீ விளையாடி முடித்து விட்டாய் . இன்னமும் நான் அதை தொடர்ந்து உன்னிடம் விளையாடி கொண்டிருக்கிறேன்.

" ஏடி மஞ்சு !!! சும்மா மணமேடைகிட்டே நின்னுகிட்டு அவனேயே பார்த்துகிட்டு இருக்காதே. போயி மணமகளை பாரு. "

" சரிம்மா "

" யாருக்கா அந்த பொண்ணு. நல்ல அழகா இருக்கு".

" யாரு மஞ்சனத்தியா ... சின்ன வயசில இருந்தே எங்க வீட்ல வேலை பார்க்குது. அம்மா அப்பா கிடையாது."

மஞ்சு வேகமாய் மணமகள் அறையை நோக்கி ஓடினாள் மகிழ்ச்சியுடன்.

" ஏண்டி மஞ்சு .. நீ என்ன லூசா ? உன் ரத்தத்தில் அவன் உணர்வை கரைச்சி, உன் உயிரில் அவன் உயிரை புதைச்சி வாழ்ந்துகிட்டு இருக்க. இப்போ அவன் கல்யாணம் கொஞ்சம் கூட வருத்தம் இல்லையா உனக்கு. "

மஞ்சுக்கு மஞ்சுவே இந்த கேள்வியை கேட்டு கொண்டாள். பதிலும் அவளே.

“அது அவுக கல்யாணம். என் கல்யாணம்தான் அவன் கூட சின்ன வயசில் இருந்தே நடந்துகிட்டு தான் இருக்கே. இருபது வருஷமா அவன் வீட்டில்தான் நானும் அவனும் வாழ்ந்துகிட்டு இருக்கோம். கூட அவன் அம்மாவும் இருந்தாக. இன்னமும் நானும் அவனும் அதே வீட்டில்தான் வாழபோகிறோம் இப்போ கூட அவன் மனைவியும் இருக்காக. அவ்வளவுதான்.

-----------

தூக்கிவிட ஆள் இருந்தால், விழுந்த இடத்திலேயே படுத்து அழலாம்;
ஆறுதல் சொல்ல ஆள் இருந்தால் அழுது கொண்டே இருக்கலாம்;
அக்கறை காட்ட ஆள் இல்லாத உலகத்தில்;
கண்ணீர் துடைக்க கைகள் இல்லாத தருணத்தில்;
கற்பனையை கொண்டுதான் கண்களை துடைத்து கொள்ள வேண்டும்.
இந்த மஞ்சனத்தியை போல.

-------

எங்க பாட்டி செத்து போச்சி !!!

2010-01-10T06:29:00.001+05:30

நள்ளிரவு தூக்கத்தை கெடுக்கும் அந்த வறட்டு இருமல் இப்பொழுது இல்லை.

அதிகாலையில் பிடிவாதமாய் அருகே அமர்ந்து தூக்கத்தை கெடுக்கும் தொந்தரவு இல்லை இப்பொழுது.

திண்ணையில் கூட்டம் சேர்த்து அரட்டை அடிக்கும் சத்தம் இல்லை.

வாசலை தாண்டும் ஒவ்வொரு முறையும் பதில் சொல்ல வேண்டிய அவசியம்மில்லை.

பாசத்தை காட்டுவதில் அம்மாவுக்கு போட்டி இல்லை இப்பொழுது.

இளமையாக பேசும் பொழுது அச்சத்துடன் குரலை தாழ்த்த வேண்டிய அவசியம்மில்லை.

பாட்டியை சாக்காய் வைத்து இனி சொந்தகரர்களின் தொந்தரவு இல்லை.

தப்பை தேடி தேடி கண்டு ஏசும் வார்த்தைகள் இல்லை.

ஆனால்,

அவளது பிணத்தை அன்று வீட்டில் இருந்து எடுத்து சென்ற போது

சமையல் அறையில் இருந்து உப்பு தொலைந்து போனது போல் இருந்தது.

இப்பொழுது வாழக்கை சூடாகவும், மணமாகவும் இருந்தாலும்;

உப்பில்லா பண்டம் போல் சலிப்பாகவே உள்ளது .

காற்றின் ஓட்டத்தை குலைக்கும் புல்லாங்குழலின் ஒட்டையாய் அவளை நினைத்திருந்தாலும்;

அவள் இறந்து அதை அடைத்த பின்பு

வாழ்க்கை, சங்கீதம் எனும் பொக்கிசத்தை இழந்து

வெறும் அடுப்பு ஊதும் குழலாய் மாறிப்போனதை உணர ஆரம்பித்திருக்கிறோம் இப்பொழுது.

கல்லறை கோவில்

2010-01-01T20:12:00.001+05:30

உடல் கழிவுகளை தற்காலிகமாக நீக்கும் இடம் கழிவறை.
மனக்கழிவுகளை தற்காலிகமாக நீக்கும் இடம் கோவில்.
இவை இரண்டையும் நிரந்தரமாக நீக்கும் இடம் கல்லறை.
கழிவறை, கோவில், கல்லறை;
மூன்றுமே முக்கியம் ஆகிவிட்டது சராசரி மனிதனுக்கு.
தினமும் கழிவறை செல்கிறாய்.
வாரம் ஒரு முறை கோவில் செல்கிறாய்.
குறைந்த பட்சம் மாதம் ஒரு முறையாவது
கல்லறைகளுக்கு சென்று சிந்தி ;
உன் வாழ்க்கை புனிதம் பெறட்டும்.

ஜென் தத்துவ விளக்க கதைகள்"

2009-12-30T19:40:00.003+05:30

இந்த ஆண்டு பாலகுமாரனின் "காதலாகி கனிந்து" தவிர வேறு எந்த புத்தஹத்தையும் நான் முழுமையாய் படித்ததை எனக்கு தெரியவில்லை. வேறு எந்த சப்பை காரணமும் சொல்லி என்னை நானே ஏமாற்றிக்கொள்ள விரும்பவில்லை. ஏனெனில் நான் சாப்பிடாமல் இல்லையே? இதோ எடுத்துவிட்டேன் நர்மதா பதிப்பகம் வெளயிட்ட தேவ்நாத் எழுதிய "ஜென் தத்துவ விளக்க கதைகள்". தினமும் இரண்டு பக்கமாவது படித்து அதில் என்னை கவர்ந்த கருத்துகளை உங்களோடு பகிர்ந்து கொள்ள ஆசை படுகிறேன்.

ஆசிரியரின் முன்னுரை:

மனிதர்கள் மூன்று வகை:

1.இருட்டில் உழன்று அதையே பழக்கபடுத்தி கொண்டவர்கள்.

2.என்றேனும் வெளிச்சம் வராதா என்று காத்து கொண்டு இருப்பவர்கள்.

3.வெளிச்சத்தை நோக்கி நடப்பவர்கள்.

இம்முன்று வகையெனரும் இந்த புத்தகத்தின் மூலம் வெளிச்சத்தை பெறலாம் என்று முழுமையாக நம்பலாம்.

மேலும் ஒரு அருமையான கவிதை “தாமரை இலை தண்ணீர்” என்ற தலைப்பில்:

பிறவிக்கடலில் ஓடுகிறது
வாழ்க்கை படகு, அதில்
ஏற்றப்பட்ட சரக்குகள் இரண்டு
“உண்டு” “இல்லை”, ஆனால்
உடைந்து போன படகில்
இரண்டுமே ஒன்றுதான்.

(தொடருவோம்)

நாத்திக குழந்தைகள்

2009-12-30T12:36:00.007+05:30

குழந்தை இயேசுவை கண்டு "பாப்பா" என்றும்;
சிவபெருமான் படம் பார்த்து "மாமா" என்றும்;
அடையாளம் காட்டியது என் நாத்திக குழந்தை.
அதட்டியவாறு அது ஆண்டவன் என்றேன் அதனிடம்.
அலட்டிக்கொள்லாமல் அம்மாவின் மடியில் படுத்துகொண்டது.
எனது அறிவு எழுந்து கொண்டது.
அணைத்து மதத்திலும் பிறக்கும் குழந்தைகள் நாத்திகர்௧ளே;
கலங்கிய மனிதர்களின் காற்று படாதவரை .
ஐயோ ! நாத்திக சமுதாயம் உறுவாக நான் காரணியாகி விடகூடாது.
குழந்தையின் நெற்றில் திருநீறு இட்டு கண்மூடி கடவுளை வணங்கி கொண்டேன் .
மீண்டும் என் அறிவு படுத்துவிட்டதா? காஞ்சிபுரம் பெருமாளுக்கே வெளிச்சம் .

பறவையே எங்கு இருக்கிறாய் ?

2009-12-10T19:33:00.002+05:30

என் மரத்தில்
நீ வசித்து சென்ற
௬டு மட்டும் தான் இப்பொழுது.
அதில் நீ உதிர்த்து சென்ற
வெண்பஞ்சு சிறகுகள்
மற்றும் எச்சங்களின் பாரம் தாங்காமல்
எப்பொழுது சரியுமோ?
என் மரம்.

ஆனால், உனது சாலையில்
எனது இரத்தகரைகள் மட்டுமே இப்பொழுது.
நீ கடந்து செல்லும் வேகத்தில் அதை பார்க்க௬ட
நேரமில்லை உனக்கு

மீண்டும் பின்னோக்கி பயணிக்க
கால இயந்திரம் இல்லை எனக்கு
இன்னமும் முன்னோக்கி சென்று சாவைதொட
கால சுதந்திரம் இல்லை எனக்கு
என்னோடு சேர்ந்துவாழ ஏனோ மனம் இல்லை உனக்கு.

இங்கே நானும்,
பறவை பிரிந்து சென்ற பறவை ௬டும்
ஏனோ இருந்து கொண்டு இருக்கிறோம்
பிறர் பார்வைக்கு.

கள்ள காதல்

2009-12-03T18:10:00.001+05:30

சமுகமே !!!
இனி மேல் சொல்லாதிர்கள் " கள்ள காதல் " என்று.
வேண்டுமானால் சொல்லிகொள்ளுங்கள் முதல் காதல் என்று.
அல்லது உண்மையான காதல் என்று.
எங்கே நான் காதலித்தேன் என் வாழ்க்கை துணையை.
நீங்களாக நினைத்துக்கொண்டால் நான் அல்ல பொறுப்பு.

தண்ணீர் ஊற்றியா வளர்த்தோம் இந்த பயிரை ?

2009-08-21T20:32:00.002+05:30

என் தந்தையும் தாயும் மகிழ்ந்து குலாவிய இந்நாட்டில் ;

அதன் முந்தையர் ஆயிரம் ஆண்டு காலம் வாழ்ந்து சிறந்த இந்நாட்டில்;

இப்பொழுது,

சில பவுன் தங்கதிற்காக எத்தனையோ கன்னிகள் அடைந்து விடுகிறார்கள் முதுமையை.

அரை ஜான் வயிற்றிக்காக எத்தனயோ கண்ணகிகள் பங்கு போட்டுவிடுகிறார்கள் கட்டிலை.

ஒரு ரூபாய் புது பிளேடில் முடிந்து விடுகிறது எத்தனயோ குடும்பங்களின் தலைபிரசவம்.

நான்கு முழ கயிற்றில் முடிந்து விடுகிறது எத்தனயோ குடும்பங்களும் கூட.

காந்தியின் சுதத்திரம் கலவி கொள்வதிலும்,

நேதாஜி கற்பித்த வீரம்,

சாதி, மத, இன சண்டையிலும் கரைந்து கொண்டிருக்கிறது.

இங்கேதான், தொழில் நுட்ப வளர்ச்சி இமாலயத்திலும்,

கோயில்களின் வருமானம் கோடிகளிலும்.

வறுமைக்கும் செழுமைக்கும் கல்யாணம் நடப்பது எப்போது???

வாழ்க பாரதம் !!! வளர்க இந்தியா!!!

சுடும் உண்மை

2009-07-27T20:30:00.000+05:30

கற்பு
மானம்
ஒழுக்கம்
கீதை
குரான்
பைபிள்
மனச்சாட்சி
அத்தனையும் மயிராச்சி
பெத்த குழந்தை வயிறு பசியில பத்தி எரியும் போது.

விதவை

2009-07-27T20:17:00.001+05:30

தினம் தினம் என்னை சித்திரவதை செய்தாய்;

மனதாலும் உடலாலும் வேதனை தந்தாய்;

இன்று என்னோடு நீ இல்லை.

உன்னோடு வாழ்வதை விட;

என் கணவன் என்னும் உன் நினைவோடு;

வாழ்வது சுகமாய் இருக்கிறது.

தெரிந்தோ தெரியாமலோ நீ தந்த சில சந்தோசங்களை அசை போட்டுகொண்டே.

தாய்மையா? தாயா?

2009-06-21T19:36:00.003+05:30

பள்ளி ஆண்டு விழாவில்,

இறைவன் எனும் நான்கெழத்து பற்றியான

கவிதை போட்டியில் அவன் எழுதிய இரண்டெழத்து கவிதை

தாய்.

நிகழ்ச்சிக்கு அனைவரும் தங்கள் பெற்றோருடன் வந்திருக்க

இவனது தாயோ சிறையில்

விபச்சார வழக்கின்கிழ்.

இளம் விதவை

2009-06-06T16:25:00.001+05:30

உன்னை இழந்து
உன் நினைவிலும், காமத்திலும்
நான் படும் வேதனைகள்
நித்தமும் உடன்கட்டை எனக்கு.

வானம் பார்த்த வீட்டுகாரி

2009-06-06T15:50:00.003+05:30

(கள்ள தொடர்பில் கருவுற்ற நடை பாதையில் வாழும் பெண் ஒருத்தி, பிறக்க போகும் தன் குழந்தையை நோக்கி கூறுவது)

நாங்கள் ஒருவரை ஒருவர் இரையாக்கி உண்டதில்
தோன்றிய என் அடிவயிற் று ஜீரணமே !
இனி நீ பூமியில் படப்போகும் வேதனைகளை பட்டியலிடுவேன் கேள்.

நான் அடி வயிறில் ஜீரணித்ததை விட
மேல் வயிறில் ஜீரணித்தது குறைவுதான்
ஆகையால், என் முலையில் நீ வாய்வைத்து உறிஞ்சினால் ஊறப்போவதென்னவோ உன் வாயின் எச்சில் மட்டுமே
சுவைக்காக என் மார்பில் காய்ந்த வியர்வையை அதில் கலந்து கொள்.

இப்பொழுது கிடைத்து கொண்டிருக்கும் ஒருவேளை உணவுக்கும் நாளை உத்திரவாதமில்லை.
உன் அக்காளின் தந்தையை போல்
இப்பொழுது உன்னை எனில் ஊட்டியவனும் ஓடிவிடகூடும்.
பின்பு, கோவில்படிகட்டுகளும் சாலைசந்திபுகளும் நம் தொழில்கூடமாக மாறிவிடக்கூடும்.

மழை பெய்தால் நனைய பழகிகொள்
வெயில் அடித்தால் காய பழகிகொள்
குளிரடித்தால் நடுங்கி கொள்
ஆனால், பசி எடுத்தால் மட்டும் அடக்கிகொள்

நிலவை பார்த்து உறங்கிகொள்
கதிரை பார்த்து விழித்துகொள்
ஏதோ ஒரு விடியலில் இருந்து, உன்னருகே நான் இருக்கபோவதில்லை.

ஆணாக பிறந்து விட்டால், உணவு விடுதியின் எச்சில் சேற்றிலும்
வாகனப் பழுது பார்க்கும் கடைகளில் எண்ணையிலும் அமிழ்ந்து போவாய்.
பெண்ணாக பிறந்து விட்டால், வயது வரும் முன்பே
வயதுக்கு வரவழைக்க படுவாய்.

இதை அனுபவிக்கதானா,என் வயற்றில் துடிப்புடன் காத்திருக்கிறாய்
காம தீயில் பிரிந்த என் சுடரே !

உன் பிஞ்சு கால்களால் என் அடிவயற்றில் உத்தரவிடு இப்பொழுதே.
ஜிரணித்திருந்தாலும் வலுகட்டாயமாக உன்னை வாந்தி எடுத்து விடுகிறேன்.

அட பொழப்ப கெடுத்த பொட்டபுள்ள !!

2009-05-30T13:59:00.003+05:30

நடு சாமத்து ஊத காத்தில்

உறக்கம் கலஞ்ச நீ

கொலுசொலி எழுப்பி என்னை அலைச்சய

ஏத்தா?

அம்மூரு சொக்கனாச்சியம்மன் கொடையில

ஆத்தா காபாத்துன்னு கண்மூடி நா கிடக்க

கோயில் வாசலோரம் நட்ட வாழமரத்து காய்பிடுங்கி

என் மேல விட்டெறுஞ்சி என் கவனம் கலச்சியே

ஏத்தா?

சிவனேன்னு குளிச்சிட்டு

ஒத்தையடி ஆத்தங்கரையில

ஈர வேட்டியை உலத்திகிட்டு நா வரையில

ஆத்துல கல் எரிஞ்சி என் மேனி நனைச்சியே

ஏத்தா?

கரும்பு காட்டுகுள்ள

பூச்சி பொட்டு பட்டுரும்ன்னு

கவனமா தண்ணி பாக்கையில

தலை நிறைய பூ வச்சி

என்னை இழுத்து உன் தனம் மேல போட்டயே

ஏத்தா?

கண்ணாலம் முன்னால கை வைச்சா தப்புன்னு

இரவைக்கு தோட்ட காவலுக்கு நான் போக

பின்னாலையே வந்து

உன் தவாணியில பாய் விரிச்சியே

ஏத்தா?

உச்சி வெயிலு மண்டைய பொளக்குதுன்னு

அம்மூரு சுடுகாட்டு ஆலமரத்துகடியில

ஆட்டோட உன் நினைப்பில் நா கிடக்க

அரவமில்லாம அசலுரூ மாப்பிள்ளை கூட

குலுங்குற கூண்டு வண்டியில

உன் உசிரை குலுங்காம புடிச்சிகிட்டு

குனிச்ச தல நிமிராம

குணவதியா போறியே

ஏத்தா?

என்னை ஏன் மணந்தாய் என் தலைவா ???

2009-04-11T19:46:00.002+05:30

என் தலைவா !!! உன்னை காணாமல்

பசலை நோய் வரவில்லை...

வளையல் கை நழுவி ஓடவில்லை......

சோலைவனம் பாலைவனம் ஆகவில்லை...

என் கனவில் எப்போதும் நீ வரவில்லை....

நீ அனுப்பும் பணக்கட்டுகளும் மகிழ்ச்சி தரவில்லை....

ஆடிக்கு என்னை அழைத்து போக என்அம்மாவும் வரவில்லை....

உன்னை பற்றி விசாரிப்பவர்களிடம் பதில் சொல்ல மனமில்லை...

திருமணம் முடிந்து முதல் ஒருமாதம் நீ முகம் கொடுத்து பேசவில்லை...

மறுமாதம் உன் பெருமை பற்றியை சிலாகித்தாய்...

மூன்றாம் மாதம் மூன்றடி பெட்டியுடன் பறந்து விட்டாய் அயல்தேசம்...

வருடமும் ஓடி விட்டது இன்றோடு.

ஏனோ! உன் தாலி கூட என் கழுத்தை உறுத்துகிறது இரவெல்லாம்.....

மனதை விட என் உடலுக்கு துணை தேடுகிறது இப்போது.

என் உடல் திரியில் நீ காமத்தீ ஏற்றி விட்டு சென்று விட்டாய்....

எனனயே நினைத்து இன்னமும் ஏங்கும் அவன்

அதற்க்கு எண்ணை ஆகி விடுவானோ என்ற பயம் உயிர் கொல்கிறது.

என்னை அலங்கரிக்க வேண்டாம்! என் தலைவா!!

சீக்கிரம் வந்து என்னை அணைத்து கொள்.

நீ காலம் தாழ்த்தி வரும் முன்பு ...

நானும் அவனும் காற்றில் கலந்திருப்போம்.

எஞ்சிய கரியை நீ பூசிக்கொள் உன் முகத்தில்.

நீ கொண்டுவரும் டாலர்களை குவித்தாலும்

மீண்டும் திரியாகாது கரி.