नरापो न्यूज नेटवर्क

प्रधानमन्त्रीको लागि फागुन महिना अन्तिम मौका

2012-02-15T14:13:00.001+02:00

काठमाडौं, ३ माघ ।

संसदमा प्रमुख प्रतिपक्षी नेपाली कांग्रेसका सभापति सुशील कोइरालाले फागुनभित्र मै शान्ति प्रक्रिया निष्कर्षर्मा पुर्‍याउन नसके प्रधानमन्त्रीको राजीनामाको विकल्प नभएको बताउनु भएको छ ।

राजधानीमा बुधबार आयोजित साक्षात्कार कार्यक्रममा बोल्दै कोइरालाले भन्नुभयो-'शान्ति प्रक्रिया टुङगिन नसके प्रधानमन्त्रीले राजीनामा गर्नुको विकल्प छैन । शान्ति प्रक्रियामा लिङगरिङ गरेर पदमा टिकिरहने प्रधानमन्त्रीको चाहना हो भने कांग्रेस पर्खेर बस्न सक्दैन ।'

सहमतिको सरकारको वातावरणका लागि शान्ति प्रक्रिया निष्कर्षमा पुग्नु पर्ने भन्दै उहाँले शान्ति प्रक्रिया नटुंगिएसम्म कांग्रेस सरकारमा नजाने स्पष्ट पार्नुभयो । माओवादीले स्वेच्छिक अवसकामा जानेलाई विदाई दिने काम सकिएपछि दर्जाको कुरा उठाएर फेरिसमायोजनको प्रक्रिया अवरुद्ध गरेको आरोप कोइरालाको थियो । उहांले माओवादीले मागे अनुसारको लडाकुलाई दोस्रो कमाण्ड दिन नसकिने स्पष्ट पार्नुभयो । माओवादी लडाकूलाई दोस्रो कमाण्ड दिनु भनेको नेपाली सेनालाई अपमान गर्नु भएको उहाँको भनाई छ । कोइरालाले भन्नुभयो-'माओवादी लडाकुलाई दोस्रो दर्जा दिनु भनेको संबेदनशिल कुरा हो । यसले नेपाली सेनालाई डिमोरलाईज गर्छ । यो कांग्रेसले स्विकार्न सक्दैन ।' जेठ १४ गतेभित्र संविधान जारी गर्नुको विकल्प दलहरुसँग नभएको भन्दै कोइरालाले संविधान जारी हुन नसके अब कुनै पनि बहानामा संविधानसभाको म्याद नथपिने स्पष्ट पार्नुभयो ।

सोही कार्यक्रममा कोइरालाले पार्टीमा विभाग, संसदीय बोर्ड, कार्यसम्पादन समिति र केन्द्रीय सदस्य एक साताभित्र मनोनयन गर्ने गरी तयार भइरहेको जानकारी दिनुभयो । उहाँले भन्नुभयो-'अब कांग्रेस एक हुन्छ, त्यसको विकल्प छैन । नमिलेको कुरालाई प्रजातान्त्रिक विधी र प्रक्रियाबाट टुङग्याउँदै अगाडि बढ्छौं ।'

दामोदर नेपाल, नरापो न्यूज, काठमाडौं ।

अध्यक्ष खनालको राजनीतिक प्रतिवेदन केन्द्रीय समितिमा पेश

2012-02-15T14:07:00.001+02:00

काठमाडौं, ३ माघ ।

नेकपा एमालेका अध्यक्ष झलनाथ खनालको राजनीतिक प्रतिवेदन एमालेको केन्द्रीय समिति बैठकमा पेश भएको छ ।

एमालेको केन्द्रीय कार्यालय मदननगर बल्खुमा बुधबार बसेको बैठकमा अध्यक्ष झलनाथ खनालले राष्ट्रिय प्रतिनिधि परिषद्को भेलामा प्रस्तुत गर्ने राजनीतिक प्रतिवेदन पेश गर्नु भएको हो । खनालको प्रतिवेदनमा वर्तमान सरकार असफल भएको ठहर गर्दै राष्ट्रिय सरकार गठनमा जोड दिइएको छ । खनालको प्रतिवेदनमाथि भोलीबाट केन्द्रीय समितिमा छलफल हुनेछ ।

आजको उक्त बैठकले केन्द्रीय समितिको एजेण्डाहरु तय गरेको छ । बैठकका एजेण्डाहरुमा राष्ट्रिय प्रतिनिधि परिषद्को भेलामा प्रस्तुत गर्ने राजनीतिक, आर्थिक र संगठनिक प्रतिवेदन, राष्ट्रिय प्रतिनिधि परिषद्का सदस्यहरुको मनोनयन लगायत छन् । बैठकमा केन्द्रीय सदस्यहरुलाई राज्य पुनःसंरचनाबारे पार्टीको संघीय विभागले पेश गरेको प्रतिवेदन अध्ययनका लागि वितरण गरिएको छ ।

त्यसैगरी सोही बैठकले सिरहा घटनबारे विशेष प्रस्ताव पारित गरेको छ । घटनाबारे अध्यक्ष झलनाथ खनालको नेतृत्वमा प्रधानमन्त्रीकोमा डेलिगेशन जाने, सिरहा घटनामा दोषीमाथि कारवाही गर्न र मृतकका परिवारलाई उचित क्षतिपूर्ति दिन माग गरेको वैकल्पिक केन्द्रीय सदस्य ठाकुर गैरेले जानकारी दिनुभयो ।

दामोदर नेपाल, नरापो न्यूज, काठमाडौं ।

राष्ट्रपतिद्वारा दलका नेताहरूसँग छलफल

2012-02-15T14:06:00.001+02:00

काठमाडौं, ३ माघ ।

राष्ट्रपति डा। रामवरण यादवले राजनीतिक गतिरोधका विषयमा आज मुख्य तीन दलका नेताहरूसँग सामुहिक छलफल गर्नुभएको छ ।

संविधान लेखनको काममा पटक पटक अवरोध सिर्जना भइरहनु, मुख्य विषयहरूमा सहमति जुट्न नसक्नु, दलहरू आफ्नो जिम्मेवारीप्रति इमान्दारीपूर्वक नलाग्नुले संविधान लेखनको काम प्रभावित भइरकेको बारे छलफल गर्न राष्ट्रपतिले तीन दलका नेताहरूलाई छलफलमा बोलाउनुभएको हो । राष्ट्रपतिले नेताहरूलाई गम्भीरतापूर्वक जेठ १४ गतेभित्र संविधान लेख्न बन्ने गरी काम सक्याउन आग्रह गर्नुभएको छ ।

राष्ट्रपतिले जिम्मेवार व्यक्तिहरूले राष्ट्रहित विपरीतको कुनै पनि अभिव्यक्ति नदिन पनि नेताहरूलाई सचेत गराउनुभएको राष्ट्रपति कार्यालय स्रोतले जनाएको छ । राष्ट्रपतिभवन शितलनिवासमा भएको भेटमा एकीकृत नेकपा माओवादी अध्यक्ष पुष्पकमल दाहाल प्रचण्ड, नेपाली काङ्ग्रेस सभापति सुशील कोइराला र नेकपा एमालेका अध्यक्ष झलनाथ खनाल सहभागी हुनुहुन्थ्यो । नेताहरूसँगको भेटमा राष्ट्रपतिले शान्ति प्रक्रिया र संविधान लेखनको काममा भइरहेको पछिल्लो प्रगतिबारे चासो व्यक्त गर्नुभएको थियो ।

दामोदर नेपाल, नरापो न्यूज, काठमाडौं ।

पत्रकार राईको निधन

2012-02-15T14:05:00.001+02:00

काठमाडौं, ३ माघ ।

सुनसरीमा क्रियाशील पत्रकार राजधन राईको आज बिहान उपचारका क्रममा निधन भएको छ ।

धरानस्थित विजयपुर एफएममा कार्यरत २५ वर्षीय राईलाई गए राति अकस्मात पेट र श्वासप्रश्वासमा समस्या देखिएपछि उपचारका लागि राति नै बिपी कोइराला स्वास्थ्य विज्ञान प्रतिष्ठान धरानमा भर्ना गरिएको थियो ।

उपचारका क्रममा रहेका राईको आज बिहान करिब १ बजे निधन भएको नेपाल पत्रकार महासङ्घ सुनसरीका अध्यक्ष केशव घिमिरेले बताउनुभयो ।

दामोदर नेपाल, नरापो न्यूज, काठमाडौं ।

संवैधानिक समितिको बैठकमा हालसम्मको प्रगतिको समीक्षा

2012-02-15T14:03:00.001+02:00

काठमाडौं, ३ माघ ।

संवैधानिक समितिको आजको बैठकमा संविधान लेखनका क्रममा हालसम्म भएका प्रगतिको समीक्षा गरियो ।

विवाद समाधान समितिका संयोजक एनेकपा (माओवादी)का अध्यक्ष पुष्पकमल दाहाल अनुपस्थित रहनुभएकाले बैठकमा कुनै औपचारिक निर्णय नभएको चुरे भावर राष्ट्रिय एकता पार्टीका सभासद् बद्री न्यौपानेले जानकारी दिनुभयो ।

राष्ट्रपति डा रामवरण यादवको निमन्त्रणामा प्रमुख दलका शीर्ष नेताहरु आज बिहान भेटघाटका लागि राष्ट्रपति भवन जानुभएको थियो । समितिको अर्का बैठक यही फागुन ५ गते शुक्रबार बिहान बस्ने कार्यक्रम छ ।

दामोदर नेपाल, नरापो न्यूज, काठमाडौं ।

सिटिइभिटीद्धारा नर्सिङ कलेजको शुल्क निर्धारण

2012-02-15T13:03:00.001+02:00

काठमाडौं, फागुन ३/ प्राविधिक शिक्षा तथा व्यवसायी परिषद् (सिटिइभिटी)ले तोकिएको भन्दा बढी शुल्क लिने नर्सिङ कलेजलाई सम्बन्धन खारेजीसम्मको कारबाही गर्ने भएको छ।सिटिइभिटीको बोर्ड बैठकले सिटिइभिटीबाट सम्बन्धन सबै नर्सिङ कलेजलाई निर्धारण गरिएको भन्दा बढी शुल्क नलिन परिपत्र समेत गरिएको सिटिइभिटीका प्रशासन प्रमुख रमेश पौडेलले बताए ।
प्रतिक्षा दाहाल, काठमाडौं,नरापो न्यूज

६ हजार माओबादी लडाकुको समुहगत समायोजन गर्ने सेनाको प्रश्ताब

2012-02-15T12:54:00.001+02:00

काठमाडौं, फागुन ३/ प्रधानसेनापति छत्रमानसिंह गुरुङले सेना समायोजनसम्बन्धी '६' हजार माओवादी लडाकुको समूहगत समायोजन गर्न सकिने प्रस्ताव गरेका छन्।शान्ति सम्झौताअनुसार लडाकुलाई व्यक्तिगत आधारमा मात्रै समायोजन गर्न सकिने अडान लिँदै आएको सेनाले प्रधानमन्त्रीलाई त्यस्तो नयाँ प्रस्ताव बुझाएका हुन ।शान्ति प्रक्रियाको आधारभूत सर्तका रूपमा लिइएको समायोजनका अन्य प्रावधानमा पनि सेना पहिलेभन्दा उदार देखिएको छ। प्रस्तावमा करिब ६० जनालाई मेजर र ३ सय ५० भन्दा बढीलाई अधिकृत तह दिन सकिने प्रस्ताव गरिएको छ।
प्रतिक्षा दाहाल, काठमाडौं,नरापो न्यूज

लखन थापाको स्मृति दिवस मनाइयो

2012-02-15T12:46:00.001+02:00

काठमाडौं, फागुन ३/ प्रजातान्त्रिक योद्धा लखन थापाको मङ्गलबार गोरखामा एक कार्यक्रम विच स्मृति दिवस मनाइयो प्रथम सहिद लखन थापा मगर स्मृति प्रतिष्ठान र स्थानीय विभिन्न क्लब र नेपाल मगर सङ्घ गोरखाको आयोजनामा मङ्गलबार आयोजना गरेको कार्यक्रममा सहभागीहरुले प्रजातान्त्रिक आन्दोलनमा स्व थापाले पुर्‍याउनुभएको योगदानबारे चर्चा गरेका छन्।सभासद् पार्वती थापाले उहाँको त्यागको आदर्शलाई सबैले सम्मान गर्नुपर्ने विचार व्यक्त गर्दै लखन थापालाई प्रथम सहिद घोषणा गर्न आफूले सदनमा कुरा उठाउने बताईन।आदिवासी जनजाति महासङ्घ गोरखाका अध्यक्ष अशोक राना मगरले देश र जनताको स्वतन्त्रताका लागि जनतालाई चेतना प्रदान गरी आन्दोलनको प्रारम्भ गरेकाले उहाँलाई नेपाली जनताले बिर्सन हुँदैन भने।

प्रतिक्षा दाहाल, काठमाडौं,नरापो न्यूज

अफगानमा पक्राउ नेपालीको उद्धार थाल्न निर्देशन

2012-02-14T11:09:00.001+02:00

काठमाडौं, फागुन २/ अफगानिस्तानमा पक्राउ परेका २१ नेपाली कामदारको स्थिति बुझेर उद्धार सुरु गर्न परराष्ट्र मन्त्रालयले पाकिस्तानस्थित नेपाली दूतावासलाई निर्देशन दिएको छ नक्कली राहदानी र भिसा प्रयोग गरेको आरोपमा शनिबार अफगान प्रहरीले उनीहरुलाई पक्राउ गरेको थियो। एकै घरबाट २१ नेपाली, २५ जना भारतीय र १५ जना श्रीलंकाली पक्राउ परेका थिए। अफगानिस्तान हेर्ने पाकिस्तानस्थित नेपाली दूतावासले उनीहरुको अवस्था बुझ्ने प्रक्रिया सुरु गरेको परराष्ट्रले जनाएको छ।
प्रतिक्षा दाहाल, काठमाडौं,नरापो न्यूज

सडक दुर्घटनामा साहित्यकार घनश्याम खड्काको निधन

2012-02-14T11:01:00.001+02:00

काठमाडौं,फागुन २/प्रगतिशील लेखक सङ्घका अध्यक्ष तथा साहित्यकार घनश्याम ढकालको सडक दुर्घटनामा परी सोमबार निधन भएको छ। बिहान करिब १०:०० बजेतिर प्रदर्शनीमार्गस्थित नेपाल पुलिस क्लब अगाडि सडक पार गर्ने क्रममा बा ४७ प ३३१९ नम्बरको मोटरसाइकलले ठक्कर दिएपछि उपचारका लागि वीरअस्पतालमा लगेपछि उनको निधन भएको हो ।महानगरीय प्रहरी प्रभाग सिंहदरबारका प्रहरी सहायक निरीक्षक जयराम थापाले दुर्घटनामा संलग्न मोटरसाइकल नियन्त्रणमा लिएर चालक बाग्लुङ हरिचौर स्थायी घर भएका मिलन बस्नेतलाई पक्राउ गरी आवश्यक कारबाही सुरु गरिएको जानकारी दिए ।
प्रतिक्षा दाहाल, काठमाडौं,नरापो न्यूज

बस दुर्घटना १ को मृत्यु,१२ घाइते

2012-02-14T10:53:00.001+02:00

काठमाडौं,फागुन २/रुकुमको खलङगाबाट सल्ले जाँदै गरेको सिस्ने यातायातको ना ४ ख ४९२३ नम्वरको यात्रुबस खलंगास्थित मथमा दुर्घटना हुंदा एक जनाको मृत्यु भएको छ । मृतकको सनाखत हुन सकेको छैन । दुर्घटनामा १२ जना गम्भीर घाइते भएका छन् । बस सडकदेखि करिब ३ सय मिटर तल खसेको प्रहरीले जनाएको छ । प्रतिक्षा दाहाल, काठमाडौं,नरापो न्यूज

सहमति भएको विषय टुङ्ग्याउँदै लैजाने

2012-02-14T10:45:00.001+02:00

काठमाडौं,फागुन २/संवैधानिक समितिअन्तर्गतको विवाद समाधान उपसमितिको मंगलबार राजधानीमा बसेको बैठकमा उपसमितिमा दलहरूबीच सहमति भएका विषयहरूलाई टुङ्ग्याउँदै लाने निर्णय भएको छ। संवैधानिक समितिको बैठक भोलिबाट निरन्तर बस्ने र उपसमितिमा विगतमा भएका सहमतिहरू टुङ्ग्याउँदै लाने निर्णय भएको उपसमितिका सदस्य कल्पना राणाले जानकारी दिएकी छिन्।सहमतिका विषयलाई टुङ्ग्याउने क्रममा कुनै दल विशेषका तर्फबाट प्रश्न खडा गरिएमा सम्बन्धित दलका नेताले त्यस विषयमा समाधान निकाल्ने पनि सहमति भएको उहाँले जानकारी दिइन्।बैठकमा नियमावली समितिमा देखिएको विवाद छिट्टै सुल्झाएर अघि बढ्ने विषयमा समेत छलफल भएको थियो।

प्रतिक्षा दाहाल, काठमाडौं,नरापो न्यूज

राजीनामा माग संविधानविरोधी कदम हो - प्रम

2012-02-14T08:50:00.001+02:00

काठमाडौं, २ फागुन ।

प्रधानमन्त्री डा बाबुराम भट्टराईले कसैले राजीनामा माग्दैमा आफूले राजीनामा नदिने बताउनुभएको छ ।

पोखरा विमानस्थलमा पत्रकारसँग कुरा गर्दै प्रधानमन्त्री डा भट्टराईले अहिलेको स्थितिमा राजीनामा माग्नु शान्ति र संविधानविरोधी कदम ठहरिने टिप्पणी गर्नुभयो ।

शान्ति र संविधानका पक्षधरले आफ्नो राजीनामा नमागेको बताउँदै उहाँले राज्यको मूल मुद्दाको किनारा नलगाएसम्म राजीनामा नगर्ने दृढता व्यक्त गर्नुभयो ।

आफ्नै नेतृत्वमा सहमतिको राष्ट्रिय सरकार बन्ने र यही सरकारमा शान्ति र संविधानका पक्षधरहरु सहभागी हुने दाबी गर्नुभयो ।

दामोदर नेपाल, नरापो न्यूज, काठमाडौं ।

वर्तमान सरकारले नै शान्ति र संविधानको कार्यभार पूरा गर्छ-मन्त्री रायमाझी

2012-02-14T08:49:00.001+02:00

काठमाडौं, २ फागुन ।

स्थानीय विकासमन्त्री टोपबहादुर रायमाझीले वर्तमान सरकारले नै शान्ति र संविधानको कार्यभार पूरा गर्ने बताउनुभएको छ ।

एकीकृत नेकपा(माओवादी)को १७ औँ जनयुद्ध दिवसका अवसरमा पार्टीको अवध-मधेस राज्य समितिले बुटवलमा आयोजना गरेको आमसभामा बोल्दै उहाँले शान्ति र संविधानको काममा उल्लेख्य प्रगति भएको अवस्थामा बाँकी रहेको पौने चार महिनाको अवधिभित्र यी दुई कार्यभार वर्तमान सरकारले नै पूरा गर्ने दृढता व्यक्त गर्नुभएको हो ।

मन्त्री रायमाझीले राष्ट्रिय सहमतिका लागि एमाओवादी सधैँ खुला रहेको प्रष्ट पार्नुभयो । एमाओवादी लडाकुका कतिपय शिविरमा स्वेच्छिक अवकाशमा जाने लडाकुलाई दिइएको चेक कमान्डरले खोसेको भनी आलोचना भैरहेका बेला एमाओवादी स्थायी कमिटी सदस्य समेत रहनुभएका मन्त्री रायमाझीले शिविर छाडेर विगतमा भागेका लडाकुहरू चेक बुझ्न आएपछि कमान्डरले खोसेको स्पष्ट पार्नुभयो ।

तर उहाँले कमान्डरले चेक खोसे पनि त्यो सरकार वा पार्टीको निर्देशनमा नभएको जिकिर गर्नुभयो । स्थानीय निकायमा गठन गरिएका सर्वदलीय संयन्त्र विधि र मापदण्डविपरीत रहेकाले खारेज गरिएको र विधि तथा मापदण्ड पुर्‍याएर त्यसको विकल्प खोजिने मन्त्री रायमाझीको भनाइ थियो ।

द्वन्द्वकालमा एमाओवादी कार्यकर्ताका नाममा घरजग्गा पास गर्न सम्भव नभएकाले जनसत्ताले त्यस्तो कार्य गरेको र यसलाई सरकारले मान्यता दिँदा अरु दलले विरोध गर्नु जायज नभएको तर्क गर्दै उहाँले निर्णय फिर्ता लिइसकेकाले त्यसको विकल्प दिन अन्य दललाई आग्रह गर्नुभयो ।

यस्तै एमाओवादीका पोलिटब्यूरो सदस्य देवेन्द्र पौडेलले यही सरकारलाई राष्ट्रिय सहमतिको स्वरुप दिएर शान्ति र संविधानलाई निष्कर्षमा पुर्‍याउनुपर्ने बताउनुभयो ।

अर्का पोलिटब्यूरो सदस्य डिलाराम आचार्यले शान्ति र संविधानमा प्रभाव पार्ने खेल भए जनताले विद्रोह गर्ने चेतावनी दिनुभयो ।

सोही अवसरमा एमाओवादीका केन्द्रीय सदस्यहरू चन्द्रहरि सुवेदी, हकि उल्लाह खाँ लगायतले आफ्नो पार्टीलाई यथास्थितिमा कैद गर्न खोजिए विद्रोह हुने चेतावनी दिनुभएको थियो ।
दामोदर नेपाल, नरापो न्यूज, काठमाडौं ।

शान्ति र संविधान निर्माणमा राष्ट्र सङ्घका विशेष प्रतिनिधिको चासो

2012-02-14T08:45:00.001+02:00

काठमाडौं, २ फागुन ।

संयुक्त राष्ट्र सङ्घका महासचिव वान कि मुनका विशेष प्रतिनिधि सामुएल टाम्राट र सभामुख सुवासचन्द्र नेम्वाङबीच भेटवार्ता भएको छ ।

भेटमा टाम्राटले सत्य निरुपण तथा मेलमिलाप र बेपत्ता खोजविन आयोग गठनसम्बन्धी विधेयक पारित हुन नसकेकोबारे चासो व्यक्त गर्नुभएको छ । यसैगरी टाम्राटले जारी शान्ति र संविधान निर्माण प्रक्रियाका सम्बन्धमा पनि जिज्ञासा राख्नुभएको थियो ।

सभामुख नेम्वाङले दलहरूबीच सहमति हुन बाँकी रहेकोले विधेयक पारित हुन नसकेको बताउँदै आउने जेठ १४ गतेभित्रै नयाँ संविधान बन्ने विश्वास दिलाउनुभएको थियो । शान्ति प्रक्रियाका महत्वपूर्ण कामहरू सुचारु ढङ्गले अघि बढिरहेकोले संविधान निर्माणमा त्यसको सकारात्मक असर पर्ने सभामुख नेम्वाङले बताउनुभएको हो ।

नेपालको शान्ति र संविधानका विषयमा जानकारी लिन नेपाल आउनुभएको टाम्राटले यसअघि विभिन्न दलका नेताहरूसँग भेटवार्ता गरिसक्नुभएको छ ।
दामोदर नेपाल, नरापो न्यूज, काठमाडौं ।

भक्तपुर नगरपालिकाद्वारा चारपाङ्ग्रे सवारी प्रवेशमा निषेध

2012-02-14T08:44:00.001+02:00

काठमाडौं, २ फागुन ।

भक्तपुर नगरपालिकाले नगरक्षेत्र भित्रको विश्वसम्पदा सूची एवं सम्पदा क्षेत्रमा आजदेखि दिउँसो चारपाङ्ग्रे सवारी साधन प्रवेशमा निषेध गरेको छ ।

दरबार स्क्वायर क्षेत्र, पाँचतले मन्दिर क्षेत्र हुँदै दत्तात्रय र च्यामसिंह ढोकासम्म दैनिक १२ घन्टा चारपाङ्ग्रे सवारी साधन प्रवेशमा आजदेखि रोक लगाइएको हो ।

नगरभित्र अव्यवस्थित सवारी पार्किङ, सवारी जामका कारण पर्यटकलाई परेको सास्ती र सवारी चाप बढेकाले बिहान ८ देखि बेलुका ८ बजेसम्म सो क्षेत्रमा चारपाङ्ग्रे सवारी निषेध गरिएको नगरपालिकाले जनाएको छ ।

अत्यावश्यक सवारी साधन एम्बुलेन्स, सफाइ गाडी, प्रहरी गस्ती, विद्यार्थी बोक्ने बस र खानेपानी बोक्ने हलुका सवारी साधन भने नगरपालिकाको अनुमतिपत्र लिएरमात्र सञ्चालन गर्न पाइने र अन्य सवारीको हकमा पूर्ण रूपमा प्रवेश निषेध गरिने छ-नगरपालिकाले भनेको छ ।
दामोदर नेपाल, नरापो न्यूज, काठमाडौं ।

आज प्रणय दिवस अर्थात भ्यालेन्टाइन डे

2012-02-14T08:43:00.001+02:00

काठमाडौं, २ फागुन ।
हरेक वरर्ष झैं यस पटक पनि संसारभरी मनाईंदै आइएको भ्यालेन्टाइन डे अर्थात् प्रणय दिवस आज पनि मनाइँदैछ ।
भ्यालेन्टाईन डेको शुरुआत चाहिं रोमन साम्राज्यको पालामा भ्यालेन्टाइन नामका एक पादरीले राजाको निर्देशनको अवज्ञा गर्दै युवायुवतीहरुलाई प्रेमका लागि उत्प्रेरित गरेको र सामुहिक विवाह समेत गराएको अभियोगमा सासकहरुले मृत्युदण्ड दिएपछि उनै भ्यालेन्टाइनको सम्झनामा हरेक वर्ष फेब्रुअरी १४ मा दिवस मनाउने गरिएको हो ।

आजको यस भ्यालेन्टाईन डे अर्थात प्रणय दिवसको अवसरमा संसारभरका प्रेमजोडीहरुले विभिन्न उपहार आदान प्रदान गरी माया साटासाट गर्ने चलन छ । त्यस्तै आफुलाई मन परेको व्यक्तिसामु प्रेम प्रस्ताव राख्ने दिनको रुपमा पनि भ्यालेन्टाइन डे लाई युवायुवतीले उपयोग गर्ने गर्छन् । भ्यालेन्टाइन डे को अवसरमा आज नेपालमा पनि राजधानी काठमाण्डु लगायत बिभिन्न सहरमा विभिन्न कार्यक्रम समेत आयोजना गरिन्छ । सार्वजनिक पार्क तथा उद्यानहरु आज प्रेमजोडीले भरिभराउ हुन्छन् । नेपालमा पछिल्लो समय प्रणय दिवस मनाउने चलन निकै बढेर गएको छ । यो दिन लाखौँका गुलाबका फूल तथा उपहारको व्यापार हुने गरेको व्यापारीहरु बताउँछन् ।
दामोदर नेपाल, नरापो न्यूज, काठमाडौं ।

बेलायतबाट ८० प्रतिशत नेपाली फर्काइन सक्ने

2012-02-13T16:20:00.000+02:00

नरापो न्यूज।

बेलायत सरकारले प्रस्ताव गरेको नयाँ आप्रवासन नीतिले हजारौँ नेपाली पेशाकर्मी तथा आप्रवासी प्रभावित हुने भएका छन् । बेलायत बस्ने युरोपेली संघ बाहिरका नागरिकको आम्दानी कम्तीमा वार्षिक ३१ हजार पाउण्ड (३८ लाख ४४ हजार रुपैयाँ) हुनुपर्ने नीतिमा छ । कम आम्दानी हुने संघबाहेकका देशका नागरिकलाई ५ वर्षको भिषा अवधि सकिएपछि सम्बन्धित देश फर्काइने छ । बेलायतका आप्रवासी सम्बन्धि मुद्धा हेर्ने नेपाली वकिल राजु थापाले यो कानुन बने नेपाली लगायत युरोपेली संघ बाहिरका अधिकांस आप्रवासी स्थायी रुपले बेलायत बस्न नसक्ने बताए । बेलायती आप्रवासन मन्त्रीले गएको साता बीबीसीसँग कुराकानी गर्दै बेलायती जिवनस्तर सुधार्ने खालका आप्रवासी मात्रै चाहेको बताएका थिए । उनले मध्यम खालका व्यवस्थापक र अदक्ष कामदारको खाँचो नरहेको बताएका थिए ।

सातौं एनआरएन क्षेत्रीय सम्मेलन अष्ट्रेलियामा

2012-02-13T11:21:00.002+02:00

नरापो न्यूज।फेब्रुअरी, १३ काठमाडौं

गैरआवासीय नेपाली संघको सातौं क्षेत्रीय सम्मेलन अष्ट्रेलियाको सिड्नीमा हुने भएको छ । एनआरएन आईसीसीको हालै वसेको वैठकले आगामी सन् २०१२ अगष्ट ३० देखि सेप्टेम्बर १ तारिखसम्म सिड्नीमा क्षेत्रीय सम्मेलन आयोजना गर्ने निर्णय गरेको छ ।वैठकले नयाँ बन्ने नेपालको संविधानमा नेपाली नागरिकताको निरन्तरताको सुनिश्चित गर्न दोहोरो नागरिकता कार्यदलको आयोजनामा सभासदहरुसँग फेब्रुवरी २३२४ मा काठमाडौंमा एक अन्तर्कृया कार्यक्रम आयोजना गर्ने तथा राजनैतिक दलका नेताहरुसँग छलफल गर्ने निर्णय पनि गरेको छ । यसै समयमा नेपालमा खुला विश्वविधालय स्थापनाका लागि शिघ्र वातावरण तयार गर्न तथा गैरआवासीय नेपाली संघको भूमिकाबारे छलफल गर्न अध्यक्ष जीवा लामिछानेको नेतृत्वमा गैरआवासीय नेपाली संघको एक प्रतिनिधी मण्डलले नेपाल सरकारका सम्वन्धित निकायहरुसँग भेट पनि गर्ने भएको छ । यसै प्रतिनिधि मण्डलले संघको दर्ता, वैदेशिक रोजगार लगायतका गैरआवासीय नेपालीसँग जोडिएका बिषयहरुमा सम्वन्धित पक्षहरुसँग छलफल गर्ने निर्णय पनि गरिएको छ।

आज संसदको बैठक बस्दै

2012-02-13T05:46:00.001+02:00

काठमाडौं, १ फागुन ।

आज व्यवस्थापिका संसदको बैठक बस्ने संसद सचिवालयले जनाएको छ । आजको बैठकमा सरकारले मनी लाउण्डरिङ सम्वन्धी संगठित अपराध, सुपर्दगी महासन्धी र पारस्परिक कानुनी सहायता सम्वन्धी विधेयक पेश गर्ने कार्यसूची रहेको छ ।

सरकारको नेतृत्व गरिरहेको दल एकीकृत माओवादीको मोहन बैद्य पक्षले विरोध गरेपछि विधेयक पारितमा समस्या परेको छ । तर पेरिसस्थित मुद्रा निर्मलीकरण अनुगमन गर्न बनेको अन्तर सहकारी वित्तीय कार्यदलले भने तीन बटा कानुन बनाउन आजसम्मको समय दिएको छ ।

सो कार्यदलले दिएको समय सीमा आजसम्ममा कानुन नबने कार्यदलले नेपाललाई कालोसूचीमा राख्न सक्छ । यदि नेपाल कालोसूचीमा पर्यो भने नेपालका बैंकहरुलाई वित्तिय कारोबारमा समेत कठिनाई उत्पन्न हुनेछ ।

दामोदर नेपाल, नरापो न्यूज, काठमाडौं ।

आजबाट लोड सेडिड. १ घण्टा घट्यो

2012-02-13T05:41:00.001+02:00

काठमाडौं, १ फागुन ।

हप्ताको ८८ घण्टा लोड सेडिड.को मार खेपीरहेका नेपालीले आजबाट दिनको एक घण्टा कम लोड सेडिड. खप्नु पर्ने भएको छ । हरेक दिन १४ घण्टा हुंदै आएको लोड सेडिड. आजबाट अब १३ घण्टा मात्र हुने नेपाल विद्युत प्राधिकरणले जनाएको छ ।

नयां तालिका सार्वजनिक गर्दै प्राधिकरणले जनाए अनुसार कुलेखानी जलाशयमा भएको पानी संचिती, मध्य मस्र्यांग्दी परियोजनाबाट विद्युत उत्पादन सुरु र विद्युत् चुहावट नियन्त्रणमा भएको प्रगति लगायतका कारणले लोडसेडिङ घटेको हो।

दामोदर नेपाल, नरापो न्यूज, काठमाडौं ।

विद्यालयलाई शान्तिक्षेत्र बनाउनु पर्छ - उपराष्ट्रपति

2012-02-13T05:34:00.001+02:00

काठमाडौं, १ फागुन ।

उपराष्ट्रपति परमानन्द झाले शैक्षिक क्षेत्रमा हुने गरेको बन्द हडतालबाट बालबालिकाको भविष्यमा नकारात्मक असर पर्ने गरेको उल्लेख गर्दै राजनीतिक दलहरुले शिक्षण संस्थालाई शन्ति क्षेत्र घोषणा गर्नुपर्ने बताउनुभएको छ ।

नाइटिङ्गेल उच्च माध्यमिक विद्यालयको १९ औँ स्थापना दिवसका अवसरका आइतबार राजधानीमा आयोजित कार्यक्रममा उहाँले भन्नुभयो- 'राजनीतिक दलहरुले विद्यालयलाई बारम्बार शान्ति क्षेत्र बनाउने बताए पनि व्यवहारमा त्यस्तो देखिएन, उनीहरुले यस क्षेत्रमा हडताल बन्द गर्नुपर्छ ।'

राजनीतिक दलहरुले देशमा शान्ति कायम गर्न नसकेको उल्लेख गर्दै उपराष्ट्रपति झाले आजका बालबालिका भोलिका राष्ट्रसेवक भएकाले उनीहरुको भविष्यमा अवरोध हुने कुनै पनि क्रियाकलाप नगर्न आग्रह गर्नुभएको हो ।

उहाँले विद्यालय सञ्चालकहरुले नैतिक शिक्षालाई पनि अध्ययन गराउनुपर्ने बताउँदै आउँदा दिनमा मर्यादित भएर देशको सेवा गर्ने योग्य व्यक्ति तयार गर्नुपर्नेमा जोड दिनुभयो ।

दामोदर नेपाल, नरापो न्यूज, काठमाडौं ।

क्यानद्वारा महिला क्रिकेटरलाई नगद पुरस्कार प्रदान

2012-02-13T05:33:00.003+02:00

काठमाडौं, १ फागुन ।

नेपाल क्रिकेट संघ क्यानले एसीसी अन्डर १९ महिला च्याम्पीयनसिप क्रिकेटको उपाधिमा ह्याट्रिक गरेको नेपाली राष्ट्रिय महिला टिमका प्रत्येक सदस्यलाई जनहि २० हजार प्रदान गरेको छ ।

क्यानले आजधानीमा आइतबार एक कार्यक्रमको आयोजना गरि हालै कुवेतमा सम्पन्ह प्रतियोगिताको उपाधि बिजेता राष्ट्रिय टोलीलाई पुरस्कार स्वरुप जनहि २० हजार प्रंदान गरेको हो । पुरस्कार पाउनेमा टोलीका १४ सदस्यीय खेलाडी र ३ जना अफिसियल रहेका छन । त्यस्तै राष्ट्रिय टिमलाई प्रायोजना गर्दै आएको सिजिले नगद ५१ हजारबाट पुरस्कृत गरेको छ ।

कार्यक्रममा खेलकुद मन्त्री कमला रोक्काले उपाधि बिजेता टोलीलाई २ लाख नगद प्रदान गर्न आफुले पहल गर्ने बताउनुभयो । यसअघि सन २०१० मा भुटानलाई पराजित गर्दै दोस्रो पटक उपाधि जित्दा महिला टोलीलाई सरकारले १ लाख नगद पुरस्कार प्रदान गरेको थियो ।

कार्यक्रममा महिला खेलाडी सोनु खडकाले आफुहरुको शिक्षा दिक्षा र भविष्यको सुनिश्चितताको लागि सरकारसंग आग्रह गर्नुभयो । प्रतियोगिताको तेस्रो सस्करणसम्म सबै १९ खेलमा अपराजित रहँदै नेपालले फाइनलमा थाइल्याण्डलाई ६ विकेटले पराजित गर्दै उपाधिमा तेस्रो पटक कब्जा जमाएको हो ।

दामोदर नेपाल, नरापो न्यूज, काठमाडौं ।

मकवानपुरमा भएको जिप दुर्घटनामा पाँच जनाको मृत्यु

2012-02-13T05:33:00.001+02:00

काठमाडौं, १ फागुन ।

वीरगन्जबाट काठमाडौँतर्फ आउंदै गरेको ना१ज २१२४ नम्बरको बलेरो जीप हेटौँडा- कुलेखानी फर्पिङ सडकखण्डअन्तर्गत पर्ने कुलेखानीको सिमखोला पुलनजिक करिब ७० फिट तल खसी आइतबार अपराह्न दुर्घटना हुँदा सो जीपमा यात्रा गर्ने एक बालकसहित पाँच जनाको घटनास्थलमै मृत्यु भएको जिल्ला प्रहरी कार्यालय, मकवानपुरले जनाएको छ ।

प्रहरीका अनुसार दुर्घटनामा परी मृत्यु भएकामध्ये एक महिला, एक बालक र अन्य तीन पुरुष रहेका छन् । यद्यपि मृत्यु भएकाहरुको सनाखत हुन सकेको छैन ।

मृत्यु भएकाहरु सबैको शव हेटौँडा लगिएको छ । सो दुर्घटनामा परी घाइते भएकाको स्थानीय बासिन्दा, प्रहरी, सेनाका जवानले उद्धार गरी थप स्वास्थ्योपचारका लागि काठमाडौँतर्फ पठाएको जिल्ला प्रहरी कार्यालय हेटौँडाले जनाएको छ ।

दामोदर नेपाल, नरापो न्यूज, काठमाडौं ।

लखन थापालाई प्रथम शहीद घोषणा गर्नु पर्छ -प्रतिष्ठान

2012-02-13T05:32:00.001+02:00

काठमाडौं, १ फागुन ।

लखन थापा मगर स्मृति प्रतिष्ठानले निरंकुश शासन व्यवस्थाको अन्त्य गरी प्रजातान्त्रिक शासन व्यवस्थाको आरम्भ गर्ने महान अभियानमा पहिलो पटक सहादत लखन थापालाई प्रथम शहीद घोषणा गर्न माग गरेको छ ।

आइतबार राजधानीमा पत्रकार सम्मेलन गरी प्रतिष्ठानले जहानियाँ राणा शासनको निरंकुश व्यवस्था विरुद्ध गोरखा जिल्ला बुङ्कोट गाविसको काहुलेभङ्गारमा विद्रोही किल्ला निर्माण गरी २००० हजार स्थानीय जनताको सहभागितासहित लडाईको मोर्चाबन्दीकै क्रममा १९३३ फागुन २ गते अमरत्व प्राप्त गरेका लखन थापालाई राज्यले उपेक्षा गरेको भन्दै प्रतिष्ठानले तत्काल थापालाई प्रथम शहीद घोषणा गर्नुपर्ने माग गरेको हो ।

प्रतिष्ठानले शहीद लखन थापा मगरलाई प्रथम शहीद घोषणा गर्नुपर्ने, शहीद गेटमा प्रथम शहीदको रुपमा लखन थापा मगरको शालिक स्थापना गर्नुपर्ने, प्रत्येक वर्ष फागुन २ गते सार्वजनिक विदा दिनुपर्ने जस्ता मागसिहत काठमाडौंको शान्ति बाटिकामा फागुन २ गते लखन थापाको १३५ औं स्मृति सभागर्ने जानकारी गराएको थियो ।

पत्रकार सम्मेलनमा प्रतिष्ठानका अध्यक्ष रुलबहादुर आलेमगरले लखन थापा मगरलाई २०५६ सालमा शहीद घोषणा गरे पनि नेपालको इतिहासमा प्रथम शहीद हुने व्यक्ति लखन थापा नै भएको दावी गर्दै उनलाई प्रथम शहीद घोषणा गर्नुपर्ने माग गर्नुभयो ।

दामोदर नेपाल, नरापो न्यूज, काठमाडौं ।