www.theaznepal.com A Complete Nepali Entertainment

'लक' युनिटमा एक मात्र महिला

2012-03-30T14:00:00.000-07:00

फिल्मीखबर, काठमाण्डौ, २०६८ चैत्र १७, शुक्रवार

५०/६० जनाको सुटिङ युनिटमा एक मात्र महिला छ भन्दा पक्कै पनि अचम्म लाग्न सक्छ । तर यो यथार्थ हो कि ४ दिन अघि सुटिङ शुरू भएको फिल्म 'लक' मा एक मात्र महिला छिन् त्यो पनि मुख्य कलाकार ।

ऋषि न्यौपानेले निर्देशन गरिरहेको फिल्म 'लक' मा मुख्य भुमिका निर्वाह गरेकी हिरोईन बेनिशा हमाल एक मात्र महिला पात्र हुन् । उनी बाहेक त्यो युनिटमा न कुनै महिला कलाकार छन् न महिला प्राबिधिक नै । महिलाको प्रतिनिधित्व गरेकी नायिका बेनिशाले फिल्मीखबरसँग कुरा गर्दै भनिन्, 'बेला बेलामा एक्लो फिल भए पनि एउटै परिवार जस्तो वातावरण भएकाले त्यस्तो अफ्ठ्यारो महसुस गरेकी छैन ।'

नायिका हमालका अनुसार अहिले सम्म आफू बाहेक अरू कुनै महिला पात्र युनिटमा नदेखेको बताईन् । उनले भनिन्, 'मैले बुझे सम्म सुटिङ सकिने बेलासम्म म मात्र महिला पात्र हो ।' एक किसिमले महिलाको प्रतिनिधित्व कम हुनु राम्रो नभए पनि अर्को किसिमले बेनिशा यसलाई लक मान्छिन् । भन्छिन्, 'एक मात्र महिला पात्र भएर काम गर्नु पनि मेरो लागि लक हो ।' तर अरू पनि महिला भएको भए काम गर्न अझ सहज हुने उनको भनाई छ ।

हरि खनालको निर्माणमा हाल राजधानीका छायाँकन भईरहेको सो फिल्ममा बेनिशा किशोर खतिवडा र अनिल थापाको अनस्क्रिन जोडी भएर अभिनय गरेकी छिन् । त्रिकोणात्मक प्रेमकथामा आधारित फिल्म 'लक' भाग्यले जहाँ डोर्‍याउँछ मान्छे त्यहिं पुग्न बाध्य हुन्छ भन्ने थिमका आधारित छ । चेतन सापकोटाको संगीत रहेको सो फिल्मको कथा निर्देशक न्यौपानेले नै लेखेका हुन् । फिल्मलाई गणेश श्रेष्ठले खिचिरहेका छन् ।

निर्देशक न्यौपानेले शुरूमा 'ज्वाला' निर्देशन गर्ने घोषणा गरेका थिए तर पछि स्क्रिप्टमा हेरेफेर भएपछि 'लक' राखिएको हो । ४५ दिनको सेड्यूल निकालिएको सो फिल्मको अधिकांश भागको छायाँकन काठमाण्डौमा नै गरिने भएको छ ।

- फिल्मी खबर

निशाले मुद्दा हाल्ने हल्ला मात्र

2012-03-28T13:57:00.002-07:00

नायिका निशा अधिकारी चलचित्र लुटको ५१ दिनको पार्टीमा पत्रकारसंगको दुव्र्यवहारपछि निक्कै विवादमा फसिन् । नायिका अधिकारीले एक पत्रकारले फोटो खिच्दै गर्दा दुव्र्यवहार गरेपछि विवाद भएको थियो । यही लुटको पार्टीमा निर्माता रोज राणाले क्यामेरा लगेर पार्टीका दृश्य खिचेका थिए । उनले, पार्टीमा भएका सवै गतिविधी खिचेर आफ्नो नया चलचित्र हिरोईनमा राख्ने तयारी गरीरहेका छन् ।

यसैविच, लुटको पार्टी खिचेर चलचित्रमा राख्ने तयारी गरीरहेका निर्माता रोज राणाको विरुद्धमा नायिका निशा अधिकारीले मुद्दा हाल्ने तयारी गरेको खवर वजारमा निक्कै चलेको छ । नायिकाले, मुद्दा हाली पार्टीमा भएको विवादित घटना चलचित्रमा राख्नलाई रोक्ने तयारी गरेको खवर वजारमा चलिरहेको छ । यसवारेमा नायिका निशा अधिकारीसँग अनलाइनखवरले वुझ्न खोज्दा उनले यो खवर गलत भएको वताएकी छिन् ।

‘मैले कसैमाथी मुद्दा हाल्ने तयारी गरेको छैन, यो खवर गलत हो’,-नायिका अधिकारीले भनिन् । यता, निर्माता रोज राणाले भने आफुले घरमा देखाउनका लागि पार्टीको दृश्य नखिचेको भन्दै यदि कसैले मुद्दा हाल्छ भने खासै केही नहुने वताए । उनले भने, ‘यदि सम्मानित अदालतले मलाई दृश्य नराख्न आदेश दियो भने म राख्दिन ।’ तर, नायिका निशा अधिकारीले मुद्दा हाल्ने कुनै सोच नराखेको वताएपछि यो हल्ला हल्लामा मात्र सिमित भएको छ ।

- Online Khabar

कहाँ बन्ला फिल्म स्टुडियो?

2012-03-26T12:47:00.002-07:00

सन्तोष रिमाल, काठमाडौं, चैत १३- दोलखाको खरिढुंगामाथिका डाङडुङे डाँडा फिल्मनगरीमा रूपान्तरण हुने समाचारले चर्चा पाएको छ। चलचित्र विकास बोर्डका अध्यक्ष गणेश भण्डारीले भ्रमण गरेर त्यहाँ सुटिङ स्टुडियो बनाउने वचन दिएपछि स्थानीयवासी हर्षित छन्।

त्यहाँको सौन्दर्यले भण्डारी लोभिएका छन्। भुस्वामित्वको कागज पाउने बित्तिकै निर्माण प्रक्रिया अघि बढाउने आश्वासन उनले दोलखावासीलाई दिइसकेका छन्। स्थानीय आगुवाले करिब ६ सय रोपनीमा स्टुडियो खडा गर्ने सपना देख्दै नाम समेत जुराइसके, 'डलिउड'।

तर, यसरी खुसी मनाइहाल्नु हतार हुनसक्छ। किनभने अध्यक्ष भण्डारीले फिल्म नगरीको सुनौलो सपना धेरै ठाउँमा बाँडेका छन्। तर, ठोस प्रक्रिया कतै सुरु भएको छैन।

आठ महिनाअघि मात्रै उनले 'फिल्म नगरी'को सपना बाँडेका थिए कास्कीको धिताल गाउँमा। त्यहाँबाट देखिने हिमशृंखला र भूबनोटलाई आधार मान्दै उनले भनेका थिए, 'यो ठाउँलाई देशको केन्द्रिय स्टुडियो बनाउँछौं। त्यसो गरे विदेशी समेत यहाँ सुटिङ गर्न आउँछन्।' उनको आश्वासनसँगै त्यहाँ जग्गाको भाउ मात्र बढेन, कतिले जग्गामा परेको रुखै काट्न थाले। स्टुडियो के हो भन्ने नबुझे पनि गाउँमा विकासको मूल फुट्ने ठानेर त्यहाँका बासिन्दाले फूलमालाले भण्डारीको गला भरे।

धितालबासी अहिले निकै खिन्न छन्। 'डलिउड'को खबरसँगै आफ्नो गाउँको योजना खोसिएको ठानेका छन् धितालवासीहरुले। बोर्डका पदाधिकारीहरुले पटकपटक अवलोकन गरेर स्टुडियो बनाउने 'पक्का' गरे पनि अन्यत्रै बन्ने खबरले गाउँलेमा आक्रोश छाएको छ।

धिताल गाउँका विश्वराज अधिकारीले भने, 'अन्य ठाउँमा बनाउने योजना थियो भने हामीलाई आश्वासन दिनु हुँदैनथ्यो।' स्टुडियो निर्माणसँगै गाउँको विकास कुरेर बसेकाहरु बोर्डको पछिल्लो गतिविधिले दुःखी भएको उनले बताए।

'मंसिरको अन्तिम साता पनि अवलोकन गर्न बोर्डका प्राविधिकहरु आएका थिए। पोखराबाट अन्य प्राविधिक पनि झिकाउने भन्दै हामीलाई थप व्यवस्था मिलाउन अनुरोध गरे, तर फर्किएनन्,' उनले गुनासो गरे।

सरकार परिवर्तन हुनसक्ने भन्दै बोर्डका पदाधिकारीले जतिसक्दो छिटो काम सक्न अनुरोध गरेकाले थप आशा जागेकोे अधिकारीको भनाइ छ। मंसिर अन्तिम साता स्टुडियो निर्माण समितिका तत्कालिन संयोजक तथा बोर्ड सदस्य उदय सुब्बाको नेतृत्वमा प्राविधिक सहितको टोली जयकोट र उपल्लो अस्ताम क्षेत्रको अवलोकनमा पनि पुगेको थियो।

'अहिलेसम्म चारपटक गाउँ आएका बोर्ड पदाधिकारीले हामीलाई धितालमै स्टुडियो बनाउने वचन दिए,' स्थानीय स्तरमा गठित स्टुडियो निर्माण समितिका संयोजक श्याम दाहालले नागरिकसँग भने, 'हाम्रो गाउँमा ल्याउने योजना नै थिएन भने आश्वासन दिनु हुँदैनथ्यो।' उनले बोर्डको पछिल्लो गतिविधि गैरजिम्मेवारीपूर्ण रहेको टिप्पणी गरे। आफूले स्टुडियोको विषयमा अध्यक्षको धारणा जान्न खोज्दा राजधानीबाहिर काममा व्यस्त रहेको भन्दै स्पष्ट जवाफ नदिएको उनको कथन छ।

धिताल गाउँमा स्टुडियो बनाउन जोड दिने फिल्मकर्मी शिवजी लामिछाने जग्गा भोगचलनको अधिकार बोर्डलाई नदिएसम्म समस्या पर्ने बताउँछन्। बोर्ड टोलीसँगै सो क्षेत्रको अवलोकनमा पुगेका लामिछानेले भने, 'त्यहाँ स्टुडियो बनाउने कुरा रेडबुकमै उल्लेख भइसकेको छ। देशको फिल्मनगरी पोखरामै बन्नु पर्छ र बन्छ पनि।' तत्काल काम अघि नबढे पनि निराश नहुन उनले धितालबासीलाई अनुरोध गरे।

त्यसो त स्थापनाकालदेखि नै बोर्डले स्टुडियो निर्माणको नारा चर्काउँदै आएको छ। टोखा, नाङ्लेभारे, नागार्जुन जस्ता उपत्यका आसपासका ठाउँलाई अघिल्ला अध्यक्षहरुले स्टुडियो निर्माण स्थलको रूपमा प्रस्ताव गरेका थिए। वर्तमान अध्यक्ष भण्डारीले धिताल गाउँ, कोहलपुर र दोलखा पुगेर स्टुडियो बनाउने योजना बाँडे। तर गृहकार्यबिनाको आश्वासनका कारण उनले आलोचनाको समना गर्नु परेको छ।

फिल्म निर्देशक नवीन सुब्बा बोर्ड पदाधिकारीले जता गए पनि स्टुडियो बनाइने वचन दिँदा आन्योल सिर्जना भएको बताउँछन्। फिल्मनगरी बनाउने घोषणा गर्नु अघि पूर्वाधारबारे प्रष्ट हुन उनी आग्रह गर्छन्। नेपालमा 'इन्डोर स्टुडियो'को खाँचो औँल्याउँदै उनले भने, 'कैलालीको थारु गाउँ होस् या कास्कीको घान्द्रुक। ती आफैं प्रकृतिक स्टुडियो हुन् र त्यहाँ विषयको माग अनुसार सुटिङ भएकै छ। जहाँ सुटिङ गर्न असम्भव छ त्यसको सेट लगाउन सकिने स्टुडियो चाहिएको हो।' उनले स्टुडियो बनाउने ठाउँमा फिल्मकर्मीलाई आवश्यक पर्ने सबै सुविधा उपलब्ध गराउनु पर्ने धारणा राखे। 'प्रकृतिले नै दिएको ठाउँमा जाऊ भन्नु पर्दैन। पूर्वाधारबिना जहाँ घोषणा गरे पनि सुटिङ गर्न जाँदैनन्,' स्टुडियोबारे 'क्लियर' हुन आग्रह गरे उनले।

फिल्म र म्युजिक भिडियो बनाउँदा 'भर्चुअल सेट'मा खेल्न खप्पिस सिमोस सुनुवार स्टुडियो नहुँदा धेरै दुःख खेप्नु परेको सुनाउँछन्। सुटिङ गर्न छिरेपछि ६० प्रतिशत काम सकेर निस्कन पाउने स्टुडियोको आवश्यकता देख्छन् उनी। बोर्डले सुनाउँदै हिँडेको स्टुडियो अवधारणासँग उनी सहमत छैनन्।

'आफ्नो हिसाबले चलाउन नमिल्ने खालको स्टुडियो भयो भने जुन फिल्म हेरे पनि उस्तै खालको देखिन्छ। त्यसैले कलर, लाइटिङ र सेट राख्न सकिने वैज्ञानिक स्टुडियो चाहिन्छ,' सिमोसले सुझाव दिए। उनी सानो बजेटकै भए पनि आश्वासनले मूर्त रूप पाएको हेर्न चाहन्छन्। नेपाल चलचित्र विकास कम्पनी, चापागाईं स्टुडियो र नुतन स्टुडियोले धानेको 'स्टुडियो धन्दा' विकसित हुनुपर्ने उनको भनाइ छ।

दोलखामा स्टुडियो बनाउने कुरा सुरु हुँदैमा धिताल गाउँको योजना रोकिने होइन भन्छन् भण्डारी। राज्यको संघीय संरचनासँगै ठाउँठाउँमा स्टुडियोको खाँचो पर्ने उनी बताउँछन्। दोलखामा भुस्वमित्वको प्रक्रिया सहज हुने देखेपछि स्टुडियो बन्ने सम्भावना पनि छिट्टै विकास भएको उनले जानकारी दिए।

'इन्डोर स्टुडियो बनाउन सुन्दर ठाउँ नै चाहिन्छ?' भन्ने नागरिककको जिज्ञासमा काठमाडौंनजिक जग्गाको समस्या परेकाले बाहिरतिर सम्भावना खोज्दै हिँडेको उनले खुलाए। विद्युतको संकट नपार्ने र स्थानीयवासीको सहयोग पनि मिलेकाले 'डलिउड'को योजनाले गति लिने संकेत देखेका छन् भण्डारीले।

(पोखराबाट सन्तोष पोखरेल र दोलखाबाट रमेश खतिवडाको सहयोगमा )

- नागरिक न्यूज

शिला के जवानीमा राजेश पायल

2012-03-21T22:43:00.002-07:00

भारतीय चर्चित नायिका कटि्रना कैफले शिला की जवानी बोलको गीतमा आईटम डान्स गरिन् । यो गीतले निकै चर्चा पनि पायो । तर अब यही बोलको गीतमा गायक राजेश पायल राईले आवाज दिने भएका छन् । गायक राजेश पायल राई र मिथिला मल्टी मिडियाबीच यस्तै सम्झौता भएको छ । भोजपुरी भाषामा तयार हुन लागेको शिला के जवानी नामक एल्वमका लागि गायक राईले आवाज दिने भएका छन् । ९ गीत समावेश हुने यो एल्बममा ८ गीतमा राईको सोलो आवाज र एक गीतमा भोजपुरी चर्चित गायिका कल्पनासँग राईले गीत गाउने बताइएको छ । चैतको अन्तिम साताबाट गीत रेकडिङ शुरु हुने यो एल्वमका सबै गीतमा गायक राईले नेपालमै आवाज दिनेछन् ।

कार्यक्रममा बोल्दै उनले भने -’म नेपाली माटोमा नै जन्मेकाले भारतमा गीत गाउन भन्दा नेपालमै गाउँछु भनेर प्रस्ताव गरें । कम्पनीले पनि स्वीकार गर्यो ।’एक नेपाली गायकले यसरी बिभिन्न भाषामा गीत गाउनु आफैंमा सकारात्मक कुरा हो । यो एल्बमलाई भारतीय चर्चित म्युजिक बितरक कम्पनी टी सिरीजले बितरण गर्नेछ । यसभन्दा अघि राईले जापानी, लिम्बु भाषमा समेत गीत गाइसकेका छन् । कार्यक्रममा राईले भने -’यसरी बिभिन्न भाषामा गीत गाउने म पहिलो गायक होला तर यसले अन्य गायकलाई समेत बाटो खोलिदिएको छ ।

यो एल्वममा विनय बिहारी, अशोक सिन्हा, अजय अनुरागी र आर.के. राजुको शब्द रहने बताइएको छ । यसरी नेपाली सिनेमाहरु भोजपुरी भाषामा डबिङ हुन थालेको समयमा एक गायकले समेत यो बाटो अपनाएका छन् । यसले नेपाली चलचित्र र संगीतको बजार फराकिलो हुने विश्वास गर्न सकिन्छ ।

Online Khabar

अभिनयले जोडेको सम्बन्ध

2012-03-19T14:16:00.001-07:00

स्मृति ढुंगाना, काठमाडौं, चैत ६- 'हाकु काले' अर्थात् सौगात मल्ल आफ्नो 'रिलेसन स्ट्याटस'बारे दोधारमा छन्। 'लुट' फिल्मबाट लोकप्रिय बनेका अभिनेता सौगातको रंगकर्मी सरिता गिरीसँग आत्मीय सम्बन्ध रहेको सबै साथीभाइलाई थाहा छ।

तैपनि यस विषयमा 'स्पष्ट' छैनन् सौगात। 'हामी एकदमै मिल्ने साथी हौं। एकअर्काको बारेमा ध्यान दिन्छौं। साथीमा प्रेम सम्बन्ध हुँदैन भन्न सकिन्न,' सौगातले सरितासँगको सम्बन्धलाई यसरी व्याख्या गरे। झन्डै १२ वर्षअघि रंगमञ्चको यात्रा सँगै सुरू गरेका उनीहरू १४ वटा नाटकमा प्रेमीप्रेमिकाका रूपमा प्रस्तुत भइसकेका छन्। यो जोडीले 'आरूको फूलको सपना' नाटकबाट सहकार्य सुरू गरेका थिए। आफ्नो सम्बन्धमा सरिता स्पष्ट छिन्। भन्छिन्, 'म उनलाई प्रेम गर्छु। बिहे गर्ने सोचमा चाँहि छैन।'

आफूहरूले समक्षदारीबाटै यस्तो निर्णय गरेको बताउँदै सरिताले भनिन्, 'प्रेम हुँदैमा बिहे गर्नुपर्छ भन्ने छैन। राम्रो साथी भएर पनि काम गर्न सकिन्छ।' एमआर थियटरमा पहिलोपटक भेट हुँदा मित्रता गाढिएको उनीहरुको अनुभव छ। फिल्ममा व्यस्त हुन थालेपछि सरितासँगको भेटघाट पातलिएको बताउँछन् सौगात।

। नचिन्नेले खरो मिजासका ठान्दा रहेछन् सौगातलाई। तर उनी आफू वास्तविक जीवनमा त्यस्तो नभएको बताउँछन्। 'प्रायः मानिसहरू मलाई देख्नासाथ भाग्छन्। एकदम थोरै साथीमध्ये मलाई बु‰ने सरिता नै हो,' उनले भने।

अरूको समस्या सुल्झाउन अघि सरे पनि आफ्नो काममा पछि हट्ने सौगातको बानी सरितालाई मन पर्दैन। आफ्नो अभिनय करियरमा सौगातको साथ भुल्न सक्दिनन् उनी। सरितालाई सानो कुराले पनि प्रभाव पार्ने बुझेका छन् सौगातले। 'बिहेबारे सोच्ने बेला भएको छैन' ठान्ने सौगातलाई केटा र केटीको मित्रता बाक्लियो भने गलत अर्थ लगाउने प्रवृत्ति मन पर्दैन।

'मेरो पहिलो केटा साथी नै सौगात हो। गाली खाइन्छ कि भनेर डराउँदै एकदिन घरमा लगेको थिएँ। तर, मेरो ममी र दिदी त पहिलादेखि नै उसको फ्यान भइसक्नुभएछ,' मित्रता सुरु हुँदाको अनुभव बताइन् सरिताले।

सौगातका अनुसार आजसम्म सरिताबाहेक अन्य केटीसँग उनको संगत छैन। सौगातलाई बिहे गर्न हतार छैन। तर, सरिता छिट्टै विवाह बन्धनमा बाँधिदै छन्। 'सौगातसँगको सम्बन्धबारे मेरो हुनेवालालाई थाहा छ,' बिहेपछि पनि अभिनयको सहकार्य नटुंगिने उनले बताइन्।

गुरूकुलको स्थापनासँगै चर्चामा रहेको जोडी हो यो। 'अब चाहिँ तिमीहरू दुवैले बिहे गरिदिए म खुसी हुन्थें,' नाटक निर्देशक तथा अभिनेता अभिनेता सुनिल पोखरेलले भनेको कुरा सरिताले बिर्सन सकेकी छैनन्। तर, पारिवारिक मान्यता र समाजका कारण पनि सोचे जसरी जीवन चलाउन अप्ठ्यारो हुने बुझेकी छिन् सरिताले। Nagarik News

श्रीषाको जीवनी कृषाले बनाउने

2012-03-03T10:58:00.002-08:00

नेपाली सिनेमा क्षेत्रमा नायिका श्रीषा कार्कीको निधन अझै पनि एउटा अविस्मरणिय घटनाको रुपमा रहेको छ । एक पत्रिकामा नाङ्गो फोटोसहित समाचार वाहीर आएपछि श्रीषाले आत्महत्या गरेकी थिइन् । श्रीषाको निधन भएपछि यसले वजारमा ठुलै हंगामा मच्चाएको थियो । एक पत्रिकामा आफ्नो नाङ्गो फोटो आएपछि उनले आत्महत्या गरेकी हुन् । उनले आत्महत्या गरेको एक दशक भैसकेको छ ।

एक दशकसम्म पनि उनको निधनको चर्चा वजारमा अझै पनि रहेको छ । अव, उनै श्रीषाको जिवनीमा आधारीत रहेर वास्तवीक सिनेमा वनाउने तयारी भैरहेको छ । यो सिनेमालाई निर्मात्री कृषा चौलागाईले निर्माण गर्ने तयारी गरीरहेकी छिन् । चलचित्रको वारेमा खासै धेरै कुराहरु नभने पनि कृषाले अनलाईनखवरसगको कुराकानीमा यो सिनेमा वनाउने तयारी भैरहेको वताएकी छिन् ।

उनले, आफुलाई एउटा वास्तवीक घटनामा सिनेमा वनाउन मन लागेको र यसको लागी विभीन्न खालको अनुसन्धान भईरहेको जानकारी गराएकी छिन् । कृषाको यो सिनेमामा नायिका को हुने पनि अहिले सम्म तय भैसकेको छैन । सिनेमाले एक नायिका को कथालाई वोक्ने छ, जुन कथाको आधार श्रीषा कार्कीको जिवनी र उनको निधन सम्मको घटना हुने वताईएको छ ।

नेपालमा यस्तो किसीमको सिनेमाको आजसम्म निर्माण भएको छैन । वलिउडमा भर्खरै मात्र रिलीज भएको चलचित्र द डर्टि पिक्चर्स पनि एक कलाकारको जिवनीमा आधारीत रहेको थियो । चलचित्रले सिल्क नाम गरेकी एक कलाकारको वलिउड आगमन, गरेका विभीन्न संघर्ष हुदै उनको निधनसम्मको कथालाई उठान गरेको थियो । जुन वलिउडमा निक्कै हिट पनि भएको थियो । अव, नेपालमा पनि एक नायिका को जिवनीमा सिनेमा वन्ने तयारी भएको छ । हेरौ, यसले भने कस्तो वजार लिने हो ?

Source - Nagarik

बैंकिङ प्रविधि सचेतनामा राजेश हमाल

2012-02-27T12:26:00.000-08:00

नायक राजेश हमालले पनि समय समयमा बिभिन्न कार्यक्रम गर्दै आएका छन् । यिनै चर्चित नायक हमाल अब बैंकिङको विषयमा सचेतना जगाउन लागि परेका छन् । काठमाडौंको एक पाँचतारे होटलमा आयोजना गरिएको एक कार्यक्रममा नायक हमालले हुन्डी प्रविधिबाट पैसा नपठाउन बिदेश वस्ने नेपालीहरुलाई आग्रह गरेका थिए ।

‘संसारा शुभकामना साँझ’को बारेमा आयोजना गरिएको पत्रकार सम्मेलनमा नायक राजेश हमालले आफ्नो भनाई राखेका थिए । संसाराले आयोजना गर्न लागेको यो शुभकामना साँझ नया वर्षको अवसर पारेर हनेछ । यो कार्यक्रम बेलायतमा आयोजना गरिने पत्रकार सम्मेलनमा जानकारी गराईएको थियो ।

कार्यक्रममा भाग लिनका लागि नायक राजेश हमाल, हाँस्यजोडी दिपकराज गिरी र दिपाश्री निरौला, गायक हिमाल सागर बेलायत जाने कार्यक्रम छ । आयोजकका अनुसार हुण्डीबाट पैसा पठाउने चलन बढ्दै गएको र यसरी पैसा पठाउदा असुरक्षित हुने भएकाले सुरक्षित बैंकिङ प्रबिधिबाट रकम पठाउन सचेतना जगाउन कार्यक्रमको आयोजना गरिएको हो ।

यसरी नायक राजेश हमाल नेपाली सिनेमा क्षेत्रमा लागि महानायक मात्र नभई बिभिन्न जनचेतना जगाउने कार्यक्रममा पनि लागि परेका छन् । हेरौं नायक हमालले अन्य के के काम गर्दै जाने हुन् ।

Source: Nagarik News

पहिला बिनिताले हटाईन्, अहिले ट्राफिकले

2012-02-17T22:06:00.000-08:00

नायिका बिनिता बरालले टपलेस फोटोसेसन गरेपछि चलचित्र चपली हाईट विवादमा तानियो । बिनिताले टपलेस फोटोसुट नगरेको र निर्माताले आफ्नो फोटो सहमति बिपरीत ल्याएको भन्दै पत्रकार सम्मेलन गरिन् ।

बिनिताले पत्रकार सम्मेलन गरी फोटोको बारेमा आपत्ति जनाएपछि चलचित्र चपली हाईटका निर्माताले सोचेको जस्तो पोष्टर भित्ताहरुमा लाग्न पाएन । यसपछि बिनिता र आमिर गौतमको अर्को फोटो तयार पारियो र हप्ता दिन यता काठमाडौंका बिभिन्न १२ ठाउँमा ठूला होडिङबोर्ड लगाएर राखियो । चलचित्रको यो पोष्टरमा बिनिता भन्दा पनि अमिर गौतमको पछिल्लो भाग शो गरिएको थियो ।

अब यो पोष्टरमा काठमाडौंका ट्राफिक प्रहरीको आँखा लागेको छ । ट्राफिक प्रहरीले काठमाडौंमा लगाईएका यि पोष्टरहरु हटाउन आदेश दिएको छ । चपली हाईटको पोष्टर अश्लिल भएको भन्दै प्रहरीले दुर्घटना बढ्नेतर्फ संकेत गर्दै पोष्टर हटाउन आदेश दिएको हो । कलंकीमा रहेको ट्राफिक प्रहरीले यो आदेश दिएपछि अहिले काठमाडौं भर लगाईएका पोष्टरहरु हटाउने क्रम शुरु भएको छ । निर्माता अर्जुन कुमारलाई फोन गरी प्रहरीले पोष्टर हटाउन भनेको थियो । जवाफमा अर्जुनले पोष्टर हटाउनका लागि केही न केही कागज त होला नि भनी प्रश्न गरेका थिए ।

जवाफमा प्रहरीले पोष्टर हटाउनका लागि कुनै कागज नचाईने भन्दै नहटाए आफैं हटाउने भनेको निर्माता कुमारले जानकारी गराए । उनले प्रहरीले अश्लिल भनेका पोष्टरको भागमा कालो पोत्ने बताएका छन् । ‘जहाँ जहाँ अश्लिल भयो भनि कुरा आएको छ, पोष्टरका ति सबै भागमा कालो पोतेर छोडिदिन्छु’ निर्माता अर्जुन कुमारले भने । उनले आजका दिनसम्म ४ वटा जति होडिङबोर्ड हटाएको बताए । यसरी लगाईका सबै पोष्टर हटाउँदा आफुलाई ४ लाख रुपैंया जति घाटा लाग्ने उनको दावी छ ।

यसरी चलचित्र चपली हाईट प्रदर्शन अगावै चर्चामा आईरहेको छ । शुरुवातमा नायिकाले नै पोष्टरमा आपत्ति जनाएकी थिईन् भने अहिले त ट्राफिक प्रहरीले नै आपत्ति जनाएको छ । हेरौं यो चर्चा चपली हाईटका लागि शुभ लक्षण हो यो होईन ।

Source - Online Khabar

छड्के हान्दै नम्रता

2012-02-07T10:17:00.000-08:00

नायिका नम्रता श्रेष्ठ केही समय गुपचुप रहेपनि अहिले फेरि बिस्तारै बाहिर क्रममा रहेकी छिन् । जीवनमा भुल्न नसकिने सेक्स स्क्यान्डलले एकाएक हराएकी नम्रता अहिले सामान्य रुपमा फकर्ँदैछिन् । युवा पुस्तादेखि संचारमाध्यमले समेत नम्रतालाई राम्रै सहयोग गरे जसका कारण नम्रतालाई चाँडै नै पुनरागमनको लागि सजिलो बनायो ।

दुईवटा सिनेमा खेल्न नपाउँदै नम्रताको उचाई चुलिएको थियो । नयाँ पुस्ताले निकै रुचाएकी नम्रता अहिले पनि चलचित्र क्षेत्रमा निकै नै माग भएकी नायिकाको रुपमा चिनिन्छन् । यसैले पनि नम्रताको आगमन सहज रुपमा भएको छ, पुनः एकपटक । अहिलेसम्म नम्रताले चलचित्र ‘सानो संसार’, ‘मेरो एउटा साथी छ’ र ‘मिस यु’ मा अभिनय गरिसकेकी छिन् । उनले अभिनय गरेको चलचित्र ‘मिस यु’ रिलिजको क्रममा रहेको छ । चलचित्र ‘मिस यु’ ले हलसम्म दर्शक तान्यो भने त्यो नम्रताकै कारणले हुने बिश्लेषण पनि बजारमा नचलेका होईनन् ।

‘मिस यु’ को रिलिजको तयारीका कारण व्यस्त नायिका अब छड्के हान्न तर्फ लाग्ने भएकी छिन् । आखिर नम्रता के कुराको छड्के हान्न तयार छिन् त ? नम्रता कुनै सरकारी निकाय या सिनेमा क्षेत्रका बिभिन्न निकायमा छड्के हान्न तयार भएकी होईनन् । नम्रताले अब चौथो सिनेमामा अभिनय गर्ने पक्का भएको छ, जसको नाम ‘छड्के’ राखिएको छ । यो सिनेमामा नम्रताले अभिनय गर्नेछिन् । चलचित्र ‘छड्के’लाई निगम श्रेष्ठले गर्ने पक्का भएको छ ।

चलचित्रमा उनका साथमा चलचित्र ‘लुट’का चर्चित कलाकार सौगात मल्ल, दयाह्याङ राई र ‘ब्याच नम्वर १६’ का चर्चित खलपात्र अर्पण थापाले अभिनय गर्ने पक्का भएको छ । चलचित्र छड्केले नम्रता धेरै नै उत्साहित भएको बुझिएको छ । जे होस्, छड्के हान्ने तयारीमा रहेकी नम्रतालाई हामी त शुभकामना भन्दा अरु के नै दिन सक्छौं र ?

- Online Khabar

अभिनेत्री सुशिला रायमाझीको निधन

2012-01-26T09:05:00.000-08:00

लामो समय देखि क्यान्सर रोगले पिडित अभिनेत्री सुशिला रायमाझीको बिहिबार दिउसो निधन भएको छ । पूरानो बानेश्वर निवासी रायमाझीको दिउसो १ बजे बिएण्डबि अस्पतालमा निधन भएको निर्माता रमेशजंग रायमाझीले जानकारी दिएका छन् । सुशिला रमेशजंगको काकी हुन् ।

निधन पश्चात रायमाझीको शव टिचिङ हस्पिटल महाराजगंजमा राखिएको रमेशजंगले जानकारी गराए । पहिलो श्रीमानबाट एक छोरी र दोस्रोबाट दुई छोरीकी आमा सुशिलाको कान्छी तर्फकी छोरी अमेरिकाबाट आजै राति १० बजे काठमाण्डू ओर्लए लगत्तै उनको अन्तिम दाहसस्कार राति नै गरिने रायमाझीले जानकारी गराए । रेडियो नाटक हुदै चलचित्र अभिनयमा अब्बल ठहरिएकी सुशिलाको पाठेघर क्यान्सर सम्पूर्ण शरिरमा फैलिएपछी उनी पछिल्लो केही बर्षयता सिकिस्त थिईन् ।

सुशिला राष्ट्रिय नाचघरकी जागिरे पनि थिईन् । उनले हिरोईन भएर खेलेको पहिलो फिल्म चोट हो जसलाई श्याम राईले निर्देशन गरेका थिए । सुशिलाले धनसम्पती भन्ने चलचित्र पनि बनाएकी थिईन् भने पवन मैनालीसंग मिलेर पिजडा भन्ने चलचित्र पनि बनाएकी थिईन् । धनसम्पती मार्फत उनले छोरी प्रसिद्धीका रायमाझीलाई पनि हिरोईन बनाएकी थिईन् । दर्जनौ चलचित्रमा अभिनय गरिसकेकी सुशिलाले पछिल्लो समय सानो संसार' र भुवन केसीको चलचित्र 'म तिमी बिना मरिहाल्छु' खेलेकी थिईन् ।

- फिल्मी खबर

शोभितका सिनेमा बेच्न किन रोक्यो विकास बोर्डले ?

2012-01-25T13:02:00.001-08:00

आफूले निर्माण गरेको चार सिनेमा भोजपुरी सिनेमाका एक वितरकलाई बेचेका निर्माता रोज राणाले राम्रै पैसा हात पारेका छन् । तीन लाख भारतीय रुपैंयामा चार सिनेमा बेचेका रोजले उक्त सिनेमाको भोजपुरी भाषामा डबको अधिकार बेचेका हुन् । रोजका चार सिनेमा भोजपुरीमा डबिङ गरी अब प्रदर्शन हुनेछ ।

पि्रन्टबाट रोजले सिनेमा बेचे लगतै शोभित बस्नेतले पनि दुई सिनेमा बेचेका छन् । तर शोभितको यि दुई सिनेमा भने चलचित्र विकास बोर्डले प्रदर्शनका लागि रोक लगाएको श्रोतले बताएको छ । आखिर शोभितका सिनेमा भने किन विकास बोर्डले रोक लगाएको हो त ?

श्रोतका अनुसार २५ हजार भारतीय रुपैंयामा शोभितले चिनो र अग्निपथ नामक दुई सिनेमा डबिङको अधिकार सहित बिक्री गरेका थिए । तर शोभितले आफ्ना सिनेमाहरुको हार्ड डिस्क सहित वितरकलाई उपलव्ध गराएपछि समस्या परेको हो । डिजिटल सिनेमाको हार्ड डिस्क नै उपलव्ध गराएपछि यो सिनेमा अन्य रुपमा पनि ‘मिस युज’ हुने देखेर विकास वोर्डले तत्कालका लागि प्रदर्शन गर्न रोक लगाएको हो ।

डिजिटल सिनेमाको हार्ड डिस्क सहित दिँदा सिनेमा किन्ने व्यक्तिले नेपाली सिनेमाका दृश्यहरुलाई हटाएर आफ्ना कलाकार समेत राख्न सक्छ । तर यो पि्रन्टमा भने असम्भव नै छ । जस्तो नेपाली सिनेमा किनेर भोजपुरीका कलाकार समेतलाई राखेर या नेपाली कलाकारका दृश्यहरु हटाएर पनि प्रदर्शन हुनसक्छ, सिनेमा । यसैले शोभित लगायत अन्य केही सिनेमाहरुलाई भोजपुरी भाषामा डबिङ गरी प्रदर्शन गर्नका लागि विकास बोर्डले ईजाजत नदिएको बुझिएको छ ।

विकास बोर्डले भारतमा या अन्य देशमा सेन्सर गरी प्रदर्शन गराउनु भनि ईजाजत दिएको कागज नबनाएसम्म अन्य देशमा चलचित्र सेन्सर गर्न पाइर्ंदैन । यसैले पनि अहिले अग्निपथ र चिनो सिनेमाको भोजपुरी भाषामा डब गरी प्रदर्शन गर्ने काम रोकिएको छ । यतिमात्र नभई बोर्डले डिजीटल प्रविधिमा बनेका सबै सिनेमालाई अहिले यसरी अधिकार दिई बेच्न पाउने कामलाई तत्कालका लागि रोकेको श्रोतको भनाई छ ।

- Online Khabar

आईएमसरीका निर्माताले ब्याज तिरे

2012-01-21T09:30:00.000-08:00

चलचित्र बनाउनु अघि नै कुनै सिनेमाका निर्माताले आफुलाई घाटा लाग्ने बताउनु आफैंमा आश्चर्यको कुरा हो । चलचित्र आई.एम.सरी. का निर्माताले आफुलाई ६० लाख भन्दा बढी घाटा लाग्ने बताएको श्रोतले जनाएको छ । उनले यति रकम घाटा लाग्ने अनुमान गरिसकेका छन् । चलचित्र आई.एम.सरी.का मुख्य नायक आर्यन सिग्देलको बजार र उनले अहिलेसम्म अभिनय गरेका चलचित्रले उठाएको रकम हेर्दा निर्माता हरि महतलाई ६० लाख रुपैंयासम्मको घाटा लाग्ने देखिएको हो ।

खासै प्रचारप्रसार नगरिएको यो सिनेमा यही माघको २७ गतेबाट देशभरका हलमा प्रदर्शनमा आउने तयारीमा रहेको छ । यसैबीच चलचित्र आई.एम.सरी.का निर्माताले चलचित्रको सम्पूर्ण कार्य भएको डिसिएन अर्थात डिजीटल सिनेमा नेपाललाई ३ लाख भन्दा माथिको ब्याज नै तिरेका छन् ।

आखिर निर्माताले चलचित्र प्रदर्शन गर्ने जिम्मा लिएको डिसिएनलाई किन यति ठुलो रकम दिएका हुन् त ? चलचित्रको प्रदर्शन मिति कहिले गर्ने भनेर पहिले नै हस्ताक्षर भएको हुन्छ र निर्माता र डिसिएनबीच । यदि यो समयमा रिलीज गर्न सकिएन भने निर्माताले ब्याज बुझाउनु पर्ने नियम रहेको छ, डिसिएनमा । यसअनुसार निर्माता हरि महतले ३ लाख रुपैंया ब्याज बुझाएका हुन् ।

यो चलचित्रको छायांकनका लागि मात्र १८ महिना लागेको थियो । यसरी सिनेमा नगरी र नबुझिकन नै निर्माताहरु यो क्षेत्रमा आउँदा उनीहरुले धेरै नै घाटा व्यहोरेका छन् । यसको एक उदाहरण निर्माता हरि महत पनि भएका छन् ।

- अनलाईन खबर

बल र दिमाग दुवै पासा

2012-01-16T10:50:00.000-08:00

दीपेन्द्र लामा - काठमाडौंका भवनहरु जति अग्लिँदैछ, यहाँ बाँच्नेहरुको महत्त्वाकांक्षा त्यति नै चुलिँदै छ। महत्त्वाकांक्षीहरु सधैं 'सर्टकट'को खोजीमा हुन्छन्। 'लुट'का मुख्य पात्रहरु पनि त्यही 'सर्टकट' रोज्छन्। बैंक लुटेर २५/२५ लाख भाग लगाउने उनीहरुको सपना केन्द्रीय पात्र हाकु काले (सौगात मल्ल)को मुठ्ठीमा कैद हुन्छ। बैंक लुट्न खोज्नु राज्यको कानुनी संरचनालाई चुनौती दिनु हो। समाजको एउटा सदस्य यस्तो निर्णयमा कसरी पुग्छ? ऊभित्र उत्पन्न हुने आपराधिक मनोविज्ञानसँग देशको राजनीति, अर्थतन्त्र, दर्शन र जैविक पक्षहरु कति गाँसिएको छ? उर्जाशील, बेरोजगार र कुलतमा लागेका युवाहरुलाई राज्यले कस्तो कार्यक्रममा समेट्नु पर्ने हो? 'लुट'ले अप्रत्यक्ष रूपमा वहसको उठान गर्छ। पोस्टरमा बन्दुक भए पनि फिल्ममा कतै गोली चल्दैन। जबकी भियतनाम युद्धसम्बन्धी हलिउडका फिल्ममा भन्दा बढी गोली खपत हुन्छ अरू नेपाली फिल्ममा। बन्दुकलाई डर र शक्तिको रूपमा प्रयोग गर्न सफल 'लुट'मा बन्दुक देख्दा पात्रहरु थर्कमान हुनुका साथै हाँसउठ्दा कौतुहलता प्रकट गर्छन्।

संवादमा बोलीचालीको भाषा छ। व्याकरण मिलाएर पूरा वाक्य भएको संवाद बोल्दा कलाकारले अभिनय नै गर्न नजानेको देखिन्छ भने अर्कोतिर भाषाको गलत अभिलेख हुन जान्छ। संवाद लेखनमा सौगात मल्ल र दयाहाङ राईको समेत सहभागिता रहेकोले भाषा सरल र चुस्त बनेको छ।

हाकु(सौगात मल्ल) र पुतली (सिर्जना सुब्बा)को एउटै दृश्यले लोग्नेस्वास्नीको उदाहरणीय सम्बन्ध छर्लङ्ग हुन्छ। पाण्डे (सुशीलराज पाण्डे) र आयषा(ऋचा शर्मा)को एउटा दृश्य र फोनवार्ता उनीहरुको प्रेम र लगाव पुष्टि गर्न काफी छ। महिला-पुरुष सम्बन्धको यति सुन्दर चित्रण कमै फिल्ममा पाइन्छ। रुखवरिपरि नाच्ने दृश्यमा लगाइने श्रम र पैसालाई यस्तै सिर्जनशीलतामा खर्चिए फिल्म राम्रो हुन्छ।

नेपाली फिल्मको कुरुक्षेत्र चोभार डाँडामा पेन किलर खुवाउँदै ५० नाघेका हिरोहरु उफार्नुको सट्टा काठमाडौंका गल्लीमा 'बाइसे चौबीसे'हरुलाई लखेट्दै 'लुट'मा आतंक मच्चाइएको छ। फरक के भने, चोभारको डाँडामा धुलो उड्छ, काठमाडौंको गल्लीमा सात्तो।

पैसा देखेपछि लोभ पलाउने मानवीय तुच्छ प्रवृत्तिको उत्कृष्ट उदाहरण गोपाल (दयाहाङ राई)ले नरेश (कर्म)को पर्स चोर्ने दृश्य हो। त्यो दृश्यमा गोपालको अभाव र खोक्रोपन एकसाथ पोखिन्छ।

फिल्ममा हरेक घटनासँगै पात्रको चरित्र एकपछि अर्को खुल्दैजान्छ। पात्रहरुको भौतिक र संवेदनाको यात्रालाई सकेसम्म सन्तुलनमा राखिएको छ। घिसिपिटी दृश्यहरुबाट फिल्म मुक्त छ। यसअघि नेपाली फिल्ममा हेर्दै आएका र दिक्क लाग्दा दृश्य यसमा छैनन्। त्यसैले फिल्मको संरचना खँदिलो लाग्छ। केन्द्रिय पात्र हाकु कालेको चरित्रमा आयाम थप्नका लागि सहायक पात्रहरु पुतली, गोपाल र पाण्डेसँगको सम्बन्धको सदुपयोग भएको छ। नरेश र खत्री (प्रतीकराज न्यौपाने)सँगको सम्बन्ध चाहिँ प्रयोग गर्न सकिएको छैन।

विषय र परिवेश 'डार्क' भएकोले फिल्म निरश बन्ने जोखिम थियो। 'सेन्ट्रल प्लट'मात्रै भएको भए यो पट्यारलाग्दो पनि हुनसक्थ्यो। तर, निर्देशकले रोचक 'सबप्लट'हरु जोडेर फिल्मको स्वादमा विविधता छर्किदिएका छन्। दृश्यको मुड र पात्रको गति अनुसार छायांकन गरेका छन् पुरुषोत्तम प्रधानले।

पात्रलाई प्राण भर्नसक्ने कलाकार पहिचान गर्न सफल कास्टिङ डाइरेक्टर प्रवीण खतिवडा प्रशंसाका पात्र बनेका छन्। निर्देशक र लेखकले कलाकारलाई स्वतन्त्रता दिएका छन्, जसले गर्दा रचनात्मक हुने अवसर कलाकारलाई प्राप्त भएको छ। त्यो छुटले कलाकार 'कठपुतली' हुनबाट जोगिई 'अभिनेता' भएका छन्।

'उध्रेको चोली' गीतमा सुष्मा कार्कीले 'ब्याच नम्बर १६' फिल्ममा जस्तै आफ्ना अंगहरुलाई अभिनयमा सक्दो परिचालन गरेकी छिन्। स्टारडम भएको फिल्म उद्योगका धेरैजसो कलाकार 'डार्लिङ एक्टर'मा सीमित छन्। अर्थात् आफ्नो राम्रो पक्ष बढी देखाउने नराम्रो पक्ष लुकाउने। यो फिल्ममा दयाहाङले आफ्नो विशाल भुँडी प्रदर्शन गर्ने हिम्मत गरेका छन्।

खत्रीले लागुपदार्थ बेचेको दृश्य कच्चा लाग्छ। 'ड्रग'को कारोबार बढी नै खुलमखुला देखाइएको छ। बरु, एकचोटि ग्राहकको रूपमा झुलुक्क देखा पर्ने बेलायती मरे केरद्वारा निर्देशित 'सिकसिटी' फिल्ममा लागु पदार्थको बिक्रीवितरण पत्यारलाग्दो थियो।

पात्रका द्वन्द्वहरुलाई आन्तरिक, व्यक्तिगत र बाह्य गरी तीन प्रकारमा बाँड्न सकिन्छ। 'लुट'का पात्रहरु यी तीनै खाले द्वन्द्वमा फस्छन्। तर, उनीहरुको द्वन्द्वको तह (लेभेल अफ कन्फ्लिक्ट)मा भने मिहेनत गर्ने ठाउँ अझै थियो। तैपनि निर्देशक निश्चल बस्नेतले पहिलो फिल्ममै आफूलाई नयाँ 'डन' साबित गरेका छन्।

एडल्ट सर्टिफिकेट दिइसकेपछि संवादमा 'टिपेक्स' लगाउने सेन्सर बोर्ड तर्कसंगत लाग्दैन। बोर्डको यस्तो कदम अभिव्यक्ति स्वतन्त्रता र प्रगतिशील रचनाविरोधी छ। सेन्सर प्रणालीबारे नेपाली फिल्मकर्मीले बेलैमा सोच्नुपर्छ।

दण्डहीनता र खुकुलो सुरक्षा व्यवस्थाको खिल्ली उडाउने 'लुट'ले टालटुल र दाह्रा किटेर फिल्म बनाउने कथित मूलधारका निर्मातानिर्देशकलाई घोचपेच गर्छ, 'बल होइन पासा दिमाग लगा दिमाग।' फिल्मका पात्रहरुले बैंक लुट्न सक्छ कि सक्दैन, सस्पेन्स नै राखौं। अहिलेलाई यति भनौं, 'यसले दर्शकको मन चाहिँ पक्कै लुट्छ र यसको लागि बल र दिमाग दुवै लगाइएको छ।'

फिल्मः लुट (साढे ३ तारा)

निर्देशक/लेखकः निश्चल बस्नेत

निर्माताः माधव वाग्ले र नरेन्द्र महर्जन

अभिनयः सौगात मल्ल, कर्म, दयाहाङ राई, प्रतीकराज न्यौपाने, सुशीलराज पाण्डे, प्रवीण खतिवडा, ऋचा शर्मा, सिर्जना सुब्बा आदि।

- Nagarik News

'क्या दामी भो...'का गायकको कमाइ कति ?

2012-01-11T09:38:00.000-08:00

स्मृति ढुंगाना, काठमाडौं, पुस २७- भर्खर बहराइनमा कन्सर्ट सिध्याएर फर्केका गायक शिव परियारले पैसा धेरै नकमाए पनि विदेश घुम्न पाउँदा मख्ख छन्। 'पैसा कमाउन होइन घुम्न पो जाने हो विदेश। अहिले दर्शकलाई आफ्नो अनुहार परिचित गराएर बिस्तारै पैसा कमाउनु पर्छ,' उनले भने। संगीतमा लागेपछि उनले आधा दर्जन देश घुमे पनि खासै कमाइ गर्न नसकेको बताए। त्यसो त नेपालका विभिन्न स्थानमा हुने महोत्सवले आफूलाई आर्थिक टेवा दिएकोमा उनी सन्तुष्ट छन्। 'महोत्सव पनि नहुने हो भने कलाकार भएर जीवन चलाउने सकिन्न थियो।' महोत्सवमा करिब १० देखि ४५ हजार रुपैयाँ लिने शिवका अनुसार प्याकेजमा हुने सम्झौतादेखि दिक्क छन्। महोत्सवका लागि उनले तीन महिना छुट्याएका छन्। महोत्सव बाहेकका आयोजकसँग काम गर्दा १० हजार पनि नपाएको उनको तीतो अनुभव छ। 'मूख्य आयोजकसँग कहिल्यै भेट हुँदैन। बीचका मान्छेले कहिलेकाहीँ पैसा नै नदिएको घटना पनि छ,' उनले सुनाए।

विदेशका कार्यक्रममा उनी न्यूनतम ५० हजार लिन्छन्। 'आजसम्म विदेशबाट खाली हात फर्कनु परेको छैन। विदेशको अफर आउनासाथ गइहाल्नुपर्छ। आलटाल गर्न लाग्यो भने अर्कै कलाकार लैजान्छ,' भन्छन् उनी।

महेन्द्रनगरको महोत्सवमा भने उनले २५ देखि ४० हजारसम्म लिइरहेका छन्। सिडी र क्यासेट बिक्रीबाट कुनै आम्दानी नहुने भएपछि यस्ता महोत्सवको मुख ताक्नु परेको उनले बताए। राजधानीका कार्यक्रममा गाउँदा कम्तीमा २० हजार हुन्छ उनको रेट। त्यस्तै अर्काको एल्बममा गाउँदा आठ देखि १६ हजार माग्छन् उनी। चिनेजानेकालाई सहुलियत दिने चलन पनि छ। सबैभन्दा थोरै कमाइ भने फिल्ममा गाउँदा हुने उनको अनुभव छ। 'फिल्ममा आठ हजार पाउनु नै सबैभन्दा धेरै रकम हो' बताउने उनले अहिलेसम्म सबैभन्दा कम पैसा फिल्मकै गीतबाट पाएका छन्। भर्खरै 'विरासत' भन्ने फिल्ममा गाएबापत उनले आठ हजार लिएका थिए। आजसम्म होटलमा चाहिँ गाएका छैनन् उनले। भन्छन्, 'मेरो एकल साँझ हुँदैछ होटलमा, त्यो बाहेक होटलमा गाएको अनुभव छैन।' विभिन्न किसिमका सहयोगार्थ कार्यक्रम हुँदा तोकिएभन्दा आधा रकममा गाउँदै आएका छन् उनी।

शिवको न्यूनतम रेट
विदेश ५० हजार
मेला १० हजार
अरुको एल्बम ८ हजार
राजधानी कन्सर्ट २५ हजार
फिल्म गीत ८ हजार

Source - Nagarik News

यही हो, बोल्ड डिसिजन !

2012-01-06T09:04:00.001-08:00

दुई दिनअघि मात्र चलचित्र विकास बोर्डका अध्यक्ष गणेश भण्डारीले बोर्डले केही दिन भित्र नै बोल्ड डिसिजन लिने बताएका थिए । यो डिसिजन सिनेमा क्षेत्रको विकासका लागि हुने उनको भनाई थियो । उनले यसो भनेको ठिक दुई दिनमै चलचित्र विकास बोर्डको सदस्य पदमा नयाँ व्यक्तिहरु आएका छन् भने पुरानालाई पदमुक्त गरिएको छ । माओवादी निकट रहेका चलचित्रकर्मीहरु विजय बस्नेत, मौसमी मल्ल र उदय सुब्बालाई पदमुक्त गरिको हो । उनीहरुलाई पदमुक्त गरी विकास बोर्डमा चलचित्र निर्देशक विकास आचार्य र गायक रामा मण्डललाई नियुक्त गरिएको छ । रामा मण्डलले वुधबार र विकास आचार्यले विहीवार मात्र नियुक्तीको पत्र

पाएका थिए । यसरी विकास बोर्डका अध्यक्षलाई परिवर्तन नगरी सदस्यहरुलाई मात्र सूचना तथा सञ्चारमन्त्री जयप्रकाश प्रसाद गुप्ताले परिवर्तन गरेका हुन् ।मन्त्री गुप्ताले बोर्डमा यस्तो कदम चाल्छन् भन्ने कुरा सम्भवतः बोर्डका सदस्यहरुलाई थाहा पनि थिएन होला । तर बोर्डमा नयाँ व्यक्तिहरु आउँदैछन् भन्ने कुराको चर्चा भने केही दिन यता चल्दै आएको थियो । यसरी बोर्डले नयाँ नेतृत्व पाएको छ । माओवादी निकट अध्यक्षसँग काम गर्नका लागि नयाँ सदस्यहरुलाई धौ-धौ पर्ने निश्चित छ ।

नयाँ सदस्यहरुलाई मिलाएर लैजान अध्यक्ष गणेश भण्डारीलाई पनि अप्ठ्यारो पर्नेछ । त्यसो त चलचित्र विकास बोर्डले केही दिनमै बोल्ड डिसिजन हुन्छ भन्दै आएकोमा भएरै छाड्यो । तर अध्यक्षले होईन मन्त्रीले गरे बोल्ड डिसिजन ।

- Nagarik News

कोरसले गर्दा रेखाको सेड्युल प्रभावित

2012-01-02T11:08:00.000-08:00

नायिका रेखा थापा अहिले चलचित्र लंकाको छायांकनका लागि सर्लाहीमा छिन् । तर, उनी केही दिन अघि नै काठमाडौं आउने कार्यक्रम थियो । रेखाले यो कुरा हामीसामु बताएकी पनि थिईन् । तर, नायिका थापा आजसम्म पनि काठमाडौं फर्कन पाएकी छैनन् । उनी अझै केही दिन लंकाको छायांकनका लागि सर्लाहीमा नै बस्ने छिन् । आखिर रेखाको सेड्युल किन परिवर्तन भयो त ।

यसको मुख्य कारण वनेका छन् गीतमा नाच्ने कोरस डान्सहरु । कोरस डान्सरहरुका कारण नायिका रेखा अझ केहि दिन सर्लाहीमा नै बस्नु परेको छ । चलचित्र लंकाको एक गीतको छायांकन गर्न बाँकी नै छ । तर, छायांकन गर्ने भनिएको दिनमा कोरस डान्सहरु नआईदिपछि उनी पनि उत्तै बस्नु परेको हो । नयाँ वर्ष लागेकाले कोरसहरु पनि काठमाडौंमा नै व्यस्त भएछन् जसले गर्दा यहाँ काम नै भएन । यतिमात्र होईन, काठमाडौं लगायत देशभर परेको पानीका कारणले पनि रेखाको सेड्युललाई प्रभावित वनाएको छ ।

पानी परेकाले छायांकन रोकियो, काम हुन पाएन, यसैले पनि अझ केही दिन बस्नु परेको हो । नायिका थापा को छायांकन प्रभावित हुनुको मुख्य अर्को कारण हुन्, नृत्य निर्देशक शंकर वि.सी । विरामी भएकाले शंकर गीतको नृत्य निर्देशनका लागि सर्लाही जान नपाएकाले पनि लंकाको छायांकन सरेको हो । उनी, सोमबार मात्र आउँदैछन् भन्ने सुनेको छु, यसपछि वल्ल छायांकन हुन्छ होला, रेखाले भनिन् ।

नेपाली सिनेमा क्षेत्र यस्तै हो, विभिन्न कारणले गर्दा छायांकन प्रभावित हुन्छ र यसले कलाकारलाई समेत प्रभावित बनाउने गर्दछ । यतिवेला, नायिका रेखा थापा यस्तै प्रंभावमा परेकी छिन् ।

Source - Nagarik

हिरोइन निशाविरुद्ध उजुरी

2011-12-25T09:58:00.000-08:00

काठमाडौं, पुस १० (नागरिक) - 'तिम्रो र सुरेशको समस्या के हो? तिमीले उसको फिल्म नखेले पनि एउटा गीतमा नाच्ने र एडभान्स रकम फिर्ता गर्ने कुरा गरेकी थियौ रे?' निर्माता संघका महासचिव केशव भट्टराईले फोन गर्दा अभिनेत्री निशा अधिकारी अचम्म परिन्। महासचिव भट्टराईले नै निशालाई बुझाए, 'थ्री लभर्स' फिल्ममा काम नगर्ने भएपछि निशासँग रिसाएका निर्देशक सुरेशदर्पण पोखरेलले उनीविरुद्ध निर्माता संघमा उजुरी दिएको कुरा।

भनेको समयमा सुटिङ नगर्ने र आफैं उजुरी गर्ने पोखरेलको शैली निशालाई निको लागेको छैन। 'हामी कलाकारलाई समय मिलाउन साह्रै अप्ठ्यारो हुन्छ । कति दिन कुर्दा केही नहुने निर्माताले भनेको समयमा तयार नभए यस्तो सिधै उजुरी?' निशाले प्रश्न गरिन्। निशाका अनुसार 'थ्री लभर्स'को सुटिङ दशैं र तिहारको बीचमा सुरु गर्ने भनिएको थियो। 'त्यसैले मंसिरमा सुरु हुने सिमोस सुनुवारको फिल्म 'मिसन पैसा रिलोडेड' खेल्ने सम्झौता भयो। तर, बेल्जियममा सुटिङ हुने भनिएको फिल्म 'थ्री लभर्स' तिहारपछि पनि सुरु भएन,' मंसिर १५ मा बल्ल सुटिङ थालिँदा समय दिन नसकेको निशाको भनाइ छ। 'मिसन पैसा'को स्त्रि्कप्ट मन परेकोले सोही फिल्म आफ्नो रोजाइमा परेको उनले बताइन्।

अन्तिम समयसम्म पनि पोखरेलले सही तालिका नदिएपछि आफूले फिल्म नगर्ने जानकारी गराएको उनको दावी छ। पोखरेलले पैसा फिर्ता नदिएको आरोपको पनि उनले खण्डन गरिन्। 'उतिखेरै पैसा फिर्ता गर्ने खबर पठाएकी हुँ। उहाँहरुले वास्ता नै गर्नुभएन। म पनि व्यस्त भएँ,' फिल्मको प्रिप्रोडक्सनमा क्रियटिभ निर्देशकको समेत काम गरेको दाबी गरिन् निशाले।

निर्देशक पोखरेल भने निशाको भनाइमा सहमत छैनन्। 'उनी दुवै फिल्म एकैसाथ गर्न चाहन्थिन्। मेरो फिल्मको तालिका सार्नुपर्‍यो भनिन्,' उनले भने, 'मैले मंसिरमा सुटिङ हुन्छ भन्दा उनले मानिनन्। तीन हप्ता भइसक्यो पैसा पनि फिर्ता गरेकी छैन।' निशाका लागि एक दिन पनि सुटिङ रोक्न नसक्ने बताउँदै उजुरी दर्ता गरेको पोखरेलले बताए।

सम्झौता अनुसार निशाले ५५ हजार रुपैयाँ एडभान्स लिएकी थिइन्। निर्माता संघका महासचिव केशव भट्टराईले उजुरी परेपछि दुवैसँग कुरा गरेर सम्झाएको बताए। 'कुनैबेला निशालाई एकमात्र योग्य अभिनेत्री मान्दै आएका सुरेशले उजुरी नै गर्नुपर्ने अवस्था चाहिँ थिएन। समझदारीमै कुरा मिलाउन सकिन्थ्यो ,' भट्टराईले भने।

- नागरिक

प्रेमिकालाई दिने समय समेत छैन हमालसँग

2011-12-20T08:42:00.001-08:00

नेपाली सिनेमा क्षेत्रमा जति नया नायकहरु आए पनि २२ वर्षदेखि यो क्षेत्रमा एकलौटी राज गरेका नायक राजेश हमालको व्यस्तता घटेको छैन । उनी, आज पनि सिनेमा क्षेत्रमा उत्तिकै व्यस्त तथा सक्रिय रहेका छन् । नायक हमालसँग अहिले आफ्नो प्रेमिकालाई दिने समय समेत नभएको बुझिएको छ । उनी हिजोआज दैनिक जम्मा ५ घन्टा मात्र आरा मगर्न पाउँछन् ।

यो ५ घण्टामा उनले खाना खान, आराम गर्न र सुत्न भ्याईरहेका छन् । आखिर किन यस्तो व्यस्त छ ? हमालका सहयोगी चीरञ्जिवी आचार्यले भने -’हाल उहाँ दुई सिनेमाको छायांकन गरिरहनु भएको छ । दिनभर एक सिनेमाको छायांकन गर्ने हमाल वेलुकी अर्को एक सिनेमाको छायांकन गरिरहेका छन् । दिनभर हमाल अहिले सुरज सुब्बा नाल्बोले निर्देशन गरिरहेको चलचित्र ‘फेसबुक’मा अभिनय गरिरहेका छन् । दिनभर यो सिनेमाको छायांकन सकेर बेलुकी यस्तै ५ बजेतिर घर पुग्ने हमाल बेलुकी ६ वजे चलचित्र ‘कारवाही’को छायांकनका लागि निस्कन्छन् । यो सिनेमाको छायांकन रातभर भईरहेको छ । रातभर छायांकन सकेर बिहानपख आफ्नो निवास फर्केपछि नायक हमाल फेरि चलचित्र फेसबुकको छायांकनका लागि सुटिङ स्पोर्टमा पुग्छन् । यसकारण उनको तालिका समेत बिगि्रएको छ ।

आखिर हमाललाई किन दिउसो, बेलुका नै काम गर्नु पर्ने बाध्यता आएको हो त ? ‘के गर्नु काम गर्नु पर्यो भनेर अफर आउँछ, नगर्ने कुरा पनि भएन । यसैले सेड्युल बिग्रिएको हो’ सहयोगी आचार्यले भने । यसरी, १९ घन्टा काम गरिरहेका हमालसँग फुर्सद निकाल्ने समय नै छैन । निकै व्यस्त भएपछि उनले आफ्नो प्रेमिकालाई समेत समय दिन नभ्याएको श्रोतको भनाई छ ।

नेपाली सिनेमा क्षेत्रमा जति नया नायकको आगमन भएपनि हमाल भने झनै व्यस्त बनिरहेका छन् । तर पैसा आउँछ भन्दैमा आफ्नो स्वास्थ्यलाई ख्याल नगरी काम गर्नु भने हुँदैन कि हमाल जी….? .हाम्रो सुझाव मात्र ।

- नागरिक

राष्ट्रिय गानमा सुष्माको मौनधारण

2011-12-12T08:11:00.000-08:00

नेपालकी अहिलेकी हट नायिका हुन्, सुष्मा कार्की । आम संचारमाध्यमदेखि दर्शकले समेत रुचाएकी एक नायिका । तर, अरु केही कलाकारले जस्तै सार्वजनिक ठाउँमा आफ्नो महत्व यिनले पनि त्यति बुझ्न सक्दिनन् । यस्तै, भयो ललितपुरमा आयोजना गरिएको बलिउड धुम कार्यक्रममा पनि । नेपालकी चर्चित नायिका भएर हिन्दी गीतमा नाचेका कारणले एकातिर आलोचना खेपेकी सुष्माले उक्त कार्यक्रममा न त ईज्जत पाईन्, न त नाम नै । बलिउडका चर्चित गायक तथा गायिकाले सपना अवस्थी र सन्दिप आचार्यले ‘मे तो लुट गई’ बोलको गीत गाउन थालेपछि एकैचोटी केही डान्सरका साथमा स्टेजमा देखिएकी सुष्मालाई कसैले पनि चिनेनन् । कारण, उनको नाम त्यहाँ कसैले पनि उद्घोष गरेका थिएनन् ।

नेपालकी एक चर्चित नायिका कुनै भारतीय गायक तथा गायिकाको आवाजको पछाडि बिना परिचय नाच्नु आफैंमा दुःखको कुरा थियो । हुन त सुष्मालाई आयोजकले रकम राम्रै दिएको होला, गीतमा नृत्य गर्नका लागि । तर, पैसा आउँछ भन्दैमा आफ्नो परिचय र ईज्जत गुमाएर कुनै हिन्दी गीतमा त्यो पनि कोरस तरीकाले नाच्न सुहाउँछ कि सुहाउँदैन, यो कुरामा सुष्माले विचार गर्नु पर्ने थियो । तर उनले गरिनन् ।

यति मात्र कहाँ हो र, नाचिसकेपछि सुष्मा एक पटक फेरि स्टेजमा देखिईन् । स्टेजमा आएपछि सुष्माले आफ्नो परिचय दिँदै दर्शकलाई मौनधारण गरिदिन आग्रह गरिन् । त्यो सुनेर दर्शकमा खैलाबैला मच्चियो । मौनधारण मानिसको मृत्युमा मात्र गरिन्छ भन्ने शायद सुष्मालाई थाहा थिएन होला । मौनधारण गर्न भनेपछि, सुष्माले हातमा रहेको सानो कागजमा हेरिन् र भन्न थालिन् -’सैयौं थुँगा फूलका हामी एउटै माला नेपाली…… ।

ल हेर्नुहोस्, त नेपालको एक जिम्मेवार कलाकारले मौनधारण भन्दै नेपाली राष्ट्रिय गान गाउनु कतिसम्मको हाँस्यास्पद छ । यहाँ, सुष्माले हिन्दी गीतमा नाचेकाले केही आफुलाई समावेशी देखाउनका लागि नेपाली राष्ट्रिय गान गाएको हुनसक्छ । तर, मौनधारण भन्ने शब्दलाई नबुझ्ने सुष्मा जस्ती नायिकालाई के भन्ने । उनले, यसो भनेर राष्ट्रिय गान गाउन थालेपछि अधिकांश दर्शक जावालाखेल मैदानबाट बाहिरिएका थिए ।

- अनलाईन खबर

‘बलिउड धूम’ का लागि भारतीय कलाकार काठमाण्डुमा

2011-12-09T10:48:00.000-08:00

ललितपुरको जावलाखेल फुटबल मैदानमा शनिबार हुने ‘बलिउड धूम’ सांगितिक कार्यक्रमका लागि भारतीय कलाकारहरुकेा टोली शुक्रबार काठमाण्डु आएको छ ।

ओरियन्टल इभेन्ट्सले गर्ने कार्यक्रमका लागि चर्चित हास्य कलाकार राजु श्रीवास्तव, मुन्नी बदनाम हुइ… की गायिका ममता शर्मा, छैयाँ छैयाँ…. गितकी गायिका सपना अवस्थी र इन्डियन आइडल-२ का विजेता सन्दिप आचार्य लगायतका कलाकारहरु शुक्रबार काठमाण्डु आएका हुन् ।

उनीहरु आज गोदाबरी भिलेज रिसोर्टमा बस्नेछन् ।

सूफी गायक रामशंकर शनिबार आइपुग्ने कार्यक्रम संयोजक सन्तोष केसीले अनलाइनखबरलाई जानकारी दिनुभयो ।

शनिबार दिउसो ४ बजेदेखि सुरु हुने कार्यक्रममा नेपालका तितो सत्य, जिरे खुर्सानी र मेरी बास्यैका हास्य कलाकारहरुले समेत आफ्नो प्रस्तुती दिनेछन् ।

कार्यक्रमलाई हास्यकलाकार मनोज गजुरेलले संचालन गर्ने आयोजकले जनाएको छ ।

बलिउड धूम सांस्कृतिक कार्यक्रमका लागि आयोजकले १ हजार र ३ हजार दरका टिकट तोकेको छ ।

कार्यक्रममा झण्डै ७ हजार दर्शक उपस्थित हुने अनुमान आयोजकले गरेकेा छ ।

- नागरिक

सुष्मासँग राजेशको रोमान्स (फोटो फिचर सहित)

2011-12-01T13:00:00.000-08:00

नायक राजेश हमालले नायिका सुष्मा कार्कीर्र्लाई बिस्तारै आफ्नो अंगालोमा राखे र निधारमा चुम्बन गरे । चारैतिरबाट सजाईएको बेडमा लजाउँदै बसेकी सुष्माले पनि राजेशको ओठमा चुम्बन गरिन् । यसपछि नायक हमालले सुष्मासँग ईशारामा सेक्सको अफर गरे । सुष्माले पनि उनको अफरलाई सहजै स्वीकार गरिन् । सुष्मालाई बेडमा बिस्तारै पल्टाएर नायक हमालले उनको गाउनको माथिल्ला भाग खोलीदिए । सुष्माले पनि हमालको सर्ट खोलिन् र चुम्न थालिन् । सुष्माको चुम्बनले राजेश लगभग उत्तेजित भैसकेका थिए । यतिकैमा, निर्देशकले ‘ओके कट’ भने ।

चलचित्र ‘मेरो जीवन साथी’का लागि नायक हमाल र नायिका कार्कीले दिएको ‘बेड सिन’को दृश्य हो यो । झण्डै साढे २ घन्टा लगाएर छायांकन गरिएको यो दृश्यमा नायक हमाल र नायिका कार्कीले खुलेर दृश्य दिए । शुरुवातमा यो दृश्य दिनका लागि दुवैले आनाकानी गरेपनि निर्देशक दिवाकर भट्टराईको आधा घन्टा लामो संझाईवुझाईपछि दुवै सहमत भए । दृश्य दिने समयमा कैयौं पटक दुवैले ‘यति भए त भैहाल्छ नि’ भनेर निर्देशकसँग आग्रह गरेका थिए । तर, निर्देशक भट्टराईले हुँदैन भन्दै दुवैलाई यो दृश्य खिचाएका थिए ।

राजेश हमालसँग पहिलोपटक यस्तो हट सिन दिनु परेकाले पनि हुनसक्छ नायिका कार्की सुटिङ अवधिभर धेरै नै नर्भस देखिएकी थिईन् । चलचित्र ‘मेरो जीवन साथीका लागि यी दुईले दिएको यो दृश्य भ्यालेन्टाईनको दिनमा प्रेमी र प्रेमिकाबीच हुने रोमान्सको हो । चलचित्र चलाउनैका लागि तयार पारिएको यो रोमान्सले सिनेमालाई फाईदा पुर्याउँछ या पुर्याउँदैन, त्यो त हेर्न बाँकी नै छ ।

source: Nagarik News

नेपाली ‘पलपलमा’ र हिन्दी ‘देसी व्वाईज’को कथा एउटै !

2011-11-27T15:30:00.000-08:00

नेपाली चलचित्रहरु हिन्दी सिनेमावाट प्रभावीत भएका या कपि नै गरिएका उदाहरण त हामी सवै सामु छर्लङ्गै छ । तर नेपाली सिनेमावाट पनि हिन्दी सिनेमाहरु प्रभावीत हुनेरहेछन् । जुन कुरा खासै वाहीर आएको पाइदैन । किनकी हामी सिनेमा हिन्दीवाट मात्र नेपालीले कपि गर्छन् भन्ने सोच राख्छौं ।

भर्खर मात्र प्रदर्शनमा आएको एक हिन्दी सिनेमा नेपाली चलचित्रसँग केही हदसम्म मिल्न गएको छ । यो सिनेमा हो, अक्ष कुमार र जोन ईव्राहीमले अभिनय गरेको चलचित्र ‘देसी व्वाईज’ । यो चलचित्रको मुख्य कथावस्तु नेपाली चलचित्र ‘पलपलमा’सँग मिल्न गएको छ । जागिर नपाएपछि यौन पेशामा लागेका पुरुषहरुको कथावस्तुमा तयार भएको नेपाली सिनेमा ‘पलपलमा’ निर्माण भएको करिव ४ वर्ष जति भयो । तर भर्खर मात्र तयार भएको चलचित्र ‘देसी व्वाईज’ले पनि यही कथावस्तुलाई मुख्य आधार वनाएको छ । चलचित्र ‘पलपलमा’ मा नायक रमित ढुङ्गाना र दिलीप रायमाझीले अभिनय गरेका छन् ।

जहाँ यी दुई आफ्नो डेराको भाडा तिर्न नसकेर र राम्रो खाउँ मिठो लाउँ भन्ने चाहना पुरा गर्न नसकेर पुरुष वेश्या वन्न थाल्दछन् । यस्तै कथावस्तुमा तयार भएको छ चलचित्र ‘देसी व्वाईज’ । चलचित्रमा आफ्नो शिक्षा अनुसारको जागीर नपाएपछि यी दुई नायक पनि पुरुष वेश्या वन्न थाल्दछन् । जहाँ नायक अक्ष कुमार एक वच्चाको पालनपोषण र भाडा तिर्नकै लागि पुरुष वेश्या वनेका छन् । उनले विभीन्न युवतीसँग रात विताउछन् र यसको वापत उनी पैसा लिने गर्दछन् । चलचित्र ‘पलपलमा’मा रमित र दिलीपको जिवनस्तर सुधि्रएजस्तै, ‘देसी व्वाईज’मा पनि पुरुष वेश्या वनेपछि अक्ष र जोनको जिवन स्तरमा फेरवदल आएको देखाईन्छ । यसरी चलचित्र पलपलमा र ‘देसी व्वाईज’को मुख्य धार एउटै हो । चलचित्र ‘पलपलमा’मा सुरुमा रमितले आग्रह गरेको पुरुष वेश्या वन्ने आग्रहलाई दिलीपले नकारेजस्तै ‘देसी व्वाईज’मा पनि अक्षले गरेको आग्रहलाई जोनले सुरुमा नकारेका हुन्छन् तर पनि अन्तत उनी पनि पुरुष वेश्या वनेको देखाईन्छ चलचित्रमा । यसरी, हेर्दा ‘देसी व्वाईज’ नेपाली चलचित्र पलपलमा वाट प्रभावीत रहेको छ ।

यदि, नेपाली सिनेमा हिन्दी सिनेमावाट यति मात्र पनि प्रभावीत भएको भए चोरीएको आरोप लगाईन्थ्यो तर नेपाली सिनेमावाट हिन्दी सिनेमा प्रभावीत भएको वारेमा कसैले पनि मुख फोरीहाल्दैनन् ।

उकेश दाहालले केही वर्ष अघि वनाएको चलचित्र ‘पलपलमा’को कथावस्तुको मुख्य धारसँग हिन्दी सिनेमा ‘देसी व्वाईज’को कथावस्तु मिल्दो जुल्दो छ । चलचित्र ‘देसी व्वाईज’ वन्ने वेलामा यसका निर्माता र निर्देशकले चलचित्र ‘पलपलमा’ हेरे या आफ्नै धारले सिनेमा लेखे, त्यो त आफ्नो ठाउँमा छ । तर, पलपलमा सिनेमाको जस्तै कन्सेप्ट राखेको छ हिन्दी चलचित्र ‘देसी व्वाईज’ले ।

- अनलाईन खबर

'बच्चा लिएरै सुटिङमा जान्थें'

2011-11-18T12:57:00.001-08:00

मौसमी मल्ल, अभिनेत्री- 'सुटिङ शुरु भइसकेपछि कृष्टि मैनालीले फिल्म नखेल्ने भइन्। तिमी काम गर्छौ?' फिल्म '२५ बसन्त' सह अभिनेत्रीको रोल पाएकी मैले त्यो अफर स्वीकार नगर्ने कुरै थिएन। दुई वच्चाको आमा भइसकेकी थिएँ। घरमा जिम्मेवारी पनि निकै थियो। तैपनि श्रीमानले नै मलाई फिल्म खेल्न उत्साहित गराउनु भयो। र, पहल पनि। एभरेष्ट कल्चर सोसाइटीबाट सांस्कृतिक कार्यक्रममा मात्रै कलाकारिता देखाउन पाएकी मलाई 'भाग्यरेखा' यो क्षेत्रमा स्थापित गराउने फिल्म हो। निर्देशक दीपक रायमाझीको पनि पहिलो फिल्म थियो। भर्खरै अध्ययन सकाएर आउनु भएको काममा खुब जोसिलो हुनुहुन्थ्यो उहाँ। त्यतिवेला फिल्म खेल्न पाउनु ठुलो कुरा थियो। त्यसैले म पनि एकदमै 'एक्साइटेड' थिएँ।

फिल्ममा अफर त आयो तर कसरी काम गर्ने भन्ने केही ज्ञान थिएन। फिल्मको लागि भनेर छुट्टै प्रशिक्षण पनि केही हुँदैनथ्यो। नाटक र नृत्य गर्दै आएको अनुभवको आधारमा मैले काम गरें।

करिब ३० दिनको सुटिङ पोखरा र चितवनमा भयो। यी ठाउँमा सुटिङ हुनु नै मेरोलागि खुशीको कुरा थियो। चितवन माइती र पोखरा घर भएकाले वच्चाको रेखदेख गर्न समस्या परेन। कहिले उनीहरुलाई पनि सुटिङमै लैजान्थें। साथीहरुले पनि माया गर्थे।

पहिला म खेलाडी हुँ। नारायणी अञ्चलबाट सहभागी भएर राष्ट्रिय स्तरको एथलेटिक्स प्रतियोगितामा जीत हात पारेपछि मेरो विहे भएको हो। त्यसपछि खेल क्षेत्रबाट विदा भएँ। मलाई फिल्मको हिरोइन बन्नु रहेछ फिल्मको ढोका खुल्यो।

१७ वर्षको उमेरमा फिल्म खेलेको। त्यो उमेरमा पैसाको के मोह हुन्थ्यो र? रहरको लागि काम गरेको पैसा पनि प्रशस्तै पाएँ। फिल्म सुरू हुनु केही हप्ता अघि नै मेरो घरमा 'भाग्यरेखा' स्क्रिप्ट पुगेको थियो। मलाई त स्त्रि्कप्टको ज्ञान नै थिएन। यसो ओल्टायो, पल्टायो केही बुझे पो! पछि निर्देशक रायमाझीले नै सिन र शटको बारेमा बताउनु भयो। कस्तो ठाउँमा के गर्ने भनेर सम्झाउनु भयो।

म निर्देशकले बताए बमोजिम काम गर्दै गएँ। अरु निर्माता/निर्देशक पनि सुटिङ हेर्न आउँदा रहेछन्। मेरो अभिनय र नृत्य मन परेकै कारण पाँच जना निर्माताले 'भाग्यरेखा'कै सुटिङ स्थलमा आएर उहाँहरुको फिल्ममा लिने सम्झौता गर्नुभयो। फिल्म खासै नवन्ने त्यो समयमा अभिनेत्रीको ठुलै महत्व थियो।

फिल्ममा लागेपछि पारिवारिक जीवनमा केही तनाव सुरू हुन थालेका थिए। तैपनि सकेसम्म परिवारलाई समय दिने कोशिस गरें। 'भाग्यरेखा' मा अभिनय गर्नु १५ वर्षकै 'कान्छी' फिल्ममा छोटो रोल पाएकी थिएँ। शर्मिला मल्ल हिरोइन हुनुहुन्थ्यो। म भने बालकलाकार थिएँ। फिल्ममा नाच्ने बालबालिका चाहिएको रहेछ। काम सकिएपछि चकलेट खाउन भनेर चार सय दिए।

'भाग्यरेखा'को सुटिङ सकाएपछि 'भुमरी', 'तिलहरी', 'मायालु'लगायतका फिल्म खेलें। २०४० तिर 'भाग्यरेखा'मा काम गरेको ०५० सालसम्म आईपुग्दा एक लाख पारिमिक लिने भइसकेकी थिएँ। झण्डै ६२ फिल्ममा अभिनय गरिसकेकी छु।

अभिनेत्री मल्लसँग स्मृति ढुंगानाले गरेको कुराकानीमा आधारित

- साभार: नागरिक न्युज

आफ्नै प्रेममा गफिए राजेश हमाल

2011-11-13T22:29:00.000-08:00

नायक राजेश हमाल अधिकांश कार्यक्रममा पुग्दैनन् । पुगिहाले पनि धेरै समय बस्दैनन् । बसिहाले भने पनि खासै गफ गर्नमा रुची देखाउँदैनन् । तर, काठमाडौंमा भएको एक कार्यक्रममा हमाललाई देख्नेहरु अचम्ममा परे । कारण थियो, उनले उक्त कार्यक्रमलाई दिएको समय । एक महिलाले आफूलाई श्रीमान् भनेर प्रहरी कार्यालयमा उजुरी दिएपछि केही समय तनावमा देखिएका नायक हमाल त्यो घटना सेलाएपछि तनाव मुक्त भै आनन्दित देखिएका थिए । यसैले पनि होला हमाल, गफ गरेर बस्न तयार भएका ।

चलचित्र प्राविधिक संघले काठमाडौंमा आयोजना गरेको एक कार्यक्रममा पुगेका हमाल त्यो कार्यक्रम सकिएपछि पनि लामै समय बसे । दुईघन्टा केही संचारकर्मी र चलचित्रकर्मीसँगको बसाइमा हमालले प्रेम गफ बढी गरेका थिए । एकजना व्यक्तिको २१ वर्षे लामो प्रेम जीवनपछि मात्र विवाह भएको भनाइ एक संचारकर्मीको मुखवाट सुनेपछि हमालले भने -’अरे बाबा मानिसहरु २१ वर्ष प्रेम गरी विवाह गर्दा रहेछन् ।

मेरो त भर्खर ३ वर्ष मात्र भयो हतारिनु पर्ने कुनै कुरा नै रहेनछ नि । उनले यति मात्र कुरा गरेनन्, बिभिन्न चलचित्रकर्मीको प्रेम जीवनलाई पनि चाख दिएर सुने । कार्यक्रममा हमालले अब आफुले सन् २०१३ सम्ममा विवाह गर्ने पनि बताएका थिए । ‘अब त बिहे गनुपर्छ की भन्ने लाग्न थालेको छ, अब भने बिहेको बारेमा धेरै नै सोच्न थालेको छु ।’

अधिकांश कार्यक्रममा कमै मात्र बोल्ने र सितिमिति उपस्थित नै नहुने हमाल यो कार्यक्रममा भने समय गएको समेत पत्तो पाएका थिएनन् । यसरी हेर्दा नायक राजेश हमाल अब भने गफगाफ र रमाइलो गर्नमा रुची राख्न थालेको देखिन्छ । अब रोमान्टिक जीवन जिउने सोच गरेका हुन् की त ?

साभार - नागरिक न्युज

रागिनीले मागिन् मुकेशसँग माफी

2011-11-05T17:51:00.000-07:00

‘रागिनी हो मेरो नाम, केही न केही उपाय त निकालिहाल्छु नि ।’ मोडल रागिनीको यही घमन्डका कारण पिकनीक गईरहेको एउटा बस नै दुर्घनामा पर्यो । दुर्घटनामा परी, लामो कपाल पालेको एक युवक सख्त घाईते नै भए । उनै युवती अर्थात मोडल रागिनीले घाईते युवकलाई भेटेर माफी माग्दै भनिन् – ‘मलाई माफ गर्नुहोला, मेरो कारणले यत्रो घटना घट्यो । आखिर के गर्ने मेरो चाँडै रिसाउने बानी छ ।’ यसो भनिरहँदा मोडल रागिनी निकै चिन्तित देखिएकी थिईन् । रागिनीले माफी मागेको व्यक्ति अरु कोही नभएर नायक मुकेश ढकाल थिए ।

तर, रागिनीले मुकेशसँग एक चलचित्रको पर्दाभित्र माफी मागेकी हुन् । पिकनीक गईरहेको गाडिलाई आफ्नो जिद्दीका कारण रोकेकी रागिनीकै कारणले बस दुर्घटना भएको हो । चलचित्रमा मोडल रागिनीको भुमिकामा देखिएकी रागिनी खड्गी यही चलचित्रको संवाद डविङ गर्ने क्रममा भेटिईन् । चलचित्रका निर्देशक शोभित वस्नेतले नायिका खड्गीलाई संवाद बोल्न सिकाउँदै थिए र रागिनी आफ्नो पहिलो सिनेमामा निकै मेहनत गरिरहेकी थिईन् ।

चलचित्र प्लानमा रागिनीका अलवा नायक मुकेश ढकाल, नायिका अनुष्का ढकाल र निर्देशक शोभित बस्नेतको समेत अभिनय रहेको छ । चलचित्रलाई कविता श्रेष्ठले निर्माण गरेकी हुन् । चलचित्र प्लानको हाल धमाधम डविङ कार्य भईरहेको छ । डविङ नसकिएकै कारणले चलचित्रको प्रदर्शन मिति मंसिरको अन्तिम साताबाट माघको पहिलो सातासम्मलाई सारिएको थियो ।

चलचित्रले डिजेहरुको कथावस्तुलाई बोकेको छ । चलचित्रको डविङ गरीरहेकी रागिनीले भनिन् – ‘मैले यो सिनेमाबाट धेरै नै अपेक्षा गरेको छु । मेरो पहिलो सिनेमा भएकाले पनि निकै मेहनत गरेको छु । हेरौं चलचित्रले मेरो करीअर अगाडि बढाउन धेरै नै मद्दत गर्नेछ ।’ निर्देशक शोभित बस्नेत पनि चलचित्रबाट रागिनीलाई प्रमोशन गर्ने सुरमा छन् । रागिनी द्वन्द्व निर्देशक राजेन्द्र खड्गीको छोरी हुन् ।

साभार: अनलाईन खबर