TechFlash

टेलिकमले उपभोक्ताको सुविधाको लागि गरेका व्यवस्थाहरुः कति नम्वरमा के गर्ने ??

2015-12-25T04:49:00.004-08:00

एडिएसएलको सिस्टम सुधार, रिचार्ज कार्डबाट महसूल तिर्ने सुविधा सुचारु

2014-10-27T21:03:00.001-07:00

काठमाडौं : पहिलोपोस्ट - | 28th October 2014 नेपाल टेलिकमले सिस्टम अपग्रेड गरेपछि एडिएसएल इन्टरनेटको महसूल पहिले जस्तै रिचार्ज कार्डबाट पनि गर्न सकिने भएको छ। टेलिकमले एडिएसएलको गति पनि पहिलेभन्दा सुधार हुने बताएको छ। टेलिकमले सोमबार सूचना प्रकाशित गर्दै गएको साउन ३१ गतेदेखि बन्द गरिएको यो सेवा फेरि सुरु भएको जनाएको हो। 'एडिएसएल सेवाको बिल भुक्तानीका लागि प्रयोगमा रहेको जिएसएम मोबाइल सेवाको रिचार्ज कार्ड तथा एमपिओएस प्रविधिको रिचार्ज सेवा केही समयदेखि बन्द रहेकोमा हाल परीक्षणको रुपमा सुरु गरिएको छ,' सूचनामा भनिएको छ। उपभोक्ताले रिचार्ज कार्ड र एमपिओएस पिनलेसबाट एडिएसएल इन्टरनेटको महसुल तिर्दा समस्या आएपछि नेपाल टेलिकमले यसको सिस्टम अपग्रेड गरिरहेको थियो।टेलिकमकी प्रवक्ता गुणकेशरी प्रधानले अहिले सिस्टम अपग्रेड भइसकेको बताइन्। तिहारअघि नै यो सेवा सुरु भएपनि परीक्षणको क्रममा रहेको उनले बताइन्। उनले भनिन्, 'अब सिस्टमले काम गर्न थालिसकेको छ। उपभोक्ताले सेवा लिन सक्छन्।' प्रधानले यो सिस्टम अपग्रेड गर्दा इन्टरनेटको गति पनि छिटो हुने बताइन्। उनले भनिन्, 'पुरानो सिस्टमले इन्टरनेटको गतिलाई पनि प्रभाव पारेको थियो। उपभोक्ताले पक्कै केही फरक पाउनु हुनेछ।' सिस्टम अपग्रेड गर्दा एडिएसएलको सेवामा समस्या आएर उपभोक्ता इन्टरनेट कहिले चल्ने कहिले बन्द हुने समस्याबाट हैरान भएका थिए।

किन बन्द भएको थियो रिचार्जबाट शुल्क भुक्तानी ?

टेलिकमका एक इन्जिनियरका अनुसार १४१३ डायल गरेर एउटै रिचार्ज कार्डले एडिएसएलको महसुल पनि तिर्न सकिने र मोबाइलमा पनि रिचार्ज गर्न सकिने भएपछि एडिएसएलको महसुल रिचार्जबाट गर्न नमिल्ने बनाइएको थियो। नेपाल दूरसञ्चार प्राधिकरणले कात्तिक महिनामा जारी गरेको एमआइएस रिपोर्ट अनुसार देशभर एडिएसएलका ग्राहकको संख्या एक लाख १४ हजार छ सय ७३ जना छन्।

टेलिकमले बागमती किनारामा हरियाली उद्यान बनाउने

2014-10-22T02:20:00.001-07:00

३ कात्तिक, काठमाडौं । onlinekhabar.com नेपाल टेलिकमले बागमती नदीको कोटेश्वर पुलदेखि मनोहरा पुलसम्मको दुबैतर्फको किनारामा हरियाली उद्यान निर्माण गर्ने भएको छ । यस सम्बन्धमा अधिकार सम्पन्न बाग्मती सभ्यता एकीकृत विकास समितिसँग सोमबार टेलिकमले सम्झौता गरेको छ ।

टेलिकमको केन्द्रीय कार्यालय भद्रकाली प्लाजामा भएको सम्झौतामा टेलिकमका निमिक्त प्रबन्ध निर्देशक मधुसूदन कर्माचार्य र समितिका सदस्य सचिव राजेशप्रसाद सिंहले सम्झौता गरेका छन् ।

सम्झौतापत्रमा हस्ताक्षर गर्दै टेलिकमा निमित्त प्रबन्ध निर्देशक कर्माचार्यले संस्थागत सामाजिक उत्तरदायित्व अन्तर्गत बाग्मती नदीको स्वच्छता र सुन्दरता वृद्धिमा सहयोग पुर्‍याउन उद्यान निर्माण गर्न लागेको बताए ।

बाग्मती सभ्यता एकीकृत विकास समितिका सदस्य सचिव सिंहले कम्पनीको सहयोगका लागि धन्यवाद प्रदान गरे ।

टेलिकमले कोटेश्वर पुलदेखि मनोहरा पुलसम्मको ९ सय २० मिटर लम्बाइ र औषत ९ मिटर चौडाइको करिव १६ रोपनी क्षेत्रफलमा हरियाली उद्यान निर्माण गरी आगामी ५ वर्षसम्म सञ्चालन तथा रेखदेख गर्नेछ ।

टेलिकमले बाग्मती नदिको स्वच्छता र सुन्दरता वृद्धिका लागि विभिन्न क्षेत्रबाट सहयोग गर्दै आइरहेको छ । गत वर्ष दशौं वाषिर्कोत्सवको अवसरमा बाग्मती सफाई महाअभियानमा सरिक भई बाग्मती नदी सफाई गर्नुको साथै सफाइमा प्रयोग हुने विभिन्न सामग्रीहरु टेलिकमले प्रदान गरेको थियो ।

यसैगरी, बाग्मती सफाई अभियान सुरु भएको दोस्रो हप्तादेखि सर्वसाधारणलाई सफाई अभियानमा संलग्न हुन कम्पनीको तर्फबाट हरेक हप्ता एक लाख भन्दा वढी एसएमएस प्रेषित गरेर योगदान पुर्‍याउँदै आइरहेको छ ।

नेपाल टेलिकमको चाडपर्व अफर, महसुलमा दश प्रतिशत छुट, ५० पैसामा एसएमएस, एडिएसएलमा भोल्युम थपियो

2014-10-06T10:25:00.000-07:00

विजमाण्डु, काठमाडौँ ।

नेपाल टेलिकमले नेपालीको महत्वपूर्ण चाड दसैँ, तिहार र छठलाई केन्द्रित गरी आफ्नो सेवाअन्तर्गत विभिन्न छुट दिएको छ । टेलिकमकी प्रवक्ता गुणकेशरी प्रधानले आइतबार विज्ञप्ति जारी गरी टेलिकमको विभिन्न सेवामा छुट दिइएको बताएकी छिन् । विज्ञप्ति अनुसार टेलिकमले उपभोक्तालाई यही असोज १३ देखि २१ गते र कात्तिक चार देखि १३ गतेसम्म विभिन्न सेवामा छुटहरु दिएको छ ।

टेलिकमले जिएसएम र सिडिएमए सेवामा कम्पनीको नेटवर्कभित्र हुने कलको विद्यमान महसुल दरमा १० प्रतिशत छुट दिएको छ । यस अनुसार उक्त अवधिभित्र जिएसएम र सिडिएमए पोष्टपेड मोवाइलबाट प्रतिमिनेट ९० पैसा र जिएसएम र सिडिएमए प्रिपेड मोवाइलबाट प्रतिमिनेट एक रुपैयाँ ३५ पैसामा कल गर्न सकिनेछ ।
यसैगरी जिएसएम र सिडिएमए सेवामार्फत कम्पनीकै नेटवर्क भित्र हुने एसएमएस सेवाको विद्यमान महसुल दरमा ५० प्रतिशत छुट उपलब्ध गराइएको विज्ञप्तिमा जनाइएको छ । सो अवधिमा कम्पनीको नेटवर्कभित्र ५० पैसामा एसएमएस गर्न सकिनेछ ।
यस्तै पिएस्टिएन/ सीफोन सेवाका ग्राहकहरुलाई न्युनतम मासिक महसुल दुईसयमा एकसय ७५ स्थानीय कल निःशुल्क उपलब्ध गराइरहेकोमा आश्विन र कार्तिक महिनामा एकसय स्थानिय कल थप गरी न्यूनतम मासिक महसुलमा कुल दुइसय ७५ कल निःशुल्क उपलब्ध गराएको छ ।
टेलिकमले जिएसएम र सिडिएमए डाटा सेवाको विद्यमान महसुल दरमा पनि छुट उपलब्ध गराएको छ । यस अनुसार जिपिआरएस र थ्रीजी सेवाको महसुल ५० पैसा प्रति एमबी र सिडिएमए इभिडियो सेवाको ४० पैसा प्रति एमबी कायम गरिएको छ ।
भोल्युम बेस्ड एडिएसएल तथा वाइम्याक्स सेवाका ग्राहकहरुलाई पनि टेलिकमले अधिकतम तीन जिबी डाटा थप गरेको छ । दशैको अवधिमा असोज १३ देखि २० गतेसम्म भ्यालिडिटी सकिनेले मात्रै सो छुटको उपयोग गर्न सक्नेछन् । थप डाटाको भ्यालिडिटी समय २१ गतेसम्म कायम रहने टेलिकमले जनाएको छ । यसैगरी तिहार र छठपर्वको अवधि (मिति २०७१।०७।०६ देखि २०७१।०७।१२) मा भ्‍यालिडिटी समय सकिने ग्राहकहरुलाई समेत तीन जिबी डाटा थप गरिनेछ । उक्त थप डाटाको समायावधि कात्तिक १३ गतेसम्म कायम रहनेछ ।
यही असोज १४ देखि २१ गतेभित्र अनलिमिटेड एडिएसएल र वाइम्याक्स अकाउन्टको समायावधि समयावधि समाप्त हुने ग्राहकहरुको समयावधि मिति असोज २२ सम्म तथा कात्तिक ६ देखि कात्तिक १२ भित्र एडिएसएल र वाइम्याक्सको समयावधि समाप्त हुने ग्राहकहरुको समयावधि मिति १३ गतेसम्म थप गरिएको छ ।
सिडिएमए सेवाका ग्राहकहरुलाई असोज ९ देखि २१ सम्म तथा कात्तिक ४ देखि १३ गतेसम्म प्रत्येक रिचार्जमा १० देखि २० प्रतिशतसम्म बोनस उपलब्ध गराएको छ । यसअनुसार उक्त अवधिभित्र प्रत्येक २०० रुपैयाँको रिचार्ज गर्दा २० र पाँचसय रुपैयाँको रिचार्ज गर्दा ७५ तथा एकहजार रुपैयाँको रिचार्ज गर्दा दुईसय रुपैयाँ बोनस उपलब्ध दिइने टेलिकमले जनाएको छ । सो बोनसको भ्यालिडिटी पिरियड क्रमशः एक र दुईदिन कायम रहनेछ ।

नेपाल टेलिकममा इन्जिनियरको अान्दोलन फिर्ता, व्यवस्थापनसँग नाै बुँदे सहमति

2014-10-06T10:21:00.002-07:00

कञ्चन अधिकारी/बिजमाण्डू

काठमाडौं । अबदेखि प्रबन्ध निर्देशक आन्तरिक खुला प्रतिस्पर्धाबाट नियुक्त गर्ने लगायतका नौ बुँदामा व्यवस्थापन र आन्दोलनरत कर्मचारीहरुबीच सहमति भएपछि तीन सातादेखि नेपाल टेलिकममा चलिरहेको आन्दोलन सकिएको छ।

गैर प्राविधिक कर्मचारीलाई नेपाल टेलिकमको प्रबन्ध निर्देशक बनाएको विरोधमा आन्दोलनरत इन्जिनियरहरु र सञ्चार सचिव तथा कम्पनी अध्यक्ष सुनिलबहादुर मल्लबीच नौ बुँदामा सहमति गरिएको संघर्ष समितिका संयोजक दिनेशचन्द्र पन्थीले पहिलोपोस्टलाई बताए। सहमति भएका बुँदा छ महिनाभित्र कार्यान्वयन नभए फेरि आन्दोलन थाल्ने चेतावनी पन्थीले दिए।

गैर इन्जिनियरलाई कम्पनीको प्रमुख बनाएको भन्दै कम्पनीका इन्जिनियर समूहले आन्दोलन गर्दै प्रबन्ध निर्देशकको कार्यकक्षअगाडि धर्ना दिँदै आएका थिए। सरकारले गत भदौ १९ गते कम्पनीको प्रबन्ध निर्देशकका कम्पनीकै सचिवालयमा नायब प्रबन्ध निर्देशक रहेका आचार्यलाई प्रबन्ध निर्देशकमा नियुक्त गरेको थियो।

के- के भयो सहमति ?

पन्थीका अनुसार 'अबदेखि प्रबन्ध निर्देशक हुँदा खुला प्रतिस्पर्धाबाट गराउने सहमति भएको छ।' टेलिकममा अहिलेसम्म खुला प्रतिस्पर्धाबाट प्रबन्ध निर्देशक नियुक्त भएका छैनन्।

आन्तरिक संस्थागत सुधारका विषय पनि सहमतिमा समेटिएको उनले जानकारी दिए।

सहमतिमा एकचोटी प्रबन्ध निर्देशक भइसकेका कर्मचारी पुनः नायब प्रबन्ध निर्देशकमा काम गर्न नपाइने पनि उल्लेख छ।

यसैगरी आन्तरिक रुपमा नै टेक्निकल अडिट हुनुपर्ने माग राखिएको विषयमा पनि सहमति भएको छ। पन्थीका अनुसार अब नेपाल टेलिकमले अब कुनै सामान खरिद गर्दा टेक्निकल अडिट गर्नैपर्ने सहमति पत्रमा उल्लेख छ।

आन्तरिक लेखापरीक्षणले पटक-पटक टेक्निकल अडिट गर्नैपर्ने सुझाव दिए पनि पूर्व एमडी तथा व्यवस्थापकहरुले यसलाई बेवास्ता गर्दै आएका थिए। टेक्निकल अडिट नगरिने हुँदा पूर्व एमडीहरुले आफ्नै सिस्टम राख्ने, आफैं सञ्चालन गर्ने र आफैं अप्रुभ गर्ने गर्थे।

दशैँ अफर भोलिदेखि

यसैबीच, आन्दोलनका कारण घोषणा हुन नसकेको दशैँ छुट भोलि सार्वजनिक हुने भएको छ। घटस्थापनादेखि नै लागू हुने गरी टेलिकमले विभिन्न अफर तथा स्किम बनाएर राखे पनि इन्जिनियरहरुको आन्दोलनले रोकिएको थियो।

के छन् सहमतिका नाै बुँदा

सञ्चालक समिति अध्यक्ष, प्रबन्ध निर्देशक, संघर्ष समितिका संयोजक र पाँच कर्मचारी युनियनको अध्यक्षहरुबीच नौ बुँदाहमा सहमित भएको छ । जसमा पहिलो बुँदामा प्रबन्ध निर्देशक छनौट तथा नियुक्तिको विषयलाई समेटिएको छ । सहमति भएका बुँदाहरु

१ कम्पनीको प्रबन्ध निर्देशक सम्बन्धमा देहाय अनुसार गर्ने

क) नेपाल टेलिकम व्यवसायिक प्रकृति अनुसार उपयुक्त प्रबन्ध निर्देशक नियुक्त गर्नका लागि प्रबन्ध निर्देशकको योग्यता, छनौट तथा नियुक्ति प्रक्रियाका प्रारुप तयार गर्ने सम्बन्धमा प्रतिवेदन पेश गर्ने दूरसञ्चार क्षेत्रका विज्ञहरुसमेत तीन सदस्यीय कार्यदल गठन गर्ने ।

ख) सञ्चालक समितिले उक्त प्रतिवेदनलाई छ महिनाभित्र कार्यान्वयन योग्य बनाउने र स्पष्ट विधि स्थापित गर्ने गरि आफ्नो राय नेपार सरकारसमक्ष पेश गर्ने ।

ग) सञ्चालक समितिले नेपाल सरकारबाट भएका निर्णयको आधारमा तयार पारिएको प्रबन्ध निर्देशकको योग्यता, छनौट तथा नियुक्ति प्रक्रियाको प्रारुप वमोजिम विधि स्थापित भएपछि कम्पनीको प्रबन्ध निर्देशक पदमा नियुक्ति गर्न आवश्यक व्यवस्था गर्ने ।

घ) उल्लेखित बुँदाहरु कार्यान्वयनको लागि प्रबन्ध निर्देशकले आवश्यक भूमिका निर्बाह गर्ने ।

२. प्रबन्ध निर्देशकको तल्लो तहको पदाधिकारी नरहने तथा कुनै खास तहका कर्मचारीको पदावधिको सिलिङ तोक्ने, कर्मचारी वृत्ति विकासमा रहेको बटल नेक हटाइ समान वृत्ति विकासको अवसर प्रदान गर्ने लगायतका विषयमा शीघ्र उपयुक्त व्यवस्था गर्ने ।

३. कम्पनीको पुनर्संरचना, स्वेच्छिक अवकास लगायतको विषयहरु कार्यान्वयन गर्न आवश्यक सुझाव प्रस्तुत गर्न युनियनका प्रतिनिधिहरु समेत रहेको एक कार्यदल गठन गरि कार्यदलको प्रतिवेदन तीन महिनाभित्र कार्यान्वयन गर्ने ।

४. टेलिकममा कार्यान्वयन भएका र सञ्चालनमा रहेका आयोजनाहरुकबा टेक्निकल अडिट कार्य सुरु गर्ने ।

५. कमर्चारीको वेत्ति विकास तथा आर्थिक सुविधा सम्बन्धमा युनियनहरुले मागको रुपमा उठाउँदै आएका विषयहरु (सापटी सिलिङ विमा जस्ता) को समग्रविश्लेषण गरि कार्यान्वयन योग्य प्रतिवेदन पेश गर्न कर्मचारी प्रतिनिधि समेत रहेको एक कार्यदल गठन गरि प्रतिवेदनको आधारमा शीघ्र कार्यान्वयन गर्ने ।

६. सञ्चालक समितिमा कर्मचारीबाट प्रतिनिधित्व हुने व्यवस्थाको लागि सञ्चालक समितिले कम्पनीको ट्रेड युनियनहरुसँग समेत छलफल एवं समन्वय गरि आवश्यक प्रक्रिया अगाडि बढाउने । साथै सञ्चालक समितिको बैठकमा प्राविधिक कर्मचारीहरु मध्येबाट एक जनालाई आमन्त्रित व्यवस्था गर्ने ।

७. कर्मचारीलाई उच्च शिक्षा हासिल गर्न निश्चित मापदण्ड अनुसार अध्ययन गर्ने अवसरको उचित व्यवस्था गर्ने ।

८. नेपाल टेलिकमको बृहत्तर विकास र कम्पनीमा कार्यरत कर्मचारीहरुको वृत्ति विकासका लागि गरिएको यो सहमित सबै पक्षबाट इमान्दारीका साथ पूरा गर्ने गराउने ।

९. नेपाल टेलिकम प्राविधिक समूहबाट हाल भइ रहेका विरोधका सबै कार्यक्रमहरु फिर्ता गर्ने ।

टेलिकम कर्मचारीबीच झडप, कार्यालयका कुर्सी र सिसा तोडफोड, दसैंतिहार योजना अनिश्चित बन्यो

2014-09-25T10:59:00.002-07:00

काठमाडौं। नेपाल टेलिकममा प्रबन्ध निर्देशक नियुक्तीको विवादले कर्मचारीबीच नै झडप भएको छ। अप्राविधिकलाई प्रबन्ध निर्देशक बनाएको विरोधमा आन्दोलन गरिरहेका इन्जिनियर र आन्दोलनको विपक्षमा रहेका अप्राविधिक कर्मचारीबीच बुधबार झडप भएको हो। आन्दोलनका कारण दसै पेश्की र उपभोक्तालाई सेवामा छुट दिन समेत नसकेको भन्दै अप्राविधिक कर्मचारीले आन्दोलनको विरोध गरेपछि दुई पक्षबीच झडप भएको हो। सुरुमा कर्मचारीहरु भनाभनमा उत्रिए र त्यसपछि हात हालाहालसम्मको अवस्था सिर्जना भयो। कर्मचारीहरुले प्रबन्ध निर्देशकको कार्यकक्ष बाहिरको सिसा फुटाएका थिए भने केही कुर्सी पनि भाँचेका छन्। बुधबारको घटनाले प्राविधिक र अप्राविधिकबीचको दुरी थप बढाएको छ। टेलिकिममा सात सयको हाराहारीमा प्रावधिक र २१ सयको हाराहारीमा अप्राविधिक कर्मचारी छन्। गत साउन १९ गते सरकारले टेलिकमका १५ नायवप्रबन्ध निर्देशकमध्ये एघारजना प्राविधिक समूहको हुँदा गैरप्राविधिक व्यक्तिलाई प्रबन्ध निर्देशकको जिम्मेवारी दिएको भन्दै इन्जिनियरले विरोध गरिरहेका छन् । प्राविधिकले गैरप्राविधिक व्यक्तिलाई प्रमुखको जिम्मेवारी दिएर सरकारले आफूहरूलाई अपमान गरेको ठानेका छन् । यही विरोधले टेलिकम कर्मचारी विभाजित भएका हुन् । विरोधमा उत्रिएका इन्जिनियरहरुले एमडी प्राविधिक९इन्जिनियर० क्षेत्रकै हुनुपर्ने माग राख्दै आन्दोलन गरेपनि टेलिकमको विनियमावलीमा एमडी प्राविधिक नै हुनपर्ने कतै उल्लेख छैन ।

प्राविधिक र अप्राविधिकको विवाद उत्कर्षमा, दसैं अफर घोषणा गर्न समेत कठिन, डर टेक्निकल अडिटको

2014-09-25T10:58:00.000-07:00

कञ्चन अधिकारी/बिजमाण्डू
काठमाडौं ।

नेपाल टेलिकमका इन्जिनियरहरु बिहान १० बजे कार्यालय पुग्छन् । आफ्नो कार्यकक्षमा जान्छन् । हाजिर गर्छन् र ११ बजेपछि प्रबन्ध निर्देशक (एमडी) बुद्धिप्रसाद आचार्यको कार्यकक्ष अघि भेला हुन्छन् ।

पाखुरामा कालोपट्टी बाँधेर टेलिकमको केन्द्रीय कार्यालय भद्रकालीको दोस्रो तलामा टेलिकम बचाउ अभियान भन्दै हाते माइकमार्फत् आन्दोलनका भाषण गर्छन्, एमडी विरोधी नाराबाजी गर्छन् र एमडीको राजीनामा माग्छन् ।

राजीनामा नदिए टेलिकमका सबै सेवा अवरुद्ध पार्ने चेतावनी दिन्छन् । बेलुकी ५ बजेपछि आन्दोलनलाई निरन्तरता दिने भन्दै आआफ्नो घर फर्कन्छन् ।

...

टेलिकममै कार्यरत प्रशासन-लेखातर्फका कर्मचारी पनि १० बजे अफिस आउँछन् । पाखुरामा न कालो पट्टी लगाउँछन् । न त आन्दोलनमा सहभागी हुन्छन् । न त आन्दोलनका बारेमा चासो नै राख्छन् र एमडीको विरोध गर्छन् । बरु हप्तौदेखिको आन्दोलनले संस्थालाई पारेको असर र इन्जिनियरहरुको व्यवहारले कर्मचारीबीचको एकता टुट्ने र संस्थानै डुब्ने डरले भयवित देखिन्छन् ।

उनीहरु आफ्नो काम गर्छन् । काम नभए कार्यकक्षमै कम्प्युटर चलाउँछन् । फेसबुक खोल्छन् । अरु समाचार साइट हेर्छन् र बेलुकी घर फर्कन्छन् । आन्दोलनतिर टाउको फर्काएर समेत हेर्दैनन् ।

अहिले नेपाल टेलिकमका प्राविधिक (इन्जिनियर) र प्रशासनका कर्मचारीको दैनिकी हो यो ।

सरकारले गत साउन १९ गते टेलिकमका नायवप्रबन्ध निर्देशकमध्ये वरिष्ठ तहमा रहेका आचार्यलाई प्रबन्ध निर्देशकमा नियुक्ति गरेपछि कर्मचारीमा आएको विभाजनले टेलिकमको भविष्य कता ? भन्ने प्रश्न उब्जिएको छ ।

टेलिकमको प्रशासन तर्फका एक कर्मचारीका अनुसार अहिले इन्जिनियर र प्रसाशनका कर्मचारीबीच बोलचाल समेत बन्द हुने अवस्था आइसकेको छ । ती कर्मचारी भन्छन्, 'इन्जिनियरहरु प्रशासनका कर्मचारीलाई बुद्धिको मान्छे देख्छन् । हामीले उहाँहरुलाई विरोधी । दुई समूहमा बाँडिए जस्तै भएको छ टेलिकम । जुन कम्पनीको लागि हितकर छैन ।'

गत साउन १९ गते सरकारले टेलिकमका १५ नायवप्रबन्ध निर्देशकमध्ये एघारजना प्राविधिक समूहको हुँदा गैरप्राविधिक व्यक्तिलाई प्रबन्ध निर्देशकको जिम्मेवारी दिएको भन्दै इन्जिनियरले विरोध गरिरहेका छन् ।

प्राविधिकले गैरप्राविधिक व्यक्तिलाई प्रमुखको जिम्मेवारी दिएर सरकारले आफूहरूलाई अपमान गरेको ठानेका छन् । यही विरोधले टेलिकम कर्मचारी विभाजित भएका हुन् ।

विरोधमा उत्रिएका इन्जिनियरहरुले एमडी प्राविधिक(इन्जिनियर) क्षेत्रकै हुनुपर्ने माग राख्दै आन्दोलन गरेपनि टेलिकमको विनियमावलीमा एमडी प्राविधिक नै हुनपर्ने कतै उल्लेख छैन ।

विनियामावलीमा नायवप्रबन्ध निर्देशकमध्ये बरिष्ठलाई एमडी बनाउन सकिने उल्लेख छ । यही विनियामावलीमा टेकेर सूचना तथा सञ्‍चारमन्त्री मिनेन्द्र रिजालले आचार्यलाई एमडी बनाएका हुन् ।

टेलिकम ध्वस्त बनाउने खेल
इन्जिनियरहरु भने टेलिकमको इतिहासमा अप्राविधिकलाई एमडी बनाएको इतिहास नै छैन भन्दै इन्जिनियरलाई नै एमडीको कार्यभार दिइनु पर्ने नत्र टेलिकम 'ध्वस्त' हुने बताउँदै आएका छन् । ४१ वर्षसम्म इन्जिनियरले नै टेलिकमको नेतृत्व गर्दै आएका थिए।

इन्जिनियरहरुले 'अप्राविधिकले प्रविधि जानेका हुँदैनन् र उनीहरुले काम गर्न सक्दैनन्, दक्ष हुँदैनन्' भन्ने आरोप लगाउँदै आएका छन् । टेलिकमका एक वरिष्ठ कर्मचारी भन्छन्, 'इन्जिनियरहरुको यो आन्दोलन भनेको श्राद्धमा विरालो बाँध्ने परम्परालाई निरन्तरता दिनुपर्छ भन्ने हो । आन्दोलनले कुनै अर्थ राख्दैन ।' टेलिकममा रहेकामध्ये वरिष्ठलाई नै प्रबन्ध निर्देशकको जिम्मेवारी दिएको र कम्पनीले स्थायी एमडी पाएको भन्दै इन्जिनियर बाहेक अन्य प्राविधिक, प्रशासन तथा लेखा समूहले भने स्वागत गरेका छन् । उनी भन्छन्, 'को मान्छे दक्ष र को अदक्ष भन्ने उसको काम नहेरी भन्न सकिन्न । आचार्यलाई कम्तिमा छ महिना काम गर्न दिएर विरोध वा समर्थन गरेको भए हुन्थ्यो। '

टेलिकमका पूर्व एमडीहरुले भने टेलिकममा इन्जिनियर नै बनाइनु पर्ने बताएका छन् । पूर्व एमडी सुगतरत्न कंसाकारले आन्दोलनलाई साथ दिँदै इन्जिनियर प्रमुख नभए टेलिकम डुब्ने बताएका थिए ।

केही वरिष्ठ नायवप्रबन्ध निर्देशकहरु पनि आचार्यको पक्षमा उभिएका छन् । उनीहरुको तर्क छ, 'सरकारले आचार्यको क्षमता देखेर नै एमडी बनाएको हो। यो आन्दोलनले प्रशासन र इन्जिनियरबीच पछिसम्म इख साँध्ने वातावरण बनाएको छ ।'

दसैं अफर ल्याउन कठिनाइ
यसरी पक्ष र विपक्षमा टेलिकमका कर्मचारी उत्रिएपछि त्यहाँको कामसमेत प्रभावित हुन पुगेको छ । दसैंमा उपभोक्ताको लागि ल्याइन लागेको विशेष अफरहरु अनिश्चित बनेको छ भने कतिपय कामहरु ठप्प भएका छन् ।

कामै ठप्प पार्ने चेतावनी
त्यसो त इन्जिनियरहरुले अहिलेसम्म सेवामा कुनै अवरोध नगरिएको बताउँदै आएका छन् । नेपालभरी रहेका टेलिकमको कार्यालयमा रहेका इन्जिनियरहरु आन्दोलनमा सहभागी हुन राजधानी आएका छन् ।

टेलिकम सुन्धाराका एक इन्जिनियर भन्छन्, 'काम नगर्ने इन्जिनियरहरुलाई आन्दोलनले फाइदा पुगेको छ । तर हामीलाई भने आन्दोलनमा आउन नपरे हुन्थ्यो जस्तो लागेको छ ।'

यदि एमडीले पद नछाड्ने हो भने टेलिकमको सबै सेवा ठप्प पारेर इन्जिनियरहरु आन्दोलनमा उत्रिने चेतावनी दिँदै आएका छन् । नेपाल टेलिकम प्राविधिक समूह संघर्ष समितिका सह-संयोजक शालिकराम पराजुली भन्छन्, 'हाम्रो माग नसुन्ने हो भने हामी सेवा नै ठप्प पार्छौं । यसको जिम्मेवारी सरकार र एमडीले लिनुपर्छ ।'

यसरी सेवा नै ठप्प पार्छु भन्ने इन्जिनयरहरुको भनाइलाई गैरजिम्मेवारी कदम भन्न रुचाउँछन् टेलिकमका अर्का इन्जिनियर । 'सेवा नै ठप्प भएको जिम्मेवारी एमडीले नै लिनुपर्ने इन्जिनियरहरुले बताएपनि यसको असर पछि इन्जिनियसरहरु नै व्यहोर्नु पर्नेछ,' ती इन्जिनियर भन्छन् ।

आफू हुन नपाएपछि आन्दोलन उक्साइयो
टेलिकमका एक कर्मचारीका अनुसार कतिपय नायवप्रबन्ध निर्देशकले आफू एमडी हुन नपाएपछि आन्दोलन गर्न उक्साएका हुन् । 'हिजोसम्म आफू कसरी एमडी हुने भनेर शक्ति केन्द्र धाउनेहरु आज आफूले कुर्सि नपाएको रिस इन्जिनियरहरु मार्फत संस्थामा पोख्दैछन,' ती कर्मचारी भन्छन् ।

उनका अनुसार कतिपयको आउँदो मंसिरमा कार्यकाल सकिने र कति नायवप्रबन्ध निर्देशकको दुई वर्ष पनि कार्यकाल बाँकी छैन । दुई वर्ष कार्यकाल बाँकी रहेका नायवप्रबन्ध निर्देशक आचार्यलाई हटाएर आफू बन्ने दाउमा छन् ।

तर सरकारले आचार्यलाई दुई वर्षको लागि एमडी बनाएको छ । आचार्यले दुई वर्ष नै एमडी खाने भएपछि आफ्नो पालो नआउने भन्दै कतिपय वरिष्ठ इन्जिनियरहरु आचार्यको राजीनामा मागिरहेका छन् ।

टेक्निकल अडिटको डर
यो भन्दाअघि टेलिकममा टेक्निकल अडिट नहुने तर आचार्य आएपछि त्यो अडिट सुरु हुनसक्ने र फ्याक्ट्री इन्स्पेक्सन्, मर्मत तथा संहार तथा सिस्टममा हुने अपारदर्शीता बाहिर आई कमाई खाने बाटो बन्द हुन सक्ने भएपछि पूर्व एमडीहरु समेत डराएका हुन् । आफूले गरेका आर्थिक कारोबारमा तानिन सक्ने आशंका भएपछि आन्दोलन गर्ने र गराउने कार्य भएको टेलिकम कर्मचारी बताउँछन् ।

नेपालमा अहिलेसम्म टेक्निकल अडिट नगरिने हुँदा पूर्व एमडीहरुले आफ्नै सिस्टम राख्ने, आफैं सञ्चालन गर्ने र आफैं अप्रुभ गर्ने भएकोले आफ्ना कमीकमजोरी बाहिर आउँछ कि भनेर झस्का पसेकोले पनि आन्दोलन गरिएको ती कर्मचारी बताउँछन् । आचार्यले संस्थागत कमजोरी बाहिर ल्याउन सक्ने आशंका देखेर डराएको उनको दाबी छ ।

आन्तरिक लेखपरीक्षणले पटक-पटक टेक्निकल अडिट गर्नैपर्ने सुझाब दिएको भए पनि यो कुरालाई पूर्व एमडी तथा व्यवस्थापकहरुले वेवास्ता गर्दै आएका छन् ।

टेलिकममा इन्जिनियर मात्र प्रमुख छैनन्
विश्वका नाम चलेका टेलिकम सेवा प्रदायक कम्पनीमा इन्जिनियर नै प्रमुख कहिँ पनि छैनन् । तर ती सेवा प्रदायक कम्पनीहरु नाफामूलक बनिरहेका छन् । स्तरीय सेवा उपभोक्तालाई दिइरहेका छन् ।

चाहे त्यो नेपालको एनसेल नै होस् या त अमेरिकाको एटिएन्टी वा भारतको रिलायन्स वा एयरटेल वा चीनको चाइना मोबाइल नै किन नहोस् यी सबै कम्पनीका प्रमुख इन्जिनियर छैनन् ।

एमविएस्कुलडटकमको तथ्याङ्क अनुसार विश्वकै सबैभन्दा ठूलो टेलिकम सेवा प्रदायक कम्पनी चाइना मोबाइलका सिइओ तथा निर्देशक वाङ सिवाउचु पनि इन्जिनियर होइनन् । उनले व्यापार व्यवस्थापनमा पिएचडी छन् ।

अमेरिकाको चर्चित र विश्वको दोस्रो टेलिकम सेवा प्रदायक एटिएन्टिमा अहिले भएका अध्यक्ष तथा सिइओ र्‍यान्डेल एल इस्टेभेन्सन गैरप्राविधिक हुन् । उनले युनिभर्सटी अफ अक्लोहामाबाट एमबिए गरेका छन् ।

अमेरिकाकै टि-मोबाइलका सिइओले तथा अध्यक्ष जोन लेगिरे पनि वाणिज्य शास्त्रमा नै स्नातकोत्तर छन् । यो अमेरिकाको ठूलो टेलिकम सेवा प्रदायक कम्पनी मध्ये एक हो ।

यस्तै भारती एयरटेल कम्पनीका सिइओ क्रिस्टियन एमडिफारिया पनि इन्जिनियर हैनन् । यस्तै एनसेलका इरिम टाइलानलर पनि इन्जिनियर हैनन् । उनले इन्टरनेसनल विजनेशमा एमबिए गरेका छन् ।

को को छन् एमडीकाे अाकां‌क्षी ?
टेलिकमको प्रबन्ध निर्देशकको दौडमा पूर्वप्रबन्ध निर्देशक अनुपरञ्जन भट्टराई, नायवप्रबन्ध निर्देशक मधुसुदन कर्माचार्य, विष्णुप्रसाद कसजु, शिवभूषणलाल यादव, श्यामसुन्दरप्रसाद यादव, राजेन्द्र नकर्मी र सुरेन्द्र थिके थिए ।

यसैगरी जुनियर नायवप्रबन्ध निर्देशकहरु नीरजकुमार अधिकारी, सूर्यभक्त पोखरेल, पद्मा केसी, कामीनीराज भण्डारी, देवनारायण यादव र वीरेन्द्रबहादुर शाक्य थिए । तर यी जुनियर प्राविधिक भने एमडीको दौडमा छैनन् । यीमध्ये निरजकुमार अधिकारी, सूर्यभक्त पोखरेल र पद्मा केसी गैरइन्जिनियर हुन् । अरु सबै सबै इन्जिनियर हुन् ।

तर, टेलिकमको व्यवस्थापनले भने प्राविधिक समूह बनाएर गरिएको आन्दोलनको कुनै अर्थ नभएको जनाएको छ । सरकारले उपयुक्त व्यक्ति छानेर नै जिम्मेवारी दिएको बताउँदै प्रशासनका ती कर्मचारी भन्छन्, 'मन्त्रीले सबैको पर्फरमेन्स हेरेर नै आचार्यलाई नियुक्ति सिफारिश गर्नु भएको हो । आफू प्रबन्ध निर्देशक हुन नपाउँदाको रिस आन्दोलनबाट पोखेर हुँदैन ।'

उनका अनुसार सरकारले कानुन सम्मत नै नियुक्ति गरेकोले इन्जिनियरहरुले गरेको आन्दोलनले कुनै असर पार्दैन । उनले भने, 'कानुनी हिसाबले पनि आचार्य नै बलियो देखिनुहुन्छ । सर्वोच्चमा गएर पनि केही हुँदैन ।'

आचार्य दशौँ तहबाट नेपाल टेलिकम प्रवेश गरेका हुन् । उनी विगत १५ वर्षदेखि टेलिकममा कार्यरत छन् । आचार्यले भारतको दि इन्ष्टिच्युट अफ चार्टड एकाउन्टेण्टस अफ इण्डियाबाट चार्टड एकाउन्टेण्सी उत्तीर्ण गरेका छन् ।

यता टेलिकमका प्रबन्ध निर्देशक आचार्य भने परम्परा भन्दा पनि नियम कानुन र नेपाल सरकारको निर्णयलाई प्राथमिकता दिनुपर्ने बताउँछन् । उनले केही साथीहरुलाई चित्त नबुझेको भए वार्ताबाट समस्या समाधान गर्न आफू तयार रहेको बताए । उनले भने, 'सरकारले सक्षमलाई नियुक्त गरेको होला । असन्तुष्टसाथीहरुसँग छलफल गरेर अघि बढ्छु ।'

टेलिकम प्रवक्ता सहित केही प्राविधिक नायवप्रबन्ध निर्देशक बिदामा बसेको छन् । तर विदा स्वीकृत भने भएसकेको छैन । टेलिकमका इन्जिनयरहरुको प्राविधिक समूहको विरोध भने पनि २८ सयको हाराहारीमा रहेका अप्राविधिक(गैर इन्जिनियर) हरुको आन्दोलनमा कुनै समर्थन छैन । उनीहरुले बेग्लै समूह गठन गरी आन्दोलन छोडेर बार्ताबाट समस्या समाधान गर्न अपिल गरिसकेका छन् ।

हप्तौ देखिको आन्दोलन बाट कम्पनीको अन्तरिक प्रसासनिक तथा अन्य कार्य समेतमा असर पुगेपछि प्रसाशन-लेखा तर्फका कर्मचारीले समेत सदभाब समिति गठन गरी व्यक्ति केन्द्रित अन्दोलनले निकास नदिने भएकोले बार्ताबाट समस्या समाधान गर्न अपिल गरेको छ ।

- See more at: http://www.bizmandu.com/content/-8889.html#sthash.dflsOG2z.dpuf

सेवा विस्तार र गुणस्तर सुदृढीकरणका लागि टेलिकमले १८ अर्ब लगानी गर्ने

2014-08-31T03:06:00.005-07:00

काठमाडौं : पहिलोपोस्ट - | 31st August 2014 | १५ भदौ २०७१ नेपाल टेलिकमले चालु आर्थिक वर्षमा कम्पनीको सेवा विस्तार र गुणस्तर सुदृढीकरणका लागि १८ अर्ब पूँजीगत लगानी गर्ने योजना सार्वजनिक गरेको छ। आइतवार काठमाडौंमा भएको पत्रकार सम्मेलनमा टेलिकमका प्रवन्ध निर्देशक बुद्धिप्रसाद आचार्यले चालु आर्थिक वर्षमा सेवा विस्तार र गुणस्तर सुदृढीकरण गर्न १८ अर्ब पुँजीगत लगानी गर्न लागेको जानकारी दिए। 'लगानी विविधिकरणको अवधारणा अनुरुप कम्पनीसँग रहेको अतिरिक्त तरलतालाई व्यवस्थापन गर्न लगानीका अन्य क्षेत्र पहिल्याई जोखिम न्यूनीकरण हुने गरी उच्च प्रतिफलयुक्त व्यवसायिक क्षेत्रमा लगानी गर्ने योजना छ', उनले भने। टेलिकमले आर्थिक वर्ष २०७१/७२ मा २० लाख मोबाइल लाइन वितरण गर्ने छ। यस्तै कूल २२ लाख ५८ हजार एक सय ८३ लाइन थप टेलिफोन वितरण गर्ने योजना छ। मोबाइल सेवाप्रति ग्राहकको बढ्दो रुचीलाई ध्यानमा राखी मुलुकभर गुणस्तरीय थ्रीजी सेवा उपलब्ध गराउने लक्ष्यसहित थप बिटिएस टावर जडान गरी सेवा विस्तार गरिने टेलिकमले जनाएको छ।

टेलिकमले नारायणी र जनकपुर अञ्चलका तराईका जिल्लामा विद्यमान पुराना उपकरणलाई थप क्षमतायुक्त नयाँ उपकरणमार्फत प्रतिस्थापन गर्ने भएको छ। यस्तै सिडिएमए प्रविधिका दुई लाख टेलिफोन वितरण गर्ने टेलिकमको लक्षय छ। सिडिएमए सेवा विस्तार गरी ७५ वटै जिल्लाका ग्रामीण क्षेत्रमा समेत सेवा सञ्चालनमा ल्याइने छ। डाटा सेवाको बढ्दो माग सम्बोधन गर्न टेलिकमले आइपी सिडिएमए मोबाइल सेवाको सेट र डाटा कार्ड निर्माता कम्पनीसँगको सहकार्यमा इभिडिओ इनेबल्ड आइपी सिडिएमए सेटसँग बन्डलिङ गरी सेवाको बिक्रीवितरण गर्ने छ। यस्तै पिएसटिएन (ल्यान्ड लाइन) सेवाका २५ हजार ९ सय ५६ लाइन टेलिफोन वितरण गर्ने लक्ष्य छ। ग्राहकका गुनासालाई केन्द्रीकृत गरी छिटो तथा सरल रुपमा सेवा प्रदान गर्न अत्याधुनिक ग्राहक सम्पर्क केन्द्र सञ्चालनमा ल्याइने टेलिकमले जनाएको छ। यस्तै डाटा सेवाको विस्तारका लागि वायरलाइन तथा वायरलेस ब्रोडब्यान्ड सेवालाई थप प्रबर्द्धन गर्ने टेलिकमको लक्ष्य छ . भिडभाड हुने क्षेत्र पहिचान गरी वाइम्याक्स प्रविधिमार्फत थप स्थानमा हटस्पट स्थापना गरी वाइफाइ वितरण गर्ने टेलिकमले जनाएको छ। यो सेवा ७५ वटै जिल्ला सदरमुकाम तथा प्रमुख ब्यापारिक केन्द्रमा सञ्चालनमा ल्याइने छ। एडिएसएल सेवाको क्षमता विस्तार गरी यो वर्ष ३२ हजार २ सय २७ लाइन वितरण गर्ने टेलिकमको लक्ष्य छ।

२०७०/७१ को उपलब्धिः

कूल टेलिफोन ग्राहकः १ करोड ९ लाख ४ हजार ४ सय ६२

टेलिफोन वितरणः १७ लाख २८ हजार ४ सय २ लाइन

इन्टरनेट ग्राहकः ४७ लाख २ सय ५२ (७० असार मसान्त भन्दा १४ लाख २२ हजार ६ सय ८५ ले बढी)

राजश्व आर्जनः ३९ अर्ब २६ करोड ८४ लाख

मुनाफाः ११ अर्ब ६८ करोड ११ लाख (अनुमान)

टेलिकमको नाफा खासै बढ्न सकेन, गत वर्षपनि ११.६८ अर्ब खुद नाफा, सेवाबाट मात्रै ३९ अर्ब रुपैयाँ अाम्दानी

2014-08-15T01:43:00.001-07:00

काठमाडौं। Bizmandu.com नेपाल टेलिकमले नाफा बढाउन सकेन। गत आर्थिक वर्षमा कम्पनीले ११ अर्ब ६८ करोड रुपैयाँ खुद नाफा कमाएको छ। यो नाफा अघिल्लो आर्थिक वर्ष २०६९/७० कै हाराहारीमा हो। अघिल्लो आर्थिक वर्षमा टेलिकमको खुद नाफा ११ अर्ब २९ करोड रुपैयाँ थियो। बजार प्रतिस्पर्धाका कारण नाफा बढाउन नसकेको जानकारी पनि टेलिकमले दिएको छ। आम्दानीमा बृद्धि गर्न नसकेपछि नाफा स्थिर भएको हो। महशुल दर नबढ्दा आम्दानी सेवा विस्तारसँग सम्बन्धित हुन्छ। आर्थिक वर्ष २०७०/७१ मा टेलिकमले कुल आम्दानी ३९ अर्ब २६ करोड रुपैयाँ गरेको छ। यो आम्दानी अघिल्लो वर्षको तुलनामा ४१ करोड रुपैयाँ मात्रै बढी हो। सेवाबाट हुने आम्दानी ३५ अर्ब ५८ करोड रुपैयाँ छ अर्थात नेपाल टेलिकमको सेवा प्रयोग गरेवापत आम उपभोक्ताले ३५ अर्ब ५८ करोड रुपैयाँ तिरेका छन्। यो आम्दानी अघिल्लो वर्षको तुलनामा एक अर्ब ४४ करोड रुपैयाँ बढाएको हो। अन्य आम्दानी भने केही घटेको छ। यसमा बैंकमा राखेको निक्षेपबाट प्राप्त हुने व्याज पनि पर्छ। टेलिकमको खर्च केही घटेको छ। लाइसेन्स फि र फ्रिक्वेन्सी फि घटेको कारण कुल खर्च कम भएको देखिएको हो। कुल खर्च चार करोड रुपैयाँ मात्रै घटेको हो। टेलिकमको सबैभन्दा ठूलो खर्च सञ्चालन तथा मर्मतमा छ। यस्तो खर्च छ अर्ब ८३ करोड रुपैयाँ छ। परसनल कस्ट चार अर्ब ९२ करोड, डिप्रिसिएसन तीन अर्ब ७८ करोड, लाइसेन्स फि तीन खर्ब ३५ करोड रुपैयाँ छ। टेलिकमको प्रतिसेयर आम्दानी ७७ रुपैयाँ छ। अघिल्लो वर्ष यस्तो आम्दानी ७५ रुपैयाँ थियो। प्रतिसेयर नेटवर्थ भने तीन सय ८३ रुपैयाँ छ। अघिल्लो वर्ष तीन सय ५७ रुपैयाँ थियो। टेलिकमले गत वर्ष लगानीकर्तालाई ४६ रुपैयाँ नगद लाभांस दिएको थियो। यो खुद नाफाले पनि लगानीकर्तालाई यही अनुपातमा लाभांस दिन पुग्छ।

दूरसञ्चार सेवा प्रदायकबीच असमान व्यवहार

2014-08-01T01:24:00.001-07:00

काठमाडौं- शुक्रबार १६ श्रावण, २०७१ प्रकटकुमार शिशिर

सरकारले दूरसञ्चार सेवा प्रदायकबीच असमान व्यवहार गरेको विश्व दूरसञ्चार संगठनको एक अध्ययनले देखाएको छ। संगठनले नेपाल टेलिकम, एनसेल, स्मार्ट टेलिकम र दूरसञ्चार प्राधिकरणमा अध्ययन गरेर तयार गरेको प्रतिवेदनमा सरकारले सेवा प्रदायकसँग विभेदकारी व्यवहार गरेको उल्लेख छ।विश्व दूरसञ्चार संगठन (आइटियू) ले नेपालको दूरसञ्चारको बजार अध्ययन गरेर तयार पारेको 'नेपालमा दूरसञ्चार प्रतिस्पर्धा र नियमन' विषयक प्रतिवेदनमा नियमन वातावरण नहुँदा सम्भावना देखिएको दूरसञ्चार क्षेत्र खुम्चिएको उल्लेख छ। नेपाल दूरसञ्चार प्राधिकरणले बिहीबार काठमाडौंमा आयोजना गरेको कार्यक्रममा आइटियूका विज्ञ सिमोन मोल्लोयले दूरसञ्चार सेवाको अस्थिर लाइसेन्स वितरण, लाइसेन्स नवीकरण शुल्कमा अस्पष्टता, दूरसञ्चारको विस्तार र पहुँचको रोडम्याप अभाव, पूर्वाधारविहीनता र पूर्वाधारको संयुक्त प्रयोग र अधिक कर यस क्षेत्रको विकासमा बाधक रहेको जनाए। सरकारले अस्थिर लाइसेन्स प्रणालीमार्फत सेवाप्रदायकसँग असमान व्यवहार गरेको उनले बताए। सरकारले लाइसेन्स नवीकरण शुल्कलाई खासमा 'स्पेक्ट्रम' मूल्य लिइरहेको र यसले दूरसञ्चार क्षेत्र अनिश्चिततातर्फ गएको उनले बताए। सरकारले निश्चित प्रकारका लाइसेन्सका लागि स्थायी नियम बनाउनुपर्ने र लगानीको सुनिश्चिता बढाउनुपर्ने बताए। मोल्लोयले आर्थिक वृद्धिमा दूरसञ्चार क्षेत्रको योगदान बढ्दै गए पनि नियमन वातावरण अझै बनिनसकेको बताए। दूरसञ्चार प्राधिकरणमा नेतृत्व नभएको कारणले तत्काल हुनुपर्ने कतिपय निर्णय हुन सकिरहेको छैन, यसले त यसको विकासमा असर पुर्या उँछ, उनले भने। दूरसञ्चार विकासका लागि सरकार नै बाधकको रुपमा देखिएको छ, प्रतिवेदन प्रस्तुत गर्दै उनले बताए।

नेपालमा विभिन्न उद्योग अनुसार कर र शुल्कको विभेद रहेको छ। दूरसञ्चार क्षेत्रमा पनि कर र शुल्कको विभेदकारी नियमले असर गरिरहेको उनले बताए, आम्दानीको ४ प्रतिशत र टेलिकम सेवा शुल्क १० प्रतिशत कर र शुल्कले दूरसञ्चार क्षेत्रलाई प्रत्यक्ष प्रभाव पारेको उनले बताए। अझ फि्रक्वेन्सी शुल्कसमेत रहेको छ, कसरी यसको विकास हुन्छ, उनले भने।

मोल्लोयले प्रस्तुत गरेको प्रतिवेदनमा उपभोक्ताको न्यून आम्दानीले पनि प्रयोग र पहुँच नबढेको उल्लेख छ। विश्वका उत्कृष्ट नियमकारी व्यवस्थालाई नेपालले आत्मसात नगर्दा दूरसञ्चार क्षेत्रमा पछि परेको प्रतिवेदनमा छ। यसमा प्राधिकरणले आइटियू, जिएसएमसँग सहकार्य गरेर आफ्नो क्षमता विस्तार गर्नुपर्ने सुझाव पनि छ। सरकारले दूरसञ्चारलाई सजिलो आम्दानीको स्रोतमात्र ठानेको तर यसको विकासका लागि नीतिगत योजनामा ध्यान नदिएको रिपोर्टमा छ। सरकारले कुल गार्हस्थ उत्पादनमा दूरसञ्चार क्षेत्रले पुर्यााएको योगदानको प्रशंसासमेत नगरेको प्रतिवेदनको निष्कर्ष छ। ग्रामीण दूरसञ्चार कोषमा रहेको रकम प्रयोग र यसको पारदर्शितासमेत नभएको मोल्मोयले प्रतिवेदनमा उल्लेख गरेका छन्। कोषको रकम ग्रामीण क्षेत्रमा प्रयोग गरेर दूरसञ्चारको विकास गर्न सकिने भए पनि त्यतातिर पहल नगरिएको उनको भनाइ छ।

कार्यक्रममा अलायन्स फर एफोर्डेबल इन्टरनेटका एसिया संयोजक बासिरहामद सद्राचले नेपालमा सुलभ मूल्य इन्टरनेटको अवस्थाबारे प्रतिवेदन पेस गरेका थिए। त्यस्तै जिएसएमएका विज्ञ जो गुनले दूरसञ्चार स्पेक्ट्रमबारे प्रतिवेदन प्रस्तुत गरेका थिए।

कार्यक्रममा सेवा प्रदायकका तर्फबाट बोल्ने अधिकांशले सरकारले दूरसञ्चार विकासका लागि ठोस कदम नचालेको तथा नवीकरण, फ्रिक्वेन्सी शुल्क र कर बढी लिएको गुनासो गरेका थिए। प्राधिकरणका निर्देशक आनन्दराज खनालले शुल्क र करका विषयमा प्राधिकरणले अध्ययन गरिरहेको बताउँदै सरकारसँगको छलफलमा निर्णय हुने आश्वासन दिए। त्यसअघि उद्घाटन सत्रमा सूचना तथा सञ्चार मन्त्री मिनेन्द्र रिजालले ब्रोडब्यान्ड नीति ल्याउन मस्यौदा तयार भइसकेको जानकारी दिँदै केही महिनाभित्रै नीति बन्ने बताए। 'अहिले मस्यौदामाथि छलफल भइरहेको छ, यसको टुंगो लाउनेबित्तिकै नीति सार्वजनिक हुन्छ,' उनले भने उनले नयाँ प्रविधि भिœयाउन सरकार लागिपरेको र ग्रामीण क्षेत्रमा दूरसञ्चारको पहँुच बढाउन योजना बनिरहेको बताए। दूरसञ्चार क्षेत्रमा अहिले सुलभ मूल्यमा गुणस्तरीय सेवा दिन जरुरी भएको बताए। 'सेवा प्रदायकले यसतर्फ सोच्नुपर्छ,' उनले भने।

टेलिकमले दशैंअघि नै सामाजिक सञ्जालको साइट ल्याउने, इमेल, एसएमएस, भिडियो एउटै प्लेटफर्ममा

2014-07-22T22:36:00.000-07:00

कञ्चन अधिकारी/बिजमाण्डू काठमाडौं । सरकारी स्वामित्वको नेपाल टेलिकमले युनिफाइड कम्युनिकेसन सिस्टम (युसिएस) को तयारी अन्तिम चरणमा पुर्‍याएको छ । हाल परीक्षणको रुपमा सञ्चालन भइरहेको यो सेवा दशैंअघि पूर्णरुपमा सञ्चालनमा आउने नेपाल टेलिकमकी प्रवक्ता गुणकेशरी प्रधानले बताइन् । यो सिस्टम सञ्चालनमा आएपछि कम्पनीको सेवा प्रयोग गरिरहेका ग्राहकले अन्य काम बाहेक अहिले फेसबुक वा ट्वीटर जस्ता सामाजिक सञ्जालमा गरिरहेका कार्यहरु नेपाल टेलिकमकै युसिएस सिस्टम मार्फत गर्न सक्छन् । प्रवक्ता प्रधान भन्छिन्, ' यो फेसबुक, ट्विटरजस्तै सामाजिक सञ्जाल हो ।' यो सिस्टम अनुसार एउटै वेबसाइटबाट टेलिकमका सबै प्रकारका सेवा प्रयोग गर्न मिल्ने प्रविधि सञ्चालन गर्न सकिन्छ । अहिले टेलिकमले आन्तरिक परीक्षणको रुपमा गृहकार्य गरिरहेको छ । प्रवक्ता प्रधानले भनिन्, 'हामीले चाँडै ल्याउने भनेका थियौँ । तर प्राविधिक कठिनाइले गर्दा ल्‍याउन सकेनौँ । तर अब अन्तिम चरणमा काम भइरहेको छ । भदौको अन्तिमदेखि सबैले चलाउन सक्छन् ।' यो सेवाअन्तर्गत सामाजिक सञ्जालका एप्लिकेसन लगायत टेलिफोन, भिडियो च्याट जस्ता एप्लिकेसन छन्। साढे दुई वर्षअघि टेलिकमले फेसबुकजस्तै सामाजिक सञ्जाल 'एनटी चौतारी' बनाएको थियो। त्यतिखेर परीक्षणकै क्रममा रहेको त्यो सञ्जाल टेलिकम सञ्चालक समितिका तत्कालीन पदाधिकारी र कर्मचारीले सञ्चालनमा ल्याउन रोक लगाएका थिए। संसारभरिका ठूला दूरसञ्चार सेवा प्रदायक कम्पनीले आफ्ना ग्राहकलाई सजिलो बनाउन विभिन्न एप्लिकेसनहरु बनाएर त्यसबाटै सेवा दिन्छन् । इन्टरनेटमा स्थानीय विषयवस्तु (कन्टेन्ट) हरु दिन सकेमा डलर तिरेर किनेको ब्यान्डविथ बचत हुने भएकोले टेलिकम यो काममा अघि बढेको प्रवक्ता प्रधान बताउँछिन् । उनी भन्छिन्, 'यो सेवाले अन्तर्राष्ट्रिय र लोकल व्यान्डविथको बचत हुन्छ ।' अहिले नेपालका दूरसञ्चार कम्पनी, इन्टरनेट सेवा प्रदायकले किनेको ब्यान्डविथको झन्डै आधा फेसबुक र ट्विटरमा मात्रै खर्च भइरहेको छ। ब्यान्डविथ खर्च कम गर्न र टेलिकमका सेवाहरु एकीकृत रुपमा एउटै साइटमार्फत दिन यो सेवा सुरु गर्न लागिएको टेलिकम प्रवक्ता प्रधान बताउँछिन् । यो दुई वर्षअघि नै ल्याउने भनिएपनि तत्कालीन सञ्चालक समितिका अध्यक्ष अवनिन्द्रकुमार श्रेष्ठले टेलिकमले यस्तो सेवा चलाउनु हुदैन भनेर निर्णय हुन दिएका थिएनन् । श्रेष्ठको ठाउँमा सूर्य सिलवाल सञ्चालक समितिको अध्यक्ष बनेपछि यस प्रकारको नयाँ सेवा सुरु गर्नुपर्छ भन्नेमा उनी सकारात्मक देखिएपछि टेलिकमले फेरि सिस्टम किन्ने प्रक्रिया अघि बढाएको थियो । युसिएसका लागि टेलिकमले टेन्डर आव्हान गर्दा एउटैमात्र टेन्डर परेको थियो । भारतीय कम्पनी डिएनएले प्रस्ताव बुझाएको थियो । उसैले अहिले वेब साइट निर्माणको काम गरिरहेको छ । टेन्डर प्राप्त गर्ने कम्पनीले वेबसाइट, कन्टेन्टको डिजाइन गरेर टेलिकमलाई उपलब्ध गराउनुपर्ने हुन्छ। यसका लागि टेलिकमले झन्डै १२ करोड रुपैयाँ बजेट राखेको छ। ल्यान्डलाइन, मोबाइल, एडिएसएल, वाइम्याक्स सेवा लिने ग्राहकलाई दिइने यस्तो एप्लिकेसन कम्प्युटर र मोबाइल दुवैमा सञ्चालन हुने गरी तयार गर्ने योजना टेलिकमको छ। ग्राहकले वेबसाइट वा एप्लिकेसनबाट दैनिक रुपमा तोकेर निशुल्क वेब एसएमएससमेत गर्न दिने तयारी टेलिकमले गरेको छ भने कतिपय एप्लिकेसन चलाउन भने पैसा तिर्नुपर्ने हुन्छ । 'वेबसाइटमा भएका एप्सहरु सित्तैमा चलाउन दिने कि शुल्क लिने भन्नेमा दुविधा छ, 'प्रधानले भनिन्, 'शुल्क लिने हो भने पनि ट्यारिफबारे बोर्ड बैठकमा छलफल भइरहेको छ ।' त्यसो त उनले यो साइट चलाउन डोमेनको नाम नजुरेकोले पनि ढिला भएको बताइन् । प्रधानका अनुसार आन्तरिक र बाह्य रुपममै राम्रो नाम जुराउन भनिएको छ । 'नेपाली कला, संस्कृतिसँगै नेपाल टेलिकमको पनि केही प्रतिक आओस भन्ने खालको नामको खोजी भइरहेको छ ।'
के हो युसिएस ?
विभिन्न रेञ्जका प्रविधि र एप्लिकेसनलाई एउटै सिंगल कम्युनिकेसन प्लेटफर्मका रुपमा डिजाइन गरेर बिक्री गर्ने र तिनको सपोर्ट समेत गर्ने सिस्टम नै युसिएस हो । एकीकृत डाटा, भिडियो र भ्वाइसलाई एकै स्थानबाट सपोर्ट गर्न सकिने किसिमले यो बनाइएको छ । प्रयोगकर्ताले इमेल, एसएमएस, भिडियो, फ्याक्स, भ्वाइस र अन्य सेवालाई एउटै प्लेटफर्ममा प्रयोग गर्न सक्नेछन् । 'यो एउटा अनलाइन सर्भिस, प्लेटफर्म तथा साइट पनि हो,' प्रवक्ता प्रधान भन्छिन्, 'जसले विभिन्न व्यक्तिबीच सोसल नेटवर्क तथा सोसल रिलेसन कायम गराउँछ ।' यसले प्रयोगकर्ताबीच इमेल तथा इन्स्ट्यान्ट म्यासेजिङको सहयोगले इन्टरनेटमा अन्तरक्रिया गर्न मद्दत गर्छ । विभिन्न सेवालाई डेस्कटप पिसीमा प्रयोग गरिरहेको भए त्यही सेवालाई स्मार्टफोन, पिडिए, ल्यापटप र अन्य वायरलेस डिभाइसमा समेत प्रयोग गर्न यसले सघाउँछ ।
नेपाल टेलिकममा युसिएस
यो सेवा प्रारम्भमा कम्पनीका मोबाइल सेवा प्रयोगकर्तालाई उपलब्ध गराइनेछ । प्रवक्ता प्रधानका अनुसार नेपाल टेलिकमको कुनै कुनै सेवा प्रयोग गरेको व्यक्तिले युसिएसमा लगइन गर्न सक्छन् । सुरुमा 'बेसिक' र 'प्रिमियम' गरि दुई प्रकारको सेवा वितरण गरिने कम्पनीको योजना छ । बेसिक सर्भिस अन्तर्गत अहिले फेसबुक वा ट्वीटर जस्ता सामाजिक सञ्जालमा प्रयोग गर्न सकिने स्ट्याटस अपडेट, सेयरिङ, लाइक, अनलाइक, कमेन्ट, च्याट आदि गर्न सकिन्छ । यसैगरी फ्रेन्ड र फ्रेन्ड ग्रुप बनाउन, ग्रुप डिस्कसन गर्न र ग्रुप च्याट गर्न, फोटो तथा भिडियो अपलोड/डाउनलोड गर्न तथा सेयरिङ गर्न, वेब एसएमएस तथा टेक्स्ट म्यासेज पठाउन, विभिन्न प्रकारका एप्लिकेसन डाउनलोड गर्न र भ्वाइस मेल सेवा समेत लिन सकिन्छ । प्रिमियम प्याकेज भने ग्राहकको अनुरोधमा मात्रै दिन सकिने कम्पनीको भनाइ छ । यो प्याकेजमा एकैपटक धेरै जनालाई एसएमएस पठाउनका लागि बल्क एसएमएस सेवा तथा आइपी कलको सुविधा समेत उपलब्ध हुन्छ ।

टेलिकम र सामसुङको संयुक्त प्याकेज : दुबैमा छुट अफर

2014-07-22T01:50:00.001-07:00

काठमाडौं । onlinekhabar.com २०७१ साउन ५ गते १७:५७ मा प्रकाशित नेपाल टेलिकम र सामसुङ मोबाइल बिक्रेता इन्टरनेशन मार्केटिङ सर्भिसेज आइएमएसले संयुक्त रुपमा विशेष छुट प्याकेज ग्राहकसामु ल्याएका छन् ।

प्याकेज अन्तर्गत टेलिकमको सिमसँग सामसुङ मोबाइलका ५ मोडलमध्ये कुनै एउटा खरिद गर्दा मोबाइलमा १० प्रतिशत नगद छुट र सिममा मोबाइल सेट मूल्यको १५ प्रतिशत बराबर टक टाइम वा डाटा सित्तैमा प्राप्त गर्न सकिने छ ।

दूरसञ्चार सेवा प्रदायक कम्पनीसँग मिलेर यस्तो प्याकेज नेपालमै पहिलो पटक ग्राहकसामु ल्याएको आइएमएसका कार्यकारी अध्यक्ष दीपक मलहोत्राले बताए । उनले प्याकेजमा तोकिएको मोबाइल खरिद गर्नेलाई ग्राहकलाई आफुहरुले १० प्रतिशत छुट दिने र सिममा टेलिकमले १५ प्रतिशत डाटा वा टक टाइम सित्तैमा उपलब्ध गराउने बताए ।

यसरी प्राप्त हुने सेवा ग्राहकहरुले ६ महिनाका लागि प्रत्येक महिना बराबर किस्ताको रुपमा प्राप्त गर्ने आइएमएसले जनाएको छ । आइएमएसका एक्सक्लुसिभ ब्रान्ड पसलहरु तथा टेलिकमका छानिएका बिक्री केन्द्रबाट प्याकेजमा मोबाइल तथा सिम खरिद गर्न सकिने बताइएको छ ।

मोडल	एमअरपी	छुट	अफर मूल्य	डाटा मूल्य
ग्यालेक्सी एस थ्री	३९,५००	३,९५०	३५,५००	५,८८०
सामसुङ कोर	२४,२००	२,४२०	२१,७८०	३,६००
सामसुङ ट्रेन्ड	१३,६५०	१,३६५	१२,२८५	२,०४०
सामसुङ लकोटा	५,७००	५७०	५,१३०	८२५
सामसुङ गुरू	२,२६०	२२६	२,०३४	३३८

सामसुङ कोर, ग्यालेक्सी एस थ्री, सामसुङ ट्याब थ्री मोडलमा इन्टरनेट डाटा उपलब्ध गराउने छ ।

यस योजना अन्तर्गत खरिद गरिएका मोबाइल सेटमा कम्पनीले एक वर्ष र एसोसेरिजमा ६ महिनाको वारेन्टी प्रदान गर्ने भएको छ । मोबाइल सेटमा देखिएका कुनै पनि समस्याहरु सामसुङको आधिकारिक सर्भिस सेन्टरबाट हल गर्न सकिने बताइएको छ ।

आइएमएसका अनुसार यस योजनामा खरिद गरिएका सम्पूर्ण मोबाइल सेट ओभर भोल्टेज, सर्ट सर्किट तथा ओभरलोड तथा इनपुट रिभर्सजस्ता समस्याबाट सुरक्षित रहनेछन् ।

टेलिकम र आइएमएसवीच भएको यो साझेदारी तीन वर्षसम्मका लागि कायम रहने बताइएको छ । यस विचमा सामसुङले कुनै मोडलको उत्पादन तथा वितरण बन्द गरेमा वा मोडलको स्तरोन्नती गरेमा स्तरोन्नती गरेका मोडल यसै योजनामा समावेश गरि बिक्री गरिने आइएमएसले जनाएको छ ।

टेलिकम सेयरधनीलाई ४६ प्रतिशत लाभांश

2014-07-09T02:35:00.001-07:00

काठमाडौं, २४ असार कारोबर सम्बाददाता- नेपाल दूरसञ्चार कम्पनी (टेलिकम) ले आर्थिक वर्ष २०६९÷७० को नाफाबाट ४६ प्रतिशत लाभांश वितरण गर्ने भएको छ । मंगलबार सम्पन्न कम्पनीको छैंटौ वार्षिक साधारणसभाले नाफा रकममध्येबाट सरकारबाट स्वीकृत चुक्ता पुँजीको ४६ प्रतिशतका दरले नगद लाभांश वितरण गर्ने प्रस्ताव पारित गरेको हो ।कम्पनीले ०६९/७० मा ११ अर्ब २९ करोड रुपैयाँ नाफा गरेको छ । कम्पनीमा सरकारको ९१.५ प्रतिशत टेलिकम कर्मचारी ४.१ र ४.४ प्रतिशत सर्वसाधारणको सेयर हिस्सा छ । सञ्चालक समितिका अध्यक्ष एवं सूचना तथा सञ्चार मन्त्रालयका सचिव सुमनप्रसाद शर्माले नााफाको साथै सेवा र नागरिकप्रतिको दायित्वलाई केन्द्रबिन्दुमा राख्दै काम गरेको बताए । सेवाग्राहीहरूको सन्तुष्टि र छनोटलाई कम्पनीको सफलताको सूत्र बनाइ ग्राहक आधारमा वृद्धि, सेवाको स्तरोन्नति, मुनाफा वृद्धि र सेयरधनीहरूलाई उचित लाभ प्रदान गर्न कम्पनी सदा लागिरहने उनले बताए । निर्णय प्रक्रियामा सुधार, कर्मचारीको कार्यशैलीमा सुधार, उचित वितरण प्रणाली, संस्थागत संरचना विकास र परिवर्तनमुखी, व्यावसायिक तथा गतिशील संगठनको रुपमा कम्पनीको विकास गर्न रणनीतिक साझेदार भिœयाउने प्रक्रिया सरकारले अघि बढाएको उनले जानकारी दिए । सभाले आर्थिक वर्ष ०६९÷७० को सञ्चालक समितिको प्रतिवेदन र लेखापरीक्षकको प्रतिवेदनसहितको २०७० असार मसान्तको वासलात, नाफा नोक्सान हिसाब तथा नगद प्रवाह विवरणलाई पारित गरेको छ । महालेखा परीक्षकको कार्यालयको परामर्श तथा लेखापरीक्षण समितिको सिफारिसबमोजिम आव ०७०।७१ को लागि कम्पनीको लेखापरीक्षकमा वरिष्ठ चार्टर्ड एकाउन्टेन्ट लुम्बध्वज महतलाई नियुक्त गरेको छ । आगामी दिनमा कम्पनीले सेवा प्रतिको विश्वसनियता अभिवृद्धि गराई ग्राहकहरूलाई कम्पनीको सेवामा टिकाइराख्न एडीएसएल एडीएसएल, एभिडिओ, वाइम्याक्स,मोवाइल इन्टरनेट आदि सेवाको विस्तार तथा मोवाइल ब्रोडब्यान्ड सेवाको प्रवद्र्धनलाई प्राथमिकता दिने बताए । उहाँले ग्रामीण क्षेत्रको बजारलाई पकेट क्षेत्रको रूपमा विस्तार गर्न आधारभूत सेवाहरूको विस्तारको साथै ग्रामीण क्षेत्रसम्म अप्टिकल फाइवरको सञ्जाल विस्तार गरी डाटा सेवाको बिक्री वितरणमा प्राथमिकता प्रदान गरिने उनले बताए । आर्थिक वर्ष ०६९÷७० मा कम्पनीको कुल आम्दानी ३८ अर्ब ८५ करोड रुपैयाँ गरेको छ । अघिल्लो वर्षको तुलनामा कम्पनीको आम्दानी वृद्धि ४.२२ प्रतिशत वृद्धि भएको छ । अध्यक्ष शर्माले कम्पनीको खर्चमा थप मितव्ययिता अपनाइने, पारदर्शितामा जोड दिइने र वितरीत सेवाहरूको गुणस्तर अझ उच्चस्तरको बनाउन प्राथमिकता दिइने बताए । कम्पनीका सचिव बुद्धिप्रसाद आचार्यले आगामी बिहीबारदेखि सेयरधनीहरूलाई एनएमबी बंैकबाट मुलुकभरका शाखाहरूमार्फत साधारणसभाबाट पारित भएबमोजिमको नगद लाभांश वितरण गरिने जानकारी दिए ।

सम्पूर्ण कर्मचारीलाई शेयर उपलब्ध गराउन माग

2014-07-09T02:19:00.001-07:00

8 JULY, 2014 काठमाडौं । http://mynewsnepal.com/ नेपाल टेलिकम भित्र शेयर विवाद चुलिएको छ । टेलिकमले चालु आर्थिक वर्षको नौ महिनामा २९ अर्ब १२ करोड ३४ लाख आर्जन गरेको र आर्जित रकममा कर कटाउँदा कम्पनीेलाई आठ अर्ब ६० करोड ६४ लाख मुनाफा भएको छ विवरण सार्वजनिक गरिरहँदा नेपाल टेलिकम शेयर विहिन कर्मचारी समूहले भने पे्रस विज्ञप्ति जारी गरी दुईवटा मागलाई अघि सारेका छन् । समूहले सम्पुर्ण शेयरविहिन कर्मचारीहरुलाई कम्पनीको सहूलियत दरको शेयर उपलब्ध गराउनु पर्ने, शेयर विहिन कर्मचारीहरुलाई कम्पनीको शेयर प्राप्त नभएसम्मका लागि तत्काल आर्थिक सूविधा सहित कर्मचारी प्रतिनिधि चयनमा मताधिकारको व्यवस्था गर्न माग गरेका हुन् । कर्मचारी समूले विगत ६ वर्षदेखि टेलिकममा कार्यरत शेयर विहिन कर्मचारीहरुले कम्पनीको स्वामीत्व प्राप्ति स्वरुप कम्पनिको सहुलियत दरको शेयर पाउनु पर्ने र नेपाल टेलिकममा शेयर हुने र नहुने कर्मचारी बिचको विद्यमान असमानताको अन्त्य गरि शेयर सम्वन्धी विद्यमान समस्याको दीर्घकालिन समाधान हुनुपर्ने आवाज उठाउँदै आएको छ । ‘नेपाल टेलिकमका कर्मचारीलाई संस्था पूर्ण प्रतिष्पर्धामा उत्रिएको अवस्थालाई मूल्याड्ढन गर्दै कर्मचारीको उत्पादकत्व अभिवृद्धी तथा कम्पनी प्रति कर्मचारीको पुर्ण लगाव तथा जिम्मेवारी वहनकै लागी सरकारले कम्पनीका कर्मचारीलाई कम्पनीको स्वामित्व (शेयर) प्रदान गरेको थियो । तर २०६४ साल जेठ १० गते पछि कम्पनीमा स्थायी पदपुर्ति भई आउने कर्मचारीहरुले कम्पनीको शेयर नपाएको अवस्थामा एउटै संस्थाभित्र शेयर सहितका र शेयरविहिन कर्मचारीहरु रहेको विद्यमान बिभेदको अवस्थाले कम्पनीको स्वस्थकर विकासको लािग सहयोग गर्ने देखिदैन ।’ विज्ञप्तिमा उल्लेख गरिएको छ । यसरी सरसर्ती हेर्दा नेपाल टेलिकमका शेयरहोल्डर कर्मचारीहरु अवकास भई शेयरविहिन कर्मचारीहरुको अनूपात आगामी दिनहरुमा क्रमशः बढ्दै जाने देखिन्छ । कम्पनीमा कार्यरत रहेका कर्मचारीहरुलाई शेयर नदिने हो भने कम्पनीस“ग बा“की हुने शेयरको संख्या पनि सोहि अनूरुपले घट्दै जान्छ । यस किसिमको अवस्थामा शेयर विहिन कर्मचारीको मनोवलमा पर्न जान सक्ने असरको साथै कर्मचारी प्रतिनिधीको रुपमा कम्पनीको सञ्चालक समितीमा चूनीएर जाने प्रतिनिधीकै बैधानिकतामा प्रश्न उठ्ने कर्मचारी समूहको दावी छ ।

रणनीतिक साझेदार ल्याउन नेपाल टेलिकमको फड्को, साझेदार भित्र्याउन सल्लाह दिने कन्सल्ट्यान्ट NTCले सर्ट लिष्टिङ गर्‍यो, अधिकांश भारतीय

2014-06-30T00:33:00.002-07:00

काठमाडौं।bizmandu.com नेपाल टेलिकमले रणनीतिक साझेदार भित्र्याउने प्रकृयामा सल्लाह दिन कन्सल्ट्यान्ट बन्न इच्छुक छ वटा कम्पनीलाई सर्ट लिष्टिङ गरेको छ। साझेदार ल्याउने प्रकृयालाई अघि बढाउन कम्पनीले कन्सल्ट्यान्ट नियुक्तीका लागि एक्सप्रेसन अफ इन्ट्रेष्ट (इओआई) माग गरि ग्लोवल टेन्डर निकालेको थियो। आवेदकहरु मध्ये चारवटा भारतीय, एक जमर्न र एक सिङ्गापुरका कम्पनी सर्ट लिष्टिङ भएका हुन्। भारतका अन्र्ष्ट एन्ड योङ एलएलपी, डिलोइट टच तोमात्सु इन्डिया प्रालि, केपिएमजी एड्भाइजरी सर्भिस प्राइभेट लिमिटेड, एनालाइसिस मास अन इन्डिया प्रालि प्रारम्भिक सूचीमा परेका छन्। जर्मनीको डेटिकोन इन्टरनेशनल जिएमबिएच र सिङ्गापुरको रोल्यान्ड बर्जर स्ट्राटेजी कन्सल्ट्यान्ट पिटिइ लिमिटेड पनि अन्तिमको छ भित्र छन्। सर्ट लिष्टिङमा परेका कम्पनीहरुलाई रिक्वेष्ट अफ प्रपोजल (आरएफपी) कागजात मंगलबारबाट बितरण गर्ने कम्पनीले जनाएको छ। यि मध्येबाट अन्तिम छनौटमा पर्ने एउटा कम्पनीले नेपाली टेलिकमको सेयर डाइभेष्टमेन्ट गरि रणनीतिक साझेदार भित्र्याउने मोडालिटीबारे सुझाव दिनेछन्।

परापर्शदाताले नेपाल टेलिकमको संरचना हेरि कस्तो साझेदार उपयुक्त हुन्छन् त्यसबारे सुझाव दिनेछ। कम्पनीको सेयर संरचना कस्तो राख्ने र साझेदारलाई कति प्रतिशत सेयर दिने भन्ने बारे पनि कन्सल्ट्यान्टले परामर्श दिनेछन्। परापर्शदाताको सुझाव बमोजिम टेलिकमले ग्लोवल टेन्डर गरि रणनीतिक साझेदार आह्वान गर्ने जनाएको छ। दुई बर्ष भित्र साझेदार भित्र्याउने कम्पनीको योजना छ।

रणनीतिक साझेदार मार्फत विदेशी लगानी र प्रविधि भित्र्याउने नेपाल टेलिकमको योजना छ। साथै कम्पनीको व्यवस्थापन समेत साझेदारमा आउने विदेशी कम्पनीले लिने हुँदा सार्वजनिक खरिदको लामो प्रकृयामा अलमल नगरि निर्णय प्रकृया छिटो हुने अपेक्षा गरिएको छ।

टेलिकमले पूर्वाधार कम्पनी खोल्ने

2014-06-25T01:19:00.003-07:00

प्रकटकुमार शिशिर, नागरिक काठमाडौं- नेपाल टेलिकमले दूरसञ्चार पूर्वाधार निर्माण गर्न २० अर्ब रुपैयाँको पूर्वाधार कम्पनी स्थापना गर्ने भएको छ। टेलिकमले दूरसञ्चार पूर्वाधारका लागि मुख्य रुपमा आवश्यक पर्ने बिटिएस टावर निर्माण गर्ने कम्पनी स्थापना गर्न लागेको हो। इन्टरनेट सामाग्री निर्माण गर्नै आइटी कम्पनीसमेत स्थापना गर्न लागेको टेलिकमले चाँडै नै करिब २० अर्ब लगानीमा पूर्वाधार कम्पनी स्थापना गर्ने जनाएको छ। टेलिकमले बुधबार पूर्वाधार कम्पनी स्थापनाका लागि अध्ययनसमिति गठन गर्दै छ । नेपाल टेलिकमका प्रबन्ध निर्देशक अनुपरञ्जन भट्टराईले पूर्वाधार सेयरिङ र बिटिएस टावर निर्माण गर्ने कम्पनी स्थापना गर्न लागिएको नागरिकलाई बताए। पूर्वाधार कम्पनीमार्फत नेपाल टेलिकमका नयाँ पूर्वाधार अरु कम्पनीसँग सेयरिङ गर्ने सकिने उनले बताए। उनका अनुसार यसले दूरसञ्चार सेवा प्रदायक सबै कम्पनीको लागत घटाउने छ। 'हामीले करिब २० अर्ब रुपैयाँ लगानीमा पूर्वाधार कम्पनी स्थापना गर्ने तयारी गरेका छौं। त्यसका लागि भोलि (बुधवार) एक अध्ययन समितिसमेत बन्छ,' उनले भने। प्रबन्ध निर्देशक भट्टराईका अनुसार पूर्वाधार कम्पनीले विशेष गरी बिटिएस टावर निर्माण गर्ने र नेपाल टेलिकमले सञ्चालनमा ल्याउने नयाँ पूर्वाधार साझेदारीको काम गर्ने छ। करिब चार हजार बिटिएस टावरबाट सेवा दिइरहेको टेलिकमले अब त्यत्ति जति थप्ने जनाएको छ। आफ्नै बिटिएस टावर र अरु कम्पनीलाई आवश्यक पर्ने टावर निर्माणमा पूर्वाधार कम्पनीको भूमिका हुने भट्टराईले बताए। 'एउटा टावर खडा गर्न ५० लाख रुपैयाँसम्म खर्च हुन्छ,' उनले भने । टेलिकमले स्थापना गर्ने पूर्वाधार कम्पनीमा टेलिकमकै ५० प्रतिशत सेयर हुने र बाँकी अरु इच्छुक सेवा प्रदायक तथा कर्पाेरेट घरानाको हुने भट्टराईले बताए। टेलिकमले पूर्वाधार साझेदारीसँगै अप्टिकल फाइबर बिछ्याउन पनि साझेदारी गर्ने जनाएको छ। भट्टराईका अनुसार पूर्वाधार कम्पनी आगामी ६ महिनामा स्थापना हुनेछ। 'पूर्वाधारमा लगानी गर्ने निहुँमा अनावश्यक खर्चसमेत भएको छ। पूर्वाधार कम्पनीमार्फत टावर निर्माण गरेर पूर्वाधार साझेदारी गर्दा सेवा प्रदायकको लागतसमेत घट्ने भट्टराईले बताए। उक्त कम्पनी अन्तर्राष्ट्रिय मापदण्ड र उच्चकोटीको हुने भट्टराईको दाबी छ। त्यस्तै टेलिकमले सहायक कम्पनीमार्फत निजी क्षेत्रसँगको साझेदारीमा स्थापना गर्न लागेको अर्काे प्रोजेक्ट आइटी कम्पनी कार्यदलको कार्यालय यसै साता स्थापना हुने भएको छ। प्रारम्भिक काम गरिरहेको कार्यदलले व्यवस्थित रुपमा काम गर्न टेलिकमकै बबरमहलस्थित भवनमा कार्यालय स्थापना गर्न लागेको हो। प्रबन्ध निर्देशक भट्टराईले कार्यदलले कम्पनी दर्ता नभएसम्मका सबै काम गर्न छुट्टै कार्यालय खोल्न लागेको जानकारी दिए। इन्टरनेटमा आधारित हरेक कुरा निर्माण गर्न टेलिकमले नयाँ कम्पनी स्थापना गर्ने घोषणा गरेसँगै कार्यदलले काम सुरु गरेको हो। कार्यदलले अहिले प्रबन्धपत्र बनाउने र कम्पनी रजिस्ट्रारको कार्यालयमा दर्ताको काम गर्ने उनले बताए। प्रबन्धपत्र तयार हुनेबित्तिकै दर्ता प्रक्रियामा जान्छ। त्यसपछि साझेदारी कम्पनीको खोजी हुने उनले बताए। उनका अनुसार कार्यदलले प्रबन्धपत्र बनाउन प्रारम्भिक काम थालिसकेको छ। आइटी कम्पनीका लागि नेपालीसहित विदेशी कम्पनीले रुचि देखाइरहेको उनले जानकारी दिए। 'सायद विदेशी कम्पनीसँग साझेदारी हुन्छ होला,' उनले भने। टेलिकमले साझेदारी गर्न इच्छुक अन्य कम्पनीबाट पनि प्रस्ताव आह्वान गरेको छ। टेलिकमले सुरुमा ४० करोड लगानी गरेर कम्पनी स्थापना गर्ने योजना बनाएको छ। टेलिकमको ५० प्रतिशत र निजी कम्पनीको ५० प्रतिशत सेयर हुने गरी कम्पनी स्थापना हुने छ। कार्यदलले कम्पनी स्थापना गरेपछि सेयर बिक्री गर्ने र नयाँ नेतृत्वलाई जिम्मेवारी दिएर छाड्ने भट्टराईले जानकारी दिए।

टेलिकमले लोडसेडिङमा पनि चलाउन मिल्ने राउटर ल्यायो, मूल्य ५५ सय देखि ५९ सयसम्म, ५ जिबी डाटा फ्रि

2014-06-06T22:16:00.001-07:00

काठमाडौं, bizmandu.com । नेपाल टेलिकमले लोडसेडिङको समयमा पनि चलाउन मिल्ने राउटर ल्याएको छ । नेपालमा दिनप्रतिदिन बढ्दै गएको लोडसेडिङलाई ध्यान दिएर यस्तो राउटर ल्याइएको टेलिकमका डेपुटी म्यानेजर अनन्तमान सिंहले बताएका छन् । टेलिकमले सजिलो इन्टरनेट सेवा अन्तर्गत यो अफर ल्याएको हो । सिंहले भने, 'दिनप्रतिदिन इन्टरनेट ग्राहकहरु उपभोक्ताहरु बढ्दै छन् । फेरी लोडसेडिङ पनि बढ्दै छ । त्यसैले हामी बत्ति जाँदा पनि उपभोक्ताहरुले इन्टरनेट चलाउन पाउन् भनेर यस्तो राउटर ल्याएका हौं ।' सजिलो इन्टरनेट सिडिएमए थ्रीजी वाइफाइ राउटरमा उपभोक्ताले आफूसँग भएको डिभाइसमा राउटर राखेपछि तुरुन्तै वाइफाइ मार्फत इन्टरनेट चलाउन सक्छन् । राउटरले फालेको वाइफाइ ५ देखि ८ जनाले एकैपटक चलाउन सक्छन् । यसको स्पिड तीन एमबीपिएस हुने कम्पनीले जनाएको छ । सिंह भन्छन्, 'अति आवश्यक काम परेको बेला चलाउन सजिलो होस् भनेर ल्याइएको अफर हो । जहाँ जतिसुकै बेला पनि नेपालभरी चलाउन सकिन्छ ।' उनका अनुसार यो राउटरमा रिम कार्ड राखेपछि सिडिएमए थ्रीजी चल्छ । यसलाई ल्यापटप, डेस्कटप, ट्याब्लेट र मोवाइलमा समेत प्रयोग गर्न सकिन्छ ।

टेलिकमले व्याट्रीको क्षमता अनुसार विभिन्न खाले राउटर बजारमा ल्याएको छ। दुई हजार मिलिएम्प आवरदेखि ३५ सय मिलिएम्प आवर क्षमता भएका इनविल्ट व्याट्री राखिएको राउटरको मूल्य ५५ देखि ५९ सयसम्म पर्छ । उपभोक्ताले राउटर किन्दा रिम कार्ड सहित तीन महिनासम्म चलाउन सकिने ५ जिबीको डाटा पाउनेछन् । उपभोक्तासँग पहिले नै रिमकार्ड छ भने रिचार्ज गरेर २५ देखि १० जिबी सम्मको डाटा राउटरबाट प्रयोग गर्न सक्छन् । टेलिकमले तोकेको माथिका मूल्यमा भ्याट समावेश नगरिको जनाएको छ । उपभोक्ताले १४१५ मा bl र vl लेखेर म्यासेज गर्दा आफ्नो राउटरमा रहेको रिमकार्डमा कति व्यालेन्स र डाटा छ भनेर समेत जानकारी लिन सक्नेछन् ।

असारभित्र ७५ जिल्लामै थ्रिजी पुर्याएर डाटा प्याकेज ल्याउँछाैं(अन्तरवार्ता)

2014-05-31T22:06:00.000-07:00

२०७१ जेठ १८ गते ९:१७ मा प्रकाशित, onlinekhabar.com

अनुपरञ्जन भट्टराई नेपाल टेलिकममा प्रबन्ध निर्देशक भएको ४ महिना बितिसकेको छ । सुरुदेखि नै उनको जोड भ्वाइसभन्दा डाटा सेवातिर बढि देखिएको छ । यो चार महिनाको अबधिमै उनले निःशुल्क वाईफाई सेवा बिस्तार गर्नेदेखि डाटा सेवालाई आक्रामक बनाइरहेका छन् । यसै सन्दर्भमा टेलिकमको डाटा सेवा विस्तार तथा आगामी रणनीतिका बारेमा प्रबन्ध निर्देशक भट्टराईसँग अनलाइनखबरका लागि नविन अर्यालले गरेको कुराकानी:

नेपाल टेलिकममा तपाई प्रबन्ध निर्देशक भएको ४ महिना भइसकेको छ । यस अवधिमा तपाईले विशेष जोड दिएका ग्राहकमुखी योजनाहरु के–के हुन् ?

एक वर्ष अगाडी देखि मैले दूरसञ्चार कम्पनीहरुको फोकस अब इन्टरनेट डाटा बिजनेशमा हुनुपर्छ भन्दै आएको छु । अहिले भ्वाइस सेवाको कभरेज झण्डै देशभर भइसकेको अवस्था छ । अधिकांश नेपालीहरुको हातमा मोबाइल पुगिसकेको छ । त्यसैले हामी अब हामी डाटा सेवाका ग्राहक बढाएर डाटा बिजनेशतर्फ बढी केन्द्रीत हुनुपर्छ । अहिले हाम्रो टिम डाटा सेवालाई प्रभावकारी बनाएर अगाडी बढ्ने कसरतमा लागेको छ । मेरो चार महिनाको उपलब्धी हेर्ने हो भने वाईफाई सेवा ३० जिल्लासम्म पु¥याईसक्यौं । यहि आर्थिक वर्षभित्रमा ७५ वटै जिल्लाका सदरमुकाम र मूख्य मूख्य व्यापारीक केन्द्रहरुमा पु¥याउँछौं । यहि आर्थिक वर्षभित्रमै फाइवर टु होम योजना पनि सुरु गर्छौं । यो चाहीँ काठमाडौंका मूख्यमूख्य स्थानमा पाइलट प्रोजेक्टको रुपमा सुरु गर्दै छौं । हाम्रा ग्राहकहरुको चाहना हाइस्पिड डाटा हो । विकसित मुलुकहरु एउटा वेबसाइट २ सेकेन्डभित्र खुल्नुपर्छ भन्ने स्टान्डर्डमा गइसकेका छन् । हामीले पनि ग्राहकलाई एकदमै द्रुत गतिको डाटा सेवा दिने हो भने फाइवरको विकल्प छैन । हामीले वारलेसबाट त्यति छिटो सेवा दिन सक्दैनौं । हामीले सहरी क्षेत्रमा फाइवरमा जानै पर्छ । तत्काल काठमाडौं उपत्कामा सुरु गरेर आगामी आर्थिक वर्षभित्र देशका मूख्य शहरहरुमा फाइवर सेवा सुरु गर्ने हाम्रो योजना छ ।

नेपालको सन्दर्भमा तत्कालै भ्वाइस सेवाको भविष्य समाप्त हुने अबस्था आइसकेको हो र ?

भ्वाईस सेवा पछिल्लो समय झन्डै–झन्डै स्याचुरेशनको अवस्थामा पुगिसकेको छ । भाइबर, स्काईपजस्ता टप प्लेयरहरु बजारमा आउन थालेका छन् । जसबाट भ्वाइस सेवा निःशुल्क उपलब्ध हुन्छ । त्यसैले हामी टेलिकम अपरेटरहरुले पनि भ्वाइस सेवा निःशुल्क दिनेतर्फ सोच्नुपर्ने बेला आएको छ । यो विषयमा मैले तीन चार वर्ष अगाडी नै कुरा उठाएको थिएँ, २०१५ बाट भ्वाइस सेवा निःशुल्क दिने काम सुरु गर्नुपर्छ भनेर । भ्वाइस कललाई निःशुल्क बनाउने क्रममा हामीले सीडीएमएको नाइट कललाई महिनाको २० रुपैयाँ शुल्क तोकेका छौं । यो हामीले भ्वाइस सेवालाई निःशुल्क बनाउने दिशातर्फको एउटा पाइला हो ।

हामीले सन् २०१५ बाट निःशुल्क भ्वाइस सेवा प्रयोग गर्न पाउँछौं ?

यहि वर्षबाट निःशुल्क कल गर्न पाउनुहुन्छ त अहिले भन्न सक्दिन । तर, टेलिकमले केही वर्षभित्रमा भ्वाइस सेवा निःशुल्क बनाउँछ । अब भ्वाइस सेवा निःशुल्क बनाएर डाटा बिजनेशतर्फ केन्द्रीत हुनुको विकल्प पनि छैन । हामी भ्वाइस सेवालाई निःशुल्क बनाउन लागिपरेका छौं । ग्राहकहरुको रेस्पोन्सलाई मध्यनजर गर्दै नेटवर्क सञ्जाल विस्तार गरेर भ्वाइस सेवा निःशुल्क उपलब्ध गराउँछौं ।

तपाईले निकै फोकस गर्दागर्दै पनि टेलिकमको डाटा सेवा प्रभावकारी बन्न सकेको छैन् । यसमा कसरी सुधार ल्याउनुहुन्छ ?

टेलिकमले थ्रिजी सेवा रिङ रोडभित्र सुरु गर्ने वित्तिकै सबैभन्दा बढी डाटाको ग्राहक हुने अपरेटरमा परेको छ । रिङरोड बाहिर पनि सेवा विस्तार गर्न थालेपछि हाम्रो मार्केट शेयर ५२ प्रतिशत पुगेको छ । बाँकी सबै अपरेटर र आइएसपीको जोडेर ४८ प्रतिशत मार्केट हिस्सा छ ।

हामीले यहि आर्थिक वर्षभित्रमा देशभरी थ्रिजी सेवा विस्तार गर्दै छौं । अहिलेलाई हामीले धनगढी, विराटनगर र नेपालगञ्ज र काठमाडौं उपत्यकामा थ्रिजी सेवा विस्तार गरेका छौं । देशभर थ्रिजी सेवा विस्तार भएपछि डाटाको मार्केट शेयर थप बढ्ने मैले विश्वास लिएको छु । हाम्रो लक्ष्य भनेकै थ्रिजी सेवालाई देशभर विस्तार गरी गुणस्तरिय डाटा सेवा ग्राहकलाई उपलब्ध गराउनु रहेको छ ।

डाटा सेवाको गुणस्तरप्रति ग्राहक सन्तुष्ट हुन सकेको अवस्था छैन । ग्राहकहरु द्रुत गतिको सेवा उपभोग गर्न खोज्छन । तर, त्यो अबस्था अहिले छैन् । कसरी सुधार गर्नुहुन्छ ?

हामीले थ्रिजी सेवा सुरु गरेको सात आठ वर्ष भइसक्यो । अहिले हामीले पुरानो नेटवर्क हटाएर नयाँ नेटवर्क विस्तार गरेपछि थ्रिजी सेवा पहिला भन्दा भरपर्दो भएको छ । तै पनि काठमाडौंका केही स्थानहरुमा अझै थ्रिजीको सिग्नल राम्रो देखिएको छैन । उक्त समस्या हटाउन हामीले बिटिएसहरु थप्दैछौं । यो महिना हामीले ३० वटा बिटिएस थप गर्छौं र त्यसपछि सयवटा थप्ने योजना छ । बिटिएस थप गरेपछि काठमाडौं उपत्यकाको थ्रिजी सेवाको गुणस्तरमा सुधार आउँछ ।

कतिपय जिल्लामा अझै राम्रोसँग टावर टिप्दैन । त्यहाँ थ्रिजी सेवा विस्तार गर्न त समस्या हुन्छ होला नी ?

दुर्गम स्थानहरुमा हामीले भ्वाइसका लागि सिडिएमए सेवा विस्तार गरेका छौं । धेरै ठाउँ त्यस्ता छन्, जहाँ टेलिकमको सिडिएमए सेवामात्र पुगेको छ । सिडिएमएले दुर्गम ठाउँमा भ्वाइस सेवा पु¥याएको छ । सोही सिडिएमएबाट हामीले ६५ जिल्लामा ई–भिडियो इन्टरनेट सेवा पु¥याइसकेका छौं । त्यसैले दुर्गम जिल्लामा पनि ई–भिडियोबाट इन्टरनेट चलाउन तथा भिडियो च्याट गर्न सम्भव भइसकेको छ । जिएसएम र सिडिएमए मोबाइलबाट हामीले देशभर इन्टरनेट डाटा सेवा विस्तार गर्ने लक्ष्य राखेका छौं ।

अहिले सबै पुरानो उपकरणलाई विस्थापित गरेर नयाँ उपकरण जडान गर्ने क्रममा छौं । अहिले ल्याएको उपकरण झन्डै–झन्डै फोरजी सेवा दिनसक्ने खालको छ ।

फोरजी सेवा चाहिँ कहिलेबाट सुरु हुन्छ ?

नेपाल दूरसञ्चार प्राधिकरणले फोरजी सेवा सञ्चालनका लागि स्वीकृति दिइसकेको छैन । फोरजीको फ्रिक्वेन्सी स्वीकृतिको पर्खाइमा रहेका छौं । स्वीकृति पाएको केही महिनाभित्रमा फोरजी सेवा उपलब्ध गराउन हामी सक्छौं । प्राधिकरणमा नेतृत्व नभएका कारण निर्णयहरु अलि ढिला भइरहेका छन् ।

तपाईले वाईफाई सेवा पनि यसै वर्षभित्र ७५ जिल्लामा पु¥याउने भन्नुभयो । तर, काठमाडौंमा पनि वाईफाईले राम्रोसँग काम गरेको छैन । गुणस्तर सुधार नगरी विस्तार गरेको सेवाबाट ग्राहकले कसरी लाभ लिन सक्छन ?

हाम्रा विभिन्न खालका ग्राहकहरु हुन्छन् । ग्राहकले एकदमै गुणस्तरको इन्टरनेट खोज्छ भने फाइवरमा जानैपर्छ । वाईफाई सेवा हामीले धेरै पैसा खर्च गर्न नसक्ने ग्राहकहरुलाई लक्षित गरी सञ्चालन गर्न लागेका हौं । यो प्रविधि नै धेरै भरपर्दो होइन । विकसित मुलुकहरुमा सञ्चालन गरेको वाईफाई सेवा हेर्नुभयो भने त्यति राम्रो पाउनुहुन्न । नेपालमा पनि अन्य सेवाप्रदायकको वाईफाई सेवा हेर्नुहुन्छ भने पनि त्यति राम्रो छैन ।

हामीले दिएको सेवा विद्यार्थी वर्ग, एक कप चिया नखाई इन्टरनेट चलाउन खोज्ने खालका ग्राहकहरुका लागि हो । वाईफाई सेवा घन्टौंसम्म नेट चलाएर बसिराख्ने वा डाउनलोड गर्न खोज्ने ग्राहकहरुका लागि ल्याएको होइन । थोरै पैसामा मोबाइलबाटै फेसवुक, ट्वीटर वा युट्युव चलाउने, साना नेपाली साइटहरु खोल्ने, अनलाइन न्यूज पोर्टलहरु हेर्ने कामका लागि वाईफाई सेवा उत्तम रहेको छ ।

वाईफाई सेवाप्रति ग्राहकहरुबाट कस्तो फिडब्याक आइरहेको छ ?

ग्राहकहरुबाट राम्रो फिडब्याक आइरहेको छ । यो सेवालाई हामीले ७५ जिल्लामा पु¥याएर व्यापक रुपमा प्रचार गर्छौं । यो सेवा हामीले घरघरमा पुराउन खोजेको होइन । हटस्पट सेवा मूख्य व्यापारिक केन्द्रहरुमा मात्र उपलब्ध हुन्छ ।

गुनासो नगरी टेलिकमको सेवा उपभोग गर्ने दिन कहिले आउला ?

नेपाल टेलिकमप्रति धेरै जनताको आशा तथा भरोषा छ । टेलिकम शत्प्रतिशत जनताकै सम्पत्ती हो । जनताले अपेक्षा गरेअनुसार शस्तो शुल्क लिएर गुणस्तरिय सेवा उपलब्ध गराउन टेलिकम लागिपरेको छ । विगतको ४ महिनालाई हेर्नुभयो भने पनि माघ १ गतेको अवस्था र जेठ १ गतेको अवस्थामा पक्कै सुधार भएको पाउनुहुन्छ । सुधारको क्रम निरन्तर अगाडी बढिरहेको छ । हाम्रो ठेकेदार, विदेशी कन्सल्ट्यान्ट र नेपाल टेलिकमका इञ्जिनियरहरुले त्रिपक्षिय रुपमा निरन्तर नेटवर्कलाई मनिटर गरिरहेका छन् । नेटवर्क सुधारका लागी हामी दिन दिनै लागिरहेका छौं ।

उपभोक्ताहरु कम शुल्कमा अधिकतम सेवा उपभोग गर्न चाहान्छन्, शुल्क घटाउनेतर्फ पनि तपाईहरुले केही सोचिरहनुभएको छ की ?

डाटाको शुल्क घटाउनुपर्छ भनेर उपभोक्ताबाट माग आइरहेको छ । खासगरी जिएसएम मोबाइलको डाटामा एउटै शुल्क भयो, प्याकेजहरु भए हुन्थ्यो भन्ने ग्राहकहरुको गुनासो छ । हामीले जिएसएम डाटाका प्याकेजहरु पनि छिट्टै ल्याउँछौं । यो आर्थिक वर्षभित्रमै विभिन्न प्याकेजहरु उपभोक्तामाझ ल्याउने तयारीमा छौं ।

थ्रिजीको नेटवर्क देशभर विस्तार भएपछि मात्र नयाँ प्याकेज ल्याउँ भनेर कुरिरहेका हौं । यहि आर्थिक वर्षभित्र हामीले ७५ जिल्लामै थ्रिजी सेवा विस्तार गरिसक्छौं, अनि प्याकेजहरु पनि उपभोक्तामाझ पस्कन्छौं । उपत्यका बाहिर पनि हामीले थ्रिजीमार्फत डाटा सेवा उपलब्ध गराउने सोचमा छौं ।

तीस प्रतिशतभन्दा बढीको ग्राहकहरुको हातमा स्मार्टफोन भएको हुँदा थ्रिजी सेवा चलाउन समस्या हुँदैन । स्मार्टफोनमा थ्रिजी सेवा चलिहाल्छ । उपभोक्ताको सिम पुरानो छ भने पनि हामीले निःशुल्क थ्रिजीमा परिणत गरिदिन्छौं ।

तपाईहरुको डाटा सेवाको माग बढाउने भनेको नेपाली कन्टेन्टले हो । कन्टेन्ट उत्पादनमा पनि तपाईहरुले केही योजना बनाउनुभएको छ ?

ग्राहकलाई डाटा सेवामा आकर्षित गर्नका लागि नेपालीपनका डाटा कन्टेन्टहरुको कमी छ । नेपाली समाज, नेपाली संस्कृतिसँग मिल्दो जुल्दो डाटा कन्टेन्टहरु बढाउनुपर्ने आवश्यकता रहेको छ । त्यसो गर्न सकेको खण्डमा सबै ग्राहकहरुलाई डाटामा आकर्षित गर्न सकिन्छ ।

हाम्रो डाटा सेवाका ग्राहकहरु पनि बढ्दैछन् । हाम्रो डाटाको मार्केट शेयर बढ्दैछ । हामीले डाटा सेवालाई मूख्य फोकस गरेर अगाडी बढिरहेका छौं । डाटाका ग्राहकहरु बढाउनका लागि नेपालीपनका कन्टेन्ट ल्याउन हामीले सहायक आईटी कम्पनी स्थापना गर्ने प्रोसेसमा पनि छौं । यो आईटी कम्पनीले डाटाका कन्टेन्टहरु बनाउने काम गर्नेछ ।

आईटी कम्पनी कस्तो हुनेछ र कहिलेसम्म सञ्चालनमा ल्याउने लक्ष्य राख्नुभएको छ ?

टेलिकमको बोर्डबाट निर्णय भएपछि आईटी कम्पनी दर्ता गर्ने र पार्टनर खोज्ने काममा अगाडी बढ्छौं । कम्पनीको मूख्य काम नेपालीपनका डाटा कन्टेन्टहरु होष्ट गर्ने नै हुन्छ । त्यसबाहेक यो कम्पनीले क्लाउड कम्प्युटिङ, विभिन्न एप्सहरु बनाउनेजस्ता धेरै सेवाहरु उपलब्ध गराउने काम गर्छ । त्यसपछि यसले ई–एजुकेशनको सेवा पनि उपलब्ध गराउनेछ । जस्तै, एसएलसीको ट्युसान भिडियोबाट पढ्न पाइनेछ ।

यसका लागि स्वदेशी वा बिदेशी कस्तो साझेदार खोजिरहनुभएको छ ?

साझेदार स्वदेशी वा विदेशी जो पनि हुन सक्छ । साझेदार बन्नका लागि हामीले सबैलाई खुल्ला राख्ने छौं । यसमा मेजोरिटी हिस्सा कसैको पनि हुने छैन । हिस्सा आधा–आधा हुनेछ ।

तपाईहरुले जतिसुकै राम्रा योजना ल्याएपनि उक्त योजना कार्यन्वयनमा ल्याउन निकै समय लाग्छ । यस्तो प्रतिस्पर्धी बजारमा यसरी निर्णय प्रकृयामा ढिलाई गर्दा कसरी टिक्न सकिन्छ ? अब फाष्ट ट्रयाक समात्नुपर्ने बेला आएको होइन ?

यहि फाष्ट ट्रयाकबाट हिँड्नका लागि हामीले रणनीतिक साझेदार भित्राउँदै छौं । साझेदार भित्राएपछि आर्थिक नीतिहरु खुकुलो हुन्छन्, हामीलाई निर्णय गर्न पनि सजिलो हुन्छ । त्यसपछि हामीलाई प्रतिस्पर्धामा उत्रिन थप सहज हुन्छ । साझेदार भित्राएपछि टेलिकम पनि कर्पोरेट संस्थाको रुपमा अगाडी बढ्छ ।

साझेदारको कुरा भलेको पनि निकै भइसक्यो । कहिलेसम्म कस्तो खालको साझेदार ल्याउँदै हुनुहुन्छ ? यसमा केही ठोस प्रगति भएको छ ?

नेपाल सरकारले विदेशी कन्सलट्यान्ट ल्याएर अडिट गराएपछि हामीले साझेदारका लागि बोलपत्र आह्वान गर्ने प्रकृया अगाडी बढाउँछौं । सन् २०१४ भित्रमै सबै प्रकृया पुरा गरेर बोलपत्र आह्वान गर्ने हाम्रो लक्ष्य रहेको छ । हामीले ४÷५ वटा देशमा दूरसञ्चार क्षेत्रमा लगानी गरेको साझेदार ल्याउँछौं । त्यसो गर्दा उसले विभिन्न देशमा संगालेको अनुभव टेलिकमका सेवाहरुमा प्रयोग गर्न सकिन्छ ।

यो निर्णय नेपाल सरकारले गर्ने हो । टेलिकमले गर्दैन । त्यसो हुँदा छिट्टै निर्णय होला र रणनीतिक साझेदार भित्राउने प्रकृया सुरु होला भनेर अपेक्षा गर्न सकिन्छ ।

रणनीतिक साझेदार भित्राएपनि तपाईहरुको काम गर्ने संयन्त्र, शैली र सोंच त यही हो । साझेदारकै कारण व्यवस्थापन र सेवामा व्यापक सुधार आउँछ भन्न सकिन्छ र ?

रणनीतिक साझेदार भित्राएपछि टेलिकमको निर्णय प्रकृया छिटो हुन्छ । त्यसो हुँदा कुनै प्राविधिक समस्या आउँदा पनि तुरुन्त सामान मगाएर मर्मत गर्न सक्छौं । अर्को कुरा उसले अरु देशमा हाँसिल गरेको अनुभव र ज्ञानबाट यहाँ हामीले नयाँ रणनीतिहरु बनाएर प्रतिस्पर्धामा जान सक्छौं । त्यसैले नयाँ साझेदार भित्रिएको ६ महिनाभित्रमै नेपाल टेलिकमको रुप फेरिन्छ भन्ने मलाई विश्वास छ ।

कुनै सयम बजारमा एकछत्र राज गरिरहेको टेलिकमले पछिल्ला वर्षहरुमा निजी क्षेत्रका दूरसञ्चार कम्पनीहरुसँग प्रतिस्पर्धा गरिरहनुपरेको छ । उनीहरुको आक्रामक मार्केटिङका अघि टेलिकमको उपस्थीति कमजोर देखिन्छ । यसमा कसरी सुधार ल्याउनुहुन्छ ?

अहिलेसम्म हामी मार्केटिङमा अलि पछाडी त छौं । तर, हाम्रो देशभर फैलिएको पूर्वाधारले गर्दा हामी प्रतिस्पर्धामा पछाडी छैनौं । प्रतिस्पर्धीहरु आएर हामीलाई थप उर्जा मिलेको छ । हाम्रो सेवालाई उपभोक्ताले रुचाएका पनि छन् । नेपाल दूरसञ्चार प्राधिकरणको तथ्यांक हेर्नुहुन्छ भने पनि हाम्रो वृद्धिदर अन्य कम्पनीको तुलनामा उच्च रहेको छ ।

टेलिकमको पछिल्लो रिपोर्ट हेर्ने हो भने त नाफा र ग्राहकसंख्या दुबैको वृद्धिदर घटेको देखिन्छ नी ?

हामीले रोयल्टी तिर्न सुरु गरेपछि हाम्रो नाफाको वृद्धिदर घटेको देखिएको हो । हामीले अढाई अर्ब तिर्नुपर्छ । हाम्रो वृद्धिदर घट्नुको कारण मार्केट बाँडिएर होइन । अर्को प्रतिस्पर्धी आएर हाम्रो ग्रोथमा त्यति असर परेको छैन । उनीहरुले पनि ग्राहक बढाइरहेका छन्, हामीले पनि ग्राहक बढाइरहेका छौं ।

कुनै समय टेलिकमको शेयरले नेप्सेमा पुरै हलचल ल्याउने गथ्र्यो । टेलिकमको शेयरमा थोरै तलमाथी भयो भने पनि नेप्सेमा परिसूचकमा ठूलो प्रभाव पथ्र्यो । तर, पछिल्लो समयमा टेलिकमको शेयर कारोबार घट्दै गइरहेको छ । लगानीकर्ताहरुको आकर्षण घट्दै जान थालेको हो ?

मलाई लाग्छ गत एक वर्षमा टेलिकमको शेयर निकै बढ्यो । केही महिना अगाडी ४ सयको हाराहारीमा रहेको मूल्य अहिले ६ सयको हाराहारीमा रहेको छ । तर पनि टेलिकमको शेयर अपेक्षित रुपमा बढ्न नसकेको पक्कै हो ।

कारण के होला ?

नेपालको शेयर बजारमा कम्पनीको प्रफमेन्सले मात्र सबै कुरा डिसाईड गर्दैन । त्यहाँ अरु खालको चलखेल पनि हुने गर्छ । त्यसैले यहि नै कारण हो भनेर भन्न गाह्रो छ । अहिले त हाम्रो बुक क्लोज हुने बेला पनि आयो । हाम्रो साधारणसभा नजिकिएको छ । त्यसको पनि प्रभाव हुन सक्छ ।

टेलिकमले पुनः लगानीकर्ताको विश्वास जित्न सक्ने अवस्था आउन सक्छ ?

यसका लागी हामीले विशेष गरी आफ्नो बजार विस्तारमा जोड दिनुपर्छ । डाटा सेवाको बजार विस्तारमै हामी केन्द्रीत रहन्छौं । त्यसपछि नयाँ–नयाँ खालका सेवाहरु ल्याउँछौं । मलाई विश्वास छ, वाईफाई सेवा निकै पपुलर भएर जानेछ । यस्तै खालका अरु सेवाहरु पनि ल्याउन सक्यौं भने कम्पनीको बजारमा इमेज अझै राम्रो हुनेछ र शेयरको भाउ पनि बढ्नका लागी बाटो खुल्छ ।

त्यसैगरी, हामीले विस्तारै कर्मचारीहरुको सोंचमा समेत परिवर्तन ल्याउने ध्याउन्नमा लागेका छौं । त्यसका लागी अलिकति समय लाग्छ । कर्मचारीका समस्याहरु टप लेभलले सुन्यो भने उनीहरुलाई काम गर्न पनि हौसला मिल्छ । त्यहि भएर मैले दिनमा डेढ दुई घण्टा कर्मचारीहरुसँग विताउँछु ।

टेलिकमले लगानी विविधिकरण गर्न खोजेको हो ?

लगानी विविधिकरण गर्ने हाम्रो योजना छ । सोही अनुरुप हामीले विद्युतमा लगानी गरिरहेका छौं । अब हामीेले आइटीको सहायक कम्पनी र म्यानेजरियल सर्भिसेज कम्पनी पनि खोल्छौं । इन्फास्ष्ट्रक्चर सेयरिङ कम्पनी पनि खोल्ने योजनामा रहेका छौं । यो चाहीँ नेपाल दूरसञ्चार प्राधिकरणसँगको सहकार्यमा खोल्छौं होला ।

मेरो सोँच पहिले सकेसम्म आफ्नै क्षेत्रमा लगानी गर्ने हो । त्यसपछि मात्र बाहिरका क्षेत्रमा लगानी गर्ने हो । तत्कालका लागी हामीले यि तीनवटा क्षेत्रमा लगानी गर्ने सोच बनाएका छौं ।

जीएसएम मोबाइल र डाटामा नयाँ नयाँ कम्पनीले पनि काम सुरु गर्दैछन् । अर्थात् तपाईहरुका प्रतिस्पर्धी बढिरहेका छन् । उनीहरुको उपस्थीतिले मार्केट लिडरका रुपमा तपाईको पोजिसन डगमगाउने अबस्था देखिन्छ नी ?

मैले प्रतिस्पर्धी कम्पनीलाई चुनौतिका रुपमा लिएको छैन । एउटा सहकर्मीको रुपमा लिएको छु । हाम्रो त्यस्तो झगडा पनि छैन र अस्वस्थ प्रतिस्पर्धा पनि छैन । उहाँले ल्याएको रणनीति र हाम्रो रणनीति त्यति जुध्दैन । त्यसैले कुनै समस्या आउने देखिएको छैन । हामी बलियो भएर अगाडी बढ्यौं भने भोलीका दिनमा पनि हामीलाई कुनै चुनौती आउने छैन । त्यसका लागी हामीले पारदर्शी मूल्यलाई कायम नै राख्नुपर्छ । हाम्रो नेटवर्कको पहुँच अरु प्रतिस्पर्धीको भन्दा बढी छ । त्यसलाई थप विस्तार गर्दै लैजान सक्यौं भने हामी दूरसञ्चारको क्षेत्रमा लिडर नै भएर अगाडी बढ्न सक्छौं ।

ADSL को गुणस्तर सुधार गर्दै टेलिकम, इन्टरनेट आउँदैजाँदै गर्ने समस्या अझै केही दिन रहने

2014-05-30T00:17:00.003-07:00

काठमाडौं, bizmandu.com नेपाल टेलिकमले एडिएसएल इन्टरनेटको गुणस्तर बढाउन सिस्टम अद्यावधिक गरिरहेको छ ।

काठमाडौं उपत्यकाभित्र एडिएसएलको गुणस्तर राम्रो नभएको उपभोक्ताले गुनासो गरेपछि टेलिकमले गुणस्तर बढाउन लागेको हो ।

केहीदिन यता एडिएसलमा कहिले इन्टरनेट चल्ने कहिले बन्द हुने समस्या आइहरेको छ । टेलिकमका वरिष्ठ इन्जिनियर विमलेश झाका अनुसार एडिएसएलमा समस्या आएकोले सिस्टम अपग्रेडको काम भइहरहेको छ । उनी भन्छन्, 'उपत्यकाका ग्राहकले एडिएसएलको सेवा राम्रो भएन भनेर गुनासो गरिरहनु भएको छ। अहिले फेरी समस्या झेलिरहनुभएको छ । हामी समस्या समाधान गर्दै छौँ । अझै केही दिन समस्या भइरहन्छ ।'

टेलिकमले अहिले इन्टरनेट विलिङ सिस्टम (आइविएस)लाई अद्यावधिक गरिरहेको छ । अहिले उपत्यकामा कतिपय एडिएसएल प्रयोगकर्ताको घरमा इन्टरनेट नै चलेको छैन भने कतिपय ग्राहकको एकछिन चल्ने र बन्द हुने समस्या आएको छ । वररिष्ठ इन्जिनियर झा भन्छन्, 'हामीले आइविएस पनि अपग्रेड गरिरहेका छौँ ।' उनका अनुसार उपत्यका बाहिर भने एडिएसएलमा कतै समस्या आएको छैन ।

झाका अनुसार अन्य हार्डवेयरमा पनि समस्या आएकोले फेर्ने काम भइरहेको छ । त्यसैले केही समय ग्राहकले एडिएसएलमा झल्दै आएको समस्या रहिरहेने झा बताउँछन् । 'हामीले यति नै दिनमा समस्या समाधान हुन्छ भनेर भन्न सक्दैनौँ । हार्डवेयर र आइविएसमा सुधार गरेपछि उपभोक्ताले अहिलेको जस्तो असुविधा पाउनुपर्दैन,' उनले भने ।

पूर्व, मध्य र सुदूरमा एकैसाथ टेलिकमको थ्रीजी

2014-05-21T04:20:00.001-07:00

कारोबार दैनिक, काठमाडौं, ६ जेठ- नेपाल टेलिकमले पूर्वाञ्चल, मध्यपश्चिमाञ्चल र सुदूरपश्चिमाञ्चल विकास क्षेत्रका विभिन्न जिल्लाहरुमा जीएसएम प्रविधिको थ्रीजी मोबाइल सेवा सञ्चालनमा ल्याएको छ ।कम्पनीले पूर्वाञ्चल विकास क्षेत्रको मोरङ र सुनसरी जिल्लाका विभिन्न स्थानमा ३३ वटा बीटीएस टावर, मध्यपश्चिमाञ्चल विकास क्षेत्रका बाँके, बर्दिया, सुर्खेत, दैलेख, दाङ, रोल्पा, सल्यान, प्युठान र जुम्ला जिल्लामा ३७ वटा बीटीएस टावर र सुदूरपश्चिमाञ्चल विकास क्षेत्रका सम्पूर्ण ९ वटा जिल्लामा ३७ वटा टावरमार्पmत थ्रीजी सेवा सञ्चालनमा ल्याएको हो । थ्रीजी सेवा जिल्ला सदरमुकाम र यसको आसपास तथा प्रमुख व्यापारिक केन्द्रहरुमा सञ्चालनमा ल्याइएको कम्पनीले जनाएको छ । अन्य क्षेत्रहरुमा निकट भविष्यमै सञ्चालनमा ल्याउने तयारीका साथ हाल उपकरण जडानको क्रममा रहेको कम्पनी प्रवक्ता गुणकेशरी प्रधानले बताइन् ।

कम्पनीको यो सेवामार्पmत उपभोक्ताहरुलाई भ्वाइस सेवाका अतिरिक्त उच्च गतिको डेटा डाउनलोड तथा अपलोड गर्ने सुविधा उपलब्ध हुनेछ । काठमाडौं उपत्यकाको चक्रपथभित्रका सीमित क्षेत्रमा केही वर्षखि सञ्चालनमा रहेको थ्रीजी सेवालाई सुदृढ तथा विस्तार गर्ने कम्पनीको योजनाअनुसार काठमाण्डौं उपत्यकाभित्र विस्तार गरी सञ्चालनमा ल्याइसकिएको प्रवक्ता प्रधानले बताइन् । टेलिकमले जीएसएम मोबाइलको १ करोड लाइन विस्तार गर्ने कार्यक्रमअन्तर्गत यो सेवा सञ्चालनमा ल्याएको हो । कम्पनीले १ करोड लाइन विस्तारलाई २ वटा प्याकेजमा वर्गीकरण गरी काम गरिरहेको छ । “प्याकेज बी” अन्तर्गत काठमाडौं उपत्यका र पश्चिमाञ्चल विकास क्षेत्र रहेका छन् भने “प्याकेज ए” अन्तर्गत पूर्वाञ्चल, मध्यपश्चिमाञ्चल, सुदूरपश्चिमाञ्चल तथा काठमाडौं उपत्यकाबाहेकको मध्यमाञ्चल विकास क्षेत्र छन् ।

टेलिकमको नाफा कछुवा गतिमा

2014-05-19T23:57:00.002-07:00

सरस्वती ढकाल, कारोबार दैनिक काठमाडौं, ५ जेठ- सरकारी स्वामित्वको नेपाल टेलिकम नाफावृद्धिको अनुपात बर्सेनि

खस्किँदै गएको छ । गत वर्ष (०६९÷७०) सुरुका ९ महिनामा ८ अर्ब ४९ करोड खुद नाफा कमाएको टेलिकमले चालू वर्षको यही अवधिमा ८ अर्ब ६० करोडमात्र नाफा गरेको छ । यो १.२७ प्रतिशतमात्र वृद्धि हो । वार्षिक रूपमा हेर्ने हो भने अवस्था अझै दयनीय छ । आव ०६५÷६६ मा २८.०८ प्रतिशतको वृद्धि देखेको टेलिकम ०६९÷७० सम्म आइपुग्दा –२.६७ प्रतिशतमा सीमित भएको छ । ०६५÷६६ पछि ०६७÷६८ मा मात्रै १२.५३ प्रतिशतको वृद्धि छ । ०६६÷६७ मा ५.८९ प्रतिशतको वृद्धि छ भने ०६८÷६९ मा आउँदासम्म –४.२९ प्रतिशतमा खुम्चिएको छ । चालू आवको तेस्रो त्रैमाससम्म टेलिकमले २९ अर्ब १२ करोड ३४ लाख रुपैयाँ कारोबार गरेको छ । ०६९÷७० का ९ महिनामा २७ अर्ब ५६ करोड ८३ लाख रुपैयाँ थियो । यो अवधिमा १७ अर्ब ६१ करोड २६ लाख रुपैयाँ खर्च गरेको छ । गत आवको सोही अवधिभन्दा यो वर्ष लाइसेन्स नवीकरण शुल्क र कर्मचारीको तलब वृद्धि भएकाले नाफा उल्लेख्य बढ्न नसकेको कम्पनी प्रवक्ता गुणकेसरी प्रधानले बताइन् । “तलबसँगै कार्यसम्पादन, मर्मतसम्भार, नयाँ प्रविधि, उपत्यकाबाहिर बीटीएस जडानमा खर्च बढेको छ, आम्दानीअनुसार फ्रिक्वेन्सी शुल्क र रोयल्टी पनि बढेको छ,” उनले भनिन् ।

दोस्रो त्रैमासमा कम्पनीले १९ अर्ब ६९ करोड ९४ लाख रुपैयाँ आम्दानी गर्दा ५ अर्ब ५९ करोड २६ लाख रुपैयाँ नाफा गरेको थियो । ३ महिनामा नाफा ३ अर्ब रुपैयाँले बढेको छ । चालू आवमा सरकारलाई २१ अर्ब ३५ करोड ३१ लाख रुपैयाँ राजस्व बुझाउने उसको प्रक्षेपण छ । त्यस्तै, करपछिको मुनाफा ११ अर्ब ९६ करोड २५ लाख रुपैयाँ हुने प्रक्षेपण पनि उसको छ । कम्पनीले ९ महिनामा सेवाबाट २६ अर्ब ३२ करोड रुपैयाँ र ब्याज तथा अन्य अम्दानीबाट २ अर्ब आम्दानी गरेको छ । गत वर्षको सोही समयमा यस्तो आम्दानी क्रमशः २५ अर्ब २७ करोड र २ अर्ब रुपैयाँ थियो । कम्पनीले साधारण टेलिफोन, जीएसएम मोबाइल, सीडीएमए, एडीएसएल, वाईम्याक्स, ईभीडीओ तथा अन्तर्राष्ट्रिय÷अन्तर्देशीय गरी दर्जनभन्दा धेरै सेवा विस्तार गरेको छ । टेलिकमले चालू आवमा करिब २९ लाख थप टेलिफोन वितरण गर्ने योजना बनाएको छ । जीएसएमतर्फ २० लाख, सीडीएमएतर्फ ८ लाख र साधारण टेलिफोनतर्फ २७ हजार लाइन वितरणको लक्ष्य राखिएको प्रवक्ता प्रधानले बताइन् । टेलिकममा ९१ प्रतिशत सेयर सरकार, ०.०३ प्रतिशत नागरिक लगानी कोष, ३.९७ सर्वसाधारण र ४.५ प्रतिशत टेलिकम कर्मचारीको हिस्सा छ । उसको चुक्ता पुँजी १५ अर्ब रुपैयाँ छ ।

वर्ष दिनमा देशैभर थ्रीजी सेवा, टेलिकमका प्रबन्ध निर्देशक भट्टराईसँगको अन्तर्वार्ता

2014-05-08T01:44:00.001-07:00

www.bizmandu.com

नेपाल टेलिकम सरकारी स्वामित्वका अन्य सस्थान र कम्पनीको तुलनामा सफल मानिन्छ, नाफा धेरै छ, सरकारलाई गैह्रकर राजस्व र नाफा सर्वाधिक बुझाउँछ । तर, गुणस्तरमा भने उपभोक्ताको निकै ठूलो गुनासो छ । नेपाल टेलिकमका प्रबन्ध निर्देशक अनुपरञ्जन भट्टराईलाई बिजमाण्डू सम्पादक सरोज काफ्लेले सोधे बार्षिक अर्बौ नाफा कमाउने कम्पनीमा गुणस्तरमा सँधै किन समस्या ?

नेपालका सफल संस्थानहरुको नाम लिनुपर्दा पहिलादेखि नै नेपाल टेलिकम नाम आउँथ्यो, कम्पनीको वित्तीय अवस्था पनि निकै राम्रो देखिँदै आएको छ । तर, अहिले पहिलाको जस्तो अब्बल गति देखिन छोडको छ, चालु आर्थिक वर्षको पुषसम्मको नाफा बृद्धिदर हेर्ने हो भनेपनि अब अगाडि जान केही बाधा देखिएको हो ?

ग्रोथरेट कम हुनुमा एउटा कारण अब हाम्रो अब हाम्रो मार्केट भ्वाइस स्याचुरेट हुने तिर गइसक्यो । त्यही भएर पनि नयाँ ग्राहक बनाउन पहिले जस्तो सकिँदैन । सबैको हातमा मोबाइल पुगिसक्यो । त्यसैले गर्दा ग्राहकको ग्रोथरेट कम देखिएको हो । अब आर्थिक रुपमा भने हामीले अरु नयाँ सेवा र ग्राहक ल्याएर नाफा बढाउनु पर्ने देखिन्छ । मोबाइलको भ्वाइस र एसएमस बाट मात्रै हाम्रो नाफा बढ्न सक्दैन ।

अब तपाईंहरु जाने भनेको डाटा हो । डाटालाई धेरै कुराले सपोर्ट गर्नुपर्छ । डाटा कति क्वालिटीको छ, कति छिटो चल्छ भन्ने पनि ग्राहकले हेर्छन् । तर त्यसमा त भ्वाइसमा जति छिटो प्रोग्रेस गर्नु सक्नु भएको छैन ?

डाटामा अब एउटा समस्या त डिभाइसको भयो । डिभाइस चाहिँ ८/१० हजार पर्छ । आठ हजार भन्दा कममा एउटा स्मार्ट फोन पाइँदैन । डाटा चलाउने ग्राहकलाई त स्मार्टफोन नभइ भएन । फिचर फोनबाट त डाटा धेरै कम चलाउन सकिन्छ । त्यसैले एउटा त स्मार्टफोनको पेनिट्रेसन बढाउनु पर्‍यो । त्यसपछि लिट्रेसीको कुरा गर्दा मेरो विचारमा स्मार्टफोनमा आइकनहरु हुने भएकोले इलिट्रेट मान्छेले पनि हेरेर गर्न सक्छन् । जस्तै भाइवरमा फोटो हेरेर पनि मान्छेले कुरा गर्न सक्छन् । त्यसैले लिट्रेसीले धेरै असर नपार्ला । मुख्यचाहिँ बाइङ पावर बढाउनुपर्छ । अब स्मार्टफोन भनेको कम्युनिकेसनको लागि बाहेक एउटा टुल पनि हो । त्यसैले हामीले धेरै खालको एपहरु अथवा कन्टेन्टहरु बनाउनु पर्यो, जसले गर्दा ग्राहकहरु डाटा युज गर्न आकर्षित हुन्छन् ।

तपाईको जवाफ अनुसार त सहरी उपभोक्ता नै अझै पनि मुख्य टार्गेट हुन् भन्ने देखिन्छ ?

सहरी पनि हुन् र गाउँमा पनि हाम्रो आफ्नै युनिभर्सल कम्युनिकेसन सर्भिस सुरु गर्न लागेका छौँ । त्यो चाहिँ भाइवर, फेसबुक, स्काइप सबै मिलाएर हो । त्यो भयो भने गाउँका मान्छेलाई पनि आफन्तसँग मुखै हेरर कुरा गर्न पनि सजिलो हुन्छ । र, नेपाल टेलिकमका ग्राहकलाई हामी मासिक प्याकेजमा सस्तोमा त्यो प्रयोग गर्न दिन्छौँ । त्यसले गर्दा म्यासेज आदानप्रदान गर्न एसएमएस भन्दा सस्तो पर्छ ।

त्यो कहिले कहिलेदेखि सुरु हुन्छ ?

यो अहिले फाइनल टेस्ट भइराखेको छ । अब एक महिनाभित्र सुरु गर्न सकिन्छ ।

न्युनतम शुल्कमा भन्नुभएको छ त्यो भनेको कति हो ?

त्यो हाम्रो कमिटीले अध्ययन गर्दै छ । अहिले नै निर्क्यौल निकालि सकेका छैनौँ ।

दूरसञ्चार प्रधिकरणबाट अनुमति चाहिँ लिइसक्नुभएको हो ?

लिइसकेका छैनौँ । प्राधिकरणमा पठाउन बाँकी छ । यसलाई पनि केही समय लाग्छ ।

यो प्याकेजमा के के हुन्छ ?

यो प्याकेजमा टेक्स्ट भइहाल्यो, भ्वाइस हुन्छ । त्यसपछि भिडियो, अनि फोन पनि हुन्छ । हामी इजी फोनलाई यसमा मिलाउँछौं । जसले गर्दा ग्राहकले पैसा हालेपछि ब्यालेन्स हुँदासम्म विश्वको जुनसुकै कुनामा रहेका आफन्तसँग सजिलै कुरा गर्न सक्छन् । र, ग्राहकहरु नेपाल बाहिर हुँदा नेपालमा कल गर्न पनि सजिलै सक्छन् । यसमा रोमिङ पनि लाग्दैन । यो एप्स मोबाइल र ल्यापटप दुबैमा चलाउन सकिन्छ । समग्रमा यो इजी फोन हो । शुल्क मिनेटका आधारमा लाग्छ ।

अरु प्रतिस्पर्धी कम्पनीको तुलनामा मार्कटिङ र ग्राहक विस्तारमा नेपाल टेलिकम पछाडि परेको हो ?

हामी अब चाहिँ एग्रेसिभ्ली मार्केटिङ गर्दैछौं ।

मुनाफा आर्जन गर्ने र कर तिर्नेमा नेपाल टेलिकम एक नम्बर कम्पनी । तपाईंको दृष्टमा कहिलेसम्म यो एक नम्वरमा रहिरहन्छ ?

अहिले हामीले भिजन २०१६ भनेर ल्याएका छौं । यसमा सन् २०१६ सम्मको रणनीति ल्याएका छौँ । यसलाई सफल बनाउन सक्यौं भने, लक्षित प्रडक्टहरु समयमा नै ल्याउन सक्यौं भने अझै पनि हामी एक नम्वरमा रहिरहनेछौँ ।

यसको मतलव सन् २०१६ सम्मचाहिँ तपाईंहरु एक नम्वरमा रहिरहनुहुन्छ ?

हैन । टेलिकम क्षेत्रमा हामीले योजना बनाउँदा प्रत्येक तीन वर्ष भन्दा बढीको योजना बनाउन मिल्दैन । किनभने प्रविधि हरेक तीन तीन वर्षमा फेरिन्छ । त्यसैले तीन वर्षपछिको लागि अहिले भन्न अलि गाह्रो छ । अहिले हामी तीन वर्षको लागि मात्रै रणनीति बनाउँदै छौँ ।

नेपाल टेलिकम (त्यतिखेरको दुरसञ्चार कम्पनी)ले लामो समय बजारमा एकाधिकार पायो । अरु कम्पनीहरु आएनन् । अहिले प्रतिश्पर्धिहरु आइ सके पछि यत्रो वर्षको एकाधिकारमा हामीले थोरै मात्रै काम गर्‍यौँ भन्ने लाग्छ कि लाग्दैन ?

त्यो बेला अहिले जति सजिलो पनि थिएन । किनभने मोबाइल थिएन । ल्याण्डलाइन एक्सपान्ड गर्न त्यति सजिलो थिएन । मोबाइलका लागि एउटा टावर २/३ हप्तामा जडान गरेपछि तीन हजार ग्राहक थप्न सकिन्छ भने ल्याण्डलाइनमा पोल गाड्न पर्‍यो अर्थात् खाल्डो खन्न पर्‍यो । तार टाग्न पर्‍यो । त्यसैले पनि त्यतिबेला सजिलोसँग एक्सपाण्ड गर्न सकिँदैन थियो।

जति गर्‍यौँ त्यति ठिकै हो भन्ने लाग्छ ?

त्यो बेला ठिकै हो । अर्को कुरा हाम्रा हरेक योजना राष्ट्रिय योजना आयोगबाट पास हुनुपर्थ्यो त्यतिबेला । सबैभन्दा सुरुमा १० हजार मात्रै मोबाइल ल्याएका थियौँ । त्यो बेला एकलाख ल्याउनुपर्छ भनेर मैले भनेको थिए । तर निर्णय गर्नेहरु सहमत भएनन् । त्यसबेला त म त म्यानेजर मात्रै थिएँ । निर्णय गर्नेहरुले त्यो भिजुअलाइज गर्न सकेनन् । त्यस्तो अवस्थामा मोबाइलमा जाउँ झन् कसरि भन्ने ?

एनटिसीले मार्केट अगाडी जान्छ भनेर अनुमाननै गर्न नसकेको हो ? कि छिमेकी मुलुकको ग्रोथरेट कम हुँदा त्यसको प्रभाव हामीकहाँ परकेो हो ?

त्यो पनि हो । हाम्रो यहाँ नीति बनाउँदा छिमेकी देशहरुलाइ हेर्ने चलन छ । २० वर्ष अघि भारत र चीन हामी भन्दा निकै पछाडि थिए। त्यसले गर्दा पनि हाम्रा निर्णयकर्ताको डिसिजन नपुगेको हुनसक्छ ।

नेपाल टेलिकमलाई सरकारले सफ्ट कर्नरमा राख्छ भन्ने प्रतिश्पर्धि कम्पनीहरुको गुनासो छ, टेलिकमलाई जति लाभ छ त्यति लाभ हामीलाई छैन, हामीलाई लेभल प्लेइङ फिल्ड थोरै भयो भन्छन् ?

हामीलाई चाहिँ त्यसको उल्टो लाग्छ । प्राइभेट कम्पनीको काम जति छिटो हुन्छ सरकारी कम्पनीको त्यति छिटो हुन पाउँदैन । अर्थात हाम्रो त्यतिछिटो हुँदैन । हामीलाई विद्युत जडान गर्नु पर्‍यो भने प्राइभेट कम्पनीलाई भन्दा दोब्बर समय लाग्छ । हाम्रो निर्णय हुँदा पनि ढिलै भइराखेको हुन्छ ।

अनुमित लिने प्रक्रिया पुरा गर्नुपर्ने कारणले नै ढिला भएको हो ?

अब प्राइभेट कम्पनीसँग कुनै जादू होला । जस्ले गर्दा उस्ले छिटो काम गर्न सक्छ ।

अहिलेसम्मको नाफाको आधार हेर्दा धेरै हदसम्म ट्यारिफ नै हो । तर ग्राहकबाट के गुनासो आउँछ भने, जुन आधारमा टेलिकमले आफ्नो नेटवर्क विस्तार गर्छ र ग्राहकको आधार पाएको छ, त्यही अनुपातमा हामीलाई छुट छैन । नाफा उच्च हुँदा पनि टेलिकमले छुट दिँदैन भन्ने गुनासो छ ?

मैले हर्दा चाहिँ हाम्रो सेवा सबैभन्दा सस्तो छ । र अहिले हामीले सिडिएमएमा एक महिनाको नाइट कल २० रुपैयाँमा दिइराखेका छौँ । त्यसैले हामीले सक्दो सस्तो र सुलभमा सेवा पुर्‍याउने प्रयास गरिराखेका छौँ र डाटा पट्टी पनि हामी कसरी अझ सस्तो पार्ने भन्ने अभ्यास गरिराखेका छौँ । इन्टरनेटको पनि हामी होमवर्क गरिराखेका छौँ । सायद छिट्टै नै हाम्रो डाटाको नयाँ ट्यारिफहरु आउँछन् ।

दक्षिण एसियालाई हेर्दा पनि नेपाल टेलिकमको शुल्क महङ्गो नै देखिन्छ ?

मलाई लाग्छ प्राइसमा हामी सस्तोमा नै छौँ । इण्डियामा एउटा समय आएको थियो कल गर्‍यो भने उल्टै पैसा थपिदिने । तर अबचाहिँ फ्रिक्वेन्सीको ब्यान्डविथको, लाइसेन्सको समस्या भयो। अब चाहिँ त्यहाँ पनि सस्तो छैन । इण्डियामा अझै रोमिङको पैसा लिन्छ । एउटा राज्यबाट अर्कोमा जानुपर्‍यो भने रोमिङको पैसा काट्छ । हामीले त ल्याण्डलाइनबाट मोबाइलमा फोन गर्दा एक रुपैयाँमा नै नेपालभरी हुने व्यवस्था गरेका छौँ । एसटिडी पनि भएन अब । त्यसले गर्दा हामी साउथ एसियामा सबैभन्दा सस्तोमध्येमा नै पर्छ ।

एसटिडी एक रुपैयाँमा झारे पछि नाफाको बृद्धिदरमा असर पर्‍यो ?

हामीले भ्वाइसको रेट सस्तो गर्दा ग्राहकहरुले अझै धेरै लामो समय कुरा गर्छन् । जसले गर्दाखेरी हाम्रो नेटवर्कले थामेसम्म हामीलार्इ सस्तो गर्दा नाफामा फरक पर्दैन ।

नेपाल टेलिकमको संरचना नै अलि भद्दा छ । कर्मचारीहरुको संख्या पनि पाँच हजार भन्दा बढी छ । जुन रेटमा तपाईहरु ग्रोथ गरिरहनुभएको छ त्यो आधारमा कम्पनीका लागि धेरै संख्या हो ?

हो, हामी पनि कम्पनीलाई अलि स्लिम बनाउने प्रोसेसमा छौँ।

अब हामी आउट सोर्सिङलाई बढी प्राथमिकता दिँदैछौँ । त्यसले गर्दा नयाँ कर्मचारी निकै कम भर्ना गर्छौँ । र रिटायर्ड भएर जाँदाखेरी घट्दो क्रममै छ ।

योजना पनि होला यति वर्षभित्र यति कर्मचारी कटौती गर्ने भन्ने ?

आगामी दुई वर्षमा हाम्रो कर्मचारी सङ्ख्या ३० प्रतिशतले घट्नेछ ।

रणनैतिक साझेदार नियुक्तिको प्रकिया सुरु गर्नुभएको छ । अब यो कहिले सकिन्छ ?

यो प्रक्रिया निकै लामो छ । कुनैपनि बाधा अवरोध भएन भने दुई वर्ष भित्र साझेदारले हामीकहाँ काम गर्न सक्छ । अर्थात २०७३ सालको वैशाख महिनादेखि काम सुरु गर्नसक्छ ।

रणनैतिक साझेदार त्यत्तिकै भित्र्याउने कुरा हैन। साझेदार आउने वित्तिकै हाम्रो कम्पनीको ग्रोथ रेट यस्तो हुन्छ भनेर केही प्रक्षेपण छ ? केही भिजनसहित रणनीतिक साझेदार ल्याउँदैछौँ ?

हामीलाई रणनीतिक साझेदार चाहिने मुख्य दुई कारण छन् । एउटा खरिद प्रक्रिया सजिलो होस् । अर्को अनुभव हो । कमसेकम पाँचवटा देशमा अप्रेसन भएको साझेदार खोजिरहेका छौँ । पाँच वटा देशको अनुभवबाट हामीलाई पनि प्रडक्टहरु नयाँ मूल्य नयाँ रणनीतिका साथ ल्याउन सहयोग पुग्छ । पूँजीका लागि यो रणनीति ल्याएका होइनौँ ।

हामी एउटा आइटीको सहायक कम्पनी स्थापना गर्न लागेका छौँ । कम्पनीको मुख्य उद्देश्य डाटाको कन्टेन्ट बढाउने हो । नेपालमै विभिन्न डाटाको कन्टेन्ट होस्ट गर्ने र नयाँ कन्टेन्ट बनाउने । जस्तै एसएलसीको ट्युटोरियल नै बनाउने वा प्लस २ को ट्युटोरियल । अहिले राम्रो शिक्षकले दिनमा ५०/६० जना बिद्यार्थी पढाउन सक्छ भने त्यस पछि थोरै पैसाले हजारौ विद्यार्थीलाई युट्युव जस्तो भिडियोबाट पढाउन सकिन्छ । त्यो गर्दा नेपाल टेलिकमलाई डाटाको युजबाट फाइदा हुन्छ । त्यो कम्पनीले क्लाउड अपरेटिङका विभिन्न एप्सहरु बनाउने र नेपालको सांस्कतिक पक्ष वा ग्राहकको चाहना अनुसारको कन्टेन्टहरु विकास गर्ने काम गर्छ । सहायक कम्पनीमा हाम्रो सेयर आधा भन्दा बढी हुँदैन । साझेदारमा अर्को नेपाली वा विदेशी प्राइभेट कम्पनी हुन सक्छ ।

सधैँभरी उपभोक्ताको कुरा के सुनिन्छ भने, टेलिकमको गुणस्तरका कारण हामीले धेरै दु:ख पायौँ । राजधानीमा केही वर्ष यताको गुणस्तरमा पछिल्लो समय केही सुधार भएको हो । तर उपत्यका बाहिर गएपछि अवस्था धेरै खराब छ ?

अब हामीले राजधानीमाचाहिँ पुरानो नेटवर्कलाई नयाँ नेटवर्कले विस्थापन गरिसकेका छौँ । केहि समय अघिसम्म रिङरोड भित्र थियो अहिले भ्याली सबैतिर विस्थापित गरिसक्यौँ । त्यसपछि केही स्थानहरुमा अझैपनि सिग्नल कमजोर भएको हुँदा हामी सयवटा जति विटिएस थप्दैछौँ राजधानीमा । त्यसपछि राजधानीमा चाहिँ समस्या आउँदैन । काठमाडौँ बाहिर पनि नयाँ एक करोड लाइनको प्रोजेक्टबाट अब देशभरी नै नयाँ सिस्टम ल्याउँदैछौँ । त्यसले गर्दा अब एक वर्ष भित्र गुणस्तर सुधार भइसक्छ र थ्रीजी सेवा पनि उपलब्ध हुन्छ । अब एक वर्षमा देसै भरी थ्रीजी सेवा पुग्छ । सिडिएमएमा त हामीले ६५ जिल्लामा इभिडियो सेवा दिइसक्यौ । इभिडियोबाट भिडियो हेर्ने र भिडियो च्याट गर्न सकिन्छ ।

व्यवस्थापनले बेला बेलामा गुणस्तर सुधार गर्‍यौँ भन्छ तर उपभोक्ताले त्यसको अनुभव किन गर्न पाउँदैनन् ?

सिडिएमएमा चाहिँ तपाईंले भनेजस्तो ग्राहक बढेर डाटा इन्टरनेट केही स्लो भएको हुनसक्छ । त्यस्तो ठाउँमा हामी फेरि क्षमता वृद्धि गर्छौँ । र, जिएसएममा हामी अहिले पुरानो सिस्टमबाट नयाँमा सिफ्ट हुने क्रममा रहेको हुँदा कहिलेकाही केही समस्या आउन सक्छ । धेरै लामो समयको लागि समस्या रहन्न । बढिमा ५/७ मिनेट हुन्छ ।

८५ प्रतिशत बढि टेलिकम पेनिट्रेसन भइसक्यो । अब नयाँ क्षेत्र के देख्नु भएको छ त बजारको लागि ?

हो, भ्वाइसका ग्राहक अब सकिन थालेका छन् । अबको बजार डाटामा छ । अहिले भएका ३०/३४ प्रतिशत डाटाका ग्राहकलाई नै ८५ प्रतिशतमा पुर्‍याउने हो । ग्राहकलाइ डाटा सेवामा फोकस गरेर व्यापक रुपमा एक्सपान्ड गर्‍यौँ भने अझै पनि आर्थिक स्थिती बलियो नै हुने देखिन्छ ।

त्यो अनुसारको तयारी छ ?

डाटामा जानको लागि जान तयारी छ । थ्रीजी प्रोजेक्टको काम भइरहेको छ । यसलाइ थ्रीजीको पनि सबभन्दा माथिल्लो लेवलको पौने फोरजी सम्म भन्न मिल्छ । २०१५ सम्म ग्राहकको मागलाई यसले व्यहोर्न सक्छ । र त्यसपछि हामी फोरजीमा जान्छौँ । हामी मुख्यमुख्य सहरका लागि फोरजीमा पनि तयार नै छौँ । अब हामीले फ्रिक्वेन्सी पायौँ भने २/३ महिनाभित्रै फोरजी चलाउन सक्छौँ । अहिले हामी फ्रिक्वेन्सी कुरिराखेका छौँ ।

डाटाको प्याकेजमा ग्राहकहरु अलि असन्तुष्ट छन् ?

हो । हामी यसको लागि नयाँ प्याकेज सहित नयाँ ट्यारिफ ल्याउँदै छौँ । त्यसपछि थप विभिन्न प्याकेजहरु ल्याउँछौँ । र, डाटाको भ्यालिडिटी बढाउने तयारी पनि गरिरहेका छौँ ।

मोबाइलमा चलाइने बाहेक अरु इन्टरनेट उपत्यका बाहिर लाने योजना के छ ?

अलि सस्तो इन्टरनेट सेवा प्रदान गर्न हामीले वाइफाइ सुरु गरेका छौँ । अहिले यो २० जिल्लामा पुगिसक्यो । र, चालु आर्थिक वर्षभित्र ७५ वटै जिल्ला सदरमुकाममा पुर्‍याउने लक्ष्य छ वाइफाइ । त्यसमा ग्राहकसँग मोबाइल नभए पनि इन्टरनेट चलाउन सम्भव छ ।

पहिला हटस्पटमा वाइफाइ निशुल्क बनाउनु भयो, ग्राहक तान्न मात्र हो ?

पहिला त ग्राहकलाई कसरी यो सेवा लिने भन्ने सिकाउन नि:शुल्क गरियो। अरु अप्रेटरहरुले पनि वाइफाइ सेवा सुरु गर्द नि:शुल्क नै दिएका थिए। जस्तो ब्रोडलिंङकले पनि सुरुमा नि:शुल्क दिएको थियो। त्यसपछि ग्राहकलाई कुन एरियामा यसको कभरेज छ थाहा हुन्छ किनभने हामी वाइफाइ कार्पेट कभरेज गर्दैनौँ । यो गर्न धेरै गाह्रो छ । धेरै मान्छेहरु एकत्रित हुने ठाउँहरुमा मात्रै वाइफाइ सेवा दिन्छौँ । त्यसैले हामीले नि:शुल्क सेवा दिँदा कहाँ हटस्पट रहेछ कसरी चलाउने भन्ने पनि थाहा भयो । र, अरु प्याकेजहरु पनि हामी ल्याउँछौँ । हाम्रो ट्यारिफ स्विक्रित भइसकेको छैन । भएपछि अरु प्याकेजर पनि ल्याउँछौँ ।

कम्तिमा तीन बर्ष एक नम्बरमा रहि रहन्छौँ भन्नु भयो, यसका लागि त अरु योजना पनि चाहिएलान् ?

हाम्रो मुख्य फोकस डाटामै हो । त्यसैले हामी एउटा आइटीको सहायक कम्पनी स्थापना गर्न लागेका छौँ, अहिले प्रोसेसमा छौँ । कम्पनीको मुख्य उद्देश्य डाटाको कन्टेन्ट बढाउने हो । नेपालमै विभिन्न डाटाको कन्टेन्ट होस्ट गर्ने र नयाँ कन्टेन्ट बनाउने । जस्तै एसएलसीको ट्युटोरियल नै बनाउने वा प्लस २ को ट्युटोरियल । अहिले राम्रो शिक्षकले दिनमा ५०/६० जना बिद्यार्थी पढाउन सक्छ भने त्यस पछि थोरै पैसाले हजारौ विद्यार्थीलाई युट्युव जस्तो भिडियोबाट पढाउन सकिन्छ । त्यो गर्दा नेपाल टेलिकमलाई चाहिँ डाटाको युजबाट फाइदा हुन्छ । त्यो कम्पनीले क्लाउड अपरेटिङका विभिन्न एप्सहरु बनाउने र नेपालको सांस्कतिक पक्ष वा ग्राहकको चाहना अनुसारको कन्टेन्टहरु विकास गर्ने काम गर्छ । सहायक कम्पनीमा हाम्रो सेयर आधा भन्दा बढी हुँदैन । साझेदारमा अर्को नेपाली वा विदेशी प्राइभेट कम्पनी हुन सक्छ । बोर्डबाट स्वीकृत भएपछि चाँडै दर्ता गर्छौँ ।

टेलिकमले आगामी एक महिनासम्म छुट दिने, CDMA नाइट प्याकेज र GSM सिम खरिदको छुट यथावत

2014-05-06T22:44:00.004-07:00

काठमाडौं । bizmandu.com नेपाल टेलिकमले १० औं वार्षिकोत्सवको अवसरमा गत माघदेखि तीन महिनाको लागि दिएको छुट थप एक महिनाका लागि दिने भएको छ । कम्पनीकै नेटवर्क भित्र हुने कल छुटलाई निरन्तरता दिइएको टेलिकमले जनाएको छ । सिडिएमए नाइट प्याकेज र जिएसएम, सिडिएमए पोष्टपेडको नयाँ सिम खरिदको छुटलाई निरन्तरता दिइएको छ । टेलिकम प्रवक्ता गुणकेशरी प्रधानका अनुसार वार्षिकोत्सवको अवसर पारेर तीन महिनाको लागि सिडिएमए मोबाइलबाट राति कल गर्दा दिइएको छुट आगामी जेठ २३ गतेसम्मलाई निरन्तरता दिइएको हो । उनले भनिन्, ‘सिडिएमएबाट नेपाल टेलिकमको नेटवर्क भित्र कल गर्दा जम्मा २० रुपैयाँमा लिइने गरेकोमा अब एक महिनाका लागि यो सुविधा थप गरिएको छ ।’ टेलिकमले राति १० बजेदेखि बिहान ६ बजेसम्म नाइट प्याकेज दिँदै आएको छ । यसैगरी टेलिकमले सिडिएम र जिएसएम पोष्टपेड किन्दा लिँदै आएको १४ सय ३० रुपैयाँलाई बढाएर पन्ध्र सय १० रुपैयाँ बनाइएको छ । टेलिकमले छुट दिनु भन्दा अघि सिडिएएम र जिएसएम पोष्पेडको नयाँ सिम किन्दा २१ सय पर्थ्यो । प्रवक्ता प्रधानले भनिन् , ‘हामीले उपभोक्ताको मागलाई ध्यान राखेर पोष्टपेडको नयाँ सिम लिँदा पुरानै मूल्यमा फर्केनौँ । डिस्काउन्टलाई निरन्तरता दिँदै १५ सय १० रुपैयाँ बनाएका छौं ।’ टेलिकमले अन्य छुटलाई सोमबारदेखि नै लागु हुनेगरी निरन्तरता दिएको जनाएको छ ।

कम्पनीकै नेटवर्क भित्र हुने कल छुटलाई निरन्तरता दिइएको टेलिकमले जनाएको छ । छुटमा

फ्रेन्डस् एन्ड फेमिली सेवा वापत सिडिएमए पोष्टपेड मोबाइलको लागि प्रतिमिनेट ५५ पैसा
सिडिएमए प्रिपेडका लागि प्रतिमिनेट ७५ पैसा
बोल्न र सुन्न नसक्ने व्यक्तिहरुका लागि विक्री वितरण गरिएको सिम र रिमबाट कम्पनीकै नेटवर्कमा एसएमएस गर्दा प्रति एसएमएस वापत २० पैसा
महिला सामुदायिक स्वास्थ्य स्वयंसेविकाहरुको लागि ल्याइएको विशेष प्याकेज अन्तर्गत वितरण गरिने सिम र रिमबाट कम्पनीकै नेटवर्कभित्र हुने प्रत्येक १० मिनेट कलको १ रुपैयाँको दरले आगामी १ वर्षसम्म बोनस वितरण गरिने
इभिडियो सेवाको समयावधी समेत थप गरेको छ । २५ एमबी तथा ३ सय एमबी डाटा प्याकेज क्रमश: २ दिन र १५ दिन भित्र चलाइक्नुपर्ने, ३ सय एमबीको १५ दिनको लागि १ सय ३०, ५ सय एमबीको १ महिनाको लागि दुई सय, दुई जिबीको २ महिनाको लागि ७ सय ६० र ५ जिबीको २ महिनको लागि १ हजार सात सय र १० जिबीको २ महिनाको लागि २४ सय शुल्क तोकिएको टेलिकमले जनाएको छ ।

नेपाल टेलिकमद्वारा छुटमा निरन्तरता

2014-05-06T04:16:00.001-07:00

काठमाडौँ, वैशाख २३ गते । नेपाल दूरसञ्चार कम्पनी (नेपाल टेलिकम)ले दशौं वार्षिकोत्सवको उपलक्ष्यमा ल्याएको छुट सोमबारदेखि तीन महिनाका लागि आफ्ना विभिन्न सेवामा छुटलाई निरन्तरता दिएको छ । जसअनुसार फ्रेन्स एण्ड फेमिली सेवाबापत सीडीएमए पोस्पेड मोबाइलका लागि प्रतिमिनट ५५ पैसा तथा सीडीएमए प्रिपेडका मोबाइलका लागि प्रतिमिनेट ७५ पैसा कायम गरिएको छ । बोल्न र सुन्न नसक्ने व्यक्तिहरूका लागि बिक्री वितरण गरिएको÷गरिने सिमबाट कम्पनीकै नेटवर्कमा एमएमएस गर्दा प्रतिएसएमएस २० पैसा कायम गरिएको कम्पनीले जनाएको छ । इभीडीओ सेवामा डाटाको भोलुमअनुसार विभिन्न दर र समयको प्याकेज बिक्रीको व्यवस्था मिलाइएको छ । ११ रुपियाँ दरको २५ एमबीको डाटाको अवधि दुई दिन, तीनसय एमबी डाटाका लागि १३० रुपियाँ र अवधि १५ दिन, पाँचसय एमबी डाटाका लागि दुई सय रुपियाँ र अवधि एक महिना कायम गरिएको छ । त्यस्तै, ७६० दर कायम गरिएको दुई जीबी डाटाको अवधि दुई महिना हुनेछ भने एक हजार सातसय दरको पाँच जीबी डाटाको अवधि दुई महिना र दुई हजार चारसय रुपियाँ दर कायम गरिएको १० जीबी डाटाको अवधि पनि दुई महिना हुनेछ । महिला सामुदायिक स्वास्थ्य स्वयंसेविकाहरूलाई विशेष प्याकेजअन्तर्गत वितरण गरिने सिमकार्डबाट कम्पनीकै नेटवर्क भित्र हुने प्रत्येक १० मिनेट कलको एक रुपियाँका दरले आगामी एक वर्षसम्म बोनस वितरण गरिने कम्पनीको विज्ञप्तिमा जनाइएका छ ।

बजार हिस्सा बढाउँदै टेलिकम

2014-04-28T22:12:00.001-07:00

काठमाडौं- मङ्गलबार १६ बैशाख, २०७१, नागरिक नेपाल टेलिकमले सेवा र गुणस्तरलाई आक्रमक रुपमा विस्तार र सुधार गर्ने भएको छ। टेलिकमको प्रतिस्पर्धी बजारमा थप सेवा विस्तार गरी गुणस्तरलाई सुधार गर्ने टेलिकमले थि्रजी सेवा दिने भएको छ। टेलिकमले दूरसञ्चार बजारमा आफ्नो हिस्सा बढाउन र सेवाग्राहीलाई नयाँ सेवा सुविधा प्रदान गर्ने योजनाबद्ध तरिकाले काम गरेको जनाएको छ। टेलिकमले आफ्नो सेवा, सुविधा, अवस्था र योजनाका विषयमा जानकारी दिन सोमबार राजधानीमा पत्रकार अन्तर्क्रिया कार्यक्रम गर्दै थप सेवा प्रदान गर्ने र गुणस्तरमा व्यापक सुधार ल्याउने प्रतिबद्धता जनाएको हो। टेलिकमले उपत्यकाभित्रको मोबाइल सेवाको नेटवर्कलाई थि्रजीमा परिवर्तन गरेको छ। नेटवर्क परिवर्तन गर्न २ वटा लटमा ४ सय १५ वटा बिटिएस टावरहरुमा नयाँ उपकरण जडान गरी सञ्चालन गरेको जनाएको छ। टेलिकमले जेटिइद्वारा निर्माण गरेको पुरानो नेटवर्कलाई हुवाइ कम्पनीको थि्रजी सेवाको जिएसएम नेटवर्कमा प्रतिस्थापन गरेको छ। डाटाको प्रयोगकर्ता बढ्दै गएपछि टेलिकमले उच्च गतिको थि्रजी सेवा सञ्चालन गरेको हो। कम्पनीले नयाँ उपकरणका कारण डाटा र भ्वाइस सेवा दुवैको गुणस्तरमा सुधार आएको जनाएको छ। टेलिकमले चाँडै देशभर थि्रजी र वाइफाइ हटस्पट सेवा विस्तार गर्ने जनाएको छ। टेलिकमका प्रबन्ध निर्देशक अनुपरञ्जन भट्टराईले काठमाडौं उपत्यकाभित्रका मोबाइलमा नयाँ नेटवर्क परिवर्तन गरेसँगै मोबाइल सेवाका बिटिएसहरुलाई अप्टिकल फाइबरले जोडेको बताए। उपत्यकाभित्रका अधिकाँश टावरलाई अप्टिकल फाइबरले जोडेको र विस्तारै अरु टावरहरुमा पनि जोडिने प्रक्रियामा रहेको छ, उनले भने। टेलिकमले मुलुकभर जिएसएम मोबाइलको एक करोड लाइन विस्तार गर्ने योजना निरन्तर अगाडि बढेको र प्याकेज ए र बी गरेर छुट्टाइएको योजनाअनुसार अधिकाँश टावरमा थि्रजी मोबाइल सेवाका उपकरण जडान भएको उनले बताए।

टेलिकमले डाटाको व्यापारमा केन्द्रित हुन आइटी कम्पनी सञ्चालन गर्नका लागि अध्ययन गरिरहेको जनाएको छ। टेलिकमले सहायक कम्पनीमार्फत निजी कम्पनीसँगको साझेदारीमा आइटी कम्पनी स्थापना गर्ने भएको हो। इन्टरनेटमा आधारित हरेक कुरा निर्माण गर्नका लागि टेलिकमले अध्ययन गरेर चाँडै नै कम्पनी स्थापना गर्ने जनाएको छ। टेलिकमले इन्टरनेट कन्टेन निर्माण गर्नका लागि कम्पनी स्थापना गर्न लागेको हो। त्यस्तै ग्राहक सेवा केन्द्र ६ महिनाभित्र सञ्चालन गर्ने टेलिकमले जनाएको छ। टेलिकमले काठमाडौंसँगै देशका प्रमुख सहरहरुमा वाइम्याक्स प्रविधिको वाइफाइ सेवा सञ्चालन गरेको जनाएको छ। टेलिकमले पूर्वको ताप्लेजुङ, पाँचथर, इलाम, झापा, मोरङ, सुनसरी र धनकुटा त्यस्तै मध्यमाञ्चलको धनुषा, महोत्तरी, चितवन, पर्सा र वारामा वाइफाइ सञ्चालन गरिसकेको छ। पश्चिमाञ्चलको कास्की, गोर्खा, रुपन्देही, नवलपरासी र पाल्पा र मध्यपश्चिमाञ्चलको बाँके, सुर्खेत, दाङ र जुम्ला, सुदुर पश्चिमाञ्चलको कञ्चनपुर, कैलाली, डोटी र बैतडी जिल्लाको प्रमुख सहरका वाइफाइ सेवा सञ्चालन भएको र अन्य जिल्लाहरुमा उपकरण जडानको काम भैरहेको टेलिकमले जनाएको छ। टेलिकमले रणनीतिक साझेदारी भित्राउने प्रक्रियालाई तीब्रता दिएको बताउँदै केही कम्पनी इच्छुक देखिएको जनाएको छ। प्रबन्ध निर्देशक भट्टराइले रणनीतिक साझेदारीको काम द्रुत गतिमा भैरहेको र चाँडै नयाँ निर्णय हुने बताए। हामीले हाम्रो सेवा र गुणस्तरमा लगानी गर्दै जलविद्युतमा समेत लगानी गरिहेको उनले बताए। हामीले उपल्लो तामाकोशीमा ६ अर्ब ऋण सहयोग र त्रिशुली त्रि बीमा २० प्रतिशत साझेदारी गरेको उनले बताए। टेलिकमको टेलिफोन सेवाको ग्राहक फागुन मसान्तसम्ममा १ करोड २ लाख ४९ हजार पुगेको छ। जिएसएम मोबाइलको ८४ लाख २९ हजार, सिडिएमए फिक्स्ड तथा मोबाइल सेवाका ग्राहक ११ लाख ७१ ह्जार तथा पिएसटिएन टेलिफोन सेवाका ग्राहक ६ लाख ४७ हजार रहेका छन्। त्यस्तै डाटा सेवा प्रयोगकर्ता ४२ लाख ४७ हजार पुगेको छ।