An Druma Mór

Deireadh ar fad le Nuacht24 clóite

2010-08-31T03:35:00.001-07:00

Tá an suíomh seo druidte. Tháinig deireadh le Nuacht24 clóite i mí Aibreáin 2010. Buíochas le gach duine a chuidigh linn is a thacaigh linn.

NUACHT24 clóite ar an Chéadaoin

2010-04-23T07:46:00.003-07:00

Foilseofar an chéad eagrán eile de Nuacht24 Dé Céadaoine seo .

An Druma Mór ag druidim -

2010-04-23T05:05:00.000-07:00

Tá An Druma Mór ag druidim faoi láthair. ár mbuíochas as bhur dtacaíocht le bliain agus breis anuas agus tá súil as againn go mbainfidh sibh oiread de shult as cibé seirbhís nua a bheidh á cur ar fáil feasta is a bhain sibh as an seirbhís seo.

Bónas Boucher

2010-04-22T02:27:00.000-07:00

Chuir polaiteoirí fáilte roimh an scéal go bhfuil ceannasaí Bhanc na hÉireann, Ritchie Boucher, gan bónas ar luach €1.5m a lorg dá phinsin. Seachas éirí as obair in aois 55 bliain leanfaidh an tUasal Boucher ag obair leis go dtí go mbeidh sé 60 bliain d'aois, rud a laghdóidh an bónas. Bhí álltacht ar cheardchumainn, polaiteoirí agus gnáthdhaoine nuair a tugadh le fios go raibh mír ina chonradh ag an Uasal Boucher a ligfeadh dó éirí as in aois 55 bliain agus pinsin ar luach €367,570 sa bhliain aige. Tá an tUasal Boucher 51 bliain d'aois anois agus saothraíonn sé tuarastal €623,000 sa bhliain. Inné dúirt Ciarán Mulvey ón Choimisiún um Chaidreamh Oibreachais go gcuirfeadh an bónas agus a macasamhail i mbaol an chomhaontú faoi phá agus coinníollacha oibre a rinneadh idir ceardchumainn agus rialtas ag Páirc an Chrocaigh ar na mallaibh.

SCAMALL DÁNA!

2010-04-21T10:22:00.001-07:00

Tá moladh mór ag dul do Gaelshirts. I gcónaí chun cinn. Maith iad.

Amharc - http://gaelshirt.spreadshirt.co.uk/

'Ní íocfaimidne' - O'Leary

2010-04-21T05:39:00.001-07:00

Deir Michael O Leary go bhfuil sé sásta dul chuig an chúirt chun nach mbeadh de dhualgas ar Ryanair íoc as costais lóistíne na bpaisinéirí sin de chuid Ryanair a fágadh i sáinn thar lear mar gheall ar an scamall luaithreán ó bholcán na hÍolsainne. Dar leis nach bhfuil ciall le riail na hEorpa, riail 261, a thugann ar aerlínte íoc as riar ar phaisinéirí a fhad is go bhfuil moill ar eitleáin. Deir ceannasaí Ryanair nach bhfuil rún aige na costais seo a íoc agus go bhfuil sé sásta dul chuig an chúirt chun a chruthú go bhfuil an ceart ag Ryanair gan a bheith ag glacadh freagracht as rudaí nach raibh faoina smacht.

Aerthaisteal ar ais - ar éigean

2010-04-21T05:34:00.001-07:00

Tógfaidh sé roinnt laethanta chun go mbeadh gnáthsheirbhís ar fáil ó Aer Lingus, Ryanair agus mórchomhlachtaí eile tugadh le fios inniu. Osclaíodh aerspás na hÉireann agus aerspás na Breataine go luath ar maidin agus diaidh ar ndiaidh tá na haerlíntí ag tabhairt faoi sheirbhísí éagsúla a chur ag dul. Meastar go dtógfaidh sé roinnt laethanta chun go mbeadh eitleáin ag iompar paisinéirí mar is nós (ar acht nach mbíonn meath ar chúrsaí mar gheall ar bholcán Eyjafjallajokull). Tá ceisteanna á gcur faoin chur chuige a bhí ag na húdaráis eitleoireachta le seachtain anuas agus amhras ar roinnt aerchomhlachtaí go mba ghá cosc iomlán a chur ar eitiltí mar a rinneadh.

Fiosrúchán ar bhás fir

2010-04-21T05:33:00.000-07:00

Tá fiosrúchán ar bun ag Omudsman an Gharda faoi bhás fir i gcillín i stáisiún an Gharda Síochána i dTamhlacht. Fuarthas an fear marbh aréir tamall beag i ndiaidh do na Gardaí an fear a ghabháil. Ghabhadh an fear, 38 bliain d'aois, as drochiompar poiblí i dTamhlacht thart faoi 8.00 aréir.

An tUachtarán chun Gaelscolaíocht a cheiliúradh

2010-04-21T05:31:00.000-07:00

Déanfaidh an tUachtarán Máire Mhic Giolla Íosa agus daltaí ó gach Ghaelscoil sa tuaisceart ceiliúradh ag Coláiste Feirste amárach, Déardaoin, ar bhunú na céad Gaelscoile ar Bhóthar Seoighe agus bunú na Gaeltachta ansin. Beidh na céadta duine i láthair don ócáid agu beidh an tUachtarán ag díriú isteach ina chaint ar an cheannródaitheacht a léirigh Gaeil Bhéal Feirste in am dorcha sa tuaisceart ar fhiontair chultúir a chuaigh chun leasa an sochaí ar fad.

Haskell Wexler sa Chultúrlann

2010-04-21T05:30:00.001-07:00

Tá Haskell Wexler ar na scannánaithe is mó clú i stair Mheiriceá. D'áirigh an Cinematrogaphers Guild i Meiriceá go raibh sé ar dhuine den deichniúr cineamatagrafadóirí is tábhachtaí i stair na scannán. Agus b'iontach mar sin gur thug sé cuairt ar an Chultúrlann i mBéal Feirste an tseachtain seo chun caint a dhéanamh faoina obair agus faoi scannánaíocht mar chuid de Fhéile Scannán Bhéal Feirste. Cuireadh mórfháilte roimhe. Tá trí hOscar buaite ag Haskell. Orthu sin Oscar a bhain sé as 'My Lai Veterans,' an scannán fáisnéise is fearr 197o, sraitgh d'agallaimh iontacha faoi sléacht My Lai le linn chogadh Vítnaem. Ba é a rinne an ghrianghrafadóireacht ar 'One Flew Over the Cuckoo’s Nest', 'In the Heat of the Night' agus 'Blade Runner' mar aon le go leor scannáin iontacha eile. Bhi sé anseo go deireannach i 1943 mar mhairneálach i gcabhlach Mheiriceá. (Bliain roimhe sin, chuir U-bád a long go tóín poill, ba é aan duine deireanach a d’fhág an long pollta agus chaith sé coicís ar bhád tarrthála a dheas do Masagascar.)

Tubaiste don turasóireacht

2010-04-20T05:42:00.000-07:00

Tá an tionscail turasóireachta ag cailleadh €9m sa lá mar gheall ar an chur isteach ar eitiltí thug an tAire Máire Ní hAinifín le fios inniu. Dar léi go mbíonn suas le 16,000 turasóir sa lá ag teacht go hÉireann i mí Aibreáin de ghnáth ach go bhfuil sin stopaithe ar fad anois. Agus thug Aer Lingus le fios inniu go bhfuil siad ag cailleadh €5m sa lá mar gheall ar an ghéarchéim. Deir Pádraig Ó Céidigh, ceannasaí ar Aer Arann, gur tubaiste do ghnó na turasóireachta an cur isteach ar eitleáin nó go dtagann an deichniú cuid de líon turasóirí a thagann go hÉireann, go dtagann siad i mí Aibreáin.

Ionsaí eile ar siopa siabhráin

2010-04-20T05:41:00.002-07:00

Rinneadh damáiste do siopa siabhráin (head shop) i mBaile Brigín aréir. Thosaigh tine ag an siopa díreach roimh an mheánoíche agus rinneadh damáiste go leor d'aghaidh an siopa. Bhí sraith de ionsaithe ar siopaí siabhráin ar fud na tíre agus i mBaile Átha Cliath dódh roinnt acu go talamh. An tseachtain seo caite ionsaíodh siopa siabhráin i nDún Dealgan le buama artola. Tá drugaí dleathacha áirithe ar díol i siopaí siabhráin ach tá an rialtas ag breath reachtaíocht a thionscnamh go luath chun díol na ndrugaí seo a chosc. I rith an ama tá rialtas na Breataine i ndiaidh cosc dlí a chur ar mephedrone, a bhí ar na drugaí a bhí á ndíol i roinnt de na siopaí siabhráin.

Géarchéim Nationwide

2010-04-20T05:41:00.001-07:00

Deir an lucht bainistíochta nua ag Irish Nationwide gur deistíneach ar fad an cleachtas a bhí i réim ag an bhanc sna blianta a d'imigh. Dar leo gur chuir cuntasóirí seachtracha in iúl don iarbhord ag an bhanc agus don iarRiailaitheoir Airgeadais roinnt uaireanta go raibh an banc ag glacadh le gnó ardriosca agus go raibh siad ag ligean iasachtaí le amhantraithe. Ach rinneadh neamhairde dá n-imní agus leanadh don chleachtas. Chaill an banc €2.5 billiún anuraidh, suim atá níos mó ná an t-airgead a shaothraigh an banc sa 137 bliain atá sé ar an tsaol. Tá an Irish Nationwide ag lorg cúnamh airgid ar lucht €2.7 billiún ón rialtas agus tá tuarascáil á dréachtú don Aontas Eorpach ag soiléiriú na roghanna atá ag an bhanc feasta. Orthu sin tá moladh go scorfaí den bhanc thar tréimhse ama. íocadh bonás €1m le hiarchathaoirleach Irish Nationwide, Michael Fingleton, i bhfómhar 2008 agus dar le ceannasaí nua an bhainc, Gerry Mc Ginn, go bhfuil litir seolta aige chuig an Uasal Fingleton ag iarraidh air an bonás sin a aisíoc le Nationwide. Níor tharla sin go fóill agus dar leis an Uasal Mc Ginn go bhfuil an banc ag coinneáil súl ar an cheist sin.

Bás Philly Mc Guinness

2010-04-20T05:40:00.001-07:00

Tá na céadta fógra comhbhróin ar shuíomh Facebook Phillip, 'Philly' Mc Guinness, i ndiaidh dó bás a fháil as gortú a bhain dó agus é ag imirt dá chlub ag deireadh na seachtaine seo caite. Thit sé agus de thaisme bhuail a chloigeann i gcoinne ghlúine imreoir eile. Tugadh chuig an ospidéal i Sligeach ar dtús é agus ar ball go hospidéal i mBaile Átha Cliath. Ach cailleadh é aréir. Deir Uachtarán Chumann Lúthchleas Ghael, Christy Cooney, gur buille trom do theaghlach mhór an Chumainn fud na tíre agus gur dona le gach duine bás Phillip. D'imir Phillip d'fhoireann Liatroime agus bhí a bheirt dhearthair ag imirt sa chluiche céanna am an taisme.

Imeachtaí Goldman Sachs le fiosrú sa Ríocht Aontaithe

2010-04-20T05:38:00.000-07:00

Thug Riailaitheoir Airgeadais na Breataine le fios ar maidin inniu go bhfuil sé chun tosú gan mhoill ar fhiosrúchán ar Goldman Sachs. Roinnt laethanta ó shin d'fhógair na húdaráis i Meiriceá go bhfuil siadsan ag cur an dlí ar Goldman Sachs agus iad den bharúil go raibh calaois ag baint le cuid den ghnó a rinne siad le blianta beaga anuas.

Buille do al Qaeda san Iaráic

2010-04-19T12:56:00.000-07:00

Deir Joe Biden, LeasUachtarán Mheiriceá go bhfuil buille millteanach trom tugtha do Al Qaeda san Iaráic. Bhí sé ag tagairt do mharú beirt cheannaire de chuid al Qaeda san Iaráic,Abu Ayyub al-Masri, and Abu Omar al-Baghdadi. Maraíodh saighdiúir Meiriceánach san ionsaí a tharla i mbaile soir ó Bagdad ag deireadh na seachtaine.

Eitiltí amárach?

2010-04-19T05:13:00.000-07:00

Deir Dave Murphy ó Met Éireann gurb é an scéal is déanaí ná go bhfuil an bolcán san Íoslainn a ba chúis leis an stop ar aerthaistil ag maolú anois agus gur seans maith go mbeidh eitleáin in ann taisteal ó Éirinn amárach. Tá deasceal ann maidir leis an ghaoth fosta rud a fhágann go bhfuil Met Éireann muiníneach go mbeidh eitiltí ag taisteal amárach. Ach beidh cosc ar eitiltí go Meiriceá go gceann roinnt laethanta eile go fiú sa chás is go gceadítear eitiltí chuig an Eoraip amárach faoi mar atáthar ag tuar.

Uachtarán nua sa Chipir Thuaidh

2010-04-19T01:43:00.000-07:00

Tá buairt faoina bhfuil i ndán don Chipir i ndiaidh do náisiúnach Tuirceach an toghchán Uachtaránacha i dtuaisceart an oileáin a bhaint. Bhuaigh Dervis Eroglu ar an tUachtarán reatha, Mehmet Ali Talat . Ní raibh ach bearna beag eatarthu. Ach ciallaíonn sé seo go mbeidh fear i gceannas sa Chipir atá ar son neamhspleáchais seachas athaontú an oileáin, rud a chuirfidh olc ar an Aontas Eorpach agus ar eagrais eile idirnáisiúnta.

Gradam an Phiarsaigh le bronnadh go luath

2010-04-19T01:36:00.000-07:00

Bronnfaidh an tAire Pat Carey, Roinn Gnóthaí Pobail, Comhionannais agus Gaeltachta, bronnfaidh sé Gradam an Phiarsaigh ar bhuaiteoir na bliana seo
(Ní sceitear ainm an bhuaiteora go dtí an oíche)
Déardaoin, 22 Aibreán 2010 in Ionad Cultúrlann na hÉireann, Baile na Manach, Co. Átha Cliath

Cá fios! Michael D

2010-04-19T00:06:00.000-07:00

Deir Michael D Higgins nach bhfuil sé curtha as an áireamh aige go ligfeadh sé dá ainm dul chun tosaigh mar iarrthóir ar son Pháirtí an Lucht Oibre i dtoghchán na hUachtaránachta ar an bhliain seo chugainn. Dar leis go raibh go leor daoine i dteagmháil leis agus iad ag iarraidh dul chun cinn ach deir sé nach ndéanfaidh sé cinneadh go dtí go mbeidh an scéal pléite ag craobhacha is cumainn an pháirtí. Luadh ainm Fergus Finlay chomh maith agus caint ag dul faoi cé a sheasfaidh ar son an pháirtí i dtoghchán na hUachtaránachta ar an bhliain seo chugainn.

Ionsaí ar teach in Longfort

2010-04-19T00:00:00.000-07:00

Deir na Gardaí go ndearnadh ionsaí de shaghas éigin ar theach ar an Longfort aréir. Ionsaíodh an teach roimhe seo le buamaí piobáin. Cuireadh fios ar an Gharda go mall aréir go raibh toit ag teacht ón teach in aice le Meathas Troim (Edgeworthstown). Fuarthas giorraisc agus i ndiaidh dóibh é sin a scrúdú ar feadh roinnt uaireanta thug an t-arm le fios gur buama bréagach a bhí ann.

Cosc ar eitleáin le bheith i bhfeidhm go dtí an Luan ar a laghad

2010-04-18T06:00:00.000-07:00

Thug Údarás Éitlíochta na hÉireann le fios Dé Domhnaigh go mbeidh aerspás na hÉireann druidte go dtí 1.00 amárach ar a laghad. Agus táthar buartha go mairidh an chosc ar eitilt ón tír seo go gceann píosa maith níos faide nó tá an cuma ar an scéal nach mbeidh mórathrú ar aimsir agus mar sin nach scaipfear an scamall deannaigh ó bholcán san Íoslainn.

Ath toghadh Phádraig Mhic Fhearghusa - preas ráiteas

2010-04-17T16:21:00.000-07:00

Tá teachtaí tar éis Pádraig Mac Fhearghusa ó Chraobh Thrá Lí a ath-thoghadh mar Uachtarán ar an eagraíocht don tríú bliain as a chéile ag Ard-Fheis Chonradh na Gaeilge 2010 san Óstán Strand, Luimneach inniu, 17 Aibreán 2010. Bhí an bua ag Mac Fhearghusa ar Sheán Ó hAdhmaill ó Craobh na nGael Óg a bhí in iomaíocht d’Uachtaránacht Chonradh na Gaeilge don chéad uair.

Is Cathaoirleach ar Chraobh Thrá Lí é Mac Fhearghusa mar aon le ball gníomhach de Bhuanchoiste agus de Choiste Gnó an Chonartha le tamall maith de bhlianta. Is eagarthóir cumasach é ar an iris mhíosúil Feasta é, atá faoi chúram Clódhanna Teoranta, comhlacht foilseacháin an Chonartha.

Cabhróidh taithí uile Mhic Fhearghusa leis an eagraíocht go dtí seo leis Conradh na Gaeilge a threorú agus a neartu sa bhliain amach roimhe agus tá an tUachtarán Mac Fhearghusa ag díriú ar na spriocanna atá sonraithe sa Dréacht-Straitéis 20 Bliain don Ghaeilge a neartú; ar neartú na heagraíochta ar an talamh; agus ar chúrsaí oideachais na Gaeilge a fheabhsú.

Dúirt Pádraig Mac Fhearghusa, Uachtarán Chonradh na Gaeilge: “Is léir go bhfuil sé i gceist ag ardstátseirbhísigh áirithe an Ghaeilge a ruaigeadh as an gcóras stát má ligtear leo; is mór an náire nár thug an Roinn Oideachais agus Scileanna aitheantas d’oiread agus gaelscoil amháin le hoscailt i mbliana, cuir i gcás, agus is mithid don Chonradh agus do phobal uile na Gaeilge troid go fíochmhar i gcoinne an naimhdeas seo agus tacú lena leithéid de Ghaelscoil Ráth Tó atá ag oscailt gan aitheantas i Meán Fómhair."

Is cathaoirleach ar Ghaelcholáiste Chiarraí, Trá Lí é Uachtarán an Chonartha, ar eagraigh sé a bhunú, agus bhí lámh aige i mbunú trí Ghaelscoil eile leis. Níos suntasaí fós b’fhéidir, is iarchathaoirleach agus bunaitheoir Ghaelscoil Mhic Easmainn, Trá Lí é, scoil a sheas in aghaidh iarracht na Roinne Oideachais deireadh a chur le luath-thumoideachas iomlán trí Ghaeilge le hImlitir 44/2007.

Arsa an tUachtarán Mac Fhearghusa: “Beidh mé ag obair i gcomhar leis an bpobal áitiúil chun an Conradh agus an teanga a chothú ón mbonn aníos. Is ar scáth a chéile a mhaireann na daoine agus tá an Conradh ag brath ar thacaíocht an phobail le seasamh a ghlacadh in aghaidh naimhde na teanga sa státchóras.”

Tréaslaíonn baill an Chonartha leis an Uachtarán ath-thofa agus guíonn siad gach rath ar an obair a bheas le déanamh i bpáirt leis sa bhliain amach romhainn.

Ní bheimid ag dul isteach le Fianna Fáil - SDLP

2010-04-17T13:51:00.000-07:00

Deir ceannasaí an SDLP Margaret Ritchie nach mbeidh an páirtí ag aontú le Fianna Fáil a fhad is go bhfuil sise ina ceannaire ann. Dúirt sí nach bhfuil rún dá laghad ag an SDLP aontú le Fianna Fáil ach gur rún di caidreamh maith a chothú idir an pháirtí agus na páirtithe uilig ó dheas.

Pádraig Mac Fhearghusa atofa ina Uachtarán

2010-04-17T07:26:00.000-07:00

Táthar ag tuairisciú go bhfuil Pádraig Mac Fhearghusa atofa ina Uachtarán ar Chonradh na Gaeilge ag an Ard Fheis i Luimneach inniu. Tuileladh eolais agus tuairisciú ag http://www.ustream.tv/channel/ard-fheis-chonradh-na-gaeilge-2010