An Druma Mór

Gunnaí aimsithe i Luimneach

2009-11-10T10:22:00.000-08:00

Tháinig na Gardaí ar thrí ghunnán i Luimneach tráthnóna. Bhí na gunnaí i bhfolach i bPáirc Naomh Mhuire. Deir na Gardaí go bhfuil an chuardach seo agus cuardaigh eile sa tsiúil acu mar gheall ar eolas cinnte.

Céim chun cinn do Chultúrlann McAdam - Ó Fiaich

2009-11-10T08:28:00.000-08:00

Dhearbhaigh Ciste Idirnáisiúnta na hÉireann inniu go bhfuil siad chun deontas ar luach £500,000 a cheadú d'fhorbairt na Cultúrlainne ar acht go ndéanann an roinn ó thuaidh atá freagrach as cúrsaí cultúrtha, DCAL, maitseáil air. Céim eile sa treo ceart ach caithfear airgeadf maitseála a fháil. Má aontaíonn DCAL a sciar siúd a thabhairt bainfear úsáid as an airgead chun an Chultúrlann a athmhaisiú agus chun cur leis an fhoirgneamh le go mbeadh sé níos lárnaí d'fhorbairt an Cheathrú Gaeltachta.

Cáineadh ar Kenny

2009-11-10T04:33:00.000-08:00

Tá RTÉ chun machnamh ar an bhealach is fearr chun plé le briseadh isteach ar chlár cúrsaí reatha den saghas a tharla ar Frontline aréir. Bhí Pat Kenny ag tabhairt chun deiridh agallamh leis an Aire Máire Ní hAinfín nuair a thosaigh fear sa lucht féachana ag tabhairt amach dó. Dar leis an fhear go raibh sé ag fanacht leis na blianta chun aird a tharraingt ar an mhór airgead a shaothraíonn Pat Kenny. Chuir sé i leith an tUasal Kenny go saothraíonn sé €600,000 sa bhliain as obair 11 uair sa lá agus go raibh sé ag saothrú €900,000 sula gearradh siar ar thuarastal na gcraoltóirí. Dúirt sé arís is arís nach raibh sé de cheart ag Pat Kenny a bheith ag tabhairt breithiúnas ar dhaoine atá ar liúntais leasa shóisialaigh is a macasamhail agus é ag saothrú ardphá mar é. Mhair a chaint trí nó ceithre bhomaite sula chinn an léiritheoir go mbeadh sos ann agus le linn an sosa d'imigh an fear ó stiúideó RTÉ. Is é seo an dara uair le tamall anuas gur bhris duine isteach ar chaint Pat Kenny agus thóg ceist faoin ardtuarastal a bhí á shaothrú aige.

Corp faighte

2009-11-10T04:27:00.001-08:00

Thangathas ar maidin ar chorp Éireannaigh atá ar iarraidh sa Téalainn le seachtain. Fuarthas corp Michael O'Brien, ar as Baile Atha Cliath é, cóngarach d'oileán Koh Pahnga, áit a raibh sé ag tonnmharcaíocht nuair a d'imigh sé as radharc.

Cuidiú, más beag féin, d'uinéirí tí atá faoi bhrú

2009-11-10T04:21:00.000-08:00

Thug Cónaidhm Bancéireachta na hÉireann le fios inniu go mbeidh síneadh ama sé mhí sa bhreis ann do úinéirí tí nach dtig leo íocaíochtaí morgáiste a íoc. Tá ardimní ann faoin líon mór daoine nach dtig leo íocaíochtaí morgáistí a dhíol agus atá i mbaol, dá bharr, a dteach a chailleadh. Mar sin tá an Cónaidhm i ndiaidh tabhairt le fios go mbeidh síneadh ama sé mhí ann ar acht go dtéann úinéir an tí i dteagmháil leis an iasachtóir.

Is leor beirt!

2009-11-09T01:58:00.000-08:00

Conradh na Gaeilge ag cur tús leis an chéad ghréasán náisiúnta de chiorcail chomhrá dar teideal Is Leor Beirt i gcomhar le Scéimeanna Phobail Gaeilge timpeall na tíre inniu, Dé Luain, 9 Samhain 2009.

Tabharfaidh scéim nua an Chonartha Is Leor Beirt deis labhartha Gaeilge don ghnáthphobal agus cinnteoidh go mbeidh an Ghaeilge le cloisteáil go poiblí in ionaid éagsúla timpeall na tíre. Eascraíonn an scéim as an smaoineamh simplí nach bhfuil ach beirt Ghaeilgeoir ag teastáil chun ciorcal comhrá a bhunú agus chun gréasán Gaeilge áitiúil a chothú, trí bhualadh le chéile chun Gaeilge a labhairt le cupán caife nó um lón uair in aghaidh na seachtaine.

Dar le Síne Nic an Ailí, Feidhmeannach Forbartha Chonradh na Gaeilge: “Tá sé an-éasca grúpa nua Is Leor Beirt a bhunú, níl ag teastáil ach go mbuailfidh grúpa beag le chéile i gcaife áitiúil nó sa bhialann san ionad oibre le comhrá le chéile i nGaeilge ar bhonn rialta. Níl aon chostas nó am breise de dhíth chun páirt a ghlacadh i ngréasán Gaeilge Is Leor Beirt, ó seo am lóin nó sos caife a bheadh á ghlacadh ag daoine ar aon nós, ach beidh sé á ghlacadh acu i suíomh éagsúil anois i dteannta daoine eile sa suim sa teanga.”

Dúirt Peadar Mac Fhlannchadha, Timire Náisiúnta an Chonartha: “Ní hamháin go mbeidh pointe teagmhála á chruthú ag scéim an Chonartha do dhaoine lasmuigh de phobal na Gaeilge ar an dóigh seo, ach cabhróidh Is Leor Beirt go mór le daoine ar an gcúpla focal an easpa muiníne agus an eagla roimh úsáid na Gaeilge a dhíbirt i gcomhluadar cairdiúil, neamhfhoirmeálta.”

Cuireann ar a laghad beirt chainteoir Gaeilge fáilte roimh dhaoine eile ag gach ionad a ghlacann páirt i scéim an Chonartha gach seachtain nó gach mí. Tá cur chuige Is Leor Beirt feiliúnach go háirithe do dhaoine atá ag iarraidh deise chun úsáid a bhaint as an méid Gaeilge atá acu, nó chun cur lena cumas teanga, agus tá grúpaí cheana féin ceangailte leis an scéim i nGaillimh, Maigh Eo, Baile locha Riach, Inis, Baile Átha Cliath agus an Tulach Mór, Co. Uíbh Fháilí.

Cainteanna, agóidí agus bagairt stailce

2009-11-09T01:35:00.000-08:00

Seachtain mhór a bheidh ann maidir leis an chaidreamh idir ceardchumainn agus an rialtas. Beidh cainteanna idir an rialtas agus ceardchumainn san earnáil phoiblí ag atosú inniu agus dóchas ann go mbeidh an dá thaobh in ann tógáil ar an dea-atmaisféar a chruthaigh ráitéis measartha a rinne an Taoiseach agus roinnt ceardchumannach sinsearach ag deireadh na seachtaine. Beidh lá gnímhe ann Dé Céadaoine agus i rith an ama tá ceardchumainn éagsúla ag vótáil maidir le stailc náisiúnta a bheith ann. Dúirt Uachtarán ar Chumann Ionadaíochta an Gharda, Michael O'Boyce, dúirt sé ar maidin go bhféadfadh comhaontú a bheith ann an tseachtain seo ach gach dream a bheith solúbtha.

Guth na Gaeltachta i gConamara

2009-11-09T01:09:00.000-08:00

Beidh a gcéad chruinniú i gConamara ag Guth na Gaeltachta ar ball an tseachtain seo. Déardaoin a bheidh an cruinniú ann ar an Cheathrú Rua agus deir Eamann Mac Niallais ó Guth na Gaeltachta gur faill a bheidh ann do mhuintir Chonamara a dtacaíocht a léiriú d'fheachtas Guth na Gaeltachta i gcoinne ciorruithe Mhic Chárthaigh. Chuimhnigh sé chomh maith go mbeidh gá le feachtas mar é ar an bhliain seo chugainn chomh maith nó beidh an rialtas ag iarraidh ciorruithe de €4 billiún breise in 2010 agus gur seans go mbeidh ciorruithe sa Ghaeltacht ar an chlár oibre acu an t-am sin arís eile.

Titim Bhalla Bheirlín - 20 bliain ó shin inniu

2009-11-09T00:56:00.000-08:00

Fiche bliain ó shin , cothrom an lá inniu, a thit Balla Bheirlín. Agus táthar ag comóradh sin ag ócáidí sa Ghearmáin agus ar fud oirthear na hEorpa. Beidh iarUachtarán na Rúise, Mikhail Gorbachev agus ceannaire na Gearmáine, Angela Merkel, orthu sin a bheidh páirteach san ócáid chomórtha i bpríomhchathair na Gearmáine.

'Bagairt chogaidh' i Meiriceá Theas

2009-11-09T00:47:00.000-08:00

Chomhairligh Hugo Chavez do cheannairí míleata na Veiniséala inné déanamh réidh do chogadh. Dar leis go bhfuil na Stáit Aontaithe ag griosú stáit sa reigiún leis an Veiniséala a ionsaí agus gur ghá don tír a bheith réidh do chogadh, cogadh a d'fhéadfadh spré tríd an reigiún. Tharla roinnt caismirtí ar an teorainn idir an Veinsiéala agus an Cholóim ar na mallaibh agus tá ardteannas idir an dá thír. Tá an Veiniséala iontach míshásta lena chois faoin dóigh a bhfuil rialtas na Colóime ag ligean do thrúpaí Mheiriceá níos mó saoirse a bheith acu sa Cholóim.

Éirigh as a Aire - Ó hEallaithe

2009-11-08T03:04:00.000-08:00

Deir Donncha Ó hEallaithe go bhfui sé in am ag an Aire Eamon Ó Cuív éirí as cúram na Gaeltachta agus é a fhágáil faoi Aire 'níos misniúla.' Deir an tUasal Ó hEallaithe gur chuir an tAire olc ar fad air nuair a mhaígh sé ag léacht ag an Oireachtas go mbeadh áit ar bith a bheadh seacht faoin gcéad de na daoine ann ag caint Gaeilge ar bhonn laethúil sa Ghaeltacht feasta. Dar leis an Uasal Ó hEallaithe go léiríonn sin nach bhfuil an tAire sásta plé le ceist teorannacha na Gaeltachta faoi mar atá sáineolaithe ag moladh. Dúirt an tAire gur amaidí caint Uí hEallaithe.

Beirt marbh i dtaismí bóthair

2009-11-08T02:51:00.000-08:00

Maraíodh beirt i dtaismí bóthair a tharla aréir. Fear 7 bliain d'aois a maraíodh i dtaisme ag Gráinseach na Gaoithe san Iarmhí. Gortaíodh an dara fear nuair a bhuail dá charr in aghaidh a chéile ach níl an dara fear gortaithe go dona. Agus maraíodh fear i nDún Droma i mBaile Átha Cliath.

Fógra ar shuíomh FOINSE

2009-11-08T02:48:00.000-08:00

Is é seo an fógra ar shuíomh FOINSE -

'Thugamar éisteacht, rinneamar foghlaim agus anois táimid ar ais . . . Foinse, nuachtán as an nua agus barr feabhais air! Beidh sé saor in aisce i bpáirtíocht leis an Irish Independent gach Céadaoin. In Foinse beidh fáil agat ar an nuacht is déanaí maidir le cúrsaí áitiúla, cúrsaí náisiúnta agus idirnáisiúnta, spórt, ceol, cúrsaí faisin agus taisteal. Beidh forlíontaí nua oideachais do bhunscoileanna agus do scoileanna dara leibhéal ann agus i bhfad níos mó ná sin.
Ná déan dearmad gur ar an gCéadaoin a bheidh Foinse istigh le do Irish Independent.'

Ní thacóimid le ciorrú ar liúntas leanaí - FG

2009-11-08T02:25:00.000-08:00

Deir Enda Ó Cionnaith nach dtacóidh Fine Gael le haon chiorrú ar liúntas leanaí i mbuiséad na míosa seo chugainn. Dar leis go bhfuil bealaí eile chun baint den mhórcaiteachas ar leasa shóisilaigh agus ar na bealaí is éifeachtaí sin ba cheart daoine a chur ag obair arís.

Eachtra á fhiosrú ag Ombudsman an Gharda

2009-11-07T04:29:00.000-08:00

Tá Ombudsman an Gharda ag fiosrú eachtra a d'fhág duine amháin i mbaol an bháis agus roinnt daoine eile gortaithe. Bhí sé ag druidim ar 3.00 ar maidin nuair a bhuail carr i gcoinne carr de chuid an Gharda a bhí páirceáilte in aice leis an timpeallán Red Crow. Gortaíodh beirt a bhí sa charr agus tá duine acu sin go dona tinn. Gortaíodh an bheirt Gharda ach ní go dona.

Tuilleadh agóidí le bheith ann

2009-11-07T03:47:00.000-08:00

Tá tuairimí éagsúla, atá ag teacht salach ar a chéile, faoin líon daoine a ghlac páirte inné i léirsithe an ICTU. Ach léirigh an mórshiúil is mó i mBaile Atha Cliath go bhfuil míshásamh go forleathan ann faoin dóigh a bhfuil ciorruithe an rialtias ag díriú ar an aicme is lú maoine agus tá ceardchumannaigh muiníneach go mbeidh siad in ann cur leis an tacaíocht sin sna míonna amach romhainn. Ach bhí an rialtas sásta nach raibh na scaiftí ar na sráideanna chomh mór is a bhí roinnt tráchtairí ag tuar agus creideann siad go dtuigeann go leor den phobal nach bhfuil an dara rogha ag an rialtas ag an am seo ach brú ar aghaidh le ciorruithe san earnáil phoiblí. Ag an agóid i mBaile Atha Cliath dúirt Jack O'Connor, ceannasaí SIPTU go mba cheart don 5% den phobal a bhfuil 40% de mhaoin na tíre faoina smacht, go mba cheart dóibh i bhfad níos mó cánach agus eile a íoc chun baint de na fadhbanna airgeadais seachas an rialtas a bheith ag iarraidh airgead a bhaint ó phócaí na ndaoine atá ar ioncam íseal. Ag an agóid i Luimneach dúirt Mike Mc Namara ó Chomhairle na gCeardchumann go mbeidh tuilleadh laethanta agóide mar nach bhfuil an dara rogha anois ag oibrithe.

Foinse - aiséirí mar fhorlíonadh san Indo?

2009-11-06T05:49:00.000-08:00

Táthar ag tuairimiú go mbeidh Foinse ar ais ar an fhód i lár na míosa seo - mar fhorlíonadh taobh istigh den nuachtán, an Irish Independent. Níorbh fhéidir teacht ar Phádraig Ó Céidigh chun an scéal a phlé ach táthar den tuairim go bhfuil baint aige leis an togra. 19 Samhain an dáta atá á lua agus ciallaíonn sé go mbeidh trí foilseachán Gaeilge ann ar bhonn seachtainiúil amach anseo, Nuacht24, Foinse san Indo agus nuachtán seachtainiúil atá le foilsiú le deontas ó Fhoras na Gaeilge.

Déan comhaontú - O'Toole

2009-11-06T05:29:00.000-08:00

Deir Joe O'Toole gur féidir leis na ceardchumainn agus leis an rialtas comhaontú go fóill ar bhealach a ligfeadh dóibh fadhbanna airgeadais a réiteach. Bhí an Seanadóir O'Toole ina cheannasaí ar an ICTU tráth agus dar leis go bhfuil sé barrthábhachtach go n-éiríonn gach taobh as a bheith ag díspeagadh nó tabhairt amach dá chéile agus go ndéantar an bearna idir lucht agóide an lae inniu agus lucht rialtais a laghdú.

Tosaíocht don troid in aghaidh fhliú na muc

2009-11-06T02:03:00.000-08:00

Fuair ceathrar bás ó dheas agus beirt ó thuaidh mar gheall ar an fhliú muciúil dar leis na húdaráis. 22 Éireannach a cailleadh mar gheall ar an fhliú le 5 mhí anuas. Ar maidin thug an Ulster Cancer Society go bhfuil siad iontach míshásta go bhfuil clár scagthástála d'aisle inne (bowel cancer) a bhí le tosú i mí na Nollag curtha ar athló. Tá an t-airgead a bhí le caitheamh ar an chlár le húsáid anois sa troid i gcoinne fhliú na muc. Dé Céadaoine thug Mary Harney le fios go mbeidh cur isteach ar sheirbhísí leighis mar gheall ar an tosaíocht atá le tabhairt don troid i gcoinne fhliú na muc.

Agóidí in ocht mbaile

2009-11-06T01:58:00.000-08:00

Tá dréim le scaiftí móra a bheith páirteach i léirsithe ICTU an lae inniu in ocht gcathair is baile ó dheas. Tá na léirsithe le tosú ar 2.30in. Deir IBEC nach gcuideoidh na léirsithe le hoiread is jab nua amháin a chruthú agus gur bhaol go mbeadh drochthionchar acu ar chúrsaí eacnamaíochta. Agus mhaígh an Taoiseach nach réiteoidh agóidí ná léirsithe fadhbanna na tíre. Ach deir Jack O'Connor gur olc an maise do na fostóirí ná don rialtas a bheith ag ionsaí léirsithe de chuid na gceardchumann nuair is iad polasaithe an rialtais a ba chúis leis an chúlú eacnamaíochta - ní na hoibrithe ná a n-iompar siúd.

Fort Hood - oifigeach airm le ceistiú

2009-11-06T01:52:00.000-08:00

Tá an oifigigeach airm a mharaigh triúr déag agus a ghortaigh 31duine eile in eachtra ag Fort Hood in Texas le ceistiú ar ball beag inniu. Tugadh le fios aréir gur maraíodh é le linn na heachtra ach ar maidin thug na péas in Texas le fios go bhfuil an Maor Malik Nadal Hasan faoi ghlas agus go bhfuil siad lena cheistiú ar ball. Ní léir cad go díreach a spreag é le dul i mbun na scaoilte ach tá tuairiscithe ann go raibh sé iontach míshásta go raibh arm Mheiriceá lena chur go dtí an Afganastáin.

Iarracht robála i gCill Dara

2009-11-05T05:31:00.000-08:00

Tá triúr á gceistiú ag an Gharda mar gheall ar iarracht a rinneadh ar maidin chun veain airgid a fhuadach i gContae Chill Dara ar maidin. Bhí eolas ag an Gharda faoin iarracht agus tháinig siad ar roinnt gunnaí, dhá charr goidte agus ábhar eile nuair a ghabh siad na fir.

Beirt eile marbh mar gheall ar Fhliú na Muc

2009-11-05T05:30:00.000-08:00

Mharaigh fliú na muc beirt duine eile ó thuaidh le seachtain anuas. Páiste naoi mbliain d'aois duine acu sin a cailleadh, cailín a bhí ar scoil do pháistí le riachtanais speisialta tuigtear. Cailleadh dáréag sa tuaisceart ó thuaidh mar gheall ar fhliú na muc mar aon le ochtar ó dheas.

Iarrachtaí ag dul i gcónaí chun an tAthair Sinnott a fhuascailt

2009-11-05T05:23:00.000-08:00

Theip inné ar iarrachtaí a bhí ar bun ag lucht idirghabhála chun an tAthair Michael Sinnott a shaoradh. Bhí siad ag iarraidh ar cheannasaíocht an ghrúpa treallcogaíochta, an MILF, tabhairt ar ghníomhaí dá gcuid a síltear a bheith freagrach as fuadach an tAthair Sinnott, tabhairt air é a ligean saor. Ach dúirt an MILF nach raibh aon fhianaise acu go raibh an duine a bhí luaite ceangailte leis an fhuadach agus dar leo nach bhfuil siad sásta tabhairt air an tAthair Sinnott a ligean saor go fiú dá mbeadh baint aige leis an fhuadach. Ach tá cainteanna ag dul ar aghaidh i rith an ama agus tá dóchas ann go saorófar an sagart go luath.

NA ag cur le slándáil

2009-11-05T02:37:00.000-08:00

Tá na Náisiúin Aontaithe chun a bhfoireann san Afganastáin a bhogadh chuig ionaid atá níos sábháilte san Afganastáin agus chuig tíortha maguaird mar gheall ar an bhagairt go n-ionseoidh an Talaban iad. An tseachtain seo caite maraíodh seisear oibrí leis an eagras nuair a d'ionsaigh triúr buamadóir féinmharfacha ionad leis na Náisiúin Aontaithe i gCabúl.