Ordessiete

A Mancomunidade de Ordes impartirá un obradoiro de lingua e literatura galegas

2014-07-08T21:21:00.002+02:00

O personal desprazaráse por cada un dos seis concellos que a integran

O Servizo de Normalización Lingüística da Mancomunidade de Municipios da Comarca de Ordes (SNL ) impartirá de balde un obradoiro de iniciación á lingua e literatura galegas para nenos e nenas de 6 a 9 anos aproximadamente.

A metodoloxía que se aplicará implica o desprazamento de persoal do SNL a cada un dos seis concellos da Mancomunidade que fan uso do servizo. A partir do conto tradicional ‘Os tres porquiños’ intentarase explicar o proceso de elaboración dun relato para concluír coa creación dun texto colectivo.

Divididos en varias partes abordaranse os seguintes aspectos: Narración do conto, explicación das diversas partes que o compoñen, actividades do conto programadas en función da idade e, por último, a elaboración dun relato colectivo a través dunha ficha con datos básicos.

Conto final

O conto final realizado en cada un dos obradoiros será publicado na páxina web da Mancomunidade (www.mancomunidadeordes.org) e editado en edición impresa. Cada rapaz ou rapaza participante recibirá a súa correspondente copia.

As datas e espazos de celebración previstos para cada concello son as seguintes:

10 de xullo: Trazo (Centro médico)

15 de xullo: Tordoia (Casa cultura)

17 de xullo: Frades (Multiúsos)

18 de xullo: Ordes (Local social)

22 de xullo: Cerceda (Centro cívico)

20 de agosto: Oroso (Centro cultural)

Montaos e Barbeiros honraron á Virxe do Carme

2014-07-08T21:16:00.003+02:00

A xornada contou con misa, procesión e música

As parroquias ordenses de Santa Cruz de Montaos e Barbeiros celebraron o pasado domingo a súa festa na honra á Virxen do Carme. A xornada festiva arrancou con oficios relixiosos e misas, seguidas de procesións.

En Santa Cruz de Montaos a orquestra Palladium e o grupo de gaitas Os pelexos de Montaos foron os encargados de animar o ambiente, mentres que o grupo Chicas Show fixo o propio en Barbeiros.

Os infantís da S.D. Club Órdenes ascenden á Liga Galega

2014-07-08T21:10:00.000+02:00

Tras vencer ao Rayo Sadense por 4 a 2

O equipo infantil da S. D. Club Órdenes celebrou por todo o alto o seu ascenso á Liga Galega, tras vencer por 2 a 4 ao Rayo Sadense. Un resultado que se acadou grazas ao esforzó de Adrián, Rubén, Jacobo, Louri, Martín, Luís, Alex, Pampím, Saad, Víctor, Pablo, David, Samuel, Landeira, Toni e Brais.

Tras recibir os parabéns do Goberno municipal, tanto os xogadores como os adestradores e membros do cadro técnico bañáronse no pilón ubicado na Alameda.

A nadadora ordense Lara López, subcampiona de España infantil de bandeiras

2014-07-02T13:31:00.002+02:00

Dentro do Campionato de España de Salvamento e Socorrismo

O Concello de Ordes quere felicitar a súa veciña Lara López Fernández, integrante do Club Natación Cerceda, tras a súa participación esta pasada fin de semana no Campionato de España de Salvamento e Socorrismo nas categorías infantil e cadete.

Unhas probas que se disputaron en Noja, Cantabria, e nas que Lara López resultou subcampiona na proba bandeiras infantil feminino.

O Concello de Ordes pon en marcha as súas escolas de verán

2014-07-02T13:25:00.003+02:00

Son 70 os nenos e nenas participantes nesta iniciativa nos meses de xullo e agosto

Inscricións na Casa do Concello ou no teléfono 981680002

O Concello de Ordes inaugurou esta semana as súas escolas de verán, nas que participan 70 nenos e nenas. Todos eles ao longo dos meses de xullo e agosto realizarán numerosas actividades que versarán, na súa meirande parte, sobre as temáticas dos oficios e do cine.

Saídas

Ademais tamén se levarán a cabo saídas a parques, zonas verdes, excursións e xornadas na piscina e noutros puntos e espazos de interese municipais como a biblioteca. O programa inclúe tamén encontros deportivos.

Con este programa de actividades o Concello de Ordes pretende ofrecer a posibilidade de conciliar a vida laboral e familiar na época estival.

Inscricións

Aqueles que queiran inscribirse aínda están a tempo. Basta con acudir ao departamento de Educación, situado no primeiro andar do Concello. Poderán facelo por quendas de 15 días ou durante máis tempo. Para conseguir máis información poden chamar ao 981 680 002.

O Museo do Traxe acolle unha mostra dos alumnos de pintura de Ordes

2014-07-02T13:17:00.002+02:00

A inauguración contou cunha gran aceptación polos amantes da pintura e das artes

O Museo do Traxe Juanjo Liñares acollerá ata o vindeiro martes 8 de xullo unha ampla mostra na que os autores son os alumnos dos cursos de pintura organizados polo Concello de Ordes. Máis de cen obras, a inmensa maioría realizada coa técnica do óleo, que responden a todo tipo de temáticas.

Inauguración

No acto de inauguración que tivo lugar note, decenas de persoas déronse cita, entre os propios autores, familiares, amigos e afeccionados e amantes da pintura e da arte.

A tenente de alcalde de Ordes, Silvia Marín, destacou o nivel de moitas das obras e mostrou a súa satisfacción pola grande aceptación popular e o beneficio que achega á veciñanza esta iniciativa emprendida dende o departamento de Cultura do Concello de Ordes.

Bo índice de aprobados no curso da ESO para adultos

2014-07-02T13:09:00.001+02:00

Este ano superou as vinte persoas matriculadas

A tenente de alcalde de Ordes, Silvia Marín, fixo hoxe entrega dos diplomas e cualificacións aos alumnos do curso de graduado en ESO para adultos organizado polo Concello de Ordes.

Un grupo que este ano superou as 20 persoas matriculadas e que unha vez máis obtiveron unhas cualificacións que “demostran o esforzo e a calidade do ensino que se imparte neste curso” segundo palabras de Marín.

De feito a comparativa mostra uns niveis de aprobado superiores á media. Nas áreas científico-tecnolóxica, lingüística e sociais o número de aprobados dos ordenses superaron o 60%, 70% e 90% respectivamente, mentres que en Santiago foron do 11%, 25% e 26%.

Festival fin de curso da escola de música de Ordes

2014-07-02T13:02:00.002+02:00

O bar Abacco gaña o concurso de tapas de Ordes

2014-07-02T12:57:00.004+02:00

Prepararon unha tosta de bacallau con granitado de alioli, ensalada de tempada e bizcoito de chocolate

O Doniña quedo en segundo lugar coa súa milfollas de mar

O bar Abacco foi o gañador do I Concurso de Tapas Concello de Ordes, grazas a súa tosta de bacallau con gratinado de ali oli, a súa ensalada de tempada e a un sabroso bizcoito de chocolate bañado en salsa de chocolate.

O segundo posto foi para o bar Doniña que nesta ocasión competiu cunha receita de milfollas de mar e os seus mexillóns estilo Delia. O terceiro posto foi para o Rincón do Pincho, que ofreceu un osobuco de porco ao forno e tripas de porco con patacas.

Participantes

Nesta primeira convocatoria participaron un total de 15 establecementos da vila de Ordes, contando cunha gran participación e involucración por parte dos residentes da vila e os seus visitantes, o que vén animar á organización a continuar con esta idea de cara á vindeira templada.

Buscás honra a San Paio

2014-06-26T22:50:00.004+02:00

O PP de Ordes urxe un plan urxente de arranxo dos equipamentos públicos na vila

2014-06-26T22:47:00.001+02:00

Demandan no Pleno que se acometan tarefas de mantemento e limpeza de beirarrúas e farois en diferentes puntos do núcleo urbano

O Partido Popular de Ordes presentou no Pleno ordinario de hoxe unha batería de rogos encamiñados a impulsar o arranxo de equipamentos públicos necesitados de mantemento urxente, como beirarrúas e puntos de luz.

O Grupo Municipal Popular insta ao Concello arranxar os tramos de beirarrúas estragados nas rúas Campeiras e Parque Municipal (nestes dous casos fronte a obras paralizadas desde hai tempo), a arranxar outro tramo da rúa Campeiras (nas dúas marxes), no que a maleza chega ata o mesmo borde da calzada; e a repasar a totalidade dos traballos de revisión de arquetas efectuados na Rúa do Recreo.

No referido ao alumeado público, o PP reclamará o arranxo e posta en servizo dos farois estragados e fóra de servizo desde hai varias semanas na rúa Compostela; así como a revisión dos puntos de luz da avenida de Alfonso Senra, algún dos cales presenta incluso risco de desprendemento.

Paralelamente, o Grupo Municipal do Partido Popular de Ordes defenderá unha moción para instar ao equipo de Goberno a habilitar novas áreas de estacionamento no centro da vila e a arranxar as dispoñibles na actualidade, moi deterioradas polas fochancas e a ausencia de mantemento axeitado.

Outros rogos

Instar á empresa encargada da recollida do lixo a colocar os contedores nos elementos de suxeición instalados a tal efecto.

Dado que as recentes chuvias provocaron problemas na evacuación de pluviais pola acumulación de restos vexetais triturados procedentes dos traballos de desbroce, instar aos operarios encargados deste traballos a mellorar a técnica empregada, efectuando tamén o mantemento de taxeas e cunetas da rede viaria municipal.

En datas recentes, unha empresa dedicada á minería aproveitou o mineral existente no subsolo dun predio de titularidade municipal situado na parroquia de Barbeiros, sen que exista constancia da concesión de aproveitamento. Por iso, o PP pide información sobre a cantidade percibida polo Concello e sobre o acordo que permitiu a ocupación, remoción e aproveitamento do subsolo.

O proxecto de execución do muro e beirarrúa elevada da piscina municipal do campo da feira, financiado pola Xunta a finais de 2011, contemplaba a execución dunha cafetería da que polo de agora non se teñen noticias. Transcorridos máis de dous anos desde entón, o PP pide información sobre a hipotética modificación do proxecto.

Reitérase a petición de efectuar o mantemento integral de todas as “illas verdes” existentes nas diferentes parroquias de Ordes, antes de que a deterioración que presentan resulte irreversible.

Rogo para que o Concello desbroce as vías paralelas aos terreos de ADIF na parroquia de Lesta e que na actualidade están pechadas pola maleza. Estas pistas dan acceso a predios rústicos situados ao carón da trazado de alta velocidade ferroviaria.

Rogo para que o Concello informe sobre as previsións para cubrir a praza de conserxe no CEIP Campomaior, que quedou vacante por xubilación.

Rogo para que se informe dos pasos a seguir por parte do Concello na praza do mercado local logo de que se rexeitara o recurso de unha praceira.

O Concello de Ordes realiza tarefas de limpeza e resinalización no roteiro de Buscás

2014-06-26T22:37:00.000+02:00

A semana que ven darán traballos no roteiro do río Mercurín

Varios membros do Goberno local de Ordes realizaron recentemente un percorrido polo roteiro de Buscás. Unha camiñata que aproveitaron para efectuar tarefas de limpeza e de resinalización ao longo deste traxecto.

Trátase dunha das rutas de sendeirismo das que dispón o municipio, que cada ano son transitadas e desfrutadas por centos de caminantes e ciclistas. Os encargados de efectuar este traballo foron Luis Gómez Candal, Lucía Iglesias, Ramón Vázquez, Roberto Iglesias e a tenente de alcalde, Silvia Marín.

Xa de cara á vindeira semana está previsto que se levan a cabo os mesmos traballos no roteiro do río Mercurín.

A piscina do Muíño xa conta cun novo céspede artificial

2014-06-26T14:28:00.001+02:00

Aberto o prazo para solicitar o carné mensual

A piscina municipal do Muíño abrirá as súas portas o vindeiro martes cun aspecto totalmente renovado. Unhas instalacións renovadas que contan cun novo manto de céspede artificial que cubre toda a extensión do solarium.

Máis de 1.500 metros cuadrados nos que os usuarios poderán desfrutar ata mediados do mes de setembro. Ademais tamén hai que sinalar as labores de limpeza, mantemento e aplicación de pintura en todo o recinto de cara a nova tempada. realizadas iniciará unha nova templada.

Tamén se contará cun amplio e efectivo corpo de salvamento, composto por dez socorristas que velarán pola seguridade dos bañistas ao longo de toda a xornada.

Carné

Quen desexe facer un carné para esta tempada pode solicitalo no departamento de Deporte, no primeiro andar da Casa do Concello. Será preciso que ademais dos seus datos persoais acheguen tamén unha fotocopia do DNI e unha fotografía tamaño carné.

No caso dos adultos o custo para toda a tempada será de 20 euros e para os menores 12 euros. Tamén se poderá adquirir por mensualidades, en cuxo caso o prezo será de 12 e 6 euros respectivamente, agás no mes de setembro, que se reducirá á metade.

Os prezos para adquirir entradas por xornadas soltas será de 1,50 euros para os maiores e de un euro para os menores.

Os maiores de Ordes disfrutaron da música dos máis novos

2014-06-26T14:00:00.001+02:00

Un grupo de estudantes do CEIP Campomaior levou diversión á residencia de persoas maiores

Varios alumnos do CEIP Campomaior de Ordes trouxeron a diversión á residencia de persoas maiores de Ordes. Alí ofreceron un recital musical para todos os residentes, bailando e coreando moitas das cancións tradicionais e populares que figuraban no repertorio.

Compartir entre xeracións

Unha experiencia coa que se pretende achegar entre sí a distintas xeneracións, á par que demostrar que os puntos en común e as posibilidades de compartir tempo, diversión e experiencias son maiores das que poidan aparecer a primeira vista.

Ainhoa Ramos, bronce en el campeonato sub 21 de taekwondo

2014-06-25T15:36:00.001+02:00

La deportista ordense pertenece al club Luar

La taekwondista ordense Ainhoa Ramos Mantenga, representante del Club Luar de Ordes, consiguio recientemente subirse al podium en el Campeonato Sub 21 de taekwondo, donde la deportista de Ordes se alzó con el bronce.

Fomento aceptou as petición do PSOE de Ordes e mellorará o pavimento da N-550

2014-06-25T15:27:00.002+02:00

Pedreira: ""A situación é especialmente grave diante do número 143 da avenida de Alfonso Senra e no tramo entre os números 122 e 133"

Os socialistas pedirán no próximo pleno unha batería de melloras viarias

O Ministerio de Fomento vén de aceptar as reclamacións formuladas pola Agrupación Socialista de Ordes e anuncia que mellorará o pavimento da N-550 na avenida de Alfonso Senra.

Unha actuación que está contemplada nun proxecto de reforzo de firmes xa redactado e que “se está adaptando con criterio de eficiencia”, segundo a resposta escrita do Goberno ao senador socialista Francisco Javier Losada de Aspiazu.

A pesar da evidente degradación do firme na N-550 ao seu paso por Ordes, en especial diante da Alameda, o Ministerio de Fomento insiste en que “su estado de conservación es correcto, al tratarse de un pavimento rígido, con mayor durabilidad en el tiempo” e se escuda na Rolda Leste para xustificar que o desvío do tráfico pesado xera menores deterioros no firme.

Beirarrúas

Sen embargo, o voceiro muncipal socialista, Xesús Pedreira, bota en falta que Fomento “aínda non se pronunciara sobre a necesidade de remodelar as beirarrúas que bordean esta travesía, para que cumpran coa legalidade vixente e garantan a seguridade viaria tanto para o tráfico rodado como, especialmente, para os peóns”.

Neste sentido, os socialistas ordenses aínda están á espera dunha resposta de Fomento á Proposición non de Lei rexistrada polos deputados socialistas Paloma Rodríguez e Miguel Cortizo en marzo de 2014. Unha proposta que conta co respaldo unánime do pleno municipal.

O voceiro municipal do PSdeG-PSOE en Ordes, Xesús Pedreira, sinala que “estamos satisfeitos de que Fomento teña previsto mellorar o pavimento na avenida de Alfonso Senra, pero negar que as placas de cemento están separadas e que o firme está descompensado amosa un gran descoñecemento da situación sobre o térreo”.

Rede viaria

Por outra banda, os socialistas ordenses presentarán na sesión plenaria deste xoves unha batería de propostas de mellora da rede viaria ordense. Así, pedirán o pintado da estrada entre o cruce de Vilasuso-Bean e o límite de Oroso (dirección Deixebre), aglomerada no seu día a petición dos socialistas ordenses pero que aínda está sen pintar no seu tramo de Ordes.

Así mesmo, os socialistas pedirán o desbroce doutra pista próxima, que vai dende a estrada de Vilasuso a Deixebre e a Casas do Monte (Beán), que leva dous anos sen desbrozar e fai que a circulación sexa máis complicada.

Por último, os socialistas faranse eco das reclamacións dos veciños das parroquias de Poulo e de Pereira e solicitaranlle ao Concello o incremento da sinalización vertical e horizontal no cruce entre a CP-3802 Ordes-Pontecarreira e a estrada que vai de Poulo a Pereira, no lugar de Carballo.

As frases de Xesús Pedreira, voceiro municipal socialista de Ordes

“Hai varios puntos da avenida Alfonso Senra onde os peóns se ven obrigados a baixarse á calzada da N-550 para poder circular, co perigo que iso supón para a súa seguridade. Un perigo que se incrementa no caso de que o viandante vaia en cadeira de rodas ou leve unha silla de nenos”

"A situación é especialmente grave diante do número 143 da rúa Alfonso Senra e no tramo entre os números 122 e 133, que incumpren o establecido na Lei 1/1998, de 5 de maio, de Accesibilidade e supresión de barreiras arquitectónicas, urbanísticas e da comunicación.

Too listo no Mesón do Vento para celebrar esta fin de semana as súas festas de San Pedro de Ardemil

2014-06-25T15:16:00.001+02:00

O luns ás 21:30 h. terá lugar unha gran churrascada popular

O Mesón Do Vento ultima detalles para celebrar esta fin de semana as súas festas de San Pedro de Ardemil. O programa de actuacións arrancará o vindeiro sábado cunha misa a partir das 13.30 horas, que estará seguida da procesión do Santísimo Sacramento.

A orquestra Abanico, que esta tempada ten como cantante principal a artista local Tania Veiras, será a encargada de animar tanto a sesión vermú como a verbena nocturna.

Domingo e luns

De cara ao domingo ás 13.30 horas novamente celebrarase unha misa con procesión, esta vez coa imaxe da Virxe do Carme. Unha xornada na que a nota musical virá da man do grupo Aramio.

Por último, o luns contarase coas actuacións dos grupos Canadá e Los Satélites, ademais de ter lugar unha gran churrascada popular a partir das 21.30 horas. Dadas as inclemencias meteorolóxicas rexistradas nos últimos días a comisión de festas instalará unha gran carpa na que poder resgardarse en caso de chuvia.

Máis de 40 atletas participan no VI Campus de Atletismo de Ordes

2014-06-25T15:12:00.000+02:00

Terá lugar na Cidade Deportiva da Vista Alegre

Máis de 40 atletas de todas as idades participan ao longo desta semana no VI Campus de Atletismo que se desenvolve nas instalacións da Cidade Deportiva de Vista Alegre. Unha cita que está organizada polos Concellos de Ordes e Cerceda e que conta coa colaboración do Club Atletismo Ordes e do Club Atlética A Silva.

A programación desenvolverase de luns a xoves de 18.30 a 20.30 horas no caso dos menores e de 21.30 a 23:00 horas para os adultos. Onte, primeiro día de celebración e debido ás condicións meteorolóxicas adversas, as probas trasladáronse ao pavillón Campomaior. Alí se disputaron carreiras de velocidade con e sen obstáculos, ademais de xogos multiatléticos.

Cadro técnico

O cadro técnico para este ano está encabezado por Xosé Domínguez, adestrador nacional de atletismo e licenciado en Educación Física. Outros compoñentes serán: Xulio Santiago Freixanes, Ana Domínguez e Irene Mallo, todos eles monitores nacionais de atletismo.

A entrega de premios terá lugar o vindeiro xoves, á cal asistirá o alcalde de Ordes, Manuel Regos.

Mañá remata o prazo de inscrición da primeira quenda do campus de verán de fútbol de Ordes

2014-06-25T15:04:00.004+02:00

Inscricións na Cidade Deportiva en horario de 17:30 a 19:30 horas ou no teléfono 600493633

Maña xoves 26 remata o prazo de inscrición para aqueles nenos e nenas que queiran participar na primeira quenda do II Campus de Verán-Fútbol S.D. Club Órdenes.

Éste primeiro grupo convócase do 1 ao 15 de xullo e desenvolverá a súa actividade nas instalacións da Cidade Deportiva de Vista Alegre. O seguinte grupo irá do 17 de xullo ao 1 de agosto e neste caso admitiranse inscricións ata o 10 de xullo. En ambos casos os participantes terán que ser nados entre os anos 1998 e 2000, ambos inclusive.

Reservas

Os interesados poderán reservar a súa praza acudindo ás instalación deportivas de luns a venres de 17.30 a 19.30 horas. Tamén se pode chamar ao 600 493 633. Os prezos son de 60 euros para cada quenda, reducíndose a 40 a partir do segundo irmán ou irmá.

No caso de querer participar durante todo o mes haberá un prezo pechado de 100 euros, que se reducirá a 60 a partir do segundo irmán ou irmá.

Mañá xoves, festas de San Paio en Buscás

2014-06-25T14:54:00.001+02:00

A Policía Local e Garda Civil impartiron unha clase de educación vial aos escolares ordenses

2014-06-23T20:33:00.001+02:00

Coñeceron como circular a pé ou en bicicleta, o significado das sinais e puideron subir aos coches patrulla

Axentes da Garda Civil e da Policía Local de Ordes impartiron hoxe unha clase especial de educación vial aos alumnos do CEIP Campomaior de Ordes.

Videos, sinais e coches patrulla

Unha sesión na que se proxectaron vídeos informativos, se deron consellos á hora de circular en bicicleta ou a pé, se analizaron as sinais máis habituais, ademais de brindarlle aos menores a posibilidade de subirse aos coches patrulla dos corpos de seguridade.

O mércores remata o prazo de inscrición nas escolas de verán de Ordes

2014-06-23T20:26:00.001+02:00

Organizaranse catro quendas durante os meses de xullo e agosto en horario de 09:00 a 14:00 horas

Inscrición no departamento de Educación na Casa do Concello

O próximo mércores día 25 rematará o prazo de inscrición para participar nas escolas de verán organizadas polo Concello de Ordes. En total organizaranse catro quendas que se repartirán por quincenas durante os meses de xullo e agosto, cun horario que irá dende as 09:00 ata as 14:00 horas.

Poderán asistir aqueles nenos e nenas escolarizados nalgún centro educativo de Ordes nos cursos de educación infantil e primaria.

Inscricións

Para anotarse basta con acudir ao departamento de Educación situado no primeiro andar da Casa do Concello. Deberán achegar a ficha de inscrición cos datos solicitados, unha fotocopia do DNI do/a menor ou ben do Libro de Familia e outra da tarxeta sanitaria. En caso de doenza tamén deberá entregar un xustificante médico sainado.

Os prezos oscilan entre os 31 e os 124 euros segundo o número de quendas ás que se asista. Ademais as familias numerosas terán unha bonificación do 50%.

Os socialistas de Ordes opóñense á ampliación do vertedoiro da Areosa

2014-06-23T20:20:00.005+02:00

Pedirán no pleno municipal a retirada do proxecto

Pedreira: "A pretensión de convertir a Areosa no macrovertedoiro de Galicia suporá graves prexuízos para os veciños de Ordes"

A Agrupación Socialista de Ordes denuncia que a ampliación do vertedoiro da Areosa, anunciado este mesmo mes pola Consellería de Medio Ambiente, Territorio e Infraestruturas, terá consecuencias medioambientais adversas para os veciños das parroquias próximas e un maior deterioro das infraestruturas viarias polo paso dun maior número de camións transportadores de residuos.

Por iso, o PSOE de Ordes pedirá na sesión plenaria deste xoves que o Concello de Ordes inste á Xunta de Galicia a abandonar este proxecto de ampliación do vertedoiro de Areosa polos prexuízos que ocasionará aos veciños de Ordes.

Xesús Pedreira (PSOE).

As frases de Xesús Pedreira, voceiro municipal socialista de Ordes

“Temos que lembrar que cerca de 400.000 toneladas das máis de 900.000 toneladas que recibe cada ano Sogama van parar ao vertedoiro da Areosa, que xa no ano 2012 acumulaba case dous millóns de toneladas de residuos sólidos urbanos"

"A pretensión de Agustín Hernández, reciclado e reutilizado agora con urxencia para alcalde de Santiago, de converter Areosa no macrovertedoiro de Galicia implica graves prexuízos para os veciños e veciñas das parroquias próximas a modo de cheiros, lixiviados, etc”.

“O incremento do número de camións con destino a Sogama suporá un maior deterioro da rede viaria e iso repercutirá economicamente sobre o concello de Ordes, xa que tanto a Xunta como Sogama se desentenden do mantemento destas estradas que estropean, pero cuxo arranxo ten que ser sufragado polas arcas municipais”

O Jogafán Ordes, subcampión da Copa Autonómica

2014-06-22T14:30:00.000+02:00

Perderon na final contra o Autos Leiros por 4-5

O Jogafán Ordes F.S proclamouse subcampión da Copa Autonómica e campión da Sección Norte tras un partido contra o Autos Leiros (Mos) no que o marcador finalizou plasmando un resultado de 4-5.

O partido foi seguido por un numeroso público que encheu as instalación do pavillón Castelao II. Previamente o Riazor F.S venceu por 3 - 0 ao Libertad F.S. o que lle permitiu aos herculinos alzar a Copa Provincial.

Gran churrascada

A xornada en Ordes estivo caracterizada non só pola deportividade senón tamén pola festa e a diversión, e en gran medida grazas á gran churrascada que se organizaou a mediodía para os xogadores, cadro técnico, directiva e seguidores.

Tanto a tenente de alcalde, Silvia Marín, como es concelleiros Lucía Iglesias e Roberto Iglesias estiveron apoiando aos locais en todo momento. Tamén se contou coa presencia do representante da Federación Galega de Fútbol Sala.

A Banda de Música de Ordes da a benvida ao verán cun concerto

2014-06-22T14:15:00.000+02:00

Tivo lugar ás portas do Museo do Traxe Juanjo Liñares

O concello de Ordes celebrou na tarde de onte a súa primeira actuación do programa lúdico 'Ordes ao serán'. Os encargados dxe abrir este quenda de actuacións foron os integrantes da Banda de Música de Ordes.

Grazas a esta iniciativa ao longo dos meses estivais e durante varios venres as inmediacións do Museo do Traxe Juanjo Liñares convertirase en escenario para numerosas formacións folclóricas e musicais, que ofrecerán o seu espectáculo de forma gratuíta.