orientacióncondesa

PASO A 1º DE PRIMARIA

2023-06-27T00:30:00.001+02:00

Como sabedes, no centro acostumamos realizar unha reunión para falar do paso de Infantil a Educación Primaria.

Con ela pretendemos acompañarvos nesta nova andaina, escoitar e, tentar de resolver, as posibles dúbidas que poidades ter.

Cremos que ter unha información adecuada evita medos, incertidumes e tensións que podedes, sen pretendelo, transmitir aos vosos fillos/as.

Na seguinte imaxe interactiva atoparedes documentos e pautas con información, co fin de facilitar o coñecemento da nova etapa e a transición á mesma.

BENVIDOS AO COLE! INFORMACIÓN PARA AS FAMILIAS DE NOVO INGRESO DE EDUCACIÓN INFANTIL

2023-06-27T00:00:00.001+02:00

Benvidos ao cole!

Como cada curso, facemos a reunión coas familias de novo ingreso, que pretende ser unha primeira toma de contacto co centro, así como proporcionar información que resolva posibles dúbidas que se vos poidan plantexar ante a escolarización dos vosos fillos/as e transmitirvos unha serie de recomendacións para poñer en práctica durante o verán e facilitar así a entrada na escola.

Sabemos que, por distintas circunstancias, non sempre é posible levar a cabo todas as suxerencias que vos facemos.

Por iso, se o voso fillo/a se atopa nalgunha situación especial, non vos preocupedes, falaremos tan pronto se escolarice e tentaremos de atopar a solución máis adecuada.

Cando escolarizades aos vosos cativos/as no colexio adquirimos un compromiso entre o centro e as familias, que ten como obxectivo traballar unidos cara unha meta común:

A EDUCACIÓN DOS VOSOS FILLOS E FILLAS

IMOS AO INSTITUTO: INFORMACIÓN ÁS FAMILIAS E ALUMNADO DE 6º DE EDUCACIÓN PRIMARIA

2023-06-22T17:17:00.000+02:00

O pasado 15 de xuño despedimos aos nosos alumnos e alumnas de sexto de Educación Primaria nunha fermosa e emotiva festa de graduación.
Nervios, tristura... pero tamén moita ilusión ante a nova etapa que comeza.

Desde o colexio, queremos acompañarvos na transición de Primaria a Secundaria, por iso, ao longo do 2º e 3º trimestre deste curso, levamos a cabo unha serie de actividades que forman parte do programa de transición a ESO, que se realiza conxuntamente co instituto ao que estamos adscritos:

Visita do alumnado ao novo centro para coñecer as aulas, as instalacións etc.
Reunión entre o equipo docente de 6º, a orientadora e a xefa de estudos do Instituto, co fin de coordinar o cambio de etapa.
Charla no instituto dirixida ás familias coa finalidade de que obteñades toda a información que precisades (martes 27 de xuño, ás 19:00 horas).

Mentres tanto, deixámosvos información co fin de facilitar o coñecemento da nova etapa e a transición a Secundaria. Esperamos que vos sexa de axuda!
Desexarvos toda a sorte do mundo nesta nova etapa, chea de novos retos e descubrimentos! E recordade: sen cambio, non hai mariposa!!

RECURSOS PARA ALUMNADO MARROQUÍ

2023-03-02T00:38:00.003+01:00

Recompilación de recursos para traballar nas aulas co alumnado de orixe marroquí

FAMILIAS VISIBLES

2022-11-17T14:18:00.021+01:00

Familias visibles é un padlet elaborado polo mestre de Educación Infantil e Primaria Rubén García Hernández (elmaestroruben) cunha selección de materiais para abordar a diversidade familiar.

A través de distintos contos pódense traballar na aula as distintas estruturas familiares desde una perspectiva tolerante, respectuosa e igualitaria.

PROTOCOLO DE PROTECCIÓN DE DATOS PERSOAIS (VERSIÓN 2022)

2022-11-16T23:11:00.006+01:00

Documento editado pola Xunta de Galicia no que se recompilan as cuestións normativas máis relevantes con respecto á protección de datos persoais nos centros escolares, así como se ofrecen modelos de cláusulas de información e autorización para ser usados nos centros.

Este protocolo actualizarase regularmente con distintos cambios normativos que se produzan.

Para acceder a el, pincha na imaxe

PROTOCOLO DE PREVENCIÓN E ACTUACIÓN NOS ÁMBITOS SANITARIO E EDUCATIVO ANTE O RISCO SUICIDA INFANTO-XUVENIL

2022-10-13T19:40:00.001+02:00

Actualización do Protocolo de prevención, detección e intervención do risco suicida no ámbito educativo do ano 2018, que inclúe novas estratexias que teñen como obxectivo abordar os malestares e o sufrimento psicolóxico e reducir o risco de suicidio da nosa poboación nos anos vindeiros.

Para descargar o documento, preme aquí

GUÍA BREVE PARA A PREVENCIÓN E ACTUACIÓN ANTE A VIOLENCIA EXERCIDA POR ADOLESCENTES

2022-04-19T19:05:00.015+02:00

Programa de intervención social e terapéutica con menores que exercen violencia física, psicolóxica e/ou sexual realizado pola Fundación Márgenes y Vínculos en colaboración coa Área de Derechos Sociales del Ayuntamiento de Málaga.

Ofrece pistas para detectar se estamos ante un adolescente que exerce algún tipo de violencia; pautas para previr estas condutas nos adolescentes; información sobre como pode afectar a violencia á persoa que agride e sobre como actuar cando nos percatamos de que se está a dar esa situación.

Para acceder ao documento, preme na guía

MENORES VIVINDO UNHA GUERRA

2022-03-25T00:53:00.005+01:00

O Colexio Oficial da Psicoloxía de Madrid publica unha guía que pretende contribuír a minimizar o impacto psicolóxico da Guerra na infancia e adolescencia.

O documento ofrece pautas psicolóxicas ás familias, aos profesionais da educación e ao persoal que traballa con nenos/as e adolescentes para minimizar o impacto que están a sufrir pola invasión de Ucrania, así como pretende dotar de estratexias para coidalos e protexelos da mellor maneira posible.

Na primeira parte da guía preséntanse pautas específicas para explicar aos nenos/as o contexto no que viven ou do que foxen; os principais problemas que poden sufrir tras estar inmersos nunha guerra e pistas para recoñecer cando están a desenvolver condutas preocupantes e como actuar ante elas.

Na segunda parte infórmase das principais reaccións emocionais que poden presentar os nenos/as expostos a crudas imaxes nos medios en función da súa idade, danse pautas para xestionar o posible malestar psicolóxico dos seus fillos/as e introdúcense accións específicas dirixidas a xerar comportamentos prosociais nos nenos/as co fin de promover unha cultura de paz e solidariedade.

Para acceder á guía pincha na imaxe

RECOMPILACIÓN DE RECURSOS PARA O ALUMNADO UCRAÍNO

2022-03-23T15:40:00.037+01:00

Recompilación de recursos para traballar nas aulas co alumnado ucraíno, así como ideas e materiais para abordar o tema nas aulas.

Imagen: Unicef

GUÍA PARA O USO RESPONSABLE DAS NOVAS TECNOLOXÍAS

2022-03-21T19:08:00.008+01:00

Guía coeditada entre a Xunta de Galicia e a Fundación INGADA, orientada particularmente ás familias e profesorado de persoas con TDAH.

Pretende educar sobre como posibilitar un uso responsable e un adecuado aproveitamento das utilidades das tecnoloxías de información e comunicación na vida diaria.

Ademais ofrece pautas para facer un uso correcto das TIC, evitando potenciais perigos, así como recomendacións de vida saudable e alternativas divertidas e formativas.

Pincha no enlace para acceder ao documento

PRINCIPIOS PARA O DESEÑO UNIVERSAL DE APRENDIZAXE

2022-03-19T16:00:00.006+01:00

A guía que a continuación se presenta pertence ao proxecto Recursos Educativos Abertos (REA) Andalucía, impulsado en 2020 pola Consejería de Educación de dita Comunidade Autonóma.

En concreto este documento pretende facilitar os principios e pautas didácticas do Deseño Universal para a Aprendizaxe (DUA).

DESEÑO UNIVERSAL E APRENDIZAXE ACCESIBLE

2022-02-16T21:36:00.010+01:00

Guía elaborada polo CEFIRE específico de educación inclusiva da Generalitat de Valencia con estratexias para facilitar a implementación dos principios do deseño universal nos procesos de aprendizaxe que permitan identificar posibles barreiras e na creación de contextos de aprendizaxe accesible.

PREVENCIÓN, DETECCIÓN E INTERVENCIÓN EN CASOS DE IDEACIÓN SUICIDA NO ÁMBITO EDUCATIVO

2022-02-04T16:32:00.037+01:00

Guía para centros escolares con pautas para a prevención do suicidio no ámbito educativo.

Elaborouna un Grupo de traballo integrado no Observatorio Aragonés pola Convivencia, baixo a coordinación do Departamento de Educación do Goberno de Aragón.

Como se pode ler na introdución do documento, este pretende poñer a disposición dos centros educativos unha ferramenta de información sobre a problemática do risco suicida na infancia e adolescencia, promover mecanismos de prevención e de protección e proporcionar pautas de actuación claras e sinxelas que permitan a toma de decisións inmediatas.

Pincha aqui para acceder ao documento

Ademais a guía trata conceptos clave para comprender o problema, para identificar as crenzas erróneas sobre o suicidio, proporciona estratexias para detectar factores de risco e sinais de alerta no alumnado, así como determina as accións para previr o risco de suicidio e dá pautas de actuación para intervir no caso de ideación suicida dun alumno/a.

ESTRATEXIAS PROACTIVAS DE REGULACIÓN EMOCIONAL

2022-02-04T00:43:00.001+01:00

Guía, elaborada pola Comisión Técnica de Traballo e Estudo da Área de Educación e Formación da Federación Autismo Madrid, con estratexias de enfrontamento ante as condutas desafiantes que presentan, en ocasións, as persoas con TEA. Tamén nos axuda a comprender estes comportamentos, así como ofrece apoios para establecer comportamentos máis axustados ao contexto no que viven desde un enfoque preventivo.

ALUMNADO CON NECESIDADES ESPECÍFICAS DE APOIO EDUCATIVO SEGUNDO A LOMLOE

2021-12-07T23:46:00.023+01:00

Imaxe interactiva cos novos tipos de alumnado con necesidades específicas de apoio educativo segundo a LOMLOE.

Así mesmo inclúense as posibles medidas de atención á diversidade que indica a Orde do 8 de setembro de 2021 pola que se desenvolve o Decreto 229/2011, do 7 de decembro, polo que se regula a atención á diversidade do alumnado dos centros docentes da Comunidade Autónoma de Galicia en que se imparten as ensinanzas establecidas na Lei orgánica 2/2006, do 3 de maio, de educación.

DEPARTAMENTO DE ORIENTACIÓN CURSO 2021-2022

2021-11-24T21:21:00.000+01:00

COMO MANEXAR A ANSIEDADE

2021-11-15T19:30:00.001+01:00

Pautas para identificar e manexar a ansiedade e a preocupación excesiva ante os exames

UN NENO CON TEA NA MIÑA CLASE

2021-09-17T18:41:00.001+02:00

Documento elaborado polo Servizo de Atención Temperá de Burgos que achega unha breve explicación sobre as características e necesidades educativas que poden ter os nenos e nenas con Trastorno de Espectro Autista, así como un conxunto de estratexias que se poden implementar nas aulas de Infantil.

ENTRADA A INFANTIL

2021-09-05T20:18:00.001+02:00

BECAS E AXUDAS PARA ALUMNADO CON NECESIDADES ESPECÍFICAS DE APOIO EDUCATIVO

2021-08-06T18:06:00.009+02:00

Becas E aXudas para alumnADO con necesidadE específica de APOIO educativo de Natalia Longo

COIDAMOS TEA- GUÍA PARA FAMILIAS QUE RECIBEN O DIAGNÓSTICO DE TEA

2021-06-13T16:14:00.008+02:00

Guía editada por Federación Autismo Galicia dirixida ás familias que reciben un diagnóstico de Trastorno de Espectro Autista.

O documento tenta recadar información que pode ser moi útil neses momentos e pretende mitigar o impacto que se produce na dinámica familiar nesa primeira etapa.

No documento abórdanse temas que se poden clasificar en tres bloques:

O primeiro relacionado coas inquietudes e sentimentos que xorden tras o diagnóstico; coas principais características das persoas con TEA e coas falsas crenza e mitos en torno a elas.

No segundo trátanse temas relacionados coa comunicación, cos diferentes tipos de apoios e intervencións terapéuticas,que poden facilitar a vida das persoas con autismo e as súas familias.

E, para finalizar, o terceiro bloque proporciona bibliografía e recursos sobre o tema, así como un directorio das entidades federadas de Autismo Galicia.

Para acceder ao documento, preme na imaxe

MALTRATO EMOCIONAL CARA UN NENO, NENA OU ADOLESCENTE

2021-05-27T17:02:00.056+02:00

Infografía realizada polo Observatorio da Infancia en Andalucía no ano 2020. Nela exponse brevemente que é o maltrato emocional, visibilizando posibles condutas e interaccións destructivas cos menores que poden provocarlle danos psíquicos graves ou poñelos en risco de padecelo (Observatorio da Infancia en Andalucía, 2020).

Accede ao documento en PDF pinchando na imaxe

En Galicia, para notificar posibles situacións de risco e maltrato a menores, existen as seguintes vías:

Servizos Sociais do propio Concello.

Consellería de Política Social e os seus respectivos Departamentos Teritoriais en cada provincia.

Rexistro unificado de maltrato infantil: so para profesionais do ámbito educativo e policial (https://rumi.benestar.xunta.es/).

Liña de axuda á infancia 116 111: servizo permanente e gratuíto, onde hai profesionais que prestan asesoramento e notifican inmediatamente a situación aos servizos que corresponda

Podes acceder a todos os teléfonos aquí.

GUÍA DE ALTAS CAPACIDADES NO CONTEXTO ESCOLAR

2021-04-10T17:19:00.002+02:00

Documentado editado pola Consejería de Educación del Principado de Asturias no ano 2019 con pautas de intervención para familias e profesorado. Pretender dar a coñecer as características máis salientables de este alumnado, así como dotar de estratexias ás familias e aos docentes ante as posibles necesidades que se poidan presentar.

Pincha na imaxe para acceder ao documento

BANCO DE RECURSOS EDUCATIVOS CON GENIALLY

2021-03-21T22:08:00.006+01:00

Espectacular banco de recursos recompilado nun Genially polo mestre Jorge QC @Frikintin.

Moito traballo e moitos recursos que paga a pena ver!

Vía: Guía de información académica e profesional