റിംഗ് റോഡ് ആദ്യഘട്ടം നിര്‍മ്മാണം ഇഴയുന്നു.

2016-10-07T23:51:00.000-07:00

പാലാ: നഗരസഭാ പ്രദേശത്തിന്റെ സമഗ്രവികസനം ലക്ഷ്യമാക്കിയും ഗതാഗതതടസം പൂർണമായും ഒഴിവാക്കുക എന്ന ഉദ്ദേശ്യത്തോടെയും നിർമാണം ആരംഭിച്ച റിംഗ് റോഡ് ശൃംഖലയുടെ പ്രഥമഘട്ടം പ്രവർത്തനങ്ങൾ മന്ദഗതിയിൽ. ഏറ്റുമാനൂർ–പാലാ സംസ്‌ഥാന പാതയിൽ കടപ്പാട്ടൂരിൽ നിന്നും മീനച്ചിലാർ കടന്ന് പൊൻകുന്നം റോഡിലെ പന്ത്രണ്ടാംമൈലിലേക്ക് പാത തുറക്കുംവിധമാണ് നിർദിഷ്ട ടൗൺ റിംഗ് റോഡിന്റെ പ്രഥമഘട്ടത്തിന് തുടക്കം കുറിച്ചത്.

ഈ വർഷം ആദ്യമാണ് നിർമാണപ്രവർത്തനങ്ങൾ ആരംഭിച്ചത്. ശബരിമല ഇടത്താവളമായ കടപ്പാട്ടൂർ ക്ഷേത്രത്തിന്റെ പ്രവേശന കവാടത്തിൽ നിന്നും പണികൾ ആരംഭിച്ചെങ്കിലും തുടങ്ങിയ അതേ അവസ്‌ഥയിൽതന്നെയാണ് ഇപ്പോഴും. 15 മീറ്റർ വീതിയിൽ നാലുവരി പാതയായാണ് റോഡ് നിർമിക്കുന്നത്.

റോഡ് മണ്ണിട്ട് ഉയർത്തുന്നതിൽ വന്ന തടസമാണ് നിർമാണപ്രവർത്തനം നിർത്തിവയ്ക്കാൻ കാരണമായത്. നിശ്ചിത ഉയരത്തിൽ മണ്ണിട്ട് ഉയർത്തി കടപ്പാട്ടൂർ പാലംമുതൽ പന്ത്രണ്ടാം മൈൽ വരെ ബൈപാസ് നിർമിക്കുന്നതിനാണ് കരാർ നൽകിയിരുന്നത്. എന്നാൽ ചുരുങ്ങിയ ചെലവിൽ റോഡ് ഉയർത്തുന്നതിനുള്ള മണ്ണ് ലഭിക്കാതെ വന്നതാണ് കരാറുകാരനെ നിർമാണത്തിൽ നിന്നും പിന്തിരിപ്പിക്കാൻ പ്രേരിപ്പിക്കുന്നതെന്ന് നാട്ടുകാർ പറയുന്നു. തുടക്കത്തിൽ റോഡ് ഉയർത്തുന്നതിനുള്ള മണ്ണെടുപ്പിനെതിരെ പ്രശ്നങ്ങളാരംഭിച്ചതോടെ കരാറുകാരൻ പിൻവലിയുകയായിരുന്നു. രണ്ടു കിലോമീറ്ററിൽ താഴെ മാത്രം നീളമുള്ള ഈ റോഡ് വളരെവേഗം പൂർത്തിയാകുമെന്നും വാഹനഗതാഗതത്തിന് തുറന്നുകിട്ടുമെന്നും പ്രതീക്ഷിച്ചവർ നിരാശരാവുകയാണ്. ഭൂമി ഏറ്റെടുക്കൽ സംബന്ധിച്ച് ഒരുവിധ തർക്കങ്ങളും ഇല്ലാതെയാണ് ഭൂവുടമകൾ സ്‌ഥലം വിട്ടുനൽകിയത്.

കടപ്പാട്ടൂർ ക്ഷേത്രത്തിൽ എത്തുന്ന വാഹനങ്ങൾ കത്തീഡ്രൽ പള്ളി റോഡ് വഴി പാലാ –പൊൻകുന്നം റോഡിൽ എത്തി ശബരിമലയിലേക്ക് യാത്ര ചെയ്യാവുന്ന വിധത്തിലാണ് റോഡ് വിഭാവനം ചെയ്തിരിക്കുന്നത്.

കരാറുകാരന്റെയും പൊതുമരാമത്ത് വകുപ്പിന്റെയും മെല്ലെപ്പോക്ക് അവസാനിപ്പിക്കണമെന്നും അനുകൂല കാലാവസ്‌ഥയിൽ റോഡ് നിർമാണം പൂർത്തിയാക്കണമെന്നും ആവശ്യപ്പെട്ട് നാട്ടുകാർ സമരപരിപാടികൾ ആരംഭിക്കാൻ തീരുമാനിച്ചിരിക്കുകയാണ്. നിർമാണപ്രവർത്തനങ്ങൾക്ക് വേഗംകൈവരിക്കാൻ നടപടിയെടുക്കണമെന്ന് ആവശ്യപ്പെട്ട് കെ.എം. മാണി എംഎൽഎക്ക് നാട്ടുകാർ നിവേദനം നൽകി.

Palavartha.com

റിംഗ് റോഡ് ആദ്യഘട്ടം നിര്‍മ്മാണം ഇഴയുന്നു.