Palode

Palode news

2017-07-30T21:28:00.001+05:30

കാരുണ്യത്തിന്റെ കൈത്താങ്ങുമായി പാലോട് പ്രവാസി കൂട്ടായ്മ.

പാലോട് :കാരുണ്യത്തിന്റെ കൈത്താങ്ങുമായി പ്രവാസി കൂട്ടായ്മ പ്രവർത്തകർ. ഇരുപതു വർഷമായി രോഗ ബാധിതനായി കിടക്കയിലായ പാലോട് നന്ദിയോടെ കള്ളിപ്പാറ കുഴിവിള വീട്ടിൽ ബാഹുലേയൻ നായർക്കാണ് ചികിത്സ സഹായവുമായി പ്രവാസി കൂട്ടായ്മ പ്രവർത്തകർ അവധിക്കു നാട്ടിൽ വിമാനമിറങ്ങിയത്. വിവിധ ഗൾഫ് രാജ്യങ്ങളിൽ ജോലി ചെയ്യുന്ന പെരിങ്ങമ്മല, നന്ദിയോട്, പാങ്ങോട് ഗ്രാമ പഞ്ചായത്തുകളിലുള്ള ഒരു കൂട്ടം യുവാക്കളാണ് പ്രവാസി കൂട്ടായ്മായിലുള്ളത്. രണ്ടു വർഷം മുൻപ് രൂപീകരിച്ച കൂട്ടായ്മ കുറഞ്ഞ കാലയളവിൽ തന്നെ നിർധനരായ മൂന്നു കുടുമ്പത്തിലുള്ളവർക്കു ചികിത്സ സഹായവും നാട്ടിൽ എത്താൻ കഴിയാത്ത പ്രവാസിയായ ഗൃഹനാഥനെ നാട്ടിൽ എത്തിക്കാൻ സഹായിക്കുകയും ചെയ്തിട്ടുണ്ട്. കൊച്ചുകരിക്കകം സ്വദേശിയായ കേൾവി ശക്തി ഇല്ലാത്ത കൊച്ചു കുട്ടിക്കാണ് കഴിഞ്ഞ തവണ ചികിത്സ സഹായം നൽകിയത്. കൂട്ടായ്മയിൽ അംഗമായുള്ള പ്രവാസികൾ അവരവരുടെ മാസ വരുമാനത്തിൽ നിന്നും നിശ്ചിത തുക മാറ്റി വെച്ചാണ് സഹായം നൽകുന്നതിനുള്ള ഫണ്ട്‌ കണ്ടെത്തുന്നത്.

കൂട്ടായ്മയിലെ നാട്ടിലുള്ള പ്രവർത്തകരായ ജനറൽ സെക്രട്ടറി അൻവർഷാൻ പാലോട് ,എക്സിക്യുട്ടീവ് അംഗങ്ങളായ രാജേഷ് അയ്യപ്പൻ, ഷാൻലാൽ, സതീഷ് താന്നിമൂട് എന്നിവർ ചേർന്നാണ് വീട്ടിലെത്തി ബാഹുലേയൻ നായർക്കു ചെക്ക്

കൈമാാറിയത്...

കൂട്ടായ്മ പ്രസിഡന്റ് അരുൺ അംബാനി, വൈസ്‌ പ്രസിഡന്റ് ഹലീൽട്രഷറർ കിഷോർ അടക്കമുള്ള മുഴുവൻ പ്രവർത്തകരും കാരുണ്യപ്രവർത്തനത്തിൽ പങ്കാളികളായി.

കാണണം, അംഗീകരിക്കണം, ഈ ചരിത്രനേട്ടം

2014-12-09T12:20:00.001+05:30

ഫര്‍ഹാനും രജനീഷ് ഹെന്റിയും വിഷ്ണുവും ലോകകിരീടവുമായി കേപ്് ടൗണിലെ ഗ്രൗണ്ടില്‍

പാലക്കാട്: ഇന്ത്യന്‍ സമയം ഞായറാഴ്ച രാത്രി 9.30. ദക്ഷിണാഫ്രിക്കയിലെ വാലി വില്‍സണ്‍ മൈതാനത്തില്‍ പ്രകാശ് ജയരാമയ്യയുടെ ഷോട്ട് ബൗണ്ടറിവരെ കടക്കുമ്പോള്‍ ലോകക്രിക്കറ്റില്‍ പുതിയ ചരിത്രം എഴുതപ്പെടുകയായിരുന്നു. കാഴ്ചയില്ലാത്തവരുടെ നാലാമത് ഏകദിനക്രിക്കറ്റ് ലോകകപ്പില്‍ ബദ്ധവൈരികളായ പാകിസ്താനെ തോല്പിച്ച് ഇന്ത്യക്ക് കിരീടം. അതും മത്സരമവസാനിക്കാന്‍ വെറും രണ്ട് പന്ത് ബാക്കിനില്‍ക്കെ. അലതല്ലിയൊഴുകിയ ആവേശത്തില്‍ സന്തോഷംകൊണ്ട് കരഞ്ഞ് മൂന്ന് മലയാളികളും ഗ്യാലറിയിലുണ്ടായിരുന്നു. പ്രതിസന്ധികളെ സധൈര്യം ഏറ്റെടുത്ത് ക്രിക്കറ്റിനെ പ്രണയിച്ച് ലോകകിരീടം നെഞ്ചോട് ചേര്‍ത്ത് അവര്‍ സന്തോഷം പങ്കുവെച്ചു. തിരുവനന്തപുരം പാലോട് പേരയം എന്ന ഗ്രാമത്തില്‍നിന്ന് വരുന്ന യു.പി. വിഷ്ണുവും മലപ്പുറം നിലമ്പൂര്‍ മൈലാടി സ്വദേശി മുഹമ്മദ് ഫര്‍ഹാനും ഇന്ത്യന്‍ ടീമിന്റെ അഡ്വൈസറായി എത്തിയ കോഴിക്കോട്ടുകാരന്‍ രജനീഷ് ഹെന്റിയും. ലോകമാധ്യമങ്ങളില്‍ നിന്നോ ഇന്ത്യന്‍ മാധ്യമങ്ങളില്‍ നിന്നോ അവരെ തേടി വിളികളെത്തിയില്ല. എങ്കിലും രവി ശാസ്ത്രിയും ശിഖര്‍ ധവാനും വിരാട് കോലിയുമടക്കമുള്ളവര്‍ ടീമംഗങ്ങളെ അഭിനന്ദനമറിയിച്ചു. ലോകകിരീടവും ഇന്ത്യന്‍ പതാകയുമായി അവര്‍ മൈതാനത്ത് താളം ചവുട്ടി. ഷാംപെയ്‌ന് പകരം ശരീരത്തിലേക്ക് വെള്ളമൊഴിച്ചു. ആര്‍പ്പുവിളിച്ചു. ആവേശവും സ്‌നേഹവും പങ്കിട്ടു.

ആദ്യം ബാറ്റ് ചെയ്ത പാകിസ്താന്‍ നിശ്ചിത നാല്പത് ഓവറില്‍ ഏഴ് വിക്കറ്റ് നഷ്ടത്തില്‍ 389 റണ്‍സെടുത്തു. 49.4 ഓവറില്‍ അഞ്ച് വിക്കറ്റ് നഷ്ടത്തില്‍ ഇന്ത്യ ലക്ഷ്യം മറികടന്നു. 38 പന്തില്‍ 82 റണ്‍സ് നേടിയ പ്രകാശ് ജയരാമയ്യ, 76 റണ്‍സ് നേടിയ ബാബുഗയ് പട്ടേല്‍, 74 റണ്‍സ് നേടിയ അജയ് റെഡ്ഡി എന്നിവരാണ് ഇന്ത്യക്ക് വേണ്ടി മികച്ച പ്രകടനം കാഴ്ചവെച്ചത്.

ലോകകപ്പില്‍ നാല് മത്സരങ്ങളില്‍ കളിച്ച ഫര്‍ഹാന്‍ മൂന്ന് വിക്കറ്റ് നേടി. രണ്ട് മത്സരം കളിച്ച വിഷ്ണു ബംഗ്ലാദേശിനെതിരായ മത്സരത്തില്‍ 73 റണ്‍സ് നേടി മികച്ച പ്രകടനമാണ് കാഴ്ചവെച്ചത്. ഏറെ കഷ്ടപ്പാടുകള്‍ നിറഞ്ഞ ജീവിതസാഹചര്യങ്ങളോട് പടവെട്ടിയാണ് വിഷ്ണുവും ഫര്‍ഹാനും ഇതുവരെയെത്തിയത്. സാമ്പത്തികമായി ഏറെ ബുദ്ധിമുട്ടുന്ന കുടുംബങ്ങളുടെ തണല്‍ കൂടിയാണ് ഈ താരങ്ങള്‍. പി. ഉദയകുമാരന്‍ നായരുടെയും പ്രസന്നകുമാരിയുടെയും മകനാണ് വിഷ്ണു. അമ്മയും വിഷ്ണുവിന്റെ സഹോദരി വീണയും ഭാഗികമായി കാഴ്ചയില്ലാത്തവരാണ്. പല ജോലികള്‍ക്കും മറ്റും പോയി കുടുംബത്തെയും ചുമലിലേറ്റുന്നത് വിഷ്ണുവാണ്. കൂലിപ്പണിക്കാരനായ അസൈനാറുടെയും ജമീലയുടെയും മകനാണ് ഫര്‍ഹാന്‍. ഡിഗ്രി പൂര്‍ത്തിയാക്കിയെങ്കിലും വീട്ടിലെ സാമ്പത്തികസാഹചര്യം മോശമായത് കാരണം ജോലിക്ക് പോവുകയാണ് ഫര്‍ഹാനും. കുടുംബത്തെ താങ്ങിനിര്‍ത്താന്‍ എത്രയും പെട്ടെന്ന് ഒരു ജോലി ലഭിക്കുമെന്നാണ് ഇരുവരുടെയും പ്രതീക്ഷ.

മറ്റ് പല സംസ്ഥാനങ്ങളിലെയും താരങ്ങള്‍ക്ക് ഇപ്പോള്‍ത്തന്നെ സര്‍ക്കാരുകള്‍ ജോലി നല്‍കുന്നതായി അറിയിച്ചതായി വിവരം ലഭിച്ചുവെന്ന് ടീമിനൊപ്പം ദക്ഷിണാഫ്രിക്കയിലുള്ള ക്രിക്കറ്റ് അസോസിയേഷന്‍ ഫോര്‍ ബ്ലൈന്‍ഡ് ഇന്‍ കേരള സംസ്ഥാന ജനറല്‍ സെക്രട്ടറി കൂടിയായ രജനീഷ് ഹെന്റി പറഞ്ഞു. ഡിസംബര്‍ 16നാണ് ടീം ഇന്ത്യയില്‍ തിരിച്ചെത്തുക. ഡല്‍ഹിയിലെത്തിയ ശേഷം പ്രധാനമന്ത്രി നരേന്ദ്രമോദിയുടെയും സ്‌പോര്‍ട്‌സ് മന്ത്രാലയത്തിന്റെയും നേതൃത്വത്തില്‍ ടീമിന് സ്വീകരണം നല്‍കുമെന്ന് അറിയിപ്പ് ലഭിച്ചിട്ടുണ്ടെന്നും അദ്ദേഹം പറഞ്ഞു.

മലയാളം സാംസ്‌കാരിക പഠനകേന്ദ്രം ഉദ്ഘാടനം

2014-11-26T13:58:00.003+05:30

പാലോട്: പാലോട് കേന്ദ്രമാക്കി മലയാളം സാംസ്‌കാരിക പഠനകേന്ദ്രം പ്രവര്‍ത്തനം തുടങ്ങി. കവി ഗിരീഷ് പുലിയൂര്‍ ഉദ്ഘാടനം ചെയ്തു. ചെയര്‍മാന്‍ സബീര്‍ഷ അധ്യക്ഷതവഹിച്ച ചടങ്ങില്‍ ബി.പവിത്രകുമാര്‍, എം.പി. വേണുകുമാര്‍, മനേഷ് ജി.നായര്‍, ഒഴുകുപാറ അസീസ്, സുജിത് പാലോട്, സുധീര്‍ഷ, നസീം, അരുണ്‍കുമാര്‍, അനിലേഷ് എന്നിവര്‍ പ്രസംഗിച്ചു. രാഷ്ട്രപതിയുടെ മികച്ച അധ്യാപകനുള്ള പുരസ്‌കാരം നേടിയ വേണുകുമാരന്‍ നായരെ ചടങ്ങില്‍ ആദരിച്ചു.

പാണ്ടിക്കാറ്റില്‍ വീടിന്റെ മേല്‍ക്കൂര പറന്നുപോയി

2014-11-26T13:57:00.003+05:30

വിതുര: പാണ്ടിക്കാറ്റ് വീശിയടിച്ചതിനെ തുടര്‍ന്ന് വിതുര കല്ലാര്‍ അംബേദ്കര്‍ കോളനിയില്‍ ജെ. ജാനമ്മ (80) യുടെ വീടിന്റെ മേല്‍ക്കൂര പറന്നുപോയി. ഷീറ്റ് മേല്‍ക്കൂര പറന്ന് അടുത്തുള്ള വീടിന്റെ മുകളില്‍ പോയിരുന്നു. മേല്‍ക്കൂര നഷ്ടപ്പെട്ടതിനെത്തുടര്‍ന്ന് ജാനമ്മ ടാര്‍പ്പോളിന്‍കൊണ്ട് വീട് മൂടിയിരിക്കുകയാണ്. ജാനമ്മ ഒറ്റയ്ക്കാണ് താമസം. വിതുര വില്ലേജ് ഓഫീസില്‍ പരാതി നല്‍കി.

മികച്ച അധ്യാപകനെ ആദരിച്ചു

2014-11-25T09:34:00.002+05:30

പാലോട്: മികച്ച അധ്യാപകനുള്ള രാഷ്ട്രപതിയുടെ പുരസ്‌കാരം നേടിയ പാലോട് ഉപജില്ലയിലെ ഞാറനീലി കാണി യു.പി.എസിലെ പ്രഥമാധ്യാപകന്‍ വേണുകുമാരന്‍ നായരെ ജില്ലാ കളക്ടര്‍ ബിജു പ്രഭാകര്‍ ആദരിച്ചു. സ്‌കൂള്‍ പി.ടി.എ. സംഘടിപ്പിച്ച ചടങ്ങില്‍ പി.ടി.എ. പ്രസിഡന്റ് സതീഷ് അധ്യക്ഷതവഹിച്ചു.
ചടങ്ങില്‍ കൊച്ചുകരിക്കകം നൗഷാദ്, എസ്. സുജിത്ത്, ശങ്കരനാരായണന്‍, മുഹമ്മദ്, ക്ലീറ്റസ് തോമസ്, മുഹയ്ദീന്‍ എന്നിവര്‍ പ്രസംഗിച്ചു. വേണുകുമാരന്‍ നായര്‍ മറുപടി പ്രസംഗം നടത്തി. മികച്ചകുട്ടികള്‍ക്ക് സമ്മാനങ്ങള്‍ നല്‍കി.

നടപ്പന്തല്‍ ഉദ്ഘാടനം ചെയ്തു

2014-11-22T23:05:00.001+05:30

പാലോട്. പനങ്ങോട് ആയിരവില്ലി കിരാതമൂര്‍ത്തി ക്ഷേത്രത്തില്‍ നടപ്പന്തലിന്റെ ഉദ്ഘാടനം പാലോട് സബ് ഇന്‍സ്പെക്ടര്‍ ഡി. ഷിബുകുമാര്‍ നിര്‍വഹിച്ചു. ജനപ്രതിനിധികളായ ബി. പവിത്രകുമാര്‍, ജോര്‍ജ് ജോസഫ്, ക്ഷേത്രട്രസ്റ്റ് പ്രസിഡന്റ് ജി. വിജയചന്ദ്രന്‍നായര്‍ എന്നിവര്‍ സന്നിഹിതരായിരുന്നു.

പാട്ടഭൂമിയില്‍ നിന്നും പുരുഷസംഘത്തിന് നൂറുമേനി വിളവ്‌

2014-11-22T18:44:00.001+05:30

പാലോട്: പാട്ടത്തിനെടുത്ത ഭൂമിയില്‍ നിന്നും പുരുഷസംഘം വിളയിച്ച നൂറുമേനി വിളവുകൊയ്യാന്‍ അഡ്വ. എ. സമ്പത്ത് എം.പി. എത്തി. പാലോട് ചിന്ത പുരുഷസ്വയംസഹായ സംഘമാണ് വിളവെടുപ്പ് ഉത്സവം നടത്തിയത്.

ഏത്തവാഴ, പച്ചക്കറി, വിവിധയിനം കിഴങ്ങുവര്‍ഗങ്ങള്‍ എന്നിവയാണ് പുരുഷസംഘം കൃഷിയിറക്കിയത്. നന്ദിയോട് കൃഷിഭവന്റെ കീഴില്‍ കഴിഞ്ഞ വര്‍ഷത്തെ മികച്ച കര്‍ഷകസംഘത്തിനുള്ള അവാര്‍ഡും ചിന്തപുരുഷ സംഘത്തിനായിരുന്നു.

ഭരതന്നൂരില്‍ വീണ്ടും വയല്‍ നികത്തല്‍ വ്യാപകം

2014-11-22T18:43:00.002+05:30

ഭരതന്നൂര്‍: ഭരതന്നൂരില്‍ വീണ്ടും വയല്‍നികത്തല്‍ വ്യാപകമാകുന്നു. പാങ്ങോട് പഞ്ചായത്തിലെ പുലിപ്പാറ, മണക്കോട്, അയിരൂര്‍ തുടങ്ങിയ സ്ഥലങ്ങളില്‍ വ്യാപകമായി നേരത്തെ വയലുകള്‍ നികത്തിയിരുന്നെങ്കിലും കുറച്ചുനാളായി നിര്‍ത്തിവെച്ചിരിക്കുകയായിരുന്നു.

രാത്രി പന്ത്രണ്ടുമണിയോടെ ആരംഭിക്കുന്ന നികത്തല്‍ പുലര്‍ച്ചെ നാലോടെയാണ് അവസാനിക്കുന്നത്. ഭരതന്നൂര്‍ ഗവണ്മെന്റ് ഹയര്‍ സെക്കന്‍ഡറി സ്‌കൂളിന് മുന്നില്‍ മണ്ണിട്ടതാണ് ഒടുവിലത്തെ സംഭവം. മൂന്നുംനാലും ടിപ്പറുകളിലായി ഒരുദിവസം രാത്രിതന്നെ നിരവധി ലോഡ് മണ്ണിട്ട് വയല്‍ നികത്തി കരയാക്കി മാറ്റിയിരിക്കും. ഭരതന്നൂര്‍ ഗാര്‍ഡര്‍ സ്റ്റേഷന്‍ മുതല്‍ കല്ലറ വരെയുള്ള ഏലായില്‍ ഇനി ഒന്നോ രണ്ടോ വയലുകള്‍ മാത്രമേ നികത്താന്‍ ബാക്കിയുള്ളൂ. പരാതിയുമായി റവന്യൂ അധികൃതരെ ബന്ധപ്പെട്ടപ്പോള്‍ പരാതിക്കാരന്റെ വിവരങ്ങള്‍ രഹസ്യമായി ചോര്‍ത്തിക്കൊടുത്ത സംഭവങ്ങളും ഉണ്ടായിട്ടുണ്ട്. കാരേറ്റ്-പാലോട് പ്രധാന റോഡിന്റെ വശത്തായുള്ള ഈ നിയമലംഘനം പലപ്പോഴും അധികൃതര്‍ കണ്ടില്ലെന്ന് നടിക്കുകയാണെന്നും ആക്ഷേപമുണ്ട്.
വയല്‍ നികത്തല്‍ വ്യാപകമായതിനെത്തുടര്‍ന്ന് മഴവെള്ളം കെട്ടിനിന്ന് റോഡും ചെളിക്കളമായി മാറി. നിയമലംഘ

പിടിയിലായ രാജവെമ്പാല പെരുമ്പാമ്പിനെ ഛര്‍ദിച്ചു

2014-11-21T13:09:00.000+05:30

വിതുര: വ്യാഴാഴ്ച വൈകീട്ട് വിതുര പൊന്നാംചുണ്ടില്‍ െവച്ച് വാവസുരേഷിന്റെ പിടിയിലായ രാജവെമ്പാല ഛര്‍ദിച്ചത് പെരുമ്പാമ്പിനെ. പൊന്നാംചുണ്ടിന് സമീപത്ത് കുന്നിന്‍ മുകളിലെ റബര്‍തോട്ടത്തിലാണ് ഉച്ചയ്ക്ക് രാജവെമ്പാലയെ കണ്ടെത്തിയത്.

തോട്ടത്തില്‍ വിറക് ശേഖരിക്കാനെത്തിയ ബിജു എന്ന യുവാവ് കണ്ട കാഴ്ച പെരുമ്പാമ്പിനെ വിഴുങ്ങിക്കൊണ്ടിരുന്ന രാജവെമ്പാലയെ. ഭയന്നോടിയ ബിജു നാട്ടുകാരെയും കൂട്ടി മടങ്ങിയെത്തി. നാട്ടുകാര്‍ വാവസുരേഷിനെ വിവരമറിയിച്ചു. വൈകീട്ടോടെ വാവ എത്തി പിടികൂടുന്നതിനിടെയാണ് രാജവെമ്പാല പെരുമ്പാമ്പിനെ ഛര്‍ദിച്ചത്.

തീറ്റ നഷ്ടപ്പെട്ടതിനാല്‍ അക്രമസ്വഭാവം കാട്ടിയ രാജവെമ്പാലയെ അല്‍പം ശ്രമകരമായാണ് വാവ ചാക്കില്‍ കയറ്റിയത്.താന്‍ പിടികൂടുന്ന 55ാമത്തെ രാജവെമ്പാലയാണിതെന്ന് സുരേഷ് പറഞ്ഞു.

ചെറ്റച്ചല്‍-ഇടമുക്ക് റോഡില്‍ ശ്രമദാനം

2014-11-16T11:52:00.001+05:30

വിതുര: ചെറ്റച്ചല്‍-ഇടമുക്ക് റോഡ് നന്നാക്കാന്‍ സോഷ്യലിസ്റ്റ് ജനത വിതുര പഞ്ചായത്ത് കമ്മിറ്റിയുടെ ശ്രമദാനം. സംസ്ഥാന പാര്‍ലമെന്ററി ബോര്‍ഡ് ചെയര്‍മാന്‍ ചാരുപാറ രവി ഉദ്ഘാടനം ചെയ്തു. ജില്ലാസെക്രട്ടറി ഭദ്രം ജി. ശശി, എ.എ. സമദ്, ടി.വി. പുഷ്‌കരന്‍, വിജയകുമാരി, നബീസാബീവി, ചെറ്റച്ചല്‍ അപ്പുക്കുട്ടന്‍ നായര്‍, ചായം മുരളി, ഷൈല, മണലയം മണികണ്ഠന്‍ എന്നിവര്‍ നേതൃത്വം നല്‍കി.

നദിയിലൂടെ ഒഴുകി കൂറ്റന്‍ മരം പാലത്തില്‍ കുടുങ്ങി; വിതുര-പാലോട് റൂട്ടില്‍ ഗതാഗതം മുടങ്ങി

2014-11-16T11:42:00.002+05:30

വിതുര. കഴിഞ്ഞ ദിവസം രാത്രിയുണ്ടായ മലവെള്ളപ്പാച്ചിലില്‍ ഒഴുകിവന്നു പൊന്നാംചുണ്ട് പാലത്തില്‍ വന്‍മരം കുടുങ്ങിയതോടെ വിതുര-പൊന്നാംചുണ്ട്- പാലോട് റൂട്ടിലെ ഗതാഗതം ഒരു രാത്രി മുടങ്ങി. മരം വിതുര ഫയര്‍ ആന്‍ഡ് റസ്ക്യൂ സ്റ്റേഷന്‍ അധികൃതരെത്തി മുറിച്ചുമാറ്റിയതോടെയാണ്, പന്ത്രണ്ടു മണിക്കൂറുകള്‍ക്കു ശേഷം ഗതാഗതം പുനഃസ്ഥാപിച്ചത്.

ആനപ്പാറ മണലി പാലത്തിനു സമീപം ആറരികത്തു കിടന്നിരുന്ന മൂന്നു മീറ്ററോളം വണ്ണമുള്ള മരമാണു മലവെള്ളപ്പാച്ചിലിനെത്തുടര്‍ന്നു മൂന്നു കിലോമീറ്ററോളം വാമനപുരം നദിയിലൂടെ ഒഴുകി പൊന്നാംചുണ്ട് പാലത്തിനു കുറുകെ തങ്ങിനിന്നത്. ഇതേത്തുടര്‍ന്നു രാത്രി മുതല്‍ പിറ്റേന്നു രാവിലെ വരെ ഗതാഗതം തടസ്സപ്പെട്ടു.

വ്യാഴാഴ്ച പാലോട്ടു നിന്നു വിതുരയിലേക്കു വന്ന ബസ് പാലത്തിനപ്പുറം കുടുങ്ങി. പല വാഹനങ്ങളും അപ്പുറവും ഇപ്പുറവുമായി നിര്‍ത്തിയിടേണ്ടിവന്നു. വിതുരയില്‍ നിന്നു പൊന്നാംചുണ്ടിലേക്കു പോകേണ്ടവര്‍ കാല്‍നടയായാണു വ്യാഴാഴ്ച രാത്രി വീടുകളിലേക്കു പോയത്. രണ്ടു മണിക്കൂറിലധികമെടുത്താണു മരത്തടി മുറിച്ചുമാറ്റിയത്. ഫയര്‍ ആന്‍ഡ് റസ്ക്യൂ അസിസ്റ്റന്റ് സ്റ്റേഷന്‍ ഓഫിസര്‍ രവീന്ദ്രന്‍ നായര്‍ നേതൃത്വം നല്‍കി.

പെരിങ്ങമ്മല - കട്ടയ്ക്കാല്‍ റോഡ് തകര്‍ന്നു

2014-11-02T20:08:00.002+05:30

മഴ: കളീക്കലില്‍ മലവെള്ളം; ഓട്ടോ ഒഴുക്കില്‍പ്പെട്ട് തകര്‍ന്നു

2014-11-02T19:58:00.001+05:30

വിതുര: ശനിയാഴ്ച ഉച്ചയ്ക്ക് പെയ്ത മഴയെത്തുടര്‍ന്ന് വിതര കളീക്കല്‍ ഭാഗത്ത് മലവെള്ളമിറങ്ങി. ചന്തമുക്ക് സ്റ്റാന്‍ഡില്‍നിന്ന് കളീക്കല്‍ അടപ്പുപാറ ഭാഗത്തേക്ക് ഓട്ടം വന്ന ഓട്ടോറിക്ഷ മടക്കയാത്രയില്‍ ഒഴുക്കില്‍പ്പെട്ട് തകര്‍ന്നു. പരിക്കുകളോടെ രക്ഷപ്പെട്ട ഡ്രൈവര്‍ പട്ടന്‍കുളിച്ചപാറ വയലിപ്പുല്ല് ശ്രുതിഭവനില്‍ പുഷ്‌കരനെ (39) മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ഒഴുക്ക് കുറവായതിനാല്‍ വാഹനങ്ങള്‍ തോട്ടിലിറങ്ങിയാണ് അക്കരെ കടക്കുന്നത്. എന്നാല്‍, ഓട്ടോറിക്ഷയുടെ മടക്കയാത്രയില്‍ അപ്രതീക്ഷിതമായി വെള്ളം പൊങ്ങുകയായിരുന്നു. ഒഴുക്കില്‍പ്പെട്ട് നൂറുമീറ്ററോളം താഴേയ്ക്ക് ഒഴുകിയ വാഹനത്തെ വിതുര ഫയര്‍‌സ്റ്റേഷന്‍ ജീവനക്കാരെത്തിയശേഷമാണ് കരയ്‌ക്കെടുക്കാനായത്. ഓട്ടോറിക്ഷ ഏതാണ്ട് പൂര്‍ണമായി തകര്‍ന്നിട്ടുണ്ട്.

പേപ്പാറ മേഖലയില്‍നിന്ന് പിടികൂടിയ അവസാന കാട്ടാനയും ചരിഞ്ഞു

2014-11-02T19:50:00.002+05:30

വിതുര: ഇക്കഴിഞ്ഞ തിങ്കളാഴ്ച പേപ്പാറ കുട്ടപ്പാറ വനത്തില്‍നിന്ന് പിടികൂടിയ പിടിയാന ശനിയാഴ്ച കോന്നി ആനപരിപാലനകേന്ദ്രത്തില്‍ ചരിഞ്ഞു. പേപ്പാറ മേഖലയില്‍നിന്ന് വനംവകുപ്പ് പിടികൂടുന്ന ആനകള്‍ അധികം വൈകാതെ ചരിയുന്ന പതിവാണ് ഇത്തവണയും ആവര്‍ത്തിച്ചത്. ശനിയാഴ്ച ചരിഞ്ഞ പിടിയാനയ്ക്ക് ഒപ്പമുള്ള കുട്ടിക്കൊമ്പന്‍ പൂര്‍ണ ആരോഗ്യവനായിയിരിക്കുന്നതാണ് ഏക ആശ്വാസം.

രാവിലെ 11 മണിയോടെയായിരുന്നു പിടിയാന ചരിഞ്ഞതെന്ന് കോന്നിയിലെ വനപാലകര്‍ അറിയിച്ചു. പ്രായക്കൂടുതലും പരിക്കുകളും മയക്കുവെടി കൊണ്ടുണ്ടായ ക്ഷീണവുമാണ് മരണകാരണമെന്നാണ് പ്രാഥമിക നിഗമനം. വൈകീട്ടോടെ പോസ്റ്റ്‌മോര്‍ട്ടം നടന്നു.
ഒക്ടോബര്‍ രണ്ടാംവാരം മുതല്‍ കുട്ടപ്പാറ ഭാഗത്തെ ആദിവാസി സെറ്റില്‍മെന്റുകളിലിറങ്ങി കൃഷിനാശമുണ്ടാക്കിയ ആനയെ 27നാണ് മയക്കുവെടി വച്ച് പിടികൂടി കോന്നിയിലേക്ക് കൊണ്ടുപോയത്.

കൊലകൊല്ലി എന്ന് വിളിപ്പേരിട്ട നെല്ലിക്കാപ്പാറയിലെ കൊമ്പന്‍, കല്ലാനയെന്ന് സംശയിച്ച ആനക്കയത്തുംമൂലയിലെ കാട്ടാന, കല്ലുപാറ വനത്തില്‍ ഒറ്റപ്പെട്ടുപോയ കുട്ടിക്കൊമ്പന്‍ എന്നിവയാണ് ഇതിനുമുമ്പ് വനംവകുപ്പ ്പിടികൂടിയ ശേഷം ചരിഞ്ഞ ആനകള്‍. ആരോഗ്യത്തിന് തകരാറുണ്ടാകുമ്പോഴാണ് കാട്ടാന നാട്ടിലേക്കിറങ്ങാറ്. ഈയവസ്ഥയില്‍ മയക്കുവെടി കൂടി നല്‍കുമ്പോള്‍ ചരിയാനുള്ള സാധ്യത കൂടുമെന്ന് വനപാലകര്‍ പറയുന്നു.

പേപ്പാറയില്‍ തുറക്കാന്‍ ഇനി ഒരു ഷട്ടര്‍ മാത്രം

2014-10-24T12:02:00.001+05:30

വിതുര: നീരൊഴുക്ക് കൂടിയതോടെ പേപ്പാറ ഡാമിലെ നാല് ഷട്ടറുകളില്‍ മൂന്നെണ്ണവും തുറന്നു. കുടുങ്ങിക്കിടന്ന മരക്കമ്പ് മാറ്റാനായി താത്കാലികമായി തുറന്ന മൂന്നാമത് ഷട്ടര്‍ ഇതുവരെയും അടച്ചിട്ടില്ല. ഇതോടെ ഡാമിലെ ജനനിരപ്പ് 106.3 ല്‍ നിന്ന് 105.8 മീറ്ററായി കുറഞ്ഞെങ്കിലും വ്യാഴാഴ്ച വീണ്ടും മഴ പെയ്തതോടെ നീരൊഴുക്ക് വര്‍ദ്ധിച്ചു.

അഗസ്ത്യമലനിരകളില്‍ ഉരുള്‍പ്പൊട്ടലുണ്ടായ കഴിഞ്ഞമാസം പോലും പേപ്പാറ ഡാമില്‍ രണ്ട് ഷട്ടറുകളെ തുറന്നിരുന്നുള്ളൂ. പക്ഷേ തുലാവര്‍ഷമെത്തിയപ്പോള്‍ ജലം അധികമായി ഒഴുക്കിക്കളയേണ്ട സ്ഥിതിയാണ്. യഥാര്‍ഥത്തില്‍ വേനല്‍കാലത്തേക്ക് കരുതിവെക്കേണ്ട വെള്ളമാണിതെന്ന് ജല അതോറിട്ടി അധികൃതര്‍ പറയുന്നു ഇതിനാണ് ഡാമിന് 110.5 മീറ്റര്‍ ശേഷി നല്‍കിയിരിക്കുന്നതും. എന്നാല്‍ ഈ സംഭരണശേഷി പണ്ടേ വിനിയോഗിക്കാത്തതിനാല്‍ വൃഷ്ടിപ്രദേശത്ത് മരങ്ങള്‍ വളര്‍ന്ന് വനമായി മാറി. ഇപ്പോള്‍ ജലനിരപ്പ് 106 മീറ്റര്‍ കഴിയുമ്പോഴേക്കും വനംവകുപ്പിന്റെ സമ്മര്‍ദത്തില്‍ ജല അതോറിറ്റി അധികൃതര്‍ ഷട്ടര്‍ ഉയര്‍ത്തുകയാണ് പതിവ്.

പേപ്പാറ ഡാം പണിയാന്‍ വേണ്ടി കുടിയൊഴിപ്പിച്ച ആദിവാസി കുടുംബങ്ങള്‍ അവരുടെ താത്പര്യപ്രകാരം വാസമുറപ്പിച്ചത് സമീപത്തെ പൊടിയക്കാല വനമേഖലയിലാണ്. ഡാമില്‍ ജലനിരപ്പുയരുമ്പോള്‍ ഇവരുടെ റോഡിനും കൃഷിയിടങ്ങള്‍ക്കും അടുത്തുവരെ വെള്ളമെത്തുന്ന അവസ്ഥയുമുണ്ട്

ബോണക്കാട് തോട്ടം തുറന്നു

2014-10-24T11:54:00.003+05:30

വിതുര: അഞ്ചുമാസത്തെ അനിശ്ചിതത്ത്വത്തിനുശേഷം ബോണക്കാട് മഹാവീര്‍തോട്ടം വ്യാഴാഴ്ച തുറന്നു. ഒരാഴ്ചമുമ്പ് ലേബര്‍ കമ്മീഷണറുമായുണ്ടാക്കിയ കരാറനുസരിച്ചാണ് മാനേജ്‌മെന്റ് തോട്ടം തുറന്നത്. കരാര്‍പ്രകാരം ഒരുമാസത്തെ കുടിശ്ശിക ശമ്പളം തിങ്കളാഴ്ച വിതരണം ചെയ്തതിനുശേഷമാണ് വ്യാഴാഴ്ച തോട്ടം തുറന്നത്. എസ്റ്റേറ്റ് തുറന്നതിന്റെ ആഹ്ലൂദം കൂടുതല്‍ തൊഴിലാളികള്‍ക്കുമില്ലായിരുന്നു. പാകമായിക്കൊണ്ടിരിക്കുന്ന കുരുമുളകില്‍ കണ്ണുെവച്ചാണ് ഇതുവരെ മുങ്ങിനടന്ന മാനേജ്‌മെന്റ് ഇപ്പോള്‍ തോട്ടം തുറന്നതെന്നാണ് ഇവര്‍ പറയുന്നത്. കോതഗിരിയില്‍നിന്ന് ഒരു മാനേജര്‍ എത്തിയതുമാത്രമാണ് ഇത്തവണത്തെ തോട്ടം തുറക്കലിലുള്ള പുതുമ.

ഇടിഞ്ഞാറില്‍ മണലൂറ്റ് വ്യാപകം; പാലം അപകടത്തില്‍

2014-10-24T11:53:00.002+05:30

പാലോട്: കരയിടിച്ച് മണലൂറ്റ് വ്യാപകമായതോടെ ഇടിഞ്ഞാര്‍ കല്യാണിക്കരിക്കകം പാലം അപകടത്തിലായി. ഇടിഞ്ഞാറില്‍നിന്നും ഈയ്യക്കോട് ആദിവാസി സെറ്റില്‍മെന്റിലേക്കുള്ള പാലമാണ് അപകടാവസ്ഥയിലായിരിക്കുന്നത്.

പാലത്തിന്റെ ഇരുകരകളില്‍നിന്നും നിരന്തരം മണലൂറ്റിമാറ്റുന്നതാണ് പാര്‍ശ്വഭിത്തികള്‍ ഇടിയാന്‍ കാരണം. ഒരുഭാഗത്തെ കല്ലുകെട്ടുകള്‍ പൂര്‍ണമായി ഇടിഞ്ഞുതാണു.
ഈയക്കോട്, കല്യാണിക്കരിക്കകം തുടങ്ങിയ നിരവധി സെറ്റില്‍മെന്റുകളിലുള്ള നൂറുകണക്കിന് ആദിവാസി കുടുംബങ്ങളാണ് ഈ പാലം നിത്യവും ഉപയോഗിക്കുന്നത്. ഇവരുടെ എതിര്‍പ്പിനെ അവഗണിച്ചുകൊണ്ടാണ് മണലൂറ്റ് സംഘം വിലസുന്നത്.

വെള്ളപ്പൊക്കത്തില്‍ ലക്ഷങ്ങള്‍ നഷ്ടപ്പെട്ടവര്‍ക്ക് നഷ്ടപരിഹാരം ലഭിച്ചില്ല

2014-10-24T11:52:00.004+05:30

പാലോട്: വെള്ളപ്പൊക്കത്തില്‍ ഒറ്റരാത്രികൊണ്ട് ലക്ഷങ്ങള്‍ നഷ്ടപ്പെട്ട പാലോട്ടെ എണ്‍പതിലധികം കട ഉടമകളും കച്ചവടക്കാരും പഴയ സ്ഥിതിയിലെത്താനാവാതെ നെട്ടോട്ടത്തില്‍.

സര്‍ക്കാര്‍ വാഗ്ദാനം ചെയ്തിരുന്ന സഹായങ്ങളെല്ലാം ജലരേഖകളായി മാറി. ചില്ലിക്കാശിന്റെ ധനസഹായംപോലും എവിടെനിന്നും ലഭിച്ചില്ല. അപേക്ഷകളുമായി ഇവര്‍ ഇപ്പോഴും താലൂക്ക് ഓഫീസിലും പഞ്ചായത്ത് പടിക്കലും കയറിയിറങ്ങുന്നു. ആഗസ്ത് 22 വെള്ളിയാഴ്ച രാത്രിയിലായിരുന്നു കനത്ത മഴയില്‍ നദി കലിതുള്ളി കരകവിഞ്ഞൊഴുകിയത്.
പാലോട് ആശുപത്രി ജങ്ഷനിലെ 26 കടകളും പാലോട് ടൗണിലെ 54 കടകളുമാണ് അന്ന് വെള്ളത്തിനടിയിലായത്. വെള്ളം കുത്തിയൊഴുകി വന്നതിനാല്‍ പെട്ടെന്ന് വെള്ളം കയറുകയായിരുന്നു. കടകള്‍ അടച്ച് പലരും വീടുകളില്‍ പോയശേഷമായിരുന്നു വെള്ളപ്പൊക്കം. അതുകൊണ്ടുതന്നെ ഒന്നും മാറ്റാന്‍ ആര്‍ക്കും സാധിച്ചില്ല.
കോഴിവളര്‍ത്തല്‍ കേന്ദ്രങ്ങള്‍, പക്ഷിവളര്‍ത്തല്‍ കേന്ദ്രങ്ങള്‍, അക്വേറിയങ്ങള്‍ എന്നിവിടങ്ങളിലെ ജീവികള്‍ ചത്തൊടുങ്ങി. നഴ്‌സറികള്‍ അഴുകി നശിച്ചു. മലവെള്ളം ഇറങ്ങിയശേഷം കടകള്‍ ചെളിമയമായി. ഇലക്ട്രോണിക് ഉപകരണങ്ങള്‍ മുഴുവന്‍ നശിച്ചു. ലക്ഷങ്ങളുടെ നഷ്ടമാണ് ഓരോ കച്ചവടക്കാര്‍ക്കും ഉണ്ടായത്.
റവന്യു ഉദ്യോഗസ്ഥര്‍ സബ്കളക്ടറുടെ നേതൃത്വത്തില്‍ സ്ഥലം സന്ദര്‍ശിച്ച് നഷ്ടങ്ങള്‍ കണക്കാക്കിയിരുന്നു. ഉടന്‍തന്നെ അപേക്ഷകള്‍ നല്‍കാനും നിര്‍ദേശമുണ്ടായി. പക്ഷേ, അപേക്ഷനല്‍കി മാസം രണ്ടുകഴിഞ്ഞിട്ടും ഒരു സഹായവും ആര്‍ക്കും കിട്ടിയില്ല. കടകള്‍ പൂര്‍ണമായും നശിച്ചുപോയവരും കൂട്ടത്തിലുണ്ട്. അവര്‍ക്ക് അടിയന്തരമായി സഹായം ലഭിക്കുമെന്ന് പറഞ്ഞിരുന്നു. പ്രശ്‌നങ്ങള്‍ നിയമസഭയിലെത്തിക്കാമെന്ന എം.എല്‍.എ.യുടെ വാഗ്ദാനവും എത്തുമെത്തിയില്ല.
പാലോട് കരിമണ്‍കോട് റോഡില്‍ സര്‍വീസ് സഹകരണ ബാങ്ക് മുതല്‍ പാപ്പനംകോട് സര്‍വീസ് സ്റ്റേഷന്‍വരെയുള്ള കടകളും പ്ലാവറ റോഡുവരെയുമുള്ള കടകളുമാണ് വെള്ളപ്പൊക്കത്തില്‍ നശിച്ചത്. ഇതില്‍ സര്‍ക്കാര്‍, അര്‍ധസര്‍ക്കാര്‍ സ്ഥാപനങ്ങള്‍, ആശുപത്രികള്‍, ലാബുകള്‍, മെഡിക്കല്‍ സ്റ്റോറുകള്‍ എന്നിവയെല്ലാം ഉള്‍പ്പെടും. ലക്ഷങ്ങള്‍ മുടക്കിവാങ്ങിയ ലബോറട്ടറി ഉപകരണങ്ങള്‍ നഷ്ടപ്പെട്ടവരും കൂട്ടത്തിലുണ്ട്.
നഷ്ടപരിഹാരത്തിന്റെ വിവരത്തെപ്പറ്റി വില്ലേജ് ഓഫീസില്‍ അന്വേഷിച്ചാല്‍ 'ഫയലുകളെല്ലാം താലൂക്ക് ഓഫീസിലാണ്' എന്നാണ് മറുപടിയെന്ന് വ്യാപാരികള്‍ പറയുന്നു. ധനസഹായം ഇനിയും ലഭ്യമാകാത്തതില്‍ അധികൃതരുടെ അനാസ്ഥയുണ്ടെന്നും ഇത് തുടരുകയാണെങ്കില്‍ വ്യാപാരികള്‍ തിരുവനന്തപുരം-തെങ്കാശി റോഡ് ഉപരോധിച്ചുകൊണ്ടുള്ള സമര പരിപാടികളുമായി രംഗത്തുവരുമെന്നും വ്യാപാരി സംഘടനകള്‍ പറയുന്നു.

പാങ്ങോട് പോലീസ് സ്റ്റേഷന്‍ പരിസരം വൃത്തിയാക്കി

2014-10-12T21:04:00.001+05:30

കല്ലറ: കാടുപിടിച്ചു കിടന്ന പോലീസ് സ്റ്റേഷന്‍ പരിസരം വൃത്തിയാക്കി പോലീസുകാര്‍. പാങ്ങോട് പോലീസ് സ്റ്റേഷനിലാണ് പോലീസ് സേനയ്ക്ക് മാതൃകയായ ശുചിത്വയജ്ഞം. വാഹനങ്ങള്‍ നിറഞ്ഞും കാടുപിടിച്ചും മൂടിക്കിടന്നിരുന്ന പോലീസ് സ്റ്റേഷന്റെ ദുരവസ്ഥയെക്കുറിച്ച് 'മാതൃഭൂമി' വാര്‍ത്ത പ്രസിദ്ധീകരിച്ചു. പുതുതായി എത്തിയ എസ്.ഐ. ജയനും ഇദ്ദേഹത്തിന്റെ നേതൃത്വത്തിലുള്ള പോലീസുകാരും ചേര്‍ന്നു പരിസരം മനോഹരമാക്കാന്‍ തീരുമാനിക്കുകയായിരുന്നു.
ഗാന്ധിജയന്തി ദിനത്തില്‍ ശുചീകരണത്തിന് തുടക്കമായി. സ്റ്റേഷനു മുന്നിലും പിറകിലുമായി കൂട്ടിയിട്ടിരുന്ന വാഹനങ്ങള്‍ ഒരു ഭാഗത്തേക്ക് മാറ്റി. സ്റ്റേഷനു പിന്‍ ഭാഗത്ത് വാഴ, മരച്ചീനി, ചീര, വെണ്ട എന്നിവയുടെ കൃഷി തുടങ്ങി. മുന്‍വശത്ത് മീന്‍കുളം, കൊക്ക്, നൂറോളം വിവിധ ചെടികള്‍ എന്നിവയും തയ്യാറാക്കി. സ്റ്റേഷന്റെ മുന്‍വശത്ത് ഒരു പാര്‍ക്കിന്റെ പ്രതീതി ഉണ്ടാക്കിയിട്ടുണ്ട്. പരാതിയുമായെത്തുന്നവര്‍ക്ക് വിശ്രമസൗകര്യം, പരാതി എഴുതാനുള്ള മേശ, പേന, പേപ്പര്‍ തുടങ്ങി എല്ലാ സൗകര്യങ്ങളും നല്‍കി മാതൃകാ സ്റ്റേഷനാക്കണമെന്നാണ് ലക്ഷ്യമെന്ന് പോലീസുകാര്‍ പറയുന്നു.

പാട്ടഭൂമിയില്‍നിന്ന് സംഘജ്യോതി കൊയ്‌തെടുത്തത് നൂറുമേനി നെല്ല്‌

2014-10-11T19:09:00.002+05:30

പെരിങ്ങമ്മല: പത്തുപറ കണ്ടം പാട്ടത്തിനെടുത്ത് നെല്‍കൃഷി ചെയ്യാനിറങ്ങുമ്പോള്‍ ഈ കൂട്ടായ്മയ്ക്ക് ആത്മവിശ്വാസം മാത്രമായിരുന്നു കൈമുതല്‍. എന്നാല്‍ വിളവ് എടുക്കാനിറങ്ങുമ്പോള്‍ നൂറുമേനി നെല്ല്. വട്ടപ്പന്‍കാട് സംഘജ്യോതി പുരുഷകര്‍ഷകസംഘത്തിന്റെ ആദ്യശ്രമമാണ് വിജയത്തിലെത്തുന്നത്. നന്ദിയോട് ഗ്രാമപ്പഞ്ചായത്തില്‍ വയല്‍ ഇല്ലാതെ വന്നതോടെ പെരിങ്ങമ്മല നോര്‍ത്ത് പാടശേഖരത്തിലാണ് ഇവര്‍ കണ്ടം പാട്ടത്തിനെടുത്തത്.

'ഉമ' ഇനത്തില്‍പ്പെട്ട നെല്ലാണ് ഇവര്‍ കൃഷിക്ക് തിരഞ്ഞെടുത്തത്. നന്ദിയോട് / പെരിങ്ങമ്മല കൃഷിഭവനുകളുടെയും പെരിങ്ങമ്മല നോര്‍ത്ത്പാടശേഖരസമിതിയുടെയും പ്രോത്സാഹനം തങ്ങള്‍ക്കുണ്ടായിരുന്നെന്ന് സംഘം പ്രസിഡന്റ് മോഹനനും സെക്രട്ടറി സജീഷും പറയുന്നു. മാസങ്ങള്‍ക്കുമുമ്പ് വട്ടപ്പന്‍കാട്ടില്‍ തന്നെ പാട്ടത്തിനെടുത്ത് കൃഷി ചെയ്ത ഭൂമിയില്‍ നിന്നും ഇവര്‍ വാഴയും പയറും വിളവെടുത്തു തുടങ്ങി. ഇതിനു പിന്നാലെയാണ് ഇപ്പോള്‍ പാട്ടഭൂമിയില്‍ നിന്ന് നൂറുമേനി നെല്ല് വിളയിക്കുന്നതും.

ദേശീയ സസ്യോദ്യാനം കേന്ദ്രസര്‍ക്കാര്‍ ഏറ്റെടുക്കണം - ഒ.രാജഗോപാല്‍

2014-09-11T16:22:00.002+05:30

പാലോട്: പാലോട്ടെ ജവഹര്‍ലാല്‍ നെഹ്‌റു ട്രോപ്പിക്കല്‍ ബൊട്ടാണിക്കല്‍ ഗാര്‍ഡന്‍ ആന്‍ഡ് റിസര്‍ച്ച് ഇന്‍സ്റ്റിറ്റിയൂട്ട് കേന്ദ്രസര്‍ക്കാര്‍ ഏറ്റെടുക്കണമെന്ന് മുന്‍ കേന്ദ്രമന്ത്രി ഒ.രാജഗോപാല്‍ ആവശ്യപ്പെട്ടു. സംസ്ഥാന ശാസ്ത്ര സാങ്കേതിക കൗണ്‍സിലിന്റെ കീഴില്‍ പ്രവര്‍ത്തിച്ചുവരുന്ന ഉദ്യാനത്തെ ദേശീയ നിലവാരത്തിലേക്ക് ഉയര്‍ത്തണം. അന്തര്‍ദേശീയ പഠന - ഗവേഷണ പ്രവര്‍ത്തനങ്ങള്‍ സാധ്യമാക്കുന്നതിന് കേന്ദ്രം ഏറ്റെടുക്കേണ്ടത് അത്യാവശ്യമാണെന്നും അദ്ദേഹം പറഞ്ഞു.
ബുധനാഴ്ച രാവിലെ സ്ഥാപനം സന്ദര്‍ശിച്ചശേഷം ശാസ്ത്രജ്ഞരുമായി സംസാരിക്കുകയായിരുന്നു അദ്ദേഹം. പ്രധാനമന്ത്രി നരേന്ദ്രമോദി ഈ വിഷയത്തില്‍ വേണ്ടത്ര ഗൗരവം കാണിക്കുമെന്നും സ്ഥാപനത്തിന്റെ കാര്യം അദ്ദേഹത്തോട് നേരിട്ടു സംസാരിക്കുമെന്നും അദ്ദേഹം പറഞ്ഞു.
ഉദ്യാനത്തിന്റെ ഡയറക്ടര്‍ ഡോ. പി.ജി.ലത, വകുപ്പ് മേധാവികളായ ഡോ. പാണ്ഡുരംഗന്‍, ഡോ.സാബുലാല്‍, ഡോ.ടി.ജെ.മാത്യു, ഡോ.എന്‍.മോഹനന്‍, ഡോ.സി.ജെ.സുധ എന്നിവര്‍ ഒ.രാജഗോപാലുമായി സംസാരിച്ചു.
ബി.ജെ.പി. ജില്ലാ പ്രസിഡന്റ് അഡ്വ. സുരേഷ്, സംസ്ഥാന സമിതി അംഗം വെള്ളനാട് കൃഷ്ണകുമാര്‍, മണ്ഡലം പ്രസിഡന്റ് എം.ആര്‍.ചന്ദ്രന്‍, സെക്രട്ടറി ആര്‍.സുനില്‍, ടി.ബി.ജി.ആര്‍.ഐ. എംപ്ലോയീസ് സംഘ് പ്രസിഡന്റ് സന്തോഷ് കുമാര്‍, സെക്രട്ടറി ഡോ.അജികുമാരന്‍ നായര്‍, വൈസ് പ്രസിഡന്റ് ഡോ.വിനോദ്, ജോയിന്റ് സെക്രട്ടറി ഡോ.വേണുകുമാര്‍ എന്നിവര്‍ രാജഗോപാലിനൊപ്പമുണ്ടായിരുന്നു.

മീനില്‍ പുഴുക്കളെ കണ്ടെത്തി

2014-09-11T16:21:00.004+05:30

ഭരതന്നൂര്‍: ചന്തയില്‍നിന്ന് വാങ്ങിയ ചൂരമീനില്‍ പുഴുക്കളെ കണ്ടെത്തി.ഭരതന്നൂര്‍ കാര്‍ത്തികയില്‍ രാജശേഖരന്‍ കഴിഞ്ഞദിവസം ഭരതന്നൂര്‍ ചന്തയില്‍ നിന്ന് വാങ്ങിയ ചൂര മീനിനുള്ളിലാണ് പുഴുക്കളെ കണ്ടത്.കാഴ്ചയില്‍ മത്സ്യം ചീഞ്ഞതായി തോന്നിയിരുന്നില്ല. വൃത്തിയാക്കുമ്പോള്‍ കടുത്ത ദുര്‍ഗന്ധം ഉണ്ടായിരുന്നു. ആരോഗ്യവകുപ്പ് അധികൃതര്‍ക്ക് ഉടന്‍ പരാതി നല്‍കുമെന്ന് രാജശേഖരന്‍ പറഞ്ഞു.

കല്ലറ-പാലാട് റോഡ് തകര്‍ന്നു

2014-09-11T16:20:00.001+05:30

കല്ലറ: രണ്ട് വര്‍ഷങ്ങള്‍ക്ക് മുമ്പ് ഒന്നേകാല്‍ കോടി രൂപയോളം ചെലവഴിച്ച് പണിചെയ്യിച്ച കല്ല-പാലോട് റോഡ് തകര്‍ന്നു. റോഡ് നന്നാക്കാത്തില്‍ പ്രതിഷേധിച്ച് നാട്ടുകാര്‍ റോഡില്‍ വാഴനട്ടു.
എം.സി. റോഡില്‍നിന്ന് കാരേറ്റ് വഴി പാലോട്ടേക്ക് പോകുന്ന പ്രധാന റോഡാണിത്. കല്ലറനിന്ന് പൊന്മുടിയിലേക്കും മറ്റും പോകുന്ന ഏക റോഡും ഇതാണ്.
പാങ്ങോട്-മണക്കോട് മുതല്‍ ഭരതന്നൂര്‍ സ്‌കൂള്‍ ജങ്ഷന്‍വരെ നാല് കിലോമീറ്റര്‍ പൂര്‍ണമായും തകര്‍ന്ന നിലയിലാണ്. റോഡില്‍ പുലിപ്പാറ മണക്കോട്ടും ഭരതന്നൂര്‍ ഹൈസ്‌കൂള്‍ ജങ്ഷനിലും വന്‍ കുഴികളാണ്. ഇവിടെ വെള്ളം നിറഞ്ഞ് ഇരുചക്ര യാത്രക്കാര്‍ അപകടത്തില്‍പ്പെടുന്നുണ്ട്.
പുലിപ്പാറ മുതല്‍ പാങ്ങോടുവരെ മുക്കാല്‍ കിലോമീറ്റര്‍ ദൂരം റോഡിന് 10 വര്‍ഷമാണ് ഗ്യാരണ്ടി പറഞ്ഞിരുന്നത്. എന്നാല്‍ അധികൃതരുടെ ഭാഗത്തുനിന്നും കരാറുകാരനെക്കൊണ്ട് റോഡ് നവീകരിക്കുന്നതിനുള്ള നടപടി ഉണ്ടായിട്ടില്ല. എത്രയുംവേഗം റോഡ് ഗതാഗതയോഗ്യമാക്കിയില്ലെങ്കില്‍ റോഡ് ഉപരോധമുള്‍പ്പെടെയുള്ള സമരമാര്‍ഗങ്ങള്‍ സ്വീകരിക്കുമെന്ന് കോണ്‍ഗ്രസ് പാങ്ങോട് മണ്ഡലം പ്രസിഡന്റ് എം.എം. ഷാഫി പറഞ്ഞു.

പൊന്മുടിയില്‍ ഓണമഞ്ഞ്

2014-09-08T12:11:00.000+05:30

വിതുര. മഴമാറി മഞ്ഞണിഞ്ഞതോടെ പൊന്മുടി കൂടുതല്‍ സുന്ദരിയായിരിക്കുകയാണ്. ഓണദിനങ്ങളില്‍ സഞ്ചാരികളെ വരവേല്‍ക്കാന്‍ പ്രകൃതിയുടെ നേതൃത്വത്തില്‍ മഞ്ഞും കുളിരും തയാര്‍. ഉത്രാടദിനമായ ഇന്നലെയും മിനിയാന്നും മോശമല്ലാത്ത രീതിയില്‍ പൊന്മുടിയിലേക്കു സഞ്ചാരികളെത്തി. സന്ദര്‍ശകര്‍ക്ക് ഏര്‍പ്പെടുത്തിയിരുന്ന നിയന്ത്രണം കൂടി അവസാനിച്ചതോടെ പൊന്മുടിയിലേക്കു സഞ്ചാരികളുടെ ഒഴുക്കു തുടങ്ങിയിട്ടുണ്ട്.

കഴിഞ്ഞ രണ്ടു ദിവസമായി ഓണത്തിനോടനുബന്ധിച്ചുള്ള പരക്കം പാച്ചില്‍ നടത്തുന്ന മലയാളി ഇന്ന് ഉച്ചയ്ക്കു തിരുവോണ സദ്യയുണ്ടു കഴിഞ്ഞാല്‍ ആസ്വാദനത്തിന്റെ പുതിയ തലങ്ങള്‍ തേടി യാത്ര തുടങ്ങും. അങ്ങനെ പൊന്മുടിയുടെ മടിത്തട്ടിലേയ്ക്കു വിവിധ സ്ഥലങ്ങളില്‍ നിന്നുമെത്തുന്ന സഞ്ചാരികള്‍ക്ക് എല്ലാവിധ സൌകര്യങ്ങളുമൊരുക്കി കാത്തിരിക്കുകയാണു പൊന്മുടി വന സംരക്ഷണ സമിതി അംഗങ്ങളുള്‍പ്പടെയുള്ളവര്‍.

വിനോദ സഞ്ചാരികളില്‍ നിന്നും സ്വര്‍ണാഭരണങ്ങള്‍ കവര്‍ന്ന സംഭവം ഈയിടെയുണ്ടായ സാഹചര്യത്തില്‍ കൂടുതല്‍ സുരക്ഷാ സംവിധാനങ്ങള്‍ പൊന്മുടി വന സംരക്ഷണ സമിതിയുടെ നേതൃത്വത്തിലൊരുക്കിയിട്ടുണ്ട്. കല്ലാര്‍ ഗോള്‍ഡന്‍ വാലി മുതല്‍ പൊന്മുടി ചെക്ക്പോസ്റ്റ് വരെ ശക്തമായ സുരക്ഷയാണ് ഒരുക്കിയിട്ടുള്ളത്. പൊന്മുടി പൊലീസും സഞ്ചാരികളുടെ സംരക്ഷണാര്‍ഥം രംഗത്തുണ്ട്.

സ്നേഹം പകര്‍ന്നു പാലോട്ട് കൂട്ടയോട്ടം

2014-09-08T12:06:00.003+05:30

പാലോട്. ഓണം അമ്മയോടൊപ്പം എന്ന സന്ദേശവുമായി സംസ്ഥാന യുവജന ക്ഷേമ ബോര്‍ഡും പാലോട് ജനമൈത്രി പൊലീസും ചേര്‍ന്നു സംഘടിപ്പിച്ച സ്നേഹ സന്ദേശ കൂട്ടയോട്ട മല്‍സരം ശ്രദ്ധേയമായി. നന്ദിയോട് ജംക്ഷനില്‍ ഡിവൈഎസ്പി:വൈ.ആര്‍. റസ്റ്റം ഫ്ലാഗ് ഓഫ് ചെയ്തു. തുടര്‍ന്നു നടന്ന ഓട്ടത്തില്‍ ഡിവൈഎസ്പിയും സിഐ ശ്യാംലാലും, എസ്ഐ: ഡി. ഷിബുകുമാറും അടക്കമുള്ള പൊലീസുകാരും ജനപ്രതിനിധികളും മല്‍സരാര്‍ഥികളോടൊപ്പം നന്ദിയോടു മുതല്‍ പാലോട് വരെ ഓടിയത് ആവേശത്തിരയിളക്കി.

രക്തദാനം ചെയ്തതിന്റെ പിറ്റേ ദിവസം മൂന്നു കിലോമീറ്ററിലേറെ ഓടി രക്തദാന സന്ദേശം കൂടി നല്‍കുകയായിരുന്നു ഡിവൈഎസ്പി. പാലോട് ജംക്ഷനില്‍ നടന്ന ചടങ്ങില്‍ വിജയികള്‍ക്കു യുവജന ക്ഷേമ ബോര്‍ഡ് വൈസ് ചെയര്‍മാന്‍ പി.എസ് പ്രശാന്ത് ട്രോഫികളും ക്യാഷ് അവാര്‍ഡും സമ്മാനിച്ചു.

ജില്ലാ പഞ്ചായത്ത് അംഗം സോഫി തോമസ്, പി.എസ് ബാജിലാല്‍, ബി. പവിത്രകുമാര്‍,ടി.കെ വേണുഗോപാല്‍, കെ. സന്തോഷ്, ജി. സുഭാഷ്, ഡി. രഘുനാഥന്‍നായര്‍, ഒഴുകുപാറ അസീസ്, എസ്. സുജിത്, മനേഷ് ജി നായര്‍, രാജ്കുമാര്‍,സുധീര്‍ഷാ, ഷെഹനാസ് തുടങ്ങിയവര്‍ പ്രസംഗിച്ചു. മല്‍സരത്തില്‍ നന്ദിയോട് സ്വദേശി അഭിജിത് ഒന്നാം സ്ഥാനവും ചിപ്പന്‍ചിറ സ്വദേശി ഹരികൃഷ്ണന്‍, രണ്ടാം സ്ഥാനവും പാലോട് സ്വദേശി കിരണ്‍ മൂന്നാം സ്ഥാനവും നേടി. ഓട്ടത്തില്‍ പങ്കെടുത്ത പ്രായം കൂടിയ ഗിരീശന്‍ നായര്‍, പ്രായം കുറഞ്ഞ ഗോപീകൃഷ്ണന്‍ എന്നിവര്‍ പ്രോല്‍സാഹന സമ്മാനവും നേടി.