Panta Rei

Говор на омраза и кај бугарските навивачи

noreply@blogger.com (GoodBytes) — Fri, 27 Jan 2012 18:18:00 +0000

На почеток, честитки за македонската репрезентација за освоеното петто место на Европското првенство во ракомет. За жал, овој пост има малку врска со спорт - но тоа и е мојата поента.

Како дополнување на мојот претходен текст, „Доста со навивачка омраза“, ќе посочам на сторијата која ја објави Deutsche Welle за говорот на омраза, кој се забележува и кај навивачите од Бугарија. Во него се кажува за расистичките скандирања против играчите со темна кожа од англиската репрезентација, како и за расистичкиот наслов во еден бугарски весник, во кој новите играчи за CSKA од Камерун и Мали се нарекуваат „црнотии“.

DW: Говорот на омраза од трибините со фанови се всели и во медиумите. Минатата недела „7 дена спорт“, еден од најголемите бугарски спортски весници, објави текст за новите донесени играчи во првата фудбалска лига. Насловот гласеше „Нов влез за ЦСКА Софија: еден Италијанец, еден Швеѓанец и две црнотии“.

Весникот отфрла одговорност за објавениот расизам, но бугарскиот Хелсиншки комитет за човекови права е спремен овој инцидент да го расчисти до крај и тоа пред Европскиот суд за човекови права.

Ова покажува дека агресијата и омразата си го наоѓаат местото и во околните држави, и дека од нив не се имуни ни медиумите. Ако не се запрат или барем маргинализираат расистичките и национал-шовинистичките движења, па дури и тие кои се маскирани во спортско навивање или известување, тие со тек на време стануваат прифатени од една група, но и придонесуваат за растење на тензиите.

Кога ќе одат навивачите на трибини, треба да уживаат во спортот, а не да се горчат со бесмислени навреди кон некој со друга боја на кожата. Како што ние треба да се оградиме од домашниот говор на омраза кај сите навивачки групи, истото треба да го направи и бугарската јавност. Ова не важи само за спортот - исто така, кога некое полудено попче од Солун ќе повикува да се прегазат „скопјаните“, тогаш „неговите“ треба да го осудат таквиот повик, како што ги осудија војниците кои ќе ги дереа нашите скопски кожи.

Ако во светот преовладува разумот, сите ние ќе имаме подобар живот. Ако дозволиме да преовлада неразумот, тогаш сиот светски „патриотизам“ нема да ни помогне.

Доста со навивачка омраза

noreply@blogger.com (GoodBytes) — Wed, 25 Jan 2012 16:07:00 +0000

Говорот на омраза кој се шири маскиран во патриотско навивање за македонската репрезентација, не само што одамна ги помина сите граници на моралот и хуманоста, туку се граничи и со автодеструктивност. Не можам да ја прифатам глорификацијата на „гоцевата раса“, бидејќи расите се за расистите, но и бидејќи идеалите за кои се бореа македонските револуционери содржеа космополитизам, а не национал-шовинизам. Исто, не можам да го прифатам освојувањето на Солунско Поле, бидејќи иако сметам дека тоа е еден од регионите од кои потекнува нашиот народ (но не само нашиот), сепак е неразумно и непотребно да се „враќаат територии“ во ова време. Историјата е полна со жртви на војни за територии. Подобро е сите заедно да живееме без граници, па тоа нека биде вреден идеал кон кој ќе се стремиме.

Photo: EHF

Уште една работа која е неприфатлива се скандирањата во кои има навреди на етничка или верска основа. Како што албанските навивачи користат погрдни слогани и песни за да го искажат својот квази-патриотизам, така и македонските навивачи извикуваат навреди за „клети Шиптари“, Грци, или кој и да е друг, сеедно. Сите овие нехумани и нетолерантни скандирања се од една страна сосем бескорисни (бидејќи не носат ништо добро за никого), а од друга страна создаваат една бескрајна спирала која води кон насилство и страдања на луѓе кои немаат врска со омразата на неколкумина.

Во текстот „Да навиваме, ама да се мразиме“, Бранко Героски вели:

Од друга страна, тоа што нашите спортисти постигнуваат возбудливи успеси на меѓународната сцена и што тие успеси ја сплотуваат нацијата во радоста, сепак, за мене барем, не го оправдува нашиот молк пред фактите, кои укажуваат дека меѓу нашите навивачи има и хулигани и шовинисти, дека во навивачките песни во Ниш се спомнаа и „клетите шиптари“ и дека никој до денес не собра храброст јавно да се огради од ваквото однесување, кое нема врска со спорот. Сега сите ловат поени и поенчиња, славејќи ги успесите на нашите спортисти (кои, нели, „гинат“ на теренот, за Македонија), па затоа простата калкулација покажува дека тој што ќе го крене гласот против расистичките и шовинистичките испади, ризикува да заврши како Мирјана Најчевска, како Роберто Беличанец и како сите други кои беа прогласени за ѓаволи, само затоа што се осмелија да кажат дека песната за „Гоцевата раса“ што ќе го освои „солунското поле“, е неприкладна за славење на спортски успеси и дека станува збор за расистичка песна.

Ќе ме радува ако луѓето научат да живеат еден покрај друг без да им пречат нивните разлики. Тоа е следниот стадиум во развојот на нашиот менталитет и е чекор напред кон функционална светска држава, каква што постепено се создава под дејство на интегративните глобализациски процеси. Гледано од една ваква перспектива, нашите локални кавги изгледаат ситно и безначајно.

Напред Македонија, и да живее цел свет!

MaxTV, среди го бирањето превод

noreply@blogger.com (GoodBytes) — Fri, 13 Jan 2012 22:50:00 +0000

Дигиталната телевизија на T-Home во Македонија се вика MaxTV. Како корисник на оваа нивна услуга можам да речам дека сум задоволен од квалитетот на сликата и од понудените канали. Но, има една работа која ме иритира откако ја имам MaxTV, а тоа е бесмисленото бирање превод секогаш кога ќе се избере каналот. Начинот на кој е смислена оваа операција е следниот:

Се избира каналот (кој е на странски јазик и за кој има превод, како на пример National Geographic).
Се кликнува копчето кое ги отвора опциите за преглед.
Се избира групата „Преводи“.
Се избира одреден превод.
Се кликнува на копчето ОК.

Навидум едноставна и брза постапка за бирање превод, нели? Но, не е така „едноставно и брзо“ како што изгледа: ако се промени каналот, за потоа пак да се дојде на каналот за кој бил избран преводот, подесувањето се губи и постапката треба да се повтори. Некој ќе рече, не е толку страшно, но ако често „моташ“ по каналите и ако гледаш странски канали, ова станува напорно, па дури и иритирачко со својата бесмисленост.

Решението за овој проблем е максимално едноставно и елегантно, а освен тоа е тривијално за имплементација: по избор на преводот „македонски“ за каналот „National Geographic“, системот да го запише ова подесување во некоја мала табела која ќе изгледа отприлика вака:

Канал	Превод
101	1
102	1
...	...

Во табелата погоре, 101 е ID на каналот National Geographic, потоа 102 го означува Discovery Channel, и слично. Во колоната „Превод“, бројот 1 е ID на македонскиот превод, 2 на албанскиот, 3 на српскиот и.т.н. Па сега, системот автоматски ќе го поставува последно избраниот превод за секој канал кој ќе биде избран.

Медиа приемникот на MaxTV всушност е рудиментарен компјутер кој работи на WindowsCE, па верувам дека не е тешко да се прават промени од ваков тип. Времето кое еден програмер ќе го потроши да ја имплементира оваа функционалност е помало од времето кое ми требаше да го напишам овој пост, а заштедата во време и нерви на илјадниците клиенти, како и заштедата во арчење на копчињата и батериите на далечинскиот управувач се огромни.

MaxTV, среди го бирањето превод!

Поповите бараат државни плати

noreply@blogger.com (GoodBytes) — Thu, 05 Jan 2012 11:54:00 +0000

Ако не си вработен, основај верска заедница и произведувај „духовна храна“. Благодарение на притисокот од црквата, еден ден може да земаш и плата за својата работа.

Канал 5: По бизнисмените, социјалните случаи, стечајците, и други маргинали социјални случаи и поповите и владиците се наредија во редот за помош од државата. Бараат државата да се однесува како членка на Европската унија и да почне да дава пари за плати и други бенефиции на свештените лица... [Владиката Петар] нагласува дека народот ја обезвреднил духовната храна зашто додека на јадење, пиење и лумпување на свадби се трошат и по 10.000 евра, надоместот за крштевки и венчавки на верниците им се гледа скап. Владиката во својот апел до државата денеска не ги спомна скапите возила што ги возат...

Само внимавај, затоа што може да се случи статусот „државен духовник“ да го добијат само доминантните религии. Ќе треба да се навлечат што поголем број следбеници (Твитер не се рачуна) за да капне платичка.

Медицина на криминалот

noreply@blogger.com (GoodBytes) — Wed, 21 Dec 2011 22:16:00 +0000

Неодамна во САД беше откриена голема мрежа за криминално влечење финансии од фондот за здравство преку офшор компании и фантом фирми со американска адреса. Овие нелегални операции минатата година испрале 48 милијарди долари од вкупно 526 милијарди долари тешкиот фонд Medicare.

Во секоја земја постојат криминални активности кои ја експлоатираат индиферентноста на јавната администрација и кои со леснотија цицаат огромни пари од касата која е „сечија и ничија“. Но, сепак може да се направи дистинкција помеѓу напредните и назадните земји, и тоа барем по две работи:

Во напредните земји постојат реални механизми за превенција или детекција на ваквите дубари (очигледно не совршени, но сепак функционираат).
Во напредните земји се анализираат и се крпат дупките во законите и/или институциите за да се избегнат слични проневери во иднина.

Македонија исто има фонд за здравство, кој исто „врти“ огромни пари. Она што ме загрижува е што кај нас не се ни откриваат здравствените далавери, камо ли да се пристапи кон нивно решавање.

Линк: Special Report: Phantom firms bleed millions from Medicare (Ројтер).

На пат со Google Street View

noreply@blogger.com (GoodBytes) — Wed, 07 Dec 2011 19:56:00 +0000

Мала фигурка од масата во една канцеларија се обидува да го види светот и тргнува на пат од Њујорк до Калифорнија, користејќи автомобилче-играчка и Google Street View. Креативно кратко видео кое е направено со stop-motion анимација како личен проект на еден лондонски режисер.

Од Фејсбук, искрено

noreply@blogger.com (GoodBytes) — Wed, 30 Nov 2011 17:50:00 +0000

Mark Zuckerberg, сопственикот на Facebook, објави порака со наслов Our Commitment to the Facebook Community, во која дава осврт на повеќе аспекти на популарниот веб сервис, меѓу кои и приватноста на корисниците. Како одговор на оваа порака, новинарот Dan Lyons, кој пишува за The Daily Beast, објави пародија од истиот текст, која е водена од темата: што ќе кажеше Марк Цукерберг ако беше брутално искрен?

Фото: Andrew Feinberg.

Сајтот Он.нет објави превод од оваа статија, па сметам дека ќе биде интересно да се прочита, со обзир колку Фејсбук манијаци има по нетов.

Вистината е дека нас не не интересира заштитата на вашата приватност а ако се уште верувате дека не засега, тогаш сте поглупави од што мислевме а верувајте мислиме дека сте многу глупави. Единствен начин нашиот бизнис да функционира е да следиме се што правите и да ги продаваме вашите информации на огласувачите. Искрено, нели веќе го сфативте тоа?

Вие не сте наш клиент. Вие сте производ кој ние го продаваме. Да речеме дека ќе ве заштитиме е исто како луѓето од живинарските фарми да ветат дека ќе создадат похумани услови за живот за кокошките. Нормално дека тие тоа го велат, ама и сами знаете дека не го мислат.

Линк: Ако Цукерберг беше искрен (целиот текст на Он.нет).

Се испили зборот

noreply@blogger.com (GoodBytes) — Sun, 20 Nov 2011 00:00:00 +0000

Според Free Dictionary, зборот "tweet" на англиски јазик значи:

Noun

A weak chirping sound as of a small bird.

Verb

Make a weak, chirping sound; "the small bird was tweeting in the tree".
Squeeze tightly between the fingers; "He pinched her behind"; "She squeezed the bottle".

Значи, се работи за постоечки збор во англискиот јазик. Па сега се прашувам: која будала од судија му доделува trademark на лице или компанија над овој збор? Какви се тие закони и на кого му служат, ако една фирма може да патентира збор кој вообичаено се користи?

Обединети бои на љубовта

noreply@blogger.com (GoodBytes) — Thu, 17 Nov 2011 13:44:00 +0000

„Немој да мразиш“, или „одмрази“ (Unhate) е темата зад најновата рекламна кампања на Benetton, познатиот светски бренд за облека. Оваа кампања е поддржана со серија од фотошопирани фотографии кои прикажуваат познати светски политички водачи како се бакнуваат со некои свои „противници“ во политиката. Ова не е ништо ново за Benetton, со обзир дека нивните досегашни кампањи се базираат на провокативни фотографии кои ги тераат луѓето да ги преиспитаат своите предрасуди. Еве еден пример подолу:

Рекламна кампања против расизам

Е сега, една од фотографиите од новата кампања го прикажува папата како се бакнува со шеикот Ахмед ел-Таеб од Институтот ал-Азхар од Каиро.

Бенедикт и Ахмед

Ватикан реагирал на оваа фотографија, нарекувајќи ја „неприфатлива провокација“, по што Бенетон целосно ја повлекол од кампањата. Дури и плакатите кои биле објавени во повеќе градови низ светот биле експресно заменети.

Кис, кис, бенг, бенг

Навистина штета, бидејќи на светот многу повеќе му е потребно да си ги промени стереотипите за тоа дали две различни религии можат да ја шират својата љубов надвор од своите домеини, отколку дали бакнежот во уста е „прифатлив“ или „провокативен“. Освен тоа, во многу култури луѓето се бакнуваат во уста без тоа да вклучува сексуална конотација. Инаку, кавгата помеѓу овие двајца се случи годинава, кога папата Бенедикт повика на поголема заштита на христијаните во Египет, по што шеикот ги прекина меѓурелигиските разговори. Како две недораснати дечиња, двајцата им демонстрирале на своите следбеници како треба да се шири љубовта. Браво!

Сега следно треба да очекуваме собири на христијански верници пред Ватикан, со пароли да не се купува од Бенетон, како и протести на радикални муслимани, кои ќе палат облека од Бенетон и ќе упатуваат смртни закани за вработените во оваа компанија.

Муслимански „марш на толеранцијата“

Инаку, ова се останатите пет фотографии од кампањата, кои барем засега, ги преживеаа суетите на „лидерите“.

Крајно е време луѓето да ги остават настрана нештата кои ги разделуваат: политика, религија, боја на кожа, нација, и многу други, и конечно да ја победат својата агресија, заменувајќи ја со љубов. Дојде време да научиме да се одмразиме. БЛАГОДАРАМ, БЕНЕТОН!

Штедливи светилки претворени во ќумур

noreply@blogger.com (GoodBytes) — Tue, 15 Nov 2011 00:00:00 +0000

Дали јас сум некој невиден баксуз, па само мене ми се паѓаат најшкартливите светилки, или ова важи за сите? Никако да ми потраат економичните светилки, постојано ми прегоруваат во рок пократок од декларираниот. Повеќето произведувачи декларираат од 6 до 8 години трајност, базирано на некое просечно време на користење во текот на денот. Мене повеќето од овие светилки ми прегоруваат за година или две (всушност, не знам и дали имам некоја која е постара до две години).

За да нема сомнеж „да не е нешто до мене“, истово ми се случува со економични светилки од разни производители: Осрам, Филипс, „едни германски“, едни не знам какви... Од аспект на квалитетот на струјата која ја имам дома, и тука не би требало да има проблем: електричар ја има мерено во неколку наврати и секогаш е во рамки на нормалата. Фасонките, каблите и прекинувачите исто не ми се стари два века, за да се сомневам во нивната неисправност. Светилките не се ни чукани, ни тресени, монтирани се без да ги допирам со прсти... Навистина не ми изгледа како да е до мене.

Оваа неколкугодишна пракса е проблем (кој нема да ме обесхрабри да користам вакви светилки) од најмалку две причини:

Светилки кои многу брзо прегоруваат не се „економични“ по џебот, бидејќи нивната висока цена не го оправдува краткиот рок на експлоатација.
Овие светилки не се „економични“ ни по природата и околината, бидејќи нивната замена става нов товар врз ресурсите со кои располагаме, а исто така придонесува и за загадување со самиот процес на производство и транспорт.

Инаку, досега за најдобри (во лумени, во бела боја, во брзина на доаѓање до полн сјај и во трајност) кај мене се покажале Osram од 23W (кореспондираат со 120W кај класичните волфрамови светилки). Исто не се покажаа како лоши ни светилките од Philips со идентична моќност (кореспондираат со 130W).

За време на пауза меѓу блок вести

noreply@blogger.com (GoodBytes) — Fri, 11 Nov 2011 00:00:00 +0000

Е, ова ти се вика усогласени презентери на вести:

Секоја чест за трудот и изведбата.

Желе видео

noreply@blogger.com (GoodBytes) — Tue, 08 Nov 2011 16:08:00 +0000

Written by Kina Grannis and directed by Greg Jardin, "In Your Arms" is a beautiful music video filmed using stop motion animation.

22 months
1,357 hours
30 people
2 ladders
1 still camera
288,000 jelly beans

Станува тесно овде

noreply@blogger.com (GoodBytes) — Mon, 31 Oct 2011 14:05:00 +0000

Според проценките, од денес планетата Земја има над 7 милијарди жители. Третина од таа популација живее во само две земји: Кина, која има 1.34 милијарди и Индија со 1.21 милијарди жители.

Земји со најголема популација

Според Википедија, следните земји имаат над 100 милиони жители:

Кина	1,339,724,852
Индија	1,210,193,422
САД	312,533,000
Индонезија	237,556,363
Бразил	190,755,799
Пакистан	177,680,000
Нигерија	162,471,000
Русија	142,905,208
Бангладеш	142,319,000
Јапонија	127,720,000
Мексико	112,336,538

Земји со барем 100 милиони жители

Време е да ги прошириме „градежните парцели“ кон небото и океаните, или да почнеме да си бараме нов дом надвор од планетава.

Поради адетот, може да се пука само еднаш

noreply@blogger.com (GoodBytes) — Wed, 26 Oct 2011 07:04:00 +0000

Ништо не зборува појасно за нивото на јавните службеници избрани од народот, отколку изјава од следниот тип:

Рамиз Мерко: Се пука еднаш кога се зема невестата или, пак, кога се дава ќерката. Тоа е адет, така било и така останало. Јас велам да се почитува законот и да не се пука по веселби, но поради адетот, може да се пука само еднаш.

Изјавата ја дал градоначалникот на Струга, кој смета дека ако пукаш ОД РАДОСТ, куршумите нема да паднат и повредат некого. Освен што е крајно дебилно да се „пука од радост“, ќе го потсетам на трагичната смрт на Наташа Кметовска, девојчето кое погина од заскитан куршум за време на новогодинешната прослава на плоштадот во Скопје. Кога една толку шокантна трагедија не е доволна за да се освести секој кој пука во воздух, тогаш ги жалам таквите, а и нас со нив во близина.

Имало туристи

noreply@blogger.com (GoodBytes) — Wed, 19 Oct 2011 23:00:00 +0000

Неодамна пишував (Што е „успешност“ во туризмот?) за разочараноста на туристичките работници од малиот број туристи оваа година, кажувајќи го и моето мислење дека всушност бројот на туристи се зголемува, но и дека се зголемува конкуренцијата.

Мене ми изгледа дека во Охрид на лето има сè повеќе и повеќе гости, било домашни, било странски. Тоа се забележува и од подолгите колони возила кои се создаваат на влезот од градот, и од турканиците по старата чаршија, гужвите по маркетите, пазарите, плажите, како и од хроничниот недостиг на паркинг простор во поширокото централно подрачје...

... ако бројот на туристи е зголемен, но истовремено се зголемени и туристичките капацитети, односно конкуренцијата, логично е зошто сезоната од година во година се „прогласува“ за неуспешна, иако јас сум убеден дека сега „се вртат“ барем десет пати повеќе пари отколку пред 20 години. Сега колачот се дели на повеќемина, и тоа изгледа дека е клучот на нашата загатка.

По објавувањето на статистиките за оваа година, испадна дека сум бил во право. Имено, бројот на туристи е зголемен за околу 9% во споредба со првите 8 месеци од минатата година, што е огромна бројка - замисли дека за 10 години со ова темпо треба да ги удвоиме туристичките капацитети! Освен тоа, забележан е позитивен прогрес во бројот на ноќевања остварени од странски туристи, и тоа за неверојатни 37%. Со обзир дека странците внесуваат во земјава hard cache, очигледно колку е добар овој тренд за македонската економија. Еве што пренесува NetPress:

Бројот на ноќевања на странските туристи за месец август, во споредба со истиот период лани, е зголемен за 50,5 отсто, додека бројот на ноќевањата на домашните туристи е намален за 0,8 отсто, стои во податоците на Државниот завод за статистика.Бројот на туристите во август 2011 година изнесува 118.341, а бројот на ноќевањата изнесува 629.670.

Очигледно дека во туризмот има многу пари, само треба да се смисли начин како тие пари да се заработат. Секоја високо-компетитивна гранка носи предизвици, но затоа наградата за најдобрите е многу голема. Македонија е мала земја, а во туризмот тоа може да биде голема предност. Се надевам дека во годините кои доаѓаат ќе видиме голем прогрес кај оваа за нас приоритетна гранка.

Една нула, една кула

noreply@blogger.com (GoodBytes) — Mon, 17 Oct 2011 14:03:00 +0000

Денес ја прочитав потресната вест од Шпанија, во врска со организираната мрежа сочинета од доктори, медицински персонал, свештеници и калуѓерки која крадела бебиња и ги ПРОдавала на посвојување на други лица. Измамата од шокантни размери траела преку 50 години и навистина е неверојатно како успеале да ја сочуваат тајната толку долго. Бебињата се земани најчесто од млади немажени мајки, на кои им било кажувано дека починале при породувањето. Учесниците во мрежата обезбедувале и лажни изводи за раѓање.

Друга работа која ми падна во очи беше големата разлика во бројот на бебиња: Курир и Точка, на пример, го пренесуваат бројот 30.000, додека Канал 5 бројот 300.000. „Една нула, една кула“, вели народниот мудрец, па веднаш отворив Google News за да видам од каде оваа разлика.

Најдов дека извор на веста е британскиот Daily Mail, кој оперира со бројката од 300 илјади. Од друга страна, на сајтот на ТВ медиумот BBC, кој инаку е автор на документарецот што ја обработува темата, се дава бројка од 30 илјади. Сепак, не е јасно дали таа бројка е дадена само во контекст на реченицата која зборува за периодот кога Шпанија беше под диктатурата на генералот Франко:

For some, that suspicion is strengthened by Spain's history. After the civil war, children were removed from Republican prisoners and given to supporters of General Franco's dictatorship. Historians estimate up to 30,000 children were affected by the 'ideological cleansing'.

Нормално, после вакви разлики во известувањата на медиумите, човек треба да си го постави прашањето: што се случи со проверката на фактите од барем три независни извори?

Второ легитимно прашање би било: што се случи со моралната чистота на религијата и со хуманоста на медицината?

Вози се со автобус

noreply@blogger.com (GoodBytes) — Thu, 13 Oct 2011 23:31:00 +0000

Читам за уште едно фрлање пари за реклами и криво ми паѓа што некои упорно прават будали од нас, полначите на буџетот, трошејќи ги нашите пари за бесмислени цели. Овој пат се работи за убедување на граѓаните (на Скопје) да се возат со автобус.

Утрински: Со ТВ и радиоспотови ЈСП, градските власти и СИЗ Македонија сообраќај АМЕРИТ почнаа да ги анимираат граѓаните помасовно да користат јавен превоз. Автобусите (новите на ЈСП) биле поефикасни и побезбедни, а придонесувале и за почиста животна средина. „Направи паметен потег, користи јавен превоз“, е мотото на кампањата која ќе трае во наредниве триесетина дена, а за која се потрошени околу 33.000 евра, пари обезбедени од сите вклучени во кампањата.

Уф, од каде да почнам? :-)

Прво, автобусите НЕ придонесуваат за почиста животна средина. Тие се загадувачи исто како и автомобилите. Тие можеби загадуваат помалку во споредба со неколку автомобили кои би ги пренеле истите патници, но и тоа е тврдење кое треба да се докаже. Дури и кога автобусите би се движеле на електричен погон (што не е случај, за жал), ако таа струја не е добиена од обновливи извори, значи тоа пак придонесува за загадување. А во Македонија струјата се добива во најголем процент со горење јаглен - РЕК Битола е најголемата машина за „магла“ над Пелагонија и веројатно најголемиот виновник зошто Битола конкурира да го преземе приматот од Велес за најзагаден град (линк1, линк2).

Второ, а сепак во контекст со првото, ако треба да се анимираат граѓаните, подобро тоа да биде за користење велосипеди, бидејќи така ем ќе се зачува (навистински) околината, ем луѓето генерално ќе бидат поздрави заради редовното возење. Ова решение, како и секое друго, создава нова група проблеми. ;-) Најважно ќе биде велосипедските патеки да се третираат со еднаков и повисок приоритет од коловозите.

Трето и најважно, луѓето нема да се префрлат на возење со автобус затоа што некој тоа им го рекол. Потребата создава навика, а користењето на јавниот превоз ќе биде масовно (зарем веќе не е и премногу?) за сите граѓани на кои повеќе им одговара да се транспортираат со градски автобуси. Секогаш ќе има луѓе кои ќе користат автомобил, и тоа од разни причини: побрзо им е, поефикасно, немаат соодветни линии кои ќе ги однесат на нивната вообичаена рута, треба да патуваат со неколку сопатници или да пренесуваат товар, и слично.

Не ми е целта да го обезвредам јавниот превоз, бидејќи и самиот сметам дека тој е добро решение за поголема урбана област. Она што всушност сакам да порачам е следното: ако превозниците понудат решенија за потребите на граѓаните и ако успешно се справуваат со предизвиците и недостатоците, тогаш природно популацијата ќе гравитира кон јавниот превоз. Нема потреба од перења мозок и кампањи за трошење пари како да се туѓи.

Еве и јас да се приклучам кон кампањата со мојот бесплатен повик: вози се со автобус!

World Community Grid

noreply@blogger.com (GoodBytes) — Sun, 09 Oct 2011 23:00:00 +0000

Колку за потсетување, World Community Grid е мрежа од јавен интерес која се занимава со решавање на најгорливите проблеми со кои се соочува човештвото. Принципот на функционирање е следен: голем број луѓе (во моментов се околу 575 илјади) на своите компјутери инсталираат програм кој сосем автоматизирано зема задачи за пресметување, ги обработува со користење на слободното време од процесорот, а потоа ги враќа резултатите назад до серверот на WCG.

Резултатите кои се собираат од волонтерските компјутери потоа се обработуваат и се објавуваат со цел да бидат употребени за решавање на најважните проблеми од научната, здравствената или друга сфера. Зад овој проект стојат големи општествено одговорни компании, како и многу елитни научни институции.

Проектите кои се обработуваат во моментов се:

Drug Search for Leishmaniasis
Computing for Clean Water
The Clean Energy Project - Phase 2
Help Cure Muscular Dystrophy - Phase 2
Help Fight Childhood Cancer
Help Conquer Cancer
Human Proteome Folding - Phase 2
FightAIDS@Home
Discovering Dengue Drugs - Together - Phase 2
Influenza Antiviral Drug Search
The Clean Energy Project
Discovering Dengue Drugs - Together.

Приклучи се на овој проект и помогни заедно да ја направиме нашата иднина подобра. Опционо, може да се приклучиш и во нашиот Тим Македонија. Благодарам!

Линк: World Community Grid.

Почина Стив Џобс

noreply@blogger.com (GoodBytes) — Thu, 06 Oct 2011 14:17:00 +0000

Стив Џобс, веројатно еден од најголемите компјутерски визионери, почина денес од рак на панкреасот. Технолошкото наследството кое го остави зад себе е за почит. Овој човек веруваше во врвен квалитет и едноставност за употреба, а со својата „think different“ иновативност остави силен печат не само на развојот на неговата компанија Apple, туку и на целата индустрија. И не само тоа, тој го промени начинот на кој се создаваат технолошките уреди. Steve Jobs го промени светот на подобро.

iMissSteve

Морничави медиумски фабрикации

noreply@blogger.com (GoodBytes) — Tue, 04 Oct 2011 11:32:00 +0000

Можам да разберам дека и во новинарството, како и во многу други професии кај нас, се случува да „залута“ некоја изгубена душа која нема поим од тоа што го работи. Сепак, она што не можам да го разберам е како во цел медиум да нема некој кој ќе прочита што се објавува КАКО ФАКТ и да рече: „Стоп, вакво ѓубре нема да објавуваме“!

Сакав да наведам некои проблематични реченици во „веста“ на Сител наречена: „Локации каде вонземјаните имаат свои бази на Земјата“, секако почнувајќи прво од насловот, па преку англо-криптичното објаснување: „Езеро Ири - Веќе само името на оваа локација зборува дека таму се случува нешто морничаво“ (зборот „eery“ преведен од англиски значи страв, нелагодност, морничавост..., всушност, името на езерото во оригинал се пишува како Erie, но овие два збора се хомофони), но како што читав стана јасно дека целиот текст е пјур рабиш.

И ајде што текстот е чиста бесмислица, фабрикација и е комплетно непоткрепен со факти, туку најголем проблем е што истово ќе го прочитаат можеби стотици луѓе и, со обзир дека е објавено на медиум (медиум, еј!) и дека нема никаков критички коментар за веродостојноста, ќе го сметаат за вистина. И после ќе рече некој дека човечката глупост не е заразна.

Линк (ако веќе толку сакаш да си го трошиш времето): Локации каде вонземјаните имаат свои бази на Земјата (Сител).

Нов alati.org

noreply@blogger.com (GoodBytes) — Thu, 29 Sep 2011 23:10:00 +0000

Веќе некое време во главата ме грицкаше едно црвче кое ми велеше да направам подобра верзија на сајтот alati.org. За тие кои не знаат, ова е мој сајт каде додавам мали веб апликации, со надеж дека на некого ќе му бидат корисни. Она за што најногу се бунеше црвчето беше фактот дека алатките (апликациите) беа направени во различни програмски јазици и дека нивниот look & feel беше комплетно шаренило.

Photo by: Tontographer.

Конечно смогнав сили и го преработив целиот сајт под една заедничка платформа, со еден стил (освен ТВ програмскиот водич, кој е намерно направен поинаков), со изглед за кој се надевам дека е чист и прегледен, а и со еден (server-side) програмски јазик: PHP. Споредувајќи ги алатките на новата со старата верзија, го исфрлив само Macedonian Top Blogs, бидејќи се изгуби смислата да се споредуваат ранговите на блоговите сега откако Technorati ја смени методологијата и откако се намали интензитетот на постирање во македонската блогосфера (или тоа можеби е само моја субјективна проценка). Сепак, за поновата верзија на alati.org да не биде со помалку функционалност, додадов некои нови можности во постоечките алатки-апликации, а додадов и една сосем нова алатка: генератор на случајни стрингови (шифри, пасворди...) - r@nd0m.

Се надевам дека новата верзија на alati.org е навистина подобра и за другите, а не само за мене, и дека ќе се користи од што поголем број луѓе. Во иднина планирам да додавам и нови веб алатки како што ќе ми доаѓаат идеи и време.

Сајтот е и секогаш ќе биде бесплатен за користење. Забелешки, критики, совети и воопшто фидбек се добредојдени.

Линк: alati.org.

Загор живее

noreply@blogger.com (GoodBytes) — Mon, 26 Sep 2011 13:52:00 +0000

Еден од омилените стрип-јунаци од моето детство беше Загор Те-неј, духот со секира. Неуморен борец против злото, кој живее во Дарквуд и од епизода до епизода влегува во секакви згоди и незгоди заедно со неговиот пријател Чико (Каетано Лопез Мартинез и Гонзалез).

За жал, денес почина Серџо Бонели, авторот на „Загор“ и на „Мистер Но“, стрипови кои редовно ги купував и ги читав во еден здив. За мене магијата на стрипот не е повеќе иста како тогаш кога бев дете, но тоа што го остави Серџо во мене и во многу други читатели ќе биде најдобриот паметник за овој автор. За тие кои сакаат да се запознаат (или потсетат) на подвизите на Загор, еве линк до сајт каде овие стрипови можат да се читаат онлајн.

Што е побрзо од светлината?

noreply@blogger.com (GoodBytes) — Thu, 22 Sep 2011 23:00:00 +0000

Мислата, ќе рече народниот мудрец. Но, теоријата на релативитет, која на светот му ја претстави Алберт Ајнштајн, тврди дека нема ништо побрзо од светлината. Сепак, научници од италијанската национална лабораторија Gran Sasso и од познатата европска лабораторија во Женева, CERN, го тврдат спротивното.

Земјата се тушира со неутрина

Имено, тие преку експерименти кои ги спроведувале во изминатите 3 години, добиле резултати од кои се врти во главата: неутрината можат да патуваат со брзина која е поголема од брзината на светлината!

Неутрина (ν) се субатомски честички, слични на електроните, но без електричен набој. Настануваат при радиоактивно распаѓање или при нуклеарни реакции и имаат многу мала маса. Тие, барем досега така се смета во физиката, можат да се движат со брзини блиски до брзината на светлината (C). Друга нивна интересна карактеристика е што можат да се движат низ материја без да се судрат (барем не во најголемиот број случаи). Всушност, во секоја секунда и низ секој квадратен сантиметар од Земјата завртен кон Сонцето, минуваат 6.5×10¹⁰ неутрина кои доаѓаат од нашата ѕвезда.

Внатрешност на детектор за космички зраци од Јапонија

Мерењата се многу едноставни: сноп со неутрина се исфрла од CERN и се пречекува во детекторот во Италија, кој инаку се нарекува Oscillation Project with Emulsion-tRacking Apparatus (OPERA). Преку мерење на времето кое е потребно за снопот да ги помине овие 730km, се дознава и брзината. Но, проблемот е во тоа што се работи за многу, многу кратки периоди кои траат околу 60 наносекунди, а според некои научници кои се скептични за веродостојноста на резултатите, мерната опрема создава можност за грешка од неколку десетици наносекунди (колку што е и времетраењето на настанот).

Локациите на двете лаборатории

Научната јавност допрва ќе го потврди или отфрли ова тврдење на италијанските физичари. Ако испадне дека неутрината СЕ побрзи од брзината на светлината, тоа ќе ги побие основите на актуелната теорија на релативитет, која вели дека C е апсолутна вредност и дека ништо не може да се движи со поголема брзина. Исто така, според друго тврдење од Ајнштајн, тело кое има маса (па дури и минимална, како неутрината), забрзано со брзини блиски до C, ќе има маса блиска до бесконечност, што повторно е невозможно (на пример, тоа тело би станало супер-црна-дупка која би ја вшмукала целата вселена со својата бескрајна гравитација). Хм, ми се чини дека ова беше формулата:

Направено со LaTeX Equation Editor.

Линк: Can Neutrinos Move Faster Than Light? (Wired Science)

Дискусии без баланс

noreply@blogger.com (GoodBytes) — Tue, 20 Sep 2011 23:09:00 +0000

Во Европарламентот во Брисел денес се одржувала некаква „панел дискусија“ во која се расправало на темата „Притисок врз новинарите“. Не успеав да најдам кој од Брисел учествувал во дискусијата, освен европратениците Јелко Кацин и Јоргос Шацимаркакис, но како учесници од Македонија биле присутни новинарите Тања Милевска, Борјан Јовановски, Билјана Секуловска, Маргарита Цаца Николовска и Роберто Беличанец.

Credit: EP.

Присутни како гости биле новинарите: Мирка Велиновска, Миленко Неделковски и Бобан Нонковиќ. Во обид да се спротистават на нешто што било кажано од некои панелисти, биле избркани надвор од Шацимаркакис, кој наводно и ги навредил. По ова следела расправија во ходниците пред салата каде се одржувала панел дискусијата.

Press 24: -Како новинари сакавме да присуствуваме на дебатата за македонското новинарство. Не не примија. Дозволија да бидеме присутни само како гости. Кога сакаа да претстават слика дека Македонија назадува како земја, реагираше мојата колешка Мирка Велиновска и им кажа дека не се во право, вели Неделковски.

Подоцна и Неделковски и Нонковиќ се спротивставиле на она што го зборувале останатите панелисти. По ова тие биле избркани од салата.

-Додека излегувавме Шацимаркакис ни се обрати со зборот „Малака“. Сите знаете што значи тој збор на грчки. Имаше камери тука, се надевам дека тој настан е регистриран, вели Миленко Неделковски.

Јорго Шацимаркакис

Информациите се контрадикторни и недоволно јасни, па затоа не ни може да се извлече некој објективен заклучок за случајов. Тоа не се обидувам, барем не засега... Од видеото кое го објави Press 24, се гледа дека новинарите-гости навистина грубо упаѓаат во дискусијата, но и дека се физички истуркани надвор, па на крај и навредени! Уште полошо, тоа не го прави обезбедувањето, туку самиот европратеник - очигледно дека адреналинот кај сите бил повисок од професионалноста.

Но, она што мене ми падна многу чудно е следново: каква е таа „панел дискусија“ во која Брисел слуша само една страна на проблемот? Односно, настрана кој е во право, зошто не се согледаат аргументите на новинари кои не мислат како оние кои биле учесници (под претпоставка дека учесниците имале спротивно мислење од оние кои реагирале, секако)? Се надевам дека наскоро ќе се добие објаснување за оваа нелогичност.

Името не е приоритет

noreply@blogger.com (GoodBytes) — Tue, 06 Sep 2011 23:00:00 +0000

Со обзир дека оваа наша агонија која ни ја наметна јужниот сосед ќе продолжи сè додека нивната дипломатија ќе може да ја пролонгира нашата изолација, а истовремено и бидејќи јавното мислење во Македонија е против промена на името, мислам дека е крајно време да се променат две работи:

Политичките партии, заедно со администрацијата (и државна, и локална) и деловниот сектор да се насочат кон решавање на економските проблеми, кои треба да го заземат врвот на приоритетите на државно ниво.
Македонската дипломатија јасно и искрено да порачува дека не сме спремни да менуваме име, па дури тоа да значи и УТРЕ да се зачлениме во НАТО и ЕУ.

Првата точка е затоа што на граѓаните на Македонија им се потребни работа и финансиска сигурност повеќе од било каков политички или воен сојуз. Всушност, НАТО и ЕУ се интермедијарна цел, бидејќи тие се генератори и гаранти на економската благосостојба и безбедноста (иако, оваа „гаранција“ некој може со право да оспорува).

Втората точка е затоа што сè додека (се) лажеме дека преговараме за нешто што ниедна нормална држава не би преговарала, дотогаш и ќе стоиме во овие рамки на (не)решенија. Отворањето на картите пред себе и пред светот ќе нè натера или да најдеме друго решение, или барем да решиме дека не може да се најде решение со Нивната Земја, па конечно да продолжиме со животот необременет од еден ваков бесмислен притисок.