Panta Rei

Кога ќе дојде мигот

noreply@blogger.com (GoodBytes) — Sun, 27 May 2012 01:54:00 +0000

Вака треба:

Нашите заклучоци од самитот на НАТО во Чикаго

noreply@blogger.com (GoodBytes) — Fri, 25 May 2012 23:00:00 +0000

За време на самитот во Чикаго, НАТО не ја ни стави апликацијата за членство на Македонија на дневен ред, покажувајќи не само солидарност со интересите на Грција, туку и непочитување на одлуката на Меѓународниот суд на правдата од Хаг.

Портпаролот на НАТО го изјави следното:

- Позиција на НАТО не е променета. Како што генералниот секретар Андерс фог Расмусен изјави во декември 2011 година, пресудата на Меѓународниот суд на правдата е во врска со билатералното прашање меѓу Грција и Република Македонија. Оваа одлука не влијае на одлуката донесена од страна на НАТО сојузниците на Самитот во Букурешт во 2008 година. Ние се согласивме дека поканата за членство на Македонија во НАТО ќе биде дадена веднаш откако ќе биде договорено заемно прифатливо решение за прашањето за името. Оваа одлука беше повторена и на следните самити и министерските состаноци.

Но, фактите велат дека пресудата на Меѓународниот суд на правдата не се базира само врз билатерално прашање меѓу Грција и Република Македонија, туку дека се однесува на членството на Македонија во меѓународни организации, кое Грција не смее да го попречува. Членот 11.1 од привремената спогодба, која Грција очигледно не ја почитува, е всушност ЕДИНСТВЕНИОТ(!) член од целата спогодба кој е во некаква полза за Македонија. Во него експлицитно се наведува мултилатералниот карактер на спорот, што ја прави погорната изјава од НАТО портпаролот комплетно бесмислена:

1. Upon entry into force of this Interim Accord, The Party of the First Part agrees not to object to the application by or the membership of the Party of the Second Part in international, multilateral and regional organizations and institutions of which the Party of the First Part is a member; however, the Party of the First Part reserves the right to object to any membership referred to above if and to the extent of the Party of the Second Part is to be referred to in such organization or institution differently than in paragraph 2 of the United Nations Security Council resolution 817 (1993).

Заклучоци:

НАТО, ЕУ и помоќните држави воопшто имаат двојни стандарди и не им е никаков проблем да ги погазат принципите кои ги декларираат премногу често, па дури и да се постават над законот и правдата ако така им одговара на луѓето кои таму ги влечат конците.
Сето тоа е политичка багра од која за жал зависиме за некои работи.

Прашања кои се отвораат:

Зошто Македонија сеуште не ја поништува за нас катастрофалната спогодба меѓу Киро/Бранко и Грција?
Што уште бараат нашите војници во НАТО мисии низ светот?
Зошто некои локални момци му се с'снаа на Груевски кога јавно ги делегитимираше (по којзнае кој пат) лицемерите од меѓународната заедница и организациите во кои имаме аспирации да членуваме? Кажа нешто неточно човекот?

Камерен град

noreply@blogger.com (GoodBytes) — Mon, 07 May 2012 22:30:00 +0000

МВР го започна проектот за електронско набљудување, засега само во Скопје.

Photo: "One nation under CCTV" by Banksy, via Daily Mail.

Дневник: Безбедносните камери што беа поставени речиси пред две години на сите прометни раскрсници во Скопје од денеска се очекува и официјално да профункционираат. Проектот наречен „Безбеден град“ ќе биде пуштен во употреба денеска, кога се прославува 7 Мај - Денот на полицијата. Отсега натаму над 100 камери поставени на најфреквентните места, на раскрсниците, на влезот и излезот од Скопје, булеварите, мостовите и на улиците што се оптоварени со сообраќај ќе снимаат сообраќајки, инциденти, прекршоци, а снимките ќе може да се користат и за откривање криминалци. Има камери што снимаат само во една позиција, но има и такви што снимаат 360 степени.

Не забележав ниеден медиум да го спомне проблемот со нарушувањето на приватноста, па си велам да потсетам на дебатата која трае во земјите каде камерите за набљудување не се новитет... Имено, некои луѓе сметаат дека ваквите системи се спротивни на принципите за граѓански слободи и приватност, додека други го оспоруваат тоа, тврдејќи дека снимањето јавни површини не се смета за интрузија на приватноста. Сепак, постојат дури и судски одлуки кои одредуваат дека граѓаните имаат право на приватност и на јавни места.

Постојат и други аргументи кои велат дека во име на некакво поголемо добро, како што е спречување на криминал, зголемување на безбедноста во сообраќајот и слично, може да се изземе правото на приватност на поединецот. Но, одговорите на овие тврдења се дека не е едноставно да се одреди и примени критериумот кој ќе го направи таквото раздвојување на „поголеми“ и „помали“ добра. А штом постои можност за злоупотреба, таа и ќе се случи.

И за крај, треба да се спомне и аргументот дека камерите само го преместуваат криминалот, а не го спречуваат. Слично како што граѓаните ги прилагодуваат своите сообраќајни навики според камерите и радарите кои ловат несовесни возачи и пешаци, така и криминалците се прилагодуваат на големиот брат, постојано изнаоѓајќи нови начини да си го прават своето останувајќи незабележани.

Патем, пред три години напишав еден пост за отпорот кон системите за набљудување кој се јавува кај граѓаните на Англија, земјата со најголем број вакви камери - Ерозија на слободата: CCTV.

Должници крај шините

noreply@blogger.com (GoodBytes) — Wed, 02 May 2012 23:00:00 +0000

Весникот Капитал објави дека акционерското друштво Македонски железници Транспорт е не само неликвидно, туку и дека има обврски кон странство кои достигнуваат 100 милиони евра. Ова се пари кои нашата држава треба да ги надомести, како што тоа го правеше и досега.

Друштвото Македонски железници Транспорт АД - Скопје е основано во 2007 година со одлука донесена од Владата на Република Македонија, како правен следбеник на ЈП Македонски железници.

Капитал: Вкупните обврски на МЖ-Транспорт до крајот на минатата година изнесуваат 86,65 милиони евра, од кои 75,05 милиони евра се веќе платени обврски на МЖ-Транспорт од страна на државата и 11,6 милиони евра се обврски на МЖ-Транспорт кои се достасани, а не се платени. Обврските на МЖ-Транспорт кои достасуваат по 01.01.2012 година изнесуваат 10,56 милиони евра.

Железничкиот сообраќај во Македонија е неефикасен и носи огромни загуби кои мораме да ги покриваме со буџетски пари. Истовремено, со железница не се поврзани сите градови (како на пример југо-западните градови и поголем дел од источните), а врските со соседните држави ни се, благо кажано, ограничени.

Од друга страна, учеството на железничкиот сообраќај во вкупниот сообраќај е маргинално. На пример, според Државниот завод за статистика, во четвртото тримесечје од 2011 година, во патниот патнички превоз бројот на превезените патници изнесува 4.043.000, во железничкиот превоз 355.000, во градско-приградскиот превоз 19.952.000, додека бројот на превезените патници во воздухопловниот превоз изнесува 195.226. Значи, имаме железница која е голем загубар и која превезува само малку повеќе патници од авионскиот сообраќај.

Чаре? Ако не се поправа, тогаш се продава, се разбира.

Веб сајт меѓу кифла и Југо

noreply@blogger.com (GoodBytes) — Mon, 30 Apr 2012 14:18:00 +0000

Државните институции на Македонија се очигледно премногу богати, штом можат да си дозволат изработки на сајтови за илјадници евра. Во моментов, во престижната трка за најскап веб сајт води сајтот на Претседателот на РМ, кој чинел 352.230 денари! Повеќе од добро наплатено за сајт од 100-200 страници, изграден врз бесплатна CMS платформа (Joomla), нели?

Сајтот кој е помал од кифла, а вреди повеќе од Југо: president.gov.mk!

За споредба, постојат фирми кои едвај плаќаат 100-200 евра годишно за изработка и хостирање на нивните сајтови. Но, во приватниот сектор парите се вадат од сопствениот џеб, па веројатно оттука е и претпазливоста при трошењето.

Предлагам од соодветните факултети да се собере група студенти кои како волонтери ќе ги прават овие сајтови, со што ќе имаме двојна добивка: ем одлично искуство за нашите млади колеги, ем државата ќе заштеди илјадници евра. Истово можеше да го прави и превработената државна администрација, но таа „покажа и докажа“ дека е премногу зафатена за да се бафта со изработка на сајтови, па поарно да не ја 'рчкаме, да не испадне сметката и поголема на крај.

Линк: Претседателот и министерствата плаќаат над просекот за своите .gov сајтови (анализа).

Тешка кражба со лесен плен

noreply@blogger.com (GoodBytes) — Wed, 25 Apr 2012 12:21:00 +0000

Не е јасно што ја прави една кражба тешка, ако пленот е незначителен?

Линк: Ограбени три цркви во тетовско (Inpress).

Стаклена пирамида на дното на мозокот

noreply@blogger.com (GoodBytes) — Fri, 20 Apr 2012 09:37:00 +0000

Повеќе македонски медиуми денес пренесоа сензационална вест дека е пронајдена огромна стаклена пирамида во областа на Бермудскиот триаголник, подрачје кое традиционално се поврзува со серија мистериозни исчезнувања на летечки и пловни објекти.

Еве на пример што пишувале Press24, Канал 5 и Sky (кликни на сликата за да го прочиташ текстот):

Бидејќи оваа „сензација“ звучи како BS за мојот скептичен парсер кој ми е интегриран во черепот, веднаш го спроведов стандардниот медиа-BS-тест: проверка дали на Google News постои истава вест. Нормално, нема ништо.

По само уште малку копање по Google, дојдов до сознание дека најверојатниот извор на веста е Apparently Apparel, некој сајт кој се расфрла со големи зборови и идеи, истовремено продавајќи маички со принт. Во нивниот текст насловен како Pyramids Of Glass Submerged In The Bermuda Triangle, тие го базираат своето тврдење на откритие кое го направил океанографот Dr. Verlag Meyer. Нормално, Google ништо не знае и за овој научен авторитет, надвор од авто-референците кон истово „откритие“.

Како дополнитена поткрепа на тврдењето, сајтот посочува на сличен напис објавен во весникот Weekly World News. Но, со само малку дополнителен напор се забележуваат уште две проблемчиња: написот е од 1991 година (чудно како досега не се потврдило откритието?), а весникот е сатиричен таблоид кој од 1979 година наваму објавува луди тврдења за паранормални појави и настани. Тоа го кажува и Википедија, но доволни се и два грама памет да се заклучи колку се веродостојни вестите за вонземјани кои киднапираат и забременуваат земјани, за сирени и слични суштества со полу-човечки карактеристики, попови кои екплодираат насред егзорцизми, нацистички астронаути кои сега се враќаат назад на Земјата, преживеани патници од Титаник кои по неколку децении се откриени на санта мраз и уште илјадници глупости слични на нив.

Како што повторно на дело се покажува, македонските медиуми ја заборавија проверката на веродостојноста на информациите, како и здравиот разум, трчајќи по ексклузивни, шокантни и скандалозни вести, како што апелира Трендо на неговиот нов сајт (вел'ки пооздрав, болан, и нек је са сречом).

Cross-browser

noreply@blogger.com (GoodBytes) — Wed, 18 Apr 2012 21:15:00 +0000

And there we go.

Google Maps Quest

noreply@blogger.com (GoodBytes) — Tue, 03 Apr 2012 23:00:00 +0000

Google објави специјално првоаприлско издание на Maps, наречено Quest, кое ги враќа спомените на 8-битната графика.

Пробај да лоцираш некоја поголема светска метропола и да вклучиш Street View. :-)

Респонсивен дизајн со Bootstrap

noreply@blogger.com (GoodBytes) — Sat, 31 Mar 2012 22:44:00 +0000

Во последно време се зборува низ веб-девелоперската фела за responsive design, односно правење веб сајтови и апликации кои ќе изгледаат пристојно на различни уреди со различни резолуции. Оваа нова тежина на програмерските плеќи се наметна со појавата на голем број мобилни и полу-мобилни компјутери, смартфони, таблети и друга геџетарија.

Image CC by thehappybit.

Несомнено дека е корисно, но правењето „добар“ изглед за повеќе резолуции може значително да го продолжи времето потребно за развојот на корисничкиот интерфејс, а и да го отежни одржувањето во иднина. Иако постојат многу начини да се тестира еден сајт за тоа како изгледа на различни уреди, еве еден линк кон страна која на едноставен начин прикажува неколку популарни резолуции одеднаш: The Responsinator.

Постојат и додатоци за браусери кои можат да ја подесуваат резолуцијата според потребата. Веројатно најраспространет ваков add-on е Web Developer Toolbar, кој и јас постојано го користам за мојата работа.

Патем, препорачувам да се користи и Twitter Bootstrap како платформа за развој, бидејќи покрај многуте негови позитивни карактеристики кои значително ја забрзуваат имплементацијата, тој од верзијата 2.0 носи и вграден механизам за респонсивен дизајн. Иако платформата ја користев и порано, како на пример за alati.org, новата верзија неодамна ја употребив за pesna.org и изгледа се куртулив од развивање две засебни верзии од сајтот, една за „нормални“ компјутери, и една „мобилна“ верзија. Како пример, еве на што личи сајтот „пуштен“ низ The Responsinator. Не е перфектно, но не е и неупотребливо, нели?

Ова не значи дека платформата може да се употреби секаде, но таму каде не постојат ограничувања кои ќе го спречат нејзиното користење, Bootstrap ќе им заштеди многу време на програмерите. Освен тоа, готовите HTML елементи изгледаат одлично, а минималистичкиот пристап кон client-side функционалноста (табови, модали, паѓачки менија, карусели и поповери) даваат можност да се користат заедно со други платформи, како и со свој custom код.

Да ти се множи тајпото

noreply@blogger.com (GoodBytes) — Wed, 28 Mar 2012 18:37:00 +0000

Изворот на веста за откритието на некое античко богатство е Dnevnik.hr:

Веста ја презема МИА, која веднаш додава две тајпоа (типографски грешки, typo): „средбро“ и „Винковици“, барем судејќи според оној мал дел кој е откриен пред да треба да се логираш.

Од МИА веста ја преземаат други медиуми кои (освен еден) не се ни потрудуваат да ги поправат грешките, камоли да ја парафразираат, проверат или надградат информацијата:

Уште повеќе, еден од нив ДОДАЛ ново тајпо во насловот, правејќи нова погрешна варијација од името на градот: Винковцки. Нормално, другите го ископирале тоа дословно, небаре за житие се работи. А за да не биде покусо, и тој едниот кој го поправил „средбро“ во „сребро“, го употребил погрешното име на градот во понатамошниот текст.

Копи-пејст новинарство според крилатицата: „не можеш да ме платиш помалку отколку што можам да (не)работам“. Медиумиве се комплит мес.

Црвената линија на антиквизацијата

noreply@blogger.com (GoodBytes) — Thu, 22 Mar 2012 11:07:00 +0000

Утрински објави интервју со Паско Кузман, директорот на Управата за културно наследство, во кој се зборува за повеќе теми кои се поврзани со археологијата. Меѓу другото, тој одговара и на прашање за логиката да се продолжи со истражувања на античкиот период, од аспект на критиките за антиквизација.

Мене не ми се допаѓа тоа што нашата влада троши толку големи средства за споменици и градби, пари кои можат да се употребат таму каде се покорисни. Исто, сметам дека нема потреба со современи мега-статуи да се покажува дали Александар Македонски е „наш“ или „нивен“, бидејќи тој е лик од древната историја кој му припаѓа на целото човештво и со кој, заради географскиот континуитет, и ние и Грците се идентификуваме - што и не е така страшно кога ќе се отстранат политичките тегови. :-)

Сепак, Паско изнесува некои размислувања на темата антиквизација со кои можам да се сложам. Намената на историските и археолошките истражувања не е чукање во гради и гордост дека „ние“ тоа сме го направиле, туку презентирање на културното наследство ОД и ЗА граѓаните на планетава. Нацијата на чие тло тие нешта постојат има обврска да ја раскаже нивната приказна. Не постои процес на антиквизација ако се раскажува приказната на луѓето кои живееле тука пред нас. Тој процес постои ако кон античката историја се однесуваш небаре е само твоја, притоа бранејќи им на другите да ја презентираат. Македонија треба да ја препознае оваа финеса, оваа црвена линија, за да не бидеме историагресивни како некои политичари и јавни фигури кои се наши јужни соседи.

Еве го тој дел од интервјуто во кој се зборува за антиквизацијата:

Паско Кузман: Ние отсекогаш сме го истражувале античкиот период и ќе го истражуваме понатаму, но терминот антиквизација се уште го сметам за смешен. Не постои процес на антиквизација, ние го истражуваме и презентираме античкиот период на тлото на Македонија кој е најбогат со податоци, но не само овде, туку и на целиот медитерански културен простор. Не само античкиот, продолжуваме и со археолошки истражувања на сите други периоди. А терминот антиквизација изминативе години не ми пречеше мене, туку на Македонија. Ако сме дел од оваа земја и сме Македонци, треба да се срамиме од таков еден термин. Јас и денеска не гледам смисла во неговата содржина.

Што можеме да антиквизираме ние? Затоа што ги ставивме скулптурите пред Владата? Мене премиерот кога ги поставувавме ме праша дали имаме нешто од подоцнежниот историски период, а навистина од среден век немаме ниту една скулптура. Да имавме ќе ги наредевме сите. Но, ние имаме скулптури само од античкиот период, не само ние, туку и целиот Медитеран, Балканот и светот има најмногу од тој период. И зошто кај нас треба тоа да е антиквизација, а кај другите не. Веројатно поради спорот со Грција се смета дека се' што сме направиле сме направиле за да ги изнервираме Грците. Тоа нема никаква врска. Ние презентираме се' што е на ова тло, се' што е наше на кое ние сега сме сопственици. Не корисници, сопственици сме на македонската почва! Од тука се' што е на таа почва, се' е наше. Ни грчко, ни турско, наше е. Тоа го сфатиле Италијанците, Римјаните и другите, а тие никогаш не ни направиле проблем што овде многу работи се од римски период.

Не е никаква антиквизација се' што е најдено овде од периодот на хеленизмот, од класичниот грчки период да го извлечеме и покажеме. До сега не можевме да го направиме тоа. Ние имаме неколку лапидариуми во земјава, но предметите таму не се така експонирани како пред Владата.

Дали навистина е пронајден лек за ракот?

noreply@blogger.com (GoodBytes) — Thu, 15 Mar 2012 22:01:00 +0000

Денес повеќе медиуми објавија вест дека е пронајден лек за ракот, но големите фармацевтски компании не се заинтересирани да го произведуваат. Овој лек се тврди дека е пронајден од универзитетот Алберта од Едмонтон, Канада.

Сепак, ова ми звучи познато (повеќе пати се појавувале вести за откривање лек за ракот), а освен тоа агрегаторот Google News / Health не покажува ниеден сличен резултат, што ми разбудува сомнеж. Сајтот на институтот при спомнатиот универзитет, како и други извори покажуваат дека ова не е ново откритие, туку дека е најмалку 3-4 години старо. Значи, без да ја спорам делотворноста на лекот - впрочем и самиот главен истражувач Микелакис последно изјавил дека се потребни повеќе испитувања, ова сепак ми изгледа како стара вест која е надуена до стадиум на сензација (се надевам дека грешам). На пример, еве едно од прашањата и одговорите од нивната FAQ страна (која последно е обновена пред две години):

When will DCA become a treatment option for cancer patients?

When more clinical trials in more than a few centres show DCA does not hurt patients and helps them more than a placebo. Until then, its use from unregulated and "for-profit" and without medical supervision is both inappropriate and dangerous, because at the wrong doses and in the wrong patient DCA can be toxic.

Последен пат кога овој тим објавил труд на оваа тема, барем кој јас можев да го најдам, е во мај 2010 година, кога во магазинот Science го публикувале написот: Metabolic Modulation of Glioblastoma with Dichloroacetate.

Оттука, се прашувам дали македонските медиуми имаат извор на оваа вест кој е релевантен за да ја потврди истата? Се работи за важна информација која би требало да се провери пред да се објави, нели? Знае некој нешто повеќе за ова?

Патем, да ве поканам повторно да земете учество во World Community Grid, каде една од целите е наоѓање лек за ракот.

Roadmap за Facebook до 2025

noreply@blogger.com (GoodBytes) — Thu, 01 Mar 2012 23:11:00 +0000

Некои батки кои себе се нарекуваат Ph.Creative направиле голема слика со нашлапани работи на неа (популарно наречена „инфографик“) со новитетите кои го чекаат Фејсбук во следните 13 години. Визиите содржат: плаќање (не е јасно дали го има македонското омилено: „одложено“), енергија, банки, болници, транспорт, образование, влада, одбрана (војска) и нација. Кој си е заразен по сурат китап, слободно нека си кликне на сликата или линкот подолу:

Линк: Where and What will Facebook be in 2025?

Субвенциониран социјален мир

noreply@blogger.com (GoodBytes) — Sun, 26 Feb 2012 13:27:00 +0000

По неколку години пумпање државни пари во земјоделството во форма на субвенции, изгледа се покажува токму тоа за што пишував повеќе пати: дека субвенциите се фрлени пари. Без јасна цел и без план како таа цел да се постигне, но и без критериум за мерење на резултатите и контрола на трошењето, субвенциите се бунар без дно во кој се фрлаат нашите пари кои можат да се употребат за нешто опипливо и трајно: здравство, образование, инфраструктура, односно за работи од кои корист ќе има ЦЕЛАТА држава. Сомнежот е дека владата ги троши овие пари не заради вистинско подобрување на земјоделството, туку заради купување социјален мир, токму како што неодамна лозарите добија субвенции само неколку часа пред да започнат со протести. Полесно е да им поделиш пари од буџет отколку да се справуваш со нивните проблеми.

Еве една кратка анализа од Радио Слободна Европа на темата „670 милиони долари за увоз на храна се пораз за Македонија!“ која ја објавил Капитал:

„670 милиони долари за увоз на храна се пораз за Македонија!“ - извикува уводничарот во најновиот Капитал, за да продолжи дека статистиката покажува дека македонската политика во земјоделството и во агро-секторот е промашена и не ги дава резултатите што по секоја логика би требало да ги дава. Иако лани растел и извозот на храна од Македонија, сепак трговскиот дефицит на земјава во трговијата со прехранбени производи достигна фрапантни речиси 300 милиони долари, наведува Капитал. Неделникот го пофалува зголемувањето на субвенциите во земјоделството за нови 12 отсто, но ја прашува Владата што сака да постигне со нив? Резултатите на терен покажуваат дека нема зголемување на производството на земјоделски производи, ниту намалување на увозот на храна. Субвенционираме евтин зеленчук и овошје на кои отпаѓа речиси половина од вкупниот македонски извоз на храна. Истите земји што го купуваат свежото овошје и зеленчук ни продаваат скапи и брендирани преработки, заклучува Капитал во својот уводник.

Македонија со оваа политика ги задоволува двата услова да биде СИРОМАШНА: не заработува доволно пари, а и тие кои ги има ги фрла бесцелно.

Management is doing things right; leadership is doing the right things.
— Peter F. Drucker

Еколошки свесен print.css

noreply@blogger.com (GoodBytes) — Wed, 22 Feb 2012 22:23:00 +0000

Некој веб дизајнер и програмер по име David Bushell има направено CSS за печатење кој има еколошка димензија. Толку е симплифициран што ми се чини дека кодот ќе го разберат и лица кои не се со технолошки бекграунд:

@media only print {
   body * { display: none !important; }
   body:after { content: "Don't waste paper!"; }
}

Многу често добрите еколошки решенија се едноставни. :-)

Линк: print.css.

Како се поправа компјутер

noreply@blogger.com (GoodBytes) — Sat, 18 Feb 2012 19:12:00 +0000

The Oatmeal има објавено еден график кој на сатиричен начин објаснува како се поправа било каков компјутер, без обзир на оперативниот систем. Како што тоа секогаш се случува, ова предизвика лавина од коментари и расправии околу квалитетите и недостатоците на водечките оперативни системи: Windows, Linux и Mac OS.

Кликни на сликата за да го отвориш графикот во целост. :-)

Нова верзија на pesna.org

noreply@blogger.com (GoodBytes) — Mon, 13 Feb 2012 19:26:00 +0000

По подолго време, најдов слободен термин за да поработам на новата верзија на сајтот Macedonian Folk Songs. Надежите се дека оваа промена е на подобро, иако реално и нема толку многу подобрувања кај фукционалноста и содржината.

Еве накратко кои работи се променети кај новата верзија:

Она што е најочигедно, визуелниот изглед сега е минималистички чист и (се надевам) повеќе прегледен. Од технички аспект, корисничкиот интерфејс е базиран на платформата Bootstrap од Twitter, чија најнова верзија ја елиминира потребата од имплементирање „мобилна“ верзија. Нивниот „респонсивен“ пристап ги скалира повеќето елементи според расположливата резолуција и ветува поголема cross-browser и cross-device компатибилност.
Сајтот има нов дел Performers кој нуди преглед на аудио семпловите според изведувачите.
Новата страна Photo gallery содржи слајдшоу од колажи во кои се прикажани речиси 400 претежно стари фотографии од Македонија. Фотографиите се тука за визуелно да го дополнат историскиот контекст во кој се создавани народните песни, нешто што веројатно е значајно особено за странците кои се заинтересирани за нашето културно наследство.
Нема веќе AdSense или било какви други реклами. :-)

Сите забелешки и мислења ќе бидат корисни и добродојдени.

Линк: Македонски народни песни.

Ромите во Македонија: премрзнати, гладни и болни

noreply@blogger.com (GoodBytes) — Sat, 04 Feb 2012 01:54:00 +0000

Веб галеријата наречена „Роми на минус 13“, која е објавена на сајтот на Вечер, е in-your-face потсетник за тоа каде Македонија има најмногу потфрлено како држава.

Очигледно е што треба да оди на врв на државните и општинските приоритети. Парите од проектот „Купи куќа, купи стан“ треба да се пренаменат за изградба на станбени блокови за оваа комплетно маргинализирана етничка група граѓани. Освен тоа, „правичната застапеност“ која навистина би била правична, би значела и државно вработување за барем еден член од секое ромско семејство (само да не биде како лагата на БЦ), за со тоа да се осигури барем минимален, но сигурен прилив на средства. Понатаму, сигурно меѓу илјадниците компјутери кои фаќаат прашина во училиштата, или фаќаат место на клупите од учениците и пречат во наставата, може да се подарат неколку стотици за ромските семејства. Со координирана работа на неколку државни институции може да се обезбеди редовна здравствена заштита и да се создадат услови за малите Роми да завршат образование.

Сите овие цели се постигаат лесно ако навистина се сака, а нема да чинат повеќе од било кој промашен проект на оваа или претходните влади. На подолги стази, овие активности ќе донесат повеќе позитивни резултати, а Ромите во Македонија би можеле конечно да се ослободат од стигмата која им ја прикачивме ние, нивните сограѓани.

Да ги изладиме жешките глави

noreply@blogger.com (GoodBytes) — Tue, 31 Jan 2012 19:27:00 +0000

Повторно се покажува колку лесно може етничката или верската нетрпеливост да ескалира во агресивност и да ја загрози безбедноста на луѓето и имотот. Навредливите скандирања од дел од навивачите на ракометното првенство во Србија, како и сатиричната маска на Вевчанскиот карневал станаа повод за протести, каменувања автобуси и палење цркви. Сето ова е далеку од разумот, но за жал истовремено е реалност во која живееме. Непотребно си го загорчуваме животот, наместо да се занимаваме со позитивни и полезни работи.

Не планирам повторно да навлегувам во истите коментари од моите два претходни поста („Доста со навивачка омраза“ и „Говор на омраза и кај бугарските навивачи“), туку само ќе го пренесам соопштението од Сојузот на Македонците со исламска религија (СМИР), кое повикува на разум. Моите размислувања одат во ист правец, иако би отстранил две-три работи за апелот да биде секуларен. ;-)

Сојузот на Македонците со исламска религија апелира до муслиманското население во Струга и Струшко, вевчанските карневалски маски да не се заменат со маски на омразата и одмазадата, бидејќи, како што наведува во соопштението до медиумите, Господ е еден, независно од обраќањето кон него.

Духовните светилишта, џамиите и црквите се богатство на народите и културите во верата кон Бога и грев е нивно сквернавење без никакво оправдување и поради никакви мотиви, нагласува Сојузот на Македонци со исламска религија. Апелира до политичките партии да излезат од канцелариите на верските објекти и својата доверба да ја вреднуваат меѓу народот со успеси и позитивни резултати, а не да го мерат својот рејтинг по големината на шовинизмот и верскиот фанатизам што го поттикнуваат.

- Градоначалниците на Струга и на Вевчани, Рамиз Мерко и Перо Илиески, се градоначалници на сите граѓани независно од нивното етничко потекло и верско уверување и така треба и да се однесуваат. Повикуваме на разум и владеење на правото, на меѓуетнички мир и верска толеранција, а од надлежните органи бараме најбрзо расчистување на случаите и пронаоѓање и најстрого казнување на сторителите како поука за други, стои во соопштението од Сојузот на Македонците со исламска религија.

Патем, ова не е прв пат СМИР да испраќа разумни пораки. Сличен апел испратија по инцидентите на скопското Кале. Не велам дека тие се едниствените гласови на разумот, но секој позитивен правец на размислување треба да се афирмира.

Не пратев толку вести за точно да знам што одговорила општината Вевчани по повод прозивките за маската (хм, не знам ни каква била таа маска) која наводно ги навредува чувствата на муслиманите. Во принцип говорејќи, карневалот е еден вид слобода на изразување и таа е елементарно човеково право, па оттука не сметам дека треба истата да се ограничува. Сепак, слободата на говор не значи истовремено и слобода на говор на омраза, односно ширењето верска или етничка нетолеранција можеби е смешно или безопасно за едни, но може да е навредливо за други. За да покаже официјално Вевчани дека тоа било само карневалска забава без малициозна намера, најдобро ќе биде да издаде искрено извинување за сите кои се нашле навредени од некоја маска, а тука мислам и на маската „Погребот на Грција“ или како и да било нејзиното име. Едноставно не се сите работи за смеење (или потсмевање) и не секој ја прима шегата на негова сметка подеднакво, ОСОБЕНО ако на некои од овие шеги им се додаде современиот општествено-политички контекст. Секој човек треба да има големина и да се извини ако неговите зборови или дела не испаднале како што очекувал - бидејќи и грешењето исто е човечка особина.

Секако, од друга страна, се согласувам со соопштението погоре дека сторителите на нереди, палења и други инциденти треба најстрого да се казнат. А за да ги оладиме главите, следната година Вевчанци треба да ги поканат соседните села (да, и „муслиманските“ села) да учествуваат со свои маски. Ајде веќе еднаш да се извлечеме од примитивните антагонизми и да го искористиме секој карневал или друга културна манифестација за да си изградиме подобар живот преку соживот, затоа што во моментов се наоѓаме во една парадоксална ситуација да ни е мило да дојдат да не гледаат туристи од преку седум мориња, а не ни е мило да се гледаме со првите соседи.

Говор на омраза и кај бугарските навивачи

noreply@blogger.com (GoodBytes) — Fri, 27 Jan 2012 18:18:00 +0000

На почеток, честитки за македонската репрезентација за освоеното петто место на Европското првенство во ракомет. За жал, овој пост има малку врска со спорт - но тоа и е мојата поента.

Како дополнување на мојот претходен текст, „Доста со навивачка омраза“, ќе посочам на сторијата која ја објави Deutsche Welle за говорот на омраза, кој се забележува и кај навивачите од Бугарија. Во него се кажува за расистичките скандирања против играчите со темна кожа од англиската репрезентација, како и за расистичкиот наслов во еден бугарски весник, во кој новите играчи за CSKA од Камерун и Мали се нарекуваат „црнотии“.

DW: Говорот на омраза од трибините со фанови се всели и во медиумите. Минатата недела „7 дена спорт“, еден од најголемите бугарски спортски весници, објави текст за новите донесени играчи во првата фудбалска лига. Насловот гласеше „Нов влез за ЦСКА Софија: еден Италијанец, еден Швеѓанец и две црнотии“.

Весникот отфрла одговорност за објавениот расизам, но бугарскиот Хелсиншки комитет за човекови права е спремен овој инцидент да го расчисти до крај и тоа пред Европскиот суд за човекови права.

Ова покажува дека агресијата и омразата си го наоѓаат местото и во околните држави, и дека од нив не се имуни ни медиумите. Ако не се запрат или барем маргинализираат расистичките и национал-шовинистичките движења, па дури и тие кои се маскирани во спортско навивање или известување, тие со тек на време стануваат прифатени од една група, но и придонесуваат за растење на тензиите.

Кога ќе одат навивачите на трибини, треба да уживаат во спортот, а не да се горчат со бесмислени навреди кон некој со друга боја на кожата. Како што ние треба да се оградиме од домашниот говор на омраза кај сите навивачки групи, истото треба да го направи и бугарската јавност. Ова не важи само за спортот - исто така, кога некое полудено попче од Солун ќе повикува да се прегазат „скопјаните“, тогаш „неговите“ треба да го осудат таквиот повик, како што ги осудија војниците кои ќе ги дереа нашите скопски кожи.

Ако во светот преовладува разумот, сите ние ќе имаме подобар живот. Ако дозволиме да преовлада неразумот, тогаш сиот светски „патриотизам“ нема да ни помогне.

Доста со навивачка омраза

noreply@blogger.com (GoodBytes) — Wed, 25 Jan 2012 16:07:00 +0000

Говорот на омраза кој се шири маскиран во патриотско навивање за македонската репрезентација, не само што одамна ги помина сите граници на моралот и хуманоста, туку се граничи и со автодеструктивност. Не можам да ја прифатам глорификацијата на „гоцевата раса“, бидејќи расите се за расистите, но и бидејќи идеалите за кои се бореа македонските револуционери содржеа космополитизам, а не национал-шовинизам. Исто, не можам да го прифатам освојувањето на Солунско Поле, бидејќи иако сметам дека тоа е еден од регионите од кои потекнува нашиот народ (но не само нашиот), сепак е неразумно и непотребно да се „враќаат територии“ во ова време. Историјата е полна со жртви на војни за територии. Подобро е сите заедно да живееме без граници, па тоа нека биде вреден идеал кон кој ќе се стремиме.

Photo: EHF

Уште една работа која е неприфатлива се скандирањата во кои има навреди на етничка или верска основа. Како што албанските навивачи користат погрдни слогани и песни за да го искажат својот квази-патриотизам, така и македонските навивачи извикуваат навреди за „клети Шиптари“, Грци, или кој и да е друг, сеедно. Сите овие нехумани и нетолерантни скандирања се од една страна сосем бескорисни (бидејќи не носат ништо добро за никого), а од друга страна создаваат една бескрајна спирала која води кон насилство и страдања на луѓе кои немаат врска со омразата на неколкумина.

Во текстот „Да навиваме, ама да се мразиме“, Бранко Героски вели:

Од друга страна, тоа што нашите спортисти постигнуваат возбудливи успеси на меѓународната сцена и што тие успеси ја сплотуваат нацијата во радоста, сепак, за мене барем, не го оправдува нашиот молк пред фактите, кои укажуваат дека меѓу нашите навивачи има и хулигани и шовинисти, дека во навивачките песни во Ниш се спомнаа и „клетите шиптари“ и дека никој до денес не собра храброст јавно да се огради од ваквото однесување, кое нема врска со спорот. Сега сите ловат поени и поенчиња, славејќи ги успесите на нашите спортисти (кои, нели, „гинат“ на теренот, за Македонија), па затоа простата калкулација покажува дека тој што ќе го крене гласот против расистичките и шовинистичките испади, ризикува да заврши како Мирјана Најчевска, како Роберто Беличанец и како сите други кои беа прогласени за ѓаволи, само затоа што се осмелија да кажат дека песната за „Гоцевата раса“ што ќе го освои „солунското поле“, е неприкладна за славење на спортски успеси и дека станува збор за расистичка песна.

Ќе ме радува ако луѓето научат да живеат еден покрај друг без да им пречат нивните разлики. Тоа е следниот стадиум во развојот на нашиот менталитет и е чекор напред кон функционална светска држава, каква што постепено се создава под дејство на интегративните глобализациски процеси. Гледано од една ваква перспектива, нашите локални кавги изгледаат ситно и безначајно.

Напред Македонија, и да живее цел свет!

MaxTV, среди го бирањето превод

noreply@blogger.com (GoodBytes) — Fri, 13 Jan 2012 22:50:00 +0000

Дигиталната телевизија на T-Home во Македонија се вика MaxTV. Како корисник на оваа нивна услуга можам да речам дека сум задоволен од квалитетот на сликата и од понудените канали. Но, има една работа која ме иритира откако ја имам MaxTV, а тоа е бесмисленото бирање превод секогаш кога ќе се избере каналот. Начинот на кој е смислена оваа операција е следниот:

Се избира каналот (кој е на странски јазик и за кој има превод, како на пример National Geographic).
Се кликнува копчето кое ги отвора опциите за преглед.
Се избира групата „Преводи“.
Се избира одреден превод.
Се кликнува на копчето ОК.

Навидум едноставна и брза постапка за бирање превод, нели? Но, не е така „едноставно и брзо“ како што изгледа: ако се промени каналот, за потоа пак да се дојде на каналот за кој бил избран преводот, подесувањето се губи и постапката треба да се повтори. Некој ќе рече, не е толку страшно, но ако често „моташ“ по каналите и ако гледаш странски канали, ова станува напорно, па дури и иритирачко со својата бесмисленост.

Решението за овој проблем е максимално едноставно и елегантно, а освен тоа е тривијално за имплементација: по избор на преводот „македонски“ за каналот „National Geographic“, системот да го запише ова подесување во некоја мала табела која ќе изгледа отприлика вака:

Канал	Превод
101	1
102	1
...	...

Во табелата погоре, 101 е ID на каналот National Geographic, потоа 102 го означува Discovery Channel, и слично. Во колоната „Превод“, бројот 1 е ID на македонскиот превод, 2 на албанскиот, 3 на српскиот и.т.н. Па сега, системот автоматски ќе го поставува последно избраниот превод за секој канал кој ќе биде избран.

Медиа приемникот на MaxTV всушност е рудиментарен компјутер кој работи на WindowsCE, па верувам дека не е тешко да се прават промени од ваков тип. Времето кое еден програмер ќе го потроши да ја имплементира оваа функционалност е помало од времето кое ми требаше да го напишам овој пост, а заштедата во време и нерви на илјадниците клиенти, како и заштедата во арчење на копчињата и батериите на далечинскиот управувач се огромни.

MaxTV, среди го бирањето превод!

Поповите бараат државни плати

noreply@blogger.com (GoodBytes) — Thu, 05 Jan 2012 11:54:00 +0000

Ако не си вработен, основај верска заедница и произведувај „духовна храна“. Благодарение на притисокот од црквата, еден ден може да земаш и плата за својата работа.

Канал 5: По бизнисмените, социјалните случаи, стечајците, и други маргинали социјални случаи и поповите и владиците се наредија во редот за помош од државата. Бараат државата да се однесува како членка на Европската унија и да почне да дава пари за плати и други бенефиции на свештените лица... [Владиката Петар] нагласува дека народот ја обезвреднил духовната храна зашто додека на јадење, пиење и лумпување на свадби се трошат и по 10.000 евра, надоместот за крштевки и венчавки на верниците им се гледа скап. Владиката во својот апел до државата денеска не ги спомна скапите возила што ги возат...

Само внимавај, затоа што може да се случи статусот „државен духовник“ да го добијат само доминантните религии. Ќе треба да се навлечат што поголем број следбеници (Твитер не се рачуна) за да капне платичка.

Медицина на криминалот

noreply@blogger.com (GoodBytes) — Wed, 21 Dec 2011 22:16:00 +0000

Неодамна во САД беше откриена голема мрежа за криминално влечење финансии од фондот за здравство преку офшор компании и фантом фирми со американска адреса. Овие нелегални операции минатата година испрале 48 милијарди долари од вкупно 526 милијарди долари тешкиот фонд Medicare.

Во секоја земја постојат криминални активности кои ја експлоатираат индиферентноста на јавната администрација и кои со леснотија цицаат огромни пари од касата која е „сечија и ничија“. Но, сепак може да се направи дистинкција помеѓу напредните и назадните земји, и тоа барем по две работи:

Во напредните земји постојат реални механизми за превенција или детекција на ваквите дубари (очигледно не совршени, но сепак функционираат).
Во напредните земји се анализираат и се крпат дупките во законите и/или институциите за да се избегнат слични проневери во иднина.

Македонија исто има фонд за здравство, кој исто „врти“ огромни пари. Она што ме загрижува е што кај нас не се ни откриваат здравствените далавери, камо ли да се пристапи кон нивно решавање.

Линк: Special Report: Phantom firms bleed millions from Medicare (Ројтер).