Pasan Live - පසන්ගේ අදහස්

අපේ සින්ඩිය v2.1

noreply@blogger.com (Pasan Buddhika) — Sat, 12 Aug 2017 14:12:00 +0000

ඔන්න විවේකයක් ලැබුනු ගමන් ඔබේ ඉල්ලීම් ඉටුකරමින් අපේ සින්ඩිය v2.1 අාවා. මුලින්ම බොහොම ස්තූතියි හැමෝටම අපේ සින්ඩිය අැප් එක දාගෙන බලල හොඳ නරක, අඩුපාඩු වගේම වැඩිදියුණු වියයුතු තැන් පෙන්නල දුන්නට.

බොහෝ දෙනෙකුට තිබුනු ප්‍රශ්ණයක්නෙ ජංගමයෙන් කොමෙන්ට් කිරිල්ල. ඔන්න ඒ්කට විසඳුමක් මේ වර්ශන් එකේ අැතුලත්. ලිපියක් කියවද්දි ඉහල දකුණු කෙලවරේ පැන්සලක සළකුණක් දැකගන්න පුළුවන්. ඒක තේරීමෙන් කොමෙන්ට ලියන්නට වින්ඩෝවක් ලැබෙනව. එහි නිවැරදිව සිංහල ලියන්න පුළුවන්. ලියල ඉවරවුනාම පහල තියන "COPY" බොත්තමෙන් ඒ්ක අරගෙන අවශ්‍ය තැනට දාගන්න (Paste කරන්න) පුළුවන්.

ඊලඟට වැඩිදෙනෙක් ඉල්ලුවෙ සෙවීමේ පහසුකම. ඒ්කත් ඔන්න හරි.

සෙවුම් ප්‍රතිඵලයක් තේරීමෙන් මෙවැනි වින්ඩෝවක් ලැබෙන අතර එමගින් බ්ලොගය ප්‍රියතම ලැයිස්තුවට දමාගැනීමටත්, බ්ලොගයට පිවිසීමටත්, අළුත්ම ලිපිය කියවීමටත් හැකිය.

තාම දාගත්තෙ නැත්නම් දැන්මම දාගන්න. කලින් දාගත්ත නම් අළුත් එකට අප්ඩේට් කරගන්න. යාළුවන්ටත් කියන්න.

හොඳ නරක මට කියන්න.

ජයවේවා !

ස්මාර්ට් විදියට බ්ලොග් කියවමු . . .

noreply@blogger.com (Pasan Buddhika) — Sat, 29 Jul 2017 07:38:00 +0000

බ්ලොග් කියවන අයට ( විශේෂයෙන් මම වගේ) තියන ගැටලුවක්නෙ අලුත් පොස්ට් හොයගන්න එක. ගොඩ දෙනෙක් සින්ඩි වලින් හොයාගන්නව. සමහරු මූනුපොතේ ශෙයා කරාම බලනව. කොහොමහරි වෙන්න ඕන කියවන එකනේ.

මටත් හිතුන සින්ඩියක් කරන්න. හැබැයි වෙනස් විදියකට. හැමදාමත් ඇප්ස් එක්ක ඔට්ටුවෙන එකේ ඇයි බැරි සින්ඩි ඇප් එකක් කරන්න. ඉතින් වැඩේ පටන් අරන් කරගෙන ගියා අන්ඩ්‍රොයිඩ් වලට. පලවෙනි නිකුතුව දැම්ම .............. හිතවත් කීපදෙනෙකුට කිව්ව දාගෙන බලන්න කියල. වැඩේ අව්ලක් නෑ වගේ. ඒ අතරෙ වැදගත් වෙයි කියල හිතෙන තවත් අංගෝපාංග ටිකක් එකතුකරල ඊලඟ නිකුතුවත් දැම්ම. දැන් තියෙන්නෙ පොදුවේ ආරාධනය කරන්න හැමෝටම මේක පාවිච්චි කරල බලන්න කියල.

"අපේ සින්ඩිය" ලෙසින් කලඑලි බහින මගේ ඇන්ඩ්‍රොයිඩ් සින්ඩි ඇප් එක google play store එකෙන් ඔයාගෙ ඇන්ඩ්‍රොයිඩ් ස්මාර්ට් දුරකතනයටත් දාගෙන බලන්න. මේ පින්තූරෙ තියන QR කෝඩ් එකෙන් ලේසියෙන්ම අැප් එක හොයාගන්න පුළුවන්.

හැම සින්ඩියක වගේම මගේ එකෙත් අළුත් ලිපි පෙන්වන තීරුවක් තියනව. ඊට අමතරව ඔයා කැමතිම බ්ලොග් වෙන්කරගන්නත් පුළුවන්. බ්ලොග් ලැයිස්තුවේ අදාල බ්ලොග් ලිපියෙ තියන තරු සලකුණ ඔබල Favorites ලැයිස්තුවට දාගත්තම හරි.

ලිපියක් තේරීම මගින් ඒක කියවන්න පුළුවන්.

අළුත් ලිපි Notification මගිනුත් ඔබට දන්වනව. ඒ් නිසා අළුත් ලිපි ඔබට මග අැරෙන්නෙන් නෑ.

මේක පාවිච්චි කරල බලන්න මම ඔබට අාරාධනා කරනව. ඒ් වගේම හොඳ නරක කියන්නත් අමතක කරන්න එපා.

Panama Paper වලින් හෙලිවන තතු

noreply@blogger.com (Pasan Buddhika) — Tue, 05 Apr 2016 15:20:00 +0000

ICJT නොහොත් International Consortium of Investigative Journalists නැමති සංවිධානය විසින් මුදල් අයථා පරිහරණයට සාක්ෂි සපයන රහසිගත ලිපිගොනු මිලියන 11.5 ක් ප්‍රසිද්ධ කර තිබෙනවා. රටවල් 50ක දේශපාලනඥයන් 150ක්, අායතන 21 සහ තවත් බොහෝ ප්‍රභල පුද්ගලයන් රැසක තොරතුරු ඒ් අතර වනවා.

පහත සඳහන් who did what, and how මත ක්ලික් කර වැඩි විස්තර බලාගන්න.

ඉතින් කොහොමෙයි . . . . . . ? හුඟකාලෙකට පස්සෙ . . . .

noreply@blogger.com (Pasan Buddhika) — Thu, 12 Jun 2014 07:28:00 +0000

සෑහෙන්න දවසකින්නෙ හරිහමන් නිවාඩුවක් හම්බවුනේ. ගේ එහෙම ටිකක් අස් පස් කරල දාල, නිවාඩු පාඩුවෙ උයාගෙන කාල එහෙම ඉන්න අතරෙ හිතුන බ්ලොග පැත්තට ඇවිත් මකුළුදැල් එහෙම කඩල පොඩ්ඩක් අළුත් කරල ගන්න.

ඉතින් කොහොමද ඔයාට? මට මේ පැත්තෙ එන්න බැරිවුනාට ඔයානම් මේ පැත්තෙ ඇවිත් හොයල බලල ගිහින් තියෙනව කියල හිට් කවුන්ටරේ බලපුවාම පේනව. බොහෝම ස්තූතියි මාව බලන්න ඇවිත් යනවට.

පහුගිය මාස දෙක තුන කියන්නෙ සංක්‍රන්ති සමයක්. රැකියා සථානය වෙනස් වුනා. කාමරේකට හිරවෙලා තිබුනු ජීවිතෙන් මිදිල අත පය දිගෑරල ඉන්න පුළුවන් තැනකට මාරු උනා. කඩේ කෑමට සමු දීල උයාගෙන කන්න පටන්ගත්ත. මේ වගේ ගොඩක් වෙනස්කම් වෙච්ච කාලයක් තමා පහුඋනේ. (මෙහෙම කියද්දි සමහරු පුදුමවෙලා අහනව . . . . . ත් මාරු කලාද කියලත්. නෑ නෑ බයවෙන්න එපා. ඒක සුපුරුදු පරිදි තියෙනව කිසිම වෙනසක් නැතුව)

ඔය අතරෙ බ්ලොගේ ආයෙත් ලියවන්න ඉල්ලීම්, යෝජනා, චෝදනා, ආයාචනා, තර්ජන, ගර්ජන, බලපෑම්, සුදු වෑන්, මැර තර්ජන වගේ දේවල් පවා ආවත් මම නෙමෙයි ඒවයින් සැළුනෙ. ;)

ඒත් ඉතින් මෙච්චර කාලයක් ඇදගෙන ආපු එක නිකන්ම වහල දාන්නෙ කොහොමද. සමහර යාළුවො හම්බුනාම කියනව පසන් ඔයාගෙ අර "මූණුපොත හොරු ගනීද?" ලිපිය බලල තමයි මාත් මගේ එකේ් සෙටිංස් හදාගත්තෙ කියල. තවත් කෙනෙක් කියනව අයියෙ අර "වින්ඩෝස් 7 වල wifi access-point එකක් හදමු......" ලිපිය හරිම ප්‍රයෝජනවත් උනා කියල. ඒ වෙලාවට පුංචි ආඩම්බරයක් ඇතිවෙනව අනේ මම පොඩි හරි වැදගත් දෙයක් කලා නේ කියල. (පොඩි ඇඩ් එකක් දාගත්තද මන්ද . . .)

හප්ෙප් මේ අවුරුද්දටම මක්කවත් ලියල නෑ නෙව. මාව එල්ලන්න එපැයි නේද . . . . බලමුකෝ මොනවහරි කරන්න. එහෙනම් ගිහින් එන්නම්කො . . . !

අමතක වෙන්න කලින් ලියල තියාගන්න - ගූගල් කීප්

noreply@blogger.com (Pasan Buddhika) — Mon, 18 Nov 2013 20:12:00 +0000

නිතරම ජාලයේ සැරිසරන අපිට විවිධාකාරයේ දේවල් හම්බ වෙනවනෙ. එවෙලෙට මතක තිබුනත් පස්සෙ වෙලාවක හොයද්දි මතක නෑ. ඉතින් ඇවිදපු තැන් පීර පීර හොයන්න වෙනව.

අහුවුන වෙලාවෙ කොහේහරි සටහනක් දාගත්තනම් හරි.

ඒත් කොහෙද දාගන්නෙ?

ගොඩක් අය පුරුදුවෙලා ඉන්නෙ මේල් එකේ ඩ්‍රාෆ්ට් එකක් දාගන්න. එහෙමත් නැත්නම් ටෙක්ස්ට් ෆයිල් එකක දාල තියාගන්න.

මම මේ කියන්න යන්නෙ ඊට වඩා පහසු ලස්සන ක්‍රමයක් ගැන. පුංචි පුංචි සටහන් දාගන්නත් චෙක් ලිස්ට් දාගන්නත් පුළුවන්කම ඒකෙ තියෙනව. ඒ තමයි ගූගල් කීප් සේවාව.

ගිහින් බලල කියන්නකො කොහොමද කියල. https://drive.google.com/keep/

දන්න සිංහලෙන් හොයාගන්න

noreply@blogger.com (Pasan Buddhika) — Thu, 19 Sep 2013 17:35:00 +0000

මේ ලඟදි දවසක මම බස්සිගෙ ගෙදර ගියා නෙ. ඒ යද්දි බස්සිගෙ තාත්තට යාළුවෙකුගෙන් දුරකථන ඇමතුමක් ලැබිල තිබුන. කාරණේ තමයි යාළුවගෙ පුතාට සාගර පලන්සූරිය ශූරීන් එහෙමත් නැත්නම් කේයස් ගැන විස්තර ටිකක් දැනගන්න. බස්සිෙගෙ තාත්තට එතුමගෙ විස්තර සෑහෙන්න දුරට මතක තිබුනත් හරියටම දින වකවානුත් සමහර කෘති වල නම් වගේ දේවල් හරියටම මතක තිබුනෙ නෑ. "සුදො සුදු" පොතේ බැලුවත් ඒතරම් විස්තරයක් හොයාගන්න බැරිවුනා.

අපේ හුඟක් ප්‍රශ්ණ වලදි පිහිටට ඉන්නෙ ගූගල් දෙයියො නිසා අන්තිමේදි මේ ප්‍රශ්නෙත් ගූගල් දෙයියන්ට ඉදිරිපත් කරන්න තීරණය කලා. ඉංගිරිසියෙන් ගහල සර්ච් කලත් ඒ තරම් හොඳෙ ප්‍රතිඵලයක් පෙනෙන්නට තිබුනෙ නෑ.

මේ අතරෙ බස්සිගෙ තාත්ත යාළුවට දන්න විස්තර කියනව ලියාගන්න කියල. මල චාටර් එකක් වෙන්න යන්නෙ. අපිට හම්බවෙච්ච විස්තර වලට වඩා පට්ටම සිරා විස්තරයක් එයා කියාගෙනයනව.

නිකමට හිතුනෙ සිංහලෙන් සෙවුමක් දාල බලන්න. අකුරු දෙකයි ගැහුවෙ, මෙන්න දෙයියො උඩපැනල අහපි "එම්බා නරය, තා හොයන්නෙ සාගර පලන්සූරිය ගැනද?" කියල.

ප්‍රතිඵල අතර ඉතාම ඉහල මට්ටමේ ලිපි රාශියක් තිබුන. තාත්ත ඒ විස්තරත් භාවිතා කරල වැඩේ සම්පූර්ණ කරගත්ත. අපිට ඉතින් සතුට කියල නිමකරන්න බෑ. යන්තම් ජාමෙ බේරගත්තනෙ.

ගූගල් සෙවුමට යුනිකේත සෙවීමේ පහසුකම එක්කරල සෑහෙන්න කාලයක් වුනත් සිංහලෙන් සෙවීම ඒ තරම් ජනප්‍රිය නොවුනෙ අන්තර්ජාලය තුල සිංහලෙන් ලියවුණු ලිපි හිඟවිම නිසානෙ.

දැන් තත්වය බොහෝ සෙයින් වෙනස් වෙලා. බොහෝ ජාතික පුවත්පත් වගේම අනෙකුත් විද්‍යුත් මාද්‍ය ආයතත් තමන්ගේ සිංහල වෙබ් අඩවි, ප්‍රවෘත්ති අඩවි සිංහල යුනිකේත මගින් ඉදිරිපත් කරනව. ඒ වගේම විවිධ ආයතන, සංවිධානල එකමුතු මගිනුත් පෞද්ගලිකවත් පවත්වාගෙන යන සිංහල වෙබ් අඩවි හා බ්ලොග් මගින් අන්තර්ජාලය තුල සිංහල අන්තර්ගතය වැඩිකිරීමට කරන සේවය මිලකල නොහැකියි.

එමෙන්ම සිංහල යුනිකේතයේ දියුණුට කැපවූවන් සිදුකල සේවය ඉතාම අනර්ඝයි. සිංහල බ්ලොග් ලිවීම ජනප්‍රිය කිරීමටත් අන්තර්ජාලය තුල සිංහල කියවන්නන් වැඩිකිරීමටත් දායක වූ සින්ඩිකේටර් හා බ්ලොග් කරුවන්ගේ එකමුතු අමතක කල නොහැකියි.

අන්තර්ජාලය තුල සිංහල ප්‍රචලිත කිරීම වෙනුවෙන් කැපවූ සියළුම දෙනා වෙත මා ගේ ප්‍රණාමය.....!!!!!!!

.jar ෆයිල් වල හොඳ නරක

noreply@blogger.com (Pasan Buddhika) — Sun, 25 Aug 2013 18:15:00 +0000

මේ ලිපිය ලියන්න හිතුනෙ වැඩ කරද්දි මුහුණ දෙන්න සිද්ධවුනු ගැටළුවක් සහ ඒ ගැටළුව විසඳගන්න යොදාගත් ක්‍රමය ඔයාලත් එක්ක බෙදාගන්න.

මේ ගැටළුවට මුහුණ දෙන්න සිද්ධවුනේ maven වලින් project එකක් build කරන්න යද්දි. එතකොට මෙන්න මේ exception එක දැකගන්න ලැබුන.

[INFO] excludes = []

[INFO] /home/pasan/works/vCity/event/self-care/ussd/src/main/scala:-1: info: compiling

[INFO] Compiling 34 source files to /home/pasan/works/vCity/event/self-care/ussd/target/classes at 1376626708173

[ERROR] error: error while loading <root>, error in opening zip file

.......

.......

මේකෙන් කියවෙනව "error in opening zip file" කියල කතාවක්. මේක Scala (හෝ java ) project එකක් නිසා ගැටළුව වියයුත්තේ .jar ෆයිල් එකකයි. ඉතින් කොහොමද හොයාගන්නෙ මොන .jar ෆයිල් එකේද ප්‍රශ්නෙ තියෙන්නෙ කියල.

එතෙන්දි මගේ පිහිටට ආවෙ මෙන්න මේ විධානය. විධානයක් කිවුවට මේක විධාන කීපයක එනතුවක් ස්ක්‍රිප්ට් එකක් කිවුවොත් වඩාත් නිවැරදියි.

find . -name *.jar -exec bash -c "echo {} && jar tvf {} | head -n 1" \;

මම කලේ ලිනක්ස් ටර්මිනල් එකෙන් .m2 රිපො එකේ මේ කමාන්ඩ් එක රන් කරපු එකයි. මේකෙදි තියන හැම .jar ෆයිල් එකක්ම පරික්ෂා කරනව. ටර්මිනල් එක දිහා බලාගෙන ඉන්නකොට පෙනෙයි .jar ෆයිල් පරික්ෂා කරගෙන යනව. ඒ අතරෙ සමහර .jar ෆයිල් යටතේ "error in opening zip file" දෝශය පෙන්වන exception එක දැකගන්න ලැබෙයි. ඔයාට කරන්න තියෙන්නෙ අදාල .jar ෆයිල් එක හොඳ .jar ෆයිල් එකකින් ප්‍රතිස්ථාපනය (replace) කිරීම විතරයි.

දන්නෑ...........

noreply@blogger.com (Pasan Buddhika) — Mon, 19 Aug 2013 15:39:00 +0000

ඔයා කාල තියනවද . . . . දන්නෑ . . .
නැත්නම් හදල තියනවද . . . දන්නෑ . . .
එහෙනම් දැකල තියනවද . . . දන්නෑ . . .
අඩුගානේ අහල තියෙනවද . . . දන්නෑ . . .

හදන්න මොනවද ඕනෑ . . . දන්නෑ . . .
කොච්චර ඕනවෙයිද හදාගන්න . . . දන්නෑ . . .
බැදලද, තම්බලාද නැත්නම් ගුලිකරලද . . . දන්නෑ . . .
බේක් කරල කෑලි කපල කනවද . . . දන්නෑ . . .

දන්නෑ . . . ගන්නෙ කොහෙන්දෝ . . .
දන්නෑ . . . මොන පාටයි දෝ . . .
දන්නෑ . . . හරි සුවඳයි දෝ . . .
දන්නෑ . . . ගාන කොහොම දෝ . . .

එහෙම වෙලත් . . . හැමදාමත් . . . මම ඇහුවොත් . . .
"ඔයා මොනවද කන්නේ . . . ?", "ඔයාට මොනවද ඕනේ . . . ?"
හැමදාමත් එයා දෙන්නෙ එකම උත්තරේ . . . "දන්නෑ . . ."
එතකොට මම අහන්නෙ . . . "කීයක් ඕනෙද දන්නෑ . . ."

බස්සිගේ නවාතැනට ගොඩවෙමුද..........

noreply@blogger.com (Pasan Buddhika) — Sat, 06 Jul 2013 18:21:00 +0000

ඔන්න එකමත් එන රටක බස්සෙකුට ලස්සන ගෑනුලමයෙක්ව හම්බවෙලා වෙච්චි දෙයක් ගැන තමා මම අද කියන්න යන්නෙ. හැබැයි ඒ කතාව මම කියනවට වඩා ලස්සන ඒ ගෑනුලමයගෙ (දැන් නම් එයා බස්සියෙක්නෙ) වචන වලින්ම අහනකොට. මොකද බස්සට වඩා හොඳට බස්සිට හැමදේම අකුරක් නෑර මතකයි.

මේ බස්ස පන වගේ ආදරේ කරන ඒ බස්සි අකුරු කරන අපේ ආදර කතාව කියවන්න ගොඩවෙන්න බස්සිගේ නවාතැනට

කළබලෙන්. . . . .

noreply@blogger.com (Pasan Buddhika) — Mon, 25 Mar 2013 07:20:00 +0000

"කළබල උනාම කොරස් කටෙත් අත දාගන්න බෑ" කියල කතාවක් නම් තියෙනව. ඒත් අපේ හුඟදෙනෙක් පුරුදුවෙලා තියෙන්නෙ අන්තිම මොහොතෙ වැඩ කරන්නනෙ. ඉතින් කළබල නොවී කොහොමද? අනික අර අපේ උන් කියනව වගේ එහෙම නොකලොත් කිසි ගතියක් නැහැලුනේ.

පාඩම් කරන්න ගියත් එහෙමනේ. මාස ගානක් හාල් වෙවී ඉඳල ඉඳල විභාගෙට දවසක් තියා තමා මතක් වෙන්නෙ පාඩම් කරන්න ඕන කියල. ටියුට් කරන්න සතියක් තිබුනත් කරන්නෙ අන්තිම පැයේදි. ඇයි ප්‍රොජෙක්ට් කරද්දි අන්තිම දවස් දෙක තුනේ අවුරුද්දක වැඩ කරනවනෙ.

වෙන එකක් තියා ඊයෙ රෑ 12 ට කලින් දාන්න තිබුනු එසයින්මන්ට් එක කරල ඉවර වෙද්දි 11.45 යි. අන්තිම මොහොතෙ ගිනි පත්තුවෙලා වගේ වැඩ කරන එක දැන් පුරුද්දට ගිහින්ද මන්ද......

ඉස්කෝලෙ කාලෙත් එහෙමයි නෙ. උදේ ගියාම තමා මතක් වෙන්නෙ කරන් එන්න කියපු වැඩ ටික. ඉතින් දාගෙන කරනව උදේ පාන්දර. කැම්පස් යද්දි හිතුව එහෙදිවත් හරියට කරනව කියල. ඒත් ඉතින ටික දවසයි. ආයිත් පරණ පුරුදු ක්‍රමේම තමා. ඒත් කවදාවත්ම කරන්න තියන වැඩ අතපසු කරේ නම් නෑ. රෑ එලිවෙනකන් කරල හරි වැඩේ ගොඩදැම්ම. ඒක නිසා අව්ලක් උනේ නම් නෑ.

අනික අන්තිම මොහොතෙ තමා පට්ට සිරා අදහස් එන්නෙ. කලින් කරන්න අරගත්තට මොලේ වැඩ නැද්ද මන්ද මෙලෝ ක්‍රමයක් හිතෙන්නෙ නැතිවුනාට අන්තිම මොහොතෙ කරනකොට නම් කරන විධි, කෙටි ක්‍රම අළුත් අදහස් ගලාගෙන එන්නෙ නිකන් වැවක් වාන් දානව වගේ.

ජොබ් එකට ගියාම නම් ක්‍රමේ ටිකක් වෙනස් වුනා. වැඩ ටික වෙලාවට කරන්න පුරුදු උනා. ඇත්තම කියන්වනම් පුරුදු උනා නෙමෙයි පුරුදු වෙන්න සිද්ධවුනා කිව්වොත් හරි. මොකද රිලීස් එකක් කට උඩ තියාගෙන් කලබලේට දාන ෆික්ස් එකක් වෙන කොහෙන්හරි පත්තුවෙලා රෑ එලි වෙනකන් කටු කන්න නොවිච්ච කෙනෙක් IT එකේ නම් ඉන්න විදියක් නෑ.

මාස්ටර් එක කරන්න පටන්ගද්දි හිතුව දැන්වත් හැදිල ඇති කියල. ඒත් ඊයෙ තේරුමිගත්ත ආයිත් පරණ ක්‍රමේම තමයි කියල. ඒත් දැන් නම් වෙනස් වෙන්නම වෙනව.
බලමුකො මොකද වෙන්නෙ කියල.............................

හුඟ කලකින් නිවාඩුවක්.......................

noreply@blogger.com (Pasan Buddhika) — Sun, 23 Dec 2012 15:57:00 +0000

පහුගිය ටිකේ බරටම වැඩ තිබුනනේ. බ්ලොග් එක පැත්ත බලන්නවත් බැරි උනා. සෑහෙන්න කාලෙකින් සතියක් විතර ගෙදර ඉන්න නිවාඩුවක් හම්බවුනේ.

ඒ අස්සෙ ලෝක විනාසෙකුත් එනව කිව්වනෙ. සමහරු නම් කියන්නෙ අයහපත් කාලගුණය නිසා ලෝක විනාසෙ කල් දාල කියලයි. මායා වරුන්ට කැලැන්ඩරේ කොටන්න ඉඩ මදි නිසා නැවැත්තුවද වෙන හේතුවකට නැවැත්තුවද කියල දන්නෙ කොටපු අයම තමයි. අපේ අයට පුළුවන් ඒ ගැන මත පලකරන්න විතරයිනෙ. ඒ අස්සෙ නිවාඩු දාල ලෝක විනාසෙට කලින් ගෙවල්වල ගියපු අයත් හිටිය.

ඒක දැන් පරණ කතාවක්නෙ. වාසනාවකට හෝ අවාසනාවකට එහෙම විනාසයක් උනේ නෑ නෙ.

හුඟ දවසකින් අද මිගාරව සෙට් උනා ස්කයිප් එකේ. එයා දැන් නවසීලන්තෙනෙ පදිංචිය. පොර කාර් එකක් ගත්තලු ඩොලර් 800 කට. ඇඬෙනව ඇහෙද්දිත්. මෙහේ හොඳ සෙල්ලම් කාර් එකක්වත් ගන්න බෑනෙ ඒ ගානට. ;)

කොහොමහරි අවුරුද්දකුත් ගෙවිල ඉවරවෙන්න යන්නෙ. නත්තලත් ලඟම එනව. මේ අවුරුද්දෙ කරපු මෝඩ කම් අතඇරල හොඳ තව තවත් දියුණු කරගෙන ඊලඟ අවුරුද්ද පටන්ගන්නයි තියෙන්නෙ. බලමුකො මොනවද කරන්න පුළුවන් කියල...............

සිත මුමුනන..................

noreply@blogger.com (Pasan Buddhika) — Sun, 23 Sep 2012 15:29:00 +0000

සිත මුමුනන කවිය අසන්නට
හද නලවන තනුව වයන්නට
සිලි සිලියේ දොඩමළු වන්නට
ආදරියේ එනුමැන මා වෙත........

මලක් වෙලා පිපුනෙන් අතු අග
නෙලාගන්න අත දිග ඈතක
සුවඳ සිඳී යා නොදී කිසි දිනෙක
සදා රකිමි හදවතට තුරුළු කර......

පිපුනත් තරු මල් නෙක ලෙස යායට
එකම සඳකි සිඳළුවේ අඳුරු කුස
ඒ සඳ සිසිලේ මැවුව සිහින රැස
තුරුළු කරන් සඳ සාවිය එනු මැන......

හිතුමතේ කුරුටු ගෑ ජීවන ගීතය
ආදරයේ තනුවෙන් තව ඔපකර
හඬගා ගයන්න ලොවටම ඇසෙන්න
එනුමැන මා හා දිවි ඇති තුරාම.........

හුඟ දවසකින් . . . . . . . .

noreply@blogger.com (Pasan Buddhika) — Sat, 30 Jun 2012 18:16:00 +0000

සෑහෙන්න දවසකින් බ්ලොග් එක පැත්තෙ එන්නත් බැරිවුනානෙ. ඉතින් ඔන්න ආයෙත් බ්ලොග් එකේ කුරුටුගාල යන්න මේ පැත්තට ආව. කියන්න විස්තර නම් ගොඩක් තියනව. ඒත් කොහෙන් පටන් අරගෙන මොනව ලියන්නද කියල හිතාගන්නත් බෑ.
ජීවිතෙත් වෙලාවකට හරිම පුදුමයි. අපි හිතන පතන විදිහටම හැමදේම සිද්ධවෙන්නෙ නෑ. ඒත් හැමදේම සිද්ධවෙන්නේ මොකක්හරි හේතුවකට කියලයි මම නම් හිතන්නෙ. අපි බලාපොරොත්තුවෙච්ච දේවල් ඒ විදියටම ඉටු නොවුනම අපි දුක් වෙනව කලකිරෙනව තමයි. ඒත් ටික කලක් ගියාමයි තේරෙන්නෙ එහෙම උන එක කොයිතරම් හොඳයිද කියල. “හැමදේම වෙන්නෙ හොඳටයි“ කියන කියමන ඇත්තයි කියල හිතෙන්නෙ ඒ වෙලාවට තමයි
හැම දේටම එහෙම හිතන්න පුළුවන් නම් අපිට ඇතිවෙන තැවුල් අවුල් ගොඩක් නැතිකරගන්න පුළුවන්. මොකද ජීවිතේ වැදගත්ම දේ සතුට මිසක් සල්ලි වත් වෙනත් දෙයක්වත් නොවන නිසා.
නොලැබිච්ච දෙයක් ගැන හිත හිත දුක්වෙන වෙලාව ආයිත් අපිට ගන්න බෑ නෙ. අපි විනාඩියක් දුකෙන් ඉන්නව කියන්කෙ සතුටෙන ඉන්න තියන විනාඩියක් නැතිකරගත්ත කියන එකයි. ඒ නිසා පුළුවන් හැම වෙලේම සතුටෙන් ඉන්න බලන්න. පුළුවන් නම් ඔයා වටේ ඉන්න අයවත් සතුටෙන් තියන්න.
තවත් කෙනෙකුගෙ මූනට හිනාවක් දෙන එක තරම් තවත් සතුටක් මම නම් දන්නෙ නෑ.

වින්ඩෝස් 7 වල wifi access-point එකක් හදමු......

noreply@blogger.com (Pasan Buddhika) — Sun, 01 Apr 2012 23:36:00 +0000

ඔයාගෙ අන්තර්ජාල සම්බන්ධතාව යාළුවොත් එක්ක බෙදාගන්න ඕන උනොත් මොකද කරන්නෙ. wifi තියනවනම් කරන්න තියෙන්නෙ ad-hoc එකක් හදල ඒකෙ තමුන්ගෙ අන්තර්ජාල සම්බන්ධතාව ‍ෂෙයාර් කරන එකයි. ඒත් ප්‍රශ්නෙ වෙන්නෙ ඔයත් අන්තර්ජාලයට සම්බන්ධවෙන්නෙ wifi වලින් නම්. ඒ වගේමයි සමහර ඩිවයිස් වලින් ad-hoc වලට සම්බන්ධ වෙන්න බැහැ. (මට මේ ක්‍රමය ඕන උනේ මගේ app ටෙස්ට් කරන Windows Phone 7 ඩිවයිස් එක ලැප් එකේ හදපු ad-hoc එක අඳුනගත්තෙ නැති නිසා)

මේකට විසඳුම තමයි wifi access-point එකක් හදාගන්න එක. මෙතෙන්දි අපේ ඇත්ත wifi ඇඩැප්ටර් එක මත පදනම් වෙලා වර්චුවල් wifi ඇඩැප්ටර් එකක් හදාගන්නව. කරගන්න විදිය පියවර වශයෙන් කියන්නම්.

මුලින්ම ඩොස් ප්‍රොම්ප්ට් එක ඇඩ්මිනිස්ට්‍රේටර් විදියට රන් කරගන්න ඕන. ඒක කරන්නෙ Start මෙනු එකේ All Programs වල Accessories වල තියන Command Prompt මත රයිට් ක්ලික් කරල එක මෙනු එකේ Run as Administrator තෝරන එකයි.
ඊටපස්සෙ මේ කමාන්ඩ් එක රන් කරන්න
netsh wlan set hostednetwork mode=allow ssid=MyConnection key=connectme
මේ කමාන්ඩ් එකෙන් MyConnection නමින් wifi access-point එකක් හදනව. පාස් කී එක connectme. ඒ දෙකට ඔයාට කැමති එකක් දාගන්න පුළුවන්.
ඊලඟට ඔයාගෙ ඉන්ටර්නෙට් කනෙක්ෂන් එක access-point එකත් එක්ක ෂෙයාර් කරන්න ඕන. ඒක කරන්නෙ මෙහෙමයි. මුලින්ම Network and Sharing Center එකට යන්න.
ඒකෙන් ඔයාගෙ ඉන්ටර්නෙට් කනෙක්ෂන් එක තෝරගන්න. (මගේ එක Mobile Broadband Connection 2 (Airtel))

Properties බොත්තම ක්ලික් කරන්න. Sharing ටැබ් එකේ "Allow other network users to connect through this computer's Internet connection" චෙක් බොක්ස් එක චෙක් කරල "Home networking connection" ලිස්ට් එකෙන් අපි හදපු access-point එක තෝරගන්න.
දැන් access-point එක ක්‍රියාත්මක කරන්නයි තියෙන්නෙ. මේ කමාන්ඩ් එක රන් කරන්න.

netsh wlan start hostednetwork

access-point එක නවත්වන්න ඕන නම් මේ කමාන්ඩ් එක රන් කරන්න.

netsh wlan stop hostednetwork

කරල බලන්නකො වැඩේ සාර්ථකද කියල. මේකට video tutorial එකකුත් හැදුව. පහලින් ඒක බලන්නකො. ඒක ලේසි වෙයි.

සඳේ...........................!

noreply@blogger.com (Pasan Buddhika) — Wed, 14 Mar 2012 03:53:00 +0000

හිස් අහස වසාගෙන
තරු රැසක් දිදුල මුත්
එකම එක සඳ මඬල
සිත් අහස පුරාවට.....

ඊයෙ අද මෙන් හෙටද
බිඳළුවේ දිවි අඳුර
එකම එක සඳක් මිස
තරු වලින් නොවේමය.....

අව අටවකින් පසුව
අමාවක ලබන මුදු
පුර සඳේ රුව ගුණය
සදා ඇත සිත කොනක.....

පුර පසින් වැඩි වැඩී
සුපුන් සඳ නැගෙන තුරු
සිත පුරා රැඳි සුවඳ
දිරි කරන් මග බලමි.....

බ්රව්සරේට හිම.......................

noreply@blogger.com (Pasan Buddhika) — Sat, 24 Dec 2011 06:55:00 +0000

එක එක කාලෙට කාලේ තාලෙට අදාල වෙන විදියට අමුතු අමුතු දේවල් ගූගල් එකේ දැකගන්න පුළුවන්නෙ. මේ මම කියන්න යන්නෙ නත්තල වෙනුවෙන් ගූගල් එකෙන් කරපු වැඩක් ගැන. මේක දාල නම් දැන් ටික දවසක්. මට කිවුවෙත් අපේ දිමුතු තමා. ඔයාලටත් කියන්න කියල හිතාගෙන හිටියත් වෙලාවක් උනේ නෑ නෙ. කමක් නෑ, දැන් හරි කිවුවනෙ නේද ;)
කරන්න තියෙන්නෙ සුළු දෙයක්. ගූගල් එකට ගිහින් (www.google.lk or www.google.com) ඒකෙ Let it snow කියල ටයිප් කරල සර්ච් කරන්නකො. එතකොට ඔයාගෙ බ්රවුසරේටත් හිම වැටෙයි මගේ එකට වැටුන වගේ.

හැමෝටම සුභ නත්තලක් වේවා!

මූණුපොත හොරු ගනීද?

noreply@blogger.com (Pasan Buddhika) — Sun, 18 Dec 2011 17:09:00 +0000

මූණුපොත එහෙමත් නැත්නම් අපි කවුරුත් දන්න ෆේස්බුක් එක හැකර් කරුවන්ගෙත් ස්පෑම් කරන්නන්ගෙත් තෝතැන්නක් බවට පත්වෙලා. තමන්ගෙ ඉතා වැදගත් පෞද්ගලික තොරතුරු පවා ෆේස්බුක් ගිනුමෙ ඇතුලත් කරන අය ඉන්න නිසා තත්වය ඉතා දරුණු වෙලා. මේ නිසාමයි අපගේ තොරතුරු ආරක්ෂා කරගැනීමට විවිධ ආරක්ෂක පුර්වෝපායන් ෆේස්බුක් මගින් හඳුන්වාදීල තියෙන්නෙ.
Privacy Settings ගැන නම් දැන් හුඟක් දෙනා දැනුවත්. ඒත් දැන් ඒක විතරක්ම ප්‍රමාණවත් නොවන තත්වයකට පත්වෙම්න් තියෙන්නෙ. වෙබ් බ්‍රව්සරය හා ෆේස්බුක් සර්වර් අතර හුවමාරු වන දත්ත ග්‍රහණය කරගැනීම මගින් අපගේ තොරතුරු තුන්වන පාර්ශවයක් අතට පත්විය හැකියි. මෙය වලක්වාගන්න ක්‍රමයකුත් ෆේස්බුක් මගින් ලබාදීල තියනව. ඒ https ආරක්ෂිත දත්ත හුවමාරුවක් සැලසීම මගින්. නමුත් මෙය සාමාන්‍යයෙන් සක්‍රීය කර නැහැ. අපට අවශ්‍ය නම් මෙය සක්‍රීය කරගන්න පුළුවන්.
ඔබේ ෆේස්බුක් ගිනුමට ඇතුල්වූවිට එහි ලිපිනය පෙන්වන්නේ මෙලෙස නම් ඔබ ආරක්ෂාකාරී නැහැ.

සක්‍රීය කරගැනීමට අවශ්‍ය නම් මුලින්ම Account Settings වෙත යායුතුයි. ෆේස්බුක් පිටුවේ දකුණුපස ඉහල කෙලවරේ ඇති පහලට යොමුවුන ඊ හිස මත ක්ලික් කලවිට ලැබෙන මෙනුවෙන් Account Settings වෙත යා හැක.

ලැබෙන පිටුවෙහි වම්පස ඉහල ඇති ලිස්ට් එකෙන් Security යන්න තෝරාගන්න. එවිට පහත පරිදි පිටුවක් ලැබේ.

මෙහි Secure Browsing ඉදිරියේ ඇති Edit මත ක්ලික් කලවිට ඊට අදාල සැකසුම් දැකගත හැක.

Browse Facebook on secure connection (https) when possible ඉදිරියෙන් ඇති චෙක් බොක්ස් එක මත ක්ලික් කර එය සක්‍රීය කර Save Changes බොත්තම මත ක්ලික් කරන්න. දැන් ඔබේ ෆේස්බුක් ගිනුම හැකි සෑමවිටම https ප්‍රොටෝකෝලය භාවිතා කරනු ඇත. දැන් ඔබේ ගිනුමට ඇතුලු වූ විට එහි ලිපිනය මෙලෙස දැකගත හැක.

මීට අමතරව අපගේ ගිනුමට සිදුකරන අනවසර පිවිසුම් පිලිබඳව දැනුවත්වීමට අවශ්‍ය නම් Login Notification ඉදිරියේ ඇති Edit මත ක්ලික් කර අවශ්‍ය තේරීම් සිදුකර Save Changes බොත්තම මත ක්ලික් කරන්න.

ඔබගේ තේරීම අනූව ඊ මේලයක් මගින් හා/හෝ sms මගින් ඔබගේ ෆේස්බුක් ගිනුමට සිදුවන පිවිසුම් පිලිබඳ ඔබව දැනුවත් කරනු ඇත.

වින්ඩෝස් වල ලිනක්ස්...........

noreply@blogger.com (Pasan Buddhika) — Sun, 11 Dec 2011 02:35:00 +0000

ලංකාවෙ වැඩිදෙනෙක් පුරුදුවෙලා තියෙන්නෙ වින්ඩෝස් වලට. වැඩිපුර භාවිතා කරන්නෙත් වින්ඩෝස් කිවුවොත් හැමෝම ඒකට එකඟවෙයි. ඒකට හේතුව තමයි භාවිතයට පහසු වීම.ඒත් දැන් බොහෝ පිරිසක් ලිනක්ස් මත පදනම් වු උබුන්ටු, කුබුන්ටු, ෆෙඩෝරා වැනි මෙහෙයුම් පද්ධති භාවිතයට යොමුවෙලා තියෙනව. මේ මෙහෙයුම් පද්ධති දෙකම තමන්ගෙ පරිගණකයේ ස්ථාපිත කරගෙන දෙකෙන්ම වැඩ ගන්න අයත් ඉන්නව. තවත් පිරිසක් ඉන්නව ලිනක්ස් මෙහෙයුම් පද්ධතියක් භාවිතා කරන්න කැමති ඒත් එකපාරටම ලිනක්ස් වලට මාරුවෙන්න අකමැති. එහෙම අය වැඩිදෙනෙක් කරන්නෙ virtual box හරි vmware හරි මගින් වින්ඩෝස් ඇතුලෙම ලිනක්ස් මෙහෙයුම් පද්ධතියක් දාගන්න එක.
ලිනක්ස් වල බලසම්න්න කම දැනෙන්න නම් ටර්මිනල් එකේ වැඩකරල බලන්න ඕන. සර්වර් මෙහෙයුම් පද්ධතියක් විදියට ලිනක්ස් ඉන්න තැනට වින්ඩෝස් වලට එන්න බැරිවෙලා තියෙන්නෙ ඒ නිසයි. ඒ නිසයි වින්ඩෝස් වලටත් power shell කියල කමාන්ඩ් ලයින් ටූල් එකක් හදන්නෙ.
ඒත් මම කියන්න යන්නෙ ඒ ගැන නෙමෙයි. වින්ඩෝස් වල ඉඳගෙනම ලිනක්ස් ටර්මිනලයෙන් වැඩ ගන්න ක්‍රමයක් ගැන. මේ ගැන මම හොයන්න පටන්ගත්තෙ මට වින්ඩෝස් වල ඉඳන් ලිනක්ස් විධාන භාවිතා කරන්න අවශ්‍යතාව තදින්ම දැනුනු නිසා. cygwin තමා ටූල් එක. ඒක වින්ඩෝස් වෙනුවෙන්ම සකස්වුනු ලිනක්ස් ආරට යන වැඩසටහනක්. විශේෂත්වය වෙන්නෙ මේක නිදහස් විවෘත්ත මෘදුකාංගයක්. Cygnus Solutions මගින් මුලින් නිර්මාණය කලත් පස්සෙ Red Hat විසින් එම සමාගම මිලදීගෙන. දැන් cygwin පවත්වාගෙන යන්නෙ Red Hat සමාගම විසින්.

http://www.cygwin.com වෙබ් අඩවියට ගිහින් cygwin ඩවුන්ලොඩ් කරගන්නත් වැඩි විස්තර දැනගන්නත් පුළුවන්. ලිනක්ස් කමාන්ඩ්ස් ඉගෙනගන්න ආසාවෙන් ඉන්න අයට මේක ගොඩක් ප්‍රයෝජනවත් වෙයි කියල හිතනව. වැඩි විස්තර ඕන නම් කියන්න. ඕන අය ඉන්නවනම් මම cygwin ස්ථාපනය කරගෙන භාවිතා කරන හැටි ඉදිරි ලිපිකින් කියන්නම්කො.

ජීවිතේ නව මගක...................

noreply@blogger.com (Pasan Buddhika) — Sat, 03 Dec 2011 13:46:00 +0000

මුලින්ම පෙර පාසලේ. ඊට පස්සෙ ප්‍රාථමික අධ්‍යාපනය මාතර ඕල්කට් ආදර්ශ විදුහලෙන්. ශිෂ්‍යත්ව කඩුල්ලෙන් පස්සෙ මාතර සාන්ත තෝමස් කුමර විදුහලට. සා. පෙළ, උ.පෙළ කඩුළු පැනගෙන අන්තිමට නැවතුනේ කැළණි විශ්ව විද්‍යාලයේ භොතීය විද්‍යා අංශයේ. පොඩි කාලෙ ඉඳන්ම ආසාව තිබුනෙ ඉලෙක්ට්‍රොණික් වලට. බැටරි, වයර් කෑලි අරගෙන එක එක දේවල් හදන එක ඒකාලෙ ඉඳන්ම කලා. (ඒකනේ ගෙදර තිබුනු හුඟක් විදුලි උපකරණ වීසිකරන්න සිද්ධවුනේ) ඕ ලෙවල් කරන කාලෙ තමා පරිගණකයට හිත යන්නෙ.

වාසනාවකට කැම්පස් එකේදි මේ කැමතිම විශයන් දෙකම ඉගෙනගන්න අවස්ථාව ලැබුන. මේ කාලෙදිමයි ස්වාධින වෙබ් අඩවි නිර්මාණකරුවෙක් විදියට වැඩ පටන්ගන්නෙ. කැම්පස් ඉන්න කාලෙ ඇතුලත පරිගණකයත් එක්ක ගොඩක් දුර යන්න පුළුවන් උනා. ඒ කාලෙ යාළුවො කියන්නෙ පසන ලැප් එකත් එක්ක ගොඩ ගිහින් කියල. දැන් නම් එහෙම කියන්න බෑනෙ ;)

මේ අවුරුද්දෙ නොවැම්බර් 9 න් කැම්පස් ජීවිතෙත් අවසන්. ශිෂ්‍යයෙක් විදියට ගතකරපු ජීවිතය ඒ විදියට ගෙවිල යද්දි වෘත්තීය ජීවිතේ අරඹන්න ඔනනේ.

ලංකාවෙ දැවැන්ත මෘදුකාංග සංවර්ධන ආයතනයනට සම්බන්ධ වෙන්න මට අවස්ථාව ලැබුන. නොවැම්බර් 18 ඉඳන් එතන වැඩ. මට පැවරිලා තියෙන්නෙ Windows Phone 7 වැඩසටහන් කීපයක් නිර්මාණය කරන්න.

දැන් ඉතින් ජීවිතය ගෙවෙන්නෙ ඒව එක්ක.............

අකුරු..............

noreply@blogger.com (Pasan Buddhika) — Sat, 29 Oct 2011 13:04:00 +0000

ඊයෙ අපේ අයියගෙ උපන්දිනේ නිසා මමත් ගෙදර ඇවිත් යන්න ආවා. අද ආපහු යන්න හිතාගෙන හිටියත් ටිකක් අසනීප ගතියකුත් තියන නිසා හෙටම යනව කියල හිතුව. උදේ ඉඳන් ඔහේ කැරකි කැරකි ඉන්නකොට හිතුන බ්ලොග් එක පැත්තෙ ඇවිත් මොනවහරි කුරුටු ගෑවොත් හොඳයි කියල.
ඒත් මොනවද දැන් ලියන්නෙ? ඉතාමත්ම වැදගත් ප්‍රශ්ණයක්. නිකන් ආවට ගියාට මොනාහරි ලියලත් බෑ නෙ.
හරි............ මතක් උනා කතාවක් හුඟ දවසක ඉඳන් කියන්න හිතාගෙන හිටියත් කියන්න අමතක වෙච්ච. මේක මේ කොච්චියේ යද්දි දැකපු දෙයක්. හවස රාගම, කැළණිය පැත්තෙ ඉඳන් කොටුව පැත්තට යනවනම් ඔයත් මේක දැකල ඇති.

මම දවසක් ගෙදර එන්න කැළණිය ස්ටේසමෙන් කොටුවට එන කොච්චියකට නැග්ග. ඒතරම්ම සෙනග හිටියෙත් නෑ කොච්චියේ. මාත් ඉඳගෙන එහෙම වට පිට බලද්දි හරි අපූරු දෙයක් දැකගන්න ලැබුන.
අවුරුදු 18ක 20ක වගේ කියන්න පුළුවන් පිරිමි ලමයෙක් ඉන්නව දොර කිට්ටුව තියන සීට් එකක. පෙනුමෙන් නම් කුලී වැඩ කරන කෙනෙක් වගේ. (මට සමාවෙන්න එහෙම නෙවෙයි නම්) එයා පොතකුයි පෑන් පැන්සල් තියාගෙන බර වැඩක්. මමත් ටිකක් විපරම් කලා. බලද්දි එයා අකුරු ලියනව.
මුලින්ම ගන්නව රතු පෑන අතට. අරගෙන ලියනව අකුරක්. ඊට පස්සෙ රතු පෑන පැත්තකින් තියල පැන්සල අරගෙන් ලියනව අර අකුර පේලියක්ම. ඊලඟට නිල් පෑනෙන් කළු පෑනෙන් පේලිය බැගින් ලියනව.
මේ අතරෙ දෙමටගොඩින් නගින පිරිමි ලමයි ටිකක් දොර ගාවට වෙලා ඉන්නව. "අයින් වෙන්න! අයින් වෙන්න! පොතට කළුවරයි " කොල්ලො ටිකට පුංචි ගෝරනාඩුවක්. කොල්ලො ටික එහාට මෙහාට කරල ආයිත් වැඩේ පටන් ගන්නව.
පිටුව පිරෙන්නම ලියල ඉවරවෙලා බොහොම ජයග්‍රාහී හිනාවක් එක්ක වටපිට බලනකොට එයා දැක්ක මම එයා දිහා බලාගෙන ඉන්නව කියල. මමත් පුංචි හිනාවක් දැම්ම. එතකොට කොච්චිය මරදානට කිට්ටු වෙලා. එයා පෑන් පැන්සල් ටික බෑග් එකට දාගෙන පොතත් අරන් ආව මගේ ලඟට. පොත මගේ දිහාට දික් කරල "මේ...." කිව්ව. මමත් පොත අරන් බලල "හොඳයිනේ..." කිව්ව. මූනෙ හිනාවක් පුරෝගෙන එයා බැහැල යන දිහා මම බලාගෙන හිටිය.
ඒ සිද්ධිය එතනින ඉවර වුනත් ඒ මතකය නම් මගේ හිතින් මැකිල ගියේ නෑ. මාතරට එනකන්ම මම ඒ ගැන කල්පනා කලා. ඇත්තටම එයාට අකුරු ඉගනගන්න තියන ආසාවට මෙහෙම කරනවද එහෙමත් නැත්නම් මානසික රොගයක්වත්ද කියල මම කල්පනා කලා.

හේතුව පලවෙනි එක නම් කොයිතරම් හොඳද...................

වසරක් ආ මග..........................

noreply@blogger.com (Pasan Buddhika) — Tue, 25 Oct 2011 16:09:00 +0000

හැක් කරපු ෆේස්බුක් ගිනුමක් නිසා ඇරඹුනු මගේ සිංහල බ්ලොග් කරණයට අදට හරියටම අවුරුද්දක්. අද වෙද්දි 15947 වාරයක් බ්ලොග් එක කියවල. මගේ ලිපි 18 ට ඔබේ අදහස් 66 ක් එකතුවෙලා. මේ දක්වා මාව ගෙනාවෙ ඔයයි. ඔයාල මගේ අදහස් කියවන නිසයි තව තවත් ලියන්න හිතෙන්නෙ. ලියන ලිපිය යටින් ඔයාගෙ අදහසකුත් තියනව දකින එක තරම් තවත් සතුටක් බ්ලොග් කරුවෙකුට නැහැ.
මේ ගෙවෙන්නෙ මගේ සරසවි දිවියෙ අවසන් දින කීපය. ප්‍රොජෙක්ට වල වැඩ වලට සෑහෙන්න මහන්සි වෙන්න වුනා. පහුගිය මාස දෙක තුනේ බ්ලොග් එක පැත්තවත් බලන්න බැරිවුනේ ඒ නිසයි. ඒත් ඉතින් බ්ලොග් එකට අවුරුද්දක් පිරෙන දවස නිකන්ම අතැරල දාන්නත් බෑනෙ.
ඔයාට බොහොම ස්තූතියි වසරක් පුරාවට මගේ අදහස් කියෙවුවට. ඉස්සරහටත් ඔයා මාත් එක්ක ඉන්නව කියල මම හොඳටම දන්නව.
මේ මල් මිට මෙතෙක් දුර මා සමගින් ආ ඔයාටයි!!!!

අහස......

noreply@blogger.com (Pasan Buddhika) — Sun, 24 Jul 2011 19:09:00 +0000

අහස හරිම පුදුමාකාරයි. වෙලාවකට ලස්සනට හිනාවෙනව. බලා ඉන්න හරිම ආසයි. තවත් වෙලාවකට හොඳටම දුක හිතිල වගේ අඬන්න ඈස් බර කරන් බලන් ඉන්නව. එහෙම ඉන්න බැරිවෙනකොට කඳුළු කැට කඩා හැලෙනව. සමහර වෙලාවට ඒ කඳුළු වලින් අපි යටවෙලා යන තරමට අහස අඬනව. තවත් වෙලාවකට අහස හරිම දරුණු වෙනව. හෙන හඬ නගල, ගර්ජනා කරල අපිව බය කරනව. ටික වෙලාවකින් ආයිත් සන්සුන් වෙලා මොනවත් නොවුනු ගානට හිනා වෙනව.

අහස හිනා වෙනකොට හැමෝගෙම හිත් සතුටින් පිරෙනව. ඒ අහසෙ හිනාව, අහස යට ඉන්න අපේ හිත් වලටත් කාන්දු වෙන නිසා කියලයි මට හිතෙන්නෙ. මම අහසට මේ තරම් ආදරය කරන්නෙ ඒ නිසයි.

අහස දුකෙන් බරවෙලා තියනකොට එහෙමත් නැත්නම් ඉකි ගගහ අඬනකොට අහස යටට වෙලා අහස දිහා බලා ඉන්න අපිටත් කොයි තරම් දුකයිද. ඒත් මේ මහ පොලව සරු කරන්න නම්, අපිට ජීවය දෙන්න නම් අහසට අඬන්නම ඕන. අහස හෙලන ඒ ආදරය පිරිච්ච කඳුළුකැට නැත්නම් මේ හැම දෙයක්ම වේලිලා ඉරි තලල යයි.

තරහ ගියාම නම් අහස ගොඩාක් දරුණුයි. බලන්න බය හිතෙන තරමට දරුණුයි. ඒ වෙලාවට නම් අපිට කරන්න පුළුවන් අහස සන්සුන් වෙනකන් බලාඉන්න එක විතරයි.

අහසත් මහ පොලව වගේම හැමදේම උහුලනව. ඒත් අහසට මහ පොලව තරම් ඉවසන්න නම් බෑ. ඒකයි ටිකක් බර වැඩිවුනු ගමන් නිකන්ම කඩාහැලෙන්නෙ.

කොයි තරම් දුක හිතුනත්, තරහ ගියත් ටික වෙලාවකින් ඒ කිසි දෙයක් නොවුනු ගානට අහස අපි එක්ක හිනා වෙනව. එ තමයි අහසෙ හැටි.......................

මාව අමතක වෙලාද................

noreply@blogger.com (Pasan Buddhika) — Sat, 16 Jul 2011 13:21:00 +0000

දවස හරියටම 2010 ඔක්තෝබර් 25 වෙනිද. මට අද වගේම මතකයි. අදට මාස 8යි දවස් 21ක් මට එයාව මුනගැහිල. මුල දවස්වල නම් හැමදාම මාව බලන්න ආව. එයා මාව බලන්න ආවම මට මාරම සතුටුයි. අඩුම ගානෙ දවසට පැයක් දෙකක් වත් මාත් එක්ක ගතකරන්න එයා පුරුදුවෙලා හිටිය. කොයි තරම් වැඩ තිබුනත් එක දවසක්වත් මග ඇරියෙ නෑ.
ඒත් ටික කලක් යද්දි මාව බලන්න එන එක ටිකක් අඩු වුනා. දවසකට දෙකකට සැරයක් ඇවිත් ගියා. ඒ එයාට වැඩ වැඩි හින්ද වෙන්න ඇති කියල මම ඉවසුව. හැමදාම ආවෙ නැතත් දවසකට දෙකකට සැරයක්වත් එනව නේද කියල මම හිත හදාගත්ත. ඉක්මනටම එයාට වැඩ අඩුවෙලා ආයිත් මගේ ජීවිතයට සතුට අරන් එයි කියල මම බලාගෙන හිටිය. හරිම ආසාවෙන් බලාගෙන හිටිය.
අවාසනාවකට ඒක එහෙම වුනේ නෑ. තත්වෙ එන්න එන්නම නරක අතට හැරුන. එයාට එන්න එන්නම වැඩ වැඩිවුනා. දවසකට දෙකකට සැරයක් එන එක සතියකට සැරයක් වුනා. සතිය දෙක වුනා. මාසෙකට සැරයක් වෙලා අන්තිමට මාව අමතකම වෙලා ගිහින්.
මම හැමදාමත් මග බලාගෙන හිටිය අදවත් එයි මාව බලන්න කියල. අන්තිමටම එයා ආවෙ මැයි 12. දැන් මාස දෙකකටත් වැඩියි. කොයි තරම් වැඩ තිබුනත් අඩුමගානෙ මාසෙකට සැරයක්වත් මාව බලල යන්න එන්න බැරිකමක් නෑනෙ. පැය ගනන් ඕන නෑ. අඩුමගානෙ විනාඩි 5 කට 10 කට වත් ඇව්ත් යන්න බැරිද.
ඉවසුව. පුළුවන් තරම් ඉවසුව. ඒත් මාස දෙකකුත් පහුවුනාම තවත් නම් ඉවසන්න බැරි වුනා. ඒ හින්දයි මෙහෙම
ලියන්න හිතුවෙ. සමහරවිට මේක දැකල ඔයාට හොඳටම තරහ යයි. අනේ ඒත් මට වෙන කරන්නම දෙයක් නැති නිසයි, මේක කියවන ඔයාගෙ යාළුවෙක්වත් ඔයාව ආයිත් මගේ ලඟට එවයි කියල හිතල මේක ලිව්වෙ.
අනේ කරුණාකරල ඔයාල කවුරුහරි පසන්ට කියනවද එයාගෙ බ්ලොග් එක එයා එනකන් මග බලාගෙන ඉන්නව කියල............................

මොබයිල් එකෙන් සිංහල..........

noreply@blogger.com (Pasan Buddhika) — Wed, 11 May 2011 20:51:00 +0000

ඔන්න ඉතින් විභාගෙත් ඉවරයි. ඒ හින්ද බ්ලොග් එකේ කුරුටුගාන්න ඉස්පාසුවක් ලැබුන. අද මම කියන්න යන්නෙ මොබයිල් එකෙන් සිංහල කියවන්න ක්‍රමයක්. මේ ක්‍රමය වඩාත්ම වැදගත් වෙන්නෙ ජාවා මොබයිල් පාවිච්චි කරන අයට තමා.
හුඟක් අය මොබයිල් එකෙන් අන්තර්ජාලයේ සැරිසරන්න භාවිතා කරන්නෙ ඔපෙරා මිනි බ්රවුසර් එකනෙ. යන එන අතරමගදි ඒක සෑහෙන්න ලොකු වාසියක්. ඒත් සිංහල කියවන්න තිබුන ලොකුම බාධාව තමයි මොබයිල්එ‍කේ යුනිකොඩ් නොමැතිවීම. ඒකට විසඳුමක් තමා මේ කියන්න හදන්නෙ.

මේක කරන්න කලින් මොබයිල් එකෙන් මගේ බ්ලොග් එකට ගියාම පෙන්නන්නෙ මෙහෙමයි.

කොහොමද මේක හදාගන්නෙ?

කරන්න ඕනෙ බොහොම පොඩි දෙයයි. ඔපෙරා මිනි බ්රවුසර්එකේ ඇඩ්‍රස් බාර් එකේ config: කියල ටයිප් කරල ඕකේ කරන්න.

එතකොට මේවගේ තිරයක් ලැබෙයි.

ඒකෙ පහලටම ගියාම තියෙනව Use bitmap fonts for complex scripts කියල එකක්. ඒකෙ ඉස්සරහ තියන ලිස්ට් එකෙන් Yes කියන එක තෝරල Save බොත්තම ක්ලික් කලා නම් හරි.

දැන් මොබයිල් එකෙන් මගේ බ්ලොග් එකට ගියාම මෙහෙම සිංහල කියවන්න පුළුවන්.

හල්කිරීමෙ එහෙම පොඩි අවුලක් තියෙනව. ඒත් බොහෝ දුරට වැඩේ සාර්ථකයි

මාසෙකට විතර පස්සෙ.........

noreply@blogger.com (Pasan Buddhika) — Tue, 01 Mar 2011 15:23:00 +0000

මේ දවස්වල නහය ගාවටම වැඩ. ලෙක්චර්ස්, ප්‍රැක්ටිකල්, ප්‍රසන්ටේෂන්, ප්‍රොජෙක්ට් ආදී එකී මෙකී නොකී විවිධාකාරයේ වැඩවලට යටවෙලා ඉන්න අතරෙ බ්ලොග් එක පැත්තටත් ඔලුව දාල අදහස් ටිකක් කුරුටුගාල යන්නත් කොහොමහරි වෙලාවක් හොයාගත්ත. ඒත් ඒ හුඟක් අය කරනව වගේ මාව සින්ඩියෙන් පන්නන එකෙන් බේරෙන්න නම් නෙමෙයි.
මේ බ්ලොග් එක ලියන එක මම හරිම ආසාවෙන් කරන දෙයක්. ඒවගේම මේක මගේ අදහස් අනෙක් අයට කියන්න තියෙන හොඳම මාධ්‍යයක්.
අපේ බ්ලොග් කියවන්න නිතරම එන පිරිසක් ඉන්නව. ඒ අය වෙනුවෙන් ලියන එක අපේ යුතුකම වගේම වගකීමක්. ඒ නිසා තමයි ඉඩක් ලැබෙන හැම වෙලාවකම බ්ලොග් එකේ පෝස්ට් එකක් දාන්නෙ. පහුගිය මාසෙ නම් මොනවත්ම ලියන්න බැරිවුනා. ඒ ගැන නම් ඔයාල හැමෝගෙන්ම සමාව ඉල්ලනව.
මේ දවස්වල ඉලෙක්ට්‍රොණික් ප්‍රොජෙක්ට් එක කරගෙන යනව. ප්‍රොජෙක්ට් එකට ස්වයංක්‍රීය නිවසක් (Automated Home) හදනව. USB පෝර්ට් එ‍කෙන් තමයි ඉන්ටර්ෆේස් කරන්නෙ. මේ වැඩේ කරගෙන යද්දි ගොඩක් දේවල් ඉගෙනගන්න පුළුවන් වුනා. ඉදිරි ලිපි වලින් ඒ දේවල් ඔයාල එක්ක බෙදාගන්න බලාපොරොත්තු වෙනව.
ඒ අස්සෙ ක්‍රිකට් වසන්තයත් ඇවිත්! ලිපිය ලිව්වෙත් ශ්‍රී ලංකා, කෙන්යා මැච් එකටත් ඇහැ දාගෙන ;-)
ශ්‍රී ලංකා ක්‍රිකට් පිලට ජය වේවා!