雪莉仍在這裡

我是鏡粉，我愛MIRROR

2021-04-19T22:09:00.065+08:00

我很喜歡MIRROR，

喜歡就是要說出口，

別人說你MK就不再追星，

因外在壓力而壓抑自我，

人生多沒趣。

喜歡MIRROR始於《男排女將》，

瘋狂愛上飾演魚仔的陳卓賢，

少爺仔火爆性格又易黑面，

說起對白生硬又尷尬，

但每次露出極其可愛的邪氣微笑，

基本上就是雌性生物不能抵抗的鄰家男寶，

一笑足以抵消幼嫩演技，

令世界變得更為美好。

接著瘋狂追看《Mirror Go》，

繼而重看《全民造星1》及《花姐Error遊》，

結果是一個不剩的全部愛上，

也不打算尷尷尬尬的暗追，

姐的風格就是要明追，

轟轟烈烈的瘋狂追。

香港人總是害怕表露情感，

既然是喜歡，

為何不能大聲說愛呢？

看了一系列「媽媽糖」的訪問，

「姜姜」前「濤濤」後，

除了重拾瘋狂的青春，

我看到了她們真心的笑容。

生於表達恨意比釋放愛意更容易的年代，

到處大叫「我愛姜濤」不是件很紓壓的事嗎？

為何到處播恨是件有個性有想法的事，

但大膽說愛卻是件尷尬的事？

斜槓青年－雪莉終極形態

2021-04-06T00:33:00.041+08:00

五年後，連點轉profile picture都唔識，唔覺唔覺，呀姐我都29歲了。

2021 - 2016 = 5

五年了。

2016年好像還在果籽當個小記者，

轉眼，

由記者轉為自由工作者，

又轉眼，

當自由工作者快兩年了。

自由工作者定義是甚麼？

首先要沉不住氣「劈炮唔撈」，

轉為自由工作者的初期，

總覺得自己不務正業，

說穿了就是捱不了正職，

想逃避現實不上班「炒散」度日。

逃不了資本主義世紀的普世價值，

嘗試為自己找很多說法，

經常與朋友說自己很多客人，

想要靠外在因素去證明自己的存在價值，

想要靠數字去證明自己不是可有可無，

多說兩次當催眠自己，

最好能順道催眠其他人吧。

經歷一輪懷疑人生的天人交戰過程後，

慢慢超脫了職級、薪金的煩惱後，

找回了寫稿及工作的真正樂趣，

開始會為寫了一段可愛的姜濤帖文感到快樂，

竟然會花盡心思看外國醫學研究，

只為Yahoo撰寫一篇關於CBD護膚品的稿件。

－

家人問：「即係做啲咩？人哋問起，要點答？」

朋友問：「其實有幾錢一個月？」

三姑六婆說：「哦，做一陣啫，呢排經濟唔好，做住先囉。」

大約半年前，

我還會說：「有咩咩客囉，一個月都有x位數收入。」

現在我會說：「自由工作者，甚麼也做，拍片寫稿做deck做schedule，好百搭，有咩就call我。」

兩年以來，

我得出了一個結論，

做自由工作者最緊要有自信，

信自己做得到，

做得到就去接，

接得到就搏盡，

搏盡後，

就會得到快樂。

我，

得到了快樂。

－

最近看了《斜槓青年》，

書中說道：

「人之所以會害怕痛苦，主要原因就是對自己沒有信心，缺乏主動選擇痛苦的勇氣。」

「炒散」有分長job與短job，

但比起全職有恆常routine而言，

每次接新job都是痛苦的開端，

面對全新的領域，

開闢全新的宇宙，

磨完七七四十九日再與呀客大戰二百回後，

總會有種苦盡甘來的快樂，

純粹的滿足感。

至於自由工作者是否自由？

現在我的工作時間為朝10晚7，

說實在比真實上班更規律，

由於做的全是自己想做的事，

省去一堆廢hea食煙辦公室政治與鬥爭時間。

想長久地自由下去，

首先要「自律」。

－

曾經聽說過：

「過十年後，我們都已是管理階層了，你呢？」

我答：

「十年後，我希望仍能從痛苦中感受快樂。」

－

曾經EX說道：

「你唔知自己做咩先咩都做。」

我現在可以非常肯定地說：

「我知自己做咩，所以我咩都做。」

亦有很多朋友說：

「以為你做KOL。」

「以為你做Blogger。」

「以為你做翻譯。」

早前做了一個小小的訪問，

導演問道：

「你最理想的生活形態是？」

我答：

「現在就是最理想的生活形態。」

到底如何定義「我」？

我是自由工作者／斜槓青年，

我不算特別自由，

但我是流動的，

沒有甚麼特別的定義。

－

失落了的九十三天－起點與終點：巴黎蒙馬特與德國國王湖

2016-10-28T00:19:00.002+08:00

今天打稿的時候，

重遇德國國王湖 St. Bartholomew's Church，

想起了很多從前的傻女小事。

歐洲十間最美的教堂全都去過了，

最愛的是巴黎蒙馬特聖心堂，

每次到巴黎都總要到訪一趟，

除了跟隨 Amélie 的急促步調外，

還因為那是小時候心目中教堂的理想原形，

直至小學入讀基督教學校後，

把美麗幻想壓榨得絲毫不剩。

教堂理應是全白色的，

聳立在與世隔絕的高山上，

看着浮華盛世而不為所動，

到訪過上百所教堂後，

蒙馬特聖心堂就是那最接近理想的原形。

但最難忘的那座教堂，

卻是德國國王湖的 St. Bartholomew's Church，

那時是七月的盛夏，

湖江山色一片綠，

坐上小木船前往湖的另一邊，

就是那座紅色洋蔥屋頂的小教堂。

這家不起眼的小教堂，

內裏也不過是簡潔普通小教堂模樣，

許多遊人也只經過拍個打卡照，

沒有走進去好好逛一下，

但因那雙新的 Nike 球鞋實在把雙腳折磨得很慘，

但又不想花無謂錢到附近咖啡館買極難喝的茶，

就走進了小教堂避難。

當時走進去就只是想休息一下，

不想動太多腦筋沒有研究太多，

今天翻查網絡資料，

才發現教堂建於 10 世紀，

原為修道院、後成為私人別墅、再於 1697 年整修成教堂，

1810 年時被巴伐利亞王國國王改建為度假中心，

最後還是回歸教堂用途，

成為德國人的結婚熱點。

那時坐在涼快的木板椅子上，

心裏想着在這裏結婚也應很不錯，

這三數年來朋友將近一個也不剩，

即使要宴請也不知該找何人，

這裏最多也只能容納 40 人，

看來租金也不會太貴，

倒不如就只在這裏兩個人解決就好了。

然後突然電話響起。

螢幕上彈出：“Sorry .. I think you have noticed ... I have girlfriend ...”

腦袋空空的，

本沒太多期望，

但還是失望了。

然後，

打開了維珍航空的機票電郵，

狠狠地推遲了兩個月再回港。

留在教堂近兩小時後，

到處隨便逛逛，

其實除了湖光山色外，

也沒甚麼太特別的事物，

在空洞的小鎮留了兩天，

一切也完了。

－

六年的恩怨情仇，

也就甚麼都完結了。

也由這座教堂開始，

一直到回倫敦為止，

沒有再打開過任何社交網絡軟件。

－

大學畢業後，

隨意地在歐洲轉了一個圈，

說長不長，

說短不短，

一共是九十三天。

除了略過許多風景，

也經歷了好一些事，

卻沒跟太多人說起過那段旅程。

－

今天又再突然想起古巨基的《歡樂今宵》，

想着那時的自己真傻豬，

但沒有那些傻豬，

也不會有今天的快樂。

然後又再想，

與其一直勉強地希望改變自己開個 Beauty Blog，

倒不如把那段未被紀錄的旅程先寫好吧。

第一位男友，我認識了 Beatles；

第二位男友，我學會了欣賞 Bob Dylan；

第三位男友，我發現了自己的貪婪；

第四位男友，我找到了自己的幸福。

這四段旅程之中，

也一直圍繞着歐洲在轉，

不停輾轉之下，

組成了今天與未來的自己。

一個反叛、討人厭，

但很快樂的自己。

1993

2016-10-27T21:49:00.002+08:00

近三數個星期，一直在想為甚麼自己最近迷上了啡色唇膏。

真的是因為 Kylie Jenner 嗎？不是自己不想承認，但看來真的不是，對她並沒太大好感，也沒有 follow 她的生活，對我來說她不過是個普通明星。是因為 YouTube 上所有 YouTuber 也在瘋狂使用嗎？在三四年前或許會因為她們而買一支半支，但在今天擁有近 400 支唇膏的我，已不會再受外界潮流的太大影響了。基本上一支唇膏在手，未上咀就知自己適合與否，例如最近有點想買的 MAC Liptensity galaxy grey Pastel 灰紫色，雖然很美但黃皮膚是絕不能碰，還是理性的放下了。

今天 M 痛宅在家，虛弱得哪裡也去不了，在看方太初的《衣飾無憂》，其中一個理論很有趣：「如果人們想擁有一件流行的物品單純因為出於慾望，那麼留下不再流行的物品又是因為甚麼？」其實啡色唇膏是 90 年代的潮流產物，根本不算是一項新的潮流，現在正在流行的啡色唇膏，不過是在 90 年代時瘋狂愛上 Spice Girls、Britney Spears 的我們，一直保存在記憶當中不再流行的物品。而當看到 Kylie Jenner 把這個記憶重新勾起時，我們又再把自己喜愛的年代產物重新塗上咀唇了。

我人生中第一支購買的唇膏，是 Chanel Rogue Coco 的 Boy ，那就是當年最流行的啡調粉紅，本想買 Victoria Beckham 的那支更 nude 的唇筆，但真的沒有勇氣。另外兩個瘋狂回憶，就是因為 Madonna 而買、充滿 Cultural Appropriation 的 MAC Russian Red，和 Avril Lavigne 那甩到痴線的 Benefit Bad Gal 黑色眼線筆了。那時對我來說是一個潮流，現在對我來說就是一個回憶，已是一個 90 年代文化了。

現在的女孩－（只限歐美或 ABC 吧，香港啡色唇膏真的不太受歡迎，至少沒有太多品牌夠膽用作主打。最大膽的已是一向以抄襲外國品牌為榮的韓牌 Etude House，都不過是主打一下，最後也沒有大賣。）會發狂搶購 Kylie Lip Kit 的，是真的把啡唇當是 Kylie Jenner 帶起的潮流，是很正宗 2010s 的真人 show 明星效應。不然很多愛唇膏之人，若親身試過乾到仆街的 Kylie Lip Kit，是絕對不會購買任何一款的，真正購買的大多是將之當是潮流產物的 2010s 妹妹仔。

然後不禁在想，原來自己的回憶，已是一個舊文化了。對喔，1996年出生的表妹已18歲要考DSE了，1991年輩的回憶已成舊物，已慢慢成為一個文化。最近發狠地購買的 MAC Liptensity Toast and Butter 、Urban Decay 1993 真的讓我感到無比的快樂，那不是因為觸碰了一個潮流，而是一個回憶被勾起的溫暖快樂，曾經的 Britney Spears，真有點想你了。

夏天是個聽盧廣仲的季節

2016-06-19T13:45:00.003+08:00

從倫敦回港後，

一直躲在家懶洋洋，

Jetlag是個事實，

也是個藉口，

每天也半睡不醒，

醒來後就在看一堆沒甚麼用的書。

大學一年級購入、用了六年的Macbook Pro，

連同經常通宵工作的主人一起壞了，

不捨得另購一部沒有英鎊符號的香港Macbook，

借了男友那部舊Macbook Pro，

按着那有非常治瘉的英鎊符號，

煲沒想像中般好看的Game of Thrones，

不用上班的日子真好。

－

小時候沒錢愛到信和買碟，

長大了有錢了扮中產常去HMV，

我是個港英餘孽，

也是個霸權擁護者，

His Master's Voice，

一個多麼腐敗的店名。

2013年時HMV鬧過倒閉，

當年Piccadilly Circus有一間很大的旗襤店，

每次在China Town吃完晚飯，

除Club和Pub外其他店都關門了，

只有數層高的HMV沒那麼早收皮，

經常一逛三小時就緩緩過去。

與一位糾纏三數年的曖昧非男友首次見面，

也約在那間HMV，

爆出倒閉那天，

放學後膽敢Rush hour搭Central Line轉Piccadilly Line趕到，

一掃二十隻碟強忍淚水希望HMV不要走，

還發下毒誓會乖乖地每個月買一張唱片。

Before Sunrise Before Sunset，

Midnight之前HMV存活了，

滿心歡喜打算到Piccadilly Circus多買一張DVD慶祝，

但分店還是沒了，

我的戀情還是告吹了，

眼淚還是掉下來了。

後來，

那個舖位開了一間紀念品店，

忘了多少年後的上個星期五，

與男友走過Piccadilly Circus，

原來紀念品店也沒了，

多年來的詛咒生效了，

趕走了我的HMV，

你也不會有好日子過。

－

忘了HMV後愛上東倫敦Brick Lane的Rough Trade，

間中愛到Camden Town的二手唱片店買咸豐年前的Radiohead《Kid A》，

與Rough Trade發生關係前，

並不知道那是間神級Hipster唱片店，

只知道它經常有我喜愛的唱片，

也讓我拿到了Boy George的親筆簽名，

即使它後來賣One Direction的唱片，

我還是經常光顧。

但回倫敦的那兩個星期，

Radiohead的新唱片還未推出，

故昨天到銅鑼灣HMV補購，

很久沒聽過華語唱片，

試聽了林憶蓮的翻唱經典，

聽着她那如蜜甜的唱腔只覺勉強，

林憶蓮是要纏綿如《沒有你還是愛你》，

又或是前衛如《蓋亞》才有味道，

《陪着你走》不應出自她口。

店內一直播林宥嘉，

但貨架卻被搶購一空，

看到了Red hot chili peppers的display，

卻因沒有試聽的唱機而卻步了。

試聽了盧廣仲的新唱片，

「我發現了煙火，你發現了我。」，

輕快慢板帶半點清涼，

二話不說就買下了。

將唱片放上託朋友在台灣帶回來，

很貴的無印文青唱片機，

臉上傳來陣陣Caudalie面霜葡萄清香，

將購自台灣獨立茶店琅茶的奶萱紅茶，

放入無印良品的冰茶泡壺，

加上一點英國全脂鮮奶，

邊喝邊看英國買回來的古怪繪本，

夏天真是個聽盧廣仲的好季節。

骨精雪莉與泰國奶奶的MMA大戰三百回

2016-05-24T01:38:00.001+08:00

早前發現原來骨精強係蘋果副刊老前輩，

雖然未及會見真人（可能係舊公司撞過都唔知），

但我諗我已經盡得其精粹，

係香港做media唔揼骨的話，

所有骨都隨時會斷。

近期迷戀揼骨變咗骨精雪莉，

據啊姐所講揼骨同Spa𢯎痕唔同，

揼骨係硬橋硬馬打真軍，

劈炮唔撈之後終於有時間去見識下。

第一次去驚為天人，

啊泰國妹不停話「你係水腫唔係肥」，

呢句嘢真係好易上腦，

就有如每次即時新聞起題有「水腫唔係肥」都一定爆hit rate，

香港好多女人都係鍾意自己呃自己。

但初體驗唔洗點郁只係俾佢打獲金，

又真係有番條腰瘦好多，

決定長線投資玩多幾次，

可能真係會退晒啲水腫呢，

其實我退晒啲水腫都係一個靚女。

然後我中伏，

終於明杜如風係《關西攻略》遇見貨不對版車夫時點解會想彈鐘。

一去到reception話Annie唔得閒話今次係Chris，

我弱弱一問：Chris？男人？

佢話係姨姨心都定晒，

見到啊姨姨年紀應該似奶奶，

咁我其實係相信薑越老越辣呢一套嘅。

（至少我返咗一年半工證實真有其事，我此等fresh grad只係廢柴白痴仔。）

嘩，

點解同上次唔同嘅？？？？？

我諗佢係打泰拳出身，

事前無協議出三成力唔打面（佢亦無打算單聲先），

喂，真打嘅？？？？？？

佢每三分鐘移一次張床，

命令我拉筋又要拱橋，

好想問可唔可以唔拱橋啊奶奶…

但由於我太聽話都係拱咗，

好後悔無及時反抗，

然後就係俾人翻來覆去攰過踩單車環台灣一周。

最恐怖係佢不停問：「痛唔痛？會唔會太大力？」

我真係大叫：「好痛！好大力！」

佢露出梁振英／林鄭式假諮詢後冷漠表情話：「忍吓啦。」

咁你又問？

咁你又問？

咁你又問？（太震驚所以要講三次）

係佢問到第三次時，

我學會了堅忍保持沉默，

如果一早就同奶奶交手的話，

可能我會捱到繼續做紙媒。

好彩我ban咗佢希望幫我踩背嘅熱情，

唔係我驚我會有創傷後遺飛蚊症，

返到屋企攰到瞓咗四個鐘。

最嬲係仲腫咗。

我學會了，

應該要彈鐘時，

唔好怕hurt到人，

如果唔係hurt到的，

就是你自己。

－唔知打咗啲咩，但久別重逢第一篇就打啲咁嘢好趕客，亦證明雪莉已被世俗污染，完－

台北的月亮忘記了

2015-12-05T18:49:00.002+08:00

在最貼近倫敦的陰涼下雨天，

聽了Coldplay的新歌，

才發現除Radiohead外，

許多BritPop樂隊都沒了那頹然的沉溺，

不適合下雨天聽的英倫樂隊，

也不再份屬英倫了。

或許全球暖化太猖狂，

把倫敦的雨天都帶走了，

剩下五月天式的無聊勵志，

搭上胡說八道的生命意義，

與裝出來的熱血，

在這個什麼都要追夢的不現實社會，

喜愛頹廢是一種罪。

－

點起了台北誠品信義店買的香薰蠟燭，

打開窗戶涼風吹送，

潮濕的雨氣緩緩流動，

房內泛起一陣帶洗衣粉香的純棉氣息，

售貨員說蠟燭用純精油製造，

可當潤膚油暖暖的塗於皮膚之上，

燃燒精油聽來是一件浪漫的事，

總比煲蠟來得優雅。

聽着一堆已過時的流行曲，

聽忽然於香港Facebook爆紅的Damien Rice，

與Coldplay的The Scientist，

無論如何取暖，

心中沁涼，

才是正宗的英倫音樂，

人不需要太積極向上的人生，

積極也不見得快樂，

不如誠實面對自己的無能為力。

－

躺於床上，

看着幾米最新作品《履歷表》，

許多人愛《向左走，向右走》，

但我小學時最愛看《月亮忘記了》，

對於沒有朋友、自我、被討厭的孩子而言，

那可算是極療瘉的作品。

那時的幾米可謂孩童界的村上春樹，

心境不達某程度的孤芳自賞是看不明白的，

現在的人要裝孤高隨身攜帶卡夫卡，

那時無出息的我，

一星期裝載十二本書回家的袋子裡，

總有一本裝作自己很有深度的幾米。

曾有中文科老師看着我袋子中的百科全書、插畫書、漫畫科普溫馨提示：

「只看圖畫書是無出息的。」

我不發一言就離開了。

反正你我交集扣除假期也不過短短九個月，

一世也不會再有交集了，

及後頑固的我總不出席無聊的小學、中學聯誼會，

我過得很好，

不需要無意義的審查聚舊。

母親收到老師打來的電話，

對方語帶關切的說：

「親愛的，您的孩子很難教。」

母親說：

「她只看書，壞極也不過是畫花書本。」

他不理解的是，

把成語書由頭背到尾的，

才是真正無出息的，

然後我憑愛看圖畫書，

會考中文拿了個A。

－

台北的101大樓對面，

有一輛安守本份的月亮巴士，

把101遮蓋了的月亮，

還給心中只剩沁涼的都市人。

穿着西裝的人們登上巴士說：

「一天以來的壓力都被治療了。」

直至《星空》還帶淡淡疏離感，

活在某個自我中心的孤島，

可是到了《走向春天的下午》，

又變成了另一部《The Fault in Our Stars》式陳腔濫調進行曲。

離棄多時，

台北重遇《履歷表》，

混濁都市中的自我肯定，

有人立志當搬運工，

有人願當一世舞者，

渺小的人兒傲慢的說：

「原來自己是個有用的人。」

走太前的你

2015-05-09T14:26:00.000+08:00

玩命，

我仲未打稿，

但我打Blog。

返工四個月發現原來自己中文好差，

原來自中一起，

每次中文作文都被扣足兩分錯字分，

直至二十三歲仍然適用，

如果而家錯字分無兩分limit，

可以繼續扣到扣完為止，

我諗我份份都要零分重作。

不過，

有編輯嘛啊哈哈哈哈哈，

死啦我最後都係做咗蛋散記者。

－

五年前今日，

初踏足英國，

半年後，

或者熟悉我嘅人都會知一路如何瘋狂過活，

每次我仆街時，

總有一個人係身邊消災解難。

我啲失戀拍拖失戀拍拖又失戀，

學校cut科無書讀、屋企水浸、攝氏一度壞熱水爐一星期重感冒、Flatmate發癲，

Project仆街、唔肯執喼、交功課先壞電腦、deadline delete咗篇essay、返intern又仆街，

直至而家趕稿、唔識／唔記得用photoshop cut煩膠圖、唔記得食飯，

唔肯執房、唔識砌layout、搵唔到題賴死係誠品對住堆書發癲，

唔識砌片、一個禮拜交四份稿，

其實小妹三百六十五日都仆街，

但打一個電話就會有人好冷靜地救我。

最浪漫唔係聽你講又中咩伏講句哎呀乖啦，

而係動手幫你解決問題。

－

無人明白點解我永遠都要花盡心力去做吃力不討好嘅事，

好自私地星期一至日不停做公司嘢，

而好老實除咗工作咩都唔想理唔想做，

當好朋友、所有前男友話人生只有工作與學業好可悲，

嫌你自私唔夠好，

你會發現想世界上有一個人理解自己實在太奢侈，

只要唔阻你，

已經係萬幸。

我唔係辭職去流浪矯情派，

無論我有幾多嘢做都好，

總之有人睇我嘅稿，

就算點樣無生活，

心甘命抵。

近兩年開始明白，

滿足感未必一定在於逃離現世，

於現世中搵到屬於自己位置，

滿足感更實在。

－

女人總係犯賤鍾意做仆街磁石，

離離合合離離合合，

我諗我手都分過N次，

五年來，

原來最好一直在身邊。

無論我又有咩瘋狂念頭，

開咗個頭收唔到科又想做好件事，

同時無人理解為咩要捨易取難玩死自己，

佢會好溫柔地話：

「我覺得你好努力。」

當我永遠都做嘢唔得閒，

佢只會講一句：

「我好易滿足，陪吓你就夠。」

五年，

有一個人一直由衷欣賞努力的你，

五年。

經歷太多，

會發現最好已經係最好，

can't ask for more。

－

而一個文字工作者，

有一個做graphics嘅男朋友，

哈哈，

seriously,

you can't ask for more.

不能太貪心，

因為全世界最浪漫，

就係當你打完稿後望住堆圖不知所措，

有一個人幫你整圖諗layout。

雖然Marvel、Gundam、Star Wars令我精神上好困擾，

but he loves London.

－

致世上為些微滿足感，

自私地默默努力，

而不被理解的人。

時裝人戰爭

2015-02-21T11:56:00.001+08:00

好多人警告我小心香港時裝界極度複雜，

花無百日紅，

One day you're in,

the next day,

you're out.

我驚唔驚？

驚。

不過，

我最好彩係入到一間倫敦完全100％ Fashion College，

突然Nick Knight guest lecture，

返學時見到Jean Paul Gaultier，

其實比你地係電視睇到、小兒科The devil wears Prada對時裝界嘅想像，

實際更要恐怖一千倍。

先勿論我係英國做Intern時如何中一千個伏，

唔好問我點解會係呢間College專心讀到書，

無論我過程點中伏點喊都好，

有一件事你需要佩服我，

小妹仍然非常熱愛時裝。

我係LCF霓虹浮華大染缸三年，

學到嘅嘢比係香港中小學加埋仲要多。

當然係社會又係另一回事，

我當然唔會天真以為仲好似小學生玩泥沙，

不過心中至少記得自己係熱愛時裝藝術，

有強大力量支撐就已經足夠，

其他事不過係執行。

經歷三年後，

我相信一句說話：

以實力鬥長命者，

總留到最後。

／

LCF玩左三年後，

我每接觸所有與時裝有關嘅人事物時，

都抱持一種態度：

「The sparkle won't last for more than fifteen minutes。」

Andy Warhol口中每人成名十五分鐘其實有另一個解讀，

十五分鐘過後，

You are nothing.

就如Janice Wong書中說道幹練超模唔會諗自己有幾紅，

清晰自己知道被寵幸過後需一技傍身搵食，

就如昨日Cara Delevingne，

今天已是Kendall Jenner，

只有一人除外，

Kate Moss，

不過世界有幾多幸運兒中獎？

我深信係人地勾心鬥角之時，

用同樣時間去學嘢，

到佢地兩敗俱傷之時，

就只可以睇下邊個有料夠長命留到最後。

／

今日大陸同學黎香港只為搵我食一餐飯，

佢講左一句：

「你係唯一一個係LCF裡面，

真正值得特登由青島飛黎香港只為食一餐飯嘅人。」

當年與友人外加兩名美國人一名英國人非常熟，

美國人B、美國人N、英國人L。

對話一＞

Sherry：「啊那美國人B和N現在怎樣呢？」

友人K：「他們啊，嘿，我沒告訴你嗎？」

S：「啊？」

K：「那時候他們不轉過去C學院Graphics嗎？」

S：「對啊，其實L學院的才好吧，C的好像是救生圈科。」

K：「我Text N問他說還有沒有位置，他說沒了，然後我收到一個短訊，N跟B說不要跟我說還有位置，因為怕我搶了他們的位置，他傳錯了給我。」

S：「哈哈，你最後不還是拿了Offer嗎？」

K：「對啊，沒轉去，只有學校出名，就是去試上兩天課，比我們的還差。我後來在C學院打工，看到N的FMP fail了，我離開英國前，他還在圖書館重弄。」

S：「你還記得我的白色Blackberry不見了嗎？」

K：「對啊，你還哭慘了說很多你跟當時男友相識時的短訊，還跟那男的不約而同用同一支Blackberry。」

S：「你記得B安慰我嗎？」

K：「對啊。」

S：「她轉去C學院後，我看到她在用同一部白色Blackberry。」

K：「...................什麼？」

S：「她偷了。我把當時男友的名字Print成貼紙貼在機殼上，然後分了後我把貼紙刮走，還有個印，那是我的。」

K：「然後呢？」

S：「我當面跟她說，“You got my phone?” 她說“What? Who do you think you are? I am a fashion editor IN COLLEGE C of course I have a blackberry!”」

K：「哈哈哈，然後呢？」

S：「就沒了，我也沒辦法，就哭多一天就當是自己倒霉啊。你記得那時候做Project的時候，她胡扯自己是Magazine的Creative Director騙人家的衣服？」

K：「啊對！那設計師說不知道她只是學生Project！啊你知道嗎？她畢業後回美國還繼續，搞到去*運動大牌R*，俾人發現提告了，你看她的假網站、Facebook都被封。」

S:：「她只有一天用同一個名字生活，都不會找到任何與Fashion有關的職業吧，Fashion industry的人都非常喜歡把人拉下馬，除了你實力堅強如Kate Moss和John Galliano。」

／

S：「那英國同學C呢？」

K：「他的最好朋友T不是在youtube短片比賽嬴了他？」

S：「對啊。」

K：「他告發T的views是買回來的，所以T被除名，C嬴了那個英國某最大藝術博物館的PR職位啊。」

K：「但他更扯，他拿我的作品當自己的Portfolio去Interview。」

S：「什麼？！」

K：「對，我去找Career support team agent時他回說看過我的作品，我說那是我原創的，問我有沒有什麼可以證明，我就給他making-of的影片啊。後來發現C還扯說他嬴了什麼什麼比賽，但全都是沒下文的那種。」

S：「結果咧？」

K：「學士Hons被除掉，現在在Next當倉務員。」

／

Group project搶嘢做好小事，

偷人啲嘢交亦好小事，

有冇聽過將人地組嘅嘢直接轉移，

話自己要睇醫生連appointment紙都攞埋要轉time slot早過人地組先presentation，

跟住話人地抄嘢，

勁到竟然用時間去拍條假嘅making-of屈人抄佢，

都唔肯用時間自己真正做一條片？

This is the real fashion.

／

K：「你還記得2nd year的時候，你在地鐵上跟我說，在時裝這塊浮華地，踏實才最重要嗎？」

S：「對啊，我們也是少有真唸書的那兩個吧。」

K：「還記得當時他們笑我們是沒品味的Chinese只會躲在圖書館嗎？」

S：「哈哈，繼續加油吧。」

K用一年時間拍攝短片將於下年度參加康城影展。

／

連college都已經係咁，

何況現實？

哈哈，

英國Fashion Internship更恐怖，

我第一份有薪Full time Internship，

雖然其實話係約滿，

事實上係俾人鬥走。

早前上Facebook望望舊公司，

哈，

你估佢仲係唔係公司？

嬴個，

又咪係老闆，

你班傻仔鬥黎鬥去，

都鬥唔過一個肯收Minimal wage嘅傻仔。

下文係曾經幫大牌J當時新晉Designer RS無悔地工作至天昏地暗，

佢成名後去左法牌D，

第一個show時，

佢打俾我叫我去backstage幫手，

亦係我人生第一次去Paris Fashion Week.

／

The sparkle won't last forever.

／

Who remains?

與王迪詩聚舊

2015-02-08T15:28:00.003+08:00

由細睇王迪詩與卓韻芝睇到大，

大學二年級時人大左又囂左，

覺得其實佢地無想像中咁神又覺得自己仲有型後停止買二人作品，

後來返香港後發現書櫃上全套卓韻芝離奇消失，

稍感可惜但不欲尋回，

我需要卓韻芝時代已過去，

或者有人比我更需要卓韻芝。

閒逛誠品偶遇老朋友王迪詩，

心頭一暖決定買左本返屋企聚下舊。

當初睇王迪詩因為書名蘭開夏道，

家住書院道，

行去蘭開夏道路程不足五分鐘，

亦因為佢曾經與Philip於倫敦漫遊，

百感交集之下覺得同佢幾有緣，

就如卓韻芝後來亦去倫敦讀書，

所有與倫敦有關之人事物都會令我無比著迷。

／

小妹唔飲紅酒，

未至於如Daisy般用芝士配紅酒觀賞蘭開夏道風景，

開左支Perrier打算如舊時溝英國蘋果汁，

一打開一陣檸檬味原來Press Con拎支係Perrier Lemon，

其實我一直唔明點解餐廳要於水中放檸檬，

我唔覺特別清新，

反而酸酸澀澀又唔落糖更重霉味。

突然諗起有一次係倫敦病得極重，

飢寒交迫之下到某人家作不速之客，

水中有青檸，

確實係我人生中飲過最難飲嘅水。

飲完十分鐘後，

胃痛，

問佢拎胃藥後，

杯水仍然係有青檸。

你試想像，

杯水到底有幾多青檸先會飲到胃痛。

不過，

我一世都會記得青檸水陣味。

當日當晚，

我不發一言，

一杯接一杯全部飲得一滴不剩，

然後我頂唔順狼狽走出佢屋企門口時，

仍然胃痛。

不過佢應該永遠唔會知當日我胃痛原因，

我諗佢仍然認為我感冒係會胃痛。

而當日應該係我人生中最不堪之時。

愛情面前，

人是何等卑微。

要趕走我，

亦只需青檸水。

想罷，

我將全支Perrier Lemon倒出，

將樽洗淨，

放入另一場Press Con時兩位外藉男士獻上的一支粉紅玫瑰，

還可以控制自己人生時，

Perrier Lemon又如何，

只不過係一支我唔鍾意飲嘅有汽檸檬水。

／

《我是我王迪詩5》其中一篇說到結婚只為有個原因俾人出軌尋找失去自由後所謂真正快樂，

朝早見到汪鋒向章子怡求婚，

從來對結婚無任何Fantasy，

一百萬求一次婚，

將所有愛情用於一次求婚，

然後再無限消費已沒落愛情，

感覺非常廉價，

如果真係相愛的話，

一百萬根本唔係導致結婚嘅原因，

如果你仍然相信愛情的話。

／

從前那個分手時狠下揚言「我唔撚會祝福你」的那位曾經，

一年過後還是找到另一最愛，

其實愛黎愛去不過一剎一時陣痛，

一段時間後，

好快就唔記得，

不過我由衷祝福佢，

He deserves better。

就如當初無悔飲下所有青檸水的我，

今日仍然生存，

未如當初躺在病床上如一個無智商廢人，

所有誓言亦已煙消雲散，

坐係書檯前望住Perrier Lemon樽內粉紅玫瑰離開世俗後繼續盛放。

從那時以後從不輕下諾言，

過幾年後，

亦不過笑話一則，

Who care?

山盟海誓過後，

忘記山盟海誓過後，

一切如常。

／

老豆百無聊賴打開電視，

正在播放林憶蓮聽說愛情回來過，

想當年，

倫敦聽完林憶蓮演唱會後，

歸家之時重遊舊地走過灰黑泰晤士河，

連續一個禮拜反覆重播聽說愛情回來過，

但愛情並無回來過。

致終將逝去的合成

2015-02-01T18:25:00.002+08:00

家住九龍塘，

轉角就到合成士多，

一日去跑步見士多俾記者圍，

噢伯伯唔撈了。

紅酒店隔離婆婆士多開左四十幾年，

合成原來仲耐五十幾年，

幾驚伯伯身體有咩事，

見啊伯健健康康老當益壯，

唔似全叔俾人抽到乾但都其實抽到差唔多上A1，

分別只不過係啊伯無穿無爛又無俾人瘋狂加租，

難得佢捨得一句唔撈就唔撈，

你估唔撈講咁易？

個個都話唔撈架啦，

事實有邊個真係唔撈，

第二日又咪返工。

／

上個禮拜Freelance攝記哥哥幫手係尖沙咀影兩張細相，

「咦啊妹你岩岩畢業？」

「係啊，英國返黎，讀時裝。」

「嘩好勁啊，我本來都想送個女去英國讀藝術，佢畫畫好靚。」

「哦你有咩可以問我啊，我係倫敦讀應該幫到你。」

「後來輸左兩層樓就無嚕。」

「無事嘅，繼續努力啦。」

「唉本來諗住唔撈收山移民，而家Freelance都撈埋。」

「咪讀大學先送佢過去，而家先中二來日方長，我都係大學先去又咪一條好漢。」

「唉啊女都係老豆無用。」

／

然後好唏噓地搭地鐵返公司，

撞到啊叔，

又叫我Shirley，

加埋成個公司叫我Shirley，

就快連我都以為自己叫Shirley，

致終將逝去的Sherry。

／

其實李逸朗除左傻女之外，

有隻歌叫粉飾太平，

話說啊鞋設計師來自威尼斯，

一個只有昨天今天無明天沉淪之城，

陳綺貞《不在他方》形容威尼斯為一個墮落之城，

威尼斯係我去過最絕望之地，

最恐怖唔係水位上升水浸城，

而係當地人已經當世界末日將至地過。

不作發展，

賺盡錢就走。

就如雙年展影展，

一刻燦爛，

展完即逝。

加上威尼斯畫派完美詮釋當地夕陽昏黃，

聖馬可廣場灰舊粉紅，

遊人付錢走過嘆息橋，

日落黃昏後，

一切消逝。

／

李逸朗走到傻女呢一步，

應該早就唔記得佢曾經有過粉飾太平。

幾多美麗結晶，

聚成沉淪的城，

一片一片風景，

即使很美，

始終褪色。

／

致終將逝去一切正在腐化的。

空隙

2015-01-31T13:25:00.001+08:00

呢兩個禮拜我做左好多嘢，

好恐怖，

但好開心。

同自細想像中要做嘅嘢有無出入？

暫時無。

發現自己打字原來真係好快，

前日做左個意大利鞋牌(三世祖)訪問，

攞左個真係唔太希罕嘅親筆簽名，

唔知佢簽一張唔係自己畫但扮係自己畫嘅Sketch時會唔會心虛。

但搵咁多錢，

睇黎就算心虧都whatever啦，

確定意大利佬真係無時無刻都好乞我憎。

意大利無論時地人物都與我八字不合，

但永遠於起始階段逼我成長，

十八歲第一次去旅行因為羅馬假期關係膽粗粗走去意大利，

當然想像永遠是美好的，

有人係我面前被打死、被打劫、被黑社會圍、酒店老闆爆開四個鎖屈我去佢apartment「煮嘢俾我食」後嚇到我訓覺時用木床塞住個門口、再被警察玩到差啲上唔到飛機後，

我喊住搭火車離開Napoli，

自始以後我去邊都再無驚過，

土耳其？巴黎？東歐？小菜一碟。

兩年後，

我與朋友road trip環遊全個意大利，

連冷震都無打過一個，

過左一個關口，

其實就無咩大不了，

只在乎幾多歲經歷，

而我幸運地係十八歲已經過左一個重要關口。

其實header張圖，

係第二次去羅馬時去羅馬許願池時影，

第一次去時掛住喊，

連許願池都無去。

Fontana di Trevi，

Audrey Hepburn Roman Holiday其中一個場景，

陳慧珊與吳鎮宇衝上雲霄曾到之地，

傳說旅人於投擲一枚錢幣，

以後會再返羅馬，

電影Three coins in the Fountain中，

投擲兩枚錢幣即將會遇到新的愛情故事，

我當時唔知道而丟左兩個，

自此後我地就再無相遇，

亦再無返過羅馬許願池。

－

然後某日無聊，

WhatsApp問那時的某人，

「其實你最鍾意邊個城市？」

「羅馬。」

「點解？」

「危險刺激。」

「你呢？」

「我最討厭意大利。」

「點解？」

「唔怪得我地搞成咁。」

「有機會一齊去羅馬。」

「其他留係倫敦就夠。」

說罷我發現有些事不能勉強，

即使你如何嘗試，

平淡愛刺激，

過山車愛安穩，

而兩種人走埋一齊注定悲劇收場。

我最愛還是倫敦，

Feels like home.

－

某日唔記得邊日出席一個活動，

遇到岑寧兒，

本來想同佢做個訪問，

但原來佢主打台灣暫離香港，

淺談幾句聽到佢自彈自唱《空隙》，

雖然未到佢最佳時期，

聽落仍然好似啊邊個邊個但講唔出，

此曲為我今個月聽過最好聽嘅歌。

「生日快樂！」

「多謝！」

「過得還好嗎？」

人大左，

真係明咩叫你有你生活我有我忙碌，

然後真係唔會再相遇。

－

Happy Birthday.

Long Long Way

2014-12-29T15:34:00.000+08:00

安坐於書桌前看著The good life巴黎特別號，

喝下美好的TWG French Earl Grey，

向下觀賞自己只值不足四百元一天的廉價頭腦，

朋友們紛紛擔憂著自身的金錢價值與人身慾望，

把那些事當作為人生最頭號的需求請求與慾求，

我卻在擔憂一些沒價值的無聊事情，

果真是個不長進的廢青。

看著家人當年以正常市價買回來的一磚一瓦，

說不定，

未來就只能憑空弔想一番，

於這個有屎食已經需要感恩的地方，

還是不要抱持過多的願望，

總有一天，

他說要收回，

就一切歸於浮土了。

－

美好的純白碎花床，

闊大的客廳空間，

薄荷綠的廚房，

到底還可保留／停留至何年何月何時何日呢？

老豆與從大陸來的親戚語帶輕率的說：

現在香港人啊，

抽到公屋都已像中了六合彩那般。

那親戚說：

現在的人啊就是不知足，

還要希望得到普選，

也太不自量力了。

我默默的坐在後車廂暗暗地想，

普選也許不能解決所有問題，

但沒有普選就連問題也不可能帶進政府，

那身為女兒的我未來該怎麼辦呢？

看來我也需要學習香港的故有獅子山精神，

有屎食，

就應當要酬謝神恩了。

我們也不過是資本主義與權力社會下的一片泥沼亡魂。

－

那年曾與一名職業妓女朋友於阿姆斯特丹coffee shop懶懶地抽著二手大麻閒聊著，

我問道：不會感到疲累嗎？

她答道：這世界總是累人的。

我問道：世界壞得很，也許你是選對了，這世界很多人一直苛求著，也不知得到了什麼。

她答道：也許這是上天賜予我的天賦，以自己的身體對抗著金錢的荒謬呢。

我追問道：那你的身體價值多少歐元？

她答道：

在接收酬金時，

才發現自己身體四十五分鐘價值一百歐元，

自己的一分鐘，

也有了不一樣的俗世價值與意義。

認為妓女們很卑賤嗎？

我倒覺得做所謂的良民於現世中被不同等別的人強姦沒顯得更高級，

至少如她所說的：

我不過是運用我的身體去換取較合理的酬金，

她同期的大學同學，

仍在H&M領著最低工資卻比她工作時間長十數倍。

她說：

或許我自私的只為自己而活，

把人類最原始慾望換取一張又一張的彩色印刷紙張，

證實世界是荒謬的，

自己雖然赤裸裸，

但卻連赤裸著也是不自由的，

那些拿著大把大把鈔票於她足前跪拜企圖以金錢換取快樂的，

也不見得比她更為快樂。

－

你認為她是墮落的人嗎？

她，

是劍橋的碩士生。

只是她選擇了一個比較聰明與激烈的方式了結自己的一生，

想當年第一次看到她時，

她還是個頭髮微灰不帶脂粉的可人兒。

看著於coffee shop裡大口大口抽著大麻的她，

絕代金髮搭上粉紅厚唇，

穿上如Pretty Woman中Julia Roberts的貼身皮質金扣露腰工作服，

渾圓的胸部就如古畫中女神般的控訴，

有一秒我想起了王家衛大導演的電影重慶森林中，

帶著麥當娜假髮的林青霞。

再配以一雙豹紋馬毛廉價高跟鞋，

本應組合上來實顯得俗不可耐，

可是當時看下一如Never on Sunday帶有女權主義的自信，

粗黑貓眼線流露那不自覺的傲慢，

後來再學懂了，

那名為入世後，

沾染上世故的成熟韻味。

說不定三數年以後，

我也能擁有那迷人的氣息，

只不過想起那不再清澈的眼神，

不禁還是感到或多或少的不安。

－

我在想著金錢與自身價值的難題，

想著那個昨天於律敦治醫院門口於樓梯上抱頭痛哭的人兒，

想著那數個看見有人跌倒亦不為所動還在找餐廳的人們，

他們的生命尚餘多少日子呢？

他們過得還好嗎？

－

看著介紹巴黎一切的雜誌，

說是要完美剖析巴黎，

還不過是介紹第一間Dior所在地與被封為Palace的頂級酒店，

人一定要追求如此高尚嗎？

就不能腳踏實地的，

於瑪克區小餐館吃一份芝士炒蛋再於免費畫廊隨意遊走嗎？

巴黎最美的，

可是那不留痕跡的野性自由，

那美輪美奐，

也不過是陪襯，

那些華而不實的美好，

不會在心裡停留太久。

就如我還在想念的，

不是那聖誕閃亮囂張的燈泡，

卻是倫敦Christmas Market中那暖暖的Mulled Wine，

與巴黎聖誕市集裡那粗野的白酒煮清口配檸檬啤酒。

偶然與巧合

2014-12-24T20:14:00.002+08:00

等待晚餐時在看陳綺貞的新書，

她那無邪、靜若、脆弱與堅強，

幸而得到世人的賞識與保育，

對於身邊人的百般愛護，

她每分每秒不忘珍惜她所擁有的，

她明瞭，

自己是幸運的。

腦中想出怪念頭時頑皮地向後看一下，

男友對著她微笑點頭，

她，

就帶著些微不安與滿滿朝氣，

戰戰兢兢地向前走了。

她的男友遇上她以後，

就只能默默配合命運，

每次綺貞想好了目的地，

他就只能看著那唱著「一起去巴黎」如孩子般的女孩收拾行裝。

－

書裡每一段旅程，

到達的每一個地點，

當你驚訝她那裝載巨大靈魂的蒼瘦身驅能遊走非洲、古巴時，

想一下，

背後還有那窮自己一生守護一名女孩到古董市場買vintage結他的男孩。

那是一部紀錄當下愛情的神話故事。

－

但我卻是一個不嚮往神話的人，

儘管我喜愛閲讀神話故事，

我討厭任何人在我的背後站著，

讓我去闖也落得被枷鎖重重扣壓。

想當年，

第一次去巴黎時，

我也唱著「一起去巴黎」跳著拿出行李箱，

然後第二次、第三次、第四次，

最後獨自一人到大皇宮看藝術展覽，

才發現自己一人也可過得很快樂，

亦不是想像中般困難。

儘管絕對自由是另一個美麗神話，

但人總愛追逐美麗、追逐神話。

那是一個夢，

只能調劑一下現實的無奈，

不能成行。

仙女書中說道：

「童話故事中假的東西都來自真的，因為人真的在寫，真的在思考，就算說一個輕輕鬆鬆的謊，也有幾分真。」

－

書中綺貞於非洲給孩子們一粒小糖果，

他們快樂得要跳舞感謝上天的賜予。

上星期晚飯過後，

約十一時於尖沙咀坐上往九龍城的巴士回家去，

下車後遇上一位約六十歲的嬸嬸，

她問道：「妹啊，喇沙利道在哪？」

我回說：「噢，我住附近喔，帶你去吧。」

雖下午陽光普照近二十度，

但入夜後寒風仍有剌骨之烈，

看著她拿著大包小包，

還是嘗試要求幫她一下，

結果當然被立刻拒絕。

她說：「我的孩子年紀與你相若喔。」

我回：「喔，那你現在去找他／她嗎？」

她說：「噢不，我到那邊去倒垃圾。」

我說：「孩子還未畢業還未有能力養你嗎？」

她淡然回：「我沒有樓沒有錢，哈哈哈，他有本事獨立起來就跑了。」

接下來我也不知該如何回應，

場面就弄得只剩下冷風在刮。

把她送到目的地後，

我把手上喜愛的香蕉蛋糕送她，

她當然不肯收，

但我堅持之下，

她還是收下了。

想當年，

也有一人特地走到機場，

就只為送我一件香蕉蛋糕。

可惜我們沒緣分，

還是沒有碰上。

－

站在法國醫院前等待交通燈轉綠，

看著在身前擦過的車輛，

與暫緩的的士與小巴司機揮手示意沒打算上車，

一時難免亦在想，

的士與小巴司機的孩子們呢？

也許嬸嬸與孩子的緣份讓他們有了血緣之親，

卻沒強烈得撐起時代巨輪的踐壓，

錢可以輕易地得到很多事物，

但錢卻不能伸手可取，

而沒有錢很多事物也未必能得到，

包括溫飽與親情。

－

說起浪費食物，

我從來不浪費食物，

儘管很多身邊讀時裝的朋友都說他們是時裝人，

點了菜後都不吃飯的。

但街外餐廳認為賣相比食物重要，

往往大盆大盆而上，

從前我都強撐把所有食物都吃完為止，

但現在，

我放下碗筷時發現有人會把飯菜全部清掉，

偶然發現有這樣的一個人在身邊真好。

－

十多年前說的理想，

十多年後還真的被我做到了。

也不說是做到，

是開始去做了吧。

十多年前的理想，

於現實社會是絕不適用的，

理想之下現實之上，

要做到自己真正想做的很難，

有人的地方、多人的地方，

所有事就會變得複雜了。

可是我還是靠著自身的倔強，

與旁人巧合的輕推下，

纏上了自己十多年前說很想做的職業。

那夜於海旁看海時細想世上果真有如此多巧合嗎？

當你把握每個珍貴的機會，

機會被你緊緊握住，

就會轉化成巧合了。

可是，

有機會而不去做的，

無論有多少巧合，

還是會輕輕流走。

還是看自己的造化吧，

世界的複雜，

現實的可怕，

未來還遠著呢。

就如我十多年前一句我要做記者，

十多年後我還是當上了，

很天真嗎？

但我還是當上了，

還會盡我的努力做到自己真正想要做的。

惶惑，

驚慌，

什麼也不懂，

倔強不愛有人從旁保護，

就只能看我自己的造化了。

「這是一本關於追求的書，探索的對象是現在，是這裡；

不屬於過去或未來，也不在他方。」－《不在他方》陳綺貞

再見懷舊

2014-12-16T02:31:00.002+08:00

那天走進HMV，

發現好多人又忽然念舊，

眼看一堆重製黑膠唱片與新型復古黑膠唱片機，

奇怪而家明明係無人願意用現實貨幣買唱片嘅時代，

突然好多人願花三四倍價錢去買黑膠唱片，

突然狹窄家居空間又可以騰出空間容得下一部黑膠機與大片黑膠唱碟。

那一貨架虛偽文藝復興放係HMV著實諷刺非常，

早前HMV破產，

又咪因為朋友們連一隻小小嘅唱片都買唔起，

又咪因為屋企連一隻微不足道嘅唱片都收藏唔起，

做咩突然又愛上文藝得非常肉麻嘅黑膠唱機。

有啲事係應該要過去，

勉強搵返黎配以新型銷售智慧，

活生生就為真正黑膠時代添上膚淺陰影，

歲月痕跡係製造唔到出黎，

不論你個colour palette如何發黃，

表面加幾多條刮痕點樣強逼一堆新造出黎嘅嘢變成淘寶式品味，

有啲嘢過左去就過左去，

又唔見你去古董街買一百蚊有找真正黑膠。

－

或者有睇開我Blog嘅人知我遭逢過一次刻骨銘心嘅經歷。

我同佢第一次相遇，

地點係倫敦Piccadilly Circus China Town外HMV，

相遇過後，

我地去左倫敦Winter Wonderland。

自從失去以後，

每次係China Town食完飯、行完Regent Street、係Oxford Circus放學又或者要買碟外加一堆藉口，

我都會特登去同一間HMV，

朋友每次會好奇點解我會專登行過去，

當你失去某啲嘢，

你會好想去捉住另一啲唔屬於自己但係相對上較容易捉住嘅物質，

好硬頸先捉緊再算，

慢慢會發現捉得愈緊，

失去時只會更痛。

Interstellar話時間比光速慢，

時間留唔住，

空間或者留得住，

而其實空間都未必敵得過時間，

當你發現原來無嘢留得住時，

仍然希望留得一日得一日，

怕時日一過，

一切就會煙消雲散。

二零一三年，

HMV宣佈破產，

第二日我即刻去Piccadilly Circus HMV呆望內心只不停重覆一句"you are still here"，

第三日第四日第五日我每日都去買碟企圖阻止佢執笠，

每日去之前我係underground都好驚去到後HMV已經唔再存在，

當然微塵不能與巨輪搏鬥，

終於一日，

人去樓空，

只剩下一堆廢棄膠袋塵灰。

當時，

我除左大腦空白，

發呆，

企係大街上眼淚不停流外，

已經無任何其他感覺。

開左九十三年嘅大型連鎖店話執就執，

自始以後我開始建立所有嘢都終有一日會離開哲學，

再發現某啲我一直好想捉住嘅嘢，

其實係好耐好耐好耐之前已經早就not there。

－

數個月後，

HMV復活，

Oxford Circus留得住，

但Piccadilly Circus原址變成London Souvenirs，

我望住英女皇面具、Beatles杯、鎖匙扣感到異常憤怒，

點解人會選擇買磁石都唔買唱片，

點解要累到我間HMV執笠，

故此及後去旅行我從來唔買任何Tourist紀念品，

我係發自內心討厭所有白痴紀念品。

－

數個月前要將所有物品運返香港，

當時買嘅所有DVD、唱片我一隻不漏全部隨箱運返香港，

時間、空間留唔住，

DVD、唱片我仍然希望留住，

那怕只能留一件。

就如Winter Wonderland，

一年只開一次，

童話過後一切回復正常，

故此我亦討厭一切無聊嘉年華會。

離開倫敦前一日，

好多人約我去食飯我都推左，

及後發現佢地大多推斷我去左Southbank，

其實我都係返左去Piccadilly Circus。

近期發現每次經過金鐘、銅鑼灣、旺角會有相同感覺，

前日於深水埗100ft park gallery見到金鐘佔領區實時錄像，

或者好多人好似我一樣，

時間空間留唔住，

仍希望捉緊每一片最後碎片，

但發現愈伸手去捉愈無力，

最後，

時間仍然係你手中搶走所有嘢，

然後，

只可以用時間去面對一切失去。

但一直懷舊有咩用，

時間永遠只可以向前走，

人亦都需要向前走，

即使你如何地不情願。

－

真正失去左啲嘢，

再去搵返，

呢啲叫真懷舊，

另名自我虐待，

而未擁有過，

未失去過，

只不過係追逐無意義。

當你發現自己愈想忘記，

就愈有一千萬個提示跟隨你，

無處不在。

當我明白懷舊非常痛苦時，

就唔再明白世界點解會追逐懷舊。

－

三日前，

我決定將所有當時為左保留HMV買嘅DVD全數捐出，

包括Before Sunrise、Before Sunset、500 days of summer、Moulin Rouge、An education、Jane Eyre、Another Boleyn Girl、The Godfather 等等等等，

仲有一隻，

叫Pretty Woman。

當年，

我每一晚都靠呢堆DVD度過，

食完飯睇完BBC十點以後係最難捱時段，

每晚我開住當日係HMV買嘅DVD，

一隻睇完睇第二隻睇完再訓唔著就開Sex & the city，

每朝起身第一眼見到嘅係已經無電、比我更加攰嘅Macbook，

但總比望住當時部白色Blackberry好。

當你追逐過唔屬於自己嘅嘢，

企圖保留唔屬於自己嘅事物，

硬頸任性將一切霸為己有，

一次猛烈失去後，

就會發現一切都只係浮雲，

金錢名利物質一切，

都只不過係過眼雲煙無關重要。

那些留不住的所有，

雖然仍然會永遠每一步每一秒緊隨在近，

但至少已經有骨氣向懷舊揮別，

未來會係點我唔知，

至少我知道前面應該有路可走。

－

慶祝無意義

2014-12-11T14:23:00.000+08:00

由細到大都有節日反高潮症候群，

每當世界普世歡騰時，

我總覺得無嘢值得需要慶祝，

一切祝福、狂歡都只不過係粉飾太平，

聖誕慶祝一個虛擬故事人物誕生，

中秋慶祝一隻虛構故事小兔，

紀念？

who cares？

一切都只不過係一場又一場無意義企圖欺騙自己世界美好嘅慶典。

昆德拉與文學界闊別八年，

推出新作《慶祝無意義》，

La fete de I'insignfiance，

首見時字面解作「慶祝並無意義」，

看畢後發現解作「慶祝世上的一切無意義」，

昆德拉於我看來係悲觀主義者企圖擁有正面想法嘗試積極生存但無力做到只好盡力消耗，

消極面對積極生存，

講到尾，

慶祝世上一切無意義，

將所有無意義之事多加慶祝，

其實諗返轉頭全無意義。

旺角清場後，

適逢無聊應酬，

突然朋友個朋友一名警察到場，

舉酒「慶祝旺角回復太平」，

太平是否真太平，

粉飾完後，

又是否能以一時喜慶遮蓋忘記一切？

啤酒飲唔落，

拎袋轉身講句抱歉就走，

朋友追過黎只說「唔好咁啦」，

我只回應：

「無謂勉強啦。」

或者工作上未必能盡如人意轉身就走，

但於還能自行抽身之時，

我又何必屈身假裝歡喜，

轉身就走雖然孤身一人，

但至少我當晚問心無愧。

－

米蘭昆德拉小說《生命中不能承受的輕》中，

共產巡遊粉飾太平企圖製造出和諧之象，

若有不從者即受責罰，

最恐怖非白色恐怖，

而係有一班人真心認為值得慶祝。

Wine&Dine一班鬼魂搶酒搶肉，

「一百蚊高級鵝肝」「二百蚊有得飲法國紅酒」狼吞入口，

如此狂搶如此鯨吞仍然認為自己非常識食到處於社交網絡宣示，

欺騙自己成為財爺口中愚昧中產一天半日就會快樂吧？

New year's eve最後一年留倫敦出外倒數體驗一下，

泰晤士河附近大雨極寒擁擠得幾近停止呼吸，

我望住在場人士叫囂，

到底有咩好慶祝？

不過又一年過去，

接近死亡行近一步，

然而現世太可怕，

有藉口，

就當麻醉一下。

慶祝為逃避寂寞，

入世或許唔適合生存得太清醒，

有事開心下咪算，

做人開心啲唔好咩？

但當你再不能於舉世歡騰中沾取一絲快樂，

你會發現於一大班無意義叫囂大隊中，

只有感到更加寂寞，

轉身就走，

或者能得到更多。

－

還好，

Facebook上沒一人與我說Happy Birthday，

那一句copy&paste又要like寒暄一番嘅Happy Birthday，

作為一個硬頸嘅人，

或者就有如斯好處，

連Like都慳返。

－

那班於金鐘清場前一直在慶祝的人，

你知道嗎？

政權最愛的，

就係搞場大龍鳳載歌載舞粉飾太平，

潛移默化之下，

令你真係覺得天下太平。

君不見北韓朝晚歌舞昇平，

君不見委內瑞拉選美大過天，

五歲孩童已被送往選美訓練，

六歲已精通化妝禮儀，

區內所有女孩只想成為下一位灰姑娘，

為此自殘自虐在所不計，

但貧民區內行出街會隨時被槍殺？

每年一度選美變成真人show，

而人最鍾意睇人仆街，

亦都鍾意睇人麻雀變鳳凰，

每個禮拜直播一集人淘汰賽提供一個希望俾貧民區女子：

你想走出貧民區？

整容啦。

你想有出息？

聽主辦人話，

整容啦。

犯罪率係解決唔到架啦，

整容啦。

你要唱歌好聽攞比賽冠軍？

鳩叫啦。

香港係無普選架啦，

移民囉。

－

唔好以為香港已經係一個已發展城市，

經濟可能會增長，

但文明好易倒退。

君不見港府對付你班廢青首要搞維穩show請韓星，

青年工作叫你地去跳下舞走出去嗎？

你仲坐係金鐘唱歌跳舞？

你要協助政權粉飾太平嗎？

初衷呢？

普選呢？

當你咩都爭取唔到時，

有咩咁值得慶祝？

你要去TVB參與台慶嘛？

你要去維穩慶典嘛？

有咩值得慶祝？

海浪離開海岸線

2014-12-10T06:22:00.000+08:00

突然好眼訓，

好耐未試過十點幾一上床就訓著，

三點幾電話響，

一位長期消失台灣朋友打黎，

佢第一句問：

「你還好嗎？」

唔知咩事，

總之就中左要害，

喊到收唔到聲，

好耐無試過答：

「我不好啊。」

一句講哂，

總之我就唔知自己做緊咩啦。

朋友話個個畢業都係咁架啦，

我又唔覺個個都係咁喎，

好似真係得我自己係咁。

總之我畢左業，

幾年唔係香港讀書，

係英國又唔係無返工，

比起好多同校人我真係有返過Full Time逗過朝九晚五糧，

只不過係我重點真係讀書，

返到黎香港發現，

嘩，

原來個個返幾耐學就返足幾耐工，

連邊間公司個HR叫咩名都知。

就如當初我係香港讀會考A-Level時，

讀書就只為讀書，

咩JUPAS啊考試啊真心咩都唔識，

我咪就係知道我好鍾意歷史好想睇書讀書囉，

極為專心讀書非常離地。

大學啊？

我真係好俾心機真心機讀書啊，

而家先發現你話俾人聽你係大學俾心機專心讀書，

人地會話：「.....你傻㗎？」，

打電話問朋友時，

我先發現，

好多嘢我諗我係應該要知，

連年尾有year bonus我都唔知，

哦原來搵工有cycle㗎，

.................咩黎㗎食得㗎？

唔單止唔知香港發生咩事，

連好基本嘅搵工常識都唔識，

我以為，

返工，

就真係只係返工咁簡單。

CV有send，

工有見，

其實知自己想做咩，

嗱，

「知自己想做咩」同「唔知自己做緊咩」係兩回事。

想做嘅等極都無回覆，

唔想做嘅零秒打黎叫你見工，

一兩個禮拜就有offer，

然後我就決定唔好再apply唔想做嘅工種。

當你慌起上黎，

係咩都會send左CV先，

當我惶恐地問朋友，

佢地話佢地早係grad前就搵定工有offer啦，

我十月中先send CV.......

嘩...

唔想做嘅真係點逼都唔想做，

唔想做嘅我有一千個藉口唔做，

想做嘅又等極都等唔到，

反正講到尾唔想做就係唔想做，

想做嘅搵極都搵唔到，

好沮喪。

Connection？

你估下我識朋友係真心為識朋友，

會唔會知人地有咩connection啊啦？

唉，

朋友就係朋友啦，

返左黎之後先發現「朋友咪即係connection囉」，

點解要搞到咁複雜，

對我黎講，

朋友就係朋友。

我知我啲朋友唔介意成為我嘅connection，

但我唔想啊，

朋友就只係朋友，

好蠢啊我知啊，

好硬頸啊我知啊，

我知啊，

但朋友....

就係朋友嘛.......

唔係我面皮薄唔想開口要人幫啊，

但我朋友唔多，

做得朋友真係好朋友啊，

真係唔想啊.......

當時代巨輪不停拉扯要將你拉去一個你唔想去嘅地方，

好多時就只係自己硬頸一息尚存要同巨輪搏鬥，

大個女啦我知啊...

搏鬥之下只有無力，

好無力。

－

我好想自己做startup，

好多嘢都好似識，

但好多嘢完全無經驗好多嘢想知又搵唔到答案，

真係好無力，

當你本來好清楚自己想做咩，

幾個月消磨之下，

你會好懷疑自己到底做緊咩，

當有人問：

「你到底想做咩？」時，

心跳手震，

我知我想做啲咩啊，

但已經開始講唔出口。

多謝好多朋友想幫我，

又不停約我食飯睇下我死得未，

我知你地好關心我，

又驚太關心我幫得太出面會令我覺得煩，

所以只好默默陰啲陰啲幫下我。

但我真係好無力，

我有努力，

但好無力，

我細個奮鬥故事係好引人入勝，

但我年紀愈大，

愈發現好多嘢唔係好似細個咁滿腔熱誠爛做三個月唔食唔瞓UCAS只係填一間學校，

然後就搏到連UAL都入到，

it's not the case。

－

唔好再話我係叻女好易難唔到你啦，

我真係唔係叻女，

老實我覺得自己好廢添，

哎呀我知你地成日同我講搵工嘅嘢係無得解，

但好難唔諗點解嘛....

唔知點解我就係有道自然流露出黎嘅霸氣，

唔係啊，

真係唔係啊，

有無辦法收埋道霸氣先，

而家收埋一兩年先啦唔需要霸氣啊。

我知生於現世一個有常識嘅人都好難搵，

我亦都知我有基本常識基本邏輯，

但係我真係好多做人道理完全唔識，

單純到一個點死衝爛撞，

多謝好多人覺得我好好想保育我，

唔係你地講我都唔知自己原來咁單純，

但我好攰。

灰心？

灰啊，

好難唔灰。

當你有好多嘢想做，

但咩都做唔到時，

灰啊，

好灰。

唔知自己想做咩，

仲無咁苦惱，

但我知啊，

咁先麻煩，

然後當你對自己有一定要求時，

仲煩，

唉。

我知啊，

但我講唔出口。

－

好攰。

失散

2014-11-30T13:54:00.001+08:00

台灣朋友今早來電，

興奮莫名地話：「我們把國民黨給幹掉了，你們香港也要加油喔。」

我答：「說實在，我是羨慕你們的，可以硬起來把政權幹掉，雖然也還不知道未來會怎樣。」

她說：「其實我們也不敢太興奮，但就是給可惡的政權一個大教訓。」

然後佢問我一位共同朋友近況，

我答：「喔，舊朋友喔。」

她說：「舊？」

我說：「對啊，已經無聯絡啦。」

她說：「不會感到可惜嗎？」

我回應：「是他放棄我們的啊。」

收線後，

向另一位現任共同朋友攞料，

佢話：「啊… 佢下場都幾悲壯，我諗佢唔係唔想同你地聯絡，只係臉皮比較薄。」

當年佢突然崛起成為當紅illustrator（插畫師），

受到賞識其實各大雜誌都有佢畫作發表，

香港畫廊開展時我地全部出席從無甩底，

幾個月內與各大紅歌星為友，

突然佢著起奇裝異服紅眼鏡，

我讀時裝所以我口中奇裝異服係指著起非自己格調而強行外裝標奇立異之服。

一日，

佢突然接到一單大陸「邀約」，

約我地出去食飯慶祝，

飯枱前聽罷個「大陸邀約」後無人笑唔出，

只異口同聲：「慎防有伏。」

佢即場反枱，

講左幾句非常難聽說話，

其中一句為：「你地唔抵得我可以走出香港。」

做藝術呢行，

一忌認為自己懷才不遇，

因為藝術係溝通表達方式一種，

如果你未能成功與target audience溝通的話，

你就係一個失敗嘅藝術工作者，

無錯，

藝術係一個行業，

藝術家係要食飯。

能溝通與迎合受眾係兩件事，

前者為成功present自己idea，

後者為成功present受眾想聽嘅idea，

人地睇唔明唔係你懷才不遇，

無論你要走幾偏鋒幾獨特都好，

責任在你無做出一件成功藝術品。

二，

忌恃才傲物，

世界非常大。

－

後來，

我們都被delete facebook friendship，

可惜嗎？

還好，

其實擔心成份比較多。

－

朋友訴說那男孩後來遭遇，

佢原來不停攻擊其他同行，

同時與大陸某雜誌合作做精品，

由於同行不忿，

夾手夾腳捉佢抄襲，

不費吹灰之力就令佢被大陸捨棄，

結果？

佢收皮了。

而家係香港做緊售貨員。

－

如果被兩三下就擊敗，

我相信空穴來風，

朋友話，

佢事實係有抄襲。

噢，

抄襲嘅嘢其實係二十一世紀好死㗎姐，

朋友話，

佢蠢在賴大陸公司趕貨期所以逼佢抄襲。

恃才傲物外加不負責任，

再加最重要係死蠢，

無得救，

你都傻既，

溫水井底蛙身在虎潭企圖反咬老虎？

傻豬。

－

收線後，

突然百感交雜，

記起當年佢仍然係library整moodboard時，

同我地講：「唉都唔知點解要剪剪貼貼，創作唔係自己畫就得啦咩？」

我讀時裝所以明白moodboard重要性為最終作品製造適當氛圍，

而一個當時話「唔係自己畫就得啦咩」嘅人衰抄襲，

唔知佢仲記唔記得當年點解會揀讀illustration？

或者，

一切係成名以後，

已經唔可以用同一把尺量度，

可能佢眼光放太遠，

遠到連自己企係邊都唔再記得。

我同朋友收線前不若而同講最後一兩句：

「其實我地都無嬲，咁小事，大事係佢仍然唔認自己有做錯。」

－

上Facebook search佢個profile page，

頭像相片中人物漂白頭髮加紅色冷帽，

彩print sweater加無敵紅色黑超，

cover picture係一張韓風graffiti寫道：「Why So Serious？」

哈哈，

why so serious。

日日去鳩嗚

2014-11-28T16:00:00.000+08:00

我住九龍塘，

身為油尖旺鄰居，

去旺角鳩嗚響應號召救救小商戶當然匹夫有責啦，

話哂我地個區有票后蔣元秋代表我呢啲薯仔向政府發聲救旺，

啊爺吹雞，

MK仔女當然義不容辭心動不如馬上行動。

以下提供一啲好去處俾各位出糧後與三五知己瘋狂購物，

將一份新鮮出爐薪金毫無保留地完全出清，

實在為一大賞心樂事，

諗唔到買咩？

唔緊要！

Sherry十二月一號生日，

接受禮物限期特意因突發公眾活動延長至十二月三十一日。

一年一度年尾出雙糧有萬幾二萬個節日promotion，

嗱咁感恩節、sherry生日禮物、聖誕、新年、買埋下年揮春啊Schedule book咁多野玩，

旺角一定可以滿足你所有資本主義物質社會所有慾望，

黎！

keep spirit high and let's shopping!

－

信和中心 - 彌敦道582-592號

細個要買唱片時，

唔會幫襯大唱片公司，

識買碟一定會去信和，

多數會比大連鎖店平買碟仲會送海報，

我書櫃所有一手二手何韻詩、盧巧音、my little airport都係信和買，

櫃上亦有啲日版舊片如gone with the wind DVD有中文字幕十蚊有交易。

年少時沉迷打機去信和倒錢，

當你發現啲老翻game碟一百蚊三隻至一百蚊七隻都有，

無論幾錢一套game要裝三四隻碟但次次裝極裝到最後一隻都裝唔到，

俾班啊叔呃返一千幾百後你會選擇買正版，

夢幻西餐廳、Sims系列、Roller Coaster Tycoon、online game點數卡，

朋友去買色情漫畫，

我係隔離睇豆腐扭蛋，

一班人白痴去長洲book房，

信和is your place。

－

然後…

田園樓上書鋪買書？

瓊華影貼紙相？

潮特買Schedule book？

先達買電話？

兆萬唱K買MK袋？

唔知點解，

我只係諗到瓊華已經執左，

潮特、新之城樓下變左金鋪，

先達變左iPhone拆貨場，

家樂我都好耐無再去過，

朗豪坊？

哈。

－

當年係波鞋街睇完波鞋，

買串魚旦再去Seven買盒朱奶、蘋果綠茶過麥花臣坐低睇人踢波，

過多兩年，

我諗無咩人會知咩係麥花臣。

當年亦因為我睇書量實在太大，

學生書屋老闆成日將啲我鍾意睇嘅新書如卓韻芝擺係二手區用二手價賣俾我，

有咩理由一本全新出左唔夠一個禮拜嘅走光再走光會放係二手區賣二十蚊？

每次我都只係笑笑講多謝，

佢地亦會笑住教訓我，

「啊妹再咁落去啊，

婆婆要執笠架啦。」

每次睇完新書，

我會拎返去換另一本二手書，

換下換下就換左六年。

上年係英國返香港時，

學生書屋已經執左笠，

變左韓國化妝品超市。

婆婆，

你還好嘛？

－

從前旺角總比人誤解，

認為係一個危險、無格調混濁之地，

但其實旺角好好，

旺角真係好好。

同道人們，

日日去鳩嗚吧，

就當為旺角，

作最後哀悼。

或者到某一日，

連我，

都唔會再有資格踏入旺角一步。

我好自私，

並唔希望旺角有任何發展成為一個國際市區，

我只希望旺角永遠係旺角，

但無奈旺角已經只能永遠於我記憶中長存。

Farewell,

Mong Kok.

星際啟示錄

2014-11-26T17:52:00.004+08:00

禮拜日去左西九自由野，

十一月尾荒謬大太陽威脅之下終於忍唔住拎返白恤衫短牛出黎著，

一入到去個主持話：「show三分鐘後開始，唔好走開啦一走左就唔會返過黎。」

由於小妹無慧根現代舞只係睇左一半就頂唔順走，

咁岩撞正觸執毛bass trio非常精彩，

再睇盧凱彤單刀用autoharp自彈自唱一曲私人最愛「哽咽」有少許感動，（另一最愛為V-live翻唱盧巧音舊曲「白光」）

加上音響由觸執毛成員主理質素專業，

望望台上有透明雨傘加黃絲帶望望Rundown原來朝早有MC仁 X LMF，

而且實在驚奇地文青活動無林一峰，（sorry我覺得香港呢類活動需要走出林一峰陰影）

音樂方面著實已經無咩好挑剔。

但我望住白色舞台後面一排豪宅，

諗起My Little Airport新歌海心公園，

其中兩句歌詞如下：

千億個晚上在這裡唱歌我沒犯法
投訴是來自那間新豪宅？

然後我望住個日落，

預測不遠未來附近豪宅會無限投訴噪音滋擾，

啊特首唔該你望望呢區好多大學生好撚危險，

我俾左成千萬買層樓又年年交稅你班契弟係奉旨要保護我，

慢慢，

西九就會由自由野變成Hunger Game內第十三區直接被毀滅變成豪宅野餐後花園。

當年係倫敦我住阿仙奴球場隔離，

Muse開演唱會時放煙花放埋火添，

球場附近住客仲可以優先買企位帶埋老豆老母去劈酒飲醉然後撞人，

我第一場去完俾啲鄰居撞到頭痛，

之後第二三日係非常清晰地聽到Green Day同Muse唱緊咩歌再被狂轟幾日，

當年一個禮拜計埋歐聯閒閒地兩場波，

從來無任何人投訴，

你住得係個場附近就預左架啦，

雖然阿仙奴近年都好生性自我放棄打算盡量唔好有歐聯同其他聯賽踢，

但無人會投訴阿仙奴擾民開放俾居民去野餐卦。

香港嘛，

事情發展大多如下：

你班垃圾廢青，

精力無地方宣洩就去老蘭跳舞爆房啦，

唔好嘈住我地正常生活。

－

琴日同朋友食完飯後，

朋友話需要雨褸擋催淚雨粉，

去到太子落車急步行去旺角，

全個旺角滿佈催淚濕氣五分鐘未夠已經滿面淚水鼻水，

發現自己handle唔到交低俾附近趕緊去油麻地嘅同路人就無奈地返屋企。

返到屋企後，

沖完涼，

冷靜坐係電腦前聽Interstellar soundtrack，

可能早排用腦過度加上神經異常繃緊，

近幾個禮拜大腦完全實哂好多時坐係書枱前咩都諗唔到咩都打唔出。

Interstellar soundtrack Disc 1 最後兩首名為“S.T.A.Y.”以及“where we're going”，

人總希望能改變過去，

Matthew Mcconaughey憑黑洞奇點闖入第五次元空間後，

起初希望提醒女兒逼自己留低，

但時間不能快於光速，

人類能改變只有未來，

而非過去，

W e're not here to change the past.

Who brought us here?

Who?

We,

We brought us here.

We brought us here to create something,

not to change the past,

but where're we going?

let's see how far we can get.

Do not go gentle into that good night.

-

前排同朋友傾計，

談論後悔、內疚與傷害等課題，

佢Quote左村上春樹《舞舞舞》內一個小段落，

「與其後悔，莫如一開始就公平地、像樣地對待他。起碼應該做出這樣的努力。然而你沒有這樣做，所以你不具備後悔的資格，完全不具備。」

Interstellar啟發我最深並非精深科學理論、親情與愛或文明被毀滅思想被拑制，

而係宇宙無嘢比光速更快，

一切都只可以向前推進，

再回頭都只係多餘，

你只可以選擇未來，

而無權改變過去。

受傷害後感到怨恨，

其實不過係執著某一段敵不過光速嘅無聊過去，

唯一可以做嘅，

係去創造不一樣嘅未來，

未來仍然係要走，

但放低，

可以走到更遠。

有位警察朋友問我：「前幾日我用警棍時唔小心打到一位學生個頭，其實我到底有冇做錯？」

我無回答，

我明白香港需要執法機關去維繫社會安寧，

唔好理邊個俾邊個利用，

其實有啲嘢係個人選擇，

你可以選擇嚴正執法，

但你都可以選擇將佢地拉返差館，

而唔係用警棍扑人個頭。

故此，

我將原句《舞舞舞》quotation send左俾佢。

然後，

佢辭左職，

準備去澳洲working holiday。

－

連譚玉英姐姐都放低左，

除下烏卒卒包袱，

一切隨風，

自己力量可以行到去邊，

就只好努力行好每一步。

－

Do not go gentle into that good night.

-

半年前，

我整好左FMP最後兩張poster，

title分別為The age of transformation / break the system，

最後一次tutorial時，

tutor寫低左一條問題：

so where are we going?

我係最後一頁加左一張postcard，

上面寫住，

Let them go.

As far as they can.

-

反正，

也回不去了。

－

獨家村

2014-10-06T19:58:00.004+08:00

不嬲都係Drama Queen，

亦都預左返到香港一切都會如常唔順利，

自己一向不合作就要接受所有事不如常理般發展，

但我好慶幸自己趕到有機會保衛旺角，

我亦都目標非常清晰首要保護學生。

守左旺角咁多日，

一堆大隻MK幫我斟茶遞水，

過住女皇般既生活，

打生打死當日，

當我攬住一班學生妹叫佢地企係我後面唔好亂咁衝撞時，

一名黑色背心大隻佬帶住幾條金毛對住我同另一位朋友講左句：

「佢地夠膽掂你地一條毛，我保證佢地出唔到旺角。」

雖然到最尾，

我都係扭親隻腳。

每日出到旺角就見到一班有屋企唔返要訓街既怪人，

旺角變得好可愛，

每個人都有自己個性想法與追求，

每個人都與眾不同，

守過旺角既，

都係真正鬥士。

－

而事情亦都唔會發展順利，

有一日，

返到屋企後，

收到一個msg：

「hey stop going to Mong Kok, I can't promise we won't charge you, because you are breaking the law.」

條友係我前男友。

條友做左警察，

而且仲係office坐落order更無恥嗰班。

話說我個story flow真係永遠沒有最仆街只有更仆街。

－

突然一陣心寒，

唔知點解自己之前會同一個黑白是非不分既人一齊過，

更加唔明點解條友會選擇我，

令我懷疑自己係咪對自己過份自信，

我答：

「you know who I am right?」

佢答：

「I know, the one who always dream for something fancy.」

絕對權力會令人絕對腐化，

錢財會令人短期內作出毀滅性改變，

亦令佢當初係我面前講過所有野都唔再成立，

令我開始唔再信任自己任何選擇，

不能原諒自己曾經愛過一個如此荒謬既人。

冷靜左一日後，

然後我心諗－

你大我啊？

拉我啊笨，

最好你親手拉，

屌你老味。

－

突然諗起旺角有個MK守夜時向我地曲線示愛，

佢話：

「雖然我地呢班MK養唔起你地班大小姐，

但我地好過好多有錢人渣架妹妹！。」

今次佔領旺角其中一個最大貢獻，

一定係打好左市民與MK關係。

唔知呢啲係咪叫做階段性失敗，

但我會選擇繼續抗爭展開不合作運動，

俾人話左on9憤青咁多年，

讀時裝讀到畢業論文寫佔領華爾街睇zizek連個tutor都覺得我痴左但又俾我畢到業，

寫嗰一萬二千字時個個都問我寫黎做乜鳩，

突然香港好多人明我咁多年黎做乜鳩，

又唔係好習慣，

堅持左咁多年，

忽然俾大量港人理解，

有一種非常奇妙既感覺。

所以我會繼續做維園啊婆，

做到抗爭勝利為止。

至於當初說好的迷幻理想，

我會自己繼續行住先，

直到終於有一個人，

會明白我做緊乜，

企係我隔離大叫：

「屌個政府都戇鳩鳩。」

「識做，一定唔撚做政府工。」

係啊，

我好硬頸，

而最勁既係，

我keep住左十幾年都仍然好硬頸。

Hey Jude!

2014-08-29T20:29:00.000+08:00

朝早起身收到一個電話：

Sherry，

今晚陪我去Soho。

我問：

下，

你知我毒撚黎架喎。

佢話：

今晚我個Ex開生日Party，

WITH HIS NEW GIRLFRIEND。

我話：

哦咁唔去咪唔洗傷心囉，

我訓多陣先有少少M前恐懼症，

byebye!

佢話：

佢新女朋友好樣衰。

啊！

仲用Gucci Monogram袋，

桃紅色。

我毫不猶豫地：

得，

今晚幾點邊度等？

－

FYI，

當晚見到個袋係類似呢個：

我同Sherlock係Season 2 第二集一樣，

佢俾“H.O.U.N.D.”吸引，

我俾“桃.紅.G.U.C.C.I.”吸引，

除左你係Paris Hilton，

拎親呢個袋都多數係講野高八度帶有公主病菌既八婆，

或者係寫字樓做左幾廿年秘書既姐姐，

兩種女朋友都會帶俾我一個非常愉快既晚上，

加上I don't see thing, I observe. ( 嘿嘿 )

Well，

條八婆搶你男朋友，

你當然要Judge佢外表啦，

唔通仲同佢伯母講：

hello伯母，我係你個女新搶返黎個男朋友個Ex啊，你身體幾好嘛？

－

約左八點半Leicester Square等，

我當然Hea到頂點著條裙就算唔著波鞋拖鞋都算俾面，

等左半個鐘，

明既，

踩場需要計劃既係咪？

得。

佢一出tube station門口，

嘩，

連新買既Celine都拎埋出黎，

千幾鎊一個clutch拎去蒲，

加上之前我無見過呢個袋應該突然新買，

憑千幾鎊除返開幾多寸皮黎計，

應該係每一寸百幾鎊，

睇黎條賤人應該hurt得佢幾緊要。

－

九點半去到Club門口，

嘩大佬一去到見到個伊巴頭日本仔仲要係Goldsmiths讀photography，

但當我一諗起個桃紅Gucci袋，

我全個人意念就非常專心地等待Paris出現，

等左十分鐘左右，

我最期待既畫面出現啦：

哈哈哈哈哈，

Elsa裙撞Gucci桃紅袋再加Jimmy Choo，

仲．要．公．主．頭，

成件事撞到啪啪聲，

我忍唔住行左過對面街後巷笑到連個頭都移左位，

Moodboard如下－

笑左一輪後，

理智問左我一個問題，

到底點解Gucci會搶到Celine個男朋友？

Celine俾我拉左過對面街冷靜，

呆企隔離雙目無神毫無笑容，

憑佢人又靚又讀Cambridge黎計，

見到個咁既新女朋友其實幾humiliating，

唔同我只係一個零，

任憑街上面一個普通女仔都會比我溫柔體貼，

只不過係我比較鍾意我自己所以I'm fine with everything，

但對佢黎講，

真係幾hurt。

我搭搭佢膊頭話don't worry you look great babe，

佢笑笑望住我，

我諗今日我都要幫下手架啦，

至少要解答到底點解Gucci會搶到佢個男朋友。

－

我同Celine行返過隔離街，

基本上Club門口係人都知Celine係Ex所以係會讓路唔會講太多Greeting廢話，

我直接同佢行去Gucci同賤人面前 -

Celine : Hi, Happy birthday.

賤人：thanks! this is Niki.

我暗睥佢個粉紅色咀心諗一定要問佢到底用咩唇膏可以將個樣毀滅到咁既地步：Hello, I'm Sherry.

Niki : 你唇膏好靚啊！咩牌子邊度買架？！

我當然唔想答啦，但由於要解答Celine心內問題都係答：Chanel Boheme. 係呢，你地都幾襯喎，點識架？

Niki : 哈哈哈，err.... 點識啊........ ermmm.... 哎呀...我唔係幾好意思講，你講啦....

然後佢用bling bling眼望住個賤人，將塊面伏係佢膊頭度。

賤人：哦，我地係船P度識，慢慢發現幾岩傾咪繼續落去。

其實我諗條賤人知我問野係有骨，所以無特別講太多。

我問多左幾條問題，

Niki (Gucci) 突然話，

哈哈其實我咩都唔識架.... 好多野都係聽條賤人講，

佢真係教到我好多野。

然後，

Celine突然捉住我隻手，

我諗我地大家都明白到底發生咩事，

已經可以走。

－

到底點解Gucci可以搶走Celine男朋友？

我同Celine都有某些終極弱點Gucci比我地優勝一千倍，

Gucci唔會問有骨既問題，

而我地，

由第一句開始已經有骨。

佢攬住個Gucci已經好滿足，

但我地追求既，

係Celine同Acne，

當然，

自己Celine自己俾錢。

再者，

Celine有足夠智商從來咩都會自己答，

絕對唔會搖條賤人隻手叫條賤人幫手答。

Of course，

我諗我同Celine一世都唔會去船P，

我一聽到船P，

噢，

唔怪得啦。

－

Well，

其實係某些位上面，

我地係一敗塗地。

－

我地放低份生日禮物後，

去左隔離街間Mexican Grill食飯，

佢一坐低就去廁所，

出黎我見佢對眼紅哂，

都只可以講：

你無輸，

你想用人地買既Gucci定自己買既Celine？

飲左一啖Margarita，

交換一個眼神後，

彷彿大家都深明，

this is how we do.

and we are happy with who we are.

－

P.S.

Sher : 你送左啲咩俾佢做生日禮物？

Celine : 嘿。

然後佢拎左抽鎖匙出黎，

我望一望，

Sher : 哈哈哈，佢屋企鎖匙？

Celine : one more cocktail？

Sher : yep!

P.P.S

如果你問點解我地咁仆街要去人地Birthday party，

首先賤人無講任何原因一句分手就了結，

第二條賤人竟然請Celine去，

到底應唔應該去可自行判斷，

反正Celine決定要去，

我都只能夠陪下佢。

Let it be.

2014-08-28T22:14:00.002+08:00

話說全歐洲所有火車都好憎我，

每次搭火車唔係delay就係取消，

我從來不諱言承認自己對所有公共交通工具有近乎皮膚敏感式憎恨與厭惡，

唯一一樣我覺得係bonus既就係火車上面好多奇怪人類會同我傾計。

由其見到啲唔知點解有hand carry喼唔用，

係都要咩住個幾千KG既backpack上車阻頭阻勢左撞右撞一撞仲要一定中頭最緊要係佢本人唔覺，

然後覺得自己好似好勵志好流浪，

企圖造出一個自己步步皆辛苦你班廢柴坐係office連出去劈炮唔撈去追求夢想都唔敢而我唔怕辛苦架好勁架我既假象阻住地球轉既煩膠時，

厭惡感會即時暴增一千。

其實我個喼係九成可以直接帶上飛機、硬殼啲野仲無咁易整爛，

除左消耗體力同我唔知佢地到底點樣係交通工具收藏個大過人既backpack外，

你會發現 - 拎backpack既人多數都拎好撚多廢物而個backpack仲要太大柒到要加錢寄艙，

而每次去旅行有朋友拎backpack都一定會發我脾氣，

例如之前去Istanbul條俄羅斯妹話：

"Sherry can you walk a little slower? my backpack is so heavy it's not fair."

而後來我發現佢個backpack入面，

竟然有風筒。

屌係土耳其夜晚十一點幾恐怖到極點唔行快啲真係等睇陳浩南出黎收數啊？

自己又咩唔到重野學咩人拎backpack累街坊仲要人受你氣姐，

除左你去喜馬拉雅山或者要係冰島火山玩野外求生，

去巴黎維也納就算唔住酒店都住hostel啦你拎backpack托咩，

係大城市就已經唔係叫流浪係叫度假啦，

講真要分辨真係識去旅行定扮識去旅行既人，

睇佢拎backpack定喼就可略知一二。

－

講返正題，

諗住走前完成最後心願－我要去ANFIELD，

為求能夠精準無誤地成功入到去個球場，

仲上網買定入場門票，

我知我係一條煩膠實有啲嘢發生，

但去Anfield實在太重要，

連零點一風險我都決定要減到最低。

朝早起身心知仆街啦，

千算萬算就係唔記得左自己要較鬧鐘添。

結果我由一出門口就開始跑一直跑到去火車站。

最仆街係，

趕住出門口無著波鞋著左對Birkenstock，

之前朋友問我有冇咩鞋比起著住對Dr. Martens跑更悲傷？

有，

Birkenstock。

－

當我發揮細個打鐘前零點零一秒跑入學校俾啲想捉我遲到但又吹我唔漲既prefect睥既神奇力量真係趕到去車站時，

我望望個board，

Manchester 10:42 - cancelled.

我諗我連隔夜屌梁振英既粗口都爆埋出黎，

我都知你架啦邊有咁順利啊，

重點係我唔知自己點解要著住對Birkenstock跑樓梯，

唔知咩原因一半去Manchester既火車全部取消，

而我其實只係要搭到去中途站轉車去利物浦，

所以我知一定有辦法死到去個車站再轉去利物浦，

只不過要有同火車搏鬥幾個鐘既鬥志與決心，

我拎住張車票含淚望住個staff，

HI I NEED TO GO LIVERPOOL TODAY (FUCK YOU)，

佢好明顯已經俾人煩左成朝話－no I'm sorry，

由於決心極大本．小．姐．今．日．一．定．要．去．ANFIELD關係，

我足足lur左佢十五分鐘。

呢幾年，

我學識左只要臉皮夠厚，

無咩野係真係做唔到。

Lur到佢入左office幫我check點轉車，

無問題，

轉六次姐，

我M又未到未需要殺哂全世界所以仲handle到。

－

憑住精神念力轉轉轉轉轉轉到去最後一程車終於去到利物浦時，

是但搵個位坐係個肥伯伯隔離，

佢突然同我講野，

我以示禮貌即刻收埋部iPod Classic陪佢吹下水。

伯伯－such a long journey we're finally there!!!

我－OH YAY I'M GOING TO ANFIELD TODAY!

伯伯話佢細個係Manchester讀大學住左七年，

所以係united忠實Fans，

當佢話鍾意左一隊波三十年時，

我即時打左個冷震，

到底鍾意同一件人事或物三十年係咩感覺？

我好似最勁都只係鍾意左何韻詩十幾年，

由其而家每隔一分鐘就有新野出現，

有時都幾佩服啲上左年紀既人可以堅持喜愛一件事物幾廿年，

更加佩服係件人事物可以last到幾廿年而唔似香港可以一秒內全部毀滅，

三十年，

真係一個urban myth。

我問佢啊你有冇睇琴晚曼狗場波輸四球，

佢話－oh I know! I saw it on newspaper. At first I think oh they lose, that's bad. Then I saw 4-0, well that's really bad.

佢問我讀咩啊之類我話係Arts London讀Fashion，

然後話佢特登去Tate Liverpool睇Mondrian，

英國人真係會搭幾個鐘火車去另一個city只為睇一個Mondrian exhibition，

原來佢係builder專起museum，

原來....我去左幾年既museum大部分佢有份幫手起。

跟住我話去完Anfield同Tate後我會去睇Beatles，

佢話OH! i didn't think of Beatles!，

佢細個讀大學時曾經特登搭三十幾個鐘火車去Hamburg睇Beatles，

而佢同佢老婆就係火車上面識。

我話：I'm a bit late you know, my time was Michael Jackson and Madonna. I got the ticket for MJ's last concert in London, but you know..

佢話佢兩個仔都有買Michael Jackson最後場演唱會，

原來睇唔到MJ場演唱會，

係好多人一生其中一個非常大既遺憾。

佢突然話－Oh you know my favourite song is Let it be. It's brilliant!

然後我拎部iPod出黎，

上車時，

其實我聽緊Let it be，

或者同伯伯有啲緣份，

所以我決定同佢一齊share一個earphone聽Let it be.

聽完後岩岩好到站，

伯伯話－

bye girl! let it be!

－

最後我去到Anfield，

去到Mathew Street，

去到Tate Liverpool。

返倫敦途中，

聽住Beatles望出窗，

突然覺得好幸福，

講唔出咩原因，

但覺得自己好幸福有機會可以坐幾個鐘火車只為睇利物浦球場同Beatles。

And when the night is cloudy,

there is still a light that shines on me.

Shine until tomorrow,

let it be.

There will be an answer,

let it be.

－

如果係隻狗撞死人，你又會點？

2014-08-23T01:49:00.000+08:00

London central line罷工，

百無聊賴邊度都去唔到落Westfield洗下錢，

返到屋企之時聽到flatmate同朋友傾計，

佢話：我唔明點解要為隻狗示威囉，佢企係條路軌又無人去拖佢返月台，咁佢就要有俾人車死既準備架啦，啲人又咪個個企係度話嘩救佢啦自己又企係度唔郁，狗黎姐，唔通成條火車線特登為佢停咩。

利申：我唔係咩愛貓愛狗之人，平時無咩特別都唔會同佢地接觸由其係白鴿，而flatmate不嬲覺得動物係要全部被人道毀滅，小朋友細過七歲只係識食識喊識叫都算係動物應該要被毀滅。

佢見我默默地係廳除鞋，順手同我講：「你唔覺好無聊架咩？」

其實我本身諗住唔出聲側側膊返房就算，

因為我仲要同佢住一段時間，

我就算幾多口都無蠢到自己送死然後被黑面直到頂唔順要去聖母院告解祈求上帝原諒我唔好再黑我面。

但由於非常唔好彩地佢問我，

我無得扮死狗唔出聲，

我用最輕描淡寫既語氣企圖將殺傷力減到最低－

「如果係路軌上面係一個人，係咪照車死佢？」

我停左一停望望個形勢先，

見到好似幾平靜，

我再加多一句：「如果可以為一個人停左架車的話，點解唔可以為一隻狗？」

佢話：「一隻狗之嘛，又唔見啲人去救佢？靜係識係度嘈。」

我話：「點解狗咬死人要人道毀滅，人撞死狗就無問題？件事係危險，路軌係港鐵範圍，加上港鐵有管理權，唔係企係月台上面指手劃腳既人可以跳落去救佢上黎就無事。」

佢話：「個月台唔係好高ja嘛，啲人得個講字就得個講字啦，狗根本就要禁止帶入去任何室內場所。」

見佢愈黎愈激動，

眼底浮現上次佢黑全屋人面一個禮拜到底有幾恐怖，

我決定自保入房食蛋糕。

－

我諗起，

去左歐洲咁多個地方，

從來無一個地方唔俾帶動物上車，

曾經有一次，

我係德國火車見到有人抱住兩隻兔仔，

英國underground你會見到高過條on9 tube既大狼狗鬆獅狗（而我一定會去第二卡），

之前朋友拎住隻龍貓火車轉地鐵轉巴士去selfridges high tea都無問題，

道理好簡單，

動物有權係任何地方活動。

最諷刺係，

上次有隻蜜蜂飛入屋我已經講過我並唔係一個好人所以一見就想拍死佢，

佢話唔好然後話開窗俾佢飛走唔好殺佢，

一個鐘之後我突然俾野針左一下，

大脾只有一支蜜蜂斷針而蜜蜂本人已經唔見左，

突然醒起前一日著住同一條牛仔褲去薰衣草園應該好多花粉佢針我係應該，

小妹隻腳到而家都仲腫緊應該有一截斷針無拎到出黎要返香港睇醫生，

但今次佢話－

狗之嘛。

P.S. 我打得出黎就當然block哂所有同佢有關既人事物啦哈哈哈哈哈。

－

三年前係意大利由羅馬搭火車去那不勒斯，

當然以我既常態劇情發展係一定會搭錯火車，

搭左幾個站發現自己搭錯係Orvieto落車轉另一架，

如途中所見其實platform與platform之間係可以行路軌過，

當日唔知點解有六七隻鴨坐係路軌打死都唔肯郁，

唔好問我點解會有鴨我只會答你無得解，

我曾經係挪威朋友屋企後花園見到鹿。

當時柒到搭左對頭車係個platform等車只有我、我朋友以及兩個法國男人，

職員話佢地要做野唔得閒，

下一班車到月台係四十五分鐘後，

俾左個plain panini叫我地幫手引佢地埋月台，

我地同佢地全家玩左（或者俾佢地玩左）三十分鐘連一厘米都無郁過，

當時係六月尾意大利曬到癲，

我當年啲tan係因為引鴨並唔係因為之後係barcelona海邊唔小心訓左幾個鐘，

睇黎佢地曬太陽曬得好舒服。

職員過黎視察情況，

佢話無辦法啦，

佢會叫架火車暫停，

我地幫手將鴨仔全家逐隻搬上月台。

yep，

我人生第一次徒手捉住一隻鴨將佢搬上月台，

當時月台上其他人準備左毛巾俾佢地上岸休息，

而我地得到幾支雪糕與冰水。

唔係就咁好似你細個捉雞仔一捉一放功夫兩個字就搞得掂，

佢地係會縮會叫會唔開心，

就只係唔會走。

搞左一輪，

將鴨仔搬哂上月台後，

職員先聯絡火車可以繼續行。

係啊無錯，

意大利為左幾隻鴨停止左運作。

原因好簡單，

因為佢地，

似返一個人。

－

當然啦，

我flatmate會話屌又Delay，

但我覺得唔係「又」啊朋友，

technical delay抵屌，

但一隻狗一隻鴨，

都好重要。

你以為死既只係一隻狗？

think twice.

（雖然我仍然好憎蜜蜂蝴蝶見親都想拍死佢地。）

－

我在橋上看風景

2014-08-22T06:43:00.000+08:00

今朝收到一個迷離電話，

一見到個來電顯示，

我心諗你仲好意思打黎但由於本人好cheap關係當然聽左咩料先，

聽完一輪bullshit藉口推三推四差啲賴埋伯母之後，

最後講左一句－「其實我都唔想」，

我冷靜到連自己都覺得好心寒地回應：「你連認自己係仆街既膽都無啊廢柴」，

然後，

我cut左線。

仆街無問題，

但做仆街，

要認，

做完仆街又唔敢認，

學咩人做仆街姐廢柴。

－

今日去Tate Modern睇Matisse，

由Shepherd's bush到St.Paul's總共有十一個站，

搭到去第五個站我已經要用精神念力維持心跳呼吸，

London underground夏天係一個流動地獄，

而由TFL整左張海報溫馨提示各位夏天搭central line記住上車要帶定枝水、同時覺得條tube 150週年從來無進步過好威威要慶祝睇黎，

佢地係短期十年內係無打算搞搞條荒謬到頂點既tube。

聽日仲要又tube strike我都唔明佢地有咩資格一年strike五六次，

上個禮拜幫屋企人退返四張oyster card，

首先排左半個鐘隊每隔幾分鐘我都用強大意志洗自己腦almost there架啦忍下啦，

然後正常topshop只需要三分鐘就re好佢用左十五分鐘refund兩張卡，

re完後，

佢夠膽叫我再排過隊re另外兩張。

我靜左一秒，

然後用mean girls語氣回應 - ARE YOU KIDDING? so why are you striking on friday? you should be fired and replaced by technology.

後面個女人講左句YA I AGREE，

睇黎佢地已經令到人神共憤我都無咩幾可見到有工會strike resident係會support政府炒哂佢地用錢黎upgrade technology，

鬧完後我頭也不回地撥一撥頭髮行去platform搭tube走，

其實......

當時我好驚哈哈哈哈哈哈哈。

－

由地獄折返人間後，

朋友今朝叫我要著波鞋，

我係tube station門口....見到兩部滑板車，

St.Paul's要經Millennium bridge過泰晤士河先去到Tate modern，

所以，

我地用滑板車滑過泰晤士河，

哈哈哈哈哈哈哈哈哈哈哈哈。

基本上如果今日有去附近的話，

你會見到一個all back馬尾、著住件oversize冷衫、紅色斜咩袋、戴住個Sony巨型headphone大叫I hate myself for loving you同Song 2既失控廢青係Millennium bridge泰晤士河上面踩住架滑板車不停溜黎溜去，

事實上仲爽過睇完午夜場係westfield外面（即係香港類似APM）坐上部supermarket shopping cart有技巧地避開security碌落斜坡。

突然收到朋友電話用heaphone傾繼續溜，

佢（Michelle）打黎第一句：「楊麗珊，我數condom時唔見左一個啊！」

我好認真地真係有用腦地答：「我諗你要報警。」

M：「唔係哩!!!!!!!!!!!!!!!佢拎左去邊啊!!!!!!!!!!」

S：「係咪擺左落銀包啊？」

M：「佢做咩要拎出街啊？」

S：「... Err.. brainstorm下姐唔洗咁認真。」

M：「如果無咁點啊？」

S：「報警。」

然後我借啲而話老豆打黎cut佢線，

再Whatsapp個賊，

佢問：「... 一盒有幾多個架？」

我決定收佢兩個皮繼續專心溜滑板車。

三秒後，

我收到老豆張selfie，

係啊我老豆自拍再加一句：「啊女我型唔型啊？」。

－

滑左半個鐘停一停，

見到有個artist係地下不停地畫，

原來佢係全條橋地面random地畫左一百幅小graphics，

佢見我同我朋友玩滑板車玩到好興奮，

於是係橋上面畫左相入架小滑板車。

倫敦，

四年來多謝您，

下次返黎，

我會搵到一個人真正理解倫敦對我既重要性與意義，

再係橋上面望住一條係歐洲黎講非常普通但對我黎講比一切華麗風景都更為美好既泰晤士河，

I'll be back,

you have my words.

-

Tate Modern Open Space由紅線起點行到去終端總共需要兩分半鐘，

現實生活中我好似都行左廿幾年，

但我好似連起點都未知係邊，

要行到去終端，

到底仲要幾多年？

如果連條線都搵唔到咁點？

搵到後捉唔實甩手又點？

其實就算搵到後，

斷線都只不過係兩三秒非常兒戲既事。

但起碼，

我知道世界有紅線存在，

Shawshank redemption中，

Morgan Freeman 話 hope is dangerous,

但 Tim Robbins 答 hope is a good thing.

－

"Load the brush and draw a line.

At the beginning it will appear dark and thick,

then it will get gradually thinner and finally disappear ...

A line must have a beginning and an end.

Space appears within the passage of time,

and when the process of creating space comes to an end,

time also vanishes."

- From Line, 1967, Lee Ufan

－

見到身邊朋友們都搵到紅線另一端，

我進度係慢左啲，

但我諗我會搵到。