PRAVASI MALAYALI

കക്കയത്തേക്കുള്ള യാത്ര സഞ്ചാരികളെ കാത്തിരിക്കുന്നത് കാലങ്ങളോളം മനസ്സില്‍ സൂക്ഷിക്കാന്‍പറ്റുന്ന പ്രകൃതിദൃശ്യങ്ങളാണ്

2010-12-12T00:15:00.000-08:00

പ്രകൃതി സൗന്ദര്യപൂജയൊരുക്കി കക്കയത്ത് സഞ്ചാരികളെ കാത്തിരിക്കുകയാണ്. നിത്യഹരിതവും വശ്യവുമാണ് ഇവിടെ കാട്. സാഹസികരെയും പ്രകൃതിസ്‌നേഹികളെയും കക്കയം ഒരിക്കലും നിരാശപ്പെടുത്തില്ല

കുന്നുകളും മലകളും കാട്ടാറുകളും ദൃശ്യവിരുന്നൊരുക്കുന്ന കക്കയം. കക്കയത്തെ കാനനഭംഗിയും ഉരക്കുഴി വെള്ളച്ചാട്ടവും ഒരിക്കലും മനസ്സില്‍ നിന്ന് മായില്ല. കക്കയത്തേക്കുള്ള യാത്ര സഞ്ചാരികളെ കാത്തിരിക്കുന്നത് കാലങ്ങളോളം മനസ്സില്‍ സൂക്ഷിക്കാന്‍പറ്റുന്ന പ്രകൃതിദൃശ്യങ്ങളാണ്. കക്കയത്തെ പ്രധാന കാഴ്ചകള്‍ കക്കയം വാലി, കരിയാത്തന്‍പാറ, പാപ്പന്‍ ചാടിക്കുഴി, ഉരക്കുഴി, ചുറ്റുകുഴി എന്നിവയാണ്. ഉരക്കുഴി വെള്ളച്ചാട്ടം ആസ്വദിക്കാന്‍ തൂക്കുപാലം നിര്‍മിച്ചിട്ടുണ്ട്.

കോഴിക്കോട് നഗരത്തില്‍നിന്ന് 50 കിലോമീറ്റര്‍ അകലെയാണ് കക്കയം. കക്കയം അങ്ങാടിയില്‍നിന്ന് 14 കിലോമീറ്റര്‍ അകലെയാണ് ഡാംസൈറ്റും വെള്ളച്ചാട്ടവും. കോഴിക്കോട്-ബാലുശ്ശേരി എസ്റ്റേറ്റ്മുക്ക്, തലയാട് വഴിയും പേരാമ്പ്ര, കൂരാച്ചുണ്ട്, കല്ലാനോട് വഴിയും കക്കയത്ത് എത്താം. കക്കയം അങ്ങാടിയില്‍നിന്ന് ഡാംസൈറ്റിലേക്കുള്ള യാത്ര തന്നെ മനോഹരവും അത്യാകര്‍ഷകവുമാണ്.

സഞ്ചാരികള്‍ക്ക് താമസിക്കാന്‍ ഹോം സ്റ്റേയുണ്ട്. സിനിമാ-ആല്‍ബം ചിത്രീകരണത്തിന്റെ പ്രധാന കേന്ദ്രമാണിപ്പോള്‍ കക്കയം. കക്കയംവാലി വികസന സമിതിയും കരിയാത്തന്‍പാറ 'ജനത' പ്രവര്‍ത്തകരും ടൂറിസ്റ്റുകളെ സഹായിക്കാന്‍ ഗൈഡുകളെ നിയോഗിച്ചിട്ടുണ്ട്.

കക്കയം വനമേഖല അത്യപൂര്‍വമായ സസ്യജൈവവൈവിധ്യങ്ങളുടെ കലവറയാണ്. ഈ ജൈവവൈവിധ്യ മേഖല ഇന്റര്‍നാഷണല്‍ യൂണിയന്‍ കണ്‍സര്‍വേഷന്‍ ഓഫ് നേച്വര്‍ (ഐ.യു.സി.എന്‍.) എന്ന സംഘടന ലോകത്തെ പ്രധാനപ്പെട്ട ജൈവസസ്യമേഖലകളിലൊന്നായി തിരഞ്ഞെടുത്തിട്ടുണ്ട്.

വന്യജീവികളുടെ വിഹാരകേന്ദ്രമാണ് കക്കയം. ഭാഗ്യമുണ്ടെങ്കില്‍ ആനക്കൂട്ടങ്ങളെയും കാട്ടുപോത്തുകളെയും കാണാം. മാന്‍, മ്ലാവ്, കരിങ്കുരങ്ങ് തുടങ്ങിയവയും ഉണ്ട്. 5000 ഹെക്ടറോളം വരുന്ന ഈ മേഖലയില്‍ അപൂര്‍വവും വംശനാശം നേരിടുന്നതുമായ ഒട്ടേറെ ഔഷധസസ്യങ്ങളും ഉണ്ട്. അപൂര്‍വയിനം പക്ഷികള്‍, പൂമ്പാറ്റകള്‍, നിശാശലഭങ്ങള്‍, കള്ളിച്ചെടികള്‍, ഓര്‍ക്കിഡുകള്‍ എന്നിവയും ഇവിടെയുണ്ട്. സാഹസികപ്രിയരായ വിനോദസഞ്ചാരികള്‍ക്ക് ട്രക്കിങ്ങിനും സൗകര്യമുണ്ട്.

കക്കയം ഡാംസൈറ്റിലേക്ക് പോകാന്‍ വനസംരക്ഷണ സമിതിയുടെ കൗണ്ടറില്‍നിന്ന് പാസ് വാങ്ങണം. കക്കയം അങ്ങാടിയിലാണ് ഈ കൗണ്ടര്‍. രാവിലെ എട്ട് മണി മുതല്‍ വൈകിട്ട് അഞ്ചുമണിവരെയാണ് സന്ദര്‍ശനസമയം.

ഇന്റര്‍നെറ്റ് അടിമത്തം അപകടം

2010-12-11T23:58:00.000-08:00

ആധുനിക ജീവിത സൗകര്യങ്ങളില്‍ ഒഴിവാക്കാനാവാത്ത ഒന്നായി ഇന്റര്‍നെറ്റ് വളര്‍ന്നുകഴിഞ്ഞു. ഇ-മെയിലും ചാറ്റിങ്ങും ബ്രൗസിങ്ങുമെല്ലാം ശരാശരി മലയാളിയുടെ ശീലമായിക്കഴിഞ്ഞു. ഇതേസമയം തന്നെ, ഇന്റര്‍നെറ്റ് ദുരുപയോഗത്തിന്റെയും സൈബര്‍ കുറ്റകൃത്യങ്ങളുടെയും വാര്‍ത്തകളും പുറത്തുവരുന്നുണ്ട്. യുവതലമുറയില്‍ 'ഇന്റര്‍നെറ്റ് അടിമത്തം' ഒരു പ്രശ്‌നമായി മാറുന്ന കാഴ്ചയാണ് കുറച്ചുനാളായി നാം കാണുന്നത്.

ഇന്റര്‍നെറ്റ് അഡിക്ഷന്‍
ജോലിയുമായി ബന്ധപ്പെട്ടല്ലാതെ, ഒരു വ്യക്തി ദീര്‍ഘനേരം ഇന്റര്‍നെറ്റ് ഉപയോഗിക്കുകയും അത് ആ വ്യക്തിയുടെ ജോലിയെയും സാമൂഹികജീവിതത്തെയും ബാധിക്കുകയും ചെയ്യുന്ന അവസ്ഥയാണ് 'ഇന്റര്‍നെറ്റ് അഡിക്ഷന്‍'. ഈ അവസ്ഥയുടെ പ്രധാന ലക്ഷണങ്ങള്‍ ഇവയാണ്:

' ജോലിയുമായി ബന്ധപ്പെട്ടല്ലാതെ ദിവസേന ആറ് മണിക്കൂറിലധികം ഇന്റര്‍നെറ്റിനു മുന്നില്‍ ചെലവിടുക; ഈ അവസ്ഥ മൂന്ന് മാസത്തിലേറെ നീണ്ടുനില്‍ക്കുക.

' നിത്യജീവിതത്തിലെ ബുദ്ധിമുട്ടുകളൊഴിവാക്കാനായി ഇന്റര്‍നെറ്റിനു മുന്നില്‍ സമയം ചെലവിടുക.

' ദോഷകരമാണെന്നറിഞ്ഞിട്ടും ഇന്റര്‍നെറ്റ് ഉപയോഗം നിയന്ത്രിക്കാന്‍ കഴിയാതെ വരിക.

' മറ്റെന്ത് പ്രധാനപ്പെട്ട ഉത്തരവാദിത്വമുണ്ടെങ്കിലും അതെല്ലാം അവഗണിച്ച് ഇന്റര്‍നെറ്റിന് മുന്നിലിരിക്കുക.

' ഇന്റര്‍നെറ്റ് ഉപയോഗത്തിന്റെ ദൈര്‍ഘ്യം ദിനംപ്രതി വര്‍ധിച്ചുവരിക.

' നെറ്റ് ഉപയോഗിക്കാന്‍ പറ്റാത്ത ദിവസങ്ങളില്‍ അമിതദേഷ്യവും അസ്വസ്ഥതയും പ്രകടിപ്പിക്കുക.

' പത്രംവായന, ടി.വി. കാണല്‍, സംഗീതം തുടങ്ങി മറ്റ് വിനോദങ്ങളിലൊന്നും തീരെ താത്പര്യമില്ലാത്ത അവസ്ഥ.

ഇന്റര്‍നെറ്റിന് അടിമപ്പെട്ടവര്‍ നെറ്റിന്റെ സഹായത്തോടെ ലൈംഗിക ചിത്രങ്ങള്‍ കാണുക, ചൂതാട്ടം, ചാറ്റിങ് തുടങ്ങിയ പ്രവര്‍ത്തനങ്ങള്‍ക്കാണ് കൂടുതല്‍സമയം ചെലവിടുന്നത്. ഈ ശീലം കൗമാരപ്രായക്കാര്‍ക്കിടയിലാണ് കൂടുതലായി കണ്ടുവരുന്നത്. ഇത്തരക്കാര്‍ ചീത്ത കൂട്ടുകെട്ടുകളില്‍ ചെന്ന് ചാടാനും പഠനം മോശമായി ഭാവിജീവിതം നശിപ്പിക്കാനും സാധ്യതയേറെയാണ്. 'സോഷ്യല്‍ നെറ്റ്‌വര്‍ക്കിങ്' സൈറ്റുകളിലൂടെ പ്രായത്തിനനുസൃതമല്ലാത്ത ബന്ധങ്ങള്‍ വളരുന്നതും കൗമാരക്കാരുടെയിടയില്‍ വര്‍ധിച്ചുവരുന്നുണ്ട്.

കാരണങ്ങള്‍
വിവരസാങ്കേതികവിദ്യയുടെ വളര്‍ച്ചയും മാതാപിതാക്കളുടെ ശ്രദ്ധക്കുറവും പലപ്പോഴും കാരണമാണെന്ന് പറയാറുണ്ടെങ്കിലും ചില പ്രത്യേക വ്യക്തിത്വ സവിശേഷതകളുള്ളവര്‍ ഇന്റര്‍നെറ്റ് അടിമകളാകാന്‍ സാധ്യത കൂടുതലാണ്. ജന്മനാ ലജ്ജാശീലരും ആത്മവിശ്വാസം കുറവുള്ളവരുമായ കുട്ടികള്‍ കൗമാരമെത്തുമ്പോള്‍ ഇന്റര്‍നെറ്റിന് മുന്നില്‍ ചടഞ്ഞുകൂടാന്‍ സാധ്യതയുണ്ട്. അമിതമായ പരീക്ഷണസ്വഭാവം പ്രകടിപ്പിക്കുന്ന, എപ്പോഴും പുതുമകള്‍ തേടുന്ന കുട്ടികളും ഈ ശീലത്തിന് അടിമകളായേക്കാം. ഇന്റര്‍നെറ്റ് അടിമകളായ കൗമാരക്കാര്‍ക്ക് ആശയവിനിമയശേഷി, സമ്മര്‍ദങ്ങളെ നേരിടാനുള്ള കഴിവ് എന്നിവ കുറവാണ്.

പൊതുവെ സ്വപ്നജീവികളായ, സുഹൃദ്ബന്ധങ്ങള്‍ അധികമില്ലാത്ത കുട്ടികളും വേഗം ഇന്റര്‍നെറ്റിന് അടിമകളായേക്കാം. മാതാപിതാക്കള്‍ തമ്മിലുള്ള പൊരുത്തക്കേടുകള്‍, അമിതസ്വാതന്ത്ര്യമുള്ള ഗൃഹാന്തരീക്ഷം, ആവശ്യങ്ങള്‍എല്ലാം സാധിച്ചുകൊടുക്കുന്ന മാതാപിതാക്കള്‍, മാതാപിതാക്കളുടെ അമിത ഇന്റര്‍നെറ്റ് ഉപയോഗം തുടങ്ങിയവയും കുട്ടികളില്‍ ഈ ശീലം വളര്‍ത്താന്‍ കാരണമായേക്കാം. കൗമാരപ്രായക്കാര്‍ ഇന്റര്‍നെറ്റിനെ ഒരു 'സുഹൃത്തായി' കണ്ട് സമയം ചെലവഴിക്കാന്‍ തുടങ്ങുന്നതാണ് ഇന്റര്‍നെറ്റ് അടിമത്തത്തിന്റെ മനശ്ശാസ്ത്രം.
ഡോ. അരുണ്‍ ബി. നായര്‍ from mathrubhumi

അനധികൃത കുടിയേറ്റം: 35 ഇന്ത്യക്കാരെ അറസ്റ്റ് ചെയ്തു

2010-12-11T23:44:00.001-08:00

ലണ്ടന്‍:അനധികൃതമായി ബ്രിട്ടനില്‍ ജോലിചെയ്ത് 35 ഇന്ത്യക്കാരെ അറസ്റ്റ് ചെയ്തു. ഫ്രാന്‍സില്‍ നിന്ന് മതിയായരേഖകളില്ലാതെ യുകെയിലേക്ക് ഒളിച്ച് കടക്കാന്‍ ശ്രമിച്ച ആറ് ഇന്ത്യക്കാരും പിടിയിലായിട്ടുണ്ട്.

വെസ്റ്റ് വെയില്‍സിലെ ഒരു നിര്‍മാണ കമ്പനിയില്‍ നിന്നാണ് 28പേരെ യു കെ ബോര്‍ഡര്‍ ഏജന്‍സി അറസ്റ്റ് ചെയ്തത്. വിസാ കാലാവധി കഴിഞ്ഞിട്ടും ബ്രിട്ടനില്‍ തങ്ങിയതിനും അനധികൃതമായി ജോലി ചെയ്തതിനുമാണ് ഇവര്‍ക്കെതിരെ കേസുളളത്. ലങ്കാഷെയറില്‍ നിന്നാണ് ഏഴുപേരെ അറസ്റ്റ് ചെയ്തത്.

നിയമവിരുദ്ധമായി ഷോപ്പുകളിലും കാറ്ററിംഗ് സ്ഥാപനങ്ങളിലും ജോലിചെയ്തതിനാണ് ഇവര്‍ക്കെതിരെ അറസ്റ്റ്. പിടികൂടിയവരെ ഇന്ത്യയിലേക്ക് തിരിച്ചയക്കാനുളള നടപടികള്‍ പൂര്‍ത്തിയാരക്കി വരുകയാണ് ഉദ്യോഗസ്ഥര്‍ . മതിയായ രേഖകളില്ലാത്തവരെ ജോലിക്കുവച്ച സ്ഥാപനങ്ങള്‍ക്കും വ്യക്തികള്‍ക്കും 10000 പൗണ്ട് പിഴചുമത്തും.

ക്രിസ്മസ് ട്രീയുമായി വന്ന ലോറിയില്‍ ഒളിച്ചിരുന്നാണ് ഇന്ത്യക്കാരായ ആറു പേര്‍ ഫ്രാന്‍സ് വഴി യു കെയിലെക്ക് കടക്കാന്‍ ശ്രമിച്ചത്.എന്നാല്‍ ഡഗആഅ യുടെ സ്‌നിഫര്‍ ഡോഗ് ഇവരുടെ ലോറിയിലെ സാന്നിധ്യം മണത്തറിയുകയായിരുന്നു.പിടിക്കപ്പെട്ട ഇവരെ ഫ്രാന്‍സിനു കൈമാറി.

ജൂലൈ മുതലാണ് അനധികൃത കുടിയേറ്റക്കാരെ കണ്ടെത്താന്‍ ബ്രിട്ടനില്‍ വ്യാപകമായ തിരച്ചില്‍ ആരംഭിച്ചത്. ഇതിനകം വിവിധരാജ്യങ്ങളില്‍ നിന്നുളള 800 പേരെ പിടികൂടി.

ജിദ്ദയില്‍ പ്രവാസി സഹായ നിധി

2010-12-11T23:37:00.000-08:00

ജിദ്ദ: കൊണ്ടോട്ടി തുറക്കല്‍ ജിദ്ദ-മെക്ക റിലീഫ് കമ്മറ്റിയുടെ നേതൃത്വത്തില്‍ പ്രവാസി സഹായനിധി രൂപവല്‍ക്കരിക്കാന്‍ തീരുമാനിച്ചു. സൗജന്യ ഇന്‍ഷുറന്‍സ് പരിരക്ഷ, അടിയന്തിര സാമ്പത്തിക സഹായം, അവധിക്ക് നാട്ടിലേയ്ക്ക് പോകുന്നവര്‍ക്ക് പലിശ രഹിത വായ്പ തുടങ്ങിയ സേവനങ്ങള്‍ ലഭിക്കും.

കമ്മറ്റിയുടെ ഭാരവാഹികള്‍: ഖുലാം മുഹമ്മദ്(ചെയര്‍മാന്‍), അബ്ദുറഹ്മാന്‍, സി.കെ റസാഖ്(വൈസ് ചെയര്‍മാന്‍), കബീര്‍ പാണ്ടിക്കാടന്‍(കണ്‍വീനര്‍), അഷ്‌റഫ് പള്ളത്തില്‍, അനീസ് അസ് ലം(ജോ), അബ്ദുള്‍ ഹമീദ്(ട്രഷറര്‍).

കൂടുതല്‍ വിവരങ്ങള്‍ക്ക് ഭാരവാഹികളുമായി ബന്ധപ്പെടേണ്ടതാണ്. യോഗത്തില്‍ അസ് ലം പള്ളത്തില്‍ അധ്യക്ഷതവഹിച്ചു. റഹ്മത്തലി, കുഞ്ഞാവ, ബാവ, അഷറഫ്, കബീര്‍ എ

മക്ക, താഇഫ് ശുദ്ധജല വിതരണം സ്വകാര്യ മേഖലക്ക്

2010-12-11T22:07:00.001-08:00

റിയാദ്: സൗദി അറേബ്യയിലെ ശുദ്ധജല വിതരണം സ്വകാര്യവത്കരിക്കുന്നതിന്റെ ഭാഗമായി മക്ക, താഇഫ് നഗരങ്ങളിലെ ജലവിതരണത്തിന്റെ സ്വകാര്യവത്കരണം അടുത്ത മാസം ആരംഭിക്കുമെന്ന് ബന്ധപ്പെട്ട കേന്ദ്രങ്ങള്‍ വ്യക്തമാക്കി. രാജ്യത്തെ 15 നഗരങ്ങളിലെ ജലവിതരണം സ്വകാര്യവത്കരിക്കുന്നതിന്റെ ഭാഗമായാണ് മക്ക, താഇഫ് നഗരങ്ങളില്‍ അടുത്ത മാസം മുതല്‍ സ്വകാര്യവത്കരണം ആരംഭിക്കുന്നത്. പദ്ധതി പൂര്‍ത്തിയാകുമ്പോള്‍ രാജ്യത്തെ 60 ശതമാനം ജലവിതരണവും സ്വാകാര്യ മേഖലക്ക് കീഴിലാവും.
നാഷനല്‍ വാട്ടര്‍ കമ്പനിക്കാണ് സ്വകാര്യ മേഖലയില്‍ ജലവിതരണത്തിന് മന്ത്രാലയം അനുമതി നല്‍കിയിരിക്കുന്നത്. റിയാദ്, ജിദ്ദ നഗരങ്ങളില്‍ ജലവിതരണ ശൃംഖല സ്ഥാപിച്ച ശേഷമാണ് പദ്ധതി ജോലികളുമായി കമ്പനി മക്കയില്‍ പ്രവര്‍ത്തനം തുടങ്ങിയത്. റിയാദിലും ജിദ്ദയിലുമായി വരിക്കാരുടെ സേവനത്തിനായി അഞ്ച് ഓഫീസുകള്‍ വെള്ള കമ്പനി തുറന്നിട്ടുണ്ട്. രാജ്യത്തിന്റെ ഏത് ഭാഗത്തുനിന്ന് വിളിച്ചാലും സേവനം നല്‍കാവുന്ന തരത്തില്‍ ഏകീകൃത നമ്പറും പ്രാബല്യത്തിലുണ്ട്.
റിയാദ്, ജിദ്ദ നഗരങ്ങളില്‍ പ്രവര്‍ത്തനമാരംഭിച്ച കമ്പനിയുടെ സേവന നിലവാരം ധനകാര്യ മന്ത്രി ഡോ. ഇബ്രാഹീം അല്‍അസ്സാഫ് വിലയിരുത്തിയിരുന്നു. സ്വകാര്യ കമ്പനിയുടെ ഭാവിപരിപാടികളെ ജല, ഊര്‍ജ മന്ത്രാലയം കഴിഞ്ഞ ദിവസം അവലോകനം ചെയ്യുകയുണ്ടായി. സ്വകാര്യവത്കരണത്തിലൂടെ ഉപഭോക്താക്കള്‍ക്ക് കൂടുതല്‍ മെച്ചപ്പെട്ട സേവനം ഉറപ്പുവരുത്താനാവുമെന്ന് ജല, ഊര്‍ജ മന്ത്രി എന്‍ജിനീയര്‍ അബ്ദുല്ല ബിന്‍ അബ്ദുറഹ്മാന്‍ അല്‍ഹുസൈന്‍ വ്യക്തിമാക്കി.

അബൂദബിയില്‍ വന്‍ പരിപാടികള്‍ക്ക് പോകുന്നവര്‍ ഇനി കൂടുതല്‍ ടാക്‌സി നിരക്ക് നല്‍കണം

2010-12-11T22:02:00.000-08:00

അബൂദബി: തലസ്ഥാന നഗരത്തില്‍ നടക്കുന്ന തിരക്കേറിയ വന്‍ പരിപാടികള്‍ക്ക് ടാക്‌സി വിളിച്ചു പോകുന്നവര്‍ ഇനി കൂടുതല്‍ നിരക്ക് നല്‍കേണ്ടി വരും. അബൂദബിയിലെ ഏഴ് പ്രധാന സില്‍വര്‍ ടാക്‌സി കമ്പനികളെ നിയന്ത്രിക്കുന്ന ട്രാന്‍സ് എ.ഡി കമ്പനിയാണ് ഈ തീരുമാനമെടുത്തത്. ഇത്തരം പരിപാടി നടക്കുന്ന സ്ഥലങ്ങളിലേക്ക് സ്റ്റാര്‍ട്ടിങ് നിരക്ക് 20 ദിര്‍ഹമാണ്. കിലോമീറ്ററിന് 1.5 ദിര്‍ഹവും ഈടാക്കുമെന്ന് ടാക്‌സി കമ്പനികളെ ഉദ്ദരിച്ച് അറബി പത്രം 'ഇത്തിഹാദ്' റിപ്പോര്‍ട്ട് ചെയ്തു.
പ്രധാനമായും നഗരത്തിന് പുറത്ത് നടക്കുന്ന ഇത്തരം പരിപാടി സ്ഥലങ്ങളിലേക്ക് പോകുമ്പോള്‍ ഗതാഗതക്കുരുക്കിലകപ്പെട്ടും അവിടുത്തെ വാഹനത്തിരക്ക് മൂലവും ഏറെ സമയം നഷ്ടപ്പെടുന്നത് കണക്കിലെടുത്താണ് നിരക്കുയര്‍ത്തിയതെന്ന് ട്രാന്‍സ് എ.ഡി വൃത്തങ്ങള്‍ പറഞ്ഞു. യാത്രക്കാര്‍ക്കുമേല്‍ ചുമത്തുന്ന അധിക നിരക്കല്ല ഇതെന്നും ഏറെ സമയം പാഴാകുന്നതിനുള്ള നഷ്ടപരിഹാരമായാണ് അധിക തുക ഈടാക്കുന്നതെന്നും അവര്‍ വിശദീകരിക്കുന്നു.
അടുത്തിടെ ഇന്ധന വില ഉയര്‍ന്നതിനെ തുടര്‍ന്ന് അബൂദബിയില്‍ ടാക്‌സി നിരക്ക് വര്‍ധിപ്പിച്ചിരുന്നു. തുടക്കത്തില്‍ മൂന്ന് ദിര്‍ഹമും തുടര്‍ന്നുള്ള ഓരോ 750 മീറ്ററിനും ഒരു ദിര്‍ഹം വീതവുമാണ് ഇപ്പോളത്തെ നിരക്ക്. നേരത്തേ ഒരു കിലോമീറ്ററിനായിരുന്നു ഒരു ദിര്‍ഹം ഈടാക്കിയിരുന്നത്.
പഴയ ടാക്‌സികള്‍ക്ക് പകരം ട്രാന്‍സ് എ.ഡി സില്‍വര്‍ ടാക്‌സികള്‍ ആരംഭിച്ചപ്പോളാണ് നിരക്കുഘടന പരിഷ്‌കരിച്ചത്.
6,500 ഓളം പുതിയ സില്‍വര്‍ ടാക്‌സികളാണ് ട്രാന്‍സ് എ.ഡിക്ക് കീഴില്‍ സര്‍വീസ് നടത്തുന്നത്. ഒരു വര്‍ഷത്തിനുള്ളില്‍ ഇത് 9,000 ആക്കുവാന്‍ അവര്‍ക്ക് പദ്ധതിയുണ്ട്. നാല് വര്‍ഷം മുമ്പ് അവര്‍ സില്‍വര്‍ ടാക്‌സി രംഗത്തിറക്കിയതോടെയാണ് വര്‍ഷങ്ങേളോളം അബൂദബി വീഥികളില്‍ നിറഞ്ഞുനിന്നിരുന്ന വെള്ളയും മഞ്ഞയും നിറമുള്ള കാറുകള്‍ അപ്രത്യക്ഷമായി തുടങ്ങിയത്. ഇപ്പോള്‍ ഇത്തരം 100 ടാക്‌സികള്‍ മാത്രമേയുള്ളൂ. അടുത്ത വര്‍ഷം കൂടുതല്‍ ടാക്‌സികള്‍ നിരത്തിലിറങ്ങുന്നതോടെ ഇവയും അപ്രത്യക്ഷമാകും.
യു.എ.ഇ സ്വദേശികളുടെ ഉടമസ്ഥതയിലുള്ളതായിരുന്നു പഴയ ടാക്‌സികള്‍. ഇവര്‍ക്ക് നഷ്ടപരിഹാരം നല്‍കിയാണ് ഗതാഗത വകുപ്പ് പുതിയ ടാക്‌സികള്‍ നിരത്തിലിറക്കിയത്. ഓരോ ടാക്‌സി ഉടമക്കും പ്രതിമാസം 1000 ദിര്‍ഹം വീതം നല്‍കും.
25 വര്‍ഷത്തേക്കാണിത്. അവ ഓടിച്ചിരുന്ന ഡ്രൈവര്‍മാര്‍ക്ക് പുതിയ ടാക്‌സി കമ്പനികളില്‍ ജോലിയും നല്‍കി. ഈ പദ്ധതി നടപ്പാക്കാന്‍ 2006ല്‍ ഗതാഗത വകുപ്പിന്റെ നേതൃത്വത്തില്‍ രൂപവത്കരിച്ചതാണ് ട്രാന്‍സ് എ.ഡി. തവസുല്‍ ട്രാന്‍സ്‌പോര്‍ട്ടേഷന്‍ കമ്പനി, കാര്‍സ് ടാക്‌സി, നാഷണല്‍ ട്രാന്‍സ്‌പോര്‍ട്ടേഷന്‍ കമ്പനി, അല്‍ ഗസല്‍ ട്രാന്‍സ്‌പോര്‍ട്ട്, ക്യു-ലിങ്ക് ട്രാന്‍സ്‌പോര്‍ട്ട്, എമിറേറ്റ്‌സ് ടാക്‌സി, അറേബ്യ ടാക്‌സി എന്നിവയെ നിയന്ത്രിക്കുന്നത് ട്രാന്‍സ് എ.ഡിയാണ്.

പ്രത്യേക പരിചരണം ആവശ്യമായവര്‍ക്ക് അബൂദബി പൊലീസിന്റെ 24 മണിക്കൂര്‍ സേവനം

2010-12-11T21:59:00.000-08:00

അബൂദബി: ഒരു എസ്.എം.എസ് സന്ദേശമോ ഫോണ്‍കോളോ ലഭിച്ചാലുടന്‍ പ്രത്യേക പരിചരണം ആവശ്യമായവര്‍ക്ക് സഹായമെത്തിക്കുന്ന അബൂദബി പൊലീസിന്റെ പുതിയ സേവന പദ്ധതിക്ക് ഇന്ന് തുടക്കമാകും. 24 മണിക്കൂറും ലഭ്യമാകുന്ന ഈ സേവനം സായിദ് ഹയര്‍ ഓര്‍ഗനൈസേഷന്‍ ഫൊര്‍ ഹ്യുമാനിറ്റേറിയന്‍ കെയര്‍ ആന്റ് സ്‌പെഷല്‍ നീഡ്‌സ് ആന്റ് മൈനേഴ്‌സ് അഫയേഴ്‌സിന്റെ സഹകരണത്തോടെയാണ് നടപ്പാക്കുന്നതെന്ന് അബൂദബി പൊലീസ് സെന്‍ട്രല്‍ ഓപറേഷന്‍സ് ഡിവിഷന്‍ മേധാവി ലെഫ്റ്റനന്റ് കേണല്‍ നാസര്‍ സുലൈമാന്‍ അല്‍ മസ്‌കരി പറഞ്ഞു. ഐ.ടി. ആന്റ് കമ്യൂണിക്കേഷന്‍സ് വിഭാഗത്തിന്റെയും അബൂദബി ഡ്രൈവേഴ്‌സ് ആന്റ് വെഹിക്കിള്‍ ലൈസന്‍സിങ് വിഭാഗത്തിന്റെയും പങ്കാളിത്തം പദ്ധതിക്കുണ്ട്. പ്രത്യേക പരിചരണം ആവശ്യമായവര്‍ക്ക് അടിയന്തര സഹായം നേരിട്ടെത്തിക്കണമെന്നുള്ള പൊലീസിന്റെ പ്രതിബദ്ധതയുടെ ഭാഗമായാണ് പുതിയ പരിപാടി ആവിഷ്‌കരിച്ചിരിക്കുന്നതെന്ന് അദ്ദേഹം പറഞ്ഞു. ഇതിനായി അബൂദബി പൊലീസ് ഓപറേഷന്‍ റൂമില്‍ ആവശ്യമായ സംവിധാനങ്ങള്‍ ഒരുക്കിയിട്ടുണ്ട്. സായിദ് ഹയര്‍ ഓര്‍ഗനൈസേഷനില്‍ രജിസ്റ്റര്‍ ചെയ്തിട്ടുള്ള, പ്രത്യേക പരിചരണം ആവശ്യമായ എല്ലാവരുടെയും ഡേറ്റാബേസും ഇവിടെ ലഭ്യമാണ്. സന്ദേശം ലഭിച്ചാലുടന്‍ ഏത് തരത്തിലുള്ള സേവനമാണ് ലഭ്യമാക്കേണ്ടത് എന്ന് കണ്ടെത്തി അതത് പൊലീസ് യൂണിറ്റിനെ അറിയിക്കും.
ആംബുലന്‍സ്, വനിതാ പൊലീസ് ഓഫീസര്‍ തുടങ്ങിയ അനുബന്ധ സേവനങ്ങളും ലഭ്യമാക്കും. 24 മണിക്കൂറും സേവനം എത്തിക്കും വിധത്തില്‍ ഓപറേഷന്‍ റൂം സുസജ്ജമാണെന്ന് വിഷ്വല്‍ സര്‍വൈലന്‍സ് സെക്ഷന്‍ ഡയറക്ടര്‍ കാപ്റ്റന്‍ ഫാരിസ് സലീം അല്‍ അമിരി പറഞ്ഞു.

ക്യാന്‍സര്‍ തടയാന്‍ മധുരക്കിഴങ്ങ്

2010-12-11T21:48:00.001-08:00

സ്വീറ്റ് പൊട്ടറ്റോ അഥവാ മധുരക്കിഴങ്ങ്, മുമ്പൊക്കെ നമ്മള്‍ പാടവരമ്പിലും പറമ്പിലുമെല്ലാം നട്ട വളര്‍ത്തിയിരുന്ന മധുരക്കിഴങ്ങ് കാഴ്ചയ്ക്ക് അത്ര സുന്ദരനല്ലെങ്കിലും രുചിയില്‍ മുന്നിലാണ്.

അടുത്തിടെ നടന്ന ഒരു പഠനത്തില്‍ മധുരക്കിഴങ്ങിന്റെ അപൂര്‍വ്വ ഗുണങ്ങളാണ് കണ്ടെത്തിയിരിക്കുന്നത്. മനുഷ്യരില്‍ കാന്‍സര്‍ വരുന്നത് തടയാന്‍ മധുരക്കിഴങ്ങിന് കഴിയുമത്രേ.

പ്രായമാകുന്നതിന്റെ ലക്ഷണങ്ങള്‍ ഇല്ലാതാക്കാന്‍ മധുരക്കിഴങ്ങിനു കഴിയുമെന്ന് പണ്ടുമുതലേ വിശ്വാസമുണ്ടായിരുന്നു. പക്ഷേ ക്യാന്‍സര്‍ പ്രതിരോധ ശോഷിയെക്കുറിച്ച് അറിവില്ലായിരുന്നു.

ക്യാന്‍സര്‍ പ്രതിരോധശേഷിയെപ്പറ്റിയും വ്യക്തമായതെളിവുകള്‍ ലഭിച്ചതോടെ എല്ലാഗുണങ്ങളുമുള്ള മധുരക്കിഴങ്ങ് ഗവേഷകര്‍ വികസിപ്പിച്ചെടുത്തിട്ടുണ്ട്.

കാന്‍സാസ് സര്‍വകലാശാലയിലാണ് ഇതിന്റെ ഗവേഷണം നടന്നത്. അധികം വില കൊടുക്കാതെ വാങ്ങാന്‍ കിട്ടുന്ന ഒന്നാണ് മധുരക്കിഴങ്ങ്. മധുരക്കിഴങ്ങെന്നാണ് പേരെങ്കിലും ഇത് പ്രമേഹം നിയന്ത്രിക്കാനും ഓര്‍മ്മശക്തി നിലനിര്‍ത്താനമെല്ലാം സഹായകമാണ്.

ഒപ്പം തന്നെ ഹൃദയാരോഗ്യത്തിനും മധുരക്കിഴങ്ങ് നല്ലതാണ്. മോണിങ് ഗ്ലോറി സസ്യകുടുംബത്തില്‍പ്പെട്ടതാണ് സ്വീറ്റ് പൊട്ടാറ്റോ. കാര്‍ബോഹൈഡ്രേറ്റ് സമ്പുഷ്ടമാണിത് ഒപ്പം തന്നെ താഴ്ന്ന കലോറിയും ഇതിന്റെ പ്രത്യേകതയാണ്.

ഇതിലടങ്ങിയിരിക്കുന്ന വിറ്റമിന്‍ ഇ, സി എന്നിവയും ബീറ്റ കരോട്ടിനുമാണ് ഹൃദയത്തെ ആരോഗ്യകരമാക്കുകയും ഒപ്പം കാന്‍സര്‍ തടയുകയും ചെയ്യുന്നത്. നാരുകളുടെ കലവറകൂടിയാണിത്. ഇതുകൊണ്ടാണ് രക്തത്തിലെ പഞ്ചസാരയുടെ അളവ് നിയന്ത്രിച്ച് നിര്‍ത്താന്‍ ഇതിന് ശരീരത്തെ സഹായിക്കാന്‍ കഴിയുന്നത്.

ബെസ്റ്റ് ആക്ടര്‍--മമ്മൂട്ടി

2010-12-11T21:01:00.000-08:00

മലയാളത്തിലെ ബെസ്റ്റ് ആക്ടര്‍ താന്‍ തന്നെയാണെന്ന് മമ്മൂട്ടി ഒരിയ്ക്കല്‍ കൂടി തെളിയിക്കുന്നു. താരത്തിന്റെ ഏറ്റവും പുതിയ ചിത്രമായ ബെസ്റ്റ് ആക്ടറിന് തകര്‍പ്പന്‍ റിപ്പോര്‍ട്ടുകളാണ് ഫസ്റ്റ് ഡേ വന്നിരിയ്ക്കുന്നത്.

ഫാന്‍സിനെയും ഫാമിലിയെയും ഒരുപോലെ തൃപ്തിപ്പെടുത്തുന്ന വിധത്തില്‍ കോമഡിയും സെന്റിമെന്റ്‌സും ഇഴചേര്‍ത്ത് ഒരുമുഴു നീള എന്റര്‍ടൈനറാണ് സംവിധായകന്‍ മാര്‍ട്ടിന്‍ പ്രാക്കാട്ട് ഒരുക്കിയിരിക്കുന്നതെന്ന് പടം കണ്ടിറങ്ങുന്നവര്‍ പറയുന്നു.

മമ്മൂട്ടിയുടെ വ്യത്യസ്തമായ ഇന്‍ട്രൊഡക്ഷനോടെയുള്ള ബെസ്റ്റ് ആക്ടറിന്റെ ഫസ്റ്റ് ഹാഫില്‍ കോമഡിയ്ക്കാണ് പ്രാമുഖ്യം നല്‍കിയിരിക്കുന്നത്. ഇന്റര്‍വെല്‍ പഞ്ചും ക്ലൈമാക്‌സിന് തൊട്ടുമുമ്പുള്ള സര്‍പ്രൈസ് ട്വിസ്റ്റും ബെസ്റ്റ് ആക്ടറിന്റെ ഹൈലൈറ്റാവുമെന്ന് വിലയിരുത്തല്‍. ലാല്‍, നെടുമുടി വേണു, സലീം കുമാര്‍, ശ്രീനിവാസന്‍ തുടങ്ങിയവരുടെ അഭിനയവും ഏറെ പ്രശംസ പിടിച്ചുപറ്റുന്നുണ്ട്.

തിയറ്റര്‍ റിപ്പോര്‍ട്ടുകള്‍ ശരിയാണെങ്കില്‍ മമ്മൂട്ടിയുടെ സെലക്ഷന്‍ വീണ്ടും ലക്ഷ്യം കണ്ടുവെന്ന് പറയേണ്ടി വരും. പോക്കിരി രാജയ്ക്ക് ശേഷം മറ്റൊരു നവാഗത ചിത്രത്തിലൂടെ മമ്മൂട്ടി വീണ്ടും ബോക്‌സ് ഓഫീസില്‍ അദ്ഭുതങ്ങള്‍ കാണിയ്ക്കുകയാണ്.

ഇതൊക്കെ പറയുമ്പോഴും ആദ്യദിനത്തിലെ പ്രധാന പ്രേക്ഷകര്‍ ഫാന്‍സുകാരാണെന്നതിനാല്‍ വന്നിരിയ്ക്കുന്ന പ്രതികരണങ്ങളില്‍ എത്രത്തോളം നിജാവസ്ഥയുണ്ടെന്ന കാര്യത്തില്‍ ഉറപ്പുപറയാനാവില്ല. വരുംദിവസങ്ങളില്‍ ബെസ്റ്റ് ആക്ടറിന്റെ യഥാര്‍ത്ഥ വിധി നിര്‍ണയിക്കപ്പെടുമെന്ന് തന്നെ കരുതാം.

അഭിനയം യഥാര്‍ത്ഥമായി; നടനെ ഗാര്‍ഡ്‌ വെടിവച്ചുകൊന്നു!

2010-12-11T05:51:00.001-08:00

അഭിനയിക്കാന്‍ ഒരു റോള്‍ കിട്ടിയപ്പോള്‍ അതു മുഖം മറച്ചിട്ടാണെങ്കിലും കിര്‍ക്‌ അബേല്ല ഏറെ ആഹ്‌ളാദിച്ചു. ഫിലിപ്പീന്‍സില്‍ അബേല്ല അഭിനയിക്കുന്ന രംഗം ചിത്രീകരിക്കാന്‍ തുടങ്ങുമ്പോഴും അദ്ദേഹം ഏറെ പ്രസന്നവദനായിരുന്നു. മുഖംമൂടി ധരിച്ച ഒരു കൊലപാതകിയുടെ വേഷമായിരുന്നു അബേലയ്‌ക്ക് രംഗത്തിലുണ്ടായിരുന്നത്‌. തോക്കുമായി രണ്ടു പേരെ വാഹനത്തില്‍ പിന്തുടരുന്ന രംഗം. സ്‌റ്റാര്‍ട്ട്‌ കാമറ ആക്ഷന്‍ പറഞ്ഞതോടെ അബേല്ല അഭിനയം തുടങ്ങി. അപ്പോഴാണ്‌ അപ്രതീക്ഷിതമായി ഒരാളെത്തുന്നതും അബേല്ലയെ വെടിവച്ചിടുന്നതും..

രംഗം കണ്ടുനിന്നവര്‍ക്ക്‌ ആദ്യം മനസിലായില്ല. മനഃസാന്നിധ്യം തിരിച്ചുപിടിക്കുമ്പോഴേക്ക്‌ അബേല വെടിയേറ്റു വീണിരുന്നു. വെടിവച്ചത്‌ ഫിലിപ്പീന്‍സിലെ ഒരു സെക്യൂരിറ്റി ഗാര്‍ഡാണ്‌. സിനിമയല്ല യാഥാര്‍ത്ഥ്യമാണ്‌ എന്നു തെറ്റിദ്ധരിച്ചാണ്‌ ഗാര്‍ഡായ എഡ്‌ഡി കുയിസോണ്‍ ഇതു ചെയ്‌തത്‌. ജനങ്ങളില്‍ ചിലര്‍ അദ്ദേഹത്തോടു പരാതി പറയുകയും ചെയ്‌തിരുന്നു. ചെന്നു നോക്കുമ്പോള്‍ കാണുന്നതാകട്ടെ മുഖം മൂടി ധരിച്ച്‌ രണ്ടു പേര്‍ പായുന്നതും. പിന്നെ വൈകിയില്ല, വെടിവച്ചിട്ടു. 32 വയസുകാരനായ അബേലയുടെ പിന്നിലാണ്‌ വെടിയേറ്റത്‌. ഫിലിപ്പീന്‍സിന്റെ വടക്കന്‍ മേഖലയിലെ സെബുവിലാണ്‌ സംഭവം നടന്നത്‌.

പ്ലാസ്‌റ്റിക്‌ തോക്കുകളുമായാണ്‌ അബേലയും സഹനടനും അഭിനയിച്ചിരുന്നത്‌. ഷൂട്ടിങിനെക്കുറിച്ച്‌ അറിയിച്ചിട്ടില്ലെന്നാണ്‌ പോലീസിന്റെ പക്ഷം. ഗ്രാമവാസികള്‍ പരാതിപ്പെട്ടതിനെ തുടര്‍ന്നാണ്‌ സെക്യൂരിറ്റി ഗാര്‍ഡ്‌ എത്തിയത്‌. കണ്ട രംഗമാകട്ടെ സംശയം സാധൂകരിക്കുന്നതും. അടുത്തിടെയായി മോട്ടോര്‍ ബൈക്കിലെത്തുന്ന ഇത്തരം കൊള്ളസംഘങ്ങള്‍ നിരവധി പേരുടെ ജീവനെടുത്തതും സെക്യൂരിറ്റി ഗാര്‍ഡിനെ ഉണര്‍ന്നു പ്രവര്‍ത്തിക്കാന്‍ പ്രേരിപ്പിച്ചു. ഗോയിങ്‌ സംവേര്‍ എന്ന ചിത്രത്തിന്റെ ഷൂട്ടിങ്ങാണ്‌ ചോരക്കളമായത്‌. ചെലവ്‌ കുറയ്‌ക്കാനായാണ്‌ നാട്ടുകാരായ ചിലരെ വച്ച്‌ പ്രാധാന്യമില്ലത്ത ചില രംഗങ്ങള്‍ ചിത്രീകരിക്കാന്‍ ഡയറക്‌ടര്‍ അലന്‍ ലിഡ്യാര്‍ഡ്‌ തീരുമാനിച്ചത്‌.

അഭിനേതാവിനെ വെടിവച്ചിട്ട സെക്യൂരിറ്റി ഗാര്‍ഡിനെതിരേ കൊലക്കുറ്റത്തിനു കേസെടുക്കാനാണ്‌ സാധ്യത. നൈറ്റ്‌ വാച്ച്‌മാനെന്ന നിലയില്‍ ഒരു സ്വകാര്യ സ്‌ഥാപനം നിയമിച്ച വ്യക്‌തിയാണ്‌ കുയിസോണ്‍. ആയുധം കൈവശം വയ്‌ക്കാന്‍ അധികാരമില്ലാത്ത വ്യക്‌തിയാണ്‌ ഇയാള്‍. അനുമതിയില്ലാതെ സിനിമ ചിത്രീകരിച്ചതിന്‌ ഡയറക്‌ടര്‍ അടക്കമുള്ളവരും കുടുങ്ങുമെന്നാണ്‌ സൂചന. ഷൂട്ടിങ്‌ പൊല്ലാപ്പായതിന്റെ വിഷമത്തിലാണ്‌ ചിത്രത്തിന്റെ മറ്റ്‌ അണിയറപ്രവര്‍ത്തകര്‍.

ശ്ശൊ.. ഈ സൗന്ദര്യം ഒരു ശാപമായല്ലോ!

2010-12-11T05:50:00.001-08:00

സുന്ദരികളായ സ്‌ത്രീകള്‍ക്കു ജോലി ലഭിക്കാന്‍ സാധ്യത കൂടുതലാണെന്നാണ്‌ പൊതുവേ പറയുന്നത്‌. എന്നാല്‍, സൗന്ദര്യമുള്ള സ്‌ത്രീകള്‍ക്ക്‌ ജോലി സാധ്യത കുറയുമെന്നാണ്‌ പുതിയ പഠനങ്ങള്‍ വെളിപ്പെടുത്തുന്നത്‌. അമേരിക്കയിലെ ഒരു സംഘം സാമൂഹ്യശാസ്‌ത്രജ്‌ഞര്‍ നടത്തിയ പഠനങ്ങളിലാണ്‌ സൗന്ദര്യം സ്‌ത്രീകള്‍ക്കു ശാപമാണെന്നു കണ്ടെത്തിയത്‌. യൂറോപ്പിലും ഇസ്രയേലിലും നടത്തിയ പഠനങ്ങളിലാണ്‌ പുതിയ വെളിപ്പെടുത്തല്‍.

വിവിധ ജോലികള്‍ക്കായി 5,312 അപേക്ഷകള്‍ അയച്ചാണ്‌ അമേരിക്കയിലെ ശാസ്‌ത്രജ്‌ഞര്‍ പഠനം നടത്തിയത്‌. ഇതില്‍ 2,656 അപേക്ഷകള്‍ വീതം സ്‌ത്രീയുടെയും പുരുഷന്റേതുമായിരുന്നു. അപേക്ഷകളില്‍ പകുതിയെണ്ണത്തിലും ഫോട്ടോ ഉള്‍പ്പെടുത്തിയിരുന്നില്ല. ഫോട്ടോ ഉള്‍പ്പെടുത്തിയ അപേക്ഷകളില്‍ സൗന്ദര്യമുള്ള സ്‌ത്രീകളും പുരുഷന്മാരും ഉള്‍പ്പെട്ടിരുന്നു. ഈ ഗവേഷണങ്ങളില്‍നിന്ന്‌ കൗതുകകരമായ വസ്‌തുതകളാണ്‌ വെളിപ്പെട്ടതെന്നാണ്‌ ഗവേഷകര്‍ പറയുന്നത്‌. ജോലിക്കായുള്ള പുരുഷന്മാരുടെ അപേക്ഷകളില്‍നിന്ന്‌ സൗന്ദര്യമുള്ളവരെയാണ്‌ കൂടുതലായും തൊഴിലുടമകള്‍ തെരഞ്ഞെടുത്തതെന്നും ഫോട്ടോ ഇല്ലാത്ത അപേക്ഷകരെയും മുഖസൗന്ദര്യം ഏറെയില്ലാത്ത പരുഷന്മാരെയും തൊഴിലുടമകള്‍ പരിഗണിച്ചില്ലെന്നുമാണ്‌ കണ്ടെത്തല്‍.

എന്നാല്‍, സ്‌ത്രീ അപേക്ഷകളില്‍ നേര്‍വിപരീതമായിട്ടായിരുന്നു തൊഴിലുടമകളുടെ പ്രതികരണം. സുന്ദരികളായ തൊഴിലന്വേഷകരെ ഒഴിവാക്കിയ തൊഴിലുടമകള്‍ ഫോട്ടോ ഇല്ലാത്ത അപേക്ഷകളാണ്‌ കൂടുതല്‍ പരിഗണിച്ചത്‌. അതോടൊപ്പം തന്നെ മുഖസൗന്ദര്യമേറെയില്ലാത്ത സ്‌ത്രീകളെയും ജോലിക്കായി തെരഞ്ഞെടുത്തു. ഇവര്‍ നടത്തിയ മറ്റൊരു പരീക്ഷണത്തില്‍ സുന്ദരികളായ ജീവനക്കാര്‍ക്ക്‌ മറ്റു ജീവനക്കാരികളേക്കാള്‍ ശമ്പളം ലഭിക്കുന്നുണ്ടെന്ന്‌ കണ്ടെത്തിയിരുന്നു. സ്‌ത്രീകള്‍ക്കിടയിലുള്ള അസൂയയാണ്‌ സുന്ദരികളെ ജോലിക്കെടുക്കാന്‍ തൊഴിലുടമകളെ വിമുഖരാക്കുന്നതെന്നാണ്‌ അമേരിക്കന്‍ ശാസ്‌ത്രജ്‌ഞരുടെ നിഗനം.

സര്‍ക്കാര്‍ ജോലിക്ക് ഒരു അച്ഛന്‍ മുടക്കിയത് 23 ലക്ഷം!

2010-12-11T05:47:00.001-08:00

കേരളത്തില്‍ സര്‍ക്കാര്‍ ജോലിയോടുള്ള അഭിനിവേശം എത്രമാത്രമുണ്ട് എന്നതിനുള്ള തെളിവാണ് പിഎസ്‌സി നിയമന തട്ടിപ്പുമായി ബന്ധപ്പെട്ട് പുറത്തുവരുന്ന കഥകള്‍ വ്യക്തമാക്കുന്നത്. മക്കള്‍ക്ക് സര്‍ക്കാര്‍ ജോലി ലഭിക്കാന്‍ ഒരച്ഛന്‍ മുടക്കിയ തുക എത്രയെന്നോ? 23 ലക്ഷം! കിടപ്പാടം പണയം വച്ച് എട്ടു ലക്ഷം നല്‍കിയാണ് മറ്റൊരാള്‍ തട്ടിപ്പിലൂടെ ജോലിക്ക് കയറിയത്. ഇതു രണ്ടു പേരുടെ മാത്രം കഥയില്‍ ഒതുങ്ങില്ല. ഓരോ ദിവസവും പുറത്തുവരുന്നത് നിരവധി തട്ടിപ്പിന്റെയും പണ നഷ്ടത്തിന്റെയും കണക്കുകളാണ്.

മൂന്നു മക്കള്‍ക്കു സര്‍ക്കാര്‍ജോലി തരപ്പെടുത്തിയപ്പോള്‍ കൊല്ലം ജില്ലയിലെ അഞ്ചല്‍ സ്വദേശിയായ കൃഷ്ണന്‍കുട്ടി ചെട്ടിയാര്‍ക്കു ചെലവായതാണ് 23 ലക്ഷം രൂപ. കിടപ്പാടം വിറ്റുകിട്ടിയ എട്ടുലക്ഷം രൂപ തട്ടിപ്പു റാക്കറ്റിനു നല്‍കിയാണു മകനെ വില്ലേജ് അസിസ്റ്റന്റാക്കിയതെന്നു മലപ്പുറം ജില്ലയിലെ വള്ളിക്കുന്ന് കുന്നപ്പള്ളി പതിനെട്ടാംവീട്ടില്‍ വിമലിന്റെ അമ്മ ഗീതാലക്ഷ്മി പറയുന്നു. നാട്ടുകാരനായ രവി ഉള്‍പ്പെട്ട നാലംഗസംഘമാണു പണം വാങ്ങിയതെന്നും കിടപ്പാടം പോലും വിറ്റാണു രണ്ടുതവണയായി പണം നല്‍കിയതെന്നും ഗീതാലക്ഷ്മി പറഞ്ഞു. പണം കൊടുത്ത് പിറ്റേന്നുതന്നെ വാളാട് വില്ലേജ് അസിസ്റ്റന്റായി നിയമനം ലഭിച്ചു. ഏപ്രിലിലായിരുന്നു ഇത്.

അസല്‍ സര്‍ട്ടിഫിക്കറ്റും ഫോട്ടോകളും വാങ്ങിയിരുന്നു. വയനാട്ടില്‍ സര്‍ക്കാര്‍ജോലി വാങ്ങിത്തരാമെന്നു പറഞ്ഞു വിമലിനെ സമീപിച്ചതു നാട്ടുകാരനും വിമുക്തഭടനുമായ കോട്ടാക്കളത്തില്‍ രവിയാണ്. ജോലികിട്ടണമെങ്കില്‍ എട്ടു രൂപ കൊടുക്കണമെന്നു പറഞ്ഞു. എട്ടുരൂപയെന്നാല്‍ എണ്‍പതിനായിരം എന്നാണു കരുതിയത്. ആ തുകയുമായി വയനാട്ടിലെത്തി തിരുവനന്തപുരത്തെ ഇന്റര്‍വ്യൂ ബോര്‍ഡിനു മുന്നില്‍ ഹാജരായി. സംഘം ഉദ്ദേശിച്ചത് എട്ടുലക്ഷമാണെന്ന് അവിടെ എത്തിയപ്പോഴാണു ബോധ്യമായത്. ബാക്കി പണം കണ്ടെത്താനുള്ള വിദ്യ പറഞ്ഞുകൊടുത്തതും രവിയാണ്. നാട്ടിലുള്ള ഭൂമിയില്‍ കുറച്ചു വില്‍ക്കാനായിരുന്നു ഉപദേശം.

എട്ടു സെന്റ് ഭൂമി വിറ്റു. സെന്റിനു ലക്ഷത്തിലധികം രൂപ കിട്ടാവുന്ന ഭൂമി 72,000 രൂപയ്ക്കാണു വിറ്റത്. എന്നിട്ടും എട്ടുലക്ഷം തികയാതെ വന്നപ്പോള്‍ വിമലിന്റെ ചെറിയമ്മയുടെ ആഭരണം പണയംവച്ചു. ബോര്‍ഡിലുള്ളവര്‍ തങ്ങളുടെ പേരിനു കോഡ് ഭാഷയാണ് ഉപയോഗിച്ചത്. തട്ടിപ്പിലൂടെയാണു നിയമനമെന്ന് ഇവര്‍ വിമലിനോടു പറഞ്ഞിരുന്നു. ഇത്തരം നിയമനങ്ങള്‍ സംസ്ഥാനത്താകെ നടത്തുന്നുണ്ടെന്നും അവര്‍ പറഞ്ഞു. നിയമനത്തട്ടിപ്പു പുറത്തറിഞ്ഞതോടെ ആത്മഹത്യ ചെയ്യുമെന്നും രാജ്യം വിടുമെന്നും പറഞ്ഞു വിമല്‍ വീടുവിട്ടു പോയി ഗീതാലക്ഷ്മി പറഞ്ഞു.പിന്നാക്കജില്ലയായ വയനാട്ടില്‍ സര്‍ക്കാര്‍ സര്‍വീസില്‍ നേരിട്ടു നിയമനം നടത്തുകയാണെന്നു തെറ്റിദ്ധരിപ്പിച്ച് ഇടനിലക്കാര്‍ പണം കൈപ്പറ്റി തന്നെയും മക്കളെയും കബളിപ്പിക്കുകയായിരുന്നെന്നു കൃഷ്ണന്‍കുട്ടി ചെട്ടിയാര്‍ പറയുന്നു.

സ്വര്‍ണവും വസ്തുവും വിറ്റാണു മൂന്നു മക്കള്‍ക്കും സര്‍ക്കാര്‍ജോലിക്കായി 23 ലക്ഷം രൂപ സംഘടിപ്പിച്ചത്. അഞ്ചല്‍ സ്വദേശികളായ അജിത്ത്, ചന്ദ്രചൂഡന്‍, കല്‍പ്പറ്റ കലക്ടറേറ്റിലെ എ വണ്‍ സെക്ഷന്‍ ക്ലര്‍ക്ക് നെടുമങ്ങാട് സ്വദേശി അഭിലാഷ് എസ്. പിള്ള, വെമ്പായം വേങ്ങവിള സ്വദേശി ജെ.പി എന്നിവരായിരുന്നു ഇടനിലക്കാരെന്നു കൊല്ലം വനിതാ ഹെല്‍പ്‌ലൈനില്‍ മകള്‍ ജ്യോതിക്കൊപ്പമെത്തിയ കൃഷ്ണന്‍കുട്ടി ചെട്ടിയാര്‍ പറഞ്ഞു.

അഞ്ചല്‍ പനച്ചവിളയില്‍ ഇരുമ്പുകട നടത്തിയിരുന്ന മകന്‍ കണ്ണനെയാണ് അജിത്തും ചന്ദ്രചൂഡനും ആദ്യം സമീപിച്ചത്. തങ്ങള്‍ മുഖേന ജോലി നേടിയ കൊട്ടാരക്കര കോട്ടാത്തല കണ്ണങ്കര പുത്തന്‍വീട്ടില്‍ ഗോപകുമാറിന്റെ നിയമനരേഖകള്‍ കാട്ടിയാണു വിശ്വാസ്യത തെളിയിച്ചത്. 11 ലക്ഷം രൂപയാണ് ആവശ്യപ്പെട്ടത്. ഒടുവില്‍ ഒന്‍പതു ലക്ഷത്തിന് ഇടപാടുറപ്പിച്ചു. കല്‍പ്പറ്റയിലെ ലോഡ്ജില്‍ അഭിലാഷ് എസ്. പിള്ളയുടെ സാന്നിധ്യത്തിലാണു പണം കൈമാറിയത്.

ഏഴുലക്ഷം അഭിലാഷും രണ്ടുലക്ഷം അജിത്തും ചന്ദ്രചൂഡനും വീതിച്ചെടുത്തു. ചില പി.എസ്.സി. ഫോമുകളില്‍ ഒപ്പിടാന്‍ ആവശ്യപ്പെട്ടു. അല്‍പ്പ സമയത്തിനകം എ.ഡി.എം. ഒപ്പിട്ട നിയമന ഉത്തരവുമായി അഭിലാഷ് മടങ്ങിയെത്തി. ജൂലൈ 13 നായിരുന്നു ഇടപാട്. തൊട്ടടുത്ത ദിവസങ്ങളില്‍ കണ്ണന്റെ സഹോദരന്‍ ശബരിനാഥിനു ജോലി വാഗ്ദാനവുമായി അജിത്തും ചന്ദ്രചൂഡനും കൃഷ്ണന്‍കുട്ടി ചെട്ടിയാരെ വീണ്ടും സമീപിച്ചു. ഓര്‍ഡര്‍ ശരിയാക്കിക്കിട്ടാന്‍ ജെ.പിയെ കാണാനായിരുന്നു അഭിലാഷിന്റെ നിര്‍ദേശം. വേങ്ങവിള ക്ഷേത്രത്തിനു സമീപം ജെ.പിയുടെ വസതിയിലെത്തി സംസാരിച്ച ശേഷമാണ് പണവുമായി കല്‍പ്പറ്റയ്ക്കു പോയത്. ഏഴു ലക്ഷത്തിനായിരുന്നു ഇടപാട്.

ജൂലൈ 19ന് ലോഡ്ജിലെത്തിയ അഭിലാഷ് പണം കൈപ്പറ്റി നിയമന ഉത്തരവു നല്‍കി. രണ്ടുമാസം കഴിഞ്ഞാണു മകള്‍ക്ക് ജോലി വാഗ്ദാനവുമായി ഇടനിലക്കാരെത്തിയത്. സ്ഥലം വിറ്റു കിട്ടിയ ഏഴുലക്ഷം മുടക്കി ഒക്‌ടോബര്‍ 19ന് നിയമന ഉത്തരവുമായി മാനന്തവാടി താലൂക്ക് ഓഫീസിലെത്തി.തഹസില്‍ദാര്‍ക്കു നിയമന ഉത്തരവ് നല്‍കിയപ്പോള്‍ ഓഫീസ് ക്ലര്‍ക്ക് അഡ്വൈസ് മെമ്മോ തിരക്കി. അവധി എടുത്ത് മടങ്ങിയ ശേഷം, ജോലി വേണ്ടെന്നും പൈസ തിരിച്ചുതന്നാല്‍ മതിയെന്നും അഭിലാഷിനെ അറിയിച്ചു. ഡിസംബര്‍16നു പണം തിരികെ തരാമെന്ന് അഭിലാഷ് സമ്മതിച്ചെങ്കിലും അതിനിടെ തട്ടിപ്പു പുറത്തായി.

വിഎസിന് എതിരേ മനോരമ; പ്രതിരോധം തീര്‍ത്ത് ഏഷ്യാനെറ്റ്: ചാനല്‍ യുദ്ധം പുതിയ തലത്തിലേക്ക്‌

2010-12-11T05:43:00.000-08:00

വിവാദ ആകാശ നഗരം പദ്ധതിയുടെ പേരില്‍ മുഖ്യമന്ത്രിയുടെയും വ്യവസായ മന്ത്രിയുടെയും ഓഫീസുകള്‍ തമ്മില്‍ നിഴല്‍ യുദ്ധം. സംസ്ഥാനത്തെ രണ്ടു സ്വകാര്യ ചാനലുകളെ മുന്നില്‍ നിര്‍ത്തിയാണിത്‌. ഏഷ്യാനെറ്റ്‌ ന്യൂസും മനോരമ ന്യൂസുമാണു മുഖാമുഖം നില്‍ക്കുന്നത്‌. മുഖ്യമന്ത്രി വി.എസ്‌ അച്യുതാനന്ദനു വേണ്ടി ഏഷ്യാനെറ്റ്‌; വി.എസിനെതിരേ മനോരമ. മുഖ്യമന്ത്രിയോ സര്‍ക്കാരോ അറിയാതെ, കൊച്ചിയിലെ ആകാശ നഗരം പദ്ധതിക്കുവേണ്ടി വ്യവസായ പ്രിന്‍സിപ്പല്‍ സെക്രട്ടറി ടി.ബാലകൃഷ്‌ണന്‍ കേന്ദ്ര സര്‍ക്കാരിന്‌ കത്തയച്ചെന്ന്‌ ഏഷ്യാനെറ്റ്‌ ന്യൂസ്‌ റിപ്പോര്‍ട്ട്‌ ചെയ്‌തതോടെയാണു തുടക്കം.

വി.എസ്‌ അറിഞ്ഞുതന്നെയാണ്‌ ആകാശ നഗരം പദ്ധതിയുടെ ഇതുവരെയുള്ള കാര്യങ്ങള്‍ നടന്നതെന്ന്‌ മനോരമ കഴിഞ്ഞ ദിവസം റിപ്പോര്‍ട്ട്‌ ചെയ്‌തു. തൊട്ടുപിറകെ ഏഷ്യാനെറ്റിന്റെ സ്റ്റോറിയും വന്നു, മുഖ്യമന്ത്രിയോ സര്‍ക്കാരോ ഒന്നുമറിഞ്ഞിട്ടില്ല. രണ്ടുകൂട്ടരും ഉപയോഗിക്കുന്നത്‌ ഒരേ രേഖകള്‍, ഒരേ യോഗത്തിന്റെ മിനുട്‌സ്‌, ഒരേ കത്തുകള്‍. വി.എസ്‌ എല്ലാം അറിഞ്ഞിരുന്നുവെന്നു വരുത്താന്‍ എളമരം കരീമിന്റെ ഓഫീസും സിപിഎമ്മില ഔദ്യോഗിക വിഭാഗവുമായി ബന്ധപ്പെട്ട ചില മാധ്യമ പ്രവര്‍ത്തകരും കരുനീക്കുന്നു. അത്‌ മനോരമ വഴി പുറത്തുവരുന്നു. വി.എസ്‌ ഒന്നുമറിഞ്ഞില്ലെന്നു സ്ഥാപിക്കാന്‍ അദ്ദേഹത്തിന്റെ ഓഫീസും വി.എസ്‌ പക്ഷ കരുനീക്കങ്ങള്‍ക്ക്‌ ചുക്കാന്‍ പിടിക്കുന്ന മുതിര്‍ന്ന മാധ്യമ പ്രവര്‍ത്തകനുമുള്‍പ്പെടെ തീവ്രശ്രമം നടത്തുന്നു. അത്‌ ഏഷ്യാനെറ്റ്‌ ന്യൂസ്‌ വഴി വാര്‍ത്തയാകുന്നു.

രണ്ടു ചാനലുകള്‍ക്കും അവരുടെ റിപ്പോര്‍ട്ടിനെ ന്യായീകരിക്കാനുതകുന്ന വിവരങ്ങളുള്ള രേഖകളാണു ലഭിച്ചിട്ടുള്ളത്‌. അതുകൊണ്ട്‌ ആരുടെയെങ്കിലും ഉപകരണങ്ങളായി നിന്നുകൊടുക്കുന്നു എന്ന പ്രശ്‌നം വരുന്നുമില്ല. വിവാദത്തില്‍ മുഖ്യമന്ത്രിതന്നെ നേരിട്ട്‌ അടുത്ത ദിവസം പ്രതികരിക്കുമെന്നുമുണ്ട്‌ സൂചന. കൊച്ചിയില്‍ കോടികള്‍ ചെലവും വന്‍ സൗകര്യങ്ങളുമുള്ള ആകാശ നഗരം സ്ഥാപിക്കുന്നതുമായി ബന്ധപ്പെട്ട്‌ കേന്ദ്രവുമായി ടി.ബാലകൃഷ്‌ണന്‍ കത്തിടപാടുകള്‍ നടത്തിയത്‌ വാര്‍ത്തയായിട്ട്‌ കുറേ ദിവസങ്ങളായി. അതങ്ങനെയങ്ങ്‌ കെട്ടടങ്ങിയെന്ന സാഹചര്യത്തിലാണ്‌, കഴിഞ്ഞ ദിവസം യശോറാം ബില്‍ഡേഴ്‌സ്‌ എന്ന പ്രമുഖ വ്യവസായ ഗ്രൂപ്പ്‌ കൊച്ചിയില്‍ വാര്‍ത്താസമ്മേളനം നടത്തിയത്‌. മുഖ്യമന്ത്രിയും വ്യവസായ മന്ത്രിയും ചീഫ്‌ സെക്രട്ടറിയും ഉള്‍പ്പെടെ പങ്കെടുത്ത യോഗത്തിലാണ്‌ ആകാശ നഗരം പദ്ധതി ചര്‍ച്ച ചെയ്‌തതെന്നും തങ്ങളാണ്‌ പദ്ധതിയുടെ രൂപരേഖ തയ്യാറാക്കിയതെന്നുമായിരുന്നു യശോറാമിന്റെ വിശദീകരണം.

മുഖ്യമന്ത്രിയെ വെട്ടിലാക്കാന്‍ ഉദ്ദേശിച്ചുതന്നെ യശോറാമിനെക്കൊണ്ട്‌ വെളിപ്പെടുത്തല്‍ നടത്തിക്കുകയായിരുന്നു ചില കേന്ദ്രങ്ങള്‍. വ്യവസായ മന്ത്രിയും വ്യവസായ സെക്രട്ടറിയും കൂടിയുള്ള ഒത്തുകളിയാണു പദ്ധതിക്കു പിന്നിലെന്ന്‌ മുഖ്യമന്ത്രിയുമായി ബന്ധപ്പെട്ട ചില കേന്ദ്രങ്ങള്‍ അനൗദ്യോഗികമായി പ്രചരിപ്പിച്ചതിനു പകരം വീട്ടല്‍ കൂടിയായിരുന്നു ഇത്‌. യശോറാമിന്റെ വെളിപ്പെടുത്തലിനു പിന്നാലെ അതുമായി ബന്ധപ്പെട്ട കൂടുതല്‍ വിവരങ്ങളുമായി മനോരമ ന്യൂസ്‌ രംഗത്തുവന്നു. 2007 ഒക്‌ടോബറില്‍ തിരുവനന്തപുരത്തു ചേര്‍ന്ന യോഗത്തിലാണ്‌ ആകാശ നഗരം പദ്ധതി ചര്‍ച്ച ചെയ്‌തതെന്നും അതില്‍ വി.എസ്‌ പങ്കെടുത്തുവെന്നുമാണ്‌ മനോരമ പറഞ്ഞത്‌.

എല്ലാം വി.എസ്‌ അറിഞ്ഞുതന്നെ എന്ന തലക്കെട്ടോടെ, ഉള്ളുകള്ളികളെയും താല്‌പര്യങ്ങളെയും കുറിച്ചു വ്യക്തമായ സൂചന നല്‌കുന്ന റിപ്പോര്‍ട്ട്‌. എന്നാല്‍, സാധാരണഗതിയില്‍ ഏതു പുതിയ പദ്ധതിയെക്കുറിച്ചുള്ള പ്രപ്പോസല്‍ വന്നാലും ചെയ്യുന്നതുപോലെ, പരിശോധിക്കാന്‍ നിര്‍ദേശിക്കുക മാത്രമാണു സര്‍ക്കാര്‍ ചെയ്‌തതെന്നാണ്‌ ഏഷ്യാനെറ്റ്‌ ന്യൂസ്‌ പറഞ്ഞത്‌. അതായതു മുഖ്യമന്ത്രിക്കു പ്രത്യേക താല്‍പര്യമൊന്നും പദ്ധതിയില്‍ ഇല്ലെന്നു മാത്രമല്ല, പുതിയ വികസന പദ്ധതിയോടുള്ള താല്‌പര്യം മൂലം അതിന്റെ സാധ്യത പരിശോധിക്കാന്‍ സമ്മതംമൂളുക മാത്രമാണു ചെയ്‌തത്‌. കാര്യങ്ങള്‍ ഇങ്ങനെയായിരിക്കെ, യശോറാം ഗ്രൂപ്പിന്റെ പങ്കാണ്‌ ഇനി പുറത്തുവരാനിരിക്കുന്നത്‌. പദ്ധതിയെക്കുറിച്ചു വെറുതെ പരിശോധിക്കാനല്ല, തുടര്‍നടപടികള്‍ സ്വീകരിക്കാനാണ്‌ യശോറാമിനെ ചുമതലപ്പെടുത്തിയതെന്നാണു വന്നിരിക്കുന്നത്‌. അതിനു വെറേ യോഗം ചേര്‍ന്നിരുന്നോ, അതില്‍ ആരെങ്കിലും പങ്കെടുത്തോ, ഒരു ഐഎഎസ്‌ ഓഫീസര്‍ക്കു മാത്രമായി സ്വന്തം നിലയ്‌ക്ക്‌ തീരുമാനച്ചു നടപ്പാക്കാന്‍ കഴിയുന്ന കാര്യമാണോ ഇത്‌, മന്ത്രിസഭാ യോഗം അറിയാതെ ഇത്തരമൊരു പദ്ധതിക്ക്‌ കരുനീക്കം നടക്കുമോ എന്നീചോദ്യങ്ങള്‍ക്കുള്ള ഉത്തരം അടുത്ത ദിവസങ്ങളില്‍ വരാനിരിക്കുന്നു.

ലഹരിക്കായി മരുന്നുകളുടെ ദുരുപയോഗം

2010-12-11T05:40:00.000-08:00

ചില പ്രത്യേക അസുഖങ്ങള്‍ക്ക് നിയന്ത്രിതമായ അളവില്‍ മാത്രം ഉപയോഗിക്കാവുന്ന മരുന്നുകള്‍ മയക്കുമരുന്നായി ഉപയോഗിക്കുന്ന ശീലം വ്യാപകമാവുകയാണ്. ഡോക്ടറുടെ കുറിപ്പുണ്ടെങ്കില്‍ മാത്രം ലഭിക്കുന്ന നൈട്രാസിപാം, സാസ്‌മോ പ്രോക്‌സിവോണ്‍ എന്നീ ഗുളികകള്‍ കഴിഞ്ഞ മാസം കോഴിക്കോട്ട്് പിടിച്ചെടുത്തത് വാര്‍ത്തയായിരുന്നു.

മയക്കുമരുന്നുകളേക്കാള്‍ എളുപ്പത്തില്‍ ലഭിക്കുമെന്നതും ഒറ്റനോട്ടത്തില്‍ സാധാരണ അസുഖത്തിനുള്ള മരുന്നാണെന്ന് തോന്നിപ്പിക്കുമെന്നതും കൗമാരക്കാരില്‍ ഇത്തരം മരുന്നുകളുടെ ഉപയോഗം വ്യാപകമാകാന്‍ കാരണമായിട്ടുണ്ട്. കൂടാതെ അസുഖങ്ങള്‍ക്ക് ഡോക്ടര്‍മാര്‍ നിര്‍ദേശിക്കുന്നവയായതിനാല്‍ ആരോഗ്യപ്രശ്‌നങ്ങളുണ്ടാകാറില്ലെന്ന തെറ്റിദ്ധാരണയും ചിലര്‍ക്കുണ്ട്. എന്നാല്‍ ഏത് മരുന്നും നിര്‍ദേശിക്കപ്പെട്ട അസുഖങ്ങള്‍ക്ക് മാത്രമേ സുരക്ഷിതമായി ഉപയോഗിക്കാന്‍പറ്റൂ. പ്രായത്തിനനുസരിച്ചുപോലും അളവില്‍ മാറ്റമുണ്ടാകുന്ന ഇത്തരം മരുന്നുകള്‍ ഉപയോഗിക്കുമ്പോള്‍ പുകവലി, മദ്യപാനം തുടങ്ങിയവ വര്‍ജിക്കണമെന്നും നിര്‍ദേശിക്കാറുണ്ട്.
ദുരുപയോഗം ചെയ്യുന്ന മരുന്നുകള്‍

പ്രധാനമായും മൂന്ന് ഇനത്തില്‍പ്പെട്ട മരുന്നുകളാണ് മയക്കുമരുന്നായി ദുരുപയോഗം ചെയ്യുന്നത്.

1. ഓപ്പിയോയിഡ്‌സ് (Opioids)
ഓക്‌സികോഡോണ്‍ (Oxycodone), ഹൈഡ്രോകോഡോണ്‍(Hydrocodone), മെപ്പെരിഡീന്‍ (Meperidine) തുടങ്ങിയവ ഈ ഗണത്തില്‍പ്പെടുന്നു.വേദനസംഹാരിയായും ചുമ, വയറ്റിളക്കം എന്നിവയ്ക്കും ഉപയോഗിക്കുന്ന മരുന്നുകളാണിവ. കേന്ദ്ര നാഡീവ്യവസ്ഥയുമായി ബന്ധപ്പെട്ട് തലച്ചോറില്‍ വേദനാസംവേദനങ്ങള്‍ എത്തുന്നത് തടയുകയാണ് ഇതിന്റെ ധര്‍മം.

2.സെന്‍ട്രല്‍ നെര്‍വ്‌സ് സിസ്റ്റം (സി.എന്‍.എസ്.) ഡിപ്രസന്റ്‌സ്
പെന്റോബാര്‍ബിറ്റോള്‍ സോഡിയം (Pentobarbital Sodium), ഡയാസെപാം (Diazepam), അല്‍പ്രെസോളം (Alprazolam)തുടങ്ങിയവയാണ് ഈ ഇനത്തില്‍പ്പെട്ട മരുന്നുകള്‍.ഉത്കണ്ഠ, മനസ്സംഘര്‍ഷം, ഉറക്കക്കുറവ് എന്നിവയ്ക്ക് നിര്‍ദേശിക്കുന്നവയാണ് ഈ മരുന്നുകള്‍. തലച്ചോറിന്റെ പ്രവര്‍ത്തനം മന്ദീഭവിപ്പിക്കുകയാണ് ഇവയുടെ ധര്‍മം. പെരുമാറ്റത്തില്‍ ശാന്തതയോ മന്ദിപ്പോ ഉണ്ടാകുമെന്നതാണ് പ്രവര്‍ത്തനം .

3. ഉത്തേജക ഔഷധങ്ങള്‍
മീതൈല്‍ ഫെനിഡേറ്റ് (Methylphchidate), ആംഫെറ്റാമിന്‍(Ampctamine) തുടങ്ങിയവ ഇക്കൂട്ടത്തില്‍പ്പെടുന്നു. കുട്ടികളില്‍ കാണപ്പെടുന്ന എ.ഡി.എച്ച്.ഡി.ക്ക് നല്‍കുന്ന മരുന്നുകളാണിവ. തലച്ചോറിന്റെ പ്രവര്‍ത്തനം ത്വരപ്പെടുത്തുക, കടുതല്‍ ജാഗ്രതയുണ്ടാക്കുക തുടങ്ങിയവയാണ് ഇതിന്റെ സ്വാധീനത്താലുണ്ടാകുന്ന മാറ്റങ്ങള്‍.

പാര്‍ശ്വഫലങ്ങള്‍
രോഗത്തിനല്ലാതെ മരുന്നു കഴിക്കുന്നതുതന്നെ അപായംവരുത്തും. മേല്പറഞ്ഞ മരുന്നുകള്‍ രോഗികളല്ലാത്തവര്‍ കഴിക്കുന്നത് അങ്ങേയറ്റം അപകടകരമാണ്. ഉദാഹരണത്തിന് ഒപ്പിയോയിഡ് ഛര്‍ദി, വിഷാദം, ചിന്താമാന്ദ്യം തുടങ്ങിയവയ്ക്ക് കാരണമാകും. അളവുകൂടിയാല്‍ ശ്വാസതടസ്സത്തിലേക്കും 'കോമ' അവസ്ഥയിലേക്കും എത്തിയേക്കും. മരണവും സംഭവിക്കാം. മദ്യത്തോടൊപ്പം ഉപയോഗിക്കുന്നതും ദുരന്തമുണ്ടാക്കും.

സി.എന്‍.എസ്. ഡിപ്രസന്റുകളും അപകടകാരികളാണ്. വേദനാസംഹാരികള്‍, അലര്‍ജിക്കുള്ള മരുന്നുകള്‍, മദ്യം ഇവയ്‌ക്കൊപ്പം കഴിച്ചാല്‍ ഹൃദയമിടിപ്പും ശ്വാസഗതിയും മന്ദഗതിയിലാക്കി മരണത്തിന് കാരണമായേക്കും. എ.ഡി.എച്ച്.ഡി.ക്കുള്ള മരുന്നുകള്‍ രോഗികളല്ലാത്തവര്‍ കഴിച്ചാല്‍ ഹൃദയത്തിന്റെ പ്രവര്‍ത്തനത്തെ ബാധിച്ചേക്കാം. ചെറിയ സമയത്തിനുള്ളില്‍ കൂടുതല്‍ അളവ് കഴിക്കുന്നതാണ് മിക്കപ്പോഴും അപായമുണ്ടാക്കുന്നത്. ലഹരിക്കായി ഇത്തരം മരുന്നുകഴിക്കുന്നവര്‍ മിക്കപ്പോഴും അളവ് കൂട്ടി കഴിക്കുന്നത് പതിവാണ്.

കുട്ടികളുടെ മേല്‍ ശ്രദ്ധ
കുട്ടികള്‍ അനാവശ്യമായി മരുന്നു കഴിക്കുന്നത് നിരുത്സാഹപ്പെടുത്തേണ്ടതാണ്. തലവേദന, ചെറുപനി എന്നിവയ്ക്കാണെങ്കില്‍ പോലും പതിവായി ഡോക്ടറുടെ കുറിപ്പില്ലാതെ മരുന്ന് കഴിക്കുന്നത് ശ്രദ്ധയില്‍പ്പെട്ടാല്‍ നിയന്ത്രിക്കേണ്ടതാണ്. കൂടാതെ അവരുടെ കൈയില്‍ പതിവായി കാണുന്ന ഗുളിക വാങ്ങി, മരുന്നിനെക്കുറിച്ച് അറിയാവുന്നവരുടെ അടുത്ത് കൊണ്ടുപോയി ചോദിച്ചറിയണം. അമിത ഉറക്കം, ഉറക്കം തൂങ്ങല്‍, വിഷാദം തുടങ്ങി അസ്വാഭാവിക പെരുമാറ്റം കുട്ടികളില്‍ കാണുകയാണെങ്കില്‍ അവരുടെ പ്രവൃത്തികള്‍ രക്ഷിതാക്കള്‍ പ്രത്യേകം ശ്രദ്ധിക്കേണ്ടതാണ്. ഒരിക്കല്‍ ഇത്തരം മരുന്നുകള്‍ അനാവശ്യമായി കഴിച്ചുതുടങ്ങിയാല്‍ മയക്കുമരുന്നുപോലെ ലഹരിയാകാന്‍ സാധ്യതയുണ്ട്

മലബാര്‍ വിദ്യാഭ്യാസ വികസനത്തിന് പോംവഴി സ്വാശ്രയം!

2010-12-11T05:35:00.000-08:00

തിരുവനന്തപുരം: മലബാര്‍ മേഖലയിലെ വിദ്യാഭ്യാസ പിന്നാക്കാവസ്ഥ പരിഹരിക്കാന്‍ ഇടതുസര്‍ക്കാറെടുത്ത നടപടി ഗുണം ചെയ്യുക സമ്പന്നര്‍ക്ക് മാത്രം. പണം മുടക്കി പഠിക്കാന്‍ കഴിയുന്നവര്‍ക്ക് മാത്രം പ്രവേശനം നേടാനാവുന്ന 41 സ്വാശ്രയ സ്‌കൂളുകളാണ് ഇന്നലെ മന്ത്രിസഭ അനുവദിച്ചത്. പാവപ്പെട്ടവന്റെ പിന്നാക്കാവസ്ഥ ഇതുകൊണ്ടു പരിഹരിക്കപ്പെടില്ല. മലബാറില്‍ വിദ്യാഭ്യാസ മേഖലയില്‍ പിന്നാക്കാവസ്ഥ ഉണ്ടെന്ന് ബോധ്യപ്പെട്ടതിന്റെ അടിസ്ഥാനത്തിലാണ് തീരുമാനമെന്ന വിശദീകരണത്തോടെയാണ് മുഖ്യമന്ത്രി തീരുമാനം പ്രഖ്യാപിച്ചത്. സ്വാശ്രയ കോളജുകള്‍ക്കെതിരെ കേരളത്തിലുടനീളം സമരം ചെയ്ത് അധികാരത്തിലെത്തിയ ഇടതുമുന്നണിയാണ് ഇപ്പോള്‍ 41 സ്വാശ്രയ സ്‌കൂളുകള്‍ അനുവദിച്ചിരിക്കുന്നത്.
മതിയായ വിദ്യാഭ്യാസ സൗകര്യമില്ല എന്ന് വിദ്യാഭ്യാസ വകുപ്പ് നടത്തിയ അന്വേഷണത്തില്‍ ബോധ്യപ്പെട്ട സ്ഥലങ്ങളിലാണ് അണ്‍എയ്ഡഡ് സ്‌കൂളുകള്‍ അനുവദിച്ചത്. സ്‌കൂള്‍ ഇല്ലെങ്കില്‍ പൊതുവിദ്യാലയമാണ്അവിടെ അനുവദിക്കേണ്ടിയിരുന്നത്. പകരം, സ്‌കൂള്‍ അനിവാര്യമാണെന്ന് ബോധ്യപ്പെട്ട ശേഷം അത് സ്വാശ്രയം മതി എന്ന് തീരുമാനിച്ചു. ഇത് ഇടതുമുന്നണി നയത്തിന് വിരുദ്ധമാണ്. മേഖലയിലെ സമ്പന്നരായ വിദ്യാര്‍ഥികള്‍ക്ക് മാത്രമാകും ഇവിടെ പഠനാവസരം ലഭിക്കുക. ഇവിടങ്ങളില്‍ ഇനി പൊതുവിദ്യാലയങ്ങള്‍ അനുവദിക്കില്ല. അതോടെ സര്‍ക്കാര്‍ തീരുമാനം ഫലത്തില്‍ സാധാരണക്കാര്‍ക്ക് എതിരാവുകയാണ്.എല്ലാവരും സ്വാശ്രയ സ്‌കൂള്‍ പഠനത്തിന് നിര്‍ബന്ധിതരാകും.
സംസ്ഥാനത്തിന്റെ തെക്കന്‍ മേഖലയില്‍ സര്‍ക്കാര്‍ പണം മുടക്കി നടത്തുന്ന സ്ഥാപനങ്ങള്‍ പലയിടത്തും കുട്ടികളെ കിട്ടാതെ ഒഴിഞ്ഞുകിടക്കുകയാണ്. അത്തരം സ്‌കൂളുകള്‍ പൊതുപണം ചെലവിട്ട് നിലനിര്‍ത്തുന്ന സര്‍ക്കാറാണ് മലബാറിലെ വികസനം സ്വാശ്രയ സ്ഥാപനങ്ങളിലേക്ക് മാറ്റുന്നത്. മതിയായ സൗകര്യങ്ങളില്ലാത്ത സ്ഥലങ്ങളില്‍ ദരിദ്രര്‍ക്ക് പ്രവേശനം അസാധ്യമായ സ്‌കൂളുകള്‍ അനുവദിച്ചുകൊണ്ട് പിന്നാക്കാവസ്ഥ പരിഹരിക്കുന്നത് കൂടുതല്‍ വലിയ അസന്തുലിതത്വമാണ് സൃഷ്ടിക്കുക. ഈ നീക്കത്തെ ഇടതു മുന്നണിക്കകത്ത് നേരത്തേ ചില പാര്‍ട്ടികള്‍ എതിര്‍ത്തിരുന്നു. തീരുമാനത്തിനെതിരെ സി.പി.എമ്മിന്റെ പോഷക സംഘടനകളടക്കം പ്രതിഷേധവുമായി രംഗത്തെത്തിയിട്ടുണ്ട്.
കേരളത്തിലെ പൊതുവിദ്യാഭ്യാസ മേഖലയില്‍ കടുത്ത അസന്തുലിതത്വം നിലനില്‍ക്കുന്നുവെന്ന വിമര്‍ശങ്ങളെത്തുടര്‍ന്നാണ് മലബാര്‍ മേഖലയില്‍ പ്രത്യേക കോഴ്‌സുകളും അധിക ബാച്ചുകളും പുതിയ സ്‌കൂളുകളും അനുവദിക്കാന്‍ സര്‍ക്കാര്‍ തീരുമാനിച്ചത്. തെക്കന്‍ കേരളത്തേക്കാള്‍ ഇരട്ടിയോളം വിദ്യാര്‍ഥികളുള്ള മലബാറില്‍ അവിടെയുള്ളതിന്റെ പകുതി വിദ്യാഭ്യാസ സ്ഥാപനങ്ങളാണുള്ളത്. എല്‍.പി, യു.പി, ഹൈസ്‌കൂള്‍, ഹയര്‍സെക്കന്‍ഡറി മേഖലകളിലെല്ലാം വന്‍തോതില്‍ ഈ വ്യത്യാസം നിലനില്‍ക്കുന്നുണ്ട്. സംസ്ഥാനത്ത് ഏറ്റവും കൂടുതല്‍ വിദ്യാര്‍ഥികളുള്ളത് മലപ്പുറം ജില്ലയിലാണ്. ഏകദേശം എട്ട് ലക്ഷത്തോളം. എന്നാല്‍ അവിടെ സര്‍ക്കാര്‍ സ്‌കൂളുകളുടെ എണ്ണം 545. അതേസമയം അഞ്ച് ലക്ഷത്തോളം വിദ്യാര്‍ഥികളുള്ള തിരുവനന്തപുരം ജില്ലയില്‍ 516 സര്‍ക്കാര്‍ സ്‌കൂളുകളുണ്ട്. എയ്ഡഡ് സ്‌കൂളുകളുടെ കാര്യവും ഇങ്ങനെതന്നെ.
അടിസ്ഥാന സൗകര്യങ്ങളുടെ കാര്യത്തിലും വലിയ അന്തരമുണ്ട്. തൃശൂര്‍, എറണാകുളം ഒഴികെ ജില്ലകളില്‍ വാടക കെട്ടിടത്തില്‍ സ്‌കൂളുകള്‍ പ്രവര്‍ത്തിക്കുന്നില്ല. എന്നാല്‍ മലബാറില്‍ എല്ലാ ജില്ലകളിലും സ്വന്തം കെട്ടിടമില്ലാത്ത നിരവധി സ്‌കൂളുകളുണ്ട്. വിദ്യാര്‍ഥികളുടെ ബാഹുല്യംകാരണം അനാദായകരമായ സ്‌കൂളുകള്‍ പോലും ഈ മേഖലയില്‍ കുറവാണ്. ഇത്രക്ക് രൂക്ഷമായ പിന്നാക്കാവസ്ഥക്കെതിരായ പ്രതിഷേധമായാണ് കൂടുതല്‍ സ്ഥാപനങ്ങള്‍ക്ക് വേണ്ടി മലബാറില്‍ ജനകീയ സമരങ്ങളുയര്‍ന്നത്. ഈ ജനകീയ ആവശ്യത്തെയാണ സ്വാശ്രയ സ്‌കൂളുകള്‍ അനുവദിച്ച് കൊണ്ട് സര്‍ക്കാര്‍ മറികടക്കുന്നത്. മലബാറില്‍ വിദ്യാഭ്യാസ രംഗത്ത് പിന്നാക്കാവസ്ഥയുണ്ട് എന്ന് അംഗീകരിക്കാന്‍ പോലും സര്‍ക്കാര്‍ ആദ്യം തയാറായിരുന്നില്ല. മന്ത്രിയെ വഴിയില്‍ തടഞ്ഞതടക്കം സമരങ്ങളെ തുടര്‍ന്നാണ് ഇക്കാര്യം പരിഗണിക്കാന്‍ തുടങ്ങിയത്.

വളന്തക്കാട്- ജൈവവൈവിധ്യത്തിന്റെ കലവറ

2010-12-11T05:23:00.001-08:00

മലിനീകരണം മൂലം ശ്വാസംമുട്ടുന്ന കൊച്ചി നഗരത്തിന് ജീവവായു നല്‍കുന്ന പച്ചതുരുത്ത്, വേലിയേറ്റവും വേലിയിറക്കവും ചേര്‍ന്നൊരുക്കുന്ന കണ്ടല്‍ക്കാടിന്റെ സവിശേഷ ആവാസ വ്യവസ്ഥ... കൊച്ചിയിലെ മരട് വില്ലേജില്‍ പെടുന്ന വളന്തക്കാട് ദ്വീപിന് ഇങ്ങനെ പല വിശേഷണങ്ങളും ആവാം. വേമ്പനാട് കായലിന്റെ ഭാഗമായി 644 ഹെക്ടര്‍ പ്രദേശത്ത് വ്യാപിച്ചു കിടക്കുന്ന ഒരു ആവാസവ്യവസ്ഥയാണ് ഇത്. കരിം കൊക്കുകളുടെ പ്രിയപ്പെട്ട വാസസ്ഥലം.

കുറച്ചു കാലം മുമ്പ് വരെ പോക്കലി കൃഷി ചെയ്തിരുന്ന പ്രദേശമാണ് ഇവിടം. കരിമീന്‍, ചെമ്മീന്‍, കണമ്പ്, ഞണ്ട് എന്നിവയുടെ ഒരു പ്രധാന പ്രജനന കേന്ദ്രവുമാണ്. പക്ഷേ, ഇവരെയെല്ലാം ആട്ടിപ്പായിച്ചു കൊണ്ട് കണ്ടല്‍ക്കാടുകള്‍ നശിപ്പിച്ച് 5000 കോടി രൂപ മുതല്‍മുടക്കില്‍ ലോകത്തരമായ ഒരു ടൗണ്‍ഷിപ്പിന് രൂപം കൊടുക്കാനുള്ള ശ്രമത്തിലാണ് അധികൃതര്‍.

രാജ്യത്ത് നിലവിലുള്ള 11 നിയമങ്ങളും നയങ്ങളും ലംഘിക്കപ്പെടുന്ന ഈ പദ്ധതി കൊച്ചിയെ മാറാരോഗിയാക്കും. മത്സ്യബന്ധനം നടത്തി ഉപജീവനം നടത്തുന്ന 68 കുടുംബങ്ങളെ വഴിയാധാരമാക്കും. വലിയൊരു ആവാസവ്യസ്ഥ തകര്‍ക്കപ്പെടും. പതിനഞ്ചോളം കമ്പനികള്‍ വാങ്ങിയിട്ടിരിക്കുന്ന ഈ 400 ഏക്കര്‍ കായലില്‍ ഉയര്‍ന്നു നില്‍ക്കുന്ന സിമന്റ് കാലുകള്‍ ധുര മൂത്ത മനുഷ്യന്റെ വികല മനസ്സിനെ ഓര്‍മിപ്പിക്കുന്നു.

എല്ലാം പണത്തിന്റെ കണക്കില്‍ മാത്രം മനസ്സിലാക്കുന്നവര്‍ക്കു വേണ്ടി, 77.28 കോടിയോളം രൂപയുടെ സേവനമാണ് ഈ അപൂര്‍വ ആവാസവ്യവസ്ഥ നല്‍കുന്നതെന്ന് ബയോഡൈവേഴ്‌സിറ്റി ബോര്‍ഡ് ഓര്‍മിപ്പിക്കുന്നു. ഏതാനും ചില വ്യക്തികള്‍ക്ക് നേട്ടമുണ്ടാക്കുന്ന 5000 കോടി രൂപയുടെ പദ്ധതി വേണോ അതോ ഈ ആവാസ വ്യവസ്ഥ നിലനില്‍ക്കാണോ എന്ന് ഓരോ കേരളീയനും ആലോചിക്കണം.

കോണ്‍ക്രീറ്റ് കാടിന്റെ ഈ ഗതിയാകുമോ വളന്തക്കാടിന്റെയും

കേരളം മരുഭൂമി ആവാതിരിക്കാന്‍

2010-12-11T05:21:00.001-08:00

ഭൂഗര്‍ഭ ജലനിരപ്പ് അനുദിനം കുറഞ്ഞുകൊണ്ടിരിക്കുകയാണ്. വേനല്‍ച്ചൂടിനു കാഠിന്യം സഹിക്കാവുന്നതിനുമപ്പുറമായി. സൂര്യാഘാത സാധ്യതയും മുമ്പെങ്ങുമില്ലാത്ത വിധം കേരളം അനുഭവിച്ചു തുടങ്ങി. കേരളത്തിനു കേട്ടുകേള്‍വിപോലുമില്ലാത്ത രീതിയില്‍ താപനില 40 ഡിഗ്രി സെല്‍ഷ്യസ് ആയിരിക്കയാണിപ്പോള്‍. കേരളം മരുഭൂമിയാവാതിരിക്കാന്‍ ജലസംരക്ഷണം അനിവാര്യമായിരിക്കുകയാണ്.

ജീവജാലങ്ങളുടെ നിലനില്പിനു ജലം അത്യന്താപേക്ഷിതമാണ്. വെള്ളത്തിനു പകരം ഉപയോഗിക്കാന്‍ മറ്റൊരു വസ്തു ഇന്നേവരെ കണ്ടെത്തിയിട്ടില്ല. പാരിസ്ഥിതിക വ്യവസ്ഥയുടെ പരമോന്നത സ്ഥാനം വഹിക്കുന്ന ജീവജലത്തില്‍ ഒരു തുള്ളിപോലും നശിപ്പിക്കുകയോ മലിനമാക്കുകയോ ചെയ്യരുതാത്തതാണ്. കാലപ്രവാഹത്തിന്റെ കുത്തൊഴുക്കില്‍ പ്രകൃതിയെ മറക്കുന്ന പ്രവണത ഏറിവരികയും ജലം അന്യമാവുകയും ചെയ്തുകൊണ്ടിരിക്കുന്നു.

താപനില ഏറുന്നതിനൊപ്പം ഭൂമിയിലെ ജലനിരപ്പ് അനിയന്ത്രിതമായി താഴ്ന്നുകൊണ്ടിരിക്കുന്നതിനു നിരവധി കാരണങ്ങളുണ്ട്. നദികളുടെയും നീര്‍ത്തടങ്ങളുടെയും പാടങ്ങളുടെയും വനങ്ങളുടെയും നാശം മാത്രമല്ല, കായലുകളുടെ ആഴം കുറഞ്ഞതും ജലലഭ്യത കുറയാന്‍ കാരണമായി. കാവും കുളവും സങ്കല്പമാകുന്നു. പ്രകൃതിയെ പൂജിക്കുന്ന വലിയൊരു സംസ്‌കാരമായിരുന്നു നമുക്കുണ്ടായിരുന്നത്.

ജലവും നദിയും മരവുമെല്ലാം നാം ആരാധനയോടെ നോക്കിക്കണ്ട കാലമുണ്ടായിരുന്നു. അതു മാറി താത്കാലിക ആവശ്യത്തിനായി ഏതിനെയും ചൂഷണം ചെയ്യുന്ന മനോഭാവം കടന്നുകൂടിയതോടെ പ്രകൃതിക്കു നാശം സംഭവിച്ചുതുടങ്ങി. അനിയന്ത്രിതമായി പ്രകൃതിചൂഷണം ചെയ്യുന്ന നിലപാടിനു മാറ്റമുണ്ടായെങ്കിലേ ജലദൗര്‍ലഭ്യവും താപവര്‍ധനയും മൂലം വരാന്‍ പോകുന്ന പ്രകൃതിദുരന്തങ്ങള്‍ക്ക് ആക്കം കുറയ്ക്കാനെങ്കിലും കഴിയൂ.

സമൂഹത്തിന്റെ സര്‍വവിധ സാമൂഹിക, സാമ്പത്തിക വികസനത്തിലും ജലം സുപ്രധാന പങ്കാണ് വഹിക്കുന്നത്. ജലം ധാരാളമുണ്ടെന്ന് പൊതുവെ പറയാറുണ്ടെങ്കിലും തികച്ചും പരിമിതമായ ഒരു പ്രകൃതിവിഭവമാണിത്. ഭാരതത്തില്‍ ആളോഹരി ശുദ്ധജല ലഭ്യത 1947-ല്‍ 6000 ഘനമീറ്ററായിരുന്നത് 2000-ത്തില്‍ 2200 ഘനമീറ്ററായി കുറഞ്ഞു.

ഇന്ത്യയില്‍ 4,00,000 കോടി ഘനമീറ്റര്‍ വെള്ളം പ്രതിവര്‍ഷം ലഭിക്കുന്നുണ്ടെന്നാണ് കണക്ക്. അതില്‍ ഉപയോഗിക്കാന്‍ കഴിയുന്നത് 1,08,600 കോടി ഘനമീറ്റര്‍ മാത്രമാണ്. നാലുതരത്തിലാണ് ജലമുള്ളത്. മഴവെള്ളം, ഹിമപാതം, തുഷാരം, ഹൈമം എന്നിങ്ങനെ. ഇതില്‍ മഴവെള്ളമാണ് ഏറ്റവും ശ്രേഷ്ഠവും ഗുണകരവും . ജലസമ്പത്തിന്റെ നിദാനവും ജല സംക്രമണവും നടത്തുന്നത് പ്രധാനമായും നദികളെ ആശ്രയിച്ചാണ്. നദികള്‍ ജീവന്റെ നിലനില്പിനെ സഹായിക്കുന്ന ഏറ്റവും പ്രധാന ജൈവ ആവാസവ്യവസ്ഥയാണ്. തടസ്സമില്ലാതെ ഒഴുകുന്ന ജലവും മണലും ജല ജീവികളുമെല്ലാം ഈ ആവാസവ്യസ്ഥയുടെ അവിഭാജ്യ ഘടകമാണ്. നദികളെ കേന്ദ്രീകരിച്ചാണ് മനുഷ്യസംസ്‌കാരങ്ങള്‍ വളര്‍ന്നുവന്നിട്ടുളളത്.

നദികള്‍കൊണ്ട് കേരളം സമ്പന്നമാണ്. പശ്ചിമഘട്ട മലനിരകളില്‍നിന്നുത്ഭവിച്ച് പടിഞ്ഞാറോട്ട്ഒഴുകുന്ന 41 നദികളും കിഴക്കോട്ടൊഴുകി കാവേരിയില്‍ ചേരുന്ന മൂന്നു നദികളും അവയുടെ 900-ത്തിലധികം വരുന്ന പോഷകനദികളും സംസ്ഥാനത്തെ ജല സമ്പുഷ്ടമാക്കാന്‍ പര്യാപ്തമാണ്. 15 കി. മീറ്ററില്‍ അധികം നീളം വരുന്ന ജലസ്രോതസ്സുകളെയാണ് നദികളെന്ന് കേരളത്തില്‍ കണക്കാക്കുന്നത്. 44 നദികളും 38 കായലുകളും 560 കി. മീറ്റര്‍ നീളം വരുന്ന സമുദ്രതീരവും മണല്‍പ്പരപ്പും കാടും മലയും താഴ്‌വരകളുമെല്ലാം ചേരുമ്പോള്‍ കേരളം ദൈവത്തിന്റെ സ്വന്തം നാടാവുന്നു.

ലോകത്ത് ഏറ്റവും കൂടുതല്‍ കിണറുകളുള്ള നാടാണ് കേരളം. 45 ലക്ഷത്തോളം കിണറുകള്‍ നമ്മുടെ ഭൂഗര്‍ഭ ജലവിതാനത്തിന്റെ വിസ്തൃതി വെളിവാക്കുന്നതാണ്. ജല സമ്പുഷ്ടിക്കുതകുന്ന പ്രവര്‍ത്തനങ്ങള്‍ കിണറുകളെയെല്ലാം ജല സമ്പുഷ്ടമാക്കിയിരുന്നു. എന്നാല്‍ സ്ഥിതി മാറി വരികയാണ്. കഴിഞ്ഞ നൂറു വര്‍ഷങ്ങള്‍ക്കുള്ളില്‍ ഇന്ത്യയില്‍ ആളോഹരി ജലലഭ്യത നാലിലൊന്നായി കുറഞ്ഞപ്പോള്‍ കേരളത്തില്‍ അത് അഞ്ചിലൊന്നായി. ദേശീയ ശരാശരിയേക്കാളും 2.78 മടങ്ങ് മഴ കേരളത്തില്‍ ലഭിക്കുന്നുണ്ട്. എന്നാല്‍ ഇതില്‍ ഉപയോഗിക്കുന്നത് നാമമാത്രവും.

കേരളത്തില്‍ ആളോഹരി ശുദ്ധജല ലഭ്യത കുറഞ്ഞു കൊണ്ടിരിക്കുകയാണ്. കൂടുതല്‍ ജലവും ഉപയോഗിക്കുന്നതു കൃഷിക്കും വ്യവസായങ്ങള്‍ക്കുമാണ്. ഇതില്‍ അഞ്ചുശതമാനം മാത്രമാണ് വീട്ടാവശ്യത്തിനായി ഉപയോഗിക്കുന്നത്. ഉപരിജല ലഭ്യത കുറഞ്ഞതോടെ നാം ഭൂഗര്‍ഭജലത്തെ അമിതമായി ഉപയോഗിച്ചു തുടങ്ങി. മഴക്കാലത്ത് പുനഃസ്ഥാപിക്കാന്‍ കഴിയുന്നതിനേക്കാള്‍ പതിന്മടങ്ങ് ഉപയോഗിക്കുന്നതിനാല്‍ ഭൂഗര്‍ഭജല വിതാനം നാള്‍ക്കുനാള്‍ താഴ്ന്നുകൊണ്ടിരിക്കുന്നു. കേരളത്തിലെ കിണറുകളിലെ ജലവിതാനം അഞ്ചു വര്‍ഷത്തിനുള്ളില്‍ മൂന്നു മീറ്റര്‍ വരെ താഴ്ന്നതായി ഭൂഗര്‍ഭ ജലവിഭവവകുപ്പ് കണ്ടെത്തിയിട്ടുണ്ട്. വരും വര്‍ഷങ്ങളില്‍ നമ്മുടെ ഒട്ടുമിക്ക കിണറുകളും വറ്റി വരളുമെന്നും ശാസ്ത്രജ്ഞന്മാര്‍ പറയുന്നു.

ജല ദുരുപയോഗത്തിലും കേരളം ഒന്നാം സ്ഥാനത്താണ്. ലോകാരോഗ്യ സംഘടനയുടെ കണക്കനുസരിച്ച് ആളോഹരി ജല ഉപയോഗം പ്രതിദിനം 120 ലിറ്ററാണ്. കേരളത്തില്‍ ഇത് 200 ലിറ്ററായി ഉയര്‍ന്ന് നില്ക്കുന്നു.അധികം ജലമുണ്ടെന്ന ധാരണയാണ് നമ്മുടെ പ്രതിസന്ധിക്കു കാരണം. സൂക്ഷ്മമായി കൈകാര്യം ചെയ്യേണ്ട വസ്തുവാണ് ജലമെന്ന് ബന്ധപ്പെട്ടവരാരും കരുതുന്നില്ല.

നദികളുടെ പാരിസ്ഥിതിക തകര്‍ച്ചയാണ് ജല സംഭരണശേഷിയെ കുറച്ചത്. അനിയന്ത്രിതവും അശാസ്ത്രീയവുമായ മണല്‍വാരല്‍ മൂലം നദികളുടെ അടിത്തട്ട് വന്‍തോതില്‍ താഴ്ന്നു. ഇക്കാരണത്താല്‍ നദീതീരത്തെ ഭൂഗര്‍ഭജല വിതാനവും കുറഞ്ഞു. മഴക്കാലം തീര്‍ന്നാല്‍ ശുദ്ധജലക്ഷാമവും തുടങ്ങുകയായി. ഇത് അടുത്ത കാലത്തെ പ്രതിഭാസമാണ്. ഭൂഗര്‍ഭജല വിതാനം ഭയാനകമാംവിധം താഴ്ന്നുകൊണ്ടിരിക്കുകയാണെന്ന സത്യം മലയാളികള്‍ മനസ്സിലാക്കുന്നുമില്ല. കേരളത്തിലെ മിക്ക നദികളും മണല്‍വാരലിന്റെ ക്രൂരത അനുഭവിക്കുന്നവയാണ്. മൂന്നു മീറ്റര്‍ മുതല്‍ ആറു മീറ്റര്‍ വരെ താഴ്ന്ന നദികളുടെ അടിത്തട്ടില്‍ ചെളിയാണിപ്പോള്‍. മണല്‍ത്തിട്ടകള്‍ പ്രകൃതി നല്‍കിയ ജലനിയന്ത്രണോപാധിയാണ്. ഇതിനെ പാടേ മാറ്റിയതോടെ പെയ്തവെള്ളം കുത്തൊഴുക്കില്‍ പോയിമറയുന്നു.

മണല്‍വാരല്‍ രൂക്ഷമായതോടെ പലനദികളും മരിച്ചു. ഒട്ടുമിക്ക നദികളുടെയും മധ്യത്തില്‍ മണ്‍തിട്ടകളും മരങ്ങളും വ്യാപിക്കുന്നു. അടിത്തട്ട് താണ് 30 കി. മീറ്റര്‍ ഉള്ളിലേക്കു വരെ ഓരുജലം കണ്ടുതുടങ്ങി. ശുദ്ധജല മത്സ്യങ്ങളുടെ വംശനാശത്തിനും ഇതു കാരണമായി.
നദീതീരങ്ങളില്‍ മുന്‍പ് കുളം കുത്തിയാലും ജല പ്രളയമായിരുന്നു. ഈ സ്ഥാനത്ത് കുഴല്‍ക്കിണര്‍ കുഴിച്ചാലും ചില സ്ഥലങ്ങളില്‍ വെള്ളം കണ്ടെത്താന്‍ കഴിയുന്നില്ല.

നദികളുടെ നാശം ഭൂഗര്‍ഭജല വിതാനം ക്രമാതീതമായി താഴേക്കു പോകാന്‍ കാരണമായി. ഇതോടൊപ്പം പാടങ്ങള്‍ വ്യാപകമായി ഇല്ലാതായതും കേരളത്തില്‍ ഭൂഗര്‍ഭ ജലനിരപ്പ് താഴാന്‍ കാരണമാണ്.മൂന്നുനാലു ദശാബ്ദങ്ങള്‍ക്കുള്ളില്‍ പാടങ്ങളുടെ സിംഹഭാഗവും വീടുകളും ഫ്‌ളാറ്റുകളുമായി. വെള്ളം സംഭരിച്ചുനിര്‍ത്തുന്നതില്‍ പാടശേഖരങ്ങള്‍ വലിയൊരു പങ്കുവഹിച്ചിരുന്നു. പാടശേഖരങ്ങളെയും നശിപ്പിക്കുന്ന മറ്റൊരു പ്രവര്‍ത്തനമാണ് മണ്ണെടുപ്പ്. ചെളിക്കു വേണ്ടി ആയിരക്കണക്കിനു ഹെക്ടര്‍ സ്ഥലം കുഴിച്ചു കുളം തോണ്ടുന്നു. മലകളെ ഒന്നായി ഇടിച്ചുനിരത്തി മണ്ണെടുക്കുമ്പോള്‍ ഒരു പ്രദേശത്തിന്റെ ആവാസവ്യവസ്ഥ ഒന്നടങ്കമാണ് താറുമാറാകുന്നത്.

മരങ്ങളും ചെടികളും പുല്ലും നിറഞ്ഞ പ്രദേശത്ത് ഭൂമി നല്ലൊരു ജലസംഭരണ കേന്ദ്രമാകും. ഇതെല്ലാം നശിപ്പിച്ച് മണ്ണു മാന്തി എടുക്കുന്നതോടെ പെയ്ത വെള്ളം താഴാതെ ഒഴുകി മാറുന്നു.കായല്‍പ്രദേശങ്ങള്‍ ഭൂമിയിലെ ജലസമ്പത്ത് നിലനിര്‍ത്തുന്ന ഘടകമാണ്. ഏഴുമീറ്റര്‍ വരെ ആഴമുണ്ടായിരുന്ന നമ്മുടെ കായല്‍പ്രദേശങ്ങള്‍ക്ക് ഇപ്പോള്‍ മൂന്നു മീറ്ററിലും താഴെയാണ് ആഴം. നദികളില്‍നിന്നൊഴുകി വരുന്ന എക്കലും മണ്ണും സമീപപ്രദേശങ്ങളിലെ മാലിന്യവുമെല്ലാം നിറഞ്ഞ് നീര്‍ത്തടങ്ങള്‍ മരണവക്ത്രത്തിലായിക്കൊണ്ടിരിക്കുന്നു.

കേരളത്തിലെ ശുദ്ധജല നീര്‍ത്തടങ്ങളുടെ ആഴവും വിസ്തൃതിയും വര്‍ധിപ്പിച്ച് മഴക്കാലത്ത് കിട്ടുന്ന ഉപരിതലജലം കഴിയുന്നത്ര സംഭരിച്ചുനിര്‍ത്താന്‍ കഴിയണം. നദികളും മരങ്ങളും വനങ്ങളും പാടങ്ങളും സംരക്ഷിക്കപ്പെടണം. ശീതോഷ്ണസ്ഥിതി ക്രമീകരിക്കുന്നതിനും ഇത് അനിവാര്യമാണ്.

പ്രകൃതിയുടെ തനതു ഭാവത്തെ തകര്‍ത്ത് താത്കാലിക ലാഭത്തിനുവേണ്ടിയുള്ള മനുഷ്യന്റെ പ്രവര്‍ത്തനം ജീവജലത്തെ ഉന്മൂലനം ചെയ്തുകൊണ്ടിരിക്കുന്നു. വറുതിയുടെ താണ്ഡവം വരുംനാളുകളില്‍ അതിരൂക്ഷമാകും. കേരളത്തില്‍ സൂര്യതാപമേറ്റ് അവശരാകുന്നവര്‍ വ്യാപകമാവുകയാണ്. നാളെ കുടിവെള്ളത്തിനായി ഒരു യുദ്ധം നടക്കേണ്ടിവന്നാലും അതിശയിക്കാനില്ല. കാലങ്ങളായുള്ള അശ്രദ്ധമായ പ്രവര്‍ത്തനവും അമിത ചൂഷണവും ഹരിതാഭമായ കേരളത്തെ മരുഭൂമിയാക്കുകയാണ്. വരും തലമുറയ്ക്കായി ഒരുതുള്ളി ജീവജലത്തിനു വേണ്ടിയെങ്കിലും നാം ഇനിയും വൈകാതെ പ്രകൃതിയുടെ തനിമ നിലനിര്‍ത്താനുതകുന്ന പ്രവര്‍ത്തനങ്ങളിലേക്കു മടങ്ങണം.

ഇന്ത്യന്‍തീരത്ത് കടല്‍നിരപ്പുയരുന്നു

2010-12-11T05:19:00.000-08:00

തിരുവനന്തപുരം: ആഗോള താപനത്തിന്റെയും കാലാവസ്ഥാ വ്യതിയാനത്തിന്റെയും ഫലങ്ങള്‍ ഇന്ത്യ അനുഭവിച്ചുതുടങ്ങിയതായി കേന്ദ്ര ഭൗമശാസ്ത്രമന്ത്രാലയം സെക്രട്ടറി ഡോ. ശൈലേഷ് നായക്.

സര്‍ക്കാര്‍ ശേഖരിച്ച സ്ഥിതിവിവരക്കണക്കുകള്‍ അനുസരിച്ച് ഇന്ത്യന്‍തീരത്ത് സമുദ്രനിരപ്പ് ഉയരുന്നതിന്റെ തോത് കൂടുകയാണ്. കടലിന്റെ ഉപരിതലത്തിലെ ചൂട്കൂടി. മഞ്ഞുപാളികള്‍ ഉരുകുന്നതും വര്‍ധിച്ചു. ശാസ്ത്രകോണ്‍ഗ്രസ്സില്‍ 'കാലാവസ്ഥയും പരിസ്ഥിതിയും' എന്ന പ്ലീനറി സെഷനില്‍ സംസാരിക്കുകയായിരുന്നു ശൈലേഷ് നായക്.

കഴിഞ്ഞ അഞ്ചുവര്‍ഷത്തില്‍ വര്‍ഷംതോറും 3.1 മില്ലിമീറ്റര്‍ എന്ന തോതിലാണ് സമുദ്രനിരപ്പ് ഉയര്‍ന്നത്. രണ്ടായിരംവരെ 1.3 മില്ലീമീറ്റര്‍ എന്ന തോതിലായിരുന്നു ഇത്. അഞ്ചുവര്‍ഷംകൊണ്ടുള്ള ഈ മാറ്റം ആശങ്കാജനകമാണ്. കഴിഞ്ഞ നൂറുവര്‍ഷങ്ങളില്‍ ഏറ്റവും ചൂടുകൂടിയ പത്തുവര്‍ഷങ്ങളാണ് കടന്നുപോയത്.

കാലവര്‍ഷത്തില്‍ ഈ മാറ്റത്തിന്റെ സ്വാധീനത്തെക്കുറിച്ച് പഠിക്കുന്നതേയുള്ളൂ. എന്നാല്‍ പരോക്ഷമായ പ്രത്യാഘാതങ്ങള്‍ വ്യക്തമായിക്കഴിഞ്ഞു. കനത്തമഴയും കടുത്ത ചൂടും അനുഭവപ്പെടുന്ന സന്ദര്‍ഭങ്ങള്‍ കൂടുതലായി ഉണ്ടാവുന്നു. ഇത് കാലാവസ്ഥയില്‍ ചില മാറ്റങ്ങള്‍ ഉണ്ടാകുന്നതിന്റെ സൂചനയാണ്. ഉപഗ്രഹങ്ങളുടെ സഹായത്തോടെ ശേഖരിച്ച ഈ സ്ഥിതിവിവരക്കണക്കുകള്‍ ഇതുവരെ പ്രസിദ്ധീകരിച്ചിട്ടില്ലെന്നും അദ്ദേഹം വ്യക്തമാക്കി.

ഈ സാഹചര്യത്തില്‍ കാലാവസ്ഥാ ഗവേഷണത്തിന് ഇപ്പോള്‍ 100 കോടി രൂപയാണ് അനുവദിക്കുന്നത്. കാലാവസ്ഥാ ഗവേഷണത്തില്‍ വിദഗ്ദ്ധ പരിശീലനം നല്‍കാനുള്ള കേന്ദ്രം ആരംഭിക്കുമെന്നും അദ്ദേഹം പറഞ്ഞു.

വിശാലമായ കടല്‍ത്തീരമുള്ള ഇന്ത്യയ്ക്ക് ആഗോളതാപനം വലിയ ഭീഷണിയാണ് ഉയര്‍ത്തുന്നതെന്ന് ജവഹര്‍ലാല്‍ നെഹ്‌റു സെന്റര്‍ ഫോര്‍ അറ്റ്‌മോസ് ഫിയറിക് സയന്‍സസ് ആന്‍ഡ് റിസര്‍ച്ച് ചെയര്‍മാന്‍ റോദം നരസിംഹ പറഞ്ഞു. തീരദേശത്ത് ജനസംഖ്യയും കൂടുതലാണ്. കടല്‍നിരപ്പുയരുന്നത് കടല്‍ത്തീരത്ത് താമസിക്കുന്നവരുടെ പലായനത്തിന് ഇടയാക്കുമെന്നും അദ്ദേഹം പറഞ്ഞു.

ആഗോളതാപനം കാലാവസ്ഥയെ എങ്ങനെ ബാധിക്കുമെന്നത് പ്രവചിക്കാനാവുമെന്ന് പുണെയിലെ ഇന്ത്യന്‍ ഇന്‍സ്റ്റിട്യൂട്ട് ഓഫ് മിറ്റീരിയോളജിയിലെ ആഗോളതാപന വിഭാഗം മേധാവി ഡോ. ആര്‍. കൃഷ്ണന്‍ പറഞ്ഞു. ഇതിനായുള്ള സംവിധാനം വികസിപ്പിക്കുന്നതിനുള്ള ഗവേഷണത്തിലാണ് കാലാവസ്ഥാ ശാസ്ത്രജ്ഞര്‍.

ആഗോളതലത്തില്‍ കാര്‍ബണ്‍ വ്യാപനത്തിന്റെ തോത് 2009-ല്‍ 387 പി.പി.എം. ആയി വര്‍ധിപ്പിച്ചുവെന്ന് ബാംഗ്ലൂരിലെ ഇന്ത്യന്‍ ഇന്‍സ്റ്റിട്യൂട്ട് ഓഫ് സയന്‍സസിലെ കാലാവസ്ഥാ വ്യതിയാനകേന്ദ്രം ഡയറക്ടര്‍ ജി. ബാല ചൂണ്ടിക്കാട്ടി. ഐ.എസ്.ആര്‍.ഒ. പ്രോഗ്രാം ഡയറക്ടര്‍ ഡോ. സി.ബി.എസ്. ദത്ത് കോ-ഓര്‍ഡിനേറ്ററായിരുന്നു

കുടിവെള്ളം മലിനമാക്കാതിരിക്കുക

2010-12-11T05:15:00.000-08:00

നാല്പത്തഞ്ച് ലക്ഷം കിണറുകളുണ്ട് കൊച്ചു കേരളത്തില്‍. 86 ശതമാനം വീടുകളിലും കക്കൂസുമുണ്ട്. ഫലം കക്കൂസ് ടാങ്കുകളില്‍നിന്ന് കിണറുവെള്ളത്തിലും മാലിന്യം കലരുന്നു.കക്കൂസ് സൗകര്യമില്ലാത്തതാണ് ലോകമെമ്പാടും ജലമലിനീകരണത്തിനുള്ള പ്രധാന കാരണമെങ്കില്‍ സൗകര്യങ്ങള്‍ കൂടിപ്പോയതാണ് കേരളത്തിലെ പ്രശ്‌നം. 44 നദികളും 900 പോഷകനദികളും 38 കായലുമുള്ള കേരളത്തിലെ ജലശേഖരമെല്ലാം ഖരമാലിന്യങ്ങള്‍കൊണ്ട് മലീമസമാണ്.

മനുഷ്യന്റെയും പ്രകൃതിയുടെയും ആരോഗ്യത്തിന് ശുദ്ധജലം കൂടിയേ തീരൂ. ആരോഗ്യമുള്ള ലോകത്തിന് ശുദ്ധജലം എന്നതാണ് ഇത്തവണത്തെ ലോക ജലദിന സന്ദേശം.അഞ്ചുവയസ്സിനുതാഴെയുള്ള കുട്ടികളുടെ ഏറ്റവും വലിയ കൊലയാളി കുടിവെള്ളത്തിലൂടെ പകരുന്ന രോഗങ്ങളാണ്. മലിനജലം കുടിക്കുന്നതുകാരണം ലോകമെമ്പാടുമായി പ്രതിവര്‍ഷം 400 കോടിയാളുകള്‍ക്ക് അതിസാരം പിടിപെടുന്നു. 22 ലക്ഷം പേര്‍ മരണമടയുന്നു.

* ആണ്ടില്‍ ആറുമാസവും മഴയായിട്ടും മഴയെത്തുംമുമ്പുള്ള മൂന്നുമാസം കേരളം കുടിവെള്ളക്ഷാമത്തിന്റെ പിടിയിലാണ്. എത്ര ഉപയോഗിച്ചാലും വെള്ളം തീര്‍ന്നുപോകില്ല എന്ന ധാരണയാണ് ജലസമൃദ്ധമായ കേരളത്തിലെ കുടിവെള്ളക്ഷാമത്തിന് കാരണം.

എണ്ണംകൊണ്ട് ലോകത്തിനുതന്നെ അത്ഭുതമായ കേരളത്തിലെ കിണറുകളിലെ ജലവിതാനം കഴിഞ്ഞ അഞ്ചുവര്‍ഷംകൊണ്ട് മൂന്നുമീറ്റര്‍ താഴ്ന്നു. മണ്ണിലേക്ക് താഴ്ന്നിറങ്ങുന്ന വെള്ളത്തിന്റെ ഇരട്ടിയാണ് നാം ഊറ്റിയെടുക്കുന്നത്.

മലിനജലം ശുദ്ധീകരിക്കുന്നതിനേക്കാള്‍ എത്രയോ എളുപ്പമാണ് ഉള്ള വെള്ളം മലിനമാകാതെ, പാഴാക്കാതെ നോക്കുകയെന്നത്. ഓര്‍ക്കുക വെള്ളത്തിനു പകരം ഉപയോഗിക്കാവുന്നൊരു പദാര്‍ഥം കണ്ടുപിടിക്കാന്‍ ഇതുവരെ മനുഷ്യനു കഴിഞ്ഞിട്ടില്ല

ജി.എമ്മിന്റെ ആറ് പുതിയ വാഹനങ്ങള്‍ വരുന്നു

2010-12-11T05:01:00.000-08:00

ന്യൂഡല്‍ഹി: ഷെവര്‍ലെ ബ്രാണ്ടിന്റെ ഉടമകളായ ജനറല്‍ മോട്ടോഴ്‌സ് ആറ് പുതിയ വാഹനങ്ങള്‍ രണ്ടു വര്‍ഷത്തിനകം ഇന്ത്യന്‍ വിപണിയില്‍ അവതരിപ്പിക്കാനൊരുങ്ങുന്നു. പിക് അപ് ട്രക്ക് മുതല്‍ വിവിധോപയോഗ വാഹനം (എം.പി.വി) വരെയുള്ളവ വിപണിയില്‍ എത്തിക്കാനുള്ള തയ്യാറെടുപ്പാണ് ജി.എം നടത്തുന്നത്. 2012 ല്‍ വിപണിയില്‍ എത്തുമെന്ന് പ്രഖ്യാപിച്ചിട്ടുള്ള ലൈറ്റ് കൊമേഴ്‌സ്യല്‍ വാഹനങ്ങള്‍ക്ക് പുറമെയാകും ആറ് ചെറുവാഹനങ്ങള്‍ വരിക. വാഹനങ്ങളുടെ രൂപകല്‍പ്പനയ്ക്കും നിര്‍മ്മാണ പ്ലാന്റിന്റെ വികസനത്തിനും വേണ്ടി 500 മില്യണ്‍ ഡോളറിന്റെ (2250 കോടി രൂപ) നിക്ഷേപം രണ്ടു വര്‍ഷത്തിനകം ഇന്ത്യയില്‍ നടത്താനാണ് അമേരിക്കന്‍ വാഹന നിര്‍മ്മാതാക്കള്‍ ലക്ഷ്യമിടുന്നത്.

പിക്കപ്പ് വാന്‍, മള്‍ട്ടി സീറ്റര്‍ വാന്‍, ഹാച്ച്ബാക്ക്, നോച്ച്ബാക്ക്, സ്‌പോര്‍ട്‌സ് യൂട്ടിലിറ്റി വാഹനം, വിവിധോപയോഗ വാഹനം എന്നിവയാകും വിപണിയില്‍ ഇറക്കുക. ചൈനയിലെ ഷാന്‍ഹായ് ഓട്ടോമോട്ടീവ് ഇന്‍ഡസ്ട്രി കോര്‍പ്പറേഷന്റെ സഹകരണത്തോടെയാകും വാഹനങ്ങള്‍ നിര്‍മ്മിക്കുക. വാഹന നിര്‍മ്മാണത്തില്‍ ജി.എമ്മിനും എസ്.ഒ.ഐ.സിയ്ക്കും 50: 50 പങ്കാളിത്തമാണ് ഉള്ളത്.

ജി.എമ്മിന്റെ ബാംഗ്ലൂരിലെ ഗവേഷണ കേന്ദ്രത്തിലാകും ഇന്ത്യന്‍ സാഹചര്യങ്ങള്‍ക്ക് ഇണങ്ങുന്ന തരത്തില്‍ വാഹനങ്ങള്‍ രൂപകല്‍പ്പന ചെയ്യുക. വാഹന നിര്‍മ്മാണത്തിനുള്ള 90 ശതമാനം ഘടകങ്ങള്‍ ഇന്ത്യയില്‍നിന്നുതന്നെ വാങ്ങാനും നിര്‍മ്മാതാക്കള്‍ക്ക് പരിപാടിയുണ്ട്. വാഹന ഘടകങ്ങള്‍ നല്‍കാന്‍ വിദേശ കമ്പനികള്‍ക്ക് ജി.എം കരാര്‍ നല്‍കിക്കഴിഞ്ഞു.

ജി.എം ഇന്ത്യ സാമ്പത്തിക ഭദ്രതയയോടെയാണ് പ്രവര്‍ത്തിക്കുന്നതെന്ന് അധികൃതര്‍ വ്യക്തമാക്കി. എന്‍ട്രി ലെവല്‍ കാര്‍ സ്പാര്‍ക്കിന്റെ നവീന പതിപ്പ് പുറത്തിറക്കാനുള്ള ശ്രമവും നിര്‍മ്മാതാക്കള്‍ നടത്തുന്നുണ്ട്. 800 സി.സിയുള്ള ചെറിയ എന്‍ജിനോടെയാകും പുതിയ സ്പാര്‍ക്ക് വിപണിയിലെത്തുക. ഇന്ത്യന്‍ വിപണിയില്‍നിന്ന് ലഭിക്കുക പ്രതികരണം നിരീക്ഷിച്ചശേഷം വിദേശ വിപണികളിലേക്കും പുതിയ 800 സി.സി സ്പാര്‍ക്ക് എത്തിക്കും. ചെറുകാര്‍ ബീറ്റിന് ഡീസല്‍ എന്‍ജിന്‍ നല്‍കാനുള്ള ശ്രമങ്ങളും ജി.എം നടത്തുന്നുണ്ട്.

ജി.എം വാഹനങ്ങളുടെ വില ജനവരി മുതല്‍ വര്‍ദ്ധിക്കും

മുംബൈ: ജനറല്‍ മോട്ടോഴ്‌സ് ഇന്ത്യ വിപണിയിലെത്തിക്കുന്ന ഷെവര്‍ലെ വാഹനങ്ങളുടെ വില 2011 ജനവരിമുതല്‍ വര്‍ദ്ധിക്കും. അസംസ്‌കൃത വസ്തുക്കളുടെ വിലവര്‍ദ്ധനയാണ് തീരുമാനത്തിന് പിന്നിലെന്ന് കോര്‍പ്പറേറ്റ് അഫയേഴ്‌സ് വൈസ് പ്രസിഡന്റ് പി.ബാലേന്ദ്രന്‍ പറഞ്ഞു. 1.5 ശതമാനം മുതല്‍ മൂന്ന് ശതമാനംവരെ വില വര്‍ദ്ധനയാകും വിവിധ മോഡലുകള്‍ക്ക് ഉണ്ടാവുക. കഴിഞ്ഞ ജൂണിലാണ് ജി.എം വാഹനങ്ങളുടെ വില മുന്‍പ് വര്‍ദ്ധിപ്പിച്ചത്. അമേരിക്കന്‍ വാഹന നിര്‍മ്മാതാവായ ജി.എമ്മിന്റെ ഇന്ത്യന്‍ ഘടകമാണ് ജി.എം ഇന്ത്യ

വന്‍തോക്കുകള്‍ക്ക് പരീക്ഷണം

2010-12-11T04:27:00.000-08:00

യൂറോപ്യന്‍ ഫുട്‌ബോളിലെ വന്‍ശക്തികളെല്ലാം പരീക്ഷിക്കപ്പെട്ട ആഴ്ചയാണ് കടന്നുപോയത്. ഇംഗ്ലണ്ടില്‍ ചെല്‍സിയും ആഴ്‌സനലും ഇറ്റലിയില്‍ ഇന്റര്‍മിലാനും ജര്‍മനിയില്‍ ബയറണ്‍ മ്യൂണിക്കും ഫ്രാന്‍സില്‍ ലിയോണും പരാജയപ്പെട്ടപ്പോള്‍, ഇംഗ്ലീഷ് ടീമുകളായ മാഞ്ചസ്റ്റര്‍ യുണൈറ്റഡും ലിവര്‍പൂളും സ്പാനിഷ് ടീം റയല്‍ മാഡ്രിഡും സമനിലയുടെ കയ്പ്പുനീര്‍ കുടിച്ചു. എന്നാല്‍, ബാഴ്‌സലോണയും എ.സി.മിലാനും മാഴ്‌സെയും പോലുള്ള ടീമുകള്‍ വിജയത്തോടെ ലീഗില്‍ മുന്നേറ്റം തുടര്‍ന്നു.

ചെല്‍സിക്ക് ആദ്യ ഷോക്ക്

തുടരെ രണ്ട് മത്സരങ്ങള്‍ തോല്‍ക്കുക. ചെല്‍സിയെപ്പോലെ യൂറോപ്യന്‍ ഫുട്‌ബോളിന്റെ മുന്‍നിരയിലുള്ള ടീമുകള്‍ക്ക് ചിന്തിക്കാന്‍ പോലുമാവാത്ത കാര്യം. എന്നാല്‍, ലീഗ് കപ്പില്‍ ന്യൂകാസില്‍ യുണൈറ്റഡിനോടും പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിയോടും പരാജയപ്പെട്ട് ചെല്‍സി ആ യാഥാര്‍ഥ്യം നേരിടുകയാണിപ്പോള്‍. തുടരെ അഞ്ച് മത്സരങ്ങള്‍ വിജയിച്ച് ഉജ്ജ്വല ഫോമില്‍ കുതിച്ചുവന്ന ചെല്‍സിയെ കാര്‍ലോസ് ടെവസിന്റെ ഗോളിലാണ് മാഞ്ചസ്റ്റര്‍ സിറ്റി പിടിച്ചുനിര്‍ത്തിയത്. ചെല്‍സിയെ മാഞ്ചസ്റ്റര്‍ സിറ്റിയാണ് കീഴടക്കിയതെങ്കില്‍, ആഴ്‌സനലിന്റെയും മാഞ്ചസ്റ്റര്‍ യുണൈറ്റഡിന്റെയും കാര്യം അതിലും കഷ്ടമായിരുന്നു. സ്വന്തം സ്റ്റേഡിയത്തില്‍ വെസ്റ്റ് ബ്രോംവിച്ചിനോട് 3-0ന് പിന്നില്‍പ്പോയശേഷമാണ് ആഴ്‌സനല്‍ മുഖം രക്ഷിക്കുന്ന രണ്ട് ഗോളുകള്‍ തിരിച്ചടിച്ചത്. മാഞ്ചസ്റ്റര്‍ യുണൈറ്റഡിന്റെയും നില വ്യത്യസ്തമായിരുന്നില്ല. ബോള്‍ട്ടന്‍ വാന്‍ഡറേഴ്‌സിനോട് രണ്ടുവട്ടം പിന്നില്‍പ്പോയശേഷം, സമനില നേടുകയായിരുന്നു മുന്‍ ചാമ്പ്യന്മാര്‍. ലീഗ് കപ്പിലെ രക്ഷകന്‍ മൈക്കല്‍ ഓവനാണ് ഇവിടെയും മാഞ്ചസ്റ്ററിനെ തുണച്ചത്. സണ്ടര്‍ലന്‍ഡാണ് ലിവര്‍പൂളിനെ സമനിലയില്‍ കുടുക്കിയത്.

ബാഴ്‌സലോണയുടെ തിരിച്ചുവരവ്

സ്പാനിഷ് ലീഗ് ലാ ലിഗയില്‍ മുന്‍നിരയിലേക്ക് ബാഴ്‌സലോണ തിരിച്ചെത്തിയ ആഴ്ചയാണ് കടന്നുപോയത്. അത്‌ലറ്റിക് ബില്‍ബാവോയെ അവരുടെ നാട്ടില്‍ മെസ്സിയില്ലാതെ നേരിട്ട ബാഴ്‌സ ഒന്നിനെതിരെ മൂന്നുഗോളുകള്‍ക്ക് മത്സരവും ലീഗില്‍ രണ്ടാം സ്ഥാനവും സ്വന്തമാക്കി. സെയ്ദു കെയ്റ്റയും സാവിയും ബുസ്‌കെറ്റ്‌സുമായിരുന്നു ബാഴ്‌സയുടെ സ്‌കോറര്‍മാര്‍. എന്നാല്‍, ഡേവിഡ് വിയക്ക് ചുവപ്പുകാര്‍ഡ് കണ്ടത് ലീഗില്‍ ബാഴ്‌സയ്ക്ക് തിരിച്ചടിയുമായി. കളിയില്‍ എഴുപതുശതമാനത്തോളം പന്തടക്കം നേടിയിട്ടും ഒരു ഗോള്‍ പോലും നേടാനാകാതെയാണ് ലാവെന്റെയ്‌ക്കെതിരെ റയല്‍ മാഡ്രിഡ് ഗോള്‍ രഹിത സമനിലയില്‍ കുടുങ്ങിയത്. ലീഗില്‍ മുന്നിലുള്ള വലന്‍സിയ, മറുപടിയില്ലാത്ത രണ്ട് ഗോളുകള്‍ക്ക് സ്‌പോര്‍ട്ടിങ് ഗിജോണിനെ പരാജയപ്പെടുത്തിയപ്പോള്‍, സെവിയയെ ഇതേ സ്‌കോറിന് അട്ടിമറിച്ച് ഹെര്‍ക്കുലസ് വീണ്ടും കരുത്ത് തെളിയിച്ചു.

തോറ്റിട്ടും ഇന്റര്‍ മുന്നില്‍

എ.എസ്.റോമയും ഇന്റര്‍മിലാനുമായുള്ള പോരാട്ടമായിരുന്നു ഇറ്റലിയില്‍ പോയവാരം ശ്രദ്ധിക്കപ്പെട്ടത്. സമനിലയിലേക്ക് എന്നുറപ്പിച്ച മത്സരത്തിന്റെ അവസാന മിനിറ്റില്‍ മിര്‍ക്കോ വുസിനിച്ച് നേടിയ ഗോള്‍ ഇന്ററിന്റെ കഥകഴിച്ചു. തോറ്റെങ്കിലും ഗോള്‍ ശരാശരിയിലെ മുന്‍തൂക്കം ഈയാഴ്ചയും ഇന്ററിനെ മുന്നില്‍നിര്‍ത്തുന്നു. ഇന്റര്‍ പരാജയപ്പെട്ടപ്പോള്‍ അയല്‍ക്കാരായ എ.സി.മിലാന്‍ ഗെനോവയ്‌ക്കെതിരെ ഒരു ഗോള്‍ വിജയവുമായി മുഖം രക്ഷിച്ചു. സ്വീഡിഷ് താരം സ്ലാട്ടന്‍ ഇബ്രാഹിമോവിച്ചാണ് എ.സി.യുടെ ഗോള്‍സ്‌കോറര്‍. മുന്നിട്ടുനില്‍ക്കുകയായിരുന്ന ചീവോയെ ഒരു ഗോളിന് തോല്‍പിച്ച് ലാസിയോ രണ്ടാം സ്ഥാനത്തേക്ക് കയറിയപ്പോള്‍, മറ്റൊരു മത്സരത്തില്‍ യുവന്റസ് 4-2ന് കാഗ്ലിയാരിയെ വീഴ്ത്തി. മിലോസ് ക്രാസിച്ചിന്റെ ഹാട്രിക്കാണ് യുവന്റസിന്റെ വിജയത്തിലെ തിളക്കം.

ബയറണിന്റെ വേദനയേറുന്നു

ജര്‍മന്‍ ലീഗ് ബുണ്ടസ്‌ലിഗയില്‍ മുന്‍ ജേതാക്കളായ ബയറണ്‍ മ്യൂണിക്കിന്റെ വേവലാതിക്ക് പോയവാരവും കുറവുണ്ടായില്ല. ലീഗിലെ ഒന്നാം സ്ഥാനക്കാര്‍ മെയ്ന്‍സിനോട് 2-1ന് പരാജയപ്പെട്ട ബയറണ്‍ ഒമ്പതാം സ്ഥാനത്താണിപ്പോള്‍. ആറ് കളികളില്‍ മൂന്നാം തോല്‍വിയുമാണിത്. എന്നാല്‍, ആറില്‍ ആറു ജയിച്ച് മെയ്ന്‍സ് അവിസ്മരണീയ കുതിപ്പ് തുടരുകയാണ്. ലീഗില്‍ മുന്‍നിരയിലുള്ള ബൊറൂസിയ ഡോര്‍ട്ട്മുണ്ട് 3-1ന് സെന്റ് പോളിയെയും ഹാനോവര്‍ 1-0ന് കൈസര്‍ലൗറ്ററേനെയും പരാജയപ്പെടുത്തിയപ്പോള്‍, നാലാം സ്ഥാനക്കാരായ ഹോഫന്‍ഹെയിമിനെ കൊളോണ്‍ സമനിലയില്‍ പിടിച്ചു (1-1).

ലിയോണ്‍ അടിത്തട്ടില്‍

ഏഴുവട്ടം തുടരെ ഫ്രഞ്ച് ചാമ്പ്യന്മാരായിട്ടുള്ള ഒളിമ്പിക് ലിയോണിന് സീസണില്‍ ഇനിയൊരു തിരിച്ചുവരവ് സാധിക്കുമോ എന്നു തന്നെ ഉറപ്പിക്കാനാവില്ല. ഏഴ് കളികളില്‍ വെറും ഒരു ജയവും രണ്ട് സമനിലയും മാത്രം നേടാനായ ലിയോണ്‍ 18-ാം സ്ഥാനത്താണിപ്പോള്‍. ലീഗില്‍ ഒന്നാം സ്ഥാനത്തുള്ള സെന്റ് എറ്റീനിനോട് ഒരു ഗോളിന് പരാജയപ്പെട്ടാണ് ലിയോണ്‍ തരംതാഴ്ത്തല്‍ മേഖലയിലേക്ക് പതിച്ചത്. നീസിനെ പരാജയപ്പെടുത്തി റെന്നെ രണ്ടാം സ്ഥാനത്തുതുടര്‍ന്നപ്പോള്‍, ടൊളൂസും ലീലും സമനിലയില്‍ പിരിഞ്ഞു. സോഷോയെ 2-1ന് പരാജയപ്പെടുത്തിയ മാഴ്‌സെ ആറാം സ്ഥാനത്തേക്ക് കയറി

തരാന്‍ എങ്ങിനെ വന്നു ...?

2010-12-11T04:14:00.000-08:00

താരന് പല കാരണങ്ങളുണ്ട്. ഏറ്റവും പ്രധാന കാരണം മലസ്സീസിയ ഫര്‍ഫര്‍ (mala-ssezia furfur) അഥവാ പിറ്റിറോസ്‌പോറം ഒവേല്‍ (pityrosporum ovale) എന്ന ഒരുതരം പൂപ്പലുകള്‍ (fungus) ആണ്. ഇവ സാധാരണയായി ശിരോചര്‍മത്തില്‍ വസിക്കുന്ന ഒരു നിരുപദ്രവിയാണ്. പക്ഷേ, ചില സമയങ്ങളില്‍ ഇവ കൂടുതലായി വളര്‍ന്നു പെരുകി താരനുണ്ടാക്കുന്നു.

താരന്‍ രണ്ടുതരമുണ്ട്. (1) ശിരോചര്‍മത്തിലെ എണ്ണമയം കൂടുന്നതു കൊണ്ടുണ്ടാകുന്ന എണ്ണമയമുള്ള താരന്‍ (greasy dand-ruff). ശിരോചര്‍മത്തിലെ എണ്ണഗ്രന്ഥികള്‍ കൂടുതലായി എണ്ണ ഉല്പാദിപ്പിക്കുന്നു. അത് പിറ്റിറോസ്‌പോറം എന്ന പൂപ്പലുകള്‍ വളരാന്‍ സഹായിക്കുന്നു. (2) സോപ്പുകള്‍, ഷാംപൂകള്‍ എന്നിവയുടെ അമിതോപയോഗം മൂലം ശിരോചര്‍മം വരണ്ട് താരനുണ്ടാകാം. ഇതാണ് വരണ്ട താരന്‍ (dry dandruff).

ശരീരത്തിലെ മറ്റു ചില അസുഖങ്ങള്‍ കൊണ്ടും താരനുണ്ടാകം. പാര്‍ക്കിന്‍സണിസം (parkinsonism) എന്ന രോഗമുള്ളവരില്‍ താരന്‍ കൂടുതലായി കാണുന്നു. ഈ അസുഖം മൂലം തലയില്‍ എണ്ണമയം കൂടുന്നതാണ് ഇതിനു കാരണം.

മദ്യപാനികള്‍, തടി കൂടിയവര്‍, ഹൃദ്രോഗികള്‍, പ്രമേഹരോഗികള്‍, അപസ്മാര രോഗികള്‍ എന്നിവരിലും താരന്‍ കൂടുതലായി കാണപ്പെടുന്നു.
എയ്ഡ്‌സ് രോഗികളില്‍ താരന്‍ ഒരു പ്രധാന രോഗലക്ഷണമായിത്തന്നെ അറിയപ്പെടുന്നു. അവരില്‍ 'പിറ്റിറോസ്‌പോറം' ഫംഗസുകള്‍ വളരെയധികമായി വളര്‍ന്നുവരുന്നതാണ് ഇതിനു കാരണം.

ചില വിറ്റാമിനുകളുടെ കുറവ് - പ്രത്യേകിച്ച് ബി കോംപ്ലക്‌സ് വിറ്റാമിനുകളായ ബയോട്ടിന്‍ (biotin), പാന്റ്റോതനിക് ആസിഡ് (pantothenic acid), റിബോഫ്ലേവിന്‍ (ribo-flavin) എന്നിവയുടെ കുറവ് താരനു കാരണമായെന്നു വരാം.

ചില മരുന്നുകളുടെ പാര്‍ശ്വഫലമായും താരനുണ്ടാകാം. രക്തസമ്മര്‍ദ്ദത്തിനുപയോഗിക്കുന്ന മീതൈല്‍ ഡോപ്പ (ാലവ്യേഹ റീുമ), മാനസിക രോഗത്തിനുപയോഗിക്കുന്ന ക്ലോര്‍പ്രോമസിന്‍ (chlorpromazine), വയറിന്റെ അസുഖങ്ങള്‍ക്ക് (hyper acidity) ഉപയോഗിക്കുന്ന സിമെറ്റിഡിന്‍ (cimetidine) എന്നിവ ചില ഉദാഹരണങ്ങളാണ്

കാവ്യവിസ്മയം

2010-12-11T02:53:00.000-08:00

കഴിഞ്ഞ ഏഴുവര്‍ഷമായി നിഘണ്ടുകളായിരുന്നു കാവ്യ ശിവശങ്കറിന്റെ കൂട്ടുകാര്‍. കിട്ടാവുന്നത്ര നിഘണ്ടുകള്‍ ശേഖരിക്കുകയും അതിലെ ഓരോവാക്കുകളും അതിന്റെ അര്‍ഥവും ഉത്പത്തിയും ഉപയോഗവും മനസ്സിലാക്കി പഠിക്കുകയും ചെയ്യുകയെന്ന ശ്രമകരമായ ദൗത്യത്തിലായിരുന്നു കാവ്യ. ജീവിതത്തിലെ ഏറ്റവും വലിയ ആഗ്രഹങ്ങളിലൊന്ന് സഫലമാക്കാനുള്ള കഠിനശ്രമം.

സ്‌ക്രിപ്‌സ് നാഷണല്‍ സ്‌പെല്ലിങ് ബീ ടെസ്റ്റില്‍ ചാമ്പ്യനാവുകയെന്ന ആഗ്രഹമാണ് കാലിഫോര്‍ണിയയിലെ ട്രയില്‍ ജൂനിയര്‍ സ്‌കൂളിലെ എട്ടാം ക്ലാസ് വിദ്യാര്‍ഥിനിയായ കാവ്യ കൂടെക്കൊണ്ടുനടന്നത്. ഇക്കൊല്ലം കാവ്യ അത് സാധിച്ചു. മത്സരത്തില്‍ പങ്കെടുത്ത 242പേരെ പിന്തള്ളി, നാല്‍പതുവാക്കുകളുടെ സ്‌പെല്ലിങ് കൃത്യമായി ഉച്ചരിച്ച് കാവ്യ ജീവിതത്തിലെ വലിയ മോഹം സഫലമാക്കി.

വാക്കുകളുടെ സ്‌പെല്ലിങ് കൃത്യമായി പറയുന്ന മത്സരമാണ് സ്‌പെല്ലിങ് ബീ. ഒരു കായിക മത്സരത്തെപ്പോലെ ആവേശം വിതറുന്ന സ്‌പെല്ലിങ് ബീയ്ക്ക് ലോകമെങ്ങും ആരാധകരുണ്ട്. സ്‌പോര്‍ട്‌സ് ചാനലായ ഇ.എസ്.പി.എന്നാണ് ഇത് സംപ്രേഷണം ചെയ്യുന്നതെന്നതുതന്നെ പരിപാടിയുടെ പ്രാധാന്യം വെളിപ്പെടുത്തുന്നു. സ്‌പെല്ലിങ് ബീയില്‍ ചാമ്പ്യനാകാതെ അടങ്ങില്ലെന്ന ആവേശം കാവ്യയ്ക്കുണ്ടാകാന്‍ ഒരു കാരണമുണ്ട്. കഴിഞ്ഞ മൂന്ന് വര്‍ഷമായി കിരീടം കപ്പിനും ചുണ്ടിനുമിടയില്‍ കാവ്യയ്ക്ക് നഷ്ടമാവുകയാണ്. 2006-ല്‍ പത്താം സ്ഥാനം. 2007-ല്‍ എട്ടാമത്. കഴിഞ്ഞവര്‍ഷം നാലാം സ്ഥാനത്ത്. ഇക്കൊല്ലം, അവസാനചോദ്യത്തിനും ശരിയായ ഉത്തരം നല്‍കിയതോടെ കാവ്യ മികവിന്റെ കിരീടം ചൂടി. സ്‌പെല്ലിങ് ബീ ചാമ്പ്യനാകുന്ന പത്താമത്തെ ഇന്ത്യന്‍ വിദ്യാര്‍ഥിയാണ് കാവ്യ. 1999-ലെ ചാമ്പ്യന്‍ നുപുര്‍ ലാലയാണ് ഈ രംഗത്ത് കാവ്യയുടെ പ്രചോദനം.

ഇക്കുറി ഫൈനലില്‍ കാവ്യയെ വെല്ലുവിളിക്കാനുണ്ടായിരുന്ന പത്തുപേരില്‍ ഏഴുപേരും ഇന്ത്യന്‍ വംശജരായിരുന്നുവെന്ന പ്രത്യേകതയുമുണ്ട്. അമേരിക്കയിലെ ഏഷ്യക്കാര്‍, പ്രത്യേകിച്ച് ഇന്ത്യന്‍ വംശജര്‍ വിദ്യാഭ്യാസരംഗത്ത് കൈവരിക്കുന്ന പുരോഗതിയായാണ് ഈ കുതിപ്പിനെ പലരും വിലയിരുത്തുന്നത്. കഴിഞ്ഞവര്‍ഷത്തെ ചാമ്പ്യന്‍ സമീര്‍ മിശ്ര രണ്ടാം സ്ഥാനക്കാരനായി. ഐശ്വര്യ ഈശ്വര്‍ പസ്തപുര്‍, സിദ്ദാര്‍ഥ് ചന്ദ്, നീതു ചന്ദക് , തുസ ഹീര, രമ്യ ഔറോപ്രേന്‍ എന്നിവരായിരുന്നു ഫൈനലിലെ മറ്റ് ഇന്ത്യന്‍ വിദ്യാര്‍ഥികള്‍.

1985-ല്‍ ബാലു നടരാജനിലൂടെയാണ് അമേരിക്കയിലെ ഇന്ത്യന്‍ വംശജര്‍ സ്‌പെല്ലിങ് ബീ കിരീടത്തില്‍ ആദ്യമായി മുത്തമിട്ടത്. 1988-ല്‍ രാജശ്രീ രാമചന്ദ്രന്‍, 1999-ല്‍ നുപൂര്‍ ലാല, 2000-ല്‍ ജോര്‍ജ് എബ്രഹാം തമ്പി, 2002-ല്‍ പ്രത്യുഷ് ബുദ്ദിഗ, 2003-ല്‍ സായ് ആര്‍.ഗണ്ടൂരി, 2005-ല്‍ അനുരാഗ് കാശ്യപ്, 2008-ല്‍ സമീര്‍ മിശ്ര എന്നിവരാണ് ലോകമെങ്ങും പ്രേക്ഷകരും ആരാധകരുമുള്ള മത്സരത്തിലെ മുന്‍കാല ഇന്ത്യന്‍ ജേതാക്കള്‍.

എത്ര കടുത്ത വാക്കുകളായാലും ചോദ്യത്തെ പതറാതെ നേരിടുന്ന കാവ്യയെ അസാമാന്യ പ്രതിഭയെന്നാണ് ഇ.എസ്.പി.എന്നിലെ പോള്‍ ലോഫ്‌ലര്‍ വിലയിരുത്തിയത്. വാക്കുകളുടെ ഉത്പത്തിയെയും അര്‍ഥത്തെയും കുറിച്ചുള്ള ഏതാനും ചോദ്യങ്ങളിലൂടെ സ്‌പെല്ലിങ് ശരിയായി ഗ്രഹിക്കാനായതാണ് തന്റെ വിജയരഹസ്യമെന്ന് കാവ്യയും പറയുന്നു. തന്റെ അച്ഛനും പരിശീലകനുമായ മിര്‍ലി ശിവശങ്കറിനാണ് ഈ നേട്ടത്തിന്റെ മുഴുവന്‍ ക്രഡിറ്റും കാവ്യ നല്‍കുന്നത്. ഭാവിയില്‍ ന്യൂറോസര്‍ജനാകണമെന്നാണ് കാവ്യയുടെ മറ്റൊരു മോഹം

ആസ്തമ.

2010-12-11T02:44:00.000-08:00

ശ്വാസകോശങ്ങളെ ബാധിക്കുന്ന ഒരവസ്ഥയാണ് ആസ്തമ. ശ്വാസോച്ഛ്വാസത്തിന് തടസ്സം നേരിടുന്നു, ചുമയുണ്ടാക്കുന്നു. ശ്വാസനാളികള്‍ സാമാന്യത്തിലേറെ ചുരുങ്ങുന്നതുകൊണ്ടാണിത്. ഇതിനു പ്രധാനമായി മൂന്ന് ഘടകങ്ങളുണ്ട്.
ആദ്യം വായുനാളികളുടെ ചുവരുകളിലെ മാംസപേശികള്‍, മുറുകി, ഉള്ളിലുള്ള സ്ഥലം കുറയുന്നു. കുറഞ്ഞ അളവിലെ വായു കടന്നുപോകൂ. അങ്ങനെ രോഗിക്ക് ശ്വാസോച്ഛ്വാസം ചെയ്യാന്‍ വിഷമമുണ്ടാക്കുന്നു.
രണ്ടാമതായി, എന്നാല്‍ അതിലും പ്രധാനമായി, വായുനാളികളുടെ പാളികള്‍ നീരുവന്നു വീര്‍ക്കുന്നു, ഉള്ളിലെ സ്ഥലം വീണ്ടും കുറയുന്നു. മാത്രമല്ല, വായുനാളികള്‍ക്ക് പ്രേരണാഘടകങ്ങള്‍ കൂടുതല്‍ അസ്വസ്ഥത ഉണ്ടാക്കുന്നു. അതുകൊണ്ടാണ് രോഗി ഇടയ്ക്കിടെ ചുമയ്ക്കുന്നത്.

മൂന്നാമതായി, അസ്വസ്ഥതമൂലം വായുനാളികള്‍ അമിതമായ അളവില്‍ കഫം ഉല്പാദിപ്പിക്കുന്നു. അങ്ങനെ കഫക്കെട്ട് ഉണ്ടാക്കുന്നു.
ആസ്തമ സര്‍വസാധാരണമാണ്. ഇത് ഏതു പ്രായത്തിലും വരാം. സ്ത്രീയോ പുരുഷനോ വൃദ്ധരോ ചെറുപ്പകാരോ എന്നു വേണ്ട, വര്‍ ഗരാഷ്ട്രഭേദമന്യേ ഏവര്‍ക്കും ഇതുണ്ടാകാം. ആസ്തമ പാരമ്പര്യരോഗമാണെങ്കിലും പലപ്പോഴും ഇത് ഏറെ തലമുറകള്‍ക്കും ഭീഷണിയാകുന്നില്ല. അതുപോലെ, കുടുംബത്തില്‍ എല്ലാവരേയും ബാധിക്കുന്നുമില്ല. ആസ്തമാബാധിതരായ കുട്ടികളില്‍ 50-70 ശതമാനം ഭാവിയില്‍ അതില്‍നിന്ന് മുക്തരാകുകയും ചെയ്യന്നു.

ഗൂഗിള്‍ എര്‍ത്തില്‍ മരങ്ങളും !!!

2010-12-11T02:39:00.000-08:00

മരങ്ങള്‍ക്ക് ഇന്റര്‍നെറ്റിലെന്ത് കാര്യം. പുതിയ ഗൂഗിള്‍ എര്‍ത്ത് ഉപയോഗിച്ചാല്‍ അക്കാര്യം മനസ്സിലാകും. ലോകത്തെ അതേപോലെ ഇന്റര്‍നെറ്റില്‍ പുനരവതരിപ്പിക്കുക എന്ന ശ്രമകരമായ ജോലി ഏറ്റെടുത്ത ഗൂഗിള്‍ എര്‍ത്ത് പുതിയ അത്ഭുതങ്ങളുമായി വീണ്ടും എത്തിയിരിക്കുകയാണ്. ആദ്യം ഭൂമിയുടെ മൊത്തത്തിലുള്ള ചിത്രവും പിന്നീട് പാതയോരങ്ങളും സൃഷ്ടിച്ച ഗൂഗിള്‍ ഇത്തവണ അതാതു സ്ഥലങ്ങളിലെ മരങ്ങളെ അതേപോലെ ത്രീഡി ചിത്രങ്ങളായി പുനസൃഷ്ടിച്ചിരിക്കുന്നു. അതോടെ ഇത്രയും കാലം കെട്ടിടങ്ങളുടേയും പാതകളുടേയും അരികത്ത് വെറുതെ നിന്ന മരങ്ങള്‍ക്കും ഗൂഗിള്‍ എര്‍ത്ത് മോക്ഷം നല്‍കി. നമ്മള്‍ നടന്നുപോകുന്ന വഴി കാണുന്ന മരങ്ങള്‍ അതേപോലെ ഇനി ഗൂഗിള്‍ എര്‍ത്തിലുംകണ്ടെടുക്കാമെന്നു സാരം.

ഭൂമിയിലുള്ള ഏതാണ്ട് എട്ടുകോടി മരങ്ങളുമായാണ് ഗൂഗിള്‍ എര്‍ത്തിന്റെ ആറാം പതിപ്പിന്റെ വരവ്. ആതന്‍സ്, ബെര്‍ലിന്‍, ഷിക്കാഗോ, ന്യൂയോര്‍ക്ക്, സാന്‍ഫ്രാന്‍സിസ്‌കോ, ടോക്യോ എന്നിവിടങ്ങളിലെ മരങ്ങളാണ് ആദ്യഘട്ടത്തില്‍ ഉള്‍പ്പെടുത്തിയിരിക്കുന്നത്. ഇന്ത്യന്‍ മരങ്ങള്‍ക്ക് തല്‍ക്കാലം അതിനുള്ള ഭാഗ്യമില്ല. ആമസോണ്‍ കണ്‍സര്‍വേഷന്‍ ടീമിന്റേയും, ഗ്രീന്‍ബെല്‍റ്റ് മൂവ്‌മെന്റിന്റെയും, കോണിബയോ തുടങ്ങിയ സംഘടനകളുടേയും സഹായത്തോടെയാണ് ഗൂഗിള്‍ ഈ പദ്ധതി തയ്യാറാക്കിയത്.

യാത്രക്കുള്ള മുന്നൊരുക്കങ്ങളിലും ഏതെങ്കിലും ഒരു സ്ഥലത്തിന്റെ ഭൂമിശാസ്ത്രം മനസ്സിലാക്കാനുമൊക്കെ ഇന്ന് നിരവധിപേര്‍ ഉപയോഗിക്കുന്ന സര്‍വീസ് ആണ് ഗൂഗിള്‍ എര്‍ത്ത്. അതിന്റെ 6.0 പതിപ്പില്‍ ഗൂഗിള്‍ സ്ട്രീറ്റ് വ്യൂ മുഴുവനായും ഉള്‍പ്പെടുത്തിയിട്ടുണ്ട്. മറ്റേതൊ ഒരു ലോകത്തുനിന്ന് ഭൂമിയിലെ ഒരു നഗരത്തിലെത്തി സ്ഥലങ്ങള്‍ ചുറ്റി നടന്ന് കാണുന്ന പ്രതീതിയായിരുന്നു സ്ട്രീറ്റ് വ്യൂ അവതരിപ്പിച്ചപ്പോള്‍ മുതല്‍ നമ്മള്‍ അനുഭവിച്ചു പോന്നത്.

അതേ അമാനുഷിക അനുഭവം ഗൂഗിള്‍ എര്‍ത്തിന്റെ പുതിയ പതിപ്പില്‍ അവതരിക്കുന്നതോടെ ഗൂഗിള്‍ എര്‍ത്ത് കൂടുതല്‍ ആകര്‍ഷകമാകുമെന്നാണ് കരുതപ്പെടുന്നത്. സ്‌ക്രീനിന്റെ വലത്തു ഭാഗത്തുനിന്നും പെഗ്മാന്‍ (LINK : http://google-latlong.blogspot.com/2008/11/happier-travels-through-street-view.html) എടുത്ത് നീലനിറത്തില്‍ ഹൈലൈറ്റ് ചെയ്ത സ്ട്രീറ്റിലെവിടെയെങ്കിലും വച്ചാല്‍ മതി നമ്മള്‍ പറക്കും തളികയിലെന്ന പോലെ അവിടെയെത്തിച്ചേരും. പിന്നീട് മൗസ് പോയിന്ററും സ്‌ക്രോള്‍ വീലുമുപയോഗിച്ച് നഗരപ്രദക്ഷിണമാകാം.

ഹിസ്റ്റോറിക്കല്‍ ഇമേജറി എന്ന സംവിധാനം കൂടുതല്‍ ലളിതമാക്കിയിട്ടുമുണ്ട് ഈ പതിപ്പില്‍. 1945 ലെ ലണ്ടന്‍ നഗരമോ ന്യൂയോര്‍ക്കോ ആസ്വദിക്കണമെങ്കില്‍ സ്റ്റാറ്റസ് ബാറിലെ സ്‌കെയിലില്‍ ആവശ്യമുള്ള വര്‍ഷം തിരഞ്ഞെടുത്താല്‍ എളുപ്പത്തില്‍ അന്നത്തെ ചിത്രം ലഭിക്കുന്ന തരത്തിലാണ് ഇത് ആവിഷ്‌കരിച്ചിരിക്കുന്നത്.

ഇന്റര്‍നെറ്റ് ചരിത്രത്തിലെ മഹാത്ഭുതമായ ഗൂഗിള്‍ എര്‍ത്തിന് ഒരു സാധാരണ ഇന്റര്‍നെറ്റ് ഉപയോക്താവിന്റെ ജീവിതത്തില്‍ അത്ര ചെറുതല്ലാത്ത സ്ഥാനമുണ്ട്. നമുക്ക് ഉപയോഗപ്രദമായ രീതിയില്‍ ഒരു വെര്‍ച്വല്‍ ലോകം തന്നെ സൃഷ്ടിച്ച ഗൂഗിള്‍ പരിസ്ഥിതിക്കുകൂടി പ്രാധാന്യം നല്‍കി അതിനെ യാഥാര്‍ത്ഥ ലോകത്തോട് കൂടുതല്‍ അടുപ്പിക്കാനാണ് ശ്രമിച്ചുകൊണ്ടിരിക്കുന്നത്. അവിടെ 'അരയാലും ആല്‍ത്തറയുമായി'. ഇനി പുഴകളും കാട്ടരുവികളുമൊക്കെ വരാനായി കാത്തിരിക്കാം.