O le atoaga o ia tausaga e tele ua faamanatu faatasi e le kolisi faatasi ai ma le 30 tausaga ua atoa foi i le tausaga lenei talu ona talia le ulufale o tama’ita’i e a’oa’oina i le Kolisi o Avele talu mai le tausaga e 1996.

O se isi lea o matāti’a na ausia e lea kolisi a le malo i le taimi o le ulua’i tama’ita’i sa avea ma pule le faletua o Aiga Poasa Esera ua mālōlō litaea mai le galuega faafaia’oga sa tautua ai i le malo i le tele o tausaga.

O se finagalo i luga o upega tafa’ilagi a le kolisi mai le faletua o Aiga Poasa Esera le ulua’i pule tama’ita’i o le kolisi o Avele, sa ia finauina le ulufale o tama’ita’i e a’oa’oina faatasi ma le itupa o alii a o avea ma pule a’oga.

O loo faamanatu e le kolisi lona 102 tausaga ma le 30 tausaga talu ona talia tama’ita’i i le kolisi i se polokalame ua faaigoaina o le “Oloamanu o Palolomua”.

O loo faatino ai le polokalame ua ‘au’au pe autū i le fesili, poo se ā se mea ua a’oa’oina e le kolisi mo alo ma fanau o Samoa.

O le a saunoa ai foi le ulua’i pule tama’ita’i faapea le ulua’i tama’ita’i a’oga sa avea ma ta’ita’i ulu poo le head girl.

O le laumua o le kolisi o loo faagasolo ai lea polokalame.

The post Sami le 102 tausaga o le Kolisi o Avele ma le 30 tausaga talu ona ulufale tama’ita’i i le kolisi appeared first on Radio Samoa.

E ui ina telē le sao o le malo peita’i ua faaalia e le Faatonu o lea faalapotopotoga tuma’oti le susuga Matā’afā Faatino Masunu Utumapu, o loo iai pea le mana’omiaga i le faaleleia atili o le lagolago a Samoa i le faamalieina o aiaiga o le feagaiga faavaomalo o loo puipuia ai aiā tatau o tagata e iai aafiaga tumau o le soifua.

O loo iai nei i le aai o Niu Ioka i Amerika le Faatonu o le Nuanua o le Alofa mo le fonotaga a Malo Aufaatasi mo atunuu o loo avea ma sui o lea feagaiga, lea sa faamanuiaina ai le susuga Matā’afā Faatino i le filifiliga o sui mo le komiti a Malo Aufaatasi e māta’itūina aiā tatau o tagata e iai aafiaga tumau o le soifua, ma sa maua ai se avanoa e fesiligia ai i se faatalanoaga i auala o fesoota’iga faatekonolosi.

Le talanoaga ma le Faatonu o le Nuanua o le Alofa ua avea nei ma sui o le komiti a Malo Aufaatasi e māta’itūina aiā tatau o tagata e iai aafiaga tumau o le soifua, susuga Matā’afā Faatino Masunu Utumapu.

O le fonotaga i Niu Ioka i Amerika o loo ta’ita’ia ai le usugafono a Samoa e le Minisita o le Matāgaluega o Tinā ma Tama’ita’i, Atina’e o Afio’aga ma Aga Fesoota’i, le afioga Moefaauouo Julius Ah Kui Tafuna’i.

O Samoa ma le atunuu o Palau o le taimi muamua lea ua filifilia ai ni ona sui i le komiti a Malo Aufaatasi e māta’itūina aiā tatau o tagata e iai aafiaga tumau o le soifua. 

The post “Ua telē le sao o Samoa i le faatinoga o aiaiga o le feagaiga o aiā tatau o tagata e iai aafiaga tumau o le soifua”…Matā’afā Faatino appeared first on Radio Samoa.

O le Aso Lua o le vaiaso a sau le malaga muamua a le Qantas i lona ālavaa fou, e ese ai ma ana malaga o loo tautua ai i le va o Ausetalia ma tuusa’o mai i Samoa.

E tolu malaga a lea kamupanī vaalele mai Aukilani mo le malae vaalele faavaomalo i Faleolo i le vaiaso.

O Aso Lua, Aso Tofi, ma Aso Toonai.

A o tulimata’i ai le amatalia o malaga a le Qantas mai Niu Sila mo Samoa, ua faailoa i se lipoti le faailoaina e le tasi o kamupanī vaalele a Ausetalia le Virgin Australia, o le faamuta o ana malaga aga’i mai i Samoa i le ogatotonu o le masina o Aokuso o le tausaga nei.

I le lipoti a le vaega faasalalau o le MerMada Pacific o loo ta’ua ai ua māfua lea faai’uga a lea kamupanī vaalele ona o tulaga siitia o le tau o suāuu ma penisini ma ua faigatā ai ona faaauau lea tautua ona o fuafuaga mamao a le Virgin Australia.

The post Lalata mai le aso o le malaga muamua mai Aukilani i Apia a le Qantas appeared first on Radio Samoa.

Mo le silafia o lenei matāupu sa tula’i mai ina ua toe taliu atu Everlee i Amerika, mai lona asia ai o Niu Sila nei, o lea na taofia ai le tama’ita’i ona o se sasi i le lē faamaoni o Everlee i le lē faailoa o sona aafiaga i le tulafono i se taimi ua sola.

E pei ona iai se matāupu na molia ai o ia i lona umiaina o se fuālaau faasāina o le maruana i le silia ma le 10 tausaga talu ai. 

O Everlee o se sitiseni Niu Sila, ae peita’i ua autausagā o nofo o ia i totonu o Amerika. 

Lipotia mai i se tusitusiga a le to’alua o le tuagane o le tama’ita’i ia Everlee, ia Courtney Wihongi na ia faailoa ai le tulaga ua iai, le faalēaogāina ai lea e le faamasinoga o lona moliaga e tauala atu lea i le lē talia ai e le faamasinoga o se maliega na faia e le va o le tama’ita’i ia Everlee ma le itu a leoleo, talu ai foi se faalētonu o le loia na tula’i mo le tama’ita’i o Everlee i lena taimi.

Faailoa e le aiga o Everlee, o le faalēaogāina ai o lenei moliaga e mautinoa le lē tatau ai i lalo o le tulafono ona taofia pea e le ICE ia Everlee. 

Faamaonia e le loia o loo tula’i mo Everlee, o lea ua faalēaogāina le moliaga a Everlee ma o loo iai le faanaunauga ia vave tatala mai i tua lea tama’ita’i.

Puna o Faamatalaga: https://www.rnz.co.nz/news/world/597762/ice-detainee-everlee-wihongi-has-charge-vacated?fbclid=IwY2xjawSWuh1leHRuA2FlbQIxMABicmlkETFGUlVRUU5KQ0tUUG9zTFVac3J0YwZhcHBfaWQQMjIyMDM5MTc4ODIwMDg5MgABHiQh-nq0hlN_ATPNd4FJgKJk1YTMZRaeTFptuCGVyoRol5U17Ep0S56OdlEO_aem_IXqj6Hwfom-CWZyD73bAyw

The post Faalēaogāina moliaga o Everlee Wihongi; a o taofia pea o ia i lalo o le vaega a le ICE  appeared first on Radio Samoa.

Faamauina i ripoti mai le RNZ, na faatautaia ai o se iloiloga i le faaaogā ai e sui o le auaunaga o leoleo o itulau i luga o le initaneti fesoota’i lea i le matāupu a lē sa avea ma Sui Komesina o Leoleo Jevon McSkimming, ina ua maua o ni ata pu’e poo ni videos a fanauiti i luga o masini faatekonolosi sa ia faaaogāina a o galue mo le auaunaga.

O ni ata o loo faaali manino ai ni faatinoga o amioga matagā o loo aofia ai fanau. 

Faamaonia mai e le Sui Komesina, Tim Anderson o lea ua aga’i le auaunaga e molia ia sui o le auaunaga i le mae’a ai o ni iloiloga ma su’esu’ega na faia ia i latou nei e to’atolu. 

E to’alua ni leoleo mai Aukilani o le a tula’i i luma o le Faamasinoga Faaitumalo i Manukau.

O le tasi o leoleo o le a tula’i i luma o le faamasinoga i Ueligitone i se taimi o i luma. 

Faailoa o loo molia uma i latou e to’atolu i moliaga eseese e aofia ai le umiaina o ia faamaumauga ma’ale’ale ma le lē talafeagai i lalo o le Tulafono ua ta’ua o le “Films, Videos, and Publications Classification Act.”

Faamanino mai o loo faamālōlō ia tagata mai le toe galulue a o faasolo su’esu’ega.

Ae na māua i faamaumauga, e 22 matāupu faapenei ua tula’i mai ma e 12 matāupu ua mae’a ona iloilo ma ua faatino foi iai ni faasalaga.

To’afā ua faamavae a o faatino ma faasolo iloiloga ma su’esu’ega.

The post To’atolu leoleo ua molia i lo latou umia ai o ni faamaumauga ma’ale’ale appeared first on Radio Samoa.

Faamauina i se pepa o faamatalaga, o loo ta’ua ai o lea pusa‘aisa la’uoloa sa aumai totonu i oloa aogā ma lelei.

E faapea na amata faatino le tuufaatasia ai o le uta mai Chile ona aga’i lea ma mālōlō mo se taimi i Peru, Colombia ma Panama a o le’i taunuu mai i Tauranga. 

Ta’ua e le vaega o tiute, na faatino sa latou iloiloga i le vaa na aumai ai le pusa’aisa la’uoloa e pei ona masani ai tiute ma matāfaioi i le oo atu o vaa i le uafu, i le kilia ai o uta e taunuu mai ai i totonu o le atunuu.

Faamatala i le faatino ai o iloiloga, o lea na maua ai e le masini o le x-ray o ni pusa e foliga e lē o tutusa lelei le tuufaatasia ai o ia pusa mai vaaiga masani, ma ua maitau foi e le ofisa metotia a i latou o taumafai e aumai i totonu nei fuālaau faasāina. 

I faamatalaga mai sui na iloiloina le pusa‘aisa la’uoloa, na o latou mauaina le sefulu o ni pusa, o loo iai i totonu ni afifi e foliga o ni piliki o loo faailoa o se oloa ua ta’ua o le PRADA.

Ae peita’i o ia afifi o ni fuālaau faasāina o le cocaine pe ā ma le 100 kilokalama lona mamafa, e $35 miliona lona tauaofa’i.

Na faatino uma vaega o su’esu’ega e sa’ili ma o lea lava na faamaonia o le ‘aisa lea na aumai i totonu o nei pusa.

Faamanino e le Faatonu o le Customs Maritime, Robert Smith, o le maua ai o ia fuālaau faasāina o se pine faamau lea o le galuega faifai pea a le Ofisa ma le Matāgaluega o Leoleo e taumafai e taofia ma lepeti gaioiga o loo vaaia le aumai ai o ia fuālaau faasāina i totonu o Niu Sila.

O loo fautuaina foi e le ofisa le mamalu lautele ina ia faafesoota’i atu lo latou ofisa pe afai o iai ni masalosaloga i ni gaioiga o le aumai faananā ai o fuālaau faasāina i totonu o Niu Sila.

Puna o Faamatalaga: https://www.customs.govt.nz/about-us/news/media-releases/customs-seizes-100-kilograms-of-cocaine-in-tauranga?fbclid=IwY2xjawSWuXhleHRuA2FlbQIxMABicmlkETFGUlVRUU5KQ0tUUG9zTFVac3J0YwZhcHBfaWQQMjIyMDM5MTc4ODIwMDg5MgABHlrsm_tp8xH2It6hydamJmxH-oPnYi0Y9rfN9NJ_gAIqW8S02cE-00CThjVl_aem_YDLk3RPhYeib3336f2R7gQ

The post Taofia e le Vaega o le Tiute a Niu Sila ni fuala’au faasāina o le cocaine; pe lata i le 100 kilokalama le mamafa ae lata i le $35 miliona lona tau aofa’i appeared first on Radio Samoa.

I se pepa o faamatalaga ua faailoa ai e le ofisa tutotonu mo faalavelave faafuase’i matuiā ma faalavelave tutupu faafuase’i, o loo mautū ma malutia pea le tulaga maua o ia oloa i Samoa ae o loo faatumau pea ona iai le atunuu i le laasaga lanumoli poo le Amber alert.

Peita’i ua faailoa lava e le ofisa tutotonu o faalavelave faafuase’i ma faalavelave matuiā le NEOC o loo silia le faatulagaina o le suāuu maua nai lo o le tapulaa o le laasaga lanumoli, ae o tulaga malupuipuia o le faaaogāina e le atunuu o ia oloa e ao ai ona faaaogā tatau.

Talu mai le Aso Lulu o lenei vaiaso o le kiso e 35 aso o lea suāuu e maua ai pea, ma e fetaui ma le isi vaa suāuu i le masina fou.

E faapena foi i le penisini e 40 aso ma le kalasini e 64 aso.

O le aso 4 o Iulai le isi vaa suāuu, aso 12 i le aso 15 o Aokuso ua faatulaga e taunuu ai le isi vaa suāuu, ma le aso 21 i le aso 24 o Setema e taunuu ai le isi uta o suāuu ma penisini.

The post Faailoa e le kamupani o le PPS le afea o Samoa e vaa suāuu i le masina o Iulai ma Aokuso appeared first on Radio Samoa.

O le faamasinoga lea o talosaga toe iloilo poo le faamasinoga apili e su’esu’eina ai ni faai’uga a le Faamasinoga o Fanua ma Suafa.

O le Aso Lulu o lenei vaiaso na faatautō ai le afioga i le tama’ita’i faamasino i luma o le afioga i le Ao Mamalu o le Malo le afioga Tuimalealiifano Vaaleto’a Sualauvi II i se sauniga na faia i le maota o le Ao o le Malo i Vailele.

Se vaega o le saunoaga a le afioga i le tama’ita’i sui faamasino o le Faamasinoga Maualuga o Fanua ma Suafa, afioga Alalatoa Rosella Viane Papalii.

O Mati o le tausaga e 2017 na faatautō ai le afioga Alalatoa Rosella a o galue faaloia e avea ma Faamasino o le Faamasinoga Faaitumalo a Samoa.

The post Faatautō le afioga Alalatoa Rosella Viane Papalii o se Sui Faamasino o le Faamasinoga Maualuga o Fanua ma Suafa appeared first on Radio Samoa.

O se ofisa sinia i le vaega o faigāfaiva a Samoa le susuga Vaa Reupena sa tuua Samoa i se vaalele o le fitafita a Farani faatasi ai ma sui o le fitafita o le sami a lea malo, mo se galuega na siaki ai ogasami uma o Samoa i se taumafaiga e māta’itū gaioiga solitulafono i le fagotaina e vaafagota tetele o isi atunuu.

I se pepa o faamatalaga mai le ofisa o le malo o Farani i Apia ua faailoa ai, o se tasi lea o galuega o loo fesoasoani ai le fitafita o le sami a lea malo i se faigāpaaga ma le ofisa tutotonu o faigāfaiva o le Pasefika o loo i le atunuu o Solomona.

O le auai o le susuga Vaa Reupena i lea galuega ua maua ai ma lona silafia i tulaga e ao ona tapena iai, mo le puipuiamalu o ogasami o Samoa mai faiga solitulafono.

The post Galulue faatasi Samoa ma Farani e taofia faigāfaiva solitulafono appeared first on Radio Samoa.

O le Faatonu o le faalapotopotoga o le Nuanua o le Alofa le tama’ita’i susuga Matā’afā Faatino Masunu Utumapu ua avea nei ma sui o lea komiti a Malo Aufaatasi, ma o le taimi muamua lenei ua saofa’i ai Samoa i totonu o lea komiti o loo iai sui o isi malo o le lalolagi.

O le tuuina atu o Matā’afā Faatino e faia iai le filifiliga sa lagolago malosi e le malo o Samoa, ma o le faai’uga o le masina o Mati o le tausaga nei na tuuina atu ai le folasaga a le sui faatū o Samoa mo le filifiliga o sui o le komiti.

O le Aso Lulu o le vaiaso nei na faailoa ai e Matā’afā Faatino Masunu Utumapu i le upega tafa’ilagi a le Nuanua o le Alofa lona filifilia.

Ua faailoa ai ma lana faafetai i le malo o Samoa i le lagolagoina o ia aemaise o isi itutino o le malo ma faalapotopotoga sa galulue faatasi mo le tuuina atu o lona tagata mo le filifiliga.

Ua lagona ai lona faatauvaa i le lagolago ua tuuina atu ma ua ia ta’utino ai, o le a ia faia le mea silisili mo le igoa o le atunuu i lona taimi o le a galue ai i le komiti a Malo Aufaatasi e māta’itūina aiā tatau mo tagata e iai aafiaga tumau.

E tolu tausaga le umi o le a avea ai o ia ma sui o lea komiti.

The post Suipi le sui faatū o Samoa i le komiti a Malo Aufaatasi mo tagata e iai aafiaga tumau appeared first on Radio Samoa.

Ma o se tulaga ua faaalia ai atugaluga talu ai ua tauāu ina aafia ai le ola mālōlōina lelei o le tamaitiiti aemaise o lona ola a’oa’oina. 

I se tasi o matāupu o loo faaalia ai se talavou Samoa e i le Vasega 13 i le A’oga Maualuga o Papakura High School, e igoa ia Sam Saega lea na faailoa, e oo atu i le 20 itula i le vaiaso o loo galue ai i se faleoloa poo se supamaketi.

Ua māfua ona o lona mana’o e tuu atu lona tau’au e fesoasoani i si ona tamā ma si ona aiga to’a sefulu ma le tasi. 
Ta’ua e lenei talavou, o le vaai alofa lava i si ona tamā lea na māfua ai ona ia aga’i e sa’ili se galuega. 

Faamauina o le tuaa o Sam o se ave taavale o le Uber ma e faatau foi ana kekepuaa e taumafai ina maua se seleni e tausi ai lo latou aiga. 

I ripoti mai le Child Poverty Action Group i le tausaga e 2024 o loo faamauina ai e lata lava i le 15,000 tupulaga talavou o loo galulue mo le 20–50 itula i le vaiaso ona o aafiaga i le tamaoaiga.

Ma i ia faamaumauga na māua ai o le tetele o itula e galue ai le talavou e fai lava sina ogaoga o aafiaga i taumafaiga a fanau i a’oa’oga. 

Faamanino e le sui o le Auckland Action Against Poverty, Agnes Magele le telē o le aafiaga e pei o le utiuti o avanoa a fanau i itu tau a’oa’oga o le a latou maua ma faigatā ai ona ausia fuafuaga i se lumana’i lelei talu ai le alu o le mafaufau i aafiaga o le aiga. 

Mo le a’oga a Papakura High School, o loo ta’ua e le Pacific Liaison, Lesieli Samiu pe ā ma le 40% o fanau a’oga o Vasega 12 ma le 13 o loo galulue e fesoasoani i o latou aiga. 

E ui i tulaga faigatā o loo feagai ma ia ae o loo maualuga lava ona moemitiga ma faamoemoega e faaauau ana a’oa’oga e aga’i atu i le iunivesite, mo se lumana’i lelei o ia ma lona aiga.

Puna o Faamatalaga: https://www.rnz.co.nz/news/education/597505/more-school-students-working-to-pay-family-bills-says-poverty-advocate

The post Faatupula’ia le numera o fanau a’oga ua faigaluega e fesoasoani i o latou aiga ua feagai ma tulaga faigatā o le taugatā o le soifuaga appeared first on Radio Samoa.

Ma i ripoti o lea na faamauina ai e le’i telē ni aafiaga mai tulaga loulouā o le tau, e pei ona molimauina ai le sou tele o le sami ma maualuluga o galu, ma oo mai ai i luga o le eleele. 

Ae e ui i le lē tetele o ni aafiaga ae o lea na māua le fautuaina o le to’atele i se poloa’iga o faalavelave tutupu faafuase’i, SOE e tapunia ai le tele o auala ma aga’i ese ai le to’atele mai ia faaitu i le amataga o lenei vaiaso. 

Faailoa na toe faalēaogāina lea poloa’iga i le aoauli o le Aso Lua, ina ua faalēaogāina tulaga matuiā na iai poo le high-risk period e ui o loo iai pea fautuaga ma lapata’iga mo ogasami. 

Ta’ua le faatino ai o iloiloga i tulaga o iai lea faaitu, na maua atu ai le tele o le suāsami ma oneone na oo atu lava i le isi ituala e aofia ai faaitu o Ōwhiro Bay ma Island Bay, ae o le tulaga lelei e le’i iai se fale na matua’i aafia. 

Faamauina i ripoti le fesiligia ai e le to’atele o tagatānuu o ia faaitu, pe na talafeagai le faatino ai o se poloa’iga talu ai e le’i faapea na matua’i aafia ma pagatia o latou aai, ae tali le pulenuu, na sa’o ma tonu lana faai’uga na fai, ona o lea lava na fai i luga o fautuaga ma lapata’iga o le ono aafia o tagata lautele, aemaise lava itu e lalata i le sami. 

O lona faanaunauga ia faamuamua lava le saogalemu o tagata uma. 

I Wairarapa, o loo faatumauina le iai i lalo o fautuaga mo ogasami ma tulaga loulouā o le tau. 

Na faamauina e sui o le vaaitau, o le malolosi tele o savili, e oo atu i le 100 kilomita i le itula lea o loo faaopoopo atu i le mata’utia tele o ave ma galu o le sami lea o loo molimauina ai aafiaga i itu o loo lalata i le sami poo coastal areas.

Puna o Faamatalaga: https://www.rnz.co.nz/news/weather/597730/wellington-weather-clean-up-expected-to-begin-but-warning-still-in-place

The post Amata fuafuaga o galuega faaleleia mo itu o Ueligitone mai tulaga loulouā o le tau; ae o loo iai pea fautuaga mo ogasami appeared first on Radio Samoa.

O se vaega ua aga’i e faatino ina ia sa’ili pe na iai ni faamaumauga ma’ale’ale na faasoa atu e lea alii leoleo sinia i le vaega faaupufai a le Leipa a o talanoaina lona auai e tamo’e mo le patī.

I ripoti mai le NZ Herald o loo faailoa ai e le Komesina o Leoleo a Niu Sila, Richard Chambers, e lē o iai ni faamaumauga o ta’ua ai le tuuina pe na faasoa atu e lea alii leoleo sinia (Naidoo) ni faamaumauga ma’ale’ale i ni vaega faaupufai, ae o le a faatino pea iloiloga i feiloa’iga ma fonotaga sa ia auai, pe na iai se taimi na faasoa ai e Naidoo ni faamatalaga.

O Rakesh Naidoo, o se Ta’ita’i Leoleo o loo avea ma Faatonu o le vaega ua ta’ua o le New Zealand Police’s Ethnic, Iwi and Communities National Partnerships.

Ma e faamauina o loo lona 13 lea sui tauva mo le vaega faaupufai a le Leipa. 

Ae talu ai o le tele o atugaluga i le ono tuuina atu e lea sui tauva i nisi o faamatalaga ma’ale’ale o le auaunaga o leoleo e tusa ai foi ma matāupu lautele.

Faamanino e le Komesina, le susuga Chambers e tāua tele le faatumauina pea o le tuto’atasi o auaunaga a leoleo faapea ai ma vaega tau faapolokiki.

Ma e tatau lava i soo se leoleo o loo iai se faanaunauga e auai i upufai o malo ona ia faailoa i ona ta’ita’i ana fuafuaga. 

I le tula’i mai ai o lea matāupu, o lea na tali le ta’ita’i o le Leipa, Chris Hipkins, o Rakesh Naidoo o se tagata faamaoni ma e leai lava se taimi ua tuuina atu ai e lea alii ni faamaumauga e pei ona iai masalosaloga ua faailoa nei.

Puna o Faamatalaga: https://www.nzherald.co.nz/nz/politics/police-to-investigate-whether-superintendent-now-labour-candidate-shared-sensitive-information/XCY6LLZJURBRBHJIM63K6SIWSA/?lid=jg9viv5kzf95

The post Faasolo su’esu’ega a leoleo, pe na faailoa e le alii leoleo o le a tamo’e mo le vaega faaupufai a le Leipa ni faamatalaga ma’ale’ale appeared first on Radio Samoa.

O le afioga Taioaliiseu Fiti Aimaasu sa seei i le nofoa o le itumalo ae na faamavae ma le tofi o Vaimauga 3 ina ua suia lana lagolago mai le vaega e puipuia aiā tatau a tagata i le patī faaupufai o le Faatuatua i le Atua Samoa ua Tasi, ua faauluina lea tagi ua molia ai le sui faipule i le ave o tupe i nisi o tagata palota ma ofoina le taavale e aumai ai i le fale ma toe momoli se tagata palota.

Ua faaulu foi e le afioga Lautimuia Uelese Vaai lana tagi ua tali atu ai i moliaga foi o faiga faaālatua i faatosina o lea palota laitiiti faasaga i le afioga Taioaliiseu Fiti Aimaasu.

O le Aso Lua o le vaiaso na te’a nei na valaau ai mo le taimi muamua lea tagi tau palota ma faatulaga ai loa le Aso Lulu o le vaiaso nei e amata su’esu’e ai molimau.

E to’alua faamasino o le Faamasinoga Maualuga o le a seei i le su’esu’eina o le tagi tau palota mai Vaimauga 3.

The post Amata su’esu’e le tagi o tuua’iga o faiga faaālatua o faatosina o le palota laitiiti a Vaimauga 3 appeared first on Radio Samoa.

O i latou e to’atolu lea e to’alua o loo taofia i le vaaiga a leoleo, ua molia i solitulafono o le ave o faamatalaga sesē i leoleo ma le solitulafono o le faia o ni gaioiga faaālatua ma le pi’opi’o poo le corruption.

O alii o James Atua, o le tama’ita’i o Nakitah Charles ma le taulealea o Fred Papalii sa tula’i i le Faamasinoga Faaitumalo i le Aso Lua mo le valaauga muamua o o latou moliaga, peita’i e le’i tuuina atu ni a latou tali ona e le’i faamautūina moliaga uma a leoleo.

O James Atua ma Nakitah Charles na taofia mai e leoleo i le malaevaalele i Faleolo i le aso 28 o Me, i se faigāmalaga a le Air New Zealand mai Samoa mo Aukilani i Niu Sila.

O i latou e to’atolu ua molia o loo aofa i le to’aiva o tagata ua taofia le toe faaaogāina o a latou teugatupe i se faatonuga mai le vaega su’esu’e o le Faletupe Tutotonu o Samoa.

O le aso 23 o Iuni e toe tutula’i ai i latou ua molia i le faamasinoga.

The post To’atolu tagata ua molia e leoleo i su’esu’ega i ni sootaga i le faalavelave i Vietnam appeared first on Radio Samoa.

I le saunoaga a le Minisita o Tupe i le faataatiaina o le tala faatatau autū o le tupe mo le tausaga e 2026 i le 2027 o loo faailoa ai, e tusa ma le 7 afe 285 le aupenisione o le a maua lea siitaga e lima selau tālā.

O le aupenisione ua aulia le 65 aga’i i le 69 tausaga o le soifua e 300 tālā i le masina ae faato’ā agavaa i le 500 pe a aulia le 70 tausaga o le soifua.

O le masina fou foi o Iulai e amata maua ai le faamanuiaga e 200 tālā mo pepe fou ma le 100 tālā i le masina mo pepe mai le tausaga ma le ono masina le matutua.

E 20 miliona tālā se vaegatupe ua fuafua le malo e faaalu ai, ma o loo faamoemoe e faato’ā faamatuu tupe o lea faamanuiaga i le masina o Ianuari o le tausaga fou 2027.

Ua māfua lea fuafuaga ona ua ua faailoa e le Minisita o Tupe i lana saunoaga o le tala faatatau o le tupe, o loo iai ni teuteuga o loo fia faia i le tulafono o le faalapotopotoga o faaputugatupe mo le lumana’i manuia o tagata, faapea tapenaga a le Matāgaluega o le Atina’ega o Aiga ma Aga Fesoota’i mo faamaumauga o fanauiti.

The post Silia i le fitu afe tagata penisione o le a tala le 500 tālā i le masina appeared first on Radio Samoa.

O le va o le fogavaa i le lotoifale o le pulega o le lakapi ua faaalia ai e le ta’ita’i malaga le susuga Su’a Hesed Ieremia, e iai ona aafiaga i tama taaalo ma latou tapenaga ma e tāua ai le galulue faatasi.

Le ta’ita’i malaga o le Manu Samoa, susuga Su’a Hesed Ieremia.

The post O faiva e sii ae tapua’ia e manuia ae a sii ae tautaulia e lē manuia appeared first on Radio Samoa.

Ua faamauina e 2 moliaga o amioga lē pulea e tusa ai o vaega o le tino maliu o se tagata oti poo le lē faamaoni foi o le faatinoga o le auaunaga i le vaaia lelei o tino maliliu. 

Na faailoa i le faamasinoga, o le tasi o matāupu, na māua ai e le’i lelei le tuuina ma le faatinoga o vaega o le pusa maliu, o se tasi o tamā o se matai, e pei ona faamatala e lata lava i le $9000 le tupe na totogi i le auaunaga o le falemaliu a lea alii. 

Faamauina na alia’e mai lea matāupu ina ua aafia le fanuatanu i timuga mamafa ma lōlōga na maua ai tulaga faaletonu na faatino ai e Tauanuu ma lana auaunaga le tino maliu o sia tamā. 

Ta’ua e le faamasino na feagai ma le matāupu, Nicola Mathers, ua lē faamaoni Tauanuu i lana auaunaga ma ua oia ai le va ma tulaga o le talitonuina o le faatinoga o galuega i le aiga, ma o lea na faatonuina ai o ia e na te totogiina o le $5000 i le aiga ona o le āfaina o faalogona o le aiga poo le vaega ua ta’ua o le emotional harm. 

O lenei matāupu na faaalia na aofia i se tasi o galuega tele a le auaunaga o leoleo na faasolo aga’i i le tautua lenei o falemaliu i Niu Sila nei, lea na aafia ai Tauanuu faapea foi lona tuafafine o Fiona Bakulich na aafia foi i le tulafono ona o gaioiga taufaavalea na matua’i aafia ai nai aiga ua motusia mafutaga ma a latou tagata na faatino e Fiona gaioiga o le tapenaina o vaega uma o le taoto ai o le tino ma pusa maliu. 

O le tasi o matāupu, na faamauina e faalua lelei taimi na lē lelei ai le faatinoga o vaega uma o le taoto ai o le tino maliu i le falemaliu na galue ai Fiona.

Ma o se vaega na faailoa e le aiga o ni gaioiga e latou te lē faamagaloina.

Puna o Faamatalaga: https://www.nzherald.co.nz/nz/crime/auckland-funeral-director-nicholas-bakulich-brother-of-disgraced-casketeers-star-fiona-bakulich-sentenced/7RDMXRMZV5HYPOUDT6F5HJWWUU/?utm_medium=Social&utm_campaign=nzh_fb&utm_source=Facebook&fbclid=IwY2xjawSS2jtleHRuA2FlbQIxMABicmlkETFYWWJZNW9mS3cxcG41REtEc3J0YwZhcHBfaWQQMjIyMDM5MTc4ODIwMDg5MgABHhtx1sj9Eh3L9SYSP8974QSp3LJJb9edtwLHnoRY_vQ92_vOv51EIUAuUX8h_aem_hqUbgVKxRDnzNHBSBys-LA#Echobox=1780707946

The post Faamaonia moliaga o Tauanuu Nicholas Bakulich i le faamasinoga  appeared first on Radio Samoa.

E pei ona ia mauaina ai se faailoga taualoa mo tufatufaga faailoga o le NZ Radio Awards 2026, i le vaega ua ta’ua o le tautua i auaunaga faasalalau, poo le Services to Broadcasting Award, ma ua amana’ia ai lana tautua mo le tele o tausaga. 

O le tinā ia Eti, o loo faatinoina le polokalame i luga o le Radio Samoa ua faaigoaina o le Toe Tepa i le Aiga, i le itula e 10am i le taeao o Aso Lua ta’itasi, ma ua silia ma le 30 tausaga o ia galue e ala i le lagolagosua i le auaunaga faasalalau, e fesoasoani atu i le faaolaolaina o le gagana Samoa, o le faatumauina o le agaga faakerisiano ma le aganuu, aemaise o matāupu tau i le soifua mālōlōina lelei o aiga. 

Ma e momoli atu ai le faamalo a le Radio Samoa ma ana paaga uma i le tinā, le faletua ia Eti Fuimaono McCarthy, ona o lea matāti’a maoa’e ua tauaao atu ia te ia e amana’ia ma patipatia ai lana tautua matavela o loo faatinoina pea mo tagata lautele.

The post Amana’ia le tinā ia Eti Fuimaono McCarthy i lana tautua i luga o le leitio mo le tele o tausaga appeared first on Radio Samoa.

I sa’ili’iliga a le pule o maliu, o lea ua faamaonia mai ai na maliu Faanānā ona o se ma’i e le’i iloa pe na silafia o maua ai lea tamālii, ma o se ma’i i lona fatu (undetected heart disease). 

E pei ona tula’i mai ai le faalavelave i le taeao o se tasi o faatasiga sa ia auai atu iai i Aukilani.

Mo le silafia o le taeao o le aso 21 o Fepuari 2024, sa auai atu ai Faanānā i se faatasiga e sa’ili tupe ai mo se tasi o fuafuaga tāua, na tula’i mai ai loa le faaletonu ina ua pa’u Faanānā ua matapogia. 

I faamaumauga mai le pule o maliu, o le maliu ai o Faanānā Efeso Collins na maliu lava ona o aafiaga i lona fatu, e lē o iai ni masalosaloga i se gaioiga lē talafeagai na māfua ai le maliu o sia tamālii. 

Faaalia le ogaoga o aafiaga o le fatu o Faanānā ina ua faatino su’esu’ega faapitoa. 

Ta’ua e le pule o maliu, na maliu faafuase’i Faanānā ona o se faama’i e le’i iloa po ua faaigoaina e i latou o le “silent” heart disease.

Faamauina foi e se tasi o foma’i faapitoa, i le latou sa’ili’iliga, o le alu o le malosi ma le vaivai tele o le tino lea na pei na alia’e mai ai se vaega na māfua ai ona oso le fatu, aemaise o lea sa faatino ni tamo’ega i lea taeao. 

Sa taumafai malosi i latou na latalata i le alii e faatino vaega uma e lavea’i ai o ia peita’i e le’i manuia taumafaiga. 

Ae i le tuuina mai o nei faamaumauga o lea ua faailoa le lē fiafia tele o le faletua o Faanānā Efeso Collins i le tuuina mai o le ripoti a le pule o maliu e aunoa ma le faia ai o se sa’ili’iliga faalaua’itele poo se public inquest.

Aemaise o le sa’ili’ili ai o tulaga uma o mea na tula’i mai i le taimi na tupu ai le faalavelave. 

Aemaise tulaga o le iai o fautuaga i totonu o lea ripoti le tatau ai ona iloa ma manino lelei sui o fesoasoani muamua o loo galulue i taimi o faatasiga tetele i itu o loo iai meafaigaluega e pei o le defibrillator e faaaogā i taimi o ni faalavelave faafuase’i. 

Na fautuaina foi le taga’i i le faatino ai o iloiloga ma se pepa tali fesili, e sa’ili ai pe talafeagai le auai o tagata i faatasiga e tusa ai ma o latou soifua mālōlōina.

Faaopoopo le faaletua ia Vasa e tāua minute uma o soo se faalavelave ma o lona faanaunauta’iga ia lava tapena ma sauni tagata uma, ma lona agaga ina ia aua ne’i iai se isi aiga e aafia i le lumana’i.

Puna o Faamatalaga: https://www.stuff.co.nz/nz-news/360988433/silent-heart-disease-took-mp-faanana-efeso-collins-coroner-finds?fbclid=IwY2xjawSS255leHRuA2FlbQIxMABicmlkETFYWWJZNW9mS3cxcG41REtEc3J0YwZhcHBfaWQQMjIyMDM5MTc4ODIwMDg5MgABHqkeCSGkrM5TuBhoiFd_WNxZVFc5csqKsHxHZc57dAR3OX_QPlzCMd-YMScQ_aem_EVG41pDTmEH7WUTERt-nXQ

The post Maua le māfua’aga tonu o le maliu faafuase’i o Faanānā Efeso Collins appeared first on Radio Samoa.

I lea feiloa’iga ma sui o le Toomaga mo ē Puapuagatia, o le S.F.A., Nuanua o le Alofa, faalapotopotoga o tina faipisinisi, faalapotopotoga o tina faifaato’aga, SENESE ma le Caritas na faailoa ai le agaga faagaeetia o le Kovana Sili ona o le maoa’e o tautua a ia faalapotopotoga tuma’oti i Samoa, ona o tagata lautele o loo fia maua le fesoasoani o loo taula’i iai a latou auaunaga.

O le fautuaga a le tama’ita’i Kovana Sili o Sam Mostyn i ta’ita’i o ia auaunaga tuma’oti ia faaauau pea ona ua faatuatuaina le latou galuega lelei auā o leo o tagata e fia maua se fesoasoani o loo ave iai le latou faamuamua.

O polokalame fesoasoani a Ausetalia o loo afea ai ia faalapotopotoga i foai tupe mo le unaia oa latou auaunaga ma tautua.

The post Maofa le Kovana Sili o Ausetalia i galuega a faalapotopotoga tuma’oti i Samoa appeared first on Radio Samoa.

O le finagalo lea o le malo ua aumai faalaua’itele ma ua faamautinoa mai ai, e lē o iai ni faafitauli tau tupe o feagai ma le poloketi o le atina’e manuia o itumalo.

Ua faaalia i lea pepa o faamatalaga faalaua’itele, e iai Fono Faavae o loo laumanu’ia ni a latou taumafaiga e fia maua tupe mai faletupe e faaaogā faaaitalafu e ala i ni overdrafts peita’i e leai se fesoota’iga o ia taumafaiga ma le poloketi a le malo i lona tulaga aoao tetele.

Afai o iai ni taumafaiga faapea ua faaalia e le malo, o le matāfaioi tauave lea i le va o se faletupe faapisinisi ma lena Fono Faavae.

O se tusi ua faasalalau faalaua’itele ua faailoa ai lea tulaga, ua faaalia i le pepa o faamatalaga o se tusi o loo lagolago ai le talosaga a se Fono Faavae mo le fia maua o se fesoasoani tau tupe mai se faletupe, ae e lē o se tulaga e ta’u ai fua le poloketi o le atina’e manuia o itumalo ona e lē o iai ni aafiaga tau tupe o feagai ma lea polokalame a le malo.

E pei ona silafia o le faai’uga o le masina lenei o Iuni e mae’a ai le tausaga faaletupe 2025 i le 2026 lea e mae’a ai ma le tufatufaga o le ta’i miliona valuselau afe tālā mo Fono Faavae a itumalo palota e 51, ae tapena Fono Faavae mo le isi tufatufaga o le a siitia i le ta’i 2 miliona e pei ona aiaia i le tālā faatatau autū fou o le tupe o loo taoto nei i le laulau a fono a le Palemene e le’i soalaupuleina ma pasia.

The post Tali le malo e lē sa’o lipoti i se talosaga mo ni tupe e faaaogā faaaitalafu mai faletupe faapisinisi appeared first on Radio Samoa.

Ua faailoa e le ofisa o le komisi o faigāpalota o le maota o le Ekalesia Katoliko i Mulivai Safata o le a amata ai le galuega i le Aso Lulu, ma faasolo ai i le maota o le EFKS i Tafitoala i le Aso Tofi ma le maota o le EFKS i Fausaga i le Aso Faraile.

E faaauau le galuega o le lesitala i le Aso Gafua e oo i le Aso Lulu o le vaiaso a sau i afio’aga o Fusi, Vaie’e, ma Nuusuatia.

O le tauaofiaga a le Palemene i le masina o Me na faamavae ai le sui faipule o Safata 2 ma le nofoa o le itumalo ina ua suia lana lagolago mai le pati faaupufai e puipuia aiā tatau a tagata, i le vaega faaupufai o le Faatuatua i le Atua Samoa ua Tasi.

The post Tapena le lesitala o tagata palota o Safata 2 appeared first on Radio Samoa.

E lima vaega ua autū iai le ta’iala e pei ona faailoa i le saunoaga a le ta’ita’i o le malo. 

O le Aso Lua o lenei vaiaso ua faia ai le faalauiloa o le ta’iala i le hall i Fasitoo Tai.

O le Aso Tofi o le a faia ai i Salelologa i Savaii ae Aso Faraile o le vaiaso nei e faia ai i le Fono Faavae i Sasina i le motu tele lava i Salafai.

The post Amata faasavali le faalauiloa o le “Ta’iala mo le Lumana’i Manuia o Samoa” appeared first on Radio Samoa.

O ni laau faifā’ili anagatā e pei ona faailoa e le faalapotopotoga o le Toomaga mo ē Puapuagatia o loo vaaia lea nofoaga o fanau sauāina, ae o se meaalofa tāua mo ia fanau.

O le afea e lea tamalii lauiloa o le atunuu i le musika o le nofoaga o le Campus of Hope o lana asiasiga i ia fanau a o le’i toe taliu atu i Amerika o loo faamautū ai.

O le Aso Toonai na te’a nei sa faia ai se faafiafiaga a Faanana Jerome Grey ma ona alo i le faletalimalo o le Sinalei Resort i Siumu.

O le valaaulia a le Palemia ma le malo i lea tamafanau a le atunuu ma ona alo sa faafiafia i le koneseti o musika o se tasi o polokalame o le Tuto’atasi o lenei tausaga.

The post Foa’i e Faanana Jerome Grey ukulele anagatā mo fanau i le nofoaga o le Campus of Hope appeared first on Radio Samoa.

O tinā o Saumalu Teofilo ma Purinisese Futi o ni taulasea o ma’i Samoa ua leva tausaga o la faia lea galuega.

O lo la faaaogā o laau mo vai e togafiti ai gasegase o le a tufa atu i lea a’oa’oga, o le a faatautaia e nisi o tagata e iai tomai faapitoa i laau.

O le mau a ia taulasea e pei ona faailoa i se pepa o faamatalaga mai le Tiapapata Art Center, ua faigatā ona sa’ili laau e fai ai vai e māfua ona ua mamao lava i uta i fanua o iai taloloa ma le vaomatua nofoaga e maua ai laau fai vai.

Ua māfua lea tulaga ona ua tele ina tatā laau ma faato’a aemaise ua nofoia e tagata ma ua lē toe maua ai i nofoaga tulalata i aai nei laau fai vai.

O se isi lea o vaega o le a silasila iai le a’oa’oga ma sa’ili se auala e totō ma faafailele ai laau e fai ai vai a taulasea.

O Saumalu ma Purinisese o nisi o taulasea o loo lotolotoi i tapenaga mo le toe faatūina o le sosaiete a taulasea Samoa.

O le Aso Tofi ma le Aso Faraile o le vaiaso nei o le a asia ai e i la’ua ma nisi o le a auai i le a’oa’oga i le nofoaga faasao i Togitogiga ma Vailima i le fia molimauina o laau eseese o loo ola ai ma o latou tāua ma aogā i le saunia o vai e togafiti ai ma’i o le tino.

The post Tāua tomai o taulasea Samoa i laau e fai ai vai mo togafitiga o gasegase appeared first on Radio Samoa.

O se aso fanau sa faamanatu ma tatala ai ma le nofoaga tutotonu o lea patī faaupufai o malo ua faaaogā iai le maota sa avea ma ofisa o le Faamasinoga o Fanua ma Suafa i Mulinuu i le tele o tausaga, ae o se maota foi na muamua avea ma nofoaga sa tapena ai le Tuto’atasi o Samoa e pei ona lumāfale le maota i le maa faamanatu.

E tasi le miliona lima selau afe tālā le tau na toe fausia ai le maota ma ua avea ai ma nofoaga tutotonu o le Faatuatua i le Atua Samoa ua Tasi.

Faaalia e le ta’ita’i o le vaega faaupufai le afioga i le Palemia susuga Laaulialemalietoa Leuatea Polataivao Fosi e faafā ona talosaga i le Matāgaluega o Puna’oa Faalenatura ma Si’osi’omaga mo le faaaogāina o le maota e le patī faaupufai ae sa lē talia.

O le amataga o le tausaga nei na faato’ā talia ai e le Minisita o lea matāgaluega le talosaga ma amata fuafua ai loa le galuega ua mae’a.

Le ta’ita’i o le Faatuatua i le Atua Samoa ua Tasi le afioga i le Palemia susuga Laaulialemalietoa Leuatea Polataivao Fosi i se vaega o lana saunoaga i le tatalaina o le nofoaga tutotonu o le vaega faaupufai o le Faatuatua i le Atua Samoa ua Tasi i Mulinuu.

O se tasi o vaega o le umusaga o le nofoaga tutotonu o lea patī faaupufai o saofaga o tupe sa saunia e matāfale e 25 o le pati i Amerika, Ausetalia, Niu Sila, Hawaii ma Amerika Samoa faapea ma Samoa.

O le tuuaofa’iga o seleni sa mā’au iai matāfale e silia i le 585 afe tālā.

Sa malaga mamao mai sui o matāfale e 25 e auai i le umusaga ma le aso fanau o le patī faaupufai.

The post Sami le 6 tausaga o le F.A.S.T. ma tatala lona ofisa tutotonu i Mulinuu appeared first on Radio Samoa.

Se faatalanoaga ma le ta’ita’i malaga o le Manu Samoa le susuga Su’a Hesed Ieremia. 

The post Amata tapena le Manu Samoa i le Ipu o le Lalolagi, mana’omia le lagolago a le atunuu appeared first on Radio Samoa.

O ia talosaga e aofia ai le taofi o le lauina o se faasalaga ae se’i iloilo muamua le talosaga ua finau ai lē ua molia ma lana loia e toe iloilo pe apili le faai’uga ua faamaonia ai moliaga o le faaoolima matagā ma le faiaiga fai faamalosi.

O loo tetee loia a leoleo i ia talosaga ona o le finauga e tatau ona lau muamua le faasalaga ona avanoa ai lea ona faia se talosaga apili.

Faaalia e loia a leoleo o faiga masani ia e tusa o le ta’iala faaletulafono o loo lima ta’ita’iina ai galuega a le faamasinoga ma e le’i teuteuina lava lea ta’iala tau tulafono o galuega a le faamasinoga. 

The post Talosaga le loia a Mahonri e taofi le lauina o se faasalaga ae toe iloilo le faai’uga a le faamasinoga appeared first on Radio Samoa.

Ua faailoa i se pepa o faamatalaga mai le Independent Boxing Samoa sa mata’ina foi i lea po le manumalo o nisi o alo o le atunuu i paga o fusuaga faa-amateur lea sa tausinio ai foi alii ma tama’ita’i.

O ia fusuaga sa tapena i se faiga faapaaga ma le alo lauiloa o Samoa i le taaloga faipele le afioga Faumuina Toaletai David Tua, ma o ia foi o se tasi o faia’oga sa tu malosi i le tapenaina o le ‘aufusu a le atunuu sa tausiniō ma alii fusu mai Fiti i le paga o le Cruiserweight ma le Lightheavy weight.

O le tausaga fou i le faailogaina o le 65 tausaga o le Tuto’atasi o le a toe tapena ai foi se isi fusuaga faavaomalo a le Independent Boxing Samoa.

The post Manumalo Jolando Ta’ala ma Saliuafi Tuāutu i alii fusu mai Fiti appeared first on Radio Samoa.

O loo ta’ua i le lipoti a le New Zealand Herald le valaau ai o auaunaga lavea’i a leoleo mo faalavelave faafuase’i i le Otakamiro Point ina ua alu ane lipoti i lea tagata na pa’ū i le sami.

Na tali atu iai le vaega a le Surf Life Saving ma le Westpac Rescue Helicopter, ma na alu sa’iliga ma maua ai e le vaega lavea’i a le helicopter le tino o lea tagata i le sami mulimuli ane, ae o le tala faanoanoa e maua lona tino ae ua uma lona ola.

O loo galulue ai nei leoleo e faamautū uma le si’osi’omaga o lenei faalavelave talu mai ona maua le tino maliu o lea alii i le sami.

O luga o le facebook o loo feavea’i ai faamaisega ma lagona faanoanoa o nisi e latou te silafia sia alii Samoa ua maliu.

O nisi o faamatalaga a i latou na molimauina le taimi na tupu ai lenei faalavelave, o loo ta’ua ai e foliga sa ta le ofe a lea alii ae ta ai loa e se galu ma pa’ū ifo ai ma tafea atu i tai.

O le molimau a le tagata na faamatala le mea na tupu, e foliga o lea alii e lē iloa aau, ma e le’i faia foi sona ofu faaola.

Sa taumafai nisi tagata faifaiva na iai e lavea’i mai sia tagata ae le’i mafai ona latou aumaia i uta i le pa’umātū.

E le’i fesoasoani foi le tulaga loulouā na iai lea aso, ma le malolosi o le fafati a galu.

Sa iai lapata’iga i le vaiaso talu ai i tulaga loulouā i timuga mamafa ma ono siisii ai foi le tai ma galu malolosi, ae o le tula’i mai o lenei faalavelave e foliga mai ai o loo iai lava le faatamala ma le lē matua’i utagia o fautuaga lapata’i o loo logologo mai pea e le vaega o loo gafa ma le saogalemū i taimi loulouā o le tau.

Puna o Faamatalaga: https://www.nzherald.co.nz/nz/muriwai-tragedy-person-found-dead-after-falling-from-rocks/KIRDNVDC3NDITIITT7KOFDRRSE/

The post Maliu se alii Samoa i Muriwai ina ua pa’ū ifo mai se papa ma pa’ū atu ai i le sami appeared first on Radio Samoa.

E matuā lē iloa e sia teine a’oga le māfua’aga ua osofa’ia ai o ia e le tama’ita’i talavou na faia le faalavelave, ma na ta’ua e le tinā o le teineitiiti na fasi, o lenei osofa’iga na faia i si ana tama, ua matuā fefe ai lava le teine e toe alu i le a’oga, ma ua tau lē tautala soo foi ona o loo gatete lava i le mea na tupu.

O le teine a’oga lenei o se Filipino, ma o le tolu tausaga talu ai na malaga mai ai ma lona aiga mai Filipaina, ma ua faamautū nei i Niu Sila

E a’oga i le Glenfield College, ma na ta’ua e se faia’oga mai lea kolisi, sa a’oga ai iinā le teine lea na osofa’ia Cloe, ae o le tausaga talu ai na tuli ese ai mai le a’oga ma e iloa uma foi i ona uiga faavevesi nei.

O loo faamoemoe mātua o si teine a’oga na faamanu’alia, ia vave ona maua e leoleo lenei tama’ita’i ma vave ai foi ona maua se fofō o lenei faafitauli, auā e lē o se taimi muamua lea ua tupu ai se mea faapea i lea lava fale faatalipasi, e faapea se lipoti, na fasi ai foi iinā i le fale faatalipasi lava lea i fafo mai o le McDonald i Glenfield, se isi foi teine a’oga Filipino i le 2023, ma o le tula’i mai o le faalavelave lea i le Aso Lulu, ua amata ai ona aga’i mai isi foi mātua e lipoti foi a latou fanau na osofa’ia ma fasi ai i lea lava vaipanoa a o isi na faia iai ni taufaamata’uga.

O se lapata’iga lea mo mātua ina ia nofo mataala ae o le latou foi talosaga, ina ia iai ni secuities i fafo ane o le kapaka a le fale’aiga mo le puipuiga o le saogalemu o nai fanau a’oga.

Puna o Faamatalaga: https://www.newstalkzb.co.nz/news/crime/north-shore-assault-teen-left-bloodied-and-traumatised-following-random-after-school-attack-at-glenfield-rd-bus-stop/

The post Osofa’i ma fasi se teine a’oga i le fale faatalipasi i Glenfield appeared first on Radio Samoa.

E pei ona masani ai i tausaga ta’itasi, e pa’ū tonu le vaiaso e faatāua ai le gagana Samoa i Niu Sila, ma le vaiaso foi lea e faamanatu ai le Tuto’atasi a le malo o Samoa, ma e faia ai foi ni faafiafiaga a tagata Samoa i Niu Sila e latou te faamanatu faatasi ai lea aso tāua i le talafaasolopito o Samoa.

E tele polokalame faasamoa na faatino i a’oga amata, o a’oga o loo iai vasega e a’oa’oina ai le gagana Samoa o se tasi o matāupu a’oa’oina a le fanau, o kolisi ma iunivesite, faapea foi i nisi o falefaigaluega ma pisinisi aemaise lava i falefaigaluega o loo to’atele ai tagata Samoa e galulue ai.

O nisi o a’oga sa faatulaga se aso e tasi e pei o ananafi ma le asō ina ia oofu atu ai fanau i o latou lavalava Samoa, sa faatino ai siva a le fanau ma faatāua foi le aai i ni taumafa Samoa na fai ai a latou lunch.

O le ‘au’au poo le matua o le vaiaso o le gagana Samoa i lenei tausaga, “E afua mai i mauga tetele manuia o le nuu”.

Ma o lena ‘au’au sa faatāua i le tele o tautalaga, talanoaga ma faasoa sa faia i totonu o a’oga, i vaega eseese o le soifuaga e mafai ona faasino atu iai le uiga o lea fuaitau, e lē gata i le soifuaga faaletino, le si’osi’omaga ae sa faatatau atu foi i le soifua faaleagaga o le tagata.

The post Faamae’a le Vaiaso o le Gagana Samoa i Niu Sila appeared first on Radio Samoa.

O lenei lapata’iga o loo faasino tonu i nofoaga ia e ono aafia e pei o le Northland, Aukilani, Great Barrier Island, Waikto, o loo faatalitalia e ono amata mai le itula e 3pm i le aoauli nei e oo atu i le 8pm i le afiafi nanei.

E faatalitalia o le a pāpā faititili ma amata totō timuga mamafa, e amata mai le 10-25mm/h, o savili malolosi e 100km/h ma e ono oso foi se asiosio.

O le malolosi o nei timuga o le a faasolo e ono aafia ai foi nisi nofoaga i ni lōlōga faafuase’i aemaise lava i nofoaga maualalalo, o nofoaga o loo iai ni ālia ma vaitafe, o ni nofoaga tofē ma ono iai foi ni sologā eleele.

E lapata’ia le nofouta o i latou e feoa’i i taavale ona o le a matuā maseesee le auala ma o le a lē faigofie foi ona manino lelei le vaai i luga o le auala pe a oo ina puaoa ma mamafa timuga.

Puna o Faamatalaga: https://www.metservice.com/warnings/home?fbclid=IwY2xjawSO0OpleHRuA2FlbQIxMABicmlkETF5Q2wwY0lmeHNVRVBqeFlxc3J0YwZhcHBfaWQQMjIyMDM5MTc4ODIwMDg5MgABHgFvUVEg7zCgUb5ZGqmiR0atwfoVrc-ZQFo92e2It9NDUQAGPOVlICUAxk-a_aem_w9MLdrTGhADcHrUr_Blexg

The post Lapata’iga o tulaga matuā loulouā o le tau i nisi o vaega o Niu Sila i le asō appeared first on Radio Samoa.

O ia fusuaga o se tasi o polokalame lautogia o le Tuto’atasi ma o loo taulamua ai le faalapotopotoga o fusu’aga le Independent Boxing Samoa poo le IBS i se faiga faapaaga ma se alo tautua o le atunuu i le faipele le afioga Faumuina To’aletai David Tua.

O paga faapolofesa o le a fetaui ai Jolando Taala o Samoa ma Sainivalati Ratu o Fiti i le paga o le Cruiserweight.

O Saliuafi Ioane o Samoa o le a fetaui ma le alii Fiti o Eliseo Cakaunivalu i le paga o le Lightheavy Weight.

E valu isi paga faaopoopo o le a fufusu ai foi nisi o alo o le atunuu i alii ma tama’ita’i.

The post Sauni tama fusu Samoa e fetaui ma tama fusu Fiti i paga faapolofesa appeared first on Radio Samoa.

O se taamilosaga o le a taaalo ai le Manu Samoa ma ‘au mai atunuu e pei o Hong Kong China, Georgia ma Romania.

O le aso 4, le aso 11 ma le aso 18 o Iulai e faia ai ia taaloga.

O le tatou ‘au e 32 ua faailoa o loo taaalo i kalapu i atunuu i fafo faapea ai ma Samoa.

O suafa o le ‘aufili a le Manu Samoa: 

1. Aki Seiuli – Burton Rugby Football Club, UK 
2. Titi Lamositele – Harlequins, UK 
3. Jeff Toomaga-Allen – Queensland Reds, Australia 
4. Marco Fepuleai – Mont-de-Marsan, France 
5. Jarred Adams – Pukekohe Rugby Club, New Zealand
6. Manaaki Boyle-Tiatia* – Waikato NPC, New Zealand 
7. Ritchie Asiata* – Queensland Reds, Australia 
8. Pita Anae Ah-Sue – Hautapu Sports Club Waikato, New Zealand 
9. Taeaoelia Pomale Time* – Northshore Rugby Club, New Zealand 
10. Michael Curry – Takapuna Rugby Club, New Zealand
11. Samuel Slade – Sayama Secom, Japan 
12. Benjamin Petaia Nee-Nee – Nippon Steel Kamaishi Seawaves, Japan 
13. Alamanda Motuga – Ardmore Marist, New Zealand 
14. Niko Jones – Moana Pasifika, New Zealand 
15. Miracle Faiilagi – Moana Pasifika, New Zealand 
16. Abraham Papalii – Castres Olympique, France 
17. Iakopo Mapu – Stade Francais, France
18. Connor Tupai – Eastern Suburbs, Sydney, Australia 
19. Joel Lam – Moana Pasifika, New Zealand 
20. Ereatara Enari – Hurricanes, New Zealand 
21. AJ Alatimu – Chiefs, New Zealand 
22. Rodney Iona – Two Blues, Australia 
23. Peter Umaga-Jensen* – Kintetsu, Japan 
24. Faletoi Peni – Moana Pasifika, New Zealand 
25. D’Angelo Leuila – Waikato NPC, New Zealand 
26. Duncan Paia’aua – Marseille Rugby, France 
27. Va’afauese Apelu Maliko – Rugby Club Suresnois, France 
28. Tuna Tuitama – Moana Pasifika, New Zealand 
29. Latrell Ah Kiong – Two Blues, Australia 
30. Warren Solomona* – Falealili, Samoa 
31. Taunuu Niulevaea* – A’ana, Samoa 
32. Elisapeta Alofipo – Faasaleleaga, Samoa 

The post Filifilia le ‘au a le Manu Samoa mo le World Nations Cup appeared first on Radio Samoa.

O le Aso Tofi i le mae’a o polokalame o le Sisigafu’a na faamae’a ai ma tufatufa ai loa faailoga.

O le ‘aukilikiti o le Ainiusami mai Lefaga ua sola ma le siamupini i le vaega o alii, ae ua siamupini foi i le taamilosaga kilikiti lava faasamoa i le tulaga faavaomalo.

O le ‘au a le Tanifa o le Vao mai Sili i Savaii ua maua le tulaga lua i le vaega lava o alii, ma le tulaga tolu o le Fetuao mai Ti’avea.

I tama’ita’i ua siamupini le ‘au o le I’a o le Vai mai Tanugamanono, tulaga lua Teine o le Papaloa mai Vailele ae tulaga tolu o Teine o le Lausalato mai Matautu Lefaga.

Sa maua faailogatupe e ‘au uma sa tausinio e aofia ai ma ‘aukilikiti ua mau tulaga.

E lima vaiaso o faagasolo taaloga o le liki kilikiti faasamoa o le Tuto’atasi.

The post Ainiusami ma le I’a o le Vai o siamupini o le liki kilikiti faasamoa appeared first on Radio Samoa.

O se faai’uga e taunuu iai iloiloga o le a iloa ai le talia ma le teena o le talosaga ua faavae i mau autū e lua, e aofia ai le āfaina o aiā tatau faalefaavae o le sui faipule, ma le pitotasi o le faatinoga o le galuega a le faamasinoga o faigāpalota sa su’esu’eina le tagi tau palota mai lea itumalo.

The post Faatali se faai’uga a le Faamasinoga Apili i le talosaga a le faipule o Falealili 1 appeared first on Radio Samoa.

Ua faaalia e Faanana o le tausaga fou e atoa ai le 80 tausaga o lona soifua, ma o lona faamoemoe pe a tumau pea lona malosi, o le a toe malaga mai i le atunuu e faia ai sana faafiafiaga tele e sami ai ia tausaga e tele o lona soifua pe a tusa ma le finagalo o le Matai sili.

O le faatalanoaga a lea tamalii lauiloa o Samoa i le musika na ia faailoa ai i tusitala e lē tuua lana taleni e faaauau pea, e faato’ā tuu lava pe a valaau mai le Matai e tapuni lona fofoga ae alu atu loa. 

The post “E lē mafai ona galo Samoa”…Faanana Jerome Grey appeared first on Radio Samoa.

O loo lava suāuu ma penisini o loo iai mo le faaaogāina peita’i ua manatu le soā komiti faufautua a le malo mo tapenaga i taimi o ni faalavelave faafuase’i matuiā, e tula’i mai e taulogologo le atunuu ina ia iai ni tulaga ma’ale’ale e aafia ai auaunaga tau i le maua o suāuu ma penisini ae o loo nofo silafia e Samoa vaega e ao ona nofo sauniuni iai.

O le feiloa’iga na taloina e lea soā komiti faufautua ma le vasega o tusitala na faailoa ai e sui o auaunaga eseese a le malo e aofia ai ma le vaega o galuega ma pisinisi tuma’oti, fuafuaga mo le tali atu i ni tulaga ma’ale’ale e tula’i mai.

O le malosi’aga tau eletise ua silasila e faasoasoa lea auaunaga mana’omia pe afai e tula’i mai se aafiaga i le tulaga i suāuu ma penisini maua, e faapea foi i le lotoifale o le malo i ana galuega faatino, aemaise le soifua mālōlōina ma le matāgaluega o a’oga.

Le ta’ita’ifono o le soā komiti faufautua a le malo mo tapenaga i ni faalavelave faafuase’i matuiā, o ia foi o le Ofisa Sili o le Matāgaluega o Puna’oa Faalenatura ma Si’osi’omaga, le afioga Lealaisalanoa Frances Brown Reupena.

The post Fautuaina Samoa e nofo mataala i ni tulaga ma’ale’ale ona o suāuu ma penisini maua appeared first on Radio Samoa.

E 45 afe le faailogatupe o le mua a le Malu o Samoa i le tuuga sa faaaogā ai foe sipuni ae 40 afe na maua i le tulaga tolu o tuuga fautasi sa faaaogā ai foe Samoa.

O le Sa o le Telefoni o le Vainuu na mua i le tuuga na faaaogā ai foe Samoa, e 50 afe lona faailoga tupe ae i le tuuga foe sipuni lea sa taualo ai lava lea Sa i foe laau, sa maua le faailoga faameaalofa ae e le’i faailoaina pe fia le tupe.

I isi fautasi sa auai i tuuga e lua sa faaaogā ai foe laau ma foe sipuni o le Little Rina e 75 afe le tuuaofa’iga o le faailogatupe ua ia maua, o le 40 afe o le tulaga lua i le tuuga na faaaogā ai foe sipuni, ae 35 afe i le tuuga o Sa na alo i foe Samoa.

O le Sa e tasi mai Salafai le Tolotolo o Tamauli e 80 afe le aofa’iga atoa o le faailogatupe ua ia maua, o le 45 afe na maua i le tulaga 2 i le tuuga na faaaogā ai foe Samoa ma le 35 afe i le tulaga tolu i le tuuga sa faaaogā ai foe sipuni.

O le fautasi o le Apia Maroon ua ia maua le faailogatupe i le tuuaofa’iga o tuuga e lua e 55 afe tālā.

E 30 afe na maua i le tulaga fā i foe sipuni ae 25 afe i le tuuga o foe Samoa.

O le Tausala o le Vasaloloa e 30 afe lana faailoga tupe i le tuuga o foe Samoa ma le faailoga faapitoa i le tuuga foe sipuni.

O le Sa lea ma le fautasi o le Telefoni o le Vainuu sa talia a la talosaga e auai i le tuuga sa alo ai Sa e fā i foe sipuni ae faaaogā lava e ia fautasi e lua foe laau poo foe Samoa.

Ua faaopoopo i faailogatupe i fautasi na maua tulaga, Ipu na saunia e le Komiti o le Tuto’atasi. 

The post Tuuga fautasi sa alo i foe sipuni ma foe laau ae faotaga e le Malu o Samoa le $85,000 appeared first on Radio Samoa.

O le Aso Lulu na tuuina atu ai e le Sui Kovana o le faletupe tutotonu o Samoa se faatonuga i faletupe o iai ni teugatupe a ia tagata e to’atolu.

O le tasi o loo umia le tusifolau tagatānuu o Ausetalia, o le isi o loo umia le tusifolau tagatānuu o le Iunaite Setete o Amerika, ae o le tasi o loo umia le tusifolau tagatānuu o Niusila.

O loo aofia ia i latou se alii mai Asia o loo faasalalau e leoleo lona ata i le fia maua o ni faamatalaga e maua ai mo su’esu’ega.

O lea alii talavou o loo umia le tusifolau Amerika.

Ua faaopoopo le to’atolu lea i le to’aono o tagata na muamua taofia le toe faaaogāina o a latou teugatupe ona o ia lava su’esu’ega a leoleo o loo faagasolo.

I le to’aiva ua faailoa suafa i le pepa o faatonuga mai le vaega su’esu’e a le faletupe tutotonu, e to’atasi ua faailoa faalaua’itele le suafa e leoleo ona o loo sa’ilia mo su’esu’ega.

O ia lea o Mathew Nhan Thien Nguyen e 23 tausaga le matua.

The post To’atolu isi ua taofia teugatupe i su’esu’ega a leoleo i ni sootaga i Samoa i le faalavelave i Vietnam appeared first on Radio Samoa.

O le iai i Samoa o le afioga Anae e auai i sauniga o le Tuto’atasi ma tauaao ai le faaaloalo maualuga a le malo o Samoa o le pine taualoa, na feiloai ai ma lea tamalii .

Ua faailoa foi e le afioga Anae Lupematasila Arthur Anae, o loo tapena nei se isi talosaga e ave i le Palemene a Niu Sila ma e mana’omia ai le lagolago a le atunuu.

O lea talosaga o le finauina lea o aiaiga o le avanoa nofomau i Niu Sila le Quota scheme ina ia tatala i se tagata e faamanuiaina le talosaga, le 6 masina e malaga atu ai i Aotearoa e sa’ili se pepa faigaluega ona foi mai lea ma faamae’a tapenaga mo le nofomau.

Faaalia e lea tamalii o se avanoa lelei lea ona ua molimauina faiga taufaasese ma isi faafitauli ua feagai ma o tatou tagata e manuia i le nofomau i le quota ona o pepa faigaluega.

The post Vivii e Anae Arthur Anae le lagolago a le Palemia o Samoa i le finauga mo se free Visa appeared first on Radio Samoa.

O le tasi o vaega o lea talosaga a le faipule o loo su’esu’eina e le Faamasinoga o Talosaga poo le Faamasinoga Apili, o le tuua’iga i le faaitu’au o le faamasinoga i le faatinoga o ana galuega a o tagofia le tagi tau palota a Falealili 1.

O le Aso Lulu o lenei vaiaso na faia ai se ‘ava o le feiloa’iga sa faafeiloa’i ai e le Matāgaluega o Faamasinoga ma le Faafoeina o Matāupu Tau Faamasinoga, le afioga i le Pelesetene ma faamasino o le Faamasinoga o Talosaga sa malaga mai fafo e faafoe lea su’esu’ega.

O se faaaloalo sa auai foi ma loia a itu auai o le matāupu o loo su’esu’eina.

E pei ona silafia ua talia e le Faamasinoga Maualuga a le atunuu le talosaga a le afioga Toelupe Maoiautele Poumulinuku Onesemo ma lana loia e ala i se poloa’iga, e taofia ai i se tulaga lē tumau le malosi faaletulafono o le faai’uga a le Faamasinoga o Faigāpalota ua faamaonia ai le moliaga o faiga faaālatua faasaga i le faipule, se’i iloilo muamua le talosaga ua i luma nei o le Faamasinoga o Talosaga apili.

O Faamasino o lea faamasinoga o loo feagai ma iloiloga o Justice Rhys Harrison, Justice Raynor Asher, ma Justice Andrew O’Regan.

The post Tagofia e le Faamasinoga Apili le talosaga a le faipule o Falealili 1 appeared first on Radio Samoa.

A o iai i Samoa le tama’ita’i Kovana Sili o Ausetalia ona o le valaaulia o sauniga o le faamanatuina o le tuto’atasi i lenei masina, o se avanoa lelei e lē gata ua feiloa’i atu ai i ta’ita’i o le malo ae ua ia tauaao ai ma se tasi o foa’i a lona malo o masini o fesoota’iga faatekonolosi mo le faaleleia o le auaunaga a le matāgaluega o le soifua mālōlōina.

O lea foa’i e tusa lona tau atoa ma le 450 afe tālā Samoa poo le 260 afe tupe Ausetalia.

O ia masini ua aofia ai komepiuta laiti e mafai ona feavea’i poo laptops faapea masini e fai ai kopi o pepa o faamatalaga eseese tau i le auaunaga a le matāgaluega.

Ma ua faailoa ai e le Minisita o le Soifua Mālōlōina i le taliaina o lea foa’i, o se faailoga o le loloto o sootaga vavalalata o faigāpaaga a Ausetalia ma le malo o Samoa.

O se sootaga foi ua tele tausaga o faaauau pea le agalelei o lea malo.

O le Aso Gafua na tatala ai nisi o galuega o loo fesoasoani ai foi lea malo o le ofisa fou o le fono aoao faitulafono, ma le faapaologa ua fausia i lumāmaota o le maota fono o le Palemene na faatupe foi e lea malo, ma o le tau o ia galuega e 66 miliona tālā Samoa.

Ua faailoa e le ofisa o lea malo i Apia o lea foa’i pe a faaopoopo iai ma isi fesoasoani i le auaunaga o masini faaonaponei e faaaogā ai fesoota’iga faatekonolosi ua maua ai le tau atoa e 7 miliona 500 afe tālā Samoa.

The post $450,000 le isi foa’i a Ausetalia o masini o fesoota’iga mo auaunaga a le soifua mālōlōina appeared first on Radio Samoa.

O le suafa o lea tagata o Mathew Nhan Thien Nguyen e lē o faailoaina e leoleo poo fea sona atunuu, ae o le talosaga a malu o le malo i o tatou tagata i Samoa ia logo atu soo se faamatalaga e fesoasoani ai i le fia maua o lea alii talavou.

O loo fautuaina foi le atunuu ia aua ne’i taumafai e feiloa’i i lea tagata ae ia logo sa’o se ofisa o leoleo o latalata ane.

E to’atasi le tagata ua taofia mo su’esu’ega a leoleo, o le alii e iai ona sootaga i le pisinisi o le Unalei Car Rental lea na taofia mai i le malae vaalele i Faleolo i le vaveao o le Aso Tofi ua mavae, a o sauni e tuua Samoa mo Niu Sila.

The post Fia maua e leoleo se isi alii Asia mo ana su’esu’ega o loo faasolo appeared first on Radio Samoa.

O lea lape o le mulimuli faailoa i le taulealea na molia o ana aiā tatau e lē faia ai sana faamatalaga i leoleo, ma le faafesoota’i o sana loia e feagai ma tapenaga uma se’ia oo i le faamasinoga.

Na ta’utino Alofaifo i leoleo o ia na faia le solitulafono o le ulufale faamalosi i le fale o se aiga ma toesea ai ni meatotino e tusa lo latou tau ma le 6 afe 300 tālā.

O lea ta’utinoga a o aga’i leoleo ma lē ua tuua’ia i le ofisa o leoleo i Faleolo na tusitusia ma tuuina atu e saini ai le taulealea sa molia.

Na faia lea gaioiga i se taimi o le taeao ua lata i le 12 i le aoauli, ae oo ane i le afiafi ua te’a le lima ae faato’ā faailoa e leoleo ia Alofaifo ana aiā tatau faaletulafono.

O loo faailoa foi i faamaumauga o lenei matāupu sa suia le faamatalaga a lē sa molia i lona faailoa i le faamasinoga na māfua ona ioe ona sa faamalosia le faia o lana ta’utinoga e leoleo.

Talu ai ia tulaga uma ua faia ai le faai’uga a le Faamasino Sili e soloia moliaga uma a leoleo.

The post Lē tausisia e leoleo ala o le tulafono i ana su’esu’ega, solofua ai moliaga o le gaoi ma le talepe fale appeared first on Radio Samoa.

O se fuafuaga lenei e faailoga i tausaga uma e amata mai le aso 31 o Me aga’i i le aso 6 o le masina nei o Iuni.

Saunoa i le lipoti lea, Faalogo Vaai mai le Matāgaluega o Tagata Pasefika o le tapunia o A’oga Amata o se lu’itau lea mo le komiuniti Samoa i Niu Sila ma o le i’uga foi o se su’esu’ega na faia ua iloa ai o le 97 pasene o tagata e talitonu e tāua tele le tautalagia pea o gagana a le Pasefika e aofia ai ma le gagana Samoa e alo ma fanau nei ma tupulaga i le lumana’i.

E pei lava ona masani ai i tausaga ta’itasi e tele foi polokalame faatulaga mo le faamanatuina o lenei vaiaso tāua. 

Ia manuia tele le faamanatuina o le vaiaso o le Gagana Samoa mo lenei tausaga 2026.

Puna o Faamatalaga: https://www.rnz.co.nz/news/pacific/596910/voices-of-praise-mark-the-start-of-samoan-language-week

The post Faamanatu le vaiaso o le Gagana Samoa 2026 appeared first on Radio Samoa.

Fai mai le RNZ e ui o loo iai nisi masaloga i le mau lea a le malo e lē faatagaina ai pe faatino gaioiga faaniukilia ae ua saunoa manino le minisita o le puipuiga a le atunuu o Chris Penk, i se fonotaga i Singapore i le vaiaso talu ai, e ui atonu e aogā ona talanoa ai ae e lē o iai se fuafuaga a le malo e faatatau i matāupu faapea.

E lē faatagaina e Niu Sila vaa faaniukilia i ona ogasami e tusa lava foi pe aumaia ai ni ‘au’upega faaniukilia.

Saunoa ai foi lē sa avea muamua ma Minisita o le Puipuiga, Wayne Mapp ua leva ona silafia e atunuu aemaise foi Ausetalia, le tulaga o Niu Sila i matāupu ia tau faaniukilia.

Puna o Faamatalaga: https://www.rnz.co.nz/news/political/596981/non-negotiable-christopher-luxon-says-nuclear-free-stance-not-changing

The post E lē suia le tulaga o Niu Sila i le matāupu faatatau i faiga faaniukilia appeared first on Radio Samoa.

O le lata i le 6 i le taeao analeila na faamaonia ai lea tulaga, o lona uiga a fua i faamaumauga e ta’i 75 sekone ma iai se tagata sitiseni i Ausetalia.

O le faitau aofa’i lea pe a tuufaatasi faamaumauga o i latou e fananau mai ma tagata e taunuu mai i le atunuu.

O le lua tausaga talu ai sa faamauina ai i le 27 miliona le faitau aofa’i ma ua fuafuaina e le ofisa, afai e faaauau pea le tulaga o loo iai nei le malaga mai o tagata ma pepe e fananau mai, e oo atu i se taimi o le 2031 ua oo le faitau aofa’i o tagata i le 30 miliona.

O loo maumaua’i pea le finagalo o le Minisita o le Home Affairs, Tony Burke e tāua tagata malaga mai i le tamaoaiga o Ausetalia.

Puna o Faamatalaga: https://www.nine.com.au/australia-news/australia-population-hits-28-million-migration-20260602-p60308.html

The post Silia i le 28 miliona le faitau aofa’i o tagata i Ausetalia i le taimi nei appeared first on Radio Samoa.

O le ofisa o Malo Aufaatasi i le United Kingdom ua latou faalēaogāina pemita faimalaga o Piker ma se tagata faasalalau ma o se loia foi o Cenk Uygur lea sa fuafua e malaga i Lonetona e saunoa ai i se festival faapisinisi e faia ai.

I se pepa o faamatalaga ua tuuina ane mai le ofisa lea o Malo Aufaatasi ua ta’ua ai le faalēaogāina o pemita o i la’ua ia ona o le māfua’aga e ono lē lelei mo tagata lautele lo la auai atu ai i le atunuu.

Ua mae’a faailoa i upega tafa’ilagi e le tagata lea o Piker le faalēaogāina o visa ma ia tuua’ia ai Isaraelu ma Peretania.

Fai mai a ia ua taotaomia e ia atunuu le sa’olotoga e faaalia ai finagalo o tagata.

O faasalalauga a Piker e masani ona faia i luga o upega tafa’ilagi e faatalanoa ai matāupu eseese e mafai ona molimauina e le silia i le 30 afe o tagata o loo taumulimuli iai ae a tuufaatasi ma le aofai o loo mulimuli foi iai i le facebook, X, Instagram ma le Twitch e silia i le 6 miliona tagata e faalogologo i polokalame a lea alii.

Puna o Faamatalaga: https://edition.cnn.com/2026/06/01/uk/hasan-piker-uk-entry-banned-intl

The post Poloka e le United Kingdom le malaga atu o Hasan Piker i Peretania appeared first on Radio Samoa.

Fai mai le CNN ua atili nenefu le matāupu ona o loo faapea mai Trump o loo faaauau pea talanoaga i le va o atunuu e 2 i se tulaga faavavevave.

Ua faailoa foi e le CNN faamatalaga mai ia Lepanona e faapea ua latou maua faamaoniga ua lagolago e Iran se maliega a le Hezbollah i se fuafuaga na fai atu e Amerika ia taofia ai fetauiga ma Isaraelu.

Peita’i fai mai le Palemia o Isaraelu, Netanyahu o le a faaauau pea osofa’iga a lana militeli i nofoaga i le itu i Saute o Lepanona e pei ona fuafuaina.

Ua faailoa foi e le Minisita o le Puipuiga a Isaraelu e lē o iai lava se taofiga o fetauiga i Lepanona.

Puna o Faamatalaga: https://edition.cnn.com/2026/06/01/world/live-news/iran-trump-lebanon-war-news

The post Fai mai Iran ua taofia lē tumau nei talanoaga ma Amerika ae fai mai Trump o loo faaauau pea talanoaga i se tulaga faavavevave appeared first on Radio Samoa.

O lea foi faaaloalo ua faaee atu le faailoga maualuga o le Koluse a Malietoa ma le pine taualoa maualuga o le Poloa’iga o Samoa le Chief Order of Samoa i nisi o Tupu, o tamalii ma tootoo lauga iloga o le atunuu ua fai i lagi le folauga ae sa lotolotoi i taumafaiga uma mo se malo tuto’atasi e pulea e tagata Samoa.

O le faailoga taualoa maualuga o le Malietoa Cross ua faaee atu i le afioga i le Tamaaiga na masoe i le mau, le afioga Tupua Tamasese Lealofi III ma sa taliaina lea faailoga taualoa e le Tamaaiga le afioga Tui Atua Tupua Tamasese Efi.

O nisi ua faaee iai lea faaaloalo, o faia’oga, faafeagaiga, loia, tagata taaalo, foma’i, tamaitai Sa ma se tasi sa avea ma pailate i le kamupani vaalele a Samoa.

I le faasologa ua faailoa lautele i auala o faasalalauga a le malo, o i latou nei ua faaee atu iai lenei faaaloalo a le malo o Samoa i pine ma faailoga taualoa.

Koluse a Malietoa

1. Tupua Tamasese Lealofi III

Poloa’iga Sili a Samoa

1. Namulauulu Lauaki Mamoe

Poloa’iga a Samoa – Tulaga Muamua

1. Mataafa Iosefo
2. I’iga Pisa
3. Patu Tiavaasu’e Falefatu Sapolu
4. Le Mamea Tuiletufuga Ropati Mualia

Poloa’iga Faapaaga a Samoa

1. Hon Le Tagaloa Leota Tama Sauafatu Dr Pita Pola Alailima
2. Hon Tolofuaivalelei Falemoe Leiataua
3. Rev Aisoli Tapā Iuli
4. Hon Misa Telefoni Retzlaff
5. Hon Leaupepe Toleafoa Apulu Faafisi
6. Tooa Salamasina Tamato Malietoa

Poloa’iga mo Galuega Maoa’e ma le Ta’uleleia

1. Afamasaga Vaafusuaga Telesia Alipia
2. Afoataga Faumuina To’aletai David Tua
3. Jai Opetaia
4. Leiataualesā Leaana Dr Lancelot Eves
5. Papalii Memea Alagaelua Dr Samuelu Petaia
6. Tofa Tavanā Namulauulu Vaafuti Tavanā
7. Sister Malia Tolotea Tauaifaga

Ofisa o le Poloa’iga a Samoa

1. I’iga Sauni Ioane Kuresa
2. Anae Lupematasila Lima Arthur John Anae
3. Tualatamalelagi Karanita Loveni Enari
4. Pastor Alaimoana Willie Papu
5. Aposetolo Viliamu Mafo’e

Sui o le Poloa’iga a Samoa

1. Hon Luagalau Levaula Kamu
2. Tofilau Tapuai Soti Mapu
3. Papalii Montgomery Richard Betham Senior 
4. Savae Laauli Sir Michael Niko Jones
5. Rev Tavita Roma

Poloa’iga a le Ao o le Malo mo le Tautua

1. Aiolupotea John Roache
2. Papalii Toiaivao Paul Perez
3. Saunimaa Pasi Ueligi Sauni
4. Tautai Toko Tofaeono

Ua iai le fuafuaga a le malo o le a ta’ilua tausaga ma faia lea faaaloalo e amana’ia ai tautua iloga eseese a tagatānuu o Samoa.

The post Tolusefulu tolu ua amana’ia sao ma tautua i le faaaloalo a le malo Samoa o pine ma faailoga taualoa appeared first on Radio Samoa.

O le Aso Lua o lenei vaiaso ua umusa ai le galuega ua toe fausia ai lea maota i le finagalo o le malo e faaolaola pea mo tupulaga lalovaoa ma le talafaasolopito o sa’iliga malo a Samoa lea nofoaga.

I talafaamaumau o ia vaitau o pulega a isi malo o le aso 14 o Ianuari o le tausaga e 1930 ina ua tuana’i le tagatavaleina o le afioga i le Tamaaiga le afioga Tupua Tamasese Lealofi III ma isi sui o le Mau e to’avalu lea na faatino e nisi o fitafita a le malo o Niu Sila, na osofa’i ai le nofoaga tutotonu o le mau e fitafita o le vaatau a Niu Sila o le HMS Dunedin, ma o se gaioiga na autū i le faata’apeina o le Mau.

O se tasi lea o polokalame o le aso lona lua o le faamanatuina o le 64 tausaga o le tuto’atasi o Samoa o le umusa o le maota fou o le Mau, faapea ma se tasi o sauniga tāua o le a faatino foi i le aso lona lua o le tuto’atasi, o le tauaaoina o pale ma teufugālaau i tuugamau o nisi o Tamaaiga ua tuumalo, faapea tamalii ma ni failauga o i latou sa tofusao i le sa’iliga o se malo tuto’atasi o Samoa.

O i latou ia e aofia ai le afioga Tuimalealiifano Sualauvi I, afioga Tupua Tamasese Meaole, afioga Tupua Tamasese Lealofi III, afioga Mataafa Iosefo, susuga Malietoa Tanumafili II, afioga I’iga Pisa, ma le tofa Lauaki Namulauulu Mamoe.

The post Umusa le galuega ua toe fausia ai le maota o le Mau i Vaimoso appeared first on Radio Samoa.

O le masina fou lenei o Iuni ua tau fai sii uma le tau o le penisini, le kiso ma le kalasini ma ua faamauina ai o le masina ua alu atu nei o Me ma le masina fou lenei ua sii maoa’e ai le tau o lea oloa mana’omia.

O le penisini o lona tau fou e 3 tālā 99 sene i le lita, i le masina o Me sa 3 tālā 51 sene i le lita le tau o le penisini, lona uiga e 48 sene le siitaga fou.

O le suāuu kiso poo le diesel o le tau fou ua 5 tālā 31 sene i le lita, i le masina o Me sa 4 tālā 50 sene i le lita, o le siitaga fou ua faaopoopo le 81 sene i le tau o le suāuu kiso i le lita e tasi.

Ma le kalasini o lona tau i le masina lenei o Iuni ua 5 tālā 02 sene i le lita, o le masina o Me sa 4 tālā 05 sene i le lita, o le siitaga fou ua faaopoopo le 97 sene i le tau o le kalasini i le lita.

O le siitaga maualuga o le tau o ia oloa ua tapena ai nei se siitaga fou i le totogi o pasese mo pasi ma taavale laiti la’upasese poo taxi ina ia tau faafetaui ai le sii o le tau o suāuu ma penisini.

The post Sii maualuga i Samoa tau o suāuu ma penisini mo Iuni 2026 appeared first on Radio Samoa.

Na amata i le vaveao analeila ona faatulaga mai savali faaaloalo ma le sauniga faapitoa na talosia ai le faamoemoe o le atunuu.

Sa faimalaga atu sui o malo e pei o Ausetalia ma Niu Sila faapea foi isi uso a atunuu o le Pasefika e molimau i lea foi aso tāua mo Samoa.

E tele polokalame ma faafiafiaga ua mae’a faatulaga mo le faamoemoe e aofia ai taaloga, faafiafiaga ma tauvaga eseese e faamanatu ma toe faaolaola ai tu ma aganuu masani a Samoa mai tausaga e tele ua tuana’i.

O le afioga i le sui o le fono a sui tofia, susuga Malietoa Molī Malietoa na sisiina a’e le tagavai o le sa’olotoga o Samoa lea ua atoa nei le 64 o tausaga o lona tuto’atasi.

The post Faamanatu le 64 tausaga o le Tuto’atasi o Samoa appeared first on Radio Samoa.

O le faaosoga lava lea i le amataga na taunuu le Telefoni i le tini o taumafai atu pea le Tolotolo o Tamauli ae le’i toe maua.

O le faai’uga o le tuuga fautasi muamua, ua siamupini le fautasi o le Telefoni o le Vainuu, tulaga lua le fautasi o le Tolotolo o Tamauli, tulaga tolu le fautasi o le Malu o Samoa, tulaga fā le fautasi o le Little Rina, tulaga lima le fautasi o le Tausala o le Vasaloloa, ae tulaga ono ai le fautasi o le Sheraton Apia Maroon.

I faasalalauga tuusa’o o tuuga fautasi na faatalanoa ai le kapeteni o le Telefoni o le Vainuu le susuga Leiataua Jerry Brunt.

Le susuga Leiataua Jerry Brunt le kapeteni o le fautasi o le Telefoni o le Vainuu sa faatalanoa e le tofa Vaasiliega Iupati Lagaaia, sa faasalalauina le tuuga i le TV 9 o se auaunaga faasalalau a le malo. 

The post Sola le Telefoni o le Vainuu ma le siamupini o le tuuga fautasi sa alo i foe Samoa appeared first on Radio Samoa.

I se pepa o faamatalaga mai le ofisa o lea malo i Samoa, o loo faailoa ai o se faailoga lea o le faatāua e lea malo o pulegamalo lelei, o lona amataga e fofoa mai i pulega faatemokarasi o loo lima ta’ita’iina ai faiga faapaleme.

O le ulua’i aso o polokalame o le 64 tausaga o le tuto’atasi i le Aso Gafua na tatala ai ma le galuega o le ofisa fou o le fono aoao e ui o loo iai le fuafuaga e faato’ā mae’a lelei i se taimi o lenei tausaga.

O le maota e mapu iai sui faipule mo mālōlōga mai fonotaga, le maota Samoa tele o le Luafatasaga e faato’ā mae’a lelei i le isi lua vaiaso o lumana’i ma sa faatupe e le malo o Samoa i le tau e silia i le lua miliona tālā. 

Faaalia e le malo o Ausetalia o le tupe ua faaalu i le galuega o le ofisa fou o le fono aoao e 66 miliona tālā ma ua fausia i faiga faaonaponei e fetaui ma suiga o le tau, aemaise o se fausaga e malosi e fuafua i le tulata o le nofoaga i le sami.

O le tama’ita’i Kovana Sili o Ausetalia faapea le ta’ita’i o le tatou malo i le Alii Palemia na saunoa i le tatalaina o le galuega.

The post Tatala galuega o le ofisa o le fono ae faato’ā mae’a lelei i se taimi o le 2026 appeared first on Radio Samoa.

O le Royal NZ Honours e faatāua ai i latou na galulue i le komiuniti ma amana’ia a latou gaioiga na mafai ona ausia i komiuniti aemaise le atunuu.

O le faatulagana o faailoga nei e aofia ai vaega e tolu o Orders, e pei o le Order of NZ, le NZ Order of Merit ma le King’s Service Order.

E aofia ai ma isi faailoga taualoa e masani ona tauaaoina ai i lea faamoemoe.

Fai mai pe ā ma le to’a 178 na mauaina faailoga ae o le 6 pasene o tagata Pasefika.

E aofia ai Beatrice Roini Liua Faumuinā, Freddie Lemalu Ah Kuoi, Okesene Seanoa Faraimo, Fane Fusipongi Ketuu, Nehru Grant Leifi, Filomena Loheni, Tofa Robertina OHalloran, Esitone Leota Pauga, Kathleen Tuai ma Vania Nive Wolfgramm faapea Rev Tapita Taia Ching ma Vaitoelau Kumitau.

Puna o Faamatalaga: https://www.rnz.co.nz/news/pacific/596915/king-s-birthday-honours-2026-pasifika-people-among-those-recognised

The post Amana’ia tautua a tagata Pasefika i faailoga taualoa o le Aso Soifua o le Tupu appeared first on Radio Samoa.

Fai mai le lipoti ua lē taunuu lea fuafuaga ae o le a maua ane e Ausetalia vaamaulu secondhand mai ia Amerika lava, o se vaega o le latou maliega tau le puipuiga, sa faia ma Amerika ma le United Kingdom.

Fai mai le minisita o lea fuafuaga o le a faafaigofie ai le lumana’i o Ausetalia ma faaitiitia ai foi ma le tupe alu.

Fai mai le minisita o le fuafuaga lea e fai si taugatā ae e tāua tele.

O vaamaulu ia o se tasi o vaega tāua o le totino lea o le AUKUS e aofia ai Ausetalia, United Kingdom ma Amerika.

Puna o Faamatalaga: https://7news.com.au/politics/defence/richard-marles-reveals-us-submarines-aukus-savings-as-australia-opts-for-secondhand-submarines-c-22361950

The post Faailoa e le minisita o le Puipuiga a Ausetalia suiga ua iai i le maliega ma le AUKUS appeared first on Radio Samoa.

Ua faatino ia gaioiga i le mae’a ona aga’i ane o ana vaegā’au i lotoifale o Lepanona ma ua ta’ua i lipoti a le BBC ua upuia ai e le UK, Farani ma Siamani ia gaioiga a Isaraelu.

Ua tuua’ia ai foi e le Palemia o Lepanona le atunuu o Isaraelu ona o ia gaioiga.

Ua valaau ane foi le failautusi o le va i fafo a le United Kingdom, Yvette Cooper ia Isaraelu ma le Hezbollah ina ia faamuta ia vevesi.

Peita’i fai mai Netanyahu ua o latou gausia le papuipui o le fefe, ma o lo latou faamoemoe o le faalauteleina o le latou fāoa o nofoaga o loo i lalo o pulega a le Hezbollah.

Puna o Faamatalaga: https://www.bbc.com/news/articles/cdep04kzz5wo

The post Maua e Isaraelu le Beaufort Castle i Lepanona appeared first on Radio Samoa.

Ua faailoa foi e le BBC o suiga e pei ona lipotia, e faatatau i le Strait of Hormuz ma le matāupu i le uranium a Iran.

O Mohhamad Bagher Ghalibaf o le sui o Iran na ia ta’ua e lē taitai foi ona malie ane Tehran i se maliega se’i vaganā lava ua faamautūina se maliega o loo puipuia ai ana aiā tatau.

O le Aso Faraile talu ai na faia ai se fonotaga a Trump ma ana sui sinia e faamautū ai matāupu i le va ma Iran.

O le atunuu o Pakistan o loo auai e fai ma mediator i talanoaga i le va o Iran ma Amerika.

Puna o Faamatalaga: https://www.bbc.com/news/articles/c1w2xve315do

The post Mana’o Trump e fai suiga i le maliega a Iran ma Amerika appeared first on Radio Samoa.

O le iunivesite i Aukilani Niu Sila ma le iunivesite a le Pasefika i Fiti sa a’oa’oina ai i latou e aofia ai alii e to’alua ma tama’ita’i e to’afā.

O le Aso Tofi i se sauniga faalefaamasinoga sa faataunuu ai a latou tautoga ma latou ta’utino ai, o le a faia le mea silisili i le faatinoga o o latou tiute faaloia aemaise o le tausisia o le ta’iala o galuega faaloia e tautua ai le atunuu aemaise o le faamasinoga e ala i le faamaoni ma tausisia ala o le tulafono.

O loia e to’aono ua faaulufale ma talia i galuega a le faamasinoga maualuga a Samoa, o Ayrton Michael Afamasaga Soonalole, Sanita Sushil Sharma, Siniva Leleimalefaga, Jeannie Mata’utia, ma se alii ma lona tuafafine, o Puleia Tanielu ma lona tuafafine o Hossana Fuarosa Tanielu.

O le alii loia o Ayrton Michael Afamasaga Soonalole, o loo tauaao i le faauuga a le Iunivesite a le Pasefika o loo faia i le Aso Faraile o lenei vaiaso i Samoa, lona faailoga tikeri o tomai i le tulafono na faamanuiaina ai mai lea iunivesite ma ua avea ai ma loia faauuina.

The post To’aono loia ua faaulufale i galuega a le Faamasinoga Maualuga appeared first on Radio Samoa.

O lea taofiga ua faia e ala i se faatonuga mai le Kovana o le Faletupe Tutotonu o Samoa, e māfua i se mana’oga mai leoleo ma i latou o loo feagai ma su’esu’ega.

O ia tagata e to’aono e pei ona faailoa i le faatonuga mai le Faletupe Tutotonu o loo aofia ai tagata e to’alua e umia tusifolau Niu Sila, to’atasi le tagata e umia le tusifolau Amerika, ma le to’alua e umia tusifolau Samoa.

O le isi to’atasi e leai se tusifolau.

O le to’alima o ia tagata o ni tagatānuu o Samoa ae o le isi o se tagatānuu o le Iunaite Setete o Amerika ae nofo i Samoa ma e maupaolo i se tama’ita’i o le tatou atunuu.

O le mana’oga o leoleo ma ē o faia le su’esu’ega, e taofi ona toe faaaogā teugatupe a ia tagata ona o loo su’esu’e sootaga o tagata i le pisinisi o taavale totogi pe a fia faaaogā lea e ta’ua o le Unalei Car Rental o loo i Vailoa Faleata.

O lea pisinisi e le’i leva ona tatala ma o se pisinisi o taavale taugatā ma anagatā ma ua faaalia e ni molimau e taugatā foi le totogi e faaaogā ai se taavale e tusa ma le tasi le afe tālā i le aso.

O se alii sa vaaia ma faagaioi lea pisinisi na taofia e leoleo lona tuua o Samoa i le Aso Lulu o le vaiaso nei.

O molimau ma lipoti ua faaalia ai o lea tagata na aveesea mai se faigāmalaga a le Air New Zealand i le po o le Aso Lulu, ma ua faaalia e se molimau na faatino le gaioiga a leoleo ae ua sauni le vaalele e tuua le malae vaalele faavaomalo i Faleolo.

O se tasi o vaega o su’esu’ega a leoleo o loo faagasolo na faasalalau ai le ata o se alii Asia sa galue i lea pisinisi ona o loo mana’omia mo su’esu’ega.

Peitai o le ata na faasalalau e leoleo na tali iai lea tagata ma ia faailoa i luga o upega tafailagi sa aga’i i le ofisa o leoleo ma fesiligia ai o ia, peita’i ua na lē iloa le māfua’aga ua faasalalau ai e leoleo lona ata ae sa ia faailoa iai o le a lagolago i su’esu’ega i soo se itu e mana’omia ai lana fesoasoani e leoleo.

Ua teena foi e lea tagata e lē o ia o se tagatānuu o Vietnam, ae o ia o se tagatānuu o Amerika.

The post Faia pea su’esu’ega a leoleo i sootaga i le faalavelave i Vietnam, to’aono ua taofia latou teugatupe appeared first on Radio Samoa.

O le faalēaogā ai o ia moliaga ona o le mae’a ona fofoga o mau ma silasila iai le faamasinoga, na taunuu ai le afioga i le tama’ita’i Faamasino le afioga Alalatoa Rosella Papalii i lana faai’uga ua lē mafai e mau a lē na tagi le tofa Ulugia Mata’u Matafeo o se matai o le afioga o Vaiusu, ona faamalieina le faamasinoga.

Se finagalo o le afioga i le minisita o faamasinoga o le sui faipule o Aana Alofi 1 le tofa Fesola’i Apulu Tusiupu Tuigamala ina ua mae’a ona lau le faai’uga a le faamasinoga.

O moliaga sa tuua’ia ai le minisita sa su’esu’eina o se tagi o moliaga o faiga faaālatua i aiaiga o le tulafono o soligatulafono, ma sa finauina e avea ai ma itu a leoleo, e se loia e galue i le vaega o ofisa loia tuma’oti.

Sa tapua’ia taualumaga o le faamasinoga e nisi o aiga o le minisita faapea nisi o matai o le itumalo palota o Aana Alofi 1. 

The post Faalēaogā moliaga o gaioiga faaālatua sa tuua’ia ai le Minisita o Faamasinoga appeared first on Radio Samoa.

Na ia ta’ua i lea lipoti o loo matua’i naunau Tehran ia maua se maliega e faamuta ai le taua peita’i e lē o ausia foi lea tulaga.

Ua faia lea saunoaga a Trump ae faato’ā mae’a ona agiga i luga o televise i Iran faamatalaga ua ta’ua ai aiaiga o le maliega o loo faatalanoa lea e faapea e aofia ai le toe tatala o le Strait of Hormuz ma le aga’i ese mai o vaegā’au a Amerika mai lea itulagi.

Fai mai le Fale Pa’epa’e e matuā lē moni ia aiaiga.

Ua teena foi e le alii Peresetene faamatalaga ua ta’ua ai o loo ia iloiloina le faamāmā o sa poo sanctions o loo faia e Amerika ia Tehran.

E iai isi lipoti e le’i mamao atu nei ua ta’ua ai le faia o nisi osofa’iga a Amerika i totonu o Iran.

Puna o Faamatalaga: https://www.bbc.com/news/articles/c74dy9jw1q9o

The post Fai mai Trump e lē o faamalieina o ia i aiaiga o le maliega o loo fetuuna’i ma Iran appeared first on Radio Samoa.

O le Hunter region ma le Mid North coast o loo faamamafa foi iai lapata’iga ma o loo iai foi lapata’iga o uila ma faititili i le itu i Mātū i Sasa’e.

O loo aafia foi le setete o Kuiniselani i timuga mamafa aemaise i le aga’i atu i le faai’uga o le vaiaso.

Ua fautuaina tagata ina ia faamamao ese ma vaitafe aemaise nofoaga maualalalo.

E iai vaega o le setete o le a faasolo ina faaitiitia mai ai timuga i le faasolo atu i le faai’uga o le vaiaso.

Puna o Faamatalaga: https://www.9news.com.au/national/nsw-weather-update-heavy-rain-and-flood-warning-for-northern-parts/a0870dc8-4c29-4e69-b7e5-41948c38ee82

The post Mamafa timuga ma loulouā le tau fautuaina mo Niu Sa Uelese ma vaega o Kuiniselani appeared first on Radio Samoa.

Lipotia i le RNZ faamatalaga mai ia Peters ma ua tusia foi i le upega tafa’ilagi a le X e faapea, na ia faamanino atu ia Abbas Araghchi le mana’oga o Niu Sila ina ia faamuta loa le taua.

Ta’ua e Peters ua mae’a faailoa ane foi e le alii minisita le tulaga o iai feutana’iga ma le Iunaite Setete o Amerika.

Faailoa e Peters o le isi ana faamatalaga na fai ia Araghchi e na o le pau le auala e maua ai se tali o le matāupu o le mulimulita’i atoatoa i tulafono faavaomalo.

Puna o Faamatalaga: https://www.rnz.co.nz/news/political/596530/nz-wants-urgent-end-to-the-conflict-peters-tells-iran-foreign-minister

The post Faailoa e Winston Peters i le Minisita o le Va i Fafo a Iran le mana’oga o Niu Sila ia faamuta loa le taua appeared first on Radio Samoa.

O le vaiaso nei ua feta’ua’ina mai ai i lipoti le faia o se su’esu’ega a leoleo i Samoa i lenei matāupu aemaise ina ua agiga mai upega tafa’ilagi ma le social media le ta’utino o ni alii Samoa e to’alua i le faatinoina o le faalavelave lea i Ho Chi Minh City i Vietnam.

Ta’ua i lipoti mai le Samoa Observer i Samoa o Joseph Vaa e 27 tausaga o le matua, ua ta’utino i le fanaina o Lorenzo Lemalu Tovia, ua lipotia ai foi ma le isi alii na o la to’alua o Steve Tofa e 23 tausaga le matua.

Na faailoa foi e le RNZ o le isi na faamanu’alia o Sauni Sam e 27 tausaga le matua, o loo iai nei i le falema’i i Vietnam i manu’aga tigāina.

Sa lipotia muamua i le Alaata 9 ma le 7 a Ausetalia o ni alii Ausetalia na faatinoina le osofa’iga, peita’i na toe lipotia mulimuli ane e le 7News sa faaaogā e i la’ua nei ni tusifolau taufaasese ma igoa lē sa’o e malaga ai i Vietnam.

Ua lipotia foi na pu’eina i la’ua i le tuaoi ma Cambodia a o le’i atoa le tolu o aso talu ona tupu le faalavelave.

Fai mai o loo faaauau le su’esu’ega i lenei faalavelave ae ta’ua foi e le RNZ ua taofia foi e leoleo nisi tagata Vietnam o loo feta’ua’ina sa fesoasoani i le faasosolaina o i la’ua ua aafia i lenei matāupu.

Puna o Faamatalaga: https://www.rnz.co.nz/news/pacific_samoa/596562/samoa-police-investigating-after-pair-admit-killing-of-coconut-cartel-ringleader-in-vietnam

The post Su’esu’e e leoleo i Samoa le faalavelave i Vietnam ina ua ta’utino alii Samoa i le fasiotia o le ta’ita’i o le Coconut Cartel appeared first on Radio Samoa.

Ua una’ia e le vaega o le puipuiga a Isaraelu, tagata ina ia aga’i i le itu i Mātū o le Zahrani River e lata i le tuaoi.

O ananafi na faia ai osofa’iga a Isaraelu i le itu i Saute o Lepanona i le aai o Tyre.

I totonu o le 24 itula ua faamatuu ane ai e Isaraelu lapata’iga ma poloa’iga mo tagata ia aga’i ese mai nofoaga o loo iai i tulaga lamatia ona o osofa’iga o loo fuafuaina.

O le aso 2 o Mati na aafia ai loa ma Lepanona i le taua ina ua osofa’i e le Hezbollah Isaraelu e faaaogā ai loketi ma isi ‘au’upega ina ua faamaonia le fasiotia o le ta’ita’i sa iai o Iran, Ayatollah Kohmeni.

A itiiti mai pe 3,200 tagata ua fasiotia i Lepanona talu ona amata le taua.

Puna o Faamatalaga: https://www.bbc.com/news/articles/cj3pgrpmlklo

The post Tuu ane poloa’iga a Isaraelu ia aga’i ese tagata Lepanona mai le itu i Saute lea ua faasolo atu iai ana osofa’iga appeared first on Radio Samoa.

O lea tulafono ua faaigoaina o le stalking and harassment laws, o gaioiga o le tulituliloaina ma le faasoesā i se tagata.

Na faato’ā pasia lava lenei tulafono e le aufaitulafono i le Aso Lua o lenei vaiaso, ma e le’i atoa lelei se aso, ae o lea ua aafia ai se tasi. 

O le pasia ai o lenei tulafono fou, o le a mafai ai e le malosi’aga a leoleo ona tuuina atu ni sala, ma molia foi tagata e maua o loo o latou faia lea soligatulafono. 

I ripoti mai le faamasinoga, o loo faamauina ai o lē ua molia nei o se alii e 39 tausaga le matua, ma ua molia i lona tulituliloaina ma le faia o uiga faasoesā i se tama’ita’i.

E faapea o lona faatinoina o lea faiga e aunoa ma le mana’o ai ma se faatagaga a lea tama’ita’i (charged with stalking and harassing a woman through persistent unwanted communication). 

Faailoa e leoleo, o lē o loo molia e faalua lelei ona ia mulimuli atu i le māfine na faaulu le tagi.

Ma o se gaioiga na tupu a’e ai le fefe o le tama’ita’i, ma o le ala lea na ia faaulu ai le tagi. 

Faamauina o loo molia foi o ia i le faia o amioga matagā faasaga i sia lava mafine. 

Na tulai lea alii i luma o le faamasinoga faaitumalo a Aukilani i le Aso Lulu. 

Ta’ua e le Sui Faatonu, Acting Director of Prevention Inspector Natasha Allan o le molia ai o lea tagata o se pine faamau lea o le faamalosia ai o malosi’aga a leoleo e saga puipuia ai tagata aafia, ina ia taofia ai ia ituaiga gaioiga a o le’i faateteleina. 

 Faamatala e le Minisita o le Faafoeina o tulaga tau faamasinoga poo le Justice, Paul Goldsmith, e matua’i tele lava aafiaga o ia gaioiga, e lē gata ina aafia ai lagona o le tagata, aemaise o le mafaufau aemaise lava i tinā ma tama’ita’i faapea nai fanau.

Faamauina e oo atu lava i le 5 tausaga le faasalaga o lenei tulafono fou pe a faamaonia.

Puna o Faamatalaga:https://www.rnz.co.nz/news/crime-and-justice/596489/first-charge-laid-under-new-stalking-and-harassment-laws

The post Ulua’i tagata ua molia i lalo o se tulafono fou faato’ā pasia e le Palemene appeared first on Radio Samoa.

E lē tau faailoa le to’atele o tagata o loo aafia i lenei matāupu, o le lē iai o ni fale e nonofo ma aumau ai.

Ae o lea ua oo mai se ripoti a le Community Housing Aotearoa, ua faaali manino ai ua oo lava i tumutumuga o numera faatulagaina le to’atele o tagata e lē o maua ni fale e malu ai (homelessness), ma le toetoe a leai ni fale e mafai ona gafatia e tagata le totogiina. 

Mai i taunuuga o ia su’esu’ega o lea ua fautuaina ai e le faalapotopotoga le malo ina ia amata fausia ni fale e oo atu i le 3000 i tausaga ta’itasi mo le isi 10 tausaga; o ni fale e taugofie ma gafatia e tagata.

Ta’ua e le Pule Sili o le faalapotopotoga o le Community Housing Aotearoa, Chief Executive o Paul Gilberd e mafai telē e Niu Sila ona taofia lenei faafitauli mai le tula’i mai, ae e moomia i sui o upufai o malo ona tula’i e faatino, ma savalia faaupuga i le taumafai e tafiesea lenei faafitauli ua amata sosolo faafaama’i. 

Faailoa e Gilberd o le maua ai o se fale o se mea e tatau ai ma e tāua tele ona maua e le tagata, e lē o se mea faavaitaimi, ma o loo faanaunau ia amata tilotilo le malo e ave le faamamafa i le toe fausiaina o ni fale se tele ma gafatia, ma ia tatau ona faailoa mai i totonu o le paketi a le malo. 

Ua upuia foi e le faalapotopotoga le fuafuaga o loo iai nei a le malo i le maua ai e le to’atele o nofoaga ma fale e aumau ai.

Faamatala e le faalapotopotoga, o se fuafuaga e lē o sa’o lona faatinoina, talu ai e lē o manuia ai tagata o loo moomia fale nei, ae o loo manuia ai na o i latou o loo faagaioia nei fuafuaga poo private landlords.

Ta’ua foi e le Community Housing Aotearoa o tagata Maori, ma tagata Pasefika ia o loo maualuga ai le numera o ē o loo matua’i aafia tele i lenei matāupu o le leai o ni fale e nonofo ai. 

Ua faamauina i lea ripoti, e lata lava i le 29% tagata Maori o loo feagai ma lenei faafitauli, e ui e na o le 17% o i latou nei o loo maua ai le numera o tagata o loo aumau i totonu o le atunuu.

Mo tagata Pasefika o loo māua e silia ma le 22% le aofa’i o i latou o loo aafia i le leai o ni o latou fale e nonofo ai, ae na o le 8% o i latou o loo aumau ma nonofo i totonu o Niu Sila. 

Ta’ua i lea ripoti o le to’atele o loo aafia i lenei faafitauli, o tagata e i lalo o le 24 tausaga, ma o le latou iloa, o le feagai ai o le to’atele ma ia faafitauli mai le talavou o o latou olaga, o le a lē fesiligia foi le faaauau ona iai pea i latou i ia aafiaga. 

O lea ua valaau le faalapotopoga i le malo ina ia vave fai loa se fuafuaga, a ia mautinoa le tele o ni fale e fausia, ma ia taga’i i ni fuafuaga e aofia ni auala e aofia ai tagata Maori ma Pasefika.

Puna o Faamatalaga: https://www.rnz.co.nz/news/political/596553/homelessness-reaches-highest-levels-in-history-community-housing-aotearoa-report-finds

The post O se talafaasolopito maoa’e le matuā to’atele o tagata Niu Sila e lē o iai ni fale e nonofo ai appeared first on Radio Samoa.

E pei ona iai mo le tele o tausaga sa faatino lava le tuuina atu e tagata o a latou talosaga tusitusia poo pepa faatumu (manually lodged documents) ae peita’i o lea ua faamanino e le Ofisa o Femalagaa’iga, o le a mafai ona faatino le tele o talosaga i luga o le initaneti poo le online. 

O se tasi lea o itu ua faalaua’itele atu ai le auaunaga aemaise o le polokalame a le ofisa ua ta’ua o le Our Future Services.

Na amata faatino mai ina ia faafaigofie le faia o talosaga mo visa ulufale a tagata ta’ito’atasi. 

E amata atu i le masina fou, o le a faasino sa’o le tagata i le itulau poo le online platform e amata faatino ai loa le faatumuina o faamaumauga eseese e pei ona moomia mo le maua ai o se visa ulufale.

Māua i lenei faasilasilaga mai le Ofisa o Femalagaa’iga, o lenei faiga fou o le a mātele ina aafia ai visa a i latou o loo faaulu talosaga mo ni visa a aiga poo le vaega ua ta’ua o family-related temporary visas. 

Faamauina o le a aofia ai visa ulufale mo ē o loo i totonu o le atunuu mo a’oa’oga (student visa), visa faigaluega (work visa) ae mo visa asiasi mai e aofia ai Partner of a Worker visas poo le visa lea mo aiga poo ta’ito’alua a i latou o loo galulue i totonu o Niu Sila i lalo foi o le visa faigaluega, ma le to’alua o se tagata o loo iai i totonu o Niu Sila mo a’oa’oga. 

Faamanino e le Ofisa o Femalagaa’iga a Niu Sila, Immigration New Zealand, mo ē ua mae’a ona tuuina atu talosaga e faaaogā ai le auala tuai, e leai se tulaga e popole ai o loo faaauau pea le iloiloina i le taimi nei.

 Ta’ua e sui o le auaunaga, o lenei faiga fou, o le a tuuitiitia ai le taimi faatalitali mo le maua ai o se tali i visa, e lē gata i lea ae o le a atili faaleleia ai tulaga o fesoota’iga a le auaunaga ma ē o loo talosaga atu i vaega o loo moomia ai le fesoasoani. 

Faailoa e le auaunaga o lea foi faiga fou, o le a iai ma se vaega ua ta’ua o le Identity Document Reader technology, o lona uiga o le a mafai ona sa’ili pe scan le tusifolau ma faamaumauga a le tagata ona alu sa’o lea o faamaumauga aga’i i le talosaga nai lo o le tau ta pe tusi i lalo, e tuuitiitia ai ni sasi ma ni vaega ua sesē. 

Ta’ua e le Immigration New Zealand o le a toe maua mai i se taimi o i luma nisi o faamatalaga e tusa ai ma ia suiga fou.

Puna o Faamatalaga: https://www.immigration.govt.nz/about-us/news-centre/family-of-temporary-visa-holder-applications-moving-to-enhanced-immigration-online/?fbclid=IwY2xjawSELmxleHRuA2FlbQIxMABicmlkETFjMlUxQXQ1TjRlQWNzbjg1c3J0YwZhcHBfaWQQMjIyMDM5MTc4ODIwMDg5MgABHpZ51OYnz5URcMstE71tCa_2WIwGjFHtxBNpxrWqJSwY_mzRqjeWtGGJK4gY_aem_rYSpQYqf2BeKzAR2jb_low

The post Faaopoopo atu isi talosaga mo visa ulufale a Niu Sila i luga o fesoota’iga tau initaneti  appeared first on Radio Samoa.

Ua faamauina o lea fesoasoani o le a totogi ai e le Lakapi Niu Sila tama taaalo se’ia pā’ia le faai’uga o le masina o Iulai, a o taumafai pea le Kalapu a le Moana Pasefika e sa’ili fofō i tulaga pagatia ua iai nei. 

Ta’ua o lenei laasaga ua aga’i iai le faalapotopotoga a le Lakapi Niu Sila i le mae’a ai o fuafuaga o le faama’ape ai o le kalapu lakapi i lenei vaiaso, a o lumana’i ai lana taaloga mulimuli i lalo o le pulega o loo iai, e pei ona tapena atu ai e taaalo ma le ‘au a le Brumbies i Canberra.

Faaalia e le faia’oga ulu a le ‘au, Faalogo Tana Umaga, o se tala fiafia ma o se tala ua talia ma le agaga faafetai e tama taaalo faapea lana pulega le fesoasoani a le faalapotopotoga lakapi a Niu Sila, e ui e lē o mautonu le tulaga o loo iai le Moana Pasifika. 

Faamanino e Umaga e ui ua na o sina taimi puupuu ae o se tala ua matua’i talisapaia e tama taaalo, i le mafai ona maua ai o se fesoasoani mo i latou ma o latou aiga ma fuafuaga. 

I le taimi nei o loo māua le faia pea o faatalanoaga i ni taumafaiga e faatumauina ai lea kalapu.

O le tasi o talosaga o loo aofia ai le vaega ua ta’ua o le Kanaloa Consortium, e pei ona māua o ē o loo iai sootaga ma sui tuai a le All Blacks, o Jerome Kaino ma Joe Rokocoko

Faamanino mai e le Kanaloa Consortium ma le asosi o tagata taaalo lakapi o le Pasefika poo le Pacific Rugby Players’ Association, o loo faasolo pea faatalanoaga ma o le a maua se tali i se taimi e lē o toe mamao.

Puna o Faamatalaga: https://www.rnz.co.nz/news/sport/596478/nz-rugby-to-cover-moana-pasifika-player-salaries-as-franchise-fights-for-future?fbclid=IwY2xjawSEP-BleHRuA2FlbQIxMABicmlkETFjMlUxQXQ1TjRlQWNzbjg1c3J0YwZhcHBfaWQQMjIyMDM5MTc4ODIwMDg5MgABHhTtIWzlR3rv9kFKYpZRwBlbUb3VuFUniP6BGwhnRPLbLA7b56ZRN7P23lQ6_aem_ecaQ9xSJwT3IXMu2Tp_Mtw

The post Aapa atu le New Zealand Rugby e fesoasoani i tama taaalo a le Moana Pasifika appeared first on Radio Samoa.

E lua ma le ‘afa million ($2.5miliona) ua faailoa e le Minisita o Tupe ua fuafua mo lea aso faailogaina o le malo ma le atunuu i le tausaga fou.

O le polokalame o le Teuila i le masina o Setema e 200 afe le vaegatupe o le a fesoasoani e tapena ma faagaioia ai lea polokalame e atoa i le tausaga nei le 35 tausaga talu ona faatino e le malo talu mai le tausaga e 1991.

The post 2 ma le ‘afa miliona ua fuafua le malo e faatupe ai le 65 tausaga o le tuto’atasi 2027 appeared first on Radio Samoa.

O le afioga i le Palemia, o ia foi o le Minisita o le Matāgaluega o Leoleo, Falepuipui ma le Toe Fuata’ina, na ia faatū le lafo ma pasia e le Palemene ua toe faaui ai i tua lea tulafono.

Ua faailoa ai e le ta’ita’i o le malo o le a toe tapena lelei ia maopoopo lea fuafuaga e ala i le tulafono ona toe tuuina atu ai lea i le Palemene.

Mo le silafia o le tausaga e 2015 na aveesea ai le vaega o falepuipui mai le matāgaluega o leoleo ae faatūina se pulega e feagai ma le faafoeina o auaunaga mo falepuipui uma i le atunuu.

Peita’i na toe tuufaatasia i le tausaga e 2020 ina ua fausia foi se isi tulafono e faatino ai.

O faafitauli sa tutupu mai i le pulega o falepuipui e pei o se sola’aga tele a ni pagota ae le’i leva ona faaaogā le falepuipui fou i Tanumalala na māfua ai ona toe tuufaatasi le vaega o falepuipui ma le toe fuata’ina ma le matāgaluega o leoleo se’ia oo mai i le taimi nei.

The post Faaui i tua le tulafono sa fausia e tuu eseese ai le pulega o falepuipui ma le matāgaluega o leoleo appeared first on Radio Samoa.

I lea aofa’iga e pei ona faailoa e le Sui Komesina o leoleo, falepuipui ma le toe fuata’ina ua aofia ai le 43 o alii ae 12 tama’ita’i.

E tusa ma le 20 osofa’iga na sa’ili ai nakoti poo fuālaau faasāina i totonu o le lima masina ua savalia o lenei tausaga, ma sa faailoa e le matāgaluega o leoleo ata ma faamatalaga uma o tagata na pu’eina ma molia, e aofia ai o latou matutua faapea o latou nuu ma afio’aga.

Ua ave ai pea le fautuaga a leoleo i le atunuu ina ia faailoa atu soo se gaioiga latou te masalomia o loo aafia ai solitulafono o le umia ma le faatau atu o nakoti.

O le ‘aisa lava ia na maua i ia osofa’iga e tusa ma le 100 tesimale 98 kalama le mamafa.

Na maua ai foi laau faasāina o le maruana, e lē gata o lālā ma lau mamago ae o fatu o le laau faasāina.

The post 55 tagata ua molia e leoleo i osofa’iga na maua ai fuālaau faasāina appeared first on Radio Samoa.

Ua faailoa e le afioga i le tama’ita’i Sui Palemia o ia foi o le Minisita o Tupe, le afioga Mulipola Anarosa Ale Molioo, i le tuuina atu o le tala faatatau o le tupe i le Palemene, o loo fua lea tulaga siitia o le tamaoaiga i le ta’iala fou ua faataoto mo le lumana’i manuia o Samoa, e ala i le galulue faatasi faapaaga ina ia faasafua fesoasoani mo le soifuaga lautele, le faalauteleina o le tamaoaiga faapea le faatinoina o atina’e tetele.

I le aotelega o le tala faatatau autū o le tupe mo le tausaga faaletupe fou 2026 i le 2027 e tasi tesimale lima piliona tālā 580 afe tupe faaalu ua fuafuaina ai, ma e pito mamafa le faasoaina o lea aofa’iga o tupe faaalu i le vaega o le soifua mālōlōina ma a’oa’oga.

O loo manino foi i le faasoa a le malo mo le isi 12 masina le faatino pea o lana pitolaau i le una’ia o le tamaoaiga e ala i tupe faaalu mo isi tautua a le malo, aemaise foi o tautua ua faasafua ai nisi o tupe mo le lautele o le atunuu, e lē gata i le poloketi o atina’e mo le manuia o tagata o itumalo ae o faamanuiaga mo i latou ua penisione.

O le masina o Iulai e amata maua ai le siitaga e 500 tālā o le penisione mo tagata ua aulia le 70 tausaga ma sili atu le matutua o le soifua. 

E faapena foi se tasi o fesoasoani tupe e 200 tālā i le masina o le a maua e pepe faato’ā fananau, ma le 100 tālā e maua i le masina pe a atoa le tausaga se’ia oo ina 2 tausaga ma le 11 masina le matutua.

E lē o iai se siitaga i le lafoga o oloa ma galuega faatino le Vagst, ae ua siitia i le 17 pasene tupe maua a le malo mai lafoga totogi.

O le poloketi miliona mo le atina’e manuia o tagata o itumalo e 102 miliona tālā ua faatatauina mo le siitia o tupe o lea polokalame o le atina’e, lea o le a siitia ai i le 2 miliona i le tausaga poo le 10 miliona o le a maua e le Fono Faavae a itumalo palota e 51 i totonu o le lima tausaga o le paea’iga 18 a le Palemene o iai nei.

I le tulaga i le aumaia o fuālaau ma vailaau mo le togafitia o gasegase, e fitu ma le ‘afa miliona tālā tupe ua siitia mo le faatauina mai o ia oloa tāua tau i le soifua mālōlōina.

Sa 14 miliona sa pasia i le tala o le tupe o loo faagasolo lona faasoaina, ae mo le tausaga faaletupe fou o le a siitia i le 21 miliona 500 afe tālā tupe o le a faaalu mo le aumaia o fuālaau ma vailaau faafoma’i.

O lea foi vaegatupe e pei ona faailoa e le Minisita o Tupe i lana folasaga i le Palemene, o le a totogi ai ma aitalafu tuua a le Matāgaluega o le Soifua Mālōlōina. 

O fuafuaga a le malo ua taoto i le tala fatatau autū o le tupe fou ua faailoa e le Palemia le susuga Laaulialemalietoa Leuatea Polataivao Fosi i le Palemene, o le a faatino ai ni mafutaga tetele ma le atunuu e faia i Upolu ma Savaii i le mae’a o le tuto’atasi.

O ia faatasiga o le a faamanino atili ai mo le silafia e tagata uma, fuafuaga a le malo o le a faasoa iai tupe a le atunuu i le isi 12 masina o le tausaga faaletupe fou.

O le autū o le tala faatatau fou o le tupe, “Aiga – Autasi i le Gafataulimaina o Atina’e”.

The post Valoia e le malo i le tala faatatau fou o le tupe le siitia o le tamaoaiga o Samoa appeared first on Radio Samoa.

O le taofia mai ai o lea alii ua faaalia o le galuega a leoleo i le su’esu’ega o itu uma e fesoota’i atu i le faalavelave i Vietnam, lea ua saisai ma taofia ai e leoleo o lea atunuu ni alii Samoa se to’alua o Vaʻa Vaʻa ma Steve Tafia.

O loo masalomia i le maliu ai o se tasi foi alii Samoa ia Lorenzo Lemalu ma faamanuʻalia ai le isi alii na iai faatasi ma Lemalu i lea po e faaaogāina ai se laaumalosi.

Ua faailoa e Leiataualetauā Afamasaga Logoimauga Samuelu Afamasaga o loo faaauau su’esu’ega a leoleo i le taimi nei i lea matāupu.

The post Taofia e leoleo le Pule o le faletaavale o le Unalei appeared first on Radio Samoa.

Ua lipotia e le RNZ ua mae’a foi ona o latou faailoa ma sainia maliega tau le puipuiga e faatatau i minerale ma le puipuiga tau malosi’aga.

O le fonotaga puupuu a i latou ia sa faia ua atoa ai le fā o a latou fonotaga, le kulupu lea ua faaigoa o le Quad.

O le latou ulua’i poloketi la lea o se uafu i Fiti ma o lea fuafuaga o le a aogā tele foi mo Iapani auā o lea ua taofia ana uta mai Saina i le sapalai lava o minerale ma nisi vaega o auaunaga tau le puipuiga.

Puna o Faamatalaga: https://www.rnz.co.nz/news/pacific/596410/australia-india-japan-us-quad-group-agrees-to-build-new-port-in-fiji

The post Malilie Ausetalia, Initia, Iapani ma Amerika e fausia se uafu i Fiti appeared first on Radio Samoa.

Na faailoa e le Minisita o le Soifua Mālōlōina o le vaiaso na te’a nei na togafitia ai e foma’i ma tausi soifua ni tamaiti na aafia i le vairusi ma ua faalēaogāina foi nisi polokalame a le malo mo le taimi lenei se’ia faatino su’esu’ega ma togafitiga e tuuitiitia ai aafiaga o le faama’i.

O mollimau a nisi o mātua na ta’ua ai ua lagona nei le loto mafatia ona e foliga lava o le falema’i na aafia ane ai fanau ina ua aga’i atu e sa’ili fesoasoani iai.

Faailoa le lē fiafia o isi mātua ona o le lē faia o tuipuipui o le fanau aemaise o le lē mafai e falema’i ona tuueseese tagata ua aafia ma isi e le’i iai ni aafiaga.

Ua silia laititi i le 2 masina ae ua oo le aofa’i o tagata ua aafia i le silia i le 60 afe Bangladesh lava ua aafia.

O loo iai lava pea le popolega ina ne’i faateteleina le pepesi o le faama’i i le aga’i atu i le lumana’i aemaise i le to’atele o le fanau e faimalaga solo ma o latou mātua.

Puna o Faamatalaga: https://www.bbc.com/news/articles/cwy2d5d7wn5o

The post To’atele tamaiti ua maliliu i le misela i totonu o Bangladesh appeared first on Radio Samoa.

Lipotia e le BBC i le aso o le fuafuaga e aofia ai le aveina ane o drones ma taavale i le masina ma ua faailoa e le alii pule o le Amazon, Jeff Bezos, o lana kamupani o le Blue Origin le isi ua filifilia e fausiaina masini mo lea taumafaiga.

O loo ta’ua e le BBC e manana’o Amerika ia tulaueleele ni tagata Amerika i le masina a o le’i mae’a le taimi o le tula’i mai o Trump i le tofi, i le 2029.

Fai mai o loo tauva lava le NASA ma Saina i le toe aveina o tagata i le masina.

O le masina o Mati na folafola ai e le NASA le polokalame e 20 piliona e fausia ai se permanent base e faaaogā ai malosi’aga faaniukilia i le masina a o le’i oo i le 2032.

Puna o Faamatalaga: https://www.bbc.com/news/articles/c39228nxyr4o

The post Faailoa fuafuaga a le NASA e fausia se nofoaga mautū mo le masina appeared first on Radio Samoa.

Ua faailoa foi e le vaega lea a le IRGC e 25 vaa e aofia ai ma vaa suāuu na ui ane i Hormuz i le aso ananafi.

O loo lipotia pea le faaauau o talanoaga a sui o malo e 2 ma ua toe maua sina fesoota’iga i le initaneti i totonu o Iran talu se taimi umi na motusia ai.

I Lepanona lava ia ua lipotia mai e 31 tagata ua maliliu i osofa’iga a Isaraelu e faasaga i le Hezbollah.

E silia i le 40 isi o loo manunu’a.

O le faamatalaga mai ia Iran e faapea ua lē tausisia e Amerika aiaiga o le maliega e taofia ai fetauiga ina ua ia faatino osofa’iga i le vaiaso nei i nofoaga e fana ane ai ‘au’upega alumamao a Iran.

Puna o Faamatalaga: https://edition.cnn.com/2026/05/25/world/live-news/iran-war-us-peace-deal

The post Lapata’ia e Iran Amerika appeared first on Radio Samoa.

O se polokalame e amana’ia ai tulaga taualoa o ia ta’ita’i i totonu o le atunuu faapea tulaga tofi i Matāgaluega ma Faalapotopotoga. 

Ma o le tausaga lenei e 2026 ua filifilia ai lana afioga i le tama’ita’i Kovana.

I ripoti o loo faamauina ai o le filifilia o Maiava, o se itu ua amana’ia ma patipatia ai lea tamalii i lana ta’ita’iga ma ana galuega fitā ma le lelei i itu tau tupe i totonu o Samoa. 

Mo le silafia, i lalo o lenei polokalame, o le a molimauina ai le avea o lea sui ma malo faaaloalogia a le faigāmalo o Niu Sila, ma o le a maua ai ma le avanoa e auai ai i le tele o faatasiga a le malo faapea foi felafolafoa’iga a ta’ita’i o le atunuu.

O lenei polokalame tāua na amata auai ai Samoa i le tausaga 2005, o se tasi o auala na saga faamalosia ma faatumauina ai le feagaiga a Samoa ma Niu Sila le Treaty of Friendship.

Ua faamauina o lea ua tuuina atu nei le tusi valaaulia i le tama’ita’i Kovana o le Faletupe Tutotonu o le atunuu o Samoa auā lona asia ai o Niu Sila nei ma amata ai lea polokalame i se taimi o i luma. 

Puna o Faamatalaga: https://www.facebook.com/share/p/1BZCMXefk9/

The post Filifilia le Kovana o le Faletupe Tutotonu o Samoa o se sui o le New Zealand Prime Minister’s Fellowship 2026 appeared first on Radio Samoa.

O ni faamatalaga ua amata tulituliloa ai e le to’atele, poo le ā le uiga, talu ai tulaga o loo iai le kalapu ma le ‘au i le taimi nei. 

I faamatalaga ma faasalalauga mai le leitio faavaomalo a Niu Sila, o lea ua filifilia pe na faapalotaina e tagata fai sea o le kalapu, se tasi e na te faama’apeina le Moana Pasifika.

E ui i le oo ai o le Moana Pasifika i lea tulaga, o lea lava na faailo e le New Zealand Rugby le iai o nisi o loo faaali o latou agaga fia fesoasoani i le kalapu, ma le faatumauina ai pea o le iai i totonu o le taamilosaga o le Super Rugby Pacific. 

Ae i se faatalanoaga a le RNZ ma Vaovasamanaia i luga o le ‘au lea na ta’ua ai loa e Vaovasamanaia, tau o lona fai mai i ‘au lagolago a le ‘au ina ia onosa’i, o le a iai se faamatalaga i se taimi o i luma. 

Faaopoopo Peters, e iai le naunauta’iga ia te ia e vaai ai i le Moana Pasifika e faaauau pea ona taaalo, ona o loo iai se lumanai lelei o lenei ‘au. 

Faailoa foi e le ta’ita’i a le New Zealand First, lona silafia ai o tulaga o loo iai le kalapu ma ia ta’ua e tatau ona taga’i i ni pulega lelei i totonu o le kalapu, o le mea lena o loo moomia e le Moana Pasifika.

E lē o iai se tulaga o ta’ua ai le ono tuuina mai o se faalauiloa a le malo e tusa ai ma lenei matāupu, ae faailoa o loo faaauau pea faatalanoaga a nisi o tagata o loo iai sootaga i le ‘au o le Moana Pasifika.

Puna o Faamatalaga: https://www.rnz.co.nz/news/political/596388/good-news-coming-for-moana-pasifika-s-future-says-winston-peters

The post Tau faaāta mai e Winston Peters se tulaga lelei mo le Moana Pasifika appeared first on Radio Samoa.

O lenei faamaninoga na āfua mai i se faamatalaga a lo latou ta’ita’i o David Seymour na fai i le taimi na faatino ai se faatalanoaga ma ni taligā fesili poo le Q&A a le TVNZ, lea na ia faailoa ai le tatau ona aofia o tagata faigaluega faavaitaimi i lea fuafuaga fou, o le totogi ai o le $6 tālā i aso o loo iai lea tagata i le atunuu. 

I le faamatalaga a le alii o Seymour, pe ā ma le 75 sene lona tau i le itula, ma e lē telē se eseesega, ona o loo lava le vaega tupe e maua e le tagata e sau mai le Pasefika e pei o Samoa. 

Peita’i na toe faasa’o mulimuli mai e le Vaega Faaupufai a le ACT, e leai na sesē le mafaufau o le ta’ita’i ma le fai o ia faamatalaga.

O le uiga moni o le fuafuaga e mo isi tagata o loo umia visa faigaluega i totonu o Niu Sila ae lē aofia ai i latou o loo aga’i mai i totonu o le atunuu i polokalame o galuega faavaitaimi. 

I faamaumauga, o loo manino ai afai ae aafia tagata faigaluega faavaitaimi i lenei lafoga o lona uiga e silia ma le 1,200 le tupe e totogi e le tagata e aumau ma galue i totonu o le 7 masina.

Ta’ua e le ACT o le a aumai i se taimi o i luma nisi o faamatalaga ma faamaumauga e tusa ai o fuafuaga ma ta’iala i femalagaa’iga – o vaega e aafia ai vaega tau faato’aga ma meatotō. 

Ta’ua o le a faailo mai i le 2 vaiaso o lumana’i i Fieldays.

Puna o Faamatalaga: https://www.rnz.co.nz/news/pacific/596442/act-backtracks-after-seymour-floated-nearly-1300-per-year-charge-on-rse-workers

The post Faamanino e le ACT e lē aofia tagata galulue faavaitaimi i lafoga totogi i luga o visa appeared first on Radio Samoa.

O paopao na faato’ā tapunia le lesitala i le Aso Lua o le vaiaso nei, ae ua mautū fausaga o tapenaga a le komiti i tuuga fautasi lea e 6 fautasi ua lesitala ai.

O fautasi e 6 ua faamautū mo lea polokalame o le tuto’atasi o Le Tolotolo o Tamauli, Apia Maroon, Telefoni o le Vainuu, Fiatau i le Vasaloloa, Little Rina, ma le Malu o Samoa.

The post Leai ni tuuga vaa tulula, ae na o tuuga fautasi ma paopao appeared first on Radio Samoa.

O tala taufaaleaga i le faigāmalo i faasalalauga a le Itu Agai ua ta’ita’isesē ai le atunuu o le autū lea o le finagalo o le Palemia i lana saunoaga faaminisita i le tauaofiaga a le Palemene i le masina o Mati, lea sa ia tuuina atu ai le matāupu i le Fofoga Fetalai mo sana iloiloga, ma aumai ai le faai’uga a le Fofoga Fetalai e ave i le komiti o tulaga aloa’ia ma amioga taualoa e su’esu’e ai ma tuuina atu ai i le Palemene mo sana faai’uga.

O lea faai’uga na faailoa e le afioga i le Fofoga Fetalai le tofa Auapaau Mulipola Aloitafua Mulipola i le tauaofiaga a le fono aoao faitulafono i le Aso Lua, ma ia faailoa ai foi ma sui o le komiti o le a feagai ma lea su’esu’ega, e ta’ita’ifono ai le Sui Fofoga Fetalai le afioga Afamasaga Leone Mati Va’ili Masame.

O le sui ta’ita’ifono o le afioga Faumuina Opapo Soanai Oeti, o sui o le komiti faapalemene e aofia ai le tofa Lenata’i Victor Faafoi Tamapua, Fiu Faaolatane Ponifasio Vasa, Vui I’iga Sione I’iga, Tilafono David Hunter, Motuopuaa Seve Henney Afereti Papalii, Mau’u Atiifale Siaosi Puepuemai ma Faalogo Asuao Kapeliele II Faalogo.

E to’alima sui faipule o le itu a le malo, to’alua faipule o le Itu Agai ma le to’alua o sui faipule tuto’atasi e maua ai le to’aiva o sui o le komiti o tulaga aloa’ia ma amioga taualoa a le Palemene o le a feagai ma lea su’esu’ega.

O le aso 20 o le masina o Oketopa o le tausaga nei i le isi tauaofiaga a le fono aoao faitulafono e tatau ona taunuu ai i le Palemene le lipoti a lea komiti.

The post Su’esu’e e le komiti o tulaga aloa’ia ma amioga taualoa a le Palemene sui faipule o Lepa, Anoamaa 2 ma Faleata 3 appeared first on Radio Samoa.

Ae i Samoa ua faagasolo su’esu’ega a leoleo e sa’ili pe iai ni sootaga o se tagata poo ni tagata i Samoa ia i la’ua ua tuua’ia.

Ua faailoa e le Sui Komesina o le Matāgaluega o Leoleo, Falepuipui ma le Toe Fuata’ina le susuga Leiataualetauā Samuelu Afamasaga, o le isi o vaega tāua o ia su’esu’ega o le sa’ili po ua iai ni gaioiga i Samoa e taupulepule ai le faia o ni solitulafonoo i se isi atunuu poo organized crimes.

I le Aso Lua i le feiloa’iga ma le Sui Komesina na fesiligia ai e tusitala e faatatau i lea faalavelave, ma faailoa ai e Leiataualetauā Samuelu Afamasaga, o loo aga’i foi su’esu’ega i tulaga tau femalagaa’iga pe sa faaaogā e ia alii talavou ni tusifolau tau tagatānuu Samoa.

O alii talavou o Joseph Vaa ma Steve Tofa e pei ona faailoa lautele i lipoti a televise mai Ausetalia o la suafa, na pu’eina e leoleo i le Aso Gafua i se nofoaga e latalata i le tuaoi o Vietnam ma le atunuu o Cambodia ma taofia ai mo su’esu’ega.

Ua salalau foi i luga o ia lipoti ta’utinoga ua faia e ia alii talavou i lo la faatino o le solitulafono a o molimauina e nisi o leoleo o le atunuu o Vietnam.

I Samoa nei, ua faailoa e le Sui Komesina o leoleo o le a faapena ona logo se feiloa’iga ma tusitala i se taunuuga o su’esu’ega ua faagasolo.

Mo le silafia o loo i Samoa le ofisa tutotonu o galuega faaleoleo i le Pasefika e māta’itūina faiga solitulafono faavaomalo ma ua galulue nei ma le matāgaluega o leoleo i le faia o ia su’esu’ega.

O lea ofisa tutotonu o loo iai uma sui o auaunaga faaleoleo mai atunuu eseese o le Pasefika. 

The post Su’esu’e e leoleo i Samoa ni sootaga i le faalavelave i Vietnam appeared first on Radio Samoa.

Na tuuina atu faamaumauga mai le falema’i faamamā toto e lagolago ai le māfua’aga o le lē oo atu o le tamā ona sa faia tonu lana togafitiga o le faamamā o lona toto i aso sa valaau ai le tagi tau palota mo le fofogaina o molimau.

O aso ia e pei ona faailoa e le itu a leoleo o le aso 8 ma le aso 17 o Tesema o le tausaga na te’a nei 2025.

I le talia ai e le faamasinoga o lea māfua’aga ma sa’oloto ai lē na molia, e to’alua molimau o ni tinā sa la faailoa na māfua ona lē oo atu e tusa o tusi samania, ona sa fetaui tonu le aso na valaau ai le tagi tau palota mo le fofogaina o molimau ae gasegase lona tuaa tinā ua 79 tausaga o le soifua.

Na faailoa e lē ua molia e leai se isi e nofo i lona tuaa, o le māfua’aga lea sa lē oo atu ai.

O le isi tinā o le māfua’aga sa ia lē usita’ia ai le poloa’iga e oo atu e molimau, ona o le aso tonu lea na tigāina ai i le mūmū na pa’ū i se tasi o ona aao poo lona vae.

Ua faatonuina le tinā e oo atu i le Aso Lulu lenei ma lona uso e faamaonia ai sa aafia lona aao i le mumu ma o lona uso foi lea sa la sailia se taulasea Samoa e fofō ai.

O le ulugalii sa faasalalau e le faamasinoga le tatau ona oo atu e faia a la molimau ina ua talia i se faai’uga a le faamasinoga le su’esu’eina o le tagi tau palota e faaaogā ai faamatalaga tautō a molimau, sa faailoa e le tamā o lona lē mautonu ma fesasia’i lona mafaufau na māfua ai ona ia faailoa muamua i le faamasinoga na māfua ona lē oo atu e fai a la molimau ma lona to’alua, ona sa faalafi la’ua e le F.A.S.T.

O lana faamatalaga ina ua tula’i i le Aso Lua na suia ai le māfua’aga, i le faapea mai o le tamā sa oo atu i le aso na faatonuina e tula’i ai peita’i na taunuu i le maota faamasino i le vaega pito i lalo o le maota, ae faailoa e nisi ua uma le faamasinoga.

O le faamatalaga foi lea a le tinā ina ua faia lana molimau.

Sa tuliloaina i le faamatalaga muamua a lona to’alua sa ta’ua ai le faalafi, ae sa tutulu le tinā ma ia faailoa i le faamasinoga o ia e fefe ae o mea uma sa faailoa e lona to’alua o le māfua’aga tonu lea.

Sa fesili faamasino pe la te le’i maua se faasalalauga sa sa’ilia ai i la’ua mo le oo atu e molimau.

O lana tali e leai se faasalalauga na o la maua.

O le aso 26 o Iuni o le a maua ai se faai’uga a le faamasinoga i faamatalaga e tusa o māfua’aga na lē oo atu ai molimau ua mae’a ona tutula’i, a o faagasolo ai pea ona faasolo atu isi o loo molia.

The post Faasa’oloto le molimau sa molia i le faalēmigao i le faamasinoga i le tagi tau palota a Falealili 1 appeared first on Radio Samoa.