The Saikawt Post

Thanghar a hun tah

noreply@blogger.com (Editor) — Wed, 6 Jul 2011 06:23:00 -0700

    Kar liemtah Inrinni (25-June-2011) a H.S.A. Saikawt Unit in Maritorious Award-cum-Feclicitation Programme an hmang na ding a khan, khawlai dung a tawngringna hmang meuvin Nu le Pa hai kuomah fielna le ngenna an siem a, programme an tan le an tawp chen khan Nu le Pa a uop mawi tu hmu ding bar an um naw kha a san iem ning a ta? Khuollien le khuol inzaum hai fielin, an member hai a kim thei ang taka thang dingin an in phut bawk a, an thei tawp an insuo chu a ni kha.
    H.Y.A. khawm ni raw se, Youth Club khawm ni raw se, ieng pawl khawm niraw se, a ieng programme khawm lo buotsei sien Nu le Pa hai a inthawka ngaiven hlaw le uop mawi hlaw hmu ding a vang hle a nih. A tlawmngai fal deu hai in an uop mawi khawm chu entawn an hlaw chuong nawh.
    Nau hai in hieng ang hunser pawimaw an nei ve hai hi Nu le Pa in uop mawi thei in la chu, boruok chu danglam ngei a tih. Social gatherring a thang hai nun le chang dan chu Nu le Pa hmel an lang ringawt khawmin nasatakin a siemtha ding si a.
    Ram le hnam ta dinga thahnem ngai awm fahran a tapte bul a ti ti sep ringawt ta lovin, kei ka chang naw chun Ram le Hman a Chang kim naw a nih ti hre in kal pen suok zai rel ei tieu. Ram le Hnam ta ding a Pasaltha hai thanghar a hun tah.

ITI Saikawt

noreply@blogger.com (Editor) — Tue, 28 Jun 2011 21:22:00 -0700

    Inchukna hin tawpchin a nei naw a, inchuk lai nilo tukhawm an um nawh. Hi kawnga hin inchuklai hai ta dinga thil tha tak tak inchuk thiem theina hmun Saikawt khawsung ngei a um ITI hi a hmang tangkai tu ni seng tum ding a nih. Inchuklai, lungril hrat lai hai hin a that na hi a hre naw um pal inlau a um takzet a nih. A hmangtangkai nek in a suksiet zawnga thangtum ni awm takin a building hai dam khi hang en chun inchukna Run anglo khawpin hmutheiin a um a, a sukchangkangna le hmasawnna tienga thang lak hi a bengvar thlak hle a nih. Sukchangkangna tienga mawphurtu ding hin midang ei zawng/ruoi ding am a nih? A sawr tangkaitu ding le a suk hmasawn pei tu dingin inchuklai hi an pawimaw em em a nih.
    Industrial Training Institute (I.T.I) Engineering in chukna school Saikawt khawsung-a a um hi hmang tangkai tum ei tieu. I.T.I. Certificate hi Professional Certificate a ni a, Employment NEWS tiem thang hai chun, I.T.I. a trade um hai hlut zie hre ching ngei an tih. Nu le Pa hai hin mani nauhai I.T.I. a hin admission thaw pek inla, tuithaphai sunga um hai lem chu I.T.I. a hin kai ngei tum ding a nih. Secular line sukbuoi lovin thil tha tak inchuk suok thei na a ni a, Secular line a lo hlawsam hai ta ding in lampui thatak inhawng zing chu a nih.
    Inchukna run tha em em el hmun le hmun a um zing hi vangneina a ni ti hi hre thar nawk in la, unau khuo dang dang hai in an idit em em el ITI hi sukhring zing ding le seimtha pei dingin hma lak a tul takzet a, chuong a ni naw chun hmun dang a sawn in um pal hlau a tih.

Saikawt P.H.C. (part II)

noreply@blogger.com (Editor) — Sat, 18 Jun 2011 21:11:00 -0700

    May-12-2011 ni a nauneina (Labour room) DC in hawngna a nei zo May-20-2011 zan a inthawk khan Nurse duty ienglaikhawm in an um tah. Damdawi in tak tak anga siem/ngaiin darkar 24/7 status a sie a nih. Nau dawm ni in damnaw case hran hran admit an ni mek.
    hienganga hmang tangkai a ni meklai hin damnaw umpuitu le kantu hai in discipline nei that a pawimaw hle. A bik takin thienghlim le faina thuah. Kuva fakna chil sak mei mei le banga sak le chinai tat mei mei hi thaw lo ding le midang in thaw an tum khawm a khap tu ni seng lem ding a nih.
    Damnaw kan hi num hun hun a fe a khawlai leng na a damdawi in hi hmang lo ding a nih. Nurse duty sukbuoi a BP en ti le a dang dang inthawtir tum tal lo ding a nih. Chun, Zu dawn na a va hmang ding an naw a, damnaw le a umpui tu chau um na ding a nih. Chun, doctor in round a thaw lai lem chu tu khawm lo um ve a thieng nawh. Damnaw hai ta dinga nghawkum le ningintel suk um zawnga naset le dumkhua ur vel lo ding a ni ti hi hriet zing a tha.
    Fecilities thar um hai hi lawm a um a, chu lai zing chun a lawm dan hi thiem ding a nih. 24/7 status hi mi lakpek nawk dai pal an tih ti inlau a umhle a nih. Sipai bel a kaia a ruol haiin lawmpuina in za um 80 chuong zet an chawia an lam hut hut ela, a tukah a bel a tla tep a nih. Lawm hi huntawk thiem a tha. Saikawt PHC hi a enkawldan/umdan izir in a chung lem Community Health Centre (CHC) khum 50 um theina a hlangkai thei a ni a, chu chu hnaite a um a nih. Fiemkhur tak le indawi taka enkawl in, khuo dang hai in an ientawn tlak ni ngei dingin mi tuel khawma hma lak a tul a nih.
    A Staff a tamlem le damnaw a pan tu hai hi khuo dang dang a inthawka hung an ni leiin, lungmuong tak le ngaingmtaka an um a pawimawi a, sin thataka an thawthei na dingin hnawksak le nghawkum zawng a tukhawm um lo ding a nih. Chu chu, tu neka fecilities thalem nei thei na lampui chu a ni ti lungril in vawng tlat ei tieu.

Lungril Hriselna (Mental Health)

noreply@blogger.com (Editor) — Fri, 17 Jun 2011 03:08:00 -0700

    Pathien in Mihriem a siem lai khan Taksa le lungril neiin a siem a, taksa le lungril chu in ang naw sienkawm an \hang tlang zing a nih. Taksa a na chun lungril ngaituo na a tla hnuoi a, lungril a na chun taksa khawm a chau deu hlak. Chu leiin, mi hrisel ni ding chun taksa a natna nei lo le lungril a natna nei lo ni a \ul ti chu Daktawr theim haiin an lo hriet suok tah.
    Ser-thur a lai-a at phel, no sunga a tui sawrlai ngituona mitthla a hmu ringawt khawma chil hung put el hlak ang hin lungril a ngaituo hai hin hi taksa hi an sukbuoi thei hlak. Thuomhnaw sawp \ul hai chu a bawma siekhawl in a hlui um sa hai khawm sawpfai lo-a, a dang sie belsa pei a ni chun a bawm in dawl zo lovin a kawi dar thei ang hin mifel le hlim thei tak hai khawm lungril a natna a kawp a thu a an nei lai chu mi thinse taka an inchang hlak. Lungril a natna umkhawl hai chu hmun him (safe place) midang a va suknat phak naw na hmun a bunthlak an \ul a nih.
    Mitin in mani insung, khawtlang, ruol le pai, le mani nun a hai hin hringnun a chona (chalanges in life) chi dang dang hai hi tuoklo theilo an ni leiin lungril a sawl/na hlak a, chuong ang mi’n a pai rawn talu pha pha a taksa-ah a hung inlang suok hlak, a hung inlang suok dan hai chu: Bu fak inhniklo dam, zan intheilo dam, ningintelna dam, lungsenna dam, thil thaw na a phurna nei naw na dam, \itna dam, manikhat a um peinaw annawleh mi dang kuoma um pei naw na dam le a dang dang hai an nih. Hieng hai hi kar khat/kar hni sunga a bo nawk a ni chun a pangngai a ni a, chu zo a an la um rawp a ni chun counsellor pan ding a nih. Mental health councellor hai chun midang kuomah chanchin an hril sawng ngai nawh a, harsatna na hai po po hril vawng el ding a nih. Chuong chun, lungril ngaituona a harsatna hai chu thunun dan ding lampui an zawng pui ding a nih. District Hospital a khawm Mental health counsellor pan thei in an um tah.
    Cuonsellor um naw na hmun a chun ruol\ha le mi rungum i harsatna phur pui thei tu ding kuomah chun hril la, i lungril a harsatna hai chun nasatakin sawk zawngkhai a che. Mi\henkhat chun, lungril sawlna an nei pha pha chun: exercise dam, inkhawm dam, hla ngaithlak dam, inzin suok dam le a dang dang an thaw hlak a, chuong hai chu lungril sukhar dan (copping technic) an ni a, thaw rawn talu le inzing talu a thaw chun lungril sawl a belsa thei lei in a huntawk hriet a \ul. Then khat nawk thung chun hieng hun a ding hin zu dawn/ inruithei thaw \ha in an hriet hlak a, a hun tawka tawp lovin addict a awl leiin thaw lo hram a \ha.
    Lungril hrisel hi taksa ta dingin a pawimaw leiin, lungril hi sawizwi le enkawl \hat ding a nih.

Saikawt PHC hi

noreply@blogger.com (Editor) — Sun, 5 Jun 2011 22:56:00 -0700

    Saikawt rohlu le damna runin tha em em ei Public Health Centre hmang thei zinga um ta chu mipui hai hin hmang tangkai in sawr tum seng ei tieu. Khuo dang Khawpuibung, Muolbem, Ngurte le a dang dang hai khawmin an hung pan in an hmang tang kai ta hle. Hmasawnna tamtak changin tu hunbi hin natna tamtak hieng malaria, Tb, AIDS etc. hai hi Lamka le hmun hla tak tak pan kher tul ta lovin mani in test nuom hai ta ding chun doctor lekha thanglo khawmin in tst tir thei zing an tah.
    Development dang tha tak tak hman thei a um ta hai chu: VCCT room a refrigerator le computer thar, DMC room ah Microscope le TB damdawi tha tak tak, Labour room le Patient room khawm hmang thei an tah. Chun, Nau ne hai ta ding khawmin insentive money ei ti chu nau an nei a zing vel pek nghak ni bawk an tih. Night duty khawm an um zing tah. Vaccination khawm thaw thei zing a nih.
    Hieng ang changkang na thar tam tak um lai hin a lo kei hnuoi tu hlak um hai chu tarlangin hei um sien la, mi tam tak hla tak tak a in thawka hung hai ta ding a buoina len em em pakhat chu, damdawi tieng pang a harsatna hi a nih. Hi harsatna leiin hin mi a tam lem chu lamka tieng a rem chang lem ti in an pan nawk el hlak. Chu leiin mipui ha ta ding a ngen na siem a um chu pharmacy thatawk tak damdawi kim taka hmu thei (a thei chun Doctor hai le inthuruol a siem ni sien) hi siem in um chu tha hleng a tih. A pahni na a chu electricity tieng pang lei hin buoina tam tak a suok dawk a, ei electricity that naw leiin vaccine tamtak cooler a um chu a lo se hlak bawk.
    Ei hospital puitling tak le ropui taka siemthei tu ei ni Saikawt mipui hai hin thang nasa tak a tharin la seng in la, a sawrtu ding hai hin hmang tangkai in a hlut zie in lang tir ei tieu.

Nungchang tha

noreply@blogger.com (Editor) — Sun, 29 May 2011 04:19:00 -0700

    Nungchang tha chun mi a dawmsang hlak a, nungchang tha nei ding chun thil thaw nuom zawng hai chu thaw vawng thei a ni nawh. Mi in a lungril nuomzawng hai chu a sie le a tha thlir hranin a taksa chu a thunun a ngai a nih. Chu chu mi’n a thei naw pha pha leh a nungchang chu a tla hnuoi hlak a nih. Nungchang tha ta lo siem that nawk chu thil harsa tak a ni leiin a siet hma a in veng fiemkhur ding a nih.
    Nungchang thalo siemthat a harsat na tak chu a Ra hmu nghal el ding a um ngai naw hi a ni tak. Daktawr chun ama rawntu kuomah chun ‘sahring fak i ta dingin a tha naw, nakie pha i hrisel na a suk siet el thei leiin’ tiin a hril a. Daktawr thuhril chu zawm el a tha vei leh a remchang hmasataka sahring fak chu an lang tlat nghal a. Sahring chu an hnika, a hnunga thil tlung ding chu a tlung tak tak di’m a tlung tak tak naw ding ti ngaituo fawm le chun sahring fak chu an buok hne ngai naw. Fak zo char a na nghal el ding nisien chu fak tum tal chi a ni naw ti hre nghal ding a na, karkhat, thlakhat annawleh kum tam tak hnunga hung inlang ding chu ngaipawimaw a harsa deu ning a tih.
    Chuong ang bawkin, nungchang suksetu zu, damdawi inruithei chi dang dang le tisa chakna hai hin Ra inrang takin an insuo el naw a, muongchang in, thul der lovin an hung ra ngei hlak si. Chu siemthat nawk na dingin hun leimtah hai kokir thei ni bawk lo. Chu leiin, nungchang chu a siet hma a inveng fiemkhur a, nungchang a tlahnuoi tan ta a ni chun inlamlet a in siemthat a hun ta ti na a ni, a talu tlung tum tal ding a ni nawh.
    Vawisuna thangthar hai hin Nungchang thanaw a pawisei zie chu hre a, nungchang sukse thei tu hai tlansan dingin lungril siem a hun ta a ni. Nungchangtha chu Khawtlang sukmawi na ding le mani nun a dingin thil tha tak a nih.

tradition

noreply@blogger.com (Editor) — Mon, 23 May 2011 02:19:00 -0700

Tradition
    Pi le pu hai khan thil \ha a an ngai hai chu an lo thaw hlak a, chuong hai chu, tulai a ding chun tradition an hung ni ta a nih. thang la hung thar ding sawng tam tak hai hun a chun vawisun a thaw a um hai hi tradition an la hung ni ve nawk ding a nih.
    Khawvel inthang hrat dungzui pei a inthang ve thei dingin traditoin hai hin siemthat le cheimawi an tul ve a nih. Entirna ding in: pi le pu hai chun siet tuok an um chang in tlangval tlawmngai thei chu thangko/zuolko in an tir hlak, tu ruok hin chu fawn hmang a inhril zung zung a ni ta. Chu chu, khawvel inthang na dungzui a an her suok pui chu a nih.
    Chun, hun in a her suok ang pei in thil tha khawm nisien a remchang naw hun a um thei leiin sukdanglam ding chu a hun le hmun a hriet ding a nih. Entirna ding in: Ruong tuok/phur tul a um chang in lirthei le inthawk suok a ni hlak a, a that lai zingin tulai hun a ding chun, lirthei a tam ta lei in lamlien sip a inzui chun lirthei dang inlawn ve hai a chawkbuoi hle hlak. Unau thenkhat hai chun thaw dan thatak an lo nei ta a, lamlien sir khingtinga inzui in sin dang nei a lo tlan ve hai sukbuoi lovin an um ta a nih. Chuong ang bawkin Mo thuoi ni hai a khawm thaw inla chu thil tha le mawi tak a va ni awm de!
    Khawsawt inriek hai khawm nithum chau riek ta ding tiin Joint Youth Association (Val Upa) hai in a ti a, chu chu zawm ve ngei ding a tha ni in an lang. Tlawmngai taka riek ni la khawm mi dang hai ta dinga harsat na in tlun tu ni pal hlau a tih. Chuong ang pei chun hun in a phur suok ang pei a inthlak danglam ve dingin lungril siem a hun ta tak zet a nih.
    Vawisun a thil thaw a um hai hi thangthar hai tradition la hung ni ding an ni lei in, an ta ding a zui thei ding le ngaihlut tlak ni ngei ding a cheibawl chu nang le kei a mawphur na a ni ti chu vawng tlat a tha.

Chibai buokna

noreply@blogger.com (Editor) — Tue, 17 May 2011 05:07:00 -0700

Saikawt post lo tiemtu hai po po inrengin editorial board chun ditsakna chibai kan buok cheu. Hunsawttak a inthawk khan Saikawt Students’ Union hmalak na in ENTU kha ei lo nei ta hlak a. Chu zo chun, Saikawt Ladies Association hmalakna in Darthlalang news a hung pieng a, tangkai tak el in khawtlang an lo sawmdawl ta a. Khang hun lai khan khawtlang news pawimaw na le tangkai dan ei theinghil chang um rawp a tih. Khawtlang news ei hung nei naw zet kha chu news pawimaw dan le ahlutna hriet naw ruol an ta nawh.
Vawisun a Hmar Students’ Assiciation in Saikawt Post a hung buotsei hi hlutsak tak le tangkai tak a hmang tu ni seng dingin kan ditsak na kan in hlan cheu a, Ei khawtlang a hin news pakhat chau ni lovin pahni pathum dam hang um ve el sien chu thiltha a va ni awm de! Association tin hai hin nangni kei ni inti el lovin ei hmalakna hai a inthangpuituo in, thilthathaw a ineltuoin ei khawtlang sukvul zing dingin thang latlang pei ei tieu.
Khawtlang nu le pa hai khawmin ei news hi mani ta a ni ti hre in hmangtangkai seng tum ei tieu. Thu insuo ding nei hai chun inphalam der lovin inthawlawm diel diel in, vawisun a news hung pieng thar hi mani nau anga ngai a duot taka enkawl seng dingin ei infiel a nih. Thu insuo dingin sum seng a ngai naw a, Editorial board hai kuoma ziek a pek thei zing a nih. Chun, thawsuol le hrilsuol pal um thei a ni leiin thiltha le indiklem a ei hriet hai chu editorial board hai kuomah hril pei dingin ei in ngen bawk a nih.
A tawptak a chun Saikawt Post editorial board chun Saikawt mipui hai inhrietthiem na, ditsakna le hlutsakna kan ngen takzet a nih.