ಶ್ರೀಸುತ | ಇದು ದಿವಾಣ ದರ್ಪಣದ ಬಿಂಬ

ನಿಯತಿ

noreply@blogger.com (Durgaprasad Diwana) — Sat, 06 Jun 2020 05:01:00 +0000

ಮುಸ್ಸಂಜೆಯ ಸಮಯ. ಭಾಸ್ಕರ ತನ್ನ ಕೆಲಸ ಮುಗಿಸಿ, ಬಾನಿನ ಕೆನ್ನೆ ಕೆಂಪೇರಿಸುತ್ತ ಪಡುವಣದಲ್ಲಿ ಮರೆಯಾಗುತ್ತಿದ್ದ. ಗಮ್ಯದೆಡೆಗೆ ಸಾಗುತ್ತಿದ್ದ ಹಕ್ಕಿಗಳ ಗುಂಪು, ಹಿತವಾಗಿ ಬೀಸುತ್ತಿದ್ದ ತಂಗಾಳಿ, ತೀರದ ಮರಳ ಸವರುವ ಕಡಲ ಅಲೆಗಳ ಸಾಲು, ದಡದತ್ತ ಬರುತ್ತಿರುವ ಪುಟ್ಟ ದೋಣಿ... ಇವೆಲ್ಲದರ ಮಧ್ಯೆ ವಿಶಾಖಾ ತನ್ನ ಯೋಚನಾ ಲಹರಿಯಲ್ಲೇ ಮುಳುಗಿದ್ದಳು. ಕಡಲು ಅವಳಿಗೆ ಹೊಸತಲ್ಲ, ಹಾಗಂತ ದಿನಾಲೂ ಸಮುದ್ರ ತೀರಕ್ಕೆ ಬರುವ ಅವಳಿಗೆ ಅದು ಎಂದೂ ಹಳೆತು ಎನಿಸಿಲ್ಲ. ಪ್ರತಿ ದಿನ, ಪ್ರತಿ ಸಂಜೆ, ಪ್ರತಿ ಅಲೆಗಳು ಅವಳಿಗೆ ಹೊಚ್ಚ ಹೊಸದೇ - ಥೇಟ್ ಜೀವನದ ಅನುಭವಗಳಂತೆ !! ಸಾಗರ ಎಂದೂ ಅವಳಿಗೆ ಅಚ್ಚರಿಯ ವಿಷಯ. ಒಳಿತು - ಕೆಡುಕು ಎಲ್ಲವನ್ನು ತನ್ನ ಒಡಲಲ್ಲಿರಿಸಿ, ನಿರಂತರ ಭೋರ್ಗರೆವ ಸಮುದ್ರ ತನ್ನ ತೀರಕ್ಕೆ ಬಂದವರಿಗೆ ನೀಡುವ ದಿವ್ಯ ಸಾನ್ನಿಧ್ಯ, ಪ್ರಶಾಂತತೆ, ನಿರಾಳತೆ ಎಲ್ಲವೂ ವಿಶಾಖಾಳಿಗೆ ಕುತೂಹಲ ಹುಟ್ಟಿಸುವ ಸರಕು. ಆದರೆ ಇಂದು ಇದ್ಯಾವುದೂ ಅವಳ ಗಮನದಲ್ಲಿಲ್ಲ.. ವಿಶಾಖಾಳ ಮನ ಗತಕಾಲದ ನೆನಪುಗಳ ರಾಶಿಯಿಂದ ನಿಧಾನವಾಗಿ ಒಂದೊಂದೇ ಹರಳನ್ನು ಹೆಕ್ಕುತ್ತಿತ್ತು....

ವಿಶಾಖಾ ಚಿಕ್ಕವಳಿರುವಾಗಿನಿಂದ ಕಡಲ ನಂಟು ಗಟ್ಟಿಯಾಗಿ ಬೆಳೆದಿತ್ತು. ಪ್ರತಿ ಭಾನುವಾರ ಅಪ್ಪ - ಅಮ್ಮನ ಜೊತೆ ಸಮುದ್ರ ತೀರಕ್ಕೆ ಬಂದು ಒಂದಿಷ್ಟು ಹೊತ್ತು ಆಟವಾಡಿ, ಮರಳ ಮೇಲೆಲ್ಲ ಚಿತ್ರ ಬರೆದು ಖುಷಿ ಪಡುತ್ತಿದ್ದ ಹುಡುಗಿ, ಬೆಳೆದು ಕೆಲಸಕ್ಕೆ ಸೇರಿದರೂ ಕಡಲ ಮೇಲಿನ ಪ್ರೀತಿ ಒಂಚೂರೂ ಕಮ್ಮಿಯಾಗಿರಲಿಲ್ಲ. ದಿನವೂ ಮನೆಯಿಂದ ಸಮುದ್ರ ತೀರಕ್ಕೆ ಬರುವ ಆ ಹಾದಿ, ಅದರ ಅಕ್ಕಪಕ್ಕದ ಗಿಡಗಳು, ಕಡುಗಪ್ಪು ಬಣ್ಣದ ಡಾಂಬರು ರಸ್ತೆ ಎಲ್ಲವೂ ಅವಳಿಗೆ ಆಪ್ತ. ಸಮುದ್ರ ತೀರದಲ್ಲಿ ಹಾರಿಸಿದ ಚಂದದ ನೀಲಿ ಗಾಳಿಪಟ, ವರ್ಷ ವರ್ಷ ಆಡಿದ ಹೋಳಿ, ಗೆಳತಿಯರೊಂದಿಗೆ ಕಿತ್ತಾಟ, ಡಿಗ್ರಿ ಮುಗಿಸಿ ಇನ್ನು ಹೀಗೆ ಎಲ್ಲರೂ ಒಟ್ಟಿಗೆ ಸಿಗುವುದಿಲ್ಲ ಎಂದು ಕಣ್ಣೀರು ಹಾಕಿದ ಭಾವುಕ ದಿನ ಎಲ್ಲವೂ ಅವಳಿಗೆ ನೆನಪಾಗುತ್ತಿತ್ತು. ಅದೆಷ್ಟು ಸುಂದರವಿತ್ತು ಆ ಕ್ಷಣಗಳು...‌ ಆಲೋಚನೆಯಲ್ಲಿ ಮುಳುಗಿದ್ದವಳಿಗೆ ವಾಸ್ತವ ರಪ್ಪನೆ ಕಣ್ಮುಂದೆ ಬಂತು.

‌‌ ಅಪ್ಪ ತೀರಿ ಹೋಗಿ ಒಂದೂವರೆ ವರ್ಷವಾಯ್ತು. ಅಮ್ಮನಿಗೋ ಈಗೀಗ ಯಾವುದರಲ್ಲೂ ಆಸಕ್ತಿಯಿಲ್ಲ. ನನಗೋ ಕಂಪೆನಿಯ ಬಿಡುವಿಲ್ಲದ ಕೆಲಸಗಳಲ್ಲಿ ಹೇಗೋ ದಿನ ಕಳೆದು ಹೋಗುತ್ತದೆ‌. ಆದರೆ ಮನೆಗೆ ಬಂದು, ಅಮ್ಮನ ಕುಂಕುಮವಿಲ್ಲದ ಹಣೆ ನೋಡಿದಾಗ ಮತ್ತೆ ಮತ್ತೆ ಅಪ್ಪನ ನೆನಪಾಗುತ್ತದೆ... ಬೇಗ ನನ್ನನ್ನು ಮದುವೆ ಮಾಡಿ ಕಳಿಸಬೇಕೆಂಬ ಕರ್ತವ್ಯದ ಹೊರೆ ಅಮ್ಮನ ಮೇಲೆ. ಅದೆಲ್ಲಿಂದ ಸಿಕ್ಕಿದನೋ ಆ ಪುಣ್ಯಾತ್ಮ...‌ " ಇಲ್ಲಿನ ನಿಮ್ಮ ಮನೆ ಮಾರಿ ನನ್ನೊಂದಿಗೆ ಮುಂಬೈಗೆ ಬನ್ನಿ ಆಂಟಿ..‌ನಾವೆಲ್ರೂ ಅಲ್ಲೇ ಆರಾಮಾಗಿರ್ಬೋದು..." ಅಂತ ಅಮ್ಮನ ಕಿವಿ ಹಿಂಡಿ, ನನ್ನ ಕೈ ಹಿಡಿಯುವ ಆಸೆಯಲ್ಲಿದ್ದಾನೆ. ಈ ಊರು, ಅಪ್ಪ ಪ್ರೀತಿಯಿಂದ ಕಟ್ಟಿಸಿದ, ನಾನು ಹುಟ್ಟಿ ಬೆಳೆದ, ಸಾವಿರ ನೆನಪುಗಳ ಮೂರ್ತ ರೂಪವಾದ ಮನೆ, ಈ ಕಡಲು ಎಲ್ಲವನ್ನು ಬಿಟ್ಟು ಹೋಗುವುದಾದರೂ ಹೇಗೆ?... ಮನೆಯನ್ನಾದರೂ ಬಿಡಬಹುದು.. ಆದರೆ ನೆಚ್ಚಿನ ಸಮುದ್ರ ತೀರ? ತುಂಬಾ ಕಷ್ಟ... ಅದು ಹೇಗೆ ಅಮ್ಮ ನನ್ನ ಕೇಳದೆಯೇ, ಹುಡುಗಿ ನೋಡುವ ಶಾಸ್ತ್ರವೂ ಮುಗಿಸದೇ ನಿಶ್ಚಿತಾರ್ಥ ಇಟ್ಟುಕೊಂಡಳು? ಈಗ ವಾಟ್ಸಾಪ್, ಫೇಸ್ಬುಕ್ ಕಾಲ ಅಂತ ಅದ್ರಲ್ಲೇ ಪಟ ಕಳಿಸಿದೀನಿ ಎಂಬ ಸಬೂಬು ಬೇರೆ... ಹುಡುಗ ನೋಡಲೇನೋ ಚೆನ್ನಾಗಿದ್ದಾನೆ. ಆದರೆ ಹೇಗೋ ಏನೋ...
ವಿಶಾಖಾ ಯೋಚನೆಯ ಸುಳಿಯಲ್ಲಿ ಸಿಲುಕಿದ್ದಳು.

"ಅಯ್ಯೋ" ಎಂಬ ಶಬ್ದ ವಿಶಾಖಾಳನ್ನು ವಾಸ್ತವಕ್ಕೆ ಕರೆತಂದಿತು. ಅವಳ ಪಕ್ಕದಲ್ಲೇ ಒಂದು ಪುಟ್ಟ ಹೆಣ್ಣು ಮಗು ಆಟವಾಡುತ್ತಿತ್ತು. ಅಲೆಗಳ ಅಬ್ಬರದಲ್ಲಿ ಕಾಲ್ಗೆಜ್ಜೆ ಸಮುದ್ರ ಸೇರಿದ್ದೂ ಪುಟ್ಟಿಗೆ ಗೊತ್ತಿಲ್ಲ. ಸ್ವಲ್ಪ ಹೊತ್ತಿನ ನಂತರ ಅದನ್ನು ಗಮನಿಸಿದ ಮಗುವಿನ ತಾಯಿ ಬೇಸರದಿಂದ ಉಸುರಿದ್ದರು. ಅವರ ಕಣ್ಣಂಚಲ್ಲಿ ನೀರು ಜಿನುಗಿತ್ತು. ಪುಟ್ಟಿಯ ಅಪ್ಪ ದುಬೈ ಹೋಗುವ ಮುನ್ನ ಪ್ರೀತಿಯಿಂದ ಕೊಡಿಸಿದ ಗೆಜ್ಜೆ ಸಾಗರದ ಒಡಲು ಸೇರಿತ್ತು. ವಿಷಯ ತಿಳಿದ ವಿಶಾಖಾ ಮಗುವಿನ ತಾಯಿಗೆ ತೋಚಿದಷ್ಟು ಸಮಾಧಾನ ಮಾಡಿ ಕಳುಹಿಸಿ,
ಮತ್ತೆ ತನ್ನ ಆಲೋಚನಾ ಲಹರಿಗೆ ಚಾಲ್ತಿ ನೀಡಿದಳು. ಈ ಬಾರಿ ಧನಾತ್ಮಕವಾಗಿ ಯೋಚಿಸಲಾರಂಭಿಸಿದಳು.

ಜಗದಲ್ಲಿ ಸ್ವಾರ್ಥತೆಯೇ ತುಂಬಿರುವಾಗ ಅವನ್ಯಾರೋ ಪುಣ್ಯಾತ್ಮ ನನ್ನ ಮದುವೆಯಾಗುವುದರ ಜೊತೆ, ಖುಷಿಯಿಂದ ಅಮ್ಮನಿಗೂ ಅವರ ಮನೆಯಲ್ಲೇ ಇರಲು ಹೇಳುತ್ತಿದ್ದಾನೆಂದರೆ ಖಂಡಿತ ಆತ ಒಳ್ಳೆಯವನೇ.. ನಾನೇ ಏನೇನೋ ಅಂದುಕೊಳ್ಳುವುದರ ಬದಲು ನೇರವಾಗಿ ಅವನೊಂದಿಗೆ ಮಾತನಾಡಬೇಕು. ಅವನನ್ನು ಅರ್ಥ ಮಾಡಿಕೊಳ್ಳಬೇಕು. ಯಾರನ್ನೇ ಮದುವೆಯಾದರೂ ಈ ಮನೆಯನ್ನಂತೂ ಬಿಡಲೇಬೇಕು. ಇನ್ನು ಸಮುದ್ರ? ಇಲ್ಲಿಯ ತೀರಕ್ಕೆ ಮುದ್ದಿಸುವ ಅಲೆಗಳೇ ಅಲ್ಲವಾ ಮುಂಬೈಯ ಕರಾವಳಿಯನ್ನೂ ಚುಂಬಿಸುವುದು? ವಿಶಾಲ ಕಡಲು ಕಡಲೇ... ತೀರ ಬದಲಾಗಬಹುದಷ್ಟೇ. ಬದುಕಿನ ದೋಣಿಯಲ್ಲಿ ಕುಳಿತು ಎಲ್ಲೂ ಹೋಗಬಾರದೆಂದು ದಡವ ಕಚ್ಚಿಕೊಂಡರೆ ಹೇಗೆ? ಎಲ್ಲವೂ ಬದಲಾಗುತ್ತದೆ. ಮುಂದಿನ ಜೀವನ ಕೂಡಾ. ಅಮ್ಮ ಹೇಳಿದ ಹುಡುಗನನ್ನೊಮ್ಮೆ ಭೇಟಿಯಾಗಿ ಮನಕ್ಕೆ ತೃಪ್ತಿಯಾಗುವಷ್ಟು ಮಾತನಾಡಬೇಕು. ಅವನ ಅಭಿಪ್ರಾಯ ಕೇಳಬೇಕು. ಇಷ್ಟವಾದರೆ ಮುಗೀತು. ಇಲ್ಲಾ ಅಂದ್ರೆ ಅಮ್ಮನಿಗೆ ನೇರವಾಗಿ ಹೇಳಬೇಕು. ಸಮಯ ತುಂಬಾ ಇದೆ. ಸದುಪಯೋಗ ಮಾಡುವ ಮನಸ್ಸು ಬೇಕಷ್ಟೇ.. ಹೀಗೆ ಇನ್ನೂ ಯೋಚಿಸುತ್ತ ಕುಳಿತವಳಿಗೆ ಯಾರೋ ಕರೆದಂತಾಯಿತು. ಹಿಂತಿರುಗಿ ನೋಡಿದರೆ ಅವಳ ಹುಡುಗ ಮುಗುಳ್ನಗುತ್ತ ನಿಂತಿದ್ದ. ಅವಳ ಕೊನೆಯಿಲ್ಲದ ಆಲೋಚನೆಗಳಿಗೆ ಅವನೇ ಗಮ್ಯವಾಗಿದ್ದ !!

-ರಂಜನಾ ಆರ್ ಭಟ್

Photo Credit: Google

About the Author

ಹೆಸರು : ರಂಜನಾ ಆರ್ ಭಟ್
▪ಕುಮಾರಿ ರಂಜನಾ ಆರ್ ಭಟ್ ಇವರು ಚಿಕ್ಕ ಪ್ರಾಯದಲ್ಲೇ ಸಾಹಿತ್ಯದತ್ತ ಆಕರ್ಷಿತರಾದವರು. ಪ್ರಾಥಮಿಕ ಹಂತದ ವಿದ್ಯಾಭ್ಯಾಸವನ್ನು ಹುಟ್ಟೂರಿನಲ್ಲಿಯೇ ಮಾಡಿದ ಇವರು ಪ್ರೌಢ ಹಾಗೂ ಪದವಿ ಪೂರ್ವ ವಿದ್ಯಾಭ್ಯಾಸವನ್ನು ಮೂಡಬಿದರೆಯ ಪ್ರತಿಷ್ಠಿತ ಆಳ್ವಾಸ್ ವಿದ್ಯಾಸಂಸ್ಥೆಯಿಂದ ವಿಶಿಷ್ಟ ಶ್ರೇಣಿಯಲ್ಲಿ ತೇರ್ಗಡೆಗೊಂಡರು. ಬೆಂಗಳೂರಿನಲ್ಲಿ ಬಿ.ಕಾಂ ಪದವಿಯನ್ನು ಪೂರ್ಣಗೊಳಿಸಿ ಪ್ರಸ್ತುತ ಉಡುಪಿಯಲ್ಲಿ ಸಿ.ಎ(CA) ಆರ್ಟಿಕಲ್ ಶಿಪ್ ಮಾಡುತ್ತಿದ್ದಾರೆ. ಕವಿತೆ, ಕಥೆ, ಲೇಖನ ಹೀಗೆ ಸಾಹಿತ್ಯದ ವಿವಿಧ ಪ್ರಕಾರಗಳಲ್ಲಿ ತನ್ನನ್ನು ತೊಡಗಿಸಿಕೊಂಡ ಇವರು ಇದುವರೆಗೆ "ಮಕ್ಕಳ ಸಾಹಿತ್ಯ"(ಕಥಾ-ಕವನ ಸಂಕಲನ) ಹಾಗೂ "ಹೊಂಗಿರಣ"(ಕವನ ಸಂಕಲನ) ವನ್ನು ಹೊರತಂದಿದ್ದಾರೆ. ವಿವಿಧ ಕವಿಗೋಷ್ಟಿಗಳಲ್ಲಿ ತನ್ನ ಕವನ ವಾಚನವನ್ನು ಮಾಡಿದ್ದು "ನಮ್ಮ ಕನ್ನಡ ತಂಡ" ಏರ್ಪಡಿಸಿದ್ದ ಕವನ ಸ್ಪರ್ಧೆಯಲ್ಲಿ ಬಹುಮಾನವನ್ನು ಪಡೆದಿದ್ದಾರೆ. ಅಲ್ಲದೆ ವಿಜಯ ನೆಕ್ಸ್ಟ್, ಸಂಪದ ಸಾಲು ಮಾಸ ಪತ್ರಿಕೆಗಳಲ್ಲಿ ಇವರ ಬರಹಗಳು ಪ್ರಕಟವಾಗಿದ್ದು ಹಲವಾರು ಕಾರ್ಯಕ್ರಮಗಳಲ್ಲಿ ನಿರೂಪಣೆಯನ್ನೂ ಮಾಡಿ ತನ್ನ ಸಾಹಿತ್ಯ ಯಾತ್ರಗೆ ಪುಟಗಳನ್ನು ಜೋಡಿಸುತ್ತಿದ್ದಾರೆ...

ಮತ್ತೆ ಬೀಸು ಗಾಳಿಯೇ

noreply@blogger.com (Durgaprasad Diwana) — Sat, 30 May 2020 14:09:00 +0000

ಭಾವಗೀತೆ ೯ - ಮತ್ತೆ ಬೀಸು ಗಾಳಿಯೇ

ಮತ್ತೆ ಏಕೆ ಗಾಳಿ ಬೀಸಿ
ನನ್ನ ಮನವ ಕದಡಿದೆ
ಬೆಂಕಿ ಏರಿ ತಾಪ ಸೋರಿ
ಕಣ್ಣಹನಿಯು ಆರಿದೆ ||ಪ||

ಇರುಳಿನಲ್ಲಿ ಸುರಿವ ಮಳೆಯು
ನೋವ ನೆಲವ ಹಿಂಡಿದೆ
ಕತ್ತಲಾಟದಲ್ಲಿ ಕನಸು
ಬೆಚ್ಚಿಬಿದ್ದು ನಲುಗಿದೆ ||೧||

ರವಿಯಕಿರಣದಲ್ಲಿ ಬೇಗೆ
ಹೃದಯವನ್ನು ಸುಡುತಿದೆ
ನೆರಳಿಗಾಗಿ ನನ್ನ ಮನವು
ಲೋಕವನ್ನೆ ಹುಡುಕಿದೆ ||೨||

ಅವನ ಮೌನ ತೋಟದಲ್ಲಿ
ಹೂವು ನಾನು ಎಂದಿಗೂ
ಸ್ಪರ್ಶವಿಲ್ಲದಾದರೇನು
ಬೇಕು ಹೂ ಸಮಾಧಿಗೂ ||೩||

ಮರೆಯಲಾರೆನವನ ಸನಿಹ
ಮತ್ತೆ ಬೀಸು ಗಾಳಿಯೇ
ಎದೆಯಲುರಿವ ಬೆಂಕಿಯನ್ನು
ಆರದಂತೆ ಮೇಲೆಯೇ ||೪||

-ಶ್ರೀಸುತ

■ ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

Photo Credit: pinterest

ಭಾವಗೀತೆ ೮ - "ಮೌನಿ ನಾನು"ಯನ್ನು ಓದಲು ಭಾವಗೀತೆ ೮ ಕ್ಲಿಕ್ ಮಾಡಿ.

ನೆರೆ-ಹೊರೆ

noreply@blogger.com (Durgaprasad Diwana) — Wed, 14 Aug 2019 06:12:00 +0000

ಮರವ ಕಡಿದೆ, ಇಳೆಯ ಸುಟ್ಟೆ
ಮನುಜ ನಿನ್ನ ಸ್ವಾರ್ಥಕೆ...
ಇಷ್ಟೆ ಸಾಕೆ ಇನ್ನು ಬೇಕೆ,
ನಿನ್ನ ಅಹಂಕಾರಕೆ...?
ಅಂದು, ಹಿಂದೆ
ಒಡಲ ಬಗೆದು ಮರಳು ತೆಗೆದು ಮಾರಲು....
ಇಂದು, ಬಂದೆ
ಮನೆಯ ಮುಂದೆ ಮರಳಿ ಮರಳ ಕೇಳಲು...
ನಾನು ನಾನು ನಾನು ಎಂದು
ಮುನ್ನುಗ್ಗಿ ಸಾಗಿದೆ...
ನಾನಾ ನೀನಾ ತಿಳಿಸಿ ಕೊಡಲು
ತಗ್ಗಿ-ಬಗ್ಗಿ ಬಂದಿಹೆ...
ನಿನ್ನ ಒಡಲು ಸುಡುತಲಿರಲು
ಈಗ ತಲೆಯ ಬಾಗಿಹೆ...
ನನ್ನ ಕರುಣೆ ಉಕ್ಕಿ
ಬರಲು ಸಮಯ ಕಳೆದು ಹೋಗಿದೆ...!!!

-ಶ್ರೀ ಧನಂಜಯ ಬಳ್ಳಡ್ಕ

Photo Credit: wallpapers-fenix.eu

About the Author

ಹೆಸರು : ಶ್ರೀ ಧನಂಜಯ ಬಳ್ಳಡ್ಕ
▪︎ಧನಂಜಯ ಬಳ್ಳಡ್ಕ ಇವರು ಮೂಲತಃ ದಕ್ಷಿಣ ಕನ್ನಡ ಜಿಲ್ಲೆಯ ಸುಳ್ಯ ತಾಲ್ಲೂಕಿನ ಬಳ್ಳಡ್ಕ ಗ್ರಾಮದವರು. ಹುಟ್ಟೂರಿನಲ್ಲಿಯೇ ತಮ್ಮ ಪ್ರಾಥಮಿಕ ವಿದ್ಯಾಭ್ಯಾಸವನ್ನು ಪೂರೈಸಿದ ಇವರು ಬರವಣಿಗೆಯನ್ನು ಸಣ್ಣ ವಯಸ್ಸಿನಲ್ಲಿಯೇ ಮೈಗೂಡಿಸಿಕೊಂಡಿದ್ದರು. ಇವರ ಕೆಲವೊಂದು ಕವಿತೆಗಳು ಬಹುಮಾನಗಳನ್ನೂ ಬಾಚಿಕೊಂಡಿರುವುದು ಸಾಹಿತ್ಯ ಕ್ಷೇತ್ರದಲ್ಲಿ ಇವರ ಆಸಕ್ತಿಗೊಂದು ಗರಿ. ಮಂಗಳೂರು ವಿಶ್ವವಿದ್ಯಾನಿಲಯದಲ್ಲಿ ಅರ್ಥಶಾಸ್ತ್ರ ವಿಭಾಗದಲ್ಲಿ ಸ್ನಾತಕೋತ್ತರ ಪದವಿಯನ್ನು ಮುಗಿಸಿ ಆನಂತರ ಬಿ.ಎಡ್ ವ್ಯಾಸಾಂಗವನ್ನೂ ಮಾಡಿ ಇದೀಗ ಅರ್ಥಶಾಸ್ತ್ರ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಕುಂದಾಪುರದ ಭಂಡಾರ್ಕಾರ್ಸ್ ಆರ್ಟ್ಸ್ & ಸಯೆನ್ಸ್ ಕಾಲೇಜಿನಲ್ಲಿ ಕೆಲ ಕಾಲ ಪ್ರಾಧ್ಯಾಪಕರಾಗಿದ್ದ ಇವರು ಪ್ರಸ್ತುತ ಶ್ರೀದುರ್ಗಾಪರಮೇಶ್ವರೀ ದೇವಳ ಪದವಿ ಪೂರ್ವ ಕಾಲೇಜು ಕಟೀಲು ಇಲ್ಲಿ ಪ್ರಾಧ್ಯಾಪಕರಾಗಿ ತಮ್ಮ ವೃತ್ತಿಜೀವನವನ್ನು ನಡೆಸುತ್ತಿದ್ದಾರೆ. ಶ್ರೀಯುತರು ಸಾಹಿತ್ಯ ಕ್ಷೇತ್ರದಲ್ಲಿ ಇನ್ನೂ ಹೆಚ್ಚಿನ ಕೃಷಿ ಮಾಡುವಂತಾಗಲಿ ಎಂದು ಆಶಿಸುತ್ತಾ ಇವರು ಬರೆದಿರುವಂತಹ ಅರ್ಥಗರ್ಭಿತವಾದ ಸಾಂದರ್ಭಿಕ ಕವನ ನಿಮ್ಮ ಶ್ರೀಸುತ ಜಾಲತಾಣದಲ್ಲಿ...

ಮೌನಿ ನಾನು

noreply@blogger.com (Durgaprasad Diwana) — Tue, 07 Aug 2018 13:53:00 +0000

ಭಾವಗೀತೆ ೮ - ಮೌನಿ ನಾನು

ಎಷ್ಟು ಬೆಳಕು ಚೆಲ್ಲುತಿದ್ದೆ
ಹೃದಯಗುಡಿಯ ಮೂರ್ತಿಗೆ
ಇಷ್ಟು ಬೇಗ ಹೇಗೆ ಕವಿದೆ
ಹೃದಯ ಸ್ಪೂರ್ತಿಗೆ ||ಪ||

ಮೋಡ ಕವಿದ ಬಾನಿನಲ್ಲಿ
ಮಳೆಯ ಹನಿಯು ಆರಿದೆ
ಮೌನವಾಗಿ ಅಳುತಲಿಹುದು
ಇಳೆಯನಪ್ಪದೆ ||೧||

ಹೊತ್ತಿ ಉರಿದ ದೀಪವೊಂದು
ಆರುವಂತೆ ತೋರಿದೆ
ಹತ್ತಿ ನಿಂತ ಪ್ರೇಮಬಿಂದು
ಭಾರವಾಗಿದೆ ||೨||

ಮೌನವೆಂಬ ನಾದವಿಂದು
ಎದೆಯ ಕದವ ಬಡಿದಿದೆ
ಮೌನಿ ನಾನು ಜ್ಞಾನಿ ನೀನು
ದಾರಿ ತೋರದೆ ||೩||

-ಶ್ರೀಸುತ

■ ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

Photo Credit: style arena

ಭಾವಗೀತೆ ೭ - "ಪ್ರೀತಿಧಾರೆ"ಯನ್ನು ಓದಲು ಭಾವಗೀತೆ ೭ ಕ್ಲಿಕ್ ಮಾಡಿ.

ಪ್ರೀತಿಧಾರೆ

noreply@blogger.com (Durgaprasad Diwana) — Thu, 19 Jul 2018 05:27:00 +0000

ಭಾವಗೀತೆ ೭ - ಪ್ರೀತಿಧಾರೆ

ಪ್ರೀತಿಧಾರೆಯೆರೆದ ಹೂವೆ
ಮಧುರವಾಗಿ ನೆನೆಯುವೆ
ಮನದಿ ಬರೆದ ಗೀತೆಯನ್ನು
ರಾಗವಾಗಿ ಹಾಡುವೆ ||ಪ||

ಭಾವತುಂಬಿ ಮನದ ಹಕ್ಕಿ
ರೆಕ್ಕೆ ಬಿಚ್ಚಿ ನಲಿಯಿತು
ನಿನ್ನ ನಗುವ ನೋಡುತಲೇ
ಮೇಲೆ ಮೇಲೆ ಹಾರಿತು ||೧||

ಕಡಲ ತೆರೆಗೆ ಮೈಯನೊಡ್ಡಿ
ನಿನ್ನ ಒಲವನರಸಿದೆ
ಮನದಿ ಬರೆದ ಗೀತೆಯನ್ನು
ಏಕೆ ಹೀಗೆ ಒರೆಸಿದೆ ||೨||

ಉರುಳಿ ಹೋಗುತಿರುವ ಕಾಲ
ಹಿಡದು ನಾನು ಕುಳಿತಿಹೆ
ನನ್ನ ಹೃದಯವನ್ನು ಒಡೆದು
ಎತ್ತ ಕಡೆಗೆ ಸಾಗಿಹೆ ||೩||

ಏರಿ ಹೋದ ಪ್ರೀತಿ ಹಕ್ಕಿ
ರೆಕ್ಕೆ ಮುಚ್ಚಿ ಕುಸಿಯಿತು
ಮೌನವಾಗಿ ಮೈಯ ಮುದುಡಿ
ಬೇನೆಯನ್ನು ಸಹಿಸಿತು ||೪||

ಬಣ್ಣಬಣ್ಣದಾಟಗಳಿಗೆ
ಮನವು ಸೋತು ಹೋಯಿತು
ಕಣ್ಣ ತೆರೆದು ನೋಡುವಾಗ
ಎಲ್ಲಾ ಮಾಯವಾಯಿತು ||೫||

-ಶ್ರೀಸುತ

■ ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

Photo Credit: wallpapersjpg.com

ಭಾವಗೀತೆ ೬ - "ಜೀವವೀಣೆ"ಯನ್ನು ಓದಲು ಭಾವಗೀತೆ ೬ ಕ್ಲಿಕ್ ಮಾಡಿ.

ಎದೆಯ ಭಾವ

noreply@blogger.com (Durgaprasad Diwana) — Fri, 25 May 2018 12:18:00 +0000

ಭಾವಗೀತೆ ೬ - ಎದೆಯ ಭಾವ

ಎದೆಯ ಭಾವ ಮುದುಡುತಲಿದೆ
ಪ್ರೀತಿಯೆರೆವರಿಲ್ಲದೆ
ಹೃದಯ ನೋವ ನುಂಗುತಲಿದೆ
ತೋರಿಕೊಳ್ಳಲಾಗದೆ

ಮಧುರ ಸಾಲುಗಳನು ಬರೆದೆ
ಚಿತ್ತದಲ್ಲಿ ಅದನು ಕೊರೆದೆ
ಎಷ್ಟು ಬಾರಿ ಯತ್ನಿಸಿದರೂ
ಸೋತೆ ಹಾಡಲಾಗದೆ

ಹೃದಯದನಿಯೆ ನಿನ್ನ ನೆನಹು
ಇರುಳಿನಲ್ಲೂ ಸುಡುತಲಿಹುದೆ
ಚುಕ್ಕಿತಾರೆ ಬೇಗೆಯಿಂದ
ಬೂದಿಯಾಗಿ ಸುರಿದಿದೆ

ಇಷ್ಟು ತಾಪವೇಕೆ ಎನಗೆ
ಎಷ್ಟು ಶಾಪವಿದೆಯೊ ಎನಗೆ
ಇಷ್ಟವಾದ ಹೂವೇ ಕೊನೆಗೆ
ಚುಚ್ಚುತಿಹುದು ಮನಸಿಗೆ

ಹಾಡುತಲಿದೆ ಹಾಡುತಲಿದೆ
ಮೌನದುಂಬಿ ಹಾಡುತಲಿದೆ
ನಾನೇ ಬರೆದ ಸಾಲುಗಳಿಗೆ
ಓಲೆ ಬರೆಯಬೇಕಿದೆ

ತಲುಪಬಲ್ಲುದೇನು ಓಲೆ
ಅಂತರಂಗದಂಚೆಯಲ್ಲಿ
ಭಾವತುಂಬಿ ಓದು ಒಮ್ಮೆ
ನಿನ್ನ ರಾಗದಲ್ಲಿ....

-ಶ್ರೀಸುತ

■ ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

Photo Credit: drawingschool.com

ಭಾವಗೀತೆ ೫ - "ಜೀವವೀಣೆ"ಯನ್ನು ಓದಲು ಭಾವಗೀತೆ ೫ ಕ್ಲಿಕ್ ಮಾಡಿ.

ನನ್ನಾಕೆ

noreply@blogger.com (Durgaprasad Diwana) — Sun, 06 May 2018 05:43:00 +0000

ಮಾರುದ್ದ ಜಡೆಯ
ನನ್ನಾಕೆ
ರೇಷ್ಮೆ ಸೀರೆಯುಟ್ಟು
ಜಡೆಗೆ ಮಲ್ಲಿಗೆ ಮುಡಿದು
ವಯ್ಯಾರದಿಂದ ನಡೆದು ಬಂದಗಾ

ನನ್ನ ಹೃದಯ ಬಡಿತ ಕೊಂಚ
ಹೆಚ್ಚಾದದ್ದು ನಿಜ
ಹೆಣ್ಣಿನ ಅಂದ
ಸೀರೆಯಲ್ಲಿಯೇ ಚಂದ
ಹೃದಯದ ವೀಣೆ ತಂತಾನೇ
ನುಡಿಸಿತ್ತು ಹೊಸ ರಾಗ

ನೀ ಕೊಟ್ಟ ಬೇವು ಬೆಲ್ಲ
ನಿನ್ನ ಪ್ರೀತಿ ಬೆರೆತು
ಬೇವು ಕೂಡ ಸಿಹಿಯಾಯ್ತು
ಓ ನನ್ನ ನಲ್ಲೆ...

-ಸಂತೋಷ್ ಸಾಗರ್

About the Author

ಹೆಸರು : ಸಂತೋಷ್ ಸಾಗರ್
ವಿಳಾಸ: ಸಾಗರ,ಶಿವಮೊಗ್ಗ ಜಿಲ್ಲೆ
ಜನ್ಮ ದಿನಾಂಕ:20/05/1985
ವಿದ್ಯಾಭ್ಯಾಸ :ಬಿ.ಎ

ವೃತ್ತಿ:ಕ್ಯಾಂಪ್ಕೋ ಮಾರಾಟ ಪ್ರತಿನಿಧಿ ಹವ್ಯಾಸ:ಫೋಟೋಗ್ರಫಿ,ಪುಸ್ತಕ ಓದುವುದು,ಕಥೆ ಕವನ ಬರೆಯುವುದು

ಅದ್ವೈತಾನುಭವ

noreply@blogger.com (Durgaprasad Diwana) — Fri, 20 Apr 2018 04:45:00 +0000

ಶ್ರುತಿಸ್ಮೃತಿಪುರಾಣಾನಾಮಾಲಯಂ ಕರುಣಾಲಯಂ ।

ನಮಾಮಿ ಭಗವತ್ಪಾದಂ ಶಂಕರಂ ಲೋಕಶಂಕರಮ್॥

'ವೇದ' ಎಂದರೆ 'ಜ್ಞಾನ' ಅವುಗಳು ಭಾರತದ ಅತ್ಯಮೂಲ್ಯ ಸಂಪತ್ತುಗಳು. ಸಂಪತ್ಭರಿತ ಭಾರತವನ್ನು ಹಲವಾರು ಲೂಟಿಕೊರರು ಹಲವಾರು ರೀತಿಯಲ್ಲಿ ಲೂಟಿ ಮಾಡಿದ್ದರೂ ಜ್ಞಾನವನ್ನು ಲೂಟಿಮಾಡಲು ಸಾಧ್ಯವಾಗಿರಲಿಲ್ಲ. ಬ್ರಿಟಿಷರು ಜ್ಞಾನವನ್ನು ಲೂಟಿ ಮಾಡದಿದ್ದರೂ ನಮ್ಮ ಜ್ಞಾನ, ಪರಂಪರೆ, ಸಂಸ್ಕೃತಿಯ ಮೇಲೆ ನಮಗೇ ಕೀಳರಿಮೆ ಬರುವಂತೆ ಮಾಡಿ ಹೋಗಿದ್ದಂತೂ ಸತ್ಯ. ಹಾಗಾಗಿಯೇ ಈ ಪ್ರಗತಿಪಪರು, ಬುದ್ದಿಜೀವಿಗಳು ಎನಿಸಿಕೊಳ್ಳುವವರು ಹುಟ್ಟಿಕೊಂಡು ಆ ಶಬ್ದಗಳಿಗಿರುವ ಸಾತ್ವಿಕ ಅರ್ಥಗಳನ್ನೇ ಇಲ್ಲದಂತಾಗಿಸಿದ್ದಾರೆ.

ಆದರೆ ಭಾರತೀಯ ವೇದಶಾಸ್ತ್ರಗಳ ಜ್ಞಾನಗಳಲ್ಲಿ ಹೊಸ ತಲೆಮಾರಿನ ವಿದೇಶಿಯರೂ ಆಸಕ್ತಿ ತೋರಿಸುವಂತೆ ಮಾಡಿದ್ದು ಮಾತ್ರ ಆದಿಶಂಕರರ 'ಅದ್ವೈತ ಸಿದ್ದಾಂತ' ಎಂದರೆ ಅದು ಅತಿಶಯೋಕ್ತಿಯಾಗಲಾರದು.

ನಾನು ಯಾರು? ನನ್ನ ಜನ್ಮದ ಉದ್ದೇಶವೇನು? ನನಗೂ ಈ ಜಗತ್ತಿಗೂ ಇರುವ ಸಂಬಂಧವೇನು?

ನಾವು ನೋಡುವ, ಅನುಭವಿಸುವ ಈ ಜಗತ್ತು ಎಲ್ಲಿಂದ ಬಂತು? ಯಾರ ಸೃಷ್ಟಿಯಿದು? ಇತ್ಯಾದಿ ಆಧುನಿಕ ವಿಜ್ಞಾನವನ್ನೂ ಕಾಡುವ ಕ್ಲಿಷ್ಟಕರ ಪ್ರಶ್ನೆಗಳಿಗೆ ಉತ್ತರ ಹುಡುಕುವ ಕೆಲಸವನ್ನು ವೇದಗಳು ಮಾಡುತ್ತವೆ. ಈ ಭೌತಿಕ ಜಗತ್ತನ್ನು ಹೊರತುಪಡಿಸಿ ಇನ್ನೊಂದು ಜಗತ್ತಿದೆ ಎಂಬ ಅರಿವನ್ನು ಮೂಡಿಸುವುದು ವೇದಗಳ ಗುರಿ.

ಸಕಲ ಚರಾಚರ ಜಗತ್ತಿಗೆ ಮೂಲವಾದ “ಬ್ರಹ್ಮ” ಎಂಬ ತತ್ವವಿದೆ. ಅದೇ ಪರಮತತ್ವ. ಪರಮಾರ್ಥವೂ ಅದೇ ಆಗಿರುತ್ತದೆ. ಹಾಗೂ “ಬ್ರಹ್ಮ ಒಂದೇ ಸತ್ಯ; ಕಾಣುವ ಈ ಜಗತ್ತು ಮಿಥ್ಯಾ” ಎಂಬ ರಹಸ್ಯವನ್ನು ವೇದಾಂತ ತಿಳಿಸುತ್ತದೆ.

ಈ ಬ್ರಹ್ಮವನ್ನು ಅರಿತಾಗಲೇ ಸಂಸಾರದ ಭವ ಬಂಧನದಿಂದ ಮುಕ್ತಿ ಸಾಧ್ಯ. “ನಾನು ಯಾವಾಗಲೂ ಸುಖಿಯಾಗಿರಬೇಕು ನನಗೆಂದೂ ದುಃಖಬರಬಾರದು” ಎಂಬುದು ಪ್ರತಿಯೊಬ್ಬ ಜೀವಕೋಟಿಯ ಆಕಾಂಕ್ಷೆ. ಸುಖಕ್ಕಾಗಿಯೇ ಮನುಷ್ಯ ಯತ್ನಿಸುತ್ತಾನೆ. ಕಷ್ಟಪಡುತ್ತಾನೆ. ಕಪಿಯೊಂದು ಆಹಾರಕ್ಕಾಗಿ ಮರದಿಂದ ಮರಕ್ಕೆ ಹಾರಾಡುವಂತೆ ಮಾನವನ ಮನಸ್ಸು ಸುಖವನ್ನು ಲೌಕಿಕ ವಸ್ತುಗಳಲ್ಲಿ ಹುಡುಕುತ್ತಾ ಅಲೆದಾಡುತ್ತಾ ಕೊನೆಗೂ ನಿಜವಾದ ಸುಖವನ್ನು ಹೊಂದದೇ ಬಳಲುತ್ತದೆ. ಆದರೆ “ಸುಖ” ಹೊರಗಿನ ವಸ್ತುವಿನಲ್ಲಿಲ್ಲ, ಅದು ಅಂತರಾತ್ಮದಲ್ಲಿಯೇ ಇದೆ. ಬ್ರಹ್ಮಸಾಕ್ಷಾತ್ಕಾರದಿಂದಲೇ ನಿರತಿಶಯ ಆನಂದ ಲಭ್ಯ” ಎನ್ನುವುದನ್ನು ವೇದಾಂತ ಸ್ಪಷ್ಟಪಡಿಸುತ್ತದೆ. ವೇದಾಂತವು ಬ್ರಹ್ಮವಿಚಾರಕ್ಕೆ ಪ್ರಾಶಸ್ತ್ಯಕೊಡುತ್ತದೆ. ಶ್ರುತಿ,ಸ್ಮೃತಿ, ಬ್ರಹ್ಮಸೂತ್ರವೆಂದು ಪ್ರಸ್ಥಾನತ್ರಯ ವೇದಾಂತದ ಆಧಾರಸ್ತಂಭ. ವೇದಾಂತಗಳಲ್ಲೆಲ್ಲಾ “ಅದ್ವೈತ “ ಸಿದ್ಧಾಂತವು ಭಾರತಾದ್ಯಂತ ವ್ಯಾಪಕವಾಗಿದೆ. ಅದ್ವೈತ ಸಿದ್ದಾಂತಾವೇ ಪ್ರಾಚೀನದಿಂದಲೂ ವೇದಾಂತವೆಂದು ಪರಿಗಣಿಸಲ್ಪಟ್ಟಿದ್ದು, ಇತರ ಶಾಸ್ತ್ರಕಾರರು ಮಾಡುವ ವೇದಾಂತಿಮತ ಖಂಡನವೆಂದರೆ ಅದ್ವೈತ ಮತ ಖಂಡನವೇ ಆಗಿತ್ತು. ಈಗಲೂ ಮುಂದೂ ಸಹ ಅದರ ಜ್ಯೇಷ್ಠತೆ-ಶ್ರೇಷ್ಠತೆಗೆ ವ್ಯತ್ಯಾಸವಾಗಲು ಸಾಧ್ಯವಿಲ್ಲ.

ನಮಗೆ ಕಾಣಿಸುವ ಜಗತ್ತು ಕೇವಲ ಭ್ರಮೆ. ಇದರ ಮೂಲ ರೂಪ ಬೇರೆಯೇ ಇದೆ. ಅದು ಮನಸ್ಸು ಇಂದ್ರಿಯಗಳಿಗೆ ಗೋಚರವಾಗದ ತತ್ವ; ಬ್ರಹ್ಮತತ್ವ.

“ತತ್ತ್ವಮಸಿ”,

“ಅಹಂಬ್ರಹ್ಮಾಸ್ಮಿ”,

“ಏಕಮೇವಾದ್ವಿತೀಯಂ ಬ್ರಹ್ಮ”,

“ನೇಹನಾನಾಸ್ತಿಕಿಂಚನ”

“ಅದ್ವೈತಂ ಪರಮಾರ್ಥತಃ”

ಇತ್ಯಾದಿ ಶ್ರುತಿಸ್ಮೃತಿಗಳ ವಾಕ್ಯಗಳ ಬಲದಿಂದ ಪರಬ್ರಹ್ಮವೊಂದೇ ನಿತ್ಯ-ಸತ್ಯ. ಮತ್ತೆಲ್ಲವೂ ಇರುವಂತೆ ಭಾಸವಾಗುತ್ತವೆ ಎಂದು ಪ್ರತಿಪಾದಿಸಲಾಗಿದೆ. ಹಗ್ಗವನ್ನು ಹಾವೆಂದು ತಿಳಿಯುವಂತೆ ಈ ಜಗತ್ತು ಕಾಣಿಸುತ್ತದೆ- ಎಂಬ ಅದ್ವೈತ ತತ್ತ್ವವನ್ನು ಆದಿಶಂಕಕರು ಉಪನಿಷತ್ತು, ಬ್ರಹ್ಮಸೂತ್ರ ಮತ್ತು ಭಗವದ್ಗೀತೆಗಳೆಂಬ ಪ್ರಸ್ಥಾನತ್ರಯಕ್ಕೆ ಭಾಷ್ಯ ಬರೆಯುವ ಮೂಲಕ ಜಗತ್ತಿಗೆ ಸಾರಿದ ಮಹಾನ್ ವಿಭೂತಿಪುರುಷರು.

ವಿವೇಕ ಚೂಡಾಮಣಿ ಮುಂತಾದ ಸ್ವತಂತ್ರ ಮೌಲಿಕ ಗ್ರಂಥಗಳಿಂದಲೂ ಅದ್ವೈತ ಸಿದ್ಧಾಂತವನ್ನವರು ಶ್ರುತಪಡಿಸಿದರು. ಶ್ರೀಗೌಡಪಾದರ ಮಾಂಡೂಕ್ಯಕಾರಿಕೆಯಲ್ಲಿ ಅದ್ವೈತ ಸಿದ್ಧಾಂತದ ಮೂಲಸೆಲೆ ಕಂಡು ಬರುವುದಾದರೂ, ಶ್ರುತಿ ಮತ್ತು ಯುಕ್ತಿಗಳಿಂದ ಅದಕ್ಕೆ ಪರಿಪೂರ್ಣರೂಪ ಕೊಟ್ಟವರು ಆದಿಶಂಕರರು. ಇತರ ಮತಗಳನ್ನು ಖಂಡಿಸಿ, ತನ್ನ ಮತವನ್ನು ಸಮರ್ಥಿಸುವಲ್ಲಿ ಆದಿಶಂಕರರ ಪ್ರತಿಭೆ ಪರಿಪೂರ್ಣ.

ವ್ಯಕ್ತಿ-ವ್ಯಕ್ತಿಗಳಲ್ಲಿ, ವಸ್ತು-ವಸ್ತುಗಳಲ್ಲಿ ಭೇದ ನಮ್ಮ ದಿನನಿತ್ಯ ಜೀವನದಲ್ಲಿ ಹಾಸುಹಿಕ್ಕಾಗಿ ಕ್ಷಣ-ಕ್ಷಣಕ್ಕೂ ತೋರಿ ಬರುತ್ತಿರುವಾಗ, ಅನಾದಿ ಕಾಲದಿಂದ ಬಂದ ಈ ಸಂಸಾರ ನಿತ್ಯ, ಸತ್ಯವೆಂಬ ಅನುಭವವಿರುವಾಗ ಅದ್ವೈತವನ್ನು ಸ್ಥಾಪಿಸುವುದು ಅಸಾಮಾನ್ಯ ಕಾರ್ಯ. ದ್ವೈತದಲ್ಲೇ ವ್ಯವಹರಿಸುವ ಎಲ್ಲ ಜನರನ್ನೂ ಅದ್ವೈತದತ್ತ ಸೆಳೆದುಕೊಳ್ಳುವ ಹಾಗೂ ದ್ವೈತವನ್ನು ಪ್ರತಿಪಾದಿಸುವ ಇತರ ಶಾಸ್ತ್ತ್ರಕಾರರನ್ನು ಸಮರ್ಥವಾಗಿ ಎದುರಿಸುವ ಪಾಂಡಿತ್ಯ ಆದಿಶಂಕರರದಾಗಿತ್ತು. ಆದ್ದರಿಂದಲೇ ಇದೇ ತಳಹದಿಯ ಮೇಲೆ ಇಂದಿನ ವೈಜ್ಞಾನಿಕ ಯುಗದಲ್ಲೂ ಅದ್ವೈತ ಸಿದ್ಧಾಂತವೇ ಪ್ರಸಿದ್ಧಿ ಹೊಂದುತ್ತಾ, ಅಚ್ಚಳಿಯದೆ ಉಳಿದಿದೆ.

ನಾನು ಎಂಬ ವ್ಯವಹಾರದಿಂದಲೇ “ಆತ್ಮ” ಸ್ವಯಂ ಸಿದ್ಧನಾಗುತ್ತಾನೆ. ಪ್ರಪಂಚದಲ್ಲಿ “ನಾನು ಇಲ್ಲ” ಎಂಬ ವ್ಯವಹಾರವೇ ಇಲ್ಲಾ. ಆತ್ಮ ಒಬ್ಬ ಇದ್ದಾನೆಯೇ? ಅಥವಾ ಇಲ್ಲವೇ? ಎಂಬ ಚರ್ಚೆಗೆ ಇಲ್ಲಿ ಆಸ್ಪದವೇ ಇಲ್ಲ. ಚಾರ್ವಾಕ ದೇಹಕ್ಕಿಂತ ಭಿನ್ನವಾದ ಆತ್ಮನನ್ನು ಒಪ್ಪುವುದಿಲ್ಲ. ಇಂದ್ರಿಯ ಅಥವಾ ಮನಸ್ಸೇ “ಆತ್ಮ” ಎಂಬುದು ಕೆಲವರ ವಾದ. ದೇಹ, ಇಂದ್ರಿಯ, ಮನಸ್ಸುಗಳಿಗಿಂತ ಭಿನ್ನವಾಗಿ ಚೈತನ್ಯರೂಪಿ “ಆತ್ಮ” ಇದ್ದಾನೆ. ಆಧ್ಯಾತ್ಮದ ಆಳಕ್ಕೆ ಹೋದಂತೆ ಅದರ ಅರಿವು ಚೆನ್ನಾಗಿಯೇ ಆಗುತ್ತದೆ.

ಜಾಗ್ರತ್, ಸ್ವಪ್ನ ಮತ್ತು ಸುಷುಪ್ತಿ ಈ ಮೂರು ಅವಸ್ಥೆಗಳು ನಮಗೆ ತಿಳಿಯುತ್ತವೆ. ಜಾಗ್ರತ್ತಿನಲ್ಲಿ ಹೊರಗಿನವಸ್ತುಗಳು ಅರಿವಾಗುತ್ತವೆ. ಸ್ವಪ್ನದಲ್ಲಿ ಆಂತರಿಕ ಕಲ್ಪನೆಗಳು ಮೂಡಿಬರುತ್ತವೆ. ಸುಷುಪ್ತಿಯಲ್ಲಿ ಶುದ್ಧ ಅರಿವು ಇರುತ್ತದೆ. ಕಾರಣ “ಗಾಢ ನಿದ್ರೆಯಿಂದ ಎಚ್ಚತ್ತ ವ್ಯಕ್ತಿ” “ಚೆನ್ನಾಗಿ ನಿದ್ರಿಸಿದೆನು”ಎನ್ನುತ್ತಾನೆ. ನಿದ್ರಿಸುವಾಗಲೂ ಜ್ಞಾನ ಅಥವಾ ಚೈತನ್ಯ ಇರುತ್ತದೆ- ಎನ್ನುವುದು ಇದರಿಂದ ತಿಳಿಯುತ್ತದೆ. ಇದರಿಂದ ಆತ್ಮನ ಅಸ್ತಿತ್ವ ಸ್ವಯಂ ಸಿದ್ಧ ಎಂದ ಮೇಲೆ ಬ್ರಹ್ಮತತ್ವವೂ ಸ್ವಯಂ ಸಿದ್ಧವೇ ಎಂಬುದಕ್ಕೆ

“ಆತ್ಮಾಚ ಬ್ರಹ್ಮ”

“ಸರ್ವಂಖಲ್ಪಿದಂ ಬ್ರಹ್ಮ”

”ಬ್ರಹ್ಮವಿದಾಪ್ನೋತಿಪರಮ್”

ಇತ್ಯಾದಿ ಶ್ರುತಿವಾಕ್ಯಗಳ ಪ್ರಮಾಣದಿಂದ “ಅದ್ವೈತ”ವು ಸಿದ್ಧವಾಗುತ್ತದೆ.

‘ಅದ್ವೈತ’ ಸಿದ್ದಾಂತದ ಬಹುಮುಖ್ಯ ಸ್ಲೋಕಗಳಲ್ಲಿ ಒಂದಾದ ನಿರ್ವಾಣ ಶಟಕವು ‘ನಾನು ಯಾರು?’

ಎಂಬ ಪ್ರಶ್ನೆಗೆ ಉತ್ತರಿಸುವ ಕೆಲಸ ಮಾಡುತ್ತದೆ ಅದರ ಸಾಲುಗಳನ್ನು ಗಮನಿಸೋಣ

ಮನೋಬುದ್ಧ್ಯಹಂಕಾರ ಚಿತ್ತಾನಿನಾಹಂ, ನ ಚ ಶ್ರೋತ್ರಜಿಹ್ವೇ ನ ಚ ಘ್ರಾಣನೇತ್ರೇ | ನ ಚ ವ್ಯೋಮ ಭೂಮಿರ್ನತೇಜೋ ನ ವಾಯಃ, ಚಿದಾನಂದರೂಪಃ ಶಿವೋಹಂ ಶಿವೋಹಂ ||

(ನಾನಲ್ಲ ಮನಸ್ಸು, ಬುದ್ಧಿ, ಅಹಂಕಾರ, ಅಥವಾ ಚಿತ್ತ. ನಾನಲ್ಲ ಪಂಚೇಂದ್ರಿಯ, ನಾನಲ್ಲ ಭೂಮಿ, ಆಕಾಶ, ಅಗ್ನಿ, ಅಥವಾ ವಾಯು (ಪಂಚಭೂತ ಗಳು). ನಾನು ಮಂಗಳಕರನಾದ (ಶಿವ) ಚಿದಾನಂದ ರೂಪನು.)

ನ ಚ ಪ್ರಾಣಸಂಜ್ಞೋ ನ ವೈ ಪಂಚವಾಯುಃ, ನ ವಾ ಸಪ್ತಧಾತುಃ ನ ವಾ ಪಂಚಕೋಶಃ | ನ ವಾಕ್ಪಾಣಿಪಾದೌ ನ ಚೋಪಸ್ಥಪಾಯು, ಚಿದಾನಂದರೂಪಃ ಶಿವೋಹಂ ಶಿವೋಹಂ ||

(ನಾನಲ್ಲ ಉಸಿರು (ಪ್ರಾಣ), ಪಂಚ ವಾಯು ಕೂಡ ನಾನಲ್ಲ, ನಾನಲ್ಲ ಸಪ್ತ ಧಾತು, ಪಂಚ ಕೋಶ ನಾನಲ್ಲ, ಕೈ, ಕಾಲು, ಬಾಯಿ ಕೊಡ ನಾನಲ್ಲ. ನಾನು ಮಂಗಳಕರನಾದ (ಶಿವ) ಚಿದಾನಂದ ರೂಪ )

ನ ಮೇ ದ್ವೇಷರಾಗೌ ನ ಮೇ ಲೋಭಮೋಹೌ, ಮದೋ ನೈವ ಮೇ ನೈವ ಮಾತ್ಸರ್ಯಭಾವಃ | ನ ಧರ್ಮೋ ನ ಚಾರ್ಥೋ ನ ಕಾಮೋ ನ ಮೋಕ್ಷಃ, ಚಿದಾನಂದರೂಪಃ ಶಿವೋಹಂ ಶಿವೋಹಂ ||

(ನನ್ನಲ್ಲಿ ರಾಗದ್ವೇಷಗಳಿಲ್ಲ, ಲೋಭಮೋಹಗಳೂ ಇಲ್ಲ. ಮದಮಾತ್ಸರ್ಯಗಳೂ ಇಲ್ಲ. ಧರ್ಮಾರ್ಥಕಾಮಮೋಕ್ಷಗಳೆಂಬ ಪುರುಷಾರ್ಥಗಳೂ ನಾನಲ್ಲ. ನಾನು ಮಂಗಳಕರನಾದ (ಶಿವ) ಚಿದಾನಂದ ರೂಪನು.)

ನ ಪುಣ್ಯಂ ನ ಪಾಪಂ ನ ಸೌಖ್ಯಂ ನ ದುಖಂ, ನ ಮನ್ತ್ರೊ ನ ತೀರ್ಥೋ ನ ವೇದಾ ನ ಯಜ್ಞ | ಅಹಂ ಭೋಜನಂ ನೈವ ಭೋಜ್ಯಂ ನ ಭೋಕ್ತಾ, ಚಿದಾನಂದರೂಪಃ ಶಿವೋಹಂ ಶಿವೋಹಂ ||

(ಪುಣ್ಯವು ಅಲ್ಲ ಪಾಪವು ಅಲ್ಲ, ಸುಖ ದುಖಃ ವು ಅಲ್ಲ. ಮಂತ್ರ ತೀರ್ಥ ವೇದ ಶಾಸ್ತ್ರ ಯಜ್ಞ ವು ಅಲ್ಲ. ನಾನು ಅನುಭವವಲ್ಲ ಅನುಭವಿಸಿದವನೂ ಅಲ್ಲ. ನಾನು ಮಂಗಳಕರನಾದ (ಶಿವ) ಚಿದಾನಂದ ರೂಪ)

ನ ಮೇ ಮೃತ್ಯುಶಂಕಾ ನ ಮೇ ಜಾತಿಭೇದಃ, ಪಿತಾ ನೈವ ಮೇ ನೈವ ಮಾತಾ ನ ಜನ್ಮಃ | ನ ಬಂಧುರ್ನಮಿತ್ರಂ ಗುರುರ್ನೈವ ಶಿಷ್ಯಃ, ಚಿದಾನಂದರೂಪಃ ಶಿವೋಹಂ ಶಿವೋಹಂ ||

(ನನಗೆ ಮೃತ್ಯು ಭಯವೂ ಇಲ್ಲ ಜಾತಿ ಬೇಧವು ಇಲ್ಲ. ತಂದೆ ತಾಯಿ ಜೊತೆಗೆ ಹುಟ್ಟು ಕೂಡ ಇಲ್ಲ. ಗುರು ಶಿಷ್ಯ ಬಂಧು ಬಳಗವಿಲ್ಲದ, ನಾನು ಮಂಗಳಕರನಾದ (ಶಿವ) ಚಿದಾನಂದ ರೂಪ)

ಅಹಂ ನಿರ್ವಿಕಲ್ಪೋ ನಿರಾಕಾರ ರೂಪೋ, ವಿಭುತ್ವಾಚ ಸರ್ವತ್ರ ಸರ್ವೇನ್ದ್ರಿಯಾಣಾಮ್ | ನ ಚಾ ಸಂಗತ ನೈವ ಮುಕ್ತಿರ್ನ ಮೇಯಃ, ಚಿದಾನಂದರೂಪಃ ಶಿವೋಹಂ ಶಿವೋಹಂ ||

(ನಾನು ನಿರ್ಗುಣ ನಿರಾಕಾರಿ, ಸರ್ವಾಂತರ್ಯಾಮಿ, ಬಂಧಿಯೂ ಅಲ್ಲದ ಮುಕ್ತಿಯು ಅಲ್ಲದ, ನಾನು ಮಂಗಳಕರನಾದ (ಶಿವ) ಚಿದಾನಂದ ರೂಪ)

‘ಅದ್ವೈತ’ವೇದಾಂತದ ಸಕಲ ತಾತ್ಪರ್ಯವೂ ಈ ಸ್ಲೋಕಗಳಲ್ಲಿಯೇ ಇವೆ. ಈ ಸ್ಲೋಕಗಳನ್ನು ಕೇಳಿದ ಯಾರೇ ಆದರೂ ತಿಂತನೆಗೆ ಒಳಗಾಗುವುದು ನಿಶ್ಚಿತ.

ಇಂದಿನ ಯುಗದಲ್ಲಿಯೂ ಅದೂ ಪಾಶ್ಚಿಮಾತ್ಯ ವಿಜ್ಞಾನಿಗಳು ಪ್ರತಿಪಾಧಿಸಿರುವ ಹಲವಾರು ವೈಜಾನಿಕ ಅನ್ವೇಷಣೆಗಳೂ ಅದ್ವೈತಸಾರವನ್ನು ಎತ್ತಿ ಹಿಡಿಯುತ್ತವೆ.

ಉದಾಹರಣೆಗೆ;

Mr. Neils Bohr ತಮ್ಮ atomic structure and quantum theory ಗೆ ಸಂಭಂದ ಪಟ್ಟ ಸಂಶೋಧನೆಗಳಿಗಾಗಿ 1922 ರಲ್ಲಿ ನೊಬೆಲ್ ಪಡೆದ ವಿಜ್ಞಾನಿ 'Reality is merely an illusion' 'ಜಗತ್ತು ಮಿಥ್ಯ' ಎಂಬ ವಾದವನ್ನು ಮುಂದಿಟ್ಟು ಹಲವರು ಹುಬ್ಬೇರಿಸುವಂತೆ ಮಾಡಿದ್ದಾರೆ.

ಗ್ಯಾಲಕ್ಸಿಗಳಿಂದ ಹಿಡಿದು ಕಣ್ಣಿಗೆ ಕಾಣುವ ಯಾವ ವಸ್ತುಗಳನ್ನು ತೆಗೆದುಕೊಂಡು ವಿಭಾಗಿಸುತ್ತಾ ಹೋದರೂ ಕೊನೆಗೆ ಸಿಗುವುದು ಅಣುಗಳು, ಜಗತ್ತಿನ ಸಲಕ ಚರಾಚರ ವಸ್ತುಗಳೂ ಮಾಡಲಪಟ್ಟಿದ್ದು ಅದೇ ಅಣುಗಳಿಂದ, ಅಂದರೆ ಸಕಲ ವಸ್ತುಗಳ ಚೈತನ್ಯ ಸ್ವರೂಪವೂ ಒಂದೆ ಭೇದವಿಲ್ಲದ ಅಣುಗಳು. ಹಾಗಿದ್ದ ಮೇಲೆ ಬೇಧವೆಲ್ಲಿಂದ? ದ್ವೈತವೆಲ್ಲಿಂದ? ಹಾಗಾಗಿಯೇ ವಿಜ್ಞಾನವೂ

“ಸರ್ವಂಖಲ್ಪಿದಂ ಬ್ರಹ್ಮ”,

“ಅಹಂಬ್ರಹ್ಮಾಸ್ಮಿ”,

“ತತ್ತ್ವಮಸಿ”

ಮುಂತಾದ ತತ್ವಗಳನ್ನು ಒಪ್ಪಿದ್ದು. ಭೂಮಿಯ ಹುಟ್ಟಿನಿಂದ ಹಿಡಿದು ಇಂದಿನವರೆಗೆ ಯಾವುದೇ ಬದಲಾವಣೆಗಳು ಕಂಡರೂ ಅದು ಕೇವಲ ಮೇಲ್ನೋಟಕ್ಕೆ ಮಾತ್ರ! ನಷಿಸಿದ ಡೈನಾಸಾರ್ಗಳು ಉಸಿರಾಡಿ ಬಿಟ್ಟ ಗಾಳಿಯನ್ನೇ ನಾವೂ ಉಸಿರಾಡುತ್ತಿದ್ದೇವೆ! ವರ್ಷಗಳ ಹಿಂದೆ ಕುಡಿದು ವಿಸರ್ಜಿಸಿದ ನೀರನ್ನೇ ಇಂದು ಪುನಃ ಕುಡಿಯುತ್ತೇವೆ! ಅವುಗಳ ದೇಹಗಳು ನಿರ್ಮಿತವಾದ ಅಣುಗಳಿಂದಲೇ ನಮ್ಮ ದೇಹಗಳೂ ನಿರ್ಮಿತವಾಗಿವೆ, ಹಲವಾರು ವರ್ಷಗಳ ಹಿಂದೆ ನನ್ನ ದೇಹದಲ್ಲಿದ್ದ ಅಣುಗಳು ಇಂದು ನಿಮ್ಮ ದೇಹಗಳಲ್ಲಿವೆ! ನಮ್ಮ ತಾತ ಮುತ್ತಾತನ ದೇಹದ ಅಣುಗಳೂ ನನ್ನಲ್ಲಿ, ನಿಮ್ಮಲ್ಲಿಯೂ ಇರಬಹುದು! ಹೀಗಿರುವಾಗ ಎಲ್ಲಿಯ ಜಾತಿ, ಎಲ್ಲಿಯ ಕುಲ, ಎಲ್ಲಿಯ ಬೇಧ!, ಹಾಗಾಗಿಯೇ ಆದಿಶಂಕರರು ಚಾಂಡಾಲನನ್ನೂ ಗುರು ಎಂದು ಕರೆದು ಕಾಲಿಗೆ ಎರವಿದ್ದು.

ಇದರಿಂದಾಗಿಯೇ ಆದಿಶಂಕರರ 'ಅದ್ವೈತ' ತತ್ವವು ನಿತ್ಯ-ಸತ್ಯವಾಗಿ ಆಧುನಿಕ ಯುಗದಲ್ಲಿಯೂ ಜೀವಂತವಾಗಿರುವುದು.

-ಜಿತೋಸ್ಮಿ Photo Credit: deviantart

About the Author

ಹೆಸರು:ಶ್ರೀ ಕೆ ಎಸ್ ಸತ್ಯನಾರಾಯಣ.

▪ಶ್ರೀ ಕೆ ಎಸ್ ಸತ್ಯನಾರಾಯಣ ಇವರು ಮೂಲತಃ ಹೊನ್ನಾವರ ನಿವಾಸಿಯಾಗಿದ್ದು ಪ್ರಸ್ತುತ ಉಡುಪಿಯಲ್ಲಿ ವಾಸ್ತವ್ಯ ಹೂಡಿದ್ದಾರೆ. ಮೂಲ್ಕಿ ವಿಜಯ ಕಾಲೇಜಿನಲ್ಲಿ B.C.A ಪದವಿ ವ್ಯಾಸಾಂಗವನ್ನು ಪೂರ್ಣಗೊಳಿಸಿ ಇದೀಗ ಸ್ನಾತಕೋತ್ತರ M.C.A ವ್ಯಾಸಾಂಗ ಮಾಡುತ್ತಿದ್ದಾರೆ. ಕಂಪ್ಯೂಟರ್ ತಾಂತ್ರಿಕ ವಿಷಯದಲ್ಲಿ ಹೊಸ ಹೊಸ ಪರೀಕ್ಷೆಗಳನ್ನು ನಡೆಸುವ ಇವರು ಎಡಿಟಿಂಗ್, ಕೋಡಿಂಗ್ ಮುಂತಾದವುಗಳಲ್ಲಿ ಪರಿಣತಿ ಹೊಂದಿದ್ದಾರೆ. ಚಿತ್ರಕಲೆಯಲ್ಲೂ ತನ್ನನ್ನು ತೊಡಗಿಸಿಕೊಂಡಿದ್ದು ಛಾಯಾಗ್ರಹಣದಲ್ಲೂ ಆಸಕ್ತಿ ಹೊಂದಿದವರು. ಸಾಹಿತ್ಯದಲ್ಲಿ ಒಲವು ಬೆಳೆಸಿಕೊಂಡ ಇವರು ಅಂಕಣ ಬರೆಯುವುದಲ್ಲಿ ಅತಿ ಹೆಚ್ಚಿನ ಆಸಕ್ತಿಯನ್ನು ಹೊಂದಿದ್ದಾರೆ. ಇವರ ಲೇಖನ ಬರಹಗಳನ್ನು ನಮ್ಮ ಜಾಲತಾಣದಲ್ಲಿ ಓದಬಹುದು.

ದೂರವಾಣಿ:7760402010

ಮಾನವರು ಸಹೋದರರು

noreply@blogger.com (Durgaprasad Diwana) — Thu, 29 Mar 2018 16:51:00 +0000

ಬೆಳದಿಂಗಳಂತೆ ಮಧು ಶೋಭೆಯಂತೆ ನವ ಬದುಕಿನ ತಾಳಗಳು
ಅನುಭೂತಿಯಿಂದ ಅನುರಾಗವಾಗಿ ಸುಮ ಜೀವನ ಚಲನಗಳು
ಮನಮನವು ಸಹನೆ ತುಂಬಲಿ
ಮತಮತದೆಡೆ ಭೇದ ತೊರೆಯಲಿ
ಕರುಣಾಡಲಿ ಬೇಟೆ ಯಾಕೆರೀ...
ಕೋಮುಗಳು ನಮ್ಮದಲ್ಲರೀ...
ಕರುಣಾಡಿ ಮಣ್ಣು ಭಗವಂತನಾ
ಪುಣ್ಯ ಬಹು ಭೂಮಿಯೇ ಸಿಂಚನಾ (೨)

ಗೆಳೆಯಾ... ಗಳೆಯಾ...
ಕೈಜೋಡಿಸು ಬಾ... ಶಾಂತಿಯ ದೀಪಾ ಬೆಳಗಿಸುವ ಬಾ...
ಮನಮಾನಸದಾ... ನವಭಾವನೆಯಾ...
ಮಧುಶೋಭೆಗಳಾ ತೆರೆಯೋಣಾ ಬಾ(೨)
ಮನದಿಂದ ಬರುತಿಹ ಶ್ವಾಸೋಚ್ಚಾಸವು ಒಂದೇ ನಮಗೆಲ್ಲ...
ನರದಿಂದ ಬರುತಿಹ ರಕ್ತದ ಕಣಗಳು ಕೆಂಪೇ ನಮದೆಲ್ಲಾ...

ಪೂರ್ವಜರಂದು ತೋರಿಸಿದ
ಸಹಬಾಳ್ವೆಯಿಂದ ಬಾಳುವ ಬಾ
ಬಸವಣ್ಣನವರುಗಳು ನುಡಿದಿರುವ ಮಧುನೀತಿಯ ಮಾತನು ನೆನೆಯುವುದು ಬಾ
ಶಾಂತಿಯ ತೋರುವ ಬಾ(೨)
(ಗೆಳೆಯಾ...)

ಭಾರತ ನಮಗದು ತಾಯಿಯ ನಾಡು
ಪರಿಮಳ ಕಸ್ತೂರಿಯ ಗಂಧದ ಬೀಡು
ಗಾಂದಿ ನೆಹರುಗಳು ಸಾರಿದ ನಾಡು
ಕನ್ಯಕುಮಾರಿಯಿಂದ ಕಾಶ್ಮೀರ ನೋಡು(೨)
ಕಮನವು ಸಂಕಲನಕೆ ಸುಮವೂ
ಜಗದಲ್ಲಿಯೆ ಅಂದದ ಸುಮವೂ
ಹಲವಿಧ ಭಾಷೆಯ ತವರೂರು
ಅವುನಮ್ಮ ತೀರದ ಚೆಲುವುಗಳು
ಶಾಂತಿಯ ಗೋಪುರವು(೨)
(ಗೆಳೆಯಾ...)

-ನಲ್ಮಿಡಿ ಚಾರ್ಮಾಡಿ

Photo Credit: kannadadindima.wordpress.com

About the Author

ಹೆಸರು : ಮಹಮ್ಮದ್ ನೌಶಾದ್
▪ಕಾವ್ಯನಾಮ: ನಲ್ಮಿಡಿ
ಊರು: ಚಾರ್ಮಾಡಿ

ಕಾಲಗರ್ಭ

noreply@blogger.com (Durgaprasad Diwana) — Sun, 25 Mar 2018 15:35:00 +0000

ಎಲ್ಲ ಕಹಿ ಘಟನೆಗಳೂ ಕಾಲ
ಗರ್ಭದೊಳಗಡಗಿ ಸಹಜತೆಯನ್ನು ಮರೆತಂತೆ
ಕಾಣುತ್ತಿವೆ.
ಆಗಿರುವ ಘಟನೆಗಳಿಗೆ ಕಾಲವೇ ಸಾಕ್ಷಿ ಎಂಬಂತೆ ಉತ್ತರಕ್ಕಾಗಿ ಕಾಲವೂ ಕೂಡ ಕಾಯುತ್ತಿದೆ.
ಉಸಿರಲ್ಲು ಉಸಿರಾಗಿ ಕಾಯುತಿದ್ದವರೆಲ್ಲ ಉಸಿರನ್ನೇ
ಕೊಂದು ನಿಂತಂತನಿಸುತ್ತಿದೆ.
ಉಸಿರ ಹಿಡಿವ ಕೆಲಸವೂ
ನನ್ನಿಂದೆನ್ನುವುದಲ್ಲವೆಂಬುವುದು ಮನುಜಗೆ ಗೊತ್ತಿಲ್ಲವೆಂದನಿಸುತ್ತಿದೆ.
ಘಟನೆಗಳ ಮಹಾ ಪೂರ ನಮ್ಮೊಳಗಡಗಿ ನಾನು ನೀನೆಂಬ ನನದೆಂಬ ಭೇದ ತೋರುತ್ತಿದೆ.
ಸಾವೇ ಸಾಕ್ಷಿಯಾಗಿ ಕಾಯ್ದು
ಕುಳಿತಿರುವಾಗ ನನ್ನೆದೆಯು
ನಿನ್ನೆದೆಯು ಯಾಕಿಹುದು ಎನ್ನುತ್ತಿದೆ.
ನಾನಿಲ್ಲದಿದ್ದರೂ ನೀನಿರುವೆಯಲ್ಲ ಎಂಬುವುದೇ
ಈ ನಾಟಕದಂತ್ಯವೆಂದು ಹೇಳುತ್ತಿದೆ.
ನಾನು ನಾನೆಂಬ ಮೋಹವಳಿಯದೆ ಇಲ್ಲಿ ಯಾರಿಗಾರಿಲ್ಲವೆಂದು ತೋರುತ್ತಿದೆ.
ಸಾವೆಂಬುದು ಸಹಜ ಸಾವಲ್ಲವದು ಅಹಂಕಾರದಳಿವಿನಾ ಸಾವೆಂದು ಅನಿಸುತ್ತಿದೆ.
ಅಹಂಕಾರವಡಗಿದ ಗರ್ಭದೊಳು ಅದಾವ ಸಾವು
ಹತ್ತಿರ ಬಂದರೂ ಅದು
ಸಾವಲ್ಲವರಿವೆಂದು ಸಾಗುತ್ತಿದೆ.

-ಶಾಂತ ಶಕುಂತಲಾ ಕುಂಟಿನಿ

Photo Credit: fizd.com

About the Author

ಹೆಸರು : ಶ್ರೀಮತಿ ಶಾಂತ ಕುಂಟಿನಿ
▪ಶ್ರೀಮತಿ ಶಾಂತ ಕುಂಟಿನಿಯವರು ಪುತ್ತೂರಿನವರು. ಸಾಹಿತಿ, ಕವಯಿತ್ರಿಯಾಗಿ ತನ್ನನ್ನು ತಾನು ತೊಡಗಿಸಿಕೊಂಡ ಇವರು ತಮ್ಮದೇ ಆದ ಕೆಟರಿಂಗ್, ಮದುವೆ ಹಾಲ್ ಹಾಗೂ ಸಭಾಭವನಗಳನ್ನು ಹೊಂದಿದ್ದಾರೆ. ಅನೇಕ ಕವಿಗೋಷ್ಠಿಗಳಲ್ಲಿ ಭಾಗವಹಿಸಿರುವ ಇವರು ಪ್ರಸ್ತುತ 'ಪುತ್ತೂರು ಸಾಹಿತ್ಯ ವೇದಿಕೆ'ಯ ಕಾರ್ಯದರ್ಶಿಯಾಗಿರುತ್ತಾರೆ. ಸತ್ಯ ಶಾಂತ ಪ್ರೊಡಕ್ಷನ್ಸ್ ಎಂಬ ಯೂಟ್ಯೂಬ್ ಚಾನೆಲ್ ಹೊಂದಿದ್ದು ಈಗಾಗಲೇ ಇವರ "ಜೈ ಭಾರತ", "ಜೈ ಗೋಮಾತಾ", "ಕನ್ನಡದ ರಾಜ್ಯೋತ್ಸವ ನಮ್ಮದಮ್ಮ" ಎಂಬ 3 ಹಾಡುಗಳು ಅನಾವರಣಗೊಂಡಿದೆ.

ಪ್ರಕಟಗೊಂಡ ಕೃತಿಗಳು:
೧.ಸತ್ಯ ಶೋಧನೆ
೨.ಸಾಕ್ಷಾತ್ಕಾರ
೩.ಸಂಸಾರವನ್ನು(ಸಂಸಾರ ಅನ್ನೋ)ತೆರೆ
೪.ಸಮರ್ಪಣೆ
೫.ಸೂಕ್ಷ್ಮ ದೃಷ್ಟಿ

ಯುಗದ, ಆದಿಯ ಹಿಂದೆ ಮುಂದೆ

noreply@blogger.com (Durgaprasad Diwana) — Mon, 19 Mar 2018 17:14:00 +0000

ಯುಗದ ಆದಿಗೆ
ಸ್ವಾಗತ ಬಯಸಿ
ಸದ್ದಿಲ್ಲದೆ ಸುರಿದಿದೆ ಸೋನೆ
ಧರೆಯ ದಗೆ ನೀಗಿಸಿ
ಮಣ್ಣಿನ ಪರಿಮಳವ
ಮೂಗಿಗೆ ವರೆಸಿ
ಧೂಳು ಹಿಡಿದ ನೆಲಕೆ
ಚಿಮು,ಚಿಮು ಹನಿಸಿಂಪಡಿಸಿ,
ಉಗಾದಿಗೆ ಉಡುಗೊರೆ ನೀಡಿದೆ

ಉಗಾದಿಗೆ,ಗಾದಿ ಹಾಸಿ
ಬರಮಾಡಿಕೊಂಡಿದೆ
ಸಕಲ ಜೀವರಾಶಿ!
ತೆಂಗು,ಬಾಳೆ,ಅಡಿಕೆ
ಪೂಜೆಗೊಂದು ಮಡಿಕೆ..
ಮಾವು, ಬೇವು ಬೆಲ್ಲ
ಬಿಸಿ ನೀರು , ಎಣ್ಣೆ ಸ್ನಾನ
ಬಯಸಿದೆ ಬಿಗಿದ ಮನ!
ಹೋಳಿಗೆ ತುಪ್ಪ,

ಕುರು, ಕುರು ಸಂಡಿಗೆ
ಹೂಸ ಉಡುಗೆ ತೊಡುಗೆ
ಹಸುಳೆಯು ಬಯಸಿದೆ
ಚಿನ್ನದ ಬಳೆಗಳು...
ದೂರದ ಊರಿನ
ಓರಗಿತ್ತಿಯರು,
ಆಗಮಿಸುವರು
ಹೂಸ ಮನ್ವಂತರದ
ಮೊದಲ ಹಬ್ಬಕೆ

ಹಿರಿಯರು ಮಾಡಿದ
ಹಬ್ಬದ ಹಿಂದೆ,
ಬಂಧ ಬೆಸೆಯುವ ಕಾರಣವೊಂದಿದೆ!
ತಿಳಿದವ ಜಾಣ,ಅರಿಯದವ ಕೋಣ
ಸುಮ್ಮನೆ ದುಡಿದು
ಮಡಿಯುವಿರೇಕೆ?
ಇರುವಾಗ ಕೂಡಿ ಉಂಡು
ನಕ್ಕು ನಲಿಯಬೇಕೆ?

ಕೂಡಲ, ಸೇರಲು
ಕಾರಣವೊಂದಿರಬೇಕು
ಹಬ್ಬ,ಹರಿದಿನ
ಜಾತ್ರೆ ಉತ್ಸವ
ತಿಂದುಡಾಡಲು
ಸಂಬಂಧ ಉಳಿಸಲು
ಉಪಾಯ ಕಲ್ಪಿಸಿ
ಮರೆಯಾದವರು!
ಪೂರ್ವದ ಪುಣ್ಯವ ಹಬ್ಬದಲಿ ಹಂಚಿ,
ಯುಗದ ಆದಿಗೆ ನಾಂದಿ ಬರೆದವರು....

-ಚನಬಸಪ್ಪ ಚೌಗಲಾ
(ವಿಶ್ವಾರಾಧ್ಯ ಪ್ರಿಯ)

Photo Credit: prajavani.net

About the Author

ಹೆಸರು : ಚನಬಸಪ್ಪ ಚೌಗಲಾ
▪ಅಧ್ಯಕ್ಷರು
ಸೃಜನಶೀಲ ಕನ್ನಡ ಸಾಹಿತ್ಯ ಬಳಗ
ತಾಲೂಕು ಘಟಕ ಹುಕ್ಕೇರಿ
ಮೊ: 08867665044

ಹನಿಗವನ-ಮೊಬೈಲು ಆಗಬೇಕಿತ್ತು

noreply@blogger.com (Durgaprasad Diwana) — Fri, 16 Mar 2018 09:41:00 +0000

ನನ್ನವರಿಗೆ
ತಿಂಡಿ ತಿನ್ನುವಾಗ
ಊಟ ಮಾಡುವಾಗಲೂ
ಅದರೊಂದಿಗೇ ಮಾತು
ಮಾತು...
ಮಾತು...
ಹೇಳುವೆ ಆಗ, ನಾನೂ ಮೊಬೈಲು ಆಗಬೇಕಿತ್ತು!
ನಿಮ್ಮ ಕಿಸೆಯೊಳಗೆ,
ಕೈಯೊಳಗೆ
ಮತ್ತು ಕಿವಿಯ ಬಳಿ
ಇರಬಹುದಿತ್ತು
ಯಾವತ್ತೂ!!

-ಶ್ರೀಮತಿ ಮಲ್ಲಿಕಾ ಜೆ. ರೈ

Photo Credit: clipart-library.com

About the Author

ಹೆಸರು : ಶ್ರೀಮತಿ ಮಲ್ಲಿಕಾ ಜೆ. ರೈ
▪ಶ್ರೀಮತಿ ಮಲ್ಲಿಕಾ ಜೆ. ರೈ ಇವರು ಪತ್ತೂರಿನ ಗುಂಡ್ಯಡ್ಕ ನಿವಾಸಿಯಾಗಿದ್ದು ಎಂ.ಕಾಮ್ ಪದವೀಧರೆಯಾಗಿದ್ದಾರೆ. ಕವಯಿತ್ರಿ, ಹವ್ಯಾಸಿ ಲೇಖಕಿಯಾಗಿರುವ ಇವರು ಪುತ್ತೂರು ತಾಲ್ಲೂಕು ಚುಟುಕು ಸಾಹಿತ್ಯ ಪರಿಷತ್ತಿನ ಹಾಗೂ ಸಿರಿಗ್ನಡ (ಮಹಿಳಾ)ವೇದಿಕೆಯ ಅಧ್ಯಕ್ಷರಾಗಿರುತ್ತಾರೆ. ಜೂನಿಯರ್ ಚೇಂಬರ್ ಆಫ್ ಇಂಟರ್ನ್ಯಾಶನಲ್ ಸೆನೆಟರ್(ಜೆ.ಸಿ.ಐ), ಪುತ್ತೂರು ಜೆ.ಸಿ.ಐ ಹಾಗೂ ಪುತ್ತೂರಿನ ಶ್ರೀ ರಾಮಕೃಷ್ಣ ಪ್ರೌಢಶಾಲೆಯ ಸದಸ್ಯರಾಗಿರುವ ಇವರು ಹಲವಾರು ಲೇಖನಗಳು, ಚುಟುಕುಗಳು ಹಾಗೂ ಕವಿತೆಗಳನ್ನು ಬರೆದಿರುತ್ತಾರೆ.

ಕಣ್ಣಾಗಬಲ್ಲವಳು ಹೆಣ್ಣು

noreply@blogger.com (Durgaprasad Diwana) — Wed, 07 Mar 2018 19:11:00 +0000

ಹೆಣ್ಣು ಎಲ್ಲದಕ್ಕೂ ಕಣ್ಣಾಗಬಲ್ಲವಳು
ತನ್ನ ಭಾವನೆಗಳನ್ನು ಬದಿಗೊತ್ತಿ ನಿಂತು
ತನ್ನವರ ಮನದಿಂಗಿತಕ್ಕೆ ತನುವಾಗಿ
ತಾರೆಯಂದದಿ ಮೆರೆವವಳು ಹೆಣ್ಣು...

ಜನನದಿಂ ಮೊದಲಾಗಿ ಜರೆಯಲ್ಪಟ್ಟು
ಜನಕೆ ಒಳಿತ ಬಯಸಿದರೂ ಒಳಿತಿಲ್ಲ
ಕುಳಿತಲ್ಲೇ ಕೂರುವ ಕಡೆಯುವ ಕಲ್ಲು...
ಬಾಲ್ಯದಲಿ ನೂರಾರು ಕಟ್ಟುಪಾಡುಗಳಿದ್ದು
ಸ್ಥಾನಮಾನದ ಕೊರಗು ಆಕೆಯನೂ ಬಿಡದು
ನೀ ಹೆಣ್ಣು ನೀ ಹೆಣ್ಣು ಮನೆಯೊಳಗಿನವಳು-
ಎನ್ನುತಿರೆ ಎಲ್ಲಿ ಹೋಯಿತು ಆ ಗಾದೆ?
ಹೆಣ್ಣು ಸಮಾಜದ ಕಣ್ಣು; ಹಣ್ಣಾದಮೇಲೆ ಮಣ್ಣು.

ವರ್ಷ ಏರುತಿರೆ ಏರುವುದು ಹೆತ್ತವರೊಡಲು
ಎಲ್ಲಿ ಆರುವುದೋ ಎಂಬ ಭೀತಿಯ ನೆರಳಲ್ಲಿ
ಸಾಗಿ ಹಾಕುವ ಚಿಂತೆಯೊಳಗೆ ಚಿತ್ತವಿಲ್ಲದೆ-
ಚಾಮರವಾಗುವಳು ಯಾರದೋ ಮನೆಗೆ...
ಸಂಸಾರ ಸಾಗರದ ಸುಳಿಯೊಳಗೆ ಸರಿಯುತ್ತ
ಸರಿ ತಪ್ಪುಗಳ ತಿದ್ದಿ ಪತಿಗೆ ಹೆಗಲೊತ್ತಿದರೂ
ನೋವು ಅವಳಿಗೇ ಸ್ವಂತ ಪ್ರತಿನಿತ್ಯ ಹೊಗೆಯಾರಿ
ಬೂದಿಯೊಳಗಿನ ಕೆಂಡ ಅವಳ ಮನಸು...

ಸಂತಾನದೊಳಗೆ ಮುದ್ದು ಮಕ್ಕಳ ಹೊಂದಿ
ತನ್ನೆಲ್ಲಾ ಕನಸುಗಳ ಅವರ ಮುಖದಲಿ ಕಂಡು
ದಿನನಿತ್ಯ ಪೂಜೆಕೈಂಕರ್ಯಗಳು ನೂರಾರು
ಕಡೆಗವಳು ಕರಿಬೆಕ್ಕು ಮನೆಯ ಹೊಸ್ತಿಲಿಗೆ...
ಮಗುವಾಗಿ ಮಗಳಾಗಿ ಕಡೆಗೆ ಮಕ್ಕಳ ತಾಯಿ
ಪತಿಗೆ ಸರಿ ಸತಿಯಿವಳು ಗೆಳತಿಯಾ ತೆರದಿ
ಎಷ್ಟು ಸವೆದರೂ ತನ್ನ ಜೊತೆಯವರ ಜೊತೆಯಾಗಿ
ಜೀವನದ ಅರ್ಥಕ್ಕೆ ನೆಲೆಕೊಡುವ ಒಡಲು.

ದೇಶವೂ ಹೆಣ್ಣು ಕರುನಾಡು ನಮ್ಮಯ ತಾಯಿ
ಕಾವೇರಿ ನೀರಿನೊಳೂ ಮಾತೃತ್ವದ ಛಾಯೆ
ಎಲ್ಲವನೂ ಪೊರೆವವಳ ಏಕೆ ಜರೆಯುವಿರೇಕೆ
ಜನನಿಯಿಲ್ಲದೆ ಇಲ್ಲ ಜನನ ಮನದೊಳಗಿರಲಿ
ಅವನಿಯಾಗಿಹಳಾಕೆ ಎಂದೂ ಮರೆಯದಿರಿ.

ಇರಲಿ ಗೌರವವು ಬದಿಯ ಗೆಳತಿಯರಲ್ಲಿ
ಪ್ರೀತಿಯಿಂದಲಿ ಸಲಹಿ ಅಕ್ಕತಂಗಿಯರ
ಸಾಂತ್ವನದ ನುಡಿಯಿರಲಿ ಹೆತ್ತಬ್ಬೆಗೊಂದಿಷ್ಟು
ಮನದಲ್ಲಿ ಒಲವಿರಲಿ ಮಡದಿ ಸಲಹುವಳು.
ಸ್ವಚ್ಛವಾಗಿರೆ ಹೃದಯ ಎಲ್ಲರೂ ನಿಮ್ಮವರು....

-ಶ್ರೀಸುತ

■ ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

ಚಿತ್ರ: ಶ್ರೀಮತಿ ಸಹನಾ ವಿರೂಪಾಕ್ಷ

ಯುಗಪುರುಷ ಮಾಸಪತ್ರಿಕೆಯಲ್ಲಿ ಪ್ರಕಟಗೊಂಡ ಕವಿತೆ:

ಗುಣಾಜೆ ಚಂದ್ರಮ ೭ - ಚುಟುಕುಗಳು

noreply@blogger.com (Durgaprasad Diwana) — Tue, 06 Mar 2018 12:15:00 +0000

೧. ಅಡ್ಡಿಗಳ ಎದುರಿಸು
ಬೆಳೆಗಳಿಗೆ ಬಹುವಾಗಿ ರೋಗ ಬಾಧಿಪುದು
ಬೆಳೆಯದ ಕಳೆಗಳಿಗೆ ರೋಗಗಳು ಬರದು
ಇದು ಪ್ರಕೃತಿಯಲಿ ಕಾಣುವ ನಿತ್ಯ ಸತ್ಯ
ಬದುಕಿನ ಸವಾಲುಗಳನೆದುರಿಸುವುದಗತ್ಯ

೨. ಸಾಸಿವೆಯಲ್ಲಿ ಸಾಗರ
ಬಾಲ ಕೃಷ್ಣನ ತೆರೆದ ಪುಟ್ಟ ಬಾಯಿಯಲ್ಲಿ
ತಾಯಿ ಯಶೋದೆ ಕಂಡಳು ಬ್ರಹ್ಮಾಂಡವೆಲ್ಲ
ಆಯ್ದ ಚೊಕ್ಕ ನಾಲ್ಕೇ ನಾಲ್ಕು ಸಾಲುಗಳಲ್ಲಿ
ಸಾಗರದರ್ಥವಿದೆ, ಚುಟುಕ ಸಾಸಿವೆಯಲ್ಲಿ.

೩. ಏಕಾಂಗಿ
ಬಂದದ್ದು ಏಕಾಂಗಿ
ಹೋಗುವುದು ಒಬ್ಬಂಟಿಯಾಗಿ
ನಡುವೆ ಬಂದು ಹೋಗಿ
ಮರೆಯಾಗುವರು, ಚಿಂತೆ, ಏಕಾಗಿ?

೪.ಪರಸ್ಪರ ಗೌರವಿಸಿ
ಕವಿಗೆ ಕವಿ ಮುನಿವಂ
ಮಾತು ಮರೆಯಾಗಿ ಕವಿಗೆ
ಕವಿ ಪ್ರೀತಿ ತೋರುವಂ
ಮೆಚ್ಚುವಂ ಆದರೆ ಹೇಗೆ?

೫. ಗುಬ್ಬಿ ಎಲ್ಲಿ?
ಗುಬ್ಬಿ ಅವಸಾನದಂಚಿನಲ್ಲಿ
ಮರೆಯಾದರೂ ಕಾಣಬಹುದು ಚಿತ್ರದಲ್ಲಿ
ಅಜ್ಜಿಯ ಕಾಗಕ್ಕ ಗುಬ್ಬಕ್ಕ ಕಥೆಯಲ್ಲಿ
ಗುಬ್ಬೀ ... ಗುಬ್ಬೀ ...
ನೀನೆಲ್ಲಿರುವೆ ಸುಬ್ಬೀ ಸುಬ್ಬೀ ?
ನೀನಳಿವಿನಂಚನ್ನು ತಬ್ಬಿ!

೬. ಚಳಿ ಮಾಯ
ಕರಾವಳಿಯಲ್ಲಿ
ನಿನ್ನೆ ಮೊನ್ನೆ ವರೆಗೆ ಇದ್ದ
ಕಚಗುಳಿಯಿಡುತ್ತಿದ್ದ
ಚಳಿ ಎಲ್ಲಿ?
ಬೆವರಿನ ಓಳಿ
ಮಾಮೂಲು ಸುರುವಾಯಿತಿಲ್ಲಿ
ಇದ್ದಿದ್ದರೆ ಚಳಿ
ಇದ್ದೇ ಇದೆಯಲ್ಲ ಕಂಬಳಿ
ಹಾಗೂ ನಲ್ಲೆಯ ಕೆನ್ನೆಯ ಗುಳಿ.

೭. ನನ್ನೊಳಗಿನ ಕತ್ತಲು
ನನ್ನೊಳಗಿನ ಕತ್ತಲನು ನೀಗು ಭಗವಂತ
ಎಂದು ನಾವು ಭಕ್ತಿಯಲಿ ಬೇಡಿದರೆ ಆತ
ತಮದಂಧಕಾರ ಕಳೆದು ದಾರಿ ತೋರಬಲ್ಲ
ಸುವಿಚಾರ ಅನುಸಂಧಾನ ಸವಿಯಬೆಲ್ಲ.

೮. ಗಾರುಡಿಗ
ದ.ರಾ.ಬೇಂದ್ರೆಯವರು ಶಬ್ದಗಳ ಗಾರುಡಿಗ
ಕಾವ್ಯ ಭಕ್ತರು ಇವರ ಸ್ಮರಣೆಯ ಆಗಾಗ
ಮಾಡುವರು, ಅವರು ಕಾವ್ಯ ರಸಋಷಿ
ಜಾನಪದ ಸೊಗಡಿನವರ ಕವನ ಓದಲು ಖುಷಿ.

-ಶ್ರೀ ಗುಣಾಜೆ ರಾಮಚಂದ್ರ ಭಟ್

ಗುಣಾಜೆ ಚಂದ್ರಮ - ೬ ನ್ನು ಓದಲು ಮುಂದಿನ ಲಿಂಕ್ ಗೆ ಭೇಟಿ ನೀಡಿ - ಚಂದ್ರಮ ೬

About the Author

ಹೆಸರು : ಶ್ರೀ ಗುಣಾಜೆ ರಾಮಚಂದ್ರ ಭಟ್.

▪ಶ್ರೀಯುತರು ಮಂಗಳೂರು ವಿಶ್ವವಿದ್ಯಾನಿಲಯದಿಂದ ಕನ್ನಡದಲ್ಲಿ ಎಂ.ಎ ಪದವಿಯನ್ನು ಪಡೆದಿದ್ದು ಮಂಗಳೂರಿನ ಸಂತ ಅಲೋಶಿಯಸ್ ಪ್ರೌಢಶಾಲೆಯಲ್ಲಿ ಕನ್ನಡ ಪ್ರಾಧ್ಯಾಪಕನಾಗಿ ಸೇವೆ ಸಲ್ಲಿಸಿ ಈಗ ಸಾಹಿತ್ಯದೊಂದಿಗೆ ನಿವೃತ್ತಿ ಜೀವನವನ್ನು ನಡೆಸುತ್ತಿದ್ದಾರೆ. ಅದಲ್ಲದೆ ಚುಟುಕ ಸಾಹಿತ್ಯ ಪರಿಷತ್ತು ಹಾಗೂ ಕನ್ನಡ ಸಾಹಿತ್ಯ ಪರಿಷತ್ತಿನ ಸಕ್ರಿಯ ಸದಸ್ಯರಾಗಿರುವ ಇವರು 2014 ರಲ್ಲಿ "ಎದೆಯ ದನಿ" ಎಂಬ ಕವನ ಸಂಕಲನವನ್ನು ಹೊರತಂದಿದ್ದಾರೆ. ಇದರ 300 ಪ್ರತಿಗಳನ್ನು ಕರ್ನಾಟಕ ರಾಜ್ಯ ಗ್ರಂಥಾಲಯ ಇಲಾಖೆಯು ಆಯ್ಕೆ ಮಾಡಿಕೊಂಡುದು ಇವರ ಹಿರಿಮೆಗೊಂದು ಗರಿ. ಅತ್ಯುತ್ತಮ ಶಿಕ್ಷಕರಾಗಿದ್ದ ಇವರು 2014ನೇ ಸಾಲಿನ ದಕ್ಷಿಣಕನ್ನಡ ಜಿಲ್ಲಾ ಮಟ್ಟದ "ಅತ್ಯುತ್ತಮ ಜಿಲ್ಲಾ ಶಿಕ್ಷಕ" ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಸುಮಾರು 50ಕ್ಕೂ ಹೆಚ್ಚು ಕವಿಗೊಷ್ಟಿಗಳಲ್ಲಿ ಭಾಗವಹಿಸಿರುವ ರಾಮಚಂದ್ರ ಭಟ್ಟರು ಕನ್ನಡ, ಹವಿಗನ್ನಡ ಹಾಗೂ ತುಳು ಭಾಷೆಗಳಲ್ಲಿ ತಮ್ಮದೇ ಶೈಲಿಯ ಸಾಹಿತ್ಯ ಸಿಂಚನವನ್ನು ಪಸರಿಸುತ್ತಿದ್ದಾರೆ. ಇದೀಗ ನಮ್ಮ ಈ ಜಾಲದಲ್ಲಿ "ಗುಣಾಜೆ ಚಂದ್ರಮ" ಎಂಬ ಹೆಸರಿನಲ್ಲಿ ಅವರ ಚುಟುಕಗಳನ್ನು ನೀವು ಓದಬಹುದು...

ವಿಳಾಸ:
ಕವನ ಸದನ
ದೇರಳಕಟ್ಟೆ ಅಂಚೆ
ಬೆಲ್ಮ ಗ್ರಾಮ
ಮಂಗಳೂರು ತಾಲೂಕು
ದ.ಕ 575018
ದೂರವಾಣಿ : +919743902522

ಕುಸುಮ ದರ್ಪಣ - ಸಂಚಿಕೆ ೧

noreply@blogger.com (Durgaprasad Diwana) — Sat, 03 Feb 2018 05:31:00 +0000

ಕುಸುಮ ಷಟ್ಪದಿಯ ಲಘುಕವಿತೆಗಳು

ಕುಸುಮ ದರ್ಪಣ ೦೦೧
■ ಸಹಜ

ಮಹಡಿ ಮೂರರ ಮನೆಯ
ಮಹದಾದ ಸಂಸಾರ
ಬಹುವಾಗಿ ನೆಮ್ಮದಿಯ ಹುಡುಕುತಿತ್ತು |
ಬಹಳ ಕಷ್ಟದ ಮನೆಯ
ಸಹಜ ನಿರ್ಮಲ ಚದರ
ಸಿಹಿಯಾಗಿ ಜೀವನವ ಕಳೆಯುತಿತ್ತು ||

ಕುಸುಮ ದರ್ಪಣ ೦೦೨
■ ಮತ್ಸರವ ಬಿಡು

ಬಿಡು ನೀನು ಮತ್ಸರವ
ಅಡಿಗಡಿಗೆ ಹಾರುತಲಿ
ಪಡು ತೋಷ ನಮ್ಮವರ ಜಯವ ಕಂಡು |
ಕೊಡು ನೀನು ಪ್ರೋತ್ಸಾಹ
ನುಡಿ ಮಧುರ ಸಲಹಗೆಳ
ನಡೆ ಮುಂದೆ ಎಲ್ಲವರ ಸೇರಿಕೊಂಡು ||

ಕುಸುಮದರ್ಪಣ ೦೦೩
■ ಬಾಳು ಹೀಗೆ

ಡಂಬವನು ಮಾಡದಿರು
ಇಂಬು ಕೊಡದಿರು ನಶೆಗೆ
ಡಿಂಭದಂತೆಯೆ ಬಾಳು ಕಪಟವಿರದೇ |
ನಂಬುಗೆಯ ಮುರಿಯದಿರು
ಜಂಭ ಪಡದಿರು ಜತೆಗೆ
ಗುಂಬ ನೀಡದೆ ಬಾಳು ಗುಂಭವಿರದೇ ||

ಕುಸುಮ ದರ್ಪಣ ೦೦೪
■ ಭಕುತಿ

ದಿನದೊಳಗೆ ನೂರೊಂದು
ಘನಜಪವ ಮಾಡುವಗೆ
ತನುಭಕುತಿಯಿಲ್ಲದೊಡೆ ಫಲವೆಲ್ಲಿದೆ |
ಮನದಿ ಭಕುತಿಯನಿಟ್ಟು
ಜನಿಸಿದೊಡೆ ಭಾವಲಯ
ಘನಫಲವು ಖಚಿತವದು ಮನಶುದ್ಧಿಗೆ ||

ಕುಸುಮ ದರ್ಪಣ ೦೦೫
■ ದೋಚುವವರು

ಜಗದೊಳಗೆ ಮುಗ್ಧತೆಯ
ಅಗೆದಗೆದು ಸೀಳುತಿಹ
ಸುಗುಣರಂತಿರ್ಪರೇ ದೋಚುವವರು |
ದುಗುಡ ದುಮ್ಮಾನಗಳ
ಬಗೆಹರಿಸಲೆಂದೆನುತ
ಮುಗಿವ ಕೈಗಳ ಹಿಡಿದು ಎಳೆಯುವವರು ||

-ಶ್ರೀಸುತ

■ ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

[ಕಠಿಣ ಪದಗಳ ಅರ್ಥ:
ಡಂಬ= ಮೋಸ
ಇಂಬು= ಎಡೆ
ಡಿಂಭ= ಎಳೆಯ ಶಿಶು
ಗುಂಬ= ಸಮಸ್ಯೆ
ಗುಂಭ= ಗುಟ್ಟು]

ಹಾರಿತೇಕೆ ಬಿಳಿ ಹಕ್ಕಿ?

noreply@blogger.com (Durgaprasad Diwana) — Thu, 18 Jan 2018 09:22:00 +0000

ಹಕ್ಕಿ ಹಾರುತಿದೆ ಗರಿ ಬಿಚ್ಚಿ
ಶಾಂತಿ ಸಂಕೇತದ ಬಿಳಿ ಹಕ್ಕಿ
ಬುವಿಯ ಬಂಧ ತೊರೆದು
ಇರದಿರಲಿಲ್ಲಿ ಪ್ರೀತಿ ವಿಶ್ವಾಸ

ಆ ಧರ್ಮ ಈಧರ್ಮ ವೆನುತ
ಹೊಡೆತ ಬಡಿತವು ಇಲ್ಲಿ ನಿತ್ಯ
ಸ್ವಾರ್ಥ ಭೋಗ ಲಾಲಸೆಗಳಲಿ
ಶಾಂತಿಗೆ ನೆಲೆಯಿಲ್ಲವಿದು ಸತ್ಯ.

ರಕ್ತಪಿಪಾಸುಗಳಿವರು ನೆತ್ತರ
ಹೊಳೆಹರಿದರೂ ತೀರದ ದಾಹ
ಅಕ್ಕರೆಯ ಅಂತಃಕರಣ ಒಳಗಿಲ್ಲ
ಬಡಜೀವಗಳಿಗೆ ಬೆಲೆಯೇ ಇಲ್ಲ.

ಮಾಡುವರು ಹತ್ತಾರು ಹೋರಾಟ
ಇದು ಬರಿದೆ ರಾಜಕೀಯ ಗುದ್ದಾಟ
ಅಧಿಕಾರ ಮದತುಂಬಿದ ಹಾರಾಟ
ಸಿಗದ ಸೌಲಭ್ಯಕೆ ರೈತರ ಗೋಳಾಟ.

ಒಳಗೊಳಗೆ ಕಶ್ಮಲವ ತುಂಬುತ
ನಡೆವರು ದುರ್ಗಂಧವ ಬೀರುತ್ತ
ಸ್ನೇಹಸೌಹಾರ್ದ ಎಂದುಸುರುತ್ತ
ಮಾಡುವರು ಕಪಟ ಹೀನ ಕೃತ್ಯ.

ಆಳುವವರ ಮನದಿ ಮಮತೆ
ಆತ್ಮಾರ್ಥತೆಯು ಇಲ್ಲದಿರಲು
ಹಾರಿಹೋಗುತಿದೆ ಬಿಳಿ ಹಕ್ಕಿ
ನೆಲೆಸಲಾರದೆ ಕಪಟಮನದೊಳಗೆ.

-ಅನ್ನಪೂರ್ಣ, ಬೆಜಪ್ಪೆ

Photo Credit: thomasschoenberger.com

About the Author

ಹೆಸರು: ಶ್ರೀಮತಿ ಅನ್ನಪೂರ್ಣ.

▪ಕಿದೂರು ಸಮೀಪದ ಬೆಜಪ್ಪೆ ನಿವಾಸಿಯಾದ ಶ್ರೀಮತಿ ಅನ್ನಪೂರ್ಣ ಇವರು ಸಾಹಿತ್ಯ ಪ್ರಿಯರಾಗಿದ್ದು ಬರವಣಿಗೆಯಲ್ಲಿ ತನ್ನನ್ನು ತಾನು ತೊಡಗಿಸಿಕೊಂಡಿದ್ದಾರೆ. ಹವ್ಯಾಸಿ ಬರಹಗಾರರಾಗಿ ಅನೇಕ ಕವಿತೆಗಳನ್ನು ಬರೆದಿದ್ದು ಅವರ ಬರಹಗಳನ್ನು ನಮ್ಮ ಜಾಲದಲ್ಲಿ ಓದಬಹುದು.

ಗೆಲ್ಲಬಹುದೇ?

noreply@blogger.com (Durgaprasad Diwana) — Sun, 22 Oct 2017 12:44:00 +0000

ಪ್ರೇಮಗೀತೆ ೩

ನಿನ್ನ ನೋಡಿದಂದೇ ನಾನು
ಅಂದುಕೊಂಡೆ...
ನೀನೇ ಗೆಲ್ಲುವೆಯೆಂದು
ಗೆಲುವಿನೊಳಗೆ ನಾ ಸೋಲುವೆ
ಸೋತ ಮೇಲೆ ನಾ
ನಿನ್ನ ಗೆಲ್ಲಬಹುದೇ?

ಕಣ್ಣು ಮಾತಾಡದೆ
ರೆಪ್ಪೆ ತೆರದೇ ಇತ್ತು...
ಕಿವಿಯು ಕಿವುಡಾಗಿ
ಕಣ್ಣಿಗೇ ಕೆಲಸ ಕೊಟ್ಟಿತ್ತು
ಬಾಯಿಯೂ ಮೌನತಳೆದು
ಮಾತಾಡದೇ ಇದ್ದಾಗ
ಅಂದುಕೊಂಡೆ
ನೀನೇ ಗೆಲ್ಲುವೆಯೆಂದು...

ಅಕ್ಷರ ಪೋಣಿಸುತ್ತಿದ್ದೆ
ನೀ ಸಿಗುವ ಮೊದಲು...
ಕವಿಯಾದೆ ಪದಗಳನು
ಜೋಡಿಸುತ್ತಾ...
ಸವಿಯಾದ ನಗುವಿನಲ್ಲಿ
ಸಾಲುಗಳ ಮೇಲೆ
ನೀ ಬಂದು ಕುಳಿತಾಗ
ಅಂದುಕೊಂಡೆ
ನೀನೇ ಗೆಲ್ಲುವೆಯೆಂದು...

ಎಷ್ಟು ದಿನ ನೀನೇ ಗೆಲ್ಲುವೇ?
ನನ್ನನ್ನೂ ಒಂದು ಬಾರಿ ಗೆಲ್ಲಿಸು
ಆ ಗೆಲುವಿನೊಳಗೆ ನಿನಗೆ
ಸೋಲಿಲ್ಲದ ಸೆತುವೆಯನ್ನು
ಕಟ್ಟಿಕೊಡುವೆ...
ಪ್ರೀತಿಯ ಕಲ್ಲುಗಳಿಂದ
ಅದು ನಿನ್ನ ಗೆಲುವು...
ನನ್ನೊಳಗಿನ ನಿನ್ನ ಗೆಲುವು!

ನನಗೂ ಗೆಲ್ಲಬೇಕೆಂಬ
ಬಯಕೆ
ಪ್ರೀತಿಯ ಸಾಗರವನ್ನು
ಪ್ರೀತಿಯಿಂದ
ಹೇಳು ಗೆಲ್ಲಬಹುದೇ?

ಗೆಲ್ಲಬಹುದೇ ಒಂದು ಬಾರಿ?
ಅದು ನಿನ್ನದೂ ಗೆಲುವು
ಶಾಶ್ವತ ನಿನ್ನದು, ನನ್ನದೂ.
ಕನಸುಗಳನ್ನು ಹೊಸೆದು
ನನಸು ಮಾಡುವ ಬಯಕೆ
ಗೆಳತಿ... ಹೇಳು
ಏನೆಂದುಕೊಳ್ಳಲಿ?
ಸೋಲಲೇ ಮತ್ತೊಮ್ಮೆ?
ಶಾಶ್ವತವಾಗಿ!

-ಶ್ರೀಸುತ

Photo Credit: whoa.in

ಪ್ರೇಮಗೀತೆ ೨ - "ಕಣ್ಣು ಮಾತಾಡಿದೆ" ಹಾಡನ್ನು ಓದಲು ಪ್ರೇಮಗೀತೆ ೨ ನ್ನು ಕ್ಲಿಕ್ ಮಾಡಿ.

ಗುಣಾಜೆ ಚಂದ್ರಮ ೬ - ಚುಟುಕುಗಳು

noreply@blogger.com (Durgaprasad Diwana) — Sat, 21 Oct 2017 05:08:00 +0000

೧. ಕೊಂದ ಪಾಪ ತಿಂದು ಪರಿಹಾರ
ಜೀವ ಕೊಡಲರಿಯದವಗೆ ಕೊಲುವ
ಸಾವ ಅನ್ಯರಿಗೆ ತಂದು ರಕ್ತ ಚೆಲ್ಲುವ
ಹಕ್ಕಿಲ್ಲ, ಇದು ಸಲ್ಲ, ಕೊಂದವನ ಪಾಪ
ಅವನು ತಿಂದೇ ಸಿದ್ಧ, ಗೊತ್ತಿಲ್ಲವಗೆ ಪಾಪ!

೨. ಭಾಗವತರಿಗೆ ಶ್ರದ್ಧಾಂಜಲಿ
ಭಾಗವತ ಶ್ರೀಧರರಾಯರ ದೇಹವು
ಅಳಿದು ಹೋದರೂ ಅವರ ಕಂಚಿನ ಕಂಠವು
ಉಳಿದು ಕೇಳುವುದು ಶತಶತಮಾನ ಕಾಲ
ಅವರ ಸವಿ ನೆನಹು ತಂಪನೀವ ತರು ಆಲ.

೩. ಕವಿಗೆ ಪ್ರೀತಿಯ ಕರೆ
ಪ್ರಶಸ್ತಿ ಪ್ರಶಂಸೆಗಾಗಿ ಕವನ ಬರೆಯದಿರು
ಎಚ್ಚರದಿ ಮನಮೆಚ್ಚುವಂದದಿ ಬರೆಯುತಿರು
ನಿನ್ನ ರಚನೆಯಲಿದ್ದರೆ ಕಸುವದು ಚಿರಸ್ಥಾಯಿ
ಇಲ್ಲದಿರೆ ಕಳಚಿ ಉದುರುವ ಹೀಚು ಕಾಯಿ!

೪. ಹನಿಗವನ ಗೋಷ್ಠಿ
ಎಲ್ಲ ಕವಿಗಳು ಓದಿದರು ಅಂದು
ತಮ್ಮ ತಮ್ಮ ಮೂರು ಮೂರು ಹನಿ
ಕವನಗಳನ್ನು, ಉತ್ಸಾಹದಿಂದ ಬಂದು
ಮುಂದೆ ಕೂತಿದ್ದವರ ಮುಖದಲ್ಲಿ ಮೂಡಿತ್ತು ಹನಿ

೫. ಭತ್ತೆ-ಲತ್ತೆ

ಸರ್ಕಾರಿ ನೌಕರಿಗೆ ಸೇರಿದರೆ
ಬೆಲೆ ಏರಿಕೆ ಹೆಚ್ಚಾದರೆ
ಸಿಗುವುದು ತುಟ್ಟಿ ಭತ್ತೆ
ಕತ್ತೆಯ ಹಿಂದೆ ಹೋದರೆ
ಅದನು ಕೆಣಕಿದರೆ
ಕೂಡಲೇ ಸಿಗುವುದು ಲತ್ತೆ!

-ಗುಣಾಜೆ ರಾಮಚಂದ್ರ ಭಟ್

ಗುಣಾಜೆ ಚಂದ್ರಮ - ೫ ನ್ನು ಓದಲು ಮುಂದಿನ ಲಿಂಕ್ ಗೆ ಭೇಟಿ ನೀಡಿ - ಚಂದ್ರಮ ೫

About the Author

ಹೆಸರು : ಶ್ರೀ ಗುಣಾಜೆ ರಾಮಚಂದ್ರ ಭಟ್.

ಹೃದಯವೇ ಮಂದಿರ?

noreply@blogger.com (Durgaprasad Diwana) — Tue, 17 Oct 2017 06:43:00 +0000

ಹೃದಯದೊಳಗಿಂದ ಅಂದು
ಚಿಮ್ಮುತಿತ್ತು ಚಿಟ್ಟೆಗಳ ಚೆಂಡು
ಹಾರಿ ಹೋಗಿ ಹರಡುತಿತ್ತು
ಹಕ್ಕಿಗಳ ಹಿಂಡು...
ಚಿಗುರಿ ನಿಲ್ಲುತಿತ್ತು ದಿಟನೆ
ಹೂವು ಪಚ್ಚೆ ಹಸಿರು
ಬೇರು ಆಳದಲ್ಲೂರಿತ್ತು
ಸಂ'ಬಂಧನ'ದ ಬದುಕು...
ಮರೀಚಿಕೆ ಅದು ಮರೀಚಿಕೆ!!!
ಈಗ ಚಿಮ್ಮುತಿದೆ ಕಂಡಿರಾ...?
ಹೃದಯದಿಂದ ಕ್ರೂರ
ಕ್ರಿಮಿಕೀಟಗಳು...
ಹಾರುತಿದೆ ಹೃದಯದಿಂದ
ಹಸಿದ ವಿಷ ಹೇಯಕೃತ್ಯಗಳು
ಚಿಗುರುತಿದೆ ಚಿಂತೆಯೆಂಬ
ಚಿತೆಯ ಲತೆಯು ಬದುಕಲಿ
ಬೇರು ಗಟ್ಟಿಯಿಲ್ಲ
ಸೂರಿಗೆ ಬಲವಿಲ್ಲ
ಹಾದಿಯೊಳು ಕಂಡ ಕಲ್ಲೊಂದು
ನಾಲ್ವರಿಗೆ ದೇವರಾಗಬಲ್ಲದು
ಉಳಿದವರಿಗಲ್ಲ!!! ಸ್ವಂತದ್ದು.
ಗುಡಿಯೊಳಗಿನ ಮೂರ್ತಿಯು
ಕಾಣತ್ತಾ ಕುಳಿತಿರುವುದು ಅಶಾಂತಿಯನ್ನು
ಬಂದು ಕೈಮುಗಿವ ಕುರುಡರನ್ನಲ್ಲ...
ನಸುನಗುತ್ತಾ ಕುಳಿತ ಮೂರ್ತಿಯು
ಕೇಳುತ್ತಿರುವುದು ಬಸಿರೊಡೆದ ಧ್ವನಿಯನ್ನು
ಗಂಟೆ ಜಾಗಟೆಗಳ ಸದ್ದನ್ನಲ್ಲ!!!
ಶುದ್ಧಭಾವವಿಲ್ಲದೇ ಭಜನೆಯೇಕೆ?
ದೇವನೊಲಿದನಂದು ಭಕ್ತಿಗೆ
ದೇವನಲಿದನಂದು ಭಕ್ತಿಗೆ
ಇಂದು ಅದಾವುದೂ ಇಲ್ಲ... ಒಳಗೆ
ಎಲ್ಲವೂ ಇದೆಯಲ್ಲಾ? ಹೊರಗೆ!!!
ದೇವನಗುತಿರುವ ಇದೆಲ್ಲವನು ಕಂಡು.
ದಿಗಂತದಂತವನ್ನು ಕಾಣಲು
ಸಾಗುತ್ತಿದೆ ಜೀವಸಂಕುಲ...
ಬಳಿಯಿರುವವರು ಯಾರೂ ನಮ್ಮವರಲ್ಲ.
ದಿಗಂತದಲ್ಲಿರುವ ನಮ್ಮವ...
ಅಪರಿಚಿತರ ಗುಂಪಿನೊಳಗಿನ ಬದುಕು
ಯಾರು ಯಾರಿಗೆ ಸಂಬಂಧದ ಬಂಧದೊಳು?
ಹೃದಯವೇ ಮಂದಿರ?
ಭಕ್ತಿಯಿಲ್ಲದ ಹೃದಯದಲ್ಲಿ ಹರಿವ
ಶುದ್ಧರಕ್ತವದು ಬದ್ಧತೆಯಿರದ ಗೂಡಿನೊಳು
ನರಳಿ ಕೆಂಪು ಕಪ್ಪಾಗುತ್ತಿದೆ... ಕತ್ತಲೆಯಾಗುತ್ತಿದೆ.
ಆವಿಯಾಗುವ ಮುನ್ನ ನೀ ಆವಿಯಾಗುವೆ...
ಹೃದಯದೊಳಗಿನ ಮಾತಿದು....
ಮರೀಚಿಕೆ ಇದು ಮರೀಚಿಕೆ!!!

-ಶ್ರೀಸುತ

Photo Credit: Anusha Koundinya

ಸಿದ್ಧರಾಗಿ...

noreply@blogger.com (Durgaprasad Diwana) — Sun, 08 Oct 2017 06:05:00 +0000

ಬದುಕಲು ಕಲಿಯಿರಿ
ಆದರೆ ಸಾವು ಕಾದಿದೆ
ಎಂಬ ಸತ್ಯವ ಮರೆಯದಿರಿ
ಬಾಳಲ್ಲಿ ಒಳಿತ ಸಾಧಿಸಬೇಕಿದೆ

ಕಣ್ಣೆದುರೇ ಸಾವ ಕಂಡರೂ
ತಾನು ಶಾಶ್ವತ ಎಂದು ಭಾವಿಸುವರು
ಮರಣ ಹತ್ತಿರ ಹೊಂಚು ಹಾಕುತಿದೆ
ಇದನರಿತು ಕ್ಷಣ ಕ್ಷಣ ಬಾಳಬೇಕಿದೆ

ಧನಕನಕ ಕೊಂಡೊಯ್ಯಲೇನಿಲ್ಲ
ಉಳಿವುದು ನಮ್ಮ ಸತ್ಸಾಧನೆಗಳೆಲ್ಲ
ಬದುಕು ಕ್ಷಣ ಭಂಗುರ
ಕೆಸುವಿನೆಲೆಯ ಮೇಲಿನ ನೀರ
ನಂಬದಿರು ಮಾನವ ನೀನು
ಎದೆ ನಿಂತಾಗ ನೀರ ಮೇಲಿನ ಮೀನು!

-ಗುಣಾಜೆ ರಾಮಚಂದ್ರ ಭಟ್

Photo Credit: meaningfullife.com

About the Author

ಹೆಸರು : ಶ್ರೀ ಗುಣಾಜೆ ರಾಮಚಂದ್ರ ಭಟ್.

ಅದಲ್ಲದೆ ಚುಟುಕ ಸಾಹಿತ್ಯ ಪರಿಷತ್ತು ಹಾಗೂ ಕನ್ನಡ ಸಾಹಿತ್ಯ ಪರಿಷತ್ತಿನ ಸಕ್ರಿಯ ಸದಸ್ಯರಾಗಿರುವ ಇವರು 2014 ರಲ್ಲಿ "ಎದೆಯ ದನಿ" ಎಂಬ ಕವನ ಸಂಕಲನವನ್ನು ಹೊರತಂದಿದ್ದಾರೆ. ಇದರ 300 ಪ್ರತಿಗಳನ್ನು ಕರ್ನಾಟಕ ರಾಜ್ಯ ಗ್ರಂಥಾಲಯ ಇಲಾಖೆಯು ಆಯ್ಕೆ ಮಾಡಿಕೊಂಡುದು ಇವರ ಹಿರಿಮೆಗೊಂದು ಗರಿ. ಅತ್ಯುತ್ತಮ ಶಿಕ್ಷಕರಾಗಿದ್ದ ಇವರು 2014ನೇ ಸಾಲಿನ ದಕ್ಷಿಣಕನ್ನಡ ಜಿಲ್ಲಾ ಮಟ್ಟದ "ಅತ್ಯುತ್ತಮ ಜಿಲ್ಲಾ ಶಿಕ್ಷಕ" ಪ್ರಶಸ್ತಿಗೆ ಭಾಜನರಾಗಿದ್ದಾರೆ.

ಸುಮಾರು 50ಕ್ಕೂ ಹೆಚ್ಚು ಕವಿಗೊಷ್ಟಿಗಳಲ್ಲಿ ಭಾಗವಹಿಸಿರುವ ರಾಮಚಂದ್ರ ಭಟ್ಟರು ಕನ್ನಡ, ಹವಿಗನ್ನಡ ಹಾಗೂ ತುಳು ಭಾಷೆಗಳಲ್ಲಿ ತಮ್ಮದೇ ಶೈಲಿಯ ಸಾಹಿತ್ಯ ಸಿಂಚನವನ್ನು ಪಸರಿಸುತ್ತಿದ್ದಾರೆ.

ಇದೀಗ ನಮ್ಮ ಈ ಜಾಲದಲ್ಲಿ "ಗುಣಾಜೆ ಚಂದ್ರಮ" ಎಂಬ ಹೆಸರಿನಲ್ಲಿ ಅವರ ಚುಟುಕಗಳನ್ನು ನೀವು ಓದಬಹುದು...

ಚಿಟ್ಟಾಣಿ ಎಂಬ ಯಕ್ಷಮಣಿ...

noreply@blogger.com (Durgaprasad Diwana) — Tue, 03 Oct 2017 19:21:00 +0000

■ ಚಿಟ್ಟಾಣಿ ರಾಮಚಂದ್ರ ಹೆಗಡೆ

ರಂಗದ ನೇಪಥ್ಯಕ್ಕೆ ಹೆಜ್ಜೆ ಹಾಕಿದ ಯಕ್ಷಮಣಿ...

ಹೌದು... ಚಿಟ್ಟಾಣಿ ಎಂಬ ಹೆಸರು ಕೇಳಿದೊಡನೆ ಮನದೊಳಗೆ ಎದ್ದು ಬರುವ ನಗುಮೊಗದ ವ್ಯಕ್ತಿ "ಚಿಟ್ಟಾಣಿ ರಾಮಚಂದ್ರ ಹೆಗಡೆ"ಯವರು. ೧೪ ಸೆಪ್ಟೆಂಬರ್ ೧೯೩೫ ರಂದು ಉತ್ತರಕನ್ನಡ ಜಿಲ್ಲೆಯ ಹೊನ್ನಾವರ ತಾಲ್ಲೂಕಿನಲ್ಲಿ ಶ್ರೀ ಸುಬ್ರಾಯ ಈಶ್ವರ ಹೆಗಡೆ ಹಾಗೂ ಗಣಪಿ ಸುಬ್ರಾಯ ಹೆಗಡೆಯವರಿಗೆ ಮಗನಾಗಿ ಜನಿಸಿದ ಇವರು ತಮ್ಮ ವಿದ್ಯಾಭ್ಯಾಸವನ್ನು ೨ನೇ ತರಗತಿಗೆ ಕೊನೆಗೊಳಿಸಿ ಬಾಹ್ಯ ಲೋಕದ ಅಧ್ಯಯನದಲ್ಲಿ ತಮ್ಮನ್ನು ತೊಡಗಿಸಿಕೊಂಡವರು. ಸಣ್ಣ ವಯಸ್ಸಿನಲ್ಲಿಯೇ ಯಕ್ಷಗಾನ ಅಭಿರುಚಿಯಿದ್ದ ಚಿಟ್ಟಾಣಿಯವರಿಗೆ ಆಗಿನ ಹಿರಿಯ ಕಲಾವಿದರುಗಳೇ ಪ್ರೇರಣೆ. ಮುಂದಕ್ಕೆ ಬಾಳೆಗದ್ದೆ ರಾಮಕೃಷ್ಣ ಭಟ್ಟರಿಂದ ಯಕ್ಷಗಾನದ ಮೂಲಪಾಠವನ್ನರಿತ ಚಿಟ್ಟಾಣಿಯವರು ಕೊಂಡದಕುಳಿ, ಕೆರೆಮನೆ ಮುಂತಾದ ಕಲಾವಿದರುಗಳಿಂದ ಇನ್ನಷ್ಟು ಪ್ರೇರೇಪಣೆಗೊಂಡರು.ಈ ರೀತಿ ಯಕ್ಷಲೋಕಕ್ಕೆ
ಅಂದು ಒಬ್ಬ ಭೀಷಣನ ಪ್ರವೇಷವಾಯಿತು ಎಂದರೆ ತಪ್ಪಾಗಲಾರದು.

(ಚಿತ್ರಕೃಪೆ: ಭಾಗ್ವತ್)

ಚಿಕ್ಕ ಪ್ರಾಯದಲ್ಲೇ ಎಲ್ಲಿಲ್ಲದ ಗಾಂಭೀರ್ಯ ಚುರುಕುನಡೆಯನ್ನು ಹೊಂದಿದ್ದ ಚಿಟ್ಟಾಣಿಯವರು ತಮ್ಮ ೧೪ನೇ ವಯಸ್ಸಿನಲ್ಲಿ ಪ್ರಥಮಬಾರಿ ಶ್ರೀಕೃಷ್ಣ ಪಾರಿಜಾತ ಪ್ರಸಂಗದ ಅಗ್ನಿಯ ಪಾತ್ರವನ್ನು ಮಾಡಿ ರಂಗದಲ್ಲಿ ಸಂಚಲನ ಮೂಡಿಸಿದ್ದರು. ಅಲ್ಲಿಂದ ಹಚ್ಚಿದ ಜ್ವಾಲೆ ಇಂದಿನವರೆಗೂ ಉರಿಯುತ್ತಲೇ ಇತ್ತು ಎಂಬುದು ಅವರ ತೇಜಸ್ಸಿಗೆ ಹಿಡಿದ ಕನ್ನಡಿ. ಗುಂಡಬಾಳ, ಅಮೃತೇಶ್ವರೀ, ಸಾಲಿಗ್ರಾಮ, ಕೊಳಗಿಬೀಸ್, ಮೂರೂರು, ಮೂಡ್ಕಣಿ, ಪೆರ್ಡೂರು, ಇಡಗುಂಜಿ ಮೊದಲಾದ ಬಡಗುತಿಟ್ಟು ಯಕ್ಷಗಾನ ಮೇಳಗಳಲ್ಲಿ ಸುಮಾರು 68 ವರ್ಷಗಳ ಕಾಲ ಸತತ ರಂಗಸೇವೆಯನ್ನು ಮಾಡಿದರು. ಬಡಗುತಿಟ್ಟು ಯಕ್ಷಗಾನ ವಲಯದಲ್ಲಿ ಚಿಟ್ಟಾಣಿಯವರು ಚಿನ್ನದ ಮುಕುಟ. ಅವರ ನಗುವಿಗೆ ಇನ್ನೊಂದು ನಗುವಿನ ಸ್ಪರ್ಧೆಯಿಲ್ಲ. ಅವರ ಪಾದಚಲನೆಯ ಮೀರುವ ಇನ್ನೊಂದು ಚಲನವಲನವಿಲ್ಲ. ಅವರ ಭಾವಾಭಿವ್ಯಕ್ತಿಯ ಹೋಲುವ ಮತ್ತೊಂದು ಭಾವಭಂಗಿಯಿಲ್ಲ. ಒಟ್ಟಿನಲ್ಲಿ ಹೇಳಬೇಕೆಂದರೆ ಅವರ ರಂಗಪಯಣದಲ್ಲಿ ಅವರೆದುರು ಮತ್ತೊಬ್ಬರಿಲ್ಲ. ಅವರ ದುಷ್ಟಬುದ್ಧಿ, ಕೌರವ, ಕೀಚಕ, ರುದ್ರಕೋಪ, ಭಸ್ಮಾಸುರ, ಕಂಸ ಮೊದಲಾದ ಪಾತ್ರಗಳು ರಂಗದಲ್ಲಿ ಪರಕಾಯ ಪ್ರವೇಶ ಪಡೆಯುತ್ತಿದ್ದವು. ತನ್ನ ಇಳಿವಯಸ್ಸಿನಲ್ಲೂ ಭಸ್ಮಾಸುರನಾಗಿ ಮೈಗೆ ಭಸ್ಮ ಹಚ್ಚಿದರೆ ಅದೇ ೨೦ರ ಹರೆಯದ ಚುರುಕುತನ ರಂಗದಲ್ಲಿ ಎದ್ದು ನಿಲ್ಲುತ್ತಿತ್ತು. ಅದೇ ನಗು, ಅದೇ ಭಾವ, ಅದೇ ನೋಟ, ಅದೇ ಅಭಿನಯ.
ಭಾಗವತರ ಪದ್ಯದ ಲಯತಾಳಕ್ಕೆ-ಏರಿಳಿತಕ್ಕೆ ಚೊಕ್ಕದಾಗಿ ಪಾದವಿರಿಸುವ ಮೃದುನಾಟ್ಯ. ಇದರಿಂದಲೇ ಏನೋ... ಚಿಟ್ಟಾಣಿ ಶೈಲಿ ಎಂಬ ಶೈಲಿ ತನ್ನಿಂದ ತಾನೇ ಚಿಗುರೊಡೆಯಿತು.

(೮೦ರ ಹರೆಯದಲ್ಲಿ ದ್ರೋಣಾಚಾರ್ಯರಾಗಿ...

ಚಿತ್ರಕೃಪೆ: ಪ್ರಶಾಂತ್ ಮಲ್ಯಾಡಿ)

ಯಕ್ಷಗಾನದ ರಂಗವ್ಯತ್ಯಾಸದಲ್ಲಿ ಮೊದಲು ಕಾಣಿಸಿಕೊಳ್ಳುವುದು ತೆಂಕು ಹಾಗೂ ಬಡಗು ಎಂಬ ಒಂದೇ ನಾಣ್ಯದ ಎರಡು ಮುಖಗಳು. ಅರ್ಥ ಒಂದೇ ಆದರೂ ಶೈಲಿ ವಿಭಿನ್ನ. ತೆಂಕು ತಿಟ್ಟಿನ ದಿಗ್ಗಜರಲ್ಲಿ ಅನೇಕ ಮಂದಿ ತೆಂಕುಯಕ್ಷನಾಟ್ಯಕ್ಕೆ ತಮ್ಮ ಅತ್ಯಮೂಲ್ಯ ಕೊಡುಗೆಯನ್ನು ಕೊಟ್ಟವರಿದ್ದಾರೆ. ಅದೇ ರೀತಿ ಬಡಗುತಿಟ್ಟಿಗೆ ಮುಖ ಮಾಡಿ ನಿಂತಾಗ ಕೋಟ ಶಿವರಾಮ ಕಾರಂತ, ಕೆರೆಮನೆ ಶಿವರಾಮ ಹೆಗಡೆ, ಕೆರೆಮನೆ ಶಂಭು ಹೆಗಡೆ, ಕುಷ್ಟ ಗಾಣಿಗರು ಮೊದಲಾದವರು ಕಾಣಸಿಗುತ್ತಾರೆ. ಅದೇ ಸಾಲಿನಲ್ಲಿ ಇಂದು ಚಿಟ್ಟಾಣಿಯವರ ಹೆಸರು ತೇಲಲು ಕಾರಣ ಅವರ ಕಲೆಯ ಮೇಲಿನ ಅತೀವ ಪ್ರೀತಿ-ಅಭಿಮಾನ-ಶ್ರದ್ಧೆ ಹಾಗೂ ಭಕ್ತಿ. ತನ್ನ 82ನೇ ಇಳಿ ವಯಸ್ಸಿನಲ್ಲಿಯೂ ಗೆಜ್ಜೆ ಕಟ್ಟಿ ರಂಗವೇರಬೇಕೆಂದರೆ ಸಾಮಾನ್ಯರಿಂದ ಆಗುವಂಥದ್ದಲ್ಲ. ಹಾಗಾಗಿ ಚಿಟ್ಟಾಣಿಯವರು ಒಬ್ಬ ಅಸಾಮಾನ್ಯ ಕಲಾವಿದರಾಗಿದ್ದರು ಎಂಬುವುದರಲ್ಲಿ ಯಾವ ಸಂಶಯವೂ ಇಲ್ಲ. ಅವರ ವಿಶೇಷವಾದಂತಹ ನಾಟ್ಯಪ್ರಕಾರದಿಂದ ಯಕ್ಷಗಾನದ ಸ್ಟೈಲ್ ಕಿಂಗ್ ಎಂದೇ ಪ್ರಖ್ಯಾತರಾದವರು ಚಿಟ್ಟಾಣಿಯವರು.

(ಚಿಟ್ಟಾಣಿ ರಾಮಚಂದ್ರ ಹೆಗಡೆ ಹಾಗೂ ಗುಂಡ್ಮಿಕಾಳಿಂಗ ನಾವಡರು
ಚಿತ್ರಕೃಪೆ: ಶ್ರೀ ಸುದೇಶ್ ಶೆಟ್ಟಿ)

ಚಿಟ್ಟಾಣಿಯವರದು ಚೊಕ್ಕ ಸಂಸಾರ. ಪತ್ನಿ ಸುಶೀಲ ರಾಮಚಂದ್ರ ಹೆಗಡೆ ಹಾಗೂ ಮಕ್ಕಳಾದ ಲಲಿತಾ ಹೆಗಡೆ, ಸುಭ್ರಮಣ್ಯ ಹೆಗಡೆ, ನಾರಾಯಣ ಹೆಗಡೆ ಹಾಗೂ ನರಸಿಂಹ ಹೆಗಡೆಯವರನ್ನು ಕೂಡಿದ ಚೆಂದದ ಮನೆ. ತಮ್ಮ ಕಲಾಸೇವೆಯೊಂದಿಗೆ ಮನೆಯವರ ಪ್ರೋತ್ಸಾಹದ ನುಡಿಯೂ ಸೇರಿದ ಕಾರಣ ಅವರ ಈ ಕಲಾಪಯಣಕ್ಕೆ ಬಲ ಬಂದಿತ್ತು. ಸುಧೀರ್ಘ ಅವಧಿಯ ಕಲಾಸೇವೆಯಲ್ಲಿ ಚಿಟ್ಟಾಣಿಯವರು ಗಳಿಸಿದ ಬರುದು ಸಂಮಾನಗಳು ಸಾವಿರಕ್ಕೂ ಮಿಗಿಲು. ಮೊತ್ತಮೊದಲ ಬಾರಿಗೆ ಯಕ್ಷಗಾನ ಕಲಾವಿದನೊರ್ವ ರಾಷ್ಟ್ರದ ಪ್ರತಿಷ್ಠಿತ "ಪದಶ್ರೀ" ಪ್ರಶಸ್ತಿಗೆ ಭಾಜನರಾದ ಹೆಗ್ಗಳಿಕೆ ಚಿಟ್ಟಾಣಿಯವರದು. ಅದೇ ರೀತಿ ೧೯೯೧ರಲ್ಲಿ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ, ೨೦೦೪ರಲ್ಲಿ ಜನಪದಶ್ರೀ ಅವಾರ್ಡ್, ೨೦೧೩ರಲ್ಲಿ ಕೆರೆಮನೆ ಶಿವರಾಮ ಹೆಗಡೆ ಅವಾರ್ಡ್, ೨೦೦೯ರಲ್ಲಿ ಕರ್ಕಿ ವೆಂಕಟರಮಣ ಶಾಸ್ತ್ರೀ ಅವಾರ್ಡ್ ಹಾಗೂ ಆರ್ಯಭಟ್ ಅಂತರಾಷ್ಟ್ರೀಯ ಪ್ರಶಸ್ತಿಗಳನ್ನು ತಮ್ಮ ಮುಡಿಗೇರಿಸಿಕೊಂಡ ಧೀಮಂತ ಕಲಾಸಾಧಕ. ಯಕ್ಷಗಾನ ಕ್ಷೇತ್ರದಲ್ಲಿ ಭಾರತ ಹಾಗೂ ಹೊರದೇಶಗಳಲ್ಲಿ ಅತ್ಯಂತ ಹೆಚ್ಚು ಪ್ರದರ್ಶನ ನೀಡಿದ ಕಲಾವಿದ ಎಂಬ ಹೆಗ್ಗಳಿಕೆ ಚಿಟ್ಟಾಣಿಯವರದು. ಇವರು ತಮ್ಮ ಅತ್ಯಮೋಘ ನಾಟ್ಯವೈಖರಿಯ ಮೂಲಕ ಚಿಟ್ಟಾಣಿ ಶೈಲಿಯ ಹರಿಕಾರ ಎಂದೆನಿಸಿಕೊಂಡರು.

(ರಾಷ್ಟ್ರಪತಿಯವರಿಂದ ಪದ್ಮಶ್ರೀ ಪ್ರಶಸ್ತಿ ಸ್ವೀಕಾರ)

ಕಣ್ಣ ಹುಬ್ಬೇರಿಸುವ ಇವರ ನಾಟ್ಯ ರಂಗದಲ್ಲಿ ಕೊನೆಯಾಯಿತು ಎಂಬುವುದು ಮನಸ್ಸಿಗೆ ಬಹಳಷ್ಟು ಬೇಸರ ತರುವ ವಿಷಯ. ದಿನಾಂಕ ೦೩ ಅಕ್ಟೋಬರ್ ೨೦೧೭ರಂದು ಶ್ರೀಯುತರು ಇಹಲೋಕವನ್ನು ತ್ಯಜಿಸಿದ್ದು ಅಪಾರ ಯಕ್ಷ ಅಭಿಮಾನಿಗಳನ್ನು ಅಗಲಿದ್ದಾರೆ. ಅವರ ಅಗಲಿಕೆ ಯಕ್ಷಲೋಕಕ್ಕೆ ತುಂಬಲಾರದ ನಷ್ಟ. ಶುದ್ಧ ನಾಟ್ಯ, ಯಕ್ಷಗಾನದ ಚೌಕಟ್ಟಿನೊಳಗೆ ತಮ್ಮ ಪಾತ್ರದ ಚಲನೆ, ಚೊಕ್ಕದಾದ ಅರ್ಥಗಾರಿಕೆ, ಸಾಂದರ್ಭಿಕ ಹಾಸ್ಯ ಹಾಗೂ ಯಾರದ್ದೂ ಮನನೋಯಿಸದಂತಹ ಮುಗ್ಧ ಭಾವ... ಇವೆಲ್ಲವೂ ಒಟ್ಟಾಗಿ ಸೇರಿ ಓರ್ವ ಚಿಟ್ಟಾಣಿ....

ಅಭಿಮಾನಿಗಳನ್ನು ಕಲೆಹಾಕುವುದು ಸುಲಭ. ಆದರೆ ಅದೇ ಅಭಿಮಾನಿಗಳನ್ನು ಸತತ 68 ವರ್ಷಗಳ ಕಾಲ ತನ್ನೊಂದಿಗೆ ಸಾಗಿಸುವುದು ಕಷ್ಟಸಾಧ್ಯ. ಈ ನಿಟ್ಟಿನಲ್ಲಿ ಚಿಟ್ಟಾಣಿಯವರದು ಎತ್ತಿದ ಕೈ. ಇದಕ್ಕೆಲ್ಲಾ ಕಾರಣ ಅವರ ಕಲಾಸೇವೆ. ನಿಷ್ಠೆ, ಪ್ರಾಮಾಣಿಕತೆಯಿಂದ ಮಾಡಿದ ಕಲಾಸೇವೆಗೆ ಜನರು ಅವರನ್ನು ಉತ್ತುಂಗದ ಶಿಖರದಲ್ಲಿಟ್ಟರು. ಇಂದು ಅದೇ ಶಿಖರವೇರಿ ಕುಳಿತ ಚಿಟ್ಟಾಣಿಯವರು ಅದೇ ಶಿಖರದಲ್ಲಿ ಯಕ್ಷಮಣಿಯಾಗಿ ನೆಲೆಯಾದರು. ಆ ಯಕ್ಷಮಣಿಯ ಹೊಳಪು ಮಾತ್ರ ಇನ್ನು ನಮ್ಮೊಂದಿಗೆ... ಅಗಲಿದ ದಿವ್ಯಚೇತನಕ್ಕೆ ಕಲಾಮಾತೆ ಶಾಂತಿಯನ್ನು ಕರುಣಿಸಲಿ ಎಂಬ ಪ್ರಾರ್ಥನೆಯೊಂದಿಗೆ ಯಕ್ಷಮಣಿ ಚಿಟ್ಟಾಣಿಯವರಿಗೆ ಈ ನನ್ನ ನುಡಿನಮನ...

-ಶ್ರೀಸುತ

■ ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

"ಲೇಖನಕ್ಕೆ ವಿಷಯಗಳನ್ನು ಕಟೀಲು ಸಿತ್ಲ ರಂಗನಾಥ ರಾವ್ ಹಾಗೂ 'ಸಂಪದ' ಅಂತರ್ಜಾಲ ತಾಣದಿಂದ ಸ್ವೀಕರಿಸಲಾಗಿದೆ..."

ಚಿಟ್ಟಾಣಿ ರಾಮಚಂದ್ರ ಹೆಗಡೆಯವರ ಕುರಿತಾದ ಸಾಕ್ಷ್ಯಚಿತ್ರದ Youtube Link ಅನ್ನು ನೀಡಲಾಗಿದೆ. ವೀಕ್ಷಣೆಗೆ ಈ ಕೆಳಗಿನ ಲಿಂಕ್ ಗೆ ಭೇಟಿ ನೀಡಿ.
ಸಾಕ್ಷ್ಯಚಿತ್ರ ಮೂಲ: ಕಟೀಲು ಸಿತ್ಲ ರಂಗನಾಥ ರಾವ್

Click Here:
https://youtu.be/KzKRTFw4Eio

(ದಿ. ಕಾಳಿಂಗ ನಾವಡರ ಭಾಗವತಿಕೆಯಲ್ಲಿ ಚಿಟ್ಟಾಣಿಯವರು ಸಾಲ್ವನಾಗಿ ಹಾಗೂ ಮಂಟಪ ಪ್ರಭಾಕರ ಉಪಾಧ್ಯಾಯರು ಅಂಬೆಯಾಗಿ...

ಚಿತ್ರಕೃಪೆ: ನಟರಾಜ ಉಪಾಧ್ಯಾಯ)

(ಚಿಟ್ಟಾಣಿಯವರ ಭಸ್ಮಾಸುರ)

(ಚಿತ್ರಕೃಪೆ: ದಿನೇಶ್ ಮನೀರ್)

ದರ್ಪಣ - ಬಿಂಬ ೩

noreply@blogger.com (Durgaprasad Diwana) — Sun, 17 Sep 2017 18:51:00 +0000

೧೧. ಕನಸು
ಕನಸಿನಲ್ಲಿ ಬದುಕುವುದು
ನಿದ್ದೆ ಮಾಡಿದಂತೆ
ಎದ್ದ ತಕ್ಷಣ ಕರಗುತ್ತದೆ...
ಕನಸನ್ನು ಬದುಕಿಸುವುದು
ತಪಸ್ಸು ಮಾಡಿದಂತೆ
ಕರಗಿದ್ದನ್ನು ಎಬ್ಬಿಸುತ್ತದೆ...

೧೨. ಅಂದು ಇಂದು
ಕೈ ಹಿಡಿದು ಬಂದಳು ಆಕೆ
ಅಂದು ನನ್ನ ಜೊತೆಯಲ್ಲಿ
ಈಗ ಕೈ ಮುಗಿಯುತ್ತಿದ್ದೇನೆ
ದಿನಾ ಅವಳಿಗೆ ಮನೆಯಲ್ಲಿ

೧೩. ನಾಶ
ಪ್ರಕೃತಿಯ ನಾಶವಿಂದು
ವೇಗವಾಗುತ್ತಿದೆ
ಇಳೆಗೆ ಮಳೆಯಿಂದು
ನಿಧಾನವಾಗುತ್ತಿದೆ

೧೪. ತತ್ತ್ವ
ಹೊಳೆಯುತಿದೆ ಹೊಸದಾದ
ಹಳೆತತ್ತ್ವ ಹೊಸದಾಗಿ
ಹೊಳೆಯುತಿದೆ ಹಳತಾದ
ಹೊಸತತ್ತ್ವ ಮನದಿ

೧೫. ಹಗಲುವೇಷ
ನವರಾತ್ರಿಯಲ್ಲಿ
ಹುಲಿವೇಷ ಮಾಮೂಲಿ
ಆದರೆ ಈಗೀಗ
ಪ್ರತಿದಿನವೂ ಜನರು
ಹಗಲುವೇಷದಲ್ಲಿ
ಕುಣಿಯುತ್ತಿದ್ದಾರೆ!!!

೧೬. ಹರಿ
ನದಿ ಹರಿಯುತಿರಿ
ದಿನ ಸೊಬಗಾಪುದು
ನದಿ ಹರಿಯದಿರೆ
ಬಾಳು ಹರಿಯುವುದು
ನೆಲವು ಬಿರಿಯುವುದು

೧೭. ಖುರ್ಚಿ
ಮುಖ್ಯಮಂತ್ರಿ ಖುರ್ಚಿ
ಬಿಸಿಯಾಗಿದೆ
ಅವರು ಬಿಸಿಮಾಡಿದ್ದಲ್ಲ
ಅವರ ಬಿಸಿ ನೋಡಿ
ಅದುವೇ ಬಿಸಿಯಾಗಿದೆ

೧೮. ಲಂಚ
ಓಟಿಗಾಗಿವರು
ನೋಟು ಬಿಚ್ಚಿ ಸವೆದರು
ಸೀಟು ಸಿಕ್ಕ ಮೇಲೆ
ನೋಟಿಗಾಗಿವರು
ಲಂಚ ಮೆಚ್ಚಿ
ಸವಿದರು

೧೯. ವಿಧಿ
ಬೇಸತ್ತಿದೆ ಮನ-
ವೇ ಸತ್ತಿದೆಯಿಂದು
ಕಂಡೂ ಕಂಡೂ
ದಾರುಣಗಳ ಹಿಂಡು
ಸಾಯದೇ ದಾರುಣತೆ?
ಅವುಗಳಿನ್ನೂ ಲತೆ!!!
ಕ್ರೂರವಾಯಿತೇ ವಿಧಿ?
ತೊರೆಯಿತೇ ಮಮತೆ?

೨೦. ಮಾ ನವ
ಮಾನವ ನೀನು
ನಿನ್ನಲ್ಲಿ ನವವಿದೆ
ವನವಿದೆ ಮನವೆದೆ
ಮನದಲ್ಲಿ ಧನವಿದೆ
ಸಹಕರಿಸು ಮನದಿಂದ
ಮುದದಿಂದ ಎಲ್ಲರಿಗೂ
ಒಳಿತಾಗುವುದು ನಿನಗೆ
ಮಾಧವನಿಂದ

-ಶ್ರೀಸುತ

Photo Credit: marksandspencer

ದರ್ಪಣ - ಬಿಂಬ ೨ ನ್ನು ಓದಲು ಈ ಮುಂದಿನ ಲಿಂಕ್ ಗೆ ಭೇಟಿ ನೀಡಿ - ಬಿಂಬ ೨

ಕಣ್ಣು ಮಾತಾಡಿದೆ

noreply@blogger.com (Durgaprasad Diwana) — Sat, 16 Sep 2017 17:15:00 +0000

ಪ್ರೇಮಗೀತೆ ೨

ಕಣ್ಣು ಕಣ್ಣು ಮಾತಾಡಿದೆ
ಏನೋ ಬೇಕು ಎಂದು
ಹೇಳು ಹೆಣ್ಣೆ ಕಣ್ಣಾಡಿದ
ಮಾತು ಏನು ಎಂದು
ಇನಿಯನೇ ಕೇಳು ಮನ ಹೇಳದೇ
ನನ್ನೆದೆ ಮಾತಾಡಿದೆ...
ಗೆಳತಿಯೇ ನನ್ನ ಮನ ಹೇಳಿದೆ
ನಿನ್ನೆದೆ ನನ್ನೊಳಗಿದೆ...
ಪ್ರೀತಿ ಗುಟ್ಟೆಲ್ಲಾ ರಟ್ಟಾಗಿದೆ...

ಇಬ್ಬನಿ ತಬ್ಬಿದ ಹೂವಿನಲಿ
ನಿನ್ನದೇ ಚೆಲುವಿದೆ
ಲೇಖನಿ ಹಿಡಿದರೆ ಪುಟಗಳಲಿ
ನಿನ್ನದೇ ಸಾಲಿದೆ
ನೀ ಬರೆದ ಸಾಲುಗಳೆಲ್ಲಾ
ಹೃದಯದಲಿ ಸೇರಿದೆ
ನಾನದರ ಓದುವ ಮೊದಲೆ
ಮನಸು ಅರಿತಾಗಿದೆ
ಕನಸುಗಳು ಈಗ ಜೋಡಿಯಾಗಿ ಸಾಗಿವೆ...

ನಿನ್ನಯ ಪರಿಚಯ ಪ್ರೀತಿಯಲಿ
ಕಾಡಿತು ಹೊಸಥರ
ನಾಳೆಯ ಜೀವನ ಪ್ರೇಮದಲಿ
ಸೋಕಿತು ಈ ಥರ
ನೀ ಬಂದ ವೇಳೆಗೆ ನಾನು
ಒಬ್ಬಂಟಿಯಾಗಿದ್ದೆ
ಪ್ರೀತಿಯನು ಕಲಿಸಿ ನೀನು
ನವಿರಾಗಿ ಮನ ಕದ್ದೆ
ಮನಸುಗಳು ಈಗ ಜೋಡಿಯಾಗಿ ಸಾಗಿವೆ...

-ಶ್ರೀಸುತ

Photo Credit: Inkedweddings

ಈ ಹಾಡನ್ನು Youtube ನಲ್ಲಿ ಕೇಳಲು ಕ್ಲಿಕ್ ಮಾಡಿ - ಕಣ್ಣು ಮಾತಾಡಿದೆ

ಪ್ರೇಮಗೀತೆ ೧ - "ಭಾವತುಂಬಿ ನನ್ನ ಮೊಗವು" ಹಾಡನ್ನು ಓದಲು ಪ್ರೇಮಗೀತೆ ೧ ನ್ನು ಕ್ಲಿಕ್ ಮಾಡಿ.

ಗುಣಾಜೆ ಚಂದ್ರಮ ೫ - ಚುಟುಕುಗಳು

noreply@blogger.com (Durgaprasad Diwana) — Fri, 01 Sep 2017 08:19:00 +0000

೧. ವಿಶ್ವಕೋಶ
ಕಾರಂತರು ಚಲಿಸುವ ವಿಶ್ವಕೋಶ
ಕಾಲಿಗೆ ಚಕ್ರವಿದ್ದಂತೆ ಸುತ್ತಿದರು ದೇಶ ವಿದೇಶ
ಅವರಿಳಿಹರೆಯದಲಿ ಕಾಣುತ್ತಿದ್ದರು ಸಿಂಹದಂತೆ
ಗೆಜ್ಜೆ ಕಟ್ಟಿ ಕುಣಿದರು ಕಾರಂತರು ನವಿಲಿನಂತೆ

೨. ಪತ್ರೊಡೆ
ಆಟಿಯಲ್ಲಿ ಮಾಡಿ ತಿನ್ನಿರುಚಿಯಾದ ಪತ್ರೊಡೆ
ಇದನ್ನಿಷ್ಟ ಪಟ್ಟು ತಿ೦ದರೆ ಹೊಟ್ಟೆಯಲಿರದು ಎಡೆ
ಇದರಲ್ಲಿ ಅಡಕವಾದ ಚೊಗಚಿ, ಕೆಸುವು
ದೇಹದ ವಿಷವ ತೆಗೆದು ಕೊಡುವುದು ಕಸುವು

೩. ಎಚ್ಚರ
ಬದುಕು ಕಟ್ಟಲು ಕಷ್ಟ
ಸುಖ ದುಃಖ ಬಂದು-
ಹೋಗುವುದು ದಿಟ
ಬದುಕು ನಶ್ವರ
ಇರಲಿ ನಿಚ್ಚ, ಎಚ್ಚರ

೪. ವರ್ಷ-ಹರ್ಷ
ಆಟಿ ತಿಂಗಳಲ್ಲಿ ಬಾರದೇ ಇದ್ದ ವರ್ಷ
ಸೋಣೆಯಲ್ಲಿ ಭರದಿಂದ ಬರುವುದು ಹರ್ಷ
ಒಂದೊಂದೇ ಇನಿ ಹನಿ ಮಣ್ಣಲ್ಲಿ ಇಂಗಲಿ
ಬುವಿಯಾಳಕಿಳಿದು ಅಂತರ್ಜಲ ತುಂಬಲಿ

೫. ಆಟಿಕಳೆಂಜ
ಆಟಿಯಲ್ಲಿ ಬರುವನು ಮನೆಗೆ ಆಟಿಕಳೆಂಜ
ಪನೆಕೊಡೆ ಹಿಡಿದು ತೆಂಬರೆಯ ಬಡಿತಕ್ಕೆ
ಹೆಜ್ಜೆಹಾಕಿ ಕುಣಿದು ರೋಗಗಳ ಕಳೆವ, ನಿಜ
ಇಂಥದು ಕಾಣೆಯಾಗಿ ಸೇರದಿದ್ರೆ ಸಾಕಿತಿಹಾಸಕ್ಕೆ!

-ಗುಣಾಜೆ ರಾಮಚಂದ್ರ ಭಟ್

ಗುಣಾಜೆ ಚಂದ್ರಮ - ೪ ನ್ನು ಓದಲು ಮುಂದಿನ ಲಿಂಕ್ ಗೆ ಭೇಟಿ ನೀಡಿ - ಚಂದ್ರಮ ೪

About the Author

ಹೆಸರು : ಶ್ರೀ ಗುಣಾಜೆ ರಾಮಚಂದ್ರ ಭಟ್.

ಸ್ನೇಹಿತರೇ... ಉತ್ತರ ಕೊಡುವಿರಾ?

noreply@blogger.com (Durgaprasad Diwana) — Sun, 27 Aug 2017 02:52:00 +0000

ದಿನಾಂಕ 05-08-2017ನೇ ರವಿವಾರದಂದು ಮಂಗಳೂರು ಆಕಾಶವಾಣಿಯ "ಯುವವಾಣಿ-ಸಾಹಿತ್ಯ ಸಂಜೆ" ಕಾರ್ಯಕ್ರಮದಲ್ಲಿ ಪ್ರಸಾರಗೊಂಡ ನನ್ನ ಸ್ವರಚಿತ ಕವನ ವಾಚನದಲ್ಲಿ ವಾಚಿಸಲ್ಪಟ್ಟ ಕವನ -
"ಸ್ನೇಹಿತರೇ... ಉತ್ತರ ಕೊಡುವಿರಾ?"

ಸಾಹಿತ್ಯ ಸಂಜೆ-ಕವನ ವಾಚನ: ಕವಿತೆ ೧

ರಚನೆ: ದಿವಾಣ ದುರ್ಗಾಪ್ರಸಾದ್ ಭಟ್ ಕಟೀಲು

ಸ್ನೇಹಿತರೇ... ನಿಮ್ಮಲ್ಲಿ ನನ್ನದೊಂದು ಪ್ರಶ್ನೆ...
ಉತ್ತರ ಕೊಡುವಿರಾ?

ಎಷ್ಟು ತಾಪವಿರಬಹುದು ಭುವಿಗರ್ಭದೊಳಗೆ?
ಸಹಿಸಿ ಸಹಿಸಿ ಜಂತುಗಳ ಪಾಪದ ಕಂತುಗಳನು...
ರಕ್ತದ ಮಡುವಿನಲ್ಲಿ ತೇಯ್ದ ಮಣ್ಣು ಕೆಂಪಾಗಿ
ಪಾದದಡಿಯಲ್ಲಿ ಭರವಸೆಯ ಕಣ್ಣನ್ನು ಕರಗಿಸಿ
ಬೇಯುತ್ತಿರುವ ಬೆವರಹನಿ ಮೈಸುಟ್ಟು ಹಾಕಿರೆ,
ಧಗಿಸುತ್ತಿದೆ ಜ್ವಾಲಾಮುಖಿ ವ್ಯಂಗ್ಯನೋಟದಲ್ಲಿ
ನಗುತ್ತಾ ಬೀಗುತ್ತಾ ಸಾಗುತಿಹ ಕಚ್ಚಾಟದಿಂದ
ಎಷ್ಟು ತಾಪವಿರಬಹುದು ಭುವಿಗರ್ಭದೊಳಗೆ?
ಸ್ನೇಹಿತರೇ... ಉತ್ತರ ಕೊಡುವಿರಾ?

ಕಡಿದು ಮರಗಿಡಬಳ್ಳಿಗಳ ಬುಡದಿಂದ ಬೇರನ್ನು
ತುಂಡರಿಸಿ ಋತುಮಾನಗಳ ಚಕ್ರಬಂಡಿಯನು
ಮಳೆಗಾಲ ಚಳಿಗಾಲ ಸೆಕೆಗಾಲ ಮರೆಯಾಗಿ
ಮಳೆಯಿಲ್ಲ ಧರೆಯಲ್ಲಿ ತಂಪಿನ ಸಹಿಯಿಲ್ಲ
ಸಿಹಿಯಿಲ್ಲ ಮರದಲ್ಲಿ ಪೈರು ಪಚ್ಚೆಗಳಿಲ್ಲ
ಬಿರುಕೊಡೆದ ನೆಲದೊಡೆಯ ಕೊರಳನಳಿಸಿ
ಹಸಿರಾರಿ ಉಸಿರೇರಿ ಬಸಿರೊಡೆದಿರಲು
ಎಷ್ಟು ತಾಪವಿರಬಹುದು ಭುವಿಗರ್ಭದೊಳಗೆ?
ಸ್ನೇಹಿತರೇ... ಉತ್ತರ ಕೊಡುವಿರಾ?

ಜಾತಿವೈರಾಣುಗಳ ಕಲುಶಿತ ನೆಲೆಯಲ್ಲಿ
ರೀತಿನೀತಿಗಳೆಲ್ಲಾ ಕೊಳೆದು ಗಂಧವ ಸಾರಿ
ಶ್ರೀಗಂಧವೂ ತನ್ನ ಪರಿಮಳವ ಕಳಕೊಂಡು
ದುರ್ಗಂಧ ಬೀರುತಿದೆ ಕೊಳಚೆ ಸೇರಿ...
ಮೂಢ ತೋರಣದೊಡನೆ ರಾಜಕಾರಣ ಬೆರೆತು
ಗಾಢಾಂಧಕಾರದಲಿ ಜನತೆ ಭಯವನೆ ಮರೆತು
ಧರ್ಮಾಂಧತೆಯಿಂದ ಜೀವ ಧರೆಗೊರಗುತಿರೆ
ಎಷ್ಟು ತಾಪವಿರಬಹುದು ಭುವಿಗರ್ಭದೊಳಗೆ?
ಸ್ನೇಹಿತರೇ... ಉತ್ತರ ಕೊಡುವಿರಾ?

ಪ್ರಾಣಿಪಕ್ಷಿಗಳನ್ನು ಹಿಚುಕಿ ಹಿಂಡುತ ಹಿಂಸೆ
ಗೂಡು ಬಂಧನದಲ್ಲಿ ಚೆಂದವನು ಕಾಣುತ್ತಾ
ಮತ್ತೆ ಕೆಲವೊಂದನ್ನು ಕತ್ತು ಕೊರೆಯುತಲಿಂದು
ಮಾರಣಾಂತಕರಾಗಿ ದಾನವರ ತೆರದಿ...
ಹಿಂಸೆಯೇ ಕಟುಕರಲ್ಲಿಂದು ಕಲೆತಿರಲಾಗಿ
ಕೋಟಿ ಸಂಖ್ಯೆಯ ಕಣ್ಣ ನೀರು ನೆಲದಲ್ಲಿ ಆರಿ
ಪೃಕೃತಿಯ ಸಮತೋಲನವೇ ಅಂತರ್ಮುಖಿಯಾಗಿರಲು
ಎಷ್ಟು ತಾಪವಿರಬಹುದು ಭುವಿಗರ್ಭದೊಳಗೆ?
ಸ್ನೇಹಿತರೇ... ಉತ್ತರ ಕೊಡುವಿರಾ?

ಸ್ವಾರ್ಥ ಆಲೋಚನೆಗಳಾಚೆ ವ್ಯರ್ಥ ಪ್ರಲಾಪದಡಿ
ಹಲವು ಜನಮನದುರ್ಗುಣಗಳಿಂದು ಬೆಳೆಯುತಿರೆ
ಪಾಪನಾಶಿನಿಯೂ ಪಾಪಕ್ಕೆ ಗುರಿಯಾಗುತಿಹಳು
ತಾಪವಾರಿಸುವಾಕೆಯೂ ತಪ್ತವಾಗಿಹಳು...
ಎಲ್ಲಿಹುದು ಶಾಂತಿ... ಸತ್ಯ ಧರ್ಮ ನೀತಿ...
ಎಲ್ಲಿಹುದು ನ್ಯಾಯ... ಅನ್ಯಾಯದೊಳಗೆ...
ಸುಪ್ತಗಾಮಿನಿಯಾಗಿ ಹರಿಯುತಿರೆ ನೋವಿನಲೆ
ಎಷ್ಟು ತಾಪವಿರಬಹುದು ಭುವಿಗರ್ಭದೊಳಗೆ?
ಸ್ನೇಹಿತರೇ... ಉತ್ತರ ಕೊಡುವಿರಾ?

-ಶ್ರೀಸುತ

ಆಕಾಶವಾಣಿ ಕಾರ್ಯಕ್ರಮದ ಧ್ವನಿಮುದ್ರಣವನ್ನು ಈ ಕೆಳಗೆ ನೀಡಲಾಗಿದೆ. ಕೇಳುಗರು ಈ ಕೆಳಗಿನ ಲಿಂಕ್ ಗೆ ಭೇಟಿ ನೀಡಿ.
ಯುವವಾಣಿ-ಸಾಹಿತ್ಯಸಂಜೆ (click here)