തനിയെ..

നമ്മൾ

2026-07-22T01:42:16.000+05:30

നമ്മളോളം നമ്മളെ മനസിലാക്കിയിരുന്ന ഒരാൾ,

ഒരു ദിവസം ഒന്നും മിണ്ടാതെ, നമ്മളെ തനിച്ചാക്കി പോകുമ്പോളെ മനസിലാവു

അയാൾ നമുക്ക് എത്രമാത്രം പ്രിയപ്പെട്ടതായിരുന്നെന്ന്.

അപ്പോൾ ഒരു വലിയ ശൂന്യത തോന്നും,

ഓർമ്മകൾ ഹൃദയത്തിൽ ആഴത്തിൽ ഇറക്കിയ വേരുകൾ

പറിച്ചെടുക്കുന്ന വേദനയല്ല കണ്ണുകൾ നിറയ്ക്കുന്നത്,

എന്നും കൂടെയുണ്ടാവുമെന്ന് കൈ പിടിച്ചു വാക്ക്കൊടുത്തതല്ലേ,

പിരിയാൻ പല കാരണങ്ങളുണ്ടാകാം പക്ഷെ

പിരിയാതിരിക്കാനല്ലേ കൂടുതൽ കാരണങ്ങൾ.

ഒരു നോട്ടം കൊണ്ടു മാത്രം മനസ്സ് വായിച്ചെടുക്കാൻ പറ്റുന്നയാൾ

ഒത്തിരി നേരം സംസാരിച്ചില്ലെങ്കിലും,

ഒരു വാക്കുകൊണ്ട് എല്ലാം മനസിലാക്കിയിരുന്നൊരാൾ

ഒരുപാട് സങ്കടപ്പെടുമ്പോൾ സാരല്യ ഞാൻ കൂടെല്ല്യേ

എന്ന് പറഞ്ഞശ്വസിപ്പിച്ചിരുന്നൊരാൾ

ഒരു ദിവസം പെട്ടെന്നില്ലാണ്ടാവാണ്

ഇപ്പൊ തോന്നണു ഒരാളെയും ഇത്രയ്ക്കും ഇഷ്ടപ്പെടാൻ പാടില്ലായിരുന്നെന്ന്

ഇനിയെന്തു പറഞ്ഞാലും എന്റെ കണ്ണുകൾ നനയില്ല, ഞാനിനി തിരിച്ചു പോകില്ല.

പക്ഷെ,

അയാളെ മറക്കാൻ, ആ ഓർമ്മകളെ മറക്കാൻ പറ്റണില്ല,

പറ്റുമായിരിക്കും അല്ലെ

മറക്കാൻ അല്ലെ എല്ലാവർക്കും ഇഷ്ട്ടം മറക്കാം.

മനസ്സിനെ പറഞ്ഞു മനസ്സിലാക്കാം ഭൂതകാലത്തെക്കുറിച്ചോർക്കാതിരിക്കാൻ, ഓർമപ്പെടുത്താതിരിക്കാൻ

ബാക്കിവെച്ച കുന്നോളം ഓർമകളുണ്ടല്ലോ

അതിന്റെ മുകളിൽ വെച്ച് മറക്കാം, തിരിഞ്ഞു നടക്കാം,

പിന്തിരിഞ്ഞു നോക്കാതിരിക്കാം. പറ്റുമായിരിക്കും

നീലക്കുറിഞ്ഞികൾ പൂക്കാറില്ല

2024-01-30T00:51:00.003+05:30

അറിയാം ഇനി നീയില്ല

ഞാനെന്റെ ലോകത്തും

നീ നിന്റെ ലോകത്തും

തിരക്കിൽ പെട്ടിരിക്കുന്നു

ഓർമകൾക്ക് പോലും

വല്ലാത്ത മരവിപ്പ്

മടുപ്പ്, വെറുപ്പ്

തിരക്കിനോടോ

ഓർമകളോടോ

അറിയില്ല, പക്ഷെ ഒന്നറിയാം

ഓർമകളിൽ

മഷി പുരണ്ടു തുടങ്ങിയിരിക്കുന്നു

എത്ര പരന്നാലും മായാത്ത

ഹൃദയത്തിന്റെ ഏതോ കോണിൽ

കടും നീല നിറം

നടക്കണം, ആ വഴിയിൽ ഇപ്പോൾ

നീലക്കുറിഞ്ഞികൾ പൂക്കാറില്ലത്രേ

സമൂഹ മാധ്യമങ്ങൾ ഇല്ലാതിരുന്നെങ്കിൽ...

2018-04-20T23:46:00.000+05:30

കുറച്ചു വർഷങ്ങൾക്കു മുൻപ് നവ മാധ്യമങ്ങളും, സോഷ്യൽ മീഡിയയും ഒന്നും ഇല്ലാതിരുന്ന നാളുകളിലേക്ക് വെറുതെ ഒരു ഓർമപ്രദക്ഷിണം നടത്തിയതാണ് ഞാൻ.

മലയാളത്തിന്റെ ഓരോ ഉത്സവങ്ങളും നമ്മൾ ആഘോഷിച്ചിരുന്നത് ഒന്നിച്ചായിരുന്നു, അതിനു മതത്തിന്റെയും കൊടിയുടെയും നിറങ്ങളും കുറവായിരുന്നു. എന്നാൽ ഇന്ന് സ്ഥിതി ആകെ മാറി മറിഞ്ഞിരിക്കുന്നു.

സൗഹൃദത്തിന്റെ കൂടിച്ചേരലുകളായും. സന്ദേശങ്ങളും, ചിത്രങ്ങളും പങ്കുവെയ്ക്കുന്നതിനുള്ള ഇടങ്ങളായും സോഷ്യൽ മീഡിയകൾ നമുക്ക് ഒഴിച്ചു കൂടാനാകാത്ത ഒന്നായി മാറിയത് പെട്ടെന്നായിരുന്നു.

ടെലി കമ്മ്യൂണിക്കേഷൻ രംഗത്തെ കുതിച്ചു ചാട്ടവും, സ്മാർട്ട്‌ ഫോൺ രംഗത്തെ നൂതന കണ്ടുപിടുത്തങ്ങളും സോഷ്യൽ മീഡിയയുടെ വളർച്ചയും അതി വേഗത്തിലാക്കി. എന്നാൽ സമൂഹ മാധ്യമങ്ങൾ എന്ന ലേബലിൽ വാർത്തകളും ലൈവ് സംപ്രേക്ഷണങ്ങളും സോഷ്യൽ മീഡിയയുടെ മുഖവും, ഭാവവും മാറ്റി മറിച്ചതു നാം പോലും അറിയാതെയായിരുന്നു.

ദിവസത്തിന്റെ പകുതിയിൽ ഏറെയും നമ്മളിൽ ഭൂരിഭാഗവും സോഷ്യൽ മീഡിയകളിൽ ചെലവഴിക്കാൻ തുടങ്ങിയതോടെ, ഞൊടിയിടയിൽ ആരുടെയടുത്തും സന്ദേശങ്ങൾ എത്തിക്കാൻ കഴിയുന്ന ഈ ജാലകത്തിന്റെ ദുരുപയോഗവും ഏറിത്തുടങ്ങിയിരുന്നു.

വിഭാഗീയതയുടെ വാഹകരായി പല സോഷ്യൽ മീഡിയകളും പൂർണ്ണമായിത്തന്നെ മാറിയിരുന്നു. നമ്മൾ പോലും അറിയാതെ നമ്മുടെ ചിന്തകളെയും തീരുമാനങ്ങളെയും സ്വാധീനിക്കാനും തെറ്റിദ്ധരിപ്പിക്കാനും നാം കൂടെ കൊണ്ടുനടക്കുന്ന, ആരോ തുറന്നു വിട്ട സോഷ്യൽ മീഡിയയിലെ ഭൂതത്തിനു കഴിയുന്നുണ്ടായിരുന്നു.

പുറത്തു ചാടിയ ഭൂതം നാൾക്കുനാൾ കൂടുതൽ ശക്തിയാർജിക്കുമ്പോൾ ഇനിയുള്ള നാളുകളിൽ അതിനെ തുറന്നു വിട്ടവർക്കുപോലും ജീവനിൽ ഭയമില്ലാതെ ഉറങ്ങാൻ കഴിഞ്ഞെന്നു വരില്ല.

കേരളത്തെ ഭ്രാന്താലയം എന്നു വിളിച്ച സാക്ഷാൽ സ്വാമി വിവേകാനന്ദനും തെറ്റു പറ്റിയില്ല നൂറു മേനി സാക്ഷരതയുടെ വീമ്പു പറയുന്ന മലയാളികൾ മത ഭ്രാന്തന്മാരാൽ നിറഞ്ഞിരിക്കുന്നു. പ്രസവമുറിക്കപ്പുറം ഒരു ഡോക്ടർക്കോ നേഴ്സിനോ ചിലപ്പോൾ തീരുമാനിക്കാൻ കഴിഞ്ഞേക്കാം നമ്മുടെ മതവും ജാതിയും എന്ന തിരിച്ചറിവിൽ എത്താൻ ഇനിയും നമുക്കാവുന്നില്ല എന്നതു മലയാളത്തെ സ്നേഹിക്കുന്ന എല്ലാവരെയും വേദനിപ്പിക്കുന്ന ഒന്ന് തന്നെയാണ്.

ഫേസ്ബുക്കിലും, വാട്സ്ആപ്പ് ലും മരങ്ങൾ നട്ടുകൂട്ടുന്നവർ ഒരു തൈ എങ്കിലും മണ്ണിൽ നട്ടിരുന്നെങ്കിൽ ഇന്ന് ഒരു കിളിക്കെങ്കിലും കൂടൊരുക്കാനായേനെ, ഒരൽപ്പം തെളിനീരെങ്കിലും കിണറ്റിലെത്തിച്ചേനെ, ഒരിത്തിരി തണലെങ്കിലും ഭൂമിക്കു നൽകിയേനെ...

ഇന്ന് പലരും അസ്വസ്ഥരാണ് , നിദ്രാവിഹീനരാണ്‌. ആരാണ് ഇവരെ ഇങ്ങനെ ആക്കിയത്?

മറുപടിയായി ഒന്നേ പറയാനുള്ളൂ സോഷ്യൽ മീഡിയകളിൽ പലരുടെയും അതിരു കടന്ന രാഷ്ട്രീയ, മത പോസ്റ്റുകളും, ഷെയറുകളും.

അവർ ചിലപ്പോൾ നമ്മുടെ ഉറ്റ സുഹൃത്തുക്കളായിരിക്കാം മനസ്സിൽ ബഹുമാനിച്ചിരുന്നു ഇഷ്ട്ടപ്പെട്ടിരുന്നവർ ആയിരിക്കാം. അതിനപ്പുറവും മനസിനെ അസ്വസ്ഥമാക്കുന്ന മറ്റെന്തൊക്കെയോ ആയിരിക്കാം.

ഇതിൽ നിന്നെല്ലാം മുക്തരായി നിങ്ങൾക്ക് സുഖമായി ഉറങ്ങണം എന്ന് തോന്നുമ്പോൾ ഫോണിലെ നിങ്ങളുടെ സോഷ്യൽ മീഡിയകളിൽ ലോഗോഫ് ബട്ടണിൽ ഒരു ക്ലിക്ക്.

നിങ്ങൾക്കിപ്പോൾ ചുറ്റുമുള്ള നല്ല കാര്യങ്ങൾ കാണാൻ കഴിയുന്നുണ്ടാവും, സ്നേഹം അനുഭവിക്കാൻ കഴിയുന്നുണ്ടാവും, നന്മചെയ്യാൻ കഴിയുന്നുണ്ടാവും, മതത്തിന്റെയും കൊടിയുടെയും ചേരി തിരിവില്ലാതെ നിങ്ങളുടെ സുഹൃത്തിനെ തന്നെ കാണാൻ കഴിയുന്നുണ്ടാവും..

ഞാനുൾപ്പെടെയുള്ള സമൂഹം ഇതൊന്നും ചെവി കൊടുക്കില്ലെന്നെനിക്കറിയാം. കാരണം ഞാനിതു പോസ്റ്റ്‌ ചെയാനൊരുങ്ങുന്നതു മേൽ പറഞ്ഞ സോഷ്യൽ മീഡിയയിൽ ഒന്നിൽ തന്നെയാണ്. എങ്കിലും ഇതെല്ലാം എഴുതുമ്പോൾ മനസ്സിൽ ഒരു വർഷകാലം പെയ്തു തോർന്ന സുഖം തോന്നുന്നു.

ഒരു പ്രവാസിയായ എനിക്കിപ്പോൾ ഓർമ വരുന്നത് മനസ്സിൽ തിരുത്തിയ ഒരു നാലുവരി കവിതയാണ്

"നടന്നു നീങ്ങുവാൻ ഇനിയൊരു വഴിത്താരയില്ല
ഉയർന്നു പാടുവാൻ ഒരു പാട്ടിന്റെ ശീലുമില്ല
പറന്നാലുമൊടുവിൽ ചിറകറ്റു വീഴുമ്പോൾ
ഒരു താങ്ങായി ഇവിടെയിനി എനിക്കെന്റെ മലയാളവും... "

ജീവിത വഴികൾ

2017-06-06T01:20:00.001+05:30

ഇപ്പോൾ ഞാനൊരു വഴിയുടെ അന്ത്യത്തിലാണ്.
മുന്നോട്ടു നയിക്കാൻ കൂട്ടായി ഞാൻ മാത്രം.

ഒറ്റപ്പെടലിന്റെയും, ഒഴിവാക്കപ്പെടലിന്റെയും
വേദനയില്ലിപ്പോൾ തെല്ലും.
മുന്നിൽ മറ്റൊരു മുഖം.

പ്രതീക്ഷയുടെ, നഷ്ട്ടങ്ങൾ തിരിച്ചു പിടിക്കലിന്റെ
സുവർണ്ണ ദിനങ്ങളിലേക്കുള്ള കൂട്ടിനായി,
ഒരു തൊട്ടാർവാടി.

അതിന്റെ മുള്ളുകൾ പക്ഷെ എന്നെ
ഒട്ടും വേദനിപ്പിക്കുന്നില്ല.
പഞ്ചസാരയുടെ മധുരവും പകരുന്നില്ല.

പ്രതീക്ഷയുടെ പുതിയ വഴികളിൽ
നന്മയുടെ ഒരായിരം പുലരികളിലേക്കുള്ള
ചുംബനപ്പൂവുകൾ മാത്രം.

അതിനിപ്പോൾ ചെമ്പക ത്തിന്റെയും,
മുല്ലയുടെയും, ലാങ്കി യുടെയും ഗന്ധം.

ചെണ്ട മേളം

2017-06-06T00:42:00.002+05:30

വാക്കുകളും, നിശബ്ദദയും തമ്മിലുള്ള
അന്തരം ഏറിവരുന്നു.
ജീവിതത്തിൽ സ്വന്തമെന്നു കരുതി
കെട്ടിപ്പൊക്കിയ പലതും
അടിത്തറയിളകി നിലം പൊത്താൻ
കാത്തുനിൽക്കുന്നു.

അല്ലെങ്കിൽ വേരിറങ്ങാത്ത മരം പോലെ
ചെറിയ ചാറ്റൽ മഴയിൽ പോലു മാടിയുലയുന്നു.

കനത്ത ഇടിയിലും, മഴയിലും ഇടറാതെ നിന്ന
നെഞ്ചിൽ, ആഴത്തിൽ കുത്തിയിറക്കിയ
കത്തിപോലുമിന്നുറച്ചുപോയിരിക്കുന്നു.

ചോരയുടെ നിറംപോലുമെന്റെ സങ്കടത്താൽ
മങ്ങിയിരിക്കുന്നു .

മറക്കാനും, പൊറുക്കാനും പറ്റാതെ
ആഴത്തിലേറ്റ ചില മുറിവുകൾ.

നിശബ്ദദ ഇരുട്ടിൽ ഓടിയൊളിക്കുന്നു.

ചെവിയിൽ അവന്റെ ചെണ്ട മേളം മാത്രം.
എത്ര കേട്ടിട്ടും മതിവരാതെ
കൊതിയോടെ വീണ്ടും, വീണ്ടും
അതിനായി മാത്രം കാതോർക്കുന്നു.

സ്വർഗവാതിലിൽ

2016-03-19T00:34:00.001+05:30

അയാൾ മരിച്ചിരിക്കുന്നു ..
ഡോക്ടറുടെ സ്ഥിരീകരണം ..

ആർക്കും മിഴി നൽകാതെ ആത്മാവിനേയും കൂട്ടി ചിത്രഗുപ്തൻ അതിനകം തന്നെ സ്ഥലം വിട്ടിരുന്നു

ചാനൽ ചർച്ചകൾ
കണ്ണീരിൽ കുതിർന്ന നുണ പറച്ചിലുകൾ

സ്വർഗവാതിലിൽ ആത്മാവിന്റെ കാത്തുനിൽപ്പ്
അവിടത്തെ എൽ ഇ ഡി സ്ക്രീനിൽ തന്റെ മരണ വാർത്തയുടെ
തത്സമയ ചർച്ചകൾ കണ്ടു വീർപ്പുമുട്ടി നില്ക്കുന്ന ആത്മാവിനോടായി ദൈവം

"താങ്കൾ ഇപ്പോൾ മറ്റൊരു ലോകത്തേക്ക് പ്രവേശിക്കുകയാണ്, ആ ലോകത്തെ രണ്ടു രാജ്യങ്ങൾ, അതിൽ എവിടേക്ക് പോകണം എന്ന് തീരുമാനിക്കാൻ ചില ചോദ്യങ്ങൾക്ക് നിങ്ങൾ ഉത്തരങ്ങൾ നല്കണം "

ആത്മാവിന്റെ മുഖത്ത് ആകാംഷ

ദൈവത്തിന്റെ ആദ്യത്തെ ചോദ്യം - നിങ്ങൾ ഭൂമിയിൽ വെച്ചു ചെയ്ത പത്തു നല്ല കാര്യങ്ങൾ പറയാൻ ആയിരുന്നു, രണ്ടാമത്തേത് പത്തു ചീത്ത കാര്യങ്ങളും

ചോദ്യം എന്തു തന്നെ ആയാലും ആത്മാവ് ആഗ്രഹിച്ചിടത്തു തന്നെ എത്തി
അതെവിടെയായിരിക്കും ?

ഓർമച്ചിതലുകൾ

2016-01-31T01:28:00.000+05:30

അതൊരൊർമ്മച്ചിതലാണ് ...

പണ്ടെപ്പോളോ മനസ്സിൽ എഴുതി നിറക്കാതെ പോയ
ചിതൽ താളുകൾ ..

അതിന്നലെ വീണ്ടുമെന്നെ തേടിയെത്തി ...
കാലം ഒരുപാട് പിന്നിട്ടിരിക്കുന്നു...

ആ താളുകൾക്കുള്ളിൽ മറഞ്ഞിരിക്കുന്ന
ചില ചോദ്യങ്ങൾ ബാക്കിയാക്കി ...

പണ്ട്, കോളേജ് ലൈബ്രറിയുടെ വരാന്തയിൽ കണ്ട
ഒരു പേടിതൊണ്ടി പെണ്ണ് ..

കാലം അവളെ കുറേ മാറ്റിയിരിക്കുന്നു
അവളിന്നു കൂടുതൽ സുന്ദരിയായിരിക്കുന്നു..
കൂടുതൽ സംസാരിക്കാൻ തുടങ്ങിയിരിക്കുന്നു ...
അവളുടെ ഭാഷയിൽ പറഞ്ഞാൽ 'കുറേ ബോൾഡ് ആയിരിക്കുന്നു'

എന്തിനാണ് അന്നാ താളുകളിൽ ചിലത് കീറിയെറിഞ്ഞു അവൾ പോയതെന്നറിയാൻ മനസു കുറേ ആശിച്ചിരുന്നു

ഇനിയതറിയണ്ടാ ചിലപ്പോളതവളെ വിഷമിപ്പിക്കലാവും ..
ആഹ് ചില സത്യങ്ങൾ അതങ്ങനെ തന്നെ ഇരിക്കട്ടെ അല്ലെ ..

പക്ഷെ, നീണ്ട ഒൻപതു വർഷങ്ങളുടെ മൗനം
അതൊരു നഷ്ട്ടം തന്നെയാണ്
ഇനിയൊരിക്കലും വീണ്ടെടുക്കാൻ പറ്റാത്ത
വലിയ നഷ്ട്ടം

പ്രണയം അത് വാക്കിനെക്കാൾ മനോഹരമാവുന്നത്
നഷ്ട്ടപെട്ടതിൽ ചിലതു തിരിച്ചു കിട്ടുമ്പോൾ തന്നെയാണ്...

കാലമിപ്പോൾ മുഖം തിരിഞ്ഞു നിന്ന് ചിരിക്കുന്നുണ്ടാവും,
ആ പഴയ കടലാസു കഷണങ്ങളെ ഇവനിനി
എന്തു ചെയ്യുമെന്നോർത്ത് ... അതെനിക്കിന്നു കണ്ണീരും ...

ഓർമ്മിക്കാൻ നമുക്കിടയിൽ ഒന്നുമില്ല, പക്ഷെ മറക്കാതിരിക്കാൻ നമുക്കിടയിൽ എന്തോ ഉണ്ട്

2016-01-08T01:47:00.005+05:30

ഒരു മഴ പെയ്തു തോർന്നിരിക്കുന്നു,

എന്നോടൊപ്പം മഴനനയാൻ ഇനി ക്ലാരയുണ്ടാവില്ലെന്ന് ഇന്നലെയാണറിഞ്ഞത്.

വെറുമൊരു മഴക്കാലമല്ല ജീവിതത്തിൽനിന്നകന്നത്

മറിച്ച് എന്നുമെന്നെ പെയ്തു നനയിക്കാൻ നീയുണ്ടാകുമെന്ന വിശ്വാസമാണ്

ഒരുപിടി വിങ്ങലുകൾക്കൊപ്പം ഇന്നലെ പെയ്തൊഴിഞ്ഞത് ...

ജോസൂട്ടിക്ക് ഇനിയും പറയാനുണ്ടേ ...

2015-12-23T00:16:00.001+05:30

ഞാനിപ്പോളും ജോസൂട്ടി യോടൊപ്പമാണ്

ജിത്തു ജോസഫ്‌ ന്‍റെ "Life of Josutti" കണ്ടു തീർന്നിട്ടും, മനസ്സിൽ ജോസൂട്ടി ഇനിയും കുറേയേറെ പറയാൻ ബാക്കിവെച്ച് മുന്നിൽ തന്നെ നിൽക്കുകയാണ്.

ഈ ചിത്രം കണ്ട ദിവസം വിഞ്ചി എന്നെ വിളിച്ചു പറഞ്ഞ വാക്കുകൾ ഇന്നും മനസിലുണ്ട് എന്നിട്ടും എന്തുകൊണ്ടാണ് കാണാൻ വൈകിയത് എന്ന് ചോദിച്ചാൽ "എല്ലാറ്റിനും അതിന്‍റെതായ സമയമില്ലേ ദാസാ" എന്നെ മറുപടിയുള്ളൂ.

ഞാനും ജോസൂട്ടിയും തമ്മിൽ എന്താണ് ബന്ധം..

പണ്ടെ എനിക്കായി മാത്രം ദൈവത്തോട് പ്രാർഥിക്കാൻ ഒന്നും ഉണ്ടായിരുന്നില്ല

അതിൽ വീട്ടുകാരും, കൂട്ടുകാരും, പ്രിയപ്പെട്ടവരും മാത്രമേ ഉണ്ടായുള്ളൂ

മറ്റുള്ളവരുടെ ഭാഗത്ത്‌ നിന്ന് ചിന്തിക്കാൻ ജോസൂട്ടിയെ പഠിപ്പിക്കുന്നത് അച്ഛനാണെങ്കിൽ എനിക്കത് ഒൻപതാം ക്ലാസ്സിലെ പ്രിയകൂട്ടുകാരൻ ഷോണിയാണ്

ആരുടേയും മനസ് വിഷമിക്കുന്നത് എനിക്ക് ഇഷ്ട്ടമല്ല, പലപ്പോളും അവരുടെ വേദനയിൽ ചേർന്ന് നില്ക്കാതിരിക്കാൻ കഴിയാറില്ല

ജീവിതത്തിൽ പരിചയപ്പെടുന്ന ഓരോ വ്യക്തികളും ഓരോ അധ്യായങ്ങളായി തന്നെ നിറഞ്ഞു നിൽക്കാറുണ്ട് ജീവിതത്തിൽ, പക്ഷെ ഓരോ കാലഘട്ടങ്ങളിൽ അവർ ഓരോരുത്തരും അവരവരുടെ ഭാഗങ്ങൾ പൂർത്തിയാക്കി ഓരോ പേജിതളുകളിലേക്ക് മറയുമ്പോൾ മറയാതെ മായാതെ ചിലർ മാത്രം എല്ലാ പേജിലും നിറഞ്ഞു നിൽക്കാറുണ്ട് പേനയിലെ കട്ടി മഷി തീർന്നുപോയെന്നറിഞ്ഞിട്ടു പോലും

ജീവിതത്തിൽ ആദ്യത്തെ പ്രണയം ഒരിക്കലും മറക്കാൻ കഴിയില്ലെന്ന് പറയുന്നതിനേക്കാൾ യഥാർത്ഥ പ്രണയം എന്നതായിരിക്കും ശരി

ചിലപ്പോൾ അത് നഷ്ട്ടപ്പെടാതിരിക്കുന്നത്, നേടാൻ ആവാത്തതിനാൽ തന്നെയാണ് അല്ലെങ്കിൽ "വന്ദനം" സിനിമ നമ്മൾ എന്നേ മറന്നു കളഞ്ഞേനെ

അച്ഛന്‍റെ നന്മയെ ജീവനായ് കൊണ്ട് നടന്നിട്ട് എന്ത് നേടി എന്ന നിസ്സഹായത ജോസ്സുട്ടിയെ പ്പോലെ എന്നെയും പലതും പഠിപ്പിച്ചു കൊണ്ടിരിക്കുന്നു

ചിലപ്പോൾ ഈ ചിത്രത്തിലെ പല അവസ്ഥകളിലും നേരിട്ടോ അല്ലാതെയോ ഞാനും സഞ്ചരിച്ചു കഴിഞ്ഞിരിക്കുന്നു എന്ന ചില അറിവുകൾ, പക്ഷെ ഒരിക്കലും എന്‍റെ ശരികൾ എന്ന അതിർ വരമ്പുകൾക്ക് അപ്പുറത്തേക്ക് ഞാനാരെയും കടത്തിവിടാറില്ല

എന്‍റെചിന്തകളും, പ്രവർത്തികളും കൊണ്ട് നിറഞ്ഞു നിന്ന ഒരു ചിത്രം അതെനിക്ക് മുന്നിൽ സമ്മാനിച്ച ജിത്തു ജൊസെഫിനു നന്ദി ,

പക്ഷെ ജോസ്സൂട്ടിക്കു ഇനിയും കുറേയേറെ പറയാനുണ്ട് അത് കേൾക്കാൻ ആരൊക്കെയോ കൂടെതന്നെയുണ്ട് ...

നന്മയും - തിന്മയും

2015-11-11T20:56:00.000+05:30

ഒരു പുസ്തകം അത് എഴുതിയ ആളുടെ മനസും,
ചിന്തകളും തമ്മിൽ കെട്ടുപിണഞ്ഞു കിടക്കുന്നതാണ്

അടുത്തിടെ നവ മാധ്യമങ്ങളിലൂടെ പ്രശസ്തയായ
ദീപ നിശാന്ത് എന്ന ദീപ ടീച്ചറുടെ
"കുന്നോളമുണ്ടല്ലോ ഭൂതകാലക്കുളിർ" എന്ന
പുസ്തകം വായിക്കാൻ ഇടയായി

ഷാർജ പുസ്തകോത്സവത്തിൽ തീർത്തും
യാത്രിശ്ചികമായി കണ്ട ഒരു പുസ്തകം
വെറുതെ തുറന്നു കണ്ണോടിച്ചപ്പോൾ
വാങ്ങാം എന്ന് തോന്നി

അതിലെ സോളമനോടുള്ള ആരാധനയും,
ജാതി പറയുന്നവരോടുള്ള അമർഷവും,
ബാല്യം പെട്ടെന്ന് തീർന്നതിലുല്ല നിരാശയും,
എണ്ണപ്പെട്ട മാധ്യമ സംസ്കാരം ഉണ്ടാകുന്നതിനു
മുൻപ് ഒരു കൗമാരക്കാരി ക്കുണ്ടായിട്ടുള്ള വിശ്വാസവും
എല്ലാം ഒരു നല്ല മനസ്സിൽ നിന്നെ ഉണ്ടാവു
എന്ന് തോന്നിപ്പോയി

തല്ലത്‌ ചെയ്യുമ്പോൾ ഉണ്ടാകുന്ന
ആത്മ സംത്രിപ്തിയെക്കാൾ വലുതായി
എന്തുണ്ട് ഈ ലോകത്ത് ...

നന്മ മരിക്കുമ്പോൾ തിന്മ ജനിക്കുന്നു ..
നന്മ മരിക്കാതെയും, തിന്മ ജനിക്കാതെയും
ഇരിക്കട്ടെ എന്ന പ്രാർഥനയോടെ ...

ഓർമപ്പെടുത്തലുകൾ

2015-11-11T00:39:00.001+05:30

അപരിചിതമായ് വന്ന ഒരു ഫോണ് കോളിലൂടെ ആണ് അവൾ അവനെ പരിചയപ്പെട്ടത്..പരിചയം ഇല്ലാത്ത നമ്പറിൽ നിന്നുള്ള വിളി പതിവ് പോലെ റോങ് നമ്പർ എന്ന് പറഞ്ഞു കാൾ വെച്ചെങ്കിലും വീണ്ടും കാളുകൾ വന്നു കൊണ്ടിരുന്നു ആദ്യം കുറെ ചീത്ത പറഞ്ഞു എങ്കിലും എല്ലാം കേട്ടിട്ടും വിനീതമായ് ഒന്നും മിണ്ടാതെ നമ്പർ മാറി പോയ് അവന്‍റെ അമ്മ ഹോസ്പിറ്റലിൽ ആണെന്ന് അൽപം സീരിയസ് ആണ് അത്യവശൃമായ് ബ്ലഡ് വേണം അതിനായ് ധൃതിയിൽ ആരെയോ വിളിച്ചപ്പോൾ മാറി പോയതാണെന്നും സങ്കടത്തോടെ ഉള്ള അവന്‍റെ മറുപടി അവൾക്കും അല്പം വിഷമമായ് അത് കൊണ്ട് തന്നെ ഒരു സോറി പറഞ്ഞു പെട്ടന്ന് കാൾവെച്ചു.

രണ്ടു ദിവസങ്ങൾക്കു ശേഷം വീണ്ടും അതെ നമ്പറിൽ നിന്നും കാൾ വന്നു ആദ്യം മടിച്ചെങ്കിലും അവൾ ഫോണ്‍ എടുത്തു ..ഹലോ ഞാൻ ബുദ്ധിമുട്ടിച്ചെ
ങ്കിൽ ക്ഷമിക്കണം എന്നെ ഓർക്കുന്നുണ്ടോ രണ്ടു ദിവസം മുൻപ് ഞാൻ വിളിച്ചിരുന്നു ..ഒന്ന് മൂളിയതല്ലാതെ അവൾ ഒന്നും മറുപടി പറഞ്ഞില്ല ..അവൻ തുടർന്നു എന്‍റെ അമ്മയ്ക്ക് സുഖമായ് നാളെ ഹോസ്പിറ്റൽ വിടും..എന്തോ ഇയാളോട് ഒന്ന് പറയണം എന്ന് തോന്നി അതാ വിളിച്ചേ ഇനി വിളിക്കില്ല കേട്ടോ മറുപടിക്ക് കാത്തു നിൽക്കാണ്ട് മറുപുറത്ത് കാൾ കട്ട് ആയ ശബ്ദം അവൾ കേട്ടു... സംസാരത്തിലെ മാന്യത അതാവണം പിറ്റേന്ന് രാവിലെ വന്ന ഗുഡ് മോർണിംഗ് മെസ്സെജിനു അവൾ മറുപടി തിരിച്ചു അയച്ചത് ..

ദിവസങ്ങൾ കഴിയുംതോറും മെസ്സേജിൽ നിന്നും കാളുകളിലേക്കും സോഷ്യൽ നെറ്റ് വർക്ക്കളിലേക്കും അവരുടെ ബന്ധം വളർന്നു..അവന്‍റെ മാന്യമായ പെരുമാറ്റവും സംസാരവും അവളിൽ അവനിൽ ഉള്ള വിശ്വാസം വളർത്തി ഒരു ദിവസം പോലും വിളിക്കാണ്ട് ഇരിക്കാൻ ആവാത്ത അത്ര അടുത്ത് അവൾ അവനോട് ..തന്‍റെ ജീവിതം ഇനി അവസാനം വരെ അവന്‍റെ ഒപ്പം ആണെന്ന് അവൾ ഉറപ്പിച്ചു ...രാത്രിയിലും വളരെ വൈകി അവരുടെ കാളുകൾ നീണ്ടു വികാര നിർഭരമായ പലനിമിഷങ്ങൾക്കും അവളുടെ കിടക്കയും , മുറിയും സാക്ഷിയായി ..

തന്‍റെ ചെയ്തികളിൽ ഒന്നും അവൾ തെറ്റ് കണ്ടില്ല എന്തെന്നാൽ ഇനി എന്‍റെ ജീവിതാവസാനം വരെ കൂടെ ജീവിക്കേണ്ടവനാണ് അവൻ അവനോടു എന്ത് ചെയ്യുന്നതിലും പറയുന്നതിലും അവൾക്കു മടി തോന്നിയില്ല ..അതുകൊണ്ട് തന്നെ ഫോട്ടോകളായ് അവൾ എന്നും അവനിലേക്ക് എത്തി കൊണ്ടിരുന്നു ..അന്ന് ആദ്യമായ് ഒന്ന് കാണണം എന്ന് പറഞ്ഞപ്പോഴും ഒരു മടിയും കൂടാതെ കൂട്ടുകാരിയുടെ കല്യാണത്തിന് പോകാൻ എന്നും പറഞ്ഞു വീട് വിട്ടിറങ്ങി

ആളൊഴിഞ്ഞ റെയിൽവേ സ്റ്റേഷനിലെ അവസാനത്തെ പ്ലാട്ഫോംമിലെ നിർത്തികിടന്ന ട്രയിനിലെ ഷട്ടർ ഇട്ട സ്ലീപ്പർ കോച്ചിൽ അവളുടെ വികാരങ്ങൾക്ക് മുകളിൽ അന്ന് ആദ്യമായ് രക്തം പൊടിച്ചപ്പോഴും എപ്പോഴോ അതൊക്കെ അവന്‍റെ മൊബൈൽ ക്യാമറ കണ്ണുകൾ ഒപ്പി എടുത്തതും ഒന്നും അവളിലെ വിശ്വാസം തെറ്റായ് കണ്ടില്ല കാരണം ഒരു പുരുഷനെ സ്നേഹിച്ചു അവനെ വിശ്വസിച്ചു അവനു വേണ്ടി ജീവിതം സമർപ്പിച്ചു അവന്‍റെ സുഖത്തിലും സന്തോഷത്തിലും അവനൊപ്പം നിന്ന് അവന്‍റെ തോളോട് തോൾ ചേർന്ന് ജീവിതം ജീവിച്ചു തീർക്കാൻ കൊതിച്ച സാധരണക്കാരിൽ സധാരണക്കാരി അയ ഒരു പെണ്ണ് തന്നെ ആയിരുന്നു അവളും ...

അന്നത്തെ കൂടികാണലിനു ...ശേഷം പലപ്പോഴും വിളിക്കുമ്പോൾ ജോലി തിരക്ക് എന്ന് പറഞ്ഞു കാളുകൾ കട്ട് ചെയ്യുന്നതും... വിളിയുടെ എണ്ണം കുറഞ്ഞതും അവൾ അവന്‍റെ അവസ്ഥകൊണ്ടാണ് എന്ന് കരുതി സ്വയം ആശ്വസിച്ചു ...കുറെ ദിവസങ്ങൾക്കു ശേഷം രാത്രി അപ്രതീക്ഷിതമായ് ഫോണ്‍ ശബ്ദിക്കുന്നത് കേട്ട് അവൾ ചാടി എഴുനേറ്റു അവൻ ആകുമെന്ന പ്രതീക്ഷയിൽ അവൾ ഫോണിലേക്ക് നോക്കി ..

ഇല്ല അവൻ അല്ല പരിചയമില്ലാത്ത നമ്പർ ആണ്.ഒരു പക്ഷെ ഇനി അവൻ വേറെ ഏതെങ്കിലും നമ്പറിൽ നിന്ന് വിളിക്കുന്നതാവുമോ അല്ലാണ്ട് ആരാ തന്നെ ഈ രാത്രി വിളിക്കാൻ എന്തായാലും എടുക്കുക തന്നെ ..ഹലോ അടുത്ത് കിടന്നു ഉറങ്ങുന്ന അനുജത്തി കേൾക്കാതിരിക്കാൻ അവൾ പതിഞ്ഞ ശബ്ദത്തിൽ പറഞ്ഞു ...ഹലോ ഇതു അഞ്ചു അല്ലെ...? ഇതാര ഈ രാത്രിയിൽ പേരെടുത്തു ചോദിച്ചു കൊണ്ട് എതിർ വശത്ത് പരിചയമില്ലാത്ത ഒരു പുരുഷ ശബ്ദം , ഒന്ന് മടിച്ചെങ്കിലും അവൾ തുടർന്നു മം അതെ നിങ്ങൾ ആരാ എന്തിനാ ഈ രാത്രിയിൽ എന്നെ വിളിച്ചേ ? എന്നെ നിങ്ങൾക്ക് എങ്ങനെ അറിയാം.?. ഞാൻ നിന്‍റെ ഒരു പഴയ ക്ലാസ്സ്മേറ്റ് ആണ് പറഞ്ഞാൽ ഓർമ്മ വരുമോ എന്ന് അറിയില്ല കുറെ പാടുപെട്ടിട്ടാണ് നിന്‍റെ നമ്പർ കിട്ടിയത്.ഒന്ന് നിർത്തിയതിനു ശേഷം അയാൾ തുടർന്നു...

അന്ന് പഠിക്കുന്ന സമയത്ത് നീ എന്ത് നല്ല കുട്ടിയായിരുന്നു പഠിപ്പിലും അച്ചടക്കത്തിലും ടീച്ചർമാർക്ക് നീ എന്നും പ്രിയപ്പെട്ടവൾ ആയിരുന്നു ഒരു ചീത്ത കൂടുകെട്ടുകളും ഇല്ലാത്തവൾ..ഇതു പറയാനാ നിങ്ങൾ എന്നെ ഇപ്പോ വിളിച്ചേ ..? അല്ല അങ്ങനെ ഉള്ള നിനക്ക് ....നിനക്ക് ഇതു എന്ത് പറ്റി എപ്പോഴാ നിനക്ക് തെറ്റ് പറ്റിയെ..നിങ്ങൾ എന്താ പറയുന്നേ എനിക്ക് ഒന്നും മനസ്സിലാവുനില്ല..എന്ത് തെറ്റ് പറ്റിയെന്ന പറയുന്നേ ..

അഞ്ചു ഇന്നു എനിക്ക് വാട്സപ്പിലെ ഒരു (ഗൂപ്പിൽ നിന്നും ആരോ ഷെയർ ചെയ്ത കുറച്ചു ഫോട്ടോസും ഒന്ന് രണ്ടു വീഡിയോയും കിട്ടി.... നഗ്നമായ ആ ഫോട്ടോയിലെയും വീഡിയോയിലെയും പെൺ രൂപത്തിന് നിന്റെ മുഖച്ഛായ ആയിരുന്നു ....അത് കേട്ടതും ഭൂമി പിളരുനത് പോലെ തോന്നി. അവൾക്കു മറുപടി പറയാതെ അവൾ ഫോണ് കട്ട് ചെയ്തു ..ഇല്ല അവൻ എന്നെ ചതിക്കില്ല അവനു അതിനു കഴിയില്ല എനിക്കറിയാം അവനെ ..പിന്നെ എന്‍റെ ഫോട്ടോസ് എങ്ങനെ ..? അവൾ മൊബൈൽ എടുത്തു അവന്‍റെ നമ്പർ ഡയൽ ചെയ്തു ..സർവ്വീസ് താൽകാലികമായ് കട്ട് ചെയ്തിരിക്കുന്നു ..അവന്‍റെ ഫേസ്ബുക്ക് അക്കൗണ്ടും കാണാനില്ല ..

അവളുടെ കണ്ണിൽ ഇരുട്ടു കയറുന്നത്പോലെ അതെ വൈകിയാണെങ്കിലും ഞാൻ അത് മനസ്സിലാക്കിയിരിക്കുന്നു.... ഞാൻ ചതിക്കപെട്ടിരിക്കുന്നു..നാളെ ഇതു സോഷ്യൽ മീഡിയകളിളുടെ ലോകം മുഴുവൻ എത്തപെടും ..അങ്ങ് മരുഭൂമിയിൽ ഞങ്ങൾക്കായ് ജോലിചെയ്യുന്ന എന്‍റെ അച്ഛൻ ..എന്‍റെ എല്ലാ ഇഷ്ടങ്ങൾക്കും.. ഒരു സുഹൃത്തിനെ പോലെ കൂടെ ഉള്ള എന്‍റെ അമ്മ .എന്‍റെ കുഞ്ഞു അനുജത്തി അവളുടെ ഭാവി..? ..എന്താകും ഇതറിയുമ്പോൾ ഇവരുടെ ഒക്കെ അവസ്ഥ .......ഇല്ല എനിക്ക് അതൊന്നും കാണാൻ കഴിയില്ല... എല്ലാവരുടെയും മുന്നില് ഒരു ചീത്ത പെൺകുട്ടിയായി ഇനിയുള്ള കാലം ആഹ്!!!!!...ഓർക്കാനേ വയ്യ. ....എനിക്ക്....

അവൾ കട്ടിലിൽ നിന്നും എഴുന്നേറ്റു ഫാൻ ഓഫ് ചെയ്തു..... ഭിത്തിയോട് ചേർന്ന് കിടന്ന മേശ പതിയെ ശബ്ദമുണ്ടാക്കാതെ വലിച്ചു ഫാനിനു കീഴെ കൊണ്ട് വന്നു .....കട്ടിലിൽ കിടന്ന ഷാൾ എടുത്തു ഫാനിൽ കുരുക്ക് കെട്ടി കണ്ണ് നിറഞ്ഞു ഒഴുകുന്നു...... ഒന്ന് ഉറക്കെ കരയണം എന്നുണ്ട് പക്ഷെ പറ്റുന്നില്ല ..അവൾ ഒരു നിമിഷം മനസ്സിൽ പ്രാർത്ഥിച്ചു അത്മാർത്ഥമായ്.. ഒരാളെ സ്നേഹിച്ചതിന്.... വിശ്വസിച്ചതിന്..... വിലപ്പെട്ടത് ഒക്കെ പങ്കു വെച്ചതിനു ..ജീവിതം ഒടുക്കേണ്ടി വരുന്ന അവസാനത്തെ പെൺകുട്ടി ഞാന്‍ ആകട്ടെ!!! കുരുക്ക് കഴുത്തിൽ മുറുകി കുറച്ചു നേരത്തെ പിടച്ചിലിന് ശേഷം അവളുടെ ശരീരം നിശ്ചലം ആയി.... ...അപ്പോഴേക്കും വീണ്ടും അമ്മയ്ക്ക് രക്തം അത്യവശൃമായ്.... ഒരു കാൾ വഴി തെറ്റി മറ്റൊരു പെൺക്കുട്ടിയിലേക്ക് എത്തിയിരുന്നു..

(കടപ്പാട് - Facebook ലെ അപരിചിതനായ സുഹൃത്തിനു)

ഈ കാലഘട്ടത്തിനു പസക്തിയുള്ള ഒന്നായി തോന്നി, കൂടുതൽ പേരിലേക്ക് എത്തട്ടെ എന്ന ആഗ്രഹത്തോടെ ...

കണ്ണാടിച്ചില്ലുകൾ

2015-11-10T00:42:00.000+05:30

അതെ, അവയിപ്പോൾ എന്‍റെ മനസ്സിലെ
കണ്ണാടി ചില്ലുകളാണ് ..
ചിത്രങ്ങൾ വ്യക്തമാവാത്ത,
ശരീരത്തെ അഗ്രഭാഗങ്ങൾ കൊണ്ട്
മുറിവേൽപ്പിക്കാൻ കഴിവുള്ള
ഓർമകചില്ലുകൾ ...

ഒരു കാലത്ത് അവ എന്‍റെ സ്വപ്നങ്ങൾക്ക്
മിഴിവാർന്ന ചിത്രങ്ങൾ തന്നു,
പ്രഭാത രശ്മികളുടെ സൗന്ദര്യം തന്നു
പക്ഷെ, ഇന്നതെന്‍റെ ഓർമകളെ
കുത്തിനോവിക്കുന്ന ചില്ലു കഷണങ്ങളാണ്
നിറം മങ്ങിയ മങ്ങിയ
വെറും ചില്ല് കഷണങ്ങൾ ...

വളപ്പൊട്ടുകൾ ..

2015-11-08T23:20:00.003+05:30

ആ പൊട്ടിയ വളപ്പൊട്ടുകൾ ചെന്നു വീണത്‌
അവളുടെ മയിൽ‌പ്പീലി കണ്ണുകളിലേക്കായിരുന്നു
പിന്നെ, എന്‍റെ ഹൃദയത്തിലേക്കും ...

അവളുടെ കണ്ണുകളെ തൊട്ടുതലോടി,
ഒരു പോറൽ പോലും ഏൽപ്പിക്കാതെ വീണ
ആ വളപ്പൊട്ടായിരുന്നെങ്കിൽ എന്നാശിച്ചു മനസ്
അവ തന്‍റെ ഹൃദയത്തിൽ വരച്ച പോറലുകൾ
ഇനിയും ഉണങ്ങിയില്ല എന്നറിഞ്ഞിട്ടുകൂടി ..

സാക്ഷി

2015-10-28T22:40:00.004+05:30

സാക്ഷിക്കെന്താ കൊമ്പുണ്ടോ ?

പഴയൊരു ചാനൽ പ്രോഗ്രാമിലെ വാചകമാണ്
പക്ഷെ, ഇന്നത്തെ സാഹചര്യങ്ങളിൽ
തീർത്തും പ്രസക്തമായ ഒന്ന്

പണം ഇല്ലാത്തവനും, അധികാരം ഇല്ലാത്തവനും
നാട്ടിൽ നിയമ സമത്വം നഷ്ട്ടപ്പെടുമ്പോൾ

ചെകുത്താന്‍റെ കീശയിലെ പണം മോഹിച്ചും,
സ്വന്തം ശരീരത്തിലെ ജീവന് വേണ്ടിയും
സാക്ഷികൾ മൊഴി മാറ്റി പറയുമ്പോൾ

ഒരുപാട് അമ്മമാരുടെയും, സഹോദരി മാരുടെയും
കണ്ണീരിനു വിലയില്ലാതാകുമ്പോൾ

സാക്ഷിയുടെ കൊമ്പൊടിഞ്ഞു പോകുന്നു ..

ഇതെല്ലാം കണ്ടുനിൽക്കുമ്പോൾ എന്‍റെ മനസ്സിൽ
ഒരു ചോദ്യം ബാക്കിയാവുന്നു

കണ്ണും, ചെവിയുമില്ലാത്ത നമ്മുടെ
നീധിപീOo സമാധിയായിട്ടിപ്പോൾ
എത്ര വർഷങ്ങളായി ?

പ്രേമവും - പ്രണയവും

2015-10-25T10:32:00.004+05:30

വളരെ അവിചാരിധമായി ഞാനിന്നലെ "എന്നു നിന്‍റെ മൊയ്ദീൻ" കണ്ടു.
അജ്മാൻ സിറ്റി സെന്‍റെർ വോക്സ് മൂവീസിൽ ടിക്കറ്റ് എടുക്കാൻ ഉള്ള ആ വലിയ തിരക്കിലെ 'ക്ലോസ്ഡ് ബോർഡ്‌' നു മുന്നിൽ നിന്നും മടങ്ങാൻ തുടങ്ങുമ്പോൾ ആരോ ഒരാൾ ടിക്കറ്റ്‌ വേണോ എന്നു തിരക്കി. അയാളുടെ കയ്യിൽ നിന്നും ടിക്കറ്റ്‌ വാങ്ങി ഉള്ളിലേക്ക് നടക്കുമ്പോളും മനസ്സിൽ പ്രതീക്ഷയുടെ വലിയ ഭാരം ഒട്ടും തന്നെ ഇല്ലായിരുന്നു.

പടം തുടങ്ങി അൽപനേരത്തെ വിരസത. റീലുകൾ തിരിയും തോറും പതിയെ മൊയ്തീന്‍റെയും, കാഞ്ചന മാലയുടെയും പ്രണയത്തിന്‍റെ തീവ്രത കൂടി കൂടി വന്നു.

വീട്ടുകാരോടും, അനിയത്തിമാരോടും ഉള്ള സ്നേഹം അവളെ അവനിൽ നിന്നും വർഷങ്ങൾ അകറ്റി നിർത്തിയപ്പോൾ, പ്രണയത്തിന്‍റെ സുഖം അതിനു കാലം വളമായ് തീർന്നിരുന്നു.

മുക്കത്തെ മഴ കൂടുതൽ സുന്തരമായി തോന്നി. ഗോപി സുന്ദറിന്‍റെ സംഗീതം അതിനെ കൂടുതൽ മനോഹരമാക്കി.

നാടിനോടുള്ള ഇഷ്ട്ടതാൽ മുക്കം വിട്ടു പോകേണ്ടിവരുമെന്ന വിഷമം അവരെ തീർത്തും അസ്വസ്ഥരാക്കിയിരുന്നു.

പ്രണയിനിയുടെ കാൽപാദം പതിഞ്ഞ മണ്ണിനോട് പോലും അവനു പ്രണയമായിരുന്നു, ഇരുവഞ്ഞി പുഴയിലെ വെള്ളം അവൾക്ക്‌ അമൃതും

ചേച്ചി പോയാൽ അനിയത്തി എന്ന 'പ്രേമം' മോഡലിനേക്കാൾ വളരെ ഹൃദയ സ്പർശിയായി തോന്നി കാഞ്ചന മാലയുടെ തോരാത്ത കാത്തിരിപ്പിന്. ഒരുപക്ഷെ പ്രേമവും, പ്രണയവും തമ്മിലുള്ള വ്യത്യാസത്തിന്‍റെ തുറന്ന പുസ്തകം കൂടിയായി "എന്നു നിന്‍റെ മൊയ്ദീൻ"

തീർച്ചയായും സംവിധായകാൻ വിമലിനും സങ്കത്തിനും കുറച്ചധികം നന്മകൾ പ്രക്ഷകരിലെക്കെത്തിക്കാൻ കഴിഞ്ഞു എന്നുള്ളത് തീർത്തും സന്തോഷകരമാണ്

മറവി ...

2015-09-27T22:55:00.002+05:30

മറക്കാനും, പൊറുക്കാനും, ക്ഷമിക്കാനും

കഴിയുക

ദൈവം നമുക്കു നൽകിയ ഏറ്റവും നല്ല
വരം

പക്ഷെ,

ചിലപ്പോൾ മറക്കാൻ ശ്രമിക്കുകയെന്നത്
ഒരിക്കലും കണ്ടിട്ടില്ലാത്ത ഒന്ന്
ഓർത്ത് എടുക്കുന്നതിനു തുല്യമാണ്

പ്രണയം, വിരഹം, മരണം
ഇവ മൂന്നും പരസ്പരം കെട്ടുപിണഞ്ഞു
കിടക്കുന്ന ഒന്നാണെന്ന് പലപ്പോഴും തോന്നാറുണ്ട്

തീർച്ചയായും
പറഞ്ഞറിയിക്കാൻ പറ്റാത്ത
വികാരം തന്നെയാണ് ഇവ മൂന്നും ...

സ്നേഹിക്കാൻ പടിപ്പിച്ചവർക്കായ്

2015-09-07T21:00:00.000+05:30

ഈ ഓർമ്മക്കുറിപ്പുകൾ അവർക്കാണ്
എന്നെ സ്നേഹിക്കാൻ പഠിപ്പിച്ച
മനസ്സിൽ ഞാൻ ആദരിക്കുന്ന എന്‍റെ ഗുരുക്കന്മാർക്ക്

''ചാലില്‍ കഴുത്തോളം വെള്ളത്തില്‍ നില്‍ക്കുന്ന
ചേലുറ്റ വെള്ളാമ്പല്‍ കൊണ്ടു നൽകാൻ
വന്‍ ചെളിയെത്ര ചവിട്ടി ഞാന്‍
തീരത്ത് പുഞ്ചിരിയൊന്നു വിരിഞ്ഞുകാണാന്‍
എന്‍തോഴി ചോല്ലുകില്‍ ചന്ദ്രനെക്കൂടിയും
തണ്ടോടറുത്തു ഞാന്‍ കൊണ്ടുനല്‍കും...''
എന്നെഴുതിയ വൈലോപ്പിള്ളിക്കും

പ്രണയത്തിന്‍റെ സുഗന്തവും,
കണ്ണീരിന്‍റെ നനവും,
ജീവിതത്തിന്‍റെ പച്ചയായ മുഖവുമായി
മജീദും, സുഹ്റയും
ബാല്യകാലസഖി യിലൂടെ വൈക്കം മുഹമ്മദ്‌ ബഷീറും

"ഒരു വളപ്പൊട്ടുണ്ടെൻ കയ്യിൽ
ഒരു മയിൽ‌പ്പീലിയുണ്ടെന്നുള്ളിൽ
വിരസ നിമിഷങ്ങൾ സരസമാക്കാനിവ
ധാരാളമാണെനിക്കിന്നും.." എന്നെഴുതിയ കുഞ്ഞുണ്ണി മാഷും
പ്രണയത്തിന്‍റെ വ്യത്യസ്ഥ ഭാവങ്ങൾ എന്നെ പഠിപ്പിച്ചു

മാധവിക്കുട്ടിയിൽ നിന്ന് കമല സുരയ്യയായ നീർമാദളത്തിന്‍റെ കൂട്ടുകാരിയും..

പ്രണയത്തിന്‍റെ മുല്ലമൊട്ടുകൾ ഒളിച്ചു വെച്ച് തനിച്ചു യാത്രപോയ നന്ദിതയും ..

പല കാലഘട്ടങ്ങളിലായി എന്നെ പ്രണയിക്കാൻ പഠിപ്പിച്ചു

പക്ഷെ,

ഒന്നെനിക്കറിയാം

ആദ്യമായ് പ്രണയിച്ച പെണ്ണും
സ്വന്തമായ് പ്രണയിച്ച പെണ്ണും
ഭ്രാന്തമായ് പ്രണയിച്ച പെണ്ണും

ഇന്നെനിക്കൊപ്പമില്ല ...

അവസാനവാക്ക് ..

2015-09-07T00:55:00.001+05:30

അതെന്‍റെ അവസാന വാക്കായിരുന്നു
അതു കേൾക്കാൻ കൂടെ ആരും തന്നെ ഉണ്ടായില്ല ..

നാല് ചുമരുകൾക്കുള്ളിലെ മങ്ങിയ വെളിച്ചത്തിൽ
വിയർപ്പുതുള്ളികളാൽ പൊതിഞ്ഞു
ഞാനെന്‍റെ അവസാന ശ്വാസത്തിനായി
കാതോർത്തു...

കുറെ ഉച്ചത്തിൽ ഞാനെന്‍റെ വാക്കുകളെ
ശ്വാസത്താൽ തള്ളിയകറ്റാൻ ശ്രമിച്ചു

അതുവരെ എന്നെ സ്നേഹിച്ചിരുന്ന,
ഞാൻ വിശ്വസിച്ചിരുന്ന അക്ഷരങ്ങൾ
ഒരൊറ്റുകാരനെ പോലെ കളിയാക്കി ചിരിച്ചു

ഇല്ല, എനിക്കതു പറഞ്ഞേ തീരു. അല്ലാതെ
എന്‍റെ ആത്മാവിനു ഈ ദേഹവും, ഭൂമിയും
വിട്ടുപോകാൻ സാധ്യമല്ല ..

ഇനിയുമതെന്തിനത് മറച്ചുവെയ്ക്കണം
ആർക്കുവേണ്ടി ചങ്ങലക്കിടണം

ഈ ലോകത്തെ മറ്റെന്തിനേക്കാളുമേറെ
ഞാൻ നിന്നെ ഭ്രാന്തമായി സ്നേഹിച്ചിരുന്നു,
സ്നേഹിക്കുന്നു ഇനിയും സ്നേഹിച്ചു കൊണ്ടേയിരിക്കുന്നു ....

ഇന്നവൾ

2015-08-05T01:20:00.004+05:30

പണ്ടെപ്പോളോ ഞാൻ അവളോടായ് പറയുമായിരുന്നു
നമ്മുടെ പ്രണയം, അത് മരിക്കാതിരിക്കണമെങ്കിൽ
നമ്മൾ വിവാഹം കഴിക്കാതിരിക്കണമെന്ന്

അന്നൊരു തമാശയായി പറഞ്ഞതാണ്
ഇന്ന്, കുറെ വർഷങ്ങൾക്കിപ്പുറം
വെറുതെ ഒന്ന് ഓർത്തു നോക്കുമ്പോൾ

ലോകത്തിന്‍റെ ഏതോ ഒരു കോണിൽ അവളും
മറ്റൊരിടത്ത് ഞാനും പരസ്പരം
അറിയാതെ കഴിയുമ്പോൾ

മനസ്സിൽ ഒരു നനുത്ത ശ്വാസമായി
ആ പ്രണയതുള്ളികൾ നിറഞ്ഞു നിൽക്കുന്നു
ഇനിയേതു കർക്കിടകത്തിലും
പെയ്തു തോരില്ലെന്ന വാശിയുമായി .....

മതവും, മനുഷ്യനും, ദൈവവും

2015-08-05T00:41:00.000+05:30

മതഭ്രാന്തന്മാർ

അവർ മതങ്ങൾക്കും, ദൈവങ്ങൾക്കും വേണ്ടി
പരസ്പരം വാളോങ്ങുമ്പോൾ
ഒരു ചോദ്യവും, ഉത്തരവും മാത്രം
ബാക്കിയാവുന്നു ..
ആര് ജയിച്ചു?
മനുഷ്യനോ, മതങ്ങളോ അതോ ദൈവങ്ങളോ

ഭാഗ്യം മൃഗങ്ങൾക്ക് മതങ്ങളും
ദൈവങ്ങളും ഇല്ലാത്തത് അല്ലെങ്കിൽ
മാനിനെ ഒരു മതത്തിലും സിംഹത്തിനെ
മറ്റൊരു മതത്തിലും ഉൾപെടുത്തായിരുന്നു

ഇല്ലെങ്കിൽ അവയുടെ വംശത്തിന്‍റെ
അന്തകരാവാൻ
മനുഷ്യ മൃഗം വേണ്ടി വരില്ലല്ലോ
അല്ലെ ....

ചുംബനം

2015-07-13T00:17:00.002+05:30

കലാലയ ഇടനാഴിയിൽ ആരും കാണാതെ ആദ്യമായി ചെറു ചുംബനം നൽകിയപ്പോൾ
നാണം കൊണ്ട് ആ മുഖം ചുവന്നു തുടുത്തപ്പോൾ അവൾ പറഞ്ഞു വൃത്തികെട്ടവൻ...!

കഴുത്തിൻ താലി വീണ് മധുവിധുവിൻ ആദ്യനാളുകളിൽ ചുംബനം കൊണ്ടു മൂടുമ്പോൾ അവൾ പറഞ്ഞു ഏത് നേരവും ഇതേ ഉള്ളു ചിന്ത....

കുട്ടികളായി കഴിഞ്ഞ് അടുക്കള വാതിൽ കടന്ന് പുറകിലൂടെ അവൾ അറിയാതെ അവളെ ചേർത്ത് പിടിച്ച് ചുംബനം നൽകിയപ്പോൾ അവൾ പറഞ്ഞു '' ദേ പിള്ളേര് കാണുമെന്നായി...'''

അവസാനം തൊലിപ്പുറത്ത് ചുളിവ് വീണപ്പോൾ പരസ്പരം കണ്ണുകളിലേക്ക് നോക്കി കുഴമ്പ് തേക്കുമ്പോൾ ഒരു പഴകി തേഞ്ഞ ചുംബനം നൽകിയപ്പോൾ അവൾ പറഞ്ഞു
കൊച്ച് മക്കൾ ആയി ഇതിന് ഒരു കുറവും വന്നിട്ടില്ല...

അവസാനം വെള്ള തുണിയിൽ പൊതിഞ്ഞ്..
എന്റെ കരളിനെ പൊതിഞ്ഞ് കിടത്തിയപ്പോൾ അവസാനമായിട്ട് ഒരു ചുംബനം നൽകിയപ്പോൾ അവൾ ഒരു പരിഭവവും പറഞ്ഞില്ല വെറുതെ അങ്ങനെ കിടന്നു
ഇത് '' എത്ര കിട്ടിയതാ എന്നാ മട്ടിൽ....''''

(കടപ്പാട് Facebook ൽ share ചെയ്ത അപരിചിതനായ സുഹൃത്തിന് )

ജന്മദിനം

2015-07-09T23:23:00.001+05:30

അന്നവളുടെ ജന്മദിനമായിരുന്നു
അതെങ്ങനെ  ആഘോഷിച്ചാലും
എനിക്കു മതിയാവില്ലായിരുന്നു.

അന്ന് ഞങ്ങൾക്കൊരു അതിഥികൂടി
ഉണ്ടായിരുന്നു, ഒരു കുഞ്ഞു മഴ

അത് ഞങ്ങളുടെ ആഘോഷങ്ങളെ
കൂടുതൽ ആനന്ദവും, ഹൃദ്യവുമാക്കി

മഴത്തുള്ളികളാൽ നനഞ്ഞ അവളുടെ
മുഖം അന്ന് കൂടുതൽ സുന്ദരമായിരുന്നു

ചെറിയ ഇടിമിന്നലുകളിൽ ഇടയ്ക്കെപ്പളോ
എന്‍റെ ജന്മദിനക്കാരി ശരിക്കും പെടിച്ചുപോയി

അവളെ നെഞ്ചോട്‌ ചേർത്ത് നിർത്തി ധൈര്യം
പകർന്നപ്പോൾ ആ തൊട്ടാർവാടിയെ
ഞാൻ കൂടുതൽ  അടുത്തറിയുകയായിരുന്നു,
സ്നേഹിക്കുകയായിരുന്നു എന്‍റെ ജീവനോളം...

മഴയ്ക്കും പ്രണയത്തിനും ഇടയിൽ

2015-05-13T00:33:00.003+05:30

ട്രെയിൻ മഴത്തുള്ളികളെ വകഞ്ഞുമാറ്റി
പാളത്തിലൂടെ പാഞ്ഞുകൊണ്ടിരുന്നു ...

നനുത്ത മഴത്തുള്ളികൾ
മനസ്സിൽ പ്രണയം നിറച്ചിരുന്ന കാലം
ഓർമയിൽ നിറഞ്ഞു

മഴയേക്കാൾ തണുപ്പായിരുന്നു
അവൾക്കു..

ജൂണ്‍ മാസത്തിലെ മഴയിൽ
നനഞ്ഞു കുതിർന്ന വസ്ത്രങ്ങളാൽ
അവൾ വരുമ്പോൾ
ഒരു പുതു മഴതൻ ഗന്ധമായിരുന്നു എങ്ങും

ഞാൻ അവളും, അവൾ ഞാനും ആയി
മാറുന്ന നിമിഷങ്ങളായിരുന്നു അത്

പ്രണയം അത് ചിലപ്പോൾ ആർക്കും
വർണ്ണിക്കാൻ കഴിയാത്ത അത്രതന്നെ
തീവ്രമായ ഒരു വികാരം തന്നെയാണു

ചുറ്റുപാടുകളെ വിസ്മരിച്ച
കെട്ടുപാടുകളെ പൊട്ടിച്ചെറിഞ്ഞ
മനസ്സിൽ കാത്തുസൂക്ഷിക്കാൻ ഒരുപാട്
ഇഷ്ട്ടപ്പെടുന്ന ഒന്നാണ് ...

ഒരിടിവെട്ടൽ പോലെ ഒരു ശബ്ദം
ഓർമകളുടെ ലാളനത്താൽ
ലയിച്ചു പോയ എന്നെ
ആരോ മടക്കി വിളിച്ചു

"നിങ്ങളുടെ ടിക്കറ്റ്‌ എവിടെ ?"

ഞാൻ പോക്കറ്റിൽ പരതി
കയ്യിൽ തടഞ്ഞ കടലാസ് തുണ്ടെടുത്തു നീട്ടി
ഭാഗ്യം, അത് ടിക്കറ്റ്‌ തന്നെ ആയിരുന്നു

എന്റെ ഓർമകളെ പാളം തെറ്റിച്ചു
അയാൾ നടന്നകന്നു

ചിലപ്പോൾ തെറ്റിയത്
എന്റെ ഓർമ്മകൾ ആയിരിക്കാം

നഷ്ട്ടപ്പെട്ടുപോയ പ്രണയം
മറ്റൊരാളുടെ സ്വന്തമായ പ്രണയം
തിരയെടുത്ത പേരാണെന്നറിഞ്ഞിട്ടും
അതിപ്പോളും താലോലിക്കുന്നത്
ഒരുതരം പാളം തെറ്റൽ തന്നെയല്ലേ ?

പ്രണയം

2014-11-06T15:36:00.001+05:30

പ്രണയം, എന്നെ വട്ടു പിടിപ്പിക്കുന്നു
കാല്പനികതയുടെ ലോകത്തേക്ക്
വലിച്ചടുപ്പിക്കുന്നു ...

വാക്കുകളുടെ ഹീനമായ മുഖം
തുറന്നു കാട്ടുന്നു ...

ഓർമകളുടെ പുസ്തകത്തിലെ
വർണ്ണത്താളുകളിൽ
വിറയാർന്ന കൈകളാൽ കോരിവരച്ച രൂപം
മനസ്സിൽ ആളിക്കത്തിക്കുന്നു

അതെ,
മനസ്സിൽ മഴയായും, തണുപ്പായും
അരിച്ചിറങ്ങി നിഞ്ചിൽ കെട്ടി നിന്നെന്നെ
കഷായപ്പനി കൊള്ളിച്ച
നിന്‍റെ പ്രണയം ...

ഓർമകളുടെ അതിപ്രസരത്താൽ
കാലത്തിനും മായ്ക്കാനാവുന്നില്ല

അത് ചിലപ്പോൾ
എനിക്കും നിനക്കും ഇടയിലെ അതിർ വരമ്പുകൾ
ഇല്ലാതാക്കിയ ഒരു വികാരമായിരിക്കാം ...

നീ എന്‍റെതാണ് എന്ന അഹങ്കാരത്തിനു മേൽ
തുളഞ്ഞു കയറിയ ഇരുമ്പ് പാളി പോലും
ഇന്നു ദ്രവിച്ചു പൊയിരിക്കുന്നു..

പക്ഷെ

ഒന്നെനിക്കറിയാം

നീ എന്ന പ്രണയം ...

അതെന്നെ അന്നും, ഇന്നും, എന്നും

വേദനിപ്പിച്ചു കൊണ്ടിരിക്കുന്നു ...

അവൾ എന്‍റെ മഴ

2014-10-28T17:20:00.001+05:30

ഞാന്‍ എന്തിനാണ് നിന്നെ ഇത്രമേല്‍ സ്നേഹിക്കുന്നത് എന്ന് ചോദിച്ചാല്‍, ചിലപ്പോള്‍ നീ എന്‍റെ പ്രിയ കാമുകി ആയതിനാലാവും, മറ്റുചിലപ്പോള്‍ നീ എന്‍റെ മനസ്സില്‍ പ്രനയതുള്ളികള്‍ കൊണ്ട് നിറക്കുന്നതിനാലാവും. എന്ത് തന്നെ ആയാലും ഞാന്‍ നിന്നെ അത്രമേല്‍ ഇഷ്ട്ടപ്പെടുന്നു .

നിന്‍റെ കൊലുസിന്റെ നാദം എന്‍റെ കാതുകളില്‍ മുഴങ്ങുന്നുണ്ട് , നീയാകുന്ന തുള്ളികള്‍ ശരീരത്തില്‍ ഒലിച്ചിറങ്ങുന്നു, വികാരങ്ങളെ ഉണര്‍ത്തിവിടുന്നു. ഞാന്‍ നിന്‍റെ പ്രണയത്താല്‍ തണുത്തുറഞ്ഞു പോയിരിക്കുന്നു. അത് ചിലപ്പോള്‍ നിന്‍റെ സ്നേഹം നിറഞ്ഞു ഒഴുകുന്നതിനാല്‍ ആയിരിക്കാം.

അറിയില്ല പര ബന്ധം പുലര്‍ത്തുന്ന നീ എന്‍റെ പ്രണയം ഇഷ്ട്ടപ്പെടുന്നുണ്ടോ എന്ന് .പലവട്ടം ഞാന്‍ നിന്നോടത് ചോദിച്ചതല്ലേ, അപ്പോളെല്ലാം മിന്നലുകള്‍ കൊണ്ട് നീ എന്നെ കളിയാക്കിയില്ലേ . ഒടുവില്‍ "നിന്നെ എനിക്ക് ഇഷ്ട്ടമല്ല" എന്ന് ഉറക്കെ വിളിച്ചു പറഞ്ഞതിന്‍റെ ദേഷ്യത്താല്‍ ഒരു വലിയ ഇടി മുഴക്കി നീ അന്നെന്നോട് വിട പറഞ്ഞതല്ലേ.

ഇണങ്ങിയും, പിണങ്ങിയും നമ്മള്‍ അത്രമേല്‍ സ്നേഹിക്കുകയായിരുന്നില്ലേ. എന്‍റെ പ്രായം നിനക്കറിയാം പക്ഷെ നിന്‍റെ പ്രായം ഒരിക്കലും ഞാന്‍ തിരക്കിയത് പോലും ഇല്ലല്ലോ, എന്നിട്ടും ബാല്യകാലം മുതല്‍ നിന്നെ ഞാന്‍ സ്നേഹിച്ചുകൊണ്ടിരിക്കുന്നു.

ഈ ജന്മം മുഴുവന്‍ മതി വരില്ലല്ലോ എനിക്ക് നിന്നെ സ്നേഹം കൊണ്ട് മൂടാന്‍. പദ്മരാജനില്‍ നിന്നും കടമെടുത്ത് നിന്നെ ഞാന്‍ സ്നേഹത്തോടെ വിളിക്കട്ടെ "ക്ലരെ" മഴവില്ലിന്റെ ഏഴു നിറങ്ങള്‍ ഉള്ളവളെ , പ്രിയപ്പെട്ടവളെ 'എന്‍റെ ക്ലരെ' നിന്നെ എത്ര സ്നേഹിച്ചിട്ടും മതി വരുന്നില്ലല്ലോ...