Social24Network

DREAM2 अभ्यासिका आणि अकॅडमी मध्ये परीक्षेवर बोलू काही मार्गदर्शन शिबिर उत्साहात साजरे

noreply@blogger.com (मुख्य संपादक) — Sun, 20 Sep 2026 02:36:27 -0700

बाळापुर - DREAM2 अभ्यासिका आणि अकॅडमी मध्ये स्पर्धा परीक्षेचा अभ्यास करणाऱ्या तसेच पोलीस भरतीचा अभ्यास करणाऱ्या विद्यार्थ्यांकरीता परीक्षेवर बोलू काही मार्गदर्शन शिबिराचे आयोजन करण्यात आले होते.

यावेळी कार्यक्रमाचे अध्यक्ष सहाय्यक पोलीस उपनिरीक्षक मा.संजय राजेंद्र चिंतलवार हेतसेच प्रमुख पाहुणे म्हणून अविनाश कापगते, हेड कॉन्स्टेबल गणेश जाधव शिपाई तसेच भारतीय सैन्य दलातील करण तायडे उपस्थित होते

यावेळी स्पर्धा परीक्षेचा पोलीस भरतीचा अभ्यास करत असताना जिद्द, चिकाटी, सातत्य, आपल्या आयुष्यातील कठीण प्रसंगातून आपण कसे मार्ग काढावे याबद्दल संजय राजेंद्र चिंचलवार यांनी विद्यार्थ्यांना विशेष मार्गदर्शन केले.

एमपीएससी चा अभ्यास करत असताना कोणत्या विषयांना जास्त प्राधान्य दिले पाहिजे अभ्यासाच्या पद्धती अभ्यासाच्या वेळा याविषयी अविनाश कापगते तसेच गणेश जाधव यांनी मार्गदर्शन केले. शारीरिक चाचणी, गोळा फेक, रनिंग याविषयी कारण तायडे यांनी मार्गदर्शन केले. आपल्या आयुष्यातील संघर्षाची परिस्थिती तसेच अनुभव सांगून विद्यार्थ्यांना परीक्षेसाठी शुभेच्छा दिल्या.

यावेळी कार्यक्रमाचे सूत्रसंचालन विश्वजीत वानखडे सर यांनी तर आभार उमेश जाधव सर यांनी केले. विद्यार्थी मोठ्या संख्येने उपस्थित होते.

'मी राजगृहातील रमाई बोलतेय' हा केवळ प्रयोग नव्हे तर वैचारिक प्रबोधन : प्रा. दिलिप महालिंगे

noreply@blogger.com (मुख्य संपादक) — Mon, 17 Aug 2026 02:20:17 -0700

छ. संभाजीनगर: 'मी राजगृहातील रमाई बोलतेय' हा केवळ प्रयोग नव्हे तर वैचारिक प्रबोधन असल्याचे प्रतिपादन ज्येष्ठ नाट्यकर्मी प्रा. दिलीप महालिंगे यांनी केले. ते रमाई फाऊंडेशन, रमाई मासिक, रमाई प्रकाशन आणि लोकनेते भय्यासाहेब तथा यशवंतराव आंबेडकर प्रतिष्ठान, छ. संभाजीनगर यांच्या संयुक्त विद्यमाने १५ ऑगस्ट २०२६ रोजी यशवंतराव चव्हाण नाट्यगृह येथे महाकवी वामनदादा कर्डक यांची जयंती आणि भारतीय स्वातंत्र्य दिनानिमित्त आयोजित या कार्यक्रमात 'मी राजगृहातील रमाई बोलतेय' या एकपात्री प्रयोगासह 'तरी आम्ही बोलू नये' या वैचारिक काव्यमय कार्यक्रमा प्रसंगी बोलत होते.

या कार्यक्रमाचे उद्घाटन ज्येष्ठ नाट्यकर्मी प्रा. दिलीप महालिंगे यांच्या हस्ते झाले
तर अध्यक्षस्थानी ख्यातनाम साहित्यिक व विचारवंत प्राचार्य डॉ. संजय मून उपस्थित होते. कार्यक्रमाचे प्रास्ताविक रमाई फाउंडेशनच्या अध्यक्षा तथा रमाई मासिकाच्या संपादक प्रा. डॉ. रेखा मेश्राम यांनी केले.

प्रा. रमणी बबिता आकाश (पुणे) यांनी 'मी राजगृहातील रमाई बोलतेय' या एकपात्री प्रयोगातून उपस्थितांची मने जिंकली. तसेच 'तरी आम्ही बोलू नये' या वैचारिक काव्यमय कार्यक्रमात प्रा. रमणी बबिता आकाश, श्रेया वाघ, अनिशा दोडके, जित्या जाली, किरण प्रकाश, स्वराज समदूर, विजय लोखंडे, प्रशिक तायडे, किशोर चक्रनारायण, सुमेध वंदना मधुकर, सुभाष गवळी आणि शुभम आव्हाळे यांनी आपापल्या कवितांमधून समाजमनाला जागृत केले.

या कार्यक्रमास प्रमुख पाहुणे म्हणून प्रा. विजयकुमार गवई ॲड एस आर बोडदे , प्राचार्य सुनिल वाकेकर, प्राचार्य डॉ. यशवंत खडसे, डॉ धनराज गोंडाने, स सो खंडाळकर, रतनकुमार साळवे, ऍड जे के नारायणे व्ही के वाघ, यांची विशेष उपस्थिती होती.

कार्यक्रमाच्या यशस्वीतेसाठी दैवतीला गवंदे, राजकन्या गोंडाणे, डॉ. वंदना पाटील, शारदा पगारे रत्नकला बनसोडे, संघमित्रा खंडाळकर, सविता अभ्यंकर, सरला सदावर्ते, गंगाबाई सुरडकर, यांनी परिश्रम घेतले.

आंबेडकरी चळवळ अधिक प्रगल्भ करण्यासाठी महिलांनी पुन्हा संघटित होण्याची गरज

noreply@blogger.com (मुख्य संपादक) — Thu, 28 May 2026 08:31:50 -0700

रमा आंबेडकर : पुण्यात १२ वे रमाई महिला चळवळीचे साहित्य संमेलन

पुणे, ता. २७ : “डॉ. बाबासाहेब आंबेडकर यांच्या नेतृत्वात महिलांनी महाडपासून ते काळाराम मंदिरप्रवेशाच्या प्रत्येक सत्याग्रहात आघाडीवर राहून लढा दिला. हाच संघर्षाचा वारसा अधारित ठेवण्यासाठी महिलांनी पुन्हा संघटित होण्याची गरज आहे,” असे आवाहन डॉ. बाबासाहेब आंबेडकर यांच्या नात व सामाजिक कार्यकर्त्या रमा आंबेडकर यांनी केले. कुटुंबाचा कणा असलेल्या स्त्रीने नव्या पिढीला आपल्या पूर्वजांच्या बलिदानाची जाणीव करून दिल्यास, आंबेडकरी चळवळ अधिक प्रगल्भ होईल, असेही त्यांनी सांगितले.

रमाई फाऊंडेशन, रमाई मासिक, रमाई प्रकाशन व लोकनेते भय्यासाहेब तथा यशवंतराव आंबेडकर प्रतिष्ठान, छत्रपती संभाजीनगर (औरंगाबाद) आयोजित महात्मा फुले यांच्या द्विजन्मशताब्दी, महाड चवदार तळे सत्याग्रह शताब्दी, संत गाडगेबाबा शतकोत्तर सुवर्णजन्मोत्सव, आचार्य दीनबंधू गुरूजी यांच्या जन्मशताब्दी निमित्त १२ वे रमाई महिला चळवळीचे साहित्य संमेलन पुणे येथे दि. २७ मे २०२६ (रमाई स्मृतिदिन) रोजी बालगंधर्व रंग मंदिर, संभाजी पार्क जवळ, जंगली महाराज रोड, शिवाजीनगर, पुणे येथे संपन्न झाले. या साहित्य संमेलनाचेउद्घाटन रमा आंबेडकर-तेलतुंबडे यांच्या हस्ते गुरुवारी झाले. याप्रसंगी संमेलनाध्यक्ष व विद्रोही सांस्कृतिक चळवळीच्या राज्याध्यक्ष प्रा. प्रतिमा परदेशी, मुख्य संयोजक प्रा. डॉ. रेखा मेश्राम, स्वागताध्यक्ष प्रसन्न गजभिये, पिंपरी-चिंचवड महापालिकेचे उपायुक्त अण्णा बोडे, प्रा. विजयकुमार गवई, अ‍ॅड. के.ई. हरिदास (सत्यशोधक समाज), डॉ. अभिजित वैद्य (पुणे), प्राचार्य म.ना. कांबळे (फुले-आंबेडकर विद्वत सभा), डॉ. बबन जोगदंड (बार्टी, पुणे) डॉ. यशवंत मानखेडकर (पुणे) मा. राजेंद्र शेलार (पुणे),आदी उपस्थित होते. या वेळी दिनकर काकडे लिखित ‘सूर्यपुत्र यशवंत ऊर्फ यशवंतराव बाबासाहेब आंबेडकर’ आणि ‘राष्ट्रमाता रमाई’ या पुस्तकांचे प्रकाशन उपस्थितांच्या हस्ते झाले.

प्रा. परदेशी म्हणाल्या, 'पुरुषसत्ताक, जातिव्यवस्था आणि वर्गव्यवस्था अशी तिहेरी बेडी महिलांना तोडायची आहे. पूर्वी जातीयवाद केला जात होता. आता जातिव्यवस्था झुंडबळीच्या माध्यमातून महिलांचे शोषण करत आहे. त्यामुळे नारीवंदन नको, महिलांना सन्मानाने वागवावे,' अशी अपेक्षा १२व्या रमाई महिला साहित्य संमेलनाच्या अध्यक्षा प्रा. प्रतिमा परदेशी यांनी बुधवारी व्यक्त केली. 'मागासवर्गीय, आदिवासी योजनांच्या पैशांवर डल्ला मारून लाडक्या बहिणींना दीड हजार रुपये दिले जात आहेत,' अशी टीका करून 'भाजपसोबत आहेत ते आमचे नाहीत, हे ठामपणे सांगण्याची वेळ आली आहे,' याकडे त्यांनी लक्ष वेधले. तसेच, पिंपरी-चिंचवड महापालिकेतर्फे सुमारे ३० गुंठे जागेत रमाई आंबेडकरांचे भव्य स्मारक उभारले जात आहे. नुकतेच त्याचे भूमिपूजन झाले असून, येत्या दोन वर्षांत हे स्मारक सर्वांसाठी खुले होईल, असे बोडे यांनी सांगितले. कविता मोरवणकर यांनी सूत्रसंचालन केले. दैवशाला गवंदे यांनी आभार मानले.

पहिला परिसंवाद ‘नारी वंदन बील : भ्रम आणि वास्तव’ या विषयावर संपन्न झाला. या परिसंवादाच्या अध्यक्षा डॉ. गीताली वि.म. संपादक ‘मिळून सार्‍या जणी’च्या या होत्या. तर मा. डॉ. नितीश नवसागरे (पुणे), मा. अ‍ॅड. वैशाली डोळस (छ. संभाजीनगर), या परिसंवादातील प्रमुख वक्ते म्हणून उपस्थित होते. दुसरा परिसंवाद ‘स्त्रीवादी चळवळीचे ५० वर्ष आणि आजचे संदर्भ’ या विषयावर संपन्न झाला. या परिसंवादाच्या अध्यक्ष प्रा. एच.एस. भालेसईनतर वक्ते म्हणून प्रा. माधुरी दीक्षित (अ.नगर), सुषमा पाखरे (वर्धा), डॉ. संजय कांबळे (पुणे) प्रा.प्रवीण कांबळे हे उपस्थित होते.

तसेच दुपारी विविध क्षेत्रांत उल्लेखनीय कामगिरी करणार्‍या महिलांना ‘रमाई गौरव पुरस्कार’ देवून त्यांचा सन्मान करण्यात येणार आहे. त्यामध्ये - मा. सीमा भालेसईन (पुणे) मा. अ‍ॅड. जयश्री भगत (छ. संभाजीनगर) मा. निरंजना आवटे (नांदेड) मा. उज्वला गणवीर (नागपूर) मा. सुरेखा पैठणे (ठाणे) मा. शिल्पा कांबळे (मुंबई) मा. अ‍ॅड. इंदूमती वराळे (छ. संभाजीनगर) मा. वनश्री वनकर (पुणे) मा. आशा डांगे (छ. संभाजीनगर) मा. डॉ. अंजली अभ्यंकर (पुणे) मा. प्रा. रमणी बबिता आकाश (पुणे) मा. प्रांजली वाणी (पुणे) मा. सुरेखा युवराज बर्वे (नाशिक) मा. निशा पंडित (इगतपुरी) मा. सुनिता सोनवणे (सोलापूर) मा. सुजाता ओव्हाळ (पुणे) मा. शीतल साठे (पुणे), मा. चित्रा कुर्‍हे (नाशिक) मा. डॉ. सुनिता बोर्डे (सांगली) मा. अ‍ॅड. गायत्री कांबळे (पुणे) मा. प्रज्ञा बोदडे (पुणे) प्रज्ञा जाधव (मुंबई) मा. कल्पना दिवेकर (घोटी) प्राचार्य डॉ. वृषाली रणधीर (पुणे) मा. रूपा धांडे (पुणे) डॉ. यशोधरा सोनवणे (पुणे) मा. मीरा अय्यंगर (पुणे) मा. कमल वानखडे (अकोला) मा. अस्मिता दिघे (कोल्हापूर) मा. करूणा जाधव (छ.संभाजीनगर) डॉ प्रद्ना इंगळे (पुणे) महानंदा डाळिंबे, यांचा समावेश आहे.

‘मी राजगृहातील रमाई बोलते’ हे एकपात्र नाटक प्रा. रमणी बबिता आकाश यांनी सादर केले. तर ‘तरी आम्ही बोलू नये’ हा वैचारिक कवितांचा कार्यक्रम यावेळी संपन्न झाला.

यावेळी रमाई फाउंडेशन तथा रमाई मासिकाच्या दैवशीला गवंदे, ललिता खडसे, बे, शारदा गजभिये, प्रा. विजया सिरसाट, कल्पना वाहुळे, डॉ. वंदना पाटील, मंगल मून, अनिता डोंगरे, जयश्री सरोदे, सुवर्णा सिरसाट, प्रभा वानखडे, शिला जाधव, अनिता चव्हाण प्रिया भोळे रत्नकला बनसोड यांनी प्रयत्न केले.

बौद्ध समाजाने जनगणनेत धर्म बौद्ध आणि जात...... ; प्रा. भारत सिरसाट यांचे आवाहन

noreply@blogger.com (मुख्य संपादक) — Thu, 21 May 2026 01:05:46 -0700

दिशाभूल करणारी माहिती पसरवणा्यांपासून सावध राहण्याचे आवाहन

छत्रपती संभाजीनगर / प्रतिनिधी - आगामी जनगणनेची तयारी सुरू झाली असून या जनगणनेत बौद्ध समाजाने अत्यंत काळजीपूर्वक व मुद्देसूद माहिती भरावी, असे आवाहन भारतीय बौद्ध महासभेचे माजी औरंगाबाद जिल्हा महासचिव, फुले-आंबेडकर विद्वत सभेचे औरंगाबाद जिल्हाध्यक्ष तथा पाली व बौद्ध साहित्याचे गाढे अभ्यास प्रा. भारत सिरसाट यांनी केले आहे.

'सोशल 24 नेटवर्क'शी बोलतांना प्रा. भारत सिरसाट म्हणाले की, आगामी जनगणनेत बौद्ध समाजाने आपला धर्म बौद्ध म्हणुन नोंद करावा, प्रवर्ग अनुसूचित जाती (SC) म्हणुन नोंद करावा तसेच जात महार म्हणुन नोंद करावी, भाषेच्या रकान्यामध्ये मराठी भाषेसह पाली भाषा नमूद करावी. जनगणनेमध्ये बौद्धांनी कोणती माहिती भरावी याबाबत अनेक सामाजिक कार्यकर्ते, साहित्यिक तसेच विचारवंत सक्रिय झाले असून त्यांनी समाजाची दिशाभूल करणारी चुकीची माहिती पसरवू नये, समाजाची दिशाभूल करू नये, असे आवाहनही त्यांनी यावेळी केले.

वैचारिक दिवाळखोरीकडे चाललेली पिढी समाजासाठी मोठे संकट : मंगल खिवंसरा

noreply@blogger.com (मुख्य संपादक) — Mon, 18 May 2026 03:10:09 -0700

छत्रपती संभाजीनगर : “वैचारिक दिवाळखोरीकडे चाललेली आजची पिढी समाजासाठी मोठे संकट ठरत असून चिकित्सा, संवाद आणि सामाजिक जाणिवा जपणारी विचार परंपरा टिकवणे ही काळाची गरज आहे,” असे प्रतिपादन ज्येष्ठ सामाजिक कार्यकर्त्या मंगल खिवंसरा यांनी केले. त्या स्थानिक जिजाऊ मंदिर, म्हाडा कॉलनी, बाबा पेट्रोल पंपाजवळ, छत्रपती संभाजीनगर येथे १२ वे रमाई महिला चळवळीचे साहित्य संमेलन, पुणे–२०२६ च्या अध्यक्षपदी प्रा. प्रतिमा परदेशी यांची निवड झाल्याबद्दल आयोजित कार्यक्रमातून बोलत होत्या. यावेळी पिछडा ओबीसी संघटनेचे सुदाम चिंचाणे तसेच आंबेडकरी साहित्यिक भीमराव सरवदे आदी उपस्थित होते.

यावेळी प्रा. प्रतिमा परदेशी यांचा शाल, पुष्पगुच्छ व स्मृतिचिन्ह देऊन उपस्थित मान्यवरांच्या हस्ते सत्कार करण्यात आला. सत्काराला उत्तर देताना प्रा. परदेशी यांनी परिवर्तनवादी साहित्याची परंपरा जपण्याचा निर्धार व्यक्त केला. “महात्मा फुले, डॉ. बाबासाहेब आंबेडकर, सावित्रीबाई फुले यांच्या विचारांवर आधारित साहित्य चळवळ समाजाला दिशा देणारी आहे, असे त्या म्हणाल्या. यावेळी सुदाम चिंचाणे यांनी मागासवर्गीय समाजातील प्रश्नांवर भाष्य केले, तर भीमराव सरवदे यांनी आंबेडकरी साहित्य चळवळीचा वारसा पुढे नेण्याचे आवाहन केले. यावेळी कांचन गादीकर, डॉ. सुनिता शिंदे, अॅड. वैशाली कडू, ललिता खडसे, जयश्री सरोदे, सविता अभ्यंकर, मंगल मून, तिलोत्तमा झाडे, अनिता दैवतकर, मोनिसा खान आदी उपस्थित होते.

प्रास्ताविक प्रा.डॉ. रेखा मेश्राम यांनी केले, सूत्रसंचालन अॅड. वैशाली डोळस, आभार प्रा. भारत शिरसाट यांनी केले. महिला वर्कशॉप मध्ये .... महिलांनी सहभाग नोंदविला. तसेच मराठा सेवा संघ, विद्रोही सांस्कृतिक चळवळ व इतर उपस्थितांकडून प्रतिमा परदेशी यांचा सत्कार करण्यात आला.

चिकित्सा नाकारणाऱ्या संस्कृतीविरोधात रमाई साहित्य संमेलनाचा एल्गार ; प्रा. प्रतिमा परदेशी
“साहित्य हे केवळ मनोरंजनाचे माध्यम नसून सामाजिक परिवर्तनाचे प्रभावी साधन आहे. स्त्री, बहुजन, श्रमिक आणि वंचित समाजाच्या वेदना मांडणारे साहित्यच समाजाला नवी दिशा देऊ शकते. परिवर्तनवादी विचारांना रोखण्याचा प्रयत्न होत असतानाच चिकित्सा नाकारणाऱ्या संस्कृतीविरोधात रमाई साहित्य संमेलनाने एल्गार पुकारला आहे.

१२ वे माई चळवळीच्या साहित्य संमेलनाच्या अध्यक्षपदी ज्येष्ठ विचारवंत प्रा. प्रतिमा परदेशी यांची निवड

noreply@blogger.com (मुख्य संपादक) — Tue, 10 Mar 2026 03:15:00 -0700

पुण्यात २७ मे रोजी 'रमाई चळवळीचे' १२ वे साहित्य संमेलन

औरंगाबाद (प्रतिनिधी): रमाई फाउंडेशन, रमाई मासिक, रमाई प्रकाशन आणि सूर्यपुत्र भय्यासाहेब तथा यशवंतराव आंबेडकर प्रतिष्ठान, औरंगाबाद यांच्या वतीने आयोजित १२ व्या रमाई चळवळीच्या साहित्य संमेलनाच्या अध्यक्षपदी विद्रोही सांस्कृतिक चळवळीच्या राज्याध्यक्षा आणि ख्यातनाम विचारवंत प्रा. प्रतिमा परदेशी यांची निवड करण्यात आली असल्याची घोषणा मुख्य संयोजक प्रा. डॉ. रेखा मेश्राम यांनी आज (सावित्रीबाई फुले स्मृती दिनी) केली आहे.

प्रा. प्रतिमा परदेशी यांची निवड ही त्यांच्या सामाजिक आणि साहित्यिक योगदानाचा गौरव मानला जात आहे. त्या गेल्या अनेक वर्षांपासून विद्रोही सांस्कृतिक चळवळीच्या माध्यमातून सक्रिय आहेत. फुले-आंबेडकरी विचारसरणीचा वारसा पुढे नेण्यात त्यांचा मोठा वाटा आहे.

संमेलनाच्या नियोजनासाठी रमाई फाउंडेशन आणि विविध सामाजिक संस्थांच्या वतीने जोरदार तयारी सुरू आहे. हे संमेलन पुण्यातील साहित्याचा आणि विचारांचा नवा टप्पा ठरेल, अशी अपेक्षा व्यक्त केली जात आहे. संमेलनाच्या मुख्य संयोजिका प्रा. डॉ. रेखा मेश्राम यांनी निवडीचे पत्र देऊन परदेशी यांचे अभिनंदन केले. या निवडीबद्दल राज्यभरातील विविध सामाजिक संघटनांनी आणि साहित्यिकांनी त्यांचे स्वागत केले आहे.

प्रा. डॉ. रेखा मेश्राम यांना 'कवी दिनकर साळवे स्मृती पुरस्कार' जाहीर

noreply@blogger.com (मुख्य संपादक) — Mon, 9 Mar 2026 23:59:00 -0700

छत्रपती संभाजीनगर/ प्रतिनिधी - संगमनेर येथील सुजात फाउंडेशन संचलित 'कवी दिनकर साळवे स्मृती पुरस्कार-२०२६' ची घोषणा करण्यात आली आहे. यंदाचा हा पुरस्कार छत्रपती संभाजीनगर येथील 'रमाई' मासिकाच्या संपादिका आणि प्रसिद्ध व्याख्यात्या प्रा. डॉ. रेखा मेश्राम यांना जाहीर करण्यात आला आहे. सुजात फाउंडेशनचे हे पुरस्काराचे पाचवे वर्ष असून, सामाजिक आणि साहित्यिक क्षेत्रातील त्यांच्या उल्लेखनीय योगदानाची दखल घेऊन ही निवड करण्यात आली आहे.

या पुरस्कार वितरण सोहळ्याचे आयोजन शनिवार, १४ मार्च २०२६ रोजी सायंकाळी ५:३० वाजता संगमनेर येथील व्यापारी असोसिएशन हॉल, पडतानी कॉम्प्लेक्स येथे करण्यात आले आहे. या कार्यक्रमाच्या अध्यक्षस्थानी महाराष्ट्र विधान परिषदेचे माजी सदस्य मा. डॉ. सुधीरजी तांबे भूषविणार असून, प्रमुख पाहुणे म्हणून मुंबईचे ज्येष्ठ पत्रकार मा. ज्ञानेश महाराव उपस्थित राहणार आहेत.

या सोहळ्याला सामाजिक आणि राजकीय क्षेत्रातील विविध संघटनांनी आपला सक्रिय पाठिंबा दर्शवला आहे. यामध्ये राष्ट्रीय दलित पँथर, वंचित बहुजन आघाडी, आर.पी.आय., राष्ट्र सेवा दल, छात्र भारती, शिव आर्मी, शेतकरी संघटना, जयहिंद लोकचळवळ, लोकपंचायत, सत्यशोधक विचार मंच, अंधश्रद्धा निर्मूलन समिती, मा. आमदार दादासाहेब रोहम फाउंडेशन, आधार फाउंडेशन, ऑल इंडिया पँथर सेना आणि बहुजन विकास परिषद अशा अनेक संयोजक संघटनांचा समावेश आहे.

डॉ. रेखा मेश्राम यांच्या निवडीमुळे साहित्यिक वर्तुळात आनंदाचे वातावरण असून, छत्रपती संभाजीनगरसह संपूर्ण जिल्ह्यातून त्यांच्यावर अभिनंदनाचा वर्षाव होत आहे.

२ रे वैदर्भीय आंबेडकरी महिला संमेलनाच्याअध्यक्षपदी डॉ. रेखा मेश्राम यांची निवड

noreply@blogger.com (मुख्य संपादक) — Thu, 26 Feb 2026 04:56:00 -0800

छत्रपती संभाजीनगर / सावित्रीमाई फुले स्मृतिदिन, जागतिक महिला दिन व प्रा. सतेश्वर मोरे यांच्या स्मृतिदिनानिमित्त आयोजित २ रे वैदर्भीय आंबेडकर महिला संमेलनाच्या अध्यक्षपदी प्रा. डॉ. रेखा मेश्राम यांची निवड करण्यात आली आहे.

हे संमेलन दि. ८ मार्च २०२६ (जागतिक महिला दिन) रोजी नेर, जि. यवतमाळ येथे संपन्न होणार आहे. या संमेलनाचे उद्घाटन संस्थापक सदस्य दलित पँथर, आंबेडकरोत्तर आंबेडकरी चळवळीचे इतिहासकार व विचारवंत ज.वि. पवार यांच्या हस्ते होणार आहे.

प्रा. डॉ. रेखा मेश्राम या रमाई फाऊंडेशनच्या अध्यक्षा आहेत. रमाई फाऊंडेशनच्या माध्यमातून त्या रमाई महिला चळवळीचे साहित्य संमेलन दरवर्षी महाराष्ट्राच्या विविध जिल्ह्यात आयोजित करतात. त्यांची अनेक पुस्तके प्रकाशित आहेत. त्या रमाई मासिकाच्या संपादक आहेत. रमाई मासिक हे केवळ महिलांसाठी चालविले जाणारे मासिक आहे. या मासिकाच्या माध्यमातून महाराष्ट्रामध्ये अनेक महिला लिहित्या करून कवी, लेखक म्हणून पुढे आणल्या आहेत. त्यांच्या या निवडीबद्दल सर्वत्र अभिनंदन होत आहे.

ड्रीम स्वेअर अकॅडमीत संत गाडगे बाबा जयंती उत्साहात साजरी

noreply@blogger.com (मुख्य संपादक) — Mon, 23 Feb 2026 04:18:00 -0800

बाळापूर (प्रतिनिधी): स्वच्छतेचे अग्रदूत आणि थोर समाजसुधारक संत गाडगे बाबा यांची 150 वी जयंती ड्रीम स्वेअर अकॅडमी व ड्रीम स्वेअर अभ्यासिका यांच्या संयुक्त विद्यमाने स्थानिक श्रीराम मंदिर सभागृह, बाळापूर येथे मोठ्या उत्साहात साजरी करण्यात आली. कार्यक्रमाच्या अध्यक्षस्थानी अकॅडमीचे संचालक प्रा. विश्वजीत वानखडे होते.

कार्यक्रमाच्या माध्यमातून गाडगे बाबांच्या विचारांचा वारसा नव्या पिढीने जोपासावा, असा संदेश देण्यात आला. प्रारंभी संत गाडगे बाबांच्या प्रतिमेचे पूजन करून त्यांना अभिवादन करण्यात आले. 'शिक्षण हेच प्रगतीचे साधन आहे' हा बाबांचा विचार आजच्या स्पर्धा परीक्षेच्या युगात किती महत्त्वाचा आहे, यावर याप्रसंगी चर्चा करण्यात आली. कार्यक्रमाचे सूत्रसंचालन प्रा. उमेश जाधव यांनी केले तर आभार प्रदर्शन प्रदीप शिरसाठ यांनी मानले. यावेळी प्रतीक बिल्लेवार, मंगेश नितनवरे, भरती दांडगे, रोहिणी राऊत, संजना तायडे, आदी उपस्थित होते.

"लोकशाहीच्या बळकटीकरणासाठी शिवकालीन राज्यकारभाराची गरज ; सुरेंद्र धोपटे

noreply@blogger.com (मुख्य संपादक) — Thu, 19 Feb 2026 02:24:00 -0800

ड्रीम स्वेअर अकॅडमीच्यावतीने छ. शिवाजी महाराज जयंती व संविधान गुण गौरव परीक्षेचा बक्षिस वितरण सोहळा संपन्न

बाळापूर/प्रतिनिधी - आजच्या आधुनिक लोकशाही व्यवस्थेसमोर भ्रष्टाचार, असमानता आणि प्रशासकीय दिरंगाईची मोठी आव्हाने उभी आहेत. या पार्श्वभूमीवर, छत्रपती शिवाजी महाराजांनी ३५० वर्षांपूर्वी राबवलेली राज्यकारभाराची पद्धत आजही तितकीच सुसंगत आणि मार्गदर्शक असून केवळ सत्ता गाजवणे हा उद्देश न ठेवता 'रयतेचे हित' केंद्रस्थानी ठेवून आखलेली शिवकालीन धोरणे, ही खऱ्या अर्थाने लोकशाही बळकट करण्याचा पाया ठरू शकतात, असे प्रतिपादन बाळापूर नगर परिषद उपाध्यक्ष सुरेंद्र धोपटे यांनी व्यक्त केले. ते (दि. 19/02/2026 रोजी) स्थानिक श्रीराम मंदीर सभागृह स्थित ड्रीम स्वेअर अभ्यासिका, ड्रीम स्वेअर अकॅडमी येथे आयोजित छ. शिवाजी महाराज यांची 396 वी जयंती आणि संविधान गुण गौरव परीक्षा - 2025 च्या बक्षिस वितरण समारंभाप्रसंगी बोलत होते. कार्यक्रमाच्या अध्यक्षस्थानी फुले-आंबेडकर विद्वत सभेचे राज्य समन्वयक भास्कर भोजने हे होते. प्रमुख पाहुणे म्हणुन ज्येष्ठ सामाजिक कार्यकर्ते डाॅ. मोहम्मद फय्याज हुसैन, नगरसेवक संजय उमाळे, ॲड. प्रशांत उमाळे उपस्थित होते.

डाॅ. हुसैन बोलतांना म्हणाले की, आजचे युग हे स्पर्धेचे युग आहे, विद्यार्थ्यांनी स्पर्धेच्या युगामध्ये टिकुन राहण्यासाठी सातत्याने परिश्रम घेणे गरजेचे आहे. शहरातील विद्यार्थ्यांना शैक्षणिक सुविधा उपलब्ध करून देण्याचे काम ड्रीम स्वेअर अकॅडमीने केले आहे, अकॅडमीला सर्व प्रकारची मदत करण्याचे आश्वासन त्यांनी यावेळी दिले. अध्यक्षीय भाषणात भास्कर भोजने म्हणाले की, छ. शिवाजी महाराज हे ऐतिहासिक पराक्रमी रयतेचे राजे होते. त्यांनी जातीच्या पलिकडे जावून राज्यकारभार चालविला आज देशामध्ये जातीच्या नावाने जनतेला भडकविण्याचे काम केले जात आहे, लोकशाही वाचवायची असेल तर संविधानाच्या बाजुने उभे राहावे लागेल.

कार्यक्रमाचे सूत्रसंचालन व प्रास्ताविक ड्रीम स्वेअर अकॅडमी व अभ्यासिकेचे संचालक प्रा. विश्वजीत वानखडे यांनी केले तर आभार प्रा. उमेश जाधव यांनी मानले. यावेळी मान्यवरांच्या हस्ते संविधान गुण गौरव परीक्षा - 2025 या स्पर्धेमध्ये सहभागी झालेल्यांना प्रमाणपत्र वाटप करण्यात आले. यावेळी रोशन दामोदर,निखिल उमाळे,प्रेम तायडे,विजय उमाळे,संजना उमाळे, रोहिणी राऊत, प्रतीक्षा उमाळे, प्रज्ञा तायडे, अश्मिरा शेख, पूर्वा पोते आदींसह विद्यार्थी-विद्यार्थीनी मोठ्या संख्येने उपस्थित होते.

जातीभेद मानणारे साहित्यिक कसे ? लोकनाथ यशवंत यांचा सवाल

noreply@blogger.com (मुख्य संपादक) — Mon, 16 Feb 2026 04:53:00 -0800

छत्रपती संभाजीनगर: "साहित्याचा विचार करताना जो माणूस जातीवाद आणि भेदाभेद मानतो, त्याला साहित्यिक म्हणता येणार नाही. समाजातील याच भेदाच्या पलीकडे जाऊन जोपर्यंत भूमिका घेतली जात नाही, तोपर्यंत साहित्याला व्यापकत्व येत नाही," असे परखड मत लोकनाथ यशवंत यांनी व्यक्त केले.

'विद्रोही सांस्कृतिक चळवळी'च्या वतीने रविवारी एन-३ सिडको येथील जिजाऊ सभागृहात नांदेड येथील होणाऱ्या २० व्या विद्रोही मराठी साहित्य संमेलनाचे नियोजित अध्यक्ष ज्येष्ठ कवी लोकनाथ यशवंत यांच्या जाहीर नागरी सत्काराचे आयोजन करण्यात आले होते. ज्येष्ठ साहित्यिक डॉ. वासुदेव मुलाटे अध्यक्षस्थानी होते, तर डॉ. संजय मून, डॉ. प्रल्हाद लुलेकर आणि ज्येष्ठ पत्रकार भाऊ भोजने यांची प्रमुख उपस्थिती होती.

सत्काराला उत्तर देताना लोकनाथ यशवंत म्हणाले की, "भारतीयांच्या डीएनएमधून जात जात नाही आणि लोक आजही आडनावावरून जात ओळखतात, म्हणूनच मी आडनाव लावणे सोडले आहे," माझ्या लहानपणी वडिलांच्या वारंवार होणाऱ्या बदल्यांमुळे मित्र सुटत गेले आणि त्यातूनच कविता सुचू लागली. अमरावतीमध्ये एका वृद्ध मजुराला मालकाकडून मिळणारी अमानुष मारहाण पाहून मी अस्वस्थ झालो आणि त्याचे दुःख शब्दांत मांडले. "जगाचे कल्याण व्हावे आणि प्रत्येकाला दोन वेळचे अन्न मिळावे हीच माझी भूमिका आहे, कारण पोट रिकामे राहिले तर माणसे गुन्हेगार होतात," असेही त्यांनी नमूद केले.

डॉ. प्रल्हाद लुलेकर म्हणाले की, महात्मा फुले यांनी साहित्य संमेलनावर लिहिलेले पत्र हेच विद्रोही साहित्याचे सूत्र आहे. जातीचे परिप्रेक्ष्य तोडणे हेच विद्रोही साहित्याचे खरे काम असून, आधुनिक कवितेचे जनक केशवसुत नसून सावित्रीबाई फुले आहेत, असे त्यांनी स्पष्ट केले.

डॉ. संजय मून यांनी लोकनाथ यशवंत यांना 'आजच्या पिढीचा आवाज' संबोधले. त्यांच्या कवितेला उर्दू शायरीप्रमाणे उत्स्फूर्त दाद मिळते आणि ती शब्दांपेक्षा अधिक आशयाने खुलते, असे गौरवोद्गार त्यांनी काढले.

कार्यक्रमाचे प्रास्ताविक प्रा. भारत शिरसाट यांनी केले, सूत्रसंचालन डॉ. समाधान इंगळे यांनी केले तर आभार डॉ. वैजनाथ कदम यांनी मानले. या सोहळ्याला पत्रकार साहित्यिक भाऊ भोजने, डॉ.अरुणा लोखंडे, डॉ. कमलाकर गंगावणे, डॉ. उत्तम अंभोरे, डॉ. यशवंत खडसे, संजय वरकड, डॉ. रेखा मेश्राम, अँड. वैशाली डोळस, वा. ना. भालेराव, डॉ. सविता लोंढे, आशा डांगे, डॉ. धोंडोपंत मानवतकर, डॉ. भगवान धांडे, संगीता अंभोरे, मंगल मुन, डॉ सुभाष बागल, सुधाकर निसर्ग, डॉ. द्रौपदी पंदीलवाड इत्यादी मान्यवर उपस्थित होते.

संविधान गुणगौरव परीक्षेत न्यू व्हिजन इंग्लिश हायस्कूलच्या विद्यार्थ्यांचे घवघवीत यश

noreply@blogger.com (मुख्य संपादक) — Tue, 27 Jan 2026 08:27:00 -0800

बाळापूर/प्रतिनिधी - स्थानिक न्यू व्हिजन इंग्लिश हायस्कूल बाळापूर येथील विद्यार्थ्यांचे सुजाण नागरिक मंच रायगड अंतर्गत स्थापित संविधान गुणगौरव समिती यांच्या विद्यमाने घेण्यात येणाऱ्या राज्यस्तरीय संविधान गुणगौरव परीक्षा2025 मध्ये घवघवीत यश या परीक्षेत वर्ग 8 वी चा विद्यार्थी मो. जमालुद्दीन हारिस मो. रिजवान हारीस याने राज्यस्तरावर लहान गटात प्रथम क्रमांक पटकावला असून त्याचा भंडारा येथील सामाजिक भवनमध्ये प्रमाणपत्र आणि सन्मान चिन्ह देऊन सत्कार करण्यात आला.

त्याच बरोबर केंद्रस्थरावर मोठ्या गटात कु. प्रज्ञा राहुल तायडे ही प्रथम तर साईराज काळे द्वितीय तसेच कु.लावण्या नरेश लोहकरे हिने तृतीय क्रमांक पटकावला त्याच बरोबर लहान गटात कु. अभिलाषा विजय लोखंडे पहिला, तर कु. अदिती अतुल अवातिरक द्वितीय आणि मो. जमालुद्दीन हारिस तृतीय क्रमांक पटकावला.

यावेळी शाळेच्या मुख्याध्यापिका अर्चना बाखडे मॅडम तसेच संविधान गुणगौरव परीक्षेचे समन्वयक प्रा. विश्वजीत वानखडे आणि केंद्रप्रमुख प्रा. उमेश जाधव याबरोबर शाळेतील सर्व शिक्षकांनी विद्यार्थ्यांना शुभेच्छा दिल्या. यावेळी विद्यार्थ्यांनी आपल्या यशाचे श्रेय त्याचे आई वडील तसेच शाळेच्या मुख्याध्यापिका, आणि वर्गशिक्षक यांना दिले

जिजाऊंचे संस्कार व विवेकानंदांचे विचार आजही मार्गदर्शक - प्रा. विश्वजीत वानखडे

noreply@blogger.com (मुख्य संपादक) — Mon, 12 Jan 2026 22:55:00 -0800

ड्रीम स्वेअर अकॅडमीच्यावतीने राजमाता जिजाऊ व स्वामी विवेकानंद जयंती उत्साहात साजरी

बाळापूर, प्रतिनिधी - राष्ट्रनिर्मितीमध्ये युवकांचे योगदान महत्त्वाचे असून जिजाऊंचे संस्कार व विवेकानंदांचे विचार आजही मार्गदर्शक असल्याचे प्रतिपादन ड्रीम स्वेअर अकॅडमीचे संचालक प्रा. विश्वजीत वानखडे यांनी यावेळी व्यक्त केले.

ड्रीम स्वेअर अकॅडमी बाळापूरच्या वतीने ड्रीम स्वेअर अभ्यासिका श्रीराम मंदिर सभागृह येथे राजमाता जिजाऊ आणि स्वामी विवेकानंद यांची जयंती उत्साहात साजरी करण्यात आली. कार्यक्रमाच्या अध्यक्षस्थानी ड्रीम स्वेअर अकॅडमीचे संचालक प्रा. विश्वजीत वानखडे हे होते, तर प्रमुख पाहुणे म्हणून प्रमोद तेलगोटे उपस्थित होते.

कार्यक्रमाचे सूत्रसंचालन व आभार प्रा. उमेश जाधव यांनी मानले. कार्यक्रमाच्या यशस्वीतेसाठी संजना तायडे, रोहिणी राऊत, वृषाली वानखडे, मंगेश नितनवरे, गौरव नळकांडे, गौरव तायडे, रोशन दामोदर आदींनी परिश्रम घेतले.

डॉ. संजय मुन हे फुले - आंबेडकरी चळवळीचे प्रभावी प्रसारक

noreply@blogger.com (मुख्य संपादक) — Mon, 12 Jan 2026 08:38:00 -0800

डॉ. बाबासाहेब आंबेडकर यांच्या नात रमा यशवंतराव आंबेडकर यांचे गौरोद्गार : डॉ. संजय मुन यांचा गौरव सोहळा उत्साहात संपन्न

छत्रपती संभाजीनगर /प्रतिनिधी - डॉ. संजय मुन यांनी लिहिलेले ग्रंथ मौलिक असून पुढील काळात त्यांनी आपले कार्य अधिक जोमाने करावे, त्यांनी साहित्यातून केलेली मांडणी ही समताधिष्ठित समाज व्यवस्थेच्या निर्मितीची असून डॉ. मुन हे बाबासाहेबांच्या संकल्पनेतील फुले-आंबेडकरी चळवळीचे प्रभावी प्रसारक आहेत, असे गौरोद्गगार डॉ. बाबासाहेब आंबेडकर यांच्या नात रमा यशवंतराव आंबेडकर यांचे यांनी काढले.

त्या रमाई मासिक, रमाई फाऊंडेशन, सूर्यपुत्र भैय्यासाहेब तथा यशवंतराव आंबेडकर प्रतिष्ठान यांच्या संयुक्त विद्यमाने आयोजित डॉ. संजय मुन यांच्या गौरव सोहळ्यात स्थानिक मराठवाडा साहित्य परिषदेच्या सभागृहात आयोजित कार्यक्रमातून बोलत होत्या. कार्यक्रमाच्या अध्यक्षस्थानी ज्येष्ठ विचारवंत डॉ. वासुदेव मुलाटे होते.

डॉ. दासू वैद्य बोलतांना म्हणाले की, “सूर्य शोधणारा हा ‘मुन’ आहे. संजय मुन यांची वृत्ती निवृत्तीची नसून उर्वरित आयुष्य त्यांनी संशोधनासाठी खर्च करावे,” असे प्रतिपादन ज्येष्ठ विचारवंत डॉ. दासू वैद्य यांनी केले.

डॉ. ऋषिकेश कांबळे म्हणाले की, “संजय मुन यांनी साहित्य आणि आंबेडकरी चळवळीत मोलाचे योगदान दिले आहे. त्यांची मांडणी ही नेहमी चिंतकाची असते. सध्या समाजात मूलगामी चिंतकांची कमतरता आहे. अशा काळात संजय मुन हे मूलगामी चिंतन करणारे महत्त्वाचे विचारवंत आहेत.” डॉ. बाबासाहेब आंबेडकर यांच्या स्वप्नांची माती शत्रूंनी नाही, तर त्यांच्या अनुयायांनीच केली, हे मी अत्यंत धाडसाने सांगतो,” असे स्पष्ट मत त्यांनी व्यक्त केले. आंबेडकरी चळवळीला ऊब देण्याचे काम संजय मुन यांनी करावे, अशी अपेक्षाही त्यांनी व्यक्त केली.

डॉ. वासुदेव मुलाटे बोलतांना म्हणाले की, सत्कार हा चिंतनाचा कार्यक्रम असतो. आज स्वतःविषयी बोलण्याच्या काळात दुसऱ्याविषयी बोलणे आणि चांगले बोलणे ही चांगली बाब आहे. आज जे काही चालले आहे ते तपासून घेतले पाहिजे. चळवळ ही प्रक्रिया आहे. तीला परिवर्तित केले पाहिजे. आंबेडकरी चळवळ ही खंबीरपणे उभी आहे. आज अंतर्मुख होऊन विचार केला पाहिजे. चिंतनकार हा जीवनाचा शोध घेणारा असतो. डॉ संजय मुन समन्वयवादी विचारवंत आहे.

सत्काराला उत्तर देताना डॉ. संजय मुन म्हणाले की, हा सत्कार मी माझ्या गुरूंना, समर्पित करतो. माझ्या विद्यार्थ्यांना, मी जेथे जेथे काम केले त्या संस्थाना समर्पित करतो. कुटुंबाप्रती आभार व्यक्त करतो. सर्व नातेवाईक प्रति आभार व्यक्त करतो. सद्यस्थिती अत्यंत बिकट आहे. अशा परिस्थितीत सुशिक्षीत पिढीवर मोठी जबाबदारी येऊन ठेपली आहे. साहित्यिकांची जबाबदारी मोठी आहे. डॉ बाबासाहेब आंबेडकरांनी ही जबाबदारी आपल्यावर दिली आहे. संकटाना सामोरे जात त्यामधून वाट काढत पुढे गेले पाहिजे. कार्यक्रमाचे सूत्रसंचलन डॉ. रेखा मेश्राम यांनी केले, मानपत्राचे वाचन प्रा. भारत शिरसाट यांनी केले, आभार ललिता खडसे यांनी मानले.

कार्यक्रमाला मंगल खिंवसरा, डॉ उत्तम अंभोरे, भाऊराव अंभोरे, डॉ. यशवंत खडसे, डॉ. भगवान धांडे, डॉ. धनराज गोंडाने, मंगल मुन, अँड. के. ई. हरिदास, डॉ. महेश खरात, अनंत भवरे, दैवशाला गवदे, रतनकुमार साळवे, बुद्धिनाथ बराळ आदींसह आंबेडकरी चळवळीतील कार्यकर्ते मोठ्या संख्येने उपस्थित होते.

प्राचार्य डॉ. संजय मून यांच्या जाहीर सत्काराचे आयोजन ; रमा आंबेडकर-तेलतुंबडे यांची प्रमुख उपस्थिती

noreply@blogger.com (मुख्य संपादक) — Mon, 5 Jan 2026 06:01:00 -0800

छत्रपती संभाजीनगर/प्रतिनिधी : रमाई मासिक, रमाई फाऊंडेशन आणि सूर्यपुत्र भय्यासाहेब आंबेडकर तथा यशवंतराव आंबेडकर प्रतिष्ठानच्या वतीने प्रसिद्ध कवी, साहित्यिक आणि विचारवंत प्राचार्य डॉ. संजय मून यांचा जाहीर सत्कार समारंभ आयोजित करण्यात आला आहे. हा सोहळा येत्या सोमवारी, १२ जानेवारी २०२६ रोजी सायंकाळी ६ वाजता पैठण गेट येथील मराठवाडा साहित्य परिषदेच्या सभागृहात पार पडणार आहे. हा सत्कार समारंभ डॉ. बाबासाहेब आंबेडकर यांची नात रमा आंबेडकर-तेलतुंबडे यांच्या हस्ते संपन्न होणार आहे. कार्यक्रमाच्या अध्यक्षस्थानी प्रसिद्ध साहित्यिक डॉ. वासुदेव मुलाटे असतील. यावेळी प्रमुख वक्ते म्हणून आंबेडकरी विचारवंत डॉ. ऋषीकेश कांबळे आणि साहित्यिक डॉ. दासू वैद्य आपले विचार मांडतील.

या कार्यक्रमाला मोठ्या संख्येने उपस्थित राहण्याचे आवाहन डॉ. रेखा मेश्राम (संपादक, रमाई मासिक), प्रा. भारत सिरसाट (अध्यक्ष, सूर्यपुत्र भय्यासाहेब तथा यशवंतराव आंबेडकर प्रतिष्ठान) यांच्यासह डॉ. सुमेध रणवीर, डॉ. कैलास वानखडे, डॉ. ललिता गोपाळ, डॉ. पुष्पा गायकवाड, डॉ. रामेश्वर चाटे, छाया साळवे, पल्लवी जमधडे, दैवशाला गवंदे, डॉ. धनराज गोंडाणे, रतनकुमार साळवे, अनंत भवरे, अमरदीप वानखडे आदींनी केले आहे.

ड्रीम स्वेअर अकॅडमीच्या वतीने सावित्रीमाई फुले यांच्या जयंती निमित्त अभिवादन

noreply@blogger.com (मुख्य संपादक) — Sat, 3 Jan 2026 04:53:00 -0800

बाळापूर/प्रतिनिधी - भारतातील पहिल्या शिक्षिका, स्त्री शिक्षणाच्या आणि स्त्री मूक्तीच्या प्रणेत्या, क्रांतीज्योती सावित्रीमाई फुले यांच्या 195 व्या जयंतीनिमित्त स्थानिक ड्रीम स्वेअर अकॅडमीच्या वतिने श्रीराम मंदिर स्थित ड्रीम स्वेअर अभ्यासिकेमध्ये अभिवादन करण्यात आले.

यावेळी कु. विदिशा विश्वजीत वानखडे (इयत्ता 1 ली) हिने सावित्रीमाई फुलेंचा पेहराव परिधान करून उपस्थितांसमोर सावित्रीमाईंचे गीत सादर केले. यावेळी ड्रीम स्वेअर अकॅडमीचे संचालक प्रा. विश्वजीत वानखडे, प्रा. उमेश जाधव, प्रणित वानखडे, विश्वजीत इंगळे, रितेश वाडेकर, गौरव नळकांडे, प्रदीप शिरसाट, रितेश शिरसाठ, प्रेम तायडे, संकेत बोदडे, रोशन दामोदर, राहुल उमाळे, प्रतीक्षा उमाळे, रोशन सुर्वे, आदी उपस्थित होते.

अशोक ढोलेंच्या कविता विद्रोह पुकारणाऱ्या- प्रा. भारत सिरसाट

noreply@blogger.com (मुख्य संपादक) — Thu, 1 Jan 2026 00:38:00 -0800

वरखेड येथे काळोखमुक्ती काव्यसंग्रहाचे प्रकाशन

तिवसा/प्रतिनिधी - कविता म्हणजे फक्त शब्द नसून त्या बडांचे निशाण असतात. अशा बंडखोर कवितेने आंबेडकरी साहित्य समृद्ध केले आहे. त्यात आंबेडकरी कवी स्मृतिशेष अशोक ढोलेंच्या क्रांतीप्रवन कविता ह्या विद्रोह पुकारणाऱ्या आहेत असे प्रतिपादन प्रसिद्ध आंबेडकरी साहित्यिक प्रा. भारत सिरसाट यांनी केले. ते वरखेड येथे आयोजित काळोखमुक्ती काव्यसंग्रहाच्या प्रकाशन समारंभ प्रसंगी अध्यक्षस्थानावरून बोलत होते.

बोलताना प्रा. सिरसाट पुढे म्हणाले की, समाजाला दिशा देण्याची जबाबदारी साहित्यिकांवर असताना कवी अशोक ढोले यांच्या मरणोत्तर काव्यसंग्रहाचे प्रकाशन करण्याची संधी रमाई प्रकाशनला मिळाल्याने त्यांच्यातील प्रचंड विद्रोहाची जवळून जाणीव झाली आहे. सामाजिक कार्यकर्ते धीरज केने यांच्या विशेष पुढाकारातुन विदर्भातील प्रसिद्ध आंबेडकरी कवी स्मृतिशेष अशोक ढोले यांच्या मरणोत्तर काळोखमुक्ती काव्यसंग्रहाचे प्रकाशन जन्मगाव वरखेड येथे मान्यवरांचे हस्ते करण्यात आले. कार्यक्रमाच्या अध्यक्षस्थानी आंबेडकरी साहित्यिक प्रा. भारत सिरसाट तर प्रमुख अतिथी म्हणून प्रा. डॉ. रवींद्र मुंद्रे, प्रा. सुभाष गडलिंग, प्रा. रवी दलाल, स्वागताध्यक्ष विनायक केने, अस्मिता ढोले यांची उपस्थिती होती.

आंबेडकरी साहित्याला परिवर्तनाचा वारसा लाभला असून वरखेडच्या मातीत दलित साहित्याची मुहूर्तमेढ रोवणारे अशोक ढोलेंच्या कविता आंबेडकरी साहित्यात मोलाची भर टाकणाऱ्या आहे असे मत डॉ. रवींद्र मुंद्रे यांनी व्यक्त केले तर अशोक ढोलेंच्या कवितेने मानवी समाजाला विद्रोहाचे धडे दिले असून त्यांचा काव्यसंग्रह आजही साहित्यक्षेत्रात ताकदीने उभा राहील असे विचार प्रा. सुभाष गडलिंग यांनी मांडले. अशोक ढोलेंचे दर्जेदार साहित्य आज उशिराने का होईना परंतु आज त्यांच्या प्रकाशित काव्यसंग्रहाच्या निमित्ताने कवितांना न्याय मिळाला असल्याची भावना साहित्यिक रवी दलाल यांनी व्यक्त केली.

कवी अशोक ढोले यांच्या निधनाने आंबेडकरी साहित्य क्षेत्राची मोठी हानी झाली असून त्यांचे अप्रकाशित साहित्य जनतेसमोर आनण्याची जबाबदारी नवलेखकांची असून ढोलेंच्या विद्रोही कवितेचा वारसा आम्ही जपण्यासाठी कटिबद्ध असू असा विश्वास प्रास्ताविक प्रसंगी सागर भवते यांनी व्यक्त केला. कार्यक्रमाचे सूत्रसंचालन ज्वाला ढोले तर आभार वंदना हरणे यांनी मानले. कार्यक्रमाचे यशस्वीतेसाठी कवी अशोक ढोले स्मृती प्रतिष्ठान, रमाई महिला मंडळ वरखेड यांनी परिश्रम घेतले.

"रमाई" फुले - आंबेडकरी चळवळीचा महत्त्वाचा दस्तऐवज : भास्कर भोजने यांचे प्रतिपादन

noreply@blogger.com (मुख्य संपादक) — Thu, 25 Dec 2025 03:16:00 -0800

रमाई मासिकाचा १६ वा वर्धापन दिन उत्साहात साजरा.

छत्रपती संभाजीनगर/प्रतिनिधी -

रमाई मासिकाच्या माध्यमातून डॉ. रेखा मेश्राम यांनी वंचित, बहुजन समाजातील महिलांना लिहिते करण्यासाठी, व्यक्त होण्यासाठी निर्माण केलेली संधी ही फुले - आंबेडकरी चळवळीला बळकटी देणारी असून रमाई मासिक हा फुले - आंबेडकरी चळवळीचा महत्त्वाचा दस्तऐवज आहे, तो जतन करण्याची जबाबदारी फुले - आंबेडकरवाद्यांचा आहे, अनेक माध्यमे उभी राहतात परंतु दीर्घकाळ टिकत नाहीत, रमाई मासिकाचा चळवळीतील वृत्तपत्रांप्रमाणे इतिहास होऊ देऊ नका, असे प्रतिपादन फुले-आंबेडकर विद्वत सभेचे भास्कर भोजने (अकोला) यांनी केले.

ते मराठवाडा साहित्य परिषद, रॉक्सी टॉकिजजवळ, पैठणगेट येथे आयोजित रमाई मासिकाचा १६ वर्धापनदिन व भारतीय स्त्रीमुक्त दिना निमित्त आयोजित कार्यक्रमातून बोलत होते.

कार्यक्रमाच्या अध्यक्षस्थानी प्राचार्य डॉ. संजय मून हे होते. प्रमुख वक्ते जिजाऊ ब्रिगेडच्या अ‍ॅड. वैशाली डोळस व बौद्ध विचारवंत डॉ. भगवान धांडे हे उपस्थित होते. प्रमुख पाहुणे म्हणून प्रसिद्ध विचारवंत प्रा. डॉ. अरुणा लोखंडे, सत्यशोधक समाजाचे अ‍ॅड. के.ई. हरिदास, बौद्ध साहित्यिक डॉ. धनराज गोंडाणे, वंचित बहुजन महिला आघाडीच्या जिल्हाध्यक्ष, कोमल हिवाळे, वंचित बहुजन महिला आघाडीच्या शहराध्यक्ष वंदना जाधव व साधना पठारे आदी उपस्थित होते.

प्रास्ताविकात रमाई फाऊंडेशनच्या प्रा. रेखा मेश्राम (संपादक रमाई मासिक) म्हणाल्या की, रमाई फाउंडेशनच्या माध्यमातून गेल्या १६ वर्षापासून रमाई मासिक अविरतपणे चालवले जात आहे. विविध उपक्रम राबवून फुले - आंबेडकरी विचारधारा रुजविण्याचे काम सातत्याने केले जात आहे, रमाई स्मृती दिनी दरवर्षी रमाई महिला चळवळीचे साहित्य संमेलन महाराष्ट्रभर भरविले जातात, समताधिष्ठित समाजव्यवस्थेच्या निर्मितीसाठी रमाई फाऊंडेशन, रमाई मासिक अविरतपणे काम करीत आहे व भविष्यातही करत राहील.

कार्यक्रमाची सुरुवातीला भारतीय संविधानाच्या प्रस्ताविकेचे डॉ. वंदना पाटील यांनी केले वाचन करून झाली. रत्नकला बनसोडे यांनी यावेळी कविता सादर केली. कांता अहिरे यांनी राजस्थान मधील जयपूर हायकोर्टातील मनूच्या पुतळ्याला काळे फासले होते त्यांचा सत्कार यावेळी करण्यात आला. माजी नगर सेविका शकुंतला धांडे, लढाऊ कार्यकर्त्या रेखा उजगरे यांचाही सत्कार यावेळी करण्यात आला.

ॲड. वैशाली डोळस बोलताना म्हणाल्या की, माध्यमांची मुस्कटदाबी होत असताना रमाई मासिक निर्भिडपणे १६ वर्षापासून अविरत सुरू आहे, तत्वांमध्ये आणि विचारांमध्ये होत असलेली घुसळण थांबली पाहिजे, भाजपा, काँग्रेसमध्ये राहून स्वतःला कट्टर आंबेडकरवादी म्हणणाऱ्यांची संख्या झपाट्याने वाढत चालली आहे त्यामुळे आंबेडकरवादी म्हणजे कोण? याची नव्याने मांडणी करण्याची गरज आहे. बाबासाहेबांनी मनुस्मृती जाळली परंतु आजही मनुस्मृती नष्ट झाली आहे का? हा प्रश्न अनुत्तरीतच आहे. सूत्रसंचालन दैवशीला गवंदे यांनी केले आभार ललिता खडसे यांनी मानले.

कार्यक्रमाला मान्यवर डॉ. यशवंत खडसे, ॲड. जयश्री भगत, राजन किर्तने, कांचन गादेकर, सी. पी. पाटील, रतनकुमार साळवे, मनोरमा बनसोडे, सविता अभ्यंकर, धम्मप्रिया खरात, संगीता अंभोरे, मंगल निकाळजे, मंगल मुन, गंगाबाई सुरडकर, मधुकर गवंदे, शैलेंद्र मिसाळ, प्रयाग म्हस्के, भीमराव गाडेकर, अनंत भवरे आदी उपस्थित होते.

२५ डिसेंबर रोजी रमाई वर्धापन दिन व भारतीय स्त्रीमुक्ती दिनाचे आयोजन

noreply@blogger.com (मुख्य संपादक) — Wed, 24 Dec 2025 06:17:00 -0800

छ. संभाजीनगर / रमाई फाउंडेशन व रमाई मासिक औरंगाबादच्या वतीने रमाई मासिकाचा १६ वर्धापनदिन व भारतीय स्त्रीमुक्त दिनाचे आयोजन दि. २५ डिसेंबर २०२५ रोजी दुपारी १२:३० वाजता मराठवाडा साहित्य परिषद, रॉक्सी टॉकिजजवळ, पैठणगेट येथे आयोजित करण्यात आला आहे.

या कार्यक्रमाचे उद्घाटक फुले-आंबेडकर विद्वत सभेचे भास्कर भोजने (अकोला) हे आहेत. या कार्यक्रमाचे अध्यक्ष प्राचार्य डॉ. संजय मून हे असणार आहेत. तर प्रमुख वक्ते जिजाऊ ब्रिगेडच्या अ‍ॅड. वैशाली डोळस व बौद्ध विचारवंत डॉ. भगवान धांडे हे राहणार आहेत.

प्रमुख पाहुणे म्हणून सत्यशोधक समाजाचे अ‍ॅड. के.ई. हरिदास, ज्येष्ठ विधिज्ञ अ‍ॅड. एस.आर. बोदडे, बौद्ध साहित्यिक डॉ. धनराज गोंडाणे, वंचित बहुजन महिला आघाडीच्या जिल्हाध्यक्ष, कोमल हिवाळे, वंचित बहुजन महिला आघाडीच्या शहराध्यक्ष वंदना जाधव व साधना पठारे या उपस्थित राहणार आहेत.

या कार्यक्रमास मोठ्या संख्येने उपस्थित रहावे असे आवाहन रमाई फाऊंडेशनच्या प्रा. रेखा मेश्राम (संपादक रमाई मासिक) तसेच प्रा. डॉ. रेखा मेश्राम (संपादक, रमाई मासिक, अध्यक्ष-रमाई फाऊंडेशन),दैवशीला गवंदे, ललिता खडसे, शोभा खाडे, बेबीनंदा पवार, जयश्री सरोदे, डॉ. प्रज्ञा साळवे, डॉ. वंदना पाटील, मंगल मून, नेहा बनसोडे, राजकन्या गोंडाणे, डॉ. ललिता गिर्‍हे, सुनंदा जाधव,रत्नकला बनसोड, गंगाबाई सुरडकर, संघमित्रा खंडाळकर, विद्या साळवे व समस्त रमाई फाऊंडेशनच्या पदाधिकार्‍यांनी केले आहे.

युवकांनी संत गाडगेबाबांच्या विचारांचा अंगीकार करून समाजपरिवर्तनासाठी कार्य करावे : प्रा. विश्वजित वानखडे

noreply@blogger.com (मुख्य संपादक) — Sat, 20 Dec 2025 02:06:00 -0800

संत गाडगेबाबा यांच्या स्मृती दिनानिमित्त ड्रीम स्वेअर अकॅडमीकडून अभिवादन

बाळापूर/प्रतिनिधी - (दि. 20 डिसेंबर 2025) : समाजातील अंधश्रद्धा दूर करून शिक्षण व विवेकशीलतेचा मार्ग स्वीकारण्याचा संदेश संत गाडगेबाबांनी दिला, युवकांनी संत गाडगेबाबांच्या विचारांचा अंगीकार करून समाजपरिवर्तनासाठी कार्य करावे, असे प्रतिपादन ड्रीम स्वेअर अकॅडमीचे संचालक प्रा. विश्वजित वानखडे यांनी केले.

स्थानिक ड्रीम स्वेअर अभ्यासिका, श्रीराम मंदिर सभागृह, बाळापूर येथे समाजप्रबोधन, स्वच्छता आणि अंधश्रद्धा निर्मूलनाचा संदेश देणारे थोर संत संत गाडगेबाबा यांच्या स्मृती दिनानिमित्त ड्रीम स्वेअर अकॅडमीच्या वतीने अभिवादन करण्यात आले.

कार्यक्रमाच्या अध्यक्षस्थानी प्रा.शोऐबुद्दीन शेख सर तर प्रमुख पाहुणे म्हणून प्रा. आझाद सर उपस्थित होते. संत गाडगेबाबा यांच्या प्रतिमेस पुष्पहार अर्पण करून कार्यक्रमाची सुरुवात करण्यात आली. यावेळी उपस्थित मान्यवरांनी आपल्या मनोगतातून संत गाडगेबाबा यांच्या कार्याचा गौरव केला. यावेळी कार्यक्रमाचे सूत्रसंचालन प्रा.उमेश जाधव सर यांनी केले. आभार दीक्षा वानखडे यांनी मानले. या कार्यक्रमास विद्यार्थी व विद्यार्थिनी मोठ्या संख्येने उपस्थित होते.

सुर्यपुत्र भय्यासाहेब तथा यशवंतराव आंबेडकर जयंती साजरी

noreply@blogger.com (मुख्य संपादक) — Mon, 15 Dec 2025 00:10:00 -0800

छत्रपती संभाजीनगर / प्रतिनिधी - चैत्यभूमी चे निर्माते, बौद्धाचार्यांचे जनक भय्यासाहेब तथा यशवंतराव आंबेडकर यांच्या ११३ व्या जयंती दि बुद्धिस्ट सोसायटी ऑफ इंडिया अर्थात भारतीय बौद्ध महासभा व वंचित बहुजन आघाडीच्या वतीने संयुक्त साजरी करण्यात आली.

नंदनवन कॉलनी येथील वंचित बहुजन आघाडीचे पदाधिकारी राजू कीर्तने यांच्या संपर्क कार्यालयात अभिवादनाचा कार्यक्रम आयोजित करण्यात आला होता या कार्यक्रमाला भारतीय बौद्ध महासभेचे छत्रपती संभाजीनगर महानगर जिल्हाध्यक्ष रमेश दादा बनसोडे, जिल्हा संघटक चंद्रकांत लहाने, रोहित शिंदे, भीमराज सरदार व दाभाडे बंधू आदी भीम बुद्ध अनुयायी उपस्थित होते.

भारतीय बौद्ध महासभेचे छ. संभाजीनगर (मध्य) शहराध्यक्ष सिद्धार्थ महाविद्यालयाचे उपप्राचार्य प्रा. डॉ. शिलवंत गोपनारायण यांनी या कार्यक्रमाचे आयोजन केले होते. भारतीय बौद्ध महासभेच्या केंद्रीय कार्यकारणीच्या आदेशानुसार सूर्यपुत्र भय्यासाहेब तथा यशवंतराव आंबेडकर यांची जयंती देशभरातील प्रत्येक शाखे मध्ये १२/१२/२०२५ ते ३१/१२/२०२५ दरम्यान साजरी करण्यात आली.

प्रा. अविनाश डोळस हे नागसेन वनातील खरे नागसेन

noreply@blogger.com (मुख्य संपादक) — Sat, 13 Dec 2025 08:18:00 -0800

वंचित बहुजन आघाडी, महाराष्ट्र राज्यचे उपाध्यक्ष ॲड. सर्वजीत बनसोडे यांचे प्रतिपादन

छ. संभाजीनगर (औरंगाबाद) : डॉ. बाबासाहेब आंबेडकरांनी या परिसरातील शिक्षक हा नागसेन व्हावा आणि विद्यार्थी मिलिंद व्हावा अशी अपेक्षा व्यक्त केली होती. जातीच्या पलीकडे जावून समतेचा विचार मांडणारे, जातीअंताच्या लढ्यामध्ये पुढाकार घेणारे आणि चळवळीची समीक्षा करणारे प्रा. अविनाश डोळस हे खऱ्या अर्थाने बाबासाहेबांच्या अपेक्षेतील नागसेन होत, ज्यांनी समताधिष्ठित समाजव्यवस्था आणि लोकशाहीचे सामाजिकीकरण करण्यासाठी आयुष्यभर कार्य केले, असे गौरोद्गार प्रसिद्ध अभ्यासक, तथा वंचित बहुजन आघाडी, महाराष्ट्र राज्यचे उपाध्यक्ष ॲड. सर्वजीत बनसोडे यांनी केले.

ते (दि. १३ डिसेंबर २०२५ ) स्थानिक डॉ. बाबासाहेब आंबेडकर विधी महाविद्यालय, नागसेनवन, छ. संभाजीनगर (औरंगाबाद) येथे प्रा. अविनाश डोळस प्रतिष्ठान, औरंगाबाद यांच्या वतीने प्रा. अविनाश डोळस यांच्या जयंतीनिमित्त "भारतीय लोकशाहीसमोरील सद्य:स्थितीतील आव्हाने व उपाय" या विषयावर आयोजित व्याख्यानाच्या कार्यक्रमातुन बोलत होते. कार्यक्रमाच्या अध्यक्षस्थानी प्रा. अविनाश डोळस प्रतिष्ठानचे अध्यक्ष प्राचार्य डॉ. संजय मून हे होते.

प्रास्ताविक करताना डॉ. प्रज्ञा साळवे म्हणाल्या की, प्रा. अविनाश डोळस यांनी एक जातीय राजकारणाची मानसिकता बदलविण्यासाठी आयुष्यभर प्रयत्न केले. प्रतिष्ठानच्या वतीने सातत्याने त्यांनी केलेल्या कार्यावर प्रकाश टाकण्याचे काम सुरू आहे.

पुढे बोलताना बनसोडे म्हणाले की, लोकशाही वाचली पाहिजे असे केवळ बोलून चालणार नाही, मोदी-शहा यांच्या विरोधात बोलण्याची कुणाची हिंमत नाही, बोलले तर त्याचा काटा काढल्याशिवाय ही व्यवस्था राहत नाही, देश अशा भयंकर परिस्थितून जात आहे जिथे लोकशाही संपुष्टात येऊन हुकूमशाही लागू होते की काय, अशी शंका आहे. साहित्यिक विचारवंत म्हणून घेणारे स्वतः कन्फुज आहेत, संविधानामध्ये बदल करणे सुरू झाले आहे, अनेक कलमांमध्ये बदल करणे सुरू झाले आहे विचारवंत केवळ सोशल माध्यमांतून संविधान वाचविण्यासाठी पोस्ट करीत आहोत. जनसुरक्षा कायदा हा लोकशाहीची हत्या करणारा आहे. पॉवर आणि पोझिशन मधील फरक आजही आपल्याला समजत नाही, हे मोठे दुर्दैव आहे. आपल्याला ब्राम्हणी व्यवस्था, मनुवादी उद्ध्वस्त करून लोकशाही, संविधानवादी व्यवस्था लागू करण्यासाठी प्रयत्न करणे गरजेचे असून त्यासाठी बाळासाहेब आंबेडकरांच्या पाठीशी खंबीरपणे उभे रहावे लागेल. कारण केवळ बाळासाहेबच मनुवादी आणि आरएसएस विरुद्ध लढू शकतात, बाकीच्यामध्ये तेवढी ताकद नाही. आज सभागृहात कुत्रे, मांजरे, बिबटे, डुक्कर, कबुतरे यावर तासनतास चर्चा होत आहे, परंतु इथे माणसांवर चर्चा होत नाही, विकासकामांवर चर्चा होत नाही, बेरोजगारीवर बोलल्या जात नाही ही लोकशाची होणारी थट्टा थांबली पाहिजे.

डॉ. संजय मुन बोलताना म्हणाले की, धर्मांध शक्तीविरोधात आपल्याला लढून लोकशाही बळकट करण्यासाठी व्यापक स्वरूपाचे जनआंदोलन उभे करावे लागेल. त्यासाठी आपल्याला जात या मानसिकतेतून बाहेर पडावे लागेल. प्रा. अविनाश डोळस सरांनी फुले आंबेडकर वादाची नव्याने मांडणी करून एकजातीय होऊ घातलेल्या रिपब्लिकन, आंबेडकरी चळवळीला बहुजातीय करण्याच्या प्रक्रियेमध्ये महत्त्वाची भूमिका बजावली आहे.

सूत्रसंचालन प्रा. भारत शिरसाट यांनी केले तर आभार अनिल खरतडे यांनी मानले.

यावेळी वंचित बहुजन आघाडीचे पश्चिम शहराध्यक्ष ॲड. पंकज बनसोडे, महिला आघाडीच्या कोमल हिवराळे, साधना पठारे, प्रा. डॉ. श्रीकिशन मोरे, डॉ. अर्चना गणवीर, डॉ. किशोर साळवे, पंडितराव तुपे, अमरदीप वानखडे, चंद्रकांत गणवीर आदी उपस्थित होते.

सांस्कृतिक चळवळ बळकट झाली तरच राजकीय क्रांती होऊ शकेल

noreply@blogger.com (मुख्य संपादक) — Fri, 12 Dec 2025 07:29:00 -0800

ॲड. संदीप थोरात यांचे प्रतिपादन ; "भय्यासाहेब आंबेडकरांची धम्मचळवळ आणि आपण" या विषयावर व्याख्यान संपन्न

छ. संभाजीनगर/प्रतिनिधी - भय्यासाहेब आंबेडकरांनी सांस्कृतिक चळवळीच्या बळकटीकरणाला भर देवून धम्म चळवळ गतिमान केली. महू ते मुंबई अशी भारतभर भीमज्योत काढून आपली प्रतिकं आणि संस्कृती रुजविण्याचे काम त्यांनी केले. त्यातूनच विहार आणि पुतळ्यांची निर्मिती झाली आणि म्हणूनच तत्कालीन काळात रिपब्लिकन पक्ष हा भारतभर सक्षम होऊ शकला होता. त्यामुळे जो पर्यंत आम्ही आमची सांस्कृतिक प्रतिकं रुजविणार नाही व धम्म चळवळ बळकट करणार नाही, तो पर्यंत आम्ही राजकीय क्रांती घडवून आणू शकणार नाही, असे प्रतिपादन ॲड. संदीप थोरात यांनी केले. ते सुपुत्र सूर्यपुत्र भय्यासाहेब यशवंतराव आंबेडकर यांच्या जयंती निमित्त सूर्यपुत्र भय्यासाहेब तथा यशवंतराव आंबेडकर प्रतिष्ठानच्या वतीने स्थानिक सत्यशोधक समाज कार्यालयात "भय्यासाहेब आंबेडकरांची धम्मचळवळ आणि आपण" या विषयावर आयोजित व्याख्यान कार्यक्रमातुन बोलत होते. कार्यक्रमाच्या अध्यक्षस्थानी वंचित बहुजन आघाडीचे नेते इंजि. महेश निनाळे हे होते.

प्रास्ताविकामध्ये बोलतांना प्रा. भारत सिरसाट म्हणाले की, गेल्या १५ वर्षापासून भैय्यासाहेब आंबेडकरांचे कार्य प्रतिष्ठान करीत आहे. १९४४ पासून भैय्यासाहेब हे बाबासाहेबांच्या चळवळीत सक्रिय काम करीत होते. तत्कालीन पुढारी आणि साहित्यिक - विचारवंतांनी भैय्यासाहेबांची दखल घेतली नाही, भैय्यासाहेब आंबेडकरांच्या विविध पैलूंवर व्याख्यानातून आणि ग्रंथ प्रकाशित करून प्रतिष्ठानने प्रकाश टाकला आहे.

सूत्रसंचालन रतनकुमार साळवे यांनी केले तर आभार अमरदिप वानखडे यांनी मानले. यावेळी डॉ. रेखा मेश्राम, अनंत भवरे, राजन कीर्तने, पंडितराव तुपे, डॉ. धनराज गोंडाने, भाऊ पठाडे, मधुकर गवंदे, जितेंद्र भवरे, एल. के. गायकवाड, रामदास अभ्यंकर, मधुकर दिवेकर आदींसह नागरिक उपस्थित होते.

सूर्यपुत्र भैय्यासाहेब आंबेडकर यांच्या जयंतीनिमित्त उद्या जाहीर व्याख्यानाचे आयोजन

noreply@blogger.com (मुख्य संपादक) — Thu, 11 Dec 2025 04:26:00 -0800

छत्रपती संभाजीनगर, दि 11 (प्रतिनिधी)- चैत्यभूमीचे शिल्पकार बौद्धाचार्यांचे जनक डॉ बाबासाहेब आंबेडकरांचे सुपुत्र सूर्यपुत्र भय्यासाहेब यशवंतराव आंबेडकर यांच्या जयंती निमित्त जाहीर व्याख्यानाचे आयोजन उद्या दि 12 डिसेंबर रोजी सायंकाळी 5 वाजता करण्यात आले आहे.

स्थानिक सत्यशोधक समाज कार्यालय सिडको एन 3 औरंगाबाद छत्रपती संभाजीनगर येथे सदरील व्याख्यान आयोजित केले असून सत्यशोधक समाज प्रतिष्ठानचे अध्यक्ष एड के ई हरिदास हे अध्यक्षस्थानी लाभणार आहेत. " सूर्यपुत्र भय्यासाहेब यशवंतराव आंबेडकर यांची धम्मचळवळ आणि आपण " या विषयावर ऍड संदीप थोरात यांचे व्याख्यान संपन्न होणार आहे.तसेच विविध संघटनेचे पदाधिकारी उपस्थित राहून भय्यासाहेबांना अभिवादन करणार आहेत.

तरी या सोहळ्यास औरंगाबाद येथील परिवर्तनवादी चळवळीतील तथा आंबेडकरी चळवळीतील कार्यकर्त्यांनी भय्यासाहेब आंबेडकर प्रतिष्ठानचे अध्यक्ष प्रा भारत शिरसाठ, आनंद चक्रनारायण, रतनकुमार साळवे, अमरदीप वानखडे, अनंत भवरे, राजन कीर्तने, पंडितराव तुपे, डॉ धनराज गोंडाने, मधुकर गवंदे, बाबुराव गवई, सुधाकर निसर्ग यांनी केले आहे

वंचितच्या वतीने डॉ. बाबा आढाव यांच्या स्मरणार्थ अभिवादन सभा

noreply@blogger.com (मुख्य संपादक) — Wed, 10 Dec 2025 07:10:00 -0800

छत्रपती संभाजीनगर/प्रतिनिधी - ज्येष्ठ सामाजिक कार्यकर्ते व असंघटित कामगारांचे नेते डॉ. बाबा आढाव यांच्या निधनानंतर आज दिनांक १० डिसेंबर २०२५ रोजी नंदनवन कॉलनी छत्रपती संभाजी नगर येथे अभिवादन सभा घेण्यात आली या अभिवादन सभेचे अध्यक्ष ॲड .बाबा सरदार हे होते बाबा सरदार यांनी डॉ. बाबा आढाव यांच्या संपूर्ण जीवन कार्याचा आढावा आपल्या अध्यक्षीय भाषणात केला तर गोपनारायण यांनी सुद्धा बाबा आढाव यांच्या सामाजिक समतेच्या विचारांना उजाळा देत आपले विचार व्यक्त केले, या अभिवादन सभेचे आयोजन वंचित बहुजन आघाडीचे पदाधिकारी राजू कीर्तने यांनी केले. याप्रसंगी सिद्धार्थ महाविद्यालयाचे उपप्राचार्य प्रा. डॉ. शिलवंत गोपनारायण, गोकुळ भुजबळ, आनंद मगरे, रोहित शिंदे, अमोल सरदार, अरुण डायलकर, सचिन आंबेवाडीकर, बाळू वाघ आदी सामाजिक कार्यकर्ते व वंचित बहुजन आघाडीचे पदाधिकारी उपस्थित होते.