Sweet N Tidy Arabia

كورس ترتيب و تنظيم المنزل باحتراف

noreply@blogger.com (Sweet N Tidy) — Tue, 22 Dec 2015 17:11:00 +0000

مرشد علامات الغسيل

noreply@blogger.com (Sweet N Tidy) — Tue, 18 Aug 2015 10:58:00 +0000

اظن جه الوقت اننا نتكلم عن الغسيل شوية . انا بحس اني معملتش حاجة مفيدة في اليوم لو فضل لسة فيه كومة في سلة الغسيل. انا بحب اقسم الغسيل لابيض وفواتح و غوامق و الملابس الناعمة لوحدها .

بس فيه حاجة كلنا لازم ناخد بالنا منها قبل ما نغسل الغسيل و الحاجة دي مهمة جدا .. عارفين ايه هي ؟ صح .. العلامات المبهمة و الي بتبقى في ضهر الملابس و بتكون خاصة بتعليمات الغسيل . زمان كان اسهل عليا اني اجرب اغسل حتة صغيرة من الهدوم قبل ما اغسلها في الغسالة اكتر من اني كل شوية ادخل النت ادور على معنى هذه الطلاسم.

بس خلاص زمن التدوير انتهى . عملت لنفسي دليل ارشادي للعلامات دي و بصراحة فادني جدا جدا ... بالنسبة للغسيل و العناية بيه دا كان حاجة تحفة

حمليها الان

متتردديش في انك تحملي المطبوعة دي عندك .. من هنا . هتساعدك جدا .. مفيش تاني تدوير على الانترنت على حاجات مش مفهومة في الغسيل . وداعا للتيشرتات الكشة و السويترز الممطوطة .. مفيش تاني سحب و غيوم رمادي على بلوزتك البيضة ولا بنطلونات مصبوغة. ياهووووو

حابة اني اسمع منكو. كنتوا تعملوا ايه لما بتشوفوا العلامات دي ورا الهدوم ؟ بتطنشوها ؟ و لا بتزعلوا لما متعرفوش معناها و لا بتكسلي انك تدوري عليها ؟ و ايه احساسك دلوقتي انها موجودة معاكي في مكان واحد؟ ابعتيلي اي سؤال او اي استفسار او سيبي كومنت تحت حتى لو مش عندك فيس بوك او اكاونت ممكن تختاري "مجهول" من القائمة تحت و سيبي الكومنت ملكيش حجة بقى :)

عربانة مطبخ مفيدة وعملية

noreply@blogger.com (Sweet N Tidy) — Tue, 19 May 2015 23:50:00 +0000

واحد من الحلول اللي ساعدتني جدا لاستغلال مساحة المطبخ الصغير جدا عندي هو اني اخترت عربانة مطبخ صغيرة او تروللي في متناول ايدي. انا عن نفسي شايفة ان عربانة المطبخ او التروللي لازم يكون عملي كفاية بحيث انه يقدر يساعدك وانتي بتطبخي عشا لذيذ.

زمان كانت العربانة او التروللي بتاعي مليان شوية اكياس بلاستك مع شوية كراكيب كدة .. بصراحة كانت حاجة تكسف اني اخد صور قبل و بعد . خدت بعد بس D: . بصراحة مكنتش اتخيل انه هيبقى حلو اوي كدة.

و لذلك انا متشوقة جدا اشارك معاكو عربانة المطبخ بتاعتي. انا كان هدفي انها تكون في متناول ايدي و تساعدني وانا بطبخ و بما اني هموت على شوية مساحة ولو صغيرة لمطبخي المتناهي الصغر اصلا فانا ممنونة للعربانة انها شايلة كل حاجات الطبخ اللي بستخدمها بشكل يومي في الطبيخ احسن ما احطهم على الرخامة و ملقيش حتة اطبخ فيها.

بالاضافة لاني حطيت ادوات الطبخ اليومية . كنت عايزة اخليها كمان تضيف جمال و ديكور للمطبخ و كمان احطلها لمستي. ممكن تكونوا لاحظتوا اني حطة صينية فضي بحيث تكون زي الرف و بصراحة شكلها حلو و بيلمع.

العربانة محطوطة جمب ضرف المطبخ التحتانية و بالضبط في مواجهة البوتاجاز. عشان كدة قررت احط فيها اطقم التوزيع اللي اتكلمت عنها من كام يوم ع الرف الفوقاني . بيساعدوني اخلص كل حاجة باسرع ما يمكن.

زي ما قلت قبل كدة اني قسمت اطقم التوزيع تلات اقسام (حضري , اطبخي , قدمي ) (prepare, cook and serve) كل كوباية او جردل مخصص لقسم معين. حطيت معاهم برضو فوط المطبخ و الطبيخ اللي بشيل بيهم الحلل او اللي بنشف بيهم المواعين .

و بحب جدا اخلي فوط الايد الصغيرة في متناول اليد .. ف بالنسبة لي هو ده احسن مكان عشان يفضلوا متوفرين ليا على طول. و استخدمت صينية بلاستك صغيرة عشان احطهم. حطيت كمان عصير و برطمان مخلل . يعني شوية حاجات بنستخدمها يوميا . و زهرية ورد خشب عشان تضفي لمسة جمالي.

و اخيرا و ليس اخرا حطيت رولات مناديل المطبخ الاضافية عشان لو الرول اللي فوق العربانة فضيت.

قولولي حطين ايه ف عربانة المطبخ او تروللي؟ حطين الحلل و الطاسات اللي بتستخدموها يوميا ؟ شوية مجات و اطباق اللي بتحتاجوها كل يوم ؟ عايزة اشوف كومنتاتكو و تفاعلكوا . مستنياكوا في البوست الجاي.

ترتيب الادوية بالصور

noreply@blogger.com (Sweet N Tidy) — Thu, 07 May 2015 11:33:00 +0000

درفة الحمام الجميل الصغير بتاعنا ميساعش كل الادوية بتاعتنا. عشان كدة انا حاطة كل الادوية و الفيتامينات في منطقة احنا خصصناها من كام شهر في البيت لاغراض العناية المنزلية . بجد احساس رائع لما تكون كل الادوية في مكان واحد . سهل تلاقي فيه او تجيبي منه او ترجعي فيه ادوية مكانها .

بالاضافة لادوية ابني الصغير احنا محتفظين بكل الادوية بتاعتنا و الاسعافات الاولية و الادوات الطبية. و بصراحة قررت اخلي ادوية ابني كلها في دولابه لوحدها كخدعة اتجنب بيها كركبة حاجات كتير اوي في مكان واحد .

لترتيب الادوية اول خطوة لازم تتعمل هي التخلص من اي ادوية ملهاش لازمة زي اللي صلاحيته انتهت او حاجة مبقاش ليها احتياج زي الادوية اللي بتتاخد اثناء الحمل و الولادة و العمليات الجراحية. الخطوة التانية هي اني قسمت الادوية . لما بيكون عندي الم في دراعي ف العضلات مببقاش متأكدة اني هفتكر اذا كان عندي مرهم او جل او بخاخ او حتى اقراص كمسكن للالم . عشان كدة اني اقسمهم حسب النوع (مراهم . شراب... الخ) مكنش عملي بالنسبة لي و كان الافضل ليا اني أقسمهم حسب سبب الاستخدام .

عشان اعمل السيستم السهل دا في ترتيب الادوية . اخترت نظام تخزين سهل في الحاجات الأقل استخداما و السيستم الاسهل شوية في الادوية الاكثر استخداما و الاسهل و الاسهل للحاجات المستخدمة بشكل يومي. أنا اشتريت العلب دي مخصوص بسعر قليل عشان احط فيها الادوية . حطيت الادوية بتاعة الجهاز الهضمي و المغص فوق هي و ادوية البرد و الانفلوانزا لان دول مستخدمين اكتر حاجة . أما الفيتامينات الزيادة و الادوية التانية تحتهم .

انا بحب الادراج دايما لسهولة استخدامها و سهولة اني اجيب الحاجة منها. و عشان كدة الادراج الصغيرة دي كانت مناسبة جدا للادوية اللي بتستخدم اكتر و اكتر او الحاجات الطبية اللي محتاجة الوصول اليها بشكل سريع زي الاسعافات الاولية .طبعا المسكنات و الاسعافات الاولية لازم يكون ليهم مكان سهل الوصول له. و عشان برضو بنستخدم ادوية العضلات و العظام اكتر حاجة اخترت احطهم في درج برضو.

أما بقى الفيتامينات و الادوية اللي بتتاخد كل يوم محطوطة في القسم اللي فوق خالص اللي مش محتاج اي مجهود اصلا عشان نجيب منه حاجة. الكورسات بتاعة الادوية زي المضادات الحيوية اثناء البرد و الانلفونزا برضو محطوطين في المكان ده عشان متتنسيش

برضو الادوات الطبية اللي بنستخدمها في تناول الادوية زي السرنجات و الكمادات و التيرمومترات موجودة برضو في واحد من الأدراج لسهولة الوضول اليها.

أنا متشوقة اشوف مشاريعكوا الترتيبية الملهمة . قولولي ازاي بتحفطوا و ترتبوا الادوية بتاعتكوا . و ازاي حاجة زي دي ممكن تكون اثرت ايجابيا على حياتكوا. اكتبي تعليق و اشتركي بايميلك عشان متفوتيش ولا بوست. اشوفكوا البوست الجاي

ترتيب ادوات الطبخ و اطقم التوزيع

noreply@blogger.com (Sweet N Tidy) — Fri, 01 May 2015 12:33:00 +0000

بالرغم من اني معنديش اطقم توزيع كتير اوي الا انهم كانوا مزنقين و مبهدلين جوة درج المطبخ و كان صعب اني الاقي اللي انا بدور عليه من غير ما اتعور من حاجة جوة الدرج. واحب انتهز الفرصة و احيي كل بنوتة عاملة معرض للادوات المنزلية على رخامة مطبخها و مش لاقية يا عيني حتة تطبخ فيها D:

بالنسة لي ادواتي كان ليهم مكان مجهول كدة جوة حفرة سوداء مش مفهومة جوة الدرج مع بقيت ادوات المطبخ . لحد ما لقيت الكوبايات او الجرادل الحلوة دي في "كارفور" . مكانوش غاليين و بصراحة كانوا مفيدين اوي للادوات المطبخية اللي بستخدمها كل يوم .

بصراحة كدة مكانهم مريح بالنسبة لي و رائع للحاجات اللي بستخدمها في الطبخ بشكل يومي . الحلو كمان في الكوبايات دي انهم بيتعلقوا ع الحيط في اي مكان فممكن طبعا اعلقهم جمب البوتاجاز او جمب الرخامة اللي بشتغل عليها ببساطة . بس انا حطاهم في الكيتشن كارت بتاعتي. اللي هي عبارة عن عربانة بتحطيها جمبك و انتي بتطبخي عشان تسهل عليكي امور كتير.

طبعا اول حاجة انك هترمي اي حاجة قديمة او مصدية او عندك منها كتير او مبتستخدميهاش خالص. و خصوصا لما يكون عندك مطبخ محندق و صغير زي حالاتي . لانك بتكوني محتاجة كل شبر في المطبخ.

الخطوة التانية اني قسمتهم لتلات اقسام . انا كان نفسي اقسمهم (اخبزي اطبخي و قدمي) (bake, cook, serve) لان شفت قبل كدة صور لادوات مطبخ مرتبة و متقسمة بالشكل دا و حبيت الفكرة بس بصراحة انا مش بخبز كتير اوي كدة يعني لدرجة اني اعمل كوباية مخصوص للمضرب اليدوي و ادوات الخبز غير كمان اني بستخدم المضرب اليدوي اكتر في عمل البشاميل و الصوصات و الصلصات اكتر من الخبز ففكرت في اقسام تانية هي ( حضري اطبخي قدمي) (prepare, cook, serve) فطبعت شوية علامات على ورق العلامات بتاعي و لزقتهم على الكوبايات دي عشان تضيف معنى و شكل جمالي كمان ليهم.

القسم بتاع حضري فيه كل الادوات اللي بستخدمها اثناء تحضير الاكل زي عصارة الليمون و مقص الاكل و السمك و السبتيولا و الفرشة السليكون و سكينة اللحمة و المصفة الصغيرة ممكن انتي برضو تحطي فيها اي حاجة بتستخدميها اثناء تحضير و تنضيف الاكل زي قشارة قروش السمك و هراسة البطاطس المسلوقة. بالنسبة لقسم الطبخ حاطة فيه المضرب اليدوي و الملاقط بتاعة الفراخ للقلي و المقصوصة عشان اخرج الحاجة من الطاسة و انا بقلي و المعالق الخشب و انا بحمر البصل او بعمل تقلية. اما بقى القسم بتاع التقديم طبعا المغرفة اللي بغرف بيها الشوربات و السوايل و قطاعة البيتزا و معلقة غرف الرز طبعا ممكن تحطي معلقة غرف السباجتي او معلقة الايس كريم .

زي ما قلت قبل كدة حطيتهم في عربانة المطبخ او الكيتشن كارت عشان يسهلوا عليا الطبخ . اوعدكو اني هشيرها قريب جدا . عاوزة اسمع منكوا اراءكوا و تعليقاتكوا . مستنية اشوف تعليقات. عايزة اعرف مرتبة ادوات المطبخ ازاي علقي تحت البوست دا و لو معندكيش حساب من الاختيارات اللي تحت عشان تعلقي بيه ممكن تختاري مجهول و تعلقي. ولو عايزة تساليني اي سؤال انا موجودة. اشوفكوا البوست الجاي

تلوين بيض شم النسيم

noreply@blogger.com (Sweet N Tidy) — Wed, 29 Apr 2015 15:28:00 +0000

من كام يوم كان شم النسيم و اليومين الجيين طبعا عيد العمال و لازم استغل فرصة زي دي عشان اقولكوا كل سنة و انتوا طيبين و بخير.

الجو اليومين دول متقلب .شوية حر و شوية برد بس محدش يقدر ينكر انه بييجي وقت عليه و بيبقى جو حلو جدا .. وقتها بيبقى الواحد نفسه ينزل يروح اي حتة حتى لو هيتمشى جمب البيت عموما انا النهاردة حابة أشير معاكو بيض شم النسيم اللي لونته من كام يوم اتمنى ينال اعجابكو

في عيد شم النسيم و في شوية اعياد و مناسبات بحب اتفنن و ابين مواهبي شوية .. و طبعا شم النسيم فرصة حلوة الواحد يرجع لطفولته و يلعب بالفرش و الالوان . بالنسبة للبيض حاولت على اد ما قدرت افضيه من غير ما اكسره كله . يعني فتحة صغننه اوي و فضيته. طبعا اخد وقت كبير بس بصراحة يستحق.

اخدت عربانة ابني اللي بيلعب بيها عشان احط فيها البيض . و على سيرة الالوان و البيض اللي ممكن يتكسر في اي لحظة .لو عندك اولاد صغيرين "لا تجرب هذا في المنزل " :) . حصلت شوية حوادث بس الحمد لله عدت على خير. يظهر كان لازم اعتذر اني خدت منه العربانة الحلوة دي.

اخترت الوان فاتحة و جربت شوية اشكال و ورود. و مترددتش اني استخدم شوية اسود. بيدي كونتراست و بينطق الالوان. قصيت شوية ورق بني كمان عشان يبقى زي العش. بصراحة حبيت شكلها في الاخر و بقيت جاهزة بتزيين اي مكان في البيت

انا برضو محبتش اني اخلي الاشكال متقنة اوي عايزة اخلي شكلها باين انها مرسومة بالايد و برضو معملتش خطوط و اشكال حادة اوي . انا حباها تبقى كدة عشان يبقالها طابع الشغل اليدوي شوية و كمان لما ابصلها احس بجو البيت الدافي.

ممكن برضو تستخدمي اي نوع من انواع الالوان او حتى الالوان الشيني و الفولماستر انا عن نفسي استخدمت الالوان المائية العادية و شكلها طلع حلو اوي بفرشة الالوان.

يارب يكون عجبكوا. و حابة اشوف بيض شم النسيم اللي لونتوه ... مستنية ردودكوا و اراءكوا . ابعتولي كومنت تحت البوست . ممكن تختاري "مجهول" من الاختيارات لو معندكيش حساب تعلقي بيه .. اشوفكوا البوست الجاي

طوابع العودة للمدارس

noreply@blogger.com (Sweet N Tidy) — Tue, 05 Aug 2014 14:06:00 +0000

العودة الى المدارس على وشك تبدأ. ناس كتير مننا مبسوطة و ناس كتير مش متحمسة للصحيان بدري و لف السندوتشات و المذاكرة للعيال. بس نعمل ايه لازم نعيش مع الوضع ده :) بصي كدة على الطوابع الحلوة دي هتخلي العودة للمدارس و وقت الدراسة احلى و امتع .

لما كنت صغيرة كنت بحب جدا وقت العودة للمدارس عشان اروح اشتري اقلام و مساطر و كشاكيل حلوة و ملونة و فيها افكار جديدة . كنت اتمنى يكون عندي شوبينج ليست حلوة زي دي كانت هتفيدني اوي . ممكن تنزلي الطوابع الحلوة دي من هنا

الطوابع دي هتكون مفيدة جدا للولاد عشان تتحط ع الشنط و الكشاكيل و الدفاتر . انا بحبها تكون بسيطة و مش اوفر و تكون واضحة و نضيفة . ممكن تنزليها من هنا

الواجب من النهاردة هيكون احسن و افضل و اكثر متعة مع الليست بتاعة الواجب الحلوة دي . تقدري تنزليها من هنا .

اتمنى يكون البوست عجبكوا و اتمنى تكون الطوابع دي مفيدة للاولاد . عايزة اسمع تعليقاتكوا . ممكن تعلقي بدون ما تسجلي اي دخول . اختاري مجهول و علقي . اشوفكوا البوست الجاي.

حاجات تاخدي بالك منها في الغسيل

noreply@blogger.com (Sweet N Tidy) — Thu, 31 Jul 2014 14:00:00 +0000

النهاردة هنتكلم عن شوية حاجات ناخد بالنا منها و احنا بننشر الغسيل . لاني لاحظت شوية اخطاء بنقع فيها لما بنعمل الغسيل .

مثلا لما يكون عندك تيشرت صوف او تيشرت غسلاه على ايدك بلاش تنشريه زي ما الصورة بتقول ف الجزء الخطأ لانه بيكون تقيل من المية جدا فهيعمل تنيات على كتف التيشيرت . الاحسن انك تسيبيه على منشر داخلي او تربيزة مش خشب بشكل افقي لحد ما ينشف لوحده .

كمان لما يكون عندك فانيلا او تيشيرت قطن بلاش تعلقيه من تحت لان القطن لما بيكون مبلول بيكون سهل اوي انه يتشد فبلاش عشان مينتهيش الامر بيه الى انه يبوظ شكله الاحسن انك تعلقيه من تحت الدراعات و تتنيه بالشكل الصح .

لما يكون عندك حاجة فيها ترتر كتير او زراير الاحسن انك تقلبيها على ضهرها قبل ما تدخليها الغسالة عشان تحمي الازرار و التراتر من انها تفك و تقع في الغسالة.

احيانا بيكون عندنا مشابك سيئة و مصنوعة من الحديد و دي بتصدي و بتعمل علامات على الغسيل و تبقعه صدى الاحسن انك تستخدمي مشابك بلاستك.

اتمنى ان يكون البوست ده مفيد ليكي و اتمنى اشوف تعليقاتكوا و اراءكوا ممكن تعلقي بدون ما تسجلي اي دخول . اختاري مجهول و علقي . اشوفكوا البوست الجاي.

كيفية ترتيب ورق الاوريجامي

noreply@blogger.com (Sweet N Tidy) — Wed, 30 Jul 2014 14:00:00 +0000

زي ما قلتلكوا قبل كدة انا بحب الاشغال اليدوية جدا .. بحب كمان فن الاوريجامي . فن طي الورق اللي بعمل منه اشكال رائعة جدا من المجسمات الورقية .. كل اللي عملته عشان ارتب الورق بتاع فن الاوريجامي اني جبت علبة احذية قديمة عندي و غلفتها بورق ملون و عملتلها مقسم بالشكل ده

و دي طريقة عمله

قطعت تلات قطع من الكرتون بعرض و ارتفاع العلبة و قطعتين بعمق و ارتفاع العلبة و ف كل قطعة قطعت شرايط طولها H/2 بعدد القطع الاخرى على مسافات متساوية عشان يعشقوا في بعض زي ما الصورة شارحة كدة

فكرة ع السريع لو متبقي معاكي ورق صغير من البروجيكتات اللي بتعمليها ممكن تجمعيهم باستيك او توكة رفيعة بتاعة ديل الحصان .

و دي طريقتي في ترتيب ورق الاوريجامي. رتبتهم على حسب اللون عشان يبقى سهل استخدمهم .

عايزة اعرف رايكوا و عايزة اشوف تفاعلكوا و اراءكوا و ابعتولي صور لمشروعات الترتيب بتاعتكوا . ممكن تعلقي بدون ما تسجلي اي دخول . اختاري مجهول و علقي. مستنياكوا

ايه اللي بيخلينا نكره الغسيل

noreply@blogger.com (Sweet N Tidy) — Mon, 28 Jul 2014 23:00:00 +0000

المصدر

الغسيل معناه كومة بالنسبة لنا كلنا. بصراحة انا بكره الغسيل برضو . دايما كان عندي اكوام غسيل و دايما عندي مشكلة ان ابني مش لاقي لبس يلبسه عشان كل هدومه ف الغسيل بتصرخ عشان تتغسل و لازم اتخلص من الغسيل ف تلات ايام اقعد اغسل ف الغسالة الغلبانة الشقيانة و ملاقيش مكان اصلا انشر فيه الهدوم المبلولة

بما اني عايشة في مصر فالحمد لله الجو مش متوصي الدنيا حر جدا و مش محتاجين مجفف . يادوب بننشر الغسيل في مكان شمس عشان تقتل الجراثيم و خلاص لان الغسالة بتنشف بنسبة 70%. طيب تعالو نشوف ايه اللي بيخلينا نكره الغسيل ؟

الجو وحش

لو عايشة في منطقة على طول برد او مش بيطلع الشمس فيها غير كل حيناً و ميناً او لو الجو سيء و فيه مطر بتنزل و احنا في الشتا ده معناه انك مش هتغسلي النهاردة . و ده معناه انك تدوري على غرفة في شقتك داخلها نور كويس و تنشري جوة في منشر داخلي و خلاص

مكسلة

عايزين نقف هنا شوية و نعرف احنا ليه بنبقى مكسلين و مش عازين نعمل الغسيل

بياخد وقت كبير جدا

كلنا فاكرين ان الغسيل بياخد وقت للابد . لانه شغلانة كبيرة لازم تتعمل .تلمي الهدوم الي عايزة تتغسل من الغرف تقسمي الغسيل و تفتشي ف الجيوب و تغسليهم و تنشفيهم لو عندك مجفف و تنشريهم تلميهم و تكويهم و تطبقيهم و تحطيهم في الدولاب حاجات كتير و خطوات كتير و ده محبط جدا و بيخلينا مش عايزين نقوم نعمل حاجة.

سلة غسل تقيلة

لما بتكون سلة الغسيل تقيلة اوي بيبقى صعب انك تشيليها و توديها ف كل مكان و محتاجين وقت طويييييل اوي عشان تغسليهم في البرامج الطويلة بتاعة الغسالة

بلكونة متربة او غرفة غسيل مش مرتب

لو عندك بلكونة متربة على طول ... او مش مرتبة غرفة الغسيل ... ده واحد من الاسباب اللي تخليكي تكرهي الغسيل و ده بسبب اننا احيانا كتير بنتجاهل البلكونة زي ما تكون مش جزء من الشقة عشانها برة و دايما متربة و مش نضيفة و محتاجة وقت طويل عشان ننضفها.

طب ازاي نحل المشاكل دي . تعالو نشوف.

حل الجو السيء

زي ما قلنا لو عندك يوم او اتنين الجو فيهم وحش و مش مناسب تنشري فيه شوفي غرفة بيدخلها هوا او نور و انشري في منشر داخلي و ده لازم يكون عندك لان احيانا كتير الدنيا بتمطر و مش بنلاقي مكان ننشر فيه

حل السلة التقيلة

احيانا كتير بنكون مستعجلين اوي الصبح و نقوم نشوف هدوم ف الدولاب نلبسها و متعجبناش و نقوم رامينها في اي حتة عشان احنا مستعجلين ... و بعد يومين كدة لما تيجي ترتبي الغرفة تلاقي شوية هدوم مرمية كدة و متعرفيش دي عايزة تتغسل و لا ايه و بينتهي بيها الامر انها تروح في سلة الغسيل . نفس الشيء بالنسبة لهدوم الشغل اللي اتلبست مرة واحدة او يوم واحد لو انتي بتشتغلي في مكان مكيف و بتبقي قاعدة على مكتب على طول ف الهدوم دي مش محتاجة تروح في الغسالة دي محتاجة بس تتعلق في الهوا او الشمس و هترجع زي الجديدة مش كل ما تلاقي هدوم حواليكي تستسهلي و ترميها في سلة الغسيل متجيبيش لنفسك وجع الضهر

حل البلكونة المتربة او غرفة الغسيل الغير مرتبة

متتجاهليش البلكونة .. البلكونة لازم تتنضف كل ما تيجي تنضفي البيت حطي فيها شوية براويز صور و شوية زرع او ورد صناعي حتى و خليها مكان جميل عايزة تدخليه كل شوية و حاجة تشجعك انك تحبي الغسيل حطي فازات ورد او تربيزة حلوة و كرسيين كدة.

انا عاوزة اسمع منكوا انتوا ليه بتكرهو الغسيل ولو بتحبيه برضو عايزة اعرف ليه بتحبيه .. عاوزة اشوف اراءكوا و تعليقاتكوا و تفاعلكوا ممكن تعلقي بدون ما تسجلي اي دخول اختاري مجهول و علقي . اشوفكوا البوست الجي

طوابع شفنيرة البيبي

noreply@blogger.com (Sweet N Tidy) — Sat, 26 Jul 2014 14:00:00 +0000

من مدة كنت شاركتكو شيفونيرة ابني و كنت حاطة عليها طوابع كيوت جدا .. و حابة اشارك معاكو الطوابع دي يارب تعجبكوا

اللي عايز ينزلها من هنا . واي سؤال او اي استفسار انا موجودة ابعتولي افكاركوا ع الميل و اكتبوا كومنتاتكوا . ممكن تعلقي بدون تسجيل اي دخول . اختاري مجهول و علقي . اشوفكوا البوست الجاي

نصيحة سريعة : لمعيار مضبوط في حليب الاطفال

noreply@blogger.com (Sweet N Tidy) — Wed, 23 Jul 2014 14:00:00 +0000

حبيت اشارك معاكو الفكرة الصغيرة دي .. انا عموما مش بعتمد اعتماد كلي على اللبن الصناعي بس لما بفتح علبة جديدة بحب اقص الكفر المعدني بتاعها بالشكل ده.

لما اجي اعمل ببرونة حليب بحب الاقي زي حافة كدة امسح فيها المعلقة عشان تديني دايما المقاس المضبوط كل مرة

ممكن برضو تستخدمي نفس الفكرة في التوابل او النواشف و ممكن تستخدمي شريط لزاق تمسحي عليه المعلقة عشان تاخدي المعيار المضبوط

اتمنى تكون الفكرة عجبتكوا . مستنية اراءكوا و تعليقاتكوا و عاوزة اشوف مشاركاتكوا .. ممكن تعلقي بدون ما تسجلي اي دخول اختاري مجهول و علقي . اشوفكوا البوست الجي

ركن القراء : تلاجة رائعة و ملونة

noreply@blogger.com (Sweet N Tidy) — Mon, 14 Jul 2014 23:32:00 +0000

اختي عايشة برة و مع ذلك هي من القراء الدائمين ليا .. يعني هو معتبرش دي حاجة رسمية لان دي اختي و حد اعرفه شخصيا . بس اهو حاجة برضو تشجعكوا و انا لسة مستنية صوركوا و مستنية اختراعاتكوا و افكاركوا .

اختي بعتتلي صور التلاجة بتاعتها بعد ما شافت البوست بتاعي بتاع التلاجة و بصراحة التلاجة عجبتني جدا تعالو نشوف.

فعلا عجبتني التلاحة جدا مليانة الوان الخضار و الفاكهة الطازة في مصافي و سلات جميلة و عجبني كمان انها حطة العصاير و الحاجات اللي بتاخدها كل يوم الصبح للاولاد قبل ما يرورحو المدرسة في سلات عشان تقدر تسحبها بسهولة و تاخد منها.

مستنية تعليقاتكوا و اراءكوا و رأيكوا في التلاجة . كمان مستنية تبعتولي افكاركوا على الايميل . لو عايزة تعلقي ممكن تعلقي بدون اي تسجيل دخول اختاري بس مجهول من الاختيارات و اكتبي التعليق. اشوفكوا البوست الجاي

كيفية تنظيم الضمانات و كتيبات دليل المستخدم

noreply@blogger.com (Sweet N Tidy) — Mon, 14 Jul 2014 15:59:00 +0000

أخدت وقت طويل شوية عشان المشروع ده يوصل للي هو فيه . انا استوحيت الفكرة من خبيرة تنظيم . لكن المشكلة ان كان عندها اظرف مقفولة و مخرومة جاهزة للفولدرات و كل واحد منهم بيشيل اكتر من متين ورقة. ده غير ان كان عندها فولدرين واحد للحاجات اللي هي بتسيبها في البيت بعد ما تعزل و فولدر تاني للحاجات الغالية زي الكاميرا و البيبي ليس. عشان كدة مكنش عندها فولدر واحد كبير و تخين جدا لانها قسمتهم على اتنين . و كمان جابت علامات اللي هي بيبقى اسمها بالانجلش Tabs اللي بتعلم بيها و تكتب انواع الكتيبات ع الفولدر.

للاسف احنا ظروفنا مختلفة تماما احنا معندناش نفس المنتجات اللي عندها .. قعدت ادور على فولدر شبه ده ملقتش خالص و لا اظرف مخرومة للفولدرات و الدوسيهات و لا لقيت حتى الحجم الصغير ده . ده غير اننا مبنسيبش اي حاجة و احنا معزلين من البيت بناخد كل حاجة معانا يعني هينتهي الموضوع بفولدر كبير و تخين جدا فيه كل انواع الاجهزة . طب ازاي اتغلبت على كل المشاكل دي ؟

جبت دوسيه عادي جدا اللي هو الكبير اوي اللي عندنا بيتباع في كل حتة . و جبت اظرف بتتقفل بكباسين عادية برضو حجم A3 و خرمتها بنفسي . الاول مكنتش اعرف ازاي اخرمهم كلهم من نفس المكان بالضبط بس بعد كدة عرفت بعلم على الاماكن اللي عاوزة اخرمها بالضبط و بشيل الجزء التحتاني من الخرامة اللي هو بيشيل قصاقيص الورق بعد الخرم و بكدة اقدر اشوف العلامات اللي علمتها ف الاظرف من تحت الخرامة و بكدة الاظرف جاهزة تخش في الحلقات بتاعة الفولدر.

الاظرف كانت A3 و للاسف كان الظرف طويل شوية على الفولدر يعني كان طالع منه و مكنش ينفع احط اي تابس و لا علامات و ده نتيجة اللي عملته.

علمت عادي ع الاظرف من غير تابس بالتتابع بحيث اقدر اشوف كل الانواع اللي عندي.

لو انا حطيت كل الكتيبات بتاعة نوع واحد في الظرف عادي كدة اللي هيحصل ان كل الكتبيات هتسقط في اخر الظرف و هيتكوموا فوق بعض و يبقى عندي ظرف تخين و ف الاخر فولدر تخين اوي مليان اظرف تخينة اوي. ممكن تكونوا لاحظتو ان الفولدر عندي مش تخين اوي ولا حاجة مع اني حاطة فيه كل انواع الكتيبات و ده بسبب الفكرة الجامدة اللي جت في دماغي.

خيطت الاظرف من النص بمكنة الخياطة .. بقى دلوقتي عندي جيبين في كل ظرف و بكدة الكتيبات هتتوزع ف الظرف و مش هتسقط في اخر الظرف و تتكوم و تعمل ظرف تخين اوي لاني لاحظت ان معظم الكتبيات بتيجي بنص حجم ال A3 او اصغر.

و ببساطة كل سيكشن او نوع من الكتيبات عملتله نوع اصغر يعني مثلا انا حطة كل كتبيات الاجهزة اللي ليها علاقة بدرجة الحرارة في ظرف لما قسمت بقى الظرف قسمين بمكنة الخياطة قسمتهم باجهزة بتعلي درجة الحرارة زي السخان و الدفاية و اجهزة بتوطي درجة الحرارة زي المكيف و المروحة.

مثلا قسم الالكترونيات قسمته اتنين الالكترونيات اللي بنستخدمها في البيت زي المكوة و التليفون الارضي و الالكترونيات اللي بنستخدمها برة البيت زي الكاميرا و الموبايلات.

طبعا قسم الكمبيوتر و الانترنت متقسم قسمين قسم كمبيوتر فيه كتيبات الفلاشات و الهارد ديسك و البرينتر مثلا و قسم الانترنت زي الراوتر و الحاجات اللي ليها علاقة بالنت.

قسم المطيخ برضو قسمته اتنين الاجهزة الصغيرة زي غلاية المية و مضرب البيض و الحاجات دي و الاجهزة الكبيرة زي التلاجة و البوتاجاز و هكذا.

بصراحة قسم الترفيه ملقتلوش اقسام اصغر لان كلهم متمحورين حوالين التلفزيون .. التلفزيون و الرسيفر و الاكس بوكس. يمكن لو كان عندي بيانو كنت قسمتهم حاجات تانية.

فكرة صغيرة حابة اقولها . اني بحب احط الضمان مع الفاتورة بدبوس و ممكن كمان باستيك .. يعني مثلا الاكس بوكس كان جاي بكتيبات صغيرة كتير بلغات كتير لميت كل تلاتة منهم باستيك و حطيتهم ورا بعض في الظرف.

الاقسام بتاعتي

الالكترونيات (جوة البيت - المكوة و التليفون الارضي ..و هكذا / برة البيت - الموبايلات و الكاميرا .. و هكذا)

الكمبيوتر و الانترنت ( كومبيوتر - الفلاشات و الهارد ديسك ..و هكذا / الانترنت -الراوتر و الاكسيس بوينت .. و هكذا)

التجميل (الشعر - السيشوار و البيبي ليس ..و هكذا / اخرى - ضمان النضارة و فواتير المكياج الغالية .. و هكذا)

حاجات البيبي (اثاث -الكرسي بتاع البيبي و المشاية ..و هكذا /ادوات الاكل - زجاجات الحليب و المعالق .. و هكذا)

الحرارة ( عالية - الدفاية و السخان ..و هكذا / منخفضة -المكيفات و المراوح .. و هكذا)

المطبخ (اجهزة كبيرة - البوتاجاز و الديب فريزر ..و هكذا / اجهزة صغيرة -العجانة و مضرب البيض ... و هكذا)

الاثاث (الخشبي - كنبة كرسي او مكتبة ..و هكذا / اكسسوارات - النجف و الستاير .. و هكذا)

الترفيه

طبعا الاقسام دي براحتك و شيء يرجعلك و على حسب ما تحبي و على حسب مانتي شايفة

بس و كتبت على الفولدر من برة انه للضمانات و الكتيبات

و حطيته في المكتبة

و بكدة اقدر اقول دي طريقتي في ترتيب الضمانات و كتيبات دليل المستخدم في البيت اتمنى يكون البوست عجبكوا و مستنية تعليقاتكوا ممكن تعلقي بدون ما تسجلي اي دخول اختاري مجهول و علقي . اشوفكوا البوست الجاي على خير.

كيفية ترتيب الشرائط الستان في غرفة الفن

noreply@blogger.com (Sweet N Tidy) — Wed, 02 Jul 2014 12:19:00 +0000

برضو من المشاريع الحلوة اللي عملتها من كام شهر . نظمت كل الشرايط الستان بتاعتي القديمة و الجديدة و كالعادة مصرفتش ولا مليم.

دي كانت علبة جزم غلفتها بورق ملون . نظمت جواها كل انواع الشرايط الستان و الخيوط المطاطة و الخيوط اللي بستعملها ف السلاسل وكمان حلقات المعدن.

عارفة ان شكلها مش تحفة اوي بس لسة شكلها حلو و مرتب و منظم . دي كل الشرائط الستان بتاعتي و كمان الشرايط اللي بتتبقى ف الاخر. هقولكوا واحدة واحدة انا عملت ايه هنا بالضبط.

الاول خالص كان عندي شرائط كتير ملهاش بكر و ف نفس الوقت بكر كتير الشرائط اللي ملفوفة حواليه قليلة و البكرة نصها فاضي فنقلت كل الشرائط القليلة اللي زي بعضها في بكرة واحدة فبقى عندي بكر كتير فاضي ممكن استخدمه .. و رحت لافة عليه الشرائط و عشان البكرة كانت واسعة اخدت كذا شريط و عشان اقدر استعمل البكرة اللي عليها كذا شريط دي لازم تلف و هي مرتاحة يعني مينفعش استخدم فيها شريطين ف نفس الوقت لان لو عملت كدة هاجي الفها عشان اخد منها شريط هلاقي الشرايط التانية اتكعبلت.. فقفلت على طرف الشرايط ف الاخر بنقطة شمعة بمسدس الشمع .. و ده معناه اني هضطر استخدم شريط واحد فقط في البكرة دي و مفتحش الشرايط التانية الملزوقة فطبعا انا عملت كدة ف الشرايط اللي زي بعضها بالضبط لان مش من المنطقي اني هفتح لفة شريط ملزوقة بالشمعة و انا اوريدي عندي واحدة مفتوحة من الاول بنفس نوع ولون الشريط بالضبط و بالطريقة دي اقدر الف البكرة براحتي بدون ما أأثر على لفات الشرايط التانية على البكرة نفسها لان بقيت البكر مقفولين بشمعة هتلاحظوا طبعا اللي بتكلم عليه بسهولة في الصورة اللي فاتت مع الشرايط الاورانج او البنفسجي مثلا.

كان فيه شرايط برضو معرفتش الاقيلها بكر فعملتلها بكر من رولات الكرتون اللي بتبقى في قلب رولات اكياس البلاستيك و حتتين كرتون قصيتهم بشكل دواير و لزقتهم على الجنبين بتاعة الرولة .. و بكدة عملنا بكر ممكن تشوفوها ف الشريط الاخضر او الشريط الازرق.

جبت اسياخ خشب بتاعة الشيش طاووق و حطيت فيهم البكر و حطيتهم ف البوكس و عشان الاقي سُمك للسيخ يخش فيه لزقت تيب تخين ف الاخر.

و للشرايط الصغيرة اللي مش مستاهلة تتلف على بكر قطعتلها حتت كرتون و غلفتهم بتيب ملون و لفيت عليهم الشرايط

و بالطريقة اللي في الصورة اللي فاتت دي دخلت طرف الشريط ف بعضه عشان ميفكش

بيتبقى عندي بواقي شرايط كتير بحب استخدمهم احيانا ف اني اعمل كورة شرايط ملونة مثلا ...جمعتهم هنا باستيك عشان المّهم.

و حطيتهم في علبة بلاستيك.

عندي تيبات بتلمع و ملونة بتاعة هدايا كتير جمعتهم بسياخ خشب.

و دي النتيجة

اتمنى يكون البوست عجبكوا مستنية تعليقاتكوا و اراءكوا ممكن تعلقي بدون ما تسجلي اي دخول اختاري مجهول و علقي . اشوفكوا البوست الجاي على خير.

حل عبقري للتخزين في غرفة الفن

noreply@blogger.com (Sweet N Tidy) — Sun, 29 Jun 2014 10:07:00 +0000

فاكرين الرفوف السلم اللي كنا عملناها قبل كدة مع بعض؟ كانو رفوف كدة بالكرتون سلم لعرض الخرز بتاعي . المهم انك هتتفاجئي لما تعرفي اني عملت صناديق بداخل مساحة التخزين جوة .

دي الرفوف اللي عملناها الاول

كل اللي عملته اني قطعت قطع من الكرتون عشان اعمل بوكسات مناسبة للمساحة اللي تحت كل رف و غلفتهم بورق هدايا ممكن انتي تغلفيهم بأي حاجة تحبيها.

كل الي عاوزة اقوله انك تفكري برة الصندوق زي ما بيقولوا . جربي حاجات جديدة و فكري فكري فكري كتيييير هتلاقي الفكرة اكيد .. مستنية تعليقاتكوا و تطبيقاتكوا ممكن تعلقي بدون ما تسجلي اي دخول اختاري مجهول و علقي .اشوفكوا البوست الجاي

شنطة الاسعافات الاولية في شنطتي

noreply@blogger.com (Sweet N Tidy) — Fri, 27 Jun 2014 11:37:00 +0000

بجد حاجة من الحاجات المهمة جدا اللي كلنا بننساها مع انها مهمة جدا و مفيدة جدا .. الاسعافات الاولية ... دي بقى لو عندك اطفال لازم لازم تخديها معاكي ف شنطتك و متستهونيش بيها خالص لان الاطفال بيجروا و يلعبوا ف كل مكان و عرضة للاصابات و انتقال الجراثيم و العدوى .. حتى للكبار كمان ممكن تتعوري و لا حاجة و انتي بتفتحي حاجة حادة او كدة ..

المقلمة دي عملتها من جينز قديم كان عندي

قطعت قطعة قماش مستطيلة و تنيتها نصين .. الحروف القصيرة خيطهم سوا ف سوستة و قلبتها للوش الغلط و خيطت الطرفين الطوال مع بعض . تعالو نشوف جواها ايه.

ترموميتر ديجيتال و ترموميتر عادي و بيتادين و مطهر و كمان بلاستر و قطع قطن و مرهم حروق و مرهم مضاد حيوي و حبوب مضادة للقىء و اسبرين و مسكن و قطرة اذن لو رايحة تصيفي او حاجة.

مليت المطهر و البيتادين في قطرة عين مغسولة طبعا بسرنجة . كدة هتبقى سهلة انك تبللي قطنة بيهم .

طبعا مبدأ سيطر ع الفوضى لازم يتطبق هنا لاني مش مستعدة لفرصة ولو %0.0000009 احتمال ان ممكن بيتادين يتسرب على حاجاتي ف الشنطة عشان كدة قطعت شوية قطع من كيس بلاستك و حطيته ع الفتحة قبل ما اقفل الغطا عشان تبقى محكمة.

حطيت مرهم انتي بيوتيك و مرهم حروق في علبة العدسات .. حبيت الفكرة اللي جت ف دماغي دي لانها مناسبة جدا لاحتياجاتي

اتمنى البوست يكون عجبكوا و عايزة اعرف ايه اللي جوة مقلمة الاسعافات الاولية عندك . مستنية ردودكو ممكن تعلقي بدون ما تسجلي اي دخول اختاري مجهول و علقي. اشوفكوا البوست الجاي

تلاجتي الاكثر مشاهدة على HGTV

noreply@blogger.com (Sweet N Tidy) — Tue, 24 Jun 2014 09:25:00 +0000

النهاردة بفتح HGTV لقيت ان تلاجتي هي الاكثر مشاهدة النهاردة عليه .. بجد انا سعيدة جدا بصوا

انا مبسوطة جدا انتوا ايه اخباركوا مستنية تعليقاتكوا و تفاعلكوا ..

مجموعة استحمام ابني المتنقلة

noreply@blogger.com (Sweet N Tidy) — Mon, 23 Jun 2014 21:15:00 +0000

فكرت ليه اشيل حاجة تقيلة لما ممكن كل حاجة تكون صغيرة و على اد الاحتياج . بحتاج احيانا مجموعة الشاور بتاعة ابني لما اروح لوالدتي يومين و لا حاجة ... طب ليه اشيل ازازة شامبو و لوشن و باودر و حاجات تقيلة ؟؟ ففكرت انقل كل الحاجات دي ف ازايز صغيرة و حطيتها في المقلمة دي

المقلمة دي عملتها من بلوزة قديمة كانت عندي .. قصيت منها مستطيل و طبقتها ارباع و وصلت الطرفين القصيرين بالسوستة و بعدين قلبتها و خيطت الطرفين الطوال .. بس كدة تعالو اوريكو جواها ايه

جواها البيبي لوشن و البيبي باودر و البيبي اويل و فيه شامبو كمان جوة خالص

صورة هنا قريبة

علبة الباودر دي بقى حكاية دي كانت اصلا علبة خلل سنان و انا استغليتها .. بجد تحفة لان فعلا الازازة مناسبة جدا جدا للباودر

اهي فيها فتحتين واحدة كبيرة و واحدة اللي بتطلع خلل سنان اللي بتبقى مخرمة .. بجد حلوة جدا.

البيبي لوشن حطيته ف علبة فيتامين لما خلصت .. هي مش نفس الديزاين بس حبيت اوريكوا قصدي ايه.

طبعا علبة الشامبو كانت علبة شامبو بس كانت شامبو عادي . اول ما خلصت مليتها شامبو الاطفال .. الطابع هنا اتمسح شويه عشان جو الشاور :). اللي عاوزة الطوابع دي يبعتلي او يسيبلي كومنت

مليت البيبي اويل ف علبة قطرة مغسولة .. مليتها بالسرنجة بصراحة اخد وقت مني بس يستاهل...

فاكرين مبدأ سيطر ع الفوضى اللي اتعلمناه من كام يوم ؟ طبقت نفس المبدأ هنا .. عشان مش عايزة الشامبو و الزيت و اللوشن يسربو برة و يعملوا مشكلة ملهاش حل .. قطعت قطع من كيس بلاستك و حطيته قبل ما اقفل الغطا بالشكل ده هيبقى محكم و مش هيسرب

اتمنى البوست يعجبكوا و عاوزة اشوف التفاعل و التعليقات و الاسئلة .. اشوفكو البوست الجاي.

كيفية تطبيق و طوي هدوم البيبي

noreply@blogger.com (Sweet N Tidy) — Sat, 21 Jun 2014 21:59:00 +0000

الاسبوع اللي فات نزلت صور ترتيبي لحاجات ابني و دلوقتي هقولكم ازاي بطبق هدومه .. انا مش هتكلم كتير ف البوست ده لان الصور بتتكلم و بتشرح اكتر. يلا نبدأ خطوة بخطوة

الفانيلات نص كم

1- هتقلبي الهدمة لوشها الصح ( الخطوة دي ف كل الهدوم)

2 - طبقي الكمام و الاطراف لجوة

3 - طبقي الجزء العلوي لفوق بالنص

4 - طبقي للنص تاني

5 - و دي كل القطع

الكمام الطويلة

1 - اقلبي الهدمة للوش الصح

2 - طبقي الاطراف لجوة

3 - طبقي للنص

4 - طبقي للنص تاني

الفانيلات الداخلية

البناطيل

معظم انواع البفتات

الملابس الداخلية

النتيجة

لو عايزة تعرفي بقيت الشفنيرة فيها ايه ادخلي هنا. اتمنى يكون البوست خفيف و بسيط و يكون عجبكوا و اتمنى اشوف تعليقاتكم و اسئلتكم ممكن تعلقي بدون تسجيل اي دخول اختاري مجهول و علقي . اشوفكوا البوست الجي

اصنع بنفسك : كيفية عمل حامل للموبايل

noreply@blogger.com (Sweet N Tidy) — Thu, 12 Jun 2014 10:07:00 +0000

واحد من الطف الحاجات اللي عملتها في اصنع بنفسك .. حامل للموبايل بتاعي .. انا بصراحة من النوع اللي بيقعد يدور على موبايله كتير ايوة عارفة تقريبا كلنا بنعمل كدة و نقعد نضيع وقت ف اننا ندور عليه لحد ما نزهق و نطلب من حد يرنلنا عليه لحد ما عملت الحامل الحلو ده و بصراحة شكله حلو و كل اللي يدخل البيت يعلق عليه

و معمول من حاجات اكيييييييييييد عندك ف البيت

محتاجة :

1 - سيديهاية قديمة ( اكيد كلنا عندنا طن سيديهات مش شغالة او مش محتاجنها )
2 - شراب نايلون او فيليه انا اخترت الاحمر عشان لايق ع الانتريه
3 - فايبر
4 - مقص
5 - ابرة
6 - استك او خيط
7 - مسدس شمع

هنلف اخر حتة ف الشراب اللي هي بتبقى عند الصوابع لحد ما نعمل شكل وردة لطيفة بالشكل ده نلمها و نربطها بالاستيك او الخيط و نقصها بالمقص

اقلبي الشراب و دخلي جواه السيديهاية لحد ما تلاقي الفتحة اللي عملتيها بالمقص ف نص السيدي

من فتحة السيديهاية هنطلع الشراب من خلالها

هتلفي الحتة اللي برة كلها بالفايبر .. ممكن يكون عندك فايبر من مخدة او خدادية قديمة

و تروحي قالبة الشراب بحيث الفايبر يكون لامم الفايبر جواه و تحشيه و تثبتي الشراب في السيديهاية بالاستك بتاع الشراب زي كدة

و اهو من ضهره عشان تعرفي ازاي

هتقصي طبعا الزيادات دي عشان السيديهاية تعرف تبقى مستوية على اي سطح و بالابرة هتظبطي الفايبر جوة الشراب لحد ما تعرفي تلاقي شكل مناسب كدة و تلزقي الوردة بمسدس الشمع

كدة خلاااااااااااااااااص ... تداااااااااااااااااااااااا

ايه رايكوا بقى

حاجة ببلاش ومن حاجات موجودة عندك ف البيت و شكلها جميل اوي بس لو موبايلك كبير اوي زي الجلاكسي نوت مثلا هتضطري تستخدمي غطا علبة اكبر و تخرميه بحاجة حامية .. اتمنى يكون البوست المرة دي فادكو اشوفكو ان شاء الله في بوستاتي الجاية و عايزة تفاعل و كومنتات عشان اكتب اكتر

اعادة استخدام : كلبسات الملابس لغلق الاكياس الصغيرة

noreply@blogger.com (Sweet N Tidy) — Thu, 12 Jun 2014 09:41:00 +0000

بجد بيعصبني اوي كيس الفيجيتار لما يتدلق ف كل مكان .. بيتبقى منه حبة صغيرين و مش بعرف اقفله باي طريقة .. من كام يوم كان عندي شراب جديد و الشرابات بيكون فيها دبابيس كدة صغيرة بتلم الشرابات مع بعضها انا فكرت ارجع استخدمها تاني في اني اقفل بيها اكياس التوابل الصغيرة

انا متاكدة ان كلنا بيكون عندنا حاجة مشابهة ف البيت اتمنى يكون البوست المرة دي خفيف و مقرمش و سهل .. عايزة اشوف تعليقاتكوا و اراءكوا و اكيد الفايز في التطبيقات بتاعة الترتيب هيتحط ف ركن القراء اشوفكوا البوست الجي

اصنع بنفسك : كيفية عمل منظم للوقت بسهولة من لوح فل

noreply@blogger.com (Sweet N Tidy) — Thu, 12 Jun 2014 09:31:00 +0000

قبل ما اتكلم عن تنظيم الوقت هحكي حكايتي .. اول ما خلفت كنت لايصة و حايسة اخر حوسة .. كل وقتي كان في محاولاتي الفاشلة المتكرر ف اسكات ابني اللي مبيسكتش و اللي مش عارفة هو عايز ايه لاني لسة ماما جديدة كل حاجة كانت فوق بعضها الغسيل مكوم و البيت مش مرتب و المواعين بترقص ف الحوض بصراحة كنت محبطة اخر احباط كانت فترة من الفترات الصعبة في حياتي .. حسيت اني مش عارفة اهتم بالبيت و لا بابني

و للاسف و كنتيجة عكسية حاولت اصلح كل المكوم .. قضيت وقت طويل جدا في اكوام الغسيل و المواعين و مسح و تنضيف البيت حسة ان كل اللي عملته اني قلبت العملة الناحية التانية ضيعت الوقت كله ف الاهتمام بالبيت و اصلاحه و ابني قاعد طول اليوم ع الكرسي الهزاز بتاعه قدام التلفزيون محدش بيلعب معاه و لا بيعلمه اي حاجة مكنش عندي وقت اقضيه مع اي حد و لا حتى مع نفسي !! لكوا ان تتخيلوا كمان علاقتي بقرايبي .. اكيد راحية في داهية مش كدة وبس لما كنت بركز في حاجة واحدة كانت الحاجة التانية بتصوت يعني ممكن اكون بنضف النيش مع ان الغسيل اولى و حسيت بالفشل للمرة التانية

طبعا من حظي اني اخدت اجازة من شغلي و الا كنت هبقى في حالة يرثى لها كل اللي كنت محتجاه هو اني اضبط الميزان .. الميزان هو الحل ... بقولكوا ايه متفهمونيش غلط احنا في تنظيم البيت اقصد يعني ف ترتيب البيت مش عايزة تعليقات سياسية لو سمحتوا :) :)

كل اللي انا عايزاه منكوا دلوقتي انك تجيبي ورقة و قلم و تكتبي كللللل حاجة عايزة تعمليها ف اليوم ..مثلا انا عشان اصلح علاقاتي باقربائي عملت لنفسي كل يوم اكلم شخص خالتي بنت خالتي .. صحبتي .. عمي .. اي حد المهم اني اكلم حد ...

بعد ما كتبت كل حاجة على ورقة بقى من الصعب اني انسى اي حاجة بعد ما عملت المنظم ده .. انا حتى ملي ازايز المية و الغسيل و تغيير الملايات حطاها ف المنظم .. حتى عدد اكواب المية اللي بشربها كل يوم حطاها لان عايزة احافظ على نسبة المية للصحة طبعا

محتاجة :

1 - لوح فل بكسر الفاء ( ممكن تجيبيه من كرتونة التلفزيون او كرتونة دفاية او تلاجة او اي لوحة فل تلاقيها كنتي هترميها )
2 - قماش قديم
3 - مقص
4 - دباسة
5 - دبابيس و مسامير
6 - جلاد شفاف

الطريقة :

هتقصي القماش على اد اللوح الفل و هتسيبي اتنين انش على كل ناحية عشان نتني القماش ع اللوح و تثبتيه بالدباسة من ورا

كويت القماش و دي حاجة اختيارية بالنسبة لك بس انا فرقت معايا اوي و غلفت بيها اللوح

كتبت كل اللي انا عايزة اعمله في اليوم حتى قائمة المشتريات و اسعار المنتجات و اي افكار عايزة اكتبها و اي ملاحظات عايزة اكتبها ف البيت ع الكمبيوتر و طبعتهم و غلفتهم بالجلاد الشفاف طبعا لاني اقدر اكتب عليه بالقلم الماركر و امسحه عادي

طبعا بالدبابيس ثبت الورق ف الفل و كان عندي صندوق كرتون صغير قديم من بواقي مكتبة لسة شارينها كان فيه شوية حاجات تبع المكتبة حطيت فيه القلم الماركر و الاستيكي نوتس و الليستة بتاعة المشتروات و كل الادوات اللي محتاجاها و ثبته ف اللوح من ورا بالمسامير

و ف الاخر ثبت مسمارين عشان اقدر اعلقه بخيط ع الحيطة ممكن تشوفي دلوقتي الدبابيس بتاعة الدباسة ف الفوم و هي مثبتة القماش

و ده الشكل النهائي ف الاخر

عايزة اشوف اراءكم و تعليقاتكم و تطبيقاتكم و اقتراحاتكم ممكن نحط ايه تاني ف اليوم ... الحاجات الملونة اللي ف اخر اللوحة دول عبارة عن تيكتات اسعار لقيتها بكر ف المكتبات .. الواحدة باتنين جنيه جبت منها كذا لون و كل لون له مدلول عملت المدلولات كلها ف الاخر ع اليمين .. لما بيكون فيه حاجة مهمة مثلا بتبقى باللون الاصفر لما يكون فيه فيلم حلو بيبقى باللون الفوشيا و هكذا

يارب يكون البوست فادكو اشوفكوا البوست الجي على خير

ديكور ببلاش و موجود في بيتك

noreply@blogger.com (Sweet N Tidy) — Thu, 12 Jun 2014 09:09:00 +0000

صحيح انا ماشية بمبدأ اني ارمي كل حاجة مش محتاجاها ... بس لما الحاجة يكون شكلها كويس و متاكدة انك ممكن تستخدميها في حاجة كويسة ليه لأ؟ الطبق القش ده كان من سوبر ماركت كبير كنت جبته في رمضان اللي فات كان محطوط فيه تمر ..اخدته و عملت بيه قطعة ديكورية في البيت

بصراحة استحرمت ارميه قعدت اسال نفسي ممكن استخدمه ف ايه ؟؟ ايه رايكو

هو الصراحة ممكن الواحد يستخدمه في حاجات كتير بس انا استخدمته كقطعة ديكورية في البيت كنت من كام يوم في ايكيا و لقيت الكور الديكورية الحلوة دي

بصراحة هما بساط و سمبل اوي و الوانهم محايدة و تليق في اي مكان و مودرن بس انا كنت مستعجلة جدا ملحقتش ابص و اشتري و كدة وانا بقى برتب حاجات الفن بتاعتي بتاعة اصنع بنفسك اللي انا خوتاكوا بيها .. لقيت خيوط الكروشيه بتاعتي طبعا انتوا عارفين شلة الكوروشيه بتيجي بالشكل ده

انا بقى لفيتها بالشكل ده المستوحاه من الكور بتاعة ايكيا

اخر الخيط ربطته بالطريقة دي مش عارفة شايفينه في الكاميرا و لا لأ عملت اللي اقدر عليه عشان تشوفوها دخلته بين الخيوط

و عملت منها كذا لون .. يعني الالوان المحايدة و الالوان اللي لايقة ع الانتريه عندي

و حطيتهم ف الطبق القش و بقى شكلهم بالطريقة دي

شكلهم حلو جدا كان عندي برضو طبق جبته من محل جمبي و كان بعشرة جنيه عملت فيه برضو نفس الحوار و حطيته ف اللفنج

صورة كمان للحبايب

انا متاكدة ان كل حد فينا عنده حاجات مشابهة لكدة .. بجد لو لقيتي حاجة ممكن تعملي بيها شغل نضيف متتردديش .. مستنية اشوف شغلكوا .. تعليقاتكوا و اراءكوا ممكن تعلقي بدون تسجيل اسم اختاري بدون اسم و علقي .. اشوفكوا البوست الجي

اعادة استخدام : صبانة الورق لحفظ واقية الاكواب

noreply@blogger.com (Sweet N Tidy) — Thu, 12 Jun 2014 08:25:00 +0000

بوست كدة في السريع كنت عايزة اشاركم معايا فيه .. عارفين واقية الاكواب المربعة اللي موجودة في كل حتة في البيت ؟؟ .. بناخدها من محل او صيدلية او اي مكان بندخله او بيوزعوه ف الشغل او في المناسبات تلاقي مرسوم عليها رمضانيات و حاجات ... هي شكلها مربع و اد الستيكي نوتس بالضبط ففكرت في الصبانة بتاعة الورق او الاستيكي نوتس عشان احفظ فيها الواقيات دي ... و بصراحة كانت فكرة جامدة جدا حطيتها بقى في كل مكان ع السفرة و جمب التلفزيون و كدة

للمرة المش عارفة كام .. رخيصة سهلة عبقرية ببلاش عايزة اشوف تعليقاتكوا و تفاعكلوا و اراءكوا ممكن تعلقي بدون ما تسجلي اي دخول اختاري بدون اسم و علقي .. اشوفكوا البوست الجااااااااي