tamileuro

வெளிநாடுகளுக்கு சட்டவிரோதமாக அனுப்பும் பின்னணியில் நாமல் ராஜபக்‌ச

2012-06-23T01:29:00.000-07:00

ஜனாதிபதியின் மகனும் பாராளுமன்ற உறுப்பினருமான நாமல் ராஜபக்‌ச வடபகுதியிலிருந்து தமிழர்களை அவுஸ்திரேலியாவுக்கு சட்டவிரோதமாக அனுப்பும் நடவடிக்கைகளின் பின்னணியில் செயற்படுவதாக செய்திகள் வெளியாகியிருக்கின்றது.

அவஸ்திரேலியாவுக்கு ஒருவரை அனுப்பிவைப்பதற்கு 10 இலட்சம் ரூபாவைப் பெற்றுக்கொள்கின்றார் எனவும், முல்லைத்தீவு கடற்பகுதியிலிருந்தே படகுகள் மூலம் ஆட்களை சட்டவிரோதமான முறையில் அனுப்பிவைப்பதாகவும், ஏற்கனவே தமது பிள்ளைகளை அனுப்பிவைத்த பெற்றோர் தெரிவித்திருப்பதாக தமிழ்நெற் செய்தி வெளியிட்டிருக்கின்றது.

அடிக்கடி முல்லைத்தீவுப் பகுதிக்குச் செல்லும் நாமல் ராஜபக்‌ஷவும் அவரது சகாக்களும் இவ்வாறு சட்டவிரோதமான முறையில் ஆட்களைக் கடத்துவது உட்பட பல்வேறு சட்டவிரோதமான நடவடிக்கைகளில் ஈடுபட்டு வருவதாக தகவல்கள் தெரிவிக்கின்றன.

வன்னி மற்றும் ஏனைய பகுதிகளைச் சேர்ந்த சுமார் 25 பேர்களைக் கொண்ட குழு ஒன்று முல்லைத்தீவின் கள்ளப்பாடு கடற்கரைப் பகுதியிலிருந்து படகு ஒன்றின் மூலம் அண்மையில் அனுப்பிவைக்கப்பட்டனர்.

இவ்வாறு அனுப்பப்பட்ட ஒவ்வொருவரிடமிருந்தும் முற்பணமாக இரண்டு இலட்சம் ரூபா பெறப்பட்டிருக்கின்றது. அடைக்கலம் கோரிச் செல்பவர்கள் அவுஸ்திரேலியாவைச் சென்றடைந்த பின்னர் மிகுதிப் பணம் கொடுக்கப்பட வேண்டும் எனவும் தெரிவிக்கப்பட்டுள்ளது.

முல்லைத்தீவில் இராணுவக் கட்டுப்பாட்டுப் பகுதியில் வசிக்கும் உறவினர்களே மிகுதிப் பணத்தைக் கொடுப்பதற்கான உறுதிப்பாட்டை வழங்கியிருக்கின்றார்கள். முல்லைத்தீவில் செயற்படும் நாமல் ராஜபக்‌சவின் கையாட்கள் மிகுதிப் பணத்தை வசூலிக்கும் பொறுப்பை ஏற்றிருக்கின்றார்கள்.
இவ்விதம் அவுஸ்திரேலியாவுக்கு அனுப்பிவைப்பதற்காக மற்றொரு குழுவும் தெரிவு செய்யப்பட்டு தயார் நிலையில் வைக்கப்பட்டிருப்பதாகத் தெரிவிக்கப்படுகின்றது.

முல்லைத்தீவிலிருந்து சிறிய படகுகளில் எற்றப்படும் அடைக்கலம் கோரிச் செல்பவர்கள், பின்னர் கப்பல் ஒன்றுக்கு மாற்றப்பட்டு கொண்டு செல்லப்படுகின்றார்கள். நாமல் ராஜபக்‌ச ஜனாதிபதியின் மகனாக இருப்பதால் அவரது படகில் செல்வது தமக்குப் பாதுகாப்பானது எனக்கருதி மக்கள் செல்ல முற்படுவதாக வன்னிவாசி ஒருவர் தெரிவித்தார்.

வடமாகாண ஆளுநர் சந்திரசிறி, அமைச்சர் றிசார்ட் பதியுதீன் உட்பட இராணுவ மற்றும் கடற்படை அதிகாரிகள் பலரும் இந்த நடவடிக்கைக்கு ஆதரவளிப்பதாகவும் தெரிவிக்கப்படுகின்றது.

வன்னியில் இராணுவக் கட்டுப்பாட்டில் வாழ்வாதார வசதிகள் இன்றித் தவிக்கும் மக்கள் தமது சொத்துக்களை குறைந்த விலைக்கு விற்றாவது தமது பிள்ளைகளைப் பாதுகாப்பாக வெளிநாடுகளுக்கு அனுப்பி வைப்பதற்குத் துடிக்கின்றார்கள்.

பிரயாண முகவர்கள் 30 - 40 இலட்சம் வரையில் கேட்பதால் நாமல் ராஜபக்‌சவின் கப்பலை நம்பி தமது பிள்ளைகளை அனுப்பி வைப்பதற்கு பெற்றோர் விரும்பவதாகத் தெரிவிக்கப்படுகின்றது.

அம்பாந்தோட்டை மாவட்ட பாராளுமன்ற உறுப்பினரான நாமல் ராஜபக்‌ச முல்லைத்தீவின் அபிவிருத்திக்காக உழைப்பதாகக் கூறி அங்கு பெருமளவு நேரத்தைச் செலவிடுவதன் பின்னணியில் பல மர்மங்கள் இருக்கலாம் என தெரிவிக்கபடுகின்றது.

சிங்கள ஊடகவியாலாளருக்கு உயிரச்சுறுத்தல்

2012-06-16T04:12:00.000-07:00

இலங்கையின் பிரபல சிங்கள நாளிதழான லங்காதீபவின் செய்தியாளர் ஒருவர் தமக்கு உயிரச்சுறுத்தல் ஏற்பட்டுள்ளதாக முறையிட்டுள்ளார்.

இலங்கையின் பொலிஸ் மா அதிபருக்கு அவர் எழுத்து மூலம் இது தொடர்பான முறைப்பாட்டை செய்துள்ளார். சுஜித் மங்கல என்ற இந்த ஊடகவியலாளர், நேற்று தமது முறைப்பாட்டை கையளித்துள்ளார்.

அதில், கடந்த 12 ஆம் திகதி பிற்பகல் ஒரு மணியளவில் கட்டுபெத்தையில் உள்ள தமது வீட்டுக்கு மோட்டார் சைக்களில் வந்த இருவர், தனது தாயை மிரட்டு விசாரணை செய்துள்ளனர் என்று செய்தியாளர் குறிப்பிட்டுள்ளார்.
எனவே தாம் தமது உயிருக்கு அச்சுறுத்தல் இருப்பதாக கருதுவதாக ஊடகவியலாளர் முறைப்பாட்டில் தெரிவித்துள்ளார்.
இதேவேளை, சில வாரங்களுக்கு முன்னர் தமது நண்பரான சி ஜே அமரதுங்க என்பவரின் அநுதரப்புரம் வீட்டுக்கு குற்றப்புலனாய்வு பிரிவினர் என்று கூறிக்கொண்டு சென்ற சிலர் அவரை விசாரணை செய்தமையையும் சுஜித் மங்கல சுட்டிக்காட்டியுள்ளார்.

ஒருநாள் சிறையில் நித்தியானந்தா

2012-06-15T04:03:00.000-07:00

நீதிமன்ற உத்தரவின் பேரில் ஒரு நாள் சிறைவைக்கப்பட்டிருந்த நித்தியானந்தா, நேற்று வியாழக்கிழமை பிணையில் விடுதலை செய்யப்பட்டார்.

ஹிப்னோடிசம் மூலம் பெண்களை அடிமைப்படுத்தி வல்லுறவுக்கு உட்படுத்தி வருகிறார் என்று நித்தியானந்தா மீது சுமத்தப்பட்ட குற்றச்சாட்டு தொடர்பில் விளக்கமளிப்பதற்காக ஏற்பாடு செய்யப்பட்ட ஊடகவியலாளர் சந்திப்பின் போது ஏற்பட்ட தகராரை அடுத்து பொலிஸாரால் தேடப்பட்டு வந்த நித்தியானந்தா நீதிமன்றில் சரணடைந்திருந்தார்.

இந்நிலையில், அவரை ஒரு நாள் சிறைவைக்குமாறு நீதிமன்றதம் உத்தரவிட்டிருந்தது. இதனையடுத்து நேற்றைய தினம் இந்த வழக்கு விசாரணைக்கு வந்தபோது நித்தியானந்தாவை பிணையில் செல்ல நீதிமன்றம் அனுமதி வழங்கியமை குறிப்பிடத்தக்கது.

மகிந்தவை கதிகலங்க வைத்த பிரித்தானிய ஈழ மக்கள்

2012-06-07T09:12:00.001-07:00

பிரித்தானிய இரண்டாவது எலிசபெத் மகாராணி முடிசூடி 60 வருட பூர்த்தியை முன்னிட்டு நடாத்தப்பட்ட வைர விழா நிகழ்வில் கலந்து கொள்ளும் நோக்கிலே ஜனாதிபதி அங்கு விஜயம் செய்திருந்தார்.

இதற்கெதிராக லண்டன் மாநகரின் பல பகுதிகளிலும் தமிழ் மக்கள் அலையென திரண்டு மஹிந்த ராகபக்‌ஷவுக்கு எதிராக தொடர் போராட்டங்களை மேற்கொண்டிருந்தனர். இதனால் அவமானத்தையும் பெரும் தலைகுனிவையும் ஏற்படுத்திய நிலையில் பிரித்தானியாவை விட்டு மகிந்த ராஜபக்ஷ வெளியேறி இருக்கிறார் என பிரித்தானிய தமிழர் பேரவை தெரிவித்துள்ளது.

இலங்கைத் தீவில் தமிழீழ மக்கள் மீது, மகிந்தா தலைமையிலான சிறீலங்கா அரசாங்கம் நடத்திய இனப்படுகொலை,மற்றும் மானிடத்திற்கு எதிரான குற்றங்கள், போர் குற்றம், மற்றும் அடக்கு முறைகளை கண்டிக்கும் வகையில் சுலோக அட்டைகளை தாங்கியும், கோசங்களை எழுப்பியும், மகிந்தாவின் உருவப் பொம்மைகளை வீதிகளில் கட்டியிழுத்தும், தூக்கில் தொங்கவிட்டும் சிங்கள தேசியக் கொடிகளை வீதிகளில் இழுத்தும் அதனை ஏறிமிதித்தும், இறுதியில் உருவப்பொம்மையும் ஸ்ரீலங்கா தேசியக்கொடியும், அதன் யாப்பும் தீயிட்டுக் கொளுத்தப்பட்டது.

இப்போராட்டம் நடைபெற்ற வேளை மகிந்தாவுக்கு ஆதரவான சில சிங்களவர்களும் தமிழர்களுக்கு எதிரான ஆர்பாட்டத்தில் ஈடுபட்டிருந்தனர். இருப்பினும் தமிழர்கள் பெரும் திரளாக திரண்டு வருவதை அறிந்த சிங்களவர்கள் சில நிமிடங்களில் அந்த இடத்தில் இருந்து காணாமல் போயிருந்ததும் குறிப்பிடத்தக்கது.

தமிழ் மக்களின் இந்த பாரிய ஆர்ப்பாட்டத்தை கண்டு கொண்டே மகாராணி அவர்கள் மால்பரோ ஹவுசினுள் மதிய உணவு விருந்திற்காக உள்நுழைந்து சென்றதுடன் பின்னர் அங்கு ராஜபக்ஷவை சந்தித்திருந்தார்.

தமிழர் அமைப்புக்களால் பல முறைப்பாட்டுக் கடிதங்களை மாகாராணிக்கு அனுப்பி வைத்தைத் தொடர்ந்து பிரித்தானியா அரசினால் மகிந்தரின் உரையும் தடுத்து நிறுத்தப்பட்டது.

லண்டனின் பல்வேறு பகுதிகளில் தமிழ் மக்கள் அலையென திரண்டு நாள் முழுவதும் மேற்கொண்ட இந்த ஆர்ப்பாட்ட நிகழ்வுகள் பல்லாயிரக்கணக்கான பிரித்தானிய மக்களையும், சுற்றுலா பயணிகளையும் கவர்ந்ததுடன் பல வெளி நாட்டு மற்றும் உள்நாட்டு ஊடகங்களிலும் முக்கிய இடம் பிடித்திருக்கிறது.

கூட்டமைப்பில் பிளவுகள் இல்லை - இரா. சம்பந்தன்

2012-06-02T01:43:00.001-07:00

ஊடகங்கள் சிலவற்றில் கூறப்படுவது போல் தமிழ் தேசியக் கூட்டமைப்பில் பிளவுகள் எதுவும் இல்லை என தமிழ் தேசியக் கூட்டமைப்பின் தலைவர் இரா. சம்பந்தன் தெரிவித்துள்ளார்.

தமிழரசுக் கட்சியின் தேசிய மாநாட்டில் சம்பந்தனால் கூறப்பட்ட சில கருத்துகள் சர்ச்சைக்குரியவை என நாடாளுமன்ற உறுப்பினர் சுரேஷ் பிரேமச்சந்திரன் கூறியதாக வெளிவந்த செய்திகள் குறித்து சம்பந்தனிடம் கேட்டபோது, "நாம் ஒரு ஜனநாயகக் கட்சி. எமது கட்சியின் அங்கத்தவர்களால் வெளியிடப்படும் கருத்களை நான் மதிக்கிறேன். அக்கருத்துக்களுக்கு எதிராக எதுவும் நான் கூறமாட்டேன். ஆனால் நிச்சயமாக எமது கட்சியில் பிளவு எதுவும் இல்லை" என பதிலளித்தார்.

ஜூலை 9 இணைய தொடர்புகள் துண்டிக்கப்படும் - கூகிள்

2012-05-28T06:50:00.000-07:00

ஜூலை 9 இல் இணையம் ஸ்தம்பிதமடையக்கூடும் என்று எச்சரிக்கை விடுக்கப்பட்டிருக்கிறது. தனது பல இலட்சம் பாவனையாளர்களுக்கு “கூகிள்’ இந்த எச்சரிக்கையை விடுத்திருக்கிறது. கணினி வைரஸினால் இணையத்தினூடாக சர்வதேச மட்டத்தில் தொடர்புகளை மேற்கொள்ளும் ஆற்றலை பாவனையாளர்கள் இழந்து விடக்கூடுமென கூகிள் தெரிவித்திருக்கிறது.

சர்வதேச ரீதியில் மற்றவர்களின் கணினித் தகவல்களை திருட்டுத்தனமாகப் பயன்படுத்துபவர்கள் இணையமூடாக விளம்பரப்படுத்தல் ஏமாற்று வேலையை மேற்கொள்ள ஆரம்பித்தபோது இந்தப் பிரச்சினை ஏற்பட்டது.

அதாவது உலகளாவிய ரீதியில் இத்தகைய பாதிப்புக்குள்ளான கணினிகள் மீது கட்டுப்பாட்டை ஏற்படுத்த நடவடிக்கை எடுத்த போது இந்தப் பிரச்சினை ஆரம்பித்து விட்டது. பாதிக்கப்பட்ட பாவனையாளர்களுக்காக இணையத்தில் ஏற்படும் குழப்பங்களைத் தடுப்பதற்காக அரசாங்கத்தின் கணினிகளைப் பயன்படுத்தி அமெரிக்காவின் சமஷ்டி புலனாய்வுப் பிரிவு (எவ்.பி.ஐ.) பாதுகாப்பு வலையமைப்பை ஏற்படுத்தியிருந்தது. ஆனால், அந்த முறைமையானது ஜூலை 9 இல் மூடப்பட்டுவிடும். இதனால் தொடர்புகளும் துண்டிக்கப்பட்டுவிட்டும். பாதிக்கப்பட்டுள்ளார்களா என்பது பற்றியும் அந்தப் பிரச்சினையை எவ்வாறு தீர்வு காண்பது என்பது தொடர்பாக விளக்கமளிப்பதற்கும் இணைத்தளமொன்றினூடாக தமக்கு அறிவிக்குமாறு சமஷ்டி புலனாய்வுப் பிரிவு பாவனையாளர்களைத் தூண்டி வந்தது.

ஜூலை 9 இற்குப் பின்னர் பாதிக்கப்பட்ட பாவனையாளர்கள் இணையத்தில் தொடர்பை ஏற்படுத்த முடியாது. இதேவேளை விழிப்புணர்வு நடவடிக்கையை முன்னெடுக்க கூகிள் இப்போது திட்டமிட்டிருப்பதாக பொக்ஸ் நியூஸ் தெரிவித்தது. பாவனையாளருக்கு விசேட செய்தியை கூகிளின் தேடுதல் பெறுபேறு பக்கத்தின் மேற்புறத்தில் காட்சிப்படுத்தப்படும். வைரஸினால் பாதிக்கப்பட்ட கணினிப் பாவனையாளருக்காக இந்த ஏற்பாடு மேற்கொள்ளப்படுகிறது.

தமது கணினிகள் பாதிக்கப்பட்டிருப்பது அநேகமானோருக்கு தெரியாத நிலைமை உள்ளதாக அறிக்கையொன்று தெரிவிக்கிறது.
வைரஸுக்கு எதிரான மென்பொருள் கருவி செயலிழந்துவிட்ட நிலையில் இருப்பதையும் இணையத்தளத்தினூடான தமது தேடுதல்கள் தாமதமடைந்திருப்பதையும் வேறு பிரச்சினைகளைக் கொண்டதாக தமது கணினி இயந்திரம் நலிந்த நிலையில் இருப்பதையும் பலர் அறியாதவர்களாக இருப்பதாக அந்த அறிக்கை குறிப்பிட்டுள்ளது.

முல்லைத்திவில் இல்மனைட் தொழிற்சாலை

2012-05-27T06:56:00.000-07:00

இல்மனைட் தொழிற்சாலை முல்லைத்தீவு கொக்கிளாய் பகுதியில்

ஆரம்பிக்க போவாதாக செய்திகள் வெளியாகியுள்ளது . இது தொடர்பில் மேலும் தெரியவருவதாவது;

தமிழர்களுக்குச் சொந்தமான 35ஏக்கர் நிலத்தில் இத்தொழிற்சாலை அமைப்பதற்கான முதற்கட்டப் பணிகள் ஆரம்பித்துள்ளதுடன் கனியவள அமைச்சினால் திட்டத்திற்கான பெயர்ப்பலகையும் அப்பகுதியில் அமைக்கப்பட்டுள்ளது .

கடந்த சில மாதங்களுக்கு முன்னர் முகத்துவாரம் வீதியின் கிழக்குப் புறத்திலுள்ள தமிழர்களுக்குச் சொந்தமான நிலத்தில் குறித்த தொழிற்சாலையை அமைப்பதற்கான முன்னேற்பாடுகள் செய்யப்பட்டிருந்தது.
எனினும் இதற்கு பிரதேச மக்கள் கடுமையான எதிர்பை தெரிவித்திருந்தனர். அதனையும் பொருட்படுத்தாமல் தொழிற்சாலை அமைக்கும் பணிகள் தொடர்ந்தும் முன்னெடுக்கப்பட்டு வந்தன.

இதன் தொடர்ச்சியாக கடந்த சில தினங்களுக்கு முன்னர் இந்த நிலத்தில் கனிய வள அமைச்சினால் இல்மனைட் தொழிற்சாலை அமைக்கப்படப் போவதாக திட்டம் தொடர்பான பெயர் பலகை நாட்டப்பட்டிருக்கின்றது.

ஆனால் நிலச் சொந்தக்காரர்களுக்கு விடயம் தொடர்பில் எந்த அறிவுறுத்தல்களும் வழங்கப்படவில்லை.

இதேபோன்று குறித்த தொழிற்சாலை அமைக்கப்படுவது குறித்து பிரதேச செயலகத்திற்கும், மாவட்டச் செயலகத்திற்கும் கொடுக்கப்பட்ட முறைப்பாட்டிற்கும் இதுவரை எந்த பதிலும் மக்களுக்கு வழங்கப்படவில்லை.
மேலும் நிலச்சொந்தக்காரர்கள் அந்த நிலங்களுக்கான உறுதிகளை (ஆவணத்தை) வைத்திருக்கின்றனர்.

இந்நிலையிலும் அமைச்சர்கள் மற்றும் இராணுவத்தினரின் அதீத தலையீட்டுடன் இந்த தொழிற்சாலை அமைக்கும் பணிகள் முன்னெடுக்கப்படுவதாக அந்தச் செய்திகள் மேலும் தெரிவிக்கின்றன.

ஆ ர் யா - நயன் காதலா ? ஆ ர் யா பதில்

2012-05-26T08:15:00.000-07:00

2 வருடங்களாக உயிருக்குயிராக பிரபுதேவாவைக் காதலித்து வந்தார் நயந்தாரா. ஆனால் இருவருக்கும் இடையே சில பல காரணங்களால் பிரிவு ஏற்பட்டு விட்டது. இந்தப் பிரிவிற்குப் பின்னர் சினிமாவில் முழு வீச்சில் நடிக்க ஆரம்பித்து விட்டார் நயந்தாரா.

காதல் தோல்விக்குப் பின் தமிழில் அவர் ஒப்பந்தமாகியுள்ளது அஜித்துக்கு ஜோடியாக நடிப்பதற்கு, அஜீதுடன் என்றாலும் அதில் ஆர்யாவும் நடிக்கிறார் என்பது குறிப்பிடத்தக்கது. ஏற்கனவே தெலுங்கு படமொன்றில் நாகார்ஜுனா ஜோடியாக நடித்துக்கொண்டிருக்கிறார்.

இந்நிலையில் ஆர்யாவிற்கும் நயந்தாராவிற்கும் நெருக்கம் ஏற்பட்டுள்ளதாக கிசு கிசு பரவியுள்ளது. ஆர்யா புதிதாக கட்டியுள்ள தனது வீட்டின் கிரகப்பிரவேச விழாவை விமரிசையாகக் கொண்டாடினார். அதில் நயன்தாராவை சிறப்பு விருந்தினராக அழைத்து ஸ்பெஷலாக கேக் செய்து அதில் வெல்கம் பேக் நயந்தாரா என எழுதிவைத்து நயந்தாராவை சந்தோஷப்படுத்தினார்.

நயன்தாரா வீட்டுக்கு வந்ததும் கைகுலுக்கி வரவேற்றார். அவர் கையாலேயே கேக்கும் வெட்ட வைத்தார். இதனால் இருவருக்கும் காதல் மலர்ந்துள்ளதாக சக நடிகர், நடிகைகள் செய்தி பரப்பினர். ஏற்கஸ் எனவே பான்கிற பாஸ்கரன் படத்தில் இருவரும் ஜோடியாக நடித்தனர். அப்படம் வெற்றிகரமாக ஓடியது.
காதலால்தான் ஆர்யா படத்தில் மீண்டும் நடிக்க நயன்தாரா ஒப்புக் கொண்டதாக கூறப்படுகிறது.

நயன்தாராவை காதலிக்கிறீர்களா? என்று ஆர்யாவிடம் கேட்டபோது, அவர் கூறியதாவது:-
"நயன்தாராவும் நானும் நண்பர்களாகத்தான் பழகுகிறோம். எங்களுக்குள் காதல் இல்லை. நயன்தாரா மன வருத்தத்தில் இருந்து மீண்டு வந்துள்ளதால் கேக்கில் அவ்வாறு வாசகம் எழுதி வைத்து வரவேற்றோம்.விருந்துக்கு நயன்தாராவை மட்டுமின்றி வேறு சிலரையும் அழைத்து இருந்தேன். நயன்தாரா தற்போது சந்தோசமாக இருக்கிறார்." என தெரிவித்தார்.

"கனேடிய தமிழன் கொலை" இலங்கை இராணுவம் - கனடாவின் சன் நியூஸ் நெட்வேக்

2012-05-14T02:11:00.001-07:00

மொன்றியலை சேர்ந்த மகேந்திரராஜா அந்தோனிபிள்ளை என்பவரே கடந்த வாரம் கிளிநொச்சியில் வைத்து கொலை செய்யப்பட்டுள்ளார் . இக்கொலையை இலங்கை இராணுவமே பொறுப்பேற்கவேண்டுமென கனடாவின் சன் நியூஸ் நெட்வேக் என்ற இணையத்தளம் செய்தி வெளியிட்டுள்ளது.

இந்தநிலையில் கனேடிய பொதுமகனின் சொத்துக்களை சுவீகரிப்பதற்காகவே இலங்கை இராணுவத்தினர் அவரை கொலை செய்தனர் என்று ஜெயா கோபிநாத் என்ற தமிழ்நெட் ஸ்தாபக ஆசிரியர் குற்றம் சுமத்தியுள்ளார்.

கொலை செய்யப்பட்ட அந்தோனிப்பிள்ளை, கிளிநொச்சியில் 8 வியாபாரத் தளங்களை வைத்திருந்தார் என்பது குறிப்பிடத்தக்கது. ஏற்கனவே அந்தோனிப்பிள்ளையின் இரண்டு வியாபாரத்தளங்கள் இராணுவத்தினரால் சுவீகரிக்கப்பட்டன. எனினும் அதற்காக நட்டஈடுகள் எவையும் அந்தோனிப்பிள்ளைக்கு வழங்கப்படவில்லை.

இதேவேளை தமது வீட்டுக்கு மின்சாரம் பெற்றுக்கொள்வது தொடர்பில் அந்தோனிப்பிள்ளை, உள்ளுர் இராணுவத்தினருடன் முரண்பாடுகளிலும் ஈடுபட்டுள்ளார்.

மே மாத முற்பகுதியில் அந்தோனிப்பிள்ளை, இலங்கை இராணுவத்தினரால் தாக்குதலுக்கும் உள்ளாகியிருந்தார். உள்ளுர் பெண் ஒருவர் தொடர்பிலேயே இந்தக் கொலை இடம்பெற்றிருக்கலாம் என்றும் சந்தேகிக்கப்படுகிறது.

இதேவேளை, தமது மைத்துனரான அந்தோனிப்பிள்ளை, இலங்கை இராணுவத்தினரால் கொல்லப்பட்டதாக கூறப்படுவதை தம்மால் உறுதிப்படுத்தப்பட முடியவில்லை என்று அவரின் உறவினரான பெஞ்சோ பூனே என்பவர் குறிப்பிட்டுள்ளார்.

இந்தநிலையில் அந்தோனிப்பிள்ளையின் சடலம் நேற்று முன்தினம் ஞாயிற்றுக்கிழமை கனடாவுக்கு எடுத்துச்செல்லப்பட்டு இறுதிக்கிரியை எதிர்வரும் வெள்ளிக்கிழமையன்று இடம்பெறவுள்ளது.

Tamileuro வாசகர்களுக்கு அன்னையர்தின வாழ்த்துக்கள்

2012-05-14T02:01:00.000-07:00

சினிமா நட்சத்திரங்கள் சினேகா - பிரசன்னா திருமணம்

2012-05-11T02:51:00.002-07:00

நடிகர் பிரசன்னா - நடிகை சினேகா திருமணம் இன்று சென்னையில் வெகுவிமர்சையாக நடைபெற்று முடிந்தது.

தமிழில் முன்னணி நடிகையாக இருப்பவர் சினேகா. புன்னகையரசி என்று எல்லோரும் வர்ணிக்கப்படும் சினேகா அச்சமுண்டு அச்சமுண்டு என்ற படத்தில் நடிகர் பிரசன்னாவுடன் சேர்ந்து நடித்தார்.

அப்போது அவர்களுக்குள் ஆரம்பமான நட்பு பின்னர் காதலாக மாறியது. ஆனால் இந்த காதலை இருவரும் வெளிகாட்டிக்கொள்ளாமல் ரகசியம் காத்து வந்தனர்.

இந்நிலையில் கடந்த சில மாதங்களுக்கு முன்னர் இந்த காதலை ‌போட்டு உடைத்தார் நடிகர் பிரசன்னா. இவர்களது திருமணத்திற்கும் இருவரது வீட்டிலும் சம்மதம் தெரிவித்ததையடுத்து திருமணம் நிச்சயமானது.
அதன்படி நேற்று மாலை திருமண நிச்சயதார்த்தமும், வரவேற்பும் நடந்தது.

முன்னதாக மணமகன் பிரசன்னா அலங்கரிக்கப்பட்ட தேரில் அழைத்து வரப்பட்டார். சினேகாவை ஒரு இளவரசி போல அலங்கரித்து, மலர் அலங்காரம் செய்யப்பட்ட பல்லக்கில் அமர வைத்து அழைத்து வந்தனர்.
பின்னர் இருவரும் மாலை மாற்றிக் கொண்டு மேடையில் நின்றனர். தொடர்ந்து இருவரும் மோதிரம் மாற்றிக்கொண்டனர். அவர்களுக்கு உறவினர்கள், நண்பர்கள் மற்றும் திரையுலகினர் வாழ்த்து தெரிவித்தனர்.
இன்று(11.05.12) காலை இருவரது திருமணமும் சென்னை, வாணகரத்தில் உள்ள ஸ்ரீவாரு வெங்கடாஜலபதி பேலஸில் நடந்தது. மணமகள் சினேகா கழுத்தில் பிரசன்‌னா தாலி கட்டி தனது மனைவியாக ஏற்றுக்கொண்டார். இந்த திருமணத்தில் ஏராளமான திரை நட்சத்திரங்களும் பங்கேற்று மணமக்களை வாழ்த்தினர்.

சாகும்வரை உண்ணாவிரதம் - பலாலி மக்கள்

2012-05-07T04:16:00.000-07:00

தமது சொந்த இடங்களில் தம்மை மீளக் குடியமர்த்துவதற்கு அரசு உடனடியாக நடவடிக்கை எடுக்க வேண்டும், இல்லாவிட்டால் தாம் சாகும் வரை உண்ணா விரதப் போராட்டத்தில் ஈடுபடப் போவதாக பலாலியில் இருந்து இடம்பெயர்ந்து தற்போது வேறு இடங்களில் வசிக்கும் மக்கள் எச்சரிக்கை விடுத்துள்ளனர்.

பலாலியில் இருந்து இடம்பெயர்ந்த மக்கள் சுமார் 30 வருடங்களாக நலன்புரி நிலையங்களிலும் உறவினர் வீடுகளிலும் வசித்து வருகின்றனர். இடம்பெயர்ந்து நீண்ட காலம் கடந்துள்ளபோதும் இவர்களை மீளக் குடியமர்த்துவதற்கான நடவடிக்கைகள் எவையும் இதுவரை மேற்கொள்ளப்படவில்லை.

வலி.வடக்கில் தற்போது பல பகுதிகளிலும் மக்கள் மீளக் குடியமர்வதற்கு இராணுவம் அனுமதித்துள்ளது. எனினும் பலாலிப் பகுதி மக்களின் மீளக் குடியமர்வு தொடர்பில் இதுவரை எந்தத் தகவலும் இல்லை.
இடம்பெயர்ந்து நீண்ட காலமாகத் தாம் பெரும் இன்னல்களைச் சந்தித்து வருவதாக அந்த மக்கள் கூறுகின்றனர். எனினும் எமது விடயத்தில் அரசு சற்றேனும் அக்கறை கொள்ளவில்லை என அவர்கள் விசனம் வெளியிட்டுள்ளனர்.

அத்துடன் இது விடயத்தில் உடனடியாக கவனம் செலுத்தப்படாது விட்டால் தாம் சாகும் வரை உண்ணாவிரதப் போராட்டத்தை மேற்கொள்ள வேண்டி ஏற்படும் எனவும் அவர்கள் எச்சரிக்கை விடுத்துள்ளனர்.

இதேவேளை இவ்விடத்தில் மக்களைக் குடியமர்த்தக் கோரி தாக்கல் செய்யப்பட்ட மனு உயர் நீதிமன்றத்தில் விசாரணையிலிருந்து வருகின்றமை குறிப்பிடத்தக்கது.

தலைமறைவாகிய புலி உறுப்பினர்கள் என பொதுமக்களை கைது செய்யும் பொலிஸ்

2012-04-29T08:30:00.000-07:00

அன்றுதொட்டு இன்று வரை சாதாரண பொதுமக்களை கைது செய்வதற்கு அரசாங்கம் கையாளும் ஒரேவழி புலி என பட்டம் சூட்டுவது தான்.

விடுதலைப்புலிகளுக்குப் புனர்வாழ்வு அளிப்பதாக கூறி அவர்களின் வாழ்க்கையை அழிப்பதே அவர்களின் நோக்கம்.

இறுதிக் கட்ட போரின் போது தலைமறைவாகிய மற்றும் தப்பிச் சென்ற புலிகள் பற்றிய தகவல்கள் திரட்டப்பட்டு வருவதாக தெரிவிக்கப்படுகிறது.

இவர்களைத் தேடிக் கண்டுபிடிக்க தேடுதலில் ஈடுபடுவதாகவும் இதன் போது அப்பாவி பொதுமக்களே கைது செய்வதாகவும், இதுவரையில் புனர்வாழ்வு அளிக்கப்படாத புலி உறுப்பினர்களை அடையாளம் காண விசேட நடவடிக்கைகள் எடுக்கப்பட்டு வருவதாகவும் தெரிவிக்கப்படுகின்றது.

இதேவேளை, புனர்வாழ்வு அளிக்கப்படாத 500 புலி உறுப்பினர்கள் பற்றிய தகவல்கள் திரட்டப்பட்டுள்ளதாகவும், இவர்களில் 200 பேர் திருகோணமலைப் பிரதேசத்தில் இருப்பதாகத் தெரிவிக்கப்படுகிறது.

சில சிரேஸ்ட புலி உறுப்பினர்களும் இவ்வாறு தலைமறைவாக வாழ்ந்து வருவதாகவும், இவர்கள் குற்றச் செயல்களில் ஈடுபட்டு வருவதாகவும் பொலிஸ் தரப்பு செய்திகள் வெளிவந்துள்ளன.

போரினால் அழிந்தது பாதி! போதைவஸ்தினால் அழிகின்றது மீதி!

2012-04-29T07:40:00.003-07:00

நம்மினம் போரினால் சின்னாபின்னமாகி அனைத்தையும் இழந்த இந்நிலையில் போதைவஸ்து பவனை ஊடுருவியுள்ளது.இறந்த பிள்ளைகளையும், சிறையில் வாடும் பிள்ளைகளையும் நினைத்து கவலைப்படும் பெற்றோர்கள் மத்தியில் தம்முடன் இருக்கும் பிள்ளைகளை எப்படி காப்பாற்றுவது என்கிற கேள்வி எழுந்துள்ளது.

போதைவஸ்து பாவனை வடக்கில் அதிக ரித்து விட்டால் எந்த வீடுமே நிம்மதியாக உறங்க முடியாது. எங்கும் வன்மங்கள் மலிந்து போகும். பாலியல் துன்புறுத்தல்கள், அடாவடித் தனங்கள் தலை விரித்தாடும்.

அதிலும் வடக்கில் ஆழ ஊடுருவியுள்ள போதைப் பொருள் பாவனையில் மாணவர்கள் உள்வாங்கப்பட்டுள்ளார்கள் என்ற தகவலால் கிறுதி வருகிறது. ஆ! கடவுளே, எங்கள் மாணவச் செல்வங்கள் மத்தியில் போதைப் பொருள் பாவனையா? இதனை அடியோடு அழிக்க மக்கள் தயாராவது காலத்தின் கட்டாய தேவை.

அதேநேரம் போதைப்பொருள் விற்பனையில் ஈடுபடுபவர்களுக்கு நீதி பரிபாலனம் கடும் நட வடிக்கை எடுத்தாக வேண் டும். இக் குற்றவாளிகள் தொடர்பில் சட்டத் தரணி கள் நிதானமாகச் செயற்படுவது அவர்களின் தார்மீகப் பொறுப்பு.

அன்புக்குரிய தமிழ் இளைஞர்களே! நீங்கள் நினைத்தால், ஒரு இரவுப் பொழுதோடு போதைப் பொருளை எங்கள் மண்ணில் இருந்து அடியோடு அழிக்கவும் அதன் விற்பனையாளர்களை சிறைக்குள் முடக்கவும் முடியும். தயாராகுங்கள்!

விடுதலை செய்யப்படும் போராளிகள் மீண்டு கடத்தல்

2012-04-29T06:36:00.002-07:00

ஸ்ரீலங்கா அரசினால் கொடூரமான முறையில் நடாத்தப்பட்ட முள்ளிவாய்க்கால் இனவழிப்புப்போரின்போது, ஆயுதங்கள் மௌனிக்கப்பட்ட நிலையில் சரணடைந்த தமிழீழ விடுதலைப்புலிப் போராளிகளை வதைமுகாம்களில் அடைத்து வைத்து நெடுநாட்களாகச் சித்திரவதை செய்த சிறிலங்காவின் புலனாய்வுப்பிரிவு, அவர்களின் ஒரு தொகுதியினரை ஜெனீவாப் பிரேரணையின் பின்னர் ஏற்பட்ட சர்வதேச அழுத்தங்களின் காரணமாக விடுதலை செய்திருந்தது.

விடுதலை செய்யப்பட்ட போராளிகளில், தமிழீழ விடுதலைப்புலிகளின் அரசியற் துறையைச் சேர்ந்த , கிளிநொச்சி மாவட்டத்தை வசிப்பிடமாகக் கொண்ட ஒரு முக்கிய பிரமுகரும் அடங்கியிருந்தார். குறித்த பிரமுகர், தமிழீழ அரசியற்துறைப் பொறுப்பாளர் சு.ப தமிழ்ச்செல்வன் அவர்களுக்கு நெருக்கமானவராகப் பணியாற்றியவர் என்பது குறிப்பிடத்தக்கது. கடந்த ஒரு மாதத்திற்கு முன்பதாக விடுதலை செய்யப்பட்ட இவர், கிளிநொச்சி நகரிற்கு அண்மித்த பகுதியில் வசித்து வந்தவேளை; கடந்த வாரம் சிறிலங்காப் புலனாய்வுப்பிரிவின் வெள்ளைவான் குழுவினரால் கடத்தப்பட்டிருக்கிறார்.

இவரைப்பற்றிய செய்திகள் அறியாது இவரது மனைவி தவித்திருக்கும் அதேவேளை, ஸ்ரீலங்கா இராணுவத்தினர் அவரைத் தாம் கைது செய்யவில்லை என கையை விரித்துள்ளதாகத் தெரியவருகிறது. விடுதலை செய்யபட்ட போராளிகள் பலரை, மீண்டும் வெள்ளைவான் கும்பல் கடத்தி வருவதாகவும், ஸ்ரீலங்கா இராணுவத்திற்குப் பயந்த நிலையில், மக்கள் செய்திகளை வெளியிடாது இருப்பதாகவும் அறியமுடிகிறது.

போரில் கொத்தணிக் குண்டுகள்! ஐ.நா. நிலக்கண்ணி நிபுணர் உறுதி

2012-04-26T11:21:00.000-07:00

சர்வதேச மட்டத்தில் தடைசெய்யப்பட்டதும் மனித குலத்திற்கு பேரழிவினை ஏற்படுத்த வல்லதுமான கொத்தணிக்குண்டுகளை ஈழத்தமிழர்கள் மீதான இலங்கைப் படைகளினது ஆக்கிரமிப்பு படை நடவடிக்கையின் போது பாவிக்கப்பட்டுள்ளமை உறுதிப்படுத்தப்பட்டுள்ளது.

இக் குற்றச்சாட்டு ஏற்கனவே தெரிவிக்கப்பட்டிருந்த நிலையில் தற்போது இது உறுதிப்படுத்தப்பட்டுள்ளது.

இதனை ஐக்கிய நாடுகளின் நிலக்கண்ணி அகற்றும் நிபுணர் அலன் போஸ்டன் தெரிவித்துள்ளதாக Associated Press செய்தி நிறுவனம் தெரிவித்துள்ளது. இதனை இலங்கை அரசாங்கம் மறுக்கிறது.

இலங்கையில் கொத்தணிக் குண்டுகள் பயன்படுத்தப்பட்டமை முதல் தடவையாக நிரூபிக்கப்பட்டுள்ளதாகவும் தெரிவித்துள்ளது. கொத்தணிக் குண்டுகளை யுத்தத்தில் பயன்படுத்தவில்லை என இலங்கை அரசாங்கம் தொடர்சியாக மறுத்து வரும் நிலையில் தற்போது ஐ.நா நிபுணரினால் உறுதிப்படுத்தப்பட்டுள்ளதாக வெளிவந்துள்ளது.

தமிழர் தாயகத்தின் புதுக்குடியிருப்புப் பகுதியிலேயே வெடிக்காத நிலையில் உள்ள கொத்தணி குண்டுகள் மீட்கப்பட்டதாக குறித்த நிபுணர் தெரிவித்துள்ளதாக Associated Aress செய்தி நிறுவனம் மேலும் தெரிவித்துள்ளது.
இலங்கையின் யுத்த குற்றச் செயல் தொடர்பான அனைத்துலக சுயாதீன விசாரணைகள் தொடர்பான அழுத்தங்களை மேலும் வலுப்படுத்தும் என எதிர்பார்க்கப்படுகிறது.

சிறிய குண்டுகளின் ஓர் தொகுதியே கொத்தணி குண்டு என அழைக்கப்படுகின்றது.

கொத்தணி குண்டு கண்டிக்கப்பட்டமை தொடர்பில் சிறிலங்கா அரசாங்கத் தரப்போ அல்லது ஐக்கிய நாடுகள் அமைப்போ இதுவரையில் எவ்வித கருத்தையும் வெளியிடவில்லை என்பது இங்கு குறிப்பிடத்தக்கது.

கொத்தணிக் குண்டுகள் என்ற வகைக்குள் வரும் எந்தவொரு ஆயுதங்களையும் இலங்கை அரசாங்க ஆயுதப்படைகள் பயன்படுத்தவில்லை என்று இராணுவப் பேச்சாளரான ருவான் வணிகசூரிய திட்டவட்டமாக மறுத்திருக்கிறார்.

விடுதலைப்புலிகள் அதனைப் பயன்படுத்தியிருப்பார்களா என்று கேட்டதற்குப் பதிலளித்த அவர் இப்படியான குற்றச்சாட்டுக்கள் இருந்ததாகவும் ஆனால் அதனை உறுதிப்படுத்த முடியாது என்றும் கூறினார்.

இது தொடர்பாக ஏதாவது ஆதாரம் இருக்கிறதா என்று ஐநாவிடம் இராணுவம் கேட்டிருப்பதாகவும் அவர் கூறினார்.

இறுதிக்கட்டப் போரின் போது அரசாங்க படைகள் வீசிய சில குண்டுகளில் இருந்த சிறிய கொத்துக்கொத்தான குண்டுகள், பல இடங்களில் சிதறிவிழுந்து வெடித்ததாகவும், அல்லது சில ஆண்டுகள் தாழ்த்தி அவை வெடித்ததாகவும், பொதுமக்கள், போர் விசாரணையின் போதும், வேறு பல சந்தர்ப்பங்களிலும் கூறியிருக்கிறார்கள்.

கொத்தணிக் குண்டுகளை தடை செய்யும் சர்வதேச ஒப்பந்தம் ஒன்று 2010 இல் அமுலுக்கு வந்தது. ஆனால் இலங்கை, அமெரிக்கா, சீனா, ரஷ்யா, இந்தியா மற்றும் பாகிஸ்தான் உட்படவேறு சில நாடுகள் அதில் கைச்சாத்திடவில்லை என்பது குறிப்பிடத்தக்கது .

சர்வதேசம் கடும் அழுத்தங்களை வழங்கிருந்தயிருந்தபோதும் போரைத் தொடர்ந்து நடத்துமாறு ஜனாதிபதியே உத்தரவிட்டார் - இராணுவத் தளபதி

2012-04-26T10:20:00.000-07:00

குருநாகலில் நடைபெற்ற இராணுவத்தினருக்கான நிகழ்வொன்றில் உரையாற்றிய இராணுவத் தளபதி லெப்டினன்ட் ஜெனரல் ஜகத் ஜயசூரிய இவ்வாறு தெரிவித்தார்.

2009 ஏப்ரலில் போர் இறுதிக் கட்டத்தை எட்டியிருக்கையில் மனிதாபிமானப் போரை நிறுத்துமாறு சர்வதேசத்தின் கடும் அழுத்தங்கள் இருந்தபோதும் அதற்கு அடிபணியவில்லை. எனக்கு இன்னும் நினைவிருக்கிறது.

போரை நிறுத்தக் கடுமையான அழுத்தங்கள் வழங்கப்பட்டபோதும் தனிப்பட என்னைத் தொலைபேசியில் அழைத்த ஜனாதிபதி, திட்டமிட்டபடி இராணுவ நடவடிக்கையைத் தொடருங்கள் என்று எனக்கு நேரில் உத்தரவிட்டார்.

அவ்வளவு உறுதியானது எங்கள் நாட்டின் அரசியல் தலைமை. நாங்கள் வெற்றி பெறுவதற்கு வேண்டிய பலத்தை அதுவே வழங்கியது'' என்று ஜகத் ஜயசூரிய கூறினார் என்று இராணுவத் தலைமையகம் வெளியிட்ட செய்திக் குறிப்புத் தெரிவித்தது.

இராணுவத் தளபதி குறிப்பிட்ட காலப்பகுதியிலேயே வன்னியில் மிகப் பெருமளவில் மனித உரிமை மீறல் சம்பவங்கள் இடம்பெற்றன என்று ஐ.நா. வல்லுநர் குழு அறிக்கையிட்டுள்ளது.

இறுதிப் போரில் 40,000க்கும் மேற்பட்ட பொதுமக்கள் கொல்லப்பட்டனர் என்று நம்புவதற்கான ஆதாரங்கள் இருக்கின்றன என்றும் அந்த அறிக்கை குறிப்பிடுகிறது.

போரின் இறுதிக் கட்டத்தில் சரணடைந்தவர்கள் நீதி விசாரணை ஏதுமின்றிச் சுட்டுக் கொல்லப்பட்டார்கள் என்றும் பெண்கள் வன்புணரப்பட்டார்கள் என்றும் "சனல்4' தொலைக்காட்சி இலங்கையின் கொலைக்களங்கள்' மற்றும் "தண்டிக்கப்படாத போர்க் குற்றங்கள்' என்ற இரு ஆவணப்படங்களை வெளியிட்டிருந்தது.

நடந்த மனித உரிமை மீறல்கள் அனைத்துக்கும் அரசின் உயர் மட்டத்தில் உள்ளவர்களே நேரடியான பொறுப்பு என்று மனித உரிமை அமைப்புக்கள் குற்றஞ்சாட்டி வருகின்றன. ஆனால் அரசு அதனைத் தொடர்ச்சியாக மறுத்து வருகிறது.

படையினரால் சிறுமி பாலியல் பலாத்காரம்!

2012-04-15T03:29:00.000-07:00

அம்பாறை மாவட்டத்தின் எல்லையில் உகுன என்ற கிராமம் இருக்கின்றது.
இங்கு இரண்டு வாரத்திற்கு முன்னர் சிங்களவரான இலத்திரனியல் வேலைசெய்யும் ஒருவர் குருணாகலையிலிருந்து இக்கிராமத்துக்கு வந்துள்ளார்.
அவர் 17 வயதான தமிழ் சிறுமியை தன்னை திருமணம் செய்துகொள்ளும்படி வற்புறுத்தியிருக்கின்றார். அதனைத் தொடர்ந்து குறித்த சிறுமியின் பெற்றோர் தம் உறவினரிடம் முறையிட்டிருக்கின்றனர்.

இதற்கிடையில் இராணுவத்தினரின் சிவில் பாதுகாப்பு படையினன் ஒருவன் அந்தக் குடும்பத்தை தனது காவலரணுக்கு மரக்கறி மீன் உள்ளிட்ட உணவுப் பொருட்களை கொண்டுவந்து தருமாறு வற்புறுத்தியிருக்கின்றான். அப்படி மரக்கறி கொண்டு சென்ற சந்தர்ப்பத்தில் இன்னொரு சிவில் பாதுகாப்பு படையினனும் சேர்ந்து குறித்த தமிழ் சிறுமிமை கடத்தி பாலியல் வல்லுறவுக்குட்படுத்தியிருக்கின்றனர்.

இது குறித்து மண்டுர் பொலிசாரிடம் வினவியபோது குறித்த சிறுமி சிவில் இராணுத்தினனை திருமணம் செய்து கொண்டுள்ளதாகவும் தற்போது குருணாகலவில் வசிப்பதாகவும் குறிப்பிட்டுள்ளார்.

இரண்டரை வயது தமிழ்ப் பெண் பிள்ளை கடத்தல்!

2012-04-15T02:48:00.000-07:00

சித்திரைப் புத்தாண்டு தினமான நேற்றைய முன்தினம் இரண்டரை வயது தமிழ்ப் பெண் பிள்ளை சிலாபத்தில் கடத்திச் செல்லப்பட்டுள்ளார் எனத் தெரிவிக்கப்படுகின்றது.

பெண் பிள்ளையின் வீட்டுக்கு புத்தாண்டு கொண்டாட்டத்திற்கு வந்ததாகக் கூறப்படும் ஒருவரே குறித்த பிள்ளையைக் கடத்திச் சென்றிருக்கலாம் என பெற்றோர் சந்தேகம் வெளியிட்டுள்ளனர்.

சிலாபம் பகுதியைச் சேர்ந்த இரண்டரை வயதான சிவகுமார் தனுஷியா என்ற தமிழ்ப் பெண் பிள்ளையே இவ்வாறு கடத்திச் செல்லப்பட்டுள்ளார். இந்தக் கடத்தல் சம்பவம் தொடர்பாக பிள்ளையின் பெற்றோர் நேற்று சிலாபம் பொலிஸில் முறையிட்டுள்ளனர்.

சிலாபம் பொலிஸார் இது குறித்து விசாரணைகளை மேற்கொண்டு வருகின்றனர்.

இலங்கை உட்பட 28 நாடுகளில் புவி நடுக்கம் தற்போது சுனாமி எச்சரிக்கை தகர்க்கப்பட்டுள்ளது

2012-04-11T11:48:00.005-07:00

இலங்கை நேரப்படி பிற்பகல் 2.20 மணியளவில் சிறியளவான பூமியதிர்வு ஏற்பட்டதை உணர முடிந்தது. கொழும்பில் 30 செக்கன் வரை இவ்வதிர்வை உணரமுடிந்தது என மக்கள் தெரிவித்துள்ளனர்.

எனினும் இலங்கைக்கு விடுக்கப்பட்ட சுனாமி எச்சரிக்கை மீளப்பெறப்பட்டுள்ளதாக வானிலை அவதான நிலையம் தெரிவித்துள்ளது. அத்துடன் மக்கள் வீடுகளுக்குத் திரும்ப முடியும் என வளிமண்டலவியல் திணைக்களம் தெரிவித்துள்ளது. இதனால் மக்கள் அச்சம் கொள்ள தேவையில்லை எனவும் வானிலை அவதான நிலையம் தெரிவித்துள்ளது.

எனினும் இந்த அதிர்வானது 2004 இல் சுனாமி ஏற்படுவதற்கு முன்பு ஏற்பட்ட பூமியதிர்வைப் போன்று இருந்ததாக மக்கள் அச்சம் தெரிவித்துள்ளனர்.
இதேவேளை, நாட்டின் சில பகுதிகளில் நில நடுக்கம் உணரப்பட்டதாக தெரியப்படுகிறது.

தலைநகரம் கொழும்பில் இவ்வாறான ஒரு உணர்வு ஏற்பட்டதாகவும், தொடர் மாடிகளில் உள்ளோர் மற்றும் அனைவரும் பீதியில் வெளியே ஓடிச் சென்றதாகவும், யாழ்ப்பாணத்தில் பெரிய கட்டிடங்களில் இந்நில நடுக்கத்தினை நன்கு உணரமுடிந்ததாகவும், வீரசிங்கம் மண்டபம், யாழ் பொதுநூலகம் போன்ற கட்டிடங்களில் இருந்தோர் பீதியில் வெளியில் ஓடிவந்தனர் எனவும் மக்கள் தெரிவித்துள்ளனர்.

இன்று உணரப்பட்ட நில அதிர்வு மலையகப்பகுதிகளிலும் உணரப்பட்டுள்ளதாக பிரதேச மக்கள் தெரிவிக்கின்றனர். இன்று பிற்பகல் 2 .15 மணியளவில் நுவரெலியா, நாவலப்பிட்டி, நானுஓயா, அட்டன், கொட்டகலை, டிக்கோயா போன்ற பகுதிகளிலும் இந்த நில அதிர்வு உணரப்பட்டதாகத் தெரிவிக்கப்படுகின்றது.

தற்போது சுனாமி எச்சரிக்கை தகர்க்கப்பட்டாலும், மீனவர்களை கடலுக்கு செல்ல வேண்டாம் என தெரிவிக்கபட்டுள்ளது.

அது கருணா கோஷ்டி நடத்தும் விழா அல்ல! - நடிகை சங்கீதா, கிரீஷ் விளக்கம்

2011-12-26T05:12:00.000-08:00

இலங்கை தமிழ் அமைப்புகள் ஏற்பாடு செய்துள்ள புத்தாண்டு விழா கருணா கோஷ்டி நடத்தும் விழா அல்ல," என்று நடிகை சங்கீதாவும் அவர் கணவர் கிரீஷும் கூறியுள்ளனர்.

சுவிட்சர்லாந்தில் தமிழ் அமைப்புகள் நடத்தும் புத்தாண்டு விழாவில் நடிகர் ஜீவா, நடிகை சங்கீதா, பின்னணி பாடகரும் சங்கீதாவின் கணவருமான கிரிஷ் ஆகியோர் பங்கேற்க திடீர் எதிர்ப்பு கிளம்பியது. விடுதலைப்புலி எதிர்ப்பாளரான கருணா கோஷ்டியினர் இவ்விழாவை நடத்துவதாகவும் அதில் கலந்து கொள்ளக் கூடாது என்றும் வற்புறுத்தப்பட்டது.

இதையடுத்து ஜீவா அந்த விழாவில் கலந்து கொள்ள மாட்டேன் என்றுஅறிவித்து விட்டார்.

எனக்கு தமிழர் நலன்தான் முக்கியம். தமிழர் விரும்பாத எதையும் நான் செய்ய மாட்டேன். எனது வெளிநாட்டு பயணத்தை ரத்து செய்து விட்டேன் என்று அவர் அறிக்கை விடுத்தார்.

ஆனால் சங்கீதா, கிரிஷ் இருவரும் அந்த விழாவை விடுதலைப்புலி எதிர்ப்பாளர்கள் நடத்தவில்லை என்று மறுத்துள்ளனர்.

இது குறித்து சங்கீதா கூறும்போது, "புத்தாண்டு விழாவை சுவிட்சர்லாந்தில் உள்ள உள்ளூர் தமிழர்கள்தான் ஏற்பாடு செய்துள்ளனர். கிரிஷ்க்கு பாராட்டு விழா நடத்துவதாக சொல்லி அழைத்தனர். சமீபத்தில் இலங்கையில் நடந்த நிகழ்ச்சியொன்றில் பங்கேற்க மனோ, கிரிஷ், சுசித்ரா, உள்ளிட்டோர் சென்று இருந்தனர்.

இலங்கை அரசு பின்னணியில் அவ்விழா நடப்பதாகவும் அதில் பங்கேற்கக் கூடாது என்றும் வற்புறுத்தப்பட்டது. இதையடுத்து அந்த நிகழ்ச்சியில் பங்கேற்காமல் நாடு திரும்பினர். இலங்கை அரசுக்கு கண்டனம் தெரிவிக்கும் வகையில் அந்த நிகழ்ச்சியை ரத்து செய்ததை பாராட்டத்தான் இவ்விழாவை நடத்துவதாக அழைப்பிதழ் அச்சிட்டு வெளியிட்டுள்ளனர்," என்றார்.

புத்தாண்டு நிகழ்ச்சியை நடத்தும் சுவிட்சர்லாந்து தமிழ் அமைப்பு வெளியிட்டுள்ள அறிக்கையில், "தமிழ் மக்கள் உணர்வுகளுக்கு மதிப்பளித்து இலங்கை அரசு பின்னணியில் நடந்த நிகழ்ச்சியை ரத்து செய்ததற்காகவே கிரிஷ்க்கு பாராட்டு விழா நடத்த ஏற்பாடு செய்துள்ளோம். எங்களை ராஜபக்சேவின் கைக்கூலிகள் என்று கூறுவது வேதனையளிக்கிறது என்று குறிப்பிடப்பட்டுள்ளது.

சுவிஸ் நாட்டில் வாழும் புலம்பெயர் தமிழ் இளைஞர்களால் உருவாக்கப்பட்ட பாடல்

2011-12-14T06:17:00.000-08:00

குதிஉயர்ந்த பாதணிகளை ஆண்களும் அணியுமாறு கோரி சமவுரிமைப் போராட்டம்

2011-12-14T06:11:00.001-08:00

உக்ரைனில், பெண்களைபோன்று உயரமான குதிகால் பாதணிகளை நாள் முழுதும் அணிந்திருக்குமாறு ஆண்களை ஆண் - பெண் சமஉரிமை பிரசாரகர்கள் வலியுறுத்தியுள்ளனர். உக்ரைனில் பெண்களின் நிலையை ஆண்கள் உணர்ந்துகொள்ளச் செய்வதற்காக இவ்வாறு வலியுறுத்தப்பட்டுள்ளது.

உக்ரைனின் கீவ் நகரிலுள்ள வர்த்தக நிலையத்திற்கு அருகில் இச்செயற்பாட்டாளர்கள் ஆர்பாட்டமொன்றையும் நடத்தினர்.
பெண்களுக்கு எதிரான வன்முறைக்கு எதிர்ப்பு தெரிவித்து ஒருவார காலமாக நடைபெறும் போராட்டத்தின் ஒருபகுதியாக இந்நிகழ்வு நடைபெற்றதாக ஆர்ப்பாட்டக்காரர்கள் தெரிவித்துள்ளனர்.

நாடு தழுவிய ரீதியில் வருடாந்தம் 1000 பெண்கள் அவர்களது துணைவர்களால் கொலை செய்யப்படுவதாக ஐரோப்பிய ஒன்றியத்தின் புள்ளிவிபரங்கள் தெரிவிக்கின்றன.

அத்துடன் 17 மற்றும் 21 வயதிற்குட்பட்ட பெண்களில் ஐந்தில் ஒரு பகுதியினர் பாலியல் ரீதியாக தாக்கப்படுகின்றனர் எனவும் தெரிவிக்கப்பட்டுள்ளது.
உள்நாட்டு தொலைக்காட்சி நட்சத்திரமான ஒல்யா போல்யாக்கோவா இது குறித்து தெரிவிக்கையில், 'இறுதியாக ஆண்கள் இன்று குதிஉயர்ந்த பாதணி அணிவது எப்படியிருக்கும் என்பதை உணர்ந்திருப்பார்கள்' என்றார்.

நாலும் தெரியாத பேர்வழியள் செய்யிற கூத்து...

2011-08-14T09:16:00.000-07:00

மஞ்சத்திருவிழா சிறப்பா நடத்தது. சனசந்தடியப் பாத்தால் வலு சந்தோஷமா இருந்தது பாருங்கோ. எங்கட விழுதுகள் வெளிநாடுகளில இருந்தும் பிள்ளை குட்டியளோட வந்து நிக்கிறதப் பாத்தா பூரிப்பா கிடக்கு.என்ர மகள் முறையான ஒருத்தி பிரான்சிலயிருந்து வந்திருக்கிறாள். பெரியப்பா நீங்களும் வாங்கோவன் என்று கேட்டாள். சரி, சாய்மனைக்கட்டில்ல கிடந்து கிடந்து அலுத்துப்போட்டு தெண்டு போட்டு நானும் அதுகளோட கூடப் போனன். வான் பிடிச்சுப் போனனனாங்கள். சின்னன் குஞ்சு குருமானெண்டு கலகலப்புக்குக் குறையில்லை. போதாக்குறைக்கு பல பழைய உறவுகளையும் காணக்கிடச்சுது.

"நான் வயது போனனான். கண்டபடி நடக்கேலாது. இஞ்ச வேம்படியில இருக்கிறன். திரியிற இடமெல்லாம் திரிஞ்சு போட்டு வாங்கோ'' எண்டு சொல்லி அதுகளை அனுப்பிப் போட்டு வேம்படிப் பக்கமா ஒதுங்கினா, அங்க எங்கட கதிரண்ணையும் நடேசரும் கதைப் பல்லக்கில நின்றினம். பிறகென்ன சந்திச் சமாவை நல்லூராண்ட வேம்படியிலயே ஆரம்பிச்சாச்சு.

கதிரண்ணை என்னக் கட்டோன்ன "என்ன சோமு சந்தியடிய விட்டுட்டு வேம்படியில வந்திருக்கிறாய்... இனி வேம்படிச் சோமெண்டு வருமோ?'' எண்டு ஒரு நக்கல் விட்டார். "இந்த வேம்படியில இருந்தா எல்லா மனப்பாரமும் இறங்கிடும். குடும்பப் பிரச்சினையில இருந்து கலியாணப் பேச்சு பொம்பள காட்டிறது எண்டு அத்தினைக்கும் அருமருந்தா இருந்த இடமெல்லே? அந்த இடத்தையும் என்ர பேரோட சேக்கிறது எனக்குச் சிறப்புத்தான். ஆனா இந்த பேப்பர்காரப் பெடியன் பேரமாத்த விடமாட்டான்'' எண்டு கதைய முடிச்சுக்கொண்டு மூச்சு விடறதுக்கிடையில, வெளிநாட்டில இருந்து வந்த பேத்தி ஓடிவந்து எனக்கு மேல பாஞ்சாள்.

"என்ன பிள்ளை என்ன நடந்தது?'' எண்டு கேக்க, "அங்கயொரு கமராக்காரன் ஒரு மனஸ் இல்லாமல் என்னை குளோசப்பில எடுக்கிறதும் பிறகு பின்னுக்கு போறதுமா வீடியோ எடுக்கிறான். அதை பெரிய ரி.வியிலயும் போட்டுக் காட்டியினம். என்னத் துரத்தித் துரத்தி எடுக்கிறான். இஞ்ச இப்படியெல்லாம் டீசன்ற்றில்லாமல் எப்படி நடக்கினம். உவையெல்லாம் மீடியா எண்டு வேற எழுதியிருக்கினம்'' என்று பொரிஞ்சு தள்ளினாள். "எங்கட நாட்டில இப்படிச் செய்தா கேஸ் போட்டு ஃபைன் அடிச்சுப் போடுவாங்கள்'' எண்டு வேற மிரட்டினாள்."கட்சி மீடியாக்களிட்ட உந்த நாகரிகத்தை எல்லாம் எதிர்பாக்க ஏலுமே'' எண்டார் நடேசண்ணை. உந்தப் பொம்பிளப் பிள்ளையளை நல்லூருக்க துரத்தித் துரத்தி எடுக்கிற ரி.விக்காரங்கள்தானே உள்ளூராட்சி தேர்தல் நடக்கேக்க, கம்பஸ் பெடியள் எண்டு வேறயாரயோ வச்சுப் படம்பிடிச்சு காட்டினவங்களாம். அதவிட சுண் ரி.வி. தயாரிப்பு எண்டு பொய்யாயும் ஒரு நிகழ்ச்சியத் தயாரிச்சு ஒளிபரப்பினவையாம். அவையளிட்டப் போய் எதிக்ஸ் பற்றிக் கேட்டா அதுகளுக்கு என்ன தெரியும்?'' எண்டார் கதிரண்ணை.

அந்தாள் சொன்னால் விளங்கிச் சொன்ன விசயமாத்தான் இருக்கும் எண்டு போட்டு, நான் சொன்னன், "மக்களெல்லாம் மாக்களெண்டு நினைச்சுக்கொண்டு மீடியா நடத்திறவங்கள் இப்படியான கேவலம் கெட்ட வேலையளைத்தானே செய்வாங்கள்'' எண்டு. நான் சொல்லிக்கொண்டிருக்க, எங்களக் கண்டிட்டு சனநெரிசலுக்க இடிச்சுத் தள்ளிக் கொண்டு வந்து சேந்தார் கம்பஸ் வாத்தியார்."என்ன வாத்தியார் என்ன புதினங்ளெண்டு?'' நாங்கள் எல்லாருமாக் கேக்க, "ஒண்டுமில்லை நாட்டில எத்தின விதமான கூத்துக்கள் நடக்குது. அதுகளை எண்ணி கவலைப்படுறதா? சிவனேயெண்டு கிடக்கிறதா? ஒண்டுமாப் புரியேல்லை'' எண்டு சலிச்சுக் கொண்டார் வாத்தியார். "ஏன் என்ன நடந்தது'' எண்டு கேட்டா, அந்தாள் சொல்லிச்சு, "குமாரசாமி மண்டபத்தில பெரிய மனிசன் சிவத்தம்பிக்கு ஒரு கூட்டம் வைச்சவை. அதுக்கு உந்த பாலர் பாடசாலை ரீச்சர்மாரோட நானும் போனனான். அங்க அந்த மிகப் பெரிய மனிசன் சிவத்தம்பியின்ர நீள அகலம் ஆழம் தெரியாதவன் எல்லாம் மிக மேலோட்டமா அந்தாள மலினப்படுத்திட்டு போறாங்கள். ஆக வெள்ளை வேட்டி பேராசிரியர் மட்டும் சிவத்தம்பி உருவாக்கி விட்டுச் சென்றிருக்கக் கூடிய புதிய தத்துவங்களை அருமையாச் சொன்னார். இதில ஆகக் கவலையானது என்னெண்டால் தமிழ்துறையில இருந்து ஒரு சட்டம்பி, ஜெயமோகன் எண்ட மூன்றாம் தர, இல்லையில்லை நான்காம் தர இலக்கிய வியாபாரி சொன்ன கூற்றிலயிருந்து தொடங்கி சிவத்தம்பிய மலினப்படுத்திட்டுப் போனது தான். துறைசார்ந்தவை இதுகளை கண்டிக்கிறதில்லையோ. ஒழுங்கு படுத்திறவை உதுகளை கவனிக்கக் கூடாதோ? அவைக்கு தாங்கள் மைக் பிடிக்க ஒரு இடம் கிடைச்சா போதும் எண்டு குளறுறதுதான் வேலை. எத்தின நாட்டில எத்தின பேர் சிவத்தம்பியிண்ட பெயரையும் பெருமையையும் சொல் லிச் சொல்லி எழுதுறான். தேம்பி அழுறான். அதுகள் ஒண்டும் தெரியாத இந்தப் பேர்வழிகள் யாரோ ஒருத்தன் காழ்ப்புணர்ச்சியில சொன்னதை தூக்கி வைச்சுக் கொண்டு திரியுதுகள்'' எண்டு கம்பஸ் வாத்தி கொட்டித் தீர்த்துப் போட்டுது.

என்ர படிப்புக்கு அந்ததாள் பேசினது அரவாசி விளங்கேல்லை எண்டாலும், அரைகுறை வாசிப்புப் பேர்வழிகள் விளக்கம் இல்லாமல் குண்டுச்சுட்டிக்க சுத்தி உலகம் போற்றுற பெரியவையச் சிறுமைப்படுத்துகள் எண்டது மட்டும் விளங்கிச்சு.

வாத்தியின்ர கதையக் கேட்ட கதிரண்ணை, "வாத்தியார் நீர் இப்பிடியெல்லாம் கதைச்சனீர் எண்டு தெரிஞ்சா உம்மையும் அடிச்சு நொருக்கி மரத்தில கட்டி தூக்கிப் போடுவாங்கள். போன கிழமை இரண்டு பேர அடிச்சுத் தூக்கியிருக் கிறாங்களாம். இப்படி எத்தின மர்மக் கொலையள் நடந்திட்டுது ஒண்டையும் துப்புத்துலக்கி பிடிக்கேலாம பொலிஸ் இருக்கிற நிலையில, கவனமா வாயத்திறக்க வேணும்'' எண்டு சொல்ல அந்த இடத்தில ஒரே கனத்த மௌனம். பிறகென்ன ஒவ்வொருத்தரும் அவரவர் வீடுகளப் பாக்கக் கிளம்பிட்டம்.

மேலை நாடுகளின் பொற்காலம் வீழ்ச்சியடைய ஆரம்பித்தது..

2011-08-07T09:31:00.000-07:00

உலகத்தின் சிறந்த பொருளாதாரம் உள்ள நாடுகளை AAA என்ற மூன்று ஏ தரத்தில் அடக்குவார்கள். 1917ல் இருந்து இந்த அதி உயர்ந்த நிலையை விட்டு அமெரிக்கா கீழே இறங்கியது கிடையாது. ஆனால் இந்த வாரம் முதல் தடவையாக அமெரிக்க கடன் பெறுமதி இறக்கம் அந்த நாட்டின் பொருளாதாரத்தை AA+ என்ற நிலைக்கு இறக்கியுள்ளது.

இந்த இறக்கம் பொருளாதாரத்தின் பின்னடைவு, அதில் இருந்து மீண்டுவிடலாம் என்ற வாதங்கள் காலவதியாகிப் போன வாதங்களாகும். அமெரிக்கா உட்பட மேலை நாடுகளில் கடந்த சுமார் ஒரு நூற்றாண்டுகால பொற்காலம் வீழ்ச்சியடைய ஆரம்பித்துவிட்டது என்பதுதான்.
பொற்காலத்தின் வீழ்ச்சி என்றால் என்ன…?

இதை விளங்கிக் கொள்ள ஸ்பானிய நாட்டின் வரலாற்றை தெரிந்து கொள்வது அவசியம்.. அந்த நாடு குடியேற்ற நாடுகளை அமைத்தபோது உழைக்காமலே தங்கம் கொட்டும் நாடாக மாறியது. ஒரு நூற்றாண்டு காலம் அந்த நாட்டு மக்கள் ஆடம்பர வாழ்வில் திளைத்து, சுகித்து மகிழ்ந்தார்கள். ஆனால் இந்தப் பொற்காலம் ஒரு நாள் முடிவுக்கு வரும் என்பதை திட்டமிட மறந்தார்கள். பெரும் பொருளாதார சுழிக்குள் சிக்குப்பட்டு ஸ்பானிய பேரரசே அழிந்தது.

தமிழிலும் இதற்கு நல்ல உதாரணம் உண்டு. இந்தியாவில் சுமார் ஒரு நூற்றாண்டு காலம் சோழர்களின் ஆட்சி பொற்காலமாக இருந்தது. கங்கையில் புலிக்கொடி ஏற்றி, கடாரம் வென்று, தஞ்சைப் பெரிய கோயில் அமைத்து பொற்காலம் கண்டனர் சோழர்கள். பொற்காலத்தில் வீழ்ச்சி வந்தால் மாற்றுத்திட்டம் என்னவென்று தெரியாத சோழர்கள் இறுதியில் அழிவடைந்தார்கள். 77 வருடங்களாக ஆட்சி செய்த இலங்கையைக் கூட சிங்களவரிடம் பறிகொடுக்குமளவுக்கு வீழ்ந்தார்கள், அழிந்தார்கள்.

இதுபோன்ற வீழ்ச்சியே இன்று அமெரிக்காவிலும், ஐரோப்பாவிலும் ஏற்பட்டுள்ளது. பொருளாதாரம் டபிள் டிப் என்னும் இரட்டைப் பாதாளத்தில் விழப்போவதை சரியாக மட்டுக்கட்டாமல் கொள்கைகளை வகுத்து இன்று பொருளாதாரத்தை குறுக வைத்துள்ளார்கள் மேலைநாடுகளின் தலைவர்கள். மீதம் பிடிக்க, வர்த்தகத்தில் குறுக்கம் ஏற்பட பொருளாதார விஷச்சுழர்ச்சி உட்பக்கமாக சுழன்று பாதளத்திற்குள் சிக்குண்டுள்ளது.

அமெரிக்காவின் பெறுமதி மிக்க பத்திரங்களை சீனா வாங்கி முதலீடு செய்திருந்தது, இப்போது அமெரிக்காவின் கடன் பெறுமதி இறக்கம் சீனாவுக்கு பேரிழப்பை ஏற்படுத்தியுள்ளது. உலகப் பொருளாதாரத்தில் முன்னணியில் நின்ற நாடொன்றின் பெறுமதி இறக்கம் முழு உலகையும் பாதிக்கும். உலகப் பொருளாதாரம் இதுவரை இல்லாத பாரதூரமான நெருக்கடிக்குள் சிக்குப்பட்டுவிட்டதாக டென்மார்க் நோர்டியா வங்கியின் பொருளியல் நிபுணர் ஜொனி போ ஜாக்கப்சன் சற்று முன் தெரிவித்தார்.

ஐரோப்பாவிலும் பல நாடுகள் வங்குரோத்து நிலையை அடைந்துவிட்டன. கிரேக்கம், ஐஸ்லாந்து போன்றன ஏற்கெனவே முறிவடைந்த பொருளாதாரத்தில் சேர்ந்துவிட்டன. தெற்கு ஐரோப்பிய நாடுகள் மோசமான பற்றாக்குறைக்குள் சிக்குண்டுவிட்டன. ஐரோப்பிய ஒன்றியத்தின் 410 பில்லியாட் யூரோ பாதுகாப்பு பொதி இந்த வீழ்ச்சியை தடுக்க முடியாது என்ற குரல்கள் கேட்கின்றன.

அமெரிக்க பொருளாதார வீழ்ச்சி நம்மை பாதிக்காது என்று இந்திய அமைச்சர் பிரணாப் முகர்ஜி நேற்று தெரிவித்துள்ளார். இந்தியாவில் மிகப்பெரிய முதலீடுகளை அமெரிக்கா செய்துள்ளது. இந்தியாவில் இதன் தாக்கங்கள் விரைவில் தெரியவரும். பிரணாப் முகர்ஜி போல தகுதி குறைந்த அமைச்சர்களின் குரல்கள் செல்லாக்காசு குரல்கள் என்பதை வரும் இந்தியத் தேர்தல் உணர்த்தும்.

அமெரிக்கப் பொருளாதாரம் யூதர்களின் கைகளில்தான் இருக்கிறது. அமெரிக்காவில் ஏற்பட்ட தாக்கம் நேற்று இஸ்ரேலில் பிரதிபலித்தது. சுமார் 7.7 மில்லியன் மக்களைக் கொண்ட அந்த நாட்டில் சுமார் 2.5 லட்சம் மக்கள் பலத்த ஆர்பாட்டங்களை நடாத்தினார்கள், விலைக்குறைப்பு, பொருளாதார மீட்சிக்காக. இதே தாக்கம் ஜப்பானில் பட்டு, அங்கிருந்து தென்னாசியாவுக்குள் தெறிப்படையும்.

இந்த டபிள் டிப்பில் இருந்து மீள்வதற்காக எகிப்து, ரூனீசியா, லிபியா, ஏமன் போன்ற நாடுகள் சூறையாடப்பட்டுவிட்டன. மக்கள் ஜனநாயகப் போராட்டம் என்ற போர்வையில் இது உலகில் பல நாடுகளின் செல்வங்களை சூறையாட ஆரம்பித்துள்ளது. கொஸ்னி முபாரக், கடாபி போன்றவர்களின் பல பில்லியாட் சொத்துக்களை உவிந்து குடித்துவிட்டது. இந்தத் தலைவர்களை உருவேற்றி பொது மக்கள் பணத்தை சூறையாட வைத்து, அவை முதிர்வடைய கதையை முடித்து, பணத்தை பறித்துவிட்டார்கள். இந்த நாடுகளின் செல்வங்களை பொருளாதார வெற்றிடம் உவிந்துவிட்டது. இதன் குடல் நீண்டு செல்கிறது பெரும் பசியோடு. சர்வதேச நாணய நிதியம், உலக வங்கி போன்றன வகுத்த பொருளாதாரக் கொள்கை தோல்வியடைந்துள்ளதால் வந்த வினையே இது.
இந்த நேரம் நாம் ஓர் உண்மையை உணர்ந்து கொள்ள வேண்டும். உலகத்தில் ஒரு சில நாடுகள் மட்டுமே உண்மையான நாடுகளாகும். ஆசிய, ஆபிரிக்க நாடுகளில் பல பீஸ்ரன்ற் உதவியில் இயங்கும் ஒட்டுண்ணி நாடுகளேயாகும். மேலை நாடுகளின் பணம் இல்லாவிட்டால் இவை நாடுகளாக இருக்க முடியாது. அமெரிக்காவின் இந்த வீழ்ச்சி ஆசியாவிலும், ஆபிரிக்காவிலும் பெரும் வறுமையை ஏற்படுத்தும். இப்போது பட்டினியில் மரணித்துக் கொண்டிருக்கும் 12 மில்லியன் ஆபிரிக்க மக்களின் நிலை இதற்கு ஓர் உதாரணம்.

இந்த பொருளாதார வீழ்ச்சி புலம் பெயர் தமிழ் மக்களையும் பாதிக்கும். தூரப் பார்வையற்ற நகர்வுகளை அவர்கள் மேற்கொண்டால் பெரும் பொறிக்குள் சிக்க நேரிடும். தீக்கோழி நிலத்திற்குள் தலையை புதைத்து வைத்துக் கொண்டு உலகம் தெரியாது வாழ்வது போல அவர்களுடைய வாழ்வை நம் ஊடகங்கள் கனவில் வைத்து, மானையும் மயிலையும் ஆட வைக்கின்றன. சிறீலங்கா முதலீடுகள், இந்திய முதலீடுகள் போன்றவற்றிலும் கூர்மையான கவனம் செலுத்த வேண்டும். முபாரக், கடாபி சொத்துக்களை கபளீகாரம் செய்தது போல புலம் பெயர் தமிழர் முதலீடுகளை இலங்கை இந்திய நாடுகள் உவியக்கூடிய நிலை இருக்கிறதா என்பதை அவதானிக்க வேண்டும். ஐயாயிரம் ரூபாவை ஒருவருக்கு கொடுத்தாலே யார் அனுப்பியது என்று சிறீலங்கா உளவுப்பிரிவு கேட்கிறது.

இருபத்தி ஐந்து ஆண்டுகளுக்கு முன்னர் மேலை நாடுகளின் பொற்காலத்தை பயன்படுத்தி வாழ்ந்த புலம் பெயர் தமிழர் தற்போது அதன் பொற்காலத்தின் வீழ்ச்சிக்குள் தாமும் சிக்குப்படுவோம் என்பதை அறிந்து நடக்கவோ, அவர்களுக்கு வழிகாட்ட அறிவுள்ள தலைவர்களோ இருக்கவில்லை. ஆகவே இந்த விவகாரத்தை இனியாவது உன்னிப்பாக அவதானிப்பது நல்லது.