Taneh Karo Simalem

Cerita Rakyat Karo " RAJA KETENGAHEN " Bagian 8

2016-06-28T19:18:00.001+07:00

CERITA RAKYAT KARO " RAJA KETENGAHEN "

BAGIAN - 8

“E, di nusur kin ngerajai taneh Ketengahen ndai, di kami kal nge duwa-duwa ras Tuwan Banuwa Kuling, entah melungen kal pagi akap kami,” nina Tuwan Mandileka Suri.

“Enda tinaruh manuk simbelin pitu ndehara manuk si nanggur dawa-dawa, e baba pituna kuteruh, lo pe pagi seh sipulu duwa bulan, amin lit pe sora cakap, amin megang pe sora tawa, ola kam tertawa, si enggo meriyah nge pagi ngerajai taneh Ketengahen,” nina ninina Datuk Rubiya Gande.

E, tantankenna alu sutera itam, sutera ijo, i tantankenna tinali gelangen. E, seh me kune itengah awang-awang, e seh kune empat bulan, meriyah sra tawa ndai, megang sora er cakap-cakap.

“E, labo kepe guwak nini katana ndube. Piga bulan nari la lit si rukat nakan pangenta? Piga bulan nari la lit si ngkapuri belo panganenta, si ngkimbangi amak man pedementa?”

Tawa kune iya, pecah tinaruh manuk simbelin, jadi kayu silemak, silislis, sijalang, i taneh jahe-jahe enda, permayan-mayanen anak ni raja siberu Gandariyah duduk di ampu-ampuna.

E, tande lima bulan, reh gangna ka sora tawa, reh riyahna kang sora ercakap, tawa ka Tuwan Mandileka Suri, pecah tinaruh manuk simbelin jadi beraspati, beraspati taneh, beraspati lau, beraspati kerangen, beraspati mbalmbal, beraspati kahang.

Reh ka bulanna reh gangna ka sora tawa, reh riyahna ka sora ercakap, tawa Tuwan Banuwa Kuling, pecah tinaruh manuk simbelin, jadi gayo, jadi nipe, jadi cibakut, jadi itik, jadi binurung, jadi ilik, jadi bindoran, jadi saringgupgup.

E reh ka bulanna, reh gangna ka sora tawa ndai, rah riyahna ka sora ercakap ndai, tawa Tuwan Mandileka Suri, pecah tinaruh manuk simbelin, e jadi page, jadi jaba, jadi dawa, jadi jaung, jambe, gundur, ritik, cimen, lacina.

E, reh ka bulanna reh gangna ka sora tawa, reh riyahna sora ercakap, tawa Tuwan Banuwa Kuling, pecah tinaruh manuk simbelin, e jadi kuda, jadi kerbo, jadi lembu, jadi kambing, jadi babi, jadi biyang, jadi manuk.

E, enggo keri tinaruh manuk pecah.

“E, lit me enda asuh-asuhen, rubiya-rubiya, lit me enda pangan-pangan di kitang duwa manganisa pangan-pangan, kitang duwa njagaisa asuh-asuhen, entah lalap melungen i taneh Ketengahen enda,” nina Tuwan Mandileka Suri kata Tuwan Banuwa Kuling.

“Ah, lit kap ndube kata nini nta, Datuk Rubiya Gandem si nurihi bukta, jari-jari nta, si nubuhken kita jadi jelma manusiya, si nantanken kita kutengah awang-awang enda.”

“Di kai pagi kesikelndu kurang entah matah, sungkun kam, suluhi pagi sabut tuwalah ijo, seh pagi cimberna idatas, ku anggeh pagi cimber sabut tuwalah ijo, kutalangi me pagi pintu lawang arah raja Kima-Kima, ku tantanken pagi tinali gelangen kuteruh alu sutera itam, sutera ijo, em pagi talindu nangkih maka ku pedahken pagi tole pedah, ku ajarken pagi tole ajar, bagem kap ndube nina nini nta Datuk Rubiya Gande ndube.”

E, suluh me kune sabut tuwalah ijo. E, pinter me kune nangkih me. Seh kune i tengah awang-awang, i bahan sabap la tuhu nina kata Datuk Rubiya Gande ndai, lapat cimber sabut tuwalah ijo, la nai anggeh Datuk Rubiya Gande i datas.

Seh me kune empat tahun, lalap ma nantan tinali gelangen kuteruh.

“E, kutera dengan enda perukur dage?” nina Tuwan Mandileka Suri>
“Aku, la nai ku eteh ukurku lit,” nina Tuwan Banuwa Kuling.

“Aku lit dengan ukurku,” nina Tuwan Mandileka Suri.

“Di tuhulah mindu, ku kataken, tiyaken kuda, tiyaken kerbo,” nina

“tiyaken lembu,” nina “kambing ras babi,” nina, “tiyaken manuk ras biyang.”

E, i tiyaken Tuwan Banuwa Kuling nina, “e maka pirah sindube enda kita manusiya. Di pirah babi, enggo kenca man, nadahken pelangkah, di pirah manuk ngkaisi, di pirah biyang, di man rubati, di pirah kerbo, di terang uwari ku juma, di ben uwari kurumah, adi pirah kambing, melawen ku juma, lampas ku rumah.”

TAMAT

Cerita Rakyat Karo " RAJA KETENGAHEN " Bagian 7

2016-06-28T19:16:00.002+07:00

CERITA RAKYAT KARO " RAJA KETENGAHEN "

BAGIAN - 7

E, kaha-kahana tuhu taneh pitu mpukul, e dumuyung kenca kune ndube.

“Enta ku seraken ku kaha-kaha, lit kap ndube i pedahken nini Datuk Rubiya Gande kata pengkaha-kaha, sibungkar kaciwer, sipaspas binara, sinjemba galungi, sirintak buluh sungsang, sitelpung tuwalang.”

E i serakennam pengkaha-kaha. E kaha si mergenjang puyub kune ndube taneh, e jadim kune uruk-uruk, jadim berneh-berneh e, enggom nteguh taneh, e enggom tembe taneh Tuwan Banuwa Kuling.

“Rajai me inganndu” nina ninina Datuk Rubiya Gande. “Ise temanku nusur nini,” nina, “Ngerajai taneh Ketengahen.”
“Tuwan Mandileka Suri”

E i sungkun me Tuwan Mandileka Suri, “Kam teman anak sintengah nusur kutengah awang-awang, ngerajai taneh Ketengahen?”
“E, di aku kin kepe ningen nini! Ku dahi lebe nini ku seberang lahulen.”

“Kam teman anak sintengah nusur, nina nini Datuk Rubiya Gande, nini!” nina.
“Lit kune jenda bulung-bulung si garaneya, di bulung-bulung si garaneya ndai kune, di lit pe jelma jelma ngalah kulana, rance dagingna, badat matana, ngerepat nahena, ngalungang babahna, di enggo i awatken bulung-bulung si garaneya arah bobona, enggo kune i akapna malem, eng man leginku kujenda nini ngku.”

“Lit nge tuhu jenda bulung-bulung tawar mesinting. Amim lit kin giya bulung-bulung tawar mesinting, di sendah la nai banci idah kam, telu kali ngenca rupana banci idah sebulan, sitik nge kenca.” Nina.

“Di kubeligai uwari telu puluh, di kutitik desa uwaluh, ku oge mamis si lima, katika telu si cembang curik si angkup-angkup nge, ku idah nipindu, enggo turah gerekndu la mehuli.”

“E, labo lepak nini!, kata uwari oge kam, e labo pilet.”

“Enggo, mulihlah kam,” nina nini ngiyani siberang lahuten.

“Sekali nari kam reh kujenda, tandangi uwari mehuli, banci nge ku bahbahi nipindu sambar, gerekndu la mehuli.”

Mulih Tuwan Mandileka Suri.

E, i tandangina uwari mehuli, i dahina ka nge nini ngiyani siberang lahuten. “Enda ka me aku reh, nini!”.

“Ah, enggo reh kin kam giya, bapa, enggo reh belinna gerekndu la mehuli, reh gerekndu si telu-telu, reh jahatna nipindu i nipi kam, darehndu enggo mulih ku lau, tulanndu mulih ku batu, i nipi kam kesahndu mulih ku angin, badanndu mulih ku taneh.”

“E, labo lepak nini!” nina Tuwan Mandileka Suri.
“Di banci i bahbahi kam nipi ngku la mehuli ndai, di banci i sapai kam gerekku la mehuli ndai, ola pe ku idah bulung-bulung tawar mesinting, malem me ateku mulih. E, kai bahbahenna nini?” nina Tuwan Mandileka Suri.

“E, bahbahenna bapa, banci nge ku sapai.”

“kai penapaina?” nina.

E, tabaskenna kune tabas pemanggil, reh manuk-manuk si nanggur dawa-dawa ndube, kabang manuk-manuk si nanggur dawa-dawa arah bobo nini si ngiyani siberang lahuten. E, rapetna alu purih tonggal pitu, ampuh mbuluna kuteruh, e jadim kejadin nina, takalna jadi galuh sitabar, layukna jadi sumpaling, atena jadi silantam, darehna jadi bunga-bunga, bilalangna jadi kapal-kapal, nahena jadi sangka sumpilet, besi-besi, kabengna jadi siputur balik, mbulu duru nahena jadi salah ernipi.

“E, mulih kam sekali nari” nina,

“Seh pagi reh uwari pemukuwi reh kam kujenda, je maka banci si sapai gerek la mehuli, nipi sambar.”

E, reh uwari pemukuwi, reh ka Tuwan Mandileka Suri, e maka i sapai gerek la mehuli.

“Kai pulungen nini?” nina Tuwan Mandileka Suri.

“Lit kap ndube kejadin manuk si nanggur dawa-dawa, geluhna pe ndube man suruh-suruhen, pate-patena pe endam man suruhen. E, di pertebusna ende-endenndu ndai, i embus sarune, di pertebus cakap-cakapndu i palu gonding, di pertebus tuwa-tuwa, i guwal cayak-cayak, di pertebus darehndu i buwat lau menturge, i buwat kalinjuhang si perkas, i piyuh benang benalum i pirpirken arah bobondu, e di pertebus batang dirindu, lit kap ndube kejadin galuh si tabar, e me raja, raja jelma, i bahan babahna la beluh ngerana, i bahan matana la erpengenehen, i bahan cupingna la erpemegi, i bahan igungna la erpenganggeh, i ban tan na la beluh ngodak, i bahan nahena la beluh erdalin, em jadiken man tukar tebusndu, man persilihi, man silindaken.”

E, mulih iya ku Ketengehen.

BERSAMBUNG ke Bagian 8

Cerita Rakyat Karo " RAJA KETENGAHEN " Bagian 6

2016-06-28T19:13:00.002+07:00

CERITA RAKYAT KARO " RAJA KETENGAHEN "

BAGIAN - 6

“E nini, di kempundu si dilaki, kempundu si diberu nini! Janahna kena gelar kena ingan, aku gelarkung lit, ingan lang. kuga kin enda ndube ajangku e, pemerekenndu?” nina anak singtengah kata ninina Datuk Rubiya Gande.

“Buwat bangku taneh pitu mpukul, lau pitu mangkok, taneh liyat, taneh ijo, taneh mirah, taneh putih, taneh kuning, taneh itam, taneh berani, emaka ku cuba ku tantanken si alu sutera itam, sutera ijo kutengah awang-awang.”

E, tsntankenna kutengah awang-awang, e i pelengas-lengasna, e pelebur-leburna, i tuwangkenna, i tembekenna jadi kasa pinggan, jadi kasa ndiru, jadi silambar juma, jadi duwa lambar juma, jadi telu lambar juma, jadi empat lambar juma, jadi lima lambar juma, jadi enem lambar juma, jadi pitu lambar juma, jadi uwaluh lambar juma, jadi siwah lambar juma, jadi sipuluh lambar juma, e jadi asa doni.

E, nare Padukah di Aji i teruh nari, e enggo dongkel ngenehen kudatas, la nai sidahen ernande, erbapa, erturang, ersenina. Ise ngasup ndongkeli aku sidahen ernande, erbapa, erturang, ersenina, bagem nate Padukah di Aji i teruh nari, i kaha-kahana taneh pitu mpukul, kabang ku tengah lawet, surung la nai tembe taneh pitu mpukul.

“E, buwat nakan bangku pitu garun,” nina Datuk Rubiya Gande,
“Buwat guie pitu bohan, buwat pola pitu terbung.”

E, enggom tasak nakan, tasak guie, pulung pola, e i suruhnam i embahken manuk-manuk si Nanggur dawa-dawa ku batang teruh, man Tuwan Padakuh di Aji. E, man, minem, Tuwan Padakuh di Aji i teruh.

E, enggo iya besur man, besur minem, medem Tuwan Padukah di Aji. Aturna medem i tembeken Datuk Rubiya Gande taneh pitu mpukul. E, enggo tembe taneh, medak ka Padukah di Aji.

“O! ise kal ndiya ngasup ndongkeli aku sidahen ernande, erbapa, erturang, ersenina,” bagem nate Tuwan Padukah di Aji. I kaha-kahana taneh pitu mpukul, kabang kutengah lawet, surung la nai kang taneh pitu mpukul.

“Buwatlah sekali nari nakan pitu garun, pola pitu terbung, guie pitu bohan,” nina Datuk Rubiya Gande. Enggom tasak nakan, tasak bengkau, pulung polla, i suruhna manuk-manuk si nanggur dawa-dawa ngembah kenca ku Kepultaken man siberu Dayang Sembahen. Man siberu Dayang, minem. Enggo besur man besur minem,”kai kata nu pola, kata nu guie, kata nu nakan?” nina siberu Dayang Sembahen.

“Lit kune ndube kata nini Datuk Rubiya Gande, si nurihi bukndu, jadri-jarindu, si nubuhken kam jadi jelma manusiya, kam kune njemak layar-layar, di talang nindu, talang, eruk nindu, eruk, di gelap nindu, gelap, diterang nindu, terang. Di esah pagi terperubat turangndu sintuwa,sintengah,singuda, kam nge pagi rukum, ukum erturang, ola i pake ukum si taka buluh, di ukum si taka buluh, si arah das i angkat, si arah teruh, i dedeh, ukum, ukum si piso-piso i baleng lah pagi i pake erturang. Di piso-piso i baleng si arah das la i angkat, si arah teruh pe la i dedeh, bagem kune ndube nina nini datuk Rubiya Gande.”

“Di em kepeken turin-turin perubatenna turang sintuwa, sintengah, singuda, aku me tuhu njemak layar i Kepultaken, di terang ningku, terang, di gelap ningku, gelap, enggo de talang ningku, talang, de eruk ningku, eruk. Surung me ringan turang sintengah, nta ku tagangi matawari, gelap pitu tahun, gelap pitu tula, pitu wari, pitu berngi. E, enggo me nteguh taneh i tembeken Datuk Rubiya Gande.”

E, gelap kune pitu tahun, pitu tula. E, i tembeken nini Datuk Rubiya Gande taneh pitu mpukul man ingan anak sintengah, itengah awang-awang. E, enggo jadi taneh, nteguh me taneh. E, i talangi siberu Dayang Sembahen me layar-layar, i bukanam kunci. E, terang me ngenehen. Nare Tuwan Padakuh di Aji i teruh nari kudatas, em enggo dongkel ngenehen, la nai sidahen ernande, erbapa, erturang, ersenina.

BERSAMBUNG ke Bagian 7

Cerita Rakyat Karo " RAJA KETENGAHEN " Bagian 5

2016-06-28T19:11:00.001+07:00

CERITA RAKYAT KARO " RAJA KETENGAHEN "

BAGIAN - 5

E, tande empat berngi reh Raja Ketengahen ku taneh Purba, i babana serser gametna. E, enggom tasak nakan pitu garun, tasak bengkau pitu bohan, pulung pola pitu terbung, i dilom gamet si ni taneh Purba ku rumah. E, man me.

Enggo besur man, besur minem, “Kade barita, rajanami?” bagem nina gamet si ni taneh Purba.

E, cakapken me cakap erdemu me arih i arihken, e pepukul me anak rja nta Tuwan Dibata ni Purba, tergelar siberu Sindar Mata ni ari ras Raja Ketengahen (Raja si Ketengahen e pitu depa gedangna).

E, tande duwa tahun, kedabuhen tuwah kemberahen Ketengahen, tubuh anak dilaki, tande telu tahun duwa anak nini nta, sada dilaki, sada diberu. Tande lima tahun, telu i pupus nini kemberahen Ketengahen. Tande kune pitu tahun empat i pupus nini, duwa dilaki, duwa diberu. Seh sepulu duwa tahun lima i pupus nini, telu dilaki, duwa diberu.

E, mbelin me anakna sintuwa dilaki, “Kai merga ngku nande” nina, “bebere kai aku, si kai gelarku, mbelin me aku la ermerga, la erbebere, la ergelar.”

“De merga kepe nindu bapa, de bebere kepe nindu, de gelar kepe nindu, lit kap nini nta si nubuhken kita, jadi manusiya, si nurihi bukta, jari-jari nta, e nge man sungkunen gelar.” “Kai deba buwaten man nini, nande?” nina. “Nakan pitu garun, pola pitu terbung, guie pitu bohan.”

Enggm tasak nakan, tasak guie, pulung pola, e i bereken man Datuk Rubiya Gande. Man me Datuk Rubiya Gande. Enggo besur man, besur minem, “Kai kata nu guie, kata nu pola, kata nu nakan?” nina Datuk Rubiya Gande. “Kai pe seya nini!” nina, “Mbelin me aku, la ermerga, la erbebere, la ergelar.” “E, kam me kepeken sintuwa i pupusken nandendu bapandu, e gelarndu si Tuwan Padukah di Aji, erkuta kam i Batang Teruh. Enda pedah kinigurun, kata pengkaba-kaba, si Rintak Buluh Sungsang, Si Jemba Galungi, Si Paspas Binara, Si Bungkar Kaciwer, Si Telpung Tuwalang, Si Lekar Padan.”

“E, aku nini, si kai gelarju?” nina siberu Dayang. “Kam kepe sintuwa diberu ame, i pupus nandendu bapandu. E gelarndu Siberu Dayang Sembahen, erkuta kam i kepultaken, kam njemak layar-layar. Di talang nindu talang, di eruk nindu i eruk, di gelap nindu gelap, di terang nindu terang, di esah pagi terperubat turangndu sintuwa, sitengah ras singuda, kam me padi ndabuhken ukum. Di ukum erturang, ola ukum si taka buluh, de ukum si taka buluh, si arah das i angkat, si arah teruh i dedeh, ukum piso-piso i baleng pagi ukum erturang. Di ukum piso-piso i baleng si arah das pe la i angkat, si arah teruh pe la i dedeh.”

“E, aku, si kai gelarku nini?” nina anak singtengah dilaki. “E, di kam kin kepeken, anak sintengah i pupus nandendu ras bapandu, kam anak si elang-elang, ergani-gani kam ku kakandu, ergani-gani kam ku agindu. De la pagi i pantek negerindu la kam banci, maka i bicara gelarndu si Tuwan Banuwa Kuling.”

“Dage aku, si kai gelarku nini?” nina si nguda diberu.” “Kam kepe singuda ame, i pupus nandendu ras bapandu, gelarndu Siberu Dibata Kacih-Kacih, kam pagi man pendungi tabas, erkuta kam i Kesunduten.”

“Dage, aku, si kai gelarku nini?” nina singuda dilaki. “Kam keoe singuda dilaki i pupus nandendu ras bapandu.” Nina datuk Rubiya Gande.

“E, gelarndu si Tuwan Rumah Hine-Hine, di lit pagin bekas bapandu marbar, kam me ngkundulisa, di lit kitang perpinemen bapandu kam nge perpinemisa, di lit pinggan perpanganen bapandu kam nge perpanganisa, di metedeh pagi ate seninandu, metedeh pagi ate turangndu, i bas kam nge pagi perpulung-pulungen.”

E, enggom ergelar kemu nini si lima, nini Datuk Rubiya Gande.

BERSAMBUNG ke Bagian 6

Cerita Rakyat Karo " RAJA KETENGAHEN " Bagian 4

2016-06-28T18:59:00.001+07:00

CERITA RAKYAT KARO " RAJA KETENGAHEN "

BAGIAN - 4

“E, di tuhung ko manuk-manuk si nanggur dawa-dawa, kabang mengko lumayang lumuyung, mulih me ko cinep ku lantaren benang pengkiren.”

E, kabang me manuk lumayang lumuyung cinep me ku lantaren benang pengkiren.

“E, tuktukken ka tubim, gurpasken kabengmu, kaisken nahem!”

E, i tuktukkenna tubina, bagi sora gerantung si lima-lima, i gurpaskenna kabengna bagi sora gendang i embusken sarune, i kaiskenna nahena, bagi langkah si lima-lima ranakken si pitu-pitu.

E, landek kalak i rumah, lit ngelandekken capah, lit ngelandekken kudin. Puwas ate kalak landek, “E, kabang mengko lumayang lumuyung,cinep ku tanduk lesung nutukken tubi nge ngurpasken kabeng.” E, landek me kalak i lesung, lit ngelandekken ndiru, lit ngelandekken lalu. E puwas me ate kalak landek i lesung, kabang me iya ku pintu lawangen, i tuktukkenna kang tubina, bagi gerantung si lima-lima i gurpaskenna ka kabengna, bagi sora gendang i embusken sarune. E, landek me kalak, si lawes ku juma ngelandekken cuwan, si lawes ku lau ngelandekken kuran.

Puwas me ate kalak landek, e kabang me manuk-manuk lumayang lumuyung, kabang ku taneh Purba.

E, cinep me iya i pintu lawang taneh Purba, nutukken tubina, nggurpasken kabengna. E, landek kalak, si lawes ku juma ngelandekken tenggala, si lawes ngeriya, ngelandekken kandi-kandi. E, ndarat me anak raja nta Tuwan Dibata ni Purba, tergelar beru Sindar Mata ni ari.

“Nterem kal me kap jelma taneh Purba enda parang mbelin, anak perana, tuwa-tuwa, singuda-nguda, danak-danak, ise kal ngasup muwat manuk-manuk si nanggur dawa-dawa, bana kal aku, la ertukur, nateku.”

E, lit me si ngeltep, lit me si menter. Di manuk-manuk si nanggur dawa-dawa bagi sumpamana manuk si ratah bulung-bulung, adikin i benter, reh dehernang, adikin i eltep reh teruhna, lalap la dat manuk si nanggur dawa-dawa.

E, mulih anak raja ku rumah, kabang manuk-manuk arah bobona lumayang lumuyung, cinep i tanduk rumah raja nta Tuwan Dibata ni Purba.

E, tuktukkena kang tubina, bagi gerantung si lima-lima, i gurpaskenna ka kabengna bagi sora gendang i embusken sarune, i kaiskenna ka nahena bagi langkah si siwah-siwah ranakken sepuluhsada, maka ersada tendi ku rumah.

E, ndarat me anak raja nta i rumah nari, i babana bayunna lolo-lolo ku ture, i landekkenna manuk-manuk si nanggur dawa-dawa nuktukken tubi, nggurpasken kabeng.

“Ola i landekken kam ame, manuk-manuk si nanggur dawa-dawa nutukken tubi, nggurpasken kabeng, ola kam denggo adon, e me kap si ojar-ojari, e me kap suruh-suruhen guru simbaso bolon.”

E, kabang manuk-manuk nge ku Ketengahen. E, tande empat berngi, i suruh Raja Ketengahen laneng erdeteng-deteng arah tengah awang-awang ku taneh Purba. E, kabang laneng erdeteng=deteng arah tengah awang-awang ku taneh Purba, i cinepina ayo raja. I tepis raja laneng cinep ibas ayona, kabang ku ayo kemberahen, i tepis kemberahen laneng si nibas ayona, ndabuh pudun empat uwaluh ku ampuna. “Pudun kutera nge enda ndiya, raja nami?, ku tepisken ndai laneng cinep ibas ayoku, ndabuh pudun si empat si uwaluh ku ampunku!”

“E, dibage kepeken, kemberahen, reh me raja si langlang kinirajanna, reh me pande si langlang kinipandenna, reh me guru si langlang kinigurunna, kemberahen!”

BERSAMBUNG ke Bagian 5

Cerita Rakyat Karo " RAJA KETENGAHEN " Bagian 3

2016-06-28T18:56:00.001+07:00

CERITA RAKYAT KARO " RAJA KETENGAHEN "

BAGIAN - 3

E, lawes anak raja Ketengahen nangkih uruk gugung Sibolangit, mentas perlanja telu kalak.

“Silih! Lawes kuja kam ena?” nina Raja Ketengahen. “Kami, lawesen kahe,silih!” nina perlanja telu kalak. “Kuterang perkahenduena, silih?” nina Raja Ketengahen, “Di kalak e ku idah bage, ngkahe aku nina, i persanna lanjanna, i tempina bekalna, i bentingkenna mudalna, ena, kahe aku nindu, lanjanndu oe kuidah la lit i persan kam, ku beligai uwari telu puluh, kutitik desa uwalah, ku oge mamis lima, katika telu-telu, amin bekalndu pe la lit i tempi kam, mudalndu pe la i bentingken kam.”

“E, labo lepak kata uwari oge kam e silih, pengidah matandu pe la lepak. Enggom ndube beras i sukati, enggom ndube mudal i peserser, enggom ndube lanjan i peserser, iban mentas ndube anak raja nta Tuwan Dibata ni Purba, tergelar siberu Sindar mata ni ari, rupa nam payo bagi matawari sigalah, perdempakenna bagi bintang tala tumala, ayona bagi suwasa i bendul, jari-jarina bagi beru lo kaheken, ipenna bagi buwah arum seding gantung, bukna bagi uwas riman nguda. E, erdalin me iya ndube i taneh Purba, i odak-odakkenna pengodakna lima puluh kurang duwa. E, sumengging ku kawes me kami, sumengging ku kemuhen. E piyah erdalin kami la nai gejapken kami nading bana lanjan si enggo i peserser ndube, nading bana mudal si enggo i peserser ndube, nading bana beras si enggo i sukati ndube, edi, la kin kepe lapak silih, kata si turi-turiken kam e.”

Nina Raja Ketengahen kata perlanja telu kalak, “Mulih kam ku taneh Purba. Aku me pagi nagtur bekalndu, aku ngadang mudalndu, datken pagi jenda lanjanndu, baba cincin ku enda sariwawang, dabuhken ko te kari ku pelabuhen anak nu raja Tuwan Dibata ni Purba, tergelar siberu Dayang Sindar mata ni ari.”

E, mulih me perlanja telu kalak ku taneh Purba. E, i dabuhkenna cincin sarirawang ku pelabuhen anak nu raja.

Gelap mata ni ari, erpelabuh me anak nu raja, i talangina tutup pelabuhenna, las rendihawa! Mbiyar siberu Dayang Sindar mata ni ari, lompat iya ku rumah, i dahina nandena kemberahen raja nta Tuwan Dibata ni Purba, guru simbaso Bunga mbulu.

“Kugang kam e ame?” nina nandena. “So pe ku akap ndai sahun pelabuhenndu i pelabuhi kam, enggo kam reh ku rumah!” “Mbiyar aku ndai nina!” nina, “ku talangi ndai tutup pelabuhenku, las rendihawa. E, lompat aku lawes ku rumah ndahi kam.” “La lit kebiyaren ame, i taneh Purba enda. Tatang tendang e, ola pelabuhen la i pelabuhi, ola denggo tombang.”

E, tatanginam tendang nina, i talangina tutup pelabuhenna. E, las sitengah taneh Purba. E, cekuhna kubas, nina pahe kenca sendeng cincin sarirawang ibas tuduh-tuduh anak raja nta Tuwan Dibata ni Purba, siberu Sindar Mata ni ari. Em kap man tendangna lawes ku rumah ndahi nandena kemberahen Tuwan Dibata ni Purba, guru simbaso Bunga mbulu. “Enda me kap si ndai nande” nina anak nu raja kata nandena. “Di bage kin kepe ame. Ku beligai kuidah uwari telu puluh, ku titik desa uwaluh, ku oge mamis lima, katika telu –telu.”

“Reh me kap raja si langlang kinirajanna, reh kap pande si langlang kinipandenna,, reh me kap guru si langlang kinigurunna.”

E, enggo sung bage, nina,”O nande!” nina Raja Ketengahen kata nandena. “I buwat kal bangku beras nande, beras page si arang, narang gerek-gerek la mehuli, beras page si senangsang, nangsang ken nipi sambar, nasangken banga kelesa, i buwat bangku beras, beras page si pande leket, beras page si sampe tuwah, maka leket anak dilaki diberu,nterem, maka leket kinibayaken kinituwah mbuewe.”

E, i buwat me beras, i sukati nge pitu tumba, pitu gantang, pitu ncupak, pitu layap, pitu ngkelih, pitu njemput, pitu ngkebuwah. E, tutu melumat, nina, i seinaken empat berngi, e jadikennam jadi manuk si cabur bintang, i bahannam kabengnam ngkepasken banga kelesa, i bahannam nahena ernaheken si kaiskais, ngkaisken nipi sambar, ersilu-siluken piso penabung, i bahanna takalna, ertakal-takal tenggeling. E, i jadikenna kerahungna, erkerahungken si dolok genting, ermataken kandu na saga, marberembingken si bunga-bunga, martubiken kalakati penjahat keling. E, merbitukaken si dole denda (tali dunda), marpusuhken jantung galuh sitabar, merateken si pungga dalit, marpeguken si bungke rimbang, marikurken si kepas dingding, ngkepasi banga kelesa, ngkepasi nipi sambar. E, i bubuh me kesahna. E jadi manuk manuk si cabur bintang.

“De tuhu mengko manuk-manuk si cabur bintang. Kabang mengko lumayang, kabang lumuyung cinep ku lantaren benang pengkiren, tuktukken tubim, gurpasken kabengmu, kaisken nahem!”

E, i tuktukkenna tubina bagi sora gerantung si lima-lima, i gurpaskenna kabengna, bagi sora gendang, i embusken sarene, i kaiskenna nahena bagi langkah si telu-telu, ranakken si lima-lima.

E, landek kalak i rumah, lit si ngelandekken busan, lit si ngelandekken ukat. E, puwas ate kalak landek, i tabaskenna tabas pemanggil, mulih manuk ku rumah. I semaken empat berngi, nulpatken nipi sambar, e jadi manuk-manuk si nanggur dawa-dawa.

BERSAMBUNG ke Bagian 4

Cerita Rakyat Karo " RAJA KETENGAHEN " Bagian 2

2016-06-28T18:52:00.001+07:00

CERITA RAKYAT KARO " RAJA KETENGAHEN "

BAGIAN - 2

Lawes me anak Raja Dibata, tergelar Siberu Pulen Bangsu si erbajuken kajang na kejung, si ruwisken sutera kolam ndumayung, bercincin sarirawang, jari-jarina berulokaheken, i penna bagi buwah arum seding, bukna bagi uwas riman nguda, rupana bagi matawari sigalah, perdempakenna bagi bintang bintang tala-tumala, kurumna bagi suwasa i beudul. E, lawes me iya kudatas, ku inganna. Tangis anak Raja Ketengahen i tadingkenna.

“Ola kam tangis bapa,” nina Fatuk Rubiya Gande, “I pelajari gelah erlajar guru, ngoge pustaka idatas pantangen pitu n tingkat bilang-bilangen, i pelajari gelah erlajar pantas, i rapati gelah erlajar pande,” nina.
“Di enggo kam pagi ngasup nitipken piso enggo tubing, ngarkari nipi kalak enggo sambar, di ngasup me kam pagi rukum kalak rubat i tengah jabuna, rubati nakan melawen tasak, ulin bage pe, enterem nge kempu ngku,” nina, “Danci kam milihi” nina.
“Kempu ngku anak Raja Dibata ni Purba, kempu ngku anak Raja Dibata Aguni, anak Raja Dibata Daksina, Narita, kempu ngku anak Raja Dibata Utara, kempu ngku anak Raja Dibata Irisan.”

E, i suruh Datuk me karah-karahen lima puluh kurang duwa, ngindang-ngindangi anak raja nta Tuwan di Aguni. E, berkat me karah-karahen lima puluh kurang duwa ngindang-ngindangi anak raja nta. Seh me karah-karahen itengah dalin, i bahan anak raja Tuwan di Aguni pe kunu, ndube meligai uwari teluh puluh, tertitik desa uwaluh, mamis silima, katika sitelu.

“Aku nande, di ku beligai uwari telu puluh, di ku titik desa uwaluh, di ku oge mamis lima, katika telu, enam reh tamu itengah dalin man dakanen me nakan pitu garun, man tasaken me guie pitu bohan, man pepulung me pola pitu terbung.”

E, nggom tasak nakan, tasak bengkau, pulung pola, seh me karah-karahen lima puluh kurang duwa i taneh raja Tuwan di Aguni. E, bere man me karah-karahen lima puluh kurang duwa.

Enggo besur man, besur minem, “kade baritam?” bage nina raja Tuwan di Aguni kata karah-karahen lima puluh kurang duwa.

“Nami, rajanami, nami suruh-suruhen raja nami, suruh-suruhen Datuk Rubiya Gande ras Raja Ketengahen, nina Raja Ketengahen,”Metuwa kal me jenda nande, la nai kesahna nutu page ku lesung, la nai kesahna njujung kuran ku lau, mbelin me impalku nina, i pupus mama ras mami i taneh raja Tuwan di Aguni,” nina Raja Ketengahen, rajanami, “E nge maka kami kujenda.”

“Mbelin nge tuhu jenda impalna,” nina, “I pupus kami ras mamina. Aku seya man sungkunen, mamina seya man sungkunen, si danak-danak nge man arihen.”

E, meganjang me matawari, ndarat me anak raja nta ibas peti besi nari. E, kundul me iya man belo me iya, teridah kumolun kudatas kuteruh campah belona ibas teldanna, jari-jarina beru lo kaheken, rupana bagi matawari sigalah, bukna bagi uwas riman nguda, ipenna bagi buwah arum seding gantung, tergelar siberu Dayang Mehuli Katana, susur me iya idatas nari kuteruh, erdawit ciken i ciken kenna, ban sibeliden nahena.

Mulih karah-karahen ku Ketengahen, la nai surung cakap i cakapken. Seh ku taneh Ketengahen, “Kadena beritana?” nina Datuk Rubiya Gande ras Raja Ketengahen. “Baritanami, rajanami, la nai surung cakap i cakapkem ban sibeliden nahena anak raja nta Tuwan di Aguni tergelar siberu Dayang Mehuli Katana.”

BERSAMBUNG ke Bagian 3

Cerita Rakyat Karo " RAJA KETENGAHEN " Bagian 1

2016-06-28T18:47:00.002+07:00

CERITA RAKYAT KARO " RAJA KETENGAHEN "

BAGIAN - 1

Erlajar guru Raja Ketengahen, i pantek ka pantangen sendi gading pitu n tingkat bilang-bilangen.

E, erlajar guru me iya, ngoge surat idas pantangen

E, pantek ciger matawari, ki lau anak Raja Dibata, naling-naling me iya, nina naling-naling,”Keri giya kata kinigurun, kata kinipanden, beluh kita giya nitipken piso tubing, ngarkari nipi sambar, kita ka giya ndiya rukum-rukum kalak rubat i tengah jabuna, rubati nakan melawen tasak, kai gunana, kai nanamna, di la lit ingan beras ergantang-gantang, di la lit ingan sira erlayap-layap, la lit ingan belo erlambar-lambar, buwah mayang erkibul-kibul, gamber kibul-kibul”.

E, tangis anak nini, Raja Ketengahen, susur iya i datas nari kuteruh, lawes iya nangkih uruk-uruk gugung Sibolangit, serpang dalin ku barat, ku timur, ku teba, ku jawi.

Pantek me ciger matawari, “A, so pe ka me reh kempu ku man ku rumah,” nate ninina, Datuk Rubiya Gande, i suruhna karah-karahen lima puluh kurang duwa. Berkat karah-karahen lima puluh kurang duwa, ndapetsa la idas pantangen. I daramina, jumpa iya idatas uruk gugung Sibolangit, serpang ku barat, ku timur, serpang ku teba, ku jawi.

“Man kita ku rumah, Raja ngku, enggo nakan i sumpitken, enggo pola i kitangken.”

E, man me iya ku rumah. Enggo besur man, besur minem. “Bapa! Kai kal nge lesek atendu?” nina ninina, Datuk Rubiya Gande. “Lampas ndube nakan i sumpitken, melawen i pan kam, lampas nge pola i kitangken, melawen inem kam.” “Kai pe seya nini! I ban ku lau ndube anak Raja Dibata, isaling-salingna kal aku idatas pantangen erlajar guru, ngoge surat.” “Di eng kepeken bapa, banci nge ku panggil.” E, tabaskenna tabas pemanggil. E reh anak Raja Dibata.

“Kai pe dahin man dahin nini?” nina anak Raja Dibata kata ninina Datuk Rubiya Gande.

“Kai pe seya ame! Lit kam man sungkunen, i saling-saling kam kune rebih kempu ngku iya erlajar guru ngoge pustaka idas pantangen sendi gading pitu n tingkat bilang-bilangen.”

“E, tuhu nge kempundu i saling-saling kami nini. I ban tengahna pantek ciger matawari ku lau kami rebih ras kempundu siberu Dayang, ningkami naling-naling kempundu,”I keriken giya kata kinigurun, i keriken giya kata kinipanden, beluh kita giya ndiya nitipken piso tubing, beluh kita giya ndiya ngarkari nipi enggo sambar, kita giya rukum kalak itengah jabuna rubati nakan melawen tasak, kai gunana, kai nanamna, di la lit ingan beras ergantang-gantang, sira erlayap-layap, gamber kibul-kibul, buwah mayang erkibul-kibul, belo erlambar-lambar, bagem ningkami nini naling-naling kempundu erlajar guru, ngoge surat idatas pantangen.”

“E kam me giya ame rukat nakan panganen kempu ngku, ngkapuri belo pangan kempu ngku, ngkimbangi amak pedemen kempu ngku.”

“Nini, di ngukat nakan, di ngkapuri belo, de ngkimbangi amak man pedemen kempundu Raja Ketengahen, la kap aku meparas, la kap metunggung, de ngkapuri belo, de ngukat nakan, de ngkimbangi aman man pedemen kempundu Raja Ketengahen, meparasna meparas aku min tuhu ngelegi pola man inemen kempundu, man si mere biyang kempundu, e maka aku meparas, e nge maka aku metunggung.

BERSAMBUNG ke Bagian 2

Guru Patimpus - Pendiri Kota Medan

2016-06-26T12:45:00.001+07:00

GURU PATIMPUS

Pendiri Kota Medan

Guru Pa Timpus dilahirkan di Aji Jahe salah satu kampung di Taneh Karo Simalem yang sejuk, dingin, nyaman dengan angin pegunungannya. Ia menikah di Batu Karang dengan beru Bangun, mendirikan kampung di Perbaji dan memiliki seorang anak laki-laki bernama Bagelit. Guru Pa Timpus bertubuh kekar, tinggi, gagah, dan berjiwa patriotik seperti seorang panglima. Ia juga seorang Guru, yang dalam bahasa Karo berarti seorang ahli dalam berbagai ilmu pengetahuan, ilmu obat-obatan, ilmu gaib, dan memiliki kesaktian, namun Ia-nya berjiwa penuh kemanusiaan lemah lembut dalam bertutur kata, mempunyai karakteristik yang simpatik, berwibawa, berjiwa besar dan pemberani.

Dengan menuruni lembah-lembah yang penuh mistis, hutan semak belukar dan binatang buas, ia mendaki lembah-lembah yang terjal dan curam, dengan menelusuri aliran Lau Petani menuju ke satu bandar di hilir sungai Deli untuk suatu tujuan yaitu mencoba ilmu kesaktiannya dan belajar pada Datuk Kota Bangun seorang Guru dan Ulama besar yang terkenal pada masa itu.

Setelah beberapa lama bermukim ia kawin dengan seorang putri dari pulau Brayan keturunan anak panglima Deli, bermarga Tarigan dan sekitar tahun 1590 M, ia membuka dan mendirikan kampung dipertemuan dua buah sungai Deli dan Babura yang dinamainya dengan ‘Medan’, dari perkawinannya ini lahirlah salah seorang putra yang diberinya nama Hafis Muda, dari sinilah silsilah keturunan Datuk Wajir Urung 12 Kuta (Datuk Hamparan Perak), keturunan terakhir dari Generasi ke-XV adalah Datuk Adil Freddy Haberham, SE sebagai salah seorang Datuk 4 suku dikesultanan Deli.

Guru Pa Timpus telah menjadi milik Masyarakat Kota Medan. Ia berjiwa Nasionalis dibuktikan dengan tidak dicantumkannya Marga Sembiring Pelawi pada Dirinya dan Anak Cucu Keturunannya.

Pemko Medan telah memberikan penghargaan terhadap Guru Pa Timpus, yaitu dengan ditetapkannya Hari Jadi Kota Medan pada tanggal 1 Juli 1590 dan kemudian memberikan nama kepada salah satu jalan di petisah dengan nama jalan Guru Pa Timpus.

Apa yang telah dilakukan Guru Pa Timpus adalah merupakan salah satu sejarah bangsa Indonesia yang tak ternilai harganya, corak dan peninggalan sejarahnya telah memberikan warna khas kepada kebudayaan bangsa, serta hasil pembangunan yang mengandung nilai perjuangan, kepeloporan yang merupakan kebanggaan nasional ini, perlu terus digali dan dilestarikan, dipelihara, serta dibina untuk memupuk semangat perjuangan dan cinta tanah air. Perencanaan Pembangunan disemua tingkatan haruslah diperhatikan pelestariannya, apalagi pelestarian bangunan benda yang mengandung nilai sejarah bertitik tolak dari keagungan Jiwa Guru Pa Timpus.

Adapun sejarah perjalanan singkat Guru Patimpus diatas dikutip dari langsung dari sumber yang layak dipercaya, yaitu Proposal Pembangunan Monumen Guru Patimpus.

Sifat Merga Si Lima Suku Karo

2016-06-20T21:56:00.001+07:00

Enda me sifat-sifat Merga Si Lima, i andingken ras jari-jari tan :

1. Karo-Karo
Jari kambal-kambal (Ibu Jari). Biak raja kapna bana, raja kin nge,Nggit usur ngerabi tapi kalak ban na sierdahinna,Perampus,merawa,la tertogan,kaipe sungkun atena ia. Emaka adi la beluh mujiken sa togan lah gelah ula. adi beluh mujikensa, kam jago na ningen maka keri pe juma na labo kapna dalih., emaka keri enggo taneh karo enda man anak beruna, mbiar dingen mehamat kal erkalimbubu makana berena juma man kalimbubuna pe ,je nari kalimbubu pe mbiar kal man anak beruna karo mergana, adi la kin pesukuti ia banci bubar runggun e.

2. Ginting
Jari Tuduh-Tuduh (Jari Telunjuk). Biak panglima,lalit kebiaren na adi enggo kapna bujur. Mesera mbuat rawana tapi adi enggo kenca ia merawa banci runtuh banna doni enda. Ia pang nge usur arah lebe, pang arah tengah, pang arah pudi. Erbentingken kibul pe nggit nge ia adi sangana ia anakberu kalak,.

3. Tarigan
Jari Tengah. Makana ingan na jari tengah,Jelmana mejile rupana,megersing umumna,maka entah payo kin nge ia nai i negeri yunan nari.e.Medate,ngerana, bagi lemuk-lemuk laneng, beluh nampilken bana, pangen nge ia mundur asangken sikitiken ukur,beluh ngerana maka kataken kalak usur perbual,mbelang perdalanen na,kuja pe uwe-uwena ,seri idahna kuja pe, Emaka ia umum na ngena ate kalak,menukah kapna empo amin la gia lit bas ia, emaka lupa ia mantek.

4. Peranginangin
Jari Manis. Ia me si bas jari manis, dahin na erjile-jile,labo tan na enca tamana emas, ipen na pe tamana emas,sorana rende mijele emaka mbue jadi perkolong-kolong, penyanyi. Mejile karena suka bersolek, Nen ndu min uga girik lau bentayan ningen i batukarang , uga jengok singalur lau ah.

5. Sembiring
Jari Kidel-Kidel (Jari Kelingking). Dehkam ia me sipudi na reh ku karo enda, maka labo mantek, umum na ia jadi anak beru,Emaka ia me ban ingan na bas kelingking,singuda, maka mekelek percemburu na, per ate-ate, man tami-tamin,emaka ia pas me bagi perik piso surit, sagak kalak ingani na,tapi teh kalak tempa ia empuna.cuba endeken lagu piso surit ciptaen jaga depari. Emaka ia nge si ngkidel manuk e, sebab tehna bana la merupa maka ban mbue sen na maka te kalak ngena, piah ia pe siempon.

enda me ia kira-kira sifat merga silima umumna, tapi enda labo banci jadi patoken, sekedar-sekedarna saja. :)

Bujur Ras Mejuah-Juah.