BORNEO.COM

Biau Pengabang(kus jaku iban,eastwood valley,miri,2010)

2011-02-18T23:25:00.001+08:00

Sa, dua, tiga, empat, lima, enam, tuuuuuujuh!
Enda ku lesi laya pambu, miau ka selanjau ijau manuk kelabu beiku layu betunggang labang,
Enda ku lesi laya sulai miau ka selanjau ijau manuk tawai bedunggul silai ngerunjung manang,
Ooooohhhhaaaa….Laban aku tu ukai mungkal ukai nanjal,
Aku tu endang niti endang nali,
Baka ijok tampung penduk,
Baka rutan tampung danan,
Baka ira tampung lemba,
Baka wi tampung tali..
Pecah periuk tanah ganti periuk tani,
Parai orang ka tuai, ganti tubuh kami,
Pambu orang ka dulu, ganti kami ka dudi…
Aku ga nampung pantang Belang Pinggang ke belang nyembayang punggung,
Nunda adat Surong Kempat ke berarat muting jelatung,
Nunda penti Buie Nasie datai ari tisi lambur gunung,
Aku tu ga nampung adat niang Rekaya dana,
Ka sidi di jari tunjuk dua, disema ka kitai bansa dayak,
Dikelandik ka kitai bansa siru bebasa di mua bala pengabang…
Oooooohaaaaa....
Lama kaki aku udah bediri ba perdani anchau tikai,
Miau ka selanjau ijau manuk tawai,
Tang sayau nyawa ku enda nekis nyaris ingar rengai-rengai,
Enda tetunda ka nyawa unggal kitai Edward Kecendai…
Enggi ia dini nya ulih tunda, endang terubah kitai dayak,
Tangkap karan tali dawai, tiap pagi nyelinting lemai,
Ka bemunyi rengai-rengai nusui ka kitai di rumah panjai atur pemansang..
Lama udah kaki ku bediri ba kerembai tikai anyam dua,
Miau ka selanjau ijau manuk Banda…
Tang sayau terinting puting gensera nyawa aku enda nekis
nyaris inggar kela-kela…
Enda munyi nyawa Aya kitai Thomas Teggung Laka,
Enggi ia dini nya ulih tunda, endang tiap pagi nyelinting ari,
Enda belepa tangkap karan tali wayar,
Bejako ari radio, nusui rita meri penerang…
Ooooooohhaaaaaa........
Nya alai nyau bepeluh aku di tubuh pati punggung,
Miauka selanjau ijau manuk tuntung,
Nunga kita ka kemumuk duduk betugung,
Baruh perentang rumah chundung…
Tang ka tu, semadi aku deka nunda biau niang Rentap,
Apai Tambung seduai Linggir laki Amung,
Enti orang nya, anang main-main,
Ati endang berani mutus kepung,
Gagah di pah pati punggung,
Endang diinang Kumang seduai Lulung,
Di kemata ka Laja seduai Sanggul Labung…
Nya alai bepantap munyi ka nesap payan betong,
Betumbuk munyi ka nyuluk buah embawang kachung…
Kati ko enda baka nya,
Laban belaban enggau Sultan Tuan Linsung,
Nan ka kuta tuchung Sadduk remawang…
Oooohhhhaaaaaaaaaaa..........
Diatu baru aku gaga sambil gagit,
Nyingkang ka bulang kaki cawit,
Miau kita enggau selanjau ijau manuk Kuncit,
Aku ga miau semang kita ari belakang mulai ka tumbit,
Ngambi ka yang tinggi kita enda kudi ngeransi mimit,
Laban aku tu ukai biau sengapa, biau pia,
Tu ga nunda biau Apai Babit Bekait, Bujang Beruang Langit,
Ancung Selung Bebelit dikumbai orang Sapit Raja Petara…
Ooohhaaaaaa.......
Kinda-kinda jari kiba tunjuk antu,
Aku ka miau kita enggau selanjau ijau manuk Sidu,
Miau kita ti duduk kemumuk duduk nungu,
Meda mua kita tak semuka bulu seribu,
Miau kita ke tuai di panah perintah lumur satu,
Dikena aku miau nuan nyadi YB madi menteri.....
Datai sampal diri melaki bini.......
Ooohhaaaaaaaa......
Meda pekaian seduai tak melan-melan cukup lagu,
Meda tancut manah cerut umba baju batik biru,
Meda pisin nyau licin manah sugu,
Jengkuan tak melan-melan tangan jam ka segenda pukul satu…
Ukai enda kita endang disadang aku ngembuan
taring belalang, tanduk engkerudu,
Nya ga endang pengaruh ka lumur satu
dikena ngulu ngiring orang..
Ooohaaaaa......
Nya alai, nyau lelak aku di selepak ujung jari,
Miau kita enggau selanjau ijau manuk Lelaki,
Nunga kita ka kemumuk duduk bebandi,
Ba kerembai tikai anyam bediri,
Meda pakaian kita tak melan-melan udu rami,
Meda setail baru putung tukang China Miri,
Meda jangkuan tanggam jam tali luji…
Nya alai, manuk tu dikena aku miau semoa bala kita ka laki,
Enti udah dibiau aku enggau selanjau ijau manuk laki tu,
pagila lusa, ka dudi hari,
Balat amat kita bebeli ka komputer enggau injin api,
Nya alai kelita nya nyau enda dipeguna,
Lampu gis nyau dibuai ambis,
Kati ko enda bakanya, laban tanda kitai udah merdeka,
Baru menira segenda lambang burung Kenyalang…
Naka penyuma aku nelenga ka rasa dabung belabu,
Miau kita enggau selanjau ijau manuk Kelabu,
Nunga kita ka kemumuk duduk gempuru,
Ba kerembai Tikai sapar rampu…
Nya alai, manuk tu kena aku miau kita ti dara enggau
semua bala kaban indu,
Meda pakaian kita tak melan-melan cukup ngaku,
Meda buk panjai kita tak lepai-lepai mulai ka dagu,
Mua tampak kita nyau radak-radak udu burak baka telu,
Umba baju kita manah lagu setail baru bedabung tisi
ngambi bungai daun kerampu…
Kada enda kita tu ke disema orang ka tuai sebaka
enggau Endu Kumang dara Satu, indai sida Liu Panggau Dulang…

Lama kaki aku udah bediri kasak-kasak,
Miau ka selanjau ijau manuk Bejalak,
Nunga kita ka kemumuk duduk betapak,
Nya alai ka tu, nyangka kita ka
Mansang nandang, mansang ngabang,
Mansang nandai, mansang makai,
Salah kenyap jai pengangkat,
Salah tenung jai burung,
Nya alai, manuk tu meh alai ia telempai, alai ia tepanggai,
Alai ia tepantup, alai ia tetekup,
Alai ia padam, alai ia tengelam,
Awak ka semua kitai gerai ko Sempandai,
Nadai apa ko petara,
Gayu ko Sentuku…
OOooohhhaa.. Oooohhhhhaaaa

Digaga: Pengajar Medan ak Radin
Diseruri:Pengajar Banabas AK Demang

Titika Singkang Orang

2011-02-18T23:13:00.003+08:00

Selamat lemai semua. Kati baka pengawa kita ba minggu ke udah? Ngarapka bala kitai semua mujur dalam sebarang pengawa ke dikereja, baik ke nya kita ke bekereja perintah,bekereja Kediri empu,bumai betupi,bisnis, kereja enggau kompeni enggau sebarang pengawa ke bukai.

Nyau ngenang kereja, enda milih nama utai dikereja, enti kitai amat-amat ngemeran ka iya sigi ulih mai pemujur ngagai kitai. Dipeda mata Tataikenyalang, menyadi kitai bansa Cina. Nanam sayur aja pan ulih kena sida meli rumah batu sebelah pasar. Nadai meda sida beumai baka kitai bansa, enda ga sida nangkal mujur ga. Pia mega bisi ga sida bepanggai pengidup semina nyual ikan aja sebelah makit dia, nyamai ga pengidup peda aku(jauh nyamai agi ari bala ke gawa perintah,begaji ninting bulan). Alit ati meda, enda ibuh kenang agi pengawa ke bukai.

Siti ari lalau pendiau bala menyadi kitai tu tau ditunda kita iya nya, pengeliat,pengeransing ati sida ngereja pengawa, baikka sida nyadi tuai(bos) tauka nyadi kuli,sida sigi ngereja pengawa sida enggau ransing. Nyemaka banding,enti sida gawa ba kedai kopi, sida ukai semina ngarapka gaji bulan aja. Tang sida lebih agi liat ati deka belajar bakani deka muka kedai kopi kediri empu jemah ila.

Enti sida kereja ba kedai mekinik ngaga moto tauka kereta, sida gawa enggau angkun sereta talukka padah tukey,tau ingat ka kita kira sepuluh taun ti deka datai ila iya ke bekuli nya tadi tau betukar iya. Enda nyadi kuli agi, tang nyau nyadi tukey. Rugi kitai enti enda nunda ulah pendiau gaya pengidup bansa bukai. Alau bkih angkat kitai nunda singkang pemansang bekau abi kaki bansa bukai. ENTI ENDA DIATU KEMAYA?

LANSA KENANG(PENATAI PEMISI)

2011-02-16T19:35:00.004+08:00

Selamat betemu baru ngagai bala temuai, nama berita kita ? Ni maya umai taun dih? Ngarap ka bala kita mujur dalam semua pengawa mih. Kitai sama nemu diatu(bulan 1 enggau bulan 2) iya nya musin pengujan. Kadang – kadang sampai beminggu nadai meda mata panas. Jaga manah pengerai anak kita mayuh penyakit deka datai maya musin pengujan tu
Ni maya anak buah lada dih? Bala ke dulu digalau bungai iya suba nyau udah bisi tau dipilh buah mansau diatu pelaba aku. Au, nyau ngenang maya ke milih buah lada(ketegal ke bedau serap mansau),bisi ngerimbas pending Tatatikenyalang bala ke ngerumban lada mansau ,bisi nya bangat enda teantika buah lada mansau. Bisi enda nyadi ba menua kita, kini. Agi pejam tudah buah lada udah digumpul. Pia mega milih buah lada nadai sampai tiga empat kali. Ama ya bisi ngenua kali ya mih nya. Sayau tudah buah lada, uji ti anti mansau ke agi enda ke bisi asil. Buah lada ti empai entu mansau ukainya bisi pemerat dih. Arinya enti asil ke patut sampai bebelas ribu ringgit(tambah mega pun ke enda tentu mayuh) ti lada gaga bakanya mina mansutka asil lima enam ribu aja setaun.
Lada ukai ka enda beri makai, jaga ari kulat enggau indu utai. Ukai mudah-mudah rega pika(jaku madahka baja ba sesebengkah endur) enggau rachun diatu. Enti lada bangat nadai rega nika kena meli rachun enggau baja? Ni kena kitai empu agi. Enti bakatu gaya kitai ngintu lada, nyadi asil ari buah lada kitai nya tadi deka kusut ari taun siti ngagai taun siti.
Nyau ngenang balaka ngintu lada,ba peda aku jarang amat deka betanya ngagai pangan diri ke udah mujur,tebal agi ta majak kediri. Jauh ka betanya nagagai bansa bukai, nama agi ti begigaka penemu sebelah internet dih, jauh ko pawie.
Ahkaidai,nyau jauh endar udah kenang aku enggau kita. Nya mih sekeda ari gaya ulah pengidup enggau pendiau kitai bansa. Taja pia pan orang bukai, tang kitai ken emu agi, enchelak agi anang ga nunda pengawa orang ke nyelaie. Bah, jaku randau enda alah tunda , mupuk dulu aku. Ila kitai betemu baru, ngenang utai bukai( manah agi ngena leka jaku ‘utai’ ari ngena leka jaku ‘pekara’ ).

Juluk Ati

2011-02-16T08:29:00.003+08:00

Nama berita bala temuai semua? Enda berasai kitai nyau udah masuk ngagai taun 2011, pia mega enda berasai nyau deka abis bulan satu(Januari). Nama juluk ati taun tu? Kati baka juluk ati 2010 dulu suba bisi ulih japai? Ah dah, baik ulih japai tauka enda juluk ati taun nyin kemari pengidup tetap diteruska. Nadai ko enggau mih, teruska pengeliat ati taun nyin suba awakka juluk ati taun nyin kemari ulih japai jemah ila. Simpulka ngena jaku pandak, nadai orang bukai ulih nulung kitai enti enda ari pengeliat enggau pengeransing diri empu.
Nyau ngenang juluk ati, dia Tataikenyalang berasai temegah ati laban ti meda sekeda kitai bansa udah mujur dalam pengidup ba taun ke udah, taja juluk ati sida enda alah japai enggau seratus persen(laban kitai mensia enda kala puas) tang jangka aku nyau deka semua pengawa sida udah mujur magang.
Siku ari sida nya iyanya Mr.Robert Slyvester, kebun sawit iya nyau udah mansutka asil, ladang chapi enggau kambin pan udah ditumbuhka iya. Iya tu mega siku ari sub-kontraktor ti jelai nama, pia mega iya udah niri ka sarang burung lelayang(walit) lalu udah bejadi beberapa iti pegung ikan. Semua bisnis iya udah mansutka asil memagang.Tataikenyalang ngarapka iya ulih mujur dalam pengawa bisnis. Ta asai ka enda arap lebuhka ngenang penatai pemisi tudah kaban tu. Nya mih,bepun ari pengeransing enggau pengeliat ati iya ulih mujur niri negi ka semua pemisi iya nya tadi. Penanggul enggau penekul ukai nadai ngipa kaki lebuh iya deka ngemajuka diri,tang semua nya semina penguji aja kenu ko iya.
Akaidai, nyau nyeregu isi ngenang penatai pemisi orang. Bah!! Ni maya kitai deh unggal? Nyangka enda semua pemisi orang ulih titihka kitai, sebagi ari semua nya pama mih. Alau ah,gaga perambu enggau manah(salah perambu tau ngasuh rugi,laban kitai endang kurang katan),jamah lubah amat mih datai.

DELHI 2010:PEMENANG ENGGAU PERAIS

2010-11-07T21:45:00.003+08:00

5536804694019878402" />
Delhi 2010: Commonwealth Games baru udah abis ,maya nya menua kitai udah mujur ngulih ke 12 iti medal mas.Tataikenyalang ngenataika pengaga ati ngagai semua bala atlit ke bisi menang. Manah amat pengangkat bala atlit menua kitai kesekali tu, laban target udah ulih dijapai.MSN ngeletak target ngagai 10 iti mas aja.

Ba Commonwealth Games nya tadi siku ari atlit menua kitai ke udah mujar ngulihka medal mas iya nya Pandelela Rinong,siku ari atlit nyemerai . Iya udah mujur ngalahka penerjun ari menua bukai dalam even Terjun 10M. Tatai kenyalang ngenataika puji enggau pengaga ati ngagai pemujur Pendalela Rinong.

Enggau nya mega perintah menua Malaysia udah meri perais mata duit ngagai bala atlit ke udah mujur bulih medal dalam lumba maya nya suba. Nyampau ga perais mata duit ulih Pendalela Rinong ya ke diberi ari perintah besai. Enggau nya bisi ga ke dipeda bala sida sebilik lalu enda mega ngelebu pengelelak iya ke udah belatih lelak ngelamatu.
Nya tadi sagu ati ari perintah besai menua Malaysia, bah ni sagu ati ti diberi ari perintah negeri deh? Tataikenyalang amat setuju perintah negeri meri sagu ati ngagai Pendalela, laban amat jarang atlit ari menua Sarawak bulih medal mas ba lumba enggau main. Nadai salah meri sagu ati ngagai iya enda milih besai tauka mit.

Pesan ngagai Pendalela Rinong, ngarapka Pendalela enda mantul ngapa dalam pengawa lumba enggau main. Terus belatih enggau penuh pemeransang dalam ati. Kelimpah arinya anang mantul mega dalam pengawa pelajar.

Main Bol Di Malaysia

2010-10-04T19:08:00.006+08:00

TATAIKENYALANG- Tabi basa ngagai bala temuai ka bisi nyenguk ngagai ruai Tataikenyalang. Betemu baru kita bala kaban,bala menyadi. Nyadi baka ke sekali tu aku ka mai bala kita sama bekenang pasal sport ba menua kitai. Bah, ngenang main bol ba menua kitai, dah nyauka setengah taun World Cup FIFA,nyau datai ga Commonwealth Games 2010 agi ga kitai bekenangka pasal pemujur, penanggul, pengelemi team main bol menua kitai ke betuaika K Rajagopal.
Diatu (Oktober 2010) bala pungka lelaki kitai bansa benung belelang di menua Vietnam berebutka Ho Chi Minh City Cup. Nangka Tataikenyalang ke nulis tu, udah dua kali team menua kitai bemain tang alu apin menang,ti baka ke ngesan nyau nulung. Ta aja pungka lelaki kitai Iban ke peturun Rimong seduai Ruma, peturun Rentap enggau sida ka bukai kering magang,ti agi nangka lumpung tekam lumping tegelam nadai mesa. Tang mar mimit laban ta main bol.
Ba penemu Tataikenyalang diatu ukai maya endur kitai nyalahka sapa-sapa. Pia mega ukai maya endur kitai ngenang pemanah bala pemain ke dulu suba. Diatu ukai enda manah,ukai enda pandai bala kitai bansa bemain. Nama kebuah Tataikenyalang ngumbai bala team menua kitai pandai, kala ga menua kitai menang baik ke sekali dua(lebuh ke bemain ngelaban team ke endaa kuat). Pia mega bisi ga bala pemain menua kitai ngemasukka gol lebuh ke bemain dalam Liga Super. Pandai sida bemain, anang ngumbai enda pandai.
Minggu tu tadi FAM udah meting, siti ari ubah baru sida iya nya deka ngambi pemain import baka dulu suba. Manah, amat manah aum tu(ngemendar ke pemain import bemain ba Liga Super). Tataikenyalang setuju amat. Tataikenyalang alit ati meda FAM baru sedar diatu ba pemanah ngambi pemain import, nama kebuah enda diteruska ari suba. Enti bisi pemain import dia bala penyukung enda belampung ati deka datai meda team menua siti-siti bemain. Mayuh penyukung datai ngagai stadium retinya kucik pen penuh wai. Ukai mina gerempung main bol menua penuh kucik, tang pia mega bala penaja ke bisi datai bedaja lebuh mai orang ke bemain. Pia mega bala deriba teksi enggau kerita sapu.
Pulai ngagai pemanah pemain import ba liga menua ambi ke banding Menua England, Jipun, Spain enggau menua-menua ke bukai. Semua menua nya tadi bisi liga ti ngambi pemain import ari menua bukai. Menua tu tadi baka ke nadai sekat berapa iku pemain import ke deka diambi bemain. Pia mega lebuh ke bemain ba berebut ke mangkuk dun ya nyau ka semua menua ke ngambi pemain import enggau nadai tatak tu mih ke masuk dia. Bah, nama kebuah menua kitai Malaysia enda ngaga bakatu deh?
Kala mansa pending Tataikenyalang,enti kitai ngambi pemain import, dia nyau nadai meri peluang ngagai bala nembiak kitai empu. Amat, amat nadai, tang ti ka masuk bemain ngarika team dalam Liga super enggau Liga Malaysia sida iya patut ngemaju ke diri dalam kualiti bemain bol.

Badminton World Cup-Paris

2010-09-02T21:10:00.004+08:00

Paris,August 2010- Pekit berebutka mangkuk dunya dalam main badminton 2010 udah tembu berami tauka udah ngiling bidai. Semua pemenang udah temu magang pia mega semua perais pan udah diberi ngagai pemenang. Mangkuk Dunya Badminton tu siti ari pekit ti pemadu berprestij kelimpah ari Olympic Game enggau Super series.
Menua China sekali agi mandangka sida siti ari menua ti amat kering dalam pekit bemain badminton. Dalam pekit tu tadi dia sida(pemain-pemain menua China) udah ngugut semua perais bepun ari mix double sampai ngagai single lelaki. Asai enda pecaya asai ati Tataikenyalang meda pemujur bala pemain sida. Abis semua pemain ari menua Malaysia, ka kala udah jelai rita tampak nama suba, alah magang. Pia mega bala uchu ichit Sukarno ari menua Indonesia, baka bala sida Taufik Hidayat, Simon Santoso enggau Sony Dwi Kuncuro. Nama agi bala ribai, sida Tina Rasmussen, sida Peter Gade mega alah magang. Ta layu baka rumput semalu kena pansa kaki bejalai bala pemain ari menua bukai alah laban bala ari Peturun Dynasty Qing enggau Dynasty Ming. Amat bisa meh pengaruh Emperegam Bisu sida tu,ta nadai tepansut ka jaku mimit bala pemain bukai.
Pemain Malaysia, mayuh raban dianjung nurun ngagai Paris, indu enggau lelaki. Tang siku pan nadai mujur magang. Ngarapka Datuk Lee C W pan alah ba round ke3.Alah pan ukai alah laban munsuh ke ngelamatu,Lin Dan, tang alah ngagai Taufik Hidayat. Pia mega double lelaki,K K Keat enggau Tan B H alah ba final Yaka ngasuh alit ati iyanya Datuk Lee CW enggau double lelaki kedua-dua nya ranking lumur 1 dunya.
Enti pengawa tu terus bakatu,dia kitai enda ulih ngarapka bala pemain ke bisi diatu. Nyau udah datai maya endur kitai ngiga bala pemain ka tau nganti bala sida ke diatu. Skuad pelapis patut digaga enda milih umur amat mih bisi talent dalam main badminton, nyengkaum sida ke agi besekula ba sekula primary. Pia mega maya ke milh skuad pelapis patut enggau chara manah,patut mega dikerembaika ngagai Sabah enggau Sarawak.

SUNYI TINGGAL SULU

2010-08-10T12:26:00.003+08:00

sunyi pengidup ku sulu,
ditinggalka nuan kediri,
sampai ati nuan sulu,
ngelengka aku kediri.

ampun penyalahku sulu,
ukai aku sengaja,
pulai meh nuan kitu baru,
tua nyambung pengerindu.

enti nyema nuan pulai,
aku sanggup begadai reta,
nama utai dipinta,
nama utai ti dikedeka,
aku sanggup,aku sanggup,
amai meh nuan pulai.

enti nyema tua begulai baru,
nuan tetap ku andai,
makai nuan aku nyapi,
mandi nuan aku nyauk,
bejalai nuan aku ngiring,
tinduk nuan aku nimang,
pulai meh sulu..

FIESTA NANAS SARIKEI 2010

2010-08-09T07:16:00.011+08:00

Pesta Nanas Sarikei,siti ari program kena perintah ngerapat ka kaul enggau rakyat.
Ngagai bala ke enda sempat nemuai,mayuh macham utai ti tau ngerinduka ati maya pengerami tu tadi.Ni bala ke bejual,ukai semina bala ke ari menua tu empu bisi bejual,tang mayuh bala ari menua jauh mega datai bejual. Kelimpah nya mega mayuh pameran ti ulih dilawa maya tu tadi.Pia mega mayuh pekit digaga maya Feista Nanas tu tadi.
Pemayuh bala mensia ka datai enda alah kira.Tataikenyalang nyau enda ulih tama ngagai dewan,laban kelalu dedat laban mensia. Tang nasit nadai utai ke nyelai nyadi.
Gambar di atas nya,nunjukka YB Datuk William Mawan benung ngerasmi ka pameran.

INDAI BLUES

2010-07-26T20:39:00.011+08:00

Tataikenyalang tekait ati ngagai siti kolum ti di tulis Dr.Chemaline Osup dalam Majalah Pegari;'Amai Bisi Ka Indai Blues?' ba vol 35.(sapa empai meli Majalah Pegari tau meli diatu kala agi mayuh ba sebelah kedai bup)

Pulai ngagai karang Dr Chemalin nya tadi, dia dr. bendar amai deka ngupas pasal pengidup indai blues,bah kati ko runding kita bala temuai? Kala kita ninga leka jaku 'Indai Blues?'. Tauka kita kala begulai enggau 'indai blues?'. Tang tataikenyalang empu lalu bedau kala betemu,begulai sekalika bekelala enggau indai blues.
Tajapan kadang-kadang orang madah sanu tu indai blues,tang maya ka udah bekelala enggau orang ka dikumbai indai blues nya tadi,ta nadai ga indu nya nyelai ari orang bukai. Kadang-kadang orang indu ka ukai dikumbai indai blues ta lebih agi ari indu ka dikumbai indai blues.(Kasih tudah diri digelar indai blues ari belakang)

Ba penemu tataikenyalang pengawa indai blues tu nadai tentu nyadi ba pengidup kitai bansa,ti dibanding enggau bansa bukai.Tegal indai blues meh leka jaku 'gigolo' pansut. Tang ba pengawa sosial bala indu kitai iban enda ngira indai blues tauka ukai endang sigi amat pama. Bekareoke,bedangdut,poco-poco enggau mayuh agi pengawa ka bukai.Nyangka ari ulah sosial ka bakatu leka jaku indai blues tu pansut. Bisi sekeda nyau enda tetanggar ke periuk,enda tebela ka anak ketegal ke kelalu ngereja pengawa sosial munyi ko aku dulu tadi.Taja pia enda meh sida tu tau dikumbai indai blues laban ba penemu aku indai blues ngereja ulah lebih agi ari ulah ka udah sebut aku nya tadi.

KAUL DEGREE ENGGAU BANSA KITAI

2010-05-24T11:27:00.006+08:00

Sebedau Tataikenyalang ngemanjaika karang ke sekali tu, keterubah ya Tataikenyalang deka bala temuai ke bisi datai berunding enda lama ngambi sekelemayang kesulai rindang,berundingka gambar ke di atas nya.Pia mega Tataikenyalang deka ngenataika pegaga ngagai bala temuai ke udah ngasaika pengerami bakaka dalam gambar.
Lebuhka bisi enggau orang nemuai ngagai pengerami baka ka dalam gambar,dia Tataikenyalang berasai sinu lebuh ke ngenang kitai bansa agi jauh endar tinggal ba pengawa pelajar. Ukai ngumbai kitai bansa enda pandai,ukai ngumbai kitai bansa nadai maju dalam pengawa sekula tang ti dibanding enggau bansa bukai kitai bansa agi mengkang jauh tinggal.
Bah, nama penanggul kitai deh? Ka ngumbai kitau tu nadai duit kena ngemaju kediri,bis ga baka bansa bukai ga kitai ba penatai pemisi.Ka ngumbai kitai bansa mayuh anak ka dijaga bansa bukai pan mayuh ga anak(nyau bekeridun bala anak sida nyempulang apai indai maya pengerami tu),bisi ga anak ka agi mit. Sinu ngenang bansa kitai ka agi bepenanggul ka anak,umur nyau lanjut enggau mayuh macham penanggul(penanggul ke bendar tauka sengaja digaga-gaga).
Ba sida ke nembiak enda aku tentu kiruh,kelebih agi sida ka baru abis pom 5 nggau pom 6,Tang ya ke ngasuh aku tekuing nulis tu iyanya ngagai kitai bansa ka udah lanjut umur.Ambi ke banding bala ke udah diau ba 'COMFORT ZONE'.
Aram meh semua bala kitai sama berunding sama bela ngemaju kediri dalam pengawa pelajar.Arapka semuai temuai ke bisi nemuai kitu nemu berunding dalam ati diri.