Tay's Web Diary

TayThink/ Gadget Stuff --- 港視開網台大塞車，其自救法的反思

2014-11-20T13:42:00.002+08:00

Tech Save your life!?

琴晚 (2014.11.19)港視開台大塞車，佢地就用左 UStream 黎自救 (我用佢地個App, 試左15分鐘都睇唔到，最後放棄左。) 吸引左廿萬人喺 UStream度
觀看，大台嘅收視就唔知啦！

不過，就令我諗返以前嘅工作上嘅小插曲，同埋有關同勇氣、保守、創新、求變、成功…

起碼都有 5/ 6 年前，睇到有關 NHK (日本電視台)嘅 R&D，佢地已經提及網路視頻串流，大眾由 YouTube 轉去 UStream (當時，YouTube 未有 Live Streaming，而且 Live Streaming 係一件唔易嘅事) ，人人都可以做電視台，你只要喺自己部 SmartPhone，裝個App，就可以用電話嘅鏡頭串流所擇嘅畫面向全世界實時播放 (不過，免費用戶只限10個連接)。

而幾年前，喺一個有份參與嘅 Project上，都提議過用 UStream，不過，最後畀Ban 鳥~~~

當然，都唔知點解會畀 Ban，大該都係「技術太新，隱定性受成疑…等等」。(其實，Ban你洗乜畀理由你!)
(◣_◢)

當時，畀 Ban後為左自己心理上平衡啲，決定開台畀同事睇，Live Stream 自己公司枱頭嘅擺設，流量 5個都冇，哈哈!

(￣▽￣)ノ

冇耐一間响日本賣叉電池嘅公司，搞左個用叉電池機械人行日本國內東海道五十三次(驛)嘅 Campaign，一共行左 500公里 (即係由東京行去京都)，由當年 9月尾行到11月中，全程都用 UStream 直播 (嗰次仲打破左世界紀錄)！！

呢次，無論 UStream 同嗰啲叉電嘅隱定性都應該唔會受成疑啦呱！！

(¬_¬)

講左咁耐，其實我想講世界不停喺度變，互聯網會令呢個世界某啲領域越黎越平。

你可以瞻小咁玩你嘅壟斷，固步自封咁玩你嘅金融、地產，毫不務實咁講如何推動本土創新工業，繼續簡單地同大財團打造本地經濟，唔難想像 10年後嘅香港會變成點，因為，最近大家好熱熾期待嘅滬港通已經畀左個答案你，仲咩人民幣離岸中心，大白象大橋 …

諗返當時自己就係唔夠大瞻，如果唔係嗰個 Project 可能已經喺香港成為 Live Streaming 嘅先驅!

失敗中嘅失敗！！
o(╥﹏╥)o

最後，NHK 喺 UStream 嘅 Channel，已經停播，改用自家串流技術，我地仲唔追，仲要做幾耐井底之蛙！？

ヾ( ･`⌓´･)ﾉﾞ

再見了！我們的紅娘貓，我還沒收下的嫁妝 - 陳波波大少 [TayThink, TSL (Tay's Spiritual Life), ]

2014-06-02T16:57:00.001+08:00

陳波波大少

波波是一隻香港花貓，它該是02年冬天在火炭的街邊出世，大該三個月大的時候，MyV 就接牠回家，成為一隻足不出戶的家貓了。波波不愛嗲人，但卻很貪吃、每夜到開飯的時候就會喊著你要給牠開飯！到晚一點時，就喊著要吃點心，少給牠一粒點心，牠就立即投訴你，到清晨（零晨四時）又喊著要喝水、吃早餐！

波波也不懂裝可愛，不少人家的貓咪，喜歡人抱抱，但波波卻很不喜歡，抱起牠兩、三秒就哇哇叫！

波波有時也蠻惡的，有時不開心就會出爪抓人，又出口咬人。

當時，還未與MyV 拍拖，知道牠這樣百厭，我就送了一隻能張開口的鯊魚毛公仔手偶給MyV對付牠...

在我們結婚自己製作的動畫短片，波波更擔當男主角！

婚後，好幾次嘗試把波波由岳父家捉回自己家也不成功⋯唯有讓這份嫁妝留給岳父照顧⋯

岳父大人其實又很疼錫牠，夏天熱就特意買竹𥱊給牠，冬天凍就連自己的羊毛衫也給牠蓋上。波波也是最聽岳父話，一叫牠的名字，就往岳父處跑過去，由於岳父已經退休，波波在岳父家也不錯，至少牠不用每晚等我們很晚放工回來才有吃的。

近這個月來，波波身體變得很弱，今天（6月1日），一家人到岳父家做節，波波弱到不能行走，就是躺在地上，輕輕地揮著尾巴，我唱了兩篇《天父領我》給牠，牠也不肯入睡，直到我們所有人也吃過飯離開了，牠才悄悄躺著離開了⋯

｡･ﾟﾟ･(>_<)･ﾟﾟ･｡

我相信波波必會到天父爸爸的懷裡，我們的紅娘貓、這份還沒收下的嫁妝，讓我們在天國再重遇時，再次讓我給撫著你軟軟的背背毛毛吧！

(´ー｀)

去吧！人人都射到嘅「衝力射球」！！[Fun / Comic + Anime, ]

2013-03-04T23:01:00.000+08:00

《足球小將》

如果，你鐘意踢波同睇漫畫，你細個一定會睇過一套漫畫叫《足球小將》キャプテン翼！

其實，不少國際球星，好似意大利托迪、迪比亞路、派路，西班牙嘅恩尼斯達、費蘭度托利斯都話睇過《足球小將》而愛上足球呢樣運動！

而漫畫裡面嘅絕招，好似大志偉嘅『衝力射球』，小志強嘅『猛虎射球』，早田嘅『剃刀射球』，『零角度射門』… 都唔知係幾多細路（可能包括左好多啲球星）係波地度苦練嘅目標，日練夜練以為可以射出呢啲咁極重『西』（旋轉）嘅波，當然冇人可以練到啦！！

不過，依家大家唔洗苦練啦！！！

日本一間玩具公司，即將推出兩款特製足球，令大家可以好輕易就射出以上呢啲嘅絕招，讓大家可以一嘗做下大志偉、小志強呢啲漫畫主角！

趣極鳥！！

o^______^o

睇片啦！！
ブレダマスター商品紹介映像

期待著 2013年夏天嘅兩大動畫！[Comic + Anime / Fun / TayThink]

2013-02-19T00:18:00.000+08:00

喺 2010年，寫左一篇暑假動畫片嘅預告，到依家都仍然高據 Tay's Web Diary 嘅 Top 5 位置！

今日， 2013年嘅春天，又同大家分享下我期待喺黎緊夏天會上畫嘅兩大動畫（香港未定幾時上）！可以話又係一次世上兩大頂級高手過招，3D動畫 vs 2D動畫！

不過，兩套我都唔會錯過！
XD

第一套係 Pixar 嘅 3D動畫，哩套係佢地繼 Toy Story 之外，歷來第二部拍續集 / 前傳嘅動畫 ﹣ Monster University（我照譯為《獸怪大學》）。

Monster University 《獸怪大學》

哩套被譽為 Monster Inc.（《獸怪公司》）前傳嘅動畫，講毛毛（Sulley）同大眼仔米高（Mike）嘅大學校園生活，一定笑料百出，睇下個大學阿癲（Dean）有咩講先…

哩間大學仲有個網站 http://monstersuniversity.com/ ，我地呢啲人類都可以買到佢地學校紀念品，佢地嘅紀念品同啲名大學有得揮o架，其中，四手短袖復古 T-恤仲賣斷市添！

O＿＿o||

而另一套就係日本動畫，宮崎駿大師嘅《風立ちぬ》（暫譯：風起之時）。

《風立ちぬ》（暫譯：風起之時）

哩套動畫原本係宮崎駿大師喺 2009年4月 - 2010年1月連載於大日本絵画嘅漫畫。2013年嘅夏天由宮崎駿大師親自監督同寫脚本！仲搵左同佢一切創作左 25年咁耐、做左好多好好聽配樂嘅久石譲大師為哩套電影配樂，真係令動畫迷同音樂迷都興奮到不得了！

細一輩嘅唔知邊個係 久石讓大師！？

你一定聽過，先畀你回味下《久石讓 in 武道館》音樂會，由平原綾香唱出《千與千尋》（日文：千と千尋の神隠し）嘅主題曲：《いのちの名前》。

各動畫迷，係咪好期待呢！？

o^______^o

新加坡嘅超級樹群出現左巨型「慈枯椗」 BB [Art / Travel / Fun]

2013-01-29T00:09:00.000+08:00

繼得意沖涼膠鴨襲完悉尼後，又有巨型嘅藝術擺設出現啦！！

今次係一個 7個月大嘅巨型「慈枯椗」 BB（由英國設計師 Marc Quinn 嘅 2008創作），佢會 “凌空” 瞓喺個公園嘅草地上！

呢個公園就係喺港人其中一個旅遊熱點﹣新加坡，擁有好有型又巨形超級樹群（Supertree Grove）嘅 Gardens by the Bays (Marina Bay)！

而且，唔同沖涼鴨，「慈枯椗」 BB會永久喺度瞓覺豬（擺放），大家得閑就飛黎探下佢啦！

o^_______^o

img from: designboom

BB ﹠ Supertree Grove
img from: designboom

Ref:

marc quinn's large-scale infant sculpture unveiled in singapore (designboom), http://www.designboom.com/art/marc-quinns-large-scale-infant-sculpture-unveiled-in-singapore/
Gardens by the Bay, http://www.gardensbythebay.com.sg/en/home.html

沖涼膠鴨襲悉尼！？[Art/ Fun/ Travel]

2013-01-08T16:52:00.002+08:00

大家仲記唔記得 09年，呢隻响日本大阪出現過，超巨大又勁可愛嘅沖涼膠鴨（Rubber Duck）呀！?

2009年，大阪府大阪市中央区北浜東
img from: hetgallery.com

今次，佢游左去澳洲悉尼嘅 Darling Harbour，仲會留到今個月23號（2013.01.23）先走，大家如果呢期會去悉尼，一定要探下佢，幫我同呢隻咁可愛嘅沖涼鴨影相！

其實，沖涼膠鴨（Rubber Duck）今次到悉尼係因為參加呢度嘅喜年華（Sydney Festival 2013），佢主人荷蘭藝術家（Florentijn Hofman）就帶左佢黎 Darling Harbour 同各位澳洲朋友 Say Hello！

大家快啲同佢影相同參加喜年華其他唔同嘅節目啦！

o^_____^o

橡膠鴨襲悉尼！？
img from: photoblog.nbcnews.com

參考資料：

Florentijn Hofman：http://www.florentijnhofman.nl/dev/projects.php
Sydney Festival 2013: http://www.sydneyfestival.org.au/2013/
光のルネサンス2009：http://www.hetgallery.com/rubber-duck-hikari-renaissance-osaka.html

愛流、留、傳於淡水 [TSL/ TayThink/ Travel/ Toto]

2012-12-29T22:39:00.001+08:00

標題：愛流、留、傳於淡水

日期：2012年6月2日 (星期六)
天氣：多雲，有幾陣雨
景點：淡水海邊、「滬尾偕醫館」、淡水禮拜堂、真理大學、理學堂大書院（亦稱牛津學堂）、紅毛城堡壘及前英國領事館

算一算，原來已十多年沒來台北旅遊了，適逢六月上旬工作上有些空檔就決定來逛逛。雖然來到台北的天氣是時雨時晴，但是這也無損我們的興致。因為，台北實在有太多我們想逛的地方，短短四日三夜的行程都安排得密密麻麻，例如台北 101大樓，因電影《那些年》而人氣大熱嘅菁桐、平溪、十份，台北各區的夜巿、浪漫的淡水漁港和不能不逛的西門町⋯都是我們行程計劃了的景點。

不經不覺地已到了行程的第三天（2012年6月2日，星期六），我們今早已到了台北 101大樓，親身感受過它的高度。在餘下的這半天裡，我們會遊走位於新北市西北部的淡水（以往舊台北市的市郊，古名為「滬尾」）。由於這次是我第一次去淡水，所以，心情也十分興奮！在乘著捷運前往途中，已不停想著一陣子要吃的街頭小吃及要參觀的景點。大概不到一個小時的車程，我們便由市中心來到淡水，而且，感恩的是雨也暫時停下來呢！

台灣新北市西北部的淡水

來到淡水剛是黃昏的時候，淡水確是一個很美也讓人感到舒服的海港城市，走出捷運站，有一個泊滿了小船的碼頭，一束束的陽光在雲間灑在碼頭旁公園的草地上，吹著微微的海風，這是多麼令人舒服的感覺呢！公園內有一家大小的吃著小食或是放著風箏，亦有一相一對的甜蜜地欣賞著這個美麗的海岸，當然少不了一班釣魚的發燒友在垂釣，更有一班工作人員努力地為今晚海旁露天音樂會作準備，每人臉上也像流露著充滿喜樂的樣子！

淡水捷運站旁的公園

我們當然亦是充滿喜樂，因為我們要走進淡水老街盡情地＂掃盡＂這裡的街邊小吃，例如很傳統的阿給，魚丸湯，清蒸肉丸，碳烤臭豆腐，乳酪豬排，阿媽的酸梅湯…等等！

淡水的街頭小吃

醫飽了五臟府後，我們便展開淡水古蹟行！我們先往在老街山坡上的紅樓，要登紅樓先要爬上共有 106級的階梯，果然是「欲窮千里目更上一層樓」！在紅樓這裡不但可以眺望淡水港，更可以看到東面的關渡口及西面的紅毛城。

可是這時又開始下著濛濛雨了，而欣賞這裡風景的最佳位置則是紅樓二、三樓的餐廳內，但是我們行程緊逼，沒時間讓我們進去慢慢地邊享受咖啡，邊欣賞美景，我們只能在微雨中欣賞片刻便離去，又向淡水最有名的紅毛城出發！

每次去旅遊，總愛用步行的方式去遊歷，只要景點能夠步行前往，我們定會行過去。原因之一是可以省掉車費，而且能用上較慢的速度和更細膩的方法去欣賞及感受當地的不同之處，有時更會遇上不少的驚喜（當然，不包括遇上凶惡的野狗， XD）！

由老街到紅毛城，若乘公共巴士只須用上數分鐘的車程，不過，今次我們同樣選擇用雙腿步行到那兒。可是當我們走出老街，突然又下起大雨來，我們不得不找個地方避雨，便進了一所看來很古舊的平房，門前的牌坊寫上「滬尾偕醫館」（Tamsui Mackay Hospital）。這所醫館現已變成了一所小型的博物館，擺放著有關這裡事蹟的資料和歷史圖片。由於這裡並不是我們行程中的景點，而當時心中正愁煩雨什麼時候才停下，對這兒的展覽不太在意，只草草地從了解到這裡少許的歷史。只知這所醫館是由一位名叫馬偕博士興建的西式醫院，目的是要幫助當時淡水居民治病之用。沒想到這個不經意地讓我們進來的「滬尾偕醫館」會令我們這個淡水之旅變得不一樣！

「滬尾偕醫館」（Tamsui Mackay Hospital）

在醫館待了一會後，雨勢又開始漸漸的停下來，我們又繼續行程。沒想到我們一踏出門，眼前的另一棟建築物再次令我們卻步。它是醫館旁的一座教堂 ﹣ 淡水教會的禮拜堂，外牆由一塊塊紅磚砌成，而且鐘樓和教堂都有鑲鉗了彩色玻璃圖，教堂正面的圖案是代表基督教教義的聖父、聖子、聖靈「三位一體」圖，鐘樓則是「五餅二魚」及「客西馬尼禱告」的聖經故事。而教堂前的一塊小空地上有一個圓形的石刻，上面刻著這教堂的外貌，也用上彩磚在教堂石刻砌了一個 ❤ 形圖案，我猜這代表由 神，從天而來的愛。不論，這個石刻或教堂建築也盡顯設計者的心思，彷彿讓人看出他對這個教會流露著的愛，確是一所既美麗又吸引的教堂！而且，由於雨才剛停下來，人流也較疏落，看著眼前這所剛被雨水擦亮了的教堂更有著一份莫名的平安！

淡水教會禮拜堂

欣賞過這座幽美的禮拜堂後，我們加緊腳步往紅毛城，在離教堂不遠的行人天橋上，我們發現在欄杆上掛滿著一支支的旗幟，上面印著：「6／2 馬偕日馬偕傳愛在淡水」的字句，而且，在旗的上也印了一位擁有一把大鬍鬚的老人家，這人正正就是馬偕博士。回想今天不就是 6月 2日嗎？剛到「滬尾偕醫館」不正正就是這個人所興建的嗎？淡水區竟然會用他的名字，把今天定為其紀念日？這人究竟為這裡作過什麼呢？心中充滿疑惑，但相信他定為這裡貢獻良多！

走過行人天橋後，我們進了當地的學校區，前方有一所名為「真理大學」的校舍，從學校的名字也不難猜到這所大學與基督教有關。而由於今天正舉行應屆畢業生畢業典禮，大學也對外開放，我們又再一次走進另一個不經意的景點！

真理大學內的大禮拜堂及理學堂大書院（亦稱牛津學堂）

大學正門左旁是一座十分宏偉的大禮拜堂，而大禮拜堂的對面，卻是一座矮小的建築物，對比下形成一幅有趣的圖畫。而這座矮小建築物的屋頂蓋上中式的簷瓦，而窗卻用了西式拱型扇門，是一所中西合璧的古建築。它的門牌上刻有《理學堂 OXFORD COLLEGE 1882 大書院》（當地人稱為牛津學堂，建於1882年） 。心想莫非這所大學又與那位馬偕博士有關？再看看大學的地圖，更發現地圖顯示了一個地方 ﹣「馬偕故居」，看來已找到答案了！

看看時間，原來已經是 5 時多了！我們還未到達目的地﹣紅毛城啊！我們立刻急急加快腳步，趕及在未關門前進到紅毛城的堡壘及前英國領事館參觀，以極速遊遍這兩個古蹟。負責的職員也緊隨著我們，當我們一踏出領事館門，他們就立即把門關上，真的不好意思，連忙向他們道謝！總算完成今天的行程，真是感恩！

太陽下沉，天色漸暗，我們沿海邊走回捷運站，日落令淡水的海面呈現淡淡的金黃色，讓人更不捨這地。

淡水的日落

回程途中，坐著捷運途中，再次勾起我對這位馬偕博士的好奇，我們找回先頭在「偕醫館」取的小冊子，一份是《人間愛鄉土情馬偕博士在淡水史話》，另一份是《淡水禮拜堂簡介》裡面敍述了有關這位馬偕博士的生平。

旅行完畢返港後更從網上找尋馬偕博士的資料，羞愧的是竟發現了自己教會常常經過的宣教事工佈告板上，早已把馬偕與其他宣教士的名字放在其中，如馬禮遜、戴德生…等！雖然，信主多年，但全不認識這位偉大的宣教士！

翻查資料後知道馬偕博士原名（George Leslie Mackay，1844年3月21日－1901年6月2日，享年 57歲），中文名字偕叡理，台灣人稱他「馬偕博士」或「偕牧師」，出生於加拿大安大略省（Ontario）牛津郡（Oxford）左拉村（Zorra），自少願為海外宣教師。

當他 27歲（1871）時，接獲加拿大長老會海外宣道會議決准馬偕為海外宣道師，並指定中國為其服務地區。馬偕同年起程前往中國傳教，到過日本橫濱、香港、廣東汕頭、廈門，最後於前往台灣在打狗（高雄）登陸，他觀摩了英國長老會在南部的工作方法，學了台灣「八聲」和部份單字，為宣教工作打好基礎。

1872年3月9日，偕牧師終於來到淡水河口，在其日記中說：「我舉目向北向南看，然後向內陸遙望青翠的山嶺，心靈非常滿足，心神安寧且清靜，我知道此地就是我的住所。有一種平靜、明晰的聲音對我說：『此地就是了。』（This is the land）同行的李庥牧師也對我說：『馬偕，這是你的教區。』」

當我看到這裡時，我想我也能少許感受到偕牧師當時的感覺，因這正正就是我第一次來到淡水的感覺，縱然現在的淡水已改變了不少！

而偕牧師來到淡水的傳教工作並不是一帆風順，不論風土、人情和言語都大大不同，常常被人排斥之餘，也遭過老婦潑糞侮辱，更差點被住民射殺喪命。而且，台灣的氣候與他家鄉的截然不同，令他容易患病，要抵受疾病之若。但他憑著自己的座右銘：寧為燒盡、不願腐銹（Rather burn than rust out），努力開拓神的國度。！在同年 4月14日偕牧師設立了淡水教會，也是淡水宣教史上最值得紀念的日子。而在 6月1 日，他開始在其自寓開始醫療施診，也把自己的家成了禮拜堂、診所和學校，實行長老會身心靈的全人拯救的宣教理念。開始免費派發醫治腿膿瘡及瘧疾（被稱為「馬偕的白藥水」）的特效藥給當地患者。求診的人日漸增加，偕牧師得商界及外國醫生的支持，把現代醫療引入淡水，令市民在醫療以至環境衛生上也大大提升。而偕牧師的拔牙術也是相當了得，試過一小時幫過百的病人拔牙，自己親手拔了多達二萬一千顆牙以上！！常常也是先唱一、兩首聖詩，然後為病人拔牙，繼而開始講道，醫治病人的身體同時也以褔音來醫治他們的心靈！偕牧師也會把簡單的醫藥理教導給信徒，令信徒們在不同的地方傳教時，也可以隨時地幫助當地的病人。

有一天，一位讀書的年輕人名叫嚴清華，他主動地拜訪偕牧師，請教很多不同的問題。後來他更帶了當地舉人、名士與偕牧師熱烈地辯論宗教問題，偕牧師則以儒、釋、道三教道理反駁，令這些文人驚訝及頹然離去。之後年輕人相信偕牧師的信仰是真理，希望成為他的學生。最後，這位年輕人更成了台灣北部教會第一位信徒！

在1878年，偕牧師來台的第六年，在淡水完成他的終身大事，迎娶了五股坑的女信徒陳塔嫂的孫女張聰明為妻，她為偕牧師生了二女一男。後來人們稱偕牧師為「上帝巨僕台灣女婿」。而他的兒子偕叡廉博士也繼承父親，在台作宣教士。我們現在看見這般美麗的淡水禮拜堂，就是偕叡廉博士於1932年親自設計、監工重建，於翌年9月30日完工。而禮拜堂在1986年把台灣屋瓦換成瑞典鋁質浪板，玻璃也換成彩色的「三位一體」、「五餅二魚」及「客西馬尼禱告」的圖案，為禮拜堂添上莊嚴之美。讓淡水教會取得「北台第一聖會」的美譽。可見偕牧師兒子及淡水教會的會友們把他們的愛盡顯在這所教會中，令今天的我們也能親身感受到這份愛吧！

而在1880年，當時偕牧師回國述職時，遇上一位同姓馬偕的夫人，她為記念自己逝世不久的丈夫 ﹣ 馬偕船長，慷慨捐贈美金 3,000元幫助偕牧師在台宣教之用，偕牧師最後在淡水建立了讓我們避雨的那所「滬尾偕醫館」了，讓更多的民衆能接受療治，令他們受惠無窮，萬萬也想不到百年後，我們也同樣受惠，免我們受雨水弄濕而生病呢！

偕牧師不但在醫療衛生上大大幫助淡水以及台灣北部的居民，他更在教育上造福了當地居民。在他回國述職期間，家鄉牛津鎮的居民為他募集了 6,215元加幣，讓偕牧師為台灣建一所現代化的書院。偕牧師回到台灣，就馬上親自繪圖設計及興建書院，在1882年7月，「理學堂大書院」終於竣成，也被稱為「牛津學堂」為的是感謝牛津鎮居民的友情。它也被淡水炮臺武官孫開華稱讚是全中國最好的學校。「牛津學堂」除了神學和聖經外，有不同的科目如社會科學、自然科學、醫學理論及臨床實習等。在 1883年，偕牧師更打破傳統守舊思想，在學堂東側創設「女學堂」，學費全免、路費代付、更提供食宿及衣著優惠，第一屆的畢業女學生多達 34位。而現今的真理大學的前身正正就是這所矮小、中西合璧的「牛津學堂」了。

在1901年6月2日下午4時，偕牧師因喉癌在淡水寓所病逝，享年 57歲，安葬於淡水中學後面其私人墓園。偕牧師一生奉獻給主，由他 27歲來到台，到離世也盡力為神作工。在短短 30年的福音事工上，設立了教會 60多所，為多達 3,000名的信徒施洗。縱然，甲午戰爭（1894年）中國戰敗，台灣被日本統治，偕牧師大可選擇留在家鄉，但他決意全家返回淡水，與當地人們一同面對日治時代，對台灣、對淡水人民不離不棄。2001年馬偕牧師逝世百年時，當時淡水鎮長郭哲道宣布每年6月2日為「馬偕日」，同年淡水鎮亦與他的故鄉加拿大牛津郡結為姊妹城市。偕牧師用了 30年所作的一切，在這過百年間不但造福了整個淡水區，以至全台灣，更甚至是全球華人社區。 神的愛流把偕牧師送到淡水這裡，他也把 神的愛化作成淡水各處的 神產業的基石和結下屬靈的種子，讓他們不繼地成長，壯大，讓更多的人接受、傳揚這從神而來的、永不止息的愛，令人更多、更多的人蒙福，接受著祂給我們的愛，讓這愛不止息地流、留、傳於淡水！

我相信我們決不是不經意地來到淡水，而是神早以安排了讓我們碰上和認識這位在 112年前今天（6月2日）的黃昏息勞了、被神接返回天家，為主行奇事、忠心的好僕人﹣馬偕牧師。回顧自己的生命，雖然，信主多年，但是，為主作的實在太少，希望今後能以偕牧師為榜樣，努力地為主多多作工！

未信主的朋友們，在這剛過去的聖誕節裡，大家可能歡喜快樂地慶祝渡過，但你們是為著什麼來慶祝呢？是為慶祝而慶祝嗎？人家買聖誕禮物時，你又跟隨著買嗎？讓我們想一想，其實聖誕節卻是記念在二千多年前，神準備了一位孩子 主耶穌基督降生來拯救我們，而我們該是為祂的誕生而慶祝吧！當你們看完偕牧師以愛還愛的一生後，你們又會怎樣準備一份禮物送給祂呢？你又會怎樣用上你這生的時間呢？

但願這篇文章，作為我在 2013年的立志，也與你們的分享神與他的僕人們是如何把祂的愛傳到地上的每一位，正如約翰一書 4章 19節所說，『我們愛，因為神先愛我們。』

新一年盼望大家能為主作更大的工，更多，更多的人能蒙主的愛與福！

淡水的海岸，攝於紅毛城

參考資料：

《人間愛鄉土情馬偕博士在淡水史話》
《淡水禮拜堂簡介》
馬偕博士生平年表﹣新北市立淡水古蹟博物館

六本木アートナイト2013 (Roppongi Art Night 2013) [Art/ Travel]

2012-11-02T14:07:00.005+08:00

六本木アートナイト2013 (Roppongi Art Night 2013)

如果你去過東京或者睇過東京旅遊書嘅介紹，你會知道六本木呢個地方係一個日人同外國人都鐘意黎消遣嘅地方商店、酒吧、食店臨立。

不過，六本木亦係一個藝術文化會集嘅地方，因為佢有全日本最大嘅美術館﹣国立新美術館（THE NATIONAL ART CENTER），而佢同森美術館及三得利美術館（東京ミッドタウン）稱號「六本木藝術金三角」！！

所以，藝術人同設計師對呢度，一定唔會陌生！

而一年一度嘅日本東京六本木藝術之夜（六本木アートナイト2013，Roppongi Art Night 2013）決定係下年，2013年 3月23日至 3月24日舉行！

六本木アートナイト2012﹣草間彌生之作，彌生妹妹同狗仔玲玲
img from: madamefigaro.jp

上年（2012年）打頭陣，就有波點怪婆婆﹣草間彌生之作，成 10高嘅吹氣公仔彌生（ヤヨイちゃん）妹妹同佢嘅狗仔玲玲（リンリン）！

而上年嘅藝術之夜會場就遍佈成個六本木咁濟，包括六本木ヒルズ，森美術館，東京ミッドタウン，サントリー美術館，21_21 DESIGN SIGHT ﹠ 国立新美術館，滿足晒鐘意戶外／戶內嘅藝術展品嘅朋友！

想參加嘅朋友，要密切留意佢地官網嘅消息，開始計劃下行程啦！

o^___^o

PS: 點解叫六本木呢？首先六本木代表六棵樹木，名嘅由來有兩個。
第一，傳說是由於江戶時代，六個姓氏漢字皆有「木」字的家族在此建有房屋居住，分別為青木氏、一柳氏、上杉氏、片桐氏、朽木氏及高木氏。
第二，因為，以前呢度有六棵松木

Ref. Link

六本木アートナイト2013: http://www.roppongiartnight.com/
国立新美術館: http://www.nact.jp/
森美術館: http://www.mori.art.museum/jp/index.html
東京ミッドタウン: http://www.tokyo-midtown.com/jp/index.html

2011 遊走東京都與橫濱 | Day 4 【完】[TayThink / Travel / Toto]

2012-10-14T23:29:00.000+08:00

標題：遊走新舊變化東京，奸爸嗲日本！

日期：2011年10月19日 (星期二)

天氣：多雲（15度）

景點：築地漁市場、淺草寺、Sky Tree (スカイツリー)、上野アメ橫町

美食：築地つきじ喜代村すしざんまい別館 (壽司三昧) 魚生飯、大定玉子燒、淺草寺人形燒、ぽん多本家日式吉列豚肉店（超豪的＝超貴的）

黎左東京幾次，有啲港人「必做」嘅野自己都未做過，好似去築地食壽司，去參觀淺草寺，去漫遊著名嘅東京鐵塔。黎到今日、又係行程嘅最後一日，決定要試下呢啲「必做」嘅野！

我地第一站先去築地，黎個「魚生飯做早餐」！啊啊～

東京築地漁市場

幾年前己經傳出海外聞名嘅東京築地漁市場會好似台灣嘅士林夜市咁被整頓，會全部鋪頭搬上樓。

雖然，只係傳聞，但係都有幸係未有重大改變之前，可以黎到。如果唔係，同去一個香港嘅市政街市冇分別，台灣嘅士林夜市就正正變成咁，衛生係好左，但係原來嘅風味己蕩然無存！！

＝＿＿＿＿＝"

スペシャル丼，有九款刺身！

確實，築地漁市場只係一個露天街市，但係貴為世界最大漁類批發市場之一，仲要喺食魚生最多嘅國家首都位置，我地每行兩小步就己經係一間又一間嘅魚生、壽司店！

我地誤打誤撞入左一間叫 "つきじ喜代村すしざんまい"（壽司三昧），因為，佢地本館（老店）太多人，我地就去左佢地轉角嘅別館（分店），先黎一個スペシャル丼（Special 丼）同三色丼，再加兩件大とろ（toro，Fatty Tuna），大滿足の早餐呢！！

o^____^o

之後，發現佢地原來今年（2012）一月以5,649萬日圓，折合港幣570幾萬的高價投得「日本一」藍鰭吞拿魚嘅壽司店！

老闆話為就算蝕大本都要投到，想為受「311大地震」影嚮嘅日人打打氣！

大定（だいさだ）玉子燒，100円都有交易！

食完個咁滿足嘅早餐，我地又去試另一築地嘅名物—玉子燒！

我地港人睇間茶餐廳好唔好食，會先睇佢杯奶茶或咖啡好唔好飲。而日人睇一間日式料理好唔好食，就會睇佢地玉子燒做得好唔好！

我地食左個咁豐富嘅早餐，當然唔係又去食料理啦！XD

只係去食一間有歷史悠久（有80年）嘅玉子燒專賣店—大定（だいさだ）玉子燒！

呢間鋪販賣不同款式嘅玉子燒，更有千幾至幾千円不等嘅禮盒裝可供選擇！但係，另一邊就好似香港街邊賣魚蛋咁，可以買一串串啱啱燒好嘅玉子燒，盛惠只係 100円，正！好好味！

掛滿左「鮑魚刷」嘅聖誕樹！ XD

食左呢個咁高蛋白質嘅早餐，我地响築地閒逛一番，發現左一間＂街坊＂嘅家居用品店，店前有一棵聖誕樹！？明明未到聖誕㗎！？睇清楚，棵樹原來掛滿左「鮑魚刷」！？原來係老闆將啲「鮑魚刷」扮成松果黎賣，笑鳥！

果然，有創意！

雷門好有型紅色大燈籠

遊完築地，我地又出發去做第二樣「必做」嘅野 — 參觀淺草寺！

不過，講真去淺草寺最想做嘅一件事，係想感受下喺雷門果個好有氣勢，同好有型紅色大燈籠嘅真身！

淺草寺前兩排掛滿嘅白燈籠

唔知點解，總係覺得日本嘅寺廟建築都係好有型，除左雷門，仲有淺草寺前兩排掛滿嘅白燈籠，又或者掛喺門旁嘅大草鞋…

淺草寺

三個熱辣辣紅豆餡嘅人形燒，只係100円咋！

一邊參觀，一邊又因為貪食同貪平，我地又去食呢度嘅名物 —人形燒！

100円就有三個熱辣辣、紅豆餡嘅人形燒！！真係又抵食又好食，啊啊～

o^_____^o

遊完淺草寺，我地冇去做第三樣「必做」嘅事遊東京鐵塔（但係好想去一次，>_<"），而係去體驗一下係 2012年5月22日先開幕嘅東京スカイツリー（SkyTree／天空樹，中文名：晴空塔）！

呢個將會成為東京嘅新地標嘅スカイツリー，位於日本東京嘅東部舊區 – 墨田区押上。其實，佢係一個高 634米嘅嘅數碼電視廣播塔，足足比只有 250米高嘅東京鐵塔高左兩倍半有多！

而佢正正係喺東京最舊嘅地區出現嘅最新、最高建築物！

佢嘅出現改變左一個東京最不起嘅地方，成為全日本，甚至全世界最矚目嘅地方，同時亦達到佢地想振興東部舊區經濟嘅目的，讚呀！

東京スカイツリー（SkyTree／天空樹，中文名：晴空塔）與金色泡沬（A記啤酒）！

因為未開幕嘅緣故，我地冇得入去參觀，但係喺淺草寺附近有一個近河邊嘅小公園（偶田公園），可以近距離一睹晴空塔嘅風彩！

如果，你有睇開我嘅Blog，兩年前都介紹左我最欣賞天空樹嘅燈光設計，而佢地係今年5月嘅東京ホタル TOKYO HOTARU FESTIVAL 2012 （東京螢火蟲節 2012）將10萬個太陽能 LED燈放入隅田川（河），真係「美得不很了」！！

東京ホタル TOKYO HOTARU FESTIVAL 2012 （東京螢火蟲節 2012）
img: 東京ホタル TOKYO HOTARU FESTIVAL 2012

同天空樹影完相，已經黎到中午嘅時間，我地行程中仲有兩樣野未做，第一係食日式吉列豚肉，第二係去探一位大叔！

兩年前黎東京嘅蜜月の旅，我地食左一間開店近百年（大正10年，即1921年）、平民化又好好味嘅日式吉列豚肉店，呢個中午我地會去試另一間，同樣開店近百年（1929年）嘅ぽん多本家日式吉列豚肉店！

呢間正宗嘅日式吉列豚肉店，喺各大嘅日本飲食網都有唔錯嘅評分，非常有名！

ぽん多本家日式吉列豚肉店

如果，你唔係特登搵，可能都未必發覺到佢，因為佢門口只係得一個招牌同兩度又大又古老嘅木門，冇擺任何餐牌或者介紹响出面，完全唔知佢裡面係咩環境，開緊鋪，定打左烊，好似香港銅鑼灣嘅金雀咁！可能呢啲就係名店嘅本色！？

喺個門口前，真係心大心細，都唔知入唔入去好！不過，諗下都搵到黎呢度，就一於膽粗粗試一次啦！

一推門。嘩！點解冇客嘅！？

只係睇到左面係收銀處，正面係廚房，廚房前面嘅枱就整緊傳統吉列豚肉嘅伴菜 —椰葉絲沙律，成座山咁高！！

正當我地猶意之際，招待嘅姐姐就請我地上一樓。

呼～原來一樓先係招呼客人嘅地方，已經坐滿左7、8成客啦！我地竟然仲可以安排坐喺近窗嘅位置。

o^____^o

招待嘅姐姐先奉上兩杯類似功夫茶嘅濃茶，果然係吉列豚肉專門店，夠細心！正所謂「濃茶解膩」！


兩杯類似功夫茶嘅濃茶	佈置充滿傳統嘅和式風味 ﹣ 和紙燈

佈置充滿傳統嘅和式風味，好似有竹窗簾、和紙燈、木製器皿，原木嘅枱櫈，而且，柔暗嘅燈光…極之懷舊！

而且，每一位客人都西裝骨骨，睇黎都係薪高要職嘅人，好似都喺度傾緊生意咁。唯獨係我地同隔離枱嘅一對撑緊枱腳嘅吊帶伯伯同妙齡少女著得比較Casual 啲，而更有趣嘅係，佢地喺午餐時段都要開支紅酒…！

冇耐，我地 order 左吉列豚肉セット（set）就黎左啦！

吉列豚肉セット

一塊厚切嘅豚肉炸到啱啱好金黃色，啲吉列皮緊緊咁包住佢，食落外層鬆脆、內層多肉汁，但係，除左食到豚肉外，其他味都感覺唔到，就連一啲多餘嘅鹽都冇！

日人食野講究「鮮」同「純」，難怪佢地咁推崇呢間吉列豚肉店！

不過，好似我地呢啲食開「重口味」嘅港人，同我呢啲平民，都係鐘意上次果間多啲！

不過，無論如何，今次我地食左有史以黎，喺日本最豪（即係最貴 =.=）嘅一餐，總算品嘗過咁高級又傳統嘅吉列豚肉店！

最後，我地就去探上次遊日喺上野嘅アメ横丁（Ameyoko）遇到嘅一位大叔！每次黎東京都會黎呢度買日本菓子做手信，大叔係一間菓子嘅老闆，佢識少少廣東話，之前有朋友M喺311前黎東京玩，都介紹左佢呢間鋪頭買手信，朋友返黎話大叔蒼桑左好多。

所以，我今次都想探下佢。

兩年前同大叔合照

確實，成條アメ横丁真係少左人，黎到見到大叔又真係冇兩年前咁有衝勁，我地挑選左大包細包嘅菓子去埋單。埋完單之後，我喺個袋度拎左一張兩年前同佢合照嘅相送畀佢，跟住同佢講句「奸爸嗲」（港式日語，がんばって）！

佢見到張相，同我講多謝，仲握埋手，跟住同我講左句廣東話「加油」！

當我地轉身走嘅時候，大叔叫住我地，仲捉住我隻手擺左幾款唔同嘅菓子，以示謝意。

同大叔道謝，同道別後，我地就返酒店準備返港。

雖然，只係一句小小嘅祝福，小小嘅幫襯，一幅小小嘅照片，但係都希望可以帶畀大叔一點點嘅支持！

日本，再次向你說再見了！

喺巨大嘅天空樹下，已經睇到你地一定會好快振興過黎，就好似我最喜愛而美麗嘅神戶市一樣！

「がんばれ，日本！！」

【完】

再次飛翔吧！日本！！

再次重溫 Day 4 相片，相簿投影播放

冇 flash player 嘅朋友，請按這裡觀看相簿。

重溫是次遊記，請按這裡！

Reference:

東京Sky Tree (スカイツリー)，http://www.tokyo-skytree.jp/
東京ホタル TOKYO HOTARU FESTIVAL 2012，http://tokyo-hotaru.jp/index.html
東京ホタル 2012 Video，http://tokyo-hotaru.jp/movie_01.html
つきじ喜代村すしざんまい， http://www.kiyomura.info/index.html
大定（だいさだ）玉子燒，http://www.daisada.jp/
アメ横商店街，http://www.ameyoko.net/

2011 遊走東京都與橫濱 | Day 3 ー Part 4 [TayThink / Travel / Toto]

2012-10-09T00:20:00.000+08:00

標題：滿足喜愛慢活、散步同愛貓嘅東京老區﹣吉祥寺與谷根千

日期：2011年10月18日 (星期二)
時間：黃昏
天氣：晴、清涼
景點：谷根千、谷中銀座
美食：一蘭拉麵、Italian Tomato 朱古力慕絲芝士及士多啤梨蛋糕

谷中銀座

講完有關【谷根千】嘅小介紹後，就正式用最原始嘅方法﹣雙腳，去感受【谷根千】嘅「下町風情」！

我地冇照住啲旅遊書要去揾邊間食店食餛飩（根の津讚岐竹烏冬餛飩），或者去邊間糖果店去買日本傳統糖果（金太郎飴），定係去神社（根津神社）參觀，我地只係一心想响呢度輕輕鬆鬆咁散策一番，同埋探下生活係呢度嘅「慢活」同「散策」代表 ﹣ 喵喵！

【夕陽階梯】「夕やけだんだん」

而日慕里嘅「谷中銀座」係我地散策【谷根千】嘅第一站，由吉祥寺去日慕里駅，要成差不多45分鐘車程，正好畀我地雙腳先休息下，黎到係下午三點幾，啱啱好係黃昏時間！

要校正黃昏黎谷中銀座有兩個原因，第一係呢度有一個好出名嘅景點，而且，仲有好多日劇都會黎取景嘅【夕陽階梯】「夕やけだんだん」，當然要响夕陽時份黎欣賞啦!

夕陽下の日光浴

第二，由於正正有一個大大嘅夕陽，呢度好多喵喵好鐘意黃昏時候出黎曬太陽，黎個夕陽下の日光浴，所以，愛貓嘅朋友要記住黃昏黎啦！

我地今日就好幸運，先係天氣晴朗又涼爽，有大大個夕陽，所以不論「夕陽階梯」或者「享受緊日光浴嘅喵喵」都畀我地睇晒！！

瞓到死豬咁嘅喵

可能呢度嘅喵喵真係「見人多過食魚」，完全唔驚人不特止，仲要任影相、任摸唔嬲！

呢隻花紋喵畀幾個人圍住影佢嘅睡姿，都完全懶埋（充滿慢活姿態），如果佢唔係轉下身，仲以為佢暈左！

谷中銀座嘅「嘉德利奧」

响【夕陽階梯】仲被我地發現左谷中銀座嘅「嘉德利奧」！！

不過，佢就畀漫畫《俏皮扮野猫》當中嘅「嘉德利奧」溫文得多，一邊恰眼瞓，一邊畀我地摸住影相！

啲毛仲好滑添！ (⌒-⌒; )

專賣招財貓擺設嘅商店﹣谷中堂

確實因為呢度有咁多貓，又有咁多人鐘意貓，所以呢度有好多唔同鋪頭都以貓黎做主題，好似我之前提到嘅貓尾蛋糕，好多特式嘅貓咖啡店，或者唔同嘅貓雜貨，更加有一間專賣招財貓擺設﹣谷中堂！

而且，不論谷中商圈嘅歡迎旗，定係為東北籌款嘅籌款箱都以貓黎做裝飾！

谷中商圈歡迎旗及貓雕像

商圈更係响鋪頭簷蓬上，製作栩栩如生嘅貓雕像，真係幾可亂真！聽聞話總共有 7隻貓雕像！？數目嘅真假就唔知啦！

真係一個可以完全滿足貓痴一族嘅地方（我唔係貓痴呢）！

o^___＿＿^o


唔知有咩食乜嘅呢？XD	點解冇黃大仙O架？XD

除左貓痴之地，我地漫無目的咁行，都偏偏可以發現啲無聊野，估唔到搵到兩個我熟識嘅名，一個係鋪頭名叫《深圳》，另一個係寺廟名叫《慈雲山》！？


古舊咖啡店	SCAI THE BATHHOUSE，COOL！

我地不停行走在充滿「下町風情」嘅【谷根千】，雖然，呢度有好多古舊嘅店鋪，但係當中亦都有唔少由古鋪翻新、改建嘅店，好似 SCAI THE BATHHOUSE 就由澡堂改建成 Art Gallery，定期都有唔同嘅主題同展覽，如果大家下次去【谷根千】，不妨上佢嘅官網睇下有冇感興趣嘅展覽，參觀藝術品之餘又可以參觀《羅馬浴場》設計師路西斯偷橋嘅地方，可能會令你有新嘅靈感唷！

XD

小巷又遇見嗲喵～

雖然行錯路，不過啲街燈好靚喎！

由黃昏一直行到入黑，搞到行錯路，想搵最近嘅JR駅，點知行左去東京大學！！！

:O

冇左陽光，開始覺得有啲凍，而且已經將咖哩飯同牛肉球消化得七七八八，個肚又開始打鼓…

>___<"

雖然話散步，不過已經由今朝行到夜晚，確實疲倦！

真係「飢寒交迫」、「疲倦不堪」！！

Italian Tomato 朱古力慕絲芝士蛋糕

還好，最終搵到一個地鐵站，轉左唔知幾多次車，終於返左池袋，即刻黎碗一蘭拉麵，而且返酒店前仲買左兩件 Italian Tomato蛋糕同 MyV 慶祝週年紀念，希望每年今日都可以同你「慢活」同「散策」！

o^________^o

愛貓朋友嘅另外一個小 Tips，如果你好想去睇貓又唔怕…，可以去「谷中靈園」，果度仲多喵喵啊！
:)

... 待續 (つつぐ)

Ref. Link:

【谷根千】 http://www.yanesen.net/info.html
谷中銀座 http://www.yanakaginza.com/
金太郎飴 http://www.kintarou.co.jp/
ねんねこ家 http://www.nennekoya.com/
カヤバ咖啡屋 http://kayaba-coffee.com/
猫町カフェ29 http://nyancafe29.blog.fc2.com/
根津神社 http://www.nedujinja.or.jp/
招き猫の谷中堂 http://www.yanakado.com/
SCAI THE BATHHOUSE http://www.scaithebathhouse.com/

再次重溫　Day 3 相片，相簿投影播放

冇 flash player 嘅朋友，請按這裡觀看相簿。

2011 遊走東京都與橫濱 | Day 3 ー Part 3 [TayThink / Travel / Toto]

2012-10-02T12:32:00.001+08:00

標題：【谷根千】簡介：充滿「慢活」同「散策」的東京老區

日期：2011年10月18日 (星期二)

天氣：晴、清涼
景點：谷根千
美食：-

【谷根千】— 谷中銀座

滿足晒個肚同雙眼，我地就離開吉祥寺，繼續去一個近年熱爆東京嘅散步好去處 — 【谷根千】(Ya-Ne-Sen)！

呢個地方有齊晒所有成為【慢活】同【散策】（散步）嘅元素！

首先﹐由佢個名【谷根千】講起﹐其實係指由谷中、根津、千馱木呢三個舊嘅小社區組成。咁你會問舊到咩程度？

據知呢度由於冇畀二次世界大戰嘅洗禮，所以仲保持住二十年代嘅樣貌，有古建築、老街、古廟宇、老鋪、更重要係有住以前嘅生活節奏，日人稱之為「下町」風情（以後再作介紹），有住「回到江戶」嘅感覺！

老街與老鋪充滿著下町風情

「古舊嘅下町風情」令呢度有【慢活】嘅其中一個重要嘅元素！

另一個元素，就係呢度同吉祥寺一樣，唔單至冇大型百貨公司，反而有好多「特色小店」，估計有成70幾間咁多。

而第三樣，就係縱然响鐵路咁發達嘅東京，都冇一個鐵路站可以直達【谷根千】呢個地方。

佢正正係喺三個唔同嘅鐵路站（日慕里、根津同千馱木）中間（地圖）。

要逛呢度嘅特色小店？

你一定要用最原始嘅方法，即係你雙腳 —「焗行」！！你或者可以用一個輕鬆嘅講法：「散步」！

愛曬日光浴的【谷根千】喵喵

最後嘅一個元素，就係呢度到處可見一種天生已經充滿住【慢活】主義，而且，極愛【散策】嘅動物 — 喵喵！

「多貓」更令【谷根千】倍添【慢活】同【散策】嘅特質，更加有好多唔同地區嘅日人專程黎睇貓唷！

o^______^o

以上四個元素，足以令【谷根千】成為東京首屈一指嘅散策嘅好去處！

... 待續 (つつぐ)

Ref:
1. 谷根千地圖 http://www.yanesen.net/common/pdf/map.pdf

2011 遊走東京都與橫濱 | Day 3 ー Part 2 [TayThink / Travel / Toto]

2012-09-16T23:04:00.002+08:00

標題：滿足喜愛慢活、散步同愛貓嘅東京老區﹣吉祥寺與谷根千

日期：2011年10月18日 (星期二)

天氣：晴、清涼

景點：吉祥寺與谷根千

美食：吉祥寺吉列松板牛肉球、まめ蔵咖哩飯、自家焙煎散步咖啡

吉祥寺 JR 出口外

有人話作為港人平時嘅生活已經夠晒繁忙，放假會想去啲悠閒嘅地方，讓自己「慢活」一番！所以，身邊好多朋友放假時會擇去啲陽光海灘嘅地方。

但係，不論琴日遊嘅橫濱，定係今日會行嘅東京，响日本你唔難搵到「慢活」嘅角落，呢啲就係證明一個國家或城市嘅多元性！

而我地今日第一站，就係幾年前黎東京已經愛上嘅小社區—吉祥寺！

個性小店

鐘意呢度嘅原因係以東京都黎計，佢係一個較少高樓大厦嘅地方﹐一棟棟嘅平房不論係前鋪後居、地鋪上居、買生活所需品定係特色嘅小店，都有住自己嘅個性同獨特性，每一間都好吸引住我雙眼！

再翻看網上嘅報導原來吉祥寺連續五年被選為東京最受歡迎嘅居住地方，而仲要係雜誌 Tokyo Walker 投票活動中，被選為 "最想住"同 "住後感"雙重冠軍！！

:O

不過﹐一年前响網上睇到嘅報道話﹐有一個大型商場 (coppice) 開幕，真係擔心會唔會對呢個地方會帶黎啲咩重大轉變！

一出吉祥寺 JR站﹐我地就去左呢間啱啱開業一週年嘅大型商場﹐除左係因為想睇下呢度有咩搞作﹐另一方面睇下呢度六樓，以唔同卡通人物而設立、獨立專櫃作招來嘅玩具區。

當中，更有近年大熱嘅水䐁（キュルッと) 專門店﹐响呢度可以見到港日女士們嘅瘋狂。而男士又唔洗咁愁﹐因為呢度都有好多男仔都鐘意嘅多美車(トミカ) 專門店 — Tomica Shop！

水䐁（キュルッと) 專門店

我地掃完一輪心頭好﹐攞住一袋二袋嘅戰利品就去重遊响吉祥寺最鐘意嘅地方吉祥寺本町二町目中通道(Nakamichi)附近嘅小街、窄巷。

第一時間係去醫肚，去我地上次食過嘅咖喱店﹣まめ蔵！

まめ蔵咖喱

呢間開左 30幾年嘅老子號，同上次黎一樣都係咁受歡迎！我諗佢地受歡迎嘅原因，係佢地嘅咖喱同吉祥寺嘅小鋪一樣充滿獨特性！佢地嘅咖喱有著陣陣嘅藥材味，同咖喱混和一齊，入口濃郁！

更趣係我地竟然坐番兩年前果個位，回味番呢間咁好味嘅咖喱飯！

洗碟咁食完雞肉咖喱飯同蘑菇咖喱飯後，我地就開始遊走於吉祥寺嘅特式小店，有買家品嘅，針織品、舊玩具嘅、木製品、更有買本土特產… 林林總總！目不暇給！！

總之，有一種 “尋幽探秘” 嘅感覺，同行大百貨公司有天淵之別！

行到有啲倦，我地就去嘆咖啡，見到一間叫「散步咖啡」就推門而入。環境一流，因為，呢間咖啡店嘅咖啡豆每日都係自家煎焙，你可以一面嘆住咖啡，一面睇住同聞住師父煎焙咖啡豆同望住街頭唔同行人路過嘅姿態，確實係小休、充電嘅好地方！

吉祥寺咖啡店與「慢活」

嘆完呢杯「秋味」嘅咖啡，我地羞不多完成晒响吉祥寺嘅散步行程。

「秋味」咖啡，帶有淡淡栗子味！

不過，有一個指定動作一定要做嘅，就係食佢地最出名嘅﹣吉列松板牛肉球！

吉列松板牛肉球

品嚐完呢個咁出名又超抵食嘅吉列松板牛肉球（SATOU）！！

我地充滿力量咁，去今日下一個景點 ﹣谷根千！

... 待續 (つつぐ)

Ref. Link:

COPPICE： http://www.coppice.jp/
まめ蔵: http://www.kuu-kuu.com/mamezo/index.html
自家焙煎珈琲散歩へようこそ: http://www7.plala.or.jp/usa-asia/coffee/index_p.html
サトウ(SATOU) 松阪牛専門店：http://www.shop-satou.com/

2011 遊走東京都與橫濱 | Day 3 ー Part 1 [TayThink / Travel / Toto]

2012-09-13T00:11:00.000+08:00

標題：池袋與貓頭鷹

日期：2011年10月18日 (星期二)

天氣：晴、清涼

景點：池袋

美食：﹣

池袋吉祥物- 貓頭鷹

未講今日遊記之前，想先同大家分享一下有關池袋嘅趣事，大家知唔知點解貓頭鷹會成為池袋嘅吉祥物呢？

大家除左到處都可以見到貓頭鷹嘅石雕，就連警局都打扮成一隻貓頭鷹嘅模樣！

其實，原來係日文上兩個詞語嘅發音都好近似，池袋係 ike-bukuro 而貓頭鷹就係 fukurou，所以，自古以黎貓頭鷹就成為左池袋嘅吉祥物啦！

池袋貓頭鷹警察局

而且，係日本文化上貓頭鷹代表左幸褔嘅意思，所以有人說《貓頭鷹守護住幸褔的池袋》！

不論係《貓頭鷹守護住幸褔的池袋》定係《貓頭鷹守護住池袋的幸褔》，仲之池袋就勁多貓頭鷹石雕啦！

咁點解成個池袋又可以見到咁多 貓頭鷹嘅石雕呢？

翻查網上文章知道原來 1987年為紀念池袋JR站通車，車站內擺設一座石雕「池貓頭鷹」（ i k e -fukurou），更成為左當地嘅地標！

池袋JR站嘅「池貓頭鷹」

自始就成風，池袋每個角落都會見到貓頭鷹嘅石雕啦！

佢亦都成為東京人相約會面兩個最出名嘅地標之一！

池袋成街都係貓頭鷹

第二個最出名嘅地標就响澀谷，大家之知唔知係也？

答案响呢個 POST 底，提示佢嘅故事2009年又翻拍左成電影㗎！XD
…
…
…
…
…
…
…
…

…
…
…
…
…
…
…
…
…
…
…
答案: 東京人相約會面另一個最出名嘅地標 ﹣澀谷嘅「忠犬八公」，電影咪係《秋田犬八千》！
o^_____^o

有一個大家都識嘅朋友未出世已經有身份證，仲要擺埋上網任人下載添!! [Comic + Anime, Fun]

2012-09-06T08:23:00.000+08:00

佢咪係近日再次紅爆香港嘅 多啦A夢 (叮噹，ドラえもん) !

你可以响川崎市政府網站下載由川崎市市長頒發多啦A夢 (叮噹)嘅身份證 (特別住民票) !!

啱啱嘅 2012年9月3 日，係佢 100年後嘅生日 (2112年9月3 日)!
XD

响佢係原來身高、體重同胸圍都係 129.3 !?!?!
仲有列明佢最鍾意嘅食物添!!

o^_______^o

睇黎日本呢個動漫國真可以打動漫牌贏經濟 !!

川崎市政府網站:
http://www.city.kawasaki.jp/20/fmuseum/index.htm

下載方法 :
1. 搵到「ドラえもん特別住民票」

2. 按是但一個超連結 (サイト = SITE)
サイト X
3. 你會下載到多啦A夢 (叮噹)嘅身份證, PDF 格式啲! :D

2011 遊走東京都與橫濱 | Day 2 - Part 3 [TayThink / Travel / Toto]

2012-08-01T00:21:00.002+08:00

標題：新奇刺激還是繼續浪漫的橫濱

日期：2011年10月17日 (星期一)
天氣：晴、清涼
景點：Toy's Club, Cup Noodle Museum, 赤レンガ倉庫（紅磚倉庫）
美食：ごろり牛肉カレー(炸咖喱牛肉包)　及丸ごとエビ(炸蝦包)￥250＠

其實﹐沉醉响浪漫嘅橫濱半山嘅時候﹐我地有一個小發現﹐就係响半山上竟然有一間玩具鋪！？

好有型嘅古董車

而鋪主仲要係一個玩具嘅大收藏家﹐鋪內鋪外嘅都有大量嘅收藏﹐其中幾架古董車同 VolksWagen MiniBus 就最非常吸引我啦！

VW小巴士，印埋玩具店嘅名！

而鋪內更有一個收費嘅鐵皮玩具展覽區﹐認真大開眼界！！

由谷戶坂行返落元町，我地冇好似阿海同阿俊去「丸英商店」食＂可樂餅＂（吉列薯茸牛肉餅），因為，我地已經過晒鐘！

我地方要趕去橫濱嘅最新嘅景點，一個月前全日本只有關西嘅大阪先有嘅「安藤百福發明紀念館」即係「日清杯麵博物館」（Cup Noodles Museum)﹐黎個橫濱新奇の旅!!

用3分鐘車程，就可以由元町.中華街站去到馬車道站，再行大該 20 分鐘，我就黎到位於海邊嘅杯麵博物館。 3個 「！」係呢個博物館嘅標誌，而所有博物館限定嘅紀念品都會印上呢3個 「！」 ！

「！！！」嘅「安藤百福發明紀念館」

「！！！」同杯麵有咩關係呢？

日人好聰明，博物館嘅名同主題都係同杯麵有關，不過，大部分嘅內容係強調創辦人 — 安藤百福嘅 Creative Thinking！

「！！！」就成為左呢度過嘅標誌。

利用佢 Creative Thinking 呢個 design process 去克服重重障礙，一次又次突破同創新，令杯麵面世，更開拓出日清王國！！

但係由於博物館啱啱 9月先開幕，係全關東近期最火爆嘅熱題之一，博物館內兩個工作坊都長期爆滿！

其中一個由小麥製成雞湯拉麵嘅工作坊（雞湯拉麵工廠），更加要一個月前預約！

全場爆滿！！

另一個自製杯麵工作坊(我的開杯樂工廠)，可以自己加入鍾意嘅配料同味道，更可以杯身設計同畫上喜歡嘅圖案，但係估唔到都完全爆滿！！

>_____<"

「失落」!!

我地只好專心參觀 …

好「型」呀！

一入到博物館嘅感覺係「型」！

因為﹐進館嘅入口位於二樓，你要行一條又大又長嘅樓梯，而建築師將樓梯上空完全清空，令樓底足足有成個博物館嘅高度，亦即係 5層樓咁高！

當我行上呢條樓梯嘅時候，就有好似入緊去香港文化中心嘅演奏廳一樣，又期待又有啲不自在嘅緊張！

入到館就可以參觀《即食麵歷史方塊展覽廳》，由百福先生响 1958年第一個發明嘅雞湯即食麵，到 1971 年發明嘅杯麵，甚至 2005年發明嘅太空拉麵都可以見到！而且，仲收集左由 1958年到依家超越半個世紀、黎至世界各地嘅即食麵同杯麵！

數唔到咁多來自世界各地嘅杯麵

:O

跟住係百福放映廳同《百福研究小屋》同《安藤百福歷史廳》，當中嘅《百福研究小屋》利用聲及畫效果，將遊人帶去 1958年百福先生點樣發明出即食麵嘅過程展示出黎！

:)

而最有趣嘅係《創造思考廳》，設計師將百福先生 Creative Thinking嘅 6個元素分別展示出黎！！當中嘅《世界處處有啓示》同《培育創想》就最有趣！！

好似《培育創想》就用左移動嘅光源同模型森林去解釋主題。

《培育創想》

參觀完博物館﹐已經係黃昏﹐一個全日最浪漫嘅時間﹐而响呢個咁近海又最早洋化嘅城市﹐想揾一個唔浪漫嘅地方﹐真係有啲難度！

我地冇去海洋塔同古船冰川丸﹐而去左橫濱赤レンガ倉庫（紅磚倉庫）﹐倉庫分為一、二館，兩座用紅色磚建於明治末期至大正初期（1902年）、經歷百年時光、多次大大小小嘅災害，歷史悠久嘅倉庫！外面係古蹟﹐裡面改建成係商場同不嘅餐廳。

赤レンガ倉庫（紅磚倉庫）

响外邊為呢間老倉庫影左一輪特寫，我地突然覺得好…肚餓呀！！

原來完全唔記得左食晏!！！
>_____<"

一入到商場我地就聞到一陣陣麵包香，聞住呢陣麵包香味就到左一呢間麵包咖啡店！

見到麵包籃擺一個個炸得好靚咖哩包，我地就叫左一個炸咖哩牛肉包（ごろり牛肉カレー）同一件 Cake 加杯咖啡嘆陣~　

炸咖哩牛肉包（ごろり牛肉カレー）

秒殺左個炸咖哩牛肉包，再 Encore 左丸ごとエビ(炸蝦包)，兩個就咁就洗左￥500 ！即係港幣50 大元！！

好貴但係又好好食！　
超矛盾嘅心情！！

>_____<"

夜色的紅磚倉庫

歎完呢個極上麵包下午茶，天已經入黑了，我地拍下被黃燈照著嘅赤レンガ倉庫（紅磚倉庫）同不停變色嘅巨型摩天輪，就告別左呢個一直同我有情意結，又卻浪漫嘅海灣城市 ﹣橫濱！

聽日會去同炸咖哩包一樣咁矛盾嘅、又係最古舊，但又係最熱門嘅東京舊區出發！！

o^_______^o

﹣Day 2 完﹣

再見了，橫濱！

Reference
1.「安藤百福發明紀念館」:
http://www.cupnoodles-museum.jp/
2. 橫濱紅磚倉庫（赤レンガ倉庫）炸咖喱包 : http://www.yokohama-akarenga.jp/shops/211.html

再次重溫　Day 2 相片

相簿投影播放

冇 flash player 嘅朋友，請按這裡觀看相簿。

我普通卻奇妙的母愛 [TayThink, TSL (Tay's Spiritual Life)]

2012-05-12T17:09:00.000+08:00

上年母親節（2011年），崇拜當中，記得牧師說每個小孩都由父母所生，由母親生養懷搋，就如耶穌在世也如是，這是神的「奇妙設計」… 而我也確確實實感到這設計的奇妙呢！

回想起來，我是相當幸運的一個，因能過著一個充滿母愛的童年。我與媽媽的故事有很多，但有一個是由小至今也沒忘記的。縱然，它只是一個很小及普通的生活情節，但數十個年頭後，在我腦海中至令仍然清清楚楚記得當時的情景，甚至感覺！

小時家境並不豐裕，但每天卻得著不少母愛。每天，父親由清晨工作至深夜，可能在吃晚飯時，能見他一面，吃過飯後他又怱怱出外繼續餘工作，有時更忙得連晚飯也不能回家吃呢！

媽媽則每天也留在家中，除了為照顧我們三姐弟，亦為幫補家計。她整天也埋首在縫衣機前為一袋又一袋從製衣廠拿回來的成衣品加工！

除了起來做家務時，其餘的時間只能看著她的背景，正因如此，媽媽每天也能「陪著」我和姐姐們，每天也感覺她的愛與“教導” ！

而小時候的我，腸胃很弱，很容易就會肚子痛，有時會痛到要扭作一團，像「攣弓蝦米」，而且，有時更渾身冒著冷汗來，媽媽就為我抺上那種刺鼻的藥油，讓我痛楚舒緩。

若媽媽不用趕工，在黃昏時，她會帶我們三姐弟到我們的「樂園」（家附近的一個細小休戲處）玩耍。在一個該是深秋的黃昏，媽媽帶我們到「樂園」去，如常地我們玩得不亦樂乎，而且天色漸漸昏暗起來。我的肚子突然又痛起來，更開始冒著冷汗，在這個沒了太陽深秋黃昏，感到更加冰冷、加倍的痛楚！當時，我甚麼也不懂，只管跑回媽媽身旁，喊著：「好肚痛！返屋企！好肚痛！返屋企！ …」

媽媽看見我這個痛楚的表情，立刻把我抱起﹐在耳邊說著：「好呀，沒事嘅。我地返屋企啦！我地好快就返到屋企㗎啦！ …」媽媽就抱著我回家，在這短短的回家路上，在她的懷中切切實實感著由她而來的「安全」及「保護」。

每人也經歷弱小的嬰孩期才會漸長到強壯的成年期，如在未強壯之前，定會不多不少遇上像我「深秋冰冷的黃昏」的經歷，若沒有這份「愛」、「照顧」、「安全」及「保護」，成長期的我也不知會怎樣？而今天的我定會很不一樣！？

感謝神！讓我經歷同樣的「奇妙設計」，讓我感著這份普通卻奇妙的母愛！

媽媽，母親節快樂！
o^_______^o

Start from 2006 ...

2011 遊走東京都與橫濱 | Day 2 - Part 2 [TayThink / Travel / Toto]

2012-01-16T22:50:00.000+08:00

標題：漫步於宮崎駿筆下的橫濱紅花坂上
日期：2011年10月17日 (星期一)
天氣：晴、清涼
景點：石川町、山手西洋館、意大利庭園、外交官の家、布拉夫18號館(ブラフ十八番館)、天主教山手教會教堂、聖公會會堂、百利普會館（ベーリック・ホール）、艾利斯曼館（エリスマン邸）、山手234號館、山手資料館、港の見える丘公園（港見丘公園）、橫濱市英國館（イギリス館）、山手111號館、『谷戶坡』
美食：----

如果，你係宮崎駿粉絲，你可能知道佢地兩父子繼『地海傳說』後又有新作，片名：『コクリコ坂から』（港譯：《紅花坂上的海》)，而且，七月已經响日本上映，今日知道有優先場就即刻買飛入場睇，簡單又浪漫嘅愛情小品（感動左我多次呢～）！
o^______^o

呢套動畫嘅故事發生嘅背景地方就正正係喺1963年嘅橫濱，而能得到宮崎駿嘅垂青，你就可以想像到呢個地方有唔少嘅吸引力，而片中日文字 ﹣ 「坂」就係指斜坡！

呢度比神戶嘅斜路斜好多呢！

而要遊呢個浪漫嘅橫濱，亦由行斜路開始，同遊神戶嘅分別係呢度嘅斜路斜好多！
=.=

另一樣唔同嘅係由石川町站一路行，沿途會見到好多型格嘅 Design House ！但係，話明係名勝遊，我地想睇嘅梗係佢地最富歷史價值嘅山手之丘上7間山手西洋館。

不同嘅 Design House

行左唔洗10分鍾就到啦！我地行入山手意大利山庭園，要先經過布拉夫18號館（ブラフ十八番館），跟住就見到最著名嘅外交官の家（前意大利領事館）。見到一班老人家响度寫生，個個畫緊油畫！！

外交官の家

而且，個個都好認真，畫得好靚，睇黎呢套動畫影嚮力不少（難怪係日本 2011年賣座電影第一名），同時又覺得自己嘅文化水平遠遠唔及呢班老人家，因為自己都唔知有幾多年連鉛筆都未拎起過～

:{

屋內有好多大大嘅玻璃窗

外交官の家嘅外型「十足十」一間大嘅玩具大屋，似足細嗰時新年實會收到嗰隻藍色鑵曲奇餅上嗰間大屋，完全係傳統西洋式建築，好可愛！屋外花園冇電影中所提到嘅紅花，但係就種滿美麗動人嘅大白花！而呢度更可以遠眺橫濱浪漫嘅海洋塔。

屋內嘅佈置細緻、簡單又典雅，當中更睇到屋主對家庭嘅注重。一入屋，百多年前嘅生活就重現眼前，大大嘅飯廳，中間有一張長長嘅大餐枱，旁邊有一個火爐。由於整間屋都有好多大大嘅玻璃窗，令大量嘅陽光照入屋內，解決當時燈具不足嘅問題。

屋內茶室

經過飯廳後，會見到一個八角形嘅茶廳，被一幅幅又大又長嘅玻璃窗包圍住，屋主同朋友就可以全天候，邊歎茶邊欣賞屋外美麗花園、橫濱市景同橫濱港口。再行上二樓欣賞埋佢地嘅寢室，就離開左外交官の家繼續响呢個半山區散步。

其實，沿半山呢度嘅山手本通一直行去港の見える丘公園（港見丘公園），就可以欣賞晒其他 5間嘅西洋館。而沿途亦可以感受到呢度充滿日洋文化交流嘅痕蹟，好似你會發現有好多唔同嘅教堂（更加有外國人墓地），當中嘅天主教山手教會教堂同聖公會會堂，就盡顯佢地嘅歷史、莊嚴同宏偉！而喺我地行經元町公園時，更聽到一班少女中學生响公園練習詩歌，感覺尤如置身外地嘅小鎮，『好唔日本』！

山手資料館

參觀完元町公園內嘅百利普會館（ベーリック・ホール）、艾利斯曼館（エリスマン邸）同山手234號館後，就見到山手資料館，據知佢係全橫濱市內現存唯一的木造西洋館。傳聞宮崎駿片中嘅《主角屋》都係參考呢度（至少顏色係）！！！

:O

港の見える丘公園（港見丘公園）

去到港の見える丘公園（港見丘公園），你就可以感受到片中女主角家中望見嘅景色 ﹣橫濱海港！公園旁就有最後兩間嘅西洋館：橫濱市英國館（イギリス館）同山手111號館，免費供遊人參觀。响英國館外更有一個玫瑰花園，有成 1,500株玫瑰，愛影花嘅朋友又要預留多啲嘅時間啦～

因為行程緊密，我地冇辦法參觀晒每間西洋館，就要離開前往山下港區一帶。而落山必經嘅斜坡﹣『谷戶坡』，就正正係片中男、女主角發展感情重要嘅一幕的所在地。

谷戶坡

雖然，我同 MyV冇好似片中男、女主角咁踏住單車落山，我地只係用雙腳慢慢咁行落山，但係諗返起當時嘅感覺，彷彿同樣感受到片中宮崎駿老師要表達嘅浪漫與甜蜜！

=^___^=

再次聽住《來自紅花坂》電影主題曲手嶌葵【さよならの夏〜コクリコ坂から〜】（道別的夏天），感覺很好呢！

…待續
…つつぐ

Day 2 相簿投影播放

冇 flash player 嘅朋友，請按這裡觀看相簿。

是次其他遊記，請按這裡!
:D

2011 遊走東京都與橫濱 | Day 2 - Part 1 [TayThink / Travel / Toto]

2011-12-27T10:42:00.002+08:00

標題：向橫濱出發
日期：2011年10月17日 (星期一)
天氣：晴、清涼
景點：橫濱，鳥濱站Outlet —Yokohama Bayside Outlet
美食：貓尾蛋糕

日本丸 ﹣ Sail Training Ship Nippon Maru

今日起床嘅時間同平時香港返工冇乜分別，一早未夠八點就要出發！！

=.=

原因係我地要去嘅地方，玩足一日都唔夠，而對於我黎講我同呢個地方有個「情意結」。

每次黎日本都好想到一到呢度，呢個地方就係日本最早對外開放嘅港口 — 橫濱！

其實由東京去橫濱真係好快，唔使半個鐘就到！不過，我地就先去一個响鳥濱站嘅 Outlet —Yokohama Bayside Outlet。

如果，你會搭JR 穿梭橫濱，你不防考慮買湘南新宿線 one Day pass (承惠500円，全日任撘JR 根岸線 + 市營港區未來線）。

去鳥濱站要喺新杉田站轉 Seaside line, One Day Pass 就唔包，一程都要成250円！！

不過，意外地又畀我地响新杉站發現到貓尾蛋糕店 ﹣ やなかのしっぽや！

貓尾蛋糕

因為太有趣，所以就算食左個早餐都忍唔住要買番條，留返一陣做小食！

忍唔住已經消化左條貓尾啦～ :P

只係4分鐘嘅車程，就黎左呢個响海邊嘅 Outlet, 呢度竟然有一間 Yamaha 嘅遊艇專門店，你就可以感覺都到橫濱有錢人應該唔少！

Outlet 化身歐陸小鎮

確實，橫濱同神戶都有好多相似嘅地方，同樣係最早對外開放嘅港口，有好多由日外文化交流留下黎嘅副產品！

不過，估唔到呢個 Outlet 都同神戶果個有啲似，當然，其中一個原因係由同一集團經營，令你置身歐洲小鎮一樣，同樣舒服寫意。

近海嘅 Outlet 當然唔少得海洋嘅元素

目標鎖定！
極速掃貨！！
速閃！！！

我地就開始我地嘅橫濱名勝遊，由石川町站開始！！！

…待續
Ref:

1. Yokohama Bayside Outlet
2. 貓尾蛋糕店 ﹣ やなかのしっぽや

2011 遊走東京都與橫濱 | Day 1 [TayThink / Travel / Toto]

2011-10-21T00:52:00.000+08:00

標題：東京暗了~
日期：2011年10月16日 (日)
天氣：清涼
景點：東京都池袋街頭、貓頭鷹警察局
美食：麵創房無敵家

揀來揀去，最後都係揀左黎東京做結婚兩週年旅行！
:D

災後未黎過日本，本來冇乜擔心過，但係，一落機就發現「東京暗了~」！

為左節省電力，機場汽水自動販賣機嘅背板燈熄晒，大部分大廈上嘅大型廣告燈都熄埋，由機場到市區嘅街燈如非必要都係熄左，真係有啲忐忑，都唔知會唔會影響之後幾日嘅行程，更重要係依家都未食晚飯！！返到酒店要成9點幾，搞埋check-in，要成10點先出去揾食，唔知啲食店會唔會因為節能會提早閂門！？
>____<"

為左節省電力，機場汽水自動販賣機嘅背板燈熄晒。

終於，我地搞掂晒check-in，就去搵我地池袋酒店附近嘅目標食店，由於酒店同火車站有一段少距離，BellBoy 教我地行一條有較僻靜嘅路。街燈，行人隧道燈都熄左一半，更返起冷風，感覺加倍幽暗。不過，一過左火車橋底就發現另一個世界，有一條長長嘅人龍！！

已經10點幾，仲係排緊長長嘅人龍！！

呢間就係其中一間最出名嘅拉麵店 —「麵創房無敵家」！

「麵創房無敵家」

店內因為只得16個位，所以，每日由開舖到閂舖又係咁多人！

不過，又唔洗擔心要排好耐隊，我地只係喺條街吹左10 零分鐘風就到我地，唔洗好似香港啲名拉麵店咁一排就排兩個鐘！！

排隊時發現，縱然今日係星期日嘅深夜，周圍嘅大廈嘅天台廣告燈都熄晒，但係，呢度都係人來人往，都安心左啲！

o^____^o

東京池袋街頭

未入去，侍應哥哥已經幫我地落定單，我地點左本店人氣No. 1 — 本丸麵，仲有肉玉麵再加餃子！

入去冇耐，侍應姐姐就送上碗湯麵响枱，已經有一股濃濃嘅豚骨味湧入個鼻裡面，再飲啖湯，條利同樣感覺濃郁嘅豚骨味！

再食一啖麵，唔…麵質有少少似生麵，所以，爽而彈！

「麵創房無敵家」— 本丸麵

而塊肥腩肉就…入口即溶！！

嘩！餓左咁耐，又吹左陣冷風，食到呢碗拉麵，我真係要學日人講句：「好幸福啊！」

食完嘅評價係，佢同另一間港人成日都去朝聖嘅「一蘭」比較，佢嘅豚骨湯9.5分 （10分滿分），原因係佢油膩左少少。

你可能可以食到10碗「一蘭」，但係只可能食到2碗「無敵家」！

不過同樣美味，「おいしい」！超讚呀！

麵質個人就始終偏好鐘意「一蘭」嘅幼韌！

食完後，我地逛下呢個「暗了」嘅池袋，感覺依然充滿活力！

我地都要充滿活力去應接聽日橫濱の旅！

Day 1 相簿投影播放 (內有貓頭鷹警察局)

冇 flash player 嘅朋友，請按這裡觀看相簿。

Ref:

麺創房無敵家

宮崎駿父子檔新作：『コクリコ坂から』來自虞美人坡道 [Movie / Comic + Anime / TayThink]

2011-10-16T01:01:00.000+08:00

《反斗車王2》
攝於Pixar 25 週年展 | 2011.05.11

仲記得喺之前暑假，大家都為《反斗車王2》而瘋狂，响日本嘅動畫迷亦為一套動畫而瘋狂，呢套就係由宮崎駿大師改編自高橋千鶴 80年代嘅少女漫畫「コクリコ坂から」(譯名為來自虞美人坡道 / 來自紅花坂)。

當知道佢會上畫嘅消息 (已經係二月嘅事)，就好想第一時間寫呢篇 post，無奈到依家先有時間…

而香港預計放映時間仲要去到出年 2012年1月19日！
=_________="

雖然，响日本開畫嘅頭3日嘅票房只係得《借東西の小矮人：亞莉亞蒂》嘅三分之二，但係對於我呢講佢同樣吸引，因為，整個故事都會發生响東京嘅橫濱！

雖然，我未去過橫濱，但係呢個地方對我黎講有著一個「情意結」，因為「佢」對我講嘅一句說話，好想親身去睇下呢個地方！

而呢套動畫係宮崎駿父子 (導演: 宮崎吾朗) 五年後再次合作，亦係令人期待！
o^______^o

＊＊啱啱寫左自己上年十月去橫濱嘅遊記 ﹣ 「漫步於宮崎駿筆下的橫濱紅花坂上」[更新：2012-01-16]

以下係『コクリコ坂から』來自虞美人坡道嘅資料：

『コクリコ坂から』來自虞美人坡道

原作 - 高橋千鶴・佐山哲郎「コクリコ坂から」（角川書店刊）
企画 - 宮崎駿
監督 - 宮崎吾朗
脚本 - 宮崎駿、丹羽圭子
プロデューサー - 鈴木敏夫
音楽 - 武部聡志（徳間ジャパンコミュニケーションズ）
主題歌 - 手嶌葵（ヤマハミュージックコミュニケーションズ）
特別協賛 - KDDI
特別協力 - ローソン、読売新聞
配給 - 東宝
アニメーション制作 - スタジオジブリ

官網: http://kokurikozaka.jp/

『コクリコ坂から』預告編

Start from 2006 ...

2010日本關西[追加中部]春の旅 | Day 8 [TayThink / Travel / Toto]

2011-08-19T00:19:00.004+08:00

標題：トミカ博.大阪.2010
日期：2010年4月29日 (四) | 昭和?日
天氣：晴

景點：「トミカ博大阪 - 2010」

美食：阪神名物 – いか燒き

「トミカ博大阪 - 2010」

黎到今次旅程嘅最後大半日，我地終於會留喺大阪，不過唔係去shopping而係去睇展覽會！

呢個展覽會就係之前响便利店用 loppi 機買飛嘅「トミカ博大阪 - 2010」！

Tomica 其實係日本玩具王國 Tomy 旗下嘅玩具車品牌。而由細到大都對「車仔」玩具都冇乜興趣，不過幾年前，有次見到一架有趣嘅幼稚園貓巴士就開始左近年黎一個新興趣！

其實，响日本每年都會响唔同嘅地方搞「 Tomica 博」，咁啱今次撞正响大阪搞，仲要係40週年，作為 「粉絲」一定要去啦！

o^____^o

トミカ40周年

今次嘅「 Tomica 博」响大阪一個叫「港區」嘅地方舉行，港區就係大阪灣，其實呢個亦係大阪傳統嘅親子地方，因為呢度有個大型嘅水族館，每逢假日日人都會一家大細呢度玩。

唔使半個鐘，我地就由梅田駅去到港區嘅トレードセンター前 (Trade Center)。展覽仲有30分鐘先開門，但係世界排隊冠軍嘅日人，已經一家大細排晒隊入場。我地當然都入鄉隨俗，就係排埋一份，耐心等候。
入到會場，又再次發現左日人細心嘅準備，第一樣就係佢地有一排排枱，上面放左一疊疊橙色嘅圓形貼紙，有幾個空格可以填上資料，枱面就貼有日文解說：「迷子...」，照估都係驚啲小朋友蕩失路而設。

為蕩失路嘅小朋友而設嘅貼紙

另一樣野，就係所有接待人員都係雙滕脆低！！

我第一個反應係「幾百円入場唧！唔洗咁大禮呀！」:O

我地唔係迷子，只係喺度度高！:)

後來就知道點解佢地要咁，因為佢地好清楚邊個係今次展覽嘅 target audience — 小朋友啊！接待員咁做係因為要同入場嘅小朋友保持 eye-level，令佢地覺得更加親切，又突顯日人嘅細心文化。可能你會話佢地過份，因為，我都覺得唔慣，哈哈！！
:)

每張入場券都可以換一架今次展覽館特注版 Tomica TDM (Tomica Dream Motor) 嘅記念車，今年係一架二合一、穿梭古代未來嘅救護車！

而適逢今年係四十週年，展覽館介紹左由1970年第一部嘅車仔到今年成年會出嘅系列。

雖然，已經四十週年，Tomica 依法保持自己嘅傳統之餘，但又不停創新，每個月都會有2款新車發表，更會加入唔同嘅元素，好似佢地今年四十週年，就請左日本石川県輪島市嘅手繪藝術大師為兩款跑車用漆塗工藝（ “ 輪島塗 ”）繪上花嘅圖案，而且，佢地更展出白金同純金嘅 Tomica！！

「プラチナトミカ」白金製 Tomica
全長約 7cm、重約 210g、價值 700０万円！

而我最欣賞係佢地有一個叫 TDM 嘅 Project，即係之前每個入場人士都攞到嘅果份記念品，每年都會畀唔同Tomica嘅愛好者自己設計夢想嘅 Tomica車仔，一經投票勝出，廠方就會為佢大量生，成為果年嘅 TDM，當中都有唔少好「爆」嘅設計，好似梳化車、大型觀光車、八爪魚工程車、太陽能帆船車…

XD

梳化車 TDM

而呢個嘅「トミカ博」，除左係展覽會，更加係玩具嘉年華，因為一大半嘅地方都係可以畀入場嘅小朋友玩！

亦都有一個小型工場，小朋友可以自己擇選唔同嘅車仔配件，工作人員即場幫佢地裝，成為自家設計嘅 Tomica！

自家製 Sabaru 360 (スバル 360)

場內仲有唔同嘅攤位，畀小朋友可以同爸爸媽媽一齊玩，親子度爆登！

場外亦照顧周到，有個美食店廣場，可以玩到餓都唔洗走到好遠去揾野食！
當然，場外最後嘅把關係トミカ販賣場！

順理成章，自動奉獻！

我地消費完一輪就離開左「トミカ博」，就返酒店準備 pack 野上機，不過酒店喺梅田，附近嘅阪神百貨B1美食街有一樣名物ー【いか燒き】（烏賊焼），冇理由唔去試下，我地最後嘅午餐亦係呢度食，不過，我地唔知今日係日本假期 – 昭和の日( 即係昭和天皇嘅生日)，更加估唔到日本人假期嘅威力，喺呢個咁出名嘅大阪 FoodCourt 會多人到咁誇張！！

唔好話冇位坐，立食(企喺度食)都要背貼背，而隔離嘅日人爸爸因為帶住仔仔，就決定索性踎喺度，畀仔仔可以坐起自己大脾度食飯，再加上呢度嘅裝修較舊，有一剎那以為自己返左大陸！

o_____O"

阪神百貨B1美食街名物ー【いか燒き】

體驗完我地嘅「極逼立食午餐」後，我地就返香港…

次次日本自遊行啲行程都係編得密密麻麻，不過估唔到今次最嘥我地時間係每次返酒店嘅路程！！

>_____<#

因為，大阪駅正值大裝修，圍板重重，不論早晚嘅都係咁多人，比新宿駅嘅人流有過之而無不及，令我地次次返酒店都要搵一大輪。
=.=

大阪城水蓋，趣！

不過，今年大阪駅終於完成裝修，當中有更多嘅商場落成，好似 JR大阪三越伊勢丹、LUCUA …

講多件趣事畀大家聽，大阪鐵路電梯嘅企位同我地港鐵一樣都係靠右企，同東京就啱啱相反係靠左企！趣！

期待下一次再遊日嘅趣事！

是次遊記(終於)完，多謝支持！！
:P

「トミカ博大阪 - 2010」

Day 8 相簿投影播放

Tomica : http://www.takaratomy.co.jp/products/tomica/
LUCUA : http://www.lucua.jp/
JR大阪三越伊勢丹: http://osaka.wjr-isetan.co.jp/
「漆塗りトミカ」石川県輪島市: http://www.takaratomy.co.jp/product_release/pdf/p100302.pdf
其他是次遊記: http://taydiary.blogspot.com/search?q=2010+%E6%97%A5%E6%9C%AC%E9%97%9C%E8%A5%BF+%E6%98%A5%E3%81%AE%E6%97%85

2010日本關西[追加中部]春の旅 | Day 7 Part 3 [TayThink / Travel / Toto]

2011-07-17T01:02:00.004+08:00

標題：令人著迷的神戶 Part 3
副題：感見用心栽種更美の神戶
日期：2010年4月28日 (三)
天氣：晴

景點：神戶、鉄人２８号、神戶港、神戶塔、北野異人館、咖啡店、ケーキ屋 (Mont Plus) 、神戸鐵板燒牛排店 (ステーキランド)美食：神戸牛、草莓蛋榚 (ガトー･オac･フレーズ，Gatō. O. Furēzu ) 、法式劇院蛋榚 (オペラ，Opera) 、香橙蛋榚 (ヴァランシア，Valencia)、松屋牛丼、美利堅公園、神戶港震災紀念公園

街燈被弄東歪西倒

由蛋糕店推門出去，太陽已經落山啦~

我地向海邊行，經過由著名建築師，Frank Gehry - 設計嘅魚餐廳 Cafe Fish!，我地就黎到今日最重要、亦係成個行程中最沉重嘅景點，位於美利堅公園側嘅阪神大地震遺址 — 神戶港震災紀念公園。

喺1995年1月17日，日本關西發生7.3級大地震！由於當時發生地震係零晨時份，好多人都係熟睡當中，所以，傷亡嘅人數相當驚人，亦係日本全國近代最沉痛嘅打擊！

當我埋手寫呢日遊記時 (諗住可以四月前寫起)，突然日本又發生311東日本大地震，悲劇又再發生，當堂難以執筆，回想當日遊歷遺址嘅情景，心情加倍沉重！

當日，我地到景點嘅時候天色已經昏暗，暗淡嘅燈光，遊人淍零，吹住一陣陣冷冷嘅海風，感覺更加淒冷！

全個公園最幽暗、靜寂嘅地方

昔日美麗嘅碼頭，路面裂開，街燈東歪西倒，畀船隻泊岸，遊人垂釣嘅碼頭，瞬間整個陷入海中，眼見自然界嘅巨大威力！當時一發的破壞力，令神戶市受到如此不能磨滅、深深嘅傷痕！

呢刻彷彿覺得呢度係全個公園最幽暗、靜寂嘅地方，除左自己嘅呼吸聲同相機嘅快門聲，其他聲都好似聽唔到，手雖然仍然按住快門影下遺址嘅景況，但膊頭感到一股無形嘅壓力，好似要同我講呢度係大家都唔願回望嘅地方。

人喺黑暗嘅地方都想搵到光明，離我地唔遠，有一棟會發出耀眼嘅光芒嘅建築物，亦係神戶市嘅傳統焦點，更加係我地今日最後景點 — 神戶塔！

神戶塔

神戶塔，高108米絕對係欣賞神戶市景嘅好地方。

旅客可以預先下載當地旅遊局嘅 coupon，用優惠票價登塔，去到離地 91米高嘅最高觀景層，你可以鳥瞰成個日神戶市嘅景色，唔同香港嘅維多利亞港，前方冇高樓大厦，只有漆黑一片嘅大阪灣，同對岸小小嘅燈光，當然，冇我地東方之珠果種眼花瞭亂嘅吸引，但係呢度仍然延續神戶嘅浪漫。

因為，觀景層天花裝上好多一顆顆嘅白光小燈，令你置身繁星滿佈嘅夜空咁，加上今日天色清朗，有大大嘅月亮陪住我地欣賞夜景，港口旁嘅更有一個閃爍嘅摩天輪，「真的浪漫極了」！

難怪見到大部分遊客都係一相一對手圈住手嘅甜蜜情侶！

o^______^o

浪漫神戶港

陶醉於浪漫氣氛之際，攞起相機，想影低呢個浪漫一刻，突然聽到「咇咇！咇咇！」兩聲！！

最後一舊電都用晒！！
:O

再睇下 MyV 果部機，都係冇晒電！！

:O + >___<"

竟然，四舊叉滿左嘅電都用晒！

影唔到我地最後嘅景點！？仲要攞左成日嘅腳架又冇得用！！？？

「玩野」相@神戶港

「唔得！！」

諗下先~ 諗下先~

又證明一次「人急智生」，同平時要學多啲常識／冷知識！！

今次要靠我條牛仔褲！！

將舊電不停响我條牛仔褲係咁擦！

用熱力將淨番喺電池果少少電都逼埋出黎！

影幾張又拎舊電出黎擦幾下，影幾張又拎舊電出黎擦幾下…
=.=

如是這，影埋呢張「玩野」相，四舊電耗盡，我地倆個嘅 "電" 都用晒！

而附近嘅餐廳都閂晒門，我地決定返大阪食廿四小時都開嘅牛丼飯！(唔係吉野家而係松屋！)

搭住火車返大阪，竟然已經有啲唔捨得神戶，唔捨得佢 1:1 嘅鉄人２８号、神戶鐵板牛、蛋糕、咖啡、風景、甚至街邊嘅鬱金香…

諗番起，究竟係乜原因令我唔捨得神戶啦？

可能係我見證左一個本來被天然災害弄得滿目瘡痍嘅地方，經過日人多年充滿愛心嘅栽種，重建呢度，令佢再次發出佢自己「獨特東洋浪漫の美」嘅過程！

神戶，你令人都著迷了！

鉄人２８号 & Tay :「頑張れ日本！！」

我堅信，日人好快會振興 311各災區，亦好快令我地再次為佢地著迷！

「頑張れ日本！！」

…待續
(是次遊記淨番最後半日大阪！加油！)

PS: 當搜集神戶嘅旅遊資料時，其實神戶最吸引我，並唔係之前所講所有嘅景點或者美食，反而係佢地當地一個叫 神戶光の祭 — 「神戸ルミナリエ」，喺每年12月嘅聖誕節前舉行，都係為左災後重建籌款，但係，佢地請左世界唔同嘅設計師去設計唔同大型嘅璀璨燈飾，靚到令人感動，所以多年來振災都好成功！！我都好希望將來可以親身去體驗呢個光の祭！！

更多資料:

Frank Gehry - 設計嘅魚餐廳 Cafe Fish : http://www.cafe-fish.com/
神戶光の祭 — 「神戸ルミナリエ」: http://www.kobe-luminarie.jp
神戶歡迎優惠券: http://www.feel-kobe.jp/_tw/profile/traffic_service/index.html#00
其他是次遊記: http://taydiary.blogspot.com/search?q=2010+%E6%97%A5%E6%9C%AC%E9%97%9C%E8%A5%BF+%E6%98%A5%E3%81%AE%E6%97%85

Day 7 相簿投影播放

「金不換」Cure [TayThink / Movie / HK Event]

2011-07-16T01:46:00.001+08:00

葉劍峰作品 :「金不換」 Cure

一直以黎，呢度都係為自己留下大大小小記憶同分享嘅地方，今次都一樣。記得幾年前，因為進修認識左一位朋友仔— Bill 兄，葉劍峰，為人健談、熱情，就係果隻「有團火」果種人！

可能我都係多口水嘅人，同佢都好投契！

成班同學仔個個都身懷絕技、獨當一面，我係最喳果個！

畢業後，雖然偶有見面，但係一見面就 "雞啄唔斷"！

XD

知道佢自資去泰國拍攝自己嘅電影，遇到唔同遭遇，由原本叫「天使之城」嘅劇本，最後拍左一套叫「金不換」 Cure 嘅電影，波折重重，更加差啲賠上性命，但呢份勇氣就令我「敬佩萬分」！

「金不換」是放映時間

幾年前，睇到一個電視節目，談及港人創業嘅百分比，遠遠低於全球平均數，記憶中香港只係得3%，全球均數為 8%。

主持人嘅總結係香港人好聰明，知道創業風險太高啦！

喺客觀嘅層面我認同呢個總結，好似貴租金，貴來貨價，貴人工…，不過，另一方面我覺得我地有時就係欠缺勇氣！

而呢位朋友畀我睇到呢份勇氣，好少响呢度賣廣告，不過，今次要「破界」啦！
o^____^o

除左係要支持呢位朋友！

更加要响呢度指出我地港人早以遺忘嘅勇於冒險嘅精神！

你可能會問 :「乜我地有過咩！？」

响 60 - 70年代，我地細細嘅香港被冠以「亞洲四小龍」嘅美譽，完全就係靠呢份精神！！

當時大家肯冒險、夠勇又勤力，造就左好多「Made in Hong kong」嘅好產品，而且，遍佈全世界，令我地引以自豪，呢份先至係真真正正嘅香港精神！

今日，我地大家再次十卜「Made in Hong Kong」、香港創作、香港獨立電影，呢份香港精神！

網上購票

「金不換」 Cure Teaser

「金不換」 Cure Trailer

Start from 2006 ...

人體樂器《人の体を楽器》[Fun / Design / Game]

2011-07-07T23:36:00.003+08:00

img from takaratomy-arts.co.jp

以後隨時响條街，貼下隔離嗰 friend就可以夾 band 啦！

XD

人體樂器《人の体を楽器》

產品網頁
Start from 2006 ...

2010日本關西[追加中部]春の旅 | Day 7 Part 2 [TayThink / Travel / Toto]

2011-05-20T00:37:00.003+08:00

標題：令人著迷的神戶

Part 2 副標題：洋和浪漫的神戶！

日期：2010年4月28日 (三)

天氣：晴

景點：神戶、鉄人２８号、神戶塔、北野異人館、咖啡店、ケーキ屋 (Mont Plus) 、神戸鐵板燒牛排店 (ステーキランド)

美食：神戸牛、草莓蛋榚 (ガトー･オ･フレーズ，Gatō. O. Furēzu ) 、法式劇院蛋榚 (オペラ，Opera) 、香橙蛋榚 (ヴァランシア，Valencia)

樓上 cafe 花店

由好熱鬧嘅火車站，沿北野坡向北野區行上去，街頭嘅嘈吵聲就愈黎愈少，行左大該5分鐘，過埋條大馬路 (中山手通) ，突然覺得有啲唔同，唔單至係因為街頭嘅人少左，而且街道兩旁嘅鋪頭嘅類型都唔同左。

我地第一間見到嘅鋪頭好有趣，係又係樓上 cafe 又係花店。店外已經擺放左一大盤嘅紅色康乃馨，响陽光下更令人注目。我地不奇然就行埋呢間咁特別嘅店鋪打量一番，再睇下周圍嘅鋪頭，原來大多都係咖啡店，每間都佈置獨特、精緻！

不過，係我周圍望嘅時候，突然發現有一樣野令我嘩然！

就係行人路喺兩旁維多利亞式街燈下嘅花圃，種左一支支筆直而盛開、有粉紅色同深紫色嘅鬱金香，每支鬱金香旁都有唔同顏色嘅小花襯托，彷彿好似响呢個街頭見到漾溢住一片片浪漫嘅戀人！

維多利亞式街燈下嘅花圃

日人就係咁，總係好肯用心思喺一啲唔起眼嘅地方，有次係佢地嘅郊外，就畀一條污水渠吸引，大家唔好覺得我變態，因為，北海道好出名嘅小樽運河依家變相都係一半用黎處理污水架啦！

估唔到响呢個街頭，會欣賞到一幅令人心醉嘅圖畫 – 「街燈下的鬱金香」！

正當欣賞緊嘅時候 (當然，又已經不停咁襟快門啦！)，腦海突然閃出一幅好爛嘅畫，就係我地香港旺角嘅有蓋行人天橋，為左美化通道兩旁而擺放嘅花圃，長期都係「寸草不生」，美化唔到之餘，更加係醜化！！

我地冇理由差咁遠o架！！

>___<" + =.=

「街燈下的鬱金香」

唔諗咩畫啦！

我地繼續行去北野區，有街上鬱金香陪住，感覺分外舒服！

o^_____^o

行左一陣我地又發現到一間好古典嘅建築物，原來係港人都好熟悉嘅星巴克咖啡店 – 《北野物語館》！

雖然，呢度並唔係我地要去嘅異人館，我亦唔知日本星巴克賣嘅咖啡同香港有咩唔同。

但係，呢間《北野物語館》星巴克咖啡店，佢地嘅粉絲或咖啡迷就應該入去一試，因為呢間並唔係仿製復古大屋，而係一間有兩層樓高、真真正正法定古蹟嘅古老木大屋。

佢建於明治 40年 (1907年)，屋內仲保留左好多當時用過嘅古董傢俬，買杯咖啡就可以响古老大屋度享受一段咖啡時光，應該會係一個超值又特別嘅咖啡經歷！

《北野物語館》星巴克咖啡店

難怪好多網友都激讚呢間星巴克咖啡店！

好可惜我地就唔可以付出呢個時間，因為有太多嘅景點要去 …

行多陣，我地就到達左「北野異人館」，我地第一時間就去食佢地好出名嘅牧場雪糕 – 六甲牧場雪糕！

啱晒行到有啲熱嘅我地黎降下溫！

《風見雞の館》

由一條石樓梯望上去，就見到我地今日嘅重點景點 –《風見雞の館》，館外有一個小廣場 – 北野町廣場，除左延續鬱金香の浪漫，响各有趣嘅銅像旁種左大大朵嘅橙色鬱金香，再加上遊人嘅笑聲，加添唔少歡樂嘅氣氛！

ラインの館

買左飛，我地就入去參觀《風見雞の館》，入面見到當時屋主 – G．托馬斯先生嘅居住環境。除左極豐歐洲嘅風味，最欣賞係佢多窗嘅設計，每層樓、每間房也會有大量嘅天然光照入黎，寧靜而好舒服嘅感覺。

其實，成個「北野異人館」，除左《風見雞の館》外，當中吸引我嘅仲有魚鱗之家 (うろこの家・うろこ美術館)、英国館、山手八番館…等等，一共廿幾間不同外國人曾經居住過嘅住宅 (異人館) 或領事館，都真係各有特色！！

我地係行程內只預留幾個鐘喺度，而且，為左慳返啲入場費，我地去左其中一個免費入場嘅ラインの館，由法國 J.R.Drewell 夫人喺 1920年 (大正 9年) 興建的，屋內同樣佈置細緻，而且一共有三個不同展館，有唔同嘅畫展，突然覺得好似去歐洲睇博物館咁！

ラインの館

其實，成個北野區都俾我有一種漾溢住濃厚歐洲嘅浪漫情懷，唯一唔同就係呢度全區禁煙，條街空氣清新又寫意！(又突然諗起人"煙"稠密嘅香港街道)

咁有歐洲嘅浪漫情懷，當地人亦好識做生意，所以，開左好多有關結婚嘅鋪頭，不論婚紗店、證婚場地、同攝影公司。

參觀完之後，我地去左位於較遠嘅《北野工房》，前身係神戶市立北野小學(校)，依家呢度就變成販賣唔同嘅手工藝品，當中有110年歷史嘅米糠番挸，火柴專門店，…

講左咁耐，大家應該好感受到呢個充滿洋風嘅神戶，我地用腳同眼去感受完有富西方建築文化嘅異人館後，我地再次用我地嘅口同胃去感受洋風嘅神戶！

除左神戶牛呢個食嘅文化產業，其實神戶嘅咖啡同西式蛋糕亦同樣極具影響力！

御影ダンケ元町店

之前提到，只得15分鐘路程嘅北野坡已經有好多唔同特色嘅咖啡店，如果要品嚐晒全神戶嘅咖啡店，就算一日飲足五餐，一年都唔知可唔可以試得晒！？

當中有喺 1948年開業、歷史最悠久嘅神戶咖啡店にしむら珈琲 (NISHIMURA Coffee) 中山手本店，一棟3層樓高嘅咖啡店，而喺地下廚窗內就擺左佢地每日自己煎焙咖啡豆嘅煎焙機！

我地最想試係一間用牛油去煎焙咖啡豆嘅咖啡店 – 御影ダンケ元町店，不過，今日係定休日，冇緣品嘗了！

不過，又好彩，咁啱經過NHK (日本放送協会)神戶大樓，咁又入去參觀下~

NHK (日本放送協会)神戶大樓

其實，神戶亦係洋式甜品天堂，佢地嘅西餅都係全國聞名！

我地今次想試嘅係一間西餅店 – ケーキ屋 (Mont Plus)，對旅行人士可以話係隱世嘅蛋糕店，因為佢位於商業區中嘅一間小店。對神戶人講就非常出名，每逢節日期間都大排長龍，訂單一個月前都爆滿，創辦人亦非常出名，店之寶就係香橙蛋糕(ヴァランシア，Valencia)！

話明隱世，真係花左我地唔少時間揾，去到嘅時候已經6點，晚飯時間都黎緊，鋪都就收！

@___@

ケーキ屋 (Mont Plus)

我地無望試佢地最出名嘅香橙蛋糕，但係點都要試下佢地其他蛋糕！

鋪頭嘅設計好有心思，推開木製嘅玻璃門，天花吊住幾盞嘅水晶燈，右邊係蛋糕櫃同收銀處，左邊一排排嘅擺放唔同製作蛋糕嘅素材同工具，供喜愛製作蛋糕嘅朋友選購，因為佢地嘅師父不定時都會開蛋糕製作班。而蛋糕店嘅盡頭就係一塊大玻璃，可以見到各師父製餅嘅手藝！

而中間位置，就係小型咖啡店，擺左大大小小嘅木櫈，木枱，畀大家嘆蛋糕、咖啡、傾計。

喺蛋糕櫃得番3款蛋糕畀我地擇，最後擇左草莓蛋榚 (ガトー･オ･フレーズ，Gatō. O. Furēzu ) 同法式劇院蛋榚 (オペラ，Opera)！

店中小型咖啡店

諗下試邊件先好呢？心諗法式劇院蛋榚會滿濃味啲，而且草莓蛋榚咁普通，一於試左草莓蛋榚先！！

慘！！真係好慘！！

因為，估唔呢件草莓蛋榚會係我地今次旅程另一樣畢生難忘嘅美食（另一件當然係一蘭拉麵）！

清甜嘅草莓、清香嘅忌廉配上軟綿綿嘅蛋糕，完美嘅味道、甜度、香度同質感嘅配合，真係蛋榚中嘅藝術品！！

而咁件 Opera 就比下去，而變得普通，到依家都仲好掛住呢件草莓蛋榚！！

草莓蛋榚
(ガトー･オ･フレーズ，Gatō. O. Furēzu )

享受住咖啡香、蛋糕甜嘅呢一刻，回想剛參觀過北野異人館各洋式大宅，神戶再次畀我一個特別洋和浪漫嘅感覺！

夜幕低垂，嘆完杯咖啡，稍稍提神，我地離開蛋糕店，去感受夜空中的神戶港！

待續…

更多資料

是次其他遊記