The blog of husfahmy

ثورة البيض

2012-01-18T02:26:00.001+01:00

فى المدرسة الابتدائية ، تعودت كل يوم الاستيقاظ على صوت أمى الذى يبدأ خافتا من المطبخ حتى يصل الى غرفتى فيعلو و يعلو .. أجد نفسى مستيقظا من شدة الصوت قبل أن تصل أمى الى السرير فتجد علامات النعاس على وجهى “المكشر المقريف علـصبح” فتربت بيدها على ثم تقول :

- ياللا حبيتشى ماما ، حبيب أمه يا ناس .. قوم يا سونة عشان تفطر و تنزل المدرسة.

أصحو فى هدوء تارة و تارة أخرى ابدأ بالسباب و اللعان .. و يضحك الجميع لأننى طفل صغير يلعب و يلهو .. و لأننى أعلم حقيقة أنهم يرونى طفلا .. فلا أجد حرج على نفسى فى السباب و اللعان و الاستمرار فيه.. حتى تنظر أمى بالعين البيضاء (أو الحمراء) فأعلم أن وقت السباب و اللعان قد إنتهى.

ثم كالعادة اغسل وجهى و اسنانى (أى كلام أى كلام) ثم اذهب الى مائدة الطعام، حيث أجد نفس ذلك الطبق الذى تعودت عليه كل يوم.

طبق بلاستيكى مزركش ببعض الاشكال الطفولية مثل عم دهب و بطوط مرسوم بشكل لا يمت لا لعم دهب و لا لبطوط بشيئ .. و بهذا الطبق ..

بيضتان مسلوقتان لونهما أبيض.

أمط شفتى فى حزن عميق و دفين. لا أريد أن آكل البيضتين. أعبر بكل توسل عن رغبتى فى عدم أكل البيض. فتقول لى أمى : معلش يا حبيبى لازم تاكل البيضتين عشان تكبر و تبقا كويس و تعرف تشتغل فى المدرسة.

أقول فى نفسى : يا ربى هو مافيش غير بيض اللى هيخلينى أركز؟ و لازم يكونوا مسلوقين .. ماينفعش يكون فى جبنة رومى طيب.. لانشون..

ثم أنظر الى أبى نظرات التوسل و الأسى : بابا ، مش عايز آكل بيض ..

فيرد الرجل الحكيم : حسين ، هو ده الفطار الموجود .. مافيش غيره و احنا مستعجلين..

ثم يعدل النظارة ..و ينظر بعيدا ..

تمسك أمى البيضة الأولى تضع عليها بعض الفلفل و الملح.. و تبدأ فى الاقتراب من فمّى .. لا أريد فتح فمى .. هذه البيضة رائحتها النافذة غاية فى البشاعة .. تبدأ أمى فى فتح فمى فأفتحه و ابدأ فى أكل البيض..

بيضة .. ثم بيضة أخرى ..

هكذا كل يوم .. أعلم أن هناك فطار آخر .. يأكلونه هم .. هى و أبى .. و عندما يأتينا ضيوف أطفالهم لا يأكلون البيض المسلوق فقط مثلى .. بل تقوم أمى بإعداد الفطار و الولائم .. البيض مع البسطرمه و الفول مع الفلفل.

و لكن لا استطيع الكلام .. هذا هو النظام.

كل يوم بيضتين فى الصباح.

أمى تقوم بإطعامى البيض تارة بالعنف و تارة استسلم لتلك البيضة .. أمى كان لديها اعتقاد راسخ بأن لا حياة الا بالبيضتين المسلوقتين فى الصباح ، و ان ذلك لمصلحتى ، و انها تمتلك كل الحق فى اطعامى ما تراه هى. فأنا طفل صغير .. لا يعلم أين مصلحته بالطبع.

بيضتين كل صباح. بيضتين باللين .. بيضتين بالشدة .. ستأكلهم هكذا. كل يوم.

هكذا 30 يوما ..

ثم حلمت يوما ، بأننى فى مكان كبير .. مطعم .. آكل كشرى فى الصباح .. كشرى كتير .. كشرى مصرى .. مممم.. ملئ بالفوائد .. و عندما ظهرت البيضتين فى الطبق .. كسرت الطبق .. و فقعت البيضتين بيدى.

و فى اليوم الثلاثين ، صحيت كالمعتاد.. جلست على الطاولة..

الطبق المزركش و بيضتان مسلوقتان ينظران الى ..

أمط شفتى مجددا.

ثم تقول امى : ياللا حبيتشى ماما ، كل البيضتين.

“كفاية بيض”. قلت

ساد الهدوء فى المكان .. ثم انفجرت أمى بالضحك و ابى .. هاهاهاهاها…

نظرت اليهم و قلت : “مش هاكل بيض النهاردة”

برقت أمى لى و أبى ظل صامتا .. و قالت : يعنى أيه؟ هتاكلها يعنى هتاكلها .. هو كده.

قلت لها : لأ مش عايز بيض… كفاية بيض مسلوق .. زهقت.

بدأت أمى بإستخدام العنف ، فتح الفم بالقوة و ادخال كميات من البيض المتفتفة .. ثم تقول : كده بوظت هدومك؟ هنضطر نشترى هدوم جديدة دلوقتى..

لم يجدى نفعا بل كسرت الطبق و رميته على الأرض صائحا : كفاية بيض !! كفااااااية.

صاح أبى : حسين !!! اسكت!! و اسمع الكلام!!

أخذت علقة ساخنة يومها .. و ذهبت المدرسة بدون افطار.

و فى اليوم التالى …

اقسمت على نفسى بأننى لن آكل ذلك البيض مرة أخرى .. لقد كسرت حاجز الخوف و لا يمكن فى اليوم التالى أن آكل البيض مرة أخرى.

جلست على الطاولة وجدت و قد اصبح البيض ملونا .. و الكثير من الفلفل الاسود الذى يذهب رائحة البيض.. و امى فى سعادة و ابتسام تقول : ياللا حبيتشى ماما .. لونتلك البيض أهو .. و حطينالك فلفل اسود كتير كمان .. ياللا يا حبيبى عشان تاكل البيض.

هل المشكلة فى لون البيضة؟ هل سيتغير شيئا إن وضعت عليها فلفل أسود؟ لا يزال بالداخل نفس البياض و نفس الصفار.

قشرت أمى القشرة الملونة .. فعادت البيضة كما هى .. و بدأت فى اطعامى هى .. فرفضت مرة أخرى .. و كسرت الطبق مرة أخرى و ضربتنى أمى مرة أخرى .. و لكن هذا الوقت استعانت بأبى ..

وجدت أبى مبتسما .. أبى الذى لم يضربنى ابدا .. يأتى و يقول : ليه يا حسين بس؟ مش عايز تاكل البيض ليه؟

“زهقت و خلاص كفاية بيض 30 يوم” ..

قال لى : خلاص كل النهاردة بس و بكرة هنشوف الموضوع ده..

قلت : لا .. مش عايز .. فى فول فى التلاجة.. انا عايز آكل فول.

قال : يا ماما .. اعمليلو فول .. اعمليلو فول النهاردة ..

امى : فول أيه بس يا عادل مش فى مصلحته ..

أبى : انت عايز تاكل أيه طيب؟

انا : انا عايز أكل ساندويتشات لانشون ..

أبى : مانتا بتاكلها فى العشا ..

انا : طب اش معنا الفطار بيضتين يعنى؟ ما كل حاجة بناكلها فى أى وقت.

امى : هو كده لازم بيضتين .. هو ده النظام .. عشان تفوق و تركز.

انا : مش واكل.

و فى اليوم التالى ، وجدت أبى هو الذى يقوم بإيقاظى .. ياللا يا حسين .. قوم يا حسين احنا صحاب و انت بقيت راجل دلوقتى .. الحقى يا ماما حسين بقى راجل أهو و بيقول عايز ياكل أيه و مش عايز ياكل أيه .. قوم يا حبيبى ..

جلست على مائدة الافطار .. وجدت بيضتان مسلوقتان ملونتان و معهما جهاز غريب جديد.

“أيه ده؟ أيه الجديد يعنى؟؟”

أبى : دى حاجة انا جايبهالك مخصوص و الله امبارح و انا راجع من الشغل و فى وسط المشاغل و كل المسئوليات اللى عليا .. فكرت فيك و جبتلك حاجة تحط فيها البيضة و تقفل عليها تلاقيها اتقطعت طرانشات .. و فى منها اشكال كمان … ايييييه رأيييياااااك؟

و كانت أمى صامتة تجلس على الكرسى وحدها تفكيرها فى شيئ واحد فقط .. كيف لى أن أغضب و أعصى لها طلبا بعدم أكل البيض؟

بدأ أبى فى أن يقوم باطعامى البيض المقطع .. و لكنه نفس البيض..

ملون .. أشكال .. بجهاز يتم تقطيعه ..

انا لا أريد بيضا جديدا .. و لا بيضا ملونا .. أريد أن أحدد ما أريد أن آكله .. لقد كبرت الآن و أعلم مصلحتى.. بل أريد أن أقترح حتى الجديد من الافطار .. ما المانع؟

و بعد بيضة .. تيقنت أن أبى و أمى .. جزء من نظام واحد.. كيف يمكن لأبى أن يكون مختلفا عن أمى و قد كان ينظر الى امى و هى تقوم بإطعامى البيض لمدة 30 يوم متواصلة قهرا و لم يحرك ساكنا.

انا : لا مش واكل..

صاحت أمى : اللى عايز تفطره قوم انت اعمله يا روح ماما..

قلت : طيب ماشى ..

أبى : و لا هتعرف تعمل حاجة .. ما احنا بنعملك الأكل أهو

انا : طب و انتو جربتو؟؟ ما انا ممكن اعمل الساندويتش لنفسى ..

امى : بطل لماضة و كل و انت ساكت .. عشان مصلحتك يبنى

“مش واكل .. “ و كسرت الطبق مرة أخرى ..

أخذت علقة يومها أشد و أشد..

استمر هذا الحال الى أن أنعقد اجتماع موسع بين أمى و أبى لمناقشة الظروف العصيبة الى يمر بها البيت. و قررا لأن مصلحة البيت تقتضى الا يهدم أو أن أتسبب فى المزيد من المطالبات مثل أن أعود كما يحلو لى ليلا مثلا .. أو أن أقوم بلعب الكمبيوتر الى الصباح الباكر .. قاموا بإقرار الآتى :

- عزل البيض المسلوق عن مائدة الافطار.

-البدأ فى اجراءات سريعة لتعليمى كيفية عمل الساندويتش وحدى

-البدأ فى مفاوضات على امكانية أكل البيض أوملت ، و قد وافقت على هذا الطرح بل تعاونت معهم فى برنامج طبيخ الأوملت..

-اتخاذ ما يلزم لتمكينى من فتح التلاجة و الحصول على الحلاوة بالفستق.

-رفع الحظر عن اللانشون و الشيبسى بطعم الكباب.

لم يتحدث منذ ذلك اليوم أبى و أمى ابدا عن البيض المسلوق .. استمرت تلك القرارات سارية ، حتى أولى ثانوى .. كان أبى يأكل بيضا مسلوقا وحده فى الصباح .. قالت لى أمى (و على وجهها ابتسامة عريضة) : تحب تاكل بيض؟

قلت لها مازحا : بيض؟ همممم.. ماشى ..

أكلته يومها و وجدته لذيذا .. لأننى أخترته بإرادتى.

انتصرت ثورة البيض. لأننى التزمت بعدم السماح لأن اتهاون مع ذلك القهر الصباحى من جانب و لكن الأهم لأن أبى و أمى غلبوا مصلحتى و مصلحة البيت و المسئولية التى على عاتقهم و قرروا الامتثال لقرارى بعدم أكل البيض المسلوق..

و لكنهم كسبوا شيئا غاليا .. كسبوا حبى و احترامى و تقديرى .. و وافر الشكر لأن أكون جزء من هذا البيت العظيم.

ليست الطفولة غباء ، و ليست أيام الشباب مراهقة.

و كفاية بيض.

مش نازل يوم 25 يناير

2012-01-17T19:18:00.001+01:00

بقالى اسبوع كده من ساعة ما السنة الجديدة دخلت و عمال افكر فى أى حاجة تخلينى أنزل يوم 25 يناير اللى جى عشان الثورة تستمر ..

أى حاجة بس تقنعنى بالنزول ..

همم.. الموضوع صعب أوى فعلا .. لدرجة أنى قررت أن أكتب ليه مش قادر أقتنع بالنزول لإستكمال الثورة و الضغط عشان مطالب الثورة تتحقق ..

طبعا مافيش حاجة تخلينى أنزل لأن :

- الحمد لله و الشكر لله كل الناس اللى ماتت خدت حقوقها ، اتعملهم تعويض يليق بمقامهم يعنى .. و الناس المصابة زى الفل زى اللى فقدوا عيونهم كلهم تمام التمام .. عرفوا يرجعوا بصرهم تانى و حياتهم ماشية عادى .. و عائلاتهم طبعا هينزلوا يحتفلوا بالثورة اللى رجعت لهم حقوقهم ..

- الكل اللى اتسبب فى مقتل مصريين أو قنصهم أو تعذيبهم بدون وجه حق الحمد لله و الشكر لله اتحكم عليهم باللى يليق بالثورة طبعا .. يعنى الواحد يمشى دلوقتى فى أمان يا أخى و يقدر يقول اللى هو عايزة و يعبر عن رأيه تمام يعنى ..

- مافيش ولا مظاهرة او اعتصام سلمى الا و التعامل معاه كان بشكل حكيم .. مافيش و لا طلقة رصاص اتضربت على الناس .. و لا خرطوش .. مافيش أى حد “لمس” بس مواطن بسوء .. كلنا أخوات و حبايب و الدنيا فل و قشطة و الله…

- المحاكمات لرموز النظام السابق شغالة الله ينور .. تمام أوى .. أحلى شغل .. و الرئيس مبارك اطال الله فى عمره و بقاءه بيتعامل زيه زى أى سجين .. و الفلول اللى المجلس العسكرى قال أنهم هما السبب فى الفوضى فى الأول بسم الله ما شاء الله بقانون العزل السياسى اتمنعوا من الفساد ..

- الانتخابات الحمد لله نزيهة تماما .. عشرة على عشرة .. و قوى الاغلبية اللى هتحكم العملية التشريعية فى برلمان الثوووورة بتقوم بعملها فى الحفاظ على مكتسبات الثورة و لا زالت تشارك المتظاهرين اللى بيطالبوا بتحقيق مطالب الثورة فى عدالة اجتماعية و دولة مدنية .. و كمان بتجرى ورا حقوق الناس اللى بتتخطف و اللى بيتسحل و اللى بيتعرى و اللى بيتضرب بالرصاص..

-البلد مافيهاش أى فساد على فكرة .. لدرجة أن فى ناس بتتحاكم بتهمة “إيهام” الناس بأن فى فساد .. فى عدل أكتر من كده .. أيه الجمال و الحلاوة دى .. يعنى حتى الإيهام بإستمرار الفساد يا راجل مالوش مكان ما بينا ..

- كل الشباب شاركوا فى الثورة اتكرموا أحلى تكريم .. اتعملهم أكبر سارى علم فى العالم .. فى مركز شباب .. ويعنى نشكر المجلس العسكرى و الحكومة على تفعيل دور الشباب فى قيادة دفة شئون البلاد الحقيقة .. يعنى عملتوا الواجب و زيادة و الشباب اللى عندهم كفاءة الحمد لله بيتم توفير لهم أفضل الامكانيات للمشاركة فى صنع القرار ..

- عندنا حكومة إنقاذ وطنى .. رئيس وزراءها بصراحة دم جديد .. لأ بجد مختلف عن النظام السابق .. تضم وزارء من كل التيارات السياسية .. و تعبر حقيقة عن الثورة .. حكومة الثورة فعلا .. و الرغيف كبير .. و الشوارع فااااااضية .. و البنزين موجود .. تعيش الحكومة .. زى ما بيقول عادل امام فى شاهد ماشفش حاجة ..

- عندنا عجلة انتاج هى صحيح واقفة فى ميدان التحرير عشان الوحشين قافلين الطريق .. بس غير كده .. يا خبر .. حريقة .. مصانع أيه و استثمارات أيه .. و شفافية أيه .. مافيش فساد و لا فى واسطة و لا فى رشاوى .. و السياحة شغالة زى الفل .. و مافيش تحريض ضد الاجانب طبعا لأن أهلا و سهلا بالسياحة ..

- عندنا وزارة تربية و تعليم .. بتعلم الطلاب عن الثورة و مطالبها و بتوضح الاسباب وراء استمرار الاحتجاجات و الاعتصامات و بتعلم الطلاب تاريخ النضال ضد النظام السابق .. و بتحكى قصة الثورة زى ما حصلت بالظبط من غير تشوية ..

- عندنا اعلام .. لا لا لا لا يا جماعة ده بقى حاجة تانية خاااااالص بقى .. بصراحة يعنى لازم نقول كلمة الحق امام الله .. الاعلام بقى بيتكلم بأسم الناس .. و بيدى فرصة التعبير لكل الاتجاهات و مش بيشوه صورة الثورة خالص و مش بيحرض طوائف ضد بعض .. و القيادات الاعلامية اتغيرت كلها .. و اصبح اعلامنا هو المصدر الرئيسى للمعلومة ..

- عندنا وزارة داخلية حصل فيها أكبر حركة ترقية قصدى نقل قيادات فى تاااااااريخ البلد .. يعنى هيكلة هيكلة .. و اختفت كل اشكال التعامل الأمنى مع أى مشكلة .. و الناس حاسة بالاستقرار الرهيب .. و مافيش بلطجية خالص ..

- عندنا دولة .. و قيادات و سلطة مؤمنة ايمان تام بأهداف الثورة .. و متأكده انها حاجة تانية خاااااالص غير النظام السابق الوحش .. الوحش أوى ..اللى و لا واحد من المسئولين كان جزء منه .. لكن دلوقتى مصر يا جماعة حاجة تانية .. مصر الثورة ..

يا سلام .. كوووووووووووووووووووووول ده … و لسا عايز تنزل يوم 25 يناير .. يا راجل .. خليك قاعد فى البيت.

EgyInnovation initiative

2011-12-11T02:07:00.001+01:00

عام 1996 ، كنت طالبا فى مدرسة وقتها و جلست مع أحد المهندسين يشرح لى و يحفذنى لدراسة علوم الكمبيوتر. أشتكى لى صديقى المهندس من أن الحكومة تنفق على البحث العلمى فى الميزانية أقل من ال 1% و تلك نسبة غاية فى التدنى و لا تليق بمصر.

و فى عام 2011 و بعد الثورة، قرأت خبرا فى المصرى اليوم يصرح بأن الحكومة تنفق على البحث العلمى أيضا أقل من ال1% و هذا معناه أن الإهتمام بهذا البند فى الميزانية خارج كل الحسابات فى ظل وجود كل تلك المؤسسات التعليمية الجامعية و أحدثها الجامعات الخاصة التى يتم صرف الاستثمارات عليها من أجل الإرتقاء بالمستوى العلمى و استيعاب أعداد هائلة من الطلاب.

و فى ظل هذا الإنفاق الحكومى المتدنى على البحث العلمى الا أن المصريين يقدمون الجديد من الاختراعات و البحوث و البراءات الاختراع التى تشهد بها مؤسسات علمية و ينقصها أن يتم الاهتمام بها على المستوى الشعبى و الرسمى.

و من أمثلة نجاح تجربة تسويق البحوث العلمية النظرية أو العملية التى لم تتحول الى الصناعة بعد ، نجد أن التعاطى الإعلامى و الشعبى مع نجاح هيثم دسوقى – الباحث فى جامعة النيل دليلا على أن “صناعة” البحث العلمى فى مصر قادرة على المنافسة اذا توافرت الامكانيات اللازمة لها و منها الدعم الاعلامى كجزء اساسى من نجاح تسويق الابتكارات المصرية فى المجالات المتعددة.

مبادرة “شجع ابتكارات بلدك” على تويتر هدفها الرئيسى استخدام الشبكات الاجتماعية فى توصيل أكبر قدر من المعلومات عن تلك التجارب الناجحة و المشرفة فى البحث العلمى و الابتكار بشكل عام حتى تصل تلك التجارب المدفونة فى نجوع و قرى و جامعات مصر الاقليمية و الحكومية و الخاصة من مرحلة الانحسار داخل جزرها المستقلة الى مساحة أكثر اتساعا من الضوء و الانتشار.

ما الذى ممكن فعله من خلال هذا الحساب على تويتر:

تغريدات عن أخبار جديدة عن ابتكارات أو براءات اختراع أو انجازات علمية مصرية و ذلك فى شتى المجالات (علوم تطبيقية –هندسة – طب – ادارة أعمال – تعليم – فن.. الخ)
استخدام الشبكات الاجتماعية كوسيلة لشرح تلك الانجارات بطريقة مبسطة للناس و توعيتهم بأهميتها
استخدام تويتر فى توعية مؤسسات أو شركات أو أشخاص على الشبكات الاجتماعية بتلك الاختراعات
سرعة وصول أخبار هذه الانجازات للإعلام و الرسمى و الشعبى و بالتالى سرعة رد فعل الاعلام تجاهها.
الحشد و المساعدة فى تحفيذ الشباب على التعريف بإختراعاتهم و بحوثهم و مساندتهم فى مسابقات دولية.

كيفية المشاركة؟

يمكنك القيام بالإرسال على egyinnovation@gmail.com كل ما يتعلق بإنجازك البحثى أو اختراعك و سبل دعمك و سوف نقوم نحن بتغريدها الى العالم و نشرها بين الالاف من المستخدمين للشبكات الاجتماعية مثل تويتر.

كما يمكنك ارسال تغريدات على EgyInnovataion@ أو الهاشتاج EgyInnovation# اذا كان لديك تويتر بما لديك من أخبار عن تلك الإنجازات.

هذه دعوة عامة لمتابعة هذا الحساب على تويتر

http://twitter.com/#!/EgyInnovation

اذا كانت لديكم أى اقتراحات نرحب بإرسالها لكى تتم اقصى استفادة من تلك المبادرة.

و ندعو كل من لديه حساب على تويتر متباعتنا و ارسالنا

كما نتمنى من كل طالب ، باحث ، أو دكتور بالقيام بإرسالنا كلما وجد فرصة فى أن يعرفنا بإنجازه.

خواطر ثورية| الاستقالة

2011-12-10T05:22:00.001+01:00

قدمت استقالتى من الشغل ..

مش متأكد اذا كان قرار صح و لا غلط ..

طبعا مؤمن و واثق ان ربنا معايا فى الآخر .. و هو فى أى حاجة حصلت من غير ما يكون ربنا معايا فيها .. اشتغلت و انجزت و حققت .. بس هنضحك على بعض؟ لازم كل شوية كده تفكر نفسك .. فوووووق.

عندى مشاعر مكبوته عايزة تنفجر …

مشاعر غضب و حزن من اللى بيحصل ..

مشاعر بالتأخر الشديد .. على طول حاسس انى متأخر .. بتقلب مشاعر غيرة ساعات

مشاعر حب افلاطونية بلا عنوان ..

مشاعر أنانية .. و ثقة بالنفس.. و رصيدى لديكم يسمح ..

مشاعر طفولية لأيام زمان..

و النتيجة .. صداع مزمن.

بقالى سنة .. شغال فى مجال محستش أنه هو ده اللى فى الآخر هيخلينى أعرف أفيد فى المجتمع اللى جى منه.. أقدر اكمل و اشتغل و لا فى مشكلة … بس مش هو ده…

بعد الاستقالة بتبدتى تحس انك رجعت من الأول .. تقرر لنفسك.. محدش هيساعدك.. كل الناس اللى بتحبك هتقف جنبك تساعدك بخبراتها و رأيها .. بس فى الآخر انت اللى هتقرر.. و انت و الظروف اللى حواليك ..

“الظروف” دى بإختصار هى كل حاجة منعاك من تحقيق اللى انت عايزه مهما كان..

ممكن يكون سنك .. خبراتك … المكان اللى انت عايش فيه .. المكان اللى انت جى منه .. الزمن اللى انت عايش فيه.. أو الزمن اللى انت جى منه .. ثقافتك … نوعية الأفلام اللى بتتفرج عليها .. آخر مسلسل شفته ..تقبل المجتمع اللى حواليك ليك شكلا و موضوعا..

كل ديه ظروف..

و فى ظروف خارج دايرتك كمان .. علاقتك بالناس .. بأهلك و أصحابك.. هم بيتغيروا و لا انت اللى بتتغير .. لا انتو الاتنين بتتغيروا .. لأن ظروفهم بتتغير..زيك تمام.. ناس كانت جنبك بتتختفى بالتدريج .. و ناس كانت حواليك .. بس انت سبتهم .. و ناس تانية بتحوم حواليك .. و ناس تانية غلطت فى حقها .. أو غلطت معاها فى حق نفسك..ظروف سياسة زى البلد دى فيها ..

البيضة و لا الفرخة ..

تقرر على اساس الظروف و لا تحارب الظروف عشان توصل ..

هتحارب الظروف .. ؟

هتحاربها لوحدك اعمل حسابك..لو كنت فى شلة يمكن الظروف تتظبط شويا؟ بس قلى انت فى شلة مييييين؟

مافيش حد فاضى لحد يابا .. حلك فى مليونية..

عاوز مليونية ؟ خووووووود…اصل دى ظروفك انت .. ماشى البلد ليها ظروف متجمعين عليها بندعم بعض و بنساند بعض و بنعمل اللى نقدر عليه .. بس فى ظروفك انت.. ده شغلك على نفسك

محتاج مليونية عشان دعمى فى مشروعى الشخصى .. انانية رهيبة .. خلاص ممكن تعمل ناشط مزيف و تركب الموجة.. ثورى ..اعملك حاجة يا أخى .. اخطف نفسك .. تاخد الختم الثورى .. على قفاك .. و فولورز على تويتر ..

بس هو ينفع تخلق لنفسك بطولات وهمية؟!!

انا هعمل اللى فى أيدى .. هبتدى أدور و أشوف ايه اللى ممكن أعمله ..هشارك فى أى مبادرة ممكن تساعد الثورة دى تنجح.. هشوف مين بيساعد فى المشاكل الاقتصادية و اشارك معاه .. مش هتوقف عن ابداء الرأى و المشاركة بمقترحاتى و اللى بيتقال عليه تنظير… هحرك الكنبة.. هعبر عن تضامنى مع كل المظلومين..هشتغل اكتر فى الحاجة اللى ممكن تفيد.. هربى عيالى على المبادئ اللى طلعت عشانها الثورة.. هعمل اللى بعرف اعمله كويس .. بهدوء افكر و بهدوء أشتغل.. مش يمكن تطلعلى فكرة تساعد .. من غير مزايدات .. و هبص لقدام .. لقدام أوى.. حتى و لو دورى لسا مجاش.. هو ده نشاطى .. نشاطى هو ان دماغى مابتوقفش..بعيدا عن الولولة و بعيدا عن المزايدة ..

إن شاء الله.

بس ده أيه علاقته بأنى استقلت .. مش عارف ..

من الواضح انه انتهى بى الأمر من محاربة الظروف لتعامل معاها..

يوووه.. يادى الكلام عن البلد .. يا عم بقولك استقلت..عايز اعيش بقى فى المجتمع اللى انا عايش فيه ده ..عايز مش كل مرة اتعرف على ناس هنا يتكلموا عن اللى بيحصل فى مصر و خلاص..عايز اعرف دلوقتى الشغل الجديد ده فعلا مرتبه اعلى و لا لأ ..عايز أرجع لحوار نسائى جديد مش مشكلة يطلع فكسان زى كل مرة… عايز اسافر بلدان تانية اشوف ثقافات تانية .. اتعرف على ناس جديدة .. عايز اقرا و اكتب كلام جديد.. عايز أعيش.. عايز اتكلم لغتهم الالمانى الغتته دى أحسن منهم .. و لا أسيب البلد دى اصلا و اشوفلى بلد بتتكلم انجليزى .. طب ما ترجع مصر..

مصر؟

البيضة و لا الفرخة تانى..اه يانى

روح يا شيخ .. يا رتنى كنت كنبة و لا فلول و خلصنا..

الصبر.. الحرب كر و فر ..قبل ما تهزم الظروف سواء بالتعامل معاها حتى تغييرها أو محاربتها حتى تغييرها.. لازم تذاكرها كويس .. عشان لما تغيرها ماتقولش يا ريتنى ما غيرتها انا عايز الظروف القديمة ..

و خليك واثق فى الآخر أن ربنا مديك الفرصة تغير .. الفرصة معاك اصلا .. حياتك هى فرصتك.

أوعى توقف دماغك…

شغل مخك.

الحياة مابتوقفش.

وثيقة حوس

2011-11-22T19:10:00.001+01:00

طبعا دى هرتلتى .. يعنى تقمصت دور المحلل الاستراتيجى و قلت لما نفتى شويا ..

الأول ايه هى المشكلة الحلول المقترحة لتسليم السلطة:

مجلس رئاسى مدنى

المزايا:

- ملئ فراغ السلطة فى رئاسة الجمهورية

- يعبر عن كل التيارات السياسية

- يعود الجيش لثكناته

عيوب

- صعوبة التوافق على الاسماء

- القوى السياسية لا تعبر عن الشارع و مطالبه

- تأجيل الإنتخابات التشريعية

استمرار المجلس العسكرى و وعود بنقل السلطة

المزايا:

- عدم تأجيل الإنتخابات التشريعية

- فرصة أفضل للمجلس العسكرى لتحسين صورته

العيوب:

- بقاء قانون الطوارئ

- استمرار السلطة المطلقة

- البطئ فى التنفيذ

- الثقة المفقودة على الأرض

تسليم السلطة لرئيس المحكمة الدستورية العليا

المزايا:

- سلطة مدنية مؤقتة

- خطوة متسقة مع الشرعية الدستورية

- عودة الجيش للثكنات

- سلطة القضاء مستقلة

العيوب:

- خشية فقدان الثقة فى مؤسسة القضاء إن لم تتم اجراءات السلطة بشكل سريع

- رئيس المحكمة الدستورية تم تعيينه من قبل مبارك

المطلوب فى رأيى هو فصل للسلطات.. بمعنى:

- اجراءات فورية لإستعادة الثقة:

o بوقف العنف ، الافراج عن النشطاء و وقف المحاكمات العسكرية للمدنيين.

o اعتذار رسمى للمجلس العسكرى هما حدث و فتح تحقيق عاجل.

o اقالة النائب العام

o تطبيق العزل السياسى على اعضاء الحزب الوطنى المنحل قبل الإنتخابات

- أولا عودة الجيش لثكناته.

- تعديل الاعلان الدستورى الحالى لكى تكون صلاحيات السلطة التنفيذية فى يد رئيس الوزراء وحكومته و وقف اصدار مراسيم بقوانين حتى انتخاب مجلس شعب لكى يتولى ذلك و بتضمين مادة تقضى بفض المجلس العسكرى لإنعقاده بمجرد انتخاب رئيس دولة مدنى فى موعد اقصاه ابريل 2012.

- المجلس العسكرى يتولى و يدير شئون وزارة الدفاع فى الفترة الانتقالية.

- الغاء المحاكمات العسكرية للمدنيين.

- تكليف رئيس وزراء مدنى تكنوقراط لا ينتمى الى اى حزب او تيار سياسى (لم يكن فى الحزب الوطنى أو أى أحزاب , دكتور جامعى .. سياسى مستقل.. ممكن يكون قاضى.. استاذ فقه دستورى .. ايه حد مستقل ). و يتم التشاور على الاسماء مع القوى الثورية. و يتم اعطاء مهلة محددة "أسبوع" للميدان للخروج بمقترحات لأسم رئيس وزراء.

- رئيس الوزراء يشكل حكومة انقاذ وطنى من كل التيارات لها كل صلاحيات السلطة التنفيذية (فقط). هدف الحكومة استعادة الأمن و اصلاح جهاز الشرطة و الأمن الغذائى و تنظيم الإنتخابات التشريعية و الرئاسية.

- الحكومة تؤدى اليمين امام رئيس الوزراء.

- الإنتخابات البرلمانية فى موعدها. و ينبثق منها مجلس شعب يتولى السلطة التشريعية.

- الإنتخابات الرئاسية فى أول 2012 على اقصى تقدير

- الالتزام بإنهاء حالة الطوارئ طبقا للإستفتاء.

- دعوة لإنتخاب جمعية تأسيسية للدستور الجديد بعد الإنتخابات البرلمانية مباشرا و يكون بها مرشحين رئاسة الجمهورية و ثلثها من اعضاء مجلس الشعب (ممثلين للتيارات داخل المجلس).

- تتولى المحكمة الدستورية العليا الفصل فى أى نزاع على مواد الاعلان الدستورى ينشئ بين المجلس العسكرى ، مجلس الوزراء ، المحافظين طبقا لمواد الاعلان المعدل الذى يضمن الفصل بين السلطات طوال الفترة الإنتقالية.

- فى موعد اقصاه أبريل 2012 يكون بمصر رئيس دولة يقوم أولا بفض انعقاد المجلس العسكرى و بتكليف بإنشاء حكومة جديدة (على الأرجح تكون حكومة أغلبية برلمانية يعين بها وزير للدفاع جديد) و الدعوة الى الاستفتاء على الدستور الجديد.

أيه رأيكم فى الفتىّ ده..

الموضوع عايز حزمة اجراءات فى يوم واحد ليكون التعامل معاها او رد فعلها بشكل واحد.

و بكده أكون طلّعت المحلل الاستراتيجى اللى جوايا..

11/11/11 in my mind.

2011-11-11T14:35:00.001+01:00

So It’s 11/11/11 .. everyone is talking about it. I thought of just documenting this day in history by taking a shot of what my thoughts are about. Let’s see:

- It’s a very normal day, I woke up late to work as usual. I Opened my twitter account and did the normal #FF. Haifa Wehbe joined twitter and the number of her followers reached 6000 in 1 day. I think by the time of the elections she’ll have more followers than ElBaradie himself.

-Nothing special. My room is still untidy I need to clean it. I also need to have my hair cut!

-Today the pyramids are closed! Some rumors about a masonic party that was going on there. Some guys had to go into the pyramids yesterday at night to prove there’s nothing of that. A network called RASSD published fake pictures about a blondie sitting in a tomb (mmm, that’s really masonic). Ignorance is yet to remain. And using apocalyptic medieval stories to hallucinate people and deviate them from the original cause is finding its way.

- Alaa Seif, a prominent figure in Egyptian revolution as a blogger and activist is still prisoned causing an overall feeling of despair, anger and sadness about what’s going on in Egypt after the revolution. No political power made a strong move to release him. He refused an offer to be released in exchange not to speak about Tantawi or SCAF according to what he said. But his followers on twitter working with #FreeAlaa hashtag showing support and a couple of marches to Tora prison were made. His mother started a hunger strike. His sister Mona – who ‘s leading a campaign against military trials – is now finding her brother in the same situation. His wife Manal is showing strength even though Khaled their new baby may come in his father’s absence. There are still people who are in jail because of blog posts. Others are still tortured till killed. This has no end.

-Police reform is more difficult than removing Mubarak in 18 days.

-Ironically, old regime guys are in Tora prison too.

-The state of emergency is still remaining. It should have stopped some month ago. But no way.

-The ministry of information (propaganda) is still there. It was removed but then returned.

-People are still suffering economically, they can’t see the change that the revolution promised not because the revolution is failing but simply because SCAF – who was “neutral” in the revolution – is the one responsible for what’s happening.

-Elections are coming, people are fighting on whether to join or not. Same like what happened in the referendum just to make people divide more. No one wants to unite in the cause and support different methodologies. Liberals VS Islamists is the most fake political bubble we’re living ever in a country that didn’t gain basic human rights, police reform and justice after a revolution that ousted a dictator.

-I am still coffee addict.

-My twitter followers are now 2,825. Twitter recently changed its interface with a new activity tab. It’s scandalous!

-Egyptians living abroad are now able to register their names in the elections database to be able to vote.

-This Eid’s Ahmed Helmy’s movie is about fat guys. Ahmed Mekki’s movie is about alien invasion or smth! Nothing really changed in Cinema.

-The wave of revolutionary culture is getting low a bit. It’s still there but the media is turning into more important thing … like 50s and 60s style Tropico game media propaganda to keep people hypnotized.

-I am single and enjoying it. (um, sure enjoying it)

-Yosri fouda’s program will be back tomorrow. He stopped it after issues concerning criticizing SCAF in his program with Alaa El Aswany.

-Most probably people are started to reveal the truth about what’s going on in Egypt. We’re heading to an inflection point. I am not sure if its a local or global but it’s certainly a minima.

-Fakeness is back.

-Court decided that former NDPs should not run for elections. However, lots are running actually. In fact, some of them changed to old regime parties (e.g. Egyptian Mozza).

- I am glad my father passed away in 2002 before all what happened, he was a former NDP (reformist from inside #fail) . I wouldn’t want me or my family to be categorized as Flool. Kanaba is enough.

- Hopes are dependent on previous events relying on the people.

-I am afraid that instead of getting united again, we’ll start blaming each other again.

- I am still using Windows 7. FIFA12 is released with Egypt (at last) there and Arabic commentary with Essam el Shawaly.

-Zamalek lost yesterday 4-1 against Atletico in the club’s 100 years celebration. I am not Zamalkawy btw. Ismailawy and proud. But I stopped watching football after #jan25.

-In my life, I am in an experimental phase, I thought it should move faster a bit. Potentials are high and I hope conditions will be good when I decide to move from preparation to real action. I’ve been going through this loop.. discovering, experimenting and acting. That’s how everyone’s life should be in these loops I guess. Getting stuck in one phase is dull and boring. Move on.

-There’s still a hope. Awareness is spreading through streets. Initiatives are blasting to create a sphere of awareness. Media is still not doing its role though, that’s why public media using twitter or Facebook is the only way for us to feel free.

- Somehow 11/11/11 can be like 10/10/10 .. except that in-between a revolution happened and you can decide on the changes yourself.

خواطر | و رحل ستيف جوبز

2011-10-08T00:02:00.001+02:00

الله يرحمك يا عم ستيف .. كنت عامل اداء عالى فى شغل براءات الاختراع و الابداع العالمى

http://www.nytimes.com/interactive/2011/08/24/technology/steve-jobs-patents.html

طبعا قعدت أفكر فى قصة الراجل ده و اكتشفت انه عبقرى فعلا .. و يستحق مننا كل التقدير و الاحترام .. و يستحق ان الناس تحط صورته على بروفايل الفاسبوك بتاعها لأنه الهم كتير .. و منهم أكيد انا شخصيا لأنه فى نفس مجال عملى ..

بس فى كام واحد فى مصر عندهم نفس العبقرية ديه .. فى كام واحد بيقدم براءات اختراع كل سنة (حتى و لو كانت قليلة) ممكن يكون ليها نفس التأثير سواء فى عالم احنا عايشينه او سواء يخدم بيها بلده من خلال تطبيقها؟

كتير ..

انتو فاكرين الفيديو ده؟

طبعا انا قعدت اضحك اول ما شفت الفيديو و اقول : يخرب عقلنا .. احنا بتوع الفهلوة .. احنا ولاد لعيبة يلا .. و شوف و نتريق و يا سلام على الذكاء المصرى الفريد.

تخيل لو نفس العربية دى بى ام دبليو فى معرض دولى مثلا و ده خاصية جديدة زودوها على العربية .. اوف… كنت حتلاقى الناس كلها بتتكلم و عايزة تجرب العربية البى ام الجديدة ام اختراع ركن جديد..

عارف ايه الفرق..

الصورة .. الماركة .. الجو الملائم و الاعلام الملائم و البيئة اللى اتاحت ان عمنا ستيف جوبز لما يعد يتخيل الاى بود يلاقى الشركة اللى تقدر تثق فى اختراعه و توصله للسوق العالمى بالآلة الاعلامية الضخمة..

وفاة ستيف جوبز اكيد خسارة كبيرة لعالم التكنولوجيا او استغلالها عشان تسعد بيها البشرية .. لكن فى نفس الوقت يمكن تدينا أمل اننا ندور على 100 ستيف جوبز فى مصر عندنا و اكيد هنلاقى لو ادناهم الفرصة.

دى صورة ستيف جوبز المنتشرة فى العالم .. رجل عمل تغيير فى العالم و ساهم فى تحقيق الرخاء للبشرية

و دى صورة احمد زويل .. عالم مصرى استطاع الاعلام يديلو حقه “بعد” ما اخد جايزة نوبل .. برضه راجل ساهم فى البحث العلمى و الانجازات.. و اتعين مستشار اهو لرئيس اوباما قبل الثورة و بعدين حاليا بيحاول يحقق انجازة بعد ما حاربه ناس كتير

اما دى فصورة مهندس اخترع 40 اختراع .. طبعا معرفش عنه اى حاجة.. جبته بالصدفه بالبحث فى جوجل بشكل عشوائى

" src="http://amay261.cdn.infralayer.com/sites/default/files/imagecache/highslide_zoom/photo/2011/05/31/6138/lmkhtr_fmt.jpeg">

و ممكن تقرا هو عمل أيه من هنا http://www.almasryalyoum.com/node/459299

حد يعرف عنه حاجة ده..؟

حاسس بفرق بين الصورة الثلاثة صح..؟

طبعا فى غيره و غيره و غيره ..

الصورة بتفرق .. و الاعلام بيفرق..

قد تكون انت ستيف جوبز القادم بأفكارك اذا اتيحت لك الفرصة … و حبذا لو كان ذلك فى بلدك اللى محتاجة كل فكرة ممكن تساعد فى تنميتها.

الله يرحمك يا عم ستيف و ربنا يطلعلنا إن شاء الله 1000 ستيف.

الدنيا مابتوقفش.

دليل الأكل الإنجازى للمهندس المغترب البرجوازى | رز بالخضار و فراخ

2011-10-01T14:25:00.001+02:00

اولا الرز:

- أغلى ماية (انجز و اغليها فى البويلر)

- كوباية و املاها رز على قدك

-حتة زبدة (زيت قشطة برضه) و ارميها فى الطاسة لحد ماتسيح و تتحمر شويا

- ارمى الرز

- قعد قلّب الرز مع الزبدة المتحمرة شويا لحد ما تشم ريحة الرز مع الزبدة طالعة حلوة كده بس اوعى يتحرق

-لو كوباية رز حط كوباية و نص و شوية ماية .. و اسمع الطشّة و انبسط و اقفل الغطا بسرعة

(الفكرة يا معلم ان الرز مش بيتغلى, الرز بيطّبخ على البخار ، فانت عايز تحط مقدار الماية الكفاية اللى لما تتبخر تنفش الرز فاهم؟)

- ارمى قطعة ماجى و شوية ملح (مش كتير .. ممكن تبقا تحط على الزر ملح و انت بتاكله قشطة) .. شوية فلفل اسود .. لو عندك بصل ناشف بيتباع فى السوبرماركت ارمى منه برضه شوية حلوين.

- وطّى على الرز و سيبه و بعد شوية لما الماية تقل ابقا قلّبه و لو حسيت ان الماية خلاص بتخلص و لسا الرز ماستواش .. ابقا زود ماية بس على خفيف..

احسن الرز يتحرق من تحت (بس مش يشيط) و يكون استوى من فوق بس تاكله مش معجن ، عن انه يعجن و مايكونش استوى و ترميه فى الزبالة.

- لو عندك خضار سوتيه مجمد (بيتباع بالزبدة بتاعته ساعات) ارميه برضه ، حايطلع رز بالخضار

ثانيا الفراخ:

- بيبيعو فى السوبرماركتات بودرة تعمل بيها صوص على اى حاجة .. حتلاقيها فى قسم الشوربات البودرة برضه .. هات شوية منهم.

- قطع الفراخ (او انجز و هات دبابيس و صدور جاهزة)

- اغلى الفرخة فى الماية مع ملح و فلفل اسود و ماجى .. كده انت عملت شوربة.. لو انت جايب من بودرة الشوربات دى حط منها برضه .. ممكن تلاقى الشوربة بقت فجأة شوربة كريمة او شوربة شامبينيون

- ارمى قطع الفراخ فى طاسة ساخنة كان فيها نقطين زيت بس عشان تلييس المسائل بدل ما الفراخ تلزق فى الطاسة.. و غطى على الطاسة .. كده الفرخة بتتشوى (بتتحرق بس مش بتتقلى)

-بعد مالفراخ تحس انها اتشوت .. ارمى بودرة الصوص و عليها ماية (من نفس البويلر) و قلّب من غير ما تقفل على الطاسة.

القاعدة : عايز تزود الطعم قلل الماية .. الماية لما بتغلى و انت قافل عليها بتتكثف و تنزل تانى .. و انت فاتح الغطا الماية بتتبخر و صوص بيتقل فى الطاسة..

بس .. لما تلاقى الصوص بقى تقيل مع الفراخ.. بس كده

و بالهنا و الشفا

ملحوظة : انا مش مسئول عن أى شيئ.

خواطر ثورية | تذكير بأهم العنواين

2011-09-29T21:13:00.001+02:00

و اليكم تذكير بأهم العنواين قبل الجمعة 30.09

لا لحالة الطوارئ
لا لإنفراد المجلس الأعلى بالقرارات
لا لعدم مشاركة الشباب فى قيادة البلاد
لا للمحاكمات العسكرية للمدنيين
لا لوزراة الاعلام و اعلام موجّه
لا لعدم تصويت المصريين بالخارج
لا لعدم الاستجابة لمطالب القوى السياسة و التعامل مع قوى محسوبة على الفلول
لا لعدم الشفافية فى وضع خريطة عمل واضحة و جدول زمنى لتحقيق المطالب و الالتزام به
لا لمصادرة رأى سواء اتفقت ام اختلفت معه
لا لممارسات الشرطة الغير قانونية
لا للتباطئ فى تحقيق مطالب الثورة
لا لمنع الاعتصامات و التظاهرات اذا كانت لها مطالب مشروعة
لا لتشتيت و التتويه و المماطلة و البالونات و اللف و الدوران و المتاهات
لا للإلتفاف حول المطالب
لا لعدم تفعيل قانون الغدر امام من افسد الحياة السياسية فى مصر
لا للتخوين
لا لمط الفترة الانتقالية
لا لإحتكار السلطة من تيار معين
لا للفلول
لا للتخويف
لا لتشوية صورة الثورة فى الاعلام
لا لعدم محاكمة كل المسئولين عن مقتل الشهداء ايا كانت مواقعهم
لا للمنصات فى التحرير
لا للتناحر بين الاحزاب و التيارات , نعم للإتفاق على مطالب موحدة
لا لحكومة ليس لديها سلطات فعّالة
لا للتطرف
لا لأى تدخلات أجنبية من أى نوع و بأى شكل و من أى بلد
لا لمجلس مدنى .. الفكرة خلاص مش منطقية .. انا عايز انتخابات تشريعية و رئاسية و ننجز ..بلا مجالس بلا نيلة
نعم لسلمية التعبير
نعم للتسامح بين الثوار فيما اختلفوا فيه
نعم للأمن و احترام القانون معا
نعم للقضاء على البلطجة الحقيقية
نعم للإصلاح الاقتصادى و الإنتاج
نعم لتشجيع اى مبادرة تحقق المطالب
نعم لدور مصرى خارجى رائد

أمضاء

واحد مواطن المفروض طبيعى بس مش فاهم فى أيه فى البلد اللى عملت ثورة دى بصراحة, و لا فى أى حزب و لا فى أى حركة , واحد هتف مع الناس الجيش و الشعب أيد واحدة و وضع ثقته كلها فى المجلس عشان يحقق المطالب مع انتهاء الثورة و مش شايف ان المطالب بتتحقق بل شايف تراجع, واحد عائلته شاركت فى الحروب و عارفين يعنى أيه جيش وطنى , واحد عنده اصحاب و قرايب من الشرطة و عارف يعنى ايه الشرطة فى خدمة الشعب , ساعات بيعتقدوا انى ناشط و ساعات يشوفونى كنبة أصلى .. بس الحمد لله عمرى ما حد شافنى فلول.

مصرى و أفتخر.. فعلا

فى حجات عايز اقول عليها “لا” برضه بس مكنش ينفع فوق:

لا للبدل
لا للبتنجان المقلى
لا للصلصة و الكوسة
نعم لإلغاء التوقيت الصيفى (عشان منبقاش ظلمنا حد برضك)

بس كده..

خواطر ثورية | بعبعة

2011-09-25T13:32:00.001+02:00

علمانية ايه و اشتراكية ايه و رأسمالية أيه .. و اخوانية أيه .. يا جدعان كل ده نقاش فى الفس ..

اه انا من الناس اللى لما بيشاهدوا مناقشة زى اللى بتحصل ما بينا دايما الايام دى بتجيلى حالة الرفض لكل شيئ ثم تحليل الموقف واحدة واحدة من الأول عشان أوصل فى الآخر لقناعة عملية نحل بيها المشكلة , خصوصا بعد الثورة اللى اساسا كنا متوقعين انها تصغر المسافات بينا. و لكن الثورة فتحت المجتمع كله على بعضه فعرفنا مين عايزها زى السعودية و مين عايزها زى امريكا و مين عايزها زى الاتحاد السوفيتى و مين عايزها ببساطة زى مصر الحقيقة .. مصر اللى تعدادها 90 مليون و مساحتها مليون كم مربع… مصر اللى عبارة عن النوبة و اسوان و الصعيد و بحرى و اسكندرية و مارينا و مدن القناة و البحر الأحمر و الجونة و سيناء و البدو و الفلاحين … و القاهرة.

مش مشكلة .. حاجة كويسة ان احنا نكتشف بعض عشان بعد كده نتقابل فى حتة متفقين كلنا عليها ..

لاااااء .. كل واحد مش عايز كده .. احنا بنعمل حاجة لطيفة أوى.. ماشيين بمنطق .. الرفض اولا.

ما علينا .. القصد أيه..

ان احنا حاطين نفسنا فى قوالب فكرية زى ما فى ناس بتقول ان الاسلام اللى كان متطبق ايام الرسول (ص) لازم يتطور بحيث يواكب العصر (مع بقاء الثوابت الاساسية اللى كلنا متفقين عليها اساسا بعيدا عن الناس اللى رافضة الدين فى حد ذاته) ..

المشكلة بقى ان فى ناس شيوعيين و رأسماليين و مش عارف أيه .. ايضا مش عايزين يطورا الفكر الانسانى ده بداخلهم .. يعنى واحد زى كارل ماركس ده عادى يعنى انسان ماكنتش عايش فى زمننا و معاهوش موبايل و لا اكاونت تويتر .. مش عشان متصورلى صورة بدقنه و هو باصص بجنب خلاص بقى البوب الفظيع.

الفكر العالمى اللى بتدور حواليه كل النقاشات اللى احنا فيها مع مقارنة التجارب متجمد عند قرون الثامن عشر و التاسع عشر .. و كلها قوالب فكرية خرجت من مناطق محددة من العالم و يبدو بسبب العولمة ان العالم مبقاش مستعد انه يتقبل نوع جديد من الأفكار لأنه الأسهل له وضع الفكر فى القوالب المتواجدة حاليا و شكرا و بعدين نعد نولع فى بعض بعدين او لأن فى مصلحة تحمى بقاء تلك القوالب ثابتة حتى و لو اتحدوا مع بعض.

و سبحان الله .. لما تلاقى دول عملت بتجارب خاصة ليها (مزجت بيها حجات ببعض و اعتمدت منهج يتوائم فيه الجميع بقدر الامكان لتحقيق التقدم) تلاقى الناس عملت قوالب للتجارب نفسها .. فأصبحنا بنتخانق هى التجربة الماليزية احسنلنا و لا التجربة التركية؟..

يعنى انا مثلا لو عملت فكرة جديدة اسمها : نظام الزرومبيح الشخرمونى حتلاقى ناس بتتريق من كل حتة.. و حتلاقى فى الآخر الشخص اللى كتب عن الفكر ده أصبح معتوه.. و حتلاقى الناس بتناقشة بإعتبار اللى اتكتب من افكار قديما اصبحت هى دوجما فى حد ذاتها (للى بيهاجموا الدوجما فى الاديان)…انتو عارفين على قد ما القذافى ده كان معتوه و دمر شعبه على قد ما بحس انه كتابه الأخضر ده اللى بنتريق عليه كلنا ده محاولة للخروج عن النص .. و الله مرة قريته جد يعنى اكتشفت فيه حجات لطيفة .. بس طبعا فى ما يرد عليه و الحكاية مش انه يجبر شعب بكامله بجنون العظمة اللى عنده ده انه ينفذ فكر هو كتبه شخصيا ..

لكن الأهم من كل ده .. ان المسئول عن الوطن (المجلس و الحكومة) يكون هو اساسا مستعد لتقبل افكار جديدة او ابداء الرأى بإنفتاح من غير أجندة و الكلام ده.. بس واضح انه طرف فى حد ذاته ليه فكره تانى خالص .. واذا كان كل واحد لديه قالب يحميه بالنقاش فإن الأخطر ان تكون لديك فكرة و تكون حاميها بالقوة او بالترهيب داخل المجتمع الواحد.

على سبيل المثال .. انا شايف ان المادة الثانية فى الدستور: الاسلام المصدر الرئيسى للتشريع دى لا تتعارض مع اى حريات لأى ناس تانية .. لأن فى من التفسيرات الاسلامية اللى تضمن حرية العقيدة بل وحمايتها كمان. القصة فى التنفيذ مش فى المسميات.. و اهو كله حبر على ورق .. طب ما فرنسا اهيه الدولة العلمانية التنين.. واحدة ماشية بحجاب فى الشارع اتمنعت من ممارسة حريتها .. و ياللا بينا نخش فى مناقشة سفسطائية مالهاش لازمة عشان كإسلامى تثبت ان فرنسا دولة متخلفة و انت كعلمانى تثبت ان قرار فرنسا كان للحفاظ على علمانية الدولة..و تجيب امثلة لممارسات المماليك فى مصر و تقول هو ده الاسلام .. فسسس .. أسف مش حخش فى مناقشة زى دى… و المثال مالوش دعوة بمصر اساسا.

و بعدين تعالى لفكرة الديمقراطية .. و هى اساسا اسلوب لكى يحكم الشعب نفسه بنفسه .. موافق. تلاقى واحد يقوللك .. اه ما هى الديمقراطية دى هى نظام الشورى عندنا .. لالا اسمها شورى .. الديمقراطية من نظم الغرب … ديمقراطية الخمر و الخنزير.

و الناحية التانية .. ايوه انت عايزها شورى.. بكرة حتمنع المايوهات.. انت بتهرج و لا أيه .. ؟

و الفكرة اساسا ان يحكم الشعب نفسه بنفسه …من غير الحكر على حريات الغير طالما لا تهدد المجتمع او تحقق ظلما لجزء منه. الحرية ان كل واحد يقول اللى هو عايزه .. و يوصل فكرته للى هو عايزه .. و الحكم فى الآخر للناس ..من غير اهانة و من غير تحقير.. ومن غير ما حد يحتكر و يقول الشعب عايز دين اديلو دين و احنا بتوع الدين .. او الدين هو سبب التخلف و الانحدار.. الاتنين بيتكلموا كأننا عايشين فى العصور الوسطى لو فكرت فيها.

الخلاصة يعنى ، عودوا الى أرض الواقع .. انزلوا لمبادئ الشعب اللى انتو عايشين فى وسطة ..مش تفكرا زاى تجبر الناس على انها تفهم فكرتك الوحيدة و تنفذها .. فكّر بمحاذاة قيم و ثوابت مجتمعك المعاصرة اولا ثم فكّر متحررا من قيود القوالب الفكرية .. كن انت فيلسوفا بفكرك و ابتكر افكار ما يمكن ان تجعل من مجتمعك ينفرد بتجربته بدلا من النظر دائما الى افكار الآخرين و تخيلها مقدسة.

بس الضمان فين؟ ده التزام من الجميع .. واذا كانت ثورة قامت خلعت رئيس .. فالالتزام ده عايز ثورة لوحده.

تعالوا الى كلمة سواء.

نفسى البلد تبقا فى شعور بالسلام مع نفسها.

كان نفسى ابعبع من زمان .. و ادينى بعبعت.

خواطر ثورية | تويت شارع

2011-07-24T16:13:00.001+02:00

يقال ان الحوار عدو العنف. و العنف حليف الجهل. مين اللى قال كده؟ مافيش حد .. دانا اللى بقول ..

وجدت فى جنبات تويتر مبادرة عن التحدث مع المواطنين فى الشارع بدلا من بقاء النقاشات الساخنة و التخوين فى بعض الأحيان داخل ذلك الموقع الذى اصبح يعبر عن وعى فئة بعينها التى تستطيع الوصول الى تلك الأداة و استخدامها. تويتر اصبح ملغما الآن بعد أن كان واحة لل”دماغ” و بمجرد ان قامت الثورة انتشرت التويتات و الآراء السياسية كالنار فى الهشيم لدرجة ان بعض الناس اعتقد ان تويتر هو ماكينة افراز رأى فى الثورة ، بل و ذهب البعض برأسة متخيلا ان تويتر هو السبب فى الثورة مثلا ، و ان اهل تويتر – هكذا بدون اى تحقيق – هم ابناء التحريض ضد الشعب و الجيش و الاخوان و السلفيين و الليبراليين و حتى سمية الخشاب و فيفى عبده او …… ضع مكان النقط ما تشاء فكل شيئ مباح.

و القصة ببساطة ان تويتر ليس الا قهوة يجتمع عليها من يستطيع الوصول الى عنوانها ، و اهل تويتر فى الحقيقة ليسوا ابناء كوزموس. انهم فقط يمثلون شريحة من المجتمع بها المؤيد و المعارض ، مع الاعتصام و ضده ، ثورى و فلولى .. و ينطبق الحال على الفاسبوك ايضا الا ان فاسبوك .. فلولى حبتــّين..

و منذ شهر تقريبا قبل الاعتصام الأخير، لاحظت ان هناك فجوة تتسع بين الرأى على تويتر و بين اصدقائى الذين يتابعون تويتر كأنه صحيفة يومية تعرفهم على اراء من يوصفون بالثوريين .. و بدأت “صراحة” منذ ذلك الوقت بعدم الاعتماد على تويتر فقط فى تكوين رأيى بل اصبحت مهتما بمعرفة رأى اصدقائى الذين يعيشون خارج هذه البالونة التويترية بحكم اننى – واصدقائئ – لسنا الا مواطنين من الأغلبية الصامتة .. التى خرجت عن صمتها لتقول رأيها..الصامت. (مش فاهم أيه اللى انا كاتبه ده)

المهم .. رأيت ان أستغل تلك الفرصة و اتقدم ببعض الاقتراحات لتلك المبادرة ان تنجح :

- دايما حط نفسك مكان اللى بتكلمه ، تخيل انت لو واقف فى امان الله كده و لقيت واحد بيكلمك مايعرفكش.. اكيد الموضوع مش حيكون سهل.

- لما واحد يقولك انت بتوع الفاسبوك ، ماتقلوش اه.. ماتلزقش نفسك فى الهطل الاعلامى و الاكلاشيهات ، انت مواطن زيك زيه

- لما واحد فى الشارع يقولك : اصل انا حالتى كرب ، ماتردش عليه : و الله كلنا كده .. جادله فى اسباب حالته و افهمه

- ماتدخلش فى جدال مع حد فى الشارع فى طريقة تفكيرك ليبرالية..اسلامية .. صينية .. كلنا مصريين. ركز فى معرفة رأيه فى اللى بيحصل و رأيه فى المطالب

- ماتقولش حاجة انت مش مقتنع بيها ، و حاول تقتنع باللى قدامك بيقولو.

- اوعى تتكلم مع مواطن فى الشارع بلهجة "اصل انت مش فاهم" .. اتكلم معاه بلهجة "انا حقوللك انا فاهم أيه"

- بلاش جو الاعلانات ده .. انا لو واقف فى الشارع و لقيت واحد جى بيبعلى رأيه ، اللى هو : مساء الخير ، انا مش عارف مين من مبادرة مش عارف أيه .. حاقولك متشكرين و ياللا من هنا يلا بدل ما جيبلك الشرطة العسكرية

- لما واحد يبنى رأيه على معلومات انت متأكد انها مغلوطة ، اسئله جاب منين الخبر ده بأسلوب مهذب ، مش .. انت جبت المعلومات دى منين؟ دى كلها اشاعات ..

- بقدر الامكان تجنب الدخول فى نقاش عن الاشخاص ، مصر فى مرحلة لازم ترتقى فوق التحدث عن الاشخاص.

- ماتلعبش على اللوم و خلاص .. يعنى لهجة : انت لو حد كان من أختك و لا من أمك كنت عملت أيه؟ بلاش لهجة اللوم دى .. لهجة العتاب أفضل.

- ماتنساس ان الثورة بقت للشعب كله مش لفئة معينه بس ، بلاش تعمل تأصيل لفكرة التفرقة بين حاجة اسمها “ثوار” و حاجة اسمها “شعب” ..

- اوعى تقع فى نفس الخطأ الشائع ، ده منظره بلطجى ، ده منظره فقير ، ده منظره ضد ، ده منظره مع .. جرّد نفسك من احكامك الشخصية و لا تقفز للنتيجة

و ربنا يعمل اللى فيه الخير .. بس كده

خواطر ثورية | ابريق الشاى تتنبأ بالثورة

2011-07-20T00:16:00.001+02:00

منذ قليل ذكرنتى صديقة على تويتر بأغنية “ابريق الشاى” للملاح رحمه الله ، و على ما تمثل هذه الأغنية جزء اساسى من طفولة الجيل الذى قام بتلك الثورة فقد رأيت فجأة أن الأغنية تتحدث عن الثورة .. كلام عجيب طبعا .. مستحيل .. هى الفكرة بس ان كل حاجة احنا بنشوفها او نسمعها بقت ببتحول لسياسة ..

تعالوا نشوف ..

الأغنية بتقول أيه؟

اسمعوا مع القراءة ..

انا انا انا ابريق الشاى ، ايدى كده ، بوزى كده ، اصب الشاى و ارجع كده .. و اعرف برضه يا كتاكيت احكى حواديت ..

هنا يتحدث أن الابريق هى الثورة ..و الكتاكيت هم شباب الثورة..

كان فى واحد اتنين تلاتة ، مبارك و عزمى و العادلى

وايا اربعة خامسة تاتا تاتا .. دول نظيف و جمال و احمد عز

راحو لعم على الحلاوانى عايزين بسكوت بالشكولاتا .. دى امريكا طبعا امال هايروحو لمين ..

بسكوت بالشيكولاتا مافيش يمكن فى عند البقال .. البقال هنا هو البنك الدولى ..

البقال قال اشتروا سكر .. خدوا بفلوسكم كلها سكر .. معونات .. و فساد و عمولات ..

و فى الكوبليه الثاني..

كان يما كان قفطان لونه احمر لابسه امورة اسمها مرمر .. طبعا مرمر هى مصر .. و القفطان هو ان مصر محمية دايما ..

و قطط رومى و ديك فيومى و انا و انتو قاعدين نتتأور .. قطط رومى دول الفلول و الحزب الوطنى و الديك الفيومى ده الله يرحمه كمال الشاذلى ..

وانا و انتم قاعدين نتنأور .. هو قصده قاعدين على تويتر بس ماكنش لسا عارف ..

حاجة ظريفة و عال العال .. بس فجأة حصل زلزال .. اتارن الفيل ابو زلومة عمال يرقص فى الادغال ..

الفيل طبعا هو الفضالى مع بلطجيته..

…

فى الكوبليه الثالث ..

كان فى بلاد العجايب حفلة شاى لتلاتة حبايب الدبة و البوبى و النملة.و التعلب (صفوت الشريف) مالوش نايب . طبعا بلاد العجايب هو ميدان التحرير..

حفلة شاى هى الاعتصامات و المظاهرات فى التحرير و التلاتة الحبايب هما الاخوان و الليبراليين و السلفيين كلهم فى التحرير ..

التعلب قدامهم فات .. و فى ديلة سبع لفات .. كل الحفلة قالولو للتعلب ابعد 10 ياردات .. تعلوبه قال فيها لخفيها .. و عشان اغيظكوا و اجننكوا راح أخبى أبريق الشاى (الثورة) ..

فى الكوبليه الرابع..

كان فى واحد مزيكاتى و معاه صاحبه مقلفاتى .. المزيكاتى هو حزب الكنبة و المقلفاتى هما النخبة ..

غرقت بيهم المركب .. عاااموا .. عاااموا .. طبعا الجزيرة هى المرحلة الانتقالية مع المجلس العسكرى .. الاتنين كانوا طوال و عراض .. بقو كده من السمك البلطى العضاض .. و السمك البلطى العضاض هما الاعلاميين اللى بيتمحلسوا ..

القرصان قال اقفوا كويس ..

قاموا قالو احنا كده كويس ..

يلا نخش عليه و نغنى ابريق الشاى .. يعنى نغنى للثورة ..

انا انا انا ابريق الشاى .. ايدى كده .. بوزى كده .. اصب الشاى و ارجع كده ..

قلش السنين ..

Thoughts | The Sweet She

2011-07-19T00:49:00.001+02:00

I was walking down that place, when I found her. She was sweet, sweeter than expected… not because of her look .. though she’s exotic .. not her pose, her style… the way she’s standing as if she’s waiting for me to grab her. I know she’s sweet inside. Out of my experience, I’ve tasted a lot.. Sweet taste is not just about sugar, its more.. it’s the aroma that makes you feel and indulge .. makes you feel how nice the moment is when you lived it before..

I found myself wanting to get closer to her. It’s been long since someone like her caught my attention. I’ve been outside the country for a while, and I wanted to remember that taste. It’s different really.

I got closer to her, she was shining more and more.. I touched her with my fingertips.. yeah .. that sensation .. that tingling smell of her.. yes.. she invites me … I grab her fast.. quickly ..

I look at her in my hands.. she’s tempting.. I just wanna taste everybit of her … but she’s not that type.. she has dignity .. she’s more than just sweet.. she’s lovely..

I looked around .. found people around her.. waiting for that moment to see what I am gonna do .. they get closer to her .. I try to keep her in my hands… she looks at me as if smiling, but she’s not of course. I dunno why … it’s keeps letting me into her … as if she wants me to taste her .. and I go in my mind and say I’ll taste her.. but after I know her more.. what’s she made up of ? .. what’s her ingredients?.. is it the same like the ones I like.. the ones I miss …

Yeah, I keep reading her … looking into her .. moving her to the right and left .. look at the labels .. she’s just different.. but her ingredients are perfectly fitting mine..

It’s one of a kind.. that’s why they’re all after her.. chasing her it seems.. and at the moment I came it was ready for me to grab and taste.. I am happy. I start to move my lips on her .. shake her with them slowly .. she is giving me all the reasons to continue.. she likes to be tasted .. I smile.

I notice a trace of someone else .. who tasted her before.. but I don’t care .. I’ll just rub that trace .. cuz she was not given the chance I guess.. she’s so sweet.

Her sweetness are filling my lips.. my tongue tastes and feels better .. feels like it’s exact the same taste I was expecting.. I want to taste more.. and more.. her sweetness pours into my mouth.. goes inside me from everywhere.. reminds me of the real me .. makes me very courage to taste it all not afraid or hesitating….Oh, I feel that taste.. addicted to it. I’ve always been addicted to it. It’s not like coffee even though I am addicted to it. It’s more .. related to my childhood maybe.. but it’s real.

Guys are getting closer, they all want her.. one cool guy appears closer .. he’s aggressive.. he’s faster than me .. he doesn’t want to give me a chance.. he has feelings for her it seems.. he looks at her.. he just touches her while she’s in my hand.. she slips away from me.. in his..

I feel the sweetness and the pain of slipping.. I can’t buy her. She’s just not something I could buy. How can I use her? How can I steal her and lie? I am a nice guy that’s how I was raised.

It’s a weird feeling, I am losing her in his hands. She looks like being sorry, but she’s not. She’s just in some other guy’s hands who didn’t take the time to read and just went crazy frenzy tasting her as if he never did that .. he wants more of her .. the pleasure.

I walk slowly away, looking at her in his hands… and smile. He drinks all.

It’s a new Coke Can product for testing that I found in a supermarket. Just another Coke Can. No one can buy it, so I couldn’t steal it. I felt pain because the guy after me was looking as if I didn’t take care of it or drank more than he can drink and he’s even whispering to her like a retard that I am not worth her. She’ll never know the truth, because she’s a just a Coke Can.

Its fate is a big trash filled with previously crushed cans. But this Coke Can will keep being passed from one mouth to another. It’s different for sure not because of its uniqueness, but because it’s for testing. Have you ever stopped yourself from tasting a new product?

Today was the first new Coke Zero can for testing I drink in a can since I came from Egypt. It really tasted nice. I enjoyed it.

TAN TARA BARAN TAN TAN =P

خواطر | زيارة الشبح الصديق

2011-07-13T14:52:00.002+02:00

اهلا بك مرة أخرى
نفس ذلك الشبح الصديق.. يريد أن يعصف بى فى كل مرة

احاربه ، ابارزة .. و ينتصر فى نهاية الأمر

يخيم بوجه القبيح ، نفس ذلك الوجه المبتسم بشماتة

يتوارى وراء نفس تلك الدموع الحمقاء و توسلات الإعتذار

لا أعلم سببها

أو ربما أعلم ، أو ربما بررت الأسهل بأننى السبب

زارنى منذ يومين و قال لى ستفشل هذه المرة ايضا

قلت له : و ما السبب هذه المرة؟

يخافونك قوتك وراء وجهك الوهن

لا يريدون ان يعيشوا فى عالمك الطاهر

من قال أنه طاهر ؟ بل هم أغبياء إن ظنوا ذلك ..

الطهارة فى الملاحم فقط .. و على الأرض قذارة و اتساخ

.. انت كاذب

يضحك عاليا .. بالطبع كاذب،

فكيف لا أهزمك و انت تصدقنى و تعلم اننى كاذب

إنه الشعور بالحاجة يا أبله ...فربما كنت صادقا و لو لمرة واحدة

سأقتل تلك الحاجة بداخلك .. سأجعلها تموت موتا بطيئا

اشعر بتلك النغزة فى صميم قلبى

نعم ، انه الموت البطئ ، الضعف

متألما ضعيفا تهزمنى اليوم و لكن الحياة فن التعلم

ما دام فى النفس حياة سأنتصر

و ستأتى يوما و نتسامر معا كيف هزمتك

و ستبكى كثيرا عندما اموت

فلا تجد من تبارزه يا صديقى

باوجز كلمه عظمة امه

2011-06-30T13:39:00.001+02:00

ما من شيء يدفع عبدا ان يستشهد ليصون الحرية للاسياد ان يحمى ارضا لايملك فيها شبرا ان يحرس عينا لا يسقى منها جرعة ماء ان يمنح دمه لحيا جلادوه، لو انا اعتقنا الناس جميعا و منحنا كلا منهم شبرا فى الارض وازلنا اسباب الخوف لحجبنا الشمس اذا شئنا بجنود يسعون الى الموت ليزودوا عن اشياء امتلكوها و اكتشفوا كل معانيها الحريه شبر الارض و ماء النبع قبر الجد و امل الغد و ضحكة طفل يلهو فى ظل البيت و ذكرى حب و قبة جامع ادوا يوما فيه صلاة الفجر
باوجز
كلمه عظمة امه

محمود دياب - باب الفتوح

خواطر ثورية |رسالة الى الناشط

2011-06-13T22:46:00.002+02:00

الى من ابعث بتلك الرسالة؟

لا يوجد مستلم لها .. مش مشكلة ..

تحية طيبة و بعد ،
عندما دعا بعض النشطاء لكتابة رسالة الى المجلس الأعلى تكسر بها حاجز الإنتقاد لسياساته بصفته الحاكم الإنتقالى الفعلى للبلاد ، تحمست للغاية للفكرة. بدأت فى كتابة الرسالة واضعا فى إعتبارى اننا لا يجب أن نفرق بين أنفسنا فى ظل هذا الوضع الحالى. و فى هذه الرسالة أوجهها لمن يهمه الأمر ، فالثورة لم يكن لها ممثل ، و لم يكن لها قائد ، و لم تكن ثورة فئوية او حتى ثورة لتيار على بقية التيارات. و على ذلك ، فإذا وقعنا فى خطأ التصنيف بين مصرى و آخر على اساس مواطن و مسئول ، ناشط و غير ناشط ، مثقف و غير مثقف بلا أن نعطى الفرصة لكل منا فى موقعه اعتبار مصريتنا و ايماننا بأهداف تلك الثورة كافية لكل نبعد شبهة التخوين، فإننا نرتكب خطأ كبيرا فى حق هذا الوطن و سوف نحاسب حساب عسير عندما نجد أن هذا الأسلوب لن يكلفنا الا سطوة تيار على التيارات الأخرى و بناء بيئة سلطوية من جديد فى مجتمع انهكه هذا الأسلوب و لم يعد يتحمل أن نعود به الى الوراء ايا كان التيار الذى سيضع نفسه فوق الجميع متخيلا أنه الوحيد القادر على حفاظ مقدرات تلك الثورة.

أذكر نفسى اننى قد آمنت بتلك الثورة لا لكى أجد تيار مسيطرا فى السلطة مختلف عن الحزب الوطنى ، فلا سطوة لمجلس أعلى و لا إئتلاف ، و لا أخوان و لا اشتراكيين و لا ليبراليين على هذه الثورة. و أيا من كان يتخيل انه حمى ميدان التحرير وحده فقد أخطأ و ايا من كان يتخيل أن شهداء الثورة كانوا ينتمون لتيار اوحد فهو مخطئ ايضا. إن الإستمرار فى العمل و الضغط من أجل تحقيق المطالب التى يجتمع الجميع عليها هو الشيئ الوحيد الذى سيبقى الثورة قادرة على التغيير. و على تلك المطالب ان تكون فى إجراءات التحول و ضمانات التحول الديمقراطى ، تضمن للجميع فرص متساوية للمشاركة فى العمل. لا يجب أن تكون المطالب تعبر عن وجهة نظر تيار عن آخر.

و من وجهة نظرى ، لا أجد الأولوية الآن فى المطالبة بتحقيق سياسات اقتصادية او قوانين اجتماعية ، فالحكومة الإنتقالية يجب أن تكون مهمتها مقتصرة على تنظيم خريطة طريق للتحول الديمقراطى و تنفيذها مع تسيير الأعمال. نعم ، مع حق التظاهر من اجل مطالب فئوية و لكن لست مع أن نطلب حتى من الحكومة الحالية حل تلك المشاكل. إن الإعتماد على الحكومة الإنتقالية الحالية و هى ليست منتخبة و لا تعمل وفق دستور جديد يجعل سلطة الرقابة و التشريع الحقيقية فى يد الشعب يعود بنا الى الوراء ، يأخذنا الى نفق العودة للإلقاء بالمسئولية على الحكومات بدون المشاركة فى صنع الحل.

لابد ان تتركز المطالب الآن بشكل قوى و فعال و محدد فى تحقيق العدالة الغير منقوصة ، و فتح المجال أمام حرية التعبير امام كل التيارات مع احترام كل تيار للمواطن ، و عودة الأمن مع وقف ممارسات الشرطة و المحاكمات الاستثنائية بأشكالها التى بدأنا فى السماع بعودتها لنعود الى سنين الى الوراء ، لا أن أجد تلك الجزر المتباعدة بين التيارات. إن اولى خطوات تحقيق الديمقراطية أن نحترم أنفسنا مع كل الإختلافات ، فأسلوب الاقصاء من جانب الثوار ، او اسلوب الإختيار من جانب السلطة الحاكمة ، أو اسلوب "المحلسة" من اى تيار كلها اخطاء فادحة تفرغ الثورة من مضمونها و تزيد من حالة البلبلة و اليأس التى نعيشها.

من ناحية عجلة الإنتاج ، التبرير بأن المشاكل الإقتصادية موجودة من قبل الثورة لا يعنى أن الحالة الاقتصادية الحالية تتطلب منا "التريقة عمال على بطال" على هذا الموضوع. فإذا كنت تجد خبزك و تكتب على تويتر رأيك ضاربا بعرض الحائط ذلك المواطن الذى يكدح من أجل لقمة عيشه ، فأنت تقصيه من شعورة بأنه جزء من الثورة. و الى كل من يهاجم المواطن الغير واعى ، الغير مثقف ، أو من يريد توفير معيشة مستورة ، إحذر غضبه و نقمته. فهذا المواطن لم تكن الثورة لتنجح الا اذا شعر بأنك ستكون بجانبه فى محنته ، و تذكر أن شهداء الثورة فى السويس لم يكونوا يمتلكوا تلك الرفاهية التى تعيش فيها و أنت تسخر من الدعوات للعمل و انقاذ الإقتصاد.

أتعجب من تحول بعض من الثائرين الى حزب الكنبة الذى هم انفسهم وضعوا فيهم من ينتقدونهم ، أعلم ان هناك من يستغل الوضع الإقتصادى من أجل لوم الثورة ، و لكن عليك كمؤمن بها أن تحتوى من يلقى اللوم بأن تكون أنت المثال و أول من يدعو للإنتاج و التشغيل و تحسين الحالة الإقتصادية بدلا من الإستهزاء و القاء اللوم فقط على الاعلام الحكومى بل و التجرأ على المواطن البسيط الذى وقف بجانبك فى التحرير و تلقى رصاص القناصة و هو ينظر اليك آملا ان يجد المخرج مما هو فيه. كفانا ضحك على أنفسنا ، كفانا استهزاء بأنفسنا ، ان المعركة لم تنتهى بعد لكى نتشتت فى جمع الغنائم.

كيف يمكن ان تلوم المواطن على عدم وعيه فى ظل كل هذه السنين من تغييبه عن المشاركة و انت لا تريد التقرب منه و التكاتف معه و توعيته بفكرك و بحلولك من اجل وطن أفضل؟ ثم تأتى و تنصب نفسك بحكمتك و حنكتك وصيا عليه ؟

اما بالنسبة لأسلوب تنظيم المليونيات فأؤكد لكم ان فى ظل وجود خطة عمل منظمة من جانب المجلس الأعلى فإنها وحدها لم تكون الحل مع عدم اعتراضى عليها ، و لكن متى كانت آخر مليونية "مليونية" بالفعل فى الفترة السابقة؟ علينا ان نفيق و لا نأخذ نفس اسلوب "حافظ مش فاهم" و "اللى تكسبه العب به" فى تنفيذ الضغط لتحقيق المطالب. إن اسلوب استفزاز السلطة لعمل امنى دموى ساذج مثلما حدث فى يناير لن يتكرر مرة أخرى ، فقد تعلم النظام الإنتقالى الحالى فى آخر مليونية عدم التواجد لكى لا يقع فى فخ كان ينصبه النظام السابق لنفسه بالإلتحام المباشر مع المتظاهرين. و يبدو التركيز واضحا فى ضربات تكتيكية لبعض النشطاء المعارضين لإسلوب ادارة البلاد الحالى و هذا للأسف أيضا شيئ لا يليق بسلطة جاءت لكى تحمى مطالب الثورة و يدعو الخوف كلما سمعت عن خبر يعيد الى اذهاننا ايام الله لا يرجعها.

إين العمل السياسى فى ظل حرية تكوين الأحزاب بالتزامن دعوات الضغط الشعبى ، و كيف لم يتم الى الآن احتواء الائتلافات فى الاحزاب ، هل نبنى نظام على شاكلة الجماهيرية القذافية فى مثلا؟ و ما دور حركات المعارضة للنظام السابق مثل 6 أبريل مثلا؟ إن استمرار التباطؤ فى العمل من اجل اصلاح الاحزاب السياسية الشرعية و تنظيفها و التكاتف من اجل بناء بيئة حزبية سليمة سيعود بنا الى الوراء لأن الشرعية فى الدستور القادم لن تأتى من ائتلاف و لا حركة ، و اذا استمر ذلك الفضاء الحزبى سنعيد انتاج حزب أوحد مرة أخرى ايا كانت ايديولوجيته.

لأننى لا أقيم بمصر حاليا فقد كنت اعتمد فقط على الأخبار التى تأتينى من تويتر لمعرفة شعورى بما ينبض به الوطن ، و لكن بعد مكالمات مع اصدقائى و اهلى اكتشفت ان الهوة بين تويتر و فاسبوك و الشعب كبيرة للغاية و اصبحت الشبكات الاجتماعية منغلقة على نفسها او شبه مسرح لا يعبر عن الأغلبية و يكتفى المواطن العادى بالدخول و الفرجة. بل ان هناك من لا يحترم الأغلبية لشعورة بأنه لم يجد المساندة الكافية فى مساعدته على تحقيق المطالب بعد خلع مبارك. كانت فكرة جيدة للغاية القيام بندوات يلتقى فيها “المتوترون” و لكن اتمنى ايضا ان نستمع الى صوت المواطن الذى لم تكن تهمه اصلا كل هذه الأشياء لأنه لا يشعر بتأثيرها عليه اساسا و يرى انها من رفاهيات الحياة.

لا يمكن ان نحقق اهداف ثورة على التوالى فالثورة لم تطلب تحقيق العدالة الاجتماعية بعد تنحى مبارك اولا ، انما تجمع الشعب على عدة اهداف واضحة ، و على ذلك لابد ان يكون الحراك متوازيا فى تحقيق تلك الاتجاهات ، بلا تسفيه من الادوار بل نشجع بعض و نبقى على التواصل.
كلها خواطر فى رأسى ، لا اعلم مدى صحتها ، و لكن أعلم شيئا واحدا ، اننى مؤمن بهذا الثورة و لا أريد لها ان تنتهى فى التاريخ الى فيديوهات يوتيوب و تويتات.

(وشوشة : انا حاسس انى فصلت عن شعورى بإستطاعى المشاركة فى التغيير ، لا بقيت عايز انضم لحزب و لا ائتلاف و لا تيار و لا نيلة بدأت ارجع تانى اتفرج على مسلسل عربى كل يوم نعرف أيه يا ترى اللى بيحصل ، و ما بين مطرقة عدم تحقيق العدالة و عودة التعسف و عودة عدم احترام المواطن و محلسة المتمحلسين و سندان التخوين الثورى ، سلملى على الثورة)

و بكده أكون طلعت الفلولى اللى جوايا .. و ارتحت.

خواطر ثورية | رسالة

2011-05-23T09:12:00.001+02:00

رسالة الى المجلس الاعلى للقوات المسلحة

تحية طيبة و بعد

نشكركم على ثقتكم الغالية فى ابناءكم من المواطنين الشرفاء الذين حبذوا التحدث بالصدق على النفاق، و التحدث بما يشعرون به على الرياء. فنحن جيل استطاع طلائع منه ان يقوم بثورة شائت الظروف ان تضعكم فى وضع الاختيار بين طريق الدماء و طريق الحفاظ على مكتسباته ، و قد انتويتم اختيار الطريق الثانى فى مفترق الطرق عندما هتف الناس الجيش و الشعب أيد واحدة… و لكن ..

افهم ان المجلس يقوم بإدارة شئون البلاد بإختصصات رئيس الجمهورية ، و قد تعودت هنا ان انتقد اداء الحكومة من رئيسها الى رئيس وزراءها الى وزراءها بدون ان اشعر بأننى من الفلول و لا من ممن يريدون الوقيعة بين الشعب و الحكومة , فكلنا مصرييين و قد شاء الله لحكمة منه ان يضعنا جميعا كشعب فى خندق واحد ايا كان موقعنا من مسئول الى مواطن. علينا ان ننظر الى الوطن من منظور المواطنين و ليس من منظور التفرقة بين فئاته.

عندما انتقد اداءكم فى ادارة شئون البلاد فذلك يعنى انتقادى لسياسة رئيس الجمهورية التى قد تسلمتم اختصاصاتها و لا أرى ان ذلك له علاقة بالجيش ، فقد كنت انتقد مبارك فى ادارته للبلاد و هو القائد الاعلى للقوات المسلحة و لم يكن ذلك يعنى الاقتراب من التحدث عن وطنية الجيش ، فمن فينا ليس له قريب او عزيز عسكرى دافع عن وطنه بشرف و استشهد من أجله.

ننتقد الاعلام البروباجندى الذى يحاول ان يخلق منكم صورة رئيس جديدة مغلفة بالخطوط الحمراء مجددا ، و على الرغم من اننا قد دخلنا عصر جديدا فى الديمقراطية لن نتراجع عنه فنرى الآن تليفزيون الدولة يقوم بقطع الارسال على احد ابناءكم من الشباب و هو يلقى خطابه فى الحوار الوطنى كدليل على سياسة جديدة من الاعلام الحكومى الذى يتحول رويدا رويدا الى اداة اعلامية لا تعبر عن كل اراء الشعب و لكن تعبر عن الاراء التى تتسق مع وجهة نظر المجلس ، و إن لم يكن لديكم يد فى ذلك لهشاشة و ضعف الاعلام الحكومى فإننى انتقد عدم سعيكم لفتح المجال امام الاعلام الحكومى لأن يعبر عن وجهات النظر جميعها حتى التى تنتقدكم.

انتقد بطئ اجراءات العدالة امام الفاسدين و فلول النظام السابق الذى اعلنتم عن انهم السبب وراء ما يحدث فى البلاد من فتن ، و قد صدقتم ، و لكننى ارى اجراءات بطيئة، مذبذبة ، و اشعر كما لو ان هناك جس نبض بين الحين و الآخر بما يمكن ان تصل به الاحكام ضد من قاموا بتشويه سمعة مصر و المسئولين عن فساد البلاد. انتقد الاجراءات التى لا تطبق على الجميع بالتساوى ، انتقد المحاكمات الاستثنائية العسكرية للمدنيين بدون وجود معيار للإختيار بين البلطجى الذى يعتدى على القوات المسلحة مباشرة فتجوز محاكمته و بين المدنى المصرى الشاب من ابناءكم الذى خرج ليعبر عن رأيه بشكل سلمى بدون ان ارى منه تحريضا ضد احد– و انا مواطن عادى لا اعلم الكثير عن اى نشاط. انتقد عدم وضوح الرؤية و احساسى بين الحين و الاخر ان هناك نوعا من المفاوضات مع رموز الفساد ، و قد اخذتم على عهدكم الانحياذ للثورة بموقفكم و ليس الحياد. انتهى زمن الحياد عندما تنحى الرئيس و اصبح من مسئوليتكم ضمان محاكمات عادلة لكل مسئول عن افساد مصر.

انتقد ما اسمعه من شهادات بعض الشباب امام الاعلام المصرى من معاملة سيئة و قاسية و قنابل غاز و شتائم فى الثورة ، و شتائم فى هذا الجيل من الشباب و اهانات لمصريتنا بلا داعى و كما لو ان شيئا لم يتغير ، اما آن للوطن ان يتلائم مع بعضه. ربما لا يكون المجلس هو من يصدر قرارات لتلك المعاملة ، و لكن عندما اشاهد على تلفزيون بلدى تلك الشهادات اشعر بالخوف بدون محاسبات سريعة و توجيهات حاسمة لمنع هذا الاسلوب و انا من اعتقدت ان زمن الخوف قد انتهى الا امام كل بلطجى و كل غير شريف يريد الوقيعة بين طوائف الشعب بما فيها قواته المسلحة الباسلة. اثمن كثيرا دعمكم لعودة الشرطة للعمل ، و لكن انتقد ان الشرطة لم تعود كما كانت و انكم كما قمتم بزيارة الشرطة و تشجيعها فعليكم ايضا انتقاد اداءها ليس بما يقذف اليأس و لكن بما يحقق معايير الشفافية.

انتقد ربط الاقتصاد بأن البلد “حالها واقف”. و اعترف اننا كمصرين مقصّرون فى حق العمل و النهوض بالبلاد بنفس الصوت العالى الذى نسمعه امام المطالبة بالحريات ، و لكن الاقتصاد المصرى يعانى من ازمات منذ الازمة الاقتصادية العالمية و من قبلها ايضا فكيف نختصر كل هذا البلاء الذى عشنا فيه انه بسبب الثورة ، نعم ، الثورة أثرت على اقتصاد الوطن لا بسبب الشعب و لكن بسبب تعنت قيادته السابقة فى الاسراع باجراءات الاصلاح.

انتقد عدم قدرتى و انا مصرى اعيش بالخارج على توفير آلية للتصويت فى الانتخابات الرئاسية المقبلة ، فهذه مسئوليتكم عندما اعترفتم بحق المصريين فى الخارج بالتصويت فكيف لا يكون هناك اسلوبا لارسال تلك الاصوات و المشاركة الفعلية فى الانتخابات.

اننا الآن فى مرحلة بناء للثقة التى ستمكننا من العمل من اجل الوطن الغالى فى معيار عادل لا يجعل من يشعر انه يعمل ان عمله سيضيع هباءا و اننا نعطى الفرصة لفاسدين آخرين مرة اخرى فى سرقة الوطن و سرقة ثورته الفتية.

ان عليكم عبئ كبير و مسئولية عظيمة فى ان يعود الوطن مرة اخرى الى الشعب بعد ان سرقه الفاسدون و رواد الثورة المضادة ، و إن الطريق الأول فى رأيى نحو ذلك هو تطبيق العدالة الكاملة الحاسمة السريعة المدنية و قد رأيتم كيف هتف الشعب لكم و كيف هتف الشعب لمأمور القسم الشرطى الذى حارب البلطجة و كيف ان كل اجراء فى طريق الديمقراطية و الحريات و ارساء قواعد الحفاظ على كرامة المواطن يؤدى الى المزيد من الثقة و العزم على العودة بمصر رائدة بنظامها الجمهورى الديمقراطى و اقتصادها القوى و وحدة ابناؤها امام الفساد فى منطقتنا العربية كما كانت.

و اننى اذا انتقد اداءكم فى بعض السياسات فإننى لا اجد غضاضة فى تذكيركم ان رصيدكم لدينا يسمح ، كما ان رصيدنا لديكم يسمح. فكلنا مصريون ، شعبا و حكومة و جيش.

وفقكم الله

اما الخطاب القادم فسيكون لإنتقاد سياسات الناشطين و الشباب الذين شاركوا فى فعاليات الثورة… فالكل سواسية، و لن اكون بوقا لأحد او منافقا لأحد حتى ابناء الثورة ايضا..

مذكرات مشينة | بروفيسورة الإتحاد الأوروبى

2011-05-22T00:11:00.001+02:00

و اخيرا و بعد طول انتظار (قال يعنى) أعود و أكتب لكم أحدى المذكرات المشينة ، و ما أكثرها من مذكرات مشينة سوف نتحدث عنها عن عصر ما قبل الثورة. و أخرى تحدث لنا بين الحين و الآخر ، فالحياة تستمر و الساقية مستمرة بالدوران و ننتقل فى حياتنا دوما من حين لآخر ايضا بين دور البطل ، و دور المتفرج.

فى العام الماضى ، و بينما كنت مغرقا فى الكثير من الأحداث و العمل من أجل الإنتهاء من رسالة الماجستير قبل تسليمها بشهر و معها النتائج التى خرجت بها من البحث (الفتىّ) الذى اتقدم به للحصول على درجة الماجسيتر. و طبعا يعلم الجميع عادتنا السيئة مما يحدث عن هرج و مرج كما لو ان العالم سينتهى كلما اقتربنا من موعد تسليم الرسالة و الدفاع عنها او أى مشروع.

و كانت عادتنى فى تلك الفترة المتينة البقاء فى الغرفة اكتب و اعمل ثم انام متأخرا ، فأصحو متأخرا و هلم جرة. و فى اثناء تلك الحالة يتبعها مجموعة من الأعراض ، مثل عدم الاهتمام بالحلاقة و عدم الاهتمام بالمظهر العام عامة .. ليس نوعا من العادة بالطبع (اى كلام اى كلام) و لكن لأننى لا أجد الوقت الكافى للإهتمام بهذه المهاترات.

و فى يوم من الأيام تلقيت و مع زملائى دعوة لحضور محاضرة تلقيها بروفيسورة فى العلاقات العامة لكى تشرح لنا خبراتها فى مجال العلاقات العامة و الموارد البشرية و كل هذه الاشياء التى لا يتقنها الكثيرون ممن يعلمون بمجال الهندسة اما لأنهم يعتقدون انها “لا دى حجات سهلة جدا ..ايه يعنى لازم اخد كورس فى الكلام ده .. انت ادينى 10 ايام و انا حاكون ماسكلك الليلة دى كلها” .. او اما لأنهم يتعاملون معاها بمنطق “يا عم بلا وجع دماغ ، احنا عايزين نعمل حاجة مفيدة.. فاااااااكس”.اما بالنسبة لى فكان الموضوع مهما لأننى لا امارس البحث العملى و فقط ، و لكننى ارى معرفة ابعاد مثل هذه الاعمال سيساعدنى مستقبلا فى ادارة و ليس فقط المشاركة فى الجزء العلمى من المشروع.

و كانت المحاضرة بالصباح الباكر .. الساعة التاسعة فى مكان ليس ببعيد عن مكان الإقامة. و كالعادة نمت متأخرا ، فصحيت بضرب “الشباشب النمساوى” اللى هى مش زى شباشبنا طبعا .. المهم .. صحيت قبل بداية المحاضرة بعشر دقائق ..

سريعا ..سريعا .. فزعا .. هلعا .. هرعا .. لبست ما وجدته امامى .. بنطلون جينز و تى شيرت (مش مغسول) و شعر معكوش و عيون يتخلل بداخل جفونها “العماص” الذى يعمى البصر فتجعل عينك كالمحترقة احمرارا .. و بالذقن المشكشكة الغير متسقة (بيسموها دقن سجون) و هالات من السواد المزرق تحت الجفون ، و سحنة انسان ضايع .. جهزت و بدأت الجرى مسرعا .. اريد ان اكون هناك قبل البداية .. فستكون حتما بروفيسورة من النوع الغتت ده .. تعمل فى هذا المجال منذ سنوات و عندها 70 سنة .. و تجاعيد وجهها ستقول لى متأخر ليه يا حيلتها .. و لكن لا .. سوف استفيد من خبراتها فى العلاقات العامة و الموارد البشرية المهمة و هذا ما اريده ..

وصلت ..

دخلت و كل زملائى جالسين ، لم اجدها .. فحمدت الله ان وصلت قبل ان تبدأ (طب ما هم بيتأخروا اهم هما كمان يعنى مش زى ما بيقولو ) المهم .. انتهزتها فرصة و ذهبت لجلب القهوة فى كوب بلاستك .. كانت القهوة مهمة جدا لبداية هذا اليوم بالشكل المظبوط و لزوم تعمير الدماغ .. و عدت

.. لأجدها ..و صدمت ..

وجدتها تقوم بتوصيل سلك “البروجيكتور” ..

… لحظة صمت ..

من هذه ؟

دعكت عيناى .. من هذه ؟ دكتورة ؟

ارسلت دماغى ادرينالين ، و علامات استفهام و تعجب .. و ذهول مخلوط بالبلاهة … انه الشعور بالهيبة ..

فهناك من النساء اللائى ينتابك نوعا من الصدمة العصبية عندما تراها امامك فتبدأ محاولا محاولات يائسة ان توصف ذلك فتقول .. انها جميلة بالمعنى الفتاك .. قنبلة نووية من الطراز الرفيع .. صاروخ ارض جو .. مزة زى ما بيقول الكتاب .. استاذ و رئيس قسم ..فخر الشوكولا البيضاء السويسرى بجوز الهند .. جمال الهدوء العاصف.. الاناقة الرفيعة .. و الهيبة و حدث و لا حرج.

طبعا لا تحدث امرأة عن ما اقوله الآن لأنها على الارجح ستقول لك بنظرة فوقية و مناخير فى السما و قلبة وش معكوشة: مافيهاش حاجة يعنى ما هى ع ع ع عادية يعنى … و ردّى دائما ما يكون بمط الشفتين للجانبين و السكوت امام هذا الهزل البيّن.

كانت دكتورة اصغر مما توقت فى منتصف العمر ، تعمل فى الاتحاد الاوروبى و تقدم نفسها بثقة فى النفس تحسد عليها (يا خبر ابيض على بتوع الاتحاد الاوروبى ده يا أخى .. حاجة كده .. اه و حياتك .. هيبة هيبة من النوع التقيل أوى)

و طبعا صاحبكم نسى ما الذى جاء به الى هنا ، و بلا علاقات عامة بقى بلا موارد بشرية بقى .. فين البشر دول يا عم .. هو انتو خليتو فيها بشر .. و انصب كل اهتمامى على متابعة هذا النجم ساطع الضوء فى ظلمة الفضاء القاتم (ايه يا عم ماتتعدل كده) .. و بهدوء جلست و وضعت القوة على مسند الكرسى بهيئتى المعكوكة التى شرحتها سالفا .. ثم بدأت فى التعرف علينا .. واحد واحد ..

و ضربات قلبى تزيد مع اقتراب دورى اقوم بإعداد قائمة من الإنجازات و تجميع كل القوة الايجابية و تندفع الهرمونات لكى تكسبنى ثقة الأسد و ذئب الغابة و تنين الازمنة الغابرة .. فيا عزيزى القارئ الانطبعات الأولى تدوم كما يقول “أكس” ..

نظرت بلؤلؤتيها اللامعتين ثم سألتنى : اسمك ايه و عرفنى بك؟..

دخل صوتها فى اذنى فانتفضت و ابتسمت بالثقة المعهودة و الثبات .. و بدأت فى تحريك يدى و انا ابدأ فى التحدث ، ناظرا اليها فى ثبات و اذبهلال .. و مع بداية ابتسامتى للتحدث عن نفسى ..

شعرت بشيئ غريب .. شيئ ساخن للغاية..

لقد انزلقت يدى الحماسية لكى تقذف بكوب القهوة الشديدة السخونة على ملابسى .. التى شيرت و البنطلون و الأرض ..

لحظة صمت .. تحولت الى خيبة أمل ..لقد انتهى زمن الانطباعات الأولى .. و بدأ الضحك الساخر علىّ ..

و فى لحظة ، تحول الأسد الى نملة ، و تحول الذئب الى ارنب ، و التنين الى عرسة ..

تحولت الابتسامة من ابتسامة ثقة الى ابتسامة طلب الرحمة من هذا الموقف .. و اندفعت علامات الاحراج البشعة لكى تحاول السيطرة على انفعلاتى فى استسلام تام منى ..

و مع تلك الابتسامة و ضحكاتها الساخرة .. وقفت فى هدوء و استأذنت فى دقائق لتغيير ملابسى المكسوة بالقهوة .. عدّت سريعا .. قمت بكوى قميص فاخر ، و بنطلون ، و حزام ، غسلت شعرى و قمت بتسريحه .. هندمت من هيئتى و استعدت الثقة مرة أخرى ، دائما هناك أمل .. و تحدث جنون العظمة لكى يشعرنى بأننى الجامد اللى مش ممكن المواقف دى تأثر فيه ..

و عدت شخصا مجددا ..

فتحت الباب .. نظرت اليها .. بثقة السنين و شياكة التنين..

فبدأت فى الضحك الساخر الهستيرى مرة أخرى ..

و كتب على قفاى : أرنب اليوم

تعلمت يومها ان اكون حذرا اذا كتبت على نفسى الثقة بحذر لا ان تصل الى حد الغرور ، و تعلمت ان اهتم بنفسى اكثر من ذلك فى تلك المناسبات …

مواقف مشينة .. مش كده؟

صباح الاحترام

2011-05-20T16:43:00.001+02:00

I got this 2 euros attached with the following letter in my postbox as a reply to a complain that’s shown in the picture.

Saba7 el e7teram!

خواطر ثورية | أزمة الثقة

2011-05-15T12:10:00.001+02:00

انا قعدت افكر كده .. و للأسف ياريتنى ما فكرت .. هى المشكلة اصلا كانت ايه ايام مبارك ؟ عادى يعنى .. فساد .. ما كل حتة فيها فساد .. مشاكل اقتصادية .. عادى .. يعنى احنا دلوقتى بقينا الصين؟ .. مافيش هدف واحد نجتمع عليه مثلا؟ … طب و هو احنا حايفضل هدفنا الأول و الأخير ان الشعب ينزل التحرير؟ .. و لحد امتا ؟.. لا لا .. فى حاجة أهم من ده كله ..

الكرامة و العدالة..

ثورة مصر ماكنتش عشان لقمة العيش .. و ثورة مصر ماكنتش ثورة شباب و بس ..و فى نفس الوقت الثورة مش هى اللى حاتغير البلد ، الثورة شعلة لكن مين اللى يمسكها و يجرى بيها و يعلى بيها بلدنا .. هو ده السؤال.

من ناحية تانية ، ازاى ممكن للعجلة الاقتصادية ان تنمو لو ماحسش المواطن بالكرامة و العدالة؟ مستحيل.. انتو عارفين فى المانيا قبل الحرب العالمية الثانية ايام عمّو هتلر؟ كانت المانيا دى اقوى دولة فى العالم ، بعملها و ترسانتها و سلاحها ، كل حاجة .. تنمية على ودنو .. و عجلة بى أم المانى زى الفل .. لكن مش دى القصة .. القصة ان المصرى عايز عدالة. و العدالة هى منبع الثقة .. فى عدالة .. فى ثقة .. مافيش عدالة و الله لو أيه .. لو عملنا حفلات ، و اغانى و جمعة مليونية .. و لا حاتفرق ..

العدالة ان الكل متساوى امام القانون ، العدالة ان فى الفترة الانتقالية لازم يتم بناء الثقة مش زرع خوف من نوع جديد.

العدالة ان الاعلام يكون حر .. من غير تشويه للحقائق او بروباجندا لده او لده .. اعلام محايد .. من غير بذاءة و شتيمة فى نفس الوقت.. العدالة ان بدل ما أحذر الناس اتحاور معاهم ، اضع اسس من غير ما صبرى ينفذ ..

العدالة ان صبرى ينفذ امام البلطجى اللى عايز يأذى مصرى بأقسى عقوبة بالقانون المدنى ، و احاكم المحرض و مشعل الفتن و الفاسد امام الجميع، بس ليه افقد الشعب ثقته فى القضاء العادى بإنى اعمل محاكمات استثنائية ، هو القضاء العادى مش قوى كفاية او قادر كفاية على حماية امن البلاد؟…طب و اذا كنا كده و فى مرحلة انتقالية امال بعد انتخاب رئيس ايه الموقف .. اذا لم نضع اسس و مبادئ عادلة و توافقية ما بين الناس ، الرئيس القادم لن يدم حكمه حتى لفترة واحدة و حاينتهى بينا الأمر للأضطرار للعودة للطوارئ مرة أخرى .. هل ده اللى احنا عايزينه؟

خطورة اهتزاز الثقة ان الاعلام السيئ و فضاء المعلومات الغير مكتمل الوضوح بيحرض على الاشاعات و حايأثر جدا فى الناس بحيث يتقسموا ، لو تفتكروا فى ايام الثورة الأولى ماكنش فى اعلام بيأثر علينا ، لأن كان كلنا عندنا ثقة فى نفسنا ان الهدف الرئيسى الآن هو تحقيق المطالب و حماية البلاد و الجيش و الشعب أيد واحدة.

انا بدأت اخاف على البلد تانى من تراجع مخيف ، بنرجع لورا ، الثقة بدأت تتهز تانى فى انفسنا، التراجع سببه ان احنا خلاص بدأنا نرجع لعادتنا القديمة ، عايزين نلصم الدنيا و نمشيها وخلاص .. و كل واحد شايف ان رأيه هو الصح و مش عايز يفهم وجهة نظر التانى .. و لما الأمور تعقد نلجئ لقاعدة البقاء للأقوى .. و لا الكلام ده غلط؟

يا مجلس ، اتمنى أن صبرك ينفذ على من لا يستحق صبر معه ، المخرب و الفاسد و رؤوس الفتن ، و اذا كان صبر الشعب نفذ فنزل ميدان التحرير و هتف سلمية ، فإن نفاذ صبرك مع الشرفاء يعنى تطبيق العدالة التى ارتضيت تطبيقها بأسرع وقت ممكن.

و بعد ان كان المواطن بيقول انا عايز العلاوة .. دلوقتى لازم يقول انا عايز العدالة..

اما انا اقول لنفسى، فاحستخدم تعبير معلش و اقوللك : معلش ، اضغط على نفسك شويا و حرك العجلة فعلا ، نفسى الطاقة اللى كانت فى التحرير دى تتحول لمشروع يخلى اقتصادنا قوى قادر على تحمل التغيرات الاجتماعية و السياسة اللى احنا مقبلين عليها. ماتستاهنش و اتحرك عشان تساعد بلدك تقوم و ماتقلقش اوعى تفتكر ان تحريك الاقتصاد معناه انك تتلهى عن مطالبك ، دا انت حاتواجه الثورة المضادة فعلا و على الأرض.. بعد ما نزلت التحرير و كنت مستعد تضحى بحياتك ، هل انت فعلا مستعد تضحى بوقتك اكتر فتشتغل اكتر عشان تنجز؟ بصراحة ؟ و لو لأ .. ليه؟ أيه اللى معطلنا ؟

الا هو الحوار الوطنى اخباره أيه؟…

ربنا يستر ..

عجيب فى بلاد العجائب

2011-05-09T21:32:00.003+02:00

قامت دار نشر ضمة بالتواجد فى معرض الكتاب الذى نظمته مكتبة ألف بأسم “مصر تقرأ” فى جميع فروعها فى الفترة الأخيرة ، و قد كان من ضمن الكتب المعروضة عجيب فى بلاد العجائب. و وددت أن اشكر مكتبة ألف على تسهيلها توصيل الكتاب الى من لم يستطيعوا الحصول عليه بإرسالهم نسخ مباشرا لهم. و هذا مجهود يشكرون عليه.

الكتاب متوافر ايضا فى Omar bookstores فى وسط البلد.

اذا كان لديكم تعليق او استفسار يمكنكم زيارة "قروب" الكتاب على فاسبوك

;)

خواطر ثورية | اللعبة القذرة

2011-05-08T19:24:00.002+02:00

فاكرين ايام التحرير لما كانت الناس كلها – مسلمين و مسيحيين – بتقول ان الورقة القادمة للفتنة هى الحل الوحيد لتفريغ الثورة من مضمونها و توقيع المصريين فى بعض هو اللى حايقضى على الثورة دى..

فاكرين لما المسيحيين كانوا بيحموا المسلمين و هما بيصلوا فى التحرير ؟ فاكرين لما ملايين الشعب المصرى كانت مع التحرير قلبا و قالبا…

امال أيه اللى حصل؟

مافيش.. الثورة المضادة شغالة الله ينور ..

يوووه .. هو كل حاجة تقول عليها ثورة مضادة؟

و هو مين قالك ان الثورة المضادة دى تنظيم مثلا و لا شوية ناس ملمومين و خلاص ، الثورة المضادة دى فكرة، طريقة تفكير ، طريقة رد فعل ، اسلوب تعامل ، و بعدين استغلال شوية ناس للجهل و الظروف عشان تحقق اللى هى عايزاه.

ماتستهنش بالثورة المضادة .. عشان اللعبة هى انك تزهق من اللى حصل و ترجع تانى تفكر بنفس اسلوب التفكير اللى كنا ماشيين بيه قبل 25 يناير. و عشان كده لازم نتفق على بعض الحجات :

اولا : كل واحد معاه سلاح ، بلطجى ، كسر ، حرق ، ولع ، ايا كانت توجهاته او فكره لازم يعاقب امام القانون بالعدل و بدون تعامل مع دينه اطلاقا. لأنه لو حرق او كسر و خرب يبقا بيضر المجتمع و الحفاظ على حق المجتمع و حق دينه هو انه يتعاقب امام الناس بالقانون ، و لا تهاون مع ده ، و مش المفروض حد يخاف من ده. و دى الخطوة الاولى عشان مانقدرش نلوم واحد كان حاسس بالرعب و طالما فى دم لابد من القصاص العادل امام القانون.

---- ثانية واحدة : هما بتوع مصطفى محمود ، و المنافقين ، و فلول الحزب ، و الثورة المضادة دول كانوا مسلمين بس او مسيحين بس ، و لا كانوا مصريين برضه؟

هل كان فى حد بيقول ان طائفة معينة من الناس هى اللى ضد مبادئ الثورة نفسها ، لا .. كان فى من كل الطوائف و الاديان ..

اش معنا بقى لما يحصل خروج من اى طرف ضد مبادئ الثورة اللى حصلت فى التحرير لازم نبتدى نحدد موقفنا … يا يمين يا شمال .. و نرجع تانى اهلى و زمالك؟ مالهاش حل .. لو مسلم و شفت واحد اخطأ فى حق بلدك بتصرفاته حتى لو ادعاءاته سليمة لازم تقف ضده ، و لو مسيحى و شفت واحد أخطأ فى حق بلدك بتصرفاته لو ادعاءاته سليمة لازم تقف ضده برضه.

ثانيا : كل واحد بيحاول يستفذ ، يحرض ، يحفذ ، او يشعل الفتنة من مؤسسات او اشخاص لازم برضه تتم معاقبته ، مش بقول ان معاقبة البلطجى زى معاقبة المحرض لكن بقول ان القانون لازم يمنع اى شكل من اشكال اثارة المشاعر ، مافيش مانع للإحتكام للقانون و التقاضى ، المهم اللى يستغل ده فى محاولة كسب سياسى او شعبى لازم تتم محاكمته ايضا.

حط فى دماغك ، كل مصرى ايا كانت ديانته بيحرض على الفتنة هو بلطجى جزء من الثورة المضادة اللى لازم نحاربها قبل مانخش فى مرحلة صياغة حياة اجتماعية و سياسية جديدة. ماتسميهوش سلفى ، ماتسميهوش قبطى متطرف ، هو واحد مؤمن بالثورة المضادة.

كل واحد داخل محيط فكره او دائرة الناس اللى بتنتمى لفكر معين حواليه و مصرى لازم يطهر من جوه كل واحد بيفكر بأسلوب محرض على العنف.

طب و حقوق الناس ؟ طب و القضايا اللى مختلفين عليها؟

لا لا لا لا مافيش اختلاف ، مافيش حقى و حقك .. مافيش .. الثورة لسا شغالة .. لما نتعلم ازاى الأول نختلف و نحط مبدأ واضح و صريح فى التعايش مع بعضنا كمصريين الأول نتكلم. لكن قبل كده اى خلاف حاينتهى بمأساة.

مبدأ التعايش بدون تحريض او عنف ، هو مبدأ اساسى عشان نخرج بمصر من الحفرة اللى بنقع فيها.

خواطر ثورية | كل سنة

2011-05-04T10:39:00.001+02:00

كل سنة و كل منافق محروق دم اهله

كل سنة و كل مظلوم راجعاله عدالته

كل سنة و كل ظالم واخد حكم يستحقه

كل سنة و كل مهموم مش مغلوب على امره

كل سنة و كل انسان حاسس بقيمة كرامته

كل سنة و كل مصرى ثاير على عداوته

خواطر ثورية | هلوسة

2011-04-30T01:55:00.001+02:00

لأفضل تكوين فكرة عن حالتى و انا اكتب هذه التدوينة ، استمع للموسيقى المرفقة …

طن طن طن طن طنــــــــــــ

ناقوس الخطر..

طن طن طن طن طنــــــــ (تانى)

ناقوس الخطر … تانى

يا شعب .. اصحى يا عم .. الثورة ماخلصتش .. يالا يابا .. قوم عشان تفطر الفطار الثورى ، مانتا كنت ظابط ايقاع حياتك بقالك كام شهر ، بدأت تتعوج كده .. شغل بتاع زمان ده ماينفعش .. كله من الأكل الفلولى اللى كلته امبارح على العشا لما قالولك بورتو طره ..

انتو مش ملاحظين ان الثورة بدأت تدخل مرحلة الذكريات؟

لا ..

انتو عارفين دا معناه أيه .. معناه ان الثورة بالنسبالنا مجرد ماتش كورة او نهائى كأس افريقيا كسبنا فيه و شكرا كده فرحنا شويا و راجعين البيت و الدورى الأى كلام بتاعنا ده و الكورة التعبانة اللى بنشوفها فى ملاعبنا حاترجع تانى ..

واحد محلل رياضى بيهمس فى ودانى دلوقتى بيقوللى : اه ماهو اصل منتخب مصر دايما متعود على المعسكرات المغلقة و البطولات المجمعة .. لكن لو تاخد بالك .. احنا وصلنا كاس العالم مرتين بس.. عشان التحضير لكاس العالم بياخد سنتين على الأقل ..

همم … يعنى ماتش الثورة اللى ما بين مصر و تونس اللى متعادلين فى ده مش حايفرق معانا فى وصول كاس العالم ، داحنا احسن ثورة فى المنطقة العربية ..

اه .. طب مانتا اول منتخب عربى برضه .. و اول افريقيا كمان ..و خد دى منى .. حاتفضل عقد شمال افريقيا حتى فى السياسة .. تخيل كده تونس كل شويا التقارير من هناك بتقول انهم جايبين لعيبة ايه .. حريفة .. شغلين زى الفل .. و حايوصلوا كاس العالم ..

ايوه بس احنا كسبنا النظام على ارضه بضربات الجزاء انت ناسى 11 فبراير و لا أيه ، و خلينا المدير الفنى بتاعه (كابتن مبارك) يستقيل و المدرب العام احمد شفيق .. ده حتى ابو تريكة النظام القديم (جمال مبارك) اعتزل اللعب الدولى يا راجل .. و جبنا مدير فنى جديد مع ان مجلس الإدارة زى ماهو ..

طب و ماتش العودة ؟ انت ناسى ان اللعيبة واضح عليها الإجهاد ..

هو امتا ماتش العودة ؟

يا نهارك اسود؟ انت مش واخد بالك .. الماتش شغال.. و فى هجمات مرتدة كمان … هجمات بلطجية و طائفية و مكائد و مصايد ..

يا عم ماتقلقش المدير الفنى الجديد عارف شغله كويس ..

اهلا بيك .. حانرجع تانى .. يابنى احنا و الله لسا ماوصلنا كاس العالم .. و لا عشان كسبنا ماتش واحد خلاص .. فين النفس الطويل ..

يااااااه .. فكرتنى .. استنا كده لما اعيد الجون بتاع طره ده .. يا سلام .. شايف اللعبة الحلوة .. ملعوبة زى الفل ..

يابنى اصحى .. انت عمال تتفرج على الاجوان بتاعة ماتش الذهاب .. انقل على الجزيرة مباشر عشان ماتش العودة بيتذاع هناك .. و بيتذاع على أون تى فى كمان ..

طب ما القناة الثانية بتذيع الماتش برضه ..

لا لا القناة الثانية بتذيع تسجيل لمباراة اتلعبت سنة 52 .. بين الاهلى و الزمالك اصلا .. كان ماتش محلى ..

طب عايز اخد راحة .. و بعدين التحكيم مش عادل يا عم .. مش لاعب ..

يا عم انت مالك بالحكم قلنا 100 مرة تلعب على الصفارة و ماتشوحش للحكم عشان الكارت الأحمر ..

الحكم ده كان بيلعب زمان فى الأهلى على فكرة ..

مش مشكلة كان بيلعب فين .. المهم انت متدرب كويس و عامل مجهودك و لا لأ .. و بعدين الماتش متذاع على الهواء مباشرا .. انت ناسى ان الماتش الأوالانى الحكم كان متواطئ اساسا و كسبنا الماتش ..

يااااااه .. فاكر الجون بتاع لما رفعـــــ…

يابنى … اصحى ..فوووووووق .. انت ريحت من ساعة ما كسبت الماتش الاولانى .. مش حاتوصل كاس العالم ..

هوبا ايه .. هوبا اه .. ان شاء الله حانكسب .. هوبا ايه .. هوبا اه ..

يا بنى ..

دى فرصتنا الأخيرة نوصل كاس العالم … كاس العالم فى الديمقراطية .. فى الانسانية .. فى العلم .. فى التحضر .. فى الانتاج ..

لو متخيل ان الماتش خلص .. و عمّال تعيد فى الاهداف .. يبقا انت نفسك قصير .. مابقاش فى وقت للراحة .. مشوار البطولة طويل .. احتمال كبير جدا ماتشفش نفسك شايل الكاس .. لكن ابنك يستحق انه يلعب و يشارك .. و يجيب اجوان.

مستعد .. و لا فقدت الأمل خلاص ؟

(ايه رأيكم فى فكرة الموسيقى التصويرية دى ؟)

خواطر ثورية | برلمانى رئاسى فرعونى

2011-04-28T17:34:00.001+02:00

طيب .. برلمانى و لا رئاسى؟

حسب ما انا فاهم و يا ريت حد يصلحلى ..

يعنى ايه برلمانى؟

برلمانى ، يعنى حكومة حزب منتخبة من الشعب و رئيس وزراء هو المسئول عن تعيينات الحكومة، امال رئيس الجمهورية بيعمل ايه؟ حسب بقى .. يعنى مثلا فى المانيا رئيس الجمهورية ده واحد راجل طيب كده مسئول عن العلاقات الخارجية ، مسئول عن استقبال الرؤساء و شوية مظاهر لطيفة ، و ممكن بردو تكون ليه بعض سلطات حل البرلمان فى ظروف استثنائية ، مصر كانت عايشة شبه نظام برلمانى ايام الملك ، مع الفرق ان الملك كان يملك و يحكم فى نفس الوقت ، و طبعا كلنا شفنا المشاكل اللى كانت بتحصل بين الملك و الحكومات … فى النظام البرلمانى الأحزاب او ائتلاف منها يحكم البلاد.

من الأمثلة المثالية للنظام البرلمانى المانيا ، و انجلترا

امال رئاسى يعنى ايه ؟

رئاسى يعنى الشعب بينتخب رئيس ، و الرئيس معاه نائب رئيس ، و بيشكلوا حكومة ، و رئيس الوزراء هو اللى راجل طيب .. و الرئيس هو الكل فى الكل ، لكن فى نفس الوقت سلطة الاحزاب متمركزة فى البرلمان ، يعنى ممكن البرلمان يعترض على قرارات الرئيس ، و ممكن الرئيس يغتت و يعمل استفتاء شعبى لتمرير القرارات ..

من أمثلة الرئاسى ، امريكا و فرنسا

فى كلتا الحالتين الرئيس هو اللى يملك قرار الحرب ، و هو رئيس كل الهيئات التنفيذية فقط. يعنى مش المفروض الرئيس يكون رئيس محكمة مثلا ، او رئيس مجلس شعب.

امال مصر كانت ايه؟

احنا بسم الله ما شاء الله ، سرّنا باتع .. احنا عبارة عن كفته .. و خلينى اسامّيها نظام الكشرى .. اللى هو ايه؟

اللى هو ان مصر عدى عليها كل انواع الحكم ، حكم فرعونى الهى ، حكم رومانى ديمقراطى ، حكم اسلامى بالشورى ، حكم اسلامى من غير شورى ، حكم المستبد المستنير ، حكم المستبد اللى مش مستنير ، حكم دستورى برلمانى ، حكم عسكرى ثورى ، و بعدين اخيرا حكم مبارك اللى مالوش توصيف الصراحة ..

العامل المشترك ما بين كل ده .. فى اى نظام من دول .. ان اللى بيحكم مصر هو كل شيئ مهما كان النظام ، و مهما كانت الاشخاص و صدق اللى قال كرسى الرئاسة فى مصر مهمين على اى حد بيعد عليه

ايه سبب الموضوع ده ؟

ان المصريين دايما عايزين قائد جهبز جامد تحرير يمسكهم ، مافيش حد مصرى الا و نفسه فى واحد زى رمسيس او كليوباترا او عمر بن الخطاب او صلاح الدين او محمد على او عبد الناصر يمسكهم .. يا سلام نفسنا فى واحد كده يجى يملى الارض عدل .. يشيل الفساد .. يعمر الارض .. أب حنون .. زوج صالح .. و هكذا ..

و ده طبعا يتعارض مع فكرة ان الشعب مصدر السلطات ، لأن طالما احنا دايما بندور على شخص

يمتلك القدرة و النية على انه ينفذ مطالب الناس (بدماغه و حنكته و حكمته) ، يبقا احنا دايما نفترض ان ارادة الفرد هى ما تحكم ارادة المجموعة ، مش ارادة المجموعة هى اللى تحدد سلوك الفرد حتى و لو كان فى منصب قيادة للمجموعة.

ايه اللى المفروض يتغير؟

قوانين ، و دستور .. و أشخاص.. موافق .. لكن اهم من ده كله الناس ..

بيقولك قال يا فرعون ايش فرعنك ، قال مالقتش حد يردنى..

و احنا عايزين اللى يرد فرعون … حاتقللى : لا يا عم هما المصريين دايما عايزين حد فرعون يتحكم فيهم .. يا عم المصريين لو مشوها ديمقراطية حاتولع .. بسبب قلة الوعى المنتشر ..

تمام.. بس مانتا كده بترجعنا لورا تانى ، انت ناسى ان الدستور ايام السادات كان بيحدد فترات رئاسة الحكم و بعدين غيروها من مدة لـمدد أخرى ؟ .. مين اللى يضمن ان الدستور ممكن حد ييجى قافش كده فى يوم من الأيام و يقول الشعب يريد تغيير الدستور بأى كلام و نرجع تانى للمأساة ؟

انت مش ملاحظين ان احنا دايما بندور على فرعون فى أى حاجة .. حتى الكورة

ايه الحل؟

انا اقترح ان يكون عندنا كذا فرعون مش واحد بس.. عايزين فرعون اسمه التعليم .. و فرعون اسمه العدل .. و فرعون اسمه العمل و الانتاج .. ايه الأى كلام اللى انت بتقوله ده يا برنس …

صح؟ الكلام مش منطقى طبعا .. لأن احنا اصلا مش محتاجين فراعنة .. الزمن ده انتهى و لازم ننتهى من آفة الفرعون .. الحاكم المطلق ..

لازم ننتهى منها فى كل حاجة من أول الأب فى البيت لحد رئيس الدولة.

مش مهم برلمانى ، مش مهم رئاسى ، مش مهم مجلس عسكرى ، مش مهم مجلس مدنى ، المهم تضمنلى مافيش فرعون