دانش نامہ

ورڈپریس کی انگریزی تھیم کا ترجمہ کریں آسانی سے

2012-12-13T15:34:00.001+05:00

اگرہمیں ورڈپریس کی انگریزی تھیم کا اردو یاکسی اور زبان میں کرنا ہو تو اسکے لیے ہمیں تھیم کی تمام فائلوں میں انگریزی میں لکھے گئے الفاظوں اور جملوں کا ترجمہ کرنا پڑتا ہے۔ اس کام کے لئے تھیم کی بیشتر فائلوں میں ترمیم کرنا پڑتی ہے جس میں کافی وقت صرف ہوتا ہے۔
مگر اب اس کام کو ورڈ پریس کے پلگ ان "کوئیک لوکلائزیشن" نے آسان بنا دیا ہے۔ "کوئیک لوکلائزیشن" کنٹرول پینل کو چھوڑے بغیر سائٹ کے منتظمین کو ورڈپریس کی کوئی بھی تھیم اور کوئی بھی پلگ ان کا ترجمہ کرنے کی سہولت دیتا ہے۔

استعمال کا طریقہ

1. "کوئیک لوکلائزیشن" ورڈ پریس پلگ ان ڈاؤن لوڈ کریں

2. زپ فائل کو ان زپ کریں۔

3. quick-localization فولڈر کو /wp-content/plugins/ ڈائریکٹری میں اپ لوڈ کریں۔

4. کوئیک لوکلائزیشن پلگ ان کو کنڑول پینل میں'پلگ انز' مینو میں جا کر ایکٹویٹ کریں۔

5. اُن لفظوں اور جملوں کی نشاندہی کریں جن کا ترجمہ مطلوب ہے۔

6. اور کام ختم

مثال: تبصرہ ارسال کرنے والےبٹن "Post Comment" کا اردو ترجمہ مطلوب ہے۔

کنڑول پینل میں کوئیک لوکلائزیشن کے ٹیب پر کلک کریں۔ Oldکے خانے میں انگلش کاوہ لفظ یا جملہ تحریر کریں جس کا ترجمہ کرنا ہے۔اور Newکے خانے میں اُس لفظ یا جملے کا اردو ترجمہ تحریر کر دیں (جس طرح تصویر میں دکھایا گیا ہے)۔

پھر Saveپر کلک کر دیں۔ اب بلاگ پر جا کر پیج کو ریفریش کریں۔ آپ نے جس انگلش کے لفظ یا جملے کا ترجمہ کیا ہو گا وہ اردو میں تبدیل ہو جائے گا۔

نوٹ:

تمام انگریزی تھیمز میں کم و بیش ایک ہی طرح کے الفاظ یا جملے ہوتے ہیں۔ اگر آپ تھیم کو تبدیل بھی کردیں گے تو وہ خود بخود اردو میں تبدیل ہو جایا کریں گی۔

ترجمہ کردہ الفاظ کی فہرست کو Export کے ذیلی ٹیب میں جاکر کاپی کرکے فہرست کا بیک اپ بھی لیا جا سکتا ہے اور بوقت ضرورت اسے واپس پیسٹ کرکےImport بھی کیا جا سکتاہے۔

نئے صوبے ۔۔مگر کیسے؟

2012-05-26T12:45:00.001+05:00

تحریر کردہ: سلیم صافی

کیا سندھ پاکستان کا حصہ نہیں اور اگر ہے تو پھر پنجاب اور خیبر پختونخوا میں لائق تحسین قرار پانے والا اقدام سندھ میں جرم کیسے قرار پاتا ہے؟۔ پیپلز پارٹی کی قیادت یا تو پنجاب اور خیبر پختونخوا کی تقسیم کے ایشوز چھیڑنے پر قوم سے معافی مانگے یا پھر سندھ کی تقسیم پر سیخ پا ہونے والوں کو بھی جواب دے۔ میاں نواز شریف یا تو بہاولپور اور ہزارہ کی حمایت پر بھی معافی مانگیں یا پھر سید غوث علی شاہ اور ماروی میمن کو سمجھادیں کہ وہ سندھ کی تقسیم کے مطالبے کا جمہوری حق استعمال کرنے والوں کو گالیاں دینے والوں کے صف سے نکل جائیں۔ تنہا میں نہیں اور بھی لاکھوں پاکستانی التجائیں کررہے تھے کہ لسانی بنیادوں پر صوبوں کی تقسیم کاپنڈورا باکس نہ کھولا جائے لیکن وقتی سیاسی مفادات کے لئے پیپلز پارٹی کی قیادت بضد تھی۔ مسلم لیگ(ن) کی قیادت بھی کم ذمہ دار نہیں ۔ سرحد اسمبلی میں جب صوبے کا نام پختونخوا رکھنے کے حق میں قرارداد پاس ہورہی تھی تو میاں نوازشریف مقتدر اور ان کی جماعت کے سردار مہتاب احمد خان عباسی قائد ایوان تھے ۔ مسلم لیگ(ن) کی قیادت نہ چاہتی تو اس وقت وہ قرارداد کبھی منظور نہیں ہوسکتی تھی لیکن تب سیاسی مصلحتوں کی خاطر اس نے قرارداد پاس ہونے دی ۔ تب پیپلز پارٹی اور جے یو آئی نے بھی اس کی حمایت کی تھی لیکن جب قرارداد کی منظوری کے بعد اس کی حمایت آئینی‘ جمہوری اور سیاسی تقاضا بن گیا تو انہی لوگوں نے مخالفت شروع کردی اور مسلم لیگ (ن) کے رہنماؤں نے ہی ہزارہ ڈویژن میں پختونخوا کے خلاف ابتدائی فضا ہموار کی ۔ سندھ یا بلوچستان میں نئے صوبوں کی آواز اٹھتی ہے تو اے این پی کو بھی مخالفت زیب نہیں دیتی کیونکہ اس کے منشور میں سرائیکی صوبہ لکھا گیا ہے ۔ ہاں البتہ ہم جیسے سندھ کی تقسیم کی حمایت تب کریں گے جب سندھ کی منتخب اسمبلی حمایت کردے ۔ جب تک سندھ اسمبلی بل یا قرارداد منظور نہیں کرتی ‘ وال چاکنگ‘ مظاہروں‘ حتیٰ کہ قومی اسمبلی کی قراردادوں کی بھی کوئی حیثیت نہیں ۔اگر کراچی کو الگ صوبہ بنانے کے لئے پورا کراچی بھی نکل آئے تو بھی اس کی کوئی آئینی اور قانونی حیثیت نہیں جب تک کہ سندھ کی منتخب صوبائی اسمبلی کی اکثریت تقسیم پر آمادہ نہیں ہوتی لیکن اگر کوئی کراچی یا کسی اور علاقے کو الگ صوبہ بنانے کا مطالبہ کرتا ہے تو اسے اس کے آئینی اور جمہوری حق سے محروم کیا جاسکتا ہے اور نہ اس کو گالی دینا مناسب ہے۔ سندھ اگر پاکستان کا حصہ ہے تو وہاں بھی اسی کلیے اور قانون کا اطلاق ہوگا جو باقی ملک میں ہوتا ہے ۔ جنوبی پنجاب کا صوبہ اگر اس بنیاد پر بنتا ہے کہ اس میں شامل علاقے صوبائی دارالحکومت سے دور ہیں تو پھر نواب شاہ‘ سکھر ‘ ژوب‘ زیارت ‘ مکران‘سبی‘ پوٹھوہار‘ بہاولپور ‘ چترال اورڈی آئی خان وغیرہ کے مکینوں کو بھی اسی بنیاد پر صوبے دینے ہوں گے ؟اگر پنجاب اور خیبر پختونخوا میں وسائل کی تقسیم غیرمنصفانہ ہے اور جو حصہ لاہور یا پشاور کو ملتا ہے ‘ وہ بہاولپور اور ایبٹ آبادجیسے دوردراز علاقوں کو نہیں ملتا تو یہی تفریق کوئٹہ اور سبی کے مابین یا پھر کراچی اورتھرپارکر کے مابین بھی پائی جاتی ہے۔ شناخت اگر سندھیوں‘ پنجابیوں‘ بلوچوں‘ پختونوں اور سرائیکیوں کا حق ہے تو اردو بولنے والوں‘ چترالیوں‘ پوٹھوہاریوں‘ بلتستانیوں اور دیگر زبانیں بولنے والوں کا بھی حق ہے ۔ دھرتی کا بیٹا ہونے اور نہ ہونے کی یہ فضول بحث اب ختم ہوجانی چاہئے ۔ جو بھی اس ملک میں رہتا ہے وہ اس دھرتی کا بیٹا ہے ۔ سب یکساں ہیں اور سب کو یکساں حقوق حاصل ہونے چاہئیں ۔ کوئی ساٹھ سال پہلے آیا ہے ‘ کوئی دو سو سال پہلے ‘ تو کوئی دو ہزار سال پہلے۔ مجھ جیسے خیبر پختونخوا کے بیشتر پختونوں کے آباء واجدادافغانستان سے ہجرت کرکے آئے ہیں۔ گیلانی صاحب کا خاندان بھی چند سو سال پہلے سرائیکی دھرتی میں آیا ہے ۔ محمد علی درانی جو اس وقت بھاولپور صوبے کی تحریک کے محرک ہیں ‘ کے آباء و اجداد بھی چند سو سال قبل قندھار سے بہاولپور آئے تھے ۔اگر یہ سب دھرتی کے بیٹے اور وارث ہیں تو پھر اردو بولنے والے کیوں نہیں؟۔ میاں نوازشریف بنیادی طور کشمیر ی ہیں اور ان کے آباء واجداد بھی ہندوستان سے لاہور منتقل ہوئے ۔ تو کیا انہیں آج بھی پنجاب کی دھرتی کا بیٹا نہیں سمجھا جائے گا۔ ایم کیوایم کا ماضی اور حال کے ارادے اپنی جگہ لیکن ایم کیوایم کی وجہ سے سب اردو بولنے والوں کو گالی دینا پاکستان کو گالی دینے کے مترادف ہے ۔ اردو بولنے والے اگر ہم سے زیادہ دھرتی کے بیٹے نہیں تو کم بھی نہیں ۔ میرے آباء واجداد تھے‘ یا دیگر زبانیں بولنے والوں کے ‘ کوئی یہاں پر حکومت کرنے آیا اور کوئی تلاش معاش میں ۔ ہمارے آباء واجداد میں سے کسی نے بھی پاکستان کی خاطر یہاں آنے اور مقیم ہوجانے کا فیصلہ نہیں کیالیکن اردو بولنے والوں کی اکثریت کے آباء واجداد نے پاکستان کی خاطر ہجرت کی ۔ یوں وہ ہم سے زیادہ پاکستانی اور دھرتی کے بیٹے ہیں ۔ یوں تو اسلام آباد پوٹھوہاریوں کی زمین پر بنا ہے لیکن یہاں کے سیاہ و سفید کے مالک کبھی اردو بولنے والے پرویز مشرف ہوتے ہیں‘ کبھی پنجابی بولنے والے میاں نوازشریف اور ان دنوں سندھی بولنے والے آصف علی زرداری مالک ہیں۔ پھر پختون اٹھ کر کہہ سکتے ہیں کہ تاریخی طور پر ان کا شہر رہنے والے کوئٹہ کی قسمت کے فیصلے کا کسی بلوچ کو اختیار نہیں دیا جاسکتا ہے یوں بھی نہ جانے ہم نئے صوبے کو نیا ملک کیوں سمجھ بیٹھے ہیں ۔ اگر نیا صوبہ بن جائے تو کیا وہاں ویزے اور پاسپورٹ کے ذریعے سفر کرنا ہوگا جو لوگ اتنا شور مچارہے ہیں ۔ اس وقت پنجاب الگ اور خیبر پختونخوا الگ صوبہ ہے لیکن مجھے پنجاب میں جانے سے کوئی روکتا ہے ‘ زمین خریدنے سے ‘ کاروبار کرنے سے اور نہ رشتہ لینے یا دینے سے ۔ بہتر یہی ہے کہ نئے صوبوں کے قیام کے لئے ایک قومی کمیشن بنا دیا جائے جو انتظامی بنیادوں پر پورے ملک میں نئے صوبوں کے قیام کے لئے فارمولا وضع کرے ۔ بہتر یہی ہوگا کہ انتظامی بنیادوں پر نئے صوبے بنائے جائیں ۔ ایک فارمولا موجودہ ڈویژنوں کو صوبے قراردلوانے کا ہوسکتا ہے ۔ ایک اورتجویز انگریز کے دور کے ڈویژنوں کو صوبے قراردلوانے کی ہوسکتی ہے۔ ان کے علاوہ بھی کوئی فارمولا بنایا جاسکتا ہے جس کا اطلاق تمام صوبوں میں یکساں طور پر ہو۔ اس کمیشن میں تمام صوبوں‘ تمام قومیتوں ‘ تمام جماعتوں اور تمام طبقوں کی نمائندگی ہونی چاہئے ۔ جب تک یہ کمیشن اپنا کام مکمل نہ کرلے تب تک سیاست اور صحافت میں نئے صوبوں کے قیام کی بحث ختم کی جائے۔ اس کمیشن کے ارکان کو بھی اٹھارویں آئینی ترمیم کی پارلیمانی کمیٹی کے ممبران کی طرح پابند کیا جائے کہ اپنے کام کی تکمیل تک وہ میڈیا میں اس موضوع پر بات نہیں کریں گے ۔ نہیں تو یہ جس طریقے سے صوبے بنائے جارہے ہیں اور اس کی بحث جس طرف چل نکلی ہے ‘اس کے نتیجے میں صوبے تو نہیں بن سکیں گے لیکن خاکم بدہن پاکستان روانڈا بن جائے گا۔ پھر کسی کے وسائل کام آسکیں گے ‘ تاریخ کام آسکے گی اور نہ شناخت۔ سب خوار ہوں گے اور سب کے بچے مریں گے۔

ماخذ

بشکریہ جنگ کراچی

محرومی کے مزید 20سال

2012-03-09T20:30:00.001+05:00

تحریر: خلیل احمد نینی تال والا

صوبہ سندھ میں کوٹہ سسٹم کی بنیاد ذوالفقار علی بھٹو کے دور میں رکھی گئی اور وجہ یہ بتائی گئی کہ شہری علاقے کے لوگوں کو چونکہ اچھی تعلیم کے مواقع حاصل ہیں جبکہ دیہی علاقے کے نوجوان اس سے محروم ہیں اور احساس محرومی کا شکار ہیں لہٰذا 10سال کیلئے حصول روزگار میں دیہی علاقے کے باشندوں کیلئے کوٹہ رکھا گیا جس سے شہری اور دیہی تفریق کی بنیاد رکھ دی گئی ۔

شہر کے لوگوں نے خیر سگالی کے جذبے کے تحت اس 10سال کے کوٹہ سسٹم کو قبول کر لیا مگر بعد کی آنے والی حکومتوں نے اس کوٹہ سسٹم میں مسلسل اضافہ کرنا شروع کر دیا اور اس دفعہ تو حد ہی کر دی گئی کہ ایک دن اچانک اس بل کو قومی اسمبلی میں پیش کر دیا گیا اور آناً فاناً یہ بل منظور کر کے ایک مرتبہ پھر شہری نوجوانوں کو سرکاری دفاتر میں 20سال کیلئے نوکریوں سے محروم کر دیا گیا۔ صوبہ سندھ کی آبادی کا اگر جائزہ لیا جائے تو اس میں 45فیصد سندھی بولنے والے رہتے ہیں اور 55فیصد دیگر زبانیں بولنے والے ۔ایک محتاط اندازے کے مطابق 45فیصدسندھی بولنے والے چھوٹے چھوٹے شہروں اور دیہاتوں میں رہتے ہیں جبکہ 45فیصد اردو بولنے والے ، جن کو اصطلاح میں مہاجر کہا جاتا ہے ، بڑے شہروں میں رہتے ہیں اور 10فیصد پاکستان کے دیگر صوبوں سے آنے والے بھی زیادہ تر شہروں میں رہتے ہیں۔ گویا اردو بولنے والوں اور سندھی بولنے والوں کی آبادی کا تناسب کم و بیش برابر ہو چکا ہے ۔ موجودہ حکومت نے اس سال مردم شماری کرائی اور نہ جانے کس مصلحت کے تحت آج تک اس کے نتائج کا اعلان نہیں کیا گیا جس کی وجہ سے مردم شماری کا مقصد فوت ہو کر رہ گیا ہے ۔ اس کے اعداد و شمار حکومت کی توقع کے خلاف سامنے آئے ہیں جن میں ردو بدل کیا جارہا ہے۔ جہاں تک صوبہ سندھ کا تعلق ہے اصولاً اردو اور سندھی زبان بولنے والوں کو مساوی نوکریاں ملنی چاہئے تھیں ، مگر ایسا نہیں ہوا ۔ شروع ہی سے تقریبا ً 80فیصد سرکاری نوکریاں سندھی بولنے والوں کو ملتی رہیں اور 20فیصد اردو بولنے والوں کے حصے میں آئیں ۔ کوٹہ سسٹم کے رائج ہونے کے بعد صرف 10فیصد اردو بولنے والوں کو سرکاری نوکریاں مل رہیں ہیں ۔ اس کی زندہ مثال حکومت سندھ کے کسی بھی ادارہ میں چوکیدار ، چپڑاسی ، نائب قاصد یا شازو نادر کلرک ، اردو بولنے والے ملیں تو ملیں آفیسر گریڈ کا کوئی نوجوان نہیں ملے گا ۔ اب صرف چند سیکریٹری اور انتظامیہ کے چند افسران رہ گئے ہیں جو کہ ریٹائرمنٹ کے نزدیک ہیں کیونکہ بھرتی کے وقت باپ ، دادا اور پر دادا کا خانہ پر کرتے وقت یہ معلوم ہو جاتا ہے کہ نوکری کا طلبگار کس طبقہ سے تعلق رکھتا ہے اور اس پر نوکریوں کے دروازے کسی نہ کسی بہانے بند کر دیئے گئے ہیں۔ اس سلسلے میں اگر تصویر کا دوسرا رخ دیکھا جائے تو یہ بات بھی کھل کر سامنے آتی ہے کہ ایسے اچھے غیر سرکاری اداروں میں جہاں ملازمت کا معیار صرف اہلیت ہوتا اور کام چوری اور سستی ایک لمحے کو بھی برداشت نہیں کی جاتی۔ سندھی بولنے والوں کی تعداد نہ ہونے کے برابر ہے ، اردو بولنے والے نوجوانوں سے سرکاری سطح پر روا رکھی گئی یہ نا انصافی ہی ہے جس کی وجہ سے ان میں مایوسی پھیلی اور مایوس اور بے روزگاری کے مارے یہ نوجوان منشیات ، اسلحہ اور دیگر غیر قانونی حربوں میں ملوث ہوئے ۔ سندھ کا امن و امان خطرے میں پ۔ڑگیا مفاد پرست لوگوں نے ان سے غلط کام لیئے اور یہ سلسلہ آج بھی جاری ہے ۔ شہروں میں قانون نام کی کوئی شے باقی نہ رہی اور گروپوں کی شکل میں ایک دوسرے کے مد مقابل آکر شہروں کے سکون کوختم کر دیا۔

آج تک یہ منطق سمجھ میں نہیں آسکی ہے کہ پاکستان کے چاروں صوبوں میں سے صرف سندھ ہی کو کوٹہ کیلئے کیوں مقرر کیا گیا ہے جبکہ سرحد ، بلوچستان اور پنجاب کیساتھ بھی تو دیہی آبادیاں ہیں وہاں کوٹہ سسٹم کیوں نافذ نہیں کیا گیا جبکہ اسلام آباد میں اس قسم کی تفریق کو منع کیا گیا ہے اور ہماری وفاقی شرعی عدالت اور شرعی ایپلٹ بورڈ بھی اس کو غیر شرعی اور غیر انسانی قرار دے چکے ہیں تو پھر کیا وجہ تھی کہ نواز شریف حکومت نے ایک مرتبہ پھر عجلت میں قومی اسمبلی میں اکثریت کے بل پر کراچی اور حیدر آباد کے نوجوانوں پر یہ فیصلہ مسلط کر کے ان کو سرکاری نوکریوں سے محروم کر دیا تھا ۔ میرے خیال میں عجلت میں یہ فیصلہ اس لئے کیا گیا ہو گا کہ تاکہ کالا باغ ڈیم پر دیہی علاقوں کو تنقید کو کم کیا جا سکے اور ان کو یہ باور کرایا جائے کہ ہم نے دیہی علاقے کے نوجوانوں کیلئے سرکاری روزگار کے مواقع پھر فراہم کر دیئے ہیں۔ مگر وہ اس بات کو بھول گئے کہ شہری نوجوان جنہیں تعلیم مکمل کرنے کے بعد پہلے ہی سرکاری نوکری نہیں ملتی تھی اب اس بے روزگاری سے تنگ آکر کوئی غلط قدم بھی اٹھا سکتے ہیں۔ لہٰذا حکومت کو چاہئے کہ پہلے سرکاری مر دم شماری کے درست اعداد و شمار سامنے لائے اور بعد ازاں کوٹہ سسٹم کو ہمیشہ ہمیشہ ختم کر کے میرٹ کی بنیاد پر شہری اور دیہی نوجوانوں کو تعلیم و روزگا ر کے یکساں مواقع فراہم کرے اور غیر منصفانہ فیصلے کو واپس لے جس طرح مرحوم بھٹو صاحب کے دورِ حکومت میں جو تعلیمی ادارے قومیائے گئے تھے وہ واپس ہو گئے اور قومیائے گئے بنک ، انشورنس کمپنیاں نجی اداروں کو بیچ دی گئیں ۔ آج کے جدید دور میں کوٹہ سسٹم جیسا فرسودہ نظام واپس لے کر پی پی پی کی حکومت جو آج تک سندھ کے شہری علاقوں میں مقبول نہیں ہو سکی اس فعال فیصلے سے کراچی ، حیدرآباد کے شہریوں کا دل جیت سکتی ہے۔

ماخذ

"سعید اجمل کا ہتھیار "تیسرا

2012-01-15T20:03:00.013+05:00

سعید اجمل نے انگلینڈ کے خلاف ٹیسٹ سیریز سے پہلے کہا ہے کہ وہ انگلینڈ کے خلاف ایک نئی ڈیلیوری متعارف کروائیں گے۔ ماہرین سعید اجمل کی نئی ڈیلیوری کو ’تیسرا‘ کہہ رہے ہیں۔ باؤلرسعید اجمل کا کہنا ہےکہ انہوں نے دوسرا کے بعد اپنی جادوئی نئی بال دورہ زمبابوے سے قبل ہی ایجاد کرلی تھی تاہم اسے انگلینڈ کے خلاف ٹیسٹ سیریز کے لیے بچا کررکھا تھا۔

آخر یہ "تیسرا" کیا بلا ہے آیئے جانتے ہیں۔

تیسرا دراصل ٹاپ اسپن گیند ہوتی ہے جس کی اچھال دوسری گیندوں سے قدرے زیادہ ہوتی ہے۔

تیسرا کرکٹ میں گیند باز کی طرف سے جانے والی ایک مخصوص ڈیلیوری کا نام ہے۔ اس ڈیلیوری کو "جلیبی" بھی کہا جاتا ہے۔ تیسرا کومعروف آف اسپنرثقلین مشتاق نےایجاد کیا ہے۔ تاہم بغور دیکھنے سے یہ پتہ چلتا ہے کہ یہ بال سادہ سی آرتھوڈکس بیک اسپنر کی طرح ہے۔ جو ایک بہت عام سی ڈیلیوری ہے جس میں انگلیوں کے گھماؤ کے ذریعے گیند کی جاتی ہے۔ اور اس وقت سے استعمال ہو رہی ہے جب سے کرکٹ کھیلی جا رہی ہے۔

اس ڈیلیوری کو نیا نام "تیسرا" اُس وقت دیا گیا جب ثقلین مشتاق انڈین کرکٹ لیگ میں لاہور بادشاہ کی جانب سے کھیل رہے تھے۔ تیسرا کا سامنا کرنا والے سب سے پہلے بلے باز رسل آرنلڈ تھے۔ ثقلین مشتاق نے گیند رسل آرنلڈ کو کرائی تو گیند رسل آرنلڈ کے پیڈ پر لگی اور ان کے خلاف ایل بی ڈبلیو کی اپیل ہوئی۔ جس پر ایمپائر نے درست طور پر آرنلڈ کو ایل بی ڈبلیو قرار دیا۔ اس طرح وہ ""تیسرا" کا شکار ہونے والے پہلے بلے باز بنے۔ رسل آرنلڈ چار دفعہ تیسرا کے شکار ہوئےہیں۔

ڈیلیوری

یہ ڈیلیوری اس بنیاد پر ایجاد ہوئی کہ یہ سلائیڈر کی طرح کام کرتی ہے(جس کو لیگ اسپینر استعمال کرتے ہیں)۔ اس ڈیلیوری کو آف اسپنر اپنے معمول کے ایکشن میں پھینکتا ہے بجائے ڈیلیوری کے وقت ہاتھ کو گھمانے کے۔ گیند باز عموما صرف انگلیوں سے پیچھےکی طرف رول کرتا ہے۔ ڈیلیوری کے وقت لگتا ہے کہ گیند زیادہ ٹرن لے گی۔ لیکن یہ بالکل ٹرن نہیں لیتی۔ یہ بلے بازکو دھوکہ دینے کا بہت اچھا طریقہ ہے۔ کیونکہ بلے باز سمجھتا ہے کہ گیند ٹرن لے گی۔

نام

تیسرا نام عام طور پر ثقلین مشتاق استعمال کرتے تھے۔ اور یہ نام "دوسرا" سے ماخوذ ہے" دوسرا" ڈیلیوری بھی ثقلین مشتاق ہی نے متعارف کروائی تھی۔ "دوسرا" کے معنی اردو میں ہیں "کوئی اور" یا "نمبردو" اس لئے ثقلین مشتاق نے اس کو تیسرا کا نام دیا جسے معنی ہیں "نمبرتین"۔ جلیبی کا نام اس گیند کو کرائے جانے کے بعد سے ہی متعارف ہو گیا تھا اور بہت سے بھارتی کمنٹیٹرز نے جلیبی کا لفظ استعمال کرنا شروع کیا۔ جلیبی ایک میٹھائی کا نام ہے جو برصغیر میں بہت مشہور ہے اور عام طور پر استعمال کی جاتی ہے۔ تاہم "بیک اسپنر" کا نام اگر دیکھا جائے تو یہ زیادہ مروج ہے جوکہ گیند کے اسپن کو ظاہر کرتا ہے کیونکہ گیند ہوا میں سفر کرتی ہوتی ہے۔

استعمال

اگرچہ یہ ڈیلیوری سوسال سے بھی زیادہ عرصے سے زیراستعمال ہے لیکن ثقلین مشتاق نے اس کو نئی شکل دی اور اسکو انڈین کرکٹ لیگ میں استعمال کیا ہے۔ ثقلین مشتاق کا کہنا ہے کہ "تیسرا" ابھی ارتقاء کے مراحل میں ہے۔ اور وہ اسکو مزید موثر بنا رہے ہیں۔ تاکہ بلے باز زیادہ تذبذب کا شکار ہوجائیں کہ گیند کہاں اسپن ہو رہی ہے، آیا وہ اسپن ہوگی بھی یا نہیں۔

سعید اجمل نے اس کو 2011 کے ورلڈ کب میں کینیڈا کہ خلاف استعمال کیا تھا جس میں وہ اپنی واحد وکٹ لینے میں کامیاب ہوئے تھے۔

مدد : وکی پیڈیا، بی بی سی، جنگ

کچھ ادبی حقائق

2012-01-07T11:39:00.008+05:00

میر ببر علی انیس (ولادت 1802ء دہلی میں اور وفات 1874ء لکھنوء) ایک مرثیہ میں یہ دعائیہ مصرع کہہ چکے تھے۔

یا رب رسول پاک ﷺ کی کھیتی ہری رہے

دوسرا مصرع حسب دل موزوں نہیں ہو رہا تھا دیر سے اسی فکر میں تھے، میر ببر علی انیس کی اہلیہ اس طرف سے گزریں تو انہوں نے پوچھا کہ کس سوچ میں بیٹھے ہیں؟ موصوف نے اپنا مصرع پڑھا اور کہا کہ دوسرا مصرع سوچ رہا ہوں بیوی نے بے ساختہ کہا یہ لکھ دو

صندل سے مانگ بچوں سے گود بھری رہے

میر انیس پھڑک اٹھےفورا یہ مصرع لکھ دیا۔ مطلع مکمل ہو کر زبان کی لطافت اور محاورے کی خوبی سے ضرب المثل ہوگیا۔

یا رب رسول پاک ﷺ کی کھیتی ہری رہے
صندل سے مانگ بچوں سے گود بھری رہے

میر انیس مرثیہ کے مستند شاعر تھے۔ ابتدا میں غزل کے بھی اچھے شاعر تھے، لیکن جوانی میں ہی میں مرثیہ گوئی کی طرف متوجہ ہوگئے تھے۔ چند اشعار اس دور کے تغزل میں ہیں۔

دنیا بھی عجب سرائے فانی دیکھی

ہر چیز یہاں کی آنی جانی دیکھی

جو آ کے نہ جائے وہ بڑھاپا دیکھا

جو جا کے نہ آئے وہ جوانی دیکھی

------------------

پاکستان قائم ہونے کے وقت 1947ء میں اس کی حمایت میں مختلف شعراء نے بہت اشعار لکھے اور جلسوں کی حمایت میں پڑھے جاتے تھے ان میں ایک نظم بہت مشہور ہوئی جس کا بند ہے۔

منزل کو بسر کرنا ہے

مشکل سے کیا ڈرنا ہے

آزادی کے شعلہ کو

دل میں روشن کرنا ہے

پاکستان کی الفت میں

اپنا جینا مرنا ہے

لے کے رہیں گے پاکستان

بٹ کے رہے گا ہندوستان

یہ نظم کیف بنارسی کی ہے۔ کیف بنارسی کی ولادت 6 مئی 1926ء کوچنار مرزا ضلع بنارس (یوپی) وفات 5 دسمبر 2003ء کراچی

----------------

بڑھاپے میں جوانی کی یاد تازہ کرتے ہوئے برمحل مطلع ہے۔

وقت پیری شباب کی باتیں

ایسی ہیں جیسے خواب کی باتیں

یہ مطلع مغلیہ خاندان کے آخری دور کے مستند شاعر شیخ محمد ابراہیم ذوق کا ہے۔ ذوق کی ولادت 1788ء میں اور وفات 1854ء دہلی میں ہوئی

--------------------

ہم بانٹ کے روڑے ہیں اِدھر کے نہ اُدھر کے

مکمل مطلع ہے۔

نے بام کے ہیں زیب نہ زینت کسی در کے

ہم بانٹ کے روڑے ہیں اِدھر کے نہ اُدھر کے

یہ مطلع ایک گمنام شاعر ذوق کا ہے جو بنارس شہر کے رہنے والے تھے1834ء میں جب تذکرہ"گلشن بے خار" نواب مرزا شیفتہ خان نےمرتب کیا تو ذوق کا انتقال ہو چکا تھا۔

بہترین اردو بلاگر کا اعزاز۔۔۔۔۔۔۔۔۔۔۔ یار فرحان دانش! ۔

2011-12-24T13:21:00.004+05:00

گذشتہ رات پاکستان بلاگ ایوارڈز2011ء کی تقریب تقسیم ایورڈزکا انعقاد ریجنٹ پلازہ کراچی میں کیا گیا۔ میں چند وجوہات کی بناء پراس تقریب میں شرکت نہ کر سکا۔ پاکستان بلاگ ایوارڈز2011ء میں میرا بلاگ بھی" بہترین اردو بلاگر " کی فہرست میں شامل تھا۔

نتائج کے مطابق بہترین اردو بلاگر کا ایوارڈ مجھے دیا گیا ہے۔ کاش میں ایوارڈز کی تقریب میں شرکت کر لیتا ۔۔۔۔۔۔۔۔۔۔ افسوس صد افسوس مگر میں ٹوئیٹر اور فیس بک کے ذریعے تقریب پر نظر رکھے ہوئے تھا۔ بہرحال اس ایوارڈ کے لیے میں اپنے اردو بلاگر ،دوستوں اور قارئین کا شکریہ ادا کرتا ہوں جن کی حوصلہ افزائی و رہنمائی کی بدولت مجھے یہ ایوارڈ دیا گیا۔

میں دیگرزمروں میں کامیاب ہونے والے بلاگرز کو بھی تہہ دل سے مبارکباد پیش کرتا ہوں۔

آخر میں پاکستان بلاگ ایوارڈزکی پوری ٹیم اور ووٹ دینے اور تبصرے کرنے والے تمام ساتھیوں کا بہت بہت شکریہ ادا کرتا ہوں جنہوں نے میرے بلاگ کو ایوارڈ کے قابل سمجھا۔ اللہ انہیں جزائے خیر دے۔

ادھورے سپنے - آخری قسط

2011-12-03T10:58:00.002+05:00

اس پوسٹ کی دسویں قسط یہاں ملاحظہ فرمائیں

گڈو کو دفن کیا جا چکا ہےاوراب محلے کی مسجد کے امام صاحب انتہائی عجزوانکساری سے گڈوکیلئے دعا مانگ رہے ہیں۔ آسمان پر بادل اورگہرے ہوچکے ہیں۔ ننھےگڈوکی موت پرآسمان کا سینہ بھی غم سے پھٹ پڑاہےاوروہ بھی مسلسل روئےچلاجارہا ہے۔ وقفے وقفےسے بادل یوں گرجتے ہیں جیسے کوئی بوڑھیا اپنے جوان بیٹے کی موت پرنوحہ کررہی ہوں۔ گہرے کالے بادل اس قدر نیچےآچکےہیں گویا وہ پرانے قبرستان میں اپنی چھوٹی سی قبر میں پرسکون سوئے ہوئے گڈوکا آخری دیدارکرنا چاہتے ہوں۔۔۔۔۔ جیسے کہ وہ ننھے گڈو کا خوبصورت ماتھا چوم لینا چاہیتے ہوں۔۔۔۔۔۔۔۔ محبت وایثار سے سرشارکسی ماں کی طرح۔۔۔۔۔۔!!

لوگ دعا کے بعدآہستہ آہستہ کچی بستی کی طرف روانہ ہوچکے ہیں اورتھوڑی دیر کےبعد قبرستان خالی ہوجاتا ہے۔ ننھے گڈو کی قبرپر کسی خدا ترس انسان نے سرخ گلاب کی پتیاں ڈال دی ہیں۔

شام کا اندھیرا، کالے بادلوں کے ساتھ مل کر دھیرے دھیرے قبرستان کو تاریک کر رہا ہے اور اب بوندوں کے ساتھ ساتھ سردہواؤں کے جھکڑ بھی چل رہے ہیں۔ شام کے اندھیرے میں تیز ہواؤں سے ننھے گڈو کی قبرسے گلاب کی پتیاں اُڑاُڑکر اِدھر اُدھرپھییل گئی ہیں۔۔۔۔۔۔ اچانک تاریک اور ویران قبرستان ننھے گڈو کی آواز سے گونج اُٹھتا ہے ۔۔۔۔۔ یوں لگتا ہے کہ گڈو چیخ چیخ کر کہہ رہا ہو،" ماں۔۔۔۔۔ ماں۔۔۔۔۔ مجھے بھوک لگی ہے ماں ۔۔۔۔ ماں مجھے روٹی دو!۔۔۔۔۔۔۔۔۔۔۔ ماں، آج تو نے مجھے گیند کیلئے بیس روپےدوگی ناماں۔۔۔۔۔۔۔۔۔؟ ماں دیکھو تم نے وعدہ کیا تھا ۔۔۔۔۔۔؟ ماں مجھے روٹی دو۔۔۔۔۔ ماں مجھے گیند دو۔۔۔۔۔ ماں مجھے روٹی دو۔۔۔۔۔ ماں مجھے روٹی دو۔۔۔۔۔

ماں۔۔۔۔۔۔۔۔ماںںںںںںںںںںںںں

*************************

یہ تھا ۔۔۔۔۔۔اختتام۔۔۔۔۔۔۔گڈو کی دردناک کہانی کا

اسکریپ بک - بلاگر اردو ٹیمپلیٹ

2011-11-29T21:00:00.001+05:00

آج میں نے اردو بلاگر ساتھیوں کے لیے ایک انگریزی بلاگرسانچے کو اردو میں تبدیل کیا ہے۔ اس ٹیمپلیٹ میں اردو میں تبصرہ جات لکھنے کے لیے علیحدہ اردو ایڈیٹر اور مصنف کے تبصروں کو علیحدہ انداز میں دکھانے کی سہولت موجود ہے۔میں نے ٹیمپلیٹ کی ٹیسٹنگ کے لیے ایک ٹیسٹ بلاگ بھی تشکیل دیا ہے۔ آپ لوگوں سے درخواست ہے کہ اگر اس ٹیمپلیٹ میں کوئی خرابی نظرآئے تومجھے مطلع کریں۔ انشا اللہ میں جلد مزید ٹیمپلیٹس کو اردو میں تبدیل کر کے آپ کے ساتھ شئیر کرونگا۔ امید ہے کہ آپ کو یہ سانچہ پسند آئے گا۔

سانچے / ٹیمپلیٹ کا پیش منظر دیکھنے کے لیے یہاں کلک کریں۔

سانچہ / ٹیمپلیٹ یہاں سے ڈاؤن لوڈ کریں۔

سکون واطمینان

2011-11-24T22:21:00.002+05:00

موجودہ دورمیں انسانی زندگی میں بے پناہ ترقی ہو چکی ہے۔جس کا تصور آج سے کئی برس قبل نہیں کیا جاسکتا تھا۔ غرضیکہ انسانی زندگی میں لاتعدادآسائشوں اور سہولتوں کا اضافہ ہوگیا ہے۔ آسائشوں اور سہولتوں کے بعد ہونا تو یہ چاہیے تھا کہ انسان پہلے سے زیادہ خوش وخرم رہتا اور زندگی کو بھرپور انجوائے کرتا لیکن ایسا نہیں ہے۔وجہ؟

آسائشیں اور سہولتیں ہی دراصل انسانی زندگی میں عذاب بن گئی ہیں۔ان کے حصول کیلئے انسان کو پیسے کمانےکی دوڑمیں مبتلاکردیاہے اور پیسے کمانے کی اس دوڑنے جائزاور ناجائزکے فرق کوختم کردیا ہے۔ کیونکہ جن لوگو ں کوجائز طریقے سے نہیں ملتا وہ ناجائزطریقے سے حاصل کرنے کی کوشش کرتے ہیں۔ معاشرے میں رسوت ستانی، ملاوٹ، ناجائزمنافع خوری، قتل و غارت گری ، لوٹ مار، چوری وڈاکا زنی اتنی عام ہوگئی ہیں کہ جن کے پاس بہت کچھ ہے وہ بھی خوش نہیں، جن کے پاس کم ہے وہ اس دوڑمیں پیچھےرہ جانےکی وجہ سے خوش نہیں۔

پیار ومحبت، ایثار، بھائی چارہ، مذہب غرضیکہ ہر چیز کو پس پشت ڈال دیا ہے۔ ہمارا معاشرہ بے عملی کا شکار ہے۔ ہم باتیں بنانے کے ماہر ہیں‘ الزام تراشی ہماری قومی عادت بن گئی ہے۔ ہماری بدنصیبی یہ بھی ہے ہم ہر معاملے کو ”مٹی ڈالو، دفع کرو“ جیسے سکون بخش کلمات سے ٹالتے ہیں۔ زندگی سے سکون واطمینان فوت چکا ہے۔ ہرمردوعورت ہراساں اور پریشان ہے۔

ضرورت اس بات کی ہے کہ مثبت قدروں کی حوصلہ افزائی کی جائے۔ زندگی میں محنت، سچائی، دیانتداری اور ایمانداری کو شعار بنالیا جائے ۔ ایسی صورت میں ذرا دیر تو ہو سکتی ہے لیکن ہم منزل کو پا لیں گے اور ہمیں حقیقی سکون بھی ملے گا۔ اگر ہم اسلام کے بنیادی اصولوں کو ہی اپنالیں تو زندگی سے تعصب، نفرت اور پریشانیوں سے چھٹکارا حاصل کر سکتے ہیں۔ سکون واطمینان کی زندگی گزارسکتے ہیں، ٹینشن اور ڈیپریشن کی کیفیت سے نکل سکتے ہیں اورجو انسان چین، سکون اور اطمینان قلب کھو چکا ہے اور پریشانیوں میں گھر گیا ہے وہ اطمینان واپس آسکتا ہے۔

الله رب العزت ہمیں زندگی کے ہر مرحلے میں سکون واطمینان نصیب فرمائے۔ آمین

ادھورے سپنے – دسویں قسط

2011-11-21T15:32:00.008+05:00

اس پوسٹ کی نویں قسط یہاں ملاحظہ فرمائیں

ننھے گڈو کی میت ایک چھوٹے سے جلوس کی شکل میں قبرستان کی طرف جارہی ہے۔ گڈوکی ماں تقریبا پاگل ہوچکی ہے اور روتی چیختی باہر گلی میں آچکی ہے، محلے کی عورتوں نے گڈوکی ماں کو پکڑ رکھا ہے جو اپنے آپ کو چھڑانے کی دیوانہ وار کوشش کر رہی ہےتاکہ وہ دوڑ کر اُن بیدرد لوگوں کو روک لے جو اُس کے لخت جگرکواُس سے ہمیشہ ہمیشہ کیلئے دور لے جارہے ہیں۔
گڈوکی ماں پاگلوں کی طرح رورہی ہے اور چیخ چیخ کر کہے چلی جارہی ہے "رُک جاؤ ، رُک جاؤ ،خداکے لئے رُک جاؤ !۔۔۔۔۔۔ خداکے لئےمیرے بچےکو مجھ سے دورنہ لے جاؤ۔۔۔۔۔۔ گڈو! گڈو! رُک جامیرا چاندرُک جا۔۔۔۔۔رُک جا میں تجھے اپنے ہاتھ سے روٹی کھلاؤں گی۔۔۔میں تجھے گیند بھی لے کر دُونگی۔۔۔اب تو لوٹ آمیرےبچے۔۔۔۔"گڈوکی ماں بدستور چیختی رہتی ہے اُسے اب امید نہیں ہے کہ گڈوروٹی اور گیندکا سن کرآنکھیں کھول دے گااوردوڑتا ہواآکر اُس کے سینے سے لگ جائے گا۔اور پھر وہ کبھی اُسے سینے سے جدا نہیں کریگی۔۔۔۔۔ لیکن کہ گڈوآنکھیں نہیں کھولتا، وہ تو اب ظالم دنیا سے ایسا روٹھا ہے کہ منائے نہیں منتا۔۔۔۔۔۔۔۔۔وہ تو اب بہت دور جا چکا ہےبہت ہی دور۔۔۔۔اتنا دور کہ جہاں اُس تک ماں کی چیخوں کی آواز بھی نہیں پہنچ سکتی۔۔۔۔۔۔۔وہ توایک ایسے دیس جا چکاہےکہ جہاں سے کبھی کوئی لوٹ کر نہیں آیا،کبھی بھی نہیں!اورنہ ہی گڈواب کبھی لوٹ کر واپس آئے گا۔۔۔۔۔۔!!

اس پوسٹ کی آخری قسط یہاں ملاحظہ فرمائیں

پاکستان بلاگ ایوارڈز2011

2011-11-16T20:29:00.004+05:00

پاکستان بلاگ ایوارڈز2011 کا انعقاد ہورہا ہے اور مقابلہ جاری ہے جس میں میرا اردوبلاگ "دانش نامہ" بھی نامزد ہوا ہے آپ تمام دوستوں سے گزارش ہے کہ آپ مجھے ووٹ دیں اور مجھےاس مقابلے میں کامیاب بنائیں۔

اگر آپ میرے بلاگ کو بطور بہترین اردو بلاگ کا ووٹ دینا چاہیں تو یہاں کلک کریں اور کھلنے والے صفحہ پر موجود ستاروں کے ذریعے اپنی پسندیدگی کا اظہار کریں۔

5 ستاروں کا مطلب سب سے زیادہ پسندیدہ ہے۔ یعنی جتنے ستاروں پر کلک کریں گے اتنا پسندیدگی کا اظہار ہوگا۔ اگر آپ مجھےیہ ایوارڈ جتوانا چاہتے ہیں تو ووٹ کریں۔

تصورپاکستان کاخالق کون؟

2011-11-09T11:37:00.004+05:00

پاکستان کے تعلیمی اداروں میں یہ پڑھایا اور بتایا جاتا ہے کہ علامہ اقبال نےپاکستان کا خواب دیکھا تھا یعنی علامہ اقبال نےپاکستان کا تصورپیش کیا تھا۔ مگرعلامہ اقبال اوپن یونیورسٹی کے ڈگری پروگرام کی کتاب مطالعہ پاکستان کے مطابق علامہ اقبال سے پہلے ہی بہت سے لوگ تصورپاکستان پیش کرچکےتھے۔

مطالعہ پاکستان کی کتاب کے صفحہ نمبر 102 پر یہ الفاظ تحریر ہیں

سن1930ءمیں مسلمانوں میں یہ تصور مقبول ہونے لگا کہ ہندوستان کو ہندواکثریت اور مسلم اکثریت کے صوبوں میں تقسیم کرکےمسلمانوں کیلئےعلحیدہ مملکت ہونی چاہیے ۔اس وقت اس تصورکا برملا اظہار علامہ اقبال کےاس خطبےمیں ہواجوانہوں نے آلہ آباد میں مسلم لیگ کا سالانہ جلسے میں صدرکی حیثیت سے پڑھا۔

اگلے ہی پیراگراف کی پہلی لائن یہ تحریر ہےکہ

ہندوستان کومسلم انڈیا اور ہندوانڈیا میں تقسیم کرنے کا یہ تصور نیا نہیں تھا۔اس سے پہلے بھی کئی مسلم رہنما اس کی طرف اس اشارہ کر چکے تھے۔ جن کے نام یہ ہیں 1890ءمیں مولانا عبدالحلیم شرر، 1915 میں چوہدری رحمت علی، 1920ء میں محمد عبدالقدیر بلگرامی اور 1923ء میں سردارمحمد گل خان۔ یہ نام صفحہ نمبر 102 سے 103 پر ہیں اس کے علاوہ 139 صفحہ نمبر پر بھی یہ نام ہیں۔

غیرضروری تعطیلات

2011-10-25T16:30:00.005+05:00

چھٹیوں کے شوقین لوگوں کیلئےبطورخاص ایک نظم

بڑوں کو اور چھوٹوں کو انہیں صدمات نے مارا
مجھے دفتر انہیں کالج کی تعطیلات نے مارا

کبھی سردی کی چھُٹی ہے، کبھی گرمی کی چھٹی ہے
یہ سب اس کے علاوہ ہیں جو ہٹ دھرمی کی چھٹی ہے

کبھی تعطیل کھانے کی، کبھی تعطیل پینے کی
پڑھائی دو مہینے، چھٹیاں ہیں دس مہینے کی

ابھی پرسوں تو رنگینیئ حالت کی چھٹی
پھر اُس کے بعد پورے ماہ ہے برسات کی چھٹی

کبھی اسکول میں اُستاد کے سردرد کی چھٹی
ہوائے سرد چل جائے تو پھر ہر فرد کی چھٹی

کبھی افسر کو تھوڑا بخار آ جائے تو چھٹی
کبھی سسرال سے بیگم کا تار آجائے تو چھٹی

کبھی ٹیبل پہ رکھ پاؤں سو جانا بھی چھٹی ہے
کبھی دفتر سے اُٹھ کر گول ہو جانا بھی چھٹی ہے

ابھی تو درد کے آثار کچھ باقی ہیں سینے میں
ابھی تو بیس ہی ناغے ہوئے ہیں اس مہینے میں

غرض جو تین سو پینسٹھ دنوں کے گوشوارے میں
ہمارے تین سو دن ہیں فقط پینسٹھ تمہارے ہیں

شاعر: نامعلوم

دو سیاستدان ایک مستقبل

2011-10-23T10:37:00.004+05:00

آج کل میڈیا عمران خان کو بہت پروموٹ کر رہا ہے اور خود عمران خان نے جب سے ایک سال قبل دھرنے دیئے تھے خود کو آنے والے وقت کا وزیر اعظم سمجھ رہے ہیں۔ کبھی کبھی تو وہ مثال بھی دیتے ہیں کہ اگر وہ وزیر اعظم ہوتے تو ایسا کرتے ویسا کرتے ایک ہاتھ سے وہ صدر زرداری کو للکارتے ہیں تو دوسرے ہاتھ سے وہ نوا ز شریف کی خبر لیتے ہیں۔ ایسی چٹ پٹی خبروں کو میڈیا والے خوب مزے لے کر اچھالتے ہیں تو عمران خان اور اُن کی پارٹی کے لوگ یہ سمجھتے ہیں کہ واقعی اگر وہ وزیر اعظم بن گئے
تو وہ دونوں پہلوانوں کو ایک ہی وار میں چت کر لیں گے۔ حالانکہ حالیہ ضمنی انتخابات میں مسلم لیگ (ن) کے ایک امیدوار جن کا لقب کھگاتھا جو اپنے والد کی جعلی ڈگری کی وجہ سے نشست کھو بیٹھے تھے مسلم لیگ (ق) جس کو پی پی پی کی بھی پوری حمایت حاصل تھی ہرا کر دگنے ووٹوں سے کامیاب ہوئے اور تیسرے امیدوار جن کا تعلق تحریکِ انصاف یعنی عمران خان کی پارٹی سے تھا نہ صرف ہار گئے بلکہ اپنی ضمانت بھی ضبط کروا بیٹھے۔ پتہ نہیں عمران خان نے اس سے سبق حاصل کیا یا وہ ابھی تک اقتدار کے سہانے سپنے دیکھ رہے ہیں۔ اب جبکہ ہمارے سندھ کے روحانی پیشوا پیر پگارہ صاحب نے 22نومبر 2011ء تک سیاسی بساط کے الٹ جانے کی پیشگوئی کی ہے یار لوگ عمران خان کے پلڑے میں اقتدار ڈالنے سے تشبیہ دے رہے ہیں اور بنگلہ دیش کی طرزِ انقلاب کی بھی پیشگوئی گزشتہ 2سال سے ہم سب سن سن کر حیران ہو رہے ہیں کہ ہر6ماہ بعد اس قسم کی ریڈی میڈ افواہ پھیلا کر حکمرانوں کو خبردار کر دیا جاتا ہے جس سے حکمران پارٹیوں میں ٹوٹ پھوٹ کا عمل رک جا تا ہے البتہ مسلم لیگ (ن) والے حسرت سے ان کی آنیاں جانیاں دیکھ کر مزید مایوس ہو جاتے ہیں ایسے میں مسلم لیگ (ق) والے حکومتی ٹرین میں سوار ہو کر اقتدار کے مزے لوٹ رہے ہیں توجے یو آئی والے اقتدار کی چلتی ٹرین سے اتر کر پچھتا رہے ہیں۔
راقم نے ماضی میں 10سال اصغر خان کی تحریک استقلال میں 1977ء سے 1986ء تک کئی اعلیٰ عہدوں پر وقت گزارا ہے اور اصغر خان کی سیاست کو بہت نزدیک سے دیکھا ہے۔ مجھے اصغر خان اور عمران خان کی سیاست میں بہت مماثلت نظر آتی ہے بہت سے ان دونوں حضرات کے فیصلے ایک ہی جیسے ہیں مثلاً جب جنرل ضیاء الحق نے پی پی پی کا تختہ الٹا تو اصغرخان نے ضیاء الحق کی بڑی بڑی تعریفیں کیں اور بھٹو صاحب کو مارشل لاء کا مورد ِالزام ٹھہرایا اور پھر بعد میں انہی اصغر خان نے اس وقت کے قومی اتحاد سے سب سے پہلے علیحدگی اختیار کر کے ضیاء الحق کے خلاف سیاست شروع کر دی ۔ عمران خان نے ایسا ہی کچھ کیا جب پرویز مشرف نے مسلم لیگ (ن) کے نواز شریف کا تختہ الٹا تو سب سے پہلے پرویز مشرف کی تعریفیں کرنے والوں میں عمران خان سب سے آگے تھے وہ بھی پرویز مشرف کے وزیر اعظم کے امیدوار تھے مگر جب پرویز مشرف نے ان کو لفٹ نہیں دی تو عمران خان نے پرویز مشرف کے خلاف ان کی پالیسیوں پر زبردست تنقید شروع کر دی اور ہر ایک ان کی نظر میں کرپٹ تھا وہ بھی اصغرخان کی طرح صرف ایک مرتبہ قومی اسمبلی کی نشست سے کامیاب ہوئے اور پھر کبھی یا تو انہوں نے الیکشن کا بائیکاٹ کیا یا پھر وہ ناکام ہوئے ۔یہ دونوں حضرات عوام میں کرپشن کے خلاف تقاریر کرنے میں شہرت رکھتے ہیں عوام ان کی باتوں سے متاثر ہوتے ہیں مگر ووٹ جا کر انہی پرانے کھلاڑیوں کو دیتے ہیں جن کی پشت پناہی جاگیرداروں ، وڈیروں اور چوہدریوں کی ہوتی ہے۔ آج کل عمران خان نے سب سے پنگا لے رکھا ہے ہر صوبے کی بڑی جماعت کو وہ برا بھلا اور کرپٹ گردانتے ہیں، پرویز مشرف جو آج کل خود ساختہ جلاوطنی گزار رہے ہیں ان کو بھی عمران خان کرپٹ سمجھتے ہیں۔ امریکہ کے تو وہ اصغر خان کی طرح ازلی دشمن ہیں ، حالانکہ دونوں کو معلوم تھا کہ بغیر امریکہ کی آشیر باد کے یہاں ایک وزیر خارجہ بھی نہیں لگ سکتایہی وجہ ہے کہ نواز شریف بھی امریکہ کی مخالفت کی وجہ سے 8سال اقتدار کھونے کے علاوہ جلاوطنی بھگت چکے ہیں۔ اگر آج بھی الیکشن ہوں تو پی پی پی اور مسلم لیگ (ن) کا ہی کانٹے کا مقابلہ ہو گا اصغر خان ساری زندگی سیاست میں گزار کر اپنے سخت فیصلوں کی وجہ سے آج گمنامی کی زندگی بسر کر رہے ہیں۔ ایسا کچھ عمران خان کی پارٹی کا بھی یہی مستقبل نظر آتا ہے۔ کرکٹ کی کپتانی، سیاسی کپتانی سے مختلف ہوتی ہے اس میں ایک طرف عوام کی خوشنودی ہے تو دوسری طرف سیاسی بصیرت کی ضرورت ہوتی ہے ۔
اصغر خان نے بھی اکثر فیصلے غلط کئے تو کبھی وہ اقتدار کے پاس سے گزر گئے تو کبھی اقتدار ان کے پاس سے گزر گیا۔ کبھی وہ سیاسی الائنس بنانے میں جلدی کرتے تھے تو کبھی وہ الائنس سے نکلنے میں جلدی کر جاتے تھے بقول پیر پگارہ صاحب کے ، ان کی پارٹی میں نہ تحریک تھی نہ استقلال بالکل اسی طرح عمران خان کی پارٹی میں نہ تحریک ہے اور نہ انصاف ، کیونکہ جو لوگ بھی ان کو سیاست میں لائے تھے ان سے اختلاف کر کے وہ ایک ایک کر کے ان کی پارٹی سے نکل چکے ہیں اور جو رہ بھی گئے ہیں وہ ان میں سیاسی لچک نہ ہونے کی وجہ سے غیر فعال ہیں۔ اگر کوئی معجزہ ہو جائے تو وہ اقتدار میں آسکتے ہیں ووٹوں کی گنتی سے وہ اقتدار میں نہیں آسکتے ، البتہ باہر بیٹھ کر اصغرخان کی طرح میڈیا کی ضرورت وہ پوری کرتے رہیں گے ۔ عمران خان کو عوام ان کے فلاحی کاموں میں بڑھ چڑھ کر چندہ تو دے سکتے ہیں مگر ووٹ دینے میں ان کی رائے مختلف ہی ہو گی۔ اس کی وجہ یہ ہے کہ ہماری اشرافیہ جو نوٹ دیتی ہے وہ بدقسمتی سے الیکشن میں ووٹ نہیں ڈالتی اور جو ووٹ ڈالنے والے ہیں وہ نوٹ نہیں دیتے۔

تحریر: خلیل احمد نینی تال والا

بشکریہ: جنگ کراچی

پاکستان میں سافٹ ویئر پائریسی

2011-10-04T16:03:00.001+05:00

آپ میں سے تقریبا ہر ایک نےزندگی میں کم ازکم ایک بار MP3سونگ فری سائیٹ سے ڈاؤن لوڈ کیا ہوگا۔ کوئی چیز مفت مل جانا بڑی بات ہےتاہم اگر وہ کسی اور کو اُسکی محنت اور کوشش کو نقصان پہنچائے بغیر ہو ۔کبھی آپ نے سوچا کہ مفت گانے، فلمیں، گیمز اور سافٹ وئیرزڈاؤن لوڈکرنے سےانکو بنانے والوں کی رائلٹی کو نقصان پہنچتاہے۔

ٹھیک ہے کہ شوبز ہی ایسی انڈسٹری نہیں ہے جس میں کہ پائریسی اثرانداز ہوتی ہے۔ تقریبا ہر دوسری انڈسٹری ان خطرات سے دوچار ہے۔ اب جبکہ ہر چیز ڈیجیٹل ہو رہی ہے اور سافٹ ویئر پائریسی ایک معمول بن چکا ہے ۔پاکستان میں خاص طور پر پائریٹڈسافٹ وئیرز کا ا ستعمال بہت زیادہ ہے۔

چلیئے ہم ونڈوز کی مثال لیتے ہیں جوکہ آپ کے کمپوٹر کا آپریٹنگ سسٹم ہے۔ پاکستان میں 95فیصد سے زیادہ لوگ ونڈوز یوزرہیں اور انہوں نے کبھی ونڈوز کو نہیں خریدا۔اسی طرح کبھی کبھی لوگ اینٹی وائرس سافٹ وئیر خریدتے ہیں ۔ہاںیہ صیح ہے کہ ہم امریکہ اور برطانیہ کی طرح اتنے امیر نہیں ہیں کہ ہم 300ڈالر کا سافٹ ویئرخریدیں۔دوسرا یہ کہ اگر ہمیں پائریٹڈ سافٹ ویئر تک رسائی نہیں ہوتی تو پاکستان کی آبادی کاا یک محدود حصہ ہی انفارمیشن ٹیکنالوجی کا تعلیم یافتہ ہوتا۔ لیکن اس کے روز مرہ استعمال کی وجہ سے بہت زیادہ لوگوں کو ٹیکنالوجی کی سمجھ آگئی ہے۔

ہاں یہ تمام دلائل ملک کی اقتصادی صورت حال کو دیکھتے ہوئے درست معلوم ہوتے ہیں۔لیکن غلط طریقے سے درست سمت میں چلنے میں مددگارنہیں ہوسکتے ۔ یہی صورت حال پاکستان میں ٹیکنالوجی کی سست رفتار ترقی کی وجہ ہے ہمارے پاس ٹیکنالوجی تو ہے لیکن اُس کا درست استعمال نہیں ہے ۔

کیا ہو اگر گورنمنٹ سافٹ وئیر کو ایک پروڈکٹ (سامان تجارت)کے طور پر تسلیم کرے جیسا کہ چینی ، چائے ، کاسمیٹک وغیرہ کہ اس کوبیرونی مارکیٹ سے خریدو اور دوسری( غیر اہم) چیزوں کی طرح اس پر سبسڈی دے کر فروخت کرو۔ہمارے پاس پاکستان سوفٹ ویئر ایکسپورٹ بورڈ ہے لیکن اب تک ہم کسی سنگ میل کو عبور نہیں کر سکے ۔ہم نے کبھی یہ نہیں سنا کہ پاکستان سوفٹ ویئر ایکسپورٹ بورڈنے کسی بڑی سافٹ ویئر کمپنی کے ساتھ کسی ایگریمنٹ پر دستخط کئے ہوں۔ تاکہ پاکستان کے لئے کم قیمت سافٹ ویئرز حاصل کیےجاسکیں۔ہمارے پاس ضروری ڈھانچہ اور ادارے تو موجود ہیں، درحقیت ضرورت ہے کہ ہم متعلقہ حکام کو بار بار یاد دھانی کرائیں کہ چیزوں کو کارگر انداز میں بروئے کار لائیں۔

Paypalاور دوسری پیمینٹ پراسسنگ سروسز پاکستان میں کام کرنے گریز کررہے ہیں جس کی وجہ سائبر کرائم ہے۔ سائبر کرائم کی شرح پاکستان میں بہت زیادہ ہے۔ یہ ضروری نہیں کہ سائبر کرائم صرف پاکستان میں ہی ہے اور دوسرے ملکوں میں نہیں ہے بلکہ یہ کہ دوسرے ممالک میں انکو کنٹرول کر لیا گیا ہے اور مرتکب افراد کے خلاف تادیبی کاروائی بھی کی جاتی ہے۔سافٹ وئیر پائریسی نہ صرف ایک جرم ہے بلکہ یہ ایک بیماری ہے جوکہ ہر انڈسٹری کو تباہ کر رہی ہے اور اگر ہم اس کو ختم نہیں کر سکتے تو کم ازکم کنٹرول ضرور کرنا چاہیے۔

آپ یا آپ کے حلقہ احباب میں سے کوئی پائریٹڈسافٹ وئیرز استعمال کررہا ہے تو آپ اس سلسلے میں خیالات یا ممکنہ تدارک اور طریقوں سے آگاہ کریں۔

پاکستانی غریب، پاکستان نہیں

2011-09-19T22:04:00.001+05:00

ادھورے سپنے – نویں قسط

2011-08-20T15:33:00.004+05:00

اس پوسٹ کی آٹھویں قسط یہاںملاحظہ فرمائیں

آسمان پر گہرے سیاہ بادل چھائے ہوئے ہیں، سرد اور تیزہوائیں چل رہی ہیں۔ بادل وقفے وقفےسے گرجتے ہیں تو یوں لگتاہےجیسے گڈو کی موت پر چپکے چپکے رورہے ہیں۔ ننھے گڈو کی میت اُٹھنے کی تیاری ہورہی ہے۔ مسجد سے لایا گیا جنازے کا ڈولا گھر کے باہررکھا ہوا ہےاور چونکہ آنگن میں لگا ٹین کا دروازہ بہت چھوٹا ہے اور ڈولا اندر لایا نہیں جاسکتالہذا پروگرام کے مطابق گڈو کو گود میں اُٹھا کر باہر جنازے کے ڈولے پر لٹایا جائے گااور اُس کے بعد میت قبرستان کی طرف روانہ ہوگی۔

اچانک محلے کے پانچ چھ افراداندر داخل ہوتے ہیں ۔ایک بوڑھا شخص آہستہ آہستہ گڈو کی چارپائی کے پاس جاتا ہے اور گڈو کی ماں کے سر پر تسلی دینے کے انداز میں ہاتھ رکھ دیتا ہے۔گڈو کی ماں آنسوؤں سے تر اور گرد سے اَٹا چہرہ اُٹھا کر اُس بوڑھے شخص کی طرف سے دیکھتی ہے۔اس کو اندازہ ہوجاتا ہے کہ گڈو کی روانگی کا وقت آگیا ہے۔۔۔۔۔۔۔ ماں جیسے پاگل ہو جاتی ہے وہ ایک دم ننھے گڈوکو سینے سے چمٹا لیتی ہے اور چیخ چیخ کر رونا شروع کر دیتی ہے۔۔۔۔۔۔۔۔۔۔یوں لگتا ہے جیسے ماں کی دردناک چیخوں سے آسمان کے صبر کا پیمانہ لبریزہو گیا ہو اور وہ بھی اپنے آنسوؤں کوضبط نہ کر سکا ہو۔۔۔۔۔آسمان سے ٹپ ٹپ آنسو ٹپکنے لگتے ہیں۔

بوڑھا شخص آگے بڑھ کر محلےکی دو تین خواتین کی مدد سے ماں کو گڈو کی لاش سے بمشکل الگ کر تا ہے اور پھر گڈو کو اپنے ناتواں بازوؤں میں اُٹھا لیتا ہے۔ بوڑھا شخص جس نے شائد کافی دیر سے ضبط کیا ہوا تھااُس ننھے فرشتے کی لاش کو کہ جسکی ننھی سی زندگی حسرتوں اور محرومیوں کی کہانی ہے، اپنے بازوؤں میں دیکھ کر ایک دم پھٹ پڑتا ہے اور پھوٹ پھوٹ کر رونےلگتاہے۔۔۔۔۔۔۔۔۔۔بوڑھا شخص گرنے کے قریب ہوتا ہے کہ ایک نوجوان آگے بڑھ کر اُسے سہارا دیتا ہے اور وہ بمشکل چلتا ہوا گڈو کو لے جاکر باہر جنازے کے ڈولے پر لٹا دیتا ہے۔

اس پوسٹ کی دسویں قسط یہاں ملاحظہ فرمائیں

سرفروشی کی تمنا اور بسمل شاہجہانپوری

2011-07-28T17:23:00.004+05:00

ایک غزل کا مطلع مشہور ہے۔

سرفروشی کی تمنا اب ہمارے دل میں ہے
دیکھنا ہے زورکتنا بازوئے قاتل میں ہے

عام طور پر یہ مولانا ظفر علی خان (1873ءتا1956ء) کےنام سےمشہور ہے لیکن یہ مطلع ایک گمنام شاعر بسمل شاہجہانپوری کاہے۔ بسمل شاہجہانپوری نے ایک مذہبی گھرانے میں آنکھ کھولی۔ ہوش سنھبالنے کے بعد دل ودماغ میں یہی تڑپ تھی کہ برطانیہ کی غلامی سے آزاد ہونا چاہیے۔ 1916ء میں ان کا رابطہ انہی خیالات کے حامل ایک اور نوجوانوں کے گروہ سے ہوا۔1918ء میں "مین پوری"سازش کے اہم واقعہ میں بسمل بھی شریک تھے 9اگست 1925ء کو انہوں نے کاکوری (لکھنو کا ایک مشہور قصبہ)ٹرین کی واردات میں حصہ لیا یہ سیاسی نوعیت کی واردات تھی۔ گرفتار ہوئے، مقدمہ چلتا رہاآخر19دسمبر1927ءکوبسمل شاہجہانپوری کو سزاموت دے دی گئی۔

بسمل شاہجہانپوری سیاست کے علاوہ شعروادب کابھی ذوق رکھتےتھے۔ مقدمے کےدوران ان کی کئی نظمیں مشہور ہوئیں، حکام نے ان کے کلام پر پابندی عائد کردی۔ زمانےکی دست وبرد سے یہی محفوظ نظم ہے اس کے ابتدائی چار شعر اورمقطع"بندے ماترم" نامی رسالہ میں اور بقیہ اورمقطع 1929ء میں "پشپانجلی"میں شائع ہوئے تھے۔پوری نظم لائق توجہ ہے۔

سرفروشی کی تمنا اب ہمارےدل میں ہے
دیکھنا ہے زورکتنابازوئےقاتل میں ہے
راہ روئے راہِ محبت رہ نہ جانہ رہ میں
لذتِ صحرانوردی دوری منزل میں ہے
وقت آنے دے بتادیں گے تجھے اے آسمان
ہم ابھی کیا بتائیں کیاہمارے دل میںہے
اےشہیدملک وملت تیرے جذبوں کے نثار
تیری قربانی کا چرچا غیر کی محفل میں ہے
دور ہواب ملک سے تاریکی بغض وحسد
بس یہی حسرت یہی ارماں ہمارے دل میں ہے
ساحل مقصود پر لے جا چل خداراناخدا
اپنے ارمانوں کی کشتی بڑی مشکل میں ہے
اب نہ اگلے ولولے ہیں نہ ارمانوںکی بھیڑ
ایک مٹ جانے کی حسرت اب دلِ بسمل میں ہے

پچاس ارب روپے

2011-07-26T11:58:00.006+05:00

پی پی حکومت 50 ارب روپے بےنظیر انکم سپورٹ پروگرام پر خرچ کررہی ہے. اس سے لوگوں کو ایک ہزار روپے ماہانہ ملتے ہیں. بےنظیر انکم سپورٹ پروگرام سےامید تھی کہ اس مستحق بیوہ عورتوں کو جو اسکی ہر شرئط پر پوری اترتی ہیں، تھوڑی ہی سہی مگر کچھ مالی مدد ملے گی

مگرافسوس ناک بات یہ ہے کہ اس پروگرام میں صرف پی پی پی کے وزراء، کارکنان اور انکے زیر اثر غیر مستحق خاندانوں کو فوقیت دی جارہی ہے. ایک ہزار روپے بھیک دے کر اگلے انتخابات کے لئے ووٹ اکٹھے کیےجارہے ہیں. اگر50 ارب روپے پیپکو (واپڈا) کو دے دییے جائیں تو پاکستان سے لوڈ شیڈنگ کا مکمل اور بیروزگاری کا جزوی خاتمہ ہو سکتا ہے.

غیر سرکاری رویت ہلال کمیٹیاں

2011-07-25T17:17:00.002+05:00

پاکستان میں رمضان مبارک کا چاند نظر آنے والا ہے۔ اور رویت ہلال پر صوبہ خیبر پختون خواہ کے "شرانگیز" مولویوں کی دکانیں کھلنے والی ہیں۔ پشاور کی مسجد قاسم علی خان غیر سرکاری رویت ہلال کمیٹی کا مرکز ہے۔ چاند کی زیادہ فکر مسجد قاسم علی خان کے مولوی شہاب الدین پوپلزئی کو ہوتی ہے جوصرف رمضان اور شوال کا چاند دیکھنے کا اہتمام کرتا ہے اورصرف رمضان اور شوال کے چاند کے لیے اپنی دوکان کھول لیتا ہے۔ کیوں کہ جو "نام نہاد" شہرت اور مشہوری رمضان اور شوال کے چاند کے لیے ملتی ہے وہ کسی اور مہینے میں نہیں ملتی۔

"نام نہاد" شہرت اورمشہوری حاصل کرنے کے لیے اگر امت مسلمہ میں شر، فتنہ، فساد اور تفرقہ پھیلانا پڑے تو کیا ہوا۔ اور کون ہے پوچھنےوالا ؟؟؟ غیر سرکاری رویت ہلال کمیٹیوں کے شر کو پھیلانے میں میڈیا کا بہت زیادہ ہاتھ ہے۔ لگتا ایسا ہے کہ میڈیا بھی ان کو پروموٹ کر رہا ہے یا سستی شہرت کا متلاشی ہے۔

رویت ہلال کے لیے صوبہ خیبرپختون خواہ کے "نام نہاد" مولویوں کے آگےعلم نجوم، ماہرین فلکیات، محکمہ موسمیات، پاکستان نیوی، سپارکو والے بھی جھوٹے اور بے بس ہو جاتے ہیں۔ ان اداروں کو حساس دوربینوں سے چاند نظر نہ آئے مگر شہاب الدین پوپلزئی اپنی آنکھوں سے چاند نظر آ جاتا ہے۔ صوبہ خیبرپختون خواہ کی سابقہ حکومتوں (متحدہ مجلس عمل اورعوامی نیشنل پارٹی) کے "بے عقل" وزیروں نے ان غیر سرکاری رویت ہلال کمیٹی کو بھرپور سپورٹ کیا اور امت مسلمہ میں شر، فتنہ، فساد اور تفرقہ پھیلانے کے کارخیر میں بڑھ چڑھ کر حصہ لیا۔

مرکزی حکومت کو چاہیے کہ صوبہ خیبر پختون خواہ میں قائم غیر سرکاری رویت ہلال کمیٹیوں کو فورا بند کروائے اوران کے کارندوں، ہمدردوں اور ان کی دکانیں سجانے والوں کو پابند سلاسل کرے ۔

ادھورے سپنے – آٹھویں قسط

2011-07-20T15:13:00.001+05:00

اس پوسٹ کی ساتویں قسط یہاں ملاحظہ فرمائیں

گڈو کی لاش اگرچہ شام سے گھر میں پڑی ہے لیکن ماں کو اب بھی یقین نہیں آرہا کہ ننھا گڈو اُسے ہمیشہ ہمیشہ کیلئے چھوڑ کر جا چکا ہے ۔۔۔۔ وہ وقفے وقفے سے دھاڑیں مار مار کر رونے لگتی ہے اور روتے ہوئے ننھے گڈوکے چھوٹے چھوٹے ہاتھوں اور منہ کو بے تابی سے چومنے لگتی ہے۔۔۔۔لیکن ننھے گڈو پر ماں کے رونے کا کوئی اثر نہیں ہوتا ۔۔۔۔
وہ بدستور اپنی ماں کی حالت سے بے خبر پر سکون سویا رہتا ہے وہ ایک بار بھی آنکھیں کھول کر ماں کی طر ف نہیں دیکھتا۔۔۔۔لیکن ماں کا دل اب بھی یہ ماننے کو تیار نہیں کہ گڈو اُسے چھوڑ کر بھی جا سکتا ہے ۔۔۔
ماں کو اب بھی یقین ہے کہ ننھا گڈو "ماں"کہہ کر مسکرا ستا ہو اُس سے لیپٹ جائے گا اور پھر اُسے ماں اپنے سینے سے لگا لے گی ۔۔۔۔کبھی جدا نہ کرنے کیلئے۔۔۔۔ لیکن ایسا نہیں ہو تا ! کیونکہ ماں کے ماننے نہ ماننے سے کیا ہوتا ہے ! حقیقت پھر حقیقت ہے ۔ اور حقیقت یہی ہے کہ گڈو مر چکا ہے !وہ ماں کو چھوڑ کر دور بہت دور پریوں کے دیس جا بسا ہے۔۔۔۔۔ایک ایسے دیس کہ جہاں سئ کبھی کوئی لوٹ کر نہیں آیا!کبھی بھی نہیں۔۔۔۔!!

ماں کو دکھ ہے وہ ننھے گڈو کو مختصر زندگی میں کوئی بھی خوشی نہ سکی۔۔۔۔نہ اچھے کپڑے ،نہ پیٹ بھر روٹی۔۔۔نہ کوئی کھلونا۔۔کھلونا، جو معصوم بچپن کی نشانی ہو ا کرتا ہے۔ کھلونا کیا وہ تو گڈو کے لئےٹینس بال بھی نہ لے سکے ۔۔۔۔ماں کو اس بات کا بھی دکھ ہے کہ گڈو اپنے خیراتی کفن اوڑھے جا رہا ہے ۔۔۔۔۔۔اور وہ گڈو کوانتہائی خواہش کے باجووداُسے اسکول بھی نہیں بھیج سکی۔ ماں کو اچھی طرح یاد ہے جب گڈو بچوں کو رنگ برنگے یو نیفارم میں اسکول جاتے دیکھ کر حسرت اور معصومیت سے ماں کی طرف دیکھ کر پوچھاکرتا تھا "ماں! میں کب اسکول جاؤں گا؟ اور پھر ماں کی آنکھوں میں اُمنڈ آنے والے آنسوؤں کو دیکھ کر وہ ننھا فرشتہ سمجھ جایا کر تا تھاکہ وہ کبھی اسکول نہیں جائے گا۔۔۔۔۔کبھی بھی نہیں!!!
اچانک ماں کو یوں لگا جیسے ننھے گڈو نے اُسے پکارا ہو وہ کہہ رہا ہو کہ ،"ماں مجھے بھوک لگی ہے!!!ماں، مجھے روٹی دو!!!ماں مجھے پیسے دو میں گیند لوں گا!!!ماں، مجھے روٹی دو!!!ماں مجھے۔۔۔۔!!!
اور ماں ایک بار پھر پھوٹ پھوٹ کر رونے لگ جاتی ہے۔۔۔۔!!!

اس پوسٹ کی نویں قسط یہاں ملاحظہ فرمائیں

بھوکے ننگے

2011-07-19T11:37:00.001+05:00

29 جون1948ء کو چوہدری قادربخش مجسٹریٹ کی عدالت میں ایک عجیب و غریب مقدمہ پیش ہوا اس مقدمے میں مہاجر کیمپ میں مقیم میاں بیوی پر سرکاری خیمے کا کچھ کپڑا کاٹنے کا الزام تھا۔ پولیس کی حراست میں اس جوڑے نے عدالت کو بتایا کہ ہم اس کیمپ میں پچھلے پانچ ماہ سے مقیم ہیں ہمارے جسموں پر پہنے ہوئے کپڑے پرانے اور بوسیدہ ہوکر اس بری طرح پھٹ چکے تھے جس سے ہمارے جسم جگہ جگہ سے بری طرح ننگے ہو رہے تھے

اور ہم دن کے وقت کیمپ سے پانی اور کھانا لینے کیلئے باہر بھی نہیں نکل سکتے تھے جب دو دن کی بھوک اور پیاس سے مرنے لگے تو مجبوراً اپنے خیمے کا ٹکڑا پھاڑ لیا جسے ہم باری باری اپنے جسموں کے گرد لپیٹ کر راشن اور پانی کیلئے باہر لائن میں لگتے ہیں اس وقت بھی ہم نے اپنے جسموں کو ان ٹکڑوں سے ڈھانپا ہوا ہے ساتھ ہی انہوں نے اپنے جسموں کے گرد اوڑھی ہوئی خیمے کے کپڑے کی بنی ہوئی وہ چادریں اٹھا دیں جس سے جگہ جگہ سے پھٹے اور گھسے ہوئے لباس سے ان کے ننگے جسم بری طرح جھانک رہے تھے۔ یہ وہی مہاجر تھے جنہوں نے پاکستان کیلئے ووٹ دیا، اپنا گھر دیا، اپنے ماں باپ بہن بھائی اور بچے قتل کروائے، اپنے کھیت دیئے، کاروبار دیا، دکانیں دیں سب سے بڑھ کر اپنے آباؤ اجداد کی قبریں چھوڑیں جن کا آج کوئی نام ونشان نہیں…

انہی کے بارے میں ذوالفقار مرزا نے اپنے ”دوست کے دوست “شاہی سید کی ”پر تکلف “دعوت کھانے کے بعد انتہائی غضب ناک لہجے میں فرمایا ”یہ اردو بولنے والے بھوکے ننگے سندھ میں مہاجر بن کر آئے انہیں ہم نے کھانے کو دیا اب یہ ہمارے سامنے کھڑے ہوتے ہیں میری کراچی اور حیدرآباد کے لوگوں سے اپیل ہے کہ ان کم بختوں کو باہر نکال دو“۔ نیک مقصد کیلئے اپنا گھر بار چھوڑنے والے ہیں اپنے ساتھ کچھ بھی نہیں لا سکتے چودہ سو سال پہلے بھی جو دین کیلئے رات کی تاریکی میں چھپ کر جان بچاتے ہوئے مدینہ کی طرف نکلے ان کے پاس بھی کچھ نہیں تھا اسی طرح یہ لوگ بھی اس لئے خالی ہاتھ نکلے تھے کہ انہیں بتایا گیا تھا یہ نیا وطن جہاں تم جا رہے ہو اسلام کیلئے بنایا گیا ہے…

ان کے مقابلے میں جن کی دعوت کا مرزا صاحب حق نمک ادا کر رہے تھے انہوں نے صوبہ سرحد کے ریفرنڈم میں گاندھی اور نہرو کا ساتھ دیتے ہوئے قائد اعظم اور قیام پاکستان کے خلاف ووٹ دیا تھا ان کی طرف سے قائد اعظم کی اپیل پر اپنا گھر بار چھوڑ کر آنے والے مہاجرین کی یہ تضحیک کوئی نئی بات نہیں ہے… مرزا صاحب کا تعلق اس ٹولے سے ہے جنہوں نے قیام پاکستان کے وقت جب دہلی، نارتول، مہندر گڑھ ، الور، بھرت پور، نابھہ، جند، ، بمبئی سے یہ بھوکے ننگے مہاجر کراچی پہنچے تو 10جون کو سندھ کے وزیر تعلیم پیر الٰہی بخش نے اعلان کر دیا کہ پنجاب اور گودھرا کے علا وہ دیگر مقامات سے آنے والوں کو مہاجرین نہیں سمجھا جائے گا اور انہیں کسی بھی قسم کی سہولت دینے سے انکار کر دیا گیا۔ ذوالفقار مرزا بھی آج یہی کہتے ہیں کہ یہ اردو بولنے والے بھوکے ننگے سندھ میں آئے اور ہم نے انہیں پناہ دی ان کو کھانے کیلئے دیا ان کو پینے کیلئے پانی دیا اب یہ ہمیں آنکھیں دکھاتے ہیں انہوں نے حیدرآباد اور کراچی میں اپنے ہمدردوں سے اپیل کی ہے کہ وہ اٹھ کھڑے ہوں اور ان کو یہاں سے بھگا دیں…
بھارت سے ہجرت کرکے آئے ہوئے ان چند بھوکے ننگے مہاجروں میں قائد اعظم محمد علی جناح ہیں جو بمبئی سے ہجرت کر کے پاکستان پہنچے اور اپنی ساری جائیداد پاکستان کے نام کر دی، لیاقت علی خان اپنی تمام جاگیر اور محلات ہندوستان چھوڑ کر پاکستان آئے اور جب گولی لگنے کے بعد آپریشن ٹیبل پر پہنچے تو ڈاکٹروں نے دیکھا کہ ان کی بنیان جگہ جگہ سے پھٹی ہوئی تھی، حبیب فیملی ہندوستان سے اپنے ساتھ بینک اور انشورنس کمپنی اور کراچی میں صنعتوں کیلئے مشینری لے کر آئی، آدم جی اپنے ساتھ کمرشل بینک اور جیوٹ ملیں لے کر آئے… باوانی، ولیکا، فینسی، ،حئی سنز، میمن اور دہلی کمیونٹی کے لوگوں نے کروڑوں روپے ساتھ لا کر کراچی میں صنعتوں کا جال بچھا د یا۔ناظم آباد، گلشن دہلی مرکنٹائل فاران روہیل کنڈ جیسے عالیشان اور بڑے بڑے پلازے یہ سب ان ننگوں بھوکوں نے تعمیر کئے کراچی بھر میں اسپتال اور اسکول قائم کئے جہاں ہر زبان بولنے والے پاکستانی کو مفت علاج اور تعلیم کی سہولت ہے جب بھی سیلاب آتا ہے، کوئی زلزلہ آتا ہے تو یہ بھوکے ننگے سب سے پہلے مدد کیلئے پہنچتے ہیں۔ رمضان المبارک میں ان کی طرف سے رنگ و نسل کی پروا کئے بغیر کراچی میں جگہ جگہ لاکھوں گز کپڑا تقسیم کیا جاتا ہے، دستر خوان سجا دیئے جاتے ہیں تاکہ کوئی ”ان کی طرح“ بھوکا اور ننگا نہ رہے۔ روزنامہ جنگ کراچی نے اپنے18جولائی1949کے اداریئے میں سندھی لیڈران اور عوام سے اپیل کرتے ہوئے لکھا تھا” سندھی عوام کو چاہئے کہ وہ مہاجرین کی مظلومیت اور مشکلات کا برادرانہ احساس کریں اور کوئی ایسی حرکت نہ کریں جس سے مہاجرین کی دل آزاری ہو اور ان کے زخموں کو مزید ٹھیس پہنچے۔ مہاجر خاندان اپنے ہمراہ علم و فن اور تہذیب و تمدن کا جو سرمایہ لے کر آئے ہیں اس کی بدولت ایک دن پورے صوبہ سندھ کی رونق اور خوش حالی کو چار چاند لگ جائیں گے…اور سب نے دیکھا کہ پورے پاکستان سے جس کو روزگار کی ضرورت ہوئی وہ کراچی چلا آیا اور کراچی کی صنعت و تجارت اور تعمیرات نے پورے پاکستان کو اپنے اندر سمو لیا آج پنجابی او رپختون بھائی لاکھوں کی تعداد میں یہاں آباد ہیں لیکن کراچی کا دل چھوٹا نہیں ہوا․․․․

لیکن یکم مئی1950 کو اس وقت کے ایک مرکزی وزیر نے پریس کانفرنس کرتے ہوئے کہا” اب مزید مہاجرین کی آباد کاری کیلئے گنجائش نہیں رہی اگر فالتو مہاجرین کراچی سے نہ گئے تو کراچی شہر غلاظت کا ڈھیر بن جائے گا انہوں نے مشورہ دیتے ہوئے کہا کہ میں آج ہی دہلی سے پہنچا ہوں بھارت میں حالات بہتر ہو گئے ہیں اس لیئے یہ مہاجرین اب اپنے گھروں کو واپس چلے جائیں بھارتی حکومت ان کا خیر مقدم کرے گی اور اس پریس کانفرنس کے ایک ماہ بعد دو جون کو سندھ حکومت نے مرکزی حکومت کو مطلع کرتے ہوئے مہاجرین کی آباد کاری کے اپنے حصے کے پچاس فیصد اخراجات برادشت کرنے سے انکار کر دیا۔جس سے چند روز بعد لالو کھیت، بزرٹا لائنز کے علا قوں میں قائم جھونپڑیوں سے سندھ حکومت نے 33 ہزارمہاجرین کو زبردستی بے دخل کرتے ہوئے کھلے آسمان تلے پناہ لینے پر مجبور کر دیا جولائی میں کراچی میں موسلا دھار بارشیں شروع ہو گئیں اور موسم کی سختی اور وبائی امراض سے ان میں سے 166 افراد لقمہ اجل بن گئے ان میں ہندوستان سے زندہ بچ کر آنے والی اکیلی عورت کی کل کائنات اس کے دو بچے بھی شامل تھے۔

ایسا لگتا ہے کہ ذوالفقار مرزا آج سے تین سو سال پہلے کے کوئی حکمران ہیں جبھی تو شیر شاہ میں تیرہ افراد کے قاتل اس طرح آزاد ہوئے ہیں جیسے انہوں نے قتل نہیں بلکہ شوٹنگ کے کسی مقابلہ میں اول پوزیشن حاصل کی ہے مرزا صاحب کی ایسی ہی حرکتوں اور اب ان کی تقریر کے بعد کراچی شہر کی کچھ دیواروں پر کراچی کو صوبہ بنانے کی جو چاکنگ کی گئی ہے اس پر کچھ لوگ لاشوں کے ڈھیر لگانے کی بات کر رہے ہیں ان کی خدمت میں عرض ہے کہ کراچی کو صوبہ بنانے کا مطالبہ آج سے58 سال قبل پاکستان کی خالق جماعت مسلم لیگ نے 21-22اکتوبر1953کو اپنے صوبائی اجلاس میں کیا تھا بائیس اکتوبر کو کراچی مسلم لیگ کونسل کے اجلاس میں احمد ای ایچ جعفر نے کراچی کو علیحدہ صوبہ بنانے کی قرار داد پیش کی جس کے حق میں81اور مخالفت میں صرف 3ووٹ آئے۔

تحریر: منیراحمد بلوچ

بشکریہ روزنامہ جنگ

کراچی، پختون، مہاجر اور زرداری

2011-07-12T11:03:00.005+05:00

پختون فکری جرگہ کے چیئرمین امیرحمزہ مروت زندگی کے بہاروں کی نصف صدی کب کی مکمل کرچکے ہیں لیکن جذبے ان کے اب بھی جوان ہیں۔صاحب مطالعہ شخصیت ہیں اور بھرپور سیاسی زندگی گزاری۔خان عبدالولی خان کے قریبی ساتھی رہے، ان کی جماعت کی مرکزی ورکنگ کمیٹی کے رکن رہے ۔ یہ جماعت بدل گئی تو انہوں نے بدلنے سے انکار کیا اور 1995ء میں اسے خیر باد کہہ دیا البتہ جب تک یہاں رہے خان عبدالولی خان کے بااعتماد افراد کی صف میں رہے اور وہ سندھ سے متعلق اہم معاملات ان کے ذریعے نمٹاتے رہے۔ پچھلے دنوں میرے دفتر تشریف لائے ۔ سندھ کے ماضی اور حال پر تفصیل سے گفتگو ہوئی۔تاریخ کے صفحات الٹتے ہوئے انہوں نے بعض ایسے واقعات سنائے کہ جو عجیب و غریب ہونے کے ساتھ ساتھ نہایت دلچسپ بھی تھے۔

امیرحمزہ مروت نے بتایا کہ” سنہ چھیاسی (86ء) کے فسادات کے بعد خان عبدالولی خان اور خود الطاف حسین یہ جتن کررہے تھے کہ پختونوں اور اردو بولنے والوں کے مابین تناؤ کا خاتمہ ہو۔ جب الطاف حسین جیل میں تھے تو خان عبدالولی خان کوشش کررہے تھے کہ وہ جیل جاکر ان سے ملاقات کریں لیکن حکومت سندھ اجازت نہیں دے رہی تھی۔ ان دنوں حاکم علی زرداری اے این پی کے مرکزی سینئر نائب صدر اور عالم شاہ صوبائی صدر تھے ۔ چونکہ خان صاحب کو بھی شک ہوا تھا کہ حاکم علی زرداری آگ کو ٹھنڈا کرنے کی بجائے مزید بھڑکانا چاہتے ہیں، اس لئے وہ ایم کیوایم کے رہنماؤں کے ساتھ رابطہ میرے (امیرحمزہ مروت) ذریعے کررہے تھے ۔ اس دوران زرداری صاحب نجی محفلوں میں کہا کرتے تھے کہ ”دو چور ہماری سرزمین پر آکر لڑرہے ہیں ، ان کولڑنے دو“۔ ولی خان کو الطاف حسین سے ملاقات کے لئے جیل جانے کی اجازت تو نہ ملی لیکن وہ ایک جلسے کے لئے کراچی آئے۔ اسی جلسے میں تقریر کے دوران حاکم علی زرداری نے ایم کیوایم کے خلاف نہایت سخت زبان استعمال کی اور یہ تاثر دینے کی کوشش کی کہ وہ پختونوں کے بہت غمخوار ہیں۔ انہوں نے اشتعال دلانے کے لئے اردو بولنے والوں کو نازیبا القابات سے بھی پکارا لیکن جب ولی خان تقریر کے لئے آئے تو انہوں نے یکسر دوسری لائن لے لی۔ پہلے انہوں نے اردو میں تقریر کرتے ہوئے کہا کہ مہاجر کے ساتھ پختون کا کوئی جھگڑا نہیں ۔ جو کام مہاجر کرتا ہے وہ پختون نہیں کرسکتا اور جو پختون کررہے ہیں وہ مہاجر نہیں کرتا۔ وہ دونوں ایک دوسرے کے حریف نہیں بلکہ ضرورت ہیں اور یوں ان کی لڑائی کا کوئی جواز نہیں۔ پھر انہوں نے پشتو میں تقریر کرتے ہوئے پختونوں کو مخاطب کیا اور ان سے کہا کہ تم لوگ یہاں جنگ اور قبضے کے لئے نہیں بلکہ مزدوری کے لئے آئے ہو۔ اس لئے سب کے ساتھ امن کے ساتھ رہنے کی کوشش کرو۔ ولی خان کی اس تقریر نے فضا بہتر بنائی ۔ پھر ایم کیوایم کی طرف سے بھی رابطے شروع ہوئے اور اے این پی کی طرف سے میں الطاف حسین سے ملتا رہا۔ جب راستہ ہموار ہوا تو پھر افضل خان لالہ اور غلام احمد بلور نے بھی ملاقاتیں کی اور یوں خان عبدالولی خان نائن زیرو تشریف لے گئے ۔ یہاں پر جب خان عبدالولی خان سے اخبارنویسوں نے سوال کیا کہ کیا وہ مہاجروں کو پانچویں قومیت تسلیم کرتے ہیں تو انہوں نے جواب میں کہا کہ انہیں مہاجروں کی الگ قومیت ہونے پر کوئی اعتراض نہیں ، جس پر نہ صرف الطاف حسین نے ولی خان کا شکریہ ادا کیابلکہ اے این پی اور ایم کیوایم کی دوستی کے ایک نئے سفر کا آغاز ہوگیا“۔

میں نے اپنی صحافت کا آغاز کیا تو اے این پی اور ایم کیوایم شیروشکر تھے۔ ایم کیوایم کے قائدین کو پہلی بار بالمشافہ میں نے پشاور میں اے این پی کے جلسوں، کانفرنسوں میں دیکھا یا پھر غلام احمدبلور جیسے لوگوں کے گھر پر ان سے ملاقات ہوجاتی تھی۔اب جبکہ اے این پی اور ایم کیوایم باہم متصادم ہوگئے تو میں سوچتا رہا کہ آخر پچھلے چند ماہ کے دوران ایسا کیا ہوگیا کہ اے این پی اور ایم کیوایم ایک بار پھر کراچی میں مورچہ زن ہوگئے ۔ یہ سوال مجھے بہت پریشان کررہا تھا لیکن امیرحمزہ مروت صاحب کی ملاقات نے میری مشکل آسان کردی۔ میں سمجھ گیا کہ کیوں زرداری صاحب اور ان کے ذولفقار مرزا جیسے چہیتوں کے مقتدر بننے کے بعد اے این پی اور ایم کیوایم لڑائی میں مصروف ہوکر پختونوں اور اردو بولنے والے معصوموں کے قتل عام کی راہ ہموار کرنے لگی ہے۔ مروت صاحب نے تو مشکل آسان کردی تھی لیکن معمہ مکمل طور پر اسلام آباد کے سیاسی حلقوں میں سرگرم، اندر کی ایک خبر نے حل کردیا۔ان ذرائع کے مطابق چند روز قبل ایوان صدر میں مسلم لیگ (ق) کے سربراہ چوہدری شجاعت حسین اور ان کے ساتھیوں کے ساتھ میٹنگ ہورہی تھی۔ گفتگو اردو اور پنجابی میں ہورہی تھی۔ کراچی کا تفصیل سے ذکر ہوا تو صدر آصف علی زرداری محفل میں شریک ایک سندھی وزیر کومخاطب کرکے تفاخرانہ انداز میں کہنے لگے کہ ”میری سیاست کو مانتے ہوکہ نہیں،کس طرح میں نے پختونوں اور مہاجروں کو الجھا رکھا ہے“۔ کہتے ہیں کہ ہوشیار پرندہ پھنستا نہیں اور جب پھنستا ہے تو پھر بیک وقت اس کے دونوں ٹانگیں جال میں پھنسا کرتی ہیں ۔ زرداری صاحب گاہے بگاہے پنجابی میں تقریر کرلیتے ہیں اور فخر سے کہتے رہتے ہیں کہ وہ پنجابی سیکھ گئے ہیں لیکن وہ یہ بھول گئے تھے کہ محفل میں شریک کوئی پنجابی بھی سندھی سمجھ سکتا ہے۔ چنانچہ محفل میں شریک ایک فرد جو سندھی سمجھ رہا تھا ،نے یہ بات باہر نکال دی اور ان دنوں اسلام آباد کے حلقوں میں زیربحث رہتی ہے ۔

اے این پی سندھ کے صدر شاہی سید تو سیاست میں دماغ کا استعمال بہت کم کرتے ہیں لیکن نہ جانے ایم کیوایم کے پڑھے لکھے اور ذہین قائدین کو کیا ہوگیا ہے جو اس کھیل کو سمجھ نہیں رہے ہیں اور بھڑک بازو ں کی چالوں میں آکر استعمال ہورہے ہیں ۔ وہ بھڑک باز جو کراچی میں کسی قاتل اور بندوق بردار کا راستہ تو نہیں روک سکتے لیکن نہتے رپورٹر اور کیمرہ مین پر اپنی بدمعاشی کا رعب جماتے ہیں ۔ جن کی بہادری کا یہ عالم ہے کہ آج تک اپنی قائد کے قاتلوں کا نام زبان پر نہیں لاسکتے لیکن جیونیوز کے نہتے رپورٹر اور کیمرہ مین کے گلے سے آفس کارڈ چھین کر بہادر ہونے کا تاثر دے رہے ہیں۔ اپنی حکومت میں پولیس اور فوج کے بغیر گھر سے باہر نکل نہیں سکتے۔ صحافی اور اینکرز تو بغیر سیکورٹی کے کراچی سے وزیرستان تک گھوم پھررہے ہیں لیکن یہ بہادر تو ذرا ایک دن پولیس کی فوج کے بغیر کراچی میں گھوم کر دکھادیں۔دوسروں کو لڑواکر اپنے مقاصد حاصل کرنے سے ایک انسان سازشی کا خطاب تو پا سکتا ہے لیکن بہادروں کی صف میں شمار نہیں ہوسکتا۔ بہادر کبھی کمزور پر ہاتھ نہیں اٹھاتا۔ پولیس اور مسلح افراد کے لاؤ لشکر کے ساتھ ایک نہتے رپورٹر اور کیمرہ مین کو دھمکیاں دینا بہادری نہیں۔ کسی نے بہادر بننا ہے تو کراچی کے ہر سندھی، ہر مہاجر اور ہر پختون کی زندگی اجیرن کرنے والے بدمعاشوں اور قاتلوں کو روک کر دکھادے۔ سندھ کے معصوم عوام کو ڈاکوؤں سے نجات دلادے اور ہمہ وقت روتی ہوئی بلوچ ماؤں کے آنسو پونجھ کر دکھادے۔

تحریر …سلیم صافی

بشکریہ روزنامہ جنگ

کراچی میں پائیدار امن ہوگیا؟

2011-07-10T16:26:00.001+05:00

ماضی قریب میں کراچی کئی بار بدامنی کا شکار بنتا رہا ہے، جب میڈیا حکومت کی توجہ بڑی تعداد میں ہونے والی ہلاکتوں کی جانب دلاتا ہے تو حکومت حرکت میں آتی ہے اور کچھ اقدامات کر کے عارضی طور پر صورتحال پر قابو پاتی ہے کچھ گرفتاریاں اور اسلحہ کی برآمدگی کے بعدپھر خواب خرگوش کے مزے لوٹنے لگتی ہے۔ کچھ عرصے بعد پھر وہی قتل و غارت گری دوبارہ شروع ہو جاتی ہے اور حکومت اپنا آہنی ہاتھ دھونڈنے میں اتنا وقت لگا دیتی ہے کہ درجنوں بے گناہ شہری دہشت گردی کا شکار ہو کر رزق خاک بن جاتے ہیں اور عوام یہی سوچتی رہتی ہے کہ بے گناہ شہریوں کا خون ناحق کب تک بہتا رہے گا اور کب شہر کراچی کو مستقل امن میسر آئے گا؟

شہر قائد میں چار دن بعد ہلاکتوں کاسلسلہ تھم گیااور شہر میں زندگی معمول پر آنے لگی اور شہریوں نے سکھ کا سانس لیا،کاروباری و تجارتی مراکز اورپیٹرول پمپ کھل گئے، سڑکوں پر ٹریفک بحال ہو گیا۔ رینجرز نے کٹی پہاڑی کا مکمل کنٹرول سنبھال لیا اور متاثرہ علاقوں میں چوکیاں قائم کرکے وہاں رینجرزاہلکاروں سمیت کمانڈوزکو تعینات کرکے علاقوں میں گشت شروع کردیاہے، جبکہ رینجرز نے متاثرہ خاندانوں کو ریسکیو بھی کیا اور پھنسے ہوئے لوگوں کو نکال کر محفوظ مقامات پر منتقل کیا۔آپریشن کے دوران بھاری مقدار میں اسلحہ بھی برآمد ہوا۔ پاکستان رینجرزکے ترجمان کے مطابق کٹی پہاڑی اور دہشت گردی سے متاثرہ دیگر علاقوں میں شروع کیا جانے والا آپریشن اب اختتام پذیر ہوگیا ہے اور حکومت کے دعوے کے مطابق امن بحال ہو گیاہے، لیکن کیا یہ امن پائیدار ہے یا دوسری دہشت گردی تک ایک وقفہ ہے؟ آخر کراچی کا اصل مسئلہ کیا ہے؟ کیا یہ سیاسی ہے یا انتظامی اور یا کراچی بین الاقوامی سازش کا شکار ہو گیا ہے؟

کراچی وہ بدنصیب شہر بن چکا ہے جس کے وسائل سے فائدے اٹھانے تو سب آتے ہیں لیکن کوئی اسے اپنانے کو تیار نہیں ہوتا۔ مسائل پیدا کرنے میں تو اپنا حصہ خوب ڈالتے ہیں لیکن مسائل کے حل کے لئے اپنا حصہ ڈالنے پر آمادہ نہیں ہوتے۔ سیاسی جماعتوں نے کراچی پر تسلط کو اپنی انا کا مسئلہ بنایا ہوا ہے ۔

حکومت وقت کے ساتھ ساتھ قانون نافذ کرنے والے اداروں کی لاتعلقی، بے حسی اور چشم پوشی بھی پوری طرح عیاں ہے۔ان کی نظروں کے سامنے دہشت گرد بے دریغ فائرنگ کر کے معصوم شہریوں کو موت کے گھاٹ اتارتے ہیں لیکن وہ کسی کو پکڑنے کی قدرت نہیں رکھتے۔ اگر حکومت نے ان کو ایکشن لینے سے منع کیا ہے یا ایکشن کے حکم کے باوجود دہشت گرد پکڑے نہیں جاتے ، دونوں صورتیں باعث شرم ہیں۔ شہر کراچی متعدد ایسے سانحات دیکھ چکا ہے جہاں قانون نافذ کرنے والے اداروں کی لاتعلقی سے بڑے بڑے نقصانات ہوئے۔ 27 دسمبر 2007 کو راول پنڈی میں بے نظیر بھٹو کی شہادت کے موقع پر کراچی کو بلاوجہ آگ و خون میں نہلادیا گیا اور شہریوں کے جانی نقصانات کے ساتھ تقریباً اٹھارہ ارب روپے کی املاک نذر آتش کی گئی۔ 27 دسمبر 2009 کو سانحہ عاشور کے موقع پر اہم تجارتی مرکز بولٹن مارکیٹ کو دہشت گردوں نے پولیس اور رینجرز کی نظروں کے سامنے لوٹ مار کرکے نذر آتش کیالیکن نہ تو کوئی گرفتاری عمل میں آئی اور نہ ہی سازش کا پردہ چاک ہوا حتی کہ اس کاروائی میں ملوث دہشت گردوں کی وڈیوز اور تصاویر تک منظر عام پر آئیں لیکن کوئی نتیجہ خیز کاروائی نہ ہو سکی۔ فرقہ ورانہ جماعتوں نے بھی کراچی کو اپنی کاروائیوں کا مرکز بنایا ہوا ہے کیونکہ اس وسیع آبادی والے شہر میں ان کو پنپنے کے تمام مواقع میسر ہیں۔ جبکہ اس خطے میں بہترین جگہ بندرگاہ رکھنے کے باعث بڑی طاقتوں کی جیواسٹرٹیجک پالیسیوں کا شکار بھی بن رہا ہے۔

ہر مصیبت میں سب کی داد رسی کرنے والا، سب کو خوش آمدید کہنے والا، سب کے سکھ دکھ میں شریک ہونے والا شہر کراچی اس وقت لہو لہان ہے۔کراچی کا شہری چاہے گھر میں ہو یا بس میں سفر کر رہا ہو ، دہشت گردوں کی گولیوں کا کھلا نشانہ ہے۔

تلخ حقیقت تو یہی ہے کہ کراچی سے اپنی جیبیں بھرنے والی حکومتوں کو اس شہر سے کوئی دلچسپی نہیں ہے اور اگر ہے تو مسائل کے حل کے لئے ان کے پاس کوئی پلان نہیں ہے۔ عارضی اور دکھاوے کے اقدامات سے کراچی کو پائیدار امن نہیں مل سکتا ۔

بشکریہ: روزنامہ جنگ

ادھورے سپنے – ساتویں قسط

2011-06-22T17:25:00.002+05:00

اس پوسٹ کی چٹھی قسط یہاں ملاحظہ فرمائیں

تاریک کمرےکےسامنےکچی اینٹوں کے آنگن میں پائیوں سے محروم چارپائی پر ننھا گڈوصاف ستھرا اور بے داغ کفن اوڑھےابدی نیند سورہا ہے۔ گڈو کے چہرے پر ایک خاص قسم کا اطمینان اور سکون نظر آرہا ہے۔شائد گڈوکو نئی سفید چادر اوڑھ کر سونے کی خوشی ہے۔

ایک ایسی صاف اور بے داغ چادر گڈو نے اپنی زندگی میں کبھی نہیں اوڑھی تھی ۔۔۔۔۔۔۔ یا شائد گڈو اس لئے پرسکون ہے کہ اب جاگنے کے بعد اُسے سوکھی روٹی اور کالی چائے سے ناشتہ نہیں کرنا پڑے گا۔۔۔۔ اور اُسےپھر کبھی بھی بوری لے کر بھوکے پیاسے پیٹ کچروں میں مارا مارا نہیں پھرنا پڑیگا۔۔۔۔ اب کبھی بھی کسی بچےکو کچھ کھاتے پیتے دیکھ کر اُس کو ترسنا نہیں پڑے گا۔۔۔۔ اب وہ تمام مصائب سے آزاد ہو گیا ہے۔۔۔۔ وہ کالی کار کے ڈرائیور کا احسان مند ہے جس نے اُسے بھوک اور پیاس بھری زندگی سے ہمیشہ ہمیشہ کیلئے نجات دلا دی تھی۔۔۔۔زندگی، جس میں گڈو کیلئےسوائے بھوک، آنسوؤں اور جھڑکیوں کے اور کچھ نہ تھا۔۔۔۔اُسے ایسی خود غرض دنیا کو چھوڑ کر جانے کا کوئی افسوس نہ تھا۔۔۔۔۔لیکن اُسے ماں سے جدا ہونے کا افسوس ضرور تھا۔۔۔۔ ماں، جواُس کی دکھ بھری زندگی میں جینے کا واحد سہارا تھی۔۔۔۔ ماں جوگرمیوں کی تپتی دوپہر میں کسی مہربان بادل کی طرح تھی۔۔۔۔ لیکن شائدگڈو اپنے آخری سفر پر بھوکے پیٹ نہیں جانا چاہتا تھا۔وہ ماں سے کچھ ناراض لگتا ہےجس نے اُسکے لئے پہلے سے روٹی کیوں نہیں پکائی۔۔۔۔ گڈو کو نئی گیند نہ لے سکنے کا بھی دکھ ہے۔۔۔۔۔۔

اس پوسٹ کی آٹھویں قسط یہاں ملاحظہ فرمائیں