TIRUPPUR NEWS

ஆதார் அட்டையை பதிவிறக்கம் செய்ய வாய்ப்பு: திருப்பூர் மாவட்ட அதிகாரிகள் தகவல்

2014-02-03T06:15:00.005-08:00

"ஆதார் அடையாள அட்டை, தபால் மூலமாக வழங்கப்பட்டு வருகின்றன. தேவைப்பட்டால், இணைய தளம் வாயிலாக, ஆதார் அட்டைகளை பதிவிறக்கம் செய்து கொள்ளலாம்,' என, திருப்பூர் மாவட்ட அதிகாரிகள் தெரிவித்துள்ளனர்.

திருப்பூர் மாவட்டத்தில் கடந்த நான்கு மாதங்களாக, தேசிய மக்கள் தொகை பதிவேடு, ஆதார் அடையாள அட்டைக்கான பதிவு முகாம் நடந்தது. கடந்த டிச., மாதம், முதல்கட்ட முகாம் நிறைவடைந்தது. மக்கள் தொகை கணக்கெடுப்பு அடிப்படையில், பதிவு முகாம் நடந்ததால், கணக்கெடுப்பில் விடுபட்டவர்களும், இடைப்பட்ட காலத்தில் குடிபெயர்ந்தவர்களாலும் பதிவு செய்ய முடியவில்லை.

விடுபட்ட நபர்கள் பயனடையும் வகையில், இரண்டாம் கட்ட முகாம், பிப்., இரண்டாவது வாரத்தில் துவங்க உள்ளது. அதற்காக, அந்தந்த கிராம நிர்வாக அலுவலகம் மற்றும் வரி வசூலிப்பு மையங்களில், படிவம் பெற்று வரும் 7ம் தேதிக்குள் பூர்த்தி செய்து வழங்க வேண்டுமென மாவட்ட நிர்வாகம் அறிவித்தது. கிராம நிர்வாக அலுவலகங்களுக்கு சென்று வருவதில் சிரமம் ஏற்படும் என்பதால், அருகில் உள்ள பள்ளிகளில் படிவம் வழங்கப்பட்டு, திரும்ப பெறப்படுகிறது.

திருப்பூர் மாவட்டத்தில் முதல் கட்டமாக, 15 லட்சத்து 700 நபர்கள் பதிவு செய்துள்ளனர். இது, 67 சதவீதம். பெரும் பாலான மாவட்டங்களில், முதல் கட்ட முகாமில், 70 சதவீதம் நிறைவு செய்யப்பட்டுள்ளது. திருப்பூர் மாவட்டத்தில், வேறிடங்களுக்கு குடிபெயர்வது அதிகளவில் நடப்பதால், மூன்று சதவீதம் குறைவாக நடந்துள்ளது.

ஆதார் பதிவு செய்தவர்களுக்கு, இரண்டு மாதத்துக்குள் டில்லியில் உள்ள தலைமை அலுவலகத்தில் இருந்து, அவரவர் வீடுகளுக்கு தபால் மூலம் ஆதார் அட்டை அனுப்பி வைக்கப்படுகிறது. மொபைல் எண் குறிப்பிட்டிருந்தால், அட்டை தயாரானதும், எஸ்.எம்.எஸ்., அனுப்ப வழிவகை செய்யப்பட்டுள்ளது. சிலருக்கு ஆதார் அட்டைகள் கிடைத்திருந்தாலும், பெரும்பாலானவர்களுக்கு இதுவரை அட்டை குறித்த விவரம் இன்னும் கிடைக்கவில்லை. அதனால், ஆதார் பதிவு செய்துவிட்டு, அடையாள அட்டைக்காக காத்திருப்பவர்கள், இணைய தளம் மூலமாக அட்டையை பதிவிறக்கம் செய்து கொள்ள வழிவகை செய்யப்பட்டுள்ளது.

திருப்பூர் மாவட்ட ஆதார் திட்ட அதிகாரிகள் கூறியதாவது:

மொபைல் போன் மூலமாக, எஸ்.எம்.எஸ்., அனுப்பினால், ஆதார் அட்டை குறித்த தகவல் அனுப்பப்படுகிறது.http://resident.uidai.net.in/web/resident/chekaadhaarstatus என்ற இணைய தள முகவரியில் சென்று தங்களது கார்டு விவரங்களை கண்டறியலாம். ஆதார் அட்டை பதிவை உறுதி செய்த பிறகு,http://eaadhaar.uidai.gov.inஎன்ற முகவரி மூலமாக பதிவிறக்கம் செய்து கொள்ளலாம். சரியான விவரங்களை கொடுத்திருந்தும், அட்டை தவறாக இருந்தால், http://resident.net.in/updatedata என்ற இணைய தள முகவரியில் சென்று, விவரங்களை சரிசெய்து, பிறகு பதிவிறக்கம் செய்து கொள்ளலாம்.

நாடு முழுவதும், ஒவ்வொரு தனிநபருக்கும் தனித்தனியாக ஆதார் எண் வழங்கப்படுவதால், தபால் மூலமாக அட்டை கிடைக்க தாமதம் ஏற்பட்டாலும் கூட, இணைய தளத்தின் மூலமாக பதிவிறக்கம் செய்தும் பயன்படுத்தலாம். மேலும் விவரங்களுக்கு, 1800 300 1947 என்ற எண்களில் தொடர்பு கொள்ளலாம். இருப்பினும், பதிவு முகாம்களில் வழங்கப்பட்ட ஒப்புகை சான்றுகளை பத்திரமாக வைத்திருக்க வேண்டும், என்றனர். எஸ்.எம்.எஸ்., எப்படி? மொபைலில், uid (இடைவெளி) status (இடைவெளி) என்று டைப் செய்தபின், பதிவு முகாமின்போது வழங்கிய ஒப்புகை சீட்டில் உள்ள 14 இலக்க எண்ணை டைப் செய்து, 51969 என்ற எண்களுக்கு எஸ்.எம்.எஸ்., அனுப்ப வேண்டும். சிறிது நேரத்தில், ஆதார் அட்டை தொடர்பான தகவல் அனுப்பப்படுகிறது.

அரசு வங்கிகளைக் கொள்ளையடிக்கும் கார்ப்பரேட் முதலாளிகள் !

2014-01-20T21:29:00.001-08:00

மொத்தக் கடன் தொகையில் 50% இந்த தனியார் கார்ப்பரேட் முதலாளிகளால் சூறையாடி தீர்க்கப்பட்டிருக்கின்றன.

இந்தியாவின் 100 முன்னணி கார்ப்பரேட் நிறுவனங்கள் அடுத்த 15 மாதங்களில் ரூ 2.1 லட்சம் கோடி மதிப்பிலான வங்கிக் கடன்களை புதுப்பிக்க உள்ளன. அதாவது, அடுத்த 15 மாதங்களில் இந்நிறுவனங்கள் கட்ட வேண்டிய கடன்களின் காலக் கெடு முடிவுக்கு வருகின்றது, அந்தக் கடன்களுக்கு மாற்றாக புதிய கடன்களை வங்கிகள் கொடுக்கப் போகின்றன. காலாவதியாகப் போகின்ற இந்த கடன்களின் மதிப்பு 2013-ம் ஆண்டின் இறுதியில் இந்திய வங்கிகளின் நிகர மதிப்பில் 29 சதவீதம் ஆகும். இந்தத் தகவல்கள் ஃபிட்ச் குழுமத்தைச் சேர்ந்த இந்தியா ரேட்டிங்ஸ் & ரிசர்ச் என்ற நிறுவனத்தால் வெளியிடப்பட்டுள்ளன.

இந்த பட்டியலில் பொதுத் துறை நிறுவனங்களோ, நிதி நிறுவனங்களோ இல்லை. இவை அனைத்தும் உற்பத்தி மற்றும் உட்கட்டமைப்பு துறையில் செயல்படும் தனியார் கார்ப்பரேட் நிறுவனங்கள். தாராளவாத ஆதரவாளர்களால் வியந்து போற்றப்படும் தனியார் துறையின் செயல்திறன் என்பது மீண்டும் மீண்டும் வங்கிப் பணத்தை ஆட்டையைப் போடுவதில்தான் அடங்கியிருக்கிறது. இப்படித்தான் இவர்கள் தொழில் செய்து நாட்டையே முன்னேற்றி வருகிறார்களாம்!

மொத்தக் கடன் தொகையில் சுமார் 24% கடன்களை வைத்திருக்கும் 20 கார்ப்பரேட்டு நிறுவனங்கள், மறு சீரமைப்பு நடவடிக்கைக்கு உட்படுத்த வேண்டிய அளவுக்கு நலிந்து போய் உள்ளன. ஏற்கனவே கடன் கட்டத் தவறியவர்கள் பட்டியலில் உள்ளன. வங்கிகளின் நிகர மதிப்பில் சுமார் 5% கடன்களை வைத்திருக்கும் இந்த நிறுவனங்கள் தமது மறுசீரமைப்பை முடிக்கும் வரையில் அந்தக் கடன் தொகைகளை வங்கிகள் மறந்து விட வேண்டியதுதான்.

இதற்கு மேல், 26% கடன்களை வாங்கியிருக்கும் 20 கார்ப்பரேட்டுகளின் மோசமான நிதி நிலைமையும், குறைவான சொத்து மதிப்பும் இப்போதைய நெருக்கடியான சந்தை நிலைமைகளில் கடன் கொடுக்க தகுதியில்லாதவையாக அவற்றை மாற்றி உள்ளன. இருந்தும் இவற்றிற்கு புதிய கடன் வழங்கா விட்டால் அவை மறுசீரமைப்பு தேவைப்படும் நிலைக்குப் போய் விடலாம். அதனால், இந்த நிறுவனங்களுக்கும் கொடுத்த காசை வர வேண்டியதாக காட்டுவதற்கே கூடுதல் கடன் கொடுத்தே தீர வேண்டிய நிலை வங்கிகளுக்கு.

அதாவது, மொத்தக் கடன் தொகையில் 50% இந்த தனியார் கார்ப்பரேட் முதலாளிகளால் சூறையாடி தீர்க்கப்பட்டிருக்கின்றன. அவர்களது நிறுவனங்களை மறுசீரமைக்க, அல்லது மறுகடன் வழங்குவதற்கு வங்கிக் கடன்கள் அல்லது வரிச்சலுகைகள் என்ற பெயரில் மக்கள் மீது இன்னும் சுமை ஏற்றப்படும்.

முன்னணி 100 கார்ப்பரேட்டுகளில் 26 மட்டுமே வங்கிகளின் விதிமுறைகளின்படி மிதமான வட்டி வீதத்தில் புதிய கடன் வாங்கும் நிலையில் உள்ளன.

இந்த கார்ப்பரேட்டுகளின் நிதிநிலைமை எப்படி இருந்தாலும் வங்கிகளுக்கு வேறு வழியில்லை, இந்திய முதலாளிகளின் பொருளாதாரத்தைக் காப்பாற்றவும், தம்மையே காப்பாற்றிக் கொள்ளவும் எப்படியாவது முயற்சித்து கடன் கொடுத்து இந்த நிறுவனங்களை பாதுகாத்தே தீர வேண்டும் என்பதுதான் நிதர்சனம்.

கல்விக் கடன் கட்டாத மாணவர்களின் புகைப்படங்கள் நாளிதழ்களில் வெளியிடப்படுவது போல இந்த முதலாளிகளின் படங்கள் வெளியிடப்படப் போவதில்லை. வாங்கிய கடனை கட்ட முடியாத விவசாயிகளைப் போல இவர்கள் தற்கொலை செய்து கொள்ளப் போவதும் இல்லை.

வங்கிக் கடன்கள் என்ற பெயரில் மக்கள் பணத்தை ஆட்டையைப் போட்டு தொழில் செய்யும் இம்முதலாளிகள் கடனை திரும்பக் கட்டா விட்டாலும் தாம் ஏற்கனவே குவித்து விட்ட சொத்து, சுகங்களை இழந்து விடப் போவதில்லை. வங்கிகளும் அரசும் முடிந்த அளவு புதிய கடன்களும், வரிச் சலுகைகளும் கொடுத்து அவர்களை காப்பாற்றப் போகின்றன. தொழில் செய்வதன் லாபங்களும் ஆதாயங்களும் தனியாருக்கு, அதில் ஏறபடும் நஷ்டங்களும் இழப்புகளும் பொது மக்களுக்கு என்பதுதான் தனியார் மயத்தின் தாரக மந்திரம்.

by வினவு,

http://www.vinavu.com/2014/01/21/top-100-corporates-to-refinance-rs-2-lakh-crore/

திருப்பூர்:உங்கள் பகுதியில் மின் வெட்டு எப்போது?

2013-12-03T17:50:00.001-08:00

திருப்பூர்:மின் பற்றாக்குறையை சமாளிக்க, திருப்பூர் மின் பகிர்மான வட்டத்திற்குட்பட்ட பகுதிகளில் தினமும் நான்கு மணி நேரம் மின் வெட்டு அமல்படுத்தப்படுகிறது. அதற்கான நேரங்களை, மின்வாரியத்தினர் அறிவித்துள்ளனர்.

மின் பற்றாக்குறை காரணமாக மீண்டும் மின் வெட்டு படிப்படியாக அதிகரித்து வருகிறது. தினமும், எட்டு மணி நேரம் முதல் 14 மணி நேரம் வரை அறிவிக்கப்படாத மின் வெட்டு ஏற்பட்டு வந்ததோடு, அடிக்கடி ஏற்பட்டு வருவதால் தொழில் துறையினரும், பொதுமக்களும் கடும் அவதிப்பட்டு வந்தனர். தொழில் துறையினரும், பொதுமக்களும் பாதிக்கப்படுவதால், மின் வெட்டு நேரத்தை அறிவிக்குமாறு வலியுறுத்தினர்.

இதனால், மின் வாரியம் மின் வெட்டு செய்யப்படும் நேரத்தை அறிவித்துள்ளது. துணை மின் நிலையங்கள், பீடர்கள் வாரியாக, தினமும் காலை இரண்டு மணி நேரம், மதியம் இரண்டு மணி நேரம் மின் வெட்டு செய்யப்படுகிறது. தொழில் நிறுவனங்களுக்கு, முடிந்தளவு தொடர்ச்சியாக மின் வினியோகம் வழங்கும் வகையில், மூன்று குழுவாக பிரித்துள்ளனர். வாரத்திற்கு ஒரு முறை சுழற்சிமுறையில் இதனை மாற்றியும் அமைத்துள்ளர்.திங்கள் முதல் சனி வரை, தொழில் நிறுவனங்களுக்கு தனி மின் நிறுத்தமும், ஞாயிற்றுக்கிழமைகளில், வழக்கமாக அந்தந்த பகுதிகளில் செய்யப்படும் மின் நிறுத்தமும் செய்யப்படும் என அறிவிக்கப்பட்டுள்ளது.தொழிற்சாலை மின் இணைப்பு, முதல் குழுவுக்கு இன்று முதல் வரும் 7ம் தேதி வரை, காலை 6.00 முதல் 7.00 மணி வரையும், 9.00 முதல் 12.00 மணி வரையும்,இரண்டாவது குழுவுக்கு, 7.00 முதல் 9.00 மணி வரையும், மாலை 3.00 முதல் 5.00 மணி வரையும், மூன்றாவது குழுவுக்கு 12.00 முதல் 3.00 மணி வரையும், மாலை 5.00 முதல் 6.00 மணி வரையும் மின் நிறுத்தம் செய்யப்படும். வாரத்திற்கு ஒரு முறை சுழற்சி முறையில் மாற்றப்படும். இரவு நேர மின்வெட்டு குறித்து அறிவிக்கப்படவில்லை.

துணை மின் நிலையங்கள் வாரியாக மின் நிறுத்தம் செய்யப்படும் நேரங்கள்.

காலை 6.00 - 8.00 மணி மற்றும் மதியம் 12.00 - 2.00 மணி:

அவிநாசி (சீனிவாசபுரம், ரங்கநாதபுரம், ராயம்பாளையம், சேயூர் ரோடு, சின்னாரிபாளையம், அழகாபுரி நகர், எஸ்.மேட்டுப்பாளையம், செம்மாண்டம்பாளையம், கருமாபாளையம், ரங்கா நகர் உள்ளிட்ட பகுதிகள்).பல்லடம் (அலுத்துபாளையம், கள்ளக்கிணறு, என்.ஜி.,பாளையம், சி.ஜி.,புதூர், மாதப்பூர், சிட்கோ, சித்தம்பலம், கொசவம்பாளையம், உடுமலை, தாராபுரம் ரோடு, அனுப்பட்டி)பழைய திருப்பூர் (முருகம்பாளையம் மெயின்ரோடு, இந்திரா நகர், ஒடக்காடு, அவிநாசி ரோடு, ஐயப்பன் கோவில், புஷ்பா, குமார் நகர் வடக்கு, வளையங்காடு, சாமுண்டிபுரம், எம்.என்.எஸ்., வி.பி.சி.,நகர், பூத்தார் தியேட்டர், சிறுபூலுவப்பட்டி, ஆவாரங்காடு, பி.எஸ்.என்.எல்., குடியிருப்பு, ஓலப்பாளையம், அண்ணா காலனி, அங்கேரிபாளையம் ரோடு, பத்மாவதி புரம், சாமிநாதபுரம் உள்ளிட்ட பகுதிகள்)வேலம்பாளையம் (ராக்கியாபாளையம், அணைப்புதூர், நெசவாளர் காலனி, பெருமாநல்லூர் ரோடு, பூலுவப்பட்டி, அம்மாபாளையம், அனுப்பர்பாளையம்புதூர் உள்ளிட்ட பகுதிகள்)

ஊத்துக்குளி மொரப்பாளையம், நடுப்பட்டி துணை மின் நிலைய பகுதிகளில் மின் நிறுத்தம் செய்யப்படுகிறது.

காலை 8.00- 10.00 மணி மற்றும் மதியம் 2.00 - 4.00 மணி :ஊத்துக்குளி, காடபாளையம், என்.ஜி., பாளையம், முத்தூர், கானூர் புதூர்.பல்லடம் (நாரணாபுரம், ராயபுரம் மற்றும் மங்கலம் ரோடு)திருப்பூர் சந்தை பேட்டை (ஷெரீப் காலனி, குறிஞ்சி நகர், கே.ஜி.,புதூர், வெள்ளியங்காடு, ஆர்.வி.இ., லே அவுட், அரசு மருத்துவமனை, கலெக்டர் அலுவலக பகுதிகள்.திருப்பூர் (ராம் நகர், டவுன் ஹால், அவிநாசி ரோடு, கோர்ட் வீதி)குமார் நகர் (ராமமூர்த்தி நகர், எஸ்.வி.,காலனி, ராமையா காலனி, வெங்கடேசபுரம்)அவிநாசி (நடுவச்சேரி, கந்தம்பாளையம் ரோடு, முத்து செட்டிபாளையம், அவிநாசி டவுன் ஒரு பகுதி), காங்கயம் டவுன், இடையர்பாளையம்.

காலை 10.00 - 12.00 மணி மற்றும் மாலை 4.00 - 6.00 மணி :

வீரபாண்டி, ஆண்டிபாளையம் துணை மின் நிலைய பகுதிகள் (பல்லடம் ரோடு, குப்பாண்டபாளையம், இடுவாய், சீரனம்பாளையம், முருகம்பாளையம், கரைப்புதூர், பாறைகாடு, சுண்டமேடு, கே.ஜி.புதூர்)காளிவேலம்பட்டி, கரடிவாவி, கேத்தனூர், பொங்கலூர், அலகுமலை, கருவலூர் (அனந்தகிரி, நம்பியம்பாளையம்)

காலை 06.00 - 8.00 மணி மற்றும் மதியம் 12.00 - 2.00 மணி :

கானூர் புதூர் (செங்காளிபாளையம்) முதலிபாளையம், பழவஞ்சிபாளையம், நல்லூர் துணை மின் நிலைய பகுதிகள். நேதாஜி அப்பேரல் பார்க், பழைய கோட்டை, அவிநாசி (பழங்கரை), திருப்பூர் சந்தைபேட்டை துணை மின் நிலையத்திற்குட்பட்ட மற்ற பகுதிகள், குமரன் ரோடு துணை மின் நிலைய பகுதிகள், அருள்புரம் பகுதிகள்.

காலை 10.00 - 12.00 மணி மற்றும் மாலை 4.00 - 6.00 மணி :

தெக்கலூர் (சேவூர் துணை மின் நிலையம்), குமார் நகர் துணை மின் நிலையத்திலுள்ள மற்ற பகுதிகள், ஊதியூர், காங்கயம் மற்ற பகுதிகள், எலவந்தி, நாரணாபுரம், பெருமாநல்லூர், முத்தூர், கருவலூர் (நரியம்பள்ளி) அவிநாசி (சுண்டக்காம்பாளையம்) ராசாத்தா வலசு (வேப்பம்பாளையம், சேமலைகவுண்டன் வலசு, தண்ணீர் பந்தல், பி.ஆர்., நகர், பூமாண்டன் வலசு, திருமங்கலம்).

ஏழு ரூபாய்க்கு ஒரு யூனிட் மின்சாரம்; தமிழகத்தில் முதல் முறையாக சூரிய ஒளி மின் உற்பத்தி நிலையம் துவக்கம்

2013-07-15T09:37:00.001-07:00

திருப்பூர் மாவட்டம், காங்கயம் தாலுகா, ஒலப்பாளையத்தில் சென்னை சில்க்ஸ் மற்றும் “டாடா பவர்” நிறுவனங்களின் சார்பில் சுமார் 10 ஏக்கர் பரப்பளவில் சூரிய ஒளி மூலம் மின்சாரம் தயாரிக்கும் நிறுவனம் தனது செயல்பாட்டை ஞாயிற்றுக்கிழமை துவங்கியது.

இதன் துவக்க விழாவில் பங்கேற்று, டாடா சோலார் பவர் நிறுவனத்தின் நிர்வாக துணைத் தலைவர் பி.அருள்குமார் சண்முகசுந்தரம் கலந்து கொண்டு பேசும்போது, தமிழகத்தின் மின் தேவை மிக அதிகமாக உள்ளது. தற்போது நிலக்கரியின் மூலமே 80 சதவீத அளவு மின் உற்பத்தி செய்யப்படுகிறது. அடுத்த 50 ஆண்டுகளில் நிலக்கரி போன்ற கனிம வளங்கள் பூமியில் குறைந்து விடும் நிலை ஏற்பட்டுள்ளது. எனவே மாற்று வழியில் மின் சக்தியை உற்பத்தி செய்ய வேண்டிய நிலையில் உள்ளோம்.

இதனால் என்றும் நிரந்தரமாக கிடைக்க கூடிய சூரிய ஒளி மூலம் மின் ஆற்றலைப் பெற தமிழக, மத்திய அரசுகள பல்வேறு நடவடிக்கைகளில் ஈடுபட்டு வருகின்றன. இதன் முயற்சியாக “டாடா சோலார் பவர்” நிறுவனமும், சென்னை சில்க்ஸ் நிறுவனமும் இணைந்து காங்கயம் அருகே, ஓலைப்பாளையத்தில் ரூ.16 கோடி முதலீட்டில் 10 ஏக்கர் பரப்பளவில் சோலார் பேனல்கள் அமைக்கப்பட்டு, மின் உற்பத்தியை துவக்கியுள்ளோம்.

இந்த சோலார் மின் உற்பத்தி நிலையத்தின் மூலம் தினசரி 5 ஆயிரம் யூனிட் மின்சாரம் தயாரிக்கப்படும்.

30 ஆண்டுகளுக்கு முன் சூரிய ஒளி மூலம் மின் உற்பத்தி செய்வதற்கு ஒரு யூனிட் ஒன்றுக்கு ரூ.800 செலவானது. தற்போது நவீன வளர்ச்சியால் ஒரு யூனிட் மின்சாரம் உற்பத்தி செய்வதற்கு ரூ.7 மட்டுமே செலவாகிறது. எதிர் காலத்தில் உற்பத்தி செலவு இன்னும் குறைய வாய்ப்பு உள்ளது. இந்த நிறுவனத்தில் செய்யப்பட்டுள்ள பொருளாதார முதலீடு அடுத்த 6 ஆண்டுகளில் முளுமையாக திரும்பக் கிடைந்து விடும். அடுத்த 25 ஆண்டுகளுக்கு இந்த உற்பத்தி நிலையம் நல்ல நிலையில் இயங்கும் வரையில் அமைக்கப்பட்டுள்ளது என்றார்.

முறைகேடாக மின்சாரம் பயன்பாடு: பறக்கும் படையினர் ஆய்வு

2013-06-26T19:47:00.005-07:00

திருப்பூர்: திருப்பூரில், மின்வாரிய பறக்கும் படையினர் நடத்திய ஆய்வில், புதிதாக கட்டப்படும் வணிக வளாகத்துக்கு 3.58 லட்சம் ரூபாய் அபராதம் விதிக்கப்பட்டுள்ளது.

மின் இணைப்பை முறைகேடாக பயன்படுத்துவதை கண்டறிந்து, அபராதம் விதிக்கும் வகையில், மின் வாரிய பறக்கும் படை மற்றும் முன்னாள் ராணுவத்தினரை கொண்ட பறக்கும் படை அமைக்கப்பட்டு, திடீர் ஆய்வு மேற்கொள்ளப்படுகிறது. மின்வாரிய ஊழியர்களுக்கே தெரியாமல், திருப்பூரில் இக்குழுவினர் ஆய்வு மேற்கொண்டு வருகின்றனர். அவர்கள் நடத்திய ஆய்வில், மாநகராட்சி அலுவலகத்துக்கு எதிரே, புதிதாக கட்டப்பட்டு வரும் வணிக வளாகத்துக்கு தற்காலிக இணைப்பு பெறாமல், அருகில் உள்ள கட்டடத்தில் இருந்து 10 கிலோ வோல்ட் வரை முறைகேடாக மின்சாரம் பயன்படுத்தப்பட்டுள்ளது. இதை கண்டறிந்து, மூன்று லட்சத்து 58 ஆயிரத்து 934 ரூபாய் அபராதம் மற்றும் 40 ஆயிரம் கூடுதல் கட்டணம் வசூலிக்கப்பட்டுள்ளது. மேலும், பல பகுதிகளில் வணிக மின் இணைப்பு பெற்று, வீடுகளுக்கு பயன்படுத்தி வந்துள்ளதும் தெரியவந்தது.

பறக்கும் படையினர் கூறியதாவது: திருப்பூரில் மின் இணைப்புகளை முறைகேடாக பயன்படுத்துவது அதிகரித்துள்ளது. விவசாயத்துக்கான இலவச மின் இணைப்பு பெற்றவர்கள், விவசாய நிலத்தில் வீடுகளை கட்டி, வாடகைக்கு விட்டுள்ளதோடு, இலவச மின்சாரத்தை பயன்படுத்தி வந்துள்ளனர். இலவச மின்சாரத்தை பயன்படுத்தி, தண்ணீர் எடுத்து விலைக்கும் விற்று வருகின்றனர்; மின்சார திருட்டுக்களும் நடந்து வருகின்றன. முறைகேடு கண்டுபிடிக்கப்பட்டால், அபராதத்துடன், கிரிமினல் குற்றமாக கருதப்பட்டு வழக்கும் பதிவு செய்யப்படுகிறது. ஆய்வுக்குச் செல்லும் பெரும்பாலான பகுதியில், வணிக மின் இணைப்பு பெற்று, "டேரிப்' மாற்றம் செய்யாமல், வீட்டுக்கு பயன்படுத்தி வருவது தெரியவந்தது. இது, மக்களுக்கு வீண் செலவு என்றாலும், புதிய மின் இணைப்பு பெறுவது சிரமம் என்பதால், மாற்றவில்லை என கூறுகின்றனர். இணைப்பு "டேரிப்'பை மாற்றிக்கொள்ளுமாறு, அவர்களுக்கு அறிவுறுத்தி வருகிறோம். இவ்வாறு, பறக்கும் படையினர் தெரிவித்தனர்.

| ஊத்துக்குளிக்கு ஆம்புலன்ஸ்பொதுமக்கள் கோரிக்கை Dinamalar

2013-06-24T08:11:00.001-07:00

| ஊத்துக்குளிக்கு ஆம்புலன்ஸ்பொதுமக்கள் கோரிக்கை Dinamalar

திருப்பூரில் தரைமட்ட பாலம் அமைப்பதை எதிர்த்து வழக்கு

2013-06-10T18:08:00.002-07:00

இது தொடர்பாக லோக் சத்தா கட்சியின் மாநில அமைப்புச் செயலாளர் செ. ஈஸ்வரன் தாக்கல் செய்துள்ள மனுவில் கூறப்பட்டிருப்பதாவது:

ஊத்துக்குளி - திருப்பூர் ரயில்வே பாதையில் ராமகிருஷ்ணாபுரம், கொங்கு நகர் ஆகிய இடங்களில் இரண்டு ரயில்வே மேம்பாலம் அமைக்க 2007-ஆம் ஆண்டு நிர்வாக அனுமதி வழங்கப்பட்டது. ஆனால், இந்தத் திட்டம் 2010-இல் மாற்றப்பட்டு வாவிபாளையம் சாலை அருகில் ஒரு மேம்பாலமும், டி.எம்.எப். மருத்துவமனை அருகில் ஒரு தரைமட்டப் பாலமும் அமைக்க முடிவு செய்யப்பட்டது. அதன்படி அமைக்கப்பட்டு வரும் தரைமட்டப் பாலம் பணிகள் முடியும் நிலையில் உள்ளது. இதற்கான அணுகுசாலை நெரிசல் மிகுந்த மிகுந்த குமரன் சாலையுடன் இணைகிறது. இதனால் போக்குவரத்து நெரிசல் இரு மடங்காகி திருப்பூர் நகரமே ஸ்தம்பிக்கும் சூழல் ஏற்பட்டுள்ளது. எனவே, போக்குவரத்து நெரிசல் ஏற்படாத வகையில் ஏற்கெனவே 2007-இல் திட்டமிட்டபடி மேம்பாலம் அமைக்க உத்தரவிட வேண்டும் என அந்த மனுவில் கூறப்பட்டுள்ளது.

இந்த வழக்கை விசாரித்த தலைமை நீதிபதி (பொறுப்பு) ஆர்.கே. அகர்வால், நீதிபதி சத்யநாராயணன் ஆகியோர், இது குறித்து 2 வாரங்களுக்குள் பதிலளிக்குமாறு தமிழக அரசின் நெடுஞ்சாலைத் துறைச் செயலாளர், தெற்கு ரயில்வே பொதுமேலாளர், திருப்பூர் மாவட்ட ஆட்சியர், திருப்பூர் மாநகராட்சி ஆணையர், நகர ஊரமைப்புத் துறை இயக்குநர் ஆகியோருக்கு உத்தரவிட்டனர்.

பெற்றோர் திட்டியதால் வீட்டு விட்டு வெளியேறி பஸ்சில் பரிதவித்த சிறுமி: போலீசார் பெற்றோரிடம் ஒப்படைத்தனர்

2013-05-26T19:07:00.001-07:00

திருப்பூர், மே. 25-

திருப்பூர் மாவட்டம் ஊத்துக்குளி அருகேயுள்ள வெள்ளைய கவுண்டன்புதூர் குட்டைகாடு பகுதியை சேர்ந்தவர் பாலசுப்பிரமணியம். கோவில் அர்ச்சகராக உள்ளார். இவரது மனைவி ரேவதி. இவர்களுக்கு 2 பெண் குழந்தைகள் உள்ளனர். மூத்த மகள் கோவையில் உள்ள மருதமலையில் பாட்டி வீட்டில் வளர்ந்து வருகிறாள். 2-ம் பெண் குழந்தைகள் என்பதால் கணவன்-மனைவி இடையே அடிக்கடி தகராறு ஏற்பட்டது.

6 வயது சிறுமி என்று கூட பாராமல் கவிதாவை அடிக்கடி திட்டி வந்தனர். வழக்கம் போல் நேற்று காலையும் கவிதாவை அவளது பெற்றோர் “வீட்டை விட்டு வெளியே போ” என்று திட்டியதாக தெரிகிறது. இதனால் மன வேதனை அடைந்த சிறுமி கவிதா மருதமலையில் உள்ள பாட்டி வீட்டுக்கு செல்ல முடிவு செய்து ஊத்துக்குளி டவுன் பஸ் நிறுத்தத்தில் நின்று கொண்டிருந்தாள். அந்த வழியாக வந்த பஸ்சில் ஏறிய அவள் மருதமலையில் உள்ள தனது பாட்டி வீட்டில் கொண்டு விடுமாறு கண்டக்டரிடம் கூறினாள். சிறுமியுடன் யாரும் வராததால் சந்தேகமடைந்த டிரைவர் பஸ்சை ஊத்துக்குளி போலீஸ் நிலையத்துக்கு ஓட்டிச்சென்றார். அங்கிருந்த இன்ஸ்பெக்டர் ஜெயபாலனிடம் சிறுமியை ஒப்படைத்து விட்டு கிளம்பிச் சென்றார்.

இன்ஸ்பெக்டர் அந்த சிறுமியிடம் விசாரித்த போது பெற்றோர் என்னை திட்டுகிறார்கள். என்னை மருதமலையில் உள்ள பாட்டி வீட்டில் கொண்டு விட்டு விடுங்கள். பெற்றோர் வீட்டுக்கு போக மாட்டேன் என்று அடம் பிடித்தாள். இன்ஸ்பெக்டர் அந்த சிறுமியை சமாதானம் செய்தார். பின்னர் சிறுமி கூறிய அடையாளப்படி அவளது வீட்டை கண்டு பிடித்து சிறுமியை ஒப்படைத்தனர்.

சிறுமியின் பெற்றோரை இன்ஸ்பெக்டர் கடுமையாக எச்சரித்தார். இந்த சம்பவம் ஊத்துக்குளி பகுதியில் பெரும் பரபரப்பை ஏற்படுத்தியது.

http://www.maalaimalar.com/2013/05/25115901/scolded-the-girl-leave-home-po.html

மின்வெட்டு நேரம் குறைந்தும் பயனில்லை : தாழ்வழுத்த மின் சப்ளையால் அவதி

2013-05-26T09:57:00.000-07:00

திருப்பூர்:காற்றாலை மின்சாரம் கை கொடுப்பதால், மின்வெட்டு நேரம் வெகுவாக குறைந்துள்ளது. அதேநேரத்தில், மின்னழுத்தம் குறைவு காரணமாக, கிடைக்கும் மின்சாரத்தை பயன்படுத்த முடியாத நிலை ஏற்பட்டுள்ளதோடு, மின் உபகரணங்கள் பழுதாவதால், பொதுமக்கள் அவதிப்படுகின்றனர்.திருப்பூர் மின் பகிர்மான வட்டத்தில், பனியன் நிறுவனங்கள், ஆயில், அரிசி, இயந்திர உற்பத்தி தொழிற்சாலைகள், வணிகம் மற்றும் வீட்டு மின் இணைப்புகள் என ஐந்து லட்சம் இணைப்புகள் வரை உள்ளன. தினமும் சராசரியாக 500 மெகாவாட் மின்சாரம் பயன்படுத்தப்படுகிறது. மின் பற்றாக்குறை காரணமாக, கடந்த சில ஆண்டுகளாக, தொழில் துறையினர் மட்டுமின்றி, பொதுமக்களும் கடுமையாக பாதிக்கப்பட்டு வந்தனர்.கடந்த இரு வாரங்களாக, காற்றாலை மின்னுற்பத்தி கிடைப்பதால், மின்வெட்டு நேரம் வெகுவாக குறைந்துள்ளது. சில நாட்கள் 24 மணி நேரமும் மின்சாரம் கிடைத்தது. தொழில் துறையினரும், பொதுமக்களும் மகிழ்ச்சியடைந்திருந்த நேரத்தில், கடந்த சில நாட்களாக தாழ்வழுத்த மின் வினியோகம் காரணமாக, கடும் பாதிப்பு ஏற்பட்டுள்ளது.இயந்திரங்களை இயக்கமுடியாமல், ஜெனரேட்டர்களையே பயன்படுத்த வேண்டிய நிலை ஏற்பட்டுள்ளதாக தொழில் துறையினரும், வீடுகளில், மிக்ஸி, கிரைண்டர், பிரிட்ஜ் உள்ளிட்ட மின் சாதனங்களுக்கு போதிய மின்சாரம் கிடைக்காமல் இயக்க முடியாத நிலை ஏற்பட்டுள்ளதாக பெண்களும் தெரிவித்தனர். "பீக் அவர்ஸ்' எனப்படும், மாலை 6.00 முதல் 9.00 மணி வரை, மிகவும் குறைந்தழுத்த மின்சாரம் மட்டுமே சப்ளையாகிறது; அதனால், மின் உபகரணங்கள் பழுதாகி வருகின்றன.

மின்வாரியத்தினர் கூறியதாவது:காற்றாலைகளில் கிடைக்கும் மின்சாரம் நிலையில்லாமல் உள்ளதே, தாழ்வழுத்த மின்சாரம் சப்ளையாவதற்கு காரணம். உயரழுத்த மற்றும் தாழ்வழுத்த மின்சாரத்தை, சீராக வழங்குவது துணை மின் நிலையங்களின் பணி, அங்கு, "டேப்செட்டிங்ஸ்' எனப்படும், தானியங்கி அமைப்பு, மின்சாரத்தை சீராக வழங்கும் பணியில் ஈடுபடும். இடைவெளி, ஓரளவு வரும்போது இந்த அமைப்பு செயல்படும். தற்போது, தாழ்வழுத்த மின்சாரம் மட்டுமே வருவதால், இந்த அமைப்பு செயல்பட முடியாத சிக்கல் ஏற்பட்டுள்ளது."மேனுவல்' முறைக்கு மாற்றும்போது, ஏற்றத்தாழ்வு உருவாகும்போது, கார்பன் காஸ் உருவாகி, டிரான்ஸ்பார்மர் பாதிக்கும். இதனால், ஆட்டோமேட்டிக் அமைப்பு

மட்டுமே செயல்பட வேண்டும் என உத்தரவு பிறப்பிக்கப்பட்டுள்ளது.ஒரு துணை மின் நிலையத்துக்கு, கடந்த சில நாட்களாக சராசரியாக வந்த மின்சாரத்தை அளவிட்டு, "மேனுவல்' முறைக்கு மாற்றலாம். இதுகுறித்து உயரதிகாரிகளே முடிவு செய்ய வேண்டும். இது, திருப்பூரில் மட்டும் உள்ள பிரச்னை அல்ல; மாநிலம் முழுவதும் உள்ள பிரச்னை, என்றனர்.மேற்பார்வை பொறியாளர் நிர்மலதாவிடம் கேட்ட போது, ""காற்றாலை மின்சாரம், சீராக கிடைப்ப தில்லை; துணை மின் நிலையங்களுக்கு மின்சாரம் வருவது குறித்து ஆய்வு செய்யப்பட்டுள்ளது. உயரதிகாரிகளின் ஆலோசனை பெற்று, விரைவில் சீராக மின்சாரம் வினியோகிக்க நடவடிக்கை எடுக்கப்படும்,'' என்றார்.சில நாட்கள் 24 மணி நேரமும் மின்சாரம் கிடைத்தது. தொழில் துறையினரும், பொதுமக்களும் மகிழ்ச்சி அடைந்திருந்தனர். ஆனால், சில நாட்களாக தாழ்வழுத்த மின்சாரம் சப்ளையாவதால், கடும் பாதிப்பு ஏற்பட்டு வருகிறது.

மின்சார கட்டுப்பாடுகளை தளர்த்த சாய ஆலை சங்கத்தினர் கோரிக்கை

2013-05-19T07:07:00.003-07:00

திருப்பூர்:"காற்றாலை மின்னுற்பத்தி அதிகரித்துள்ளதால், உயரழுத்த மின்சார பயன்பாட்டுக்கான கட்டுப்பாடுகளை தளர்த்த வேண்டும்,' என, திருப்பூர் சாய ஆலை உரிமையாளர்கள் வலியுறுத்தியுள்ளனர்.இச்சங்க தலைவர் நாகராஜன், தமிழக மின்துறை அமைச்சருக்கு அனுப்பியுள்ள கடிதம்:சில நாட்களாக, காற்றாலை மின்னுற்பத்தி கணிசமான அளவு உயர்ந்து, தொழில் துறையினருக்கு உதவி வருகிறது. வரும் ஆறு மாதங்களுக்கு மின்னுற்பத்தி அதிகரித்து, உயரழுத்த மின்சாரத்தை பயன்படுத்துவோருக்கு சீரான மின் வினியோகம் கிடைக்கும் என்ற நம்பிக்கை ஏற்பட்டுள்ளது.தற்போதைய நிலவரப்படி, 24 மணி நேரத்தில் 3,000 முதல் 3,500 மெகாவாட் வரை மின்னுற்பத்தி நடக்கிறது. எனினும், உயர் மின்னழுத்த இணைப்பில் தேவையான அளவுக்கு மின்சாரம் பயன்படுத்த முடிவதில்லை.மொத்த தேவையில், 60 சதவீதத்தை மட்டுமே பெற வேண்டும்; மொத்த மின்திறனில் 60 சதவீதத்தை மட்டும் பயன்படுத்த வேண்டும்; மாலை 6.00 முதல் இரவு 10.00 மணி வரை, உயரழுத்த மின்பயன்பாட்டுக்கு கட்டுப்பாடு விதிக்கப்பட்டுள்ளது.இக்கட்டுப்பாடுகளால், உற்பத்தியாகும் மின்சாரத்தை முழுமையாக பெற முடியவில்லை. காற்றாலை மின்னுற்பத்தியை நிறுத்தி வைக்க வேண்டும் என மின்வாரியம் நெருக்கடி தருகிறது. இதனால், முழு நேர மின்வினியோகம் இருந்தாலும், தடை செய்யப்பட்ட நேரத்தில், ஜெனரேட்டர் மூலம் மின்னுற்பத்தி செய்யப்படுகிறது.மின்சாரம் இருக்கும் நேரங்களில், உயரழுத்த மின்சாரத்தை தேவையான அளவுக்கு பயன்படுத்தவும், உற்பத்தி குறையும்போது, 20 சதவீதம் பயன்பாட்டை குறைக்கவும் நடவடிக்கை எடுக்க வேண்டும். உற்பத்தி சீரான தருணங்களில், மாலை நேர மின்கட்டுப்பாட்டை தளர்த்த வேண்டும், என, அக்கடிதத்தில் கூறியுள்ளார்.

ஈரோடு - பாலக்காடு இடையே நீட்டிப்பு செய்யப்பட்ட பயணிகள் ரயில் சேவை துவங்கியது.

2013-05-12T09:07:00.000-07:00

ஈரோடு - பாலக்காடு இடையே நீட்டிப்பு செய்யப்பட்ட பயணிகள் ரயில் சேவை துவங்கியது.

கேரள மாநிலம், பாலக்காடு - கோவை இடையே பயணிகள் மின்தொடர் ரயில் (இன்ஜின் மட்டும்) சேவை இருந்தது. அந்த ரயிலை, ஈரோடு வரை நீட்டிக்க வேண்டும், என பல்வேறு தரப்பினரும் கோரிக்கை விடுத்தனர். அதையடுத்து, இன்று முதல் (12ம் தேதி), ஈரோடு - பாலக்காடு இடையே, எட்டு பெட்டிகளுடன், பயணிகள் ரயில் சேவை காலை, 11.20 மணிக்கு துவங்கியது.சேலம் ரயில்வே கோட்ட மேலாளர் சுஜாதா ஜெயராஜ், ஈரோடு எம்.பி., கணேசமூர்த்தி ஆகியோர் நீட்டிப்பு செய்யப்பட்ட ரயில் சேவையை துவக்கி வைத்தனர்.பின், கோட்ட மேலாளர், சுஜாதா ஜெயராஜ் நிருபர்களிடம் கூறியதாவது:ஈரோடு ரயில்வே ஸ்டேஷன், 60 லட்சம் ரூபாய் மதிப்பில் மேம்படுத்தப்படும். வாகனங்கள் நிறுத்தும் இடம், பூங்கா, பஸ் நிறுத்தம், முகப்பு விளக்குகள், பழுதான கட்டிடங்கள் சீரமைப்பு உள்ளிட்ட பணிகள் செய்யப்படும். இரண்டு லிஃப்ட் அமைப்பதற்கான அனுமதி கிடைத்துள்ளது.தானியங்கி நடைபாதை அமைப்பதற்கான வாய்ப்புகள் குறித்து ஆய்வு நடத்தப்படுகிறது. ஈரோடு - பழனி இடையே ரயில் சேவை குறித்து அரசின் பரிசீலனையில் உள்ளது. காட்பாடி - சேலம் இடையிலான ரயில் சேவையை, ஈரோடு வரை நீடிக்க வேண்டும் என்ற கோரிக்கை குறித்து பரிசீலிக்கப்படும், என்றார்.ரயில்வே அதிகாரிகள் கூறியதாவது:ரயில்வே அட்டவனைப்படி, நாளை (12ம் தேதி) முதல், பாலக்காட்டில் இருந்து மதியம், 2.30 மணிக்கு புறப்பட்டு, இரவு, 7 மணிக்கு ஈரோடு வந்தடைகிறது.பின், ஈரோட்டில் இருந்து காலை, 7.45 மணிக்கு புறப்பட்டு, மதியம் 12.30 மணிக்கு பாலக்காட்டுக்கு சென்றடைகிறது. வாரத்தில், வியாழக்கிழமை தவிர மற்ற நாட்களுக்கு, தினமும் பயணிகள் ரயிலாக இயக்கப்படும், என்றனர்.சேலம் கோட்ட ஏ.எஸ்.சி., ஆனந்தராஜ், ரயில்வே போக்குவரத்து இன்ஸ்பெக்டர் சிவானந்தம், ஈரோடு மாவட்ட அனைத்து வணிகர் சங்கங்களின் கூட்டமைப்பு தலைவர் சிவநேசன் உட்பட பலர் பங்கேற்றனர்

திருப்பூர் : துணை மின் நிலையத்தில் "ஸ்கேடா ' மைய பணிகள் தீவிரம்

2013-04-11T19:07:00.003-07:00

திருப்பூர், குமார் நகர் துணை மின் நிலைய வளாகத்தில் அமைக்கப்படும், நவீன "ஸ்கேடா' தொழில் நுட்ப மையத்திற்கான, இயந்திரங்கள் சீனாவிலிருந்து கொண்டு வரப்பட்டு, அவற்றை பொருத்தும் பணி நடந்து வருகிறது. தமிழகத்தில், 30 ஆயிரம் மின் இணைப்புகளுக்கு மேல் உள்ள நகரங் களில், மின் மேம்பாடு மற்றும் சீரமைப்பு திட்டத்தின் கீழ், செயற்கைக்கோள் உதவியுடன், முழுவதும் கம்ப்யூட்டர் மயமாக்கப்பட்ட, அதிநவீன தொழில் நுட்பத்தில் "ஸ்கேடா' (மேல் கட்டுப்பாடு மற்றும் விவரங்கள் சேகரித்தல் மற்றும் பகிர்மான மேலாண்மை திட்டம்) மையம் அமைக்கப்படுகிறது. "ஸ்கேடா' மையத்தின் மூலம் மின் பகிர்மானம், மின்கசிவு, மின் துண்டிப்பு, மின் இழப்பு உள்ளிட்ட அனைத்தையும் ஒரே இடத்தில் கண்காணிக்க முடியும்; ஒவ்வொரு மின் பாதையிலும் பயன் படும் மின் அளவும், ஒவ்வொரு மின் நுகர்வோர் பயன்படுத்தும் மின் அளவீடும் தெரிந்துகொள்ள முடியும். "ஸ்கேடா' மையத்திலிருந்து, நவீன தொழில் நுட்பத்தின் மூலம், மின் "ரீடிங்' எடுத்து, பில் அனுப்பவும் முடியும். மின் பாதைகளில் ஏதாவது தடங்கல், துண்டிப்பு ஏற்பட்டால் உடனடியாக "அலர்ட்' தகவல் கிடைப்பதோடு, சரியான இடத்திற்கு உடனே சென்று, அதனை சீராக்கவும் இந்த தொழில் நுட்பம் உதவுகிறது. திருப்பூர், மின் பகிர்மான வட்டத்துக்கு, சீனாவை சேர்ந்த நிறுவனத்தின் மூலம், நவீன தொழில் நுட்ப மையம், குமார் நகர் துணை மின் நிலைய வளாகத்தில் அமைக்கப்படுகிறது. அதிகாரிகள் கூறியதாவது: கட்டுமான பணி முடிந்து, தளவாடங்கள் பொருத்தும் பணி நடந்து வருகின்றன. பெல்ஜியத்திலிருந்து, மையத்துக்கான இயந்திரங்கள் வந்துள்ளன. அந்நாட்டின் பொறியாளர்கள், இயந்திரத்தை பொருத்தி வருகின்றனர்; இம்மாத இறுதிக்குள் பணி நிறைவடையும், என்றனர்.

திருப்பூர் ஆர்வம் காட்டாத மின் நுகர்வோர் வீணாக இருக்கும் தகவல் மையம்

2013-04-10T22:05:00.003-07:00

திருப்பூர், குமார் நகர் துணை மின் நிலைய வளாகத்தில் உள்ள, தகவல் மற்றும் புகார் மையத்தை அணுக மக்கள் ஆர்வம் காட்டாததால், அத்திட்டம் வீணாகி வருகிறது.

திருப்பூர் மின் பகிர்மான வட்டத்தை சேர்ந்த மின்நுகர்வோருக்கு ஏற்படும் மின் சேவை குறைபாடுகளை தெரிவிக்கவும், புதிய மின் இணைப்பு, பெயர் மாற்றம் உள்ளிட்ட தகவல்களை பெறவும், மின்னுற்பத்தி மற்றும் பகிர்மான கழகம் சார்பில், குமார் நகர் துணை மின் நிலைய வளாகத்தில், தகவல் மையம் அமைக்கப்பட்டுள்ளது.

கம்ப்யூட்டர் மயமாக்கப்பட்ட இம்மையத்தில், சுழற்சி முறையில் அலுவலர்கள் பணியாற்றுகின்றனர்; காலை 10.00 முதல் 1.00 மணி வரை, இம்மையம் செயல்படுகிறது. மையம் அமைத்து நான்கு மாதங்களாகியும் சொற்ப அளவிலான மக்களே, இதன் மூலம் பயனடைந்துள்ளனர். மின்நுகர்வோர் ஆர்வம் காட்டாததால், இம்மையம் வீணாகி வருகிறது.

அதிகாரிகளிடம் கேட்ட போது, "தகவல் மையம் அமைத்தும், பொதுமக்களிடம் போதிய விழிப்புணர்வு இல்லை. இம்மையத்தில் புகார் தெரிவித்தால், உடனடியாக தீர்வு கிடைக்கும். தேவையான தகவல்களும், வழிகாட்டுதல்களும் கிடைக்கும். ஆனால், நுகர்வோர், புரோக்கர்களையும், அருகிலுள்ள மின் பணியாளர்களிடமும் கேட்டு வருகின்றனர். இதனால், நுகர்வோருக்கு செலவுதான் அதிகரிக்கும். தகவல் மையத்தை பயன்படுத்த, மின் நுகர்வோர் முன்வர வேண்டும்,' என்றனர்.

ரயில் கட்டணம் உயர்வு திருப்பூரில் அமலுக்கு வந்தது

2013-04-06T04:31:00.000-07:00

திருப்பூர்: ரயில் டிக்கெட் கட்டணம் உயர்வு, திருப்பூரில் அமலுக்கு வந்தது. கடந்த 1ம் தேதி முதல் உயர் வகுப்பு ரயில் டிக்கெட்டுகளுக்கான முன்பதிவு கட்டணம், எக்ஸ்பிரஸ் ரயில்களுக்கான கூடுதல் கட்டணம், தட்கல் கட்டணம், இரண்டாவது வகுப்பு ஏ.சி., மற்றும் மூன்றாம் வகுப்பு ஏ.சி., கட்டணம் உயர்த்தப்பட்டது. திருப்பூரில் இருந்து சென்னை செல்ல, இதுவரை படுக்கை வசதிக்கு 245 ரூபாய்; மூன்றடுக்கு ஏ.சி., 620; இரண்டடுக்கு ஏ.சி., 870; கட்டண உயர்வுக்குபின், படுக்கை வசதிக்கு 255; மூன்றடுக்கு ஏ.சி., 650; இரண்டடுக்கு ஏ.சி., 915. தட்கலில் பதிவு செய்ய, படுக்கை வசதி 345; மூன்றடுக்கு ஏ.சி., 910 மற்றும் இரண்டடுக்கு ஏ.சி., 1,225 ரூபாய். திருப்பதி செல்ல, இதுவரை படுக்கை வசதிக்கு 240; மூன்றடுக்கு ஏ.சி., 600; இரண்டடுக்கு ஏ.சி., 845; கட்டண உயர்வுக்குபின், படுக்கை வசதிக்கு 250; மூன்றடுக்கு ஏ.சி., 635; இரண்டடுக்கு ஏ.சி., 885. இதுவே, தட்கலில் 340, 890 மற்றும் 1,195 ரூபாய். பாட்னா செல்ல, படுக்கை வசதிக்கு 720; மூன்றடுக்கு ஏ.சி., 1,865; இரண்டடுக்கு ஏ.சி., 2,775; கட்டண உயர்வுக்குபின், படுக்கை வசதிக்கு 720; மூன்றடுக்கு ஏ.சி., 1,880; இரண்டடுக்கு ஏ.சி., 2,805; தட்கலில் பதிவு செய்ய 895, 2,240 மற்றும் 3,220 ரூபாய். பெங்களூரு செல்ல, படுக்கை வசதிக்கு 205; மூன்றடுக்கு ஏ.சி., 530; இரண்டடுக்கு ஏ.சி., 755; கட்டண உயர்வுக்குபின், படுக்கை வசதிக்கு 215; மூன்றடுக்கு ஏ.சி., 550; இரண்டடுக்கு ஏ.சி., 780. தட்கலில் பதிவு செய்ய 295, 805 மற்றும் 1,095 ரூபாய்.

திருப்பூர் மக்கும் குப்பையில் இருந்து மின்சாரம் தயாரிக்க...பரிசீலனை!"பயோ மெத்தனேசன் பிளான்ட்' அமைக்க திட்டம்

2013-04-03T17:55:00.000-07:00

திருப்பூர் மாநகராட்சியில் சேகரமாகும் எளிதில் மக்கும் தன்மை கொண்ட குப்பையில் இருந்து எரிவாயு தயாரித்து, அதன் மூலமாக உற்பத்தியாகும் மின்சாரத்தை, தெருவிளக்குகளுக்கு பயன்படுத்தும் திட்டத்தை மாநகராட்சி நிர்வாகம் பரிசீலித்து வருகிறது.திருப்பூர் மாநகராட்சியில் தினமும் 550 மெட்ரிக் டன் அளவுக்கு திடக்கழிவுகள் உருவாகின்றன. அவற்றில், 450 முதல் 500 டன் வரையிலான கழிவுகள் தினமும் சேகரிக்கப்படுகின்றன.

சேகரமாகும் குப்பை, வெள்ளியங்காடு பாறைக்குழியிலும், வேலம்பாளையம் பகுதியில் உள்ள பாறைக்குழிகளிலும் கொட்டப்பட்டு வருகின்றன. கோவில்வழியில் செயல்பட்டு வந்த உரக்கிடங்கு, கோர்ட் வழக்கு காரணமாக மூடப்பட்டுள்ளதால், பொதுமக்களுக்கு இடையூறு ஏற்படாத வகையில், பாறைக்குழிகளில் குப்பைகள் கொட்டப்பட்டு வருகின்றன.இந்நிலையில், அனைத்து மாநகராட்சிகளிலும், குப்பையில் இருந்து மின்சாரம் தயாரித்து பயன்படுத்த வேண்டுமென தமிழக அரசு உத்தரவிட்டுள்ளது.

அதன்படி, நகராட்சி நிர்வாக ஆணையரகம், திருப்பூர் மாநகராட்சிக்கு சுற்றறிக்கை அனுப்பியுள்ளது. அதில், சேகரமாகும் திடக்கழிவுகளில், எளிதில் மக்கும் தன்மை கொண்ட குப்பையில் இருந்து எரிவாயு மின்சாரம் தயாரித்து, தெருவிளக்குகளுக்கு பயன்படுத்த அறிவுறுத்தப்பட்டுள்ளது.தினசரி மார்க்கெட், தென்னம்பாளையம் சந்தைப்பேட்டை, ஆடுவதைக்கூடம் மற்றும் மீன் மார்க்கெட் பகுதிகளில் இருந்து தினமும் 30 டன் அளவுக்கு மக்கும் குப்பைகள் கிடைக்கின்றன.

எனவே, முதல்கட்டமாக, மக்கும் குப்பைகளில் இருந்து எரிவாயு தயாரித்து, அதன் மூலமாக கிடைக்கும் மின்சாரத்தை தெருவிளக்குகளுக்கு பயன்படுத்த 90 லட்சம் ரூபாய் மதிப்பீட்டில் மதிப்பீடு தயாரிக்கப்பட்டுள்ளது.கமிஷனர் செல்வராஜ் கூறியதாவது:மாநகராட்சி பகுதியில் இருந்து தினமும் 30 டன் அளவுக்கு மக்கும் குப்பைகள் சேகரிக்கப்படுகின்றன. சந்தைப்பேட்டை வளாகத்தில் இத்திட்டத்தை செயல்படுத்துவதற்கான "பிளான்ட்' அமைக்க போதிய இட வசதி உள்ளது.

முதல்கட்டமாக, ஐந்து மெட்ரிக் டன் அளவுள்ள குப்பையை கொண்டு, மீத்தேன் வாயுவை உருவாக்கி, அதிலிருந்து மின்சாரத்தை உற்பத்தி செய்து தெருவிளக்குகளுக்கு பயன்படுத்தவும் திட்டமிடப்பட்டுள்ளது. ஆடுவதைக் கூடம் அருகிலேயே "பயோ மெத்தனேசன் பிளான்ட்' அமைக்கவும் உத்தேசிக்கப்பட்டுள்ளது.இத்திட்டத்துக்காக, உத்தேசமாக, 90 லட்சம் ரூபாய் மதிப்பீடு தயாரிக்கப்பட்டுள்ளது. மாநகராட்சி நிதியில் இருந்தும், பொதுமக்கள் பங்களிப்பு மூலமாகவும் இத்திட்டம் செயல்படுத்தப்படும், என்றார்.

திருப்பூரில் கூட்டுறவு சங்க தேர்தல்; வேட்பாளர்கள் பெயர் நீக்கம் : தேர்தல் அதிகாரி ஓட்டம் தினமலர்

2013-03-31T07:20:00.003-07:00

திருப்பூரில், மின்வாரிய கூட்டுறவு கடன் சங்க நிர்வாகிகள் தேர்தலில், வேட்பாளர்கள் பட்டியலில் திடீர் மாற்றம் செய்யப்பட்டது. அதிருப்தி அடைந்த உறுப்பினர்கள் சங்கம் முன் நேற்று திரண்டனர். உடனடியாக, தேர்தல் அதிகாரி அங்கிருந்து கிளம்பிச் சென்றதால் பரபரப்பு ஏற்பட்டது. திருப்பூர் குமார் நகரில், தமிழ்நாடு மின்வாரிய திருப்பூர் கோட்ட பணியாளர்கள் கூட்டுறவு சிக்கன மற்றும் கடன் சங்கம் உள்ளது.

இச்சங்க தேர்தலில் போட்டியிட நேற்று முன்தினம் வேட்பு மனுக்கள் வழங்கப்பட்டன. வேட்பு மனுக்கள் வழங்குவதிலேயே பிரச்னை ஏற்பட்டது. உறுப்பினர்கள் சங்க அலுவலகத்தில் தேர்தல் அதிகாரியை முற்றுகையிட்ட பின், ஒரு மணி நேரம் தாமதமாக மனுக்கள் வழங்கப்பட்டன. தேர்தலில் போட்டியிட 37 பேர் மனு தாக்கல் செய்தனர். இப்பட்டியல் நேற்று முன்தினம் மாலை, சங்கத்தின் அறிவிப்பு பலகையில் ஒட்டப்பட்டது. இந்நிலையில், நேற்று மாலை, அப்பட்டியல் எடுக்கப்பட்டு 11 பேர் கொண்ட பட்டியல் ஒட்டப்பட்டது. இதையறிந்து அதிர்ச்சியடைந்த உறுப்பினர்கள் அங்கு கூடினர். தேர்தல் அதிகாரி கருணாபூபதியை அணுகியபோது, அவர் எதுவும் பதிலளிக்கவில்லை. பத்திரிகையாளர்கள் வந்ததை அறிந்த அவர், சங்க அலுவலகத்தை பூட்டி விட்டு, அவசர அவசரமாக புறப்பட்டுச் சென்று விட்டார். இதனால், அங்கு பரபரப்பு ஏற்பட்டது. சி.ஐ.டி.யு., மாவட்ட செயலாளர் சந்திரன் கூறியதாவது: மனு தாக்கல் முடிந்ததும் 37 பேர் பட்டியல் வெளியிடப்பட்டது. ஆனால், எந்த முகாந்திரமும் இல்லாமல், 11 பேர் பட்டியல் இன்று வெளியிடப்பட்டுள்ளது. இத்தேர்தலில் சி.ஐ.டி.யு., - ஏ.ஐ.டி.யு.சி., - எச்.எம்.எஸ்., - பி.எம்.எஸ்., அம்பேத்கர் சங்கம் உள்ளிட்ட தொழிற்சங்கங்கள் ஒன்றிணைந்து வேட்பாளர்களை நிறுத்தியுள்ளன. இச்சங்கங்களை சேர்ந்த நான்கு பேருடன், ஆளும்கட்சியை சேர்ந்த வேட்பாளர்கள் பெயரையும் சேர்த்து பட்டியல் வெளியிடப்பட்டுள்ளது. இது, எங்கள் அமைப்புகளுக்குள் பிளவை ஏற்படுத்தும், ஜனநாயக படுகொலை என கருதுகிறோம். தொடர் நடவடிக்கை குறித்து சங்க மேலிட ஆலோசனைப்படி நடக்கும்.இவ்வாறு, அவர் தெரிவித்தார். திருப்பூர் மாவட்டத்தில் கூட்டுறவு சங்கத்துக்கான முதல்கட்ட தேர்தலே பெரும் பிரச்னைகளுடன் துவங்கியதால், மாற்றுக்கட்சியினர் பெரும் அதிருப்தியில் உள்ளனர்.

மாணவர் எழுச்சி தினறிய திருப்பூர்....

2013-03-19T10:36:00.003-07:00

இன்று திருப்பூர் அதை சுற்றியுள்ள பகுதியை சேர்ந்த அனைத்து கல்லூரி மாணவர்கள் மனித சங்கிலி போராட்டமும் அதை தொடர்ந்து திருப்பூரின் பிரதான சாலையான குமரன் சாலையில் நான்கு புற வழிகளையும் அடைத்து எழுச்சிமிகு போராட்டத்தை சுமார் 5 மணி நேரத்திற்கு மேல் நடத்தினார்கள். காவல்துறையின் வெற்று மிரட்டல்களை கடந்து அவர்களின் எழுச்சியை கண்டு தினறியது

காவல்துறை. திருப்பூரின் சமிபக கால நிகழ்வில் மொத்த திருப்பூரும் தினறியது இதுவே முதன் முறையாகும், பொதுமக்களும் மாணவ கண்மனிகளுக்கு ஆதரவாக நின்றது நிச்சயம் இப்போராட்டாங்கள் வெல்லும் என்பதை காட்டியது. என் மன்னின் மைந்தர்கள் இன்று திருப்பூர் மாநகரத்தை தினறடித்தது பெரும் மகிழ்சியே..

தாட்கோ கடன் பெற 30ம் தேதி வரை ஆன்லைனில் அவகாசம்

2013-03-17T08:26:00.000-07:00

திருப்பூர்: தாட்கோ மூலம் பொருளாதார மேம்பாட்டு திட்டங்களுக்கு கடன் பெற, வரும் 30ம் தேதி வரை ஆன்லைனில் விண்ணப்பங்கள் வரவேற்கப்படுகின்றன.

கலெக்டர் கோவிந்தராஜ் வெளியிட்ட அறிக்கை: தாட்கோ மூலம் நிலம் வாங்குதல், மேம்படுத்துதல், தொழில் முனைவோர் பொருளாதார மேம்பாட்டுத் திட்டம், இளைஞர்களுக்கான சுயவேலைவாய்ப்பு, டாக்டர் பட்டம் பெற்றவர்கள் மருத்துவமனை அமைத்தல், பெட்ரோல், டீசல், கியாஸ் சில்லரை விற்பனை நிலையம், மகளிர் சுயஉதவிக்குழுக்களுக்கான சுழல்நிதி, பொருளாதார கடனுதவி, துரித மின் இணைப்பு திட்டம், விருப்புரிமை நிதி, இந்திய குடிமைப்பணி முதன்மை தேர்வு எழுதுவோருக்கு நிதியுதவி ஆகியவற்றுக்கு மானியத்துடன் கூடிய கடன் உதவி பெற, இந்து ஆதிதிராவிடர்களிடம் இருந்து விண்ணப்பங்கள், 15 லிருந்து 30ம் தேதி வரை வரவேற்கப்படுகின்றன.

வயது வரம்பு 18 முதல் 55 வரை, இளைஞர்களுக்கான சுய வேலைவாய்ப்புத் திட்டத்திற்கு, வயது வரம்பு 18 முதல் 35 வரை இருக்க வேண்டும். விண்ணப்பிப்போரின் குடும்ப ஆண்டு வருமானம் ஒரு லட்சம் ரூபாய்க்குள் இருக்க வேண்டும். சிறப்புத் திட்டமான பெட்ரோல், டீசல், கியாஸ் சில்லரை விற்பனை நிலையம் அமைக்க குடும்ப வருமானம் மூன்று லட்சம் ரூபாய்க்குள் இருக்க வேண்டும்.

இத்திட்டத்தில் கடன் பெற விரும்புபவர்கள் டttணீ://ச்ணீணீடூடிஞிச்tடிணிண.tச்டஞீஞிணி.ஞிணிட் என்ற இணையதள முகவரிக்கு சென்று விண்ணப்பத்தினை ஆன்லைனில் பதிவு செய்ய வேண்டும். பதிவின் போது ரேஷன் கார்டு எண் அல்லது இருப்பிடச் சான்று, சாதிச் சான்று, வருமானச் சான்று ஆகியவற்றின் எண், வழங்கப்பட தேதி ஆகியவற்றை அதற்கான இடத்தில் அவசியம் பதிவு செய்ய வேண்டும்.

அதுபோல் திட்ட அறிக்கை பெறப்பட்ட தேதியையும் அதற்கான இடத்தில் குறிப்பிட வேண்டும். போட்டோவை ஸ்கேன் செய்து, பதிவேற்றம் செய்ய வேண்டும். தகுதி வாய்ந்த ஆதிதிராவிட இனைத்தை சார்ந்தவர்கள், மேற்குறிப்பிட்டுள்ள பல்வேறு திட்டங்கள் மூலம், மானியம் பெற ஆன்லைனில் விண்ணப்பித்து பயனடையலாம். இவ்வாறு கலெக்டர் தெரிவித்துள்ளார்.

மின் இணைப்பை விரைவாக வழங்கணும்: மாவட்ட நிர்வாகம் உத்தரவு

2013-03-17T08:24:00.000-07:00

திருப்பூர்:"வறட்சியை சமாளிப்பதற்காக அமைக்கப்படும் ஆழ்குழாய் கிணறுகளுக்கு, விரைவாக மின் இணைப்புகளை வழங்க வேண்டும்' என, மாவட்ட நிர்வாகம் உத்தரவிட்டுள்ளது.தமிழகத்திலேயே, திருப்பூர் மாவட்டத்தில்தான் குறைவான மழை பெய்துள்ளது. பருவ மழை பொய்த்ததால், சென்னை நீங்கலாக அனைத்து மாவட்டங்களையும் வறட்சி மாவட்டமாக, தமிழக அரசு அறிவித்துள்ளது. வறட்சியை சமாளிக்கவும், கோடை வெயிலில் தடையில்லா குடிநீர் வழங்கவும் நடவடிக்கை எடுக்க வேண்டுமென, மாவட்ட நிர்வாகங்களுக்கு உத்தரவிடப்பட்டுள்ளது.
திருப்பூர் மாவட்ட அளவில் நடந்த ஆய்வு கூட்டத்தில், மொத்தம் உள்ள 13 ஊராட்சி ஒன்றியங்களிலும் 1.70 கோடி ரூபாய் மதிப்பில் குடிநீர் வினியோக பணிகளை மேற்கொள்ள <முடிவு செய்யப்பட்டது. குடிநீர் பற்றாக்குறையால் தவிக்கும் கிராமங்களில், ஆழ்குழாய் கிணறுகள் அமைத்து, அதன்மூலமாக தண்ணீர் வினியோகம் செய்ய உத்தரவிடப்பட்டது.

ஒவ்வொரு ஒன்றியமும், பொதுநிதியை பயன்படுத்தி குடிநீர் வினியோக பணிகளை மேற்கொள்ளவும் மாவட்ட நிர்வாகம் நிர்வாக அனுமதி வழங்கியுள்ளது. ஆழ்குழாய் கிணறு அமைத்து, மோட்டார் பொருத்திய பிறகும், அதற்கான மின் இணைப்புகளை வழங்குவதில், மின்வாரியத்தினர் தாதம் ஏற்படுத்தி வருகின்றனர். "மின்வாரிய தாமதத்தால், மக்களுக்காக எடுக்கப்படும் நடவடிக்கைகள் பலனளிப்பதில்லை,' என உள்ளாட்சி பிரதிநிதிகள் குற்றஞ்சாட்டுகின்றனர்.

மாவட்ட ஊராட்சி குழு தலைவர் சண்முகம் கூறியதாவது:

பொதுமக்களுக்கு குடிநீர் தட்டுப்பாடு ஏற்படக்கூடாது என்பதை உணர்ந்து, 13 ஊராட்சி ஒன்றியங்களிலும் ஆழ்குழாய் அமைக்கும் பணிகள் துவங்கியுள்ளன. சில ஊராட்சிகளுக்கு மின் இணைப்பு வழங்குவதில் நீண்ட இழுபறி ஏற்பட்டுள்ளது. அனைத்து பணிகளையும் முடித்த நிலையில், மின் இணைப்பு பெறுவதற்காக, ஒப்பந்ததாரர்கள் நடையாய் நடக்கின்றனர்."ஊராட்சிகள் மற்றும் ஒன்றியங்களுக்கு எவ்வளவு பாக்கி இருந்தாலும், குடிநீர் தேவைகளை கருத்தில்கொண்டு, ஆழ்குழாய் கிணறுகளுக்கு போர்க்கால அடிப்படையில் மின் இணைப்பு வழங்க வேண்டும்,' என கலெக்டர் உத்தரவிட்டுள்ளார். அதனால், கடந்த சில நாட்களாக மின் இணைப்பு விண்ணப்பங்கள் மீது வேகமாக நடவடிக்கை எடுக்கப்பட்டு வருகிறது, என்றார்.

திருப்பூர் அருகே ஊத்துக்குளியில் தொடர் திருட்டு * பொதுமக்கள் அச்சம்

2013-03-17T08:18:00.003-07:00

திருப்பூர்: ஊத்துக்குளி அடுத்த நீலக்கோணம்பாளையத்தில், அடிக்கடி திருட்டுகள் நடப்பதால், கிராம மக்கள் அச்சமடைந்துள்ளனர்.

திருப்பூரை அடுத்த ஊத்துக்குளி ஒன்றியத்துக்கு உட்பட்டது நீலக்கோணம்பாளையம். கயித்தமலை கோவில் அடிவாரத்தில், அமைந்துள்ள இக்கிராமத்துக்கு பல ஆண்டுகளாக இப்பகுதிக்கு பஸ் வசதியில்லை; ஊத்துக்குளி ரயில்வே ஸ்டேஷன் பஸ் ஸ்டாப்பில் இறங்கி, கயித்தமலை கோவில் மலைப்பாதை வழியாக 3 கி.மீட்டர் நடந்து ஊருக்கு நடந்து செல்ல வேண்டும்.

விவசாயம் சார்ந்த பணிகள் குறைந்து விட்டதால், அருகிலுள்ள திருப்பூர், பெருமாநல்லூர், செங்கப்பள்ளி, பெருந்துறை பகுதிகளுக்கு, கிராம மக்கள், வேலைக்கு செல்கின்றனர். கடந்த சில நாட்களுக்கு முன், மலைப்பாதையில், ஊருக்கு டூவீலரில் சென்று கொண்டிருந்த வாலிபர்களை மறித்து, கத்தியை காட்டி, இரண்டு பவுன் செயினை பறித்து கொண்டு, வாகனத்தையும் திருடி சென்றனர்.

கடந்த மாதம், நீலக்கோணம்பாளையம் மேற்கு பகுதியில், ஒரு வீட்டுக்கு கதவை, கடப்பாரையால் தட்டிய ஆறு பேர் கொண்ட கும்பல், தாழ்ப்பாளை உடைத்து உள்ளே சென்று, கணவனை கடப்பாரையால் அடித்து , மனைவிடம் ஆறு பவுன் நகையை கொள்ளையடித்து சென்றது. இவ்வாறு தொடர்ச்சியாக திருட்டு சம்பவங்கள் நடப்பது, அக்கிராம மக்களை அச்சத்தில் ஆழ்த்தியுள்ளது.

அப்பகுதியினர் கூறுகையில், "கயித்தமலை ரோட்டில் நடந்து வரும் பெண்களிடம் நகைகளை பறித்து கொள்கின்றனர். மின்விளக்கு வசதி குறைவாக உள்ளது. இதனை சாதமாக்கி கொள்ளும் திருடர்கள், அடிக்கடி பணம், நகைகளை ஊருக்குள் புகுந்து கொள்ளையடிக்கின்றனர். இரவு நேரங்களில் வெளியே நடமாக பயமாக உள்ளது. போலீசார் இரவு ரோந்து பணியை மேற்கொள்ள வேண்டும்' என்றனர்.

400 கிலோவாட் உயர் அழுத்த மின் கம்பிகளில் இருந்து கசியும் மின்சாரம் நிலங்களில் பாய்கிறது தினகரன் செய்தி

2013-02-26T20:32:00.000-08:00

கோபி:கோவை மாவட்டத்திற்கு கூடுதலாக 400 கிலோவாட் மின்சாரம் வழங்குவதற்காக மின்வாரியம் கடந்த 4 ஆண்டுகளுக்கு அளித்த திட்ட முன்மொழிவுக்கு அரசு அனுமதி அளித்தது. இதைத்தொடர்ந்து கடந்த 2010ம் ஆண்டு மேட்டூரில் இருந்து அம்மாபேட்டை, அந்தியூர், கோபி, அவிநாசி வழியாக கோவை மாவட்டத்தில் உள்ள கருமத்தம்பட்டி துணை மின்நிலையத்திற்கு புதிய மின்பாதை அமைக்கும் பணி கடந்த மூன்று ஆண்டுகளாக நடந்து வந்தது. உயரழுத்த மின்சார கோபுரம் அமைக்க நிலம் கையகப்படுத்துதல் மற்றும் மின்சார டவர்கள் அமைக்கப்பட்டு, மொத்தம் 120 கிலோ மீட்டர் தூரத்திற்கு 6 பிரிவுகளாக, ஒவ்வொரு பிரிவிலும் 2 கம்பிகள் கொண்ட மின்பாதை அமைக்கப்பட்டது. 45 மீ. உயரத்தில் அமைக்கப்பட்டுள்ள டவரில் தரை மட்டத்தில் இருந்து 20 மீ. உயரத்தில் மின் கம்பிகள் அமைக்கப்பட்டுள்ளது. கடந்த மாதம் பணிகள் முடிவுற்ற நிலை யில் புதிய மின் பாதையில் மின்சாரம் கொண்டு செல்ல அனுமதி அளிக்கப்பட்டது.

கடந்த 22ம் தேதி மேட்டூரில் இருந்து புதிய மின் பாதையில் சோதனை ஓட்டமாக மின்சாரம் வழங்கப்பட்டது. 400 கிலோ வாட் மின்சாரம் என்பதால் அதன் பாதைகளில் மின்வாரிய அதிகாரிகள் கண்காணித்து வந்தனர். இந்நிலையில் இந்த மின் பாதை செல்லும் வழித்தடமான கோபியை அடுத்த சிறுவலூர் அருகே உள்ள மணியகாரன்புதூரில் உள்ள விளை நிலங்களில் உள்ள பயிர்களுக்கு தண்ணீர் பாய்ச்ச சென்ற விவசாயிகளை மின்சாரம் தாக்கியது. இதனால் அதிர்ச்சியடைந்த அவர்கள் இந்த இடங்களில் இன்டிகேட்டர் வைத்து மின்சாரம் பாய்வதை உறுதி செய்தனர். இதுகுறித்து மின்வாரியத்திற்கு தகவல் தெரிவித்தனர். டவர் அமைத்த ஒப்பந்ததாரர்களும் சோதனை செய்து இதுகுறித்து உயர் அதிகாரிகளுக்கு தகவல் தெரிவித்துள்ளனர். சரி செய்யும் வரை புதிய மின் பாதை யில் மின்சாரம் கொண்டு செல்லக்கூடாது என விவசாயிகள் கோரிக்கை வைத்துள்ளனர். - See more at: http://www.dinakaran.com/News_Detail.asp?Nid=41892#sthash.S0PuGa0j.dpuf

திருப்பூர்: "பார்கோடிங்' கருத்தரங்கு

2013-02-23T10:29:00.000-08:00

திருப்பூர்: தொழில் நிறுவனங்கள், தங்களது"பார்கோடிங்' பதிவு செய்வது தொடர்பான பயிற்சி கருத்தரங்கு, திருப்பூரில் வரும் 25ல் நடக்கிறது.மத்திய அரசின் சிறு, குறு மற்றும் நடுத்தர நிறுவனங்கள் அமைச்சகம் சார்பில், எம்.எஸ்.எம்.இ., வளர்ச்சி நிறுவனம் இயங்கி வருகிறது. அந்நிறுவனம் சார்பில், திருப்பூர் குமார் நகர், கதர் கிராம தொழில்கள் வாரிய வளாகத்தில், "பார்கோடிங்' பயிற்சி கருத்தரங்கு நடத்தப்படுகிறது.

கருத்தரங்கு மூலம், பார்கோடிங் குறித்த விளக்கம், பதிவு செய்யும் வழிமுறை, உள்நாடு மற்றும் வெளிநாடு வியாபாரத்தில் பெறும் நன்மைகள், "பார்கோடிங்' பதிவு செய்வதற்கு, மத்திய அரசின் மானிய திட்டங்கள், மானியம் பெறும் வழிமுறை குறித்து விளக்கப்படும். பயிற்சியில் பங்கேற்க விருப்பமுள்ள, சிறு, குறு மற்றும் நடுத்தர நிறுவனங்கள், தங்களது பெயர்களை பதிவு செய்துகொள்ள வேண்டும். மேலும் விவரங்களுக்கு, 0422 - 2233 956 என்ற எண்ணில் தொடர்புகொள்ளலாம், என, மாவட்ட நிர்வாகம் தெரிவித்துள்ளது.

மீண்டும் அடிக்கடி ஏற்படும் மின்வெட்டு : தொழில் துறையினர் அதிர்ச்சி

2013-02-08T09:09:00.002-08:00

திருப்பூர் :திருப்பூரில் கடந்த இரண்டு மாதமாக மின்வெட்டு நேரம் குறைந்திருந்த நிலையில், மீண்டும் அடிக்கடி மின்வெட்டு ஏற்பட்டதால், தொழில்துறையினர் அதிர்ச்சி அடைந்துள்ளனர்.

திருப்பூரில் நூற்பாலைகள், பின்னலாடை உற்பத்தி, அரிசி, ஆயில் மில்கள், விசைத்தறி, இயந்திரங்கள், பாத்திர உற்பத்தி,கோழி பண்ணைகள், விவசாயம், இயந்திரங்கள் உற்பத்தி என தொழில்கள் அதிகம் உள்ளன. தினமும் சராசரி, 700 முதல் 750 மெகாவாட் வரை, மின்சாரம் தேவைப்படுகிறது.கடந்த இரு மாதங்களாக, நகர பகுதிகளில் இரண்டு மணி நேரம்; கிராம பகுதிகளில் அதிகபட்சமாக நான்கு மணி நேரம் என்ற அளவிலேயே மின்வெட்டு இருந்தது. அடிக்கடி மின்வெட்டு ஏற்படாமல், சீராக குறிப்பிட்ட நேரம் மட்டும் ஏற்பட்டதால், பொதுமக்களும், தொழில் துறையினரும் நிம்மதியடைந்தனர்.

ஆனால், கடந்த சில நாட்களாக மீண்டும் மின்வெட்டு நேரம் படிப்படியாக அதிகரித்து வருகிறது. திடீர், திடீரென மின் நிறுத்தம் செய்யப்படுகிறது. இரண்டு நாட்களாக தினமும் சராசரியாக, எட்டு மணி நேரம் வரை நகர பகுதிகளிலும், கிராம பகுதிகளில் 10 மணி நேரம் வரையிலும் மின் தடை ஏற்பட்டது. இதனால், பொதுமக்களும், தொழில் துறையினரும் அதிர்ச்சி அடைந்துள்ளனர். கோடை காலம் துவங்குவதற்கு முன்பே, மின் வெட்டு நேரம் அதிகரித்துள்ளது; நீர் மின் உற்பத்தி குறைவு, மின் தேவை அதிகரிப்பு ஆகிய காரணங்களால், மின்வெட்டு மேலும் நேரம் அதிகரிக்கும் என்ற அச்சத்தில் மக்கள் உள்ளனர்.

மேற்பார்வை பொறியாளர் நிர்மலதா கூறியதாவது:ரேணிகுண்டா மின் உற்பத்தி நிலையத்தில் ஏற்பட்ட பழுதால், நமக்கு கிடைக்க வேண்டிய, 1,000 மெகாவாட் மின்சாரம் தடைபட்டுள்ளது. இதனால், மீண்டும் மின்வெட்டு நேரம் அதிகரித்துள்ளது. தடையில்லாமல் மின்சாரம் கிடைத்து வந்தபோது, 700 மெகாவாட் வரை திருப்பூர் மின் பகிர்மான வட்டத்தில் பயன்படுத்தப்பட்டது. தற்போது, 480 மெகாவாட் மட்டுமே கிடைத்து வருகிறது. இதனால், மீண்டும் எட்டு மணி நேரம் வரை மின் வெட்டு ஏற்படுகிறது. இரண்டு நாட்களுக்குள் நிலைமை சரியாகும். கோடை காலத்தில், காற்றாலை மூலம் மின் உற்பத்தியாக வாய்ப்புள்ளதால், மின்வெட்டு நேரம் அதிகரிக்க வாய்ப்பில்லை.இவ்வாறு அவர் கூறினார்.

"கோடை வரும் பின்னே... மின் வெட்டு வரும் முன்னே' :

மதுரை உட்பட தென்மாவட்டங்களில், மீண்டும் பல மணி நேர மின் வெட்டு அமலாகி உள்ளது. இது கோடையில் அதிகரிக்கும், என எதிர்பார்க்கப்படுகிறது.சென்னையை தவிர பிற மாவட்டங்களில், 2012 நவ., டிசம்பரில் நாள் ஒன்றுக்கு 18 மணி நேர மின் வெட்டு நடைமுறைப்படுத்தப்பட்டது. 2012 துவக்கத்தில் இருந்தே மழையின்றி நீர்நிலைகள் வறண்டதால், மின் உற்பத்திக்கு வழியில்லை. காற்றாலை மின் உற்பத்தியும் ஏமாற்றியது. சில அனல் மின் நிலையங்களில் ஏற்பட்ட தொழில்நுட்ப கோளாறு காரணமாகவும் மின் உற்பத்தி எதிர்பார்த்த அளவு இல்லை. இதனால் மின்வெட்டு அதிகமானது.

ஜன., துவக்கத்தில் நீர், அனல், காற்றாலை, எரிவாயு மூலம் மின் உற்பத்தி கணிசமாக உயர்ந்தது. இதனால், மின்வெட்டு நேரம் குறைக்கப்பட்டது. இரவில் மின் வெட்டு அமல்படுத்தப்படவில்லை. இந்நிலையில், தென்மாவட்டங்களில் சில நாட்களாக பகல், இரவில் மின் வெட்டு அதிகமாகி உள்ளது. இது கோடையில் மேலும் அதிகரிக்கும், என எதிர்பார்க்கப்படுகிறது. மேட்டூர் நீர் மின் நிலையம், தூத்துக்குடி அனல் மின் நிலையம், பெரியாறு லோயர்கேம்ப்பில் மின் உற்பத்தி முடக்கம், நாள் ஒன்றுக்கு 3000 வரை கிடைக்கக்கூடிய காற்றாலை மின் உற்பத்தி, தற்போது வெறும் 600 மெகாவாட் என்ற நிலையில் நின்று விட்டதே இதற்கு காரணம். குத்தாலம், வழுதூர் இயற்கை எரிவாயு மின் உற்பத்தியில் மந்தநிலை காரணமாக, இந்த மின் வெட்டு நிலவுவதாக மின் வாரிய அதிகாரிகள் கூறினர். தெரிவிக்கிறது.

திருப்பூரில் புத்தக கண்காட்சி 37 பதிப்பகங்கள் பங்கேற்பு

2013-01-23T08:16:00.000-08:00

திருப்பூர் : பின்னல் புக் டிரஸ்ட் மற்றும் பாரதி புத்தகாலயம் சார்பில், திருப்பூர் கே.ஆர்.சி., சிட்டி சென்டரில் புத்தக திருவிழா, வரும் 25ல் துவங்கி, பிப்., 3 வரை நடக்கிறது; தினமும் மாலை கருத்தரங்கு, கலை நிகழ்ச்சிகள் நடைபெற உள்ளன. 37 பதிப்பகங்கள்; 36 விற்பனையாளர்கள்; 11 மல்டி மீடியா நிறுவனங்கள் பங்கேற்று, 120 ஸ்டால்கள் அமைக்கப்பட உள்ளன.

வரவேற்பு குழு தலைவர் சவுக்கத்தலி, செயலாளர் முத்துக்கண்ணன் ஆகியோர் நிருபர்களிடம் கூறியதாவ து:

திருப்பூரில், 10 வது புத்தக திருவிழா நடைபெற உள்ளது. வன்முறை, போதை என சீரழிந்துள்ள சமுதாயத்தை மாற்றவும், மனித மாண்புகளை மீட்கவும், கருத்தியல், சுரண்டலுக்கு எதிராக சமூக விழிப்புணர்வு ஏற்படுத்தும் வகையில், வாசிப்பு அதிகரிக்க வேண்டும் என்ற நோக்கில், புத்தக திருவிழா நடத்தப்படுகிறது.

திருப்பூரில் கிடைக்கும் வரவேற்பை பார்த்து, கடந்தாண்டை விட, 25 பதிப்பாளர்கள் ஆர்வமாக முன்வந்து, பங்கேற்கின்றனர். தினமும் மாலை கருத்தரங்கு, பட்டிமன்றம், கலை நிகழ்ச்சி மற்றும் குறும்படங்கள் வெளியிடப்படும்.

நிகழ்ச்சிகளில், தமிழக அரசின் முதன்மை செயலர் இறையன்பு, அரசு செயலர் தனவேல், ஐ.ஏ.எஸ்., அதிகாரி உதயச்சந்திரன், போலீஸ் டி.ஐ.ஜி., பாரி உள்ளிட்ட அரசு துறை அதிகாரிகள், எழுத்தாளர்கள், கவிஞர்கள், சமூக ஆர்வலர்கள் உள்ளிட்டோர் பங்கேற்று, கருத்துரை வழங்குகின்றனர். புத்தக திருவிழாவை, இந்து சமய அறநிலைய துறை அமைச்சர் ஆனந்தனர் திறந்து வைக்கவும், முதல் விற்பனையை மேயர் விசாலாட்சி துவக்கி வைக்கவும் உள்ளனர், என்றனர்.

திருப்பூரில் இருந்து சென்னை செல்ல, படுக்கை வசதி டிக்கெட் ரூ.245

2013-01-23T08:14:00.000-08:00

திருப்பூர் : சமீபத்தில் உயர்த்தப்பட்ட ரயில் கட்டணம், நடைமுறைக்கு வந்துள்ளது. திருப்பூரில் இருந்து சென்னை செல்ல, படுக்கை வசதியுள்ள ஒரு டிக்கெட், 245 ரூபாய்; இது, பழைய கட்டணத்தில் இருந்து 28 ரூபாய் அதிகம். சாதாரண டிக்கெட், 130 ரூபாய்; இது, 22 ரூபாய் உயர்ந்துள்ளது.சமீபத்தில், ரயில் கட்டணத்தை உயர்த்தி, ரயில்வே துறை அறிவித்தது. புறநகர் சாதாரண இரண்டாம் வகுப்பு கட்டணம் கி.மீ.,க்கு, 2 பைசா, புறநகர் இல்லாத பகுதிகளுக்கு, கி.மீ.,க்கு 3 பைசா உயர்த்தியது. இரண்டாம் வகுப்பு எக்ஸ்பிரஸ் மற்றும் சூப்பர் பாஸ்ட் எக்ஸ்பிரஸ் ரயிலில், கி.மீ.,க்கு, 4 பைசா, இரண்டாம் வகுப்பு படுக்கை வசதி ரயில்களில் 6 பைசா உயர்த்தப்பட்டது. புதிய கட்டண விகிதங்கள் நடைமுறைக்கு வந்துள்ளன.

திருப்பூரில் இருந்து வெளியூர் செல்லும் ரயில்களில் பயணிக்க கட்டண விவரம்:

சென்னைக்கு பழைய சாதாரண கட்டணம் 108 ரூபாய்; ரூ.22 அதிகரித்து, 130 ரூபாயாக உயர்ந்துள்ளது. படுக்கை வசதி பழைய கட்டணம் 217 ரூபாய்; ரூ.28 அதிகரித்து, 245 ஆகியுள்ளது. மூன்றடுக்கு "ஏசி' பழைய கட்டணம் 572; புதிய கட்டணம் 620; இரண்டடுக்கு "ஏசி' பழையது 845; புதியது 870 என அதிகரித்துள்ளது.

பெங்களூரு செல்ல பழைய சாதாரண கட்டணம் 89; புதிய கட்டணம் 105. படுக்கை வசதி பழையது 178; புதியது 205. மூன்றடுக்கு "ஏசி' பழையது 430; புதியது 530. இரண்டடுக்கு "ஏசி' பழையது 730; புதியது 755 ரூபாய்.

மதுரைக்கு பழைய சாதாரண கட்டணம் 66 ரூபாய்; புதியது 80. படுக்கை வசதி பழையது 140; புதியது 160. மூன்றடுக்கு "ஏசி' பழையது 376; புதியது 445 ஆக உயர்ந்துள்ளது. திருப்பதிக்கு இரவில் செல்லும் அதிவிரைவு ரயிலில் பழைய சாதாரண கட்டணம் 85; புதியது 125. படுக்கை கட்டணம் பழையது 191; புதியது 220. மூன்றடுக்கு "ஏசி' கட்டணம் பழையது 524; புதியது 570. இரண்டடுக்கு "ஏசி' கட்டணம் பழையது 785; புதியது 815 ஆக உயர்ந்துள்ளது. பகலில் செல்லும் ரயிலில் உட்காரும் இருக்கை பழையது 120; புதியது 140. "ஏசி' சேர்கார் பழையது 441; புதியது 485 ஆக உயர்ந்துள்ளது.

திருப்பூரில் இருந்து சேலத்துக்கு சூப்பர் பாஸ்ட் எக்ஸ்பிரஸ் 55, எக்ஸ்பிரஸ் 45, பாசஞ்சர் 25, ஈரோடு, கோவைக்கு சூப்பர் பாஸ்ட் 40, எக்ஸ்பிரஸ் 30, பாசஞ்சர் 15, மதுரை எக்ஸ்பிரஸ் 80, பாசஞ்சர் 45, திருநெல்வேலிக்கு எக்ஸ்பிரஸ் 115, பாசஞ்சர் 65, நாகர்கோவில் எக்ஸ்பிரஸ் 130, பாசஞ்சர் 75, பாலக்காடு சூப்பர் பாஸ்ட் 55, எக்ஸ்பிரஸ் 45, பாசஞ்சர் 20, பெங்களூரு எக்ஸ்பிரஸ் 95, பாசஞ்சர் 55 என புதிய கட்டணம் நிர்ணயிக்கப்பட்டுள்ளது.

வெளியூர்களுக்கு செல்ல, ஏற்கனவே டிக்கெட் முன்பதிவு செய்தவர்கள், கூடுதல் கட்டணம் செலுத்த, திருப்பூர் ரயில்வே ஸ்டேஷனில், முன்பதிவு செய்யும் இடத்திலும், தகவல் மையத்திலும், சிறப்பு கவுன்டர் திறக்கப்பட்டுள்ளது. டிக்கெட் முன்பதிவு செய்தவர்கள், அவ்விரண்டு இடங்களில், கூடுதல் கட்டணம் செலுத்தி, டிக்கெட் பெற்றுக் கொள்ளலாம், என, ரயில்வே அதிகாரிகள் தெரிவித்தனர்.