TKA HNAMTE

Company hrang hrangte hming neih dan

2011-12-30T12:45:00.000+05:30

Apple Computers :
Steve Jobs chuan apple tluka thei duh a nei lo a. An company thar chuan thla 3 hnuah pawh hming a la nei lo a, a thawhpuite hnenah a aia hming tha an hria a nih loh chuan Apple Computers tih a nih tur thu a sawi a. Rawtna dang a awm tak loh avangin an pu hlen ta a ni.
CISCO :
Awmze ril tak a nei lem lo a, San Francisco tih atanga lakchhuah mai a ni.
Compaq :
An company hming hi computer lamtawi COMp leh thil te tak te sawina PAQ belhbawm a ni.
Corel :
Corel tichhuaktu Dr. Michael Cowpland hming atanga an phuah chhuah a ni a. A awmzia tak chu COwpland REsearch Laboratory tihna a ni.
Google :
A tirah chuan fiamthu deuh reuhin ‘Googol’ an ti phawt a. Googol tih hi number sawina - 1 zawha 0 hlir 100 sawina a ni a. Stanford graduate pahnih - Sergey Brin leh Larry Page te chuan an hralhchhawng a, ‘Google’ tiin an thlak ta a ni.
Hotmail :
A hmuchhuaktu Jack Smith chuan website atanga e-mail hman theih dan a ngaihtuah a. Sabeer Bhatia chuan tihdan tha deuh a rawn hria a, bul an tan a. ‘HoTMaiL’ tiin a hming an phuah a, ‘html’ tih tel ngei an duh vanga phuah an ni.
Hewlett Packard :
Bill Hewlett leh Dave Packard te chuan an company din chu Hewlett-Packard nge Packard-Hewlett ni ang tiin thum an vawr a, Hewlett Packard tih hming hi an vawrchhuak ta a ni.
Intel :
Bob Noyce leh Gordon Moore te chuan an company din thar chu ‘Moore Noyce’ tih an tum a. Mahse hotel chain hmingah an lo hmang tawh si a, INTegrated ELectronics atanga lakawpin Intel hi an phuah ta ringawt mai a ni.
Lotus :
Mitch Kapor chuan ‘The Lotus Position’/’Padmasana’ tih atangin he hming hi a rawn phuah a ni.
Microsoft :
Bill Gates chuan MICROcomputer SOFTware chhawm zui zel duhna nei chungin a tirah ‘Micro-Soft’ tiin a phuah a. A hnuah ‘-’ hi an paih a, Microsoft tia hriat zui a ni.
Motorola :
A dintu Paul Galvin chuan car a hman chi radio an siamchhuah tantirhin he hming hi a phuah a. Khatih laia radio company lar ber Victrola behchhan deuha a phuah a ni.
Sony :
Hemi hming hi Latin tawng ‘sonus’ tih atanga lak a ni a, a awmzia chu ‘sound (ri)’ tihna mai a ni a. Hei leh American hovin naupang nikhua tak kohna atana an hman ‘sonny’ nen kaikawpin ‘Sony’ hi a rawn piangchhuak a ni.
Yahoo! :
He thu hi Jonathan Swift tihchhuah a ni a, Gulliver’s Travels ah khan a lo hmang tawh a. ‘Yahoo’ tih chu a pawnlam landana mi hip lo tak, mihring pangngai pawh ang lo tluka ngaih tihna angin Swift chuan a hmang a. Yahoo! dintu Jerry Yang leh David Filo te khan anmahni chu ‘yahoo’ mize nei nia an inhriat avangin he hming hi an thlan phah a ni.

HLAWHTLINNA

2011-10-24T15:53:00.000+05:30

Kum 4 ah hlawhtlinna chu thawmhnaw zunkhum loh.
Kum 12 ah hlawhtlinna chu thian neih.
Kum 16 ah hlawhtlinna chu driving license neih.
Kum 20 ah hlawhtlinna chu sex hman.
Kum 35 ah hlawhtlinna chu pawisa neih.
Kum 50 ah hlawhtlinna chu pawisa neih.
Kum 60 ah hlawhtlinna chu sex hman.
Kum 70 ah hlawhtlinna chu driving license neih.
Kum 75 ah hlawhtlinna chu thian neih.
Kum 80 ah hlawhtlinna chu thawmhnaw zunkhum loh.

HIV positive a ni tih a zep lo

2011-10-05T12:11:00.000+05:30

HIV positive a ni tih a zep ngai lo a, zep tul a ti hek lo. Amah ang bawka HIV positive te tana thawk turin a inpe a, a hun tam zawk chu midangte tanpuinan a hmang thin. “Tunah hian positive leh positive loh chungchangah Pathianin duh min thlantir leh ta se, ka inngaihtuah viau tawh maithei a ni,” ti hialin a sawi.

Lalchhuanzuali hi March ni 6, 1988 khan Aizawl Civil Hospital ah a piang a. A pa chu Lalnunfela niin, a nu chu Lalthlanchhuahi a ni a. An chhungkuain Venghlui, Aizawl ah an khawsa mek a.
Chhuanzuali te unau hi 4 an ni a, hmeichhe pathum leh mipa pakhat niin, amah hi a upa ber a ni.
Sikul hi a kal kual ve nual mai a, Govt. Primary School, Venghlui an bul tanin, Govt. Bible Middle School, Venghlui; Hrawva English Medium School; Brighter Higher Secondary School; MICE leh Basilea ah te kalin, Class 12 thleng a zir a, a bak chu pasal a neih tak avangin a chhunzawm ta lo.
Khawtlangah a theih ang tawk tawkin a inhmang thin a, an Branch KTP in documentary an siam pawhin a theihna apiangah thahnem ngai takin a tel ve a ni.
May, 2006 khan pasal a nei a, nau a pai zui a. A nau pai hi a fuh chiah loh avangin December thla khan doctor te chuan ‘bed rest’ turin an ti a, damdawi inah a lut a.
Nau pai apiang an tih thin ang bawkin Chhuanzuali pawh HIV hrik a pai leh pai loh an en a, positive a nih thu hi an hrilh a.
A thu hriat hian a deng na em em mai a, mi lepchiah leh drugs ti te chauhin an kai thin nia a ngaih khan a taksa a luhchilh ve tlat bawk sia.
Hreh takin a chhungte a hrilh a, a pasal chuan pawm duh tawh loin an inthen phah hial a. Chhuanzuali hi rilru hrehawm takin a awm a, a chhungte bula awm pawh a hreh a, mut pindanah a inkhung a, khumah muin a inlukhup daih thin.
Awmkhawloh vang emaw, tal duhdah vang emawa he natna hrik hi kai a ni lo a, tihpalh thil thu, vanduai vang liau liau a ni.
"A tirah chuan ka mangang a, sawi ngaihna ka hre lo. Ka tap tawp," a ti a, "A hrehawm a ni tawp mai. Tumah ka kawm duh lo a, ka chhungte pawh ka hmu duh lo," a ti bawk.
HIV positive a ni tih hriatchhuah a nih lai hian a thiannuin a kalpui a, a thiannu chu amah tih lohva a hre hmasa bertu a ni. A pasal chuan a pawm thei lo a, "Kei chu ka ni ve lo, rawn haw tawh suh," tih chu a thudawn a ni.
Mangang takin awm mah se a nu leh pa, a chhungte chu a lamah an tang tlat a, an thinhrik ve lo. Ani pawh a insangmar a, tunah chuan Mizorama HIV positive te enkawla buaipuitu a ni ta a, tunah phei chuan Mizoram mai ni lovin India ram a vil tawh dawn.
February, 2007 khan Social Guidance chuan gospel camping an buatsaih a, hetah hian Chhuanzuali pawh a lut ve a, nun thar neiin Pathianah lawmna famkim a hmu tan a.
Pu Vanlalmuana (Kawngtea), President, Positive Network of Mizoram thusawi a ngaihthlak tumin Chhuanzuali rilru hneh deuh tu a awm a. “Pu Kawngtea kha ka en thin a, kei aia sa chhe zawk ania, khati chung khan midangte tan theihtawp chhuahin a inpe thei a, eng vangin nge ka theih loh bik ang,” tih ngaihtuahna neiin, a rilruah HIV positive te tana thawk tura inpek chu a lian ta hle mai a.
HIV positive a ni tih a inhriat hnu hian kawng engkimah LPS Nun Krista host, Lalrintluangi chuan a kaihruai a. A tulna apiangah a tawiawm zel a, a chungah hian Chhuanzuali pawh a lawm hle a.
June 20, 2007 khan Chhuanzuali hian fanu a hring a, hemi hnu hian MPLAS ah a thawk zui a. Amaherawhchu, CHARCA project a tawp avangin a hna atang chuan a chawlh a ngai leh a.
2008 khan Shalom ah a thawk leh a, hei pawh hi project a tawp leh avangin a thawk zui thei ta lo bawk a.
March, 2011 atangin Positive Network of Mizoram ah a thawk tan a, councellor nihna a chelh a. Chu mai bakah, PNM hnuaia Women Cell ah President nihna a chelh mek bawk.
Mizoram hmun hrang hrangah campaign leh programme hrang hrang vangin a zinkual nasa hle a. A tlangpuiin HIV/AIDS chungchangah mipuiin awareness kan la tlachham lutuk hi a vei hle a.
A zinna pakhatah pawh HIV positive a nih thu a sawilan avangin chaw eia sawmtu pawh a hmuh zawh loh thu sawiin, khawlaia a kal pawh mak tih hmel deuha an en hrek hrek thu a sawi bawk a.
Hemi hmuna an campaign chu a hlawhchham chiang hle nia ngaiin, a pawi a ti hle a. Mahse, a hnu daihah chumi khuaa HIV positive pakhat chuan phone in a rawn be nawlh mai a, a rawn berawn a, a hlawhchham thak lo tih a langchhuak ve leh a ni.
HIV/AIDS awareness campaign neiin a zinchhuak deuh reng a, mi tam takin an tangkaipui hle a, hlawkpuitu leh sawtpuitu an pun phah hle a.
Chhuanzuali hian HIV positive a ni tih hi a zep lem loh avangin hei hian mi tam takah chona a pe a, ama zarah hian mi tam takin awareness an neih that phah a ni.
Tunah hian YWCA National Piya Committee member a ni mek a, Positive Women Network ah committee member a ni mek bawk a. National Piya Committee ah hian India hmarchhak atangin mi pahnih chauh an thlang a, Chhuanzuali leh Guwahati-a mi pakhat chauh an awm a ni.
July ni 9-17 chhung khan Switzerland-a Zurich khuaah Young Women Christian Association (YWCA) khawmpui lian, kum li dana an neih thin, World Council an hmang a. Hmeichhia, HIV positive ngei tir tura tih an nih avangin Mizoram YWCA pawhin Chhuanzuali hi an tir a.
Zoram la pel miah lo a nih avangin a huphurh hle mai a, Shillong-ah he khawmpuia a thusawi tur sawi chhin turin an ko a, hemi hnu hian Switzerland lam chu a pan chauh a.
He khawmpuiah hian khawvel ram hrang hrang 100 chuang atangin mi an fuankhawm a, HIV positive chu mi 20 emaw vel chauh an ni a.
Hmeichhe positive te hian anmahni rama harsatna an tawhte an sawi a. Chhuanzuali chuan Mizoramah nu tha tak tak, mahni pasalte avanga HIV positive an tam thu a sawi a. Amah ngei pawh HIV positive anih thu hi huaisen takin a sawichhuak a, inthup kher tul a tih loh thu a sawi zui avangin a thusawi ngaithei lo deuh deuh pawh an awm nual reng a ni.
A nihna a zep duh loh vanga amah hawtu hi awm thin mahse, a thiltum hi a thulh phah ngai chuang lo a. Thahnemngai takin midangte tan a thawk ngar ngar mai a ni.
“Pathianin amah ka hnaih theih nan tiin he dinhmunah hian min dintir niin ka hria a. Tunah hian HIV positive nih leh nih loh chungchangah Pathian hian duh min thlantir dawn ta se, ka inngaihtuah rei viau ang,” tiin Chhuanzuali hian a sawi.
Hmeichhe positive te harsatna tawh chungchang sawiin, Chhuanzuali chuan Mizoramah nu tha tak tak, pasalte vanga he natna hrik kai an tam thu a sawi a.
"Nu, a then chu la naupang tak tak, pasalte atanga kai an tam tawh khawp mai a, inenkawlna lamah kan la pachhe hle a, inzirtir nasat lehzual a tul hlein ka hria a. Hmeichhiate hi inchhungkhurah kan buai a, inah kan tawm deuh reng a, zirtirna kan dawng lo. Kan chep a, hun kan nei lo bawk a, enhran kan hlawh bawk," Chhuanzuali chuan a ti.
A him tur zawnga mipat hmeichhiatna (safe sex) hmang tura inzirtir tul a tih thu a sawi a, "Sex hmang lo tura inzirtir hi a tha a, mahse a tawk lo. Safe sex hmang tura inzirtir a tul tih hi ka ngaihdan a ni," a ti.
"Nu leh pate'n sex hmang lo turin an fate an zirtir a, mahse an fanu kha a lo virgin lo daih tawh thei a. Tin, nupa karah pawh safe sex hi sawi a tul. Entirnan - nu pakhat chuan a pasal kha a ringhlel a, a pasal chu sex lama tladah tak a ni a. A pasal chuan a hmeichhe kawpte atangin natna hrik a kai ta a, a nupui chuan a pasal hnen atangin a kaichhawng ve leh a. Chutiang chu Mizo zingah pawh an tam a, safe sex hmang tura inzirtir hi a tul a ni," tiin a sawi zawm a ni.
"Mi ramah chuan positive-te hian enkawlna an dawng tha a, ei leh in pawh a tha a. Positive-te pawh an hawiharh a. Keini ramah chuan enkawlna dawngte ngei pawh hian mahni damdawi ei hming leh a thawh dan tur pawh kan hre lo. Tin, tuna positive kan hriatte hi a rethei lam, tanpuina mamawh leh chenna tur thlenga mamawh te kan ni a. A hausate chu an inthup tlat a. Rualawh a na duh khawp mai," tiin a rualawh thu a sawi.
HIV positive te tan rualawh a nat thu a sawi a, Mizoramah CD4 Count pakhat chauh a awm thu sawiin, "Mi ramah chuan an ngah a, Mizoramah chuan mi 3000/4000 velin pakhat kan intawm a, tlo pawh a tlo lo," a ti a. CD4 Count hi HIV positive te enna a ni a, CD4 Count hmanga en an nihin, a hniam chuan ART an la thin a, positive te enkawl nana thil pawimawh ber pakhat a ni a. Mizoramah khawl pakhat chauh a awm avangin a rim hle a, a overload phah fo reng a ni.
Mizoramah enhran an hlawh thu sawiin, positive te hi an chhungte'n an hnawtchhuak fo tih a sawi a, chutiang mite leh thingtlang atanga inenkawl tura Aizawl pante tan han riah maina tur (short stay home) an mamawh thu Chhuanzuali hian a sawi a, sorkar hruaitute hnenah pawh a thuphunga an lo thlen tawh thu a sawi bawk.

HIV/AIDS chungchanga harsatna neite puih a inhuam hle a. Hetianga harsatna neite chuan a hnuaia Chhuanzuali phone number tarlanah hian engtiklai pawhin biakpawh theih reng a ni.

Chhuanzuali - 9612977974

Damdawi tel loa depression enkawl dan

2011-08-10T10:44:00.000+05:30

Depression hi rilru lam natna chikhat a ni a.
Depression neite chu lungchhia, hnual, thinrim, hrehawm ti tak leh ngui takin an awm thin.

Mizo zingah depression nei hi an tam tawh a, a tam zawk chuan an nei tih an inhre lo a, inenkawl nachang pawh an hre lo a. Depression nei tih inhria, inenkawl lem lo pawh thahnem tak an awm bawk.
Depression nei hi thalai zingah an tam bik emaw tih theih a ni a, hetih rual hian kum upa lamah pawh an thahnem viau bawk a. Inenkawl loh avanga nunna chan an tam tawh hle a. Hei hi pumpelh tur chuan inzirtirna tha tak leh tam tawk tak kan dawn a ngai a ni.
Depression neih hi taksa natna ai hian a hrehawm daih zawk a. Hetiang neite hi chuan mahni chauha awm hran daih te an ching a, an thin a chhe thut thut thin a, an rilru te a na hma em em bawk a. An chaw ei a tui lovin, an mu thei lo thin a. Awmna ngaiah an awm reng thei lo a, thawpik up up ang tein an awm thin. Thil eng pawh ti dawn se an peih lo viau thin a, an thil tihna reng rengah an rilru an pe tha thei lo thin a. Hlutna nei reng reng lo nia inngaihna te pawh an nei thin.
Eng vanga depression hi awm nge tih hi mithiamte pawhin chiang takin an la sawi hleithei lo a. Thenkhat chuan thluaka chemical thenkhat inthlak danglam vang niin an ngai.
Mihring 10 zela 1 hi chuan kan damchhungin vawikhat tal chu depression hi kan nei niin mithiamte chuan an sawi a. Damdawi hmangin an enkawl tlangpui a, mahse depression damdawi thenkhat hi chak tak tak a awm avangin taksa tan a tha ber lo niin thenkhat chuan an sawi a. Hei vang hian damdawi tel loa enkawl theih tluka tha a awm lo.
Damdawi tel loa depression enkawl dan hi kawng hrang hrang a awm a, chu’ngte chu:
Insawizawi:
Mihring kan insawizawi hian kan harhvang a, kan rilru a tithawl thin a. Thil engemaw kan tihhlawhtlin hian keimahniah phurna te, mahni inrintawkna te min pe thin. Zing tlan emaw, infiamna chi hrang hrang ngaina lo tan pawh lam (dance) hi insawizawina tha tak a ni.
Tawm reng loh tur:
Inchhungah tawm reng loin chhuahvah zeuh zeuh a tha a, chuti a nih loh chuan mahnia awm reng hian a tul lo thleng thlenga inngaihtuah a awl a. Pawnah chhuakin thenrual te kawm tam ila, rilru hnual leh beidawng lutuk tur hi kawng tam takin a veng thei a ni.
Inkhel en thin rawh:
Hmeichhiate hian inkhel en hi an peih lo duh viau a, mahse hetianga inkhel en hian rilru a la peng a, depression nei tan chuan a tha em em a ni.
Ei leh in:
Depression neite chuan ei leh in uluk a ngai hle a, a theih hram chuan thlai leh thei lampang ei hnem a tha a. Thil mawm lampang ei nasat hian rilru a tihnual duh hle niin mithiamte chuan an sawi. Sa ngaina deuh tan chuan sangha ei a pawi lo a ni.
Zai nasat tur:
Zai vak vak hian rilru a tithawl a, depression nei thenkhat chuan damdawi leh thildang zawng aiin zai hian a pui tha ber niin an sawi.
Lehkhabu tha chhiar:
Lehkhabu chhiar tam a tha hle a, engemaw mai mai ni lo, lehkhabu pangngai chhiar tam a pawimawh hle niin mithiamte chuan an sawi a ni.

I hriat miah lohin sexual harassment i tawng em?

2011-07-21T14:09:00.000+05:30

Mi tam tak chuan sexual harassment hi an tawk tih an inhre lo a, hnathawhnaah te, zirna inah te hetiang thil hi a tam hle tih hrethiam lo hi a tam zawk an la ni a. Hetiang lamah hian a hranpaa inzirtirna hi a awm lem lo a. A bik takin hmeichhiate hian an hriat miah lohin sexual harassment hi an lo tawng fo tawh thin a ni.

National Labour Institute chuan 1996 chhung ringawt pawh khan hnathawhnaa sexual harassment thlen vanga case ziahluh 5,671 zet a awm thu an sawi a. 2007 khan 93% zeta pungin, case 10,950 an ziaklut a. Hetianga an ziahluh zat zet hi thuneitu hnena thlen loh a awm tih an sawi bawk.

Hnathawhna hmunah hian sexual harassment chu a tam ber nia sawi a ni a. Thawhpuite’n hmeichhe hnute chu an kutin an hrut ‘palh’ fo a, a tihpalh a nih leh nih loh a hriat tak tak tawh si loh a. Thawhpui pakhatin hmeichhe pakhat chu a mutpui tawh niin thu a thehdarh vak mai a, chu hmeichhia chu zanah a mut theih loh phah mai bakah, mahni inrintawkna a hloh phah bawk a, a hna atanga ban mai a duh phah hial a. Hetiang thilte hi sexual harassment vek an ni.

Supreme Court chuan office zawng zawngah hetiang lam veng tur hian committee din theuh turin a ti a. Hetiang tuartu chuan amah khawihtu emaw, hetiang zawnga cheibawltu chu hmun danga sawnchhuak turin a ngen thei a. A hrem theih dan chi hrang hrang a awm a, hna atanga chawlh lailawktir te, bantir te, ngaihdam dil tura tih te a tel a ni.

Sexual harassment leh pawngsual hi thil thuhmun ang deuha ngaih an ni a. Heng thil pahnihah hian a tuartu chu a inang reng - hmeichhia an ni.

India ramah chuan sexual harassment hi ‘hmeichhe chhaih nawmnah’ anga sawi a ni deuh ber a. A sawi dan hi zim hmel viau mahse a huam zau hle thung a. Mipat hmeichhiatna lam hawi zawnga hmeichhe bula tawng te, hetiang rawngkaia taksa insiktir te, zahmawh rawngkai milem inentir te, tawngkam leh cheziaa zahmawh rawngkai lantir te leh hetiang lam hawi chi hrang hrang a huam tel vek a ni.

India danpui pawhin sexual harassment hian mipa leh hmeichhe inkar a tihrang lehzual niin a tarlang a, India Constitution chuan Article 14 ah hei hi a tarlan bakah, Article 21 ah hmeichhia chu zahawm taka awm turin zalenna leh dikna a pe a ni.

India ram danah hian sexual harassment chungchang hi chiang taka dah a awm lo a; mahse, IPC Section 354 ah chuan hmeichhe zahawmna tibawrhbang zawnga che te hrem theihna a awm a. Section 509 ah pawh hmeichhe zahawmna tibawrhbang zawnga tawngkam, chetzia leh tha thawhte hremna a awm bawk a ni.

Sexual harassment chu:
Supreme Court chuan August 13, 1997 khan ‘Guidelines on Sexual Harassment’ a tichhuak a, hetah hian sexual harassment chu ‘duh vang ni loa an laka mipat hmeichhiatna lam hawia midang an awm hi’ niin an sawifiah a. Chi hrang hrangin an thliar a, an thliar dan chu:
Tawngka: Zahmawh rawngkai fiamthu emaw, inchhaih emaw te; mi thawmhnaw hak emaw, an awmdan emaw, an taksa emaw zahmawh lamhawia sawi te; mipat hmeichhiatna lam hmanpui tum te; phone hmanga tawngkam zahmawh deuha mi biak te; midang nunphung, a bikin mipat hmeichhiatna lama an inhman dan sawidarh vak te; hna lampang sawi laia zahmawh lam hawia lo her kual te.
Tawngka ni lo: Mi taksa lo thlir ngawih ngawih te; chet danah zahmawh rawngkai lantir te; mitmenga mipat hmeichhiatna beisei zawnga mi melh te; hmel lan dan mipat hmeichhiatna hawi zawnga awmtir te; mitsiai leh intih itawmna atana hmui liah kual vel te.
Taksa insi: An duh lo chung midang pawm leh fawh; midang din hnaih leh lutuk emaw, midang nawk thei tura din; midang chul, zut, manbeh emaw piai emaw; mipat hmeichhiatna hawi zawnga chet duh vanga midang kalna dal luih; mi beisei vanga a ruka zui; mipat hmeichhiatna hmanpui tum; an duh lo chung an taksa khalhsak.
A ena en: Poster, cartoon, lemziak, calendar, milem chi hrang hrang zahmawh deuh deuh te; computer a zahmawh rawngkai dah te; lehkhathawn emaw, e-mail emaw a zahmawh deuh deuh thawn.

India ram....
*    Minute 26 danah hmeichhe pakhat khawihchhiat zel ang a ni.
*    Minute 34 danah hmeichhe pakhat pawngsual zel ang a ni.
*    Minute 93 danah hmeichhe pakhat thah zel ang a ni.
*    Khawvela naupang khawihchhiat tamna ber a ni.
*    Naupang khawihchhiatna hmun tam ber chu hnathawhna hmunah niin, zirna in chu pahnihna a ni.
*    National Women’s Commission in an sawi danin hmeichhe zingah hnathawhnaa sexual harassment tawng tawh hi 46.58% an awm a, 3.54% te chauhin thuneitu an hriattir a ni.

I thin a rim a nih chuan.......

2011-07-06T23:27:00.000+05:30

Mi zawng zawng hian kan nun hman chhoh ah mil loh zawng leh nin riau kan tawng theuh a. Kan thian kawm thin emaw, kan thawhpui emaw, kan chhungte emaw pawh an ni maithei.
Kan duh emaw, duh lo emaw, hetiang mi hi kan kalsan thei tak tak dawn chuang lo a, chuvangin keimahni lam insiamrem thiam a pawimawh tihna a ni.
Ngaithlatu ni rawh:
Mi inkara buaina intan chhan tam zawk chu ngaihdan inan loh vang a ni a. Hetianga buaina a thlen tawh chuan insawithiam a ngai nasa thin a. Heng zawng zawng pumpelhna tha ber chu mi hnialtu leh thil sawitu bera tan tum loin, a ngaithlatu nih tam hi a ni.
Ngaihsak lo lui rawh:
Midang thiltih emaw, an khawsak dan emaw ngaihtuah duh miah loh hi a tha khawp mai a. Kan nin deuh te kan theihnghilh phah hauh dawn lo a, mahse a ziaawm ve duh hle.
Miin an rawn zarbuai sek che a, inhnial buai emaw, intihbuai emaw i duh lo a nih chuan ngaihsak duh tlat lo la, buai leh zelna tur a pumpelh ve theih a ni.
Tlang takin sawi thin rawh:
I nin em emte kha tlang takin thil hrilh thin la, an nungchanga i duh loh zawng te, an thil tih thin dan tha i tih lohte kha thu pehhel lem loin hrilh pawp zel la, engemaw chen chu a ziaawm phah thei.
Insum hram rawh:
I thawhpui emaw, i thian emaw, i laina hnai emaw, i nin em em thin kha han inhnialpui deuh rap rap chak chang i ngah ang. Mahse, insum hram hram la, dam dapa awm zel tum ang che. I thin a rim dawn chuan an lak atangin inthiarfihlim daih la, i thinrim a reh hunah chauh titipui leh thin ang che.

Puitlingte tana naupang thusawmpek

2011-06-21T23:22:00.000+05:30

1. Ka kut hi a te a. Khum ka siamin emaw, milem ka ziah emaw pawhin duhthusam ni turin beisei suh la. Dawhthei takin thil min tihpui thin ang che.

2. Ka mit a la fing tawk lo a, i hmuh ang khan thil ka la hmu ve thei lo a. Ka duh thlirkual theiin min siam la, a tul loah min khuahkhirh suh ang che.

3. Inchhungah tih tur chu a awm reng dawn a. Vawikhatah tlemte bak ka la ti thei lo a. Inpe takin thil nihphung hi chiang takin min hrilh thin ang che.

4. Ka rilru a la no a, ka duhnate min hriatsak thin la. Engtiklai pawhin min tur reng lo la, nangmah enkawl i duh ang bawkin min enkawl ang che.

5. Pathian thilpek hlu tak ka ni a, min roh viau la, duat takin min enkawl ang che.

6. Ka thanlen zelnaah i fakna leh i fuihna ka mamawh reng a. Min sawiselna ringawt zawng loin, ka tangkaipui tur min ngaihtuahsak thin ang che.

7. Keima thilah thutlukna siam thei turin zalenna min pe la, ka insiamthat theih nan hlawhchham min phalsak ang che.

8. Engkim min tihsak tum lo la, i mit tlunga ka ti lo a nih pawhin dawh hram hram la. Ka unau dangte nen min khaikhin fo suh ang che.

9. Hmundanga min zinsan hreh lo la, i awm loh changa inenkawl zirna hun tha min siamsak zawk a ni tih hria ang che.

10. Biak inah min hruai ngun hle la, ka tana entawn tlakin awm fo ang che.

Chhangchhe Thufing

2011-03-15T15:28:00.000+05:30

*    Hun laklawh deuhah chauh naute muhil an harh thin.
*    Naupang chuan chhuat bal laiah thil an tibaw ngai lo.
*    Toys chhe thei lo chu a chhe thei tihchhiatna atan a tangkai duh.
*    Fate laka phuba lak duh chuan min nin em em thlenga dampui reng tur.
*    Fa pakhat chauh hi chu a tlem mah mah a, pahnih erawh chu duh aiin an tam mah mah thung.
*    ‘Naupang ang zeta mu tui’ anga insawi thin te hi chuan fa an la nei lo tlangpui.
*    Fa naupang tak chu bengchheng leh bal thei tak an ni tlangpui.
*    Fate duat rawh; anmahni bawk kha enkawl let tur che an ni si a.
*    I fate’n an ngaihsak duh loh che chuan nuam ti awm deuhin awm la, an rawn pan vat mai ang che.
*    Rilru buaina hi chu a inthlahchhawn theih; i fate atangin i nei ngei ngei ang.
*    Fate atang hian thil tam tak a zir theih a, a bik takin dawhtheihna eng ang tak nge i neih tih te hi.
*    I fate tana i hman that theih ber chu ‘hun’ a ni.

Engtin nge ni ang?

2011-02-01T12:20:00.000+05:30

* Nimin lama lawmthu kan hrilh loh avangin Pathian hian vawiinah hian mal min sawm turin hun nei ta lo se, engtin nge ni ang?

* Vawiina Amah kan zui loh avangin Pathian hian naktukah min kaihruai tum ta lo se, engtin nge ni ang?

* Pathianin ruah a surtir vanga kan phunnawi pangpar par vul chuk hmuh tur awm tawh lo se, engtin nge ni ang?

* Ama ni a ni tih kan hriat loh avangin Pathian hi kan bulah kal ta lo se, engtin nge ni ang?

* Vawiinah Bible kan chhiar loh vangin Pathian hian Bible min lakbosak ta se, engtin nge ni ang?

* A thu kengtu thusawi kan ngaihthlak loh avangin Pathian hian a thuchah chu dahbo ta se, engtin nge ni ang?

* Kan thinlung kawngkhar kan hawn loh avangin biak in kawngkhar hi khar tlat se, engtin nge ni ang?

* Midangte kan hmangaih loh leh kan ngaihsak loh vang hian Pathian hian min hmangaih lo se, min ngaihsak lo bawk se, engtin nge ni ang?

* Niminah a thu kan ngaihthlak loh avangin vawiinah kan thu ngaithla duh ta lo se, engtin nge ni ang?

* Ama min kohna kan chhan ang vel hian kan tawngtaina hi Pathianin chhang ta se, engtin nge ni ang?

* A tana kan nun kan hlan tlukpui zel hian Pathian hian kan mamawh hi min pe ta se, engtin nge ni ang?

Mipa leh hmeichhe mize maksak

2010-12-27T23:07:00.000+05:30

Mipa :
* Mipa zawng zawng hi an buai em em vek.
* Buai viau mahse hmeichhe tan chuan hun an nei thei zel.
* Hmeichhe tan hian hun nei thei mahse, an ngaihsak tak tak lem lo.
* An ngaihsak tak tak lem loh lai hian pakhat tal chu an kawp ve reng si.
* Pakhat tal kawp ve reng mahse midang an beisei tel tlat thin.
* Midang beisei tel tlat thin mahse an kawppui chuan a kalsanin an thinrim thin.
* An kawppuiin kalsan mahse an thil tih dik loh atangin an inzir thei chuang lo a, midang an beisei chhunzawm zel thin.

Hmeichhia :
* Hmeichhe tana pawimawh ber chu pawisa neih hnem a ni.
* Pawisa neih hnem hi pawimawh viau mahse thawmhnaw man to tak tak an lei zel tho.
* Thawmhnaw man to tak tak lei thin mahse hak tur ka nei lo an ti reng thung.
* Hak tur ka nei lo ti reng mahse mawi takin an inchei thei zel.
* Mawi takin inchei thei zel mahse an thawmhnaw chu thing an ti viau zel.
* An thawmhnaw chu thing ti viau zel mahse fak erawh an phut ru tlat thin.
* Fak phut ru tlat thin mahse, i fak chiah chuan an awih leh duh ngai chuang lo.

Show Me The Way

2010-10-18T16:18:00.000+05:30

Zantin ka mut dawn apiangin ka tawngtai ziah a, vanram hi a awm tak tak ka beisei ru tlat a. Heti chung hian nitinin ka rilru a buai belhchhah reng thung a, mithianghlim nia ka lo hriat ve thinte chu sualnain a bawm khat tlat a, misual ber berte an ni leh tlat zel mai a.
Ka naupan laia milar leh miropui tak tak, ka lo ngaihsan ve ber ber thinte lah chu engmah lo mai, hluma milem siam vel mai an ni zo ta si a. Ka thinlung hi a ruak huai tawh mai a, heng thilte avang hian ka ngaihtuahna a buai a, ka rinna thlengin ka hloh chho ta mai a.
Ka tawngtainaah chuan Pathian ka au a, ‘Kawng min kawhhmuh la, chu luiah chuan min hruai la, ka suangtuahna rilru buai tak mai hi min lak bosak la, kawng dik chu min hmuhtir hram rawh’ tiin ka ngen leh ngawt thin.
Zan a lo thleng a, ka muhil leh ta siai siai mai a, hun reilote chhung chu ka mumang chu serhhran tlak khawpa thianghlim a ni ve a. Ka mit ka chhing a, he khawvel, sualna leh inhuatna hlira khat karah hian remna leh muanna chu a la awm a ni tih ngaihtuahna ka nei a, hei hian min chhawk ve leh hawk mai a.
Zing a lo ni a, chanchinthar ka’n en a, chanchin duhawm lo tak tak hlirin a khat leh chuk a, kawng dik zawh tur chuan hmabak kan la ngahzia ka hrechhuak leh ta uaih uaih mai a. Kawng dik kan zawh tak tak theih hun tur hriat theihna turin engemaw tak hriattirna ka dawn ka beisei ru reng a, mahse hlauhnaa ka khah tlat avangin hriattirna pawh chu ka ngaihtuah mumal thei chuang lo.
‘Engemaw’ tak chu lo hriain, eng duhawm tak mai pawh chu lo hmu ila, ka ring nghal thlap dawn em tih zawhna chuan ka thinlung a luah khat leh a, ka buaina a belhchhah leh ta vek mai a. Pathian tanpuina dilin, hetiang hun a thleng ta a nih pawhin min hriattir ngei turin ka ngen leh ta ngawt mai a.
Hei mai hi duhtawk loin, chakna leh huaisenna ka dil a, kawng dik zawh tur min kawhhmuh hun atan min buatsaih turin ka dil a, engtikah emaw chuan chu hmun ropui chu ka thleng ngei ka ring tlat a ni.
Zan mut dawna tawngtai chu ka bansan ngai hauh lo a, vanram chu a awm tak tak beisei reng chungin Pathian hnenah chuan kawng dik zawh tur chu min kawhhmuh turin ka dil reng mai a ni.
Styx chuan December, 1990 khan ‘Show Me the Way’ tih hla, mawi tak mai chu an tlangzarh a. He hla hi lead vocalist/keyboardist Dennis DeYoung phuah niin, Roman Catholic ruh tak mai a ni a. He hla hi a fapa Matthew-a tana a phuah a ni a, he khawvel hi huatnain khat mahse a fapa chu rinawm taka Pathian hnung zui zel tur a duh thu a phuahna a ni.
Vengchhungah thianzahoin band kan din ve thin a, keiin bass perhin Lalrotluanga chu lead guitarist a ni a. PB Lianhmingthanga’n keyboard a tum a, Chhuantea chu vocalist a ni a. Hla chi hrang hrang sain, he hla ‘Show Me the Way’ hi kan thiam bel em em a, ‘Kan hlapui’ ti hialin kan sawi thin a. Vengchhung thiltihna mai bakah Bial KTP thiltihah te, Vanapa Hall ah te kan sa ve hman a ni.
Kan intawhkhawm leh hun nghaka chatuan ram atanga min lo thlirtu, Chhuantea’n thiam tak maia a sa vawng vawng thin kha rilruah a cham reng a, tun thleng hian thinlungah a la reh thei lo. He hla ngaihthlak apiangin thinlungah Chhuantea a thar ziah a ni.
Khawvela a thenrual tha, chhungkhat laina leh ringtu zingah he hla phuahtu rilru ang pu an awm ve fur a rinawm a, rilru hah chang te, ngaihtuahna fel lo tak tak, rilru tibuai tak takin min bawhbuai chang pawha Pathian hnena tanpuina dil zel a pawimawhzia hrechhuak thar turin Chhuantea pawhin min duh ka ring tlat a ni.

Is this the world we created?

2010-08-27T15:45:00.000+05:30

A thil hriat thar chuan a rilru a luah khat nghal vek mai a, eng dang mah a ngaihtuah thei lo.

TV ah chuan Africa ram chanchin an rawn tilang a; an ram retheihzia te chu engmah zep then awm hauh lo in a lang vek mai si a, a chhungrilah chuan a tawt nghal up up a, a awmdan chu amah pawhin a hrethiam meuh lo.

A ngaihtuahna a buai nuaih mai a, a thin a rim viau laiin lungchhiatnain a bawh tel bawk a. A tha a zawi vek a, a hnuk te chu a ulh teuh mai a. A rilruah eng dang mah a lang thei tawh lo, khuanu remruat dan mak tihna te a rawn lan phah hial mai.
Mihringte’n siamtu kutchhuak ropui tak kan suasam nasat tawhzia te chu a ngaihtuah chhuak ta uaih uaih bawk a.

Pathian thilsiam zinga ropui ber, Ama anpuia a siam, a hmangaih em em mihringte khawsak dan dik lo lutuk avanga mahni tawrhna insiamchawp vanga mi tam tak hrehawmna khura an pil thuk tawhzia a ngaihtuah phei chuan a puakkeh lo chauh.

Khawvel hmundanga chengte aiin an ril a tam har bik pawh a ni lo, ei leh in an ngaina lo bik hek lo; midangte ang bawka riltam thei, hrehawm pawh hre ve thei an ni.

An ril chu tam eng ang mahse an dinhmunin a zir miau loh avangin an taksa mamawh ang ei leh in tur an nei miau si lo. An nunphung chu hrehawm an ti em em a, dingchhuak leh turin kal ngaihna an hre si lo.

Eng ber nge an mamawh pawh hre lo khawpa bo chung chuan an vak darh a, an tawn fuh fuh tawng turin an mitlaw chhuah ve thawr zel mai chu a ni si a!!

Hetiang khawvel hi keimahni siamchawp chu a ni si maw? Eng vanga hetianga chhuah nge maw kan nih chu le? Pathian pawh zah zo lo khawpin kan suasam a maw? Hetiang mai hi a ni maw kan damchhan lo ni ta? Kan khawvel siamchawp zet chu le!!!

Nitin hian naute pawi sawi lo, chinchang engmah la hre lo an piang ve reng bawk si a. Heng nausen rawn piang, engmah thil awmzia pawh la hre lote hian hmangaihtu an mamawh a, inchhung nuam tak, chhungkaw hlim tak uapna chu an thlahlel ve em em si a. Mahse, heng thilte hi chu an tan chuan vana rah ang a ni si.

Khawvel hmundangah chuan mihausa tak tak, an sum neih lutuk vanga awm ngaihna pawh hre tawh lo, sum hman ngaihna pawh hre tawh lo an kat nuk mai a. Heng mite hian lal an hrawt a, an duhthalin an khawsa bik si a.

Khawvel lehlama harsatna chi hrang hrangin a tlakbuak mekte chu an rilru peng khat pawhin an hre der si lo. Khawvel vir vel chu an thlirliam satliah vel mai mai tawh a. Khuanu remruat dan hi hriatthiam zawng a har a ni..

Mihringte’n kan chenna khawvel nuam tak mai kan tihkhawloh tak avangin keimahni vekin kan tuar a. Vanah khian Pathian hi a awm tak tak a nih ngai chuan hmangaih taka a siam, mihringte chenna tur khawvel kan tihchereu dan hi a hmuhin engtin tak ngai ang maw?

1981 khan Queen chuan an album thar tur ‘Hot Space’ atan hla an phuah tan a, hla ropui leh lungkuai zet mai ‘Is this the world we created’ tih chu chawpchilh deuhin an phuah a. A hmaa an lo phuah tawh ‘There must be more to life than this’ tih thlakna atana hman an tum uk a. ‘Hot Space’ ah hian an telh leh ta lo a, ‘The Works’ album atan an khek leh ta zawk a.

He hla thu hi Freddie Mercury phuah a ni a, TV ah Africa ram documentary a en fuh a. Hetah hian Africa ram retheihzia a hmu a, a rilru a khawih em avangin he hla tawi tak, mahse ril em em si hi a rawn phuah chhuak ta a ni.

Brian May chuan Freddie hla thu phuah sa chu a thluk a siam ve leh a. Nihnih chhung lekin an peihfel der mai a. Freddie hian khawvel ram rethei tam tak a awm laia ram hausa te’n an vei tawk lo nia ngaihna thinlung a nei lian hle a, rethei leh hausa kar inthlau tawh lutuk chu a dik a ti thei ngang lo a ni.

Just look at all those hungry mouths we have to feed
Take a look at all the suffering we breed
So many lonely faces scattered all around
Searching for what they need

Is this the world we created?
What did we do it for?
Is this the world we invaded
Against the law?
So it seems in the end
Is this what were all living for today?
The world that we created

You know that every day a helpless child is born
Who needs some loving care inside a happy home
Somewhere a wealthy man is sitting on his throne
Waiting for life to go by

Is this the world we created?
We made it on our own
Is this the world we devastated
Right to the bone?
If there's a God in the sky looking down
What can he think of what weve done
To the world that he created?

Pawisa chuan....

2010-08-19T23:14:00.000+05:30

Khum a lei thei a,
Mutthilh erawh a lei thei lo.

Sana a lei thei a,
Hun erawh a lei thei lo.

Lehkhabu a lei thei a,
Finna erawh a lei thei lo.

Nihna a lei thei a,
Zahawmna erawh a lei thei lo.

Damdawi a lei thei a,
Hriselna erawh a lei thei lo.

Thisen a lei thei a,
Nunna erawh a lei thei lo.

Chuvangin, PAWISA hi engkima engkim a nih lohzia a chiang.
Natna leh tawrhna te a thlen fo lehnghal.

Thian tha tak tak, kan duhsakte tawrhna leh natna te chu tihbosak kan duh thin...

An natna leh tawrhna kan tihbo theih nan hemi thlentu PAWISA hi min pe vek se, an nat ai leh an tawrh ai lo tuar ila.

Hetianga an nat ai nat huam, an tawrh ai tawrh inhuam thian tha an nei hi chu vannei an inti ve viau ang.

SMS hmangin tawng kan suasam

2010-07-29T22:49:00.000+05:30

    Mobile phone in min chiah hneh ta hle mai a, chitin chitangin kan nei fur tawh hlawm a. Tleirawl pawh la hre lem lo te thlengin khawilo kalnaah mobile phone an hum far tawh mai a. Hetiang taka kan leklam ta hi changkannain a ken tel chu ni tho mahse fuh lohna a nei nual mai.
    Kawng hrang hrang chu sawi lem lo ila, ka ngaihpawimawh berte zinga mi, SMS inthawnna vela tawngkam an hmang uluk ta lo lutuk hi ka vei em avangin heti lam chauh hi thlur bik ngaiin ka hria.
    SMS inthawn hi a biaka inbiak kher ai chuan kan hmang tlanglawn ber zawk niin a lang a. An thu chhut dan tam tak hi chu chhiar a harsa nek nek hle mai!! Min rawn thawn tam tak hi chu a awmzia ka hriat thin loh avangin min rawn thawntu hnenah 'Ka chhiar thiam lo' tih ka thawnlet fo reng a.
    Hetiang kan ching hi a tha lo em em mai a, kan rilruah ngaihsamna te, thatchhiatna te, inthlahdahna te chu zawi zawiin a tuh chho zel a. Hun a kal zel phei chuan Mizo tawng hi kan suasam nasa lutuk dawn niin a lang tlat. Tun vut vutah chuan a thleng thut kher lo a ni thei a; mahse, tam takah chuan a langchhuak tan tawh tlat si. Mizo tawng thiam chiang chiah si lo, tawng dang thiam em em si loah kan chhuak ang tih a hlauhawm ka ti.
    Thalai tam zawk tawngkam hman hi kan chik ve thin a nih chuan dik chiah lo deuh hi a tam ta hle mai a. Hengte pawh hi SMS thawn duhdahin a nghawng zinga pakhat niin a ngaih theih ka hria a. Tuna ho deuha lang hi nakinah chuan buaipui tham zawng a la ni ngei ngei dawn a, chuvangin thlir liam mai mai chi niin ka hre tlat lo.
    'Ek n ceh reg rigwt mai', 'mdag in mn gak, k cyg thei toh lo', 'lug a leg th m my', 'thln hnah ka rn t ve dn', 'k hw twh dn a' tih ang chi te hi Mizo tawng ziak dan tur a ni lo chiang khawp mai a. Hetiang SMS hmang hian kan tawng kan suasam nasa mah mah deuh zawng a ni. Theihtawpa humhalhtu tur zawkin hetianga kan sawp retheih zel chuan kum tam a liam hmain kan mumal lo nuaih tawh mai ang.
    Pangngai taka SMS inthawn hi thil harsa leh hahthlak a ni lo a, kei ngei pawh hi SMS hmang nasa em em mai ka ni a, tawngkam pangngaia kan hman ang thlap thlapin ka thawn thin. A dik taka thu inthawn avanga hunin a daih tak loh emaw chu an awm ka ring hauh lo a, an phone a chhiat phah emaw, an kut a nat phah emaw pawh ka ring hek lo. Chuvangin, hetianga tih hi chu inthlahdah vang te, thatchhiat vang te a ni berin a lang.
    Keini Mizo te bak hi 'Mizo tawng' humhalh tur kan awm tawh chuang lo a, hei hi hriain SMS a ni emaw, nitina midang kan biaknaah emaw pawh ni se, tawngkam pangngai kan neih hi hmang hram hram ila a duhawm khawp mai.

Thalaite leh tunlai khawvel

2010-06-15T21:48:00.001+05:30

Mizoramin kan buaipui leh kan hlauh em em chu ‘lirnghing’ a ni. Lirnghingin a nuai na ramah chuan thihna leh chhiatna rapthlak a thleng thin. Mahse, hei aia hlauhawm zawk chu ‘nun nghing’ hi a ni. Tleirawl/rawlthar, kum 13-15 inkar nun a nghin laklawh tawh chuan siamthat a har em em a. Anmahni nunah damchhunga reh thei tawh lo tur ‘Ser’ insiamin, nih tur ang an ni pha lo a, an zirnain a tuar a, mahniah ‘inthiam lohna ruk’ neiin, an nun a inchawm a, a thente phei chu ‘mahni intihlum’ ta mai te pawh an awm fo a ni.
Kan fimkhurna tur thil tlem azawng thlirho ila.
1. Tattoo :
Tattoo hi hun engemawti kalta atang khan thalaite’n intihchangkan nan intih tunlai nan chhut kan uar hle mai a. Amaherawhchu tattoo hi tunlai thil thar rawn chhuak ni lovin, hmanlai atanga an lo chin tawh a ni. Chung lo ching hmasate chu ringlo mi, ramhuai biate, Baal pathian bia te, thingbul lungbul be thinte, hringeite an ni tlangpui. Tin, heavy metal star te, biker te, gang rual te pawhin an ching nasa hle.
Anih chuti a nih si chuan keini’n kan lo chin ve ngawt hi a dik em? Kan Bible chuan “Do not cut your bodies for the dead of put tattoo marks on yourselves” (Leviticus 19:28) a ti. Chuvangin, Kristiante chuan Bible in ti lo tura min hrilh chu kan ti tur a ni lo ang.
2. Horoscope :
Tunlaia thalaite’n kan buaipui tak pakhat chu ‘Horoscope’ hi a ni. Horoscope hi dawithamna chikhat niin milem (ni, thla leh arsi) be tute’n an thlarau zawl atanga lo chhuak a ni. “Arsi zir mite, mifingte siam alawm” i ti maithei. Mahse, kan Bible chuan “A siamtu biak aiin a siama chu biain, a rawng an bawl ta zawk a” a ti. (Rom 1:25).
Chuti a nih si chuan arsi, ni leh thlate siamtu ‘Pathian chibai buk’ aiin a thil siam chibai lo bukna a lo ni reng a nih chu. Kan fimkhur a va pawimawh em! Keini chuan kan hmathlir (future) atan Horoscope aia ‘rintlak Pathian kan nei’ tih hi kan hre reng dawn nia.
3. Emo :
‘Emo’ tih tawngkam hi tunlaia band lar tak ‘Tokyo Hotel’ atanga kan uar thar niin a lang. A nihna takah chuan ‘Emo’ tih tawngkam hi ‘Hardcore punk’ music atanga rawn zichhuak niin, ‘Emo music’ hrim hrim hi D.C. Hardcore punk hunlai, Rites of Spirit band (America) atanga kum 1980 vel atanga rawn chhuak a ni a. ‘Emo’ tih hi ‘Emotive Hardcore’ emaw, ‘Emotion’ ti paw’n a sawi theih awm e.
Zirmite leh chikmite chuan “Emo ho chu mahni inlabing, mahnia zia inti nei hrang leh mahni hriselna aia incheina ngaipawimawhho” tiin an sawi a. ‘Emo’ haircut hi 2000 A.D. vel atanga rawn chhuak niin an incheinaah pawh tight jeans, T-shirt (music band lem chuang) leh converse pheikhawk te an uar hle a, ‘Emo boy’ leh ‘Emo girl’ te hian make-up an uar hle bawk.
Tunlai hian Emo style lo copy a inchei thalaite kan tam ta hle mai. An style lo copy a, ‘It’s my life’ lo tih ve ngawt hi Kristiante tih tur em ni dawn? I Kor. 6:19-20 ah chuan, “Mahni ta pawh in ni lo a, mana lei in ni asin..” a ti. Chuti a nih chuan ‘It’s my life’ ti ngam tur kan ni dawn em ni? Rom 12:1-2 ah chuan, “He khawvel dan ang hian awm suh ula..” a ti a. Chuti a nih chuan Kristiante tih a mawia kan inchei a tul a ni. Tunlaina hian thalaite hi min tlan khalh lo se, thalaite hian tunlaina hi i tlansan ang u.
4. Om sign :
Tunlaiin hetiang inziahna T-shirt tam tak a awm a, kan nulate zingah pawh hetiang awmna ha hi tam tak an awm a ni. Hei hi ‘Om pathian’ sign, Hindu ho pathian serh leh sang a nih avangin Kristiante chuan nalh hle mahse kan hak loh ngam a tul a ni.
5. Ganesh sign :
Hei pawh hi Hindu ho pathian sign a ni a, a bikin T-shirt ah hmuh tur a tam hle mai. Kan hak loh ngam a tul a ni.
6. Taoism :
Khawchhak sakhua, Taoism sign niin; thi, bengbeh, T-shirt ah tam tak a awm a, inbel lo ngam Kristian thalai i ni ngam ang u.
7. Neronic cross/Nero cross :
He symbol hi kum 2000 kal liamta ah khan Kristiante huatna chhinchhiahnan an hmang a. Thi, bengbeh, T-shirt, toys, wallet, calendar, kawnghren, etc. ah te a chuang thluah mai a. Anti-Christ (Isua dodaltute) sign a nih avangin Kristiante chuan kan inbel lo mai ni lovin, kan haw ngam tur a ni.
Tlangkawmna :
Tam tak sawi tur a awm, kan sawi seng lo. Mahse, khan kan sawi tlem azawngte kha kan tih loh ngam a, kan zawm phawt chuan kan nunah ‘lei rem’ kan rah phah thei dawn a ni. ‘Hetiang sign, a ho lutuk’ i lo ti palh ang e.
Dr. Rebecca Brown chuan, “Sual luh theihna, keimahnia awm zawng zawng hi kan dang ngam tur a ni,” a ti. Sualin a zuam ngam thawmhnaw i inbel fo emaw, Kristiante tih a mawi ni lo zawnga i nun i hmang a nih chuan ‘lo inchik reng rawh’.
Kan thanlen chhoh zelnaah hian sual lam kan awn tlat zel zuk nia. Chuvangin, ‘Engpawh ni se, in awm dan chu Krista chanchintha nen inmil phawt rawh se’ (Philipi 1:27-28).

Hriatthiam har an ti

2010-06-02T14:41:00.000+05:30

Scientist rualte hian thiam loh an nei tawh lo emaw tih mai tur a ni a, a lo ni bik hauh lo. Mihring nunphungah hian hrilhfiah theih loh an lo la nei ve nual mai a. Heng zinga a langsar zualte hi han thlur bik ila.
1. Sen awp awp :
Dawt sawi emaw, zah deuh emaw chuan mi tam tak chu an sen awp awp thin a. Hei hi Charles Darwin pawh khan a chhan a hrilhfiah thiam bik lo a. Tun thleng hian hetianga kan awm theih dan hi tumahin an la sawifiah thei tlat lo.
2. Nuihza :
Mihring kan nuih hian kan rilru tihahdamtu hi kan taksaah a insiam thin a. Mahse, kum 10 zet an zir hnuah fiamthu aiin tawngkam uchuak hian mi a tinui nasa zawk tih an finfiah a, hei hian an ngaihtuahna a tibuai leh map mai.
3. Infawh :
Infawh hi eng vanga ching tan nge kan nih? A chhanna an hre thei lo. Thenkhat chuan hnute hnek atanga chhawm chhoh niin an ngai a, dik erawh an ti chiah bik lo.
4. Mumang neih :
Sigmund Freud khan kan ngaihtuahna chhungril ber phochhuaktu chu mumang a ti thin a. Mahse, hei hian pawm a hlawh lo viau a. Mumang maksak deuh deuh kan neih chhan hi sawifiah thiam an la awm tlat lo.
5. Puithuna :
Eng vanga puithuna hi awm chho tan nge tih hi an la hre thei meuh lo a, tam tak chuan sakhuana atanga rawn chhuak niin an ring ringawt.
6. Hnapkhir kheuh :
Thil chin mawi lo tak, tupawhin an tih tawh vek ni si hi eng vanga ching chho nge kan nih tih hi sawifiah ngaihna an hre chiah lo.
7. Tleirawl :
Thil nung zingah tleirawl chhuah, taksa inthlak danglam hi mihringah chauh a awm a. Taksa mai bakah nungchang a inthlak chhoh dan hi sawifiah thiam an la awm chiah lo.
8. Thilphalna :
Phut let awm miah lova midangte hnena thil kan pe thin hi nunphung danglam zinga sawifiah harsa an tih pakhat a ni.
9. Duhzawng :
Zai, lam, rimawi ngainat, lemziak ngainatna te hi eng vang taka insiam nge tih an sawifiah thiam lo a. Hetiang thil hi kan hriatna tihpunna atan niin an ngai ber.
10. Taksa hmul :
Mihring tam zawk chu hmul nei kan ni hlawm a, taksa hmun hrang hrang a hmul hlawm a. Heng hmul kan neihte hi a tangkaina sawi fak tur an hre mumal tlat lo.

Mipa rilru a na thin

2010-06-02T11:47:00.000+05:30

Hmeichhiate hi mipa aiin an awm a nem zawk kan ti thin a, a ni reng bawk a. Hetiang a nih lai hian mipa rilru han tihnat leh mipa an tihduhdah ve deuhna lai a awm thin.
1. Phone an la duh lo :
Hmeichhiate hian mipa tam tak hi an phone number an hrilh tha duh lo a, an hrilh ve pawhin a dik lo te an hrilh a. A number dik tak an pek pawhin mipa zawkin biak an tum changa phone lak duh loh an ching.
2. In tur leitir :
Hmeichhe tam tak chu khawilo an chhuah changin anmahni sum hman tum miah lo hian an vakchhuak ve tawp a. Mipa an tawn remchangte chu an duhzawng leitir tum sa ranin an awm thin a. Bar velah emaw phei chuan in tur leh ei tur leitir phet an tum thin a. An duh ang an leisak hnu chuan an kalsan leh daih zel.
3. Kar awl hnawhkhahna :
Hmeichhe tam tak chu an kawppui nen an inthen chiah hian an mipa tawn remchang chu a kar awl hnawhkhah nan an kawp a, an duhzawng an hmuh chuan an tawpsan leh daih zel.
4. Mittui an hmang tangkai :
Mipa te hian hmeichhe tap lai hmuh hi hrehawm an ti tlangpui a, hei hi hriain hmeichhe tam tak chuan an mittui hi an duh duha mipa kawihher nan an hmang thin.
5. Kut thak hnawihna :
Mipain hmeichhia kut an thlak hian sawisel an hlawh viau a, hmeichhiain an thlak ve thung hi chuan an enliam leh mai thung a. Hemi hre ran hian hmeichhe tam tak chuan an kawppuite hi kut thak hnawihnan an hmang chawk thin a, mipain an tilet dawn lo tih an hriat avangin an zawngchhang phah fo bawk.
6. Mi zinga sawisel :
Mi awm tamna laiah an kawppuite sawisel vak ching an awm thin a. Mipa rilru nat leh nat loh lam an ngaihtuah vak tawh ngai lo.
7. Inthiktir :
Hmeichhe tam tak chu an kawppui te’n an ngaihsak vak lo nia an hriat chuan engmah sawichhuak lem lovin midang an kawp kual vel a. An kawppuite chuan thik se an tih thin vang a ni.

A hmangaih che em?

2010-05-11T20:12:00.001+05:30

Mit leh mit a intawng chiah a, i rilruah zawhna a rawn lut nghal zut zut mai a. “I kawrhak kha inhmeh a ti che em? Inkawp i duh a, mahse a melh dan che kha a lerh lutuk em aw? I melh ngun avanga mak ti ena rawn en ve mai ani zawk em?”
Hetiang thil hi thalai chuan an tawng ngei ngei a, inngaizawng ni lem lo, ralkhat atanga induhtawn si, sawilang ngam si lo hi an awm fur reng a ni.
Ralkhat atanga inhel lai vel hian an mizia tur chu kawng tam takin a hriat theih a, hemi azir hian bawhzui chi nge chi loh tih pawh a hriat then theih a ni.
Mipa tan :
Hmeichhe chet dan atang hian thil tam tak a hriat ve theih a, a then tarlang ila.
Mit : A mitmu a tihchet dan khan thil tam tak a tilang a. Nangmah a thlir pah che khan a hma aia a men zau zawk chuan a ngaihven che tihna a ni a. Thildangah tilang lo mahse a insum seng lo tihna a ni a, hmeichhe zakzum lamah a awm duh bik. Bawhzui vat mai tur.
Sam : I bulhnaia a awm laiin a sam a khawih sek emaw a nih chuan i vannei thut thei ania.
Dar leh khup : I bulah emaw a thut laia nangma lam hawia a dar leh khup te a hawitir chuan a ngaihven hle che tihna a ni a, lawm hle ringawt rawh.
Hmeichhe tan :
Mipa pawh hian inthup tum viau mahse tihlan chin an nei thin a, chutiang chu ngun taka lo chik mai tur a ni a. Kawp che a duh tih hriat theihna awlsam thenkhatte chu :
Mipain a hmeichhe duhzawng a hmuh chuan a mithmul chu a tisangin a tihniam vel thin a, a chal chu a rawn chuar tap mai ang. Nangmah a hmuh vang che a hetianga a awm chuan ‘a chiang sa’ a ni mai.
In mit a intawn chiah khan tlemin a thle deuh bak a nih chuan a ngaihven hle che tihna a ni bawk a. I bula a awm laiin a nui deuh sang reng a nih pawhin a thinlungah i tla na hle tih hria ang che.
I tih ang zela a ti a nih chuan ngei mai suh, a tum reng vang pawh ni lovin, a rilru i luah khat lutuk a, a ngaihtuah miah loh laiin a lo ti ve zel a ni mai.
Thil dang ngaihtuah lek lova a thlir reng che a nih phei chuan kawp che a duh tih a chiang. I tan chuan ‘Aw’ nge ‘Aih’ tih a ni tawh mai.
Thlirna dang :
Nangmah en che hreh hmel deuhin i lam rawn hawi emaw, in mit a intawn dawn pawha a hawisan zel che chuan a duh vak lo che tih hriat a tha.
In inbiak lai vela hmundang a melhkual emaw, lehlam hawi chunga a be vel mai mai che a nih chuan beisei chi a ni lo.
‘Min la hmangaih em?’ He zawhna i zawh laia a hmui a hup emaw, a hmui a hliah zel chuan ngaih titha reng reng suh. A hmui a liak emaw, hmundang a melh daih emaw, a mit chu hnuailam leh dinglama a lentir chuan midang zawn a hun tihna. Beisei zui mah la a tui tak tak tawh chuang lo ang.

Pasal atana neih loh turte

2010-05-11T20:09:00.002+05:30

I bialpa chu i hmangaih ve hle mai a, pasal atan pawh i duh hle mai a. Mahse, i tan a tha ber ang em tih erawh ngaihtuah ngun a ngai khawp mai.
Catholic puithiam, Father Pat Connor chuan kum 40 teh meuh mai nupa chungchang hi a zirchiangin, nupa inkar buai a lo chingkual tawh a. Pasal atana neih tlak leh tlak loh chu an mizia atangin a hre tawh hle.
Pat Connor hian innei turte chu counselling a neihpui hnem tawh hle a, mi 200 chuang chu a lo inneihtir tawh a ni.
Hmeichhe zingah pawh tleirawl chhuak hlim ho hi a zirtir nasa bik hle a. Ngaihzawng an neih tawh hnu chuan an mit a del vek tawh thin a, ngaihzawng an neih hma hian an rilru a la fim ber niin Connor hian a sawi.
A sawi dan chuan mi a hmangaih vak theih a, mahse an han inneih chiah hian a fuh vek ngai lem lo a. Hei vang hian hmeichhiain an mipa duhzawng tak pawh ni se, a hnuaia mi ang hi an nih chuan pasal atan an tha ngai lo a ni.
Pasal atana neih chi loh te chu :
1. Nu te tih ang anga awm.
2. Mipa pawisa hmang thiam lo tak.
3. Thian nei mumal lo.
4. Mi zinga i rilru tihnual thin.
5. Midangte khak mai hreh lo.
6. Amah an fiam tuma nui ve duh ngai lo.
7. Thuneihna intawm duh lo.

Kashmir ah Isua an phum

2010-05-11T19:31:00.000+05:30

“Isua Krista kha kraws-a an khenbeh khan a thi lo a, an lakthlak hnuin Kashmir lamah a kal a. Kashmir ah hian hun engemawchen a khawsak hnuin Srinagar ah a thi a, helai hmunah hian an phum zui ta a ni.”

He thu hi tunhnai mai ni lo, hun rei tawh tak atang khan an lo sawi thin a, awihtu pawh an thahnem viau mai a. Srinagar a hmun pakhat, Rozabal hmun thianghlim an tihah Isua hi an phum niin an ring hlawm a ni.
Tunhnai khan Isua thlah kal zel nia insawi pakhat, New York lama lehkhabu ziaktu Suzanne Olsson chuan Isua ruang chu phawrh leh a tum a, inhnialna a chawkchhuak nasa hle.
He hmun thianghlim, Rozabal hi 1973 khan Srinagar journalist pakhat, Aziz Kashmiri chuan a lehkhabu ‘Christ in Kashmir’ ah a ziaklang a, heta tanga lar chho hi a ni.
A ziah dan chuan kum 2,000 chuang kalta khan Isua chu an khengbet ngei a. Mahse, kraws ah khan a thi lo a, Kashmir lamah hian a pem a, a hnuah Srinagar ah hian an phum ta niin a ziak.
Suzanne Olsson hian Isua thlah chhawng 59 na niin a insawi a, he hmun thianghlima an sawi hi zirchianga, DNA test neih a tum a ni.
Olsson chuan Rozabal hi an chhungkaw thlan hmun a nih thu a sawi a. France ram mi an nih thu sawiin, Isua leh a nupui Mari Magdalini te chu Isua an khenbeh hnu khan France ah hian kum 30 an khawsa phawt niin a sawi bawk.
A sawi zelnaah chuan Isua leh Mari Magdalini hian fapa pahnih leh fanu pakhat an nei a, Suzanne hian Isua fapa pakhat zawk thlah kal zel an nih thu a sawi a ni.
Suzanne Olsson hian Isua ruang chu haichhuah leh ngei a tum hle a, hei vang hian thlan vengtu pakhat, Mohammad Amin chuan an kalh tlat thu leh ngun lehzuala helai hmun hi an ven thu a sawi a. Isua chu khawvelah an phum tih thuthang chu dawt mai a nih thu a sawi bawk.
Islam lehkhabu thianghlim ‘Quran’ ah chuan Isua chu ‘Messiah’ tiin a inziak a, kraws-ah pawh an khengbet lo a, Pathian hnenah a nung chungin a chho niin a inziak bawk.
Amin chuan Quran zirtirna atang chuan Olsson-i ngaihdan chu pawmpui harsa a tih thu sawi a. Olsson-i lakah hian FIR te pawh an thehlut a, a visa pawh thuneitute an cancel tir hial a ni.
Olsson-i ngaihdan tawmpuitu pakhat, Kashmiri lehkhathiam Fida Hassnain chuan 1994 khan lehkhabu pakhat ‘A Search for the Historical Jesus’ tih a ziak a, hetah hian Srinagar-a Isua an phum chungchang hi a ziak a. Hemi hnu hian Olsson nen hian lehkhabu pakhat ‘Roza Bal the Tomb of Jesus’ tih an ziakdun leh bawk.
Amin chuan hetianga thuthang a awm tan dan chiah hi hrechiang lo mahse, an khuaa sumdawng thenkhatin an khuaa mi an hipluh theihna a nih beiseiin dawt an thehdarh ni bera a hriat thu a sawi a. Thlan tlawhtu chu an thahnem thei ngang mai a, an khua chu an buai phah hle niin a sawi bawk.
Khualzin pakhat, helai hmun en ve pakhat pawhin thlan chu a lo tichhia a, a them thenkhat chu a hawn nghe nghe tih a sawi.
Rozabal chauh lo, thawnthu dang hmangin Isua leh Kashmir hi an sawizawm tel bawk a. Srinagar bul lawka Buddhist biak in pakhat chu Isua hian a tlawh niin an sawi bawk.
India rama Isua kal chungchang pawh an sawi nasa hle a, Islam, Buddhist leh Kristian mithiam thenkhat thuziakah chuan Isua hian India hi kum zabi 19 na velah khan a tlawh niin an tarlang a.
Isua hi kum 12 leh kum 30 inkar a nih lai khan a chanchin hi hriat mumal theih a ni lo a, Chanchintha bu velah khan engmah a intarlang lo a. Hemi hun chhung hian Isua chu India ah kalin Buddhist rinna vel a zirchiang niin an sawi.
Hetianga buaina neuh neuh a awm chhoh takah chuan Rozabal enkawl tura an din, Caretakers’ Committee chuan sakhaw hruaitu hrang hrang kohkhawm an tum a, hmalak zel dan tur an rel dawn niin Mohammad Amin chuan a sawi.

Buaipui tham ‘Sexting’

2010-03-09T16:13:00.003+05:30

Kum 10 pawh a la liam hman lo, khatih hunlai khan nupa emaw, inngaizawng karah emaw rinawmlo deuhte manchhuahna tha tak chu kawr nghawnga hmui hnawihsen kai te, hotel bill sang lutuk te emaw a ni thin a. Tunlai khawvelah chuan engkim a danglam zo ta.
Khawvel hmun hrang hrangah mobile phone in mihring nunah hmun a luah nghet tawh hle a. Kan ram ngeiah pawh mitin maiin neih an tum tawh a tih theih bawk a. Mobile phone hi a tangkai viau laiin kawppuite laka rinawmlohna lanchhuahtirtu a ni tan tlat. Ram changkangte ang bawkin hmundanga kal chhuak lem lo pawhin, mahni inchhung lum atangin kawppuite lakah a rinawm loh theih ta a. Kutzungpui chauh tiche chungin midang nen thinlung inpawh takin a awm theih der tawh a ni.
Khawvel hmun hrang hrangah hetianga SMS hmanga thu thianghlim lo tak tak inthawn hi an uar hle a, a sawi awlsam nan ‘sexting’ an ti mai a. A tir takah chuan thalai zawkte zingah a tam hle a, tunah chuan tlema phanchang zualte zingah pawh thil thar a ni tawh tlat lo. Ngaihzawng nei lai emaw, nupui pasal nei tawh emaw zingah pawh ‘sexting’ hian bu a khuar hneh tawh hle a. Tunhmaa uirena kan tih ang tak kha ni tawh lo mahse hei hi ‘uirena chhuak thar’ a tih theih hial tawh awm e. Thenkhat chuan uirena ang ema ngaih chu dik an ti lo maithei a, mahse psychotherapist Paula Hall chuan ‘tisa uirena’ em thleng lo mahse ‘rilru uirena’ a thlen hrim hrim avangin sawi hran theih a nih loh thu a sawi ve mauh mai.
Paula chuan, “Sexting ti thinte zingah thudik puanchhuah duh lohna thinlung a awm a, kawppuite laka thil zepruk ngai a awm avang hian a thianghlim tawh lo a. Kawppuite laka rinawmlohna lian tak chu a ni tawh hrim hrim,” a ti a.
“Hetianga kawppuite laka thuruk neih tlat hi a pawi a, inkawp zelna kawngah thil pawi tak a thlen thei a ni,” a ti bawk.
Ram changkang zawkah te chuan SMS mai ni lovin, an phone changkang tak tak hmangin an thlalak saruak deuh deuhte MMS hmangin an inthawn thin a. Hetianga an inthawn chhoh zel hnu chuan a taka intawn duhna thinlung a siam ta thin a ni.
Sexting hi a bik takin thalai zingah hian a hluar hle a, kan ramah chuan MMS te a la tih theih ve lem loh a, heti chung hian SMS hmang chungin sexting hi an kalpui nasa hle a. MMS leh SMS te hi inang lo viau mahse an tum chu a inang reng tho a, sawi hran theih chu a ni lo. Mithiamte sawi dan chuan sexting hian mipat hmeichhiatna ang bawkin mi pahnih inkarah boruak thianghlim lo tak a siam thin a. Hetiang thil hi chin laklawh tawh chuan atchilh theih em em a ni a, hei vang hian thil hlauhawm tak a ni.
Tam takah chuan taksa intawng kher lo pawhin an kalpui a, hmai chhana inhmu kher lo pawhin thu zahmawh tak takte an inthawn tawn thin a. Hetiang thil hian kawppuite nena inthenna a thlen nasa hle a. Mi tam tak chu an kawppuite nen an hlim loh em avangin sexting lamah hian an inhmang nasa a. An rilru hah tihdamna atana hmang niin chhuanlam an siam a. A dikna chen a awm laiin, a rei deuh hnu chuan an atchilh chho a, a bawihah an lut ta thin a. An duh hunah an talchhuak leh thei thin lo a ni.
Tunhnai lawkah milar zinga hetiang thil vanga inthen phah hi sawi tur an awm nual a. Chelsea left-back Ashley Cole pawh a nupui Cheryl Cole chuan a manchhuah phah a, tunah hian an inthen mek a. A hma deuhin golf lalpa tih hial Tiger Woods pawh a lo hmingchhe hluai tawh bawk a. TV presenter lar tak Vernon Kay pawh a nupuiin sexting vang hian a manchhuak a, an inthen phah tawh bawk. Ashley Cole, Tiger Woods leh Vernon Kay te hian an hmeichhe thil thawn thinte hi an mutpui theuh a. Tiger Woods phei chuan pakhat aia tam daih a mutpui lehnghal. A tir takah chuan an tum bik kher lo ang, mahse a rei deuh hnu chuan an thiltih chu nuam tihna an nei a, tih zel chakna an nei chho a. A tawpah chuan an nupuite tana an rinawmna kha an theihnghilh phah ta a ni.
2005 vel atang khan sexting hi sawi tur a awm tan a, US, UK, Australia, New Zealand leh Canada ah te hetiang hunlai atang hian an ching tan a.
2008 a tleirawl 1,280 vel an zawhnaah chuan kum 13-19 inkar (Group A) zinga 20% leh kum 20-26 inkar (Group B) zinga 33% te chuan anmahni thlalak, saruak deuhte ch midang an thawn tih an sawi a. Group A zinga 39% te leh Group B zinga 59% te chuan midang hnenah zahmawh rawngkai thu an thawn thin thu an sawi a.
UK bikah kum 11 leh kum 18 inkar zinga 38% te chuan hetiang zahmawh rawngkai milem leh thu hi an thawn nasa tih an sawi. Ram dangah chuan tleirawl te te, zahmawh rawngkai inthawn thinte hi an manchhuak nasa tawh a, dan hmangin an hrem zel a ni. American tleirawl zinga 15% te chuan an cell phone ah milem leh thu zahmawh tak tak an dawng thin a.
12 leh kum 17 inkarah 4% te chuan anmahni saruak thlalak emaw, an video emaw chu midang hnenah an thawn tawh bawk a. Kum 17 bawr vel zinga 8% te chuan hetiang thil hi an thawnchhuak a, 30% te chuan an dawng bawk.
Hmun thenkhatah chuan sexting vanga mahni intihlum an awm nual tawh a. Kum 18 a upa Jessica Logan chuan an sikulah bilapa a nei a, a bialpa hnenah hian a saruak thlalak a thawn a. A hnuah a bialpa nen hian an inban leh ta si a, a mipa chuan thlalak hi hmeichhe dang hnenah a thawn darh ta a. Heng hmeichhiate hian Jessica chu mihur chhuahin an chhuah phah a. Jessica chuan hrehawm a ti leh ta hle a, sikul pawh a kal ngam tawh lo a. Thla hnih hnuah chuan a bedroom ah a inawhhlum phah a ni.
Thil atthlak a ni :
Sexting hi thil atthlak tak mai a ni a, milem emaw, thu emaw pawh ni se, thawn tawh chu lak let leh theih a ni tawh lo a. Mi kuta a awm tawh chuan an duh duhin an tikual thei tawh a, pawi thui tak a thlen thei tlat a ni.
Thlalak emaw, video emaw te chu midangin an neih tawh chuan cell phone mai bakah internet thlengin an thehdarh tawh thin a. Heti a nih chuan kumkhuain tihbo theih tawh lohin a awm thei a, mi nunkawng a tichhe vek thei tihna a ni a.
La naupang tak tak thlalak emaw, video emaw a nih phei chuan an khawsak zelna turah harsatna tam tak a thlen thei a. Kawppui zawn kawngah phei chuan buaina lian tak an tawk ngei ang a, kawppui tur hmuh zawh loh pawh awl tak a ni ang.
Tunlai khawvel changkang tawhah chuan mitinin privacy vawn thiam hi a pawimawh tawh lehzual a. Sexting lama inhnamhnawih loh hi a him ber a, luhchilh laklawh chuan chhuah a harsa a, a atthlak mai bakah hian thihna hial a thlen thei tih hriat a tha hle.

Sexting chu eng tihna nge?

Sexting tih chu mobile phone hmanga zahmawh rawngkai message emaw, milem zahmawh deuh deuh emaw inthawn tihna a ni.

Hmeichhe duhthusam mipa famkim chu

2010-03-08T16:24:00.000+05:30

Hmeichhe hovin an mipa duhzawng tak an sawi a, heta ngaihdan lakkhawmah hian an mipa duhthusam chu kumkhatah cheng nuai 3 vel tal lalut an nih a ngaih bakah, 5ft 11 inches a sang an nih a ngai bawk a. Hei mai hi a la ni lo cheu, hetianga mipa duhthusam hian car changkang tak mai a neih tel a ngai bawk.
UKDating.com chuan hmeichhe 83,000 rual zette ngaihdan a lakhawm a, he ngaihdan lakkhawm atanga an chhanna tam berte chu mi pakhatah an chantir chhin a. A chunga tarlan tak khi British hmeichheho chuan an mipa duhthusam chu a ni.
Heng hmeichheho chhanna en hian an mipa duh chu lehkha pawh zir sang ve pangngai tak, a lo berah graduate chin tal an nih a ngai a. Incheina lamah pawh ti mai mai lo, smart taka inchei thin an duh tel bawk.
He ngaihdan lakkhawmah hian hmeichheho duhthusam ni tur chuan hmelthat em em pawh a pawimawh chuang lo a. Hetiang mipa hi kg 76 bawr vel a nih a ngai bawk a.
Mahni invawng fel thei tak, meizial zuk leh drugs vel tih aia gym kal ngaina mi nih a ngai bawk a. Heng hmeichhe zinga 98% ngawt chuan finna lamah pawh mi pangngai aia sang ngat an duh a ni.
Heng mipa hian wine lampang bakah ran vulh chungchang pawh an hriat a ngai a. Hmuihmul zuah, sam sei leh pa tawi deuhte chu an duh thak lo.
Hemi zirchiannaa hma latu ber, David Brown chuan, “Tunlai khawvelah hian a hma zawng aiin sum hi a pawimawh lehzual tawh a. Hmeichhe maltlat zawng zawngte hian an duhthusam anga awm theih an tum vek tawh a tih theih,” a ti a.
“Hetianga hmeichhe tlahlang te hian an duhthusam anga awm tur chuan mipa hlawh sang tak, khawsak lamah pawh nuamsa ve tak an duh phah a ni,” a ti bawk.

Sex ah thlarau mi an sang duh

2010-03-05T20:33:00.002+05:30

Tunhnaia mithiamin an zirnaah chuan thlarau mi tak mai te hian mipat hmeichhiatna an hmang nasa bik niin an sawi a. Hetianga thlarau mi zingah pawh hian hmeichhe lam an ni duh bik tih an sawi bawk.
University of Kentucky mithiamte’n an zirnaah hian thalai zingah ruihtheih thil vang emaw, ngaihtuah lawk lem lo chung emaw, sakhaw thil emaw avanga mipat hmeichhiatna hmang ai mahin thlarau mi nih avanga hetiang lama inhmang hi an sang duh zawk an ti.
Hemi zirchianna kawnga hma latu ber, Jessica Burris chuan, “Sakhaw lama inhman leh thlarau mi nih hi kan nitin nunah a pawimawh tih hi chu mitinin rei tak chu kan lo hre tawh,” a ti a.
“Chiang lehzuala han zir takah chuan thlarau chenchilh hian danglamna tam tak chu a lo nei chiang hle a. Hei hi kawng khat chauh a ni mai lo a, kawng hrang hrangah a ni lehnghal,” a ti bawk.
An zirchiannaah hian tehna chikhat, ‘Spiritual Transcendence Scale’ an tih chu an hmang a, an chhutnaah chuan inpawhtawnna (connectedness), mi zawng zawng huap zo (universality) leh tawngtai hlawhtlinna (prayer fulfillment) te chu a bulpui pawimawh tak an ni a.
Heng thil pathum zingah hian inpawhtawnna ber hian mipat hmeichhiatna lam kawng chu a kawk tih thu sawiin, thlarau lama itna insiam chuan mi hrang hrang nena mipat hmeichhiatna hman kawngah a hruailut a. Heng mite hian a tlangpuiin mipat hmeichhiatna an hman hian condom an hmang ngai lem lo niin an sawi bawk.
He thil an zirna lamah hian university zirlai, undergraduate 353 te chu zawhna zawtin an kawm chiang a, heng zinga 61% te chu hmeichhia an ni nghe nghe a. An zawhnaah chuan ruihtheih thil tih thin dan te, rilru thawh thut ang anga chet thin dan te, sakhaw ngaihsak dan te, thlarau lam ngaihtuah dan te leh mipat hmeichhiatna an hman dante a tel a.
Thlarau nun lama an chhanna tam zawkah chuan an tawngtai emaw, fianrial hun an hman emaw hian inpumkhatna rilru an pu tlangpui niin an tarlang a. Mimal taka inpawh chu thil harsa niin lang mahse, a nawlpui nena inhawng taka inpawh duhna an nei ta thin niin an tarlang bawk.
Hetianga rilru lama inpawhna tha tak nei vek tura ngaihtuahna an put vang hian mipat hmeichhiatna lam pawh zalen takin an hmang ta mai thin a. Hei hi sualah pawh an ngai lem lo a, thil pangngai ve tak ni maiin an ngai tawh a ni.

Guitar zut nalh ber Jimi Hendrix

2010-02-24T16:05:00.000+05:30

Kum 40 chuang a ral tawh a, guitarist ropui tak tak an chhuak hnem tawh hle a, heti chung hian ‘Guitar Lalpa’ ti hiala hriat Jimi Hendrix chu guitar zut nalh berah an la thlang ta cheu a. Amah ber hian fam chang tawh mahse tunhnai khan musician rualte chuan 1970 vela Jimi Hendrix hla ‘Voodoo Child (Slight Return) a guitar zut chu tun thlenga guitar zut mawi berah an thlang. Voodoo Child hian Guns N’ Roses hla ‘Sweet Child O’ Mine’ chu a khum a, Slash-a guitar zut hi pahnihnaah a awm a. Kum 5 kalta khan Total Guitar magazine chuan hetiang hi an thlang a, hemi tum hian ‘Sweet Child O’ Mine’ hi pakhatna a ni thung. Tun tumah hian musician website MusicRadar.com chuan guitar zut nalh ber thlanna hi an buatsaih a. Khawvel hmun hrang hranga musician rualte chuan vote hi an thlak a, Jimi Hendrix hi a chungnung ber a ni. Top 20 an thlanchhuah zingah hian Michael Jackson-a hla ‘Beat It’ pawh 20 naah a lang a, he hlaah hian Van Halen guitarist Eddie Van Halen chuan a zut a ni. Pakhatna dinhmun hauhtu Voodoo Child bul tan nan hian Hendrix chuan ‘wah-wah’ effect a hmang a, a hmaa Jimi Hendrix-a hla ‘Voodoo Chile’ tih chhunzawmna niin, a album ‘Electric Ladyland’ ah a telh a. 1970 khan single angin a tichhuak a, a hnu chuan a hming pawh hi Voodoo Chile tiin a thlak ve leh a ni. Guitar zut nalh thlanchhuah zingah hian hranghlui lam an lang hnem hle a, tunhnua mi chu pahnih chauh an lang a tih theih a. The White Stripes guitarist Jack White leh Muse guitarist Matt Bellamy te bak chu tunhma lam chhuak vek an ni. MusicRadar.com tlawhtu mi 5,000 chuangin vote an thlak atanga a lan dan chuan 2009 ah pawh tunhmaa rock music khan rimawi ngainatute a la hneh ber a tih theih.
Top 20 :
1. The Jimi Hendrix Experience - Voodoo Child (Slight Return)
2. Guns N' Roses - Sweet Child O' Mine
3. Led Zeppelin - Whole Lotta Love
4. Deep Purple - Smoke On The Water
5. Derek and the Dominos - Layla
6. AC/DC - Back In Black
7. Metallica - Enter Sandman
8. The Beatles - Day Tripper
9. Nirvana - Smells Like Teen Spirit
10. The Rolling Stones - (I Can't Get No) Satisfaction
11. Black Sabbath - Paranoid
12. Muse - Plug In Baby
13. Eddie Van Halen - Ain't Talkin' 'Bout Love
14. The Kinks - You Really Got Me
15. The White Stripes - Seven Nation Army
16. AC/DC - Highway to Hell
17. Led Zeppelin - Heartbreaker
18. Black Sabbath - Iron Man
19. Led Zeppelin - Black Dog
20. Michael Jackson - Beat It

Football hlapui - "You'll never walk alone"

2010-02-24T16:01:00.000+05:30

English Premier League en thangte zingah chuan hre lo an awm lo ang tih theih, Liverpool FC hlapui ‘You’ll Never Walk Alone’ hian chanchin a ngah phian mai a. He hla hi football kaihhnawih thilah chuan khawvel hmun hrang hranga sak hlawh ber a ni a, thenkhat phei chuan ‘Football khawvela tawngtaina hla’ ti hialin an sawi a. A chanchin hi chiang zawkin belchiang ila.
He hla ‘You’ll never walk alone’ tih hi musical pakhat, ‘Carousel’ tiha telh tura Richard Rodgers leh Oscar Hammerstein II te phuah a ni a. ‘Carousel’ hi Ferenc Molnar-a’n lemchan pakhat a phuah ‘Liliom’ tih atanga lakchhawn a ni.
‘You’ll never walk alone’ awmna lemchan ‘Carousel’ hi April 19, 1945 khan Broadway ah an hawng a, vawi 890 ngawt an entir nghe nghe a. He lemchanah hian a changtunu Julie Jordan-i cousin Nettie Fowler chuan ‘You’ll never walk alone’ tih hla hi Julie te nupa thlamuan nan leh Julie pasal Billy Bigelow-a’n ruk ruk a tumna a tlawlh avanga intihhlum a tum laia Julie fuih nan a hmang a ni.
He lemchan tawp dawna an fanu Louise-i’n a lehkha zir lai tha taka a zawh avanga fuihna atan leh an nufaa a hmangaihzia lantir nan a pa Billy chuan a rawn sa ve leh bawk.
Liverpool khaw band, rock and roll group ‘Gerry & the Pacemakers’ khaipa ber Gerry Mardsen chuan he hla hi nalh a ti em em mai a, a band member te hnenah chuan sak ngei a duh thu a sawi a. An han sak chhoh takah chuan hriat an hlawh phah ta hle a.
Hetianga Liverpool khawpuia a lar chhoh takah chuan Liverpool Football Club pawhin a thluk chu an hmang phawt a, a hnulamah a hla thu pawh chu an chhawm zui ta zel a. A tawpah phei chuan a hla thupui hi an club chhinchhiahnaah hial an telh zui a, tun thlengin an la hman chhunzawm phah a ni.
1963 khan khatih laia Liverpool manager Bill Shankly chu Gerry Marsden chuan ‘You’ll never walk alone’ tih hla an thun fel vek tawh chu a pe a. Shankly chuan a duh em em a, football chanchin ziaktute chuan an hre ve leh a, Liverpool FC chuan Gerry Marsden-a hla hi an club hlapuiah an hmang dawn tih chu mi hriatah an puang ta a ni.
Tunah chuan Liverpool mai pawh ni lo, khawvel hmun hrang hranga club te chuan he hla hi an chham rual dual dual tawh mai a. Football ngaina tak tak inti te zingah chuan hre lo an awm lo ang tih theih a, football khawvelah chuan he hla aia sak hlawh hi a awm chuang lo.
He hla lo sa tawh hi an thahnem hle mai a, heng zinga a langsar zual thenkhatte chu :
1. Gerry & the Pacemakers :
Gerry & the Pacemakers in an sak hi hriat hlawh leh lar ber chu a ni a, khawvel hmun hrang hranga football stadium chhunga ri thin chu anni sak hi a ni.
2. Die Toten Hosen :
German rock band Die Toten Hosen hian an ram chhunga football fans te tan he hla hi an sa a, football hmunpuiah chuan anni sak hi a ri reng mai a ni.
3. The Three Tenors :
The Three Tenors an tih thin, classical lama miropui - Plácido Domingo, José Carreras leh Luciano Pavarotti te chuan a dan dang deuhin he hla hi an vawrh ve leh a ni.
4. Tom Jones :
‘The Tiger’ an tih, Tom Jones chuan soul music lam hawiin a sa a, hriat pawh a hlawh lehzual phian.
5. Jordin Sparks :
‘American Idol’ hian a dinhmun ropui tak thlenna kawngah he hla hi fuh em emin a vawrhchhuak a, a dinhmun siamtu pakhat niin an sawi.
6. Renée Fleming :
Renée Fleming chuan US president Barack Obama lawmna ‘The Obama Inaugural Celebration Concert’ ah he hla hi a sa a, lawm a hlawh hle.
7. Elvis Presley :
‘The King’ chuan ama style pangngaiin he hla hi a sa a, he hla sa tawh zawng zawng zingah chuan a thlawh fuh ber pawla sawi a ni.
8. Celtic FC supporters :
Celtic FC fans te chuan 2004 UEFA Cup a FC Barcelona nen an inkhelh dawn tuma firfiak hovin fans kalkhawm an thahte hriatreng nan an sa a, mi thinlung a hneh dan a danglam hle.
9. Danielle & Jeri :
English hmeichhe pahnih Danielle leh Jeri te hian rui deuh chungin Karaoke khawl hmaah he hla hi an sa a, hei hi YouTube ah an dah a, lawm a hlawh phian.
10. Liverpool FC fans :
Sawi tam a ngai lo, Anfield Road, Liverpool ah chuan hei baka hla ropui hi a awm thei tawh lo.