wafanews

’کہیں بچے کا گردہ بیچنا نہ پڑجائے‘

noreply@blogger.com (NAAT) — Mon, 09 Dec 2019 01:52:00 +0000

اپنی صحافتی کام کے دوران طرح طرح کے لوگوں سے ملنے کا اتفاق ہوا: طاقتور، کمزور، امیر، عام، خاص، سچے، جھوٹے وغیرہ۔ لیکن بعض ایسے لوگ بھی ملے جن کی کہانیاں ذہن پر نقش ہوگئیں۔ انہی میں سے ایک عنصر علی ہے۔

عنصر سے میری ملاقات سرگودھے کی تحصیل کوٹ مومن میں ایک رپوٹنگ اسائنمنٹ کے دوران ہوئی۔ پنجاب کا یہ زرخیز علاقہ مالٹوں، نارنگیوں اور کینو کی پیداور کی وجہ سے جانا جاتا ہے۔

عنصر کی عمر تیس سے پینتیس سال ہوگی (وہ نہ تو اپنی سہی عمر جانتا ہے اور نہ ہی پڑھ لکھ سکتا ہے)۔ کچھ سال پہلے اس کا موٹر سائیکل کے ساتھ حادثہ ہوگیا، جس کے بعد سے وہ ذرا لنگڑا کر چلتا ہے۔ عنصر اور اس کی بیوی ایک زمیندار کے پاس روزانہ سولہ سے سترہ گھنٹے محنت مزدوری کرتے ہیں۔ عنصر باہر کھیتوں میں زمین اور مال مویشی سنبھالتا ہے اور اس کی بیوی سارا دن زمیندار کے گھر میں کام کرتی ہے۔

دونوں کو ماہانہ تین چار ہزار روپے ملتے ہیں۔ اس تنخواہ میں ایک انسان کا گذر بسر بہت مشکل ہے۔ عنصر کو دو وقت کی روٹی کے لیے بار بار زمیندار سے قرض لینا پڑتا ہے۔ عنصر کے مطابق یہ زمیندار کوئی ظالم انسان نہیں۔ وہ مار پیٹ نہیں کرتا اور اگر غصہ آ بھی جائے تو ذرا ذرا سی بات پر گالم گلوچ نہیں کرتا۔ عنصر کے مالک نے اسے اپنی زمین پر دو کمروں کا گھر بھی دے رکھا ہے۔

جب کبھی علاج معالجے کی ضرورت پڑ جائے، خوشی یا غم کا موقع ہو تو وہی ان کے کام آتا ہے اور مزید رقم دے دیتا ہے۔ لیکن ہوتا وہ قرض ہی ہے، جس کا ریکارڈ زمیندار اپنے پاس رکھتا ہے۔ عنصر صرف کاغذات پر انگوٹھا لگا دیتا ہے۔

کچھ سال پہلے جب یہ قرض زیادہ بڑھ گیا تو زمیندار کی طرف سے دباؤ بھی بڑھ گیا۔ عنصر کے پاس اور کوئی راستہ نہیں تھا، تو اُس نے اپنا ایک گردہ فروخت کر ڈالا۔ مقامی ایجنٹ اور ہسپتال کے عملے نے اپنے بیس ہزار روپے کاٹ کر اُسے ایک لاکھ روپے پکڑا دیے۔ عنصر کا قرضہ کم ہوا، لیکن زیادہ عرصے کے لیے نہیں۔

چند برسوں کے اندر عنصر پر زمیندار کا قرضہ پھر چڑھ گیا تو اس بار اس نے اپنی بیوی کو گردہ بیچنے پر آمادہ کر لیا۔ ایک بار پھر انہوں نے چین کا سانس لیا، لیکن یہ بھی عارضی ثابت ہوا۔ ان تمام برسوں میں اس کے یہاں آٹھ پچے پیدا ہوئے۔ عنصر کے پاس خود دو وقت کی روٹی میسر نہیں تھی تو ایسے میں انہوں نے اتنے بچے کیوں پیدا کیے؟

''یہ تو اوپر والے کی دین ہے،‘‘ اس نے کھسیانے انداز میں کہا۔ مجھے اس پر ترس آیا اور کچھ غصہ بھی۔ میں نے پوچھا، ''کبھی خاندانی منصوبہ بندی کے طریقوں کا سُنا ہے؟‘‘ تو اُس نے نفی میں سر ہلا دیا۔

سرگودھا کوئی سندھ یا بلوچستان کا دور افتادہ علاقہ نہیں بلکہ ملک کے سب سے بڑے صوبے پنجاب میں لاہور۔ اسلام آباد موٹروے سے متصل ایک تحصیل ہے۔ دل میں سوچا کہ اگر یہاں تک بھی خاندانی منصوبہ بندی والے نہیں پہنچ پائے تو آپ سمجھ سکتے ہیں کہ ملک کے طول و عرض میں آبادی میں تیزی سے کیوں اضافہ ہو رہا ہے۔

بعض لوگوں کو کہتے سُنا ہے کہ بچے پیدا کرنا بھی دین کی خدمت ہے کیونکہ اس سے دنیا میں مسلمانوں کی تعداد میں اضافہ ہوتا ہے۔ ان کا عقیدہ ہے کہ اوپر والے نے ہر جاندار شہ تک رزق پہنچانے کا وعدہ کیا ہے۔ لیکن اگر ایسا ہے تو ملک میں عنصر علی جیسے مقروض لیکن محنتی لوگ اور اس کے بچے فاقے کاٹنے پر کیوں مجبور ہیں؟

عنصر کا کوئی بھی بچہ اسکول نہیں جاتا۔ وہ خود ساری زندگی زمیندار کا مقروض رہا ہے۔ کیا اس کے بچوں کا بھی یہی مستقبل ہے؟ عنصر کا کہنا ہے کہ اسے کل کا پتہ نہیں لیکن وہ اتنا ضرور جانتا ہے کہ چاہے وہ کچھ بھی کر لے غلامی کی اس زندگی سے شاید کبھی نہ نکل پائے۔

اس دوران ملک میں مختلف حکومتیں آتی جاتی رہیں لیکن اس کا عنصر کی صحت پر کوئی فرق نہیں پڑا۔ فوجی ہو یا سولین ادوار، ملک کے سیاسی نظام پر طاقتور وڈیرے، زمیندار اور چودہری حاوی ہیں۔ زرعی اصلاحات کسی کے بھی ایجنڈے پر نہیں۔ ویسے بھی اس نظام سے مستفید ہونے والا طبقہ بھلا کیوں اسے ٹھیک کرنے لگا؟

پاکستان میں قرض کی ان دیکھی زنجیروں میں کتنے لوگ غلامی کی زندگی گذارنے پر مجبور ہیں، اس پر کوئی باوثوق سرکاری اعداد و شمار دستیاب نہیں۔ لیکن آسٹریلیا میں قائم عالمی تنظیم 'گلوبل سلیوری انڈیکس‘ کا اندازہ ہے کہ یہ تعداد تیس لاکھ تک ہو سکتی ہے۔

ان خاندانوں کی اکثریت کھیتی باڑی کے شعبے سے وابستہ ہے جبکہ اینٹیں بنانے والے بھٹہ مزدور اور قالین کے صنعت سے وابستہ بچے اور خواتین بھی جدید دور میں انسانی غلامی کی مثال ہیں۔ یہ مسئلہ پاکستان تک محدود نہیں۔ بھارت، نیپال، بنگلادیش اور افغانستان میں بھی لاکھوں خاندان اس استحصالی نظام کا شکار ہیں۔

قرض اتارنے کے لیے عنصر علی نے اپنا اور اپنی بیوی کے گردے تو بیچ دیے لیکن جوں جوں قرض دوبارہ بڑھ رہا ہے، اب وہ کیا کرے گا؟

اس نے کہا، ''کوئی اور راستہ نہیں۔ کبھی کبھی سوچتا ہوں کہ میرا یہ چھوٹا بچہ کچھ بڑا ہو جائے تو کہیں مجھے اس کا گردہ نہ بیچنا پڑجائے۔‘‘

https://ift.tt/eA8V8J
from Qaumi Awaz https://ift.tt/2LxOgTR
https://ift.tt/eA8V8J
December 09, 2019 at 07:10AM

اُف! لرزہ براندام کر دینے والی یہ وارداتیں... سہیل انجم

noreply@blogger.com (NAAT) — Sun, 08 Dec 2019 10:48:00 +0000

کیا کوئی انسان اتنا بھی وحشی ہو سکتا ہے کہ کم عمر بچیوں کو اپنی ہوس کا شکار بنا لے؟ کیا کوئی اتنا بھی وحشی ہو سکتا ہے کہ 80 سالہ ضعیفہ کو بھی نہ چھوڑے؟ کیا کوئی اتنا بھی وحشی ہو سکتا ہے کہ اپنی ہی لخت جگر کی عزت و آبرو پر ہاتھ ڈال دے؟ کیا کوئی اتنا بھی وحشی ہو سکتا ہے کہ اپنے ہی گھر کی خواتین کی چادر عصمت تار تار کر دے؟ کیا کوئی اتنا بھی وحشی ہو سکتا ہے کہ کسی مجبور و بے بس خاتون کی عزت لوٹنے کے بعد اسے زندہ جلا دے؟ اس کا جواب تو نفی میں ہونا چاہیے لیکن کیا کیجیے کہ ہمیں اس کا جواب ہاں میں دینا پڑ رہا ہے۔

حیرت انگیز اور شرمناک بات یہ ہے کہ ایسا کسی مغربی معاشرے میں نہیں ہو رہا ہے بلکہ ہندوستان جیسے ایک مذہبی معاشرے میں ہو رہا ہے جہاں خواتین کو دیوی کا درجہ حاصل ہے۔ جہاں خواتین کی پوجا کی جاتی ہے اور جہاں انھیں انتہائی مقدس مانا جاتا ہے۔ اسی ہندوستانی معاشرے میں عورتوں اور معصوم بچیوں کی عزت سے ایسے کھیلا جاتا ہے جیسے کہ وہ کوئی بہت ہی مرغوب اور پسندیدہ کھیل ہو۔

اس وقت ہمارے معاشرے میں جو ماحول پیدا ہو گیا ہے وہ سرزمین عرب کے دور جاہلیت کے ماحول سے بھی گندہ، وحشی اور غیر انسانی ہے۔ اُس معاشرے میں تو بچیوں کو زندہ درگور کر دیا جاتا تھا لیکن اِس معاشرے میں پہلے ان کی روح کو زخمی کیا جاتا ہے پھر زندگی چھین لی جاتی ہے۔ دہلی کی نربھیا کا واقعہ ہو یا حیدرآباد کی خاتون ڈاکٹر کا یا پھر اناؤ کی لڑکی کا۔ یہ واقعات اس بات کے شاہد ہیں کہ ہندوستانی معاشرے سے انسانیت کا جنازہ اٹھ گیا ہے اور شیطانیت کا بول بالا ہو گیا ہے۔

نربھیا سے لے کر اناؤ کی لڑکی کے واقعہ کے درمیان ایسے اور بھی جانے کتنے بہیمانہ واقعات ہوئے ہیں جن کے بارے میں لوگوں کو کم کم ہی معلوم ہو سکا ہے۔ مذکورہ واقعات تو میڈیا کی زینت بن گئے اور سیاست دانوں کی توجہ پا گئے۔ لیکن اس درمیان ایسی جانے کتنی وارداتیں انجام پا چکی ہیں جو ہندوستانی معاشرے کی پیشانی پر کلنک کا ٹیکہ بن گئیں لیکن وہ عوامی نگاہوں سے دور رہیں۔ جن کو میڈیا کے کیمرے پکڑ نہیں پائے او رجو سیاست دانوں کی توجہ سے محروم رہیں۔

کیا کسی دن کے اخبارات عصمت دری اور اجتماعی عصمت دری کی خبروں سے اچھوتے ہوتے ہیں۔ نہیں بالکل نہیں۔ روزانہ کہیں نہ کہیں کسی نہ کسی خاتون کی عزت پر ڈاکہ ڈالا جاتا ہے۔ ایک رپورٹ کے مطابق ہندوستان میں ہر پندرہ منٹ پر کسی نہ کسی عورت کی عزت پامال ہوتی ہے اور خواتین کے خلاف جرائم کا ارتکاب ہوتا ہے۔

جرائم کا ریکارڈ رکھنے والے حکومت کے ایک ادارے کے مطابق 2017 میں عصمت دری کے 32500 واقعات رجسٹر ہوئے تھے۔ یعنی 90 واقعات یومیہ۔ اس سال ریپ سے متعلق 18300 مقدمات کو عدالتوں نے نمٹایا اور اس وقت تک عصمت دری سے متعلق ایک لاکھ 27 ہزار 800 واقعات معرض التوا میں تھے۔

اگر ہم اکیسویں صدی میں عصمت دری کے معروف واقعات پر نظر ڈالیں تو سب سے پہلے دسمبر 2012 کا نربھیا کا واقعہ سامنے آتا ہے۔ وہ فزیوتھریپی کی طالبہ تھی۔ اسے ایک چلتی بس میں گینگ ریپ کا نشانہ بنایا گیا اور پھر انتہائی بیدردی کے ساتھ اس پر تشدد کیا گیا۔ پہلے دہلی میں اس کا علاج ہوا اور پھر سنگاپور میں۔ لیکن وہ جاں بر نہ ہو سکی۔ اس وقت پورے ملک میں زبردست احتجاج ہوا تھا اور حکومت نے خواتین کے خلاف جرائم کے سلسلے میں موجود قوانین کو بہت زیادہ سخت کر دیا تھا۔ خیال تھا کہ اس کے بعد ایسے واقعات نہیں ہوں گے۔ لیکن یہ لوگوں کا خیالِ خام ثابت ہوا۔ اس طرح کی وارداتیں اب بھی ہو رہی ہیں۔

اس کیس میں تیز رفتاری کے ساتھ قانونی و عدالتی کارروائی کی گئی اور عدالتوں نے تمام ملزموں کو مجرم ٹھہراتے ہوئے انھیں سزائے موت سنائی۔ لیکن ابھی تک اس سزا پر عمل درآمد نہیں ہو سکا ہے۔

2018 میں کٹھوعہ، جموں کی ایک بکروال خاندان کی ایک آٹھ سالہ بچی کے ساتھ ایک مندر میں کئی دنوں تک ریپ کیا جاتا رہا۔ اس کے بعد اس کو ہلاک کر دیا گیا۔ اس کی موت کو یقینی بنانے کے لیے اس کا سر پتھر سے ٹکرایا گیا۔ اس پر بھی پورے ملک میں احتجاجی لہر اٹھی تھی۔ لیکن یہ بھی دیکھنے میں آیا تھا کہ ریاست کی بی جے پی پی ڈی پی کی مخلوط حکومت میں شامل بی جے پی کے دو وزرا اور مقامی ہندووں نے ملزموں کے حق میں ریلیاں کیں اور بھارت ماتا کے نعرے لگائے۔ اس کیس میں بھی فیصلہ آچکا ہے اور ملزموں کو سزا سنائی جا چکی ہے۔

2018 ہی میں چنئی کی ایک بارہ سالہ لڑکی کے ساتھ 19 افراد نے سات ماہ تک منہ کالا کیا۔ اس دوران اسے نشہ آور چیزیں کھلائی پلائی جاتی رہیں۔ اسی سال کیرالہ کے ایک کیتھول بشپ فرانکو ملکل نے ایک راہبہ کی عصمت دری کی۔ یہ معاملہ بھی کافی اچھلا تھا۔ اگر چہ بشپ نے الزام کی تردید کی لیکن عدالت میں اس کے خلاف مقدمہ چل رہا ہے۔

2019 میں اترپردیش کے اناؤ میں ایک نابالغ لڑکی کی عصمت دری بی جے پی کے ایک رکن اسمبلی کلدیپ سنگھ سینگر نے کی۔ لڑکی نے اس کے خلاف رپورٹ درج کرائی اور جب یہ معاملہ کافی اچھلا اور عوام اور سیاست دانوں کی جانب سے زبردست دباؤ پڑا تب کہیں جا کر سینگر کو گرفتار کیا گیا۔ اسے جیل میں ڈال دیا گیا۔ مقدمہ چل رہا ہے۔ اور اس دوران لڑکی کے والد اور اس کے خاندان کے کئی افراد کی مشکوک حالات میں موت ہو چکی ہے۔

27 نومبر 2019 کو حیدرآباد میں ایک ویٹرینری ڈاکٹر کے ساتھ چار لوگوں نے حیوانیت کی اور پھر ثبوت مٹانے کے لیے اسے زندہ جلا دیا۔ دو روز کے بعد چاروں پکڑے گئے۔ اس کے خلاف بھی پورے ملک میں زبردست احتجاج ہوا اور بالآخر حیدرآباد کی پولیس نے 6 دسمبر کی صبح کو ان چاروں کا انکاونٹر کر دیا جس پر مختلف حلقوں سے سوال اٹھائے جا رہے ہیں۔

مارچ 2019 میں یو پی کے اناؤ کی ایک 23 سالہ خاتون کی اجتماعی عصمت دری کی گئی۔ اس نے گاؤں کے پردھان کے بیٹے سمیت پانچ لوگوں کے خلاف رپورٹ درج کرائی۔ تین گرفتار ہوئے تھے دو فرار تھے۔ گرفتار شدگان ضمانت پر رہا ہو گئے۔ مذکورہ خاتون پانچ دسمبر کو اسی کیس کی عدالتی سماعت میں شرکت کے لیے رائے بریلی جا رہی تھی کہ ملزموں نے اس پر مٹی کا تیل ڈال کر اسے جلا دیا۔ وہ 90 فیصد جلی حالت میں پہلے رائے بریلی، پھر لکھنؤ اور پھر دہلی کے اسپتال میں داخل کی گئی۔ لیکن 6 دسمبر کی شب میں اس کی موت ہو گئی۔

یہ وہ چند واقعات ہیں جو بہت زیادہ مشہور ہوئے اور جنھیں میڈیا، عوام اور سیاست دانوں کی توجہ حاصل ہوئی۔ ورنہ اس قسم کے بے شمار واقعات ہیں جو عوامی نظروں سے اوجھل ہیں۔ اگر 2000 ء سے پہلے جا کر دیکھیں تو اور بھی کئی ایسی وارداتیں انجام دی گئیں جو رونگٹے کھڑے کر دیتی ہیں۔

سوال یہ ہے کہ کیا آج کا انسان جتنی زیادہ ترقی کر رہا ہے اتنی ہی زیادہ وہ تنزلی کے غار میں بھی گرتا چلا جا رہا ہے۔ یہ صورت حال ہندوستان جیسے ملک کے لیے انتہائی تکلیف دہ ہے۔ کیا ہمارا معاشرہ اتنا بے حس ہو گیا ہے کہ اسے انسانیت کا ذرا بھی احساس نہیں اور کیا یہاں کے انسان وحشی جانو ربن چکے ہیں؟

https://ift.tt/eA8V8J
Visit Now Islamic Website

اُف! لرزہ براندام کر دینے والی یہ وارداتیں ... سہیل انجم

noreply@blogger.com (NAAT) — Sun, 08 Dec 2019 10:33:00 +0000

from Qaumi Awaz https://ift.tt/2YsCT4Y

الفردة فى سرح البردة :*

noreply@blogger.com (WafaSoft) — Wed, 21 Aug 2019 06:41:00 +0000

*الفردة فى سرح البردة :*

مدحت رسول مقبول ﷺ میں امام عشق حضرت علامہ امام بوصیری رضی اللّٰه عنہ کی مشہور و معروف کتاب "قصیدۃ البردۃ" کی اب تک ایک نہیں بلکہ کئی ایک اچھی اور قیمتی شروحات منظرِ عام پر آئے ان میں ایک نہایت اہم شرح حضور تاج الشّریعہ علیہ الرحمۃ کے رضوی قلم سے منصۂ شہود پر انکی کتاب "الفردۃ فی شرح البردہ" ہے جس میں علمی و فنّی گفتگو بھی ہے اور علوم متداولہ مثلاً صرف و نحو، معانی و بیان، ادب و منطق، علم کلام و علم حدیث اور علم فقہ و اصول فقہ وغیرہ کی اصطلاحات اور انکی تعریفات بھی ہیں اور اکابر علمائے اہلسنت کی کتابوں سے عقائد اہلسنت کا اثبات بھی. خصوصاً جابجا اعلی حضرت امام اہلسنت کی تصنیفات سے معمولات اہلسنت کی وضاحت بھی ہے نیز دیگر شارحین کے تسامحات پر تنبیہ بھی گویا حضور تاج الشّریعہ کی یہ شرح یونی "الفردہ فی شرح البردہ" سابقہ تمام شرح کی جامع اور قاری کی تشنگی کو دور کرنے والی ہے.

قصیدہ بردہ شریف میں کل دس فصلیں ہیں. پہلی فصل غزلیات میں ہے. اس فصل میں حضرت تاج الشّریعہ نے علم نحو و صرف اور علم معانی و بیان کے اعتبار سے شرح فرمائی ہے. دوسری فصل نفس امارہ کے بیان میں ہے. اس میں حضرت نے مذکورہ علوم و فنون کے ساتھ ساتھ علم تصوف و روحانیت سے بھی کام کیا ہے. تیسری فصل مدح نبوی علیہ الصلوۃ والسلام پر مشتمل ہے. اس میں حضور والا نے اپنے جد کریم سیدی اعلیٰ حضرت اور دیگر اکابر علمائے اہلسنت کی کتب سے عشق رسالت کا درس دینے کے ساتھ عقائد و معمولات اہلسنت کا واضح بیان فرمایا ہے اور احادیث مبارکہ سے حضور علیہ السلام کے فضائل و شمائل بیان فرمائے ہیں. چوتھی فصل میلادالنبی ﷺ کے بیان میں ہے. اس میں میلاد مصطفی ﷺ منانے کی مشروعیت بحث کی ہے. اور دلائل و براہین سے ثابت فرمایا ہے کہ میلاد مصطفی ﷺ منانا ایسا نیک عمل ہے جسے مسلمانوں نے اپنے آبا و اجداد سے ورثے میں پایا ہے. پانچویں فصل حضور اکرم ﷺ کے معجزات کے بیان میں ہے. اس فصل کی شرح میں کثرت کے ساتھ آیات و احادیث نقل کی ہے. چھٹی فصل شرف قرآن کے بارے میں ہے. اس کے اشعار کی شرح میں علم عقائد کی مشہور و معرکۃ الآرا بحث کلام باری کے تعلق سے انتہائی فاضلانہ اور پر مغز بحث کی ہے اور کلام نفسی و کلام لفظی کی بحث میں اعلی حضرت کے رسالے "انوار المنان فی توحید القرآن" سے نقول پیش کئے ہیں اور شرف قرآن کے متعلق بحث امام اہل سنّت کی تصنیف لطیف "انباء الحی بان کلام المصون تبیان لکل شئ" سے پیش فرمائی ہے. ساتویں فصل معراج کے بیان میں ہے اس کے اشعار کی شرح میں آپ نے واقعۂ معراج میں مذاہب مختلفہ میں جمع و تطبیق، واقعۂ معراج کے رات میں ہونے کی حکمت اور رویت باری تعالیٰ سے متعلق قیمتی ابحاث شامل ہیں. آٹھویں فصل میں نبی کریم ﷺ کے جہاد کے بیان میں ہے، نویں فصل حبیب خدا ﷺ کی ذات بابرکت کو وسیلہ بنانے کے بیان میں ہے اور دسویں فصل مناجات اور عرض حاجات کے بیان میں ہے.

اس کتاب کا اردو ترجمہ تاج الشّریعہ کے بڑے بھائی حضرت ریحانِ ملّت علیہ الرحمۃ کے پوتے، خلیفۂ تاج الشّریعہ، حضرت مولانا مفتی محمد ارسلان رضا خاں قادری ازھری حفظہ اللہ نے "الوردۃ فی شرح الفردۃ" کے نام سے کیا ہے جس کا اجراء ۹۹/عرس رضوی، بریلی شریف میں ہوا تھا.

نوٹ : کتابیں فقیرِ قادری(محمد شعیب رضوی) سے واٹس ایپ نمبر 9571066808 کے ذریعے حاصل کر سکتے ہیں.

کامیابی کیلئے قرآن مقدس، اسوۂ مبارکہ اور شریعت اسلامی پر عمل ناگزیر

noreply@blogger.com (WafaSoft) — Wed, 21 Aug 2019 06:40:00 +0000

کامیابی کیلئے قرآن مقدس، اسوۂ مبارکہ اور شریعت اسلامی پر عمل ناگزیر

مدینہ مسجد میں ختم قرآن کی محفل میں عالم اسلام کیلئے رقت انگیز دعا کا اہتمام

مالیگاؤں: قرآن مقدس نے وہ صالح انقلاب برپا کیا کہ ایک صدی کا عرصہ بھی نہیں گزرا تھا کہ اسلام پوری شان و شوکت کے ساتھ کئی براعظموں کو فیض یاب کرنے لگا۔ آج ہم تباہ و برباد کیے جا رہے ہیں، ستائے جا رہے ہیں، مسلمانوں کا خون فلسطین و شام میں بہایا جا رہا ہے۔ درجنوں مسلم ملکوں کو یہود و نصاریٰ نے تباہ و برباد کر دیا۔ اس بربادی کی وجہ یہ ہے کہ ہم نے قرآنی احکام پر عمل کرنا چھوڑ دیا ۔ قرآن سے ہمارا رشتہ کم زور ہوگیا۔ ہمیں قرآن مقدس، سیرتِ طیبہ اور شریعتِ اسلامی پر عمل پیرا ہونا ہوگا جس سے ہماری شوکت کا وہ عہدِ زریں پھر لوٹ آئے گاجو شان دار ماضی کا خاصہ تھا۔ اس طرح کا اظہار خیال مدینہ مسجد میں ختم قرآن مقدس کی بابرکت تقریب میں غلام مصطفی رضوی (نوری مشن)نے کیا۔ شبِ قدر کی مبارک ساعتوں میں امام محترم حافظ فراز احمد قادری کی خدمات کو خراج عقیدت پیش کرتے ہوئے کہا کہ امام موصوف نے قریب تین دہائیوں سے اس مسجد کے منبر و محراب کو رونق بخشی ہوئی ہے اور تراویح میں پابندی کے ساتھ ختم قرآن مقدس کی سعادت حاصل کر رہے ہیں۔ ہم ان کی خدمات اور پابندیِ وقت کو کلماتِ تبریک نذر کرتے ہیں۔ آپ نے یہ بھی کہا کہ ماہ رمضان کے تربیتی موسم کے اثرات پورے سال ملحوظ رکھے جائیں تو زندگی پاکیزہ گزرے گی۔ ہمیں اپنے تمام معاملات میں قرآن مقدس سے رہبری حاصل کرنی ہو گی۔ ہماری ذمہ داری زیادہ ہے کہ ہمارے پیغمبر بھی ختم المرسلین ﷺ ہیں اور ہماری کتاب بھی آخری کتاب ہے۔ ہمیں چاہیے کہ اپنا معاشرہ قرآنی معاشرہ بنائیں تا کہ یاسیت کے بادل چھٹ جائیں۔ اس موقع پر حافظ فراز احمد قادری نے عالم اسلام بالخصوص بیت المقدس کی بازیابی و رزق میں برکت کے لیے رقت انگیز دعا کی۔محفل ختم قرآن کا اہتمام منتظمین مدینہ مسجد نے کیا۔اس محفلِ پاک میں مرحومین کے لیے ایصال ثواب کیا گیا۔

02-06-2019