wejen hud 魔法彼女

co rein

noreply@blogger.com (asuka) — Thu, 21 May 2009 21:31:00 +0000

co be ges i ddoe - orennau falensia organig oedd 'da nhw yn yr archfarchnad. sdim fawr o ots da fi am organigion - o'r hyn rwy'n ei ddeall smo pethau organig bob tro yn well i ti nac i'r amgylchedd, ond mae lot o ots 'da fi am orennau falensia - sy'n well ym mhob ffordd na'r rhai botwm bola am a wn i, hyd yn oed er taw y nhw sydd i'w gweld yn y siopau o gwmpas fan hyn fel rheol.

ar ddihun

noreply@blogger.com (asuka) — Thu, 21 May 2009 03:40:00 +0000

waeth pa mor hir y bydda i 'di bod wrthi'n dysgu, mae'r cwestiynau'n para - cwestiynau digon sylfaenol hefyd - rhai sy'n 'nghadw i ar ddihun liw nos pan ddylwn i fod yn breuddwydio 'mreuddwydion cymraeg anodd. cwestiynau fel: "ffordd mae cyfieithu'r cysyllteiriau saesneg "when" a "though" yn y gymraeg."

nawr wi'n gwybod be ti'n feddwl: mae asuka ni 'di cael clatsien i'r pen, ac wedi colli ei niwrons pan ac er. gad ifi egluro beth yn rhagor. nid y defnydd arferol ar "when" a "though" fel cysyllteiriau isradd sy 'da fi mewn golwg yma, ond defnydd arall lle mae'r geiriau 'ma fel 'sen nhw'n gysyllteiriau cydradd.
h.y., nid
• When I was sitting typing, Shinji bit me.
ond
• I was sitting there typing, when up jumped Shinji and bit my arm.

ac nid
• Though he gets plenty of attention he always wants more.
ond
• He gets plenty of attention - though he always wants more!

falle nad yr iaith "isradd/cydradd" mo'r un briodol yma, ond mae 'na wahaniaeth beth bynnag rwyt ti am ei alw e. yn yr ail "frawddeg when" uwchlaw, mae "when" yn gyfwerth ag "a dyna" neu "ac wedyn", neu jest "a". yn yr ail "frawddeg though" ar y llaw arall, "ond" mae "though" yn gyfleu mewn gwirionedd, ynteu? so eniwê dyma fi'n gofyn i fy hunan ydy pan ac er mor hapus yn gwneud y ddwy swydd yn y gymraeg sydd i "when" a "though" yn saesneg? fel arall, os taw "a" yw'r ystyr, fyddai'n well iwsio "a" yn hytrach na "pan", ac os "ond", "ond" yn lle "er"?

(ffaelu ffeindio'r ateb yn 'ngramadegau i - 'na syrpréis iti. ond alla i'm peidio meddwl na ddylwn i fod yn edrych mewn gramadeg o gwbwl a'r cwestiwn yn un mor sylfaenol. swn i'n talu rhagor o sylw wrth ddarllen, fyddai dim rhaid wrth sut adnoddau eilradd mae'n debyg...)
（￣へ￣）

ponyo! ponyo! ponyo!

noreply@blogger.com (asuka) — Fri, 15 May 2009 19:46:00 +0000

cael cyfle i weld ponyo (崖の上のポニョ) a wnes i'n ddiweddar, y ffilm newydd sbon gan miyazaki hayao. anodd gweud faint o ffefryn bydd y ffilm 'ma'n mynd yn y dyfodol ar ôl ei gweld hi unwaith yn unig, ond ar y foment sa i'n siwr ydw i di joio'r un o ffilmiau miyazaki ers kiki's delivery service (魔女の宅急便, 1989) yn fwy na hon.

lot o bethe gwych am y ffilm 'ma, ond dyma ichi un am y tro: y cymeriad lisa, mam i'r prif gymeriad. rhyfedd pa mor amal mewn storïau ffantasi i blant y bydd mam yn farw ynteu yn marw, yn dost iawn, neu absennol am ryw reswm arall. ond nid fel'na yn ponyo. yma mae'r fam yn ifanc ac yn cŵl, yn fywiog ac yn gyffrous, yng nghanol pob dim. dyna hi uwchlaw. on'd yw hi'n edrych yn alluog ac yn hwylus?

os yw ffilm miyazaki totoro yn dangos inni ddelfryd o dad ifanc, un sy'n gallu gofalu am eu plant yn gyfrifol wrth adael y lle iddyn nhw dyfu, mae ponyo yn gwneud yr un peth i famau! hwrê am mam!

bicis!

noreply@blogger.com (asuka) — Thu, 14 May 2009 19:22:00 +0000

sdim byd fel bwydydd cartre i ddwyn gwlad ei eni i gof un sy'n byw yn bell oddi cartre, oes e? ac o ofyn i alltud o awstraliad beth mae hi (neu e) yn golli fwyaf o ran bwyd, posib iawn y clywi di'n ateb y gair ar ben y post hwn, sef... "bicis!"

bisgis awstralia! milk arrowroots, scotch fingers, milk coffees, morning coffees, honey jumbles, gingernuts, spicy fruit rolls, currant luncheons... enwau dewinol pob un ohonyn nhw, ac yn amal iawn ers symud i u.d.a. rwyf fi a 'mhriod wedi eistedd wrth y ford yn llafarganu'r swyneiriau hyn wrth ein gilydd mewn hanner breuddwyd a'r dŵr yn llifo'n rhydd o'n dannedd...

ond sdim rhaid wrth sut ddefodau mwyach - newydd gael gwerth dros gan doler o fisgis awstraliaidd drwy'r post, llond bocs y buon ni ei archebu ar y we, ac mae'n iced vovos ac orange slices i gyd yn nhŷ asuka ar hyn o bryd!

ga i fanteisio ar y sefyllfa i gyflwyno ichi'r monte carlo, ffefryn i fi, ffefryn i 'mhriod, ffefryn i tithau fydd wi'n siwr! gyda'u dwy fisgïen gnau coco a'r haenen o hufen a jam yn y canol, mae'r monte carlo yn frenin coronog ar fyd bisgedi, yn nhŷb i - ac ardderchog gyda phaned o de. iawn, mae'n amser te beth bynnag. jest gad ifi roi'r tegell ar y ffwrn ar gyfer potaid o de ceylon, cawn ni rannu cwpwl o'r danteithion yma 'da'n gilydd. cei di weld!

HOMING LASER!!!

noreply@blogger.com (asuka) — Wed, 13 May 2009 02:57:00 +0000

wel, wel, mae'r hen flog annwyl yn dal i fod wedi'r cwbwl! down i'm yn siwr fyddai blogger wedi ei ddileu neu rywbeth a finnau heb sgrifennu'r un gair arno ers cyn y dolig... mae'r coed ginco yn sgwâr y dre 'di gadael i'w llwyth drycsawrus ddisgyn i'r ddaear, mae'r eira wedi dod a mynd, mae cennin pedr y gwanwyn nhwthau drosodd yn yr ardd, a dyma fi nôl o'r diwedd.

pam? wel, mae angen awch sydd ar 'nghymrâg i cymaint ag eriôd, mae'n siwr - na, mwy nag eriôd, mae'n debyg. at hynny mae 'na lwyth o anime wi moyn sgrifennu arnyn nhw! anime fel... gunbuster! (トツプをねらえ！ cyf. anno, 1988). dyna noriko o gunbuster! uwchlaw - y hi sy'n gyfrifol am y bloeddiad ffantastig o ddisynnwyr yn nheitl y post. amdani, noriko! darn ar hon'na'n dod yn fuan. (^_-)

sori am ddiflannu gyda llaw, os oes ots 'da neb. ond cath rhywun yn y brifysgol "syniadau" bot hi'n hen bryd ifi ddysgu peth almaeneg, so bues i'n gwneud hyn'na am sbel. ac wedyn roedd hi'n amser crynsh ar gyfer traethawd ph.d. 'mhriod i so treuliais i amser hir yn helpu gyda hyn'na, gan wirio pob atalnod a throednodynnod. ac wedyn...
hei - wi yma nawr ocê!

wrth sôn am y cennin pedr ac ati - am wanwyn! eriôd 'di byw yng nghefn gwlad o'r blaen. eriôd 'di meddwl y byddwn i'n byw yng nghefn gwlad, a gweud y gwir, ond waw. ac nawr bod yr eira 'di mynd o ddifri a'n gardd ni'n tyfu'n wyllt, mae 'na gwningen fach frown sy'n ymweld 'da ni bob gyda'r nos i bori tu nôl i'r tŷ - wi'n disgwyl arni drwy'r ffenest wrth deipio'r union eiriau hyn. wir iti.

sdim clem 'da fi beth mae ddi wrthi'n fyta yna. dant y llew o bosib. neu wair. mae fy chwaer i sophie yn honni y bydd cwningod yn byta unrhyw beth. buon nhw'n edrych ar ôl bwni dosbarth fy nith saith oed dros nos pe ddwrnod, a bytodd hon'na fflip-fflop gŵr sophie a thamed o ddrws y cefen...

... mynte sophie.

annwyl s4c

noreply@blogger.com (asuka) — Mon, 22 Dec 2008 21:03:00 +0000

ar ran y tramorwyr i gyd sy ddim yn gallu gwylio eu s4c dros y we mwyach...
nadolig llawen,
asuka.

siawt-awts!

noreply@blogger.com (asuka) — Tue, 09 Dec 2008 19:11:00 +0000

trodd dad yn saith deg oed yn ystod yr wythnos diwetha' tra bydd mam yn dathlu pen-blwydd sydd ::peswch:: lawn mor arwyddocaol o fewn pythefnos. (^_-)

pennau hapus blwydd o benblwyddi felly i'r ddau ohonynt ill dau, f'annwyl mummy a daddy i!

bwyd figanaidd

noreply@blogger.com (asuka) — Sun, 07 Dec 2008 16:23:00 +0000

mae'r blog 'ma'n cysgu ers rhai wythnosau mae arna' i ofon (fel osaka-chan o azumanga daioh ar y chwith) - nid nad oes dim 'da fi i'w rannu, wrth gwrs. diffyg amser, 'mond diffyg amser yw'r hanes. gobeithiaf sgrifennu ychydig ar ein teithiau diweddar ni i detroit ac efrog newydd cyn bo hir, ond yn y cyfamser dyma ichi ddolen at wefan cwpwl o gogyddion gwych o figaniaid: the post punk kitchen.

dwy yn efrog newydd ŷn nhw sy 'di cyhoeddi sawl llyfr da iawn. pan own i'n tyfu, bois, roedd bwyd figanaidd fel 'sai'n ofnadwy bob amser, yn enwedig pob math o fwyd parti figanaidd fel teisennau a phhhhwdinau. ond mae pob peth rŷn ni 'di ei dreio mas o lyfrau'r rhain jest yn lyfli. dylísh. mae'r ryseitiau ar eu gwefan nhw yn gymysg braidd (dyna'r we ichi!) - ond does modd rhoi dolen at y llyfrau eu hunain, oes e? wel, dim eto.

breuddwydion anodd!

noreply@blogger.com (asuka) — Fri, 14 Nov 2008 03:36:00 +0000

ces i freuddwyd neithiwr lle rown i'n siarad cymraeg. nid taw dyma'r tro cyntaf ifi gael breuddwyd fel 'na, wrth gwrs - rwy'n cael breuddwydion tebyg yn eitha' amal ers blynyddau nawr - ond timod be? nhw yw'r breuddwydion anhawsaf y gelli di eu cael, mwn i! bob tro ifi ddihuno ar ôl y fath freuddwyd bydda' i mor flinedig fel 'mod i am fynd yn ôl i gysgu'n syth.

mae'n gwneud synnwyr wrth gwrs - os taw gyda chryn drafferth rwyt ti'n dy fynegi dy hunan drwy'r gymraeg yn y dydd, dyna'r profiad y bydd breuddwyd yn ei seilio ei hunan arno 'fyd. - a dyna fi'n credu erioed fod gallu breuddwydio mewn ail iaith yn rhyw arwydd bod dyn 'di "cyrradd" o ran dysgu!? ... ha!

cyrri a kare kano

noreply@blogger.com (asuka) — Sun, 09 Nov 2008 14:35:00 +0000

heno o'r diwedd mae cwpwl o'n ffrindiau newydd ni yn oberlin (bois yn adran 'mhriod) yn galw draw am noson anime. fi sy'n gwneud y bwyd (cyrri indiaidd gyda bara nan); diolch i anno (evangelion) am yr adloniant - ei gyfres kare kano ("his and her circumstances").

wel, y disg cyntaf ohoni o leiaf, ac wedyn falle'r trydydd - smo'r ail ddisg ar gael ar netflix o gwbwl. rhyfedd.

"eleven, legs eleven... ETHOLIAD!"

noreply@blogger.com (asuka) — Wed, 05 Nov 2008 13:59:00 +0000

eitha' cyffrous gwylio'r etholiad ar y teledu yma neithiwr. gwnaethon ni gysylltu erial o'r diwedd a chael llun aneglur iawn ar ein set deledu ni. ('na'r erial ar y chwith. ond paid â becso, smo ni'n mynd yn wylwyr teledu - 'nôl i'r nenlofft ag e heddiw.)

a diddorol iawn oedd clywed sylwebaeth katie couric - bron bob tro iddi gyfeirio at dalaith benodol, byddai hi'n iwsio rhyw ymadrodd bachog - "ohio, the buckeye state", "kansas, ruby red" ac ati - a greodd argraff o'r etholiad cyfan yn fath o noson bingo wleidyddol.

*cwestiwn ynglŷn â'r iaith:
• ...a greodd argraff o'r etholiad cyfan yn fath o noson bingo
oes bosib iwsio'r gair "yn" fan'na mewn gwirionedd, tybed?

pwmpenni sbŵci!

noreply@blogger.com (asuka) — Fri, 31 Oct 2008 03:43:00 +0000

hei, t'awydd gweld ein pwmpenni ni?
wrth gwrs bod!

dyma nhw ar ôl ifi bennu cerfio nhw pnawn 'ma, sef totoro ar y chwith, kiki y witsh fach ar y dde...

ac wedi eu goleuo heno 'ma...

a dyma iti'r un llun o totoro ar ôl ifi ei newid e ychydig ar y cyfrifiadur...

ŵŵŵ - dychrynllyd!

byw mewn swigen

noreply@blogger.com (asuka) — Sat, 18 Oct 2008 12:26:00 +0000

newydd fod yn darllen yn y new york times fod y tymor gwleidyddol presennol yn curo pob record yma yn u.d.a. o ran hysbysebu ar y teledu - a finnau heb weld yr un hysbyseb eto! rwy fel 'swn i'n colli rhywbeth diwylliannol o bwys drwy nad oes set deledu 'da ni!

bydd rhaid ifi aros i'r hysbysebion gael eu rhyddhau ar DVD ymhen chwe mis, fel tymhorau the wire a battlestar galactica rwy'n aros amdanynt! (^o^)

'mond caffi grawnfwyd eto. hei, beth...?

noreply@blogger.com (asuka) — Tue, 14 Oct 2008 23:34:00 +0000

'co be daethon ni ar ei draws wrth grwydro strydoedd cleveland bnawn sadwrn: caffi grawnfwyd, h.y. caffi sy'n gweini tri deg chwech o fathau gwahanol o rawnfwyd. (ie, tri deg chwech! un ar bymtheg ar hugain! deuddeunaw!)

a dewis o "toppings" ar gael 'fyd. yr unig topping rwy'n gyfarwydd â fe yw'r siwgwr ar fy nghornflêcs (er bod rhai pobl yn cael ffrwyth dros ei weetabix sbo - o gredu'r llun ar y pecyn). erioed 'di gweld sut beth.

roedd caffi pwdin reis yn little italy yn efrog newydd wrth gwrs, ond mae 'na lot o bethau ynfyd yn efrog newydd. (^o^)

sylw da, emma reese

noreply@blogger.com (asuka) — Tue, 16 Sep 2008 03:29:00 +0000

...er 'mod i'n ffaelu cofio'r olygfa ras geir yn alice.
(gw. y post blaenorol)

'nôl i (c)harm city

noreply@blogger.com (asuka) — Tue, 16 Sep 2008 00:36:00 +0000

buon ni 'nôl yn baltimore dros y sul mewn priodas ffrind. baltimore, y ddinas ro'n ni'n byw ynddi rhwng 1999 a 2003 ond rwyf fi heb ei gweld ers inni ymadael, a dinas ro'n ni'n eitha' balch o gael ei gadael erbyn y diwedd - gan mor ddanjerus yw hi, a hefyd jest o achos diffyg pethau diddorol i'w gwneud yna. ydych chi 'di gweld tymor un the wire, lle mae'r gwerthwyr cyffuriau yn treulio eu diwrnod cyfan jest yn eistedd ar y soffa 'na yng nghanol eu stad yng ngorllewin baltimore? wel, 'na baltimore ichi!

so beth am y daith 'ma i baltimore?

i) gwelais i rywbeth hollol wych na welais i erioed mohono tra o'n ni acsiyli'n byw yn y ddinas, sef y tŷ gwydr ym mharc druid hill, y lle y cynhaliwyd y seremoni. on'd yw e'n anhygoel o beth? pam nad own i'n gwybod bod 'na rywbeth mor cŵl yn 'ninas fy hunan pan own i'n byw yna? byddai 'di bod yn neis bod â rhywbeth ychwanegol i'w wneud yna/rhywle newydd i fynd ag ymwelwyr iddo.

ii) ces i f'atgoffa dros y sul ynghylch ambell i beth gwych am baltimore a'i thrigolion, gan gynnwys yr iaith - gofynnodd menyw ar y bws inni "have you got an ink pen i could borrow?" rown i 'di anghofio'r ymadrodd 'na'n llwyr. "ink pen." (^_^)
rown i hefyd 'di anghofio mor hynod o falch yw pobl baltimore o faner daleithiol maryland. rwy'n siwr bod hyn yn destun a fydd yn hollol boring i bawb ond fi, so croeso iti roi'r gorau i ddarllen y post 'ma fan hyn, ond byddi di'n gweld y faner 'ma ym mhob man - roedd 'na un lan tu fas i'n gwesty ni hyd yn oed. rwy 'di byw mewn pedair talaith yma hyd yn hyn ac er na fyddai clem 'da fi ynghylch baneri massachusetts, nac efrog newydd, nac ohio, rwy'n adnabod baner maryland ar unwaith ar ôl ein sbel ni yn baltimore. be' chi i gyd yn ei feddwl ohoni? mae ddi ychydig fel rhywbeth y byddai dyn yn ei chwifio i gychwyn ras geir, yn nhŷb i, ond wedi gweud hyn'na, baner olygus. un hawdd ei hadnabod, beth bynnag.

'strwth!

noreply@blogger.com (asuka) — Wed, 10 Sep 2008 15:46:00 +0000

un peth nad own i'n barod ato am fyw yng nghefn gwlad rywsut: y bywyd gwyllt i gyd!

cael 'nghnoi gan geiliog y gwair yn y gwely liw nos. gweld groundhogs a drewgwn yn yr ardd. ceirw a gwiwerod ym mhob man.

mae ddi fel y blincin life and times of grizzly adams o gwmpas fan hyn!

sake anime?

noreply@blogger.com (asuka) — Tue, 09 Sep 2008 00:16:00 +0000

cysyniad y'm cyflwynwyd iddo gan flog aimar (aimar, meistres y gwenoglun!) - diolch iddi hi, 'lly! thank you, aimar, for the link!

doedd dim clem 'da fi fod sut bethau'n bodoli, ond 'co'r wefan fan hyn sydd (mi gredaf) yn hysbysebu sake "mezon ikkoku", hynny yw sake ac ar ei label luniau o'r cymeriad poblogaidd kyoko o mezon ikkoku (neu maison ikkoku), y clasur o gyfres manga/anime o'r wythdegau.

beth nesaf? wisgi cymreig "superted"?

(^_^) \_/7o(^_^)

noreply@blogger.com (asuka) — Mon, 08 Sep 2008 01:10:00 +0000

er bod te 'da nhw yn ein general store wych ni, gibson's, bagiau yw'r rhan fwyaf ohono, ac mae e bach yn ddrud at hyn'na. dyma felly ein parsel cyntaf ni o de wedi'i archebu dros y we. te du sri lanca, te du assam a keemun, ychydig o oolong a chymysgedd o'r enw "irish breakfast tea" (a fydd fel arfer yn cynnwys assam gyda rhyw de arall sy'n llai cryf) - dros bedwar pwys o de yna yn aros am ei yfed. doedd e ddim yn rhad, ond dyw te ffansi byth sa' i'n credu.

iawn - y cyfan sy eisiau nawr yw tegell newydd! roedd tegell hyfryd 'da ni am flynyddoedd, un a brynon ni 'nôl yn baltimore ym 1999. mi dorrodd e wythnos diwetha' (y ddolen a ddaeth bant o'r diwedd), so prynon ni un newydd yn y siop five and dime fan hyn - sy ddim cweit yn gwneud y tro rywsut... er fod e i fod i chwibanu, dyw e ddim; ar y llaw arall mae e yn gollwng dŵr, yr hyn rwy bron yn sicr na ddylai tegell ei wneud! rhaid talu mwy na "dime" i gael un da mae'n debyg. ^^

taith shizuku

noreply@blogger.com (asuka) — Sat, 06 Sep 2008 19:49:00 +0000

pwy arall sy'n dwlu ar y ffilm studio ghibli mimi-o sumaseba (whisper of the heart, cyf. kondō, 1989)? gwych o ffilm yw hi - a ffefryn mawr i mi o achos ei phortread serchus o orllewin tokyo ac o'i chymeriadau ei hunan ac o achos ei golwg optimistaidd ar bosibiliadau bywyd teuluol, cariad a chyfeillgarwch. mae celfyddyd y ffilm 'ma'n hardd iawn 'fyd - y hi yw tarddiad y llun a weli di fan'na ar y dde o dan y teitl ffrindie fi. ffilm dda iawn yn y bôn. (ac os darllenir hyn gan rai sy'n hoff o anime ac sy ddim 'di gweld y ffilm hon - wel, rhag eich cywilydd, mi wedaf!)

rwyf am ddiolchi i emma reese am hala ataf ddwy ddolen mae a wnelont â'r ffilm wych hon a pheth gwybodaeth yn ei chylch. down i'm 'di sylweddoli i ba raddau mae'r lleoedd yn y ffilm wedi'u seilio ar leoedd penodol yn tokyo. mae'r wefan hon yn rhoi map (gw. uchod) sydd i'w weld wrth orsaf drên yn y byd rial mae'r prif gymeriad shizuku yn cychwyn ar daith gerdded ohoni yn un o olygfeydd mwyaf cofiadwy'r ffilm - geill ymwelwyr iwsio'r map 'lly i ddilyn yn olion traed shizuku fel petai - tra ceir ar y wefan hon ffotos o leoedd rownd yr ardal sy'n ymddangos wedi'u hanimeiddio yn y ffilm.

gwych darganfod bod gan rywbeth lu o ffans pan fydd y peth yn ei haeddu!

wrth nyrsio 'nhroed i...

noreply@blogger.com (asuka) — Fri, 05 Sep 2008 01:26:00 +0000

llwyddais i dorri 'nhroed chwith ddoe so bore 'ma bues i yn y feddygfa yn cael triniaeth. roedd rhaid i fi seiclo adref wedyn dan wisgo'r sblint esgid enfawr ar 'nhroed!

dywedodd y meddyg wrthyf taw gwylio lot o My-HiME yw'r peth gorau ar gyfer troed 'di ei thorri.

a siocled.

rwy'n ceisio canlyn ei hargymelliadau'n ofalus er mwyn gwella cyn gynted ag y bo modd.

hei, 'co hwn!

noreply@blogger.com (asuka) — Fri, 29 Aug 2008 22:34:00 +0000

torth o fara a wnes i neithiwr - croeso iti brofi tamaid, 'rhen ffrind!

rwy'n teimlo ychydig fel cymeriad diane keaton yn baby boom, a ddywed wrth ei ferch a nhwthau'n symud o efrog newydd i gefn gwlad vermont:
"it's going to be a whole new life for us... i'm going to learn to relax and sleep late, bake apple pies, get into quilts... we're going to be just like the farmer in the dell."

* ac rwy'n dal i ffaelu ffeindio'r camdreiglad y soniodd szczeb amdano yn y post blaenorol (oni bai fod e am ifi sgrifennu "a fois" yn lle "bois"!). wyt ti'n gwybod beth sy gan szczeb mewn golwg, f'annwyl ddarllennydd?

asuka drws nesa' ii

noreply@blogger.com (asuka) — Thu, 28 Aug 2008 21:13:00 +0000

cefn gwlad ohio. a chymaint o brofiadau sy’n hollol newydd fan hyn - a finnau'n un o'r ddinas, cofiwch - fel bod hi wir yn anodd gwybod ble yr ydys i ddechrau… ond dyma ychydig o’r pethau rŷn ni'n eu mwynhau ers cyrraedd o efrog newydd ryw bythefnos yn ôl:

pryfed tân! ie - pryfed tân! wedi eu gweld nhw o’r blaen yn yr eidal, ond feddyliais i erioed y byddai ein pryfed tân ein hunain 'da ni yn yr ardd - erioed!
cael cynnyrch yr haf wedi ei brynu gan stondinau ffermydd tu fas i’r dref (ffa, tomatos, afalau, india corn, mafon, …)
joio mêl lleol â damper cartref (bara soda awstraliaidd)
gallu seiclo i’r llyfrgell
y ffaith bod casgliad da o anime yn y llyfrgell gyhoeddus a chasgliad gwych o ffilmiau tramor o bob math yn llyfrgell y coleg y cewn ni eu benthyg i gyd am ddim

wythnos nesa' mae'r tymor yn dechrau yn y coleg yma ac mae'n debyg y bydd 'na ryw ffair weithgareddau, rhywbeth y geill pobl y dref nhwthau'n mynd iddo (gwir college town yw hon lle mae a wnelo pob dim â'r coleg yn ôl pob sôn). rwy'n bwriadu gosod stondin i weld a oes diddordeb gan neb mewn dysgu cymraeg. ac os bydd (neu unwaith y bydd!) galla' i gynnig dosbarth nos yn ein parlwr unwaith yr wythnos neu rywbeth fel'ny.
'na gynllun ichwi, bois! be' chi'n feddwl ohono?

(un peth nad wy’n ei joio ar hyn o bryd - darllen llyfr gan r.m. jones am feirniadaeth lenyddol, yr hwn sydd - o bosibl - yn un o’r pethau mwyaf gwirion rwy ’di eu darllen erioed. os llwyddaf i bennu’r peth, bydda’ i’n siwr o sgrifennu darn ar pam!)

*ôl-feddwl: ydy hi'n gywir o safbwynt gramadegol sgrifennu "... sydd yn un o’r pethau mwyaf gwirion" fel y gwnes i uchod?
byddwn i'n gweud "rwy'n pori yn un o’r llyfrau mwyaf gwirion" wedi'r cwbwl, nid "rwy'n pori mewn un o’r llyfrau mwyaf gwirion" - ac ar y sail honno tybed a fyddai'n well osgoi "sydd" uchod, gan jest ddodi "... ac fe yw un o’r pethau mwyaf gwirion" yn ei le?

asuka drws nesa'

noreply@blogger.com (asuka) — Fri, 22 Aug 2008 19:51:00 +0000

wel, dyma ni 'di cyrraedd ein tŷ newydd ac wedi dechrau ymgartrefi o'r diwedd - sori am beidio ag ysgrifennu 'slawer dydd, ond a ninnau'n pacio/datbacio, symud, dechrau dod i nabod y dre' 'ma, a glanhau, glanhau, glanhau, rwy heb gael fawr o gyfle yn ddiweddar i eistedd i lawr o flaen cyfrifiadur!

so sut le yw e? wel, fe'i gelwais yn "dre'" uchod, a thref yw e. smo ni'n bell bell o ddinas cleveland fan hyn, felly down i'm yn siwr beth i'w ddisgwyl yn union, ond ar ôl cael cip o gwmpas y lle a theithio rhwng ein cartref ni a'r ddinas galla' i ddatgan yn swyddogol nad rhan o'r maestrefi mo hwn. rŷn ni'n byw yng nghefn gwlad bendant, mewn small town - ac mewn college town 'fyd.

rhywbeth hollol tu fas i'm profiad yw'r college town (does yr un yn awstralia) ond fel pawb arall, rwy 'di gweld digon o ffilmiau o america i adnabod small town america pan y'i gwelaf - a rhyfedd iawn yw ei gweld hi yn y cnawd! mae 'na fanc oddi ar y brif stryd yma o'r enw third federal savings and loans - sy'n 'nharo i'n americanaidd iawn o enw. 'set ti'n gweud wrthyf fi taw dyna enw'r banc yn it's a wonderful life, byddwn i'n ei gredu e. a beth yw enw'r brif stryd ond main street wrth gwrs! rwy'n cael yr argraff bod un o bob peth yn y dre'. un siop lyfrau (sy'n eitha' mawr o achos y coleg), un general store sydd fel 'sai'n gwerthu popeth bwytadwy, gan gynnwys losins cartref (ac mae'n nhw'n gwerthu te 'fyd, sy'n bwysig i ni'r awstraliaid). llyfrgell gyhoeddus neis rwy 'di ymaelodi â hi'n barod.

yn sydyn bach, mae genny' gymaint o bethau i flogio yn eu cylch - y dref, y ffermydd o'i chwmpas, y llyfrgelloedd, cynlluniau ar gyfer y dyfodol (e.e. ffeindio mas a fyddai gan unrhyw un yn y dre' ddiddordeb mewn dysgu cymraeg, manteisio ar y coleg er mwyn dysgu almaeneg a japaneg), ein tŷ ni. mae'r tŷ yn lyfli, gyda llaw. dim ysbrydion cas eto, er 'mod i'n dal i gael hyd i goesau o wallt hir, du wrth lanhau sy'n peri ifi feddwl o'r ffilmiau ju-on. iaics.

ac ambell i makkuro-kurosuke, wedwn i, o'r herwydd dyma fi'n glanhau, glanhau, glanhau!

er enghraifft

noreply@blogger.com (asuka) — Tue, 12 Aug 2008 01:58:00 +0000

gweler y post blaenorol...