www.saarthakam.com - സാര്‍ത്ഥകം ഓണ്‍ലൈന്‍ മാസിക

1-പ്രസാധനം

2013-08-19T14:44:00.003+05:30

മണമ്പൂർ രാജൻ ബാബു

കാമുകനേയും കാമുകിയേയും പോലെ
പ്രസാധകനും എഴുത്തുകാരനും
ആദ്യമാദ്യം പരസ്പരാശ്ളേഷത്താൽ
മതി മറന്ന് അവർ
പുറം ലോകത്തെ പുറത്താക്കും
അന്യോന്യമൂറ്റിക്കുടിച്ച് നിർവ്വാണമടയും.
സ്വർഗ്ഗവും നരകവും വരുതിയിലാക്കി
ചെപ്പും പന്തും കളിക്കും
അക്കവും അക്ഷരവും ഇണചേർന്ന്
ചാപിള്ളകൾ പിറക്കുന്നതങ്ങനെ
ഒടുവിൽ
പഴി ചാരി പരസ്പരം പുറത്താക്കുമ്പോൾ
എഴുത്തുകാരൻ പ്രസാധകന്‌
വെറും സാധനം

പ്രസാധകന്റെ ആകാശമേടയിലേക്ക്
ആംഗിൾ ഓപ്ഫ് എലിവേഷനിൽ
എഴുത്തുകാരന്റെ നിരാശാഭരിതമായ നോട്ടം,
പിന്നെ,ഇരുവരും മണ്ണടിയുമ്പോൾ
സകല മൺമേടകൾക്കും മുകളിൽ
ധ്രുവനക്ഷത്രമായി എഴുത്തുകാരൻ!
നല്ലവരെക്കുറിച്ചല്ല ഈ കിസ്സ
നല്ല പ്രസാധകർ എവിടെയുണ്ട്‌?
പറയാം,അന്വേഷിച്ചുപോയവർ
തിരിച്ചെത്തട്ടെ.

2-കന്നഡകവിതയുടെ പരിഭാഷ
മൂലകവിത-രൂപാ ഹസ്സൻ
വിവർത്തനം-ഡോ: പാർവ്വതി.ജി.ഐത്താൾ

പാതിരാവിൽ ഒരു സംവാദം

വേണ്ടെങ്കിൽ
ഇല്ല
ഇവിടെ ഒന്നും സംഭവിച്ചിട്ടേ ഇല്ല
സംഭവിച്ചതൊക്കെ നേരം പോക്ക് മാത്രം
കണക്കല്ല
കൂട്ടിവെച്ചിട്ടില്ല
എന്ന് പറഞ്ഞുകൊണ്ട് ഒന്നിനും ബദ്ധമാകാതെ
എല്ലാം കൊടഞ്ഞുവെച്ച്‌
എഴുന്നേറ്റു പോകാം
വേണ്ടാത്തതെല്ലാം അംഗീകരിച്ച്
തോൾ തുറന്നു കെട്ടിപ്പിടിച്ച്
നിറഞ്ഞ്,നിറഞ്ഞ്
കയറിവരുന്ന
എല്ലാം
ഉള്ളിലേക്കൊതുക്കിവെച്ച് അടച്ചമർത്തിപ്പിടിച്ച്
എങ്ങനെയാണെഴുതുക
പരമ്പരാഗതമല്ലാത്ത
ശാസ്ത്രീയമല്ലാത്ത
ഛന്ദോബദ്ധമല്ലാത്ത
എന്നാലും അർത്ഥപൂർണ്ണമായ ഒരു കവിത!
അത് വിട്
ഇഷ്ടമുണ്ടെങ്കിൽ
കടലും കടക്കാം
അതെ,പക്ഷേ ആദ്യം കടക്കണം വാതിൽപ്പടി!
ഉള്ളിൽ നിന്ന്‌ പിടിച്ചുവലിക്കുന്ന
നൂലാമാലയായ വേരുകൾ
പുറത്തു നിന്ന്‌ വലിച്ചെടുക്കുന്ന
രൂപമില്ലാത്ത അവ്യക്തമായ ആകാരങ്ങൾ
ഇവിടെ ഒന്നിനും
പരിപൂർണ്ണമായ രൂപമില്ല
നിരാകാരത്തിന്‌ ആകാരം നിൽക്കുന്നത് മാത്രം
കൈകളുടെ പണിയെല്ലാം
ആകാരം നേടിയതെല്ലാം
ചരിത്രമായിത്തീർന്നു
വാതിൽപ്പടി കടന്നവർക്കെല്ലാം
പാതാളം അല്ലെങ്കിൽ
ആകാശം.
വേറെവിടേയാണ്‌ അവകാശം
രണ്ട് അതിരറ്റങ്ങളുടെ നടുക്ക്
അതിക്രമിക്കുന്ന പരിമിതിയുണ്ടോ?
ഉപയോഗിച്ച് തേഞ്ഞ തുലാസിന്റെ തട്ട്
അളക്കാൻ വേണ്ടി മാത്രം
ജീവിക്കാൻ പറ്റില്ല
അതീതരെയെല്ലാം അളവിന് കിട്ടുന്നില്ല
അളവിന്റെ പരിമിതിയിൽപ്പെട്ടവർ
വിട്,അതീതരാവില്ല.

ഗാന്ധിജിയുടെ വരുംകാല പ്രസക്തി

2013-08-19T14:43:00.004+05:30

പി.വി. മോഹനൻ.

1909 ൽ ഗാന്ധിജി രചിച്ച ‘ഹിന്ദ്സ്വരാജ്’ എന്ന കൃതിയുടെ പുനർവായനയാണ്‌ ഈ കുറിപ്പ്. ഹിന്ദ്സ്വരാജിനെ ഗൗരവത്തോടെ പഠിക്കുന്ന ചിന്തകർ ‘വരുംകാലരാഷ്ടീയമാനിഫെസ്റ്റോ’ എന്ന് ഈ കൃതിയെ വിശേഷിപ്പിക്കുന്നു. ഇന്ത്യ സ്വാതന്ത്ര്യം നേടിയ സന്ദർഭത്തിൽ മുഖ്യമായ രണ്ടുധാരകളാണ്‌ നമ്മുടെ മുന്നിലുണ്ടായിരുന്നത്. ഗാന്ധിയുടേയും നെഹ്രുവിന്റേയും വ്യത്യസ്തമായ രണ്ടുവഴികൾ. ഗ്രാമങ്ങളുടെ സ്വയംപര്യാപ്തതയിൽ ഊന്നിയ ഭൂമിക്കും പ്രകൃതിക്കും പരുക്കേൽക്കാത്ത പങ്കാളിത്തസ്വഭാവമുള്ള ജനാധിപത്യ(ഗ്രാമസ്വരാജ്) മാർഗ്ഗമായിരുന്നു ഗാന്ധിയുടേത്. നിർഭാഗ്യവശാൽ നെഹ്രുവിന്റെ മാർഗ്ഗമാണ്‌ ഇന്ത്യ പിന്തുടർന്നത്. ശാസ്ത്രസാങ്കേതികവളർച്ചയുടെ പിൻബലത്താൽ വികാസം പ്രാപിച്ച ആധുനികബ്രിട്ടീഷ് നാഗരികതയുടെ പകിട്ടുംതിളക്കവുമായിരുന്നു നെഹ്രുവിനെ ആകർഷിച്ചത്. ഭക്രാനങ്കലിനെ ചൂണ്ടി നെഹ്രുപറഞ്ഞു, ‘ഇത് ആധുനികഭാരതത്തിന്റെ ക്ഷേത്രമാണ്‌’എന്നാൽ മണ്ണിനും വിണ്ണിനും ഏറെ വിപത്തുകൾ വരുത്തിയ, നാം ഏറെ കൊട്ടിഘോഷിച്ചുനടപ്പിലാക്കിയ ഹരിതവിപ്ലവം മുതൽ ഈയ്യിടെമാത്രം സംഭവിച്ച ഉത്തരഖണ്ഡിലെ വൻപ്രളയംവരെയുള്ള ദുരന്തത്തിന്റെ നാൾവഴികൾ ഗാന്ധിജിയുടെ മാർഗ്ഗമായിരുന്നു ശരി എന്ന് നമ്മെ തുടർച്ചയായി ഓർമ്മിപ്പിച്ചുകൊണ്ടിരിക്കുന്നു.

യൂറോപ്പ്യൻ നാഗരികത അതിന്റെ എല്ലാ ആയുധങ്ങളും പുറത്തെടുത്ത് ലോകമാകെ അടക്കിവാഴുന്നകാലത്താണ്‌ ഹിന്ദ്സ്വരാജ് രചിക്കപ്പെട്ടത്. ഡോ.കെ.എൻ.പണിക്കർ എഴുതുന്നു, ഹിന്ദ്സ്വരാജ് പാശ്ചാത്യനാഗരികതയുടെ ദൗർബ്ബല്യത്തെക്കുറിച്ചുമാത്രം പ്രതിപാദിക്കുന്നതല്ല. നാഗരികതയുടെ ഭാവിയെക്കുറിച്ചുള്ള ഉത്കണ്ഠകൾ അതിൽ നിഴലിക്കുന്നു. അതിൽ പരാമർശിച്ചകാര്യങ്ങൾ, യന്ത്രവത്കൃതയുഗത്തിന്റെ ഭീകരതകൾ, ഇന്ന് യാഥാർത്ഥ്യമായി കഴിഞ്ഞിരിക്കുന്നു.ഒരുപക്ഷേ ഇരുപതാംനൂറ്റാണ്ടിൽ എഴുതപ്പെട്ട ദൂരദർശിത്വമുള്ള ഗ്രന്ഥമായി ഹിന്ദ്സ്വരാജിനെ വിശേഷിപ്പിക്കാമെന്നു തോന്നുന്നു.(ഗാന്ധിജിയെ ഓർക്കുമ്പോൾ). ഒരു വ്യക്തിയെസംബന്ധിച്ച് അയാളുടെ ചിന്തകൾ രൂപപ്പെടുന്നതും പടുത്തുയർത്തപ്പെടുന്നതും നിലവിലുള്ള നാഗരികതയുമായി പ്രതിപ്രവർത്തിച്ചാണ്‌. യൂറോപ്പിന്റെ സൃഷ്ടികളായ മുതലാളിത്തവും കമ്മ്യൂണിസവും ഒരേയിടത്ത് എത്തിച്ചേർന്നതിന്റെ കാരണവും ഇതുതന്നെ. അമേരിക്കയും റഷ്യയും ചൈനയും വ്യത്യസ്തനാഗരികതകളാണെന്ന് ഇപ്പോൾ ആരും പറയുമെന്നുതോന്നുന്നില്ല. കമ്മ്യൂണിസ്റ്റു-ക്യാപ്പിറ്റലിസ്റ്റു ശക്തികൾ ഒരിക്കൽ രണ്ടായി വിഭജിച്ചെടുത്ത ലോകം ഒരേ ഈടുംപാവുമുപയോഗിച്ച് നെയ്തെടുത്തതിന്റെ ഫലമാണിത്. ഹിന്ദ്സ്വരാജിന്റെ നാഗരികസങ്കല്പങ്ങൾ പൗരാണികഭാരതീയനാഗരികതയുമായോ ആധുനിക പാശ്ചാത്യനാഗരികതയുമായോ വിളക്കിച്ചേർക്കാവുന്നതല്ല. അത് നിലവിലുള്ളതോ ഉണ്ടായിരുന്നതോ അല്ലാത്ത പുതിയൊരു ലോകക്രമത്തിന്റെ അന്വേഷണമാണ്‌.

ആധുനികപരിഷ്കാരത്തിന്റെ മുഖമുദ്രയായ യന്ത്രത്തെ ഗാന്ധിജികാണുന്നത് വൻവിപത്തിന്റെ പ്രതീകമായിട്ടാണ്‌. ഇംഗ്ലണ്ട് എന്ന ആധുനികസ്റ്റേറ്റും ശാസ്ത്രവും മൂലധനവും സംയോജിക്കുന്ന മണ്ഡലത്തിൽ നിന്നാണ്‌ ഭൂമിയിൽ അധിനിവേശത്തിന്റെ ചരിത്രം ആരംഭിക്കുന്നത്. സാമ്രാജ്യത്വം എന്ന ചൂഷണവ്യവസ്ഥിതിയുടെ അടിവേരുകൾ ആധുനികശാസ്ത്രത്തിലും മൂലധനത്തിലും ആണെന്ന തിരിച്ചറിവാണ്‌ ഗാന്ധിജിയെ ആധുനികയന്ത്രസംവിധാനത്തെ എതിർക്കുവാൻ പ്രേരിപ്പിച്ചത്.. മാഞ്ചസ്റ്ററിലെ ആധുനികവ്യവസായശാലകളിൽ നിന്ന് ഇറക്കുമതിചെയ്ത വസ്ത്രങ്ങളും മറ്റ് ഉല്പന്നങ്ങളും കൊണ്ടാണ്‌ ഭാരതത്തിലെ കരകൗശലതൊഴിലാളികളെയും നെയ്ത്തുകാരേയും നശിപ്പിച്ചത്. അവരുടെ സ്ത്രീകളേയും, കുട്ടികളേയും നിത്യദാരിദ്ര്യത്തിലേക്ക് തള്ളിവിട്ടത്. മനുഷ്യാദ്ധ്വാനത്തെ കേവലം കൂലിവേലയായി യന്ത്രങ്ങൾ മാറ്റി. ആവിയന്ത്രത്തിൽ നിന്ന് കമ്പ്യൂട്ടറിലേക്കുള്ള ആധുനികശാസ്ത്രത്തിന്റെ പരിണാമത്തോടൊപ്പം സംഭവിച്ചുകൊണ്ടിരിക്കുന്ന അപമാനവീകരണം,ചൂഷണം,പരിസ്ഥിതിനശീകരണം,സാംസ്കാരികത്തകർച്ച തുടങ്ങിയവ മനുഷ്യവർഗ്ഗത്തിന്റെ വിജയഗാഥകളായിട്ടാണ്‌ ചരിത്രം ഘോഷിക്കുന്നത്. യന്ത്രങ്ങളെക്കുറിച്ച് മാർക്സിനുണ്ടായിരുന്നകാഴ്ച്ചപ്പാട് നിരന്തരം പരിഷ്ക്കരിക്കപ്പെടുന്നതും കൂടുതൽ ഉല്പാദനം നടത്താൻ ശേഷികണ്ടെത്തുന്നതും എന്നാണെങ്കിൽ ഗാന്ധിയെസംബന്ധിച്ച് അത് മനുഷ്യകരങ്ങളുടെ സഹായി എന്നനിലയിൽ മാത്രമായിരുന്നു. യന്ത്രത്തെ ഗാന്ധി പൂർണ്ണമായും നിരാകരിക്കുകയല്ല,യന്ത്രം മനുഷ്യനുപകാരമായിരിക്കരുത് എന്ന് അടിവരയിടുകയാണ്‌. മനുഷ്യനിലെ ക്രിയാത്മകതയെ യന്ത്രത്തിനെതിരെയുള്ള വെല്ലുവിളിയായി ഉയർത്തുവാൻ ശ്രമിച്ചു എന്നതാണ്‌ ആധുനികകാലത്ത് ഗാന്ധിയുടെ പ്രസക്തി.

പാർലിമെന്ററി ജനാധിപത്യസമ്പ്രദായത്തിന്റെ കാപട്യവും പൊള്ളത്തരങ്ങളും 1909 ൽ തന്നെ ഗാന്ധിജി കണ്ടെത്തിയിരുന്നു.ബ്രിട്ടീഷ് പാർലിമെന്റിനെ മച്ചിയോടും വേശ്യയോടുമാണ്‌ ഗാന്ധി ഉപമിച്ചത്. അദ്ദേഹത്തിന്റെ താഴെ ഉദ്ധരിച്ചിട്ടുള്ള വാക്കുകൾ ഇപ്പോഴത്തെ ഇന്ത്യൻ ജനാധിപത്യസമ്പ്രദായത്തിനുപോലും എത്രമാത്രം യോജിച്ചതാണെന്നു കാണുക. ‘ജനപ്രതിനിധികൾ പൊതുവിൽ തൻകാര്യം നോക്കികളും കപടനാട്യക്കാരുമാണ്‌. സ്വന്തം കാര്യത്തെക്കുറിച്ചാണ്‌ ഓരോരുത്തരുടേയും ചിന്ത......ഗൗരവമുള്ളവിഷയത്തെക്കുറിച്ച് ചർച്ചനടക്കുമ്പോൾ തന്നെ സഭയിൽ നീണ്ടുനിവർന്നുകിടന്നുറങ്ങുന്നവരുണ്ടാകും. വിഷയം തൊടാതെ വലിച്ചുനീട്ടിയാകും പലരുടേയും പ്രസംഗം.

മനുഷ്യശരീരത്തെ ഡോക്ടർമാരുടെ പിടിയിൽനിന്നു മോചിപ്പിച്ചു രോഗിക്കുതന്നെ തിരിച്ചുനല്കാനുള്ള ദർശനം ഗാന്ധി രൂപപ്പെടുത്തി. രോഗിയുടെ ശരീരത്തിൻമേലുള്ള ചികിത്സകരുടെ അധികാരം ഗാന്ധി വകവെച്ചുകൊടുത്തില്ല. പകരം തന്റെ ശരീരത്തെ അറിയുവാനും നിർവ്വചിക്കുവാനുമുള്ള അവകാശം വ്യക്തിയെത്തന്നെ ഏല്പിച്ചു. സ്വയംപരീക്ഷിച്ച,തന്റെ കുടുംബാംഗങ്ങളിലും ആശ്രമവാസികളിലും പരീക്ഷിച്ചുവിജയിച്ച പ്രകൃതിചികിത്സസമ്പ്രദായം ഗാന്ധിജി പ്രാബല്യത്തിൽ വരുത്തിയിരുന്നു.

അഹിംസാ സിദ്ധാന്തത്തിൽ നിന്ന് അണുവിടപോലും വ്യതിചലിക്കാതെയാണ്‌ ഗാന്ധിജി തന്റെ സഹനസമരം രൂപപ്പെടുത്തിയത്. ഗാന്ധിജി എഴുതുന്നു: ‘പീരങ്കികൊണ്ട് അന്യരെ വെടിവെച്ചു നുറുക്കുന്നതിനോ അതോ വെടിയേറ്റു നുറുങ്ങുന്നതിനോ ഏതിനാണ്‌ കൂടുതൽ ധൈര്യം വേണ്ടിവരിക? നിങ്ങൾ തന്നെ പറയൂ, സ്വന്തം മരണത്തെ ഉറ്റതോഴനെപോലെ കൂടെക്കൊണ്ടുനടക്കുന്നവനോ അതോ അന്യരുടെ മരണത്തെ സ്വന്തം കാര്യസാദ്ധ്യത്തിന്‌ കരുവാക്കാൻ നോക്കുന്നവനോ ആരാണ്‌ യഥാർത്ഥ പോരാളി?

ഭീരുവിനൊരിക്കലും സഹനസമരക്കാരനാകാനൊക്കില്ല (പേജ് 51). ആധുനിക ചിന്തകൾ ഇന്ന് ഗൗരവപൂർവ്വം ഗാന്ധിയെ അന്വേഷിക്കുന്നു. ഗാന്ധിയെ മനസ്സിലാക്കാൻ വായനക്കപ്പുറമുള്ള അന്വേഷണം ആവശ്യമാണ്‌. ഏതെങ്കിലും പ്രസ്ഥാനത്തിന്റെ സ്പോൺസർഷിപ്പിലെ ഗാന്ധിയൻ ചിന്തയുടെ വളർച്ചയും വ്യാപനവും ലോകത്തു സംഭവിക്കുന്നത്. ഗാന്ധിയൻ ദർശനം സ്വന്തം ഉൾക്കരുത്തുകൊണ്ടു തന്നെയാണ്‌ പോയ കാലത്തേക്കാൾ തീവ്രതയോടെ ആധുനിക നാഗരികതയ്ക്കു നേരെ കലാപങ്ങൾ സൃഷ്ടിക്കുന്നത്. ഉപഭോഗാർത്തിയുടെ ഭ്രാന്തിനെ അളക്കാനുള്ള ചങ്ങലയാണ്‌ ഗാന്ധി. ഈഗാന്ധിയേയാണ്‌ വരുംതലമുറകൾക്കാവശ്യം. ഗാന്ധിയൻ വികസനസങ്കല്പം കേന്ദ്രബിന്ദുവാക്കുന്ന ജൈവരാഷ്ടീയമാണ്‌ ഇന്ന് കോർപ്പറേറ്റുകളും ഭരണാധികാരിവർഗ്ഗവും ഭയക്കുന്നത്. ഗാന്ധി മുന്നോട്ടുവച്ച അഹിംസയിലടിയുറച്ച ആദർശാത്മകജീവിത സമ്പ്രദായത്തിലാണ്‌ ഇന്ന് ലോകത്തും ഭാരതത്തിലും സ്ത്രീകളുടേയും, കീഴാളരുടേയും, കുടിയിറക്കപ്പെട്ടവരുടേയുമൊക്കെ മോചനത്തിനും, ജീവിതത്തിനും, മണ്ണിനും വേണ്ടിയുള്ള സമരങ്ങൾ നടക്കുന്

മുഖപടമണിയുന്ന നഗര യൗവ്വനം.

2013-08-19T14:42:00.001+05:30

.-അനിൽ കുമാർ

സ്ഥലം ബാങ്ക്ലൂര്‍ നഗരത്തിലെ ഒരു പ്രധാന ഷോപ്പിംഗ്‌ മാള്‍..
ചന്നം പിന്നം പെയ്യുന്ന മഴയില്‍ 'വീക്കെന്റ് ' ചിലവഴിക്കാന്‍ പറ്റിയസ്ഥലം.
കുടുംബവുമൊത്ത് മാളിലെ സ്റ്റെയര്‍ കയസുകള്‍ കയറി ഇറങ്ങുന്നതിന്നിടയില്‍
മുഖം മൂടി ക്കെട്ടിയ ഒരു സ്ത്രീ ഞങ്ങളെ തന്നെ നോക്കുന്നു..
അവളുടെ കണ്ണുകളിലേക്കു നോക്കിയപ്പോള്‍ പുഞ്ചിരിക്കുന്നതായി തോന്നി.
തിരിച്ചും ഒന്ന് പുഞ്ചിരിച്ചെന്നു വരുത്തി ദൃഷ്ടി മാറ്റാന്‍ ശ്രമിക്കവേ
പരിചിതമായ സ്വരത്തില്‍
ചോദിക്കുന്നു " മനസ്സിലായില്ലേ .." ഒരു ചമ്മലോടെ പറഞ്ഞു
'ഇല്ലായിരുന്നു.. സ്വരം കേട്ടപ്പോള്‍
മനസ്സിലായി..'. അപ്പോഴേയ്ക്കും അവരുടെ ഭര്‍ത്താവും , മകനും അവരുടെ ഒപ്പം
കൂടി. കുടുംബ സുഹൃത്ത്ദേവിയും ഭര്‍ത്താവും അവരുടെ മകനും.
എന്താ ഈ വേഷത്തില്‍ മഴയത്തു അലര്‍ജിയായോ എന്ന എന്റെ ചോദ്യത്തിനു അമര്‍ഷത്തോടെ
അലര്‍ജിയാണേല്‍ സഹിക്കാമായിരുന്നു.. ഇതതുകൊണ്ടല്ല .. വരൂ പറയാം എന്ന് പറഞ്ഞു അവര്‍
ഞങ്ങളെ മാളിലെ ഒരു ഒഴിഞ്ഞ ബഞ്ചിലേക്ക് നയിച്ചു. കുടുംബങ്ങള്‍ തമ്മില്‍
ലോഹ്യം പറച്ചിലിനിടയില്‍
ഞാന്‍ വീണ്ടും ചോദിച്ചു മുഖംമൂടിയുടെ കാരണം . 'എല്ലായിടത്തും ക്യാമറയാ .
അതില്‍ നിന്നും
രക്ഷ നേടാന്‍ കണ്ടെത്തിയ മാര്‍ഗ്ഗമാ ഈ മൂടുപടം.. ' ക്യാമറയില്‍
കുടുങ്ങിയാല്‍ ഫോട്ടോയും വീഡിയോയും
എവിടെയെല്ലാം എത്തുമെന്ന് എത്തരത്തില്‍ ദുര്യുപയോഗം ചെയ്യുമെന്നും
ആര്‍ക്കറിയാം.. ചിലപ്പോള്‍ മാനം
നഷ്ട്ടപ്പെടുന്ന രീതിയിലായിരിക്കാം അശ്ലീല വെബ്സൈറ്റുകളില്‍ പ്രത്യക്ഷപ്പെടുക.
' ധാര്‍മികത നഷ്ട്ടപ്പെട്ട ഈ സമൂഹത്തില്‍
സ്വയം സംരക്ഷിക്കപ്പെടെണ്ടതുണ്ട്. ..' അവള്‍ ഇത്രയും ഒറ്റ ശ്വാസത്തില്‍
പറഞ്ഞു തീര്‍ത്തു.
മുഖപടത്തില്‍ ഒളിപ്പിച്ച അവളുടെ മുഖത്തിലെ അമര്‍ഷ ഭാവം അവളുടെ കണ്ണില്‍
നിന്നും, ശബ്ദത്തില്‍ നിന്നും
എനിക്ക് മനസ്സിലാക്കാനായി..
ഞങ്ങള്‍ക്കിടയിലെ ഏതാനും നിമിഷത്തെ നിശബ്ദതക്ക് ശേഷം ദേവി വീണ്ടും തുടര്‍ന്നു .
ഇന്റര്‍നെറ്റിലെ ഫോട്ടോ ദുര്യോപയോഗത്തെ കുറിച്ച് അവള്‍
വാചാലയായി..ഇതെല്ലം കേട്ടതോടെ എന്റെ 'വാമഭാഗം '
ഭയപ്പെടോടെ എന്റെ മുഖത്തേക്ക് നോക്കി..അരക്ഷിതയായ സ്ത്രീയുടെ ദൈന്യത
ഞങ്ങള്‍ക്ക് ഇരുവരുടെയും കണ്ണുകളില്‍
കാണാമായിരുന്നു..
സി.സി ക്യാമറകളും, ഫ്ലാഷില്ലാതെ കറങ്ങി നടക്കുന്ന മൊബൈല്‍ ക്യാമറകളും
'ദേവിക്കു' പേടി സ്വപ്നമായി തീര്‍ന്നിരിക്കുന്നു.
'സാങ്കേതിക വിദ്യ ..' ഒരുക്കിയ ശാപം... മന:സ്സമാധാനത്തോടെ ഒന്നു
പുറത്തിറങ്ങി നടക്കാനാവില്ലത്രെ.. ഷോപ്പിംഗ്‌ മാളോ,
പാര്‍ക്കോ, വിവാഹ ചടങ്ങോ , പിറന്നാള്‍ ആഘോഷമോ എന്ന് വേണ്ട എവിടെയും
അവളുടെ 'യവ്വന സൌന്ദര്യം' പകര്‍ത്താന്‍ ആളുണ്ടാവും.
ഏതാനും ദിവസം മുന്‍പ് ഒരു സുഹൃത്തിന്റെ മകളുടെ പിറന്നാള്‍ ചടങ്ങില്‍
പങ്കെടുത്തപ്പോള്‍ ഉണ്ടായ കാര്യം ദേവി പറഞ്ഞു.
ചടങ്ങിന്റെ പിറ്റേന്ന് ഫേസ്ബുക്കില്‍ പിറന്നാള്‍ ആഘോഷത്തിന്റെ ഫോട്ടോ
പോസ്റ്റ്‌ ചെയ്തിരിക്കുന്നു.. പലതും 'ക്ലോസ് അപ് ' ചിത്രങ്ങള്‍ .
അവര്‍ കണ്ടപ്പോഴെയ്ക്കും പലരും ചിത്രങ്ങള്‍ ഷെയര്‍ ചെയ്തിരുന്നു..ഉടന്‍
തന്നെ സുഹൃത്തിനെ വിളിച്ചു പറഞ്ഞു ചിത്രങ്ങള്‍ നീക്കം
ചെയ്യാനാവശ്യപ്പെട്ടു.
കൂടാതെ ഇനി പുറത്തിറങ്ങുമ്പോള്‍ മുഖം ' സ്കാര്‍ഫ് ' കൊണ്ട് മറയ്ക്കാനും
തീരുമാനിച്ചു.
സമൂഹത്തിലെ സാങ്കേതിക മുന്നേറ്റത്തില്‍ അവള്‍ അനുഭവിക്കുന്ന ചില
കാര്യങ്ങള്‍ കൂടി മനസ്സ് തുറന്നു പറഞ്ഞു..
ഓഫീസില്‍ ഇരിക്കുന്ന എട്ടും പത്തും മണിക്കൂര്‍ തങ്ങളില്‍ പലരും
ഒളിക്ക്യാമറകളെ ഭയന്ന് പ്രാഥമിക കര്‍മ്മം പോലും ചെയ്യാറില്ലത്രേ.
ഇത് പലരെയും തള്ളിവിടുന്നത് ഗുരുതരമായ ആരോഗ്യ പ്രശ്നത്തിലേക്കായിരിക്കും.
ട്രെയിനിലും മറ്റും ദൂരയാത്ര ചെയ്യുമ്പോഴും അവള്‍
അനുഭവിക്കുന്നത് സമാന സാഹചര്യം തന്നെ.. അതെ.. ഇത് വളരുന്ന
സാങ്കേതികവിദ്യ 'ദേവിമാര്‍ക്ക്' ' സൃഷ്ടിക്കുന്ന പ്രശ്നങ്ങളിലൊന്ന്
മാത്രം.
അപ്പോഴേയ്ക്കും ഞങ്ങളുടെ കുട്ടികള്‍ കൈ പിടിച്ചു കാണാമറയത്തേക്ക് നീങ്ങിതുടങ്ങിയിരുന്നു..കുടുംബ

ങ്ങള്‍ പരസ്പരം 'ബൈ' പറഞ്ഞു ഞങ്ങള്‍വീണ്ടും
മുകള്‍ നിലയിലേക്ക് നിരങ്ങി നീങ്ങുമ്പോള്‍ മുഖപടമണിഞ്ഞ ഏതാനും
'ദേവി'മാരെക്കൂടി ഞങ്ങള്‍ക്ക് കാണാനായി..അപ്പോഴും മനസ്സില്‍ പ്രതി
ധ്വനിക്കുന്നത്‌
ദേവിയുടെ അമര്‍ഷത്തിലുള്ള സ്വരം .. ' ധാര്‍മ്മികത നഷ്ട്ടപ്പെട്ട ഈ
സമൂഹത്തില്‍ നാം സ്വയം രക്ഷാ കവചം തീര്‍ക്കേണ്ടിയിരിക്കുന്നു.. '
'അതെ അവളുടെ യൗവ്വനം മുഖപടമണിയട്ടെ ..'

കർണ്ണാടകനായർ സർവ്വീസ് സൊസൈറ്റിയുടെ മന്നം മെമ്മോറിയൽ എഡ്യുക്കേഷണൽ ട്രസ്റ്റ് സ്ക്കൂൾ

2013-08-19T14:41:00.000+05:30

-സ്വന്തം ലേഖകൻ-

“ഭ്രാന്താലയം” എന്ന് സ്വാമിവിവേകാനന്ദനാൽ വിശേഷിപ്പിക്കപ്പെട്ട കേരളം, ഇരുപതാം നൂറ്റാണ്ടിന്റെ ആദ്യദശകത്തിൽ തന്നെ നവോത്ഥാനത്തിന്റെ കാഹളംവിളികേട്ടുണരാൻ തുടങ്ങി. അയിത്തമടങ്ങുന്ന അനാചാരങ്ങൾ, അന്ധവിശ്വാസങ്ങൾ, അടിമത്തം തുടങ്ങിയ തുരുമ്പെടുത്ത ഫ്യൂഡൽ മൂല്യബോധങ്ങളെ തകർത്തെറിഞ്ഞത് വിശ്വമാനവീകതയുടെ പ്രകാശധാരചൊരിഞ്ഞുകൊണ്ടാണ്‌. സമുദായത്തിന്‌ പുറത്ത് പൊതുവിഹാരം നിഷേധിക്കപ്പെട്ട അവസ്ഥയിൽ, മനുഷ്യൻ, അനുവദനീയമായ സാമൂദായിക ഭൂമിയിൽ തന്നെ സംഘടിക്കുകയാണ്‌ ചെയ്തത്. ഈഴവനും,പുലയനും,നമ്പൂതിരിയും, നായരും സംഘടിച്ച്,സ്വയം പരിഷ്കരിക്കപ്പെടുകയും, അതുവഴി സമൂഹം നവീകരിക്കപ്പെടുകയും ചെയ്തത് കേരളം അഭിമാനപുരസ്സരം ഓർക്കുന്ന ചരിത്രകാലമാണ്‌ , നവോത്ഥാനകാലം.

നായർ സമൂഹം ആദരസമന്വിതം ആചാര്യനെന്ന് വിളിക്കുന്ന, രാഷ്ടം പത്മഭൂഷൺ നല്കി ആദരിച്ച ഭാരതകേസരി മന്നത്ത് പത്മനാഭൻ 99 വർഷം മുമ്പ്, 1914 ൽ നായർ സർവ്വീസ് സൊസൈറ്റിക്ക് പെരുന്നയിൽ വെച്ചാണ്‌ രൂപം കൊടുത്തത്. 1982 ലാണ്‌ കർണ്ണാടകത്തിൽ നായർസർവ്വീസ് സൊസൈറ്റി സംഘടിപ്പിക്കുന്നതിന്‌ പിന്നിൽ മറ്റൊരു സാഹചര്യമാണ്‌ ഒരുങ്ങിവന്നത്. മത്തിക്കരെയിൽ, ഒരു നായർ സഹോദരൻ മരണപ്പെട്ടപ്പോൾ, ആചാരപ്രകാരം മൃതശരീരം സംസ്കരിക്കാനും,അനന്തരക്രിയകൾ ചെയ്യാനും ഏതാനുംസുഹൃത്തുക്കളാണ്‌ഒത്തുക്കൂടിയത്.ഇത്തരം സാഹചര്യങ്ങളിൽ,മറുനാട്ടിൽ മനുഷ്യൻ ഒറ്റപ്പെടുന്ന ജീവിതസന്ധികളെ അതിജീവിക്കണമെന്ന ചിന്തയാണ്‌,ഇന്ദിരാനഗറിലേയും ദൂരവാണിനഗറിലേയും സഹോദരങ്ങളെക്കൂടി ചേർത്ത് ഈ സംഘടന പിറവിയെടുത്തതിന്റെ മൂലകാരണം. ഇന്ന് ബാംഗ്ലൂർ മലയാളികൾക്കിടയിൽ 31 ശാഖകളോടെ നായർ സർവ്വീസ് സൊസൈറ്റി സുസംഘടിതമായ ഒരു സംഘടനയായി മാറിക്കഴിഞ്ഞു. എം.ബി. മേനോനായിരുന്നു സ്ഥാപകചെയർമാൻ.

കേരളത്തിലങ്ങോളമിങ്ങോളം വിദ്യാഭ്യാസസ്ഥാപനങ്ങൾ സ്ഥാപിച്ച മന്നത്ത് പത്മനാഭന്റെ കാല്പാടുകൾ പിന്തുടർന്നുകൊണ്ടാണ്‌ എം.എസ്. നഗറിൽ, രാമസ്വാമിപാളയത്ത്,മന്നം മെമ്മോറിയൽ എഡ്യുക്കേഷണൽ ആന്റ് ചാരിറ്റബിൾ ട്രസ്റ്റ് രൂപീകരിക്കുകയും, എം.എം.ഇ.ടി.സ്ക്കൂൾ സ്ഥാപിക്കുകയും ചെയ്തത്. കേവലം 13 വിദ്യാർത്ഥികളിൽ തുടങ്ങിയ ഈ സ്ഥാപനത്തിന്‌ ഇന്ന് ദൂരവാണിനഗറിന്‌ സമീപം,ടി.സി.പാളയത്ത് മറ്റൊരു സഹോദരസ്ഥാപനം കൂടി ആരംഭിക്കാൻ കഴിഞ്ഞു. മൊത്തം,1300ലേറെ വിദ്യാർത്ഥികളും,അദ്ധ്യാപക-അനദ്ധ്യാപകജീവനക്കാരായി അറുപതോളം പേരും ഈ രണ്ടു വിദ്യാലയങ്ങളിലുമായിട്ടുണ്ട്. തോറനഹള്ളിയിൽ, ഹൊസ്ക്കൊട്ടെയിൽ നിന്ന് 11.കി.മീറ്റർ ദൂരെയായി ഒരു സി.ബി.എസ്.സി. സിലബസ്സിൽ, റസിഡൻസിസ്കൂൾ തുടങ്ങുക എന്നതാണ്‌ അടുത്തലക്ഷ്യം. അവിടെ 5 1/4 ഏക്കർ സ്ഥലം ഇതിനായി ലഭിച്ചിട്ടുണ്ട്.

1987ൽ വിദ്യാലയം,ഇടുങ്ങിയ ഒരു വാടകകെട്ടിടത്തിൽ ആരംഭിക്കുമ്പോൾ പ്രശ്നങ്ങളും,പരാധീനതകളും പ്രാരാബ്ധങ്ങളും തുറിച്ച് നോക്കുകയായിരുന്നു. പാവപ്പെട്ടവരും സാധാരണക്കാരുമായി വിദ്യാർത്ഥികൾ,ഗുണനിലവാരമുള്ള അദ്ധ്യാപകർക്ക് അർഹമായ ശബളം കൊടുക്കുകയും വേണം. ത്യാഗസന്നദ്ധതയും,പ്രതിബന്ധതയും,സാമ്പത്തിക അച്ചടക്കവും അനിവാര്യം. ഉയർന്ന റിസൽറ്റ് കൂടിയേതീരു. 22ട്രസ്റ്റിമാരും, എൻ.എസ്.എസ്.ഭാരവാഹികളും ഒത്തുപിടിച്ചിട്ടാണ്‌ സിൽവർജൂബിലി കഴിഞ്ഞവർഷം ആഘോഷിക്കുമ്പോഴേക്കും,വിദ്യാലയത്തെ പ്രശസ്തമായ നിലയിലേക്ക് കൈപിടിച്ചുയർത്താൻ കഴിഞ്ഞത്. ത്യാഗത്തിന്‌ വിലകിട്ടും എന്ന വസ്തുത സാർത്ഥകമാക്കികൊണ്ട് ഇന്ന് 95 നും 100നും ഇടയിൽ വിജയശതമാനം നിലനിർത്തികൊണ്ട് പോകുമ്പോൾ മറ്റൊരുവസ്തുത ഓർമ്മിക്കേണ്ടതായുണ്ട്.ചെറിയ ജീവിതസാഹചര്യങ്ങളിൽ നിന്ന് വരുന്ന വിദ്യാർത്ഥികളെയാണ്‌ ഈ നിലവാരത്തിലേക്ക് ഉയർത്തുന്നതെന്ന്.

കമ്പ്യൂട്ടറിന്റെ സാങ്കേതികവിദ്യയെ ഉപയോഗപ്പെടുത്തി സ്മാർട്ട്ക്ലാസ്സുകൾ തുടങ്ങി ആധുനികവിദ്യാഭ്യാസരീതികൾ ഇവിടെ നടപ്പിലാക്കിവരുന്നു. പഠനത്തോടൊപ്പം കായികമായും സാംസ്കാരികമായും ഉയർത്തുവാനുള്ള സൗകര്യങ്ങളും ഒരുക്കുന്നുണ്ട്. താലൂക്ക്-ജില്ലാതലമത്സരങ്ങളിൽ വിദ്യാർത്ഥികൾ മികവോടെ സമ്മാനങ്ങൾ സമാഹരിക്കുന്നുണ്ട്. സമൂഹിക അവബോധമുള്ള പൗരന്മാരാക്കി ഉയർത്തുന്നലക്ഷ്യത്തോടെ 2005 മുതൽ “ബാലജനഗൃഹ” പദ്ധതി നടപ്പിലാക്കുന്നുണ്ട്. കാലാനുസൃതമായി വൈജ്ഞാനികരംഗത്തുണ്ടാകുന്ന ചലനങ്ങളെ സാംശീകരിക്കുന്നതിന്‌ വേണ്ടുന്ന അദ്ധ്യാപകപരിശീലനവും നടത്തിവരുന്നുണ്ട്.

കെ.എൻ.എസ്.എസ് ചെയർമാൻ രാമചന്ദ്രൻപാലേരി, ജന.സെക്രട്ടറി എം.രാധാകൃഷ്ണൻ, പ്രത്യേക ക്ഷണിതാവ് ഐ.പി.രാമചന്ദ്രൻ,ട്രഷറർ വി.വിജയൻ എന്നിവരുടെ മേൽനോട്ടത്തിലും, എം.എം.ഇ.ടി.പ്രസിഡന്റ് ഒ.വി.പി.നമ്പ്യാർ,സെക്രട്ടറി എം. വിജയൻ നായർ എന്നിവരുടെ ഭരണത്തിലുമാണ്‌ ഈ വിദ്യാലയങ്ങൾ ഇന്ന് വിജയത്തിന്റെ പടവുകൾ ചവുട്ടിക്കയറുന്നത്. സാമ്പത്തികമായി പിന്നോക്കം നിൽക്കുന്നവർക്ക് സഹായഹസ്തമായി, പഠിക്കുന്നവർക്ക് പ്രോത്സാഹനം നല്കിക്കൊണ്ട്, സാമ്പത്തികശേഷിയുള്ളവരിൽനിന്ന് ധനശേഖരണം നടത്തി, സ്കോളർഷിപ്പുകളും എന്റൊവ്മെന്റുകളും വിദ്യാർത്ഥികൾക്കായി നല്കിവരുന്നുണ്ട്. വിദ്യാലയനടത്തിപ്പിൽ പെരുമയാർജ്ജിച്ച മറുനാടൻ മലയാളിക്ക്, ഈ സ്ഥാപനവും ഒരു തിലകക്കുറിയാണ്‌.

കന്നഡ-മലയാളസിനിമാ സംവിധായകൻ ജോളി ബാസ്റ്റ്യൻ സംസാരിക്കുന്നു

2013-08-19T14:38:00.002+05:30

കന്നഡ-മലയാളസിനിമാ സംവിധായകൻ ജോളി ബാസ്റ്റ്യൻ സംസാരിക്കുന്നു

മാറ്റത്തിന്റെ വഴിയിൽ മലയാള സിനിമ
ജോളി സെബാസ്റ്റ്യൻ

കഴിഞ്ഞ കുറച്ചു വർഷങ്ങളായി ഗതി മുട്ടി നിന്ന മലയാള സിനിമ മാറ്റത്തിന്റെ വഴിയിലാണ്‌. “ന്യൂ ജനറേഷൻ സിനിമ” മാത്രമാണിതിന്‌ കാരണമെന്ന് പറയാനാവില്ല. സിനിമയറിയുന്ന നിരവധി ചെറുപ്പക്കാർ,തിരക്കഥ, സംവിധാനം,ക്യാമറ, എന്നീ മേഖലകളിലേക്ക് കടന്നുവരികയും നിലവിലുള്ള സിനിമാകലാകാരന്മാരുമായി അവരുടെ പ്രവർത്തനങ്ങൾ സങ്കലനപ്പെടുകയും ചെയ്യുന്നത് ഗുണകരമാകുന്നു. ഇപ്പോൾ തന്നെ അതിന്റെ ഗുണം മലയാളത്തിന്‌ ലഭിക്കുന്നുണ്ട്‌.കൂടുതൽ നേട്ടങ്ങൾ ഉണ്ടാവും-ജോളി ബാസ്റ്റ്യൻ പറഞ്ഞു.
അറുപതുകളുടെ അന്ത്യത്തിലാണ്‌ ജോളി ബാസ്റ്റ്യന്റെ പിതാവ് ജോൺ സെബാസ്റ്റയ്ൻ എറണാംകുളത്തു നിന്ന്‌ ബാംഗ്ളൂരിലേക്ക് വരുന്നത്‌,അമ്മ സിന്റർലാ.മെക്കാനിക്കായിരുന്ന അച്ഛന്റെ തൊഴിലിനോട് ചെറുപ്പത്തിലേ ജോളിക്കും താൽപ്പര്യമായി. സ്ക്കൂൾപഠനകാലത്ത് തന്നെ മോട്ടോർമെക്കാനിസം പഠിക്കുകയും പണി ചെയ്യുകയും ചെയ്തു. പതിനെട്ടാം വയസ്സിൽ തിപ്പസാന്ദ്രയിൽ സ്വന്തമായി ഗാരേജ് തുടങ്ങുകയും ഓട്ടോമൊബൈൽ ഡിപ്ളോമക്ക് പഠിച്ച് പാസ്സാവുകയും ചെയ്തു. ബൈക്ക് ഓടിക്കുന്നതിലും ബൈക്കിൽ അഭ്യാസം നടത്തുന്നതിലുമുള്ള വൈദഗ്ദ്ധ്യമുണ്ടായിരുന്നു. കന്നഡ നടൻ രവിചന്ദ്രന്റെ ഫിസിക്കൽ ഇൻസ്ട്രക്റ്റർ മൂർത്തി ഒരിക്കൽ ജോളിയുടെ ബൈക്ക് അഭ്യാസപ്രകടനം കണ്ട്‌ ഇഷ്ടപ്പെട്ട്‌ “പ്രേമ ലോക” എന്ന സിനിമയിൽ ,രവിചന്ദ്രന്റെ ഡ്യൂപ്പായി 1986-ൽ അഭിനയിപ്പിച്ചു. അത് ഹിറ്റായതോടെ കൈനിറയെ പടങ്ങളായിരുന്നു.എട്ടുവർഷം,സ്റ്റണ്ട് രംഗങ്ങളിൽ അഭിനയിച്ചു.94-ൽ“പുട്ടനഞ്ച” എന്ന ചിത്രത്തിന്റെ ആക്ഷൻ ഡയറക്ടറായി.അതും ഹിറ്റായതോടെ ജോളിബാസ്റ്റ്യൻ സ്റ്റണ്ട് സംവിധാനത്തിൽ ഒഴിവാക്കാനാകാത്ത ഒരു വ്യക്തിയായിമാറി.കന്നഡ,തമിഴ്,തെലുഗു,പഞ്ചാബി,ബംഗാളി,സിംഹള,മലയാളം എന്നീ ഭാഷകളി ലായി 600ലേറെ ചിത്രങ്ങളുടെ ആക്ഷൻ രംഗങ്ങളുടെ ആശയവും ചിത്രീകരണവും ഈ കലാകാരന്റെ കൈകളിലൂടെ കടന്നുപോയി. രാംഗോപാൽ വർമ്മയുടെ “ബേജ് വാഡാ”(തെലുങ്ക്)എന്ന ചിത്രത്തിന്റെ ആ ക്ഷൻ ഡയറക്ടരാണ്‌.സ്വാഭാവികതയും, നാടകീയതയും,ഉദ്വേഗവും വേണ്ടും വിധം ഉപയോഗപ്പെടുത്തുന്നതിലാണ്‌ ജോളിയുടെ കരവിരുത്‌.
ലാൽ ജോസിന്റെ “അയാളും ഞാനും തമ്മിൽ”ബി.ഉണ്ണിക്കൃഷ്ണന്റെ“ഐലൌ മീ” അങ്കമാലി എം.എൽ.എ.ജോസ് തെറ്റയിൽ അഭിനയിച്ച വിനയന്റെ“കാണാക്കൊമ്പത്ത്”ലോഹിതദാസിന്റെ “നിവേദ്യം”ഇതെല്ലാം പ്രശസ്തമായ ചിലത് മാത്രം.

സംവിധാനം

വിശാൽ ഹെഗ്ഡേ,പൂജാഗാന്ധി എന്നിവർ നായകനും, നായികയുമായഭിനയിച്ചു് 2009-ൽ ജോളി തിരക്കഥയെഴുതി സംവിധാനം ചെയ്ത ആദ്യകന്നഡ ചിത്രമാണ്‌ “നിനക്കാകി കാതിരുവേ”.രാജൻ പി.ദേവിന്റെ മകൻ ജൂബിൻ രാജ് നായകനും,സുജാത നായികയുമായഭിനയിച്ച് ജോളി തിരക്കഥയും സംവിധാനവും നിർവ്വഹിക്കുന്ന മലയാളപടത്തിന്‌ പേരിട്ടിട്ടില്ല,ഷൂട്ടിംഗ് പൂർത്തിയായി,എഡിറ്റിംഗ് ടേബിളിലാണ്‌.ഡബ്ബിംഗ് കഴിഞ്ഞ് തിയ്യേറ്ററിലെത്താൻ രണ്ടു മാസം കഴിയണം.
അഭിനയം
ആക്ഷൻ രംഗങ്ങളി ൽ മാത്രമല്ല,ചെറിയ റോളുകളിലായി 200ലേറെ ചിത്രങ്ങളി ൽ അഭിനയിച്ചിട്ടുണ്ട്‌.
ഗായകൻ-ട്രൂപ്പുടമ
ആയിരത്തോളം പാട്ടുകൾ,(ഹിന്ദി,തമിഴ്,കന്നഡ,മലയാളം ഭാഷകളിലെ)ഹൃദിസ്ഥമാക്കിയ ഈ ഗായകൻ രണ്ടായിരാമാണ്ടി ൽ സ്വന്തമായി ഓർക്കസ്ട്രാ ട്രൂപ്പ്“ഗാനതരംഗ” നടത്തുന്നുണ്ട്‌. ദക്ഷിണേന്ത്യൻ നഗരങ്ങളിൽ ഈ ഗാനമേളട്രൂപ്പിന്‌ നിരവധി അവസരങ്ങൾ കിട്ടിക്കൊണ്ടിരിക്കുന്നുണ്ട്`.
മലയാള സിനിമയെക്കുറിച്ചും കലാകാരൻമാരേ ക്കുറിച്ചും മതിപ്പുള്ള ജോളി മലയാളിയാണെന്നതിൽ അഭിമാനിക്കുന്നു. മലയാള സിനിമ മറ്റു ഭാഷാചിത്രങ്ങളിലേക്ക്“പുനർ നിർമ്മാണം ” നടത്തുന്നതും,മൊഴിമാറ്റം നടത്തുന്നതും നമ്മുടെ ഗുണമേൻമയെ അടയാളപ്പെടുത്തുന്നു. ദീർഘകാലമായി ഇന്ത്യൻ സിനിമയിൽ മലയാളസിനിമക്ക് സ്വന്തമായ ഒരു സ്ഥാനമുണ്ട്‌. അതിന്റെ പേരിൽ മറ്റു ഭാഷാസിനിമാപ്രവർത്തകർക്കിടയിൽ തനിക്ക് നല്ല ബഹുമാനവും അംഗീകാരവും കിട്ടുന്നുണ്ടെന്ന് ഈ യുവകലാകാരൻ സാക്ഷ്യപ്പെടുത്തുന്നു.
അഖിലേന്ത്യാ ഫിലിംവർക്കേഴ്സ് ഫെഡറേഷന്റെ ദേശീയപ്രവർത്തക സമിതി അംഗം കൂടിയായ ജോളി ബാസ്റ്റ്യന്‌ ഞങ്ങളുടെ ആശംസകൾ....
ജോളിബാസ്റ്റ്യൻ-080 50314002

ഇതു ന്യൂ ജനറേഷൻ സംസ്ക്കാരമോ?

2013-08-19T14:37:00.003+05:30

സതീഷ് ബാബു.ആർ.

ഭാഷയുടെയും സംസ്ക്കാരത്തിന്റേയും അതിർ വരമ്പുകൾക്കുള്ളിൽ മാത്രം ജീവിച്ചിരുന്ന മലയാളി ഇന്ന് ന്യൂ ജനറേഷൻ സംസ്ക്കാരത്തിന്റെ നടുവേ ഓടിക്കൊണ്ടിരിക്കുകയാണ്‌.ഇത്‌ ഇന്നലേയോ,ഇന്നോ ഉണ്ടായതല്ല. വർഷങ്ങൾക്കു മുമ്പേ ഇതിന്റെ വിഷബീജങ്ങൾ നമ്മുടെ നാട്ടിൽ നാമറിയാതെ എത്തിക്കഴിഞ്ഞിരുന്നു.
ഗ്രാമീണസംസ്ക്കാരത്തിന്റെ ശ്രീകോവിലായിരുന്ന ഗ്രന്ഥശാലകളു ടെ പ്രൌഢി മങ്ങിത്തുടങ്ങി. മലയാളം പഠിപ്പിച്ചിരുന്ന നാട്ടിലെ വിദ്യാലയങ്ങൾ യവനികക്കുള്ളിലായിക്കൊണ്ടിരിക്കുന്നു. കേരള കലകളുടെ കേളീരംഗമായിരുന്ന ഉൽസവപ്പറമ്പുകൾ ശൂന്യമായിക്കൊണ്ടിരിക്കുന്നു. കേരളത്തിന്റെ തനതുകലകളെല്ലാം മലയാളിക്ക് അപ്രിയങ്ങളായിത്തുടങ്ങി. മനോഹരമായി കത്തുകളെ ഴുതിയിരുന്ന മലയാളി അതും വെറുത്തുകഴിഞ്ഞു. കഴിഞ്ഞ ഒന്നരനൂറ്റാണ്ടുകാലം നമ്മോടൊപ്പം ഉ ണ്ടായിരുന്ന കമ്പിയില്ലാക്കമ്പി ആഘോഷപൂർവ്വം നാം അടച്ചുപൂട്ടി. എന്തിനേറെ ചിറകിന്നടി യിൽ കാത്തുസൂക്ഷിച്ചിരുന്ന മാതാപിതാക്കളെപ്പോലും നാം അനാഥാലയങ്ങളിലും, വൃദ്ധസദനങ്ങളിലും ഏൽപ്പിച്ച് സ്വാർത്ഥതയും ദുരാഗ്രഹവുമായി അതിവേഗം ഓടിക്കൊണ്ടിരിക്കുന്നു. എവിടെയാണ്‌ നമുക്കു പിഴച്ചത്‌?
എല്ലാ അതിർവരമ്പുകളും ഭേദിച്ചുവന്ന മലയാളി ഇന്ന് ന്യൂ ജനറേഷൻ സംസ്ക്കാരമെന്ന പത്മവ്യൂഹത്തിനുള്ളിൽ കറങ്ങിക്കൊണ്ടിരിക്കുന്നു. ഇതു ഭേദിച്ചു പുറത്തുവരാൻ കഴിയുമോ?
മാതൃഭാഷയായ മലയാളത്തിന്‌ ശ്രേഷ്ഠഭാഷാപദവി ലഭിച്ച ഈ കാലഘട്ടത്തിൽ പോലും മലയാളത്തെ ശരിയായി അറിയാനോ,ആ സംസ്ക്കാരത്തെ പുതലമുറക്കു പകരാനോ മലയാളി തയ്യാറാകുന്നുണ്ടോ?മലയാളം മീഡിയത്തിൽ പഠിച്ചവർ പോലും യാത്രാവേളകളിലും മറ്റും കയ്യിൽ കരുതുന്നത് ഇംഗ്ളീഷ് ഭാഷയിലെഴുതിയ പ്രസിദ്ധീകരണങ്ങളാണ്‌. ഇല്ലെങ്കിൽ മറ്റുള്ള വരെന്തു കരുതും എന്നാണ്‌ നമ്മുടെ ആശങ്ക.
ആധുനികമായ വിവരസാങ്കേതികവിദ്യകളെല്ലാം ആവശ്യമാണ്‌.ഇതിൽ നിന്നെല്ലാം നല്ലതു മാത്രമല്ല നമ്മുടെ കുഞ്ഞുങ്ങൾ ഉൾക്കൊള്ളുന്നത്‌. ഇവിടെയാണ്‌ ഭാഷയുടെയും,സംസ്ക്കാരത്തിന്റേയും പ്രസക്തി. മൊബൈലിലൂടെയും,ഇന്റർനെറ്റിലൂടെയും അനവധി അപകടങ്ങൾ പതിയിരിക്കുന്നു. ഇത്തരം അബദ്ധങ്ങളി ൽ പെട്ട് എത്രയോ ജീവിതങ്ങൾ വിടരും മുമ്പേ കൊഴിയുന്നു. ഈയടുത്ത കാലത്തിറങ്ങിയ ചില സിനിമകളി ൽ കുത്തിനിറച്ചിരിക്കുന്നത് സഭ്യമല്ലാത്ത സംഭാഷണങ്ങളും, ദ്വയാർത്ഥപ്രയോഗങ്ങളുമാണ്‌. ടെലിവിഷൻ ചാനലുകളും പുറകിലല്ല. വാർത്താചാനലുകൾ മക്കളോടൊപ്പം കാണാൻ കഴിയാതെ വന്നിരിക്കുന്നു. കേരള രാഷ്ട്രീയത്തിലെ അവിഹിതബന്ധങ്ങളുടെ കഥ കേട്ട്‌ മതിയായി.ഇതൊക്കെയാണോ പുതിയ സംസ്ക്കാരം?
ടെലിവിഷൻ അവതാരകരെയെടുത്താൽ മംഗ്ളീഷുകാരുടെ പ്രളയമാണ്‌. ഇതെല്ലാം മലയാളി ഇഷ്ടപ്പെട്ടു തുടങ്ങി അഥവാ ഇഷ്ടപ്പെടേണ്ടി വരുന്നു.
മാതൃഭാഷയുടെയും,സംസ്ക്കാരത്തിന്റേയും അടിത്തറയില്ലാതെ വളരുന്ന നമ്മുടെ കുഞ്ഞുങ്ങളിൽ പലരും ഇതൊക്കെയാണ്‌ യഥാർത്ഥ ഭാഷയും ,സംസ്ക്കാരവും എന്ന്‌ തെറ്റിദ്ധരിച്ച് വികലമായ ഈ അവസ്ഥയെ അനുകരിക്കുന്നു. ഇതു കുഞ്ഞുങ്ങളിൽ സൃഷ്ടിക്കുക വകതിരിവില്ലായ്മയായിരിക്കും. പുതിയ അറിവിനോടൊപ്പം ഓരോരുത്തരും തങ്ങളുടെ കുട്ടികൾക്ക് മലയാളത്തിന്റെ തനിമയെക്കൂടി ബോധ്യപ്പെടുത്തണം.എല്ലാ വിദ്യാലയങ്ങളിലും മലയാളം ഒന്നാം ഭാഷയാക്കാൻ സർക്കാർ തയ്യറാകണം. അങ്ങിനെ ആശാനേയും,ഉള്ളൂരിനേയും,വള്ളത്തോളിനേയുമൊക്കെ നമ്മുടെ കുഞ്ഞങ്ങൾ പഠിക്കുകയും മനസ്സിലാക്കുകയും ചെയ്യട്ടെ. ഭരണ ഭാഷ പോലും മലയാളമാക്കിയ ഈ കാലഘട്ടത്തിൽ ഇതൊരു ബാലികേറാമലയല്ല. നമ്മുടെ സ്വപ്നമായിരുന്ന മലയാളം സർവ്വകലാശാലയുടെ പണിപ്പുരയിലുള്ളവർ ഇതെല്ലാം ശ്രദ്ധിക്കുമെന്ന്‌ കരുതുന്നു.

സ്വാതന്ത്ര്യ ചിന്തകൾ

2013-08-19T14:37:00.000+05:30

സ്വാതന്ത്ര്യ ചിന്തകൾ

ഇന്ത്യയുടെ രാഷ്ട്രീയാധികാരം,ജൻമിമുതലാളിത്തത്തിന്റെ കൈകളിലേക്ക് ചെന്നുവീഴുന്നത്,ജനതയുടെ പൂർണ്ണസ്വാതന്ത്ര്യത്തിലേക്ക് വഴി തെളിയിക്കില്ല എന്ന് പുരോഗമനവാദികൾ ആശങ്കപ്പെട്ടിരുന്നു. എങ്കിലും ജനാധിപത്യ മൂല്യങ്ങൾ ഉയർത്തിപ്പിടിച്ചു കൊണ്ട് ആറരപ്പതിറ്റാണ്ടുകൾ,സ്വതന്ത്രാധികാരം കൈവിടാതെ ലോകരാജ്യങ്ങൾക്കിടയിൽ അവഗണിക്കാനാവാത്ത ശക്തിയായി നിലനിൽക്കുന്നത് ജനതയുടെ വിജയം തന്നെയാണ് . തെരെഞ്ഞെടുപ്പു പ്രക്രിയകകൾ കുറ്റമറ്റതല്ലെങ്കിൽ കൂടി സമാധാനപരമായി നടത്താനും അകത്തു നിന്നും പുറത്തു നിന്നുമുള്ള ഭീഷണികളെ നേരിടാൻ കഴിയുന്നതും ഇന്ത്യയുടെ നേട്ടമാണ്‌.
എന്നാൽ ബാബറി മസ്ജിദ് തകർന്നതോടെ യഥാർത്ഥത്തിൽ തരിപ്പണമായത് നമ്മുടെ മതേതരമൂല്യങ്ങളായിരുന്നു.
വിദ്യാഭ്യാസ-ആരോഗ്യ രംഗങ്ങളി ൽ,ഉൽപ്പാദനത്തിൽ,ശാസ്ത്രസാങ്കേതിക വിനിമയമേഖലകളി ൽ എല്ലാം തന്നെ മുന്നേറ്റം നടത്തിയത് അഭിമാനകരമാണ്‌. ഉള്ളവനും,ഇല്ലാത്തവനും തമ്മിലുള്ള വിടവ് കുറയ്ക്കാൻ കഴിയാതിരുന്നത് മൂലധനശ്ശക്തികൾ ഭരണ നിർവ്വഹണമേഖലകളിൽ പിടി മുറുക്കിയത് കൊണ്ടാണ്‌. കഴിഞ്ഞ രണ്ട് പതിറ്റാണ്ടു കളായി ആഗോളീകരണ പ്രക്രിയക്ക് പരവതാനി വിരിച്ചതോടെ,കർഷകത്തൊഴിലാളികളുമടങ്ങുന്ന പാവപ്പെട്ടവനാണ്‌ ആ പരവതാനിയിൽ കുളിപ്പിച്ച് കിടത്താൻ വിധിക്കപ്പെട്ടത്‌. ആഗോള മൂലധനസ്രോതസ്സിനെ അമിതമായി ആശ്രയിക്കുന്നത്‌ കൊണ്ട് അവരുടെ മുതൽ മുടക്ക് ശേഷി കുറയുന്ന അവസ്ഥയിൽ നമ്മുടെ ഉൽപ്പാദനം കുറയുന്നു. രൂപയുടെ മൂല്യം കുറയുന്നു.ആ കാരണം കൂടി പറഞ്ഞ് പെട്രോൾ,ഡീസൽ,ഗ്യാസ് എന്നിവയുടെ വിലക്കയറ്റം-സാധാരണക്കാരന്റെ നടുവൊടിയുകയാണ്‌.
സാമ്രാജ്യത്വ വിരുദ്ധ മുദ്രാവാക്യം മുഴക്കി സ്വാതന്ത്ര്യ സമരം നടത്തിയ ജനത നവ സാമ്രാജ്യത്വ മൂലധനശ്ശക്തികളുടെ കാൽക്കീഴിൽ കിടന്നു നരകിക്കുമ്പോൾ വള്ള ത്തോളിന്റെ വരികൾ ചൊല്ലി ദേശീയബോധം ഇനിയും തട്ടിയുണർത്തേണ്ടി വരും.

റംസാൻ മുതൽ ഓണം വരെ

2013-08-19T14:36:00.004+05:30

ലോകമെമ്പാടുമുള്ള ഇസ്ളാം മതവിശ്വാസികൾക്ക് ഇക്കഴിഞ്ഞ ഒരു മാസം വ്രതാനുഷ്ഠാനത്തിന്റെ പുണ്യനാളുകളായിരുന്നു. പകൽ മുഴുവൻ ഭക്ഷണം ത്യജിച്ച് ,അഞ്ചു നേരം നിസ്ക്കരിച്ച്,സഹജീവികളു ടെ കണ്ണീരൊപ്പി,ദാനധർമ്മങ്ങൾ ചെയ്ത് വിശ്വമാനവികതയുടെ വിപുലമായ സാഹോദര്യ സന്ദേശം ഏറ്റെടുത്ത പവിത്രദിനരാത്രങ്ങൾ. ഇരുളിന്റെ ദുരിതങ്ങളി ൽ നിന്ന് പുതിയ പ്രതീക്ഷകളുടെ ചന്ദ്രക്കല അങ്ങകലെ ആകാശഗോപുരങ്ങളിൽ ഉദിച്ചുയർന്നപ്പോൾ നോമ്പു മുറിച്ച് അവർ റംസാൻ മാസത്തിലെ ചെറിയ പെരുന്നാൾ ആഘോഷിച്ചു,സ്നേഹത്തിന്റേയും സാഹോദര്യത്തിന്റേയും പുത്തൻ പുലരികൾ ക്കായി അവർ കാത്തിരുന്നു.

ആഗസ്റ്റ് 15 ഇന്ത്യൻ ജനത സാഭിമാനത്തിന്റെ ത്രിവർണ്ണ പതാക ഉയർത്തുന്ന ദിനം. നാനൂറിലേറെ വർഷങ്ങൾ സാമ്രാജ്യത്വശക്തികൾക്ക് കീഴിൽ തലകുനിച്ച് നിന്ന നാളുകളിൽ നിന്ന്‌ മോചനത്തിന്റെ സ്വാതന്ത്ര്യ വായു പ്രവഹിച്ച ദിനം.കക്ഷിരാഷ്ട്രീയത്തിന്നതീതമായി അനേകായിരം ധീര ദേശാഭിമാനികൾ ജീവനും,ജീവിതവും വകവെക്കാതെ അടർക്കളത്തിൽ നിന്ന് അടരാടിയ ദിനങ്ങളുടെ സാക്ഷാത്ക്കാരം. ഓരോ സ്വാതന്ത്ര്യ ദിനം നാം ആഘോഷിക്കുമ്പോഴും വിഭജനത്തിന്റെ വാൾ നമ്മുടെ ഹൃദയത്തിലേൽപ്പിച്ച ഉണങ്ങാത്ത മുറിവുകൾ വേദനിപ്പിച്ചുകൊണ്ടേയിരിക്കുന്നു. ഇന്ത്യക്കും പാക്കിസ്ഥാനും നേരെ ബ്രിട്ടീഷുകാരന്റെ സാമ്രാജ്യത്വക്കഴുകക്കണ്ണുകൾ ഇറുക്കി ക്രൂരമായി ചിരിക്കുന്നത്‌ നാം കാണുന്നുണ്ട്‌...പക്വമായ ജനാധിപത്യ മതനിരപേക്ഷതയിലേക്ക് നീങ്ങിക്കൊണ്ട് ആ മുറിവുകൾ ഉണക്കാൻ ഇന്ത്യക്കും പാക്കിസ്ഥാനും കഴിയും എന്നു തന്നെ വിശ്വസിക്കാം. ഇരുരാഷ്ട്ര നേതൃത്വവും അതിനുസാഹചര്യമൊരുക്കാൻ ശേഷിയുള്ളവർ തന്നെയാണ്‌.
പൊന്നിൻ ചിങ്ങമാസത്തിന്റെ പൂവിളിയായി. അത്തപൂക്കളമിട്ട്,തൂശനില പരത്തി,തുമ്പപ്പൂ ചോറു വിളമ്പി,ഓണപ്പാട്ടുകൾ പാടി പൊന്നോണത്തിന്റെ വരവായി.....ഓണച്ചന്തയുടെ ഒരുക്കങ്ങൾ..ഓണക്കോടിയുടുക്കാൻ തിടുക്കം...മണ്ണിനടിയിൽ നിന്ന് പൊന്തിവരുന്ന പൂമ്പാറ്റകൾ പോലെ ഒളിവിൽ പ്പോയ കലാരൂപങ്ങൾ കേരളാന്തരീക്ഷത്തിലേക്ക് പറന്നുയരുന്ന ദിനരാത്രങ്ങൾ.
സമൃദ്ധിയുടേയും സമത്വത്തിന്റേയും സന്ദേശം പരത്തിക്കൊണ്ട് വരുന്ന മാവേലി മന്നനെ വരവേൽക്കാൻ മലയാളി വെമ്പുകയാണ് .എല്ലാ വായനക്കാർക്കും സാർത്ഥകം ന്യൂസിന്റെ ഓണാശംസകൾ......

മുഖാമുഖം-2 സാംസ്ക്കാരിക പ്രവർത്തകൻ എ.ഗോപിനാഥ് സാർത്ഥകം ന്യൂസിനോട് സംവദിക്കുന്നു.

2013-08-19T14:35:00.003+05:30

വർഗ്ഗപരമായ ധ്രുവീകരണത്തിന്‌ ശക്തിയും വേഗവും വർദ്ധിപ്പിക്കുക

വിവരസാങ്കേതിക രംഗത്തേയും മറ്റു ശാസ്ത്രസാങ്കേതിക മാധ്യമങ്ങളുടെയും ഫലപ്രദമായി ,തങ്ങൾക്കനുകൂലമായി ഉപയോഗിക്കാൻ മൂലധനശക്തികൾക്ക് കഴിയുന്നുണ്ട്‌.ബാഹ്യമായി സ്വീകാര്യമാകുന്ന രീതിയിൽ‘ ആഗോളീകരണം’എന്ന പരികൽപ്പനയുടെ അപകടകരമാകുന്ന നടത്തിപ്പിലൂടെ ലോകത്തെ മുഴുവൻ സാമ്പത്തികമായും, ബൌദ്ധികമായും കീഴടക്കുമ്പോൾ,അവർ തന്നെയാണ് ജനശത്രു എന്ന തിരിച്ചറിവുണ്ടാക്കാനും,അതിനെതി
രെ ശക്തമായ ഒരു പ്രതിരോധനിര കെട്ടിപ്പടുക്കുവാനും പീഡിതർക്ക് കഴിയുന്നില്ല എന്നത് വസ്തുതയാണ് . അതിവേഗം വളർന്നു വന്ന ചൂഷിത സമൂഹത്തിന്റെ ലക്ഷ്യബോധത്തിലധിഷ്ഠിതമായ മുന്നേറ്റങ്ങൾ, അവകാശബോധവികാസങ്ങൾ, സമരങ്ങൾ എന്നിവയെ തളർത്താനും,പ്രതിരോധങ്ങളെ ദുർബ്ബലമാക്കാനും അധീശശക്തികൾ ക്കു കഴിയുന്നു. പകരം വർഗ്ഗീയത, വംശീയത, ജാതീയത, ലൈംഗീകത മുതലായ ഇടുങ്ങിയ ചിന്തകളുടെ പരിസരങ്ങളിലേക്കാണ് മനുഷ്യൻ നയിക്കപ്പെടുന്നത്`. മൂല്യാധിഷ്ഠിത മാധ്യമപ്രവർത്തനങ്ങളെ മൂലധനശക്തികൾ തന്നെ വിലയ്ക്കെടുത്തുകൊണ്ട് നിയന്ത്രണം ഏറ്റെടുക്കുകയും അവരുടെ വക്താക്കളായി അരാഷ്ട്രീയത അതിവിദഗ്ദ്ധമായി പ്രചരിക്കപ്പെടുകയും ചെയ്യുന്നു. മാധ്യമങ്ങൾ വിതരണം ചെയ്യുന്ന, പരസ്യങ്ങളാൽ നിയന്ത്രിക്കപ്പെടുന്ന മനഷ്യനാണിന്ന്‌. വൈവിദ്ധ്യവൈരുദ്ധ്യങ്ങളുടെ സങ്കീർണ്ണതകൾ നിറയുന്ന ഇന്ത്യയിൽ വർഗ്ഗ വിരുദ്ധപ്രവർത്തനം എളുപ്പമാണ്‌. വിശ്വാസവും,അന്ധവിശ്വാസവും,ആൾദൈവപ്രീണനവും.ആത്മീയവിപണനവും ആൾക്കൂട്ടങ്ങളെ അരാഷ്ട്രീയരാക്കുന്നു. സാമ്രാജ്യത്വ സാമ്പത്തിക വ്യവസ്ഥ അടിച്ചേൽ പ്പിക്കുന്നതിലൂടെ,അവരുടെ ചീഞ്ഞളിഞ്ഞ സംസ്ക്കാരത്തിന്റെ ജാരഗർഭവും ഈ ജനത ഏറ്റെടുക്കേണ്ടിവരുന്നു.

ഈ രാഷ്ട്രീയവസ്തുതകളു ടെ കാതൽ ചികഞ്ഞ് വർഗ്ഗപരമായ ധ്രുവീകരണത്തിന്‌ സജ്ജരാക്കുന്ന ദിശാബോധമുള്ള പ്രസ്ഥാനങ്ങൾ ഉയർന്നു വരണം. വൈയക്തിക വിയോജിപ്പുകൾക്ക് അവധി കൊടുത്തുകൊണ്ട് ആശയപരവും,ആദർശനിഷ്ഠയുമുള്ള സംവാദങ്ങൾക്ക് വേദിയൊരുക്കാനും ബോധപൂർവ്വ ശ്രമങ്ങൾ ഉണ്ടായേ തീരു. അതിന്‌ ശക്തിയും വേഗവും വർദ്ധിപ്പിക്കുക എന്നതാണ്‌ വർത്തമാനകാലം ആവശ്യപ്പെടുന്നത്‌. ശ്രീ ഗോപിനാഥ് പറഞ്ഞു നിർത്തി.

1967-ൽ എസ്.എസ്.എൽ.സി പാസ്സായി ഗുരുവായൂരിൽ നിന്ന്‌ ബാംഗ്ളൂരിലേക്ക് വണ്ടി കയറിയതാണ് . ഐ.ടി.ഐയുടെ നാലു വർഷത്തെ മെക്കാനിക്കൽ കോഴ്സ്‌(.നാഷണൽ അപ്പ്ര ന്റിസ് ഷിപ്പ് ) പാസ്സായി.ഐ.ടി.ഐയിൽതന്നെ ജോലിയിൽ പ്രവേശിച്ചു. തുടർന്നുള്ള ജീവിതം പൂർണ്ണമായും ജനങ്ങൾക്കിടയിൽ. 1969-ൽ പത്തൊൻപതാം വയസ്സിൽ ബൈപ്പനഹള്ളി കേരള സമാജത്തിന്റെ വൈസ് പ്രസിഡണ്ട്‌,ജന:സെക്രട്ടരി എന്നീ സ്ഥനങ്ങൾ ഏറ്റെടുത്ത്‌ മലയാളികളു ടെ തോഴനായി. 73 മുതൽ ഐ.ടി.ഐ.എംബ്ളോയീസ് യൂണിയനിൽ എക്സിക്യൂട്ടീവ് അം ഗമായി. 26 വർഷം,ഒരിക്കൽ പോലും തോൽക്കാതെ വർക്കിംഗ് പ്രസിഡണ്ടായി തെരെഞ്ഞെടുക്കപ്പെട്ട മറ്റൊരു മലയാളിയില്ല. 76 മുതൽ ഇന്ത്യൻ കമ്മ്യൂണിസ്റ്റ്(മാർക്സിസ്റ്റ്)പാർട്ടിയിൽ അംഗമാണ്‌. കെ.എൻ.ഇ.ട്രസ്റ്റിലെ ട്രസ്റ്റീ,സെൻട്രൽ കൾച്ചറൽ അസോസിയേഷൻ,...ദൂരവാണിനഗർ കേരളസമാജം.റൈറ്റേഴ്സ് ഫോറം,ശാസ്ത്ര സാഹിത്യപരിഷത്ത് തുടങ്ങി പന്ത്രണ്ട് സംഘടനകളിൽ ആജീവനാന്ത അംഗത്വമുണ്ട്‌. 5 വർഷം മുമ്പ് അശരണരുടെ കണ്ണീ രൊപ്പുന്ന “കാരുണ്യ ബംഗ്ളൂരു” എന്ന സംഘടനക്ക് രൂപം കൊടുത്തു. ഈ സംഘട നയുടെ ബുദ്ധികേന്ദ്രവും നട്ടെല്ലുമാണ്‌ എ.ഗോപിനാഥ്. നഗരത്തിലെ ഏറ്റവും വലിയ മലയാളിപ്രസ്ഥനങ്ങളി ലൊന്നായിമാറിക്കഴിഞ്ഞു ഈ പ്രസ്ഥാനം. ജാതി-മത-ഭാഷാചിന്തകൾ ക്ക തീതമായി ജീവകാരുണ്യപ്രവർത്തനങ്ങളിൽ മുഴുകുമ്പോഴും ഈ അറുപത്തിമൂന്നുകാരന്റെ കണ്ണുകളിൽ വിപ്ളവബോധത്തിന്റെ ചുവപ്പു നിറം തിളങ്ങിനിൽക്കുന്നുണ്ട്‌.

ഉത്തരാഖണ്ഡ്പ്രകൃതിക്ഷോഭം - ഒരു വിചിന്തനം

2013-08-19T14:33:00.002+05:30

സുധാകരുണാകരൻ

ഹിമഗിരിയുടെ മടിത്തട്ടിൽ ശാന്തമായി മയങ്ങിയിരുന്നപ്രദേശങ്ങളെ ഇക്കഴിഞ്ഞ ജൂൺ 16 തീയ്യതി ഉണ്ടായ പ്രളയം തകർത്തെറിഞ്ഞു. ദേവഭൂമി ഒരു ദുരന്തഭൂമിയായി .ഹിമാലയൻ സുനാമി എന്ന് പേരിട്ട് വിളിച്ചമിന്നൽ പ്രളയത്തിൽ നാമാവശേഷമായത് ഏകദേശം 7000 മനുഷ്യരുടെ ജീവൻ മാത്രമല്ല. നൂറ്റാണ്ടുകളുടെ പഴക്കമുള്ള പൈതൃകസംസ്കാരത്തിന്റെ തെളിവുകൾ കൂടിയാണ്‌.

ഉത്തരാഖണ്ഡിലെ ഓരോ സ്ഥലത്തിനും പുരാണ,ഇതിഹാസ പ്രാധാന്യമുണ്ട്. കേദാർനാഥ്,ബദരിനാഥ്,ഗാംഗോത്രി,യമുനോത്രി എന്നി നാല്‌ കേന്ദ്രങ്ങൾ ഉൾപ്പെടുന്ന ചാർധാം തീർത്ഥാടനത്തിനു പ്രാധാന്യം ഏറെയാണ്‌. ശ്രീനഗർ രുദ്രപ്രയാഗ്,ചമോലി തുടങ്ങി ഉത്തരാഖണ്ഡിലെ ചെറുപട്ടണങ്ങളെല്ലാം സ്ഥിതിചെയ്യുന്നത് ഗംഗയുടെ തീരത്താണ്‌. വെള്ളം കുറഞ്ഞ് നദി ഉൾവലിഞ്ഞപ്പോൾ ആ സ്ഥലം കൈയ്യേറിനിർമ്മിച്ച കെട്ടിടങ്ങളെയെല്ലാം പ്രളയജലം കൊണ്ടു പോയി.

ഇതിൽ ബദരിനാഥ് ക്ഷേത്രസമുച്ചയത്തിൽ കേടുപാടുകളൊന്നും സംഭവിച്ചിട്ടില്ലെങ്കിലും,കേദാ

ർനാഥ് ക്ഷേത്രത്തിന്റെ ഗർഭഗൃഹം ഒഴിച്ച് ബാക്കിയെല്ലാം പ്രളയത്തിൽ പെട്ടു . ചാർധാം യാത്രനടത്താനാഗ്രഹിച്ചിരുന്നവർക്കും, യാത്രചെയ്തിട്ടുള്ളവർക്കും വലിയൊരു നഷ്ടംതന്നെയാണ്‌ ഈ പ്രളയം വരുത്തിവെച്ചിരിക്കുന്നത്. ഈ യാത്ര നടത്തുന്ന എല്ലാ തീർത്ഥാടകരും ആവശ്യം അറിഞ്ഞിരിക്കേണ്ട കാര്യങ്ങളും, പോകേണ്ട തീർത്ഥാടനകേന്ദ്രങ്ങളും, അതിനെല്ലാം ഉപരിയായി യാത്ര നടത്തേണ്ടവഴികളുമാണ്‌ പ്രകൃതിയുടെ സംഹാരതാണ്ഡവത്തിൽ തകർന്നടിഞ്ഞത്. ഇത് ബാഹ്യമായ ഒരു വിവരണം മാത്രം. പക്ഷേ നഷ്ടങ്ങളുടെ കണക്കെടുത്താൽ നമ്മുടെയൊക്കെ കണക്കുകൂട്ടലിനും അപ്പുറത്തായിരിക്കും കാര്യങ്ങൾ. മുപ്പത്തിരണ്ടോളം ഗ്രാമങ്ങൾ തന്നെ ഇല്ലാതായി എന്ന് പറയുന്നു. ദേവഭൂമി എന്ന് വിശേഷിപ്പിച്ചിരുന്നിടം ഇന്ന് ശ്മശാനഭൂമിയായി മാറിയിരിക്കുന്നു.
ദേവഭൂമി എന്ന നാമത്തെ അന്വർത്ഥമാക്കുന്ന വിധത്തിലാണ്‌ ഋഷികേശിലെ ഭൂപ്രകൃതി. ഒന്നുറക്കെ തുമ്മിയാൽ പ്പോലും അടർന്നു വീഴുന്നതരത്തിൽ നിൽക്കുന്ന മലനിരകൾ. (ഗഡ് വാ ൾ മലനിരകൾക്ക് ഉറപ്പില്ലാത്തതുകാരണം അവിടുത്തുകാർ ഉറക്കെ ചിരിക്കാറില്ലെന്നു പറയപ്പെടുന്നു.)ആ സ്ഥലമാണ്‌ ഏറ്റവും കൂടുതൽ പ്രളയത്തിന്നിരയായത്‌. ആയിരം അടിയെങ്കിലും താഴ്ച്ചയുള്ള കൊക്കളൊ, അതല്ലെങ്കിൽ അത്രതന്നെ താഴ്ച്ചയിൽ കൂലം കുത്തിയൊഴുകുന്ന നദികളൊ ആണ് മറുവശത്ത്‌. പർവ്വതത്തിനു് അരഞ്ഞാണം ചാർത്തിയ പോലെ കാണപ്പെടുന്ന ഋഷികേശ് മുതൽ ബദരീനാഥ് വരേയുള്ള റോഡുകളിൽ ക്കൂടിയുള്ള യാത്ര സാധാരണനിലയിൽ തന്നെ ക്ളേശകരമാണ്‌. അതിനോടൊപ്പം പ്രവചനാതീതമായ കാലാവസ്ഥയും മണ്ണിടിച്ചിലും വാക്കുകളാൽ പറയാൻ അസാധ്യമാണ്‌.

ഈ പ്രകൃതി ക്ഷോഭത്തിനെല്ലാം ആരാണുത്തരവാദി? തീർച്ചയായും തദ്ദേശവാസികളായ ജനങ്ങളല്ല. തീർത്ഥാടനത്തിന്റെ പേരും പറഞ്ഞ് കൊള്ള ലാഭം പ്രതീക്ഷിച്ച് ആയിരക്കണക്കിന്‌ വർഷങ്ങളുടെ പാരമ്പര്യമുള്ള സ്ഥലങ്ങളെ വികസനത്തിന്റെ പേരും പറഞ്ഞ് കച്ചവടകേന്ദ്രങ്ങളാക്കുന്ന കുത്തക മുതലാളി വർഗ്ഗം തന്നെയാണ്‌. പ്രകൃതി ദുരന്തങ്ങൾ സംഭവിക്കുന്നത് മനുഷ്യർ പ്രകൃതിയോടു ചെയ്യുന്ന ക്രൂരത കൂടുമ്പോഴാണ്‌.അശാസ്ത്രീയ മായ നിർമ്മാണപ്രവർത്തനങ്ങളും കാരണമാകാം. ഗംഗയുടെ ആറു കൈവഴികളിലും അണക്കെട്ടുകളും അതിനോടനുബന്ധിച്ചുള്ള തുരങ്കങ്ങളും,ജലവൈദ്യുത പദ്ധതികളും ഒക്കെ ദുർബ്ബലമായ മേഖലകളി ൽ നടത്തിയതു കൂടാതെ വാഹനങ്ങളുടെ നിരക്ക് ക്രമാതീതമായതും ഈ പ്രദേശത്തിന്‌ താങ്ങാനാവാത്ത ഭാരം നൽകി. അതിന്റെ തിരിച്ചടിയാണ്‌ ഈ പ്രകൃതിദുരന്തമെന്ന്‌ പരിസ്ഥിതി വാദകർ.
ജനസംഖ്യാ നിരക്ക് വളരെ കുറഞ്ഞ സംസ്ഥാ നങ്ങളിൽ ഒന്നാണ്‌ ഉത്തരഖണ്ഡ്‌. ഗ്രാമങ്ങളോട് വിട പറയുന്നവരുടെ ഭൂമി തുച്ഛമായ നിരക്കിൽ ഭൂമാഫിയക്കാർ സ്വന്തമാക്കുന്നു. പണത്തിനുവേണ്ടി പതിയിരിക്കുന്ന അപകടങ്ങളെ ഓർക്കാതെ ചെയ്ത പ്രവർത്തനത്തിന്റെ പരിണതഫലം ഘോരദുരന്തമായി പരിണമിക്കുന്നു. നദിയുടെ സ്വത്വം മനുഷ്യൻ മറന്നാലും,നദികൾ മറക്കാറില്ല.നുറ്റാണ്ടുകൾക്കു ശേഷമാണെങ്കിലും നദികൾ അവയുടെ യഥാർത്ഥ അതിരുകൾ തിരിച്ചുപിടിക്കും.
പതിവിലും വിപരീതമായി ഇക്കൊല്ലം നേരത്തെ എത്തിയ കാലവർഷവും ഉത്തരഖണ്ഡിനെ തളർത്തി. അതോടൊപ്പം തീർത്ഥാടകരുടെ തിക്കും തിരക്കും എല്ലാറ്റിനും ആക്കം കൂട്ടി. ചില വർഷങ്ങളിൽ ഏകദേശം രണ്ടരക്കോടിയോളം ജനങ്ങൾ ചാർധാം യാത്ര നടത്തിയതായി കണ ക്കുകൾ രേഖപ്പെടുത്തുന്നു. മൊത്തത്തിൽ പ്രകൃതിയുടെ സന്തുലിതാവസ്ഥക്കു തന്നെ കോട്ടം സംഭവിക്കുന്നു.
ആളും അർത്ഥവും നശിച്ചതിന്റെ കണക്കെടുപ്പു കഴിയുമ്പോൾ പ്രളയം ചരിത്രത്തിൽ സ്ഥലം പിടിക്കും. ഇതിനു മുമ്പും രണ്ടു പ്രാവശ്യം ഗഡ് വാളി ൽ പ്രളയമുണ്ടായതായി ചരിത്രരേഖകളി ലുണ്ട്‌. അന്ന് സപ്തർഷികൾ അഭയം തേടിയത് ബദരീനാഥിനടുത്തുള്ള മന എന്ന ഗ്രാമത്തിലായിരുന്നത്രെ. ചൈനയുടെ അതിർത്തിയിൽ ഏറ്റവും ഒടുവിലത്തെ ഇന്ത്യൻ ഗ്രാമമാണ്‌ മാന. ഭൂമിക്കടിയിലൂടെ ഒഴുകുന്ന സരസ്വതി നദിയുടെ ജന്മസ്ഥലം.

കേദാർനാഥിലെ പ്രതിഷ്ഠയും,ശങ്കരാചാര്യരുടെ സമാധിയും ഈ പ്രളയത്തിൽ ഒഴുകിപ്പോയെന്നു പറയുന്നു. ഈ അടുത്ത കാലത്ത് ഉത്തരഖണ്ഡിൽ ഇന്ത്യൻ സേനയുടെ നേതൃത്വത്തിൽ സാഹസികമായ പ്രവർത്തനങ്ങൾ നടന്നതും പരാമർശിക്കേണ്ടതുണ്ട്‌. പ്രതികൂലാവസ്ഥയോട് മല്ലടിച്ച്‌ അതിജീവനത്തിനായുള്ള മനുഷ്യന്റെ നിസ്സഹായനിലവിളികളിലേക്ക് പറന്നിറങ്ങിയ കര-വ്യോമസേനയുടേയും മറ്റു വിവിധ അർദ്ധസൈനിക വിഭാഗങ്ങളിലേയും ആയിരക്കണക്കിന്‌ ജവാന്മാർ രാപ്പകൽ ഭേദമെന്യേ ആഹാരം പോലുമില്ലാതെ വെല്ലുവിളികളോടെ ചെയ്ത ദുരന്ത നിവാരണ മാർഗ്ഗം വഴിയാണ്‌` അപകടത്തിന്നിരയായവരിൽ പലരേയും രക്ഷപ്പെടുത്തിയത്‌. രക്ഷാപ്രവർത്തനിടയിലെ അപകടത്തിൽ മരിച്ചവരിൽ ഉൾപ്പെട്ട ജവാൻ ജോമൻ ഉൾപ്പെടെയുള്ളവർക്കു മുന്നിൽ ഇന്ത്യൻ ജനത ശിരസ്സു നമിക്കുന്നു.
ഇനിയുള്ള പുനർനിർമ്മാണങ്ങൾക്ക് വർഷങ്ങളുടെ കണക്ക് അധികാരികൾ പറയുന്നുണ്ടെങ്കിലും എല്ലാം പൂവ്വാവസ്ഥയിലാവാൻ എത്ര കാലം വേണ്ടിവരുമെന്നു പറയാൻ കഴിയില്ല. പ്രകൃതിയുടെ ഏതു ഭാഗത്താണെ ങ്കിലും പരിസ്ഥിതിയെ മാനിച്ചുകൊണ്ടുള്ള ഉയിർത്തെഴുന്നേൽ പ്പുകളാണ്‌ വേണ്ടത് . പ്രകൃതിയുമായി പൊരുത്തപ്പെട്ടു പോകണമെന്ന വ്യക്തമായ സന്ദേശമാണ്‌ ഓരോ പ്രകൃതി ദുരന്തത്തിലൂടേയും നാം മനസ്സിലാക്കേണ്ടതും

അരങ്ങ്‌-പതിനെട്ട്

2013-07-29T19:27:00.003+05:30

അരങ്ങ്‌-പതിനെട്ട്
പീ.വി.ശ്രീവൽസൻ

-ജീവിതപ്പാതയിൽ മേലിൽ കണ്ടുമുട്ടാത്ത നാം

വേർതിരിഞ്ഞു-വേർപിരിഞ്ഞു കഴിഞ്ഞുവല്ലോ

നനച്ചു വളർത്തി രാവും പകലുമായ്,കാത്തുവന്ന

നിനവുകൾ-കിനാവിലെക്കനലുകളായി.

അണഞ്ഞുപോയ്പ്പക്കലാളി; ചരമഗീതത്തിൻ,രൂപ

മണിഞ്ഞിതാവന്നു,പോക്കുവെയിൽനാളങ്ങൾ,

ഉറക്കം വരുന്നു,മിഴി കുഴയുന്നു,നിശേ,വന്നു

കറുപ്പു വസ്ത്രത്താലെന്നെപ്പുതപ്പിച്ചാലും-പി.കുഞ്ഞിരാമൻ നായർ

അരങ്ങത്തെ ഏതോ വേഷം പോലെ ജീവിതത്തിൽ നിന്നു മാഞ്ഞുപോയ പ്രിയപത്നി.അത്‌,എന്നെന്നേയ്ക്കുമായുള്ള ഒരു തിരിച്ചുപോക്കാണല്ലോ എന്നോർത്തപ്പോൾ തോന്നിയ വ്യർത്ഥതാബോധം.അടുക്കും ചിട്ടയുമില്ലാതെ മനസ്സിനെ ചവിട്ടി മെതിച്ച ദുരന്തബോധം.

നാലഞ്ചു ദിവസം നീണ്ട മടക്കയാത്ര കഴിഞ്ഞു വാഴേങ്കടയിൽ തിരിച്ചെത്തിയ നേരം.ഉമ്മറത്തിണ്ണ യിൽ എട്ടും പൊട്ടും തിരിയാത്ത രണ്ടു കുട്ടികൾ; അച്ഛനെ കാത്ത്.

ഇളയവനെ ഒക്കത്തു വെച്ചു മൂത്തവന്റെ കൈ പിടിച്ചു.ഏറെ ദൂരം യാത്രയാക്കാൻ വന്ന അവരുടെ അമ്മ.യാത്ര പോലും പറയാതെ പിരിഞ്ഞുപോയതോർക്കുമ്പോൾ.........

കുട്ടികളെ മാറോടടക്കി ചേർത്തുപിടിച്ചു.എത്ര നിയന്ത്രിച്ചെങ്കിലും അടക്കാനായില്ല.

പിന്നെ,അവിടെത്തന്നെ വീണു ബോധം കെട്ടുറങ്ങി.

ആരും വിളിച്ചുണർത്തിയില്ല.

ദിവസങ്ങൾ ചിലതു ചത്തുമലച്ചു.അതിനിടക്ക് ആരെല്ലാമോ ചിലർ,കൂടെയുള്ള കഥകളിക്കാരും സുഹൃത്തുക്കളും വന്നു.പലതും പറഞ്ഞു ധൈര്യം നൽകി.

കുഞ്ചുനായർക്കന്ന് മുപ്പത്താറ്‌ വയസ്സ്‌.

ഉയർന്നുവരുന്നൊരു വേഷക്കാരൻ.പക്ഷേ വഴി മുട്ടിയ ജീവിതം.

അതുവരെ പാലിച്ച അച്ചടക്കത്തിന്റേയും ചിട്ടയുടെയും കെട്ടുകളയഞ്ഞു തുടങ്ങി.കളികൾക്കു പോകാൻ തോന്നിയില്ല.ചിലപ്പോൾ ആരോടും പറയാതെ എങ്ങോട്ടെങ്കിലുമൊക്കെ പോയി. എവിടെപ്പോകുന്നു,എന്തിനു വേണ്ടി പോകുന്നു എന്നൊരു ലക്ഷ്യബോധവുമില്ലാതെ.ഒന്നുരണ്ടു ദിവസം കഴിയുമ്പോൾ തിരിച്ചെത്തും. നല്ലവണ്ണം മദ്യപിച്ചിട്ടുണ്ടാകും.കുട്ടികളെ കെട്ടിപ്പിടിച്ചു കരയും.

വഴിവിട്ടുപ്പോവുമോ എന്ന് ആധി പൂണ്ട വീട്ടുകാർ. മകൾ പോയി,അവളുടെ പിഞ്ചു കുട്ടികൾ.അവരുടെ അച്ഛൻ,അവർക്കൊന്നും വരുത്തരുതേയെന്ന ഭയാശങ്കകളിൽ മനമുരുകിയ കുഞ്ചുനായരുടെ ഭാര്യാപിതാവും മാതാവും.

ആ കൊല്ലത്തെ വർഷം കഴിഞ്ഞു.കഥകളിയുടെ കാലം തുടങ്ങി. ഇനി കഥകളിയല്ലാതെ മനസ്സിൽ മറ്റൊന്നിനും സ്ഥാനമില്ലെന്നു സ്വയം തീരുമാനിച്ച കുഞ്ചുനായർ കളികൾക്കു പോകാൻ തുടങ്ങി.

വേഷം കെട്ടി അരങ്ങത്തു ചെല്ലുമ്പോൾ എല്ലാ ദുഃഖവും മറന്നു. മനസ്സിന്റെ സംയമന നിലയിലേക്കു തിരിച്ചെത്തുന്നതായുള്ള തിരിച്ചറിവുകൾ,തിരിവെളിച്ചങ്ങൾ.

ഒരു നാൾ, എവിടേയോ കളി കഴിഞ്ഞു വീട്ടിലെത്തിയ സമയം. കുളി കഴിഞ്ഞ് ഊണു കഴിക്കാനിരുന്നു. തികച്ചും അപ്രതീക്ഷിതമായി,ഒരിക്കൽ പ്പോലുമൊന്നൂഹിക്കുകപ്പോലും ചെയ്യാത്ത ഒരു കാര്യം കുഞ്ചുനായരെ അറിയിച്ചു, ഭാര്യയുടെ അമ്മ. മരിച്ചുപോയ പത്നിയുടെ ഇളയ സഹോദരി,ലക്ഷ്മിക്കുട്ടിയെക്കുറിച്ചായിരുന്നു അത്‌.

വാഴേങ്കട നിന്ന് നാലഞ്ചു നാഴിക വടക്കുകിഴക്കുള്ള ചെത്തല്ലൂർ.അവിടെയായിരുന്നു അവരുടെ അച്ഛന്റെ വീട്‌. ചെത്തല്ലൂരമ്പലത്തിലെ ഉൽസവക്കളിയും പ്രസിദ്ധമായിരുന്നു. അവിടത്തെ സ്ക്കൂളിൽ നിന്ന് എട്ടാം ക്ളാസ് പാസായി വീട്ടിലിരിക്കുകയായിരുന്നു ലക്ഷ്മിക്കുട്ടി.

പതിനെട്ടു വയസ്സു കഴിഞ്ഞ ലക്ഷ്മിക്കുട്ടിക്ക് നല്ല നിലയിലുള്ള വിവാഹാലോചനകൾ വന്നുകൊണ്ടിരുന്ന കാലം.കുഞ്ചുനായരേക്കാൾ പതിനെട്ടുവയസ്സിനിളപ്പമുള്ള പെൺകുട്ടി. ഭാര്യ മരിച്ച് രണ്ടു ചെറിയ കുട്ടികളുമായി കഴിയുന്ന ഒരാൾ,ഇരട്ടി പ്രായവും.അങ്ങനെയുള്ള ഒരാളെ സ്വീകരിക്കാൻ അയാൾ എത്ര പേരെടുത്ത കഥകളി ക്കാരനായാലും,സാധാരണ ഗതിയിൽ ഒരു പെൺകുട്ടിയും തയ്യാറാവുകയില്ല.

സ്വന്തം സഹോദരിയുടെ കുട്ടികളെ ഒരു പക്ഷേ കഴിയും വിധം സംരക്ഷിച്ചെന്നിരിക്കും. അതിനപ്പുറം അങ്ങനെയൊരാളുടെ ,വലിയൊരു ജ്യേഷ്ഠന്റെ സ്ഥാനമുള്ള ഒരാളുടെ രണ്ടാമത്തെ ഭാര്യയായി ജീവിക്കുവാൻ സ്വാഭാവികമായും സമ്മതിക്കാനിടയില്ല. അതുകൊണ്ട് കുഞ്ചുനായർക്ക് അത്തരത്തിലുള്ള ഒരു ചിന്തയേ ഉണ്ടായില്ല. അതു മാത്രവുമല്ല ആ സാഹചര്യത്തിൽ രണ്ടാമതൊരു വിവാഹത്തെക്കുറിച്ച് ആലോചിച്ചിട്ടേയില്ല.

ലക്ഷ്മിക്കുട്ടിയെ ഭാര്യയായി സ്വീകരിക്കുന്നതിൽ അവിടെയുള്ള എല്ലാവർക്കും, ആ പെൺകുട്ടിയടക്കം സമ്മതമാണെന്ന കാര്യം പലതവണ സൂചിപ്പിച്ചു. കൃത്യമായി മറുപടി പറയാനായില്ല.

അങ്ങനെയും ചില ദിവസങ്ങൾ,അതിനിടയ്ക്കുള്ള കളികളും.

പിന്നെപ്പിന്നെ സ്വയമറിയാതെ അങ്ങനെയൊരാഗ്രഹം വല്ലപ്പോഴും മനസ്സിലുണർന്നുവോ?

താൻ ചെയ്യുന്നത് ശരിയാണോ?തന്നേക്കാൾ പകുതി പ്രായമുള്ള ,വിദ്യാഭ്യാസവും പക്വതയുമുള്ള ഒരു പെൺകുട്ടി. ആ പെൺകുട്ടിയുടെ യഥാർത്ഥ മനസ്ഥിതിയെന്തെന്നറിയാതെ...?

ഇക്കാര്യം അവൾക്കും സമ്മതമെന്നത് സത്യമാണെങ്കിൽ ഇതുതന്നേയല്ലേ കുട്ടികൾക്കും തനിക്കും നല്ലത്‌...?അവനവനോടു തന്നേയുള്ള ചോദ്യങ്ങൾ, സംശയങ്ങൾ.

ആളും ആരവവുമില്ലാതെയുള്ള ഒരു പുടമുറിക്കല്യാണം. പല കാര്യങ്ങളിലും നാണിക്കുട്ടിയേക്കാൾ വ്യത്യ്സ്തസ്വഭാവം.ഒഴിവു നേരങ്ങളിൽ എന്തെങ്കിലും വായിക്കാനിഷ്ടപ്പെട്ടു. കഥകളിയെപ്പറ്റി പൊതുവായി കാര്യങ്ങളറിയാൻ താല്പ്പര്യമാണെങ്കിലും അവനവനു താല്പ്പര്യമുള്ള കഥ മാത്രമേ കാണുകയുള്ളു. അഞ്ചു ദിവസം കളിയുണ്ടെങ്കിലും എല്ലാ ദിവസവും ഒരുപോലെ ഉറക്കമൊഴിച്ചു കളി കാണില്ല. വായിക്കുവാൻ വേണ്ടി അക്കാലത്തേറെ പ്രചാരമുണ്ടായിരുന്ന “അമ്പിളി അമ്മാവൻ” മാസിക സ്ഥിരമായി വരുത്തിയിരുന്നു. കുന്നത്ത് ജനാർദ്ദനമേനോന്റെ മഹാഭാരത കഥകളും വാങ്ങിക്കൊടുത്തു. ഉൽസവക്കാലത്തും മറ്റു വിശേഷാവസരങ്ങളിലും വീട്ടിൽ നിറയെ അതിഥികളും മറ്റു വേണ്ടപ്പെട്ടവരുമുണ്ടാകും. അവർക്കെല്ലാം സമൃദ്ധമായി വെച്ചു വിളമ്പി ഊട്ടുന്നതിൽ അങ്ങേയറ്റം ആഹ്ളാദവതിയായിരുന്ന ഒരു ഭാര്യ.

ഈ കാലത്ത് അരങ്ങത്ത് തന്റേതായ ഒരു നിലപാടും വ്യക്തമായ സ്ഥാനവും നേടിയെടുക്കാൻ കുഞ്ചുനായർക്കു കഴിഞ്ഞു. അദ്ദേഹത്തിന്റെ മനസ്സിലെ എക്കാലത്തേയും ദൈവസാന്നിദ്ധ്യമായ വാഴേങ്കട ദേവന്റേയും ഗുരുഭൂതന്മാരുടേയും അനുഗ്രഹത്താൽ ബഹുജനങ്ങളിൽ നിന്ന് ചില ആശീർവാദമുദ്രകൾ ലഭിച്ചു. ശ്രീ കുതിരവട്ടത്ത് കുഞ്ഞൻ തമ്പാൻ വക ഒരു മോതിരം(അഭ്യാസത്തിന്റെ അവസാനകാലത്തായിരുന്നു അത്‌. അഭ്യാസച്ചിലവിലേക്ക് വേണ്ടി ഈ മോതിരം-ആദ്യം കിട്ടിയ സമ്മാനം-വിൽക്കേണ്ടി വന്നു. എന്നാലും അഭ്യാസം പൂർത്തീകരിക്കാൻ വേണ്ടിയാണല്ലോ അങ്ങനെ ചെയ്യേണ്ടിവന്നത് എന്നു സമാധാനപ്പെടുകയും ചെയ്തു.)

അതിനുശേഷം ബോംബെ മലയാളി കോൺഫ്രൻസ് വക ഒരു സ്വർണ്ണ മെഡൽ,മഹാരാഷ്ട്രയിലെ ഒരു പ്രസിദ്ധ കവിയായിരുന്ന ശ്രീ രമേഷ് ഗുപ്ത വക ഒരു മെഡൽ. പാറശ്ശേരി യുവജനസംഘം വക ഒന്നേമുക്കാൽ പവൻ തൂക്കമുള്ള ഒരു മെഡൽ,ബ്രഹ്മശ്രീ പഴയിടത്ത് ദാമോദരൻ നമ്പൂതിരി വക ഒരു മോതിരം,ഒറ്റപ്പാലം സാഹിത്യപരിഷത്ത് കളി ക്ക് ഒരു മോതിരം,ചെർപ്പു ളശ്ശേരിയിൽ നിന്നും പഴയന്നൂരിൽ നിന്നും ഓരോ മെഡൽ തുടങ്ങിയുള്ള അംഗീകാരങ്ങളും ആദരവുകളും ധാരാളമായി ലഭിച്ചു.ആസ്വാദകരുടെ ഈ തിരിച്ചറിവുകളും അനുമോദനങ്ങളും ആശീർവാദങ്ങളും കുഞ്ചുനായരെ പിന്നെപ്പിന്നെ അരങ്ങത്തും കളരിയിലും കൂടുതൽ കർമ്മനിരതനാക്കി.

ഇതിനിടയിൽ ഭാര്യവീട് സാമാന്യം പുതുക്കിപ്പണിതു.സ്ഥിര താമസം അവിടെയായി. ഭാര്യയുടെ അമ്മയും, അച്ഛനും ആ കാലത്തിനിടെ മരിച്ചുപോയി. ഭാര്യയുടെ നേരെ മൂത്ത ഒരു ജ്യേഷ്ഠത്തി കൂടെയായിരുന്നു. അപസ്മാരത്തിന്റെ അസുഖമുള്ളതിനാൽ അവർ അവിവാഹിതയായിത്തന്നെ കഴിഞ്ഞുകൂടി. പിന്നെ ലക്ഷ്മിക്കുട്ടിയുടെ ജ്യേഷ്ഠൻ ശങ്കുണ്ണിനായർ കൂടെത്തന്നെയായിരുന്നു.

കഥകളി പഠിക്കുന്ന കാലത്തു തുടങ്ങിയ കൃഷിയിലുള്ള കമ്പം മനസ്സിലന്നും ബാക്കി കിടന്നു. കാലം ചെന്നപ്പോൾ കുറേശ്ശെ കൃഷിയിടങ്ങൾ വാങ്ങി. കന്നും കൃഷിയും കഥകളിയുമായി ജീവിതം മുന്നോട്ടുപൊയ്ക്കൊണ്ടിരുന്നു. അപ്പോഴേക്കും ഏതാണ്ടു നാല്പ്പതു വയസ്സ് കഴിഞ്ഞിരുന്നു.

ഭാര്യാസഹോദരൻ കൃഷികാര്യങ്ങളിൽ നൈപുണ്യമുള്ള ആളെന്ന നിലയ്ക്കും,നാട്ടുകാരുടെയിടയിൽ ചെറുപ്പക്കാലത്തുതന്നെ സുസമ്മതനുമായിരുന്നു. ജാതിമതഭേദമെന്യേ ഏതൊരു കാര്യത്തിനും എപ്പോൾ വേണമെങ്കിലും കൈയ്മെയ് മറന്ന് ചെന്നെത്തുന്ന ഒരു പ്രകൃതം. കഥകളി യേക്കാൾ അയ്യപ്പൻ വിളക്കിലായിരുന്നു കമ്പം. പിന്നെ,പഴനി,മധുര തുടങ്ങിയ ക്ഷേത്രങ്ങളിലേക്കു തീർത്ഥയാത്രകളും.കുഞ്ചുനായരുടെ കൃഷിയിലുള്ള താല്പ്പര്യം പൂർത്തീകരിച്ചത്,എല്ലാ നിലയ്ക്കും ഈ മനുഷ്യനായിരുന്നു. (എന്നാൽ നാൽപ്പത്തിരണ്ടാം വയസ്സിൽ അദ്ദേഹം അകാലചരമമടഞ്ഞു.)

അങ്ങനെയിരിക്കെ വൈദ്യരത്നം പി.എസ്.വാര്യർ അവർകളുടെ കോട്ടയ്ക്കൽ പി.എസ്.വി.നാട്യസംഘത്തിൽ കഥകളി ആചാര്യനായി ചെല്ലാൻ കുഞ്ചുനായർക്ക് അപ്രതീക്ഷിതമായി അവസരം കൈവന്നു.

ആരാച്ചാർ ശാക്തീകരണത്തിന്റെ വേറിട്ട ചരിത്രം

2013-06-25T20:09:00.003+05:30

പ്രൊഫസ്സർ സി.ചന്ദ്രമതി.

ബാംഗ്ളൂർ മലയാളി റൈറ്റേഴ്സ് ആന്റ് ആർട്ടിസ്റ്റു ഫോറത്തിന്റെ ആഭിമുഖ്യത്തിൽ പ്രശസ്ത നോവലിസ്റ്റ് കെ.ആർ.മീരയുടെ “ആരാച്ചാർ” എന്ന നോവലിന്റെ ചർച്ച സംഘടിപ്പിച്ചു.പ്രസിഡണ്ട് ഇന്ദിരാബാലൻ അദ്ധ്യക്ഷത വഹിച്ച യോഗത്തിൽ സെക്രട്ടറി സി.ഡി.ഗബ്രിയേൽ സ്വാഗതം പറഞ്ഞു. എഴുത്തുകാരി പ്രൊ.സി.ചന്ദ്രമതി മുഖ്യപ്രഭാഷണം നടത്തി.ആരാച്ചാർ എന്ന നോവൽ ശാക്തീകരണത്തിന്റെ വേറിട്ട ചരിത്രമാണ്‌.`ശക്തിയും,ധൈര്യവു

മുള്ള സ്ത്രീകൾ എല്ലാ കാലത്തും ജീവിച്ചിരുന്നിട്ടുണ്ട്‌.പക്ഷേ വിരലിലെണ്ണാവുന്നവർ മാത്രം.ഇന്നും സ്ഥിതി അതു തന്നെ.കൂടുതൽ സ്ത്രീകൾ മാനസികമായും,ശാരീരികമായും ശക്തിയാർജ്ജിക്കേണ്ടതുണ്ട്‌. സ്ത്രീകൾ കേവലം നിഴലുകളല്ല്,സ്വന്തം നിയതിയുടെ വിധാതാക്കളുമാണ്‌.വെറും കളിപ്പാവകളും,ചവിട്ടുപടിയും ആയി സ്ത്രീകളെ കരുതുന്ന സമൂഹത്തെ നേരിടാൻ സ്ത്രീകൾ ശക്തരായി സംഘടിക്കേണ്ടത്‌ കാലഘട്ടത്തിന്റെ ആവശ്യമാണ്‌."Empowerment of more and more Women".ഇതാണ്‌ മീര ഈ നോവലിലൂടെ നല്കുന്ന സന്ദേശം. പ്രൊ.സി.ചന്ദ്രമതി അഭിപ്രായപ്പെട്ടു.

തുടർന്നു നടന്ന ചർച്ചയിൽറെയിൽ വീൽ ഫാക്ടറിയിലെ സീനിയർ എൻജിനീയറും,സ്ത്രീപക്ഷ പ്രവർത്തകയുമായ ശ്രീമതി നിർമ്മലാജോർജ്ജ്, ടി.എം.ശ്രീധരൻ,കെ.ആർ.കിഷോർ,ആർ.വി.പിള്ള,ടി.എൻ.എം.നമ്പൂതിരി,സലീം കുമാർ,എം.ബി.മോഹൻ ദാസ്,തങ്കച്ചൻ പന്തളം,പൊന്നമ്മ ദാസ്,സി.ഡി.തോമസ്,എന്നിവർ പ്രസംഗിച്ചു.സന്തോഷ് ശിവൻ കവിത ആലപിച്ചു.ഡോക്ടർ രാജൻ നന്ദി രേഖപ്പെടുത്തി.

(ഫോട്ടോയിൽ പ്രൊ.ചന്ദ്രമതി പ്രഭാഷണം നടത്തുന്നു.സമീപം ഇന്ദിരാ ബാലൻ,നിർമ്മലാ ജോർജ്ജ്,ടി.എം.ശ്രീധരൻ,സി.ഡി.ഗബ്രിയേൽ)

എന്നു
ഇന്ദിരാ ബാലൻ

IMG_5189.JPG
3637K View Download

അഴി തേടുന്ന അഴിമതികൾ

2013-06-11T21:59:00.004+05:30

അഴി തേടുന്ന അഴിമതികൾ

വസന്തകുമാർ ബൻസാൻ എന്ന റെയിൽവെ മന്ത്രിയുടെ കസേറ തെറിച്ചു. അതിനു മുമ്പ്

2-ജി.സ്പെക്ട്രം കേസുമായി ബന്ധപ്പെട്ട് സ്ഥാനമൊഴിഞ്ഞ രാജ എന്ന മുൻമന്ത്രി

കോടതിവരാന്ത നിരങ്ങുകയാണ്‌. യദിയൂരപ്പയും ഖനിരാജാക്കന്മാരായ റെഡ്ഢിമാരും

കേസിൽപ്പെട്ട് ശ്വാസം വലിക്കുകയാണ്‌. ദൈവത്തിന്റെ സ്വന്തം നാടായ

കേരളത്തിലെ ഗണേശൻ മന്ത്രിക്ക് സിനിമാസ്റ്റൈലിൽ രാജിവെക്കേണ്ടി വന്നത്

അഴിമതിക്കു കൂട്ടു നിൽക്കാത്തതുകൊണ്ടാണെന്ന് അദ്ദേഹത്തിന്റെ

അനുചരവൃന്ദഭാഷ്യം. രാഷ്ട്രത്തിന്റെ യശസ്സ് ഉയർത്താൻ വേണ്ടി വീറോടെ

കളിക്കളത്തിൽ പോരാടിയ ശ്രീശാന്തും ക്രിക്കറ്റ് ഒത്തുക്കളിക്കേസിൽ പെട്ട്

തീഹാർജയിൽ കിടന്ന് പല്ലു കടിക്കുന്നു. ഗാന്ധിജിയേയും,

ജയപ്രകാശ്നാരായണനേയും, കാമരാജിനേയും ,കെങ്കൻ

ഹനുമന്തയ്യയേയും.ഇ,എം.എസ്സിനേയും

പ്രസവിച്ച ഭാരതാംബയുടെ ഹൃദയം വേദനകൊണ്ട്
പുകയുകയാണോ? എവിടെയാണ്‌` അഴിമതിയുടെ ഉറവ പൊട്ടുന്നതെന്നു
അന്വേഷിക്കുമ്പോൾ ചെന്നെത്തുന്നത് മന്ത്രിമാരിലോ,ഉദ്യോഗസ്ഥരിലോ
ക്രിക്കറ്റ്ക്കളിക്കാരിലോ ഒന്നുമല്ല. അവരെല്ലാം കളിയറിയാതെ കളിക്കുന്ന
കുരങ്ങുകൾ. കുരങ്ങിന്റെ കഴുത്തിൽ കയറിട്ട് കളി നിയന്ത്രിക്കുന്ന
കളിക്കാരനാണ്‌,കുരങ്ങിനെക്കൊണ്ട് കളിപ്പിച്ച് നാണയത്തുട്ടുകൾ
മടിശ്ശീലയിലാക്കുന്നത്‌. അവരാണ്‌` രാജ്യത്തിന്റെ കഴുത്തിൽ കയറിട്ട്
രാഷ്ട്രനേതാക്കളെ കുരങ്ങുവേഷം കെട്ടിച്ച് അപഹാസ്യരാക്കുന്ന കോർപ്പറേറ്റ്
സാമ്രാജ്യധനശക്തികൾ. ശ്രീശാന്തിനെപ്പോലെ പ്രതിഭയുള്ള കളിക്കാരെ
കുരുക്കുന്നത്‌ അധോലോകക്കാരും, വൻകിടവാതുവെപ്പുസംഘങ്ങളുമാണ്‌.

ആയിരക്കണക്കിന്‌ കോടികൾ ഖജനാവിൽ നിന്നു ചോർത്തിക്കൊടുക്കുമ്പോൾ
ഉദ്യോഗസ്ഥന്മാർക്കും മന്ത്രിമാർക്കും കിട്ടുന്നത്` ഏതാനും നക്കാപ്പിച്ച
ലക്ഷങ്ങൾ മാത്രം. പ്രലോഭിപ്പിച്ചും, ഭീഷണിപ്പെടുത്തിയും പല അടവുകളും
പയറ്റാൻ അവർ മിടുക്കരാണ്‌. അവരെ തളക്കാൻ ഭരണകൂടങ്ങൾക്ക് ശേഷിയുമില്ല.
എന്നാൽ, തെരെഞ്ഞെടുക്കപ്പെടുന്ന രാഷ്ട്രീയ ഉദ്യോഗസ്ഥപ്രമുഖന്മാർക്ക്‌
രാഷ്ട്രത്തോടും നീതിപീഠത്തോടും പ്രതിബദ്ധത വേണ്ടതാണ്‌.
ശ്രി‍ൂതി കേട്ട മഹീശർതന്നെയീ-
വ്യതിയാനം സ്വയമേ തുടങ്ങുകിൽ
ക്ഷതി ധർമ്മഗതിക്ക് പറ്റിതാൻ
ക്ഷിതി ശിഷ്ടർക്കനിവാര്യമായിതാൻ“

എന്ന് ചിന്താവിഷ്ടയായ സീതയിലെ ആശാന്റെ വരികളാണ്‌ ഓർമ്മയിൽ തെളിയുന്നത്‌.
പേരും,പെരുമയുമുള്ള നമ്മുടെ ഭരണക്കർത്താക്കൾ തന്നെ ധാർമ്മികമൂല്യങ്ങളിൽ
നിന്ന് സ്വയം വ്യതിചലിച്ച് നീങ്ങിയാൽ, ധർമ്മം അന്യമാകുന്ന ഈ ഭൂമിയിൽ
പിന്നെ എങ്ങനെ ജീവിക്കും?ധാർമ്മികമൂല്യങ്ങൾ വറ്റിവരണ്ടുണങ്ങിയ
മരുഭൂമിയല്ല ഇന്ത്യ.ത്യാഗവും, സ്നേഹവും,ഹൃദയവിശാലതയും എളിമയും, തെളിമയും
നിസ്വാർത്ഥതയും സമൂഹത്തിൽ ഇപ്പോഴും നിലനിൽക്കുന്നുണ്ട്`. പൊതുരംഗം
സ്വാർത്ഥപ്രയോജനത്തിലാണെന്ന അബദ്ധധാരണ ഒരു രോഗമായി മാറുമ്പോൾ ,അതിനൊരു
മറുമരുന്നായി‘ദുരവസ്ഥയിൽ’സാവിത്രി അന്തർജ്ജനത്തിന്റെ ആത്മഗതമായ ആശാന്റെ
വരികൾ ഉപയോഗിക്കാം.
”താണുകിടക്കും സഹചരരെപ്പൊക്കുവാൻ
താണതാണെങ്കിൽ ഞാൻ ധന്യയായ്"
അതെ,താഴെയുള്ളവരെ ഉയർത്താൻ വേണ്ടി,ദുരഭിമാനം വെടിഞ്ഞ് തനിക്കു
താഴേണ്ടിവന്നാൽ ,അതു ധന്യതയാണെന്ന് പറയാനുള്ള മനുഷ്യസ്നേഹം നമ്മുടെ
പൊതുപ്രവർത്തകരുടെ ഹൃദയത്തിൽ പൂവിൽ തേനെന്ന വണ്ണം നിറഞ്ഞുകവിയും എന്നു
തന്നെ പ്രത്യാശിക്കാം,അഥവാ പ്രതിവിധികൾ ജനതയുടെ ഭാഗത്തു നിന്ന്‌
ഉണ്ടാകേണ്ടിവരും.

അരങ്ങു-പതിനേഴ്

2013-05-04T21:20:00.001+05:30

പീ.വി.ശ്രീവൽസൻ

കുഞ്ചുനായരെന്ന നടനെ സംബന്ധിച്ച്‌ കഥകളിജീവിതത്തിലെ സമ്മോഹനമായ ഒരു കാലമായിരുന്നു പിന്നീട്‌.കുട്ടിത്തരത്തിൽ നിന്ന് ഇടത്തരത്തിലേക്കും പിന്നെ ആദ്യവസാന വേഷങ്ങളിലേക്കും ചുവടു മാറിത്തുടങ്ങിയ യുവനടൻ,വാഴേങ്കട കുഞ്ചുനായർ

വിവാഹശേഷമുള്ള പ്രണയഭരിതമായ മനസ്സ്‌. ഓരോ വേഷം ചെയ്യുമ്പോഴും ആ കഥാപാത്രങ്ങളുമായി നടത്തിയ മൌനസംവാദങ്ങൾ, മനന നിരീക്ഷണങ്ങൾ.അത്തരത്തിലുള്ള ചില അഭിവീക്ഷണങ്ങളിലൂടെ പതുക്കെപ്പതുക്കെ തന്റേതായ ചില ‘ഇടങ്ങൾ ’ അരങ്ങത്തു സൃഷ്ടിക്കാൻ മോഹിച്ചു.

അതിന്റെ അടിസ്ഥാനശില പാകിയത്‌,രാവുണ്ണിമേനോനാശാന്റെ കീഴിലുള്ള അഞ്ചു വർഷം തന്നെ.

കളിയരങ്ങിൽ മാത്രമല്ല ജീവിതത്തിലും പതിഞ്ഞ പദങ്ങൾ ആടിത്തിമർത്തിയ കാലം. എതിരില്ലാത്ത യൌവ്വനകാലം.കഥകളിയോട് അങ്ങോട്ടെത്രമാത്രം അടുപ്പമുണ്ടോ അതിലിരട്ടി, കഥകളിക്ക് കുഞ്ചുനായരെന്ന നടനോടും അടുപ്പം വന്ന കാലം.

ദൂരസ്ഥലങ്ങളിൽ കളിക്കു പോയാൽ കിട്ടുന്ന പ്രതിഫലത്തിൽ പകുതി ഭാഗവും നാണിക്കുട്ടിക്കു വേണ്ട സാധനങ്ങൾ വാങ്ങി. കസവു വേഷ്ടിയും, മുണ്ടും, വള, മാല, അങ്ങനെയങ്ങനെ പലതും. കുട്ടികൾക്കും വേണ്ടതെല്ലാം ചെയ്തു.

കഥകളികൊണ്ട്‌ ധനം നേടാനുള്ള ആഗ്രഹമില്ല. ധനസമ്പാദനത്തിനുള്ള ഒരു മാർഗ്ഗമായി കഥകളിയെ കണ്ടില്ല. പക്ഷേ, കഥകളികൊണ്ടു സന്തോഷമായിത്തന്നെ ജീവിക്കാമെന്ന ഉറച്ച വിശ്വാസം തോന്നി.

കുറേക്കാലമായി ആഗ്രഹിക്കുന്ന ഒരു കാര്യം, നല്ലൊരു ജോഡി വെള്ളിപാദസരം.

വിവാഹപൂർവനാളുകളിൽ വാഴേങ്കട ക്ഷേത്രത്തിലെ പ്രദക്ഷിണവീഥിയിൽ വെച്ചു പറഞ്ഞത്‌, അന്ന്‌, ആരുമറിയാതെ അവളുടെ കൈ പിടിച്ചു വാഗ്ദാനം ചെയ്ത വെള്ളിപാദസരം. കല്യാണത്തിന്‌ അതു വാങ്ങാൻ കഴിഞ്ഞില്ല. ആ പാദസരക്കിലുക്കം കേൾക്കാൻ അന്നു മനസ്സെത്രമാത്രം കൊതിച്ചിരുന്നു. കളികൾ കിട്ടിത്തുടങ്ങിയപ്പോൾ അല്പ്പാല്പ്പമായി ഒരുക്കൂട്ടിവെച്ച പണം. അതിനിടക്ക് എന്തെങ്കിലും കാരണവശാൽ അതു അപ്രതീക്ഷിതമായി ചെലവായിപ്പോകും. അങ്ങനെയിരിക്കുമ്പൊൾ, ചില മറുനാടൻ ശിഷ്യൻമാരുടെ ഉൽസാഹത്തിൽ പ്രത്യേകിച്ച് യോഗ്‌സുന്ദർ ദേശായി എന്ന ശിഷ്യന്റെ ആഗ്രഹപ്രകാരം ബോംബെയിൽ നാലഞ്ചുനാളത്തെ കഥകളിപ്രോഗ്രാമിനു ക്ഷണം വന്നു. കഥകളി ഡെമോൺസ്ട്രേ ഷൻ ,അതിനുശേഷം കഥകളി,ഒരു ചെറിയ സംഘവുമായി ബോംബെ യാത്ര തീരുമാനിച്ചു.

ഇരുത്തം വന്ന ഒരാദ്യവസാനക്കാരനെന്ന പേര്‌ പടർന്നു പിടിച്ച കാലം. അരങ്ങത്ത് ഏതു വേഷം കെട്ടി പ്രവർത്തിക്കുമ്പോഴും അവനവന്റേതു മാത്രമായ ചില പ്രത്യേകത, അതുവരേയും പലരിലും കണ്ടിട്ടില്ലാത്ത ഒരു സൂക്ഷ്മബുദ്ധി, കുഞ്ചുനായരുടെ വേഷങ്ങളിൽ പ്രതിഫലിച്ചിരുന്നെന്ന് അന്നത്തെ ഗ്രഹിതക്കാർ അഭിപ്രായപെട്ട കാലവും. കിർമ്മീരവധത്തിൽ ധർമ്മപുത്രരുടെ വേഷം പട്ടിക്കാംതൊടിയുടേതല്ലാതെ കാണുക പോലും ചെയ്യാതിരുന്ന കാറല്മണ്ണ കൊയ്ത്താടി മനയിൽ പർമേശ്വരൻ സോമയാജിപ്പാട്,അവിടത്തെ ഒരുൽസവക്കളിക്ക് വെറുമൊരു നേരമ്പോക്കിനുവേണ്ടി കുഞ്ചുനായരുടെ ധർമ്മപുത്രർ,അല്പ്പനേരം അരങ്ങിന്റെമുന്നിലിരിക്കാതെ ഒരു ഭാഗത്തുനിന്നുകൊണ്ടു ഏതാനും നേരം കണ്ടു നിന്നു. രാവുണ്ണിമേനോന്റെ വേഷത്തോടും രംഗക്രിയകളോടും അത്യധികം മമതയും ആദരവുമുണ്ടായിരുന്ന അദ്ദേഹത്തിന്‌ ശിഷ്യന്റെ ധരമ്മപുത്രർ ബോധിച്ചു. അല്പ്പം കഴിഞ്ഞപ്പോൾ ഇരുന്നുതന്നെ വേഷം കണ്ടു.. പിറ്റേ ദിവസം അദ്ദേഹത്തിൽ നിന്നുസത്യസന്ധമായ അഭിപ്രായപ്രകടനവും ലഭിച്ചു. മാത്രമല്ല, അദ്ദേഹത്തിനു പഥ്യമുള്ള പല സ്ഥലങ്ങളിലും, (പ്രത്യേകിച്ച് തിരുവേഗപ്പുറയിലെ വാധ്യാൻ കളി യോഗത്തിലേക്കും)കുഞ്ചുനായരെ ക്ഷണി ക്കുക പതിവാക്കുകയും ചെയ്തു. അഭ്യസിപ്പിക്കാനും, വേഷം കെട്ടുവാനും.

ഇതിനിടയ്ക്കായിരുന്നു ബോംബെ യാത്ര.

വാഴേങ്കടയിൽ നിന്നു തൂതപ്പാതയിലേക്കുള്ള വഴിയിൽ കുറെദൂരം കുട്ടികളു മൊത്ത് നാണിക്കുട്ടിയും കൂടെ വന്നു. ബോംബെക്കു പോകുന്ന കാര്യമുറച്ചപ്പോൾ ആദ്യം അവളോടു പറഞ്ഞതു മറ്റൊന്നായിരുന്നില്ല. പാദസരം ബോംബെയിൽ നിന്നു വാങ്ങാം.

അന്ന്‌.യാത്ര പറഞ്ഞു പിരിയുമ്പോൾ പതിവില്ലാതെ അവളുടെ കണ്ണു നിറഞ്ഞു,അവൾ പറഞ്ഞു,

“പിന്നേയ് പാദസരമൊന്നും ഇനിയിപ്പോൾ വേണ്ട. കളി കഴിഞ്ഞതും വേഗം ങ്ട് പോന്നാൽ മതി. പാദസരം ഇവിടെ വന്നിട്ടു വാങ്ങാം,അത്ര നിർബന്ധാച്ചാൽ.അതിനുവേണ്ടി അന്യനാട്ടിലലഞ്ഞു തിരിയൊന്നും വേണ്ട. അതത്ര കിട്ടാത്ത സാധനമൊന്നുമല്ലല്ലൊ. നമ്മടെ നാട്ടിൽ നിന്ന് വാങ്ങാം..അപ്പോൾ മതി.”

അതുകൊണ്ടു മാത്രമല്ല ബോംബെന്നാവുമ്പോൾ ഇവിടത്തേക്കാൾ നല്ലതു കിട്ടും.അതിനത്ര ബുദ്ധിമുട്ടുണ്ടാവില്ല.

കുഞ്ചുനായർ ഭാര്യയെ സമാധാനിപ്പിച്ചു.

കഥകളിക്കു മാത്രമല്ല, ഡമോൺസ്ട്രേ ഷനും നിറഞ്ഞ സദസ്സ്. മുതിർന്ന ശിഷ്യനും ഇംഗ്ളീഷും, ഹിന്ദിയും ,മറാത്തിയും വളരെ നന്നായി കൈകാര്യം ചെയ്യാനറിയുന്ന യോഗ് സുന്ദറി ന്റെ നേതൃത്വത്തിൽ കാര്യങ്ങൾ ഭംഗിയായും ചിട്ടയായും നടന്നു. അവസാനത്തെ ദിവസം കുഞ്ചുനായരുടെ വേഷം രുക്മാംഗദനായിരുന്നു. വേഷമൊരുങ്ങി അരങ്ങത്തേക്കു പോകാറായ ധന്യനിമിഷം വേഷമുണർന്ന മനസ്സോടെ അരങ്ങത്തേക്ക്...........

അപ്പോൾ

പെട്ടെന്ന് യോഗ്സുന്ദർ ദേശായ് അല്പ്പം പരിഭരമത്തോടെ കുഞ്ചുനായരുടെ മുമ്പിലെത്തി. കൂടെ അരങ്ങത്തേക്കു വരാനായിരിക്കും. സംഘാടനത്തിലെ പ്രധാനി. അയാളുടെ കൈയ്യിൽ ഒരു കടലാസുതുണ്ട്‌. അതു പൊട്ടിച്ചു വായിക്കുന്നുണ്ട് അയാൾ. ഒന്നുമൊന്നും പറഞ്ഞില്ല. ചില കൈമുദ്രകൾ. ...നാട്ടിൽ നിന്ന് ...ഒരു ടെലഗ്രാം....

ചുണ്ടപ്പൂവിട്ട കണ്ണുകൾ...

ഒന്നും വ്യക്തമായില്ല, വാചകം...

“ഇഥം വൈവസ്വതം തം നിജപുരിലയ

ച്ചഞ്ജസാ പദ്മജയാ.....

.............................

അരങ്ങത്തു നിന്ന്‌ കേട്ട ശ്ളോകം. രാഗാലാപനമാധുര്യം.മോഹിനിയെക്കാണുന്ന രുക്മാംഗദൻ.

വേഷം നിറഞ്ഞുനിന്ന മനസ്സ്‌.

ഇനി, എന്തായാലും വേഷം കഴിഞ്ഞുവരട്ടെ.ടെലഗ്രാം ശിഷ്യന്റെ കൈയിൽ തന്നെ ഏല്പ്പിച്ചു. അയാൾ, പക്ഷേ ആ വരികൾ വായിച്ചു കഴിഞ്ഞിരുന്നു. എന്നാൽ, ആരോടെങ്കിലും അതു പറഞ്ഞില്ല.

ആദ്യരംഗം കഴിഞ്ഞു അണിയറയിൽ തിരിച്ചെത്തിയ വേഷക്കാരൻ, ടെലഗ്രാമിലെ വിവരം?

പക്ഷേ, അതു പറയാൻ അയാൾക്കു കഴിഞ്ഞില്ല. നിർബന്ധം സഹിക്കാതായപ്പോൾ കൈയിൽ കൊടുത്തു മാറി നിന്നു. എന്തു സംഭവിക്കുമെന്നറിയാതെ.വിറയ്ക്കുന്ന കൈകളോടെ വിറങ്ങലിച്ച മനസ്സുമായി ആ വേഷക്കാരൻ അതു വായിച്ചു. അപ്പോഴേക്കും കഥയുടെ അവസാനരംഗമായിരുന്നു. വേഗം കിരീടം വെച്ചു. ആത്മവ്യഥയുടെ ഒടുങ്ങാത്ത നീറ്റലിൽ നിന്ന് പുനർജ്ജനിച്ച വേഷം. രുക്മാംഗദൻ.!

”നാഥാ ജനാർദ്ദനാ...എന്ന പദം

ഒരു പക്ഷേ, കഥകളിയുടെ ചരിത്രത്തിലെ എതിരില്ലാത്ത ഒരരങ്ങ്‌!അന്നു കഥകളി കാണുവാൻ വിശ്വപ്രസിദ്ധ നർത്തകി കനക് റെലെയും സദസ്സിലൂണ്ടായിരുന്നു. വേഷം കഴിഞ്ഞെത്തിയ ആ വേഷക്കാരന്റെ കാൽക്കൽ അവർ കുമ്പിട്ടു നിന്നു. അത്ഭുതാദരവോടെ ആ നടൻ മുഖത്തെ ചുട്ടി മായ്ക്കുന്നതു നോക്കിനിന്നു.

..............ബോംബെയിൽ നിന്നുള്ള മടക്കയാത്ര.

എല്ലാവരിൽനിന്നുമൊഴിഞ്ഞ് വണ്ടിയുടെ ജനലിലൂടെ ചക്രവാളത്തിലേയ്ക്കു നോക്കിയിരുന്ന ഒരു വേഷക്കാരൻ. വണ്ടിയുടേ അയഞ്ഞ താളത്തിലെവിടേയോ കുരുങ്ങിപ്പോയ അയാളുടെ തേങ്ങൽ, പാദസരത്തിന്റെ കിലുക്കങ്ങൾ.ജീവസ്വമായിരുന്ന പ്രിയതമയുടെ അകാലവിയോഗം1945 ഫെബ്രുവരി 26ന്‌(1120 കുംഭം 15)പതിമൂന്നരകൊല്ലത്തെ ദാമ്പത്യം. അതിന്റെയവസാനം, ആ പാദസരക്കിലുക്കങ്ങൾ നാണിക്കുട്ടിയുടെ സൌമ്യസ്മരണയായി മനസ്സിന്റെയാഴങ്ങളിലേക്ക് ആഴ്ന്നിറങ്ങി.

ദുരന്തങ്ങളേറ്റുവാങ്ങാൻ അന്നേ ശീലിച്ച മനസ്സിൽ, പിന്നെ ഓരോ വേഷങ്ങൾ സ്വന്തക്കാരായി വന്നു സാന്ത്വനിപ്പിച്ചു, സമാധാനിപ്പിച്ചു.ശോകവും, കരുണവും ഇഷ്ടഭാവങ്ങളായി.

ധർമ്മപുത്രനും, വിരഹിയായ നളനും,രുക്മാംഗദനും, കറുത്തനളനും. ബ്രാഹ്മണനുമെല്ലാം പ്രിയപ്പെട്ട വേഷങ്ങളുമായി. ജീവിതവും,,അരങ്ങും രണ്ടല്ലാതായി.

നടരാജന്റെ ജടാമകുടത്തിലൂടെ കണ്ട കല

കഥകളിയുടെ ചന്ദ്രക്കല.
അതു തേടിയുള്ള യാത്ര; പിന്നീട്‌......

മറുനാടൻ മലയാളിയുടെ രാഷ്ട്രീയം

2013-05-04T20:51:00.003+05:30

തിരഞ്ഞെടുപ്പിന്റെ മിനിയാന്ന്,ഒരു സുപ്രഭാതത്തിൽ മുമ്പെങ്ങും കാണാത്ത മലയാളിപ്രേമത്തിന്റെ കള്ളപുഞ്ചിരിയുമായി സമീപിക്കുന്ന പച്ചക്കാമുകന്മാരുടെ പഞ്ചാരപ്പുഞ്ചിരിയിൽ മയങ്ങാനൊന്നും മലയാളനാട്ടിൽ നിന്നും വരുന്ന ഒരാളെയും കിട്ടില്ല.മലയാളി മാത്രമല്ല,തീർച്ചയായും ഏതൊരു പൌരനും സംഘടിക്കണം,രാഷ്ട്രീയസാക്ഷരരാവണം. രാഷ്ട്രഗതി നിർണ്ണയത്തിനാവശ്യമായ അറിവും,അവബോധവും സാധാരണക്കാരൻ ആർജ്ജിക്കുമ്പോഴാണ് രാഷ്ട്രീയം പ്രോജ്ജ്വലിക്കുന്നത്‌. എന്നാൽ ഓരോ സംസ്ഥാനങ്ങളിലുമുള്ള മലയാളികൾ, കേവലം മലയാളികളായി, രാഷ്ട്രീയമായി സംഘടിക്കുന്നത്‌ വിഭാഗീയതയാണ്‌,വിഘടനാവാദമാണ്‌,അനുചിതമാണ്‌.കാരണം ,മലയാളിക്ക് മാത്രമായി അടിസ്ഥാനപരമായി ,രാഷ്ട്രീയമായി പ്രശ്നങ്ങളൊന്നുമില്ല എന്നതാണ് ` യാഥാർത്ഥ്യം. ജാതി-മത-വംശീയാടിസ്ഥാനത്തിൽ സംഘടിക്കുന്നത്‌പോലെത്തന്നെ പിഴക്കുന്ന കാൽവെപ്പുകളാണ്‌ ഭാഷയുടെ കൊടി പിടിച്ച് രാഷ്ട്രീയം കയ്യാളുന്നതും.

നവോഥാനത്തിന്റെ പുലരികളിൽ ഉണർന്ന് ദേശീയപ്രസ്ഥനത്തിലൂടെ വളർന്ന് പുരോഗമന പാതയിലൂടെ സാംസ്ക്കാരിക ഉയരങ്ങളിലേക്ക് നടന്ന് കയറുന്ന മലയാളി ഓരോ സംസ്ഥാനത്തിലും അനുയോജ്യമായ പാർട്ടിയിൽ ചേർന്ന് പ്രവർത്തിക്കുന്നുണ്ട്‌. വസിക്കുന്ന ദേശത്തിന്റെ പ്രശ്നങ്ങളുമായി ഇഴ ചേർന്ന് നീങ്ങുന്ന മലയാളി രാഷ്ട്രീയപ്രവർത്തകൻ പൊതുസമൂഹത്തിന്റെ വക്താവാണ്‌. അയാൾ മലയാളിയുടെ പ്രശ്നത്തിലും സ്വാഭാവികമായി ഇടപെടും.

മലയാളസിനിമാലോകത്തെ നഷ്ടങ്ങൾ

2013-04-17T10:55:00.000+05:30

തിലകൻ

ഏറ്റവുമധികം ജനസ്വാധീനമാർജ്ജിച്ച മലയാളസിനിമാലോകം ഇന്നു കണ്ണുനീർ വാർക്കുകയാണ്‌. കരാണം ഒരേ സമയത്താണ്‌ അതുല്യ പ്രതിഭകളുടെ വേർപാടുകളും,അപകടങ്ങളും, അനാരോഗ്യവും സംഭവിച്ചിരിക്കുന്നത്‌. ഇതു മലയാളസിനിമാലോകത്തിനു കനത്ത നഷ്ടം തന്നെയാണ്‌` വരുത്തിവെച്ചിരിക്കുന്നത്‌.

സുകുമാരി

ശക്തമായ നിരവധി കഥാപാത്രങ്ങളിലൂടെ അഭിനയത്തിന്റെ ക്ഷാത്രവീര്യവുമായി എത്തിയ മഹാനടൻ തിലകൻ, ഏതു കഥാപാത്രത്തേയും അനായസേന സ്വീകരിക്കാനും, തൻമയത്വത്തോടെ അവതരിപ്പിക്കാനും ശേഷി നേടിയിരുന്ന , ആകസ്മികമായി പൂജാമുറിയിൽ നിന്നും പൊള്ളലേറ്റ് അതിഗുരുതരാവസ്ഥയിൽ വളരെപെട്ടെന്നു നമ്മളോടു യാത്ര പറഞ്ഞുപോയ “പദ്മശ്രി” സുകുമാരി, ദക്ഷിണേന്ത്യൻസിനിമയുടെപ്രിയഗായകനായി ,സംഗീതരംഗത്തു തനതായ സ്ഥാനം നേടിയെടുക്കുകയും, ഗൃഹാതുരത്വത്തിന്റേയും, ഭാവസാന്ദ്രതയുടെയും സംഗീതപാലാഴിയുടെ അനിർവ്വചനീയ മധുരാനുഭൂതി നല്കി സംഗീതാസ്വാദകരെ ഒരു കാലഘട്ടത്തിലേക്കു നയിച്ച ശ്രീ എം.ബി.ശ്രീനിവാസൻ എന്നിവരുടെ വിയോഗം മലയാള സിനിമാലോകത്തിനെ സ്തംബ്ധമാക്കിയിരിക്കുന്നു.

ജഗതി

അതുപോലെതന്നെ നിനച്ചിരിക്കാതെ കാറപകടത്തിൽ പെട്ടു സംസാരശേഷി തന്നെ താല്ക്കാലികമായി നിന്നുപോയ നവരസങ്ങളുടെ രാജാവെന്നോ, അഭിനയ കുലപതിയെന്നോ വിശേഷിപ്പിക്കാവുന്ന നടൻ ജഗതിശ്രീകുമാർ,വികലാനുകരണങ്ങളി ല്ലാതെ സ്വതസിദ്ധമായ നർമ്മത്തിന്റെ മേമ്പൊടി വിതറി പ്രേക്ഷകരെ കൂടെകൂട്ടി ,ക്യാൻസർ എന്ന മഹാരോഗത്തെപ്പോലും നർമ്മം കൊണ്ടു കീഴടക്കിയിരിക്കുന്ന

ഇന്നസെന്റ്

ശ്രീ ഇന്നസെന്റ് എന്നിവരുടെ അസാന്നിധ്യവും മലയാളസിനിമയെ സംബന്ധിച്ചു കനത്ത നഷ്ടം തന്നെയാണ്‌. നമ്മളെ വിട്ടുപിരിഞ്ഞ പ്രതിഭകളുടെ നിത്യശാന്തിക്കും, ജീവിച്ചിരിക്കുന്ന ആദരണീയകലാകാരന്മാരുടെ ആരോഗ്യം തിരിച്ചുനൽകി, അവർ അഭിനയവേദിയിലേക്ക് അതിവേഗം തിരിച്ചെത്താനും നമുക്കൊരുമിച്ചു പ്രാർത്ഥിക്കാം........

കൈരളികലാസമിതി

2013-04-11T11:42:00.001+05:30

മലയാളിപ്പെരുമ (ആസൂത്രിതവും,അർപ്പണബോധവും ഒത്തിണങ്ങിയ മലയാളിയുടെ സംഘടിത പരിശ്രമം കൊണ്ട് തിളങ്ങിനില്ക്കുന്ന സ്ഥാപനങ്ങളെ ഈ പംക്തിയിൽ അവതരിപ്പിക്കുന്നു. )

കൈരളിനിലയം വിദ്യാലയങ്ങൾ

സാംസ്ക്കാരികപ്രവർത്തനം രക്തത്തിൽ അലിഞ്ഞുചേർന്നവരാണ്‌ മലയാളികളിലധികവും. മറുനാട്ടിലും,വിദേശത്തും അവർ ഒത്തുകൂടുന്നതിന്‌ പ്രേരണയാകുന്നത്‌ കേരളീയ ജീവിതത്തിൽ നിന്ന് സംഭരിച്ച സാംസ്ക്കാരികോർജ്ജമാണ്‌. ബാംഗ്ളൂരിലെ എച്ച്.എ.എൽ എന്ന പൊതുമേഖലാസ്ഥാപനത്തിലെ ഒരു കൂട്ടം തൊഴിലാളികൾ എച്ച്.എ.എൻ സ്പോർട്ട് ഗ്രൌണ്ടിൽ ഒരു യോഗം കൂടുന്നു, ഒരു കലാസമിതിക്ക് രൂപം കൊടുക്കുന്നു. കല, സാഹിത്യം, സംസ്ക്കാരം, സമൂഹം, ഭാഷ ഇങ്ങനെ മനുഷ്യനെക്കുറിച്ച് അവർ ചിന്തിക്കുന്നു. അതിലൂടെ പുതിയൊരാശയം രൂപം കൊള്ളുന്നു.അവരുടെ മക്കൾക്ക് മലയാളം പഠിക്കണം, നാളെ നാട്ടിൽ പോകേണ്ടിവരുമ്പോൾ മലയാളമറിയാതെ എങ്ങിനെ ജീവിക്കും? ഒരു മലയാള വിദ്യാലയം ആരംഭിക്കണം, എന്ന ചിന്തയിൽ എ.എൻ.ബാച്ചലേഴ്സ് ക്വോർട്ടേഴ്സിൽ ഒരു മലയാള വിദ്യാലയം ആരംഭിക്കാൻ എച്ച്.എ.എൽ കമ്പനിയധികൃതരുടെ അനുവാദവും, ആശീർവാദവും, അംഗീകാരവും ആ വിദ്യാലയത്തിന്‌ ലഭിക്കുന്നു. നാലാംക്ളാസ്സ് വരെ മലയാളം മാധ്യമവും, 5മുതൽ 7വരെ ഇംഗ്ളീഷ് മാധ്യമവും ആയി ആ വിദ്യാലയം വളരുന്നു. 1976 ആകുമ്പോഴേക്കും അതു ഹൈസ്ക്കൂളായി വളർന്നുകഴിഞ്ഞിരുന്നു. കൈരളി കലാസമിതി എന്ന മഹത്തായ ഈ സംഘടനക്ക് നേതൃത്വം കൊടുത്തവരിൽ പ്രമുഖർ സർവ്വശ്രീ എ.കെ.ഗോവിന്ദൻ, പി.രാമൻ(അവിഭക്ത കമ്മ്യൂണിസ്റ്റ് പാർട്ടി നേതാവ്)

ശ്രീധരപ്പണിക്കർ എന്നിവരായിരുന്നു. അവരും അവരോടൊപ്പം ത്യാഗപൂർണ്ണമായ പ്രവർത്തനങ്ങൾകൊണ്ട്‌ സംഘടനയെ ശക്തിപ്പെടുത്തിയ നിരവധി മലയാളികളുടെ ചിന്തയും, രക്തവും വിയർപ്പുമുണ്ട്‌. കലാസമിതിയുടേയും, കൈരളിനിലയം വിദ്യാലയങ്ങളുടേയും അഭൂതപൂർവ്വമായ വളർച്ചാവികാസങ്ങളിൽ ഗണ്യ മായ സംഭാവന നല്കിയ വ്യക്തികളിൽ പ്രമുഖർ സർവ്വശ്രീ പി.ജി.സുരേന്ദ്രൻ, എം.എൻ.ജി.നമ്പൂതിരി,രാജഗോപാലമേനോൻ,എന്നിവരാണ്‌.

കലാ-സാംസ്ക്കാരികപ്രവർത്തനം

ബാംഗ്ളൂർ മലയാളികളുടെ സാംസ്ക്കാരികബോധത്തിൽ ഏഴു പതിറ്റാണ്ടുകളായി ഇടപെട്ടുക്കൊണ്ടിരിക്കുന്ന പ്രമുഖ സ്ഥാനമാണ് ` കൈരളി കലാസമിതിക്കുള്ളത്‌. കേരളത്തിലെപ്പോലെത്തന്നെ ഗ്രന്ഥശാലയുടെ പ്രവർത്തനം തൂടക്കത്തിലേ ഉണ്ട്‌. ചെറുതും, വലുതുമായ മലയാളത്തിലേയും, ഇംഗ്ളീഷിലേയും പ്രസിദ്ധീകരണങ്ങളും സമ്പന്നമായ ഗ്രന്ഥശേഖരവും ഇവിടെയുണ്ട്‌. സാഹിത്യമൽസരങ്ങൾ, നാടകമൽസരങ്ങൾ, ചർച്ചകൾ, സെമിനാറുകൾ, സംഗീതനൃത്തപരിപാടികൾ തുടങ്ങി മറുനാട്ടിലും കേരളീയസംസ്ക്കാരത്തിന്റെ പ്രസാരണം ഈ കലാസമിതിയിലൂടെ നടന്നുവരുന്നുണ്ട്‌. പ്രശസ്ത ചിത്രകാരനായ യൂസഫ് അറയ്ക്കൽ, നോവലിസ്റ്റ് സുധാകരൻ രാമന്തളി,എന്നിവർ ഈ കലാസമിതിയിൽ തങ്ങളുടെ കലാപ്രവർത്തനങ്ങൾ അർപ്പണബോധത്തോടെ സമർപ്പിച്ചിട്ടുണ്ട്‌. കൈരളികലാസമിതി സ്ത്രീകളു ടെ പ്രവർത്തനങ്ങൾക്ക് ഊന്നൽ കോടുത്തുകൊണ്ട്‌ മഹിളാവേദി രൂപീകരിച്ചിട്ടുണ്ട്‌. ഓണോൽസവം, വനിതാദിനം മുതലായ പ്രതിവർഷ സാംസ്ക്കാരികോൽസവങ്ങൾ ആസൂത്രിതമായി,അവധാനതയോടേ നടത്തി വരുന്നു. കേന്ദ്രസാഹിത്യ അക്കാദമി, ബാംഗ്ളൂർകഥകളിക്ളബ്ബ്, ബാംഗ്ളൂർ കേരളസമാജം, ബാംഗ്ളൂർ മലയാളി റൈറ്റേഴ്സ് ആന്റ് ആർട്ടിസ്റ്റു ഫോറം തുടങ്ങിയ സംഘടനകളു ടെ സഹകരണത്തോടെ ബൃഹത്തായ സാംസ്ക്കാരിക സമ്മേളനങ്ങളും സംഘടിപ്പിച്ചിട്ടുണ്ട്‌. ജ്ഞാനപീഠജേതാക്കളായ ഓ.എൻ.വി,ചന്ദ്രശേഖരകമ്പാർ,യു.ആർ.അനന്തമൂർത്തി,സുഗതകുമാരി, പുനത്തിൽ കുഞ്ഞബ്ദുള്ള, ഡി.വിനയചന്ദ്രൻ, വിജയകൃഷ്ണൻ, കെ.ഇ.എൻ,ഡോ:ഗോവിന്ദവർമ്മ രാജ, പി.ടി.ഭാസ്ക്കരപ്പൊതുവാൾ,തുടങ്ങി നിരവധി പ്രഗല്ഭമതികളുടെ സാന്നിദ്ധ്യം ഇവിടത്തെ മലയാളിസദസ്സുകളെ ധന്യമാക്കിയിട്ടുണ്ട്‌. ബാംഗ്ളൂരിലെ എഴുത്തുകാർക്കും, സാംസ്ക്കാരികപ്രവർത്തകർക്കും തങ്ങളുടെ ആത്മപ്രകാശനത്തിനും ഇത്തരം വേദികൾ തുറന്നുകൊടുത്തിട്ടുണ്ട്‌. “കൈരളി”യുടെ പ്രവർത്തനം ബാംഗ്ളൂർ മലയാളികൾ സശ്രദ്ധം വീക്ഷിക്കുന്നു.
നിരവധിയാളുകളുടെ അർപ്പണബോധത്തോടെയുള്ള പ്രവർത്തനമാണ് കൈരളികലാസമിതിയെ മലയാളികളു ടെ അഭിമാനകരമായ ഒരു സംഘടനയായി വളർത്തിയത്‌. അതിന്‌ ഒട്ടേറേ കഷ്ടതകളുടേയും, ത്യാഗപൂർണ്ണമായ പ്രവർത്തനങ്ങളുടേയും കഥകളുണ്ട്‌.

കൈരളി നിലയം സ്ക്കൂൾ

1952ൽ കൈരളികലാസമിതി പ്രവർത്തകർ എച്ച്.എ.എൽ ബാച്ചിലർ ക്വാർട്ടേഴ്സിലെ ഒരു ക്വാർട്ടറിൽ മലയാളം വിദ്യാലയം ആരംഭിച്ചു. ഒന്നാംക്ളാസ്സ് മുതൽ നാലാംക്ളാസ്സു വരെ മലയാളം മീഡിയവും 5മുതൽ 7വരെ ഇംഗ്ളീഷ് മീഡിയവും.1976ൽ ഹൈസ്ക്കൂളായി ഉയർന്നു.
പ്രീനഴ്സറി,നഴ്സറി തുടങ്ങി പത്താംക്ളാസ്സ് വരെ പ്രശസ്ത രീതിയിൽ പ്രവർത്തിക്കുന്നു. നഴ്സറിസ്ക്കൂൾ കർണ്ണാടക സർക്കാരിന്റെ എയ്ഡഡ് സ്ക്കൂൾ(കൈരളി നിലയം പ്രൈമറി സ്ക്കൂൾ,ഹൈസ്ക്കൂൾ)കൈരളി നിലയം സി.ബി.എസ്.ഇ സ്ക്കൂൾ, കൈരളി നിലയം സെന്ട്രൽൽ സ്ക്കൂൾ എന്നിങ്ങനെ 3സ്ക്കൂളുകൾ. കഴിഞ്ഞ ഒന്നര ദശാബ്ദമായി അഭൂതപൂർവമായ പുരോഗതിയാണ്‌ വിദ്യാലയത്തിനുണ്ടായത്‌. രണ്ടായിരാമാണ്ടിൽ കേവലം 450 വിദ്യാർത്ഥികളുണ്ടായിരുന്നെങ്കിൽ ഇന്നു മൂന്നു സ്ക്കൂളിലുമായി മൂവ്വായിരത്തോളം വിദ്യാർത്ഥികളും , നൂറ്റിയിരുപതോളം ജീവനക്കാരുമുള്ള ഒരു ബൃഹത് സ്ഥാപനമായി വികസിച്ചു കഴിഞ്ഞിരിക്കുന്നു.

പ്രത്യേകതകൾ

ആധുനിക സൌകര്യങ്ങളോടുകൂടിയുള്ള ലാബുകൾ,3 കമ്പ്യൂട്ടർ ലാബുകൾ

സ്മാർട്ട് ക്ളാസ്സുകൾ

പ്രപഞ്ചത്തിലെ വസ്തുതകളും , സംഭവങ്ങളും ചിത്രങ്ങളും ഡിജിറ്റൽ ക്യാമറയിലൂടെ ഒപ്പിയെടുത്ത് എല്ലാ ക്ളാസ്സുകളേ യും ബന്ധിപ്പിച്ച് കമ്പ്യൂട്ടറിലൂടെ ദൃശ്യവല്ക്കരണം നടത്തുന്ന -ഡിജിറ്റൽ ലേണിംഗ് സമ്പ്രദായം.(30 ലക്ഷം രൂപ ചിലവഴിച്ച പദ്ധതി)

നൂറോളം മിടുക്കരായ വിദ്യാർത്ഥികൾക്ക് സ്ക്കോളർഷിപ്പുകളും ,എൻഡോവ്മെന്റുകളും(പ്രശസ്തമായ കമ്പനികളു ടെ ധനസഹായം സ്വീകരിച്ചുകൊണ്ട്‌)

ചൈൽഡ് ഡവലപ്പ്മെന്റ് ഓഫീസർ

വിദ്യാർത്ഥികളു ടെ സ്വഭാവരൂപീകരണം, വ്യക്തിത്വവികസനം, എന്നിവയെ സഹായിക്കുവാൻ ഒരു മുഴുവൻ സമയകൌൺസിലർ

ഫസ്റ്റ് എയ്ഡ് സെന്റർ

പ്രാഥമിക ശുശ്രൂഷക്ക് വേണ്ടുന്ന ഔഷധസാമഗ്രികളും ,ഒരു മുഴുവൻ സമയ നഴ്സും.

ജലസംഭരണികൾ

മഴവെള്ളം ഉപയോഗപ്പെടുത്തി, ജല ക്ഷാമപരിഹാരം.

കോർട്ടുകൾ

കായികപരിശീലനത്തിന്‌ അനുയോജ്യമായ കോർട്ടുകൾ

ഫീമാനേജ്മെന്റ് സോഫ്റ്റ്വെയർ

സാമ്പത്തിക ഇടപാടുകൾ കാര്യക്ഷമവും,സുതാര്യവുമാക്കുന്ന കമ്പ്യൂട്ടർ സംവിധാനം.

ഉയർന്ന വിജയശതമാനം

95നും 97നും ഇടയിലുള്ള വിജയശതമാനം കഴിഞ്ഞ പതിനഞ്ചു വർഷമായി നിലനിർത്തുന്നു.

പുവർ ചിൽഡ്രൻ എഡ്യുക്കേഷൻ ഫണ്ട്‌

സാമ്പത്തികമായി പിന്നോക്കം നില്ക്കുന്നവരെ ഫീസിളവ് നല്കി സഹായിക്കുന്നു. കുറഞ്ഞത്‌ 7ലക്ഷം രൂപ പ്രതിവർഷം.

ഇന്റർനാഷണൽ നിലവാരം

വർഷം തോറും 95 ശതമാനത്തിൽ കുറയാത്ത വിജയവും, മറ്റു പ്രവർത്തനങ്ങളും ഇന്റർനാഷണൽ സ്ക്കൂളുകളുടെ നിലവാരം കൈവരിച്ചിരിക്കുന്നു.

സാമ്പത്തിക അച്ചടക്കം

കരാറുകളും , ഇടപാടുകളും സുതാര്യവും, മാനേജിംഗ് കമ്മിറ്റിയുടെ പൂർണ്ണയറിവോടു കൂടിയതും നിയന്ത്രണത്തോടും കൂടിയത്‌.

പ്ളസ് 2

പ്ളസ് 2 അടക്കം ഉന്നതവിദ്യാഭ്യാസ മേഖലയാണ് ` അടുത്ത ലക്ഷ്യം.

ഭരണസമിതി

കൈരളികലാസമിതിയുടെ തെരെഞ്ഞെടുക്കപ്പെട്ട ഭരണസമിതിയാണ്‌ വിദ്യാലയത്തേയും നയിക്കുന്നത്‌. കഴിഞ്ഞ ഒന്നര ദശാബ്ദമായി വർഷങ്ങളായി ജനറൽ സെക്രട്ടറിയായി സേവനമനുഷ്ഠിച്ചത്‌ പ്രശസ്ത നോവലിസ്റ്റും, സാംസ്ക്കാരികനായകനും, വ്യവസായചിന്തകനുമായ ശ്രീ സുധാകരൻ രാമൻതളിയാണ്‌ പ്രസിഡണ്ടായി എൻ.എ.എസ് പെരിഞ്ഞനം സേവനമനുഷ്ഠിച്ചു. ഇപ്പോൾ സുധാകരൻ രാമൻതളി പ്രസിഡണ്ടായി പ്രവർത്തിക്കുന്നു.അദ്ദേഹത്തിന്റെ ആത്മസമർപ്പണവും, ദീർഘവീക്ഷണവും കൈരളി കലാസമിതിയുടെ അഭൂതപൂർവമായ പുരോഗതിക്ക് ഗണ്യമായ സംഭാവനയായിട്ടുണ്ട്‌. വ്യവസായിയും, സാമൂഹ്യപ്രവർത്തകനുമായ ശ്രീ പി.കെ.സുധീഷ് ജനറൽ സെക്രട്ടറിയായി പ്രവർത്തിക്കുന്നു. അദ്ദേഹത്തിന്റെ ആത്മാർത്ഥതയും, യുവത്വവും സമിതിക്ക് നേട്ടമാണ് . . ഭരണസമിതിയിലെ ഓരോ അംഗവും സത്യസന്ധവും ആത്മാർത്ഥവുമായി പ്രവർത്തിക്കുന്നതിനാൽ ഐക്യവും, കാര്യക്ഷമതയും സ്വാഭാവികമായി കൈവരിക്കുന്നു.മലയാളിയുടെ പെരുമയായ ഈ പ്രസ്ഥാനം ഇനിയും ഉയരങ്ങൾ കീഴടക്കട്ടെയെന്ന് ഞങ്ങൾ ആശംസിക്കുന്നു.

ഉള്ളുറക്കത്തിൽ കാണുന്ന കനവുകൾ---

2013-04-04T13:55:00.002+05:30

കെ. ജി ബാലകൃഷ്ണൻ

ഈ നൂലാമാലയിൽ

ഒരു നിലാവിഴത്തുടിപ്പ്,

ഒരു ചിലമ്പൊലിയുടെ ലവം,

പൂത്തുമ്പിച്ചിറകനക്കം,

നിന്റെ ഒളിച്ചിരിപ്പിന്ന്

അറുതി.

ഇരുളിൽ,

എവിടെനിന്നൊ

ഒരു തൂവൊളിത്തുള്ളി

ഇറ്റുന്നത്.

ഈ ഇത്തിരിയുടെ

ഈറൻ വീർപ്പിൽ

തുടക്കമൊടുക്കം

കെട്ടുപിണഞ്ഞ്.

നീളം വീതി ആഴം-

സമയമിഥ്യയുടെ

കാനൽജലത്തിൽ

ഇന്നലെ ഇന്ന് നാളെ

തുടർച്ചയുടെ ജാലപ്പെരുക്കം;

നിൻറെ പുല്ലാംകുഴല് വിളി,

തിര, ഈണം.

കാതിന്ന്

അപ്പുറം, ഇപ്പുറം,

മറുപുറം

അറിയാത്താളം;

ലയത്തിൻ മിനുമിനുപ്പ്

എൻറെ ഭ്രമം.

എൻറെ കണ്ണ് വെളിച്ചം

കുഞ്ഞുവെട്ടം-

വിധിയുടെ കാവൽപ്പുര;

ഇരുളിൻറെ ഉറക്കമിളപ്പ്-

കിങ്കരൻറെ ജാഗ്രത;

നിമിഷം

വെടീയൊച്ചക്ക്

കാതോർത്ത്.

നാളെ,ഉദയം

അന്യമെന്ന് മനസ്സ്.

എങ്കിലും

ഒരു തുടി കൂടി

ഒരു മിഴി കൂടി

നീലവാനപ്പൊലിമ

നിറപ്പിറവിയുടെ നേർമ്മ

എനിക്ക് നുകരണം.

ഉള്ളുറക്കത്തിൽ

കാണുന്ന കനവുകൾ

ഓർക്കാനാവുന്നില്ല;

അല്ലെങ്കിൽ,

ഞാനത് നിൻറെ കാതിൽ,

മന്ത്രിക്കുമായിരുന്നു!

കരിമ്പൂച്ച

എലിയെപ്പിടിക്കാൻ

അഞ്ചറിവും

ഒരേയൊരൊന്നിൽ

കൂർപ്പിച്ച്.

ഞാനെൻറെ ഗതികേടിൻറെ

കഥകഴിക്കാൻ ഞൊടിപാർത്ത്.

അളവുകോലിൻറെ

പൊരുളെഴായ്മ,

കാണലിൻറെ തൂക്കക്കുറവ്

എൻറെ വിമ്മിട്ടം;

ഞാൻ ശ്വസിക്കുന്നു

ഈ മലിനവായു.

============

പൊറ്റേക്കാട്ട് മൂല്യങ്ങൾ ഉയർത്തിപ്പിടിച്ച എഴുത്തുകാരൻ

2013-04-04T13:54:00.003+05:30

സി.രാധാകൃഷ്ണൻ

പുതിയ കാലത്തെ സാഹിത്യകാരന്മാർക്ക് നഷ്ടപ്പെടുന്ന മൂല്യങ്ങൾ ഉയർത്തിപ്പിടിച്ച എഴുത്തുകാരനായിരുന്നു എസ്.കെ.പൊറ്റേക്കാട്.സാഹിത്യത്തിന്റെ ഒരു ഗ്രൂപ്പിലും ചേരാത്ത ഒറ്റയാനായിരുന്നു അദ്ദേഹം. മലയാളികളെ സ്വപ്നത്തിലേക്കാനയിച്ച കഥാകാരൻ. ഏതുകാര്യത്തേയും സൂക്ഷ്മമായി നിരീക്ഷിക്കുന്ന സ്വഭാവം എസ്.കെയിൽ കാണാമായിരുന്നു.അതു കഥാപാത്രങ്ങളിൽ പ്രതിഫലിക്കുകയും ചെയ്തിരുന്നു.

കേരളസാഹിത്യ അക്കാദമി പൊറ്റേക്കാട്ട് ജന്മശതാബ്ദി ആഘോഷസമാപനത്തിൽ നടന്ന പൊറ്റേക്കാട്ടിന്റെ സർഗ്ഗജീവിതത്തിലൂടീന്ന സെമിനാരിൽ പങ്കെടുത്തു സംസാരിക്കുകയായിരുന്നു സി.രാധാകൃഷ്ണൻ, പുനത്തിൽ എന്നിവർ

പത്രവാർത്ത

അരങ്ങ്-16

2013-04-04T13:52:00.001+05:30

പീ. വി ശ്രീവത്സന്‍

കലാമണ്ഡലത്തിൽ നിന്നു വിട്ടുപോന്നശേഷം തന്റെ കുടുംബഭാരമോർത്തിട്ടാകണം കുഞ്ചുനായർ കേരളം വിട്ടു. കഥകളി പഠിപ്പിച്ചുകൊണ്ട്‌ മറ്റു പല സ്ഥലങ്ങളിലും അലഞ്ഞുതിരിഞ്ഞു. കളിയുടെ കാലമായാൽ നാട്ടിലെത്തും.

മംഗലാപുരം, വിജയനഗരം, കർണ്ണൂൽ,ഊട്ടി, ബാംഗ്ളൂർ,കോയമ്പത്തൂർ, മദിരാശി,കൊല്ക്കത്ത, ഹൈദരാബാദ്, ബോംബെ, ഡൽഹി മുതലായ നാനാദേശ ങ്ങളിലും, കേരളത്തിൽ തിരുവനന്തപുരം വരേയും പോയി. ഇവിടങ്ങളിലൊക്കെ പലരേയും പഠിപ്പിച്ചു. ചിലർക്ക് ഒരു വേഷം മാത്രം. ചിലർക്ക് കുറച്ചധികം. മറ്റു ചിലർക്ക് വിസ്തരിച്ച്‌. ഇതിനു പുറമേ പാറശ്ശീരി(കോങ്ങാട്) തൃശൂർ, തൂത, വാഴേങ്കട, എന്നിവിടങ്ങളിൽ വെച്ചും ചിലരെയെല്ലാം പഠിപ്പിച്ചു. ചില ഉത്തരേന്ത്യൻ ശിഷ്യന്മാർ ശരിക്കും ഗുരുകുല ക്ളിഷ്ടമായ രീതിയിൽത്തന്നെയായിരുന്നു അഭ്യസിച്ചത്‌. അഭ്യാസമില്ലാത്ത സമയത്ത് അവർ വീട്ടിലെ പണികളിൽ സഹായിക്കുകപോലും ചെയ്യുക പതിവായിരുന്നു. അതായത്‌ വിറകു വെട്ടുക, വെള്ളം കോരുക, തുടങ്ങിയ പണികൽ തന്നെ. ഹിമ്മത്ത്സിംഗ് എന്നൊരു പഞ്ചാബ് ശിഷ്യൻ നല്ല അധ്വാനശീലനായിരുന്നു.

വടക്കെ ഇന്ത്യക്കാരായിരുന്നു കൂടുതൽ ശിഷ്യന്മാരും. അക്കാലത്ത് ചിമ്മൻ ഷേട്ട്,ഛബിൽ ദാസ്,പ്രവീൺ കുമാർ, യോഗേന്ദ്ര ദേശായ്,(ഗുജറാത്തിലെ രാജ്കോട്ടിലെ ഒരു രാജാവിന്റെ മകൻ. ഡൽഹിയിലെ പ്രശസ്തമായ ഇന്ത്യൻ റയില്വേ ഗ്രൂപ്പിന്റെ സ്ഥാപകനും, ഡയറക്ടറും,തൂതയിൽ വെച്ചായിരുന്നു അഭ്യസിപ്പിച്ചത്‌‍ാമനുമോഡി, ശശികാന്ത്, കൃഷ്ണമൂർത്തി, പ്രസാദ് മല്ലിഘാട്,റാമ്രാവു, ശ്രീനിവാസ്, സോഹൻലാൽ, മനുകാന്ത് പട്ടേൽ, ദർബാർ യോഗേന്ദ്ര ദേശായ്, നവീൻ ദേശായ്, ശരത്കുമാർ, ഗോവർദൻ പഞ്ചാൽ, ധർമ്മസിംഗ്, പിനാകി, അരുൺ ടാഗോർ, നട്ടുവക്കാണീ, ഹിമ്മത്ത്സിംഗ്, നാഥുഭായ് പഹാഡ്, ചിമ്മൽ ആചാരി, ജാൻസിംഗ്, രത്നം, ശാന്താറാവു(സിനിമയിൽ നൃത്ത സംവിധായകനായി പിന്നീട് വീണ, നയന, കാന്താ ജാവേരി സിസ്റ്റേഴ്സ്, എന്ന പ്രസിദ്ധരായ മണിപ്പുരി ഡാൻസേഴ്സ്) കിമ്മോരി, നളിനി, ധീമതി, പിന്നെ പ്യുർഫൽ, ലൂയിസ്ലൈറ്റ്ഫുട്ട് തുടങ്ങിയ വിദേശവനിതകളും കുഞ്ചുനായരുടെ കീഴിൽ പഠിച്ചവരായിരുന്നു.

കഥകളിയുടെ അലൌകികാനുഭൂതി ഒരു തരത്തിലല്ലെങ്കിൽ മറ്റൊരു തരത്തിൽ കേരളത്തിന്റെ പുറത്തെത്തിക്കുവാൻ അക്കാലത്തു തന്നെ ഒരു പരിധി വരെ ഇതുകൊണ്ടു സാധിച്ചുവെന്നത് അതിൽപ്പെട്ട ചില ശിഷ്യന്മാരുടെയെങ്കിലും പ്രവർത്തനമണ്ഡ ലം പരിശോധിച്ചാലറിയാം. അവരിൽ പലരും കുഞ്ചുനായരുമായുള്ള ബന്ധം ദീർഘകാലം നിലനിർത്തുകയും ചെയ്തിരുന്നു. ഇക്കാലത്തോടെ കേരളത്തിൽ , പ്രത്യേകിച്ചും മധ്യമലബാറിൽ ചില കളിസ്ഥലങ്ങളിൽ കുഞ്ചുനായരെന്ന യുവനടനോടും അയാളുടെ വേഷങ്ങളോടും ഒട്ടൊരു പ്രതിപത്തി പ്രകടിപ്പിക്കുന്ന ചില ചെറുപ്പക്കാരുടെ സംഘങ്ങളും ഉണ്ടായിവന്നു. കലാമണ്ഡലം കൃഷ്ണൻ നായരുടെ ആരേയും മയക്കുന്ന പൂതനാമോക്ഷത്തിലെ ‘ലളിതയും’ സാർവ്വത്രികമായി അരങ്ങുകളെ ഭരിച്ച കാലം കൂടിയായിരുന്നു അത്‌. കൃഷ്ണൻ നായരും പല ആചാര്യന്മാരിൽ നിന്നും പഠിച്ച്‌ കലാമണ്ഡലത്തിൽ നിന്ന്` പുരത്തുവന്ന അനുപമസിദ്ധിയുള്ള നടനായിരുന്നു. കുഞ്ചുനായരേക്കാൾ പ്രായം കൂറഞ്ഞ കൃഷ്ണൻ നായരും കളി യരങ്ങിലെ യുവസാന്നിധ്യമായിരുന്നു. അദ്ദേഹവും വിദ്യാർത്ഥിജീവിതത്തിന്റെ അവസാന കാലത്തായിരുന്നു വിവാഹിതനായത്‌. അതും ഒരു പ്രണയ വിവാഹം തന്നെ.

കുഞ്ചുനായരിലും, കൃഷ്ണൻ നായരിലും ജീവിതത്തിൽ പലേ പ്രകാരത്തിലുള്ള സമാനതകളും വ്യത്യസ്തതകളും കാണാം. സമകാലികരായിരുന്ന അവരുടെ ജീവിതകഥയിൽ നിന്നും, കഥകളിജീവിതത്തിൽ നിന്നു മനസ്സിലാക്കാം. രണ്ടുപേരും പ്രധാനമായും പച്ച വേഷങ്ങളിലും മിനുക്കിലുമായിരുന്നു ആധിപത്യം പുലർത്തിയത്‌. കൃഷ്ണൻ നായർ ഏറിയ കാലവും തെക്കും കുഞ്ചുനായർ ഏതാണ്ടു മുഴുവൻ കാലവും മധ്യമലബാറിലുമായിരുന്നു കഥകളിയുമായി കൂടുതൽ ഇണങ്ങിനിന്നത്‌.

കലാമണ്ഡലത്തിലെ രണ്ടാം അധ്യാപകനായിരുന്ന കാലത്ത് അവിസ്മരണീയമായ ഒരു സംഭവമുണ്ടായി. ഒരു പക്ഷേ, ജീവിതത്തിൽ പലേ കാര്യങ്ങളും, തീർത്തും അപ്രതീക്ഷിതങ്ങളാണല്ലൊ. അതുപോലെ ഒന്നെന്നു കരുതിയാൽ മതി.

കലാമണ്ഡലം കഥകളി സംഘവുമായി കൽക്കത്തയിൽ പോകാനുള്ള അവസരമുണ്ടായി. അവിടെച്ചെന്നപ്പോൾ ,കുറച്ചു ദൂരമുള്ള ബോൾപ്പൂർ എന്ന ഒരു സ്ഥലത്തേക്കും പോയി. ഇളങ്കാറ്റിൽ പ്പോലും രവീന്ദ്രസംഗീതത്തിന്റെ നേർത്ത ഈണങ്ങൾ .ബാവുൽ ഗായകരുടെ നാടോടിപ്പെരുമ,വിശ്വവിഖ്യാതമായ ശാന്തിനികേതനം.

വിശ്വകവീന്ദ്രനായ രവീന്ദ്രനാഥടാഗോറിനെ കാണാനും അദ്ദേഹത്തിന്റെ പാദങ്ങളിൽ നമസ്ക്കരിക്കുവാനുമുള്ള മഹാഭാഗ്യമുണ്ടായി. അവിടെ ഒരു വേഷവും, ഏതെന്നോർമ്മയില്ല. ആ വേഷത്തേക്കാൾ മനസ്സിൽ നിറ പറ ചൊരിഞ്ഞത് മറ്റൊന്നായിരുന്നു.വെളുത്ത് പഞ്ഞിപോലുള്ള നീണ്ട മുടിയുടേയും, നീളൻ താടിയുടേയുമിടയ്ക്കു തീക്ഷണഗോളങ്ങൾ! ലോകത്തെ നോക്കിക്കണ്ട , ആത്മാവിലേക്കിറങ്ങിച്ചെന്ന തിളങ്ങുന്ന കണ്ണുകൾ. അതിനേക്കാൾ ജ്വലിച്ച അകക്കണ്ണുകൾ ഒരു മഹാ ഋഷിയെപ്പോലെ ടാഗോർ. അതെ, അതൊരു പുണ്യമായിരുന്നു. വേഷം കഴിഞ്ഞപ്പോൾ അദ്ദേഹത്തിന്റെ അനുഗ്രഹമായി ഒരു പുരസ്ക്കാരം. കീർത്തിമുദ്ര,ആദ്യമായി,അരങ്ങത്തു വെച്ചുകിട്ടുന്ന അംഗീകാരം.

പിന്നീട് കാലം കുറെ കഴിഞ്ഞപ്പോൾ ,നളചരിതം നാലാം ദിവസത്തെ കഥയ്ക്കും അദ്ദേഹത്തിന്റെ ‘ശ്യാമ’ എന്ന കാവ്യത്തിനും എവിടെയെല്ലാമോ ചില സാമ്യം തോന്നി. അദ്ദേഹത്തിന്റെ ‘ചിത്രാംഗദ’ എന്ന ആദ്യ നൃത്തനാടകം എൻ.വി.കൃഷ്ണവാര്യർ ആട്ടക്കഥയാക്കിയപ്പോൾ അതിൽ അർജ്ജുനനായി വേഷം കെട്ടി. മികച്ചൊരു ആട്ടക്കഥയായിട്ടായിരുന്നില്ല അത്‌. ഗുരുദേവന്റെയല്ലേ കൃതി! ആ ആദരവ്‌,ബഹുമാനം, ജീവിതം, മധുരോദാരം.

മനസ്സ്

2013-04-04T13:46:00.000+05:30

സുഷമാശങ്കർ

നിന്റെ മനസ്സൊരു എഴുത്തായിരുന്നെങ്കിൽ

ഞാനത് തുറന്നുവായിച്ചേനെ

നിന്റെ മനസ്സൊരു സുന്ദരകവിതയായിരുന്നെങ്കിൽ

എന്റെ ഭാവനക്കനുസരിച്ച് രചിച്ചേനെ

നിന്റെ മനസ്സൊരു മനോഹര ചിത്രമായിരുന്നെങ്കിൽ

എന്റെ ഇഷ്ടചായം മാത്രം തേച്ചേനെ

നിന്റെ മനസ്സൊരു മണി വീണയായിരുന്നെങ്കിൽ

ഞാനിഷ്ടപ്പെട്ട രാഗം മാത്രം മീട്ടിയേനെ

നിന്റെ മനസ്സൊരു മയിൽ പീലിയായിരുന്നെങ്കിൽ

ഞാനെടുത്തെന്റെ ഹൃദയപ്പുസ്തകത്തിൽ

സൂക്ഷിച്ചുവെച്ചേനെ

നിന്റെ മനസ്സിതൊന്നുമല്ല! എന്റേയും

മനസ്സു മനസ്സുമാത്രമാണ്‌.

ആർക്കും മനസ്സിലാക്കാൻ കഴിയാത്ത

മനസ്സു മാത്രം...!

ആത്മാവിന്റെ വിളക്ക്

2013-04-04T13:45:00.003+05:30

കരുണാനിധി,ഭിലായ്

ഏതോ നിശീഥിനി പ്രാകിപറഞ്ഞൊരു

വാക്കിൻ പൊരുൾ തേടി ഞാനോ

കാലം കുടഞ്ഞു കളഞ്ഞൊരു ഈരടി

തപ്പിപ്പിടിച്ചു പിഴിഞ്ഞു

ഹൃത്തിൻ തുടിപ്പിൻ നിഗൂഢത തന്നിലായ്

കണ്ടു തിളങ്ങുന്ന വെട്ടം

അന്തരാത്മാവിന്റെ ബന്ധങ്ങളൊക്കെയും

കൂടിനില്ക്കുന്ന പ്രണാമം

തല്ക്ഷണം മാത്രം ഞാൻ നിർവൃതി പൂണ്ടൊരു

മഞ്ഞിൻ കണം പോലെ നിന്നു

ഉള്ളിന്റെയുള്ളിൽ ജ്വലിക്കുന്ന സത്യങ്ങൾ

കത്തിയെരിയുന്ന പോലെ

ആ നിമിഷത്തിന്റെ ജീവിതസന്ധി തന്ന-

സ്ഥിമാടങ്ങളെ കാണാൻ

നീറിയെരിയും കനൽ കട്ട വീർപ്പിച്ച്

നേരിൻ വിളക്കായ് നില്പ്പൂ....!

യക്ഷികളുടെ നഗരം

2013-04-04T13:45:00.000+05:30

ടി.കെ.ഗംഗാധരൻ

മുംബൈ മഹാനഗരത്തിലെ കൊളംബ സൈന്യബാരക്കിൽ നിന്നും പുറപ്പെട്ട രംഗബഹദൂർ താപ്പ ഗർഭബീജങ്ങൾ അഭയം തേടിയലയുന്ന ശുക്ളാജി സ്ട്രീറ്റിലേയും, ഫാൾക്കന്റ് റോഡിലേയും തെരുവുകൾ കടന്ന് കാമാത്തിപുരയിൽ എത്തിനിന്നു.

വിദൂരാതിർത്തികൾക്ക്കപ്പുറത്ത് ഹിമാലയസാനുക്കളിൽ ചിതറിക്കിടക്കുന്ന ലളിതശീലുകൾ, നേപ്പാളി ഗ്രാമങ്ങളുടെ വ്യഥകൾ സഹിക്കുന്ന രംഗബഹദൂറിന്‌ വയർ പിളർന്നുകിടക്കുന്ന കാമാത്തിപ്പുരയിലെ ഓടകലുടെ ദുർഗ്ഗന്ധത്തിൽ മടുപ്പു തോന്നി.

നീണ്ട കഴുത്തുള്ള പഞ്ചാബി കാമിനികളോടൊപ്പം പാൻ ചവച്ചിരുന്ന് സൊറ പറയുന്ന രത്നഗിരിയിലും രത്തലാമിലും നിന്നും വരുന്ന ഗനീകകളാണ്‌ കാമാത്തിപ്പുരയിലെ കോളനികലിലധികവും. അവരോടൊപ്പം അരക്കെട്ടിൽ ചോരത്തിളപ്പിന്റെ കലിയുമായി ഉറഞ്ഞുവരുന്ന കോമരങ്ങളെ തളയ്ക്കുന്ന കർണ്ണൂലിലേയും,വിജയവാഡയിലേയും കാറ്റേറ്റു വളർന്ന കാതരകളായ പെൺകൊടികളും ഒരുപാടുണ്ടവിടെ.

വെളിച്ചം കടക്കാത്ത മുംബൈയിലെ ചേരികളിൽ പോക്കറ്റടിയും, കൂലിത്തല്ലും കൊലയും, കളവും തൊഴിലാക്കിയ പോക്കിരികളുടെ രഹസ്യമാളങ്ങൾ ഒരു പാടുണ്ടെന്നാണ്‌ കേൾവി. മഹാനഗരങ്ങൾക്ക് കാന്തശക്തിയുണ്ടെന്നും പറയാറുണ്ട്‌. മജ്ജയിൽ തീക്കനലിന്റെ ചൂടും, ധമനികളി ൽ കൊടുങ്കാറ്റിന്റെ ആവേശവുമായി വരുന്ന കൊമ്പന്മാർ അടിയറവു പറയുന്ന പറുദീസ.

നേപ്പാളി അഭയാർത്ഥികളുടെ സ്വപ്നങ്ങളെക്കുറിച്ചോർത്തുകൊണ്ട് രംഗബഹദൂർ ബാരക്കിലേക്ക് മടങ്ങി. ബാരക്കിനിപ്പോൾ നീഗ്രോ ഫയൽവാന്റെ ലേബലൊട്ടിച്ച റമ്മിന്റെ ചവർക്കുന്ന ഗന്ധവും ,ചെമ്മരിയാട്ടിൻ മാംസം വീലമ്പുന്ന രാത്രിയുടെ ചടുലമായ പൊട്ടിച്ചിരികളു മായിരുന്നു.

മദ്യത്തിന്റെ ഇളം ചൂടിലും, രംഗബഹദൂർ വട്ടമുഖമുള്ള ,അമ്മയുടെ സ്നേഹവും വാൽസല്യവും തന്ന തന്റെ മൂത്ത സഹോദരിയെക്കുറിച്ചോർത്തു.

ഹിമഗന്ധിയായ നേപ്പാൾ മലയടിവാരങ്ങളിൽ വിളവ് സമൃദ്ധമല്ലെന്നുള്ളതാണ്‌ സങ്കടം. തൊഴിൽ സാദ്ധ്യതകൾ വളരെ കുറവ്. നെല്ലും,ഉരുളക്കിഴങ്ങും ആവശ്യത്തിന്‌ തികയുന്നില്ല, മാമസത്തിനും പാലിനും ഉപകരിക്കുന്ന ചെമ്മരിയാടുകൾ വേണ്ടത്രയില്ല.

ഉത്തരേന്ത്യയിലെ മിലിട്ടരി കണ്ടോൺമെന്റുകളിലെ കബാഡി ബസാറുകളിൽ നിന്നും കിട്ടുന്ന സൈന്യവസ്ത്രങ്ങളണിഞ്ഞ്, യുദ്ധാനുഭവങ്ങളുണ്ടെന്ന മേനിപറച്ചിലുമായി വരുന്ന പെൺവാണിഭക്കാരെ വിശ്വസിക്കുന്നവർ ഒരു പാടുണ്ട്‌ നിഷ്ക്കളങ്കമായ തനെ ഉൾനാട്ടിൽ.

ഉദാരമായ ചിരിയുമായി പ്രത്യക്ഷപ്പെടുന്ന അത്തരക്കാരുടെ വീർത്ത ബാഗുകളിൽ റം കുപ്പികളുണ്ടായിരിക്കും. ഇടനാട്ടുകാരിഷ്ടപ്പെടുന്ന വലിയ പൂക്കളുള്ള സാരികലൂം കുപ്പിവളകലൂം വാസനസോപ്പുമുണ്ടായിരിക്കും.

ചെമ്മരിയാടുകളെ മേയ്ച്ചും, ജീവിതസഖികളിൽ ഉണ്ണികളെ ഉല്പ്പാദിപ്പിച്ചും ജൻമദൌത്യം നിറവേറ്റിയ തന്റെ പിതാവ് വളരുന്ന മക്കളെ ശ്രദ്ധിച്ചില്ല.

ചിറകുണങ്ങിയ പെൺമക്കൾ അതിർത്തി കവച്ച് ഭാരതത്തിലേക്ക് ചേക്കേറി കൊറ്റ് തേടിക്കൊള്ളുമെന്ന് ആ മനുഷ്യ ൻ ആശ്വസിച്ചിരുന്നിരിക്കണം.

മുംബൈ നഗരത്തിന്റെ മഹിമകൾ പാടിവന്ന അത്തരമൊരുത്തനായിരുന്നു സഹോദരിയെ വേളി കഴിച്ചത്‌. സാക്ഷാൽ ലക്ഷ്മി വിളയാടുന്നൊരു രാജ്യത്ത് ജോലി ചെയ്ത് സമ്പാദിക്കുന്ന ആണൊരുത്തനെ അച്ഛൻ വേഗം വിശ്വസിച്ചു.

കപടനാട്യക്കാരനും ദുഷ്ടബുദ്ധിയുമായ ഒരുത്തൻ സ്പർശിച്ച് മലിനമാക്കാൻ വിധിക്കപ്പെട്ട ദരിദ്രകന്യകയുടെ സങ്കടം ആരുമറിഞ്ഞില്ല.

വാഗ്ദാനങ്ങൾ വാരിക്കൊടുത്ത് അതിർത്തി കടന്ന് അപ്രത്യക്ഷനായ കബാഡി വേഷക്കാരനെ ഒരു പെണ്ൺ എത്രകാലം കാത്തിരിക്കും? വർഷങ്ങ്ളേറേ ചെന്നപ്പോൾ മറ്റൊരു നഗരത്തിന്റെ ചിരിയും കൂട്ടിക്കൊടുപ്പുകാരന്റെ ദുഷ്ടലാക്കുമായി വന്ന വേറെ ഒരുത്തന്റെ കൂടെ അവർക്ക് മലനാട് വിട്ട് പോരേണ്ടി വന്നു.

അന്ന് രംഗബഹദൂർ ഏഴ് വയസ്സുള്ള സ്ക്കൂൾ വിദ്യാർത്ഥിയായിരുന്നു. പെൺവാണിഭക്കാർ ചെറുപ്പക്കാരികളെ അതിർത്തി കടത്തികൊണ്ടു പ്പോകുന്നത്‌ ചുവന്ന ഗല്ലികളിൽ വിറ്റ് മാറാനെന്നറിയാത്ത കുട്ടി...

ബാരക്കിൽ പത്തുമനീക്ക് പതിവുപോലെ ലൈറ്റ് കെടുത്താറായിട്ടും സൈനികർ,പെണ്ണേ നീ വന്നപ്പോൾ വസന്തവും വന്നു....എന്ന ഗാനം മൂളുന്നുണ്ടായിരുന്നു. സൈനികരങ്ങനെയാണ്‌,റമ്മിന്റെ ലഹരിയിൽ പരുക്കൻ ആർമി നിയമത്തിന്റെ ഭാരം മറന്ന്, പൂക്കാലം വരവായെന്നും, സുന്ദരി നീ ഉണരാറായില്ലേ....എന്നും പാടുന്നവർ.

രംഗബഹദൂർ കൊതുവലക്കുള്ളിൽ ചുരുണ്ടുകൂടി,ചേച്ചിയുടെ താരാട്ട് വീണ്ടും കേൾക്കാൻ തുടങ്ങി.

സരസ്വതി സമ്മാനം സുഗതകുമാരിക്ക്

2013-04-04T13:36:00.001+05:30

മലയാളത്തിന്റെ വാൽസല്യവും, പച്ചപ്പും അക്ഷരങ്ങളിൽ നിറച്ച പ്രിയകവി സുഗതകുമാരിക്ക് ഇന്ത്യയിലെ ഏറ്റവും വലിയ സാഹിത്യപുരസ്ക്കാരമായ സരസ്വതി സമ്മാനം ലഭിച്ചു. (10ലക്ഷം രൂപ )“മണലെഴുത്ത്” എന്ന കവിതാസമാഹാരത്തിനാണ്‌ ലഭിചത്‌. സമകാലികകമലയാളവിതയുടെ പരിച്ചേദമാണ്‌ ഈ സമാഹാരത്തിലെ കവിതകൾ. ഭാവഗീതിയുടെ വൈവിധ്യം, ആലങ്കാരിക ഭാവനയുടെ സമ്പന്നതയും, സങ്കീർണ്ണതയും,വർത്തമാനകാലത്തിൽ ഭൂത-ഭാവി-കാലങ്ങളുടെ സങ്കലനം,പ്രാന്തവല്ക്കരിക്കപ്പെട്ടവരുടേയും,പ്രകൃതിയുടേയും, ഭാവിയെക്കുറിച്ചുള്ള ധാർമ്മികരോഷം എന്നിവ ശ്രദ്ധേയം. വനിതകൾ, കുട്ടികൾ, പരിസ്ഥിതി തുടങ്ങിയ വിഷയങ്ങളെക്കുറിച്ചുള്ള കവിതകൾ സാമൂഹികപ്രതിബദ്ധ്തയുള്ള വായനക്കാരുടെ പ്രിയപ്പെട്ട വരികലായി മാറുന്നു. തീവ്രവും, ദൌത്യ്പൂർണ്ണവുമായരചനയാണ്‌“വനിതാക്കമ്മീഷൻ” എന്ന കവിത.

മലയാളത്തിൽ നിന്നു മുൻപു രണ്ടുപേർക്കാണ്‌ സരസ്വതി സമ്മാനം കിട്ടിയിട്ടുള്ളത്`. 1995ൽ ബാലാമണിയമ്മക്കും, 2005ല്കെ.അയ്യപ്പപ്പണിക്കർക്കും.

പത്രവാർത്ത

ലൈബ്രറി കൌൺസിൽ പുരസ്ക്കാരം ഓ.എൻ.വിക്കും കെ.പി.എൻ.നമ്പീശനും

2013-04-04T13:35:00.004+05:30

മലയാളഭാഷയ്ക്കും, കേരളീയ സമൂഹത്തിനും നല്കിയ സംഭാവനകൾ പരിഗണിച്ച് ഓ.എൻ.വിക്കുംകെ.പി.എൻ.നമ്പീശനും കേരളസ്റ്റേറ്റ് ലൈബ്രറി കൌൺസിലിന്റെ സമഗ്രസംഭാവന പുരസ്ക്കാരം ലഭിച്ചു. 25000 രൂപയും, ശില്പ്പവും, പ്രശസ്തിപത്രവുമടങ്ങുന്നതാണ് പുരസ്ക്കാരം.

അമ്പതുകൽ മുതൽ ഗ്രന്ഥശാലാ പ്രസ്ഥാനവുമായി പ്രവർത്തിക്കുന്ന കെ.പി.എൻ.നമ്പീശൻ സംഘത്തിന്റെ തൃശൂർ ജില്ലാ പ്രസിഡണ്ടായിരുന്നു.

പത്രവാർത്ത