Zomi Angvaan

Zomi khangthak leh Zomi AI

2026-01-13T09:20:00.000-08:00

Facebook te AI pupi pa uh Sente ahi Wang bang pen Kum 24 ahih in AI tawh Billionaire na suak hi.

Nungkum June 2025 in ama bawl AI pen Meta ten Billion hon khat in na lei aa, tua lai ah aman semsuak hi.

Data/Software khat a bawl khia thei khat in, Company kumpi tungah na bawl pah in, tua tawh na hong sem uhhi.

Cih nopna ah mipi ading nasep hoih i bawl khiat theih aleh Company khat phut khiat tawh ki zom hi. Company khat phut khialo ihih keileh mipi adingin mu khia taktak lo cihna hita hi.

Khang thakte in mite pilna sinin mu theita ahih manin, na thak, van thak i muh khiat sawm keileh zong, amau bawl van khat peuhpeuh nuntak zawh dong dingin siam sawm, zat theih sawm ngiat leng, Pilna tawh nasep, nuntakna ki muhlawhzo dingin ka um hi.

AI hong minthang aki panin, AI nam tuamtuam ki bawl khia khengkhang pahin, AI khat aki muh khiatna tung tawn panin mitampi in nuntakpih zah khop in na muhbehto zangzang pah uh hi.

Online Shopping bangzong Amazon, Alibaba, Ebay..cih bangin, na khat peuhpeuh khat aki muh khiat aleh tua dan khat miten nuntak lawh, hauhlawh nang na muhbehto pah zangzang hi.

Khangthak ten hanciam un, mite lai theih banhin, pau theih bangin nozong asiam hi uhteh. Lampi hanciam in zong lecin uh lampi tampi om ding hi.

Tu lai nu leh pa te danin Tha tang tawh na semsem nuam na hih uhleh Nu leh Pa te theihlohna dinmun ah a tuaksuk na hita uhhi. Deihsakna tawh gelh khilh aomleh nin bung ah na paihsak un.

Thang Thawn Tuang

#T3Zomi

January 13, 2026

Neihman hilo, Phalman

2024-12-23T11:24:00.000-08:00

Hih ka Nu leh Pa man ka muhteh ka heh suahna pawl khat leh ka gennop hong suak pawl khat ka gennuam hi.

Kawltu huan pen Bapi gam ah munnih leh Tuimang gam ah munnih a gawmin huan mun 4 ka nei ngei uhhi. Ka khualzin zawh ka Pa ten Ngasa khawina nei uhhi. A nung ciangin u Kam Sawm Kim in luahto hihtuak hi.

Ka Nu leh Pa in Kawltu lei hong vatpih, hong suanpih, hong khawhpih, hong hekpih, hong zuakpih mun mahmah hi. Nu leh Pa bel nasep a hanciam veve in mu ing. Zanglo Ciingnih (munnih) neih in Buh tawh kisai sinkham omlo limlim hiphot hi.

Khua khal taptal inn ah om hit hiat cih hun omlo, Zang giak, Huan ah giak, ka unau tengun na hong seppih den hi. Sangkah tuakteh huan ah ka kuan hun uhzong om thei mahmah hi.

Khual ah Sakol tawh Thangkhuai, Zasan, Antang cihzong ka Pa in hong zuakpihzel hi. Khual ah keibek ka zinteh nang na pa kua hong ci om aa, Kam Ngaih kacihteh, a thei na tampeuh mah in noptuam mahmah hi. Kapa pen amin Kam Ngaih in ki theizaw hi. Aminpi Nang Za Kam hi aa, amin ah Ngaih pa hetlo na pi, aki ngaihsapna in ka thei hi.

Ka heh suakna pawl khat bel Kawltuu huan ah mi hong pai om peuhleh Kawltuu, Thangkhuai a mawkna in piapia den hi. Anne sak lai hi. Zin neihleng zanpuan athak aki koihte silhsak hi. Mite Buh gawisak, mite puan khuisak in sum alakloh tampi ka theih hi. Buh leh antangsa zong a mawkpiak ka theih mitampi om hi. Tuaten tuhun teh phawk khalo in gensia theilai uhhi😁.

Tu hunteh naupang lai aa, ihehna te ka ngaihsut teh Thupi hetlo aa, Nu leh Pa in neih luat man hilo aa, Phalna leh itna lungsim tawh Neih bangbang mite phattuamna dingin a bawlzawhna uh Topa thupha taktak ahihna ka phawk sansan hi.Tu-in USA leitang ah ka Nu leh Pa Cidam ludam in nopsa in atate a tute tawh khuasa uhhi. Topa thupha taktak hi.

Thawn Tuang

Dec 23, 2024

Lungdambawl leh Zanvak

2024-12-23T11:15:00.000-08:00

Inn sungah lutse lo in, pawlpi innkim ciat ah hih video danin pawlpi khempeuh ki vak ziahziah den hi.

Zanvakna ah Law-si-pi-ka ( Loudspeaker 📢) leh Meipi ( Meiso pi) a tawi kaki laihzel uhhi. Zanvak tawpni ka inn vuah zanhak zel in, pawi la aomleh pawila te inn ah zan ki hak hi. Zanhakna ah pawlpibup ahizo teng ki zanhak hi. Tu lamlam teh khangno te hun ki piazawleh ki lawm hi.

Lungdambawl ciangin Taakkungte, Phuitong kungte, Nahtang luangte inntual leh kongpi ah ki phut in Laidal kangte veihnam khau tungah khai lingleng cih bangin Lungdambawlna ding innte decoration hoih mahmah tawh ki zem hi. Lungdambawl teh Inn leh khua sungzong ahi theizah in ki puahsiang zaw deuh hi. Han mual suang khawng zong ki puah zawdeuh hi. Samsau ten zong sammet zaw deuh in, ki sil siang zawdeuh uhhi. Lungdambawl ni aki sillo omlo hi😀.

Lungdambawlni zingsang Ak masa khuangteh ka Pa in hong phawng in, khuadampipi in Takmualvum ah hong paipihto in Singlamteh ki phuhna ah, Thungen zel, Pasian thu tangko zel, Cassette tawh Lungdambawl la hong zel hi. Ni hong suah ciangin innlam ah hong ciahpih hi.

Khual pan sum thalawh te hong ciah in, silh leh teen a thak hong nei zaw deuh uhhi. Sangkahte hong ciah in, pawlpimi akimpen hun zong lungdambawl hunmah hizaw deuh hi. Sunin pawlpi khempeuh in ki mawlna Khau ki kaih, Bawngnawi hai sat..cihbang ki mawlna tuamtuam ki neih aa, a khatna nihna cihte letsong in Buangnaikual leh Tuai at (Lingkhei ) ki pia hi.

Lungdambawl annek ciangin Lawhpi leh Pakanpi sungah Buh ki thuk in, Meh a lai ah om in, mi 6, 7 in ki um khawmin ki ne hi. Mehtui pen Keupi khat ciat ki tawi in, zasan a duhten amau keu sung ciat ah sawh uhhi. Mehtui Keupi nih leh thum vei bang ki vik ciat hi😁. Nop veve ei.

Kumsim Zanvakna ah puak ding neulai in Sangtuah khitteh ka nauteng leh Suan Gen te unau tawh Holma ka zong uhhi. Ka thangkhuai uhtawh gawizan khawmin zanvak teh ip sungah ka pua uhhi. Mi dang a neilo ten hong ngetteh mat khatta bek ka pialel uhhi😁. Tangval teh khual ah sangkah in ki omta ahih manin zanvak ka zang kha nawnkei hi.

Naupang lai aa, zanvak cihloh, Zi leh tate tawh innkuan lungdambawl zanvak hi kik pan ahih manin nop zawlai hi.

Lungdambawl leh Kumthak hunnuam zangh ciatni.

Thawn Tuang

Dec 21, 2024

Min genna leh Identity genna ki banglo

2024-02-28T11:53:00.000-08:00

A mun leh mual zui in dawnna leh genna om hi. Ei Tulsa te, ei Chin te, ei Zomi te, ei Asian mite, ei Kawlgam mite...cih danin i genna pen minam min genna hipah samlo aa, i ki hopih mite leh a thuzui aa genna hi.

Minam min Identity hong ki dong tangtang ahihleh mi khempeuh in amau minam ciat genlel uhhi. Nang koi pan Chin pan, Kawlgam pan, Tulsa pan, Tedim pan, Malaysia pan...cih dan tuamtuam om hi. Hih mun ah minam min pulak dihdih ding hilo hi.

Zomi MP ten Chin state bup MP te tawh aki ho teh ei Chin te acih mah ding hi aa, Kawlgam mibup ki thuahna ahihleh ei Kawlgam mite cih ding mah ahihi. Minam min genna hilo hi.

Lai thupi tungah State mun ah State min ki gelh, minam min acihleh minam min gelh ding, tenna khua acihleh i teenna gelh ding ahihi.

Namdangte pau a theilua lah hilo, nam dangte tawh ki pawl khawmin tutna ngahlah hisam lo, Zomi tengmah in, Chin ki paai theilo, Chin mimah hihang acici ten, a zatna ding mun atheihloh man hizaw hi. Identity i zatna dingmun ah zat ding ahihi. Nang na zat keileh nangma Identity pen na suak na khak ten na kan veve ding aa, na zangh kik veve ding uhhi.

Kawlgam mi phazah kisimna ah minam code ah Zomi hong pialo uh aa, hih code ah aomlo ten 914 gelh un acihpen Zomi MP te bekbek a mawhsak omlai zen hihang. GZA aki pan ki pawlna tuamtuam teng thukim aa, 914 ah Zomi gelhni aci uh ahihi. 914 pen Zomi te bek hici aa, a pum piakpiak zong om hihang. A kik ah Code ngah theihna ding lampi makaiten a hong ahihi. Kawlgam ki ukna hoihloh manin, bangmah a result pulaklo uhhi. Chin code 401 ah nang na gelh hiam, gelh na hihleh a dangte ah nang buai nang thu omlo hi.

Zomi ul tung sak a omleh a hi theithu ahihi. Eima hehna ding omlo pi ee, sihna dinglah hilo, poilo pi ee. A huat huaizaw ah Zomi hi na pi, Zomi te lak ah Zolai mahmah tawh ei Chin minam hihang acite huat huai pen hi. Chin minam na hihleh Zolai sese tawh gelh kullo pi ee. Chin minam aom zenzen aleh amau zong amau lai cihkhat neisamlo di hiam. Amauvai pen amau ki sai sakni in, ei sungah eivai i gen pen hehna ding omlo lua hi.

Thawn Tuang

#T3Zomi

February 28,2024

Lungdambawl 2023 leh ki tenzawh 15 years Anniversary

2023-12-28T09:40:00.000-08:00

Ki tenzawh kum 15 cin leh Lungdambawl gawm khawm thei

Photo te all select upload ahih manin, a om dandan in akoihsuk a hihi.

Zeisu nei leh neilo

2023-06-22T10:44:00.001-07:00

1. Zeisu aneiten mi mawhna maisak ding hanciam uhhi. ( aneilo ten mite mawhna maisak cihthadah mimawhna zongzaw uhhi)

2. Zeisu a neiten amah a itlo te itzawh nang hanciam hi( Zeisu neilo ten amah a it tengbek it, hong itlo pi khawng, itloh pah ding ci uhhi)

3. Joseph in nu ki banglo a sanggamte mawhna maisak in, it in a huhna pen Zeisu a neihna hi( Zeisu neikei leh antaw in a pai a sanggamte mawhna thukkik thei ding hi)

4. Tapa taimang pa in a pa neihsa akimkhat a utna ah azatbei khitteh, a Pa kiangah kisikkik in ahawmpi in ciahkik aa, a Pa in itkik veve hi( a Pa in Zeisu neilo hileh, itna neilo in, hawlmang theilai ding hi.)

5. Zeisu neihte Biakinn sung bek hilo, apua ah gamtat hoih ding hanciam hi( a neihlo ten Biakinn sung ateng, mangggilh in, apua ah a ut bangin gamta theilel hi.)

6. Zeisu a neite' mawh theilo hilo in, a mawh aleh ki sikkik in, ki lehkik hi( a neihlo te man ki sa tawn tungin, ki sik theilo uhhi)

7. Itna, hehpihna, mawh maisakna, ki sikkikna...cihte Zeisu aa-hi aa, Zeisu a neihten hihte zuih ding hamciam den hi( a neihlo ten hihte tungah amah thukhen dingin, man kisa in om phieuphiau den hi)

Thawn Tuang

June 22,2023

#T3Zomi

Nu leh Pa

2023-06-17T18:27:00.003-07:00

✍️A thupha bek deihin Nu leh Pa a it ki neih khemkei ni.

✍️Nu leh Pa in hong itna thu, hong dampih laimah in, gengen zaw ni.

✍️Nu leh Pa in hong dampih nawnloh ciangin, mite tungah Nu leh Pa it ding thu a gen panpan hikei ni.

✍️Nu leh Pa cinlohna aom sunte, mawhsak in thu gengen keini.

✍️Mi Nu leh Pa tawh tehkhak in, amau tungah i gen hangin phattuamna om nawnlo ahih manin genkei zawni.

✍️Nu leh Pa in cinlohna a neih ciangin, naupang bangin tai gawp in, thuhilh keini.

✍️Pasian in keima Nu leh Pa ding ngiat in hong bawlsak hi cihthei in, khasiat sak ding sawm ngeikei ni.

✍️Nu leh Pa tungah Thupha i bawlsiamloh hangin, dahin a khi tui uh luansak sawm ngeikei ni.

✍️Nu leh Pa pen it deuh, paih deuh cih bang neihkei ni.

✍️Nu leh Pa in hong nusiat khit ciangin, bangbang i genzongin, Nu leh Pa in za theiding hi nawnlo ahihmanin, hong dampihlai in, lungkim huaitak in hopih in, bawlni.

👍a tawpna ah Facebook sungah aman suahsak ziauna tawh, ki cingsak keini.

Thawn Tuang

#T3Zomi

June 17, 2023

Kapa tawh kisai tomcik

2023-06-14T15:20:00.005-07:00

Lungsim hongzo deuh man na om veve tham hi.

Ka Nu leh Pa te Kawltu huan leh US Citizen ngahna man hi.

Kapa zia tomcik

Kapa pen Nang Za Kam ( Kam Ngaih)

Dawibia sung panin khangkhia himahleh guihtheih khamtheih cihte zangh ngeilo hi. Ama khang panin Christian innkuan lam hi. Tu in USA Nashville TN ah atate inn 7 tawh teeng hi.

Tuimang khua ah aom lai in, Zingsang thobaih in, Sanset tawh mite nekding an ngawisak in, An ngawi ding aomkei leh, mite puan khuisak hi. An nek khit ciangin Kawltuu huan, Sa-hawk huan leh Zanglo cihte ah na sem kuan tangtang hi. Huan ah akuanlohni in Inn ah Patkap set tawh Patkap zel, Puankhui tawh ni tum den hi.

Khualak ah cimvak hit hiat cihte leh inn ah lum hit hiat cihte zangh ngeilo hi. Na sep ding thei in, hauh pekpak aomloh hangin, mite neih leh lam englo hi. An nek ding neilo, puansilh ding neilo, sum zattawm ding neilo, huh tuakte huhzolo cihte nei ngeilo pah hi( ata atu te vaimim tawh vaklo hi).

Pawlpi vai, Khuasung vai, Sangvai...cihte ah ahih theihzah in mapang den hi. Zin leh leng zong tatsatlo in, neih den aa, amahzong khual azinteh zintunna ding sin kham om ngeilo pah hi.

Mitawh ki tawngin, ki sel gawp cihte neih ngeilo hi. Mite khasiat nangzong gamtatlo hi. Ahih theihzah in mite huh in panpihnuam hi. Ka manggilh theihloh khatbel Sanset tawh mi nekding an a ngawi sakteh a mawkna in a ngawisak mi tampi ka theih om hi( eibang aki hehnuam phial hi😁). Damlo te ahih theihzah in panpih hi.

A theih ngeilo eimi tawh aki muhteh lawm bawl theihpah hi. Ki theihpih zong hau hi. Thu zong theinuam in, mite tawh ki zom ban ah, Laibu ama tungah aki zuak khempeuhzong lei in, Lai Siangtho bek hilo, Laidang zong tampisim tangtang den hi.

USA ah atuncil akua mapeuh in, na semken cita leh utlo in, ka ngap laiteng nasem ding ka cidam zaw, USA na sep nop mahmah hilo maw ci in, sem tangtang hi. A na sep sungin Kawlpi ah innmun nih lei in, Khua ah innkhat lamthak in, a tute sangvai khempeuh sik in, huhna ki ngen khempeuh huhzo kawikawi hi. Tuimang Zion UPC Biakinnpi ahzong mapang mahmah hi.

Tuni dongin ka Nu leh Pa pen a tate, a tute muan leh suanpi penin Pasian in damna hong piaksak mahmah ka lungdam ngaungau hi. Nu leh Pa deihloh khamtheih guihtheih aki pan cikmah hunin ka zangh ngeikei aa, hampha ka kisa hi.

A tawpna ah, mihingte ihoihloh lam ki zongleng, agen baanglo kuamah omlo aa, tua pipi mah in i sepna khempeuh i tangthu ding na hi gige hi. Ka Nu leh Pa in Pasian thupha tawh hong dampih lai in, online bek hilo, amau maitang leh mite maitang ah ki suanna nei hetlo in, ahi bangthu ka gen theih zelzelte tom cikcik in, kong gelh khiat hizaw hi. Hong itna, ki thuahna leh a dangdangte gennai vetloh ciphot ni.

Thawn Tuang

June 14, 2023

Lungsim mit tawh etna

2023-05-30T15:56:00.006-07:00

A khangto dingten a mailam a et uhteh lam etna mit tawh en uh aa, a nunglam a et uhteh thalakna mit tawh en uhhi.

A khangto lo dingten amailam a et uhteh hihzo kei ning cih mit tawh en uh aa, a nunglam a et uhteh thanemna mit tawh en uhhi.

Pasian thu a um taktak ten amailam a et uhteh itna leh hehpihna mit tawh en uh aa, a nunglam a et uhteh maisakna mit tawh en uhhi.

Pasian thu um aki neihten amailam a et uhteh thukkik na ding mit tawh en uh aa, a nunglam a et uhteh mimawhna zongna mit tawh en uhhi.

Leitung thubek a ngaihsun ten mailam a et uhteh huaihamna, hazatna mit tawh en uh aa, nunglam a et uhteh ki sak theihna mit tawh en uhhi.

Pasian thu a um taktak ten a nuailam a et uhteh itna mit tawh ensuk uh aa, a tunglam a et uhteh upna mit tawh ento uhhi.

Vantung tawh aki pawlnuam lungsim mit in Thukhual aa, Leitung bek tawh ki pawlnuam lungsim mit in Vang neih nopna mit bek neih uhhi.

Pasian tawh ki zopna lungsim mit pen ki lem diamdiamna hi aa, Dawi mangpa tawh ki zopna lungsim mit pen ki tot ngeingai nopna ahihi.

Thawn Tuang

#T3Zomi

May 30, 2023

Zeisu kiangah paipih

2023-03-17T11:15:00.004-07:00

Andrew pen nungzui dangte banglo in thugen thei, lasa theipawl zong hih tuak lo hi. A kizen saisai pawl zong hih tuak khol lo hi. Akamtam mel lo, pau tumteng lo-a muibun mahmah pawl bel hih tuak hi. Andrew kivakna ahihleh Zeisu kiangah mi paipih ahihi.

Andrew in Zeisu amuh khit ciangin a sanggampa Peter zongin Zeisu kiangah na paipih pah hi( John 1:41). Mi dangte sangin, a sanggampa mah na deihsak masa tinten hi. A innkuan sungmah masa sak hi.

Zeisu in Galilee gun piau ah cina damsak in, tua khitteh mual tung lam ah apai ciang mipiten zui ngeingai uh hi. Ni tum kuanta annek hunta, mipite zong a gil uh hong kialta hi.

Nungzui te zong hihzah annek ding koi ah ngah ding cih hong lungkham uhhi. Tua laitak in Andrew in Ngasa tawnnih leh Khomun pum nga apua tangval pa mu citciat aa, Zeisu kiangah na paipihpah hi. Hihzah leltak Zeisu kiangah paipihlo in, a kim aom gil kial khat peuh na pialeh ahi thei thu hi aa, Zeisu kiang paipih tangtang hi( John 6:8,9)

Greek mi tampi tak Zeisu tawh a kimusak zong Andrew mah na hi zel hi (John 12:22). Andrew kivakna pen "Zeisu kiangah mi paipih na" hi.

Zeisu kiangah lampi tuamtuam tawh mite i paipih theihna om ciat ding hi. Pawl khatte Makaihna, Lasakna, Thugenna, Thungetna, Gamtatna...cihbang a tuamtuam Talent Pasian in mihingte tungah hong piaksa ahihi. Zeisu ading i nuntak sungin mainawt in thala semsem ni. Lungdam

Thawn Tuang

March 17, 2023

Dawi mangpa leh Kha Siangtho

2023-02-17T16:53:00.003-08:00

Siapa khat in a sang naupangte kiangah Laimai khat sungah Kha Siangtho thu kanin honggelh un, Laimai nihna sungah Dawi thu kanin hong gelh uncih vaikhak hi.

Sang naupang tenzong amau kan theih bangbangin kanin laigelh ziahziah uhhi.

Sang naupang khat in a siapa vaikhakna bangin laigelh lo in, a Laimai nih dimin Kha Siangtho thu bekmah gelh in neih hi. A laigelh tawpna ah Siapa aw Dawi mangpa thu kan unla laimai khat ah hong gelh un na cihpen kong gelh kei hi. Ka hun leh ka ngaihsutna pen Dawi mangpa thu kanna dingin, ka zangh nuam kei hi cihi.

Khat veivei i nuntakna ah Pasian thuman kan ding sangin, mi tampipi gente peuh kan ding, i thalawp hun tam thei mahmah hi. Nipi ni hong tunma, i hun neih khempeuh a hoihlam in zangh in, Pasian thuman kanin, Lai Siangtho simin,Thungen in, Phatna la ngaingai peuhleng, i nisim nuntakna sungah Kha Revival a zanghzangh ki hihi.

Tuni Lai Siangtho tang bulphuhlo in, ka thangahna hong hawmsawm thei ka hihmanin lungdam.

By~Thawn Tuang

February 17,2023

Zeisu in, " Na Inn ah Ciah in" ci in sawl

2023-01-25T17:51:00.005-08:00

Zeisu hoihna thu gamlapi ah pai aa, gen ding zong hoih na ven, ahizongin Zeisu in innkuanpihte kiangah gen masak ding hong deih aitam ci in, tuni LST simna panin ka thagahna te hong hawmsawm hi-ing.

Zeisu in Dawivei mikhat a damsak khit ciangin, tua pa in Zeisu zuih sawm pah hi. Zeisu in ki zuisak lo in na innah ciah inla, Topa Zeisu in nang tungah bangzah tak bawl a, nang bangzah takin hong hehpih cih thu na innkuan pihte kiangah na gen in ci-in sawl hi. Mark 5 sungah ki mu theihi.

Galkap mangpa nasem khat a damsaknang Zeisu in thu apiak khit ciangin, na inn ah ciah in ci hi. Matt 8:13

Khut leh khe a zaw mikhat Zeisu in a damsak inzong a inn mah ah ciah dingin na sawl hi. Mark 2:11

Kum 12 damlo siluang numei nu zong a damsak khit ciangin na inn ah ciah in Zeisu in sawl hi. Mark 5:34

Damlo vive ten damna a ngah ciangin, Zeisu in a inn ah ciah in ci-in sawl tangtang hi. Zeisu i neih keileh i kha a damlo, a zawngkhal cihna hi aa, Zeisu i neih a ki panin i kha cidam hi aa, tua cidamna hong lungdampih ding innkuanpihte kiangah gen masak ding Zeisu in na sawl tangtang hi. Na inn ah ciah in. Lungdam

Thawn Tuang

January 25,2023

Huhna Sanglo, Nolh kik

2023-01-24T13:39:00.004-08:00

Mr. George Muller

aw, Sum ka hong khak den ding hi, hih pen a kipatna ahi hi. Lawm le gual tampi in zong hong huh nuam

hi," cih laikhak khat leh Check an pound 100 kim azo ding khat tawh mi khat in huhna lai khak khawm hi.

George Muller in hih huhna sanglo in, a khakpa khak kik hi. Topa kiang panin a kiciangtan thei lo huhna muangzaw hi.

"My dear sir, Nong sumkhak leh nong laikhak ka ngah

aa, ka lungdam mahmah hi. Ko nupa in neihsa tawh kisai bangmah ka nei kei uh

hi. Tu ma kum 26 akipan Topa in ka kisapnate uh hong pia hi. Muh theih nate muangin mailam ading ka lungmuang ngei kei uh hi. Tua ahi manin mi zawng, mi cimawh, mi gen theihte ka muhnak uh leh ka neih

bangbang uhtawh ka panpih uh hi. Pasian in ka kisapna uh mite zangin hong huh den hi.

Tutung nong khak banah mailam ciangin sum nong khak lai ding cih ka theih uh ciangin nong sum khak kong sang ngam kei uh hi. Banghang hiam cih leh Pasian sangin nang kiang

panin hong pai ding sum ka muang khak ding uh ka patau uh hi.

"Nong thupha bawlna hangin ka nuam mahmah uh hi. Pasian in thupha tampi hong piak lailai nading zong thu ka ngen uh hi. Hong tel siam dingin kong lamen uh hi. George Muller," ci-in lai khak tawh huhna kipia nolh kik hi.

Mihing sangin Pasian a muang zaw den George Muller Pasian

in thupha pia-a, ama nuntakna sung mahmahin tagah mi 10,000 khansuah hi.

Thawn Tuang

January 24,2023

Thuk kik na

2023-01-23T11:11:00.003-08:00

A sia pen ahoih tawh thukkikna pen Zeisu nungzuih dan ahihi. A hoih khat a sia tawh thukkikna pen Satan mizat dan ahihi. A sia khat ahoih in i thuk kikzo kei phial zongin, a sia mah in thukkik keileng hoih hi. Maisak zawh ding hanciam huai hi.

Australia gam panin India gam ah Missionary aom Graham Stuart Staines leh a tapa te nih January 23,1999 in a khual zinna India gam Orissa state Manoharpur khuano ngei a tun uh ciangin, khua zanlua ta in a mawtaw Jeep sunguh ah giak uhhi.

Christian a mu dah mi gilo pawl khat in tua zanin Jeep meitawh haltum in, a sunga atuang Graham leh a tapa Philip kum 10, Timothy kum 6 a thum un kangtum uhhi. Tuni in a sihzawh uh kum 24 acinni ahihi.

Graham zi Gladys Staines leh a tanu ten inn a ngakna uh panin hihthu piangte a zak uh ciangin, a dip ngekna in, dahlua mahmah in, cihna ding mel theilo in om uhhi. A tawpna ah a pasal leh atapa te athat teng thu om bangin, zumkong mangkong, phulak ding, thukkik ding cihte ngaihsun hetlo in, Pa aw amauten bang hih cih theilo uh ahih manin amaute na maisak in Luke 23:34 sung bulphuh in, na maisakzo mawk uhhi. A pasal na sep maban India mah ah Missionary semzom suak in, Milimbia tampi tak pen Christian ah tampi tunpihzo hi.

Maisak theihna pen Zeisu lungsim puakna hi aa, a thuman bangin mite tungah thuk ciatciat ding lungsim neihna pen leitung lungsim Satan lungsim puakna hi cihtawh akizo Nupi Gladys Staines etteh huai kasa mahmah hi. Akua mapeuh in thalakna tuamtuam in, i neihzawh khakleh ci in, ka laisimna tuntawn panin hong hawmsawn ka hihi. Lungdam.

Thawn Tuang

January 23, 2023

Hampha ka ki sakna

2023-01-21T18:17:00.007-08:00

Kha Siangtho lam lahna Aksi en man nawnlo in mipilte apai ciangin, honpa pen kumpi omna ah suak dinghi cih hong ngaihsun uh aa, a lehlam Jerusalem kumpi Herod om na hong tung uh hi. Zeisu pen leitung pilna tawh i zon sawmleh a lehlam ah ki paipai ding cih hong lak hi.

Mipil ten a suak khinsa Judah te kumpipa koi ah om hiam? Nisuahna lam ah ama aksi ka mu uh a, amah bia dingin kong pai uh hi. (Matt 2:2) na ci uhhi. Kumpi pa zong na lung hihmawh pah ahih manin siampi leh laithei upa te kaikhawm pah in, Khazih suahna ding koi lai hiam hong ci hi.

Pasian kamsang pa in, Lai Siangtho Micah 5:2 na bulphuh pah lian hi. Jerusalem ah suaklo dinga, Bethlehem ah suak ding hi na ci hi. Kumpipa Herod omna ah mipil ten Khazih a muhloh uh ciangin, pai khia uh aa Kha Siangtho lamlahna Aksi hong et kik uh ciangin, a tawpna ah Zeisu hong mu pan uhhi.

Zeisu pen Pasian taktak ahihna, Kha Siangtho lamlahna tawh i telcian mahmah, tuamah hampha ka ki sa penpen hi. Lungdam.

Thawn Tuang

January 21,2023

USA Zomite Khantohna ding kalkhat

2022-11-15T10:08:00.003-08:00

Kuakua kumpi in hong sem zongin Zomi USA a teengte' khantohna ding kal tampi lakpan kalkhat bekbek gennuam ing. A zangh nailo te ading bek ci ni.

Food Stamps( EBT) vai;

Hihpen Refugee galtaite ading hi cih dan hilo in, income tawm, income neihlo, nek leh dawn ki cinglo, damlo zawngkhal te ading bek ahihi.

USA tung buang, mawtaw hoihpipi neihzo, Inn hoihpipi neihzo dingin Pasian in hong siamin, ki neih kimphial takpi hi.

Pasian thuzong a tamzaw ki hat in, Pasian thu um vive hihang. Food Stamps i ngahnop manin, Bank account aom sumteng la khia in, thuman tawh, manlo tawh nek leh dawn gilpi adingin zuau a phuak tampi om hi. Ngahleng tampi pha tuam kha mah ding hi.

Nek leh dawn ading lieliau bek ading ahih manin, nek leh dawn, ki vakzo buangleng, kuakua khemna lah hilo, Pasian muhna ahzong hoihzaw lo ding hiam? Zuau tatna pen milim biakna mahtawh ki bang hi.

A tamzaw Tate sangkahna High School ciang pen ei sum abei hisamlo, ei innkuan nek leh dawn ading zuau phuak ki samlo in, ki vakzo ciatleng, i khantohna kal khat a suan hi ding hihang. A ngahzo ding ciang dinmun takpi ahihleh, mailam ah i hanciam ding tampi om toto lai kha ding hi.

Nang neihsa sa maw? Naci phial uhzongun, Pasian thu um ihih manin, zuau phuak kulse lo in, ngah leh ngahlo ding dinmun ah om ka hiam cih i ngaihsut ding hoih hi.

𝗔 𝘁𝗮𝘄𝗽𝗻𝗮 𝗮𝗵 𝗰𝗶𝗮𝗺𝗻𝘂𝗶𝗵 𝗰𝗶𝗵𝘁𝗮𝗸( 𝑍𝑎𝑛 𝑙𝑢𝑚𝑝𝑖ℎ 𝑝𝑢𝑎𝑛 𝑘ℎ𝑎𝑤𝑛𝑔 𝑡𝑎𝑤ℎ 𝑘ℎ𝑢𝑎𝑙𝑎𝑘, 𝑚𝑖𝑙𝑎𝑘 𝑎ℎ 𝑝𝑎𝑖𝑘𝑒𝑖 𝑖𝑛𝑙𝑎, 𝑖𝑛𝑛ℎ𝑜𝑖ℎ, 𝑚𝑎𝑤𝑡𝑎𝑤 ℎ𝑜𝑖ℎ 𝑛𝑎 𝑛𝑒𝑖ℎ 𝑚𝑎ℎ 𝑏𝑎𝑛𝑔𝑖𝑛, 𝑛𝑎 𝑛𝑒𝑖ℎ𝑠𝑎 𝑡𝑒 𝑧𝑜𝑛𝑔 𝑠𝑡𝑎𝑛𝑑𝑎𝑟𝑑 𝑑𝑒𝑢ℎ 𝑡𝑎𝑤ℎ 𝑜𝑚𝑧𝑎𝑤ℎ 𝑑𝑖𝑛𝑔 ℎ𝑎𝑛𝑐𝑖𝑎𝑚 𝑖𝑛)Ni11152022#𝒯3𝒵ℴ𝓂𝒾

Puteek Pa khat leh Tangval pa tangthu

2021-09-20T16:06:00.005-07:00

Tangval thahat mahmah pa leh a thahat nawnlo Puteek pa tangthu kong gen ding hi. Phat tuamna aom kei zongin thalakna dingin ka ngaihsut thu ka pulak nuam hi. Tangval pa pen thahat ban-ah taihat mahmah hi. Sum zong hau mahmah in a sum Thung ip pi khat pua in a khua sung vuah vak hi. A hauna a khuapihten thei khin uhhi.

Khat vei Bawlung ki mawl Tangval thahat pawl khatte kiangah kei hong delh unla hong khoih masa penpen ka sum teng ka pia ding hi cih kamciam hi. Tangval ten zong delh pah ngeingai in phazolo uhhi.

Nih veina leuleu Lo kha pasal 5 bangte ngei ah kei hong khoih masa penpen ka sum teng ka pia ding hi hong delh un ci-in tangko leuleu hi. Tua ten zong phazo tuanlo uhhi.

Thum veina leu ah Mawtaw cycle tai ki dem tangval hon khatte kiangah a cih ngei bangin kamciam pia in tangko leuleu hi. Cycle tawh a delh uh hangin amah kawi tai zalzal zel ahih manin phazo tuanlo uhhi. A tawpna ah Puteek pa khat a innka dawn ah ni lum awi khat kiangah Pu aw kei hong koihkha peuhpeuh ka sum tampi ka pia ding hi hong khoih khak sawmin tua hileh mihau na suak pah ding hi cihi. Puteek pa zong hoih gei ei..kei tha tawh delh leng cik mah hunin pha ngeilo ding, khoih kha ngeilo ding ka hihteh Bil ngong ki neih leng khoihkha pen ning cih ngaihsut siamna hong neih hi.

Tangval pa in mi kiangah a cih ngei danteng a cihteh Puteek pa in bang a hiam na gengen tel mahmah keng, ki tello lua ci hi. Tangval pa in Puteek pa telding leh a zak ding deih ahih manin Puteek pa zak ding naih pheiphei in cici in, Puteek pa in a za lo ki neih semsem aa, a tawpna ah.....hoi...ha..ci-in Tangval pa pen Puteek pa in hong hing mat zo lian hi.

Thupha ih ngahna dingin a ging khempeuh ih zuih pahpah leh Thupha ki tanlawh thei zawsop hi. Khat veivei a ging khempeuh Bil ngong bangin om hit hiat in thu khingkhai zelzel leng Thupha ngahna ding lampi na hi thei hi. A ging ngaih khempeuh zong up pahpah leh zuih pahpah huailo hi. Tua pen ciimna leh pilna hi gige ka sa hi. Lungdam

Thawn Tuang

March 22,2015

Israel Pau Sian Tuang lungdampihna

2020-08-10T17:24:00.002-07:00

Tangthu thak, Laimai thak Israel Pau Sian Tuang 5D Lungdampihna

Lai simkum 2019-2020 Tan 10 laivuanna August 8,2020 ni in Tan 10 zawhna Kawlgam kumpi in hong suaksak uhhi. Rev.Dr.Cin Deih Thang leh Nu Ning Man Vungte Tapa Israel Pau Sian Tuang in 5D tawh gualzawhna hong ngah hi. Tuimang cih min aom zawh kum 100 valta aa, Tuimang mi sungah hih bangin Tan 10 5D tawh a zo masa pen hong suak ahih manin, lungdamna genzawh hilo hi.(#Genbehpakleng: Sian Tuang in All D ngah ding ki lam en mahmah hi aa, amah zong 5D bek ka ngah ci in, lungkimzo taklo hi, Pil mahmah himawk hi)

Apa Cin Deih Thang zong tukum mahin Ph.D a zo khinlian hi aa, atapa Israel Pau Sian Tuang in Tan 10 5D tawh hong zo to lai ahih manin, Tuimang khua adingin Topa thupha tawh Tangthu thak, Laimai thak hong behlap ata te innkuan sungah Topa'n thupha hong piaksak semsem hen.

Sian Tuang nu leh pa pen Kawlgam ah Tan 10 ong bek thamloh B.A zong a zo tuak uh ahihi. Yangoon ah teeng uh aa, tukum 2020 ciangciang Tuimang mi khempeuh Malaysia paiding, USA pai ding a kua mapeuh amau inn ah ki tungin, amau hong angvaan na vive tawh gam thupi Tuimang vontawite a tung hihang cihzong Tuimang Vontawi te adingin a ki manggilh theilo ding Tangthu ahihi.

Thupha icihpen Pasian in hong mot piaklo, mite tungah Thupha a bawl zo dente innkuan sungah Topa'n ama thupha mah tawh na dawn tuah takpi ahihlam keimuhna ahihi. Lungdampihna mahmah ka hih manin gelh khilh aomleh hongna thei siam un. Lungdampih mahmah ung ei Sian Tuang.

Thawn Tuang

USA August 9,2020

Mi minthangte Kammal hoih pawl khat

2020-07-06T18:35:00.001-07:00

1. Mi thadahte na hamsem dingin kasawl hi. Banghang hiam cihle amau te in a awlno takin semthei uhhi. Bill Gates

2. Gualzawh nading bek in nasem kei inla, na muibut nading in hanciam zaw in. Albert Einstein

3. Thupha ngahna dingbek thungen kei inla, zeh etna nathuak zawh nading zong thungen zaw in. Bruce Lee

4. Na khatpeuh nasep khialh khak ding lau kei in, na khialh napan in pilna la zaw in. George Clooney

5. Nasep nahahkat nakle, na sunmang te hong tangtung lel ding hi. Serena Williams

6. Ka gualzawh theih nading in, kum 17 le ni 114 sung hun kala hi. Lionel Messi

7. Kasupna hangin ka kisik kei a, kasep ngamloh na hangin ka kisik zaw hi. Jeff Bezos

8. Na guallelh khakding dah kei in, tuapen na gualzawh nading hizaw hi. Lebron James

9. “Sunmang” ih cih pen, ih mut laitak na mat mang hilo a, ih mu theilo liang a hong koihpen hi zaw hi. Cristiano Ronaldo

10. Nang sunmang nasep ngam keile, midang khatpeuh in amau sunmang ah semding in hong zangh lel ding hi. Dhirubhai Ambani

11. Khat veivei ciangin keiguak ka ommah nuam kasa zaw hi. Banghang hiam cihle kimle paampan in phattuamna hong pialo kammal te hangin ka sinso leltak hi. Ryan Reynolds

12. Mihai te ngaihsutna pen mipil te ngaihsutna sangin muibun zaw thei hi. Warren Buffett

13. Kahaksat laitak kihel lo nahih manin, ka gualzawh ciangzong ah kihel khading in ki lam en kei in maw. Will Smith

14. Nasum neihzah simzo lai nahih le, paikik inla nasimzawh nawnloh madong nasem in. Leonardo DiCaprio

15. Online tung khawng a gualzo/minthang khatpeuh eng pahpah ding hilo hi. Kuamah in a guallelh nate uh post ngei selo uhhi. Jeff Bezos

16. Mipawlkhat te in ageel na uh apaing ding lunggulh uhhi. Pawlkhat te in piangsak uhhi. Michael Jordan

17. Midang te ngaihsutna (idea) piak ding baih mahmah thei a, sepkhiat taktak ding hamsa thei gige hi. Guy Kawasaki

18. Lungkia ke’n! Tuni haksa khading a, zingciang in hamsa zawlai ding hi. Ahihhang in thaiciang ahih le nang ading in sunnithak hongtang tading hi. Jack Ma

19. Nikhat niciang keihun hongtung ding ahih manin ah baihsa in ka kiging tawntung hi. Abraham Lincoln

20. Eite khempeuh khutkilen a kalsuan khawm ih hih nakle ihtup namun ih tungding hi. Aung San Suu Kyi

Zomite Hong Ki Delh Ngei

2020-07-06T06:22:00.000-07:00

Chin mite i cih lanlan ten tuma kum 20-30 lai in, Zomite ukna nuai ah om hihang ci-in, tua a ki panin dem cihtak in hong dem uh, delh cihtak in hong delh uh cih ki phawk kik hi. Ki ukna hoihlo cihteng tawh Laisinna, Kumpi nasepna cihlam peuhmah ki kin nawnlo hi.

Pilna zon hunteng sumzon hunin i laih a ki panin, i mipilte a nung thuap ding Laitan neih ki om nawnlo semsem in, Kawlgambup lailam a hoihlo pen ah Chin state hi aa, Chin state huam sungah eimi omna lampen a hoihlo pen ki hi toto hi.

Chin icih lamten hong delhdelh uh hong phata, tu in ahihleh Chin state zumlam ah amau vive dimta, amau kiangah deihna ki ngen, a ki phu hita mawk hi. Khangtak pawl khat in tu-in lainatna hong neihkik uh aa, amau i delhkik pianta hi.

Chin te ki pumkhat dan a lim gen thei mi ki tam mahmah hi. Amau tuma kum 20 lai pek a kipan Zomite hong delh, i ki pumkhat keileh a cihcih den uh hi aa, tu lamlam teh ki pumkhat lam tawh kisai hat mahmah uhhi.

Zomite dinmun pen Kawlgam ah Zomi omlo hong ki cihteh, tawmkhat hong lok, Covid-19 hangin Tedim panin Zato lian omna Falam, Kawlpi lam aten hong deihloh teh tawmcik laina pian panpan hihang. Zomibup i lainat mahmah nang, vai lian khat hong omloh in, ki pumkhat thei kei liangleng hi lawm hi.

Office mun tampi ah ulian pipi Zomi i om zawh nangin, Khangthakte tungah lainatna veina lianpi hong om nangin lunggulh huai mahmah hi. MP cihbel a ki laitoto den hilel aa, office zum ah ulianpipi cihte amau Pension dong mah kip thei hi. A piakhia mi utmaw, mi tungah deih ngen mi ut cihtawh hong ki bangta hi. Nong simsak manin Lungdam.

Thawn Tuang
July 6,2020

Party sangin a Mi thupi zaw

2020-07-03T15:19:00.000-07:00

Zogam sungah mi namdangte MP hong suaknuam omlo ding uhhi. A eiteng mah aki toktok hilel ngel hihang.

Kuakua Party a zo zongin, Zogam a zuunding Party te hilo aa, MP te ahihi. MP icih pen palai, Zomi MP icih Zomite adingin Palai ahihi. Palai icihteh hong uk gawp ding mi hilo aa, Zogam ading Kumpi tungah a phu, ngetna abawl dingte Palai kici hi.

Amau thu bangbangin a utteng mawk nget cihzong Palai hilo hi. Mipite ki tangsap, Zogam sungah aki tangsam bang cih a ensiam kisam hi. Palai pa in a ma ip sung aom sum tawh hong zuun ding hilo aa, kumpi budget tawh hong zuun ding ahihi. Kumpi neihsa sum leh paai a ngensiam MP kisam hi.

Party min cihbel ahoih zeza ta zongin, MP palai pa hong hoih tuan keileh lawhtaak ding omlo hi. Khua kim ah deihteng ki pulak sak ngeingai in, Sialpi Sialtal i ngawh phial zongin MP pa in hong deihsak keileh a lem vetlo ding hizel hi. Minam vai ah Sialpi Sialtal ki ngawh cihbel i ki lungkimsak nang suak hi. Lam khat pan mai et suak hi.

No khua, ko khua hong deihsak MP pa thupi mahmah hi. Mi pawl khat in a Party enzaw ding maw, a Mi enzaw ding ci uhhi. A gualzozo Party icih teisam hangin, agualzo penpen Party mee pia in, MP pa pen i khua, i Zogam adingin Sahang hong hileh lemlo zel hi. Zogam a zuunnuam, apuahnuam mipen ei Zomi sungah ami mahmah in, ki theih mahmah lel ding hi. Tu tadih in a Party sangin ami mahmah thupizaw hi.

Panmun khat ngahnop luat manin ki thehthang ding hilo aa, ki pumkhat in mapang khawmleng Sia Do Suan Mung cihdanleh, "ki hai thutuah lel leng", Siadaw Lian Khen Thang cihdanleh, " i khilh khak aleh vantung thungetna ngen leng", acih danin ki pumkhat limlim leng ut huai hi. Mimal lunggulhna tawh...

Thawn Tuang
July 3,2020

Ki Teen Dan tuamtuam

2020-03-10T07:08:00.000-07:00

Ki Teen Dan Tuam Tuam

Ki teendan nam tuamtuam om ta hi. Ni dang lai-in zong namtampi om mah leh tu hunteh ki teendan tampi ki behlap toto hi. Nop tuak ih sa zaw hiam? Thu man i sa zaw hiam?

1. Ki teenna siangtho leh a siangtho ki teenna

Hih nihte pen adeihna ki banglo hi. Lum khomkhin ten mopawi bawl thei veve uh a, tuate Pastor te'n, " ki teenna siangtho", ci se uh hi. Lum khawm nai ngiatlo te, " a siangtho ki teen", ci leuleu hi.

2. Nu le pa theihpih leh theihpihlo a ki teenna

Zo ngeina tawh ki teenna pen, "nu le pa theihpih ki teenna", ki ci hi. Zo ngeina ahilo nu le pa in theih pahlo ki teenna pen, "zawltai, ki guk teenna", ki ci hi. Ki gukteen te mo ki khua nung pi hi.

3. Ki ngai/it masa ki teenna, ki teenna neih masa ki it/ngai pan

Ki it ki ngai masa ki teenna pen nungak le tangval ki zawlleng, ki helhel in tua khit ciangin ki teenna aneihte pen, "ki it/ngai masa in ki teenna", neih ki ci hi. Ki teenna neih masa i cihteh tulai khua huntawh ki tuak in Percel acihte leh nu le pa in deihsak in ki gawmgawp cihte pen ki it/ngai masa lo uh ahih manin, "ki teenna neih masa ki it ki ngai", ki teenna ki ci hi.

4. Khatvei ki muhna tawh kiteenna, sau veipi ki ngaihzawh teh ki teenna

Pawi bawlna khawng ah ki mu vat in, khual zinna khawngah ki mu vat in tua panin ki it/ki ngai tuak in midang thudong nawnlo in ki ciah pihsuak cihte pen, " khat vei ki muhna tawh ki teenna", ki ci aa, hih bang danpen ki gukteen zong ki ci thei veve hi. Kum 7 bang ki ngai, ki it uh aa tua sungah siatna tuamtuam tampi om mah leh a ki teeng kha veve te pen, "sauvei pi ki ngaizawh teh ki teenna", ki ci hi.

5. Mel kimu nai lo ki teenna, mel ki mumu ki teenna

Online, Phone panin ki theikha in tua tung tawnin Zongeina mah tawh mel ki muse lo in ki teenna neite pen, "ki mu nailo ki teenna", ki ci hi. Innkhat sungah om khawmkhawm na pi Zongeina tawh ki teenna neih mello te pen, " mel ki mumu ki teenna" ki ci hi.

Tampi gen ding om lak ah hih teng lak ah na deihpen gen in la, na deihsak pen mi pia in hong kici leh nambat bang zahna mite na pia ngam tam.

Koi bang ki teenna na deih aa, koi bang ki teenna tawh ki teenna neih na hiam.

Thawn Tuang

Zomi Angvaan

Dec 10, 2011

Amah Ka Nau Hiven

2019-11-01T23:09:00.000-07:00

Ka Nau Hi Ven

Unau nih khuakim ah Vasa bengin ki zui uhhi. A u pen kum 12 gual hi aa, anau pen kum 6 gual khawng ahihi. Vasa zong tawm khat man uhhi. Inn a ciah kal dinguh ngaklah mahmah uhhi.

A ciah madeuh un guahzu ding ki thoi-in huihnung gawp aa, a unau un a innlam uh manawh in nawhtai mahmah uhhi. Guahmal te zong hong khia pianta in huihlah hatsemsem kawm hi. Amau zong Vasa a benguh tuahpha kisa in, inn a tunkal dinguh ngaklah mahmah uhhi. Nawh tai semsem uh aa, hong gimpian uhhi. A khua uhpen khamlak ahih manin to tai vava uhhi.

Anau zong inn a tunkal ding a ngaklah kikal leh a khe hong sui kha in deih bangin tai hat nawnlo hi. Guahlah tam semsem huihlah hat semsemta ahih manin a u in a nung ah anau pua in taipihzo nawnlo in gimpipi in pua hi. A khuanawl uh panin Papi khat in a muhteh ka inn vuah hong baang un ci-in amau zong baang uhhi. Papi pa in a nau a u in a puak a muhte gimsa lua mahmah ahih manin Papipa in na nau bang hangin pua na hiam cih a dotleh a u pa in, "Amah Ka Nau Hi Ven", ci ziau hi. Anau hehpihna itna tak tawh gim thuak keeikaipi mah in pua hi.

Itna neihten gimpipi haksa sa pipi in ih thuak haksatna te thudon in puakpih nuam hi. Ka u hiven, ka nau hiven cih zah dongin Zomipihte sungah ih cinlohna tampite itna tak tawh ki telsiamzo beek leng bangzah tak in et lawm ding aa, Biakinn ah Khomun leh Lenggahtui i zatte a manh nei hong lak semsem ding hi. Maisakna an leh tui zanghzangh na pi in mite tungah mawhmai sakzawhlohna khawng i neihkha hiam?

A tate hong itna hang mah tawh i mawhna i van gik khempeuh pua khia in Calvary mual tungah Sihna tawh Zeisu in hong zawhpih khinzo hi. Lungdam.

Thawn Tuang
Nashville TN USA
Oct 17,2015

Zomi Vaphual omdan nam 3

2019-09-11T07:50:00.000-07:00

Vaphual omdan nam 3
Zomi Vaphual pen pawl khat in, a tuamtuam in agen omta ahih manin tawm gensuk leng;

1. Ki mai ngat mah hoih ci
( ki mai ngat in, ho lung kum khawm mah hoih ci, pawl khat in ki mai ngatlua liangin, i kim i paam ate thu ki mulo, ki zalo ci)

2. Ih ngatna lam ki bang hoih ci
( I etna lam ki bang pen hoih aci om, i etna lam ki bang aa, ei leh ei i ki muh khakloh zong hoih kei aci om )

3. Ki nung ngat mah hoih ci
( ki nung ngat pen nung leh ma panin hong sim ding omleh zong ki thei, ki mu aci om hi, minam ki bang khat ki nung ngatngat cih hoihlo aci om)

Deih dan, khiat dan ki banglo ciat hi. A hoih lamin a La te'n ahoih lam mah in, mu thei lel hi. Siat lak ciat leng, ahoih omlo hi.

Zomite ki ciamtehna Zomi Vaphual pen ki mai ngat mah No.1 mah kei bangin hoih asa denden ka ahihi. Mailam khangthakte sungah tulai khanglak lawh pawlin, ama thu ki mang keileh Khaicii hoihlo hong tuh nuam tam simsim ta ahih manin, ki dawp huaisa ing. Lungdam.

Thawn Tuang
#T3Zomi
Sept 11, 2019

Thuman gen, Hangsan

2019-02-11T14:21:00.002-08:00

Thuman Gen
Nam Hih in Genleng

Khatna: hih pa pen a melvom, aha zong mi ahtawh ki banglo sau deuh, asamzong kiil hi.

Nihna: hih pa pen siamna neih in, a mel muhbek maitai suah in, mai ngap huai, lawm huai tuak hi.

Thuman gen veve pen, mite hehna dingin a gensiam om aa, mite lungkim nang a gensiam om hi.

Thuman ahita teu zongin, mite hehna ding, ki totna ding peuh i gen khakleh Thusia deih ki hi aa, hai hang sanna ahihi.

Thuman veve ki lemna, lungdamna agente pen thu hoih deih ahihi.

Thuhoih deihte in, thuman khempeuh pusuah saklo aa, mite muan leh belhtaak dingin, kep bit ding thu na om veve hi. Lungdam.

Thawn Tuang
#T3Zomi