அலையல்ல சுனாமி

காதலின்பின் மெளனம்

noreply@blogger.com (விச்சு) — Mon, 01 Apr 2013 09:08:00 +0000

நடந்துசெல்லும் பாதையில் கையில் கிடைக்கும் மரத்தின் இலைகளை பறிக்கும்போது அதற்கு வலிக்கும் என்று உணர்ந்திருக்கிறீர்களா!

காலில் எறும்புகள் மிதிபடும் என்பதை நாம் ஒருபோதும் யோசிப்பதில்லை.. அதற்கு நேரமும் இல்லை. இயல்பாய் இருப்பவனுக்கே இந்த நிலமை என்றால்.... காதலித்துப்பார் உலகத்தில் நீங்கள் மட்டுமே இருப்பதாய் உணர்வாய். உலகம் மறக்கும். சுற்றம் மறக்கும்.

காதலி
சரியென்று சொன்னால்
புல்லின் நிழலில் கூட
ஓய்வெடுக்கலாம்
எறும்புகளுடன்
ஓட்டப்பந்தயத்தில்
கலந்துகொள்ளலாம்..!

எதிர்வரும் மனிதர்கள் எந்த நிறத்தில் நம்முடன் பழகுகிறார்கள் என்பதை நம்மால் எளிதில் உணரமுடியாது. மனசுக்கு நிறமுண்டு. ஆனால் அந்த நிறம் அவனுக்கு மட்டுமே தெரியும்.

காதலி
மனசின் நிறத்தை
கண்ஜாடையில்
உணர்ந்துகொள்வான்
காதலன்..!

உலகம் எளியோர்களை எப்போதும் மதித்ததில்லை. தினமும் கோடானகோடி உயிர்கள் இறக்கின்றன. அத்தனையும் நமக்கு செய்திதான். நம்முடைய உறவினர் ஒருத்தர் யாரேனும் இறந்துவிட்டால் துக்கம் தாளாமல் அழுகிறோம்.

காதலி
மனசும் இறக்கிறது
நிராகரிக்கப்பட்ட
காதலால்..!

கோபங்கள் மனசை காயப்படுத்தும். கோபத்தில் வரும் வார்த்தைகளுக்கு முகம் கிடையாது. அது யாரையும் பார்க்காது. அதன் கடிவாளம் நம்மிடம் உள்ளவரை கோபம் நம்வசப்படும். காதலிலும் வரும் கோவம் வார்த்தைகளை வரவிடாது. அது மெளனக்கோபம்...

பறவைகள்
கிளைகளை நம்புவதில்லையாம்
நானும் உன்னை நம்பவில்லை
உன் மனதை மட்டுமே..!

காதலில் காதலியை மட்டுமே அங்குலம் அங்குலமாய் தெரியும். காதலில் தோற்றுப்பார் உலகமும், வாழ்வும் புரியும். வலி என்பதன் அர்த்தமும் புரியும். மெளனத்தில் உள்ள அர்த்தம் புரியும்.

வார்த்தையை கொல்வதும்
மெளனம்
உன்னை கொல்வதும்
மெளனம்தான்
மெளனம் அழகானது
பிரிதொருமுறை
பேசுவாய் எனும்வரையில்
மெளனம் சித்திரவதையானது
பேசவேமாட்டாய் எனும்போது
நானும் மெளனிக்கிறேன்.. !

தொலைந்த வார்த்தைகள்

noreply@blogger.com (விச்சு) — Sat, 02 Mar 2013 00:09:00 +0000

"இப்போதும்
பேசிக்கொண்டுதானிருக்கிறோம்
மெளனங்களால்…"

வாழ்க்கையில் ஒவ்வொருவரும் ஏதோவொன்றை தேடிக்கொண்டுதானிருப்பார்கள். நான் வார்த்தைகளைத் தேடிக்கொண்டிருக்கிறேன்.

“புரிந்து கொள்ளப்படாத மொழி
மெளனம்”

வைகறைப்பொழுது, அந்திப்பொழுது, இரவுப்பொழுது, நடுச்சாமம் எந்நேரமும் வார்த்தைகள் என்மீது பிள்ளையார் எறும்பாய் ஊறிக்கொண்டுதான் இருக்கும். சிலநேரங்களில் காக்காய் கடிபோல் கடித்தும் என்மீது துப்பியும் விழுந்துகிடக்கும்.

”பலயுகங்களாய்
காற்றில் பறவைகள் எழுதிக்கொண்டுதான் இருக்கின்றன
தரையில் பல உயிரினங்கள் எழுதுகின்றன
நீரிலும் மீன்கள் எழுதிக்கொண்டுதான் இருக்கின்றன
எதுவும் புரியாமலே தாவரங்கள் தலையசைக்கின்றன”

எந்தப்புத்தகத்திலும் இல்லாத வார்த்தைகளை நான் தேடிக்கொண்டு இருக்கின்றேன். நிறையப்பேர் வார்த்தைகளை விற்றுக்கொண்டுதான் இருக்கிறார்கள். நான் அவற்றை எல்லாம் பொறுக்கிகொண்டு இருக்கிறேன்.

“ வார்த்தைகளுக்கும் கால் முளைக்கும்
பொய்பேசும்போது! “

வார்த்தைகளை கோர்த்துப் படிக்கும்போது அவை ரசிக்க வைக்கிறது. அது ரகசியக்காதலையும் எழுதிச்செல்கிறது.

“ நீ எழுதும் வார்த்தைகளில்
நிச்சயமாய் நானில்லாமல் இருக்கலாம்
ஆனால்..
உன் இதயத்தசைத் துளிகளில்
எங்கேனும் சிறிது ஒட்டிக்கொண்டுதானிருப்பேன் “

நமக்குத் தெரிந்த அத்தனை வார்த்தைகளையும் பேசித்தீர்த்துவிட்டோம். நான் உன்னிடம் கொஞ்சம் கடன் வாங்கிக்கூட பேசியிருக்கிறேன். வார்த்தைகளும் ஒருநாள் தீரும் என்பதை அறிந்துகொண்டேன். எனக்கான வார்த்தைகள் எங்கேனும் ஒழிந்து கொண்டிருக்கலாம். எனக்கான வார்த்தையை நீ எழுதியவற்றில் இருந்தே நான் அறிந்துகொண்டேன். அது மெளனம்…

”காதலித்துப்பார்
பேசிக்கொண்டே இருப்பாய்
காதலில் தோற்றுப்பார்
மெளனமாய் இருப்பாய்”

நானும் ஆவிதான்

noreply@blogger.com (விச்சு) — Sat, 16 Feb 2013 10:24:00 +0000

என்னுடைய பிரச்சனையைத் தீர்க்க மருத்துவரிடம் சென்றுதான் ஆகவேண்டும் என முடிவெடுத்துவிட்டேன். விசாரித்துப் பார்த்ததில் டாக்டர் ஆவிதாசன்தான் சிறந்த மருத்துவர் என எல்லோரும் கூறினர். அவருடைய பெயரே வித்தியாசமாக இருந்தது. அவர்தான் ஆவிகளுடன் பேசுபவராம். இரவு எட்டு மணிக்கு அவருடைய மருத்துவமனைக்குச் சென்றேன். மருத்துவமனையைச் சுற்றிலும் புகைமண்டலமாக இருந்தது. எனக்கு மட்டும்தான் இப்படி தெரிகிறதா ! யோசித்தவாறே சென்றேன்.

மருத்துவர் என்னை அழைத்து இருக்கையில் அமரவைத்தார்.

" உங்களுக்கு என்ன பிரச்சனை?" டாக்டர் விசாரித்தார்.

எனக்கு சில வாரங்களாக எல்லாமே வித்தியாசமாக இருக்கிறது.

என்ன வித்தியாசம்?

யாரைப்பார்த்தாலும் பேய் மாதிரி தெரிகிறது. பல் நீண்டும், முடியை விரித்துப் போட்டவாரும் தெரிகிறது. எங்குபார்த்தாலும் புகை மண்டலமாக இருக்கிறது.

எப்போதிருந்து?

இரண்டு வாரத்திற்குமுன் டூவீலரில் செல்லும்போது கீழே விழுந்துவிட்டேன். தலையில் அடிபட்டது. அப்போதிருந்துதான்…

ஓ! அப்போ இது சாதாரண பிரச்சனைதான்.

“சாதாரண பிரச்சனையா !” என்னுடைய நிலைமையில் நீங்கள் இருந்தால்தான் உங்களுக்கு இந்த பிரச்சனையின் வீரியம் புரியும்.

சரி...! வேறெதாவது உங்களுக்கு வித்தியாசமாகத் தோணுகிறதா?

ஆமாம்.. முருங்கை மரத்தினைப்பார்த்தால் தொங்கவேண்டும்போல் உள்ளது. யாரையாவது பிடித்து ஆட்டவேண்டும்போல் இருக்கிறது. எதுவும் சாப்பிட பிடிக்கவில்லை. சிலநேரம் ரத்தம் குடிக்கவேண்டும்போல் உள்ளது. இப்போது உங்களைப் பார்த்தால்கூட ஆவி மாதிரிதான் தெரிகிறது.

டாக்டர் சிரித்தார்.

சார்.. நான் சீரியசா பேசிக்கிட்டு இருக்கேன்.. நீங்க சிரிக்கிறீங்க !

“வீட்டிற்கு போக பிடிக்காதே?” டாக்டர் அன்பாக விசாரித்தார்.

அட! ”ஆமாம் சார்” என்றேன்.

சுடுகாட்டுக்கு இப்போ தனியா பயமில்லாமல் போவீங்களே?

ஆமாம்..ஆமாம்.. இதுக்கு என்ன சார் ட்ரீட்மெண்ட்? சரியாயிடுமா?

இதுக்கு மருந்து மாத்திரை எதுவும் தேவையில்லை. இது நார்மல்தான்..

என்னது நார்மலா!

ஆமாம் ஆவியா இருந்தால் இது நார்மல்தானே.. மனிதர்கள்தான் பயப்படுவார்கள்.

“ஆவியா? நானா?” ஆச்சரியமாகவும் பயத்துடனும் கேட்டேன்.

ஆமாம்.. நீங்கள் தலையில் அடிபட்டு இறந்துவிட்டீர்கள். இப்போது ஆவிகள் உலகத்தில் இருக்கிறீர்கள்.

அப்போ நீங்கள் மட்டும் எப்படி இங்கே? ஆவிகளுடன் பேசுகிறீர்கள்...

ஹாஹா....ஹா.. என சிரித்துக்கொண்டே சொன்னார். நானும் ஆவிதான். புதிதாக ஆவிகள் உலகத்திற்கு வருபவர்களுக்கு இதுதான் பிரச்சனை. அவர்களுக்கு கவுன்சிலிங் கொடுக்கத்தான் இந்த டாக்டர் ஆவிதாசன்.

ஆவி அரண்டு போய் அமர்ந்து இருந்தது.

பூ..காய்..பருத்தி

noreply@blogger.com (விச்சு) — Thu, 17 Jan 2013 12:54:00 +0000

”நல்லவேளை
பரிமாறும்போதே
பசியாறிவிட்டேன்”

இத்தனை நாள் ஒழுங்காய்தானே இருந்தான். எங்கிருந்து வந்தது இந்த காதலும், கத்தரிக்காயும். அப்பாவின் கைபிடித்துக்கொண்டுதான் அலைவான். அப்பாதான் அவனுக்கு எல்லாமும்... அவனுக்கு இருக்கும் ஒரே நண்பன் அப்பாதான். இப்போது அவனிடம் கேளுங்கள்.. உன்னுடைய முதல் எதிரி யாரென்று? நிச்சயம் அப்பாதான்.

”எந்த ஒளி பட்டால்
இந்த பூ பூக்கும்”

அவளுக்கு எல்லாமே அம்மாதான். அம்மா அவளுக்கு தலையில் அழகாக ரெட்டை ஜடை பின்னி, சிவப்பு கலர் ரிப்பன் கட்டி, கனகாம்பரம் பூச்சூடி அழகு பார்ப்பாள். அம்மாதான் உலகம். அம்மாவிற்கு பிடித்த எல்லாமும் இவளுக்கும் பிடிக்கும். இப்போது அவளிடம் கேட்டுப்பாருங்கள். உனக்கு பிடித்தது யாரென்று? நிச்சயம் அம்மா இல்லை.

மண்ணும் கருக்கொண்டது
மழைநீர் புகுந்ததால்!

அவளின் நினைவுகள் அவனை ஆட்கொண்டது. அவனுடைய சைவ நினைவுகள் அசைவமாக மாறிக்கொண்டிருந்தன. திமிர் பிடித்த கரையானாய் அவன் மனசை அரித்துக்கொண்டிருந்தது. எப்படியாவது கேட்டுவிடவேண்டும். நீ என்னை காதலிக்கிறாயா? கண்ணாடி முன்தான் கேட்டுக்கொள்ள முடிந்தது.

”பறந்துவந்த ஒரு
அசைவ விமானம்
கொத்தத்தொடங்கின
அவள் இதயத்தை”

இவன் எல்லோரையும் போல்தான் சைக்கிள் ஓட்டுகிறான். பிறகு ஏன் இவன் மட்டும் என் மனதில் புகுந்தான். ஒருவேளை பறக்கிறானோ! மனப்பிரமையா? அவளாக மனதில் கேட்டுக்கொண்டாள். இவள் சைக்கிளை உரசியபடி வேகமாகப் பறந்துசெல்வான். திடீரென மனசையும் உரசிச்சென்றுவிட்டான்.

“சத்தியமாக
இயல்பாகத்தான் இருக்கிறேன்
பலதடவை சொல்லிக்கொண்டான்
சொரணையில்லாமல்”

குளியலறைக்குள் புகுந்துகொண்டால் பச்சைத் தண்ணீர் சுடுதண்ணீர் ஆகும்வரை குளித்தான். தலைமுடியை சீவ ஆரம்பித்தால் சீப்பு நுனி தேயும் வரை சீவிவிட்டு பின்பு முடிகலைத்துதான் செல்வான். சாப்பிட்டுவிட்டு பசிக்குது என்பான். இப்போதெல்லாம் ஆடையில் அதிக அக்கறை எடுத்துக்கொண்டான். அவள் உடுத்தும் ஆடையின் நிறத்தில் அள்ளிக்குவித்தான்.

“ பால் கொதித்தது
ஆவியானான் அவன்”

அவளுக்கு ஜன்னல் வீடானது. இப்போதெல்லாம் தலைகீழாகவே படிக்க ஆரம்பித்துவிட்டாள். வெறும் தட்டில் சாப்பிட ஆரம்பித்தாள். அடுப்பில் பாலை பொங்கவிட்டு வேடிக்கை பார்த்தாள். கண்கள் நிலைகுத்தி தன்நிலை மறந்தாள். பில்லி சூனியமோ என நினைத்து வீட்டில் பயந்தார்கள். அது அந்த ஆண்பிள்ளையின் சூனியம் என அறியாமலேயே!

”பழம் அழகுதான்
வண்டுதான் குடைந்துகொண்டிருந்தது”

இருவரும் மனசைத் தொலைத்து தேடிக்கொண்டிருந்தார்கள். வாழ்க்கை அவர்களை தொலைத்துவிட்டிருந்தது.

“இதயம் வரைந்துகொண்டிருந்தேன்
ஒடிந்தது பென்சிலும்”

இருவருக்கும் மதிப்பெண் குறைந்தது. வீட்டில் காது நிறைந்து வழியும்படி திட்டு விழுந்தது. பள்ளி சரியில்லை, ஆசிரியர் சரியில்லை, நண்பர்கள் சரியில்லை, நேரம் சரியில்லை, ஊரே சரியில்லை என்று பலவாறு சிந்தித்தனர் அவன் வீட்டாரும், அவள் வீட்டாரும். அவர்களுக்கு யார் சொல்வது? இருவருக்கும் ஹார்மோன் சரியில்லை என்று.

“நான் பார்த்தேன்
புள்ளியாய் நீ
அங்கிருந்து
நீயும் பார்
நானும் புள்ளிதான்”

காமெடி காதல்

noreply@blogger.com (விச்சு) — Tue, 08 Jan 2013 13:14:00 +0000

உன்னை பீச்சுக்கு அழைத்தேன்
வரமறுத்தாய்
கோவிலுக்கு அழைத்தேன்
உடனே வந்தாய்
அப்புறம்தான் தெரிந்தது
ஒருவாய் சுண்டலுக்கு என்றாய்
நீ என்னையே உற்றுப்பார்த்தாய்
வெட்கமாய் இருந்தது
அப்புறம்தான் தெரிந்தது
நீ பார்த்தது
என் சம்பள கவரை என்று
ஜவுளிக்கடை அழைத்தாய்
சந்தோசமாக வந்தேன்
எனக்கு முந்நூறு ரூபாய் சட்டை
இன்னும் சந்தோசப்பட்டேன்
உனக்கு ஐயாயிரம் ரூபாய் புடவை
பில்லை மட்டும் என்னிடம் கொடுத்தாய்
மெலிந்துபோய் இருக்கிறாய்
நன்றாக சாப்பிடு என்றாய்
என்ன ஒரு அக்கறை என நினைத்தேன்
உணவகம் அழைத்து சென்று
வாயில்வராத பெயரை எல்லாம் சொல்லி
ஆர்டர் செய்தாய்
எனக்கு ஒரு தட்டும் நீ முப்பது
தட்டுமாய் தின்னு தீர்த்தாய்
என் சம்பள கவர் இன்னும் மெலிந்தது
நீ இன்னும் பருத்தாய்
இறுதியாக சொன்னாய்
நான் லவ்வுவது உன்னையல்ல
உன் நண்பனை என்று
அவனை பழிவாங்க நினைத்தேன்
நல்லபடியாகவே நடந்தது
நானும் சொன்னேன் நான் லவ்வியது
உன்னையல்ல
உன் தங்கைகளை என்று!

இறுதிப்பயணம்

noreply@blogger.com (விச்சு) — Tue, 08 Jan 2013 13:08:00 +0000

அதிகாலை நேரம்

கதிரவனின் கதிர்கள்

சிறகை விரித்து வெப்பம் பரப்பியது

முகவரி இல்லாத இடத்திற்கு

தனிமைப்பயணம் மேற்கொள்ள

ஆயத்தப்படுத்திக்கொண்டேன்

பயணத்திற்கு தேவையானவற்றை

தயார்செய்தேன்

எடுத்துச்செல்ல ஒன்றுமில்லைதான்

சில மாதங்கள் முன்பு

சுற்றுலா கிளம்பும் ஒரு வேளையில்

என் ஒல்லியான தேகத்தினை

கண்ணாடியில் பார்த்தபோது

மூக்கு கொஞ்சம் அளவாக

இருந்தால் நன்றாகயிருக்கும்

இன்னும் கொஞ்சம் குண்டாக

இருந்தால் நன்றாகயிருக்கும்

கொஞ்சம் சிவப்பாக

இருந்திருக்கலாமோ என

எல்லாம் குறைகளாகவே தெரிந்தன

இப்போது எதைப்பற்றியும் யோசிக்கவே இல்லை

மதியம் தாண்டிவிட்டது

என்னை வழியனுப்ப பலர்

வெளியூரிலிருந்தும் வந்துவிட்டனர்

வீட்டைவிட்டு வெளியே வந்தேன்

சூரியனின் வெப்பம்

தகிப்பது போல

வந்தவர்கள் உணர்ந்தனர்

தெருவில் ஒரு பெண் அழுதுகொண்டிருந்தாள்

தன் காதலன் மறைந்துவிட்டதாக

ஒரு பெரியவரும் அழுதார்

தன் மகன் இறந்துவிட்டதாக

ஒரு சிறுமி அழுதாள்

தன் சித்தப்பா செத்துவிட்டதாக

ஒரு பாட்டி அழுதாள்

தனக்கு முன் பேரன் இறந்துவிட்டதாக

எல்லாம் ஒருவர்தான்

முகமூடிகள்தான் வேறு

பயணத்தினை தொடர்ந்தேன்

கூடவே சிலர் வந்தனர்

செத்ததூரம் துணைக்கு

வருவதாகக் கூறினர்

சிலர் அழுவதும்

பலர் மனதுக்குள்

சந்தோசப்படுவதுமாக இருந்தனர்

காதலனை இழந்த பெண்

மட்டும் உயிரைக்கொடுத்து

அழுதுகொண்டிருந்தாள்

யாரும் சட்டை செய்யவில்லை

வழியில் மணக்கோலத்தில்

ஒரு ஊர்வலம்

என்னைப்பார்த்ததும் திகைத்து

ஒதுங்கி வழிவிட்டனர்

மணமகனும் மணமகளும்

சந்தோஷத்தில் திளைத்தனர்

பலர் வியர்வை வழிய வழிய

என் உடன் வந்தனர்

என்னை மகிழ்ச்சியாக்க

முயன்று தோற்றனர்

மலர் தூவியும்

சத்தங்கள் எழுப்பியும்

வெடிபோட்டும் வந்தனர்

மாலைநேரம்

சூரியன் ஓய்வெடுக்கவும்

நிலவு தன் பணியைத்

தொடரவும் தயாராகியது

நேரமாகிவிட்டது

என சிலர் அவசரப்படுத்தினர்

ஒவ்வொருவரும்

பரபரப்பாக அவரவர்

வேலையில் இயங்கினர்

இரவு கருப்பு நிறத்தை

தன்மேல் பூசிக்கொண்டது

நிலவு யாருக்காகவோ

ஒளிபாய்ச்ச தொடங்கியிருந்தது

எப்போதும்போலவே

மிகவும் குளிர்ச்சியாக இருந்தது

பின்பு பிரயாணக்களைப்பில்

எனக்கான இடத்தில் படுத்துக்கொண்டேன்

சுத்தமாக இருட்டியிருந்தது

காற்றும் இன்னபிற

சத்தங்களும் அடங்கிவிட்டிருந்தன

வந்தவர்கள் நேரமாகிவிட்டது

எனப் புலம்பியபடியே

கிளம்பிவிட்டிருந்தனர்

தனிமையில் என் பயணத்தினைத்

தொடர்ந்தேன் இனிமையாகவே!

கடைசி பெஞ்ச் மாணவன்

noreply@blogger.com (விச்சு) — Tue, 08 Jan 2013 13:00:00 +0000

கடவுள் உன்னை
இலக்கணப்படிதான் படைத்துள்ளார்
இம்புட்டு அழகா!
நீயும் தமிழும் ஒன்றுதான்
மிக இனிமையாக

தயவு செய்து
ஆங்கிலத்தில் பேசாதே
உன் மனதைப்போலவே
எனக்கு எதுவும் புரியவில்லை

உன்னைக் கூட்டவும் முடியாமல்
கழிக்கவும் முடியாமல்
என் காதலில்
பெருத்துக்கொண்டே போகிறேன்
உன்னைப்பார்த்த நாளிலிருந்து
கணக்கில் நான் ஜீரோதான்

இதயத்தின் படம் வரைய
அறிவியல் ஆசிரியர்
கட்டளையிட்டார்
நான் உன்னை வரைந்து
கொண்டிருக்கிறேன்

புவியின் அமைப்பை போல
உன் உடலின் அமைப்பினை
கொஞ்சம் வரைந்து கொடு
இதயம் எங்குள்ளது
என அறிந்து கொள்வேன்

விரைந்து வா!
உன் தந்தை என்மீது
போர் தொடுக்கும்முன்
இருவரும் சேர்ந்து
நம் படைகளைப் பெருக்கி
புது வரலாறு படைக்கலாம்!

ஓலைக்குடிசை

noreply@blogger.com (விச்சு) — Sat, 22 Dec 2012 12:36:00 +0000

இரவு வானின் அழகை
எங்கள் ரசிக்க முடியாத
ஓட்டை குடிசையின்
வழியே ரசிக்கலாம்
ஒரு மழைக்காலத்தில்
கிழிந்த பாய்
பழைய துணி
நைந்துபோன சாக்கு
இத்துப்போன கிடுகு
வீணாய்போன பாலித்தீன்
இவற்றில் ஏதோ
ஒன்றை வைத்து
தற்காலிகமாய்
மழை நிற்க வைப்போம்
அடுத்த மழைக்குள்
ஓட்டையை சரி செய்யனும்
இயலாமையை வெளிப்படுத்துவார்
தந்தை
எனக்கும்
ஓலையில் செய்த
கால்சட்டை எங்கேனும்
கிடைக்குமா?
இவற்றில் ஏதேனும்
ஒன்றை வைத்து மறைத்து
நானும் மானம் காத்துக்
கொள்வேன்!

வழிப்போக்கனின் கதை

noreply@blogger.com (விச்சு) — Fri, 21 Dec 2012 13:27:00 +0000

திசை தெரியாத பறவை
ஒன்று பறந்து கொண்டிருந்தது
தன் சிறகுகளை வேகமாக
உதிர்த்தபடி....

எங்கே போய் சேரவேண்டும் என்பது தெரியாமலேயே பயணம் செய்தான் வழிப்போக்கன் ஒருவன். நீண்ட தனிமைப் பயணம் அது. வெற்று மனிதனாகத்தான் சென்றான். வழியில் பூஞ்சோலைகள், அருவிகள், மரங்கள், பறவைகள் என வரிசையாக ரசித்துக்கோண்டே சென்றான். இடையிடையே பழங்களை உண்டு பசியாறினான்.

ஒரு பனிக்கால காலைப்பொழுதில் இன்னுமொரு வழிப்போக்கனைக் கண்டான். தனிமையில் இருந்த அவனுக்கு அது நிச்சயமாக மகிழ்ச்சி தரக்கூடியதாக இருந்தது. இதுவரை தேக்கி வைத்திருந்த பேச்சினை எல்லாம் அவனிடம் பேசினான். அவனும் பொறுமையாகக் கேட்டான். அவன் திறமைசாலி போலும். நிறைய நாட்டுப்புற பாடல்கள் பாடினான். உண்பதற்கு சில வித்தியாசமான உணவுகளையும் கொடுத்தான். அவனுடைய காதல் கதைகளைக் கூறினான். இடையிடையே அழகான கவியும் படைத்தான்.

”என் விழிகளின் மூலம்
நீ கனவு கண்டுபார்
என் அன்பு உனக்கு விளங்கும்”

அவன் பேச்சினை ரசித்தான். இதுவரை அதிகமாக யாருடைய பேச்சினையும் கேட்டறியாத இவனுக்கு அவன் பேச்சு பிடித்திருந்தது. இரவும் பகலும் அவன் பேச்சினைக் கேட்டான். சந்தோசத்தில் இரவினில் புரண்டான். அவன் அழுக்கினை பவுர்ணமி நிலா வந்து கழுவியது. அவன்மீது அன்பு அதிகமானது. சண்டைகள் போட்டனர், சந்தோசங்களைப் பகிர்ந்தனர், இவன்மீது உரிமை எடுத்து திட்டினான். அது இவனுக்கு புதிதாக இருந்தது. அனைத்தையும் ரசித்தனர். இருவரிடமும் பரஸ்பரம் அன்பு அதிகரித்தது. திகட்டவில்லை இந்த வழிப்போக்கனுக்கு.

”ஊமை பேசும் மொழிகளை
புரிந்து கொள்ளும் எனக்கு
நீ பேசும் மொழி
புரிந்து கொள்ள இயலவில்லை”

திடீரென அவன் செல்லுமிடத்திற்கான வழி ஒரு இடத்தில் பிரிந்தது. அவனை அழைத்துச்செல்ல நண்பர்கள் நிறைய காத்திருந்தனர். தனிமையில் செல்லும் இவனுக்கு அது ஆச்சரியமாக இருந்தது. அனைவரும் சற்று நேரம் அமர்ந்து பேசினார்கள். அவன் நண்பர்களுடன் செல்லும் நேரம் நெருங்கியதால் இவனைத் தவிர்த்தான்.

வெற்று மனிதனாக வந்த இந்த வழிப்போக்கன் திரும்பவும் வெற்று மனிதனாகவே புறப்பட்டு சென்றான். ஈசல் மடியுற மாதிரி சடக்குனு மடிஞ்சுட்டா அவனின் நினைவுகளை அவமதித்தது போலாகிவிடும். எனவே இனிமையான நினைவுகளுடன் திசை தெரியாத அவன் பயணமும் தொடர்ந்தது. கற்களும், முற்களும், கொடூர விலங்குகளும் இருக்கும் பாதையைத் தேர்ந்தெடுத்து நடந்தான். இனி யாருமற்ற தனிமைப்பாதையிலே சந்தோசமாகவே சென்றான். அவனின் நினைவுகளும் இவனுடன் பயணித்தன.

தா...வரம்

noreply@blogger.com (விச்சு) — Wed, 21 Nov 2012 01:56:00 +0000

நான் இல்லையென்றால் பூமியில்

காற்றும் இல்லை

எனக்கும் கர்வம்தான்

நான் இல்லையென்றால்

பெட்ரோல்... நிலக்கரி

எதுவுமில்லை

கர்வம்தான்

நான் இல்லையென்றால் எந்த

உயிரினமும் உலகிலில்லை

கர்வம்தான்

நான் இல்லையென்றால் பூமியின்

வெப்பம்கூடி சுடுகாடாயிருக்கும்

கர்வம்தான்

மனிதனின் மானமும் காப்பேன்

உயிரையும் காப்பேன்

கர்வம்தான்

உலகில் உயரமானவனும்

நான்தான்

கர்வம்தான்

பரந்துவிரிந்து சிறகடிக்கும்

என்னை மனிதன் ஒருவன்

ஜட்டிக்குள்ள

குட்டிபோட வைத்தான்

அவனுக்கு இது கர்வம்தான்...!!!

எனக்கும் தா... ஒரு வரம்!!

நானும் அவனை வளர்க்கவேண்டும்

என் ஜட்டிக்குள்...!!!

ஒரு டவுட்!

noreply@blogger.com (விச்சு) — Thu, 08 Nov 2012 01:51:00 +0000

வரவர நானும் அறிவாளியாகிக்கிட்டே இருக்கேன். ஒரு டவுட்டுனு சொல்லிட்டு நிறைய கேட்டிருக்கேன்.

ஒருதலைக்காதல்

இருவரும் காதலிச்சால்தானே அது காதல். அப்படித்தானே! அப்போ... ஒருதலைநினைப்பு!

குடிச்சிட்டு வண்டி ஓட்டக்கூடாது
அப்போ பார்ல வண்டியை பார்க் பண்ன எதுக்கு இடம் ஒதுக்குறீங்க...

ஒவ்வொரு ஆணின் வெற்றிக்கு பின்னாலும் ஒரு பெண் இருக்கிறாளாம்!

அப்போ.. ஒவ்வொரு பெண்ணின் வெற்றிக்கு பின்னால் யார் இருக்கிறாங்க? (ஏன் பின்னாலேயே இருக்கிறாங்க..)

பெண்புத்தி பின்புத்தி

ஏன் பின்னை மட்டும் சொல்லனும். ஒரு அறுவாள், கத்தி, பிளேடு ஏதும் சொல்லக்கூடாதா?

தகுதித்தேர்வு

ஒன்றுமறியா குழந்தைகளுக்கு பாடம் சொல்லிக்கொடுக்க மட்டும் ஆசிரியர்களுக்குத் தகுதித்தேர்வாம்! நிறைய விசயங்கள் அறிந்த மக்களை ஆட்சி செய்பவர்களுக்கு மட்டும் தகுதி எதுவும் வேண்டாமா? ( அட! குறைந்த பட்சம் பள்ளிக்காவது சென்றிருக்க வேண்டாமா...)

ஃபேஸ்புக்’

ஆனால் நிறைய பேர் ஃபேஸையே மறைச்சுதான் இருக்காங்க.. இதுக்கு ஏதும் வேறபேர் வைக்கலாம்ல...

பாடல் எழுதினால் பாடலாசிரியர். கதை எழுதினால் கதாசிரியர். அப்போ.. பரீட்சை எழுதினால்?

அவன் மட்டும் ஸ்டூடெண்டா?

குறட்டை போட்டா மத்தவங்களுக்கு கேட்குது .. ஏன்? அவர் குறட்டை அவருக்கு கேட்க மாட்டுக்கு?

விளக்கம் கொடுப்பவர்களுக்கு கீழே வழங்கப்பட்டுள்ள சான்றிதழ் வழங்கப்படும். காப்பி பேஸ்ட் பண்ணிக்கொள்ளவும். சான்றிதழ் பிடிக்காதவர்கள் வேறு சான்றிதழை நீங்களே டிசைன் பண்ணி வைத்துக்கொள்ளவும். நீண்ட விளக்கம் வேண்டாம். கம்பெனி ஆட்களுக்கு புரியாமல் போய்விடும்.

படிப்பு

noreply@blogger.com (விச்சு) — Sat, 03 Nov 2012 01:35:00 +0000

படிப்பு என்றால் என்ன? மனிதனை உருவாக்குவதே படிப்பு. அப்போ! படிக்காதவனெல்லாம் மனிதனில்லையா? பக்குவப்பட்ட, அறிவுடைய, சிந்திக்கும் திறனுடைய ஒருவனை உருவாக்குவதே கல்வி. உலகைப்பற்றி அறியவும் பலதரப்பட்ட சம்பவங்களை தெரிந்து கொள்ளவும்தான் படிப்பு உதவும்.

அந்த படிப்பை ஒருவன் வாழ்க்கையில் எப்படி பயன்படுத்துகிறனோ அவனே வெற்றியடைகிறான். என்னுடன் படித்தவர்களில் பல மாணவர்கள் நல்ல மதிப்பெண் எடுத்தனர். அதில் இன்னும் சிலர் வாழ்க்கையில் ஒரு நல்ல நிலைமையை அடைய முடியாமல் தவிக்கின்றனர். ஆனால் சராசரி மதிப்பெண் எடுத்த பலர் வாழ்க்கையில் ஒரு நல்ல அல்லது வெற்றிகரமான நிலைமையை அடைந்துள்ளனர். ஏனெனில் நன்றாக படிக்கும் பலர் புத்தக அறிவு மட்டுமே போதும் என்றிருந்துவிட்டனர். அதற்குமேல் வாழ்க்கைக்கல்வி என்ற ஒரு விசயம் இருப்பதை மறந்தும் விட்டனர்.

சிலர் அரசுவேலை ஒன்றையே குறியாக வைத்து படிக்கின்றனர். ஆனால் அது தராத ஒரு வெற்றியை தனியார் வேலைகள் தருகின்றன. அரசு வேலையில் இருபது வருடங்களில் கிடைக்கும் பலன்களில் ஒரு நல்ல தனியார் நிறுவனத்தில் வேலை செய்வதால் கிடைக்கும் பலன்கள் பத்து வருடத்தில் கிடைக்கின்றன. ஆனால் அதனையும்விட சிறந்த ஒன்று சுயதொழில்.

சுயதொழிலில் பல இலாபங்கள் நிச்சயமாக உள்ளன. கடினமாக உழைத்தால் பலபடிகள் வாழ்க்கையில் முன்னேறலாம். கற்றுக்கொள்ள வேண்டியது படிப்பைவிட வாழ்க்கையில் எப்படி முன்னேறுவது என்பதையே ஆகும். இதனை வேறுவிதமாகவும் கூறலாம். படிக்கும் படிப்பினை வாழ்க்கையில் எப்படி தொடர்புபடுத்துவது என்பதைத் தெரிந்து வைத்துக்கொள்ள வேண்டும். ஒரு பிரச்சினையை எப்படி தீர்ப்பது, எவ்வாறு ஒரு நல்ல முடிவினை எடுப்பது என்பது போன்ற விசயங்களை அறிந்துகொள்ள வேண்டும். நேர்முகத்தேர்வினை எவ்வாறு எதிர்கொள்வது, குழுவிவாதத்தில் எப்படி பங்குகொள்வது என்பதையும் நன்கு அறிந்துகொள்ள வேண்டும். அதை இன்றைய கல்விமுறை கற்றுக்கொடுக்க மறந்துவிட்டன. பாடத்திட்டமும் அதைச்சொல்லித்தர முயற்சிக்கவில்லை என்பது காலத்தின் கொடுமையே.

குழந்தைகளையும் படி படி என்று நச்சரிக்காமல் அவர்களுக்கு பிடிக்கும் பல விசயங்களில் ஈடுபடச்செய்யலாம். அது குழந்தைக்கு நிச்சயம் பிற்காலத்தில் உதவும். முதல் மதிப்பெண் எடுக்கும் மாணவன்தான் சிறந்த மாணவன் என்ற எண்ணத்தினை முதலில் மாற்ற வேண்டும். எல்லோரும் முதல் மதிப்பெண் எடுத்தால் முதல் என்பதற்கே அர்த்தமில்லை. எந்த துறையில் ஒருவனுக்கு திறமை இருக்கிறதோ அதில் ஈடுபடச்செய்வதுதான் சாலச்சிறந்தது.

காக்கா பிடித்தல்

noreply@blogger.com (விச்சு) — Fri, 26 Oct 2012 12:47:00 +0000

சிறிய வயதில் காகம் வடையைக் தூக்கிக்கொண்டு போன கதையில்தான் முதன்முதலாக காகம் அறிமுகமானது. அதில் காகமானது மற்றவர்களை ஏமாற்றும் என்றே கற்பித்தார்கள். பின்பு ஒரு கதையில் புத்திசாலியாக சித்தரிக்கப்பட்டது. குடிப்பதற்கு தண்ணீர் கிடைக்காமல் ஒரு காகம் அலையும் எனவும் சிறிதளவு தண்ணீர் உள்ள ஒரு மண்பானையில் கல்லைத்தூக்கி போட்டு நீரை நிறையவைத்து தண்ணீர் குடித்துவிட்டு செல்லும். அப்போது முதல் காகத்தை நிறையவே நேசித்தேன். எங்கள் வீட்டு எதிரில் செல்லும் மின்கம்பியில் வரிசையாக காகம் அமர்ந்திருக்கும் அழகே தனிதான். ஆனால் இப்போது காகத்தை பார்ப்பதே அரிதாக உள்ளது. உண்மையிலேயே காகம் இனம் அழிந்துகொண்டு வருகிறதா எனத்தெரியவில்லை. வீட்டு மொட்டை மாடியில் வடாம் காயவைக்கும்போது எதுக்கு பயப்படுகிறார்களோ இல்லையோ காகத்திற்கு பயப்படுவார்கள். ஆனால் அந்த காகத்தினை கூப்பிட்டு விரதமிடும் நாளில் மட்டும் உணவும் வைப்பார்கள். (ஆனா வடாம் திங்கக்கூடாது.. என்ன ஞாயம் இது) சிலர் தினமும் உணவு வைப்பதை கண்டிருக்கிறேன்.

பி.மன்தேய்ஃபெல் எழுதிய ”இயற்கை விஞ்ஞானியின் கதை” என்ற நூலில் காகம் பற்றிய அருமையான தகவல் கிடைத்தது. அதனை பகிர்ந்து கொள்கிறேன். காக்கைகளின் மூளை பெரும்பாலான பறவைகளின் மூளையைக்காட்டிலும் அதிக வளர்ச்சி பெற்றது. கூர்ந்து கவனித்தால் விசித்திரமான நிகழ்ச்சிகளைக் காணலாமாம். வயல்களில் உள்ள பூச்சிகளையும் உணவாகக் கொள்வதால் உழவர்களின் நண்பன் எனப்படுகிறது. இறந்துபோன உடல்களையும் இது தின்பதால் துப்புரவாளர் என அழைக்கலாம். காகம் பொதுவாக அறிவுத்திறன் உடையது.

உத்திரப்பிரதேச வேட்டைக்காரர் ஒருவர் விந்தையான நிகழ்ச்சி ஒன்றை வருணித்திருந்தார்.. ஒரு சுரங்கப் பொறியாளர் ஒருவர் குறி தவறாமல் சுடப்பழகுவதற்கு தினமும் காக்கைகளைச் சுடத்தொடங்கினார். சில நாட்களில் காக்கைகள் அவரைக்கண்டதும் ஓடத்தொடங்கின. இதனால் அவர் குப்பைக்கிடங்கின் அருகில் இருக்கும் ஒரு கொட்டடியில் பதுங்கிக் காத்திருந்து பொறியாளர் பொறி வைத்தார். குப்பைக்கு உணவு உண்ண காக்கை வரும் என காத்திருந்தார். ஆனால் காக்கைகள் அவரைப் பார்த்துவிட்டன. மரத்தின் உச்சியில் பதுங்கி இருக்கும். அவர் சென்ற பின்புதான் காகம் பறக்கத்தொடங்கும்.

மறுநாள் பொறியாளர் ஒரு நண்பருடன் கொட்டடிக்குள் போனார். நண்பர் உடனே வெளியே வந்துவிட்டார். தான் சென்றுவிட்டதாக நினைத்து காகம் வரும் என பொறியாளர் நம்பினார். ஆனால் இந்த தந்திரம் பலிக்கவில்லை. அடுத்த நாள் இரண்டு நண்பர்களுடன் கொட்டடிக்குள் போனார். நண்பர்கள் உடனே வெளியே வந்துவிட்டனர். ஆனாலும் காக்கைகள் ஏமாறவில்லை. இவர் எழுந்து சென்றபின்புதான் காகம் பறந்து குப்பை மேட்டிற்கு வந்தது. பொறியாளருக்கு பயங்கர கோபம். காக்கைகள் என்ன அவ்வளவு அறிவாளியா? அதை வென்று காட்டுவேன் என்றார்.

விடமாட்டேன் காக்கைகளை என உணர்ச்சி பொங்க சபதமிட்டு அடுத்தநாள் மூன்று நண்பர்களுடன் கொட்டடிக்குள் போனார். மூன்று நண்பர்களும் உடனே கொட்டடியிலிருந்து வெளியேறினர். இப்போது காக்கைகள் ஏமாந்துபோய் பறந்துவந்தன. இப்போது பொறியாளர் வென்றார்.

இந்த விபரங்களை எழுதிவிட்டு அந்த வேட்டைக்கார நண்பர், காக்கைகளால் மூன்றுவரைதான் எண்ணமுடியும் அதனால்தான் மூன்று நண்பர்கள் வெளியேறியவுடன் அவரும் சென்றுவிட்டதாக எண்ணிவிட்டன என்று முடிவு செய்தார். என்ன ஒரு வில்லத்தனம். காக்காவுக்கு எழுதப்படிக்கத் தெரியாதுன்னு நினச்சுட்டாரு போல.

இது உண்மையிலேயே சரிதானா? மூன்று நண்பர்கள் வெளியேறும்போது நெருக்கமாகச்சென்றிருக்கலாம். காக்கைகள் அவரும் சென்றுவிட்டதாக எண்ணி பறந்திருக்கலாம். பொதுவாக தங்களுக்கு தீங்கு செய்பவர்களின் முகங்களை காக்கைகள் எளிதில் மறக்காதாம். இவற்றின் அறிவுத்திறனுக்குக் காரணம் அதன் மூளைப்பகுதியில் அமைந்துள்ள 'நிடோபோடாலியம் ஆகும். நிடோபோடாலியம் என்பது பறவைகளின் அறிவுத்திறனுக்குக் காரணமாக உள்ள மூளையின் செயல்பாட்டுப் பகுதியாகும். சிம்பன்சி மற்றும் மனிதனின் மூளைப்பகுதியில் அமைந்துள்ள 'நியோகார்டெக்ஸ்' பகுதிக்குக் கிட்டத்தட்ட சமமானதாகவும் சிம்பன்சிகளில் உள்ள நியோகார்டெக்ஸ்' பகுதியை விட பெரிய அளவிலும் நிடோபோடாலியத்தைப் பெற்றிருப்பதே ஆகும். அதனால் காகங்கள் சிறந்த ஞாபகசக்தி உடையதாக உள்ளதாம். அப்போ காக்கா பிடிக்கிறத இனிமே யாரும் கேலி பேசாதீங்க...(ஏன்னா காக்காவை விரட்டிப்பாருங்க. அதைப்பிடிப்பது எம்புட்டு கஷ்டம்னு உங்களுக்கு புரியும்) ஆனால் தீங்கு செய்பவர்களை காக்கா மாதிரி ஞாபகம் வச்சுக்கோங்க. காக்கா நண்பனாகவும் பழகும். அதைப்பார்க்க இங்க கையை வச்சு அமுக்குங்க. என்ன அதுக்குள்ள எங்க கிளம்பிட்டீங்க. ஓ! காக்கா பிடிக்கவா?

நானோ

noreply@blogger.com (விச்சு) — Tue, 23 Oct 2012 02:23:00 +0000

தனிமமாக இருக்கும் நம்மை

உன் தந்தை சேர்மமாக மாற்றுவாரா!

இது வேதியியல் படிக்கும் ஒரு மாணவரின் காதல் கவிதை. சரி தனிமம் என்றால் என்ன? சேர்மம் என்றால் என்ன?

தனிமம் : தனிமம் என்பது தனிப்பட்ட ஒரே வகை அணு. ஒவ்வொரு தனிமத்திற்கும் ஓர் அணு எண் உண்டு. தங்கம், வெள்ளி, இரும்பு போன்றவை வெவ்வேறு தனிமங்கள் ஆகும். 2006 ஆம் ஆண்டு இறுதி வரையிலும் மொத்தம் 117 தனிமங்கள் கண்டுபிடிக்கப்பட்டுள்ளன, அவற்றுள் அணுவெண் 1 கொண்ட ஹைட்ரஜன் முதலாக அணுவெண் 94 கொண்ட புளுட்டோன்யம் வரை உள்ள 94 தனிமங்களும் இயற்கையில் கிடைப்பன. இது, சாதாரண வேதியியல் நுட்பங்களைப் பயன்படுத்தி வேறு பதார்த்தங்களாகப் பிரிக்க அல்லது அவ்வாறு மாற்ற முடியாதவை ஆகும். இத் தனிமங்களின் இயல்பு கெடாமல் மேலும் பிரிக்கமுடியாத மிகச் சிறிய துகள் அணு எனப்படும். தனது எல்லா அணுக்களிலும் ஒரே அளவான புரோட்டான்களை (protons) கொண்ட பதார்த்த வகையே தனிமம் ஆகும். கால்சியம் என்ற தனிமம் அனைத்து உயிரிகளின், உடல் செயல்பாட்டுக்கும் கட்டாயம் தேவையாகும். கால்சியம் என்றால் என்ன தெரியுமா? அதுதான் சுண்ணாம்பு. லத்தீனில் கால்சிஸ் என்ற வார்த்தைக்கு சுண்ணாம்பு என்பதுதான் பொருள். ஓஸ்மியம் (osmium) அல்லது இருடியம் (iridium) தான் அடர்த்தி மிகுந்த தனிமம் ஆகும்.

சேர்மங்கள் : சேர்மங்கள் என்பன ஒன்றுக்கும் மேற்பட்ட தனிமங்களின் இணக்கத்தினால் உருவாகும் கூட்டமைப்பு ஆகும். அணுக்களின் இடையே உருவாகும் பிணைப்பின் தன்மையைப் பொறுத்து சேர்மங்கள் வகைப்படுத்தப் படுகின்றன. எடுத்துக்காட்டாக இரண்டு ஹைட்ரஜன்அணுக்களையும் ஒரு ஆக்ஸிஜன் அணுவினையும் கொண்ட நீர் (H₂O) ஒரு சேர்மம் ஆகும்.

நானோ :நானோ தொழில் நுட்பம் (nanotechnology) என்ற சொல்லை முதல் முதலில் டோக்கியோ அறிவியல் பல்கலைக்கழகப் (Tokyo Science University) பேராசிரியர் நொரியோ தனிகுச்சி (Norio Taniguchi) என்பவர் 1974ல் அறிமுகப்படுத்தினார்.ஒரு நானோ மீட்டர் 1,000,000,000 பாகமாக பிரித்தால் கிடைக்கும் ஒருபகுதி ஆகும். ஒரு நானோ மீட்டர் என்பது பத்து ஹைட்ரஜன் அணுக்களை பக்கத்தில் வைத்தால் கிடைக்கும் நீளம் ஆகும்.மனிதர்களின் தலைமுடியானது 70,000 முதல் 80,000நானோமீட்டர் தடிமன் கொண்டது. ஒரு எலக்ட்ரானை தன் விருப்பம்போல் நடத்துவதுதான் நானோவின் முக்கிய குறிக்கோள். தற்போது இதன் பயன்பாடு மிகவும் அதிகரித்துள்ளது. கம்ப்யூட்டர் முதல் உடல் செயல்பாடு, விவசாயம், மருத்துவம் என அனைத்திலும் நானோவின் தொழில்நுட்பம் பயன்படுகிறது. பெண்களுக்கு இதன் பயன்பாடு ரொம்பவே அதிகம். அழகு சாதனப்பொருட்கள் தயாரிக்கவும் பயன்படுகிறது. இனி வருங்காலத்தில் பெண்ணை வர்ணிக்கும்போதுகூட

”நாணமோ இன்னும் நாணமோ...” என்று புரட்சி தலைவர் எம்ஜிஆர் பாடிய பாடலை ”நானோவோ இன்னும் நானோவோ...” என்று வருங்கால நடிகர்கள் மரத்தைச் சுற்றி பாடலாம். நானோ பற்றி மேலும் அறிந்து கொள்ள அதனுள்ளேயே பயணம் செய்ய இங்கு கிளிக் செய்யவும். கட்டணம் இலவசம். இதற்கு மேல் எழுதினால் அது நானோ பதிவாக இருக்காது. போதும் நெக்ஸ்ட் மீட் பண்ணுவோம்.

TET Answer Key Oct 2012

noreply@blogger.com (விச்சு) — Tue, 16 Oct 2012 14:23:00 +0000

14.10.2012 அன்று ஆசிரியர் தகுதித்தேர்வு (TET) நடந்தது. இத்தேர்வில் சுமார் 6.50 லட்சம் பேர் தேர்வு எழுதினார்கள். இத்தேர்விற்கான முதல்தாள் (PAPER I) மற்றும் இரண்டாம் தாள் (PAPER II) உத்தேச பதில்கள் (Tentative Answer Key October 2012) சில பயிற்சி மையத்தாரால் வெளியிடப்பட்டுள்ளது. அதன் இணைப்பு கீழே உள்ளது. மீண்டும் நினைவூட்டுகிறோம். இவை அனைத்துமே உத்தேச பதில்கள் மட்டுமே. அதிகாரப்பூர்வ பதில் இன்னும் சில தினங்களில் வெளியிடப்படும் என எதிர்பார்க்கப்படுகிறது.

1. TET Paper I
2.TET Paper II
3. TET Paper II
4. TET Paper II
5. TET Paper I & TET Paper II

UPDATE :
ஆசிரியர் தேர்வு வாரியத்தினால் அதிகாரப்பூர்வ பதில்கள் வெளியிடப்பட்டுள்ளது. அதன் இணைப்பு பெற இங்கே கிளிக் செய்யவும்.

TET Answer key Oct 2012

noreply@blogger.com (விச்சு) — Mon, 15 Oct 2012 01:02:00 +0000

14.10.2012 அன்று ஆசிரியர் தகுதித்தேர்வு (TET) நடந்தது. இத்தேர்வில் சுமார் 6.50 லட்சம் பேர் தேர்வு எழுதினார்கள். இத்தேர்விற்கான முதல்தாள் (PAPER I) உத்தேச பதில்கள் (Tentative Answer Key October 2012) வேலூர் பயிற்சி மையத்தாரால் வெளியிடப்பட்டுள்ளது. அதன் இணைப்பு கீழே உள்ளது.
1. TET PAPER I

ஆசிரியர் தகுதித்தேர்வு - புவியியல்

noreply@blogger.com (விச்சு) — Fri, 28 Sep 2012 13:42:00 +0000

புவியின் சுற்றளவு 40,067 கி.மீ
சூரியன் ஒளி பூமியை வந்தடைய எடுத்துக்கொள்ளும் நேரம் 8.3 நிமிடங்கள்
புவிக்கும் பிராக்சிமா செண்டாரிக்கும் உள்ள தூரம் 4.3 ஒளியாண்டு
சூரியன் மேற்பரப்பில் உள்ள வெப்பநிலை 6000 டிகிரி செல்சியஸ்
புவியின் மையப்பகுதியில் உள்ள வெப்பநிலை 5000 டிகிரி செல்சியஸ்
சூரியனின் மையப்பகுதி வெப்பநிலை 15,000,000 டிகிரி செல்சியஸ்
பனிப்பந்து என்றழைக்கப்படுவது புளூட்டோ
ஆகாய கங்கை எனப்படுவது பால்வெளி அண்டம்
சனிக்கோளின் துணைக்கோள்கள் எண்ணிக்கை 60
சந்திரன் பூமிய சுற்றும் சராசரிவேகம் 9,84,401 கி.மீ
சூரியக்குடும்பத்தில் அதிக அளவு வெப்பமுடைய கோள் வெள்ளி
இந்தியாவில் சூரிய உதயத்தினை முதலில் பார்க்கும் மக்கள் அருணாச்சல பிரதேசம்
இந்தியாவில் உள்ள மொத்த தீர்க்க கோடுகள் 29
புவியின் வடிவம் ஜியாட்
இந்தியாவில் சூரியன் மறைவதினை கடைசியாக பார்க்கும் மக்கள் குஜராத்
குள்ளக்கோள்கள் புளூட்டோ, செரஸ்,ஏரிஸ், மேக்மேக்
லீப் வருடத்தினை உருவாக்கியவர் போப் கிரிகாரி
பருவகாலம் மாற்றம் ஏற்படக்காரணம் பூமியின் அச்சு 23 1/2 டிகிரி சாய்வாக அமைந்திருத்தல்
லார்ஜ் ஹெட்ரான் கொலாய்டர் என்பது பெருவெடிப்பு கொள்கை பரிசோதனை கருவி
சிமா என்பது சிலிக்கா மற்றும் மக்னீசியம்
நைஃப் என்பது கருவம்(நிக்கல் மற்றும் இரும்பு)
ரிக்டர் அளவு கோலின் அளவு 0 முதல் 9
உறங்கும் எரிமலைகள் என்பது தணிந்த எரிமலைகள்
துருப்பிடித்தல் என்பது ஆக்ஸிகரணம்
பெந்தலாசா(கிரேக்க சொல்) என்பது எல்லா நீரும்
எல்நினோ(ஸ்பானிய மொழி) என்பதன் பொருள் குழந்தைஏசு.கிரிஸ்துமஸ் காலத்தில் தோன்றும். இதனால் வறட்சி, பஞ்சம் ஏற்படும்.
காயல் ஏற்படுவது கடல் அரிப்பினால்
தாழ் மேகங்கள் எனப்படுவது படை மேகங்கள்
உயர்மேகங்கள் என்பது கீற்றுமேகங்கள்
செங்குத்தான மேகங்கள் என்பது கார்படை மேகங்கள்
பாரோமீட்டர் என அளவிடுவது வளிமண்டலத்தின் அழுத்தம்
அனிமோமீட்ட அளவிடுவது காற்றின் வேகம் மற்றும் திசை
மான்சூன்(அரேபிய சொல்) மவுசிம் என்றும் அழைக்கப்படும். இதன் பொருள் பருவகாலம்
உயிரி ஆற்றல் பெறப்படுவது சாண எரிவாயு, கரும்பு, ஆமணக்கு
வெள்ளை கழுத்துப்பட்டை பணியாளர்கள் எனப்படுவது நான்காம் நிலைத்தொழில்கள்
நீல கழுத்துப்பட்டை பணியாளர்கள் என்போர் இரண்டாம் நிலைத்தொழில்கள்
கனிமங்கள் வெட்டி எடுத்தல் என்பது முதல்நிலைத்தொழில்
சிவப்பு கழுத்துப்பட்டை பணியாளர்கள் என்போர் முதல் நிலைத்தொழில்கள்
சிறந்த மீன்பிடித்தளம் கண்டத்திட்டு
பெட்ரோலிய ஆழ்கிணறுகள் காணப்படுவது கண்டத்திட்டு
நான்காம் நிலைத்தொழில் அதிகம் காணப்படும் இடம் நகரம்
ஆப்பிரிக்க காடுகளில் வசிப்பது புஷ்மென்
டோன்லேசாப் என்பது உலகின் மிகப்பெரிய மீன்பிடித்தளம்
இரும்புத்தாதுவின் வகை சிட்ரைட்
தங்க கழுத்துப்பட்டை பணியாளர்கள் என்போர் ஐந்தாம் நிலைத்தொழில்கள்
அலுமினியத்தாதுவின் வகை பாக்சைட்
அடிப்படையான ஆதார வளம் நிலம்
தற்சுழற்சி காலம் அதிகம் உள்ள கோள் வெள்ளி
கிரீன்விச் தீர்க்ககோடு 0 டிகிரி தீர்க்ககோடு
புவி சூரியனை சுற்றி வருவதால் ஏற்படுவது பருவ காலம்

அந்தோ! ஆசிரியர்

noreply@blogger.com (விச்சு) — Mon, 24 Sep 2012 15:36:00 +0000

”பள்ளிக்கூடம் என்பது நாகரீக உலகின் முன் அறிவிக்கப்படாத கொத்தடிமை முறை; குழந்தைகள் மீது நிகழ்த்தப்படும் சமூகம் அங்கீகரித்த கொடிய வன்முறை” என்றார் ஜான் ஹோல்ட். 1972 ல் பள்ளி மாணவர் உரிமை கோரும் மாநாட்டில் நான்கு விசயங்களை மாணவர்களுக்கு அளிக்ககோரியது.

1. மாணவர்களை அடிப்பது, தண்டனைகள் உடல் ரீதியில் வழங்குவதை உடனே தடை செய்ய வேண்டும்.

2. உணவு இடைவேளையோடு, இரண்டு மணி நேரத்திற்கு ஒருமுறை குறைந்தபட்சம் பதினைந்து நிமிட ஆசுவாசப்படுத்தலை அமல் செய்யவேண்டும்.

3. இடைவேளையின் போது பள்ளியில் எங்கும் சுற்றித்திரியும் சுதந்திரம்.

4. உடனடியாக சீருடை திணிப்பை நிறுத்தி சீருடைகளை தேர்ந்தெடுக்கும் உரிமையை மாணவர்களுக்கு வழங்கவேண்டும்.

மேலும் அவர் கூறுகையில் “பள்ளிக்கூடத்தில் ஒரே மாதிரி உட்காரும் கொடுமையிலிருந்தும் கட்டுப்பாட்டு பயங்கரத்திலிருந்தும், ஆசிரியரின் கோலிடமிருந்தும் தப்பி உடனடியாக ஒளிய ஒவ்வொரு குழந்தைக்கும் ஒரு சுரங்கப்பாதை இருந்தால் எவ்வளவு நன்றாக இருக்கும்?” என்றார்.

பாலீ ஃப்ரையிரே என்ற கல்வியாளர் நடத்திய ஆய்வில் ஆசிரியர் மாணவர் உறவு என்பது....

ஆசிரியர் பாடம் நடத்துபவர் ; மாணவர் நடத்தப்படுபவர்.

ஆசிரியருக்கு எல்லாம் தெரியும்; மாணவருக்கு ஒன்றும் தெரியாது.

ஆசிரியர் பேசுவார்; மாணவர்கள் கவனிப்பார்கள்.

நிகழ்ச்சிப்போக்கை ஆசிரியர் தீர்மானிப்பார்; மாணவர்கள் தங்களை வடிவமைத்துக்கொள்ள வேண்டும்.

இன்றைய கல்விமுறையை ‘வங்கிமுறை” கல்வி என்று பாலீ ஃப்ரையிரே அறிவித்தார். வங்கியில் பணத்தினை போட்டு டெபாசிட் செய்வதைப்போல ஆசிரியர் என்பவர் மாணவனின் தலையில் தகவல்களை இட்டு நிரப்பும் முரட்டு அமைப்பிற்கு கல்விமுறை என்று பெயரிடுவதா என்று கொதித்தார்.

அலெக்ஸாந்தர்யுட்னோவிச் ஸெலென்கோ என்பவர் ஒரு கணக்கீடு மூலமாக பின்வருமாறு சொகிறார். நம்நாட்டில் ஒரு பத்தாம் வகுப்பு படிக்கும் மாணவர் குறைந்தபட்சம் 2000 முதல் 2200 நாட்கள் பள்ளியில் நாள் ஒன்றுக்கு எட்டுமணிநேரம் செலவிட்டு ஆக 16 ஆயிரம் முதல் 17 ஆயிரத்து 600 மணிநேரம் வரை தனது வாழ்நாளை செலவிட்டு ( எல்கேஜி, யுகேஜி கணக்கில் இல்லை) 14 வயதுக்குள் பள்ளியை விட்டு வெளியே வரும்போது எழுதப்படிக்க தெரிந்ததைத்தவிர வேறு என்ன தெரிகிறது. தானாக ஒரு தொழில் கூட செய்யத்தெரியாத பரிதாப நிலைமை.

எல்லாம் சரி... உண்மைதான். ஆனால் இன்றைய மாணவர்களின் போக்கும் மிக மோசமாக உள்ளது. நீதிபோதனை என்று பேச ஆரம்பித்தால் ”வந்துட்டார்யா புத்தரு” என்று நக்கலும் நையாண்டியும் மாணவர்களிடம் அதிகமாகவே உள்ளது.

”குழந்தைகள்

பள்ளிக்கு நடந்து செல்கிறார்கள்

ஆனால்...

வீட்டிற்கு ஓடிவருகிறார்கள்!”

என்றார் ஒரு கவிஞர். ஆசிரியர்களின் நிலைமையும் அதுதான். ஒவ்வொரு நாளும் எந்த மாணவன் எந்தவிதமான பிரச்சினையை கொண்டுவருவானோ என்று பயப்படும் நிலைமை ஆசிரியருக்குள்ளது.

இன்றைய மாணவர்களின் போக்கு அதிர்ச்சி அளிக்க கூடியதாக உள்ளது. ஆசிரியைகளிடத்தில் அவர்கள் நடந்துகொள்ளும்முறை அநாகரீகமானது. பயிற்சிக்கு செல்லும் ஆசிரியைகளிடத்தில் மிக மோசமான நிகழ்வுகளை இன்றைய தலைமுறை மாணவர்கள் செயல்படுத்துகின்றனர். அத்துமீறி நடக்கவும் செய்கின்றனர். அதனை ஆசிரியர்கள் கண்டும் காணாமல்தான் செல்லவேண்டியுள்ளது. மாதா, பிதா வரிசையில் ஆசிரியருக்கு உள்ள இடம் மிக முக்கியமானது. அருணகிரிநாதர் கந்தர் அனுபூதி என்ற நூலில்கூட

”உருவாய் அருவாய் உளதாய் இலதாய்

மருவாய் மலராய் மணியாய் ஒளியாய்

கருவாய் உயிராய் கதியாய் விதியாய்

குருவாய் வருவாய் அருள்வாய் குகனே”

என வேண்டுகிறார்.

ஆனால் மாணவர்கள் ஆசிரியர்களை கேலி செய்கிறார்கள், செல்போனில் படம் எடுக்கிறார்கள், ஆபாசமாக சித்தரிக்கப்படுகிறார்கள் என்றால் அதனைப்பற்றி நிச்சயம் கவலைப்பட்டுத்தான் ஆக வேண்டும். ஜாதி மோதல்கள் பள்ளியிலேயே ஆரம்பிக்கப்படுகிறது. அதற்கான காரணம் ஆசிரியரானாலும் மாணவரானாலும் முளையிலேயே கிள்ளி எறியப்படவேண்டும்.

இதற்கெல்லாம் காரணம் கல்விமுறையா? ஆசிரியரா? மாணவரா? பெற்றோரா? எனப்பல வினாக்களை எழுப்பினாலும் அனைவருமே காரணம் என்றுதான் சொல்லவேண்டும். அதைவிட முக்கியமாக தொலைக்காட்சிகளும், திரைப்படங்களும் முக்கிய பங்கு வகிக்கின்றன. அந்தக்கால மாணவர்கள் ஆசிரியரிடத்தில் பணிவு கொண்டிருந்தார்கள். எந்த வயதிலும் தனக்கு கற்றுக்கொடுத்த ஆசிரியரை சந்திக்கும்போது பணிவும் மரியாதையும் கொண்டிருந்தார்கள். ஆனால் இப்போது ஆசிரியரை மதிக்கும் எண்ணம் இல்லை. அவர் சொல்வது எதனையும் காது கொடுத்து கேட்பதும் இல்லை. சில மாணவர்களின் இந்தச்செயல் பல மாணவர்களை பாதிக்கிறது. மீறி கண்டித்தால் மேல கையை வைக்ககூடாது.. தெரியுமில்லை.. போலீஸ் ஸ்டேசன் போக ஆசையா இருக்கா? என்று மிரட்டும் மாணவர்களும், பெண் ஆசிரியர் என்றால் அவர்களை மிக அசிங்கமாக பேசுவதும், பள்ளி சுவர்களில் எழுதுவதும் போன்ற செயல்களில் ஈடுபடுகின்றனர். ஆசிரியர்கள் மாணவர்களை கண்டிக்கும் இது போன்ற செயல்களை சில ஊடகங்களும் இதற்காகவே இரண்டாம் பக்கத்தினை ஒதுக்கி செய்தியை பெரிதுபடுத்துகின்றன.

எந்த ஆசிரியரும் வேண்டுமென்றே மாணவர்களைத் தண்டிப்பதில்லை. தமது குழந்தைகளை தவறு செய்தால் தண்டிப்பதில்லையா? மாணவர் ஆசிரியரை கத்தியை எடுத்து குத்தினாலும் மாணவரை தண்டிக்ககூடாதாம். மாணவர்களினால் எத்தனை ஆசிரியர்கள் மன உளைச்சலுக்கு ஆளாகியுள்ளார்கள் என ஒரு சர்வே செய்தால் உண்மை விளங்கும். இன்றைய ஆசிரியர்களின் நிலைமை அந்தோ பரிதாபம். மனத்திருப்தியுடன் பணிபுரியும் ஆசிரியர்களின் எண்ணிக்கை மிகக்குறைவே. மாணவர்களை கண்டித்தால் பிரச்சினை வரும் என்று எண்ணியே பல ஆசிரியர்கள் எதையும் கண்டுகொள்வதே இல்லை. இதுதான் இன்றைய நிலைமை.

ஆனால் இப்போது கிராமங்களில் நடைபெறும் உள்ளூர் கலை விழாவானாலும் பள்ளி, கல்லூரிகளில் நடைபெறும் ஆண்டு விழாவானாலும் குத்தாட்டம் என்ற சிறப்பு நிகழ்ச்சி இடம்பெறாத மேடைகளே இல்லை. எல்லாம் தொலைக்காட்சிகளின் புண்ணியத்தால் அரங்கேறுகின்றன. கொஞ்சம் கொஞ்சமாக குழந்தைகள் மனதில் விஷத்தினை ஊடகங்கள் ஏற்றுகின்றன. நாமும் துணைபோகிறோம். ஆசிரியர் எது கேட்டாலும் நக்கலாக பேசுதல் அல்லது வடிவேல் பாணியில் பதில் சொல்லுதல் மாணவர்களிடையே அதிகரித்துள்ளது.

பண்பாடு இல்லாத கல்வி யாருக்கும் பயனில்லை. ஆசிரியர்களிடத்தில் மாணவர்களுக்கு நிச்சயம் மரியாதையும் பணிவும் இருக்க வேண்டும். மாணவனை அடிக்க கூடாது, மிரட்ட கூடாது, மனம் புண்படும்படி பேசக்கூடாது ஒழுங்கு கட்டுப்பாட்டினை வலியுறுத்தகூடாது போன்ற சுதந்திரச் சிந்தனைகளையும், மாணவர்களை எந்த வேலையும் வாங்கக்கூடாது, பள்ளி வளாகத்தில் உள்ள செடிகளுக்கு தண்ணீர்கூட ஊற்றச்சொல்லக்கூடாது, குப்பைகளை அள்ளச்சொல்லக்கூடாது போன்ற பல கூடாதுகள் மாணவர்களை கெட்டுப்போகச்செய்யத்தான் வழிவகுக்கும். இதுமாதிரியான சுதந்திரசிந்தனைகளை கடாசிவிட்டு எதற்கும் கட்டுப்படாத மாணவர்களை படிப்பே தேவையில்லை என்று பெற்றோரை அழைத்து வீட்டுக்கு அனுப்பவும் தயங்கக்கூடாது.

அந்தக்கால மாணவர்கள் குருகுலத்தில் தங்கியிருந்து அத்தனை வேலைகளையும் செய்வார்கள். ஆனால் இன்று படிப்பு மட்டுமே போதும் மற்ற எந்த வேலையும் தேவையில்லை என்று அரசும் தீர்மானித்துவிட்டது. நல்லொழுக்கமும், சுத்தமும், சுகாதாரமும் ஏட்டுச்சுரைக்காயில் மட்டும் இருந்தால் பயனில்லை. அதனை அமல்படுத்தவும் வேண்டும். ஒரு வகுப்பறையில் கல்வி கற்கும் அனைவரையும் முதல் ரேங்க் வாங்க வைப்பதே பள்ளிகளின் நோக்கமாக பிசகிவிட்டது. பள்ளிக்கூடத்தில் தனது படிப்பை முடித்து வெளியேறும் ஒருவர் தனது இருப்பிடத்தில் ஒரு சிறு தோட்டத்தினை பராமரிக்கக்கூட கற்றுக்கொள்ளாத விட்டேத்தியான நிலையை உருவாக்கும் கல்விமுறையைத்தான் அரசு விரும்புகிறது போலும். மாணவர்களை கண்டிக்கும் உரிமையையும், ஆசிரியர் தங்களைப் பாதுகாத்துக்கொள்ளும் உரிமையையும் ஆசிரியருக்கு வழங்கவேண்டும்.

பொறுப்பில்லாத சமூக விரோதிகளை வளர்ப்பதற்கு மக்கள் அரும்பாடுபட்டு கட்டும் வரிப்பணத்தினை வீணாக்கி அழக்கூடாது. ”அனைவருக்கும் கல்வி” என்பதை ”ஆர்வமும் அக்கறையும் உள்ள அனைவருக்கும் கல்வி” என்று திருத்தி அமல் செய்யவேண்டும். செய்வார்களா?

நன்றி:

தினமணி - வி.குமாரமுருகன்

உலகக் கல்வியாளர்கள் - இரா.நடராசன்

என்பெயர் கவிதை

noreply@blogger.com (விச்சு) — Sun, 16 Sep 2012 02:08:00 +0000

உன்னைப் பார்த்தநாள் முதல்

நானும் கவிஞனானேன்

உன்னை மலரென்றேன்

நிலவென்றேன்

ஒளியென்றேன்

குழந்தையென்றேன்

தாயென்றேன்

கற்பனையில் தோன்றும்

அத்தனையும் நீயென்றேன்

நானும் கவிஞன்தான்!

பாரதியும்

கண்ணதாசனும்

வாலியும்

வைரமுத்துவும்

ஒத்துக்கொள்ளத்தான் வேண்டும்

உன்னை விரும்பும்

நானும் கவிஞன்தான்!

நானும் கவிதை

எழுதுகிறேன் என்றேன்

நண்பர்கள் அனைவரும்

நக்கலாய் சிரித்தார்கள்

உன் பெயர் எழுதியதும்

வாயடைத்து நின்றார்கள்

நானும் கவிஞன்தான்!

உன்னுடன் சண்டை போட

வேண்டுமென்று தவித்தேன்

ஊடலின்பின் கூடலாயிருக்குமென்று!

உன் சமாதானமும் சண்டையும்

எனக்கு பிடித்தமானதாய்!

உன் காலை வணக்கம் முதல்

இரவு வணக்கம்வரை

அத்தனையும்

எனக்காகவே படைக்கப்பட்டது

அதையும் கவிதையில் படைத்தேன்

நானும் கவிஞன்தான்!

நீ நடந்தாலும் கவிதை

நீ பேசினாலும் கவிதை

நீ திட்டினாலும் கவிதை

உன்னிடமிருந்துவரும்

அத்தனையும் கவிதை

உன்னைச்சுற்றும் நானும்

என்பெயரும்கூட இனி

கவிதைதான்!

இப்படிக்கு
கவிஞர் விச்சு...

குறிப்பு : கவிஞர்கள் யாரும் இவனும் கவிஞனாயென்று கோவிச்சுக்காதீங்கப்பா. கவிஞர் பட்டம் பிரபலமான பல்கலைக்கழகத்திலிருந்து வழங்கியுள்ளார்கள்.

குறிப்புக்கு ஒரு குறிப்பு: அது எந்த பல்கலைக்கழகம் என்று விசாரித்து உங்கள் நேரத்தை வீணடிக்கவேண்டாம்.

எனக்கு ஒரு வயசு

noreply@blogger.com (விச்சு) — Fri, 14 Sep 2012 15:42:00 +0000

அன்பிற்கினிய வலைத்தள நண்பர்கள் அனைவருக்கும் வணக்கம்.

அனைவரையும் பூங்கொத்து கொடுத்து வரவேற்கிறேன்.

சென்ற வருடம் செப்டம்பர் 15ல் விச்சு'வால்' தொடங்கப்பட்ட அலையல்ல சுனாமியாகிய நான் இன்றுடன் ஒரு வருடத்தினை வெற்றிகரமாகப் பூர்த்தி செய்து விட்டேன்.

இதனால் சாதித்தது நண்பர்கள்... நண்பர்கள்... நிறைய முகமறியா நண்பர்கள். அனைவருக்கும் சாக்லெட்... இந்தாங்க ... எடுத்துக்கோங்க...

எனது எழுத்துக்கு தொடர்ந்து கருத்துக்கள் மூலம் உற்சாகம் வழங்கிய ஹேமா, athira, Ramani, முனைவர்.இரா.குணசீலன், Rathnavel Natarajan, இராஜராஜேஸ்வரி, திண்டுக்கல் தனபாலன், esther sabi, ராஜி, ஸாதிகா, ராமலக்ஷ்மி , s suresh, வரலாற்று சுவடுகள், தனிமரம், Rasan , விமலன், யுவராணி தமிழரசன், வை.கோபாலகிருஷ்ணன், அகிலா, kovaikkavi, செழியன், மாலதி, அப்பாதுரை, ananthu, T.N.MURALIDHARAN, ஆளுங்க அருண் , ravindran, இக்பால் செல்வன், ஸ்ரீவிஜி விஜயலக்ஷ்மி, செய்தாலி , asa asath, அன்பை தேடி,,அன்பு , ரெவெரி, அருணன் கோபால், ஹாரி பாட்டர், arul , கோவை மு.சரளா , தமிழானவன், MANO நாஞ்சில் மனோ, சீனு , கவிதை வீதி... // சௌந்தர் // , Yoga.S., கவி செங்குட்டுவன், மூவேந்தன் , BHARATHI , jagan nathan, மாத்தியோசி - மணி , கலை , நிலவை தேடி, Asiya Omar, சசிகலா, ARUN PALANIAPPAN , சத்ரியன் , கோகுல், tamizparai, கீதமஞ்சரி, நிரூபன், கே. பி. ஜனா..., சிவகுமாரன், காட்டான், என் ராஜபாட்டை"- ராஜா, AUTOMOBILE தமிழன் , kari kalan, siliconshelf, வீடு சுரேஸ்குமார், ANGOOR, தமிழானவன், மணிமேகலா, Sivaranjani ,AROUNA SELVAME, அதிரை தங்க செல்வராஜன் ,துளசி கோபால், நம்பள்கி, Jaleela Kamal, Vairai Sathish , சிவகிரி செந்தில் , palani vel, கும்மாச்சி, Speed Raheem, திவ்யா @ தேன்மொழி, Priya, ரிஷபன், nidurali , மாலதி, சேக்காளி, கோமதி அரசு , லியோ, இராம்குமார் , மதுரை சரவணன், jagan nathan, பாரத்... பாரதி..., t.varudarajan, அ.குரு, முனைவர் பரமசிவம், தமிழ்மகன் , guna thamizh , அப்பாவி தங்கமணி, Kanchana Radhakrishnan, seenivasan ramakrishnan, சிட்டுக்குருவி , ஐடியாமணி - Dip in USA, UK, UAE, FR and RMKV,BMW , stalin wesley , Lakshmi, மதுரை அழகு, தமிழ்வாசி பிரகாஷ், பத்மநாபன், மணிவானதி, எஸ்.எஸ்.பூங்கதிர், Barari , ~முஹம்மத் ஆஷிக் citizen of world~ , இருதயம், thamizkanal, ஷைலஜா , கணேஷ், சி.பி.செந்தில்குமார், ஆமினா, பழனி.கந்தசாமி , கோவி , Chitra,ஸ்ரவாணி, வியபதி, Gopi Ramamoorthy, கோபிநாத் , ராஜ நடராஜன் ,Shakthiprabha , jayaram thinagarapandian, Jeyapriya, ராஜா MVS , suryajeeva, ரா.செழியன்., ♔ம.தி.சுதா♔, நிவாஸ் , ஜ.ரா.ரமேஷ் பாபு , !* வேடந்தாங்கல் - கருன் *! , அம்பாளடியாள் , ! ஸ்பார்க் கார்த்தி @, சென்னை பித்தன், சம்பத்குமார், எம்.எஸ்.ரஜினி பிரதாப் சிங் , வெளங்காதவன், மாசிலா, Kannan, IlayaDhasan, இராகவன் நைஜிரியா, புதுகை அப்துல்லா, காந்தி பனங்கூர் அனைவருக்கும் எனது மனமார்ந்த நன்றிகள். (யாரேனும் விடுபட்டிருந்தால் கோவிச்சுக்க வேணாம்... அவர்களுக்கும் சாக்லெட் உண்டு. தாராளமாக எடுத்துக்கலாம்)

கழுதையும் குருவியும்

noreply@blogger.com (விச்சு) — Sat, 08 Sep 2012 08:04:00 +0000

ஆளுக்கொரு உரிமை என நாடுகளுக்கிடையேயும் உலக வர்த்தக அமைப்புடனும் போடப்படும் ஒப்பந்தத்தினை கேலி செய்யும் வகையிலும் அது ஒரு ஏமாற்று வேலை என்பதையும் சொல்லும் விதமாக ஒரு கதை. ”முதலாவது”, “இரண்டாவது” என்று சொல்லப்படுவதன் அர்த்தமின்மையையும் இந்தக் கதையின்மூலம் விளங்கிக் கொள்ளலாம். விருதுநகர் மாவட்டம் திருச்சுழி வட்டம் அறிவொளி கற்போர் கூறிய கதையின் தொகுப்பிலிருந்து எடுத்தாளப்பட்டுள்ளது. இது ஒரு எளிய கதைதான் என்றாலும் பல அர்த்தங்களைக் கொண்டுள்ளது.

கழுதையும் குருவியும் நண்பர்களாம். இரண்டும் சேர்ந்து விவசாயம் செய்ய ஒப்பந்தம் செய்துகொண்டன. ஒப்பந்தத்தில் ஆளுக்கு ஒரு உரிமை தரப்பட்டது.

பயிரில் எந்தப்பகுதி யாருக்கு என்று தீர்மானிக்கும் முதல் உரிமை கழுதைக்கு. என்ன பயிரிடுவது என்று தீர்மானிக்கும் இரண்டாம் உரிமை குருவிக்கு.

விவசாயம் செய்ய ஆரம்பிக்கும் முன் ”நண்பா! பயிரில் உனக்கு எந்தப்பகுதி வேண்டும்?” என்று குருவி கனிவோடு கேட்டது. முதல் உரிமை பெற்ற கழுதை விறைப்பாகச் சொன்னது. “பயிரின் கீழ்ப்பகுதி எனக்கு; மேல்பகுதி உனக்கு” என்று தன் ‘முதல் உரிமை’யை நிலைநாட்டியது.

குருவி ,சரி’ என்றது. பயிரைத்தேர்ந்தெடுக்கும் ‘இரண்டாவது உரிமை’ குருவியிடம் இருந்தது. குருவி நெல்லைத் தேர்ந்தெடுத்துப் பயிரிட்டது. குருவிக்கு நெல் கிடைத்தது.

அடுத்தமுறை இப்போது பயிரில் உனக்கு எந்தப்பகுதி வேண்டும்?” என்று குருவி கனிவோடு கேட்டது. “பயிரின் மேல்பகுதி எனக்கு; கீழ்ப்பகுதி உனக்கு” என்று கழுதை ஜாக்கிரதையாக சொன்னது. குருவி இப்போது கடலை பயிரிட்டது. கழுதைக்கு இலைகள் மட்டும்தான் கிடைத்தது.

அடுத்தமுறையும் ”இப்போது பயிரில் உனக்கு எந்தப்பகுதி வேண்டும்?” என்று குருவி கேட்டது. பதில் சொல்ல கழுதை ரொம்ப நேரம் எடுத்துக்கொண்டது. ”இந்தமுறை மேல்பகுதி, கீழ்ப்பகுதி எனக்கு, நடுப்பகுதிதான் உனக்கு” என்று கழுதை சொன்னது. குருவி நமட்டுசிரிப்பு சிரித்தது.

“சரிப்பா! வச்சுக்க” என்று சொல்லிவிட்டு குருவி கரும்பு பயிரிட்டது. கழுதைக்கு வழக்கம்போல தூறும், கொழுத்தாடையும் கிடைத்தது. குருவிக்கு ருசியுள்ள நடுப்பகுதி கிடைத்தது.

கழுதைக்கு ஏற்பட்ட ஏமாற்றம், அவமானத்தால் ஒப்பந்தம் அத்தோடு முடிவுக்கு வந்தது. ஒப்பந்தத்தினை பார்த்துப்போடுங்கப்பா....

சாக்கடை மணம்

noreply@blogger.com (விச்சு) — Fri, 07 Sep 2012 11:01:00 +0000

அந்த ஊரில் இது கொஞ்சம் பெரிய பாலம்தான். இரண்டு பகுதிகளையும் இணைக்கும் முக்கியமான பகுதி அது. பாலத்தின் கீழ் ஒரு ஆறு ஓடியதற்கான அடையாளம் இன்னும் மாறவில்லை. இப்போதெல்லாம் இரண்டு அல்லது மூன்று நாட்கள் தொடர்ச்சியாக மழை பெய்தால் மட்டுமே அதில் நீர் ஓடும். மற்ற நாட்களில் எல்லா ஊரிலும் ஓடிக்கொண்டேயிருக்கும் அதே சாக்கடைதான் இங்கும் ஓடுகிறது.

எல்லா ஊர்களிலும் ஆறு தன் அடையாளத்தினை இழந்து வருகிறது. அது ஓடிய வழித்தடங்களை மனிதன் தனதாக்கிக்கொண்டான். ஆறு தன்னை சுருக்கிக்கொண்டது. தன் உடம்பில் ஓடிய சுத்தமான நீரை அது இழந்து பல காலமாகிவிட்டது. தன் உடம்பையும் வருத்திக்கொண்டு பல குப்பைகளையும், நாற்றமெடுக்கும் நீரையும் மட்டுமே தன்னுள் அடக்கிக்கொண்டுள்ளது. அதிலிருந்து வரும் வாசனையை ஏற்க மனமில்லாமல் மனிதன் மூக்கைப்போத்திக்கொள்கிறான். அத்தனை கழிவுகளும் அவனிடமிருந்துதான் வந்தன என்பதை அறியாமலும் அதனை மனம் ஏற்காமலும் உள்ளான்.

சாக்கடை என்றாலே அதன் கருப்பு நிறம்தான் மனதுக்கு ஞாபகம் வருகிறது. கருப்பு என்றாலும் இது நல்ல அடர்த்தியான மினுமினுக்கும் கருப்பு. அந்த பாலத்தின் கீழ் இது அமைதியாகத்தான் இத்தனை காலங்களும் ஓடிக்கொண்டிருக்கிறது. இரண்டு பக்கமும் நிறைய வீடுகள். அவர்களும் ஒருநாளும் மூக்கைப் பொத்தியதில்லை. அவர்களுக்கு பழகிப்போன ஒன்றுதான் இந்த மணம். பாலத்தின்மீது பலதரப்பட்டவர்கள் பயணம் செய்கிறார்கள். அவர்களின் மீது பல வாசனைகள். எல்லாமே செயற்கையாகத் தயாரிக்கப்பட்டவை. அந்த மணம் இந்த மணத்தின் வாசனையை அமுக்கிவிடுகிறது போலும்.

இத்தனை நாளும் அமைதியாக இருந்த அந்த சாக்கடையை இன்று ஒருவன் கிளறிக்கொண்டிருந்தான். உள்ளிருந்த அதன் அத்தனை வாசனையும் விடுதலையாகி வெளியேறியது. அங்கு பயணித்துக்கொண்டிருந்த அத்தனை பேரின் கைகளின் விரல்களும் இப்போது மூக்கின்மீதுதான். பாலத்தின்மீது பயணித்துக்கொண்டே அவனை ஏதோ வெளிக்கிரகவாசியை பார்ப்பதுபோல் பார்த்தனர்.

அவன் கருமமே கண்ணாக இருந்தான். அவனைச்சுற்றியும் வர்ணிக்கமுடியாத அளவு கழிவுகள். அவன் அதனை அலட்சியப்படுத்திவிட்டு கையில் ஒரு இரும்பு தட்டுடன் சாக்கடையின் உள்ளே இறங்கினான். அவன் சாக்கடையில் இடுப்பு மூழ்கும் அளவுக்கு இறங்கினான். கையில் வைத்திருக்கும் தட்டால் உள்ளேயிருந்து மண்ணை அள்ளி வெளியில் குமித்தான். கருப்பு மணல் போன்று சொதசொதவென மண்ணை அள்ளி வெளியில் வாரிப்போடுவதை தொடர்ந்து செய்தான். அவன் அந்த சாக்கடையில் முழ்கி அள்ளும்போதும் மூச்சினை அடக்கிக்கொண்டு அள்ளிப்போட்டுவிட்டு இழுத்து மூச்சு விட்டுக்கொள்வான். பாலத்தின்மீது நடந்து செல்வோர் மூக்கினைப்பொத்திக்கொண்டு இவனையையும் ஒரு பார்வை பார்த்துக்கொண்டே சென்றனர். தொடர்ந்து வாரினான். போதுமென்று மனசுக்குப் பட்டதும் வெளியில் ஏறி வந்தான்.

குவித்து வைத்திருந்த மண்ணை கிளறிவிட்டு உட்கார்ந்து சலிக்கலானான். அவன்மேல் அங்கிருந்த அத்தனை ஈயும் அப்பியது. கொசுக்கள் ஒரு பக்கம் படையெடுத்து அவன் மேல் உட்கார்ந்தது. அதைத் தடுக்க அவனுக்க விருப்பமில்லை. பொறுமையாகச் சலித்தான். ஏதாவது கிடைத்தால் அதை எடைக்கு எடை போடலாம். அதிலிருந்து வரும் பணத்தில்தான் குடும்பம் ஓடும். இந்தப்பகுதிக்கு பெரும்பாலும் வரமாட்டான். மனதில் பல எண்ணங்கள் ஓடியது. இது எல்லோருக்கும் இயற்கைதான். ஒரு வேலை செய்யும்போது மனதில் பல ஆயிரம் எண்ண ஓட்டங்கள் ஓடிக்கொண்டுதான் இருக்கும். அவன் மகளுக்கு குழந்தை பிறந்து மூன்று மாதங்களாகி விட்டது. புருசன் வீட்டிற்கு அனுப்பவேண்டும். குழந்தைக்கு ஏதாவது போட்டு அனுப்பலாமென்றால் வாயுக்கும் வயித்துக்குமே பெரும்பாடாயுள்ளது.

வெறிகொண்டு சலித்தான். வழக்கம்போல கண்ணாடி வளையல் துண்டு, இத்துப்போன பழைய நாணயம், மருந்து பாட்டில்கள், ஊசி,இரும்புத்துண்டு, வளையம், உடைந்த கண்ணாடி, சீப்பு, கம்பி, பிய்ந்துபோன செருப்பு, ஒயர் இன்னும் ஏதேதோ பொருட்கள் கிடைத்தன். இரும்பாலான பொருட்களை மட்டும் தனியாக சேமித்தான். இன்னும் அரைகிலோகூட தேறவில்லை. மீண்டும் சாக்கடையில் இறங்கினான். மறுபடியும் தூர்வாரினான். பாலத்தின்மீது செல்வோர் வசைபாடிக்கொண்டே சென்றனர். அருகருகே உள்ள வீட்டிலுள்ளவர்கள் ஜன்னலை இறுகி சாத்தினர். இவன் கண்டுகொள்ளவில்லை. ஆனால் மனம் விம்மியது. எனக்கு மட்டும் ஏன் இந்ததொழிலைக் கற்றுகொடுத்தாய் ஆண்டவா! மனதின் எண்ண ஓட்டம் ஓடியது. மீண்டும் சலிக்க அமர்ந்தான்.

அவன்மீது நீர் வழிந்தோடியது. சாயநீர், பாத்திரம் கழுவிய நீர், மலஜலம் கழித்த நீர்,குளித்து அழுக்கை வெளியேற்றிய நீர், துணிகளைத்துவைத்து வெளியேறும் நீர் இன்னும் பலவகை நீர் அவன் உடம்பில் வழிந்தது. சில கண்ணாடி பொருட்கள் காலில் கிழித்து ரத்தம் எட்டிப்பார்த்தது. அவனுக்கு எதுவும் உறைக்கவேயில்லை. சலித்தான்.. முடிந்தமட்டும் வேகமாக சலித்தான். பழையபொருட்கள்... அவன் பார்த்து பார்த்து பழகிப்போன அதே பழைய பொருட்கள்.

இரும்பின் அளவைப்பார்த்தான். ம்ம்... மனசு திருப்திப்படவில்லை. சூரியனைப்பார்த்தான். மணி மூன்றிருக்கும் என்று நினைத்து கையை சாக்கடையில் ஓடும் நீரிலேயே கழுவினான். உடம்பினை துண்டால் துடைத்தான். கொண்டு வந்திருந்த கஞ்சியைக் குடித்தான். மீண்டும் கையை அந்த நீரிலேயே கழுவிவிட்டு வேலையைத் தொடங்கினான். மனசும் கையும் வலிக்கும்வரைத் தொடர்ந்து செய்தான்.

மாலை நேரமும் வந்தது. பள்ளி சென்றவர்கள், அலுவலகம் சென்றவர்கள் அதே பாலம் வழியே திரும்பினர். இவன் இறுதியாக ஒரே ஒரு தடவை முயற்சி செய்வோம் என்று அள்ளினான். எல்லாவற்றையும் கரையில் வாரிக்கொட்டினான். மீண்டும் சலித்தான். நம்பிக்கை வீண்போகவில்லை. இதுவரை அவனுக்கு சிக்கியதெல்லாம் வீணான பொருட்கள். இப்போது அதிர்ஷ்ட தேவதை இவன் பக்கம். ஒரு வளையம் சிக்கியது. அதை கையில் எடுத்துப்பார்த்து சாக்கடை நீரில் அலம்பினான். அந்த வளையம் மின்னியது. நிச்சயம் தங்கமாகத்தான் இருக்கவேண்டும். இப்போது அவனின் கண்களும் மின்னியது. அதை முகர்ந்து பார்த்தான். ஆம்...சாக்கடையும் இப்போது மணத்தது.

ஒரு டன் மரமும் ஒரு டன் இரும்பும்

noreply@blogger.com (விச்சு) — Wed, 05 Sep 2012 13:42:00 +0000

எது அதிக கனமானது?-- ஒரு டன் மரமா? ஒரு டன் இரும்பா? சிலர் யோசிக்காமல் ஒரு டன் இரும்புதான் என்று சொல்வார்கள். ஆனால் உண்மையில் ஒரு டன் மரம்தான் அதிக கனமானது. நம்பமுடியாவிட்டாலும் இதுதான் உண்மை.

அதாவது ஆர்க்கிமிடிஸ் விதியின்படி (திரவங்களுக்கு மட்டுமல்ல.. வாயுக்களுக்கும் பயன்படுத்தலாம்) காற்றில் ஒவ்வொரு பொருளும் தனது எடையில் ஒரு பங்கை “இழக்கிறது”; இந்த எடையிழப்பு அப்பொருளினால் இடம்பெயர்க்கப்பட்ட காற்றின் எடைக்குச் சமமாகும். மரமும் இரும்பும்கூட தத்தம் எடையில் ஒரு பங்கை இழக்கின்றன. எனவே, அவற்றின் உண்மையான எடையைக் கண்டுபிடிக்க வேண்டுமானால், எடை இழப்பை கூட்டிக் கொள்ளவேண்டும். எனவே மரத்தின் உண்மையான எடை ஒரு டன் + அது இடம்பெயரச்செய்யும் காற்றின் எடை ஆகும்.

அதுபோல இரும்பின் உண்மையான எடையும் ஒரு டன் + அது இடம்பெயரச்செய்யும் காற்றின் எடை ஆகும். எனினும் ஒரு டன் இரும்பைவிட ஒரு டன் மரம் அதிக சுமார் 15 மடங்கு அதிகமான இடத்தினை அடைத்துக்கொள்ளும். ஆகவே ஒரு டன் மரத்தின் உண்மையான எடை ஒரு டன் இரும்பின் உண்மையான எடையைவிட அதிகமாயிருக்கிறது. அல்லது, அதை வேறுவிதமாகச்சொன்னால் காற்றில் ஒரு டன் மரத்தின் உண்மையான எடை, காற்றில் அதே டன் எடையுள்ள இரும்பின் உண்மையான எடையைவிட அதிகமாயிருக்கிறது என்று சொல்லலாம்.

ஒரு டன் இரும்பின் கனபரிமாணம் 1/8 கனமீட்டர்; ஒரு டன் மரத்தின் கன பரிமாணம் 2 கனமீட்டர். ஆதலால் இடம் பெயர்க்கப்பட்ட காற்றின் எடைகளில் உள்ள வித்தியாசம் கிட்டத்தட்ட 2.5 கிலோகிராம். ஒரு டன் மரம் ஒரு டன் இரும்பைவிட உண்மையிலேயே இவ்வளவு அதிக கனமுள்ளதாயிருக்கிறது!

நன்றி : பொழுதுபோக்குப் பெளதிகம்

யா.பெரெல்மான்

உலக பெண் விஞ்ஞானிகள்

noreply@blogger.com (விச்சு) — Sun, 26 Aug 2012 05:23:00 +0000

இரா.நடராசன் அவர்கள் எழுதிய உலக பெண் விஞ்ஞானிகள் என்ற நூலில் இதுவரை நாம் கேள்விப்படாத பெண் விஞ்ஞானிகளின் பட்டியலைத் தந்துள்ளார். பெண் விஞ்ஞானிகள் யார்? யார்? எனக்கேட்டால் நிச்சயம் ஒரு சில பெயர்களைத்தவிர யாரையும் நமக்குத்தெரியாது.உலகின் முதல் விஞ்ஞானி ஒரு பெண்ணாகவே நிச்சயம் இருந்திருக்கவேண்டும் என சிந்தனையாளர் லெவிஸ்ட்ராஸ் குறிப்பிட்டுள்ளார். ஆண் விஞ்ஞானிகளின் பெயர்களைத் தெரிந்திருக்கும் அளவுக்கு பெண் விஞ்ஞானிகள் பெயர்களை நாம் தெரிந்திருப்பதில்லை. அதற்கான காரணம் ஆணாதிக்கமா? அல்லது இருட்டடிப்பு செய்யப்பட்டுள்ளதா? என்பது தெரியவில்லை. பெண்களின் சிந்தனைகளை வளரவிடக்கூடாது என்ற எண்ணமாகக்கூட இருக்கலாம்.

இந்த நூலை வாசிப்பவர்கள் கீழ்க்கண்ட உண்மைகளை ஒப்புக்கொள்வார்கள் என நூலாசிரியர் குறிப்பிடுகிறார்.

1.பெண் விஞ்ஞானிகளில் பெரும்பாலானவர்கள் மிகச்சாதாரண குடும்பங்களில் பிறந்து அடிமை முறையில் ஊறிய சமூகத்தைப் போராடி வென்று தங்களது அறிவு ஜீவிதத்தை நிரூபித்தார்கள்.

2.பேரழிவு ஆதிக்க அறிவியலுக்கு பெண் விஞ்ஞானிகள் யாருமே துணைபோகவில்லை.

3.விஞ்ஞான உலகில் ஆண் விஞ்ஞானிகளின் ஆர்வ கோளாறுகளால் சூழ்ந்த ஆபத்துகளிலிருந்து பெண் விஞ்ஞான உலகம் நம்மைக்காப்பாற்றி மீட்கும் பங்களிப்பை வழங்கியுள்ளது.

4.புவியின் பாதுகாப்பை முன்மொழியும் சுற்றுசூழல் உட்பட நவீன அறிவியல் துறைகளைத் தோற்றுவித்தவர்களே பெண் விஞ்ஞானிகள்தான். எனவே அவர்களுடைய அறிவியல் உலக அமைதிக்கும் ஆக்கத்திற்குமான அறிவியல் ஆகும். இப்புத்தகத்தை உருவாக்கிய இரா.நடராசன் அவர்களை எவ்வளவு பாராட்டினாலும் தகும்.

32 உலக பெண் விஞ்ஞானிகளின் பெயர்பட்டியல்

1.மேரிகியூரி 2. மரியா ஜீயஸ் 3.எம்மா பெர்ரி கார் 4 ராச்சல் லூயிஸ் கர்சன் 5. ரோசலிந்த் எல்ஸி பிராங்க்லின் 6.கிரேஸ் முர்ரே ஹாப்பர் 7.ஜீலியட் கியூரி 8.லிஸி மெய்ட்னர் 9. மேரி ஏஞ்சல் பென்னிங்டன் 10.டொரோத்தி மவுட் வ்ரிஞ்ச் 11.மரியா டெல்கஸ் 12.சார்ஹாசி காட்சீக்கோ 13.எலன் ஸ்வாலோ ரிச்சர்ட்ஸ் 14.ஜிடி தெரசா ராட் நிட்ஸ் கோரி 15.டோரொத்தி க்ரோஃபுட் ஹட்ஜ்சிங் 16.மேரி ஹெலன் ஜோன்ஸ் 17.டெஸி லி பியூ 18.மேரி ஜோன் அஸ்பர்ன் 19.ரீத்தா க்ளார்க் கிங் 20.வாலண்டினா தெர்ஸ் ஹோவா 21.பாலின் ராமர்ட் லூகாஸ் 22.ரீத்தா லெவி மொண்டால்சின் 23.லீன் அலெக்ஸாந்தர் மார்குலிஸ் 24.லுக்ரெஷியா கரோலின் ஹெர்ஷல் 25.சாலி க்ரிஸ்டன் ரைடு 26.டெட்சுகோ டெக்கபே 27.பிளாரன்ஸ் ஸ்வாம்புகு 28.ஷென்னான் டபிள்யூ லுசிட் 29. ஹெலன் கால்டிகாட் 30.ஜெர்டு பில்லி எலியன் 31.பார்பரா மெக்லிண்டாக் 32.கல்பனா சாவ்லா இவர்களைப்பற்றி மேலும் அறிய உலக பெண் விஞ்ஞானிகள் எனும் நூலைப் படியுங்கள். பெயர்களை ஆங்கிலத்திலும் தந்திருக்கலாம் எனபது என் எண்ணம்.பாரதி புத்தகாலயம் இந்நூலை வெளியிட்டுள்ளது. பெண்களின் அவதாரங்களையும் கொஞ்சம் தெரிந்துதான் கொள்வோமே...

குழந்தையிடம் கற்றுக்கொள்

noreply@blogger.com (விச்சு) — Sat, 25 Aug 2012 09:33:00 +0000