TIRANË – Deputetët socialistë do të kthehen sot në Kuvend për të kërkuar miratimin e nismës së tyre ligjore që bënë të mundur hetimin e zgjedhjeve parlamentare të 28 qershorit. Në një mbledhje që ka zgjatur fare pak, grupi parlamentar socialist ka vendosur që të jetë i pranishëm në seancën e sotme plenare, ku dhe është parashikuar të diskutohet dhe votohen disa ndryshime në ligjin për komisionet hetimore parlamentare.

Kështu, socialistët do të synojnë të frenojnë miratimin e amendamenteve të paraqitura prej Partisë Demokratike dhe kalimin e propozimeve të tyre të rrëzuara dy ditë më parë nga Komisioni i Ligjeve. Vetë situata e rëndë e krijuar si për shkak të krizës së gjatë politike ashtu edhe për shkak të vendimit të Komisionit të Ligjeve që rrëzoi propozimet e socialistëve, duke i zëvendësuar ato me disa amendamente të tyre, pritet të sjellë sot një debat të ashpër dhe të gjatë në seancë plenare. Për këtë qëllim deputetët opozitarë kanë marrë masat dhe kanë përcaktuar edhe hapat që do të ndjekin gjatë kësaj seance, e cila është konsideruar prej tyre si shpresa e fundit për t’i dhënë zgjidhje krizës politike në vend nëpërmjet miratimit të propozimeve të tyre. Në mbledhjen e djeshme mësohet se ka folur kryetari i grupit, Gramoz Ruçi, i cili ka bërë të ditur vendimin për të qenë prezentë në seancë vetëm gjatë kohës kur do të nisë shqyrtimi i pikës së rendit të ditës që përfshinë pikërisht këtë çështje.

Por, prezenca e tyre në këtë pjesë të debatit nuk do të jetë thjesht formale, pasi deputetët e majtë kanë vendosur që të angazhohen seriozisht që nëpërmjet diskutimeve të sjellin argumentet e duhur për të bindur shumicën e djathtë që të mos kalojë një nismë të tillë pa marrë parasysh propozimet e tyre. Kështu mësohet se për të marrë pjesë në diskutime do të angazhohet një numër i madh deputetësh socialistë, të cilët që në çelje të këtij debati do të regjistrojnë emrin për të diskutuar në seancë. Lista e deputetëve që do të marrë pjesë në këtë debat, përveç anëtarëve të komisionit të ligjeve, përbëhet edhe nga një numër i konsiderueshëm të zgjedhurish të tjerë socialistë, listë e cila mësohet se e kalon numrin 30.

Vetë angazhimi i një numri kaq të madh deputetësh në këtë debat duket se ka dhe një qëllim të fshehur të socialistëve, pra moslejimi i miratimit të amendamenteve të PD-së. Kjo pritet të bëhet e mundur me zgjatjen e seancës deri pas mesnate me shpresën që mazhoranca të ndërpresë punimet për t’i vijuar ditën tjetër kur dhe në Tiranë pritet të mbërrijë komisioneri i BE-së për zgjerimin, Stefan Fule, i cili natyrisht do të angazhohet edhe për zgjidhjen e krizës politike shqiptare. Në mbledhjen e djeshme të grupit ka folur edhe deputeti Fatmir Xhafaj, i cili ka njohur kolegët e vet me qëndrimin e mbajtur prej socialistëve në Komisionin e Ligjeve, si dhe amendamentet e propozuara prej demokratëve në ligjin për komisionet hetimore parlamentare. Në mbledhjen e grupit kanë marrë pjesë edhe të gjithë deputetët që e kanë prezantuar veten si përfaqësues të LMN-së. Nuk dihet nëse edhe ata do të marrin pjesë në këtë debat apo jo.(Shekulli)

Sllovenia po bën ende përpjekje për të ulur për herë të parë në një tryezë të përbashkët udhëheqësit e Kosovës dhe Serbisë gjatë një takimi rajonal në fundjavë në qytetin slloven të Bërdos.

Drejtori për marrëdhënie me publikun në Ministrinë e Jashtme të Sllovenisë, Urosh Mahkovec, i tha BBC-së se po vazhdojnë përpjekjet për të siguruar pjesëmarrjen e Serbisë në konferencën e udhëheqësve të Ballkanit.

Por ai tha se pavarësisht nga vendimi i Serbisë, takimi në Slloveni do të mbahet, organizatorët thonë se shumica e të ftuarve tashmë e kanë konfirmuar pjesëmarrjen.

Autoritetet serbe e kanë kushtëzuar pjesëmarrjen e tyre me kërkesën që Kosova të paraqitet në konferencë vetëm mbi bazën e Rezolutës 1244 dhe jo si një vend i pavarur.

Udhëheqësit e institucioneve të Kosovës kanë deklaruar se do të marrin pjesë në konferencë vetëm në cilësi të barabartë me të gjitha vendet e tjera të rajonit.

BBC: Deri ku kanë arritur përpjekjet për organizimin e konferencës?

Urosh Mahkovec: Ne ende po përpiqemi që t’i kemi të gjithë. Deri sot shumica nga pjesëmarrësit e kanë konfirmuar pjesëmarrjen, por një zgjidhje përfundimtare shpresojmë të gjendet deri nga fundi i kësaj jave.

BBC: Ju thoni zgjidhja përfundimtare, çfarë nënkupton ajo?

Urosh Mahkovec: Qëllimi ynë është që të mbledhim të gjithë pjesëmarrësit e ftuar, përfshirë këtu edhe Serbinë.

BBC: Pra, ende keni problem që të keni Serbinë në bord?

Urosh Mahkovec: Puna rreth kësaj çështjeje ende po vazhdon.

BBC: Cili është skenari, a do të paraqiten këta pjesëmarrës në bazë të shteteve apo në bazë të emrave të tyre personalë?

Urosh Mahkovec: Kjo gjithashtu është duke u harmonizuar dhe në këtë fazë është ende e vështirë të thuhet. Por qëllimi i konferencës është që të mblidhen të gjithë udhëheqësit e rajonit dhe kjo do të shënonte herën e parë në këto 18 apo 20 vitet e fundit që ata të ulen së bashku.

BBC: Pra, ju jeni shumë optimist se do të arrini t’i keni edhe pjesëmarrësit nga Kosova dhe Serbia në konferencë?

Urosh Mahkovec: Duhet të jeni optimist nëse doni që të keni një takim të tillë.

BBC: Por cili është qëllimi kryesor që të organizoni një konferencë të tillë?

Urosh Mahkovec: Qëllimi kryesor është që të ulim së bashku në një konferencë të gjithë udhëheqësit e rajonit, posaçërisht në raport me BE-në. Dhe mendoj se kjo është një porosi shumë e qartë nga pikëpamja evropiane. Gjithashtu ky samit është punuar në një bashkëpunim të ngushtë me presidencën spanjolle, e cila parasheh që në qershor të këtij viti të organizojë një takim të ngjashëm të udhëheqësve të rajonit.

BBC: Si një prej oragnizatorëve kryesorë të kësaj konference, Sllovenia…

Urosh Mahkovec: Kjo konferencë është një ngjarje e përbashkët e Sllovenisë dhe Kroacisë, e dy kryeministrave të të dyja vendeve.

BBC: Por çfarë mund të bëjë Sllovenia në lehtësimin e marrëdhënieve ndërmjet vendeve të rajonit të Ballkanit, marrë parasysh të kaluarën?

Urosh Mahkovec: Sllovenia është i vetmi anëtar i plotë i BE-së nga rajoni dhe ajo mund të ndajë përvojën e saj me të gjitha vendet e tjera të rajonit që edhe ato t’i bashkohen BE-së.

BBC: A është kjo konferencë një lloj rasti i mirë për t’u takuar për herë të parë udhëheqësit e Kosovës dhe të Serbisë?

Urosh Mahkovec: Ne shpresojmë. Sinqerisht shpresojmë të jetë kështu.

BBC: Dhe ju jeni përfundimisht optimist që ta keni Serbinë në këtë konferencë?

Urosh Mahkovec: Po, kjo është e sigurt.

BBC: Por çka nëse Serbia nuk do të marrë pjesë në këtë konferencë?

Urosh Mahkovec: Takimi do të zhvillohet gjithsesi. Nuk do të ketë problem. Takimi është i sigurt dhe ajo do të mbahet. I takon Serbisë që të vendosë se në çfarë niveli dhe në ç’mënyrë do që të marr pjesë.(Shekulli)

Drafti për Shërbimin Informativ Shtetëror i miratuar dy ditë më parë nga Komisioni i Sigurisë pritet që të mos kalojë sot për miratim në Kuvend. Burime nga ky institucion deklaruan dje për gazetën “Shekulli” se të gjitha gjasat janë që ky draft të marrë edhe një konsultë të fundit, për të kaluar më pas për miratim, por jo ditën e sotme, gjatë seancës plenare.

Megjithatë, burimet sqaruan se çdo gjë varet nga zhvillimet politike të ditës së sotme, të cilat natyrisht parashikohet të jenë shumë intensive lidhur me këtë çështje. Aktualisht, Ministria e Drejtësisë po konsultohet edhe me misionin e Bashkimit Europian për sistemin e drejtësisë EURALIUS lidhur me draftin në fjalë. Ndërkohë, tryeza e djeshme e organizuar nga ish-presidenti i Republikës, Alfred Moisiu, tregoi qartë qëndrimin në unison të ambasadorëve të huaj të akredituar në Tiranë lidhur me shqetësimin, që ata kishin sa i përket përmbajtjes së këtij drafti. Në të njëjtën kohë, një shqetësim të tillë ka paraqitur edhe vetë NATO-ja, ku Shqipëria është anëtare me të drejta të plota. Pak ditë më parë, qeveria shqiptare mori një letër nga zyra përgjegjëse e NATO-s për koordinimin global të sigurisë, i ashtuquajturi NOS.

Kjo zyrë i kërkonte qeverisë shqiptare që projektligji i ri për SHISH-in (para së të miratohet në Kuvend) të kalojë më parë nga kjo zyrë, që përbëhet nga 3 degë: Orientimet e përgjithshme, Inteligjenca për sigurinë dhe Siguria e mbrojtjes. Nga ana tjetër një aleat i fuqishëm i Shqipërisë në NATO, SHBA përmes Ambasadorit të akredituar në Tiranë, Xhon Uidhers, deklaroi se drafti i miratuar për ndryshimet e fundit në ligjin për SHISH-in binte ndesh me standardet e NATO-s dhe po e çonte Shqipërinë në rrugë të gabuar. Kundrejt qëndrimeve të njëpasnjëshme të ndërkombëtarëve, qeveria shqiptare duket se do të ndërmarrë një hap pas, për të vendosur në miratimin e këtij drafti në një kohë të mëvonshme.

___________

Ambasadorët e huaj ne vendin tone kanë përforcuar thirrjen e tyre drejtuar qeverisë për të mos u nxituar me reformën e SHISH-it, përmes miratimit të projektligjit, që kaloi vetem nje dite me pare ne komision vetem me votat e mazhorances.

Në një takim të përbashkët, ambasadori amerikan, Withers, ajo britanike McIlwham dhe ambasadori i OSBE-së, Bosch kanë theksuar se masat e marra duhet të jenë të çliruara nga ndikimet politike dhe ligji i ri duhet t’i garantojë SHISH-it pavarësinë.

“SHISH është një partner i denjë i ndërkombëtarëve, por reforma nuk duhet të nxitohet”- ka thënë ambasadorja britanike, duke shtuar se ndarja e pushteteve ka rëndësi të madhe.

Ndërkohë, ambasadori amerikan Withers, pas apelit publik të pak ditëve më parë kundër projektligjit të ri për Shërbimin Informativ ka deklaruar se SHBA janë të gatshme të ofrojnë gjithë shërbimet për të ndihmuar në këtë reformë.

“Nuk kërkojmë të nxisim më tej kundërshtitë, por duam të kontribuojmë në zgjidhje që reformimi i SHISH të bëhet sa më mirë. Besoni dhe lejoni miqtë t’u ndihmojnë”- ka thënë Withers.

Sipas tij, duhet të sigurohemi që sa herë të kërkohen masa të brendshme të ndermerren të cliruara nga ndikimet politike, pra Shërbimi Informativ Shtetëror të jetë i pavarur prej saj.

Duke vlerësuar rëndësinë që ka SHISH, ambasadori i OSBE-së, Bosch ka deklaruar se projektligji duhet të garantojë pavarësinë. Sipas tij, qeveria i di shqetesimet e nderkombetareve, nderkohe qe ka shtuar se nuk kane dijeni per rifreskimet e bera ne projektligj.

Ne tryezen e sotme, ku u fol per projektligjin e SHISH, kane apeluar edhe ish presidentet, Moisiu dhe Mejdani.

“Jo çdo ndryshim është reformë dhe sjell rezultate pozitive”- ka thene Moisiu, duke shtuar se i bën thirrje klasës politike për një reflektim për një vendimarrje të pjekur.

Kurse Meidani ka theksuar se me ndryshimet e bera, Berisha synon te mbaje nen kontroll SHISH-in, i cili ne fakt duhet te jete i pavarur.

Dje presidenti i vendit, Bamir Topi ka deklaruar se për ligjin e shumëdebatuar të SHISH-it, kundërshtuar nga opozita, ndërkombëtarët, SHBA dhe së fundi edhe NATO do të flasë vetëm përmes dekretit.

Gjatë një interviste në emisionin “5 pyetje nga Babaramo”, Topi është shprehur se nuk mund të paragjykojë një ligj që është duke u diskutuar ende në strukturat parlamentare.

“Mesazhi i presidentit vjen në momentin e duhur. Presidenti flet me dekret”- ka thënë Topi, duke sqaruar tre opsionet që ka në dispozicion; miratimin, kthimin mbrapsht ose heshtjen.

Ai ka pranuar se është në dijeni të debatit të madh me të cilin është shoqëruar ligji në fjalë, por ka këmbëngulur se do të flasë në momentin e tyre.

Komisioni i Sigurisë miratoi dje me votat e mazhorancës projektligjin për SHISH-in, pavarësisht kundërshtive të hapura të ndërkombëtarëve, SHBA-së, opozitës e së fundi edhe NATO-s.

Mbledhja u zhvillua me dyer të mbyllura, ndërkohë që mësohet se kalimi i ligjit u bë vetëm me disa ndryshime të vogla teknike.

Pas mbledhjes, kreu i Komisionit Leonard Demi ka theksuar se në këtë mbledhje u miratua projektligji për Shërbimin Informativ, i cili i jep më shumë pavarësi këtij institucioni.

Po dje, pak para miratimit te projektligjit Kryetari i Partisë Socialiste Edi Rama i ka kërkuar sot Kryeministrit Berisha që të terheqë ligjin për SHISH edhe për faktin se është duke cënuar marrëdhëniet me SHBA-të.

“Kemi pritur tre ditë me rradhë reagimin e zotit Berisha për deklaratën shumë shqetësuese të ambasadorit Withers, i cili vuri alarmin për një projektligj të ulët në qëllim, të rrezikshëm në në përmbajtje e të shëmtuar në formë, që nuk e ka pëlqimin e partnerit tonë kryesor”, u shpreh Rama.

Sipas Ramës, pa SHBA-në vendi ynë nuk do të ishte antër i NATO-s dhe s’do kishte sigurinë që ka sot.

Ndaj mungesa e një reagimi në përgjigje të anbsadorit Withers është sjellje që nuk turpëron thjesht zotin Berisha, po turpëron Shqipërinë në marrëdhëniet me Shtetet e Bashkuara. “Nuk është hera e parë”, vijoi Rama, “që Sali Berisha u bën karshillëk Shteteve të Bashkuara në kundërshtim me interesat e Shqipërisë e të shqiptarëve dhe, edhe këtë herë, në sfondin e karshillëkut provincial është kriza e demokracisë, e shtetit të së drejtës, e ekonomisë së vendit”.

“Unë i bëj thirrje zotit Berisha ta tërheqë menjëherë, pa humbur asnjë ditë, projektin e turpshëm të kthimit të Shërbimit Informativ të Shtetit në Shik-un famëkeq që përgjonte e përndiqte kundërshtarët e tij në politikë, media e shoqërinë civile”, tha ai.(Shekulli)

ROME-Duhet përdorur termi “ishte”, jo se gruaja me e vjetër në Europë nuk është më, por sepse një tjetër grua, i ka zënë vendin duke ja thyer rekordin. Nëna shqiptare Feride Hyka, 114 vjec që para pak ditësh mori soxhornon për të fituar leje qëndrimi tek familjarët në Itali thyen rekordin e italianes Santa Gennari nga Ascoli Piceno. Nënë Ferideja që aktualisht po jeton prej pak ditësh në Itali bëhet kështu gruaja më e vjetër në Europë.

Fëmijët e Feride Hykës jetojnë të gjithë në Itali dhe janë përpjekur prej kohësh të marrin dhe nënën e tyre nga Shqipëria. Por, ja që sistemimi i nënë Feridesë në Itali nuk ishte shumë i lehtë, sepse kompjuteri i programuar për regjistrimin e ditës së lindjes së personave ishte programuar për të lindurit nga vitit 1900 e tutje. Ndërkohë nëna Feride kishte lindur në vitin 1896.

Madje në pasaportë dallohet qartë dhe viti, 1896. Por në Shqipëri vetëm 5 vitë më parë lindi kompjuterizimi i të dhënave në gjendjet civile, kështu që problemi preku deri në Itali.

Duket gati e pabesueshme, por ja që 114 vjecarja mbeti e panjohur për shkak të kompjuterit që ishte programuar për regjistrimin e të lindurve nga viti 1900 e tutje.
Ndërkohë prezenca e saj tani ka marrë xhiron rreth botës.

Nënë Ferideja ka 8 fëmijë dhe shumë nipër e mbesa që I përkushtohet cdo ditë asja me shumë dashuri.

Në 7 Gusht ajo mbush 115 vjec dhe familjarët e shumtë të Feridesë po përgatisin një festë të madhe me këtë rast.

114 vjecarja shiqptare është një grua simpatike, pavarësisht moshës. Nuk ka shumë rrudha, në dallim nga moshataret e saj mbi 100 vjece dhe mban një shami të bardhë në kokë, duke lënë të qartë pamjen vizive të fytyrës.

Por, ja që familja Hyka është quajtur nga mediat italiane si një familje me shumë fat. Rrallë të takon të kesh një gjyshe, stërgjyshe, stër, stërgjyshe 114 vjecare, që ka parë 3 shekuj, që ka jetuar dy Luftra Botërore dhe një diktaturë të egër në Shqipëri.

Sot ajo jeton në Itali, rrethohet nga fëmijët, mbesa e nipërit që i japin shumë dashuri dhe padashur theu rekordin e italianes më të vjetër dhe europianes më të vjetër në moshë.

Ndërkohë gruaja më e vjetër në Botë është një gjeorgjiane, plot 130 vjec. Duket e pabesueshme dhe I vështirë ky rekord, por ne i urojmë Nënë Feridesë jetë të gjatë, dh eta festojë së më bukur këtë 115 vjetor të saj.

(pergatitiD.Bonollari/BalkanWeb)

SHKODER-Një sasi eksplozivi e vendosur në banesën e një gazetari është caktivizuar në kohë duke shmangur një ngjarje të rëndë në qytetin e Shkodrës.
TVNeës24 mëson se një sasi tritoli prej 100 gramësh u gjet sot në mëngjes para banesës së Ervin Dushit, gazetarit të emisionit investigativ “Fiks Fare”. Sasia e eksplozivit u gjet nga një fqinj i Dushit, rreth orës 06:00 të mëngjesit. Fqinji i gazetarit lajmëroi menjëherë policinë dhe familjarët e Dushit për të dalë nga banesa. Më pas kanë qënë forcat speciale ato që kanë caktivizuar lëndën plasëse duke shmanguar kështu shpërthimin që mund të shkaktontë dhe viktima në banesën e gazetarit.

Policia po heton për autorët e mundshëm të vendosjes së lëndës plasëse. Nje nga pistat e hetimit eshte dyshimi se eksplozivi eshte vendosur per shkak te profesionit te Ervin Dushit. Efektivet kane nisur te hetojne mbi ngjarjet e fundit mbi te cilat ka investiguar Dushi, per te zbardhur situaten e sotme qe mund ti kishte kushtuar me jete gazetarit, dhe familjareve te tij.

Vendosja e tritolit para banesave në Shkodër është bërë tashmë një ngjarje e përsëritur. Para pak ditësh në banesën e një avokati në Shkodër plasi një sasi tritoli duke shkatërruar banesën e avokatit, por pa shkaktuar dëme në njerëz.

(d.b/BalkanWeb)

Duke folur për takimin e humbur përballë Interit në Stamford Bridge, mesfushori i Chelseat, Michael Ballack, ka thënë se Interi është skuadra më e mirë defensive në botë.
“Të luash ndaj këtij ekipi është vështirë, ata ishin shumë të fortë në mbrojtje dhe në çdo duel ishin të pabesueshëm, të mençur, dhe të fortë. Interi është skuadra me mbrojtjen më të fortë në botë”.

“Natyrisht se ju gjeni përgjigje sepse ne jemi gjithashtu një ekip fizik, por nuk ishte dita jonë dhe jemi tejet të zhgënjyer”, përfundoi gjermani. /Telegrafi/

Në Indonezi, balta nuk shërben vetëm si material për të krijuar tulla dhe qeramikë, por përdoret edhe si biskotë për ngrënie që një familje e prodhon me gjenerata.
Tuban, në provincën lindore të Javas, është i vetmi fshat që prodhon “ampo”, një biskotë e prodhuar nga dheu i pastër, i cili mblidhet nga një fushë me baltë aty pranë.

Edhe pse nuk ka dëshmi mjekësore, fshatarët besojnë se biskotat e dheut janë një ilaç i mirë për parandalimin e dhimbjeve ndërsa femrat shtatzëna preferohen t’i hanë ato pasi besohet se rregullojnë lëkurën e fëmijës në barkun e nënës.

Sa më i mirë kualiteti i baltës, aq më të shijshme bëhen edhe biskotat, thotë Rasima prodhuesja e biskotave. Ajo është prodhuesja e vetme e ampos në fshat dhe fiton deri në 2 dollarë në ditë nga shitja e biskotave të baltës në tregun e fshatit.

Ata që hanë këtë produkt thonë se biskotat kanë një shije të mirë si të kremit. /Telegrafi/

Kater muaj pasi kreu nderhyrjen kirurgjikale per te ndryshuar seks, nje pastor luterian nga Finlanda ka hequr veshjen e kishes.
Marja-Sisko Aalto qe para operacionit quhej Olli Aalto shprehet se nuk arriti te ndertonte nje lidhje te mjaftueshme per te fituar besimin e nevojshem per te vazhduar me zanatin e pastorit.

Marja-Sisko Aalto eshte pastori i pare transeksual i kishes luteriane finlandeze. Ai e kishte bere te ditur qe ne vitin 2008 idene per te ndryshuar seks, duke shkaktuar polemika te medha.

Menjehere pas ketij njoftimi, peshkopi Voitto Huotari njoftoi se Aalto do ta hiqte menjehere veshjen e kishes nese do ta kryente nje veprim te tille.
(t.ch)

Një burg është një vend ku të privohet liria nëse shkel ligjin. Por vetëm kaq. Liria është e drejta e vetme nga e cila privohen të dënuarit. Një e drejtë tjetër, ajo për të pasur marrëdhënie intime me partnerët e ligjshëm, në një vend normal, është e garantuar.
Kështu edhe në një burg të përzier për burra dhe gra në kryeqytet. Ata që koha e dënimit i ka kapur beqarë, duhet të kënaqen me kujtimet e tyre. Ndërsa të martuarit…

Do të takojme sot dy zonja që vuajnë dënimet këtu, historitë e tyre janë të rralla, fatet e tyre janë të ngjashme. Administrata e burgut na tregon se përgjithësisht femrat e dënuara braktisen nga familjarët dhe bashkëshortët, por kjo nuk ka ndodhur në rastin e Veziresë dhe te Nuliferit nga Maqedonia.

Në momentin e arrestimit Nuliferi ka qenë me bashkëshortin dhe të dy janë dënuar me nga 10 vjet burg. Bashkëshorti ndodhet në Fushë Krujë dhe deri në takimin e parë kaloi shumë kohe.

“Jam takuar pas tre viteve se kam qenë në paraburgim dhe nuk lejoheshin takimet”, shprehet Nuliferi.

Është një nga mangësitë e mëdha të jetës së lirë, por disa një herë në muaj për 4 orë mund të jetojnë caste intime në dhomën e takimeve speciale. Nuliferi është me fat pasi ajo e gëzon këtë liri për 24 orë.

“Takimin tjetër e kam në 20 mars”, thotë Nuliferi.

Kur pyet për takimin e radhës sytë e këtyre grave shkëlqejnë si të femijëve.

Cdo takim normal eshte i paharrueshëm për të dënuarit ndërsa takimet speciale janë akoma më të rëndësishëm.

“Ishte shumë e vështirë. Sepse ishte një mungesë e gjatë”, thotë Vezirja.

Për Veziren fjalët janë të vështira për t’u gjetur, emocionet janë të mëdha dhe për më tepër që takimi i saj special sapo ka mbaruar, ndërkohë që xhirohej kjo intervistë.

“Me bashkëshortin i kam marrëdhëniet shumë të mira. Mezi po pres që të vij muaji tjetër”, thotë Vezireja.

Një mundësi që jo të gjithë të burgosurit e kanë, qofshin burra apo gra, por rëndësia për ata që e kanë është pothuajse jetike e ndoshta fjalët më të përshtatshme i gjen vete Vezirja e cila rrefen dhe dashurinë e madhe për babain e tre fëmijëve të saj.

“Familja është gjithcka për mua dhe ajo na bashkon”, thotë Vezirja.

(t.ch)

Rezarta Skifteri, diplomuar në Akademinë e Arteve në Tiranë për dizajn tekstil në vitin 2000 dhe e pajisur me një diplomë ndërkombëtare në po të njëjtin vit, është një nga emrat më të njohur në modën shqiptare.
Atelieja e saj është nga me të preferuarat për shumë artistë dhe organizatorë të evenimenteve të mëdha në vend.

Një klient mund të deshirojë një veshje sportive, klasike, preta-porte, e deri tek kostumet e banjës dhe aksesorë të tjerë.

Por ajo që spikat në sfilatat e Rezarta Skifterit është stili Houte Couture Alta Moda, një stil ku veshjet edhe vishen, edhe jo.

Në sfilatat e saj Rezarta Skifteri ka guxuar të sjellë gruan e viteve ’30, transparente, sensuale, luksoze, me dantella e gurë të cmuar.

Gruas “Made in Skifteri” pervecse delikate dhe shumë shik, i shtohet doza glamur.

E preferuar për stilin e saj, ajo terheq vëmendjen e botuesve të cilët e zgjedhin për kopertina revistash të rëndësishme në vend, ku nje sy stilisti si ai i Rezartes është i besueshëm për t’u kujdesur mbi imazhin e personazheve të zgjedhur.

Megjithëse e angazhuar për orë të tëra gjatë ditës, ajo nuk i mohon vetes shoqerinë e mikeshave të saj më të mira, me të cilat ndan orët kryesisht të fundjavës, udhëtimet apo emocionet e aktiviteteve të ndryshme.

Mira është njëra prej tyre, e cila rrëfen plot entuziazëm shoqërinë shumëvjecare me Rezartën.

“Rezin e njoh prej një kohe shumë të gjatë dhe më ka bërë përshtypje se Rezi është shumë e thjeshtë, shumë ë dashur dhe e sinqertë”, shprehet Mira.

Një tjetër mikeshë e ngushtë e Rezarta Skifterit është Gena, e cila pranon se të qenurit nëna i ka lidhur më tepër me njera-tjetrën.

Të kesh një mike si Rezarta ka plot avantazhe, sepse përvec të tjerash je e orientuar ku të drejtohesh nëse të duhet një veshje për cdo rast, por me dorë të spikatur stilisti.

“Gjëja tjetër që na lidh neve janë vajzat tona që në kemi në krahë dhe ndajmë shumë probleme që kemi me fëmijët tanë”, thotë Gena.

Pas një gruaje të fortë, ambicioze, gjithnjë me një buzëqeshje të madhe në fytyrë dhe me sy që të ftojnë ta njohësh më mirë, fshihet një mama e cila përkujdeset deri në detaje që vajzës së saj 3 vjecare të mos i mungojë asgjë.

Një jetë e lumtur bashkëshortore dhe një rol prej nëne të përkushtuar e plotësojne figurën e një emri që jemi mësuar ta dëgjojmë gjithnjë pas krijimeve origjinale dhe modeleve në pasarela në këto vite zhvillimi në Shqipëri.
(t.ch)