Alienized!

ಅನುಮತಿ ಕೊಡು

2023-09-21T00:35:00.001-07:00

ನೀ ನಾಚಿ ಇನೊಮ್ಮೆ ನಕ್ಕು ಬಿಡಬೇಡ ನನ್ನ ನೋಡಿ,

ನಿನ್ನ ನಾಚಿಕೆ ನೋಡಿ ನಾ ನಿನ್ನ ಪ್ರೀತಿಯಲ್ಲಿ ಮರುಳಾಗಿಬಿಡುವೆ,

ಮತೊಮ್ಮೆ ಹೇಳಿ ಬಿಡುವೆಯಾ ನಿನ್ನ ಮನದಾಳದ ರಾಗವ ಹಾಡಿ,

ನಾ ಇನೊಮ್ಮೆ ನಿನ್ನ ರಾಗಕ್ಕೆ ನನ್ನ ರಾಗ ಸೇರಿಸಿ ಈ ಜಗಕ್ಕೆ ಹೇಳಿ ಕೂಗಿ ಬಿಡುವೆ,

ಪುಟ ಹೃದಯ ಇದು ಹುಚ್ಚು ಕನಸು ಕಂಡಿದೆ ಎಂದು,

ಆ ಹುಚ್ಚ ಕನಸಲ್ಲಿ ನಿನ್ನನ್ನೇ ತುಂಬಿರುವೆ ಇಂದು,

ಒಮ್ಮೆ ಕೂಗಿ ಹೇಳಿ ಬಿಡು ಆ ಕನಸಿನ ರಾಣಿ ನೀ ಆಗುವೆಯಾ,

ನಿನ್ನ ನನ್ನ ಹೃದಯದಲ್ಲಿ ಪಟ್ಟಾಭಿಷೇಕ ಮಾಡಲು ಕಾದಿರುವೆಯಾ,

ಒಮ್ಮೆ ನೀ ಈ ಸಿಂಹಾಸನ ಏರಿ ಹೃದಯದ ಒಡತಿ ಆಗಿಬಿಡು,

ಸದಾ ಕಾಲ ನಿನ್ನ ಸೇನಾಧಿಪತಿಯಾಗಿ ನಿನ್ನನ್ನು ಕಾಯಲು ಅನುಮತಿ ಕೊಡು..!

ಕಾಡಬೇಡ ಗೆಳತಿ

2023-09-21T00:06:00.000-07:00

ಹಗಲು ಇರುಳೆನ್ನದೆ ಕಾಡಿದೆಯನ್ನ

ಕಿರುನಗೆ ಬೀರುತ ಮೋಹಿಸಿದೆಯನ್ನ

ಕನಸ, ನನಸಾಗಿಸಿ ಆಲಂಗಿಸಿದೆಯನ್ನ

ನೆನಪುಗಳ ಭಾವದಲ್ಲಿ ಬಂಧಿಸಿರುವೆಯನ್ನ..!!

ಎಂದು ಬರುವೆ...?

ಈ ಕನಸ ಹೂವಾಗಿಸಿ,ನಲ್ಮೆಯ ರಸದೌತಣ

ಉಣಬಡಿಸಲು ಕಾದಿರುವೆ ನಾನಿನ್ನ,

ತುಂಬಿದ ಹೃದಯದಲ್ಲಿ ಭಾಂದವ್ಯದ

ಭಾವ ತಿಜೋರಿಯೊಳಗೆ ಬಂಧಿರೀಸಿರುವೆ ನಿನ್ನ..!!

ಅನುರಾಗದ ಅರಮನೆಯಲ್ಲಿ ಕಾದಿರುವೆ ನಿನಗಾಗಿ

ಎದೆ ಕದವ ತೆರೆದು,

ಈ ಜಗದ ದೊಂಬಿಯ ಮರೆತು ಹೃದಯ ತಾಳ ತಪ್ಪುತಿರುವುದು,

ಮುತ್ತಿನ ಮಳೆ ಸುರಿಸುತ್ತ, ನಮ್ಮ ಪಾಲಿಗೆ ಇದು ಸ್ವರ್ಗವಾಗಿರುವುದು..!!

ಅಂತರಂಗದಿ ಪುಟಿದೇಳುತಿದೆ ನಿನ್ನಯ

ಚೆಲುವು ತುಂಬಿದ ಕಂಗಳ ನೆನೆದು,

ಬಯಕೆ ಮೂಡಿಹುದು ಮನಸು ನಿನ್ನ ಸೇರಲು

ಹಪಹಪಿಸುತ್ತಿರುವುದು,

ನಿನ್ನ ಕಾಣುವ ಹಂಬಲದಿ ಕನಸುಗಳ

ಹೆಣೆಯುತಿಹುದು..!!

ಮನಕ್ಕೆ ಬೇಕಿಹುದು ನಿನ್ನ ತೋಳಬಲದ ಅಪ್ಪುಗೆ,

ಕಳೆದು ಹೋಗುವೆ ಪ್ರೀತಿಯ ಬೇಡುತ ನಿನ್ನೊಪ್ಪಿಗೆ,

ಎದೆಗೊರಗಿ ನಾನು ನಿದ್ರಿಸುವೆ ಮಗುವಾಗಿ,

ಅಪ್ಪಿ ಮುದ್ದಿಸುವೆಯಾ ನೀ ಬೆಳದಿಂಗಳ ಚಂದಿರನಾಗಿ..!!

"ಕಾಡಬೇಡ ಗೆಳತಿ ನೀನಿನ್ನೂ

ದೂರ ನಿಂತು ಕಾಡಿಸಿದ್ದು ಸಾಕಿನ್ನೂ "

ಆದರ್ಶ ಶಿಕ್ಷಕ

2019-10-15T22:58:00.000-07:00

ಆದರ್ಶ ಶಿಕ್ಷಕ :

"ಹಿಂದೆ ಗುರು ಇರಬೇಕು, ಮುಂದೊಂದು ಗುರಿ ಇರಬೇಕು ", ಎನ್ನುವ ಮಾತು ನನಗೆ ಯಾವಾಗಲೂ ಗುರುವಿನ ಮೇಲಿರುವ ನಂಬಿಕೆಯನ್ನು ತೋರಿಸುತ್ತದೆ.
ಗುರು ಎನ್ನುವ ಪದಕ್ಕೆ ಅಥವಾ ಆ ವ್ಯಕ್ತಿತ್ವಕ್ಕೆ ಸಮಾಜದಲ್ಲಿರುವ ಪ್ರಾಮುಖ್ಯತೆ ಬಹುಶ ಬೇರೆ ಯಾವ ವ್ಯಕ್ತಿಗೂ ಇಲ್ಲ ಎಂದೆನಿಸುತ್ತದೆ. ಯಾಕೆಂದರೆ ಎಲ್ಲಾ ವ್ಯಕ್ತಿಗಳಿಗೂ ಮೂಲ ಈ ಗುರುವಿನ ಕಾರ್ಯವಲ್ಲವೇ ? ಅನಾದಿ ಕಾಲದಿಂದಲೂ ನಡೆದಾಡುವ ದೇವರೆಂದರೆ ತಾಯಿಯ ನಂತರ ನಿಲ್ಲುವುದು ಇದೆ ಗುರುವಿರಬಹುದು, ನಮ್ಮ ಗುರಿಗೆ ರೂವಾರಿಯಾಗುವ ಗುರು.
ನನ್ನ ಬಹುದಿನದ ಅಂದರೆ ಚಿಕ್ಕ ವಯಸ್ಸಿನ ಗುರಿ ಗುರುಯಾಗಬೇಕೆಂದು ಅಂದರೆ ಶಿಕ್ಷಕ ವೃತಿಯನ್ನು ಅನುಸರಿಸಬೇಕೆಂದು, ಪ್ರಾಯಶಃ ಯಾಕಿರಬಹುದು? ನನ್ನ ಪ್ರಕಾರ ಭ್ರಷ್ಟಾಚಾರವೇ ಇಲ್ಲದ ಒಂದೇ ಒಂದು ಕ್ಷೇತ್ರ ಅದಾಗಿತ್ತು. ಆದರೆ ಇಂದಿನ ಪರಿಸ್ಥಿತಿ ಭಿನ್ನವಾಗಿಯೇ ಇದೆ ಬಿಡಿ...,
ವೇದಗಳ ಕಾಲದಿಂದಲೂ ಬ್ರಾಹ್ಮಣರಿಗೆ ಮಾತ್ರ ವಿದ್ಯಾಭ್ಯಾಸ ಬೇಕು , ಅವರು ಮಾತ್ರ ಗುರು ಸ್ಥಾನದಲ್ಲಿ ಇರಬೇಕೆಂಬ ಧೋರಣೆ ಬದಲಾಗಿದೆ. ಶಿಕ್ಷಣವನ್ನು ನೀಡುದುವ ಪ್ರತಿಯೊಬ್ಬರೂ ಶಿಕ್ಷಕರಾಗಿದ್ದಾರೆ. ಮನೆಯೇ ಮೊದಲ ಪಾಠಶಾಲೆ , ತಾಯಿಯೇ ಮೊದಲ ಗುರು ಎನ್ನುವ ಮಾತಿನಂತೆ, 6 ನೇ ವಯಸ್ಸಿಗೆ ಒಂದು ಮಗು ( ಈಗ ಮೂರನೇ ವಯಸ್ಸೇ ಆಗಿರುವುದು ಶೋಚನೀಯವೇ ಸರಿ ) ಶಾಲೆಯಲ್ಲಿ ತನ್ನ ಭವಿಷ್ಯವನ್ನು ಕಟ್ಟಿಕೊಳ್ಳುವ ಪದ್ಧತಿ ಇದೆ. 6 ವರ್ಷದ ಆ ಮಗುವನ್ನು ತಿದ್ದುವ ಸಂಪೂರ್ಣ ಜವಾಬ್ದಾರಿ ಗುರುವಿನದೇ ಆಗಿರುತ್ತದೆ " ಇಂದಿನ ಮಕ್ಕಳೇ ನಾಳಿನ ಪ್ರಜೆಗಳು " ಎಂಬ ನಾಣ್ಣುಡಿಯಂತೆ ದೇಶದ ಭವಿಷ್ಯವನ್ನು ಕಟ್ಟುವ ಕೆಲಸವನ್ನು ಶಿಕ್ಷಕರೇ ಮಾಡಬೇಕು. ದೇಶದ ಬೆನ್ನೆಲುಬು ರೈತ ಹೇಗೋ ಹಾಗೆಯೇ ಶಿಕ್ಷಕ ಕೂಡ ದೇಶದ ಬೆನ್ನೆಲುಬೇ..., ಪ್ರತಿಯೊಬ್ಬನನ್ನು ತಿದ್ದುವ ಅಧಿಕಾರ ಮತ್ತು ಧೈರ್ಯವಿರುವ ಆ ಶಿಕ್ಷಕನೂ ಕೂಡ ಆದರ್ಶವಾಗಿರಬೇಕಲ್ಲವೇ?? ಅವನಲ್ಲಿಯೂ ಕೆಲವು ಆದರ್ಶ ಗುಣಗಳಿರಬೇಕಲ್ಲವೇ?
ಹೌದು, ಖಂಡಿತವಾಗಿಯೂ ಆತನು ಒಬ್ಬ ಒಳ್ಳೆಯ ಶಿಕ್ಷಕನಾಗುವುದರ ಜೊತೆಗೆ ಆದರ್ಶ ಶಿಕ್ಷಕನೂ ಆಗಿರಬೇಕು. ಆತನ ಪ್ರತಿ ಕ್ಷಣದ ನಡೆ ನುಡಿಯೂ ಮಕ್ಕಳ ಮೇಲೆ ಪರಿಣಾಮ ಬೀರುತ್ತದೆ, ಕೇವಲ ಸರ್ಕಾರ/ಸಂಸ್ಥೆಯ ಶಿಕ್ಷಕನಾಗಿ ನೇಮಿಸಿದ್ದಾರೆ, ಸಂಬಳ ಕೊಡುತ್ತಾರೆ ಅಥವಾ ತನ್ನ ಜೀವನ ಸಾಗಿಸಲು ಪಾಠ ಮಾಡುತ್ತಾನೆ, ಕಲಿತರೂ ಬಿಟ್ಟರು ನನಗೇನು ನಷ್ಟವಿಲ್ಲ ಎನ್ನುವವ ಎಂದಿಗೂ ಗುರುವಿನ ಸ್ಥಾನದಲ್ಲಿ ನಿಲ್ಲಲು ಅರ್ಹನಲ್ಲ.
ಆದರ್ಶ ಶಿಕ್ಷಕನೆಂದರೆ; ವಿದ್ಯಾರ್ಥಿಗಳಿಗೆ ಎಲ್ಲವನ್ನು ಕಲಿಸುವವನಾಗಿರಬೇಕು, ಮಕ್ಕಳಿಗೆ ಕೇವಲ ಪುಸ್ತಕದಲ್ಲಿ ಇರುವ ಜ್ಞಾನವಲ್ಲದೆ ಸಮಾಜದ ನಿಜವಾದ ಅರಿವು ಮೂಡಿಸುವವನಾಗಿರಬೇಕು, ವಿದ್ಯಾರ್ಥಿಗೆ ಪ್ರೇರಣೆಯಾಗುವ, ಸ್ಫೂರ್ತಿ ತುಂಬಿಸುವ ತಾಕತ್ತು ಆತನಲ್ಲಿರಬೇಕು, ಮಕ್ಕಳ ಮೇಲೆ ಆತನ ವ್ಯಕ್ತಿತ್ವ, ಮಾತು, ನಡೆ - ನುಡಿ ತುಂಬಾನೇ ಪರಿಣಾಮ ಬೀರುತ್ತದೆ.
ಎಷ್ಟರ ಮಟ್ಟಿಗೆ ಅಂದರೆ, ಈ ವರ್ಷದ ರಜಾ ದಿನಗಳಲ್ಲಿ, ನನ್ನ ಸ್ನೇಹಿತರ ಜೊತೆಗೆ ನಾನೇ ಕಲಿತ ಶಾಲೆಯಲ್ಲಿ ಹವ್ಯಾಸಕ್ಕಾಗಿ ಪಾಠ ಮಾಡುವ ನಿರ್ಧಾರಕ್ಕೆ ಬಂದೆವು. ನಾವು ಆಯ್ಕೆ ಮಾಡಿಕೊಂಡ ವಿಷಯ ಜೀವನ ಮೌಲ್ಯಗಳು. ಅದು ಒಂದು ಸಣ್ಣ ಪ್ರಾರ್ಥಮಿಕ ಶಾಲೆ, ನಾನು ಮತ್ತು ನನ್ನ ಒಬ್ಬಳು ಸ್ನೇಹಿತೆ, ಆರು ಮಾತು ಏಳನೇ ತರಗತಿಗೆ ಹೋಗಿದ್ದೇವು, ಸುಮಾರು ಒಂದು ವರೆ ಗಂಟೆಯ ಕಾಲಾವಕಾಶ ನಮಗೆ, ಹೀಗೆ ಹೇಳಿಕೊಡುತ್ತಿದ್ದ ಸಮಯದಲ್ಲಿ ಒಬ್ಬ ಹುಡುಗ ಎದ್ದು ನಿಂತು,
" ಸರ್.. ಸರ್.. ಇವ್ನು ನನಗೆ ಹೊಡಿತಾ ಇದ್ದಾನೆ" ಎಂದ
ನಾನು, " ಯಾಕಪ್ಪ , ಯಾಕೆ ಹೊಡ್ದೆ " ಎಂದು ಕೇಳಿದಕ್ಕೆ ಇನೊಬ್ಬ
" ಸರ್ .. ಅವ್ನು ನನ್ನಗೆ ಕೆಟ್ಟದಾಗಿ ಬೈದ , ಅದಕ್ಕೆ ಹೊಡೆದೆ , ಎಂದ
" ನೋಡಿ ನೀವು ಹೀಗೆಲ್ಲ ಜಗಳ ಮಾಡಬಾರದು, ಈ ರೀತಿ ಕೆಟ್ಟ ಮಾತಲ್ಲಿ ಬಯ್ಯಬಾರದು, ಬಯ್ಯುವುದರಿಂದ ನಮಗೆ ಏನು ಸಿಗಲ್ಲ, ಬದಲಾಗಿ ಯಾವಾಗಲೂ ಒಳ್ಳೆಯದೇ ಮಾತನಾಡಿದರೆ ನಿಮ್ಮ ಸ್ನೇಹಿತರು ಕೂಡ ನಿಮ್ಮನ್ನು ಹಾಗೆ ಒಳ್ಳೆಯ ರೀತಿಯಲ್ಲಿ ಮಾತನಾಡಿಸುತ್ತಾರೆ" ಎಂದೆ ಮತ್ತು ಪಾಠವನ್ನು ಮುಂದುವರಿಸಿದೆ. ಒಂದು ಅರ್ಧ ಘಂಟೆ ಆಗಿರಬೇಕು ಅನಿಸುತ್ತದೆ , ನನ್ನ ಗೆಳತಿಗೆ " ಲೇ ಮಂಗಾ , ಆ ಬುಕ್ಸ್ ಸರಿಯಾಗಿ ಜೋಡಿಸು " ಎಂದೆ ಎಲ್ಲಾ ಮಕ್ಕಳ ಮುಂದೆಯೇ, ತಕ್ಷಣಕ್ಕೆ ಒಬ್ಬ ಹುಡುಗ ಎದ್ದು ನಿಂತು " ಸರ್ .. ನಮಗೆ ಬಯ್ಯ ಬಾರದು ಅಂತ ಹೇಳಿ ನೀವು ಮಾತ್ರ ಬಯ್ಯುತ್ತಿದ್ದೀರಾ " ಅಂದ. ನನಗೆ ನಿಜವಾಗಿಯೂ ನಾಚಿಕೆಯಾಯಿತು.
ಹೀಗೆ ಶಿಕ್ಷಕರನ್ನು ಪ್ರತಿ ಕ್ಷಣದಲ್ಲಿಯೂ ಗಮನಿಸುವ , ಅನುಕರಿಸುವ ಮಕ್ಕಳ ಮುಂದೆ ಪ್ರೇರಣಾದಾಯಕವಾಗಿರುವುದು ಆದರ್ಶ ಶಿಕ್ಷಕನ ಆದ್ಯ ಕರ್ತವ್ಯ. ತಾಳ್ಮೆ , ಕರುಣೆ, ಸಹನೆ , ತಾರತಮ್ಯ ಇಲ್ಲದ ಗುಣ ಆದರ್ಶ ಶಿಕ್ಷಕನಲ್ಲಿರಬೇಕು. ಕಲಿಸುವ, ಕೆಲಸ ಮಾಡುವ ಆತನೂ ವಿದ್ಯಾರ್ಥಿಗಳ ಜೊತೆ ಕಲಿಯುವ ಗುಣ ಮತ್ತು ತಾನು ಕೂಡ ಒಬ್ಬ ನಿರಂತರ ವಿದ್ಯಾರ್ಥಿಯಾಗಿರಬೇಕು. ತನ್ನ ಕೆಲಸದ ಮೇಲೆ ಆತನಿಗಿರುವ ಶ್ರದ್ಧೆ ಮತ್ತು ಪ್ರೀತಿ ಆತನನ್ನು ಮತ್ತೊಂದು ಮಟ್ಟಕ್ಕೆ ಕೊಂಡೊಯುತ್ತದೆ.
ಒಂದು ಕಾಲೇಜಿಗೆ ಒಂದೇ ಸಮಯದಲ್ಲಿ ಬಂದ ಇಬ್ಬರು ಶಿಕ್ಷಕರು , ಅಂದರೆ ಅವರಿಬ್ಬರ ವಯಸ್ಸು, ವಿದ್ಯಾಭ್ಯಾಸ, ರೂಪ, ವಿಷಯ ಎಲ್ಲವು ಕೂಡ ಒಂದೇ , ಆದರೆ ಒಬ್ಬ ಶಿಕ್ಷಕ ಆದರ್ಶ ಶಿಕ್ಷಕನೆನಿಸುತ್ತಾನೆ ಮತ್ತೊಬನ ಪಾತ್ರ ತುಂಬಾ ಕಡಿಮೆ ಇರುತ್ತದೆ, ಕಣ್ಣಾರೆ ಕಂಡು ಅನುಭವಕ್ಕೆ ಬಂದದ್ದು, ಕಾರಣ ಇಷ್ಟೇ , ಆದರ್ಶ ಶಿಕ್ಷಕನೆನಿಸಿದವ ವಿದ್ಯಾರ್ಥಿಗಳ ಜೊತೆ ಸ್ನೇಹಯುತವಾದ, ನಂಬಿಕೆಯುತವಾದ ಸಂಭಂದವನ್ನು ಬೆಳೆಸಿಕೊಳ್ಳುತ್ತಾನೆ . ತಾನು ವೃತ್ತಿಗೆ ಹೊಸಬ ಎಂದು ಕಲಿಯುವುದರ ಜೊತೆಗೆ ಕಲಿಸುವ ಮನೋಭಾವ ಹೊಂದಿರುತ್ತಾನೆ. ಕೇವಲ ಪಠ್ಯ ಮುಗಿಸುವ ಗುರಿ ಇರಿಸಿಕೊಳ್ಳದೆ ವಿದ್ಯಾರ್ಥಿಗಳಿಗೆ ಅರ್ಥೈಸುವ ಕೆಲಸ ಮಾಡುತ್ತಾನೆ.
ದೇಶದ ಭವಿಷ್ಯವನ್ನು ರೂಪಿಸುವ ಶಿಕ್ಷಕ ಶಿಸ್ತಿನ ಮತ್ತು ಮೌಲ್ಯಯುತ ಶಿಕ್ಷಣಕ್ಕೆ ದಾರಿಯಾಗಬೇಕು. ತಂದೆ ತಾಯಿ , ಸ್ನೇಹಿತರು ಅಥವಾ ಬಂಧುಬಳಗದವರು ಒಬ್ಬ ವ್ಯಕ್ತಿ ಹೊಟ್ಟೆ ಹಸಿವು ಎಂದಾಗ ಊಟ ಕೊಡುವುದಾದರೆ , ಅದೇ ಒಬ್ಬ ಆದರ್ಶ ಶಿಕ್ಷಕನಾದವನು ಅದನ್ನು ಸಂಪಾದಿಸುವ ಮಾರ್ಗ ತೋರಿಸಬೇಕು.
"A great teacher is someone who teaches not only with mind but also with heart " ಎನ್ನುವ ಮಾತಿನಂತೆ , ತನ್ನ ಕೆಲಸದ ಮೇಲೆ ಶ್ರದ್ಧೆ , ಪ್ರೀತಿ ಇದ್ದು ಮಕ್ಕಳ ಜೊತೆ ಮಕ್ಕಳಾಗಿ ತಾನು ಕಲಿಯುವ ವಿನಮ್ರತೆ ಇರುವವ , ಅವನು ನಿಜವಾದ ಆದರ್ಶ ಶಿಕ್ಷಕ.
ಆದರೆ ಎಲ್ಲದಕ್ಕಿಂತಲೂ ಬದುಕು ದೊಡ್ಡದು , ಜೀವನಕ್ಕಿಂತ ದೊಡ್ಡವನಾದ ಆದರ್ಶ ಶಿಕ್ಷಕನಿಲ್ಲ.
"ಪ್ರತಿಯೊಬ್ಬರೊಳಗೊಂದು ಪದ ಕಲಿತು ಸರ್ವಜ್ಞನಾಗುವುದೇ" ಶಿಕ್ಷಣ. ಅವನೇ ಆದರ್ಶ ಶಿಕ್ಷಕ.

- AliEn!

- Amrutha!

ತಾಳ್ಮೆಯೇ ಸದ್ಗುಣ

2019-08-06T09:45:00.002-07:00

ನಿಮ್ಮ ನಿರೀಕ್ಷಿತ ಸಮಯದಲ್ಲಿ ಕೆಲಸಗಳು ನಡೆಯದ ಕಾರಣ ಮುಂದುವರೆಯುವುದು ಬೇಡ ಎಂದು ನೀವು ಯೋಚಿಸಿದೀರಾ?

ನಿಮ್ಮ ಕೆಲಸದಲ್ಲಿ ಬೆಳವಣಿಗೆಯನ್ನು ಕಾಣದ ಕಾರಣ ನೀವು ಏನು ಮಾಡುತ್ತಿದ್ದೀರಿ ಅದನ್ನು ಕೈಬಿಡಲು ನಿರ್ಧರಿಸಿದೀರಾ?

ನಿಮ್ಮ ಕೆಲಸದಲ್ಲಿ ಅನುಭವಿಸಿದ ವೈಫಲ್ಯಗಳಿಂದಾಗಿ ನೀವು ಎಂದಾದರೂ ಆ ಕೆಲಸವನ್ನು ಕೊನೆಗೊಳಿಸಬೇಕೆಂದು ತೀರ್ಮಾನಿಸಿದೀರಾ?

ಜೀವನದಲ್ಲಿ ಅನಿವಾರ್ಯವಾಗಿ ಕಂಡ ಏರಿಳಿತದ ಕಾರಣದಿಂದಾಗಿ ನೀವು ದುಃಖದಿಂದ, ಖಿನ್ನತೆಯಿಂದ ಮತ್ತು ನಕಾರಾತ್ಮಕ ಭಾವನೆಗಳಿಂದ ಮುಳುಗಿದಾಗ, ಮಾಡುತ್ತಿರುವ ಕೆಲಸವನ್ನು ಅರ್ಧದಲ್ಲಿ ಬಿಡಬೇಕೆಂದು ನೀವು ಭಾವಿಸಿದಾಗ, ಜೀವನವನ್ನು ಮುಂದುವರಿಸಲು ಒಂದು ಕಾರಣವನ್ನು ನೋಡಲು ನಿಮಗೆ ಸಾಧ್ಯವಾಗದಿದ್ದಾಗ, ನಿಮನ್ನು ನೀವು ಸರಳವಾದ ಮತ್ತು ಆಳವಾದ ಒಂದು ಸಾದೃಶ್ಯವೆಂದು ಭಾವಿಸಿಕೊಳ್ಳಿ. ಅದಕ್ಕಾಗಿ ಈ ಸಣ್ಣ ಅನುಭವವನ್ನು ಓದಿ:

ಒಬ್ಬ ವ್ಯಕ್ತಿ ತನ್ನ ಹೊಲದಲ್ಲಿ ಜರೀಗಿಡ ಮತ್ತು ಬಿದಿರಿನ ಬೀಜಗಳನ್ನು ಬಿತ್ತಿದನು ಮತ್ತು ಅವುಗಳಿಗೆ ಸಾಕಷ್ಟು ಬೆಳಕು ಮತ್ತು ನೀರು ಸಿಗುವಂತೆ ನೋಡಿಕೊಂಡರು. ಜರೀಗಿಡವು ಭೂಮಿಯಿಂದ ಬೇಗನೆ ಮೊಳಕೆಯೊಡೆದು ಹೊರಹೊಮ್ಮಿ ಅದರ ಸಂಪೂರ್ಣ ಸುತ್ತಮುತ್ತಲಿನ ಪ್ರದೇಶಗಳನ್ನು ಹಸಿರು ಬಣ್ಣದಿಂದ ಆವರಿಸುವುದನ್ನು ನೋಡಿ ಅವನು ಸಂತೋಷಪಟ್ಟನು, ಆದರೆ ಬಿದಿರಿನ ನೋಟದಿಂದ ಏನೂ ಹೊರಬರದನ್ನು ನೋಡಿದಾಗ ಅವನು ನಿರಾಶೆಗೊಂಡನು, ಆದರೆ ಅವನು ಅದನ್ನು ಬಿಟ್ಟುಕೊಡಲಿಲ್ಲ, ತನ್ನ ಪ್ರಯತ್ನವನ್ನು ಮುಂದುವರೆಸಿದನು. 2 ನೇ ವರ್ಷದಲ್ಲಿ ಜರೀಗಿಡದ ಬೆಳವಣಿಗೆ ಐಷಾರಾಮಿ, ರೋಮಾಂಚಕ ಮತ್ತು ಹೇರಳವಾಗಿ ಬೆಳೆದಿತ್ತು ಆದರೆ ಬಿದಿರಿನ ಬೀಜದಿಂದ ಇನ್ನೂ ಏನೂ ಹೊರಬರಲಿಲ್ಲ. ಆದರೆ ಆ ವ್ಯಕ್ತಿಯು ತನ್ನ ಪ್ರಯತ್ನವನ್ನು ಬಿಡಲಿಲ್ಲ, ಅವನು ಬಿದಿರಿನ ಆರೈಕೆಯನ್ನು ಮುಂದುವರೆಸಿದನು. 3 ನೇ ವರ್ಷದಲ್ಲಿ ಬಿದಿರಿನ ಬೀಜದಿಂದ ಇನ್ನೂ ಏನೂ ಬರಲಿಲ್ಲ ಆದರೆ ಅವನು ಇನ್ನೂ ತನ್ನ ಪ್ರಯತ್ನ ಬಿಟ್ಟುಕೊಡಲಿಲ್ಲ. 4 ನೇ ವರ್ಷದಲ್ಲಿ ಮತ್ತೊಮ್ಮೆ ಬಿದಿರಿನ ಬೀಜದಿಂದ ಏನೂ ಬರದನ್ನು ಅವನು ನೋಡಿದನು, ಈ ಬಾರಿಯೂ ಅವನು ಅದನ್ನು ಉಳಿಸಿಕೊಂಡನು ಮತ್ತು ತನ್ನ ಪ್ರಯತ್ನವನ್ನು ಮುಂದುವರೆಸಿದನು. 5 ನೇ ವರ್ಷದಲ್ಲಿ ಅವನು ಭೂಮಿಯಿಂದ ಬಿದಿರಿನ ಒಂದು ಸಣ್ಣ ಮೊಳಕೆ ಹೊರಹೊಮ್ಮುವುದನ್ನು ನೋಡಿದನು. ಜರೀಗಿಡಕ್ಕೆ ಹೋಲಿಸಿದರೆ ಬಿದಿರಿನ ಮೊಳಕೆ ಚಿಕ್ಕದಾಗಿದೆ ಮತ್ತು ಅತ್ಯಲ್ಪವಾಗಿತ್ತು, ಆದರೆ ಅಂದಿನಿಂದ ಕೇವಲ 6 ತಿಂಗಳಲ್ಲಿ ಬಿದಿರು 100 ಅಡಿ ಎತ್ತರಕ್ಕೆ ಬೆಳೆಯಿತು. ಆ ಬಿದಿರು ತನ್ನ ಬೇರುಗಳನ್ನು ಬೆಳೆಯಲು 5 ವರ್ಷಗಳನ್ನು ಕಳೆದಿದೆ ಮತ್ತು ಆ ಬೇರುಗಳು ಬಿದಿರನ್ನು ಬಲಪಡಿಸಲು, ಬದುಕಲು, ಅಭಿವೃದ್ಧಿ ಹೊಂದಲು, ಬೆಳೆಯಲು ಬೇಕಾದ ಎಲ್ಲವನ್ನೂ ಪೋಷಕಾಂಶವನ್ನು ನೀಡಿರುವುದನ್ನು ಅವನು ಅರಿತುಕೊಂಡ.

ನೋಡಿ, ಜೀವನವು ಯಾರಿಗೂ ನಿಭಾಯಿಸಲಾಗದ ಸವಾಲನ್ನು ನೀಡುವುದಿಲ್ಲ ಎಂಬುದು ನಿಜವಲ್ಲವೇ. ಈ ಸಮಯದಲ್ಲಿ ನೀವು ಸವಾಲು ಎದುರಿಸುತ್ತಿದ್ದರೆ, ಅದನ್ನು ನಿಭಾಯಿಸುವ ಸಾಮರ್ಥ್ಯ ನಿಮ್ಮಲ್ಲಿದೆ ಎಂದು ಖಚಿತವಾಗಿ ತಿಳಿದುಕೊಳ್ಳಿ, ನಿಮ್ಮ ಸವಾಲುಗಳು ಮತ್ತು ಹೋರಾಟಗಳನ್ನು ಎದುರಿಸಲು ನೀವು ಮೀಸಲು ಮಾಡಿದ ಎಲ್ಲಾ ಸಮಯದಲ್ಲಿ ಬೇರುಗಳನ್ನು ಬೆಳೆಸುತ್ತಿರುವಿರಿ ಎಂದು ನಿಮಗೆ ತಿಳಿದಿರಲಿ. ಆ ವ್ಯಕ್ತಿ ಬಿದಿರನ್ನು ಬಿಟ್ಟುಕೊಡದಂತೆಯೇ, ನಿಮ್ಮನ್ನು ನೀವು ಬಿಟ್ಟುಕೊಡಬೇಡಿ, ಎಂದಿಗೂ ಬಿಡಬೇಡಿ, ನಿಮ್ಮನ್ನು ಇತರರೊಂದಿಗೆ ಹೋಲಿಸಬೇಡಿ. ಬಿದಿರು ಮತ್ತು ಜರೀಗಿಡ ತುಂಬಾ ವಿಭಿನ್ನವಾಗಿವೆ, ಆದರೂ ಎರಡೂ ಅರಣ್ಯವನ್ನು ಸುಂದರಗೊಳಿಸುತ್ತವೆ, ಪ್ರತಿಯೊಂದೂ ಅದರ ವಿಭಿನ್ನ ಉದ್ದೇಶವನ್ನು ಪೂರೈಸುತ್ತವೆ. ನಿಮಗೊಂದು ಸಮಯ ಬರುತ್ತದೆ, ನೀವೂ ಬೆಳೆಯುತ್ತೀರ ಮತ್ತು ಎತ್ತರಕ್ಕೆ ಏರುತ್ತೀರ. ನಿಮ್ಮ ಸಾಮರ್ಥ್ಯದಷ್ಟು ಎತ್ತರಕ್ಕೆ ಹೋಗಿ, ಬೇರೊಬ್ಬರ ಸಾಮರ್ಥ್ಯದಷ್ಟಲ್ಲ. ತಾಳ್ಮೆಯಿಂದ ನಿಮ್ಮ ಕೆಲಸ ಮಾಡಿ. ಒಂದು ದಿನ ನೀವು ಬಿದಿರಿನಂತೆ ಎತ್ತರಕ್ಕೆ ಬೆಳೆಯುತ್ತೀರ. ಜೀವನದಲ್ಲಿ ಎಲ್ಲವೂ ಸರಿಯಾದ ಸಮಯದಲ್ಲಿ ನಡೆಯುತ್ತದೆ. ತಾಳ್ಮೆಯೇ ಸದ್ಗುಣ, ನಿಮಗಾಗಿ ಸರಿಯಾದ ಸಮಯ ಬರುತ್ತದೆ, ಕಾಯಿರಿ. ಅವಸರದಿಂದ ಚಿಂತಿಸಿ ನಿರ್ದರಿಸಬೇಡಿ.

ಮೌನ : ಏಕಾಂತದ ಸಂಗಾತಿ :

2017-12-22T11:26:00.001-08:00

ಮೌನ : ಏಕಾಂತದ ಸಂಗಾತಿ :

ಹೆಣ್ ಹೆಸರ ರೂಪ ಧರಿಸಿ..
ನಿನಾದದ ಗೋಡೆ ಮರೆಗೆ ಅವಿತವಳು..
ಮಾತುಗಳು ಉಸಿರೆಳೆದಾಗ..
ಭಾವುಕತೆಗೆ ಮಾತಾದವಳು...
ನನ್ನ ಉಸಿರಾದವಳು; ಮೌನ..!!

ಕ್ಷಮಿಸಲಾಗದ ತಪ್ಪು ಮಾಡಿದ ನನಗೆ..
ಕ್ಷಮೆಯೊಪ್ಪಿ ಪ್ರೀತಿ ಕೊಟ್ಟು ಪ್ರೀತಿಸಿದವಳು..
ಭಾವನೆಗಳ ಕಾಲುವೆಯಲ್ಲಿ ಅವಿತಿದ್ದಾಗ..
ಕಣ್ಣೀರೆರೆದು ಬೆಳೆಸಿ ಪೋಷಿಷಿದವಳು..
ನನ್ನ ಉಸಿರಾದವಳು; ಮೌನ..!!

ಮಾತು ಬಾರದ ಮುಗುಳ್ನಗೆಯೊಂದಿಗೆ..
ನಗುಮುಖವ ಧಾರೆಯೆರೆದು ಬೆಂಬಲಿಸಿದವಳು..
ನಡುರಾತ್ರಿ ಕಣ್ಣ ಬೆವರಲ್ಲಿ ನಡುಗುತಿದ್ದಾಗ..
ತನ್ನ ಹಸ್ತ ನೀಡಿ ಸ್ವಾಗತಿಸಿದವಳು..
ನನ್ನ ಉಸಿರಾದವಳು; ಮೌನ..!!

ತನ್ನ ಅಸೆ ಆಕಾಂಕ್ಷೆಗಳನ್ನು ತೊರೆದು,
ಪ್ರೀತಿಯ ಜಡಿಮಳೆ ಸುರಿಸಿ ಅವಕಾಶ ಕಲ್ಪಿಸಿದವಳು,
ತಪ್ಪು ದಾರಿ ಹಿಡಿದು, ಸೋತು ದುಃಖದಲ್ಲಿದ್ದಾಗ
ದೂರವೇ ನಿಂತು ಸಾಂತ್ವನ ಹೇಳಿ ಸಂತೈಸಿದವಳು
ನನ್ನ ಉಸಿರಾದವಳು; ಮೌನ!

ಕವಿದ ಕಲ್ಪನೆಗೆ ಹಣತೆಯಾಗಿ
ಒಲವಿನ ಪುಟದ ಮರೆಗೆ ಕವಿತೆಯಾದವಳು
ಜೀವನದಲ್ಲಿ ಕಹಿಯನ್ನೇ ಕಂಡು ಬರಿದಾಗಿದ್ದಾಗ
ಹಠಮಾರಿತನದ ಕಬ್ಬನು ಬಸಿದು ಸೌಮ್ಯತೆಯ ಸಿಹಿ ನೀಡಿದವಳು
ನನ್ನ ಉಸಿರಾದವಳು; ಮೌನ!

ಸೋಕದ ಮುತ್ತಿನ ಬಿಸಿಗೆ ಕರಗಿ
ವಾಲದ ತೋಳಿನ ನಡುವೆ ಬಂದಿಯಾದವಳು
ಉಸಿರಿನ ಅಂಚೆ ಕಳೆದು, ಮನಃ ಜೋಪಡಿಯಾದಾಗ
ಎದೆಯ ಅಂತಃಪುರಕ್ಕೆ ಕಿರೀಟವಿರದೆ ರಾಣಿಯಾದವಳು
ನನ್ನ ಉಸಿರಾದವಳು; ಮೌನ!
- AliEn -

ಆತ್ಮ ಸ್ತಯ್ರ್ಯ ..

2017-07-15T00:30:00.001-07:00

ದಯವಿಟ್ಟು ಅವಳಿಗೆ ಅಂಗವಿಕಲೆ ಪಟ್ಟ ಕಟ್ಟಬೇಡಿ
ಅವಳಿಗೆ; ನೀನು ಸಬಲಳು ಎಂದು ಒಮ್ಮೆ ಹೇಳಿನೋಡಿ,
ದಯವಿಟ್ಟು ಅವಳನ್ನು ಶೋಷಿಸುವ ಹಾಗೆ ನೋಡಬೇಡಿ
ಅವಳನ್ನು ಯಾವತ್ತು ಹೀಯಾಳಿಸಬೇಡಿ.

ನೀವು ಭಾವಿಸಬಹುದು, ಅವಳಿಗೆ ಬೇಕು ಸಹಾನುಭೂತಿ
ಆದರೆ; ಅವಳಿಗೆ ಬೇಕಾಗಿರುವುದು ಬರಿ ಅನುಭೂತಿ,
ನೋಡಿ ಅವಳನ್ನು ಅದೇ ಪೂರ್ಣ ಘನತೆಯಿಂದ
ಅದೇ ಮಾನವೀಯತೆಯ ದೃಷ್ಟಿಯಿಂದ.

ಯಾವಾಗಲೂ ಅವಳಿಗೆ ಒಂದು ಅವಕಾಶ ನೀಡಿ
ಅವಳು ಶಕ್ತಳಲ್ಲ ಎಂದು ಯೋಚಿಸುವುದನ್ನು ಬಿಡಿ,
ಅವಳಿಗೆ ಅದನ್ನು ಸ್ವಂತವಾಗಿ ಮಾಡಬಹುದಾದರೆ
ಒಬ್ಬಳೇ ಮಾಡಲಿ ಬಿಡಿ, ನಿಮಗೇನು ತೊಂದರೆ.

ನೀವು ಭೇಟಿಮಾಡುವಾಗ ಆಕೆಯನ್ನು;
ಅಂತರಇರಿಸಬೇಡಿ
ಆಕೆಯ ಅಂಗವಿಕಲತೆಯನ್ನು ಬಿಡಿ;
ಆಕೆಗೆ ಪ್ರಾಮುಖ್ಯತೆ ಕೊಡಿ.

ನಾವು ನೋಡದ ಒಂದು ಆತ್ಮ ಅವಳಲ್ಲಿ ಇದೆ,
ಅವಳನ್ನು ಇತರ ಮಾನವರಂತೆ ನೋಡಿ!

- AliEn!

ಅಪರಿಚಿತೆ...!

2017-06-03T09:47:00.001-07:00

ಅಪರಿಚಿತೆ...!

ನಿನ್ನ ಕಣ್ಣ ಕಣ್ಮರೆಯಲ್ಲಿ ಕರಗಿ ನೀರಾಗುವ ಆಸೆಯೊಂದಿಗೆ,
ಹಾತೊರೆಯುತಿದೆ ನನ್ನ ಕನಸುಗಳು ...

ಕಣ್ಣ ಜೋಡಿ ಮಿಟುಕಿಸುವ ಮುನ್ನವೇ,
ಕಣ್ಣ ಮಳೆ ಧಾರಾಕಾರವಾಗಿ ಸುರಿಯಲಾರಂಭಿಸಿತು,
ನಿನ್ನ ನೆನೆದು..

ನೆನಪಾದವು, ನೀ ನನ್ನ ಸಂತೈಸಿದ ಆ ಏಕಾಂತದ ದಿನಗಳು,
ಮುಗುಳ್ನಕ್ಕು; ಮೋಡ ಕರಗಿತು ಕಣ್ಣಂಚಿನಲ್ಲಿ...

ಎಲ್ಲಿರುವೆ; ನನ್ನ ಹೃದಯದ ವೀಣೆಯ ತಂತಿಯ ಮೀಟಿದ, ಅಪರಿಚಿತೆ..
ಕಣ್ಣ ಮುಂದೆ ಬಂದು; ನನ್ನ ಕಣ್ಣ ಮಳೆಗೆ,
ಕೊಡೆ ಹಿಡಿಯಲಾರೆಯ..?

- AliEn!

ಪ್ರಶ್ನಾರ್ಥಕ ಚಿಹ್ನೆ??

2017-05-26T04:43:00.001-07:00

ಇನ್ನೇನು ಉಳಿದಿಲ್ಲ ಪಶ್ಚಾತಪಿಸಲು
ಮಾತು ಮುರಿಯದ ನಿನ್ನ ಮೌನ
ಅರ್ಥ ಇಲ್ಲದ ನನ್ನ ಕವನ
ನಿನ್ನ ಪರವೇ ವಾದ ಮಂಡಿಸಿದ ಮೇಲೂ.

ನಿನ್ನ ಕಿರುಬೆರಳ ಮೀಟಲು ಹೃದಯ ಉರಿದಿತ್ತು
ನಿನ್ನ ಕಣ್ಣ ತೀಕ್ಷ್ಣತೆಯೊಂದಿಗೆ
ಈಗ ಸೇದಿದ ಸಿಗರೇಟು
ತುಟಿ ಸುಟ್ಟದ್ದೂ ಅರಿವಿಲ್ಲ ಎನಗೆ.

ನಾವು ಮಾತನಾಡಿದ ಸ್ವರವೆಲ್ಲ ಕೇಳಿತು,
ಅವಳೆಲ್ಲಿ ಅಂತಾ..
ಉತ್ತರಕ್ಕೂ ಇಲ್ಲಿ ಪ್ರಶ್ನಾರ್ಥಕ ಚಿಹ್ನೆ ,
ಕಣ್ಣೀರಿನ ಸಮುದ್ರಕ್ಕೆ ಅಣೆಕಟ್ಟೇಕೆ ..?
ನೀ ಕೈಕೊಟ್ಟಾಗ ಅತ್ತದ್ದು ,
ನಿನ್ನ ತುಟಿಯ ಮೇಲಿನ ನನ್ನ ನೂರು ಮುತ್ತು ಮಾತ್ರ...!

- AliEn!

ಅಕಸ್ಮಾತಾಗಿಯೇ ಸಿಗುವ...!

2017-05-25T09:39:00.000-07:00

ಅಕಸ್ಮಾತಾಗಿಯೇ ಸಿಗುವ...!

ಮಸುಕು ಮಾಡಿ ಮರೆಯದಾದೆನು ಇಂದು

ವಿಳಂಬ ಮಾಡದೇ ನೀ ವಿರಳವಾಗಿ ಬಂದು

ನನ್ನ ಕಂಗಳ ಕಬ್ಬಿಣದ ಒಂದೊಂದು ನೋಟದಲ್ಲು

ದರದರನೇ ಎಳೆಯಿತಲ್ಲ ನಿನ್ನ ಮೂಗುತಿ ಕಾಂತಕಲ್ಲು...!

ನೆಪವೊಡ್ಡಿ ಬಂದೆನಲ್ಲ ನೀನೇನೆ ಇರುವೆಡೆ

ನಿನ್ನಂತೆಯೇ ಕಂಡೆನಲ್ಲ ಇನ್ನಾರನೋ ಹಲವೆಡೆ

ನಿನ್ನೆಸರ ಕೇಳಲಾರೆ ಗೊತ್ತು ಬಿಡು

ನನಗೊಂದು ಅಡ್ಡಹೆಸರಾ ಕೊಟ್ಟುಬಿಡು...!

ಈ ಮುಗ್ಧ ಮನಸು ಯಾಕೋ ಜಾರಿದ ಅಂದಿದೆ

ಹೇಳದೇನೆ ಪ್ರೇಮ ಕಾಯಿದೆ ಜಾರಿಗೆ ಬಂದಿದೆ

ಪಕ್ಕ ಇದ್ದಾಗ ಬೇಡ, ದೂರ ಹೋಗಿಯೇ ಕಾಣಿಸು ಮೊಗವ

ತಾರೀಖು ಕಾಯ್ದಿರಿಸುವ ಬದಲು, ಆಗಾಗ ಅಕಸ್ಮಾತಾಗಿಯೇ ಸಿಗುವ...!!

-AliEn!

ತಲೆ ಕೆಡಿಸುವ ಪ್ರಯತ್ನ ..!!

2017-05-14T08:17:00.003-07:00

ತಲೆ ಕೆಡಿಸುವ ಪ್ರಯತ್ನ ..!!

ನಿನ್ನ ಕಂಗಳು , ಹುಣ್ಣಿಮೆಯ ಬೆಳದಿಂಗಳು
ಮುದ್ದು ಮುದಾಗಿ ಮಿಟುಕಿಸುವ ನಿನ್ನ ಆ ರೆಪ್ಪೆಗಳು
ವರ್ಣಿಸಲು ನಿನ್ನ ನನಗಿಂದು ಸಿಗುತ್ತಿಲ್ಲ ಪದಗಳು

ಆದರೂ, ಪ್ರಯತ್ನಿಸುವೆ...

ಆ ಬೀಸುವ ತಂಗಾಳಿ ಕೆಣಕಿತು ನಿನ್ನ ಮುಂಗುರುಳ
ಅದ ಸರಿಸಿ ನೀ ಕದ್ದೆ ನನ್ ಎದೆಯ ಪಾರಿವಾಳ
ನೀನೆ ಬೇಕೆಂದು ಹೇಳುತಿದೆ ನನ್ ಅಂತರಾಳ
ನಿರಾಕರಿಸಿ ಶೊನ್ಯ ಮಾಡಬೇಡ ನನ್ನ ಬಾಳ!

ಆದರೂ, ಪ್ರಯತ್ನಿಸುವೆ...

ಮಿಂಚನಂತಿರುವ ನಿನ್ನ ಕಣ್ಣ ತೀಕ್ಷ್ಣತೆ
ಮುಗಿಯಿತಿಂದು ನಿನ್ನ ಮುಂದೆ ನಿಂತ ನನ್ನ ಕತೆ
ನೀ ಸಿಗುವೆಯೋ ಇಲ್ಲವೋ, ಅದು ನನ್ನ ವ್ಯಥೆ
ಸಿಗುವವರೆಗೂ ಪ್ರಯತ್ನಿಸುವೆ ಇಟ್ಟು ನನ್ನ ಪ್ರಾಣವ ಒತ್ತೆ!

- AliEn!

ನನ್ನೊಳಗಿನ ಕವಿತೆ..!

2017-05-11T23:43:00.002-07:00

ಹೇ ಹುಡುಗಿ, ನನ್ನೊಳಗಿನ ಕವಿತೆ ನೀನು ....
ನಿನಗಾಗಿ ರಾತ್ರಿಯಿಡಿ ಬರೆದೆ ನಾನು ..!!

ನನ್ನೊಳಗಿನ ಕವಿತೆ ...
ನೀನ್ ಇಲ್ಲದಿಂದ್ದು ಸಾಯುತ್ತೆ ..
ನನ್ನೇಕೆ ನೀನು ಮರೆತೆ..
ಬೇರೆಲ್ಲಿ ಈ ಹೃದಯ ಸೇರುತ್ತೆ...!

ಕವಿತೆಯ ಪ್ರತಿ ಪುಟದಲ್ಲೂ ನಿನ್ನ ಪ್ರತಿಬಿಂದವೇ ...
ಒಡೆದಿರೋ ಗಾಜಲೂ ನಾ ನಿನ್ನನೇ ಕಾಣುವೇ..
ನಿನ್ನಯ ನೆನಪಲಿ ಈ ಮಳೆಯಲು ಬೆವರುವೇ...
ಆ ಬೆವರಿನ ಹನಿಯಲು ನಿನ್ನ ಮುಖವಾಡವೇ...!

ನನ್ನೊಳಗಿನ ಕವಿತೆ ...
ನೀನ್ ಇಲ್ಲದಿಂದ್ದು ಸಾಯುತ್ತೆ ..

ಕಣ್ಣಿನ ಅಂಚಲಿ ನಾ ನಿನ್ನನೇ ನೆನೆಯುವೇ...
ನೆನಪಿನ ಪುಟದಲಿ ಬರೆಯ ಏಕಾಂತವೇ...
ಏಕಾಂತದ ಪ್ರತಿ ಕ್ಷಣದಲ್ಲೂ ನಿನ್ನನೇ ಬಯಸುವೇ ...
ಆ ಬಯಕೆಯ ಕನಸಲು ನಿನ್ನೆ ಕನವರಿಸುವೇ ...

ನನ್ನೊಳಗಿನ ಕವಿತೆ ...
ನೀನ್ ಇಲ್ಲದಿಂದ್ದು ಸಾಯುತ್ತೆ ..

-AliEn!

Kannada Poem

2017-05-11T06:30:00.001-07:00

ಮುಗ್ದತೆಯ ‌‌‌‌ಮಂಪರು ಗೊಂಬೆ..!!

ಲೇ ಹುಡುಗಿ,

ನಾನಿಂದು ನಿನ್ನ ಪ್ರೆಮ ಪೀಡಿತ

ನನ್ನವಳಂತು ನೀ ಖಂಡಿತ

ನನಗರಿವಿಲ್ಲ ಏನಿದ್ದಕ್ಕೆ ಪ್ರೇರೇಪಿತ

ನೀನಿಲ್ಲದೆ ನಿಲ್ಲುತ್ತೆ ನನ್ನ ಎದೆಬಡಿತ..!

ನನ್ನನೇಕೆ ಕಾಡಿಸುತೀಯ ಓ ಹೆಣ್ಣೇ

ಮರೆಯಲಾರೆ ಕಣ್ಣಲ್ಲಿ ನೀ ಕೊಟ್ಟ ಸನ್ನೆ

ನಿನ್ನಾ ಜೋಡಿಸಿರುವ ಹಲ್ಲುಗಳು ದಾಳಿಂಬೆ ಹಣ್ಣೇ

ನೀನಿರದೆ ಬದುಕಲಾರೆ ಭೂಮಿ ತಾಯಾಣೇ...!

ಮನದಲಿರುವುದನ್ನು ಹೇಳುವಾಸೆ ಚೆಲುವೆ

ನನಗಿಂತ ಮೊದಲು ನೀನೇ ಹೇಳು ನನ್ನೋಲವೆ

ಕಣ್ಣ ನೋಟದಲ್ಲೇ ನೀ ನನ್ನ ಸೆಳೆವೆ

ನೆದ್ದೆಯಲ್ಲೊ ನಾ ನಿನ್ನೆಸರೇ ಕನವರಿಸುವೆ...!

ನೀನೊಂದು ಮುಗ್ದತೆಯ ‌‌‌‌ಮಂಪರು ಗೊಂಬೆ

ನನ್ನ ಮನದಾಸೆಯ ಉರ್ವಷಿ, ಮೇನಕೆ, ರಂಬೆ

ಓ ಹುಡುಗಿ,

ನೀನಿರದೆ ನಾನಾಗುವೇ ಬಾಡಿದ ಮರದ ಕೊಂಬೆ..!

-AliEn!