තරංග

රට දැයට ආදරය කරන සියළු දෙනා කියවිය යුතු.... මේ ශ්‍රී ලංකාද්වීපය තුල කසල කුම්භාන්ඩයින් බිහි වූ අයුරු...

noreply@blogger.com (අංජන (Anjana)) — Thu, 13 Aug 2015 09:28:00 +0000

සෝම සමිඳුන් මෙරටින් නික්ම ගියහ. අද මුළු මහත් ජාතියටම ඒ හඬ අමතක වී ඇත. ඒ හඬ සමාජයෙන් මැකී ගොස් ඇත. එහෙත්, එදා ජාතියට පණ පෙවූ ඒ වදන් මොහොතකට හෝ මතක් කර ගත යුතුව ඇත.

එදා ඒ රැල්ල හැමුවේ කොයි දිශාවටද? දරුණු යුද්ධයක බියකරු හඬ දසතින් පැතිරෙන වකවානුවේ දී ජාතිය ඇමතූ සෝම සමිඳු නිහඬ කරවූයේ කවුද? සෝමහාමුදුරුවනේ නැවත වඩින්න! අපට නායකයෙකු නැත. මෙවන් ඉල්ලීම්, කහ කොඩි මුළු රට පුරා ලෙළ දුන්නේ හදවතේ ශෝකාලාපයන් තුලිනි. මළ මිනී ගමක් ගමක්ගානේ උතුරින් පැමිණෙද් දී, සෝම හාමුදුරුවන් ද රටින් නික්ම ගියේ ය.

මෙසේ වා තලයට එක් වූ දරුණු සෝ සුසුම් තුලින් බිහිවූ පක්ෂයක් විය. ඒ ජාතික හෙළ උරුමයයි. ඔබ සැම සංඝයා වහන්සේලාට ඡන්දය දුන්නේ සෝම සමිඳු නැති අඩුව පුරවාලීම පිණිසය. එසේ නොවේද? අද ඔබලාගේ අරමුණ ඉෂ්ට වී ඇති ද? මදක් සිතන්න. එක අතකට යුද්ධය නිමාකරවීමෙහි ලා ඔබගේ ඡන්දය ඵලදායී ලෙස උදව් වූයේද? එසේ නම් සැනසුම් සුසුමක් හෙළිය හැක. එහෙත් අද දසතින් පැතිරෙන්නේ බලු පොරයක හඬක් නොවේ ද? බල්ලන් උඩු බුරලන හඬ ඇසෙන විට අපට හැඟෙන්නේ කුමක් ද? මහා මූසල අනාගතයක පෙරනිමිති ය. මෙසේ වන විට වැඩිහිටියන් කියන්නේ ඉක්මනින් මළගමක් අසන්නට ලැබෙන බව ය. තිස් වසරක යුද්ධය නිමා වූ මොහොතක, නැවත කුලල් කා ගන්නේ මස් රාත්තල බෙදා ගන්න බැරුවද? මේ භූමියට ජීවය දුන් ඉතිහාසයට නැවත ගොස් මස් රාත්තල කිරා බලමු. ඉතිහාසයේ වීර පුරන් අප්පු, ගොන්ගාලේගොඩ බණ්ඩා, වීර කැප්පෙටිපොල යනාදී ජාතික වීරවරයන් බවට පත් වූයේ කුමන මංමාවත් පසු කර පැමිණීමෙන් ද? මේ ඉතිහාසය ඔබ දන්නවාද? යටත් විජිත කාලය පසු කළ අප මුතුන් මිත්තන් හැලූ කඳුළු මේ භූමිය තෙත් කළ දුක්බර ඉතිහාසයක් ලියා තිබුණි. මෑත අතීතයෙහි දී දරුවන් පූජා කල අම්මාවරු හඬන හඬ තවමත් ඇසේ. එම කඳුළු දැනුදු වියකී නැත. එය ඔබට අමතක ද?

භෞමික අඛණ්ඩතාවය යනු කුමක් ද? ඉන්දියන් සාගරය තුලින් ම මෙම පුංචි දූපත වෙන් කර ඇත. බුදුරදුන් තෙවරක් වැඩම කොට බුද්ධ ශාසනය පිහිටවීමේ ශක්තිය එක් කළ ලෝකයේ එකම දේශය මේ ශ්‍රී ලංකාද්වීපයයි. විදේශිකයන් මස් කටු විසි කරන විටම සෑම විටම ඒවා අහුලා ගත් සුනඛ ප්‍රජාවක් මේ රටේ බිහි වූයේ කෙසේ ද? අපි ඉතිහාසය විවර කර බලමු.

පුරන් අප්පු යනු දේශ හිතෛෂී ජාතික පුත්‍රෙයක් මෙන්ම අප රටේ වීරවරයින් අතර රැව් පිළිරැව් දෙන නාමයක් බවට පත් වූයේ ද? පත්කරවූයේ ද? මේ ගැන මදක් සිතා බලමු. ඔහු 1848 දී කැරැල්ලක් ගැසුවේ ද? නැතහොත් දේශ හිතෛෂීන් එකතුකොට ගෙන හද පුරා නැගුණු දේශ මාමකත්වය හා තම ජාතිය පරාධීනත්වයෙන් බේරාගැනීම උදෙසා අපරාජිත ජාතියක් බිහි කරවනුවස් මෙරට පාගාගෙන සිටි දීන නිවට පර සුද්දන් ඉදිරියේ අභීත සටනක යෙදුනේ ද? මෙය විග්‍රහ කර බැලිය යුතු කාරණයකි. කැරැල්ල යනු පවතින රජයකට හෝ විශේෂිත වූ නිවැරදි ජන කොට්ඨාශයකට විරුද්ධව ගෙන යන බලවේගයකි. එහෙත් ඔහු ගෙන ගියේ තම ජාතිය පාගාගෙන සිටි සිහළ දේශයට එරෙහි වූ විජාතික බලවේගයකට එරෙහිව ගෙන ගිය තම අයිතීන් සුරැකීම උදෙසා හදවත තුලින් බුර බුරානැගි පීඩනය හා මානසික වේදනාව එකතතු කර ඉදිරියට ගෙනයාමකි. මෙහි දී අප දකින විශේෂත්වය නම් එසේ ක්‍රියාකාරී වූ පුද්ගලයෙකුට සමාජය තුලින් මංපහරන්නා, කොල්ලකාරයා, ස්ත්‍රී දූෂකයා යනුවෙන් හංවඩු ගැසීමට භාජනය වීම ගැන සත්‍ය විවේචනයක් කල යුතු බවය. විදේශීය බලවේගයන්ට යටත්වී සිටි මෙම රට එම කාල වකවානුවෙහි දී සමාජය තුලින් ම විදේශීය ගැත්තන්, කුමන්ත්‍රණකාරයින් බිහිකළ අධර්මිෂ්ඨ පරදේසක්කාරයින්ගෙන් ගහනව සියලු තල ඔස්සේ පරගැති මානසිකත්වයන් බිහිකර තිබූ යුගයකි. එම පරගැත්තන් සියලු දෙනාගේ මානසිකත්වයට ඇතළු කලේ මුදලට වහල් වන බලලෝභීත්වය, ද්වේශය, වෛරය, කුමන්ත්‍රණය යන සතර අගතීන්වලට හසුවන්නා වූ දුශ්චරිත දුර්ගන්ධයක් හමන්නා වූ සමාජ බෙලහීනත්වයයි. ගැමුණු යුගයෙන් ආරම්භ කොට ගත් කොන්ද පණ ඇති වීර ජාතියක ස්වර්ණමය යුගයන් එකින් එක පසුවෙද් දී මෙවන් දීන නිවට සිංහලයින් බිහිකරවනු වස් අප සමාජ සංස්ථාව තුලින්ම කසල කුම්භාණ්ඩයින් බිහිවූයේ කෙසේ ද?

එදා මෙදා තුර යටත් විජිතවාදීන්ගෙන් මිදුනා යයි කියන සිංහල දේශය තුල තම දේශය තබා භාෂාව කෙරෙහිවත් ගෞරවයක් නොමැති ජාතියක් බිහිකරවූයේ; ඉංග්‍රීසි භාෂාවට, විජාතික පරභාෂාවන්ට ගරුකරන තම ලිංගිකත්වය පවා නොහඳුන සුනඛ ප්‍රජාවක් මෙරටට පැමිණ ආධිපත්‍ය පතුරාගත් විජාතික බලවේග විසින්මයි. එම මානසිකත්වය කුමන්ත්‍රණ නිර්මාණය සකස්කරවනු වස් බිහිකළ කණ්ඩායම් මෙම නගර තුල උදම් අනන,පාරම්බාන රාවය විවිධ සමාජ ස්ථරයන්ට පැතිරී ගියේ මූසල දුර්ගන්ධයන් දසත පතුරවමිනි. බූවල්ලන්ගේ ඇට නැති ගාත්‍රා මෙන් පැතිරවූයේ කොන්ද නැති අමනයන් නිසාමය. ඉතිහාසය පුරා මෙවැනි සාක්ෂි දැරූ පෙළ ගැස්මවල් ඔබට ඉදිරිපත් කල හැකිය. පුරන් අප්පු ජාතිය බේරා ගැනීම උදෙසා තම ජීවිතය පවා කැප කරද්දී සිංහල ජාතිය තුලින් ම ඔහුව හිරගෙට යවන තෙක්ම කුමන්ත්‍රණ පටබැඳ බිහිකළ සිංහල පරගැති අමන නායකයෝ එදා ද වූහ. වීරපුරන් අප්පු චරිත කතාව හොඳින් කියවන්න.

වීරපුරන් අප්පු පමණක් නොව එදා මෙදා තුර ජාතික නායකයින්, අනගාරික ධර්මපාල, වාරියපොළ සුමංගල හිමිථ එස්.මහින්ද හිමි ආදී නායකයින් හටද නොයෙක් නම් පටබැඳීම් සමාජය තුල කැළඹිලි ඇතිකර එම නායකයා හට බොරු ගොතා කුමන්ත්‍රණකාරී පිරිසක් බිහිකොට එම පුද්ගලයාගේ උදාර ගති ගුණ හඳුනාගැනීමට නොහැකිවන අයුරින් මත සමාජය තුලට කින්දවා විපරීත බුද්ධියක් ඇතිකළේ විදේශික බලවේගයන් තුලින් ම ය. එවිට මනුෂ්‍ය සමාජය තුල මේ පුද්ගලයාගේ ගුණාංග හඳුනාගත නොහැකිව අතරමැදි ප්‍රශ්නාර්ථයන් වලට සමාජය මුහුණ දුනි.එම නායකයාගේ චරිතය ඝාතනය කරමින් දුශ්චරිතයෙන් ලෙස හඳුන්වමින් නොයෙක් බොරු කතා ගොතමින් සමාජය තුලට කාන්ඳු කලේ මෙම විදේශික බලවේගයන් ම ය. එහි දී උදාර නායකයා මානසික පීඩනයට යටත්ව සමාජ ගර්හා ඉදිරියේ හදවතේ කම්පනය ඇති වී ඔහුගේ කොන්ද කඩා දැමීමේ නීච අභිමතාර්ථය මෙම විදේශීය බලවේගය තුල ඇත්තේ ය. ඔවුහු ඉතිහාසයේ දී ද එය ක්‍රියාවට නැංවූයේ ඔවුන්ගේ ම පරගැති මානසිකත්වයන් බිහිකර හැදූ සිංහල කණ්ඩායම් තුළිනි. උදාහරණයක් හැටියට ශ්‍රී දළදා වහන්සේ ආරක්ෂා කිරීම පිණිස ඉදිරිපත් වූ වාරියපොළ සුමංගල හිමියන් එම දළදා වහන්සේ සුරැකීම රාජද්‍රෝහී ක්‍රියාවක් ලෙස පවසමින් යුද්ධාධිකරණය ඉදිරියට පමුණුවන ලදී. දළදා වහන්සේ විනාශ කිරීමේ අභිමතාර්ථය තිබූ විජාතිකයාට ඒ ගැන කැක්කුමක් ඇතිවූයේ කෙසේ ද? මෙය අප විසින් කල්පනාකර බැලිය යුතු කාරණයකි. එයින් නොනැවතුණු ඔවුහු දළදා වහන්සේ ආරක්ෂා කිරීමෙහිලා සිවුර ඇතුලේ හොවා ගනිමින් උදාර කාර්ය භාරයක් කළ සුමංගල හිමියන්ව දළදා වහන්සේ සොරකම් කිරීමේ චෝදනාව මත යාපනය සිර කඳවුරේ වද බන්ධනයට ලක්කරන ලදී. දේශමාමක බලවේග අතරට එක් වූ එස්. මහින්ද හිමියන්ට නට්සිවාදියා නමින් හංවඩු ගසමින් සමාජය තුල අපකීර්තියට ලක්කළේ සිංහල මිනිසුන් අතර මතවාදයක් ගොඩනගමිනි. යුධවාදි මානසිකත්වයක් තිබූ හිට්ලර්ගේ හමුදාවේ සිටි ජාතික විරෝධී බලවේගයන්ට මෙන් එම හිමියන්ට අපහාස කිරීම පිණිස මෙම හිමියන්ට පටබැඳි නාමය සිංහල ජාතිකයන් විසින් අපහාස කරවමින් සිංහල ජාතිකයන් තුලින්ම එම හිමියන්ව ප්‍රතික්ෂේප කරවීමෙහලා අරමුණු විය.

මෙසේ සමාජය තල ගොඩ නැගෙන්නා වූ වීර චරිත, දේශ හිතෛශී චරිත වලට බොරු නම් පටබැඳ සමාජය තුලින්ම ප්‍රතික්ෂේප කරවීම සඳහා මෛ විජාතීය බලවේගයන් තමන්ට පරගැති කීකරු කණ්ඩායම් බිහිකරවා ඔවුන් ලවා කුමන්ත්‍රණ ඇතිකරවීම යටත්විජිත ඉතිහාසය පුරාම පැතිර තිබුණි. මෛ විජාතික බලවේගයන් විසින් අප සමාජයේ ජාතිභේදය ඇවිස්සුවේ මේ අතරවාරයේය. ලංකා ජාතික ව්‍යාපාරය පිහිටවූයේ පැටලුනු නූල් බෝලයක් මෙන් ලිහාගත නොහැකිව තාඩන පීඩන වලට ලක්වූ සියලුම ජාතික බලවේග හා ජාතික ස්පන්දනයන් එකිනෙකා තුල අවබෝධයන් ගොඩනගා ගැනීම සඳහා අවශ්‍ය වකවානුවකය. විජාතීය බලවේග මේ රටේ සමාජ සංසකෘතියට අත පොවා සමාජයේ සෑම ස්ථරයකම තමන්ට තමන්ව හඳුනාගත නොහැකි කණ්ඩායම් බිහිකර තිබූ අවධියකය. 1505 සිට 1948 දක්වා යටත් විජිතයක්ව තබා ගනිමින් තිබූ මෙම රටෙහි පංචසීලය රැකි පිරිස විනාස කර ලෝභ, ද්වේශ, මෝහයන්ගෙන් පිරුණු වෛරීය සමාජයක් බවට පත්කර තිබුනේ එකිනෙකා අතර භේද භින්න මානසිකත්වයක් ඇතිකරලීමෙන් සමාජය තුල වෛරය පතුරුවා ඒ තුලින් තම අරමු‍ණු ඉටුකරගැනීම උදෙසාමය.

අනගාරික ධර්මපාලතුමා සමඟ ගොඩනැගුණු මෙම ජාතික ව්‍යාපාරය විචක්ෂණ බුද්ධයෙන් විශ්ලේෂණයට ලක්කිරීම මෙම දේශය තුළ සිටින සෑම මානසිකත්වයක් තුළම ඇතිවී ඇති අරවුල නිරවුල් කරගැනීම උදෙසා පිහිටවනු නිසැකය. එතුමා සමග එකට ජාතික ව්‍යාපාරයේ වැඩකල සර්.පොන්නම්බලම් රාමනාදන්, සිද්ධිලේබ්බේ වැනි මුස්ලිම් දෙමළ නායකයින් සමඟ ඊ.ඒ.ගුණසිංහ, දොස්තර වික්‍රමසිංහ වැනි සිංහල නායකයන් ද වූහ. අනගාරික ධර්මපාලයන්ගේ සහයෝගීතාවයෙන් මෙම ජාතික ව්‍යාපාරය විදේශීය බලවේගයන්ට යම්තාක් දුරට අභියෝගයක් වෙමින් පැවතුනු වකවානුවක විදේශීය කුමන්ත්‍රණ වලට හසුකර අනගාරික ධර්මපාලතුමාව සිරගතවීම පිළිබඳව විචක්ෂණ බුද්ධියෙන් යුතුව විග්‍රහ කිරීම වටී. බෞද්ධයන්ගේ උරුමයක් වන බුද්ධගයාව ආරක්ෂා කිරීම උදෙසා අනගාරික ධර්මපාල තුමා දිවි පරදුවට තබමින් දැරූ ව්‍යායාමය තම උදර පරමාර්ථය පිණිස නොවන බැව් අප හඳුනාගතයුතුය. එතුමා ඒ සඳහා කාසි එකතු කිරීම සමාජ විවේචනයට ලක්වීමෙන් මුට්ටකාසි හොරා යන නම පටබැඳීම වර්තමානය සමඟ සැසඳීම වටී. මෙහි බුද්ධගයාව බේරීමේ ලා අනගි ව්‍යායාමයක නිරත වූ එතුමාට හිමි වූයේ සිර දඬුවමයි. අනගාරික ධර්මපාල තුමාගේ දළවශයෙන් සත් අවුරුද්දක පමණ සිරගතිවී සිටි කාලය තුල එතුමා සමඟ එකට වැඩකළ ජාතික ව්‍යාපාරයට වූයේ කුමක්ද? විජාතික මස් කටුවල රසය බලන්නට ලොල් වූ සුනඛයන් මෙම ව්‍යාපාරය තුලද සිටි බව ප්‍රත්‍යක්ෂයි. විජාතික බලවේගයන් ඔවුන්ගේ ඔළුගෙඩි සේදූහ. නැවත සිය මව් රටට පෙරලා පැමිණෙන විට තමන් සමඟ එකට වැඩකළ විජාතික බලවේගයන්ට පරගැති වූ තම සහෘදයින්ම පහරගසන්නට වූයේ තාන්න මාන්න බලයට ලොල් වූ පිසාචයින් එම චරිත තුල ජීවත් වූ නියවෙනි. එදවස මෙවැනි චරිත බිහි වූයේ හර පද්ධති නියාම ධර්මයන් කෙලෙසපු විජාතිකයන්ගේ හස්තයන්ට නතු වීමෙනි. අද දක්වා එය ක්‍රියාත්මක වනුයේ ඉතිහාස වංස කතාවෙන් බිහිවුණු නින්දිත මානසිකත්වයේ ප්‍රතිඵලයක් නිසාවෙන්මද?

වර්තමානයේ රට රකින ජාතිකත්වයට නින්දා අපහාස කිරීම සිහළ දෙමළ ඔබ අනුමත කරන්නේද? එදා ඒ විජාතිකයින් දෙමළ සිහළ භේදය ඇතිකරවීමට තුඩු දුන් මානසිකත්වයන් බිහි කළ බැවි ඉතිහාසය දෙස විග්‍රහශීලීව බලන ඔබ හට අවබෝධ වන්නේමයි.

දෙමල-සිහල භේදය පමණක් නොව සිහල-මුස්ලිම් භේදය පවා ඔවුන් විසින් ම නිර්මාණය කරන ලද්දක් බැව් ඉතිහාසය දෙස උපෙක්ෂා සහගත සිතින් විග්‍රහශීලීව බැලූ විට ප්‍රඥාවට හසු වේ. මේ වකවානුව වනවිට සිහල ජාතිය තුල ම සිහල ජාතියට එරෙහි කණ්ඩායමක් මෙම ජාතික ව්‍යාපාරය තුලින් බිහි වූ අයුරු සක් සුදක් සේ ඔබට ඉතිහාසය කියවූ විට පැහැදිලි වනු ඇත. 1915 දී සිංහල-මුස්ලිම් කැරැල්ලක් ඇති වූයේ ද විජාතිකයින් එවැන්නක් කරවීමට පෙළඹවූයේද යන්න ඉතිහාසය තුලින් ම මනාව විග්‍රහ වෙයි.

අනගාරික ධර්මපාලතුමාට විරුද්ධ වූ ජාතික ව්‍යාපාරයේ සාමාජිකයින් තුලින් භේද භින්න වූ කණ්ඩායම් සී සීකට ගොස් ද්‍රවිඩ සංගමය, කම්කරු සංගමය, එක්සත් ජාතික පක්ෂය වැනි කණ්ඩායම් බිහි වූ බව ඔබ දන්නෙහි ද? ඒ.ඊ.ගුණසිංහ නායකත්වය දුන් කම්කරු සංගමය වැනි සංගම් ජාතික ව්‍යාපාරය තුලින් වෙන් වෙද්දී ඉතිරි වූයේ විදේශිකයන් විසින් බිහි කර වූ පරගැති සිංහල නායකත්වය පමණී. පරමාදර්ශී නායකත්වයන් නොමැති කර වූ පරදෙසක්කාරයින් විසින් ලංකා ජාතික ව්‍යාපාරය සුනු විසුනු කරන්නේ ජාතිවාදී කුලවාදී භේද භින්න කරවන මානසිකත්වයන් ඇති ජාතික සංගම් නායකත්වයන් ඉතිරි කරවමිනි. එක්සත් ජාතික පක්ෂයේ නායකයින් ලෙස පසු කාලීනව පත් වන්නේ මෙම ජාතික ව්‍යාපාරය විනාශ මුඛයට ගෙන ගිය පිරිස ය. අවසානයේ සුද්දන් 1948 දී නිදහස දී අපට ඉතුරු කරන්නේ රට ජාතිය ගැන හැඟීම නැති සුද්දන්ට ගැති වූ පර භාෂාවට ගරු කරන සුද්දන්ගේ වීසිකරන කටු ලෙව කන සුනඛයින් මෙන් හැසිරෙන්නා වූ මනුෂ්‍ය පිරිසකි. ඔවුන්ගේ සිත් සතන් කැලිකසලවලින් ගහන වූ ප්‍රදේශවල හැසිරෙන්නා වූ දුර්ගන්ධය ම හමවන්නා වූ කසල කුම්භාන්ඩයින්ගේ ප්‍රතිරූපයක් මෙනි. අද ද මෙම රජ විජාතිකයින්ට පාවා දීමට සැරසෙන නායකත්වයන්ට මෛ නාමකරණය වටියි යැයි අප හැඟී අරමුණයි.

මෙවැන පරගැති කොන්දක් නැති නායකයින් මේ රට තුලින් තුරන් වේවායි! අපි අධිෂ්ඨාන කරමු.

-උපුටා ගැනීම හෙළ සුවය සංවිධානයෙනි

ටික ටික හෙළි වන යුධ අපරාධ අවදානම

noreply@blogger.com (අංජන (Anjana)) — Thu, 06 Aug 2015 21:48:00 +0000

මේ දවස් වල ඡන්දය හින්දා හැමෝටම අමතක වෙලා තිබුනත් තව මාසයක් යනකොට මේ රටේ ප්‍රධාන මාතෘකාව වෙන්නේ යුධ අපරාධ චෝදනා වාර්තාව. ඒක මොනවගේ වෙයිද කියලා විවිධ පුද්ගලයන්ගේ ප්‍රකාශ වලින් අපිට ඉඟියක් ලබා ගන්න පුළුවන්. (මම ප්‍රාර්ථනා කරනවා මෙතනදී මගේ පුරෝකථනයන් වරදින්න කියලා)

Heavy wait battle: Sirisena wants to wait, but UNP cannot (ද සන්ඩේ ටයිම්ස්- 2015 ජුනි 21)

මහින්ද-මෛත්‍රී සමඟි කරන්න පත්කල නිදහස් පක්ෂයේ 6 දෙනාගේ කමිටුව ජනාධිපති මෛත්‍රීපාල මුණගැහිච්ච වෙලාවේ ජනාධිපතිතුමා විශේෂ ප්‍රකාශයක් කරලා තියනවා. පුවත්පත ඒක වාර්ථා කරන්නේ මෙන්න මේ විදිහට.

''He said three different countries were now probing Rajapaksa but did not name them. This was besides the strong likelihood of critical references against Rajapaksa in the probe report on alleged war crimes.''

මේ වෙලාවේ මහින්ද ගැන විමර්ෂණයක් කරන්න රටවල් තුනකට අවශ්‍ය නම් ඒ යුධ අපරාධ ගැන මිසක් වෙන දෙයක් ගැන නොවන බව පැහැදිළියි. යුධ අපරාධ වාර්තාවෙන් මහින්ද රාජපක්ෂට ඍජුවම චෝදනා එල්ල වෙන් පුළුවන් බවට පළවෙච්ච පළවෙනි ප්‍රභලම ඉඟිය මෙයයි. වැදගත්ම දේ තමයි මේ පුවත්පත වාර්තා කරල තිබ්බ දේ කිසිම කෙනෙක් වැරදියි කියලා ප්‍රකාශයක් කලේ නැහැ.

Sri Lanka polls timed ahead of U.N. war crimes report to foil Rajapaksa comeback (රොයිටර් වෙබ් අඩවිය - 2015 ජූලි 6)

යුධ අපරාධ වාර්තාව ඉදිරිපත් වීමට පෙර මේ රටේ මැතිවරණය පැවැත්වීමේ අවශ්‍යතාවය මේ පුවතින් පෙන්වා දෙනවා.

''A U.N. report on the last days of the war is due for release in September but an aide to President Maithripala Sirisena said diplomatic sources had warned it may be leaked in late August.

The possibility of an early release prompted Sirisena to call elections for Aug. 17 to give his ally Prime Minister Ranil Wickremesinghe an edge and hopefully deny Rajapaksa any chance of a political resurgence, said sources close to Sirisena.

"Even if is not said openly, the U.N. report was considered when deciding the date," Champika Ranawaka, power and energy minister and one of Sirisena’s close allies, told Reuters.

Foreign diplomatic sources said some Western countries also worried the U.N. report could help Rajapaksa and urged Sirisena not to delay elections.''

මේ වාර්තාවෙන් කියවෙන විදිහට යුධ අපරාධ වාර්තාව මැතිවරණයට පෙර ඉදිරිපත් උනොත් එය පැහැදිළිවම මහින්දට මැතිවරණය ජය ගන්න උදව්වක් වන බවයි. එය මහින්දට ජය ගන්න උදව්වක් වන්නේ ඔහුට යුධ අපරාධ වාර්තාව හරහා යුධ අපරාධ චෝදනාවක් එල්ල වනවා නම් පමනයි. යුධ අපරාධ වාර්තාව හරහා ඔහු යම් වරදකරුවකු වීමේ අවදානමක් නැත්නම් ඒ හරහා මහජන සහයෝගයක් ලබා ගැනීමේ හැකියාවක් ඔහුට නැහැ. ඒ නිසා මහින්දට කෙළින්ම චෝදනා ඉදිරිපත් වන බවට පෙනෙන දෙවන ප්‍රභල ඉඟිය මෙයයි.

යුධ අපරාධ නිර්දේශ වලට රජයෙන් කොළ එළි (දිවයින - 2015 අගෝස්තු 07 )

ඒ වාර්තාවේ මෙන්න මෙහෙම සඳහන් වෙනවා

''සැප්තැම්බර් 15 දා ප්‍රකාශයට පත් වන ශ්‍රී ලංකාවට එරෙහි යුද අපරාධ පරීක්‍ෂණ මණ්‌ඩලයේ නිර්දේශ පිළිබඳව ක්‍රියා කිරීමට ශ්‍රී ලංකා රජය කටයුතු කරන බව ඉහළ පෙළේ ආරංචි මාර්ග පැවසීය.

කොටි සංවිධානය සිදු කළ වරද ලෙස දක්‌වා ඇත්තේ ළමා සෙබළුන් බඳවා ගැනීම බවද එහි දක්‌වා තිබේ. මෙකී වාර්තාවෙන් සුදු කොඩි සිද්ධිය පිළිගෙන ඇත. එහි ප්‍රධාන සාක්‍ෂිකරු හිටපු නෝර්වේ අමාත්‍ය එරික්‌ සෝල්හයිම් යෑයි හෙළිවී තිබේ.''

තනි පුවතක් විදිහට මෙහි එතරම් ලොකු ඉඟියක් නැතිවුනත් ඇමති රාජිතගේ ප්‍රකාශත් එක්ක ගත්තාම වැදගත් දෙයක් තියනවා. ඒ ප්‍රකාශ නම්,

සුදුකොඩි ඔසවද්දී මරන්න නියෝග දුන්නා නම් බේරාගන්න බෑ - කැබිනට් ප්‍රකාශක ඇමති රාජිත සේනාරත්න (දිවයින - 2015 අගෝස්තු 06)

මෙහිදී ඇමතිවරයා මෙහෙම කියනවා

''යුද්ධය පැවැති අවස්‌ථාවේදී සුදු කොඩි උස්‌සාගෙන එන අය මරන්න කවුරුන් හෝ නියෝග දුන්නේ නම් ඔවුන් බේරා ගැනීමට නොහැකි බව කැබිනට්‌ මාධ්‍ය ප්‍රකාශක ඇමැති රාජිත සේනාරත්න මහතා පැවැසීය.

ජිනීවා සමුළුවේදී ලංකාවට යුද අපරාධ චෝදනා එල්ල කළහොත් ඊට සැප්තැම්බර් මාසයේදී පිළිතුරු ලබාදෙන බව කී ඇමැතිවරයා යුද්ධයේදී සිදුවූ සැබෑ සිද්ධීන් වලදී ආණ්‌ඩුව පෙනී සිට සියලු දෙනා බේරාගන්නා බවද කියා සිටියේය.

එහෙත් යුද්ධයට මුවාවී විවිධ අපරාධ, මිනී මැරුම් කළ හෝ කිරීමට අණදුන් කිසිවකු වෙනුවෙන් පෙනී නොසිටින බවද ඇමැතිවරයා කීය.''

අනිවාර්යයෙන්ම මෙහිදී ඉදිරිපත්වන්නේ යුධ අපරාධ පිළිබද චෝදනාය. ඇමතිවරයාම කියන පරිදි අපරාධ කල අය වෙනුවෙන් පෙනී ඉන්නේ නැත.

ඒ වගේම සන්ඩේ ටයිම්ස් පුවත්පතේ වාර්තාවේ ජනාධිපතිතුමා මෙහෙම කිව්වා කියලත් සඳහන් වෙනවා.

''If Rajapaksa agrees to accept his offer, Sirisena said there was a possibility of Rajapaksa being defended or saved.''

මෙහිදී ඔහුගේ යෝජනාව වූයේ

''He then made clear he was not prepared to make Mahinda Rajapaksa the prime ministerial candidate nor give him nominations to become a candidate at the parliamentary elections. He will also not be named on the National List. However, Sirisena said he could be given a ‘sambhavaneeya thanathurak’ or a distinguished position.''

ඒ අනුව මහින්ද ඇතුළු යුද්ධයට සම්බන්ධ වූවන් දඩයම් කිරීමේ පැහැදිළි අවදානමක් ඇති බව මම දකිනවා. ඒ වගේම ඔවුන් වෙනුවෙන් පෙනී ඉන්න වත්මන් රජය සූදානම් නැති බවත් කියවෙනවා. (නැවතත් මා ප්‍රාර්ථනා කරනවා මගේ අනුමානය වරදින්න කියලා)

කෙනෙකුට කියන්න පුළුවන් අපරාධයක් කරලා නැත්නම් ඇයි බය වෙන්නේ කියලා. ඒකට මට කියන්න තියෙන්නේ කාරණා දෙකයි.

1.නඩුත් හාමුදුරුවන්ගේ බඩුත් හාමුදුරුවන්ගේ
2. කන්න ඕනේ උනාම කබරගොයාත් තලගොයා වෙනවා

ඉදිරි මහමැතිවරණයේදි කැමත් පක්ෂයකට කැමති පුද්ගලයෙකුට මනාපය දීමට ඔබට අයිතිය හා නිදහස තියනවා. ඒකේ කිසි ගැටලුවක් නැහැ. කරුමෙට වගේ මේ දේවල් ඇත්ත උනෝතින් එදාට මතක්කර ගන්න මෙහෙම දේකුත් කවුරුහරි කිව්වා කියලා.

දින සියය - ප‍‍ළමු කොටස (10/01/2015)

noreply@blogger.com (අංජන (Anjana)) — Sat, 10 Jan 2015 11:48:00 +0000

මැතිවරණයෙන් මෛත්‍රීපාල පාර්ෂවය පැහැදිළි ජයක් අත්කර ගනිද්දී හිටපු ජනාධිපතිතුමා ‍ගෞවරවාන්විතව තම ධූරයට සමු දුන්නේය. මෑත කාලයේ අප දුටු සාමකාමීම මැතිවරණය මෙය වූ අතර හිතුවාටත් වඩා හොඳින් සුහදව හා සාමකාමීව බල හුවමාරුවක් සිදු විය. ඒ සඳහා විශේෂයෙන්ම පැවති රජයටත් වික්‍රමසිංහ මහතාටත් ස්තූතිය පළ කල යුතුය.

සරල චාම් දිවුරුම් දීමේ උත්සවයක් පැවැත්වීමත් නැවත වතාවක් ජනාධිපති ධූරයට තරඟ කිරීමේ අදහසක් නැතිබව මෛත්‍රීපාල මහතා ප්‍රකාශ කිරීමත් පැසසිය යුතු කරුණකි. විශේෂයෙන්ම පළි ගැනීම් හා ප්‍රචන්ඩ සිදුවීම් තොරව නව රජය බිහිවීම ගැන ශ්‍රී ලාංකිකයන් ලෙස අප සතුටු විය යුතුය.

දින සියයේ පොරොන්දුව පරිදි රනිල් වික්‍රමසිංහ මහතා අගමැති ධූරයට පත් කරන ලද අතර එය මැතිවරණ පොරොන්දුවක් වීම නිසාම එයට ජනතා අනුමැතිය ලැබී ඇතැයි සැලකිය හැක. පාර්ලිමේන්තුවේ බහුතරය නැති පක්ෂයකින් අගමැති පත් කිරීම ව්‍යවස්ථා විරෝධියැයි යම් මතයක් ගොඩ නැගෙමින් පවතී. නමුත් ව්‍යවස්ථාව අනුව පාර්ලිමේන්තුවේ බහුතරයකගේ විශ්වාසය දිනාගත හැකියැයි තමන්ට හැඟෙන පුද්ගලයා අගමැතිවරයා වශයෙන් පත් කරන්නට ජනාධිපතිවරයාට බලය ඇත. මෙහි *හැඟෙන* යන වචනය ඉතා ප්‍රභලය. ඒ අනුව ඒ ගැන පාර්ලිමේන්තුවේ මතය විමසීමට අවශ්‍ය නැත. නමුත් දින 100 වැඩසටහනට අවශ්‍ය පාර්ලිමේන්තුවේ බහුතර හා ඇතැම් විට අවශ්‍ය 2/3 බලය දිනා ගැනීමේ අභියෝගය නව රජය ඉදිරියේ ඇත.

මේ අවස්ථාවේදී නිදහස් පක්ෂය හා මහින්දට සහය දැක්වූවන් කල යුත්තේ සුභවාදි ප්‍රවේශයක සිට මේ වැඩ පිළිවෙල දෙස බැලීමය. යහපත් දේට සහය දීමත් වැරදි දේ විවේචනය කිරීමත් හා ඒවා පරාජය කිරීමටත් කටයුතු කල යුතුය. මෙම දින 100 ඇතුළත රජය හා නිදහස් පක්ෂය ප්‍රමුඛ විපක්ෂය හැසිරෙන ආකාරයෙන් ඊලඟ පාර්ලිමේන්තුවේ ජයග්‍රාහකයා තීරණය කරනු ඇත.

තම තම නැණ පමණින් තොරා ගනිත්වා

noreply@blogger.com (අංජන (Anjana)) — Tue, 30 Dec 2014 10:48:00 +0000

2015 ජනාධිපතිවරණයට ඇත්තේ තව දින 10කටත් අඩු කාලයකි. 2005,2010 වසර වල මෙන් නොව මෙවර පැහැදිළිව එක පිළක් තෝරා ගැනීමට නොහැකිව ඇත. සරල බැලුවෝතින් මහින්ද හා මෛත්‍රී සතුව පැහැදිළි භයානක අනාගතයක්ද යම් යම් සුභවාදී බලා පොරොත්තුද ඇත.

හැමදෙනාම වැඩියෙන් කතා කරන මෛත්‍රී පිළ ගැන බැලුවෝතින් පැහැදිළිව පෙනෙන්නට තියෙන්නේ එක්තරා ආකාරයක කැඳ හැලියකි. සමහරුන් කියනා පරිදි 2005දී මහින්ද පැමිණියෙත් මෙවැනිම කැඳ හැලියක් සමඟින්ය. නමුත් එදා ශ්‍රීලනිප ජවිපේ හා හෙළඋරුම හවුලට වඩා එජාප හෙළ උරුම මුස්ලිම් කොනුග්‍රස් හා ටීඑන්ඒ හවුල රටට අහිතකර ඉතිහාසයකින් යුක්තය. මේතුල බෙදුම්වාදය පැළපදියම් වී ඇත. ඒ නිසා මෛත්‍රී ආවෝතින් නැවත බෙදුම්වාදය හිස ඔසවා රට අස්ථාවරවේ යැයි බියක් ඇති වීම සාධාරණය. අප කාටවත් එය එසේ නොවේ යැයි කිව නොහැක. මේ අතර මෛත්‍රීපාල ගෙන එන්නට තනන ව්‍යවස්ථා වෙනස අසාර්ථක වුවහොත් වන්නේ කබලෙන් ලිපට වැටීමකි. නමුත් යම් හෙයකින් විධායක ජනාධිපති ධූරයේ අත්තනෝමතික බලතල ඉවත් කර ස්වාධීන අධිකරණ පද්ධතියක් රටේ ස්ථාපනය කරන්නට හැකි වුවහොත් සුභදායක අනාගතයක් ඇතිවීමට යම් හැකියාවක්ද ඇත. නමුත් එය සුභවාදී බලාපොරොත්තුවක් මිස අනිවාර්යයෙන්ම සිදුවන්නක් ලෙස බොරු කීමට අපට නොහැක.

අනිත් අතට මහින්ද බෙදුම්වාදයට විරුද්ධව ක්‍රියා කරන බව පසුගිය කාලය පුරාවටම ක්‍රියාවෙන් ඔප්පු කර ඇත. බෙදුම්වාදය යනු වතුරේ පාවන රබර් බෝලයක් නම් ඔහු තම ශක්තියෙන් එය පාවීමට ඉඩ නොදී වතුරේ ඔබා ගෙන සිටී. මෙය ඇත්තටම තාවකාලික විසදුමකි. ඔහුගේ බලය ක්‍රමයෙන් පිරිහීමත් සමඟ ජාත්‍යන්තරව එල්ල වන පීඩනය හමුවේ ඔහුගේ වත්මත් ප්‍රතිපත්ති වලින් මිදීමට ඉඩක් ඇතත් එහි සම්භාවිතාවය අවම යැයි අපට උපකල්පනය කල හැක. ඒ මක් නිසාද යත් අද වනවිට ඔහුගේ ඡන්ද පදනම රැදී ඇත්තේ ඒකීය රාජ්‍යය වෙනුවෙන් පෙනී සිටින නිසාමය. නමුත් මහින්ද නැතිදාක ඒකීය බව (විශේෂයෙන්ම ඉඩම් හා පොලිස් බලතල) ප්‍රශ්නාර්ථයක් වන යුගය නැවත බිහිවනු ඇත. ඒ මහින්ද යනු රටේ ඒකීය භාවයට හා සුරක්ෂිත භාවයට යොදාගත හැකි තාවකාලික විසදුමක් මිසක් තිරසාර විසදුමක් නොවන බැවිනි.

නමුත් මහින්දගේ පාලනය තුළ අන් සියළු අංශ බිඳ වැටී ඇත. ඔහු ඇසට පෙනෙන භෞතින සංවර්ධනයක් කර ඇති බව සැබෑය. නමුත් ඒ වෙනුවෙන් රටක් විදිහට අපට ගෙවීමට සිදුවී ඇති මිල ඉතා ඉහළය. අනිත් අතට ඒ ව්‍යාපෘති මඟින් රටට කෙතරම් ආදායමක් ජනිත කර ඇත්ද යන්නද ප්‍රශ්නාර්ථයකි. අධිවේගී මාර්ග කෙතරම් හොඳ වුවත් ඒ සඳහා කල වියදම කෙසේවත් සාධාරණය කල නොහැක. මත්තල ගුවන් තොටුපොල නිසි අධ්‍යයනයකින් තොරව ඉදිකල තවත් සුදු අලියෙකි. හම්බන්තොට වරාය පමණක් යම් ප්‍රගතියක් ලබා ගනු ඇතැයි සිතිය හැක. සරලවම පවසනවා නම් මෙම ආර්ථික ප්‍රතිපත්ති හා පවතින නීතියේ බිඳ වැටීම තව අවුරුදු 7-8කට අප සමාජයට දරා ගැනීමට හැකිදැයි කියා සිතිය නොහැක. මෙවැනි තියුණු මැතිවරණ කාල සීමාවකදී පවා ඔහු තම අනාගත පාලනය යහපත් අතට හරවා ගන්නට කිසිම සූදානමක් නැති බවද පෙන්වා ඇති බවයි මගේ හැගීම. ඒ නිසා තාවකාලික විසදුම් හරහා ඒකීය රටක් පවත්වා ගනිමින් හා දූෂිත පාලනයක් පවත්වා ගනිමිනි තව වසර 8ක් මේ රට පාලනය වුවහොත් නැවත මහා විනාශයක් ඇති වීමටද ඉඩ ඇත. හෙළ උරුමය පවසන්නා සේ මැස්සෝ වහන්නේ තුවාලයක් ඇති විටය. මහින්ද මේ ආකාරයෙන්ම රට පාලනය කලහොත් විශේෂයෙන්ම තරුණ පරපුර අතර පවතින මේ තුවාලය ඔඩු දුවනු ඇත. රට කෑවත් අපි මහින්දට කියා මහින්ද දිනවා තව අවුරුදු 7-8ක් හූල්ලන්ට අපට නොහැක.

සරලවම පවසනවා නම් මෛත්‍රීපාලනයක් තුලින් වඩා හොඳ හෙට දවසක් බිහිවන බවට අපට සහතික විය නොහැක. මහින්දට තව වාරයක් දුන්නෝතින් රටට හිතකර පාලනයක් ඇති කරන බවටද සහතික විය නොහැක. කල හැක්කේ තම තම නැණ පමණින් තමන්ගේ හෘද සාක්ෂියට අනුව කාට හෝ ඡන්දය දීමය. මෙවර අපට තව කෙනෙකුට කියන්නට බෑ අහවලා දිනවන්න කියලා. මොකද මේ යකුන් දෙදෙනාගෙන් එකෙක් අනෙකාට වඩා හොඳයි කියන්නට බැරි නිසාය. එය පුද්ගලයාගෙන් පුද්ගලයාට අනුව එක යකෙක් අනෙකාට වඩා හොඳ විය හැක. නමුත් එය සාපේක්ෂ බව අප තේරුම් ගත යුතුය. කොටින්ම ජවිපේ කියන්නා සේ මෙවර කාටවත් චරිත සහතික දීමට සක්කරයාටවත් බැරිය.

අවසාන වශයෙන් කියන්නට ඇත්තේ කවුරු දින්නත් එතනින් එහාට සිදුවන දේ හරිනම් හරි කියන්නටත් වැරදි නම් වැරදියි කියන්නටත් අපට කොන්දක් තිබිය යුතුයි. 2010 දී අපට ඒ කොන්ද නොතිබුන නිසා අද මේ තත්වය ඇති වී තිබෙන බවද කණගාටුවෙන් වුවද කිව යුත්තේය.

සිංහලෙන් පාඩම් කියලා දෙන්න ඔබත් එනවාද?

noreply@blogger.com (අංජන (Anjana)) — Sun, 02 Jun 2013 16:15:00 +0000

http://www.openculture.com/2012/12/introducing_ka_lite_an_offline_version_of_the_khan_academy_that_runs_on_almost_anything.html

ඛාන් ඇකඩමිය එහෙමත් නැත්නම් ඛාන් ශාස්ත්‍රාලය ලංකාවේ අපට එතරම් හුරුපුරුදු නමක් නොවුනට අද වෙනකොට ලෝකයේ බොහොමත්ම ජනප්‍රිය නොමිලේ අධ්‍යාපනය සපයන වෙබ් අඩවියක්. පහුගිය දවස් වල මේ පිළිබදව බොහොම වැදගත් ලිපියක් පළවුනා අරුණි ශපිරෝගේ බ්ලොග් අඩවියේ.

බොහොම සරලව ආරම්භ කරපු ඛාන් ඇකඩමිය අද ලෝකයේ බොහෝ රටවල දරුවන් තමන්ගේ අධ්‍යාපන කටයුතු පහසු කරගන්න භාවිතා කරන්නේ එහි තියන සරල එහෙත් ප්‍රයෝජනවත් බව නිසයි. මේ ප්‍රයෝජනවත් බව නිසාම ඛාන් ඇකඩමියේ ඇති පාඩම් මාලාවන් විවිධ භාෂාවන් වෙත පරිවර්තනය කෙරෙමින් පවතිනවා. පරිවර්තනය කියන්නේ හඩ කැවීම හා උපසිරස යෙදීමයි.

තවමත් ලංකාවේ අන්තර්ජාලය භාවිතා වන්නේ චිත්‍රපට නැරඹීමට, ෆේස්බුක් යෑමට හා ප්‍රවෘත්ති බැලීමට වැනි කාරණාවලට පමණක් නිසාදෝ ඛාන් ඇකඩමියේ පාඩම් සිංහලට පරිවර්තනය කරන්නට වැඩි අවදානයක් යොමු වී නැහැ. අපට පුළුවන්නම් මෙම පාඩම් පරිවර්තනය කරන්න එහෙමත් නැත්නම් අපටම කියා පාඩම් මාලාවක් නිර්මාණය කරන්න අපේම රටේ නංගිලා මල්ලිලාට සෑහෙන්න ප්‍රයෝජනයක් වේවි. අධ්‍යාපනය වැනි ක්ෂේත්‍ර ගත්විට අපේ රටේ සම්පත් බෙදීයාමේ ලොකු ගැටලුවක් තියනවා. දුෂ්කර ප්‍රදේශ වල සිසුන්ට කොතරම් භෞතික සම්පත් ලබා දුන්නත් ඒ ප්‍රදේශවල ඇත් ගුරුහිගයට විසදුම් දෙනතාක් කල් ඒ ප්‍රදේශවල සිසුන්ට කවදාවත් නිදහස් අධ්‍යාපනයේ නියම ඵල ප්‍රයෝජන අත්විදින්ට ලැබෙන්නේ නැහැ. අද වෙනකොට අන්තර්ජාලය හෙමින් හෙමින් සමාජය පුරා පැතිරී යන යුගයක ඒ හරහා අපේම රටේ අපේම සහෝදර සහෝදරියන් කොටසකට යම් උදව්වක් කරන්න පුළුවන් නම් ඒක වචනයෙන් කියලා නිම කරන්න බැරි සේවයක්. අපිට මේ වැඩේ හරියට කරන්න පුළුවන්නම් අද ඒ ළමයින්ට පොත් පත් දෙන දානපතීන් හෙට ඒ ළමයින්ට ලැප්ටොප් වුනත් දේවි. අපට කරන්න තියෙන්නේ ඛාන් මහතා කලා වගේ ලාබ ප්‍රයෝජන නොතකා මේ වැඩේ පටන් ගන්න පමණයි.

එහෙම හිතපු මම ඇත්තටම පාඩම් කිහිපයක්ම සිංහලට පරිවර්තනය කලා. මෙන්න මෙතනින් ඒවා බලන්න පුළුවන්.

මම නම් මේ වැඩේට අත ගැහුවේ විනෝදාංශයක් විදිහට. ඛාන් ඇකඩමියේ ලංකාවේ නියෝජිතයා විදිහට කටයුතු කරන්නේ තඹරු විජේසේකර. අද වෙනකොට ආසියානු සංවර්ධන බැංකුවේ අවධානය අපේ ව්‍යාපෘතිය වෙත යොමු වෙලා තියනවා. නමුත් අපට ඇත්තටම ඕනේ කරන්නේ හොද පිරිස් බලයක්. මේ සද්කාර්යයට දායක වෙන්න කැමති අයට පුළුවන් මෙන්න මේ ලින්කුව හරහා ගිහින් මේ සදහා දායක වෙන්න. හැමදාම අදුරට සාප නොකර මේ රටට යම් එළියක් දක්වන්න අපි දරණ සරල උත්සායක් මේ.

වැඩි විස්තර සදහා

වයිකින් දේසේ වෙසක් මංගල්‍යය

noreply@blogger.com (අංජන (Anjana)) — Sat, 25 May 2013 14:31:00 +0000

වයිකින් දේසෙට පායපු වෙසක් පුන් සද

දෙන්නෙක් කසාද බැන්දට පස්සේ එළඹෙන අළුත් අවුරුද්ද , උපන්දින , වෙසක් පොසොන් උත්සව එක්තරා ආකාරයකට විශේෂයි කියලයි මම නම් හිතන්නේ. ඒ අතින් බැලුවාම මේ අවුරුද්දේ වෙසක් උත්සවය අපි දෙන්නාට බොහොම විශේෂයි. අනිත් අතට බැලුවහම ලංකාවෙන් සැතපුම් දහස් ගණනක් දුර, පන්සලක් කියලා නාමයක් නැති ලෝකයේ උතුරු කොනේ ඉදන් ගෙවෙන පළවෙනි වෙසක් මංගල්‍යය.

මුලින්ම නම් මේ පාර වෙසක් එකට කූඩුවක් හදන්න තුන් හිතකවත් අදහසක් තිබුනේ නෑ. මීට දවස් දෙකකට කලියෙන් විභාගයක් තිබුන නිසා ඇත්තම කියනවා නම් මට මේ ගැන හාංකවිස්සියක්වත් මතකෙට ආවේ නෑ. හැමදාම මොකක් හරි කූඩුවක් හදපු මට මේ පාර විතරක් කූඩුවක් නොහදා ඉන්න හිතුනේ නෑ. අනිත් අතට අපේම කියලා පුංචි ගේ කෑල්ලක ඉන්න කොට වෙසක් එකට කූඩුවක් වත් හදන්නේ නැත්නම් ඇති වැඩේ මොකද්ද කියලාත් හිතුනා.

බෞද්ධයෝ විදිහට අපි වෙසක් කූඩු වගේ ආමිස පූජාවන්ට වඩා ප්‍රතිපත්ති පූජාවන්ට ප්‍රමුඛත්වයක් දෙන්න ඕනෑ. නමුත් ඒ වගේම අපේ සංස්කෘතියත් එක්ක බැදුනු දේවල් අපි ඉදිරියට ගෙනි යන්නත් ඕනේ. අපි පුංචි කාලේ ගමේ ගිහින් බට පතුරුයි ඔට්ටපාලුයි අරගෙන ඇවිත් අම්මයි තාත්තයි එක්ක කූඩු හදපු හැටි මට තාම මතකයි. එදා ඒ කූඩු හදන කොට ලබපු සතුට වචන වලින් විස්තර කරන්න අමාරුයි. මම හිතන්නේ ඒ සතුට විදින්න අපේ අනාගත පරම්පරාවටත් අපිට වගේම අයිතියක් තියනවා. අපි වගේ නගරබදව ඉන්න පවුල්වල උදවියට එකට එකතු වෙන්න පුළුවන් දවසක් තමයි මේ අසිරිමත් වෙසක් උත්සවය. හැබැයි ඒ එකමුතුකම ඒ සරල සතුට කඩෙන් සල්ලි වලට කූඩු ගෙන්ල්ලා තමන්ගේ ගේ සරසලා නම් ලබා ගන්නට බෑ.

කොහොම හරි ඉතින් කූඩුවක් හදන්න හිතුවට ඒකට ඕනේ කරන දේවල් හොයා ගන්න එකනේ අමාරුම වැඩේ. ලංකවේ ඉන්න කොට නම් කාඩ්බෝඩ්, පේපර් පල්ප් වගේ ඒවත් ගත්තා කුඩු හදන්න. ඒත් මෙහෙ ඒවා කරන්න අමාරුයි. එක පැත්තකින් ගිනි ගණන්. අනිත් පැත්තෙන් වෙලාව මදි. (එක දවසයි තියෙන්නේ පෝයට). ඒ වෙලාවේ තමයි මතක් වුනේ මෙහෙ තියන grill skewers එහෙමත් නැත්නම් BBQ කෝටු. ඒවයි රබර් පටි වලින් තමයි යන්තම් අටපට්ටම හදා ගත්තේ. හදිස්සියට හදපු හින්දා ටිකක් ඇදවුනා. ඒත් ඉතින් මුකුත් නැතුව ඉන්නවාට වඩා ඔය හොදයිනේ. වැඩේ එකම අවුලකට තිබ්බේ දැන් මෙහෙ කළුවර වෙන්නේ රෑ 11ට විතර. ඉතින් 11 වෙනකම් බලන් ඉන්න වුනා කූඩුවේ හැඩ බලන්න. ඒක දකින කොට ලංකාවේ පරණ මතකයන් හිතට ගලාගෙන ආවේ නිකම්මම වගේ. ඔන්න ඔහොමයි වයිකින් දේසයේ වෙසක් සැමරුවේ.

සාදා ගත් සැකිල්ල

අපේ පුංචි වෙසක් කූඩුව

විභාගයේදී ඔබේ ලකුණු රැක ගන්න

noreply@blogger.com (අංජන (Anjana)) — Wed, 26 Dec 2012 10:13:00 +0000

කොච්චර දැනගෙන හිටියත් විභාගයේදී හිතපු තරම් ලකුණු හම්බ වෙන්නේ නැද්ද? ඒ ඔබ ඔබට හිමි විය යුතු ලකුණු රැක ගන්නේ නැති නිසා. ඔබ දන්නා බව විභාග පරීක්ෂකවරයාට පෙන්වන්නේ නැති නිසා. විභාගයක් ගැන ඔබ තේරුම් ගතයුතු මූලික කරුණ ඇතුලත් කරලා කලින් මා ලිවු ලිපි දෙක සම්බන්ධ කරලා පොඩි පොතක් පිළියෙල කලා. ඒක

මෙතනින් බාගන්න පුළුවන්

මේ පොත විභාග වලට මුහුණ දෙන නංගිලා මල්ලිලා එක්ක විතරක් නෙමෙයි යාළුවෝ එක්කත් බෙදා හදා ගන්න

උසස් පෙළට දැන් ලෑස්තිද? .... (2)

noreply@blogger.com (අංජන (Anjana)) — Fri, 03 Aug 2012 02:10:00 +0000

කලින් ලිපියේ අපි සාකච්චා කලේ විභාගයකට මුහුණ දෙනකොට අපි විසින් මූලිකවම දැන ගන්න ඕනේ කරුණු කාරණා කිහිපයක්. අද මේ ලිපියෙන් ඉන් තරමක් ඔබ්බට ගිය කරුණු කිහිපයක් තේරුම් බේරුම් කර ගමු.

කලින් ලිපියේදී අප කියා සිටියා උත්තර සපයන එකත් එක්තරා සන්නිවේදන ක්‍රියාවලියක් කියා. සන්නිවේදනයේදී අප උත්සාහ කරන්නේ අපේ හිතේ ඇති යම් අදහසක් හෝ හැගීමක් තව කෙනෙකුගේ හිතට ඇතුළු කිරීම. එහෙමත් නැත්නම් ඔහුට එය තේරුමටයි. නමුත් අපිට කවදාවත් අපේ හිතේ තියන දේ ඒ ආකාරයෙන්ම වෙන කෙනෙකුට තේරුම් කර දෙන්න නම් බෑ. අපි කියන්නේ එකක් නමුත් අනිත් අය තේරුම් ගන්නේ වෙන දෙයක් - මේක අපේ ජීවිතයේදී සාමාන්‍ය දෙයක්. ඒ සාමාන්‍ය දේ විභාගයටත් පොදුයි කියන එක අපි තේරුම් ගන්න ඕනේ. එදිනෙදා ජීවිතයේදී නම් අපි කියන දෙයක් අනිත් අයට තේරුනේ නැති වුනාම ඒ දේ තේරුම්යනකම් නැවත නැවත අපිට කියා දෙන්න පුළුවන්. නමුත් විභාගයකදී අපට ලැබෙන්නේ එකම එක අවස්ථාවක් පමණයි. අපට විභාග පරීක්ෂකවරයා වෙතට ගොස් අප කියන්න උත්සාහ කලේ මෙන්න මෙයයි කියලා නැවත පැහැදිළි කරන්න අවස්ථාවක් ලැබෙන්නේ නෑ. අන්න ඒකයි විභාගයක් ලියන එකත් කලාවක් කියන්නේ. තමන් කොච්චර දැනුමෙන් සන්නද්ධ වුවත් තමන් දන්නා බව ලොකයාට පෙන්වන්ට බැරි නම් විභාග කියන දේ සමත් වන්නට තරමක් අසීරුයි.

සන්නිවේදනයේදී වචනයට වඩා රූපය ප්‍රභලයි. අපි කථාවට කියන දෙයක් තමයි වචන දාහකින් කියන්න බැරි දේ එක රූපයකින් කියන්න පුළුවන් කියන එක. ඡේද ගණනාවකින් අප කියන්නට හදන දේ එක රූප සටහනකින් අපට විස්තර කරන්නට පුළුවන්. ඒ වගේම බලන කෙනෙකුට එය පහසුවෙන් තේරුම් ගන්නත් පුළුවන්. බලන්න ප්‍රශ්න පත්‍රයක රූප මගින් විස්තර කර තිබෙන ප්‍රශ්න අපි බොහොම ලේසියෙන් හා ඉක්මනින් තේරුම් ගන්නවා නමුත් අනිත් අතට වචන මගින් විස්තර ඇති ප්‍රශ්න තේරුම් ගන්නට දෙතුන් විටක්ම කියවන්නට වෙනවා.

ඒ නිසා හැකි සෑම විටම රූප සටහන් මගින් ඔබේ පිළිතුර විස්තර කරන්න. මේවා දළ රූප සටහන් වීම ප්‍රමාණවත්. අඩිරූලක් අරගෙන ගාණට මිම්මට අදින්න අවශ්‍ය නෑ.අවශ්‍ය වන්නේ පැහැදිළි රූපයක් විතරයි.

විභාගයකදී භාවිතා කරන්න පුළුවන් තවත් වැදගත් අංගයක් වන්නේ වගු භාවිතයයි. බොහෝ විභාග වලදී සන්සන්දනය කිරීමේ ප්‍රශ්න ඉදිරිපත් වනවා. වාසි අවාසි විස්තර කිරීම එහෙමත් යම් කරුණු දෙකක් හෝ වැඩි ගණනක් සංසන්දනය කිරීම වගේ දේවල් බොහොම සුලබයි. එවැනි අවස්ථාවකදී ඡේද මගින් විස්තර කිරීමට වඩා වගු මගින් විස්තර කිරීම බලන්නාට මෙන්ම ලියන්නාටද පහසුවක් ඇති කරවනවා. කොහොමද ලියන්නාට මින් පහසුවක් ඇති කරවන්නේ? ඡේද ගණන් ලියනකොට වගේ නෙමෙයි වගුවක් සකසන විට හිතේ සංසන්දනාත්මක අදහස්, කරුණු ඇති කිරීම පහසු කරවනවා. ඒ නිසා වඩා සාර්ථක උත්තරයක් අවසානයේදී පිළියෙල කරන්නට පුළුවන්. ඒ වගේම වගුවක් තුළින් බලන්නාට ඔබේ සංසන්දනය ප්‍රභලව නිරීක්ෂණය කරන්නට පුළුවන් වීමත් සිදුවෙනවා.

අනිත් වැදගත් කාරණය වන්නේ පුළුවන් තරම් ඡේද වෙනුවට කරුණු වශයෙන් (point form) තමන්ගේ පිළිතුර දැක්වීම. බොහොමයක් සිසුන්ගේ අත් අකුරු එතරම් පැහැදිළි නැතිනිසා මෙවැනි ක්‍රම මගින් වඩා වැඩි පැහැදිළිතාවයක් තම තමන්ගේ පිළිතුරු පත්‍රය වෙත ලබා දෙන්නට පුළුවන්. ඒ විතරක් නෙමෙයි මේ මගින් උත්තර පරීක්ෂාකරන පුද්ගලයාට පුදුමාකාර මානසික පහසුවක්ද ඇති කරනවා.

උසස් පෙළට දැන් ලෑස්තිද?

noreply@blogger.com (අංජන (Anjana)) — Wed, 25 Jul 2012 07:59:00 +0000

නිමේෂ්ට ඉංග්‍රීසි වතුර වගේ කතා කරන්න පුළුවන්. ඒ වුනාට විභාගයේදි නිමේෂ්ට වඩා ඉංග්‍රීසි වලට ලකුණු ගන්න ළමයි දහයක් පහළවක් විතර ඉන්නවා. චමත්ට ඉලෙක්ට්‍රොනික් වැඩ කිරි කජු වගේ පුළුවන් විශ්ව විද්‍යාල සිසුවෙක්. ඒ වුනාට චමත්ට විභාගයේදී ඉලෙක්ට්‍රොනික් වලට හම්බවුනේ B+ එකක් විතරයි. අපිට ජීවිතයේදී මේවගේ යාළුවෝ ඕනෑ තරම් මුන ගැහිලා ඇති. ඇයි මේ දක්ෂයන්ගේ දක්ෂකම් විභාගයකින් මනින්න බැරි? ඒක අනිවාර්යයයෙන්ම විභාග ක්‍රමයේ ඇති දුර්වලතාවයක්. අවුරුද්දක් තිස්සේ ඉගෙන ගත්ත දේවල් පැය දෙකකින් තුනකින් මනින්නේ කොහොමද කියන එක ගැටළුවක්. අනිත් අතට වත්මන් විභාග ක්‍රමය වෙනුවට යොදාගන්න පුළුවන් වෙනත් ප්‍රායෝගික ක්‍රමයක් තවමත් අප සතුව නැති බවත් පිළිගන්න ඕනේ. අදුරට සාප කරනවාට වඩා එක පහනක් හෝ දැල්වීම වැදගත් නිසා පවතින ක්‍රමයට දොස් නගන්නේ නැතිව පවතින ක්‍රමය තුළ ජයගන්නේ කොහොමද කියලා සිතීම වැදගත්.

තොරතුරු තාක්ෂණය, සන්නිවේදනය, IT කියන්නේ අපේ යුගයේ වචන. ඔබ විභාගයකට මුහුණ දීමට සූදානම් වන විට ඔබ පැහැදිළිව තේරුම් ගතයුතු කරුණ වන්නේ විභාග ප්‍රශ්න පත්‍රයකට පිළිතුරු ලිවීම යනු එක්තරා සන්නිවේදන ක්‍රමයක් බවයි. අපට කෙලින්ම විභාග පරීක්ෂකවරයෙක් ලගට ගොස් අපේ දැනුම, දක්ෂතා ඔප්පුකර පෙන්විය නොහැකි නිසා අප වෙනුවට අපේ උත්තර පත්‍රය විභාග පරීක්ෂකවරයා වෙත යොමු කරනවා. සරලව කියනවා නම් අපේ උත්තර පත්‍රය අපේ නියොජිතයායි. අපේ වැඩක් අප වෙනුවෙන් කරන්න කියා වෙන කෙනෙකුට පවරනකොට අපි ඒක ආවට ගියාට කරන්නේ නෑ. අපි ඒ වැඩේ හරියට කරන්න පුළුවන් විශ්වාසවන්ත කෙනෙකුට විතරයි පවරන්නේ. උදාහරණ විදිහට

· ගමනක් යනවිට ගේ දොර බලා ගැනීමට කෙනෙකුට පැවරීම
· බැංකුවට ගොස් බිලක් ගෙවීම
· පාසලේ සිට ළමයාව ගෙදර එක්කාගෙන ඒම

වැනි සිද්ධි ගත්විට ඒ වැඩේ බාර දෙන්න කලින් අපි දෙපාරක් හිතනවා. ඉතින් ජීවිතයේ දිශාව තීරණය කරන විභාගයකදී අපව නියෝජනය කරන උත්තර පත්‍රය නිවැරදිව සකස් කර ගන්නේ කොහොමද කියන එක ගැන යම් පැහැදිළි අදහසක් තිබිය යුතුමයි.

උත්තර පත්‍ර පරීක්ෂකයෙක් අපගේ උත්තර පත්‍රය පමණක් නොවෙයි පරීක්ෂා කරන්නේ. ඔහු ඒ හා සමාන උත්තර පත්‍ර සිය දහස් ගණනක් පරීක්ෂා කරනවා. ඒ නිසා අපි හැමවිටම උත්සාහ කරන්න ඕනේ උත්තර පත්‍ර පරීක්ෂකවරයාට කිසිම අපහසුතාවයක් නැතිව පරීක්ෂා කරන්න පුළුවන් උත්තර පත්‍රයක් නිර්මාණය කිරීමට. උත්තර පත්‍ර පරීක්ෂකවරයාට අපගේ උත්තර පත්‍රය බැලීම වෙහෙස ඇති කරවනවා නම් ඔහු අපට දෙන්න පුළුවන් උපරිම ලකුණු ප්‍රමාණය ලබා නොදෙන්නත් පුළුවන්. උත්තර පත්‍ර පරීක්ෂකවරයාව වෙහෙසට පත් නොකරන්නේ කෙසේද? සරලම පිළිතුර නම් පිළිතුරු පැහැදිළිව උත්තර පත්‍රය තුළ සටහන් කිරීමයි. ඒ සදහා,

· පැහැදිළිව ප්‍රශ්නයේ අංකය, අනුකොටස් වල අංක උත්තර පත්‍රයේ වම් අත තීරුවේ ලියන්න.
· වම් අත තීරුවේ (හෝ පරීක්ෂකවරයාට වෙන්කර ඇති තීරුවේ) වෙන කිසිවක් නොලියන්න.
· ප්‍රශ්නයක අනුකොටස් අතර රූලක හෝ දෙකක පරතරයක් තබන්න.
· අනිවාර්යයයෙන්ම සෑම ප්‍රශ්නයකටම පිළිතුරු අළුත් පිටුවකින් ආරම්භ කරන්න.

කෙනෙකුට හිතෙන්න පුළුවන් මේවා බොහොම සරල දේවල්. මෙවැනි දේවල් අත්‍යවශය නෑ කියලා. නමුත් එහෙම හිතන්න කලින් පහළ රූප දෙක බලන්න.

රූපය 1

රූපය 2

පළවන රූපය ඉහත උපදෙස් අනුගමනය කර ඇති නිසා ප්‍රශ්නයේ අනුකොටස් කිසිම අපහසුතාවයකින් තොරව තෝරාබේරා ගන්නට පුළුවන්. නමුත් දෙවන රූපයේ අනු කොටස් අතර බැලූබැල්මට ඇති පටලැවිලි සහගත තත්වය නිසා සිසුවා කියන්නට හදන දේ එක් වරම ඒ ආකාරයෙන් පරීක්ෂකවයාට තේරෙන්නේ නැති වන්නට පුළුවන. අප තේරුම් ගත යුත්තේ පිළිවෙලකට උත්තර පත්‍රය ඉදිරිපත් කිරීම තුළින් වැඩි ලකුණු ලැබීම කෙසේ වෙතත් අපට හිමි ලකුණ ඒ ආකාරයෙන් සුරැකීම සිදුවන බවයි. නමුත් අපිළිවෙලට ඉදිරිපත් කිරීම නිසා ලැබිය යුතු ලකුණුත් ඒ ආකාරයෙන්ම නොලැබෙන්න පුළුවන්.

මෙහිදී සදහන් කලේ විභාගයකදී අනුගමනය කළ යුතු සරලම කරුණු කිහිපයක් පමණයි. මීටත් වඩා එහාට ගිය කරුණු කාරණා කිහිපයක් හෙට අනිද්දාම අපි කථා කරමු.

Power point වලට බායි කියමු !!!

noreply@blogger.com (අංජන (Anjana)) — Sat, 28 Jan 2012 11:20:00 +0000

අපි කොහොමද ළමයෙක්ට හරියට උගන්වන්නේ? මේ ප්‍රශ්නය හැම ගුරුවරයෙක්ම තමන්ගෙන් අහන්න ඕනේ දෙයක්. හැබැයි කවදාවත්ම මේකට උත්තරයක් නොලැබෙන තරමට හොදයි මොකද එතකොට තමයි හැමදාමත් ඉගැනුම් ක්‍රියාවලිය දියුණුවෙන්නේ.
ඉතින් මමත් පුළුවන් තරම් මේකට උත්තර හොයනවා. විශේෂයෙන්ම අලුත් වන තාක්ෂනය කොහොමද සිසුන්ට ප්‍රයෝජනවත් විදිහට එහෙමත් නැත්නම් ඵලදායි විදිහට ඉගැන්වුම් කටයුතු වලට පාවිච්චි කරන්නේ කියලා.
අද අපේ රටේ සාමාන්‍යයෙන් ඉගැන්වුම් කටයුතු වලට පාවිච්චි කරන මෘදුකාංගය පවර් පොයින්ට් (power point) පමණයි. එකත් හරියට යොදාගන්නවද කියන දේ ගැනත් අපි ටිකක් හිතන්න ඕනේ. හුග දෙනෙක් කරන දෙයක් තමයි තමන්ගේ සටහන (note) සම්පුර්ණයෙන්ම slide වලට යෙදීම. ගුරුවරයෙක් විදිහට මේ විදිහට දේශනය (lectures) පැවැත්වීම හරිම ලේසියි. ඇයි ඉතින් whiteboard එකේ හරි blackboard එකේ හරි ලියන්න ඕනේ නෑ නේ. හැබැයි ඉතින් වැඩක් නෑ මොකද ළමයි ඒ ක්‍රමයෙන් ලොකු දෙයක් ඉගෙන ගන්නේ නෑ. සටහන නම් සම්පුර්ණයෙන්ම ලියාගෙන යාවි නමුත් lecture එකේ හරි අරමුණ ඒක නෙමෙයිනේ. සාමාන්‍යයෙන් හුග දෙනෙකුට ඒ වගේ presentation එකක් දකින කොටත් නිදීමට වෙනවා. ඒ නිසා lectures වලට multimedia යොදාගන්න කොට අපි ටිකක් කල්පනාකාරී වෙන්න ඕනේ. ඔන්න ඔය අතරෙදි තමයි මට prezi හම්බවුනේ.

Prezi වල තියෙන වටිනාම දේ තමයි යම් මාතෘකාවක තියෙන අනු කොටස් කොහොමද ප්‍රධාන මාතෘකාවට සම්බන්ධ වෙන්නේ කියන ඒක බොහොම පැහැදිලිව පෙන්වන්න පුළුවන් වීම. ඒ නිසා lectures සාමාන්‍ය මට්ටමට වැඩ ක්‍රියාශීලි ලෙස කරගෙන යන්නත් පුළුවන්.

මේ තියෙන්නේ මම ඒ විදිහට හදපු පාඩමක්. හැබැයි තවම ගෝලයන්ගෙන් මේ ගැන ප්‍රතිචාර නම් ලබාගන්න බැරි උනා. කොහොම උනත් මම හිටන්නේ මේක power point එකට වැඩිය හොදයි. ඔයාලටත් පුළුවන් මේක තමන්ගේ presentation වලට පාවිච්චි කරලා බලන්න.

කන්න අතට ගත්ත දේ කටේ දමා ගමු

noreply@blogger.com (අංජන (Anjana)) — Tue, 11 Oct 2011 17:08:00 +0000

2007 දී ඕස්ට්‍රේලියාවට එක්ක පැරදුනු අවසන් තරගය

ගැනද වැඩිය දුක?

2011 දී ඉන්දියාවට එක්ක පැරදුනු අවසන් තරගය

ගැනද වැඩිය දුක?

කියල ඇහුවෝතින්

හුග දෙනෙක් කියාවි

ඒ ඉන්දියාව එක්ක තරගය කියලා.

ඇයි ඒ?

අපිට ඒක දිනන්න තිබ්බ එකක්. දිනන්න පුළුවන් එකක්

රටක් විදිහට අද අපි ඉන්නෙත් දිනන්න පුළුවන් තත්වෙක නේද?

යුද්ධය නිමා වූ රටක්

තුනෙන් දෙකක බලයක් ඇති රටක්

ස්වභාවික උවදුරු නැති රටක්

අළුත් ආත්ම විශ්වාසයකින් යුතු මිනිසුන් සිටින රටක්

අළුත් බලාපොරොත්තු සහිත රටක්

ඒත් අපි පැරදුනෝතින්

අනාගත පරපුර අපි හැමෝටම සාප කරාවි

මේ අපේ අගනාම මෙන්න අවසාන අවස්ථාව නිසා

දැන්වත් මෝඩ වැඩ නොකර

හරි දේට හරි කියමු

වැරදි දේට වැරදියි කියමු

පාට පාට කණ්නාඩි ඉවත දමමු

අතීතය ගැන පසු නොතැවෙමු

අතීතයෙන් පාඩමක් ඉගෙන ගෙන

අනාගතයට රටක් ඉතිරි කරමු.

සිංහල ‍‍බෞද්ධ සංස්කෘතිය මත පදනම්ව විද්‍යාවක් බිහි කළ හැකිද?

noreply@blogger.com (අංජන (Anjana)) — Thu, 11 Aug 2011 09:37:00 +0000

මුලින්ම කියන්න ඕනේ මම කවදාකවත් මහාචාර්ය නලීන් ද සිල්වා මැතිතුමාගේ අනුගාමිකයෙකුවත් එතුමාව දැඩි ලෙස විවේචනය කරන්නෙකුවත් නොසිටි බව. උසස් පෙළ සමත් වීමෙන් පසු එතුමාගේ විද්‍යා කතන්දර කෘතිය මිලට ගත්තත් අද වනතුරු හරියට කියවලා නොතිබුනත් ( දැන්නම් කොහොම හරි කියවන්න ඕනේ) එතුමාගේ මතය එතුමාගේ වචන වලින්ම අහගන්න ආසාවක් හිතේ අස්සක මුල්ලක සැගවිලා තිබුනා. ඇත්තටම අපි යමක් පිළිගන්න හරි විවේචනය කරන්න හරි කලින් ඒ සම්බන්ධයෙන් හොද අධ්‍යයනයක් කරන්නට අවශ්‍යයි. කෙසේ වුවත් එතුමගේ දේශන සොයාගෙන ගොස් සහභාගී වීමට කරම් උනන්දුවක් මා තුළ නොමැති වූ බවද පිළිගන්නටම ඕනේ කාරනයක්.

ඉතින් මට මේ සදහා හොද අවස්ථාවක් ඊයේ දිනයේදී උදාවුනා. ඒ එතුමාගේ දේශනයක් අපගේ විශ්ව විද්‍යාලයේදී පැවැත්වූ බැවින්. මාතෘකාව වුනේ "සිංහල ‍‍බෞද්ධ සංස්කෘතිය මත පදනම්ව විද්‍යාවක් බිහි කළ හැකිද?" යන්නයි. පැහැදිලිවම කියනවා නම් බලාපොරොත්තු වූවාට වඩා හිතන්නට යමක් ඉතිරි කළ දේශනයක් ලෙස එය හදුන්වන්ට පුළුවන්. නිතර බ්ලොග් නොලියන මම මේ සම්බන්ධයෙන් සටහනක් තබන්නට කල්පනා කලෙත් ඒ නිසයි.

මේ කතාව අහන්න කැමති කෙනෙක් ඉන්නවා නමි මෙන්න මෙතන්න අහන්නට පුළුවන්.

හැබැයි මේ කතාව අහලා මම එතුමාගේ අනුගාමිකයෙකු වුනේ නෑ. නමුත් එතුමා කියන කතාවේ ඇත්තක් පදනමක් තියනවා කියන එක නම් තේරුම් ගත්තා. ඒක මගේ ජීවිතයට බොහොම වැදගත් වන බව දැනුනු නිසයි ඒක බෙදා හදා ගන්නට මෙහි අවේ.

එක එක පාට කණ්නාඩි දාගෙන බලන්නේ නැතුය පුළුවන් තරම් මධ්‍යස්ථව හා උපේක්ෂාවෙන් මේකට ඇහුම්කන් දීලා බලන්න

අපේ උසස් අධ්‍යාපනය පත්ව ඇති තත්වය.........

noreply@blogger.com (අංජන (Anjana)) — Tue, 19 Jul 2011 06:36:00 +0000

සම්පූර්ණ වාර්තාව මෙතනින්

දක්ෂිණලංකා අධිවේගී මාර්ගයේ අලුත් පින්තූර

noreply@blogger.com (අංජන (Anjana)) — Sat, 18 Jun 2011 01:44:00 +0000

දක්ෂිණලංකා අධිවේගී මාර්ගයේ අලුත් පින්තූර ටිකක් හම්බ වුනා.

තර්කය හරි සුන්දරයි ඒත්.....................

noreply@blogger.com (අංජන (Anjana)) — Fri, 10 Jun 2011 18:08:00 +0000

ඉතිහාසය කන්නද?

සමහරු අහන දෙයක් මගෙන්

ඉතිහාසයෙන් තොර අනාගතයක් නෑ

තවත් සමහරු කියන දෙයක්

බුදු හාමුදුරුවෝ ලංකවේ උපන්නා

හිත දෝලනය වන්නේ මෙතනයි මේ දවස් වල

කතාවනම් හුගක් තර්කානු කූලයි

ඒකෙ නම් සැකයක් නෑ

සාක්කිත් එමටයි

ඒ වුනත්

ඒ ගැන තර්ක කිරීමෙන් පලක් වේද?

හිත ලතවෙන්නේ එතනයි

තර්කය හරි සුන්දරයි

පුදුම එළවන සුලුයි

හැබැයි ප්‍රතිඵලය.......?

ඊට වඩා වැදගත්

බුදු හිමියන් දෙසූ මග

යන එක

මම හිතාගත්තා

සෙනසුරයි සෙනසුරාගේ අම්මයි

noreply@blogger.com (අංජන (Anjana)) — Fri, 14 Jan 2011 06:28:00 +0000

ඔන්න දවසක් සෙනසුරාගේ අම්මා සෙනසුරාගෙන් ඇහුවලු ඇයි පුතේ උඹ හැමදාම දුප්පත් අසරණ මිනිස්සුන්ටම කරදර කරන්නෙ? ඇයි අර හොදට කාලා බිලා සැපට ඉන්න එවුන්ට මුකුත් කරන්නෙ නැත්තේ අනික උඔ හැමදාම කරදර කරන්නේත් එකම මිනිස්සු ටිකකටනේ කියලා.

සෙනසුරා ඉතින් අම්මට ඕව තේරෙන්නෙ නෑ කියලා යන්න ගියාලු.

දවසක් සෙනසුරා අම්මට කිව්වලු අම්මේ මට කෙහෙල් ගහක් විනාස කරන්න ඕනෙ කියලා. ඉතින් අම්මා කිව්වලු අර ඕනෙ තරම් තියෙන්නේ ගේ පිටිපස්සේ ගිහින් ඕනෙ දෙයක් කරගන්න කියලා. සෙනසුරත් ඉතින් ගිහින් වත්තේ තිබ්බ හොදම කෙහෙල් ගහ විනාස කරල ආවලු. ඒක දැක්ක සෙනසුරාගේ අම්ම කෑ ගැහුවලු මොකද්ද බං උඔ කරපු අපරාදේ අර අච්චර කේඩෑරි වේච්ච, වේලිච්ච ගස් තියෙද්දි උඹ මේ හොදම ගහට කරපු වින්නැහියක් කියලා. එතකොට සෙනසුරා කියපි දැන් අම්මටත් ඕනේ හොදට තියෙන ගස් රැකගෙන ඔය කනාටු ගස් ටික විනාස කරන්න නේ. මාත් එහෙම තමයි අම්මේ ඔය හොදට ඉන්න මිනිස්සුන්ට කරදරයක් කරන්න යන්නෙ නෑ කියලා.

තව දවසක් ඔන්න සෙනසුරා වත්තෙන් අලුත් කෙහෙල් කැනක් කපාගෙන ඇවිත් ඒකෙන් එක ඇවරියක් කපාගෙන ගියාලු. ඔන්න ඉතින් හවස් වෙලා සෙනසුරාගෙ අම්මා මේ කෙහෙල් කැන දැකලා එයත් ඇවරියක් කපා ගත්තලු. ඒක දැකපු සෙනසුරා ඇහුවලු අම්මේ අර වත්තේ අච්චර කෙහෙල් කැන් තියෙද්දි මම ඇවරියක් කපා ගෙන පැත්තකින් තියපු කෙහෙල් කැනෙන්ම ඇවරියක් කැපුවේ කියලා. අම්මා එතකොට කිව්වලු ඉතින් පුතේ මේ ඇවරියක් කපපු කැනක් තියෙද්දී අනිත් ඒවායෙන් කැපුවනම් අපරාදෙනෙ කියලා. සෙනසුරා එතකොට කිව්වලු අන්න ඒ නිසයි අම්මේ මාත් හැමතිස්සේම එකම අයට කරදර කරන්නේ කියලා.

චාටර් කූඹියා

noreply@blogger.com (අංජන (Anjana)) — Thu, 18 Nov 2010 08:54:00 +0000

මේ අද ඊමේල් එකකින් ආපු අපූරු කතාවක්...

‍ඩෙංගු මාරයා - ගස්ලබු වීරයා

noreply@blogger.com (අංජන (Anjana)) — Sun, 18 Jul 2010 12:26:00 +0000

මීට පෙර ‍ඩෙංගු වලට අපූරු බෙහෙතක් කියා ලිව්ව ලිපියට අදාළ වෛද්‍ය හෙට්ටිගේ මහතා ගැන අද දෙරණ වෙබ් අඩවියේ සදහන් වුනා.මේ තියෙන්නේ ඒ උපුටා ගැනීමයි.

ඩෙංගු රෝගීන් සඳහා පැපොල් (ගස්ලබු) පත්‍රවල යුෂ සුදුසු බව වෛද්‍ය පරීක්ෂණවලින් සනාථ වී ඇත. ළමුන් 10 - 15ත් අතර පිරිසක්ද ඇතුළුව ඩෙංගු වැළදුණු රෝගීන් 70 දෙනෙකු යොදා ගනිමින් සිදුකළ පරීක්ෂණයක් සිදුකර ඇති අතර ඔවුන්ගෙන් සෑම අයෙකුටම පැපොල් කොළ යුෂ මිලි ලීටර් 10ක් පානය කිරීමට දී තිබේ.

සාමාන්‍යයෙන් සිදුකරන වෛද්‍ය පරීක්ෂණවලින් ඕනෑම රෝගයක් සුවවීමේ ප්‍රතිශතය වන්නේ 50%ක් පමණය. නමුත් පැපොල් යුෂ යොදා ගනිමින් ඩෙංගු රෝගීන් වෙනුවෙන් සිදුකළ මෙම පරීක්ෂණයේ ප්‍රතිඵලය 100%ක් බවට ඔප්පුවී ඇතැයි වෛද්‍ය සනත් හෙට්ටිගේ මහතා ප්‍රකාශ කර ඇත. ඵලදාව ඇති, හොඳින් වැඩුණු රතු වර්ගයේ ගස්ලබු (Red lady) ගසක පත්‍රය පමණක් ගෙන පිරිසිදු ජලයෙන් හොඳින් සෝදා එම පත්‍රය වංගෙඩියක දමා කොටාගත යුතුය. වතුර හෝ ලුණු වතු නොදමා ගස්ලබු කොළය පමණක් මෙසේ හොඳින් කොටා ගෙන එයින් මිරිකා ගත් සාරය බීමට ගත යුතුය. සීනි හෝ වතුර හෝ කිසිවක් මිශ්‍ර නොකර ගස්ලබු කොළ සාරය පමණක් පානය කළ යුතු බව වෛද්‍ය හෙට්ටිගේ මහතා සඳහන් කරයි.

වැඩිහිටියන් මි.ලී 10ක ප්‍රමාණයක්ද, වයස අවුරුදු 05 - 12ත් අතර ළමුන් මි.ලී 05ක් ප්‍රමාණයක්ද දිනකට දෙවරක් පානය කළ යුතුය. ඩෙංගු වැළඳී අසාධ්‍ය මට්ටමේදී මෙය පානය කිරීමේ ප්‍රතිඵලයක් නොලැබේ. ඩෙංගු යැයි හඳුනාගත් වහාම මෙය පානය කළ යුතු අතර ඩෙංගු රෝගය සඳහා දෙනු ලබන බෙහෙත් සමඟ මෙය බීමට ගත හැකිය.

මෙසේ පැපොල් කොළ යුෂ බීමට ගැනීමෙන් ඩෙංගු රෝගීන්ගේ සුදු රුධිරාණු මෙන්ම රුධිර පට්ටිකා වර්ධන කෙරේ. එසේම ‍ රුධිරය කැටි ගැසීම වර්ධනය කරන අතර ඩෙංගු වැළඳීමෙන් අක්මාවට වන හානිය යම් තරමක් දුරට සමනය වේ. සාමාන්‍යයෙන් පුද්ගලයෙකුගේ රුධිර පට්ටිකා 150,000 - 350,000 අතර පවතී. ඩෙංගු රෝගය වැළඳීමෙන් එය 150,000ක් වැනි අඩු තත්වයක් පැවතියහොත් පැපොල් කොළ පානය කිරීමෙන් එය වර්ධනය කරගත හැකිය.

මගේ මව මෙන්ම සහෝදරයෙක්ද මෙම ප්‍රතිකාරය නිසා නිට්ටාවටම සුව වූ අතර මෙය රට පුරා ප්‍රචාරය කිරීම සැමගේ වගකීම වේ.

Dr.Sanath Hettige (MBBS, DFM, MD, MCGP)

The Medical Clinic Tel – 0112851517

92,Wattegedara Rd, Email – hettiges@sltnet.lk

Maharagama

ඩෙංගු වලට අපූරු බෙහෙතක්

noreply@blogger.com (අංජන (Anjana)) — Sat, 03 Jul 2010 00:36:00 +0000

ඩෙංගු.... සමාජයක් විදිහට අප ඉදිරියේ පවතින තවත් එක් අභියෝගයක්. නමුත් අපේ අවාසනාවකට මෙන් අනවශ්‍ය ආකාරයෙන් දේශපාලනී කරණය වීම නිසා උඩු දුවපු, එක තැන පල්වුනු එහෙමත් නැත්නම් වන වුනු ප්‍රශ්නයක් විදිහටයි මම මෙය දකින්නේ. විශේෂයෙන්ම මේ අනවශ්‍ය දේශපාලනී කරණය වීම නිසා මෙහි සම්පූර්ණ වගකීම රජය හා ඊට සම්බන්ධ ආයතන වලට පැවරීමටත් මේ සම්බන්ධයෙන් තමන්ගේ වගකීමෙන් මිදීමටත් රටේ බොහෝ දෙනෙක් පෙළඹී සිටින බව මගේ හැගීමයි.

මේ සම්බන්ධයෙන් බොහෝ දෙනෙකු සිතන්නේ කියුබාවෙන් BTI බැක්ටීරියාව ගෙන්වීමෙන් මීට සදාකාලික විසදුමක් ලැබෙන බවයි. මීට පෙර ලිපියකින්ද මා පෙන්වා දුන්නේ එය එසේ නොවන බවයි.

අද මා සදහන් කරන්නේ මීට අපේ රටේම වෛද්‍යවරයෙක් විසින් සොයාගත් අපූරු බෙහෙතක් ගැනයි. කවුරුත් දන්න දෙයක් තමයි ඩෙංගු වැළදුනු විට අපේ රුධිරයේ රුධිර පට්ටිකි සීඝ්‍රයෙන් අඩුවන බව. සාමාන්‍යයෙන් අපේ රුධිරයේ රුධිර පට්ටිකා 150,000-450,000 ප්‍රමාණයක් රුධිර මයික්‍රො ලීටරයක තිබිය යුතුයි. රුධිර වාර්ථාවක මෙය දැක්වෙන්නේ PLT නමින්. ඩෙංගු වැළදුනු විට මෙය 50,000 දක්වා වුවත් අඩු වීමේ අවධානමක් පවතිනවා. සාමාන්‍යයෙන් භාවිතා වන බටහිටඖෂධ වලින් දිනකට මෙය වර්ධනය කරගන්නට පුළුවන් වන්නේ 10,000 පමණය. නමුත් මේ අපූරු ඖෂධයෙන් 70,000 පමණ වර්ධනයක් ලබා ගත හැක. මේ ඖෂධය තව දුරටත් අපූරු වන්නේ එය ලංකාවේ ඕනෑම ගෙවත්තක පහසුවෙන් වැවෙන ශාකයක් වීමයි. මේ දැක්වෙන්නේ පසුගිය දිනක මෙම ඖෂධය ලබාගත් රෝගියකුගේ විස්තරයි.

මෙහිදී 28 දා මෙම ‍ඖෂධය භාවිතා කළ අතර පැය 24ක කාලයක් තුළදී රුධිර පට්ටිකා 134,000 සිට 207,000 දක්වා වර්ධනය විය.

නමුත් අවාසනාවකට මේ ගැන තවමත් රටේ බලධාරීන්ගේ අවධානය යොමු වී නැත. ඒ නිසාම මේ ගැන කිසිදු හෙළිදරව්වක් කිරීමට මා පැකිළෙන්නේ කොතළ හිඹුටු වලට වූ දේ මෙයටත් වේ යැයි බියෙනි. නමුත් ඇත්තෙන්ම අප මේ ගැන රටේ අස්සක් මුල්ලක් නෑරම ප්‍රචලිත කළ යුතුය. එය‍ මා සිතන්නේ අප සැමගෙම යුතුකමකි.

‍‍

ඩෙංගු ගැන දේශපාලන කෝණයකින් නොව මිනිස් හදවතකින් බලමු. තමන්ගේ ගෙවත්තේ, ආයතනයේ ඩෙංගු මදුරුවන් බෝ නොවීමේ වගකීම තමන් අතට ගන්න. ඩෙංගු නැතිකළ හැක්කේ සමාජීය එකමුතුවකින්ම පමණී. නැතුව බැක්ටීරියාවකින්නම් නොවේ.

අපි පොලිතින් පුච්චමු

noreply@blogger.com (අංජන (Anjana)) — Wed, 23 Jun 2010 18:48:00 +0000

පොලිතින් ............. අපේ රටේ තවත් එක් ප්‍රබල ගැටලුවක්. ඒ ගැන අමුතුවෙන් කියන්න ඕනේ නෑනේ. ඒ වුනාට පොලිතින් භාවිතයේ අඩුවකුත් නෑ. පාවිච්චි කරල ඉවර වුනාට පස්සේ බොහෝ දෙනෙක් කරන්නේ කුණු කූඩෙ‍ට දාන එකනේ. එක අතකින් බැලුවහම කාට මොන කරදරයක් වුනත් තමන්ට කරන්න පුළුවන් ලේසිම වැඩෙත් ඒකනේ. හැබැයි හුග දෙනෙක් පොලිතින් පුළුස්සන්න ටිකක් මැළිකමක් දක්වනවා. ඒ විෂ රසායනික ද්‍රව්‍ය පරිසරයට එකතු වෙනවා කියන මතය නිසයි. ඇත්තම කියනවා නම් මමත් හිතාගෙන හිටියේ එහෙම තමයි. නමුත් අද අපේ සර් කෙනෙක් ඉදිරිපත් කළ තර්කය අපිට අළුතෙන් හිතන්නට යමක් එකතු කළා.

දැන් බලන්න මේ තමයි පොලිතින් වල සංයුතිය.

CH₃ – (CH₂)_n –CH₃

පොලිතින් පිච්චුවාම පිට වෙනවා කියලා කියන්නේ ඩයොක්සින් කියන සංයෝගයයි. මේ තියෙන්නේ අන්න ඒක.

දැන් තියන ගැටලුව තමයි පොලිතින් පිළිස්සූවිට කොහොමද ඩයොක්සින් හැදෙන්නේ කියන එකයි. අපි දන්න රසායනවිද්‍යාව‍ට අනුව නම් වෙන්න බෑනේ ඉතින්.

මෙතනදී මම තේරුම් ගත්ත දේ තමයි කවුරු හරි කිව්ව පළියට හරි එහෙමත් නැත්නම් පොතක පත්තරයක තිබුනයි කියලා අපි යමක් පිළිගන්න නරකයි. අපි ඉගෙන ගත්ත දැනුම තර්කානුකූලව යොදල ඒ ගැන තීරණයකට එන්න ඕනේ කියලා මට හිතුනා. ඇත්තටම අපේ රටේ සරසවි හෝ එවැනි වෙනත් ආයතනවල ශිෂ්‍යන් මේ වගේ හිතන්න පුරුදු වෙලා නෑ නේද? ඒ ගැනත් අපි හිතන්න ඕනේ කාලය එළඹිලා.

දැන් ආපහු කතාවට එමුකෝ. මම ඉතින් මේ ගැන තව ටිකක් හොයලා බැලුවා. කතාව ඇත්ත. පොලිතින් පිච්චුවා කියලා පරිසර හානියක් වෙනවා කියන්න සාක්ෂි නෑ. හැබැයි පොලිතින් සහිත කුණුගොඩවල් නම් පුච්චන්න එපා. ඒ කුණුගොඩේ තියන ක්ලෝරීන් අඩංගු ද්‍රව්‍ය සමග ඩයොක්සින් හැදෙන්න පුළුවන් නිසයි. ඒ වගේම PVC වගේ ක්ලෝරීන් අඩංගු ප්ලාස්ටික් වර්ගත් පුළුස්සන්න එපා.

ඒ කියන්නේ අපිට බය නැතුව පොලිතින් ඉන්ධනයක් විදිහට පාවිච්චි කරන්න පුළුවන්. මොකද පොලිතින් කියන්නේ බොරතෙල් වල තවත් එක් ප්‍රථිඵලයක්. විශේෂයෙන්ම ලී කුඩු හෝ දර ලෙහෙ‍සියෙන් ගිනි අවුළුවා ගන්නට බැහැ. ඒ නිසයි අපි භූමිතෙල් වැනි දෙයක් යොදන්නේ. ඒ වෙනුවට අපට පුළුවන් පොලිතින් ඒවා සමග එක් කර ගෙදර දොරේ ඉන්ධනයක් විදිහට පාවිච්චි කරන්න.

EXMO ට පෙරවදනක්

noreply@blogger.com (අංජන (Anjana)) — Fri, 28 May 2010 08:38:00 +0000

එළඹෙන ජුනි මස 11,12 හා 13 යන දින වල මොරටුව විශ්වවිද්‍යාලයේදී පැවැත්වෙන ExMO 2010 ප්‍රදර්ශනය ගැන ඔබ දැනටමත් දන්නවැ ඇති. ඊට සමගාමීව වෙනමම බ්ලොග් අඩවියක් ආර්ම්භ කරන්නට මම තීරණය කළා. ඒ තමයි මැවිසුරු.

මෙන්න එහි පළ කල අළුත්ම ලිපිය

අපි දන්න කියන ඉතිහාසයට අනුව ( රාවණා රජ්ජුරුවන්ගේ, දඩුමොණරයේ කතා ඇත්තක් නම් මම මේ ලියන වාක්‍ය බොරු වෙනවා) ඉතිහාසයේ අන්කවරදාකටවත් වඩා භෞතික අතින් ඉතා දියුණු මට්ටමකට මිනිසා අද පැමිණ සිටිනවා. හෝමෝ ඉරෙක්ටස් ගේ සිට නූතන මානවයා දක්වා පැමිණි මේ ගමනේ සාර්ථක බවට ඉතාම වැදගත් සාධකයක් විදිහට ‘මිනිසාගේ කුතුහලය’ හදුන්වන්නට පුළුවන්. මම දකින විදිහට අපගේ ලෝකයේ හෙට දවස බිහිවන්නේ අද දවසේ අප තුළ ඇති කුතුහලයන් සන්සිදුවා ගැනීමට අප ගන්න විවිධ ක්‍රියා මාර්ග තුළින්.

ඉතින් මීට අවුරුදු දහස් ගනනකට පෙර අපේ මුතුන් මිත්තන්ට අවට ලෝකය ගැන පුදුමාකාර කුතුහලයක් පවතින්ට ඇති. ඒ නිසාම මේ ලෝකය පුරා විවිධාකාරයේ අරුම පුදුම ශක්තීන් සැගවී ඇති බවට ඔවුන් විශ්වාස කරන්නට ඇති. ඒ ශක්තීන් තුළින් කවදා හෝ අමරණිය වීමට, ඕනෑම රෝගයක් සුවපත් කළ හැකි ‍ඖෂධ සාදාගැනීමට පමණක් නොව ඕනෑම දෙයක් රත්තරන් බවට පත්කර ගන්නට පුළුවන් වේවි යැයි ඔවුන් සිතීම පුදුමයක් නෙමෙයි. අපි කවුරුත් දන්නවනේ මොකක් හෝ කුතුහලයක් ඇති වුනාම ඒ ගැන හොයල බලනකම් හිතට නිවනක් නෑ කියලා. ඉතින් අන්න ඒ එදා මිනිසුන් ඔවුන් මේ විශ්වාස කළ සැගවුනු ශක්තීන් ගැන සොයන්නට පටන් ගත්තා. ඒ අයව හදුන්වන්නේ ඇල්කෙමිවරු ‘alchemist’ කියලයි. නමුත් අද වෙනකොට එදා දුටු සිහින ස‍දාකල් මානව වර්ගයාගේ සිහිනයක් ලෙසම පවතින බව පැහැදිළිවී අවසන්. නමුත් ඒ අරමුණට යන්නට ගත් උත්සාහය නම් අපතේ ගියේ නෑ. අද දවසේ ලෝකයේ එක් පදනමක් වන විවිධ රසායන ද්‍රව්‍ය බිහිවූයේත් සෑම නව සොයාගැනීමකට පදනම වූයේත් මේ මහා ගවේෂණය හා එහි අතුරු ප්‍රතිඵලයි.

අද වෙනකොට ඇල්කෙමිවරු මේ ලෝකය මත නෑ. නමුත් ඔවුන්ට නෑකම් කියන ඔවුන්ගේ පරපුරේ නූතන පුරුක් ලොව පුරාම පැතිරී සිටිනවා. විද්‍යාඥයන් විවිධ පර්යේෂකයන් ඒ අතර විශේෂයි. ඒ අතර තවත් පිරිසක් සිටිනවා මේ ලෝකයට සුවිශේෂී කාර්යයක් කරපු මෙන්ම කරන. ඒ තමයි ‘chemical and process engineers’ හෙවත් රසායන හා ක්‍රියාවලි ඉංජිනේරුවන්.

මම හිතන්නේ ලංකාවේ තවමත් බොහෝ දෙනෙක් මේ වෘත්තිය පිළිබදව දන්නේ නෑ. එහෙමත් නැත්නම් පැහැදිළි අදහසක් නෑ. ඉංජිනේරු විෂය බොහොම පුළුල් විෂයක්. අතීතයේ නම් සිවිල්, කාර්මික, විදුලි ආදී සීමිත ‍ක්ෂේත්‍රන් වලින් සමන්විත වුවත් අද වන විට ඉංජිනේරු විෂය සීමා මායිම් නැති විෂයක් බවට පත්වෙලා. ඉලෙක්ට්‍රොන්ක්, පරිඝනක, ද්‍රව්‍ය (materials), ආදී පමණක් නොව food, polymer, nano technology, nuclear, environmental, biochemical ආදී මෙකී නොකී ක්ෂේත්‍රන් ගණනාවක ඒ සම්බන්ධයෙන් විශේෂඥ දැනුමක් ඇති ඉංජිනේරුවන් සිය දහස් ගණනක් අද ලෝකයේ සිටිනවා. නමුත් ලංකාවේ සමාජය තුළ මේ සම්බන්ධයෙන් ඇති දැනුම දුර්වල මට්ටමකය් පවතින්නේ. බොහෝ දෙනෙක් සිතන්නේ ඉංජිනේරුවන් සිටින්නේ ගොඩනැගිලි හෝ යන්ත්‍ර සූත්‍ර ගොඩ නැගීමට කියාය. නමුත් අද එතනින් ඔබ්බට ගිය වගකීමක් ඉංජිනේරුවන් හට පැවරී ඇත. රසායන හා ක්‍රියාවලි ඉංජිනේරුවන් යනු එවැනි වගකීමක් ඇති ඉංජිනේරුවන් පිරිසකි.

කාර්මික විප්ලවයට පෙර ලෝකයේ සම්පත් හෝ බලශක්තිය සීමා සහිත යැයි හෝ නිශ්පාදන වියදම අවම කරගත යුතු යැයි හැගීමක් මිනිසුන් තුළ තිබුනේ නෑ. ඒ නිසා විශේෂයෙන්ම බටහිර සමාජය තුළ කාර්යක්ෂම නිශ්පාදනයකට එනම් භාවිතා කරන අමුද්‍රව්‍ය හා බලශක්තියට අනුරූපීව උපරිම නිශ්පාදනයක් හෝ අවම අමුද්‍රව්‍ය ප්‍රමාණයකින් හා අවම බලශක්ති ප්‍රමාණයක් වැය කර නිශ්පාදනය කිරීමට අවශ්‍යතාවයක් ඔවුන් සතුව තිබුනේ නෑ.

නමුත් කාර්මික විප්ලවයත් සමග මහා පරිමාණ නිශ්පාදනයත් වෙළද පොළ තරග කාරී බවත් වර්ධනය වූවා. ඒ සමගම එවකට නිශ්පාදකයන්ට පෙර කී කාර්යක්ෂම නිශ්පාදන සංකල්පය අත්‍යවශය වූවත් එවකට පැවති ඉංජිනේරුමය දැනීම එයට ප්‍රමාණවත් වූයේ නෑ. මේ සදහා එවකට පැවති ඉංජිනේරු දැනුමට රසායන විද්‍යාවේ දැනුම පමණත් නොව ගණිත‍ය, ආර්ථික විද්‍යාව, ජීව විද්‍යායවද අවැසි වූවා. මෙලෙස සියළු විද්‍යාවන්ගේ අපූරු සංකලනයකින් එදා රසායන හා ක්‍රියාවලි පිළිබද ඉංජිනේරු විද්‍යාව එළිය දුටුවා. මහා පරිමාණයේ කර්මාන්ත ඇති යුරෝපයේ හා ඇමරිකාවේ අදටත් ඉතා විශාල ඉල්ලුමක් ඇති වෘත්තයක් වන්නේ රසායන හා ක්‍රියාවලි ඉංජිනේරුවන්ය.

නමුත් රසායන හා ක්‍රියාවලි ඉංජිනේරුවන්ගේ හැකියාවන් හා වගකීම් පැහැදිළි ලෙස විස්තර කිරීමට මෙම ලිපිය ප්‍රමාණවත් නැති බව මගේ විශ්වාසයයි. ඒ නිසා මේ සම්බන්ධයෙන් ලිපි පෙළක් ලිවීමටද බලාපොරොත්තු වනවා. ඒ අතරම තවත් දෙයක් මතක් කරන්නට ඕනේ. ඒ තමයි රසායන හා ක්‍රියාවලි ඉංජිනේරුවන්ගේ දස්කම් විස්කම් සියැසින් දැකබලා ගැනීමට අපූරු අවස්ථාවක් එළඹෙන ජුනි මස 11,12 හා 13 යන දින වල මොරටුව විශ්වවිද්‍යාලයේදී පැවැත්වෙන ExMO 2010 ප්‍රදර්ශනයේදී ඔබට හිමි වනවා.

2020 කරා .......... අපිට මොකද උනේ?

noreply@blogger.com (අංජන (Anjana)) — Thu, 01 Apr 2010 04:46:00 +0000

කතාව පටන් ගන්න කලින් අපි ටිකක් අතීතයට යමු. වැඩි ඈතකට නෙමෙයි මීට අවුරුදු 60කට විතර අතීතයට. හරියටම කියනවා නම් වර්ෂ 1955 ට. ඒ කියන්නේ අපි නිදහස ලබලා වසර හතක් ඉක්ම ගිය තැන. ඇත්තටම එදා රටේ ආර්ථික තත්වය මොනවගේද? ටිකක් බලමු ඒ ගැන.

රටේ මුලු ආදායම - රුපියල් මිලියන 1159

රටේ මුලු වියදම - රුපියල් මිලියන 1008

අයවැය අතිරික්තය - රුපියල් මිලියන 91

විදේශීය වත්කම් ප්‍රමාණය - ඩොලර් මිලියන 258 ( මෙය එවකට මාස 10ක ආනයන වලට ප්‍රමාණවත් විය)

මුලු විදේශ ණය - ඩොලර් මිලියන 43 ( දල ජාතික නිෂ්පාදනයෙන් 3.9%)

එදා මුලු මහත් ආසියාකරයේම ලංකාවට වඩා ඉදිරියෙන් හිටියේ ජපානය පමණයි. නමුත් ජපානය ඒ වන විටත් යුද්ධයෙන් වූ හානියෙන් පීඩා විදිනවා. කොරියාව යුද්ධයෙන් දෙකඩ වෙලා. භාරතය ඉන්දියාව පකිස්තානය ලෙස දෙකඩ වෙලා. එදා ආසියාවේ පැහැදිළි අනාගතයක් හිමි ඒ සදහා හොද පදනමක් ඇති රට වශයෙන් සැලකුවේ අපේ මේ ලංකාවයි. ආසියාවේ ඇතැම් රටවලට අදටත් නැති පැහැදිලි නීති පද්ධතියකින්, විධිමත් රාජ්‍ය සේවයකින් මෙන්ම විධිමත් රාජ්‍ය යාන්ත්‍රණයකින් පමණක් නෙවේ මනා මාර්ග පද්ධතිකින් යුක්ත වූ මේ පුංචි රට බොහෝ දිගු ගමනක් යාවි යැයි බොහෝ ලෝක නායකයන් සිතු‍වා. සිංගප්පූරුවේ ලී කුවාන් යූ ඒ අතරින් එක් අයෙක්. එදා මේ තත්වය නිකම් හරියට හාවාගෙයි ඉබ්බගෙයි රේස් එක වගෙයි. නමුත් අවාසනාවකට මේ කතාව අන්තිමට අපේ ආච්චිලා අපට කියා දුන්නු හාවාගෙයි ඉබ්බාගෙයි කතාව වගේම වුනා. අන්තිමට ඉබ්බො ඔක්කෝම ටික හාවා පහු කරගෙන ගියා.

එදා අපේ තොටලග හා වෙනත් ප්‍රදේශ වල ඉන්න දුප්පත් පැල්පත් වාසීන් ඉන්න ප්‍රදේශ වලට කිව්වේ කොරියාව කියලයි. ඇත්තටම එදා මුලු කොරියාවම පැල්පත් වලින් පිරී ඉතිරුනා. නිකම් හරියට මහා අනාත කදවුරක් වගෙයි. ඒත් අද? අපේ කොරියාව නම් එහෙමමයි. හැබැයි කොරියාව නම් බොහෝම දුර ගමනක් ගිහින්. එදා අපේ රටේ ඒක පුද්ගල ආදායමෙන් තුනෙන් එකක් තිබූ කොරියවේ අද ඒක පුද්ගල ආදායම අපේ වගේ දොළොස් ගුණයක්.

මේ තත්වය ගැන සිංගප්පූරුවේ නායක ලී කුවාන් යූ මහතා තම තුන්වන ලෝකයෙන් පළමු ලෝකය කරා යන ග්‍රන්ථයේ මෙසේ සදහන් කර ඇත.

Ceylon was Britain’s model Commonwealth country. It had been carefully prepared for independence. After the war, it was a good middle-size country with fewer than 10 million people. It had a relatively good standard of education, with two universities of high quality in Colombo and Kandy teaching in English, a civil service largely of locals, and experience in representative government starting with city council elections in the 1930s. When Ceylon gained independence in 1948, it was the classic model of gradual evolution to independence.

Alas, it did not work out. During my visits over the years, I watched a promising country go to waste

ඉතින් ‍‍මොනවද හිතෙන්නේ? දුකක්, කේන්තියක්, කළකිරීමක් එහෙමත් නැත්නම් ගිය හකුරට නාඩන්නේ තියෙන හකුර රැක ගන්නේ වගේ හැගීමක්? හැබැයි තියෙන හකුර රැක ගන්නා අතරම ගිය හකුරත් කෙසේ හෝ සොයා යන්නට කාලය ඇවිල්ලා කියලයි මම නම් හිතන්නේ.

මේක කියවගෙන යනකොට ඕනෑම කෙනෙකුට හිතෙන දෙයක් තමයි ඇයි අපිට මෙහෙම උනේ කියලා. ඇත්ත අපිට මෙහෙම උනේ ඇයි කියලා ආපස්සට හැරිලා බලන්නත් කාලය ඇවිල්ලා. එහෙම නැතිවුනෝතින් අනාගතයේදීත් අපි අතින් ඒ වැරදි නැවත නැවතත් සිදු වේවි. අනිත් අතට අනෙකුත් රටවල් අපව පසුකරගෙන සංවර්ධනය කරා ගිය මාර්ගය කුමක්ද? ඔවුන්ගේ උපක්‍රම මොනවාද කියලත් හොයල බලන්න කාලය ඇවිත්.

අපි නිදහස ලබලා වසර 60කුත් ගෙවිලා ගිහින්. මේ අවුරුදු 60න් අවරුදු 50කටත් වැඩි කාලයක් මේ රටේ බොහෝ අය දේශපාලන තීන්දු තීරණ ගත්තේ බඩ ගැන හිතලයි. ඔබත් මමත් අපේ දෙමාපියන් විතරක් නෙමෙයි ආච්චි සීයා ද මේ ගොඩට අයත් වෙනවා. ආර්ථිකයේ ප්‍රධානතම නියමයක් තමයි ඉල්ලුමට අනුව සැපයුම. මෙය දේශපාලනයටත් අදාළයි මොකද එක්තරා ආකාරයකට දේශපාලනය යනු වෙළද ‍පොළකි. ඒ නිසා අපේ දේශපාලන පක්ෂත් ජනතාවගේ බඩ ඉලක්ක කරගෙන දේශපාලනය කළා. අදටත් එක්තරා ප්‍රමාණයකට කරනවා. හාල් සේරුව, ධාන්‍ය රාත්තල දේශපාලන කරලියට ආවේ අන්න එහෙමයි. මෙවැනි පසුබිමක් තුළ පෙර සදහන් ආකාරයේ ආ මග පිළිබද පසුවිපරමක් මෙම සමාජයෙන් බලාපොරොත්තු වන්නට බෑ.

නමුත් වසර දෙදහසින් මෙහාට මෙහි යම් වෙනස් කමක් ක්‍රමයෙන් දකින්ට ලැබෙනවා. පසුගිය ජනාධිපතිවරණය ගත්විට මේ රටේ අතිමහත් බහුතරයක් කුමන අපේක්ෂකයකුට තම මනාපය පළ කළත් ඒ පළ කලේ තමන් බඩට වඩා මේ රටට යමපත් කිරීමට බව අප තේරුම් ගත යුතුයි. අන්න ඒ නිසයි ආ මග දෙස ආපසු හැරී මේ රටට අවැසි තේරුම් ගැනීමට කාලය ඇවිත් කියා පැවසූයේ.

අපට වැරදුනේ කෙසේද කියා සංවදෙයක් මෙන්ම ඒ වරද හදාගෙන ඉදිරියට යන්නේ කොහොමද කියන එක ගැන සංවාදයක්ද අප අතරින්ම ඇතිවිය යුතුය. ඇත්තෙන්ම මේ ගැන මේ ලිපියෙන් කතා කරන්නට ගියෝතින් මේ ලිපිය ඕනෑවට වඩා දික් වේවි. ඒ නිසා ඒ ගැන අපි ඉදිරි ලිපියකින් කතා කරමු. ඒ වගේම මේ ඔබේ අදහස් ඉදිරි ලිපි සකස් කිරීමේදී බෙහෙවින් වැදගත් වේවි. මුලින් කිව්වා වගේ අපට මේ පිළිබදව සංවාදයක් ඕනෑ කරන‍වා. මේ ඒකට හොදම කාලයයි.

(මූලාශ්‍ර පාඨලී චම්පික රණවකයන්ගේ ඉදිරි දැක්ම 2020)

BTI බැක්ටීරියාව

noreply@blogger.com (අංජන (Anjana)) — Mon, 22 Mar 2010 03:40:00 +0000

BTI බැක්ටීරියාව එහෙමත් නැත්නම් Bacillus thuringiensis israelensis යන බැක්ටීරියාව Bacillus thuringiensis යන බැක්ටීරියා වර්ගයේ එක් විශේෂයක්. Bacillus thuringiensis කෘමිනාශක හැකියාවක් සහිත බැක්ටීරියා විශේෂයකි. මෙය delta-endotoxin, හෝ "toxic crystal" ලෙස හදුන්වන ප්‍රෝටීනය නිපදවන අතර එය අදාළ කෘමියාගේ ජීර්ණපද්ධතිය අක්‍රිය කිරීමට සමත්කම් දක්වයි. ඒ අනුව මෙම බැක්ටීරියා විශේෂ කෘමිනාශක ලෙස භාවිතයේදී එය කෘමියාගේ ශරීරගත විය යුතුය. එවිට ජීර්ණපද්ධතිය අක්‍රිය වී කෘමියා කුසගින්නේ මිය යයි.

කෘමියා තම ශරීරය පුරා ආහාර ගබඩා කරගන්නා සමය (larva) මෙම බැක්ටීරියාව ක්‍රියාත්මක කළයුතු අවධියයි. මෙම බැක්ටීරියාව ජලයේ පමණක් නොව ගස්වල කොළ වල මෙන්ම පොළවේද පවතී.

මේ අනුව මෙම බැක්ටීරියාව විනාශකරන්නේ මදුරු බිත්තර නොව මදුරු කීටයායි. දැන් විමසිලිමත් මනසකට ඇතිවිය යුතු ගැටලුව නම් මෙම බැක්ටීරියාව මදුරුවන් පමණක් නොව අනෙකුත් කෘමීන්ද විනාශ කරනවාද යන්නයි. සමස්තයක් ලෙස ගත්විට පිළිතුර ඔව්. නමුත් පෙර සදහන් කල පරිදි Bacillus thuringiensis බැක්ටීරියාවේ විශේෂ කිහිපයක් පවතී. ඉන් Bacillus thuringiensis israelensis යන්න මදුරුවන් හා Black fly හා Fungus gnat යන කෘමීන් මර්ධනයට විශේෂිත වේ. දැනට සොයාගෙන ඇති කරුණු වලට අනුව ඉන් වෙනත් ජීවීන්ට අනතුරක් නැත. මිනිසාට කිසිසේත්ම අනතුරක් නැත්තේ අපගේ ආම්ලික ආමාජශය තුළ ඉහත කී ප්‍රෝටීනය ක්‍රියා නොකරන නිසාය.

නමුත් මෙම බැක්ටීරියවේ වෙනත් විශේෂ මකුළුවන් පළගැටියන් සමනළයන් විනාශ කිරීමේ හැකියාවෙන් යුක්ත වේ.

අප ප්‍රවේසම් විය යුත්තේ ඇයි?

අපේ රට ජෛව විවිධත්වයෙන් බහුල රටකි. අපේ රටට ආවේණික සතුන් කෘමීන් විශාල සංඛ්‍යාවක් ඇත. මොවුන්ට මෙම Bacillus thuringiensis israelensis හි බලපෑම ගැන නිශ්චිත දත්ත නැත. ඇත්තේ අනුමාන පමණී. රටකට ආගන්තුක ජීවීන් ගෙන්වන විට එය ඉතාමත්ම ප්‍රාවේශමෙන් කළ යුතුය. ඒ එම ජීවීන් එම රටෙහි ජීවීන්ට කෙසේ ප්‍රතිචාර දක්වයිද කියා නිෂ්චිතව කිව නොහැකි නිසාය. ඇතැම් විට යෝධ නිදිකුම්බා වැනි ආක්‍රමණකාරී ස්වභාවයකින් විශාල පරිසර හානියක් ද සිදුවිය හැක. එනිසා මෙම BTI බැක්ටීරීයාව ලංකාවට ගෙන්වීමට පෙර එහි සුදුසු බව 100%කින් තහවුරු කරගත යුතුය.

නමුත් නැවතවරක් මතක් කළ යුත්තේ BTI බැක්ටීරීයාව ලොව අවදානම අවම කෘමි මර්ධන ක්‍රමයක් ලෙස සැලකෙන බවයි.

අපගේ අවධානය යොමු විය යුතු තවත් කරුණක් පවතී. එනම් බැක්ටීරියා හි ජීවිත කාලය ඉතා කෙටිය. මේ නිසා අපට සාපේක්ෂව ඔවුන් ඉතා කෙටි කාලයකින් විශාල පරම්පරා සංඛ්‍යාවක් බිහිකරයි. මේ නිසා ඔවුන්ගේ ජානවල යම් යම් වෙනස් වීම් සිදුවීමේ වේගයද වැඩිය. මේ නිසා මෙවැනි බැක්ටීරියාවක් අපගේ පරිසරයට මුදාහළ විට අපගේ පරිසර තත්වයන් සමග කාලානුරූපීව එය කෙසේ අනුවර්තනය වේදැයි අවධානයෙන් සිටිය යුතුය.

පසුවදන

ඩෙංගු මර්ධනය කිසිසේත් BTI බැක්ටීරීයාව මගින් පමණක් ඉටුකර ගත නොහැක. මෙම BTI බැක්ටීරීයාව මගින් ඩෙංගු මර්ධනය කිරීමට නම් මදුරුවන් බෝවන සෑම ස්ථානයකටම මෙම බැක්ටීරියාව ව්‍යාප්ත කළ යුතුය. එනම් ඔබගේ ගෙවත්තේ වතුර එක්රැස්වෙන පොල්කටුව තුළට මෙම බැක්ටීරියාව පැමිණිය යුතුය. මෙය එසේ පැමිණියද කාලයත් සමග එම බැක්ටීරියාව විනාශ වීමටද පුළුවන් බැවින් නිතර තිතර ව්‍යාප්ත කිරීම් සිදුකල යුතුය. මෙය එතරම් ප්‍රායෝගික නැත. ඒ නිසා දිගින් දිගටම මදුරුවන් බෝවන ස්ථාන විනාශ කිරීද සිදුකළ යුතුය. එහි වගකීම මුළු මහත් සමාජයම සතු කාරණයකි. BTI බැක්ටීරීයාව භාවිතා විය යුත්තේ මෙම ඩෙංගු මර්ධන ව්‍යාපෘතියේ සාර්ථකත්වය වැඩිකර ගැනීමට හා එය තිරසාර විසදුමක් බවට පත්කර ගැනීමටය.

ඩෙංගු BTI හා අපි

noreply@blogger.com (අංජන (Anjana)) — Sun, 21 Mar 2010 07:20:00 +0000

‍ ඩෙංගු...පසුගිය කාලය පුරාම වැඩිපුරම කතාබහට ලක්වුනු මාතෘකාවක්. මෙවර ඩෙංගු සමග තවත් අළුත් වචනයක් සෑම තැනම කියවුනා. ඒ තමයි BTI බැක්ටීරියාව. මේ සමගම සමාජය තුළ හටගත් මතය නම් කියුබාව මෙම බැක්ටීරියාව මගින් ඩෙංගු උවදුර ජය ගත්තා නම් අපටත් එය කළ හැකි නොවේද යන්නයි. ඇත්ත වශයෙන්ම අපට එය කරන්න පුළුවන. අද සමාජය විශ්වාස කරන්නේ කියුබාවෙන් මෙම බැක්ටීරියාව ගෙන්වා රට පුරා එය ව්‍යාප්ත කිරීමෙන් ඩෙංගු උවදුර නිවාරණය කරගත හැකි බවයි. නමුත් එය ඒ ආකාරයෙන් සරලව දැකිය හැකි කාරණයක්ද?

කියුබානුවන් හා ඩෙංගු උවදුර

‍ඩෙංගු ඉතිහාසය පුරාම වරින් වර කියුබාවට මහත් හිසරදයක් වූ වසංගතයක්. 1981 දී පමණ පැතිරී ගිය වසංගතයෙන් රෝගීන් 158 දෙනෙක් මියගියා. සුපුරුදු පරිදි මෙය ඇමරිකානු කුමන්ත්‍රණයක් ලෙස හැදින්වුවද කියුබානුවන් මීට මුහුණ දීමට පියවර ගනු ලැබුවා. ඒ සදහා ඔවුන් විද්‍යාත්මකවත් දේශපාලන හා සමාජීය වශයෙන් එක්රැස් වූවා. BTI බැක්ටීරියාව අයත් වන්නේ විද්‍යාත්මකව මේ සදහා ඇතිකල විසදුම් ගොන්නටයි. මෙම විසදුම යථාර්තයක් බවට පත්කර ගන්නට දස දහස් ගණනක් සිවිල් ජනතාව එක් රැස් වූවා. ඩෙංගු මදුරුවා විනාශකිරීමේ වගකීම බැක්ටීරියාවට පමණක් බාර නොදී මිනිසුන් තම අවට පරිසරයේ මදුරුවන් බෝවන තැන් නිරන්තරයෙන් සොයාබලා විනාශ කරනු ලැබුවා. එරට ජනමාධ්‍යයද ඩෙංගු රෝගීන් ගණන ගණන් කරනු වෙනුවට ‍ඩෙංගු මර්ධන ව්‍යාපෘතියට මිනිසුන් උන්නදු කරවනු ලැබුවා. දැනුවත් කරනු ලැබුවා. රජය මෙම සමස්ථ ක්‍රියාවලියට අවැසි නායකත්වය දෙනු ලැබුවා. කියුබාව ‍ඩෙංගු ජයගත්තේ සාමූහික ක්‍රියාවලියක් ලෙසිනි. BTI බැක්ටීරියාව එම ක්‍රියාවලිය වේගවත් කරනු ලැබුවා පමණී

BTI බැක්ටීරියාව හා එහි ක්‍රියාවලිය ගැන ඊලග ලිපියෙන් කතා කරමු

ග්ලුකෝමා - ආලෝකය සොරා ගන්නා

noreply@blogger.com (අංජන (Anjana)) — Sun, 14 Mar 2010 08:42:00 +0000

අපට ජීවිතයේ බොහොම සුලබව අසන්නට ලැබෙන කියමන් දෙකක් තමයි ‘දන්නෙම නැතුව උදේ වෙලා’ හා ’දන්නෙද නැතුව රෑ වෙලා’. ඇත්තටම අපි ඇස් පියාගෙන හිටියෝතින් ඉර නැගීමවත් ඉර බැසීමවත් අපට දැනෙන්නෙ නෑ. අන්න ඒ විදිහටම අපට නොදැනීම අපේ පෙනීම එහෙමත් නැත්නම් අපේ ජීවිතයේ ආලෝකය හෙරකම් කරගෙන යන රෝගයක් තමයි ග්ලුකෝමා Glaucoma කියන්නේ.

අනිත් ඇස් රෝග මෙන්ම ග්ලුකෝමා ද දෘෂ්ඨික ස්නායුවට ( ඇසේ සිට මොළයට පණිවිඩ ගෙන යන ස්නායුවට) හානි සිදු කරනු ලබනවා. මේ නිසා ඇසේ පෙනීම පිරිහෙන අතර ප්‍රතිකාර සිදු නොකලෝතින් අන්ධභාවයට පත්වීම වළක්වන්නට බැරිය.

ඇසට අවශ්‍ය පෝෂ්‍ය පදාර්ථ ගෙන ඒමටත් අපද්‍රව්‍යය ඉවත් කිරීමටත් ජලමය දියරයක් නිතරම ඇස තුළ නිපදවෙනවා. ඇතැම් පුද්ගලයන්ගේ මෙම දියරය ගමන් කරන මාර්ගයේ විවිධ අවහිරතා ඇතිවෙනවා. නමුත් දිගින් දිගටම දියරය නිපදවෙන බැවින් ඇස තුළ පීඩනයක් වර්ධනය වනවා. ග්ලුකෝමා රෝගයේ නිධානය මෙයයි.

මෙහි භයානක කම කුමක්ද?

ඇත්තෙන්ම මෙම රෝගයට පැහැදිළි රෝග ලක්ෂණයන් නොමැත. රෝගියාට තම පෙනීමෙහි අඩුවක් හෝ වෙනත් අමුත්තක් නොදැනේ. බොහෝ විට නොදැනීම අන්ධභාවයට පත් වීමට ඇති ඉඩකඩ වැඩිය. නමුත් පහත කරුණු එකක් හෝ වැඩි ගණනක් තිබීම රෝගයට ගොදුරු වීමේ ප්‍රවණතාවය වැඩි කරයි.

1. වයස අවුරුදු 40ට වැඩි වීම

2. මව පියා සහෝදර සහෝදරියන් හෝ කිට්ටු නෑදෑයන්ට රෝගය වැළදී තිබීම

3. අවිදුර දෘෂ්ඨිකත්වය - ළග පමණක් පෙනීම

4. කලක පටන් ඉරුවාරදය පැවතීම

5. කෝට්සෝන් (ස්ටීරොයිඩ්) අඩංගු බෙහෙත් භාවිතය

‍ තවමත් මෙම රෝගය සුව කිරීමට නිසි ප්‍රතිකාරයක් සොයා ගෙන නැත. වාසනාවන්ත ලෙස රෝගය හදුනා ගැනීමට හැකිවූවෝතින් එය පාලනය කිරීම පමණක් කළ හැක. නැතහොත් තමන්ට හොරෙන් ජීවිතය අදුරු වී යනු ඇත.

නිකම් ලෙඩ ගැන කියලා බය කරනවා කියලා හිතන්න එපා. මම මේක ලිව්වේ මගේ පෞද්ගලික අත්දැකීමක් නිසයි. ඒ මගේ ළගම නෑදෑයෙකුට මෙය වැළදී ඇති බව බොහොම අහන්බෙන් හොයා ගත්ත නිසා. තම බිරිදට කණ්නාඩි කුට්ටමක් ගැනීමට ගිය අවස්ථාවේ නිකමට වගේ තමන්ගේ ඇස් ද පරීක්ෂා කරගත් නිසා අදටත් ආලෝකය විදින්නට ඔහු වාසනාවන්ත වුනා. ඒ වාසනාව හැමෝටම ලැබෙන්නයි මේක ලිව්වේ.