അരുണകിരണം

സൊലുങ്ങ് കാഴ്ചകൾ.

2011-09-03T23:15:00.011+05:30

സൊലുങ്ങ് കാഴ്ചകൾ.

അരുണാചൽ പ്രദേശിലെ ആദിവാസികളിൽ ഒരു മുഖ്യവർഗ്ഗമാണ് ‘ അദി‘കൾ. ഇവരുടെ പ്രധാന ഉത്സവമാണ് സൊലുങ്ങ്. കാർഷികോത്സവമായ സൊലുങ്ങ് എല്ലാ വർഷവും സെപ്റ്റംബർ ഒന്നാം തിയതി ഇവർ ആഘോഷിക്കുന്നു. കാർഷിക വിളവെടുപ്പുമായി ബന്ധപ്പെട്ട നൃത്തവും ‘കിനെ നാനെ’, ‘ദൊയിങ് ബോതെ’, ‘ദാദീ ബൊതേ’ എന്നീ ആദിവാസി ദേവതകളെ പ്രീതിപ്പെടുത്താനായുള്ള ചടങ്ങുകളും, തിന/ചാമ പുളിപ്പിച്ച് വാറ്റിയെടുത്ത കള്ളും മിഥുൻ ഇറച്ചിവിഭവങ്ങളും ചേർന്ന സാമൂഹികസദ്യയും മറ്റുമാണ് ആഘോഷങ്ങളുടെ മുഖ്യ ആകർഷണം.

പൊനുങ്ങ് നൃത്തം.

കാർഷികവൃത്തിയുമായി ബന്ധപ്പെട്ട നൃത്തം.

ഒരേ താളത്തിൽ..

‘അദി’ തരുണികൾ.

പരമ്പരാഗത ‘അദി’ വേഷമണിഞ്ഞ കുട്ടികൾ.

കൊച്ചുസുന്ദരിമാർ.

പരമ്പരാഗത ആഭരണങ്ങൾ.

ദലായ് ലാമ - അരുണാചല്‍ സന്ദര്‍ശനം.

2009-11-15T12:35:00.005+05:30

ദലായ് ലാമ - അരുണാചല്‍ സന്ദര്‍ശനം.

ടിബറ്റന്‍ ബുദ്ധമതവിശ്വാസികളുടെ പരമോന്നത ആത്മീയഗുരുവും സമാധാനത്തിനുള്ള നോബല്‍ സമ്മാനജേതാവുമായ പതിനാലാമത് ദലായ് ലാമ (ടെന്‍സിംഗ് ഗ്യാത്സോ)യുടെ അരുണാചല്‍ പ്രദേശ് സന്ദര്‍ശനത്തെ കുറിച്ച് ചൈന ഉയര്‍ത്തിയ അനാവശ്യ വിരോധങ്ങള്‍/വിവാദങ്ങള്‍ക്കിടയിലും ഈ പ്രദേശങ്ങളിലെ ബുദ്ധമതവിശ്വാസികള്‍ ഏറെ നാളായി കാത്തിരുന്ന അവര്‍ “ജീവിക്കുന്ന ദൈവ”മായി മനസ്സില്‍ ഉറച്ച് വിശ്വസിക്കുന്ന ദലായ് ലാമയുടെ 8 ദിവസത്തെ സന്ദര്‍ശനം വളരെ വിജയകരമായി പൂര്‍ത്തിയാക്കി. കഴിഞ്ഞ വര്‍ഷം മാറ്റിവെച്ച സന്ദര്‍ശനമാണ് ഇപ്പോള്‍ പൂര്‍ത്തിയാക്കിയത്. പൂര്‍ണ്ണമായും മതപരവും ആത്മീയകാര്യങ്ങള്‍ക്കായിരുന്നു ഈ സന്ദര്‍ശനം.

ബുദ്ധമതവിശ്വാസികള്‍ കൂടുതല്‍ പാര്‍ക്കുന്ന തവാങ്ങിലും ദിരാങ്ങിലും ബോംഡിലയിലും കളക്ത്താങ്ങിലുമായി 6 ദിവസത്തെ സന്ദര്‍ശനശേഷമാണ് തലസ്ഥാനമായ ഇറ്റാനഗറില്‍ 14‌‌ാം തിയ്യതി രാവിലെ എത്തിച്ചേര്‍ന്നത്. ചൈന ഉയര്‍ത്തിയ വിരോധവും വിവാദങ്ങളും കൂടി കണക്കിലെടുത്ത് കനത്ത സെക്യൂരിറ്റിയാണ് സന്ദര്‍ശനസ്ഥലങ്ങളിലെല്ലാം ഏര്‍പ്പെടുത്തിയത്. ‘ജീവിച്ചിരിക്കുന്ന ദൈവ’മായി കരുതുന്ന തങ്ങളുടെ പരമോന്നത ആത്മീയഗുരുവിനെ ഒരു നോക്കുകാണുവാനും ആശീര്‍വാദം നേടാനും പ്രഭാഷണം ശ്രവിക്കാനുമായി അരുണാചല്‍ പ്രദേശിന്റെ വിവിധഭാഗങ്ങളില്‍ നിന്നും സിക്കീമില്‍ നിന്നും അയല്‍‌രാജ്യമായ ഭൂട്ടാന്‍, നേപ്പാള്‍ എന്നിവിടങ്ങളില്‍ നിന്നും നിരവധി ബുദ്ധമത വിശ്വാസികള്‍ തവാങ്ങ്, ബോംഡില, ഇറ്റാനഗര്‍ എന്നിവിടങ്ങളില്‍ എത്തിയിരുന്നു.

ഇന്നലെ ഇറ്റാനഗറിലെ സിദ്ധാര്‍ത്ഥ് വിഹാര്‍ തുപ്തെന്‍ ഗത്സാലിങ്ങ് ഗൊമ്പയിലായിരുന്നു ദലായ് ലാമയുടെ മുഖ്യപരിപാടി. ടിബറ്റന്‍ ഭാഷയിലെ പ്രാര്‍ത്ഥനാമന്ത്രങ്ങള്‍ ആലേഖനം ചെയ്ത വിവിധവര്‍ണ്ണത്തിലുള്ള കൊടിതോരണങ്ങള്‍ കൊണ്ട് അലങ്കരിച്ച സിദ്ധാര്‍ത്ഥവിഹാര്‍ ബൌദ്ധക്ഷേത്രത്തില്‍ സന്ദര്‍ശനം നടത്തിയശേഷം അവിടെ കാത്തിരുന്ന ബുദ്ധസന്യാസിമാരേയും വിശ്വാസികളേയും മറ്റ് പൊതുജനങ്ങളെയും ബഹു: ദലായ് ലാമ ആശീര്‍വദിക്കുകയും അഭിസംബോധന ചെയ്യുകയും ചെയ്തു.
...

8 ദിവസത്തെ സന്ദര്‍ശനവേളയില്‍ തവാങ്ങ്, ദിരാങ്ങ്, ബോംഡില, കളക്താങ്, ഇറ്റാനഗര്‍ എന്നിവിടങ്ങളിലായി ഏകദേശം 40000 വിശ്വാസികളേയും പൊതുജനങ്ങളെയും ദലായ് ലാമ അഭിസംബോധന ചെയ്ത് പ്രഭാഷണം നടത്തിയിരുന്നു. തവാങ്ങില്‍ ദലായ് ലാമ സംഭാവന നല്‍കിയ 20 ലക്ഷം രൂപ കൂടി ചേര്‍ത്ത് പണികഴിപ്പിച്ച ആശുപത്രി ബ്ലോക്കിന്റെ ഉദ്ഘാടനം അദ്ദേഹം നിര്‍വഹിച്ചിരുന്നു.

ബോംഡിലയില്‍ ബുദ്ധ സ്റ്റേഡിയത്തില്‍ നടത്തിയ പ്രഭാഷണത്തില്‍, സമാധാനത്തിന്റെയും അഹിംസയുടേയും മതസൌഹാര്‍ദ്ദത്തിന്റെയും സഹനത്തിന്റെയും സന്ദേശവാഹകരുടെ നാടായാണ്‍് ഭാരതത്തെ ബഹു: ദലായ് ലാമ വിശേഷിപ്പിച്ചത്. വിവിധമതങ്ങളെ ഉള്‍ക്കൊള്ളാന്‍ കഴിയുന്ന ഭാരതത്തിന് ലോകസമാധാനത്തിനും അഹിംസക്കുമായി മുന്നില്‍ നിന്ന് നിരവധി കാര്യങ്ങള്‍ ചെയ്യാന്‍ കഴിയുമെന്നും അദ്ദേഹം പറഞ്ഞു.
14‌ാം തിയ്യതി രാവിലെ ഇറ്റാനഗറിലേക്ക് തിരിക്കും മുമ്പ് ബോംഡിലയില്‍ വെച്ച് ശിശുദിനവേളയില്‍ സ്കൂള്‍ കുട്ടികളേയും അദ്ധ്യാപകരെയും അഭിസംബോധന ചെയ്ത് സംസാരിച്ചു. നല്ല ഭാവി വാര്‍ത്തെടുക്കുവാനും ശത്രുതയും വൈരാഗ്യവും കൈവെടിഞ്ഞ്, സ്നേഹവും ദയയും അഹിംസയും മനസ്സില്‍ കൊണ്ട് നടക്കാനും ഓര്‍മ്മിപ്പിച്ചു.
...
ഇറ്റാനഗറില്‍ ബുദ്ധസന്യാസിമാരെയും വിശ്വാസികളെയും അഭിസംബോധന ചെയ്ത അദ്ദേഹം, ലോകത്തിന്റെ പലയിടങ്ങളിലും അസന്തുലിതമായ വികാസമാണ് നടക്കുന്നതെന്നും അതിനാല്‍ തന്നെ യാതനകളും കഷ്ടപ്പാടുകളും അനുഭവിക്കുന്നവര്‍ കൂടിവരികയാണെന്നും പറഞ്ഞു. ലോകത്തിലെ ജനങ്ങള്‍ അനുഭവിക്കുന്ന കഷ്ടപ്പാടുകള്‍ ദൂരീകരിക്കുന്നതിനായി ഭൌതികവികാസവും ആത്മീയവികാസവും ലഭിക്കേണ്ടതാണെന്നും പറഞ്ഞു. ഭാരതവും ടിബറ്റുമായി നൂറ്റാണ്ടുകളായ ബന്ധമാണുള്ളതെന്നും അദ്ദേഹം പറഞ്ഞു. വിവിധ മതങ്ങള്‍ തമ്മിലുള്ള അഭിപ്രായവ്യതാസങ്ങള്‍ മാറ്റിവെച്ച് പരസ്പര വിശ്വാസവും സ്നേഹവും മതസൌഹാര്‍ദ്ദവും ഊട്ടിയുറപ്പിക്കണമെന്നും ദലായ് ലാമ ഉദ്ബോദിപ്പിച്ചു. എന്റെ ലക്ഷ്യം, ആത്മവിശ്വാസവും കരുത്തുള്ളതുമായ എന്നാല്‍ ദയയും അനുകമ്പയും നിറഞ്ഞ ഹൃദായാലുക്കളുള്ള ഒരു മാനവസമൂഹം പടുത്തുയര്‍ക്കുക എന്നുള്ളതാണെന്ന്, ബഹു; ദലായ് ലാമ ,മതസൌഹാര്‍ദ്ദവും അനുകമ്പയുമുള്ള ഒരു സമൂഹത്തിന്റെ ആവശ്യകതയെക്കുറിച്ച് ഊന്നി പറഞ്ഞു. “ഓം മനെ പമേ ഹും” (ഓം മണി പദ്മേ ഹം) എന്ന മന്ത്രം 21 തവണ സദസ്സിനൊപ്പം ഉരുവിട്ടുകൊണ്ടാണ് ദലായ് ലാമ പ്രഭാഷണം തുടങ്ങിയത്.

പിന്നീട് സ്റ്റേറ്റ് ബാങ്ക്വെറ്റ് ഹാളില്‍ നിയമസഭാസാമജികരും ഉന്നത ഉദ്യോഗസ്ഥരും വിശിഷ്ടവ്യക്തികളുമായുള്ള കൂടിക്കാഴ്ചയിലും ദലായ് ലാമ പ്രഭാഷണം നടത്തി. ‘ഭാരതം എന്റ്റെ ഗുരുവാണ്‍`, ആ ഭാരതത്തിന്റെ സന്ദേശവാഹകനാണ് ഞാന്‍. പുരാതനഭാരതം എന്താണോ പ്രചരിപ്പിച്ചിരുന്നത് അതാണ് ഞാന്‍ പ്രചരിപ്പിക്കുന്നത്. പരസ്പര ശത്രുത കൈവെടിഞ്ഞ് സമാധാനം ലോകമെങ്ങും പ്രചരിക്കട്ടെ’, അദ്ദേഹം പറഞ്ഞു. ഭൌതികവികാസം വേണ്ടതാണെന്നും എന്നാല്‍ ഭൌതികവികാസം ആത്മീയവികാസത്തെ മറികടന്നാല്‍ പിന്നെ വികാസത്തിന് അര്‍ത്ഥമില്ലാതാവുമെന്നും, പല പശ്ചിമരാജ്യങ്ങളിലേയും ഇന്നത്തെ സ്ഥിതി ഓര്‍മ്മിപ്പിച്ചുകൊണ്ട് അദ്ദേഹം പറഞ്ഞു. ഭൌതികവികാസത്തിന്റെ കാര്യത്തില്‍ ജാപ്പാന്‍ വളരെ മുന്നിലാണെന്നും അതേസമയം അത്മീയവികാസത്തില്‍ അവിടെയുള്ള ജനങ്ങള്‍ പുറകോട്ട് പോവുകയാണെന്നും, ഇത് അവിടെ ആത്മഹത്യാ നിരക്ക് വര്‍ദ്ധിപ്പിക്കാന്‍ കാരണമായിട്ടുണ്ടെന്നും അദ്ദേഹം എടുത്ത് പറഞ്ഞു.

മഹായണ വിഭാഗത്തിലെ സിദ്ധാര്‍ത്ഥ് വിഹാര്‍ ഗൊമ്പ സന്ദര്‍ശനത്തിനു ശേഷം ദലായ് ലാമ ഇവിടെ അടുത്തുള്ള ഹിനായണ വിഭാഗത്തിലെ ബൌദ്ധക്ഷേത്രമായ തെരവേഡ ബുദ്ധക്ഷേത്രത്തിലും സന്ദര്‍ശനം നടത്തി.

...
ബഹു: ദലായ് ലാമയുടെ ഇറ്റാനഗര്‍ സിദ്ധാര്‍ത്ഥ് വിഹാര്‍ ഗൊമ്പയിലെ സന്ദര്‍ശനത്തെക്കുറിച്ച് ഒരു സചിത്ര ഫീച്ചര്‍ താഴെ:

ദലായ് ലാമയെ മുഖ്യമന്ത്രിയും ബൌദ്ധസന്യാസിമാരും ചേര്‍ന്ന് സീകരിക്കുന്നു.

സിദ്ധാര്‍ത്ഥ് വിഹാര്‍ (തുപ്തെന്‍ ഗത്സാലിങ്ങ് ഗൊമ്പ) ബൌദ്ധക്ഷേത്രത്തിലേക്ക് ദലായ് ലാമയെ ആനയിക്കുന്നു.

മുഖ്യമന്ത്രി ദലായ് ലാമയുടെ കൈപിടിച്ച് ബൌദ്ധമന്ദിറിന്റെ മുന്നില്‍ ഒരുക്കിയിരിക്കുന്ന ദര്‍ശന/പ്രഭാഷണ വേദിയിലേക്ക് ആനയിക്കുന്നു.

വിശ്വാസികളെ ആശീര്‍വദിച്ചുകൊണ്ട്...

വേദിയില്‍ പ്രത്യേകം തയ്യാറാക്കിയിരിക്കുന്ന ഉയര്‍ന്ന പീഠത്തില്‍ ഇരുന്ന് വിശ്വാസികളേയും മറ്റ് സദസ്സ്യരേയും ആശീര്‍വദിക്കുകയും അഭിസംബോധനയും ചെയ്യുന്ന ദലായ് ലാമ.

തങ്ങളുടെ പരമോന്നത ആത്മീയഗുരുവിന്റെ പ്രഭാഷണം ശ്രവിക്കുന്ന ബൌദ്ധസന്യാസിമാരും വിശ്വാസികളും. ബുദ്ധമതവിശ്വാസികളല്ലാത്തവരും നിറയെ പങ്കെടുത്തിരുന്നു.

വേദിയില്‍ ഒരു ഭാഗത്ത് ഇരിക്കുന്ന മുഖ്യമന്ത്രിയും മറ്റ് വിശിഷ്ടവ്യക്തികളും.

തന്റെ സ്വതസിദ്ധമായ പുഞ്ചിരിയില്‍ പരസ്പര സ്നേഹത്തെക്കുറിച്ചും അഹിംസയെക്കുറിച്ചും സംസാരിക്കുന്നു.

ലോകസമാധാനത്തെക്കുറിച്ചും മതസൌഹാര്‍ദ്ദം ഊട്ടിയുറപ്പിക്കേണ്ട ആവശ്യകതയെക്കുറിച്ചും സംസാരിക്കുന്നു.

ബുദ്ധവിഹാര്‍ അങ്കണത്തില്‍ 1983-ല്‍ ദലായ് ലാമയുടെ സന്ദര്‍ശനവേളയില്‍ നട്ട് പിടിപ്പിച്ച് വൃക്ഷച്ചുവട്ടിലെ മുനിയുടെ പ്രതിമ.

ദലായ് ലാമയെ ഒരു നോക്ക് കാണാനും ആശീര്‍വാദം നേടാനുമായി വളരെ ദൂരെ നിന്നും എത്തിയിരിക്കുന്ന ഒരു വയോവൃദ്ധസന്യാസി.
(ഭാരത-ചൈന അതിര്‍ത്തി ‘മക്‍മോഹന്‍ ലൈന്‍’ നടുത്തുള്ള ഒരു ഒറ്റപ്പെട്ട ഗ്രാമത്തില്‍ നിന്നും കിലോമീറ്ററോളം കാല്‍നടയായും പിന്നീട് വാഹനങ്ങളിലും യാത്ര ചെയ്താണ് ഇവിടെ എത്തിപ്പെട്ടിരിക്കുന്നത്. പണ്ട് രാജീവ് ഗാന്ധിയുടെ സന്ദര്‍ശനവേളയില്‍ ഇദ്ദേഹത്തെ അഭിനന്ദിച്ചിണ്ടത്രേ)

പ്രാര്‍ത്ഥനാ വിഗ്രഹങ്ങളും കൈയ്യിലേന്തി...
(കേന്ദ്രസാഹിത്യ അക്കാഡമി അവാര്‍ഡ് ജേതാവും സീനിയര്‍ ഐ.എ.എസ്സ്. ഉദ്യോഗസ്ഥനുമാണ് ഇദ്ദേഹം)

ബൌദ്ധപ്രതിമയുമായ്..

സിദ്ധാര്‍ത്ഥ് വിഹാര്‍ ഗൊമ്പയില്‍ നിന്നു ദലായ് ലാമയെ യാത്രയയക്കുന്നു.

തങ്ങളുടെ ആത്മീയഗുരു ദലായ് ലാമ വേദിയില്‍ നിന്നും പോയശേഷം, അദ്ദേഹം വേദിയിലിരുന്ന ഇരിപ്പിടത്തില്‍ ഒന്നു സ്പര്‍ശിക്കാനും അതിലൂടെ സായൂജ്യം നേടാനുമായി വിശ്വാസികളുടെ തിരക്ക്.
ഇനി എപ്പോഴാണ് ഇങ്ങനെ ഒരു അവസരം ലഭിക്കുമെന്ന് പറയാനാവില്ലല്ലോ.

മൂന്ന് പെണ്‍‌കുട്ടികള്‍.

2009-10-28T09:44:00.004+05:30

മൂന്ന് പെണ്‍‌കുട്ടികള്‍.

(അരുണാചലിലെ നിശി വര്‍ഗ്ഗ പെണ്‍‌കുട്ടികള്‍)

സ്വാതന്ത്ര്യദിനാഘോഷചിത്രങ്ങള്‍.

2009-08-25T10:24:00.000+05:30

സ്വാതന്ത്ര്യദിനാഘോഷചിത്രങ്ങള്‍.

ഇക്കഴിഞ്ഞ സ്വാത്രന്ത്ര്യദിനാഘോഷത്തില്‍ നിന്നും ചില ദൃശ്യങ്ങള്‍.

മുഖ്യമന്ത്രി പതാക ഉയര്‍ത്തി അഭിവാദ്യം ചെയ്യുന്നു.

മാര്‍ച്ച് പാസ്റ്റ് നയിക്കുന്നു.

മാര്‍ച്ച് പാസ്റ്റ്.

സ്കൂള്‍ കുട്ടികളുടെ മാര്‍ച്ച് പാസ്റ്റ്.

പെണ്‍കുട്ടികളുടെ മാര്‍ച്ച്പാസ്റ്റ്.

അരുണാചലിലെ ആദിവര്‍ഗ്ഗ സ്ത്രീകള്‍ (അദി) അവരുടെ പരമ്പരാഗത നൃത്തം അവതരിപ്പിക്കുന്നു.

അപ്പാത്തനി നൃത്തം.

ഗലോ സ്ത്രീകള്‍ പരമ്പരാഗത നൃത്തം അവതരിപ്പിക്കുന്നു.

സ്കൂള്‍ കുട്ടികള്‍ അവതരിപ്പിച്ച ദേശഭക്തി നൃത്തത്തില്‍ നിന്നും.

ദേശഭക്തി നൃത്തനാടകത്തില്‍ നിന്നും ഒരു രംഗം.

ദേശഭക്തി നൃത്തനാടകം.

സൂര്യഗ്രഹണദൃശ്യങ്ങള്‍.

2009-07-22T12:25:00.000+05:30

സൂര്യഗ്രഹണദൃശ്യങ്ങള്‍.

ഈ നൂറ്റാണ്ടിലെ ഏറ്റവും കൂടുതല്‍ സമയം നീണ്ടുനില്‍ക്കുന്ന സമ്പൂര്‍ണ്ണ സൂര്യഗ്രഹണം ജൂലായ് 22ന് രാവിലെ ദൃശ്യമാകും എന്നറിഞ്ഞതോടെ കൌതുകമായിരുന്നു. ഇന്ത്യയില്‍ ഗുജറാത്തിലെ സൂറത്തില്‍ നിന്നും തുടങ്ങി ഇന്ധോര്‍, ഭോപ്പാല്‍, വാരണാസി, പാറ്റ്ന, ഡാര്‍ജിലിംഗ്, സിലിഗുറി, ഡിബ്രുഗാഡ്, ഗാംഗ്ടോക്ക്, അരുണാചല്‍ പ്രദേശിലെ ഇറ്റാനഗര്‍ വരെയുള്ള ഗ്രഹണസഞ്ചാരപാതയില്‍ സൂര്യഗ്രഹണം പൂര്‍ണ്ണമായി കാണാന്‍ കഴിയുമെന്നുള്ളതും, ഇനി ഇതുപോലെ നീണ്ടുനില്‍ക്കുന്ന പൂര്‍ണ്ണസൂര്യഗ്രഹണം ദര്‍ശിക്കണമെങ്കില്‍ 123 വര്‍ഷങ്ങള്‍ക്ക് ശേഷമേ സാധ്യമാവൂ എന്നുള്ളതും ഇത് ദര്‍ശിക്കണമെന്നുള്ള ആഗ്രഹം വര്‍ദ്ധിപ്പിച്ചു. അതിലേറെ ഈ ഗ്രഹണത്തിന്റെ ചിത്രം പകര്‍ത്തണമെന്നുള്ളതും. കാരണം ഇതിനുമുന്‍പുള്ള സൂര്യഗ്രഹണം ദര്‍ശിച്ചിട്ടുണ്ടെങ്കിലും അത് ഒരിക്കലും ക്യാമറയില് പകര്‍ത്താന്‍ കഴിഞ്ഞിരുന്നില്ല. അന്നൊന്നും ഡിജിറ്റല്‍ ക്യാമറ കൈയ്യിലില്ലായിരുന്നു. ഇപ്പോഴുള്ള ക്യാമറ വെച്ചും ഗ്രഹണദൃശ്യം നേരെപോലെ പകര്‍ത്താന്‍ പറ്റില്ലെന്നറിയാം, എന്നാലും ഒന്നു ശ്രമിക്കാമല്ലോ. നല്ലപോലെ ഗ്രഹണം പകര്‍ത്തണമെങ്കില്‍ പൂട്ടുകുറ്റിയേക്കാള്‍ നീളമുള്ള 300എം‌എം-ഓ അതിനുമുകളിലുള്ള സൂം ലെന്‍സ് വേണം, ചുരുങ്ങിയത് 200 എം‌എം സൂം ലെന്‍സെങ്കിലും. കൈയ്യിലുള്ളതോ 55 എം‌എം-ന്റെ കിറ്റ്ലെന്‍സും. ട്രൈപ്പോഡും ഫില്‍റ്ററും ഇല്ലാതാ‍നും. എന്നാല്‍ ഉള്ളതുവെച്ച് ഒരു കൈനോക്കാം. നേരെ കിട്ടിയാല്‍ ഊട്ടി അല്ലേല്‍ ചീറ്റി!!

ഇവിടത്തെ ഇപ്പോഴത്തെ കാലാവസ്ഥയാണെങ്കില്‍ മഴ തല്‍ക്കാലം ഒരു ബ്രേക്ക് എടുത്തിരിക്കയാണ്‍്. അതിനാല്‍ തന്നെ ഒരാഴ്ചയായി തെളിഞ്ഞ ആകാശവും നല്ല ചൂടും, 40 ഡിഗ്രി സെല്‍‌ഷ്യസിനപ്പുറം. പക്ഷേ, മഴ എപ്പോള്‍ വേണമെങ്കിലും തകര്‍ത്തുപെയ്യാം, ആകാശം മഴമേഘങ്ങളാല്‍ മൂടികിടക്കാം. എന്നാല്‍ തന്നെയും ഗ്രഹണദിവസം നല്ല തെളിഞ്ഞ ആകാശമായിരിക്കുമെന്ന് ഒരു തോന്നലുണ്ടായിരുന്നു. ഇപ്പോള്‍ സമ്മര്‍ സീസണായതുകൊണ്ട് ഇപ്പോള്‍ രാവിലെ നാലുമണിക്കേ പ്രഭാതവെളിച്ചം പരന്നുതുടങ്ങും. നാലരക്കുശേഷം സൂര്യോദയവും. രാവിലെ 5.30നാണ് ഇവിടെ ഗ്രഹണം ആരംഭിക്കുന്നത്. അതിനാല്‍ തന്നെ ഗ്രഹണം തുടങ്ങുന്ന സമയത്ത് ഇവിടെ സൂര്യന്‍ ഉദിച്ച് പൊങ്ങിയിട്ടുണ്ടാവും. രാവിലെ 6.30 നു ഇവിടെ പൂര്‍ണ്ണഗ്രഹണം കാരണം 3 മിനിറ്റിലധികം നേരം അന്ധകാരമായിരിക്കും.(കേരളത്തില്‍ ഭാഗികസൂര്യഗ്രഹണമാണെങ്കിലും ഉദിച്ചുവരുന്ന സൂര്യന്‍ ഗ്രഹണസൂര്യനായിട്ടാണ്).

2009 ഇന്റര്‍നാഷനല്‍ ആസ്ട്രോണമി വര്‍ഷമായും, ഗലീലിയോ ടെലിസ്കോപ്പ് ഉപയോഗിച്ചതിന്റെ 400ആം വാര്‍ഷികമായും ആചരിക്കുകയാണ്. അതുകൊണ്ടെല്ലാം ഈ നൂറ്റാണ്ടിലെ ദീര്‍ഘമേറിയ സമ്പൂര്‍ണ്ണ സൂര്യഗ്രഹണത്തിനു നല്ല പ്രാധാന്യമുണ്ട്.

പക്ഷേ, സൂര്യഗ്രഹണം നേരിട്ട് കാണാനുള്ള ഒരുതരം ഫില്‍റ്റര്‍ കണ്ണട ഒരെണ്ണമുണ്ടായിരുന്നത് അരിച്ചുപെറുക്കിനോക്കിയിട്ടും കാണാനില്ല. 2-3 മിനിറ്റ് നീണ്ടുനില്‍ക്കുന്ന പൂര്‍ണ്ണഗ്രഹണസമയമൊഴിച്ച്, ഗ്രഹണത്തിനുതൊട്ട് മുമ്പും അതിനുശേഷവും സൂര്യേട്ടെനെ നേരിട്ട് നോക്കിയാല്‍ കണ്ണടിച്ച് പോകും, ഉറപ്പാ. ഇനിയിപ്പൊ എന്തുവഴി. അങ്ങനെ പഴയ ഒരു എക്സ്‌റേ ഫിലിം വെട്ടി ഒരു കണ്ണടയും ഉണ്ടാക്കി, എക്സ്പോസ്ഡ് ആയ ഭാഗം കൊണ്ട് ക്യാമറക്കുവേണ്ടി ഒരു ഫില്‍റ്ററും നിര്‍മ്മിച്ചു. എക്സ്‌റേ ഫിലിം ഉപയോഗിച്ച് സൂര്യഗ്രഹണം ദര്‍ശിക്കുന്നത് അത്ര സുരക്ഷിതമല്ലെന്നറിയാം, പക്ഷേ എന്തുചെയ്യാം വേറെ ഒരു കുന്ത്രാണ്ടവും ഇല്ലതാനും. പണ്ട് സ്കൂളില്‍ പഠിക്കുന്ന കാലത്ത് ഒരു സൂര്യഗ്രഹണസമയത്ത് ചാണകവെള്ളത്തില്‍ നിഴല്‍ നോക്കിയും പിന്നെ ഫിലിം നെഗറ്റീവ് വെച്ച് നോക്കിയതുമെല്ലാം ഓര്‍മ്മവരുന്നു.

ഇന്ന് രാവിലെ അഞ്ച് മണിക്ക് എഴുന്നേറ്റ് നോക്കിയപ്പോള്‍ മഴ പെയ്തിരിക്കുന്നു. ആകാശം കുറച്ച് മേഘാവൃതമായിട്ടുണ്ടെങ്കിലും മഴ പെയ്യാനുള്ള സാധ്യത ഇല്ലെന്നു പറയാം.

ക്യാമറയുമെടുത്ത് ഉയര്‍ന്ന തുറസ്സായ സ്ഥലത്ത് എത്തിയെങ്കിലും മേഘം മാറാനുള്ള ഭാവമില്ലെന്ന് തോന്നി. അതുമല്ലാ, ചെറിയ മലമടക്കുകളില്‍ നിന്നും കൂടുതല്‍ മേഘശകലങ്ങള്‍ ഉയര്‍ന്ന് കൊണ്ടിരിക്കയാണ്.

ഗ്രഹണം തുടങ്ങിയിട്ടും മേഘങ്ങള്‍ കാരണം അത് ദൃശ്യമാകാന്‍ പറ്റാത്തതിലുള്ള വിഷമവുമുണ്ട്.

കാത്തിരിപ്പ്.

കുറച്ച് കഴിഞ്ഞപ്പോള്‍ കുറച്ച് പേര്‍ കൂടി അവിടെ ഒത്തുകൂടി. പ്രത്യേകിച്ചും കുട്ടികള്‍ക്ക് വലിയ ആകാംക്ഷയായിരുന്നു. ഗ്രഹണം നോക്കാനായി മിക്കവരും എക്സ്-റേ ഫിലിമിന്റെ ഭാഗങ്ങള്‍ മുറിച്ച് കൊണ്ടുവന്നിരിക്കുന്നു.

ഇരുട്ട് ചെറുതായി പരക്കാന്‍ തുടങ്ങിയതോടെ ആകാശത്തില്‍ നക്ഷത്രങ്ങള്‍ നല്ലപോലെ ദൃശ്യമായിതുടങ്ങി. ഷെയ്ക്കായിപോയ ഒരു നക്ഷത്രം.

ഗ്രഹണം ആരംഭിക്കാന്‍ തുടങ്ങുന്നു.

ചന്ദ്രേട്ടന്‍ സൂര്യേട്ടനെ മറയ്ക്കാന്‍ തുടങ്ങുന്നു.

ഗ്രഹണത്തിനുമുമ്പ് മേഘങ്ങളിലെ നിറവ്യത്യാസം.

ക്രമേണ അന്ധകാരം പരക്കാന്‍ തുടങ്ങിയതോടെ പക്ഷികളും മറ്റും പ്രത്യേകശബ്ദമുണ്ടാക്കി പറക്കാന്‍ തുടങ്ങി.

രാവിലെ സൂര്യന്‍ ഉദിച്ചതിനുശേഷം ഗ്രഹണത്താല്‍ അന്ധകാരം പരക്കുന്നു. വണ്ടികള്‍ ഹെഡ്ഡ് ലൈറ്റ് ഇട്ടാണ് ഈ സമയത്ത് ഓടിച്ചുപോയത്. വൈകീട്ട് ഏഴരസമയത്തെ അനുസ്മരിപ്പിക്കുന്ന കാലാവസ്ഥ.

പൂര്‍ണ്ണഗ്രഹണം കഴിഞ്ഞ ഉടന്‍. ഇവിടെ പൂര്‍ണ്ണഗ്രഹണം ഏകദേശം മൂന്ന് മിനിറ്റ് നീണ്ടുനിന്നിരുന്നു.

ഗ്രഹണം കഴിഞ്ഞ ഉടനുള്ള ‘ഡയമണ്ട് റിംഗിന്റെ പ്രകാശമായിരിക്കണം ഇത്. മേഘങ്ങളാല്‍ മറഞ്ഞിരിക്കുന്നതുകാരണം വ്യക്തമല്ല. മേഘങ്ങള്‍ ഇല്ലായിരുന്നെങ്കില്‍ ഇത് നഗ്നനേത്രം കൊണ്ട് ദര്‍ശിക്കുന്നത് കാഴ്ചശക്തി നശിക്കാന്‍ ഇടയാക്കും.

സൂര്യന്‍ മറ വിട്ടു പുറത്തുവരുന്നു.

ഗ്രഹണം കാണാന്‍ എത്തിയവര്‍ പൂര്‍ണ്ണഗ്രഹണം കാണാന്‍ പറ്റാത്തതിലുള്ള വിഷമം പറയുന്നുണ്ടായിരുന്നു.

മേഘങ്ങള്‍ തടസ്സം സൃഷ്ടിച്ചതുകൊണ്ടും ഡി‌എസ്സ്‌എല്‍‌ആര്‍ ക്യാമറകൊണ്ട് ദൃശ്യങ്ങള്‍ ഉദ്ദേശിച്ചപോലെ പകര്‍ത്താന്‍ കഴിയാത്തതിലുള്ള വിഷമം, അവസാനം പോരാന്‍ നേരം പഴയ പോയന്റ് ആന്റ് ഷൂട്ട് ക്യാമറ കൊണ്ട് ഒന്ന് രണ്ട് ഷോട്ട് എടുത്തപ്പോഴാണ് മാറിയത്.
ഈ ജീവിതകാലത്ത് ഇതുപോലുള്ള ദൃശ്യം ഇനി കാണാന്‍ സാധിക്കില്ലല്ലോ.
ഗ്രഹണം കഴിയാറായപ്പോള്‍ എടുത്ത ചിത്രങ്ങള്‍.

മേഘങ്ങള്‍ മാറുകയും, സൂര്യന്‍ പൂര്‍ണ്ണമായും വെളിയില്‍ വന്നതോടെ വെയില്‍ നല്ലപോലെ പരന്നുതുടങ്ങി. അങ്ങനെ ഒരു സൂര്യഗ്രഹണം കൂടി ഈ ജന്മത്തില്‍ ദൃശ്യമായി.

ഗോത്രനൃത്തങ്ങള്‍.

2008-08-26T17:05:00.002+05:30

ഗോത്രനൃത്തങ്ങള്‍.

വീണ്ടും ചില ഗോത്രവര്‍ഗ്ഗനൃത്ത ദൃശ്യങ്ങള്‍:

റെഡി. അപ്പോ തുടങ്ങാം.
നൊക്ടെ വര്‍ഗ്ഗത്തിലുള്ള യുവതികള്‍ തയ്യാറെടുക്കുന്നു.

നൊക്ടെ ഗോത്രവര്‍ഗ്ഗ നൃത്തം.

കളര്‍ സെലക്ഷന്‍ മോഡിലുള്ള ഷോട്ട്‌.

ഗാലോ വര്‍ഗ്ഗക്കാരുടെ പരമ്പരാഗത നൃത്തം.

ഗാലോ നൃത്തം.

നിശി വര്‍ഗ്ഗയുവതികളുടെ നൃത്തം.

അപ്പാത്തനി ഗോത്ര യുവതികള്‍.

അപ്പാത്താനി ഗോത്ര നൃത്തം.

അദി വര്‍ഗ്ഗ യുവതികളുടെ നൃത്തം.

അദി വര്‍ഗ്ഗ നൃത്തം.

ഗ്രാമമൂപ്പന്മാര്‍.

2008-08-12T10:00:00.000+05:30

ഗ്രാമമൂപ്പന്മാര്‍ - ഒരു പരിചയം.

ഗോത്രവര്‍ഗ്ഗക്കാര്‍ക്കിടയില്‍ ഇപ്പോഴും തുടര്‍ന്നുവരുന്ന ഒരു സമ്പ്രദായമാണ്‌ ഗ്രാമമൂപ്പന്‍ അഥവാ നാട്ടുമൂപ്പന്‍. ഗോത്രവര്‍ഗ്ഗക്കാര്‍ക്കിടയില്‍ തര്‍ക്കങ്ങള്‍, സാമൂഹികപ്രശ്നങ്ങള്‍, ആഘോഷങ്ങള്‍എന്നിവയില്‍ ഇവര്‍ പ്രധാന സ്ഥാനം വഹിക്കുന്നു. അരുണാചല്‍ പ്രദേശില്‍ ഇപ്പോഴുംതുടര്‍ന്നുവരുന്ന ഇവരെ ഗാംബുഡാ / ഗാവ്ബുറാ (ഗ്രാമമൂപ്പന്‍) എന്നു വിളിക്കുന്നു. ഇവിടെ ഓരോ ഗോത്രഗ്രാമത്തിലും അവിടത്തെ ജനസംഖ്യക്കനുസരിച്ച്‌ ഒന്നോ അതിലധികമോ ഗ്രാമമൂപ്പന്മാരുണ്ടായിരിക്കും. ഇതിനുപുറമെ കൂടുതല്‍ ജനസംഖ്യയും ഗ്രാമമൂപ്പന്മാരുള്ള ഗ്രാമത്തില്‍ഹെഡ്‌ ഗാംബുഡയേയും നിയമിക്കും. ജില്ലാ ഭരണകൂടമാണ്‌ ഓരോ ഗ്രാമത്തിലേയും പ്രമുഖരായ താല്‍പ്പര്യമുള്ളവരെ ഗ്രാമമുഖ്യന്മാരായി നിയമിക്കുന്നത്‌. വളരെ വര്‍ഷങ്ങളായി നിലനിന്നുപോരുന്ന ഒരു വ്യവസ്ഥിതിയാണിത്‌. ഇങ്ങനെ നിയമിക്കപ്പെടുന്നവര്‍ക്ക്‌ മാസാമാസം ഒരു നിശ്ചിത തുക ഹോണറേറിയമായി നല്‍കുന്നു. കൂടാതെ ചുവന്ന കമ്പിളി കോട്ട്‌, മെറ്റല്‍ ബാഡ്ജ്‌ തുടങ്ങിയവയുംനല്‍കുന്നു.

ഗാം‌ബുഡയും ഹെഡ്ഡ് ഗാംബുഡയും.

ഓരോ ഗ്രാമത്തിലേയും വ്യക്തികള്‍ തമ്മിലുള്ള തര്‍ക്കങ്ങള്‍, അതിര്‍ത്തിതര്‍ക്കം, കുടുംബങ്ങള്‍തമ്മിലുള്ള വഴക്ക്‌ എന്നിവ പരിഹരിച്ച്‌ തീര്‍പ്പാക്കുക, സര്‍ക്കാര്‍ ഉദ്യോഗസ്ഥന്മാര്‍ ഗ്രാമങ്ങള്‍സന്ദര്‍ശിക്കുമ്പോള്‍ അവര്‍ക്ക്‌ ആവശ്യമായ വിവരങ്ങളും സഹായങ്ങളും തരപ്പെടുത്തികൊടുക്കുക, വിവിധ സര്‍വ്വേ ഉദ്യോഗസ്ഥരെ സഹായിക്കുക എന്നിവ എവരുടെ ചുമതലകളില്‍ പെടുന്നു. ജില്ലാ, താലൂക്ക്‌ ആസ്ഥാനങ്ങളില്‍ മന്ത്രിമാര്‍, വി.ഐ.പി.കള്‍ സന്ദര്‍ശനം നടത്തുമ്പോള്‍ ഈ ഗ്രാമമൂപ്പന്മാര്‍ചുവന്ന കോട്ടണിഞ്ഞ്‌ സ്വീകരിക്കാനെത്തുന്നു. ഇങ്ങനെ പങ്കെടുക്കുമ്പോള്‍ ഇവര്‍ക്ക്‌ കമ്പിളിപുതപ്പി, കുട, ടോര്‍ച്ച്‌ ഇത്യാദി സമ്മാനമായും കൊടുക്കാറുണ്ട്‌. അതുപോലെ തന്നെ, ദേശീയാഘോഷപരിപാടികളില്‍ ഇവര്‍ നിര്‍ബന്ധമായും പങ്കെടുക്കേണ്ടതുണ്ട്‌.

പരമ്പരാഗത നിശി തൊപ്പിയണിഞ്ഞ ഗാംബുഡമാര്‍.

ഒരു ഗ്രാമത്തിലെ ചെറിയ തര്‍ക്കങ്ങളെല്ലാം ഈ ഗ്രാമമൂപ്പന്മാര്‍ അവിടത്തെ പരമ്പരാഗതതര്‍ക്കസഭ/ഗ്രാമക്കോടതി കൂടി തീര്‍പ്പ്‌ കല്‍പ്പിക്കുന്നു. ഇത്തരം തര്‍ക്കങ്ങള്‍ കൂടിയിരുന്ന്തീര്‍പ്പാക്കുന്നതിനും മറ്റുമായി ജില്ല, താലൂക്ക്‌ ആസ്ഥാനങ്ങളില്‍ യാല്ലുങ്ങ്‌ ഘര്‍, മേല്‍ ഹൗസ്‌ എന്നിങ്ങനെ അറിയപ്പെടുന്ന തര്‍ക്ക പുരകളും ഉണ്ട്‌. ഗ്രാമങ്ങളില്‍ താല്‍ക്കാലിക പുരകളിലോ തുറസ്സായ സ്ഥലങ്ങളിലോ ആണ്‌ നടത്തുന്നത്‌. രണ്ട്‌ ഗ്രാമത്തിലുള്ളവര്‍ ഉള്‍പ്പെടുന്ന തര്‍ക്കങ്ങള്‍, മോഷണക്കേസ്‌, സ്ത്രീകളുടെ ഒളിച്ചോട്ടവുമായി ബന്ധപ്പെട്ട കേസുകള്‍, (ബഹുഭാര്യാ സമ്പ്രദായം, പുരുഷധനം (സ്ത്രീധനം വാങ്ങുന്നതിനു പകരം, വരന്‍ വധുവിന്റെ പിതാവിനു പണം, മൃഗങ്ങള്‍ എന്നിവകൊടുക്കുന്ന രീതി) എന്നിവ നിലവിലുള്ള ഗോത്രങ്ങളില്‍ ധനസ്ഥിതിയുള്ള പുരുഷന്‍ ഒന്നിലേറെ സ്ത്രീകളെ ഭാര്യയായി വെക്കുന്നതുകാരണവും, വയസ്സന്മാരായ ഭര്‍ത്താക്കന്മരുടെ അടുക്കല്‍ നിന്നും ചെറുപ്പക്കാരികളായ ഭാര്യമാര്‍ ഒളിച്ചോടി വേറെ യുവാക്കളോട്‌ ഒത്തുചേരുന്നതും അപൂര്‍വ്വമല്ല. അതിനാല്‍ ഇത്തരം കേസുകള്‍ ഗോത്രവര്‍ഗ്ഗ ഗ്രാമ കോടതികളില്‍ എത്താറുണ്ട്‌), വളര്‍ത്തുമൃഗങ്ങളെ തട്ടികൊണ്ടുപോകല്‍, അടിപിടി കേസുകള്‍ എന്നിവ ഇത്തരം ഗ്രാമകോടതി/തര്‍ക്കസഭയില്‍വരുമ്പോള്‍ സര്‍ക്കാര്‍ പ്രതിനിധിയായി പൊളിറ്റിക്കല്‍ ഇന്റര്‍പ്രെറ്റര്‍/പൊളിറ്റിക്കല്‍ അസിസ്റ്റന്റ്‌ന്റെയോ മേല്‍നോട്ടത്തിലായിരിക്കും വാദപ്രതിവാദങ്ങളും തീര്‍പ്പുകല്‍പ്പിക്കലും നടത്തുക. ഇങ്ങനെ ന്യായമായ തീര്‍പ്പുകല്‍പ്പിക്കുന്നതിനെ അതാതു മേഖലയിലെ തഹസില്‍ദാര്‍ സമാനനായ ഭരണാധികാരി അംഗീകാരം നല്‍കുന്നു. ഇതില്‍ തൃപ്തരാവാത്ത കക്ഷികള്‍ക്ക്‌ മേലുദ്യോഗസ്ഥന്റെയടുത്തോ, പോലീസിലോ കോടതിയിലോ പരാതിപ്പെടാവുന്നതാണ്‌.

ദൂരെ ദൂരെ.. അങ്ങു ദൂരെയാണെന്റെ ഗ്രാമം. ഒരു നിശി ഗാംബുഡ.
പുറത്ത് തൂക്കിയിട്ടിരിക്കുന്നത് പക്ഷി തൂവലുകള്‍ കൊണ്ടുണ്ടാക്കിയ വിശറി.

ഗോത്രവര്‍ഗ്ഗ ആഘോഷങ്ങള്‍, വിവാഹം തുടങ്ങിയ സാമൂഹികചടങ്ങുകളിലും ഇവര്‍ക്ക്‌ പ്രധാനസ്ഥാനമുണ്ട്‌. ഇത്തരം ചടങ്ങുകളില്‍ മാംസം, നാടന്‍ കള്ള്‌ (ചോറില്‍ മരുന്നിട്ട്‌ പുളിപ്പിച്ചെടുക്കുന്നകള്ള്‌) എന്നിവ ഇവര്‍ക്ക്‌ നല്‍കേണ്ടതുണ്ട്‌. കൂടാതെ തര്‍ക്കങ്ങളില്‍ തീര്‍പ്പ്‌ കല്‍പ്പിക്കുമ്പോള്‍ ഒടുക്കുന്നപിഴസംഖ്യയില്‍ ഒരു വിഹിതവും ഇവര്‍ക്ക്‌ കിട്ടുന്നു.

ഏയ് നാണിച്ചതല്ലാ.. ഇതല്ലേ പോസ്.

ചെറിയ തര്‍ക്കങ്ങള്‍ ഗ്രാമങ്ങളില്‍ തന്നെ തീര്‍പ്പ്‌ കല്‍പ്പിക്കുക, ഭരണകൂടത്തെ സഹായിക്കുകഎന്നിവയാണ്‌ മുഖ്യമായും ഈ ഗ്രാമമൂപ്പന്മാരുടെ കര്‍ത്തവ്യം.

ഗാന്ധിപ്പുക്കും പട്ടുനൂല്‍പ്പുഴുവും.

2008-07-29T12:11:00.001+05:30

ഗാന്ധിപ്പുക്കും പട്ടുനൂല്‍പ്പുഴുവും.

ഗാന്ധിപുക്ക്‌ എന്ന് കേട്ട്‌ തെറ്റിദ്ധരിക്കല്ലേ. ഇതിനു നാം അറിയപ്പെടുന്ന ഗാന്ധിമാരുമായി ഒരു ബന്ധവുമില്ലെന്നുവേണം കരുതാന്‍. ഗാന്ധിപുക്ക്‌ എന്നാല്‍ ഒരു തരം കീടത്തിന്റെ പേരാണ്‌. പുക്ക്‌ എന്നാല്‍ കീടം, 'ഗാന്ധി കീടം' എന്ന് ചുരുക്കത്തില്‍. ഈ കീടങ്ങള്‍ അരുണാചലിലെ നിശി ഗോത്രവര്‍ഗ്ഗക്കാര്‍ക്കിടയിലെ ഒരു വിശിഷ്ട്യഭോജ്യവസ്തുവാണ്‌. ഇവരുടെ ഇടയില്‍ ഈ പേരിലാണ്‌ ഈ കീടം അറിയപ്പെടുന്നത്‌. ഇതിന്‌ എങ്ങനെ ഈ പേര്‍ കിട്ടിയെന്ന് പലരോടും ചോദിച്ചെങ്കിലും അവര്‍ക്കൊന്നും തൃപ്തികരമായ മറുപടി തരാനായില്ല. എല്ലാവരും അങ്ങനെ വിളിക്കുന്നു.

കാണാന്‍ ഏകദേശം കോക്രോച്ചിനെപ്പോലെയുള്ള ഈ 'ഗാന്ധിപുക്ക്‌ ' നദികളില്‍ കല്ലുകള്‍ക്കടിയിലും പാറക്കെട്ടുകള്‍ക്കിടയിലുമാണ്‌ കാണുന്നത്‌. തണുപ്പുകാലങ്ങളിലാണ്‌ ഇത്‌ കൂടുതലായി കിട്ടുന്നത്‌. തണുപ്പ്‌ കാലങ്ങളില്‍ നദികളില്‍ വെള്ളം കുറവായിരിക്കുമ്പോള്‍ നദികളിലിറങ്ങി ഇത്‌ നിറയെ ശേഖരിക്കുന്നവരുണ്ട്‌.

ഇങ്ങനെ ശേഖരിച്ച്‌ പച്ചക്കറി മാര്‍കറ്റിലും വഴിയോരത്തും വില്‍ക്കാന്‍ വെച്ചിരിക്കുന്നതാണ്‌ ചിത്രത്തില്‍. രണ്ടുമൂന്നു മണിക്കൂര്‍ വെയിലത്തുവെച്ചതുകാരണമാകാം എല്ലാം മയങ്ങികിടക്കുകയാണ്‌. മൂക്കില്‍ തുളച്ചുകയറുന്ന ഒരു വല്ലാത്ത ഗന്ധമാണ്‌ ഇതിന്‌. പച്ചക്ക്‌ തിന്നാല്‍ ഒരു തരം എരിവ്‌ അനുഭവപ്പെടുമത്രേ. പച്ചമുളക്‌ ചേര്‍ത്ത്‌ വതക്കി എടുക്കുന്ന ഇത്‌ നിശി വര്‍ഗ്ഗക്കാര്‍ക്ക്‌ വളരെ പ്രിയമുള്ള ഒരു വിഭവമാണ്‌.

മഴക്കാലത്താണെങ്കില്‍ പുല്ലുവളര്‍ന്നു നില്‍ക്കുന്ന ഇടങ്ങളില്‍ നിന്നും പുല്‍ച്ചാടികള്‍ പോലത്തെ ബ്രൗണ്‍ നിറത്തിലുള്ള ഒരു കീടത്തെ ശേഖരിക്കുന്നത്‌ കാണാം. അതും ഭോജ്യത്തിനുള്ളതുതന്നെ.

ഇത്‌ മാംസക്കഷണങ്ങള്‍ വടിയില്‍ കോര്‍ത്ത്‌ പുകയില്‍ പുകച്ചത്‌ വില്‍ക്കാന്‍ വെച്ചിരിക്കുന്നത്‌. പുകയില്‍ പുകച്ചിരിക്കുന്നതുകാരണം കൂടുതല്‍ ദിവസം കേടുകൂടാതെ ഇരിക്കും. യാത്രപോകുമ്പോള്‍ ഗോത്രവര്‍ഗ്ഗക്കാരുടെ ചൂരല്‍ സഞ്ചിയില്‍ ഇതുപോലുള്ളവ കരുതിയിരിക്കും. എപ്പോള്‍ വേണമെങ്കിലും എടുത്ത്‌ ഉപയോഗിക്കാം.

പട്ടുനൂല്‍പ്പുഴുക്കളെ നാം സാധാരണ വളര്‍ത്തുന്നത്‌ അതില്‍നിന്നും പട്ടുനൂല്‍ ഉല്‍പ്പാദിപ്പിച്ച്‌ സില്‍ക്ക്‌ തുണികള്‍ നിര്‍മ്മിക്കാനാണ്‌. എന്നാല്‍ വടക്കു കിഴക്കന്‍ സംസ്ഥാനങ്ങളില്‍ ചില വര്‍ഗ്ഗക്കാര്‍ പട്ടുനൂല്‍പ്പുഴുക്കളെ ഉല്‍പ്പാദിപ്പിക്കുന്നത്‌ നൂലിനുമാത്രമല്ല, ആഹാരത്തിനുംകൂടിയാണ്‌. അതുകൊണ്ടുതന്നെ, പച്ചക്കറികള്‍ വില്‍ക്കുന്ന ഗോത്രവര്‍ഗ്ഗ സ്ത്രീകള്‍ പട്ടുനൂല്‍പ്പുഴുക്കളും വില്‍ക്കാന്‍ വെച്ചിരിക്കുന്നത്‌ കാണാം. പട്ടുനൂല്‍പ്പുഴു പൂപ്പയില്‍ ധാരാളം പ്രോട്ടീന്‍ അടങ്ങിയിരിക്കുന്നതായി ഗവേഷണങ്ങള്‍ തെളിയിച്ചിട്ടുണ്ട്‌. ഇതിനെ ചൂടുവെള്ളത്തില്‍ പുഴുങ്ങി ഇഷ്ടമ്പോലെ പാകം ചെയ്തു കഴിക്കാം.

ജീവനോടെയുള്ള പുഴുക്കള്‍ പച്ചക്കറികള്‍ക്കടുത്ത്‌ വെച്ചിരിക്കുന്നതു കൊണ്ട്‌ ചുമ്മാ വില എത്രയെന്ന് ചോദിച്ചപ്പോള്‍, കിലോക്ക്‌ നൂറു രൂപ മാത്രമെയുള്ളൂവെന്നും, എത്ര വെണമെന്നും ചോദിച്ച്‌ ത്രാസ്സില്‍ നിറച്ചുതുടങ്ങി. പ്രോട്ടീന്‍ സേവ പിന്നൊരിക്കലാവാം എന്നു പറഞ്ഞ്‌ തല്‍ക്കാലം ഒഴിവായി.

ദേശഭക്തിനൃത്തം

2008-03-11T21:48:00.001+05:30

ദേശഭക്തിനൃത്തം

സ്കൂള്‍ കുട്ടികള്‍ അവതരിപ്പിച്ച ദേശഭക്തിഗാനത്തെ ആധാരമാക്കിയുള്ള നൃത്തത്തിന്റെ ചില ദൃശ്യങ്ങളാണ്‌ ചുവടെ:

വന്ദേ മാതരം...

നമ്മുടേ ദേശീയപതാകയുടെ ത്രിവര്‍ണ്ണങ്ങളില്‍ വസ്ത്രം ധരിച്ച് ഗാനത്തിന്റെ ഈണത്തില്‍ ചുവടുകള്‍ വെച്ചപ്പോള്‍..

ജയ് ഹിന്ദ്.

ഗോത്രനൃത്തദൃശ്യങ്ങള്‍.

2008-01-29T10:25:00.000+05:30

ഗോത്രനൃത്തദൃശ്യങ്ങള്‍.

അരുണാചല്‍ പ്രദേശിലെ വിവിധ ഗോത്രവര്‍ഗ്ഗക്കാരുടെ നൃത്തങ്ങളില്‍ നിന്നും ചില ദൃശ്യങ്ങള്‍. പരമ്പരാഗത നൃത്തങ്ങളിലും വേഷഭൂഷാദികളിലും കാലത്തിനനുസരിച്ചുള്ള മാറ്റങ്ങള്‍ ചെറുതായിട്ടെങ്കിലും പ്രകടമാണ്. ഇവരുടെ പരമ്പരാഗത വേഷങ്ങള്‍ കൊണ്ടും സംസാരഭാ‍ഷ കൊണ്ടുമാണ് ഇവരെ പുറമെനിന്നുള്ളവര്‍ക്ക് തിരിച്ചറിയാന്‍ സഹായകരമാകുന്നത്.
ഈ വര്‍ഷത്തെ റിപ്പബ്ലിക്ക് ദിനാഘോഷത്തോടനുബന്ധിച്ച് അവതരിപ്പിച്ച ചുരുക്കം ചില നൃത്തദൃശ്യങ്ങളില്‍ ചിലത്:

അപ്പാത്താനി വര്‍ഗ്ഗ സ്ത്രീകളുടെ നൃത്തച്ചുവടുകള്‍.

വാഞ്ചു വര്‍ഗ്ഗക്കാരുടെ നൃത്തം. നാഗാനൃത്തവുമായി വളരെയേറെ സാമ്യമുണ്ടിതിന്.

നൊക്ടെ വര്‍ഗ്ഗക്കാരുടെ പരമ്പരാഗത നൃത്തച്ചുവടുകള്‍.
ഇതും നാഗാ നൃത്തവുമായി ഏറെ സാമ്യമുണ്ട്.

താഗിന്‍ വര്‍ഗ്ഗക്കാരുടെ നൃത്തം.

ഗാലോ വര്‍ഗ്ഗത്തിലെ സ്ത്രീകളുടെ നൃത്തം.

ഗാലോ വര്‍ഗ്ഗ സ്ത്രീകള്‍ പരമ്പരാഗതമായി വെള്ളയില്‍ ചെറുതായി കറുത്ത ഡിസൈനിലുള്ള വസ്ത്രങ്ങളാണ് ധരിച്ചുകാണാറുള്ളത്.

ഇത് നിശിവര്‍ഗ്ഗക്കാരുടെ നൃത്തം - റിഖാം‌പാദ.

അദിവര്‍ഗ്ഗ പെണ്‍‌കൊടിമാരുടെ നൃത്തച്ചുവടുകള്‍. അദിവര്‍ഗ്ഗ സ്ത്രീകള്‍ തലയില്‍ തട്ടം പോലത്തെ തുണി ധരിക്കാറുണ്ട്. കൃഷിസ്ഥലങ്ങളില്‍ പണിയെടുക്കുമ്പോള്‍ ഇത് തലയില്‍ വെയിലും ചാറ്റല്‍ മഴയുമേല്‍ക്കാതിരിക്കാന്‍ സഹായിക്കുന്നു.

അദി, നിശി, താഗിന്‍ തുടങ്ങിയ മിക്ക ഗോത്രവര്‍ഗ്ഗസ്ത്രീകളും അവരുടെ വേഷഭൂഷാദികളില്‍ കല്ലുമാലകള്‍, വെള്ളിആഭരണങ്ങള്‍, ലോഹംകൊണ്ടുള്ള അരപ്പട്ട എന്നിവ അണിയാറുണ്ട്.

ഈണത്തിനനുസരിച്ച് ചുവടുവെച്ച് നീങ്ങുന്ന അദി പെണ്‍‌കൊടിമാര്‍.

റിപ്പബ്ലിക്ക് ദിന കാഴ്ചകള്‍.

2008-01-27T11:30:00.000+05:30

റിപ്പബ്ലിക്ക് ദിന കാഴ്ചകള്‍.

ഭാരതത്തിന്റെ ഭരണഘടന നിലവില്‍ വരുകയും ഭാരതം ഒരു പൂര്‍ണ്ണ റിപ്പബ്ലിക്ക് രാജ്യവുമായിട്ട് 58 വര്‍ഷം തികഞ്ഞു. അമ്പത്തിയൊമ്പതാം റിപ്പബ്ലിക്ക് ദിനം ഭാരതമൊട്ടുക്കും, ഭാരതത്തിനു വെളിയിലുള്ള ഇന്ത്യാക്കാരും ഇന്നലെ ആഘോഷിച്ചു.

അരുണാചല്‍ പ്രദേശില്‍ തലസ്ഥാനത്തെ ഔദ്യോഗിക ആഘോഷപരിപാടിയില്‍്‍ ബഹു: മുഖ്യമന്ത്രി ശ്രീ ദൊര്‍ജി ഖണ്ഢു ദേശീയ പതാക ഉയര്‍ത്തി സല്യൂട്ട് സ്വീകരിച്ചു. ഇവിടത്തെ ആഘോഷപരിപാടികളിലെ ചില ദൃശ്യങ്ങള്‍:

ബഹു: മുഖ്യമന്ത്രി ദേശീയപതാക ഉയര്‍ത്തി സല്യൂട്ട് സ്വീകരിക്കുന്നു.

ഗാര്‍ഡ് ഓഫ് ഹോണര്‍ നിരീക്ഷണം.

എല്ലാവര്‍ക്കും അഭിവാദ്യങ്ങള്‍.
സായുധപോലീസിന്റെ മാര്‍ച്ച് പാസ്റ്റ് നിരീക്ഷിക്കുന്നു.

എന്‍.സി.സി. ആണ്‍കുട്ടികളുടെ മാര്‍ച്ച് പാസ്റ്റ്.

എന്‍.സി.സി. പെണ്‍കുട്ടികള്‍.

വിവിധ സ്കൂളുകളില്‍ നിന്നുള്ള സ്കൌട്ട്, ഗൈഡ്, തുടങ്ങിയവരുടെ മാര്‍ച്ച് പാസ്റ്റ്.

ജയ് ഹിന്ദ്.
---

വിവിധ ഗോത്രവര്‍ഗ്ഗക്കാര്‍, സ്കൂള്‍ കുട്ടികള്‍ അവതരിപ്പിച്ച നൃത്തദൃശ്യങ്ങള്‍ അടുത്ത പോസ്റ്റില്‍:

സന്ധ്യമയങ്ങും‌നേരം.

2008-01-23T16:20:00.000+05:30

സന്ധ്യമയങ്ങും‌നേരം.

തണുപ്പുകാലമായതുകൊണ്ട് സൂര്യന്‍ നേരത്തേ മറയുകയായി. യാദൃശ്ചികമായി ഹെലിപ്പാഡിനടുത്തെത്തിയപ്പോള്‍ ഒരു കേന്ദ്രമന്ത്രിക്ക് വരവേല്‍പ്പും സ്വാഗതനൃത്തവും നടത്തി തിരിച്ചുപോകാനൊരുങ്ങുകയാ‍യിരുന്നു ഒരു സംഘം ചെല്ലക്കിളികള്‍. രണ്ടുമൂന്ന് വണ്ടീകളിലായി മറ്റു ചെല്ലക്കിളികള്‍ പോയിത്തുടങ്ങിയിരുന്നു. ഇവര്‍ക്ക് വീട്ടിലേക്ക് തിരിച്ചുപോകേണ്ട മിനിബസ്സിലെ ഡ്രൈവര്‍ വരാന്‍ ലേശം വൈകി. എന്റ്റെ കൈയ്യിലെ കാമറ കണ്ടപ്പോള്‍ എന്നാല്‍ പിന്നെ ഒരു പടം പിടിച്ചുകളയാമെന്നായി. അങ്ങനെ അവര്‍ നിരന്നുനിന്നു.

ഗാലോ വര്‍ഗ്ഗക്കാരായ ചെല്ലക്കിളികളുടെ വേറെയും പല പോസിലും ചിത്രം എടുത്തെങ്കിലും വെളിച്ചക്കുറവുമൂലവും ഷേക്ക് അബ്ദുള്ളയായതുകൊണ്ടും ഇതുമാത്രം ഇവിടെയിടുന്നു.

സന്ധ്യ മയങ്ങുകയായി. ആകാശത്തിലെ മേഘപടലങ്ങള്‍ക്ക് ഇവളുടെ കവിള്‍ പോലെ ചുവന്ന നിറം വന്നുതുടങ്ങി.
(അപ്പോഴേക്കും ഡ്രൈവര്‍ ‘കാലമാടന്‍‘ വണ്ടി സ്റ്റാര്‍ട്ട് ചെയ്ത് ഹോണടി തുടങ്ങിക്കഴിഞ്ഞു..ചെല്ലക്കിളികള്‍ കൂടണയാന്‍ വണ്ടിയില്‍ക്കയറി പറന്നുപോയി.)

ഗൊമ്പാ കാഴ്ചകള്‍ - ഭാഗം 2.

2008-01-07T18:04:00.000+05:30

ഗൊമ്പാ കാഴ്ചകള്‍ - ഭാഗം 2.

ഗൊമ്പായിലെ പുറംകാഴ്ചകള്‍ ഇവിടെ കണ്ടല്ലോ.

എന്നാല്‍ ഇനി സിദ്ധാര്‍ത്ഥ്‌ വിഹാര്‍ ഗൊമ്പക്കകത്തെ കാഴ്ചകള്‍ കാണാം.

ശ്രീ ബുദ്ധപ്രതിമ. മുഖ്യ ആരാധനാമൂര്‍ത്തി.

ഒരു വിശ്വാസി പ്രാര്‍ത്ഥനയില്‍.

ശ്രീ ബുദ്ധന്റെ ഇരുവശത്തുമുള്ള പ്രതിമ.

(ഈ മൂര്‍ത്തികളുടെ ടിബറ്റന്‍ പേരുകള്‍ അവിടുത്തെ ലാമ പറഞ്ഞുതന്നിരുന്നെങ്കിലും വ്യക്തമല്ലാത്തതുകൊണ്ട് എഴുതുന്നില്ല) .

ടിബറ്റന്‍ ബുദ്ധമതക്കാരുടെ ഇപ്പോഴത്തെ ആത്മീയഗുരു ബഹു: 14ാ‍മത്‌ ദലായ്‌ ലാമ(ടെന്‍സിംഗ്‌ ഗ്യാത്‌സോ)യുടെ ചിത്രം.

പുറകിലെ ഷെല്‍ഫില്‍ ടിബറ്റന്‍ ഭാഷയിലുള്ള ബുദ്ധമതഗ്രന്ഥങ്ങളാണ്‌.

ഓരോ ദലായി ലാമയുടേയും കാലശേഷം, അദ്ദേഹത്തിന്റെ ആത്മാവ്‌ വേറൊരു കുഞ്ഞിലൂടെ(ശരീരത്തിലൂടെ) പുനര്‍ജനിക്കുന്നുവെന്നാണ്‌ ഇവരുടെ വിശ്വാസം. മുതിര്‍ന്ന ശ്രേഷ്ടലാമകളുടെ മതാചാരപ്രകാരമുള്ള ധ്യാനപ്രാര്‍ത്ഥനകളിലൂടെയും പ്രത്യേകരീതിയിലുള്ള ദൈവീക
പ്രവചനത്തിലൂടേയും ശാക്യമുനിയുടെ ആത്മാവ്‌ ഏത്‌ ദിശയിലാണ്‌
പുനര്‍ജനിച്ചിരിക്കുന്നതെന്ന് കണ്ടെത്തുന്നു. ചില ഗൂഡസൂചനകളിലൂടെയോ/ പ്രവചനത്തിലൂടെയോ ആ പുണ്യബാലനെ കണ്ടെത്തുന്ന ശ്രമമാണ്‌ പിന്നീട്. അങ്ങനെ ദിവ്യ സൂചനകള്‍ വെച്ച്‌ ടിബറ്റില്‍ നിന്നുതന്നെയോ മറ്റേതെങ്കിലും രാജ്യങ്ങളില്‍ നിന്നോ കൃത്യമായി കണ്ടെത്തുന്ന ബാലനെയാണ്‌ ദലായി ലാമയായി വാഴിക്കുന്നത്‌. ഇപ്പോഴത്തെ ദലായി ലാമ കുഞ്ഞായിരിക്കുമ്പോള്‍ ചൈനയിലെ അംദൊ പ്രവിശ്യയില്‍ നിന്നാണ്‌ ഇതിനായി നിയോഗിക്കപ്പെട്ട ലാമമാര്‍ തിരഞ്ഞു കണ്ടെത്തിയത്‌. ഭക്ത്യാദരങ്ങളോടെ ആ ബാലനെ ടിബറ്റിലെ ലാസയില്‍ കൊണ്ടുവന്ന്‌ 1940-ല്‍ ദലായി ലാമയായി വാഴിച്ചു. 1950-ല്‍ 15ആമത്തെ വയസ്സില്‍ ഇദ്ദേഹം ടിബറ്റിന്റെ ഭരണചുമതലയും ഏറ്റെടുത്തിരുന്നു. പിന്നീട്‌ 1959-ല്‍ ഇന്ത്യയിലേക്ക്‌ പാലായനം ചെയ്തതിനുശേഷം ഹിമാചല്‍ പ്രദേശില്‍ ധര്‍മ്മശാലയിലാണ്‌ 14ാ‍ം ദലായി ലാമയുടെ താല്‍ക്കാലിക ആസ്ഥാനം.

ഒരിക്കല്‍ ഒരു അഭിമുഖത്തില്‍ ഇപ്പോഴത്തെ ദലായി ലാമ പൂര്‍വ്വജന്മത്തിലെ കാര്യങ്ങള്‍ ഓര്‍ക്കുന്നുണ്ടോ എന്നു ചോദിച്ചപ്പോള്‍, ബാല്യകാലത്തില്‍ വളരെ വ്യക്തമായി പൂര്‍വ്വജന്മത്തിലെ കാര്യങ്ങളെല്ലാ തെളിഞ്ഞു കണ്ടിരുന്നുവെന്നും,
വര്‍ഷങ്ങള്‍ കഴിയുന്തോറും ആ ഓര്‍മ്മകള്‍ ങ്ങിവരുകയാണുമെന്നാണ്‌ അദ്ദേഹം പറഞ്ഞത്‌.

ഇതുവരെയുള്ള ദലായി ലാമമാര്‍ ഇവരാണ്‌:

1. ഗെദും ദ്രുപ (1391-1474)

2. ഗെദും ഗ്യാത്‌സൊ (1475-1542)

3. സോനം ഗ്യാത്‌സോ (1543-1588)

4. യോന്റെന്‍ ഗ്യാത്‌സോ ( 1589-1617)

5. ന്യവാംഗ്‌ ലൊബ്സാംഗ്‌ ഗ്യാത്‌സൊ (1617-1682)

6. സംഗ്യാംഗ്‌ ഗ്യാത്‌സോ (1682-1706)

(ഇദ്ദേഹം ജനിച്ചത്‌ അരുണാചലിലെ തവാംഗിലാണ്‌)

7. കെല്‍സാങ്ങ്‌ ഗ്യാത്‌സോ (1708-1757)

8.ജമ്പേല്‍ ഗ്യാത്‌സോ (1758-1804)

9.ലുങ്ങ്റ്റോങ്ങ്‌ ഗ്യാത്‌സോ (1805-1815)

10. സുല്‍ത്രിം ഗ്യാത്‌സോ (1816-1837)

11. കെദ്രുപ്‌ ഗ്യാത്‌സോ (1838 - 1856)

12. ത്രിന്‍ലേ ഗ്യാത്‌സോ ( 1856-1875)

13. തുപ്തെന്‍ ഗ്യാത്‌സോ (1876-1933)

14. ടെന്‍സിംഗ്‌ ഗ്യാത്‌സോ (1935- )

ടിബറ്റന്‍ ഭാഷയിലുള്ള പ്രാര്‍ത്ഥനാഗ്രന്ഥം.
ഗൊമ്പയിലെ ഒരു ലാമ

(ചിത്രം ഷേക്കിയതാ)

ഗൊമ്പക്കകത്തെ ചുമര്‍ ചിത്രങ്ങള്‍. പ്രകൃതിയില്‍ നിന്നും ലഭിക്കുന്ന ചായങ്ങളാണ്‌ ഇതു വരക്കാന്‍ ഉപയോഗിക്കുന്നത്‌.

ശ്രീബുദ്ധന്റെ ചുവര്‍ചിത്രം.

ഇതേ മാതൃകയില്‍ പ്രകൃതിയില്‍ നിന്നും കിട്ടുന്ന ചായം ഉപയോഗിച്ച് കട്ടിയുള്ള തുണി ക്യാന്‍‌വാസ്സില്‍ ശ്രീബുദ്ധന്റെ പെയിന്റിംഗ് ചെയ്യുന്നു. അതിനെ തങ്ങ്കാ പെയിന്റിംഗ് എന്നു പറയുന്നു. ഇത് കലണ്ടര്‍ പോലെ തൂക്കിയിടാവുന്നതാണ്.

ഗൊമ്പാ കാഴ്ചകള്‍ - 1.

2008-01-05T11:23:00.001+05:30

ഗൊമ്പാ കാഴ്ചകള്‍-1.

ഇപ്രാവശ്യം നമുക്ക് ഒരു ഗൊമ്പാ സന്ദര്‍ശനം നടത്താം.

ബുദ്ധമതക്കാരുടെ ആരാധനാലയമാണല്ലോ ഗൊമ്പാ.
പ്രാചീനകാലം തൊട്ടേ ബുദ്ധമതം ഭാരതത്തില്‍
വേരൂന്നിയതാണല്ലോ. എന്നാല്‍ അരുണാചല്‍ പ്രദേശില്‍ ടിബറ്റന്‍ ബൌദ്ധസന്യാസികളുടെ പ്രയാണത്തെത്തുടര്‍ന്നാണ് കൂടുതലായി വേരൂന്നിയത്. അതിനാല്‍ തന്നെ വര്‍ഷങ്ങള്‍ക്ക് മുന്‍പ് ടിബറ്റില്‍നിന്നും പാലായനം ചെയ്ത് താമസമാക്കിയവരും സ്വദേശികളില്‍ ചുരുക്കം ചില വര്‍ഗ്ഗക്കാരും ബുദ്ധമതം പിന്തുടരുന്നു. ഇവിടെ കൂടുതലായും ബുദ്ധമതത്തിലെ മഹായണ
വിഭാഗത്തിലുള്ളവരാണ്. എന്നാല്‍ മ്യാന്മറിനോട് ചേര്‍ന്ന് അതിര്‍ത്തിയുള്ള കിഴക്കന്‍ ജില്ലകളില്‍ ചെറിയ ഒരു വിഭാഗം ഹിനായണ വിഭാഗത്തിലുള്ളവരാണ്.സമാ‍ധാനത്തിനുള്ള നോബല്‍
സമ്മാന വിജയിയും ടിബറ്റന്‍ ആത്മീയഗുരുവും ഇപ്പോഴത്തെ (പതിനാലാമത്) ബഹുമാന്യ ദലായ് ലാമ (ടെന്‍സിംഗ് ഗ്യാത്‌സോ) 1959-ല്‍ ചൈനീസ് പട്ടാളം പിന്തുടര്‍ന്നപ്പോള്‍ സാധാരണ
ലാമ വേഷത്തില്‍ ടിബറ്റിലെ ലാസയില്‍ നിന്നും മഞ്ഞുമലകള്‍ കയറിയിറങ്ങി, അരുണാചല്‍ പ്രദേശിലെ (അന്നത്തെ നേഫ) സെമിത്താംഗ്, ലും‌ല, തവാംഗ്, ബോംഡില വഴി മൈലുകള്‍ താണ്ടി
ആസ്സാമിലെ തേസ്‌പൂരില്‍ എത്തിപ്പെട്ടു. അതിനുശേഷമാണ് ഭാരതസര്‍ക്കാര്‍ അഭയം കൊടുത്ത് ഹിമാചല്‍ പ്രദേശിലെ ധര്‍മ്മശാലയില്‍ ദലായ് ലാമക്ക് ആത്മീയകാര്യങ്ങള്‍
നിര്‍വഹിക്കുന്നതിനും മറ്റുമായി ആസ്ഥാനം നല്‍കിയത്.

ഇന്ത്യയിലെ ഏറ്റവും വലിപ്പം കൂടിയതും ഏഷ്യയിലെ രണ്ടാമത്തെ വലിയതുമായ ഗൊമ്പയും ബൌദ്ധസന്യാസമഠസമൂഹവും തവാംഗിലാണ് സ്ഥിതി ചെയ്യുന്നത്. സമുദ്രനിരപ്പില്‍ നിന്നും 10000 അടി ഉയരത്തിലുള്ള അവിടുത്തെ മൊണാസ്റ്റ്രി 1861-ല്‍ മേരക് ലാമയാണ് നിര്‍മ്മിച്ചത്. ഇപ്പോള്‍ അവിടെ 500ഓളം ബൌദ്ധസന്യാസിമാര്‍ പാര്‍ക്കുന്നുണ്ട്.

ബുദ്ധമതക്കാര്‍ വസിക്കുന്ന സ്ഥലങ്ങളിലെല്ലാം ചെറുതും വലുതുമായ ഗൊമ്പാകളോ സ്തൂപങ്ങളോ സ്ഥാപിച്ചതായി കാണാം.

എന്നാല്‍ ചെറുതാണെങ്കിലും ഇറ്റാനഗറിലുള്ള സിദ്ധാര്‍ത്ഥ് വിഹാര്‍ ഗൊമ്പയില്‍ നമുക്കൊന്ന് ചുറ്റിനോക്കാം.

ഗൊമ്പയിലേക്കുള്ള മുഖ്യപ്രവേശന കവാടം. ഉള്ളില്‍ കാണുന്നത് സ്തൂപം
സ്തൂപം.

സ്തൂപം - പാര്‍ശ്വദൃശ്യം.

സ്തൂപം. മുന്‍‌വശം.
മുന്‍പ് വര്‍ഷകാലത്ത് എടുത്ത ചിത്രം

ഗൊമ്പയും ബുദ്ധസന്യാസിയും.

സിദ്ധാര്‍ത്ഥ് വിഹാര്‍ ഗൊമ്പ. ഈ ഗൊമ്പ സ്ഥാപിച്ചത് ബഹുമാന്യ ദലായ് ലാമ (പതിനാലാമത്) യാണ്.

പ്രാര്‍ത്ഥനാചക്രം തിരിക്കുന്നു;

ഗൊമ്പക്ക് ചുറ്റും ഇതുപോലുള്ള പ്രാര്‍ത്ഥനാ ചക്രം സ്ഥാപിച്ചിരിക്കുന്നു. ഇതില്‍ കറക്കികൊണ്ടാണ് ഗൊമ്പക്ക് പ്രദക്ഷിണം ചെയ്യുക.

“ഓം മണി പദ്മേ ഹും” ( Jewel in the centre of the lotus) എന്ന മന്ത്രം ആലേഖനം ചെയ്തിരിക്കുന്ന പ്രാര്‍ത്ഥനാചക്രം. ഇതിനെ കറക്കുമ്പോള്‍ ഇതില്‍ ആലേഖനം ചെയ്തിരിക്കുന്ന മന്ത്രം കാറ്റില്‍ നാലു ദിക്കിലേക്കും കരുണയും സ്നേഹവും ശാന്തിയും പ്രവഹിപ്പിക്കുന്നു എന്നാണ് വിശ്വാസം.

ടിബറ്റന്‍ ഭാഷയില്‍ മന്ത്രങ്ങള്‍ ആലേഖനം ചെയ്ത തോരണങ്ങള്‍
മന്ത്രങ്ങളെഴുതിയ കൊടിതോരണങ്ങള്‍. ഇതുപോലുള്ളവ ബുദ്ധമതവിശ്വാസികളുടെ വീട്ടുപരിസരത്തും വെക്കാറുണ്ട്.
ആല്‍ ചുവട്ടിലെ മഹാമുനിയുടെ പ്രതിമ. ദലായ് ലാമ മേയ് 1983-ല്‍ സ്ഥാപിച്ചതാണ് ഇത്.
ഗൊമ്പാ പരിസരത്തുനിന്നുള്ള പുറംദൃശ്യം.

(ചിത്രങ്ങളില്‍ ക്ലിക്കിയാല്‍ വലുതായി കാണാം)

(ഗൊമ്പക്കകത്തെ ദൃശ്യങ്ങള്‍ അടുത്ത പോസ്റ്റില്‍.)

ഗതി കെട്ടാല്‍ ആന.......!!!!

2007-11-27T12:50:00.000+05:30

ഗതി കെട്ടാല്‍ ആന.......!!!!

നമ്മള്‍ മലയാളികള്‍ ഏവരും ആദരിക്കുന്ന ഗജവീരന്മാരെ എവിടെ കണ്ടാലും നാം ഒന്നു നോക്കിപോകും. നല്ല തലയെടുപ്പുണ്ട്‌. ഏത്‌ ആനയാണിത്‌. നെറ്റിപട്ടം കെട്ടി ഉത്സവത്തിനും പൂരത്തിനും അണിഞ്ഞൊരുങ്ങിവരുമ്പോള്‍ കാണാനെന്തു ചേല്‌. തലയെടുപ്പുള്ള ഗജരാജന്മാര്‍ തിടമ്പുമേറ്റി നില്‍ക്കുമ്പോള്‍ അറിയാതെ നമ്മുടെ ഉള്ളില്‍ ഭക്തിയും ആദരവും തോന്നും. മേളത്തിനൊപ്പം വലിയ ചെവി ആട്ടുമ്പോള്‍ നാം കണ്‍കുളിര്‍ക്കെ കണ്ട്‌ ആസ്വദിക്കുന്നു. നമ്മളില്‍ പലരും ആശിച്ചിട്ടുണ്ട്‌ ഒരാനവാല്‍ കിട്ടിയെങ്കില്‍, ആനവാല്‍ മോതിരം ഉണ്ടാക്കി അണിയാമെന്ന്‌. പണ്ട്‌ വലിയ ആഢ്യന്മാരുടെയും ജന്മിമാരുടെയും വീടുകളില്‍ ആനക്കൊമ്പ്‌ അലങ്കരിച്ചുവെച്ചിരുക്കുന്നത്‌ ആനയുടെ പ്രാധാന്യവും തറവാടിന്റെ പ്രൗഢിയും വിളിച്ചോതുന്നതായിരുന്നു. 'ആനയുള്ള തറവാടാണ്‌', 'ആന കൊടുത്താലും ആശ കൊടുക്കാമോ', 'ആന മെലിഞ്ഞാലും തൊഴുത്തില്‍ കെട്ടാമോ' എന്നീ വിശേഷണങ്ങള്‍ ആനയുടെ പ്രാധാന്യത്തെ എടുത്തു പറയുന്നതാണ്‌. ഗുരുവായൂര്‍ കേശവനെ നാം ഒരു ദൈവീകസ്ഥാനം തന്നെ നല്‍കി ബഹുമാനിക്കുന്നു. കേരളത്തിലെ നിരവധി പേരെടുത്ത ഗജവീരന്മാരെക്കുറിച്ച്‌ ഞാന്‍ പ്രത്യേകം എടുത്തു പറയേണ്ടതില്ലല്ലോ. 'ഏഷ്യാഡ്‌ അപ്പു' വിനെ ആര്‍ക്ക്‌ മറക്കാന്‍ കഴിയും. ആന മുഖ്യ കഥാപാത്രമായും കഥാപാശ്ചാത്തലമായും എത്ര സിനിമകള്‍ നാം കണ്ടു. കഴിഞ്ഞ വര്‍ഷം ആനകള്‍ക്കു പ്രാഥാന്യം നല്‍കി 'ആനച്ചന്ത'വും ഇറങ്ങി.
ഉത്സവത്തിനും പറയെടുപ്പിനും വരുമ്പോള്‍ നാം ആനക്ക്‌ പഴവും ശര്‍ക്കരയും നല്‍കി സന്തോഷം കൊള്ളുന്നു. ആനയെ ഒന്നു തൊട്ട്‌ നോക്കാന്‍ ആര്‍ക്കാണ്‌ ആഗ്രഹമില്ലാത്തത്‌. ആനക്ക്‌ തിന്നാനായി പാപ്പാന്‍ തെങ്ങിന്‍പട്ട ചോദിക്കുമ്പോള്‍ നാം വെട്ടിക്കോളാന്‍ അനുവദിക്കുന്നു. ആനപ്പുറത്ത്‌ ഒന്ന് കയറി ഇരിക്കാന്‍ ആര്‍ക്കും ഒരു ആഗ്രഹമില്ലേ. പലര്‍ക്കും അത്‌ സാധിക്കാറില്ലെന്നു മാത്രം. (പണ്ട്‌ എനിക്ക്‌ ഒരു പ്രാവശ്യം രണ്ട്‌-മൂന്ന്‌ മണിക്കൂറോളം ആനപ്പുറത്ത്‌ ഇരിക്കാനുള്ള ഭാഗ്യം കിട്ടിയിരുന്നു).

നമ്മുടെ സമൂഹത്തില്‍ ഇത്രയൊക്കെ പ്രഥാന്യമുള്ള ഗജവീരന്മാര്‍ക്ക്‌ എന്തെങ്കിലും ഗുരുതരമായ അസുഖമോ അപകടമോ വന്നാല്‍ അത്‌ ഒരു വാര്‍ത്താപ്രഥാന്യമുള്ള വിഷയമാകുന്നു. കഴിഞ്ഞ വര്‍ഷം തിരുവനന്തപുരം ജില്ലയില്‍ കാടിളക്കുകയും കൃഷിനാശം വരുത്തുകയും മനുഷ്യജീവന്‌ ഭീഷണിയാവുകയും ചെയ്ത 'കൊലകൊല്ലി' എന്ന ഒറ്റയാനെ തളക്കാന്‍ സര്‍ക്കാര്‍ എത്ര ലക്ഷങ്ങളാണ്‌ ചിലവഴിച്ചത്‌. അവസാനം മയക്കുവെടിവെച്ച്‌ മറ്റ്‌ ആനകളുടെ സഹായതോടെ തളച്ച്‌ കൂട്ടിലാക്കിയപ്പോഴോ ആനയെ ഒരു നോക്കു കാണാന്‍ വമ്പിച്ച ജനത്തിരക്ക്‌. ആനയെ 'വകവരുത്താന്‍' അനുകൂലിച്ചവര്‍ക്ക്‌ പോലും 'കൊലകൊല്ലി'യോട്‌ അനുകമ്പ. ഒരുനാള്‍ പെട്ടെന്ന്‌ 'കൊലകൊല്ലി' സര്‍ക്കാര്‍ സംരക്ഷണയില്‍ 'ചരിഞ്ഞ'പ്പോഴോ പലരും ഒരു തുള്ളി കണ്ണീര്‍ പൊഴിച്ചു. അത്രയുണ്ട്‌ നമ്മുടെ ആനസ്നേഹം.

പക്ഷേ ഇതൊക്കെയാണെങ്കിലും ആനയെകൊണ്ട്‌ ഉത്സവത്തിനും ശീവേലിക്കും എഴുന്നെള്ളിക്കുക മാത്രമാണോ നാം ചെയ്യുന്നത്‌?. 'ഓഫ്‌ സീസണില്‍' വരവ്‌ കുറയുമ്പോഴും തീറ്റിപ്പോറ്റേണ്ടെ. കാട്ടില്‍ തടി പിടിക്കാന്‍ ആനയെ ഉപയോഗിക്കുന്നു. ഉല്‍ഘാടനകര്‍മ്മത്തിനും, സ്വീകരണവേളകളിലും, നഗരങ്ങളില്‍ പരസ്യപ്രചാരണത്തിനും നാം ആനയെ പ്രയോജനപ്പെടുത്തുന്നു. സര്‍ക്കസ്സുകളില്‍ ആന ഒരു പ്രധാന ഐറ്റമാണെങ്കിലും ഇപ്പോള്‍ സര്‍ക്കസ്സ്‌ കൂടാരങ്ങള്‍ കാണുന്നതുതന്നെ വിരളമായിട്ടാണ്‌. കാട്ടിലെ മരം വെട്ട്‌ കുറഞ്ഞതുകൊണ്ടും മൃഗങ്ങളെ പീഢിപ്പിക്കുന്നത്‌ കുറ്റകരമായതുകൊണ്ടും തടിപിടുത്തം, സര്‍ക്കസ്സ്‌ തുടങ്ങി പല മേഖലകളിലും ആനകള്‍ക്ക്‌ ജോലിയില്ലാതായി. പണ്ട്‌ ബസ്സ്‌ ട്രക്ക്‌ തുടങ്ങിയ വാഹനങ്ങള്‍ റോഡില്‍നിന്നും താഴ്ചയുള്ള സ്ഥലത്തേക്ക്‌ മറിഞ്ഞാല്‍ വലിച്ചെടുക്കാന്‍ ആനയുടെ സഹായം അത്യാവശ്യമായിരുന്നു. ഇന്നിപ്പോള്‍ ഇതിനായ്‌ റിക്കവറി വണ്ടികള്‍ എവിടെയും ലഭിക്കാമെന്നായിട്ടുണ്ട്‌. ചുരുക്കത്തില്‍ ആനകളുടെ സേവനം ടൂറിസം മേഖലയിലും ഉത്സവങ്ങള്‍ക്കും ശീവേലിക്കുമായി കുറഞ്ഞു.

ഉത്സവങ്ങള്‍ക്ക്‌ കൂടുതലായി ആനകളുടെ സേവനം ഉപയോഗപ്പെടുത്താത്ത മറ്റ്‌ സംസ്ഥാനങ്ങളില്‍ ആനകളെ കൊണ്ട്‌ എന്ത്‌ ചെയ്യും? നിങ്ങള്‍ ഒന്ന് ആലോചിച്ച്‌ നോക്കിയിട്ടുണ്ടോ. ആന സ്വന്തമായുള്ളവര്‍ക്ക്‌ അതിനെ തീറ്റിപോറ്റണമല്ലോ. പപ്പാനും മറ്റുമുള്ള ശമ്പളവും ചിലവും വേറെ. അപ്പോള്‍ പിന്നെ ഈ ഗജവീരന്മാരെകൊണ്ട്‌ എന്ത്‌ ജോലിയെടുപ്പിക്കാം. ആനക്ക്‌ വിലയുണ്ടെങ്കിലും മെയിന്റനന്‍സിനുള്ള പണം കണ്ടെത്തണമല്ലോ. എന്നാല്‍ പിന്നെ കൃഷിസ്ഥലത്ത്‌ ആനയെവെച്ച്‌ പണിയെടുപ്പിച്ചാലോ?

ങേ..!!ആനയെക്കൊണ്ട്‌ കൃഷിസ്ഥലത്ത് എന്ത്‌ ജോലി ചെയ്യിക്കാനാണ്‌?

നിലം ഉഴുതുമറിക്കാന്‍!!

ഛേ.. ആനയെക്കൊണ്ട്‌ നിലം ഉഴുതാനോ. എന്ത്‌ വിഡ്ഡിത്തമാണ്‌ പറയുന്നത്‌. സാക്ഷാല്‍ ഇന്ദ്രദേവന്റെ വാഹനം. ആനയെ സാക്ഷാല്‍ ഗണപതിയായി നാം ദര്‍ശിക്കുന്നു. വണങ്ങുന്നു. കരയിലെ ഏറ്റവും വലിയ ജീവി. കാട്‌ കുലുക്കി ഭരിക്കുന്നവന്‍. കാട്ടില്‍ വഴിയില്‍കാണുന്നതെന്തും ചവിട്ടിമെതിച്ച്‌ മസ്തകം ഉയര്‍ത്തിപ്പിടിച്ച്‌ ചിന്നം വിളിച്ച്‌ കാടിനെ വിറപ്പിക്കുന്ന ഗജവീരന്‍ കണ്ടത്തില്‍ നിലം ഉഴുതുകയോ? വെറും ഒരു പോത്തിനേപ്പോലേ. ആ കാര്യം നമുക്ക്‌ ചിന്തിക്കാന്‍ തന്നെ ഒരു വിഷമം. തറവാടുകളില്‍ പ്രൗഢിയോടെ നിന്നവന്‍. ഉത്സവത്തിന്‌ ജനസഹസ്രങ്ങളുടെ ഹരമായിരുന്ന V.I.P. ഇത്രയും ബഹുമാനം അര്‍ഹിക്കുന്ന ഈ ജീവിയെക്കൊണ്ട്‌ നിലം ഉഴുതുകയോ? വിശ്വസിക്കാന്‍ പറ്റുന്നില്ല അല്ലേ. എന്നാലിത്‌ സത്യം. താഴത്തെ ചിത്രം നോക്കൂ..

എന്താ.. വിശ്വാസം വരുന്നില്ലേ.

(ആനകള്‍ ധാരാളമായുള്ള അരുണാചല്‍ പ്രദേശിലെ ഒരു കിഴക്കന്‍ ജില്ലയില്‍നിന്നുമുള്ള ഒരു ദൃശ്യം. മൂന്നുനാല്‌ വര്‍ഷങ്ങള്‍ക്ക്‌ മുന്‍പുള്ള ഒരു ചിത്രമാണിത്‌.)

ഗതി കെട്ടാല്‍ പുലി പുല്ലും തിന്നും.

ആനയോ..

ജോലിയില്ലാതായാല്‍ പോത്തിനേപ്പോലെ നിലവും ഉഴുത്‌ മറിക്കും.

വിശക്കുമ്പോള്‍ വയറു നിറക്കണ്ടേ.. ആശാനേ.. പട്ടിണികിടക്കാനാവില്ലല്ലോ.

ഐസാ ഭീ ഹോത്താ ഹൈ! യേ ഹൈ ഇന്ത്യ!

ഝണ്ടാ മുണ്ടാ - ഒരു ദീവാളിക്കളി.

2007-11-15T12:10:00.000+05:30

ഝണ്ടാ മുണ്ടാ - ഒരു ദീവാളിക്കളി.

ഝണ്ടാ മുണ്ടാ - ഈ പേര്‌ അത്ര കേട്ട്‌ പരിചയമില്ല അല്ലേ. ഇത്‌ ഒരു കളിയാണ്‌, പണം വെച്ചുള്ള കളി. നമ്മുടെ നാട്ടിലെ 'ആനമയില്‍ഒട്ടകം' പോലത്തെ ഒരുതരം കുലുക്കിക്കുത്ത്‌ കളി. പക്ഷേ ഝണ്ടാ മുണ്ടക്ക്‌ ചില പ്രത്യേകതകളൊക്കെ ഉണ്ട്‌. ഇത്‌ ദീപാവലി ദിവസങ്ങളിലാണ്‌ കളിക്കുന്നത്‌. പണമെറിഞ്ഞ്‌ ഭാഗ്യം പരീക്ഷിക്കുന്ന ഈ കളിക്കുവേണ്ടി ചിലര്‍ ഒരു കൊല്ലം മുഴുവന്‍ ഏറെ പ്രതീക്ഷയോടെ കാത്തിരിക്കുന്നു.

(ദീപാവലി ഭാരതത്തിലെ ഒരു പ്രധാന ഉത്സവമാണല്ലോ. ഭാരതത്തിനുപുറമെ അയല്‍രാജ്യങ്ങളായ നേപ്പാള്‍ തുടങ്ങിയ രാജ്യങ്ങളിലും ഇത്‌ ആഘോഷിക്കുന്നു. കേരളത്തില്‍ അത്ര ഗംഭീരമല്ലെങ്കിലും ഉത്തരേന്ത്യയിലും തമിഴ്‌നാട്ടിലുമൊക്കെ വളരെ വിപുലമായാണ്‌ ദീപാവലി ആഘോഷിക്കുന്നത്‌. ലക്ഷ്മീദേവിയെ പൂജിച്ച്‌, ദീപങ്ങള്‍ തെളിയിച്ചും പടക്കങ്ങള്‍ പൊട്ടിച്ചും മധുരപലഹാരങ്ങളും സമ്മാനങ്ങളും നല്‍കിയും ദീപാവലി ആഘോഷിക്കുന്നു. ബംഗാളിലും മറ്റും മേല്‍പറഞ്ഞ ആചാരങ്ങളോടെ കാളിപൂജയായിട്ടാണ്‌ ഇത്‌ ആഘോഷിക്കുന്നത്‌. ദീപാവലിക്ക്‌ മുന്‍പേ വീടുകളും കച്ചവടസ്ഥാപനങ്ങളും പുതിയ പെയിന്റടിച്ച്‌ മോടിപിടിപ്പിക്കുന്നു. ദീപാവലിയോട്‌ ചേര്‍ന്ന് വരുന്ന 'ധന്‍തേരസ്‌' ദിവസങ്ങളില്‍ ആഭരണങ്ങള്‍, വസ്ത്രങ്ങള്‍, വീട്ടുപകരണങ്ങള്‍ എന്നിവ വാങ്ങുന്നത്‌ ശുഭകരമാണെന്നാണ്‌ വിശ്വാസം. ഇത്‌ കച്ചവടക്കാര്‍ നല്ലപോലെ ഉപയോഗപ്പെടുത്തുകയും ചെയ്യുന്നുണ്ട്‌.ദീപാവലിക്ക്‌ ഗുജറാത്തികള്‍, മാര്‍വാഡികള്‍ തുടങ്ങിയ വാണിജ്യ/വ്യവസായ/കച്ചവട സമൂഹം ഗണപതി-ലക്ഷ്മി പൂജ കഴിച്ചശേഷം, നീളത്തില്‍ ചുവന്ന ചട്ടയുള്ള സാമ്പത്തിക പുതുവര്‍ഷത്തേക്കുള്ള അവരുടെ പരമ്പരാഗതമായ പുതിയ കണക്കുപുസ്തകം (ബഹികാത്ത) തുറക്കുന്നു. ഇന്ന്‌ അതിന്റ്റെ സ്ഥാനം ലാപ്‌ടോപ്പുകള്‍ കയ്യേറിയെങ്കിലും എല്ലാവിധ യഥാര്‍ത്ത വരവുചിലവ് കണക്കുകള്‍ അവരുടെ ’മുണ്ടി’ രീതിയില്‍ എഴുതുന്നത് മറ്റുള്ളവര്‍ക്ക് പെട്ടെന്ന് പിടികിട്ടില്ല. എല്ലായിടത്തും സാമ്പത്തികവര്‍ഷം ഏപ്രില്‍ 1 മുതല്‍ മാര്‍ച്ച്‌ 31 വരെയാണ്‌ കണക്കാക്കുന്നതെങ്കില്‍, ഈ ഭാരതീയ പരമ്പരാഗത വ്യവസായികള്‍ക്ക്‌ ദീപാവലി തൊട്ടാണ്‌ പുതുസാമ്പത്തിക വര്‍ഷം തുടങ്ങുന്നത്‌. പുതിയ സാമ്പത്തിക ഇടപാടുകള്‍ക്കും വാണിജ്യ-വ്യവസായത്തിനും ദീപാവലി ദിനം ശുഭമായതുകൊണ്ടാണ്‌ ഇത്‌. മുംബൈ, ഡെല്‍ഹി അടക്കം ചില സ്റ്റോക്ക്‌ എക്സ്ചേഞ്ചുകളില്‍ ദീപാവലിക്ക്‌ മുഹൂരത്‌ ടേഡിംഗും നടത്താറുണ്ട്‌. പ്രാചീന കാലം മുതലേ ധനത്തെ ശ്രീലക്ഷ്മിയായിട്ടാണല്ലോ ഭാരതീയര്‍ കാണുന്നത്‌. അതുകൊണ്ട്‌ ദീപാവലിക്ക്‌, പുതിയ കച്ചവടം തുടങ്ങല്‍, ധനക്രയവിക്രയം തുടങ്ങല്‍, ധനം വെച്ചുള്ള ഭാഗ്യപരീക്ഷണം എന്നിവ പണ്ടുമുതലേയുള്ള ആചാരങ്ങളും രീതികളുമാണ്‌. )

അതിലൊന്നാണ്‌, ചില സ്ഥലങ്ങളില്‍ ധനം കൊണ്ടു കളിക്കുന്ന, ഭാഗ്യപരീക്ഷണമായ ചൂതുകളിയുടെ സ്വഭാവമുള്ള ഝണ്ടാ മുണ്ടാ. ഝണ്ടാ മുണ്ടാ എന്നത്‌ ചില വടക്കുകിഴക്കന്‍ സംസ്ഥാനങ്ങളിലും നേപ്പാളിലും മറ്റും ദീപാവലിക്ക്‌ ഒഴിച്ചുകൂടാനാവാത്തതായി മാറിക്കഴിഞ്ഞു. വര്‍ഷങ്ങളായി, പണിതേടിവന്ന അദ്ധ്വാനശീലരായ നേപ്പാളികള്‍ അരുണാചലിന്റെ എല്ലാ സ്ഥലങ്ങളിലും ഉണ്ട്‌. ദീപാവലിക്ക്‌ ഝണ്ടാ മുണ്ടാ കളിക്കുക എന്നത്‌ ഇവരുടെ ഒഴിച്ചുകൂടാനാവാത്ത ഒരു ആചാരമാണ്‌. ഇവരിലൂടെ വര്‍ഷങ്ങള്‍ കൊണ്ട്‌ പകര്‍ന്നതാകാം, അരുണാചലിലെ ഓരോ ഗോത്രവര്‍ഗ്ഗക്കാര്‍ക്കും ഇന്ന് ഈ കളി ഒരു ഹരമായിരിക്കുന്നത്‌. ഇതിനായി ഇവര്‍ക്കൊപ്പം മറ്റു ജനസമൂഹവും കാത്തിരിക്കുന്നു.

ഝണ്ടാ മുണ്ടാ ബോര്‍ഡ്‌.

ഝണ്ടാ മുണ്ടയില്‍ കുലുക്കാന്‍ ഉപയോഗിക്കുന്ന പ്ലാസ്റ്റിക്‌ ഭാഗ്യ കട്ടകള്‍.

പല പല സ്ഥലങ്ങളില്‍ ദീപാവലിയോടനുബന്ധിച്ച്‌ നാലഞ്ചു ദിവസം അനിയന്ത്രിതമായി ഇത്തരം കളി നടക്കുന്നതുകൊണ്ടാവാം ജില്ലാ ഭരണകൂടം ഇതിന്‌ നിയന്ത്രണം ഏര്‍പ്പെടുത്തിയിരിക്കുന്നത്‌. വര്‍ഷങ്ങളായി അതാത്‌ ജില്ല ഭരണകൂടം ചില നിയന്ത്രണങ്ങള്‍ക്ക്‌ വിധേയമായി ചില തിരഞ്ഞെടുത്ത സ്ഥലങ്ങളില്‍ പൊതുവായി നടത്താന്‍ പെര്‍മിറ്റ്‌ നല്‍കിവരുന്നു. കളി നടത്തുവാനായ്‌ ഡൈസ്‌ പെര്‍മിറ്റിനുവേണ്ടി ഓരോ വര്‍ഷവും നിരവധി അപേക്ഷകളാണ്‌ ജില്ല ഭരണകൂടത്തിന്‌ കിട്ടുന്നത്‌. 48 മണിക്കൂര്‍ നേരത്തേക്ക്‌ ഒരു ബോര്‍ഡ്‌ പെര്‍മിറ്റിനുവേണ്ടി 8000 രൂപയാണ്‌ ഔദ്യോഗികമായി ജില്ല ഭരണകൂടത്തിനു കൊടുക്കേണ്ടത്‌. നേരത്തെ നിശ്ചയിച്ച മൂന്നോ നാലോ പൊതുസ്ഥലങ്ങളില്‍, മുളയും പ്ലാസ്റ്റിക്‌ ഷീറ്റും തുണിയും കൊണ്ടുള്ള താലക്കാലിക പന്തല്‍ കെട്ടി അവിടെയാണ്‌ ഇത്‌ ഔദ്യോഗികമായി അനുവദിക്കുന്നത്‌. ഓരോ പന്തലിനടുത്തും 24 മണിക്കൂറും പോലീസുകാരെ ഡ്യൂട്ടിക്ക്‌ നിയോഗിക്കും. ഇതുപോലുള്ള ഡ്യൂട്ടിക്ക്‌ അവര്‍ക്ക്‌ 'ഉത്സാഹം' കൂടുതലാണല്ലോ.

ഝണ്ടാ മുണ്ടാ കളി നടക്കുന്ന ഒരു പന്തലിലെ ദൃശ്യം.

രണ്ട്‌ കട്ടില്‍ ചേര്‍ത്തുവെച്ചോ അല്ലെങ്കില്‍ ഇരട്ട കട്ടിലിലോ ആണ്‌ ഇതിന്റെ ബോര്‍ഡ്‌ വിരിക്കുന്നത്‌. കട്ടിലിന്‌ ചുറ്റുമായി കസേരകളും ബഞ്ചുകളും നിരത്തിയിരിക്കും. പ്ലാസ്റ്റിക്‌ ഷീറ്റോ റെക്സിനോ കൊണ്ടുള്ള ബോര്‍ഡില്‍ 6 കളങ്ങള്‍ ഉണ്ടാവും. നാലു വശങ്ങളിലായി ക്ലബ്സ്‌(ക്ലാവര്‍), സ്പേഡ്‌ (ഇസ്പേട്‌), ഡൈമണ്ട്‌ (ഡൈമണ്‍), ഹാര്‍ട്സ്‌ (ആഡ്‌തന്‍) എന്നിവയും നടുവിലായി ഝണ്ടാ (പതാക)യും മുണ്ടാ (കിരീടം)യുമാണ്‌ ചിഹ്നങ്ങള്‍. പ്ലാസ്റ്റിക്‌ കൊണ്ടുള്ള ചതുരക്കട്ടകളില്‍ അതിന്റെ 6 വശങ്ങളിലും ഈ ചിഹ്നങ്ങള്‍ അടയാളപ്പെടുത്തിയിട്ടുണ്ടാകും. അതിനെ ഒരു ബക്കറ്റോളം വലുപ്പമുള്ള കട്ടിതുകല്‍/റബ്ബര്‍ കൊണ്ടുള്ള ഒരു ജാറില്‍ ഇട്ട്‌ മൂടികൊണ്ട്‌ മൂടിയശേഷം നല്ലപോലെ കുലുക്കി കമിഴ്ത്തുന്നു. ഇനി കളിക്കാന്‍ വന്നവര്‍ നോട്ടുകള്‍ അവര്‍ക്കിഷ്ടപ്പെട്ട ബോര്‍ഡിലെ ഓരോ കളങ്ങളിലും വെക്കുന്നു. ഒരേ സമയം ഒരാള്‍ക്ക്‌ ഒന്നില്‍കൂടുതല്‍ കളങ്ങളിലും രൂപ വെക്കാവുന്നതാണ്‌.വെച്ച പണം കിട്ടണമെങ്കില്‍ ചുരുങ്ങിയത്‌ രണ്ട്‌ കട്ട(ഗുട്ടി)കളുടെ മുകള്‍ ഭാഗത്തുള്ള ചിഹ്നം ഒരേ പോലുള്ളതായിരിക്കണം. ഒരേ ചിഹ്നത്തിലുള്ള രണ്ട്‌ ഗുട്ടികള്‍ വന്നാല്‍ ആ ചിഹ്നമുള്ള കളത്തില്‍ വെച്ചിരിക്കുന്നവര്‍ക്ക്‌ വെച്ച പണവും കൂടാതെ അതിന്റെ രണ്ടിരട്ടിയും കിട്ടും. 3 ഗുട്ടികള്‍ ഒരേപോലെ വന്നാല്‍ മൂന്നിരട്ടി. ഏതെങ്കിലും ഒരു കളത്തിലെ ചിഹ്നത്തിന്റെ ഒരു ഗുട്ടി മാത്രം വരുകയോ അല്ലെങ്കില്‍ വരാതിരിക്കയോ ചെയ്താല്‍ പണം നടത്തിപ്പുകാരന്‌. രണ്ട്‌ മൂന്ന് ദിവസം തുടര്‍ച്ചയായി കട്ടകള്‍ വലിയ ജാറില്‍ നല്ലപോലെ കുലുക്കി കമിഴ്ത്തുന്നതും ശ്രമകരം തന്നെ. ഇതിന്‌ പ്രത്യേകം ആളെ നിയോഗിക്കും. കുലുക്കി കമിഴ്ത്തുന്നയാള്‍ക്കും ചില അവകാശങ്ങള്‍ ഉണ്ട്‌. കുലുക്കി കമിഴ്ത്തി 6 കട്ടകളും 6 വിവിധ ചിഹ്നങ്ങളില്‍ വന്നാല്‍ ആര്‍ക്കും തന്നെ പണം തിരികെ കിട്ടുകയില്ലല്ലോ. അപ്പോള്‍ ആ ബോര്‍ഡില്‍ വെച്ചിരിക്കുന്ന പണം മുഴുവനും കുലുക്കുന്ന ആള്‍ക്ക്‌ (അത്‌ കൂലിക്ക്‌ വെച്ച ആളായാലും)ഉള്ളതാണ്‌. നിര്‍ദ്ദിഷ്ട കുലുക്കു കൂലിക്കും ചിലവിനും പുറമെയാണിത്‌. ഇനി 6 കട്ടകളും ഒരേ ചിഹ്നത്തില്‍ വന്നെന്നിരിക്കുക (സാധ്യത വിരളം), അപ്പോള്‍ ആ കളത്തില്‍ വെച്ചിരിക്കുന്ന പണത്തിന്റെ 6 മടങ്ങ്‌ പണം വെച്ചിരിക്കുന്ന ആള്‍ക്ക്‌ കിട്ടും.

കളിക്കാര്‍ക്കുള്ള ദാഹശമനി (നാടന്‍ കള്ള്‌) കുപ്പിയില്‍ പന്തലിനടുത്തുതന്നെ ലഭ്യം. കള്ള്‌ വില്‍ക്കാനിരിക്കുന്ന അമ്മയും മക്കളും.

കളിക്കാന്‍ വരുന്നവര്‍ക്ക്‌, അവരെ അവിടെതന്നെ കൂടുതല്‍ കളിക്കാന്‍ പ്രോല്‍സാഹിപ്പിക്കുന്നതിനായി ചായ, ജൂസ്‌, വെള്ളം, പാന്‍ (മുറുക്കാന്‍) എന്നിവ സൗജന്യമായി നല്‍കുന്നു. ആവശ്യമെങ്കില്‍ നാടന്‍ കള്ളും നല്‍കും. പന്തലുകളോട്‌ ചേര്‍ന്ന്‌ താല്‍ക്കാലിക ചായക്കടകളില്‍ നാടന്‍ കള്ളും സുലഭമായി ലഭിക്കുന്നു.ഈ കളിയില്‍ സ്ത്രീകളും പെണ്‍കുട്ടികളും സജീവമായി പങ്കെടുക്കുന്നതായി കാണുന്നു. ആദിവാസി, നേപ്പാളി സ്ത്രീകളാണ്‌ ഇതില്‍ കൂടുതലും. കളി നടത്തുന്നവരുടെ കൂടെയുള്ള പെണ്‍കുട്ടികള്‍, മറ്റു ബോര്‍ഡുകളിലേക്ക്‌ പോകുന്ന കസ്റ്റമേര്‍സിനെ തങ്ങളുടെ ബോര്‍ഡിലേക്ക്‌ കളിക്കാന്‍ ക്ഷണിച്ചുവരുത്തുന്നു.

ഇതാ.. നിങ്ങള്‍ക്കടിച്ച പണം.

കളിക്കളത്തില്‍ പണം വെക്കുന്നതിന്‌ ചില നടത്തിപ്പുകാര്‍ അവരുടെ സാമ്പത്തിക സ്ഥിതിക്കനുസരിച്ച്‌ പരിമിതികളൊക്കെ വെക്കാറുണ്ട്‌. ഒരാള്‍ ഒരു സമയം ഒരു കളത്തില്‍ വെക്കാവുന്ന പരമാവധി പണം സാധാരണഗതിയില്‍ 2000 മുതല്‍ 5000 വരെ അനുവദിക്കുമ്പോള്‍, ചിലര്‍ അത്‌ 10,000 മുതല്‍ 50,000 വരെ അനുവദിക്കുന്നു. ഇതിനായി നേരത്തെ തന്നെ ആവശ്യമുള്ള പണം കരുതി വെക്കുകയും ചെയ്യുന്നു. രണ്ടു ദിവസത്തെ കളി കഴിയുമ്പോള്‍ ചിലര്‍ക്ക്‌ പതിനായിരങ്ങളും ലക്ഷങ്ങളും കിട്ടുമ്പോള്‍, ചിലര്‍ക്ക്‌ ഉള്ളത്‌ മുഴുവന്‍ പോകുന്ന അവസ്ഥയിലുമാകുന്നു. സാധാരണയായി പുരുഷന്മാരാണ്‌ കൂടുതല്‍ പണം ഇറക്കി കളിക്കുന്നത്‌. എന്നാല്‍ ഇക്കഴിഞ്ഞ ഝണ്ടാ മുണ്ടാ കളിക്ക്‌ ഒരു ആദിവാസി സ്ത്രീ ബാഗുമായി വന്ന്‌ രണ്ടു ദിവസം തുടര്‍ച്ചയായി ഒരോ കളിക്കും 500ഉം 1000വും ഇറക്കി കളിക്കുന്നത്‌ കാണാനായി.

ഇവിടെ ഇമ്മിണി വല്യ കളിയാ. ഒരു കളത്തില്‍ ഒരാള്‍ക്ക്‌ വെക്കാവുന്നത്‌ 50 രൂപ മുതല്‍ 50,000 രൂപ വരെ.

കൂടുതല്‍ പണം നേടുക എന്നതിലുപരി ഒരു രസത്തിനും, ഭാഗ്യം പരീക്ഷിക്കാനുമായി കളിക്കുന്നവര്‍ നിരവധിയുണ്ട്‌. ഇവര്‍ 10-15 തവണ ചെറിയ തുകക്ക്‌ കളിച്ച്‌ പിന്‍വാങ്ങുന്നു. പൊതുസ്ഥലത്ത്‌ പെര്‍മിറ്റ്‌ എടുത്ത്‌ കളിക്കുന്നതിനു പുറമെ, പെര്‍മിറ്റ്‌ എടുക്കാതെ കോളനികള്‍ക്ക്‌ സമീപവും, വീട്ടുപരിസരത്തും ചെറിയ തുകക്ക്‌ കളി നടത്തുന്നവരും ഉണ്ട്‌. കുട്ടികളെയും സ്ത്രീകളെയും ഉദ്ദേശിച്ചാണ്‌ ഇത്‌. ഈ കളി നിരോധിക്കണമെന്ന് ഒരു സംഘടന ആവശ്യപ്പെട്ടുവെങ്കിലും, (മദ്യനിരോധനം, ലോട്ടറി നിരോധനം എന്നിവ നടപ്പിലാക്കുമ്പോള്‍ സര്‍ക്കാരിനുണ്ടാകുന്ന വരുമാന നഷ്ടവും ഉപഭോക്താവിന്റെ താല്‍പ്പര്യവും വിലയിരുത്തുന്നതുപോലെ) നിരോധനത്തിനുള്ള സാധ്യത കുറവാണ്‌.

കളിപന്തലിനടുത്ത നീല ബോര്‍ഡ്‌ ശ്രദ്ധിക്കൂ "Accident do not happen, they are caused". ഡ്രൈവര്‍മാരുടെ ശ്രദ്ധക്കായി ബോര്‍ഡര്‍ റോഡ്‌ ഓര്‍ഗനൈസേഷന്‍ സ്ഥാപിച്ച ഈ ബോര്‍ഡില്‍ പറഞ്ഞിരിക്കുന്നതും ഇവിടെ നടക്കുന്നതും ഏകദേശം ഒരു പോലെയല്ലേ. അപകടം സംഭവിക്കുന്നില്ല, അത്‌ വരുത്തുകയാണ്‌. എത്ര വാസ്തവം.

കളി നടത്തുന്നവര്‍ മിക്കവരും നല്ല ലാഭമുണ്ടാക്കുമ്പോള്‍ അതുപോലെ നഷ്ടം സംഭവിക്കുന്ന കളിനടത്തിപ്പുകാരും കളിക്കാരും ഉണ്ട്‌. പക്ഷേ, അവര്‍ വീണ്ടും പണം സ്വരുക്കൂട്ടി അടുത്തവര്‍ഷത്തെ ദീപാവലിക്കായി കാത്തിരിക്കുന്നു, പോയത്‌ തിരിച്ചുപിടിക്കാന്‍. ഭാഗ്യദേവത കനിയുമെന്ന വിശ്വാസത്തില്‍.
***

കൂടുതല്‍ ഝണ്ടാ മുണ്ടാ ചിത്രങ്ങള്‍: ഇവിടെ ഞെക്കിയാല്‍ കാണാം.

യുവ ഗോത്രജോഡികള്‍-2.

2007-11-12T11:53:00.000+05:30

യുവ ഗോത്രജോഡികള്‍-2.

അരുണാചല്‍ പ്രദേശിലെ ഗോത്രവര്‍ഗ്ഗ യുവജോഡികളെ അവരുടെ പാരമ്പര്യ വേഷത്തില്‍ പരിചയപ്പെടുത്തുന്നു രണ്ടാം ഭാഗം: (ഒന്നാം ഭാഗം ഇവിടെ )

ഇവര്‍ ഇദു മിഷ്‌മി വര്‍ഗ്ഗക്കാര്‍. അപ്പര്‍ ഡിബാംഗ് വാലി, ലോവര്‍ ഡിബാംഗ് വാലി, ജില്ലകളില്‍ വസിക്കുന്ന മിഷ്മി വര്‍ഗ്ഗക്കാരെ ‘ചുലിക്കാട്ടാ’കള്‍ എന്നും വിളിക്കാറുണ്ട്‍.

(പണ്ട് ശ്രീകൃഷ്ണന്‍ ബീഷ്മക് രാജാവിനെ തോല്‍പ്പിച്ച് രുഗ്മിണിയെ വിവാഹം കഴിച്ചത് ഇവരുടെ ജാതിയില്‍ നിന്നാണെന്ന് ഇവര്‍ വിശ്വസിക്കുന്നു. ഇതിനെ എതിര്‍ത്ത രുഗ്മിണിയുടെ പിതാവിനുനേരെ സുദര്‍ശനചക്രം തൊടൂത്തൂവെന്നും രുഗ്മിണി അരുതെന്ന് അപേക്ഷിച്ചകാരണം തലക്കുപകരം അയാളുടെ മുന്‍‍വശത്തെ മുടി ലേശം അറുത്തു എന്നും പറയപ്പെടുന്നു. അതിനുശേഷമാണത്രേ മിഷ്മികള്‍ മുന്‍‍വശത്തെ കുറച്ച് മുടി മുറിച്ച് കളയുന്നതെന്നും പറയപ്പെടുന്നു. ഇന്നത്തെ തലമുറയിലുള്ളവര്‍ ഇത് പിന്തുടരുന്നില്ല. പുരാതനവും അടിസ്ഥാനപരവുമായ ചരിത്രാവശിഷ്ടങ്ങളില്‍ ചിലത് ലോവര്‍ ഡിബാംഗ് വാലി ജില്ലയിലെ ബീഷ്മക് നഗറില്‍ ഉണ്ട്. കളിമണ്‍ ഇഷ്ടിക കൊണ്ട് നിര്‍മ്മിച്ച കോട്ടയുടെ ശിഥിലമായ അവശിഷ്ടങ്ങള്‍ ആര്‍ക്കിയോളജി വിഭാഗം സംരക്ഷിക്കുന്നു.ഇതിന്‍് A.D. നാലാം ശതകത്തിന്റെ പഴക്കമുണ്ടെന്ന് പറയുന്നു.) .

പണ്ടൊക്കെ ഇവര്‍ കസ്തൂരി മാനിനെ വേട്ടയാടി അതില്‍ നിന്നും കിട്ടുന്ന കസ്തൂരി , മാന്‍‍തോല്‍ എന്നിവ വിപണനം നടത്തിയിരുന്നു. മഞ്ഞു വീണുകിടക്കുന്ന മലനിരകളില്‍ ആഴ്ചകള് താണ്ടിയിട്ടാണ് കാസ്തൂരിവാഹകരായ മാനിനെ വേട്ടയാടുന്നത്. വളരെയേറേ ഔഷധമൂല്യമുള്ള ‘മിഷ്മി തീത്ത‘ (ഇംഗ്ലീഷില്‍ ‘കോപ്റ്റിസ് തീത്ത‘) മിഷ്മികള്‍ വസിക്കുന്ന മലനിരകളില്‍ സുലഭമായി ലഭിക്കുന്നു. അതുകൊണ്ടാണ് ഇതിന് ‘മിഷ്മീ തീത്ത’ എന്നു പേര് വന്നത്. ഇതിന്‍റെ ചെടിയിലെ വേര് ഉണക്കിയ്യെടുത്ത്‌ വിപണനം ചെയ്യുന്നു. വളരെ കയ്പേറിയ ഇത് നിരവധി മാരകരോഗങ്ങള്‍ക്ക് പ്രതിവിധി മരുന്ന് നിര്‍മ്മാണത്തിലെ മുഖ്യഘടകമാണ്. ഒരു ചെറിയ കഷണം വേര്‌ ഒരു പാത്രം വെള്ളത്തിലിട്ട് അടുത്തദീവസം രാവിലെ വെറും വയറ്റീല്‍ കുടിച്ചാല്‍ നല്ല്ലതെന്ന് പറയുന്നു. വളരെയേറെ കയ്പേറിയ ഈ വെള്ളം രാവിലെ നോക്കുമ്പോള്‍ മഞ്ഞകലര്‍ന്ന ചുവപ്പ് നിറത്തിലായിരിക്കും.

ഇവര്‍ ഡിഗാരു മിഷ്മി വര്‍ഗ്ഗക്കാര്‍. മിഷ്മി വര്‍ഗ്ഗക്കാരിലെ ഒരു വിഭാഗം‍. ലോഹിത്, അഞ്ചാവ് ജില്ലയില്‍ വസിക്കുന്നവര്‍.
ഇവര്‍ ഖംത്തി വര്‍ഗ്ഗക്കാര്‍. ലോഹിത് ജില്ലയില്‍‍ വസിക്കുന്നവര്‍. ഹിനായണ-ബുദ്ധമത വിശ്വാസികളായ ഇവര്‍ ബര്‍മ്മ(മ്യാന്‍‍മാര്‍)യിലെ ഷാന്‍ ഭാഗങ്ങളില്‍ നിന്നും വളരെ പണ്ട് കുടിയേറിപ്പാര്‍ത്തവരാണ്. ഇവര്‍ക്ക് മാത്രമാണ് അരുണാചലില്‍ സ്വന്തമായി എഴുതാന്‍ അക്ഷരമാല ഉള്ളത്. ബുദ്ധമതവിശ്വാസികളാണെങ്കിലും മരണശേഷം ഇവര്‍ ശവത്തെ ശവപ്പെട്ടിയില്‍ അടക്കം ചെയ്ത് സംസ്കരിക്കുന്നു. (ഇവര്‍ കൃഷീ ചെയ്യുന്ന മണമുള്ള ഖംത്തി അരിയും അത് മുളം‍കുറ്റിയില്‍ പാകം ചെയ്തെടുക്കുന്നതും ഇവിടെ വായിക്കാം.)

ഇവര്‍ക്ക് പുറമെ ബുദ്ധമതവിശ്വാസികളായ സിങ്ഫോ എന്ന ഗോത്രവര്‍ഗ്ഗക്കാരും ബര്‍മ്മയിലെ കചിന്‍ പ്രവിശ്യായില്‍ നിന്നും ഇവിടെ കുടിയേറി പാര്‍ത്തവരാണ്.

ഇവര്‍ ചംഗ്ലാംഗ് ജില്ലയിലെ തംഗ്സാ വര്‍ഗ്ഗക്കാര്‍. നല്ല നെയ്ത്ത് കാരാണ് ഇവര്‍.

ഇവര്‍ വാഞ്ചു വര്‍ഗ്ഗത്തിലുള്ളവര്‍. നാഗാലാന്റിനോട് ചേര്‍ന്ന് കിടക്കുന്ന തിറാപ്പ് ജില്ലയിലെ പടിഞ്ഞാറ് ഭാഗത്ത് വസിക്കുന്നവര്‍. നാഗാ ജീവിത സംസ്കാരം പുലര്‍ത്തുന്നു. പണ്ട് കാലത്ത് എതിരാളികളുടെയും ശത്രുവിന്‍റെയും തല കൊയ്യുക എന്നത്‌ ഇവരുടെ ആചാരമായിരുന്നു. ഇവരുടെ വര്‍ഗ്ഗത്തിലെ ക്രമസ്സമാധാനം നിയന്ത്രിക്കുന്നത് ശക്തമായ ഇവരുടെ ഗ്രാമസഭയാണ്. ശരീരത്തില്‍ പച്ചകുത്തുന്നത് ഇവരുടെ സമൂഹ ആചാരമാണ്. മരത്തില്‍ നല്ല ശില്പങ്ങള്‍ കൊത്തുന്നവരാണ് വാഞ്ചു വര്‍ഗ്ഗക്കാര്‍.

തിറാപ്പ് ജില്ലയിലെ നൊക്ടെ വര്‍ഗ്ഗ ജോഡി. തിറാപ്പ് ജില്ലയിലെ മദ്ധ്യഭാഗത്ത് വസിക്കുന്ന ഈ വര്‍ഗ്ഗക്കാര്‍ വൈഷ്ണവമാര്‍ഗ്ഗം ആചരിക്കുന്നവരാണ്. പണ്ട് കാലത്ത് നല്ലപോലെ ഉപ്പ് ഉണ്ടാക്കിയിരുന്ന ഇവര്‍ ബാര്‍ട്ടര്‍ രീതിയില്‍ ഉപ്പും മറ്റു വസ്തുക്കളും കച്ചവടം നടത്തിയിരുന്നു.‍
പഴമയും പുതുമയും വസ്ത്രധാരണത്തില്‍ ഇടകലര്‍ത്തിയപ്പോള്‍.

***

മേൽപ്പറഞ്ഞ ഗോത്രവര്‍ഗ്ഗക്കാര്‍ക്ക് പുറമെ നിരവധി ചെറിയ ഗോത്രവര്‍ഗ്ഗ ഗ്രൂപ്പുകളില്‍ എടുത്തു പറയത്തക്കതാണ്, പശ്ചിമ/പൂര്‍വ്വ കാമെംഗ് ജില്ലകളില്‍ വസിക്കുന്ന ഹൃസ്സൊ അഥവാ അക്കാ എന്നറിയപ്പെടുന്ന വര്‍ഗ്ഗം. ബുദ്ധമതത്തിലും ഹിന്ദുമതത്തിലും വിശ്വസിക്കുന്ന ഇവര്‍ പണ്ട് ആസ്സാമിലെ അഹൊം രാജാക്കളുമായി ബന്ധം പുലര്‍ത്തിയിരുന്നെന്ന് പറയപ്പെടുന്നു. പുരുഷന്മാര്‍ ധരിക്കുന്ന ചൂരല്‍/മുള ചീകിയുണ്ടാക്കുന്ന കിരീടം പോലെ തോന്നിക്കുന്ന തൊപ്പിയില്‍ ഒരു മയിൽപീലി തുണ്ടും ഇവര്‍ വെക്കുന്നു.

ബുദ്ധമതവിശ്വാസികളായ വേറൊരു ചെറിയ വര്‍ഗ്ഗമാണ് ഖംബാകള്‍ എന്നും മെംബാകള്‍ എന്നും അറിയപ്പെടുന്നവര്‍. പശ്ചിമ സിയാംഗ് ജില്ലയിലെ വടക്ക് വശത്ത് ടിബറ്റിനോട് ചേര്‍ന്ന് കിടക്കുന്ന പ്രദേശങ്ങളില്‍ വസിക്കുന്ന ഇവരുടെ ഇടയില്‍ ബഹുഭര്‍തൃത്വം നിലനില്‍ക്കുന്നു. ഇവരുടെ ഇടയില്‍ സ്ത്രീകളുടെ കുറവായിരിക്കണം ഇതിനുള്ള പ്രധാന കാരണം.

ബുദ്ധമതത്തില്‍ വിശ്വസിക്കുന്ന വേറൊരു ചെറിയ വര്‍ഗ്ഗക്കാരാണ് പശ്ചിമ കാമെംഗ് ജില്ലയില്‍ വസിക്കുന്ന ഷെര്‍ഡുൿപെന്‍ എന്നറിയുന്നവര്‍.

കൃഷ്.

യുവ ഗോത്രജോഡികള്‍-1.

2007-11-06T11:30:00.000+05:30

യുവ ഗോത്രജോഡികള്‍-1.

അരുണാചല്‍ പ്രദേശിലെ വിവിധ ഗോത്രവര്‍ഗ്ഗക്കാരെ (യുവജോഡികളെ )അവരുടെ പാരമ്പര്യ വേഷത്തില്‍ പരിചയപ്പെടുത്തുകയാണ് ഇവിടെ.

അരുണാചല്‍ പ്രദേശില്‍ പ്രധാനമായും 20 മുഖ്യ ഗോത്രവര്‍ഗ്ഗവും അതിനുകീഴില്‍ നിരവധി ഉപജാതികളും ഉണ്ട്‌. ഖംതി വര്‍ഗ്ഗക്കാര്‍ക്കൊഴിച്ച്‌ മറ്റു വര്‍ഗ്ഗക്കാര്‍ക്ക്‌ സ്വന്തമായി അക്ഷരമാലയോ എഴുത്തുഭാഷയോ ഇല്ല. ഇവരുടെ സംസാരഭാഷ ഓരോ ഗോത്ര/ജാതിക്കനുസരിച്ച് വ്യത്യാസമുണ്ട്. സ്വന്തം സംസാരഭാഷയില്‍ എഴുതുന്നതിന്‌ റോമന്‍ അക്ഷരമാലയെ ആണ്‌ ആശ്രയിക്കുന്നത്‌. എന്നാല്‍ താനി ഗ്രൂപ്പില്‍ പെട്ട ഗോത്രവര്‍ഗ്ഗക്കാര്‍ക്കായി 'താനി ലിപി' എന്ന അക്ഷരമാല/എഴുത്തു ഭാഷ വികസിപ്പിച്ചുകൊണ്ടിരിക്കയാണ്‌. ഇവിടത്തെ എല്ലാ ഗോത്രവര്‍ഗ്ഗ സ്ത്രീകളും നല്ല നെയ്ത്തുകാരാണ്‌. അവര്‍ക്ക്‌ വേണ്ടതായ പരമ്പരാഗത വസ്ത്രങ്ങള്‍ നല്ല നിറത്തിലും ഡിസൈനിലും നെയ്തെടുക്കുന്നു. പുരുഷന്മാര്‍ മുഖ്യമായും കൃഷിയില്‍ ശ്രദ്ധ കേന്ദ്രീകരിക്കുന്നു. മുള, ചൂരല്‍ എന്നിവകൊണ്ട്‌ പുരുഷന്മാര്‍ കരകൗശല വസ്തുക്കളും നിത്യോപയോഗ സാധനങ്ങളും നിര്‍മ്മിക്കുന്നു. ചില ഗോത്രവര്‍ഗ്ഗക്കാര്‍ മരത്തില്‍ കൊത്തിയെടുക്കുന്ന രൂപങ്ങള്‍ ഉണ്ടാക്കുന്നതില്‍ വിദഗ്ദരാണ്‌. പുരുഷന്മാരുടെ വേഷവിധാനങ്ങളോടൊപ്പം ഒഴിച്ചുകൂടാനാവത്തതാണ്‌ അവര്‍ ധരിക്കുന്ന വാള്‍. സ്ത്രീകള്‍ പ്രധാനമായും മുത്ത്‌/കല്ലുമാലകളും വെള്ളികൊണ്ടുള്ള ആഭരണങ്ങളും ധരിക്കുന്നു. ചില ഗോത്രവര്‍ഗ്ഗക്കാര്‍ക്കിടയില്‍ ബഹുഭാര്യാത്വം നിലവിലുള്ളപ്പോള്‍ ചുരുക്കം ചില ഗോത്രവര്‍ഗ്ഗക്കാര്‍ക്കിടയില്‍ ബഹുഭര്‍ത്തൃത്വവും നിലനില്‍ക്കുന്നു.

അരുണാചലിലെ 9 പടിഞ്ഞാറന്‍ ജില്ലകളില്‍ വസിക്കുന്ന പ്രധാന ആദിവാസികളെയാണ് താഴെ പരിചയപ്പെടുത്തുന്നത്:

ഇവര്‍ ചൈനയോട് ചേര്‍ന്ന് കിടക്കുന്ന തവാംഗ് ജില്ലയിലും പശ്ചിമ കാമെങ് ജില്ലയിലുമുള്ള മൊന്‍പ വര്‍ഗ്ഗ യുവജോഡി. മഹായണ-ബുദ്ധമതവിശ്വാസികള്‍. ടിബറ്റുകാരുമായി വളരെയേറെ സാമ്യം. തവാങ്ങിലെ ബുദ്ധ മൊണാസ്റ്റ്രിയുമായി ഇവരുടെ ജീവിതവും സംസ്കാരവും ഇഴചേര്‍ന്നുകിടക്കുന്നു.

നിശി - ഇവര്‍ പൂര്‍വ്വകാമെങ്, കുറുംഗ്‌കുമെ, ലോവര്‍സുബന്‍സിരി, അപ്പര്‍ സുബന്‍സിരി ജില്ലകളില്‍ വസിക്കുന്ന പ്രധാന ഗോത്രവര്‍ഗ്ഗക്കാ‍ര്‍ . ഇവര്‍ ധരിച്ചിരിക്കുന്ന പരമ്പരാഗത മാലകള്‍ക്കും മണികള്‍ക്കും ഇവരുടെ ഇടയില്‍ നല്ല വിലയുണ്ട്. പുരുഷന്മാര്‍ മുടി നെറ്റിക്ക്‌ മുകളിലായി ചുരുട്ടി കെട്ടിവെച്ച്‌ അതിനുമുകളില്‍ വേഴാമ്പിലിന്റെ കൊക്കും വെച്ച, ചൂരല്‍ കൊണ്ടുണ്ടാകിയ തൊപ്പി ധരിക്കുന്നു. ഇവരുടെ ഇടയില്‍ ബഹുഭാര്യാത്വം നിലനില്‍ക്കുന്നു. വിവാഹത്തിന്‌ 'പുരുഷധന'മായി നിരവധി കാട്ടുപോത്തുകളും (മിത്തുന്‍) പന്നികളും, മുത്തു/കല്ലുമാലകളും ധനവും വധുവിന്റെ പിതാവിന്‌ നല്‍കേണ്ടതുണ്ട്‌. അങ്ങിനെ 'പുരുഷധനം' നല്‍കാന്‍ കഴിവുള്ളയാള്‍ക്ക്‌ ഒന്നിലധികം വിവാഹം ചെയ്യാം. രസകരമായ കാര്യം, വിവാഹശേഷം സ്ത്രീ സ്വമേധയാ വിട്ടുപോകുകയോ, വേറെ ആളുടെ കൂടെ ഒളിച്ചോടിപോകുകയോ ചെയ്താല്‍, ആദ്യ ഭര്‍ത്താവ്‌ കല്യാണത്തിനും 'പുരുഷധന'ത്തിനുമായി എത്ര ചിലവാക്കിയോ അതും അതിന്റെ കൂടെ പിഴയും സ്ത്രീയുടെ പിതാവോ, അല്ലെങ്കില്‍ പുതിയ ഭര്‍ത്താവോ ആദ്യ ഭര്‍ത്താവിന്‌ നല്‍കേണ്ടതുണ്ട്‌. ഇത്‌ തീരുമാനിക്കുന്നത്‌ ഈ ഗോത്രവര്‍ഗ്ഗക്കാരുടെ ഇടയിലുള്ള പരമ്പരാഗത തര്‍ക്കം തീര്‍ക്കുന്ന (യല്ല്ലുംഗ്‌) ഗോത്രഗ്രാമസമിതിയാണ്.

ഇത് താഗിന്‍ ഗോത്ര ജോഡി. അപ്പര്‍ സുബന്‍സിരി ജില്ലയില്‍ കൂടുതലായി വസിക്കുന്നു. പുരുഷന്റെ കൈയ്യിലുള്ളത് മുളകൊണ്ടുള്ള വില്ല്. അമ്പ് സൂക്ഷിക്കുന്നത് കഴുത്തില്‍ തൂക്കിയിട്ടിരിക്കുന്ന മുളംകുറ്റിയില്‍. എല്ലാ ഗോത്രവര്‍ഗ്ഗക്കാരിലും വേഷധാരണത്തിന്റെ ഭാഗമാണ് വാള്‍. ഇവരുടെ ഇടയില്‍ ബഹുഭാര്യാത്വം ആചാരപരമായി നിലവിലുണ്ട്‌.

ഇത് അപ്പാത്താനി വര്‍ഗ്ഗത്തില്‍ പെട്ട യുവമിഥുനങ്ങള്‍. ലോവര്‍ സുബന്‍സിരി ജില്ലയില്‍ വസിക്കുന്നവര്‍. അപ്പാത്താനി പുരുഷന്മാര്‍ മുടി മുകളില്‍ ചുരുട്ടികെട്ടുകയും മുഖത്ത്‌ പച്ചകുത്തുകയും ചെയ്യുന്നു. സ്ത്രീകള്‍ മൂക്കില്‍ വലിയ ദ്വാരങ്ങള്‍ ഇട്ട്‌ അതില്‍ വലിയ മൂക്കുത്തി ധരിക്കുകയും മുഖത്ത്‌ പച്ചകുത്തുകയും ചെയ്യുന്നു. ഈ രീതികള്‍ രണ്ടു മൂന്ന് ദശാബ്ദങ്ങളായി പിന്തുടരുന്നില്ല.കാലം മാറിയതിനനുസരിച്ച് വസ്ത്രങ്ങള്‍ തുന്നുന്നതില്‍ ചെറിയ മാറ്റങ്ങള്‍ വന്നിട്ടുണ്ട്.

ഇവര്‍ ഗാലോ ജോഡി. പശ്ചിമ സിയാംഗ് , പൂര്‍വ്വ സിയാംഗ്, അപ്പര്‍ സുബന്‍സിരി ജില്ലകളില്‍ വസിക്കുന്നവര്‍.

ഇവര്‍ അദി വര്‍ഗ്ഗ ജോഡി. പൂര്‍വ്വ സിയാംഗ്, പശ്ചിമ സിയാംഗ്, അപ്പര്‍ സിയാംഗ്, ലോവര്‍ ഡിബാംഗ് വാലി ജില്ലകളില്‍ വസിക്കുന്നവര്‍.

നിശി, അപ്പാത്താനി, അദി, ഗാലോ, താഗിന്‍ എന്നീ വര്‍ഗ്ഗക്കാര്‍ അബോത്താനി എന്ന പേരുള്ള പൂര്‍വ്വികന്‍റെ പിന്‍‍തുടര്‍ച്ചക്കാരാണെന്ന് വിശ്വസിക്കുന്നു. ഇവര്‍ പരമ്പരാഗതമായി ഡോന്യി-പോളോ (സൂര്യന്‍-ചന്ദ്രന്‍) യെ ആരാധിച്ചുവരുന്നവരാണ്. (കാലക്രമേണ മതം‍മാറ്റം കൊണ്ട്, ഡോന്യി-പോളോയെ ആരാധിക്കുന്നവര്‍ ഇപ്പോള്‍ കുറവാണ്)

(തുടരും)

കൃഷ്.

മൊന്‍പാ നൃത്തം-2

2007-10-18T15:02:00.000+05:30

മൊന്‍പാ നൃത്തം-2
(ഗോത്രവര്‍ഗ്ഗനൃത്തങ്ങള്‍-5)

ഇത് മൊന്‍പ വര്‍ഗ്ഗക്കാരുടെ വേറോരു പരമ്പരാഗത നൃത്തം.

മഞ്ഞുപെയ്യുന്ന മലമ്പ്രദേശത്ത് വസിക്കുന്ന ഇവരുടെ വസ്ത്രധാരണത്തിലുമുണ്ട് പ്രത്യേകതകള്‍. നല്ല കട്ടിയുള്ള കമ്പിളി വസ്ത്രമാണ് ഇവര്‍ ധരിക്കുന്നത്. സ്ത്രീയും പുരുഷനും കാലില്‍ നീളമുള്ള കാന്‍‌വാസ്/കമ്പിളി ഷൂ ധരിക്കുന്നു.
ഇവരുടെ കൈയ്യിലുള്ളത് സില്‍ക്ക് തുണി (കാത്താ). അതിഥികളെ സ്വീകരിക്കുന്നതിനും ബുദ്ധപ്രതിമയില്‍ ചാര്‍ത്തുന്നതിനും ഇത് ഉപയോഗിക്കുന്നു.
താളത്തിനൊത്ത നൃത്തം. ( ഇന്ത്യയില്‍, ടിബറ്റിനോട് ചേര്‍ന്ന് കിടക്കുന്ന പ്രദേശങ്ങളില്‍ വസിക്കുന്ന ഇവര്‍ ബുദ്ധമതത്തില്‍ വിശ്വസിക്കുന്നവരാണ് )

മൊന്‍പ യുവതി.
മൊന്‍പ യുവാവ്. തലയില്‍ ധരിച്ചിരിക്കുന്നത് യാക്ക് മൃഗത്തിന്റെ കട്ടിയുള്ള രോമം കൊണ്ട് നിര്‍മ്മിച്ച പരമ്പരാഗത തൊപ്പി.

കൃഷ്.

മൊന്‍പ നൃത്തം.

2007-10-15T10:35:00.000+05:30

മൊന്‍പാ നൃത്തം.
(ഗോത്രവര്‍ഗ്ഗനൃത്തങ്ങള്‍ - 4)

ഗോത്രവര്‍ഗ്ഗനൃത്ത പരമ്പരയിലെ അടുത്ത ഒരു നൃത്തരൂപമാണ് മൊന്‍പകള്‍ അവതരിപ്പിക്കുന്ന ഈ നൃത്തം. പരമ്പരാഗത വേഷധാരണങ്ങളോടെ മൊന്‍പ യുവാക്കളും യുവതികളുമാണ് ഇത് അവതരിപ്പിക്കുന്നത്:

ഗിത്താര്‍ പോലുള്ള ഒരു പരമ്പരാഗത സംഗീത ഉപകരണം ഉപയോഗിച്ച് യുവതികളുമായി നൃത്തത്തില്‍.

അതാത് ഇണയെ പുകഴ്ത്തി പാടുന്നു.
സ്നേഹത്തിന്റെ അംഗീകാരമായി യുവാക്കള്‍ക്ക് പാനീയം നല്‍കുന്നു.

കൃഷ്.

നാഗാ നൃത്തം.

2007-09-06T13:56:00.001+05:30

നാഗാ നൃത്തം.

ഗോത്രവര്‍ഗ്ഗ നൃത്തങ്ങള്‍-3.

നാഗാലാന്‍ഡിലെ ഗോത്രവര്‍ഗ്ഗക്കാരുടെ നൃത്തമാണ്‌ നാഗാ ഡാന്‍സ്‌. അരുണാചല്‍ പ്രദേശിന്റെ കിഴക്ക്‌ ഭാഗത്തുള്ള തിറാപ്പ്‌ ജില്ല നാഗാലാന്‍ഡിനോട്‌ ചേര്‍ന്ന് കിടക്കുന്നതുകാരണവും അവിടെയുള്ള നൊക്ട്ടെ ഗോത്രക്കാര്‍ നാഗാക്കാരുടെ ജീവിതരീതിയും സംസ്കാരവുമായി വളരെ സാമ്യമുള്ളതിനാലും ഇവരും നാഗാ നൃത്തം ചെയ്യാറുണ്ട്‌.

സ്കൂള്‍ കുട്ടികള്‍ അവതരിപ്പിച്ച ഒരു നാഗാ നൃത്തത്തിന്റെ ദൃശ്യങ്ങള്‍ ആണ്‌ ഇവിടെ കാണിച്ചിരിക്കുന്നത്‌:

കൃഷ്‌.

സിംഹക്കളി.

2007-08-23T13:12:00.000+05:30

സിംഹക്കളി.
ഗോത്രവര്‍ഗ്ഗ നൃത്തങ്ങള്‍-2.

അരുണാചല്‍ പ്രദേശിലെ മൊമ്പ വര്‍ഗ്ഗക്കാര്‍ തന്നെ അവതരിപ്പിക്കുന്ന മറ്റൊരു കലാരൂപമാണ്‌ ലയണ്‍ ഡാന്‍സ്‌. ഇത്‌ ടിബറ്റന്‍കാരും അവതരിപ്പിക്കാറുണ്ട്‌. തടിയില്‍ കൊത്തിയുണ്ടാകിയ മുഖരൂപവും കമ്പിളിനൂലുകൊണ്ടുള്ള ആവരണവും ധരിച്ച്‌ രണ്ടുപേര്‍ ചേര്‍ന്നാണ്‌ ഒരു സിംഹത്തിനെ അവതരിപ്പിക്കുന്നത്‌.

അവതാരകന്‍ സിംഹങ്ങളെ വരുതിയിലാക്കാന്‍ എന്തൊക്കെയോ മന്ത്രങ്ങള്‍ ചൊല്ലുന്നു.

ഇവിടെ നില്‍ക്കൂ .. ഇവരെല്ലാം നിന്നെയൊന്നു കാണട്ടെ.
ഇനി അഭ്യാസങ്ങള്‍ ഓരോന്നായി കാണിക്കൂ..
ഇതാണ്‌ ഞങ്ങള്‍ സിംഹക്കുട്ടികള്‍.. പക്ഷേ ക്ഷീണിച്ചുപോയി.
പറഞ്ഞാല്‍ അനുസരിക്കൂല്ലാലേ..നിന്നെ ഞാന്‍ ശരിയാക്കാം.
പിന്നെ.. ഇയാളിപ്പം ഒലത്തും. ഒന്ന് കിടക്കാനും സമ്മതിക്കൂലാ..
ആഹാ.. അത്രക്കായോ.
എങ്ങിനെയുണ്ട്‌ ഗ്ലാമര്‍. അപ്പോള്‍ ബൈ.
****

(അടുത്ത പോസ്റ്റില്‍ വേറൊരു കലാരൂപം)
കൃഷ്‌.

ഗോത്രവര്‍ഗ്ഗ നൃത്തങ്ങള്‍-1.

2007-08-21T14:24:00.000+05:30

ഗോത്രവര്‍ഗ്ഗ നൃത്തങ്ങള്‍-1.

സ്വാതന്ത്ര്യ ദിനാഘോഷത്തോടനുഭന്ധിച്ച്‌ ഇറ്റാനഗറില്‍ അവതരിപ്പിച്ച അരുണാചല്‍ പ്രദേശിലെ വിവിധ ഗോത്രവര്‍ഗ്ഗക്കാരുടെ തനതായ നൃത്തകലാരൂപങ്ങള്‍ ഒരു ഫോട്ടോ പോസ്റ്റായി ഇവിടെ അവതരിപ്പിക്കുന്നു:

1. യാക്ക്‌ നൃത്തം.
അരുണാചല്‍ പ്രദേശിലെ തവാങ്ങ്‌, പശ്ചിമകാമെങ്ങ്‌ ജില്ലകളില്‍ വസിക്കുന്ന മൊന്‍പ വര്‍ഗ്ഗക്കരാണ്‌ യാക്ക്‌ നൃത്തം അവതരിപ്പിക്കാറ്‌. കടുത്ത തണുപ്പുള്ള സ്ഥലങ്ങളില്‍ വസിക്കുന്ന ഇവരുടെ ഒരു പ്രധാന മൃഗമാണ്‌ നിറയെ രോമങ്ങളുള്ള കറുത്ത നിറമുള്ള യാക്ക്‌. ഉയര്‍ന്ന തണുപ്പുള്ള മലപ്രദേശങ്ങളിലാണ്‌ യാക്ക്‌ കൂടുതലായി കണ്ടുവരുന്നത്‌.

ബുദ്ധമതവിശ്വാസികളായ മൊന്‍പ വര്‍ഗ്ഗക്കാര്‍ യാക്കിന്റെ കൊഴുപ്പു കൂടിയ പാലും അതില്‍നിന്നുണ്ടാക്കുന്ന നെയ്യും ഉപയോഗിക്കുന്നു. യാക്കിന്റെ രോമം കൊണ്ടുണ്ടാക്കിയ തൊപ്പിയും വസ്ത്രവും മഞ്ഞില്‍നിന്നും കൊടും തണുപ്പില്‍ നിന്നും രക്ഷ നല്‍കുന്നു. യാക്കിന്റെ ഇറച്ചിയും ഇവര്‍ക്ക്‌ പ്രിയമാണ്‌. മഞ്ഞുപെയ്യുന്ന മലകളില്‍ അലയുന്ന യാക്കുകളെ ഉപ്പ്‌ നല്‍കിയാണ്‌ വശത്താക്കുന്നത്‌.യാക്കിന്റെ രോമം കൊണ്ടും കമ്പിളിനൂലുകൊണ്ടും ഉണ്ടാക്കിയ യാക്കിന്റെ ആവരണത്തില്‍ രണ്ട്‌ മൊന്‍പ യുവാക്കളാണ്‌ ഇവിടെ യാക്ക്‌ നൃത്തം അവതരിപ്പിക്കുന്നത്‌.

പെട്ടെന്ന്‌ ചാടാനും മറിയാനും മറ്റും ആവരണത്തിനകത്തുള്ള രണ്ടുപേരും തമ്മില്‍ നല്ല ഏകോപനം ആവശ്യമാണ്‌.
കൊമ്പു കുലുക്കുമ്പോള്‍ ചാട്ടയടിച്ച്‌ യാക്കിനെ വറുതിക്ക്‌ നിര്‍ത്തുന്ന മൊന്‍പ.

യാക്ക്‌ അനുസരിക്കാതെ പിണങ്ങി കിടക്കുകയാ.
കുറച്ച്‌ ഉപ്പ്‌ കൊടുത്തപ്പോള്‍ ആള്‌ ഉഷാറായി.

ഇനി താഴെ വിരിച്ചിരിക്കുന്ന സില്‍ക്ക്‌ തുണി (കാത്താ) കൊമ്പ്‌ കൊണ്ട്‌ എടുക്കണം.
എപ്പടി..കണ്ടോ കൊമ്പുകൊണ്ട്‌ തുണി കോരിയെടുത്തത്‌.
സബാഷ്..
എന്നാല്‍ പിന്നെ കാണാം. ഇപ്പോള്‍ അയാള്‍ ചാടി യാക്കിന്റെ പുറത്തിരിക്കും.

****

അടുത്ത പോസ്റ്റില്‍ വേറൊരു ഗോത്ര നൃത്തരൂപം.
കൃഷ്‌ .

61ാ‍ം സ്വാതന്ത്ര്യ ദിനാഘോഷം - ചിത്രങ്ങള്‍.

2007-08-16T11:00:00.000+05:30

ഇന്ത്യക്ക്‌ സ്വാതന്ത്ര്യം ലഭിച്ചിട്ട്‌ ഷഷ്ഠിപൂര്‍ത്തി കഴിഞ്ഞിരിക്കുന്നു.
ഇറ്റാനഗറില്‍ നടന്ന 61ാ‍ം സ്വാതന്ത്ര്യദിനാഘോഷ ചടങ്ങുകളില്‍ നിന്നും ചില ദൃശ്യങ്ങള്‍:
വന്ദേ മാതരം.
ഭാരത്‌ മാതാ കീ ജയ്‌.

ഝണ്ടാ ഊഞ്ചാ രഹേ ഹമാര,വിജയീ വിശ്വ തിരംഗാ പ്യാരാ.
(എന്നെന്നും നമ്മുടെ ദേശീയ പതാക ഉയരത്തില്‍ പറക്കട്ടെ)

സ്വാതന്ത്ര്യ ദിന അഭിവാദനങ്ങള്‍.

വിവിധ ഗോത്രവര്‍ഗ്ഗ വനിതകളുടെ പരേഡ്‌.
ജാഗ്രതയോടെ വനിതാപോലീസും. തൊട്ടടുത്ത്‌ മൊമ്പാ കലാകാരന്മാര്‍.
ഇനി ബലൂണ്‍ പറത്തിവിട്ടില്ലെന്നു വേണ്ടാ..

(എയിഡ്‌സ്‌ ബോധവല്‍ക്കരണത്തിന്റെ ഭാഗമായി ബലൂണ്‍ പറത്തല്‍).
വി.ഐ.പി. റോസ്റ്റ്രം.

ഇവിടെ മുഴുവന്‍ കളറുകളാ ഭായി.

(പരേഡ്‌ കഴിഞ്ഞിറങ്ങുന്ന സി.ആര്‍.പി.എഫ്‌. ജവാന്മാര്‍)
ഡാ.. നമുക്ക്‌ പ്രൈസ്‌ ഉണ്ട്‌ !! (മാര്‍ച്ച്‌ പാസ്റ്റില്‍ സമ്മാനം അനൗണ്‍സ്‌ ചെയ്തപ്പോള്‍ എന്‍.സി.സി. കാഡറ്റുകള്‍)

ദേ, ഇനി എത്ര നേരം നില്‍ക്കണം. (കലാ പരിപാടികള്‍ക്കായി ഊഴം കാത്തു നില്‍ക്കുന്ന മൊമ്പാ കലാകാരന്മാര്‍)
ഇന്ത്യ സ്വാതന്ത്ര്യത്തിന്റെ 60ാ‍ം വാര്‍ഷികം ആഘോഷിക്കുന്ന ഈ വേളയില്‍ എല്ലാവര്‍ക്കും അഭിവാദനങ്ങളുടെ പൂച്ചെണ്ടുകള്‍.
****

ഗോത്രവര്‍ഗ്ഗ കലാപരിപാടികളുടെ കൂടുതല്‍ ചിത്രങ്ങള്‍ അടുത്ത പോസ്റ്റില്‍. കാത്തിരിക്കുക.
കൃഷ്‌.

വേഴാമ്പല്‍ കൊക്കുവെച്ച തൊപ്പി.

2007-08-06T12:06:00.000+05:30

വേഴാമ്പല്‍ കൊക്കുവെച്ച തൊപ്പി.

ഹോണ്‍ബില്‍ അഥവാ വേഴാമ്പലിനെക്കുറിച്ച്‌ കേള്‍ക്കാത്തവര്‍ ചുരുക്കമാണ്‌. പല വര്‍ഗ്ഗത്തിലുള്ള ഹോണ്‍ബില്ലുകളില്‍ കൂടുതലായി വംശനാശം നേരിട്ടുകൊണ്ടിരിക്കുന്ന ഒന്നാണ്‌ ഗ്രേറ്റ്‌ ഹോണ്‍ബില്ല് അഥവാ ഗ്രേറ്റ്‌ ഇന്ത്യന്‍ ഹോണ്‍ബില്‍ എന്ന ഇനം വേഴാമ്പല്‍. (ശാസ്ത്രനാമം - Buceros bicornis) ഇന്ത്യയിലെ വനപ്രദേശങ്ങളിലും തെക്കുകിഴക്കനേഷ്യയിലെ ചില വനപ്രദേശങ്ങളിലും ഇത്‌ കണ്ടുവരുന്നു. ഏകദേശം 50 വര്‍ഷം വരെ ജീവിക്കുന്നതായി കണ്ടിട്ടുള്ള ഈ പക്ഷികള്‍ കാണാന്‍ വളരെ ഭംഗിയുള്ളവയാണ്‌.

സുന്ദരന്‍ പക്ഷി, ഗ്രേറ്റ് ഇന്ത്യന്‍ ഹോണ്‍ബില്‍.
4 അടിയോളം നീളമുള്ള ഈ പക്ഷിയുടെ ചിറകിന്‌ 60 ഇഞ്ച്‌ ദീര്‍ഘമുണ്ട്‌. ഈ പക്ഷിയുടെ എടുത്തുപറയത്തക്ക പ്രത്യേകത ഇതിന്റെ കൊക്കുകളാണ്‌. നീണ്ട്‌ അല്‍പ്പം വളഞ്ഞ്‌ മഞ്ഞ നിറത്തിലുള്ള കൊക്കുകളും അതിനോട്‌ ചേര്‍ന്ന്‌ തലക്കുമുകളിലായുള്ള 'കിരീട'വും വളരെ ഭംഗിയുള്ളവയാണ്‌.

നിന്‍ ചുണ്ടിനിന്നെന്ത്‌ ഭംഗി,
നിന്‍ അധരത്തിനെന്തു മധുരം.
ചുണ്ടും ചുണ്ടും മന്ത്രിക്കും പ്രണയമന്ത്രങ്ങള്‍.

കാട്ടില്‍ വളരെ ഉയരമുള്ള മരത്തില്‍ വിടവുകളിലോ പൊള്ളയായ ഭാഗത്തോ പൊത്തുണ്ടാക്കി ഭാഗികമായി അടച്ച്‌ അതിനകത്താണ്‌ പെണ്‍പക്ഷി മുട്ടയിടുന്നത്‌. ഒന്നോ രണ്ടോ മുട്ട വിരിയിക്കാനായി 40 ദിവസത്തോളം കൂട്ടിനകത്ത്‌ അടയിരിക്കുന്ന പെണ്‍പക്ഷിക്ക്‌ ആഹാരം ശേഖരിച്ച്‌ എത്തിച്ചുകൊടുക്കുന്ന ചുമതല ആണ്‍പക്ഷിയുടേതാണ്‌.

അരുണാചല്‍പ്രദേശിലെ നിരവധി ഗോത്രവര്‍ഗ്ഗങ്ങളില്‍ ഒരു പ്രധാന ഗോത്രവര്‍ഗ്ഗമായ 'നിശി' വര്‍ഗ്ഗക്കാരുടെ ജീവിതത്തിലും സംസ്കാരത്തിലും അചാരനുഷ്ഠാനങ്ങളിലും ഈ പക്ഷി ഒരു പ്രധാനപങ്ക്‌ വഹിക്കുന്നു. ഈ ഗോത്രത്തിലെ പുരുഷന്മാരെല്ലാം ചൂരല്‍ കൊണ്ട്‌ ഉണ്ടാക്കിയ തൊപ്പി (നിശി വായ്‌മൊഴിയില്‍ - ബൊപ്പിയ) ധരിക്കുന്നു. ഈ തൊപ്പിയുടെ മുകളിലായി ഗ്രേറ്റ്‌ ഹോണ്‍ബില്‍ പക്ഷിയുടെ മഞ്ഞനിറമുള്ള കൊക്ക്‌ (നിശിയില്‍ ഹിബു) വെച്ചുപിടിപ്പിക്കുന്നു. തൊപ്പിയുടെ പിറകിലായി പക്ഷിയുടെ ഭംഗിയുള്ള നീണ്ട തൂവലുകല്‍ പിടിപ്പിച്ചിരിക്കും. വളരെ ശ്രദ്ധയോടും ഭംഗിയോടും ഉണ്ടാക്കുന്ന ഈ തൊപ്പിയില്‍ ഏറ്റവും വലുതും സുന്ദരവുമായ ഹോണ്‍ബില്‍ കൊക്കുകള്‍ ഘടിപ്പിച്ച്‌ മോടിപിടിപ്പിക്കാന്‍ ഇവര്‍ പ്രത്യേകം ശ്രദ്ധിക്കുന്നു.

ഹോണ്‍ബില്ലിന്റെ കൊക്കും തൂവലും വെച്ചുപിടിപ്പിച്ച തൊപ്പിയണിഞ്ഞ നിശി ഗോത്രവര്‍ഗ്ഗക്കാര്‍.

ഈ തൊപ്പിധാരണം ഒഴിച്ചുകൂടാനാവാത്തതും, അവരുടെ സാമൂഹ്യവ്യവസ്ഥിതിയുടെ ഭാഗവും, ഓരോരുത്തരുടേയും വ്യക്തിത്വം വിളിച്ചോതുന്നതുമാണ്‌. ഈ തൊപ്പി ധരിച്ചേ ഇവര്‍ ഏതൊരു ആചാരങ്ങളിലും ആഘോഷങ്ങളിലും ചടങ്ങുകളിലും പങ്കെടുക്കുകയുള്ളൂ. ഭംഗിയുള്ള പക്ഷിതൂവല്‍ ചേര്‍ത്ത്‌ വെച്ച്‌ ഉണ്ടാക്കുന്ന വിശറിയും ഇവര്‍ കൊണ്ടുനടക്കുന്നു.ഇവരുടെ സംസ്കാരങ്ങളിലും ആചാരങ്ങളിലും ഗോത്രവര്‍ഗ്ഗ കഥകളിലും വലിയ സ്ഥാനമുള്ള ഈ പക്ഷിയെ ഇവര്‍ വളരെ ബഹുമാനിക്കുന്നു. അരുണാചല്‍ പ്രദേശില്‍ നിറയെ കണ്ടുവരുന്ന ഈ ഹോണ്‍ബില്‍ പക്ഷി (പോയ്യ്‌ എന്ന്‌ നിശിയില്‍) സംസ്ഥാനത്തിന്റെ ദേശീയ പക്ഷി കൂടിയാണ്‌. സംസ്ഥാന സര്‍ക്കാരിന്റെ ചിഹ്നത്തിലും മറ്റു വകുപ്പുകളുടെ ചിഹ്നത്തിലും ഹോണ്‍ബില്ലിന്‌ തന്നെ പ്രാധാന്യം.പക്ഷേ, ഹോണ്‍ബില്ലിന്റെ കൊക്കിനും തൂവലിനും വേണ്ടി ഈ പക്ഷിയെ നിരന്തരം വേട്ടയാടിയതുകൊണ്ട്‌ അതിന്റെ ജനസംഖ്യ കുറഞ്ഞ്‌ വംശനാശത്തിലേക്ക്‌ നീങ്ങുകയായിരുന്നു. കൂടാതെ ഹോണ്‍ബില്ലിന്റെ എണ്ണക്ക്‌ (ഒഫ്‌) ഔഷധഗുണമുണ്ടെന്നും ആര്‍ത്രൈറ്റിസ്‌ രോഗങ്ങള്‍ ശമിപ്പിക്കുന്നതിന്‌ ഇത്‌ സഹായകമാണെന്നുള്ള വിശ്വാസം കാരണവും ഈ പക്ഷി വേട്ടയാടപ്പെടുന്നു. ഈ പക്ഷിയുടെ കൊക്കും തൂവലും നിശി ഗോത്രവര്‍ഗ്ഗക്കാരുടെ സംസ്കാരവും ആചാരാനുഷ്ഠാനങ്ങളുമായി ബന്ധപ്പെട്ടുകിടക്കുന്നതുകൊണ്ട്‌ ഇവയെ വേട്ടയാടുന്നത്‌ തടയല്‍ ഫലപ്രദമാവുന്നില്ലായിരുന്നു.

ആധുനികത വന്നാലും പാരമ്പര്യം മറക്കരുതല്ലോ.

അബോ-താനിയുടെ പിന്‍തുടര്‍ച്ചക്കാരായ ഈ വര്‍ഗ്ഗക്കാര്‍ പരമ്പരാഗതമായി ദോണി-പോളോ (സൂര്യ-ചന്ദ്രന്‍)യെ ആരാധിച്ചുവരുന്നു. (ഇവരില്‍ നല്ലൊരു ഭാഗവും അടുത്തകാലത്തായി കൃസ്തുമതത്തിലേക്ക്‌ മതപരിവര്‍ത്തനം ചെയ്തവരാണ്‌). ഇവരുടെ വിശ്വാസങ്ങളേയും പരമ്പരാഗത തൊപ്പിയണിയലിനേയും സാരമായി ബാധിക്കാതെതന്നെ എങ്ങിനെ വംശനാശം നേരിട്ടുകൊണ്ടിരിക്കുന്ന ഹോണ്‍ബില്ലിനെ രക്ഷിക്കാന്‍ കഴിയും. ഒരു നിശി തൊപ്പിയുണ്ടാക്കണമെങ്കില്‍ ഒരു വലിയ ഹോണ്‍ബില്‍ വേട്ടയാടപ്പെടും, തീര്‍ച്ച.

തൊപ്പിയണിഞ്ഞ നിശി യുവാക്കള്‍.

അങ്ങിനെയാണ്‌ 3-4 വര്‍ഷം മുമ്പ്‌ വനം-വന്യജീവിവകുപ്പും ഇന്ത്യയിലെ ലോകവന്യജീവി സംഘടനയും ചേര്‍ന്ന്‌, ഹോണ്‍ബില്ലിന്റെ കൊക്കിന്‌ പകരമായി അതേ വലിപ്പവും, നിറവും, ആകാരവുമുള്ള ഫൈബര്‍ഗ്ലാസ്സ്‌ കൊണ്ട്‌ നിര്‍മ്മിച്ച കൊക്കുകള്‍ തികച്ചും സൗജന്യമായി നിശി ഗോത്രവര്‍ഗ്ഗക്കാര്‍ക്കിടയില്‍ നല്‍കി തുടങ്ങിയത്‌. ആദ്യമൊക്കെ കടുത്ത എതിര്‍പ്പുകളും ശങ്കയുമുണ്ടായിരുന്നെങ്കിലും ക്രമേണ മിക്കവരും അവരവരുടെ തൊപ്പിയിലെ യഥാര്‍ത്ഥ ഹോണ്‍ബില്‍ കൊക്കുകള്‍ ഇളക്കികൊടുത്ത്‌ പകരം ഫൈബര്‍ കൊക്കുകള്‍ വെച്ച്‌ ധരിച്ചുതുടങ്ങി.
കരകൗശല കേന്ദ്രങ്ങള്‍ വില്‍പ്പനക്കുവെച്ചിരിക്കുന്ന ഫൈബര്‍ കൊക്കുകള്‍ പിടിപ്പിച്ച നിശി തൊപ്പികള്‍.

ഇതിനുപുറമെവന്യജീവി-പക്ഷിസങ്കേത-സംരക്ഷിതവനത്തിന്‌ അടുത്തുള്ള ഗ്രാമങ്ങളിലും ഈ പക്ഷി വേട്ട തടയാന്‍ ഇവരെ തന്നെ അംഗങ്ങളായി കമ്മിറ്റിയും രൂപീകരിച്ചു. ആരെങ്കിലും ഈ പക്ഷിയെ വേട്ടയാടിയതായി കണ്ടാല്‍ നിശ്ചിത പിഴയും ഈടാക്കും. അതിനുപുറമെ കരകൗശല കേന്ദ്രങ്ങള്‍ മുഖേനെ ഫൈബര്‍ കൊക്ക്‌ പിടിപ്പിച്ച തൊപ്പികള്‍ ഉണ്ടാക്കി വില്‍പ്പനയും നടത്തുന്നുണ്ട്‌.

ഇതെല്ലാകൊണ്ടുതന്നെ ഈ പ്രദേശങ്ങളില്‍ വംശനാശം നേരിട്ടുകൊണ്ടിരിക്കുന്ന ഹോണ്‍ബില്‍ പക്ഷിയുടെ സംരക്ഷണ ശ്രമങ്ങള്‍ക്ക്‌ കുറച്ചെങ്കിലും നല്ല ഫലമാണ്‌ കിട്ടിയിരിക്കുന്നത്‌.
.......

"പോകൂ പ്രിയപ്പെട്ട പക്ഷി
കിനാവിന്റെ നീലിച്ച ചില്ലയില്‍നിന്നും
നിനക്കായി വേടന്റെ കൂരമ്പൊരുങ്ങുന്നതിന്‍മുമ്പ്‌..."

(ബാലചന്ദ്രന്‍ ചുള്ളിക്കാടിന്റെ വരികളില്‍ നിന്നും)

അല്ലെങ്കില്‍ വരും തലമുറ നിന്നെ ഇങ്ങനെ കാണേണ്ടിവരും.
(തടിയില്‍ തീര്‍ത്ത ഹോണ്‍ബില്‍ ശില്‍പ്പം.)

***

(വാല്‍ക്കഷണം:: ഫൈബര്‍ഗ്ലാസ്സ്‌ കൊണ്ട്‌ കുറെ ആനക്കൊമ്പുകള്‍ നിര്‍മ്മിച്ച്‌ കാട്ടുകള്ളന്‍ വീരപ്പന്‌ നല്‍കിയിരുന്നുവെങ്കില്‍ (കര്‍ണ്ണാടക-തമിഴ്‌നാട്‌-കേരള) കാട്ടിലെ എത്ര കൊമ്പനാനകള്‍ വീരപ്പന്റെ വെടിയേല്‍ക്കാതെ രക്ഷപ്പെട്ടേനെ !!! വെടിയേറ്റ ആനകളും പോയി, വെടിയേറ്റ്‌ വീരപ്പനും പോയി. ഇനി പറഞ്ഞിട്ടെന്താ കാര്യം,ല്ലേ !)

കൃഷ്‌ krish