3-day furlough request ni CGMA, ibinasura

bombo_junmendoza@bomboradyo.info (Jun Mendoza) — Mon, 27 Feb 2012 09:49:34 +0000

Si Ginang Aleli Arroyo umano ang tatanggap ng Philippine flag mula sa House of Representatives sa gagawing necrological service para sa namayapang si Negros Occidental Rep. Ignacio Arroyo.

Inihayag ni Atty. Lorna Kapunan na bilang legal wife umano, karapatan ng kaniyang kliyente na siyang tatanggap ng bandila ng Pilipinas mula sa liderato ng Kamara.

Maalala na iginawad ng korte sa London kay Grace Ibuna, ang live-in partner ni Cong. Iggy, ang karapatan para sa pagpapa-uwi sa labi nito.

Ayon kay Kapunan, nakatakda umanong dumating ang labi ni Arroyo mula London alas-10:00 ng gabi ng Miyerkules, kung saan kaagad itong dadalhin sa Arlington Chapel. Mula sa punerarya, dadalhin ang labi ng kongresista sa kaniyang ancestral home sa La Vista Subdivision kina-umagahan hanggang sa araw ng Sabado.

Itinakda naman aniya ang necrological service sa mababang kapulungan sa Lunes.

Samantala, ipinagpasalamat naman ng dating pangulo at ngayon ay Pampanga Rep. Gloria Macapagal Arroyo sa pagpayag ng Pasay-Regional Trial Court na makadalaw ito sa burol ng namayapang bayaw.

Alinsunod sa court ruling, makakalabas ang dating pangulo ng Veterans Memorial Medical Center sa March 1, simula alas-8:00 ng umaga hanggang alas-4:00 ng hapon.

Sa panayam ng Bombo Radyo kay Atty. Ferdinand Topacio, inihayag ng abogado na bagama’t tatlong araw ang hinihingi nilang palugit sa korte, pero nagpapasalamat na rin umano sila sa desisyon ni Pasay Judge Jesus Mupas.

"Iyon lamang po ang ibinigay ng korte. Pero magkagayunman, atin pong ginagalang at kami po ay nagpapasalamat sa hukuman. Susundin po namin iyan," ani Topacio.

Mosyon na pag-interrogate kay Sereno, binawi

bombo_junmendoza@bomboradyo.info (Jun Mendoza) — Mon, 27 Feb 2012 06:15:40 +0000

Binawi na umano ni Senator-Judge Antonio Trillanes ang nauna nitong mosyon na padalhan ng written interrogatories si Associate Justice Maria Lourdes Sereno upang patunayan ang dissenting opinion o expose nito kaugnay nang umano'y nasilip na katiwalian laban kay Chief Justice Renato Corona.

Sa pagpapatuloy ng impeachment trial sa Senado, inanunsyo ni Presiding-Judge Juan Ponce Enrile na inatras na ni Trillanes ang nasabing kahilingan.

Nabatid na una nang tinanggihan ng pangulo ng Senado ang paglalabas ng subpoena kay Sereno at iba pang justices ng Supreme Court bilang pagkilala sa kanila bilang co-equal branch of government.

Naglabas din ng circular ang Supreme Court na nagbabawal na isapubliko ang mga kaganapan sa en banc session nito.

Magugunitang itinuring na hearsay ng impeachment court ang naging testimonya ni Justice Sec. Leila De Lima dahil wala itong direktang alam sa naging dissenting opinion ni Sereno.

Aminado naman si Sen. Miriam Defensor-Santiago na malaki ang maitutulong ni Sereno sa prosekusyon sa oras na tumistigo ito sa paglilitis.

"The testimony of the Justice secretary is hearsay and is inadmissible. She is not testifying on her own personal knowledge, but her testimony is based on the dissenting opinion of Justice Serreno. So to answer you hypothetical question, if the Justice herself testifies, then that will of course, bolster the case of the prosecution," ayon kay Santiago.

Magugunitang isa si Sereno sa komontra sa inilabas na temporary restraining order (TRO) ng Korte Suprema laban sa watch list order (WHO) kay dating Pangulong Gloria Macapagal-Arroyo noong nagbabalak itong pagpapagamot sa abroad sa harap ng nilulutong kaso sa bansa.

SC: Bar exam result, ilalabas sa Miyerkules

brp_news@bomboradyo.com (Elmar Acol) — Mon, 27 Feb 2012 04:56:32 +0000

Inanunsyo ngayon ng Korte Suprema ang paglalabas ng resulta ng Bar examination sa darating na araw ng Miyerkules, Pebrero 29, 2012.

Sa pahayag ni Court Administrator at Supreme Court (SC) spokesman Justice Jose Midas Marquez, ang resulta ng Bar exams ay isasapubliko dakong alas-2:00 ng hapon.

Nabatid na ito ang pinakamaagang pagsasapubliko ng resulta ng pagsusulit sa abogasya, makaraang palitan ang format ang eksaminasyon mula sa essay type patungong multiple choice.

Wika ni Marquez, noong mga nakaraang taon ay inilalabas ang Bar exam results tuwing buwan ng Marso o bago isakatuparan ang summer session ng mga mahistrado sa Baguio City.

Umabot naman sa 6,200 na law students ang kumuha ng Bar exams noong 2011 na isinagawa sa University of Santo Tomas (UST) sa España, Maynila.

Kulang lang sila sa ebidensya, testigo - defense

brp_news@bomboradyo.com (Elmar Acol) — Mon, 27 Feb 2012 04:54:03 +0000

Pagkatapos kumpirmahin ng prosecution panel na nais na lamang nilang tapusin sa loob ng anim na araw ang presentasyon sa impeachment trial laban kay Chief Justice Renato Corona agad naman na tumugon ang panig ng depensa na welcome sa kanila ang nasabing plano.

Ayon kay defense spokesman Atty. Tranquil Salvador, mas makakabuti rin para sa kanila ang nasabing plano upang hindi na umano matagalan pa ang pagtalakay sa kinakaharap na reklamo ng punong mahistrado.

Hindi rin maiwasan na magkomento ni Salvador na maaaring wala ng sapat na ebidensiya at testigo ang prosekusyon kaya't hindi na lamang nila tatapusin ang walong mga artikulo na ginawang basehan na sinasabing dahilan para mapatalsik si Corona.

Dagdag pa ng defense spokesman, maaaring boluntaryong tumestigo rin si Associate Justice Ma. Lourdes Sereno at kanilang ipa-authenticate ang dissenting opinion umano na ginawang basehan kamakailan sa pagtestigo ni Justice Sec. Leila de Lima.

Pero mahihirapang imbitahan sa witness stand si Sereno.

Ito'y dahil kailangan munang isaalang-alang ni Sereno ang magiging approval ng Supreme Court en banc.

Ani Salvador, tanging ang Korte Suprema ang maaaring makapag-waive ng karapatan nito na makapagtestigo.

Makakapagtestigo lamang si Sereno sa labas ng kaniyang tinawag na judicial privilege.

Inihayag naman ni Marikina Rep. Miro Quimbo, inaaasahang isasalang mamaya ang attending physician ni dating Pangulong Gloria Macapagal-Arroyo na si Dr. Juliet Gopez-Cervantes.

Ayon kay Quimbo, dati nang nakapagtestigo si Cervantes sa Pasay City Regional Trial Court (RTC) kaya wala silang nakikitang problema sa pagsalang nito sa witness stand ng impeachment tribunal at sa halip ay umaasa sila ng panibagong pasabog.

Magugunitang sinabi ng doktor noon na hindi naman maituturing na napakalubhang kondisyon ang kalusugan ni Arroyo noong nagbigay ng kautusan ang Korte Suprema na payagan ang mga ito na makalabas ng bansa.

Sa paraang ito, maipapakita umano ng prosekusyon na ginamitan ng impluwensya ni Corona ang pag-isyu ng TRO para lamang paboran ang nag-appoint sa kaniya na si ginang Arroyo.

Bukod sa attending physician ng dating pangulo, nais din ng prosekusyon na maiharap bilang testigo ang ilang tauhan ng media, pati na ang kopya ng telecast sa tangkang pag-alis ng mag-asawang Arroyo noong nakaraang taon.

Samantala, suportado ng Palasyo ang desisyon ng prosecution panel na tapusin ang presentasyon ng ebidensya sa loob ng anim na araw o trial days.

Sinabi ngayon ni Presidential Spokesman Edwin Lacierda, kumpiyansa silang sapat na ang naiharap na ebidensya para ma-convict ang punong mahistrado.

Para kay Lacierda, napatunayan sa Article 2 na hindi na dapat manatili sa puwesto si Corona matapos ang kabiguang ideklara at isapubliko ang kanyang statement of assets, liabilities and net worth (SALN).

Pero bahala na umano ang prosekusyon kung ano ang kanilang diskarte sa impeachment trial.

“Article 2 sufficiently laid down the basis for conviction,” ani Lacierda.

Meryl Streep at Jean Dujardin, Oscar best actors

bombo_leizl@bomboradyo.info (Leizl Galan) — Mon, 27 Feb 2012 04:43:22 +0000

HOLLYWOOD - Big winner sa katatapos na 84th Oscar Awards ang black-and-white movie na "The Artist."

Ang pelikulang ito ni Michel Hazanavicius ang kinilalang Best Film sa prestihiyosong awards ceremony.

Sa kabuuan, limang Oscar trophy ang naiuwi ng "The Artist" na kinabibilangan ng Best Film, Best Actor, Best Director, Best in Original Score at Best in Costume Design.

Ang French-American romantic comedy na "The Artist" ay siya ring kinilalang Best Picture sa British Academy Film Awards (BAFTA), Golden Globe Awards sa kategoryang musical-comedy.

Unang pagkakataon ito sa kasaysayan ng Oscars na kinilalang best picture ang pelikula tungkol sa "movie-making."

Humakot din ng parangal ang pelikulang "Hugo" na nag-uwi ng limang Oscar trophies.

Nasungkit ng pelikula ni Martin Scorsese ang Best in Cinematography, Best in Art Direction, Best in Sound Mixing, Best in Sound Editing at Best in Visual Effects.

Mistulang na-sweep ng aktor na si Jean Dujardin ang parangal sa awards season nang muling kilalanin bilang best actor.

Ang pagganap ni Dujardin sa pelikulang "The Artist" ay nagbigay sa aktor ng kauna-unahang Oscar trophy.

Napag-alaman na si Dujardin din ang tinanghal na best actor sa Golden Globe, BAFTA, Cannes Film Festival at Screen Actors Guild Award.

Iginawad naman kay Meryl Streep ang kaniyang pangatlong Oscar trophy nang kilalanin ito bilang Best Actress sa kaniyang pagganap bilang si dating British Prime Minister Margaret Tatcher sa "The Iron Lady."

Sa kaniyang speech, maluha-luha si Streep na 17 beses nang nominado sa Academy Awards, gayunpaman hindi pa rin nabawasan ang excitement nito at inunang pasalamatan ang kaniyang mister.

Ang pagganap ni Streep bilang Tatcher ay nagbigay din sa kaniya ng best actress award sa Golden Globe Award at BAFTA.

Samantala, gumawa ng kasaysayan ang 82-anyos na si Chistopher Plummer bilang pinakamatandang Oscar awardee nang kilalaning Best Supporting Actor para sa "The Beginners."

Maluha-luha ang aktor nang tanggapin ang award at nagbirong bakit ngayon lang ito nakatanggap ng Oscar trophy gayong simula nang isinilang daw ay nagpa-practice na siya ng kaniyang thank you speech sa Oscars.

Na-sweep naman ni Octavia Spencer ang awards season nang tanghaling Best Supporting Actress para sa "The Help" kung saan kinilala rin ng Golden Globe at Screen Actors Guild Award ang kaniyang pagganap.

Kinilala bilang Best Foreign Language Film ang "A Separation" mula sa Iran.

Ito ang unang pelikula mula sa Iran na ginawaran ng Oscar award kaya umani ito ng standing ovation mula sa audience.

Bago igawad ang mga major awards, inalala at binigyang pugay ang mga naging kasapi ng industriya, mula writers hanggang producers, na pumanaw na at isa na rito si Whitney Houston.

Wala ring kupas ang comedian na si Billy Crystal na sa ika-siyam na pagkakataon ay nag-host ng Oscar Awards.

Kakaibang opening ang ibinigay ni Crystal kung saan may halikan pa sila ni George Clooney at idinaan sa musical ang kaniyang opening spiel.

Una kanina, rumampa ang mga celebrities sa red carpet kung saan mistulang may fashion off sa pabonggahan ng mga gown.

Lutang ang mga red, white, blue, gold at neutral color na gowns ng mga celebrities.

Ang mga bigating pangalan na kinuha ng Academy of Motion Picture, Arts and Sciences na maging award presenters ay sina Angelina Jolie, Ben Stiller, Bradley Cooper, Cameron Diaz, Christian Bale, Colin Firth, Emma Stone, Gwyneth Paltrow, Jennifer Lopez, Meryl Streep, Michael Douglas, Morgan Freeman, Owen Wilson, Natalie Portman, Penelope Cruz, Sandra Bullock, Tom Cruise, Will Ferrell, Tom Hanks at iba pa.

Narito ang mga nanalo sa 84th Oscar Awards:

Best Film - "The Artist"

Best Actor - Jean Dujardin ("The Artist")

Best Actress - Meryl Streep ("The Iron Lady")

Best Supporting Actor - Christopher Plummer ("The Beginners")

Best Supporting Actress - Octavia Spencer ("The Help")

Best in Cinematography - "Hugo"

Best in Art Direction - "Hugo"

Best in Costume Design - "The Artist"

Best in Make-up - "The Iron Lady"

Best Foreign Language Film - "A Separation" (Iran)

Best in Film Editing - "A Girl with a Dragon Tattoo"

Best Director - Michel Hazanavicius ("The Artist")

Best in Sound Editing - "Hugo"

Best in Sound Mixing - "Hugo"

Best Documentary Feature - "Undefeated"

Best Animated Feature Film - "Rango"

Best in Visual Effects - "Hugo"

Best in Original Score - "The Artist"

Best Original Music - "Man or Muppet" (The Muppets

Best Adapted Screenplay - "The Descendants"

Best Original Screenplay - "Midnight in Paris"

Best Live Action Short Film - "The Shore"

Best Documentary Feature - "Saving Face"

Best Animated Short Film - "The Fantastic Flying Books of Mr. Morris Lessmore

Bryant at West 'wagi vs East sa All-Star game

brp_news@bomboradyo.com (Elmar Acol) — Mon, 27 Feb 2012 04:13:03 +0000

ORLANDO, Florida - Muntik pang masilat ang team ni Kobe Bryant ng Western Conference team ng karibal na Eastern Conference matapos na magwagi sa katatapos lamang na All-Star Game na ginanap sa Orlando Florida, 152-149.

Napigilan ng West ang tangkang comeback ng East sa pangunguna ni LeBron James.

Nakalapit pa ng husto ang East sa dying seconds ng laro mula sa 21-point deficit subalit kinapos ang koponan ni James.

Si Bryant ay nagpasok ng 27 points para tanghaling greatest scoring leader sa All-Star games.

Napili naman si Kevin Durant bilang Most Valuable Player (MVP) na umiskor ng 36 points, seven rebounds, three assists at three steals.

Si Lebron ay kumamada ng kabuuang 36 points, habang nagtala naman ang kanyang kapwa Miami Heat star na si Dwayne Wade ng triple double.

Noong nakaraang taon ay nanalo rin ang West laban sa East, 148-143.

Una rito binasag ni Bryant ang record ni Michael Jordan sa All-Star games.

Binura ni Bryant ang record ni Jordan na may kabuuang 262 points sa pamamagitan ng ginawa niyang dunk habang nasa 4:57 minuto na lamang ang nalalabi sa third quarter.

Nagawa ni Bryant ang record sa kanyang ika-20 puntos sa laro.

Si Bryant na siyang may hawak ng record-tying na apat na All-Star Most Valuable Player awards, ay sinimulan ang laro kanina na meron ng natipon na 244 points sa 12 All-Star games na kanyang nilahukan.

Samantalang si Jordan ay naglaro sa 13 All-Star games.

Nalampasan na rin ni Bryant ang naitalang record nina Oscar Robertson na may kabuuang 246 points at Kareem Abdul-Jabbar na may hawak na 251 total points.

Bago ito dumugo ang ilong ni Kobe makaraang tamaan siya ng hard foul ni Dwyane Wade ng Miami.

Mga senator-judges, hati sa isyu kay Sereno

brp_news@bomboradyo.com (Elmar Acol) — Sun, 26 Feb 2012 23:17:39 +0000

Muling nakita ang hindi pagkakaisa ng mga senator-judges sa isyu kung dapat bang tumestigo si Supreme Court Associate Justice Ma. Lourdes Sereno sa impeachment trial kay Chief Justice Renato Corona.

Sa panig ni Sen. Miriam Defensor-Santiago nagbabala ito na maaaring magdulot ng masamang epekto sa Korte Suprema ang pagharap sa witness stand ni Sereno.

Ang pangamba ni Santiago, kahit pa boluntaryong humarap si Sereno sa impeachment court ay maaring magiging dahilan ito ng pagbabangayan sa publiko ng mga mahistrado ng kataastaasang hukuman dahil sa posibilidad na maaaring kumuha rin ang depensa ng iba pang mahistrado para kontrahin ang pahayag ng testigo ng prosekusyon.

Pero para kay Sen. Kiko Pangilinan, kailangan ni Sereno na humarap sa impeachment court upang maresolba na ang itinuturing na hearsay statements ni Justie Sec. Leila De Lima kaugnay sa dissenting opinion ng mahistrado sa pagpabor ng Korte Suprema sa travel ban kay dating Pangulong Gloria Macapagal-Arroyo.

Kinontra naman ni Pangilinan ang sinasabing pagharang ng Korte Suprema sa pagtestigo ni Serenao sa impeachment court bunsod ng usapin ng 'judicial privilege' na aniya'y kung mangyayari ito lumalabas na nakikiaalam pa rin ang kataastaasan hukuman sa tungkulin ng Senado na resolbahin ang kaso ni Corona.

Una na ring isinulong ni Sen. Antonio Trillanes ang pagpapadala ng written interrogatories kay Sereno upang ipaliwanag ang kanyang kontrobersiyal na dissenting opinion.

Pero maging si Sente President Juan Ponce Enrile ay nagdadalang isip sa legalidad ng mungkahi ni Trillanes kaya't isang caucus ang itinakda ng mga senador-judges ngayong umaga para pag-usapan ang nakabinbin na isyu.

36 OFWs mula Syria, dumating na sa bansa

epagac2@yahoo.com.ph (Jofrey Cagape) — Sun, 26 Feb 2012 14:33:05 +0000

Panibagong batch ng mga overseas Filipino workers (OFWs) na umaabot sa 36 ang duamting kahapon ng hapon hanggang kagabi lulan ng Emirates Airlines flight EK 332 at Emirates Airlines flight EK 334 sa Terminal 1 ng Ninoy Aquino International Airport (NAIA) mula sa magulong bansa na Syria.

Ayon kay Department of Foreign Affairs (DFA) spokesman Raul Hernandez, pinakahuling dumating ang 16 na mga Pinoy workers na sinalubong ng OWWA.

Napag-alaman na una nang dumating ang 20 Pinoy workers.

Tiniyak naman ng OWWA ang pagbibigay ng kaukulang tulong habang nasa Metro Manila ang mga ito gayundin sa kanilang mga kakailanganin sa pagbalik sa kani-kanilang mga probinsiya.

Sa ngayon nasa 1,009 OFWs na ang na-repatriate ng gobyerno mula sa nasabing bansa.

Ang pagpapauwi sa Pilipinas sa mga OFWs ay kasunod na rin ng mandatory repatriation na utos ng gobyerno matapos itaas sa level 4 ang alerto sa Syria dahil sa kaguluhan.

Ang mga naunang OFWs na nakabalik sa bansa ay isinailalim din sa stress debriefing maliban sa tulong pinansiyal na kanilang tinanggap.

Palasyo, mas 'concern' sa basura sa INC rally

bombo_junmendoza@bomboradyo.info (Jun Mendoza) — Sun, 26 Feb 2012 07:20:22 +0000

Patuloy na dumidistansiya ang Aquino administration sa nalalapit na "grand rally" ng religious group na Iglesia Ni Cristo (INC) sa Pebrero 28, bilang pag-suporta umano kay Supreme Court Chief Justice Renato Corona.

Tumanggi ring magkomento ngayon si deputy presidential spokesperson Abigail Valte sa report na walang balak ang Catholic charismatic group na El Shaddai na sumama sa nabanggit na pagtitipon.

Una na ring sinabi ng Pangulong Benigno Aquino III na wala naman siyang ginawang masama para mabahala sa nasabing pagtitipon ng maimpluwensyang INC.

Ayon sa Pangulo, sinasamantala lamang ang nasabing religious activity na maaring bahagi ng "media and spin war".

"The (Feb. 28 gathering) is a regular religious activity that is being given political color... Many people are really opportunists. This (pro-Corona scenario) is probably a media war and a spin war," ayon sa naunang pahayag ng Pangulo.

Sa panig ni Valte, inihayag nito na mas "concern" pa umano ang Palasyo sa kalat at basurang iiiwan ng mga magtutungo sa nasabing programa.

“Sana magtulung-tulong tayo, inabutan natin malinis ang paligid sana pag-alis natin malinis din," paalala ni Valte.

Sa darating na Martes, gaganapin ang religious gathering ng INC sa Luneta Park, sa lungsod ng Maynila.

Una ng kumalat ang mga espekulasyon na ang nasbaing pagtitipon ay bilang pagsuporta umano kay Corona na ngayon ay nahaharap sa impeachment trial.

Bagong SALN form, OK na sa Malacañang

bombo_junmendoza@bomboradyo.info (Jun Mendoza) — Sun, 26 Feb 2012 07:05:34 +0000

Hindi umano pursigido ang Malacañang sa nauna nitong pahayag na rerepasuhin ang kontrobersiyal na bagong format ng Statement of Assets Liabilities and Net Worth (SALN) para sa mga government officials.

Sa isang pahayag, sinabi ni deputy presidential spokesperson Abigail Valte na batay aniya sa mga karanasan, wala umano sa design ng form ang problema kundi sa paraan ng paghahain ng SALN ng mga kawani ng pamahalaan.

Binanggit pa ng kalihim na malimit nagkakaroon ng problema ang isang empleyado o opisyal ng gobyerno dahil sa hindi tapat na pagdideklara ng kaniyang mga ari-arian.

"Siguro in the past we’ve seen in our experience hindi ang form ang problema, ang nagfi-fill out ang nagiging problema pagdating sa SALN,” ayon kay Valte sa isang panayam.

Magugunitang pumalag ang ilang kongresista sa nasabing bagong SALN format dahil sa paniwalang labag ito sa Konstitusyon at maaring ma-expose ang mga government employees sa harassment.

Nagbabala rin ang mga kongresista na maglabas ng resolusyon na aatas sa CSC na bawiin ang nasabing desisyon.

Pero iginiit naman ni Civil Service Commission chairman Francisco Duque III, may pinagbabatayang batas ang desisyon ng CSC en banc at kanila itong ipatutupad hangga’t walang pagtutol o pagharang mula sa korte.

Top Stories