Bebaakweekly.blogspot

مالیگاؤں: مہنگائی سے بدحال عوام کو اب سرکاری راشن کے گیہوں کیلئے بھی ترسنا پڑ رہا ہے!

noreply@blogger.com (BEBAK URDU NEWS ) — Wed, 28 Oct 2026 18:00:52 +0000

مالیگاؤں: مہنگائی سے بدحال عوام کو اب سرکاری راشن کے گیہوں کیلئے بھی ترسنا پڑ رہا ہے!

راشن دکانوں سے گیہوں غائب، بلیک مارکیٹنگ کی چہ میگوئیاں، کیا غریبوں کے حصے کا اناج بازار میں فروخت ہو رہا ہے؟

ایم ایل اے مفتی اسماعیل سمیت اسلام پارٹی، سماجوادی،کانگریس اور ایس ڈی پی آئی سے عوام کا سوال،بنیادی مسائل پر کب ہوگی ٹھوس کارروائی؟

مالیگاؤں : 28 اکتوبر (بیباک نیوز اپڈیٹ)مہنگائی کی مسلسل مار جھیل رہی مالیگاؤں کی عوام اب سرکاری راشن کے اناج کیلئے بھی پریشان دکھائی دے رہی ہے۔ پہلے ہی بازار میں گیہوں، چاول، دال اور دیگر ضروری اشیائے خوردونوش کی بڑھتی ہوئی قیمتوں نے غریب اور متوسط طبقے کے گھریلو بجٹ کو بری طرح متاثر کر رکھا ہے،ایسے میں سرکاری راشن دکانوں سے گیہوں دستیاب نہ ہونے کی شکایات نے عوام کی مشکلات میں مزید اضافہ کردیا ہے۔سوال یہ ہے کہ جب غریب عوام کو سستے داموں اناج فراہم کرنا حکومت کی ذمہ داری ہے تو پھر راشن دکانوں پر گیہوں کی عدم دستیابی کی وجہ کیا ہے؟شہر میں یہ بات بھی زیرِ بحث ہے کہ بعض راشن دکانداروں کی جانب سے گیہوں کی مبینہ بلیک مارکیٹنگ تو نہیں کی جارہی ہے؟ یہ چہ میگوئیاں بھی سامنے آرہی ہیں کہ بعض مقامات پر راشن کا گیہوں شہر میں روٹی فروخت کرنے والے کاروباری افراد تک پہنچایا جارہا ہے۔ تاہم، ان الزامات کی سرکاری سطح پر تصدیق ہونا ضروری ہے اور کسی بھی دکاندار کے خلاف ٹھوس ثبوت کے بغیر حتمی رائے قائم نہیں کی جاسکتی۔

واضح رہے کہ مالیگاؤں شہر میں ریڈی میڈ روٹی کی فروخت کا چلن تیزی سے بڑھا ہے۔اب ہوٹلوں کے علاوہ شہر کے مختلف علاقوں میں بھی روٹی فروخت کی جارہی ہے۔ ایسے میں یہ جاننا ضروری ہوگیا ہے کہ روٹی کے کاروبار کیلئے استعمال ہونے والا گیہوں کہاں سے حاصل کیا جارہا ہے اور کیا کہیں سرکاری راشن کے اناج کا غیرقانونی استعمال تو نہیں ہورہا ہے؟ یہ بھی واضح رہے کہ روٹی فروخت کرنے والے تمام کاروباری افراد کو اس معاملے میں مشتبہ قرار دینا درست نہیں ہوگا،لیکن راشن دکانوں سے گیہوں غائب ہونے کی شکایات نے سوال پیدا کردیا ہے۔

مہنگائی کے اس دور میں سرکاری راشن غریب اور مستحق خاندانوں کیلئے بڑی راحت کا ذریعہ ہے۔اگر راشن دکانوں پر اناج دستیاب نہیں ہوگا تو اس کا سب سے زیادہ اثر انہی خاندانوں پر پڑے گا جو محدود آمدنی میں اپنے گھر کا خرچ چلاتے ہیں۔ایسے میں متعلقہ محکمۂ FDO کے افسران کی ذمہ داری بنتی ہے کہ وہ راشن دکانوں پر گیہوں کی دستیابی،سرکاری اسٹاک، تقسیم کے ریکارڈ اور اناج کی ترسیل کی جانچ کریں۔ اگر کہیں بے ضابطگی یا بلیک مارکیٹنگ پائی جاتی ہے تو ذمہ داروں کے خلاف سخت کارروائی کی جائے، تاکہ مستحقین کو ان کے حق کا اناج مل سکے۔

اب عوام کی نظریں شہر کے موجودہ ایم ایل اے مفتی اسماعیل پر بھی لگی ہوئی ہیں، جن سے عوامی مسائل کے حل کیلئے مؤثر مداخلت کی توقع کی جارہی ہے۔ بالخصوص محکمۂ FDO کے افسران سے بازپرس کرتے ہوئے راشن دکانوں پر گیہوں کی عدم دستیابی کی وجوہات معلوم کرنا اور عوام کو ان کا حق دلانا وقت کی اہم ضرورت ہے۔دوسری جانب شہر کی بڑی سیاسی قوت کے طور پر ابھرنے والی اسلام پارٹی کے علاوہ سماجوادی پارٹی، کانگریس اور ایس ڈی پی آئی سے بھی عوام یہ توقع کررہے ہیں کہ وہ اس معاملے کو سنجیدگی سے اٹھائیں گی۔ کیا یہ سیاسی جماعتیں متعلقہ افسران سے جواب طلب کرتے ہوئے راشن کے مسئلے کو حل کرنے کیلئے عملی اقدامات کریں گی؟ یا پھر عوام کے بنیادی مسائل ایک مرتبہ پھر سیاسی بیانات اور وعدوں تک محدود رہ جائیں گے؟خیال رہے کہ مالیگاؤں کی عوام کو اس وقت سیاسی نعروں سے زیادہ بنیادی سہولتوں اور اپنے جائز حقوق کی فکر ہے۔مہنگائی کے باعث پہلے ہی پریشان خاندانوں کیلئے سرکاری راشن کی عدم دستیابی ایک سنگین مسئلہ ہے۔ضرورت اس بات کی ہے کہ متعلقہ محکمہ فوری طور پر صورتحال واضح کرے، گیہوں کی فراہمی بحال کرنے کیلئے اقدامات کرے اور بلیک مارکیٹنگ کی شکایات کی غیرجانبدارانہ جانچ کرائے۔اب دیکھنا یہ ہے کہ ایم ایل اے مفتی اسماعیل سمیت شہر کی سیاسی جماعتیں اس مسئلے پر محض بیانات جاری کرتی ہیں یا عوام کو حقیقی راحت پہنچانے کیلئے میدانِ عمل میں بھی اترتے ہیں۔ عوام کاصاف کہنا ہے کہ جب مہنگائی سے جینا پہلے ہی دشوار ہے تو سرکاری راشن کے گیہوں کیلئے بھی آخر کب تک پریشان ہونا پڑے گا؟

کرناٹک میں ووٹر لسٹ سے تقریباً ایک کروڑ نام خارج ، ایس آئی آر کے بعد حتمی فہرست جاری

noreply@blogger.com (BEBAK URDU NEWS ) — Tue, 27 Oct 2026 15:12:32 +0000

کرناٹک میں ووٹر لسٹ سے تقریباً ایک کروڑ نام خارج ، ایس آئی آر کے بعد حتمی فہرست جاری

خواتین ووٹروں کی تعداد مردوں سے چار لاکھ زیادہ ،نوجوان ووٹروں کی تعداد میں بھی اہم اضافہ

بنگلورو:27 اکتوبر(بیباک نیوز اپڈیٹ) کرناٹک میں انتخابی فہرستوں کی خصوصی گہری نظرثانی (SIR) کے بعد حتمی ووٹر لسٹ جاری کردی گئی ہے۔اس عمل کے نتیجے میں ریاست کی ووٹر لسٹ سے تقریباً ایک کروڑ نام کم ہوگئے ہیں۔ انتخابی حکام کے مطابق نظرثانی سے قبل ریاست میں تقریباً 5.54 کروڑ رجسٹرڈ ووٹر تھے، جبکہ حتمی فہرست میں ووٹروں کی تعداد گھٹ کر تقریباً 4.55 کروڑ رہ گئی ہے۔ اس طرح مجموعی طور پر تقریباً 99.32 لاکھ ووٹروں کی کمی درج کی گئی ہے۔ووٹر لسٹ کی نظرثانی کے دوران 24 اگست کو جاری کی گئی ابتدائی فہرست سے تقریباً 1.08 کروڑ نام خارج کیے گئے تھے۔ان افراد کو غیر حاضر، مستقل طور پر منتقل شدہ، فوت شدہ، دوہری اندراج اور دیگر زمروں میں رکھا گیا تھا۔ان میں سب سے بڑی تعداد ایسے ووٹروں کی تھی جنہیں مستقل طور پر دوسری جگہ منتقل شدہ قرار دیا گیا۔ اس زمرے میں تقریباً 65.45 لاکھ افراد شامل تھے، جبکہ تقریباً 19 لاکھ افراد کو غیر حاضر قرار دیا گیا تھا۔

ابتدائی فہرست جاری ہونے کے بعد ووٹروں کو اپنے نام شامل کروانے، تفصیلات میں اصلاح اور اعتراضات درج کروانے کا موقع دیا گیا۔ اس دوران بڑی تعداد میں درخواستیں موصول ہوئیں اور انتخابی حکام نے متعلقہ دستاویزات کی جانچ کی۔ حکام کے مطابق نوٹس جاری کیے گئے تقریباً 43.82 لاکھ افراد میں سے تقریباً 43.20 لاکھ افراد کے نام حتمی فہرست میں شامل کیے گئے، جبکہ 61,867 افراد کے نام جانچ کے بعد حتمی فہرست سے خارج کردیے گئے۔

حتمی انتخابی فہرست کے مطابق کرناٹک میں خواتین ووٹروں کی تعداد مرد ووٹروں سے زیادہ ہے۔ دستیاب اعداد و شمار کے مطابق ریاست میں تقریباً 2.29 کروڑ خواتین اور 2.25 کروڑ مرد ووٹر درج ہیں، جبکہ تیسری جنس کے ووٹروں کی تعداد 2,841 ہے۔ اس طرح خواتین ووٹروں کی تعداد مرد ووٹروں کے مقابلے میں تقریباً چار لاکھ زیادہ ہے۔حتمی فہرست میں 18 سے 19 سال کی عمر کے 6.83 لاکھ سے زائد نوجوان ووٹر شامل ہیں۔ اس کے علاوہ 30 سے 39 سال کی عمر کے افراد ووٹروں کا سب سے بڑا گروپ ہیں، جن کی تعداد تقریباً 1.02 کروڑ بتائی گئی ہے۔ انتخابی فہرستوں کی نظرثانی کا مقصد ووٹر لسٹ کو تازہ ترین بنانا اور اس میں موجود غیر متعلقہ یا دہرے اندراجات کی نشاندہی کرنا بتایا گیا ہے۔حتمی ووٹر لسٹ جاری ہونے کے بعد انتخابی فہرست میں اپنا نام موجود ہونے کی تصدیق کرنا ووٹروں کے لیے اہم ہے۔ اگر کسی اہل شہری کا نام فہرست میں شامل نہیں ہے تو وہ مقررہ طریقۂ کار کے مطابق نام درج کروانے کے لیے درخواست دے سکتا ہے۔انتخابی حکام کے مطابق ووٹر لسٹ میں اندراج اور تفصیلات کی اصلاح کا عمل مسلسل جاری رہتا ہے۔

مالیگاؤں: دودھ گرم کرتے ہی ربڑ میں تبدیل،راولگاؤں میں ملاوٹ کے شبہ سے کھلبلی

noreply@blogger.com (BEBAK URDU NEWS ) — Tue, 27 Oct 2026 13:16:13 +0000

مالیگاؤں: دودھ گرم کرتے ہی ربڑ میں تبدیل،راولگاؤں میں ملاوٹ کے شبہ سے کھلبلی

عوام کی صحت کا معاملہ سنگین، فوڈ اینڈ ڈرگ ایڈمنسٹریشن سے فوری جانچ اور کارروائی کا مطالبہ

مالیگاؤں: 27 اکتوبر (بیباک نیوز اپڈیٹ) مالیگاؤں کے راولگاؤں میں کوجاغری پورنیما کے تہوار کے لیے لائے گئے دودھ کو گرم کرتے ہی اس کا ربڑ جیسی لمبی اور چپکنے والی پٹی میں تبدیل ہوجانے کا حیران کن واقعہ سامنے آیا ہے۔ اس واقعے کے بعد گاؤں میں کھلبلی مچ گئی ہے، جبکہ دودھ میں ملاوٹ یا کیمیکل کی آمیزش کے شبہ کے باعث عوام کی صحت اور غذائی تحفظ کا معاملہ ایک مرتبہ پھر موضوعِ بحث بن گیا ہے۔موصولہ اطلاعات کے مطابق، راولگاؤں کے قدیم اور معروف شیو گنیش نوراتری اُتسو منڈل کی جانب سے ہر سال کی طرح اس سال بھی اتوار کی شب نوراتری اُتسو کے بعد کوجاغری پورنیما منائی جارہی تھی۔ اس پروگرام کے لیے منڈل کے کارکنان نے گاؤں کی ہی ایک دودھ ڈیری سے تقریباً 25 لیٹر دودھ خریدا تھا۔ اگلے دن دودھ کی قلت سے بچنے کے لیے اسے ایک روز قبل خرید کر فریج میں محفوظ رکھا گیا تھا۔

اگلے روز پروگرام کے لیے جب دودھ کو کڑاہی میں گرم کیا گیا تو محض 10 سے 15 منٹ کے اندر دودھ کی شکل غیر معمولی طور پر تبدیل ہونے لگی اور اس کا ایک عجیب سا لوتھڑا بننے لگا۔کارکنان نے جب چمچے سے دودھ کو ہلانے کی کوشش کی تو وہ معمول کے مطابق پھٹنے یا گاڑھا ہونے کے بجائے ربڑ کی طرح چپکنے لگا۔ بتایا جاتا ہے کہ دودھ سے بننے والی یہ لچک دار پٹی تقریباً 5 سے 7 فٹ تک کھنچ رہی تھی۔ دودھ کی یہ غیر معمولی کیفیت دیکھ کر موقع پر موجود تمام افراد حیران رہ گئے۔

عام طور پر دودھ خراب ہونے کی صورت میں وہ پھٹ کر چھینا یا دہی جیسی شکل اختیار کرسکتا ہے، لیکن اس طرح ربڑ کی مانند کھنچنے کا معاملہ غیر معمولی ہونے کے باعث دودھ میں ملاوٹ یا مصنوعی اجزا کی آمیزش کا شبہ ظاہر کیا جارہا ہے۔ یہ اندیشہ بھی ظاہر کیا جارہا ہے کہ کوجاغری کے موقع پر دودھ کی مانگ بڑھنے کے سبب باہر سے ملاوٹ شدہ دودھ منگوایا گیا ہو، تاہم دودھ میں کسی مخصوص کیمیکل یا مصنوعی مادے کی موجودگی کی تصدیق لیبارٹری جانچ کے بعد ہی ہوسکے گی۔واقعے کی سنگینی کو محسوس کرتے ہوئے منڈل کے کارکنان نے مذکورہ دودھ شہریوں میں تقسیم نہ کرنے کا فیصلہ کیا اور اسے فوری طور پر الگ محفوظ رکھ دیا۔ اس کے علاوہ گاؤں کے دیگر شہریوں کو ممکنہ خطرے سے آگاہ کرنے کے لیے سوشل میڈیا کے ذریعے احتیاطی پیغام بھی جاری کیا گیا۔اس معاملے کے سامنے آنے کے بعد مقامی عوام کی جانب سے فوڈ اینڈ ڈرگ ایڈمنسٹریشن سے مطالبہ کیا جارہا ہے کہ واقعہ کا فوری نوٹس لیتے ہوئے متعلقہ دودھ کے نمونے حاصل کیے جائیں اور انہیں لیبارٹری میں جانچ کے لیے بھیجا جائے۔ اگر جانچ میں ملاوٹ یا کسی غیر قانونی مادے کی آمیزش ثابت ہوتی ہے تو ذمہ دار افراد کے خلاف سخت قانونی کارروائی کی جائے، تاکہ عوام کی صحت سے کھلواڑ کرنے والوں پر قابو پایا جاسکے۔

بریکنگ نیوز:غزالہ پروین کی دو سال بعد ممبئی ہائی کورٹ سے ضمانت منظور، لیکن فی الحال رہائی ممکن نہیں

noreply@blogger.com (BEBAK URDU NEWS ) — Tue, 27 Oct 2026 08:49:42 +0000

بریکنگ نیوز:غزالہ پروین کی دو سال بعد ممبئی ہائی کورٹ سے ضمانت منظور، لیکن فی الحال رہائی ممکن نہیں

غزالہ کے وکیل کی کامیاب پیروری، آصف شیخ و مستقیم ڈگنیٹی بھی کورٹ میں موجود رہے

مالیگاؤں : 27 اکتوبر (بیباک نیوز اپڈیٹ) جنم و اموات معاملے میں ممبئی ہائی کورٹ نے اہم فیصلہ سناتے ہوئے ملزمہ نمبر 21 غزالہ پروین اقبال احمد کی ضمانت منظور کرلی ہے۔ جسٹس ملند این۔ جادھو کی عدالت نے فریقین کے دلائل سننے کے بعد 25 ہزار روپے کے مچلکے اور ضمانت کی شرائط پر ان کی رہائی کا حکم دیا۔ چھاؤنی پولیس اسٹیشن میں درج سی آر نمبر 51/2025 کے معاملے میں غزالہ پروین کی ضمانت کو سرکاری ملازمین کے زمرے میں پہلی اہم کامیابی قرار دیا جارہا ہے۔عدالت میں ضمانت کی درخواست پر سماعت کے دوران ملزمہ کی طویل عدالتی حراست، خاندانی ذمہ داریوں اور مقدمے کی نوعیت کو اہمیت دی گئی۔ دستیاب تفصیلات کے مطابق، غزالہ پروین کو 22 مارچ 2025 کو گرفتار کیا گیا تھا اور وہ ناشلسک سینٹرل جیل میں قید ہیں۔ ان کے دو کم سن بچے ہیں، جن کی دیکھ بھال کے حوالے سے مشکلات کا معاملہ بھی عدالت کے سامنے رکھا گیا، جبکہ ان کے ضعیف والدین کی علالت کا ذکر بھی کیا گیا۔ غزالہ پروین پر ڈپٹی رجسٹرار کے دستخطوں کی مبینہ جعل سازی کا الزام ہے۔ عدالت میں یہ نکتہ بھی اٹھایا گیا کہ ہینڈ رائٹنگ ماہر کی رائے حاصل کرنے کے لیے پولس نے چار دیگر ملزمان کے نمونے لیے تھے، تاہم درخواست گزار کے نمونوں سے متعلق کارروائی کے فقدان کی نشاندہی کی گئی۔ عدالت نے ضمانت کی درخواست پر غور کرتے ہوئے مقدمے کے ان پہلوؤں سمیت دیگر متعلقہ امور کا جائزہ لیا۔

اس معاملے میں اس سے قبل سات دیگر ملزمان کو ضمانت مل چکی ہے۔ تاہم، اب تک ضمانت حاصل کرنے والوں میں ایجنٹوں یا رشتہ داروں کا نام سامنے آیا تھا، جبکہ سرکاری ملازمین میں غزالہ پروین کو ضمانت ملنا ایک اہم پیش رفت قرار دیا جارہا ہے۔عدالت نے ضمانت کے قانونی اصولوں پر غور کرتے ہوئے اس بات کو اہمیت دی کہ زیرِ سماعت مقدمے میں کسی شخص کو غیر معینہ مدت تک جیل میں رکھنا اس کے آئینی حقوق سے متعلق سوالات پیدا کرسکتا ہے۔ آئین ہند کے آرٹیکل 21 کے تحت زندگی اور شخصی آزادی کے تحفظ کو اہمیت حاصل ہے۔ عدالت نے اسی قانونی تناظر میں ملزمہ کی ضمانت منظور کرنے کا فیصلہ کیا۔ممبئی ہائی کورٹ نے غزالہ پروین کو 25 ہزار روپے کے ذاتی مچلکے اور اتنی ہی مالیت کی ایک یا دو ضمانتیں پیش کرنے کی شرط پر رہا کرنے کا حکم دیا ہے۔ عدالت نے ہدایت دی ہے کہ وہ تفتیشی افسر کو اپنے موجودہ پتے اور موبائل نمبر سے باخبر رکھیں گی، طلب کیے جانے پر تفتیشی افسر کے سامنے حاضر ہوں گی اور ہر ماہ کے پہلے منگل کو ٹرائل کورٹ میں اپنی حاضری درج کروائیں گی۔ اس کے علاوہ عدالت کی پیشگی اجازت کے بغیر ریاست مہاراشٹر سے باہر جانے اور گواہوں یا شواہد پر اثرانداز ہونے سے بھی انہیں منع کیا گیا ہے۔غزالہ کو ممبئی ہائی کورٹ سے ضمانت تو مل گئی لیکن انکی رہائی فی الحال نہیں ہوسکتی کیونکہ ان پر اسی ضمن میں ایک اور مقدمہ درج ہے جس کی ضمانت کیلئے مالیگاؤں کورٹ میں عرضداشت دائر کی گئی ہے اب اس پر سماعت کے بعد فیصلہ ہوگا اور غزالہ کو یہاں ضمانت ملتی ہے تو انکی رہائی ممکن ہوسکے گی ۔

غزالہ پروین کی ضمانت کے معاملے میں ان کے اہل خانہ کی مسلسل کوششوں کے ساتھ مائنارٹی ڈیفنس کمیٹی کی رہنمائی اور تعاون بھی شامل ہے۔ کمیٹی کے ذمہ داران آصف شیخ اور مستقیم ڈیگنیٹی سمیت مقامی وکلاء نے اول اول قانونی معاونت فراہم کی لیکن ممبئی ہائی کورٹ میں غزالہ کے وکیل راجو نے کامیاب پیروی کی۔ضمانت کا فیصلہ سنائے جانے کے وقت مائنارٹی ڈیفنس کمیٹی کے آصف شیخ اور مستقیم ڈیگنیٹی بھی عدالت میں موجود تھے۔

اس معاملے میں غزالہ پروین کی جانب سے سینئر وکیل راجو چوہان نے پیروی کی۔ ضمانت منظور ہونے کے بعد اہل خانہ اور کمیٹی کے ذمہ داران کی جانب سے اطمینان کا اظہار کیا گیا۔ اس ضمن میں حاصل تفصیلات کے مطابق، مقدمے میں نامزد تواب شیخ سمیت دیگر سرکاری ملازمین کی ضمانت اور آئندہ قانونی حکمت عملی پر غور کرنے کے لیے ایڈوکیٹ راجو اور مائنارٹی ڈیفنس کمیٹی کے ذمہ داران کے درمیان ایک اہم میٹنگ طے کی گئی ہے۔ اس میٹنگ میں بقیہ ملزمان کے قانونی معاملات اور آئندہ کی کارروائی پر تبادلۂ خیال کیا جائے گا۔غزالہ پروین کی ضمانت کو اس معاملے میں ایک اہم قانونی پیش رفت قرار دیا جارہا ہے، جبکہ دیگر ملزمان کی ضمانت سے متعلق آئندہ کارروائی پر بھی نگاہیں مرکوز ہیں۔

خادمِ قرآن مولانا غلام وستانویؒ کو مالیگاؤں کا منفرد خراجِ عقیدت

noreply@blogger.com (BEBAK URDU NEWS ) — Mon, 26 Oct 2026 17:08:36 +0000

خادمِ قرآن مولانا غلام وستانویؒ کو مالیگاؤں کا منفرد خراجِ عقیدت

مدرسہ ریاض الجنہ کی چھ منزلہ عمارت مولانا کے نام سے منسوب، 56 طلباء کی تکمیلِ حفظِ قرآن پر دستار بندی و جلسہ

مولانا حذیفہ وستانوی کی مالیگاؤں آمد؛ نئی عمارت کا افتتاح،شعبۂ عالمیت کا آغاز اور کتابوں کی رونمائی، پریس کانفرنس سے خطاب

مالیگاؤں : 26 اکتوبر (بیباک نیوز اپڈیٹ) مدرسہ ریاض الجنہ، مالیگاؤں کی جانب سے خادمِ قرآن، رئیس الجامعہ حضرت مولانا غلام محمد وستانویؒ کو منفرد خراجِ عقیدت پیش کرتے ہوئے ادارے کی نئی چھ منزلہ عمارت کو ان کے نام سے منسوب کیا گیا ہے۔ تقریباً سوا سال کی قلیل مدت میں تعمیر ہونے والی اس جدید عمارت کا افتتاح 29 اکتوبر، بروز جمعرات، حضرت مولانا غلام محمد وستانویؒ کے جانشین حضرت مولانا حذیفہ محمد وستانوی صاحب کے دستِ مبارک سے عمل میں آئے گا۔ اس طرح کی تفصیلات فردوس گنج میں واقع مدرسہ ریاض الجنہ کی نئی عمارت میں منعقدہ پریس کانفرنس سے مدرسہ کے ناظم اعلیٰ حافظ جمیل اشاعتی نے دی ۔انہوں نے بتایا کہ اس موقع پر تکمیلِ حفظِ قرآن کی تقریب، شعبۂ عالمیت کے آغاز اور کتابوں کی رونمائی سمیت مختلف اہم پروگرام منعقد کیے جائیں گے۔انہوں نے کہا کہ مدرسہ ریاض الجنہ کا بنیادی مقصد نئی نسل کو قرآنِ کریم سے جوڑنا، اس کی تعلیم و اشاعت کو فروغ دینا اور قرآنی تعلیمات کو عام کرنا ہے۔ اس ادارے کی بنیاد حضرت رئیس الجامعہ مولانا غلام محمد وستانویؒ نے رکھی تھی۔ ان کے پیش کردہ تعلیمی و دینی مشن کو آج بھی مدرسے کے اساتذہ، معلمین، طلباء اور طالبات پوری لگن کے ساتھ آگے بڑھا رہے ہیں۔ نئی عمارت کو مولانا مرحوم کے نام سے منسوب کرنا ان کی دینی و علمی خدمات کے اعتراف اور ان کے مشن سے وابستگی کا ایک اہم اظہار ہے۔ (بیباک نیوز اپڈیٹ)

حافظ جمیل اشاعتی نے مدرسہ ریاض الجنہ کی اس شاندار عمارت کی تعمیر میں مالیگاؤں کے غریب و امیر، چھوٹے بڑے، مرد و خواتین اور بچوں نے اپنی استطاعت کے مطابق بھرپور تعاون کیا۔ علمائے کرام اور مفتیانِ عظام کی سرپرستی اور شہر کے عوام کی دینی جذبے سے سرشار کوششوں کے نتیجے میں یہ عمارت تکمیل کو پہنچی ہے، فی الحال یہ عمارت تین منزلہ تعمیر ہوئی ہے لیکن اسے چھ منزل تک پہنچانے کا کام جاری ہے۔ تقریباً سوا سال کے عرصے میں تعمیر ہونے والی یہ عمارت ادارے کی تعلیمی و دینی سرگرمیوں کو وسعت دینے میں اہم کردار ادا کرے گی۔حافظ جمیل نے تفصیلات پیش کرتے ہوئے کہا کہ تقریب کا ایک اہم اور روح پرور پہلو 56 طلباء و طالبات کی تکمیلِ حفظِ قرآن ہے، جو ادارے اور شہر کے لیے باعثِ مسرت و افتخار ہے۔ ایک ہی ادارے سے اتنی بڑی تعداد میں طلباء و طالبات کا قرآنِ کریم حفظ کرکے حفاظ و حافظات کی صف میں شامل ہونا اللہ تعالیٰ کی عظیم نعمت اور مدرسے کی تعلیمی کاوشوں کا نمایاں ثبوت ہے۔اس سلسلے میں 29 اکتوبر، بروز جمعرات، بعد نمازِ مغرب، مالیگاؤں ہائی اسکول میں جلسۂ تکمیلِ حفظِ قرآن و دستار بندی منعقد ہوگا، جس میں حفاظ و حافظات کی حوصلہ افزائی کی جائے گی اور ان کی اس عظیم دینی کامیابی پر مسرت کا اظہار کیا جائے گا۔(بیباک نیوز اپڈیٹ)

اس پروقار تقریب میں شہر کے معروف عالمِ دین، شیخ الحدیث حضرت مولانا ادریس عقیل ملی صاحب کے علاوہ حضرت مولانا حذیفہ محمد وستانوی خصوصی خطاب فرمائیں گے جبکہ گجرات کے فقیہ المکاتب حضرت مولانا اسماعیل صاحب کاڈرا کی شرکت بھی متوقع ہے۔ پروگرام میں شہر و بیرونِ شہر کے علمائے کرام، مدارس کے اساتذہ، دینی و سماجی شخصیات اور دیگر معززین کی بڑی تعداد شریک ہوگی۔مدرسہ ریاض الجنہ کی تعلیمی سرگرمیوں میں وسعت کے پیشِ نظر اس موقع پر شعبۂ عالمیت کا آغاز بھی کیا جائے گا۔اس اقدام سے دینی تعلیم کے حصول کے خواہش مند طلباء کو مزید تعلیمی مواقع میسر آنے کی توقع ہے۔ تقریب کے دوران کتابوں کی رونمائی بھی عمل میں آئے گی، جس سے دینی و علمی سرگرمیوں کو فروغ دینے کے ادارے کے عزم کی عکاسی ہوگی۔مدرسے کے اس پروگرام کا بنیادی پیغام پیش کرتے ہوئے حافظ جمیل نے کہا کہ امت کے بچوں میں قرآنِ کریم کی عظمت و اہمیت کا شعور بیدار کرنا اور ان کے اندر احساسِ کمتری کے بجائے دینی و علمی خود اعتمادی پیدا کرنا ہے۔موجودہ دور میں مسلمانوں کو درپیش مختلف چیلنجز کے تناظر میں قرآنِ کریم سے مضبوط تعلق قائم کرنے، اس کی تعلیمات کو سمجھنے اور ان پر عمل کرنے کی ضرورت پر زور ہے۔مدرسہ ریاض الجنہ کی یہ کاوش نہ صرف حضرت مولانا غلام محمد وستانویؒ کے دینی و تعلیمی مشن کو آگے بڑھانے کی علامت ہے بلکہ نئی نسل کو قرآن سے وابستہ کرنے اور معاشرے میں دینی شعور کو فروغ دینے کی ایک اہم کوشش بھی ہے۔ توقع ہے کہ اس بابرکت تقریب سے شہر میں دینی تعلیم کے فروغ اور قرآنِ کریم سے وابستگی کے جذبے کو مزید تقویت حاصل ہوگی۔(بیباک نیوز اپڈیٹ)

عزیز کلو اسٹیڈیم کی قسمت بدلے گی! تزئین و آرائش اور جدید پویلین کی تعمیر شروع،میئر کے ہاتھوں سنگ بنیاد

noreply@blogger.com (BEBAK URDU NEWS ) — Sun, 25 Oct 2026 15:34:51 +0000

عزیز کلو اسٹیڈیم کی قسمت بدلے گی! تزئین و آرائش اور جدید پویلین کی تعمیر شروع،میئر کے ہاتھوں سنگ بنیاد

میونسپل کارپوریشن کے بجٹ سے 2 تا 3 کروڑ روپے مختص، نوجوانوں کو کھیلوں کی جانب راغب کرنے پر زور

اسٹیڈیم کی حفاظت عوام کی بھی ذمہ داری،میئر ڈپٹی میئر و اسٹینڈ چیئرمین و گٹ نیتا کا خطاب

مالیگاؤں : 25 اکتوبر (بیباک نیوز اپڈیٹ)مالیگاؤں کے مشہور عزیز کلو اسٹیڈیم کی تزئین و آرائش، خوبصورتی اور جدید پویلین کی تعمیر کا کام شروع ہوگیا ہے۔اسٹیڈیم کی ترقی کے دیرینہ مطالبے کو پورا کرنے کے لیے میونسپل کارپوریشن کے بجٹ سے فنڈ مختص کیا گیا ہے۔ اس سلسلے میں منعقدہ افتتاحی تقریب میں میئر نسرین شیخ، ڈپٹی میئر شانِ ہند، خالد حاجی، مستقیم ڈگنیٹی، اعجاز صاحب، کارپوریٹر امین انصاری سمیت دیگر معززین موجود تھے۔اس موقع پر خطاب کرتے ہوئے کارپوریٹر و CMC کے ذمہ دار امین انصاری نے کارپوریشن کے بجٹ کی کاپی پیش کرتے ہوئے کہا کہ ماضی میں اسٹیڈیم کی ترقی کے لیے کئی مرتبہ بڑے بڑے وعدے کیے گئے، لیکن عملی طور پر کام نہیں ہوسکا۔ ان کے مطابق بعض لیڈروں نے 8، 8 کروڑ روپے کے فنڈ کے اعلانات کیے، مگر یہ وعدے تک محدود رہے۔امین انصاری نے دعویٰ کیا کہ میونسپل کارپوریشن کے بجٹ میں پہلی مرتبہ عزیز کلو اسٹیڈیم کی ترقی کے لیے تقریباً 2 سے 3 کروڑ روپے مختص کیے گئے ہیں اور اب اس کام کا عملی آغاز ہوچکا ہے۔ انہوں نے کہا کہ شہر کی ترقی کے لیے محض اعلانات کے بجائے عملی اقدامات ضروری ہیں۔انہوں نے نوجوانوں کو کھیلوں کی جانب راغب کرنے کی ضرورت پر زور دیتے ہوئے کہا کہ کھیلوں کی سرگرمیوں کو فروغ دے کر نوجوان نسل کو منشیات جیسی سماجی برائیوں سے دور رکھا جاسکتا ہے۔ اس کے ساتھ ہی شہر کے دیگر علاقوں میں بھی اسپورٹس گراؤنڈز تعمیر کرنے کی تجویز پیش کی۔

اس تقریب سے مستقیم ڈگنیٹی نے اسٹیڈیم کی ترقی کے لیے کی جانے والی کوششوں پر سی ایم سی کو مبارکباد پیش کی۔ انہوں نے کہا کہ شہر میں کئی کھلے میدانوں پر ناجائز قبضے کے مسائل سامنے آتے ہیں، لیکن عزیز کلو اسٹیڈیم کو محفوظ رکھا گیا ہے۔ جدید پویلین اور ڈریسنگ روم کی تعمیر سے کھلاڑیوں کو بہتر سہولیات میسر آئیں گی اور اسٹیڈیم میں بڑے کرکٹ ٹورنامنٹس کے انعقاد کے امکانات بھی بڑھیں گے۔میئر نسرین شیخ و ڈپٹی میئر شانِ ہند و اعجاز بیگ نے اپنے خطاب میں کھلاڑیوں اور کھیلوں کے منتظمین کی کوششوں کو سراہا۔ انہوں نے کہا کہ کھیلوں کی سرگرمیوں کو فروغ دے کر نوجوانوں کو منشیات اور جرائم سے دور رکھنے میں مدد مل سکتی ہے۔میئر نے کھلاڑیوں، کھیلوں کے شائقین اور شہریوں سے اپیل کی کہ وہ اسٹیڈیم میں تعمیر ہونے والی نئی عمارت اور فراہم کی جانے والی سہولیات کی حفاظت کو اپنی ذمہ داری سمجھیں، تاکہ یہ ترقیاتی کام آنے والی نسلوں کے لیے بھی مفید ثابت ہوسکے۔عزیز کلو اسٹیڈیم کی تزئین و آرائش اور پویلین کی تعمیر کا آغاز شہر کے کھیلوں کے بنیادی ڈھانچے کو بہتر بنانے کی سمت ایک اہم قدم ہے۔اب شہریوں اور کھلاڑیوں کی نظریں اس بات پر مرکوز ہیں کہ یہ منصوبہ مقررہ مدت میں کس حد تک مکمل ہوتا ہے اور اس سے شہر کے نوجوان کھلاڑیوں کو کتنی سہولتیں حاصل ہوتی ہیں۔

جلگاؤں:132اساتذہ کی منظوری منسوخ، ادارہ منتظمین کے خلاف بھی درج ہوں گے مقدمات

noreply@blogger.com (BEBAK URDU NEWS ) — Sun, 25 Oct 2026 11:16:07 +0000

جلگاؤں :132 اساتذہ کی منظوری منسوخ، ادارہ منتظمین کے خلاف بھی درج ہوں گے مقدمات

تنخواہیں بند کرنے اور وصولی کی کارروائی کا فیصلہ، جعلی دستاویزات اور فرضی جاوک نمبروں کا انکشاف

ناسک، دھولیہ ،جلگاؤں اضلاع میں ایس آئی ٹی کی جانچ اور کارروائی کا دائرہ تیز

ناسک:24 اکتوبر (بیباک نیوز اپڈیٹ) مہاراشٹر میں شالارتھ آئی ڈی گھوٹالے کے خلاف جاری کارروائی کے دوران جلگاؤں ضلع میں 132 اساتذہ کی تقرریوں کی منظوری منسوخ کرنے کا فیصلہ کیا گیا ہے۔ اس معاملے میں متعلقہ اداروں کے منتظمین کے خلاف بھی فوجداری مقدمات درج کرنے کی ہدایت دی گئی ہے۔یہ کارروائی جعلی دستاویزات اور غیر قانونی طریقے سے حاصل کی گئی منظوریوں کے انکشاف کے بعد کی جا رہی ہے۔مراٹھی اخبار دیویہ مراٹھی کی رپورٹ کے مطابق، ناسک ڈویژن کے تحت آنے والے اضلاع میں نجی امدادیافتہ ثانوی اور پرائمری اسکولوں میں مشتبہ تقرریوں اور شالارتھ آئی ڈی کے معاملات کی جانچ جاری ہے۔ خصوصی تحقیقاتی ٹیم (ایس آئی ٹی) نے جلگاؤں ضلع میں 132 اساتذہ کے دستاویزات کی جانچ مکمل کرلی ہے، جس کے بعد جعلی تقرریوں کے خلاف سخت کارروائی کی تیاری کی گئی ہے۔

محکمہ تعلیم کے مطابق، جن اساتذہ کی منظوری منسوخ کی جائے گی، ان کی تنخواہیں روکنے اور سرکاری خزانے سے ادا کی گئی رقم کی وصولی کی کارروائی بھی کی جا سکتی ہے۔ اس کے علاوہ، فرضی تقرریوں کے ذریعے مالی فائدہ حاصل کرنے کے معاملے میں متعلقہ اداروں کے منتظمین، ہیڈ ماسٹرز اور دیگر ذمہ دار افراد کے خلاف فوجداری مقدمات درج کرنے کی ہدایت دی گئی ہے۔رپورٹ میں بتایا گیا ہے کہ ناسک، جلگاؤں اور دھولیہ سمیت متعلقہ اضلاع میں اساتذہ کی تقرریوں اور شالارتھ منظوریوں کی جانچ کے دوران کئی سنگین بے ضابطگیاں سامنے آئی ہیں۔ بعض معاملات میں جعلی دستاویزات، غائب فائلوں اور مشتبہ جاوک نمبرات کے ذریعے منظوری حاصل کیے جانے کا شبہ ظاہر کیا گیا ہے۔

اس معاملے میں ان افسران اور ملازمین کے خلاف بھی محکمہ جاتی کارروائی کی تجویز ہے جن کے دورِ کار میں مبینہ طور پر غیر قانونی منظوریوں کو منظوری دی گئی تھی۔ محکمہ تعلیم کی جانب سے کارروائی کے احکامات مرحلہ وار جاری کیے جا رہے ہیں۔جلگاؤں کے محکمۂ تعلیم کے مطابق، بعض احکامات جاری ہوچکے ہیں جبکہ دیگر معاملات میں کارروائی کا عمل جاری ہے۔حکام کا کہنا ہے کہ جانچ اور احکامات کے مطابق متعلقہ افراد کے خلاف کارروائی کی جائے گی۔

مالیگاؤں: سمتا اسکول گھوٹالہ سابق ہیڈ ماسٹر،اہلیہ اور بہو کی پیشگی ضمانت مسترد

noreply@blogger.com (BEBAK URDU NEWS ) — Sun, 25 Oct 2026 08:59:46 +0000

مالیگاؤں : سمتا اسکول گھوٹالہ سابق ہیڈ ماسٹر،اہلیہ اور بہو کی پیشگی ضمانت مسترد

ممبئی ہائی کورٹ کا سخت موقف، عبوری توسیع سے بھی انکار، گرفتاری کا امکان

مالیگاؤں:24 اکتوبر (بیباک نیوز اپڈیٹ)مالیگاؤں شہر کے ٹہرے گاؤں میں واقع سروانگائن وکاس منڈل کے زیرِ انتظام سمتا سیکنڈری و ہائر سیکنڈری اسکول کے بینک کھاتوں سے مبینہ غبن کے معاملے میں ممبئی ہائی کورٹ نے سابق ہیڈ ماسٹر گیان دیو دامو پاٹل، ان کی اہلیہ کمل گیان دیو پاٹل اور بہو پرینکا چنتامن گنگورڈے کی قبل از گرفتاری ضمانت کی درخواستیں مسترد کر دی ہیں۔ عدالت نے معاملے کی سنگینی کو مدنظر رکھتے ہوئے ملزمین کو عبوری راحت میں مزید 15 روز کی توسیع دینے سے بھی انکار کر دیا، جس کے بعد ان کی گرفتاری کا امکان بڑھ گیا ہے۔موصولہ تفصیلات کے مطابق، اس معاملے میں مالیگاؤں چھاؤنی پولیس اسٹیشن میں سروانگائن وکاس منڈل کے بانی صدر جی بھاؤ نارائن شیوالے (84) کی شکایت پر دھوکہ دہی اور غبن کا مقدمہ درج کیا گیا ہے۔ شکایت میں الزام عائد کیا گیا ہے کہ گیان دیو پاٹل، جو 2008 تک ادارے کے سکریٹری اور اسکول کے پرنسپل رہے، نے ریٹائرمنٹ کے بعد بھی ادارے کے بینک کھاتوں سے رقم نکالنے اور اسے اپنے اہلِ خانہ کے کھاتوں میں منتقل کرنے میں مبینہ طور پر کردار ادا کیا۔

تحقیقات کے مطابق، پنجاب نیشنل بینک میں موجود نان سیلری گرانٹ اکاؤنٹ،جونیئر کالج اکاؤنٹ اور اسکول نیوٹریشن اکاؤنٹ سے مبینہ طور پر رقم نکال کر گیان دیو پاٹل، ان کی اہلیہ کمل، بہو پرینکا، منیجنگ ٹرسٹی اور دیگر متعلقہ افراد کے بینک کھاتوں میں نقد یا براہِ راست منتقل کی گئی۔ اس معاملے میں دستاویزات کے ذریعے رقم نکالنے اور مالی لین دین میں مبینہ بے ضابطگیوں کے الزامات بھی سامنے آئے ہیں۔

ادارے کے بینک کھاتوں کے آڈٹ میں سال 2017 سے اب تک مجموعی طور پر 70 لاکھ 82 ہزار 616 روپے کی مالی بے ضابطگی سامنے آنے کی اطلاع ہے۔ تحقیقات میں مختلف بینک کھاتوں کے درمیان بڑی رقوم کی منتقلی کا بھی انکشاف ہوا ہے۔ معاملے کی تفتیش کے دوران ان مالی لین دین اور متعلقہ دستاویزات کی جانچ کی جا رہی ہے۔مذکورہ معاملے میں ملزمین کی جانب سے ممبئی ہائی کورٹ میں پیشگی ضمانت کی درخواستیں دائر کی گئی تھیں۔ سماعت کے بعد عدالت نے الزامات کی سنگینی کو پیش نظر رکھتے ہوئے تینوں ملزمین کی درخواستیں مسترد کر دیں۔ عدالت نے عبوری راحت میں مزید 15 روز کی توسیع کی درخواست بھی قبول نہیں کی۔تعلیمی اداروں کے فنڈز اور سرکاری گرانٹس سے متعلق مبینہ مالی بے ضابطگیوں کے اس معاملے میں ہائی کورٹ کے فیصلے کو اہم پیش رفت قرار دیا جا رہا ہے۔ ضمانت کی درخواستیں مسترد ہونے کے بعد پولیس کی جانب سے ملزمین کے خلاف آئندہ کیا کارروائی کی جاتی ہے، اس پر سب کی نگاہیں مرکوز ہیں۔

مالیگاؤں قلعہ سے دہلی تک ’بھارت بچاؤ جن آندولن‘ کے تحت پیدل مارچ کا اعلان

noreply@blogger.com (BEBAK URDU NEWS ) — Sat, 24 Oct 2026 18:43:46 +0000

مالیگاؤں قلعہ سے دہلی تک ’بھارت بچاؤ جن آندولن‘ کے تحت پیدل مارچ کا اعلان

ووٹ چوری، ای وی ایم، بے روزگاری اور مرکزی حکومت کی پالیسیوں کے خلاف آواز اٹھانے کا عزم، نوجوانوں کی پریس کانفرنس

مالیگاؤں: 24 اکتوبر (بیباک نیوز اپڈیٹ) مالیگاؤں کے تاریخی قلعہ سے ملک کے دارالحکومت نئی دہلی تک ’بھارت بچاؤ جن آندولن‘ کے تحت پیدل مارچ نکالنے کا اعلان کیا گیا ہے۔ شہر کے غیر سیاسی نوجوانوں کی جانب سے سنیچر کی شب نو بجے حبیب لانس میں منعقدہ پریس کانفرنس میں عمران راشد نے بتایا کہ اس تحریک کا مقصد جمہوریت، آئین اور عوامی حقوق کے تحفظ کے ساتھ مرکزی حکومت کی پالیسیوں اور مبینہ ووٹ چوری کے خلاف ملک گیر سطح پر بیداری پیدا کرنا ہے۔انہوں نے کہا کہ مالیگاؤں کا تاریخی قلعہ آزادی کی جدوجہد اور قربانیوں کی یاد دلاتا ہے۔ اسی تاریخی پس منظر کو سامنے رکھتے ہوئے مالیگاؤں سے دہلی تک پیدل مارچ نکالنے کا فیصلہ کیا گیا ہے، تاکہ ملک کے مختلف علاقوں میں عوام تک جمہوریت اور آئین کے تحفظ کا پیغام پہنچایا جاسکے۔منتظمین کے مطابق اس پیدل مارچ میں نوجوان مولانا ابوالکلام آزاد، مہاتما گاندھی، ڈاکٹر باباصاحب امبیڈکر، اشفاق اللہ خان، رام پرساد بسمل اور بھگت سنگھ جیسے مجاہدینِ آزادی کے روپ میں شرکت کریں گے۔ اس اقدام کا مقصد آزادی کی تحریک میں حصہ لینے والی شخصیات کی قربانیوں کو یاد کرنا اور نوجوان نسل کو جمہوری اقدار و آئینی حقوق کے تحفظ کے لیے بیدار کرنا ہے۔

تحریک کے منتظمین نے واضح کیا کہ ان کا احتجاج کسی مخصوص سیاسی جماعت کے خلاف نہیں، بلکہ ان کے بقول حکومت کی ان پالیسیوں کے خلاف ہے جن سے عام شہریوں، طلباء، خواتین اور صحافیوں کو مشکلات کا سامنا کرنا پڑ رہا ہے۔ انہوں نے دہلی کے جنتر منتر پر احتجاج کرنے والے طلباء اور میڈیا سے وابستہ افراد کے ساتھ مبینہ تشدد اور آواز دبانے کے واقعات پر بھی تشویش ظاہر کی۔مقررین نے الزام عائد کیا کہ ملک میں جمہوری آزادیوں کو محدود کیا جارہا ہے اور عدالتوں و الیکشن کمیشن جیسے آئینی اداروں کے کردار پر بھی سوالات اٹھ رہے ہیں۔ انہوں نے مطالبہ کیا کہ جمہوری اقدار اور شہریوں کے بنیادی حقوق کا تحفظ یقینی بنایا جائے۔

پریس کانفرنس میں انتخابی عمل، ووٹر لسٹوں سے ناموں کے اخراج اور ووٹ چوری کے الزامات پر بھی تشویش کا اظہار کیا گیا۔ منتظمین نے ای وی ایم کے مبینہ غلط استعمال، ایس آئی آر (SIR) کے عمل، امتحانی پرچوں کے افشا اور نوجوانوں میں بڑھتی ہوئی بے روزگاری جیسے مسائل کو بھی پیدل مارچ کے اہم موضوعات میں شامل کرنے کا اعلان کیا۔ان کا کہنا تھا کہ انتخابی عمل میں شفافیت، نوجوانوں کو روزگار کی فراہمی اور شہریوں کے جمہوری حقوق کا تحفظ ملک کے اہم مسائل ہیں، جن پر حکومت اور متعلقہ اداروں کو جواب دہ ہونا چاہیے۔

تحریک کے قائدین نے بتایا کہ مختلف ریاستوں سے گزرتے ہوئے پیدل مارچ کے نئی دہلی پہنچنے پر وزیر اعظم سے ملاقات کی کوشش کی جائے گی۔اس موقع پر ملک کے موجودہ حالات اور تحریک کے مطالبات پر مشتمل یادداشت پیش کرنے کا منصوبہ ہے۔آخر میں منتظمین نے مالیگاؤں سمیت ملک بھر کی سیاسی و سماجی تنظیموں، طلباء، نوجوانوں اور عام شہریوں سے اپیل کی کہ وہ اس تحریک میں شریک ہوکر آئین، جمہوریت اور عوامی حقوق کے تحفظ کے لیے اپنا کردار ادا کریں۔ اس پریس کانفرنس میں عمران راشد کے عبداللہ مبارک علاوہ احتشام بیکری والا ،ڈاکٹر ساجد نعیم، صابر نورانی، مقیم مینا نگری وغیرہ موجود تھے ۔

مجھ پر فائرنگ ہوتی ہے اور اگر میں زندہ نہ رہا تو غریبوں کی مدد اور عوامی خدمت کرتے رہنا، آصف شیخ کا پیغام

noreply@blogger.com (BEBAK URDU NEWS ) — Fri, 23 Oct 2026 20:44:08 +0000

مجھ پر فائرنگ ہوتی ہے اور اگر میں زندہ نہ رہا تو غریبوں کی مدد اور عوامی خدمت کرتے رہنا، ورکروں کو آصف شیخ کا پیغام

ظلم، زیادتی اور ناانصافی کے خلاف اب خاموش نہیں بیٹھیں گے، عوام اور نوجوانوں کے نام آصف شیخ کا اہم خطاب

مہاراشٹر میں عوام کا ساتھ رہا تو ایک نہیں پانچ میئر بنا سکتے ہیں،آصف شیخ کا دعویٰ،پارلیمنٹ چناؤ لڑنے کا اعلان

مالیگاؤں : 23 اکتوبر (بیباک نیوز اپڈیٹ) اگر مجھ پر فائرنگ ہوتی ہے یا گولی لگتی ہے اور اگر میں آپ کے درمیان نہ رہوں تو بھی اسلام پارٹی کو زندہ رکھنا ہے اور عوام کے حقوق کیلئے لڑتے رہنا ہے ۔آج ہمارے سیاسی مخالفین مجھکو راستے سے ہٹانے کیلئے سازش رچھ رہے ہیں لیکن میں ڈرنے والا نہیں ہوں ،موت آنی ہے آج آئے یا کل، ہمارا ایمان ہے کہ جب موت لکھی ہوگی آئے گی لیکن ہم عوام اور غریبوں کی خدمات کرتے رہیں گے ۔اس طرح کے جملوں کا اظہار اسلام پارٹی کے رہنما آصف شیخ نے مالیگاؤں میں واقع فیسٹیول گراؤنڈ آگرہ روڈ پر پارٹی کے قومی صدر نوید خطیب احمد کی صدارت میں منعقدہ دو سالہ جشن یوم تاسیس و انقلابی جلسہ عام سے کیا۔انہوں نے خطاب کرتے ہوئے اسلام پارٹی کی پالیسیوں اور مستقبل کے لائحہ عمل پر تفصیلی روشنی ڈالی.انہوں نے کہا کہ اگر مہاراشٹر کی عوام نے ساتھ دیا تو ریاست کے اندر ایک نہیں بلکہ پانچ میئر بنائے جا سکتے ہیں.انہوں نے اس عزم کا اظہار کیا کہ جس طرح مالیگاؤں میں زمینی سطح پر تعمیراتی کام اور عوام کی خدمت کی گئی ہے، اسی ماڈل کو دوسرے شہروں میں بھی نافذ کیا جائے گا۔انہوں نے آئندہ پارلیمنٹ الیکشن لڑنے کا اعلان بھی کیا ۔آصف شیخ نے خطاب کے دوران ملک کے موجودہ حالات بالخصوص کشمیر سے کنیاکماری اور دہلی سے ممبئی تک کے حالات پر گہری تشویش کا اظہار کیا.انہوں نے الزام عائد کیا کہ بھارتیہ جنتا پارٹی SIR کے نام پر الیکشن کمیشن کا استعمال کرتے ہوئے ملک بھر میں اقلیتوں اور مسلمانوں کی ووٹیں کاٹ رہی ہے.موصوف نے دعویٰ کیا کہ ملک بھر میں تقریباً 13 کروڑ ووٹیں کاٹ دی گئی ہیں جن میں سے 70 فیصد ووٹ اکیلے مسلمانوں کی کاٹی گئی ہیں.

سپریم کورٹ اور عدالتی نظام پر بات کرتے ہوئے آصف شیخ نے کہا کہ اپوزیشن اور عوام جب بھی انصاف کے لیے عدالت کا دروازہ کھٹکھٹاتے ہیں تو وہاں سے مایوسی ملتی ہے.انہوں نے سوال اٹھایا کہ ملک کے مسلمانوں، دلتوں اور آدیواسی بھائیوں کے ساتھ ہونے والی ناانصافیوں پر انصاف کا دروازہ کیوں بند کیا جا رہا ہے؟ اس موقع پر سابقہ مسلم قائدین اور رہنماؤں بالخصوص عتیق احمد ،اشرف احمد، اعظم خان، مختار انصاری ۔شہاب الدین، شرجیل امام اور خالد عمر کی عوامی خدمت کو یاد کرتے ہوئے کہا کہ جو لوگ قوم کے حقوق کی آواز اٹھاتے تھے، انہیں سازش کے تحت راستے سے ہٹایا گیا یا جیلوں میں ڈالا گیا۔لیکن آج اویسی برادران کو کھلی چھوٹ دی جارہی ہے، بھارتیہ جنتا پارٹی اور ایم آئی ایم مل کر ہندو مسلم کی سیاست کررہی ہے ۔انہوں نے کہا کہ اویسی برادران ہندو بھائیوں کیخلاف نفرت کی سیاست کرتے ہیں لیکن ان پر کیوں کارروائی نہیں ہوتی، کیوں ای ڈی اور سی بی آئی کی کارروائی نہیں ہوتی؟ کیونکہ وہ بی جے پی کی بی ٹیم ہے۔آصف شیخ نے کہا کہ آج اپوزیشن سمیت طلبا ایس آئی آر کیخلاف سڑکوں پر نکل آئے ہیں لیکن ایم آئی ایم اس تحریک میں کہیں شامل نہیں ہے وہ درپردہ ایس آئی آر اور مودی حکومت کی حمایت کررہی ہے ۔

جلسہ گاہ میں موجود جم غفیر سے آصف شیخ نے خطاب کرتے ہوئے کہا آج سکل ہندو سماج نفرت کی سیاست کر دندانے پھر رہے ہیں اور کہہ رہے ہیں کہ ہندو خطرے میں جبکہ ملک و ریاست میں بی جے پی کی سرکار ہے، ظلم اقلیتوں پر ہورہا ہے اور سرکاری کارروائی میں اقلیتوں کو نشانہ بنایا جارہا ہے پھر بھی کہتے ہیں کہ ہندو خطرے میں ہے، آصف شیخ نے کہا کہ ہندو خطرے میں نہیں بی جے پی خطرے میں ہے، انہوں نے امید ظاہر کی کہ اب انکی یہ نفرت کی دکان بہت جلد بند ہونے والی ہے ۔ایسے حالات میں ورکروں اور عوام سے خطاب کرتے ہوئے آصف شیخ نے کہا کہ ڈرنے اور گھبرانے کی کوئی ضرورت نہیں ہے۔پارٹی کے کارکنان ڈاکٹر بابا صاحب امبیڈکر کے آئین اور قانون کی پاسداری کرتے ہوئے ہر ظلم کا ڈٹ کر مقابلہ کریں گے.اگر عوام کا ساتھ رہا تو آنے والے دنوں میں سیاسی میدان میں مزید بھرپور طریقے سے حقوق کی جنگ لڑی جائے گی۔

آصف شیخ نے مالیگاؤں کی سیاست پر تبصرہ کرتے ہوئے کہا کہ ایم آئی ایم کو بہت تکلیف ہورہی ہے کہ سیکولر فرنٹ والے اتنا اچھا کام کیوں کررہے ہیں؟ مالیگاؤں کی ترقی میں رکاوٹ ڈالنے کیلئے موجودہ ایم ایل اے اور انکے ورکرس بجٹ پر اسٹے حاصل کرنے کیلئے منترالیہ کے چکر کاٹ رہے ہیں ۔آصف شیخ نے کہا کہ 8 مہینوں میں ہم نے مالیگاؤں میں 250 کروڑ کے تعمیری کاموں کا آغاز کردیا ہے اور بہت جلد مالیگاؤں ایک ترقی کا ماڈل بنے گا ۔انہوں نے موجودہ ایم ایل اے جو اتفاق سے عالم و مفتی بھی ہے پر تنقید کرتے ہوئے کہا کہ انکے سرکل میں عصمت دری کے ملزم اور لڑکیوں و خواتین کی عزت تار کرنے والے نظر آتے ہیں اور ایم ایل اے شان سے انہیں اپنے ساتھ رکھتے ہیں ۔آصف شیخ نے کہا کہ پولس کے منع کرنے پر ہم خاموش ہیں ورنہ انکے چہرے سے جس دن نقاب اتارے لینگے مالیگاؤں کی عوام انہیں پچان لیگی ۔انہوں نے کہا کہ موجودہ ایم ایل اے اور انکی پارٹی کے لوگ اسلام پارٹی کی مقبولیت سے گھبراہٹ کا شکار ہے ۔عوامی کاموں میں رکاوٹ پیدا کررہے ہیں بہت جلد عوام کے سامنے انہیں بے نقاب کیا جائے گا ۔اس موقع پر ورکروں کی جانب سے آصف شیخ کو 2 لاکھ 40 ہزار روپے مالیت کی چاندی کی تلوار تحفہ میں دی گئی جسے آصف شیخ نے ایک عائشہ نامی چھوٹی بچی جو موذی مرض میں مبتلا ہے کو بطور مدد پیش کردی ۔اس موقع پرمستقیم ڈگنیٹی نے کہا کہ اسلام پارٹی قابل مبارکباد ہیں ۔ایم آئی ایم اور بی جے پی جیسی فرقہ پرست طاقتوں سے لڑنا ہے ۔وقت پڑا تو اسلام پارٹی سیکولر فرنٹ کی طرح مہاراشٹر بھر میں اسلام پارٹی سے اتحاد کریگی اور ونچت بہوجن اگھاڑی سے بھی اتحاد پر غور کریگی. انہوں نے کہا کہ آج کے دور میں پارٹی کو بچانا بڑی ہے لیکن اسلام پارٹی دو سالوں میں پھل پھول رہی ہے جو کہ قابل مبارکباد ہیں، یہاں دھولیہ سے وسیم اکرم انصاری، امراوتی سے اویس احمد، رئیس عثمانی ،اورنگ آباد سے ظفر بلڈر،نادیڑ سے مراٹھواڑہ یونٹ کے صدر حیدر پٹیل ،حافظ انیس اظہر ،بھیونڈی سے شفقت اخلاق، بنگال سے ترنم بہار ، سابق میئر طاہرہ شیخ رشید وغیرہ نے اپنے خیالات کا اظہار کیا ۔اس جلسہ گاہ میں مہاراشٹر سمیت بنگال یوپی ،گجرات اور مدھیہ پردیش سے بھی پارٹی کے وفود شریک تھے اور انہوں نے پارٹی کو مضبوط کرنے کیلئے عزم کا اظہار کیا ۔

اسلام پارٹی کا قومی و ریاستی ورکنگ کمیٹی کا اجلاس، تنظیمی توسیع سمیت پانچ اہم تجاویز منظور

noreply@blogger.com (BEBAK URDU NEWS ) — Fri, 23 Oct 2026 13:34:45 +0000

اسلام پارٹی کا قومی و ریاستی ورکنگ کمیٹی کا اجلاس، تنظیمی توسیع سمیت ملک کے موجودہ حالات پر پانچ اہم تجاویز منظور

ایس آئی آر اور یو سی سی کی مخالفت، آئین و جمہوریت کے تحفظ کیلئے جدوجہد جاری رکھنے کا فیصلہ

قومی کور کمیٹی کی تشکیل، ہر ضلع میں پارٹی دفتر قائم کرنے و بی جے پی اور ایم آئی ایم سے راست مقابلہ کا اعلان

مالیگاؤں: 23 اکتوبر (بیباک نیوز اپڈیٹ) انڈین سیکولر لارجیسٹ اسمبلی آف مہاراشٹر (اسلام پارٹی) کی مہاراشٹر اسٹیٹ و قومی ورکنگ کمیٹی کا اجلاس مالیگاؤں کے ڈائمنڈ لانس میں پارٹی کے قومی صدر نوید خطیب کی صدارت میں منعقد ہوا۔اجلاس میں مہاراشٹر سمیت اتر پردیش، مغربی بنگال، مدھیہ پردیش، گجرات اور دیگر علاقوں سے آئے پارٹی عہدیداران و کارکنان نے شرکت کی۔ اس موقع پر ملک و ریاست کی موجودہ سیاسی و سماجی صورتحال، پارٹی کی تنظیمی سرگرمیوں اور مستقبل کی حکمت عملی پر تبادلۂ خیال کیا گیا۔اجلاس میں آصف شیخ نے اوپن سیشن کا اعلان کیا، جس میں ورکنگ کمیٹی کے اراکین نے مختلف امور پر اپنے خیالات پیش کیے۔ اسلام پارٹی کے مقامی صدر اعجاز عمر نے بھی پارٹی کی کارکردگی، تنظیمی سرگرمیوں اور آئندہ کے عزائم پر روشنی ڈالی۔ اجلاس میں تنظیم کو نچلی سطح تک مضبوط بنانے اور مختلف ریاستوں و شہروں میں پارٹی کی سرگرمیوں کو وسعت دینے کے لیے اہم فیصلے کیے گئے۔

اجلاس میں آئندہ تین ماہ کے اندر قومی کور کمیٹی تشکیل دینے کا فیصلہ کیا گیا۔ مجوزہ کمیٹی میں مختلف ریاستوں کے نمائندگان، ضلعی صدور اور پارٹی کے اہم عہدیداران شامل ہوں گے، جو باقاعدگی سے اجلاس منعقد کرکے تنظیمی کارکردگی اور درپیش مسائل کا جائزہ لیں گے۔پارٹی کے تنظیمی ڈھانچے کو مزید فعال بنانے کے لیے تحصیل، ضلع، شہر اور مہانگر سطح پر ایکٹو ممبران مقرر کرنے اور ہر ضلع میں اسلام پارٹی کا باقاعدہ دفتر قائم کرنے کا بھی اعلان کیا گیا۔ اجلاس میں عہدیداران کو ذمہ داریاں سونپتے ہوئے تنظیمی سرگرمیوں میں تیزی لانے پر زور دیا گیا۔سیاسی و جمہوری امور پر گفتگو کرتے ہوئے اجلاس میں ایس آئی آر کے نفاذ اور ووٹوں کے مبینہ غیر قانونی اخراج کے خلاف سخت موقف اختیار کرنے کا اعلان کیا گیا۔

پارٹی قیادت نے کہا کہ اسلام پارٹی ووٹروں کے حقوق کے تحفظ کے لیے عوام کے درمیان جاکر آواز اٹھائے گی اور ضرورت پڑنے پر احتجاجی تحریک بھی چلائی جائے گی۔اسی طرح یکساں سول کوڈ (یو سی سی) اور حکومت کی جانب سے متعارف کرائے جانے والے ان قوانین کی مخالفت کا فیصلہ کیا گیا جنہیں پارٹی اپنے نقطۂ نظر سے جمہوری و آئینی حقوق کے منافی سمجھتی ہے۔ اجلاس میں اس بات پر بھی زور دیا گیا کہ آئین اور قانون کے دائرے میں رہتے ہوئے جمہوریت، انصاف اور عوامی حقوق کے تحفظ کے لیے جدوجہد جاری رکھی جائے گی۔پارٹی رہنماؤں نے ناموں کی تبدیلی کی سیاست پر تنقید کرتے ہوئے کہا کہ شہروں کے نام تبدیل کرنے کے بجائے عوام کے بنیادی مسائل، روزگار، تعلیم، ترقی اور فلاح و بہبود پر توجہ دی جانی چاہیے۔ اسلام پارٹی نے تمام مذاہب، دلتوں، آدیواسیوں اور پسماندہ طبقات کو ساتھ لے کر چلنے کے عزم کا بھی اظہار کیا۔

مختلف ریاستوں اور شہروں میں عہدیداران کا اعلان

اجلاس کے دوران پارٹی کی تنظیمی توسیع کے تحت مختلف ریاستوں، اضلاع، شہروں اور شعبہ جات کے لیے نئے عہدیداران کی تقرریوں کا اعلان کیا گیا۔تفصیلات کے مطابق اتر پردیش میں شاداب ندوری کو ضلع غازی آباد کا کوآرڈینیٹر، مغربی بنگال میں ترنم بہار کو ریاستی خواتین صدر، جبکہ مدھیہ پردیش میں ڈاکٹر محمد فاروق شیخ کو ریاستی صدر اور زاہد احمد خان کو نائب ریاستی صدر مقرر کیا گیا۔مہاراشٹر کے بھیونڈی میں شفقت شرافت خان کو ریاستی کارگزار صدر اور وسیم احمد طفیل صدیقی کو شہر صدر کی ذمہ داری دی گئی۔ ممبئی کے گوونڈی علاقے میں یحییٰ باق اللہ شیخ کو شمال مشرقی ضلع صدر، محمد شاقب جاوید عمر صدیقی اور زریج احمد طیب خان کو ضلع جنرل سکریٹری، جبکہ خان محمد کو اساتذہ ونگ کا جنرل سکریٹری مقرر کیا گیا۔ گوونڈی شہر کے لیے سید محمد کاشف کو شہر صدر، اظہر جعفر بیگ کو نائب صدر، فہیم قریشی کو سوشل میڈیا صدر اور عبدالہادی عبدالحفیظ ملک کو اسٹوڈنٹ ونگ کا صدر بنایا گیا۔

ناسک ضلع میں کرن سین بھارت چوہان کو اسلام پارٹی ضلع صدر مقرر کیا گیا۔ بھساول میں شیخ فرحان شیخ بشیر کو شہر صدر اور سرفراز احمد عبدالغنی شیخ کو تعلقہ صدر کی ذمہ داری سونپی گئی۔امراوتی میں رحیم خان شبیر خان (بابلو راج) کو شہر صدر، ارشاد خان رحیم خان کو ضلع کارگزار صدر، شیخ رفیق شیخ حبیب (پہلوان) کو اقلیتی شعبے کا ضلع نائب صدر، عبدالعمران عبدالعزیز کو ضلع نائب صدر اور شیخ شاہ رخ محمد فاروق کو ضلع یوتھ نائب صدر مقرر کیا گیا۔ یوتمل میں اویس الدین شرف الدین کو ضلع صدر بنایا گیا۔ناندیڑ میں سید حیدر پٹیل کو مراٹھواڑہ صدر، شیخ رزاق کو ضلع صدر، شیخ ایوب شیخ صمد کو ضلع یوتھ صدر، احمد خان گاؤس خان کو ضلع یوتھ جنرل سکریٹری، سید ضمیر کو شہر یوتھ صدر اور شیخ مشتاقیم شیخ احمد کو آٹو یونین کا ضلع صدر مقرر کیا گیا۔ جالنا میں سید جاوید سید سلیم کو ضلع کوآرڈینیٹر، جبکہ سید فضل سید مبین اور شاہد شیخ لطیف کو شہر کوآرڈینیٹر کی ذمہ داری دی گئی۔اجلاس کے اختتام پر پارٹی قیادت نے تنظیمی ڈھانچے کو مضبوط بنانے، عوامی مسائل پر سرگرم کردار ادا کرنے اور آئین، جمہوریت، انصاف و سماجی مساوات کے تحفظ کے لیے اپنی جدوجہد جاری رکھنے کے عزم کا اعادہ کیا۔ پارٹی کے مطابق مختلف ریاستوں اور شہروں میں نئی تقرریوں کا مقصد تنظیمی سرگرمیوں کو وسعت دینا اور عوام سے رابطے کو مزید مؤثر بنانا ہے۔یہاں پارٹی کے صدر و عہدیداران، کارپوریٹرس ،میئر نسرین شیخ و سابق میئر طاہرہ شیخ رشید سمیت دیگر ذمہ داران موجود تھے ۔

جمعہ کو اسلام پارٹی کا انقلابی جلسہ عام،آصف شیخ کی تقریر پر انتظامیہ و اپوزیشن کی نظر

noreply@blogger.com (BEBAK URDU NEWS ) — Thu, 22 Oct 2026 18:21:17 +0000

جمعہ کو اسلام پارٹی کا انقلابی جلسہ عام،آصف شیخ کی تقریر پر انتظامیہ و اپوزیشن کی نظر

مالیگاؤں :22 اکتوبر (بیباک نیوز اپڈیٹ) اسلام پارٹی کے دو سالہ جشن یوم تاسیس کے موقع پر گزشتہ 20 اکتوبر سے رسم پرچم کشائی کے بعد ورکروں کا استقبال، خواتین کیلئے حوصلہ افزائی کے پروگرام اور یوتھ ونگ کی جانب سے مریضوں میں پھلوں کی تقسیم سمیت کئی فلاحی سرگرمیاں انجام دی گئی اور آج 23 اکتوبر کو اسی سلسلے کی میں کڑی ڈائمنڈ لانس میں ایگزیکٹو ورکنگ کمیٹی مہاراشٹر اسلام پارٹی کی جانب سے شام چار بجے آصف شیخ کی سرپرستی میں منعقد کی جارہی ہے جس کی صدارت پارٹی کے قومی صدر نوید خطیب احمد کرینگے جبکہ آخری کڑی کے طور پر فیسٹیول گراؤنڈ آگرہ روڈ پر شام 7 بجے سے رات دس بجے تک اسلام پارٹی کا انقلابی جلسہ عام منعقد کیا جارہا ہے اس طرح کی تفصیلات احسان شیخ و رضوان حاجی نے میڈیا کو دی ۔انہوں نے پارٹی کے قومی صدر و سپریمو آصف شیخ کے توسط سے بتایا کہ یہ انقلابی جلسہ اپنے آپ میں ایک تاریخ رقم کرنے جارہا ہے جہاں مہاراشٹر کے پندرہ اضلاع اور ملک کی چار بڑی ریاستوں کے نمائندہ وفود تشریف لارہے ہیں جو مالیگاؤں کیلئے اعزاز کی بات ہے ۔انہوں نے کہا کہ پہلے ہم کسی دوسری پارٹی کے پروگراموں میں شہر سے باہر جایا کرتے تھے لیکن اب ہمیں میزبان بننے کا موقع مل رہا ہے اور یہ سب شیخ آصف کی کوششوں اور شہریان کی دعاؤں کا نتیجہ ہے ۔انہوں نے بتایا کہ اس جلسہ میں انوکھی طرز پر استقبال، روشنائی (آتش بازی) کا استعمال ہوگا جو مالیگاؤں کیلئے نیا پن ہوگا ۔انہوں نے مزید بتایا کہ آصف شیخ رشید کی تقریر بھی جلسہ کی نوعیت کی مناسبت سے انوکھی ہوگی جس پر شہریان سمیت ملک بھر کی نظر لگی ہوئی ہیں ۔آصف شیخ مالیگاؤں سے لیکر ریاستی و قومی سیاست پر اپنی بات پیش کرینگے ۔آصف شیخ کی تقریر پر جہاں اپوزیشن نطر جمائے ہوئے ہیں وہیں انتظامیہ بھی جلسہ گاہ کو دیکھ رہی ہے۔احسان شیخ و رضوان حاجی نے شہریان مالیگاؤں بالخصوص اسلام پارٹی کے تمام کارپوریٹرس ،عہدیداروں اور ورکروں سے اپیل کی کہ وہ وقت سے پہلے جلسہ گاہ میں تشریف لائیں ۔

اسلام پارٹی کے دو سال مکمل؛ آصف شیخ کا بڑا اعلان، شبِ برات سے قبل دو روزہ مفت میڈیکل کیمپ کا انعقاد‘‘

noreply@blogger.com (BEBAK URDU NEWS ) — Wed, 21 Oct 2026 16:45:01 +0000

اسلام پارٹی کے دو سال مکمل؛ آصف شیخ کا بڑا اعلان، شبِ برات سے قبل دو روزہ مفت میڈیکل کیمپ کا انعقاد

اسلام پارٹی کے عروج میں شہر کی خواتین کا بھی برابر کا حصہ رہا ہے، آصف شیخ کا اظہار تشکر

’’پانی اور بنیادی سہولیات ہماری اولین ترجیح، آئندہ چھ ماہ میں ہر وارڈ اور گلی تک پانی کی پائپ لائن پہنچانے کا منصوبہ‘‘

مالیگاؤں: 21 اکتوبر(بیباک نیوز اپڈیٹ) اسلام پارٹی کے قیام کے دو سال مکمل ہونے پر ڈائمنڈ لانس میں میئر نسرین شیخ کی صدارت میں منعقدہ استقبالیہ تقریب اور اظہارِ تشکر کے پروگرام میں سابق رکن اسمبلی اور اسلام پارٹی کے رہنما آصف شیخ رشید نے عوامی مسائل کے حل، بنیادی سہولیات کی فراہمی اور صحت عامہ کے حوالے سے اہم اعلانات کیے۔ انہوں نے کہا کہ عوام کو پینے کا پانی اور دیگر بنیادی سہولیات فراہم کرنا اسلام پارٹی کی اولین ترجیح ہے۔ اسی مقصد کے تحت شہر کے مختلف علاقوں میں پانی کی پائپ لائن پہنچانے کے منصوبے پر کام کیا جائے گا، جبکہ شبِ برات سے قبل دو روزہ مفت میڈیکل کیمپ کا انعقاد بھی کیا جائے گا۔

تقریب میں خواتین، پارٹی ورکروں اور عہدیداران کی بڑی تعداد موجود تھی۔اس موقع پر آصف شیخ نے اپنے استقبالیہ خطاب میں پارٹی کارکنوں، بالخصوص خواتین کی محنت، جدوجہد اور دعاؤں کا شکریہ ادا کیا۔ انہوں نے کہا کہ مردوں کے ساتھ ساتھ خواتین کے سپورٹ سے اسلام پارٹی آج کامیابی کی منزل پر پہنچ رہی ہے اور عوام کے تعاون اور حمایت کی بدولت اسلام پارٹی نے گزشتہ دو برسوں میں اپنی شناخت قائم کی ہے اور مالیگاؤں کے ساتھ مہاراشٹر کے دیگر شہروں میں بھی پارٹی کی سرگرمیوں کو وسعت مل رہی ہے۔

آصف شیخ نے میونسپل کارپوریشن انتخابات کا حوالہ دیتے ہوئے کہا کہ عوام کے اعتماد اور تعاون کے نتیجے میں اسلام پارٹی نے 35 کارپوریٹروں کے ساتھ نمایاں کامیابی حاصل کی، جبکہ نسرین شیخ کو اسلام پارٹی کی پہلی خاتون میئر بننے کا اعزاز حاصل ہوا۔ انہوں نے کہا کہ مرحوم شیخ رشید نے عوامی خدمت کا جو راستہ دکھایا تھا، اسی پر چلتے ہوئے غریبوں، مزدوروں اور عام شہریوں کے مسائل حل کرنا پارٹی کا بنیادی مقصد ہے۔

انہوں نے ورکروں سے اپیل کی کہ وہ عوام کے درمیان رہ کر ان کے مسائل کو سمجھیں اور ان کے حل کے لیے مسلسل کوششیں جاری رکھیں۔ ان کے مطابق سیاسی کامیابی کی اصل اہمیت اسی وقت ہے، جب اس کے ذریعے عام شہریوں کو راحت پہنچائی جائے اور شہر کی ترقی کے لیے عملی اقدامات کیے جائیں۔

مالیگاؤں میں پینے کے پانی کے مسئلے اور مختلف علاقوں میں بورنگ کی کھدائی و تنصیب کے معاملے پر گفتگو کرتے ہوئے آصف شیخ نے مقامی رکن اسمبلی مفتی اسماعیل پر تنقید کی۔ انہوں نے الزام عائد کیا کہ میونسپل کارپوریشن کی جانب سے غریب اور جھونپڑی والے علاقوں میں کھدوائی گئی بورنگز کو مکتوب کے ذریعے رکوا دیا گیا ہے، جس سے ان علاقوں کے شہریوں کو مشکلات کا سامنا کرنا پڑ رہا ہے۔

آصف شیخ نے کہا کہ وہ خود اس معاملے کی پیروی کریں گے اور بند پڑی بورنگز کو دوبارہ شروع کروانے کے لیے کوششیں کریں گے۔ انہوں نے مزید کہا کہ آئندہ چھ ماہ کے اندر شہر کے تمام وارڈوں اور گلیوں تک پانی کی پائپ لائن پہنچانے کے منصوبے کو مکمل کرنے کا ہدف رکھا گیا ہے، تاکہ شہریوں کو پینے کے پانی کی فراہمی میں درپیش مشکلات کم کی جاسکیں۔

آصف شیخ نے کہا کہ شبِ برات سے قبل مالیگاؤں میں دو روزہ تاریخی مفت میڈیکل کیمپ منعقد کیا جائے گا، جس میں مختلف امراض کے ماہر ڈاکٹروں کو مدعو کیا جائے گا۔آصف شیخ کے مطابق اس کیمپ میں خواتین اور مردوں کے ماہر ڈاکٹروں کے علاوہ کینسر، امراضِ قلب، دماغی امراض اور بچوں کے ماہرین کی خدمات حاصل کرنے کی کوشش کی جائے گی۔ میونسپل کارپوریشن کے تعاون سے منعقد ہونے والے اس کیمپ میں ادویات، ای سی جی، مختلف طبی جانچ اور آپریشن کی سہولیات مفت فراہم کرنے کا منصوبہ ہے۔

انہوں نے کہا کہ اس اقدام کا مقصد خصوصاً غریب اور ضرورت مند خاندانوں کو بہتر طبی سہولیات فراہم کرنا ہے، تاکہ مالی مشکلات کے باعث کسی شہری کو علاج سے محروم نہ رہنا پڑے۔ میڈیکل کیمپ کے ذریعے شہر کے زیادہ سے زیادہ ضرورت مند افراد تک طبی خدمات پہنچانے کی کوشش کی جائے گی۔

اپنے خطاب کے اختتام پر آصف شیخ نے مالیگاؤں کے عوام، بالخصوص نوجوانوں، بچوں، خواتین اور پارٹی کارکنوں کی محبت و حمایت پر اظہارِ تشکر کیا۔ انہوں نے اسلام پارٹی کے مستقبل، عوامی خدمت اور شہر کی ترقی کے لیے دعاؤں کی اپیل کرتے ہوئے کہا کہ عوامی مسائل کے حل کے لیے کوششیں جاری رکھی جائیں گی۔انہوں نے 23 اکتوبر کو منعقد ہونے والے اسلام پارٹی کے دوسرے جشنِ یومِ تاسیس اور انقلابی جلسۂ عام کا تذکرہ کرتے ہوئے شہریوں، خواتین اور پارٹی حامیوں سے کثیر تعداد میں شرکت کی اپیل بھی کی۔اس تقریب میں سابق میئر طاہرہ شیخ، موجودہ میئر نسرین شیخ، اسلام پارٹی کے قومی صدر نوید خطیب سمیت پارٹی کی متعدد خاتون کارپوریٹرس، عہدیداران اور کارکنان موجود تھے۔ تقریب میں پارٹی کے دو سالہ سفر، عوامی تعاون اور مستقبل میں شہر کے بنیادی مسائل کے حل کے عزم کا اظہار کیا گیا۔

دیسی پستول،کارتوس،کوڈین سیرپ کی سو بوتلیں، 5,385 نشیلی گولیاں، 4 کلو سے زائد گانجہ اور ضبط

noreply@blogger.com (BEBAK URDU NEWS ) — Wed, 21 Oct 2026 16:16:00 +0000

دیسی پستول،کارتوس،کوڈین سیرپ کی سو بوتلیں، 5,385 نشیلی گولیاں، 4 کلو سے زائد گانجہ اور ضبط،

مالیگاؤں پولس کا بڑا ایکشن! منشیات اور غیر قانونی اسلحہ کے خلاف پانچ بڑی کارروائیاں، کئی ملزمین گرفتار

مالیگاؤں:21 اکتوبر (بیباک نیوز اپڈیٹ)مالیگاؤں پولس نے شہر کے مختلف علاقوں میں منشیات کے غیر قانونی کاروبار، ممنوعہ نشیلی گولیوں کی فروخت، اسلحہ کی اسمگلنگ اور گانجہ کی اسمگلنگ کے خلاف بڑی کارروائیاں انجام دی ہیں۔ گزشتہ ایک ہفتے کے دوران انجام دی گئی ان کارروائیوں کی تفصیلات ایڈیشنل سپرنٹنڈنٹ آف پولس سورج گنجال نے پریس کانفرنس کے ذریعے صحافیوں کے سامنے پیش کیں۔ اس موقع پر پوارواڑی، آزاد نگر، سٹی اور رمضان پورہ سمیت دیگر پولیس اسٹیشنوں کے سینئر پولس افسران بھی موجود تھے۔پولیس کی جانب سے پیش کردہ تفصیلات کے مطابق، مختلف کارروائیوں میں کوڈین پر مشتمل ممنوعہ کف سیرپ کی 100 بوتلیں، الپرازولم کی مجموعی طور پر 5,385 گولیاں، 4 کلو 125 گرام گانجہ، ایک دیسی پستول، زندہ کارتوس اور موٹر سائیکلیں ضبط کی گئی ہیں۔ ان کارروائیوں کے دوران متعدد ملزمین کو گرفتار کیا گیا ہے، جبکہ منشیات اور غیر قانونی اسلحہ کی سپلائی سے وابستہ دیگر افراد کی تلاش بھی جاری ہے۔

تفصیلات کے مطابق پوارواڑی پولیس اسٹیشن کی حدود میں خفیہ اطلاع کی بنیاد پر کارروائی کرتے ہوئے پولس نے ممنوعہ کوڈین کف سیرپ کی 100 بوتلیں ضبط کرکے دو ملزمین کو گرفتار کیا۔ گرفتار شدگان کی شناخت 26 سالہ عبیدالرحمان عتیق الرحمان، ساکن مدنی نگر، اور 25 سالہ عتیق احمد رفیق احمد، ساکن جمبور نگر، کے طور پر کی گئی ہے۔

پولس کے مطابق، ابتدائی تفتیش کے دوران ملزمین نے مذکورہ بوتلیں گجرات کے شہر سورت سے لانے کی بات بتائی ہے۔ اس معاملے میں این ڈی پی ایس ایکٹ کے تحت مقدمہ درج کرکے مزید تحقیقات کی جارہی ہیں، تاکہ منشیات کی سپلائی کے ذرائع اور اس کاروبار سے وابستہ دیگر افراد کا پتہ لگایا جاسکے۔اسی طرح پاورواڑی پولس نے غیر قانونی اسلحہ کے خلاف کارروائی کرتے ہوئے گولڈن نگر کے رہنے والے 25 سالہ محمد رضوان عرف رضوان ناٹیا کو ایک دیسی پستول اور زندہ کارتوس کے ساتھ گرفتار کیا۔ پولس کی ابتدائی تفتیش میں اسلحہ اترپردیش سے لانے کی بات سامنے آئی ہے۔ پولس اب اس بات کی تحقیقات کررہی ہے کہ اسلحہ کہاں سے حاصل کیا گیا اور اس کی سپلائی میں کون کون ملوث ہے۔

سٹی پولس اسٹیشن نے بھی منشیات کے خلاف کارروائی کرتے ہوئے الپرازولم کی 14 اسٹرپس، یعنی مجموعی طور پر 210 گولیاں ضبط کی ہیں۔ اس معاملے میں خلیل اسکول کے قریب رہنے والے 31 سالہ عرفان محمد اسلام عرف عرفان بوڑھا کو گرفتار کیا گیا ہے۔پولس کے مطابق، گرفتار ملزم نے ابتدائی پوچھ تاچھ میں ان گولیوں کو دھولیہ سے لانے کی بات بتائی ہے۔ پولس اس معاملے میں نشیلی گولیوں کی خرید و فروخت اور ان کی سپلائی کے ذرائع کی جانچ کررہی ہے۔

آزاد نگر پولس اسٹیشن نے نشیلی گولیوں کے غیر قانونی کاروبار کے خلاف کارروائی کرتے ہوئے 5,175 الپرازولم گولیاں اور ایک موٹر سائیکل ضبط کی ہے۔ اس معاملے میں رسول پورہ کے رہنے والے 22 سالہ معاذ امیر مصطفیٰ اور جعفر نگر کے رہنے والے 23 سالہ غفران احمد رضوان احمد کو گرفتار کیا گیا ہے۔اتنی بڑی تعداد میں نشیلی گولیوں کی برآمدگی کے بعد پولس ان کے سپلائی نیٹ ورک کی چھان بین کررہی ہے۔ تفتیش کے دوران یہ معلوم کرنے کی کوشش کی جارہی ہے کہ گولیاں کہاں سے لائی گئیں، انہیں کن افراد تک پہنچایا جانا تھا اور اس غیر قانونی کاروبار میں مزید کون کون شامل ہے۔

مالیگاؤں پولس کے دائرہ کار کے تحت آنے والے چاندوڑ پولس اسٹیشن نے بھی گانجہ کی اسمگلنگ کے خلاف کارروائی کرتے ہوئے 4 کلو 125 گرام گانجہ اور ایک موٹر سائیکل ضبط کی ہے۔ پولس کے مطابق، ضبط شدہ سامان کی مجموعی مالیت 3 لاکھ 15 ہزار 722 روپے ہے۔اس معاملے میں چاندوڑ کے رہنے والے 47 سالہ آنند پردیسی اور 56 سالہ سنجے شندے کو گرفتار کیا گیا ہے۔ دونوں ملزمین کے خلاف این ڈی پی ایس ایکٹ کے تحت مقدمہ درج کیا گیا ہے اور پولس مزید تحقیقات کررہی ہے۔پریس کانفرنس سے خطاب کرتے ہوئے ایڈیشنل ایس پی سورج گنجال نے واضح کیا کہ مالیگاؤں پولس منشیات کے غیر قانونی کاروبار، ممنوعہ نشیلی گولیوں کی فروخت اور غیر قانونی اسلحہ کی اسمگلنگ کے خلاف کارروائیاں مزید سختی کے ساتھ جاری رہیں گی۔

انہوں نے بتایا کہ پولس صرف گرفتار ملزمین تک محدود نہیں رہے گی، بلکہ منشیات اور اسلحہ کی سپلائی کے پورے نیٹ ورک کی کڑیاں جوڑ کر اس کاروبار سے وابستہ دیگر افراد تک پہنچنے کی کوشش کرے گی۔پولس کی ان کارروائیوں سے واضح ہے کہ شہر اور اطراف میں منشیات کے غیر قانونی کاروبار کے خلاف کارروائیوں کا سلسلہ تیز کیا جارہا ہے۔ اب دیکھنا یہ ہے کہ ان مقدمات کی مزید تفتیش میں سپلائی نیٹ ورک سے وابستہ کتنے دیگر افراد کے نام سامنے آتے ہیں۔

مالیگاؤں:سڑک حادثہ میں تیس سالہ محمد ارشاد جاں بحق، ایک شخص زخمی

noreply@blogger.com (BEBAK URDU NEWS ) — Tue, 20 Oct 2026 20:29:55 +0000

مالیگاؤں:سڑک حادثہ میں 30 سالہ محمد ارشاد جاں بحق، ایک شخص زخمی

چار بچوں کے سر سے اٹھ گیا باپ کا سایہ، لوند واڑہ شیوار پھاٹا کے قریب پیش آیا حادثہ

مالیگاؤں:20 اکتوبر (بیباک نیوز اپڈیٹ) مالیگاؤں میں سڑک حادثات کا سلسلہ تھمنے کا نام نہیں لے رہا ہے۔ 20 اکتوبر کو مغرب کے وقت لوند واڑہ شیوار پھاٹا کے قریب تعلقہ پولس اسٹیشن سے کچھ آگے دو موٹر سائیکلوں کے درمیان زوردار ٹکر ہوگئی۔ اس حادثے میں محمد ارشاد محمد سعید نامی تقریباً 30 سالہ نوجوان کی موقع پر ہی موت واقع ہوگئی، جبکہ ایک دیگر شخص شدید زخمی ہوگیا۔ حادثے کی اطلاع ملتے ہی مقامی افراد نے فوری طور پر زخمی کو جائے حادثہ سے اٹھایا اور علاج کے لیے سہارا اسپتال میں داخل کرایا۔حادثے کی تفصیلات شفیق اینٹی کرپشن، خالد ایس اور عارف ایام ممبر کی جانب سے فراہم کی گئیں۔ حادثے کی خبر سے علاقے میں غم کی لہر دوڑ گئی، جبکہ متوفی کے اہل خانہ پر غم کا پہاڑ ٹوٹ پڑا۔

حادثے میں جاں بحق ہونے والے نوجوان کی شناخت محمد ارشاد محمد سعید کے نام سے ہوئی ہے۔ متوفی مالیگاؤں کے سنجری چوک، سنجری نگر، فارمیسی کالج کے قریب کا رہائشی تھا۔ بتایا جاتا ہے کہ محمد ارشاد پیشے سے پاور لوم مزدور تھا اور پاور لوم چلا کر اپنے اہل خانہ کی کفالت کرتا تھا۔ وہ چار بچوں کا باپ تھا۔ اس کی اچانک موت سے بچوں کے سر سے باپ کا سایہ اٹھ گیا، جبکہ اہل خانہ اور رشتہ داروں پر غم و اندوہ کی کیفیت طاری ہے۔

شہر اور اطراف کے علاقوں میں پیش آنے والے سڑک حادثات پر سوشل ورکروں نے تشویش کا اظہار کرتے ہوئے عوام سے اپیل کی ہے کہ سڑکوں اور شاہراہوں پر سفر کے دوران انتہائی احتیاط سے کام لیں۔ خصوصاً موٹر سائیکل سوار ہیلمٹ کا استعمال کریں، رفتار پر قابو رکھیں اور ٹریفک قوانین کی پابندی کریں۔شہریوں کا کہنا ہے کہ معمولی سی لاپروائی بھی کسی خاندان کی خوشیاں اجاڑ سکتی ہے۔ اس لیے ہر شخص کو اپنی جان کی حفاظت کے ساتھ اپنے اہل خانہ کی ذمہ داری کا احساس بھی رکھنا چاہیے، تاکہ ایسے افسوسناک حادثات سے بچا جاسکے۔

آزاد نگر پولس کی دو بڑی کارروائیاں،قابلِ اعتراض ویڈیوز بھیجنے کے الزام میں نوجوان گرفتار

noreply@blogger.com (BEBAK URDU NEWS ) — Tue, 20 Oct 2026 14:58:31 +0000

آزاد نگر پولس کی دو بڑی کارروائیاں،قابلِ اعتراض ویڈیوز بھیجنے کے الزام میں نوجوان گرفتار

منشیات کے خلاف بھی پولس کا بڑا ایکشن، 5,175 نشیلی گولیاں اور اسکوٹر ضبط، دو ملزمان گرفتار

مالیگاؤں: 20 اکتوبر (بیباک نیوز اپڈیٹ) آزاد نگر پولس اسٹیشن نے دو الگ الگ کارروائیاں انجام دیتے ہوئے قابلِ اعتراض تصاویر اور ویڈیوز بھیجنے کے الزام میں ایک نوجوان کو گرفتار کیا ہے، جبکہ منشیات کی غیر قانونی خرید و فروخت کے خلاف کارروائی کرتے ہوئے دو دیگر ملزمان کو بھی حراست میں لیا گیا ہے۔ پولس نے منشیات کے معاملے میں ملزمان کے قبضے سے مجموعی طور پر 5,175 نشیلی گولیاں اور ایک اسکوٹر ضبط کیا ہے، جن کی مجموعی مالیت 67 ہزار 857 روپے بتائی گئی ہے۔

آزاد نگر پولیس کی پہلی کارروائی میں جعفر نگر کے رہائشی رئیس احمد رمضان علی کو ایک 35 سالہ خاتون کے موبائل فون پر مبینہ طور پر قابلِ اعتراض تصاویر، ویڈیوز اور نامناسب پیغامات بھیجنے کے الزام میں گرفتار کیا گیا ہے۔پولیس ریکارڈ کے مطابق، یہ واقعہ 26 ستمبر 2026 کی رات اور صبح کے درمیان پیش آیا، جب مبینہ طور پر خاتون کے موبائل فون پر نامناسب الفاظ، تصاویر اور ویڈیوز ارسال کی گئیں۔ اس واقعے کے سبب شکایت کنندہ خاتون اور ان کی والدہ کو ذہنی پریشانی اور شرمندگی کا سامنا کرنا پڑا۔ معاملے کی شکایت موصول ہونے کے بعد آزاد نگر پولیس نے کارروائی کرتے ہوئے ملزم کو گرفتار کرلیا۔اس سلسلے میں بھارتیہ نیائے سنہتا (BNS) کی متعلقہ دفعات اور انفارمیشن ٹیکنالوجی ایکٹ کے تحت مقدمہ درج کیا گیا ہے۔ پولیس انسپکٹر سندیپ گھوگے کی نگرانی میں معاملے کی مزید تفتیش جاری ہے۔

آزاد نگر پولیس نے دوسری کارروائی میں مبینہ طور پر نشیلی گولیوں کی غیر قانونی فروخت کے خلاف کارروائی کرتے ہوئے سردار نگر علاقے میں واقع عتیق سیٹھ کے کارخانے کے سامنے چھاپہ مارا۔ اس دوران پولیس نے دو نوجوانوں کو حراست میں لے کر ان کے قبضے سے بڑی تعداد میں نشیلی گولیاں برآمد کرنے کا دعویٰ کیا ہے۔پولس کے مطابق، گرفتار ملزمان کی شناخت ماز امیر محمد مصطفی، ساکن رسول پورہ، اور غفران احمد رضوان احمد، ساکن جعفر نگر، کے طور پر ہوئی ہے۔ کارروائی کے دوران ملزمان کے قبضے سے 5,175 الپرازولام (Alprazolam) گولیاں اور ایک سیاہ رنگ کی چیتک اسکوٹر ضبط کی گئی۔

پولیس نے ضبط شدہ گولیوں اور اسکوٹر کی مجموعی مالیت 67 ہزار 857 روپے بتائی ہے۔ اس معاملے میں نارکوٹک ڈرگز اینڈ سائیکوٹروپک سبسٹینسز (NDPS) ایکٹ کے تحت مقدمہ درج کرکے مزید تفتیش شروع کردی گئی ہے۔آزاد نگر پولیس اسٹیشن کی جانب سے کی گئی ان دونوں کارروائیوں میں ایک طرف خاتون کو مبینہ طور پر قابلِ اعتراض مواد بھیجنے کے معاملے میں کارروائی کی گئی، تو دوسری جانب نشیلی گولیوں کی غیر قانونی فروخت کے خلاف ایکشن لیا گیا۔ پولیس دونوں معاملات کی مزید تفتیش کررہی ہے تاکہ متعلقہ واقعات کے تمام پہلوؤں کا جائزہ لیا جاسکے اور قانونی کارروائی کو آگے بڑھایا جاسکے۔

اسلام پارٹی کی کامیابی کا کریڈٹ عوام اور ورکروں کے نام، اسمبلی و پارلیمنٹ میں بھی نمائندے منتخب کرنے کا عزم!

noreply@blogger.com (BEBAK URDU NEWS ) — Tue, 20 Oct 2026 13:04:55 +0000

اسلام پارٹی کی کامیابی و مقبولیت کا کریڈٹ عوام اور ورکروں کے نام، اسمبلی و پارلیمنٹ میں بھی نمائندے منتخب کرنے کا عزم!

23 اکتوبر کے انقلابی جلسہ میں اترپردیش، بنگال، مدھیہ پردیش اور گجرات سمیت مہاراشٹر کے 15 اضلاع کے وفود کی مالیگاؤں آمد

دو سالہ جدوجہد اور کامیابیوں کا جشن شروع، ہزار کھولی رابطہ آفس پر پرچم کشائی، ورکروں کا استقبال

مالیگاؤں: 20 اکتوبر (بیباک نیوز اپڈیٹ)انڈین سیکولر لارجیسٹ اسمبلی آف مہاراشٹر (I.S.L.A.M) پارٹی نے اپنے قیام کے دو سال مکمل ہونے پر جشنِ یومِ تاسیس کی تقریبات کا آغاز کردیا ہے۔ اس سلسلے میں منگل 20 اکتوبر کی شام 5 بجے ہزار کھولی پارٹی کے رابطہ آفس پر ایک تقریب منعقد کی گئی، جس کی صدارت پارٹی کے قومی صدر خطیب نوید احمد نے کی۔ اس موقع پر پارٹی کے بانی و قائد آصف شیخ رشید، اعجاز عمر اور دیگر ذمہ داران کے ہاتھوں رسمِ پرچم کشائی انجام دی گئی۔تقریب میں پارٹی کے عہدیداران، کارکنان اور شیخ رشید کے دیرینہ ساتھیوں نے شرکت کی اور دو سالہ جدوجہد و کامیابیوں پر اپنے خیالات کا اظہار کیا۔

تقریب سے خطاب کرتے ہوئے اسلام پارٹی کے بانی و قائد آصف شیخ رشید نے پارٹی کے دو سالہ جشنِ یومِ تاسیس کی مبارکباد پیش کی اور عوام و کارکنان کا شکریہ ادا کرتے ہوئے کہا کہ اسلام پارٹی کی کامیابی اور مقبولیت کا اصل کریڈٹ عوام اور پارٹی ورکروں کو جاتا ہے۔ انہوں نے کہا کہ مالیگاؤں میونسپل کارپوریشن میں 35 نشستوں پر کامیابی حاصل کرکے پارٹی کا پرچم لہرانے میں عوام کی محبت، اعتماد اور کارکنوں کی محنت کا بنیادی کردار رہا ہے۔ پارٹی عوام اور کارکنوں ہی سے وجود رکھتی ہے اور ان کی حمایت ہی اس کی اصل طاقت ہے۔آصف شیخ نے پُراعتماد انداز میں کہا کہ اگر عوام کی محبت اور کارکنوں کی محنت و لگن اسی طرح برقرار رہی تو ان شاء اللہ آئندہ انتخابات میں اسمبلی اور پارلیمنٹ میں بھی اسلام پارٹی کا نمائندہ منتخب ہوگا۔ انہوں نے کہا کہ پارٹی کا مقصد صرف انتخابی کامیابی حاصل کرنا نہیں بلکہ عوام کے اعتماد پر پورا اترنا، ان کے مسائل حل کرنا اور شہر کی تعمیر و ترقی کے لیے مسلسل کام کرنا ہے۔

آصف شیخ رشید نے اپنے خطاب میں ماضی کی سیاسی صورتحال کا حوالہ دیتے ہوئے کہا کہ ان کے والد شیخ رشید کے انتقال کے بعد مخالفین کی جانب سے یہ اندازے لگائے جارہے تھے کہ اب آصف شیخ کی سیاسی سرگرمیاں ختم ہوجائیں گی اور وہ اسمبلی انتخابات میں 30 ہزار سے بھی کم ووٹ حاصل کرپائیں گے، لیکن عوام نے ایک لاکھ سے زائد ووٹ دے کر ان تمام اندازوں کو غلط ثابت کردیا۔ انہوں نے کہا کہ عوام نے نہ صرف انتخابی میدان میں بھرپور حمایت کی بلکہ میونسپل کارپوریشن میں بھی اسلام پارٹی کو اقتدار تک پہنچایا۔ ان کے مطابق یہ کامیابی عوام کے اعتماد اور کارکنوں کی مسلسل محنت کا نتیجہ ہے۔

23 اکتوبر کے جلسے میں ملک بھر سے وفود کی شرکت، مالیگاؤں کے لیے اعزاز

آصف شیخ نے اعلان کیا کہ جمعہ 23 اکتوبر کو منعقد ہونے والے اسلام پارٹی کے جشنِ یومِ تاسیس اور انقلابی جلسۂ عام میں مغربی بنگال، اترپردیش، مدھیہ پردیش اور گجرات سمیت مہاراشٹر کے 15 سے زائد اضلاع سے وفود کی شرکت متوقع ہے۔ انہوں نے کہا کہ ملک کے مختلف علاقوں سے لوگوں کی مالیگاؤں آمد اور پارٹی میں شمولیت کے لیے دلچسپی ظاہر کرنا شہر، پارٹی اور کارکنوں کے لیے اعزاز کی بات ہے۔انہوں نے عوام سے اپیل کی کہ وہ جلسۂ عام میں وقت سے پہلے پہنچ کر پروگرام کو کامیاب بنائیں۔ آصف شیخ کے مطابق یہ جلسہ پارٹی کی دو سالہ جدوجہد، کامیابیوں اور مستقبل کے سیاسی عزائم کو پیش کرنے کا اہم موقع ہوگا، جس میں ملک کے مختلف علاقوں سے آنے والے وفود کی شرکت پارٹی کی بڑھتی ہوئی سرگرمیوں کی عکاسی کرے گی۔

آصف شیخ والد شیخ رشید کے نقشِ قدم پر شہر کی ترقی کے لیے کوشاں: طاہرہ شیخ رشید

سابق میئر طاہرہ شیخ رشید نے اپنے خطاب میں کہا کہ آصف شیخ رشید اپنے والد مرحوم شیخ رشید کے نقشِ قدم پر چلتے ہوئے مالیگاؤں کی تعمیر و ترقی اور عوامی مسائل کے حل کے لیے سرگرم ہیں۔ انہوں نے کہا کہ غریبوں سے ملاقات کرنا، ان کے مسائل کو سمجھنا اور ان کے حل کے لیے کوششیں کرنا عوامی خدمت کا اہم حصہ ہے۔طاہرہ شیخ رشید نے کہا کہ گزشتہ دو برسوں کے دوران آصف شیخ نے جس انداز میں سیاسی کامیابیاں حاصل کی ہیں، وہ عوام کی محبت اور اعتماد کا ثبوت ہیں۔ انہوں نے امید ظاہر کی کہ اگر عوام اور کارکنوں کا یہی تعاون جاری رہا تو مستقبل میں بھی اسلام پارٹی اپنی سیاسی حیثیت برقرار رکھنے میں کامیاب رہے گی۔ انہوں نے پارٹی کارکنوں پر زور دیا کہ وہ باہمی اتحاد کے ساتھ عوامی مسائل کے حل اور شہر کی ترقی کے لیے اپنی کوششیں جاری رکھیں۔

شیخ رشید کے دیرینہ ساتھیوں اور محنتی کارکنوں کا استقبال

تقریب کے دوران اسلام پارٹی مائناریٹی و اوقاف سیل کے صدر رضوان میمن کی قیادت اور آصف شیخ رشید کی سرپرستی میں مرحوم شیخ رشید کے دیرینہ ساتھیوں اور سیکڑوں محنتی کارکنوں کا استقبال کیا گیا۔ اس موقع پر پارٹی کے تئیں ان کی خدمات اور جدوجہد کو سراہا گیا۔تقریب میں مالیگاؤں اسلام پارٹی کے صدر اعجاز عمر، مائناریٹی سیل کے صدر رضوان میمن سمیت دیگر ذمہ داران نے بھی اپنے خیالات کا اظہار کیا۔ مقررین نے پارٹی کی دو سالہ جدوجہد، انتخابی کامیابیوں، عوامی رابطوں اور مستقبل کے عزائم پر روشنی ڈالتے ہوئے کارکنوں سے اپیل کی کہ وہ اتحاد، نظم و ضبط اور عوامی خدمت کے جذبے کے ساتھ اپنی سرگرمیاں جاری رکھیں۔واضح رہے کہ اسلام پارٹی کا جشنِ یومِ تاسیس 23 اکتوبر کے جلسۂ عام کے حوالے سے خصوصی اہمیت رکھتا ہے۔ پارٹی قیادت کی جانب سے اسمبلی اور پارلیمنٹ میں اپنے نمائندے منتخب کرانے کے عزم کا اظہار اس بات کی نشاندہی کرتا ہے کہ پارٹی مستقبل میں مالیگاؤں سے آگے بڑھ کر وسیع تر سیاسی میدان میں اپنی شناخت مستحکم کرنے کی خواہاں ہے۔

نعمانی پل کا سلیب بھرنے اور مارچ تک پل کی تعمیر مکمل کرنے کا عزم و کوشش ہماری ہے

noreply@blogger.com (BEBAK URDU NEWS ) — Tue, 20 Oct 2026 11:14:30 +0000

نعمانی پل کا سلیب بھرنے اور مارچ تک پل کی تعمیر مکمل کرنے کا عزم و کوشش ہماری ہے

مولانا عبدالحمید نعمانیؒ کے نام سے منسوب پل کو "بےایمانی پل" کہنے والے موجودہ ایم ایل اے پر تنقید

نعمانی پل کی تعمیر پر کریڈٹ کی سیاست، ترقیاتی کاموں میں رکاوٹیں ڈالنے کے مستقیم ڈگنیٹی کے سنگین الزامات

مالیگاؤں: 20 اکتوبر (بیباک نیوز اپڈیٹ) شہر کے اہم ترین ترقیاتی منصوبوں میں شامل نعمانی پل کی تعمیر اور اس سے وابستہ کاموں کو لے کر مالیگاؤں کی سیاسی فضا ایک بار پھر گرم ہوگئی ہے۔ نعمانی پل کی تعمیر، اس کے تکنیکی مراحل اور ترقیاتی کاموں کا کریڈٹ لینے کی سیاست کے درمیان مستقیم ڈگنیٹی نے ایم ایل اے اور انکے حواریوں پر سنگین الزامات عائد کرتے ہوئے کہا ہے کہ ترقیاتی کاموں میں بلاوجہ رکاوٹیں کھڑی کرنے کے بجائے شہر کی تعمیر و ترقی کو ترجیح دی جانی چاہیے۔نعمانی پل کی تعمیر کے سلسلے میں کیے گئے اقدامات کا ذکر کرتے ہوئے انہوں نے بتایا کہ نعمانی پل بناؤ کمیٹی کا قیام گزشتہ اگست میں عمل میں آیا تھا۔ کمیٹی کی جانب سے مارچ 2027 تک پل کی تعمیر مکمل کرنے کا عزم ظاہر کیا گیا ہے۔ اس مقصد کے تحت ضروری دفتری کارروائی اور تکنیکی مراحل کو مکمل کرنے کے لیے کوششیں کی گئیں، تاکہ تعمیراتی کام کو تیزی سے آگے بڑھایا جاسکے اور عوام کو جلد از جلد اس اہم منصوبے کا فائدہ حاصل ہو۔پل کی تعمیر میں حائل تکنیکی رکاوٹوں کا ذکر کرتے ہوئے مستقیم ڈگنیٹی بتایا کہ راستے میں موجود 11 ہزار کے وی کی ہائی ٹینشن بجلی کی لائن کو ہٹانے کے لیے متعلقہ محکموں سے ضروری منظوری حاصل کرکے ہم نے کارروائی مکمل کی۔ اس اقدام کا مقصد پل کے سلیب کی تعمیر سمیت دیگر اہم کاموں کو بلا رکاوٹ آگے بڑھانا ہے۔ کمیٹی کی کوشش ہے کہ تعمیراتی کام مقررہ مدت میں مکمل ہو اور شہریوں کو آمدورفت کی بہتر سہولت میسر آسکے۔

نعمانی پل کی تعمیر کے حوالے سے جاری سیاسی سرگرمیوں پر ردعمل ظاہر کرتے ہوئے مستقیم ڈگنیٹی نے الزام عائد کیا کہ اپوزیشن ترقیاتی کاموں کا کریڈٹ حاصل کرنے کی سیاست میں مصروف ہیں۔انہوں نے یہ بھی الزام لگایا کہ پل کی تعمیر کو مقررہ مدت، یعنی مارچ 2027 کے اختتام تک مکمل ہونے سے روکنے کے لیے رکاوٹیں پیدا کرنے کی کوششیں کی جارہی ہیں۔ نعمانی پل کے نام کے حوالے سے بھی مستقیم ڈگنیٹی نے ناراضگی کا اظہار کیا۔ ان کا کہنا تھا کہ یہ پل حضرت مولانا عبدالحمید نعمانی رحمۃ اللہ علیہ کے نام سے منسوب ہے، اس لیے انکے نام کے ساتھ نامناسب الفاظ جوڑنے سے گریز کیا جانا چاہیے۔ انہوں نے نام کے تقدس اور احترام کو برقرار رکھنے کی اپیل کرتے ہوئے کہا کہ مذہبی و سماجی شخصیات سے منسوب ناموں کے معاملے میں ذمہ داری اور سنجیدگی کا مظاہرہ ضروری ہے۔

انہوں نے مفتی اسمٰعیل کے بے ایمانی پل کہنے پر مذمت کی ۔نعمانی پل شہر کے متعدد علاقوں کے شہریوں کی آمدورفت کے لیے اہمیت رکھتا ہے۔ قلعہ باغ، محمود پورہ، موتی پورہ، اسلام آباد اور رسول پورہ سمیت مختلف علاقوں کے شہری روزانہ اس راستے سے گزرتے ہیں۔ پل کی تعمیر میں تاخیر یا کام میں رکاوٹوں کے باعث ان علاقوں کے رہنے والوں کو مشکلات کا سامنا کرنا پڑ سکتا ہے۔مستقیم ڈگنیٹی نے کہا کہ عوام کے مفاد کو مدنظر رکھتے ہوئے ضروری ہے کہ تعمیراتی کام کو سیاسی اختلافات سے بالاتر ہوکر آگے بڑھایا جائے۔مستقیم ڈگنیٹی نے کہا کہ نعمانی پل کی تعمیر کی بروقت تکمیل نہ صرف شہریوں کی سہولت بلکہ شہر کی مجموعی ترقی کے لیے بھی اہم ہے۔ اس لیے ضروری ہے کہ اپوزیشن باہمی اختلافات کو ایک طرف رکھتے ہوئے تعمیراتی کام کی تکمیل میں تعاون کریں، تاکہ عوام کو جلد از جلد اس منصوبے کا فائدہ حاصل ہوسکے۔

اس موقع پر مستقیم ڈگنیٹی کے ہمراہ نعمانی پل بناؤ کمیٹی کے عبدالسلام سلو عطر والے، جمیل احمد چشتی، حسن شاہ، الیاس کامریڈ، انور خان، شکیل احمد اور اسرائیل سردار موجود تھے۔اس کے علاوہ سماجوادی پارٹی کے ذمہ داران حاجی اطہر حسین اشرفی، مولانا زاہد ندوی، شبیر احمد ببلو قریشی، رئیس سیٹھ ڈومن، اقبال انصاری قلعہ، راحیل حنیف، آصف اقبال ناگا، فیضان رجو، فہیم جاگیردار اور ابواللیث انصاری عبدالرحمٰن انصاری، ابوشعیب نہالی،سلو عطر والا،حسن شاہ و نعمانی پل بناؤ کمیٹی کے ذمہ داران سمیت علاقے کے دیگر ذمہ داران بھی اس موقع پر موجود تھے۔

چاول اور دال بھی عام لوگوں کی پہنچ سے دور!،مہنگائی کی مار سے گھریلو بجٹ پر اضافی بوجھ

noreply@blogger.com (BEBAK URDU NEWS ) — Sun, 18 Oct 2026 07:05:38 +0000

چاول اور دال بھی عام لوگوں کی پہنچ سے دور!،مہنگائی کی مار سے گھریلو بجٹ پر اضافی بوجھ

پانی کی قلت اور زرعی پیداوار میں کمی سے مزید مہنگائی بڑھنے کا خدشہ

نئی دہلی : 17 اکتوبر (بیباک نیوز اپڈیٹ) ملک میں بڑھتی مہنگائی کے درمیان اب چاول، دالوں اور دیگر غذائی اجناس کی قیمتوں میں اضافے نے عام لوگوں کی پریشانیوں میں مزید اضافہ کر دیا ہے۔ دسہرہ اور دیوالی جیسے اہم تہواروں سے قبل روزمرہ استعمال کی اشیائے خوردونوش مہنگی ہونے سے متوسط اور غریب طبقے کے گھریلو بجٹ پر دباؤ بڑھنے کا خدشہ ظاہر کیا جا رہا ہے۔تہواروں کے موقع پر گھروں میں مختلف پکوان اور مٹھائیاں تیار کرنے کے لیے جہاں راشن کی خریداری بڑھ جاتی ہے، وہیں بڑھتی قیمتیں عام خاندانوں کے لیے اضافی مالی بوجھ بن رہی ہیں۔میڈیا رپورٹس کے مطابق کرناٹک میں بارش کی کمی اور آبی ذخائر میں پانی کی سطح گھٹنے کے باعث دھان کی فصل متاثر ہونے کا اندیشہ ہے، جس کے نتیجے میں چاول کی قیمتوں میں اضافہ دیکھا جا رہا ہے۔ گزشتہ تین ماہ کے دوران چاول کی بعض اقسام کی قیمتوں میں تقریباً 25 سے 30 فیصد تک اضافہ ہونے کی اطلاعات ہیں۔ جو چاول پہلے 50 سے 60 روپے فی کلو فروخت ہو رہا تھا، اس کی قیمت اب بڑھ کر 70 سے 90 روپے فی کلو تک پہنچنے کی اطلاع ہے۔چاول کے ساتھ دیگر غذائی اجناس کی قیمتوں میں بھی اضافہ درج کیا گیا ہے۔رپورٹ کے مطابق گیہوں، جوار اور دیگر اناج کی قیمتوں پر بھی کم بارش اور پیداوار میں ممکنہ کمی کے اثرات مرتب ہو رہے ہیں۔ گیہوں کی قیمت گزشتہ سال تقریباً 35 سے 40 روپے فی کلو تھی، جو اب بڑھ کر 55 سے 60 روپے فی کلو تک پہنچ گئی ہے۔ اسی طرح گڑ کی قیمت بھی تقریباً 50 روپے فی کلو سے بڑھ کر 80 سے 85 روپے فی کلو تک پہنچنے کی اطلاع ہے۔

چاول کے ساتھ مختلف دالوں کی قیمتوں میں بھی تیزی اضافہ دیکھا جا رہا ہے۔ منڈیوں میں دستیاب قیمتوں کے مطابق تور دال 130 سے 160 روپے فی کلو، چنا دال تقریباً 95 سے 100 روپے فی کلو، ہری مونگ 110 سے 120 روپے فی کلو اور اڑد دال 100 سے 165 روپے فی کلو تک فروخت ہونے کی اطلاعات ہیں۔ تاہم، مختلف اقسام اور مقامی بازاروں کے لحاظ سے ان قیمتوں میں فرق ہو سکتا ہے۔بازار میں غذائی اجناس کی قیمتوں میں اضافے کی اہم وجوہات میں کم بارش، پانی کی قلت، فصلوں کی پیداوار متاثر ہونے کا خدشہ اور تہواروں کے دوران بڑھتی ہوئی مانگ شامل بتائی جا رہی ہیں۔ زرعی پیداوار میں کمی آنے سے بازار میں اناج کی آمد متاثر ہوتی ہے اور رسد و طلب کے درمیان فرق پیدا ہونے پر قیمتوں میں اضافہ ہونے لگتا ہے۔چاول اور دالیں عوام کی روزمرہ خوراک کا اہم حصہ ہیں۔ ایسے میں ان کی قیمتوں میں اضافہ براہِ راست ماہانہ گھریلو اخراجات کو متاثر کرتا ہے۔ پہلے ہی مہنگائی سے پریشان عام خاندانوں کو اب تہواروں کی خریداری کے لیے زیادہ رقم خرچ کرنا پڑ سکتی ہے۔ اگر قیمتوں میں اضافے کا سلسلہ جاری رہا تو آنے والے دنوں میں عام صارفین کی مشکلات مزید بڑھ سکتی ہیں۔

مالیگاؤں:پھر آیا سامنے زمین کا تنازعہ!رضوان پارک کے ڈیڑھ سو سے زائد پلاٹ مالکان پریشان

noreply@blogger.com (BEBAK URDU NEWS ) — Fri, 16 Oct 2026 17:12:54 +0000

مالیگاؤں:پھر آیا سامنے زمین کا تنازعہ!رضوان پارک کے ڈیڑھ سو سے زائد پلاٹ مالکان پریشان

تین ایکڑ زمین پر ساہوکار کا دعویٰ،کروڑوں روپے کے لین دین پر سوالیہ نشان

اپنی حلال کمائی سے خریدے گئے پلاٹ بچانے کیلئے دربدر بھٹک رہے ہیں متاثرین

مالیگاؤں : 16 اکتوبر (بیباک نیوز اپڈیٹ)مالیگاؤں شہر میں زمین کی خرید و فروخت کے معاملے میں ایک بار پھر کروڑوں روپے کے مبینہ لین دین اور افر تفری کی گونج سنائی دینے لگی ہے۔ رضوان پارک، گٹ نمبر 217/1 اور 217/2 میں پلاٹ خریدنے والے ڈیڑھ سو سے زائد افراد اپنے مستقبل اور اپنی زمین کو لے کر شدید تشویش میں مبتلا ہیں۔معاملے میں تقریباً تین ایکڑ زمین پر ایک ساہوکار کی جانب سے دعویٰ کیے جانے کی اطلاعات کے بعد پلاٹ مالکان میں بے چینی اور افرا تفری کا ماحول پیدا ہوگیا ہے۔موصولہ اطلاعات کے مطابق رضوان پارک کے گٹ نمبر 217/1 اور 217/2 میں سال 2019 سے قسطوں کے ذریعے پلاٹوں کی خرید و فروخت کا سلسلہ جاری تھا۔اس طرح کی تفصیلات پلاٹ ہولڈرس کی جانب سے دی گئی ۔انکی جانب سے بتایا جاتا ہے کہ پلاٹ خریداروں نے گٹ مالک رضوان آر کے سے تقریباً ساڑھے تین لاکھ روپے فی پلاٹ کے حساب سے زمین خریدی اور اپنی رقم قسط وار ادا کی۔ دعویٰ کیا جارہا ہے کہ خریداروں سے مکمل رقم وصول ہونے کے بعد تقریباً چھ ایکڑ زمین کا نقشہ تیار کرکے پلاٹوں کی فروخت کے ذریعے کروڑوں روپے جمع کیے گئے۔

اس معاملے میں سب سے تشویش ناک پہلو پلاٹوں کی خرید و فروخت کے دستاویزی ریکارڈ سے متعلق سامنے آرہا ہے۔ اطلاعات کے مطابق، بعض خریداروں کو زمین کی خریدی کے دستاویزات فراہم کیے گئے، جبکہ کئی افراد کو ایک ہی پلاٹ کے لیے دو مرتبہ خریدی دیے جانے اور بعض خریداروں کو ایک ہی پلاٹ کی دو نوٹری ملنے کی شکایات ہیں۔ اس کے علاوہ متعدد افراد ایسے بھی بتائے جاتے ہیں جنہیں رقم کی مکمل ادائیگی کے باوجود اب تک خریدی کے کاغذات اور متعلقہ دستاویزات فراہم نہیں کیے گئے۔ ان شکایات نے زمین کے لین دین کی شفافیت پر سنگین سوالات کھڑے کردیے ہیں۔اب اس معاملے میں ایک نیا موڑ سامنے آنے کی اطلاعات ہیں۔ ذرائع کے مطابق، قرض یا مبینہ سودی لین دین کے تحت حاصل کی گئی رقم کی ادائیگی نہ ہونے کے باعث تقریباً تین ایکڑ زمین ایک ساہوکار کو مبینہ طور پر ’’ریٹرن سودے‘‘ کے نام پر دے دی گئی۔ بتایا جاتا ہے کہ یہ وہی زمین ہے جسے قسطوں پر پلاٹ خریدنے والے عام شہریوں کے حوالے کیا جانا تھا۔ اگر یہ اطلاعات درست ثابت ہوتی ہیں تو قرض اور مالی لین دین کے تنازعے کا خمیازہ ان عام خریداروں کو بھگتنا پڑ رہا ہے، جنہوں نے اپنی محنت کی کمائی سے پلاٹ خریدے تھے۔اس تعلق سے آج جمعہ کو رضوان پارک میں عوام کی کثیر تعداد موجود تھیں جو پریشان حال نظر آئی، پلاٹ خریدنے والے افراد اب اپنی زمین کی نشاندہی اور قبضے کے لیے پریشان ہیں۔ بعض خریدار اپنے پلاٹوں پر وال کمپاؤنڈ تعمیر کرنے کی کوشش کررہے ہیں، لیکن دوسری جانب ساہوکار کی جانب سے تقریباً تین ایکڑ زمین پر دعویٰ کیے جانے کی بات سامنے آرہی ہے۔ متاثرین کا کہنا ہے کہ انہیں زمین خالی کرنے کے لیے دباؤ اور دھمکیوں کا سامنا کرنا پڑ رہا ہے، جبکہ دوسری جانب زمین پر اپنا دعویٰ مضبوط کرنے کے لیے وال یا تار کمپاؤنڈ تعمیر کرنے کی تیاری کی جارہی ہے۔ اس صورت حال نے پلاٹ مالکان کی مشکلات میں مزید اضافہ کردیا ہے۔

اس پورے معاملے کو لے کر یہ سوال اٹھ رہا ہے کہ اگر زمین کے لین دین میں لینڈ ڈیولپر اور ساہوکار کے درمیان قرض یا مالی معاملات کا تنازعہ ہے تو اس کی سزا عام پلاٹ خریداروں کو کیوں بھگتنا پڑ رہی ہے؟ ذرائع کے مطابق، زمین کے اس معاملے میں مبینہ مالی لین دین اور آپسی اختلافات کی جڑیں نیا پورہ تک پھیلی ہوئی بتائی جاتی ہیں۔ تاہم، ان الزامات کی آزادانہ تصدیق اور متعلقہ فریق کا مؤقف سامنے آنا ضروری ہے، تاکہ معاملے کی اصل حقیقت واضح ہوسکے۔رضوان پارک کے پلاٹ خریدار اس وقت شدید ذہنی پریشانی سے گزر رہے ہیں۔ اپنی حلال کمائی سے زمین خریدنے والے ان افراد کو خدشہ ہے کہ کہیں وہ اپنی جمع پونجی سے بھی محروم نہ ہوجائیں اور برسوں کی محنت کے باوجود انہیں اپنی زمین کا قبضہ حاصل نہ ہوسکے۔ متاثرین اب شہر کے مختلف عوامی نمائندوں اور پولیس انتظامیہ سے مدد کی امید لگائے بیٹھے ہیں، تاکہ ان کی شکایات کا غیر جانب دارانہ اژالہ ہو اور انہیں قانونی طور پر ان کے حقوق مل سکیں۔

رضوان پارک میں زمین کی خرید و فروخت سے متعلق سامنے آنے والی شکایات نے شہر میں زمین کے کاروبار اور پلاٹوں کی قانونی حیثیت پر ایک بار پھر بحث چھیڑ دی ہے۔ اس معاملے میں چھ کروڑ روپے سے زائد مالیت کی زمین کے لین دین سے متعلق دعوے بھی سامنے آرہے ہیں، تاہم اصل مالیت، ملکیت اور دستاویزات کی حیثیت کا تعین متعلقہ ریکارڈ اور قانونی جانچ کے بعد ہی ہوسکے گا۔ اب دیکھنا یہ ہے کہ پولس انتظامیہ اور متعلقہ حکام اس معاملے میں کیا کارروائی کرتے ہیں اور متاثرین کو ان کی زمین اور رقم کے تحفظ کے لیے کب تک انصاف مل پاتا ہے۔ایسے حالات میں عوام کو چاہیے کہ وہ زمین یا پلاٹ خریدنے سے پہلے ملکیت کے اصل کاغذات، سات بارہ (7/12) اتارہ، پراپرٹی کارڈ، متعلقہ نقشہ، قانونی اجازت ناموں اور زمین پر کسی قسم کے قرض، رہن یا تنازعے کی مکمل جانچ ضرور کریں۔ محض نوٹری یا رقم کی رسید پر بھروسا کرنے کے بجائے رجسٹرڈ دستاویزات اور قانونی تصدیق کو ترجیح دیں، تاکہ زندگی بھر کی جمع پونجی کسی تنازعے میں نہ پھنس جائے۔

مالیگاؤں کورٹ کا اہم فیصلہ، وجے کھیرنار کو پھانسی کی سزا،ڈونگرالے کی معصوم بچی کو بالآخر انصاف مل گیا!

noreply@blogger.com (BEBAK URDU NEWS ) — Fri, 16 Oct 2026 06:50:16 +0000

مالیگاؤں کورٹ کا اہم فیصلہ، وجے کھیرنار کو پھانسی کی سزا،ڈونگرالے کی معصوم بچی کو بالآخر انصاف مل گیا!

متاثرہ خاندان کو 10 لاکھ روپے معاوضہ دینے کا بھی حکم،24 گواہوں کی گواہی اور خصوصی سرکاری وکیل کے دلائل

مالیگاؤں: 16 اکتوبر (بیباک نیوز اپڈیٹ) مالیگاؤں تعلقہ کے ڈونگرالے گاؤں میں ساڑھے چار سالہ معصوم بچی کے ساتھ جنسی زیادتی اور قتل کے انتہائی سنگین معاملے میں مالیگاؤں کی ضلع و ایڈیشنل سیشن عدالت نے آج ایک اہم فیصلہ سناتے ہوئے مجرم وجے عرف شیکھر کھیرنار کو پھانسی کی سزا سنائی ہے۔عدالت نے متاثرہ بچی کے اہل خانہ کو 10 لاکھ روپے معاوضہ ادا کرنے کا حکم بھی دیا ہے۔ اس فیصلے کے بعد اس معاملے میں انصاف کی منتظر متاثرہ خاندان کی جدوجہد ایک اہم مرحلے پر پہنچ گئی ہے۔

16 نومبر 2025 کو پیش آیا تھا دل دہلا دینے والا واقعہ

موصولہ اطلاعات کے مطابق، 16 نومبر 2025 کو مالیگاؤں تعلقہ کے ڈونگرالے گاؤں میں ساڑھے چار سالہ معصوم بچی کو مبینہ طور پر اغوا کرنے کے بعد اس کے ساتھ جنسی زیادتی کی گئی اور پھر اس کا قتل کردیا گیا۔ اس واقعے نے پورے علاقے کو جھنجھوڑ کر رکھ دیا تھا۔ واقعے کے بعد عوام میں شدید غم و غصہ پایا گیا اور ملزم کو سخت ترین سزا دینے کا مطالبہ کیا گیا تھا۔

24 گواہوں کی گواہی اور خصوصی سرکاری وکیل کے دلائل

اس مقدمے کی سماعت مالیگاؤں کی عدالت میں ہوئی، جہاں سرکاری استغاثہ کی جانب سے مجموعی طور پر 24 گواہوں کے بیانات قلم بند کیے گئے۔ مقدمے میں خصوصی سرکاری وکیل ایڈوکیٹ اجول نکم نے استغاثہ کی نمائندگی کرتے ہوئے عدالت میں دلائل پیش کیے۔ طبی، فارنسک اور ڈی این اے شواہد سمیت مختلف پہلوؤں کی بنیاد پر استغاثہ نے ملزم کے خلاف الزامات ثابت کرنے کی کوشش کی۔ عدالت نے 30 ستمبر 2026 کو وجے کھیرنار کو قصوروار قرار دیا تھا، جبکہ سزا کے تعین کے لیے مزید سماعت کی گئی۔

پھانسی کی سزا کے ساتھ 10 لاکھ روپے معاوضے کا حکم

آج 16 اکتوبر کو عدالت نے سزا سے متعلق اپنا حتمی فیصلہ سناتے ہوئے وجے کھیرنار کو پھانسی کی سزا سنائی اور متاثرہ بچی کے اہل خانہ کو 10 لاکھ روپے معاوضہ دینے کا حکم دیا۔اس مقدمے پر نہ صرف ڈونگرالے بلکہ مالیگاؤں اور اطراف کے علاقوں میں بھی گہری نظر رکھی جارہی تھی۔ عدالت کے اس فیصلے کو اس سنگین جرم کے معاملے میں ایک اہم عدالتی پیش رفت قرار دیا جارہا ہے۔ اس دلخراش واقعے کے بعد سے متاثرہ خاندان اور مقامی شہری ملزم کو سخت ترین سزا دینے کا مطالبہ کررہے تھے۔ عدالت کے تازہ فیصلے سے اس مقدمے میں سزا کا مرحلہ مکمل ہوا ہے۔ (بیباک نیوز اپڈیٹ)

خبردار! پانی ضائع کرنے والوں پر فوجداری کارروائی کا انتباہ،پانی کا استعمال کفایت شعاری سے کریں

noreply@blogger.com (BEBAK URDU NEWS ) — Thu, 15 Oct 2026 13:32:39 +0000

خبردار! پانی ضائع کرنے والوں پر فوجداری کارروائی کا انتباہ، پانی کا استعمال کفایت شعاری سے کریں

جمعہ سے پانی سپلائی میں کٹوتی ،مالیگاؤں سمیت ضلع میں پانی کی قلت، کارپوریشن و کلکٹر کی عوام سے اپیل

مالیگاؤں : 15 اکتوبر (بیباک پر نیوز اپڈیٹ) پانی کا ہر قطرہ قیمتی ہے - پانی بچائیں، پانی کے ضیاع سے بچیں! سلوگن کیساتھ مالیگاؤں میونسپل کارپوریشن کی جانب سے عوام کو مطلع کیا جاتا ہے کہ ال نینو کے سبب پینے کے پانی کی حفاظت کو یقینی بنانے کے لیے ضلع میں دستیاب پانی کے وسائل کا 31 اگست 2027 تک کفایت شعاری، ترجیحی اور منصوبہ بند طریقے سے استعمال کریں۔اس ضمن میں ضلع کلکٹر، ناسک کے 8 اکتوبر کے سرکلر کے مطابق، ال نینو کے ممکنہ اثرات کی وجہ سے، بارش میں کمی واقع ہوئی ہے، اور دستیاب پانی کے وسائل کو کفایت شعاری اور منصوبہ بند طریقے سے استعمال کرنے کی ہدایات دی گئی ہیں۔ جس کے مطابق مالیگاؤں شہر میں پانی کی سپلائی 16 اکتوبر سے 10 منٹ تک کم ہو جائے گی۔عوام کے لیے یہ بہت ضروری ہے کہ وہ پینے کے پانی کا کفایت شعاری سے استعمال کریں تاکہ مستقبل میں پانی کی ممکنہ قلت پیدا نہ ہو اور پانی کے دستیاب وسائل طویل عرصے تک موجود رہیں۔

پانی کی حفاظت کیلئے عوام کو چاہیے کہ وہ اپنے نلوں میں پانی کے بہاؤ کو کنٹرول کرنے کے لیے ضروری وال فوری طور پر لگائیں۔ جنہوں نے ابھی تک اپنے نل میں وال نہیں لگائے ہیں وہ بغیر کسی تاخیر کے فوری طور پر وال (ٹونٹی) لگا لیں۔ یہ بھی دیکھا جارہا ہے کہ نلوں میں وال نہ لگانے کے سبب پانی کی سپلائی کے دوران غیر ضروری طور پر پانی کو بہنے دینے کی وجہ سے پانی کی بڑی مقدار ضائع ہو رہی ہے۔

اس کے علاوہ پانی کی سپلائی شروع ہونے کے بعد بعض شہری بغیر کسی وجہ کے اپنے گھروں کے سامنے سڑکوں پر پانی بہاتے ہیں۔ اپنی گاڑیاں دھونے کے لیے پینے کا پانی استعمال کرتے ہیں۔ پینے کے پانی کو اس طرح ضائع کرنا ایک سنگین معاملہ ہے اور یہ پانی بچانے کی کوششوں میں رکاوٹ ہے۔ اس لیے پینے کے پانی کو سڑک پر یا نالے میں چھوڑ کر گاڑیوں کو دھونے کے لیے استعمال کرنا یا کسی اور طریقے سے پانی ضائع کرنا فوری طور پر بند کر دینا چاہیے۔

مالیگاؤں میونسپل کارپوریشن پانی کی فراہمی کے دوران پانی ضائع کرنے اور پینے کے پانی کا غلط استعمال کرنے والے نل مالکان اور متعلقہ عوام کے خلاف قواعد کے مطابق تعزیری کارروائی کرے گی۔ نیز، کیس کی نوعیت کے لحاظ سے قابل اطلاق قانونی دفعات کے مطابق فوجداری کارروائی کی جائے گی۔ اس لیے کسی بھی شہری کو اس مشورے کو نظر انداز نہیں کرنا چاہیے۔ تاہم شہر کے تمام عوام کو یہ سمجھنا چاہیے کہ پینے کے پانی کو بچانا ایک اجتماعی ذمہ داری ہے اور پانی کا صرف ضرورت کے مطابق استعمال کریں، نلوں میں لیکیج کو ٹھیک کریں، پانی کے رساؤ کو فوری طور پر ٹھیک کریں اور پینے کے پانی کے ضیاع سے مکمل طور پر بچیں۔ مالیگاؤں میونسپل کارپوریشن عوام سے اپیل کرتی ہے کہ وہ دستیاب پانی کے وسائل کی مناسب منصوبہ بندی کرتے ہوئے پینے کے پانی کی دستیابی کو یقینی بنانے کے لیے میونسپل کارپوریشن کے ساتھ تعاون کریں۔اس طرح کی تفصیلات ایک پریس ریلیز میونسپل کارپوریشن نے کمشنر کے توسط سے جاری کی ۔

فائر ڈپارٹمنٹ میں چار رائل اینفیلڈ بلٹس شامل ،تنگ گلیوں میں آگ بجھانے کیلئے فائدہ مند

noreply@blogger.com (BEBAK URDU NEWS ) — Thu, 15 Oct 2026 10:55:54 +0000

فائر ڈپارٹمنٹ میں چار رائل اینفیلڈ بلٹس شامل ،تنگ گلیوں میں آگ بجھانے کیلئے فائدہ مند

ریپڈ ریسپانس ٹو وہیلرس کا میونسپل میئر و کمشنر کے ہاتھوں افتتاح

مالیگاؤں :15 اکتوبر (بیباک پر خبروں)مالیگاؤں فائر ڈپارٹمنٹ میں چار نئے شامل کیے گئے رائل اینفیلڈ بلٹس کی افتتاحی تقریب کا انعقاد میئر نسرین شیخ اور کمشنر رویندر جادھو کے ہاتھوں کیا گیا۔یہ بلٹ جو کہ رائل اینفیلڈ کمپنی کی ہے، جدید ترین ہے اور اس پر جنریٹر ہے اور پانی کے چھڑکاؤ کے لیے دو سلنڈر فراہم کیے گئے ہیں۔ مائع مواد کی آگ کو اس میں فوم ڈال کر بھی بجھایا جا سکتا ہے، اور برقی آگ بجھانے سے بھی اچھی مدد مل سکتی ہے۔مالیگاؤں شہر کی چھوٹی گلیوں میں اس گاڑی کا استعمال بہت فائدہ مند مانا جا سکتا ہے۔

اس موقع پر محترم کمشنر رویندر جادھو اور میئر نسرین خالد شیخ نے اپنے خیالات کا اظہار کرتے ہوئے کہا کہ یہ ریپڈ ریسپانس گاڑی عوام اور ان کی حفاظت کے لیے بہت مفید ثابت ہو سکتی ہے۔ اس کے ساتھ ہی انہوں نے اس موقع پر مالیگاؤں سٹی میونسپل کارپوریشن کے فائر بریگیڈ کے کام کی تعریف کی۔اس پروگرام میں میئر نسرین شیخ، کمشنر رویندر جادھو، چیف فائر آفیسر سنجے پوار کے ساتھ ملازمین موجود تھے۔

لیونگ سرٹیفکیٹ اور جنرل رجسٹر میں تصحیح کے اختیارات ایجوکیشن آفیسر کو حاصل

noreply@blogger.com (BEBAK URDU NEWS ) — Thu, 15 Oct 2026 09:40:09 +0000

لیونگ سرٹیفکیٹ اور جنرل رجسٹر میں تصحیح کے اختیارات ایجوکیشن آفیسر کو حاصل

اسکول چھوڑنے کے بعد بھی تصحیح ممکن،ہیڈ ماسٹر کے ذریعے ایجوکیشن آفیسر کو درخواست دینا ضروری

نام،والد کے نام،کنیت اور تاریخ پیدائش میں درستی کیلئے طلبہ اور والدین کو راحت، خلاف ورزی پر توہین عدالت کی کارروائی!

ممبئی: 15 اکتوبر (بیباک نیوز اپڈیٹ) اسکول چھوڑنے یا تعلیم مکمل کرنے کے بعد بھی طلبہ کو اپنے لیونگ سرٹیفکیٹ (LC) اور اسکول کے جنرل رجسٹر میں درج نام، والد کے نام، کنیت یا تاریخ پیدائش میں واضح غلطیوں کی اصلاح کروانے کا حق حاصل ہے۔اس سلسلے میں بمبئی ہائی کورٹ کی اورنگ آباد بنچ نے ایک اہم فیصلہ صادر کرتے ہوئے واضح کیا ہے کہ محض اس بنیاد پر درخواست مسترد نہیں کی جاسکتی کہ متعلقہ طالب علم اسکول چھوڑ چکا ہے۔ اس فیصلے سے ان طلبہ اور والدین کو بڑی راحت ملنے کی امید ہے جو تعلیمی دستاویزات میں موجود غلطیوں کی اصلاح کے لیے طویل عرصے سے محکمہ تعلیم کے دفاتر کے چکر کاٹ رہے ہیں۔ موصولہ قانونی تفصیلات کے مطابق، رٹ پٹیشن نمبر 8739 آف 2026، سید سہانا مبین بنام حکومت مہاراشٹر کے معاملے میں 4 اگست 2026 کو دیے گئے فیصلے میں عدالت نے اسکول کے جنرل رجسٹر اور لیونگ سرٹیفکیٹ میں تصحیح کے طریقۂ کار پر روشنی ڈالی۔ اس کے مطابق، اسکول چھوڑنے کے بعد بھی متعلقہ معاملے میں ایجوکیشن آفیسر (EO) کے پاس تصحیح کی درخواست پر غور کرنے کا اختیار موجود ہے۔ تاہم، اس عمل کے لیے مقررہ قانونی طریقۂ کار پر عمل کرنا ضروری ہے۔اس طرح کی تفصیلی معلومات ایجوکیشن آفیسر سروج جگتاپ نے ہیڈ ماسٹر گروپ میں شیئر کیا ہے۔

اس فیصلے کے پیراگراف 1، 5 اور 8 کے مطابق، ایجوکیشن آفیسر (EO) کو اسکول چھوڑنے کے بعد جنرل رجسٹر یا سرٹیفکیٹ میں تصحیح کرنے کا اختیار ہے۔ اسکول کے ہیڈ ماسٹر کو اپنی سطح پر جنرل رجسٹر میں اس نوعیت کی تبدیلی کرنے کے بجائے ضروری دستاویزات اور متعلقہ ثبوتوں کے ساتھ تصحیح کی تجویز تیار کرکے مجاز ایجوکیشن آفیسر کو بھیجنی ہوتی ہے۔ ایجوکیشن آفیسر کی جانب سے تحریری منظوری یا حکم جاری ہونے کے بعد ہی اسکول کے ریکارڈ میں متعلقہ تبدیلی کی جاسکتی ہے۔ اس طرح تصحیح کے عمل میں قانونی ضابطوں اور سرکاری طریقۂ کار کی پابندی ضروری قرار دی گئی ہے۔ اس معاملے کا ایک اہم پہلو یہ ہے کہ اگر کسی طالب علم نے اسکول چھوڑ دیا ہے یا اپنی تعلیم مکمل کرلی ہے تو محض اسی وجہ سے اس کی درخواست کو خارج نہیں کیا جاسکتا۔ تعلیمی دستاویزات میں نام، والد کے نام، کنیت یا تاریخ پیدائش سے متعلق واضح غلطیاں موجود ہونے کی صورت میں درخواست پر متعلقہ قواعد کے مطابق غور کیا جانا چاہیے۔ اس فیصلے سے ان افراد کے لیے امید پیدا ہوئی ہے جو اسکول سے تعلیم مکمل کرنے کے کئی سال بعد اپنے سرٹیفکیٹ یا رجسٹر میں موجود غلطیوں کی اصلاح کروانا چاہتے ہیں۔

عدالت نے اپنے فیصلے میں جنابائی ہمتراؤ ٹھاکر بنام حکومت مہاراشٹر کے مقدمے میں بمبئی ہائی کورٹ کے فل بنچ کے فیصلے کا بھی حوالہ دیا۔ مذکورہ فیصلہ AIR Online 2019 Bombay 1055 کے طور پر درج ہے۔ قانونی اصول کے مطابق، اسکول کے ریکارڈ میں موجود واضح انسانی یا علمی غلطیوں کی اصلاح کے معاملے میں متعلقہ قواعد، بالخصوص سیکنڈری اسکول کوڈ (S.S. Code) کے ضابطہ 26.3، کی روشنی میں درخواست پر غور کیا جاسکتا ہے۔ اگرچہ موجودہ فیصلہ ایک مخصوص عرضی کے تناظر میں دیا گیا ہے، تاہم اس میں ہائی کورٹ کے فل بنچ کے فیصلے کا حوالہ اور متعلقہ قانونی اصولوں کی وضاحت مستقبل میں اسی نوعیت کے معاملات کے لیے اہم رہنمائی فراہم کرسکتی ہے۔ البتہ ہر درخواست کا فیصلہ متعلقہ حقائق، دستیاب دستاویزات اور نافذ العمل قواعد کی روشنی میں کیا جائے گا، اس فیصلے کے تناظر میں جن طلبہ کے لیونگ سرٹیفکیٹ یا جنرل رجسٹر میں نام، والد کے نام، کنیت یا تاریخ پیدائش سے متعلق واضح غلطیاں موجود ہیں، وہ متعلقہ ثبوتوں کے ساتھ تصحیح کے لیے اسکول کے ہیڈ ماسٹر کو درخواست دے سکتے ہیں۔ اگر درخواست صرف اس بنیاد پر مسترد کی جاتی ہے کہ طالب علم اب اسکول میں زیرِ تعلیم نہیں ہے تو متعلقہ قانونی حکم اور قواعد کی روشنی میں اس معاملے پر دوبارہ غور کرنے کی درخواست کی جاسکتی ہے۔عدالت نے سختی سے متنبہ کیا ہے کہ اگر اسکول و محکمہ تعلیم کے افسران نے بار بار واضح احکامات کے باوجود طلباء کی درخواستیں مسترد کیں تو ان کے خلاف توہین عدالت ایکٹ کے تحت براہ راست تادیبی کارروائی کی جائے گی۔اس سلسلے میں ضروری ہے کہ درخواست گزار اپنے تعلیمی ریکارڈ اور دیگر مستند دستاویزات محفوظ رکھیں اور ضرورت پڑنے پر قانونی ماہر سے رہنمائی حاصل کریں۔

مالیگاؤں:گرنا ڈیم روڈ پر نامعلوم 30 سالہ خاتون کی آدھ جلی ہوئی لاش برآمد

noreply@blogger.com (BEBAK URDU NEWS ) — Mon, 12 Oct 2026 19:33:24 +0000

مالیگاؤں:گرنا ڈیم روڈ پر نامعلوم 30 سالہ خاتون کی آدھ جلی ہوئی لاش برآمد،پولس اور سوشل ورکروں نے عوام سے شناخت اپیل کی

مالیگاؤں : 12 اکتوبر (بیباک نیوز اپڈیٹ)مالیگاؤں شہر سے متصل گرنا ڈیم کی جانب جانے والے راستے پر ایک سنسنی خیز واقعہ پیش آیا ہے جہاں ایک نامعلوم خاتون کی آدھ جلی ہوئی لاش برآمد ہوئی ہے۔ واقعے کی اطلاع ملتے ہی تعلقہ پولس اور سوشل ورکر حرکت میں آگئے ہیں اور مقتولہ یا متوفیہ کی شناخت کے لیے ہر ممکن کوششیں کی جا ہیں۔موصولہ اطلاعات کے مطابق، یہ واقعہ پیر کے روز مالیگاؤں شہر کے قریب واقع دیہات "چیچگوان" کے نزدیک پیش آیا۔یہ مقام گرنا ڈیم کے راستے پر ڈیم سے تین سے چار کلومیٹر پہلے واقع ہے۔ اس طرح کی تفصیلات شفیق اینٹی کرپشن، عارف ایا ممبر ،ضیا مسکان وغیرہ نے دی ۔انہوں نے بتایا کہ اس واقعہ کی اطلاع ملتے ہی تعلقہ پولیس اسٹیشن کے PI اور پولیس عملہ فوری طور پر موقع پر پہنچا اور نعش کو اپنی تحویل میں لے کر پوسٹ مارٹم کے لیے سول اسپتال کے پی ایم روم منتقل کیا۔

ابتدائی طبی معائنے اور ڈاکٹروں کے اندازے کے مطابق متوفیہ خاتون کی عمر تقریباً 30 سے 35 برس کے درمیان ہے۔ موقع پر موجود سماجی کارکنان اور پولیس کے مطابق خاتون نے سبز رنگ کا پاجاما اور کرتا پہن رکھا ہے، جبکہ اس کے ہاتھ میں ایک سرخ رنگ کی چوڑیاں موجود ہے۔لاش کے قریب سے کچھ نامکمل اور جلے ہوئے دستاویزات بھی ملے ہیں جن میں ایک دسویں جماعت کی مارک شیٹ (جس پر ممکنہ طور پر والدہ کا نام 'عائشہ' درج ہے) اور ایک راشن کارڈ شامل ہے۔لاش ملنے کے فورا بعد مالیگاؤں کے سماجی خدمتگار سول اسپتال پہنچے۔ انہوں نے خاتون کی شناخت کو یقینی بنانے کے لیے اس کی تصاویر اور تفصیلات کو مختلف سوشل میڈیا گروپس (تقریباً 3000 سے زائد واٹس ایپ گروپس) پر وائرل کر دیا ہے تاکہ شہر یا اطراف میں اگر کسی کا کوئی لاپتہ ہو تو وہ فوری طور پر رابطہ کر سکے۔پولس انتظامیہ اور سماجی کارکنان نے مالیگاؤں کی عوام سے پُرزور اپیل کی ہے کہ اگر کوئی بھی اس خاتون کو جانتا ہے یا اس کے حلیے سے واقف ہے، تو وہ فوری طور پر تعلقہ پولیس اسٹیشن کے پی آئی ، اے پی آئی ساونت میڈم یا پاردی یا سول اسپتال کے عملے سے رابطہ قائم کرے تاکہ متوفیہ کی بروقت شناخت کر کے اگلی قانونی کارروائی عمل میں لائی جا سکے۔