بنت مصريّـة

أم علاء

2011-11-06T17:43:00.001+02:00

مايشيلش همك إلا أمك.. والأمهات في مصر شايلين الهم طول الوقت. عشان كده بنخاف منهم وبنخاف عليهم وبنعمل لهم حساب.

الأم المصرية كانت وقود الثورة..
كل نقطة نور اللي بتشعلها أم..
كل ما نيأس وللا نقلق ولا نرجع لورا خطوتين.. تفوقنا الأمهات وتقوينا وتخلينا نقول لأ هنكمل.
أم خالد سعيد ماقعدتش في بيتها تبكي ابنها، خرجت يوم ما خرجت في البلكونة تشكر الشباب اللي راح تحت بيتها يهتف دم ابنك هيحرر بلد. ومن يومها وأم خالد شايلة قضية بلد على كتفها وبتلف الميادين..

وزي أمهات خالد سعيد كتير، أمهات الشهداء اللي اتضرب عليهم نار من مصريين زيهم.. أمهات شافوا قصاد عنيهم ولادهم بيستشهدوا جمب اقسام البوليس، وامهات قعدوا يدوروا على ولادهم وبناتهم مش عارفين لهم جثة ولا طريق.. أمهات الجرحى اللي بيجروا على علاجهم .. وأمهات المحاكمين عسكريا اللي متمرطين بين محكمة ونيابة وسجن ومراكز حقوقية عشان ولادهم اللي اتاخدوا غدر واتحكم عليهم عسكريا وهم مدنيين باحكام توصل لخمس وعشر سنين.. أمهات عمرها بيقصر من كتر الحزن على ولادهم.. ولادهم اللي زي الورد

وأم زي أم علاء عبدالفتاح، ست علمت ولادها إن الوطن أهم. مارضعتهمش الخوف وقالت لهم امشوا جمب الحيط.. عرفت ولادها طريق المظاهرات والاعتصامات، وقفت معاهم يهتفوا للعيش والحرية.

ييجوا بعد الثورة ويحبسولها ابنها، ابنها اللي ربيته يقول كلمة الحق اللي شايفها، وهو كل اللي عمله قالها.. قال للنيابة العسكرية مش من حقك تحققي معايا عشان انتي تبع طرف متورط في القضية.. حبسوه

حبسوا ابنها.. الراجل اللي بميت راجل

أم علاء اعلنت اضرابها عن الطعام النهاردة. تعمل إيه طيب؟ تسكت لحد ما يحكموا على ابنها؟ متهمينه بسرقة سلاح وتحريض على الجيش.. دا كلام؟ الناس دي اتهبلت؟ وهبلهم هيودي البلد دي في داهية. بس أم علاء مش هتسكت

أم علاء زي أي أم مصرية مش هتسكت. اعلنت اضرابها عن الطعام النهاردة، فساندوها.. ساندوا الام المصرية في محنتها، ساندوا كلمة الحق وقولوا لا للمحاكمات العسكرية

أم علاء بتشعل نقطة نور تانية ضد المحاكمات العسكرية، ربنا يخلي لنا أمهاتك يا مصر.. لولاهم كانت الثورة ماتت من زمان

إيدي بتاكلني

2011-10-30T01:13:00.001+02:00

بس لأ! أنا مش هكتب عن الثورة، عشان الثورة لسه في الشارع.

نحن في زمن المجلس العسكري

2011-08-14T02:18:00.004+02:00

بصي يا مصر،

أنا بشهدك وبشهد التاريخ أهو.. انتو الاتنين قاعدين على كنبة واحدة سامعين وشايفين كل حاجة وانا مش هكدب عليكو

الحالة بعد الثورة وحشة أوي، الحالة الاقتصادية يعني. الحال نايم وقطاعات كتيرة حصل فيها كساد زي السياحة والأسعار مولعة نار والناس مش طايقة

وإن جيتو للحق وقف الحال ده سببه واحد، واحد بس.. المجلس العسكري

أيون، وربنا كلمة حق اتحاسب عليها قصاد رب كريم يوم لا ينفع فيه الندم.. المجلس العسكري هو سبب وقف الحال ده. لو الظرف كان مختلف كان اللي مسك مصر بعد الثورة على طول عمل انتخابات برلمان وانتخابات رئاسة وجه رئيس بقى يخطط ويبني نهضة مصر الحديثة ويجيب حكومة تاخد قرارات مصيرية وتنفذها

اللي حاصل دلوقتي، ان شاء الله تعدموا ضحكتي من على وش الأرض إن كنت بكدب، إن المجلس العسكري بقالة ست شهور ماسك البلد ولحد دلوقتي مافيش انتخابات، ولا نظام جديد ولا عصر جديد ولا عهد جديد .. نحن في برزخ

برزخ ضيق وبيضيق كل يوم عشان الحكومة الانتقالية خايفة تسير الأعمال لأنهم عارفين انهم مؤقتين، والمؤقت طبيبعي مش عايز يبقى مسئول ومتعلقة حاجة في رقبته

المجلس العسكري لاعب في الساعة وموقف العقارب قال يعني بيجهز للعصر الجديد براحته، بس الزمن مابيقفش بوقف العقارب .. الميكانيكا العسكرية دي مابتأكلش عيش ولا بتدي مرتب ولا بتمشي مرور ولا بتستر حال

حالنا بقى يصعب ع الكافر والسبب المجلس العسكري والبرزخ اللي موقفنا فيه ده

يرضيكي كده يا مصر؟ يرضيك كده يا تاريخ؟

ماتعرفوش نائب عام يعرف ربنا أقدم له بلاغ اشتكي المجلس العسكري بوقف عجلة الانتاج؟

اسعى يا عبد

2011-07-08T01:15:00.002+02:00

بحثا عن لحظة هدوء، ونسمة هواء باردة وضوء خافت، جلست تحت الشباك.

كل شئ يتغير من حولي، وأنا أحاول أن أستوعبه. هذه البلد، وأنا وما أعمل.

أنا وبلدي نتحرك للأمام، مصيرنا مجهول، والضغوط كثيرة من حولنا. كلانا يشعر بالأمل والقوة، وكلانا لا يريد أن يتكأ على الآخرين لأننا منذ زمن فقدنا الثقة بهم أو فقدنا الثقة بقدرتهم على التحمل.

أضغط على نفسي كثيرا. أعمل كثيرا. أتحرك كثيرا. الشهور القليلة القادمة تدفعني دفعا للعمل بلا توقف. أشعر بإنهاك شديد، ولكن لا وقت الآن للراحة. هذه الدقائق أسرقها الآن لأني لم آخذ أجازة منذ شهر.

كذلك بلدي، تجري من مظاهرة لاعتصام لحملة، لا تتوقف، تخاف أن تسرق ثورتها، وهناك من يتربصون بها. لن تتركهم يتحكمون بها، مات هذا الزمن. بلدي شابة وصغيرة تستطيع أن تسهر ليلا في الميدان حتى الصباح مفتوحة العينين.

كلانا يرى مستقبل قريب، يريد أن يصل إليه بأي ثمن. أنا وبلدي نسعى.. ولسوف نرى.

الداخلية لازم تنحل

2011-07-08T00:34:00.004+02:00

الداخلية لازم تنحل، تتفشكل، تتفرط، وتتشكل من جديد

لو فيها ظابط واحد يعرف ربنا زمانه سابها ونفد بجلده، الباقيين دول زبانية جهنم والعياذ بالله

الناس بكرة نازلة التحرير عشان العصابة المحلية دي لازم يتم إيداعها في السجن، وتتعمل وزارة جديدة بناس جديدة

عمليا، احنا محدش بيوفر لنا الأمان في مصر غير ستر ربنا والناس. الشرطة قاعدة في بيتها، ولما تحب تعمل حاجة بتتحرش بالمتظاهرين. بتنضرب علقة وترجع تستخبى تاني

الداخلية لازم تنحل .. آخر الكلام

احلموا احلموا

2011-06-24T23:39:00.003+02:00

أنا سبت شغلي عشان بجري ورا حلم.
لما بفكر في شريط حياتي القصير بلاقيني أخدت قرارات مصيرية كتير، منها اللي كنت مدركة وقتها إنه مصيري ومنها اللي بيظهر بعد كده قد إيه غير حياتي. بس كلها كانت عشان مستقبل أفضل أو حاضر مش عاجبني.

هو أنا عايزة إيه من حياتي؟

السؤال ده دايما بيشجعني أخد قرارات قاطعة لأنه بيظهر لي الحقيقة زي الشمس عز الضهر.

أنا عايزة أعمل تجربة حلوة ومفيدة في حياتي قبل ما أموت - وخصوصا إني احتمال كبير أوي أموت صغيرة - تجربة تبسطني وتفيد غيري، تمتعني وتضيف للناس، للمجتمع، للوطن، معنديش مانع كمان أقول للبشرية .. دي أجابة السؤال ببساطة.

التفاصيل بقى بتيجي مرتبطة بالظرف الحياتي الحالي، الفكرة والناس والفلوس والتقنية.. التوليفة دي اللي يا تخليك تقدر تعمل حاجة حلوة أو تخليك تمشي تلعن حظك في كل سما وكل أرض.

نفس التوليفة اللي هتفضل تراجع تفاصيلها كل شوية وتقيمها عشان تقرر هتقدر تكمل بيها لأخر الطريق وللا لأ.. الحاجة الوحيدة اللي مابتتغيرش هي الهدف وإنت.

إنت والهدف.. أهم نقطتين، على أن تدعمك ذاكرة قوية تنبهك لهدفك باستمرار وتجلو من عليه أي شوائب أو محاولات للتشويه .. أما المسار فهو مجموعة الناس والأقتراحات والتنبيهات والتحذيرات والتفضيلات والدروس والإلهامات اللي بتشكل يوم عن يوم فكرتنا وتخليها أكثر عمقا ورحابة.

أنا وياسمين بنعمل حاجة اسمها "سوبرماما".. بس زي ما سوبر ماما خلتني أكتب بوست جديد على بنت مصرية ودي حاجة بقت عزيزة أوي، زي ما مهربة من عنينا النوم ومسهرانا زي طفل صغير. على قد ما هي تجربة ممتعة على قد ما هي مهلكة. بنعمل حاجات كتير عشانها مش بس على مستوى الفكرة والتنفيذ، لكن على مستوى حياتنا كلها، بناخد قرارات مصيرية من نوع هندي سوبر ماما كل اللي محوشينه ولو نطول ندفع أهالينا هندفعهم.. ياسمين مرة قالت في لحظة سينمائية دراماتيكية ولا تحية كاريوكا* في زمنها: "انا هبيع دهبي لو اضطرينا" ... ههههههه

كل ده، في جو مليان حماس وإبداع وتخطيط.. وعفوية، نفس الروح اللي بنتمنى توصل لكل أم وزوجة هتتعرف بعد كام شهر على سوبر ماما.

كفاية كده، تصبحوا على خير، هنام بدري عشان ورانا بكرة اجتماع عمل من بتاع أربع خمس ساعات ده
---

* لو تعروفوا قد إيه أنا بحب تحية كاريوكا، أيقونة الفن والجمال والوطنية والجدعنة المصرية.. وبحب ياسمين

السهر قصاد التلفزيون مش حلو

2011-06-13T23:55:00.003+02:00

طيب ماشي. مصر لقت جاسوس إسرائيلي ظابط في المخابرات الإسرائيلية كان بينزل بنفسه يعمل صحفي نزل الميدان ايام الثورة ونزل امبابة ايام الفتنة.

ماشي، ما عادي يعني، منطقي في مرحلة حساسة بتمر بيها بلد زي دي كل واحد ليه مصلحة بيدور عليها وامريكا وايران واسرائيل وكوستاريكا يبعتوا جواسيسهم، عادي يعني، دا لا يعيب ثورتنا في شيئ. أمال لو ما نزلوش دلوقتي ينزلوا امتى؟

بس يعني يا سيادة الجيش، إيه لازمته دلوقتي؟ لقيت جاسوس ايراني ولقيت جاسوس اسرائيلي، ايه لزمته تشغل الرأي العام وتلخمه في مغامرات صالح مرسي دي؟ إيه أهمية ده في حياتنا دلوقتي؟

عشان نحرص مثلا؟...

أنا مابحبش كده، والطريقة دي مش عجباني، الشعب ده مش طيب واهبل وعلى نياته عشان يضحك عليه بتمثليات رمضان. خلاص خلصنا. وعيب اللي بيحصل ده. بدل ما تشغلوا الناس بحواديت قبل النوم، وفروا الأمن ونزلوا الشرطة.. وارفعوا الحد الأدني للأجور عشان عجلة الانتاج تشتغل بقى

يا اخوانا!!

2011-05-29T03:06:00.005+02:00

نوارة كاتبة مجموعة نصائح للإخوان، بعد العك اللي عكوه الكام يوم اللي فاتوا.. كلام حلو يا ريت يتنفذ

حاجة واحدة عايزة اضيفها، لو قيادات الإخوان فضلت زي ما هي وما مشيتش وخلت شباب الأخوان يمسك الجماعة، فأنا بطلب من شباب الأخوان دول، اللي كلنا عارفين إنهم رجالة وبيفهموا، انهم ينفصلوا ويعملوا حاجة جديدة.. عشان خاطر مصر. إنتو عيال زي الفل وقيادات الاخوان هيفطسوكوا ومصر تخسركوا

----
وبالمرة، صبحي صالح لازم يترمي بالحجارة في ميدان عام.. حسبي الله ونعم الوكيل فيه

كيف تجعل حياتك أفضل؟

2011-05-27T21:44:00.002+02:00

أولا: تخلص من كل ما تدمنه

حتى لا تتوه الفكرة .. مايو ٢٧

2011-05-26T01:57:00.005+02:00

الجيش قال هناك أزمة اقتصادية. أساتذة اقتصاد قالوا انه يمكن أن تحل بسرعة بالتحكم في الأسعار ووضع حد أدنى وأقصى للأجور وفرض ضريبة تصاعدية

الأمن مضطرب في الشارع والجيش طوال الوقت يقبض على بلطجية، أين الشرطة؟ ولماذا لا يقومون بعملهم وواجبهم؟ الشرطة لازم تنزل، وهذا ليس تفضلا، هذا واجب وهذا عملهم ويأخذون مرتبا عليه.

سوزان دفعت فلوس وخرجت وحتى الآن لا أعرف ما هذا القانون الذي يتيح ذلك وطفا على السطح كلام عنا العفو عن مبارك تم انكاره بعد يومين من تلك الطعنة

لازال الظباط الذين قتلوا المتظاهرين احرار، ولازال المصابين لم يعالجوا على حساب الدولة، في حين أن مبارك يعالج على حساب الشعب وحسابهم، ويرقد في مستشفى شرم الشيخ رغم أن سريره ينتظره في مستشفى طره

أرى ان هناك أزمة في القضاء، وأتمنى أن ينهض القضاة الشرفاء من غفوتهم لينقذوا الثروة من شبهة أن يحاكم مبارك أمام قاضي متواطىء وكذلك الضباط القتلة.

لكل هذا، ولهذا فقط أرى أنه من الضروري أن يسمع المجلس الأعلى للقوات المسلحة صوتي، كواحدة من الشعب، غير منتمية لأي حزب ولا أي جماعة. يملؤني الخوف والقلق وأريد أن أطمئن على تلك الثروة وهذا الشعب الذي يتعرض لانتهاك امنه برفض نزول الشرطة حتى الآن، ويتعرض لاغتصاب لقمة عيشه بأزمة اقتصادية لايريدون أن يحلوها من جذورها.

أنا صوت بنعم في الاستفتاء لا لشيء إلا ليتم اجراء الانتخابات في أسرع وقت وحتى يعود الجيش لثكناته. حياتنا المدنية وحكمها المدني هو الأهم بالنسبة لي وعلى رأس كل الأولويات.

لا أطالب بمجلس رئاسي مدني بالمرة، لأنه ببساطة لن يكون منتخب ولن يكون منفصلا عن رؤية المجلس الأعلى للقوات المسلحة والذي أثق أنه لن يتخلى عن الحكم لمجلس مدني مؤقت في هذا الظرف الصعب. وبالتالي ما الفائدة إذا من مجلس مدني الآن؟ أرفضه تماما

وأرفض أن تتم كتابة الدستور في حضور الجيش، أريد أن يكون في حضور مجلس الشعب. ببساطة.

-‫-----‬

ما هي الأزمة في الخروج للمطالبة بهذه الأمور؟ والتي أراها ملحة. فهي أزمات آنية: العدل والأمن والاقتصاد

واحد من قيادات القوات المسلحة اتصل بيسري فودة أمس، وقال له: إيه المشكلة إن الناس تخرج تعمل مليونيات، المليونيات دي بتعرفنا الشعب عايز إيه

بالظبط كده. اتفق معه تماما. لأنه لا يوجد برلمان، المظاهرات آلية مباشرة لمعرفة رأي الشارع.

-‫-----‬

‫اعرف إسلاميين وأخوان وسلفيين ويساريين وليبرالين سوف ينزلون في مظاهرة يوم الجمعة للمناداة بنفس ما أنادي به. هؤلاء هم شركاء في الوطن. لا يجوز تخوينهم، وإصدار بيانات اتهام كما فعل الأخوان المسلمين. ‬

‫هل لا يدرك الأخوان حتى الآن أن تلك الثورة ليس لها قائد وليس لها موجه. وبالتالي عندما يقرر الناس الخروج في مظاهرات سوف تكون هناك قاعدة عريضة من المطالبات على كل الألوان ولكن هذا الشعب العظيم يغربل وينخل ويعبر بإجماع فقط عما اتفق عليه بإجماع؟ ‬

‫حتى لو وجدنا بيننا في مظاهرة يوم الجمعة من ينادون بمجلس مدني وتعجيل بالدستور ، فهم ليسوا أغلبية بالمرة. الشعب فقط والجماعة فقط هي من تقرر ‬المطالبات النهائية. وهي بهذا ستكون على حق، لأن يد الله مع الجماعة.

حزنت عندما قرأت بيان الإخوان المسلمين. وكما قلت أعرف شباب من الأخوان سوف يحضرون المظاهرة بشكل شخصي.

‫------‬

أرفض أن يكون اسم هذه المظاهرة “ثورة ثانية” هذا ابتذال مطلق
هذه ليست ثورة ثانية. هذا ضغط مستمر ومعتاد منذ تولى المجلس الأعلى للقوات المسلحة إدارة شئون البلاد، آلية شعبية ليصل صوت المجموع لمن يحكمون.

-‫-----‬

يا رب، أنت بمصر رحيم

مطالبنا الملحة .. مع هوامش

2011-05-23T01:35:00.007+02:00

مطالب مليونية يوم الجمعة ٢٧ مايو .. مع تعليقاتي عليها:

أولا: مطالب اقتصادية
- وضع حد أدنى وأقصى للأجور
يعني دلوقتي أزمة السولار والكلام عن ثورة الجياع وإن مصر هتفلس، يقتضي حلولا عملية وعاجلة .. الدعوات لفض المظاهرات الفئوية مش هتحلها، يعني حل المشكلة بدل ما تحاول تمنع العرض وتاخد مسكنات.
لما نكون في أزمة اقتصادية من نوع "إن مصر هتفلس قريب" على حسب قول أحد أغنى أغنياء مصر، يبقى وضع حد أقصى للأجور أصبح مطلب ملح. فهمني إيه نوع الشغل اللي واحد يستحق عليه ١٠٠٠٠٠ جنيه مثلا؟؟ ليه واحد ياخد رقم زي ده وواحد تاني بقاله عشر سنين بيشتغل بياخد ٨٠٠ جنيه وللا واحد تاني لسه جديد بياخد ١٥٠
بجد يعني، ١٥٠ جنيه يعملوا معاه إيه؟ اللهم إلا بركة من ربنا وحزام مشدود ع الآخر.
ليه نيجي ع الغلابة بالشكل ده؟ لا عاش ولا كان، لا عاش ولا كان

- إعادة توزيع الثروات لإنقاذ البلاد من الأزمة الاقتصادية
انا معرفش عمليا إزاي ده يتحقق. بس المفروض اننا في مركب واحدة، لما واحد ثورته ٥٠ مليار ومصر دايرة تشحت ٤ مليار من السعودية وفرحانة عشان أمريكا هتسقط مليار.. يبقى فين الوطنية بقى بتاع الأخ الغني أوي ده؟ والله العظيم والله العظيم أنا لو أملك ٥٠ مليار وللا ٥٠ مليون جتى هتبرع بنصهم إن لم يكن تلات اربعهم. ولو ان معرفش ازاي واحد ممكن يحقق الثروة دي بالحلال، ما علينا يعني.

- التحكم في الأسعار
بسيطة! وربنا بسيطة.. في أجهزة رقابية تشوف شغلها، ودا حل عملي لإنقاذ مصر.. إنقاذها من جشع الجشعين اللي بيعملوا فلوسهم في أوقات الأزمات أكتر من أي وقت تاني.

- فرض الضريبة التصاعدية
أهو، حل كمان أهو. بس طبعا مش هيعجب طبقة الأثرياء من رجال الأعمال الحرامية اللي بيضغطوا بكل ما لهم من نفوذ عشان مايبقاش في الضريبة دي. بس أكيد هو حل يوافق عليه كل وطني مخلص.

- محاكمة كافة رجال الأعمال الفاسدين ومصادرة الأموال التي اكتسبوها بشكل غير شرعي
إنما تقول لي نعمل قانون مصالحة ونسامح رجال الأعمال الفاسدين عشان مصانعهم واستثماراتهم اللي شغالة فيها ألاف العمال، دا يبقى تحايل على الحق. وربنا مايرضاش بكده أبدا. نسكت على السرقة ونطرمخ عشان الحرامي غني يبقى احنا م الآخر كده شرار خلقه اللي هتقوم عليهم القيامة. أعوذ بالله، يا رب احفظنا

ثانيا: المطالب السياسية
- عودة الأمن بشكل مكثف
قوللي بقى الظباط قاعدين في البيوت ليه؟ طبعا مش كلهم، في منهم نزل وفي منهم بيعامل ربنا وبيشتغل، بس في نسبة كبيرة لسه مابيشتغلوش، حتى لو راحوا الاقسام هم قاعدين يلعبوا مش بيوفروا الأمن. دي جريمة أكبر من جريمة الانسحاب الكامل يوم ٢٨. عيب كده. وإذا كان وزير الداخلية مش عارف ياخد منكو لا حق ولا باطل، يبقى يتشال ونجيب حد يعرف يشغل الوزارة دي. أصلا، المفروض يتم اعادة هيكلتها.. اللواءات الكبار الفاسدين لسه في أماكنهم.. ماكنتش ثورة دي!

- تقديم مبارك للمحاكمة بتهمة الخيانة العظمى، على إثر اعتراف المشير بإعطاء مبارك الأمر للقوات المسلحة بقتل
المتظاهرين
هو ده الكلام. مش كلام عن العفو؟؟ هنروح من ربنا فين لما مانطبقش العدل عشان ده كان رئيس؟ في حين دلوقتي بيتقبض على أي حد بيتحاكم كمان محاكمة عسكرية. لا بجد، حرام. بلاش، هتقول إيه لولادك الصغيرين لما يشوفوا إن اللي بيغلط وكان غني أو صاحب نفوذ مش هيتحاسب.. هتقولهم إيه؟

محاكمة مبارك عدالة! ومايخافش من العدالة غير الظالم. ولما يتنتور الكلام عن العفو عن مبارك يبقى مبارك ظالم وخايف من العدالة.. أنا مش عارفة هو هيروح من ربنا فين. بس احنا كمان هنروح من ربنا فين لو سبناه وعفينا عنه؟

- إشراف قضائي وحقوقي على جهاز الأمن الوطني ومحاكمة كل الضباط المتورطين في قتل المتظاهرين وتعذيبهم
إيه الصعب وللا الغلط في مطلب زي ده؟ ليه الأمن الوطني رافض الإشراف القضائي؟ إيه المشكلة لما القضاء يشرف على عمليات الأمن الوطني، فميقدرش يتجسس على مكالمات حد إلا بورقة موافقة من القضاء مثلا، إيه المشكلة؟ حد يقول لي إيه المشكلة؟ ومعناه إيه إن الضباط المتورطين في قتل المتظاهرين لسه ماتحاكموش، وفي منهم لسه بيمارس عمله. هما قتلوا فراخ؟ دي أرواح بني أدمين، وأطهر بني أدمين كمان.

- حل المجالس المحلية
كلنا عارفين المجالس فاسدة قد إيه، وكلنا عارفين إن انتخاباتها بردو كانت مزورة لصالح الحزب الوطني. دا حتى زكريا عزمي الحرامي قالك "المجالس المحلية .. فساد للركب"، يعني شهد شاهد من أهلها يعني. كل اللي في أماكنهم في المجالس المحلية ماسكين البلد من رقبتها، خانقينها.. المجالس المحلية لازم تتحل بجد

- حل جهاز الأمن المركزي أو ادماجه في الجيش
هو إيه لزمته بالظبط؟ غير ضرب المتظاهرين؟

- التأكيد على حقوق المصريين في الخارج في الانتخابات
اللي انا سمعته من اللوا عتمان إن القانون الجديد لا يمنع.

- إقالة يحيى الجمل ومحاكمة عمر سليمان
يحيى الجمل ده بتاع قانون التصالح مع رجال الأعمال الفاسدين! حاجة تفلق، هو بيعمل إيه في الوزارة غير التخنيق على الثورة وظلم الشعب لحساب نفس الطبقة الفاسدة!

ثالثا: الحريات
- إلغاء إحالة المدنيين إلى قضاء عسكري
القضاء العسكري مش المفروض يكون غير للعساكر. مالوش معنى المدنيين يحاكموا عسكريا. المشكلة كمان إن المحاكم العسكرية كارثية. سريعة جدا ومابتديش فرصة للدفاع، حرام كده والله، دا حق دستوري ان يحصل المواطن على محاكمة عادلة.. محاكمة عادلة يا ناس .. العدل يا ناس، العدل .. دا احنا عايزين العدل مع مبارك مش هنعوزه مع بقية الشعب؟

- إعادة محاكمة كل المحكوم عليهم بأحكام عسكرية بعد تحويلهم لمحاكم مدنية
ايوه. إيه المشكلة يعني؟ هو مش قرآن!

- حظر فض الاعتصامات بالقوة بشكل كامل
- تطهير الإعلام، نريد إعلاما ثوريا معبرا عن صوت الشعب وليس صوت الحاكم أيا كان

معنديش كلام تاني أقوله. في مطالب ملحة ماتنستناش برلمان ولا رئيس.. أهم المطالب دي العدل

شتات المصريين

2011-05-17T23:49:00.007+02:00

هو إحنا كنا عايزين إيه؟ كنا عايزين إيه؟

أنا فاكرة إن أول ما خلعنا مبارك، الدنيا نورت وقلنا الحمد لله خلعنا مبارك، هنجيب واحد تاني يخدمنا، ونعمل انتخابات برلمانية تجيب ناس بيمثلونا ونعمل دستور يساوي بيننا جميعا ويحمي حقوقنا...

لا بجد مش فاكرة أكتر من كده. وحقيقي مش عايزة أكتر من كده.

لما نأسس لدولة قانون بدستور وانتخابات حرة تجيب اللي الشعب عايزة نقدر نحقق كل أحلامنا، من أول رفع الأجور والاهتمام بالتعليم والصحة لحد فتح المعبر والعلاقات مع أفريقيا ومحاكمة مبارك وعصابته.

الصراحة أنا مش عايزة من المجلس العسكري غير الانتخابات. يسلم السلطة لينا ويروح. مش عايزة منه يبقى مسئول يأكلنا عيش وللا يضرب لنا مبارك على قفاه - أيوه صحيح أنا عايزة نمسك مبارك قبل ما يفلفص مننا - بس أنا أثق في رئيس منتخب يحاكم في عهده مبارك عن مجلس عسكري هو في الآخر طفل في مسألة الحكم - ولا أسمح بتخوينه على فكره - أنا مش عايزة حاجة من المجلس العسكري.. مش عايزة حاجة

أنا معنديش مانع نفوض المجلس العسكري لمحاولة حل بعض القضايا الملحة لحين الانتخابات، منها توفير الأمن (وظباط الزفت الشرطة ينزلوا من بيوتهم ويتقوا اللي خلقهم ويشتغلوا بقى) والمصايب الطائفية اللي الله أعلم مين اللي بيلعب فيها، وكمان المحاكمات العسكرية للمدنين (واللي هي للأسف أسوأ شيء بيجي مع باكتة حكم العسكر)

على عيني وعلى راسي عصام شرف يروح افريقيا . قشطة، بس لو فشل مش هحاسبه واخرج اطالب برحيله، لأنها مش شغلته ومش مطلوب منه أصلا.. وهكذا مواضيع كتير أوي

أنا متضايقة من المصابين من انفصام الشخصية اللي مخليهم مش طايقين المجلس العسكري ومع ذلك بيطالبوه يحل كل مشاكلهم. اللي مش حاسين نهائيا بالشعب ومنفصلين عنه، اللي مش بيبذلوا مجهود في الشارع عشان خاطر الانتخابات اللي جاية دي، عشان البرلمان يمثل كل طوائف المصريين، عشان الدستور اللي هيتكتب على إيد مجلس الشعب ده يراعي كل طوائف المصريين... وكلنا عارفين إننا محتاجين نشتغل عشان نوعي الناس ونضمن انهم مش هيبيعوا أصواتهم، على الأقل

أنا متضايقة ومخنوقة. مش متضايقة من الشعب، خالص على فكرة. متضايقة من الناس اللي ماتعملش الواجب اللي عليها وماسكة في خناق المجلس العسكري. ومستصيعين بالبق. معرفش بقى، يمكن دا دورهم في الحياة أصلا.. منظرين سياسين يلعنون سلسفيل المجلس العسكري اللي هو أصلا مش مطلوب منه يعمل أي حاجة غير الانتخابات عشان نخلص بقى.

أرجوكم، أرحموا أمي.. انتبهوا، الثورة ستفشل إذا لم يمثل مجلس الشعب القادم كل المصريين، ليس قبل تلك اللحظة تموت الثورة وليس بعدها

اللهم بلغت، اللهم فاشهد

مغامرة

2011-04-24T01:56:00.003+02:00

‎تتنقل بين الأيام‫.‬ متشابهة‫. تنتابها حالة مغامرة. تمسك الورقة والقلم وتتصنع التفكير لكنها - إذا أردت الحقيقة - برغبة قلب يريد بقوة أن يقلب وجه الأيام حسمت الأمر‬

بلال فضل: محاولة فهم ما حدث والتحذير مما قد يحدث: لكى لا نخرب بيوتنا بأيدينا!

2011-04-11T03:06:00.003+02:00

دي مقالة بلال فضل المنشورة أمس يوم ١٠ إبريل - مهمة أوي عشان كده بنشرها هنا كاملة

عادتنا ولن نشتريها، دائما لدينا مشكلة فى التقفيل، وكنا نتمنى ولانزال أن تفلت ثورتنا المجيدة من تلك المشكلة، ففى الثورات كما فى غيرها بالضبط «الركة على الفينيش». «كل ده كان ليه؟!» سؤال سيتوقف عنده المؤرخون طويلا وهم يحللون ما حدث، ولا أعتقد أنهم سيجدون إجابة شافية بسهولة، هذه ثورة حققت خلال شهرين فقط أهدافاً مذهلة بأقل قدر ممكن من الخسائر البشرية فى التاريخ، ومع ذلك لم يتمكن بعض المشتركين فيها من حساب المكاسب والخسائر جيدا، واندفعوا وراء مزايدات غير محسوبة قد تؤدى إلى خسارة الكثير مما حققوه.

ثم هذا جيش انحاز إلى ثورة شعبه ورفض أوامر بإطلاق الرصاص على المتظاهرين فى ظروف كان يمكن أن يبررها بأنه ينحاز إلى الشرعية الدستورية، ثم قام بالاستجابة للكثير من مطالب الثورة، وارتكب أخطاء على الأرض اعتذر عن بعضها ووعد بالتحقيق فى البعض الآخر، ثم فجأة قرر أن يتعامل بشكل غير مسبوق وغير مقبول مع حدث كان يمكن أن يتم حله بالتفاوض وطولة البال بدلا من صب الزيت على نار مشتعلة لا يعلم إلا الله متى يمكن أن تخمد تماما.

إذا كنا نريد أن نتأمل حقيقة ما حدث لكى نخرج بنتائج توصلنا إلى بر الأمان، فعلينا أن نتذكر أن القصة الحزينة لم تبدأ فجر السبت فى ميدان التحرير، بل بدأت قبلها بأيام عندما نشر ضابطان سابقان فى الجيش فجأة على الإنترنت فيديوهات تهاجم المجلس العسكرى بكل ضراوة فتعددت فى حقهما التفسيرات والاجتهادات، وقلت أنا على سبيل المثال ما نصه: «لا أريد أن أظلم أحدا، فقد تكون هناك مشاعر غضب وطنية لدى هؤلاء، لكن من قال إن أجهزة المخابرات لا يمكن أن تقوم بتوظيف أصحاب النوايا الحسنة لمصالحها؟!»،

ثم اتضح طبقا لما نشرته الزميلة نشوى الحوفى يوم الجمعة أن لدى هذين الضابطين مشاعر غضب، لكنها ليست وطنية بل هى شخصية ورخيصة أيضا، ومع ذلك مازال بعض الأصدقاء غاضبين منى بسبب ما نشرته عنهما، كأن المفروض لكى أحصل على شهادة حسن سلوك ثورى أن أمشى وراء كلام الضابطين بحذافيره لمجرد أننى أختلف مع الجيش فى تأخر تحقيق بعض مطالب الثورة، فأكون كمن يشكو من تنميل يده فيقرر أن يقطعها.

الآن وبعد كل ما نشرته الصحف لم يعد سرا أن الضابط حاتم محمود عبادى تم طرده من الخدمة فى أول ديسمبر 2004، لأنه تزوج سرا من سيدة نرويجية بالمخالفة لقانون الجيش الذى يطلب من منتسبيه الاستقالة إذا قرروا الزواج من أجنبيات، يعنى لم تكن هناك مبررات سياسية تدفعه لأن يظهر بالمظهر النضالى الذى ظهر عليه فى الفيديو كليب. أما الضابط الثانى نقيب شريف محمد عثمان فقد تم طرده من الخدمة فى 20 سبتمبر 2006 لأنه رفض العودة إلى الخدمة بعد أن أنهى بعثة دراسية كلفت القوات المسلحة أكثر من مائة وخمسين ألف دولار، يعنى البيه استولى على أموال المصريين ثم قرر أن يناضل باسمهم لكى يدعوهم إلى فتنة تأكل الأخضر واليابس.

عقب نشر مقالى يوم الخميس الماضى، جاءتنى رسائل عديدة من قراء أعزاء عرفوا الضابطين عن قرب، الأستاذ إسلام محمد يسكن فى نفس منطقة من تم وصفه بالبطل حاتم عبادى ويصفه - والعهدة على الراوى - بأنه «مريض نفسيا ومولع بحب الظهور واتفصل من القوات المسلحة بعد ما اتجوز نرويجية تعرف عليها على الشات ولم يبلغ عن زيجته لكى لا يستقيل من الجيش طبقا للقانون».

المقدم محمد الوكيل أرسل يقول لى: «كنت زميلا للضابط شريف عثمان والتقيت به فى ولاية تكساس فى مدينة سان أنتونيو عام 2007 عندما ذهبت لبعثة تدريبية، وهو ليس وطنيا كما يدعى بل خائن للأمانة لأنه سافر إلى الولايات المتحدة ليأخذ دورة تدريبية لمعلمى اللغة الإنجليزية ثم انتهى من الدورة ولم يعد إلى الوطن بل تزوج من ضابطة صف أمريكية كانت تعمل بقاعدة لاكيلاند الجوية، حيث معهد اللغات الذى كنا ندرس به حتى يتسنى له الحصول على الجنسية، وقد تعاملت معه وأرى أنه ليس وطنيا بالمرة ولا يمت للوطنية بصلة، وللعلم فإن السيدة والدته عميد طبيب بالقوات المسلحة، يعنى كان المفروض أن يكون رجلا يعرف الصح من الغلط لكنه خيب آمال أسرته فيه من أجل نزوات شخصية»،

نفس معلومة هروب شريف من الخدمة يؤكدها الأستاذ وائل فودة، ويؤكدها أيضا الأستاذ محمد عمر نقلا عن أصدقاء له كانوا زملاء لشريف ويعرفون سمعته السيئة التى أكدتها صور نشرها زملاء له على الفيس بوك، يمكن لحضرتك أن تشاهدها بسهولة على الإنترنت، والأستاذ محمد يناشد القوات المسلحة أن تتبع شفافية كاملة فى كل ما يخص ضباطها لأن ترك أى نقاط صغيرة دون مكاشفة يساعد على استمرار حالة البلبلة التى يخلقها البعض أحيانا بحسن نية وأحيانا بسوء نية.

من ناحية أخرى، الأستاذ جمال فؤاد أحد المشاركين فى الثورة يقسم بأنه رأى بعينيه الجمعة قبل الماضى أشخاصا من أعوان وبلطجية الحزب الوطنى يتطاولون بالسباب على أفراد وضباط الجيش بالمنطقة العسكرية بمصطفى كامل بقصد استفزازهم، وقد أنهى رسالته نهاية طريفة يقول فيها: «للعلم، أنا أصبت خلال الثورة بأكثر من 17 طلقة رش فى جميع أنحاء الجسم وكنت أفتخر بذلك إلى وقت قريب إلى أن عرفت بطريق الصدفة أن هذا الرش يستخدم لصيد الكلاب الضالة ومن ساعتها أصبحت مثار سخرية أطفالى الأعزاء».

جاءتنى أيضا رسالة من أحد ضباط القوات المسلحة تقول إن هناك ضابطا جديدا مفصولا سينضم إلى الاثنين السابقين، وإن كان قد بدأ مشاركته كتابة هذه الأيام، وهو نقيب ذهب إلى بعثة دراسية لمدة أربع سنوات فى الكلية البحرية فى أمريكا، وأصيب بقطع فى الرباط الصليبى، وغضب لأنه حصل على قرار بالخروج من الخدمة لأسباب طبية.

أخيرا، جاءتنى رسالة مجهلة من ضابط فى الدفاع الجوى يقسم بالله أن الضابط حاتم عبادى كان فعلا أول دفعته لمدة خمس سنوات لكنه خالف القانون العسكرى بزواجه من نرويجية وذهب معها إلى النرويج وهو ما يجعل شهادته مجروحة، ويقول فى شهادته المهمة إن ضباط الجيش خصوصا من الرتب الصغيرة لديهم شكاوى فعلا لكنه يضيف: «لا أنكر أننا نشعر ببعض الضيق والغصة لأننا لم نجن ثمار التغيير الذى طال البلد كافة، إلا أننى وقطاعاً عريضاً من الضباط الذين أحسبهم وطنيين نرفض هذه المهاترات من بعض الضباط السابقين وقلة قليلة من أصاغر الضباط الذين لا يستطيعون تغليب المصلحة العامة، نحن صابرون حتى يطولنا التغيير ولن نرهن خدمتنا للوطن به أبدا».

لا أريد أن أتسرع فى اتهام الضابطين المفصولين بالعمل لحساب أجهزة مخابرات، لمجرد أنهما فُصلا لسوء سلوكهما أو لأنهما يقيمان بالخارج وتزوجا من أجنبيات، فقد يكون وراء موقفيهما رعونة وطيش ورغبة فى الانتقام، لكن ما قاما به يخدم فى نهاية الأمر كل من يرغب داخليا وخارجيا فى إجهاض الثورة وإدخال مصر فى حالة سيولة كاملة تنتج عنها فوضى لا يعلم مداها إلا الله.

وهو ما ينطبق أيضا على الإخوة الذين نزلوا مرتدين الملابس العسكرية إلى ميدان التحرير يوم الجمعة دون أن يتأكد أحد هل هم مفصولون من الجيش أم أنهم مازالوا فى الخدمة، لكن أيا كان موقفهم من الخدمة فهم بالطبع أكثر شجاعة لأنهم أعلنوا موقفهم من داخل مصر وعرّضوا أنفسهم للخطر، مع أنهم كانوا من المفروض أن يخلعوا ملابسهم العسكرية وينضموا كمدنيين للتعبير عن رأيهم لكى لا يورطوا الثورة فى تحمل مواقفهم الشخصية.

قد تكون لديهم اعتراضات أو تحفظات على المؤسسة العسكرية التى يعرفونها من الداخل، لكننى شخصيا لا يمكن أن أتضامن مع ما فعلوه لسبب بسيط هو أننى أعتقد الآن أن مصر فى حالة حرب، وليس من مصلحة أحد أن يسمح بحدوث أى تفكك فى المؤسسة العسكرية أيا كانت دوافعه أو أهدافه نبيلة، فنحن نشكو من تباطؤ فى تحقيق المطالب، ولم نر خيانة لأهداف الثورة تبرر مثل هذا الخروج السافر على المؤسسة العسكرية.

أرجو من كل من يجد نفسه راغبا فى لعنى الآن أن يهدأ قليلا ويأخذ نفسا عميقا ثم يفكر فى إجابات لهذه الأسئلة: من المستفيد من نشر حوار ينسب للمشير طنطاوى مع مجلة «دير شبيجل» يتحدث عن وقوع انقلابات فى الجيش، ثم يتضح أن الحوار مفبرك جملة وتفصيلا، بعد أن فتح الباب لكم مهول من الأقاويل حول وضع الجيش وأظهره كأنه يعانى من اضطرابات داخلية؟

من المستفيد من وجود صفحة على الإنترنت تدعى أنها تساند ضباط الجيش المنشقين وتنشر يوم الجمعة خبرا يقول إن الضابط أحمد شومان تعرض لحكم بالسجن لمدة 37 سنة، قبلها بيوم يقوم شخص يتخذ لنفسه على موقع «تويتر» اسم (ضابط جيش) بنشر تويتة يقول فيها إن شومان محتجز فى مستشفى للقوات المسلحة، قسم الأمراض النفسية، ويتعرض لحقن هلوسة، ثم ترد نفس المعلومة فى فيديو لضابط مفصول بشكل غير مباشر ودون الإشارة إلى اسم شومان، قبل أن يقولها الضباط المنضمون للتحرير ويتناقلها عنهم أناس على الـ«فيس بوك» و«تويتر»؟

كل ذلك يقال قبل أن تكشف الكاتبة دعاء سلطان بحكم صداقتها بزوجة الرائد شومان أنه حر طليق ويذهب إلى عمله كل يوم، الأدهى من ذلك أن الفنان هشام عبدالله قال لى إن الرائد شومان اتصل هاتفيا بالضباط الذين نزلوا إلى التحرير وكلم الشباب هاتفيا بعد أن تم وضعه على الميكروفون وقال لهم: «إحنا بنّظم نفسنا دلوقتى عشان ننزل معاكم»، بعدها فوجئت برسالة تأتى على هاتفى المحمول مكتوب فيها الآتى «لازم نتفق نبقى ضد أى فتنة أو انشقاق فى صفوف الجيش فى الوقت الصعب ده، مهما اختلفنا معهم فى أسلوب وشكل وطريقة قيادتهم للوطن، الفتنة قد تؤدى لظهور ميليشيات ملونة تعود بالوطن للمجهول.

أحمد شومان»، بعدها فورا اتصلت بى الأستاذة دعاء سلطان لتقول لى: «الرائد أحمد شومان حاول يكلمك ودى نمرته.. ياريت تكلمه»، سارعت بالاتصال به فوجدته فى غاية القلق على ما يحدث، وأنكر كل ما قيل عنه أو نسب إليه من أقوال، واستأذنته فى نشر نص رسالته التى يبدى فيها اعتراضه على كل ما حدث يوم الجمعة الماضى، لكى يدرك الناس أن هناك لعبة خطيرة تحدث، ويتم جرنا إليها جميعا للأسف الشديد لكى تدخل البلاد فى نفق مظلم.

لقد كتبت من قبل أن طاقة الرفض هى التى أنجحت الثورة، وهى - للأسف الشديد - التى يمكن أن تدفع بها إلى الفشل، ولذلك سألت بعض الذين وجدتهم يهتفون ضد الجيش عن طبيعة ما يريدونه لكى أفهم موقفهم، فوجدت آراء مختلفة متنافرة، بعضهم يهتف ضد المشير مطالبا بإسقاطه، والآخر يطالب بإسقاط المشير والفريق سامى عنان، والبعض الثالث يطالب بإسقاط المجلس العسكرى كله، بل إننى وجدت من يطالب بتنحية كل من يحمل رتبة اللواء، وكل الذين يقولون هذه الآراء يتحدثون بصفتهم وطنيين وثوريين وحريصين على مصر، لكن هل ما يطالبون به فى مصلحة مصر فعلا؟

أعتقد أن أى عاقل سيجيب بلا، قبل أن يسأل ما هى الآلية التى يمكن بها تنفيذ هذه الطلبات، ومن سينفذها، ومن الذى سيمنح صك الوطنية لهذا القائد ويستثنى ذلك؟ وكيف سيكون الحال لو تمرد الجنود التابعون لهذا القائد رافضين تنحيته لأنهم يحبونه ويدركون وطنيته ودخلوا فى مواجهات مسلحة مع الذين يرفضونه؟

وإذا كنا قد اتفقنا على أن نقد المجلس العسكرى لا يعنى نقد الجيش فمن أين أتى هؤلاء بمعلومات تؤكد لهم أن المطالبة بإسقاط المجلس العسكرى لن تعتبر موجهة ضد الجيش بأكمله، ألا يفترض أن يكون لدىَّ معلومات أبنى عليها موقفى قبل أن أتخذه؟

وهل مصر التى تعانى من الفراغ الأمنى يمكن أن تتحمل فراغا عسكريا واستراتيجيا لو فتحنا الباب لكل من هب ودب لكى يبدى رأيا فى قيادته العسكرية؟

وهل يعرف أى من هؤلاء شيئا عن تقاليد العسكرية المصرية قبل أن يفترضوا أنها ستسلم لمطالبهم بمنتهى السهولة؟

وأين هى الدولة الديمقراطية التى يُسمح لأفراد جيشها بأن يخرجوا فى مظاهرات لكى يُبدوا رأيا فى قياداتهم؟

وأين تكمن بالضبط مشكلتنا مع المؤسسة العسكرية، هل فى أدائها السياسى أم فى شخوص قادتها؟ وهل سيسعد الشهداء فى قبورهم إذا وجدوا أننا أشعلنا حربا أهلية مسلحة فى البلاد؟

أزعم أن من حقى كمدنى أن أقف فى أى ميدان يعجبنى لكى أنتقد الأداء السياسى للمؤسسة العسكرية بأعلى صوت، أنا فعلت ذلك فى هذه الصحيفة، وأفخر بأننى كنت أول من فتح ملف التعذيب الذى قام به أفراد من الجيش للناشطين العسكريين، انتقدت على الهواء مباشرة اقتحام الشرطة العسكرية للحرم الجامعى، ودخلت خلال برنامج الزميل يسرى فودة فى نقاش طويل مع أحد قادة الجيش حول بطء المجلس الأعلى فى تنفيذ مطالب الثورة،

وانتقدت هنا تصريحات اللواء ممدوح شاهين فى برنامج «آخر كلام»، ونشرت رده على انتقادى بكل احترام لشجاعته فى مراجعة ما قاله، ثم أنا أعلن الآن رفضى للطريقة التى تمت بها مهاجمة الاعتصام فى ميدان التحرير للقبض على الضباط المعتصمين، فهى طريقة أفسدت ولم تصلح، والبيان الذى صدر لتبريرها لا أظنه موفقا، خاصة أن الذين تم ضربهم كانوا مدنيين عزلاً لم يقوموا بالتكسير أو التخريب بل مارسوا حقهم فى التعبير عن رأيهم الذى يمكن أن نختلف معه لكن لا يمكن أبدا أن نقر قمعه بهذا الشكل الذى أفزعنا ونحن نتابعه على شاشة «الجزيرة مباشر» فما بالك بمن شاهدوه رأى العين؟!

وحتى يحدث إصلاح جذرى لهذا الموقف المفزع، سأظل أنتقد كل من أراه خاطئا فى طريقة إدارة المجلس الأعلى للفترة الانتقالية، لكننى سأرفض أيضا كل محاولات تفكيك وحدة المؤسسة العسكرية، وسأرفض ترديد اتهامات عن فساد المؤسسة العسكرية دون دليل، فأنا لا أؤمن بالكلام الذى لا جمرك عليه، ولم أعد أثق فى كل من يناضل خلف اسم مستعار أو يظن أن الشجاعة أن تكون رجلا فقط فى الفضاء الافتراضى، ولن أصدق أى شائعات حقيرة تتحدث عن وجود ملفات فساد كان يحملها الضباط المعتصمون،

بينما لم أر أحدا شاهد هذه الملفات بنفسه حتى الآن، لذلك موقفى بسيط وواضح، من كان يحب هذا الوطن فليقل خيرا أو ليصمت، إذا كانت لديك أدلة على فساد سين أو صاد فى المؤسسة العسكرية فكن رجلا وتقدم بها إلى القضاء أو تحمل مسؤوليتها وانشرها باسمك فى أى موقع على الإنترنت، لكن أن ترددها بشكل مرسل وأنت تستخدم اسما مستعارا فأنا لن أثق فى نواياك أبدا.

أقول كل ذلك لأن هناك مدوناً يدعى أنه ضابط جيش ويختبئ خلف اسم مستعار هو أحمد سعيد، يتصور أنه يضربنى ضربة قاصمة عندما يتهمنى بأننى أصبحت متحدثا رسميا للجيش، وهو أمر لا أظن أنه يعيبنى، فلم أسمع من قبل أن دفاع الإنسان عن جيش بلاده سُبّة (جديدة حكاية العمالة لجيش بلادك دى؟)، طبعا بإمكانى الآن أن أزايد على هذا الأخ وأمثاله فأقول مثلا إن عمل الإنسان لمصلحة بلاده وجيشها خير من عمله لمصلحة خطط جيش الدفاع الإسرائيلى الذى يلعن سنسفيل هذه الثورة كل يوم، واقرأوا ترجمات الصحف العبرية التى تنشرها صحيفة «القدس العربى» لتتأكدوا من ذلك، مع ذلك لن أزايد على وطنية أخينا الضابط المختبئ،

بل فقط سأسأله: لماذا أصلا يجب أن أصدق كلامك وأنت جبان تختبئ خلف اسم مستعار لكى تنشر أحقادك التى تعلم أنها يمكن أن تجد رواجا فى ظل طاقة الرفض التى ستظل فائرة حتى تتم محاكمة مبارك وأسرته؟ يا سيدى، إذا كانت حكاية الدفاع عن الجيش المصرى تهمة، فيسعدنى أن تشاركنى فيها أسماء محترمة مثل: عمرو الشوبكى وطارق البشرى ووحيد عبدالمجيد ومحمد المخزنجى وجمال الغيطانى ونوارة نجم وفهمى هويدى والمعتزبالله عبدالفتاح الذى كتب مقالا بديعا فى «الشروق» يتحدث فيه عن اتهامه هو أيضا بأنه بات متحدثا رسميا للجيش.

فى الوقت نفسه يسعدنى أن يكون هناك أكثر من خمسة جروبات على الـ«فيس بوك» تحمل أسماء من نوعية (كارهى بلال فضل) و(حملة ضد بلال فضل وكل منافق) و(الصفحة الرسمية للقواد بلال فضل) وكلها مليئة بشتائم، بعضها قبيح يتهمنى بتعكير صفو العلاقة بين الشعب والجيش والتشكيك فى الجيش، وربما كان الشىء الوحيد الذى يحزننى فى هذه الجروبات أن أعداد المشتركين فيها ليست كبيرة مما يقلل من حسناتى، وأظن أننى أديت لأصحابها واجب الدعاية وليست لهم حجة الآن.

عموما، يا أيها المختبئ خلف اسم مستعار، إذا كنت غاضبا لأننى لم أجبك عن سؤالك حول ما الذى تحقق من أهداف الثورة حتى الآن، فأعتقد أننى مازلت أحفظ مطالب الثورة التى كانت مكتوبة على لافتة قماشية ضخمة معلقة على عمارة كنت أقف تحتها كل يوم فى ميدان التحرير، وقد تحقق منها الآتى: خلع الرئيس الفاسد وأسرته وإنهاء مشروع التوريث إلى الأبد، إسقاط الدستور الفاسد، حل المجالس النيابية المزورة، تشكيل حكومة كفاءات وطنية على رأسها رئيس وزراء تفتخر به مصر وبها وزراء داخلية وخارجية وعدل وثقافة ومالية وعمل، أشعر بالفخر لأننى عشت حتى أرى وزراء مثلهم، فهل أنسى أن كل ذلك قد تحقق لكى أجرى وراء رغبتك الغامضة فى إشعال الحرائق فى وطن تركه الفاسدون على شفا الخراب.

نعم، مازلت أطالب بمحاكمة مبارك وأسرته واسترداد الأموال المنهوبة والقصاص لدماء الشهداء وتطهير البلاد من رموز النظام الفاسد فى كل المجالات، لكننى سأفعل ذلك وأنا أبنى مصر التى أصبح وضعها الاقتصادى مرعبا بعد أن تركها مبارك قاعا صفصفا، سأفعله وأنا أساعد الجيش على أن يعود إلى ثكناته بعد أن أنتخب نوابا ورئيسا وآتى بحكومة تواصل تحقيق مطالب الثورة التى جاءت لكى تصبح مصر دولة عصرية متمدنة، وليس لكى تصبح خرابة ينعق فيها البوم.

ختاما، هناك حقيقة مُرّة نتعلمها من التاريخ تقول لنا إن كل الفتن الكبرى التى حدثت فيه جاءت فقط فى الأوقات التى يعتقد الجميع أنهم كانوا على حق، دون أن يقوم أحدهم بمراجعة مواقفهم ولو قليلا. فهل ندرك ذلك أم نصر على إكمال السير فى النفق المظلم الذى دخلناه فجر السبت للأسف الشديد؟! هذا، «وعلى الله قصد السبيل ومنها جائر، ولو شاء لهداكم أجمعين».

الجيش والشعب آيد واحدة

2011-04-09T14:16:00.002+02:00

إمبارح أول النهار لم شفت كام ظباط طلعوا ع المنصة، اتضايقت. ماينفعش يا حضرة الظابط المحترم تيجي بلبسك العسكري تنضم لثورة شعبية مدنية وتقول لازم نشيل المشير.

حضرتك متضايق منه روح اعمل مظاهرات تحت مكتبه، لكن ماتدخلناش في خناقة احنا مش عايزينها. كل اللي احنا عايزينه يعمل محاكمات ويقبض ع اللي بيولعوا في البلد .. وبنضغط كل أسبوع على كده وخلاص. ومستنيين انتخابات مجلس الشعب في أمان الله، ومستنيين انتخابات الرئاسة بردو في أمان الله.

ورغم إني ماكنتش واثقة في الظباط دول ولا في نيتهم، بقى كل خوفي إن المتظاهرين يهللولهم من باب إن كل اللي بيطلع ع المنصة ويقول كلمة بيصقفولوا ويهللوا وراه. بس الحقيقة إن في ناس قلبها اتوغوش كده، وفي ناس حدفتهم بأزايز ميه.

وبدل ما يروحوا زي ما كل الناس هتروح اخر الليل. قاللك لأ، لو روحنا هيتقبض علينا. نهارك أبيض يا سعادة الظابط! ما انت كده كده هيتقبض عليك، لو مش النهاردة هيبقى بعد أسبوع بعد شهر، حد قاللك انك هتفضل معتصم إلى الأبد؟ وللا انت متصور إنك اقنعت الشعب يعتصم لحد ما يشيلولك المشير؟

مين قالك بنباهة أهلك اننا عايزين نشيل المشير، وللا المجلس العسكري يعنينا في حاجة؟ طالما ماشي على قد إيدينا مش هنقوله يمشي

إيه الوضع يا رجالة؟ يا شجعان؟ هتعتصموا في الميدان؟ بطولكم؟ عشرة ظباط في ميدان هو؟ لا طبعا، هيقعد معاكو الثوار ، اللي بدل ما يقنعوكوا تروحوا وللا تهربوا، قرروا يسهروا معاكو ويحموكوا. فانتو بدل ما تسترجلوا وتقولوا لهم ملهاش آخر احنا بنورطكم معانا، وهنقوم احنا نمشي طالما ماعرفناش نقنع الشعب، قررتوا تتحاموا في مدنيين وتباتوا في الميدان وانتو عارفين ان الجيش هيتدخل بعد حظر التجول. والثوار عارفين ان الجيش هيتدخل بعد حظر التجول. انا الوحيدة الهبلة اللي قلت الجيش مش هيعمل كده عشان في انقسام شعبي حوالين العسكر دول، ولا انقسام شعبي ولا نيلة، هم شوية الثوار اللي باتوا معاكو وعليهم عشرين واحد كمان، بقية الشعب بيلعن في سلسفيل الوقيعة والفتنة ومش مصدقكوا. حتى الثوار اللي معاكوا، في منهم بات عشان ضميره انبه عليكو مش أكتر.

عنها والجيش اتدخل. هيجيبهم يعني هيجيبهم، وبردو بدل ما تسترجلوا وتوفروا ع المدنيين الل سهروا معاكوا مواجهة خسرانة وغير متوازنة القوة مع الجيش، ورغم انهم قالولكم غيروا ملابسكم العسكري واتنيلوا اتداروا وسطينا، قولتوا، لأ نحب نموت في بدلتنا العسكرية؟ يا حلاوتك يا حلاوة أهلك، والمدني اللي جمبك هيموت هو كمان، ولما انت مستعد تموت في البدلة العسكرية مارحتش اتظاهرت ليه عند مكتب المشير؟

والجيش ضرب نار في الهوا، وهجم واخد كام واحد عسكري، وماخدش مدنيين. وبيقولوا مات واحد واتصاب ٧١

تحبوا تعرفوا رأي الشعب إيه؟ سيبوكوا مبدأيا م المشعلالتيه إللي من أول ما المجلس الاعلى مسك الحكم وهم مش طايقين وعايزين يشوفوا دم ومعجبين أوي بالتجربة الليبية

الشعب بقى، الناس اللي ماشية في الشارع دي، ومنهم اللي راح الميدان في الثورة ومنهم اللي شتم الثورة
قالك الظباط دول أصلهم إيه؟ وهم ظباط بجد؟
طب هم لسه فاكرين ان الجيش فيه فساد يوم ٨ ابريل ؟
طب مارحوش يتظاهروا ليه جوه الجيش؟ جايين يتحاموا فينا ليه؟
طب وباتوا ليه في الميدان وعرضوا حياة مدنيين للخطر قرروا يسترجلوا ويباتوا معاهم؟
الجيش كان هيجيبهم هيجبيهم وكان يحاسبهم، دا انشقاق يا جماعة، هم مش عارفين خطورة اللي علموه؟ دا احنا عارفين!

الدور ده كله هيخلص على إن الشعب شايف ان الجيش ماغلطش، هو بس كان عنيف شوية، وفي حتى ناس هتبرر العنف وتقول “دا انشقاق، هو هزار؟ الجيش مايعرفش أبوه”.

أنا بقى بقول. إن الجيش ده آخر حاجة لينا في الدنيا. لو اتهبلنا واتقلبنا عليه، وللا لو ساعدنا انه ينشق على نفسه إحنا اللي هناكل التراب، ومش هينبسط غير شوية الهمجيين اللي نفسهم يبقوا أبطال بالدم.

ومن الأول بقول إن الجيش ده - سبحان الله - بيجي بالمسايسة مرة وبالضغط مرة. يبقى ليه نعمل في نفسنا كده؟

أمريكا وإسرائيل مش ساكتين، وطالقين علينا كل اللي مؤمن بيهم وبأفكارهم يخرب العلاقة بينا وبين الجيش. الجيش أكيد واعي للي بيحصل، ورغم إني مش فاهمة ليه كان عنيف امبارح، بس حاسة إنه لازم اقعد افكر في الاجابة وادور ليه قرر يبعت رسالة “عنيفة” كده؟ ولمين؟ وهو عارف ومتأكد إن الشعب ماقتنعش بموقف الظباط دول

ويا ترى الجيش هيعرفنا الظباط دول مين وزعلانين ليه؟

اللي اتعلمته من الثورة دي من أول ما ابتدت إن كل مصيبة تحصل، تقلب على صاحبها وتبقى في صالح مصر. المصيبة دي زي غيرها، والشعب مش هيتضحك عليه لأنه واثق في جيشه، وعارف إن معركته مش مع المجلس العسكري. وإن المظاهرات والمليونيات السلمية كفيلة تحقق لنا أهدافنا.

معرفش مصير الظباط دول إيه، ورغم إني متغاظة منهم إلا إن قلبي واكلني عليهم، عيال صغيرة قد أخويا، وماتمناش تحصل لهم حاجة وحشة.

المهم المشعللتيه، واللي بيقولوا هنصعد ومش هنسكت وهنقف للمجلس العسكري، عيب عليكوا.. عيب عليكوا تتصرفوا بغباء في ظل حمقة وغضب.. عايز حقك فكر تاخده صح، مش بالشعلله والولولة وتحميض نفوس الناس ضد بعضها.. واللي بيحبوا الدم والبطولات المزيفة، روح أشوف فيكو يوم أسود على دماغكم ، مصر أمانة والشعب مش هيضيعها.

بلادي مفتوحة كالسماء

2011-03-26T02:42:00.002+02:00

أنا الشعب أنا الشعب
لا أعرف المستحيلا.. ولا أرتضي للخلود بديلا

تحية إلى الأحرار في تونس ومصر واليمن والبحرين وليبيا وسوريا

الجيش لازم يمشي

2011-03-23T18:16:00.002+02:00

أنا بحب الجيش. بحبه لدرجة ان حد في اصدقائي بيضايق ويقولي انتي بتعاملي الجيش كأنه بابا وماما.

أنا بحب الجيش وعايزاه يمشي. ولما اخترت "نعم" اخترته عشان عمر الجيش في الحكم يبقى أقصر ما يكون.

النهاردة مجلس الوزراء بيتكلم عن مشروع قرار يجرم التظاهرات "التي تعطل العمل". والاسبوع اللي فات اصدروا قرار بإعدام المغتصب، والأسبوع اللي قبله اصدروا قانون لأحكام مشددة للبلطجة اتحاسب بسببه ثوار واخدوا خمس سنين.

الوضع ده مش لازم يستمر، لازم ترجع حياتنا المدنية في أقرب وقت. الجيش خلقه ضيق ومايعرفش أبوه. أنا متأكده انه بيعمل كده عشان مش عايز العملية تفلت منه وتبهوق. ودي طريقتهم في التفكير. حتى اسألوا أي ظابط في الجيش اتربى ازاي في الكلية وازاي هو نفسه ايف ان ده طبيعي وإن الحزم والتشدد في القرارات بتخلصلهم المواضيع

احنا مش متعودين على كده، ولا هنتعود. عشان كده الجيش لازم يمشي. عشان يتفرغ لمهمته المقدسة وعشان مانكرهش بعض لمجرد ان طريقتنا في الحياة مختلفة.

ربنا يعدي الكام شهر الجايين على خير، ويا رب يا رب الجيش مايزودش يوم واحد عن الست شهور اللي قال عليهم.

ربنا يستر

كلمة حق عند أطراف جائرة

2011-03-22T14:22:00.004+02:00

آفة أي فكر التطرف والنظرة الفوقية وإقصاء الآخر

-----

الصورة الوردية اللي بحلم بيها في زمن تحكم فيه الشعوب نفسها، هو إن يكون صندوق الانتخاب وسيلتنا المشروعة للمحافظة على تداول السلطة لما الشعب يقرر إن اللي ماسكين دلوقتي وحشين ويبقى عايز يختار غيرهم.. يغيرهم. وتخوفي الوحيد هو ديكتاتورية الأغلبية. وأن تجور على الأقلية في حقوقها، لمجرد إن الأغلبية قررت إنه لا، أو إنه نعم أو إنه بالطريقة الفلانية مش العلانية.

موضوع الاستفتاء على التعديلات الدستورية كان فرصة جت سريعة جدا بعد الثورة عشان تتكشف لنا أوراق لعب، ولعيبة، وتكتيكات محدش فينا بيفكر فيها أصلا في الثورة ولا قبل الثورة. ناس كلها نايمة ومكبوتة ومستخبية.. دلوقتي نزلوا الملعب.

بس كل أمراضهم نزلت معاهم: التمركز حول الذات - التطرف - الجهل بالآخر (دا بالنسبة لتعامل القوى السياسية والانتماءات الدينية مع بعضها) والتقليل من قيمة الشعب (وبما يمثله من وعي وضمير جمعيين)

الأمراض دي تطال الجميع، من أول العلمانيين والاخوان وحتى السلفيين والمسيحيين. وإذا رأيت أحد منهم منصف فهو “شخص”، أو “حالة” تمثل نفسها، وتبدو أعقل وأنصف ممن تنتمي إليهم.

والكوميديا إن كل العيوب ظهرت عشان كلمة واحدة اتفرضت أو فرضت نفسها “الدين”

طيب، أنا عشان اختصر.. هعتبر إن تجربة الاستفتاء دي أظهرت لنا عيوبنا، عشان نبتدي نعالجها. فهوجه رسالة لكل الاتجاهات المعنية، على الله يسمعوني.

ابتدي بمين طيب؟ ابتدي ب”بتوع الدين”؟ وللا اللي بيبوظوا الطبخة على بقرش ملح؟ وللا الانتهازيين اللي بيتهموا الاخر انه انتهازي؟

وبعد حادي بادي: العلمانيين
زي ما قلت في أول الكلام، إن آفة أي فكر التطرف‪والنظرة الفوقية وإقصاء الآخر ‬
وأنا هقولكو اللي ليكو واللي عليكو في موضوع الاستفتاء. اللي ليكو هو إن حقكوا ترفضوا الدين كمرجعية للدولة وتشريعها وكل ما يخصها. حقكوا يكون عندكو منهج تاني.. المبدأ بيقول إن الإنسان حر، وربنا ماطردش حد من تحت سماه عشان علماني. اعمل يا سيدي برنامجك اللي بيفصل الدين عن الدولة ده وقدمه للشعب، حقك تماما..

اللي مش ليكو بقى هو الفوبيا الغريبة لكل ما له علاقة بالدين حتى لما الواحد يقعد يفهمكوا الفرق بين دولة دينية ودولة ذات مرجعية إسلامية، بتلخبطوا الورق وتعملوا مش فاهمين وتقولوا هو ده هو ده.

الفوبيا دي هتوديكوا ورا الشمس. لأن الشعب المصري، زي ما كلنا عارفين يا ولاد، متدين من أيام الفراعنة. مسيحيين على مسلمين، فكرة ربنا والدين والشرع وإيه الحلال وإيه الحرام فكرة أصيلة جوا الشعب ده.

فنصيحة يا ابن الحلال، عندك عقد من ناحية الدين، ابعد عن السياسة وعيش حياتك براحتك. مُصر تنخرط في السياسة عشان هدفك الأكبر هو إن البلد دي تبقى أفضل يبقى تبتدي تتعلم إزاي تسوق أفكارك، ولازم لازم تدرس الكائنات المتدينة وتفهم هم بيفكروا ازاي.

لأن يا محترم كلمة زي “السلفيين بيستغلوا الدين عشان السياسة ودي لعبة قذرة” العبارة دي مش هتاكل مع الشعب. إنت محتاج تعصر على نفسك لمونة وتقرا في الدين ده وتطلع منه الخطاب الديني اللي يثبت للكائنات المتدينة إنه “إزاي كلام الشيوخ ده مخالف للدين شخصيا” و “إزاي بيستغلوا الدين لمآربهم الشخصية أو على أفضل تقدير هم مش فاهمين الدين بيقول إيه” و”إزاي إن دا ضد العدل والمساواة اللي أمر بيهم ربنا”..

أنا فاهمة إن طول ما انت رافض الدين كله على بعضه مش هيجيلك نفس أصلا تقرا وتدرس وتتكلم وتتحاور مع الناس. هو ده اللي بالظبط بقول عليه “التطرف”. كراهيتك العمياء للدين، اللي هو مكون أساسي وجذري في حياة شعبنا مش هيوصلك لحاجة، هتفضل تهري وتنكت في نفسك والناس هتفضل رافضاك ومش بتسمعك. اتكلم لغتهم يا محترم أو شوفلك مترجم. وماتنساش تعرف الفرق بين الدولة الدينية والدولة ذات المرجعية الإسلامية، روح لحد في حزب الوسط يقولك.

ماعملتش كده، يبقى انت بتقفل كل طرق الحوار، ولا تلمن إلا نفسك. وبلاش وحياتك النظرة الفوقية بتاعة ان الدين هو اللي مضيعهم وإن انت جاي تنقذهم من “الدين”. مش لازم تخسر معركتك بدري أوي كده.

هتقولي ما المسيحيين قالوا لا عشان فهموا اللعبة القذرة اللي الاسلاميين بيعلبوها وإن المسيحيين رافضين تدخل الدين في السياسة. هقولك لأ، المسيحيين بردو قالوا لا من منطلق ديني بحت ومن خوف هستيري إن الإسلاميين يمسكوا الحكم. هم خايفين على نفسهم وعلى دينهم. مع انهم لو فكروا شوية هيلاقوا ان وجودهم في دولة علمانية أو إسلامية مش هيفرق طالما كلتا الدولتين ترعى مصلحة الجميع ولا تقصي آحدا وتحترم حرية الأقليات بل وكل الأفراد. (اه عشان تبقى عارف، ده بيأمر بيه الدين الإسلامي، زي ما انت كعلماني مؤمن بيه)

مين كمان؟ الإخوان المسلمين
النقطة المشتركة بيني وبينكو هي إن أنا وانتو بندعي إن مرجعيتنا إسلامية، وبيشترك معانا حزب الوسط والسلفيين. بس طبعا احنا عارفين ان قماشة الكلمة دي عريضة. بدليل كل التنوعات دي. زي أي حاجة في الدنيا بردو، ما في شيوعين على ميت لون بردو.

أنا مكنتش بقلق من وجودكم قبل كده، وأيام الثورة، كنتم فصيل مهم جدا في حسم معركة الأعداد. كل مرة ببقى حاطة إيدي على قلبي لا الإخوان يقرروا ماينزلوش مليوينة ما، انا عارفة إن عددكم كان في اللمون.

بس دلوقتي. بجد، كل يوم والتاني بتعملوا حركات مش فاهمة لها، هل انتو اغبيا وللا مختلفين جوه بعضكوا وللا انتو فعلا ناويين لنا على نية سودة. وللا نيتكم كويسة بس انتو ما بتعرفوش تتكلموا.. ازاي بس وانتو بتقولوا على نفسكو الحركة الوحيدة المنظمة والمحتكة بالشعب.

محكتة بالشعب ازاي وأنا كل ما اكلم حد ألاقيه مرعوب م الإخوان أحسن يوصلوا الحكم، أسأل مرعوب ليه، مالقيش إجابة، اهو يبص بقرف وخلاص.

وبعدين تطلع يفط تقول قول نعم عشان دا واجب شرعي انك تقول نعم، وترجعوا تنكروا. عصام العريان يطلع يقول إن وائل غنيم اخواني.... نهار ابيض! بتكدب كده عيني عينك؟ هو وائل غنيم مات مايعرفش يدافع عن نفسه؟ عصام العريان بردو يطلع يقول إن شباب الإخوان دافعوا عن البرادعي لما اتحدف بالطوب، وطلع يقولك احنا ماحشدناش عشان الانتخابات. أولا، من حقك تحشد، ومن حقك تعمل دعاية للرأي اللي انت مؤمن بيه، فليه تنكر؟؟؟.. يا جماعة، بجد ماينفعش عصام العريان تاني خالص، بينرفز الشعب.

انتو دعائيا بوظتوا الدنيا، وسقطوا من نظر ناس كتير أوي أوي في وقت سريع أوي أوي، أنا نفسي ابتديت أشك فيكو، مع إني صابرة عليكو للآخر بس عشان ولاد خالتي منكو، ودول أعقل ناس أنا شفتهم في حياتي. طب هاتوهم هم يتكلموا بدل عصام، بلاش، هاتوا أي شباب صغير، بجد بيعرفوا يتكلموا عنكوا. وللا بجد فعلا في انشقاق وخلافات بين كهول وشباب الجماعة؟ هل ننتظر كورة الثلج الكبيرة تنقسم إلى اتنين تلات كور؟

على ما ده يحصل، بلاش والنبي الكدب المفضوح ده، وبلاش استخدام العبارات اللي بتحمل معنيين، عيب، يعني دا انتو مسلمين المفروض تبقوا صرحاء. والله مكسوفة وانا بقولكوا كده: الكدب حرام

ومهم أوي في برنامج الحزب الجديد بتاعكو توضحوا موقفكم من الأقليات كافة. كام صفحة حلوين كده تضمن لهم حقوقهم وحرياتهم زي ما الإسلام قال، انتو عارفين كويس أوي إن الإسلام قال نحترم الآخر ونوده ونبره طالما ماحناش في حالة حرب (مفهومة دي)، وإن “لكم دينكم ولي دين” وإن الرسول صلى الله عليه وسلم في المدينة المنورة نظم حياة الدولة على أسس تكفل لليهود حقوقهم وهم وقتها كانوا الأقلية الدينية هناك.

الكلام ده لازم يبقى واضح. ولازم بدل ما تهمشوا المسيحيين وتستقلوا عددهم، تقعدوا معاهم وتفهموهم إن وجودهم في دولة ذات مرجعية إسلامية مش حاجة وحشة. وإن ديننا أمرنا إنهم يحتكموا فيما بينهم بشريعتهم. افتحوا باب الحوار. (انا كنت هعيط امبارح لما صاحبتي القبطية قالت لي انا خايفة الاسلاميين ييجوا ويلبسوني الحجاب.. تصوروا؟ للدرجة دي الصورة غلط.. البنت متخيلة إن المسلمين هيجبروها تتحجب وهي مش مسلمة).. افتحوا باب الحوار. إزاي بس تخسروا طرف مهم جدا زي ده بتجاهلكم ليه؟

نيجي بقى للصناديد اهل غزوة الصناديق: السلفيين
أنا متضايقة منكم من زمان عشان انتو متصورين انكم بتحتكروا أهم حاجة في حياتي أنا وأغلى حاجة في حياتي وهي الدين. الدين عندكو هو رايكم وبس، خد رأي الشيخ، وارمي عليه. لو طلع غلط هو متحمله. أنا بقى مش مؤمنة بكده، أنا ربنا علمني إن كل واحد بيحاسب على أفعاله وإننا مكلفين وإن كل واحد مننا ليه عقل، وإنه هيحاسب. تخيلوا انا مختلفة معكم جذريا لحد فين؟ انتو بتقولوا انكم ماشيين على خطى السلف. وأنا شايفة إن السلف لو شافوا اللي انتو بتعملوه وبتفتوا بيه، هيزعلوا منكم ويتبرأوا من كتير من اللي انتو بتقولوه.

أنا فاهمة كويسة إيه اللي خلا حد زي الشيخ يعقوب يقول “إن الشعب قال نعم للدين” وفاهمة كويس إيه اللي يخلي السلفيين يتعاملوا مع الآمر على إنه “واجب ان تقول نعم”

فاهمة ولكن مش موافقة. شايفة في كلا الجملتين تعدي صارخ على الدين، وتحويله لجلابية تلبسوها عشان تداروا عوراتكم السياسية ومنطقكم الناقص. حضرتك كسلفي عايز تحكم بما آمر الله. ببساطة. وأنا معاك، بل أنا كمان متبنية الفكرة دي لأني شايفة إن شريعة ربنا فيها صلاح الإنسان وفيها الخير. لكن في زمن حكم الشعب، الشعب من حقه يختار. زي ما من حقه يختار يؤمن بربنا أو لا، من حقه يختار نعم أو لا للتعديلات. التضليل اللي مارسه بعض شيوخ السلفيه، هو إن الناس لو قالت لا، هيتعمل دستور جديد هيتشال منه المادة التانية وكده يبقى هزم الدين، وعشان ننتصر للدين لازم نقول نعم عشان مايتعملش دستور وماتتشالش المادة التانية.. هو ده التسلسل اللي استنتجوا منه الوجوب. بس المشكلة إن ده تضليل بين. لأن كده كده هيتعمل دستور جديد، الفرق هو مجرد توقيت وترتيب زمني للأحداث. ثانيا، لما تيجي معركة المادة التانية نبقى نتكلم ساعتها. لما رجل بسيط يتضحك عليه ويتقاله الكلام ده عشان يقول نعم، يبقى ذنب البلد تتحملوه انتو يا شيوخ. وذنب الدين اللي سيرته على كل لسان علماني دلوقتي وحاطينه على راسهم وزاعقين بردو ذنب تتحملوه انتو يا شيوخ. انتو نفسكوا ياللي خرجتوا الناس للإستفتاء، انتو اللي قلتوا التظاهر حرام، مع إن أفضل الجهاد كلمة حق عند سلطان جائر، وانتو اللي بتقولوا السياسة حرام ومجلس الشعب حرام والديمقراطية حرام، مع انها مجرد صورة من صور تشكيل الدولة والرسول لما مات ماقلش الدولة تبقى شكلها إيه. وبالتالي كل دي امور تدخل في نطاق “أنتم أعلم بشئون دنياكم” طالما سكت عنها الرسول الكريم. ده معناه، إن لما ماتعجبكش الديقراطية هات سبب حقيقي غير إنها “حرام” لأنك كده بتزيف وبتغالط وبتلعب بالدين.

لما حسين يعقوب يخرج يقول “إحنا بتوع الدين” فهو بيستفز كل جزء في كياني. لهذه الدرجة تستأثر بالدين لنفسك وجماعتك؟ ليه هو الوحي نزل عليك وقالك انت بتاع الدين؟ الدين علمني كل قيمة خلتني أعيش بين الناس واتحرك واتعامل. أنا بتعامل مع الناس بالدين، بس الدين اللي اعرفه يختلف كتير عن اللي انت بتدعو إليه وبتقصي ما دونه. لاحظ إني أنا لا استطيع أن أقصيك لأن فهمي لديني يمنعي من ذلك، في حين إن إنت بتقصي الجميع.

دي مشكلتك. ماينفعش. احنا اتعلمنا حاجة اساسية في الدين. إن في مبادىء لا خلاف عليها، وفي أمور أخرى محل خلاف وتفكير. في احكام وفي فتاوى، الأحكام هي مثل القوانين، والفتاوى هي مثل الحكم في قضية معينة. انت بقى بتتبني رأي واحد، وتقصي ما دونه. مع إن ربنا خلق لكل واحد عقل، وخلقنا مختلفين وخلقنا شعوب وقبائل لنتعارف، مش كده؟ سنة ربنا في الكون الإختلاف والتنوع.. مش كده؟ لو ربنا أردا الجميع يبقى مؤمنين بيه كان عمل كده.. مش كده؟ إزاي مش شايفين حكمته عز وجل في التنوع والإختلاف؟

ماينفعش تيجي تقول الشعب اختار الدين واللي مش عجبه يرحل. لأ!
حتى لو الشعب اختار الدين، وهو على فكرة اختار الدين، مش في صندوق الانتخاب زي انت ما بتدعي، بي الشعب كده كده من الاول اختار الدين، المسلمين والمسيحيين اختاروا الدين، في ميدان التحرير كانوا بيصلوا وبيدعوا ويبتهلوا ويرتلوا ويقيموا القداسات. الشعب في عز الثورة كان بيلجأ لربنا، الشعب اختار الدين، بس ماتنساش إن في وسط الميدان كان في كل الاطياف التانية والاتجاهات الفكرية التانية.. ماينفعش تقصي أيا منهم. ماينفعش تقولهم مش عجبكوا سيبوا البلد. لأ!

لأ مش هيسيبوا البلد، ولا المسيحيين هيسيبوا البلد. دي بلدهم وليهم فيها زي ما ليك فيها. ولازم تعمل لهم اعتبار ولازم تراعي وجودهم في حياتك ولازم تحترم ده لأن دينك بيأمرك بكده. مجتمع المدينة المنورة اللي انت كل شوية تستشهد بيه كان فيه يهود. المسلمين لما دخلوا مصر لقوا المسيحيين والكل عاش مع بعضه، وللمسيحيين واليهود بل والملحدين دور في الحضارة الإسلامية والتراث الإسلامي لأن دولة الإسلام لم تكن لتقصي الآخر يا شيخ يا “بتاع الدين”.

اختم بالمسيحيين بقى:
أنا عارفة إنكم مفزوعين ومخضوضين من فكرة إن الإسلاميين يوصلوا الحكم. بس اللي احب تفهموه هو مبدأ بسيط ياريت كلنا نتفق عليه إننا نخاف من وصول “المتطرفين” للحكم.

سواء كان المتطرفين دول إسلاميين أو مسيحيين أو علمانيين. ايوه، لو وصل علمانيين متطرفين الحكم، لا انا كمسلمة ولا إنتو كمسيحيين هنتعامل كويس، هيخنقوا علينا في ديننا، ابسط مثال على كده، علمانية اتاتورك في تركيا منعت على الستات انهم يلبسوا الحجاب. ولغت المدارس والمعاهد الدينية وحاجات كتير تانية ياما. تخيل انت بقى لما تبقى في حاجة هي بالنسبة لك أمر ديني وانت لازم تطيعه وتيجي دولة تطلع قوانين ضده، اضطهاد وللا مش اضطهاد؟

فإنتوا خافوا من المتطرفين، انا نفسي هخاف لو وصل اسلاميين متطرفين الحكم، انا مش عايزة ألبس النقاب مثلا ‪:‬D

لكن لو واحدة زيي وصلت الحكم، ما انا بعتبر نفسي إسلاميين، هدلعكوا. مش عشان أنا ملاك نازل م السما، بس عشان ديني قاللي كده. هو انا فخورة بيه من شوية.

فاستهدوا بالله كده، وفكروا في مصلحة البلد العليا وبلاش الخوف والفزع لأنهم بيمنعوا الدماغ من إنه يفكر بعقلانية. يعني يا سلام لو تنخرطوا في الحياة السياسية، يا سلام لو تنخرطوا في الحياة شخصيا. ما تدوش لحد فرصة يحس انكم مش موجودين وللا ملكوش صوت وللا خايفين ومجهزين الباسبورتات في جيوبكم. دي بلادكم.
ووالنبي بلاش تسمعوا كلام القساوسة اللي بيقولوا تقولوا لا عشان المسلمين قالوا نعم، بالذمة دا كلام؟ انا لسه بقول للسلفيين عيب يصدقوا كلام شيوخهم في الموضوع ده، تقوموا انتو تسمعوا كلام القساوسة؟

---- في بقى كلمة لفئة كانت مخلطة من كل دول، الفئة المريعة من ضمن اللي قالو لا، ومن ضمن افكارهم اللوذعية في تحفيز الناس هو “استخدام دم الشهدا”.. عيييييييييب احنا بنتكلم في مجال الاختلاف فيه مقبول، عيب، دي قلة ذوق، زي قلت ذوق الشيوخ اللي قالوا إن نعم واجبة.

---- كلمة بعد الأخيرة، بالله عليكو يا عقلاء الأطراف، تدخلوا، اتكلموا، امسكوا المتطرفين منهم وكلموهم، دوركم ومسئوليتكم، على الأقل تخلوا مسئوليتكم. الساكت عن الحق شيطان أخرس.

---- ونداء خاص لكل المسلمين والإسلاميين الوسطيين والمؤسسات الدينية الحرة والإزهر (لما يبقى حر عن قريب إن شاء الله) دا دوركم، لازم تتكلموا وتنطقوا دلوقتي. الساكت عن الحق شيطان أخرس. بلدنا أهم من أي حاجة ولازم نؤلف القلوب ولازم نفهم الناس ولازم نوعيهم ولازم نحفظ حقوق الجميع.. لازم تتكلموا.. اكلموا اكلموا ما احلى الكلام ما أعظمه ما ألزمه.

أفكركم جميعا بحاجة قلتها في أول الكلام، صندوق الانتخاب، تداول السلطة، حق وقدرة الشعب على اختيار رئيسه وبرلمانه. لو حافظنا على المبادىء دي محدش في كل الاطراف يخاف بقى، لأن أيا كان اللي هييجي للحكم، لو معجبناش، هنمشيه.

بجدول زمني: المطالب العاجلة والآجلة لائتلاف شباب الثورة

2011-02-28T11:54:00.003+02:00

دا بيان ائتلاف شباب الثورة اللي اعطوه للمجلس الأعلى للقوات المسلحة وهو بيان فيه مطالب الثورة وجدول زمني.. وفي انتظار رد المجلس الأعلى للقوات المسلحة خلال يومين.

نرجو النشر على أوسع نطاق. ودا رابط مباشر لصفحة البيان.

بناء علي لقاء مجموعة من الائتلاف بالمجلس الأعلى للقوات المسلحة اليوم نرجو أن يرد علينا المجلس بتحديد جدول زمني في تنفيذ أول ثلاث مطالب خلال يومين.

1 إقالة حكومة الفريق أحمد شفيق، وإعادة تشكيل حكومة تكنوقراط من غير الحزبيين، يترأسها شخصية وطنية متوافق عليها، في حد أقصاه شهر من الآن.

2 الإفراج عن كافة المعتقلين السياسيين، قبل وبعد 25 يناير، في مدي زمني أقصاه شهر من الآن، والنظر في العفو عن المسجونين السياسيين في غضون شهرين من الآن.

3 تقديم كل المسئولين الحقيقيين عن قتل الشهداء بإطلاق النار، أو بإصدار الأوامر للمحاكمة العادلة، بتهم واضحة، في أمر أقصاه شهر من الآن.

في حالة عدم تحديد جدول زمني للاستجابة للمطالب المذكورة أعلاه سوف يتوقف الائتلاف عن التفاوض ويعمل مع جموع ثوار مصر علي الضغط من أجل تحقيقها كي يثبت أن هذه هي مطالب جموع المصريين الذين اعتصموا في التحرير وسائر مدن مصر ولم يرحلوا

الا عندما اعتقدوا أنها قيد التحقق

في حالة موافقة المجلس علي مطالب الثورة المصرية سننتقل الي التفاوض في بقية المطالب المتمثلة في التالي:

4 إعادة هيكلة وزارة الداخلية، بما يسمح بالإشراف القضائي الكامل عليها، والمراقبة الشعبية الحقيقية على أدائها، على أن يتولى رئاستها وزير مدني سياسي، في غضون الستة أشهر المحددة للفترة الانتقالية.

5 حل جهاز مباحث أمن الدولة في مدي زمني شهرين من الآن، وإلغاء توجيه المجندين لقطاع الأمن المركزي في غضون الستة أشهر المحددة للفترة الانتقالية.

6 الإسراع في تشكيل مجلس رئاسي مدني يضم شخصية عسكرية في مدي زمني شهرين من الآن ، مع تحديد صلاحيات المجلس ، ويتولي بنفسه مع الحكومة الانتقالية الإشراف علي تحقيق المطالب الثورية وإجراء الانتخابات التشريعية والرئاسية .

7 تقديم موعد انتخابات المحليات في حد أقصاه الستة شهور المحددة للفترة الانتقالية، وإعادة

النظر في قانون الحكم المحلي .

8 ملاحقة بقايا النظام من الفاسدين ، والمتربحين من دماء هذا الشعب ، وتقديمهم للمحاكمة العادلة ، ومصادرة أموالهم وممتلكاتهم .

9 الشكر والتقدير للجنة التي تم تشكيلها لتعديل الدستور برئاسة المستشار طارق البشري علي المجهود القيم الذي قامت به ، ونؤكد علي أننا في سبيل إعداد ورقة دستورية وقانونية للمشاركة بها في الحوار المجتمعي الدائر حول التعديلات والقوانين المكملة لها ، ولكننا نطالب المجلس العسكري بمطالبة اللجنة بإضافة قانون الأحزاب إلي القوانين المكملة للدستور والتي تعتزم اللجنة تعديلها أو تغييرها .

بيان ائتلاف شباب الثورة

27 فبراير

من أجل ثورة كاملة. بيان

2011-02-25T16:51:00.002+02:00

البيان التالي, كتبه مجموعة من الشباب المصريين, بناء على نصائح من المستشار هشام البسطاويسي
الرجاء توزيعه ع الانترنت, وطباعته”كل ع قدر استطاعته” وتوزيعه في ميدان التحرير, او في الاحياء, او اماكن العمل الخ.

البيان: من اجل ثورة كاملة

إن ثقتنا فى رجال القوات المسلحة والمبنية على الموقف الوطنى الذى اتخذته أثناء الثورة تعتبر من الثوابت التى لا نسمح لأحد بالمزايدة عليها. ولوعينا بوجود قوى مضادة تسعى للإفلات من المحاسبة والاستيلاء على السلطة مجددًا. فإننا نؤكد على أننا مستمرون فى ثورتنا ضمانا لتحقيق مطالبنا كاملة احتراما لتضحيات الشعب ودماء الشهداء.

أولا: الرفض التام لكل محاولات الإبقاء على حكومة الفريق أحمد شفيق والإصرار على الاسقاط الفورى لهذه الحكومة الفاقدة للشرعية والتى اقسمت يمين الولاء أمام رئيس وصل الى منصبه عبر شرعية زائفة (تزوير صناديق الاقتراع) سقطت تماما فى الخامس والعشرين من يناير بخروج الشعب مطالبا باسقاط نظام هذا الرئيس.

ثانيا: عدم الاكتفاء بتعطيل الدستور الحالى واعلان الغائه التام.مع اصدار ميثاق وطني مؤقت (وثيقة دستورية) يشمل المواد المعدلة بعد الموافقة الشعبية عليها فى استفتاء يجرى تحت اشراف قضائى كامل، بالاضافة الى اعتبار المبادئ الواردة بكافة المواثيق الدولية المتعلقة بالحقوق والحريات سارية فى تلك الوثيقة الدستورية ويتمتع بها المواطنين المصريين. على أن يسقط العمل بهذا الميثاق الوطنى بمجرد اقرار دستور جديد تضعه لجنة تاسيسية منتخبة تضع دستورا جديدا يلبى آمال الشعب المصرى ومطالبه فى دولة مدنية ديموقراطية تحكمها المؤسسات.ويعد اسقاط هذا الدستور (الذى جرى ترقيعه لسنوات لخدمة القوى غير الديمقراطية التى تولت حكم البلاد فى الاعوام المنقضية) اسقاطا لفرص فلول نظام الرئيس مبارك فى العودة عبر وجوه واقنعة جديدة.خاصة وان اسقاط هذا الدستور يعنى الاسقاط الكامل للنظام.

ثالثا: نرفض كافة محاولات الالتفاف على المطلب الشعبى الخاص بالمحاسبة الفورية لكل من تسبب فى اراقة قطرة دماء مصرية فى محافظات مصر المختلفة وكل من تسبب فى اصابة او اعاقة مواطن مصرى سواء بتوجيه الأمر أو عبر تنفيذه. ونخص بالذكر قيادات وزارة الداخلية التى مازالت تنكر على لسان وزيرها اللواء محمود وجدى وجود أى دور لها فى الاعتداء على الثوار السلميين خلال الايام الثمانية عشرة الأولى من ثورتنا الشعبية. رغم وجود شهادات عدة وثقها المواطنون من المدنيين وابناء جهاز القوات المسلحة تثبت تورط عناصر من الوزارة فى هذه الجرائم المرتكبة ضد الشعب وضد الانسانية. ونؤكد أن بناء الثقة بين المواطن وأجهزة الأمن مرهون بالمحاسبة وتطهير الأجهزة الأمنية.

رابعا: العمل على الغاء اجهزة القمع الامنية وبخاصة جهاز مباحث أمن الدولة الذى ثبت تورطه فى جرائم عدة ضد الانسانية عبر ثلاثين عاما قضاها الرئيس المخلوع فى الحكم وقضاها الجهاز فى خدمته، بالاضافة للعمل على اعادة هيكلة باقى الاجهزة التابعة للوزارة ومن بينها قطاع السجون التى سجلت منظمة العفو الدولية تجاوزاته فى حق المسجونين وجهاز المباحث الجنائية الذى ثبت لسنوات لجوء عناصره لانتزاع الاعترافات عبر التعذيب عوضا عن استخدام الاساليب الشرطية والعلمية للبحث الجنائى.

خامسا: الافراج الفورى عن المعتقلين لدى الاجهزة المختلفة والتحقيق فى حالات الاختفاء القسرى والتى تدفع المواطنين للتشكك فى وعود الإفراج عنهم .

سادسا: نؤكد عبر هذا البيان تضامننا الكامل مع مطالب العمال المشروعة وكل ما يتخذوه من اجراءات فى سبيل تنفيذها بما فى ذلك الحق فى الاعتصام والاضراب بما لا يعطل عجلة الانتاج. خاصة وان مطالبهم المشروعة المتمثلة فى رفع الحد الادنى للاجور وتطهير المؤسسات تتفق مع اهداف الثورة فى التغيير والعدالة الاجتماعية. ونهيب بعمال مصر تنظيم مواقفهم الاتجاجية اسوة بعمال المحلة الذين استطاعوا الضغط لتنفيذ مطالبهم دون ان يتوقف الانتاج بمصانعهم. مع التأكيد على حقهم فى اتخاذ الاجراءات التنظيمية اللازمة لاصلاح وتطهير نقاباتهم.

ونؤكد بما لا يدع مجالا للشك لدى أى طرف أن الثورة ودماء الشهداء هى المرجعية الوحيدة لمشروعية أى قرارات للمجلس العسكرى. وعليه فان أية قرارات تأتى مخالفة لمطالب الثوار هى قرارات باطلة ومنعدمة الشرعية بالتبعية.

عن الثورة والثورة المضادة والجيش وليبيا.. عن الخطر والحل

2011-02-24T00:32:00.006+02:00

ماحصلش قبل كده إني نقلت تدوينة لحد تاني بالنص في مدونتي. بس كلام نوارة في التدوينة دي مهم جدا جدا جدا جدا جدا جدا جدا. .ولو أقدر أطبعه وأوزعه في الشوارع هطبعه، اقروا وفكروا

"... تحديث:
انا كاتبة في البوست: ده اللي حنقوله بكرة
بكرة ايه؟ قصدي الجمعة، مافيش بكرة حاجة.. بس الايام عندي دخلت على بعضها
-------------
في صدفة احسن من الف ميعاد حضرت شبه ندوة للمستشار هشام البسطويسي، الغريب اني يوميها الصبح كنت باقول، يا رب هشام البسطويسي يبقى الريس، وبعدين رحت التحرير، قابلت فاطمة ومالك، رحنا قهوة نتفرج على القذافي، مالك جاله تليفون قالوا له ده المستشار هشام البسطويسي قاعد في بينوس واحنا رايحين له، قمنا رحنا له
المهم
اهم النقاط اللي قالها سيادة المستشار كام حاجة:
1- الاطراف الموجودة في البلد ثلاثة: الثورة، الثورة المضادة المتمثلة في اتباع مبارك، ومبارك، وجمال مبارك، وامريكا واسرائيل، والطرف التالت هو الجيش
بالنسبة للثورة، انتصارها الحقيقي في وحدة الصف، وخلاصة كلامه عن كيفية توحيد الصف، اننا نخفض جناحنا لبعض، ما حدش يتربس على التاني (اه... يعني لما نقول مثلا نغير المكان عشان فيه ناس مش عايزة تروح التحرير يبقى نغيره، ما نتربسش، لما حد يتربس مايجيش حد تاني يطلع بيان مضاد ويقول احنا مش رايحين التحرير، دي هيافة من الطرفين، والطرفين كويسين، دول الناس اللي سبقوا ونزلوا يوم 25 او الناس اللي استجابوا في ساعة العسرة ونزلوا يوم 28 البشع، يبقى ليه كل انسان يحط راسه براس زميله؟ واحد قالك مش رايح التحرير، يا سيدي غير له المكان ما جراش حاجة، التاني قالك لا والله ما مغير المكان الاولاني ما يطلعش بيان كأن حربك مع زميلك مش مع النظام، نتواد يا شباب، نتواد، اخوك وكان حيموت معاك، وواكلين مع بعض عيش وملح في ميدان التحرير، وما نخليش حد يدخل بينا، كل واحد فينا يتنازل للتاني، والطرف اللي يتنازل لاخوه هو الطرف الاحسن، والاحرص على الثورة، والاعقل، والاصدق، نتنافس في الحفاظ على ثورتنا مش نتنافس مين اللي كلمته تمشي، ولو طلبوا منك مقابلة ما تنساش اخوك، ولو اخوك راح يعمل مقابلة ونسيك ادعي له يفتكر كل المطالب اللي انت عايزها، انت رايح تتصور؟ أم الطفل هي اللي ما ترضاش ابنها يتشق نصين بالسكينة، اللي بين قوسين ده كلامي، عملا بنصيحة المستشار هشام البسطويسي اللي قال لازم يبقى فيه نقد ذاتي من غير جلد ذات، احنا عملنا انجاز ومافيش داعي نجلد ذاتنا، وعايزين نحسن اداءنا ومحتاجين ننقد ذاتنا، وانا شخصيا، وبصدق وامانة، شايفة كل الاطراف مخلصة، وكل الاطراف لها وجهة نظر، بس لو كل طرف تنازل للتاني النتيجة حتبقى احسن، احنا عايزين نسترجع روح الحب اللزج اللي كانت موجودة في ميدان التحرير، عشان ثبت اننا ناس كويسين وجدعان، وادعي على الثائر واكره اللي يقول امين، ويرجع بينا المودة والتراحم تاني اللي كانت موجودة في خضم المعارك لان المعركة ما خلصتش، وما نفرجش علينا الناس، احنا قدام الناس لحمة واحدة، مهما نتناقش، وعلى رأي فاطمة عابد، حتى لو اختلفنا لازم نخلي اللي بيشوفنا واحنا بنختلف يقول: شوف الشباب المحترم لما يختلف بيبقى عامل ازاي؟).
وقال المستشار ان وحدة الصف بين الناس، لازم تبقى مصحوبة بالتقارب مع مزاج الشارع من غير ما يبقى فيه تفريط (كلامي: اصل فيه قطاع في الشارع يعني مش مفروض تلتفت له خالص، اللي قعد طول الثورة ياكل ويشرب زي الجاموسة واحنا عمالين نموت ويقول لنا خشوا البيوت، ودلوقت كل ما يشوف وشنا يقول لنا انتوا عايزين ايه بقى؟ ما خلاص، ده مش مهم خالص، المهم هم الناس اللي متعاطفة مع الثورة وكانت بتبعت اكل او تشاور لنا من البلكونة، دول لازم نحتفظ بيهم)
وقال برضه اننا لازم نتجاوز عن بعض، وما نشدش السلخ على بعض، وقعد كتير يقول في فكرة التراحم المتبادل دي، وقال نصا: مافيش داعي نلجأ للتخوين، اللي يغلط نصوبه وما نخونوش، ولو رجع نرحب بيه.
بالنسبة للثورة المضادة:
بيشتغلوا على قدم وساق، وبيعملوا على عدة محاور، هم هدفهم واضح، عايزين يرجعوا النظام، فيه عدة احتمالات لانهم يرجعوا النظام، انهم مثلا يعيدوا انتاج النظام بوجوه اخرى زي عمرو موسى او عمر سليمان، وقال ان فيه رغبة انهم يرجعوا عمر سليمان في الصورة تاني لان امريكا واسرائيل بيحبوه قوي، كمان مراكز القوى ورجال الاعمال مهتمين باعادة انتاج النظام، وبيقول ان مبارك مش صحيح انه مهمش، بدليل وجود ممدوح مرعي وده مالوش صاحب غير مبارك، وما حدش حيخليه غير مبارك
بيعملوا ايه عشان يحققوا الهدف ده؟
بيحاولوا يشقوا صف الثورة، دي احسن وسيلة لهم عشان يرجعوا تاني، وكل القضايا اللي ضدهم تتحفظ، الوسيلة اللي يرجعوا بيها، اننا ننقسم وقال باللفظ: يعني ناس تقول نازلين التلات وناس تقول مش نازلين، يقوم يبقى عددنا قليل، لو اتكررت الحكاية دي حيحصل شق للصفوف ونرجع تاني للميتين واحد وساعتها ممكن ينزل هو مظاهرة مليونية في مقابل الميتين واحد ويقولوا له ارجع ويرجع بناء على طلب الجماهير. الجملة الاخيرة هي نص كلامه. وهم بيراهنوا على ان الناس تتعب بعد شوية وتزهق، وهو شايف انه عشان كده مش لازم نستنزف نفسنا وفي نفس الوقت مش لازم ننام، وهو من وجهة نظره ان النزول يوم الجمعة كويس، وبيضغط، وفي نفس الوقت ما يخسركش الشارع، وما يستنزفش قوتك، وقال ان النزول يوم الثلاثاء كان غلط، بس ما جراش حاجة، نصحح نفسنا، وقال ان اذناب النظام بيحاولوا كمان يشتتوا اهدافنا بانهم يخلونا نهتم بالحاجات الصغيرة وهم عندهم هدف واحد اعادة انتاج النظام.
(كلامي: امن الدولة جمع نفسه ورجع يشتغل تاني وفي يوم واحد قسيس اتقتل وناس طلعت تتظاهر، والفين واحد اتظاهروا عشان يهدوا كنيسة، وبيوت بهائيين اتحرقت، وسبحان الله... كلها مصادفات يا اخي، طيب ايه الرد اللي مفروض نعمله؟ الرد الوحيد على اي حوادث طائفية، مظاهرات برضه، بس لحل امن الدولة، اي حد يتظاهر تظاهرات طائفية، نعرف على طول انه من بلطجية الحزب الوطني زي بتوع معركة الجمل، ويتعمل معاهم اللي اتعمل مع بتوع معركة الجمل، وعلى فكرة بلطجي امن الدولة حمار، لان احنا كنا في ميدان التحرير اي حد بيصاب بيلاقي اللي يدافع عنه ويعالجه، انما بلطجية الحزب الوطني اللي كانوا بيهجموا علينا كانوا بيتعوروا ويتسابوا في الشارع ماحدش بيلحقهم، ما تساويش يعني الميتين جنيه اللي اخدتهم يا حمار، يبقى اي مجابهة لاي حادث طائفي او مظاهرة طائفية، هي المطالبة بحل امن الدولة فورا، او دمجه في الجيش بقى، ياخدوهم يربوهم ويخلوهم يقطعوا حجر في الجبل وياخدوا ميزانيتهم يصرفوها في حاجة مفيدة، وتبقى المظاهرة قدام مديرية الامن، سلمية برضه).
يبقى مافيش حل لمواجهة الثورة المضادة غير اننا نوحد الصف ونتجاوز اي نقاط خلافية، زي مثلا ما المستشار تجاوز نقطة المادة الرابعة في مشروع الدستور بتاعه لما الاخوان اعترضوا، وقال شيلوا المادة دي خالص مدام حتخلق خلاف، والحل التاني اننا نطارد اذناب النظام ونجتثهم من جذورهم وعلى رأسهم امن الدولة، (كلامي: اظن انتوا شفتوا محمود وجدي بيقول ان الشرطة ما عملتش حاجة وان كان فيه مندسين مسلحين بين المتظاهرين.... لا ده يمشي، ده يمشي، ده يمشي فورا فورا فورا، وجهاز امن الدولة يتحل او يدمج في الجيش، والجيش اولى بالميزانية المهولة اللي بتتصرف على امن الدولة، واننا نوحد هدفنا).
الجيش:
المستشار هشام البسطويسي بيقول ان الجيش متعاطف معانا، وعايز يعمل لنا اللي احنا عايزينه، بس زي ما هو بيحاول يتفهمنا، احنا كمان لازم نحاول نتفهم طبيعة المؤسسة العسكرية، هو فيه ناس بتحاول تمارس عليه ضغوط، من اطراف الثورة المضادة، من امريكا واسرائيل واذناب مبارك ورجال الاعمال الخ، واحنا بدورنا علينا اننا نساند الجيش باننا ما نشككش فيه وفي نفس الوقت نلح بمطالبنا بالاسلوب اللي يتناسب مع المؤسسة العسكرية، والمستشار قال اننا لازم نفهم ان دي مؤسسة عسكرية، يعني فيه اسلوب لمخاطبتها، وفيه اسلوب للتعامل معاها، ومش لازم نستعديها علينا، لازم نستمر زي ما كنا بنكسبها لصفنا لانها اصلا متعاطفة معانا (كلامي: سامعين ياللي عمالين تتعوجوا على الجيش؟ مش انا لوحدي اللي باقول كده، اهو المستشار هشام البسطويسي قال لكم وبلال فضل بعد ما اجتمع معاهم قال لي انا عمري ما شفت جيش في الدنيا كده دول ناس حريصة على الدولة المدنية اكتر منا، ماحدش عاد يتعوج على الجيش تاني، وماحدش عاد يتعوج على المشير طنطاوي تاني، ايه بقى حكاية كان مش بيصطدم مع مبارك دي؟ الحمد لله، مش فيه حاجة اسمها رجل مؤمن من آل فرعون يكتم ايمانه؟ مش ساعة الجد نفعنا؟ لو كان راجل صدامي كان اتشال واتحط مكانه واحد زي عمر سليمان، وتقولوا سامي عنان كان في امريكا؟ الحمد لله ان سامي عنان هو اللي بيعمل المقابلات الدورية لامريكا، مش احسن ما هو يرفض ويقوم بالمقابلات دي واحد الله اعلم بيه يبيعنا ويتفق معاهم علينا؟ تعامل الجيش المصري مع امريكا مش الجيش هو اللي عمله، السادات هو اللي فرضه على الجيش، اقروا وثائق ويكيليكس عشان تعرفوا ان الجيش المصري بيعمل البدع عشان يحافظ على وطنيته وفي نفس الوقت يلتزم بالالتزامات اللي فرضها عليه السادات، وايوة فيه اجنحة كتير في الجيش مش حابة فكرة ان مبارك يتبهدل من واقع انه كان القائد الاعلى للقوات المسلحة، بس احنا اللي عايزينه يتبهدل، يبقى احنا اللي نعمل الحكاية دي بمطالبتنا والحاحنا ونرفع عنهم الحرج، وانا لو عايزة اقابل الجيش اقدر اقابله، بس انا مش عايزة اقابل الجيش عشان افضل احبه حب عذري وكلامي ما يبقاش مجروح، اتعدلوا، باكرر تاني، اتعدلوا، انا شخصيا باحب الجيش من قبل الحكاية دي لاني قريت وثائق ويكيليكس وشفت قد ايه الجيش بيقاوم بقاله تلاتين سنة من ساعة توقيع اتفاقية كامب ديفيد عشان يفضل جيش مصر مش جيش النظام، وما يتمسخش زي ما كل مؤسسات النظام اتمسخت وبقت العوبة في ايد امريكا واسرائيل، وكمان عشان سيدنا محمد قال عليهم احسن ناس، يعني حاصدقكم واكدب سيدنا محمد؟ بس حتى من غير كده، الجيش واخد موقف لحد دلوقت رائع مع الوضع في الاعتبار ان الموضوع مش احنا وهم وخلاص، فيه جهات كتير بتحاول تمارس عليه ضغط، ومع ذلك هو بيرجح كفتنا على اي كفة ومنحاز لينا، يبقى نحترم نفسنا بقى واحنا بنتعامل مع الناس، زي ما هم بيحترمونا)
نعمل ايه احنا عشان نساند الجيش؟ رأي المستشار اننا نضغط بالاسلوب اللي يتناسب مع طبيعة المؤسسة العسكرية في مطالبنا، يقوم ينزل على طلباتنا لانه اصلا كل ما بنطلب منه حاجة بيعملها لنا، بس احنا نوحد هدفنا ونطلب بالاسلوب الصح. يعني مثلا ننزل الجمعة الجاية (كلامي: وزي ما احنا عارفين، لما ننزل الجمعة الجاية شغلتنا نأمن الجيش قبل ما نأمن نفسنا لأن اجهزة النظام القديم نشطت وابتدت تشعر بالخطر، انا وانت نموت ومافيش عسكري في الجيش يتخدش)، بلال بيقترح اننا نقول: احنا مطالبنا كانت كذا وكذا، اتحقق منها كذا وكذا، واحنا بنشكر الجيش على تحقيقها وعلى مساندته لينا وموقفه الوطني، بس لسه عندنا مطالب كذا وكذا، وتبقى مطالب واضحة كده، مش نهوبص ونتوههم معانا، هم عليهم من ده بايه؟
طيب
واحد حيقول نشيل شفيق عشان ده بتاع مبارك، وهو له حق
واحد حيقول نشيل محمود وجدي، وانا شخصيا نفسي يبات ليلة في القسم عشان يبقى يرجع يقول الشرطة بريئة تاني، ولنا حق
وواحد حيقول نشيل ابو الغيط ده ساب المصريين يتبهدلوا في ليبيا، وله حق
وواحد حيقول: فين صفوت الشريف وزكريا عزمي وعمر سليمان؟ دول كلهم متورطين في قضايا قد كده، وله حق وانا شخصيا باقولكم عمر سليمان متورط في جرائم ضد الانسانية، وطلب من اسرائيل انها تدخل سيناء عشان تطارد المتعاونين مع حماس، يعني خيانة عظمى
وواحد حيقول: انا حاسس ان مبارك بيحكم مصر من شرم الشيخ، وله حق يخاف
وواحد حيشكك في الجيش وده حنجز له لسانه من لغاليغه ونعين عليه لجان شعبية مخابرات عشان نكتشف انه من فلول الحزب الوطني.. احسن جيوش في الامم جيوشنا
احنا في مصر هنا مالناش بعد ربنا غير وحدتنا وجيشنا وقضائنا واي حد يعمل فورتينا في اللحمة دي يبقى عدونا
كلللللللللللل ده لخصه المستشار هشام البسطويسي في مطلب واحد يأمنا كلنا من كل المخاوف دي: الالحاح على المجلس العسكري بانه يعلن موت الدستور القديم وان التعديلات الدستورية اللي بتقوم بيها اللجنة واللي وصلت لاربعتاشر مادة دي مش تعديلات ده دستور مؤقت
باعلان المجلس العسكري ان التعديلات هي دستور مؤقت وان الدستور القديم تم الغاؤه ده يضمن لنا ان مبارك ونظامه انتهوا الى غير رجعة، ويضمن لنا ان مافيش حصانة لاي حد من اذناب النظام، ويشيل الشرعية عن شفيق وتوابعه، بل ويضمن لنا ان لو حصلت انتخابات مبكرة ونجح فيها بعض اذناب الحزب الوطني نظرا لانهم هم اللي بيوزعوا وجبات على العشوائيات دي تبقى حكومة مؤقتة
لان ممكن لو تعاملنا مع التعديلات على انها تعديلات واعدنا العمل بالدستور القديم تيجي حكومة تقول ماهو دستور اهو نبقى نعدل بعدين على مهلنا بقى، سنة اتنين عشرة الف.. كل سنة وانتوا طيبين
المستشار مش عاجبه الاعتصامات الفئوية وشايف انها تتحل بان الدستور برضه يبقى مؤقت توطئة لدستور يضمن العدالة الاجتماعية
بس مالك رد وقال ان ممكن تتحل مشكلة العمال مؤقتا بان الحد الادنى يبقى ستميت جنيه لحين حل كل المشاكل
اهم حاجة من وجهة نظر المستشار البسطويسي ان الدستور القديم يتلغي
ساعتها بقى مبارك يقعد في شرم الشيخ، يقعد في المنصورة، يقعد في الترعة البولاقية، ما تفرقش كتير، لكن طول ما الدستور اللي فات ما ماتش يبقى فيه خطورة من قعدته معانا
ليه؟
اولا: لاننا لسه بنصرف عليه كأننا مطلقينه وبندي له نفقة
ثانيا: لان ده معناه انه مش خايف مننا
ثالثا: معلش مع احترامي لكل الناس اللي بتقول مش معقول يرجع، خش جوة مخه واقنعه بحاجة زي دي، ولو احنا ضعفنا، له الف واحد مستفيد منه يقول له برقبتي يا ريس... كفاية ان شفيق بيقول عليه الرئيس مبارك
ده رأي المستشار البسطويسي، وهو بيقول ان لجنة تعديل الدستور تقدر هي نفسها تعلن موت الدستور اللي فات وتقول ان التعديلات دي بمثابة دستور مؤقت
وفي كل الاحوال، هو شايف اننا نوحد مطلبنا على المطلب ده، كويس ورخيص وابن ناس
وده اللي نقوله بكرة ان شاء الله...
اللي شايفاه ان كلام البسطويسي متوازن، هو مش حاطط في بطنه بطيخة صيفي زي ابراهيم عيسى وبلال، وهم لهم وجهة نظر ان فعلا الجيش اهل للثقة، وفي نفس الوقت مش عايز يخلق لنا بلبلة زي هيكل، وبرضه له وجهة نظر ان مبارك واذنابه مش حيسكتوا، البسطويسي شايف ان فيه شوية مشاكل، ولها حلول بسيطة، بس لو سكتنا عنها حتتفاقم وتبقى خطر علينا وعلى الجيش، ولو حليناها نقدر نحلها بشكل بسيط ونريح دماغنا
الا هل بلغت؟ اللهم فاشهد
انتهت خلاصة القعدة مع المستشار البسطويسي
ملحوظة: عايزة اوضح لكم ان الجيش مش عايز النظام القديم يرجع، لان النظام القديم عايز لو - لا قدر الله - رجع ينتقم من الجيش زي ما عايز ينتقم منا بالظبط، فيا ريت نساعد بعضينا يعني، عشان احنا في مركب واحدة
------------------------
بالنسبة لليبيا:
ليبيا مهمة قوي يا شباب... مهمة قوي قوي قوي
طبعا البحرين واليمن مهمين جدا، بس اولا الاوضاع عندهم بقت اهدأ، والوضع اكثر مأساوية في ليبيا، بس كمان احنا والتوانسة لو ربنا كرمنا والليبيين عرفوا يتخلصوا من القذافي بدون اي تدخل اجنبي يبقى زاعق لنا نبي، ويبقى بتاع خمسين في المائة من هموم المصريين والتونسيين انزاحت. لان نظام القذافي على صلة وثيقة جدا - استخباراتيا وبلطجيا - مع نظام بن علي ومبارك، والقذافي فعلا مقتنع انه يقدر يرجع اصحابه - الى جانب العاهل السعودي طبعا - بس زي ما انتوا شايفين كلهم مجانين وعندهم رفض للواقع، وحتى لو ما عرفوش يرجعوا بعض، ممكن يخربوها على دماغنا، ولو نظام القذافي وقع بسواعد عربية دون تدخل اجنبي، فعلا فعلا، حنبقى احنا التلاتة سكر نباتة فعلا، ربنا حيكرمنا اخر كرم ان شاء الله
اخطر حاجتين ممكن تحصل في ليبيا:
1- ان القذافي ما يقعش
2- انه يقع بتدخل اجنبي
خصوصا احنا، حنتعمل ساندوتش... لو لا قدر الله حصل تدخل اجنبي في ليبيا، مش عارفة اقولكم احنا ممكن يحصل لنا ايه؟ واحنا وضعنا حيبقى أسوأ من تونس كمان
يبقى احنا نبذل كل الجهد، وكل اللي نقدر عليه عشان نساعد الثورة الليبية انها تنجح بنفسها بدون تدخل اجنبي
مافيش حاجة واضحة في دماغي دلوقت
بس مثلا التونسيين عملوا حاجة ذكية قوي، تجمهروا باعداد كبيرة قوي قدام سفارة ليبيا لحد ما البعثة الليبية في تونس انضمت للثورة، وده طبعا بيضعف نظام القذافي، لانه خسر جواسيس له في تونس
يبقى ده نقدر نعمله هنا نحاول نضغط على البعثة الليبية في مصر لحد ما تنضم للثورة وبالشكل ده نظام القذافي يخسر جناح من اجنحته
بالنسبة للناس اللي بتقول لما نحل مشاكلنا نبقى نحل مشكلة ليبيا
والله مش عارفة اقول ايه، انا باتعاطف مع اللي فيه نقطة مش بيفهم فيها كويس، لكن مش باتعاطف مع اللي ما عندوش احساس
يعني اللي بيقول كده ممكن يبقى ما بيفهمش في السياسة، ومش فاهم ان سقوط نظام القذافي حينقل الثورتين المصرية والتونسية نقلة نوعية ويأمنا تأمين كبير، ويضمن ان ضغوط كتير من اتجاهات مختلفة تتخفف من على الجيش، لان نظام القذافي بيدعم بالمال والسلاح والبلطجية فلول النظامين البائدين، وان انهيار استخبارات القذافي حيؤدي بشكل فوري لانهيار كبير في استخبارات النظامين البائدين
عادي، ممكن تبقى مش عارف الحكاية دي، مش فاهمها كويس، مش كل الناس بتفهم في الحاجات دي، انت اكيد بتفهم في حاجات تانية، والحاجة دي انت مش فاهمها، عادي، ماهو انا مش بافهم في الكيميا الحيوية، واكيد الكيميا الحيوية اصعب من اللي باقوله ده، يبقى انا فهمت السهل وانت فاهم الصعب.... مثلا
بس مش ممكن تبقى البعيد ما بتحسش ولا عندك دم، اطفال متفحمة... اطفال متفحمة يابني ادم... انت ايه؟ انتتتتتت ايييييه؟ المفهومية بانورامية في الانسان، وكل واحد بيشوف الزاوية بتاعته، لكن الاحساس نعمة.. الاحساس ده بقى الحاجة اللي مفروض كل الناس تتمتع بيها
ايه يا اخي؟ ايه؟ دول لو قطط وكلاب يا اخي المفروض تحس على دمك شوية
انت مش خايف من ربنا؟ انت مش عارف ان مبارك وبن علي زي القذافي بالضبط ونسخة طبق الاصل منه؟
مش عارف ان مبارك امر الجيش بتاعنا انه يعمل فينا اللي عمله القذافي في الليبيين، وان ده سبب عزله
ونفس الحكاية بالنسبة لبن علي وده سبب عزله
وان الفرق الوحيد بين القذافي وبين مبارك وبن علي، ان مصر وتونس فيهم جيش وطني، بينما القذافي حل الجيش وجاب مرتزقة؟ ومع ذلك حتى المرتزقة فيه منهم هرب وما قدرش يكمل قتل في البني ادمين؟
انت ايه؟ ما بتفهمش وقلنا طيب... ما بتحسش؟ ما بتخافش من ربنا يعمل فيك اللي بيتعمل في جيرانك؟ دي كلمة تقولها؟
اعوذ بالله... اعوذ بالله، ده انت والواحد كده يخاف يقعد ياكل معاك يا اخي لتكون حاطط له سم
اللي بيقولوا الكلام ده بيفكروني بضباط امن الدولة، عشان مافيش حد لا بيفهم ولا بيحس وعامل ناصح غيرهم
التونسيين - كالعادة - سابقين علينا بجون... زنقوا البعثة الليبية
واحنا نحاول نحصلهم
وعلى فكرة، التونسيين بيستقبلوا المصريين اللي جايين من طرابلس... ها؟ ما قالوش يعني: احنا مالنا ومال المصريين لما نشوف عيالنا الاول
اعوذ بالله.. اعوذ بالله
احنا عايزين نعمل قائمة سوداء ببتوع احنا مالنا ومال الناس دي عشان ما ناكلش معاهم، بجد يعني، ده ممكن يسمك او يفك لك الفرامل على فكرة...."

خلص كلام نوارة.. ابتدا كلامكم وفعلكم..

النظام لسه بيلعب

2011-02-19T23:12:00.006+02:00

فاكرين المصريين كانوا حلوين ازاي في الميدان؟ مسلم ومسيحي؟ إخوان ويسار وليبراليين وسلفيين وناس مالهمش فيها؟؟ ستات ورجاله؟ كبار وصغيرين؟

مش عايزين حد يفرقنا.. مش عايزين حد يوقع بينا

المؤامرة القذرة شغالة دلوقتي ودي ملامحها:

1- الكلام اللي ظهر اليومين دول على المادة التانية من الدستور، واللي مش وقته خالص، ومش من ضمن أولوياتنا نهائي نهايئ.. لكن الخلاف فيه دلوقتي بيخلق جو مشحون وتفرقة ماينفعش... أسامة سرايا لعنه الله ورد كيده عامل النهاردة في الأهرام استفتاء على المادة الثانية... دا وقته يا ابن الكلب؟؟؟؟؟؟

2- خروج مظاهرات لأخوة سلفيين ينادون بـ "إسلامية" "إسلامية"... بالذمة دا وقت الكلام دلوقتي؟؟؟ مين ورا الناس دي طلع في الوقت الحرج ده؟

3- إشاعات عن تجميد أرصدة "نجيب ساويرس" وطبعا كلنا عارفين غن نجيب مسيحي وكان مع الثورة إلى حد كبير

4- استمرار الكلام عن الإخوان كفزاعة ونوايايهم وخططهم، ولا كأنهم جزء من الشعب ده ولهم نفس حقوقه، لكن الكلام دلوقتي بصيغ التشكيك والتخوين دي لعبة قذرة جدا

لو ظهرت خطط أخرى هكتبها هنا... عشان خاطري خللوا بالكو.. الديول لسه بتلعب، والراجل الكبير والصغير في شرم الشيخ والصهاينة رايحين جايين عليهم زي ما هيكل بيقول، وشفيق لسه ماسك الحكومة وهو صديق مقرب لمبارك وعمر سليمان لسه في القصر الجمهوري وأسامة سرايا لسه رئيس تحرير الأهرام.. وخطة التفرقة وبث الفتن شغالة.... مش لازم نسيبهم يفرقونا أبدا.. الثورة حت عشان تسقط النظام بالكامل وتبني مصر جديدة

كش ملك ١

2011-02-12T22:50:00.004+02:00

في الأيام الجاية، اللي هيجي على بالي بخصوص الثورة هقوله، مفيش حاجة مرتبة أو جاهزة بس هي مجرد افكار وتحليلات متواضعة لاني دماغي مش بيبطل يفكر في تلك المعجزة اللي عشناها ١٨ يوم

الليلة دي هحكي عن الثلاثة نقلات شطرنج اللي خلت ناس كتير جدا من بعد ما كانت اقتنعت بخطاب مبارك الثاني، تبدل رأيها وتنضم للثورة

١- النقلة الأولى: بعد ١٢ ساعة من الخطاب بدأت "موقعة الهجانة" وهجمت على المعتصمين والمتظاهرين في ميدان التحرير. في مشهد هو مزيج من الوحشية والكوميدية الصارخة. لم يصدق أحد عيناه وهو يرى الأحصنة والجمال تهاجم شباب عزل

٢- النقلة الثانية: عندما تم نشر أرقام حسابات عدد من رجال النظام.. فأرقام مثل ١٨ مليار و١٢ مليار و٨ مليار كانت كافية بإشعال نار الغضب في قلوب كثير من المصريين الذين يعرفون تماما أنهم يسرقون كل وم ولكنهم لا يعرفون مقدار هذه السرقة.. وأصبحت جملة مثل "عايزين فلوسنا" هي الهم الأول والشغل الشاغل لكثير من المصريين الذين كانوا قد تعاطفوا مع خطاب مبارك الثاني

٣- النقلة الثالثة: هي ظهور وائل غنيم بعد اختفاء دام ١٢ يوم، وروايته عن تخطيطه مع آخرين للدعوة للثورة وماحدث خلال الإثنى عشر يوم اختفاء وأخيرا انهياره باكيا عند رؤية صور شهداءنا.. شهداء ٢٥ يناير

كانت تلك النقلات كافية لإشعال الثلاثاء الأخير وخروج الملايين بعفوية وغضب كبيرين لمشاركة هؤلاء المرابطين في التحرير

بكرة أكيد هحكي معاكو على أفكار تانية.. تصبحوا على خير وحرية

مصر يا ولاد :)))

2011-02-11T18:30:00.004+02:00

يا رب لك الحمد ولك الفضل.. راقبت طول الأيام السابقة مكرك الذي هو خير من مكرهم.. يا رب لك المنة

مبروك لكل المصريين.. لكل الثوار.. لكل اللي غيروا وهيغيروا مصر وهيعلموا منها مصر الجميلة الشابة القوية

مبروك يا مصر.. مبروك يا أم الصابرين

إسمعوا شادية :))

‎يا أم الصابرين ‫...‬ توهنا وإلتقينا
‎يا أم الصابرين‫..‬ ع الألم عدينا

‎يا مصر يا أمنا
‎يا مصر يا أرضنا
‎يا مصر يا حبنا
‎يا مصر يا عشقنا

‎مشينا وجينا للامان عدينا
‎يا ورد الحرية يا مضلل علينا

‎من دهبك لبسني العقد حبيبي
‎من نيلك سقاني الشهد حبيبي
‎من قمحك وكلني اللقمة حبيبي
‎من صبرك علمني الحكمة حبيبي

‎من قصصك غنالي حكايتي حبيبي
‎من وردك زوقلي مرايتي حبيبي
‎من غصنك غزللي توبي حبيبي
‎من أملك سطر مكتوبي حبيبي

‎من خيرك ميل وإداني حبيبي
‎من حبك علمني إيماني حبيبي
‎من أرضك أهداني زهرة حبيبي
‎من فجرك فرحني ببكرة حبيبي

اللصان

2011-02-11T01:13:00.002+02:00

المؤكد إن النظام فقد شرعيته، والآن مبارك وسليمان يغتصبان الحكم ولابد للجيش أن يحمي الشرعية الأصلية.. شرعية الشعب الثائر