भोजपत्तर

सात समंदर पार से भोजपुरी सिनेमा पर पीएचडी करे पहुंचली कैथरीन

2010-02-22T14:26:00.001+05:30

भोजपुरी देस दुनिया में त छवलहिं बा...लोग सात समुंदर पार से खिंचाइल चलि आव तारे। कैथरिन हार्डी के भोजपुरी सिनेमा आताना निमन लागल कि बान्हि छान्हि के चल देली। बनारस में हिंदी सिखली...आ अब भोजपुरी सिनेमा पर पीएचडी पूरा करे में जुटि गइल बाड़ी...

[स्रोत : लिंक ]

अब इग्नू में सुरू भइल भोजपुरी के फाउंडेशन कोर्स

2009-09-24T17:52:00.001+05:30

भोजपुरी के पाढ़ाई अब युनिवर्सियो में होखे लागल। इंदिरा गांधी राष्ट्रीय मुक्त विश्वविद्यालय में भोजपुरी में फाउंडेशन पाठ्यक्रम सुरू हो गइल बा। भोजपुरी खातिर इ बड़ी नीक खबर बा।
ए पाठ्यक्रम के सुरुआत लोकसभा अध्यक्ष मीरा कुमार कइली हा। ए मोका पर जब मीरा कुमार खुदो भोजपुरिये में बोलली त सभे के नीक लागल। मीरा कुमार के राइ रहल की भोजपुरी अब सिर्फ यूपीए बिहार में बलकी दुनिया भरि में बोलल जा ता। विश्वविद्यालय के कुलपति प्रो. वी एन राजशेखरन पिल्लई कहलन कि तीन महीना के भीतर भोजपुरी भाषा, साहित्य आ संस्कृति के पढ़ाई लिखाई खातिर अलग से सेंटर बानावल जाई। अतने ना ऊ कहलन की भोजपुरी में एगो सर्टिफिकेट कोर्स भी जल्दिये सुरू कईल जाई।

एसी के सफर वाया तिहाड़

2009-05-20T04:05:00.002+05:30

लइका के भागे लरकोरी जिये...अब इहे होखे जाता...तिहाड़ जेल में रहे वालन के अब एसी कोच में आवे जाए के मिली...अगर ओकनी के कहीं सुनवाई खातिर जेल से ले जाइल जाई त ऊ अब स्लीपर के जागाहा प एसी कोच में जइहें... लेकिन अइसन बात नइखे कि उनुका लोग के इ सुबिधा कहीं से बख्सीस में मिली...असल में दिल्ली पुलिस के जवन जवान अइसन कैदियन के ले आवेले आ ले जाले ओ लोग के अब एसी के सुबिधा मिलि रहल बा...लेकिन कैदियन के चलते सबसे स्लीपर में जाए के पड़ेला...जब ई बात उठल त भोइल कि कैदियन खातिर जवान काहें सुबिधा से दूरि रहिहें...अब ए मामला में सरकार के आदेस के इंतजार बा...

भोजपुरी में सस्पेंस फिलिम

2009-05-13T09:30:00.005+05:30

अब जल्दिये भोजपुरियो में सस्पेंस फिलिम देखे के मिली। 'गंगा मइया तोहे पियरी चढ़इबो' (1961) के बाद जवने फिलिम बनल ऊ लगभग पारिवारिक फिल्म बनल। अब डाइरेक्टर अनिल उपाध्याय भोजपुरी में पहिलका सस्पेंस फिलिम बानावे जा तारे। फिलिम के नाम बा 'मेहदी राचाइबि तोहरे नाम के'। [फोटो : एनडीटीवी.कॉम]

एनडीटीवी के मुताबिक, "गांव के माहौल में बनि रहल ए फिलिम में एगो लइका आ लइकी के बिआह तय क दिया ता बाकिर बाद में लइकवे के माई-बाबू रिस्ता तूरि दे तारे। एहि के ताना बाना ले के काहानी तेयार कइल गइल बा।"

ए फिलिम में सुशील सिंह पवन सिंह, ब्रजेश त्रिपाठी, मिस पटना रहि चुकल रूबी सिंह आ कल्पना शाह काम करता लोग। फिलिम बानावे के काम पूरा हो गइल बा... आ उमीद बा कि एहि महीना के 22 तारीख तक इ फिलिम रिलीज भी हो जाई।

मारीशस में होखी चउथा भोजपुरी सम्मेलन

2009-04-06T14:28:00.004+05:30

अगिला विश्व भोजपुरी सम्मेलन मारीशस में होखे जाता...सात दिन तक चले वाला इ सम्मेलन 31 अगस्त से सुरू होई...ए सम्मेलन में कम से कम 41 देस के लोगन के सामिल होखे के उम्मीद बा...ए सम्मेलन के सुरुआत मारीशस के राष्ट्रपति सर अनिरूद्ध जगन्नाथ करिहें...आ सामापन उहां के प्रधानमंत्री नवीन रामगुलाम करिहें...

जाSतानी गाड़ी पकड़े हाथ में 'हिट' बा नूं?

2009-01-30T10:20:00.000+05:30

घर त घर...अब अगर गाड़ी से भी कहीं जाए के बा...त तेलचाटा मारे वाला दावाई लेके जाइबि...ना त हो सकेला सुतले में कान में कौनो कीड़ी घुसि जाउ... बनारस जाए खातिर आतवार के सुरेमनपुर से एकहि गाड़ी मिलेले...सारनाथ एक्सप्रेस...एसे ओहि से आवे के रहुए...एसी थ्री में पहिलहीं से रिजर्वेशन रहुए...जा के बइठि गउंई जा...गाड़ी बलिया से थोड़ा आगेही बढ़ल रहुए कि साइड वाली सीट पर सुतल एक जानी उठि के चिलाए लगुई...आस पास केहु देखात ना रहुए...एसे आचानक कुछु समझ में ना आइल...ऊ आताना ना डेरा गइल रहुई कि बोलिओ ना पावत रहुई...लगे गइला पर धीरे से देखउई...देखीं ना इहंओ काकरोच...घर में त आतना साफाई राखल जाला...सफर में भी साफ सुथरा जगहि मिले एसे एसी में लोग रिजर्वेशन कारा दिहल हा...लेकिन इहां त खोभारियो से खाराब हालति बा...अब बाताईं ना का कइल जाउ...जइसे तइसे उनुका के समझा बुझा के बइठुवीं जा...बाकिर फिकिर त लागले रहुए...कहीं झपकी मति आ जाउ आ कौनो कीड़ा कान में मति घुसि जाउ... सांझि खा स्पेसलवा पकड़े के रहुए...ए से जल्दी जल्दी सहर में काम कइके फेरू स्टेशन पहुंचि गंउवीं जा...सब कुछु ऐज यूजुअल...नोटिस बोर्ड पर 'रत मने राइट टाइम प्लेटफार्म नंबर ७ से' लिखल रहुए...प्लेटफार्म पर ढेर भीड़ ना रहुए...बइठहुं के जगहि मिलि गउए...जे दु चारि आदमी रहुए उहो एने से ओने भागत रहुए...ओसहिं जइसे हमेसा स्टेसन पर होत रहेला... तनिकिए देर में टीटी लउकुवनि...त सबसे पहिले दिमाग में अउए कि पहिले बर्थ के पाता कई लीहल जाउ...काहें से कि गाजियाबाद से चलते वक्त जातारा खाराब बुझात रहुए...जइसे तइसे भागि दउरि के गाड़ी में चढ़नी जा...ई-टिकट के हिसाब से बी-२ में रिजर्वेशन रहुए...चाढ़ला प पाता चलुए कि बी-२ कोच में हमनि के बर्थ नंबर हइए नइखे...एतना में त केहुए के दिमाग घुमि जाइ...काहें से कि ई-टिकट पर पहिलके नियम लिखल बा कि जब चार्ट में नाम रही तबे सही मानल जाई...नाहिं त पइसा देला के बावजूद...विदाउट टिकट... बाद में पाता चलुए कि रिजर्वेशन ७२ वाली बोगी के हिसाब से होखल रहल हा...आ कोच ६५ वाला लागि गइल बा...अटेंडेंट सुभाव के निमन रहुए...खोजि खाजि के बाता दिहुए कि हमनि के रिजर्वेशन बी-२ से बी-१ में कई दिहल गईल बा... खैर इहां सब ठीक रहुए...एतने में चारु ओर सभे ठाठा के हंसे लगुए...हमनि के सोचनी जा कि आखिर इहों लाफ्टर चैनल सुरु हो गईल का...तले टीटी साहब खुदे समझि गउअनि...तनी हंसि के फेर लिखे पढ़े में लागि गउंअन... असल में लाउडस्पीकर से लागातार बोलत रहुए कि स्पेसल ट्रेन प्लेटफार्म नंबर सात पर आ गइल बिया...लेकिन लउके भरि में गाड़ी के कहीं पते ना रहुए...एही बहाने हंसी के महौल करीब पांच मिनट तक चलुए... ड्राइबरो के सायद सुना गउए...थोड़ी देर में गाड़ी आइए गउए...भीतर जाके जवन देखे मिलल ऊ रसोई में अकसरे देखे के मिलेला...बाकिर गाड़ी के एसी बोगी में पहिल बार देखे के मिलल... पहिले त आदमी आपने बर्थ खोजेला...साइड अपर आ साइड लोअर दूनो बर्थ एके साथे रहुए...बर्थ पर एने से ओने कम से कम पांच-सात गो तेलचाटा घूमत रहुअन स...ऊपर वाली बर्थ पर भी ऊहे हाल...अगल बगल भी काकरोच रेस चलत रहुए...झाड़ि झूड़ि के बिछा के हमनियों के बइठुविं जा...तले ले दू गो जीव झोरा में घुसे लगुअनि स... तब सिर्फ ओ मेहरारू के चेहरा सामने रहुए...जौन सुबह गाड़ी में तेलचाटा से डेरा के चिलात रहुई...काहें से कि हमनि के त पूरी रात बितावे के रहुए... "हामारा त राति भर निनिए ना लागि...आंखि त अपने मुंदा जाए कान कइसे मूंदबि"...बगल वाली बर्थ पर एक जानी परेसान रहुई...

आईं ठीहा प जुटीं सभे !

2008-11-27T13:16:00.000+05:30

इ भोजपुरी के अइसन ठीहा ह जाहां रउआ सभे के कुल्हि चीजु मिली...जवन कहीं ना मिलि पावेला...उहो परोसे के कोसिस कईल जाई...भोजपुरी के जवन खांटी सावाद रहल हा...उ अब कमे सुने के मिलता...कगो अइसन चीजु बा जवन अब कहूं ना सुनाला...अइसने कुछु खोजे के कोसिस बा...'भोज पत्तर ' ए दिसा में 'मील के ठीहा' साबित होखे के चाहीं...अइसन उमीद बा...त आईँ सभे अभिए से ए में जुटि जाइल जाउ...