അടുക്കളത്തളം

കരിക്ക് പുഡ്ഡിങ്ങ്

2012-02-08T01:05:00-08:00

ഇളം കരിക്കുകൊണ്ടുള്ള, വളരെ രുചികരമായ വിഭവം....

ആവശ്യമുള്ള സാധനങ്ങൾ:

ഇളം കരിക്കിന്റെ ഉൾഭാഗം ഒരു സ്പൂൺ കൊണ്ട് ചുരണ്ടിയെടുത്തത് - 2 എണ്ണത്തിന്റെ
കരിക്കിൻ വെള്ളം - ഒരെണ്ണത്തിന്റെ
ജലറ്റിൻ - 20-25 ഗ്രാം
കണ്ടൻസ്ഡ് മിൽക്ക് - ഒരു ടിൻ
പാൽ - രണ്ടു കപ്പ്
പഞ്ചസാര - ആവശ്യത്തിന്
തേങ്ങ ചിരകിയത് - ഒരു പിടി

ഉണ്ടാക്കുന്ന വിധം:

കരിക്ക് ചുരണ്ടിയെടുത്തതും കരിക്കിൻ‌വെള്ളത്തിന്റെ പകുതിയും കൂടി മിക്സിയിലിട്ട് നന്നായി അടിക്കുക.

തേങ്ങ ചിരകിയത് ഒരു സ്പൂൺ പഞ്ചസാരയും ചേർത്ത് അടുപ്പത്ത് വച്ച് ബ്രൗൺ നിറമാകുന്നതുവരെ മൊരിക്കുക.

ബാക്കി പകുതി കരിക്കിൻ വെള്ളം നന്നായി ചൂടാക്കി, ജലറ്റിൻ അതിലിട്ട് അലിയിച്ചെടുക്കുക.
പാലും പാകത്തിന് പഞ്ചസാരയും കൂടി ചേർത്ത് അടുപ്പത്തു വച്ച് തിളപ്പിച്ചെടുക്കുക. ഇതിൽ ജലറ്റിൻ അലിയിച്ചതും കണ്ടൻസ്ഡ് മിൽക്കും ചേർത്ത് നന്നായി യോജിപ്പിക്കുക.

ഈ കൂട്ട് ചൂടാറിയശേഷം തയ്യാറാക്കിവച്ചിരിക്കുന്ന കരിക്ക് മിശ്രിതവും ചേർത്ത് യോജിപ്പിക്കുക.

പുഡ്ഡിങ്ങ് സെറ്റ് ചെയ്യാൻ ഉദ്ദേശിക്കുന്ന പാത്രത്തിന്റെ/ബൗളിന്റെ അടിയിൽ മൊരിച്ചു വച്ചിരിക്കുന്ന തേങ്ങാ മിശ്രിതം വിതറിയശേഷം പാത്രം ഫ്രീസറിൽ കുറച്ചുനേരം വച്ചാൽ തേങ്ങ ഉറച്ചുകിട്ടും. (പുഡ്ഡിങ്ങ് മിശ്രിതം ഒഴിക്കുമ്പോൾ തേങ്ങ മുകളിലേക്ക് പൊങ്ങിവരാതിരിക്കാനാണ് ഇങ്ങനെ ചെയ്യുന്നത്)

പാത്രം ഫീസറിൽ നിന്നെടുത്ത ഉടനെ അതിലേക്ക് പുഡ്ഡിങ്ങ് കൂട്ട് സാവധാനം ഒഴിക്കുക. മീതെയും കുറച്ച് മൊരിച്ച തേങ്ങ വിതറാം. നിങ്ങളുടെ മനോധർമ്മം പോലെ നട്സോ, ഉണക്കമുന്തിരിയോ ഒക്കെ ചേർക്കാം. ഞാൻ തേങ്ങ മാത്രമേ ചേർത്തുള്ളു.

പുഡ്ഡിങ്ങ് സെറ്റ് ചെയ്യാൻ വയ്ക്കുക. 30 മിനിട്ട് ഫ്രീസറിൽ വച്ചശേഷം പിന്നീട് ഫ്രിഡ്ജിലേക്ക് മാറ്റുന്നതാണ് നല്ലത്.

ഉറച്ചശേഷം ഒരു പ്ലേറ്റിലേക്കോ മറ്റോ കമഴ്ത്തിയിടാം.

കഷ്ണങ്ങളായി മുറിച്ച് കഴിക്കാം. വളരെ സ്വാദിഷ്ടമാണ് ഈ പുഡ്ഡിങ്ങ്.

അസ്ത്രം

2012-01-23T20:06:00-08:00

ചേമ്പ്/കാച്ചിൽ മോരും തേങ്ങയും ചേർത്തുണ്ടാക്കുന്ന കൂട്ടാനാണ് അസ്ത്രം. വളരെ ലളിതമാണ് സംഭവം. ഉണ്ടാക്കാനുമെളുപ്പം.

ആവശ്യമുള്ള സാധനങ്ങൾ:

ചേമ്പ്/കാച്ചിൽ - കാൽ കിലോ
ലേശം മഞ്ഞൾപ്പൊടി
തേങ്ങ ചിരകിയത് - ഒരു മുറിയുടെ പകുതി
പച്ചമുളക് - 3-4 എണ്ണം (അല്ലെങ്കിൽ നിങ്ങളുടെ പാകത്തിന്)
അര സ്പൂൺ ജീരകം
പുളിയുള്ള മോര് - ആവശ്യത്തിന്
പാകത്തിന് ഉപ്പ്
കറിവേപ്പില, വെളിച്ചെണ്ണ

ഉണ്ടാക്കുന്ന വിധം:

തേങ്ങ ജീരകവും ചേർത്ത് നന്നായി അരച്ചുവയ്ക്കുക.

ചേമ്പ് തൊലി കളഞ്ഞ് വൃത്തിയാക്കി തീരെ ചെറുതല്ലാത്ത കഷ്ണങ്ങളാക്കുക. കഷ്ണങ്ങൾ വെള്ളമൊഴിച്ച് മഞ്ഞൾപ്പൊടിയും പാകത്തിന് ഉപ്പും ചേർത്ത് വേവിക്കുക.

നന്നായി വെന്ത് വെള്ളം വറ്റുമ്പോൾ തീ കുറച്ച്, തേങ്ങയരച്ചത് ചേർത്തിളക്കുക. അതോടൊപ്പം മോരും ചേർക്കുക. പുളിപ്പിന് ആവശ്യമുള്ളത്ര മോര് ചേർത്താൽ മതി.

മോര് പതഞ്ഞുവരുമ്പോൾ തീ കെടുത്തി, കറിവേപ്പിലയും വെളിച്ചെണ്ണയും ചേർത്തിളക്കുക.

അസ്ത്രം റെഡി! സാധാരണ ഒഴിച്ചുകൂട്ടാനേക്കാൾ കുറച്ചുകൂടി കട്ടിയായിരിക്കണം അസ്ത്രം.

മിക്സ്ചർ

2012-01-09T22:00:00-08:00

എരിവുള്ളത്, മധുരമുള്ളത്, എരിവ് തീരെ ഇല്ലാത്തത് എന്നിങ്ങനെ മിക്സ്ചർ ഒരുപാടു തരത്തിലുണ്ട്. ചേരുവകളുടെ അടിസ്ഥാനത്തിലും വ്യത്യസ്തത ഉണ്ടാവാം. അവിൽ കൊണ്ടുണ്ടാക്കുന്ന മിക്സ്ചറിനെ പറ്റി നേരത്തേ പറഞ്ഞിട്ടുണ്ട്. ഇവിടെ ഇപ്പോൾ പറയാൻ പോകുന്നത് കേരള മിക്സ്ചർ എന്നറിയപ്പെടുന്ന, നമ്മൾ പൊതുവേ മിക്സ്ചർ എന്നു വിളിക്കുന്ന, സാദാ മിക്സ്ചറിനെപ്പറ്റിയാണ്. കടലമാവാണിതിന്റെ പ്രധാന ചേരുവ. പിന്നെ കുറച്ചു കപ്പലണ്ടി, പൊട്ടുകടല, അങ്ങിനെ അല്ലറ ചില്ലറ ചേരുവകളും വേണം. മിക്സ്ചറുണ്ടാക്കുന്നത് ഭയങ്കര ബുദ്ധിമുട്ടുള്ള ഒരു പണിയാണെന്നൊക്കെ തോന്നാം. പക്ഷേ സത്യത്തിൽ ഇത് വല്യ മെനക്കേടൊന്നുമില്ലാത്ത പരിപാടിയാണ്. നമുക്കൊന്നു നോക്കാമല്ലേ?

ആവശ്യമുള്ള സാധനങ്ങൾ

കടലമാവ് - 3 ഗ്ലാസ്
അരിപ്പൊടി - അര ഗ്ലാസ്
മഞ്ഞൾപ്പൊടി - അര ടീസ്പൂൺ
കായം പൊടി - ആവശ്യത്തിന്
മുളകുപൊടി - ആവശ്യത്തിന്
ഒരു നുള്ള് സോഡാപ്പൊടി
കറിവേപ്പില, ഉപ്പ് - പാകത്തിന്
അവിൽ - അര ഗ്ലാസ് (നിർബന്ധമില്ല)
പൊട്ടുകടല - ഒരു പിടി
കപ്പലണ്ടി - രണ്ടു പിടി
പകുതി ഏത്തക്കായ (നിർബന്ധമില്ല)
ഒരു ചെറിയ ഉരുളക്കിഴങ്ങ് (നിർബന്ധമില്ല)
വറുക്കാനാവശ്യമായ വെളിച്ചെണ്ണ
സേവനാഴി, ദ്വാരങ്ങളുള്ള ഒരു പാത്രമോ കണ്ണാപ്പയോ.

ഉണ്ടാക്കുന്ന വിധം:

കടലമാവും അരിപ്പൊടിയും രണ്ടു തുല്യഭാഗങ്ങളാക്കുക.
ഒരു ഭാഗത്തിൽ സ്വല്പം മഞ്ഞൾപ്പൊടിയും പാകത്തിന് മുളകുപൊടിയും കായപ്പൊടിയും ഉപ്പും ചേർത്ത് ഇടിയപ്പത്തിന്റെ മാവിന്റെ അയവിൽ കുഴച്ചെടുക്കുക.

സേവനാഴിയിൽ ഇടിയപ്പത്തിന്റെ അച്ചിട്ട് ഈ മാവ് തിളച്ച വെളിച്ചെണ്ണയിലേക്ക് വട്ടത്തിൽ പിഴിഞ്ഞ് വറുത്തുകോരുക. (ഞാനിവിടെ ഇടിയപ്പത്തിന്റെ അച്ചും അതിനേക്കാൾ സ്വല്പം കൂടി വലുപ്പത്തിൽ ദ്വാരങ്ങളുള്ള അച്ചും ഉപയോഗിച്ച് രണ്ടു തരത്തിൽ ഉണ്ടാക്കിയിട്ടുണ്ട്).

ആറിയശേഷം കൈകൊണ്ട് ഞെരിച്ച് ചെറിയ കഷ്ണങ്ങളാക്കാം.

ഇനി മറ്റേ പകുതി മാവിൽ ഇതേപോലെ മഞ്ഞൾപ്പൊടിയും മുളകുപൊടിയും കായപ്പൊടിയും ഉപ്പും ഒരു നുള്ള് സോഡാപ്പൊടിയും ചേർത്ത് ഇഡ്ഡലിമാവിന്റെ അയവിൽ കലക്കുക.
ദ്വാരങ്ങളുള്ള ഒരു പാത്രമോ വലിയ കണ്ണാപ്പയോ തിളക്കുന്ന എണ്ണയുടെ മുകളിൽ പിടിച്ച് (ചൂടുള്ള ആവി കയ്യിലടിച്ച് പൊള്ളാതിരിക്കാൻ ഇടയ്ക്കിടെ ഊതുക) ഈ മാവ് കുറേശ്ശെയായി ഒഴിച്ച് വിരലുകൾ കൊണ്ട് ഒന്നു ഇളക്കിക്കൊടുക്കുക. അപ്പോൾ മാവ് തുള്ളികളായി എണ്ണയിൽ വീണ് കുമിളച്ചു പൊങ്ങും. ഇത് മൂക്കുമ്പോൾ കോരിയെടുക്കുക. (മിക്സ്ചർ ഉണ്ടാക്കുമ്പോൾ ഇതാണ് കുറച്ചു ബുദ്ധിമുട്ടുള്ള പണി).
ബൂന്ദി ഉണ്ടാക്കാനായി പ്രത്യേകം വാങ്ങാൻ കിട്ടുന്ന പാത്രമാണ് താഴെ കാണുന്നത്.

ഇനി, അവിൽ ഒരു ചീനച്ചട്ടിയിട്ട് എണ്ണയില്ലാതെ വറുക്കുക. കറുമുറാന്നായാൽ വാങ്ങാം.

പൊട്ടുകടലയും കപ്പലണ്ടിയും സ്വല്പം എണ്ണയിൽ വറുത്തുമാറ്റുക.

അടുത്തതായി, തീരെ കനം കുറച്ച് നാലായി നുറുക്കി, ഉപ്പു പുരട്ടിയ ഏത്തക്കായയും ഉരുളക്കിഴങ്ങും വറുത്തുകോരുക.

അവസാനമായി കുറച്ച് കറിവേപ്പിലയും വറുത്തുകൊറുക.

എല്ലാം കൂടി നന്നായി മിക്സ് ചെയ്താൽ മിക്സ്ചർ റെഡി!

കുറിപ്പ് :

മിക്സ്ചറിന് എരിവ് കൂടുതൽ വേണമെന്നുള്ളവർ ഓരോ ഇനവും വറുത്തുകോരിയ ഉടനെ, ആ ചൂടിൽത്തന്നെ കുറച്ചു മുളകുപൊടി തൂവുക. (ചൂടാറിയാൽ മുളകുപൊടി ശരിക്ക് പിടിക്കില്ല)
നല്ല കരുകരുപ്പ് കിട്ടാനാണ് അരിപ്പൊടി ചേർക്കുന്നത്.
മഞ്ഞൾപ്പൊടി ചേർക്കുന്നത് നല്ല മഞ്ഞനിറം കിട്ടാനാണ്. വേണമെങ്കിൽ ഫുഡ് കളർ ചേർക്കാം. മഞ്ഞ, ചുവപ്പ്, പച്ച എന്നിങ്ങനെ പല കളറുകളിൽ ഉണ്ടാക്കി ബഹുവർണ്ണ മിക്സ്ചർ തയ്യാറാക്കാം.
വറുക്കാനുപയോഗിക്കുന്ന വെളിച്ചെണ്ണ മേന്മയുള്ളതും ഒട്ടും പഴകാത്തതുമായാലേ മിക്സ്ചറിന് സ്വാദുണ്ടാവൂ.

കൂവപ്പായസം

2012-01-08T01:59:00-08:00

വീണ്ടുമൊരു തിരുവാതിര...
തിരുവാതിരയ്ക്ക് കൂവപ്പൊടി(Arrowroot powder) കൊണ്ടാണ് പായസമുണ്ടാക്കുക പതിവ്. കൂവപ്പൊടിക്ക് “കൂവനൂറ്” എന്നാ‍ണ് വീട്ടിൽ പറയാറുള്ളത്. തിരുവാതിരനൊയമ്പിന് കഞ്ഞിക്കും പുഴുക്കിനുമൊപ്പം കൂവപ്പായസവും ഒരു പ്രധാന പ്രധാന വിഭവമാണ്. കൂവ ഉള്ള് തണുപ്പിക്കുമെന്ന് അമ്മമ്മ പറയുമായിരുന്നു.

കൂവക്കിഴങ്ങിൽ നിന്നാണ് കൂവപ്പൊടി ഉണ്ടാക്കുക. ഇത് കടകളിൽ വാങ്ങാൻ കിട്ടും.

വളരെ എളുപ്പമാണിതുണ്ടാക്കാൻ. അഞ്ചു മിനിട്ടു മതി. (എല്ലാർക്കും ഇതിന്റെ സ്വാദ് ഇഷ്ടപ്പെടണമെന്നില്ലാട്ടോ...)

ആവശ്യമുള്ള സാധനങ്ങൾ:

കൂവപ്പൊടി - 25 ഗ്രാം
ശർക്കര - ഏകദേശം 100 ഗ്രാം
തേങ്ങ ചിരകിയത് - ഒരു മുറിയുടെ പകുതി (കൂടുതലും ആവാം)
ചെറുപഴം - 4-5 എണ്ണം
ഒരു നുള്ള് എലയ്ക്കാപ്പൊടി
ആവശ്യത്തിന് വെള്ളം

ഉണ്ടാക്കുന്ന വിധം:

ശർക്കര ഉരുക്കി അരിച്ച് പാനിയാക്കി വയ്ക്കുക.

കൂവപ്പൊടി വെള്ളമൊഴിച്ച് കട്ടയില്ലാതെ കലക്കുക. ധാരാളം വെള്ളം ചേർത്ത് നല്ല അയവിൽ കലക്കണം. ഇത് ഒരു കട്ടിയുള്ള പാത്രത്തിൽ അടുപ്പത്ത് വച്ച് ഇളക്കുക. മൈദയും അരിപ്പൊടിയുമൊക്കെ കുറുകുന്നതുപോലെ വളരെ പെട്ടെന്നുതന്നെ ഇത് കുറുകാൻ തുടങ്ങും.

ഇതിൽ ശർക്കരപ്പാനിയും തേങ്ങയും ചേർത്ത് കുറുകാൻ തുടങ്ങുമ്പോൾ എലയ്ക്കാപ്പൊടി ചേർത്ത് വാങ്ങുക.

വാങ്ങിവച്ചശേഷം പഴം നാലായി നുറുക്കിയത് ചേർത്തിളക്കുക. കഴിഞ്ഞു! ഇത്രേയുള്ളു കാര്യം!

കൂവപ്പായസം റെഡി! ചൂടോടെയോ, തണുപ്പിച്ചോ കഴിക്കാം.

വട പാവ് (Vada Pav)

2011-12-20T17:55:00-08:00

പാവ് എന്നാൽ ബൺ. പാവിന്റെ ഉള്ളിൽ വട വച്ചാൽ വട-പാവ് ആയി. ചുരുക്കത്തിൽ, ബർഗറിന്റെ ഇന്ത്യൻ രൂപമാണ് വട-പാവ് എന്നു വേണമെങ്കിൽ പറയാം. ബോബെയിലും മറ്റും വട-പാവ് ചൂടോടെ ഉണ്ടാക്കിവിൽക്കുന്ന തെരുവോര കച്ചവടക്കാരെ ധാരാളം കാണാം. അതിശയകരമായ വേഗതയിലാണ് അവരിതുണ്ടാക്കുക. രാവിലെ ജോലിക്കും മറ്റും പോകാനിറങ്ങുന്നവർ വട-പാവ് വാങ്ങി ധൃതിയിലകത്താക്കി റെയിൽ‌വേസ്റ്റേഷനിലേക്കോടുന്നത് ബോബെയിൽ സ്ഥിരം കാഴ്ചയാണ്. നല്ല കനപ്പെട്ട ആഹാരമാണിത്. ഒരെണ്ണം കഴിച്ചാൽ മതി; ഉച്ചവരെ അവിടെ കിടന്നോളും.

വട-പാവ് ഉണ്ടാക്കുന്നതിനുമുമ്പ് ഇതിലുപയോഗിക്കുന്ന മൂന്നുതരം ചട്ണികൾ നേരത്തേ തയാറാക്കിവയ്ക്കണം.
1. തേങ്ങ-കപ്പലണ്ടി ചട്ണിപ്പൊടി (Peanut-coconut chutney powder)
2. ഗ്രീൻ ചട്ണി (green chutney)
3. മീഠാ ചറ്റ്ണി (Meeta chutney)
ഇതിൽ ഗ്രീൻ ച്ട്ണി ഒഴിച്ചുള്ള മറ്റു രണ്ടു ചട്ണികളും ഫ്രിഡ്ജിൽ എത്രനാൾ വേണമെങ്കിലും സ്റ്റോക്ക് ചെയ്യാവുന്നതാണ്.

തേങ്ങ-കപ്പലണ്ടി ചട്ണിപ്പൊടി:
ഒരു ഗ്ലാസ് തേങ്ങ ചിരകിയത്, അര ഗ്ലാസ് കപ്പലണ്ടി, കാൽ ഗ്ലാസ് എള്ള് എന്നിവ വെവ്വേറെ വറുത്തെടുക്കുക. 8-10 വെളുത്തുള്ളിയല്ലി പച്ചമണം മാറുന്നതുവരെ ഒന്നു ചൂടാക്കുക. എല്ലാം കൂടി പാകത്തിന് മുളകുപൊടിയും ഉപ്പും ചേർത്ത് തരുതരുപ്പായി പൊടിച്ചെടുക്കുക.

ഗ്രീൻ ചട്ണി:

രണ്ടു പിടി മല്ലിയില, ഒരു പിടി പുതിനയില, ഒരു സവാളയുടെ പകുതി, ഒരു സ്പൂൺ ഇഞ്ചി-വെളുത്തുള്ളി പേസ്റ്റ്, 2-3 പച്ചമുളക്, ഒരു നുള്ള് ജീരകപ്പൊടി, ഒരു സ്പൂൺ ചെറുനാരങ്ങാനീര് എന്നിവ പാകത്തിന് ഉപ്പു ചേർത്ത് അരച്ചെടുക്കുക.

മീഠാ ചട്ണി:

കുറച്ച് പുളി പിഴിഞ്ഞെടുത്ത ചാറിൽ, പുളിയുടെ പകുതിയോളം (കുരു കളഞ്ഞ) ഈന്തപ്പഴവും ഇത്തിരി ശർക്കരയും ചേർത്ത് അടുപ്പത്തു വയ്ക്കുക. ഈന്തപ്പഴം ഒന്നു മൃദുവായാൽ വാങ്ങാം. ഇതിൽ ഒരു സ്പൂൺ ജീരകപ്പൊടിയും പാകത്തിന് ഉപ്പും മുളകുപൊടിയും ചേർത്ത് അരച്ചെടുക്കുക.

ഉത്തരേന്ത്യക്കാർ പാവ് എന്നു വിളിക്കുന്നതരം ബണ്ണാണ് താഴെ ഫോട്ടോയിലുള്ളത്. ഇപ്പോ നമ്മുടെ നാട്ടിലെ സൂപ്പർമാർക്കറ്റുകളിലും കിട്ടാറുണ്ട്. സാധാരണ ബണ്ണിനേക്കാൾ ചെറുതും, എതാണ്ടൊരു ചതുരാകൃതിയുമായിരിക്കും പാവിന്. മിക്കവാറും ആറെണ്ണം കൂടിച്ചേർന്നിരിക്കുന്ന രൂപത്തിലായിരിക്കും കിട്ടുക. (അറിയാത്തവർക്കുവേണ്ടി പറഞ്ഞെന്നേയുള്ളു. ഇത് കിട്ടിയില്ലെങ്കിൽ സാധാരണ ബണ്ണുപയോഗിച്ചാലും മതി)

കൂടിച്ചേർന്നിരിക്കുന്ന പാവ് എളുപ്പത്തിൽ വേർപെടുത്താൻ കഴിയും. ദാ, നോക്കൂ:

ഇത്രയുമായില്ലേ...ഇനി വട ഉണ്ടാക്കാം:

ആവശ്യമുള്ള സാധനങ്ങൾ:

ഉരുളക്കിഴങ്ങ് - രണ്ടോ മൂന്നോ
ഇഞ്ചി-വെളുത്തുള്ളി-പച്ചമുളക് അരച്ചത് - ഒരു വലിയ സ്പൂൺ
അല്‍പ്പം മഞ്ഞൾപ്പൊടി, കായം‌പൊടി, ജീരകപ്പൊടി
മല്ലിയില അരിഞ്ഞത് - ഒരു പിടി
ഒരു സ്പൂൺ ചെറുനാരങ്ങാനീര്.
വറുക്കാനുള്ള കടുക്, എണ്ണ (വെളിച്ചെണ്ണ വേണ്ട)
പാകത്തിന് ഉപ്പ്

കടലമാവ് - ഒന്ന്/ഒന്നര കപ്പ്
കുറച്ച് മഞ്ഞൾപ്പൊടി, മുളകുപൊടി
പാകത്തിന് ഉപ്പ്, വെള്ളം
ഒരു നുള്ള് സോഡാപ്പൊടി
കുറച്ച് മല്ലിയില അരിഞ്ഞത്.

വറുക്കാനാവശ്യമായ എണ്ണ.

ഉണ്ടാക്കുന്ന വിധം:

ഉരുളക്കിഴങ്ങ് പുഴുങ്ങി പൊടിച്ച് ഉപ്പ് ചേർത്തുവയ്ക്കുക.

എണ്ണയിൽ കടുക് പൊട്ടിച്ചശേഷം ഇഞ്ചി-വെളുത്തുള്ളി-പച്ചമുളക് അരച്ചത് ചേർത്ത് ഇളക്കുക. ഇതിലേക്ക് മഞ്ഞൾപ്പൊടിയും ജീരകപ്പൊടിയും കായവും ചേർത്ത് യോജിപ്പിച്ചശേഷം വാങ്ങുക. ഈ കൂട്ട് ഉരുളക്കിഴങ്ങും മല്ലിയിലയും നാരങ്ങാനീരും ചേർത്ത് കൈകൊണ്ട് കുഴച്ച് യോജിപ്പിക്കുക. ഇത് ചെറിയ ഉരുളകളായി എടുത്ത് കയ്യിൽ‌വച്ച് ഒന്നമർത്തി വടയുടെ ഷേപ്പിലാക്കി വയ്ക്കുക.

കടലമാവ് പാകത്തിന് വെള്ളവും മറ്റു ചേരുവകളും ചേർത്ത് നല്ല കട്ടിയിൽ കലക്കിവയ്ക്കുക.

ഉരുളക്കിഴങ്ങ് മിശ്രിതം ഓരോന്നെടുത്ത് മാവിൽ മുക്കി ചൂടായ എണ്ണയിൽ വറുത്തെടുക്കുക. വട തയ്യാറായി. ബട്ടാട്ട വട എന്നാണിതിന് പറയുന്നത്.

ഇനി, പാവ് എടുത്ത്, കഴിയുന്നതും അറ്റം വിട്ടുപോരാത്ത രീതിയിൽ കുറുകെ രണ്ടായി മുറിക്കുക. (അറ്റം വിട്ടുപോന്നാലും കുഴപ്പമൊന്നുമില്ല. നല്ല പരിചയമുള്ളവർക്കേ ഇത് കൃത്യമായി ചെയ്യാൻ പറ്റൂ. ഞാനുണ്ടാക്കിയപ്പോഴും ഒന്നുരണ്ടെണ്ണം ശരിയായില്ല.)

ഒരു ദോശക്കല്ലിൽ ഒരു സ്പൂൺ വെണ്ണയൊഴിച്ച് ഉരുകിപ്പരന്നു തുടങ്ങിയാൽ പാവിന്റെ മുറിച്ച വശം കീഴോട്ട് വരത്തക്കവിധം വെണ്ണയിലേക്ക് കമഴ്ത്തിവച്ച് വെണ്ണ മുഴുവൻ പാവ് കൊണ്ട് തുടച്ചെടുക്കുക. ഇങ്ങനെ ഓരോ പാവും ചെയ്തെടുക്കുക. (പാവിന്റെ ഉള്ളിൽ സാധാരണ പോലെ കുറച്ചു വെണ്ണ പുരട്ടിയാലും മതി. ശരിയായ രീതി പറഞ്ഞെന്നേയുള്ളു)

ഇനി, പാവിന്റെ രണ്ടുപകുതിയിലും യഥാക്രമം മീഠാ ചട്ണി, ഗ്രീൻ ചട്ണി, ചട്ണിപൗഡർ എന്നിവ പുരട്ടുക. അതിനുമുകളിൽ ഒരു വട വച്ചശേഷം മറ്റേ പകുതികൊണ്ട് അടച്ച്, എല്ലാം കൂടി ചേർന്നിരിക്കാൻ വേണ്ടി ഒന്നമർത്തുക.

ഇങ്ങനെ ഓരോ പാവും ചെയ്യുക.

ദാ, നമ്മുടെ ഇന്ത്യൻ ബർഗർ റെഡി! ചൂടോടെ കഴിക്കുക.

അത്ര വലിയ ബുദ്ധിമുട്ടുള്ള പണിയൊന്നുമല്ലാട്ടോ ഇത്. ഞാൻ ഒരുപാട് നീട്ടിവലിച്ച് എഴുതിയതുകണ്ട് പേടിക്കണ്ട. ചട്ണിപ്പൊടിയും മീഠാചട്ണിയും നേരത്തെ ഉണ്ടാക്കി ഫ്രിഡ്ജിൽ സ്റ്റോക്കു ചെയ്യാവുന്നതേയുള്ളു. ഈ ചട്ണിപ്പൊടി അത്യാവശ്യം ദോശയുടെ കൂടെയൊക്കെ കഴിയ്ക്കാവുന്നതുമാണ്. പിന്നെ, നോർത്ത് ഇന്ത്യൻ വിഭവങ്ങളിലൊക്കെ ജീരകപ്പൊടി ചേർക്കുന്നത് പതിവാണ്. അതുകൊണ്ട് കുറച്ചു ജീരകം വറുത്തുപൊടിച്ച് സ്റ്റോക്കു ചെയ്യുന്നതും നല്ലതുതന്നെ.

സുഖിയൻ

2011-12-14T16:50:00-08:00

പരിപ്പുവടയും ഉണ്ടൻപൊരിയുമൊക്കെ പോലെ സുഖിയനും ഒരു തനിനാടൻ പലഹാരമാണ്. ചെറുപയറും ശർക്കരയുമാണ് പ്രധാന ചേരുവകൾ.

ആവശ്യമുള്ള സാധനങ്ങൾ:

ചെറുപയർ - ഒരു ഗ്ലാസ്
ശർക്കര - നിങ്ങളുടെ പാകത്തിന് ഏകദേശം 200-250 ഗ്രാം മതിയാവും
തേങ്ങ ചിരകിയത് - ഒരു പിടി (കൂടുതൽ വേണമെങ്കിൽ ആവാം)
സ്വല്പം ഏലയ്ക്കാപ്പൊടി
മൈദ(ചിലർ അരിപ്പൊടിയാണ് ഉപയോഗിക്കുക) - കൃത്യമായ അളവ് പറയാൻ സാധിക്കില്ല. ഒരു 100-150 ഗ്രാം മതിയാവും.
വറുക്കാനാവശ്യമായ വെളിച്ചെണ്ണ

ഉണ്ടാക്കുന്ന വിധം :

ചെറുപയർ നികക്കെ വെള്ളമൊഴിച്ച് വേവിച്ചെടുക്കുക. വല്ലാതെ വെന്തു കുഴയരുത്.
ശർക്കര വെള്ളമൊഴിച്ച് ഉരുക്കി അരിച്ചെടുത്തശേഷം ഇതിലേക്ക് ചെറുപയർ വേവിച്ചതും തേങ്ങയും ചേർത്ത് തുടരെ ഇളക്കുക. വെള്ളം വറ്റിത്തുടങ്ങുമ്പോൾ ഏലയ്ക്കാപ്പൊടി ചേർക്കുക.
വെള്ളമയം നിശ്ശേഷം വറ്റി, ഉരുട്ടാൻ പാകത്തിലാവുമ്പോൾ വാങ്ങാം.

മൈദ വെള്ളമൊഴിച്ച് കട്ടയില്ല്ലാതെ ഇഡ്ഡലിമാവിന്റെ പരുവത്തിൽ കലക്കിവയ്ക്കുക.
ചെറുപയർ കൂട്ട് ചൂടാറിയാൽ ഓരോ പിടിയെടുത്ത് ഉരുട്ടിവയ്ക്കുക.

ഈ ഇരുളകൾ മൈദമാവിൽ മുക്കി, ചൂടായ വെളിച്ചെണ്ണയിലിട്ട് വറുത്തെടുക്കുക.

ഇത്രേയുള്ളു! സംഭവം റെഡി!

ചൂടോടെയോ അല്ലാതെയോ ചായയുടെ കൂടെ കഴിക്കാം. എനിക്ക് നന്നായി ചൂടാറിയ സുഖിയനാണ് ഇഷ്ടം.

പടവലങ്ങ-കടലപ്പരിപ്പ് തോരൻ

2011-12-12T23:12:00-08:00

പടവലങ്ങയും കടലപ്പരിപ്പും നല്ല കോമ്പിനേഷനാണ്. തോരനുണ്ടാക്കിയാൽ നല്ല സ്വാദാണ്.

ആവശ്യമുള്ള സാധനങ്ങൾ:

കടലപ്പരിപ്പ് - 100 ഗ്രാം
പടവലങ്ങ - ഏതാണ്ട് 300-400 ഗ്രാം
തേങ്ങ ചിരകിയത് - അര മുറി
ചെറിയ ഉള്ളി - ഒരു പിടി
പച്ചമുളക് - ആവശ്യത്തിന്
ജീരകം - അര സ്പൂൺ
മഞ്ഞൾപ്പൊടി - ലേശം
പാകത്തിന് ഉപ്പ്
വറുക്കാനാവശ്യമായ കടുക്,മുളക്, കറിവേപ്പില, വെളിച്ചെണ്ണ.

ഉണ്ടാക്കുന്ന വിധം:

പടവലങ്ങ കഴുകി വൃത്തിയാക്കി ചെറുതായി നുറുക്കുക.തീരെ പൊടിയായി അരിയണമെന്നില്ല.

കടലപ്പരിപ്പ് വേവിക്കുക. വെന്തോന്ന് ചോദിച്ചാൽ വെന്തു, അത്രയേ ആകാവൂ. ഉടഞ്ഞുപോകരുത്. പരിപ്പിങ്ങനെ മണിമണിയായി കിടക്കണം.

ഇനി സാധാരണ നിങ്ങളെങ്ങനെയാണ് തോരൻ ഉണ്ടാക്കുന്നതെന്നു വച്ചാൽ അങ്ങിനെ ഉണ്ടാക്കുക.

ഞാൻ ചെയ്തത്:

തേങ്ങയും ഉള്ളിയും ജീരകവും പച്ചമുളകും കൂടി ഒന്നു ചതച്ചെടുത്തു.
വെളിച്ചെണ്ണയിൽ കടുകും മുളകും കറിവേപ്പിലയും വറുത്തതിലേക്ക് പടവലങ്ങയും, വേവിച്ച പരിപ്പും, ലേശം മഞ്ഞൾപ്പൊടിയും, ഉപ്പും, തേങ്ങാമിശ്രിതവും ചേർത്ത് നന്നായി ഇളക്കിച്ചേർത്ത് ചെറുതീയിൽ കുറച്ചുനേരം അടച്ചുവച്ച് വേവിച്ചു. (വെള്ളമൊഴിക്കേണ്ട ആവശ്യമില്ല). അത്രേയുള്ളു!

പാലക് പനീർ

2011-12-07T23:20:00-08:00

പാലക്കും പനീറും: അതുതന്നെ പാലക് പനീർ! ഇതൊരു ഉത്തരേന്ത്യൻ വിഭവമാണ്. ചപ്പാത്തി, പൂരി, പൊറോട്ട, നാൻ, ബ്രഡ് മുതലായവയ്ക്ക് പറ്റിയ കറിയാണ്. ഏറെ സ്വാദിഷ്ടവും. എന്നാൽ, പനീറിന്റെ രുചി പിടിക്കാത്തവർക്ക് ഇത് ഇഷ്ടപ്പെടില്ലതാനും. പനീർകഷ്ണങ്ങൾ പായ്ക്കറ്റിലാക്കിയത് സൂപ്പർമാർക്കറ്റുകളിൽ വാങ്ങാൻ കിട്ടും. വാങ്ങിയാൽ, ഉണ്ടാക്കുന്ന സമയം വരെ ഫ്രീസറിൽ സൂക്ഷിക്കുകയും വേണം. അല്ലെങ്കിൽ കേടാവും. ഇനി, വാങ്ങാൻ കിട്ടിയില്ലെങ്കിൽ അല്പമൊന്ന് മിനക്കെട്ടാൽ ഇത് വീട്ടിലുണ്ടാക്കുകയും ചെയ്യാം. തിളപ്പിച്ച പാലിൽ സിട്രിക്കാസിഡോ ചെറുനാരങ്ങാനീരോ ചേർത്ത് പിരിക്കുമ്പോൾ കിട്ടുന്ന ഖരപദാർത്ഥമാണ് പനീർ. ചിലയിടങ്ങളിൽ പാലിറച്ചി എന്നും പറയുമത്രേ! ഇതുണ്ടാക്കുന്നതിന്റെ വിശദവിവരങ്ങൾ ഇവിടെ ഉണ്ട്.

പാലക് പനീർ ഉണ്ടാക്കുന്നതെങ്ങനെയെന്ന് പറയാം. മുമ്പ് പലപ്രാവശ്യം പനീർ വീട്ടിൽ ഉണ്ടാക്കിയിട്ടുണ്ടെങ്കിലും, തൽക്കാലം വാങ്ങിക്കുന്ന പനീറാണ് ഞാനിവിടെ ഉപയോഗിച്ചിരിക്കുന്നത്.

അപ്പോ തുടങ്ങാം?

ആവശ്യമുള്ള സാധനങ്ങൾ:

നല്ല ഫ്രഷ് പാലക് - ഏകദേശം അരക്കിലോയുടെ കെട്ട്
പനീർ - ഏകദേശം അര കിലോ
പച്ചമുളക് - 5-6 (ആവശ്യത്തിന്)
അണ്ടിപ്പരിപ്പ് - 15-20 എണ്ണം
തക്കാളി വലുത് - 1
സവാള - ഒന്നര(വലുത്)
ഇഞ്ചി-വെളുത്തുള്ളി പേസ്റ്റ് - ഒരു വലിയ സ്പൂൺ
ഗരം മസാല - 2 സ്പൂൺ
മല്ലിപ്പൊടി - ഒരു സ്പൂൺ
ജീരകം - ഒരു സ്പൂൺ
ഉലുവയില ഉണക്കിയത്(കസൂരി മേത്തി എന്ന പേരിൽ സൂപ്പർ മാർക്കറ്റുകളിൽ കിട്ടും) - കുറച്ച്
മല്ലിയില
പാകത്തിന് ഉപ്പ്, പാചകയെണ്ണ(വെളിച്ചെണ്ണ ഈ കറിക്ക് നല്ലതല്ല)
ഒരു സ്പൂൺ വെണ്ണ

ഉണ്ടാക്കുന്ന വിധം:

പാലക്ക് ഇലകൾ നന്നായി കഴുകിയശേഷം (അരിയാതെ)തിളച്ചവെള്ളത്തിലിട്ട് അഞ്ചു മിനിട്ട് അടച്ചുവയ്ക്കുക. അപ്പോഴേക്കും ഇലകൾ വാടിക്കുഴഞ്ഞിട്ടുണ്ടാവും. ഇത് പച്ചമുളകും ചേർത്ത് മിക്സിയിട്ട് നന്നായി അരച്ചെടുക്കുക. വെള്ളം ചേർക്കേണ്ട. പച്ചമുളക് ആവശ്യത്തിന് ചേർക്കുക. അരച്ചശേഷം അരപ്പിന് ആവശ്യത്തിന് എരിവില്ലേ എന്നു നോക്കുക. (ഓർക്കുക: ഇനി നമ്മൾ ഈ കറിയിൽ വേറെ എരിവൊന്നും ചേർക്കുന്നില്ല).

ഇനി ഒരു നോൺ സ്റ്റിക്ക് പാനിൽ സ്വല്പം എണ്ണയൊഴിച്ച് പനീർ കഷ്ണങ്ങളിട്ട് ഇളക്കുക. ഇടയ്ക്കിടെ തിരിച്ചും മറിച്ചുമിട്ട് ഒരു ഇളം ബ്രൗൺ നിറമാവുമ്പോൾ കോരി മാറ്റുക. തീ കൂട്ടി വച്ചാൽ പനീർ പെട്ടെന്നു കരിഞ്ഞുപോകും, പറഞ്ഞേക്കാം.

ഇനി, ഇതേ എണ്ണയിൽ കശുവണ്ടിപ്പരിപ്പ് ഇട്ട് വറുത്തു മാറ്റിവയ്ക്കുക. അതിനുശേഷം ജീരകമിട്ട് പൊട്ടുമ്പോൾ സവാള അരിഞ്ഞതും ഇഞ്ചി-വെളുത്തുള്ളി പേസ്റ്റും ചേർത്ത് വഴറ്റുക. കുറച്ച് മല്ലിയിലയും ചേർക്കാം. ഇതിലേക്ക് തക്കാളി കഷ്ണങ്ങൾ ഇട്ട് ഇളക്കുക. തക്കാളി നന്നായി ഉടഞ്ഞുയോജിച്ചാൽ ഗരം മസാലയും മല്ലിപ്പൊടിയും ചേർക്കാം. എല്ലാം കൂടി യോജിച്ചു കഴിഞ്ഞാൽ വാങ്ങാം.

വഴറ്റി വച്ചിരിക്കുന്ന മിശ്രിതവും അണ്ടിപ്പരിപ്പ് വറുത്തതും കൂടി നന്നായി അരച്ചെടുക്കുക.

ഇനി ഒരു ചീനച്ചട്ടി അടുപ്പത്തു വച്ച് അതിലേക്ക് അരപ്പും, പാലക്കും, പാകത്തിന് ഉപ്പും ചേർത്ത് നന്നായി ഇളക്കി യോജിപ്പിക്കുക.

ഇതിലേക്ക് പനീർ കഷ്ണങ്ങൾ ചേർക്കുക. ഈ കറി കുറച്ചു കട്ടിയായിട്ടാണ് ഇരിക്കേണ്ടത്. അയവ് പോരെങ്കിൽ വെള്ളം ചേർക്കരുത്. പകരം കുറച്ചു പാൽ വേണമെങ്കിൽ ചേർക്കാം.

ഒന്നു തിളച്ചാൽ വാങ്ങാം. അധികം തിളപ്പിച്ചാൽ പാലക്കിന്റെ പച്ചനിറം നഷ്ടപ്പെടും. വാങ്ങുന്നതിനുതൊട്ടുമുമ്പ് കുറച്ചു മല്ലിയില അരിഞ്ഞതും ഉലുവയിലയും ഒരു സ്പൂൺ വെണ്ണയും ചേർക്കുക.

പാലക്ക് പനീർ റെഡി! ചൂടോടെ ചപ്പാത്തിയുടെ കൂടെ കഴിക്കുക.

കുറിപ്പ്:

ഈ കറി ഉണ്ടാക്കാൻ എണ്ണയ്ക്കു പകരം വെണ്ണ ഉപയോഗിച്ചാൽ സ്വാദു കൂടും
വാങ്ങുന്നതിനുമുമ്പ് സ്വല്പം ഫ്രഷ് ക്രീം ചേർക്കുന്നതും സ്വാദു കൂട്ടാൻ നല്ലതാണ്.

ഉണ്ടൻ പൊരി

2011-12-05T00:06:00-08:00

നാടൻ ചായക്കടകളിലെ ചില്ലലമാരിയിൽ പഴം പൊരിക്കും സുഖിയനുമൊപ്പം അടുക്കിവച്ചിട്ടുള്ള ഉണ്ടൻ പൊരി കണ്ടിട്ടില്ലേ....? കഴിച്ചിട്ടില്ലേ....?

ഉണ്ണിയപ്പത്തിന്റെ ലളിതരൂപമാണ് ഉണ്ടൻ പൊരിയെന്നു പറയാം.. ഉണ്ണിയപ്പം അരിമാവുകൊണ്ടാണ് ഉണ്ടാക്കുന്നതെങ്കിൽ ഉണ്ടൻപൊരി ഗോതമ്പുമാവുകൊണ്ടാണ് ഉണ്ടാക്കുന്നത്.

എങ്ങിനെയെന്ന് പറയാം:

ആവശ്യമുള്ള സാധനങ്ങൾ:

ഗോതമ്പുപൊടി - ഒരു ഗ്ലാസ്
ശർക്കര - പാകത്തിന് (ഒരു 100-150ഗ്രാം മതിയാവും)
പാളയങ്കോടൻ പഴം - ഒന്ന്
കുറച്ച് തേങ്ങാക്കൊത്ത്
ഏലയ്ക്കാപ്പൊടി
സോഡാപ്പൊടി - ഒരു നുള്ള്
വറുക്കാനാവശ്യമായ വെളിച്ചെണ്ണ

ഉണ്ടാക്കുന്നവിധം:

ശർക്കര ഉരുക്കി അരിച്ച് പാനിയാക്കുക.

ഗോതമ്പുപൊടിയിൽ സോഡാപ്പൊടിയും തേങ്ങാക്കൊത്തും പഴവും ഏലയ്ക്കാപ്പൊടിയും ചേർത്ത് യോജിപ്പിച്ചശേഷം പാകത്തിന് ശർക്കരപ്പാനി ചേർത്ത് നല്ല മയത്തിൽ കുഴച്ചെടുക്കുക.

ഈ മാവ് കുറേശ്ശെയെടുത്ത് ചെറിയ ഉരുളകളാക്കി വെളിച്ചെണ്ണയിലിട്ട് വറുത്തുകോരുക. തീ കുറച്ചു വച്ചാൽ മതി. അല്ലെങ്കിൽ പെട്ടെന്ന് കരിയുമെന്ന് മാത്രമല്ല, അകം വേവുകയുമില്ല..

ഇത്രേയുള്ളു! വളരെ എളുപ്പമല്ലേ...? നാലുമണിച്ചായക്ക് പറ്റിയ വിഭവമാണിത്.

വറുത്തിട്ട അപ്പം

2011-11-14T19:00:00-08:00

ഇങ്ങനെയൊരു പേര് നിങ്ങളാരെങ്കിലും കേട്ടിട്ടുണ്ടോ എന്നെനിക്കറിയില്ല. ഞങ്ങളുടെ വീട്ടില്‍ പണ്ട് ഉണ്ടാക്കിയിരുന്ന ഒരു തട്ടിക്കൂട്ട് പലഹാരമാണിത്. വറുത്തിട്ട അപ്പം എന്ന പേര് പഴയ തലമുറയിലെ ആരുടെയെങ്കിലും കണ്ടുപിടിത്തമായിരുന്നോ അതോ, മറ്റെവിടുന്നെങ്കിലും കിട്ടിയതാണോ എന്നൊന്നും ഒരു പിടിയുമില്ല. പണ്ട് ഞങ്ങള്‍ കുട്ടികള്‍ക്ക് പ്രാതലിനുള്ള പലഹാരമായിട്ടോ, നാലുമണിപ്പലഹാരമായിട്ടോ ഒക്കെ ഇത് തരാറുണ്ട്. നൊസ്റ്റാള്‍ജിയ തലയ്ക്കു പിടിക്കുന്ന അവരസരങ്ങളില്‍ ഞാന്‍ ചിലപ്പോഴൊക്കെ ഇതുണ്ടാക്കും. ഉണ്ടാക്കാന്‍ വളരെയെളുപ്പം. എങ്ങിനെയെന്ന് പറയാം:

ആവശ്യമുള്ള സാധനങ്ങള്‍:

പൊന്നി അരി - ഒരു ഗ്ലാസ് (പച്ചരിയായാലും മതി. പൊന്നി അരിയാണെങ്കില്‍ കുറച്ചുകൂടി മാര്‍ദ്ദവമുണ്ടാകും).
വറുത്തിടാനുള്ള കടുക്, മുളക്, കറിവേപ്പില, ഉഴുന്നുപരിപ്പ്
ആവശ്യത്തിന് വെളിച്ചെണ്ണ
പാകത്തിന് ഉപ്പ്

ഉണ്ടാക്കുന്ന വിധം:

അരി കുതിര്‍ത്തശേഷം നന്നായി അരച്ചെടുക്കുക (ഇഡ്ഡലിമാവിന്റെ അയവില്‍). പാകത്തിന് ഉപ്പ് ചേര്‍ക്കുക. അരി അരയ്ക്കുന്നതിനു പകരം അരിപ്പൊടി കലക്കിയാലും മതി. പക്ഷേ, ഫ്രഷ് ആയി അരച്ചെടുക്കുന്നതാണ് കൂടുതല്‍ സ്വാദ്.
ഒരു നോണ്‍സ്റ്റിക്ക് പാനില്‍ വെളിച്ചെണ്ണയൊഴിച്ച് കടുകും മുളകും കറിവേപ്പിലയും വറുത്തശേഷം ഉഴുന്നുപരിപ്പിട്ട് ചുവക്കെ വറുക്കുക. തീ നന്നായി കുറച്ചശേഷം അരച്ചുവച്ചിരിക്കുന്ന മാവ് സാവധാനത്തില്‍ ഇതിലേക്ക് ഒഴിക്കുക.

അടച്ചുവച്ച് വേവിക്കുക. കുറച്ചു കഴിഞ്ഞ് മറിച്ചിടുക. ഇങ്ങനെ ഇടയ്ക്കിടെ തിരിച്ചും മറിച്ചുമിട്ട് അപ്പം നന്നായി വേവിച്ചെടുക്കണം. രണ്ടു വശവും മൊരിഞ്ഞ് ബ്രൗണ്‍ കളര്‍ ആവുകയും വേണം (വേണമെങ്കിൽ കുറച്ചുകൂടി വെളിച്ചെണ്ണ ഒഴിച്ചുകൊടുക്കാം). അപ്പം നല്ല കനത്തിലായതുകൊണ്ട് വെന്തുകിട്ടാന്‍ കുറച്ചു സമയമെടുക്കും.

വെന്തുകഴിഞ്ഞാല്‍ വാങ്ങാം. കഷ്ണങ്ങളായി മുറിച്ച് വെറുതെയോ, ചട്ണിയോ അച്ചാറോ കൂട്ടിയോ കഴിയ്ക്കുക. ചൂടോടെ കഴിക്കണം. തണുത്താല്‍ കൊള്ളില്ല.

കഞ്ഞിവെള്ളം കൊണ്ട് കൂട്ടാൻ

2011-10-30T23:25:00-07:00

പണ്ടുകാലത്ത് എളുപ്പത്തിൽ തട്ടിക്കൂട്ടുന്ന ഒരു കൂട്ടാനാണിത്. അന്നൊക്കെ പരിപ്പ് മുതലായ ധാന്യവർഗ്ഗങ്ങൾ എപ്പോഴും അടുക്കളയിൽ സ്റ്റോക്കുണ്ടാകണമെന്നില്ല. അപ്പോൾ പരിപ്പു ചേർക്കാതെ ഇങ്ങനെ ചില സൂത്രപ്പണികൾ ഒപ്പിക്കും. അതാണു പതിവ്.

ആവശ്യമുള്ള സാധനങ്ങൾ:

കുത്തരിയുടെ കഞ്ഞിവെള്ളം
കുറച്ച് തേങ്ങ ചിരകിയത്
ചുവന്ന മുളക് - അവശ്യത്തിന്
അരി - ഒരു ടീസ്പൂൺ
ജീരകം
കുറച്ച് ചുവന്നുള്ളി അരിഞ്ഞത്
ഏതെങ്കിലും ചീരയില/മത്തയില/കുമ്പളത്തില അരിഞ്ഞത് - കുറച്ച്
വറുത്തിടാനുള്ള കടുക്, മുളക്, കറിവേപ്പില, വെളിച്ചെണ്ണ.
പാകത്തിന് ഉപ്പ്

ഉണ്ടാക്കുന്ന വിധം:

തേങ്ങ, ജീരകം, മുളക്, അരി എന്നിവ നന്നായി അരച്ചെടുക്കുക.
ചീനച്ചട്ടിയിൽ വെളിച്ചെണ്ണയൊഴിച്ച് കടുകും മുളകും കറിവേപ്പിലയും വറുത്ത ശേഷം അതിലേക്ക് ഉള്ളി അരിഞ്ഞതിട്ട് മൂപ്പിക്കുക. ഇതിൽ കഞ്ഞിവെള്ളം ഒഴിച്ചിളക്കുക.

അരച്ചുവച്ചിരിക്കുന്ന തേങ്ങാമിശ്രിതവും ചേർത്ത് തിളച്ചാലുടൻ അരിഞ്ഞുവച്ചിരിക്കുന്ന ചീരയില (ഞാനിവിടെ കുമ്പളത്തിലയാണ് എടുത്തിരിക്കുന്നത്) ചേർക്കുക.

നന്നായി തിളച്ച് കുറുകിവരുമ്പോൾ വാങ്ങാം.

കഴിഞ്ഞു! ഇത്രേയുള്ളു കാര്യം. വളരെ എളുപ്പമല്ലേ? ഇത് ഇങ്ങനെതന്നെ ഉണ്ടാക്കണമെന്നില്ല. നിങ്ങളുടെ മനോധർമ്മമനുസരിച്ച് ചേരുവയിൽ മാറ്റങ്ങൾ വരുത്താം. ഉദാഹരണത്തിന്, സ്വല്പം പുളി/മോര് ചേർത്ത്, അല്ലെങ്കിൽ മറ്റെന്തെങ്കിലും കഷ്ണം ചേർത്ത്...അങ്ങനെയങ്ങനെ.....

ക്യാരറ്റ് ഹൽ‌വ

2011-10-26T03:26:00-07:00

ഉത്തരേന്ത്യക്കാരുടെ ദീപാവലി മധുരങ്ങളിൽ പ്രധാനപ്പെട്ട ഒന്നാണ് ക്യാരറ്റ് ഹൽ‌വ അഥവാ ഗാജർ കാ ഹൽ‌വ. സാധാരണ ഹൽ‌വ പോലെ മുറിച്ചെടുക്കാവുന്ന രീതിയിലല്ല ഇതുണ്ടാക്കുന്നത്. ശർക്കരപ്പായസമൊക്കെ പോലെ സ്പൂൺ കൊണ്ടെടുത്ത് കഴിയ്ക്കാവുന്ന പരുവത്തിലാണ് ക്യാരറ്റ് ഹൽ‌വ ഉണ്ടാക്കുക. വളരെ സ്വാദിഷ്ടമായ ഒരു വിഭവമാണിത്. ഉണ്ടാക്കാൻ അത്ര ബുദ്ധിമുട്ടില്ലതാനും.

ആവശ്യമുള്ള സാധനങ്ങൾ:

ക്യാരറ്റ് - അരക്കിലോ
വെണ്ണ/നെയ്യ് - 100 ഗ്രാം
പാൽ - അര ലിറ്റർ
പഞ്ചസാര - 150 ഗ്രാം. (നിങ്ങളുടെ പാകത്തിന് കൂട്ടുകയോ കുറയ്ക്കുകയോ ചെയ്യാം)
ഏലയ്ക്കാപ്പൊടി - ഒന്നര സ്പൂൺ
അണ്ടിപ്പരിപ്പ്, ഉണക്കമുന്തിരി, ബദാം

ഉണ്ടാക്കുന്ന വിധം:

അണ്ടിപ്പരിപ്പും ബദാമും ചെറിയ കഷ്ണങ്ങളായി നുറുക്കിയശേഷം (എണ്ണയില്ലാതെ) വറുത്തു വയ്ക്കുക.
ക്യാരറ്റ് കഴുകി വൃത്തിയാക്കി ഗ്രേറ്റ് ചെയ്യുക.

ഒരു നോൺസ്റ്റിക്ക് പാനിൽ വെണ്ണ/നെയ്യ് ഇട്ട് ഉരുകുമ്പോൾ ക്യാരറ്റിട്ട് വഴറ്റുക. തുടർച്ചയായി ഇളക്കണം.

ക്യാരറ്റ് ഒന്നു മൃദുവായാൽ (ഒരു 10 മിനിട്ടൊക്കെ മതിയാവും) പാൽ ഒഴിക്കുക. കുറച്ചു കണ്ടൻസ്ഡ് മിൽക്കും ചേർക്കുകയാണെങ്കിൽ കൂടുതൽ സ്വാദുണ്ടാവും.

കുറച്ചുനേരം കഴിഞ്ഞാൽ പാൽ കുറുകി, മിശ്രിതം കട്ടിയാവും.

ഇനി പഞ്ചസാര ചേർക്കാം. (പഞ്ചസാര കുറേശ്ശേ ചേർത്ത് നിങ്ങളുടെ പാകത്തിനാക്കുക. കുറിച്ചിരിക്കുന്ന അളവ് പോരെങ്കിൽ കൂടുതൽ ചേർക്കാവുന്നതാണ്).

ഈ ഘട്ടത്തിൽ, അണ്ടിപ്പരിപ്പ്, ബദാം, ഉണക്കമുന്തിരി, ഏലയ്ക്കാപ്പൊടി എന്നിവയും ചേർക്കാം. തുടർച്ചയായി ഇളക്കണം.

കുറച്ചുകഴിഞ്ഞാൽ, ചേരുവകളെല്ലാം യോജിച്ച് കുഴഞ്ഞ പരുവത്തിലാവാൻ തുടങ്ങും. വെള്ളമയം വറ്റി, മിശ്രിതം പാനിൽ കിടന്ന് ഉരുണ്ടുകളിക്കുന്ന പരുവത്തിൽ വാങ്ങാം.

ഇത്രേയുള്ളു! ക്യാരറ്റ് ഹൽ‌വ റെഡി!

എല്ലാവർക്കും ദീപാവലി ആശംസകൾ.....

വഴുതനങ്ങ മസാല

2011-10-16T17:57:00-07:00

വഴുതനങ്ങ കൊണ്ടുള്ള ഈ മസാലക്കറി തെലുങ്കരുടെ വിശേഷവിഭവമാണ്. “ബൈങ്കന്‍/ബൈഗന്‍ മസാല” എന്നാണ് അവര്‍ പറയുന്നത്. ഇതുണ്ടാക്കുന്നതെങ്ങനെയെന്ന് പറയാം:

ആവശ്യമുള്ള സാധനങ്ങള്‍:

ചെറിയ ഉണ്ടവഴുതനങ്ങ - അര കിലോ (ഏറ്റവും ചെറുത് നോക്കിയെടുക്കുക)
കപ്പലണ്ടി - 75 ഗ്രാം
എള്ള് - ഒരു പിടി
സവാള - (ഇടത്തരം) രണ്ട്
പച്ചമുളക് - 3
ഇഞ്ചി-വെളുത്തുള്ളി പേസ്റ്റ് - ഒരു ടീ സ്പൂണ്‍
തേങ്ങ ചിരകിയത് - രണ്ട് വലിയ സ്പൂണ്‍
മഞ്ഞള്‍പ്പൊടി - പാകത്തിന്
മുളകുപൊടി - പാകത്തിന്
ഗരം മസാല - ഒരു റ്റീസ്പൂണ്‍
ജീരകം - അര ടീസ്പൂണ്‍
ശര്‍ക്കര - തീരെ ചെറിയ ഒരു കഷ്ണം
പുളി - ഒരു നെല്ലിക്കാ വലുപ്പം
വറുക്കാനുള്ള കടുക്, മുളക്, കറിവേപ്പില
എതെങ്കിലും പാചക എണ്ണ - ആവശ്യത്തിന് (ഈ കറിക്ക് വെളിച്ചെണ്ണ അനുയോജ്യമല്ല)
പാകത്തിന് ഉപ്പ്
മല്ലിയില

ഉണ്ടാക്കുന്ന വിധം:

കപ്പലണ്ടിയും എള്ളും വെവ്വേറെ വറുത്തശേഷം തരുതരുപ്പായി പൊടിച്ചുവയ്ക്കുക.

വഴുതനങ്ങയുടെ ഞെട്ട് മാറ്റിയശേഷം, ഞെട്ടുഭാഗം വിട്ടുപോരാത്ത രീതിയില്‍ നാലാക്കി മുറിക്കുക. (അഥവാ വിട്ടുപോന്നാലും പേടിക്കേണ്ട. പോലീസ് പിടിക്കുകയൊന്നുമില്ല).

ഒരു നോണ്‍ സ്റ്റിക്ക് പാനില്‍ എണ്ണയൊഴിച്ച് വഴുതനങ്ങയിട്ട് ചെറുതീയില്‍ നന്നായി വഴറ്റുക. അടച്ചു വച്ചാല്‍ ഉള്‍ഭാഗം നന്നായി വെന്തുകിട്ടുകയും ചെയ്യും. എല്ലാ വശവും മൊരിയാനായി ഇടയ്ക്കിടെ അടപ്പുമാറ്റി തിരിച്ചും മറിച്ചുമിടണം. നന്നായി മൊരിഞ്ഞ് ബ്രൗണ്‍ നിറമാവണം.

ദാ കണ്ടോ, വഴുതനങ്ങ കിടക്കുന്ന കിടപ്പ്! പാവം!

വഴറ്റിയ വഴുതനങ്ങ മാറ്റിയശേഷം അതേ പാനില്‍ എണ്ണയൊഴിച്ച് കടുകും മുളകും കറിവേപ്പിലയും വറുക്കുക. ഇതിലേക്ക് ജീരകം ചേർത്ത് മൂത്തമണം വന്നാല്‍ സവാള ചെറുതായി അരിഞ്ഞതും പച്ചമുളക് നീളത്തിലരിഞ്ഞതും ഇഞ്ചി-വെളുത്തുള്ളി പേസ്റ്റും ഇട്ട് വഴറ്റുക. ഒരുവിധം വഴണ്ടുവരുമ്പോള്‍ തേങ്ങയും ഇട്ടിളക്കുക.

അതിലേക്ക് മഞ്ഞൾപ്പൊടി, മുളകുപൊടി, ഗരം മസാല എന്നിവ ചേർത്തിളക്കിയശേഷം പുളി പിഴിഞ്ഞെടുത്ത വെള്ളവും പാകത്തിന് ഉപ്പും ശർക്കരയും ചേർക്കുക.

അതിനുശേഷം കപ്പലണ്ടി-എള്ള് മിശ്രിതം ചേർത്ത് നന്നായി യോജിപ്പിക്കുക. (ഈ മിശ്രിതമാണ് ഈ കറിയിലെ താരം).

അവസാനം വഴറ്റിവച്ചിരിക്കുന്ന വഴുതനങ്ങയും ചേർത്തിളക്കുക.

എല്ലാം കൂടി നന്നായി യോജിച്ച്, മൊരിഞ്ഞുകിട്ടാനായി ചെറുതീയിൽ കുറച്ചുനേരം കൂടി വയ്ക്കുക. വാങ്ങുന്നതിനു മുമ്പ് മല്ലിയില പൊടിയായി അരിഞ്ഞത് ചേർക്കുക.

വഴുതനങ്ങ മസാല റെഡി! വളരെ രുചികരമാണ് ഇത്. വഴുതനങ്ങ ഇഷ്ടമല്ലാത്തവർക്കുപോലും ഇഷ്ടപ്പെടും. പരീക്ഷിച്ചുനോക്കൂ.... (തെലുങ്കർ വളരെയധികം എണ്ണ ഉപയോഗിച്ചുകൊണ്ടുള്ള മറ്റൊരു രീതിയിലാണ് ഉണ്ടാക്കുന്നത്. ആ രീതി ഞാനൊന്നു മാറ്റിയെന്നു മാത്രം).

ചപ്പാത്തിക്ക് അനുയോജ്യമായ കറിയാണിത്.

തക്കാളി അച്ചാർ

2011-10-04T18:30:00-07:00

തക്കാളി അച്ചാര്‍ തെലുങ്കരുടെ പ്രിയപ്പെട്ട വിഭവമാണ്. ഹൈദ്രാബാദില്‍ വച്ച് അമ്മയാണിതു ആദ്യം പഠിച്ചെടുത്തത്. അമ്മയില്‍ നിന്ന് ഞാനും. പണ്ട് തറവാട്ടില്‍ വച്ച് അമ്മ ഇതൊരു സ്പെഷ്യല്‍ വിഭവമായി ഉണ്ടാക്കാറുണ്ട്. പണ്ടുമുതലേ വെളുത്തുള്ളി എന്നു പറഞ്ഞാല്‍ എന്തോ അറപ്പുള്ള ഒരു സാധനം പോലെയാണ് വീട്ടിൽ മറ്റെല്ലാവര്‍ക്കും. എന്നാല്‍, വെളുത്തുള്ളി ചേര്‍ക്കുന്ന വിഭവമാണിതെങ്കിലും ഇതിനോടു മാത്രം എല്ലാവര്‍ക്കും വലിയ ഇഷ്ടമായിരുന്നു. അമ്മമ്മ തമാശയായി ഈ അച്ചാറിന് “റാമന്‍” എന്നാണ് പേരു പറഞ്ഞിരുന്നത്. (കാരണം എന്താണെന്ന് അറിയില്ല). എന്തായാലും, അമ്മമ്മ പറഞ്ഞുപറഞ്ഞു പിന്നീട് എല്ലാവരും റാമന്‍ എന്ന പേര് സ്ഥിരമാക്കി.
തെലുങ്കര്‍ തക്കാളി അച്ചാറുണ്ടാക്കുന്ന രീതി അല്പം ബുദ്ധിമുട്ടുള്ളതാണ്. എളുപ്പവഴിയില്‍ ക്രിയ ചെയ്യുന്ന രീതിയാണ് ഇവിടെ പറയുന്നത്.

ആവശ്യമുള്ള സാധനങ്ങള്‍:

തക്കാളി - അഞ്ച് കിലോ
പുളി - കാല്‍ കിലോ
ഉപ്പ് - പാകത്തിന്
മഞ്ഞള്‍പ്പൊടി - 2-3 സ്പൂണ്‍
ഉലുവാപ്പൊടി - 3 സ്പൂണ്‍
കായം പൊടി - 5 സ്പൂണ്‍
മുളകുപൊടി - 125-150 ഗ്രാം (നിങ്ങളുടെ പാകത്തിന്) കാശ്മീരി മുളകുപൊടിയുടെ അളവാണ് ഇത്. സാധാരണ മുളകുപൊടിയാണെങ്കില്‍ അളവ് ഇതിലും കുറച്ചു മതിയാവും. കുറേശ്ശേ ചേര്‍ത്ത് പാകത്തിനാക്കുക.
നല്ലെണ്ണ - അര ലിറ്റര്‍
വെളുത്തുള്ളി - 100 ഗ്രാം (കൂടുതല്‍ വേണമെങ്കില്‍ ആവാം)
ഉഴുന്നുപരിപ്പ് - ഒരു പിടി
കടലപ്പരിപ്പ് - ഒരു പിടി
ചെറുപയര്‍ പരിപ്പ് - ഒരു പിടി
കടുക്, മുളക്, കറിവേപ്പില.

(നമ്മുടെ രീതിക്കനുസരിച്ച് മാറ്റിയെടുത്ത അളവുകളാണ് ഇതൊക്കെ. തെലുങ്കര്‍ ഉപ്പും പുളിയും എരിവും എണ്ണയുമൊക്കെ ഇതിനേക്കാളും അധികം ചേര്‍ക്കും).

ഉണ്ടാക്കുന്ന വിധം:

തക്കാളി കഴുകി, ചെറിയ കഷ്ണങ്ങളായി നുറുക്കുക.

പുളി കുറച്ചു വെള്ളത്തില്‍ കുതിര്‍ത്ത്, നാരും കുരുവുമൊക്കെ ഉണ്ടെങ്കില്‍ അതൊക്കെ മാറ്റി, വൃത്തിയാക്കി വയ്ക്കുക. പിഴിയേണ്ട.

നല്ല കട്ടിയുള്ള ഒരു പാത്രത്തില്‍ തക്കാളിക്കഷ്ണങ്ങള്‍ പുളിയും മഞ്ഞള്‍പ്പൊടിയും ഉപ്പും ചേര്‍ത്ത് വേവിക്കുക. (വെള്ളം ഒട്ടും ചേര്‍ക്കേണ്ട ആവശ്യമില്ല). അടിയില്‍ പിടിക്കാതിരിക്കാന്‍ ഇടയ്ക്കിടെ നന്നായി ഇളക്കിക്കൊടുക്കണം. തീ കുറച്ചു വച്ചാല്‍ മതി. തക്കാളിയും പുളിയും കൂടി വെന്തുകുഴഞ്ഞ് വെള്ളം ഒരുവിധം വറ്റിയ പരുവത്തില്‍ വാങ്ങിവയ്ക്കുക.
(ഇവിടെയാണ് തെലുങ്കരുടെ രീതി വ്യത്യാസമുള്ളത്. തക്കാളി വേവിക്കുന്ന പരിപാടിയല്ല അവരുടേത്. തക്കാളിയും പുളിയും കൂടി മഞ്ഞള്‍പ്പൊടിയും ഉപ്പും പുരട്ടി ഒരു ദിവസം വയ്ക്കും. പിറ്റേദിവസം കഷ്ണങ്ങള്‍ വെയിലത്ത് നിരത്തിവച്ച് ഉണക്കും. ഇതില്‍ ഊറിവന്നിട്ടുള്ള വെള്ളവും വെറെ പാത്രത്തില്‍ വെയിലത്തു വയ്ക്കും. വെള്ളം മുഴുവന്‍ വറ്റിത്തീരുന്നതുവരെ ഇങ്ങനെ ദിവസേന വെയിലത്തു വയ്ക്കും. അവസാനം എല്ലാംകൂടി ആട്ടുകല്ലില്‍ വച്ച് ഇടിച്ചെടുക്കും. എല്ലാം കൂടി മൂന്നുനാലു ദിവസത്തെ പരിപാടിയാണിത്. ഇതിനുപകരമാണ് നമ്മള്‍ വേവിച്ച് വെള്ളം വറ്റിക്കുന്നത്). ഓക്കെ?

വെളുത്തുള്ളി തൊലി കളഞ്ഞ് അല്ലികളാക്കി വയ്ക്കുക.

ഇനി, ചുവടു കട്ടിയുള്ള ഒരു ചീനച്ചട്ടിയില്‍ നല്ലെണ്ണ ഒഴിച്ച്, അതില്‍ കടുകും മുളകും കറിവേപ്പിലയും മൂപ്പിക്കുക. ഇതിലേക്ക് പരിപ്പുകള്‍(കടലപ്പരിപ്പ്, ചെറുപയര്‍പരിപ്പ്, ഉഴുന്നുപരിപ്പ്) ചേര്‍ത്ത് ചുവക്കെ വറുക്കുക. ഇതില്‍ വെളുത്തുള്ളി ഇട്ട് വഴറ്റുക.

വെളുത്തുള്ളി മൂത്ത മണം വന്നാല്‍, വേവിച്ചുവച്ചിരിക്കുന്ന തക്കാളി മിശ്രിതം ചേര്‍ത്ത് യോജിപ്പിക്കുക. ഇതിലേക്ക് മുളകുപൊടിയും ഉലുവാപ്പൊടിയും കായവും കൂടി ചേര്‍ത്ത് നന്നായി യോജിപ്പിക്കുക. ഉപ്പും എരിവുമൊക്കെ പാകത്തിനാണൊ എന്ന് നോക്കുക.

ഇനി, എണ്ണയില്‍ ഈ മിശ്രിതം നന്നായി വരട്ടിയെടുക്കണം. (ഒരു നോണ്‍സ്റ്റിക് പാത്രമാണെങ്കില്‍ എളുപ്പമുണ്ട്). എണ്ണ പലതവണകളായി ചേര്‍ത്തു കൊടുക്കുക. തീ കുറച്ചുവച്ചാല്‍ മതി. എണ്ണ ചേര്‍ക്കുന്നതിനനുസരിച്ച് ഇടയ്ക്കിടെ നന്നായി ഇളക്കണം. അവസാനം വെള്ളമൊക്കെ നിശ്ശേഷം വറ്റി, എണ്ണ തെളിഞ്ഞുവരാന്‍ തുടങ്ങിയാല്‍ വാങ്ങിവയ്ക്കാം. ആസ്വാദ്യകരമായ ഒരു മണമായിരിക്കും ഈ സമയത്ത് അടുക്കള മുഴുവന്‍.

തണുത്താല്‍ കുപ്പികളിലാക്കാം. മുകള്‍പ്പരപ്പില്‍ എണ്ണ തെളിഞ്ഞു നില്‍ക്കണം. എണ്ണ പോരെന്നു തോന്നുന്നുണ്ടെങ്കില്‍ കുറച്ചു നല്ലെണ്ണ ചൂടാക്കി തണുപ്പിച്ചശേഷം മുകളില്‍ ഒഴിക്കാം. (എണ്ണ പച്ചയ്ക്ക് ഒഴിയ്ക്കരുത്). അധികകാലം സൂക്ഷിക്കണമെന്നുണ്ടെങ്കില്‍ ഫ്രിഡ്ജില്‍ വയ്ക്കുന്നതാണ് നല്ലത്. തെലുങ്കരുടെ രീതിയില്‍ വെയിലത്തുവച്ച് ഉണക്കിയൊക്കെ ഉണ്ടാക്കിയാല്‍ എത്രകാലം വേണമെങ്കിലും കേടാവാതെ ഇരിക്കുമെന്നൊരു ഗുണമുണ്ട്.

വളരെ രുചികരമാണ് ഈ അച്ചാര്‍. ചോറിനും ചപ്പാത്തിക്കും ഇഡ്ഡലിക്കും ദോശക്കുമൊക്കെ പറ്റിയ കൂട്ടാണിവന്‍.

അസ്ത്രക്കെട്ട് (ചേമ്പിലക്കെട്ട്)

2011-09-21T19:00:00-07:00

ചേമ്പില കീറിയെടുത്ത് ചുരുട്ടി ചെറിയ കെട്ടുകളാക്കുന്നതിനേയണ് അസ്ത്രക്കെട്ട് എന്നു പറയുന്നത്. കുറച്ചു ബുദ്ധിമുട്ടുള്ള പണിയാണ് കേട്ടോ ഇത്. ബുദ്ധിമുട്ടെന്നു പറഞ്ഞാൽ....മല മറിക്കുന്ന പണിയൊന്നുമല്ല. പെട്ടെന്നു ചെയ്തു തീർക്കാൻ പറ്റില്ലെന്നു മാത്രം.
എന്തായാലും, എങ്ങിനെയാണിത് ചെയ്യുന്നതെന്നു പറയാം:

ആവശ്യത്തിന് ചേമ്പില സംഘടിപ്പിക്കുക. തളിരില നോക്കി എടുക്കണം.

ഇനി, ചേമ്പില ദീർഘചതുരാകൃതിയിലുള്ള കഷ്ണങ്ങളാ‍യി കീറിയെടുക്കുക. (ഇതിന് വേണമെങ്കിൽ കത്രികപ്രയോഗം നടത്താം) .
ഓരോ കഷ്ണവും തെറുത്തെടുത്തശേഷം നടുക്ക് കെട്ടുണ്ടാക്കുക. ഇതാണ് അസ്ത്രക്കെട്ട്. (ചെയ്തു പരിചയമുള്ളവർക്ക് നല്ല ഭംഗിയായി ചെയ്യാൻ പറ്റും. ഞാൻ ചെയ്തത് അത്ര ഭംഗിയായിട്ടില്ല)

ഇങ്ങനെ ആവശ്യത്തിന് അസ്ത്രക്കെട്ടുകൾ തയ്യാറാക്കുക.
ഇനി ഇതുകൊണ്ട് തോരനോ, മൊളോഷ്യമോ, പുളിങ്കറിയോ ഒക്കെ ഉണ്ടാക്കാം.

അസ്ത്രക്കെട്ടുകൊണ്ട് ഞാൻ ഒരു തോരൻ ഉണ്ടാക്കി.

ഉണ്ടാക്കിയ വിധം:

സാധാരണ തോരൻ ഉണ്ടാക്കുന്നതുപോലെ തന്നെ.

ആദ്യം തന്നെ കുറച്ചു തേങ്ങയും കാന്താരിമുളകും ജീരകവും ഉള്ളിയും കൂടി ചതച്ചുവച്ചു.

എന്നിട്ട് വെളിച്ചെണ്ണയിൽ കടുകും മുളകും കറിവേപ്പിലയും വറുത്തശേഷം കുറച്ചു ഉഴുന്നുപരിപ്പിട്ട് മൂപ്പിച്ചു. അതിലേക്ക് അസ്ത്രക്കെട്ടുകൾ ഇട്ട്, കുറച്ചു പുളിവെള്ളം തളിച്ചശേഷം തേങ്ങാമിശ്രിതവും ചേർത്തിളക്കി ചെറുതീയിൽ അടച്ചുവച്ചു. (ചേമ്പിലയ്ക്ക് ചൊറിച്ചിലെങ്ങാനും ഉണ്ടെങ്കിൽ അത് പോവാനാണ് പുളിവെള്ളം തളിക്കുന്നത്). ചൂടുതട്ടുമ്പോഴേക്കും അസ്ത്രക്കെട്ടുകളെല്ലാം ശൂ..ന്നങ്ങ് ചൊട്ടി, നേർപകുതിയാവും. (ഉപ്പ് ഈ സമയത്ത് ചേർത്താൽ മതി. ആദ്യത്തെ അളവുപ്രകാരം ഇട്ടാൽ ചിലപ്പോൾ അധികമായിപ്പോവും). വെള്ളം നന്നായി വറ്റിയശേഷം അല്പനേരം കൂടി ചെറുതീയിലിട്ട് ഇളക്കിയിട്ട് തോരൻ വാങ്ങാം. നിങ്ങളുടെ താല്പര്യമനുസരിച്ച് ചേരുവകളിൽ മാറ്റങ്ങൾ വരുത്താവുന്നതാണ്.

അസ്ത്രക്കെട്ട് കൊണ്ടുണ്ടാക്കുന്ന ഈ തോരൻ വളരെ രുചികരമാണ്.

ഇത് അസ്ത്രക്കെട്ട് കൊണ്ടുണ്ടാക്കിയ മൊളോഷ്യം. പരിപ്പ് വേവിച്ചതിൽ അസ്ത്രക്കെട്ടുകളിട്ട് വേവിച്ച്, തേങ്ങയും കാന്താരിമുളകും കൂടി അരച്ചത് ചേർത്ത് യോജിപ്പിച്ചശേഷം വാങ്ങിവച്ച് കറിവേപ്പിലയും വെളിച്ചെണ്ണയും ചേർത്തു. അത്രതന്നെ.

നാരങ്ങാക്കറി

2011-09-08T01:14:00-07:00

സദ്യകൾക്ക് ഒഴിച്ചുകൂടാനാവാത്ത ഈ അച്ചാർ വടുകപ്പുളി നാരങ്ങകൊണ്ടാണ് ഉണ്ടാക്കുന്നത്. ഓണം പ്രമാണിച്ച് ഞാനും ഉണ്ടാക്കി കുറച്ചു നാരങ്ങാക്കറി. വളരെ എളുപ്പമാണിത്.

ആവശ്യമുള്ള സാധനങ്ങൾ:

വടുകപ്പുളിനാരങ്ങ - ഇടത്തരം വലുപ്പമുള്ളത് ഒന്ന്
പച്ചമുളക് - ഏകദേശം പത്തെണ്ണം
മുളകുപൊടി - ഞാൻ ഏതാണ്ട് 6 വലിയ സ്പൂൺ എടുത്തു
കായം‌പൊടി - രണ്ട് സ്പൂൺ
ഉലുവാപ്പൊടി - അര സ്പൂൺ
പാകത്തിന് ഉപ്പ്, തിളപ്പിച്ചാറിയ വെള്ളം

ഉണ്ടാക്കുന്ന വിധം:

നാരങ്ങ കഴുകി വൃത്തിയാക്കി, നെടുകെ നാലാക്കി മുറിച്ചശേഷം കനം കുറഞ്ഞ സ്‌ലൈസുകളാക്കുക. ഇനി ഈ സ്‌ലൈസുകൾ ചെറിയ കഷ്ണങ്ങളാക്കുക.

പച്ചമുളക് വട്ടത്തിൽ അരിയുക.

നാരങ്ങാക്കഷ്ണങ്ങളും പച്ചമുളകും കൂടി ഉപ്പ് ചേർത്ത് ഒരു ദിവസം അടച്ചു വയ്ക്കുക. അടുത്ത ദിവസം മുളകുപൊടിയും കായവും ഉലുവാപൊടിയും ചേർത്ത് നന്നായി ഇളക്കി യോജിപ്പിച്ചശേഷം തിളപ്പിച്ചാറിയ വെള്ളമൊഴിച്ച് പാകത്തിന് അയവിലാക്കുക.

നാരങ്ങാക്കറി റെഡി! ഇത്രേയുള്ളു!
ചിലർ ഇതിൽ കടുകും മുളകും കറിവേപ്പിലയും വറുത്തിടാറുണ്ട്. ഞങ്ങളുടെ വീട്ടിൽ പതിവില്ല.

സദ്യയ്ക്ക് ഇലയുടെ ഇടത്തേമൂലയിൽ പുളിയിഞ്ചിയുടേയും കടുമാങ്ങയുടേയുമൊക്കെ കൂട്ടത്തിൽ നാരങ്ങാക്കറിയെ പ്രതിഷ്ഠിക്കുക. പായസം മൂക്കുമുട്ടെ അകത്താക്കാൻ ഇടയ്ക്കിടെ നാരങ്ങാക്കറി തൊട്ടുനക്കുക.

അപ്പോ ശരി, എല്ലാവർക്കും ഓണാശംസകൾ....

പത്തില തോരൻ

2011-08-14T20:35:00-07:00

ചിങ്ങം പൂക്കളുടെ മാസമാണെങ്കിൽ, കർക്കിടകം പച്ചപ്പിന്റെ, ഇലകളുടെ മാസമാണ്. അതെ, നിത്യജീവിതത്തിൽ ഇലകൾക്ക് ഏറ്റവും പ്രാധാന്യമുള്ള മാസം. കർക്കിടകത്തിൽ ദശപുഷ്പം ചൂടുന്ന പതിവുണ്ടായിരുന്നു പണ്ട്. ദശപുഷ്പം എന്നു പറയുമെങ്കിലും യഥാർത്ഥത്തിൽ ഇത് പത്ത് ചെടികളാണ്. മുക്കൂറ്റിയിലയുടെ ചാറ് ചാലിച്ചെടുത്ത് പൊട്ടു തൊടുന്നതും, മൈലാഞ്ചിയുടെ ഇല അരച്ച് കയ്യിലിടുന്നതുമൊക്കെ കർക്കിടകത്തിൽ തന്നെ. ഭക്ഷണകാര്യത്തിലും സ്ഥിതി മറിച്ചായിരുന്നില്ല. വിവിധതരം ഇലകളുടെ ധാരാളിത്തം കൊണ്ട് സമ്പന്നമായിരുന്നു പണ്ട് പഞ്ഞമാസക്കാലത്തെ വിഭവങ്ങൾ. ഒന്നും കാശുകൊടുത്ത് വാങ്ങുന്നവയല്ല. എല്ലാം തൊടിയിൽ നിന്ന് അപ്പപ്പോൾ പറിച്ചെടുക്കുന്നതാണ്. പഞ്ഞമാസക്കാലത്തെ പ്രധാന വിഭവമാണ് പത്തില തോരൻ. എന്നു വച്ചാൽ പത്തുതരം ഇലകൾ കൊണ്ടുള്ള തോരൻ എന്നർത്ഥം. ഭക്ഷ്യയോഗ്യമായ ഏത് ഇലയും എടുക്കാം. പയർ, തഴുതാമ, മത്ത, കുമ്പളം, ചീര, തകര എന്നു തുടങ്ങി ചൊറിയൻ തുമ്പ(കൊടിത്തൂവ) വരെ എടുക്കുന്നവരുണ്ട്! ( സംഗതി അപാര ടേസ്റ്റാണെന്നാണ് കേൾവി. പക്ഷേ അരിഞ്ഞെടുക്കുന്ന കാര്യം ആലോചിച്ചാൽ തന്നെ നമുക്ക് കൈ ചൊറിയാൻ തുടങ്ങും അല്ലെ..? ).

ഏതായാലും ഞാനും ഉണ്ടാക്കി ഒരു പത്തിലത്തോരൻ. എല്ലാം തൊടിയിൽ നിന്നും തോട്ടുവക്കത്തുനിന്നുമൊക്കെ പറിച്ചെടുത്തതുതന്നെ.

ഞാനിവിടെ എടുത്തിരിക്കുന്ന ഇലകൾ ഏതൊക്കെയാണെന്നു പറയാം. നോക്കൂ:

1. കോവലിന്റെ തളിരില

2. മത്തയുടെ തളിരില (പൂവും എടുത്തു)

3. തഴുതാമ

4. മുള്ളൻ‌ചീര

5. കാട്ടുതാൾ

6. കുളത്താൾ

7. തകര

8. പയറില

9. സാമ്പാർ ചീര

10. കുമ്പളത്തില

ഉണ്ടാക്കുന്ന വിധം :

ഇലകളെല്ലാം കഴുകി വൃത്തിയാക്കിയശേഷം ചെറുതായി അരിയുക. (ഓരോന്നും ഓരോ പിടി വീതം).

കുറച്ചു തേങ്ങയും കാന്താരിമുളകും ചുവന്നുള്ളിയും ജീരകവും കൂടി ഒന്നു ചതച്ചെടുക്കുക (നിങ്ങളുടെ അഭിരുചിക്കനുസരിച്ച് വെളുത്തുള്ളിയോ, ഇഞ്ചിയോ ഒക്കെ ചേർക്കാം).

വെളിച്ചെണ്ണയിൽ കടുകും മുളകും കറിവേപ്പിലയും കുറച്ചു ഉഴുന്നുപരിപ്പും ഇട്ടുമൂപ്പിച്ച ശേഷം ഇതിലേയ്ക്ക് ഇലകൾ അരിഞ്ഞതും മഞ്ഞൾപ്പൊടിയും ചേർത്ത് ഇളക്കി, ചെറുതീയിൽ കുറച്ചുനേരം അടച്ചുവയ്ക്കുക( വെള്ളം ഒഴിയ്ക്കേണ്ട ആവശ്യമില്ല).
ഇനി തുറന്നുനോക്കിയാൽ ഇലയിലെ വെള്ളമൊക്കെ വറ്റി പകുതിയായി ചുരുങ്ങിയിരിയ്ക്കുന്നതു കാണാം. ഉപ്പ് ഈ സമയത്ത് ചേർത്താൽ മതി.( ഇലയുടെ അദ്യത്തെ അളവുപ്രകാരം ചേർത്താൽ ഒരുപക്ഷേ ഉപ്പ് അധികമായെന്നുവരും). ഇനി ചതച്ചുവച്ചിരിയ്ക്കുന്ന തേങ്ങാമിശ്രിതം ചേർത്ത് നന്നായിളക്കി അഞ്ചുമിനിട്ടിനു ശേഷം വാങ്ങിവയ്ക്കാം.

വളരെ സ്വാദിഷ്ടമായ പത്തിലത്തോരൻ റെഡി! ഈ തോരനും, ഉപ്പുമാങ്ങ അരച്ചുകലക്കിയും, ചെത്തുമാങ്ങയും, ചുട്ടപപ്പടവും പിന്നെ മഴയും ബെസ്റ്റ് കോമ്പിനേഷനാണ് !!

വെണ്ടയ്ക്ക-പരിപ്പ് പുളിങ്കറി

2011-07-25T23:46:00-07:00

വെണ്ടയ്ക്ക കൊണ്ട് വളരെ ലളിതമായ ഒരു കൂട്ടാനിതാ:

ആവശ്യമുള്ള സാധനങ്ങള്‍:

വെണ്ടയ്ക്ക - 8-10 എണ്ണം മതിയാവും.നീളം കൂടിയതാണെങ്കില്‍ എണ്ണം കുറയ്ക്കാം. വെണ്ടയ്ക്ക അധികമായാല്‍ കൂട്ടാന്‍ വല്ലാതെ കട്ടിയായിപ്പോവും.
പരിപ്പ് - 100 ഗ്രാം
തേങ്ങ - ഒരു മുറിയുടെ പകുതി
കാന്താരിമുളക് / പച്ചമുളക് - ആവശ്യത്തിന്
മുളകുപൊടി, മഞ്ഞള്‍പ്പൊടി
പുളി, ഉപ്പ് - പാകത്തിന്.
വറുത്തിടാനുള്ള കടുക്, മുളക്, കറിവേപ്പില, വെളിച്ചെണ്ണ

ഉണ്ടാക്കുന്ന വിധം:

വെണ്ടയ്ക്ക കഷ്ണങ്ങളാക്കിവയ്ക്കുക.(സാമ്പാറിലിടാന്‍ നുറുക്കുന്നതുപോലെ).

തേങ്ങ കാന്താരിമുളക് ചേര്‍ത്ത് നന്നായി അരച്ചുവയ്ക്കുക. (പച്ചമുളകായാലും മതി. എങ്കിലും, കാന്താരിമുളക് ചേര്‍ക്കുന്നതാണ് കൂടുതല്‍ സ്വാദ്)

പരിപ്പ് പ്രഷര്‍ക്കുക്കറില്‍ വേവിച്ചശേഷം നന്നായി ഉടച്ചെടുക്കുക. ഇതില്‍ കുറച്ചു വെള്ളമൊഴിച്ച്, ഉപ്പും മുളകുപൊടിയും മഞ്ഞള്‍പ്പൊടിയും ചേര്‍ത്ത് അടുപ്പത്തു വയ്ക്കുക. തീ കുറച്ചു വച്ചാല്‍ മതി. നന്നായി തിളച്ചാല്‍ വെണ്ടയ്ക്ക കഷ്ണങ്ങള്‍ ചേര്‍ക്കുക.

വെണ്ടയ്ക്ക വെന്തു വരുമ്പോള്‍ പുളി പിഴിഞ്ഞത് ചേര്‍ക്കുക.

അവസാനമായി തേങ്ങ അരച്ചതും ചേര്‍ത്ത് യോജിപ്പിച്ച് ഒന്നു തിളച്ചാല്‍ വാങ്ങാം. വെളിച്ചെണ്ണയില്‍ വറുത്ത കടുകും മുളകും കറിവേപ്പിലയും കൂടി ചേര്‍ത്താല്‍ കൂട്ടാന്‍ റെഡി. വെണ്ടയ്ക്കയല്ലേ നായകന്‍? അതുകൊണ്ട് ഈ കൂട്ടാന്‍ തണുക്കുംതോറും കൊഴുകൊഴാന്നിരിക്കും. ഉണ്ടാക്കുന്ന സമയത്തുതന്നെ ആവശ്യത്തിനു വെള്ളം ചേര്‍ത്ത് നല്ല അയവിലാക്കിയാല്‍ ഈ പ്രശ്നം പരിഹരിക്കാം. നല്ല എരിവും പുളിയും വേണം കേട്ടോ ഈ കൂട്ടാന്. കാന്താരിമുളകിന്റെ സ്വാദ് മുന്നിട്ടുനില്‍ക്കണം.

ഉപ്പുമാങ്ങ അരച്ചുകലക്കി

2011-07-06T23:36:00-07:00

അരയ്ക്കുക, കലക്കുക. അതാണ് അരച്ചുകലക്കി. തേങ്ങയാണ് പ്രധാന ചേരുവ. തേങ്ങയുടെ കൂടെ ഉപ്പുമാങ്ങ, നെല്ലിക്ക ഇത്യാദികൾ ചേർത്തരച്ചാണ് സാധാരണ അരച്ചുകലക്കി ഉണ്ടാക്കുക. ഇനി, ഇതൊന്നുമില്ലെങ്കിൽ തേങ്ങ മാത്രം അരച്ചും ഉണ്ടാക്കാം. വളരെ ലളിതമായ, പെട്ടെന്നുണ്ടാക്കാവുന്ന, ഒരു കൂട്ടാനാണിത്. ഉപ്പുമാങ്ങ സ്റ്റോക്കുണ്ടെങ്കിൽ ഉപ്പുമാങ്ങ അരച്ചുകലക്കി ഉണ്ടാക്കാം. എങ്ങിനെയെന്ന് പറയാം:

ആവശ്യമുള്ള സാധനങ്ങൾ:

ഉപ്പുമാങ്ങ - വലുപ്പമനുസരിച്ച് ഒന്നോ രണ്ടോ.
തേങ്ങ - ഒരു മുറിയുടെ പകുതി
കാന്താരിമുളക്/പച്ചമുളക് - ആവശ്യത്തിന്
മുളകുപൊടി, ഉപ്പ് - പാകത്തിന്
മോര് - പുളിപ്പിന് ആവശ്യമായത്ര
വറുത്തിടാനുള്ള കടുക്, മുളക്, കറിവേപ്പില, വെളിച്ചെണ്ണ

ഉണ്ടാക്കുന്ന വിധം:

ഉപ്പുമാങ്ങ പൂളിയെടുക്കുക. ഇത് തേങ്ങയും കാന്താരിമുളകും മുളകുപൊടിയും ചേർത്ത് നന്നായി അരച്ചെടുക്കുക. പുളിപ്പിനാവശ്യമായ മോരും ചേർത്തശേഷം ആവശ്യത്തിന് വെള്ളം ചേർത്ത് ഒഴിച്ചുകൂട്ടാന്റെ പരുവത്തിൽ കലക്കിയെടുക്കുക. പാകത്തിന് ഉപ്പും ചേർക്കുക.(ഉപ്പുമാങ്ങയിൽ ഉപ്പുള്ളതുകൊണ്ട് അധികം ഉപ്പ് ചേർക്കേണ്ടിവരില്ല)

ഇത് അടുപ്പത്ത് ചെറുതീയിൽ വയ്ക്കുക. പതഞ്ഞുവരുമ്പോൾ വാങ്ങുക. തിളയ്ക്കരുത്.

ഇനി വെളിച്ചെണ്ണയിൽ വറുത്ത കടുകും മുളകും കറിവേപ്പിലയും കൂടി ചേർത്താൽ സംഗതി റെഡി. എന്തെളുപ്പം അല്ലേ? വളരെ രുചികരവുമാണ് ഈ വിഭവം. ചോറിന് പറ്റിയത്. ചുട്ട പപ്പടവും കടുമാങ്ങയും പയറില തോരനുമാണ് അരച്ചുകലക്കിയ്ക്ക് പറ്റിയ കൂട്ട്. പണ്ട് ഞങ്ങളുടെ വീട്ടിൽ മിഥുനം-കർക്കിടകമാസങ്ങളിലാണ് അച്ചാർ ഭരണികളും ഉപ്പുമാങ്ങ , ഉലുമാങ്ങ ഭരണികളുമൊക്കെ തുറക്കുന്നത്. അതുകൊണ്ട് അക്കാലത്തെ സ്ഥിരം വിഭവങ്ങളിലൊന്നായിരുന്നു ഈ അരച്ചുകലക്കി.

കൊണ്ടാട്ടംമുളക്

2011-06-15T04:23:00-07:00

കൊണ്ടാട്ടം മുളക്/തൈരുമുളക് കണ്ടിട്ടില്ലേ...? ഇത് പാക്കറ്റിൽ വാങ്ങാൻ കിട്ടും. പക്ഷെ ഞാനിതുവരെ വാങ്ങിയിട്ടുള്ളതിനെല്ലാം ഭയങ്കര ഉപ്പായിരുന്നു. കഴിക്കാൻ പറ്റാതെ പലപ്പോഴും കളയേണ്ടി വന്നിട്ടുണ്ട്. ഏതായാലും ഇത്തവണ വേനൽക്കാലം മുഴുവൻ നാട്ടിലായിരുന്നു. തീ പോലുള്ള വെയിൽ ഒട്ടും പാഴാക്കാതെ കുറച്ച് കൊണ്ടാട്ടപ്പണികളൊക്കെ ചെയ്തു.തൃശ്ശൂർ ശക്തൻ മാർക്കറ്റിൽ നിന്ന് കുറച്ചു നല്ല മുളക് കിട്ടിയപ്പോൾ കൊണ്ടാട്ടം മുളകുമുണ്ടാക്കി.

സാധാരണ നമ്മളുപയോഗിക്കുന്ന പച്ചമുളല്ല കൊണ്ടാട്ടത്തിന് ഉപയോഗിക്കുന്നത്. അതിനുള്ള സ്പെഷ്യൽ മുളക് മാർക്കറ്റുകളിൽ വാങ്ങാൻ കിട്ടും(എല്ലായ്പോഴും കിട്ടണമെന്നില്ലാട്ടോ). സാധാരണ പച്ചമുളകിനെ അപേക്ഷിച്ച് ഇത്തരം മുളകിന് എരിവ് കുറവും, തൊലിക്ക് കട്ടി കൂടുതലുമായിരിക്കും. രണ്ടു തരത്തിൽ ഈ മുളക് ലഭ്യമാണ്:നല്ലനീളത്തിലുള്ളവയും, നീളം തീരെകുറഞ്ഞ ഉണ്ടമുളകും. ഉണ്ടമുളകിന് താരതമ്യേന എരിവ് കൂടുതലായിട്ടാണ് കണ്ടിട്ടുള്ളത്. എരിവ് കുറഞ്ഞ നീളൻ മുളകാണ് ഞങ്ങൾ സാധാരണ വാങ്ങാറുള്ളത്.
അപ്പോ ശരി, കൊണ്ടാട്ടം മുളക് തയ്യാറാക്കുന്നതെങ്ങനെയെന്ന് പറയാം.

ആവശ്യമുള്ള സാധനങ്ങൾ:

മുളക് - 2 കിലോ
നല്ല പുളിയുള്ള, വെണ്ണ മാറ്റിയ മോര് - ഏകദേശം ഒന്നര ലിറ്റർ
ഉപ്പ് - പാകത്തിന്
വെയിൽ - നാലു ദിവസത്തെ.

ഉണ്ടാക്കുന്ന വിധം:

മുളക് കഴുകിയെടുത്ത് ഓരോന്നും ഒരു ഈർക്കിൽ കൊണ്ടോ കത്തിമുനകൊണ്ടോ 1-2 ദ്വാരങ്ങൾ ഉണ്ടാക്കിയശേഷം സ്റ്റീമറിന്റെ തട്ടിൽ നിരത്തി ആവിയിൽ ഒന്നു വാട്ടിയെടുക്കുക(ഇതിനുപകരം വെയിലത്തിട്ട് വാട്ടിയെടുത്താലും മതി)

മോരിൽ പാകത്തിന് ഉപ്പു ചേർത്തിളക്കിയശേഷം ഈ മുളകുകൾ അതിലിട്ടു വയ്ക്കുക. നല്ല അടപ്പുള്ള എതെങ്കിലും പാത്രമെടുക്കണം. ഞാനിവിടെ ഒരു പ്ലാസ്റ്റിക്ക് ബക്കറ്റാണ് എടുത്തിരിക്കുന്നത്. ഒരു ദിവസം മുഴുവൻ മുളക് തൈരിൽ കിടക്കട്ടെ. പാത്രം അടച്ചുവയ്ക്കുക. ഇടയ്ക്കൊന്ന് ഇളക്കിക്കൊടുക്കുന്നത് നല്ലതാണ്.

പിറ്റേദിവസം മുളക് മോരിൽനിന്നെടുത്ത് ഒരു പ്ലാസ്റ്റിക്ക് ഷീറ്റിലോ, പായയിലോ, വലിയ പ്ലേറ്റിലോ മറ്റോ നിരത്തി വെയിലത്തു വയ്ക്കുക. മോര് കളയരുതേ...
ഒരു ദിവസത്തെ ഉണക്കുകൊണ്ട് മുളക് ഇങ്ങനെയായി:

വൈകുന്നേരം മുളകിനെ വീണ്ടും അതേ മോരിൽ ഇടുക. നന്നായി ഇളക്കി, മോര് എല്ലാ മുളകിലും പുരണ്ടിട്ടുണ്ടെന്ന് ഉറപ്പുവരുത്തണം. രാത്രിമുഴുവൻ ഇങ്ങനെ വച്ചശേഷം രാവിലെ വീണ്ടും മുളക് വെയിലത്തു വയ്ക്കുക. ഓരോ ദിവസം കഴിയുന്തോറും പാത്രത്തിലെ മോര് കുറഞ്ഞുവരും. അങ്ങനെ മോര് തീരെ ഇല്ലാതാവുന്നതുവരെ ഈ പരിപാടി തുടരുക. മൂന്നുനാലു ദിവസം മതിയാവും. അവസാനം മുളക് ഒന്നുകൂടി വെയിലത്തിട്ട് നന്നായി ഉണക്കിയെടുക്കണം. ദാ, കണ്ടോ...? കഴിഞ്ഞു പരിപാടി! കൊണ്ടാട്ടം മുളക് റെഡിയായി. ഇനി ഇത് അടപ്പുള്ള ഏതെങ്കിലും പാത്രത്തിലോ ഭരണിയിലോ ആക്കി സൂക്ഷിക്കാം.

കൊണ്ടാട്ടം മുളക് ആവശ്യത്തിനെടുത്ത് എണ്ണയിൽ വറുത്ത് ചോറിന്റെ കൂടെ ഉപയോഗിക്കാം.
എന്റെ അമ്മയും വല്യമ്മയുമൊക്കെ കൊണ്ടാട്ടം മുളക് ചപ്പാത്തിക്ക് കൂട്ടിക്കഴിക്കാനും ഉപയോഗിക്കും. എനിക്കും ഇഷ്ടമാണ്. എങ്ങനെയാണെന്നോ...? പറയാം:
2-3 കൊണ്ടാട്ടം മുളക്, ഒരു സ്പൂൺ നെല്ലിക്ക അച്ചാർ, ഒരു സ്പൂൺ ദോശപ്പൊടി, ഒരു സ്പൂൺ വറുത്ത എണ്ണ(പപ്പടമോ മറ്റോ കാച്ചാനുപയോഗിച്ച എണ്ണ), ഇതെല്ലാംകൂടി നന്നായി ഞെരടി യോജിപ്പിച്ച്, അതിൽ കുറച്ചു തൈരും ഒഴിച്ച് യോജിപ്പിക്കുക, ചപ്പാത്തി കൂട്ടി കഴിക്കുക. അദന്നെ!

ചക്ക ദോശ

2011-06-13T00:36:00-07:00

ചക്ക കൊണ്ട് ദോശയോ..! അൽഭുതപ്പെടേണ്ട...അതും സാ‍ധ്യമാണ്.
സംഗതി എങ്ങനെയാണെന്നു പറഞ്ഞുതരാം..പരീക്ഷിച്ചുനോക്കൂ...

ആവശ്യമുള്ള സാധനങ്ങൾ:

ചക്കച്ചുള(പച്ച) - കാൽ കിലോ
പൊന്നിയരി - കാൽ കിലോ
ചുവന്നുള്ളി - ഒരു പിടി
തേങ്ങ ചിരകിയത് - ഒരു പിടി
കാന്താരിമുളക് - 3-4 എണ്ണം
ചുവന്ന മുളക് - 2-3എണ്ണം (അല്ലെങ്കിൽ ആവശ്യത്തിന്)
ജീരകം - 1 സ്പൂൺ
ഇഞ്ചി - ഒരു ചെറിയ കഷ്ണം
കായം‌പൊടി - കാൽ ടീസ്പൂൺ
കുറച്ച് കറിവേപ്പില
ഉപ്പ്, വെള്ളം - പാകത്തിന്

ഉണ്ടാക്കുന്ന വിധം:

ചക്കച്ചുള കുരുവും ചവിണിയും കളഞ്ഞ വൃത്തിയാക്കുക. അരി വെള്ളത്തിലിട്ട് കുതിർത്ത ശേഷം ചക്കച്ചുളയും ചുവന്ന മുളകും ചേർത്ത് അരച്ചെടുക്കുക. ഇതിലേക്ക് കാന്താരിമുളകും ഉള്ളിയും കൂടി ചതച്ചെടുത്തത്, കറിവേപ്പിലയും ഇഞ്ചിയും പൊടിയായി അരിഞ്ഞത്, പിന്നെ ജീരകം, തേങ്ങചിരകിയത് എന്നിവ ചേർക്കുക. കായവും പാകത്തിന് ഉപ്പും വെള്ളവും ചേർത്ത് എല്ലാം കൂടി നന്നായി ഞെരടി യോജിപ്പിക്കുക. വെള്ളം കൂടിപ്പോവരുത്.
(വേണമെങ്കിൽ ഉള്ളി, മുളക്, തേങ്ങ മുതലായ സാമഗ്രികളെല്ലാം കൂടി അരിയോടൊപ്പം അരച്ചെടുക്കുകയും ചെയ്യാം. അപ്പോൾ പണി എളുപ്പമാവും. പക്ഷേ നേരത്തെ പറഞ്ഞരീതിക്കാണ് കൂടുതൽ രുചി.)

മാവ് റെഡിയായി. ഇനി ദോശയുണ്ടാക്കാം.
മാവ് ഒഴിക്കുന്ന സമയത്ത് ദോശക്കല്ലിന്റെ ചൂട് നന്നായി കുറഞ്ഞിരിക്കണം. അല്ലെങ്കില്‍ ശരിക്ക് പരത്താന്‍ പറ്റാതെ മാവ് ഉരുണ്ടുകൂടും.(കല്ല് തീയില്‍നിന്ന് മാറ്റിപ്പിടിച്ച് മാവൊഴിച്ച് പരത്തിയശേഷം തിരിച്ചു വയ്ക്കുകയാണ് ഞാന്‍ ചെയ്യുന്നത്. അപ്പോള്‍ നന്നായി പരത്താന്‍ സാധിക്കും. മാവ് ഫ്രിഡ്ജില്‍ വച്ച് നന്നായി തണുപ്പിക്കുന്നതും ഗുണം ചെയ്യും).

തിരിച്ചു മറിച്ചുമിട്ട്, എണ്ണ പുരട്ടി നന്നായി മൊരിച്ചെടുക്കുക.

ചക്കദോശ റെഡി! ചൂടോടെ ചട്ണിയോ ചമ്മന്തിയോ കൂട്ടി കഴിക്കുക. തണുത്താൽ പിന്നെയിത് ഒന്നിനും കൊള്ളില്ല.

ചക്കയട

2011-05-24T19:11:00-07:00

ചക്കവരട്ടി സ്റ്റോക്കുണ്ടെങ്കില്‍ അതുകൊണ്ട് പായസം മാത്രമല്ല, അടയുമുണ്ടാക്കാം. വരട്ടിയത് ഇല്ലെങ്കില്‍ കുറച്ചു ചക്കപ്പഴം വേവിച്ച് അരച്ച്, ഒന്നു വെള്ളം വറ്റിച്ചെടുത്ത് എളുപ്പത്തില്‍ അട ഉണ്ടാക്കുകയുമാവാം. പക്ഷെ, നന്നായി വരട്ടിവച്ചിരിക്കുന്ന ചക്കകൊണ്ട് അടയും പായസവുമൊക്കെ ഉണ്ടാക്കിയാലാണ് കൂടുതല്‍ സ്വാദെന്നാണ് ഞാന്‍ പറയുക.

അപ്പോ ശരി, നമുക്ക് അടയുണ്ടാക്കാന്‍ തുടങ്ങാം:

ആവശ്യമുള്ള സാധനങ്ങള്‍:

ചക്കവരട്ടിയത് - അരക്കിലോ
അരിപ്പൊടി(പച്ചരിയുടെ) - ഏകദേശം 300 ഗ്രാം കരുതിവയ്ക്കുക. (വറുത്ത പൊടി എടുക്കരുത്. ഫ്രെഷ് ആയ പൊടിയാണ് വേണ്ടത്).
ശര്‍ക്കര - കൃത്യമായ അളവ് പറയാന്‍ പറ്റില്ല. ചക്കവരട്ടി മധുരമുള്ളതാണ്. പോരാത്തതു മാത്രം ചേര്‍ത്താല്‍ മതിയാവും)
തേങ്ങ ചിരകിയത് - രണ്ടു പിടി
തേങ്ങാക്കൊത്ത് -ഒരു മുറിയുടെ പകുതിയുടേത്
ഏലയ്ക്കാപ്പൊടി - ഒരു സ്പൂണ്‍
ചുക്കുപൊടി - കാല്‍ സ്പൂണ്‍

ഉണ്ടാക്കുന്ന വിധം:

ശര്‍ക്കര സ്വല്പം വെള്ളമൊഴിച്ച് ഉരുക്കി, അരിച്ചെടുത്ത്, ചക്കവരട്ടിയുമായി നന്നായി യോജിപ്പിക്കുക. മിക്സിയിലിട്ട് നന്നായി അടിച്ചെടുത്താല്‍ നല്ല മയം കിട്ടും. ഇതില്‍ അരിപ്പൊടി കുറേശ്ശേയായി ചേര്‍ത്ത് യോജിപ്പിക്കുക. മാവ് ഒന്നു കട്ടിയാവാന്‍ വേണ്ട അരിപ്പൊടി ചേര്‍ത്താല്‍ മതി. കൂടുതലായാല്‍ അട തീരെ മയമില്ലാതെ കല്ലുപോലിരിക്കും.

ഇനി തേങ്ങ ചിരകിയതും തേങ്ങാക്കൊത്തും, ഏലയ്ക്കാപ്പൊടിയും, ചുക്കുപൊടിയും കൂടി ചേര്‍ത്താല്‍ അടയ്ക്കുള്ള മാവ് റെഡിയായി.
ചിത്രം നോക്കൂ.....

ഇനി അടയുണ്ടാക്കാം. ഇതിന് പലയിടത്തും പല രീതികളുണ്ട്. പ്ലാവിലയില്‍, കറുവയുടെ(വയണ/ഇടന/ഇലവര്‍ങം) ഇലയില്‍, വാഴയിലയില്‍ ഒക്കെയാണ് സാധാരണയായി അട ഉണ്ടാക്കുന്നത്. (കറുവയിലയില്‍ ഉണ്ടാക്കുന്ന അടയ്ക്ക് കറുവാപ്പട്ടയുടെ നേരിയ രുചിയും മണവും ഉണ്ടാവും. അത് ഇഷ്ടമുള്ളവര്‍ മാത്രം അതില്‍ ഉണ്ടാക്കിയാല്‍ മതി). ഇനി, വേറെ ഏതെങ്കിലും ഇല ഉപയോഗിക്കുമോ എന്നെനിക്കറിയില്ല.

അടയ്ക്ക് പ്ലാവില ഉപയോഗിക്കുന്ന രീതിയാണ് താഴെ കാണുന്നത്. കുറച്ചു മാവ് ഇലയുടെ നടുക്ക് വച്ച്, ഞെട്ടുഭാഗം മടക്കി, ഞെട്ട് ഇലയിലൂടെ കോര്‍ത്ത് “ലോക്ക്” ചെയ്യുക.

ഇതേരീതി തന്നെയാണ് കറുവയില ഉപയോഗിക്കുമ്പോഴും. പ്ലാവിലയില്‍ തയ്യാറാക്കിയ മാവും കറുവയിലയില്‍ തയ്യാറാക്കിയ മാവും യഥാക്രമം താഴെയുള്ള ചിത്രത്തില്‍ കാണാം:

ഇനി അടുത്തരീതിയാണ് സര്‍വ്വസാധാരണമായത്. അതായത് മാവ് വാഴയിലയില്‍ പൊതിയുന്ന രീതി. (എന്റെ ഭര്‍തൃഗൃഹത്തില്‍ “ചക്കപ്പൊതി” എന്നാണ് ഈ അടയ്ക്ക് പറയുന്നത്). ഇലക്കഷ്ണങ്ങള്‍ ഒന്നു വാട്ടിയെടുത്തശേഷം കുറച്ചു മാവ് നടുക്കു വച്ച് സാധാരണ കടലാസുപൊതിയുന്നപോലെ പൊതിയുക. ഒരുപാട് വലുപ്പം വേണ്ട. ചെറിയചെറിയ പൊതികളാണ് നല്ലത്.

മേല്‍പ്പറഞ്ഞ രീതികളില്‍ ഏതാണ് ഇഷ്ടമായതെന്നു വച്ചാല്‍ അത് ചെയ്യുക. എന്നിട്ട് പ്രഷര്‍കുക്കറിലോ ഇഡ്ഡലിപ്പാത്രത്തിലോ നിരത്തിവച്ച് വേവിച്ചെടുക്കുക,കഴിക്കുക. അത്രതന്ന!
നല്ലോണം ചൂടാറിയിട്ട് കഴിച്ചാല്‍ മതീട്ടോ....അതാണ് കൂടുതല്‍ സ്വാദ്.

ഇത് കറുവയിലയില്‍ ഉണ്ടാക്കിയത്:

ഇത് പ്ലാവിലയില്‍ ഉണ്ടാക്കിയത്:

ഇത് വാഴയിലയില്‍ ഉണ്ടാക്കിയത്:

ഉപ്പുമാങ്ങ

2011-05-20T18:14:00-07:00

ഞങ്ങളുടെ തറവാട്ടുവളപ്പില്‍ മാമ്പഴസമൃദ്ധിയുടെ ഒരു കാലമുണ്ടായിരുന്നു. ചെറിയൊരു കാറ്റു വീശിയാല്‍ മതി, മാമ്പഴം മഴപോലെ പൊഴിയുമായിരുന്നു. ഇറയത്ത് കുന്നുകൂടുന്ന മാങ്ങ പിന്നെ ഉപ്പുമാങ്ങ, ഉലുമാങ്ങ, മാങ്ങാത്തൊലി ഒക്കെയായി രൂപാന്തരപ്പെടും. പഞ്ഞമാസക്കാലത്തേക്കുള്ള കരുതിവയ്ക്കല്‍........ഇതില്‍ ഉപ്പുമാങ്ങയാണ് ഏറ്റവും കൂടുതല്‍ ഉണ്ടാക്കാറ്. വലിയ വലിയ ചീനഭരണികളില്‍..........

പതിവുകളൊക്കെ ഇപ്പോഴും ചെറിയതോതില്‍ തുടരുന്നു...മിക്കവാറും വിലകൊടുത്ത് വാങ്ങിയ മാങ്ങകൊണ്ടായിരിക്കുമെന്നു മാത്രം....നല്ല മാങ്ങ കിട്ടിയപ്പോള്‍ കുറച്ചുപ്പുമാങ്ങയിട്ടു. എങ്ങനെയാണെന്നു പറയാം:

ആവശ്യമുള്ള സാധനങ്ങള്‍:

നല്ലയിനം നാട്ടുമാങ്ങ - 5 കിലോ (പൊട്ടിയതും ചതഞ്ഞതുമായ മാങ്ങ ഉപയോഗിക്കരുത്. ഉപ്പുമാങ്ങയ്ക്ക് പച്ചമാങ്ങയാണ് സാധാരണ ഉപയോഗിക്കുക. എന്നിരുന്നാലും, പഴുക്കാന്‍ തുടങ്ങിയ മാങ്ങയും ഞങ്ങള്‍ ഉപ്പിലിടാറുണ്ട്. മധുരവും ഉപ്പും പുളിയുമെല്ലാം കൂടി കലര്‍ന്ന സവിശേഷ രുചിയായിരിക്കും ഈ ഉപ്പുമാങ്ങയ്ക്ക്).
ഉപ്പ് - കൃത്യമായ കണക്ക് പറയാന്‍ പറ്റില്ല. പച്ചമാങ്ങയാണെങ്കില്‍ ഏകദേശം അരക്കിലോ മതിയാവും. പഴുത്ത മാങ്ങയാണെങ്കില്‍ ഉപ്പ് അതിനനുസരിച്ച് കുറയ്ക്കണം.
തിളപ്പിച്ചാറിയ വെള്ളം ആവശ്യത്തിന്.

ഉണ്ടാക്കുന്ന വിധം:

ഉപ്പുമാങ്ങ ഇടാനുദ്ദേശിക്കുന്ന ഭരണി/സ്ഫടികഭരണി വൃത്തിയായി കഴുകി വെയിലത്തുവച്ച് നന്നായി ഉണക്കിയെടുക്കണം.
വെള്ളത്തില്‍ ഉപ്പ് ചേര്‍ത്ത് തിളപ്പിക്കുക. ഇത് തണുക്കാന്‍ വയ്ക്കുക.
മാങ്ങ കഴുകി വൃത്തിയാക്കുക.
ഭരണിയിലേക്ക് മാങ്ങ ഇട്ട് തിളപ്പിച്ചാറിയ ഉപ്പുവെള്ളം ഒഴിക്കുക. മാങ്ങകള്‍ വെള്ളത്തില്‍ മുങ്ങിക്കിടക്കണം. വെള്ളം പോരെങ്കില്‍ വീണ്ടും തിളപ്പിച്ച് ഒഴിക്കണം.

ഏറ്റവും മുകളിലായി കുറച്ചു പച്ചക്കശുവണ്ടി രണ്ടായി മുറിച്ച് (നെയ്യോടുകൂടി) നിരത്തിവയ്ക്കുന്നത് മാങ്ങ കേടാവാതിരിക്കാനും പുഴു വരാതിരിക്കാനുമൊക്കെ നല്ലതാണ്.

ഇനി ഭരണി അടച്ചുവയ്ക്കാം. ചുമ്മാ അടച്ചാല്‍ പോരാ. മെഴുക് ഉരുക്കി ഒഴിച്ചോ മറ്റോ ഭരണി നന്നായി സീല്‍ ചെയ്യണം. അതിനുശേഷം ഏറ്റവും പുറമേ ഒരു തുണിയോ പ്ലാസ്റ്റിക്ക് ഷീറ്റോ വച്ച് മൂടിക്കെട്ടുകയും ചെയ്യാം. ഇനി ഭരണിയെ ശല്യപ്പെടുത്താതെ ഏതെങ്കിലും ഒഴിഞ്ഞ മൂലയില്‍ സ്ഥാപിക്കുക.
ഒരു മാസമൊക്കെ കഴിഞ്ഞാല്‍ വേണമെങ്കില്‍ ഉപ്പുമാങ്ങ പുറത്തെടുക്കാം. പണ്ടുകാലത്ത് കര്‍ക്കിടകമാസത്തിലാണ് ഉപ്പുമാങ്ങ/ഉലുമാങ്ങ ഭരണിയുടെയൊക്കെ സീല്‍ പൊട്ടിക്കുന്നത്.

ദാ, ഇതാണ് ഉപ്പുമാങ്ങ.
ഉപ്പുമാങ്ങ പിഴിഞ്ഞ് കാന്താരിമുളകും കൂട്ടി ചാലിച്ചെടുത്താല്‍ ഒരു കിണ്ണം ചോറുണ്ണാന്‍ പിന്നെ വേറൊന്നും വേണ്ട.
ഇനി അതല്ല, ഇതുകൊണ്ട് കൂട്ടാനുകളുണ്ടാക്കണമെങ്കില്‍ അതും ആവാം. (അത് പിന്നീട് പറയാം).

ചക്ക പ്രഥമൻ

2011-05-08T18:00:00-07:00

ചക്ക വരട്ടിയതുകൊണ്ടാണ് സാധാരണ ഞങ്ങള്‍ പായസം ഉണ്ടാക്കുക. ചിലര്‍ ചക്കപ്പഴം വേവിച്ച് അരച്ചെടുത്ത് അപ്പോള്‍ തന്നെ പായസം ഉണ്ടാക്കാറുണ്ട്. പ്രത്യേകിച്ചും സദ്യകള്‍ക്ക് ഇങ്ങനെ ചെയ്യുന്നത് കണ്ടിട്ടുണ്ട്. എങ്കിലും ചക്കവരട്ടി കൊണ്ട് ഉണ്ടാക്കുന്നതിനാണ് കൂടുതല്‍ രുചിയെന്നാണ് ഞാന്‍ പറയുക. ഞാനിവിടെ ഉണ്ടാക്കാന്‍ പോകുന്നതും അതാണ്.

ചക്കപ്പഴം വരട്ടുന്ന രീതി ഇവിടെ വിശദമായി പറഞ്ഞിട്ടുണ്ട്.

അപ്പോള്‍ നമുക്ക് പായസം ഉണ്ടാക്കിനോക്കാം അല്ലേ....?

ആവശ്യമുള്ള സാധനങ്ങള്‍:

ചക്കവരട്ടിയത് - അര കിലോ
ശര്‍ക്കര - ശര്‍ക്കരയുടെ അളവ് കൃത്യമായി പറയാന്‍ കഴിയില്ല. ഒരു മുക്കാല്‍ കിലോയോളം കരുതിവയ്ക്കുക.
തേങ്ങ - മൂന്ന്
തേങ്ങാക്കൊത്ത് - അര മുറിയുടേത് (കൂടുതല്‍ വേണമെങ്കില്‍ ആവാം)
ചുക്ക് പൊടിച്ചത് - 3 ടീ സ്പൂണ്‍
ജീരകം പൊടിച്ചത് - ഒന്നര ടീ സ്പൂണ്‍
നെയ്യ് - കുറച്ച്

ഉണ്ടാക്കുന്ന വിധം:

ആദ്യം തന്നെ തേങ്ങ ചിരകി, ഒന്നാം പാലും രണ്ടാം പാലും, മൂന്നാം പാലും വെവ്വേറെ എടുത്തുവയ്ക്കുക. തേങ്ങയില്‍ ലേശം വെള്ളം തളിച്ചശേഷം ചതച്ചെടുത്ത് നല്ല കട്ടിയില്‍ പിഴിഞ്ഞെടുക്കുന്നതാണ് ഒന്നാം പാല്‍. നല്ല വൃത്തിയുള്ള ഒരു തുണിക്കഷ്ണത്തിലൂടെ പിഴിയുന്നതാണ് നല്ലത്. ഒന്നാം പാല്‍ എടുത്ത ശേഷമുള്ള തേങ്ങയില്‍ കുറച്ചു വെള്ളം ഒഴിച്ച് യോജിപ്പിച്ചശേഷം പിഴിഞ്ഞടുക്കുന്നതാണ് രണ്ടാം പാല്‍. ഇതിന് അദ്യത്തേതിനേക്കാള്‍ കട്ടി കുറവായിരിക്കും. ഇതിനുശേഷം കുറച്ചധികം വെള്ളം ചേര്‍ത്ത് ഞെരടി പിഴിഞ്ഞെടുക്കുന്നതാണ് മൂന്നാം പാല്‍. ഇത് വളരെ നേര്‍ത്തതായിരിക്കും. ( തേങ്ങാപ്പാല്‍ പൊടിയാണ് ഉപയോഗിക്കുന്നതെങ്കില്‍, നല്ല കട്ടിയില്‍ കലക്കിയത്, കുറച്ചുകൂടി നേര്‍പ്പിച്ചത്, വളരെ നേര്‍പ്പിച്ചത് എന്നിങ്ങനെ മൂന്നു തരത്തില്‍ പാല്‍ തയ്യാറാക്കി വയ്ക്കുക).

ശര്‍ക്കര കുറച്ചു വെള്ളം ഒഴിച്ച് ഉരുക്കി, അരിച്ചെടുത്ത് പാനിയാക്കി വയ്ക്കുക.

ഉരുളിയിലോ അല്ലെങ്കില്‍ നല്ല കട്ടിയുള്ള ഏതെങ്കിലും പരന്ന പാത്രത്തിലോ വേണം പായസമുണ്ടാക്കാന്‍. അല്ലെങ്കില്‍ തുടക്കത്തില്‍ തന്നെ കരിഞ്ഞുപിടിക്കാന്‍ തുടങ്ങും. ഉരുളിയില്‍ ചക്കവരട്ടി ഇട്ട്, ശര്‍ക്കരപ്പാനിയും ഒഴിച്ച് അടുപ്പത്തു വയ്ക്കുക. (ശര്‍ക്കരപ്പാനി അദ്യം തന്നെ മുഴുവനും ഒഴിക്കേണ്ട. ചക്കവരട്ടി മധുരമുള്ളതാണല്ലോ. അതുകൊണ്ട് ശര്‍ക്കരപ്പാനി കുറച്ചൊഴിച്ച് മധുരം നോക്കിയശേഷം പിന്നീട് ആവശ്യത്തിന് ചേര്‍ത്താല്‍ മതി).

മെല്ലെ ഇളക്കിയിളക്കി, ചക്കവരട്ടിയെ ഒട്ടും കട്ടയില്ലാതെ ശര്‍ക്കരപ്പാനിയിലേക്ക് ലയിപ്പിച്ചെടുക്കണം. കട്ടി കൂടുതലുണ്ടെങ്കില്‍ കുറച്ചു വെള്ളമൊഴിക്കാം. ലേശം നെയ്യ് ചേര്‍ത്തുകൊടുക്കുന്നത് നല്ലതാണ്.

ഇനി, തേങ്ങയുടെ മൂന്നാം പാല്‍ കുറേശ്ശെയായി ഒഴിച്ചിളക്കുക. ഈ ഘട്ടത്തില്‍ മധുരം പാകത്തിനാണോന്ന് നോക്കുക. പോരെങ്കില്‍ പാകത്തിന് ശര്‍ക്കരപ്പാനി ചേര്‍ക്കുക.

നന്നായി തിളച്ച് യോജിച്ചാല്‍ രണ്ടാം പാല്‍ ഒഴിച്ചിളക്കുക. തുടര്‍ച്ചയായി ഇളക്കിക്കൊടുക്കണം. തീ അധികം വേണ്ട. നെയ്യ് ഓരോ സ്പൂണ്‍ വീതം 3-4 തവണകളായി ചേര്‍ക്കുക.

കുറച്ചു കഴിയുമ്പോള്‍ പായസം കുറുകാന്‍ തുടങ്ങും. ഇനി തീ കെടുത്തിയശേഷം ഒന്നാം പാല്‍ സാവധാനം ഒഴിച്ച് യോജിപ്പിക്കുക.

ഒന്നാം പാല്‍ ഒഴിച്ചാല്‍ പിന്നെ തിളയ്ക്കരുതെന്നാണ് പറയുക. ഉരുളി ഉടനെ വാങ്ങിവയ്ക്കുക. വാങ്ങിവച്ചാലും അഞ്ച് മിനിട്ടുകൂടി ഇളക്കുന്നത് നല്ലതാണ്.

പായസം റെഡിയായി. ഇനി പൊടിപ്പും തൊങ്ങലും ചേര്‍ത്ത് ഒന്നുകൂടി ഭംഗിയാക്കാം.

ചക്കയ്ക്ക് ചുക്ക് എന്നാണ് പറയുക.(ചക്കയ്ക്ക് കൂട്ടായി അല്പം ചുക്കിനേയും കൂടി അകത്തേക്ക് കടത്തിവിട്ടാല്‍ നല്ലതാണത്രേ. ദഹനക്കേടൊന്നും വരാതെ ടിയാന്‍ കാത്തോളും). അപ്പോ പറഞ്ഞുവന്നത്, കുറച്ചു ചുക്കുപൊടിയും ജീരകപ്പൊടിയും കൂടി അങ്ങ്ട് ചേര്‍ക്കുക. അതുതന്നെ. ചക്കപ്പായസത്തില്‍ ഏലയ്ക്കാപ്പൊടി ചേര്‍ക്കുന്ന പതിവില്ല.

അവസാനമായി, തേങ്ങാക്കൊത്ത് നെയ്യില്‍ വറുത്തത് ചേര്‍ക്കുക (വറുക്കാനുപയോഗിച്ച നെയ്യുള്‍പ്പെടെ). പിന്നെ, വേണമെങ്കില്‍ അണ്ടിപ്പരിപ്പും മുന്തിരിയുമൊക്കെ ചേര്‍ത്ത് ഒന്നുകൂടി ആര്‍ഭാടമാക്കാം കേട്ടോ. ഞാന്‍ തേങ്ങാക്കൊത്ത് മാത്രമേ ചേര്‍ത്തുള്ളൂ.

പുതുമയുള്ള ഒരു അവിയൽ

2011-05-03T22:45:00-07:00

ചക്കയും മാങ്ങയും ചീരയും വെള്ളരിയുമൊക്കെ സുലഭമായ വേനല്‍ക്കാലത്ത് ഉണ്ടാക്കാന്‍ പറ്റിയ ഒരു സ്പെഷ്യല്‍ അവിയലാണ് ഇത്തവണ. കാഴ്ചയിലും രുചിയിലും സാധാരണ അവിയലില്‍നിന്നും ഏറെ വ്യത്യസ്തമാണിത്.

ആവശ്യമുള്ള സാധനങ്ങള്‍:

ചക്കക്കുരു, വെള്ളരി, ചുവന്ന ചീര (തണ്ടും ഇലയും വേണം), മുരിങ്ങക്കായ - എല്ലാം തുല്യ അളവില്‍ (ഓരോ പിടി എന്നു വയ്ക്കുക).
പച്ചമാങ്ങ - ഒന്ന്
കുറച്ച് മഞ്ഞള്‍പ്പൊടി, മുളകുപൊടി
തേങ്ങ - ഒരു മുറിയുടെ പകുതി
ജീരകം - ഒരു സ്പൂണ്‍
പച്ചമുളക് - 2-3 എണ്ണം
പാകത്തിന് ഉപ്പ്
കറിവേപ്പില, വെളിച്ചെണ്ണ

ഉണ്ടാക്കുന്ന വിധം:

പച്ചക്കറികളെല്ലാം അവിയലിന് പാകത്തിന് നീളത്തില്‍ അരിയുക. ചീരയുടെ തണ്ടും ഇലയും വെവ്വേറെയും. മാങ്ങ തൊലി കളഞ്ഞ് കഷ്ണങ്ങളാക്കുക. കഷ്ണങ്ങള്‍ ഉപ്പും മഞ്ഞള്‍പ്പൊടിയും മുളകുപൊടിയും ചേര്‍ത്ത് വെള്ളമൊഴിച്ച് വേവിക്കുക. ചക്കകുരു ആദ്യം ഇട്ട് ഒരു വേവാകുമ്പോള്‍ മറ്റു കഷ്ണങ്ങള്‍ ഇട്ടാല്‍ മതി. ചീരയില അവസാനവും. മാങ്ങാക്കഷ്ണങ്ങള്‍ പുളിപ്പിന് ആവശ്യമായത്ര ചേര്‍ത്താല്‍ മതി. നല്ല പുളിയന്‍ മാങ്ങയാണെങ്കില്‍ വളരെ കുറച്ചുമാത്രം മതിയാവും. പുളി അധികമായാല്‍ സകല സ്വാദും പോവും, പറഞ്ഞേക്കാം.

കഷ്ണങ്ങള്‍ വെന്ത് വെള്ളം വറ്റിത്തുടങ്ങുമ്പോള്‍ തേങ്ങയും ജീരകവും പച്ചമുളകും കൂടി ഒതുക്കിയെടുത്തത് ചേര്‍ത്ത് യോജിപ്പിക്കുക. ( തേങ്ങയുടെ കൂടെ 2-3 ചുവന്നുള്ളിയും ചേര്‍ക്കാം. എനിക്കിഷ്ടമല്ലാത്തതുകൊണ്ട് ഞാന്‍ ചേര്‍ത്തില്ല). വാങ്ങിവച്ചശേഷം കറിവേപ്പിലയും വെളിച്ചെണ്ണയും ചേര്‍ത്തിളക്കി, കറിവേപ്പിലയുടെയും വെളിച്ചെണ്ണയുടേയും വാസനയെ രക്ഷപ്പെടാന്‍ അനുവദിക്കാതെ ഉടനെ അടച്ചുവയ്ക്കുക. ഇത്രേയുള്ളു!

ഈ പാചകക്കുറിപ്പിന് കടപ്പാട് : ആഗ്നേയ