நந்தாவிளக்கு

என் பெயர் பாண்ட் ... ஜேம்ஸ் பாண்ட் - பகுதி மூன்று

2018-05-06T15:13:00.000+05:30

தங்கவிரல்

நம் தோல் மூச்சு விடும் என்பது உங்களுக்குத் தெரியும் தானே ... அந்த மூச்சை நிறுத்த உடல் முழுவதும் நீங்கள் ஆசைப்படும் தங்கத்தை முலாமாகத் தடவினால் ... இந்தப் படத்தின் கதை அது தான் ...

கதையின் வில்லனுக்கு ஒரு பொழுதுபோக்கு ... தன்னோடு போட்டி போடுபவர்களைத் தன் தந்திரங்களால் தோற்கடிப்பது ... சீட்டாட்டம் (எதிரில் இருப்பவனின் சீட்டுகளை தன் ஆளான ஒருவர் மூலம் அவர் பக்கத்தின் தூரத்திலிருந்து பைனாக்குலர் மூலம் கண்டு கொள்வது), கோல்ஃப் (அடித்துத் தொலைந்து போன பந்தைப் போலவே ஒன்றை தன் உதவியாளர் மூலம் எங்காவது தருவித்து ஜெயிப்பது ... பாண்ட் இந்த ரெண்டு விஷயங்களிலும் இவரைத் தன் தந்திரத்தால் ஜெயிக்கும் காட்சி அபாரமாக இருக்கும்)

இந்த ஜேம்ஸுக்கு என்று எப்படித் தான் பெண்கள் மடிகிறார்களோ .... மடிந்து போகிறார்களோ ...

தங்கம் பொருளாதாரத்துடன் சம்மந்தப்பட்டது ... அதை உருக்கிக் கடத்தினால் ... கண்டுபிடிப்பது சிரமம் ... அதைத் தான் வில்லன் செய்கிறான் ... ஒரு இடத்தில் வாங்கிய தங்கத்தை இன்னொரு இடத்தில் விற்றால் லாபம் அதிகம் வரலாம் ஏனெனில் தங்கத்தின் விலை இடத்திற்கு இடம் மாறுபடும் ... பணத்தின் மதிப்பு போல

அந்தத் தங்கம் அதன் நிறம் அதன் திறன் அதன் தேவகனம்

இந்தப் படத்தில் வரும் பாண்ட் பெண்ணின் பெயர் புஸ்சி கெலோர் ... இது பெயர்ச்சொல் எனவே மொழிபெயர்த்துக் கிளர்ச்சி அடைய வேண்டாம் ...

ஒரு காட்சியில் பாண்டைப் பார்த்து ... உன் மயக்கும் ஆற்றலை நீ மறைத்துக் கொள்ளலாம் ஏனெனில் நான் இதற்கெல்லாம் ஒரு நோய் எதிர்ப்பு சக்தி கொண்டவள் ... என்கிறாள் வில்லி

மற்றபடி இது ஒரு வழக்கமான ஆனாலும் சுமாரான ஜேம்ஸ் பாண்ட் படம்.

என் பெயர் பாண்ட் ... ஜேம்ஸ் பாண்ட் - பகுதி ரெண்டு

2018-04-21T19:42:00.002+05:30

இயன் ஃப்ளெமிங் யுத்த களத்தில் நேரடியாக இறங்கிச் சண்டையிடவில்லை ஆனால் ஆட்களைப் பணித்தார், ஆட்டுவித்தார் ... அதை மிகச் சிறப்பாகச் செய்தார். SIS (Secret Intelligence Service) அல்லது MI6 (Military Intelligence 6) என்பது இங்கிலாந்து உளவுத்துறையைக் குறிக்கும். அதில் பணியாற்றும் பொழுதே அவர் தான் ஒரு உளவுத்துறை சார்ந்த நாவல் எழுத விரும்புவதாகச் சொல்லி அதையும் ரெண்டே மாதங்களில் தன் முதல் நாவலாக "கேஸினோ ராயல்" எனும் தலைப்பில் வெளியிட்டார். சீக்கிரம் நிகழவிருக்கும் தன் திருமணத்திலிருந்து தன்னையே திசை திருப்பவே நாவலை எழுதியதாகவும் வேறு சொன்னார். அவர் திருமணம் செய்தது கர்பமுற்றிருந்த ஒரு மாற்றான் தோட்டத்து முல்லையை. அவர் காரியதரிசியாக இருந்து அவர் நாவலை தட்டச்சு செய்து கொடுத்த பெண்மணியின் பாதிப்பில் தான் மனிபென்னி உருவானாள்.

நாவலை முதலில் படித்த ஃப்ளெமிங்கின் நண்பர் இதில் வாசகனை எதிர்பார்க்க வைக்கும் அந்த சஸ்பென்ஸ் தன்மையே இல்லை என்றாராம். எனினும் நாவல் படிக்கும் படி இருந்ததால் ஒரு பதிப்பக நிறுவனத்திற்கு அனுப்பி வைத்தார். அந்தப் பதிப்பக நிறுவனம் அந்த நாவலில் அதிகம் ஸ்வாரஸ்யம் காட்டவில்லை எனினும் ஃப்ளெமிங்கின் சகோதரர் அந்தப் பதிப்பக நிறுவனத்தில் தொடர்ந்து பயண இலக்கியம் எழுதுபவர் ஆதலால் வேறு வழியில்லாமல் அதை வெளியிட்டார்கள். உடனுக்குடன் மூன்று பதிப்புகள் வெளியிடுமளவு அந்த நாவல் விற்றுத் தீர்ந்தது.

இயன் ஃப்ளெமிங் தன் ஜேம்ஸ் பாண்ட் கதாபாத்திரத்தை முதலில் உருவாக்கியபோது, பாண்ட் ஒரு மிக மந்தமான, சுவாரசியமற்ற மனிதராக இருக்க வேண்டும் என்று விரும்பினார் ... ஒரு மழுங்கிய கருவியாக ... ஆனால் நடந்தது வேறு ... பாண்ட், ஃப்ளெமிங் சந்தித்த பல நிஜ வாழ்வு உளவுத்துறை அதிகாரிகளின் கூட்டுக் கலவை கதாபாத்திரம்.

இயன் ஃப்ளெமிங் அதீதக் குடியாலும் புகையாலும் இதய நோயினால் தன் 56 வயதில் இறந்தார் ... ஆனால் ஜேம்ஸுக்கு எவ்வளவு குடித்தாலும், எவ்வளவு புகைத்தாலும், எவ்வளவு பெண்களிடம் போனாலும் எதுவுமே ஆகாது போல ...

ரஷ்யாவிலிருந்து காதலுடன் அல்லது ஜேம்ஸ் பாண்டைக் கொல்வது எப்படி

முதல் படத்தின் வெற்றியில் குதூகலமாகி ரெண்டு மடங்கு முதலீட்டில் மாபெரும் வெற்றி அடைந்த படம் இது ... 2 மில்லியன் டாலர்கள் முதலீடு ஆனால் வந்த லாபமோ 76 மில்லியன் டாலர்கள். ஷான் கானரிக்கு 54000 டாலர்கள் சம்பளம் போக 100,000 டாலர்கள் போனஸும் தரப்பட்டது (ஆண்டு 1963). அமெரிக்க அதிபர் ஜான் எஃப்.கென்னடிக்குப் பிடித்த முதல் பத்து நாவல்களுள் இதுவும் ஒன்று ... மேலும் அவர் பார்த்த இறுதிப் படமும் இது தான் ...

ஸ்பெக்டர் (SPECTRE) எனும் உலகளாவிய குற்றக் கூட்டமைப்பு இந்தப் படத்திலிருந்து தான் வலுவான பாண்ட் வில்லனாக உருவானது.

இஸ்தான்புல்லின் அழகிய ஸ்தலத்தில் படமாக்கி இருக்கிறார்கள்

இந்தப் படத்தில் இருந்து தான் பாண்டுக்கு அதிநவீன ஆயுதங்களைத் தரும் மிஸ்டர் க்யூ (Q) எனும் கதாபாத்திரம் டெஸ்மன்ட் லெவிலின் (Desmond Llewelyn) என்பவர் மூலம் அறிமுகமாகியது. அதன் பின்னர் இவரே இருபத்தியோரு படங்களில் க்யூவாக நடித்திருக்கிறார். இந்தப் படத்திலிருந்து தான் ஜேம்ஸ் பாண்ட் இதில் என்ன புது தொழில்நுட்ப சாதனங்கள் உபயோகிகப் போகிறார் எனும் எதிர்பார்ப்பு ஆரம்பிக்கத் துவங்கியது.

மீண்டும் இந்த பாண்ட் பெண்கள் பற்றிப் பேச எனக்கே கூச்சமாகத் தான் இருக்கிறது ஆனால் என்ன செய்ய இந்த டேனியல்லா பியான்ச்சி (Daniela Bianchi) அப்படி இருக்கிறாரே ... அழகாக ... ஒரு ரோமாபுரி தேவதை மாதிரி ...

படத்தின் முடிவில் வரும் இந்த தேவ கானத்தைக் கேளுங்கள் ...

ரஷ்யாவிலிருந்து காதலுடன்
நான் உன்னை நோக்கிப் பறக்கிறேன்
உனக்கு விடைகொடுத்த பிறகு
இந்த உலகம் முழுவதும் பயணித்து விட்டேன்
திரும்பி வர வேண்டும் என்பதை கற்பதற்காகவே

ரஷ்யாவிலிருந்து காதலுடன்
நான் இடங்களைப் பார்த்திருக்கிறேன், முகங்களையும்
ஒரு வினாடிப் புன்னகைகளையும்
...

https://www.youtube.com/watch?v=scTDEj0yYUQ

ஜேம்ஸ் பாண்டைக் கொல்வது எப்படியா ... முதலிலேயே சொன்னேனே ... அவரையெல்லாம் கொல்லவே முடியாது ...

என் பெயர் பாண்ட் ... ஜேம்ஸ் பாண்ட் - பகுதி ஒன்று

2018-04-20T17:58:00.003+05:30

ஜேம்ஸ் பாண்ட் (James Bond) திரைப்படங்கள் அனைத்தையும் காலக்கிரமப்படி வரிசை கட்டிப் பார்த்துக் கொண்டிருக்கிறேன். மொத்தம் இருபத்து ஐந்து படங்கள். ஜேம்ஸ் பாண்ட் எனும் சாகச வீரனை மையப்படுத்தி இயன் ஃப்ளெமிங் (Ian Fleming) எழுதியது மொத்தம் பன்னிரெண்டு நாவல்களும் ரெண்டு சிறுகதைத் தொகுதிகளும் (ஒன்பது சிறுகதைகள்) மட்டுமே. ஆனால் அதற்குப் பிறகு பலர் அதே கதாபாத்திரங்களையும், சூத்திரங்களையும் பயன்படுத்திப் பல தொடர் நாவல்களையும் சிறுகதைகளையும் எழுதிவிட்டார்கள் (ஏறக்குறைய இருபத்து ஏழு புதிய நாவல்கள் ... இது தவிர இளவயது பாண்ட் தோன்றும் ஏறக்குறையப் பத்து புதிய நாவல்கள் மற்றும் ஒரு சுயசரிதம் வேறு). இவற்றுள் செபாஸ்டியன் ஃபால்க்ஸ் (Sebastian Faulks) எழுதிய 'Devil May Care - டெவில் மே கேர்' (போனால் போகட்டும் போடா என்ற அர்த்தத்தில் வரும்) நாவலும், ஜான் பியர்ஸன் (John Pearson) எழுதிய 'ஜேம்ஸ் பாண்ட் OO7: அங்கீகரிக்கப்பட்ட சுயசரிதம்' (James Bond OO7: The Authorized Biography) என்ற புத்தகமும் சிறந்தவையாகக் கருதப்படுபவை. அங்கீகரிக்கப்பட்ட சுயசரிதமா ... யார் அங்கீகரித்தது ... இயன் ஃப்ளெமிங்கா ... அவர் தான் இறந்துவிட்டாரே ... பிறகு ... வேறு யார் ... ஜேம்ஸ் பாண்டே தான் அங்கீகரித்தாராம் :). இவை தவிர மனிபென்னி டயரிஸ் (The Moneypenny Diaries) என்று ஜேம்ஸ் பாண்ட் மேல் ஒரு தலைக் காதல் கொண்ட பாண்ட்-இன் தலைவர் எம்-இன் (M) காரியதரிசி குறித்த மூன்று நாவல்களும் உள்ளன. சிறு வயதில் ராணி காமிக்ஸ் வெளியிட்ட ஒரு பாண்ட் சித்திரக் கதையில் அப்பட்டமான நிர்வாணப் படங்களைக் கண்டு பெருங்கிளர்ச்சியும் சிறு-அதிர்ச்சியும் அடைந்திருக்கிறேன் ... அந்த காமிக்ஸின் பெயர் 'அழகியைத் தேடி' என நினைக்கிறேன் ... அந்த ஓவியங்கள் இன்னும் நினைவில் இருக்கின்றன.

எந்த ஆங்கிலத் திரைப்படமும் அமெரிக்காவைச் சேர்ந்தது தான் என, சிறு வயதில் நினைத்துக் கொண்டிருந்தேன். பாண்ட் படங்கள் ப்ரிட்டனைச் சேர்ந்தவை எனப் பிறகு தான் தெரிந்தது. அது போலவே பாண்டின் எண் நாட் நாட் செவன் (007) அல்ல டபுள் ஓ செவன் (OO7) என்பதும் பிறகே தெரிந்தது. ஸீரோவை, ஓ எனச் சொல்வது ஆங்கிலேயர்களின் வழக்கம் ... காரணம் எழுத்துரு ஒற்றுமை தான். பறவையியலில் ஆர்வம் கொண்ட இயன் ஃப்ளெமிங், ஜேம்ஸ் பாண்ட் என்ற ஒரு பறவை ஆராய்ச்சியாளரின் பெயரையே தன் கதாநாயகனுக்குச் சூட்டினார். பாண்ட் கதாபாத்திரத்தை ஃப்ளெமிங், ரெண்டாம் உலகப்போரின் போது தான் பணியாற்றிய கடற்படை புலனாய்வுப் பிரிவில் சந்தித்த பலரின் பாதிப்பில் வடிவமைத்தார். ஆனால் தன் சுய ஆளுமைப் பண்புகள் பலவற்றை பாண்ட் பாத்திரத்தில் புகுத்தினார் ... சிகரெட் பிடிப்பது முதற்கொண்டு ... ஜமைக்காவில் (Jamaica) இருக்கும் தன் தங்கக்கண் (Goldeneye ... பின்னாட்களில் இதே பெயரில் ஒரு பாண்ட் படம் வெளியானது ... தவிர தன் கடற்படை புலனாய்வு காலத்தில் அவர் மேற்பார்வையில் நிகழ்ந்த ஒரு இயக்க நடவடிக்கையின் பெயரும் இஃதே) மாளிகையில் இருந்து தான் அனைத்து பாண்ட் நாவல்களையும் ஃப்ளெமிங் எழுதினார். 1953இல் வெளியான கேஸினோ ராயல் (Casino Royale) தான் முதல் பாண்ட் நாவல். ஆனால் 1958இல் வெளியான டாக்டர் நோ (Dr.No) தான் 1962இல் திரையாக்கம் கண்ட முதல் பாண்ட் படம் ... ச்சிட்டி-ச்சிட்டி-பேங்க்-பேங்க் என்ற குழந்தைகள் நாவல் கூட (இது திரைப்படமாகவும் வந்து புகழ் பெற்றது) ஃப்ளெமிங் எழுதியது தான்.

இந்த பாண்ட் படங்களில் எனை வெகு விசேஷமாகக் கவர்ந்தவை பற்றி மட்டுமே பேசப் போகிறேன்.

டாக்டர் நோ

முதல் படம் தான் எனினும் நன்றாகவே எடுக்கப்பட்டிருக்கிறது. குறிப்பாக பாண்டின் அறிமுகக் காட்சியும் ... அந்தப் புகழ் வெற்ற வசனமும் ... அந்தப் புகழ் பெற்ற இசையும் ...

மாண்டி நார்மேன் (Monty Norman) என்பவர் தான் அந்த இசையை அமைத்தவர் ஆனால் அதைச் செயல்படுத்திய ஜான் பேரி (John Barry) அதைத் தான் தான் படைத்ததாகக் கூறி ரெண்டு முறை நீதிமன்றத்தில் சண்டையிட்டுத் தோற்றிருக்கிறார். மாண்டி நார்மேனுக்கு இந்த ஜேம்ஸ் பாண்ட் இசைக்காகவே இருபத்து மூன்று வருடங்களில் ஏறக்குறைய ஐந்து கோடி ரூபாய்கள் கிடைத்திருக்கின்றன ... அந்த ஜாஸ் (Jazz) பாணி கிட்டார் இசை ... வாவ் சொல்ல வைக்கும். இந்த இசையின் மூலம் என நார்மேன் சொல்வது "நல்ல அடையாளம் கெட்ட அடையாளம்" என்ற அவரே இசையமைத்த வி.எஸ்.நைபால் எழுதிய "மிஸ்டர் பிஸ்வாஸுக்கு ஒரு வீடு" எனும் நாவலின் அடிப்படையில் அமைந்த மேடை நாடக இசையை ... https://www.youtube.com/watch?v=g6EuzGhIyRQ ... இதன் டம்டிடிடிம்டிம் எனும் அடிப்படை இசைக் கூறு தான் இதன் வெற்றி

பாதிக்கு மேல் ஜமைக்காவில் படமாக்கப்பட்டிருக்கும் இந்த படத்தின் அறிமுக இசைப்பாடலான "மூன்று குருட்டு எலிகள்" (The Three Blind Mice) குறிப்பிடத் தகுந்தது ... https://www.youtube.com/watch?v=fb-xuf-HqQ4

இந்தப் படத்தில் முதலில் எனைக் கவர்ந்தது கன் (Gun) அப்புறம் பெண் ... ஜேம்ஸ் பாண்ட்டின் பெரெட்டா (Beretta) வகைக் கைத்துப்பாக்கியை ஆரம்பத்திலேயே தூக்கிக் கடாசிவிட்டு அவருக்கு ஒரு வால்த்தர் பி.பி.கே. 7.65mm (Walther P.P.K. 7.65mm) வகைத் துப்பாக்கியைத் தருகிறார்கள் (இந்த mm என்பது துப்பாக்கியின் குழலின் உட்புறச் சுற்றளவு அல்லது குண்டின் சுற்றளவு) ... ரெண்டுமே அழகு தான் ஆனால் அழகிய ஆபத்து. ஆனால் எப்படி ஒரு படத்தில் நிஜ வாழ்வின் ப்ராண்ட்களைக் குறிப்பிட்டு ஒன்றை ஏற்று ஒன்றை நிராகரிக்கிறார்கள் எனப் புரியவில்லை ... யாராவது கேஸ் போட மாட்டார்களா ...

கவனிக்க வேண்டிய இன்னொரு விஷயம் இங்கிலாந்து மற்றும் அமெரிக்க உளவுத்துறை ஆட்கள் ஆரம்பத்திலிருந்தே ஒன்றாகப் பணிபுரிந்து வந்திருக்கிறார்கள் என்பது ... ஃபீளிக்ஸ் லெய்ட்டர் (Felix Leiter) என்ற சி.ஐ.ஏ. கதாபாத்திரம் பாண்டின் மேலும் பத்து படங்களில் தோன்றியிருக்கிறது.

படத்தின் மற்றும் ஒரு குதூகலப் பாடல் "உயரக் குதி ஜமைக்கா" (Jump Up Jamaica) என்பது ... https://www.youtube.com/watch?v=mtTC3aH1sgY

பாண்ட் படங்களில் எனக்குப் பிடித்த மற்றும் ஒரு விஷயம் - பயணம் - எத்தனை வெளிகள் - எத்தனை அனுபவங்கள் ... என் சிறு வயதில் How to be a detective என்ற புத்தகத்தைப் படித்துவிட்டும் (அதில் டால்கம் பவுடர் மற்றும் கை-லென்ஸ் வைத்துக் கொண்டு கைரேகை எப்படிக் கண்டுபிடிப்பது எனச் சொல்லிக் கொடுத்திருந்தார்கள்) இம்மாதிரிப் படங்களைப் பார்த்துவிட்டும் ஒரு அரசாங்க உளவுத்துறை நிபுணனாக விரும்பினேன்.

இந்தப் படத்தில் எனைக் கவர்ந்தவர்கள் ரெண்டு அழகிகள். முதலில் மனிபென்னி-ஆக வரும் லோயிஸ் மேக்ஸ்வெல் (Lois Maxwell) ... இவரை ஏன் ஜேம்ஸ் அவரே விரும்பியும் ஒரு இரவு உணவிற்குக் கூட அழைத்துச் செல்ல விரும்பவில்லை என்பது ஒரு புதிர் தான். ஒரு வேளை வேலை பார்க்கும் இடத்தில் யாரையும் காதலித்து வேலைக்கு உலை வைத்துக் கொள்ளக் கூடாது எனும் எளிய சூத்திரம் காரணமாக இருக்குமோ. லோயிஸ் மேக்ஸ்வெல் மனிபென்னி-ஆக பதினான்கு ஜேம்ஸ் பாண்ட் படங்களில் நடித்தார் ... அவ்வளவு அழகு ... மனிபென்னி டயரிஸ் படிக்க வேண்டும்.

அடுத்த அழகு உர்சுலா ஆண்ட்ரஸ் (Ursulla Andress) ... கடலுக்குள் இருந்து கடற்சங்குகளை எடுத்துக் கொண்டு அவர் ரெண்டு துண்டு ஆடையில் துளியும் ஆபாசமில்லாமல் மேலெழுந்து வரும் அழகு இருக்கிறதே ... அதைச் சொல்லித் துவளாது கடல் ...

படத்தின் மற்றும் ஒரு அற்புதம் ... மாமரத்தின் அடியிலே ... மங்கையவள் மடியிலே (Underneath the mango tree) எனும் இந்தப் பாடல் ... மாமரத்து பூவெடுத்து மாதிரி ஒரு அருமையான ரொமேன்டிக் மெலடி ... https://www.youtube.com/watch?v=mj7rZRKrJ-c

படத்தின் மற்றும் ஒரு அம்சம் ஜேம்ஸ் குடிக்கும் சரக்குகள் - டாம் பீரியன் '53 (Dom Perignon '53) எனும் ச்சேம்பெயின் (Champagne) மற்றும் ஜேம்ஸுக்கு மிகப் பிடித்தமான மார்ட்டினி (Martini) எனும் காக்டெயில் (cocktail) - வோட்காவும் ஜின்னும் கலந்தது - குலுக்கியது கலக்கியது அல்ல எனும் சொற்றொடருடன்

சொல்லியே ஆக வேண்டிய மற்றும் ஒரு விஷயம் - வேறு யார் - ஷான் கானரி தான் - அவரின் ரகசிய உளவாளி மற்றும் பெண் ஈர்ப்பாளர் கதாபாத்திர வார்ப்பும், நடிப்பும், அந்த செக்ஸியான குரலும் - வாவ் ... அருமை - இந்தப் படத்தில் நடிக்க ஆரம்பிக்கும் போது இவருக்கு முப்பது வயது தான் - ஒரு முறை என் அப்பா சொன்னார் ஜேம்ஸ் பாண்ட்னா அது ஷான் கானரி தான்டா என்று ... நான் மறுத்து இல்லை ரோஜர் மூர் தான் என்றேன் ... இப்போது சொல்கிறேன் அனைத்து ஜேம்ஸ் பாண்ட் படங்களையும் ஒட்டு மொத்தமாக ஒரே வீச்சில் பார்த்து முடித்து விட்டு ... ஷான் கானரி தான் சிறந்த ஜேம்ஸ் பாண்ட் ... இந்தப் படம் இயன் ஃபெளிமிங் வரைந்த மாதிரி ஜேம்ஸ் பாண்ட் படம் ...

மெட்டியில் தொற்றிக் கொண்ட தனிமை: லாவண்யா சுந்தரராஜனின் 'அறிதலின் தீ' கவிதைத் தொகுப்பை முன்வைத்து ...

2017-03-22T20:45:00.000+05:30

இந்தச் சிட்டுரையில் நான் எந்த ஆராய்ச்சிக்கும் போகவில்லை. ஒவ்வொரு கவிதையும் எனக்குள் ஏற்படுத்திய உணர்ச்சியை, மிகச் சுருக்கமாகப் பதிவு செய்திருக்கிறேன் அவ்வளவு தான். விமர்சனத்தில் ஆழமில்லை எனத் தெரியும். இது தான் கருத்து வெடிப்பு உலகமாயிற்றே. அது தான் நீட்டி முழக்காமல் இத்துடன் நிறுத்திவிட்டேன்.

லாவண்யாவின் கவிதைகள் பெரும்பாலும் நேரடித் தன்மை கொண்டவை, ஒரு மெலிதான நுணுக்கம் அவற்றுள் இருந்தாலும். 'அறிதலின் தீ' தொகுப்பின் முதல் கவிதையான 'சுவர் வரைந்த சித்திரம்' அப்படியான ஒரு கவிதை. ஒரு சுவரின் இடிபாடு என்பது சரித்திரத் தன்மை கொண்டது, ஒரு மனிதனின் வயோதிகத்தைப் போல. எனக்குப் பிடித்த ஒரு கவிதை இது.

சில கவிதைகள் வெறுமனே வாசித்துவிட்டுக் கடக்கக் கூடியதாக, எந்தவொரு உணர்வெழுச்சியும் தர இயலாதவையாக (எனக்கு), அமைந்திருக்கின்றன. எண்ணிக்கை என்பது முழு நேரக் கவிஞனுக்குக் கூட கணக்கில் வராது ... நமக்கு எதற்கு (சலனம், உணர்வின் வண்ணம்) லாவண்யா. அதற்கு பதில் ஒரு குவளை சீரக வெந்நீர் அருந்துவது தான் நான் பொதுவாக மேற்கொள்ளும் பயிற்சி. தொகுப்பின் தலைப்புக் கவிதையான 'அறிதலின் தீ' கூட எனக்குச் சாதாரணமாகத் தான் தெரிகிறது.

ஆனால் 'காதலென்று' என்ற கவிதையில் இணைந்து இழையோடும் காமம் அவ்வளவு நுட்பமான அழகுடன் மிளிர்கிறது. எனக்குப் பிடித்த மற்றதொரு கவிதை. 'பிள்ளைகள் வளர்ந்தனர்' கவிதையாகாமல் செய்திக் குறிப்பாக அது உருவாக்க வேண்டிய வலியையும் கடத்த வேண்டிய துக்கத்தையும் தவற விடுகிறது. 'சுயநலமற்ற தனிமை' கவிதை ஒரு ரசிக்கத்தக்க சுகமான சுமையை அவ்வளவு அழகாக வரைந்து செல்கிறது. ''வீட்டிலிருந்து புறப்பட்டபொழுது / மெட்டியில் தொற்றிக் கொண்டது / தனிமை' என்பது கிட்டத்தட்ட ஹைக்கூ (இல்லை என வாதிடவும் முடியும் என்பதால் கிட்டத்தட்ட).

'தீதும் நன்றே' நகைமுரணைச் சுட்டிவதாகக் காட்டும் ஒரு பாவ்லா, அவ்வளவுதான். 'மரணம்' கவிதை அது கோரும் எந்த அதிர்ச்சியையும் ஏற்படுத்தவில்லை என்பதுதான் அதிர்ச்சி. 'தோற்றம்' கவிதையில் 'கொடியில் உலரும் / பால்ய வயதின் ஆரஞ்சு ரிப்பன் / போல / வயல் பரப்பில் / சிறு தீ படபடத்துக் கொண்டிருந்தது / கரிசல் காட்டில் / சின்னச் சின்ன சாம்பல் குன்றுகள்' என்பதோடு நல்ல கவிதையின் சித்திரம் முடிந்துவிட்டது. அதன் பிறகும் விடமாட்டேன் என்று மூன்று வரிகள் நீட்டுகிறார் ... ஏன் என்று என் அறிவுக்கு விளங்கவில்லை.

'தற்கொலையாளி' கவிதை அல்ல ஏதோ தீர்ப்பு மாதிரி தெரிகிறது. நீதி விசாரணையைக் கவிதையில் கையாள்வது அவ்வளவு சுலபமல்ல. 'அவமதிப்பின் ஒப்பனை' 'சுயநலமற்ற தனிமை' போல ஒரு நல்ல கழிவிரக்கக் கவிதை. 'துடைப்போவியம்' கவிதை என்ற கண்துடைப்பு தான் அன்றி வேறில்லை. 'அடையாளம் துறக்கும் நேரம்' ஒரு சிறந்த பெண்ணியக் கவிதையாய் மலர்ந்திருக்க வேண்டியது. ஆனால் மிக மிகச் சாதரணமான ஒரு நிலையில் நின்று நம்மிடம் பேசிப் பார்க்கிறது.

'மலைப்பெண்' சாதரணமாக இருந்தாலும் கவிதை தான் என்ற ஆசுவாசத்தைக் கொடுக்கிறது அது பிரதிபலிக்கும் வாதை. 'அருவருப்பின் ரகசியம்' நாம் அறிந்த ஒன்றையே திரும்பச் சொல்கிறது. ஆனால் இது திரும்பச் சொல்லப்பட வேண்டியது தான். 'இருளின் நிழல்' அருமையாகத் தன் வலியைப் பதிவு செய்கிறது. 'பிரிவு' கவிதை தன் துக்கத்திற்கு நேர்மையாக வெளிப்படுகிறது அலட்டாமல். 'ஆரண்யம்' எல்லாம் கவிதையா என கவிஞர் சிந்திக்க வேண்டும். 'பற்றி எரிப்பவை' காமத்தைப் பேசத் துணிவது போல் நடித்து பயந்து ஒளிகிறது. 'சிறுமி வளர்க்கும் வெய்யில்' (தலைப்பே ஒரு அபாரக் கவிதை) மாய-எதார்த்தமாகச் சொல்லப்பட்ட அருமையான சித்தரிப்பு. 'உறங்காத வீடு' கவிதை எனக்குப் புரியவில்லை எனச் சொல்லி நகர்ந்து விடுகிறேன் ... ஆதிகாலத்தில் ஏதோ அமானுஷ்யம் நடந்திருக்கும் போல.

'பொழுது போக்கு' மற்றோரு குறுங்காவியக் கூறு. 'கடந்து போகும்' கவிதை ஒரு சிறு தத்துவத்தை உதிர்க்கிறது ஆனால் கவிதையும் சேர்ந்து கடந்து போய் விடுவது துரதிர்ஷ்டமே. 'அலையும்' மற்றும் 'ஈரம்' கவிதைகள் எல்லாம் வெற்று அறிக்கைகளாக மட்டுமே எஞ்சுகின்றன். 'அறிந்ததும் அறியாததும்' எப்படிக் கவிதையாகிறது எனத் தெரியவில்லை. 'மௌன ஊற்று' எந்தப் புத்துணர்ச்சியும் தர இயலாது கிடக்கிறது. 'துளித் துளியாய்த் தொலையும் வெறுப்பு' அட என்று ஒரு சலனத்தை உருவாக்கத் தவறவில்லை என்பதால் நம்முடன் நம்முள் ஒரு உரையாடலைத் தொடங்கி விடுகிறது. 'போதை' தன் பேசு பொருளை இன்னும் கூர்மையாக அணுகியிருந்தால் கிறுகிறுக்கச் செய்யாவிட்டாலும் எறும்பாவது கடித்திருக்கும். 'தனிமையாய்' கவிதை சொல்லிச் சலித்து நைந்த ஒன்று.

'சமையல்' நல்ல பகடி. 'சந்தேகம்' கவிதை ஒரு சுயபுலம்பலாகவே எஞ்சிவிடுகிறது. 'வெறுமனே நோக்குதல்' குருவின் முன் சிஷ்யையின் அவையடக்கத்தைப் பாதுகாக்கிறது - இதை சமர்ப்பணமாகத் தொகுதி ஆரம்பிக்கும் முன் சேர்த்திருந்தால் அதன் தாக்கமே வேறு தளத்தில் இருந்திருக்கும். 'பிரிவற்ற பிரிவொன்று' தன் கடைசி வரியில் சட்டெனக் கவிதையாகி நெகிழ்த்துகிறது. 'வெளிச்சத்தின் சுவை' மாதிரியான நல்ல கவிதைகளைத் தான் லாவண்யா உங்களிடம் இன்னும் நிறைய எதிர்பார்க்கிறேன். 'உறுத்திக் கொண்டு இருப்பது' உறுத்தாமல் பொருத்தமாகக் காட்சி தருகிறது. 'அடையாளமற்றுப் போனவள்' போலக் கருணையற்றக் குரூரமும் இவர் கவிதையில் ஆச்சரியமான சுய விமர்சனத்துடன் வெளிப்படுகிறது என்பது ஆச்சரியம்.

'பயம்' கவிதை அதன் புதிர்தன்மையால் சுவாரஸ்யப்படுத்துகிறது. 'சொல்லாதவை', 'மலையோடே இருக்கும் மலை', 'தருவதற்கு வேறு ஏதுமில்லை' எல்லாம் வெற்று எண்ணிக்கைகள் மட்டுமே. 'ரயில் இசை' மற்றொரு அபஸ்வரம். 'இளங்காலை பொழுதொன்றில்' எளிமையான அருமையான கவிதை. 'பாசக்கயிறு', 'உடைந்த குடை' வெகு சராசரி ... எப்படி மனசு வந்து தொகுப்பில் சேர்த்தாரோ. 'உடலற்ற உணர்வுகள்' தாய்மை அற்ற ஒரு பெண்ணின் குரலை மிக அழுத்தமாகப் பதிவு செய்கிறது. 'அவசரம்' அவசரப்பட வேண்டாம், நல்ல கவிதைக்கு நிதானம் தேவையோ எனச் சொல்ல வைக்கிறது.

'பழம் புத்தகம்', 'பாவமும் தர்மமும்', 'இருத்தல்', 'துரத்தும் கனவுகள்' எல்லாம் மேலும் சில வெற்று எண்னிக்கைக் கவிதைகள். 'நீர்ப்பாறை' கவிதையோடு சேர்த்து நம்மையும் கடலில் கரைத்துவிடுகிறது. 'நீலநிலவு' ஒரு சாதாரண பிரதிபலிப்பு. 'குடும்ப வாசனை' ஒரு சாதரண ஏக்கப் பெருமூச்சுடன் மூர்ச்சையாகிவிடுகிறது. 'பந்தாட்டம்' அன்றாட அலுவல் அலுப்பு குறித்து நன்றாக வந்திருக்க வேண்டிய ஒரு கவிதை. 'அந்தரங்கம்' ஒரு நல்ல அவதானிப்பு. 'பேனாக்கள் நிரத்தரமில்லை' கவிதையில் பேனா என்பது ஒரு சலித்த குறியீடாகத் தோன்றி அயற்சி தருகிறது, எதுவும் எழுதியதாகத் தெரியவில்லை.

'முதுகுப்பாரம்' கவிதைக்கு அருகில் வர மறுக்கிறது. 'ஆயுதக் காதல்' அருமையான வெளிப்பாடு ... இப்படி எழுதத் தான் ஆள் வேண்டும். 'எனக்கான கவிதை' கவிஞரே சொல்வது போல் நமக்கான கவிதை இல்லை என்பதால் மன்னித்து நகரலாம். 'பின்மழை' ஒரு அருமையான சென்ரியு வகைக் கவிதை ... '... குடைக்கம்பியொன்று/ மழலை வாய்விடுத்த/ முலைக்காம்பாய் ...' என அட சொல்ல வைக்கிறது. 'நீர்ப்பெண்' மற்றொரு நல்ல கவிதை. 'உறங்கும் இரவு' நமக்குள் எந்த சலனத்தையும் ஏற்படுத்தவில்லை. 'மனம்' கவிதையின் ரெண்டாம் பகுதி பரவயில்லையே எனச் சொல்ல வைக்கிறது. 'பிறைமொழி' வெகு சாதாரணம். 'குட்டிச்சட்டி' அது வாசகனுக்கு உருவாக்கித் தந்திருக்க வேண்டிய அடையாளப்படுத்தலை தவறவிடுகிறது. 'இரு பெண்கள்' ஒரு சாதரண உருவாக்கம்.

ஒரு முழுக் கவிதைத் தொகுப்பில் தொடர்ந்து 40 கவிதைகள் வாசித்து முடித்த செயலெல்லாம் பல வருடங்களுக்கு பிறகு இத்தொகுப்பில் தான் நிகழ்ந்தது. மிச்ச கவிதைகளை வேலைப் பளு காரணமாக சற்று இடைவெளி விட்டுத் தான் படிக்க முடிந்தது. தன் மூன்று கவிதைத் தொகுதிகளையும் வாசித்து என் எண்ணங்களைப் பகிர்ந்து கொள்ளும்படி லாவண்யா கேட்டுக் கொண்டிருந்தார். நட்பிற்காகவாவது நான் அதை முன்னமே செய்திருக்க வேண்டும். முதல் தொகுதியில் ('நீர் கோல வாழ்வை நச்சி') இங்கொன்றும் அங்கொன்றுமாக வாசித்து இவரைப் ப்ரிய க்ளிஷேக்களின் ராணி எனச் சொல்லி இருந்தேன். ரெண்டாம் தொகுதியை இன்னும் வாசிக்கவில்லை. அதனால் என்ன, 'ஒரு பாவை சோற்றுக்கு ஒரு சோறு பதம்'. இத்தொகுப்பில் பாதிக்குப் பாதி நல்ல கவிதைகள் இருக்கின்றன. வாழ்த்துகள் லாவண்யா.

எமக்கு உபதொழில் கவிதை

2016-12-09T14:21:00.001+05:30

நாமே எழுதி, நாமே பத்திரிக்கைகளுக்கு அனுப்பி, அது வெளியாகிறதா எனப் பார்த்துப் பரவசப்பட்டு அல்லது அவசரப்பட்டு முகநூலில் பகிர்ந்து, பின் நாமே ஒரு பத்திப்பகத்தைத் தேடிச் சென்று நிதம் காத்து நின்று, நாமே காசு கொடுத்து, நாமே அட்டைப் படம் அமைத்து, நாமே வெளியிட்டு, அதைப் பத்து பேர் பத்து வருட இடைவெளியில் படிப்பார்கள் எனத் தெரிந்தும் ஒவ்வோரு முகவரியாய்த் தேடி, பத்திரிக்கைகள் ... தெரிந்தவர் ... தெரியாதவர் என நாமே தபால் செலவு செய்து ஒரு நூற்றைம்பது பேருக்கு அனுப்பி, மீதமிருக்கும் நூற்றைம்பது பிரதிகளைக் கண்டு கொதித்து ... சுவாமி ரம்யானந்தா சொல்வது போல் ... "இதுக்கு வேற ஏதாவது தொழில் செய்யலாங்க ஐயா" என நினைத்து, சரி அடுத்த தொகுதிக்குத் தகுதி வந்துவிட்டது என உணர்ந்து ஒரு செயலூக்கம் அடைவோமே அதற்கு நிகர் இன்னும் ஒரு தொகுப்பை வெளியிடுவதில் தான் இருக்கிறது ... இதில் விருது ஆசை வேறு சேர்ந்துகொண்டால் செலவு இன்னும் அதிகம் ஆகும் எனச் சொல்லக் கேள்வி ... இந்தத் தொகுதியில் நான் கவிதைகளில் முன்னேறிவிட்டதாக சிலர் நினைக்கக் கூடும் ... உமக்கே புரியும் கவிதைகளை எழுதிவிட்டீர் எனப் பேசக் கூடும் ... எனினும் எனக்குத் தெரியாதா என்ன "எமக்கு உபதொழில் கவிதை" என்று ... தொழிலுக்குத் தான் மென்பொருள் நிறுவனத்தில் வன்மையாக உழைக்கிறேனே ...

(எப்போதாவது வெளிவரப் போகும் "எமக்கு உபதொழில் கவிதை" என்ற என் மின்னூலின் முன்னுரையில் இருந்து)

பி.கு. வேண்டுமென்றே உணர்ச்சி சின்னங்களைத் தவிர்த்திருக்கிறேன்

கவிதைகள் கேள்விகள் பதில்கள்

2014-04-09T21:22:00.003+05:30

எழுத்தாளர் லதா ராமகிருஷ்ணன் அவர்கள், கவிஞர் பிரம்மராஜன் வழிநடத்தும் தமிழ் ம்யூஸ் இந்தியா மின் இதழுக்காக ஒரு நேர்காணல் போல கவிதை குறித்து பல கேள்விகளை பல கவிஞர்களுக்கு அனுப்பி இருந்தார். நானும் பதிலளிக்க முயற்சித்தேன். கேள்விகள் பெண் கவிஞர்களை நோக்கில் கொண்டு உருவாக்கப்பட்டிருந்தன. கவிஞர் லீனா மணிமேகலையின் பதில்கள் தான் இதழில் வெளியாயின. எனினும் என் பதில்கள் இதோ. கவிதைகள் எழுதுபவர் எனில் நீங்களும் பதில் சொல்லிப் பாருங்களேன் ...

1. கவிதை மனதில் உருவாகும் தருணம் எது?
Which is the exact moment when a poem begins to form in your mind?

ரயில் பயணம், கார் பயணம், திரைப்படங்கள், தூக்கம், மது, கவிதை, புத்தகம், இயற்கை, மழை, மௌனம், சாவு, காமம், காதல், இரவு, தனிமை, ஓவியம், ஒளிப்படம், பறவைகள், காடு, கானுயிர், நினைவுகள் இவையெல்லாம் எனக்குத் தொடர்ந்து கவிதை உருவாகும் தருணங்களைத் தருபவையாக இருக்கின்றன. இவற்றில் இருக்கும் பொது அம்சம் ‘trance’. இந்த ‘trance’ இருந்தும் கவிதை வாய்க்காமல் போவதும் உண்டு. அப்போது அனுபவம் மட்டுமே போதும் என அதைக் கவிதை வழி கடத்தாமல், அல்லது கடத்த முடியாமல் அல்லது laziness ஆல் அப்படியே மறந்து விட்ட சந்தர்ப்பங்களும் நிறைய உண்டு. பல சமயங்களில் ஒரு முழு கவிதையின் வரிகள் பல்வேறு காலகட்டங்களில் தோன்றி வேறு ஒரு காலத்தில் compile ஆகி இன்னும் சற்று காலம் கழித்து மனதில் முழு வடிவமாகப் print ஆகி இருக்கின்றன. இதுதான் மிகத் துல்லியமாக கவிதையின் காலத்தை அறுதியிடுவதில் உள்ள சிக்கல். முழுக் கவிதையும் ஒரே shotஇல் தோன்றி வருவதெல்லாம் குறைவு.

2. இந்த விஷயங்கள் குறித்துத் தான் கவிதை எழுதுவது என்று வைத்துக்கொண்டிருக்கிறீர்களா? அப்படியெனில் அவை என்ன? அப்படியில்லையெனில் எவை யெல்லாம் உங்களைக் கவிதை எழுதத் தூண்டுகின்றன?
Do you have any specific themes beforehand, to write poems? If so what are they? If not, which trigger you to write poetry?

Conscious ஆக அப்படி ஒரு லிஸ்ட் இல்லை. ஆனால் நான் மீண்டும் மீண்டும் அல்லது அதிகம் எது பற்றி எழுதுகிறேன் என்பதை வைத்து எதையெல்லாம் எழுதாமல் விட்டிருக்கிறேன் (பல சமயங்களில் தவிர்த்தும் இருக்கிறேன்) என்பதைப் புரிந்து கொள்ளலாம் … -[மைனஸ் ஒன்]1 அதற்கு சாட்சி. Trigger points for poetry பற்றி முதல் கேள்வியின் பதிலில் சொல்லியிருக்கிறேன்.

3. நவீன கவிதை எழுதுபவர் என்ற அளவில் உங்களைப் பொறுத்தவரை மொழி நடை அல்லது மொழிப்பிரயோகம் எந்த அளவுக்கு முக்கியத்துவம் பெறுகிறது?
In your view, what is the role played by style in modern Tamil poetry?

மொழி நடை அல்லது மொழிப்பிரயோகம் கவிதைக்கு முக்கியம் என்றே நம்புகிறேன். நேர்த்தியாகவும், ஸ்வாரஸ்யமாகவும் விஷயத்தைச் சொல்ல இது உதவும்.

4. ஒரு கவிதைக்கான வார்த்தைகளை எவ்வாறு தேர்ந்தெடுக்கிறீர்கள்? பிரக்ஞாபூர்வமாகவா அல்லது குறிப்பிட்ட கவிதையே தனக்கான வார்த்தைகளைத் தெரிவுசெய்துகொண்டுவிடுமா?
How do you choose the words for your poetry? Or, does the poem instinctively select its own choice of words?

ரெண்டுமே. Case by case இது மாறும்.

5. நவீன கவிதையில் இருண்மை உள்ளது, புரியவில்லை என்று முன்வைக்கப்படும் குற்றச்சாட்டுகள் குறித்து உங்கள் நிலைப்பாடு என்ன?
There are those who complain that modern Tamil poetry has the element of ambiguity in it and that it is not easily comprehensible. What do you have to say about this?

இருண்மை என்பதை Abstraction எனக் கொண்டு, Evocative ஆக இல்லாமல் introspective ஆக இருக்கும் கவிதைகளுக்கு இந்த ஆபத்து அதிகம் எனலாம். நிறைய வாசிப்பு, தேர்ந்த வாசிப்பு இது தான் என் பரிந்துரை.

6. எழுதவேண்டும் என்பதற்காக அல்லது தரச்சொல்லி எந்தப் பத்திரிகையாவது கேட்டுக்கொண்ட காரணத்திற்காக கவிதை எழுதியதுண்டா? உண்டெனில் எதில் அதிக நிறைவுணர்ந்திருக்கிறீர்கள்?
Do you write poems when they come to you ? or, have you written any poem on having been asked by some magazine? If so, which one gives you more satisfaction?

ம்ஹூம். முயற்சித்தது உண்டு ஆனால் முடிந்ததில்லை. சில முறை இப்படி தெரிந்தவர்கள் தங்கள் பத்திரிக்கைகளுக்குக் கேட்டபோது முதலில் ஒப்புக் கொண்டு பிறகு முடியவில்லை எனக் கைவிரித்திருக்கிறேன். Instant இலக்கியம் எனக்கு வராது போல.

7. உங்களுடைய கவிதைகளிலேயே உங்களுக்கு மிகவும் மனநிறைவைத் தந்தது[வை] எது?[யாவை?] ஏன்?
Of all your poems which one[s] is[are] your favourite[s]? why?

கலைக்கப்படும் அமைதி : சிறுகதைத் தன்மைக்காக

முன் செல்லும் காமத்தின் முகம் : உடலுறவு, உணர்வுறவு ஆகியவற்றை அழகியலோடு சொல்ல முயல்வதால்

Whiskey with நந்தா : பகடி மற்றும் சுயசரிதப் புனைவு

தலைப்பிடப்படாதது : அதிர்ச்சி மதிப்பிற்காக

மண்புழுக்கள் நெளியும் மண்டை : for the madness

ஏழாவது விழிப்பு : கவித்துவத்திற்காக

ஒளி எரித்த திரை : பகடி கலந்த விஞ்ஞானப் புனைவிற்காக

ரெண்டாம் காலம் : மொழி பிரவாகம் இயல்பாகப் பொழிவதால். இந்தக் கவிதையின் தலைப்பும் முதல் சில வரிகளும் திருச்சி மலைக்கோட்டை தாயுமானவர் சன்னிதியில் தோன்றியதால்.

4°C: கவிதை முன் வைக்கும் கருணைக்காக

பலூன்கள் பறக்கும் பள்ளத்தாக்கு : படிமங்களின் பாடலாக ஒலிப்பதால்

-1 : ஒரு dystopian உலகத்தை கச்சிதமாகச் சொல்ல முயற்சித்ததற்காக

1500m AMSL: மேகம் 9 - ஸ்தலபுராணம் : பயணக் கவிதை. இதை ஒரு series ஆக எழுதிக் கொண்டிருக்கிறேன்.

ரயிலாட்டம் : ரயில் கவிதை. இதையும் ஒரு series ஆக எழுதிக் கொண்டிருக்கிறேன்.

எஃகு முட்டைகள் : தாட்சண்யமற்ற இறுகிய மொழிக்காக

முன் பின் : ஒரு pseudo code போல முயற்சித்ததால் (ஆனால் இது pseudo poem என்ற விமர்சனம் எழுந்தது)

ஒரு நாள் கூத்து : தத்துவத்திற்காக, எளிமைக்காக

2010.01.01 00:00:01 அன்று அவன் எழுதப்போகும் கவிதை : நவீன புத்தாண்டு புதுக்கவிதை

உறக்க விதி : நேரடித்தன்மைக்காக

µP பதிப்பிக்கப்பட்ட மூளை சொல்லும் போன ஜென்மத்துக் கதைகள் : உரைநடையின் லாவகத்தில் ஒரு கவிதையை முயன்றதற்காக

கண்ணீர் கவிதை : அபத்தத்திற்காக, வேடிக்கைக்காக

நுனிஇரவு மேயும் கதிர் : மொழியின் சாதுர்யத்தை வெல்ல முயன்றதற்காக

நதி உணரும் பகல் : புனைவின் சுதந்திர வெளியை அளக்க முயன்றதற்காக

இலை கொஞ்சும் மழை : சமூகச் சாடலை சப்தமில்லாமல் சொல்ல முயன்றதற்காக

நான் இப்பொழுது குடிக்கும் பியர் : கொண்டாட்டத்திற்காக / for it's hedonism

ராமாயணம் 301 : மாய எதார்த்தத் தன்மைக்காக

மீண்டும் தவளை : ஹைக்கூ. பாஷோவின் தவளையை மீண்டும் கண்டுபிடித்ததற்காக

சாக்கடை என்பதும் நீர்நிலை : for the imagery and philosophy

8. உங்களுடைய கவிதைகளில் ஒரு வாசகராக நீங்கள் உணரும் நிறைகள் யாவை? குறைகள் யாவை?
As a discerning reader which are the plus and minus points that you find in your poems?

நிறை – style, making

குறை – மனஎழுச்சி குறைவாக இருப்பதாக எழும் விமர்சனம்

9. உங்களுக்குப் பிடித்த சக கவிஞர்கள் யார்? அவர்களுடைய கவித்துவத்தில் எது உங்களை ஈர்க்கிறது?
Who is your favourite one among the contemporary poets? What in their poetry draws your attention most?

மண்குதிரை – அழகியல் உணர்வுகள் பொங்கும் romanticism கொண்டதற்காக

யாத்ரா – அக உணர்வுகளின் தாண்டவம் ஆடும் கொந்தளிப்பை அநாயசமாகச் சொல்வதால்

நேசமித்ரன் – ஒவ்வொரு முறையும் ஒரு அற்புத உலகைப் படைத்து, காலத்தையும் வெளியையும் ஒரு கண்கட்டு வித்தை போல கடந்து விடும் வரிகளால்

விநாயக முருகன் – எளிமையான நேரடித்தன்மை மற்றும் கதை பாணியிலான அமைப்பு; சிறு விஷயங்களையும் நுட்பமான பார்வையுடன் கவனித்து கவிதையாக்குதல் போன்றவற்றிற்காக

முபீன் சாதிகா – பின்மரபுத்துவத்திற்காக

பொன். வாசுதேவன், வா.மு. கோமு, எம்.டி.முத்துகுமாரசாமி – இவர்களையெல்லாம் contemporary எனலாமா தெரியவில்லை. தொன்னூறுகளின் இறுதியிலே கணையாழியில் எழுதிவிட்டதாலேயே என்னை போன தலைமுறை என சொல்வோரும் உண்டு.

வாசுவின் காதல் மற்றும் தத்துவக் கவிதைகள் இந்த நவீன யுகத்திலும் ஸ்வாரஸ்யம் இழக்காமல் இருப்பதால்.

வா.மு.கோ.மு.வின் கவிதைகள் அவிழ்த்துப் போடும் காமத்தின் நிர்வாண அழகிற்காக.

எம்.டி.முத்துகுமாரசாமியின் கவிதைகளின் metaphysical தன்மைக்காக.

நிலா ரசிகன் – இவரின் கவிதைகளின் இயங்கு தளமே ஒரு graphic novelஐப் போல இருப்பதால்

அய்யனார் – பிறழ்வின் மையத்தையும் நெருங்கத் துணியும் கனமான சொற்களுக்காக

வா.மணிகண்டன் – மனித இருப்பின் ஊஞ்சலாட்டமும், நவீன வாழ்வில் நாம் ஆடும் பரமபதம் மற்றும் அதற்கான எதிர்வினைகளையும் பாசாங்கில்லாமல் சொல்வதற்காக

ராணி திலக் – வாழ்வின் அபத்தவியல் தரிசனங்களுக்காக

10. கவிதைக்கான வெளியும் வரவேற்பும் வெகுமக்கள் இதழ்களில் இப்போது முன்பைக் காட்டிலும் அதிகமாகியிருக்கிறதா? இப்போதுள்ள நிலை என்ன?
As for as the Tamil pop magazines are concerned has the space and demand for good poetry increased now?

இல்லை. ஆனால் ஆனந்த விகடன் சற்று பரவாயில்லை எனத் தோன்றுகிறது.

11. கவிதை எழுதும் பெண் என்ற அளவில் ஒருவர் பெண் சார்ந்த விஷயங்களையே தமது கவிதையில் முன்னிலைப்படுத்த வேண்டும், கையாள வேண்டும் என்று நினைக்கிறீர்களா?
As a woman writing poetry do you feel that your poems should focus on women’s issues or they should have women as their prime theme?

இல்லை. பலர் பிற விஷயங்களும் எழுதுகிறார்கள். அப்படியும் இருக்கலாம். இது தனி நபர் விருப்பு சார்ந்தது.

12. 80கள், 90களிலெல்லாம், ஏன் இப்பொழுதும் கூட சிறுபத்திரிகைகள் அல்லது மாற்றிதழ்களில் தான் நவீன தமிழ்க்கவிதைகள் வெளியிடப்பட்டன, வெளி யிடப்படுகின்றன என்னும் நிலையில், இந்த வெளியில் இயங்குபவர்களுக்குப் பொதுவாகவே உரிய கவனம் கிடைக்காத நிலையே நடப்புண்மையாக இருக்கும்போது கவிதை எழுதும் பெண்கள் ஒடுக்கப்படுகிறார்கள் என்ற குற்றச் சாட்டு எப்படி உண்மையாக இருக்க முடியும்?
In the 80s and 90s, why, even now modern Tamil poems have found and are finding place in small magazines or alternate magazines alone. When this being the case, when all those who function in this alternate magazine circle do not get the recognition due to them, is it a valid accusation to say that women writing poetry were/are suppressed and sidelined?

ரெண்டுமே உண்மை.

13. பெண்கள் பாலியலைப் பற்றி எழுதுவதை ஒழுக்கநெறி சார்ந்து எதிர்த்த ஆண்களும் உண்டு, கவிதைநெறி சார்ந்து விமர்சித்தவர்களும் உண்டு. இந்த இரு பிரிவினரையும் ஒன்றாகப் பார்த்து ஆணாதிக்கவாதிகளாகப் பகுப்பது எவ்வளவு தூரம் சரி?
There were those who criticized and condemned the poems of women writing poetry on moral grounds and poetic grounds. Is it right to club the two together and brand them as male-chauvenists?

ஓரளவு சரி தான். ஆனால் ஆதிக்கவாதிகள் எனச் சொல்லவது தான் இன்னும் பொருத்தமாக இருக்கும். இதை எதிர்க்கும் பெண்களும் கணிசமாகவே இருக்கிறார்கள். அதன் sex contentடிற்காக மட்டும் ரசிக்கும் ஆண்களும் இருக்கிறார்கள்.

14. பெண்கள் எழுதும் கவிதைகளை விமர்சிக்கவே கூடாதா? பெண்கள் எழுதும் கவிதைகள் குறித்த விமர்சனங்கள் எப்படியிருக்கின்றன? எப்படியிருக்கக் கூடாது என்று கருதுகிறீர்கள்?
Is it wrong to review the poems of women at all? Are they to be considered as above criticism? Is it a healthy trend? In your view which is a healthy review or criticism of the poems of women writing poetry? How should it be?

விமர்சிக்கலாம். விமர்சிக்கப்படுகிறார்கள். ஆனால் பாலியலைப் பற்றி எழுதினால் அதை அந்தக் கவிஞரின் ஒழுக்கநெறியுடன் தொடர்பு படுத்தி விமர்சிப்பதில் நியாயமே இல்லை.

15. பெண்கவிஞர் என்ற அடைமொழியே கூட கவிதை தெரிந்த தெரியாத எந்தவொரு ஆணும் ஒருவித patronizing tone ஐ மேற்கொண்டு அவற்றைப் பற்றி பேச வழிவகுத்துவிடுகிறதல்லவா? இந்த அடைமொழி அவசியம் என்று கருதுகிறீர்களா? எதனால் அவசியம்?
Don’t you think that the very coinage ‘women poets’ give room for any man, whether he knows poetry or not, to sit on a pedestal and speak about women writing poetry in a patronizing tone? Or, do you think that this coinage is essential? If so, why?

இந்த அடையாளம் அவசியமில்லை. ஆனால் ஆண்பால் பெண்பால் என்பது இயற்கை. எல்லாவற்றிலும் male version, female version உண்டு - நான் சொல்வது perception பற்றி. பல சமயங்களில் இந்த ரெண்டு versionஉம் ஒரே மாதிரி கூட இருக்கும். அதனாலேயே இது தவிர்க்க முடியாததாகி விட்டதோ …

16. வரலாறு என்பதை இரண்டாகப் பிரிக்க முடியும். கடந்த கால வரலாறு, நிகழ்கால வரலாறு. அப்படிப் பார்த்தால் கடந்த காலத்தில் பெண்கள் எழுத்து புறக்கணிக்கப்பட்டதாக நீங்கள் நினைத்தாலும் தற்போது கவிதை எழுதும் ஆண்களுக்கு இல்லாத அளவு கவிதை எழுதும் பெண்களுக்கு கவனம் கிடைக்கிறதல்லவா? இது சம காலத்தில் வாழும் ஆண் கவிஞர்களுக்குச் செய்யப்படும் அநீதியென்று சொல்லலாமா?
History is twofold: the history of the past and the history of the present. So, even if you genuinely feel that women were suppressed and oppressed in the literary field in the past [which is not the whole truth] today the women writing poetry get more attention than men writing. Can we call this as injustice meted out to your male contemporaries?

ஒரு அநீதியும் இல்லை. Suppression, oppression, depression எல்லாம் வேறு எப்படி வெளிப்படும் …

17. காலச்சுவடு போன்ற மாற்றிதழ்கள் தொடர்ந்த ரீதியில் கவிதை எழுதும் பெண்களை ஊக்குவித்தபோது, முன்னிலைப்படுத்திய போது கவிதை எழுதும் பெண்களின் வரவு அதிகமாகியது. அதற்கு முன்பும் கவிதையின் பால் ஆர்வம் கொண்ட பெண்கள் எழுதிக்கொண்டிருந்தார்கள். இப்பொழுது கவிதை எழுதும் பெண்கள் வரவில் மீண்டும் ஒரு தேக்க நிலை ஏற்பட்டிருப்பதைப் பார்க்கிறோம். எனவே ஒடுக்குதல் என்பதை விட ஊக்கப்படுத்துதல் தான் அதிகம் பெண்கள் இலக்கிய வெளியில் வர வழிவகுக்கிறது என்று சொல்லலாமா?
It was when magazines like Kalachuvadu encouraged and promoted women writing poetry, on a continuous basis the number of women writing poetry increased. Ofcourse, even before that women interested in writing poetry were writing. Now you can see that there is a lull and not many women entrants have appeared in the field of poetry? So, can we say that it is not suppression but lack of encouragement and promotion that come in the way of women writing poetry?

ரெண்டுமே உண்மை.

18. கவிதைக்கும் வாழ்வுக்குமான தொடர்பு தனி மனித அளவிலும், சமூக அளவிலும் எப்படியிருக்கிறது? எப்படியிருக்கவேண்டும்?
What should be the relationship between poetry and life, both on an individual level and on a social level?

ஏனோ எனக்கு இந்த கேள்வி களைப்பைத் தருகிறது. வேறு ஒரு சந்தர்ப்பத்தில் இது குறித்து நான் சந்தோஷமாக உரையாடத் தயாராக இருக்கலாம். இப்போதைய மனநிலை அப்படி. மன்னிக்கவும்.

19. கவிதை எழுதும் பெண்ணாக உங்களுடைய தனிமனித வெளி, சமூக வெளி எந்த அளவு விரிவடைந்திருக்கிறது? As a woman writing poetry how far have your personal space and social space expanded?

Not Applicable.

20. ஒரு கவிஞருக்கு பாலியலை எழுதுவதை விட மனதின் அடியாழத்தில் பதுங்கியுள்ள பொறாமை, வன்மம் போன்ற உணர்வுகளை கவிதையில் சுய விமர்சனமாக வெளிப்படுத்துவது தான் கடினம் என்று சொல்லப்படுவதை எப்படிப் பார்க்கிறீர்கள்?
It is said that more than writing about sex and sex related issues it is writing about one’s own jealousy, deception, arrogance, ill feelings in one’s poetry as a confession which is more difficult. How do you view this observation?

ஓரளவு உண்மை.

21. ஒரு கவிஞரோ எழுத்தாளரோ சமூகப் போராளியாகவும் இயங்கியாக வேண்டுமா? அதற்கான வழியாய் அவர் தன் எழுத்தில் இயங்கினாலே போதாதா?
Is it a must that a writer or a poet should also function as a social activist. Isn’t it enough to use one’s writing as the tool for initiating social change?

அவசியம் இல்லை. அப்படி இருப்பது தனி நபர் விருப்பம் சார்ந்தது. ஆனால் கவிதை எழுதும் activistக்கு மதிப்பு சற்று அதிகம் தான்.

22. குழந்தைகளுக்கான கவிதைகள் என்று புதிதாக தமிழில் ஒன்றுமே இல்லையெனலாம். ஒரு கவிஞர் என்ற வகையில், இந்தக் குறையை எப்படி சரியாக்கலாம் என்று கூறுங்கள்.
There are absolutely no new Tamil rhymes, songs or poems for children. As a poet, tell us a way to set right this scarcity.

இந்த வருஷம் ஒரு குழந்தைகள் கவிதையாவது எழுத முயற்சிக்கிறேன்.

- நந்தாகுமாரன்

மைனஸ் ஒன் [-1]: நூல் அறிமுகம்

2013-04-22T15:52:00.000+05:30

இடம்: கோவை

பொருள்: கோவை இலக்கியச் சந்திப்பு-29

என் கவிதை தொகுதி "மைனஸ் ஒன் [-1]" பற்றி பா.மீனாட்சி சுந்தரம் உரையாற்றுகிறார்

காலம்: 28-4-2013 [ஞாயிறு மதியம் சுமார் 4 மணியளவில்]

வருக!

Buy Minus One Online

2013-03-29T14:29:00.003+05:30

Buy my book Minus One [-1] online through the following sites

(Click on any of the below logo images to go to their respective site)

Tamilbooks.co.in

நானும் மைனஸ் ஒன்னும் : 36-வது சென்னை புத்தகக் கண்காட்சி - உயிர்மை அரங்கு

2013-01-20T12:28:00.001+05:30

2013 ஜனவரி 17, 18 தேதிகளில் சென்னை 36-வது புத்தகக் கண்காட்சிக்குச் சென்றிருந்தேன். உயிர்மை அரங்கில் என் முதல் கவிதைத் தொகுப்பான மைனஸ் ஒன் (-1) காட்சிக்கு வைக்கப்பட்டிருந்ததைக் காண சந்தோஷமாகத் தான் இருந்தது. பார்க்கலாம் எத்தனை பேரை இது எப்படிச் சென்றடைகிறதென.

மனுஷ்யபுத்திரனுடன் சற்று நேரம் பேசிவிட்டு முதுகும் கால்களும் வலிக்கும் வரை இரு தினங்களும் கண்காட்சியைச் சுற்றினேன். கண்காட்சியில் கால்களுக்கு அடியிலிருந்த மேடையின் பலகைகள் தடுக்கி பல முறை விழ இருந்தேன். அகநாழிகை பொன்.வாசுதேவனையும் ச.முத்துவேலையும் சந்தித்தேன். முத்து உடனடியாகக் கிளம்பிவிட்டதால் பேச முடியவில்லை. எனினும் வாசுவுடன் சற்று உரையாட முடிந்தது. வெளியீட்டு விழாவில் என் கவிதைகள் குறித்துப் பேச அவரால் வர இயலவில்லை. ஒரு review எழுதித் தரக் கேட்டிருக்கிறேன். சாயங்காலம் ஜ்யோவ்ராம் சுந்தரைப் பார்த்துப் பேசினேன். யாத்ராவை இம்முறையும் சந்திக்க முடியவில்லை. மேலும் சிலரையும் பார்க்க முடியவில்லை. ஆனால் என் கல்லூரித் தோழர்கள் இருவரை சந்தித்துப் பேச முடிந்தது.

புத்தகக் கண்காட்சியில் நான் வாங்கிய நூல்கள் மிகக் குறைவு ஏனெனில் என் புத்தகமே நூறு பிரதிகள் சுமந்து திரும்ப வேண்டியிருந்தது.

1. கோபிகிருஷ்ணன் படைப்புகள் - நற்றிணை பதிப்பகம் - ரூ.800
2. ஒரு லோட்டா இரத்தம் - பேயோன் - ஆழி பதிப்பகம் - ரூ.150
3. என் பெயர் ஜிப்சி - நக்கீரன் - கொம்பு வெளியீட்டகம் - ரூ.50
4. அருந்தப்படாத கோப்பை - மனுஷ்யபுத்திரன் - உயிர்மை பதிப்பகம் - ரூ.80
5. தோன்ற மறுத்த தெய்வம் - மனுஷ்யபுத்திரன் - உயிர்மை பதிப்பகம் - ரூ.130
6. மரங்கொத்திச் சிரிப்பு - ச.முத்துவேல் - உயிர் எழுத்து பதிப்பகம் - ரூ.60
7. உயிர் எழுத்து : ஜனவரி 2013 - ரூ.25
8. வலசை - ரூ.100

தவிர ஜ்யோவ்ராம் சுந்தருக்காக அவர் கேட்டு ஜஸ்டின் (நாவல்) மார்க்விஸ் தே சாட் - தமிழாக்கம்: உமர் - புலம் வெளியீடு மற்றும் வா.மு.கோமுவின் புதிய நாவலான 57 ஸ்நேகிதிகள் ஸ்நேகித்த புதினம் - எதிர் வெளியீடு (இதை முதல் முப்பது பக்கங்கள் காரிலேயே பரபரவென படித்தேன் ... a fast paced start ...) வாங்கினேன்.

முதல் நாள் கண்காட்சியின் கார் பார்கிங்கில் வாசு மற்றும் மண்குதிரைக்காகக் காத்திருந்தபோது மாலை ஆறு மணிக்கு காருக்குள் வந்த கொசுப் படையின் தாக்குதலும், அடுத்த நாள் குடிக்கப் போன இடத்தில் கடிக்க வந்த கம்பளிப் பூச்சி ஜ்யோவைத் தடிக்க வைத்ததையும், வெளியேறும் போது கண்காட்சி திடலின் மரக்கூட்டத்திலிருந்து வெளிப்பட்டு நாய்களுடன் குப்பைகளைக் கிளரிய புள்ளி மான் கூட்டத்தையும், டிராஃபிக் காரணமாகக் கிளம்புவதற்கு பதினைந்து நிமிடங்களுக்கு முன் சதாப்தியில் முதன் முதலாக லக்கேஜுடன் நா வரள ஒடி சென்று தாவி ஏறியதையும் மறக்க முடியாது.

மைனஸ் ஒன் (-1) இனி உங்கள் பாடு.

மைனஸ் ஒன்: 36-வது சென்னை புத்தகக் கண்காட்சியின் உயிர்மை அரங்கில் -1

2013-01-16T08:10:00.003+05:30

சென்னை புத்தகக் கண்காட்சியின் உயிர்மை அரங்கில் என் கவிதைத் தொகுதி "மைனஸ் ஒன்" (-1) கிடைக்கும்

36-வது சென்னை புத்தகக் காட்சி
உயிர்மை பதிப்பகம்
நாள்: 11.01.2013 முதல் 23.01.2013 வரை
கடை எண்: 363
புத்தகம்: மைனஸ் ஒன் (-1)
எழுத்தாளர்: நந்தாகுமாரன்
நேரம்: வேலை நாட்களில் பிற்பல் 2.00 முதல் இரவு 8.30 வரை; விடுமுறை நாட்களில் முற்பகல் 11.00 முதல் இரவு 8 வரை
இடம்: ஒய்.எம்.சி.ஏ உடற்பயிற்சி கல்லூரி மைதானம், நந்தனம், சென்னை

Stall Layout

அநேகமாக நான் 17/01/2013 முதல் 19/01/2013 வரை சென்னையில் இருப்பேன்.

சந்திக்க விரும்புபவர்கள் தொடர்பு கொள்ள:
nundhaa@gmail.com
09945382316

Book Release Function: -1 : Photos

2013-01-09T22:49:00.003+05:30

சென்னையில் புக் பாயிண்ட் அரங்கில் உயிர்மை வாயிலாக என் முதல் கவிதைத் தொகுதியான மைனஸ் ஒன் வெளியிடப்பட்டது (January 6 2013)

Welcome to the Release Function of my Poetry Book -1 on Jan 6 at 6 PM at Book Point in Chennai

2013-01-05T16:53:00.000+05:30

வருக! -1 கவிதைத் தொகுதி வெளியீடு : விழா அழைப்பிதழ்

2013-01-01T22:33:00.000+05:30

வருகிறது ...

2012-11-24T22:05:00.000+05:30

John Carter எனும் 3D மொக்கை

2012-03-11T22:53:00.002+05:30

பெங்களூர் PVR Gold Classஇல் (ஒரு டிக்கெட் 750 ரூபாய், ஒரு coffee 75 ரூபாய்), ambiance நன்றாக இருக்கும் என்று, 'மனைவியோடு வருடத்திற்கொரு படம் தியெட்டரில்' qoutaவில், 2011இல் 2012இல் கண்டிப்பாக பார்க்க வேண்டிய படம் என்று நெட்டில் ஒரு பக்கி எழுதியிருந்ததை மட்டும் படித்து, வேறெந்த reviewவும் படிக்காமல், வால்ட் டிஸ்னி தயாரிப்பு என்பதால் நம்பி, ரிலீசான முதல் வாரத்திலேயே போய் மாட்டிக்கொண்டேன்.

படம் ஆரம்பிப்பதற்கு முன் வரவிருக்கும் இன்னும் மூன்று படங்களுக்கு 3Dயிலேயே trailer காட்டுகிறார்கள். 3D கண்ணாடி அணிந்தால் வண்ணங்கள் தெளிவான வேறுபாடுகள் எல்லாம் இல்லாமல் ஒரு மாதிரி இருட்டாகத் தெரிகிறது. நிச்சயம் என் கண்ணில் எந்தக் கோளாரும் இல்லை.

இத்தனை படங்கள் பார்த்தும் கொஞ்சம் கூட புத்தியில்லாமல் இப்படியெல்லாம் நான் ஏன் சிக்கிக் கொள்கிறேனோ. இதைத் தமிழில் 'மார்ஸில் மொக்கைச்சாமி' என்று வெளியிட்டுத் தொலைப்பார்கள்.

கதை பற்றியெல்லாம் எதுவும் கேட்காதீர்கள். Edgar Rice Burroughsஇன் Barsoom தொடர் நாவல்களின் அடிப்படையில் வரும் முதல் நாவலான A Princess of Marsஐத் தழுவி உருவான கதையாம் ... கொடுமை. இன்னும் சில பாகங்கள் வரும் போல. சத்தியமாக இனிமேல் நான் பார்க்க மாட்டேன். குழந்தைகளோடு பார்க்க வேண்டிய படம் என்றெல்லாம் ஏமாந்து போக வேண்டாம்.

My New Photography Blog

2010-09-06T20:43:00.000+05:30

Camera Games

கவிதை

2010-06-21T17:58:00.004+05:30

என்னுடைய கவிதைகள் எழுதாமல் இருப்பது எப்படி? படைப்பு, ‘உரையாடல் : சமூக கலை இலக்கிய அமைப்பு’ நடத்திய கவிதைப் போட்டியில் வெற்றி பெற்றிருக்கிறது.

நிலா நகரும் பாதை

2010-06-07T20:26:00.002+05:30

என்னுடைய நிலா நகரும் பாதை, ஸ்தலபுராணம் III, அபார்ட்மெண்ட் முண்டமும் சூரியத்தலையும் ஆகிய 3 கவிதைகள் இம்மாத (ஜூன் 2010) அகநாழிகை இதழில் வெளியாகியிருக்கின்றன. இக்கவிதைகளைப் படித்தே ஆக வேண்டும் என நினைப்பவர்கள் அகநாழிகையைத் தொடர்பு கொள்ளவும்.

சுயபுராணம் II

2010-02-11T07:53:00.004+05:30

என்னுடைய ஸ்தலபுராணம் II (இடிபாடுகளின் இதிகாசம்) படைப்பு, இந்த வார (08-02-2010) உயிரோசை இதழில் வெளியாகியிருக்கி்றது.

திடீர்

2010-01-31T08:58:00.005+05:30

என்னுடைய 'திடீர்’ கவிதைகள் படைப்பு, இந்த வார ஆனந்த விகடன் (03-02-2010) இதழில் வெளியாகியிருக்கி்றது.

கிளிஞ்சலும் மரப்பாச்சியும்

2010-01-15T13:23:00.007+05:30

1. என்னுடைய உறக்க விதி படைப்பு, வம்சி புக்ஸ் வெளியிட்டுள்ள கிளிஞ்சல்கள் பறக்கின்றன கவிதைத் தொகுப்பில் இடம் பெற்றுள்ளது.

2. என்னுடைய மூன்றாம் கை படைப்பு, வம்சி புக்ஸ் வெளியிட்டுள்ள மரப்பாச்சியின் சில ஆடைகள் சிறுகதைத் தொகுப்பில் இடம் பெற்றுள்ளது.

விதி

2010-01-12T06:44:00.008+05:30

என்னுடைய உறக்க விதி படைப்பு, இந்த வார ஆனந்த விகடன் (13-01-2010) இதழில் வெளியாகியிருக்கி்றது.

கவிவெளி

2009-12-28T21:20:00.006+05:30

என்னுடைய கவிதை எண் ∞, ஒரு நாள் கூத்து மற்றும் ஒரு முறை இறந்தவன் படைப்புகள், 24-12-2009 அதிகாலை மின்-இதழில் வெளியாகியிருக்கி்ன்றன.

என்னுடைய µP பதிப்பிக்கப்பட்ட மூளை சொல்லும் போன ஜென்மத்துக் கதைகள் இம்மாத மணல் வீடு அச்சு இதழில் வெளியாகி இருக்கிறது.

அகநாழிகையில் ...

2009-10-16T22:23:00.005+05:30

என்னுடைய ஸ்தலபுராணம் மற்றும் ஒரு நாள் கூத்து படைப்புகள், அக்டோபர் 2009 அகநாழிகை இதழில் வெளியாகியிருக்கி்ன்றன.

ரயில்விலங்கு

2009-10-06T21:44:00.003+05:30

என்னுடைய ரயில்விலங்கு ஓடிக் கடக்கும் மலைப்பிரமிட்கள் படைப்பு, இந்த வார உயிரோசை இதழில் வெளியாகியிருக்கி்றது.