അപ്പു കണ്ടതും പറഞ്ഞതും

അറബ് ന്യൂസിന് ഹാലിളകി

2016-08-03T07:51:00.001-07:00

അറബ് ന്യൂസ് പറയുന്നത് ഇന്ത്യൻ മാ‍ദ്ധ്യമങ്ങൾ കള്ളം പറയുന്നു എന്നാണ് !!! എല്ലാം ഭദ്രമെങ്കിൽ പിന്നെ എന്തിനാണ് സൌദി ഓജറിലെ 31,000 തൊഴിലാളികൾ ലേബർ ഓഫീസിൽ പരാതി നൽകിയത്? ( ഈ പറയുന്ന അറബ് ന്യൂസ് തന്നെയാണ് ഇതും റിപ്പോർട്ട് ചെയ്തത് !!!) ഒന്നും ഇല്ലാതെ ഒരു രാജ്യം മറ്റൊരു രാജ്യത്തേയ്ക്ക് അവരുടെ മന്ത്രിയെ അയയ്ക്കുകയും നയതന്ത്രതലത്തിൽ ചർച്ച ചെയ്ത് വിഷയം പരിഹരിക്കാൻ മുതിരുകയുമില്ലല്ലോ? മറ്റ് നിരവധി രാജ്യക്കാർക്കും ആശങ്കയുള്ളാപ്പോൾ ഇന്ത്യാക്കാർക്ക് മാത്രം എന്താ ഇത്ര ചൊരുക്ക് എന്നാണ് അറബ് ന്യൂസ് കാരുടെ ചോദ്യം... !!! ഇതുവരെയും ഇന്ത്യൻ ഗവണ്മെന്റും എംബസ്സിയും അവരുടെ പൌരന്മാരുടെ കാര്യത്തിൽ ഇത്രയും ഉണർന്നു പ്രവർത്തിച്ചിരുന്നില്ല. ഫിലിപ്പൈൻസ് എംബസ്സിയും മറ്റ് യൂറോപ്യൻ എംബസ്സികളും മാത്രമാണ് പണ്ടും എന്തെങ്കിലും മിണ്ടിയിരുന്നത്. ഇപ്പോൾ ആ സ്ഥിതി മാറി ഇന്ത്യാക്കർക്കും ചോദിക്കാനും പറയാനും ആളുണ്ടെന്നു വന്നപ്പോൾ അറബ് ന്യൂസ് പത്രത്തിന് ഹാലിളകി.

എന്റെ കുള്ളൻ മരങ്ങൾ

2013-05-08T22:38:00.000-07:00

എന്റെ കുള്ളന്‍ മരങ്ങള്‍

നോക്കാനാളില്ലാതെ വെട്ടിയൊതുക്കാതെ

എന്റെ കുള്ളന്‍ മരങ്ങള്‍

വളര്‍ന്നു വലുതായിരിക്കുന്നു

ചട്ടി പിളര്‍ന്ന് വേരുകള്‍

തറയിലേയ്ക്ക് താഴ്ന്നിറങ്ങിത്തുടങ്ങി

സ്വാതന്ത്ര്യത്തിന്റെ പുതിയ ചില്ലകള്‍

വായുവില്‍ തലയാട്ടി നിന്നു

ഞാനെന്തിനീ ചുവരുകള്‍ക്കുള്ളില്‍

ഇനിയും അവയെ തളച്ചിടണം?

ഇരുട്ടുമുറിയിലെ ശ്വാസം മുട്ടലില്‍ നിന്ന്

ഞാനവര്‍ക്ക് മോചനം നല്‍കി

പാവം എന്റെ ബോണ്‍സായ് കുട്ടികള്‍

കായലരികത്ത് വലയെറിഞ്ഞപ്പോ............!

2013-05-05T23:31:00.004-07:00

കായലരികത്ത് വലയെറിഞ്ഞപ്പോ............!

പണ്ട് .. പണ്ട്.. എന്നുവച്ചാല്‍ കുറേവര്‍ഷം മുന്‍പ് ...

ഓഹ്. ഈ പണ്ട് പണ്ട് പറഞ്ഞപ്പോഴാ മറ്റൊരു കാര്യം ഓര്‍മ്മ വന്നേ. ഈ പണ്ട് പണ്ട് എന്ന് പറയുന്നത് ചിലര്‍ക്ക് കേള്‍ക്കുന്നതേ അലര്‍ജിയാ പ്രത്യേകിച്ചും എന്റെ മോള്‍ക്ക്. അവള്‍ കുഞ്ഞായിരുന്നപ്പോള്‍ കഥ കേള്‍ക്കാന്‍ ഭയങ്കര ഇഷ്ടം ആയിരുന്നു അങ്ങിനെ ഇഷ്ടം കൂടി രാത്രി അച്ചമ്മേടെ അടുക്കല്‍ പോകും കഥകേള്‍ക്കാന്‍. അച്ചമ്മ കഥ പറഞ്ഞ് തുടങ്ങും... പണ്ട്..പണ്ട് കാട്ടില്‍ ഒരു ചെന്നായും ഒരു കുറുക്കനും ഉണ്ടായിരുന്നു..... കഥ കാല്‍ ഭാഗം ആകുമ്പോള്‍ അച്ചമ്മ ഉറക്കം പിടിച്ച് തുടങ്ങും... കഥ ഒഴുകിയൊഴുകി ഒടുവില്‍ ഐസില്‍ സൈക്കിള്‍ തെന്നുമ്പോലെ ഒരു പോക്കാണ്. അന്നേരം മോള്‍ കുലുക്കി വിളിക്കും. അച്ചമ്മോ.. എന്നിട്ട് കുറുക്കനെന്ത് പറ്റീന്ന് പറ.. അച്ചമ്മ വീണ്ടും ഉഷാറാകും.. അങ്ങിനെ കുറുക്കന്‍ വിശന്ന് തളര്‍ന്ന്... വീണ്ടും അച്ചമ്മയുടെ കഥ വലിഞ്ഞ ഓഡിയോ ടേപ്പ് മാതിരിയാകുമ്പോള്‍ മോള്‍ വീണ്ടുംകുലുക്കി വിളിക്കും..... ഒടുവില്‍ മടുത്ത് അച്ചമ്മയെ ഒരു തള്ളും കൊടുത്ത് ചാടിത്തുള്ളി പോയി കിടക്കും.. അതിനുശേഷം ഈ പണ്ട് പണ്ട് അല്ലെങ്കില്‍ ചെന്നായും കുറുക്കനും എന്നൊക്കെ കേള്‍ക്കുമ്പോളെ അവള്‍ക്ക് കലിയാണ്.....

അപ്പോള്‍ പറഞ്ഞ് വന്നത് പണ്ട് പണ്ട് എന്നു വച്ചാല്‍ കുറേ വര്‍ഷം മുന്നേ ആദ്യപ്രണയം കരിഞ്ഞുണങ്ങി നിന്നപ്പോള്‍ പിന്നെത്തെ പ്രണയിനി ഒഴിച്ച വെള്ളത്തിലതങ്ങനെ തിളിര്‍ത്ത് വരാന്‍ തുടങ്ങിയ കാലം “കായലരികത്ത് വലയെറിഞ്ഞപ്പോള്‍ ......” ഈരടികള്‍ മനസ്സില്‍ വരച്ച ഒരു ചിത്രം ഉണ്ടായിരുന്നു, നാണത്താല്‍ മൂടി മണ്ണും ചാരിനില്‍ക്കുന്ന ഷീലാമ്മയുടെ അടുക്കല്‍ തൊട്ടടുത്ത തെങ്ങോലയെ പിടിച്ചുലച്ച് സുന്ദരനായകന്‍ പ്രേം നസീര്‍ പ്രണയാതുരനായി പാടുന്ന ചിത്രം... അങ്ങിനെയിരിക്കെ അടുത്ത വീട്ടിലെ ടി വി യില്‍ പാട്ടു പെട്ടി ... സുരേഷിന്റെ വശ്യസുന്ദരശബ്ദത്തില്‍ പറയുന്നു, ഇനിയൊരു പ്രണയഗാനമാകട്ടെ പാട്ടുപെട്ടിയില്‍ അടുത്തത്... ഞാനോടി ടി വി വച്ചു...ശ്ശൊ... സകല മൂഡും കളഞ്ഞു ആ സീന്‍ കണ്ടപ്പോള്‍ ഞാന്‍ മനസ്സില്‍ വരച്ച ചിത്രം വലിച്ചൊരേറു കൊടുത്തു.. ഹും ഭഗവതി വിലാസം ഹോട്ടലിന്റെ ഉള്ളിലിരുന്നൊരാള്‍ വല ശരിയാക്കുന്നു...സുരേഷിനെ മനസ്സു കൊണ്ട് ശപിച്ചു... പ്രണയം പോലും പ്രണയം..

ഇപ്പോഴെന്താ ഈ കഥയോര്‍ക്കാന്‍?... അന്നുണക്കി തട്ടിന്‍ മുകളില്‍ വച്ചതാ ആ വല!! കഴിഞ്ഞ ദിവസം എന്റെ ഒരു കൂട്ടുകാരി ചോദിച്ചു എന്ത മാഷേ വലയെറിയാന്‍ പോണില്ലേന്ന്!! അന്നേരമാണ് ഞാന്‍ വീണ്ടും ആ ഉണക്കിപ്പൊതിഞ്ഞു തട്ടിന്‍ പുറത്തിട്ട വലയെക്കുറിച്ചോര്‍ത്തത്. വേഗം പോയി അത് നിവര്‍ത്തിത്തോളിലിട്ട് വീശാനിറങ്ങി. മനസ്സു നിറയെ പെടയ്ക്കണ മീനുകളായിരുന്നു. നെത്തോലി മുതല്‍ ചൂര വരെ ഉള്ളിന്റെയുള്ളില്‍ പെടച്ച് ചാടിക്കളിച്ചു... മൂന്നു ഭാഗത്തും കടലാണ് ഈ വലയൊന്നെവിടെ വീശും? കടലിലാണെങ്കില്‍ ശ്രാവുകളും തിമിങ്ങലങ്ങളും മദിച്ചു നടക്കുന്നുമുണ്ട്.. പിരാ‍നകളെ എനിക്ക് പേടിയാണ് കമ്പി വല പോലും ഒറ്റക്കടിയ്ക്ക് പതിനാറ് കഷ്ണമാക്കുന്ന പിരാനകള്‍ പക്ഷേ കടലില്‍ പിരാനകളുണ്ടാവില്ലെന്ന് ആശ്വാസത്തില്‍ വലവീശാനായി നില്‍ക്കുമ്പോഴുണ്ട് അടുത്ത കൂട്ടുകാരി ഉപദേശവുമായി വരുന്നു, കൊമ്പന്‍ സ്രാവും തിമിംഗലമുണ്ട് മോനെ ദിനേശാ വലേം ഒപ്പം നിന്നെം കൊണ്ട് പോകാതെ നോക്കിക്കോന്ന്.. സത്യനെം കൊണ്ട് പറക്കുന്ന കൊമ്പന്‍ ശ്രാ‍വിന്റെ ചിത്രം മനസ്സിലോടി വന്നു.. ഹോ ... വീശണോ വേണ്ടായോന്ന് ഒരു നിമിഷമോര്‍ത്തു.. ആ പെടയ്ക്കണ പൂമീനുകളെപ്പോലെ എന്റെ ചങ്ക് പടപടാന്നിടിച്ചെങ്കിലും വച്ചകാല്‍ വള്ളത്തീന്നെടുത്തില്ല.. ഞാന്‍ ഉള്ളിലേയ്ക്ക് തുഴഞ്ഞു.. തിരക്കുഴിയും കടന്ന് കടലിന്റെ മാറിലേയ്ക്ക്.. സ്വസ്ഥമായി വലയെറിയാനൊരിടം നോക്കി പതിയെ വലയെറിഞ്ഞു....

കനത്തിലേതാണ്ട് തടഞ്ഞപ്പോള്‍ വല ഞാന്‍ വലിച്ചെടുത്തു.... ഹോ ഒറ്റ മീനേ കുടുങ്ങിയുള്ളു എന്താ ഭംഗി ഡോള്‍ഫിന്റെ പോലെ ചുണ്ടുള്ള ഒരു സുന്ദരി മത്സ്യം വലിച്ചെടുത്ത് കരയ്ക്കിട്ടു, വള്ളത്തില്‍ വീണ പാടേ അത് കൈ രണ്ടും കൊണ്ട് മാറത്ത് പൊത്തിപ്പിടിച്ചു. അയ്യേ... മത്സ്യമല്ല അതൊരു പെണ്ണായിരുന്നല്ലോ ഉടല്‍ മനുഷ്യന്റേം വാല്‍ മത്സ്യത്തിന്റേം. ഇതാണല്ലേ മത്സ്യകന്യക? കന്യകേ.. ഞാന്‍ വിളിച്ചു മത്സ്യം പറഞ്ഞു.. ഞാന്‍ കന്യകയും വനിതയും ഒന്നും അല്ല. എന്റെ പേര് സുന്ദരി. ആ തോര്‍ത്തിങ്ങോട്ട് താ മനുഷ്യാ... !! ഞാനെന്റെ തോളില്‍ കിടന്ന തോര്‍ത്തെടുത്തിട്ടുകൊടുത്തു. നാണം മറച്ച അവള്‍ രൂക്ഷമായി എന്നെ നോക്കി.. ഇയാക്കെന്തിന്റെ കേടാ എന്തിനാ എന്നെപ്പിടിച്ചിതിനകത്തിട്ടേ.. എനിക്ക് പോണം. ... എനിക്ക് പോണം.. അവള്‍ കരയാന്‍ തുടങ്ങി.. ഭഗവാനെ കരയ്ക്കെത്തിയാല്‍ പീഡനത്തിന് കേസുമാകുമല്ലോന്നൊര്‍ത്ത് ഞാനാ അഴകിനെ നോക്കി നോക്കിയിരുന്നു....

മോണിറ്ററിനു മുന്നില്‍ പന്തം കണ്ട പെരുച്ചാഴിയെപ്പോലിരിക്കുന്ന എന്റെ തലയ്ക്കിട്ടാരോ കൊട്ടിയപ്പൊഴാണ് ഞാനുണര്‍ന്നത് അവളെവിടേ..... സുന്ദരീ...സുന്ദരീ.... :)

അയാള്‍ക്ക് മുഴുവട്ടാ സുനിലേ.. പാതിരായ്ക്കൊരു സുന്ദരി...ഹും..... കൂട്ടുകാരന്‍ പറയുന്നുണ്ടായിരുന്നു... ശരിയാണ് മുഴുവട്ടാ!!!!

--------------------------------------------------------------------------------------------------------
സമർപ്പണം : 1) വല പൊടിതട്ടിയെടുക്കാൻ ഓർമ്മിപ്പിച്ച കൂട്ടുകാരിയ്ക്ക്
2) പിരാനകളില്ലാത്തയിടം കാട്ടിത്തന്ന കൂട്ടുകാരിയ്ക്ക്

ചിത്രം : ഗൂഗിൾ സെർച്ച്

ഡെസ്ഡമോണ (Desdemona)

2013-04-13T11:56:00.000-07:00

ഡെസ്ഡമോണ, സ്നേഹത്തിന്റെ പര്യായമായി വാനോളം പുകഴ്ത്തപ്പെട്ടവൾ.

തന്നെക്കാൾ അധികം ഭർത്താവിനെ സ്നേഹിച്ച ,സ്നേഹമയിയായ ഭാര്യയെ സംശയത്തിന്റെ പേരിൽ, കഴുത്ത് ഞെരിച്ച് കൊന്നവൻ ഒഥല്ലോ. ഡെസ്ഡമൊണയുടെ സൌന്ദര്യം കണ്ട് ആ വെനീഷ്യൻ സുന്ദരിയുടെ ഗുണഗണങ്ങൾ വാഴ്ത്തിയത് വായിച്ച് വായിച്ച് ഒരു ഉച്ചനേരം..... ആരോ എന്റെ മടിയിലിരുന്ന പുസ്തകം പതിയെ എടുത്ത് മടക്കി വച്ചു.

“Cosa ne pensi di mia moglie?”

കൊളോണിന്റെ ഒരുതരം മത്ത് പിടിപ്പിക്കുന്ന മണത്തോടൊപ്പം മുഴങ്ങിയ ആ ശബ്ദം കേട്ടൊന്ന്

ഞെട്ടി. പടച്ചട്ടയണിഞ്ഞ ഒരു ദീർഘകായൻ എന്റെ മുന്നിൽ ആ പുസ്തകവും പിടിച്ച് നിൽക്കുന്നു.

നിങ്ങൾക്കെന്താ വേണ്ടേ? എന്താ നിങ്ങൾ ചോദിച്ചത്?

ഓഹ്.. പുവർ ഇന്ത്യൻ.. മ്.. എന്റെ ഭാര്യയെക്കുറിച്ച് നീ എന്താണ് കരുതുന്നത് എന്ന്..

ഹോ അതാണോ... അവർ സുന്ദരിയായിരുന്നു. ഭർത്താവിനെ തന്റെ അച്ഛനേക്കാൾ, തന്നേക്കാളൊക്കെ സ്നേഹിച്ചിരുന്നു....സ്നേഹമയിയായ ഭാര്യ .. എന്നിട്ടും ദുഷ്ടനായ താൻ എന്തിനാ പാവം അവരെ ഞെക്കിക്കൊന്നേ ദുഷ്ടാ..

Ti sbagli caro! നിങ്ങൾ തെറ്റിദ്ധരിച്ചിരിക്കുന്നു. സ്നേഹം.. മണ്ണാങ്കട്ട.. നിങ്ങൾക്കെന്നല്ല ഈ ഭൂമുഖത്ത് ഒരാൾക്കും അറിയില്ല ഡെസ്ഡമോണയെ. നിങ്ങൾ വായിച്ച വരികൾ മാത്രമേ നിങ്ങൾക്കറിയൂ.. പക്ഷേ ഡെസ്ഡമോണ ഇതൊന്നുമായിരുന്നില്ല....!. നിങ്ങളെന്താ കരുതിയത്. വെറുമൊരു തൂവാല അവിടെ കണ്ടതിനാൽ തെറ്റിദ്ധരിച്ച് ഞാൻ അവളെ ഞെക്കിക്കൊന്നു എന്നോ? അതാണ് ഞാൻ പറഞ്ഞത് നിങ്ങൾ തെറ്റിദ്ധരിച്ചിരിക്കുന്നു എന്ന്..! നിങ്ങൾക്കറിയണോ സത്യം?. ഞാൻ പറയാം....!

ഞാനൊന്ന് നിവർന്നിരുന്നു. ആജാനുബാഹുവായ അയാൾ പറയുന്നത് കേട്ടിരുന്നില്ലെങ്കിൽ എന്റെ കഥ അയാൾ കഴിക്കും...

ങും പറയൂ.. ഞാൻ കേൾക്കാം !

ഞാൻ ഡെസ്ഡമോണയെ കണ്ടതും ഞങ്ങൾ വിവാഹിതരായതും നിങ്ങൾ വായിച്ചില്ലെ അത് ശരിതന്നെ. ഞങ്ങൾ പരസ്പരം സ്നേഹിച്ചു ജീവിക്കാനൊരുങ്ങുമ്പോഴാണ് തുർക്കികളുടെ ആക്രമണം നേരിടാൻ എനിക്ക് പ്രഭുവിന്റെ ആവശ്യപ്രകാരം സൈപ്രസിലേയ്ക്ക് തിരിക്കേണ്ടി വന്നത്. അതോടെ എന്റെ കഷ്ടകാലവും തുടങ്ങി. ഇയാഗോ എന്റെ കീഴ് ജീവനക്കാ‍രനാണ് വിശ്വസ്ഥനും, അയാൾ എന്തിന് എനിക്കെതിരാകണം? നിങ്ങളെ ആ വരികളിൽ തെറ്റിച്ചു. ഇയാഗോ ആ തൂവാല കാഷ്യോയുടെ വീടിനുള്ളിൽ ഇട്ടു എന്ന് കഥാകാരൻ നിങ്ങളെ പഠിപ്പിച്ചു.. പക്ഷേ നടന്നത് അതല്ലായിരുന്നു. നിങ്ങൾ വിശ്വസിക്കുമോ സുഹൃത്തേ? ...

ഞാനെന്തു പറയാൻ..... നിങ്ങൾ അനുഭവസ്ഥനല്ലേ പറയൂ.. ഞാൻ നിങ്ങളെ വിശ്വസിക്കാം..!!

ഒഥല്ലോ പറയാൻ തുടങ്ങി, ആ നീലക്കണ്ണുകളിൽ മുമ്പെങ്ങും കണ്ടിട്ടില്ലാത്ത തിളക്കം.

യുദ്ധത്തിന്റെ ഇടവേളയിലൊരുനാൾ ഞാൻ പെട്ടെന്ന് വീട്ടിലേയ്ക്ക് മടങ്ങി. ഡെസ്ഡമോണയുടെ സൌന്ദര്യത്തിൽ മത്ത് പിടിച്ചിരുന്ന എന്റെ മനസ്സ് അവിടേയ്ക്ക് പായുകയായിരുന്നു. അല്ലെങ്കിൽ എന്തോ ഒരു ശക്തി ഒരു പക്ഷേ എന്നെ അവിടേയ്ക്കെടുത്തെറിഞ്ഞതായിരിക്കുമോ? നിലാവിനും നിഴലിനുമിടയിലൂടെ ഞാൻ അവിടെയെത്തി. കതകിൽ മുട്ടി വിളിച്ചു.

ഡെസ്ഡമൺ.... ഡെസ്ഡമൺ... കുറേ നേരം അനക്കമില്ലായിരുന്നു.

വാതിലിനു മുന്നിൽ. വീണ്ടും ഞാനാ കതകിലേയ്ക്ക് മുട്ടാനാഞ്ഞതും അത് മെല്ലെ തുറന്നു. അഴിഞ്ഞുലഞ്ഞ മുടിയുമായി ഡെസ്ഡമോണ വാതിൽ തുറന്നു. എന്റെ ഡെസ്ഡമോണയെ വാരിപ്പുണരാൻ ഞാൻ മുന്നോട്ടായവേ ഒരു നിഴലാട്ടം ഉള്ളിൽ കണ്ടു.. ഞാൻ അകത്തേയ്ക്ക് പാളിനോക്കി. എനിക്കെന്റെ കണ്ണുകളെ വിശ്വസിക്കാനായില്ല. കണ്ണു തിരുമി ഞാൻ വീണ്ടും നോക്കി.........ഉള്ളിൽ ഞാൻ കണ്ടത് കാഷ്യോയെ ആയിരുന്നു. കൈകളിൽ ആ തൂവാല..... ഞാൻ എന്റെ പ്രിയതമയ്ക്ക് എന്റെ ഹൃദയത്തിനു പകരം സൂക്ഷിക്കാനേൽ‌പ്പിച്ച അതേ തൂവാല....... !! ഡെസ്ഡമൺ നിർവ്വികാരയായി നിന്നു. കാഷ്യോയും..ഒടുവിൽ തല താഴ്ത്തി അവൻ മുറിവിട്ടിറങ്ങി. ഒറ്റ വെട്ടിനവന്റെ തലയറുക്കാൻ ഞാൻ വാൾപ്പിടിയിൽ കൈവച്ചു. പക്ഷേ ഡെസ്ഡമോണ എന്റെ കൈകളിൽ ശക്തമായി പിടിച്ചു.. വേണ്ട എന്ന് തലയാട്ടി... കാഷ്യോ മുറിവിട്ട് പോയിരുന്നു...

തകർന്നത് എന്റെ ഹൃദയം മാത്രമായിരുന്നില്ല സുഹൃത്തേ, നിങ്ങൾ വനോളം ഉയർത്തിയ ഡെസ്ഡമോണയുടെ ഭർത്തൃസ്നേഹത്തിന്റെ കൊടുമുടിയായിരുന്നു. ഒരു നിമിഷം ഞാൻ എന്ത് ചെയ്യണമെന്നറിയാതെ വലഞ്ഞു.....! അഴിഞ്ഞുലഞ്ഞ മുടിയും ആലസ്യം നിറഞ്ഞ കണ്ണുകളുമായി അതേ നിർവികാരതയോടെ ഡെസ്ഡമോണ എന്നെ നോക്കി. ഞാൻ ഉള്ളിലേയ്ക്ക് കയറി കതകടച്ചു. ഡെസ്ഡമോണ കട്ടിലിൽ ഇരുന്നു... ആ സൌന്ദര്യം എന്നെ വീണ്ടും മത്ത് പിടിപ്പിച്ചിരുന്നു. പക്ഷേ അടുത്ത നിമിഷം അൽ‌പ്പം മുൻപ് ഞാൻ കണ്ട രംഗം എന്റെ സിരകളെ വലിഞ്ഞ് മുറുക്കി.. ഞാൻ അവളുടെ കഴുത്തിൽ മുറുകെ പിടിച്ചു. എന്നിട്ടലറി,

എന്തിനായിരുന്നു ഡെസ്ഡമൺ... നീയിതെന്നോടെന്തിനു ചെയ്തു!?.

അവൾ ശബ്ദം പുറത്തേയ്ക്കെടുക്കാൻ പരിശ്രമിച്ചു... ഒന്നും കേൾക്കാൻ, ന്യായീകരണങ്ങൾക്കായി കാതോർക്കാൻ എനിക്ക് മനസ്സിലായിരുന്നു. ഇനി ഒരു നൂറു കള്ളങ്ങൾ കൊണ്ട് ആ സത്യത്തെ മറയ്ക്കുന്നത് കേൾക്കാൻ എനിക്ക് മനസ്സില്ലായിരുന്നു. ഒടുവിൽ കൈ ഒന്നയഞ്ഞപ്പോൾ അവൾ പറയുന്നുണ്ടായിരുന്നു.

കാഷ്യോയെ ഞാൻ സ്നേഹിച്ചിരുന്നു... നിങ്ങളെക്കാൾ മുൻപ്.. എനിക്ക് കാഷ്യോ എല്ലാമായിരുന്നു...............

എന്റെ കൈകൾ ശക്തമായി ആ കഴുത്തിൽ മുറുകി......

ഇനി പറയൂ, ഒഥല്ലോ കൊലയാളിയായത് മണ്ടത്തരമായിരുന്നോ? ഇയാഗോയുടെ കള്ളക്കഥയിൽ വീഴുകയായിരുന്നോ ഈ ഒഥല്ലോ? പറയൂ സുഹൃത്തേ പറയൂ.. ജീവനേക്കാൾ ഞാൻ സ്നേഹിച്ച എന്റെ ഡെസ്ഡമൺ എന്നെ വഞ്ചിക്കുകയായിരുന്നില്ലേ?.....

ഒഥല്ല്ലോ ദീർഘമായി നിശ്വസിച്ചു.... നിങ്ങളെന്നല്ല ലോകം മുഴുവനും ഞാനിത് പറഞ്ഞാൽ വിശ്വസിക്കില്ല. പക്ഷേ ഇതായിരുന്നു സത്യം...

Otello non è un vigliacco e Otello è un gran destro ... un gran destro ....! ഒഥല്ലോ ഭീരുവല്ല കൂട്ടുകാരാ ഒഥല്ല്ലോ ഒരു വലിയ ശരിയായിരുന്നു ഒരു വലിയ ശരി!!!

കൊളോണിന്റെ മണം ആ മുറി വിട്ടു പോയി.. അപ്പോഴും ആ ശബ്ദം എന്റെ കാതുകളിൽ മുഴങ്ങിക്കൊണ്ടേയിരുന്നു.. ഒഥല്ലോ ഒരു വലിയ ശരിയായിരുന്നു... ഒരു വലിയ ശരി....

----------------------

Pict. from Wikipedia

സഹചാരി

2013-03-10T13:16:00.001-07:00

സഹചാരി
ഞാനിതൊക്കെയാണെന്ന് പറഞ്ഞിട്ടും
എന്നെ വിട്ടുപോകാതെ നീ അടുക്കുന്നതെന്തേ?
ഇനി നിന്നെ ഞാന്‍ എന്തു പറഞ്ഞ്- പറിച്ചെറിയും?
ഇനിയൊരുവേള പറിച്ചെറിഞ്ഞെന്നാകിലും
അതൊരു ചങ്ക് പിളര്‍ക്കും നോവാവില്ലെ?
കൂടെ വരരുതെന്നു പറഞ്ഞു പലവട്ടം
പക്ഷേ നീയെന്റെ നിഴലായി മാറി
കാണരുതെന്നു പറഞ്ഞു പലവട്ടം
പക്ഷേ നീയെന്റെ കണ്ണാടിയായി മാറി
വിളിക്കരുതെന്നു പറഞ്ഞു പലവട്ടം
പക്ഷേ നീയെന്റെ നാദമായി മാറി
അങ്ങിനെ ഊന്നുവടിയായും, മിന്നാമിന്നിയായും
നീയെന്നിലലിയാന്‍ ശ്രമിക്കുന്നതെന്തേ?
ഇനി എന്തു പറഞ്ഞ് ഞാന്‍ നിന്നെ പറിച്ചെറിയും

ആലിംഗനം

2013-03-04T23:34:00.000-08:00

ആലിംഗനം

അവന്‍ ചിലപ്പോള്‍ ഒച്ചിഴയുന്ന ശാന്തതയില്‍

ചിലപ്പോള്‍ വെടിയുണ്ടയുടെ വേഗതയില്‍

രണ്ടായാലും ഒരിക്കലവന്‍ എന്നിലേയ്ക്കെത്താതിരിക്കില്ല

ഒരാലിംഗനത്തിന്റെ മടുപ്പിക്കുന്ന സുഖത്തോടെ

അവനിലേയ്ക്കലിയാന്‍ ഇനിയെത്രനാള്‍ ?

കാത്തിരിപ്പിന് ശാപമോക്ഷം നല്‍കി

പ്രസരിപ്പോടെ അവനെത്തിയെങ്കില്‍

ഓരോ പ്രഭാതവും ആകാംക്ഷയോടെ കാത്തിരിപ്പ് തുടങ്ങും

പ്രദോഷമാകുമ്പോള്‍ അവനെക്കാണാതെ മടങ്ങും

രാത്രികളില്‍ ഒരു കള്ളനെപ്പോലെ അവന്‍ വരുമെന്ന് കരുതും

പക്ഷേ വീണ്ടും പ്രഭാതത്തില്‍ നിരാശയോടെ എണീക്കും.

ഈ കാത്തിരിപ്പിന്റെ മടുപ്പിക്കുന്ന മൌനത്തിലേയ്ക്ക്

നിനക്കെന്നേ സ്വാഗതവുമായ് ഞാന്‍ കാത്തിരിക്കുന്നൂ

ഇനിയും വൈകുവതെന്തേ നീ ...... ഇനിയും വൈകുവതെന്തേ?

വരണമാല്യം

2013-03-02T11:02:00.002-08:00

വരണമാല്യം

കൊഴിഞ്ഞ് വീഴുന്നൊരെൻ മൊഴിപ്പൂ‍ക്കൾ

പെറുക്കിയെടുത്തു നീ മാലകോർക്കൂ

ആ ദലങ്ങളിൽ പറ്റിയ മൺ തരികൾ കുടഞ്ഞ്

വീണ്ടും മോഹനാരിനാൽ നീ കോർത്തെടുക്കൂ

വരണമാല്യമായ് ചൂടുവാനായില്ലെങ്കിലുമവ

പട്ടടയിൽ എൻ യാത്രയ്ക്ക് കൂട്ടായിരിക്കട്ടെ

കൊഴിഞ്ഞ് വീഴുന്നൊരെൻ മൊഴിപ്പൂ‍ക്കൾ

പെറുക്കിയെടുത്തു നീ മാലകോർക്കൂ

അവസാന വാക്കുകൾ കൊണ്ടെങ്കിലും

നിനക്കാകട്ടെയാ രക്തഹാരം പൂർത്തിയാക്കുവാൻ

കാലമേറെയായ് ഒരോ പൂവിതളും കൂട്ടി വയ്പ്പു ഞാൻ

വാടാതെ നിറം മങ്ങാത്തൊരോർമ്മയായ്

സ്നേഹത്തിൻ മഞ്ഞു തുള്ളി പനിനീരായ് തളിച്ച്

കാലത്തിൻ ചൂടിനാൽ കരിവാളിക്കാതെ കാത്തു ഞാൻ

കൊഴിഞ്ഞ് വീഴുന്നൊരെൻ മൊഴിപ്പൂ‍ക്കൾ

പെറുക്കിയെടുത്തു നീ മാലകോർക്കൂ

------>OoO<------

Picture Curtsey: (C)Dolls of India.com

ഒരു തുളസിക്കതിരിന്റെ ഓർമ്മയ്ക്ക്

2013-02-28T05:16:00.000-08:00

ഒരു തുളസിക്കതിരിന്റെ ഓർമ്മയ്ക്ക്

ചക്രവാളസീമയിലെ സാന്ത്വനരേഖയായ്
പകലിരവുകളിൽ ഒരു നനുത്തകാറ്റായ്
നിൻ സുഖദസാമീപ്യമെന്നിൽ നിറയുന്നുവോ സഖീ
മധുരവാണിതന്നലകളുണർത്തി നീ വീണ്ടുമെത്തിയോ.
ദാവണിപ്പുടവതൻ ഞൊറികളായ് പിന്നെ
കിലുകിലുങ്ങുന്ന കുപ്പിവളകൂട്ടമായ്
ഈറൻ മുടിത്തുമ്പിലൊളിക്കുമാ
തുളസിക്കതിരിൻ നൈർമ്മല്യമായ്
വീണ്ടുമൊരു പ്രഭാതമായ് നീയെത്തവേ
എന്നോ വീണുടഞ്ഞൊരാ തങ്കക്കിരീടത്തിൻ
തിരുശേഷിപ്പുകളെൻ ഓർമ്മതൻ മാറാപ്പിൽ
നിറം മങ്ങിയ വളപ്പൊട്ടുകളായ്
മയങ്ങിക്കിടപ്പുണ്ടാകണം....ഞാനെടുക്കട്ടേ
മാറാല മാറ്റിത്തിരുമ്മിപ്പുറത്തെടുക്കട്ടെ ഞാൻ
തിളക്കമാർന്നൊരെൻ ജന്മസുകൃതമായ്
വീണ്ടും നിനക്കണിയാൻ ഒരുക്കിവയ്ക്കട്ടെ ഞാൻ
കാ‍ലം ഉരച്ച പാടുകൾ കാണുമതിലെന്നാകിലും
ഹൃദയരക്തക്കറയ്ക്കിടയിലൊളിമങ്ങാതെ
ശോഭ മാറാതാ രജതകിരണങ്ങളിന്നും
പ്രശോഭിതമാണെന്‍ മാറാപ്പിനുള്ളില്‍ സഖീ
ഒരു യാത്രാമൊഴിയിലെന്നെ തളച്ചിട്ടു നീ
നഗരസാഗരത്തിലേയ്ക്കൂളിയിട്ടിഴുകവേ
വ്രണിതമാനസന്‍ ഞാനെങ്ങ് പോയിടാന്‍
തപിതഹൃദയ പഥികനായ് അലഞ്ഞു വീഥിയില്‍
കാത്തുനിന്നാ മരച്ചോട്ടിലേറെ നേരം വൃഥാ
കാലമേറെച്ചെന്നിട്ടുമിന്നുമാ മൊഴികളിലൊക്കെ
പരതിടുന്നു ഞാനാ വാക്കുകൾതന്നർത്ഥമറിയാനായ്
ഋതുക്കളെത്തി മാഞ്ഞുപോയെങ്കിലും
വാക്കുകൾ മുറിച്ച പാടുകള്‍ മാഞ്ഞതില്ലിന്നുമേ.
അപരിചിതരല്ലേ നാമിന്നീവീഥിയില്‍
കണ്ണുകളുടക്കിയോ ഒരു നിമിഷാര്‍ദ്ധമെങ്കിലും
തിരിഞ്ഞ് നോക്കാതെ നടന്നീടുക തോഴി നീ
ഇനിയുമൊരു യാത്രാമൊഴിവേണ്ട മല്‍സഖീ

പാദരക്ഷ

2013-02-24T09:29:00.003-08:00

നീണ്ട ഇരുപത്തിയഞ്ചുവർഷം

എന്റെ സന്തതസഹചാരിയായിരുന്നവർ

ആദ്യമാദ്യം പാകമാകാത്ത വള്ളിയിൽ

കാൽ തിരുകിക്കയറ്റാൻ ഭയന്ന്

മുറിയുടെ ഒരു കോണിലേയ്ക്ക് എടുത്തിട്ടു

അവയുടെ ദൈന്യമായ നോട്ടം

പലപ്പോഴും എന്റെ ചങ്ക് പൊളിച്ചിരുന്നു

പിന്നെപ്പിന്നെ ഞാൻ ആ വള്ളികളിൽ

നിർബന്ധമായും കാലുകൾ തിരുകിക്കയറ്റാൻ ശ്രമിച്ചു.

പതിയേ വേച്ച് വേച്ച് ഞാനവയെയും കൊണ്ട്

നടക്കാൻ പഠിച്ചു.......

നീണ്ട ഇരുപത്തിയഞ്ച് വർഷം

പലപ്പോഴും ആ വള്ളികൾ ശക്തമായി

എന്റെ കാൽ‌പ്പാദങ്ങളെ നോവിച്ചിരുന്നു

എങ്കിലും കല്ലിലും മുള്ളിലും എന്റെ കാലിന് രക്ഷയായ

അവയെ തള്ളിപ്പറയാൻ എനിക്കായില്ല

കുറെ നടന്ന് തേഞ്ഞപ്പോൾ ആ വള്ളികൾ എന്റെ

കാൽ‌പ്പാദങ്ങളുമായി പ്രണയത്തിലായി

പിരിയാൻ കഴിയാതവർ ഇഴുകിച്ചേർന്നു

വാറഴിച്ച് വയ്ക്കുമ്പോൾ അവയുടെ നിഴൽ

എന്റെ കാൽ‌പ്പാദങ്ങൾക്കു മുകളിൽ

വെളുത്ത പാടായി പറ്റിക്കിടന്നിരുന്നു

അഞ്ചുവിരലുകളുടെയും പിന്നെ ഉപ്പൂറ്റിയുടെയും

ചതവുകൾ അവയ്ക്ക് പുറത്ത് ചിത്രം വരച്ചിരുന്നു.

നീണ്ട ഇരുപത്തിയഞ്ച് വർഷം

നോവിച്ചിരുന്നെങ്കിലും എനിക്കവയെ

ഉപേക്ഷിക്കാൻ തോന്നിയില്ല

അവർ എന്റെ ശരീരത്തിന്റെ ഭാഗമായിത്തീർന്നിരുന്നു.

ഞെരിഞ്ഞും അമർന്നും വലിഞ്ഞുമുരഞ്ഞും

അവർ എന്റെ കൂട്ടുകാരായിമാറിയിരുന്നു

ഇനിയെന്റെ അവസാന യാത്രയിലും

എനിക്ക് കൂട്ടായി അവരുണ്ടാകണം.....

അവർ മാത്രം... അവർ മാ‍ത്രം...!

പുറം ചൊറിച്ചിൽ .... !

2013-01-12T00:03:00.002-08:00

“ഡോക്ടർ, എന്റെ മുതുകത്ത് ഭയങ്കര ചൊറിച്ചിൽ, ചില സമയത്ത് അത് എന്നെ ദേഷ്വ്യം പിടിപ്പിക്കുന്നു. ജോലി ചെയ്യാനാകുന്നില്ല, ഇതൊരു രോഗമാണോ പ്രതിവിധിയുണ്ടോ?”

എന്റെ സുഹൃത്തായ ഡോക്ടർ നെ ഒരാൾ ഫോണിൽ വിളിച്ച് ചോദിച്ചത്രെ. സരസനായ ഡോക്ടർ തിരിച്ച് ചോദിച്ചു..

"അങ്ങ് ഒരു എഴുത്തുകാരനാണോ? ബ്ലോഗ്, ഫേയ്സ്ബുക്ക് പേജ് എന്നിവ കൈകാര്യം ചെയ്യുന്നുണ്ടോ? ആണെങ്കിൽ ഇതൊരു രോഗമല്ല, മറിച്ച് ഈ വിധ സെറ്റപ്പുകൾ ഒന്നുമില്ലെങ്കിൽ ഇതൊരു ത്വക് രോഗമാണ് “നൊറ്റാൾജിയ പരെസ്തെറ്റിക”. ആൽ‌ഫ ഹൈഡ്രോക്സി ആസിഡ് അടങ്ങിയ ആം ലാക്റ്റിൻ ക്രീം പോലുള്ളവ ഉപയോഗിച്ച് ചർമ്മം ഈർപ്പമുള്ളതായി സൂക്ഷിക്കുക. ചൊറിച്ചിലിനൊരാശ്വാസം കിട്ടും. അതല്ല നേരത്തേ പറഞ്ഞ എഴുത്തിന്റെ അസുഖമുണ്ടെങ്കിൽ അടുപ്പമുള്ള ആരെക്കൊണ്ടെങ്കിലും “പുറം ചൊറിയിക്കുക” ഓരോ രണ്ട് പോസ്റ്റുകൾക്കും ഇടയിലും ഇങ്ങിനെ പുറം ചൊറിയിച്ചുകൊണ്ടേയിരിക്കുക, പ്രത്യേകിച്ചും തരുണീമണികളുടെ അഴകാർന്ന നഖക്ഷതമേറ്റാൽ ആ ചർമ്മത്തിലെ ചൊറിച്ചിൽ താനേ മാറും.... ആഹാ.....ഹാ... എഴുത്തുകാരനും പിന്നെ വായനക്കാർക്കും പരമ സുഖം!!

(Photo: Google Search - from The Telegraph page)

എനിക്കുമില്ലേ മോഹങ്ങൾ..! (Soliloquy of a Sweet Young Tree!)

2012-12-20T03:01:00.002-08:00

എനിക്കുമില്ലേ മോഹങ്ങൾ..!

(Soliloquy of a Sweet Young Tree!)

ദാ തൊട്ടടുത്ത് തന്നെയുള്ള എന്റെ കൂട്ടുകാരെ നോക്കു. പ്രണയലോലുപരായി അവർ പരസ്പരം ആലിംഗനബദ്ധരാകുമ്പോൾ അവജ്ഞയും സങ്കടവും അടക്കാനാവാതെ ഞാനെന്റെ മൊട്ടയായ ദേഹത്തേയ്ക്ക് നോക്കും. അവർ ആടിത്തിമിർക്കുന്നത് കാണുമ്പോൾ കണ്ണുകൾ പൂട്ടി ഞാനിരിക്കും. പ്രഭാതത്തിലെ മഞ്ഞും ഇളം വെയിലുമേറ്റ് കാറ്റിന്റെ മർമ്മരത്തിനൊപ്പം അവർ കഥകൾ പറഞ്ഞും പാട്ടുപാടിയുമിരിക്കുമ്പോൾ എന്നെ മൊട്ടയടിച്ചവരെ ഞാൻ മനസ്സിൽ ശപിക്കും. എന്തിനെന്നെ നിങ്ങൾ ഈ കോലത്തിലാക്കി? അന്തരീക്ഷത്തിലേയ്ക്ക് കൈകൾ വീശാൻ മോഹമുണ്ട്. ആടിപ്പാടാൻ മോഹമുണ്ട്, എന്റെ കൂട്ടുകാരെപ്പോലെ പൂവിടാൻ, പുഷ്പിണിയാവാൻ......

വലിയ വീട്ടിൽ നിന്നും വന്നവർ എന്നെ കൊണ്ടുപോയപ്പോൾ എല്ലാരും പറഞ്ഞു. ഹോ അവൾ രക്ഷപ്പെട്ടു. ഈ കാട്ടിൽ കിടന്ന് നരകിക്കണ്ടല്ലോ? സമയത്തിന് വെള്ളം ആഹാരം ഒക്കെ കിട്ടില്ലെ!.. അവളുടെ ഭാഗ്യം!. പക്ഷേ ബാല്യം കഴിഞ്ഞ് പെണ്ണായപ്പോൾ കൊണ്ടുവന്ന് നിർത്തിയവരുടെ മട്ട് മാറി... ദാ കണ്ടില്ലേ ഇപ്പോൾ ഈ കോലത്തിലും. അവരുടെ മുറ്റം അലങ്കരിക്കാന് എന്റെ വന്യസൌന്ദര്യത്തെ അവരില്ലാതാക്കി. അലറിത്തുള്ളിപ്പെയ്യുന്ന പേമാരിയിൽ മുടിയഴിച്ചിട്ട് യക്ഷിയെപ്പോലെ അലറിവിളിക്കാനിപ്പോൾ കഴിയില്ലല്ലോ!.

കാ‍ലം കഴിയുമ്പോൾ, മനുഷ്യന്റെ ഈ ഭ്രമമൊടുങ്ങുമ്പോൾ വീണ്ടും ഞാൻ ജരാനരബാധിച്ച് ആർക്കും വേണ്ടാത്തവളായി ഈ കോണിൽ ഉണങ്ങി നിൽക്കുമായിരിക്കും. എന്നെത്തേടി കിളികൾ വരില്ല, ഫലങ്ങളില്ലാത്തമരത്തിൽ ആരാണ് വിരുന്ന് വരിക? ഒരു കുളിർകാറ്റുപോലും ഈ വഴി വരില്ല!.

ജീവിതം സഫലമാക്കാൻ ആഹാരവും വെള്ളവും മതിയോ ? എനിക്കുമില്ലേ മോഹങ്ങൾ?

[ചിത്രങ്ങൾ കടപ്പാട്: Ms. Marie Kiriyanthan Jacob (USA) & Google (USA) !]

കനകം.... കസ്റ്റംസ്.....കനകമ്മ!!

2012-11-20T06:14:00.001-08:00

കാര്യം കമലാസനൻ എന്റെ അനിയനാണേലും അപാര ബുദ്ധിയാ. അതുപോലെ ബുദ്ധി കിട്ടിയ പെണ്ണുമ്പിള്ളയ്ക്കും പൊടിയ്ക്കുണ്ട്. പക്ഷേ പേരുപോലെ തന്നെ കനകമ്മയ്ക്ക് കനകത്തിലാണിത്തിരി നോട്ടക്കൂടുതൽ അതിനെന്റെ കമലാസനൻ പേർഷ്യേക്കിടന്ന് പെടുന്ന പാടൊന്നും ചില്ലറയ്ക്കുമല്ല.

“കുഞ്ഞുകളിയൊന്നുമല്ല രണ്ട് പെണ്മക്കളാ നിങ്ങക്കെന്നാ ബോധമൊന്നുമില്ലേ മനുഷ്യാ” ന്ന് നാഴികയ്ക്ക് നാൽ‌പ്പതുവട്ടം അവളവനെ ഓർമ്മിപ്പിച്ചുകൊണ്ടേയിരുന്നു.

കഴിഞ്ഞമാസം കമലാസനനൊരു പൂതി കനകത്തിനെ ദുബായ് കാണിക്കണമെന്ന്. അങ്ങനെ ഒരു വിസിറ്റ് വിസയൊക്കെ ഒപ്പിച്ച് കമലാസനൻ കമലത്തിനെം പിള്ളാരേം ദുബായ്ക്ക് കൊണ്ട് പോയി. പോകാനൊരുങ്ങും മുന്നേ കമലാസനൻ പറഞ്ഞു എടീ ഇപ്പോ പണ്ടത്തെപ്പോലെ സ്വർണ്ണമൊന്നും നാട്ടിലേയ്ക്ക് കൊണ്ടു പോകാൻ കഴിയില്ല അതുകൊണ്ട് നീ അവിടെ നിന്ന് പണ്ടത്തെപ്പോലെ സ്വർണ്ണം വാരിയണിഞ്ഞൊന്നും വരല്ലേ തിരികെപ്പോകുമ്പം കുടൂംങ്ങുമേന്ന് പക്ഷേ വിമാനത്താവളത്തിൽ വന്നിറങ്ങിയ കനകവിഭൂഷിതയായ കനകത്തെക്കണ്ട് കമലാസനൻ ബോധം കെടുന്ന വക്കോളമെത്തിയെന്ന് പിന്നീടവൻ പറഞ്ഞു. ശ്ശോ ഈ പെണ്ണുമ്പിള്ളേടേ സ്വർണ്ണമോഹമെന്നു തീരുമെന്റെ ദൈവമേന്ന് കമലാസനൻ മനസ്സിലോർക്കുകേം ചെയ്തു.

ഒരുമാസം കമലാസനന്റെ ക്രഡിറ്റ് കാർഡിന്റെ ബലത്തിൽ കനകം ഷോപ്പിംഗ് പൊടിപൊടിച്ചു. പിള്ളേർക്കുള്ള ഡ്രസ്സ്, ടോയ്സ്, പെർഫ്യൂംസ് എന്ന് വേണ്ട ഒരു ലുലു മുഴുവൻ കനകം ആ അപ്പാർട്ട്മെന്റിലെത്തിച്ചു. പോരാത്തതിനു സ്വർണ്ണം വേറേം. കമലാസനൻ പറഞ്ഞു .. ടീ അങ്ങോട്ട് പോകുമ്പോൾ 10 ഗ്രമിനേതാണ്ട് 3000 രൂപ വച്ച് കസ്റ്റംസിൽ അടയ്ക്കേണ്ടി വരും നീ ഇതെന്തു ഭാവിച്ചാ.. ?

കനകം ഇത്തിരി ആത്മവിശ്വാസത്തിലാ. അതൊക്കെയുണ്ട് മനുഷ്യാ നിങ്ങളൊന്നടങ്ങിയിരുന്നേ.

കനകമ്മ ഇട്ടുകൊണ്ടുവന്നതെല്ലാം ഊരി കമലാസനനെ ഏൽ‌പ്പിച്ചു. “ദേ ഇതൊക്കെ ഇതിയാൻ വരുമ്പൊൾ കൊണ്ടുവന്നാൽ മതി. ഞാൻ പുതുതായി വാങ്ങിയതാ ഇട്ടോണ്ട് പോണേ...“!

അങ്ങനെ കനകമ്മയും മക്കളും വിസ കാലാവധി കഴിഞ്ഞ് നാട്ടിലേയ്ക്ക് മടങ്ങി. കസ്റ്റംസ് കഴിഞ്ഞ് വീട്ടിലെത്തിയ കനകമ്മ കമലാസനനെ വിളിച്ചു പറഞ്ഞു ഞങ്ങളെത്തീട്ടാ...
“ടീ സ്വർണ്ണത്തിനെത്ര വാങ്ങി ഡ്യൂട്ടി?“
“ഓ .....ഒന്നുമായില്ലാന്നേ?“
“ഒന്നുമായില്ലേ അതെന്നാ?“
“ഞാൻ വന്നപ്പോഴിട്ടോണ്ട് വന്ന സ്വർണ്ണം ഡിക്ലയർ ചെയ്തിട്ടല്ലേ വന്നേ അത്രേം എനിക്ക് തിരികെ കൊണ്ടോവാൻ ഒരു മറ്റവന്റേം ഡ്യൂട്ടി വേണ്ടല്ലോ മനുഷ്യാ... നിങ്ങടെ കയ്യിലിരിക്കുന്നതേയ് ഒരു ഗ്രാം തങ്കത്തിന്റെ സ്വർണ്ണാ...“ എങ്ങനുണ്ട് കനകമ്മേടെ പുത്തീ...!!
(ചിത്രം: ഗൂഗിൾ സേർച്ച്)

ടെക്സ - വെള്ളിനിലാവ്

2012-10-30T02:41:00.000-07:00

എക്സിറ്റ് 32 എന്ന് കേട്ടപ്പോൾ ഞെട്ടിപ്പോയി.. റിയാദിൽ അത്രേം എക്സിറ്റുണ്ടെന്നറിയുന്നതു തന്നെ അപ്പോഴാണ്!!. ടെക്സയുടെ വെള്ളിനിലാവുദിക്കുന്നത് എക്സിറ്റ് 32 ലാണെന്ന് എഫ് ബിയിൽ നോട്ടീസ് കണ്ടിട്ടാണ് ഞെട്ടിയത്. കബീർ കണിയാപുരം അവിടെത്തിച്ചേരാനുള്ള മാപ്പും നൌഷാദ് അവിടെത്താനുള്ള ജാമ്യവും അയച്ചുതന്നു. 7 മണിയ്ക്ക് പ്രോഗ്രാം തുടങ്ങുമെന്ന് നോട്ടീസിൽ. രാത്രി ഭക്ഷണം പോലും കഴിക്കാൻ നിൽക്കാതെ വച്ചു പിടിച്ചു 32 ലെയ്ക്ക്. അവിടെ എത്തിയപ്പോഴാട്ടെ അവിടെ മുഴുവനും ഇത്തരം ഓഡിറ്റോറിയം മാത്രം അതും അറബിയിലെഴുതിയ ബോർഡുകളും. ഒരു സ്വദേശിയോട് തിരക്കി അതിൽ നിന്ന് അൽ മുസ്തഷർ ആഡിറ്റോറിയം കണ്ടുപിടിച്ചുള്ളിൽ കയറി. ചെന്നപാടെ അവിടെ കൌണ്ടറിൽ ചായ കൊടുക്കുന്നു. നന്നായി .. ഒരു കപ്പ് ചായ വാങ്ങി. താങ്ക്യു പറഞ്ഞ് തിരിഞ്ഞപ്പോൾ പുള്ളി പറഞ്ഞു “ഒരു റിയാല്....” . (ആദ്യായിട്ടാ ഇത്തരം സംഘടനാ പരിപാടികൾക്ക് പോകുന്നത്, ഞാൻ കരുതി ഇത് വെൽക്കം ഡ്രിങ്കാവുംന്നാ...!!) ഒരു റിയാൽ കൊടുത്ത് ചായേം മോന്തി നൌഷാദിനെ തിരഞ്ഞപ്പോൾ സ്ത്രീകൾക്കായി പ്രത്യേകം തിരിച്ച ഭാഗത്ത് കിടന്ന് ഉഴിയുന്നു കോഡിനേറ്റർ. കയ്യിലൊരു 110 കെ.വി. ലൈനും ഉണ്ട്.. (ഇതിനാ “ലൈനടി ലൈനടീ“ ന്ന് പറയണേന്ന് പിന്നെയാ അറിഞ്ഞത്!!). അവിടെത്തിച്ചേർന്നതിലുള്ള സന്തോഷം പങ്ക് വച്ചപാടെ നൌഷാദ് പറഞ്ഞു പലരും തിരക്കുന്നുണ്ട്. അപ്പൂസിനെന്ന്. ഈശ്വരാ എഫ് ബിയിലെ കമന്റുകൾക്കു മറുപടിയുമായി ആൾക്കാരിരിപ്പുണ്ടെന്നറിഞ്ഞ് മുങ്ങാൻ തുടങ്ങിയപ്പോഴുണ്ട് പകുതി ഷർട്ടിട്ട് ബാക്കി പകുതി പിന്നെയാട്ടെന്നും പറഞ്ഞൊരാൾ നൌഷാദിനടുത്തേയ്ക്ക് ഓടിച്ചാടി വന്നു. വന്ന പാടെ നൌഷാദ് പറഞ്ഞു.. “ഇതാണ് കബീർ കണിയാപുരം” , സ്വന്തം പേരു പറഞ്ഞ് പരിചയപ്പെടുത്തി ഞാൻ പറഞ്ഞു “മാ‍പ്പ്...“ കബീർ. അതൊന്നും സാരമില്ല. വൈകീട്ടില്ലാ‍ന്നെ..ഞങ്ങളാ താമസിച്ചതിനു മാപ്പുപറയേണ്ടേന്ന്.. അതല്ല ഗഡീ അയച്ചു തന്ന റൂട്ട് മാപ്പ്... പുള്ളി രണ്ട് നാലടി നടന്നിട്ട് തിരികെ വന്നു.. എന്താ പേരു പറഞ്ഞേ? .. ഇനി അവിടെം ഫേക്കായാൽ ഇരുത്തിയില്ലെങ്കിലോന്നോർത്ത് എന്റെ യഥാർത്ഥപേരു പറഞ്ഞു.. പുള്ളി വീണ്ടും രണ്ട് ചാൽ നടന്നിട്ട് തിരികെ വന്ന് “അങ്ങിനൊരാൾക്ക് ഞാൻ റൂട്ട് മാപ്പ് അയച്ചില്ലല്ലോ? ആകെ അയച്ച്ത് ................. എന്താ എഫ് ബി ഐഡി... ഹഹഹഹ ഇപ്പ പിടികിട്ടി. ഞാനൊരാൾക്കെ വ്യക്തിപരമായി അയച്ചുള്ളു. അതാ പേരു പറഞ്ഞപ്പോൾ സംശയം ആയത്!!. “ദേ കാര്യമൊക്കെ കൊള്ളാം ഇവിടെ അലുമ്പുണ്ടാക്ക്യാ പാഷാണം വാങ്ങി വച്ചിട്ടുണ്ട് ഞാൻ“ ... എന്നിട്ട് രൂക്ഷമായൊരു നോട്ടവും!! എന്നിട്ട് ഓടിപ്പോയി മൈക്കെട്ത്ത് ഒരു പ്രഖ്യാപനം.. വിശിഷ്ടാതിഥികൾ എത്തിയിട്ടുണ്ട്. ഉടൻ തന്നെ സമ്മേളനം ആരംഭിക്കും. (ആരംഭിക്കുന്നതിനിടെ ഒരു അഞ്ചു പ്രാവശ്യമെങ്കിലും ഈ അനൌൺസ്മെന്റ് കേട്ടു ഞാൻ!) . തിരികെ വന്ന് നൌഷാദിനോട് പറഞ്ഞു മാഷേ എന്തു വന്നാലും നമ്മൾ 8 നു ആരംഭിക്കും ആരു വന്നാലും വന്നില്ലെങ്കിലും..!!

പാഷാണപ്രയോഗമോർത്ത് ഞാൻ ഒരു മൂലയ്ക്ക് ജയ് ഹിന്ദ് ടി വീ ടെ ക്യാമറയ്ക്ക് ചോട്ടിലായി ഒരു കസേരയൊക്കെ വലിച്ചിട്ട് മര്യാദക്കാരനായി ഇരുന്നു. വയ്ക്കോൽ തുറുവിനു മുകളിൽ വലിഞ്ഞു കയറുമ്പോലെ ആ ക്യാമറച്ചേട്ടൻ മേശമേൽ അള്ളിക്കയറി ക്യാമറയൊക്കെ സെറ്റപ്പാക്കുന്നുണ്ട് ഇടയ്ക്കിടെ, ചുവട്ടിൽ ആശങ്കയോടെ ഞാനും. മുമ്പ് ടെക്സ നടത്തിയ ഖമറൊളിയുടെ ക്ലിപ്പ്സ് പ്രൊജക്ടറിലൂടെ അവിടെ പതിയുന്നത് കണ്ട് കൊതിയോടെ ഇരുന്നു. (എന്നാലും എന്റെ കോർഡിനേറ്ററേ ഈ ശീലേം പ്രൊജക്ടറും 16 ആം നൂറ്റാണ്ടിലേതല്ലേ.. ഇപ്പോ നാട്ടിൽ കോരന്റെ കല്യാണത്തിനു പോലും നല്ല യമണ്ടൻ എൽ. ഇ. ഡി ടിവിയൊക്കെ വെയ്ക്കുമ്പൊൾ ഈ നരച്ച തുണി പരിപാടി ഗൾഫിൽ വേണായിരുന്നോ?ന്ന് ചോദിക്കണം ന്നുണ്ടായിരുന്നു. പക്ഷേ നീ തന്നോ കാശെന്നു ചോദിച്ചാൽ മെമ്പർ പോലുമല്ലാത്ത എനിക്കെന്തു കാര്യം! ഹും..)

ഒടുവിൽ കാത്ത് കാത്തിരുന്ന സംഗതിയെത്തി.. സാംസ്കാരിക സമ്മേളനം... സ്വാഗതം, ആശംസാപ്രസംഗങ്ങൾ കൃതജ്ഞത. എന്റെ സുഹൃത്തായ ഇഖ്ബാൽ സർ (മമ്മൂട്ടിയും എന്റെ സുഹൃത്താ പുള്ളീടെ എത്രയെത്ര സിനിമ ഞാൻ കണ്ടിരിക്കുന്നു. അതു പോലെ ഇഖ്ബാൽ സാറും ന്റെ സുഹൃത്താ മലയാളം ന്യൂസിൽ എന്തോരം ഞാൻ വായിച്ചിരിക്കുന്നു..!!) ചോദിക്കുന്നത് കേട്ടു കുടുംബങ്ങൾ കുറവാണല്ലോന്ന്... മുത്താവ പ്രശ്നം കാരണം ആണോ അതോ ഷിഫയിൽ സന്നിധാനത്തിന്റെ പ്രോഗ്രാം ഉള്ളതിനാലാണോന്നറിയില്ല സ്ത്രീ ജനം കുറവായിരുന്നു. ഇതിനിടെ എന്റെ പുറകിലിരുന്ന് രണ്ട് വിദ്വാന്മാരുടെ സംസാരം ഇഖ്ബാൽ സാറിന്റെ പ്രസംഗത്തേക്കാളും മുന്നെ എന്റെ കാതിൽ വീണൂ.. “ഡേയ്.. കയറിവന്നപ്പോൾ നമ്മൾ കണ്ടില്ലേ അവളുമാര് എന്തൊരെറിയാടേ... ദാ നോക്ക് രണ്ടും നിർത്തുന്ന മട്ടില്ലാ കേട്ടാഡേയ്..”

ഈശ്വരാ ഇവന്മാരെനിക്കും കൂടെ പണി വാങ്ങിത്തരുമെന്നു കരുതി കസേര കുറെക്കൂടെ മുന്നിലേയ്ക്കിട്ട് ഞാനിരുന്നു. (എന്റെ വലതു വശത്തായിട്ടാണ് സ്ത്രീകൾക്കിരിക്കാനുള്ള സ്ഥലം തുണിമതിൽ കെട്ടി തിരിച്ചിരിക്കുന്നത്. അങ്ങോട്ട് നോക്കീട്ടാ ആ “തിരോന്തരം ചേട്ടന്മാരുടെ“ “ഏറ്.“ !)

ഇഖ്ബാൽ സാർ പറഞ്ഞ റിയാലിറ്റിയില്ലാത്ത റിയാലിറ്റി ഷോകളുടെ ഉള്ളുകളികൾ ഇഷ്ടായി. നമ്മുടെ സഹോദരിമാർ അറിയേണ്ട വിഷയം ആയിരുന്നു. വരവറിയാതെ ചെലവാക്കി കടത്തിലേറുന്ന മലയാളിയെയും വരച്ചു കാട്ടി. ഒരേപോയിന്റിൽ തന്നെ അഡ്വ. അജിത്തും, ഷിഹാബ് കൊട്ട്കാടും മറ്റെല്ലാരും കുരുങ്ങി വീണു. പ്രസംഗിച്ചാൽ ഞാൻ കൂവുമെന്ന് പറഞ്ഞത് കേട്ട് പേടിച്ച് പനിയും ചുമയും പിടിപെട്ട ഷീബ ടീച്ചറിനു പകരം (?) വന്ന ടെക്സ വനിതാ മേധാവി റൂബി മാഡത്തിന്റെ പേര് നേരത്തെ ഷിഹാബ് കൊട്ടൂകാടിനോട് പറയാതിരുന്നത് കോർഡിനേറ്ററുടെ പിഴവായിരുന്നോ?. വിശിഷ്ടാതിഥിയായ നോർക്ക കൺസൾട്ടന്റ് ഷിഹാബിനുള്ള കൃതഞ്ജത പറയാൻ അതിനു ചുമതലപ്പെടുത്തിയ ആൾ വിട്ടു പോയത് ശരിയായില്ല എന്തായാലും ടെക്സ പ്രസിഡന്റ് അത് മേക്കപ്പ് ചെയ്തു!!. എന്തായാലും പൊതുസമ്മേളനം ഗംഭീരമായി കഴിഞ്ഞു.

കലാ പരിപാടികൾ ആരംഭിച്ചു. ടെക്സായുടെ സ്വാഗത ഗാനം കരാക്കോ ബി.ജി. എം ഇൽ പ്പെട്ട് ഒന്നും കേൾക്കാനാകാത്ത അവസ്ഥയിലായിരുന്നു. (നൌഷാദിന്റെ നല്ല വരികൾ, നല്ല ഈണം., കലാകാരന്മാർ നല്ല രീതിയിൽ പാടുകയും ചെയ്തു!!). പൊതുവേ എല്ലാ പാട്ടുകളുടേം ട്രാക്കിന്റെ ശബ്ദ ക്രമീകരണം കാരണം ശരിക്ക് കേൾക്കാനായില്ല.. മാത്രവുമല്ല, ആവേശം മൂത്ത കിടാങ്ങൾ പുറകിൽ നല്ലപോലെ ഒച്ചയിടുകയും ചെയ്തു. സിനിമാതാരങ്ങളുടെ ഫാൻസുകാർ തിയേറ്ററിൽ അലമ്പുണ്ടാക്കുന്നതാണ് ഓർമ്മയിലെത്തിയത്. അതിനേക്കാൾ മോശമായിരുന്നു പ്രകടനം, ടി.വി.ക്കാർ ഇടയ്ക്കിടെ ക്യാമറ അങ്ങോട്ട് തിരിച്ച് കവർ ചെയ്തതും ആവേശത്തീയിൽ എണ്ണയൊഴിച്ചു. ആവേശം നല്ലതു തന്നെ പക്ഷേ പൊതു പരിപാടികൾക്ക് നിയന്ത്രണങ്ങളുള്ള സൌദി പോലൊരു രാജ്യത്ത് നമ്മൾ സ്വയം പാലിക്കേണ്ട ചില ചിട്ടകൾ ഉണ്ട്. ഇത്തരം പ്രവർത്തികൾ ആണ് പലേടത്തും മുത്തവയും പൊലീസും ഒക്കെ വരാൻ കാരണമാക്കുന്നത്. ഈ ആഡിറ്റോറിയത്തിനു പുറത്തും പോലീസും മുത്തവയും വന്നു എന്നാ‍രോ പറഞ്ഞതും പരിപാടി അൽ‌പ്പ നിമിഷം നിർത്തേണ്ടി വന്നതും പരിഭ്രാന്തിയുണ്ടാക്കി.

ഏറ്റവും നയനമനോഹരമായത് കുഞ്ഞുങ്ങളുടെ സംഘ നൃത്തമായിരുന്നു. അവർ അഭിനന്ദനം അർഹിക്കുന്നു. പരിപാടി കോമ്പിയർ ചെയ്യാൻ വന്ന കുട്ടി തുടക്കത്തിൽ തന്നെ വാക്കുകൾ വിഴുങ്ങിയതും അതേ കുട്ടി തന്നെ നൃത്തത്തിനു വന്നിട്ട് പാതി വഴിയിൽ ഇറങ്ങിപ്പോയതും കല്ലുകടിയായി. സ്റ്റേജിൽ ഇളകിയാടിയ ഒരു നർത്തകിയുടെ പ്രകടനം പുറകിൽ ബഹളമുണ്ടാക്കിയവരുടെ ആവേശത്തിനു കൂടുതൽ ഹരം പകരുന്നതായി പലപ്പോഴും തോന്നി. ഗാനങ്ങൾ, സ്ക്റ്റിറ്റ്സ്, എല്ലാം നന്നായിട്ടവതരിപ്പിച്ചു. ഈ പരിപാടിയിൽ പങ്കെടുത്ത് കലാപരിപാടികൾ അവതരിപ്പിച്ച എല്ലാ കലാ‍കാരന്മാരും കലാകാരികളും അവരവരുടെ ഭാഗം നന്നാക്കിയിരുന്നു. അഭിനന്ദനങ്ങൾ.

പ്രോഗ്രാമിനിടെ അപ്പോഴപ്പോഴായി കബീർ അനൌൺസ് ചെയ്യുന്നുണ്ടായിരുന്നു. ഇന്ന് ഇവിടെ ഗംഭീരമായ നറുക്കെടുപ്പുണ്ട് ജീവകാരുണ്യ പ്രവർത്തന ഫണ്ടിലേയ്ക്കായി മുതൽക്കൂട്ടുന്നതിന് കൂപ്പൺ എടുത്ത് സഹായിക്കണമെന്നൊക്കെ. ഓരോ പരിപാടിയ്ക്ക് ശേഷവും ടി.വി യിലെപ്പോലെ “ഈ പരിപാടി നിങ്ങൾക്കായി സ്പോൺസർ ചെയ്തത് കാട്ടുമുക്കിൽ ജൂവലേഴ്സ് “ എന്ന കബീറിന്റെ അനൌൺസ്മെന്റ് അവരുടെ കാശ് വാങ്ങിയതിന്റെ നന്ദിയായി കരുതി ക്ഷമിച്ചു!!!. കുറേക്കഴിഞ്ഞപ്പോൾ തിയേറ്ററിലെ കപ്പലണ്ടി വിൽ‌പ്പനക്കാരനെപ്പോലെ കൂപ്പണുമായി ഒരാളെത്തി. ഇതിനെക്കാൾ ഭേദം പ്രവേശനം പാസ്സ്മൂലം എന്ന് പറഞ്ഞാൽ പോരായിരുന്നോ നൌഷാദേന്ന് മനസ്സിൽ കരുതി കൂപ്പൺ എടുത്തു. പിന്നെ ജീവകാരുണ്യമല്ലേന്നോർത്താ പോട്ടേന്ന് വച്ചത്. എന്തായാലും നറുക്കിട്ട് സമ്മാനങ്ങൾ വിതരണം ചെയ്തു.. ആശ്വാസമായി എന്റെ കൂപ്പൺ ഒരക്കത്തിന്റെ വ്യത്യാസത്തിൽ 10 നമ്പരിനു പിന്നിലായിപ്പോയി!!!

കബീറിന്റെ പാഷാണപ്രയോഗം പേടിച്ച് ഒരു മൂലയ്ക്ക് കുത്തിയിരുന്നതിനാൽ ഭക്ഷണം കിട്ടിയില്ല. രാത്രി വളരെ വൈകി പുറത്തിറങ്ങിയപ്പോൾ കണ്ടത് വിളപ്പിൽശാലയെയും തോൽ‌പ്പിക്കുന്ന മട്ടിൽ ആഹാരം കഴിച്ചവരുടെ മാലിന്യക്കൂമ്പാരം വരാന്ത മുഴുവൻ!!! (അന്നേരം ആണറിഞ്ഞത് അവിടെ കാശുകൊടുത്താൽ ഭക്ഷണവും കിട്ടുമായിരുന്നൂന്ന്!!) സമയം അതിക്രമിച്ചതിനാലും ഉറക്കവും വിശപ്പും എന്നെ ഞെക്കിപ്പിഴിഞ്ഞതിനാലും കബീറിനോട് ടാറ്റാ പറഞ്ഞ് ഞാനിറങ്ങി.. പിന്നെ അവിടെ എന്ത് നടന്നു എന്നറിയില്ല.

ഇങ്ങനെ ഒരു വിരുന്നൊരുക്കിയ ടെക്സ ഭാരവാഹികളോടും അംഗങ്ങളോടും എന്നെ ക്ഷണിച്ച നൌഷാദിനോടും കബീറിനോടും എന്റെ നന്ദി അറിയിക്കുന്നു. കൂടാതെ, പൊതുപരിപാടികൾക്ക് വിലക്കുള്ള സൌദിയിൽ ഈദിനോടനുബന്ധിച്ച് ഇങ്ങനെയുള്ള കലാ പരിപാടികൾ ആഡിറ്റോറിയങ്ങൾക്കകത്താണെങ്കിൽ പോലും അനുവദിക്കുന്നതിൽ അവരോട് കൃതജ്ഞതയുള്ളവരായിരിക്കണം നമ്മൾ പ്രവാസികൾ. ഇനിയെങ്കിലും അതിരുകടന്ന ആവേശം കാണിക്കാതെ പക്വതയോടെ പ്രോഗ്രാമുകൾ കണ്ട് വിജയിപ്പിക്കാൻ കാണികളും തയ്യാറാകണം എന്ന ഒരു അഭ്യർത്ഥന കൂടെയുണ്ട്.

(ചിത്രത്തിനു കടപ്പാട് : പ്രശാന്ത് വാമനപുരം, - കബീറിന്റെ ഭീഷണി നിലനിന്നിരുന്നതിനാൽ ഫോട്ടോയ്ക്കായി മൊബൈൽ പോലും പുറത്തെടുത്തില്ല. )

(കബീർ ഇതിന്റെ പേരിൽ പാഷാണം കലക്കി തരല്ലേ പ്ലീസ്... !! )

ശ്..ശ്ശ്...ശ്ശ്..പുലികൾ തിരക്കിലാണ്.....!!!

2012-09-24T23:14:00.003-07:00

നഗരത്തിലെ ഒരു റെസ്റ്റോറന്റിന്റെ മൂലയ്ക്കിരുന്ന് പുലികൾ ആലോചന തുടങ്ങി... “അളിയാ ഇന്നെന്താ സ്കൂപ്പ്?.”.. “തങ്കപ്പൻ ഒന്ന് വന്നോട്ടെ അളിയാ.... അവൻ ആ മലയാളി ഗല്ലിയിൽ കറങ്ങി നടപ്പുണ്ട്.. ചൂടുള്ള വല്ല ലുങ്കി ന്യൂസും കൊണ്ടു വരുമോന്ന് നോക്കട്ടെ..!“. "പ്രവസി ലേഖകരുടെ" തിരക്കിട്ട ചർച്ചയാണവിടെ. പഴയകാലത്ത് സൌദി പ്രസ് ഏജൻസി നൽകുന്ന സ്റ്റോറിയിൽ നിന്ന് ഒരു വാക്ക് എഡിറ്റ് ചെയ്യാൻ സ്വാതന്ത്ര്യമുണ്ടായിരുന്നില്ലത്രെ. അവിടെ നിന്നും ഇപ്പോൾ ഈ പറഞ്ഞ സകല “ലുങ്കി ന്യൂസ്”കളും കൊടുക്കാമെന്ന സ്വാതന്ത്ര്യത്തോളം എത്തി നിൽക്കുന്നു സൌദി പത്രമേഖല. മലയാളികളുടെ സ്നേഹാദരങ്ങൾ നേടി ഈ മേഖലയിൽ കന്നിക്കാരനായെത്തിയ “മലയാളം ന്യൂസ്” അഭിനന്ദനമർഹിക്കുന്നു. മലായാളിയ്ക്ക് അവന്റെ ഉൾത്തുടിപ്പുകൾ കുറിച്ചിടാൻ ഒരിടം ആദ്യമായി നൽകിയത് മലയാളം ന്യൂസ് ആണ്. പിന്നാലെ ഗൾഫ് മാദ്ധ്യമം (അവർ മാധ്യമം എന്നേ എഴുതൂ എന്ന വാശിയിലാണ്!!). എത്തിയതോടെ എഴുത്തുകാരുടെ എണ്ണവും വർദ്ധിച്ചു!!. ഇന്ത്യൻ ന്യൂസ് ഫോറവും(?) റിയാദ് മീഡിയ ഫോറവും(?) ഒക്കെ നിലവിൽ വന്നു. ലേഖകരും പല ഗ്രൂപ്പുകളായി എന്നും അപ്പൂസ് മനസ്സിലാക്കുന്നു. കേരളത്തിൽ ചാനലുകളുടെ എണ്ണം പെരുകിയതോടെ സൌദിയിലും ചാനൽ ലേഖകരുടെ എണ്ണത്തിലും തള്ളിക്കയറ്റമുണ്ടായി. തലയിലും തോളത്തും കമ്പിയും സിമന്റും ചുമന്നു നടന്നവരും അതൊക്കെ മാറ്റി കാം തോളത്ത് വച്ച് നടന്ന് റിപ്പോർട്ടിം നടത്തുന്നതും അപ്പൂസ് കണ്ടു.!.. എന്റെ ഏറ്റവും അടുത്ത സുഹൃത്ത് ഒരിക്കൽ പറഞ്ഞു “അക്കാദമിക് ക്വാളിഫിക്കേഷനല്ല എഴുത്തിനാധാരം” എല്ലാവർക്കും ജേണലിസം ഡിഗ്രിയും ഡിപ്ലോമയും ഒന്നും ഉണ്ടായെന്നു വരില്ല പക്ഷേ എഴുതാനുള്ള കഴിവുണ്ട് എന്ന് പറഞ്ഞതിൽ കഴമ്പുണ്ട്. മലയാളത്തിലെ പഴയ തലമുറയിൽ‌പ്പെട്ട പത്രലേഖകരൊന്നും “ഡിഗ്രി /പി.ജി. ഇൻ ജേണലിസം” കഴിഞ്ഞവരൊന്നുമല്ലായിരുന്നു എങ്കിലും ശക്തമായ എഴുത്തിലൂടെ മന്ത്രിസഭ വരെ തള്ളിയിട്ട “പുലികൾ” തന്നെയായിരുന്നു അവർ എന്നും സമ്മതിക്കുന്നു.

ഞാൻ “ലുങ്കി ന്യൂസ്” എന്ന് പറഞ്ഞത് ആരേയും ആക്ഷേപിക്കാൻ വേണ്ടിയല്ല. മാസങ്ങൾക്ക് മുമ്പ് “മലയാളം ന്യൂസ്” ന്റെ മുൻ പേജിൽ പ്രധാന തലക്കെട്ടോടെ ഒരു വാർത്ത വന്നു. സൌദി എയർ ലൈൻസ് 2012 മാർച്ച് മുതൽ തിരുവനന്തപുരത്തേയ്ക്ക് സർവ്വീസ് ആരംഭിക്കുമെന്ന്!!. ആ വാർത്ത മലയാളികളുടെ ശ്രദ്ധനേടി. എയർ ഇന്ത്യയുടെ സർവ്വീസ് മുടക്കലും ലേറ്റ് ടേക്കോഫും ഒക്കെ കാരണം മനം മടുത്തിരിക്കുന്ന മലായാളികൾക്ക് ഇത് നൽകിയ സന്തോഷം ചില്ലറയൊന്നുമല്ലായിരുന്നു. ജനുവരിയായിട്ടും സൌദി എയർലൈൻസിന്റെ ഡെസ്റ്റിനേഷൻ ലിസ്റ്റിൽ തിരോന്തരം കാണാനില്ലാതെ വന്നപ്പോൾ ഞാൻ സൌദിയയുമായി ഇ-മെയിലിൽ ബന്ധപ്പെട്ടു, “ഏത് ഉമ്മൻ ചാണ്ടി... എന്ത് എമർജിംഗ്..??” എന്ന് ഫോക്സ്‌വാഗൻ കാ റുകാർ ചോദിച്ചപോലെ അവരിങ്ങോട്ട് ചോദിക്കുന്നു..” യേത് തിരോന്തരം.. യെന്തരപ്പീ ക്നാവുകള് കണ്ടാ..”ന്ന്.. അവർ അങ്ങിനെ ഒന്നിനെക്കുറിച്ച് ആലോചിച്ചിട്ടുപോലുമില്ലാത്രെ!!... അപ്പോൾ പിന്നെ ഇതൊക്കെ “ലുങ്കി ന്യൂസ്” എന്നല്ലാതെ എന്താണ് പറയേണ്ടത്?. ഉദാഹിരിക്കാൻ ഇനീം നിരവധിയുണ്ട്. യ്യോ... പറഞ്ഞ് പറഞ്ഞ് നേരം പോയി... നാളെത്തേയ്ക്ക് ഒരു “സ്കൂപ്പ്” ഉണ്ടാക്കിയില്ലെങ്കിലെന്റെ പണി പോയത് തന്നെ.... “തങ്കപ്പണ്ണാ.... നില്ല് ... നില്ല്.. ഞാനും വരണേയ്..........”

വെള്ളിത്തിരയിൽ നിന്നും മാഞ്ഞുപോയവർ.....

2012-09-23T13:24:00.001-07:00

1976 ൽ കെ.ജി. ജോർജ്ജിന്റെ സംവിധാനത്തിൽ പുറത്തിറങ്ങിയ ചിത്രമാണ് “സ്വപ്നാടനം”. ഡോ. പി.കെ. മോഹൻ‌ദാസ് ഗോപിയായും, റാണിചന്ദ്ര സുമിത്രയായും, ഇതിൽ വേഷമിട്ടു; ഇവരെക്കൂടാതെ എം.ജി.സോമനും, മല്ലികയും, പി.കെ.വേണുക്കുട്ടൻ നായരും ഇതിൽ അഭിനയിച്ചിരുന്നു. ബ്ലാക്ക് ആൻഡ് വൈറ്റിൽ പുറത്തിറങ്ങിയ ഈ ചിത്രത്തിന് കേരള സർക്കാരിന്റെ ചലച്ചിത്ര പുരസ്കാരവും, മികച്ച ചലച്ചിത്രത്തിനുള്ള കേന്ദ്ര പുരസ്കാരവും ലഭിച്ചിരുന്നു. അക്കാലത്തിറങ്ങിയ ചിത്രങ്ങളിൽ നിന്നും വളരെ വ്യത്യസ്ഥമായ ശൈലിയായിരുന്നു കെ.ജി.ജോർജ്ജ് ഈ ചിത്രത്തിൽ സ്വീകരിച്ചിരുന്നത്. അതു കഴിഞ്ഞ് ഒന്നോ രണ്ടൊ ചിത്രങ്ങളിൽ കൂടി ഡോ. മോഹൻ‌ദാസ് അഭിനയിച്ചിരുന്നു. പിന്നീട് അദ്ദേഹം അഭിനയം മതിയാക്കി പ്രാക്ടീസിൽ ശ്രദ്ധ ചെലുത്തി. ഇപ്പോൾ ദുബായിൽ ജോലി നോക്കുന്നു(?).

മോഹൻ‌ദാസിന്റെ അഭിനയം കാണുമ്പോൾ പെട്ടെന്നോർമ്മ വരുന്നത് അന്തരിച്ച വേണു നാഗവള്ളിയെയാണ്. നല്ലൊരു നടനായിരുന്നു ഡോ. മോഹൻ‌ദാസ് പക്ഷേ എന്തുകൊണ്ടൊ മലയാള സിനിമ അദ്ദേഹത്തെ ശ്രദ്ധിക്കാതായി. ഇന്റർനെറ്റിൽ വളരെയധികം തെരഞ്ഞു. അദ്ദേഹത്തെക്കുറിച്ച് ഒരു വരിപോലും ഒരിടത്തും കണ്ടെത്താനായില്ല... അദ്ദേഹത്തെക്കുറിച്ചറിയുന്നവർ ഇത് അപ്ഡേറ്റ് ചെയ്യും എന്ന് പ്രതീക്ഷിക്കുന്നു.

(ചിത്രം : കടപ്പാട് ഗൂഗിൾ സേർച്ച്, വിവരങ്ങൾ : വിക്കിപീഡിയ)

കാത്തിരിപ്പ്

2012-09-18T23:24:00.000-07:00

ഉത്തരം കിട്ടാത്ത ഒരുപിടി ചോദ്യങ്ങൾ മനസ്സിലിട്ട് നടക്കാൻ തുടങ്ങിയിട്ട് നീണ്ട വർഷങ്ങളായി .... ചോദിക്കാനുള്ള ആളെ മുന്നിൽ കിട്ടിയിട്ട് ചോദിക്കാനയി ഞാൻ ഒക്കെയും അടുക്കി സൂക്ഷിച്ചു വച്ചു. ഇടയ്ക്കിടക്ക് അവയെടുത്ത് മാറാല മാറ്റി പൊടിതട്ടി തിളക്കി വയ്ക്കും. ഒർക്കൂട്ടിലെയും ഫേസ്ബുക്കിലെയും പ്രണയ സ്ക്രാപ്പുകൾ കാണുമ്പോഴൊക്കെയും ഓർമ്മകൾ നിനക്കു ചുറ്റും പാറിപ്പറക്കും. പറന്നു തളർന്ന് വീണ്ടും ആ ചോദ്യങ്ങൾക്കുമേൽ അടയിരിക്കും.

അങ്ങനെ കാത്തിരുന്ന് കാത്തിരുന്ന് നിന്നെ മുന്നിൽ കിട്ടിയപ്പോൾ ഞാൻ കാത്തുവച്ചിരുന്നു ചോദ്യങ്ങൾക്ക് പ്രസക്തിയില്ലാതായി.. കാരണം നിന്റെ ആദ്യ ചോദ്യം “ നിങ്ങൾ ആരാണ്!!!.. ഞാനോർക്കുന്നില്ലല്ലോ” ഒടുവിൽ ഉത്തരമില്ലാത്ത എന്റെ ചോദ്യങ്ങളെ ചാപിള്ളയെപ്പോലെ ഞാൻ കുഴിച്ചുമൂടി..!.

എനിക്കും വേണം ഒരു “ബ്ലോങ്ങാക്കുല”

2012-09-16T23:21:00.001-07:00

അപ്പുവിനൊരു “ബ്ലോങ്ങാക്കുല” വേണം എന്ന ആഗ്രഹം തുടങ്ങിയത് ഇന്നും ഇന്നലെയുമല്ല. പക്ഷേ ആ ആഗ്രഹം അരങ്ങിട്ടുറപ്പിച്ചത് ഇന്നലെ. എന്റെ കൂട്ടുകാരൻ പറഞ്ഞു അവരിവിടെ “ബ്ലോങ്ങൻ” മാരുടെ കൂട്ടായ്മ വീണ്ടും നടത്തുന്നൂന്ന്.. കിട്ടുന്ന ബിരിയാണിയെന്തിന് ഒരു “ബ്ലോങ്ങ”യുടെ പേരിൽ ഞാൻ നഷ്ടപ്പെടുത്തണം. അതു കൊണ്ട് ഞാനും കരുതി ഒരു “ബ്ലോങ്ങാക്കുല” തുടങ്ങാം എന്ന്. സദയം ആശീർവദിക്കുക. ഞാൻ അറിഞ്ഞതും കണ്ടതും പറഞ്ഞതുമായ കാര്യങ്ങൾ -നേരോടെ, നിർഭയം, നിരന്തരം- ഒന്നുമല്ലെങ്കിലും, ഇവിടെ പങ്കുവയ്ക്കാം. തെറ്റുകൾ പൊറുക്കണം., ക്രിട്ടിസൈസ് ചെയ്യാം, കൊല്ലരുത് പ്ലീസ്... സഹകരണം പ്രതീക്ഷിച്ചുകൊണ്ട്. ബ്ലോങ്ങാക്കുല ഉദ്ഘാടനം ചെയ്തതായി പ്രഖ്യാപിച്ചുകൊള്ളുന്നു.