வேல்வெற்றியின்

முத்தங்கள் - மூச்சடக்கவா?

2026-10-12T19:29:09.759+05:30

முத்தங்கள் - மூச்சடக்கி
மோகனம் படிப்பதோ?
ரத்தங்கள் சூடேறி
ரசவாதம் நிகழ்த்துவதோ?

ஒத்திருந்து பொழிந்தே
ஒருமனப்படுவதோ?
பித்தம் தெளிவது
பிரிவினில் என்றாவதோ?

சித்திரத்தைக் கண்டவுடன்
சித்தம் கலங்கியே
நித்தம் வேண்டிடும்
நிலைதனைக் கொண்டதோ?

தித்திப்புப் பண்டமாய்த்
தினம்தினம் கிடைத்திட
யுத்தகள உத்திகளா?
யூகங்கள் வகுப்பதோ?

பத்தன், பாமரன்
பந்தத்தில் விழுந்திட
சத்தமின்றி முத்திரை
சாகசமாய் அளிப்பதோ?

கொத்தும் கிளிக்குக்
கொடுத்துச் சிவக்க
அத்துப்படியாக
அவளும் ஒத்துழைக்க

தனித்ததுவம் என்றே
தந்தவை போதாதென
தத்தையின் வித்தைகள்
“தா... தா...” என்றோதிட

மொய்க்கும் வண்டாகி

மொத்தமாய் கொடுத்திட
மெய் சிலிர்த்தாளே - யானோ

மெய் மறந்தேனே

மெய் மறந்த
அ. வேல்முருகன்

ஓட்டுத் திருட்டு

2026-10-12T01:22:22.419+05:30

யாரும்
யாரையும்
காட்டிக் கொடுக்காத
சனநாயகத்தில்

தன்னாட்சி நிறுவனங்கள்
கால் நக்கிப் பிழைத்திட
காக்கிச் சட்டைகள்
கலவரங்களைத் தூண்டுது

நீதியை மறுத்து
சேவைகளை முடக்கி
மக்களைத் தாக்கிட
மகேசன் உத்தரவு

திருடர்களுக்கு எதிராக
தேவதைகள் தெருவில் இறங்கியும்
உச்ச நீதிமன்றம்
உணர்வற்றுப் போனது

குடியாட்சியில்
குரல்வளையை நெறிப்பவர்கள்
தடியடிக்கு
தராதரம் பார்ப்பதில்லை

அஞ்சி நடுங்கி
ஆங்காங்கே தடுப்புகள்
மிஞ்சிடும் கூட்டத்தில்
கண்ணீர்ப் புகைக் குண்டுகள்

மண்ணையும் மனிதத்தையும்
நேசிப்பவர்களை
நகர்ப்புற நக்சல்கள் என்றே
மண்டை உடைப்பாம்

சட்டங்களை மதிக்காத
சர்வாதிகாரிக்கும்
சலாம் போடுபவர்களுக்கும்
இசட் வகைப் பாதுகாப்பாம்

ஓட்டளிக்கும் கடமையை
உனக்களித்த சட்டம்
கட்சிமாறும் உரிமையை
கயவாளிகளுக்குக் கொடுத்ததேன்?

சனநாயகத்தின் கேலிக்கூத்து
எண்ணிக்கையில் இருப்பதால்
பிணங்கள் உலாவரும்
பிரமாத உலகமிது

வீடு வீடாகப் பொறுக்கியதை
விலை பேசும் விற்பன்னர்கள்
வெட்கங்கெட்டவர்கள்
வேசிக்கும் கீழானவர்கள்

மக்கள் நலன் என்பது
வரிக்கு மேல் வரி விதிப்பதா?
கோரிக்கையோடு கொடிபிடிக்க
குண்டாந்தடி பரிசளிப்பதா?

கூடுதல் வரிவசூலில்
கொஞ்சம் இலவசமளித்து
நெருடலின்றி விலையேற்றத்தை
வேடிக்கை பார்ப்பதா?

உண்ணவும், உடுக்கவும்
கற்கவும், உழைக்கவும்
கவலை மறந்து உறங்கவும்
வழங்குவதன்றோ சேவை!

இயற்கை வளங்களைக்
கொள்ளையடிக்கவும்
அரசு நிறுவனங்களை
அடிமாட்டு விலைக்கு விற்கவும்

ஆட்சி நிர்வாகமெனில்
ஆம் என்பாயோ?
அறமல்ல என்று
ஆர்ப்பரித்து எழுவாயா?

அ. வேல்முருகன்

இது அரசியல்தான்

2026-08-23T21:24:34.647+05:30

தாமரை
நீர்நிலைகளை ஆக்கிரமிக்க
கைகள்
சலனமற்று இருக்கிறது

இலைகள்
உதிர்ந்து கொண்டிருக்க
திடீரென
விசில் சத்தங்கள்

கதிர் அரிவாள்
சுத்தியல்
கொள்கை தடுமாற்றத்தால்
களையிழந்து போக

மாம்பழத்தில்
மரபணு மாற்றம் நிகழ
பம்பரம்
சாட்டையின்றி இருக்குது

பிறைநிலவு
வளரவேயில்லை
டார்ச்லைட்
ஒளியின்றிப் போனது

முரசடிக்க
முகங்களில்லை
குக்கரில் – பருப்பு
வேகவில்லை

சூரிய அஸ்தமனமென

சூழ்ந்திருந்தவர்கள் விலகிட
பானையும் – ஆங்கே

பொங்கவில்லை

துடைப்பக் கட்டைகள்
தேய்ந்து போய்விட்டன
வங்கத்து மலர்கள்
வாடிவிட்டன

வில் அம்பை (சிவசேனா)
ராமன் உடைத்துவிட
யானைகள்
பழக்கப்படுத்தப்பட்டுவிட்டன

சங்கு (பிஜூ ஜனதாதளம்)
மக்களால் ஒதுக்கப்பட
சைக்கிள் ஓடுகிறது
இடத்திற்கு தகுந்தாற்போல்

சின்னங்கள் எதுவாயினும்

சிந்தாந்த நக்சல்களால்

கரப்பான் பூச்சிகளைக் கொண்டு

காலத்தை மட்டுமே விரயமாக்கலாம்

அ. வேல்முருகன்

H₂O என்றால்...?

2026-06-10T19:56:08.017+05:30

கடவுள்—
நம்பிக்கையா?
அனுபவிக்கும் அனுபவமா?

கண்மூடி
காலங்காலமாய் சொன்னதை
கேள்வி கேட்காமல் ஏற்பதா?

நேரடி அனுபவமோ,
நிலைத்திருக்கும் சாட்சிகளோ
இல்லாததா கடவுள்?

ஆதாரம் ஏதுமின்றி
அவதாரங்களைக் கடவுளென்பது
ஆபத்தானது.

ஆதலால் தேடுகிறேன்;
ஆங்காங்கு
அவரவர் வசதிக்கேற்ப.

உருவமற்றோ, உருவத்தோடோ
ஒரு நம்பிக்கையுடன்
ஆராதிக்கின்றனர்.

பூமி சூரியனைச்
சுற்றுவது போல்
கோயிலைச் சுற்றினால்,

இரவு பகல் நிகழ்வது போல்
கடவுள் உண்டு, இல்லையென
காரணம் சொல்லலாமா?

கடவுள் வந்துவிட்டால்,
கற்பித்த நம்பிக்கைகளை
காணும் அனுபவத்தைத் தந்தால்,

எக்குலத்தின் பிரதிநிதியென
ஏடாகூடக் கேள்வி தவிர்த்து,
H₂O வியாபாரம்
செய்யலாமா என்பேன்.

அ. வேல்முருகன்

கல்நெஞ்சுக்காரி

2026-05-26T20:42:29.151+05:30

கல்நெஞ்சென உரைத்திட,
கண்ணீர் வடித்தாய்;
சொல்லொண்ணா வலிகளை
சொற்களில் பதித்தாய்.

அல்லலில் உழலுவதை
அடிமனதில் இரசித்தாய்;
இல்லாளன் என்றாலும்
இறைஞ்சிட வைத்தாய்.

என்னவள் என்பதனால்
எதையும் சகித்தேன்;
அன்னியமாய் அளவளாவ
ஆழ்மனதில் அழுதேன்.

என்னாங்கு எதுகுறை
எந்நாளும் அறியேன்;
உன்னத அன்பிற்கு
உடனுறைதல் என்பேன்.

சன்னிதியில் ஊழியம்
சந்ததம் செய்தாலும்,
என் விதி என்னவோ—
ஏகாந்தம் என்றாச்சு.

நன்னாள் என்றாலோ,
நாளெதற்கு வருகுதென
தன்மானம் கேட்டாலும்
தற்காக்குது நம்பிக்கை

வலிமறைத்து வாழ்ந்திட
வலிமை கொண்டேன்;
சலிப்பே வந்தாலும்
சமாதானமாகிறேன்.

பொலிவிழந்த போதிலும்
புலம்பிடாது இருந்து,
கெலித்தே காட்டுகிறேன்;
கெத்தாக உலவுகிறேன்.

அ. வேல்முருகன்

புல்டோசர் இந்தியா

2026-05-25T12:15:25.976+05:30

ஆறுகால பூஜையோ,
ஐந்துவேளை தொழுகையோ,
அவரவர் நம்பிக்கை—
அதில் புல்டோசர் ஏன்?

மசூதிகளை இடித்தால்
வீதிகளில் தொழுவோமென
மார்க்கத்தை நம்புபவர்கள்
மறுமொழி உரைத்திட,

இந்துகளுக்கு மட்டுமே
இவன் சேவை என்பதற்கா
இந்நாடு உருவாயிற்று?
அங்ஙனமெனில் அதை மாற்று.

மன்னனென அகங்காரமா?
மக்களுக்கு எதிராய் அரசாங்கமா?
மசூதிகளை இடிக்கவா
மக்களதிகாரம் அளித்தனர்?

அதிகாரமற்ற புல்டோசர்
அமைதியாய் இருக்கும்;
அரசு இயந்திரம் இயக்கிட
அடிபணியாது எதிர்த்திடும்.

சிறுபான்மையினர் என்றாலும்
சிறப்புடன் வாழ்ந்திடனும்;
சிரமம் என்றானால்
சீரழியும் சமூகமே!

அ. வேல்முருகன்

கோமாதா எங்கள் குலமாதா

2026-05-25T11:29:59.066+05:30

உழவர்களின்
உபரி வருமானத்திற்கு
உதவிய பசுக்களை,

கோமியம் குடிப்பவர்கள்
“கோமாதா” என்று பாதுகாக்க
கோடிகளில் நிதி ஒதுக்கிட,

கொள்கை முடிவெடுத்து
கோரிக்கை வைத்தனர்
குர்பானி கொடுப்பவர்கள்.

குலமாதா தேசிய விலங்கா?
குறிக்கோள் எதுவென்று
குழப்பங்கள் இந்துகளிடையே.

குறும்பாடு உண்டாலே
கொலை செய்யும் நாட்டிலே
கூர்த்த முடிவு நானென்பேன்.

தேவியைத் துதித்து பாடியதை
தேசப் பாடலாய்
தேர்ந்தெடுத்ததைப் போல,

தேசிய விலங்காய்
கோமாதாவை அறிவிக்க
தீருமோ பிரச்சனை?

நந்தனைத் தேடினர்,
நாயன்மாராகி விட்டதால்
கோரோசனை வேண்டாமென்கிறார்.

இந்துகள் வீட்டில்
இருவேளை உணவில்லை;
கோமாதாவும் பட்டினியோடு.

வளர்த்த மாடுகளை
வாங்க ஆளில்லாததால்,
வயிற்றில் ஈரத்துணியோடு
வாழ்க ஜனநாயகம்...

அ. வேல்முருகன்

தீர்ப்புகள் திருத்தப்படலாம்

2026-05-25T10:42:37.405+05:30

சட்டவிரோத
செலாவணி முறைகேட்டில்
சிறை சென்றவர்
குற்றமற்றவர் என்றொரு தீர்ப்பு.

முப்பத்தொரு மாத
காராகிரகத்தில்
முடங்கிய நிறுவனத்தை
மூழ்கியதாய் அறிவித்தனர்.

திவால் நிறுவனத்தை
திறம்பட கையாள்வோர்
தேசத்தில் ஒருவரே என
காணிக்கையளித்தனர்.

கடன் கொடுத்த வங்கியோ,
கைக்குக் கிடைத்ததை விற்று,
வாராக்கடன் விதிப்படி
வரவு வைத்துக் கொண்டனர்.

ஆங்காங்கே வழக்குகள்
ஆதாரமில்லை என்றே,
அவரை விடுவிக்க
அந்தகாரம் எங்கெங்கும்.

வளர்ச்சி என்பது
தேசத்தில் ஒவ்வொருவரும்
ஒரு படி மேலேறுவதா?
ஒருவர் மட்டும் வாழ்வதா?

அ. வேல்முருகன்

கரப்பான் பூச்சி

2026-05-23T13:20:36.017+05:30

வேலையற்றவர்கள்

வீதிக்கு வாராது,
“விதியே” என்று
விடியலுக்கு தவமிருக்க,

அதிகாரத்தைச் சுவைத்த
ஒட்டுண்ணிகள்
அதிகாரமற்றவர்களுக்கு
அளித்த பெயர்.

ஆண்டு கணக்காக
அநீதியாய் வாய்தா;
மீண்டதோ நியாயம்—
மக்களின் சோம்பலால்.

சமூக வலைதளங்களில்
சந்தி சிரித்தாலும்,
ஊழல் மயமானவர்கள்
ஒருபோதும் வெட்கப்படுவதில்லை.

ஊடகமெல்லாம்
ஊனத்தால் சார்ந்திருக்க,
ஊமையான மக்கள்
ஊர்வலம் வந்திட,

கரப்பான் பூச்சிகள்
கரையானாய் பரவ,
கலங்கியது நீதியா?
கார்ப்பரேட் அரசா?

அ. வேல்முருகன்

யார் எவரோ?!

2026-05-11T18:28:23.474+05:30

காலாற நடந்து
கைக்கோர்த்து சென்றது
காட்சிப் படிமமாய்
கலங்கச் செய்திட,

மறக்க முயற்சித்து
மனமது இயங்காமல்,
மாயங்கள் நிகழாமல்
மறத்தே போனது.

காயங்கள் ஆறிட
நினைவுகள் அகன்றிடனும்;
நிழலாய் ஏன் இன்னும்
நிம்மதியைக் கெடுக்கிறாய்?

வலிகள் வடுவாக,
வடிகால் இல்லாமல்,
வழி மீள யோசிக்கையில்
வதைப்படலம் நீட்டிக்கிறாய்.

எதிரெதிர் வந்தாலும்
யார் எவரோ என்றே,
எதுவும் நிகழாததுபோல்
எங்ஙனம் நகர்கிறாய்?

அ. வேல்முருகன்

சனகன் மகளாயினும்

2026-05-11T12:00:00.362+05:30

எனக்கு மாற்றென
யாரைத் தேடுகிறாய்?
வனப்பு குறைவென்றா
வடிகட்டப் பார்க்கிறாய்?

முன்பின் பழகாமல்
முந்தானையில் முடிச்சிட்டால்,
முதல் நாளே குழப்பங்கள்,
முரண்களின் அணிவகுப்புகள்.

சரியான இணையென
சந்தித்த நொடிகளில்
சாதகமாய் சொல்லுகின்ற
சந்தோஷங்கள் நிலைப்பதல்ல.

சனகன் மகளாயினும்
சங்கடங்கள் உண்டு.
வினாக்களுக்கு விடையுண்டு
விவேகத்துடன் தேர்ந்தெடு

உனை இழக்க விரும்பாததால்
உரிமையோடு சொல்கிறேன்
உருவங்கள் மாறினாலும்
உள்ளக்கிடக்கை யாரறிவார்

முற்றிலும் வலியற்று,
முத்தங்களில் மூழ்கி,
மினுமினுக்கும் காதலெல்லாம்
புனைவுகளிலும் கனவுகளிலும்.

ஆகச் சிறந்த இணைகளாய்
திரைப்படங்களில் மட்டுமே
கற்பனைகள் அல்லவே காதல்;
வலிகளோடுதான் ஆரம்பம்.

முற்றும் முழுமையாய்
முகவரி அறிய
விலகிச் செல்லாது
கற்றுக் கொடு

அறிதலும் புரிதலும்
அந்த நொடியில் நிகழாது;
பரிவும் பற்றுமே
பாதை வகுக்கும்.

துள்ளி மகிழ்ந்திட
துணையிடம் பட்டியலிடு;
அள்ளிக் கொடுத்திட
ஆவணச் செய்கிறேன்.

எது உனை மகிழ்விக்கும்
என அறியா மடந்தையிடம்
எண்ணங்களை சொல்லிடு;
ஏற்றப்படி மாறிக் கொள்கிறேன்

அனைத்தையும் சொல்லாதே — நின்
அகம் மகிழும் விருப்பங்கள்
அறிந்துகொள்ள விழைகிறேன்;
அதற்கேற்றாற்போல் மாறிக்கொள்ள.

பேரிடிகள் வந்தாலும்
பின் நிற்பது நானென
பெரு நம்பிக்கை கொள்;
பேதலித்து விடாதே.

கடந்து செல்லாதே;
கடமையில் குறையிருப்பின்
கட்டியணைத்து பேசு—
கரையேறிட வழியுண்டு.

நான் கவனிக்காததை
நச்சென சுட்டிக்காட்டு- நின்
கணிப்புகள் மாறாது
கடைப்பிடித்து காட்டுகிறேன்.

பற்றாக்குறை காலத்தில்
பதுக்கி விற்பதல்ல;
பருவங்கள் மாறினாலும்
பாசங்கள் மாற்றமில்லாதது.

அத்தகைய காதலை
அருகிருந்து கட்டமைக்க
அன்னியோன்யம் பிறக்கும்;
அகவிருள் விலகும்.

உண்மையான காதல்
ஒன்றிணைந்து வளரும்;
ஒவ்வொருவரின் நிறைகுறைகளை
நிதர்சனமென ஏற்கும்.

அ. வேல்முருகன்

என்னுலக நாயகன்

2026-05-08T10:37:02.411+05:30

பனையளவு உயரமும்,
பார்த்தாலே பரவசமும்,
பகட்டுச் சொற்களும்
பாவையெனை கவராது.

பிரமிக்க வைக்கும்
பரிசுப் பொருளோ,
விலையுயர்ந்த அணிகலனோ
விளைவுகளை ஏற்படுத்தாது.

கடினமானச் சூழலில்
கைகோர்த்து நிற்பவனும்,
சங்கடங்கள் நேர்ந்தாலும்
சந்தித்துப் பேசுபவனும்,

தன்னுறவு இவளென்று
தன் சுகதுக்கங்களை
துறந்தெனை நேசிக்கும்
தக்கதொரு இணையாய்,

என்னை விரும்புவனும்,
என்னவன் இவனென
எண்ணத்தை விதைத்து
என்நம்பிக்கையை கூட்டுபவனும்

கதைக்கின்ற பொழுது
கடமைக்குத் தலையாட்டாது
கவனமாய் கேட்டு
கனிவுடன் நடப்பவனும்

உணர்வுகளைக் கடக்காமல்
உடனிருந்து மதித்து,
நிலைத்த அன்புடன்
நித்தமும் நேசிப்பவனை

எழுச்சி முரசறிவித்து
என்னுலக நாயகன்,
என்சுவாச காவலனென
எத்திக்கும் சொல்வேனே

அ. வேல்முருகன்

ஊக்கம் நீயென்பதால்

2026-05-06T18:15:44.281+05:30

உறவான என்னவளே,
ஊடுதல் ஏனடி?
சிறப்பான வாழ்விலே
சித்தாந்தம் நீயடி.

அறத்தின் நிழலிலே
அன்றிலாய் வாழ்ந்திட,
பறந்து வந்திடு
பருவத்தில் பயிர் செய்திட.

உருட்டல் மிரட்டலில்
உள்ளன்பு வருவதில்லை,
பொருளின்றிப் பொருத்தங்கள்
பொதுவில் நிலைப்பதில்லை.

விருப்பம் உள்ளதாலே
விண்ணப்பம் அளித்தேனடி,
ஒருமித்து வாழ்ந்திட
உன்னருள் போதுமடி.

பழகும் பாசாங்கு
பாவை அறிவாள்;
குழப்பம் ஏதுமில்லை,
குயுக்திகள் கொண்டவனே.

உழலும் மனதை
உன்னிடமே கொடுத்தேன்;
நிழலும் நீயென்று
நெஞ்சத்திற்கு சொன்னேன்.

ஆகட்டும், பார்க்கலாம்
ஆசையின் எல்லையினை;
தாகமும் தவிப்பும்
தள்ளாடுதா என்றே.

யூகத்தின் அடிப்படையில்
யுத்தங்கள் கூடாதடி;
ஊக்கம் நீயென்பதால்
உயிரானேன் உன்னிடமே.

அ. வேல்முருகன்

ஒழியுமா திராவிடம்?

2026-05-05T12:40:48.003+05:30

திக்கற்றவர்களின் ஒளியான
திராவிடம் ஒழிந்ததாய்
திருநாட்டில் ஒரு குதூகலம்.

தீர்ப்புகள் மாறினாலும்,
திராவிடம் இனமா?
தீர்த்து சொல்லும் சித்தாந்தமா?

கவர்ச்சியில் கவிழ்ந்தவர்களை
மதவெறியில் காத்திடுவாரோ—
காத்திருப்போம்.

சிபிஐ, ஈ.டி.யோடு
புல்டோசர், ஜெய் ஸ்ரீராம்
புகுந்திடுமோ?

நீதிபதிகள்
துப்பாக்கியோடு
தீபமேற்றுவார்களோ?

அதிகாரத்தை இழந்தவர்கள்
அனுபவிக்கட்டும் என்றே
அமைதியாய் இருப்பார்களோ?

உணர்வற்று தமிழன்
ஒருபோதும்
ஓய்ந்திருக்க மாட்டான்.

களம் என்பது
அதிகாரம் மட்டுமே அல்ல—
மக்களோடு மக்களாய் இருப்பது.

அ. வேல்முருகன்

அசமத்துவ அகிலம்

2026-05-05T09:58:23.502+05:30

பேராசை சமூகத்தின்
பெரும் மன்னன்
பேரங்கள் நடத்துவது....

ஈரானை வீழ்த்தவா,
இஸ்ரேலை மகிழ்விக்கவா,
இலாபங்கள் ஈட்டவா?

எண்ணெய் ஆதிக்கத்தில்
ஏறும் விலைவாசி
என்னை பாதிக்குமா?

கொலை, கொள்ளை
குற்றமில்லை என்றோத...
ஐ.நா.வும், அமெரிக்காவுமா?

அகோரப் பசிக்கு
அட்சயப் பாத்திரமாய்
அரசியல் பதவியா?

தேசங்களின் இறையாண்மை...
தீர்மானிப்பது வல்லரசுகளா
பன்னாட்டு நிறுவனங்களா

பேரண்டம் யாரையும்
பேதமாய் பார்க்காதபோது
பேரரசு என்பது மாயையா?

வான் பாதுகாப்பென்பது
வளிமண்டலத்தை
வஞ்சிப்பதா?

செயற்கை நுண்ணறிவில்
தானியங்கி ஏவுகணைகள்—
கற்காலத்தை நோக்கியா?

எல்லோருக்கும் எல்லாம்
என்பது பெருங்கனவா,
ஏற்றத்தாழ்வே நீதியா?

அசமத்துவமே அகிலத்தின்
அடிப்படை கொள்கையா?
அதனை மாற்றதான் முடியமா?

அ.வேல்முருகன்

தாலி

2026-05-02T16:29:33.675+05:30

பண்பாட்டின் சடங்கா?
பாவையின் அங்கமா?
எண்ணில்லா வடிவமா?
எதற்கென்று தெரியுமா—
பெண்ணினை அடிமையா,
பேரண்டம் முழுமையா?
கண்ணியாய் கைவிரலில்,
கழுத்தினில் கட்டியதோ?

அத்துகட்டி வாழ
அவளுக்குச் சுதந்திரமா?
வித்துபுட்டு குடிக்க
வீட்டிலிருக்கும் பண்டமா?
நித்தம் சுமங்கலியா,
நீங்காத அணிகலனா?
செத்துபுட்டா அறுத்து
செல்வியாக முடியுமா?

இடைஞ்சலென இரவில்
இலட்சினையைத் துறப்பதில்,
உடையவனும் உடன்பட,
ஊமையாய் கிடுமூரே;
அடையாள அடிமையிடம்
அக்கறை இல்லையெனில்,
மடைமாறும் அன்புதான்
மகமாயி மகிழ்ந்திடவே.

அருஞ்சுவை அன்பும்
அருகாமை இன்பமும்
கருப்பை நிரப்பல்ல
களிப்புடன் வாழ்ந்திடவே
பெருஞ்சுமை என்றானால்
பெரும்புராணம் ஏதுமின்றி
விரும்பியவழிச் சென்றிட
விவேகம் என்றறிந்தே

அச்சத்தில் ஆண்டாண்டு
அடையாள மாக்கியதை
துச்சமென தூக்கிவீசி
துணையிது வல்லவென்றே
இச்சமயம் இவளுரைக்க
இச்சட்டங்கள் மாளட்டுமே
சச்சரவின்றி சரிசமமாய்
சமூகத்தில் வாழட்டுமே

அ. வேல்முருகன்

மேகமே...... மேகமே.......

2026-04-30T18:20:03.627+05:30

அலைந்து திரியும் உனை
அகவை நிறைந்தவளுக்கு
அணியும் பாவாடையாக்கவா?

மலை முகட்டை
மறைத்துச் செல்கிறாயே—
மாராப்பு ஞாபகமா?

சுட்டெரிக்கும் சூரியனை
சூழ்ந்து மறைக்கிறாயே—
சுகமெதுவென காட்டவா?

காதற் கிழத்தியை
காணும் முழுநிலவன்று
காணாது போனாயே!

வேலைவெட்டியில்லா எனக்கு
வேடிக்கை காட்டவா
வெண்மேகமா வந்தாய்?

காலத்தே பயிர் செய்து
கழனி செழிக்கவா
கருமேகமா திரண்டாய்?

முடிவில்லாத பால்வீதியில்
முகிலினமே— எந்த
முகவரியைத் தேடுகிறாய்?

எண்ணற்ற நட்சத்திரங்கள்
ஏன் கண் சிமிட்டுகின்றன?
எனக்காக கேட்டுச் சொல்லேன்.

அலுமினியப் பறவையில்
அருகிருந்து காண வந்தேன்;
அதிரவைத்து அச்சமூட்டினாய்.

ஆயினும் ஆங்காங்கே
பஞ்சுப் பொதிகளாய்
பரவசப்படுத்தினாய்.

நிர்கதியாய், நிர்மூலமாய்
நீல வானம்—
நீ எங்கே சென்றாய்?

நீயின்றி நீரில்லை;
நானிலத்தில் நதிகளோடு
நாங்களும் இல்லை.

அ. வேல்முருகன்

உச்சநீதிக்கு -வாதம் -2

2026-04-29T18:18:37.235+05:30

பற்பல நம்பிக்கைகள்
பலகாலம் தொடர்ந்திருக்க,
பட்டென மீறுவதால்
பலர் மனது நோகுது.

தொழுவது தொன்மை,
தொடுடையோன் ஆயினும்,
தொடர்பு இல்லை எனில்
தொழுவத்தில் அனுமதி இல்லை.

நம்பிக்கையற்றவர்களுக்கு
ஆலய நுழைவு
அடிப்படை உரிமையா?
தனிப்பட்ட உரிமையா?

வறண்ட பாலைவனத்தின்
வற்றாத நம்பிக்கை
ஓரான் காடுகளில்
ஒளிந்திருக்கிறதா?

கங்கையும் யமுனையும்
புறப்படும் இடத்தில்
புனிதம் புகுத்தப்பட்டதால்
இயற்கை தெய்வமானதோ?

முப்பது கோடி முகமுடையாள்,
உயிர் மொய்ம்புற ஒன்றுடையாள் —
பாரதியின் பொழிப்புரை
மத நம்பிக்கைகளுக்கல்ல.

அரசியலமைப்பின்
அடிப்படை உரிமை
25 மற்றும் 26-ல் வரையறுத்தாலும்,
வழக்கங்கள் மட்டுமே ஏற்கப்படும்.

ஒழுங்குபடுத்தும் அதிகாரம்
அரசுக்கு உள்ளதென்றால்,
பெரும்பான்மை மதத்திற்கா
சிறுபான்மை சுதந்திரத்திற்கா?

ஆன்மீகத்தில் அரசின்
ஆராய்ச்சி கூடாதென்றாலும்,
அதன் இயக்கத்தின்
அளவை கட்டுப்படுத்துவது.

அவசியமான நடைமுறையில்
பாதுகாப்பு நோக்கமென்றாலும்,
அவர்களுக்கேற்ப
அடிக்கடி மாற்றப்படும்.

பொறுப்பும் கட்டுப்பாடும்
பொதுவில் என்றாலும்,
பெரும்பான்மை மீறுவது
பெருமை என்றானது.

நம்பிக்கையற்றவர்கள்
நன்னெறி வகுக்க
தகுதியற்றவர்கள் என
நம்பிக்கையாளர்கள் வாதிட.

பெரும்பான்மை தகுதி
இவர்களை தவிர்த்து,
எவரோ அவரே என
அதிகாரம் எழுதி வைத்தது.

இறை மறுப்பாளனும்
இந்து என்றானதால்,
பகுத்தறிவில் - பக்தமான்கள்
நீதி கோருகிறார்கள்.

அரசியலமைப்பில்
“அனைவரும்” என்பதும்
அந்தக் கூட்டம் மட்டுமே —
அனைத்து கூட்டமுமல்ல.

சமம் என்றாலும்
சமமில்லை;
வலிமையுள்ளவனே
வகுக்கிறான் நீதி.

பொருத்திருப்போம் —
பொருள் பொதிந்த நீதி,
மானுட தர்மமா
மத தர்மமா என்றே.

வாதம் தொடரும்

அ. வேல்முருகன்

சாதி

2026-04-25T20:05:36.875+05:30

கண் கலந்து
காதலில் விழுந்து
கரம் பிடித்தேன்

ஒன்னு கலந்து
ஒரு பிள்ளையும் பெத்து
ஒத்திசைந்து வாழ்ந்திருந்தேன்

வார்த்தெடுத்த வார்த்தைகளின்
வர்ணஜாலத்தை
வஞ்சியவள் இரசித்திருக்க

பேச்சு வழக்கிலே
பேசிக் களிக்கையிலே
எதோவென்று சொன்னேன்

“எங்க ஆளுங்க
இதுபோல பேச மாட்டாங்க”
எதார்த்தமாகச் சொன்னாள்

எனினும்
தரம் குறைந்தவர்கள் எனும்
தொனி தொக்கி நின்றதால்

வாடியது முகம்
ஆண்டாண்டு கால
அவச்சொல்லை மாற்றுவதெப்படி?

அந்தத் தெரு மக்களை
இந்தத் தெருவில் இருப்பவர்கள்
அப்படித்தான் அழைப்பார்களாம் ...

அப்படித்தான் ஒருநாள்
உறவுகளோடு
ஓர் ஊருக்குச் சென்றிருந்தேன்

குலம், கோத்திரத்தோடு
குடியிருப்பு எங்கே என
குணமாதான் கேட்டார்கள்

ஒரு சாதிதான் – ஆனா
கொள்வினை, கொடுப்பினை
அக்கூட்டத்தோடு இல்லையென்றனர்

நுண்ணிய அளவில்
மானுடத்தை பிரித்த
சமுகத்தை மாற்ற முடியுமா?

அ. வேல்முருகன்.

கண்களின் விதி

2026-04-25T13:57:02.798+05:30

நியூட்டனின்
3வது விதிப்படி
எனை ஈர்க்கும்
எதிர்வினையே

திக்குத் தெரியாத
பரந்த வெளியில்
திசைதனை காட்டுவது

கன்னி உன் கண்களே

காந்த ஊசிபோல்
கன்னி இருக்கும் திசையை
புலனறியும் வித்தை
பூவுலகின் விந்தையே

கன்னியின் கண்களின்
மின்னோட்டக் காந்தப் புயல்
அன்பின் அலைவரிசையில்
அதிர்வெண்களைப் பரப்ப

தாலமி, கோபர்னிகசின்
கோட்பாடுகள் மாறலாம்
எனைச் சுற்றும் பூமியாய்,
உனைச் சுற்றும் சூரியனாய்

அட்சரேகை, தீர்க்கரேகை
சந்திக்கும் புள்ளியில்
சங்கமிக்க
புதுமைகள் படைப்போமடி

ஒளிச்சேர்க்கை விதியின்படி
உனைப் பார்த்தே
என் சுவாசங்கள்
நீடித்திருக்கின்றன

உயிரியல் தத்துவம்,
வேதியியல், இயற்பியலில்
இருந்துவிட்டு போகட்டும்—
இலக்கியமாய் இக் கவிதை

உனக்காக
அ. வேல்முருகன்

உச்சநீதிக்கு -வாதம் -1

2026-04-22T14:10:43.852+05:30

படைத்தவனை
பார்க்க அனுமதி வேண்டிட,
பாராமுகமாய் இருந்ததால்
பஞ்சாயத்து.

இயல்புகளுக்கு முரணாக
இறைவன் இருப்பதால்,
இப் பெண்களை
18-ஆம் படியில் பார்க்க விரும்பவில்லை.

அரசியல் சாசனம்
அர்ச்சகர் ஆவதற்கு
அனுமதி 25(2)(பி) கீழ் வழங்கினாலும்,
அதற்கும் தடை விதித்திட.

நிரந்தர பிரம்மச்சாரியின்
நிஷ்டை கலைந்திடுமோ,
நீள்விழி முலையுடைய மாதை
பட்டினத்தான் கண்டது போல்.

ஜெயமாலாவின் வாக்குமூலம்
ஜெயிக்கவில்லை என்றாலும்,
மனோரமா, சுதா சந்திரனுக்கு
அபராதம் விதித்து காத்தனர்.

தீண்ட அனுமதி இல்லை எனில்,
தீர்ப்பு எழுதுவதற்கு முன்
தீண்டித்தான் பார்ப்போம்—
தீர்ப்புகள் திருத்தப்பட?!!

வாதம் தொடரும்
அ. வேல்முருகன்

யார் உலகத் தலைவர்

2026-04-17T17:11:00.002+05:30

மணி கணக்கில்
நாள் கணக்கில்
வாரக் கணக்கில்
கெடு வைக்கிறார்

நாளை முடிவதற்குள்
நாகரிகத் தொட்டில்
நிலப்பரப்பில் இல்லாது
நிர்மூலமாக்கப் படுமென்கிறார்

ஆதரிக்காத தலைவர்களை
“ஆகட்டும், பார்க்கலாம்” என்கிறார்
ஆதரித்த மன்னர்களை
அரங்கத்தில் அசிங்கப்படுத்துகிறார்

சர்வதேச சட்டங்களை
கழிப்பறை காகிதமாக்குகிறார்
ஊரேச மமதையில்
ஒதுக்கித் தள்ளுகிறார்

அணுகுண்டு இருப்பதாய்
ஆலாபிக்கிறார்
ஹார்மேஸ் நீரிணை
அவருடையது என்கிறார்

"நேட்டோ" நாடுகள்
கூட்டில் இல்லையென்றவுடன்
"வீட்டோ" அதிகாரமிருந்தும்
வீரிட்டுப் புலம்புகிறார்

கப்பம் கட்டச் சொல்லி
கட்டுக்கதைகளைப் பரப்புகிறார்
எதிர்ப்பவர்களை
கற்காலத்திற்கு அழைக்கிறார்

சரிந்த சந்தையை
சரமாரி பொய்களால்
நிமிர்த்த முயன்று
நிலைகுலைந்து போகிறார்

பல "நாட்டிக்கல்“ தூரம் நின்று
பலமான குரல் எழுப்பி
பணியவில்லை என்றால்.......
பம்மாத்து செய்கிறார்

அவர்களோ, சரணடைவது
சைரஸ் வழிவந்தவர்களின்
சரித்திரத்தில் இல்லையென
வீர முழக்கமிடுகின்றனர்

அ.வேல்முருகன்

அன்பெனப்படுவது....

2026-04-16T16:46:00.007+05:30

ஆருயிரே என
அள்ளி அணைத்து
அழுந்ததொரு முத்தமிடுவதா?

தினம் தினம்
தளிர் மேனி காணாது
தவித்தேன் என்பதா?

ஆலிங்கனத்தில்
ஆழ்கடல் முத்தெடுக்க
அம் மேனி குளிர்ந்திருப்பதா?

இதயத்தை இயக்கும்
இனிய தேவதையென
விதந்து ஓதுவதா?

அன்பு – என்றும்
அலங்கார வார்த்தைகளை
அள்ளித் தெளிக்க கிடைப்பதா?

ஊரே எதிர்த்தாலும்
உதவிட நானிருக்கிறேனென,
ஓடி வருவது

அவசியப்படும் போது
ஆதரவு கரம் நீட்டுவது,
கொடுத்த வாக்கைக் காப்பாற்றுவது

கோபத்தின் உச்சியில்
குதறி எடுக்காமல்
மதிப்புடன் நடத்துவது

காதலும், ஈர்ப்பும்
கணப்பொழுதில் மாறுகின்ற
காலச்சூழலில் – மாறாதிருப்பது

நொடிப்பொழுது செயலல்ல,
நீண்ட நெடிய பயணத்தின்
நீடித்து நிலைத்துக் கொண்டிருப்பது

அ. வேல்முருகன்

போடுங்கம்மா ஓட்டு

2026-04-03T19:30:00.006+05:30

ஜனநாயகத் திருவிழா
ஜனநாயகன் திரைப்படம்
சதிகளால் வரவில்லை என
சந்துக்கு சந்துப் பேசிக் கொள்கிறார்கள்

வேட்பாளர் பட்டியல்
வெளியிட முடியாத கட்சிகள்
வெற்றிப் பெற்றுவிடுவதாய்
கனவு காண்கிறார்கள்

மார்க்சிய-லெனினிய குழுக்கள்
மதவாதிகளை எதிர்கொள்ளாது
திராவிடத்தை
தழுவிக் கொண்டனர்

யார் அழைப்பார்களென
யௌவன வேடமிட்டு
காத்திருந்து காத்திருந்து
யாசகம் கேட்கிறார்கள்

துரோகிகள் என தூற்றிய
துடைப்பக் கட்டைகள்
பட்டுக் குஞ்சம் கட்டி
பல்லக்கில் செல்கிறார்கள்

வளர்ச்சிக்கேற்ப
வழங்கவில்லை இடங்களென
வருத்தங்களிருந்தாலும்
வலதுசாரிகள் வரக் கூடாதென்பதற்காக

இடதுசாரிகளின் இடிமுழக்கம்
வெளியே தெரியாதவாறும்
மாவளவனின் வருத்தத்தோடும்
மையத்தின் தியாகத்தோடும்

கொள்கைக் கூட்டணியென்ற
கோட்பாட்டை மறந்து
ஆர்.எஸ்.எஸ். அடிவருடியை
இணைத்தொரு கூட்டணி

அதிகாரம் வேண்டுமென
அவர்கள் டெல்லிக்கு
ஆவலாய் பறந்து
அமைத்தொரு கூட்டணி

அனாதைகள் இணைந்து
அவர்களிருப்பை
அகிலம் கவனிக்க
அமைந்தது மற்றொரு கூட்டணி

எல்லோரிடமும் பேசி
எங்கும் பேரம் படியாததால்
யாரும் வேண்டாமென
எல்லா இடங்களிலும் போட்டி

இந்தத் திருவிழாவில்
செய்தி ஊடகங்கள்
சில்லறை பார்ப்பதற்காக
சித்திரங்களை காட்டுகின்றன

எல்லோரும் இலவசமென
எழுப்பும் கூவல்களில்
ஏனோ மறந்தோம்
ஏறும் விலைவாசியை

வாக்கெனும் வாய்கரிசியை
வழங்கிய பின்
நேட்டோ போல
நோட்டாவும் உதவாது

ஆக, என்ன செய்யலாம்
ஊரை நிர்வாகம் செய்பவன்
ஊழல் நிகழ்த்துவானெனில்
உடனே நீக்கிட அதிகாரம் கேள்!!

அ. வேல்முருகன்

வரிக்கு மேல வரி.........

2026-04-03T16:24:00.004+05:30

அச்சடிக்கும் இயந்திரத்தை
அரசாங்கம் வைத்துக் கொண்டு
அது ஏன்?
வரிக்கு மேல வரிகளை போடுகிறது

உழைத்துக் கிடைக்கும்
ஊதியத்திற்கு
உன்னிடம் கேட்பது
நேரடி வரியாம்

உண்டி வளர்க்க
உப்பு, புளி, மிளகாயோடு
உன் விருப்ப ஆடையணிய
மறைமுக வரியாம்

அலை அலையாய்
அகப்பட்டவனிடம் வாங்குவது
அரசாங்க விதியாம் – அந்த
கடவுளுக்கும் அதே கதியாம்

விலகிச் செல்ல
விழித்துக் கொண்டாலும்
விட்டில் பூச்சி நீ
விளங்கா அரசைக் கவனி

வசூலித்த வரியில்
வார்த்த சாலைக்கு
சுங்க வரியென (Toll)
கூசாமல் கேட்டிடும்

மகிழ்வூர்தி இலட்சமெனில்
பசுமை வரி, சாலை வரி
காப்பீடு, இதரச் செலவோடு
இருமடங்கு ஆகிடும்

பெட்ரோல், டீசலுக்கு
கலால் வரி – காரை
பேரிச்சம்பழத்திற்கு விற்றாலும்
சரக்கு சேவை வரி என்கிறான்

சேமிப்பின் வட்டிக்கு வரி
வசிக்கும் வீட்டிற்கு வரி
வழங்கும் மின்சாரத்திற்கு வரி
வளர்ப்பு பிராணிக்கும் வரி

சொத்து வாங்கினால்
பதிவு கட்டணம்
சொத்தை விற்றால்
இலாபத்திற்கு வரி கட்ட வேண்டும்

நிறுவனம் என்றால்
தொழில் வரியோடு
உரிமம், அனுமதி
சேவை வரியென நீளும்

காமதேனு நீ
வற்றாத மடியுனக்கு
வரிகள் கொட்டுமென
வாட்டுவது குடிமக்களை

அரசின்
அத்தனை வரிகளும்
அம்மக்களை கட்டுப்படுத்தவே
அதற்குதான் சட்டங்களே…!!!!

அ. வேல்முருகன்