திண்ணை தமிழ்

ரவை பணியாரம் | Rava Paniyaram in Tamil

2020-12-24T19:45:00.004+04:00

மைதா மற்றும் சீனி சேர்க்காத சுலபமான மாலை நேரப் பலகாரம். 15 நிமிடத்தில் தயாரிக்கக்கூடிய ரவை இனிப்புப் பணியாரம். இந்த செய்முறையில், வெல்லத்துக்குப் பதிலாக நாட்டுச் சர்க்கரை அல்லது கருப்பட்டி சேர்த்தும் தயாரிக்கலாம்.

மேலும், சத்தான

ஓட்ஸ் பணியாரம்

எள்ளுருண்டை செய்முறைகளையும் நீங்கள் பார்க்கலாம்.

தேவையான பொருட்கள்

ரவை - 1 கப்

பொடி செய்த வெல்லம் - 1/2 கப்.

நன்கு பழுத்த வாழைப்பழம் - 1

சுக்குத்தூள் - அரை டீஸ்பூன்

ஏலக்காய் பொடி - 1/4 கால் டீஸ்பூன்

எள் - 2 டீஸ்பூன்

சோடா உப்பு (விருப்பப்பட்டால்) - 1/4 கால் டீஸ்பூன்

தண்ணீர் - 1/4 கப் + 2 டேபிள்ஸ்பூன்

உப்பு - 2 சிட்டிகை

எண்ணெய் - பொரிப்பதற்கு

செய்முறை

ரவை, வெல்லம், 2 சிட்டிகை உப்பு ஆகியவற்றை மிக்ஸி ஜாரில் சேர்க்கவும். அத்துடன் வாழைப்பழத்தையும் நறுக்கிச் சேர்க்கவும்.

1/4 கப் தண்ணீர் சேர்த்து நன்கு அரைத்துக் கொள்ளவும்.

அரைத்த மாவை வேறு ஒரு பாத்திரத்திற்கு மாற்றவும். மாவு கெட்டியான பதத்தில் இருக்கவேண்டும். அத்துடன், சுக்குப்பொடி, ஏலக்காய்ப்பொடி, எள், மற்றும் சோடா உப்பு சேர்த்து நன்றாகக் கலந்து கொள்ளவும்.

வாணலியில் எண்ணெய் விட்டு சூடாக்கவும். ஒரு குழிக்கரண்டி மாவை ஊற்றி, மிதமான தீயில் வேக விடவும். ஒரு புறம் நன்கு சிவந்ததும், மறுபுறம் திருப்பிவிட்டு வேகவிடவும். இருபுறமும் பொன்னிறமானதும் எடுத்துவிடலாம்.

இதே மாவை குழிப்பணியாரக் கல்லில் ஊற்றியும் பணியாரங்கள் தயாரிக்கலாம்.

மிகவும் சுலபமான, இனிப்பான ரவைப் பணியாரம் தயார்!

********

கொள்ளு இட்லிப்பொடி | இட்லி பொடி செய்முறை

2020-10-05T11:16:00.005+04:00

சத்தான, கருப்பு உளுந்து, கொள்ளு சேர்த்த இட்லி மிளகாய்ப்பொடி செய்முறை. இந்த இட்லிப் பொடியை, இட்லி தோசையுடன் மட்டுமல்லாமல், சாதத்துடனும் சாப்பிடலாம்.

இந்த இட்லிப் பொடி தயாரிக்க நல்லெண்ணெய் இருந்தால் நல்லது. அது தவிர, இந்த இட்லிப் பொடி தயாரிக்க இரண்டு விதமான மிளகாய்கள் தேவை. காரமான குண்டு மிளகாய் மற்றும் விதைகள் நீக்கிய நீளமான மிளகாய்.

தேவையான பொருட்கள்

கருப்பு உளுந்து - 1 கப்

கடலைப்பருப்பு - 2 டேபிள்ஸ்பூன்

கொள்ளு - 1 டேபிள்ஸ்பூன்

எள் - 1 டேபிள்ஸ்பூன்

காரமான குண்டு மிளகாய் - 5,

விதை நீக்கிய நீள மிளகாய் - 5,

கட்டிப் பெருங்காயம் - ஒரு சிறிய துண்டு

பூண்டு - 2 பல்

கறிவேப்பிலை - ஒரு கைப்பிடி

நல்லெண்ணெய் - 1 டீஸ்பூன்

உப்பு - தேவையான அளவு.

செய்முறை

நீளமான மிளகாயில் உள்ள விதைகளை நீக்கி விட்டு எடுத்துவைத்துக் கொள்ளவும்.

வாணலியில் ஒரு டீஸ்பூன் நல்லெண்ணெய் சேர்த்து, பெருங்காயத்தைச் சேர்த்து வறுக்கவும். தூள் பெருங்காயம் சேர்ப்பதாக இருந்தால் அதனைக் கடைசியாகச் சேர்த்தால் போதும்.

அடுத்ததாக, மிளகாயைச் சேர்த்து கருகாமல் வறுத்து எடுக்கவும்.

மீதமிருக்கும் எண்ணெயில் ஒரு கப் உளுந்தம் பருப்பு, கடலைப்பருப்பு 2 டேபிள்ஸ்பூன், கொள்ளு ஒரு டேபிள்ஸ்பூன் சேர்த்து வறுக்கவும்.

பருப்புகள் வறுபட்டு வாசம் வர, 6 முதல் 8 நிமிடங்கள் ஆகலாம். அதன்பின், ஒரு டேபிள்ஸ்பூன் எள் சேர்த்து வறுக்கவும். எள் வெடிக்க ஆரம்பித்தவுடன், அத்துடன் கறிவேப்பிலை மற்றும் பூண்டுப் பற்களைச் சேர்க்கவும்.

மேலும் அரை நிமிடம் வறுத்துவிட்டு, அடுப்பை அணைத்துவிடவும். 10 முதல் 20 நிமிடங்கள் ஆற விடவும்.

ஆறியபின், தேவையான உப்பு சேர்த்து, கொரகொரப்பாக அரைத்து எடுக்கவும்.

இந்தப் பொடி நன்கு ஆறிய பின் காற்றுப்புகாத பாட்டிலில் வைத்து மூடி வைக்கவும். இந்தப்பொடி, இரண்டு முதல் மூன்று மாதங்கள் வரை நன்றாக இருக்கும்.

சாதத்துடன் சாப்பிட, இந்தப் பொடியுடன் நெய் சேர்த்துப் பிசைந்து அப்பளம் அல்லது வடகத்துடன் சாப்பிடலாம் நல்லெண்ணெய் சேர்த்து இட்லி தோசையுடன் பரிமாறலாம் மிகவும் சத்தான முழு உளுந்து, கொள்ளு இட்லிப் பொடி தயார்.

எள், மற்றும் பூண்டு சேர்க்க விருப்பமில்லாதவர்கள் தவிர்த்துவிடலாம்.

******

மாசி சம்பல் | மாசிக் கருவாடு பொரியல் | Masi Karuvadu Recipe in Tamil

2020-09-27T17:23:00.004+04:00

மீன் உணவுப் பிரியர்களுக்கு மிகவும் பிடிக்கும் இந்த மாசி சம்பல் அல்லது மாசிக்கருவாடு பொரியல்.

மாசி மீன் அல்லது மாலத்தீவு மீனைப் பக்குவப்படுத்திப் பெறப்படும் மாசிக் கருவாட்டைக் கொண்டு தயாரிக்கப்படும் மாசி சம்பல் அல்லது மாசி பொரியல் செய்முறை. அட்டகாசமான இதன் சுவை அசைவப்பிரியர்களுக்கு மிகவும் பிடிக்கும்.

தேவையான பொருட்கள்

மாசித்தூள் - 3 டேபிள் ஸ்பூன்

மிளகாய் வற்றல் - 4 அல்லது 5

பெரிய வெங்காயம் - 2

தேங்காய் - 1 துண்டு

(அல்லது) தேங்காய்த் துருவல் 1 கப்

உப்பு - தேவையான அளவு

தாளிக்க

கடுகு - 1/2 டீஸ்பூன்

உளுந்து - 1/2 டீஸ்பூன்

கருவேப்பிலை - 1 இணுக்கு

செய்முறை

தேங்காய் மற்றும் வெங்காயத்தை நறுக்கிவைக்கவும்.

மாசித் தூளுடன், மிளகாய் வற்றல் மற்றும் தேவையான உப்புக் கலந்து, மிக்ஸியில் கொரகொரப்பாகப் பொடி செய்து கொள்ளவும். மாசிக் கருவாட்டில் ஏற்கனவே உப்பு இருக்கும் என்பதால் சிறிதளவு உப்பு சேர்த்தால் போதும்.

அரைத்த பொடியுடன், தேங்காய் சேர்த்து சில வினாடிகள் அரைத்துவிட்டு, அத்துடன் நறுக்கிய வெங்காயத்தைச் சேர்த்து அரைத்துக் கொள்ளவும். கொரகொரப்பாக அரைத்தால் போதும்.

சிறிதுகூடத் தண்ணீர் சேர்க்கக்கூடாது. வெங்காயம் சேர்த்து அரைத்தபின் துவையல் பதத்தில் இருக்கும்.

வாணலியில் எண்ணெய் விட்டு, அதில் கடுகு, உளுத்தம் பருப்பு, கறிவேப்பிலை சேர்த்துத் தாளிக்கவும்.

கடுகு வெடித்த பின், அதில் அரைத்து வைத்த மாசிக்கலவையைச் சேர்க்கவும்.

மிதமான தீயில் வைத்து, துவையல் பதத்தில் இருக்கும் மாசிக் கலவை உதிரியாக ஆகும் வரை பொரிக்கவும்.

மிகவும் சுவையான இந்த மாசி சம்பல், ரசம் சாதத்துடன் சாப்பிட மிகவும் சுவையாக இருக்கும்.

****************

ராகி களி | கேழ்வரகு களி | Ragi Kali in Tamil

2020-09-21T12:02:00.002+04:00

பத்தே நிமிடத்தில் தயாரிக்கக்கூடிய, சத்தான ராகி களி செய்முறை. ராகியில், கால்சியம் சத்து, இரும்புச்சத்து மற்றும் அதிக அளவு நார்ச்சத்தும் இருப்பதால், ராகியில் செய்த உணவுகளை எடுத்துக்கொள்ளும்போது, அது ஜீரணிக்க அதிக நேரமாகும். அதனால் பசி எடுப்பதும் தாமதமாகும்.

அது மட்டுமன்றி, ராகியில் செய்த உணவுகளை உண்ணும்போது, மலச்சிக்கல் பிரச்சனையும் இருக்காது. இதனால், உடல் எடையைக் குறைக்க நினைப்பவர்களும், நீரிழிவு உள்ளவர்களும் ராகியைத் தொடர்ந்து உணவில் சேர்த்துக் கொள்ளலாம். வளரும் குழந்தைகளுக்கும் ராகி மிகவும் நல்லது. ரத்தசோகை தீரவும், எலும்புகள் மற்றும் பற்கள் பலப்படவும் ராகி மிகவும் உதவும்.

ராகி களி செய்யத் தேவையான பொருட்கள்

ராகி மாவு - 1/4 கப்

தண்ணீர் - 3/4 கப்

சின்ன வெங்காயம் - 5 அல்லது 6

பச்சை மிளகாய் - 1

கறிவேப்பிலை - சிறிதளவு

உப்பு - தேவையான அளவு

நல்லெண்ணெய் -3 டீஸ்பூன்

செய்முறை

கால் கப் ராகி மாவில், முக்கால் கப் தண்ணீர் கலந்து, கட்டிகள் இல்லாமல் கரைத்துக்கொள்ளவும்.

சின்ன வெங்காயம், பச்சை மிளகாய், கறிவேப்பிலையை நறுக்கி வைக்கவும்.

அடிகனமான வாணலியில், ஒரு டீஸ்பூன் நல்லெண்ணெய் விட்டு, கரைத்து வைத்த ராகி மாவை அதில் சேர்க்கவும்.

மாவுடன் நறுக்கி வைத்த வெங்காயம், பச்சை மிளகாய், கறிவேப்பிலையைச் சேர்க்கவும். தேவையான உப்பு சேர்க்கவும்.

ஒன்றிரண்டு நிமிடங்களில், மாவு கெட்டியாக ஆரம்பிக்கும். விடாமல் கிளறி விடவும்.

மாவு கொதித்து கெட்டியாகும் பருவத்தில், மீதமுள்ள 2 டீஸ்பூன் எண்ணையைச் சேர்த்துக் கலந்துவிடவும்.

தீயை நன்கு குறைத்து விட்டு, வாணலியை மூடி வைத்து, சிறு தீயில் ஐந்து நிமிடங்கள் மாவை வேக விடவும்.

ஐந்து நிமிடங்கள் வெந்தபிறகு, களி நன்கு வெந்து, கையில் ஒட்டாத பதத்தில் இருக்கும். சாப்பிட மிருதுவாகவும், சுவையாகவும் இருக்கும். களியை அடுப்பைவிட்டு இறக்கிவிடவும்.

இந்தக் களியை, பருப்புக் குழம்பு, மீன் குழம்பு அல்லது வெங்காயம், பச்சை மிளகாயுடன் பரிமாறவும்.

மிகவும் சத்தான காலை அல்லது மதிய உணவு தயார்!

இரவு நேரத்தில் ராகி உணவுகளை உண்பதைவிட, பகலில் உண்பது நல்லது.

******

பாரம்பரிய எள்ளுருண்டை | Ellu Urundai Recipe in Tamil

2020-09-20T15:17:00.062+04:00

பாகு வைக்காமல் பத்தே நிமிடத்தில், இரண்டே பொருட்களை கொண்டு, வீட்டிலேயே தயாரிக்கக்கூடிய, ஒரு எளிமையான பாரம்பரியத் தின்பண்டம் இந்த எள்ளுருண்டை.

இந்த எள்ளுருண்டை செய்யப் பாகு வைக்கத் தேவையில்லை. மிகவும் சுலபமான முறையில், வெல்லத்தூள் சேர்த்து இந்த எள் உருண்டை தயாரிக்கலாம். எள்ளுடன் பொட்டுக்கடலை சேர்த்துத் தயாரிக்கும், இன்னொரு வகையான எள்ளுருண்டை செய்முறையை இங்கே பார்க்கலாம்.

எள்ளை ஒரு மருத்துவ மூலிகை என்றே சொல்லுவார்கள். இந்த எள், கறுப்பு, சிவப்பு, வெள்ளை என மூன்று நிறங்களில் கிடைக்கிறது. எள்ளில் இருந்து எடுக்கப்படும் எண்ணெயே நல்லெண்ணெய் அது மிகவும் பயனுள்ள மருத்துவ தன்மைகளைக் கொண்டுள்ளது என்பது நம் அனைவருக்கும் தெரியும். எள்ளில் இருக்கும் இரும்புச்சத்து, ரத்த விருத்திக்கு மிகவும் நல்லது.

தேவையான பொருட்கள்

எள் - 1 கப் (150 கிராம்)

வெல்லம் / வெல்லத்தூள் - 1/2 கப் (100 கிராம்)

செய்முறை

ஒரு அடிகனமான வாணலியில், எள்ளைச் சேர்த்து மிதமான தீயில் வறுக்கவும்.

சில நிமிடங்கள் வறுத்தவுடன், எள்ளிலிருந்து புகை வர ஆரம்பிக்கும். அதன்பின், எள் படபடவென்று வெடிக்கும் சத்தம் கேட்கும்.

வெடிக்க ஆரம்பித்தவுடன், அடுப்பை அணைத்துவிட்டு, பாத்திரத்தின் சூட்டிலேயே மேலும் ஒரு நிமிடம் வறுத்து விடவும்.

பின்னர், ஒரு தட்டில் கொட்டி ஆறவிடவும். ஆறிய பின், எள்ளுடன் பொடி செய்த வெல்லத்தைச் சேர்க்கவும்.

இந்த எள்ளு வெல்லக் கலவையை, மிக்ஸியில், விட்டு விட்டு ஒரு நிமிடம் அரைத்தால் போதும்.

அரைத்து எடுத்த எள்ளுக் கலவையை, ஒரு அகலமான தட்டில் கொட்டி, சிறு சிறு உருண்டைகளாகப் பிடித்து எடுக்கவும்.

எள்ளில் இயல்பாக இருக்கும் எண்ணைப் பதமே இந்த எள்ளுருண்டை செய்யப் போதுமானது. எள்ளு வெல்லக் கலவை மிகவும் உதிரியாக இருந்தால், ஒரு சில துளிகள் நல்லெண்ணெய் சேர்த்துக் கொள்ளலாம்.

நாம் எடுத்துக்கொண்ட இந்த அளவுக்கு, 10 முதல் 12 உருண்டைகள் கிடைக்கும்.

மிகவும் சத்தான தின்பண்டம் தயார்.

இதனைத் தொடர்ந்து உண்ணும்போது, எலும்புகள் நரம்புகள் வலுவடையும். ரத்தம் விருத்தியாகும் . எள்ளிலிருந்து கிடைக்கும் எண்ணெய்ச் சத்து, தோல் சம்பந்தமான நோய்களை வர விடாமல் தடுக்கும்.

ராகி மாவில் செய்யக்கூடிய சத்தான பால்கொழுக்கட்டை செய்முறையையும் பாருங்கள்.

பழங்காலத்துப் பலகாரங்கள் உணவே மருந்தாக நமக்கு நலமளிக்கக்கூடியவை. இவற்றை, நீங்களும் செய்து பாருங்கள்.

******

பிரெட் ஆம்லெட் செய்முறை | Bread Omelette Recipe

2020-09-17T23:08:00.006+04:00

வீட்டில் பிரெட் இருந்தால் உடனடியாகத் தயாரிக்கக்கூடிய சுலபமான காலை உணவு இந்த பிரெட் ஆம்லெட்.

இதற்குத் தேவையான பொருட்கள்

முட்டை - 1

பிரெட் - 2 துண்டுகள்

நறுக்கிய வெங்காயம் - 2 டேபிள்ஸ்பூன்

பச்சை மிளகாய் - 1

மிளகுத்தூள் - 1/2 டீஸ்பூன்

உப்பு - தேவையான அளவு

எண்ணெய் - 2 டீஸ்பூன்

செய்முறை

முட்டையுடன், நறுக்கிய வெங்காயம், பச்சை மிளகாய் மிளகுத்தூள், உப்பு சேர்த்து நன்கு கலந்து கொள்ளவும்.

தோசைக்கல்லில் எண்ணெய் விட்டு, முட்டைக் கலவையை ஊற்றவும். முட்டைக் கலவை ஒரு நிமிடம் மிதமான தீயில் வெந்த பிறகு, அதன்மேல் ஒரு பிரெட் துண்டை வைக்கவும்.

சில விநாடிகள் கழித்துத் திருப்பி விடவும். குறைவான தீயில், முட்டை வெந்து, பிரெட் துண்டு நன்கு சிவந்த பிறகு எடுத்து விடவும்.

அதே தோசைக்கல்லில், மற்றொரு பிரட் துண்டை, சிறிதளவு எண்ணெய் அல்லது வெண்ணெய் சேர்த்து நன்கு சிவக்கவிட்டு, அதை ஆம்லெட்டின் மறுபுறம் வைத்துப் பரிமாறவும்.

மிகவும் சுவையான பிரெட் ஆம்லெட் தயார்!

***********

மட்டன் மிளகு கறி | Mutton Pepper Masala in Tamil

2020-09-13T08:00:00.010+04:00

மிக மிக சுவையான மட்டன் மிளகு கறி செய்முறை. இது, சாதத்துடனும், இட்லி, தோசை, சப்பாத்தி மற்றும் பரோட்டாவுடனும் சேர்த்துச் சாப்பிட ஏற்றது.

பாரம்பரிய முறையில் வறுத்து அரைத்த மசாலாவுடன் சமைத்த கறி பிரட்டல் அல்லது மட்டன் சுக்கா செய்முறையையும் பாருங்க.

தேவையான பொருட்கள்

மட்டன் 200 கிராம்

வெங்காயம் - 2

தக்காளி -1

இஞ்சி - 1அங்குலம்

பூண்டு - 6 பல்

வத்தல் தூள் - 1/4 டீஸ்பூன்

மல்லித்தூள் - 2 டீஸ்பூன்

பொடித்த மிளகு - 1 டீஸ்பூன்

பட்டை - 1 அங்குலத் துண்டு

கிராம்பு - 3

எண்ணெய் - 3 டேபிள் ஸ்பூன்

மட்டனுடன் ஊறவைக்க...

மஞ்சள் தூள் - 1/4 டீஸ்பூன்

வத்தல் தூள் - 1/2 டீஸ்பூன்

கரம் மசாலா - 1/2 டீஸ்பூன்

உப்பு - 1/2 டீஸ்பூன்

செய்முறை

மட்டனுடன், ஊறவைப்பதற்குரிய மஞ்சள் தூள், வத்தல் தூள் கரம் மசாலா உப்பு சேர்த்து நன்றாக பிரட்டி 30 நிமிடங்கள் ஊற விடவும்.

ஊறவைத்த மட்டன் துண்டுகளுடன், வெட்டி வைத்த வெங்காயம், இஞ்சி பூண்டு விழுது, தக்காளி அத்துடன், கால் கப் தண்ணீர் சேர்த்து 3 விசில் வைத்து வேக வைத்துக் கொள்ளவும்.

வாணலியில், மூன்று டேபிள் ஸ்பூன் எண்ணெய் விட்டு, அதில் பட்டை மற்றும் கிராம்பு சேர்த்துத் தாளிக்கவும்.

அத்துடன் வேக வைத்த மட்டன் கலவையைச் சேர்க்கவும். கூடவே, 2 டீஸ்பூன் மல்லித் தூள் கால் டீஸ்பூன் வத்தல் தூள் தேவையான உப்பு சேர்த்துக் கலந்து விடவும்.

சேர்த்த மசாலாக்களின் பச்சை வாசனை போகும் அளவுக்கு 6 முதல் 8 நிமிடங்கள் மிதமான தீயில் வைத்து சமைக்கவும்.

கடைசியாக, ஒரு டீஸ்பூன் மிளகை, கொரகொரப்பாகப் பொடி செய்து மட்டனுடன் சேர்த்து, கூடவே இரண்டு இணுக்கு கறிவேப்பிலையையும் சேர்க்கவும்.

மேலும் மூன்று நிமிடங்கள் சிறு தீயில் வற்றவைத்து இறக்கவும்.

மிக மிக சுவையான மட்டன் மிளகு கறி தயார்!

******

கோதுமை மாவு போண்டா | Wheat Flour Bonda in Tamil

2020-09-12T15:58:00.004+04:00

உடனடியாகச் செய்யக்கூடிய கோதுமை மாவு போண்டா செய்முறை. கேரட் சேர்த்துச் செய்திருக்கும் இந்த போண்டாவை, கேரட் சேர்க்காமல் வெங்காயம் பச்சை மிளகாய் மட்டும் சேர்த்துக்கூடச் செய்யலாம். முழுமையான வீடியோ செய்முறை இங்கே...

மொறு மொறு வெங்காய பக்கோடா செய்முறை, மற்றும் சத்தான கொண்டைக்கடலை வடை செய்முறையையும் பாருங்க.

தேவையான பொருட்கள்

கோதுமை மாவு - 1 கப்

ஓட்ஸ் - 1/4கப்

சீரகம் - 1/2 டீஸ்பூன்

மஞ்சள் பொடி - ஒரு சிட்டிகை

வத்தல் தூள் - 1/2 டீஸ்பூன்

சோடா உப்பு - 1/4 டீஸ்பூன்

நறுக்கிய வெங்காயம் - 1/2 கப்

கேரட் துருவல் - 1/4 கப்

பச்சை மிளகாய் (நறுக்கியது) -1

கொத்தமல்லி (நறுக்கியது) - 1/4 கப்

கறிவேப்பிலை (நறுக்கியது) - சிறிதளவு

உப்பு - தேவையான அளவு

எண்ணெய் - பொரிப்பதற்கு

செய்முறை

கோதுமை மாவுடன் ஓட்ஸ், சோடா உப்பு, சீரகம், மஞ்சள் தூள், வத்தல் தூள், உப்பு சேர்த்து சிறிதளவு தண்ணீர் சேர்த்து கெட்டியாகக் கலந்து கொள்ளவும்.

மாவுக் கலவையில், நறுக்கிய வெங்காயம், துருவிய கேரட், கொத்துமல்லி, கறிவேப்பிலை, பச்சை மிளகாய் ஆகியவற்றையும் சேர்த்துக் கலந்து கொள்ளவும்.

உப்பு சரி பார்க்கவும்.

கலந்து வைத்த மாவை, கையாலோ அல்லது கரண்டியாலோ எண்ணெயில் சேர்த்து, மிதமான தீயில், சிறுசிறு போண்டாக்களாகப் பொரித்தெடுக்கவும்.

சுலபமான மாலை நேரத் தின்பண்டம் தயார்!

*****

ஓட்ஸ் பணியாரம் | Oats Paniyaram Recipe in Tamil

2020-09-10T15:22:00.006+04:00

நார்ச்சத்தும் நல்ல பல சத்துக்களும் நிறைந்த, சுலபமான ஓட்ஸ் குழிப்பணியாரம். குழந்தைகள் பெரியவர்கள் அனைவரும் விரும்பும் இனிப்பான மாலை நேரப் பலகாரம்.

மொறுமொறு வெங்காய பக்கோடா செய்முறையும் 👈இங்கே

தேவையான பொருட்கள்

ஓட்ஸ் - 1/2 கப்

கோதுமை மாவு - 1/4 கப்

அரிசி மாவு - 1/2 டேபிள்ஸ்பூன்

சீனி - 5 டேபிள்ஸ்பூன்

பாதாம் பருப்புத் துண்டுகள் - 2 டேபிள்ஸ்பூன்

ஏலக்காய்ப்பொடி - 1/4 டீஸ்பூன்

சோடா உப்பு - 1/4 டீஸ்பூன்

உப்பு - 1 சிட்டிகை

பொரிக்க - நெய் அல்லது எண்ணெய்

செய்முறை

ஓட்ஸுடன் கோதுமை மாவு, அரிசி மாவு, சிட்டிகை உப்பும் சேர்த்து, தண்ணீர் சேர்த்து, கெட்டியான, இட்லி மாவு பதத்தில் கலந்து, அரை மணி நேரம் ஊற விடவும்.

ஊற வைத்த ஓட்ஸ் கலவையில், சீனி, சோடா உப்பு, ஏலக்காய்ப் பொடி மற்றும் பாதாம் துண்டுகளைச் சேர்க்கவும்.

குழிப்பணியாரக் கல்லில், ஒவ்வொரு குழியிலும் அரை டீஸ்பூன் நெய் அல்லது எண்ணெய் ஊற்றி, ஓட்ஸ் மாவுக் கலவையை ஊற்றி, இரு புறமும் பொன்னிறமாக வேகவிடவும்.

நெய் சேர்த்துச் செய்தால், சுவை மிக அருமையாக இருக்கும். சுவையான மாலை நேரத் தின்பண்டம் தயார்!

முழுமையான வீடியோ செய்முறை...இங்கே!

***

பூசணிக்காய் எரிசேரி | Poosanikai Kootu in Tamil

2020-09-10T10:16:00.004+04:00

இது கேரளாவில் மிகவும் பிரசித்தி பெற்ற ஒரு கூட்டு வகை. இந்தக் கூட்டில், பூசணிக்காயுடன் தட்டைப்பயறு சேர்த்துச் சமைப்பார்கள். இது, மிகவும் சுலபமான, சுவையான கூட்டு செய்முறை. இந்தக் கூட்டு சாதத்துடனும் சப்பாத்தியுடனும் சாப்பிட ஏற்றது. சப்பாத்திக்கு ஏற்ற கத்திரிக்காய் பருப்பு செய்முறையையும் பாருங்க.

தேவையான பொருட்கள்

தட்டைப்பயறு - 1/4 கப்

பூசணிக்காய் - 400 கிராம்

தேங்காய்த்துருவல் - 1/4 கப்

சீரகம் - 1/2 டீஸ்பூன்

மஞ்சள் தூள் -1 சிட்டிகை

வத்தல் தூள் - 1/2 டீஸ்பூன்

சீனி - 1/2 டீஸ்பூன்

உப்பு - தேவையான அளவு

தாளிக்க...

தேங்காய் எண்ணெய் - 3 டீஸ்பூன்

கடுகு - 1/2 டீஸ்பூன்

சிவப்பு மிளகாய் - 3

பெருங்காயம் - 1/4 டீஸ்பூன்

கறிவேப்பிலை - 1 இணுக்கு

செய்முறை

பூசணிக்காயைத் தோல் நீக்கி, துண்டுகளாக நறுக்கி வைக்கவும்.

தட்டைப்பயறை மூன்று நிமிடங்கள் வெறும் வாணலியில் வறுத்து, அத்துடன் முக்கால் கப் தண்ணீர் சேர்த்து, 2 அல்லது 3 விசில் வைத்து, வேக வைத்துக் கொள்ளவும்.

தேங்காயைச் சீரகத்துடன் சேர்த்து அரைத்து வைக்கவும்.

வாணலியில் 3 டீஸ்பூன் தேங்காய் எண்ணெய் விட்டு, கடுகு, காய்ந்த மிளகாய், பெருங்காயம், கறிவேப்பிலை சேர்த்துத் தாளிக்கவும்.

அத்துடன், வெட்டிவைத்த பூசணிக்காய்த் துண்டுகளைச் சேர்க்கவும்.

பூசணிக்காயுடன், மஞ்சள்தூள் மற்றும் கால் கப் தண்ணீர் சேர்த்து, மூன்று நிமிடங்கள் மூடி வைத்து வேகவிடவும்.

பூசணிக்காய் பாதி வெந்த பிறகு, அத்துடன் உப்பு, வத்தல் தூள், அரைத்த தேங்காய் விழுது, சிறிதளவு தண்ணீர் சேர்த்துக் கலந்து, பச்சை வாசனை போகும் அளவுக்கு மேலும் 3 நிமிடங்கள் வேகவிடவும்.

பூசணிக்காய் நன்கு வெந்தபின், அத்துடன் வேகவைத்த தட்டைப்பயறு சேர்க்கவும்.

உப்பு சரி பார்த்து விட்டு, கூடவே அரை டீஸ்பூன் சர்க்கரையும் சேர்த்துக் கலந்துவிடவும்.

மேலும் ஒரு நிமிடம் கொதிக்கவிட்டு இறக்கவும்.

மிகவும் சுவையான பூசணிக்காய் தட்டைப்பயறு கூட்டு தயார்!

******

வெங்காய பக்கோடா | ஆனியன் பக்கோடா | Onion Pakoda in Tamil

2020-09-08T10:39:00.006+04:00

கடைகளில் செய்த மாதிரி, அருமையான மொறு மொறு வெங்காய பக்கோடா வீட்டிலேயே செய்யும் முறை...

இனிப்பான, ஓட்ஸ் பணியாரம் செய்முறையையும், உடனடி கோதுமை போண்டா செய்முறையையும் நீங்கள் நம் வலைப்பக்கத்தில் இங்கே 👆👆👆 பார்க்கலாம்.

தேவையான பொருட்கள்

கடலை மாவு - 1 கப்

அரிசி மாவு - 1 டேபிள்ஸ்பூன்

வெங்காயம் - 1

பச்சை மிளகாய் - 2

வத்தல் தூள் - 1/2 டீஸ்பூன்

நறுக்கிய கறிவேப்பிலை - 1 டேபிள்ஸ்பூன்

நறுக்கிய கொத்தமல்லி - 1 டீஸ்பூன்

பெருங்காயம் - 1/4 டீஸ்பூன்

சோடா உப்பு - 1/4 டீஸ்பூன்

சூடாக்கிய எண்ணெய் - 1 டேபிள்ஸ்பூன்

உப்பு - தேவையான அளவு

எண்ணெய் - பொரிப்பதற்கு

தண்ணீர் - தேவையான அளவு

செய்முறை

வெங்காயம், பச்சை மிளகாயை மெலிதாக நறுக்கி வைக்கவும்.

ஒரு அகலமான பாத்திரத்தில், நறுக்கிய வெங்காயம், பச்சை மிளகாய், கறிவேப்பிலை, கொத்துமல்லி, மிளகாய்த்தூள், பெருங்காயம், சோடா உப்பு, சூடாக்கிய எண்ணெய் மற்றும் உப்பு ஆகியவற்றைச் சேர்த்து மூன்றிலிருந்து ஐந்து நிமிடங்கள் கையால் நன்கு பிசைந்துகொள்ளவும்.

வெங்காயத்திலிருக்கும் ஈரப்பதத்திலேயே, எடுத்து வைத்திருக்கும் கடலை மாவு, அரிசி மாவைச் சேர்த்து, நன்றாகப் பிரட்டி விடவும்.

மிகக் குறைந்த அளவு தண்ணீர் தெளித்து, மாவை கெட்டியாகத் திரட்டிக் கொள்ளவும்.

ஒரு கையளவு மாவை எடுத்து, சூடான எண்ணெயில் சிறு சிறு துண்டுகளாக உதிர்த்து விடவும்.

பொன்னிறமாகும் வரை மிதமான தீயில் பொரித்தெடுக்கவும்.

கடைகளில் வாங்குவது போன்ற, மொறுமொறுப்பான வெங்காய பக்கோடா தயார்!

*****

பாரம்பரிய கருப்பட்டிக் கூழ் | அரிசி மாவு கூழ்

2020-09-02T15:15:00.006+04:00

பாரம்பரிய முறையில், கோயில்களில் தயாரிப்பதுபோல், குடிக்கும் பக்குவத்தில் கூழ் தயாரிக்கும் செய்முறை. இது, திருநெல்வேலி, தூத்துக்குடி மாவட்டத்து அம்மன் கோயில்களில் தயாரிக்கும் செய்முறை. கருப்பட்டியில் கால்ஷியம் சத்து அதிகமென்பதால் அதனை உணவில் அடிக்கடி சேர்த்துக்கோள்வது நல்லது.

மேலும்,

ஓட்ஸ் பணியாரம் மற்றும், உடனடி போண்டா செய்முறைகளையும் நம் வலைப்பக்கத்தில் பார்க்கலாம்.

தேவையான பொருட்கள்

அரிசி மாவு - 6 டேபிள் ஸ்பூன்

கருப்பட்டி - 300 கிராம்

துருவிய தேங்காய் - 3 டேபிள் ஸ்பூன்

சுக்குத்தூள் 1/2 டீஸ்பூன்

ஏலக்காய் - 2 அல்லது 3 சுக்கு

செய்முறை

கருப்பட்டியை ஒரு கப் நீர் சேர்த்து, அடுப்பில் வைத்துக் கரையவிடவும். தட்டி வைத்த சுக்கு, ஏலக்காயைக் கருப்பட்டிக் கலவையில் சேர்த்துக் கொதிக்கவிடவும்.

அரிசி மாவைச் சிறிது சிறிதாக நீர் சேர்த்துக் கரைத்துக் கொள்ளவும். அத்துடன், ஒரு சிட்டிகை அளவு உப்பு சேர்த்துக் கட்டிகளில்லாமல் கரைத்து எடுக்கவும்.

அடி கனமான பாத்திரத்தில் நான்கு கப் தண்ணீர் கலந்து கொதிக்கவிடவும். தண்ணீருடன் கரைத்த கருப்பட்டிக் கலவையை வடிகட்டிச் சேர்க்கவும்.

துருவி வைத்த தேங்காயை கருப்பட்டிக் கலவையில் சேர்க்கவும்.

கொதித்தவுடன், தீயைக் குறைத்துவிட்டு, கரைத்து வைத்துள்ள அரிசி மாவுக் கலவையைச் சேர்க்கவும். கட்டிகள் விழாமல் கலந்துவிடவும். 5 நிமிடம் கொதிக்க விடவும்.

கலவை கெட்டியாக ஆரம்பிக்கும்போது, அடுப்பை அணைத்து விடவும்.

சூடு ஆறியதும், கூழ் கெட்டியாகி குடிக்கும் பதத்தில் தயாராக இருக்கும். கெட்டியாகத் தயாரிக்க வேண்டுமென்றால் தண்ணீரைக் குறைவாகச் சேர்த்துத் தயாரிக்கவும்.

மிகவும் சுவையான, கருப்பட்டிக்கூழ் தயார்!

முழுமையான வீடியோ செய்முறை 👇👇👇

கருப்பட்டிக் கூழ் செய்முறை

******

மட்டன் பிரியாணி | Mutton Biryani in Tamil

2020-08-30T21:42:00.005+04:00

இது என்னோட சிநேகிதியின் பிரியாணி செய்முறை. மணமும் ருசியும் அமோகமா இருக்கும் இந்த பிரியாணியில்.

பொதுவாவே நாம் பிரியாணியில சேர்க்கிற அநேகப் பொருட்கள், மருத்துவ குணங்கள் உள்ளது. பிரியாணி பரிமாறினோம்னா, அதிலிருக்கிற கொத்துமல்லி, புதினா, பச்சைமிளகாய் தக்காளின்னு ஒண்ணொண்ணையா எடுத்து, ஓரத்தில் ஒதுக்குவாங்க சின்னக் குழந்தைகள். இந்த பிரியாணியில், அரைத்துச்சேர்ப்பதால் அப்படி ஒதுக்க முடியாது.

பிரியாணிக்குத் தேவையான பொருட்கள்

பாஸ்மதி அரிசி - 3 கப்

மட்டன் (எலும்புள்ளது) - 3/4 கிலோ

வத்தல் தூள் - 1 தேக்கரண்டி

மல்லித்தூள் - 1 1/2 தேக்கரண்டி

கரம் மசாலாப் பொடி - 1/2 தேக்கரண்டி

சூரியகாந்தி எண்ணெய் - 50 மிலி

நெய் - 2 மேஜைக்கரண்டி

தயிர் - 1/2 கப்

முந்திரிப்பருப்பு - 15

எலுமிச்சம் பழம் - 1/2

பட்டை - 2 அங்குலம்

ஏலம் - 5

கிராம்பு - 6

பிரியாணி இலை - 3

உப்பு - தேவையான அளவு

அரைக்க

வெங்காயம் - 200 கிராம்

தக்காளி - 3 (பெரியது)

பச்சைமிளகாய் - 10

இஞ்சி - 2 அங்குலம்

பூண்டு - 15 பல்

நறுக்கிய புதினா, கொத்துமல்லி - ஒவ்வொன்றும் 1/2 கப்

செய்முறை

அரிசியைக் கழுவி, அரைமணிநேரம் ஊறவச்சுக்கோங்க.

கறியைக் கழுவி, மஞ்சள் தூள், 1/4 கப் தயிருடன் பிரட்டி, 1/2 கப் தண்ணீர் & 1 தேக்கரண்டி உப்பு சேர்த்து, குக்கரில் 3 முதல் 5 விசில் வைத்து வேகவைத்து எடுத்துக்கோங்க.

தக்காளி, வெங்காயம், பச்சை மிளகாய், இஞ்சி, பூண்டு, புதினா கொத்துமல்லி எல்லாவற்றையும் மொத்தமாக, மிக்ஸியில் போட்டு அரைச்சு வச்சுக்கோங்க. ( இனி, ஓரத்தில் ஒதுக்கமுடியாதில்ல...)

குக்கரை அடுப்பில் வைத்து, எண்ணெய், நெய் ஊற்றி, சூடானதும் பட்டை, கிராம்பு, ஏலம், பிரியாணி இலை, முந்திரிப்பருப்பு போட்டுத் தாளிச்சுக்கோங்க.

அத்துடன், அரைத்த தக்காளி, வெங்காய மசாலா விழுதைச் சேர்த்து, கூடவே மசாலாப் பொடிகளையும், மீதமிருக்கும் 1/4 கப் தயிரையும் சேர்த்து, எண்ணெய் பிரியும் வரை வதக்கிக்கோங்க.

வதக்கியபின், வேகவைத்த மட்டனைச் சேர்த்து, அதிலிருக்கும் தண்ணீரையும் சேர்த்து மொத்தம் 4 1/2 கப் தண்ணீர் சேருங்க. தேவையான உப்பு சேர்த்து, 1/2 மூடி எலுமிச்சம்பழம் பிழிந்து விடுங்க.

தண்ணீர் கொதிவரும் சமயத்தில், அரிசியைத் தண்ணீர் இன்றி வடிகட்டிச் சேருங்க. உப்பு சரிபாருங்க. மேலே ஒரு தேக்கரண்டி நெய்யும் கொஞ்சம் கொத்துமல்லி இலையும் சேர்த்துக்கோங்க.

குக்கரை மூடி, மிதமான தீயில் 5 நிமிடமும், மிகக்குறைவான தீயில் 8 முதல் 10 நிமிடங்களும் வைத்து இறக்குங்க. விசில் வரவேண்டியதில்லை. 15 நிமிடம் கழித்து, ஆவி அடங்கிய பின் திறந்து, அரிசி உடையாமல் மெதுவாகக் கிளறி விடுங்க.

மணமான, சுவையான மட்டன் பிரியாணி தயார்!

***

திருநெல்வேலி தக்காளி ரசம் | Tomato Rasam in Tamil

2020-08-27T16:39:00.009+04:00

திருநெல்வேலி ஸ்பெஷல் தக்காளி ரசம் செய்முறை...முழுமையான வீடியோ செய்முறை இங்கே...

தேவையான பொருட்கள்

தக்காளி - 3

பச்சை மிளகாய் - 1

புளி - நெல்லிக்காய் அளவு

வேகவைத்த துவரம்பருப்பு - 1 குழிக்கரண்டி

மிளகு - 1 தேக்கரண்டி

சீரகம் - 1/2 தேக்கரண்டி

பூண்டு - 4 பல்

மஞ்சள் தூள் - 1 சிட்டிகை

தேங்காய் எண்ணெய் - 2 டீஸ்பூன்

கடுகு - 1/4 டீஸ்பூன்

காய்ந்த மிளகாய் - 2

கறிவேப்பிலை - 1 இணுக்கு

பெருங்காயம் - சிறிதளவு

உப்பு - தேவையான அளவு

செய்முறை

புளியை நீர் விட்டுக் கரைத்து வைக்கவும்.

மிளகு, சீரகம், பூண்டைச் சேர்த்து, ஒன்றிரண்டாகத் தட்டி வைக்கவும்.

மூன்று தக்காளியையும் நறுக்கி, அதில் உப்பு, பச்சை மிளகாய், கறிவேப்பிலை ஆகியவற்றைச் சேர்த்து, கைகளால் நன்கு மசித்துக் கொள்ளவும். கூடவே, சிறிது கொத்தமல்லி சேர்த்துக் கொண்டால் இன்னும் வாசனையாக இருக்கும்.

வாணலியில் 2 டீஸ்பூன் தேங்காய் எண்ணெய் சேர்த்து, அதில் கடுகு, காய்ந்த மிளகாய் பெருங்காயம் சேர்த்துத் தாளிக்கவும்.

கடுகு வெடித்த பின், அதில் நாம் தட்டி வைத்திருக்கும் மிளகு சீரகம் பூண்டு கலவையைச் சேர்த்து, சில வினாடிகள் வறுத்து விடவும்.

அத்துடன், நாம் கைகளால் மசித்து வைத்திருக்கும் தக்காளி கலவையை சேர்த்து, அத்துடன் உப்பு மற்றும் மஞ்சள் தூள் சேர்த்து 2 நிமிடங்கள் வதக்கவும்.

தக்காளி சிறிது வதங்கியவுடன், அத்துடன் நாம் கரைத்து வைத்திருக்கும் நெல்லிக்காயளவு புளித்தண்ணீரைச் சேர்த்து, கூடவே தேவையான அளவு தண்ணீர் சேர்த்துக் கொள்ளவும்.

உப்பு, புளிப்பு சரிபார்த்து, கூடுதலாகத் தண்ணீர் தேவையென்றால் சேர்த்துக் கொள்ளலாம்.

நுரை கூடி வரும் சமயத்தில், ஒரு குழிக்கரண்டி அளவுக்கு வேக வைத்த துவரம்பருப்பைச் சேர்த்துக் கலந்துவிட்டு அடுப்பை அணைத்து விடவும்.

அருமையான தக்காளி ரசம் தயார்!

******

ராகி பால் கொழுக்கட்டை | பால் கொழுக்கட்டை செய்முறை

2020-08-21T09:44:00.180+04:00

சத்தான, சுவையான பால் கொழுக்கட்டை செய்முறை. ராகியில், எலும்பு வளர்ச்சிக்கு ஏற்ற கால்ஷியமும், ரத்த விருத்திக்குத் தேவையான இரும்புச் சத்தும் நிறைந்திருப்பதால், ராகியை அடிக்கடி உணவில் சேர்த்துக்கொள்வது அனைவருக்கும் நல்லது. இருபது நிமிடத்தில் இந்தப் பால் கொழுக்கட்டையைச் செய்துவிடலாம்.

காலை உணவுக்கு ஏற்ற உடனடி ராகிக்களி செய்முறையையும் இங்கே பார்க்கலாம்.

தேவையான பொருட்கள்

ராகி மாவு - 1/2 கப்

அரிசி மாவு - 1 டேபிள் ஸ்பூன்

வெல்லம் - 125 கிராம்

உப்பு - 1/4 டீஸ்பூன்

நெய் - 1/2 டீஸ்பூன்

ஏலக்காய்த்தூள் - 1/4 டீஸ்பூன்

சுக்குத் தூள் - 1/4 டீஸ்பூன்

காய்ச்சி ஆறவைத்த பால் - 1/4 கப்

செய்முறை

ஒரு கப் தண்ணீரில், அரை டீஸ்பூன் எண்ணெய் அல்லது நெய், கால் டீஸ்பூன் உப்புக் கலந்து கொதிக்கவிடவும்.

அரை கப் ராகி மாவுடன், ஒரு டேபிள் ஸ்பூன் அரிசி மாவு கலந்து, கொதித்த வெந்நீர் கலந்து, சப்பாத்தி மாவு பதத்திற்குப் பிசைந்து கொள்ளவும்.

பிசைந்த ராகி மாவை, சிறு சிறு உருண்டைகளாக உருட்டிக் கொள்ளவும்.

125 கிராம் வெல்லத்தை, அரை கப் தண்ணீர் சேர்த்துக் அடுப்பில் வைத்து கரைத்துக்கொள்ளவும்.

வாயகன்ற ஒரு பாத்திரத்தில், ஒன்றேகால் கப் தண்ணீர் சேர்த்துக் கொதிக்க விடவும்

தண்ணீர் கொதித்த பின், அதில் உருட்டி வைத்த ராகி மாவு உருண்டைகளைச் சேர்க்கவும். மாவு உருண்டைகள் வெந்து தானாக மேலெழும்பும் வரை அவற்றைக் கரண்டியால் கிளற வேண்டாம்.

ஆறிலிருந்து எட்டு நிமிடங்கள் வேக விடவும். உருண்டைகள் வெந்து மிதந்த பிறகு, கரைத்து வைத்த வெல்லக் கரைசலைச் சேர்க்கவும்.

கால் டீஸ்பூன் சுக்குத்தூள், கால் டீஸ்பூன் ஏலக்காய்த்தூள் சேர்க்கவும்.

கலவை கெட்டியாக, ஒரு டீஸ்பூன் அளவுக்கு ராகி மாவை

2 டேபிள் ஸ்பூன் அளவு தண்ணீரில் கரைத்து, அதைக் கொழுக்கட்டைகளுடன் சேர்க்கவும்.

கால் கப் தேங்காய்த் துருவல் சேர்த்து 2 முதல் 3 நிமிடங்கள் கொதிக்கவிட்டு அடுப்பை அணைக்கவும்.

அடுப்பைவிட்டு இறக்கியபின், காய்ச்சி ஆறவைத்த பால்

கால் கப் சேர்க்கவும்.

சுவையான ராகி மாவு பால் கொழுக்கட்டை தயார்!

******

கொண்டைக்கடலை வடை | Vadai Recipe in Tamil

2020-08-19T13:44:00.078+04:00

மாலைத் தேனீருக்கு ஏற்ற, சத்தான கறுப்புக் கொண்டைக்கடலையில் செய்த வடை.

முழுமையான வீடியோ செய்முறை கீழே 👇👇👇

கொண்டைக்கடலை வடை

மொறு மொறு வெங்காய பக்கோடா செய்முறை

இனிப்பான ஓட்ஸ் பணியாரம் செய்முறைகளையும் பாருங்க.

கொண்டைக்கடலை வடை செய்யத் தேவையான பொருட்கள்

ஊற வைத்த கொண்டைக்கடலை - 1 கப்

வெங்காயம் - 1

பச்சை மிளகாய் - 1

புதினா இலைகள் - 10

கறிவேப்பிலை - 1 இணுக்கு

சோம்பு/பெருஞ்சீரகம் - 1/2 தேக்கரண்டி

செய்முறை

* வெங்காயம் பச்சை மிளகாயை நறுக்கவும்.

* நறுக்கிய வெங்காயத்தை இரண்டாகப் பிரித்துவைக்கவும்.

* ஊறவைத்த கடலையுடன், பாதி வெங்காயம், புதினா, உப்பு சேர்த்துக் கொரகொரப்பாக அரைத்துக்கொள்ளவும்.

* அரைத்த கலவையுடன், மீதி வெங்காயம், பச்சை மிளகாய், கறிவேப்பிலை, சோம்பு சேர்த்துப் பிசைந்துகொள்ளவும்.

* எண்ணெய் காய்ந்ததும், மிதமான சூட்டில் வடைகளாகப் பொரித்து எடுக்கவும்.

* சுலபமான செய்முறையில் சத்தான வடை தயார்!

******

குழம்பு ஆம்லெட் | Omelette Recipe in Tamil

2020-08-15T08:44:00.085+04:00

ரோட்டோரக் கடைகளில் செய்யப்படுகிற சுவையான குழம்பு ஆம்லெட் செய்முறை. இந்த ஆம்லெட்டில், மட்டன் குழம்பு அல்லது சிக்கன் குழம்பு சேர்த்துச் செய்யலாம்.

ஆம்லெட் செய்யத் தேவையான பொருட்கள்

முட்டை - 2
வெங்காயம் - 1/2
பச்சை மிளகாய் - 1
கறிவேப்பிலை - சிறிதளவு
மிளகுத்தூள் - 1/2 டீஸ்பூன்
மட்டன் குழம்பு -
(எலும்பில்லாத
சிறுசிறு துண்டுகளுடன்) - 3 டேபிள் ஸ்பூன்
உப்பு - தேவையான அளவு

செய்முறை

பாதி வெங்காயத்தையும் பச்சை மிளகாயையும் பொடிப் பொடியாக நறுக்கிக் கொள்ளவும்.

குழம்பில் உள்ள மட்டன் துண்டுகளை, சிறு சிறு துண்டுகளாக ஆக்கி வைக்கவும்.

முட்டையுடன் பொடியாக நறுக்கிய வெங்காயம், பச்சை மிளகாய், கறிவேப்பிலை, எடுத்து வைத்துள்ள மட்டன் குழம்பு, மிளகுத்தூள், உப்பு ஆகியவற்றைச் சேர்த்து, நன்றாக அடித்துக் கொள்ளவும்.

தீயை மிதமாக வைத்து, தோசைக்கல்லில் ஆம்லெட்களாக ஊற்றி எடுக்கவும்.

சுவையான, மட்டன் குழம்பு வாசனையுடன் ஆம்லெட் தயார்!

******

முட்டைக்கோஸ் மசாலா | Muttaikose Kootu in Tamil

2020-08-12T13:44:00.171+04:00

சப்பாத்தி பூரியுடன் சாப்பிட, சத்தான முட்டைக்கோஸ் கூட்டு. முட்டைக்கோஸுடன், சத்தான பச்சைப்பயறு சேர்த்துச் செய்யும் மசாலா கறி. சப்பாத்திக்கு ஏற்ற, சத்தான கத்திரிக்காய் தால், அது தவிர, கிராமத்து முறை உருளைக்கிழங்கு குருமா செய்முறைகளும் இருக்கிறது. அவற்றையும் பாருங்க.

தேவையான பொருட்கள்

முட்டைக்கோஸ் - 200 கிராம்

பெரிய வெங்காயம் - 1 சிறியது

பச்சை மிளகாய் - 2

பச்சைப் பயறு - 3 டேபிள் ஸ்பூன்

சீரகம் - 1/2 டீஸ்பூன்

மஞ்சள் தூள் - 1/4 டீஸ்பூன்

கரம் மசாலா - 1/2 டீஸ்பூன்

எண்ணெய் - 2 டீஸ்பூன்

கறிவேப்பிலை - 1 இணுக்கு

சீனி - 1/4 டீஸ்பூன்

உப்பு - தேவையான அளவு

வறுத்து அரைக்க

பட்டை - 1 இன்ச்

கிராம்பு - 3

ஏலக்காய் - 1

சிவப்பு மிளகாய் - 3

கொத்துமல்லி - 1 டீஸ்பூன்

தேங்காய் துருவல் - 3 டேபிள் ஸ்பூன்

செய்முறை

* முட்டைகோஸை நறுக்கி, இரண்டு மூன்று முறை தண்ணீரில் அலசி வைக்கவும்.

* பாசிப்பயறை உப்பு சேர்த்து குக்கரில் வேகவைத்துக் கொள்ளவும்.

* வெங்காயத்தையும் பச்சை மிளகாயையும் நறுக்கி வைக்கவும்.

* வறுக்க வேண்டிய பொருட்களை மிதமான தீயில் வைத்துக் கருகாமல் வறுத்து, ஆறியதும் தேவையான அளவு தண்ணீர் சேர்த்து அரைத்து வைக்கவும்.

* வாணலியில் எண்ணெய் விட்டு, சீரகம் போட்டு, சீரகம் வெடித்ததும் வெங்காயம், பச்சை மிளகாய், கறிவேப்பிலை சேர்த்து தாளிக்கவும்.

* வெங்காயம் வதங்கி நிறம் மாறும் சமயத்தில், வெட்டிவைத்த முட்டைகோஸை சேர்த்து ஒரு நிமிடம் வதக்கவும். வதக்கிய பின், உப்பு, மஞ்சள்தூள், கால் கப் தண்ணீர் கலந்து 5 நிமிடம் வேகவிடவும்.

* வெந்த முட்டைகோசுடன், வறுத்து அரைத்த மசாலாவைச் சேர்த்து, சிறிதளவு தண்ணீர் விட்டு, மசாலா வாசனை போகும்வரை, மறுபடியும் ஒரு மூன்று நிமிடம் மூடி வைத்து வேகவிடவும்.

* கடைசியாக வேகவைத்த பாசிப் பருப்பை மசித்து, முட்டைகோஸில் சேர்த்து நன்றாகக் கலந்து விடவும்.

* பாசிப்பயறுக்கு பதிலாக, பாசிப்பருப்பு சேர்த்தும் இந்தக் கூட்டு செய்யலாம்.

* தேவையான அளவு தண்ணீர் சேர்த்து, உப்பு சரிபார்த்தபின், கடைசியாக அரை தேக்கரண்டி கரம் மசாலாவும், அரைத் தேக்கரண்டி சர்க்கரையும் கலந்து இறக்கவும்.

* கொத்தமல்லி தூவி இறக்கவும்.

* சுவையான முட்டைக்கோஸ் மசாலா தயார்!

******

புதினா தேநீர் | Mint Tea in Tamil

2020-08-08T12:44:00.095+04:00

பலமான சாப்பாட்டுக்குப் பின்னரும், பசியில்லாத சமயங்களிலும், காலை உணவுக்கும் மதிய உணவுக்கும் இடைப்பட்ட சமயத்திலும், இந்தத் தேநீர் குடிப்பது மிகவும் நல்லது.

புதினா டீ செய்யத் தேவையான பொருட்கள்

புதினா - கைப்பிடி அளவு

தண்ணீர் - 1 1/2 கப்

இஞ்சி - 1/2 அங்குலத் துண்டு

மிளகு - 1/4 டீஸ்பூன்

சர்க்கரை - 3 டீஸ்பூன் (அல்லது)

தேன் - 3 டீஸ்பூன்

செய்முறை

சுத்தம் செய்த புதினா இலைகளை ஒரு பாத்திரத்தில் போட்டு, அதில் ஒன்றரைக் கப் தண்ணீர் சேர்க்கவும்.

அரை அங்குலத் துண்டு இஞ்சியையும், அரை டீஸ்பூன் மிளகையும் இடித்துச் சேர்க்கவும்.

மூன்று நிமிடங்கள் கொதிக்க விட்டு அடுப்பை அணைக்கவும்.

அடுப்பை அணைத்த பின் சில நிமிடங்கள் தேநீரை மூடி வைத்துவிட்டு, பின்னர் வடிகட்டி, சர்க்கரை அல்லது தேன் கலந்து பருகலாம்.

இந்த அளவு தேநீரை இருவர் பருகலாம்.

இந்தத் தேநீர், தொண்டைக்கு மிகவும் இதமாகவும், பசியைத் தூண்டுவதாகவும் இருக்கும்.

******

சிவப்பரிசி சாம்பார் சாதம் | Sambar Sadam in Tamil

2020-08-05T13:44:00.175+04:00

சத்தான சிவப்பு சம்பா அரிசியில் ( மட்டா அரிசி) செய்த சாம்பார் சாதம் செய்முறை. இதே செய்முறையில், வெள்ளை அரிசியிலும் சாம்பார் சாதம் செய்யலாம்.

தேவையான பொருட்கள்

அரிசி - 1/2 கப் + 2 டேபிள் ஸ்பூன்

துவரம் பருப்பு - 1/4 கப்

கடலை பருப்பு - 1 டேபிள் ஸ்பூன்

சின்ன வெங்காயம் - 6

பூண்டு - 6 பல்

தக்காளி - 1

பச்சை மிளகாய் - 2

கத்தரிக்காய் - 2

முருங்கைக்காய் - 1

புளி - நெல்லிக்காய் அளவு

மஞ்சள் தூள் - 1/4 டீஸ்பூன்

வத்தல் தூள் - 1/2 டீஸ்பூன்

மல்லித்தூள் - 1/4 டீஸ்பூன்

சாம்பார்ப்பொடி - 1 டேபிள் ஸ்பூன்

நெய் - 1 1/2 டேபிள் ஸ்பூன்

தாளிக்க

நல்லெண்ணெய் - 2 டேபிள் ஸ்பூன்

சின்ன வெங்காயம் - 1

கடுகு - 1/2 டீஸ்பூன்

சீரகம் - 1/4 டீஸ்பூன்

வெந்தயம் - 1/4 டீஸ்பூன்

சுவப்பு மிளகாய் - 2

பெருங்காயம் - 1/4 டீஸ்பூன்

கறிவேப்பிலை - 1 இணுக்கு

செய்முறை

*அரிசி பருப்பைக் கழுவி, 3 கப் தண்ணீர் சேர்த்து, அரைமணி நேரத்திலிருந்து முக்கால் மணி நேரம் வரை ஊற வைக்கவும்.

* வெங்காயம் பூண்டைத் தோலுரித்து வைக்கவும்.

* காய்கறிகளை நறுக்கி வைக்கவும்.

*புளியைத் தண்ணீரில் ஊறவைக்கவும்.

* ஊறிய அரிசி பருப்பைக் குக்கரில் 5 விசில் வைத்து வேக வைத்து எடுக்கவும்.

* வாணலியில் நல்லெண்ணெய் விட்டு, தாளிக்கக் கொடுத்துள்ள பொருட்களைச் சேர்த்துத் தாளிக்கவும்.

* கடுகு வெடித்த பின், வெங்காயம், பச்சை மிளகாயைச் சேர்த்து வதக்கவும். வெங்காயம் வதங்கிய பின் காய்கறிகளை ஒவ்வொன்றாகச் சேர்த்து வதக்கவும்.

* வதங்கிய காய்கறிகளுடன் தண்ணீர், மஞ்சள்ப்பொடி, உப்பு சேர்த்து வேக வைக்கவும்.

* காய்கறிகள் வெந்தபின், புளித் தண்ணீரைச் சேர்த்து, அத்துடன் வத்தல், மல்லிப்பொடிகளையும் சேர்த்து, பச்சை வாசனை போகும்வரை கொதிக்கவிடவும்.

* அத்துடன், சாம்பார்ப்பொடி சேர்த்து இரண்டு நிமிடம் கொதிக்கவிடவும்.

* உப்பு சரிபார்க்கவும். கூடுதலாக 1/4 தேக்கரண்டி சீனி சேர்க்கவும்.

* குழம்புக் கலவையுடன், மசித்த அரிசி பருப்புக் கலவையைச் சேர்த்து, அத்துடன் ஒன்றரை தேக்கரண்டி நெய்யும் சேர்த்துக் கிளறி இறக்கவும்.

* சத்தான, சுவையான சிவப்பு அரிசி சாம்பார் சாதம் தயார்!

******

கத்திரிக்காய் தால் | சப்பாத்திக்கு ஏற்ற கத்திரிக்காய் பருப்புக்கூட்டு

2020-07-29T14:44:00.164+04:00

சப்பாத்தி மற்றும் சாதத்துடன் சாப்பிடுவதற்கு ஏற்ற சுவையான கத்திரிக்காய் பருப்புக் கூட்டு.

தேவையான பொருட்கள்

கத்தரிக்காய் - 200 கிராம்
துவரம்பருப்பு - 1/4 கப்
வெந்தயம் - 1/2 தேக்கரண்டி
வெங்காயம் - 1
தக்காளி 1 அல்லது 2
பூண்டு - 6 பல்
கறிவேப்பிலை - ஒரு இணுக்கு
மஞ்சள் தூள் - 1/4 தேக்கரண்டி
வத்தல் தூள் - 1/2 தேக்கரண்டி
கரம் மசாலா - 1/4 தேக்கரண்டி
எண்ணெய் - 2 அல்லது 3 தேக்கரண்டி
உப்பு - தேவையான அளவு

செய்முறை

கால் கப் துவரம் பருப்புடன், அரைத் தேக்கரண்டி வெந்தயம், கால் தேக்கரண்டி மஞ்சள் தூள், சிறிதளவு பெருங்காயம், நறுக்கிய தக்காளி சேர்த்து, பிரஷர் குக்கரில் வேகவைத்து எடுக்கவும்.

கத்தரிக்காயைச் சிறு சிறு துண்டுகளாக நறுக்கி, தண்ணீரில் போட்டு வைக்கவும்.

பூண்டு, வெங்காயத்தைத் தோலுரித்து நறுக்கிவைக்கவும்.

வாணலியில் எண்ணெய் விட்டு, சீரகம், காய்ந்த மிளகாய், பெருங்காயம் சேர்த்துத் தாளிக்கவும்.

தாளித்த பொருட்களுடன், வெட்டி வைத்த வெங்காயம், பூண்டு, கறிவேப்பிலை சேர்த்து வதக்கவும். வெங்காயத்துடன் சிறிது உப்பு சேர்த்து வதக்கிக் கொள்ளவும்.

வெங்காயம் நன்கு வதங்கிய பின், மஞ்சள் தூள், வத்தல் தூள் சிறிதளவு கரம் மசாலா சேர்த்து வதக்கவும்.

வெட்டி வைத்த கத்தரிக்காய்களையும் சேர்த்து வதக்கவும் ஒரு நிமிடம் வதக்கிய பின், அத்துடன் கால் கப் தண்ணீர் சேர்த்து வேகவைக்கவும்.

வெந்த கத்திரிக்காயுடன், வேக வைத்த பருப்புக் கலவையைச் சேர்த்துக் கலந்து விடவும். தேவையான தண்ணீர் சேர்க்கவும்.

உப்பு சரி பார்த்துவிட்டு, கடைசியாக, கால் தேக்கரண்டி சர்க்கரை சேர்த்துக் கலந்து விட்டு இறக்கவும்.

மிகவும் அருமையான கத்தரிக்காய் பருப்பு தயார்!

சப்பாத்தியுடன் மட்டுமல்லாமல், சூடான சாதத்துடன், நெய்யும் அப்பளமும் சேர்த்துச் சாப்பிடவும் மிகவும் சுவையாக இருக்கும்.

முழுமையான வீடியோ செய்முறை இங்கே 👇👇👇

கத்திரிக்காய் தால்

******

உடனடி போண்டா செய்வது எப்படி | இட்லி மாவு போண்டா

2020-07-15T08:44:00.159+04:00

உடனடியாகச் செய்துவிடக்கூடிய மாலை நேரப் பலகாரம்...இட்லி மாவு இருந்தால் உடனே செய்து பாருங்க!

குழந்தைகள் கேட்டு வாங்கிச் சாப்பிடும் கீரை போண்டா செய்முறை, இங்கே!

தேவையான பொருட்கள்

அதிகம் புளிக்காத இட்லி மாவு - 1 கப்

ரவை - 3 டேபிள்ஸ்பூன்

கடலைமாவு - 2 டேபிள்ஸ்பூன்

வெங்காயம்-1

பச்சை மிளகாய் - 1

இஞ்சி - சிறு துண்டு

கறிவேப்பிலை - 2 இணுக்கு

வத்தல் தூள் - 1/2 டீஸ்பூன்

சீரகம் - 1/2 டீஸ்பூன்

பெருங்காயம் - சிறிதளவு

உப்பு - தேவையான அளவு

எண்ணெய் - பொரிப்பதற்கு

செய்முறை

வெங்காயத்தை மெலிதாக நறுக்கி வைக்கவும்.

பச்சை மிளகாயைச் சிறிதாக நறுக்கவும். இஞ்சியைத் துருவிக் கொள்ளவும். கறிவேப்பிலையையும் பொடியாக நறுக்கி வைக்கவும்.

இட்லி மாவில், எடுத்து வைத்திருக்கும் ரவை, கடலை மாவு, நறுக்கி வைத்த வெங்காயம், பச்சை மிளகாய், கறிவேப்பிலை, இஞ்சி, வத்தல் தூள், உப்பு ஆகியவற்றைச் சேர்த்து, நன்கு கலந்து கொள்ளவும்.

தயாரித்த மாவை, பத்திலிருந்து இருபது நிமிடங்கள் ஊற வைக்கவும்.

ஊறியபின், மாவைக் கரண்டியால் அல்லது கைகளாலேயே சிறிய சிறிய உருண்டைகளாக எண்ணெயில் போட்டுப் பொரித்தெடுக்கவும்.

இந்த போண்டா, வெளிப்புறம் மொறுமொறுப்பாகவும், உள்ளே மிருதுவாகவும் இருக்கும்.

மிகவும் சுவையான சுலபமான போண்டா தயார்!

******

மிளகு சாம்பார் | பாரம்பரிய சாம்பார் செய்முறை

2020-07-08T08:44:00.139+04:00

பாட்டி காலத்துப் பாரம்பரிய மிளகு சாம்பார் செய்முறை...மணமான இந்த சாம்பார், இட்லி, தோசையுடன் மிகவும் பிரமாதமாக இருக்கும்.

தேவையான பொருட்கள்

துவரம்பருப்பு - 1/4 கால் கப்

தக்காளி (சிறியது) - இரண்டு

வெந்தயம் - 1/4 டீஸ்பூன்

மஞ்சள் தூள் - 1/4 டீஸ்பூன்

மிளகு - 1/2 டீஸ்பூன்

சீரகம் - 1/4 டீஸ்பூன்

சின்ன வெங்காயம் - 6

பூண்டு - 6 பல்

பச்சை மிளகாய் - 2

தாளிக்க

எண்ணெய் - 3 டீஸ்பூன்

கடுகு - 1/2 டீஸ்பூன்

சீரகம் - 1/4 டீஸ்பூன்

வெந்தயம் - 1/4 டீஸ்பூன்

பெருங்காயம் - 1/4 டீஸ்பூன்

கறிவேப்பிலை - சிறிதளவு

செய்முறை

பருப்புடன் வெந்தயம், தக்காளி, சிறிதளவு மஞ்சள் தூள் சேர்த்து பிரெஷர் குக்கரில் வேக வைத்துக்கொள்ளவும்.

புளியை மூழ்கும் வரை தண்ணீர் ஊற்றி ஊற வைக்கவும்.

சின்ன வெங்காயம், பூண்டு, பச்சைமிளகாயை நறுக்கி வைக்கவும்.

வாணலியில் எண்ணெய் விட்டு, சின்ன வெங்காயம், கடுகு சீரகம், வெந்தயம், பெருங்காயம், கருவேப்பிலை சேர்த்துத் தாளிக்கவும்.

அத்துடன், சின்ன வெங்காயம், பூண்டு, பச்சை மிளகாய், கறிவேப்பிலை சேர்த்து வதக்கவும்.

வெங்காயம் வதங்கியதும், கரைத்த புளித் தண்ணீரையும் உப்பையும் சேர்த்துக் கலந்துவிடவும்.

புளித்தண்ணீர் பச்சை வாசனை போகும் அளவுக்கு 3 நிமிடம் கொதிக்க விடவும்.

மசித்து வைத்த பருப்பு தக்காளி கலவையைச் சேர்க்கவும்.

வாணலியில் அரை டீஸ்பூன் மிளகு, கால் டீஸ்பூன் சீரகம் சேர்த்து, இளம் வறுப்பாக வறுத்துக்கொள்ளவும்.

வறுத்த பொருட்களைச் சிறிது ஆறிய பின், கொரகொரப்பாகப் பொடித்து சாம்பாரில் கலக்கவும்.

கடைசியாக ஒரு டீஸ்பூன் நெய் சேர்த்து, சிறிதளவு கொத்தமல்லி தூவி இறக்கவும்.

மணமான, சுவையான மிளகு சாம்பார் தயார்!

******

முட்டைக்கோஸ் ஓமப்பொடி ஆம்லெட்

2020-06-24T00:44:00.131+04:00

காலை உணவாகவும், மாலை நேரத் தின்பண்டமாகவும் உண்பதற்கு ஏற்ற ஆம்லெட் செய்முறை. பொதுவாக நம் வீடுகளில் மீதமாகும் மிக்சர், முறுக்கு போன்ற தின்பண்டங்களை இது மாதிரி ஆம்லெட் செய்யும்போது சேர்த்துச் செய்தால் சுவை அதிகமாக இருக்கும். முறுக்கைப் பொடி செய்து அதைக் கூட்டு, பொரியல் செய்யும்போது சேர்த்துப் பயன்படுத்துவது வழக்கம்.

இன்றைக்கு நாம் செய்யப்போகும் இந்த செய்முறையில் ஓமப் பொடி சேர்த்து ஆம்லெட் செய்யப்போகிறோம். ஓமப்பொடிக்கு பதிலாக மிக்சர் சேர்த்தும் பண்ணலாம். அதிலுள்ள கடலை, மற்றும் பருப்புகளை நீக்கிவிடலாம்.

தேவையான பொருட்கள்

முட்டை - 2

ஓமப்பொடி - 3 டேபிள் ஸ்பூன்

நறுக்கிய முட்டைக்கோஸ் - 1/4 கப்

சின்ன வெங்காயம் - 3

பச்சை மிளகாய் - 1

வத்தல் தூள் - 1/4 டீஸ்பூன்

கறிவேப்பிலை - 1 இணுக்கு

உப்பு - தேவையான அளவு

எண்ணெய் - பொரிப்பதற்கு

செய்முறை

நறுக்கிய முட்டைக்கோஸ், வெங்காயம், பச்சை மிளகாய், கறிவேப்பிலை ஆகியவற்றை ஒரு பாத்திரத்தில் சேர்த்துக் கொள்ளவும்.

அத்துடன், இரண்டு முட்டைகளை உடைத்துச் சேர்க்கவும். தேவையான உப்பு, கால் டீஸ்பூன் வத்தல் தூள் சேர்த்துக் கலந்துகொள்ளவும்

முட்டையை நன்றாக அடித்து கலந்த பிறகு, கடைசியாக, 3 டேபிள் ஸ்பூன் அளவுக்கு ஓமப்பொடியை அதில் சேர்த்து நன்றாகக் கலந்து விடவும்.

தோசைக்கல்லில் சிறிதளவு எண்ணெய் விட்டு, அதில் சிறு சிறு ஆம்லெட்களாகவோ அல்லது பெரியதாக ஒரே ஆம்லெட்டாகவோ பொரித்து எடுக்கலாம்.

தோசைக்கல்லில் ஊற்றியதும், சிறிது நேரம் மூடி வைத்து வேக விட்டால், திருப்புவதற்கு மிகவும் எளிதாக இருக்கும்.

இது குழந்தைகள் பெரியவர்கள் அனைவருக்கும் மிகவும் பிடிக்கும். காபியுடன் அல்லது தேநீருடன் சாப்பிட மிகவும் சுவையாக இருக்கும்.

***

முருங்கைக்கீரை அடை | கீரை ஆம்லெட்

2020-05-26T22:44:00.068+04:00

சத்தான முருங்கைக் கீரையில் செய்யக்கூடிய சுலபமான பிரேக்ஃபாஸ்ட் செய்முறை. இந்தக் காலை நேர உணவு தயாரிக்க நமக்குப் 10 நிமிடங்களே போதும்.

தேவையான பொருட்கள்

முருங்கைக்கீரை - 1 கொத்து

பொட்டுக்கடலை - 2 டேபிள் ஸ்பூன்

சின்ன வெங்காயம் -3 அல்லது 4

பச்சை மிளகாய் - 1

முட்டை - 1

பொட்டுக்கடலை - 2 டீஸ்பூன்

மிளகுத்தூள் - 1/2 டீஸ்பூன்

உப்பு - தேவையான அளவு

செய்முறை

பச்சை மிளகாயையும் சின்ன வெங்காயத்தையும் பொடியாக நறுக்கிக் கொள்ளவும்.

கீரையை உருவியெடுத்து, கழுவித் தயார் செய்யவும்.

சுத்தம் செய்த கீரையுடன், நறுக்கிய வெங்காயம், பச்சை மிளகாய், பொடி செய்த பொட்டுக்கடலைப் பொடி,

மிளகு தூள், உப்பு, அத்துடன் ஒரு முட்டை கலந்து கொள்ளவும்.

கலவையை நன்றாக அடித்து தயார் செய்யவும். கலவை கெட்டியாக இருந்தால் இன்னொரு முட்டை அல்லது சிறிதளவு பால் கலந்துகொள்ளலாம்.

தயார் செய்த முட்டைக் கலவையை மிதமான தீயில் அடைகளாக ஊற்றி எடுக்கவும்.

மிகவும் சத்தான காலை உணவு தயார்!

******